{"id":14801,"date":"2022-02-25T16:10:27","date_gmt":"2022-02-25T12:10:27","guid":{"rendered":"https:\/\/azbyka.ru\/molitvoslov\/kanon-svjatitelju-vasiliju-episkopu-rjazanskomu.html"},"modified":"2022-02-25T16:10:57","modified_gmt":"2022-02-25T12:10:57","slug":"kanon-svjatitelju-vasiliju-episkopu-rjazanskomu","status":"publish","type":"post","link":"https:\/\/azbyka.ru\/molitvoslov\/kanon-svjatitelju-vasiliju-episkopu-rjazanskomu.html","title":{"rendered":"\u041a\u0430\u043d\u043e\u043d \u0441\u0432\u044f\u0442\u0438\u0442\u0435\u043b\u044e \u0412\u0430\u0441\u0438\u043b\u0438\u044e, \u0435\u043f\u0438\u0441\u043a\u043e\u043f\u0443 \u0420\u044f\u0437\u0430\u043d\u0441\u043a\u043e\u043c\u0443"},"content":{"rendered":"

\"Святитель<\/p>\n

Песнь 1<\/h4>\n

Ирмос:<\/strong> Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.<\/em><\/p>\n

Приидите, благочестия рачителие, согласно воспоим вси священнаго иерарха Василия и похвальными песньми почтим память его, яко молитвенника о душах наших и хранителя граду Рязани.<\/p>\n

Ангельски на земли пожив, Богомудре Василие, ликом избранных рабов Божих вчинился еси, темже молим тя: моли Христа Бога избавитися нам от бед и огня вечнующаго.<\/p>\n

Молитвами твоими, святителю Василие, сохрани стадо твое духовное от напастей чувственных и мысленных и даже до конца невреждены нас соблюди.<\/p>\n

Богородичен:<\/strong> Яко стену и прибежище стяжахом Тя, Богомати: спаси нас от бед и скорбей и от мук будущих избави молитвами Твоими.<\/p>\n

Песнь 3<\/h4>\n

Ирмос:<\/strong> Ты еси утверждение притекающих к Тебе, Господи, Ты еси Свет омраченных, и поет Тя дух мой.<\/em><\/p>\n

Треволнения житейскаго пучину преплавая и не имея управителя помышлений, к тебе, святителю Василие, прибегаю и от тебе ожидаю скорыя помощи.<\/p>\n

В мори мя плавающа и на пути шествующа соблюди, святителю, и настави творити волю Господню, яко да обрящу в День судный содеянных мною согрешений разрешение.<\/p>\n

Аз, любострастный, яко ладия, обуреваюся от прегрешений моих, но во благоутишное пристанище покаяния настави мя молитвами твоими, пречудне святителю.<\/p>\n

Богородичен:<\/strong> Страсти моего сердца исцели, Мати Всеблагая, ум мой умири и просвети и направи мя ходити непреткновенно путем спасения, яко да присно Тя ублажаю.<\/p>\n

Седален, глас 2<\/h4>\n

Окрилив ум верою и любовию к Богу, мирскаго смешения возгнушался еси, святителю Василие, и, крест на рамена твоя взем, последовал еси Владыце Христу, и был еси храм Духа Святаго. Темже вопием ти: моли Христа Бога грехов оставление даровати празднующим любовию святую память твою.<\/p>\n

Песнь 4<\/h4>\n

Ирмос:<\/strong> Ты моя крепость, Господи, Ты моя и сила, Tы мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.<\/em><\/p>\n

Иовли крепости во искушениих не стяжах, и враг спасения поглотити мя тщится, но ты, святителю, помози мне сети лукаваго сокрушити молитвами твоими ко Владыце Христу, да зову Ему: силе Твоей слава, Человеколюбче.<\/p>\n

Любовию сочетався Христу, святитель богоприятен и пастырь истинен явился еси, отче Василие. Темже тя благочестно ублажающе, молим: молися Христу Богу, да явит нам силу Свою во благовременную помощь.<\/p>\n

Иерарха тя, яков нам подобаше, стяжавше, тобою хвалимся и, в заступлении твоем помощь обретающе на видимыя и невидимыя враги, вопием к Богу Спасителю: силе Твоей слава, Человеколюбче. ,<\/p>\n

Богородичен:<\/strong> Ангельских чинов превышшая, Мати Божия, буди ми скорая в бедах Помощница, крепость моя и утверждение и от врагов защищение, да не убоюся вражия прещения, но присно пою Тя и славлю, Всепетая.<\/p>\n

Песнь 5<\/h4>\n

Ирмос:<\/strong> Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся.<\/em><\/p>\n

Святолепным житием и учением твоим, Богомудре Василие, многия ко Христу привел еси; темже и мы, чада твоя, ныне молим тя помощь нам даровати, да ходим непреткновенно в путех заповедей Господних.<\/p>\n

Во стране пришельствия течение добре совершив, ко Свету невечернему восхождение обрел еси, преблаженне, и венец светел приял еси от Царя Славы Христа, к Немуже ныне молися, от помрачения и уныния душевнаго нас свободити и на стези спасения стопы наша направити.<\/p>\n

Яко первопрестольника и святителя нашего чтуще тя, молим, чада твоя, блаженне: от тьмы греховныя избави и светом благодати просвети души наша.<\/p>\n

Богородичен:<\/strong> Ты еси просвещение и избавление мое, Мати Незаходимаго Света, на Тя по Бозе надежду спасения моего возлагаю и молю Тя: избави мя от належащих бед и скорбей, да славлю Тя во веки.<\/p>\n

Песнь 6<\/h4>\n

Ирмос:<\/strong> Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.<\/em><\/p>\n

Избавитися нам от бури страстей и от потопления в пучине зол молися, святителю отче Василие, да, молитвами Твоими направляемы, достигнем во пристанища тихая Божественныя воли.<\/p>\n

Тя, досточудне Василие, от воднаго потопления, якоже Иону во чреве китове, Господь сохранил есть. О, чудесе новаго и преславнаго! Темже молим тя: твоими ко Христу молитвами избави нас от потопления в молве житейских попечений и тлетворных страстей.<\/p>\n

Ежечасно волнами житейскими погружаюся, и буря искушений потопляет мя. К тебе, отче Василие, чудно по водам шествовавшему, ныне прибегая, вопию: молися Христу Богу, да изведет из глубины греховныя жизнь мою, яко Человеколюбец.<\/p>\n

Богородичен:<\/strong> Лютыми страстьми одержимым скорая Помощница и готовое обуреваемым пристанище сущи, Мати Божия, сохрани мя от злобы и клеветы человеческия и не даждь ми разбитися о камень маловерия и отчаяния, да не погублю вконец душу мою.<\/p>\n

Кондак, глас 8<\/h4>\n

Яко многосветлая звезда, от града Мурома возсиял еси, святителю Василие, по водам же дошед до града нашего Рязани, Церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.<\/p>\n

Икос<\/h4>\n

Умная очеса всегда к Вышним возводя, Небесных непрестанно желал еси, святаго же ради жития твоего архиерейства саном украшен быв, Церковь и люди твоими учении обогатил еси и, течение благочестно совершив, к Богу преславно духом прешел еси, нам святыя мощи твоя в память и освящение оставив, имже ныне со умилением покланяющеся, молимся от страстей треволнения нас сохранити, яко да в тишине богоугодно поживше, тебе благодарно вопием, глаголюще: радуйся, отче Василие, скорый помощниче и теплый к Богу о нас молитвенниче.<\/p>\n

Песнь 7<\/h4>\n

Ирмос:<\/strong> В начале землю основавый и Небеса словом утвердивый, благословен еси во веки, Господи, Боже отец наших.<\/em><\/p>\n

Якоже пресельник от града Мурома быв, к Богоматери руце простирая, спасение обрел еси, святителю отче Василие: водам бо, послужившим тебе Божиим мановением, града Рязани достигл еси и, тамо Христу Богу угодив, Тому ныне радостно поеши: благословен еси, Господи Боже, во веки.<\/p>\n

Рязанския области благовернаго князя и христоименитыя люди радости исполнил еси твоим дивным по водам пришествием, сопутника и хранителя Христа обрет, к Немуже ныне радостно зовеши: благословен еси, Господи Боже, во веки.<\/p>\n

Якоже трие отроцы в пещи Вавилонстей огненную силу угасиша молитвою, тако и ты, святый отче, огнь злобы вражия и клеветы человеческия верою и молитвою угасил еси, поя Богу Спасителю: благословен еси, Господи Боже, во веки.<\/p>\n

Богородичен:<\/strong> Земле святая, безсеменно произрастившая Спасение мира, Христа Бога нашего, от бури сопротивныя и искушений избави мя и из глубины зол возведи, да пою непрестанно милости и щедроты Твоя, Мати Всеблагая.<\/p>\n

Песнь 8<\/h4>\n

Ирмос:<\/strong> Покрываяй водами превыспренняя Своя, полагаяй морю предел песок и содержаяй вся, Тя поет солнце, Тя славит луна, Тебе приносит песнь вся тварь, яко Содетелю всех во веки.<\/em><\/p>\n

Ангелоподобным житием возсиял еси, святителю отче Василие, благочестия рачитель быв неусыпаемь, темже со Ангелы предстоя ныне Престолу Владыки всяческих, моли избавитися нам от всякаго прилога вражия, поющим верно: благословите, вся дела Господня, Господа и превозносите Его во веки.<\/p>\n

На земли пожив, яко Ангел, с плотию, яко безплотен, безплотныя враги под ноги покорил еси. Темже ныне со Ангелы на Небесех светло ликуя, Христу вопиеши: благословите, вся дела Господня, Господа и превозносите Его во веки.<\/p>\n

Источник благодатных дарований стяжав, Богоблаженне, подаждь ми источник умиления и слез, да омыю душевныя моя страсти и светом покаяния убелю очерневшую мою душу, радостно поя: благословите, вся дела Господня, Господа и превозносите Его во веки.<\/p>\n

Богородичен:<\/strong> Христа нам родившая, радость вечную, горестных слез моих не забуди и стенания души моея не презри, Всеблагая, но яви на мне милость и человеколюбие Сына и Бога Твоего.<\/p>\n

Песнь 9<\/h4>\n

Ирмос:<\/strong> Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.<\/em><\/p>\n

Велие чудо на тебе видится, преблаженне Василие, яко блаженное тело твое чрез многа лета соблюдеся невредимо мановением Бога, дивнаго во святых Своих, Егоже моли грехов прощение нам даровати.<\/p>\n

Адамант крепкий явился еси, святителю Василие, веру яко основание непоколебимо в души твоей имея: многи бо враги видимыя и невидимыя победил еси, яко добр воин Владыки Христа, Емуже молися, да спасет тебе ради души наша.<\/p>\n

Любовию чтуще твою память, молим тя, святителю и предстателю наш: моли прилежно Христа Бога о граде твоем и людех, избавити нас от всякия скорби и напасти, да тя сердцем и усты непрестанно ублажаем.<\/p>\n

Богородичен:<\/strong> Юже поют ангельстии чини и славят патриарси со архиереи яко Матерь Божию, Тебе, Дево Богородице, и мы, грешнии, припадающе, молим: пристанище тихое буди нам, обуреваемым страстьми, и от всех бед сохрани нас матерними Твоими молитвами ко Христу, Сыну Твоему и Богу нашему.<\/p>\n

Светилен<\/h4>\n

Царственное имя нося, Всецарю Христу житием твоим последовал еси, Емуже ныне в чертозе Небеснем соцарствуеши, преблаженне Василие, Того моли и нас облистати славою Его Божественною.<\/p><\/p>\n","protected":false},"excerpt":{"rendered":"

Песнь 1 Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим. Приидите, благочестия рачителие, согласно воспоим вси священнаго иерарха Василия и похвальными песньми почтим память его, яко молитвенника о душах наших и хранителя граду Рязани. Ангельски на земли пожив, Богомудре Василие, ликом избранных рабов Божих вчинился еси, темже\u2026<\/p>\n","protected":false},"author":1,"featured_media":0,"comment_status":"open","ping_status":"","sticky":false,"template":"","format":"standard","meta":{"_acf_changed":false,"footnotes":"","_links_to":"","_links_to_target":""},"categories":[24],"tags":[],"avtor":[],"class_list":["post-14801","post","type-post","status-publish","format-standard","hentry","category-kanony"],"acf":[],"_links":{"self":[{"href":"https:\/\/azbyka.ru\/molitvoslov\/wp-json\/wp\/v2\/posts\/14801","targetHints":{"allow":["GET"]}}],"collection":[{"href":"https:\/\/azbyka.ru\/molitvoslov\/wp-json\/wp\/v2\/posts"}],"about":[{"href":"https:\/\/azbyka.ru\/molitvoslov\/wp-json\/wp\/v2\/types\/post"}],"author":[{"embeddable":true,"href":"https:\/\/azbyka.ru\/molitvoslov\/wp-json\/wp\/v2\/users\/1"}],"replies":[{"embeddable":true,"href":"https:\/\/azbyka.ru\/molitvoslov\/wp-json\/wp\/v2\/comments?post=14801"}],"version-history":[{"count":0,"href":"https:\/\/azbyka.ru\/molitvoslov\/wp-json\/wp\/v2\/posts\/14801\/revisions"}],"wp:attachment":[{"href":"https:\/\/azbyka.ru\/molitvoslov\/wp-json\/wp\/v2\/media?parent=14801"}],"wp:term":[{"taxonomy":"category","embeddable":true,"href":"https:\/\/azbyka.ru\/molitvoslov\/wp-json\/wp\/v2\/categories?post=14801"},{"taxonomy":"post_tag","embeddable":true,"href":"https:\/\/azbyka.ru\/molitvoslov\/wp-json\/wp\/v2\/tags?post=14801"},{"taxonomy":"avtor","embeddable":true,"href":"https:\/\/azbyka.ru\/molitvoslov\/wp-json\/wp\/v2\/avtor?post=14801"}],"curies":[{"name":"wp","href":"https:\/\/api.w.org\/{rel}","templated":true}]}}