Азбука верыПравославная библиотекасвятитель Димитрий РостовскийМолитва, или Краткое воспоминание страданий Христовых


святитель Димитрий Ростовский

Молитва, или Краткое воспоминание страданий Христовых

Радуйся, всем властем трепетная Господа нашего Иисуса Христа главо, нас ради за власы терзанная, тернием венчанная, тростию биенная, и даже до мозгу изболенная!

Радуйся, предрагое Спасителя нашего лице, добротою паче всех сынов человеческих краснейшее, Божественным зраком сияющее, Ангелы проникнута желаемое и всем удивительное, нас ради оплеванное, бесчестие прикровенное, пястьми биенное, все изсинелое, ни вида, ни доброты не имущее!

Радуйтеся, всемилостивии очи, паче солнца светлейший, зрением всех сердца к себе влекущий и умиляющий, нас ради слезами облитый и кровью затекший!

Радуйтеся, пребожественнии ноздри, воню благоухания духовнаго ощущающий, нас ради от беззаконных устен скверных и мерзких блевотин смрад терпевший!

Радуйтеся, медоточная уста и пресладкая гортане, нас ради оцтом и желчию напоенныя!

Радуйтеся, всечестнейшии уши, нас ради неисповедимое поругание, хулу и бесчестие терпевший!

Радуйся, всесмиренная вые, греху неповинная, нас ради заушенная и вервием на пропятие веденная!

Радуйся, хребте пресвятый, нас ради лютыми спекулаторскими (палачей) бичами у столпа биенный и весь даже до костей иссеченный!

Радуйтеся, всесильнии и вседержавнии руце и рамена, нас ради мучительски вязании. Крест понесший и на нем протягненнии!

Радуйтеся, прекроткии перси, паче Авраамлих недр наперсников и другое своих упокоевающий, нас ради нестерпимых страстей и мук ужасом смущенный и спекулаторскими бичьми биение купно с хребтом и чревом претерпевший!

Радуйся, присно живущее сердце, нас ради смертоносными скорбьми, печальми и копием ураненное!

Радуйтеся вси, преблагоутробнии внутренности, нас ради горькими пачеестественными болезньми без меры томленные!

Радуйся, преславное боготочное ребро, нас ради воинским копием даже до сердца прободенное и оттуду Кровь и воду источившее, от нихже купель седмеричных Тайн животворная к нашему очищению и освящению устроена!

Радуйтеся, почитаемии и всепоклоняемии колена, в молитве к земле преклоненная и под Крестом на землю и камение падающая!

Радуйтеся, почитаемии и всепоклоняемии нозе, нас ради гвоздьми ко Кресту с руками пригвозденнии!

Радуйся, всецелое Тело Господа нашего Иисуса Христа, нас ради на Кресте между злодеи распятое, без милости уязвленное, от ног до главы целости не имущее, умершее и погребенное!

Радуйся, пребесценная Крове от всех жил и составов Спасителевых, и от самаго сердца нас ради нещадно излиянная!

Радуйся, пресвятая душе Христова, на Кресте за ны с воплем крепким Богу Отцу преданная!

В том предании и аз днесь душу мою Тебе, Спасу и Искупителю моему, предаю и вся чувства и глаголы моя, советы и помышления моя и вся тела и души моея употребления, веру и жительство мое, течение и кончину живота моего, день и час издыхания моего, преставление мое и упокоение, и воскресение души и тела моего вручаю и молюся: прими в руце Твоего Владычняго защищения, распятыма Твоима дланьма благослови, в язвах Твоих сохрани и избави мя от всякаго зла; Кровию Твоею очисти многое множество моих беззаконий; Крестом Твоим аки копием пронзи окаянное сердце мое, яко да кроме Тебе, Живодавца моего, ничтоже ино возлюбит, и яко да на Тебе распятаго взирает, состраждая и умиляяся, грехом, аки мерзкою блевотиною, гнушаяся, волю свою отсекая, и яже о себе на Твой Промысл возлагая и оттуду полезное восприяти уповая; смертию Твоею умертви ми душетленныя страсти телесныя и подаждь исправление злому моему и развращенному житию, от грядущих грехопадений лютых восхищая, от бесов, страстей и злобы человеческия немощь мою покрывая, и безбедным спасительным путем к Тебе, пристанищу моему и желаний моих краю, руководствуя, и благословенным Твоим овцам сопричитая, да с ними Тебе, Творца моего со Отцем и Святым Духом славлю вовеки. Аминь.