{"id":15213,"date":"2022-02-25T16:56:40","date_gmt":"2022-02-25T12:56:40","guid":{"rendered":"https:\/\/azbyka.ru\/molitvoslov\/akafist-presvjatoj-bogorodice-pred-ikonoj-minskaja.html"},"modified":"2022-02-25T16:57:25","modified_gmt":"2022-02-25T12:57:25","slug":"akafist-presvjatoj-bogorodice-pred-ikonoj-minskaja","status":"publish","type":"post","link":"https:\/\/azbyka.ru\/molitvoslov\/akafist-presvjatoj-bogorodice-pred-ikonoj-minskaja.html","title":{"rendered":"\u0410\u043a\u0430\u0444\u0438\u0441\u0442 \u041f\u0440\u0435\u0441\u0432\u044f\u0442\u043e\u0439 \u0411\u043e\u0433\u043e\u0440\u043e\u0434\u0438\u0446\u0435 \u043f\u0440\u0435\u0434 \u0438\u043a\u043e\u043d\u043e\u0439 \u00ab\u041c\u0438\u043d\u0441\u043a\u0430\u044f\u00bb"},"content":{"rendered":"

\"Икона<\/p>\n

Конда́к 1.<\/h4>\n

Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́:<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

И́кос 1.<\/h4>\n

А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м:<\/p>\n

Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная.<\/p>\n

Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая.<\/p>\n

Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая.<\/p>\n

Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая.<\/p>\n

Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние.<\/p>\n

Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 2.<\/h4>\n

Ви́девши святы́й о́браз Тво́й, Пречи́стая, святы́м Луко́ю первопи́санный, рекла́ еси́: «С си́м о́бразом благода́ть Моя́ и си́ла да пребу́дет». И во Ми́нстем о́бразе зря́ще сбы́тие слове́с Твои́х, о Тебе́ просла́вим Го́спода, пою́ще Ему́: Аллилу́иа.<\/p>\n

И́кос 2.<\/h4>\n

Разуме́ти не мо́жно ди́внаго Про́мысла Бо́жия, ка́ко чу́дная ико́на Твоя́, Богоро́дице, насади́телю ве́ры правосла́вныя, благове́рному кня́зю Влади́миру, на по́мощь даде́ся во апо́стольстве его́ от Царьгра́да и Корсу́ни да́же до Ки́ева. Мы́ же, преи́скренне умиля́ющеся Твоему́ о ро́де на́шем предста́тельству, ве́рно вопие́м:<\/p>\n

Ра́дуйся, и́стиннаго благоче́стия наста́внице; ра́дуйся, язы́ческаго нече́стия искорени́тельнице.<\/p>\n

Ра́дуйся, чудотво́рною ико́ною а́ки драгоце́нным да́ром кня́зя Влади́мира обогати́вшая; ра́дуйся, в равноапо́стольных труде́х его́ укрепи́вшая.<\/p>\n

Ра́дуйся, вла́сть де́монскую сокруши́вшая; ра́дуйся, ве́ру правосла́вную в земли́ на́шей утверди́вшая.<\/p>\n

Ра́дуйся, Тобо́ю от пре́лести диа́воли свобожда́емся; ра́дуйся, Тобо́ю же позна́ния Творца́ сподобля́емся.<\/p>\n

Ра́дуйся, ко́зней вра́жиих посече́ние; ра́дуйся, ве́рных ча́д Отцу́ Небе́сному усыновле́ние.<\/p>\n

Ра́дуйся, злове́рия и́дольскаго попра́ние; ра́дуйся, уче́ния Христо́ва насажде́ние.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 3.<\/h4>\n

Си́лу благода́ти, явле́нныя в честне́й ико́не Твое́й, Влады́чице, ви́де святы́й равноапо́стольный кня́зь Влади́мир и со благогове́нием ве́лиим поста́ви ю́ в Десяти́нней це́ркви гра́да Ки́ева, вопию́ще Бо́гу: Аллилу́иа.<\/p>\n

И́кос 3.<\/h4>\n

Иму́щи попече́ние ма́тернее о просвеще́нных лю́дех земли́ Ру́сския, соде́лала еси́ ю́ До́мом Свои́м, и то́ки чуде́с от ико́ны Твоея́ преизоби́льно источи́ла еси́, Богоро́дице, сего́ ра́ди взыва́ем Ти́ си́це:<\/p>\n

Ра́дуйся, притека́ющих к ико́не Твое́й луча́ми чуде́с озаря́ющая; ра́дуйся, обраща́ющимся к не́й безчи́сленныя ми́лости подаю́щая.<\/p>\n

Ра́дуйся, все́м прося́щим мо́ре щедро́т излива́ющая; ра́дуйся, духо́вную ра́дость на́м соде́ловающая.<\/p>\n

Ра́дуйся, о лю́дех правосла́вных при́сное попече́ние; ра́дуйся, о́браз Тво́й дарова́вшая на́м я́ко зало́г спасе́ния.<\/p>\n

Ра́дуйся, исто́чник благода́ти неистощи́мый; ра́дуйся, кла́дезю сокро́вищ многоце́нный.<\/p>\n

Ра́дуйся, кре́посте тве́рдая ве́ры правосла́вныя; ра́дуйся, все́м чту́щим Сы́на Твоего́ по́моще пресла́вная.<\/p>\n

Ра́дуйся, пу́ть и́стины указу́ющая заблу́ждшим; ра́дуйся, ско́ро поспе́шствующая на по́мощь Тя́ призыва́ющим.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 4.<\/h4>\n

Бу́ри бе́д и напа́стей за грехи́ на́ша мно́гажды на Ру́сь воздвиза́еми бы́ша, та́кожде и гра́д Ки́ев огню́ и мечу́ предава́ем бе́ от нечести́вых ага́рян, не ве́дущих пе́ти и́стинному Бо́гу: Аллилу́иа.<\/p>\n

И́кос 4.<\/h4>\n

Слы́шав о бога́тстве Ки́ева, ха́н ага́рянский во еди́но ле́то устреми́ся расхи́тити е́, и гра́д то́й пожже́. Во́ин же не́кий злочести́вый, взя́в ри́зу многоце́нную, Всеблага́я Ма́ти, ико́ну же Твою́ вве́рже в Дне́пр, оба́че сия́ неврежде́нна в вода́х сохрани́ся, подвиза́ющи на́с восхвали́ти Тя́ си́це:<\/p>\n

Ра́дуйся, о́браз Тво́й, я́ко купину́ неопа́льну яви́вшая; ра́дуйся, ико́ну Твою́ от пла́мене сохрани́вшая.<\/p>\n

Ра́дуйся, по вода́м а́ки по су́ху от Ки́ева да́же до Ми́нска ико́ну Твою́ прене́сшая; ра́дуйся, во́ды Неми́ги и Сви́слочи явле́нием Свои́м освяти́вшая.<\/p>\n

Ра́дуйся, Цари́це небесе́ и земли́, Е́йже вся́ стихи́и покоря́ются; ра́дуйся, Тобо́ю же на спаси́тельныя стези́ лю́ди наставля́ются.<\/p>\n

Ра́дуйся, пото́па грехо́внаго усмире́ние; ра́дуйся, свире́пых страсте́й укроще́ние.<\/p>\n

Ра́дуйся, мо́ря жите́йскаго благонаде́жное прохожде́ние; ра́дуйся, от земли́ на не́бо ве́рных возведе́ние.<\/p>\n

Ра́дуйся, ди́вное благода́ти зна́мение; ра́дуйся, си́лы чудотво́рныя явле́ние.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 5.<\/h4>\n

Боготе́чней звезде́ уподо́билася еси́ пречестна́я ико́на Твоя́, Богороди́тельнице, лучи́ чу́дными осия́вшая насе́льники гра́да Ми́нска. Они́ же, зря́ще таи́нственное явле́ние ея́ на вода́х Сви́слочи, со умиле́нием воспе́ша Сы́ну Твоему́ и Бо́гу на́шему: Аллилу́иа.<\/p>\n

И́кос 5.<\/h4>\n

Ви́девше чу́дную ико́ну сию́, о Всеми́лостивая, и прие́млюще я́ко да́р Бо́жий, лю́ди христиа́нстии взя́ша ю́ от воды́ и поста́виша в це́ркви за́мковой в че́сть Пресла́внаго Рождества́ Твоего́, и а́бие благода́рне воззва́ша:<\/p>\n

Ра́дуйся, от ико́ны Твоея́ да́ры многоразли́чнии источа́ющая; ра́дуйся, я́ко Само́й Ти́ су́щей во ико́не Твое́й благода́ть на́м излива́ющая.<\/p>\n

Ра́дуйся, гре́шников не отмета́ющая; ра́дуйся, ка́ющихся те́пле прие́млющая.<\/p>\n

Ра́дуйся, гра́да на́шего неусы́пная храни́тельнице; ра́дуйся, за на́с пред Бо́гом любвеоби́льная хода́таице.<\/p>\n

Ра́дуйся, ве́ры и благоче́стия исправле́ние; ра́дуйся, в моли́твах ко Го́споду всемо́щное дерзнове́ние.<\/p>\n

Ра́дуйся, боля́щих и немощству́ющих исцеле́ние; ра́дуйся, заблу́ждших на пу́ть пра́вый наставле́ние.<\/p>\n

Ра́дуйся, благода́ти оби́льное дарова́ние; ра́дуйся, люде́й христоимени́тых непосты́дное упова́ние.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 6.<\/h4>\n

Пропове́дниками чуде́с ве́лиих, от ико́ны Ми́нския истека́ющих, яви́шася мно́зи лю́дие, и́хже Ты́, Премилосе́рдная Влады́чице, поклоня́тися святы́не се́й научи́ла еси́, да нело́жно воспою́т Бо́гу: Аллилу́иа.<\/p>\n

И́кос 6.<\/h4>\n

Возсия́ и возвели́чися ве́ра на́ша по мно́зех ле́тех плене́ния ле́стнаго и непра́ваго, и па́ки возврати́ся ико́на Ми́нская лю́дем правосла́вным, и́же с ра́достию воспе́ша Богоро́дице:<\/p>\n

Ра́дуйся, Правосла́вия щи́те и огражде́ние; ра́дуйся, оте́ческих уста́вов незы́блемое утвержде́ние.<\/p>\n

Ра́дуйся, малове́рных вразумле́ние; ра́дуйся, в сомне́нии су́щим снисхожде́ние.<\/p>\n

Ра́дуйся, ве́рных ча́д Це́ркве Правосла́вныя духо́вное услажде́ние; ра́дуйся, отсту́пников пра́выя ве́ры посрамле́ние.<\/p>\n

Ра́дуйся, правосла́вных немо́лчная похвало́; ра́дуйся, гони́мым за ве́ру несокруши́мое забра́ло.<\/p>\n

Ра́дуйся, утесня́емым ско́рое вспоможе́ние; ра́дуйся, му́чеников и испове́дников неизглаго́ланная отра́до.<\/p>\n

Ра́дуйся, искуша́емым по́моще; ра́дуйся, обурева́емым приста́нище.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 7.<\/h4>\n

Хотя́ Влады́ка на́ш и Судия́ Пра́веднейший вразуми́ти зе́млю Ру́сскую за беззако́ния тмочи́сленныя, попусти́ мучи́телем гна́ти Це́рковь Правосла́вную, да вси́, в покая́ние прише́дше, возопии́м Ему́: Аллилу́иа.<\/p>\n

И́кос 7.<\/h4>\n

Но́вое наста́ испыта́ние от Го́спода, егда́ собо́рный хра́м во гра́де Ми́нске разруше́н бы́сть от неи́стовых гони́телей. Ико́на же Твоя́, о Богома́ти, отъя́та и сокры́та бе́ от ве́рных. Лю́дие же правосла́внии в сокруше́нии серде́ц возопи́ша к Богоро́дице:<\/p>\n

Ра́дуйся, во дни́ правосу́днаго Бо́жия посеще́ния гне́в Его́ отводя́щая; ра́дуйся, в тя́жких злострада́ниях на́с не оставля́ющая.<\/p>\n

Ра́дуйся, лю́тыя крамо́лы облича́ющая; ра́дуйся, душегуби́тельныя уче́ния низлага́ющая.<\/p>\n

Ра́дуйся, благосе́рдая на́ша вразуми́тельнице; ра́дуйся, непамятозло́бная на́ша настави́тельнице.<\/p>\n

Ра́дуйся, в злы́х обстоя́ниих неистощи́мое терпе́ние; ра́дуйся, с правосу́дием Бо́жиим смире́нное примире́ние.<\/p>\n

Ра́дуйся, малоду́шных и па́дших возста́ние; ра́дуйся, ду́ха уны́ния и боя́зни отгна́ние.<\/p>\n

Ра́дуйся, грехо́в на́ших отпуще́ние; ра́дуйся, Бо́жие к на́м благоволе́ние.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 8.<\/h4>\n

Стра́нное и ужа́сное наше́ствие иноплеме́нных пости́же на́с. Милосе́рдием же Бо́жиим одоле́в враги́, лю́дие, предста́тельством Богома́тери, отверзо́ша хра́мы правосла́внии и возда́ша благодаре́ние Го́сподеви, воспева́я Ему́: Аллилу́иа.<\/p>\n

И́кос 8.<\/h4>\n

Вся́ испо́лнися ра́дости неизрече́нныя, егда́ раба́ Бо́жия Варва́ра обре́те чу́дный о́браз Тво́й, Ма́ти Де́во, сокры́тый посреде́ пра́ха и тле́ния. Мы́ же, дивя́щеся таково́му неча́емому обре́тению, восхваля́ем Тя́:<\/p>\n

Ра́дуйся, ве́ру Христо́ву от поруга́ния защища́ющая; ра́дуйся, пра́ведный гне́в Бо́жий на ми́лость претворя́ющая.<\/p>\n

Ра́дуйся, отсту́пников ве́ры постыжа́ющая; ра́дуйся, нече́стие гре́шников облича́ющая.<\/p>\n

Ра́дуйся, броне́ неуязви́мая; ра́дуйся, воево́до непобеди́мая.<\/p>\n

Ра́дуйся, от наше́ствия иноплеме́нных избавле́ние; ра́дуйся, от рабо́ты вра́жия свобожде́ние.<\/p>\n

Ра́дуйся, ви́димых и неви́димых супоста́т одоле́ние; ра́дуйся, вражду́ющих ско́рое вразумле́ние.<\/p>\n

Ра́дуйся, упокое́ние за дру́ги своя́ ду́шы положи́вших; ра́дуйся, прославле́ние за Ве́ру и Оте́чество на по́ле бра́ни убие́нных.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 9.<\/h4>\n

Вся́кое разуме́ние челове́ческое не возмо́жет исчести́ страда́ния, ко́и претерпе́ли гра́ждане Оте́чества на́шего в годи́ну во́ин, лихоле́тий и в после́днее вре́мя от беды́ черно́быльския. Взира́я же на ико́ну Твою́, Богома́ти, я́ко на цельбоно́сное утеше́ние, непреста́нно пое́м: Аллилу́иа.<\/p>\n

И́кос 9.<\/h4>\n

Вети́я суему́дренныя соблазня́ются о дре́вности ико́ны Ми́нския и недоуме́ют пости́гнути таи́нственный Про́мысл Бо́жий, сохрани́вший ю́ в огне́ и вода́х, от ру́к иноплеме́нных и злоумышле́ний супроти́вных. Мы́ же, прославля́юще Богоро́дицу пред чудотво́рным о́бразом Ея́, вопие́м такова́я:<\/p>\n

Ра́дуйся, почита́ния святы́х ико́н увенча́ние; ра́дуйся, иконобо́рнаго злоче́стия обличе́ние.<\/p>\n

Ра́дуйся, душеполе́зных зна́ний преизоби́льное излия́ние; ра́дуйся, душевре́днаго мра́ка све́тлое озаре́ние.<\/p>\n

Ра́дуйся, неве́рных смы́слов ми́лостивое просвеще́ние; ра́дуйся, непра́во му́дрствующих внеза́пное низверже́ние.<\/p>\n

Ра́дуйся, ве́рных незы́блемое увере́ние; ра́дуйся, отъе́млющая духо́вное помраче́ние.<\/p>\n

Ра́дуйся, Про́мысла Бо́жия прославле́ние; ра́дуйся, прего́рдых хули́телей устраше́ние.<\/p>\n

Ра́дуйся, суему́дренных прему́дро смиря́ющая; ра́дуйся, заблу́ждших кро́тко вразумля́ющая.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 10.<\/h4>\n

Спаси́тельное приста́нище от жите́йских треволне́ний и́мамы во хра́ме Ду́ха Свята́го Богоспаса́емаго гра́да на́шего, иде́же светоза́рная ико́на Твоя́, Влады́чице, неотсту́пно доны́не пребыва́ет, все́х на́с путеводя́ к жи́зни ве́чней. Сего́ ра́ди о Тебе́ возглаша́ем Бо́гу: Аллилу́иа.<\/p>\n

И́кос 10.<\/h4>\n

Стена́ и заступле́ние не то́кмо гра́ду на́шему, но и все́м с ве́рою притека́ющим к Тебе́, Преблагослове́нная, даде́ся свята́я ико́на Твоя́, е́юже мно́гажды благоде́яла еси́ на́м и отце́м на́шим, да вознесе́м Ти́ пе́ние таково́е:<\/p>\n

Ра́дуйся, и́щущим спасе́ния пра́вый пу́ть указу́ющая; ра́дуйся, снисше́дших да́же до дна́ а́дова моли́твами Свои́ми спаса́ющая.<\/p>\n

Ра́дуйся, супроти́в наше́ствия иноплеме́нных на́с воздвиза́ющая; ра́дуйся, от враго́в Оте́чество на́ше избавля́ющая.<\/p>\n

Ра́дуйся, отча́янных ско́рое услы́шание; ра́дуйся, неду́гов душе́вных и теле́сных безме́здное врачева́ние.<\/p>\n

Ра́дуйся, печа́лей жите́йских утоле́ние; ра́дуйся, грехо́вных я́зв очище́ние.<\/p>\n

Ра́дуйся, во обстоя́ниях су́щим всегда́шняя помо́щнице; ра́дуйся, лю́дем благове́рным усе́рдная споспе́шнице.<\/p>\n

Ра́дуйся, неча́янная Ра́досте; ра́дуйся, непосты́дная Наде́ждо.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 11.<\/h4>\n

Пе́ние и моле́ние о Богохрани́мей стране́ на́шей, власте́х, во́инстве и наро́де ея́, приими́ пред чудотво́рным о́бразом Твои́м, Влады́чице, и спаси́ на́с, я́ко держа́щая ски́петр в руце́ Свое́й. Богомладе́нец же Иису́с, име́яй в десни́це держа́ву, да да́рует на́м ти́хое и безмо́лвное житие́, слы́шаще от на́с: Аллилу́иа.<\/p>\n

И́кос 11.<\/h4>\n

Све́тлый пра́здник явле́ния ико́ны Твоея́, Присноде́во, во гра́де Ми́нске, исполня́ет ликова́нием сердца́ на́ша. Сего́ ра́ди с ве́рою припа́дающе и с любо́вию лобыза́юще чу́дный о́браз Тво́й, вопие́м Ти́:<\/p>\n

Ра́дуйся, Богоспаса́емому гра́ду на́шему ми́лость показа́вшая; ра́дуйся, на́с гре́шных сия́нием Свои́м просвети́вшая.<\/p>\n

Ра́дуйся, при́сно си́лу Свою́ явля́ющая; ра́дуйся, предста́тельством Свои́м на́с спаса́ющая.<\/p>\n

Ра́дуйся, моли́твы на́ша прие́млющая; ра́дуйся, хвале́ния на́ша не отверга́ющая.<\/p>\n

Ра́дуйся, небожи́телями при́сно прославля́емая; ра́дуйся, собо́ром белору́сских святы́х и новому́чеников сугу́бо воспева́емая.<\/p>\n

Ра́дуйся, людьми́ благочести́выми в позлаще́нную ри́зу облече́нная; ра́дуйся, мно́гими би́серами и адама́нтами преукраше́нная.<\/p>\n

Ра́дуйся, серде́ц на́ших ти́хое умиле́ние; ра́дуйся, жития́ на́шего до́брое устрое́ние.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 12.<\/h4>\n

Благода́ти Своея́, о Всеми́лостивая Ма́ти, не лиши́ на́с гре́шных, претерпева́ем бо дне́сь но́выя ско́рби и нестрое́ния, ника́коже иму́ще наде́жды оправди́тися, но помози́ на́м возста́ти от поги́бельных сму́т, да, о Тебе́ ра́дующеся, воспое́м Бо́гу: Аллилу́иа.<\/p>\n

И́кос 12.<\/h4>\n

Пою́ще Небе́сную Засту́пницу на́шу, ве́руем и испове́дуем, я́ко и в после́дняя времена́ яви́ши благода́тную по́мощь, и и́миже ве́си судьба́ми сохрани́ши на́с от собла́знов ми́ра сего́, да благода́рне восхва́лим Тя́:<\/p>\n

Ра́дуйся, избавле́ние на́ше от наве́т вра́жиих; ра́дуйся, спасе́ние от кова́рств лука́ваго.<\/p>\n

Ра́дуйся, от сна́ грехо́внаго пробужде́ние; ра́дуйся, беззако́ний на́ших проще́ние.<\/p>\n

Ра́дуйся, пред Всевы́шним благогове́йное предстоя́ние; ра́дуйся, по́лчищ сатани́нских благомо́щное разсе́яние.<\/p>\n

Ра́дуйся, поги́бших взыска́ние; ра́дуйся, прельще́нных вразумле́ние.<\/p>\n

Ра́дуйся, напра́сную сме́рть от на́с отводя́щая; ра́дуйся, о кончи́не христиа́нстей на́м хода́тайствующая.<\/p>\n

Ра́дуйся, врата́ небе́сная на́м отверза́ющая; ра́дуйся, к жи́зни ве́чней на́с приводя́щая.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 13<\/h4>\n

О Всепе́тая Ма́ти, Засту́пнице Небе́сная гра́да на́шего, приими́ сию́ ма́лую моли́тву и умоли́ Сы́на Твоего́, Судию́ Пра́веднаго, да сподо́бит десна́го стоя́ния на́с, вопию́щих Ему́: Аллилу́иа.<\/p>

[\u0421\u0435\u0301\u0439 \u043a\u043e\u043d\u0434\u0430\u0301\u043a \u0433\u043b\u0430\u0433\u043e\u0301\u043b\u0435\u0442\u0441\u044f \u0442\u0440\u0438\u0301\u0436\u0434\u044b.]<\/br>[\u0414\u0430\u043b\u0435\u0435 \u043f\u043e\u0432\u0442\u043e\u0440\u044f\u0435\u043c 1\u2011\u0435 \u0438\u043a\u043e\u0441 \u0438 \u043a\u043e\u043d\u0434\u0430\u043a:]<\/em><\/p>

И́кос 1.<\/h4>\n

А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м:<\/p>\n

Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная.<\/p>\n

Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая.<\/p>\n

Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая.<\/p>\n

Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая.<\/p>\n

Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние.<\/p>\n

Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице.<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Конда́к 1.<\/h4>\n

Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́:<\/p>\n

Ра́дуйся, Пренепоро́чная Отрокови́це, гра́да на́шего Небе́сная Засту́пнице.<\/p>\n

Моли́тва.<\/h4>\n

О Всепе́тая и Всеблага́я Де́во Богоро́дице, Небе́сная на́ша Засту́пнице! К Тебе́ по Бо́зе, я́ко Премилосе́рдей Госпоже́, собо́рне прибега́ем и вопие́м: приими́ сие́ ма́лое хвале́бное пе́ние, сохрани́ Богоспаса́емый гра́д се́й, ему́ же чудотво́рная ико́на Твоя́ во отра́ду и утеше́ние даде́ся. Сего́ ра́ди мо́лим Тя́: изба́ви на́с от вра́г ви́димых и неви́димых, от наше́ствия иноплеме́нных и междоусо́бныя бра́ни, от зла́го обстоя́ния и ско́рби, от искуше́ний, бе́д и боле́зней.<\/p>\n

Спаси́ и поми́луй рабы́ Твоя́: Вели́каго Господи́на и Отца́ на́шего Святе́йшаго Патриа́рха Моско́вскаго и всея́ Руси́, Преосвяще́нныя митрополи́ты, архиепи́скопы, епи́скопы, ве́сь свяще́ннический и мона́шеский чи́н, и ве́сь при́чет церко́вный. Приими́ под кро́в Тво́й вла́сти и во́инство богохрани́мыя страны́ на́шея, вразуми́ и наста́ви и́х пра́во пра́вити, за́поведи Бо́жия соблюда́юще, да ти́хое и безмо́лвное житие́ поживе́м во вся́ком благоче́стии и чистоте́. О Пречи́стая Влады́чице! Не забу́ди на́с во вся́ дни́ жи́зни на́шея и да пребыва́ет с на́ми неотсту́пно о́браз Тво́й честны́й. Во вре́мя же исхо́да на́шего проле́й те́плую Твою́ моли́тву ко Пра́ведному Судии́, да, презре́в безчи́сленная прегреше́ния, поми́лует и спасе́т на́с, я́ко Бла́г и Человеколю́бец. Ами́нь.<\/p><\/p>\n","protected":false},"excerpt":{"rendered":"

Конда́к 1. Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́: Ра́дуйся, Пренепоро́чная Отрокови́це, гра́да на́шего Небе́сная Засту́пнице. И́кос 1. А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о\u2026<\/p>\n","protected":false},"author":1,"featured_media":0,"comment_status":"open","ping_status":"","sticky":false,"template":"","format":"standard","meta":{"_acf_changed":false,"footnotes":"","_links_to":"","_links_to_target":""},"categories":[25],"tags":[],"avtor":[],"class_list":["post-15213","post","type-post","status-publish","format-standard","hentry","category-akafisty"],"acf":[],"_links":{"self":[{"href":"https:\/\/azbyka.ru\/molitvoslov\/wp-json\/wp\/v2\/posts\/15213","targetHints":{"allow":["GET"]}}],"collection":[{"href":"https:\/\/azbyka.ru\/molitvoslov\/wp-json\/wp\/v2\/posts"}],"about":[{"href":"https:\/\/azbyka.ru\/molitvoslov\/wp-json\/wp\/v2\/types\/post"}],"author":[{"embeddable":true,"href":"https:\/\/azbyka.ru\/molitvoslov\/wp-json\/wp\/v2\/users\/1"}],"replies":[{"embeddable":true,"href":"https:\/\/azbyka.ru\/molitvoslov\/wp-json\/wp\/v2\/comments?post=15213"}],"version-history":[{"count":0,"href":"https:\/\/azbyka.ru\/molitvoslov\/wp-json\/wp\/v2\/posts\/15213\/revisions"}],"wp:attachment":[{"href":"https:\/\/azbyka.ru\/molitvoslov\/wp-json\/wp\/v2\/media?parent=15213"}],"wp:term":[{"taxonomy":"category","embeddable":true,"href":"https:\/\/azbyka.ru\/molitvoslov\/wp-json\/wp\/v2\/categories?post=15213"},{"taxonomy":"post_tag","embeddable":true,"href":"https:\/\/azbyka.ru\/molitvoslov\/wp-json\/wp\/v2\/tags?post=15213"},{"taxonomy":"avtor","embeddable":true,"href":"https:\/\/azbyka.ru\/molitvoslov\/wp-json\/wp\/v2\/avtor?post=15213"}],"curies":[{"name":"wp","href":"https:\/\/api.w.org\/{rel}","templated":true}]}}