07-08 Свята́го блаже́ннаго Проко́пия, Христа́ ра́ди юро́диваго, У́стюжскаго чудотво́рца

Свята́го блаже́ннаго Проко́пия, Христа́ ра́ди юро́диваго, У́стюжскаго чудотво́рца

Краткое наименование:

07-08 Свята́го блаже́ннаго Проко́пия, Христа́ ра́ди юро́диваго, У́стюжскаго чудотво́рца

Минея. Дата 2024-07-21 (08 июля по ст. стилю)

Знак типикона: Полиелейный
Праздник: святого

---

Чтения

На Утрени:

Апостол:

Евангелие:

---

Прокимен

Прокимен, глас :
Стих:

---

Аллилуарий

Аллилуарий, глас :
Стих:

---

Причастен

---

Тропари

Глас 4:

Просвети́вся Боже́ственною благода́тию, Богому́дре,/ и весь ра́зум и се́рдце от су́етнаго ми́ра сего́ к Зижди́телю неукло́нно возложи́в/ целому́дрием и мно́гим терпе́нием,/ во вре́менней жи́зни тече́ние до́бре сконча́л еси́/ и ве́ру соблю́л еси́ непоро́чну./ Те́мже и по сме́рти яви́ся све́тлость жития́ твоего́:/ источа́еши бо чудесе́м исто́чник неисчерпа́емый/ ве́рою притека́ющим ко свято́му твоему́ гро́бу,/ Проко́пие всеблаже́нне,/ моли́ Христа́ Бо́га,/ да спасе́т ду́ши на́ша.

Глас 4:

В терпе́нии твое́м от Бо́га мзду дарова́ний проро́чества/ прия́л еси́, блаже́нне,/ моли́твами, бде́нием и поще́нием/ те́ло свое́ изнури́в,/ ду́шу же возвы́сив на Небе́сная,/ Царя́ всех Христа́ Бо́га сла́вы зре́ти сподо́бися/ и неувяда́емым венце́м увязе́ся./ Ему́же с ли́ки святы́х предстоя́,/ за лю́ди своя́ моле́ние предлага́я,/ те́пле пролия́ слез исто́чник,/ изба́вил еси́ град Вели́кий У́стюг и лю́ди своя́/ от тру́са стра́шнаго, и огня́, и напра́сныя сме́рти./ Те́мже и мы, к честне́й ра́це твое́й припа́дающе, вопие́м ти:/ о Проко́пие чудоно́сне,/ хода́тай нам бу́ди ко Го́споду/ во дни наше́дших печа́лей, рабо́м твои́м,/ и моли́ся, да спасе́т ду́ши на́ша.

Глас 4:

От земли́ Воззва́вый тя к ве́чным оби́телем/ соблюда́ет и по сме́рти неврежде́нно те́ло твое́, свя́те,/ ты бо, в целому́дрии и чистоте́ житие́ пожи́в, блаже́нне,/ не оскверни́л еси́ пло́ти истле́нием сме́ртным./ Те́мже тя любо́вию чтим, Проко́пие.

Глас 2:

В терпе́нии твое́м, свя́тче Бо́жий,/ от Го́спода мзду восприя́л еси́/ и пожа́л еси́ ни́ву пи́щи ра́йския,/ безсо́нным бде́нием и юро́дством те́ло твое́ изнури́л еси́/ и му́дростию ду́шу твою́ спасл еси́,/ живота́ земна́го небре́гл еси́,/ но Небе́снаго Ца́рствия зре́ти возжеле́л еси́,/ и Небе́снаго Царя́ ви́дети сподо́бился еси́,/ и Тому́ поклони́лся еси́./ Мы же, недосто́йнии раби́ твои́, ко гро́бу твоему́ уми́льно припа́дающе/ и сокруше́нным се́рдцем взира́юще на о́браз ико́ны твоея́, си́це вопие́м:/ о Проко́пие чу́дный,/ хода́тай бу́ди и моли́твенник ко Го́споду о рабе́х твои́х/ и засту́пник гра́ду на́шему/ во дни наше́дших печа́лей/ и моли́ся ко Го́споду о спасе́нии душ на́ших.

---

Кондаки

Глас 4:

Христа́ ра́ди юро́дством/ возду́шная мыта́рства на рука́х а́нгельских неприкоснове́нно преше́д,/ ца́рскаго дости́гл еси́ престо́ла/ и от Царя́ всех Христа́ Бо́га дар прие́м благода́ть исцеле́ний,/ мно́гими бо чудесы́ твои́ми и зна́мением стра́шным/ удиви́л еси́ град твой Вели́кий У́стюг:/ лю́дем твои́м ми́лость испроси́в,/ ми́ро от честна́го о́браза Пресвяты́я Богоро́дицы моли́твою изве́л еси́/ и неду́жным по́дал еси́ цельбы́./ Те́м же мо́лим тя, чудоно́сче Проко́пие:/ моли́ Христа́ Бо́га непреста́нно пода́ти грехо́в на́ших проще́ние.

Икос: Ка́ко возмогу́ гре́шный и скве́рный аз душе́ю вку́пе и те́лом/ исписа́ти во пло́ти су́щее равноа́нгелом житие́ твое́ и пресла́вная чудеса́?/ А́ще у́бо мно́зи прему́дрии не дости́гнут испове́дати мно́гаго твоего́ терпе́ния,/ и смире́ния, и те́плыя ко Христу́ любве́,/ но, оба́че наде́яся на твое́ беззло́бие, о блаже́нне, си́це вопию́ ти:/ ра́дуйся, пресве́тлая звездо́, от восто́ка доброде́телей возсия́вшая/ и вселе́нную чудесы́ озари́вшая./ Ра́дуйся, возненави́девый роди́тельскую любо́вь,/ Христа́ же еди́наго, над все́ми су́щаго Бо́га, всем се́рдцем возлюби́вый/ и Тому́ невозвра́тным жела́нием после́довавый./ Ра́дуйся, я́ко бу́йственное и юро́дственное, е́же по апо́столу, жи́тельство избра́вый./ Ра́дуйся, премени́вый тле́нная и настоя́щая наде́ждею бу́дущих благ./ Ра́дуйся, дре́внему И́ову уподо́бивыйся терпе́нием./ Ра́дуйся, страстоте́рпче Христо́в непобеди́мый,/ но при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий, ны́не почива́еши в не́дрех Авраа́млих./ Ра́дуйся, и́же по отше́ствии ми́ра сего́/ су́щим в беда́х и искуше́ниих гото́в обрета́яйся предста́тель и засту́пник./ Ра́дуйся, везде́ призыва́ющия тя бы́стро предваря́яй,/ мо́лиши бо Христа́ Бо́га непреста́нно пода́ти грехо́в на́ших проще́ние.

Глас 4:

Ве́рою па́мять твою́, блаже́нне, соверша́ющих/ и любо́вию пра́зднующих свято́е торжество́ твое́/ соблюда́й от вся́кия зло́бы и собла́зна змии́на,/ и́маши бо дерзнове́ние ко всех Влады́це,/ Его́же моли́ изба́витися от бед рабо́м твои́м, Богому́дре Проко́пие.

Икос:

---

Стихиры на "Господи, возвах"

Глас 8:

Блаже́нне Проко́пие Богому́дре,/ чи́стая твоя́ душа́/ правове́рным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́щи,/ те́мже, я́ко прича́стника тя невече́рней благода́ти,/ ублажа́ем благоче́стно вси, досточу́дне.

Име́я ду́шу ми́лостивну,/ и чист по́мысл, и се́рдце бо́дро,/ ве́ру небла́знену и любо́вь воистинну нелицеме́рну,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже тя почита́ем свяще́нными пе́сньми/ и благоче́стно вси сла́вим,/ досточу́дне Проко́пие.

Боже́ственными уче́нии укрепля́яся,/ стра́сти плотски́я от души́ отгна́л еси́/ и Святе́й Тро́ице селе́ние преочище́нное был еси́./ Тем к Боже́ственней жи́зни преста́вился еси́,/ Бо́гу, соблюда́ющу ны́не невреди́мо/ твое́ блаже́нное те́ло,/ Боже́ственным судо́м, и́мже Сам весть,/ прославя́яй тя я́ве, Проко́пие.

Я́ко тече́ние до́бре сконча́вшему,/ и ве́ру соблю́дшему непоро́чну,/ и враги́ безпло́тныя терпе́нием свои́м попра́вшему,/ возложи́ся на честны́й твой верх/ побе́ды вене́ц пресве́тел/ от руки́ Вседержи́теля Бо́га,/ Его́же ра́ди мир и я́же в нем су́етства преоби́дел еси́./ Тем и свята́я твоя́ чи́стая душа́/ на Небеса́ востече́, ра́дующися,/ пра́ведных же ли́цы срето́ша тя, веселя́щеся,/ и Небе́сная селе́ния све́тло восприя́ша,/ блаже́нное же и честно́е те́ло твое́/ на земли́ пребыва́ет нетле́нно,/ ве́рным подава́я исцеле́ние./ Те́мже ве́рою пра́вою и те́плым жела́нием/ к свято́му твоему́ гро́бу припа́дающе,/ Богому́дре Проко́пие,/ про́сим испроси́ти у Христа́ Бо́га на́шего/ гра́ду твоему́ непоколеби́му и безмяте́жну/ пребы́ти от наве́т вра́жиих и пога́нскаго наше́ствия,/ оте́честву на́шему побе́ды на враги́,/ умире́ния ми́ру/ и спасе́ние душа́м на́шим.

---

Стихиры на стиховне

Глас 2:

Дом и жили́ще/ Ду́ха Пресвята́го,/ прему́дре Проко́пие, был еси́./ Те́мже и нас до́мы Того́ соде́лай,/ святу́ю твою́ па́мять почита́ющих.

Стих: Возвесели́тся пра́ведник о Го́споде/ и упова́ет на Него́.

Житие́ твое́, я́ко со́лнце/ в сердца́ ве́рных возсия́,/ чуде́с зарю́ испуща́я,/ те́мже и нас све́том невече́рним озари́,/ всечестну́ю твою́ па́мять почита́ющих.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Не преста́й моля́ся, Проко́пие,/ о при́сных твои́х рабе́х,/ и́хже духо́вным твои́м житие́м просвети́л еси́,/ да вси честно́е твое́ успе́ние,/ веселя́щеся, почита́ем.

Богородичен,

Све́том разу́мным от Бо́га просвеще́н,/ мирска́го пристра́стия отбе́гл еси́,/ бу́йство Христа́ ра́ди стяжа́в,/ тем гра́да на́шего У́стюга засту́пник был еси́,/ в не́мже чи́стым и непоро́чным житие́м Го́сподеви угоди́л еси́/ и мно́гия лю́ди удиви́л еси́ чудесы́,/ Богоблаже́нне Проко́пие./ Но и ны́не име́я дерзнове́ние ко Влады́це всех Христу́ Бо́гу,/ моли́ о ве́рою творя́щих всечестну́ю па́мять твою́/ и притека́ющих со усе́рдием к чудотво́рному гро́бу твоему́,/ изба́витися страсте́й, душе́вных же вку́пе и теле́сных,/ и вся́ких бед и скорбе́й/ и спасти́ся душа́м на́шим.

---

Стихиры на хвалитех

Глас 4:

Дал еси́ при́тчу терпе́ния и му́жества,/ Преблаги́й Го́споди,/ пра́веднаго Проко́пия и многочуде́снаго,/ доброде́тельми, и словесы́, и де́лы сия́юща,/ целому́дрием украша́ема и кро́тостию,/ тем Твое́ неизрече́нное смотре́ние сла́вим,/ Иису́се Всеси́льне/ и Спа́се душ на́ших.

Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Проко́пие блаже́нне,/ просвеще́н доброде́тельми/ и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко благряни́цею многоце́нною, оде́явся, Проко́пие,/ пра́вдою же и кро́тостию,/ я́ко Боже́ственным венце́м, увя́злся еси́,/ со стра́ждущими Христа́ ра́ди/ ца́рствовати возжеле́л еси́./ И ны́не Царю́ сил предстои́ши,/ Иису́су Всеми́лостивому/ и Спа́су душ на́ших.

Доброде́телей твои́х, Богому́дре,/ исправле́ния уясни́ша ве́рных сердца́:/ кто́ бо, слы́шав безлме́рное твое́ смире́ние и терпе́ние, не удиви́тся?/ Е́же ко всем кро́тость и беззло́бие,/ к скорбя́щим ми́лование и к су́щим в беда́х ско́рое поможе́ние,/ в путь ше́ствующим благо́е поспеше́ние/ и к пла́вающим немяте́жное приста́нище./ Вся боголе́пно предвари́л еси́, досточу́дне Проко́пие,/ и ны́не неувяда́емым увя́злся еси́ венце́м от руки́ Вседержи́теля Бо́га,/ Его́же моли́ спасти́ся душа́м на́шим.

Богородичен,

Все упова́ние мое́ / на Тя возлага́ю, Ма́ти Бо́жия, / сохрани́ мя под кро́вом Твои́м.

---

Седальны

Глас 8:

От ю́ности, я́ко свети́льник, возсия́л еси́, блаже́нне,/ зе́льным воздержа́нием, умертви́л еси́ плотска́я взыгра́ния,/ тем и на высоту́ восте́кл еси́ Богоразу́мия, пресла́вне,/ пожи́в в ми́ре богоуго́дно, посрами́л еси́ бесо́вская ополче́ния, Проко́пие всеблаже́нне./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Глас 4:

Был еси́ бездо́мен на земли́, Богому́дре Проко́пие, вся́ко озлобле́ние претерпева́я,/ до́брыя де́тели, я́коже фимиа́м благово́нен и же́ртву благоприя́тну, Бо́гу прине́сл еси́./ Тем ны́не на Небеси́ дерзнове́ние стяжа́в к Нему́,/ моли́ дарова́ти согреше́ний очище́ние ве́рою хва́лящим святу́ю па́мять твою́.

Глас 8:

Я́ко врача́ прему́дра и уго́дника Госпо́дня благоприя́тна,/ к чудоно́сному твоему́ гро́бу прикаса́ющеся, Богому́дре,/ соше́дшеся любо́вию и ве́рою, во псалме́х и пе́ниих возра́дуемся, сла́вяще Христа́,/ такову́ю благода́ть тебе́ дарова́вшаго исцеле́ний, Проко́пие всеблаже́нне./ Моли́ Христа́ Бо́га согреше́ний оставле́ние дарова́ти/ ве́рою и любо́вию пра́зднующим всечестну́ю па́мять твою́.

Глас 8:

Возду́шная мыта́рства на рука́х а́нгельских неприкоснове́нно преше́л еси́/ и Небе́сным врато́м ско́ро приспе́л еси́,/ ра́дость мно́гу А́нгелом сотвори́л еси́/ и гра́ду У́стюгу от Го́спода ми́лость испроси́л еси́,/ бесо́м мног плач сотвори́л еси́ и струп соде́лал еси́./ За сла́вящия же и почита́ющия тя ко Го́споду помоли́ся,/ я́ко да твои́ми моли́твами, вели́кий Проко́пие, умоле́н бу́дет Влады́ка/ и изба́вит нас от беззако́ний на́ших,/ прости́т нам согреше́ния на́ша и спасе́т ду́ши на́ша.

---

Светильны

Удали́лся еси́, бе́гая мирска́го сожи́тельства,/ и Христу́, су́щему над все́ми Бо́гу на́шему,/ непоро́чным житие́м благоугоди́л еси́, всеблаже́нне Проко́пие./ Его́же и ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́.

Богородичен: Прему́дрость Ипоста́сную, Сло́во О́тчее присносу́щное,/ врача́ челове́ком Христа́ ро́ждшая, Де́во Пречи́стая,/ я́звы и стру́пы се́рдца моего́ исцели́, лю́тыя и многовре́менныя,/ и страстна́я взыгра́ния утиши́ пло́ти моея́.

---

Каноны

Кано́н свята́го Проко́пия, глас 2 (основной)

---

Житие