Жития святителей Гурия и Варсонофия, Казанских чудотворцев^*

Повесть полезна, яко близ очима зрится: но недоумение и скудость разума, яко птицу по воздуху парящу, далечайшу от ума нашего творит. Но обаче надеяся на множество щедрот Сына Божия, Господа и Бога нашего и Спаса Христа Исуса, и на молитвы преподобных угодников его, и царскаго ради повеления, и архиерейскаго ради благословения, дерзнух коснутися хартии и трости. Аще бо и не обретох святых сих святителей и преподобных отец от младенства знающих житие их и отечество известно: но обаче еже слышах от ведящих, сия и написати дерзнух. Обретению же честных и чудотворных нетленных их мощей первый самовидец бых, и своима рукама осязах святыя их мощи и чудотворныя прежде всех; к сему же еще, во время обретения честных мощей их, и глас некоему верну слышашеся. От гласа же слово сие бысть: «во граде обстояния удиви Господь святыя своя».

К сему же еще и сие да воспомянуто будет: еще бо жив сый святый Варсонофий, к некоему клирику в мире живущу, речь некаку прозрительну посла с духовником своим, еже последи и сбыстся по пророчеству святаго; живяше бо тогда святый Варсонофий во граде Казани в созданней от него обители, святаго боголепнаго Спасова Преображения, оставя паству Тферскаго престола. К сему же еще и мне непотребному случися в той святей обители, пятому по нем быти, и на месте его стояти, и жезл его в руку моею держати. Последи же Богу изволившу, аще и зазрит ми кто дело сие, страшно бо сие мне есть, и зазрително от многих: понеже неключим бых таковому великому и пресловущему и имени, не токмо делу; но обаче и на святаго Гурия месте стоях, и жезл его такожде в руку моею носих, числом же от перваго девятый бых, в преименовании же первый. И сия вся воспоминах, и судих сам в себе: аще не дерзну коснутися повести, боюся осуждения лениваго раба, вземшаго господина своего сребро, и прикупа не сотворшаго, якоже самая истина рече Господь и Бог наш; и паки во втором законе: «не явишися, – рече, – пред Господем... тощ» (Втор.16:16), но койждо по сих дароносити; великому же Василию глаголющу: «Поставленный убо на строителство слова, и не брегий о сем, яко убийца судится»; великий же богословесный Григорий глаголет: «Безчестие бо есть еже молчати, о ихже потреба есть глаголати»; многий же и великий в словесех златоустый Иоанн: «Аще удержу, рече, слово, и не подам, тогда убог есмь, аще подам, богатее буду: аще не подам, един богатею, аще подам со всеми радостен плод принесу». Якоже убо и трость писца без пишущаго праздна есть, тако и стрела стрелца без влекущаго ю недвижима ест, и требует споспешника; или якоже цевница, аще кто не будет ударяяй ю, праздна является и безделна: тако и мы, аще оставим о сих святых повести писати, о обретении честных и чудотворных мощей их, и множестве чудес, праздни будем и безделни, и с ленивым рабом точная приимше обрящемся. Обаче же несть мое поспешение или силы, но от Бога есть все человеческое исправление; сам бо Господь глаголет: «яко без Мене не можете ничтоже творити» (Ин. 15:5).; мы же елико вемы, то и принесем во славу Богу, и в похвалу святым.

Сей убо преподобный и святый отец наш Гурий, якоже поведают, рождение его и воспитание во граде Радонежи, родом от менших боляр, в мире бе имя ему Григорий сын Григорьев, по реклу Руготин. Случися же ему служити у некоего князя, именем Иоанна, иже именовашеся Пенковы, или за скудость имения, или по насилию, якоже многожды случается силным неволею порабощати менших. Григорий же бе нравом смирен, и тих, и беззлобив, и к Божией Церкви прилежно притекая, и постом и молитвами, и милостынею, и целомудрием, и протчими делы добрыми: тщание имея не леностно, како бы угодити Богу, к сему же и девственное житие возлюби, не изволи бо жены пояти, но чистоту телесную паче почте; послушествует же сему и пречестное тело его, нетлением бо почтеся от Бога. И тако Григорию в добродетели живущу, и видя добронравие его господин, нача его любити, такоже и госпожа его, за смирение его и кротость. и за протчия добродетели, нача брещи его; господин же его повелел быти Григорию в дому своем стоителем, и вся домовная вложи в руку его: и бе строяся в дому его вся добре.

Старый же и общий враг наш диявол, не хотя видети человека в добродетели живуща, и в заповедех Божиих ходяща, воздвизает на добляго брань, якоже древле на праведнаго и святаго отрока Иосифа, и научает старшия клевреты его завидети праведному, и творит лгати на преподобнаго, якоже и древле старцы оны на целомудренную, и влагагот во уши господину своему суетная, и вяжут венцы преподобному, душам же своим в препинание плетут сети, клевещут на преподобнаго забывше реченнаго: пространно слово клеветнику на языце его, внутрь же его душа его тем страшно связуется; и паки глаголет Писание: треми вещми клеветник пакостит клевещущему, клевещущаго, сам себе, обаче вся беды на суде клеветнику единому. Но что убо реку: не единому Григорию творят клеветницы напасть искушения, но и госпожу и чад их сводят в печаль неудобьстерпимую: поведают Григориа сплетшася с госпожею своею беззаконием.

Господин же Григориев сия слышав, вскоре и без испытания повелевает умертвити Григориа. Сын же господина его разумен сый, и ощутив вещь злую сию, и нестерпимый срам отцу своему и матери, и сам себе испытывает по толку клеветников онех, якоже и Даниил на целомудренную клевещущих; к сему веру емлет и матери своей, яко зло сие замышление ложно, и от диявола содеяся, а никакоже истинна; и умоляет отца, да не ускорит клевещущим веру яти, и не предает себе студу конечному, и их чад своих да не осрамит вечно: и да не обезчестится, рече, весь род наш, без испытания бо, глаголет, таковому делу не подобает быти. Господин же Григориев, яко от изумления во ум прииде, и послушлив бывает отец своему сыну, повелевает от смерти отвести Григориа: обаче же горкому и лютому предает праведнаго заточению, якоже и соименитаго тому преподобнаго святителя арменскаго, или яко акрагантийскаго великаго и чудеснаго: ров убо глубок ископовается, в немже и твердыми стенами древа темница готовится, и ту неповинный яко злодей вводится, и дверь заключается, мало оконце токмо на верху земли оставляется, идеже быти пище метаеме: ядь же бе преподобному даема не человеческа, на три убо дни вметаем бывает преподобному един сноп овса, такожде и воды скудною мерою; и в таковой убо беде преподобный наипаче простирашеся на славословие Божие, терпя и благодаря Бога о всем, поминая древних святых мучения и терпение. И в таковой беде преподобному уже ко исходу втораго лета близ приходит, отлагает страх некто клеврет его, иже бе прежде друг ему, и умоляет стрегущаго его, приходит ко оконцу темницы Григориевы нощию, и вопрошает: како пребывание его? Григорий же о всем и во всем благодарствует Бога, и Пречистую Богородицу, и всех святых; друг же его обещавается ему приносити ядь; Григорий же не повелевает тому яди приносити к себе; многа бо, рече, и преизобилна благодать Божия питает его; и воспоминает в писании глаголемое: яко всяка душа не наказанна неисцелна, не убо люто, еже уязвену быти, но люто еже не уцеломудритися язвою; токмо повеле приносити к себе бумаги, чернил и трость; друг же его сотвори по повелению его; Григорий же писаше книжицы малыя, яже в научения бывают малым детищам, и повелеваше продавати сия, цену же их нищим раздаяти, себе же никакоже ничтоже от яди и от протчих потребных, кроме бумаги и чернил, не повелеваше приносити. Господину же его никтоже смеяше о нем воспомянути; сам же господин его, или забыв, или Божие смотрение тако бысть: понеже никакоже воспомяну Григориа.

Егда же Григорию преидоша в темнице лета два, тогда во един от дни явися ему во дверех свет: он же во ужасе бысть, чая быти вражию мечтанию, и востав нача молитися: понеже в два лета никогда же отверсты беша двери тыя; и паки свет бысть во дверех болши перваго, двери же затворены бяху; Григорию же вземшу рукою дверь, и абие отверзеся; он же разуме, яко Божию быти смотрению, и взем образ Пресвятыя Владычицы нашея Богородицы, иже бе в темнице у него, и изыде дню сущу, никимже видим, и иде из дому того и из града.

И прииде в пречестную обитель Пресвятыя Богородицы, честнаго и славнаго ея Успения, иже Иосифов именуется, бе бо обещался, в темнице седя, ту пострищися; и пострижеся в той обителя, и преименован бысть от Григориа в Гуриа и Божиею благодатию бысть монах чуден, и живяше по монастырскому чину и обычаю, и игумену и братии во всем повинуяся, по писанному: повинуйтеся братие наставником вашим, рече, и покаряйтеся, тии бо бдят о душах ваших, понеже слово им воздати о вас. Последи же бысть игумен тоя пречестныя и великия обители; потом же оставляет паству немощи ради телесныя, и паки по мале времени самодержцем посылается во игумены святыя живоначальныя Троицы, иже Селижаров именуется.

И егда убо изволи Бог предати благочестивому и христолюбивому государю царю и великому князю Иоанну Васильевичу всея России самодержцу, болгарския земли отчину его град Казань: тогда благочестивый царь советова с отцем своим и богомолцем святейшим Макарием митрополитом Московским и всея России, и с протчими святыми Росския земли митрополии, кого поставити архиепиекопом новоприятому и новопросвещенному граду Казани; избирают из архимандритов и из игуменов четырех благоговейных и преподобных священномонахов, в нихже бе и Гурий преподобный; и любим бывает самодержцу царю и святителю преподобный Гурий; обаче не восхищают на ся суда Божия, но полагают на волю Божию, и апостолски избирают жребием: и повелевают царь же и святитель написати имена сих избранных четырех честных и духоносных священных монахов, и положити на престол велицей церкви, Пречистыя Владычицы нашея Богородицы и приснодевы Марии, честнаго и славнаго ея Успения; и певше молебная вземлют от престола два жребия, в нихже обретается един Гуриев, и паки полагают о́на два жребия, и певше молебная, взимают един от них от престола, и обретается паки имя преподобнаго Гуриа. Царь же и митрополит, и весь собор священный и вси людие воздаша о сем славу Богу вси вкупе: яко избра Бог мужа праведна и свята новопросвещенному граду Казани, и овященной пастве первоначалника. Волею же самодержавнаго царя, и благословением преосвященнаго Макария митрополита всея России, и советом всего яже о нем священнаго собора, в лето седмь тысящь шестдесят третие (1555), февруариа в 7 день, поставлен новопросвещенному граду Казани и новому граду Свияжскому и протчим градом, в третие лето по взятии города Казани, первый архиепископ преосвященный Гурий.

Самодержец же посылает со архиепископом в соборную церковь Пресвятыя Владычицы нашея Богородицы честнаго и славнаго ея Благовещения чудныя местныя иконы, и протчее церковное драгое строение; книги же многие вдает из своея царокия казны; к тому же и из честных монастырей повелевает самодержец архиепископу образы и книги приносити властем; самого же Гуриа архиепископа по премногу почти, и честныя и драгия церковныя вещи многи вда ему. Посылает же самодержец со архиепископом два архимандрита на болшую архимандрию, и обитель составити Пресвятыя Богородицы честнаго и славнаго ея Успения во град Свияжск, из Старицы града богородицкаго архимандрита Германа Садырева-Полева, иже по первом преосвященном Гурии архиепископе бысть в Казане вторый архиепископ, его же мощи неисповедимыми Божиими судбами мне недостойному многогрешными моими руками осязати изволи Бог, и надгробная певше соборне погребсти честныя его мощи в созданней его обители, Пресвятыя Владычицы нашея Богородицы, честнаго и славнаго ея Успения в Свияжском граде; преставибося сей преподобный архиепископ Герман в царствующем граде Москве, в лето седмь тысящ седмдесять шестаго (1567), ноября в 6 день; пас церковь Божию три лета и месяц восемь; бе же тогда на Москве мор силен; повеле же себе положити в чину святительском, якоже поведают ученицы его, обаче тогда не сподобися святилски погребен быти, не сущу бо тогда митрополиту, ни иному кому обрестися от святитель во граде Москве грех ради наших. но тако просто погребен бысть архимандритом паствы своея свияжским Иродионом и казанским Иеремием, в чину святителском, якоже повеле, у церкви святаго Николая, яже зовется мокрый, и лежа тамо, дóндеже у благочестиваго государя царя Феодора Иоанновича всея России испросиша мощи его ученицы его, и: привезоша в монастырь в лето седмь тысящь сотое; мы же со благословением господина и отца нашего святейшего Иова, патриарха Московскаго и всея России, честне погребохом его, септемвриа в день. Бе же тогда и благоухание велие от мощей его не токмо во олтаре и в церкве, но и по всему монастырю, якоже всем дивитися. И из монастыря святаго Николая, иже зовется Песношский, посылает самодержец игумена Варсонофиа, о немже нам слово предлежит, и сему повелевает быти архимандритом в пресловущем граде Казане, еже и бысть.

И того же лета, в седмую неделю по пасце, совещавает благочестивый самодержец царь и великий князь Иоанн Васильевич всея России со отцем своим митрополитом Макарием всея России, в соборной и великой церкви Пресвятыя Богородицы, честнаго и славнаго ея Успения, повелевает царь митрополиту и всему священному собору молебная пения совершати, и святив воду святым и животворящим крестом, и тако с чудотворными иконами и с честными и животворящими кресты, сам самодержец и с братиею своею, и митрополит со всем освященным собором, и всенародное множество, провождают честныя и чудотворныя иконы местныя, коим в Казане быти, и архиепископа Гуриа, с литиею и пришед пред градныя врата, иже именуются Флоровския, и ту совершают молебная; и тако самодержец, и братия его, и бояре, у архиепископа Гуриа благословляются, и отпущают касатися путному шествию; такоже и святый Макарий митрополит всея России Гуриа архиепископа, и архимандритов Германа и Варсонофиа. и всех людей, иже с ним в путь грядут, осеняет их честным и животворящим крестом, и благославляет их в новопросвещенный град Казань.

И Божиею благодатию, и молитвами Пречистыя Владычицы нашея Богородицы, и всех святых молитвами, преподобный Гурий архиепископ со архимандриты, и со священными мужи, и с честными монахи, и с прочими людми, иже с ними путь шествоваша, в пресловущий град Казань здрави приидоша, и молебная пения Господу Богу и Спасу нашему Iсусу Христу, и Пречистой Богородице, и всем святым совершиша, и святив воду честным и животворящим крестом, и служив божественную Литоргию со архимандриты и со всеосвященным собором, и посылает к самодержцу и к митрополиту о своем благополучном прибытии в град Казань. И тако преподобный Гурий архиепископ первопрестольник бывает новопросвещенному граду Казани и прочим, не украд власти, ниже восхитив, ниже гонив честь, но честию гонимь, ниже человечу благодать, но от Бога и Божественну приим; и сбыстся о нем, якоже речено бысть в Писании: Аз предах тя, и Аз помогу ти, яростию малою поразих тя, и милостию вечною прославлю тя: болши мера человеколюбия твоего, паче меры наказания. Живяше же преподобный богоугодно, нищия кормя, и неимущия всеми потребами удовляя, и бедныя, и вдовицы, и сироты заступая, и от бед изимая, и труды к трудом прилагая, и обнощное стояние присно в молитвах выну принося к Богу, близ бо келлии его церковь святых великих страстотерпцев Бориса и Глеба, и в той многотрудне обычай бе ему молитвы творити, и всякими добрыми делы угождая Богу, и крепким житием по Бозе живяше, и к верным слово здраво и немятежно и учително имея, и неверныя уча и наказуя познати истиннаго Бога и творца всему, и веровати во Отца и Сына и Святаго Духа, во святую и неразделиму Троицу единосущну, и многи неверныя в веру приведе, и крести их множество и жены и дети; всюду убо Божия богатно излияся благодать, по писанному: посетил еси землю, и упоил еси ю, умножил еси обогатити ея даром благодати Святаго Духа, святым крещением; и явишися мнози от неверия православнии, ихже имена в книгах животных. И бывает преподобный. яко некое древо доброродно, кипящее плоды красными, и всем произносящее богатно овощие: тако и сей божественный муж Гурий архиепископ учением своим множество душ присвояет Христу.

Егда же убо прииде время, о нем же и псаломник рече: дние лет наших, в нихже семдесять лет, аще же в силах осмдесят лет, и множае их труд и болезнь: тако и сему преподобному прииде время: старость бо, рече пророк, честна, но немноголетна, ни в числе лет исчитается. В болезни же слежа святый много время; поведают бо, яко на трилетное время протягнутися болезни его; токмо на святыя великия праздники господския к церкви к Литоргии ношаху его; и тогда в церкви лежаше или седяше, стояти же не можаше; обаче душевнаго любомудрства не преможе телесная болезнь; о Бозе бо ревность легце криле творит, якоже и здрава телеса имущим, тако и сей преподобный душу име над телом яко воеводу; аще бо и в болезни лежаше, но пение непрестанно к Богу возсылаше, потом же и воздержанием удручая тело свое, по вселенныя учителя глаголющему слову: егда изнемогаю, тогда силен есмь; тогда убо глаголаше возмогати душевней сим, егда телесныя изнемогают слабости, и на всяк день яко начало полагаше; зде бо человеческое житие, рече, требует трудом делание, будущее же воздаяние, и подвизавшиися на земли наследят в радости небесныя, и отложще тленная, нетленная восприимут; не бо суть достойна страдания нынешняго века противу хотящей славе открытися; аще бо и писано есть: от болящаго не истязует Бог поста ни трудов, токмо терпения и благодарения, но сей преподобный муж к сим и сия совокупи, всех трудов касается, и к Богу сим присвояется; и многих неверных учением своим сотвори отступити от злоб их, и от бесерменския их веры, и просвети их банею Святаго Духа, святым крещением, и прежде бывшия хулники устроив славити Отца и Сына и Святаго Духа. И в старости добрей быв, позна отшествие свое к Богу; и декемвриа во второй день призывает предпомянутаго архимандрита Варсонофиа, имя же бо к нему любовь велию духовную, и повелевает ему возложити на себя великий образ, еже есть святая схима; в четвертый же день тогоже месяца декемвриа в осмый час нощи отходит ко Господу, в лето 7072; пас Церковь Божию лет восемь и месяц девять; и повеле положити святое и трудолюбное тело свое во обители боголепнаго Спасова Преображения за алтарем у болшия церкви; и погребоша земли сродное честное и святое тело его честне со псалмы и песнми духовными.

В тоже время, в дому Пречистыя Богородицы честнаго и славнаго ея Благовещения, царевым повелением служа преподобному Гурию архиепископу болярин именем Иоанн Застолобский, муж благ, ненавидя неправды, и от всякаго зла огребаяся, и ум крепок имея, к преподобному же Гурию архиепископу велию веру и любовь имея при животе святаго, такожде и по смерти, и гробницу над гробом святаго, и клеть каменну немалу соделавшу ему. Ему же Иоанну сын бе по плоти, именем Нестор, по реклом Димитрий, тако же тих и кроток, смирен и беззлобив, и во младости стар смысл обреташеся в нем, и разум многолетных седин живяше в нем; постом же и молитвою, и бдением, и суходеянием удручая тело свое; ктомуже, никомуже ведящу, ношаше на теле своем под срачицею власяницу жестоку; и бе видети умилен взор, ризою убо светлою одеян бе, якоже боляром обычай, бледностию же лица и тонкостию тела его поста ради, яко и хлеба не ядый являшеся; бе же и той служа на трапезе архиепископове, полагая им хлеб.

Предпомянутый же Иоанн, отец сего Нестора, зовомаго Димитрия, богат зело. Сему же Нестору никакоже о богатстве мира сего радети, ниже о чем о мирских вещех попечение имети, якоже обычай сверстников его, якоже всем нам знаемь бе, и прежде монашества монах познавашеся; потом же умоляет отца, и в монашеская облачится, в той же велицей обители боголепнаго Спасова Преображения, и Нектарий преименуется; и мало время пребыв, отходит ко Господу, егоже измлада возлюби. Отец же его Иоанн погребает тело его в тойже клети, идеже преподобный Гурий лежаше; верую бо, рече, молитвами святаго, якоже обещамися, да умолит и о нас Христа. Потом же и Иоанн постригает власы главы своея, и Иона преименуется; и мало поболев, конец жития прият, и в той же клети каменной, юже сам созда, повелевает погребсти тело свое, близ святаго Гуриа.

Преподобный отец наш Варсонофий рождение и воспитаяие име во граде Серпухове; в мире же бе имя ему Василий, сын некоего иереа именем Василиа; и дан бе отцем своим в научение граммате; и еще не у достигшу ему совершеннаго возраста, пленен бысть от крымских татар и заведен в плен, и пребывая в плене и благодаря Бога, работая неверным со всяким усердием и со смирением и кротостию, и воздержанию многу обучая себе, сна же мало приемля, и всякия добродетели прилежно касаяся, и из уст поя псалмы Давыдовы, ихже помня, и биет ратники Iсусовою молитвою, по писанному: не обрящеши бо, рече, крепчайши того оружия ни на небеси, ни на земли. Невернии же, имже служаше Василий, видяще его в таковом устроении, дивятся многому разуму, и добронравию, и правде, и нелицемерным трудом его, и смирению, и на всяку страду без хулнаго роптания, и послушание, и во всем беззлобие, и непрекословна послу́шателя, повелевают Василию во ослабе жити и страде не касатися.

Егда же трие лета преидоша в плене Василию, тогда Божиим смотрением приходит в неверных землю иерей Василий, отец Василиев, и искупует его от плена и тако возвращается Василий в Российскую землю, извык до конца бесерменский язык, и граммоту срацынскую, бе бо глубок ум имея. И прииде в пресловущий град и великий царствующий Москву, и входит в монастырь зовомый Андроников, и отлагает власы главы своея, вкупе же соотлагает и мирская вся мудрования, и бывает зовом Варсонофий; изящно же бе доволен и книжному учению, и божественному гласованию; и помнит в божественном писании лежащая: яко здесь убо и злая и благая конец имут, будущая же вечна и безсмертна, и во веки не имут конца; и проходит добре монашеская натрижнения, яко и самодержцу царю знати его, монашескаго ради труда и добронравия; и бывает достоин пасти Христова стада словесных овец.

Посылается самодержцем, и благословляется святителем, хранити путь, иже вводит в некончаемое блаженство царства небеснаго; и бывает полконачалник Христовым воином, игумен и отец чадом честныя обители, иже на Песноше, великаго во святителях и всемирнаго ко Христу молебника Николая, безпрестани аки реки милостивых чудес изливающаго; и оттоле водим водящим в радость безконечную, и ключимь бывает на составление паствы новыя.

И повелеваемь бывает благочестивым царем, и святителем, быти архимандритом боголепнаго Преображения Господа и Бога и Спаса нашего Исуса Христа, и составити обитель новую в новопросвещенном граде Казани; еже и бысть: Христовою благодатию, и по благословению преосвященнаго Гуриа архиепископа, монастырь сооружает, и церкви созидает, и келлии поставляет, и до ныне убо Богом соблюдаем младеет и распространяется, яко древо при водах благолиственно и доброплодно; приносит же убо не яко древо тленен плод и единем временем кончающся, но нетленен и безконечен плод, от негоже и хвала Творцу возсылается: святыя, глаголю, святители и преподобныя монахи, ихже имена в книгах животных написана суть. Да не зазрит ми кто о словеси сем: видех бо во святей обители сей, не токмо сих святых телеса нетлением почтени от Бога, но и монаси и мирстии нетленни мнози обретошася, еще же и святаго града Иеросалима благоволи Бог святому мужу и преподобному Епифанию, архиепископу монастыря святыя Голгофы, в той же честней обители положитися. К преподобному же святителю Гурию Варсонофий архимандрит имяше во всем послушание, и духовный союз, и любовь нелицемерну, и во всем повинуяся и совопрошаяся, и с молитвою и со благословением его вся творяше; постом же и молитвою, и слезами и бдением, и всенощным стоянием тело свое удручая; ношаше же преподобный Вароонофий и вериги на теле своем, никомуже ведущу. И бысть во всем образ братии к добродетели, монахи наставляя, и мирския поучая, и неверныя приводя во Христову веру, бе бо, якоже и преди рекохом навык писанию срацынскому, и мухамедова скверная предания срацыном добре ведый, и языками многими ведяше глаголати, и стязаяся с неверными, и укоряя их, и препирая, и ко крещению приводя, уча и наказуя веровати во святую Троицу, Отца и Сына и Святаго Духа; всякому бо делающему благое Бог помогает на благое, якоже рече некто от древних святых: благодарение, рече, приемлющаго подвижет дающаго, яко и болша дарования подати ему.

Потом же Божиим смотрением, по повелению самодержца государя царя и великаго князя Иоанна Васильевича всеа России, в лето седмь тысящь седмдесять¹ ... Афанасием, митрополитом Московским и всея России, поставляется на епископство славному граду Тфери, на Акакиево место преподобнаго епископа, сему убо ко Господу отшедшу: жившу на епископстве сорок лет, и добре Богу угодив, преставися. Сему же преподобному Варсонофию еще диакону сущу у преподобнаго Акакиа живущу ему, якоже сам поведа учеником своим, и многащи к нему Акакию глаголати, за многая лета преставления своего: яко быти тебе, рече, Варсонофие, зде Тфери епископом по моем к Богу отшествии и правити люди Божия; еже и бысть. И добре пасяше словесное стадо Христовых овец, паче убо и паче протяг усердие к подвигу, и множа умножи талант господина своего, и пребывая в посте и молитвах, и слезах, и во всенощном стоянии молитву принося выну к Богу. И прият от Бога благодать разсуждения; разсуждение бо, рекоша отцы, корень всем добродетелем. К сему же и врачебней хитрости преподобный Варсонофий искусен бе, и во имя Господне многия болящия телесне уврачева, еще жив сый, мзды же не приемля, якоже и прежнии святии врачеве не приемляху мзды, но туне врачеваху: кая бо потреба, рече, та стяжати, яже не можем с собою взяти; болных же паче врачеваше Духа Святаго благодатию душевныя страсти, врачь бо бе искусен по Господни благодати обоим сим врачеваниемь; псалмы же Давыдовы непрестанна бе молитва к Богу из уст его; ручное же бе ему делати клобуки гречестии, еже ношаху святителие; то бо делаше, и посылаине братии своей, и моляше их молити о нем Бога, то бо бе за рукоделие нетленная мзда ему.

Егда же бе преподобный Варсонофий во глубочайшей старости, оставляет паству, и преселяется паки в созданный им монастырь, во обитель боголепнаго Спасова Преображения, ея же сам состави, в ново просвещенной град Казань; и паки касается делу своему, емуже бе обыкл, угождая Богу постом, и молитвою, и бдением, и милостынею, и всенощным стоянием, и труды ко трудом прилагая; и возлагает на себе великий образ. Скорбию же многою преподобный и болезнию дряхлствуя другим бываше, правила же своего не пременяше никогдаже; к церковною пению старости ради и многих ради болезней не можаше уже ходити, но ученицы его к церкви вожаху его на колесцах, дóндеже изнеможе зело, и нача конечно болети; и познав от мира сего отшествие свое к Богу, и причастився божественных и животворящих Христовых Таин, отъиде ко Господу, егоже возлюби. Преставися же преподобный Варсонофий, епископ Тферский, в лето 7084 (1576), априлия месяца 11 дня, на память священномученика Антипы, епископа Пергама Асийскаго, и погребен бысть честно в созданем от него монастыре, боголепнаго Спаса Господня Преображения, архиепископом Тихоном первым, по числу же пятым, близ преподобнаго Гуриа архиепископа. Тогоже лета, иуниа в 14 день, архиепископ Тихон ко Господу отходит, и повеле положити себе в монастыре святыя и живоначалныя Троицы, иже внутрь града Казани близ двора архиепископля. И о сем до зде.

Божиим изволением, повелевает благочестивый государь царь и великий князь Феодор Иоанновичь всея России самодержец в монастыре воздвигнути церковь каменну боголепнаго Спасова Преображения. И егда начаша рвы копати, тогда гробницы каменныи, иже беша над гробы святых, преподобнаго Гуриа архиепископа Казанскаго, и Варсонофиа епископа Тферскаго, повелеша сняти, золожена бо бе новая церковь болши первыя; и егда доидоша до целбоносных гробов преподобных отец, октовриа в 4 день, тогда поведаша мне смиренному. Нам же со всем освященным собором принесше Господу Богу безкровную жертву, и певше панихиду, и шедше в монастырь, приидохом на место, и поклонихомся нетленным гробом преподобных отец Гуриа и Варсонофиа. И вскрывше гроб Гуриа архиепископа, и видехом дивно, еюже не надеяхомся, рака бо бе святаго полна благоуханна мира, мощиже святаго Гуриа оки губа ношахуся, части же ни единой погружене бывши: нетлением бо одари Бог честное и многотрудное его тело, яко и ныне зрится всеми, токмо мало верхния губы тление коснуся, протчия же уды его целы быша; мне же недостойному многогрешною моею рукою святаго телеси коснувшуся: святое же тело его бе плавая; осязахом же и погребалныя ризы его, и бяху крепка зело; покусихомся же и мантии его, и прочей погребалной одежды его зелно потягнути, и быша новых крепчае; в главах же у преподобнаго Гуриа лежаше клобук греческий вязен недовершен, о немже поведают Варсонофиевы ученицы, яко той клобук делаем бе преподобным Варсонофием преосвященному Гурию архиепископу, и егда Гурий архиепископ преставися, тогда Варсонофий положи во гроб Гурию в возглавие клобук той не довершен; нам же соборне смотрившим клобук той, и едину прядь из него вземше, и едва преторгнуша, всяко бо новаго крепчае бе; благоуханное же честное и святое миро устроиша в сосуд нов; православнии же христиане, монаси и мирстии, и жены и младенцы, мажущеся святым тем миром, исцеления неоскудна приемляху.

Потом же открыхом раку преподобнаго Варсонофиа, и видехом многим нетлением почтени от Бога мощи святаго Варсонофиа, к ногам же преподобнаго тление коснуся, но обаче не токмо кости неразрушены, но и крепки бяху зело, и никакоже слабости в составех имуще, якоже и Гурию святителю, своими бо руками с Арсением архимандритом святыя их и чудотворныя мощи преложихом от гробов в ковчеги, и погребалныя ризы, такожде яко и Гурию, преподобному Варсонафию новых крепчае. Мы же неизреченному человеколюбию Божию дивящеся, со слезами и радостию певше надгробная над преподобными отцы, и поставихом их на верху земли, да вси приходяще видят, и дивящеся славят Бога, прославляющаго святыя своя, и целуют с верою честныя и святыя их мощи. Два же монаха Иона и Нектарий, иже к Гурию архиепископу веру несумненну держаста, и во единой гробнице положистася с ним, о нихже прежде речено бысть, тии такожде многим нетлением почтени быша, и ризы их не истлеша; и над сими такожде надгробная певше, земли предахом.

Возвестихом же о сем государю царю самодержцу великому князю Феодору Иоанновичу всея России, и святейшему Иову патриарху Московскому и всея России, писанием со архимандритом Арсением тояжде святыя обители. Святый же царь, и святый патриарх, и весь царский синклит, и множество благочестивых воздаша о сем славу Богу, яко неверныя люди в веру привели, и устроили веровати, и покланятися единому в Троице славивому Богу, и святым крещением просветили, и яко неплодную землю, доброплодну сотворили, и в Троице славимый Бог преподобных сих святителей нетленны показа. Благочестивый же самодержец, и святый патриарх, повелеша хранити честныя их и многотрудныя и многоцелебныя мощи на верху земли; и у болшия церкви, со южныя страны олтаря, повелеша церковь создати, и ту поставити мощи святых отец наших Гуриа и Варсонофиа, еже и бысть. Болшая же церковь благолепнаго Спасова Преображения, милостию в Троице славимаго Бога, и молитвами Пресвятыя Владычицы нашея Богородицы и преподобных отец наших Гуриа и Варсонофиа молитвами, изрядна и прекрасна лепотою устроися о пяти главах, величеством же и красотою малым чим недостаточествует церкви Пресвятыя Богородицы, честнаго и славнаго ея Одигитрия, иже в девичи монастыре в Новом, близ царствующаго града Москвы. Егда же убо благоволением Божиим обретошася мощи, иже во святых отец наших Гуриа, перваго архиепископа новопросвещеннаго града Казани, и Варсонофиа, епископа славнаго града Тфери, тогда начаша бывати многа и различна чудесная исцеления от святых мощей их с верою приходящим. И приставиша хранити четырех монахов благоговейных и богобоязливых, Псалтырь говорити над святых мощами.

Конец житий святых чудотворцов казанских