Глас 1, суббота
Краткое наименование:Вернуться назад
Октоих. Глас 1, Суббота
Знак типикона: ВседневныйПраздник: святого
Чтения
На Утрени:
Апостол:
Евангелие:
Прокимен
Прокимен, глас :
Стих:
Аллилуарий
Аллилуарий, глас :
Стих:
Причастен
Тропари
Кондаки
Стихиры на "Господи, возвах"
Глас 1:Му́чеников еди́нственное торжество́, струя́ми свои́х крове́й мно́жество бесо́в удави́ша, и вся́кия уста́виша сту́дныя же́ртвы, и́дольскую разруши́ша пре́лесть, терпели́вно пострада́вше и ны́не мо́лятся Христу́ дарова́ти душа́м на́шым ми́р, и ве́лию ми́лость.
Па́стырие всесвяще́ннии, му́дрыми словесы́ и уче́нии все́х научи́ша во Еди́нстве Божество́ Тро́ическое сла́вити, Ли́ц слия́ния и разделе́ния, Боже́ственне убега́юще. И ны́не мо́лятся, дарова́ти душа́м на́шым ми́р, и ве́лию ми́лость.
Преподо́бных сосло́вие, плотска́я хоте́ния успи́ша, и стремле́ния обузда́ша, житие́ равноа́нгельное показа́вше. Те́мже и в жили́щах Небе́сных ны́не ликовству́ют, Христу́ моля́щеся, дарова́ти душа́м на́шым ми́р, и ве́лию ми́лость.
Моли́твами Го́споди, все́х святы́х и Богоро́дицы, тво́й ми́р да́ждь на́м, и поми́луй на́с, я́ко Еди́н Ще́др.
Е́же на суди́щи ва́ше испове́дание святи́и, де́монов оплева́ си́лу, и от пре́лести челове́ки свободи́. Те́мже и глава́м усека́емым, взыва́сте: да бу́дет Го́споди, же́ртва ду́ш на́ших благоприя́тна пред Тобо́ю, я́ко Тебе́ возлюби́вше, неради́хом о вре́менней жи́зни, Человеколю́бче.
О до́брыя ва́шея ку́пли святи́и! Я́ко кро́ви да́сте, и Небеса́ насле́довасте: и вре́менно искуси́вшеся, ве́чно ра́дуетеся. Вои́стинну добра́ ва́шя ку́пля: тле́нная бо оста́вльше, нетле́нная восприя́сте, и со А́нгелы ликовству́юще, пое́те непреста́нно Тро́ицу единосу́щную.
Богородичен,Всеми́рную сла́ву, от челове́к прозя́бшую, и Влады́ку ро́ждшую, Небе́сную две́рь воспои́м Мари́ю Де́ву, безпло́тных пе́снь, и ве́рных удобре́ние. Сия́ бо яви́ся Не́бо, и хра́м Божества́: Сия́ прегражде́ние вражды́ разруши́вши, ми́р введе́, и Ца́рствие отве́рзе. Сию́ у́бо иму́ще ве́ры утвержде́ние, Побо́рника и́мамы из Нея́ ро́ждшагося Го́спода, дерза́йте у́бо, дерза́йте лю́дие Бо́жии: и́бо То́й победи́т враги́, я́ко Всеси́лен.
Стихиры на стиховне
Глас 1:Прехва́льнии му́ченицы, ва́с ни земля́ потаи́ла е́сть, но Не́бо прия́т вы́, и отверзо́шася ва́м ра́йския две́ри, и вну́трь бы́вше Дре́ва живо́тнаго наслажда́етеся: Христу́ моли́теся, дарова́ти душа́м на́шым ми́р и ве́лию ми́лость.
Стих: К Тебе́ возведо́х о́чи мои́ Живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.
Ка́я жите́йская сла́дость пребыва́ет печа́ли неприча́стна? ка́я ли сла́ва стои́т на земли́ непрело́жна? вся́ се́ни немощне́йша, и вся́ со́ний преле́стнейша: во еди́н ча́с вся́ сия́ сме́рть прие́млет. Но во све́те Христе́ лица́ Твоего́, и в наслажде́нии Твоея́ красоты́, я́же избра́л еси́, упоко́й я́ко Человеколю́бец.
Стих: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.
Никто́же безгре́шен, никто́же от челове́к бы́в, то́кмо Ты́ Еди́не Безсме́ртне: те́мже рабы́ Твоя́ я́ко Бо́г Ще́дрый, во све́те со А́нгельскими ликостоя́нии Твои́ми учини́, благоутро́бием Твои́м, презира́я беззако́ния, и подая́ и́м проще́ние.
Богородичен,Вои́стинну па́че ума́ чу́дная Твоя́ вели́чия, рождества́ Твоего́ Богоневе́сто, я́же пропове́даша проро́цы вси́ вся́ Пресла́вная: зача́тие и рождество́ Всепе́тая недомы́сленно и несказа́нно, и́мже ми́р спа́сл е́сть, я́ко Милосе́рд.
Стихиры на хвалитех
Глас 1:Страстоте́рпцы Христо́вы, прииди́те лю́дие вси́ почти́м, пе́ньми и пе́сньми духо́вными, просве́щники ми́ра, и пропове́дники ве́ры: исто́чники приснотеку́щыя, от ни́хже истека́ют ве́рным исцеле́ния. Те́х моли́твами Христе́ Бо́же на́ш, ми́р ми́ру твоему́ да́руй, и душа́м на́шым ве́лию ми́лость.
Си́и во́ини Царя́ вели́каго проти́вишася повеле́нием мучи́телевым, до́блественне неради́ша о му́ках, и ле́сть всю́ попра́вше, досто́йне венча́ни бы́ша. Про́сят от спа́са ми́ра, и душа́м на́шым ве́лия ми́лости.
Ва́с прехва́льнии му́ченицы, ни ско́рбь, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́чь, ниже́ о́гнь претя́й разлучи́ти от Бо́га возмого́ша: любо́вию же па́че я́же к нему́, я́ко в чужди́х подви́гшеся телесе́х, естество́ забы́вше, и сме́рть презре́сте. те́мже и досто́йно трудо́в ва́ших мзду́ прия́ли есте́, небе́сному Ца́рствию насле́дницы бы́вше: Христу́ моли́теся о душа́х на́ших.
Весели́теся му́ченицы о Го́споде, я́ко по́двигом до́брым подвиза́стеся, и проти́вистеся царе́м, и мучи́тели победи́сте: огня́ и меча́ не устраши́стеся, и звере́й ди́виих снеда́ющих телеса́ ва́ша. Христу́ со а́нгелы пе́снь возсыла́юще, с небесе́ венцы́ прия́сте: испроси́те дарова́ти ми́р ми́ру, и душа́м на́шым ве́лию ми́лость.
Де́лом Спа́се мо́й явля́еши, я́ко Ты́ еси́ все́х воскресе́ние, сло́вом сло́ве Ла́заря от ме́ртвых возста́вил еси́. Егда́ же ме́ртвии от гробо́в воскресо́ша, и врата́ А́дова смято́шася: тогда́ челове́ком сме́рть со́н явля́шеся. Но и́же на спасе́ние своего́ созда́ния, а не на осужде́ние прише́дый, и́хже избра́л еси́, упоко́й я́ко Человеколю́бец.
Богородичен,Ра́дуйся от на́с, Свята́я Богоро́дице Де́во Чи́стый Сосу́де всея́ вселе́нныя: Свеще́ неугаси́мая, вмести́лище Невмести́маго, хра́ме необори́мый. Ра́дуйся, из нея́же роди́ся А́гнец Бо́жий, взе́мляй грехи́ всего́ ми́ра.
Седальны
Глас 1:Страда́ния похвало́ю, и вене́чною по́честию, сла́внии страстоте́рпцы оде́явшеся Тобо́ю Го́споди, терпе́нием у́бо ра́н беззако́нных победи́ша, и си́лою Боже́ственною от небе́с побе́ду прия́ша: те́х моли́твами и на́с свободи́ от неви́димаго врага́ Спа́се, и спаси́ на́с.
Глас 1:Ра́нами святы́х, и́же по Тебе́ пострада́ша, умоле́н бу́ди Го́споди: и вся́ на́шя боле́зни и стра́сти исцели́ Человеколю́бче, мо́лимся.