Канон тесты


Октоих, Глас 7.5, Пятница, Кано́н честно́му и животворя́щему Кресту́, творе́ние ки́р Ио́сифа

Глас 7

Песнь 1

Ирмос: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

При­пев:

Христо́с возноси́мь на Кре́ст, к Себе́ вся́ при­вле­че́ челове́ки, и низве́рже вра­га́, все́х низве́ргшаго.

При­пев:

Во́ду живо­ту́ мое­му́, Иису́се, от живоно́сных ре́бр источи́л еси́, и умертви́л еси́ вра­га́, Влады́ко, бы́в ме́ртв.

При­пев:

Моли́тву Хри­сту́ за на́с, страстоте́рпцы, приле́жную принеси́те, стра́шнаго суда́ все́м на́м изба́витися.

Сла́ва Отцу́ и Сы́ну и Свято́му Ду́ху.

Смири́вшеся вы́ Хри­ста́ ра́ди, прему́дрии му́ченицы, го́рдаго вра­га́ низложи́сте Боже́ственною благода́тию.

И ны́не и при́сно и во ве́ки веко́в. Ами́нь.

Бого­ро­ди­чен: Возсия́вшаго из Тебе́, превели́ким благоутро́бием, Влады́чице, на Кре­сте́ зря́щи пла́кала еси́, того́ сла́вящи.

Песнь 3

Ирмос: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́, Го́споди, и Тя́ пое́т ду́х мо́й.

При­пев:

Безстра́стный по суще­ству́, ка́ко стра́сть терпи́ши, живо́т мне́ вдыха́яй? Ка́ко умира́еши на дре́ве? Ве́лия Твоя́ ми́лость и долготерпе́ние, Спа́се.

При­пев:

На Кре­сте́ посре­де́ разбо́йников, Сло́ве, непра́ведно воздви́глся еси́, и оправда́л еси́ ве́рою позна́вшаго Тебе́ Зижди́теля всея́ тва́ри, во́лею стра́ждуща.

При­пев:

Строга́ния пло́ти терпя́ще, ру́к же отя́тие, и но́г, и все́х удо́в страстоте́рпцы, сла́вы сподо́бишася, о на́с моля́щеся.

Сла́ва Отцу́ и Сы́ну и Свято́му Ду́ху.

Премно́гими му́ками о Бо́зе просвети́вшеся, премно́гую сла́ву му́дрии ны́не насле́довасте, все­гда́ моля́щеся о душа́х на́ших.

И ны́не и при́сно и во ве́ки веко́в. Ами́нь.

Бого­ро­ди­чен: Разреше́ние долго́в на́ших, Чи́стая Де́во, пода́ждь ма́терними Твои́ми моли́твами, на Кре­сте́ пригвожде́ннаго челове́ка бы́вша, Бо́га Сло́ва ро́ждшая.

Седален, глас 7

Це́рковь вопие́т Ти́, Хри­сте́ Бо́же, в пе́вке и ке́дре и кипари́се, покланя́ющися Тебе́: побе́ды ве́рным да́руй, Богоро́дицы ра́ди, и поми́луй на́с. Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть. И́же мене́ ра́ди претерпе́вый на Кре­сте́ пригвожде́ние, при­и­ми́ и мое́ бо́дренное хвале́ние, Хри­сте́ Бо́же, я́ко Человеколю́бец.

Песнь 4

Ирмос: Услы́шах слу́х Тво́й, и убоя́хся: разуме́х дела́ твоя́, и ужасо́хся Го́споди.

При­пев:

Я́коже красне́йший гро́зд на Кре­сте́ воздви́глся еси́, Влады́ко, весе́лия вино́ иска́пал еси́ Человеколю́бче.

При­пев:

Многоболе́зненныя челове́ков стра́сти утиши́л еси́ вои́стинну, стра́сти Влады́ко, во́лею на пло́ти Твое́й прие́м.

При­пев:

Острупи́ша острупля́еми страстоте́рпцы бор­ца́: и яви́шася вра́чеве ду́ш на́ших.

Сла́ва Отцу́ и Сы́ну и Свято́му Ду́ху.

Ополчи́шася к мучи́телем страстоно́сцы, и победи́вше, венча́ни бы́ша побе́дными венцы́.

И ны́не и при́сно и во ве́ки веко́в. Ами́нь.

Бого­ро­ди­чен: Роди­ла́ еси́ без се́мене Де́во Сло́ва, на Кре­сте́ погуби́вшаго тле́ние бла́гостию.

Песнь 5

Ирмос: У́тренюет ду́х мо́й к Тебе́, Бо́же: зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

При­пев:

Воздви́жемь, Влады́ко, на Дре́во пло́тию, тва́рь всю́ из ро́ва лю́тых неразу́мия извле́кл еси́, к ра́зуму Тво­е­му́, Человеколю́бче.

При­пев:

На ло́бнем Тя́ ме́сте испроси́ша лю́дие беззако́ннии распя́ти Иису́се, гла­ву́ па́губную зми́еву сокруша́ющаго.

При­пев:

Уста́висте злоче́стия тече́ние, Христо́вы му́ченицы, Боже́ственными кро­вь­ми́ ва́шими, и фарао́на мучи́теля в си́х потопи́сте.

Сла́ва Отцу́ и Сы́ну и Свято́му Ду́ху.

Ноготьми́ неща́дно стру́жеми, растерза́сте обличе́ньми, страда́льцы, серд­ца́ суему́дренная, и победи́телие бы́сте.

И ны́не и при́сно и во ве́ки веко́в. Ами́нь.

Бого­ро­ди­чен: Освяти́л е́сть Бо́г утро́бу Твою́, Свята́я Чи́стая, и всели́ся в ню́: и на Кре́ст воздви́жемь, тва́рь совоздви́гл е́сть.

Песнь 6

Ирмос: Ио́на из чре́ва а́дова вопия́ше: воз­ве­ди́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

При­пев:

Неду́говавшее челове́ческое есте­ство́, я́влься за милосе́рдие ми́лости, вра­чу́ неду́гующих, исцели́л еси́ Кресто́м и стра́стию Твое́ю.

При­пев:

Дре́вом дре́вле Ада́м осуди́ся: Дре́вом же ны́не кре́стным оправда́ся, вхожде́ние прие́м в ра́й, и сла́дости восприя́тие.

При­пев:

Пое́м Тя́ пло́тию распе́ншагося, сла́вим те́рнием венча́вшагося, и сла́вою венча́вшаго челове́ки, Царю́ преблаги́й.

При­пев:

Губи́тельный ны́не отри́нувше вре́д страда́льцы идолобе́сия, му́кам причасти́шася: и уме́рше со Христо́м ца́рствуют.

Сла́ва Отцу́ и Сы́ну и Свято́му Ду́ху.

Ни гоне́ние, ни гла́д, ни наго­та́, ни беды́, ниже́ сме́рть, отню́д Боже́ственныя страстоте́рпцы, от люб­ве́ Христо́вы разлучи́ша.

И ны́не и при́сно и во ве́ки веко́в. Ами́нь.

Бого­ро­ди­чен: Славосло́виши из Тебе́ вопло́щшагося, и пла́чеши на Кре­сте́ воздви́женаго, того́ смотря́ющи, Де́во Ма́ти Свята́я Всенепоро́чная.

Песнь 7

Ирмос: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.

При­пев:

Тяго­ту́ облегча́я беззако́ний мои́х, посре­де́ беззако́нных воздви́глся еси́ на Кре́ст, преблаги́й Го́споди, превозноси́мый отце́в Госпо́дь, и Бо́г благослове́н еси́.

При­пев:

Копие́м пробо́дься в Боже́ственная ре́бра Твоя́, и ре́бренное поползне́ние испра́вил еси́, Спа́се, пла́менному же ору́жию дава́ти ми́ вхо́д рая́ повелева́еши всегда́.

При­пев:

Зве́зды на высо­те́ основа́нныя це́ркве му́ченицы бы́вше, тва́рь озаря́ете страда́ний све́тлостию, и исцеле́ний сия́нием.

Сла́ва Отцу́ и Сы́ну и Свято́му Ду́ху.

Кни́га прино́сит при́сно напи́санных живы́х Госпо́дних му́ченик, напи́саная Бо́жия оправда́ния усе́рдно сохрани́вших, и пострада́вших кре́пко.

И ны́не и при́сно и во ве́ки веко́в. Ами́нь.

Бого­ро­ди­чен: Всесвята́я, пресвято́е Сло́во, е́же от нея́ возсия́вшее, на святе́м Кре­сте́ воздви́жено, и освяща́ющо земны́я, зря́щи рыда́ше.

Песнь 8

Ирмос: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.

При­пев:

Ме́ртва мя́ пока­за́ дре́во ра́зума, Ты́ же, Хри­сте́ мо́й, умертви́вся на дре́ве оживи́л еси́, и просвети́л еси́ пе́ти: по́йте, свяще́нницы, лю́дие превозноси́те во вся́ ве́ки.

При­пев:

Те́рнием вен­ча́ законопресту́пный со́нм Тя́, Царю́, преслуша́ния искоренева́юща те́рние Ада́ма первозда́ннаго, и воздви́же на Кре́ст, вся́ из глу­би­ны́ пре́лести извле́кшаго.

При­пев:

Ра́зумом просте́ршаго Небе­са́, Тебе́ простира́ют на Дре́ве лю́дие неразу́мнии, исцеля́юща на́шя стра́сти стра́стию Твое́ю, Спа́се, и уставля́юща боле́зни, я́же от гвозде́й боле́зньми.

Сла́ва Отцу́ и Сы́ну и Свято́му Ду́ху.

Му́ченик мо́щи благоуха́ния испуща́ют чуде́с приходя́щым несумне́нным се́рдцем, и страсте́й злово́ние прогоня́ют при́сно, и все́м здра́вие о Бо́зе подава́ют.

И ны́не и при́сно и во ве́ки веко́в. Ами́нь.

Бого­ро­ди­чен: Святы́х чи́нове мо́лятся, Де́во, из утро́бы Тво­ея́ проше́дшему Влады́це, показа́вшему на Кре­сте́ си́м пу́ть страда́ния, Чи́стая, и славосло́вят Тя́ я́ко все́х Цари́цу.

Песнь 9

Ирмос: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

При­пев:

На Кре­сте́ Тя возвы́шена, Царю́ веко́в, я́ко ви́де со́лнце омрачи́ся, и зем­ля́ потрясе́ся, и це́ркве раздра́ся заве́са све́тлости, Иису́се Всеси́льне.

При­пев:

Ископа́ша ру́це и но́зе твои́ беззако́нницы, и ре́бра живоно́сная прободо́ша копие́м, и же́лчи со о́цтом напои́ша Тя́, Хри­сте́ мо́й, все́х сла́дость, и Бо́га и́стинна.

При­пев:

Сокруши́ша началозло́бнаго се́ти, сокруша́еми вся́кими ви́ды муче́ния, и венцено́сцы побе́дою бы́вше, до́блии страда́льцы ублажа́ются.

Сла́ва Отцу́ и Сы́ну и Свято́му Ду́ху.

Освяти́ша положе́нием моще́й всю́ зе́млю страстоте́рпцы, и угаси́ша сква́ры идоложе́ртвенныя, огню́ примеша́ющеся, и в не́м та́йно всесожига́еми.

И ны́не и при́сно и во ве́ки веко́в. Ами́нь.

Бого­ро­ди­чен: Благолюби́вая, херуви́м святе́йшая, я́же Бо́жие Сло́во Бо́га пло́тию ро́ждшая, воздви́женнаго на Кре­сте́ хоте́нием, за все́х приле́жно тому́ моли́ся.

«Азбука молитвы»
в Telegram.
t.me/azprayer
Размер шрифта: A- 15 A+
Цвет темы:
Цвет полей:
Шрифт: A T G
Текст:
Боковая панель:
Сбросить настройки