Автор акафиста: протоиерей Андрей Ефанов
Кондак 1
Избранней от человеческого рода Преславней Христовой Голубице, всему миру христианскому всеблагой Царице, похвальную песнь сице приносяще, милости и заступничества у Нея просяще, славу и хвалу Ей вопием: радуйся, Всеблагаго Господа нашего благая Мати, Заступница рода христианского.
Икос 1
Благую весть от Ангела приимше, подательницею мира и носительницею Слова явилася еси, тем же и от нас сицевую песнь приими:
Радуйся, яко Спаса нам родила еси.
Радуйся, яко радость ангельскую в сердце Своем прияла еси.
Радуйся, Святая Святых, чистотою Своею благодать восприявшая.
Радуйся, даже до Успения чистоту сию соблюдшая.
Радуйся, Храме Творца Невместимаго, все небо в Себе вместившая.
Радуйся, Богоизбранная Отроковице, вся заповеди Господни неразоримо сохранившая.
Радуйся, яко Тобою роди христианские сохраняются.
Радуйся, яко немощные от страстей своих Твоим предстательством избавляются.
Радуйся, Всеблагаго Господа нашего благая Мати, Заступница рода христианского.
Кондак 2
Видяще славу Божию, на Себе явленную, во смирении сердца Дева вопияше ко Ангелу: Како сие возможет на Мне совершитися? Обаче славу Богу воздаю: Аллилуиа.
Икос 2
Разуму непостижное на Себе зряще, Дева возопи ко Ангелу: Се раба Господня, буди по глаголу Твоему. Мы же, смирению Твоему дивящеся, воспеваем Ти:
Радуйся, обетования Божия Приятелище.
Радуйся, славы Божественныя Хранительнице.
Радуйся, рождшая Искупителя всех.
Радуйся, сим упразднившая тяготу греховную.
Радуйся, в Тебе бо невместимый Христос вместилище обрете.
Радуйся, яко мира сего любовию Своею доныне не оставила.
Радуйся, Мати Всевечнаго Слова и Творца.
Радуйся, Себе Сыну Своему посвятившая даже до конца.
Радуйся, Всеблагаго Господа нашего благая Мати, Заступница рода христианского.
Кондак 3
Силою Своею неплодная ложесна отверзая, Господи, Проповедника и Предтечу Своего миру даровал еси, воспевающаго Ти: Аллилуиа.
Икос 3
Имуще во чреве Своем Невместимаго, милости южику Свою сподобила еси, приимше благословение тоя, и от нас сию песнь ныне услыши:
Радуйся, Предтечево играние приимшая во славу Господню.
Радуйся, призирающая и ныне на наготу людей греховную.
Радуйся, Елисаветин глас приимшая.
Радуйся, мира земнаго Своим предстательством не оставльшая.
Радуйся, ветве мирныя во устах Ноевой голубицы.
Радуйся, дивная наша ко Господу молитвеннице.
Радуйся, от роды родов ублажаемая.
Радуйся, и от нас, грешных, присно прославляемая.
Радуйся, Всеблагаго Господа нашего благая Мати, Заступница рода христианского.
Кондак 4
Буря смущения Иосифа на сладость райскую применишася, егда истина пред ним явишася. Узрев же славу на Тебе явленную, возопи к Богу: Аллилуиа.
Икос 4
Слух пастырский удивися Твоего великаго Рождества таинству, и, притекше ко яслям, славу Богородице творя, рекоша:
Радуйся, Бога Творца Мати Неизреченная.
Радуйся, Слово рождшая непостижно, славная.
Радуйся, Славою Божией присно облистаемая.
Радуйся, славу Божию людям приносящая.
Радуйся, яко роды родов Тя, Богородицу, славят.
Радуйся, яко и ангели высшую себе Тя величают.
Радуйся, мира земнаго надежная Хранительница.
Радуйся, Царства Небеснаго милостивая Царица.
Радуйся, Всеблагаго Господа нашего благая Мати, Заступница рода христианского.
Кондак 5
Зряще новыя звезды, Богопровозвестницу от востока к западу, волсви дары Тебе, Творцу всяческих, приносят и о Матери Твоей Богу вопиют: Аллилуиа.
Икос 5
Видяше Слово, в мир пришедшее, волсви древние дары Слову Неизреченному, Сыну Божию во плоти, приносяще, славу и хвалу Матери Его возопише:
Радуйся, от восток даже до запада Славо непреходящая.
Радуйся, Востоком Сына Твоего темный запад естества нашего просветившая.
Радуйся, падшее наше естество обновляющая.
Радуйся, Сына Своего утверждающая величество.
Радуйся, Лествице от небеси даже до земли явленная.
Радуйся, славословием ангельским приснославимая.
Радуйся, к Сыну Своему с любовию приклонившаяся.
Радуйся, наше поклонение Сыну приносящая.
Радуйся, Всеблагаго Господа нашего благая Мати, Заступница рода христианского.
Кондак 6
Проповедницы славы Божественной, во странах восточных волсви явишася, со апостолы и Христовым Предтечей служение совершиша, вся языки научая славу Божию Богу воздати, поя: Аллилуиа.
Икос 6
Свет Египту Себе Самаго с Материю Своею явил еси, идольское служение в прах попрал еси, темже, видяще славу Твою, вопием к Богоблаженней:
Радуйся, погибель бесом, от ангелов восхваляемая.
Радуйся, страстей ниспровержнице, от человеков превозносимая.
Радуйся, Тобою мир обрете Избавителя своего.
Радуйся, яко роды родов предстательства жаждут Твоего.
Радуйся, дарующая любовь чтущим Тя.
Радуйся, на мне, окаяннем, да пребудет милость Твоя.
Радуйся, Ты бо даровала нам радость Свою.
Радуйся, покрывающая грехов наготу мою.
Радуйся, Всеблагаго Господа нашего благая Мати, Заступница рода христианского.
Кондак 7
Хотяще славу Божию прежде успения зрети, на руцех праведных Симеон Сына Девы, вся содержащего, вознесе и возопи: Аллилуиа.
Икос 7
Новое чудо зрим о Тебе, Богородице, яко Церковь Свою Христос научает воспети тако Приснодеву:
Радуйся, Цвете Благоуханный, Богом в земная принесенный.
Радуйся, Плод древа праведного, миру на избавление проращенный.
Радуйся, Благоухание чуднаго к Богу кадила.
Радуйся, яко Небесную Чистоту на руцех Своих безгрешно носила.
Радуйся, Нетленная Дево, по Рождестве Приснодевою пребываеши.
Радуйся, яко девство Свое во образ подражания нам даеши.
Радуйся, яко славу Твою ниже ангели постигнути возмогут.
Радуйся, яко и грешнии милостию Твоею покой обретут.
Радуйся, Всеблагаго Господа нашего благая Мати, Заступница рода христианского.
Кондак 8
Странен мирови образ Рождества Твоего, ибо от Безвестныя Девы в скромном чертозе в мир приходяще, Непреходящее Царство подаеши нам, вопиющим Ти: Аллилуиа.
Икос 8
Во Славе со Отцем и Духом пребывая, на земли же полнотою во плоть облекся еси, пеленами повит лежишь и воспевати к Матери Своей народ Божий и вкупе с ними вси языки поучаеши сице:
Радуйся, Бога и Творца Лествице низводящая.
Радуйся, смиренный наш ум горе возводящая.
Радуйся, Росо Гедеоново, волну нашу безводную благодатию напояеши.
Радуйся, Манно, христианские роды обильно питаеши.
Радуйся, Давидом праотцем древле славимая.
Радуйся, даже до конца века земнаго никогда же забвенная.
Радуйся, Кресте Моисеов, змия Евиного вкушения ни во что же вменившая.
Радуйся, при Кресте Сына Своего о милости нам молившая.
Радуйся, Всеблагаго Господа нашего благая Мати, Заступница рода христианского.
Кондак 9
Всякое естество животное, земных и небесных, непостижное Рождество Твое зря, славу Царю царствующих воздают: Аллилуиа.
Икос 9
Витийство древних и новое риторство никакоже славу Твою достойно возвести возмогут, обаче приими наш смиренный глас, к Тебе возносимый:
Радуйся, Земная, небесные чины превозшедшая.
Радуйся, Небесная, к земным милость явившая.
Радуйся, Ниво Господня, в саде райском благоукрашенная.
Радуйся, Земле Обетования, от Моисея иудеям проповеданная.
Радуйся, Светильниче Гедеонов, тьмы тем супостат преоборовшая.
Радуйся, Илиино воззвание к Богу о дожде на людех явившая.
Радуйся, яко смирение Твое превыше небес Тебе вознесло.
Радуйся, радость Свою и нам преподала еси.
Радуйся, Всеблагаго Господа нашего благая Мати, Заступница рода христианского.
Кондак 10
Спаситель миру, Господь Всемогий, к нашему падшему естеству склонил еси слух Свой, ради велия сего человеколюбия славу Ему воздаем: Аллилуиа.
Икос 10
Стену непреодолимую града Божия Тя проповедуем, Ты бо ограждение верным и сень к Сыну Твоему притекающим и Тебя прославляющим:
Радуйся, Бога Творца всяческих всесовершенное Творение.
Радуйся, наше к Богу твердое упование.
Радуйся, Милость, превыше всякия милости земныя.
Радуйся, Света Христова сияние на свечнице Церкви Небесныя.
Радуйся, образы Своя чудоточныя нам явившая.
Радуйся, вся концы Вселенныя дивно просветившая.
Радуйся, открывшая нам непостижное величество славы Господней.
Радуйся, яко мы притекаем к Тебе, Преславней.
Радуйся, Всеблагаго Господа нашего благая Мати, Заступница рода христианского.
Кондак 11
Песнословца Давида нимало подражатели мы явихомся, ибо славу Божию никакоже воспети достойно возможем, обаче воспеваем Ти: Аллилуиа.
Икос 11
Светоподательный Светильник Церкви Божией зрим Тя, Богоотроковице, вся бо концы земли просветишися светом Твоим, и поклоняются Ти, и славят непрестанно:
Радуйся, всякия неправды разрушение.
Радуйся, Христовыя правды Источниче.
Радуйся, Миро, облагоухавшее праведных души.
Радуйся, Елей святый, благодать подающий.
Радуйся, Сень святая, осеняющая верных.
Радуйся, Огнь, попаляющий козни зловерных.
Радуйся, Кивоте, законоположника Христа, носящий.
Радуйся, Столпе, к Сыну Своему нас возводящий.
Радуйся, Всеблагаго Господа нашего благая Мати, Заступница рода христианского.
Кондак 12
Благодатствуеши древле иссохшия ветви, вертоград Отца Своего кровию присно напояеши, даруеши Себе Самаго зовущим Ти: Аллилуиа.
Икос 12
Поюще несказанное Божие воплощение, к Матери Его возносим радостнословный и благий глас, да предстательствуеши о нас, зовущих Тя:
Радуйся, Тобою бо в мир Сын Божий изшед.
Радуйся, о людех печалуеши пред Сыном Своим.
Радуйся, Ты бо даруеши радость, величающим Тя.
Радуйся, Ты бо не оставляеши призывающих Тя.
Радуйся, Огнь Божества в мир произведшая.
Радуйся, искушения мира ни во что же вменившая.
Радуйся, Славо Преславная, наше обрадование.
Радуйся, в Царстве Небесном наше Предстательство и Упование.
Радуйся, Всеблагаго Господа нашего благая Мати, Заступница рода христианского.
Кондак 13
О Всепетая Мати Творца и Бога нашего! Малое сие прими славословие, нас, Тебе славящих, не остави, но в Царство Небесное введи и о Тебе Богу воспевати сподоби: Аллилуиа!
[Се́й конда́к глаго́лется три́жды.][Далее повторяем 1‑е икос и кондак:]
Икос 1
Благую весть от Ангела приимше, подательницею мира и носительницею Слова явилася еси, тем же и от нас сицевую песнь приими:
Радуйся, яко Спаса нам родила еси.
Радуйся, яко радость ангельскую в сердце Своем прияла еси.
Радуйся, Святая Святых, чистотою Своею благодать восприявшая.
Радуйся, даже до Успения чистоту сию соблюдшая.
Радуйся, Храме Творца Невместимаго, все небо в Себе вместившая.
Радуйся, Богоизбранная Отроковице, вся заповеди Господни неразоримо сохранившая.
Радуйся, яко Тобою роди христианские сохраняются.
Радуйся, яко немощные от страстей своих Твоим предстательством избавляются.
Радуйся, Всеблагаго Господа нашего благая Мати, Заступница рода христианского.
Кондак 1
Избранней от человеческого рода Преславней Христовой Голубице, всему миру христианскому всеблагой Царице, похвальную песнь сице приносяще, милости и заступничества у Нея просяще, славу и хвалу Ей вопием: радуйся, Всеблагаго Господа нашего благая Мати, Заступница рода христианского.
Молитва
О Всепетаго и Всеславнаго Господа Бога, Творца нашего, Мати! Вся небесныя силы непрестанно величают Тя: херувимы и серафимы превозносят высшую себе, начала и власти силу воспевают Твою, ангели и архангели милость славят Богоматернюю, вся святые лики присно блажат Тя. Мы же на земли, аще и недостойнии, обаче ревностию облекшись, яко ризою, славити и величати ныне Тя дерзаем. Высшая земных и славнейшая небесных, Сына Своего Всесовершенное Творение, Заступница христиан обидимых и оружие на сопостаты, Утешительнице скорбящих и Радосте обрадованных, в бедах помощница и в благодарениях благопоспешнице, присно славимая во веки, милосердое призрение на человеки, Славо неистленная Тя славящих и Надеждо неблазная к Тебе прибегающих, Мати всех Творца, ниже остави нас даже до конца, обаче милость яви нам и вся потребная даруяй, да прославим имя Твое, Госпоже Пресвятая, во веки. Аминь.
Комментировать