07-01 Святы́х и чудотво́рцев, безсре́бреников Космы́ и Дамиа́на, в Ри́ме му́чившихся

Святы́х и чудотво́рцев, безсре́бреников Космы́ и Дамиа́на, в Ри́ме му́чившихся

Краткое наименование:

07-01 Святы́х и чудотво́рцев, безсре́бреников Космы́ и Дамиа́на, в Ри́ме му́чившихся

Минея. Дата 2025-07-14 (01 июля по ст. стилю)

Знак типикона: Вседневный
Праздник: святого

---

Чтения

На Утрени:

Апостол: 1Кор.12:27-13:8

Евангелие: Мф.10:1,5-8

---

Прокимен

Прокимен, глас :
Стих:

---

Аллилуарий

Аллилуарий, глас :
Стих:

---

Причастен

---

Тропари

Глас 8:

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.

---

Кондаки

Глас 2:

Благода́ть прии́мше исцеле́ний,/ простира́ете здра́вие су́щим в ну́ждах, вра́чеве,/ чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.

Икос: Вся́каго ра́зума и му́дрости прехо́дит сло́во му́дрых враче́в,/ и всем ра́зум подаю́т:/ Вы́шняго бо благода́ть прие́мше, неви́димо здра́вие да́руют всем./ Отону́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия,/ боле́зни бо всех избавля́ют,/ мир исцеля́юще чудесы́.

---

Стихиры на "Господи, возвах"

Глас 1:

Чуде́сными заря́ми/ боле́зней на́ших отжени́те всяк неду́г,/ безсре́бренно благода́ть простира́юще,/ дарова́ньми Учи́теля обога́щшеся,/ на земли́ боле́зни земноро́дных/ взе́мшаго на ра́мех Свои́х.

Враче́бне, у́бо пе́рвее,/ наказа́вшеся до́бре,/ боле́зни всем очища́ете ве́рою,/ второ́е же, па́ки духо́вно себе́ вооружи́вше,/ отгоня́ете Боже́ственне/ и душе́вных неду́г врежде́ния.

Я́ко безсре́бренно благода́ть от Христа́ Бо́га прие́мше,/ всем безсре́бренно исцеля́ете,/ безсре́бреницы, неду́ги,/ не то́кнмо на́ша боле́зни очища́ете,/ но и ското́м даю́ще слове́сно исправле́ние,/ я́ко ми́лостиви.

Вода́ми духо́вными, я́ко ре́ки, наводня́еми,/ и, я́ве напо́лншеся, тварь напоя́ете/ Богозна́меньми и пресла́вными исцеле́ний дарова́нии,/ и душетле́нныя стра́сти изсуша́ете,/ и неду́ги исцеля́ете,/ и отгоня́ете ду́хи,/ Богоно́снии безсре́бреницы,/ моли́твенницы о душа́х на́ших.

Стра́сти безслове́сныя поко́рше, святи́и,/ душе́вными си́лами,/ челове́ком и ското́м благодея́ние подава́ете,/ от Христа́ дарова́нием исцеле́ний обога́щшеся./ Те́мже свяще́нное ва́ше/ и светоно́сное торжество́ соверша́юще,/ про́сим очище́ния душа́м на́шим.

Боже́ственный храм ваш/ я́ко не́бо показа́ся, светоза́рно и спасе́нно,/ я́ко зве́зды, чудеса́ спаси́тельна ны́не притяжа́в/ и, я́коже со́лнце све́тло,/ исцеле́ний Боже́ственное де́йство,/ Космо́ преблаже́нне, Дамиа́не пресла́вне,/ Госпо́дни служи́тели,/ моли́твенницы о душа́х на́ших.

Безконе́чна есть святы́х благода́ть,/ ю́же от Христа́ прия́ша,/ те́мже и мо́щи их от Боже́ственныя си́лы/ непреста́нно де́йствуют чудеса́,/ и́хже и имена́, ве́рою призыва́ема,/ неисце́льныя боле́зни исцеля́ют;/ и́миже, Го́споди, и нас душе́вных и теле́сных страсте́й свободи́,/ я́ко Человеколю́бец.

Крестобогородичен,

А́гнца Своего́ А́гница нескве́рная дре́вле/ и Непоро́чная Влады́чица/ на дре́ве Кре́стнем я́ко узре́,/ ма́терски восклица́ше и, дивя́щися, вопия́ше:/ Ча́до сладча́йшее,/ что́ зре́ние сие́ но́вое и пресла́вное?/ Ка́ко сонм безблагода́тный суди́щу Пила́тову предаде́ Тя/ и осужда́ет на смерть Живота́ вся́ческих?/ Но воспева́ю Твое́ неизрече́нное, Сло́ве, снизхожде́ние.

---

Стихиры на стиховне

Глас 6:

Всегда́ иму́ще Христа́,/ де́йствующа в вас,/ святи́и безсре́бреницы,/ чудоде́йствуете в ми́ре, боля́щия исцеля́ете,/ и́бо врачевство́ ва́ше исто́чник есть неисчерпа́емый:/ че́рплемый же, па́че изоби́льно истека́ет,/ и излива́емь, изоби́лует;/ на ки́йждо день истощева́емь, и умножа́емь,/ всем подая́, и неоскудева́емь пребыва́я;/ и че́рплющии насыща́ются исцеле́ния,/ той же пребыва́ет неиждиву́щ./ Что́ у́бо вас нарече́м?/ Цели́тельных ли враче́в душ же и теле́с?/ Цели́телей страсте́й неисце́льных,/ ту́не исцеля́ющих всех,/ прие́мших дарова́ние от Спа́са Христа́,/ подаю́щаго нам ве́лию ми́лость.

Крестобогородичен,

Ви́дящи Тя распина́ема, Христе́,/ Тебе́ Ро́ждшая вопия́ше:/ что́ стра́нное е́же ви́жу та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

---

Стихиры на хвалитех

Глас 1:

Благода́ть исцеле́ний от Бо́га прие́ше,/ безсре́бренно стра́сти душ и теле́с на́ших те́пле исцеля́ете,/ всекра́снии безсре́бреницы,/ те́мже ва́ми Христо́с ве́рным да́нное здра́вие да́руя,/ свети́ла неле́стная вас показу́ет вселе́нней./ Того́ умоли́те, спасти́ся душа́м на́шим.

От вы́шняго про́мысла бе́здну исцеле́ний поче́рпше,/ всем источа́ете ве́рным исцеле́ния, безсре́бреницы,/ преесте́ственне бо неду́гующих стра́сти/ рукоде́йствии та́инственными,/ от сокро́вищ Ду́ха лечбы́ предлага́юще спаси́тельныя,/ стра́ждущих исцеля́ете./ Те́мже храм че́стен бы́сте Живонача́льныя Тро́ицы,/ в вас бо я́ве оби́тель сотвори́,/ Е́йже моли́теся/ спасти́ся душа́м на́шим.

Любо́вию Боже́ственною и жела́нием бу́дущих,/ де́тельне пожи́вше,/ спаси́тельныя пути́ испра́висте./ Те́мже, чистоту́ душе́вную нескве́рно соблю́дше,/ ве́щным до конца́ проти́ву ста́сте,/ Ду́хом же Боже́ственным позла́щшеся,/ беззла́тно исцеле́ние неду́гующим подае́те,/ дво́ице свяще́нная,/ светоза́рное собра́ние,/ просвеще́нный Боже́ственный сопру́же, безсре́бреницы,/ в ско́рбех и боле́знех посеща́юще нас/ и душ на́ших неду́ги безме́здно исцеля́юще.

Вели́ким сподо́бльшеся даро́м, прехва́льнии,/ в смире́нном житии́ на земли́ пожи́сте/ и, проходя́ще всю́ду, ту́не боля́щих стра́сти исцеля́юще,/ яви́стеся А́нгелом собесе́дницы,/ Космо́ с Дамиа́ном му́дрым,/ бра́тия прекра́снии,/ и на́ша стра́сти моли́твами ва́шими исцели́те.

Исто́чник исцеле́ний еди́наго то́кмо в ле́те исцелева́ше,/ храм же безсре́бреников все мно́жество исцеля́ет неду́гующих:/ неоску́дно бо есть и неиждива́емое бога́тство святы́х./ Тех моли́твами, Христе́, поми́луй нас.

Ра́дуется лик святы́х во ве́ки,/ Ца́рство бо Небе́сное насле́доваша;/ земля́, мо́щи их прие́мши, благово́ние распусти́,/ раби́ Христо́вы бы́ша,/ все́льшеся в жизнь ве́чную.

Исто́чник исцеле́ний иму́ще, святи́и безсре́бреницы,/ исцеле́ние подае́те всем тре́бующим,/ я́ко вели́ким даро́м сподо́бльшеся от приснотеку́щаго исто́чника – Спа́са Христа́./ Рече́ бо к вам Госпо́дь, я́ко единоревни́телем апо́столов:/ се дах вам власть над ду́хи нечи́стыми,/ я́коже тех изгони́ти/ и исцели́ти всяк неду́г и вся́кую я́зю./ Те́мже, в повеле́ниих Его́ до́бре пожи́вше,/ ту́не прия́сте, ту́не подае́те,/ исцеля́юще стра́сти душ и теле́с на́ших.

Крестобогородичен,

Распина́ема Христа́ Человеколю́бца ви́дящи Пречи́стая/ и ре́бра ископава́ема копие́м,/ пла́чущи, вопия́ше:/ что́ сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне, Твоему́ во́льному распя́тию.

---

Седальны

Глас 8:

Исцеле́ний да́тели, и чудотво́рцы,/ и чуде́с свети́льники светоприе́мнии всем яви́стеся духо́вною благода́тию,/ страстны́й бо пла́мень ве́рою прохлажда́ете/ и ве́рным в ней смысл согрева́ете./ Тем врачевство́ душе́вное стяжа́вше, Боже́ственную це́рковь ва́шу,/ к не́йже прибега́юще, вопие́м:/ Богоно́сцы безсре́бреницы, моли́те Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.

---

Светильны

Ко́е дово́льно бу́дет сло́во безсре́бреник изрещи́ благода́ть исцеле́ний?/ И́бо суть по Бо́зе всей вселе́нней вра́чеве и спаси́телие.

Богородичен: Держа́вным Твои́м кро́вом от враг наве́та нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ско́рбех.

---

Каноны

Канон святых, глас 4 (основной)

---

Житие