Азбука веры » Молитвослов » Акафисты
Система Orphus

Акафист Честному и Животворящему Кресту Господню (третий)

• Цвет фона:


• Шрифт: Book Antiqua Arial Times
• Размер: 14pt 12pt 10pt 8pt
• Выравнивание: по левому краю по ширине
 

Конда́к 1.

Избра́нному Царе́м Сла́вы и освяще́нному кре́стною сме́ртию Искупи́теля ми́ра, чудоде́йственную си́лу иму́щему дре́ву, соста́вим, ве́рнии, похвалу́ и ра́достно возопие́м:

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Икос 1.

Ангельския си́лы, я́ко Бо́жии служи́телии, о́крест Креста́ Госпо́дня неви́димо предстоя́щии, ужаса́ющаяся, и поно́сную на земли́ сме́рть Иису́сову, на небеси́ воспева́ша; мы́ бо, недосто́йнии, зна́мением Честна́го Креста́ Госпо́дня освяща́яся, ра́достно взыва́ем:

Ра́дуйся, честно́е Дре́во, кро́вию Богочелове́ка освяще́нное.

Ра́дуйся, честно́е Дре́во, просла́вльшееся послуша́нием Христо́вым.

Ра́дуйся, честно́е Дре́во, освободи́вшее на́с от а́да.

Ра́дуйся, честно́е Дре́во, низложе́ние диа́вола.

Ра́дуйся, честно́е Дре́во, возглаше́ние си́лы Иису́совой.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 2.

Ви́дящи Тя́, на Кресте́ ви́сяща, вся́ си́лы небе́сныя, ли́ца закрыва́юще, хва́ляша и воспева́ша Твое́ вели́чие, Живода́вче Христе́; мы́ бо, на земли́ со стра́хом и тре́петом пред святы́м Твои́м Кресто́м предстоя́, воспева́ем ра́достно пе́снь: Аллилу́ия.

Икос 2.

Ра́зум неуразуме́нный, зна́мением Честна́го и Животворя́щаго Креста́ Госпо́дня ди́вно просвеща́ющийся, со стра́хом и любо́вию поклоня́ется свято́му Дре́ву и непреста́нно воспева́ет си́це:

Ра́дуйся, Честны́й Кре́ст Христо́в, из ме́ртвых воскреша́ющий.

Ра́дуйся, Честны́й Кре́ст Христо́в, проявля́ющий и́стину.

Ра́дуйся, Честны́й Кре́ст Христо́в, на не́м бо Иису́с во́лею распя́ся и гвоздьми́ бы́сть пригвожде́н.

Ра́дуйся, Честны́й Кре́ст Христо́в, на не́м бо Свята́я Же́ртва принесе́ся.

Ра́дуйся, Честны́й Кре́ст Христо́в, Дре́во всеси́льное.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 3.

Си́лою Честна́го и Животворя́щаго Креста́ Госпо́дня бе́сы низлага́ются, очища́ется нечи́стое житие́ на́ше, грехо́вныи по́мыслы отгоня́ются, озаря́ется чистото́ю се́рдце на́ше; того́ ра́ди с ве́рою творя́ кре́стное зна́мение и с благогове́нием взира́я на изображе́ние страда́ний Христо́вых, пое́м Бо́гу: Аллилу́ия.

Икос 3.

Име́я всегда́ пред очи́ма на́шима Кре́ст святы́й, осеня́ющий и освяща́ющий святы́е хра́мы христиа́нскии, охраня́ющий святы́ню Госпо́дню, мы́ со слеза́ми благодаре́ния воспева́ем си́це:

Ра́дуйся, честно́е Дре́во, исто́чниче бла́г ве́чных.

Ра́дуйся, честно́е Дре́во, освяще́нное пло́тию и кро́вию Богочелове́ка.

Ра́дуйся, честно́е Дре́во, Дре́во чудоде́йственное.

Ра́дуйся, честно́е Дре́во, Дре́во треблаже́нное.

Ра́дуйся, честно́е Дре́во, Дре́во жи́зни и спасе́ния.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 4.

Бу́рю страсте́й лю́тых си́лен угаси́ти Святы́й и Всече́стный Кре́ст Христо́в, то́й бо ме́чь духо́вный, щи́т ве́рных, ору́жие всеси́льное и зна́мение всепобежда́ющее, сего́ ра́ди и мы́, недосто́йнии, в весе́лии взыва́ем Бо́гу: Аллилу́ия.

Икос 4.

Слы́ша уче́ние Христо́во, ве́руем в та́йну спаси́тельного искупле́ния, поклоня́емся страсте́м Христо́вым, лобыза́ем Кре́ст Всеси́льный и ра́достно взыва́ем си́це:

Ра́дуйся, Честны́й Кре́ст Христо́в, угаси́вший я́рости пла́мя.

Ра́дуйся, Честны́й Кре́ст Христо́в, порази́вший богоотсту́пников.

Ра́дуйся, Честны́й Кре́ст Христо́в, победи́вший по́лчища вра́жии.

Ра́дуйся, Честны́й Кре́ст Христо́в, отсе́кший главу́ зми́еву.

Ра́дуйся, Честны́й Кре́ст Христо́в, торжество́ ве́ры и наде́жды христиа́н.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 5.

Богото́чный исто́чник исцеле́ний бы́сть на́м Кре́ст чудоде́йственный, на не́м бо Христо́с во́лею пострада́ на́шего ра́ди спасе́ния, и Боже́ственныя дла́ни Своя́ распросте́рши любо́вию Отчею, с Голго́фы объя́ всю́ вселе́нную, сего́ ра́ди возопие́м Ему́, Бо́гу на́шему, пе́снь: Аллилу́ия.

Икос 5.

Ви́девши вси́ язы́цы вели́чие сла́вы Креста́ Госпо́дня и чудоде́йственную си́лу изображе́ния и зна́мения его́, уве́роваша во Святу́ю, Живонача́льную и Неразде́льную Тро́ицу и поклони́шася Кресту́ Всечестно́му, сего́ ра́ди взыва́ем ра́достно:

Ра́дуйся, честно́е Дре́во, си́лою свое́ю на добро́ на́с вразумля́ющее.

Ра́дуйся, честно́е Дре́во, си́лою свое́ю на́с от боле́зней исцеля́ющее.

Ра́дуйся, честно́е Дре́во, сла́вою свое́ю вся́ вра́жия си́лы в бе́гство обраща́ющее.

Ра́дуйся, честно́е Дре́во, сла́вою свое́ю Венцено́сных Царе́й прославля́ющее.

Ра́дуйся, честно́е Дре́во, вели́чием свои́м Их Ца́рство возвыша́ющее.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 6.

Пропове́дником богоно́сным яви́ся честно́е Дре́во, из него́ бо бе́ сооруже́н Кре́ст Христо́в, Кре́ст четвероконе́чный, трисоста́вный, его́ бо земля́ чудоде́йственно израсти́ нетле́нным и зело́ благоуха́ющим. Кре́ст — покро́в безпомо́щных, на не́м бо Христо́с во́лею закла́н бы́сть. Ему́ бо, Спаси́телю ми́ра, прино́сим пе́снь: Аллилу́ия.

Икос 6.

Возсия́л еси́ я́ко со́лнце пра́вды, всечестны́й Кре́ст Христо́в, в не́драх земли́ сокрове́нный, не́сколько столе́тий безду́шными камня́ми, я́ко сокро́вище, сберега́емый и на ра́дость всему́ ми́ру обрете́нный, Ему́ бо велегла́сно возопие́м:

Ра́дуйся, Честны́й Кре́ст Христо́в, моли́твами и усе́рдием Благочести́вой Цари́цы Еле́ны на́йденный.

Ра́дуйся, Честны́й Кре́ст Христо́в, на высоту́ Патриа́рхом Мака́рием воздви́гнутый для торже́ственнаго поклоне́ния все́ми язы́цами.

Ра́дуйся, Честны́й Кре́ст Христо́в, посрами́вший идолопокло́нство и неве́рие.

Ра́дуйся, Честны́й Кре́ст Христо́в, призва́вший хули́телей к покая́нию.

Ра́дуйся, Честны́й Кре́ст Христо́в, я́ко ты́ Дре́во чудоде́йственное и христоно́сное.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 7.

Хотя́й прояви́ти милосе́рдие Свое́ Спаси́тель ми́ра к ро́ду челове́ческому, во́лею прие́млет поноше́ние, присужда́ется к позо́рной сме́рти, ко Кресту́ пригвожда́ется и кре́стною сме́ртию сме́рть попира́ет, те́м бо и мы́ пое́м Ему́: Аллилу́ия.

Икос 7.

Ди́вное зре́лище явля́ется ми́рови: Богочелове́к распина́ется, ру́це и но́зе пригвожда́ются, ре́бра Его́ пробода́ются, страда́ниями Его́ и уничиже́нием очища́ются ра́ны грехо́внаго челове́чества. Кре́ст Христо́в явля́ется торже́ственно победоно́сным зна́мением сла́вы Бо́жией; сего́ ра́ди взыва́ем си́це:

Ра́дуйся, честно́е Дре́во, смире́ния о́браз.

Ра́дуйся, честно́е Дре́во, апо́столов похвало́.

Ра́дуйся, честно́е Дре́во, преподо́бных утвержде́ние.

Ра́дуйся, честно́е Дре́во, му́чеников кре́посте.

Ра́дуйся, честно́е Дре́во, пустынножи́телей огражде́ние.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 8.

Стра́нное чу́до! Позо́рный кре́ст преврати́ся в Дре́во жи́зни и спасе́ния, то́й бо вразумля́ет, освяща́ет и от боле́зней душе́вных и теле́сных исцеля́ет с ве́рою и любо́вию непреста́нно вопию́щих Бо́гу: Аллилу́ия.

Икос 8.

Все́ грехо́вное житие́ на́ше очища́ется чудоде́йственным Кресто́м Спаси́теля ми́ра, послужи́вшим к примире́нию Божества́ с престу́пным челове́чеством, сего́ ра́ди мы́ благода́рственно возопие́м:

Ра́дуйся, Честны́й Кре́ст Христо́в, явля́ющий на́м любо́вь и долготерпе́ние Бо́жие.

Ра́дуйся, Честны́й Кре́ст Христо́в, и́м бо соверши́ся призва́ние язы́ков.

Ра́дуйся, Честны́й Кре́ст Христо́в, явле́ние бла́гости благоупова́ющим.

Ра́дуйся, Честны́й Кре́ст Христо́в, глубина́ упова́ния ду́ш, лю́бящих Го́спода.

Ра́дуйся, Честны́й Кре́ст Христо́в, си́ла и ра́дость все́х христиа́н.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 9.

Вся́кая жите́йская бу́ря сокруша́ется си́лою кре́стных страда́ний Богочелове́ка Иису́са, искупи́вших ве́сь ми́р, те́м бо и мы́, честву́я Всечестна́го Креста́ Госпо́дня свято́е зна́мение, смире́нно прино́сим Бо́гу любви́ и сла́вы ра́достную пе́снь: Аллилу́ия.

Икос 9.

Вити́йствующий язы́к не мо́жет изрещи́ досто́йныя похвалы́ Дре́ву всечестно́му, из него́ бо соста́влен бы́сть чудоде́йственный Кре́ст Христо́в, благоуха́ющий любо́вию Страда́льца Иису́са Христа́, сего́ ра́ди и мы́, недоуме́я досто́йно восхвали́ти Тя́, со слеза́ми возопие́м:

Ра́дуйся, честно́е Дре́во, торжество́ Це́ркви Христо́вой.

Ра́дуйся, честно́е Дре́во, врачевство́ на́ше и ра́дость.

Ра́дуйся, честно́е Дре́во, освяще́ние все́х путе́й жи́зни на́шей.

Ра́дуйся, честно́е Дре́во, все́м христиа́нам вспоможе́ние.

Ра́дуйся, честно́е Дре́во, все́х немощны́х си́ла и подкрепле́ние.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 10.

Спасти́ хотя́ ми́р, дла́ни Своя́ пречи́стыя Христо́с на Дре́во возне́с и дре́во преслуша́ния замени́ся Дре́вом Сыно́вняго к Бо́гу Отцу́ послуша́ния: рука́ невоздержа́ния, низве́ргшая Ада́ма, распросте́ртыми рука́ми Богочелове́ка соединя́ет Свое́ю любо́вию все́ концы́ ми́ра. Те́м бо и мы́ торже́ственно взыва́ем побе́дную пе́снь: Аллилу́ия.

Икос 10.

Стена́ еси́, огражда́ющая на́с от все́х бе́д и напа́стей, Кре́ст Всечестны́й, цельбоно́сный исто́чниче все́х язы́ков, осеня́ющихся святы́м твои́м зна́мением во и́мя Отца́ и Сы́на и Свята́го Ду́ха, сего́ бо ра́ди с весе́лием взыва́ем ти́:

Ра́дуйся, Честны́й Кре́ст Христо́в, кро́вию Богочелове́ка обагре́нный.

Ра́дуйся, Честны́й Кре́ст Христо́в, цвета́ми ра́йскими благоуха́ющий.

Ра́дуйся, Честны́й Кре́ст Христо́в, луча́ми ве́ры на́с озаря́ющий.

Ра́дуйся, Честны́й Кре́ст Христо́в, луча́ми наде́жды на́с подкрепля́ющий.

Ра́дуйся, Честны́й Кре́ст Христо́в, луча́ми любви́ на́с обогаща́ющий.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 11.

Пе́ние похва́льное прино́сим ти́, Боже́ственное, Животворя́щее Дре́во Креста́ Госпо́дня, ве́рных осеня́ющее, неве́рных облича́ющее и все́х на́с огражда́ющее от вся́каго врага́ и супоста́та, сего́ бо ра́ди вопие́м пе́снь: Аллилу́ия.

Икос 11.

Пою́щии твоя́ чудеса́, всеси́льный Кре́ст Христо́в, мы́ с ве́рою и благодаре́нием преклоня́ем коле́на се́рдца на́шего, со слеза́ми лобыза́ем святы́и но́зи Страда́льца Иису́са, поклоня́емся страсте́м Христо́вым и та́ко возопие́м:

Ра́дуйся, честно́е Дре́во, ски́петр Царе́й христиа́нских непрело́жный.

Ра́дуйся, честно́е Дре́во, держа́ва все́й вселе́нной.

Ра́дуйся, честно́е Дре́во, основа́ние благоче́стия.

Ра́дуйся, честно́е Дре́во, вода́м освяще́ние.

Ра́дуйся, честно́е Дре́во, поля́м и сада́м плодоно́сие.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 12.

Благода́ть Твою́ всеси́льную, Го́споди, явля́ет на́м Дре́во Треблаже́нное, то́й бо осеня́ет у́м на́ш, вразумля́ет и науча́ет пе́ти непреста́нно пе́снь побе́дную: Аллилу́ия.

Икос 12.

На го́ру Голго́фскую водруже́н бы́сть Кре́ст Честны́й, и Ты́, Созда́тель ми́ра, вознесе́н бы́сть на не́м я́ко в позо́р ми́рови, мы́ же, ве́рнии, лобыза́ем пречи́стыя я́звы Твоя́, поклоня́емся Честно́му Кресту́ Твоему́, си́це взыва́я:

Ра́дуйся, Честны́й Кре́ст Христо́в, предназна́ченный Бо́гом для та́инства искупле́ния.

Ра́дуйся, Честны́й Кре́ст Христо́в, я́ко ты́ еси́ ра́достное зна́мение на́шего спасе́ния.

Ра́дуйся, Честны́й Кре́ст Христо́в, зна́мение на́шего освобожде́ния.

Ра́дуйся, Честны́й Кре́ст Христо́в, страсте́й на́ших умерщвле́ние.

Ра́дуйся, Честны́й Кре́ст Христо́в, со́вести на́шей успокое́ние.

Ра́дуйся, честно́е Дре́во, на не́м бо соверши́ся та́инство всеми́рнаго искупле́ния.

Конда́к 13.

О, Пречестно́е, Боже́ственное и Животворя́щее Дре́во Креста́ Госпо́дня! Чудоде́йственною твое́ю си́лою огради́ мя́, гре́шнаго, осеня́ющаго с ве́рою чело́ мое́ и пе́рси моя́ и вся́ соста́вы и у́ды моя́ святы́м твои́м зна́мением во и́мя Отца́ и Сы́на и Свята́го Ду́ха, во сла́ву Святы́я Тро́ицы, во Еди́нице прославля́емой, и благода́рственно воспева́ющаго пе́снь побе́дную: Аллилу́ия.

[Се́й конда́к глаго́лется три́жды. Та́же и́кос 1-й: Ангельския си́лы… И конда́к 1-й: Избра́нному Царе́м Сла́вы…]

Моли́тва Свято́му и Животворя́щему Кресту́ Госпо́дню.

О, ди́вный чудоде́йственною си́лою четвероконе́чный и трисоста́вный Кре́ст Христо́в! У подно́жия твоего́ во пра́х распросте́ртый, поклоня́юся ти́, честно́е Дре́во, отгоня́ющее от на́с вся́кое де́монское стреля́ние и освобожда́ющее на́с от все́х бе́д, скорбе́й и напа́стей. Ты́ бо еси́ Дре́во жи́зни, ты́ еси́ очище́ние возду́ха, освяще́ние свята́го хра́ма, огражде́ние на́шего жили́ща, охране́ние одра́ моего́, просвеще́ние ума́ моего́, се́рдца и все́х мои́х чу́вств. Твое́ свято́е зна́мение огражда́ет мя́ со дня́ моего́ креще́ния, оно́ со мно́ю и на мне́, во вся́ дни́ живота́ моего́, на су́ше и на вода́х, оно́ же сопровожда́ть мя́ бу́дет до моги́лы, осени́т и пра́х мо́й, оно́ бо, свято́е зна́мение чудоде́йственнаго Креста́ Госпо́дня, возвести́т все́й вселе́нной о часе́ всео́бщаго воскресе́ния ме́ртвых и после́дняго стра́шнаго и пра́веднаго Суда́ Бо́жия.

О, Кре́сте Всечестны́й! Осене́нием твои́м вразуми́, научи́ и благослови́ мя, недосто́йнаго, всегда́ несомне́нно ве́рующаго в непобеди́мую си́лу твою́, огради́ мя от вся́каго врага́ и супоста́та, исцели́ вся́ неду́ги моя́ душе́вныя и теле́сныя.

Го́споди, Иису́се Христе́ Сы́не Бо́жий! Си́лою Честна́го и Животворя́щаго Креста́ Твоего́ поми́луй и спаси́ мя, гре́шнаго. Ами́нь.


 
Как помочь