06-06 Преподо́бнаго Паи́сия, У́глечскаго чудотво́рца

Преподо́бнаго Паи́сия, У́глечскаго чудотво́рца

Краткое наименование:

06-06 Преподо́бнаго Паи́сия, У́глечскаго чудотво́рца

Минея. Дата 2024-06-19 (06 июня по ст. стилю)

Знак типикона: Полиелейный
Праздник: святого

---

Чтения

На Утрени:

Апостол:

Евангелие:

---

Прокимен

Прокимен, глас :
Стих:

---

Аллилуарий

Аллилуарий, глас :
Стих:

---

Причастен

---

Тропари

Глас 8:

Христо́вы ра́ди любве́ оте́чество и род оста́вил еси́,/ и, а́нгельскому житию́ поревнова́в,/ в пусты́ню всели́лся еси́,/ в не́йже многотру́дное житие́ яви́л еси́/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Глас 8:

Христо́вы ра́ди любве́ оте́чество и род оста́вил еси́/ и, а́нгельскому житию́ поревнова́в,/ духо́вному отцу́ твоему́ преподо́бному Мака́рию, подража́тель быв,/ гра́да У́глеча дости́гл еси́,/ и близ того́ при вода́х в пусты́ню, А́нгелом пока́занную, всели́лся еси́,/ и оби́тель прекра́сну Ма́тери Бо́жией воздви́гл еси́,/ и мно́жество мона́хов собра́л еси́,/ и́мже и наста́вник ко спасе́нию быв,/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Глас 8:

Слез твои́х тече́ньми пусты́ни безпло́дное возде́лал еси́/ и, иже из глубины́ воздыха́ньми, во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Паи́сие, о́тче наш,/ моли́ Христа́ Бо́га/ спасти́ся душа́м на́шим.

---

Кондаки

Глас 2:

Чистото́ю душе́вною боже́ственно вооружи́вся/ и непреста́нныя моли́твы, я́ко копие́, имы́й,/ кре́пко ссекл еси́ бесо́вское ополче́ние,/ Паи́сие, о́тче наш,/ моли́ непреста́нно о всех нас.

Икос: Всеси́льное Ду́ха Свята́го де́йство бога́тно в тя всели́ся:/ Бо́жиим манове́нием иды́й к горе́,/ иде́же хоте́л еси́ оби́тель воздви́гнути,/ я́коже Небе́сный рай, благово́нными насажде́н цветы́,/ сию́ обре́т, всели́лся еси́,/ и храм Богома́тере чу́дне воздви́же,/ и мона́хов мно́жество собра́л еси́,/ и сих, доброде́тельными твои́ми дея́нии све́тло блиста́ющих, в воздержа́нии му́дростию соде́лал еси́./ И ны́не в па́мять твою́ соше́дшеся, вопие́м ти:/ моли́ о нас, Паи́сие преподо́бне, о́тче наш.

---

Стихиры на "Господи, возвах"

Глас 5:

Ра́дуйся, свяще́нная главо́,/ о́тче Паи́сие Богому́дре,/ Бо́жия ра́зума и́стиною святи́мь/ плод благоуха́нен яви́лся еси́/ житие́м твои́м от ю́ности, преподо́бне:/ а́ще и челове́к естество́м был еси́,/ но а́нгельски на земли́ пожи́л еси́,/ страх Бо́жий возлюби́в/ и в за́поведех Его́ при́сно поуча́яся,/ тих же и уте́шителен словесы́ показа́вся,/ ми́лостив и кро́ток был еси́/ и ны́не ра́дости Го́спода твоего́ сподо́бился еси́,/ приле́жно моли́ся/ дарова́ти душа́м на́шим ве́лию ми́лость.

Ра́дуйся, преподо́бне о́тче Паи́сие,/ кра́снии твои́ но́зе/ до́блественне к ше́ствию напра́вил еси́,/ и пусты́ни дости́гл еси́,/ и храм во сла́ву Святы́я Богоро́дицы воздви́гл еси́,/ и мно́жество мона́хов собра́л еси́,/ и доброде́тельми ты́я просвети́л еси́,/ и всели́лся еси́, иде́же сия́ет Свет Невече́рний,/ иде́же предстоя́т А́нгелов чи́ни,/ с ни́ми же, преподо́бне,/ моли́ спасти́ся душа́м на́шим.

Ра́дуйся, преподо́бне Паи́сие,/ я́ко от Бо́жия А́нгела извеще́ние прия́л еси́,/ и́же мно́гим ко спасе́нию наста́вника тя нарече́./ Ты же, Богому́дре,/ сла́дкий глас от него́ слы́шав,/ на бо́льшее воздержа́ние подви́глся еси́/ и, до́бре тече́ние соверши́в,/ ко Христу́ восхожде́ния сподо́бился еси́./ Честны́я твоя́ мо́щи источа́ют исцеле́ния/ с ве́рою приходя́щим к тебе́, Паи́сие преподо́бне,/ моли́ Христа́ Бо́га/ дарова́ти нам ве́лию ми́лость.

Кто изглаго́лет до́блести твоя́, Паи́сие преподо́бне?/ Ра́вно А́нгелом житие́ пожи́л еси́,/ воздержа́нием ум просвети́в,/ сле́зными тече́нии ду́шу очи́стил еси́,/ тем и ны́не укра́шен, предстои́ши со А́нгелы, ра́дуяся,/ и сугу́бым венце́м украси́лся еси́./ Приле́жно моли́ся, блаже́нне,/ прося́ ми́ра ми́рови/ и земли́ Ру́сстей утвержде́ния./ Мы же, собра́нная твоя́ ча́да,/ к честно́му гро́бу припа́дающе, с любо́вию, Паи́сие, вопие́м:/ сохрани́ ста́до твое́ моли́твами твои́ми.

---

Стихиры на стиховне

Глас 8:

О, пресла́внаго чудесе́!/ Я́ко звезда́ от за́пада,/ Паи́сие, провозсия́л еси́/ и был еси́ пра́вило доброде́телей,/ мона́хов утвержде́ние, по́стников удобре́ние./ Те́мже, соше́дшеся в па́мять твою́,/ Христа́ возвели́чим,/ прославля́ющаго Своя́ уго́дники.

Стих: Честна́ пред Го́сподем/ смерть преподо́бных Его́.

О, пресла́внаго чудесе́!/ В после́дняя времена́,/ я́ко заря́, облиста́л еси́, Паи́сие,/ мона́х и́стинен был еси́,/ любве́ яви́лся еси́ испо́лнен/ и, я́ко А́нгел, на земли́ пожи́л еси́,/ подража́я Боже́ственным соверше́нством,/ тем па́мять твою́ почита́ем, досточу́дне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О, пресла́внаго чудесе́!/ Паи́сий ди́вный, креста́ си́лою вооружи́вся,/ я́ко кре́пкий во́ин,/ победи́ неви́димых враго́в ополче́ния/ и со А́нгелы ны́не водворя́ется./ Те́мже в па́мять его возопии́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.

Мона́хов мно́жества,/ наста́вника тя почита́ем, о́тче наш Паи́сие,/ твое́ю бо стезе́ю вои́стинну пра́во ходи́ти позна́хом:/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́ми же моли́ся Го́сподеви/ поми́ловатися душа́м на́шим.

---

Стихиры на хвалитех

Глас 4:

От ю́ности прилепи́вся Влады́це всех,/ Сего́ возжеле́л еси́,/ кре́пко к подвиго́м му́жески устреми́лся еси́/ и обогати́лся еси́ Боже́ственною благода́тию,/ во е́же твори́ти ти исцеле́ния/ и чудоде́йствовати пресла́вная,/ и восше́ствие к Небеси́ обре́л еси́./ Те́мже, со А́нгелы лику́я,/ непреста́нно моли́ся о ста́де твое́м, Богоблаже́нне.

Со́лнца светле́йши/ свяще́нная па́мять твоя́ провозсия́,/ всеблаже́нне Паи́сие,/ пресве́тлыми светлостьми́ озаря́ющи вся,/ по́двиги твоя́ почита́ющия./ Не преста́й моля́ся, блаже́нне,/ Просла́вльшему святу́ю па́мять твою́/ и чуде́с сокро́вище тя су́щим в ми́ре/ Дарова́вшему, преподо́бне.

Мирски́я красоты́, блаже́нне,/ ра́дуяся, избе́гл еси́,/ предпоче́л же еси́ те́сный, и боле́зненный путь,/ и зело́ же́стокий/ и в слеза́х препроводи́л еси́ все житие́ твое́, преподо́бне./ Те́мже утеше́ния Боже́ственнаго и непреста́ннаго весе́лия/ ны́не наслажда́ешися, Паи́сие.

Преподо́бне о́тче,/ измла́да в доброде́тели приле́жно подвиза́вся,/ сосу́д был еси́ Свята́го Ду́ха,/ тем и чуде́с дарова́ния прии́м,/ челове́ки научи́л еси́ презира́ти маловре́менная./ Ны́не же неизрече́нным све́том све́тло сия́я,/ просвети́ на́ша помышле́ния,/ о́тче преподо́бне Паи́сие.

---

Седальны

Глас 8:

Заре́ю Боже́ственнаго сия́ния просвети́вся,/ оста́вил еси́ ми́ра кра́сная вся/ и восприя́л еси́ со Безпло́тными житие́ духо́вное,/ Боже́ственными благода́тьми обогати́вся,/ отону́дуже исцеле́ний дар восприя́л еси́, тем вопие́м ти:/ моли́ Христа́ Бо́га спасти́ся душа́м на́шим.

Глас 2:

Стра́стныя тьмы отбе́г,/ безстра́стия путе́м ше́ствовал еси́,/ и к Све́ту Невече́рнему восте́кл еси́,/ от Него́же озари́вся, нетле́ния дар насле́довал еси́,/ моли́ непреста́нно о всех нас.

Глас 6:

Воздержа́нием мно́гим мудрова́ния пло́ти умертви́л еси́,/ ду́шу укра́сив оде́ждею безстра́стия,/ сле́зныя ка́пли с непреста́нною моли́твою совокупи́л еси́,/ преше́д умо́м ко И́стинному Рачи́телю,/ испроси́ нам ве́лию ми́лость.

Глас 4:

Мраз нощны́й претерпе́л еси́,/ и тяготу́ ва́ра дневна́го поне́сл еси́,/ и сих ра́ди ве́чное наслажде́ние и пи́щу присноживу́щую восприя́л еси́,/ Христо́в уго́дниче, блаже́нне Паи́сие, моли́ спасти́ся душа́м на́шим.

Глас 8:

Защи́титель сый Боже́ственных повеле́ний Влады́ки, сла́вне,/ чи́стым житие́м твои́м показа́лся еси́ ца́рское свяще́ние,/ ка́плями по́тов твои́х пре́лести лю́тое у́тлие погаси́л еси́/ и, в ти́хое приста́нище дости́г, зри́ши, блаже́нне, Его́же возжеле́л еси́./ Те́мже вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

---

Светильны

Многосве́тлый свети́льник, пусты́нное воспита́ние,/ чистоты́ сокро́вище, А́нгелом собесе́дниче,/ дом Ду́ха Пресвята́го, Паи́сие преподо́бне,/ непреста́нно моли́ся о ве́рою почита́ющих пречестну́ю па́мять твою́.

Богородичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на святы́х Твои́х объя́тиих Боже́ственное Сло́во,/ Его́же пе́сньми досто́йно сла́вим.

---

Каноны

Канон святому, глас 6 (основной)

Други́й кано́н свято́му, глас 8 (основной)

---

Житие