10-15 Священноиспове́дника Афана́сия, епи́скопа Ковро́вскаго

Священноиспове́дника Афана́сия, епи́скопа Ковро́вскаго

Краткое наименование:

10-15 Священноиспове́дника Афана́сия, епи́скопа Ковро́вскаго

Минея. Дата 2024-10-28 (15 октября по ст. стилю)

Знак типикона: Полиелейный
Праздник: святого

---

Чтения

На Утрени: Лк.12:8-12

Апостол: Еф.6:10-17

Евангелие: Лк.12:8-12

---

Прокимен

Прокимен, глас :
Стих:

---

Аллилуарий

Аллилуарий, глас :
Стих:

---

Причастен

---

Тропари

Глас 4:

Сла́вы Бо́жия ревни́теля/ и благоле́пия церко́внаго блюсти́теля,/ те́сным житие́м и мно́гими по́двиги/ вели́кому иера́рху Александри́йскому подо́бника,/ святи́теля Афана́сия, испове́дника Росси́йскаго,/ усе́рдно восхва́лим, ве́рнии./ Сей бо при́сно мо́лится/ о спасе́нии земна́го Оте́чества своего́/ и о всех, живу́щих в нем,/ велегла́сно с любо́вию взыва́я:/ Русь свята́я,/ храни́ ве́ру Правосла́вную,// в не́йже тебе́ утвержде́ние.

---

Кондаки

Глас 3:

Днесь Афана́сий святи́тель,/ Христо́в испове́дник и пра́ведник,/ в невече́рнем Ца́рстве Сла́вы/ све́тло лику́ет/ и в со́нме всех Ру́сских святы́х,/ всесоста́вным гла́сом побе́дную песнь воспева́я,/ приле́жно мо́лит о нас// Преве́чнаго Триеди́наго Бо́га.

Икос: Днесь, ве́рнии, соше́дшеся, восхва́лим святи́теля Афана́сия,/ безсме́ртия тезоимени́таго, ревни́теля Правосла́вия,/ блюсти́теля благоче́стия, обличи́теля отсту́пников,/ пропове́дника покая́ния,/ песнопе́нии досточу́дными святы́х,/ в земли́ Росси́йстей просия́вших, просла́вльшаго,/ той бо приле́жно мо́лит о нас Преве́чнаго Триеди́наго Бо́га.

---

Стихиры на "Господи, возвах"

Глас 8:

Святи́телю Афана́сие досточу́дне,/ печа́льнику земли́ Ру́сския,/ преподо́бному Се́ргию ревну́я,/ я́ко еди́н от учени́к о́наго яви́лся еси́,/ и любве́ ра́ди Христо́вы/ ду́шу за Це́рковь Правосла́вную положи́л еси́,/ я́ко сла́вий добропе́снивый,/ святы́х сро́дников на́ших прославля́я,// с ни́миже ны́не воспева́еши Тро́ицу Единосу́щную.

Святи́телю Афана́сие богому́дре,/ страда́нием за Христа́ очи́стив се́рдце твое́,/ стяжа́л еси́ дерзнове́ние необори́мое,/ во е́же обличи́ти отсту́пники,/ преда́ния церко́вная отверга́ющия/ и нововведе́ния льсти́вая вводя́щия,/ те́мже Не́бо благода́рственно прия́т тя,/ иде́же ны́не дре́ва жи́зни наслажда́ешися,// Христу́ моля́ся, дарова́ти нам мир и ве́лию ми́лость.

Святи́телю Афана́сие блаже́нне,/ благоуха́ние Христо́во яви́лся еси́ в Це́ркви на́шей,/ я́ко сладкопе́вец но́вый,/ святы́я, в земли́ Росси́йстей просия́вшия, пе́сньми велича́я,/ и я́ко па́стырь до́брый,/ ду́шу твою́ за о́вцы полага́я,/ у́зы и го́рькия рабо́ты Христа́ ра́ди претерпе́л еси́,/ те́мже, вене́ц пра́вды стяжа́в,// моли́ся дарова́ти нам мир и ве́лию ми́лость.

По вся дни Бо́га ра́ди умерщвля́емь был еси́,/ Це́ркве Ру́сския сла́во, святи́телю Афана́сие,/ вмени́лся еси́ я́ко овча́ заколе́ния,/ ско́рби и тесноты́, гоне́ния и глад претерпева́я,/ и испове́дал еси́, я́ко ничто́же тя возмо́же разлучи́ти от любве́ Бо́жия,// я́же о Христе́ Иису́се, Го́споде на́шем.

---

Стихиры на стиховне

Глас 2:

Земле́ Ру́сская,/ гра́де святы́й,/ велича́й святи́теля твоего́,/ и́же пе́сньми боже́ственными // ве́лий сонм святы́х просла́ви.

Стих: Бог мой еси́ Ты,// и испове́мся Тебе́.

Це́рковь Ру́сская,/ красу́йся и лику́й,/ се бо Афана́сий святи́тель/ Престо́лу Влады́чню// во сла́ве предстои́т, ра́дуяся.

Стих: Отве́рзите мне врата́ пра́вды,// вшед в ня, испове́мся Го́сподеви.

Святи́телю о́тче Афана́сие,/ архиере́ю честне́йший,/ моли́ся ко Го́споду/ о земно́м оте́честве твое́м// и о почита́ющих тя любо́вию.

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

Богородичен,

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ доны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О, Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

---

Стихиры на хвалитех

Глас 4:

Святи́телю о́тче Афана́сие всехва́льне,/ ты в годи́ну лю́тых гоне́ний на ве́ру Христо́ву,/ у́зами и ра́нами искуси́вся,/ в лише́ниих, изгна́ниих и го́рьких рабо́тах многоле́тне пребыва́я,/ Це́рковь Ру́сскую песнопе́нии украси́л еси́/ и столп Правосла́вия яви́лся еси́./ Сего́ ра́ди в час кончи́ны твоея́/ вси святи́и земли́ Росси́йския яви́шася тебе́,/ с ни́миже, ны́не Престо́лу Бо́жию предстоя́,// моли́ спасти́ и просвети́ти ду́ши на́ша.

Святи́телю о́тче Афана́сие богоно́сне,/ ты, я́ко свети́льник пресве́тлый, яви́лся еси́,/ егда́ бо нече́стие омрачи́ зе́млю на́шу,/ пра́вду Бо́жию со дерзнове́нием пропове́дал еси́/ и, оскорбля́емь, гони́мь и низлага́емь,/ Бо́гу ве́рен оста́лся еси́./ Сего́ ра́ди свиде́тель и́стинен быв,/ страда́ния новому́чеников Росси́йских запечатле́л еси́,/ с ни́миже, ны́не Престо́лу Бо́жию предстоя́,// моли́ спасти́ и просвети́ти ду́ши на́ша.

Святи́телю Афана́сие богоблаже́нне,/ ты, по сло́ву Госпо́дню любо́вь ко враго́м явля́я,/ клену́щия тя благословля́ше,/ ненави́дящим тя добро́ творя́ше/ и за зло де́ющих ти моля́шеся,/ те́мже и́стинным сы́ном Отца́ Небе́снаго наре́клся еси́./ Сего́ ра́ди, дерзнове́ние ве́лие име́яй,/ в собо́ре святы́х земли́ Росси́йския лику́еши/ и с ни́ми Престо́лу Бо́жию предстои́ши,// моля́ спасти́ и просвети́ти ду́ши на́ша.

Иерусали́ма Вы́шняго гра́жданы,/ от земли́ Ру́сския возсия́вшия/ и вся́кое ме́сто ея́ освяти́вшия,/ во дни же обстоя́ний сугу́бо за ню предста́тельствующия,/ и́хже чрез все житие́ воспева́л еси́,/ яви́шася с Го́сподем пред кончи́ною твое́ю уте́шити ду́шу твою́,/ я́ко не ве́дети ти, в те́ле или́ кроме́ те́ла,/ на земли́ или́ на Небеси́ был еси́, святи́телю Афана́сие,// Бо́га ди́внаго во святы́х восхваля́я.

Прииди́те, правосла́внии лю́дие,/ просла́вим святи́теля Афана́сия,/ той бо со все́ми святы́ми, в земли́ Росси́йстей просия́вшими,/ предстои́т Триипоста́сному Бо́гу/ и со дерзнове́нием мо́лится:/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

Богородичен,

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О, Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

---

Седальны

Глас 5:

Се́рдце ми́лующее име́л еси́, святи́телю о́тче Афана́сие,/ расточа́я и дая́ убо́гим ску́дная име́ния твоя́,/ ни еди́ному же гоня́щему тя зла за зло воздая́,/ сего́ ра́ди ми́лости от Бо́га сподо́бился еси́/ и пра́вда твоя́ пребыва́ет в век ве́ка.

Глас 7:

Прии́м вся ору́жия Бо́жия и обле́кся в броню́ пра́вды,/ не пло́тию, но ду́хом вои́нствовал еси́, святи́телю о́тче Афана́сие,/ и благода́тию Бо́жиею испове́дал еси́ Иису́са Христа́, я́ко Го́спода и Спаси́теля./ Его́же моли́ поми́ловати нас в день лют.

Глас 4:

Прииди́те, празднолю́бцы и по́стницы,/ воспои́м благоче́стия ревни́теля, Афана́сия богоглаго́ливаго,/ и́же, я́ко труба́ та́инственная, к духо́вному пе́нию вся воздви́же,/ святы́х земли́ Ру́сския восхваля́я/ и пе́нии моле́бных слове́с Це́рковь Ру́сскую напая́я.

Глас 4:

Взира́я на Нача́льника ве́ры и Соверши́теля Иису́са, святи́телю о́тче Афана́сие,/ благода́тию не́мощь естества́ челове́ческаго превозмо́гл еси́:/ в го́рьких рабо́тах мно́жае,/ в ра́нах пребо́ле,/ в темни́цах и́злиха, близ сме́рти мно́гащи,/ во изгна́нии надо́лзе пребыва́я,/ беды́ от гони́телей, беды́ от лжебра́тии безро́потно терпе́л еси́/ и пра́вду яви́л еси́./ Те́мже жи́зни ве́чныя ны́не наслажда́ешися.

---

Светильны

Предста́вил еси́ себе́ же́ртву жи́ву Бо́гови,/ свя́ту, благоуго́дну и непоро́чну в слове́снем служе́нии и испове́дании,/ святи́телю Христо́в Афана́сие,/ и та́ко просвети́ся свет твой пред челове́ки,/ я́ко сла́вят вы́ну о тебе́ Отца́ Небе́снаго.

Богородичен: Свет Незаходи́мый ми́ру ро́ждшая,/ све́тлости святы́х сподо́би лю́ди земли́ Ру́сския, Тебе́ почита́ющия,/ и благодаре́ние от души́ принося́щия и вопию́щия:/ не забу́ди рабы́ Твоя́, Еди́на Благослове́нная.

---

Каноны

Канон святому, глас 8 (основной)

---

Житие