Глас 4, суббота.
Краткое наименование:Вернуться назад
Октоих. Глас 4, Суббота
Знак типикона: ВседневныйПраздник: святого
Чтения
На Утрени:
Апостол:
Евангелие:
Прокимен
Прокимен, глас :
Стих:
Аллилуарий
Аллилуарий, глас :
Стих:
Причастен
Тропари
Кондаки
Стихиры на "Господи, возвах"
Глас 4:Христа́ Человеколю́бца страсте́м поревнова́вше страстоте́рпцы, телеса́ у́бо на ра́ны преда́сте, и го́рьким му́кам, тьма́м же боле́знем, я́ко предзря́ще при́сно рая́ Боже́ственное наслажде́ние, пи́щу же неиждива́емую и ве́чнующее благосла́вие, е́же получи́вше, моли́теся о воспева́ющих ва́с.
Па́стырие всесвяще́ннии, нача́льнаго па́стыря сла́внии подо́бницы бы́вше Христа́ все́х Царя́, ду́шы усе́рдно о овца́х положи́сте, беды́ лю́тыя претерпе́сте, я́ко бори́ми от волко́в тя́жких, достоблаже́ннии, спаса́ете невре́дно богоизбра́нное ста́до.
Же́ртвы одушевле́нныя, всесожже́ния слове́сная, му́ченицы Госпо́дни, заколе́ния соверше́нная Бо́гу, Бо́га зна́юща, и Бо́гом зна́ема овча́та, и́хже огра́да волко́м невходи́ма: моли́теся и о на́с, упасе́нным бы́ти с ва́ми на воде́ упокое́ния.
Честна́ сме́рть святы́х Твои́х, Го́споди: мече́м бо и огне́м, и душе́ю сокруше́нною пролия́ша кро́ви своя́, упова́ние иму́ще на Тя́, восприя́ти трудо́в мзду́, и претерпе́вше прия́ша от Тебе́, Спа́се, ве́лию ми́лость.
Иму́ще дерзнове́ние ко Спа́су, святи́и, моли́те непреста́нно за ны́ гре́шныя, оставле́ния прегреше́ний прося́ще, и душа́м на́шым ве́лия ми́лости.
Богородичен,И́же тебе́ ра́ди Богооте́ц проро́к Дави́д, пе́сненно о Тебе́ провозгласи́, вели́чия тебе́ сотво́ршему: предста́ Цари́ца одесну́ю Тебе́. Тя́ бо, Ма́терь, хода́таицу живота́ показа́, без отца́ из Тебе́ вочелове́читися благоволи́вый Бо́г, да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, ко Отцу́ принесе́т и Своему́ хоте́нию, с небе́сными совокупи́т си́лами, и спасе́т, Богоро́дице, ми́р, Христо́с име́яй ве́лию и бога́тую ми́лость.
Стихиры на стиховне
Глас 4:Прославля́яйся в па́мятех святы́х Твои́х, Христе́ Бо́же, и от ни́х умоле́н быва́я, низпосли́ на́м ве́лию ми́лость.
Стих: К Тебе́ возведо́х о́чи мои́ живу́щему на Небеси́, се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.
И́же святы́х му́ченик прие́мый терпе́ние, и от на́с приими́ пе́ние, Человеколю́бче, да́руй на́м те́х моли́твами ве́лию ми́лость.
Стих: Поми́луй на́с, Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.
Со ду́хи пра́ведных сконча́вшихся ду́шы ра́б Твои́х, Спа́се, упоко́й, сохраня́я и́х во блаже́нней жи́зни, я́же у тебе́, Человеколю́бче.
Богородичен,Свеще́ неугаси́мая, престо́ле пра́ведный, Пречи́стая Влады́чице, моли́ спасти́ся душа́м на́шым.
Стихиры на хвалитех
Глас 4:Кто́ не ужаса́ется зря́, святи́и му́ченицы, по́двига до́браго, и́мже подвиза́стеся? ка́ко во пло́ти су́ще, безпло́тнаго врага́ победи́сте, Христа́ испове́дающе, и Кресто́м вооружи́вшеся; те́мже досто́йно яви́стеся бесо́в прогони́тели, и ва́рваров победи́тели, непреста́нно моля́щеся спасти́ся душа́м на́шым.
А́нгелом соприча́стницы бы́сте, святи́и му́ченицы, на суди́щи Христа́ му́жески пропове́давше: вся́ бо я́же в ми́ре оста́висте кра́сная я́ко не су́ща, ве́ру же я́ко наде́жду тве́рду удержа́сте, те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся спасти́ся душа́м на́шым.
Ка́ко ва́шым подвиго́м не удиви́мся, святи́и му́ченицы? Я́ко те́лом умира́ющим обложе́ни, безпло́тныя враги́ победи́сте, не устраши́ша ва́с мучи́тельская преще́ния, ни ужаси́ша ва́с му́к приложе́ния, вои́стинну досто́йно от Христа́ просла́вистеся.
Честна́ сме́рть святы́х Твои́х, Го́споди, мече́м бо и огне́м, и душе́ю сокруше́нною пролия́ша кро́вь свою́, упова́ние иму́ще на Тя́, восприя́ти трудо́в мзду́: претерпе́ша бо и прия́ша от Тебе́, Спа́се, ве́лию ми́лость.
В поко́ищи Твое́м, Го́споди, иде́же вси́ святи́и твои́ почива́ют, усо́пшыя рабы́ Твоя́ поко́й, я́ко еди́н сы́й Человеколю́бец.
Где́ е́сть ми́ра пристра́стие? Где́ е́сть привре́менное мечта́ние? Где́ е́сть зла́то и сребро́? Где́ е́сть рабо́в мно́жество и молва́? Вся́ пра́х, вся́ пе́пел, вся́ се́нь! Но прииди́те возопии́м безсме́ртному Царю́: Го́споди, ве́чных Твои́х бла́г сподо́би преста́вльшыяся от на́с, и упоко́й ты́я в нестаре́емом блаже́нстве.
Богородичен,Еди́на Чи́стая и Пречи́стая Де́во, я́же Бо́га безсе́менно ро́ждшая, моли́ спасти́ся душа́м на́шым.
Седальны
Глас 4:Дне́сь а́нгельская во́инства в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти: от ни́хже, Бо́же, умоле́н быва́я, да́руй на́м ве́лию ми́лость.
Глас 4:Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости, те́х моли́твами спаси́ ду́шы на́шя.
Светильны
Каноны
Други́й кано́н усо́пшым, глас 3 (основной)