Слово о страхе Божием

Всегда любимии братия и сестры имеем страх Божий пред очима своима. и час смертный воспоминайте. и оны страшныа муки. уготованныа грешником. убоим же ся огненаго родства¹. яко вечно есть. и огня яко не гасим есть. боимжеся грозы. яко не прелогается в теплоту. и тмы яко не бывает свет. боимжеся червия. яко не усыпают и безсмертни суть. ангели же над муками зли суть и не милостиви. всем не творящим воля Божия люто будет осужение. о братие. или мук боящеся останите зло деяти. еже на пагубу есть души. или небеснаго царствия желающе потщитеся добродетельно пожити в Худом веце сем. вся бо света сего временна и тленна суть. богатстно и слава. и человеки смерть приемлет. а онамо все нетленно. ни конца не имать. ни летом числа. ни времени пременения. убоимся братие вечных мук. иже дияволу уготованы. не гасим бо есть огнь и ядовиты черви. аще бо зде банныя горющия теплоты укропныя не может плоть наша терпети. то како стерпим он лютый огнь. и кипящия смолы мучения. аще убо комара или мухи страшаща не терпим. то како братие не усыпающих червий лютость стерпим. но потщимся убо вечных избыти мук делы добрыми. чистотою милостынею не лицемерною любовию. се лицемерство наричет. еже богатых стыдетися. аще и неправду деют. а сироты же озлобляти. имейте убо истину ко всем. то Божия любовь есть. всяку же вражду и гнев отверзите. пианства бегайте. в питии бо мнозем всяка злоба бывает. зависть же и клевету и прочия злобы покаянием отрините. да наследницы царствиа небеснаго будете. любимицы. когождо нас век скоро скончевается. друзии бо вечер легше на одре. а утро не восташа. отъидоша бо жития сего. тогда что убо человек может добро сотворити. или исповедатися. или прияти тело и кровь Сына Божия. но в немъже приимет ны смерть. в том Бог осудит ны. или в добре или во зле. тем убо кождо вас внимайте себе. а чюжих грех не осужайте. да не осужени будете. кождо бо о своих делех ответ даст пред Богом. а не поможет тамо никтоже никомуже. ни отець сыну. ни сын отцю. ни брат брату. но дела когождо или осудят. или спасут.