архиепископ Ириней (Клементьевский)

Псалом 7

Пс.7:1. Псалом Давиду, егоже воспет Господеви о словесех Хусиевых, сына Иемениина.

НАДПИСАНИЕ И СОДЕРЖАНИЕ

Кто был сей Хусий, толковники между собою не согласуют. Августин и другие почитают сего Хусиа за онаго Арахиина сына, который, как повествуется во второй книге Царств, гл. 16, возвестил Давиду о совете, данном Ахитофелом Авессалому против Давида: но имя Хусии Арахиина пишется в Еврейских книгах чрез букву хет, а сего, о котором воспоминается в сем псалме, чрез букву каф. Почему неизвестно, был ли Хусий Арахиин, сын Иемениин, а притом и потому, что Давид в сем псалме отражает от себя клевету некоего сына Иемениина, как явно от оных слов его: аще сотворих сие. Хусий же Арахиин ни единыя клеветы произнес на Давида, но паче уведомил его о злом оном совете. Иероним мнит, что надпись сию разуметь должно о Сауле, котораго нарицает Хусием, сиречь, Ефиоплянином, ради черноты его нравов. Он бо, как повествуется в первой книге Царств, гл. 22, рече о Давиде ко отроком своим, предстоящим ему: несть от вас боляй о мне, яко воздвиже сын мой раба моего на мя врага, якоже день сей. Сию убо клевету отражает Давид в сем псалме, по мнению Иеронима. С равным вероподобием можно сказать, что Хусий, в сем месте упоминаемый, есть Семей сын Иемениин, который, проклиная Давида, бегающего от Авессалома, оныя дерзкия слова произнес: Изыди, изыди мужу кровей, и мужу беззаконий: возврати на тя Господь вся крови дому Сауля, понеже воцарился еси вместо его (2Цар. 16:7–8). По случаю сея гнусныя и весьма ложныя клеветы, мнится нам, псалом сей сложил Давид, моляся Богу, дабы защитил невинность и правду его. В таинственном смысле, представляется здесь лице Христово, и всякаго праведника, от врагов оклеветаемаго.

Пс.7:2. Господи Боже мой, на тя уповах, спаси мя от всех гонящих мя и избави мя:

На Тя, глаголет, уповах, зане вси оставиша мя: ибо и самый сын мой Авессалом, и тесть мой Саул ищут мене убити. Не имам человека, на негоже бы понадеятися могл, разве на Тебе, Бога моего. Ты убо спаси мя от всех гонящих мя. Вси бо гонят мене, инии советом, инии клеветою и злословием, инии войною и оружием.

Пс.7:3. да не когда похитит яко лев душу мою, не сущу избавляющу, ниже спасающу.

Сие глаголет относительно к главному гонителю своему Саулу, и употребляя подобие льва, увеличивает лютость его, дабы чрез то лучше преклонить Бога на помощь, исхищающаго бедных овец из челюстей волков; ведал бо Давид, что все тщание человеческое без Бога суетно есть.

Пс.7:4. Господи Боже мой, аще сотворих сие, аще есть неправда в руку моею,

Пс.7:5. аще воздах воздающым ми зла, да отпаду убо от враг моих тощь:

Пс.7:6. да поженет убо враг душу мою, и да постигнет, и поперет в землю живот мой, и славу мою в персть вселит.

Присовокупляет причину, чего ради просит помощи и избавления от Бога: понеже-де Бог ведает невинность его. И тако отражает клевету Хусиа или Семеа о мнимых наветах против Саула, и о похищении царства, представляя Богу, что не токмо не воздавал зла за добро, но, напротив того, делал добро за зло. И первее глаголет о том, что не воздавал зла за добро. Потом присовокупляет, что воздавал добро за зло. Аще, глаголет, сотворих сие, еже клеветники присвояют мне, сиречь, аще наветовах царю, или аще восхитих царство коею-либо лестию, или насилием: аще есть неправда в руку моею, сиречь, аще сотворих таковую несправедливость, воздав злая за благая: аще за великую оную честь, еюже почтил мене Саул, удостоив быть зятем своим, и поставив тривуном над тысящею мужей; аще за вся сия благодеяния воздах коварством и наветами, якоже они глаголют. И паки: аще воздах воздающим ми зла, сиречь, аще царю моему Саулу, или врагу моему Семею, воздавшим мне многая злая за восприятая от Мене благая, воздах равная; убо да отпаду от враг моих тощ, сиречь, аще истинны суть глаголы их, а не ложныя клеветы, да паду от руки врагов моих тощ, сиречь, лишен Твоея помощи. Пусть они гонят меня, и да уловят аки зверя в сети. По сих да поперут в землю живот мой, да отимут жизнь, и труп мой да поперут ногами, наконец, и славу мою в персть да вселят, дабы и самая память имене моего исчезла.

Пс.7:7. воскресни, Господи, гневом твоим, вознесися в концах враг твоих, и востани, Господи Боже мой, повелением, имже заповедал еси,

Доказав невинность свою, и в том закляв себя клятвами, просит у Бога праведнаго защищения, представляя, что сие к вящшей славе Его послужит, когда Он произведет суд над нечестивыми. Воскресни, Господи, гневом Твоим, то есть, востани, сяди на судилищном престоле, яви праведный гнев Твой на враги моя, разжени их и устраши, да не вредят. Вознесися в концах враг Твоих. Явися на высоте славы Твоея, открой величие правосудия Твоего, распространи ужас в пределах врагов Твоих, да вси возчувствуют присутствие Твое. Писание приписывает Богу воскресение, сиречь, возстание, якоже и сон, не в собственном, но в иносказательном разуме. Воскресает Бог, когда помогает нам, спит же, когда не помогает. Сюда относятся оныя изречения: востани, Вскую спиши, Господи? и воскресни, Господи, помози нам (Пс. 43:24, 27) и:

"и востaни, Господи Боже мой, повелением, имже заповедал еси."

Пс.7:8. и сонм людий обыдет тя: и о том на высоту обратися.

Пс.7:9. Господь судит людем: суди ми, Господи, по правде моей и по незлобе моей на мя.

Присовокупляет вторую причину, чего ради прилично Богу подать ему помощь против врагов: понеже де сам Он заповедал судиям земли, да избавляют неповинных от руки утесняющих, откуду следует, что сие кольми паче прилично ему: Той бо есть верховный Судия над всеми судиями. Востани, глаголет, повелением, имже заповедал еси: сиречь, сотвори по повелению, или по собственному глаголу Твоему, имже заповедал еси судиям, да судят праведно. Востани убо, и суди врагам моим. И сонм людей обыдет тя: то есть, от сего правосуднаго деяния Твоего, явленнаго чрез усмирение врагов моих, и чрез защищение меня, воспоследует то, что сонмы людей даже и неверных познают Тя, и прославят; и тако всегда будут прибегать к правосудию Твоему, окружая судилищный престол Твой. Засим присовокупляет, и о том на высоту обратися: то есть аще не мене ради, то поне сонма ради людей оных, имеющих прославляти Тя, на высокий престол правды взыди, и явися в концах врагов, да познают, яко Господь судит людем, сиречь, яко Ты еси един верховный Владыка всех. егоже правосудия никтоже избегнет.

Суди ми, Господи, по прaвде моeй и по незлобе моeй на мя.

Сим заключает всю вышереченную молитву. Понеже бо удостоверен был о себе, что клевета врагов была ложная, в чем и совесть свою и Бога имел свидетелями: того ради просит Бога, яко верховнаго всех Судию, да разсудит дело его по правде Своей и по невинности его, и да воздаст всякому свое.

Пс.7:10. Да скончается злоба грешных, и исправиши праведнаго, испытаяй сердца и утробы, Боже, праведно.

Отсюду начинается вторая часть псалма, относящаяся к нравоучению, в которой показывает Пророк, что творящии злая сами себе зло творят, и чрез то увещавает всех, да обратятся от злобы к правде. Глаголет убо: да скончается злоба грешных, и исправиши праведнаго. Аки бы сказал: пусть совершится, и до самой крайности дойдет злоба грешных, но праведному вреда не причинит, ниже может совратити его от правыя стези на шуюю, зане Ты, Боже, исправиши праведнаго, да не уклонится на шуее. Ты промыслом Твоим присно присущ будеши праведнику. Ты сие сотвориши, един ведый, кто есть истинно праведен и того достоин: Ты бо испытуеши сердца и утробы, сиречь, внутренния расположения души и сердца, желания, помышления, намерения, и проч.

Пс.7:11. Помощь моя от Бога, спасающаго правыя сердцем.

Из общаго предложения выводит частное о себе самом заключение, показывая, что имея толико правосуднаго Бога, праведно надеется на помощь Его. Помощь моя, глаголет, от Бога. То есть, Тот, Который испытует сердца и утробы, и ведает мою правоту, что я не воздавал зла за зло, Тот, глаголю, подаст мне скорую и известную помощь: Ему бо единому приличествует помогати невинно гонимым, и спасати правыя сердцем. Той убо и мене спасает, и врагов моих судити будет. Сие назнаменуя, присовокупляет:

Пс.7:12. Бог судитель праведен и крепок, и долготерпелив, и не гнев наводяй на всяк день.

Пс.7:13. Аще не обратитеся, оружие свое очистит, лук свой напряже, и уготова и,

Сими словами подтверждает вышереченное, то есть, что Бог, хотя и не всегда гневается и угрожает, однако иногда изливает гнев, и наводит злая, которыми угрожал. Аще не обратитеся, глаголет, сиречь, аще не премените нрава, и не покаетеся, оружие свое очистит, или, как в Еврейском тексте изображено, меч свой изострит, и не точию меч изострит, но и лук напряжет, и уже напряже и уготова и. Употребляет подобие меча и лука, дабы показать, что Бог поражает ово близ, ово издалече. Ибо когда вина законопреступника тяжкая и явная есть, или злодей близко преследует праведнаго, тогда поражает мечем близ; а когда намереваемое зло отдаленно и как бы сокровенно есть, тогда издалече пускает стрелы, и оными поражает нападателя.

Пс.7:14. и в нем уготова сосуды смертныя, стрелы своя сгараемым содела.

Дабы не возмнил кто, что стрелы Божия удобно отразить или избежать их возможно: того ради нарицает стрелы оныя сосудами смертными, сиречь орудиями смертоносными, соделанными из вещества загарающагося, каковы бывают стрелы молниины, которыя с непонятною скоростию, и с великою силою все проникают в миг, так что предупредить или избежать их никак не возможно. Имя сосуда повсюду в Писаниях берется за орудие, как-то во Пс. 70, 22; Ис. 22, 17; Иер. 50, 25; Иер. 51, 20.

Пс.7:15. Се, боле неправдою, зачат болезнь и роди беззаконие:

Пс.7:16. ров изры и ископа и, и падет в яму, юже содела.

Сими и следующими за сим словами доказывает Пророк, что нечестивые люди тем самым действием, которым вред причиняют праведным, самим себе вредят. Сие же праведное наказание насылает на грешников Бог, устрояя чудесным промыслом Своим так, дабы все умыслы и коварства их на них самих обращалися. В доказательство сего употребляет слова преносныя, взятыя, во-первых, от жены, мучащияся родами, и производящия плод непотребный, сиречь, изверга. Во-вторых, от человека, копающаго ров или яму, и самого во оныя впадающаго. Наречие указательное, се, означает презрение или насмешку. Се, глаголет, боле нечестивый наветник неправдою. Чего ради? Понеже зачат злую зависти болезнь. И что по сем? Роди беззаконие, или, как в Еврейском тексте изображено, ложь, мечту и призрак. Ров изры и ископа. Чего ради? Дабы праведнаго или тайно, или явно погубить. Но что из сего? Сам окаянный падет в яму, юже содела другому. Отсюду явствует, каким родом болезни мучился грешник. Зачатие болезни есть зачатие зависти, или ненависти на ближняго, яже суть семена или начала зол; а рождение, последующее за сим, есть плод оныя. И праведно зачатие зависти или ненависти нарицает зачатием болезни: понеже зависть и ненависть мучат и терзают душу завидующаго и ненавидящаго. От сего злаго семене зачатаго раждается плод растленный, или дело беззаконное, яко то: убийство, хищение, ложь, клевета, ложное свидетельство, клятвопреступление, измена Богу, Государю, Церкви и ближнему. Итак слова сии, боле неправдою, положены здесь вместо оглавления, а потом вкратце изъяснены чрез оныя слова: зачат болезнь, и роди беззаконие. А понеже сказал, что грешник родил беззаконие, то есть, ненависть на праведнаго; того ради присовокупляет, что и ров ископал: ров изры, и ископа и, которым подобием означает, что грешник иногда явно, а иногда тайно устрояет козни праведному. И понеже рождение и копание суть действия трудныя; то сим означается, что злыя дела не без болезни и труда содеваются. За сим следует: и падет в яму, юже содела. Чем показывает Пророк, что злыя оныя дела грешников самим им точию вредят, как сказано выше. Далее то же самое изображая другими словами, присовокупляет:

Пс.7:17. Обратится болезнь его на главу его, и на верх его неправда его снидет.

Не точию, глаголет, тайныя злоумышления, которыя чрез ископание ямы означаются, но и явныя злодеяния от ненависти происходящия, яко-то убийство, хищение, грабеж, и прочая сим подобная, на главу виновника своего, Богу тако располагающу, обратятся, подобно стреле, или камню, которыя, будучи брошены на высоту, паки обращаются на главу стреляющаго, или бросающаго. Что исполнилось на Сауле, Авессаломе, Ахитофеле и на иных премногих.

Пс.7:18. Исповемся Господеви по правде его и пою имени Господа вышняго.

Заключает псалом исповеданием Бога. Исповедание же повсюду в писании берется вместо похвалы и прославления; ибо кто хвалит кого, тот исповедует или признает, что хвалимый достоин есть похвалы. Исповемся Господеви по правде его: то есть, восхвалю и прославлю Бога, как требует правда Его, толь чудными образы избавляющая праведных, и наказующая нечестивых. И пою имени Господа Вышняго, то есть, хвалебную песнь принесу всевышнему Владыце, или верховному Судии, седящему на высоком престоле.


Источник: Толкование на Псалтирь, по тексту еврейскому и греческому, истолкованное тщанием и трудами святейшаго правительствующаго Синода члена, покойнаго архиепископа Псковскаго, Лифляндскаго и Курляндскаго и кавалера, Иринея [Текст]. - Изд. 7-е. - Москва : в Синодальной тип., 1882. - 25 см.

Комментарии для сайта Cackle