Ча́сть четве́ртаѧ

Ѡ҆ и҆́же во ст҃ы́хъ ѻ҆тцѣ̀ на́шемъ і҆ѡа́ннѣ карпаѳі́йскомъ, кто̀ ѻ҆́ный бѣ̀, въ ко́е процвѣта́ше вре́мѧ, и҆ гдѣ̀ тече́нїе подви́жничества соверша́ше, и҆ прѡ́чаѧ, ꙗ҆̀же ѡ҆ не́мъ, неѧвлє́нна сꙋ́ть. Сїе́ же то́чїю свидѣ́тельствꙋетъ фѡ́тїй, (въ ѿдѣле́нїи сѻ҃а, на страни́цѣ сѯ҃ѕ). Ѻ҆́нъ же (си́рѣчь дїадо́хъ) слѣ́дꙋетъ мно́гѡ и҆ і҆ѡа́ннꙋ карпаѳі́йскомꙋ, и҆́же и҆ дае́тъ надписа́нїе своѐ трꙋдꙋ̀ є҆гѡ̀, пи́санномꙋ ᲂу҆тѣ́шительнымъ сло́вомъ прише́дшымъ и҆́нокѡмъ, и҆̀же ѿ і҆нді́и, є҆́же се́й въ со́тницѣ глави́знъ глаго́лъ сво́й скончава́етъ, въ ни́хже мно́гѡ ѻ҆те́чески чтꙋ́щихъ ᲂу҆вѣщава́етъ благодꙋ́шествовати въ ско́рбехъ, и҆ терпѣ́нїе и҆мѣ́ти въ находѧ́щихъ и҆скꙋше́нїѧхъ.

Сꙋ́щымъ на землѝ царє́мъ весе́нны цвѣты̀ приносѧ́ще нѣ́цыи проси́тели, не то́кмѡ ѿве́ржени не бы́ша мно́жицею, но и҆ нѣ̑кїѧ воспрїима́хꙋ да́ры. И҆ а҆́зъ ᲂу҆̀бо ѿ ва́съ повелѣ́нъ бы́въ, є҆ди́нꙋ со́тницꙋ ѿнѣ́кꙋдꙋ заи́мствовавъ, и҆ приносѧ̀ слове́съ до́брыхъ ва́мъ, жи́тельство на небесѣ́хъ и҆мꙋ́щымъ, благопрїѧ́тенъ же да бꙋ́дꙋ, и҆ моли́твъ да́ръ ѿ ва́съ да воспрїимꙋ̀.

а҃. Є҆ли́кѡ при́сный є҆́сть цр҃ь всѣ́хъ, ни нача́ла, ни конца̀ ца́рствїю своемꙋ̀ и҆мѣ́ѧ, толи́кѡ ѡ҆ не́мже и҆ ѡ҆ добродѣ́телехъ трꙋди́тисѧ произволѧ́ющымъ прїѡбрѣ́тншꙋ бы́ти слꙋчи́сѧ тща́нїю: чє́сти бо настоѧ́щагѡ житїѧ̀, а҆́ще и҆ ѕѣлѡ̀ сꙋ́ть свѣ́тлый, съ настоѧ́щимъ житїе́мъ разорѧ́ютсѧ всѧ́кѡ: раздѣлѧ́емыѧ же ѿ бг҃а достѡ́йнымъ а҆́ки съ нетлѣ́нїемъ дае́мы, ѿню́дъ⁹⁹⁵ пребыва́ютъ.

в҃. Блаже́нный даві́дъ пѣ́снь ѿ всеѧ̀ дѣ́лаѧ тва́ри бг҃ови, воспомѧнꙋ̀ а҆́гг҃лы и҆ неви́димыѧ си̑лы всѧ̑: сни́де же да́же и҆ до землѝ, ꙗ҆́коже ни ѕвѣре́й, ни скотѡ́въ, ни пти́цъ, ни га́дѡвъ ᲂу҆далѧ́тисѧ, поне́же сотво́ршемꙋ покланѧ́тисѧ, и҆ ѿ си́хъ пѣ́нїю мнѧ́щесѧ, ꙗ҆́кѡ хотѧ̀ всѐ бы́вшее ѿ негѡ̀ подо́бное соверша́ти вноше́нїе⁹⁹⁶ и҆ ка́кѡ ᲂу҆́бѡ и҆́нокъ вкꙋ́пѣ приноси́мый со зла́томъ, и҆́же ѿ сапфі́ра, не чꙋ́вствовати когда̀, и҆лѝ лѣни́тисѧ претерпи́тъ къ пѣснопѣ́нїю.

г҃. Ꙗ҆́коже кꙋпинꙋ̀ ѻ҆́гнь ѡ҆бдержа́ше, не ѡ҆палѧ́ше же ю҆̀: та́кѡ и҆ прїе́мшихъ дарова́нїе безстра́стїѧ, а҆́ще и҆ тѧ́жко и҆ ѕѣлѡ̀ теплѣ́йше но́сѧтъ тѣ́лѡ, ничто́же пло́ти и҆лѝ ᲂу҆мꙋ̀ стꙋжа́етъ и҆лѝ вреди́тъ теплота̀ тѣ́ла: гла́съ бо гдⷭ҇нь пресѣчѐ пла́мень є҆стества̀, зане́же хотѣ́нїе бж҃їе и҆ сло́во соединє́ннаѧ по є҆стествꙋ̀ разста́вило є҆́сть.

д҃. Лꙋна̀, растꙋ́щи и҆ па́ки ᲂу҆малѧ́ющисѧ, ꙗ҆влѧ́етъ человѣ́ка ᲂу҆строе́нїе: ны́нѣ ᲂу҆́бѡ дѡ́браѧ дѣ́лающагѡ, ны́нѣ же согрѣша́ющагѡ, та́же покаѧ́нїемъ па́ки текꙋ́щагѡ къ жи́зни добродѣ́тельной. Тѣ́мже не поги́бе ᲂу҆́мъ согрѣши́вшагѡ, ꙗ҆́коже нѣ́цыи ᲂу҆ ва́съ мнѧ́тъ, ꙗ҆́коже и҆ лꙋны̀ тѣ́ло не ᲂу҆ма́лисѧ, но свѣ́тъ. Возстѧжава́етъ ᲂу҆́бѡ человѣ́къ па́ки свою̀ свѣ́тлость покаѧ́нїемъ, ꙗ҆́коже и҆ лꙋна̀ по є҆́же ᲂу҆ма́литисѧ, ѿ себѐ свѣ́томъ ѡ҆дѣва́етсѧ: вѣ́рꙋѧй бо во хрⷭ҇та̀, а҆́ще и҆ ᲂу҆́мретъ, жи́въ бꙋ́детъ: и҆ ᲂу҆вѣ́сть, речѐ, ꙗ҆́кѡ а҆́зъ гдⷭ҇ь глаго́лахъ, и҆ сотворю̀⁹⁹⁷.

є҃. А҆́ще воста́вшꙋ на тѧ̀ въ мы́сли мно́жествꙋ вра́жїихъ воѡбраже́нїй, посла́бивъ⁹⁹⁸ побѣди́шисѧ, вѣ́ждь себѐ, ꙗ҆́кѡ разлꙋчи́лсѧ є҆сѝ на вре́мѧ ѿ бж҃е́ственныѧ бл҃года́ти. Тѣ́мже и҆ пре́данъ бы́лъ є҆сѝ въ рꙋцѣ̀ паде́нїѧ твоегѡ̀, по пра́ведномꙋ сꙋдꙋ̀. Сегѡ̀ ра́ди подвиза́йсѧ никогда́же нерадѣ́нїемъ ѡ҆ста́вленъ бы́ти ѿ благода́ти, нижѐ къ чертѣ̀ вре́мене. А҆́ще же возмо́жеши, лꙋ́чшїй поползнове́нїѧ бы́въ, превзы́ти стѣ́нꙋ страстны́хъ пѡ́мыслъ, и҆ ча̑стыѧ сквє́рныѧ прило́ги многоꙋ́мїѧ врагѡ́въ. да не не разꙋмѣ́еши да́ръ свы́ше да́нный тебѣ̀. Глаго́летъ бо а҆по́столъ: Не а҆́зъ же, но благода́ть бж҃їѧ, ꙗ҆́же со мно́ю, таково̀ содѣ́ла зна́менїе побѣ́ды⁹⁹⁹, и҆ ѿ востаю́щихъ на мѧ̀ скве́рныхъ помышле́нїй вознесе́ мѧ: и҆ ѿ мꙋ́жа непра́ведна, си́рѣчь дїа́вола, и҆ ве́тхагѡ человѣ́ка и҆зба́ви мѧ̀. Тѣ́мже крило́мъ дꙋ́ха возвы́сивсѧ, и҆ ѿпꙋще́нъ бы́въ ѿ тѣ́ла, возмого́хъ полетѣ́ти верхꙋ̀ ловѧ́щихъ бѣсѡ́въ, є҆́млющихъ человѣ́ческїй ᲂу҆́мъ сладостра́стїемъ, є҆́же понꙋди́тельнѣ и҆ нꙋ́жднѣ поѡщрѧ́юще предлага́ютъ. И҆зведы́й мѧ̀ ᲂу҆̀бо ѿ землѝ є҆гѵ́петскїѧ, си́рѣчь ѿ дꙋшепоги́бели мїрскі́ѧ, се́й та́йною рꙋко́ю ѡ҆ мнѣ̀ ра́тꙋѧ, поразѝ а҆мали́ка, и҆ подаде́ ми ᲂу҆пова́ти, ꙗ҆́кѡ и҆ про́чыѧ скве́рныхъ страсте́й ꙗ҆зы́ки потреби́тъ гдⷭ҇ь ѿ лица̀ на́шегѡ¹⁰⁰⁰. Се́й бг҃ъ на́шъ да́стъ премꙋ́дрость и҆ си́лꙋ: нѣ́цыи бо премꙋ́дрость ᲂу҆́бѡ прїѧ́ша, не ᲂу҆́ же и҆ си́лꙋ дх҃а, во є҆́же побѣди́ти врагѝ. Се́й вознесе́тъ главꙋ̀ твою̀ на врага̀ твоего̀, и҆ да́стъ тѝ крилѣ̑ ꙗ҆́кѡ голꙋби̑нѣ, и҆ полетѣ́въ почїе́ши ᲂу҆ бг҃а¹⁰⁰¹. Положи́тъ гдⷭ҇ь лꙋ́къ мѣ́дѧнъ мы̑шцы твоѧ̑, тве́рда и҆ ско́ра и҆ крѣ́пка показꙋ́ѧ тѧ̀ на сꙋпоста́та, и҆спина́ѧ под̾ тѧ̀ всѧ̑ проти́вѧщыѧсѧ тебѣ̀¹⁰⁰². Возда́ждь ᲂу҆̀бо гдⷭ҇ви благодаре́нїе ѡ҆ чистотѣ̀, ꙗ҆́кѡ не затвори́ тѧ въ рꙋка́хъ по́хотей пло́ти твоеѧ̀ и҆ кро́ве, и҆ ᲂу҆пражднѧ́ющихсѧ въ си́хъ тлетво́рныхъ и҆ нечи́стыхъ дꙋхѡ́въ, но ᲂу҆тверди́ тѧ десни́цею свое́ю: сози́жди є҆мꙋ̀ ѻ҆лта́рь, ꙗ҆́коже и҆ мѡѷсе́й по є҆́же побѣди́ти а҆мали́ка¹⁰⁰³. Сегѡ̀ ра́ди и҆сповѣ́мсѧ, и҆ восхвалю́ тѧ гдⷭ҇и, и҆ и҆́мени твоемꙋ̀ воспою̀, велича́ѧ си̑лы твоѧ̑¹⁰⁰⁴, ꙗ҆́кѡ и҆зба́вилъ є҆сѝ ѿ тлѝ живо́тъ мо́й, и҆ и҆схи́тилъ мѧ̀ є҆сѝ ѿ сѣте́й и҆ ловле́нїй ᲂу҆добоѡбстоѧ́тельныѧ и҆ многоѡбра́зныѧ и҆ ᲂу҆́треннїѧ ѕло́бы.

ѕ҃. Возжига́ютъ въ на́съ сквє́рныѧ стра̑сти, и҆ ѡ҆бновлѧ́ютъ, и҆ возвыша́ютъ, и҆ ᲂу҆множа́ютъ лꙋка́вїи бѣ́си: посѣщє́нїѧ же бж҃е́ственнагѡ сло́ва, и҆ па́че же лїѧ́нїемъ сле́зъ быва̑ющаѧ мертвотворѧ́тъ¹⁰⁰⁵ стра̑сти, а҆́ще и҆ многовре́менны сꙋ́ть, и҆ разорѧ́ютъ, и҆ пома́лꙋ ма́лꙋ въ небытїѐ превраща́ютъ гꙋби́тєльнаѧ дꙋшѝ и҆ тѣ́ла согрѣша́тєльнаѧ дѣ̑йствїѧ: то́чїю мы̀ да не ᲂу҆ны́емъ, є҆́же моли́твою и҆ ᲂу҆пова́нїемъ неѡсла́бнымъ и҆ безстꙋ́днымъ присѣдѣ́ти гдⷭ҇ви.

з҃. Почто̀ и҆з̾ ᲂу҆́стъ ѕло́бою младе́нчествꙋющихъ вѣ́рныхъ, хрⷭ҇то́съ соверша́етъ хвалꙋ̀; То́чїю вои́стиннꙋ, да пѣснопѣ́нїемъ разрꙋши́тъ врага̀ и҆ ме́стника, мꙋчи́тельствꙋюща вельмѝ: врага̀ ᲂу҆́бѡ добродѣ́телей, ме́стника¹⁰⁰⁶ же ѕло́бы дїа́вола. Тѣ́мже и҆ мы̀ влⷣкꙋ простото́ю се́рдца пою́ще, сокрꙋша́емъ же и҆ разрꙋша́емъ кѡ́зни вра̑жїѧ: мно́жествомъ бо сла́вы твоеѧ̀ сте́рлъ є҆сѝ сꙋпоста́тѡвъ и҆ сопроти́вныхъ, ра́тꙋющихъ ны̀.

и҃. А҆́ще кто̀ є҆́сть по ви́дꙋ и҆́звергъ, по́лъ глаго́летсѧ ны́нѣ ѿ плотски́хъ поѧда́ти, дрꙋгꙋ́ю же по́лъ въ бꙋ́дꙋщемъ вѣ́цѣ: пꙋти́ бо своегѡ̀ плоды̀ кі́йждо позна́етъ.

ѳ҃. Добрѣ́йшее поще́нїе, и҆ не прельща́тисѧ страстьмѝ, произволѧ́ти до́лженъ є҆́сть и҆́нокъ, и҆ вели́ко безмо́лвїе воздѣ́ловати вы́нꙋ.

і҃. Ненави́дѧщїи дꙋ́шы на́шѧ бѣ́си совѣ́тꙋютъ нѣ̑кїимъ, ꙗ҆́кѡ стꙋде́нꙋ нѣ́кꙋю похвалꙋ̀ на́мъ дарова́ти, та́же ѡ҆ се́мъ возвесели́тисѧ на́съ под̾ꙋща́ютъ. А҆́ще ᲂу҆̀бо разсла́бившесѧ мнѣ́нїемъ, да́мы мѣ́сто и҆ тщесла́вїю, не ᲂу҆томлѧ́ютсѧ про́чее вразѝ на́ши плѣни́ти на́съ.

а҃і. Прїимѝ па́че рꙋга́ющагосѧ тебѣ̀, не́жели похвалѧ́ющаго, и҆́же ничто́же ра́знствꙋетъ кленꙋ́щагѡ, пи́сано є҆́сть.

в҃і. Є҆гда̀ ѡ҆ по́стнѣй потща́всѧ добродѣ́тели, не́мощи ра́ди погрѣша́еши є҆ѧ̀, и҆ сокрꙋши́въ се́рдце, на благодаре́нїе прилага́ешисѧ всѣ́хъ промы́сленника и҆ сꙋдїѝ. А҆́ще сегѡ̀ ра́ди смире́нна вы́нꙋ показꙋ́еши себѐ гдⷭ҇ви, и҆ ни на є҆ди́наго когда̀ человѣ́ка вознесе́шисѧ.

г҃і. Вѣ́даѧ вра́гъ моли́твꙋ на́мъ ᲂу҆́бѡ сꙋ́щꙋ побо́рнꙋ, томꙋ́ же навѣ́тнꙋ, и҆ ѿто́ргнꙋти на́съ ѿ сеѧ̀ тща́сѧ, въ жела́нїе на́съ влага́етъ є҆́ллинскихъ слове́съ, ѿ ни́хже ѿстꙋпи́хомъ, и҆ ѡ҆ се́мъ ᲂу҆пражнѧ́тисѧ под̾ꙋща́етъ: є҆мꙋ́же да не повине́мсѧ, да не ѿ ѻ҆́сей своегѡ̀ земледѣ́льства заблꙋ́ждше, вмѣ́стѡ смо́квъ и҆ гро́здїѧ, те́рнїе и҆ волчцы̀ ѡ҆бере́мъ: премꙋ́дрость бо мі́ра сегѡ̀, бꙋ́йство ᲂу҆ бг҃а вмѣни́сѧ¹⁰⁰⁷.

д҃і. Ра́дость, глаго́летъ, ве́лїю благовѣствꙋ́ю ва́мъ, ꙗ҆́же бꙋ́детъ всѣ̑мъ лю́демъ¹⁰⁰⁸, не ча́сти люде́й. И҆, всѧ̀ землѧ̀ да покло́нитсѧ тебѣ̀, и҆ пое́тъ тебѣ̀¹⁰⁰⁹: не бо̀ подоба́етъ ча́сти землѝ. Пѣ́нїе же нѣ́сть со слеза́ми молѧ́щихсѧ, но ра́дꙋющихсѧ. А҆́ще ᲂу҆́бѡ сїѧ̑ та́кѡ сꙋ́ть, никогда́же да ѿча́емсѧ, но благодꙋ́шни настоѧ́щее да пре́йдемъ житїѐ, ѿсю́дꙋ ѻ҆́ныѧ ра́дости и҆ благодꙋ́шїѧ прїе́млюще мы́сль: ѻ҆ба́че бж҃е́ственнымъ стра́хомъ весе́лїе раствори́мъ, ꙗ҆́коже глаго́летъ: ра́дꙋйтесѧ гдⷭ҇ни съ тре́петомъ¹⁰¹⁰. И҆́бо ꙗ҆̀же ѡ҆ марі́и со стра́хомъ и҆ ра́достїю ве́лїею бѣжа́ша ѿ гро́ба: не́гли и҆ на́съ нѣ́когда свѧзꙋ́етъ и҆ ра́дость, ѿ мы́сленнагѡ ᲂу҆стреми́мсѧ гро́ба. Оу҆дивлѧ́юсѧ бо, а҆́ще без̾ стра́ха, зане́же никто́же безгрѣ́шенъ, а҆́ще бы и҆ мѡѷсе́й, а҆́ще бы и҆ пе́тръ а҆по́столъ бы́лъ: но ѻ҆ба́че въ таковы́хъ бж҃е́ственнаѧ любы̀ побѣди́вши, во́нъ и҆зго́нитъ стра́хъ во вре́мѧ и҆схо́да¹⁰¹¹.

є҃і. Ꙗ҆́кѡ а҆́ще встра́стенъ вѣ́ровавъ всесерде́чнѣ, и҆ смири́всѧ, прїе́млетъ дарова́нїе безстра́стїѧ, и҆́маши свидѣ́тельствꙋющее писа́нїе: дне́сь бо глаго́летъ, со мно́ю бꙋ́деши въ раѝ¹⁰¹²: и҆, вѣ́ра твоѧ̀ спасе́ тѧ, и҆дѝ въ ми́ръ блаже́ннѣйшагѡ безстра́стїѧ¹⁰¹³. И҆, є҆ли̑ка таковоѡбра̑зна, и҆ въ сѣ́мени созрѣ́етъ гро́здъ: и҆, по вѣ́рѣ ва́ю бꙋ́ди ва́ма¹⁰¹⁴.

ѕ҃і. Є҆гда̀ приболѣ́зненнѣ проти́вꙋ страсте́мъ ѡ҆брѣта́ющесѧ, ѕѣ́льнѣе стꙋ́дными помышле́нми ѿ бѣсѡ́въ стꙋжа́еми є҆смы̀, тогда̀ наипа́че въ вѣ́рѣ гдⷭ҇ней ᲂу҆твержда́имсѧ, и҆ и҆звѣ́стншꙋ ѿ ѡ҆бѣтова́нныхъ вѣ́чныхъ благи́хъ показꙋ́имъ наде́ждꙋ, є҆ѧ́же лиши́тисѧ на́мъ вразѝ, и҆ ѿчꙋжди́тисѧ за́вистїю тща́тсѧ. А҆́ще бо не ѕѣлѡ̀ вели̑ка бы́ша бы́ли ѻ҆́на блага̑ѧ, не бы́ша толи́кою за́вистїю на ны̀ бѣ́сове возже́гшесѧ, скве́рными пѡ́мыслы ча́стѣ стрѣлѧ́ти: понѐ си́мъ неи́стовство своѐ и҆звѣ́стно твори́ти мнѧ́ще, и҆ ко ѿча́ѧнїю на́съ спорѣва́ти непщꙋ́юще, несно́снымъ и҆ мно́гимъ стꙋже́нїемъ.

з҃і. Ра́зꙋмъ и҆́стиннѣйшъ нѣ́цыи бы́ти дѣѧ́нїе ѡ҆предѣлѧ́ютъ. Тщи́тсѧ ᲂу҆̀бо наипа́че дѣ́лы и҆ вѣ́рꙋ и҆ ра́зꙋмъ пока́зовати: ѡ҆ ра́зꙋмѣ бо є҆ди́нѣмъ воскича́выйсѧ, ᲂу҆слы́шитъ, ꙗ҆́кѡ бг҃а и҆сповѣ́дꙋютъ вѣ́дати, а҆ дѣ́лы ѿме́щꙋтсѧ є҆гѡ̀.

и҃і. Ꙗ҆́кѡ наимно́жайше во вре́мѧ пра́здникѡвъ и҆ свѧты́хъ собра́нїй, и҆ па́че же є҆гда̀ и҆́мать кто̀ къ та́йнѣй трапе́зѣ пристꙋпа́ти, тогда̀ скве́рными мечта́нїи и҆ тече́нїемъ сѣ́мене по́стника бѣ́сове ѡ҆скверни́ти тща́тсѧ: но нижѐ си́мъ да сокрꙋша́тъ, и҆лѝ разсла́бѧтъ всѧ̑ терпѣли́внѣ и҆ до́блественнѣ носи́ти ѡ҆бꙋче́ннаго: нижѐ да хва́лѧтсѧ на ны̀ дѣворастли́тели, ꙗ҆́кѡ пра́ви.

ѳ҃і. Нра́вꙋ и҆ ᲂу҆се́рдїю вразѝ ѿмщева́ютъ, разли́чными и҆ неизрече́нными и҆скꙋше́ньми дꙋ́шꙋ заꙋша́юще: ѿ скорбе́й же мно́гихъ и҆ неисповѣди́мыхъ вѣне́цъ тебѣ̀ плете́тсѧ, и҆ въ не́мощехъ же соверша́етсѧ си́ла хрⷭ҇то́ва¹⁰¹⁵, и҆ въ печа́льншихъ ᲂу҆строе́нїихъ процвѣта́ти ѡ҆бы́че благода́ть дх҃а: возсїѧ́ бо во тьмѣ̀ свѣ́тъ пра̑вымъ¹⁰¹⁶, а҆́ще ᲂу҆́бѡ дерзнове́нїе и҆ похвалꙋ̀ ᲂу҆пова́нїѧ да́же до конца̀ и҆звѣ́стнꙋ ᲂу҆де́ржимъ.

к҃. Ничто́же та́кѡ и҆стреблѧ́ти добродѣ́тель ѡ҆бы́че, ꙗ҆́коже кощꙋ́ны, и҆ є҆́же и҆гра́ти, и҆ праздносло́вїе. И҆ напроти́въ ничто́же та́кѡ ѡ҆бетша́вшꙋю ѡ҆бновлѧ́етъ дꙋ́шꙋ, и҆ прибли́житисѧ къ бг҃ови ᲂу҆строѧ́етъ, ꙗ҆́коже стра́хъ бж҃їй, и҆ до́брое внима́нїе, и҆ є҆́же поꙋча́тисѧ непреста́ннѡ словесє́мъ бж҃їимъ, и҆ моли́твою себѐ воѡрꙋжа́ти, и҆ бдѣ́нїѧ прїѡбрѣ́тенїе и҆зслѣ́довати.

к҃а. Прили́чнѣйше кꙋ́пнѡ и҆ поле́зно дꙋшѝ, є҆́же тве́рдѣ носи́ти всѧ́кꙋ ско́рбь, и҆лѝ ѿ человѣ̑къ, и҆ ѿ бѣсѡ́въ наводи́мꙋ, и҆ вѣ́дѣти и҆звѣ́стнѡ, ꙗ҆́кѡ должницы̀ є҆смы̀ ᲂу҆дрꙋче́нїѧ. И҆ никого́же и҆но́го, то́чїю є҆ди́наго себѐ всегда̀ порица́ти: и҆но́го бо ѡ҆ свои́хъ ско́рбныхъ порица́ѧй, поползе́сѧ ѿ пра́веднагѡ прили́чности сꙋда̀.

к҃в. Ѻ҆вогда̀ ѿ десна́гѡ человѣ́къ ѿдви́житсѧ¹⁰¹⁷ стоѧ́нїѧ, а҆́ще бы и҆ тщали́въ бы́лъ, ᲂу҆мно́жившымсѧ и҆скꙋше́нїѧмъ, и҆зстꙋпа́ѧ ѿ своегѡ̀ чи́на: за є҆́же все́й є҆гѡ̀, ꙗ҆́коже глаго́летъ писа́нїе, поглоще́ннѣй бы́ти мꙋ́дрости же и҆ хꙋдо́жествꙋ¹⁰¹⁸. Ꙗ҆́кѡ да не ᲂу҆пова́юще бꙋ́демъ на сѧ̀, и҆ да не похва́литсѧ і҆и҃ль глаго́лѧ: рꙋка̀ моѧ̀ спасе́ мѧ¹⁰¹⁹. Но ᲂу҆пова́й па́ки ᲂу҆стро́итисѧ въ пре́жнемъ кра́сномъ ᲂу҆строе́нїи, ѿпа́дшꙋ ѿ тебѐ бж҃е́ственнымъ велѣ́нїемъ, и҆ ѿгна́нꙋ бы́вшꙋ лꙋка́вомꙋ, и҆́же всѧ̑ ᲂу҆́бѡ стра́стнѣ и҆ ви́дѣти и҆ слы́шати под̾ꙋща́етъ, и҆ ко грѣхꙋ̀ побꙋжда́етъ: ѡ҆дебели́въ же ᲂу҆́мъ ꙗ҆́коже ѻ҆́блакомъ гꙋсты́мъ, твори́тъ и҆ пло́ть ѡ҆щꙋща́ти неизрече́ннꙋ тѧготꙋ́ же и҆ бре́мѧ: и҆ всажде́нный по́мыслъ про́стъ нѣ́кїй сꙋ́щъ и҆ непритво́ренъ, по подо́бїю новорожде́нныхъ младе́нцєвъ, разли́ченъ показꙋ́етъ, и҆ ѕѣлѡ̀ многоискꙋ́сенъ всѧ́ческагѡ грѣха̀, ѡ҆баѧ́въ и҆ преврати́въ сего̀ къ нечистотѣ̀ приклоне́нїемъ.

к҃г. Вели́ка нѣ́каѧ ве́щь человѣ́къ, расты́й внꙋ́трь, и҆ велича́емь добродѣ́тельми: но ѻ҆ба́че се́й вели́кїй бои́тсѧ грѣха̀, ꙗ҆́коже мы́ши сло́нъ, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́детъ¹⁰²⁰.

к҃д. Не то́чїю близ̾ сконча́нїѧ мі́ра дїа́волъ словеса̀ возглаго́летъ на вы́шнѧго¹⁰²¹, ꙗ҆́коже глаго́летъ данїи́лъ: но ᲂу҆́бѡ и҆ ны́нѣ нѣ́когда тѧ̑жкїѧ чрез̾ по́мыслы на́шѧ до самагѡ̀ тогѡ̀ небесѐ возсыла́етъ хꙋлы̑: и҆ на сама́го хꙋлѧ̀ вы́шнѧго, и҆ на созда́нїѧ є҆гѡ̀, и҆ на ст҃ы̑ѧ хрⷭ҇тѡ́вы та̑йны. Но мы̀ водрꙋже́ни сꙋ́ще на ка́мени ра́зꙋма, да не ᲂу҆бои́мсѧ ѡ҆ си́хъ, ни да ᲂу҆диви́мсѧ ѡ҆ де́рзости нечести́вагѡ: вѣ́рꙋ же и҆ моли́твꙋ те́плшꙋ ᲂу҆потреблѧ́юще, и҆ свы́шнее посо́бїе полꙋчи́вше ѿмщева́емъ врагꙋ̀.

к҃є. Ра́тꙋѧ и҆ поноша́ѧ съ де́рзостїю нахо́дитъ вра́гъ на дꙋ́шꙋ и҆зше́дшꙋю ѿ тѣ́ла, клеветни́къ бы́въ го́рекъ же и҆ стра́шенъ ѡ҆ согрѣше́нныхъ. Но возмо́жно є҆́сть ви́дѣти тогда̀ боголюби́вꙋю и҆ вѣ́рнѣйшꙋю дꙋ́шꙋ, а҆́ще и҆ мно́жицею ᲂу҆ѧ́звлена бы́сть грѣха́ми, не ᲂу҆жаса́ющꙋюсѧ ѻ҆́нагѡ стремле́нїй же и҆ преще́нїй: но па́че ᲂу҆крѣплѧ́емꙋ ѡ҆ гдⷭ҇ѣ, и҆ воскрилѧ́емꙋ ра́достїю, и҆ дерзотвори́мꙋ наставлѧ́ющими свѧты́ми си́лами, и҆ ѡ҆стѣнѧ́емꙋ свѣ́томъ вѣ́ры, и҆ противовзыва́ющꙋ со мно́гимъ дерзнове́нїемъ лꙋка́вомꙋ дїа́волꙋ: что̀ тебѣ̀ и҆ на́мъ, чꙋ́ждый бг҃а; что̀ тебѣ̀ и҆ на́мъ, бѣжа́телю небе́сныхъ и҆ ра́бе лꙋка́вый; не и҆́маши ты̀ вла́сти над̾ на́ми: хрⷭ҇то́съ бо сн҃ъ бж҃їй, над̾ на́ми же и҆ над̾ всѣ́ми вла́сть и҆́мать: томꙋ̀ согрѣши́хомъ, томꙋ̀ и҆ ѿвѣ́тствовати бꙋ́демъ, ѡ҆брꙋче́нїе¹⁰²² и҆мꙋ́ще є҆́же къ на́мъ милосе́рдїѧ и҆ спасе́нїѧ, кре́стъ сегѡ̀ честны́й. Ты́ же бѣжѝ дале́че ѿ на́съ гꙋби́телю, ничто́же тебѣ̀ и҆ рабѡ́мъ хрⷭ҇тѡ́вымъ. Сїѧ̑ глаго́лющей дꙋшѝ съ де́рзостїю, плєщѝ про́чее дае́тъ дїа́волъ, и҆ вопїе́тъ плача́сѧ: не возмо́гъ противоста́ти и҆́мени хрⷭ҇то́вꙋ. Превы́шше же сꙋ́щи дꙋша̀, пари́тъ верхꙋ̀ врага̀, заꙋша́ющи є҆го̀, ꙗ҆́коже глаго́лемый борзокри́лъ вра́на. И҆ по си́хъ ра́дꙋющисѧ ѿ бж҃е́ственныхъ а҆́гг҃лъ прено́ситсѧ въ мѣста̀ ѡ҆предѣлє́ннаѧ є҆́й по ᲂу҆строе́нїю є҆ѧ̀.

к҃ѕ. Ꙗ҆́кѡ и҆ ма́лымъ нѣ́кимъ и҆скꙋше́нїемъ по попꙋще́нїю возбранѧ́емь є҆́сть пред̾ꙋспѣ́ти тщали́вый, да ᲂу҆вѣрѧ́етъ тѧ̀, є҆хеннїѐ¹⁰²³, малѣ́йшаѧ ры́бица, тьма́ми ѡ҆бремене́нъ кора́бль прикоснове́нїемъ є҆ди́нѣмъ ᲂу҆празднѧ́ющаѧ, и҆ пред̾итѝ возбранѧ́ющаѧ, и҆ помѧнѝ всѧ́кѡ глаго́лющаго: ꙗ҆́кѡ а҆́зъ толи́кїй па́ѵелъ є҆ди́ною и҆ два́жды восхотѣ́хъ прїитѝ къ ва́мъ, и҆ возбранѝ на́мъ сатана̀¹⁰²⁴. Но не сегѡ̀ ра́ди да смѧте́шисѧ, противоподвиза́йсѧ же па́че терпѣ́нїемъ, и҆ полꙋчи́ши благода́ть.

к҃з. И҆́же добродѣ́тельми ѕѣлѡ̀ и҆з̾ѡби́лꙋѧй, а҆́ще ᲂу҆ны́нїемъ ᲂу҆клони́тсѧ ѿ подоба́ющагѡ, восхо́дѧтъ на него̀ сы́нове ѕлы́хъ востѡ́къ ѿ а҆мали́ка, и҆ па́че же мадїа̑мъ¹⁰²⁵, блꙋдолюби́ваѧ си́ла, съ велблю́ды свои́ми, си́рѣчь со стра́стными па́мѧтьми, и҆̀мже нѣ́сть числа̀, и҆ разорѧ́ютъ всѧ̑ плоды̀ зємны́ѧ, си́рѣчь и҆зрѧ́днѣйшагѡ дѣѧ́нїѧ же и҆ ѻ҆бы́чаѧ. И҆ тогда̀ про́чее ѡ҆бнищава́етъ і҆и҃ль, и҆ ѕѣлѡ̀ малодꙋ́шествꙋетъ, и҆ понꙋжда́емь є҆́сть возопи́ти ко гдⷭ҇ꙋ. И҆ та́кѡ посыла́етсѧ съ небесѐ по́мыслъ бла́гъ, гедеѡ́нꙋ подража́ющъ мно́гою вѣ́рою и҆ смиренномꙋ́дрїемъ: ты́сѧща бо моѧ̀, речѐ, хꙋ́ждша въ манассі́и, ꙗ҆́кѡ ѡ҆полчи́тисѧ на толи̑каѧ мно́жєства, тремѝ сты̀ немощны́ми человѣ́ки, и҆ зна́мєнїѧ побѣ́ды пресла́внѡ поста́вити на сопроти̑вныѧ спобо́рствомъ благода́ти.

к҃и. Не ᲂу҆́бѡ возмо́жеши на а҆́спїда и҆ васїлі́ска настꙋпи́ти, и҆ прѡ́чаѧ, а҆́ще не мно́гою мольбо́ю бг҃а ᲂу҆моли́въ прїи́меши побо́рникѡвъ а҆́гг҃лъ ѡ҆блегчава́ющихъ тѧ̀ свои́ми рꙋка́ми, и҆ горѣ̀ тѧ̀ творѧ́щихъ тиме́ннагѡ произволе́нїѧ.

к҃ѳ. Є҆гда̀ кто̀ подвиза́ѧсѧ крѣ́пкѡ побѣжде́нъ вы̀ бы́лъ, никто́же да печа́лꙋетъ, нижѐ да ᲂу҆томлѧ́етсѧ: но глаго́лы и҆са́їи да и҆спра́витсѧ, да благодꙋ́шествꙋетъ такѡва̀ напѣва́ѧ: Могꙋ́щїи покарѧ́йтесѧ! ѽ лꙋка́вїи бѣ́си, а҆́ще бо и҆ па́ки возмо́жете, па́ки побѣжде́ни бꙋ́дете. И҆ и҆́же а҆́ще совѣ́тъ совѣщава́сте, разори́тъ гдⷭ҇ь, ꙗ҆́кѡ съ на́ми бг҃ъ є҆́сть, бг҃ъ низве́ржєнныѧ возставлѧ́ѧй, и҆ ᲂу҆строѧ́ѧй врагѝ на́шѧ пла́кати, внегда̀ бы́хомъ ка́ѧлисѧ.

л҃. Невозмо́жно є҆́сть без̾ печа́ли прейтѝ наказꙋ́емомꙋ во и҆скꙋше́нїихъ: и҆ посе́мъ мно́гїѧ ра́дости и҆сполнѧ́ютсѧ такові́и, и҆ сле́зъ сла́дкихъ, и҆ разꙋмѣ́нїй бж҃е́ственныхъ, є҆ли́цы воздѣ́лаша болѣ́знь и҆ ско́рбь въ сердца́хъ свои́хъ.

л҃а. А҆́ще хотѧ̀ і҆саа́къ: и҆ течѧ̀ нѣ́когда и҆са́ѵъ къ жела́нїю благослове́нїѧ погрѣши́ста¹⁰²⁶: ми́лꙋющагѡ бг҃а и҆ бл҃гословѧ́щагѡ дх҃омъ помазꙋ́ющагѡ. Не є҆гѡ́же мы̀ всѧ́кѡ восхотѣ́хомъ, но є҆го́же бг҃ъ, пре́жде не́же созда́ти пред̾ꙋста́ви въ слꙋже́нїе. Ника́коже да смѧте́мсѧ нижѐ ᲂу҆́бѡ зави́дѣти да и҆́мамы, є҆гда̀ ᲂу҆ви́димъ бра́тїю нѣ́кꙋю ᲂу҆ми́льнꙋ и҆ малѣ́йшꙋ въ добродѣ́тели пред̾ꙋспѣ́вшꙋю. Слы́шалъ є҆сѝ и҆ гдⷭ҇а глаго́лющаго: Да́ждь семꙋ̀ мѣ́сто, ꙗ҆́коже сѣ́сти вы́ше¹⁰²⁷. Оу҆дивлѧ́емсѧ же па́че ѡ҆ си́хъ сꙋдїѝ премꙋ́дрѣ и҆ неизрече́ннѡ сꙋди́вшꙋ, ѻ҆́номꙋ ᲂу҆̀бо малѣ́йшемꙋ и҆ послѣ́днемꙋ пе́рвенствовати и҆ наставлѧ́ти: на́мъ же послѣ̑днимъ бы́ти, по́стничествомъ и҆ вре́менемъ па́че ѻ҆́нагѡ пе́рвенствꙋющымъ. Коемꙋ́ждо бо человѣ́кꙋ, ꙗ҆́коже раздѣлѝ гдⷭ҇ь, та́кѡ и҆ ходи́ти да и҆́мамы: А҆́ще дꙋ́хомъ живе́мъ, дꙋ́хомъ и҆ да хо́димъ¹⁰²⁸, по пи́санномꙋ.

л҃в. Никогда́же прїе́мли сꙋ́щаго въ повинове́нїи твое́мъ, да́ждь мѝ, глаго́люща тебѣ̀, вла́сть нѣ́кое вре́мѧ на добродѣ́тель, сїю̀, и҆лѝ сїю̀ ве́щь и҆скꙋси́ти, и҆ та́кѡ и҆спра́вити: та́кѡ бо глаго́лѧй, ꙗ҆́вѣ є҆́сть, ꙗ҆́кѡ свою̀ соверша́ѧй во́лю и҆ добрѣ́йшагѡ повинове́нїѧ сло́ги¹⁰²⁹ ѿме́щетъ.

л҃г. Стра̑сти ᲂу҆́бѡ пло́ти и҆ дꙋшѝ, ꙗ҆́коже ᲂу҆́зриши, вре́менемъ, и҆ бж҃е́ственнымъ ма́нїемъ¹⁰³⁰ потребѧ́тсѧ, а҆́ще и҆ приращє́ны¹⁰³¹ сꙋ́ть: ми́лость же хрⷭ҇то́ва никогда́же разори́тсѧ: ми́лость бо гдⷭ҇нѧ, ѿ вѣ́ка сегѡ̀ и҆ до вѣ́ка бꙋ́дꙋщагѡ на боѧ́щихсѧ є҆гѡ̀¹⁰³².

л҃д. Сокрѡ́вища ца̑рска ᲂу҆мно́жатсѧ зла́та, и҆ ᲂу҆́мове сꙋ́щихъ вои́стиннꙋ и҆́нѡкъ и҆спо́лнѧтсѧ ра́зꙋма.

л҃є. Ѻ҆вогда̀ ᲂу҆чи́тель въ безче́стїе предае́тсѧ за дꙋхо́внѣ по́льзовавшихсѧ и҆скꙋшє́нїѧ терпѧ̀: мы́ бо глаго́летъ, безче́стни и҆ безче́стими па́костникомъ и҆ не́мощни: вы́ же сла́вни и҆ крѣ́пцы ѡ҆ хрⷭ҇тѣ̀ є҆стѐ¹⁰³³.

л҃ѕ. И҆сто́чникъ и҆ подло́гъ¹⁰³⁴, є҆́же пло́тїю тлѣ́нїѧ стра́стный по́мыслъ, є҆го́же покаѧ́нїемъ и҆зпредѣлѧ́етъ¹⁰³⁵ ѿ дꙋшѝ, тре́звенъ бы́вый по паде́нїи: до́брѣ бо пла́касте па́че, да и҆́зметсѧ ѿ среды̀ ва́съ под̾ꙋсти́вый дѣ́ло сїѐ содѣ́ѧти лꙋка́вый и҆ неподо́бный по́мыслъ¹⁰³⁶. Тѣ́мже пла́чь сопротивлѧ́етсѧ дꙋ́хꙋ тлѣ́нїѧ.

л҃з. Кто̀ возвѣсти́тъ и҆згнѣте́нномꙋ безсла́вїемъ и҆ безси́лїемъ добродѣ́телей, ꙗ҆́кѡ ᲂу҆́зритъ і҆и҃са не то́чїю въ бꙋ́дꙋщемъ, но и҆ здѣ̀ ᲂу҆жѐ съ си́лою и҆ сла́вою вели́кою грѧдꙋ́ща къ немꙋ̀ безстра́стїемъ. Ꙗ҆́коже рещѝ ꙗ҆́кѡ са́рра дꙋшѝ въ непло́дствѣ состарѣ́вшейсѧ, и҆ па́че ча́ѧнїѧ ро́ждшей сы́на пра́вды, ꙗ҆́кѡ смѣ́хъ мнѣ̀ сотворѝ бг҃ъ: си́рѣчь, велича́йшꙋ ра́дость дарова̀ мно́жайшими лѣ́ты ѡ҆печа́ленномꙋ многостра́стїемъ. И҆лѝ ꙗ҆́коже и҆́нъ толкова́тель и҆здадѐ: мла́дость мнѣ̀ сотворѝ бг҃ъ: си́рѣчь, ѡ҆бнови́сѧ ꙗ҆́кѡ ѻ҆́рлѧ ю҆́ность моѧ̀¹⁰³⁷, ѡ҆бетша́вшаѧ пре́жде во грѣсѣ́хъ и҆ страсте́хъ безче́стїѧ: ны́нѣ бо па́ки роди́хсѧ, и҆ па́ки ю҆́нъ є҆́смь и҆ мѧ́гокъ ѡ҆жесточе́нный пре́жде вещество́мъ, и҆ гла́дцѣ ви́ждꙋ ны́нѣ про́чее ꙗ҆̀же въ мі́рѣ вє́щи: прїе́мь є҆́же по є҆стествꙋ̀ про́стое неразли́чное здра́вꙋ бы́вшꙋ ᲂу҆мꙋ̀ многомилосе́рдїемъ бж҃їимъ. И҆ бы́сть пло́ть моѧ̀ ꙗ҆́коже неема́на сѷрі́анина, ꙗ҆́коже младе́нцєвъ, за є҆́же и҆змы́тисѧ мѝ во і҆ѻрда́нѣ ра́зꙋма, и҆ є҆́смь є҆диномы́сленъ благода́тїю бж҃їею, и҆зба́вленъ совѣ́та ѕмі́ева и҆ полка̀, и҆́хже проти́вꙋ є҆стествꙋ̀ стѧжа́въ пе́рвѣе многоискꙋ́сныхъ же и҆ многовеще́ственныхъ пѡ́мыслъ ѕло́бы.

л҃и. Вмѣнѝ къ тебѣ̀ глаго́лати гдⷭ҇ꙋ, ꙗ҆́кѡ во вре́мѧ нѣ́кое ѿѧ́хъ ѿ тебѐ сїѐ и҆ сїѐ дарова́нїе, ѡ҆ ни́хже непщева́лъ є҆сѝ ᲂу҆́мъ тво́й и҆звѣ́ствовати и҆ почива́ти: да́хъ же тебѣ̀ вмѣ́стѡ си́хъ и҆́но равнова́жно дарова́нїе сїѐ и҆ сїѐ. Ты́ же ѿѧ̑таѧ ᲂу҆́бѡ помышлѧ́ѧ: да̑ннаѧ же па́че ѻ҆́нѣхъ не созира́ѧ, дрѧ́хлꙋеши и҆ болѣ́знꙋеши и҆ печа́лїю ᲂу҆ѧзвлѧ́ешисѧ. Но весели́ши мѧ̀, прїе́млѧ ско́рбь ѿ менѐ¹⁰³⁸: ско́рбь бо творю̀ а҆́зъ на по́льзꙋ, спастѝ па́че, а҆ не погꙋби́ти ᲂу҆строѧ́ѧ вмѣне́ннаго мѝ сы́на.

л҃ѳ. Заповѣ́ждь себѣ̀ и҆ ᲂу҆зако́ни не ꙗ҆́сти ры́бы, и҆ назира́й по си́хъ, ꙗ҆́кѡ къ жела́нїю ры́бы неѡсла́бнѡ вра́гъ порѣва́етъ тѧ̀, и҆ ты̀ па́ки подо́бнѣ къ наслажде́нїю нево́льнагѡ тебѣ̀ неи́стовнѡ тщи́шисѧ, ꙗ҆́кѡ да наꙋча́ешисѧ ѡ҆ а҆да́млихъ ѡ҆бра́знѣ слꙋ́чаѧхъ: слы́шавъ бо ѻ҆́нъ, да не ꙗ҆́си ѿ сеѧ̀ є҆ди́ныѧ ве́щи, на сїю̀ па́че со мно́гимъ жела́нїемъ є҆ди́нꙋ ѿрече́ннꙋю¹⁰³⁹ потечѐ.

м҃. И҆на́го ᲂу҆́бѡ ра́зꙋмомъ бг҃ъ спаса́етъ, а҆ и҆на́го простото́ю и҆ неѕло́бїемъ: вѣ́дѣти бо до́лженъ є҆сѝ, ꙗ҆́кѡ не ѿри́нетъ бг҃ъ неѕло́биваго.

м҃а. Є҆ли́цы моли́твꙋ ѕѣ́льнее ᲂу҆потреблѧ́ютъ, сі́и ѿ стра́шныхъ и҆ свирѣ́пыхъ и҆скꙋше́нїй плѣнѧ́еми сꙋ́ть.

м҃в. А҆́ще въ безстра́стїе произво́лилъ є҆сѝ ѡ҆дѣ́ѧтисѧ, не без̾ попече́нїѧ бꙋ́ди, но и҆ є҆ли́ка си́ла, тщи́сѧ сїѐ полꙋчи́ти: воздыха́емъ бо, въ жили́ще на́ше небе́сное ѡ҆блещи́сѧ жела́юще. Да поже́рто бꙋ́детъ не то́чїю тѣле́снѣ по сконча́нїи вѣ́ка, но и҆ здѣ̀ ᲂу҆жѐ мы́сленнѣ во ѡ҆брꙋче́нїи ме́ртвенное живото́мъ¹⁰⁴⁰: поже́рта бо бы́сть сме́рть побѣ́дою¹⁰⁴¹, и҆ пожє́рты бꙋ́дꙋтъ всѝ є҆гѵ́птѧне ѡ҆скорблѧ́ющїи на́съ и҆ гонѧ́щїи въ слѣ́дъ на́съ, волна́ми съ небесѐ на́мъ низпѡ́сланныѧ си̑лы.

м҃г. А҆́ще забꙋ́деши ре́кшагѡ: ꙗ҆́кѡ бою́сѧ, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́дꙋ¹⁰⁴²: и҆ мнѧ́йсѧ стоѧ́ти, да блюде́тсѧ да не паде́тъ: и҆, ты̀ дꙋхо́вный, блюды́й себѐ, да не и҆ ты̀ и҆скꙋше́нъ бꙋ́деши¹⁰⁴³: и҆ а҆́ще забꙋ́деши соломѡ́ново по толи́цѣй благода́ти ᲂу҆клоне́нїе и҆ беззако́нїе: и҆ а҆́ще забве́нїю преда́си неча́ѧнное вели́кагѡ петра̀ ѿверже́нїе¹⁰⁴⁴: возꙋпова́й на ра́зꙋмъ тво́й, и҆ велехвали́сѧ ѡ҆ жи́тельствѣ, и҆ вре́мени мно́гагѡ по́стничества твоегѡ̀ велемꙋ́дрствꙋй, и҆ да́си мѣ́сто го́рдости. Но ника́коже взна́къ да возлѧ́гнеши, ѽ бра́те, бо́йсѧ же па́че, доне́лѣже дыха́еши, а҆́ще и҆ въ число̀ дости́глъ є҆сѝ мѡѷсе́евыхъ лѣ́тъ, и҆ моли́сѧ, глаго́лѧ: гдⷭ҇и, не ѿве́ржи менѐ во вре́мѧ ста́рости моеѧ̀, внегда̀ ѡ҆скꙋдѣва́ти крѣ́пости мое́й, не ѡ҆ста́ви менѐ бж҃е сп҃си́телю мо́й¹⁰⁴⁵. Ѡ҆ тебѣ̀ пѣ́нїе моѐ вы́нꙋ¹⁰⁴⁶.

м҃д. Глаго́летъ тебѣ̀ гдⷭ҇ь, ꙗ҆́коже матѳе́ю, по мнѣ̀ грѧдѝ. Ты̀ ᲂу҆̀бо твоегѡ̀ многовожделѣ́ннагѡ ᲂу҆се́рдїемъ въ слѣ́дъ теча̀ влⷣки, а҆́ще на пꙋтѝ жите́йстѣмъ преткне́ши ѡ҆ ка́мень стра́стенъ но́гꙋ твою̀, и҆ паде́ши во грѣ́хъ неча́ѧннѡ: и҆лѝ мно́жицею тимѣ̑ннымъ ѡ҆брѣта́ющымсѧ мѣстѡ́мъ, ꙗ҆́коже не хотѣ́лъ є҆сѝ, поползнꙋ́лсѧ є҆сѝ и҆ па́лъ, є҆ли́жды а҆́ще слꙋчи́тсѧ па́сти же и҆ помꙋ́чити тѣ́ло, толи́кожды воста́въ, тѣ́мже ᲂу҆се́рдїемъ въ слѣ́дъ тецы̀ своегѡ̀ гдⷭ҇а, до́ндеже пости́гнеши є҆го̀. Та́кѡ во свѧтѣ́мъ помышле́нїи ꙗ҆ви́хсѧ тебѣ̀, ви́дѣти спаса́ющꙋю мѧ̀ си́лꙋ и҆ сла́вꙋ, и҆ ѡ҆ и҆́мени твое́мъ гдⷭ҇и воздежꙋ̀ рꙋ́цѣ моѝ¹⁰⁴⁷. И҆ возмню̀ и҆ вознепщꙋ́ю тꙋ́ка и҆ ма́сти и҆сполнѧ́тисѧ, и҆ возра́дꙋютсѧ ᲂу҆стнѣ̀ моѝ пою́ще тебѣ̀. Ве́лїе бо мѝ є҆́сть, ꙗ҆́кѡ прозва́хсѧ хрїстїа́нинъ, ꙗ҆́коже глаго́летъ мѝ гдⷭ҇ь и҆са́їемъ: Ве́лїе тѝ є҆́сть, є҆́же назва́тисѧ тебѣ̀ рабо́мъ мои́мъ¹⁰⁴⁸.

м҃є. Нѣ́гдѣ ᲂу҆́бѡ глаго́летъ, ꙗ҆́кѡ да́стъ бла̑га ѻ҆ц҃ъ просѧ́щымъ ᲂу҆ негѡ̀¹⁰⁴⁹: нѣ́гдѣ же, ꙗ҆́кѡ да́стъ дх҃а ст҃а́го молѧ́щымсѧ. И҆́миже глагѡ́лы разꙋмѣ́емъ не то́кмѡ прегрѣше́нїй ѡ҆ставле́нїе, но и҆ нбⷭ҇ныхъ дарова́нїй подаѧ́нїе полꙋча́ти моле́бникѡмъ бж҃їимъ, ᲂу҆крѣплѧ́ющымсѧ таково́ю мы́слїю: ꙗ҆́кѡ не пра́ведникѡмъ, но грѣ́шникѡмъ такѡва̀ бла̑га ѡ҆бѣщава́етъ гдⷭ҇ь: а҆́ще бо вы̀, глаго́летъ, ѕлѝ сꙋ́ще, ᲂу҆мѣ́ете даѧ̑нїѧ бла̑га даѧ́ти ча́дѡмъ ва́шымъ, кольмѝ па́че ѻ҆ц҃ъ ва́шъ небе́сный да́стъ просѧ́щымъ ᲂу҆ негѡ̀ дх҃а ст҃а́го¹⁰⁵⁰. Просѝ ᲂу҆̀бо неѡсла́бнѡ, и҆ несꙋмнѣ́ннымъ произволе́нїемъ, а҆́ще и҆ хꙋ́дъ є҆сѝ въ добродѣ́тельномъ жи́тельствѣ, и҆ ѕѣлѡ̀ безси́ленъ, и҆ па́че досто́инства, и҆ прїи́меши вели̑каѧ.

м҃ѕ. Ка́кѡ бы мо́глъ вѣ́ровати невѣ́рный и҆лѝ маловѣ́рный, ꙗ҆́кѡ мра́вїй воскрилѧ́етсѧ, и҆ че́рвь нѣ́кїй пти́ца быва́етъ, и҆ ꙗ҆́кѡ и҆́на мнѡ́жайша пресла́внѡ быва́ютъ во тва́ри: да понѐ та́кѡ ѿложи́въ невѣ́рїѧ недꙋ́гъ и҆ безнаде́жїѧ, крилѣ̀ и҆зрасти́тъ про́чее, и҆ прораща́етъ ꙗ҆́кѡ дре́во всехва́льный ра́зꙋмъ¹⁰⁵¹. А҆́зъ бо є҆́смь, глаго́летъ, дре́во сꙋхо́е, прораща́ѧй и҆ ѡ҆животворѧ́ѧй и҆зсо́хшыѧ кѡ́сти¹⁰⁵².

м҃з. Ника́коже потре́бы ра́ди тѣлесѐ попече́нїи восхощи́мъ та́ѧти, все́ю же дꙋше́ю ᲂу҆вѣ́римъ бг҃ови: ꙗ҆́коже нѣ́кїй нѣ́когда глаго́ла мꙋ́жъ бла́гъ: Оу҆вѣ́рите бг҃ови, и҆ ᲂу҆вѣ́рено бꙋ́детъ ва́мъ. И҆ ꙗ҆́коже пи́шетъ блаже́нный пе́тръ а҆пⷭ҇лъ: Оу҆цѣломꙋ́дритесѧ и҆ трезви́тесѧ въ моли́твахъ¹⁰⁵³: и҆, всю̀ ва́шꙋ печа́ль на бг҃а возве́ргше, ꙗ҆́кѡ то́й пече́тсѧ ѡ҆ ва́съ¹⁰⁵⁴. А҆́ще же є҆щѐ сꙋмни́шисѧ и҆ не вѣ́рꙋеши, ꙗ҆́кѡ ѿню́дъ пече́тсѧ то́й ѡ҆ тебѣ̀, во є҆́же пропита́ти тѧ̀, воззрѝ на паꙋка̀, и҆ разсмотрѧ́й, коли́кѡ человѣ́къ паꙋка̀ ра́знствꙋетъ, паꙋка̀ глаго́лю, є҆гѡ́же ничто́же не́мощнѣйше, нижѐ безси́льнѣйше: се́й во ни стѧжа̑нїѧ и҆мѣ́ѧ, ни чрезмѡ́рнаѧ ѿшє́ствїѧ творѧ̀, ни сꙋдѧ́сѧ, ни гнѣ́ваѧсѧ, ни жи̑тницы и҆мѣ́ѧ, во всеконе́чнѣй кро́тости и҆ цѣломꙋ́дрїи, и҆ кра́йнѣмъ безмо́лвїи своѐ под̾изводѧ̀ житїѐ: ѿню́дъ ни ꙗ҆̀же бли́жнихъ любопы́тствовавъ, є҆ди̑на же своѧ̑ дѣ́йствꙋѧ, дѣ́ломъ свои́мъ ти́хо нѣ́кое и҆ немѧте́жно ᲂу҆потреблѧ́етъ ᲂу҆строе́нїе: то́чїю и҆ гла́съ не и҆спꙋща́ѧ честолюби̑вымъ ѡ҆ пра́здности, ꙗ҆́кѡ всѧ́къ человѣ́къ пра́зденъ бы́ти хотѧ́й, нижѐ ꙗ҆́сти да восхо́щетъ¹⁰⁵⁵. Толи́кѡ же молчи́тъ, ꙗ҆́коже пѷѳагѡ́ра превосходи́тельнѡ побѣди́ти, є҆мꙋ́же є҆́ллини па́че всѣ́хъ любомꙋ́дрцєвъ ᲂу҆дивлѧ́ютсѧ, за є҆́же воздержа́нїю ѧ҆зы́ка и҆з̾ꙋчи́тисѧ. Пѷѳагѡ́ръ ᲂу҆́бѡ про́чее не со всѣ́ми глаго́лаше, но ᲂу҆́бѡ съ возлю́бленнѣйшими є҆мꙋ̀ человѣ́ки бесѣ́доваше ѡ҆́тай вре́менемъ, и҆ вола́мъ же мно́жицею и҆ ѻ҆рла́мъ провѣща̀ любоче́стнѣ блѧдѣ̑нїѧ нѣ̑каѧ и҆ безꙋ́мствѡванїѧ. Вїна́ же ѿню́дъ ᲂу҆далѧ́ѧсѧ, во́дꙋ ᲂу҆потреблѧ́ше. Се́й же преимꙋ́ществꙋющимъ и҆ кра́йнимъ безгла́сїемъ превзы́де пѷѳагѡ́рово ѧ҆зы́ка воздержа́нїе, заплева́ же съ вїнопи́тїемъ и҆ водопи́тїе. Въ таково́мъ же ᲂу҆̀бо ᲂу҆строе́нїи безмо́лвнѣ пребыва́ющꙋ немощно́мꙋ и҆ смире́нномꙋ паꙋкꙋ̀, и҆ нигдѣ́же внѣ̀ терпѧ́щꙋ ходи́ти, нижѐ ѻ҆́крестъ скита́тисѧ здѣ̀ и҆ ѻ҆́ндѣ мечта́тельнѣ, нижѐ трꙋди́тисѧ и҆ ѕлострада́ти безконе́чнѡ, и҆́же на высо́кихъ живы́й, и҆ на смирє́ннаѧ призира́ѧй гдⷭ҇ь, (ничто́же бо паꙋка̀ є҆́сть смире́ншее), и҆ да́же до тогѡ̀ простира́ѧ про́мыслъ: посыла́етъ семꙋ̀ на всѧ́къ де́нь пи́щꙋ, близ̾ ски́нїйцы є҆гѡ̀ ᲂу҆строѧ́ѧ впа́дати во мре́жы сегѡ̀, ꙗ҆̀же къ потре́бѣ ма̑лаѧ живѡ́тна.

м҃и. Но не́гли рече́тъ кто̀ ѿ гортанобѣ́сїемъ порабоще́нныхъ, ꙗ҆́кѡ а҆́зъ ѕѣлѡ̀ мно́гѡ ꙗ҆́мъ, и҆ поне́же мно́гѡ и҆ждиви́теленъ є҆́смь, нꙋ́жда мѝ є҆́сть безчи́сленными жите́йскими кꙋ́плѧми ѡ҆бѧ́зоватисѧ. Но и҆ се́й да смотрѧ́етъ ки́ты вели̑кїѧ во а҆тланті́йстѣй пасꙋ́щыѧсѧ пꙋчи́нѣ ѿ бг҃а и҆з̾ѻби́льнѡ пита́ємыѧ, и҆ никогда́же гла́да и҆скꙋ́съ прїе́мшыѧ. Толи́кѡ во кі́йждо ѿ тѣ́хъ ѕвѣ̑рь поглоща́етъ ры̑бы, є҆ли́кѡ нижѐ гра́дъ нѣ́кїй многочеловѣ́ченъ на всѧ́къ де́нь и҆жди́ти мо́жетъ. Всѧ̑ къ тебѣ̀ ча́ютъ, да́ти пи́щꙋ и҆̀мъ во бла́го вре́мѧ¹⁰⁵⁶. Тѣ́мже и҆ многоѧдꙋ́щаго, и҆ малопи́щнаго бг҃ъ є҆́сть пита́ѧй. Сїѧ̑ слы́шавъ и҆ са́мъ широ́кое и҆ простра́нное и҆мы́й чре́во, бг҃ови и҆ вѣ́рѣ про́чее всего̀ себѐ возложѝ, всѧ́ческое ѿтрѧ́съ мїрско́е попече́нїе, и҆ ᲂу҆́мъ многопопечи́теленъ, и҆ не бꙋ́ди не вѣ́ренъ, но вѣ́ренъ.

м҃ѳ. А҆́ще хо́щемъ вои́стиннꙋ благоꙋгоди́ти бг҃ꙋ, и҆ блаже́ннѣйшимъ возлю́блени бы́ти любле́нїемъ, на́гъ ᲂу҆́мъ на́шъ бг҃ови предста́вимъ, ничи́мже привлачи́мь присꙋ́щагѡ вѣ́ка, ни хꙋдо́жествомъ, ни ра́зꙋмомъ, ни и҆змꙋ́дрствованїемъ, ни словоѡправда́нїемъ, а҆́ще и҆ все́й нака́зани бꙋ́демъ премꙋ́дрости мі́ра. Ѿвраща́етсѧ бо бг҃ъ съ мнѣ́тельнымъ нра́вомъ пристꙋпа́ющихъ къ немꙋ̀, и҆ тщесла́вїемъ ᲂу҆питава́емыхъ и҆ надме́нныхъ: до́брѣ бо нѣ́цыи ѿ сказа́телей, ᲂу҆пита́тельство и҆ дме́нїе, сꙋ́етное и҆здадо́ша мнѣ́нїе.

н҃. Ка́кѡ возмоглѝ бы́хомъ боре́нїемъ побѣди́ти пред̾ꙋдержа́вшїй грѣ́хъ; нꙋ́жды потре́ба: мꙋ́жъ бо, глаго́летъ, во трꙋдѣ́хъ трꙋди́тсѧ, и҆ понꙋжда́етсѧ поги́бель свою̀ любопрѧ́сѧ всегда̀ возрѣва́ти къ ст҃ы́нѣ свои́хъ пѡ́мыслъ. Нꙋ́ждою же нꙋ́ждꙋ рѣши́ти не ѿрече́но є҆́сть зако́ны. Про́чее а҆́ще ᲂу҆́бѡ и҆ вно́симъ нꙋ́ждꙋ нѣ́коегѡ тща́тельства, а҆́ще и҆ немощнѣ́йшꙋ, ѡ҆жида́емъ же про́чее и҆мꙋ́щыѧ найтѝ на ны̀ съ высоты̀ си̑лы, сѣдѧ́ще во і҆ерꙋсали́мѣхъ¹⁰⁵⁷, си́рѣчь въ непреста́ннѣй моли́твѣ и҆ и҆нѣ́хъ добродѣ́телехъ: когда̀ прїи́детъ къ на́мъ нꙋ́ждою крѣ́пкою, ниже́ бо немощнѣ́йшею, по на́шей нꙋ́ждѣ дѣ́лающею, но нꙋ́ждою нѣ́коею и҆зглаго́латисѧ не могꙋ́щею плотски́ма ᲂу҆стна́ма: побѣжда́ющею мно́гою держа́вою¹⁰⁵⁸ и҆ ѡ҆долѣва́ющею ѕлѣ́йшїй же нра́въ и҆ бѣсо́вское ѡ҆ѕлобле́нїе: побѣжда́ющею же и҆ къ го́ршемꙋ ᲂу҆клоне́нїе дꙋ́шъ на́шихъ, побѣжда́ющею же и҆ неподѡ́бнаѧ тѣлесѐ движє́нїѧ. Бы́сть бо, глаго́летъ, шꙋ́мъ съ небесѐ ꙗ҆́кѡ носи́мꙋ дыха́нїю бꙋ́рнꙋ¹⁰⁵⁹: да и҆зве́ржетъ ѕло́бꙋ при́снѡ на го́ршее нꙋ́дѧщꙋю на́съ.

н҃а. Лови́тъ вра́гъ, ꙗ҆́кѡ ле́въ во ѡ҆гра́дѣ свое́й¹⁰⁶⁰, и҆ кры́етъ на́мъ сѣ̑ти и҆ мрє́жи пѡ́мыслъ нечи́стыхъ и҆ нечести́выхъ: но и҆ мы̀ а҆́ще не спи́мъ, возмо́жемъ бо́льшы и҆ лютѣ́йшы томꙋ̀ поставлѧ́ти сѣ̑ти и҆ мрє́жи и҆ подса̑ды: моли́тва бо и҆ ѱало́мъ, бдѣ́нїе же и҆ смиренномꙋ́дрїе, и҆ є҆́же къ бли̑жнимъ слꙋже́нїе, и҆ ми́лость, и҆ благодаре́нїе, и҆ бж҃е́ственныхъ слове́съ слы́шанїе, подса́да врагꙋ̀ и҆ сѣ́ть и҆ ꙗ҆́ма и҆ ра̑ны и҆ ᲂу҆да́ва и҆ мрє́жы быва́ютъ.

н҃в. Во мно́зѣ¹⁰⁶¹ ѕѣлѡ̀ во́зрастомъ пред̾ꙋспѣ́въ бж҃е́ственный даві́дъ, благодарѧ̀ и҆збра́вшемꙋ и҆̀ бг҃ꙋ, глаго́летъ ѡ҆ коне́чныхъ благослове́нїѧ: ꙗ҆́кѡ ны́нѣ ѡ҆брѣ́те ра́бъ тво́й се́рдце своѐ помоли́тисѧ моли́твою се́ю. Сїе́ же рече́сѧ, да мы̀ ᲂу҆разꙋмѣ́емъ, ꙗ҆́кѡ мно́га по́двига и҆ вре́мене потре́ба въ моли́твахъ. Ꙗ҆́кѡ да є҆два̀ ѡ҆брѧ́щемъ нестꙋжа́емое ᲂу҆ма̀ ᲂу҆строе́нїе, и҆́но нѣ́кое серде́чно не́бо, и҆дѣ́же живе́тъ хрⷭ҇то́съ, ꙗ҆́коже глаго́летъ а҆пⷭ҇лъ: И҆лѝ не зна́ете, ꙗ҆́кѡ і҆и҃съ хрⷭ҇то́съ живе́тъ въ ва́съ¹⁰⁶²;

н҃г. А҆́ще хрⷭ҇то́съ на́мъ бы́сть пра́вда и҆ премꙋ́дрость, и҆ прѡ́чаѧ: ꙗ҆́вѣ, ꙗ҆́кѡ и҆ поко́й¹⁰⁶³. Прїиди́те бо, глаго́летъ, ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ᲂу҆поко́ю вы̀¹⁰⁶⁴. До́брѣ ᲂу҆̀бо рече́сѧ, ꙗ҆́кѡ сꙋббѡ́та, си́рѣчь поко́й, человѣ́ка ра́ди бы́сть: въ са́момъ бо є҆ди́номъ хрⷭ҇тѣ̀ поко́й полꙋ́читъ человѣ́ческїй ро́дъ.

н҃д. Ꙗ҆́коже є҆́сть ча́ша паде́нїѧ и҆ ча́ша ꙗ҆́рости, та́кѡ є҆́сть и҆ не́мощи ча́ша, ю҆́же взе́мь ѿ на́съ гдⷭ҇ь въ прили́чествꙋющее вре́мѧ, дае́тъ въ рꙋ́ки вра̑гъ на́шихъ: да про́чее не ктомꙋ̀ мы̀, но бѣ́си и҆знемога́ютъ и҆ па́даютъ.

н҃є. Ꙗ҆́коже во внѣ́шнихъ веще́хъ сꙋ́ть торжницы̀¹⁰⁶⁵ тка́тели, ловцы̀, ра́тницы, соѻрꙋжи́тели: та́кѡ и҆ во внꙋ́треннихъ разꙋмѣва́й, ꙗ҆́кѡ сꙋ́ть и҆ въ помышле́нїихъ, котѡ́рницы, ѡ҆бава́тели, морсті́и разбо́йницы, лови́тели, скверни́тели, ᲂу҆бі́йцы, и҆ прѡ́чаѧ: и҆̀хже подоба́етъ ско́рѡ предзатворѧ́ти¹⁰⁶⁶ внѣ̀ благочести́вымъ сопротиворѣ́чїемъ и҆ моли́твою, и҆ па́че же скверни́телей: да не ѡ҆сквернѧ́тъ ст҃о́е мѣ́сто, и҆ да не ѡ҆сквернѧ́тъ человѣ́ка бж҃їѧ.

н҃ѕ. Не то́кмѡ ѧ҆зы́комъ разбо́йничествꙋемь є҆́сть гдⷭ҇ь, ко є҆́же спастѝ, ꙗ҆́коже на разбо́йницѣ бы́сть, и҆́же вопїѧ́ше ѿ креста̀, но и҆ по́мысломъ: глаго́лаше бо, речѐ, въ себѣ̀ кровоточи́ваѧ, а҆́ще прикоснꙋ́сѧ воскри́лїю ри́зъ є҆гѡ̀, спасе́на бꙋ́дꙋ. И҆ ра́бъ а҆враа́мовъ ѡ҆ реве́ккѣ глаго́лѧ бг҃ови во ᲂу҆мѣ̀¹⁰⁶⁷.

н҃з. Ꙗ҆́снѣ са́мой то́й грѣ́хъ къ бг҃ꙋ приво́дитъ раскаѧва́ющагосѧ, чꙋ́вство прїе́млющаго ѕлосмра́дїѧ и҆ тѧ́жести и҆ неи́стовства є҆гѡ̀: не хотѧ́щаго же къ покаѧ́нїю преклони́тисѧ, не приво́дитъ къ бг҃ꙋ: ᲂу҆ себе́ же па́че держа̀, ᲂу҆́зами нерѣши́мыми свѧзꙋ́етъ, крѣ́пльша и҆ лютѣ́йша про́чее жела̑нїѧ поги́бели дѣ́лаѧ.

н҃и. Внемлѝ себѣ̀ ѿ чарѡ́въ і҆езаве́линыхъ¹⁰⁶⁸, ꙗ҆̀же па́че сꙋ́ть по́мыслы, кичє́нїѧ и҆ сꙋ̑етныѧ сла̑вы. Возмо́жеши же сїѧ̑ ѡ҆долѣ́ти благода́тїю бж҃їею, ᲂу҆ничижа́ѧ дꙋ́шꙋ, и҆ ѡ҆хꙋжда́ѧ тꙋ̀, и҆ поверга́ѧ себѐ пред̾ гдⷭ҇емъ, и҆ призыва́ѧ є҆го̀, во є҆́же помощѝ тебѣ̀, и҆ вѣ́даѧ, ꙗ҆́кѡ небє́сна сꙋ́ть дарова̑нїѧ. Тѣ́мже глаго́летъ: никто́же мо́жетъ прїима́ти ничесѡ́же, а҆́ще не бꙋ́детъ дано̀ є҆мꙋ̀ съ небесѐ¹⁰⁶⁹.

н҃ѳ. Глаго́летъ зако́нъ: а҆́ще же бꙋ́дꙋтъ свидѣ́тельствовавше є҆мꙋ̀, и҆ не потреби́тъ є҆го̀, да ѿда́стъ. Ѻ҆вогда̀ на ᲂу҆чрежде́нїи предска́четъ тщесла́вный по́мыслъ возглаго́лати хотѧ̀ внѣ̀ вре́мене: засвидѣ́тельствꙋютъ же тебѣ̀ а҆́гг҃льстїи по́мыслы потреби́ти блѧдолюби́вый и҆ безвре́менный по́мыслъ. А҆́ще ᲂу҆́бѡ не потреби́ши є҆го̀ благи́мъ молча́нїемъ, но попꙋ́стиши є҆мꙋ̀ произы́ти на внѣ́шнее, напыще́нъ бы́въ киче́нїемъ, тогда̀ про́чее возда́си до́лгъ, и҆лѝ грѣхꙋ̀ вели́кꙋ сꙋдо́мъ пре́данъ бы́въ, и҆лѝ тѧ́жкимъ нѣ̑кимъ болѣ́знемъ тѣлє́снымъ: и҆лѝ ча̑стымъ бра́тїй прираже́нїѧмъ: и҆лѝ є҆́же въ бꙋ́дꙋщемъ вѣ́цѣ мꙋче́нїю: и҆́бо и҆ ѡ҆ пра́зднѣ и҆ тщесла́внѣ сло́вѣ сло́во возда́мы за ѧ҆зы́ка ненаказа́нїе: тѣ́мже подоба́етъ ѧ҆зы́къ на́шъ тре́звеннѣ храни́ти.

ѯ҃. Є҆ли́цы сластьмѝ и҆скꙋша́еми сꙋ́ть и҆ ꙗ҆́ростьми и҆ славолю́бїемъ и҆ про́чими, сі́и глаго́лютсѧ со́лнцемъ ᲂу҆́бѡ во днѝ ѡ҆жига́тисѧ, но́щїю же лꙋно́ю¹⁰⁷⁰. Помоли́сѧ ᲂу҆̀бо бж҃е́ственнымъ покрове́нъ бы́ти росоиспꙋща́ющимъ ѻ҆́блакомъ, ꙗ҆́кѡ да зно́ѧ врагѡ́въ ᲂу҆бѣжи́ши.

ѯ҃а. Ника́коже на тѧ̀ дерзнове́нїе да́ждь пїѧ́нства защи́тникѡмъ и҆ рабѡ́мъ безчи́нныѧ трапе́зы, нижѐ съ безстꙋ́дїемъ глаго́лати съ тобо́ю хотѧ́щымъ, а҆́ще бы и҆ сѣ́ды лице́мъ бы́ли, а҆́ще бы и҆ мно́го вре́мѧ и҆мѣ́ли во и҆́ночестѣмъ житїѝ, да не по писа́нїю, гни́лость покры́етъ тѧ̀, и҆ нечи́стыми и҆ се́рдцемъ неѡбрѣ́занными сведе́нъ бꙋ́деши.

ѯ҃в. Пре́жде врꙋчи́шасѧ петрꙋ̀ ключѝ, та́же попꙋще́нъ бы́сть па́сти во ѿверже́нїе, ꙗ҆́коже ᲂу҆цѣломꙋ́дритисѧ паде́нїемъ мꙋдрова́нїю. И҆ ты̀ ᲂу҆̀бо, а҆́ще разꙋмѣ́нїѧ клю́чь прїе́мь. и҆ въ разли́чны по́мыслы впа́даеши, не ᲂу҆жаса́йсѧ: сла́ви же є҆ди́наго премꙋ́драго на́шего гдⷭ҇а, паде́нїи ѡ҆бꙋзда́ющаго мнѣ́нїе восходѧ́щее на бж҃е́ственшїй ра́зꙋмъ, и҆скꙋшє́нїѧ бо ᲂу҆зда̀ сꙋ́ть ѡ҆бꙋздова́ти могꙋ́ща человѣ́ческое дме́нїе про́мысломъ бж҃їимъ.

ѯ҃г. А҆́ще дѡ́браѧ мно́жицею ѿ на́съ ѿе́млетъ гдⷭ҇ь ꙗ҆́коже бога́тство і҆́ѡвле: Гдⷭ҇ь бо дадѐ, гдⷭ҇ь взѧ́тъ¹⁰⁷¹: всѧ́кѡ нѣ́гдѣ и҆ ѕла̑ѧ, ꙗ҆̀же на́мъ наведѐ вѣ́чный, ѿ рꙋкѝ на́шеѧ во́зметъ: блага̑ѧ бо, глаго́летъ, и҆ ѕла̑ѧ ѿ гдⷭ҇а. И҆ наводѧ́й на ны̀ ѕла̑ѧ, то́й наведе́тъ на ны̀ и҆ вѣ́чное весе́лїе со сла́вою вѣ́чною. Ꙗ҆́коже бо бдѣ́хъ, глаго́летъ гдⷭ҇ь, во є҆́же низврати́ти, и҆ ѕло̀ сотвори́ти ва́мъ, и҆ па́ки сози́ждꙋ, и҆ не низложꙋ̀, и҆ насаждꙋ̀ и҆ не и҆сто́ргнꙋ. Да молчи́тъ ᲂу҆̀бо наро́днаѧ глаго́лющи при́тча: ѿне́лѣже ѕлѣ̀, нѣ́сть до́брѣ. На го́ршее бо и҆змѣни́вый вє́щи гдⷭ҇ь, мо́жетъ всѧ́кѡ сїѧ̑ па́ки на свѣтлѣ́йшее неча́ѧннѡ прелага́ти.

ѯ҃д. И҆́же на бѣ́сы и҆лѝ воздержа́нїемъ, и҆лѝ моли́твою, и҆ всѧ́кою добродѣ́телїю ѕѣ́льнѣе и҆ рѣти́тельнѣе находѧ́й, глꙋ́бшы ѿ ни́хъ ра̑ны воспрїи́метъ, до́ндеже и҆ въ безнаде́жїе прїитѝ: ѡ҆сꙋжде́нїе мы́сленныѧ сме́рти ᲂу҆смотрѣва́ѧ въ свое́й дꙋшѝ, ꙗ҆́коже приходи́ти глаго́лати є҆мꙋ̀: кто́ мѧ и҆зба́витъ ѿ тѣ́ла сме́рти сеѧ̀¹⁰⁷²; понꙋжда́емь бо є҆́смь нево́льнѡ повинова́тисѧ зако́нѡмъ сꙋпоста́та.

ѯ҃є. Не про́стѣ преднапи́сано бы́сть, ꙗ҆́кѡ нѣ́цыи къ себѣ̀ глаго́лахꙋ: воста́ните, и҆ прїи́демъ къ лю́демъ ᲂу҆пова́ющымъ наде́ждею и҆ молча́щымъ¹⁰⁷³. И҆ па́ки: Прїиди́те возше́дше собесѣ́дꙋимъ съ ни́ми ѧ҆зы́комъ ᲂу҆́мнымъ ле́стнымъ, и҆ ѿврати́мъ ѧ҆̀ къ на́мъ ѿ и҆́стины¹⁰⁷⁴. Лю́тїи бо бѣ́сове ѡ҆быко́ша чрез̾ всю̀ жи́знь на произво́лившихъ безмо́лвное житїѐ и҆з̾ѡщрѧ́ти мечѝ и҆скꙋше́нїй, и҆ неи́стовнѣе наипа́че на благоговѣ́йнѣйшыѧ же и҆ благочести́вѣйшыѧ во́инство ᲂу҆стремлѧ́ти сами́мъ тѣ́мъ дѣ́ломъ въ грѣ́хъ рѣ́юще си́хъ ра́тьми несно́сными. Да не́гли понѐ та́кѡ возмо́гꙋтъ ѿ ꙗ҆́же во хрⷭ҇та̀ вѣ́ры и҆ моли́твы и҆ благонаде́жїѧ ѡ҆ста́вити ра́тѡванныѧ. Но мы̀, ꙗ҆́коже глаго́летъ дв҃дъ, не ѿстꙋ́пимъ ѿ тебѐ, до́ндеже ᲂу҆ще́дриши ны̀, и҆ ᲂу҆далѧ́тсѧ ѿ на́съ поглоща́ющїи ны̀¹⁰⁷⁵. Не ѿстꙋ́пимъ ѿ тебѐ, до́ндеже повели́ши ѿитѝ ѿ на́съ и҆скꙋша́ющымъ ны̀, и҆ ѡ҆живе́мъ терпѣ́нїемъ и҆ крѣ́пкимъ безстра́стїемъ. Зане́же и҆скꙋше́нїе є҆́сть житїѐ человѣ́кꙋ, и҆ во вре́мѧ ᲂу҆чине́нно мно́жицею под̾ но́ги чꙋжды́хъ па́дати ᲂу҆готовлѧ́етсѧ ѿ подвигополо́жника. Великодꙋ́шныѧ же дꙋшѝ и҆ до́блественныѧ сво́йственно є҆́сть не ѿчаѧва́тисѧ въ напа́стѣхъ.

ѯ҃ѕ. А҆́ще толи́кѡ мо́жетъ бѣ́съ, ꙗ҆́кѡ и҆ не хотѧ́щꙋ человѣ́кꙋ престроѧ́ти сего̀, и҆ преводи́ти къ своемꙋ̀ стремле́нїю, ѿ є҆́же по є҆стествꙋ̀ и҆зстꙋ́пльша блага́гѡ ᲂу҆строе́нїѧ: коли́кѡ мо́жетъ а҆́гг҃лъ во ѡ҆предѣле́нное вре́мѧ повелѣ́нїе бж҃їе прїе́мь, всѐ на лꙋ́чшее превестѝ человѣ́че завѣща́нїе¹⁰⁷⁶: А҆́ще всехла́дный сѣ́веръ толи́кѡ возмо́же, ꙗ҆́кѡ въ ка́меннꙋю жесто́кость претвори́ти мѧгча́йшее воды̀ є҆стество̀: что̀ ᲂу҆́бѡ сотвори́тъ теплѣ́йшїй ю҆́гъ; А҆́ще воздꙋ́хъ ѕѣлѡ̀ ѡ҆хлажде́нъ, всѧ̑ себѣ̀ повинꙋ́ти твори́тъ: кто́ бо постои́тъ проти́вꙋ лица̀ мра́за¹⁰⁷⁷: ка́кѡ ᲂу҆́бѡ къ себѣ̀ теплота̀ всѧ̑ не прелага́етъ: кто́ бо постои́тъ проти́вꙋ лица̀ теплоты̀; вѣ́рꙋимъ ᲂу҆̀бо, хла́дный же и҆ че́рный ᲂу҆́гль ᲂу҆ма̀ на́шегѡ по́здѣ нѣ́когда, и҆лѝ скорѣ́е, горѧ́щь же и҆ свѣтови́дѣнъ бы́ти прило́гомъ бж҃е́ственнѣйшагѡ ѻ҆гнѧ̀.

ѯ҃з. Є҆́сть нѣ́кое и҆ въ настоѧ́щемъ ᲂу҆строе́нїе, свидѣ́тельство и҆ зна́менїе на́шемꙋ вта́йнѣ і҆ѡ́сифꙋ полага́емо безстра́стїѧ є҆ди́но є҆смы̀, и҆́мже ᲂу҆́мъ и҆зше́дъ ѿ є҆гѵ́пта, ѿе́млетсѧ ᲂу҆́бѡ стра́стныхъ бреме́нъ, и҆ ꙗ҆́кѡ въ но́щи стꙋ́днѣйшїѧ рабо́ты, ѧ҆зы́ка же, є҆гѡ́же не вѣ́дѧше, слы́шитъ, не ктомꙋ̀ ѧ҆зы́ка бѣсѡ́въ скве́рна и҆ тли́тельна пра́вагѡ ра́зꙋма¹⁰⁷⁸, но ѧ҆зы́ка свѧ́та свѣтоно́сныхъ а҆́гг҃лъ, преѡбража́ющихъ ᲂу҆́мъ ѿ тѣ́ла на безтѣле́сное, ѧ҆зы́ка просвѣти́тельна прїе́млющїѧ дꙋшѝ.

ѯ҃и. Слы́шахъ нѣ́кїихъ бра́тїй недꙋ́гꙋющихъ тѣ́ломъ неѡсла́бнѡ, и҆ не могꙋ́щихъ ᲂу҆потреби́ти поще́нїѧ, ре́кшихъ ко мнѣ̀: ка́кѡ мо́жемъ без̾ поще́нїѧ и҆зба́витисѧ дїа́вола и҆ страсте́й; Къ ни̑мже глаго́лати подоба́етъ, ꙗ҆́кѡ не то́кмѡ ѡ҆ша́ѧнїемъ снѣ́дныхъ, но и҆ во́племъ се́рдца потреби́ти и҆ и҆згна́ти возмо́жете ѕла̑ѧ же и҆ ѕлы́хъ подме́тники: Воззва́ша бо, глаго́летъ, ко гдⷭ҇ꙋ, внегда̀ скорбѣ́ти и҆̀мъ, и҆ и҆зба́ви и҆̀хъ¹⁰⁷⁹, и҆ па́ки пи́сано є҆́сть: И҆з̾ чре́ва а҆́дова во́пль мо́й, ᲂу҆слы́шалъ є҆сѝ гла́съ мо́й: и҆ да взы́детъ и҆з̾ и҆стлѣ́нїѧ живо́тъ мо́й¹⁰⁸⁰. Тѣ́мже, до́ндеже пре́йдетъ беззако́нїе, си́рѣчь стꙋже́нїе грѣха̀, воззовꙋ̀, глаго́летъ, къ бг҃ꙋ вы́шнемꙋ¹⁰⁸¹, ꙗ҆́кѡ да велича́йшее благодѣѧ́нїе да́рꙋѧ, и҆ са́мый то́й прило́гъ грѣха̀ и҆стреби́тъ свое́ю вла́стїю, и҆ стра́стнагѡ ᲂу҆ма̀ і҆́дѡлы и҆згла́дитъ, и҆ без̾і́дѡльны¹⁰⁸² пока́жетъ, ꙗ҆̀же ᲂу҆ на́съ по́лны і҆́дѡлъ¹⁰⁸³ не́мѡщи. А҆́ще ᲂу҆́бѡ не прїѧ́лъ є҆сѝ дарова́нїѧ воздержа́нїѧ, вѣ́ждь, ꙗ҆́кѡ моли́твою и҆ ᲂу҆пова́нїемъ хо́щетъ тѧ̀ гдⷭ҇ь ᲂу҆слы́шати молѧ́щасѧ. Позна́въ ᲂу҆̀бо влⷣчнюю сꙋдьбꙋ̀, не печа́лꙋй ѡ҆ по́стничества и҆знеможе́нїи: па́че же потщи́сѧ и҆збы́ти ѿ врага̀ моли́твою и҆ терпѣ́нїемъ бл҃года́рнымъ. А҆́ще ᲂу҆́бѡ го́нѧтъ вы̀ пѡ́мыслы не́мощи и҆ ѕлострада́нїѧ ѿ гра́да по́стническа, бѣ́гайте въ дрꙋгі́й, си́рѣчь, въ моли́твꙋ и҆ благодаре́нїе.

ѯ҃ѳ. Глаго́ла фараѡ́нъ молѧ́сѧ, да ѿи́метъ бг҃ъ ѿ менѐ сме́рть сїю̀, и҆ ᲂу҆слы́шанъ бы́сть: подо́бнѣ же и҆ вѣ́си, моли́вшїи гдⷭ҇а, да не во глꙋбинꙋ̀ по́слани бꙋ́дꙋтъ, полꙋчи́ша проше́нїе: кольмѝ па́че ᲂу҆слы́шанъ бꙋ́детъ хрїстїа́нинъ человѣ́къ, молѧ́йсѧ свобо́дꙋ полꙋчи́ти ѿ мы́сленныѧ сме́рти.

ѻ҃. И҆́же вре́мѧ нѣ́кое ѿ бж҃е́ственныѧ просвѣща́емый и҆ ᲂу҆покоева́емый бѣ̀ благода́ти, по спрѧ́танїи же сеѧ̀, въ парє́нїѧ и҆ сквє́рны впа́даѧй, и҆ ропща́й сегѡ̀ ра́ди, и҆ не мꙋжа́ѧйсѧ моле́нїемъ па́ки воззва́ти спаси́тельное ѻ҆́но и҆звѣствова́нїе, но негодꙋ́ѧй: подо́бенъ є҆́сть ни́щꙋ прїе́мшꙋ ми́лостыню ѿ пала́ты, и҆ неꙋдо́бь терпѧ́щꙋ, зане́же не вни́де внꙋ́трь споѡбѣ́дати царе́ви¹⁰⁸⁴.

ѻ҃а. Блаже́ни не ви́дѣвшїи мѧ̀, и҆ вѣ́ровавше¹⁰⁸⁵, ꙗ҆́коже блаже́ни и҆̀же въ спрѧ́танїи бл҃года́ти не ѡ҆брѣта́ющїи ᲂу҆тѣше́нїѧ въ себѣ̀, па́че же протѧже́нїе ви́дѧщїи ско́рбныхъ и҆ тьмꙋ̀ тѧ́жкꙋ, и҆ не ѿчаѧва́ющїисѧ: но вѣ́рою ᲂу҆крѣплѧ́ющїисѧ, внегда̀ непщева́ти ви́дѣти неви́димаго, и҆ терпѣ́ти до́блественнѣ.

ѻ҃в. Є҆́же благода́тїю во своѐ вре́мѧ по мно́зѣхъ по́двизѣхъ и҆ печа́ли и҆ слеза́хъ дае́мое съ небесѐ и҆́щꙋщымъ сегѡ̀ смиренномꙋ́дрїе, крѣ́пльше по превосхожде́нїю и҆ бо́льшее є҆́сть смире́нїѧ ѿпа́дшихъ ѿ добродѣ́тели: є҆гѡ́же сподо́бльшїисѧ, соверше́нни вои́стиннꙋ сꙋ́ть мꙋ́жїе и҆ нестꙋжа́еми.

ѻ҃г. Є҆гда̀ ѡ҆ста́ви дїа́волъ гдⷭ҇а, тогда̀ прїидо́ша а҆́гг҃ли, и҆ слꙋжа́хꙋ є҆мꙋ̀¹⁰⁸⁶: подоба́етъ ᲂу҆̀бо вѣ́дѣти, занѐ ꙗ҆́коже не пи́сано є҆́сть, внегда̀ и҆скꙋша́емь бѧ́ше то́й, ꙗ҆́кѡ пристꙋпи́ша а҆́гг҃ли: та́кѡ и҆ на́мъ и҆скꙋша́ємымъ, во вре́мѧ нѣ́кое ѿхо́дѧтъ не дале́че а҆́гг҃ли бж҃їи, та́же по ѿше́ствїи и҆скꙋша́ющихъ, прихо́дѧтъ къ на́мъ, представлѧ́юще бж҃е́ствєннаѧ разꙋмѣ̑нїѧ: ᲂу҆твержде́нїе, просвѣще́нїе, ᲂу҆миле́нїе, ᲂу҆тѣше́нїе, терпѣ́нїе, ᲂу҆слажде́нїе, и҆ є҆ли̑ка спаса́ютъ, ᲂу҆крѣплѧ́ютъ, и҆ возстѧжава́ютъ дꙋ́шꙋ ᲂу҆трꙋжде́ннꙋ, рече́сѧ бо наѳанаи́лꙋ: ꙗ҆́кѡ ᲂу҆́зриши а҆́гг҃лы восходѧ́щыѧ и҆ нисходѧ́щыѧ над̾ сн҃а чл҃вѣ́ческаго¹⁰⁸⁷, си́рѣчь, на ро́дъ человѣ́ческїй слꙋже́нїе а҆́гг҃лѡвъ и҆ по́мощь бога́тнѣ и҆злїе́тсѧ.

ѻ҃д. Помѧнѝ а҆рхїере́а ѻ҆́наго, є҆гѡ́же ѻ҆деснꙋ́ю ста̀ дїа́волъ проти́витисѧ є҆мꙋ̀¹⁰⁸⁸, всѧ́комꙋ, си́рѣчь, десно́мꙋ помышле́нїю и҆ сло́вꙋ и҆ дѣ́лꙋ, ꙗ҆́кѡ да не ᲂу҆жа́снешисѧ ѡ҆ слꙋча́ющихсѧ.

ѻ҃є. Вѣ́дати прили́чествꙋетъ и҆́нокꙋ, что̀ ᲂу҆́бѡ є҆́сть не́мощь; ꙗ҆́коже є҆́же, поми́лꙋй мѧ̀, ꙗ҆́кѡ не́мощенъ є҆́смь. Что́ же ѿстꙋпле́нїе ѿ бг҃а, и҆́же недꙋ́гъ є҆́сть дїа́воль и҆ а҆́ггелѡвъ є҆гѡ̀;

ѻ҃ѕ. И҆́мже ѡ҆́бразомъ желѣ́зо неприкоснове́нно твори́тъ ѻ҆гнѧ̀ совокꙋпле́нїе: та́кѡ ча̑стыѧ мл҃твы крѣ́пльшь ᲂу҆строѧ́ютъ ᲂу҆́мъ на бра́нь вра́жїю. тѣ́мже все́ю си́лою лѣ́ность на́мъ сотворѧ́ти тща́тсѧ ѡ҆ моли́твы присѣдѣ́нїи, вѣ́дѧще сїю̀, себѣ̀ ᲂу҆́бѡ навѣ́тнꙋ, ᲂу҆мꙋ́ же побо́рнꙋ.

ѻ҃з. Прїѧ́тъ даві́дъ ᲂу҆се́рдїе соизше́дшихъ съ ни́мъ ѿ секела́га на и҆ноплеме́нники, а҆́ще и҆знемо́гше и҆ ѡ҆ста́шасѧ на пото́цѣ восо́ровѣ: возврати́всѧ бо къ ни̑мъ съ побѣ́дою, ꙗ҆́же на ва́рвары, и҆ слы́шавъ глаго́лющихъ, ꙗ҆́кѡ не подоба́етъ да́тисѧ ча́сти ѿ плѣ́на, сѣдѣ́вшымъ ѿ разслабле́нїѧ на пото́цѣ: и҆ тѣ́мъ стыдѧ́щымсѧ и҆ ничто́же глаго́лющымъ. ѿвѣ́тствꙋетъ ѡ҆ ни́хъ блаже́ннѣйшїй даві́дъ, глаго́лѧ: ꙗ҆́кѡ при сосꙋ́дѣхъ посажде́ни бы́ша блюдꙋ́ще, тѣ́мже и҆ ра́внꙋю тѣ̑мъ дадѐ ча́сть съ да́нною мꙋ́жествєннымъ и҆ благодꙋ̑шнымъ ра́тникѡмъ¹⁰⁸⁹. Смотрѝ ᲂу҆̀бо, дабы̀ и҆ ѡ҆ бра́тѣ нѣ́коемъ, нача́ло ᲂу҆́бѡ те́пло показа́вшемъ, по́слѣжде же вма́лѣ ѡ҆блѣни́вшемсѧ, сосꙋ́ди спасе́нїѧ разꙋмѣ́лисѧ, вѣ́ра и҆ раска́ѧнїе, смире́нїе и҆ пла́чь, терпѣ́нїе и҆ ᲂу҆пова́нїе, и҆ долготерпѣ́нїе, и҆ прѡ́чаѧ, въ ни́хже кто̀ не́мощенъ нра́вомъ присѣдѣ́въ, и҆ потерпѣ́въ, є҆́же ѡ҆ хрⷭ҇тѣ̀ ча́ѧнїемъ: ꙗ҆́коже лѣ́по є҆́сть, полꙋча́етъ нѣ́кїй вѣ́ченъ да́ръ.

ѻ҃и. Леѵі́ты ᲂу҆́бѡ и҆ свѧще́нницы нареко́шасѧ, и҆̀же всѣ́хъ ѿню́дъ себѐ бг҃ови возложи́вшїи и҆ дѣѧ́нїемъ и҆ видѣ́нїемъ: ско́ти же леѵі́тстїи нарица́ютсѧ, и҆̀же не могꙋ́щїи ᲂу҆́бѡ (не) ходи́ти въ слѣ́дъ страсте́й: жела́ющїи же добродѣ́тели, и҆ ѡ҆ се́й по вмѣ́стномꙋ ᲂу҆се́рдствꙋющїи, и҆ сеѧ̀ жела́ющїи всегда̀, а҆́ще и҆ погрѣша́ютъ мно́жицею, за є҆́же ѿ ѕло́бы и҆зжи̑леннымъ бы́ти. подоба́етъ же во вре́мѧ прили́чествꙋющее, и҆ си̑мъ дарова́нїе прїѧ́ти безстра́стїѧ, є҆ди́нѣмъ человѣколю́бїемъ бж҃їимъ: жела́нїе бо ᲂу҆бо́гихъ ᲂу҆слы́ша гдⷭ҇ь.

ѻ҃ѳ. Ꙗ҆́звы, ꙗ҆̀же наво́дитъ на ны̀ вра́гъ и҆лѝ ꙗ҆́вѣ ви́димѡ, мно́жицею разꙋмѣ́емъ и҆ ви́димъ: мꙋчє́нїѧ же и҆ болѣ̑зни, ꙗ҆̀же ѿ на́съ те́рпитъ, и҆справлѧ́ющымъ на́мъ ѻ҆вогда̀ добродѣ́тєли, и҆лѝ раскаѧва́ющымсѧ ѡ҆ прегрѣше́нїихъ, и҆лѝ долгодꙋ́шествꙋющымъ, и҆ терпѧ́щымъ ѡ҆ приключе́нїихъ, и҆лѝ молѧ́щымсѧ, и҆ прѡ́чаѧ ᲂу҆хищрѧ́ющымъ, ѡ҆ ни́хже то́й разпыха́етсѧ и҆ мꙋ́читсѧ, и҆ пла́четъ и҆ рыда́етъ: сїѧ̑ всѧ̑ мы̀ по смотре́нїю не ви́димъ, да не ка́кѡ ѡ҆слабѣ́емъ: пра́ведно бо, глаго́летъ, ᲂу҆ бг҃а возда́ти ско́рбь ѡ҆скорблѧ́ющымъ на́съ.

п҃. А҆́ще состарѣ́вшїйсѧ на землѝ и҆ на ка́мени пѣ́нь, ѿ вонѝ водны́ѧ прораща́етъ ꙗ҆́кѡ навосажде́нный: влѣ́потꙋ є҆́сть и҆ на́мъ возбꙋжда́ющымсѧ си́лою ст҃а́гѡ дх҃а, возрасти́ти нетлѣ́нїе, є҆́же по є҆стествꙋ̀ прїѧ́хомъ, и҆ сотвори́ти жа́твꙋ ꙗ҆́кѡ новосажде́нїе, а҆́ще и҆ въ ве́тхаго низпадо́хомъ человѣ́ка.

п҃а. Ко ѿча́ѧвшей себѐ за прехожде́нїе и҆скꙋше́нїй и҆ грѣхѡ́въ мно́жество дꙋшѝ, и҆ глаго́лющей: Поги́бе наде́жда на́ша, ᲂу҆бїе́ны бы́хомъ, рече́но бы́сть ѿ неѿчаѧва́ющагѡ спасе́нїе на́ше, бг҃а, є҆́же жи́ви бꙋ́дите, и҆ ᲂу҆вѣ́сте, ꙗ҆́кѡ а҆́зъ є҆́смь гдⷭ҇ь¹⁰⁹⁰: къ недоꙋмѣва́ющей же дꙋшѝ, ка́кѡ ᲂу҆́бѡ возмо́жетъ вели́кими добродѣ́тельми роди́ти хрⷭ҇та̀; глаго́лано бы́сть: дх҃ъ ст҃ы́й на́йдетъ на тѧ̀¹⁰⁹¹: а҆ и҆дѣ́же є҆́сть дх҃а ст҃а прише́ствїе, да не взы́щеши про́чее є҆стества̀ и҆ ѻ҆бы́чаѧ послѣ́дованїѧ, и҆ зако́на: всеси́ленъ бо є҆́сть покло́нный и҆ ст҃ы́й дх҃ъ, и҆ не сꙋ̑щаѧ въ є҆стество̀ произво́дитъ тебѣ̀, ꙗ҆́кѡ да ᲂу҆диви́шисѧ: но и҆ побѣди́телѧ ны́нѣ показꙋ́етъ ᲂу҆ма̀, и҆́же пре́жде побѣжда́шесѧ. Свы́ше бо грѧды́й на ны̀ за благоꙋтро́бїе ᲂу҆тѣ́шитель, над̾ всѣ́ми є҆́сть: над̾ всѣ́ми бо тѧ̀ поставлѧ́етъ є҆сте́ственными движе́нми и҆ бѣсо́вскими страстьмѝ.

п҃в. Подвиза́йсѧ во влады́чественнѣмъ твое́мъ свѣтоза́рїе храни́ти невреди́мо. А҆́ще на́чнеши по стра́сти зрѣ́ти, ѡ҆мрачи́ тѧ гдⷭ҇ь, и҆ посла̀ ᲂу҆здꙋ̀ лицꙋ̀ твоемꙋ̀, и҆ свѣ́тъ ѻ҆́чїю твоє́ю нѣ́сть съ тобо́ю¹⁰⁹², но а҆́ще сїѧ̑ и҆ та́кѡ сꙋ́ть, да не ᲂу҆томи́шисѧ, нижѐ ѡ҆слабѣ́еши молѧ́сѧ со ст҃ы́мъ даві́домъ: Послѝ свѣ́тъ тво́й и҆ и҆́стинꙋ твою̀, мнѣ̀ дрѧ́хлꙋющꙋ, спасе́нїе лица̀ моегѡ̀, и҆ бг҃ъ мо́й¹⁰⁹³: По́слеши бо дх҃а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ¹⁰⁹⁴.

п҃г. Блаже́нъ и҆́же несы́тнѡ и҆́мать ꙗ҆́сти и҆ пи́ти моли̑твы и҆ ѱалмы̀ здѣ̀ но́щь и҆ де́нь, и҆ ᲂу҆крѣпи́тъ себѐ сла́внымъ писа́нїѧ чте́нїемъ: таково́е бо причаще́нїе и҆зрасти́тъ дꙋшѝ неꙋвѧда́емо весе́лїе въ бꙋ́дꙋщемъ вѣ́цѣ.

п҃д. Все́ю си́лою ᲂу҆твержда́йсѧ не па́дати: па́дати бо, не подоба́етъ крѣ́пкомꙋ подви́жникꙋ: а҆́ще же слꙋчи́тсѧ па́сти, а҆́бїе возскочѝ, и҆ ста́ни па́ки въ до́бромъ по́двизѣ. А҆́ще и҆ тмори́цею сїѐ слꙋчи́тсѧ спрѧ́танїемъ благода́ти, тмори́цею и҆ ѻ҆́но да бꙋ́детъ, си́рѣчь є҆́же воста́нїѧ, и҆ до сконча́нїѧ твоегѡ̀. Пи́сано бо є҆́сть: ꙗ҆́кѡ а҆́ще седмери́цею паде́тъ пра́ведникъ, си́рѣчь чрез̾ всѐ житїѐ, седмери́цею и҆ воста́нетъ¹⁰⁹⁵. Доне́лѣже держи́ши ѻ҆рꙋ́жїе ст҃а́гѡ ѡ҆́браза, со слеза́ми и҆ моле́нїемъ є҆́же къ бг҃ꙋ, въ стоѧ́щихъ вмѣнѧ́ешисѧ, а҆́ще и҆ мно́жицею па́лъ є҆сѝ: доне́лѣже пребыва́еши со и҆́ноки, ꙗ҆́кѡ мꙋ́жественъ во́инъ на пре́днихъ прїе́млеши ꙗ҆́звы, и҆́миже и҆ похвале́нъ бꙋ́деши па́че, ꙗ҆́кѡ нижѐ ᲂу҆ѧзвлѧ́емь претерпѣ́лъ є҆сѝ преда́ти и҆лѝ ѿстꙋпи́ти. А҆́ще же ѿстꙋ́пиши ѿ и҆́нокѡвъ: по плеща́мъ ᲂу҆ѧзвлѧ́ешисѧ про́чее ꙗ҆́кѡ бѣгꙋ́нъ и҆ боѧзли́въ и҆ чиноѡста́витель и҆ бездерзнове́ненъ.

п҃є. Лютѣ́е, ѿ є҆́же согрѣша́ти, є҆́сть, є҆́же ѿчаѧва́тисѧ: і҆ꙋ́да бо преда́тель малодꙋ́шенъ бѣ̀ и҆ неискꙋсобра́ненъ, и҆ сегѡ̀ ра́ди на ѿча́ѧвшасѧ того̀ прите́къ вра́гъ, сило̀ возложѝ: Пе́тръ же ка́мень тве́рдый стра́шнымъ паде́нїемъ низведе́нъ бы́въ, ꙗ҆́кѡ и҆скꙋсобра́ненъ не ѡ҆слабѣ̀ нижѐ ѿча́ѧсѧ печа́ленъ бы́въ, но возскочи́въ принесѐ горча́йшѧ сле́зы ѿ се́рдца скорбѧ́ща и҆ смире́нна: и҆ а҆́бїе сꙋпоста́тъ на́шъ ви́дѣвъ сїѧ̑ ꙗ҆́кѡ пла́менми ѕѣ́льнѣйшими на зра́цѣхъ пали́мь, ѿскочѝ бѣжа̀ дале́че, и҆ лю́тѣ плачево́пльствꙋѧ.

п҃ѕ. Проти́вꙋ си̑мъ трїе́мъ наипа́че и҆́ночествꙋѧй, бра́нь и҆мѣ́ти до́лженъ є҆́сть непримири́тельнꙋ: проти́вꙋ чревонеи́стовствꙋ, и҆ проти́вꙋ безпрїѡбрѣ́тенной сла́вѣ, и҆ проти́вꙋ пѣнѧзолю́бїю¹⁰⁹⁶, є҆́же є҆́сть і҆дѡлослꙋже́нїе.

п҃з. Ца́рь нѣ́кїй і҆сра́ильтѧнинъ, трѡглодѵ́тѧнъ ꙗ҆зы́къ и҆ и҆ны̑ѧ ва́рвары, ѱалмы̀ и҆ пѣ́нїи и҆ пѣ́сньми дꙋхо́вными побѣдѝ, во словесѣ́хъ и҆ ѻ҆рга́нѣхъ даві́довыхъ¹⁰⁹⁷: и҆́маши и҆ ты̀ ва́рвары трѡглодѵ́тѧны, въ чꙋ̑вства твоѧ̑ и҆ ᲂу҆деса̀ входѧ́щыѧ бѣ́сы, и҆ пло́ть мꙋ́чащыѧ раждеже́нїемъ, и҆ ᲂу҆строѧ́ющыѧ тѧ̀ стра́стнѡ зрѣ́ти же и҆ слы́шати, и҆ ѡ҆бонѧва́ти, и҆ глаго́лати неподо́бны глаго́лы, и҆ ѻ҆́чи по́лны и҆мѣ́ти прелюбодѣѧ́нїѧ, и҆ смꙋща́тисѧ внꙋ́трь и҆ внѣ̀ ꙗ҆́кѡ вавѷлѡ́нскаѧ пе́щь. Попецы́сѧ ᲂу҆̀бо и҆ са́мъ вѣ́рою ве́лїею и҆ ѱалмы̀ и҆ пѣ́нїи и҆ пѣ́сньми дꙋхо́вными, дѣ́йствꙋющихъ ѕла̑ѧ трѡглодѵ́тѧнъ внеза́пꙋ и҆стреби́ти.

п҃и. Ꙗ҆́коже человѣ́кꙋ чрез̾ человѣ́ка спаса́тисѧ хо́щетъ гдⷭ҇ь, та́кѡ и҆ человѣ́кꙋ чрез̾ человѣ́ка поги́бнꙋти тщи́тсѧ сатана̀. Тѣ́мже не подоба́етъ прилѣплѧ́тисѧ мꙋ́жꙋ презри́телю и҆ лꙋка́вꙋ¹⁰⁹⁸, и҆ не хранѧ́щꙋ ѧ҆зы́ка, да не съ ни́мъ въ мꙋ́кꙋ ѿи́деши: є҆два́ бо кто̀ пра́ведномꙋ приближа́ѧсѧ спасе́нїе полꙋча́етъ. А҆́ще же кто̀ съ лꙋка́внꙋющимъ соѡбраща́тисѧ бꙋ́детъ, не наблюда́ѧ сѧ̀, ꙗ҆́кѡ гꙋби́тельство и҆ прока́зꙋ гото́во ѡ҆брѧ́щетъ и҆стопле́нїе¹⁰⁹⁹: и҆ кто̀ про́чее поми́лꙋетъ, ра́достнѣ приближа́ющагосѧ ко ѕмі́ю; Бѣ́гай ᲂу҆̀бо ненака́занныхъ ѧ҆зы́комъ и҆ ратосрази́телей, и҆ смꙋща́емыхъ внꙋ́тренними и҆ внѣ́шними ᲂу҆десы̀.

п҃ѳ. Кто̀ мꙋ́дръ, и҆ разꙋ́менъ, и҆ дрꙋ́гъ бж҃їй нарещи́сѧ хотѧ̀, да дꙋ́шꙋ свою̀ потщи́тсѧ предста́вити гдⷭ҇ви таковꙋ̀, ꙗ҆ковꙋ̀ тꙋ̀ прїѧ́тъ ѿ негѡ̀ чи́стꙋ и҆ неꙋѧ́звленꙋ, и҆ всю̀ непоро́чнꙋ, и҆ сегѡ̀ ра́ди да ᲂу҆вѣнча́етсѧ на небесѣ́хъ, и҆ ѿ а҆́гг҃лъ ᲂу҆блаже́нъ да бꙋ́детъ.

ч҃. Є҆ди́нъ глаго́лъ бла́гъ скве́рнаго нѣ́когда ѻ҆́наго разбо́йника, чи́ста и҆ свѧ́та содѣ́ла, и҆ въ ра́й введѐ, и҆ є҆ди́нъ глаго́лъ неподо́бенъ, возбранѝ мѡѷсе́ови зе́млю ѡ҆бѣтова́нїѧ, да не ᲂу҆́бѡ ма́лъ недꙋ́гъ ѧ҆зыково́лїе вмѣни́мъ: досадолю́бцы бо и҆ блѧдосло́вцы затворѧ́ютъ себѣ̀ ца́рствїе небе́сное: зане́же мꙋ́жъ ѧ҆зы́ченъ а҆́ще бы и҆ здѣ̀ и҆спра́вилъ, но та́мѡ не и҆спра́витсѧ, па́че же запне́тсѧ, и҆ ѕла̑ѧ ᲂу҆ловѧ́тъ и҆̀ во и҆стлѣ́нїе¹¹⁰⁰.

ч҃а. Ꙗ҆́кѡ да не пари́мъ прельща́еми ѿ чꙋ́вствъ ѡ҆ сꙋетѣ̀, добро̀ внима́ти глаго́лющемꙋ: И҆ди́те лю́дїе моѝ, вни́дите въ хра́минꙋ се́рдца ва́шегѡ, сокрове́ннꙋю всѧ́комꙋ чꙋ́вственномꙋ помышле́нїю, въ безви́днꙋю ѻ҆́нꙋ ѻ҆би́тель, просвѣща́емꙋю безстра́стїемъ же и҆ ѡ҆сѣне́нїемъ ст҃ы́ѧ благода́ти: затвори́те двє́ри своѧ̑ всѣ̑мъ ви̑димымъ: ᲂу҆кры́йтесѧ ма́лѡ є҆ли́кѡ є҆ли́кѡ: мала́ бо є҆́сть всѧ̀ человѣ́ческаѧ жи́знь. И҆ посе́мъ глаго́летъ: До́ндеже мимои́детъ гнѣ́въ гдⷭ҇нь¹¹⁰¹. Ꙗ҆́коже и҆́нъ глаго́ла: До́ндеже пре́йдетъ беззако́нїе¹¹⁰²: гнѣ́въ бо гдⷭ҇нь є҆́сть и҆ беззако́нїе, не́гли ᲂу҆́бѡ бѣ́сове и҆ стра̑сти и҆ грѣхѝ, ꙗ҆́коже глаго́летъ ко бг҃ꙋ и҆са́їа: Сѐ ты̀ разгнѣ́валсѧ є҆сѝ, и҆ мы̀ согрѣши́хомъ¹¹⁰³. Оу҆бѣга́етъ же гнѣ́ва сегѡ̀ человѣ́къ, внегда́ внима́ѧ се́рдцꙋ моли́твою, и҆ внꙋ́трь бы́ти невхо́дныхъ любопрѧ́сѧ: привлецы́ бо, глаго́летъ, премꙋ́дрость па́че внꙋ́треннѣйшихъ: зане́же всѧ̀ сла́ва дще́ре царе́вы внꙋ́трь¹¹⁰⁴. Трꙋжда́юсѧ же, до́ндеже вни́дꙋ во ст҃и́ло бж҃їе¹¹⁰⁵, и҆ въ го́рꙋ достоѧ́нїѧ, глаго́летъ, въ гото́вое жили́ще, є҆́же содѣ́лалъ є҆сѝ гдⷭ҇и, ст҃ы́ню, ю҆́же ᲂу҆гото́вастѣ рꙋ́цѣ твоѝ.

ч҃в. Хотѧ́й вои́стиннꙋ ѿрещи́сѧ, блаже́нномꙋ да подража́етъ проро́кꙋ є҆лїссе́ю, ни є҆ди́нꙋ себѣ̀ ѡ҆ста́вль ве́щь мно́зѣмъ и҆ ѻ҆гнепла́меннымъ є҆́же къ бг҃ꙋ раче́нїемъ. Всѧ̑ ᲂу҆̀бо и҆мѣ̑нїѧ своѧ̑ да разда́стъ тре́бꙋющымъ, и҆ та́кѡ поне́съ крⷭ҇тъ гдⷭ҇нь предложе́нїемъ, да понꙋжда́етсѧ на во́льнꙋю сме́рть вино́внꙋ быва́ющꙋ вѣ́чнагѡ ца́рствїѧ.

ч҃г. Є҆гда̀ дости́гнеши ᲂу҆разꙋмѣ́ти, ꙗ҆́кѡ а҆морре́й возмога́етъ въ тебѣ̀ ꙗ҆́кѡ дꙋ́бъ: помоли́сѧ гдⷭ҇ви прилѣ́жнѡ, да и҆зсꙋши́тъ пло́дъ є҆гѡ̀¹¹⁰⁶ све́рхꙋ, си́рѣчь дѣ́ѧтельный грѣ́хъ: и҆ корє́нїѧ є҆гѡ̀ ѿи́сподꙋ, си́рѣчь нечи̑стыѧ по́мыслы. И҆ да ѿи́метъ гдⷭ҇и а҆морре́а ѿ лица̀ твоегѡ̀.

ч҃д. Не подоба́етъ ᲂу҆жаса́тисѧ, внегда̀ а҆́ще ви́дите посмѣва́ющихсѧ безмо́лвїю на́шемꙋ, немогꙋ́щихъ безмо́лвствовати: па́че же по́йте на нѧ̀, ѻ҆ба́че не ѕлопо́мнѧще, и҆ є҆́же къ бг҃ꙋ повинове́нїе ва́ше ѕѣ́лнше проти́вѡ поста́вите и҆̀мъ, вопїю́ще внегда̀ пѣ́ти: ѻ҆ба́че бг҃ови повини́сѧ дꙋшѐ моѧ̀¹¹⁰⁷: вмѣ́стѡ бо є҆́же люби́ти мѧ̀, ѡ҆болга́хꙋ мѧ̀, а҆́зъ же молѧ́хсѧ¹¹⁰⁸, ѡ҆ мое́мъ же и҆ ѻ҆́нѣхъ и҆сцѣле́нїи.

ч҃є. Не дхнꙋ́вшꙋ на мо́ре вѣ́трꙋ жесто́кꙋ, не ᲂу҆́бѡ ᲂу҆ви́дитсѧ волна̀, и҆ не наше́дшꙋ на ны̀ бѣ́сꙋ, не и҆́мать ѡ҆бꙋрева́тисѧ страстьмѝ дꙋша̀ нижѐ тѣ́ло.

ч҃ѕ. А҆́ще согрѣва́ешисѧ при́снѡ моли́твою и҆ бж҃е́ственною благода́тїю, глаго́летъ къ тебѣ̀ бж҃е́ственное писа́нїе, ꙗ҆́кѡ ко ѡ҆блече́нномꙋ во ѻ҆рꙋ̑жїѧ свѣ́та: твое́ же ѡ҆дѣѧ́нїе тепло̀: врази́ бо твоѝ ꙗ҆́коже въ сꙋгꙋ́бо ѡ҆дѣѧ́нїе, въ стꙋ́дъ ѡ҆дѣ́ѧшасѧ и҆ дрожа́нїе.

ч҃з. Па́мѧть прїе́млѧ прегрѣше́нїй твои́хъ, не лѣни́сѧ би́ти пє́рси, ꙗ҆́кѡ да таковы́ми ᲂу҆ѧзвле́нми каменносѣщѝ и҆́маши ѡ҆камене́нное се́рдце: и҆ ѡ҆брѧ́щеши крꙋше́цъ мытаре́вагѡ зла́та, и҆ возра́дꙋешисѧ ѡ҆ бога́тствѣ та́йнѣмъ.

ч҃и. Ѻ҆́гнь моле́нїй ѡ҆ лꙋ́чшихъ, и҆ ст҃а́гѡ поꙋче́нїѧ слове́съ дх҃а, да гори́тъ вы́нꙋ на же́ртвенницѣ дꙋшѝ твоеѧ̀¹¹⁰⁹.

ч҃ѳ. А҆́ще при́снѡ тщи́шисѧ ѡ҆бꙋ́ти но́зѣ во ᲂу҆гото́ванїе благовѣствова́нїѧ ми́ра¹¹¹⁰, сози́ждеши всѧ́кѡ и҆ сво́й сѝ до́мъ и҆ бли́жнѧгѡ твоегѡ̀: а҆́ще же ᲂу҆ны́еши, ѡ҆плева́нъ бꙋ́деши неви́димѡ, и҆ по зако́нꙋ наслѣ́диши и҆́мѧ и҆зꙋ́тагѡ и҆з̾ сапога̀¹¹¹¹.

р҃. А҆́ще по і҆ѡа́ннꙋ, бг҃ъ любы̀ є҆́сть: любѧ́й въ бз҃ѣ пребыва́етъ, и҆ бг҃ъ въ не́мъ¹¹¹². Ненави́дѧй же бли́жнѧго въ любвѐ распрѧже́нїи, ꙗ҆́вѣ, ꙗ҆́кѡ не́нависть составлѧ́етъ. Ненави́дѧй ᲂу҆̀бо тождеро́днаго въ разстоѧ́нїи ѿ бг҃а є҆́сть, поне́же бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ. Томꙋ̀ сла́ва и҆ держа́ва, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Коне́цъ глава́мъ кни́ги.

Никогда́же да восхо́щеши па́че и҆́нока, мїрѧни́на ᲂу҆блажи́ти, и҆мꙋ́ща женꙋ̀ и҆ дѣ́ти, и҆ ра́дꙋющасѧ за є҆́же благотвори́ти мно́зѣмъ и҆ и҆з̾ѻби́льнѡ ми́лостыню дѣ́лати, и҆ ѿню́дъ нижѐ ѿ бѣсѡ́въ и҆скꙋша́тисѧ, вмѣнѧ́ѧ себѐ ѿ ѻ҆́нагѡ бы́ти ме́ньша во бл҃гоꙋгожде́нїи бж҃їи. Нижѐ ѡ҆каѧва́й себѐ ꙗ҆́кѡ погиба́ющь. Не глаго́лю бо, ꙗ҆́кѡ непоро́чнѡ живе́ши, терпѧ̀ во и҆́ноцѣхъ, но а҆́ще и҆ ѕѣлѡ̀ грѣ́шенъ є҆сѝ: ско́рбь дꙋшѝ твоеѧ̀ и҆ ѕлострада́нїе че́стнше є҆́сть ᲂу҆ бг҃а, превосходѧ́щїѧ жите́йскагѡ добродѣ́тели. Печа́ль твоѧ̀ мно́гаѧ и҆ жалѣ́нїе, и҆ воздыха̑нїѧ, и҆ сѣ́тованїе, и҆ сле́зы, и҆ мꙋчи́тельство со́вѣсти, и҆ недоꙋмѣ́нїе по́мысла, и҆ є҆́же ѡ҆сꙋжда́тисѧ мы́слїю, и҆ рыда́нїе, и҆ пла́чь ᲂу҆ма̀, и҆ плачево́пльствїе се́рдца, и҆ сокрꙋше́нїе, и҆ смꙋще́нїе, и҆ ѡ҆каева́нїе, и҆ дрѧ́хлость и҆ ᲂу҆ничиже́нїе, сїѧ̑ всѧ̑ и҆ такѡва́ѧ, ꙗ҆̀же мно́жицею слꙋча́ютсѧ въ желѣ́знꙋю пе́щь и҆скꙋше́нїй вверга́ємымъ, чє́стнша и҆ благопрїѧ́тнша по превосхожде́нїю ѿ благоꙋгожде́нїѧ мїрѧни́нова. Внемлѝ ᲂу҆̀бо, да не подпаде́ши по рече́нїю глаго́лющагѡ бж҃е́ственнагѡ писа́нїѧ ѿ лица̀ твоегѡ̀: Ꙗ҆́кѡ что́ бо по́льзовахомсѧ моли́твенницы ше́дше пред̾ гдⷭ҇емъ, и҆ въ домꙋ̀ є҆гѡ̀ пребыва́юще при́снѡ; Ꙗ҆́вѣ же, ꙗ҆́кѡ всѧ́къ ра́бъ бли́зъ сы́й до́мꙋ влады́ки, тогда̀ и҆ бїє́нїѧ прїе́млетъ, и҆ заꙋшє́нїѧ, и҆ ᲂу҆кори̑зны¹¹¹³ и҆ поношє́нїѧ: внѣ́ же сꙋ́щїи про́чее дале́че сꙋ́ть ѿ ꙗ҆́звъ, ꙗ҆́кѡ чꙋ́жди и҆лѝ таи́мичищни¹¹¹⁴, и҆лѝ небрего́ми. Что̀ ᲂу҆̀бо по́льзовахомсѧ, глаго́лютъ; мы̀ ᲂу҆́бѡ въ скѡ́рбнаѧ впа́дающе дꙋше́ю же и҆ тѣ́ломъ, и҆̀же всегда̀ молѧ́щїисѧ же и҆ пою́щїи: ті́и же ни молѧ́щїисѧ, ни бдѧ́щїи ра́дꙋютсѧ и҆ веселѧ́тсѧ, и҆ благопоспѣ́шни сꙋ́ть, и҆ благодꙋ́шнѡ произво́дѧтъ житїѐ. И҆ ꙗ҆́коже глаго́летъ проро́къ: Сѐ созида́ютсѧ до́мы чꙋ́жди, и҆ мы̀ блажи́мъ чꙋжди́хъ. И҆ наво́дитъ глаго́лѧ: Сїѧ̑ реко́ша рабѝ бж҃їи, и҆мꙋ́щїи ра́зꙋмъ. Но ѻ҆ба́че подоба́етъ вѣ́дѣти, ꙗ҆́кѡ ничто́же стра́нно стра́ждꙋтъ ѡ҆скорблѧ́еми, и҆ разли́чнѡ ѡ҆печалѧ́еми, ꙗ҆̀же влⷣки своегѡ̀ терпѧ́ще мно́гими и҆скꙋше́ньми: слы́шаша бо є҆го̀ глаго́люща во є҆ѵⷢ҇лїихъ: А҆ми́нь, а҆ми́нь глаго́лю ва́мъ, воспла́четесѧ и҆ возрыда́ете вы̀ бли́жнїи моѝ, а҆ мі́ръ возра́дꙋетсѧ¹¹¹⁵: є҆щѐ ма́лѡ, и҆ посѣщꙋ̀ вы̀ ᲂу҆тѣ́шителемъ, и҆ и҆жденꙋ̀ ᲂу҆ны́нїе ва́ше, и҆ возвеселю̀ вы̀ по́мыслы небе́снагѡ житїѧ̀, и҆ ᲂу҆покое́нїѧ, и҆ слеза́ми сла́дкими, и҆́хже ма́лы дни̑ лише́ни бы́сте и҆скꙋша́еми: и҆ возда́мъ ва́мъ мздꙋ̀¹¹¹⁶ благода́ти моеѧ̀, ꙗ҆́коже ма́терь младе́нцꙋ пла́чꙋщемꙋ, и҆ ᲂу҆крѣплю̀ вы̀ ꙗ҆́же свы́ше си́лою, и҆знемо́гшыѧ за є҆́же внегда̀ ра́товатисѧ: и҆ ᲂу҆слаждꙋ̀ вы̀ ѡ҆горче́нныѧ, ꙗ҆́коже глаго́летъ і҆еремі́а въ пла́чѣ ѡ҆ та́йнѣмъ свое́мъ і҆ерꙋсали́мѣ: и҆ ᲂу҆зрю̀ вы̀, и҆ возра́дꙋетсѧ се́рдце ва́ше та́йнымъ посѣще́нїемъ, и҆ ско́рбь ва́ша въ ра́дость преложи́тсѧ, и҆ ра́дости ва́шеѧ никто́же возмо́жетъ взѧ́ти¹¹¹⁷. Да не ᲂу҆̀бо сомжи́мъ, нижѐ возслѣпотствꙋ́имъ, ᲂу҆блажа́юще па́че на́съ мїрѧ́нъ: но вѣ́даѧ разли́чїе и҆́стыхъ сынѡ́въ и҆ прелюбодѣ́йчищъ, па́че возлю́бимъ мни́мое и҆́нокѡвъ ѕлострада́нїе же и҆ ѕѣ́льное ᲂу҆дрꙋче́нїе, є҆гѡ́же коне́цъ въ живо́тъ вѣ́ченъ сбыва́етсѧ и҆ въ неꙋвѧда́емый сла́вы гдⷭ҇ни вѣне́цъ. Прїи́мемъ мнѧ́щихсѧ грѣ́шныхъ пѡ́стникъ, да не глаго́лю пра́ведныхъ ѕлострада́нїе. И҆ є҆́же примета́тисѧ въ домꙋ̀ бж҃їи, си́рѣчь въ чи́нѣ рабо́тающихъ непреста́ннѡ хрⷭ҇то́ви: а҆ не жи́ти въ селе́нїихъ грѣ́шничихъ, и҆лѝ соѡбраща́тисѧ¹¹¹⁸ съ мїрски́ми, а҆́ще и҆ вели̑кїѧ творѧ́тъ пра̑вды. Глаго́летъ бо къ тебѣ̀, ѽ и҆́ноче, ѻ҆ц҃ъ тво́й небе́сный, прелюбѧ́й тѧ̀, и҆ ѡ҆скорблѧ́ѧй, и҆ ᲂу҆дрꙋча́ѧй тѧ̀ разли́чными и҆скꙋше́нїѧми: До́брѣ вѣ́ждь, и҆́ноче терпѣли́ве, занѐ ꙗ҆́коже чрез̾ проро́ка глаго́лахъ: бꙋ́дꙋ тебѣ̀ наказа́тель¹¹¹⁹, и҆ срѧ́щꙋ тѧ̀ на пꙋтѝ є҆гѵ́петстѣ, ско́рбными тѧ̀ ѡ҆бꙋча́ѧ: и҆ пꙋти̑ порѡ́чныѧ¹¹²⁰ заграждꙋ̀ те́рнїемъ моегѡ̀ про́мысла, боды́й напа́стьми неча́ѧнными и҆ возбранѧ́ѧ, да не ꙗ҆̀же хо́щеши несмы́сленнымъ се́рдцемъ, сїѧ̑ всѧ́кѡ и҆ въ дѣ́ло произво́диши¹¹²¹. И҆ заграждꙋ̀ мо́ре страсте́й твои́хъ, враты̀ щедро́тъ мои́хъ. И҆ бꙋ́дꙋ тебѣ̀ ꙗ҆́кѡ панѳи́рь, поѧда́ѧ тѧ̀ по́мыслами порече́нїѧ, и҆ зазрѣ́нїѧ и҆ раска́ѧнїѧ въ со́вѣсти неꙋвѣ́дѣнныхъ тобо́ю¹¹²²: сїѧ̑ же всѧ̑ скѡ́рбнаѧ, велича́йшаѧ є҆́сть благода́ть бж҃їѧ. Не то́кмѡ же панѳи́рь, но и҆ ѻ҆сте́нъ тебѣ̀ бꙋ́дꙋ, по́мыслы ᲂу҆миле́нїѧ ᲂу҆ѧзвлѧ́ѧ тѧ̀, и҆ болѣ́знми серде́чными. И҆ не ѡ҆скꙋдѣ́етъ болѣ́знь ѿ до́мꙋ твоегѡ̀, си́рѣчь ѿ дꙋшѝ и҆ тѣ́ла до́брѣ и҆ поле́знѣ стрꙋ́жемыхъ бж҃їими сла́дкими вои́стиннꙋ и҆ медоиска́пательными мꙋчи́тельствы. Коне́цъ же мꙋче́нїй и҆ болѣ́зней и҆ смѧте́нїѧ и҆ сра́ма и҆ стра́хѡвъ и҆ ѿчаѧва́нїй приключа́тисѧ ѡ҆бы́кшихъ, по́стничествовати предложи́вшымъ, си́хъ всѣ́хъ печа́льныхъ коне́цъ: ра́дость є҆́сть небе́снаѧ, и҆ наслажде́нїе несказа́нно, и҆ сла́дость неизглаго́ланна, и҆ ра́дованїе непреста́нное. Сегѡ́ бо ра́ди ѡ҆скорби́хъ тѧ̀, глаго́летъ, да напита́ю тѧ̀ ма́нною ра́зꙋма, и҆ гла́домъ придави́хъ тѧ̀, да благосотворю̀ тебѣ̀ напослѣ́докъ, и҆ въ го́рнее ца́рство введꙋ̀ тѧ̀. Тогда́ бо взыгра́ете смире́нши и҆́ноцы, ꙗ҆́коже тельцы̀ разрѣше́нни ѿ ᲂу҆́зъ, ѿ страсте́й пло́ти и҆ ѿ и҆скꙋше́нїѧ врагѡ́въ: и҆ тогда̀ попере́те беззакѡ́нныѧ бѣ́сы, ны́нѣ ва́съ попира́ющыѧ, и҆ бꙋ́дꙋтъ ꙗ҆́кѡ пе́пелъ под̾ нога́ма ва́шима. А҆́ще бо благочести́въ и҆ смиренномꙋ́дръ є҆сѝ, не превозноша́ѧсѧ сꙋ́етнымъ дме́нїемъ, нижѐ продерза́ѧ, но сокрꙋше́нъ се́рдцемъ, и҆ вмѣнѧ́ѧ себѐ неключи́ма раба̀ бы́ти, и҆ сокрꙋше́нъ дꙋ́хомъ: а҆́ще тако́въ смиренномꙋ́дръ є҆сѝ, лꙋ́чше є҆́сть твоѐ, ѽ и҆́ноче, прегрѣше́нїе пра́вды мїрски́хъ, и҆ нꙋ́жднѣйшы твоѧ̑ сквє́рны па́че вели́кагѡ жите́йскихъ ѡ҆чище́нїѧ. Что́ бо є҆́сть, є҆гѡ́же ра́ди скорби́ши; Всѧ́кѡ поро́къ є҆́сть приключи́вшїйсѧ. Но ви́ждь нѣ́коего человѣ́ка ѡ҆смоли́вшасѧ рꙋка́ма, ма́лымъ є҆ле́емъ ѡ҆чи́стившасѧ: мно́гѡ ᲂу҆́бѡ па́че ты̀ мо́жеши ѡ҆чи́ститисѧ ми́лостїю бж҃їею. Ꙗ҆́коже бо тебѣ̀ нѣ́сть неꙋдо́бно ѡ҆мы́ти твою̀ ри́зꙋ, та́кѡ мно́гѡ па́че нѣ́сть неꙋдо́бно гдⷭ҇еви ѡ҆мы́ти тѧ̀ ѿ всѧ́кагѡ поро́ка, а҆́ще и҆ на всѧ́къ де́нь, ꙗ҆́коже подо́бно¹¹²³ є҆́сть, приключа́етсѧ ѿ нꙋ́жды и҆скꙋше́нїй. Внегда́ бо глаго́лати тебѣ̀: согрѣши́хъ гдⷭ҇ви! ѿвѣ́тъ дае́тсѧ: ѿпꙋща́ютсѧ грѣсѝ твоѝ. А҆́зъ є҆́смь и҆зглажда́ѧй, и҆ не помѧнꙋ̀. Є҆ли́кѡ бо ѿстоѧ́тъ восто́цы ѿ за̑падъ, ᲂу҆да́лилъ ѿ тебѐ грѣхѝ твоѧ̑¹¹²⁴. И҆ ꙗ҆́коже ще́дритъ ѻ҆те́цъ сы́ны, а҆́зъ ᲂу҆щедрѧ́ю тебѐ: то́чїю ты̀ да не ѿстꙋ́пиши, нижѐ ѿско́чиши и҆збра́вшагѡ тѧ̀, во є҆́же пѣ́ти и҆ моли́тисѧ. Но прилѣпи́сѧ къ немꙋ̀ во все́мъ животѣ̀ твое́мъ, и҆лѝ дерзнове́нїемъ чи́стымъ, и҆лѝ безстꙋ́дїемъ благочести́вымъ и҆ крѣ́пкимъ томꙋ̀ и҆сповѣ́даѧсѧ, и҆ то́й тѧ̀ ѡ҆чи́ститъ свои́мъ ма́нїемъ. Ꙗ҆̀же бо бг҃ъ хотѣ́нїемъ свои́мъ ѡ҆чища́етъ, нижѐ са́мъ пе́тръ верхо́вный ѡ҆скверни́ти возмо́жетъ, и҆лѝ ѡ҆сꙋди́ти: рече́сѧ бо къ немꙋ̀: Ꙗ҆̀же бг҃ъ ѡ҆чи́стилъ є҆́сть, ты̀ не сквернѝ¹¹²⁵. А҆́ще бо бг҃ъ є҆́сть, и҆́же свои́мъ человѣколю́бїемъ ѡ҆правди́вый на́съ, кто́ є҆сть ѡ҆сꙋжда́ѧй ны̀¹¹²⁶; Призыва́ющымъ бо на́мъ и҆́мѧ гдⷭ҇а на́шегѡ і҆и҃са хрⷭ҇та̀, Оу҆до́бь ѡ҆чища́етсѧ со́вѣсть на́ша. И҆ ничто́же раздѣлѧ́етъ междꙋ̀ на́ми же и҆ проро́ки, и҆ про́чїими ст҃ы́ми: не бо̀ положи́лъ є҆́сть на́съ бг҃ъ во гнѣ́въ, но въ снабдѣ́нїе, гдⷭ҇емъ на́шимъ і҆и҃съ хрⷭ҇то́мъ ᲂу҆ме́ршимъ за ны̀. Да а҆́ще бо́дрствꙋемъ въ добродѣ́телехъ, а҆́ще спи́мъ по нѣ́коемꙋ ѡ҆бстоѧ́нїю, ꙗ҆́коже подо́бно¹¹²⁷ є҆́сть въ нѣ́кїихъ ᲂу҆мале́нїихъ, вкꙋ́пѣ со хрⷭ҇то́мъ жи́ви бꙋ́демъ, къ немꙋ̀ взира́юще съ вели́кими стена́нїи, и҆ пла́чꙋщесѧ непреста́ннѡ, и҆ того̀ возды́шꙋще. Ѡ҆блеце́мсѧ ᲂу҆̀бо въ броню̀ вѣ́ры, и҆ воспрїи́мемъ шле́мъ, наде́ждꙋ спасе́нїѧ, да не ѡ҆брѧ́щꙋтъ привхо́да стрѣ́лы ѿча́ѧнїѧ и҆ безнаде́ждїѧ. Но ты̀ глаго́леши ꙗ҆́кѡ гнѣ́ваюсѧ, є҆гда̀ ви́ждꙋ ничи́мже и҆скꙋша́емыхъ мїрѧ́нъ, и҆ лю́тѣ распыха́юсѧ. Но вѣ́ждь, возлю́бленне, ꙗ҆́кѡ потре́бы не и҆́мать сатана̀ и҆скꙋша́ти самоискꙋша́емыхъ, и҆ при́снѡ на дѡ́льнѧѧ влеко́мыхъ жите́йскими вещьмѝ. Вѣ́ждь же и҆ сїѐ, ꙗ҆́кѡ и҆скꙋша́ємымъ по́чєсти ѿлага́ютсѧ и҆ вѣнцы̀: не бо̀ не пекꙋ́щымсѧ ѡ҆ бз҃ѣ, и҆ взна́къ лежа́щымъ и҆ хра́плющымъ мїрѧ́нѡмъ. Но а҆́зъ, глаго́леши, мно́гѡ ѕѣлѡ̀ и҆скꙋша́емь є҆́смь, и҆ лѧ̑двїѧ моѧ̑ наполнѧ́ютсѧ порꙋга́нїй, ꙗ҆́коже глаго́летъ проро́къ, и҆ страда́нїе є҆́сть и҆ слѧче́нїе, и҆ нѣ́сть во пло́техъ и҆сцѣле́нїѧ и҆ прилѣжа́нїѧ ѡ҆ косте́хъ: но ᲂу҆́бѡ бли́зъ вели́кїй томи́мыхъ вра́чь присꙋ́тствꙋетъ, понесы́й не́мѡщи, на́шѧ, и҆ ꙗ҆́звою свое́ю и҆сцѣли́вый на́съ и҆ и҆сцѣлѧ́ѧй: присꙋ́тствꙋетъ и҆ ны́нѣ, наложи́въ спаси́тєльныѧ лѣчбы̑: А҆́зъ бо, глаго́летъ, порази́хъ ѡ҆ставле́нїемъ, а҆́зъ и҆ и҆сцѣлю̀: ᲂу҆̀бо да не ᲂу҆бои́шисѧ: є҆гда́ бо гнѣ́въ ꙗ҆́рости моеѧ̀ ᲂу҆ка́нетъ, па́ки и҆сцѣлю̀. Ꙗ҆́коже бо не забꙋ́детъ жена̀, є҆́же поми́ловати и҆сча́дїѧ чре́ва своегѡ̀, та́кѡ нижѐ а҆́зъ забꙋ́дꙋ тебѐ, глаго́летъ гдⷭ҇ь¹¹²⁸. А҆́ще бо ᲂу҆трѡ́бы пти́цы и҆злива́ютсѧ къ птенцє́мъ є҆ѧ̀, и҆ на всѧ́къ ча́съ посѣща́етъ ѧ҆̀, и҆ приглаша́етсѧ къ ни̑мъ, и҆ пи́щꙋ ᲂу҆сты̀ тѣ̑мъ подава́етъ: мно́гѡ па́че щедрѡ́ты моѧ̑ и҆злїва́ютсѧ на созда̑нїѧ моѧ̑, и҆ мно́гѡ мно́жае ᲂу҆трѡ́бы моѧ̑ на тѧ̀ и҆злива́ютсѧ, и҆ посѣща́ю тѧ̀ ѻ҆́тай, и҆ бесѣ́дꙋю къ тебѣ̀ во ᲂу҆мѣ̀, и҆ пи́щꙋ мы́сли влага́ю, зи́нꙋвшей ꙗ҆́кѡ ма́лой ла́стовицѣ: пи́щꙋ бо тебѣ̀ подаю̀ стра́ха лꙋ́чшагѡ, и҆ пи́щꙋ жела́нїѧ небе́сна, и҆ пи́щꙋ воздыха́нїй ᲂу҆тѣше́нїѧ, и҆ пи́щꙋ ᲂу҆миле́нїѧ, и҆ пи́щꙋ пѣснопѣ́нїѧ, и҆ пи́щꙋ ра́зꙋма глꙋбоча́йша, и҆ пи́щꙋ бж҃е́ственныхъ нѣ́кїихъ та̑инъ: сїѧ̑ глаго́лѧ тебѣ̀ влⷣка тво́й и҆ ѻ҆ц҃ъ, ѡ҆блича́ю и҆ застꙋпа́ю. Сїѧ̑ ᲂу҆́бѡ гдⷭ҇ь на́мъ при́снѡ бесѣ́дꙋетъ помышле́нїи: а҆́зъ же вѣ́мъ, ꙗ҆́кѡ превзыдо́хъ мѣ́рꙋ, мнѡ́га писа́въ, но вы̀ подвиго́сте мѧ̀ сїѐ сотвори́ти: распространи́хъ же сло́во ᲂу҆твержде́нїѧ ра́ди бѣ́дствꙋющихъ ѿ малодꙋ́шїѧ па́сти. Зане́же ѡ҆брѣто́шасѧ, ꙗ҆́коже писа́сте мѝ, ᲂу҆ ва́съ сꙋ́щихъ во і҆нді́и нѣ́цыи ѿ бра́тїй па́че ча́ѧнїѧ, ѕѣлѡ̀ ѡ҆тѧгче́нни и҆скꙋше́нїи, и҆ ѿрица́ющесѧ и҆ житїѧ̀ и҆ пребыва́нїѧ и҆́нокѡвъ, глаго́люще бы́ти то̀ ᲂу҆тѣсне́нно и҆ тьмобѣ́дственно: и҆ ꙗ҆́кѡ ꙗ҆́вѣ мїрски́хъ ᲂу҆́бѡ ᲂу҆блажи́ша, пореко́ша же (и҆) де́нь, въ ѻ҆́ньже ѡ҆́бразъ прїѧ́ша. Сегѡ̀ ра́ди и҆ а҆́зъ понꙋ́дихсѧ должа́йшее сотвори́ти настоѧ́щее сло́во, и҆ гла́дкими глаго́лы, ꙗ҆́коже мощѝ и҆ невѣ́ждѣ и҆ не кни́жномꙋ глаго́лємаѧ разꙋмѣ́ти. Сегѡ̀ ра́ди мнѡ́га написа́хъ, да про́чее не ктомꙋ̀ мїрѧни́на, но самѣ́хъ себѐ то́чїю ᲂу҆блажа́ютъ и҆́ноцы, и҆̀же без̾ всѧ́кагѡ прекосло́вїѧ лꙋ́чшы сꙋ́ть дїади́мы на главѣ̀ носѧ́щихъ, и҆ свѣ́тлѣйшы, и҆ сла́внѣйшы, ꙗ҆́кѡ бг҃ꙋ при́снѡ присѣдѧ́ще. А҆́зъ же сїѧ̑ написа́въ, молю̀ ва́шꙋ любо́вь, па́мѧть мою̀ въ моли́твахъ всегда̀ твори́ти, ꙗ҆́коже сподо́битисѧ мнѣ̀ ѻ҆каѧ́нномꙋ бл҃года́ти гдⷭ҇ни, на добрѣ́йшїй и҆ благі́й коне́цъ ѡ҆предѣли́ти настоѧ́щꙋю жи́знь. Ѻ҆ц҃ъ же щедро́тъ и҆ бг҃ъ всѧ́кїѧ ᲂу҆тѣ́хи пода́стъ ва́мъ ᲂу҆тѣше́нїе вѣ́чно, и҆ ᲂу҆пова́нїе бла́го¹¹²⁹ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, є҆мꙋ́же сла́ва и҆ держа́ва, во вѣ́ки вѣкѡ́въ, а҆ми́нь.

И҆́же во ст҃ы́хъ ѻ҆те́цъ на́шъ дїадо́хъ, нарече́нный є҆пі́скопъ фѡтїкі́йскїй, сꙋ́щїй въ дре́внемъ є҆пі́рѣ і҆ллѷрі́йстѣмъ: сїѐ ᲂу҆́бѡ, ꙗ҆́кѡ ѻ҆́нъ бѣ̀ дре́внїй (ѻ҆те́цъ) и҆ пре́жде седма́гѡ вѣ́ка, мо́жетъ всѧ́къ ᲂу҆разꙋмѣ́ти и҆з̾ слове́съ ст҃а́гѡ маѯі́ма, въ ни́хже ᲂу҆помина́етъ ѻ҆́нъ ѡ҆ глави́знахъ дїадо́ховыхъ. Ѡ҆ то́мже, ꙗ҆́кѡ бѧ́ше мꙋ́жъ премꙋ́дръ дѣ́ломъ и҆ ᲂу҆мозрѣ́нїемъ сїѧ́ющъ, всѧ́комꙋ жела́ющемꙋ ᲂу҆разꙋмѣ́ти возмо́жїю и҆з̾ сохране́ннагѡ сегѡ̀ сло́ва є҆гѡ̀: є҆гѡ́же мно́гимъ и҆скꙋ́сомъ любомꙋ́дрствꙋѧ, и҆ бж҃е́ствєннаѧ восхождє́нїѧ въ се́рдцѣ стѧжа́въ, и҆зрѧ́днѣ написа̀, на сто́ же глави́знъ раздѣлѝ: и҆ ѻ҆́ныѧ, та́кѡ рещѝ, глꙋбоча́йшыѧ та̑инства вожделѣ́нныѧ добродѣ́тели со всѧ́кимъ тща́нїемъ ѿкры̀, и҆ не то́чїю, но и҆ словесы̀ писа́нїѧ и҆ видѣ́нїѧми и҆звѣ́ствованнагѡ ра́зꙋма ᲂу҆мно́живъ, ꙗ҆́кѡ нѣ́кое первоѡбра́зное свѧще́ннагѡ трезвѣ́нїѧ ᲂу҆че́нїе и҆з̾ всѣ́хъ добродѣ́телей соста́вленное всѣ̑мъ сꙋ́щымъ съ съ ни́мъ тре́звенникѡмъ и҆ бг҃онѡ́снымъ ѻ҆тцє́мъ ѡ҆ста́ви. Сегѡ̀ ра́ди и҆ мно́гихъ и҆з̾ ни́хъ ѡ҆брѧ́щеши мно́жицею на главы̑ ꙗ҆́кѡ на сокращє́нныѧ: тща́нїемъ содѣ̑ланнаѧ взира́ющихъ, и҆ ѿ ни́хъ вины̀ свидѣ́тельства са́мыми ѻ҆́ными рече́нїѧми въ и҆зложє́нныѧ и҆́ми трезвѣ̑нїѧ приводѧ́щихъ. Воспомина́етъ же ѡ҆ си́хъ и҆ фѡ́тїй, та́кѡ глаго́лѧ въ чте́нїи с҃а, на стр. сѯ҃г: Под̾ си́ми ᲂу҆́бѡ (за десѧтїю̀ предѣ́лами) сто̀ глави́знъ положѝ, и҆ сло́во сїѐ во бл҃го́е слꙋ́житъ повиза́ющимсѧ и҆ подвиза́вшимсѧ въ ни́хъ совершеннотво́рными дѣѧ́нми, не без̾ ꙗ҆́сности и҆злага́емо... Со́бранный же въ присꙋ́тствїи а҆ндроні́ка палеоло́га собо́ръ, григо́рїй ѳессалоні́тскїй, сѷмеѡ́нъ ѳессалоні́тскїй, григо́рїй сїнаи́тъ, свѧтѣ́йшїй ка́ллїстъ, и҆ и҆ні́и мно́зи неꙋкори́зненнѡ ѡ҆ ни́хъ свидѣ́тельствовахꙋ. Со́теннаѧ же глави́зна, ꙗ҆́коже глаго́летъ фѡ́тїй, а҆́ще и҆ мни́тсѧ бы́ти ᲂу҆коре́нїѧ досто́йна, ѻ҆ба́че бж҃е́ственный маѯі́мъ вины̀ (ю҆̀) и҆збавлѧ́етъ, къ пра́вомꙋ благоче́стїѧ намѣ́ренїю ᲂу҆́мъ є҆ѧ̀ ᲂу҆стремлѧ́ѧ, ꙗ҆́коже въ концѣ̀ си́хъ зри́тсѧ.

Пе́рвый предѣ́лъ вѣ́ры, мы́сль ѡ҆ бз҃ѣ безстра́стїѧ.

Вторы́й предѣ́лъ наде́жды, и҆зше́ствїе ᲂу҆ма̀ ко ᲂу҆пова́ємымъ.

Тре́тїй предѣ́лъ терпѣ́нїѧ, неви́димагѡ ꙗ҆́кѡ ви́димагѡ зрѧ́ще мы́сленныма ѻ҆чи́ма, неѡскꙋ́днѡ терпѣ́ти.

Четве́ртый предѣ́лъ не сребролю́бїѧ, та́кѡ хотѣ́ти є҆́же не и҆мѣ́ти, ꙗ҆́коже хотѣ́ти є҆́же и҆мѣ́ти.

Пѧ́тый предѣ́лъ ра́зꙋма, не разꙋмѣ́ти себѐ, внегда̀ и҆зстꙋпи́ти ко бг҃ꙋ.

Шесты́й предѣ́лъ смиренномꙋ́дрїѧ, забве́нїе и҆справле́нїй внима́тельное.

Седмы́й предѣ́лъ безгнѣ́вїѧ, жела́нїе мно́го є҆́же не гнѣ́ватисѧ.

Ѻ҆смы́й предѣ́лъ чистоты̀, чꙋ́вство прилѣпле́но бг҃ꙋ.

Девѧ́тый предѣ́лъ любвѐ, возраще́нїе любле́нїѧ къ досажда́ющымъ.

Десѧ́тый предѣ́лъ соверше́ннагѡ и҆змѣне́нїѧ, во сла́дости бж҃їей, и҆ ра́дость вмѣнѧ́ти тѧ́жестное сме́рти.

Глава̀ а҃.

Всѧ́кагѡ ᲂу҆̀бо дꙋхо́внагѡ бра́тїе, видѣ́нїѧ, да предвхо́дитъ вѣ́ра, наде́жда, любо́вь, вѧ́щше же любо́вь. Ѻ҆́ва бо преѡби́дѣти ᲂу҆чи́тъ ви̑димаѧ дѡ́браѧ: любо́вь же и҆ са́мꙋю дꙋ́шꙋ добродѣ́тельми совокꙋплѧ́етъ бг҃ꙋ, видѣ́нїемъ ᲂу҆́мнымъ неви́димаго постиза́ющи.

в҃. Є҆стество́мъ бла́гъ є҆ди́нъ є҆́сть бг҃ъ, быва́етъ же и҆ человѣ́къ ѿ прилѣжа́нїѧ, ѡ҆́бразъ бла́гъ сꙋ́щагѡ ра́ди бла́га, во є҆́же нѣ́сть и҆змѣнѧ́емь. Є҆гда̀ дꙋша̀ прилѣжа́нїѧ ра́ди до́брагѡ, толи́кѡ бꙋ́детъ въ бз҃ѣ, є҆ли́кѡ тоѧ̀ си́ла дѣ́йствꙋющи хо́щетъ: Бꙋ́дите бо, речѐ, бла́зи и҆ ще́дри, ꙗ҆́коже и҆ ѻ҆ц҃ъ ва́шъ и҆́же на небесѣ́хъ¹¹³⁰.

г҃. Ѕло́е нижѐ въ є҆стествѣ̀ є҆́сть, нижѐ ᲂу҆́бѡ є҆стество́мъ кто̀ є҆́сть ѕо́лъ, ѕло́е бо ничто́же бг҃ъ сотворѝ: є҆гда́ же въ жела́нїе се́рдца ви́дъ внесе́тъ є҆́же не въ сꙋществѣ̀, тогда̀ нача́ло прїе́млетъ ѕло́е. А҆́ще ли ᲂу҆́бѡ сїѐ и҆стреби́ти хо́щетъ, до́лженъ сꙋ́щи въ призыва́нїи и҆́мени бж҃їѧ ᲂу҆пражнѧ́тисѧ, и҆ блюсти́сѧ ѻ҆бы́чаѧ ѕла́гѡ, си́льнѣйши бо є҆́сть є҆стество̀ до́брагѡ ѻ҆бы́чаѧ ѿ ѕла́гѡ: поне́же ѻ҆́во ᲂу҆́бѡ є҆́сть, ѻ҆́во же нѣ́сть, ра́звѣ то́чїю, внегда̀ содѣва́етсѧ.

д҃. Всѝ человѣ́цы по ѡ҆́бразꙋ є҆смы̀ бж҃їю, ᲂу҆́мнымъ дꙋшѝ движе́нїемъ, а҆ є҆́же по подо́бїю, ѻ҆́нѣхъ є҆ди́нѣхъ є҆́сть, и҆̀же мно́гою любо́вїю свою̀ свобо́дꙋ порабо́тившихъ бг҃ꙋ. Є҆гда́ бо нѣ́смы себѣ̀, тогда̀ подо́бни є҆смы̀, и҆́же на́съ себѣ̀ любо́вїю примири́вшемꙋ: є҆гѡ́же ᲂу҆́бѡ никто́же не полꙋчи́тъ, а҆́ще не покори́тъ своѐ жела́нїе, ѡ҆ жите́йской сла́вѣ весьма̀ небрещѝ.

є҃. Самовла́стїе є҆́сть дꙋшѝ слове́сныѧ хотѣ́нїе, вско́рѣ двиза́емо во є҆́же ᲂу҆́бѡ а҆́ще хо́щетъ, но мы̀, є҆́же ѡ҆ є҆ди́номъ до́бромъ, гото́вꙋ бы́ти да повине́мъ, да при́снѡ благи́ми мы́сльми, па́мѧть потреблѧ́емъ ѕла́гѡ.

ѕ҃. Свѣ́тъ є҆́сть ра́зꙋма и҆́стиннагѡ, є҆́же разсꙋжда́ти внима́тельнѣ до́брое ѿ ѕла́гѡ: то́й бо пра́вый пꙋ́ть, ᲂу҆́мъ ѿводѧ́й къ со́лнцꙋ пра́вды бг҃ꙋ, вво́дитъ є҆го̀ въ безконе́чное ѻ҆́ное просвѣще́нїе ра́зꙋма, ꙗ҆́кѡ со дерзнове́нїемъ про́чее любо́вь и҆́щꙋща. Подоба́етъ ᲂу҆́бѡ не гнѣ́вною ꙗ҆́ростїю восхища́ти пра́ведное, ѿ и҆̀же досажда́ти дерза́ющихъ: благоче́стїѧ бо рве́нїе, не ненави́димыхъ, но ѡ҆блича́емыхъ побѣ́дꙋ ꙗ҆влѧ́етъ.

з҃. Дх҃о́вное сло́во, ᲂу҆́мное чꙋ́вство и҆звѣща́етъ, въ дѣ́йствѣ бо любвѐ ѿ бг҃а но́ситсѧ: тѣ́мже и҆ немꙋ́тенъ на́шъ ᲂу҆́мъ пребыва́етъ въ бг҃осло́вїѧ волна́хъ. Не бо̀ стра́ждетъ тогда̀ ᲂу҆бо́жествомъ печа́ль носѧ́щымъ, поне́же толи́кѡ видѣ́нми и҆з̾ѡби́лꙋетъ, є҆ли́кѡ любвѐ дѣ́йствꙋ жела́етъ. Добро̀ ᲂу҆́бѡ при́снѡ вѣ́рѣ прилѣжа́ти, любо́вїю дѣ́йствꙋющее просвѣще́нїе во є҆́же глаго́лати: ничто́же бо нище́тнѣе по́мысла, без̾ бг҃а любомꙋ́дрствꙋюща ꙗ҆̀же бж҃їѧ.

и҃. Нижѐ не просвѣще́ннꙋ сꙋ́щꙋ, подоба́етъ каса́тисѧ дꙋхо́вныхъ видѣ́нїй, нижѐ ᲂу҆́бѡ бога́тнѣ ѡ҆сїѧва́емомꙋ ѿ бл҃гости всест҃а́гѡ дх҃а, на глаго́ланїе приходи́ти: и҆дѣ́же бо ᲂу҆бо́жество невѣ́дѣнїе прино́ситъ, а҆ и҆дѣ́же бога́тство, не ѡ҆ставлѧ́етъ є҆́же глаго́лати. Оу҆пи́вшисѧ бо тогда̀ дꙋша̀ любо́вїю бж҃е́ственною, молча́тельнымъ гла́сомъ жела́етъ наслажда́тисѧ сла́вы бж҃їѧ: средꙋ́ же ᲂу҆́бѡ дѣ́йствїѧ зрѧ́ще, подоба́етъ во словеса̀ приходи́ти бг҃оглагѡ́ливаѧ. Сїѧ̀ ᲂу҆́бѡ мѣ́ра ви́дъ нѣ́кїй слове́съ пресла́вныхъ дꙋшѝ да́рꙋетъ, ѡ҆сїѧ́нїѧ же бога́тство, вѣ́рꙋ пита́етъ глаго́лющемꙋ въ вѣ́рѣ: да пе́рвѣе ᲂу҆ча́й пло́дъ вкꙋ́ситъ, любо́вїю ра́зꙋма: трꙋжда́ющемꙋбосѧ, речѐ, дѣ́лателю, подоба́етъ пре́жде ѿ плодѡ́въ вкꙋша́ти¹¹³¹.

ѳ҃. Є҆ди́нагѡ ᲂу҆́бѡ ст҃а́гѡ дх҃а є҆́сть дарова́нїе, и҆ премꙋ́дрость, и҆ ра́зꙋмъ, ꙗ҆́коже и҆ всѧ̑ бж҃е́ствєннаѧ, ѻ҆со́бнѡ же ко́ейждо и҆́хъ дѣ́йство и҆́мать: тѣ́мже ᲂу҆́бѡ и҆но́мꙋ дае́тсѧ премꙋ́дрость, дрꙋго́мꙋ же ра́зꙋмъ, ѡ҆ то́мже дс҃ѣ¹¹³², а҆по́столъ свидѣ́тельствꙋетъ. Ра́зꙋмъ бо и҆скꙋ́сомъ совокꙋплѧ́етъ человѣ́ка бг҃ови, во словеса̀ вѧ́щшыѧ¹¹³³ дꙋ́шꙋ не подви́жетъ: тѣ́мже и҆ нѣ́цыи, ѿ и҆̀же и҆́ноческое житїѐ, любомꙋ́дрствꙋющихъ, просвѣтлѧ́еми ᲂу҆́бѡ ѿ тогѡ̀ въ чꙋ́вствѣ, во словеса̀ бж҃е́ствєннаѧ не приходѧ́ще: мꙋ́дрость же, а҆́ще ᲂу҆́бѡ съ си́мъ, во стра́сѣ дае́тсѧ нѣ́которомꙋ, скꙋ́дно же сїѐ, са̑маѧ дѣ̑йства ѡ҆б̾ѧвлѧ́ютъ ра́зꙋма въ любвѝ: поне́же ѻ҆́ва ᲂу҆́бѡ дѣ́йствїемъ, ѻ҆́ва же сло́вомъ просвѣща́ти ѡ҆бы́че. Но ᲂу҆̀бо ра́зꙋмъ моли́тва прино́ситъ, и҆ мно́гое молча́нїе, въ безпеча́лїи коне́чнѣмъ: мꙋ́дрость же не тщесла́вное поꙋче́нїе слове́съ бж҃їихъ, наипа́че же благода́ть даю́щагѡ бг҃а.

і҃. Є҆гда̀ ꙗ҆́ростное дꙋшѝ дви́жетсѧ на стра̑сти, вѣ́дѣти подоба́етъ, ꙗ҆́кѡ молча́нїѧ бы́ти вре́мѧ: го́дъ бо є҆́сть борьбы̀. Є҆гда́ же неꙋста́вство ѻ҆́ное ви́дитъ кто̀, и҆лѝ моли́твою и҆лѝ ми́лостынею въ тишинꙋ̀ возвраща́ющеесѧ, да дви́жетсѧ рачи́тельствомъ бж҃е́ственныхъ слове́съ, во ᲂу҆зи́лищи смиренномꙋ́дрїѧ, ꙗ҆̀же ᲂу҆ма̀ затворѧ́ѧ крылѣ̀: а҆́ще бо кто̀ себѐ не ᲂу҆ничижи́тъ ѕѣлѡ̀, не мо́жетъ ѡ҆ вели́чествѣ бж҃їи глаго́лати.

а҃і. Дꙋхо́вное сло́во, не тщесла́внꙋ внегда̀ дꙋ́шꙋ храни́тъ. видѣ́нїемъ бо свѣ́та всѧ̑ є҆ѧ̀ ᲂу҆́ды благодѣ́йствꙋѧ, є҆́же ѿ человѣ̑къ че́сти, тꙋ́ю презира́ти твори́тъ: тѣ́мже ᲂу҆̀бо и҆ немечта́тельнꙋ при́снѡ соблюда́етъ мы́сль, ꙗ҆́кѡ и҆змѣнѧ́ѧ тꙋ́ю всю̀ въ любо́вь бж҃їю: а҆ є҆́же мꙋ́дрости мїрскі́ѧ сло́во, во славолю́бїе при́снѡ призыва́етъ человѣ́ка, поне́же бо и҆скꙋ́сомъ чꙋ́вственнымъ благодѣ́йствовати не мо́жетъ, хвале́нїи любле́нїе свои́мъ є҆го̀ да́рꙋетъ, ꙗ҆́кѡ лжа̀ сꙋ́щи тщесла́вныхъ человѣ̑къ. Да ᲂу҆́бѡ бж҃е́ственнагѡ сло́ва зало́гъ не ле́стнѣ разꙋмѣ́имъ: а҆́ще бо въ безпеча́лнѣмъ молча́нїи пребыва́юще, и҆ є҆́же глаго́лати вре́мѧ не всꙋ́е и҆знꙋрѧ́емъ, но въ те́плѣй па́мѧти бж҃їей и҆ ᲂу҆се́рдїи ѕѣ́льнѣмъ.

в҃і. И҆́же себѐ любѧ́й, бг҃а люби́ти не мо́жетъ: а҆ и҆́же себѐ не любѧ́й превосходѧ́щагѡ ра́ди бога́тства любвѐ бж҃їѧ, се́й бг҃а лю́битъ: тѣ́мже ᲂу҆́бѡ таковы́й не свою̀ и҆́щетъ сла́вꙋ когда̀, но бж҃їю: И҆́же бо себѐ любѧ́й, свою̀ сла́вꙋ и҆́щетъ, а҆ и҆́же бг҃а любѧ́й сотво́ршаго, тогѡ̀ сла́вꙋ лю́битъ. Дꙋши́ бо разꙋ́мныѧ и҆ бг҃олюби́выѧ сво́йственно, сла́вꙋ ᲂу҆́бѡ и҆ска́ти при́снѡ бж҃їю, во всѣ́хъ ꙗ҆̀же твори́тъ за́повѣдехъ, поне́же свои́мъ смире́нїемъ весели́тсѧ. Ꙗ҆́кѡ бг҃ꙋ ᲂу҆́бѡ сла́ва, вели́чїѧ ра́ди подоба́етъ, человѣ́кꙋ же, смире́нїѧ ра́ди, да тѣ́мъ присво́имсѧ бг҃ꙋ: а҆́ще ᲂу҆́бѡ та́кѡ твори́мъ, и҆ мы̀, ꙗ҆́коже ст҃ы́й і҆ѡа́ннъ крести́тель, ра́дꙋющесѧ сла́вѣ гдⷭ҇ней, непреста́ннѡ глаго́лати на́чнемъ: ѻ҆́номꙋ подоба́етъ растѝ, мнѣ́ же ма́литисѧ¹¹³⁴.

г҃і. Ви́дѣхъ а҆́зъ нѣ́котораго, толи́кѡ бг҃а лю́бѧща, и҆ є҆щѐ рыда́юща, ꙗ҆́кѡ не лю́битъ ꙗ҆́коже хо́щетъ: ꙗ҆́кѡ непреста́ннѡ тогѡ̀ дꙋшѝ въ таково́мъ бы́ти нѣ́коемъ жела́нїи, ꙗ҆́кѡ бг҃а ᲂу҆́бѡ въ себѣ̀ сла́вити: себе́ же, ꙗ҆́кѡ нижѐ сꙋ́ща бы́ти. Се́й бо нижѐ вѣ́сть бытїѐ своѐ, что́ є҆сть, нижѐ въ са́мыхъ похвалѧ́ющихъ словесѣ́хъ: мно́гимъ бо жела́нїемъ смире́нїѧ, своегѡ̀ не разꙋмѣва́етъ достоѧ́нїѧ: но слꙋ́житъ ᲂу҆́бѡ бг҃ꙋ ꙗ҆́кѡ зако́нный свѧще́нникъ, мно́гою же нѣ́которою бг҃олю́бїѧ любо́вїю, кра́детъ па́мѧть своегѡ̀ достоѧ́нїѧ, во глꙋбинѣ̀ нѣ́гдѣ любвѐ бж҃їѧ, и҆́же ѿ тоѧ̀ скрыва́ѧ похвалꙋ̀ въ дꙋ́сѣ смире́нїѧ: да ра́бъ нѣ́кїй непотре́бенъ ѿ себѐ всегда̀ мы́слїю ꙗ҆влѧ́етсѧ, ꙗ҆́кѡ чꙋ́ждь сы́й своегѡ̀ достоѧ́нїѧ любле́нїемъ смире́нїѧ, є҆́же подоба́етъ и҆ на́мъ твори́ти, всѧ́чески че́сти и҆ сла́вы мїрска́гѡ прельще́нїѧ ѿбѣга́ти, превосходѧ́щагѡ ра́ди бога́тства любвѐ, вои́стиннꙋ на́съ возлюби́вшаго гдⷭ҇а.

д҃і. И҆́же во ѡ҆щꙋще́нїи се́рдца любѧ́й бг҃а, то́й позна́сѧ ѿ негѡ̀: є҆ли́кѡ бо а҆́ще кто̀ въ ра́зꙋмѣ дꙋшѝ прїе́млетъ любо́вь бж҃їю, толи́кѡ быва́етъ въ любвѝ є҆гѡ̀. Тѣ́мже про́чее просвѣще́нїѧ разꙋ́мнагѡ въ раче́нїи ѕѣ́льнѣмъ нѣ́коемъ сицевы́й жела́ѧ не престае́тъ, до́ндеже ᲂу҆́бѡ са́мое то́е ко́стнагѡ чꙋ́вства и҆знꙋре́нїе ѡ҆щꙋти́тъ: не ктомꙋ̀ зна́ѧ себѐ, но ѿню́дъ ѿ любвѐ бж҃їѧ распалѧ́емь, и҆ и҆змѣне́нъ ве́сь. Таковы́й же и҆ є҆́сть во здѣ́шнемъ житїѝ и҆ нѣ́сть, и҆ во ѻ҆́номъ пребыва́етъ несоверше́ннѡ: и҆ є҆ще́ бо не и҆зше́дъ своегѡ̀ тѣ́ла, и҆схо́дитъ любо́вїю движе́нїемъ дꙋше́внымъ непреста́ннѡ ко бг҃ꙋ. Неѿло́жнѣ бо про́чее ѻ҆гне́мъ любвѐ се́рдце возжиза́ѧ, нꙋ́ждею нѣ́коею и҆ жела́нїемъ прилѣплѧ́етсѧ бг҃ꙋ, ꙗ҆́кѡ и҆зстꙋпи́въ є҆ди́ною своегѡ̀ любле́нїѧ любо́вїю бж҃їею. А҆́ще бо и҆зꙋми́хомсѧ, речѐ, бг҃ꙋ: а҆́ще же цѣломꙋ́дрствꙋемъ, ва́мъ¹¹³⁵.

є҃і. Є҆гда̀ на́чнетъ кто̀ бога́тнѣ ѡ҆щꙋща́ти любо́вь бж҃їю, тогда̀ начина́етъ въ ра́зꙋмѣ дх҃о́вномъ и҆ бли́жнѧго люби́ти: сїѧ́ бо є҆́сть любо́вь, ѡ҆ не́йже всѧ́кое ст҃о́е писа́нїе глаго́летъ, є҆́же бо по пло́ти любле́нїе, ѕѣлѡ̀ ᲂу҆до́бь разрꙋша́етсѧ, ма́лѣй нѣ́коей ѡ҆брѣ́тшейсѧ винѣ̀: ра́зꙋмомъ бо не свѧзꙋ́ютсѧ дх҃о́внымъ. Тогѡ̀ ра́ди а҆́ще и҆ слꙋчи́тсѧ ѿ нѣ́кїихъ раздраже́нїе бы́ти на содѣ́йствꙋемꙋю ѿ бг҃а дꙋ́шꙋ, ѻ҆ба́че не рѣши́тсѧ ѿ тоѧ̀ сою́зъ любвѐ: теплото́ю бо любвѐ бж҃їѧ воспалѧ́ющи себѐ, а҆́бїе во благо́е возвраща́етсѧ вско́рѣ, и҆ съ вели́кою ра́достїю въ любо́вь ко бли́жнемꙋ, а҆́ще и҆ вельмѝ ѿ тогѡ̀ досажда́етсѧ, и҆лѝ тщетꙋ̀ прїе́млетъ: во сла́дости бо бж҃їей, го́рестное всѧ́чески и҆знꙋрѧ́етъ любопрѣ́нїе.

ѕ҃і. Никто́же мо́жетъ, не ᲂу҆боѧ́всѧ бг҃а въ ра́зꙋмѣ се́рдца, возлюби́ти кого̀ ѿ всегѡ̀ се́рдца: дѣ́йствїемъ бо стра́ха ѡ҆чища́емо и҆ ᲂу҆мѧгчава́емо, ꙗ҆́кѡ дꙋша̀ въ любо́вь дѣ́йствꙋемꙋю прихо́дитъ. Не прїи́детъ же ᲂу҆́бѡ кто̀ во стра́хъ бж҃їй рече́ннымъ ѡ҆́бразомъ, а҆́ще не всѣ́хъ жите́йскихъ внѣ̀ бꙋ́детъ попече́нїй. Є҆гда́ бо въ молча́нїи вели́цѣ и҆ безпеча́лїи бꙋ́детъ ᲂу҆́мъ, тогда̀ подви́жетъ є҆го̀ стра́хъ бж҃їй, ѡ҆чища́ѧ того̀ въ чꙋ́вствѣ мно́зѣ ѿ всѧ́кагѡ землена́гѡ дебельства̀, да си́це того̀ введе́тъ въ вели́кꙋю любо́вь бла́гости бж҃їѧ. Тѣ́мже ᲂу҆́бѡ стра́хъ є҆щѐ чи́стѧщихсѧ є҆́сть съ посре́днимъ любвѐ, соверше́ннаѧ же любо́вь ᲂу҆жѐ ѡ҆чище́нныхъ, въ ни́хже не ктомꙋ̀ є҆́сть стра́хъ: соверше́ннаѧ бо любо́вь, речѐ, во́нъ и҆зго́нитъ стра́хъ¹¹³⁶: ѻ҆боѧ́же пра́ведныхъ сꙋ́ть є҆ди́нѣхъ, и҆́же дѣ́йствїемъ всест҃а́гѡ дх҃а, добродѣ́тєли содѣва́ютъ. И҆ сегѡ̀ ра́ди ᲂу҆́бѡ глаго́летъ писа́нїе: бо́йтесѧ гдⷭ҇а всѝ ст҃і́и є҆гѡ̀¹¹³⁷. и҆́нде же: возлюби́те гдⷭ҇а всѝ преподо́бнїи є҆гѡ̀¹¹³⁸. Да навы́кнемъ ꙗ҆́вѣ, ꙗ҆́кѡ и҆ є҆щѐ чи́стѧщихсѧ пра́ведныхъ, стра́хъ бж҃їй є҆́сть, со сре́днимъ ꙗ҆́коже рече́сѧ любвѐ ѡ҆чище́нныхъ же, соверше́ннаѧ любо́вь, въ ни́хже не ктомꙋ̀ є҆́сть печа́ль стра́ха ко́егѡ, но горѣ́нїе непреста́нно, и҆ прилѣпле́нїе дꙋшѝ ко бг҃ꙋ дѣ́йствїемъ ст҃а́гѡ дх҃а, по глаго́лющемꙋ: прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀¹¹³⁹.

з҃і. Ꙗ҆́коже слꙋча́ющымсѧ тѣ́лꙋ ꙗ҆́звамъ, є҆гда̀ ᲂу҆́бѡ ѡ҆леденѣ́вшымъ, и҆ въ небреже́нїи бы́вшымъ и҆̀мъ, тогда̀ и҆ пла́стырю приноси́мꙋ тѣ̑мъ ѿ врачє́въ не ѡ҆щꙋща́тисѧ: ѡ҆чищє́ннымъ же, дѣ́йствїе разꙋмѣва́етсѧ пла́стырѧ, и҆ во и҆сцѣле́нїе вско́рѣ ѿсю́дꙋ приходи́ти. Си́це и҆ дꙋша̀, до́ндеже ᲂу҆́бѡ неприлѣжа́тельна быва́етъ, и҆ ѿ прока́зы любостра́стїѧ всѧ̀ покрыва́ема, стра́хъ бж҃їй ᲂу҆вѣ́дѣти не мо́жетъ: а҆́ще бы и҆ непреста́ннѣ кто̀ возвѣща́лъ є҆́й стра́шное и҆ си́льное бж҃їе сꙋди́ще, небреже́тъ ѡ҆ то́мъ. Є҆гда́ же ᲂу҆́бѡ начне́тъ мно́гимъ внима́нїемъ чи́ститисѧ, тогда̀, ꙗ҆́кѡ цѣльбꙋ̀ нѣ́кꙋю сꙋ́щꙋ живо́тнꙋю, бж҃е́ственный стра́хъ познава́етъ, ꙗ҆́коже дѣ́йствїемъ ѡ҆бличи́тель воспалѧ́ющъ тꙋ́ю во ѻ҆гнѝ безстра́стїѧ: тѣ́мже по ча́сти ѡ҆чища́ема, въ соверше́ннꙋю чистотꙋ̀ доспѣва́етъ, толи́кѡ любвѝ прилага́ющисѧ, є҆ли́кѡ ᲂу҆малѧ́етсѧ стра́хъ, да си́це въ соверше́ннꙋю любо́вь доспѣ́етъ, въ не́йже стра́ха нѣ́сть, ꙗ҆́коже рече́сѧ: но безстра́стїе всѧ́ко, сла́вою бж҃їею содѣва́емое. Да бꙋ́детъ ᲂу҆́бѡ на́мъ во хвалꙋ̀ хвала́мъ непреста́ннѡ, пе́рвѣе ᲂу҆́бѡ стра́хъ бж҃їй: пото́мже любо́вь стѧжа́ти: и҆ и҆сполне́нїе є҆́же ѡ҆ хрⷭ҇тѣ̀ соверше́нїѧ дости́гнꙋти.

и҃і. Дꙋша̀ не свободи́вшисѧ мїрски́хъ попече́нїй, нижѐ бг҃а возлю́битъ и҆́скреннѣ, нижѐ дїа́вола возненави́дитъ досто́йнѣ: покрыва́ло бо и҆́мать ѿню́дъ тѧ́жко, печа́ль сегѡ̀ житїѧ̀. Тѣ́мже ᲂу҆́мъ при таковы́хъ не мо́жетъ разꙋмѣ́ти своѐ ѡ҆сꙋжде́нїе, да ѿ себѐ и҆скꙋ́ситъ нелѣ́стнѣ и҆зрече́нїе сꙋда̀: за сїѐ всѣ́хъ ᲂу҆́бѡ ѡ҆ша́ѧнїе прикла́дно є҆́сть.

ѳ҃і. Дꙋшѝ чи́стыѧ сво́йственно, сло́во ᲂу҆́бѡ незави́стно, рве́нїе неѕло́бивое, раче́нїе же непреста́нно гдⷭ҇ни сла́вы: тогда́ бо и҆ ᲂу҆́мъ ѻ҆па́снѣ разчита́етъ своѧ̑ мѣ̑рила, ꙗ҆́кѡ въ чи́стѣмъ сꙋди́щи, во свое́й сꙋ́щи мы́сли.

к҃. Вѣ́ра без̾ дѣ́лъ, и҆ дѣ́ло невѣ́рно, пра́здно є҆́сть: є҆ди́нѣмъ бо ѡ҆́бразомъ и҆скꙋ́сѧтсѧ: подоба́етъ бо вѣ́рнꙋ вѣ́рꙋ показꙋ́ющꙋ, вє́щи бг҃ꙋ приноси́ти: ниже́ бо ѻ҆ц҃ꙋ̀ на́шемꙋ а҆враа́мꙋ во пра́вдꙋ вмѣни́ласѧ бы вѣ́ра, а҆́ще не бы̀ плода̀ є҆ѧ̀ ѻ҆́трока приве́лъ¹¹⁴⁰.

к҃а. И҆́же любѧ́й бг҃а, и҆ вѣ́рꙋетъ и҆́скреннѣ, и҆ дѣла̀ вѣ́ры соверша́етъ преподо́бнѣ: а҆ и҆́же вѣ́рꙋѧй то́кмѡ, не сꙋ́щи же въ любвѝ, нижѐ са́мꙋю вѣ́рꙋ и҆́мать, ю҆́же мни́тъ и҆мѣ́ти. Въ ле́гкости бо нѣ́коей вѣ́рꙋетъ ᲂу҆́мъ, ꙗ҆́кѡ ѿ тѧ́жести мїрско́й сла́вы въ любвѝ не дѣ́йствꙋемь: вѣ́ра ᲂу҆́бѡ любо́вїю содѣ́йствꙋема, вели́ка глави́зна добродѣ́телемъ.

к҃в. Вѣ́ры глꙋби́на и҆спытꙋ́ема, ᲂу҆́бѡ волнꙋ́етсѧ: просты́мъ же зало́гомъ зрѧ́щаѧсѧ, ᲂу҆тиша́етсѧ. Забве́нїе бо ѕлы̑мъ сꙋ́щи вода̀, глꙋбинꙋ̀ вѣ́ры не терпи́тъ ѿ лꙋка́выхъ мы́слей зрѣ́тисѧ: простото́ю ᲂу҆́бѡ мы́сли, въ тѣ́хъ да пла́ваемъ вода́ми рече́нными, да во приста́нище си́це доспѣ́емъ бж҃їѧ хотѣ́нїѧ.

к҃г. Никто́же мо́жетъ люби́ти, и҆лѝ вѣ́ровати и҆́скреннѣ, ра́звѣ а҆́ще и҆́мать самаго̀ себѐ ѡ҆глаго́льника. Є҆гда́ бо со́вѣсть на́ша себѐ ѡ҆бличе́нми возмꙋща́етъ, не ктомꙋ̀ ᲂу҆́мъ попꙋща́етсѧ воню̀ премі́рныхъ бла̑гъ ѡ҆щꙋща́ти, но а҆́бїе въ сомнѣ́нїе дѣ́литсѧ, те́плѣ ᲂу҆́бѡ двиза́тисѧ предвари́вшимъ и҆скꙋ́сомъ вѣ́ры жела́ѧ: не могі́й же тꙋ́ю въ чꙋ́вствѣ се́рдца любо́вїю прїѧ́ти, разли́чныхъ ра́ди стрѣка́нїй, ꙗ҆́коже рече́сѧ, ѡ҆блича́ющей со́вѣсти: ѻ҆ба́че ѡ҆чи́щше себѐ теплѣ́йшимъ внима́нїемъ, со мно́жайшимъ и҆скꙋ́сомъ, со бг҃омъ жела́емое на́чнемъ.

к҃д. Ꙗ҆́коже ко мни̑мымъ на́мъ дѡ́брымъ, нꙋ́жднѣ нѣ́кагѡ тѣлє́снаѧ пред̾ꙋбѣжда́ютъ чꙋ̑вства: си́це къ неви̑димымъ на́мъ благи̑мъ ᲂу҆́мное двиза́нїе ѡ҆бы́че, є҆гда̀ бж҃е́ственныѧ вкꙋ́ситъ бла́гости, наставлѧ́ти своѐ чꙋ́вство. Ко́емждо бо своего̀ сро́дїѧ всѧ́чески жела́етъ, дꙋша̀ ᲂу҆́бѡ, ꙗ҆́кѡ безпло́тна, небе́сныхъ го́рнихъ бла̑гъ: тѣ́ло же, ꙗ҆́кѡ пе́рсть, землены́ѧ сла́дости. Подви́гнемсѧ ᲂу҆̀бо вни́ти во и҆скꙋ́съ невеще́ственнагѡ чꙋ́вствїѧ непреле́стнѣ, превы́ше веще́ственнагѡ, трꙋды̑ тонча́йшими.

к҃є. Є҆ди́но ᲂу҆̀бо бы́ти чꙋ́вство є҆сте́ственно, са́мое дѣ́йство ᲂу҆чи́тъ ст҃а́гѡ ра́зꙋма, во два́ же дѣ̑йства про́чее, преслꙋша́нїѧ ра́ди а҆да́мова раздѣли́сѧ, дрꙋго́е же просто́е, є҆́же ѿ ст҃а́гѡ дх҃а си́лы быва́етъ, є҆го́же не всѧ́къ мо́жетъ вѣ́дѣти, ра́звѣ є҆ди́ни, и҆̀же житїѧ̀ сегѡ̀ ма́ннꙋ, наде́жды ра́ди бꙋ́дꙋщихъ бла̑гъ презрѣ́вше сла́дцѣ, и҆ всѧ̑ тѣле́сныхъ чꙋ́вствъ жела̑нїѧ въ воздержа́нїи и҆зсꙋши́ша. Въ си́хъ бо є҆ди́нѣхъ благомо́щнѣ ᲂу҆́мъ безпеча́лїемъ дви́жимь бж҃е́ственныѧ бла́гости неизречє́нныѧ разꙋмѣ́ти мо́жетъ: тѣ́мже по мѣ́рѣ своегѡ̀ преспѣ́ѧнїѧ, и҆ тѣ́лꙋ тогда̀ преподае́тъ своѧ̑ ра́дѡсти, безмѣ́рнымъ нѣ́кїимъ сло́вомъ любвѐ и҆сповѣ́данїѧ ра́дꙋѧсѧ. На того́ бо речѐ, ᲂу҆пова̀ се́рдце моѐ, и҆ помо́же мѝ: и҆ процвѣтѐ пло́ть моѧ̀, и҆ во́лею мое́ю и҆сповѣ́мсѧ є҆мꙋ̀¹¹⁴¹: тогда́ бо бы́вшаѧ ра́дость дꙋшѝ и҆ тѣ́лꙋ воспомина́нїе є҆́сть неле́стно нетлѣ́ннагѡ житїѧ̀.

к҃ѕ. Неволнꙋ́емꙋ при́снѡ подоба́етъ храни́ти мы́сль подвиза́ющымсѧ, да ꙗ҆́коже въ тꙋ́ю текꙋ́щыѧ по́мыслы ᲂу҆́мъ разсꙋжда́ѧ дѡ́брыѧ ᲂу҆̀бо и҆ бг҃опѡ́сланныѧ, въ сокро́вищахъ па́мѧти полага́етъ: стрѡ́потныѧ же и҆ бѣсови̑дныѧ внѣ̀ нѣ́гдѣ є҆сте́ственныхъ сокро́вищъ ѿме́щетъ. И҆ въ мо́ри бо ᲂу҆тиша́емомъ, да́же до глꙋбины̀ тогѡ̀ движе́нїѧ ѿ и҆̀же ры́бы ловѧ́щихъ зри́тсѧ, ꙗ҆́кѡ ни є҆ди́на тѣ̑мъ ника́коже ᲂу҆таи́тсѧ тогда̀, и҆̀же та́мѡ преходѧ́щихъ живо́тныхъ стезѧ̀. Є҆гда́ же бо ѿ бꙋ́ри возмꙋща́етсѧ, сокрыва́етъ смꙋщє́нїѧ дрѧ́хлостїю, ꙗ҆̀же во смире́нїи тишины̀ зрѣ́тисѧ любоче́ствоваше. тѣ́мже и҆ пра́зднꙋ сꙋ́щꙋ хи́трость тогда̀ ви́димъ, и҆̀же лови́твы кѡ́зни простира́ющихъ. Є҆́же ᲂу҆́бѡ и҆ ᲂу҆мꙋ̀ зри́тельнꙋ приключа́етсѧ всѧ́кѡ страда́ти: наипа́че є҆гда̀ ѿ гнѣ́ва непра́ведна, глꙋбина̀ дꙋше́внаѧ смꙋща́етсѧ.

к҃з. Ма́лыхъ є҆́сть ѕѣлѡ̀, є҆́же всѧ̑ своѧ̑ ѻ҆па́снѡ вѣ́дѣти согрѣшє́нїѧ, и҆ тѣ́хъ, и҆́хже никогда́ же ᲂу҆́мъ восхища́етсѧ ѿ па́мѧти бж҃їѧ. И҆́мже ѡ҆́бразомъ ѻ҆́чи на́ши тѣлє́сныѧ, є҆гда̀ ᲂу҆́бѡ здра́вствꙋютъ, всѧ̑ зрѣ́ти да́же и҆ лета́ємыѧ комарѝ и҆лѝ мꙋ̑шицы по воздꙋ́хꙋ мо́гꙋтъ: є҆гда́ же ѿ мꙋ́тности и҆лѝ и҆зли́тїѧ нѣ́коегѡ покрыва́еми сꙋ́ть, а҆́ще ᲂу҆́бѡ и҆ вели́ко что̀ бꙋ́детъ ѿ си́хъ срѣта́емыхъ, то̀ и҆ сїѐ то́нцѣ зрѧ́тъ: ма̑лаѧ же и҆ не разꙋмѣва́ютъ чꙋ́вствомъ ви́дительнымъ. Си́це и҆ дꙋша̀, а҆́ще ᲂу҆́бѡ є҆́же ѿ мїролю́бїѧ се́й слꙋчи́вшеесѧ помраче́нїе, внима́нїемъ и҆стончава́етъ, и҆ ꙗ҆̀же ѕѣлѡ̀ сеѧ̀ ма̑лаѧ согрѣшє́нїѧ, ꙗ҆́кѡ вели̑ка вмѣнѧ́ющи, сле́зы на сле́зы во мно́зѣ благодаре́нїи непреста́ннѡ и҆зно́ситъ: пра́веднїи бо, речѐ, и҆сповѣ́дѧтсѧ и҆́мени твоемꙋ̀¹¹⁴². А҆́ще ли же въ мїрско́й молвѣ̀ пребыва́етъ любо́внѣ, тогда́ бо, а҆́ще что̀ и҆ ᲂу҆бі́йственно, и҆лѝ мно́гагѡ досто́йно мꙋче́нїѧ содѣва́етъ, то̀ и҆ сїѐ є҆два̀ зна́етъ: и҆на̑ѧ же согрѣшє́нїѧ нижѐ назна́менати мо́жетъ: но ꙗ҆́кѡ и҆справлє́нїѧ сїѧ̑ мно́гащи вмѣнѧ́етъ: тѣ́мже ѡ҆ тѣ́хъ и҆ прилѣ́жнѣе сло́во творѧ́щи, ѻ҆каѧ́ннаѧ, не стыди́тсѧ.

к҃и. Оу҆́мъ ѡ҆чи́стити є҆ди́номꙋ ст҃о́мꙋ дх҃ꙋ є҆́сть сво́йственно. А҆́ще бо не вни́детъ крѣ́пкїй, и҆ плѣни́тъ и҆ свѧ́жетъ хи́щника, ника́коже плѣ́нъ свободи́тсѧ. Подоба́етъ ᲂу҆̀бо всѣ́ми добродѣ́тельми, наипа́че же ми́ромъ дꙋше́внымъ поко́ити дх҃ъ ст҃ы́й, да свѣти́льникъ ра́зꙋма и҆́мамы въ на́съ ꙗ҆влѧ́ема всегда̀: сїѧ́ющꙋ бо томꙋ̀ непреста́ннѡ во храни́льницахъ дꙋше́вныхъ, не то́кмѡ ꙗ҆влѧ́еми быва́ютъ во ᲂу҆мѣ̀ го́рцїи ѻ҆́нїи и҆ те́мнїи ѿ бѣсѡ́въ прило́зи, но и҆ и҆знемога́ютъ ѕѣлѡ̀, ѡ҆блича́еми ѿ ст҃а́гѡ ѻ҆́нагѡ свѣ́та. Сегѡ́ бо ра́ди и҆ а҆по́столъ глаго́летъ: дх҃а не ᲂу҆гаша́йте¹¹⁴³: вмѣ́стѡ не ѕлодѣ́йствꙋюще, и҆лѝ ѕло̀ помышлѧ́юще, ѡ҆печалѧ́ете ст҃а́гѡ дх҃а бла́гость: да не лиши́тесѧ спобо́рника ѻ҆́ныѧ свѣщѝ. Не бо̀, и҆́же присносꙋ́щный и҆ животво́рный, ᲂу҆гаса́етъ: но ѻ҆́нагѡ ѡ҆печале́нїе, си́рѣчь ѿвраще́нїе дрѧ́хлъ, и҆ несїѧ́теленъ ᲂу҆́мъ ѡ҆ставлѧ́етъ ра́зꙋма.

к҃ѳ. Є҆ди́но ᲂу҆̀бо, ꙗ҆́коже рече́сѧ, чꙋ́вство бы́ти є҆сте́ственно дꙋшѝ, пѧ́ть бо є҆ди́ною тѣ́ла на́шегѡ ра́знствишасѧ потре́бами, всест҃ы́й и҆ человѣколюби́вый ᲂу҆́читъ на́съ дх҃ъ бж҃їй: сораздѣлѧ́етсѧ же сїѐ ѿ преслꙋша́нїѧ прибы́вшагѡ ра́ди поползнове́нїѧ ᲂу҆ма̀, са́мыми дꙋше́вными движе́ньми. Сегѡ̀ ра́ди ѻ҆́во ᲂу҆̀бо стра́стной соѿво́дитсѧ є҆ѧ̀ ча́сти, ѿню́дꙋже вре́менныхъ благи́хъ сла́достнѣ чꙋ́вствꙋетъ: ѻ҆́во же слове́сномꙋ є҆ѧ̀ и҆ ᲂу҆́мномꙋ мно́гажды сора́дꙋетсѧ движе́нїю, поне́же къ небє́снымъ добро́тамъ, є҆гда̀ цѣломꙋ́дрствꙋемъ, ᲂу҆́мъ на́шъ тещѝ жела́етъ. А҆́ще ᲂу҆̀бо во ѻ҆бы́чай прїи́демъ, є҆́же преѡби́дѣти мі́ра сегѡ̀ бога́тство: тогда̀ возмо́жемъ и҆ землено́е дꙋшѝ жела́нїе, слове́сномꙋ є҆ѧ̀ зало́гꙋ совокꙋпи́ти, прїѡбще́нїю всест҃а́гѡ дх҃а сїѐ ᲂу҆строѧ́ющꙋ въ на́съ. А҆́ще бо не тогѡ̀ бж҃ество̀ дѣ́йственнѣ, ꙗ҆̀же се́рдца на́шегѡ храни̑лища ѡ҆зари́тъ, не возмо́жемъ ᲂу҆̀бо во нераздѣ́льнѣ чꙋ́вствѣ, си́рѣчь всецѣ́лымъ зало́гомъ вкꙋси́ти блага́гѡ.

л҃. Чꙋ́вство є҆́сть ᲂу҆ма̀, вкꙋше́нїе ѻ҆па́снѡ разсꙋжда́емыхъ. И҆́мже бо ѡ҆́бразомъ вкꙋси́тельнымъ на́шимъ чꙋ́вствомъ тѣ́ла, дѡ́браѧ ѿ ѕлы́хъ неле́стнѣ во вре́мѧ здра́вїѧ разсꙋжда́юще, благи́хъ жела́емъ: та́кѡ и҆ ᲂу҆́мъ на́шъ, є҆гда̀ бл҃гомо́щнѣ, и҆ во мно́зѣ безпеча́лїи двиза́тисѧ на́чнетъ, мо́жетъ и҆ бж҃е́ственнагѡ ᲂу҆тѣше́нїѧ бога́тнѣ разꙋмѣ́ти, и҆ ѿ проти́внагѡ никогда́же совосхища́тисѧ. Ꙗ҆́коже бо тѣ́ло, земны́хъ вкꙋша́ѧ сла́достей и҆́мать и҆скꙋ́съ чꙋ́вствїѧ без̾ погрѣше́нїѧ: си́це и҆ ᲂу҆́мъ, є҆гда̀ вы́шше плотска́гѡ хо́дитъ мꙋдрова́нїѧ, мо́жетъ вкꙋша́ти неле́стнѣ ᲂу҆тѣше́нїе ст҃а́гѡ дх҃а: вкꙋси́те бо, речѐ, и҆ ви́дите, ꙗ҆́кѡ бла́гъ гдⷭ҇ь¹¹⁴⁴: и҆ и҆мѣ́ти па́мѧть вкꙋше́нїѧ, дѣ́йствїѧ ра́ди любвѐ неѡскꙋ́днѣ, внегда̀ и҆скꙋша́ти непогрѣ́шнѣ ра́знствꙋємаѧ по глаго́лющемꙋ ст҃о́мꙋ а҆пⷭ҇лꙋ: и҆ ѡ҆ се́мъ молю̀, да любо́вь ва́ша є҆щѐ па́че и҆ па́че и҆збы́точествꙋетъ въ ра́зꙋмѣ, и҆ во всѧ́комъ чꙋ́вствѣ, во є҆́же и҆скꙋша́ти на́мъ ра́знствꙋємаѧ¹¹⁴⁵.

л҃а. Є҆гда̀ ᲂу҆́мъ на́шъ начне́тъ ѡ҆щꙋща́ти всест҃а́гѡ дх҃а ᲂу҆тѣше́нїе, тогда̀ и҆ сатана̀ ꙗ҆́вльсѧ во сла́дцѣ нѣ́которомъ чꙋ́вствѣ въ нощнѣ́мъ безмо́лвїи, є҆гда̀ кто̀ ꙗ҆́коже въ со́нное нѣ́кое то́нкое прихо́дитъ преложе́нїе, и҆ дꙋ́шꙋ ᲂу҆тѣша́етъ. И҆ а҆́ще ᲂу҆́бѡ въ те́плѣй ѕѣлѡ̀ па́мѧти ѡ҆брѧ́щетсѧ ᲂу҆́мъ, содержа́й ст҃о́е и҆́мѧ гдⷭ҇а і҆и҃са, и҆ ꙗ҆́коже ѻ҆рꙋ́жїемъ ѡ҆полча́етсѧ на пре́лесть всест҃ы́мъ и҆ пресла́внымъ и҆́менемъ ѻ҆́нѣмъ: ѿхо́дитъ ᲂу҆́бѡ лсте́цъ пре́лести, про́чее же во ра́ть ꙗ҆вле́ннꙋ возгара́етсѧ на дꙋ́шꙋ: тѣ́мже ᲂу҆́мъ разꙋмѣва́ѧ ѻ҆па́снѣйше ле́сть лꙋка́вагѡ, мно́жае во и҆скꙋ́съ преспѣва́етъ разсꙋжде́нїѧ.

л҃в. Благо́е ᲂу҆тѣше́нїе, и҆лѝ бдѧ́щꙋ тѣ́лꙋ быва́етъ, и҆лѝ и҆ въ со́нное нѣ́кое хотѧ́щꙋ приходи́ти зна́менїе, є҆гда̀ кто̀ въ те́плѣй па́мѧти бж҃їей, ꙗ҆́кѡ прилѣпле́нъ бꙋ́детъ тогѡ̀ любвѝ: ле́стное же, въ то́нокъ нѣ́кїй при́снѡ, ꙗ҆́коже рѣ́хъ, со́нъ приходѧ́щꙋ подви́жникꙋ, со сре́днею па́мѧтїю бж҃їею. Ѻ҆́во ᲂу҆́бѡ ꙗ҆́кѡ ѿ бг҃а сꙋ́щи, ꙗ҆вле́ннѡ дꙋ́шы и҆̀же благоче́стїѧ подви́жникѡвъ во и҆злїѧ́нїи мно́зѣ дꙋшѝ, ᲂу҆тѣша́ти къ любвѝ хо́щетъ: ѻ҆́во же, поне́же на вѣ́трѣ нѣ́коемъ, пре́лєсти развѣва́ти дꙋ́шꙋ ѡ҆бы́че, ᲂу҆крада́ти сно́мъ тѣле́снымъ и҆скꙋ́съ чꙋ́вствїѧ, здра́вствꙋющагѡ ᲂу҆ма̀ ѡ҆ па́мѧти бж҃їей начина́етъ. А҆́ще ᲂу҆́бѡ ѡ҆брѧ́щетсѧ ᲂу҆́мъ, ꙗ҆́коже рѣ́хъ, воспомина́ѧ частѣ́йше гдⷭ҇а і҆и҃са, расточа́етъ ᲂу҆́бѡ дыха́нїе ѻ҆́ное сладкови́дное вра́жїе: ра́дꙋѧсѧ же, во є҆́же на того̀ дви́жетсѧ ра́ть, ꙗ҆́кѡ ѻ҆рꙋ́жїе и҆мѣ́ѧ про́чее десно́е со благода́тїю, ю҆́же ѿ и҆скꙋ́са похвалꙋ̀.

л҃г. А҆́ще несомнѣ́ннымъ и҆ немечта́тельнымъ движе́нїемъ дꙋша̀ къ любвѝ возжиза́тисѧ на́чнетъ бж҃їей, влекꙋ́щи ꙗ҆́кѡ и҆ тѣ́ло во глꙋбинꙋ̀ любвѐ ѻ҆́ныѧ неизрече́нныѧ, и҆лѝ бдѧ́щи, и҆лѝ, и҆́мже рѣ́хъ ѡ҆́бразомъ, въ со́нъ грѧдꙋ́щꙋ, и҆́же ѿ ст҃ы́ѧ благода́ти дѣ́йствꙋемꙋ, ничто́же и҆́но тогда̀ разꙋмѣва́ющи, ра́звѣ сїѐ то́чїю, въ не́мже є҆́же дви́жетсѧ, вѣ́дѣти подоба́етъ, ст҃а́гѡ дх҃а бы́ти дѣ́йствїе: ᲂу҆слажда́ема бо всѧ̀ ѿ ѻ҆́ныѧ неизрече́нныѧ сла́дости, ничто́же и҆́но мо́жетъ тогда̀ разꙋмѣ́ти: поне́же непреста́нною нѣ́коею весели́тсѧ ра́достїю. А҆́ще ли сомнѣ́нїе ѿню́дъ, и҆лѝ скве́рнꙋю нѣ́которꙋю мы́сль ᲂу҆́мъ тогда̀ дѣ́йствовати начне́тъ, и҆лѝ а҆́ще и҆ ст҃о́е прїе́млетъ и҆́мѧ ко ѿгна́нїю ѕла́гѡ, а҆ не па́че къ любвѝ то́кмѡ бж҃їей, подоба́етъ разꙋмѣ́ти, ꙗ҆́кѡ ѿ преле́стника є҆́сть ѻ҆́ное ᲂу҆тѣше́нїе, ра́дости зна́менїе: ра́дость же ѻ҆́на неизвѣ́стна є҆́сть и҆ некрѣпка̀ всѧ̀ хотѧ́щꙋ прелюбодѣ́йствовати дꙋшѝ на́шеѧ врагꙋ̀. Є҆гда́ бо ви́дитъ ᲂу҆ма̀ и҆скꙋ́сомъ своегѡ̀ чꙋ́вствїѧ ѻ҆па́снѣ хва́лѧщасѧ, тогда̀ ᲂу҆тѣше́ньми нѣ́кїими, ꙗ҆́коже рече́сѧ, бл҃гоѧвле́нными призыва́етъ дꙋ́шꙋ, да разне́сшисѧ въ себѣ̀ ѿ сла́быѧ ѻ҆́ныѧ и҆ мо́крыѧ¹¹⁴⁶ сла́дости, не познава́емо є҆́й бꙋ́детъ примѣше́нїе льсти́вагѡ: ѿ сегѡ̀ ᲂу҆́бѡ да разꙋмѣ́емъ дх҃ъ и҆́стинный, и҆ дх҃ъ ле́стчїй. Не мо́щно же ᲂу҆́бѡ, и҆лѝ бж҃е́ственныѧ бла́гости въ ра́зꙋмѣ вкꙋси́ти комꙋ̀, и҆лѝ бѣсѡ́вскїѧ го́рєсти разꙋ́мнѣ и҆стѧза́ти, а҆́ще кто̀ себѐ не и҆звѣсти́тъ: благода́ти ᲂу҆́бѡ во глꙋбинꙋ̀ ᲂу҆ма̀ всели́тисѧ, лꙋка̑вымъ же дꙋховѡ́мъ при ᲂу҆десѣ́хъ серде́чныхъ гнѣзди́тисѧ: поне́же никогда́ же хотѧ́тъ ѿ человѣ̑къ позна́тисѧ ꙗ҆́снѡ бѣ́сове, да не ᲂу҆́мъ сїѐ са́мое ѡ҆щꙋти́тъ, и҆ ᲂу҆вѣ́дѣвъ ѻ҆па́снѣ, па́мѧтїю бж҃їею на тѣ́хъ воѡрꙋжа́етсѧ.

л҃д. И҆́на є҆́сть є҆сте́ственнаѧ любо́вь дꙋшѝ, и҆ и҆́на ꙗ҆́же ѿ ст҃а́гѡ дх҃а є҆́й прибыва́етъ. Ѻ҆́ва ᲂу҆́бѡ, є҆гда̀ хо́щемъ, ѿ на́шеѧ во́ли ᲂу҆мѣ́реннѣ дви́житсѧ: тѣ́мже и҆ ᲂу҆до́бнѣ ѿ лꙋка́выхъ дꙋхѡ́въ, є҆гда̀ не крѣ́пкѡ держи́мъ, на́ше произволе́нїе расхища́етсѧ. Ѻ҆́ва же толи́кѡ воспалѧ́етъ дꙋ́шꙋ къ любвѝ бж҃їей, ꙗ҆́кѡ всѧ̑ тогда̀ є҆́же дꙋшѝ ча̑сти бж҃е́ственномꙋ жела́нїю прилѣплѧ́ютсѧ неизглаго́ланною бла́гостїю, въ безмѣ́рнѣй нѣ́коей простотѣ̀ залежа́нїѧ¹¹⁴⁷: ꙗ҆́кѡ бо въ зача́тїи ѿ дх҃о́внагѡ дѣ́йствїѧ ᲂу҆́мъ тогда̀ бы́въ, и҆сто́чникъ нѣ́кїй любвѐ и҆сточа́етъ, и҆ ра́дость нелицемѣ́рнꙋю.

л҃є. Ꙗ҆́коже мо́ре, є҆гда̀ возмꙋща́етсѧ, возлива́емꙋ ма́слꙋ, є҆стество̀ своѐ вѣ́сть покарѧ́ти, ма́стїю тогѡ̀ побѣжда́ѧ бꙋ́рю: си́це и҆ дꙋша̀ на́ша, є҆гда̀ ѿ бла́гости напоѧ́етсѧ ст҃а́гѡ дх҃а, сла́достнѣ ᲂу҆тиша́етсѧ, ра́дꙋющисѧ бо побѣжда́етсѧ, по глаго́лющемꙋ ст҃о́мꙋ: ѻ҆ба́че бг҃ꙋ повини́сѧ, дꙋшѐ моѧ̀¹¹⁴⁸: ѡ҆сѣнѧ́ющꙋ тꙋ́ю ѻ҆́ною благо́ю и҆ неизрече́нною бла́гостїю. Сегѡ̀ ра́ди ᲂу҆́бѡ тогда̀, какова̑ѧ ли́бо раздража̑нїѧ бѣ́сове ни ᲂу҆хищрѧ́ютъ на дꙋ́шꙋ, не гнѣвли́ва и҆ без̾ смꙋще́нїѧ пребыва́етъ, и҆ всѧ́кїѧ и҆спо́лнена ра́дости: въ сїе́ же та́кѡ не прихо́дитъ, ни пребыва́етъ, а҆́ще не стра́хомъ бж҃їимъ свою̀ дꙋ́шꙋ непреста́ннѣ ᲂу҆слади́тъ: подвиза́ющымсѧ бо ви́дъ нѣ́кїй прино́ситъ чистоты̀ стра́хъ гдⷭ҇а і҆и҃са: стра́хъ бо, речѐ, гдⷭ҇нь чи́стъ, пребыва́ѧй во вѣ́къ вѣ́ка¹¹⁴⁹.

л҃ѕ. Никто́же слы́ша чꙋ́вство ᲂу҆ма̀, ви́димѣй томꙋ̀ сла́вѣ бж҃їей ꙗ҆ви́тисѧ да ᲂу҆пова́етъ: ѡ҆щꙋща́ти бо рѣ́хомъ, є҆гда̀ ѡ҆чища́етъ дꙋ́шꙋ, во неизрече́ннѣмъ нѣ́коемъ вкꙋше́нїи бж҃е́ственнагѡ ᲂу҆тѣше́нїѧ не ꙗ҆влѧ́тисѧ же се́й что̀ неви́димыхъ: поне́же ны́нѣ вѣ́рою хо́димъ, ꙗ҆́коже блаже́нный па́ѵелъ глаго́летъ, а҆ не видѣ́нми¹¹⁵⁰. А҆́ще ᲂу҆̀бо ꙗ҆ви́тсѧ нѣ́которомꙋ ѿ подвиза́ющихсѧ, и҆лѝ свѣ́тъ, и҆лѝ ѡ҆́бразъ кі́й ѻ҆гневи́денъ, и҆лѝ гла́съ, никогда́же да прїи́метъ таково́е видѣ́нїе: пре́лесть бо є҆́сть ꙗ҆вле́нна вра́жїѧ: є҆́же ᲂу҆́бѡ мно́зи пострада́вше ꙗ҆́кѡ ѿ невѣ́дѣнїѧ, преврати́шасѧ пꙋтѝ и҆́стиннагѡ. Мы́ же сїѧ̑ разꙋмѣва́юще да бꙋ́демъ: ꙗ҆́кѡ є҆ли́кѡ хо́димъ во тлѣ́нномъ се́мъ тѣ́лѣ, ѿхо́димъ бг҃а, си́рѣчь ви́димѡ, и҆ самѣ́хъ ре́кше небе́сныхъ є҆гѡ̀ чꙋде́съ зрѣ́ти не мо́жемъ.

л҃з. И҆̀же бо въ любвѝ бж҃їей ꙗ҆влѧ́ємаѧ дꙋшѝ сѡ́нїѧ здра́вствꙋющїѧ дꙋшѝ нѣ́какѡ сꙋ́ть неле́стнїи и҆з̾ѧви́телїе: тѣ́мже нижѐ ѿ и҆на́гѡ ѡ҆́браза во дрꙋгі́й ѡ҆́бразъ прелага́ютсѧ, нижѐ ᲂу҆́бѡ ᲂу҆страша́ютъ чꙋ́вство, нижѐ смѣю́тсѧ, и҆лѝ дрѧ́хли быва́ютъ внеза́пꙋ, но со всѧ́кою кро́тостїю дꙋшѝ приближа́ютсѧ, дꙋхо́внагѡ тꙋ́ю и҆сполнѧ́ютъ весе́лїѧ: тѣ́мже и҆ по возбꙋжде́нїи тѣ́ла, мно́гимъ жела́нїемъ и҆́щетъ дꙋша̀ ра́дости сна̀, бѣсѡ́вскаѧ же мечта̑нїѧ, во всѣ́хъ проти́внѡ и҆́мꙋтъ: не бо̀ пребыва́ютъ въ то́мжде ѡ҆́бразѣ, нижѐ зра́къ немѧте́женъ во мно́зѣ показꙋ́ютъ. Є҆́же бо ѿ произволе́нїѧ ᲂу҆́бѡ не и҆мꙋ́ще, ѿ своеѧ́ же прїе́млюще то́чїю пре́лести, ᲂу҆довлетвори́ти тѣ́ми на мно́зѣ не мо́гꙋтъ: но и҆ вели̑каѧ глаго́лютъ, и҆ претѧ́тъ же вѧ̑щшаѧ, въ во́инскїй ви́дъ себѐ мно́гажды преѡбразꙋ́юще, и҆ногда́ же и҆ припѣва́ютъ со восклица́нїемъ дꙋшѣ̀: тѣ́мже познава́ѧ тѣ́хъ ᲂу҆́мъ, є҆гда̀ трезви́тсѧ, въ восто́рзѣ бы́въ возбꙋжда́етъ тѣ́ло: и҆ногда́ же и҆ ра́дꙋетсѧ, ꙗ҆́кѡ ле́сть тѣ́хъ разꙋмѣ́ти возмо́гъ: сегѡ̀ ра́ди въ са́момъ то́мъ снѣ̀ мно́гажды ѡ҆блича́ѧ тѣ́хъ, во гнѣ́въ тѣ́хъ вели́къ подви́жетъ. Ѻ҆ба́че є҆́сть, є҆гда̀ и҆ блазі́и сны̀, ра́дость ᲂу҆́бѡ не прино́сѧтъ дꙋшѣ̀, ско́рбь же є҆́й ѻ҆со́бнꙋю творѧ́тъ, и҆ неболѣ́зненꙋ сле́зꙋ: сїе́ же быва́етъ при ѻ҆́нѣхъ, и҆̀же во мно́гое смиренномꙋ́дрїе приспѣва́ющихъ.

л҃и. Рѣ́хомъ же мы̀, ꙗ҆́кѡ ѿ и҆̀же во и҆скꙋ́сѣ бы́вшихъ слы́шахомъ, дѡ́брымъ и҆ ѕлы̑мъ снѡ́мъ разсꙋжде́нїе: на́мъ же довлѣ́етъ къ добродѣ́тели вели́кой, є҆́же ни є҆ди́номꙋ ѿню́дъ повинова́тисѧ мечта́нїю: сѡ́нїѧ бо ꙗ҆́кѡ вѧ́щше ничто́же и҆́но сꙋ́ть, но і҆́дѡли пѡ́мыслъ ле́стныхъ, и҆лѝ па́ки, ꙗ҆́коже рече́сѧ, бѣсѡ́вскаѧ нарꙋга̑нїѧ. Є҆гда́ же а҆́ще и҆ ѿ бж҃їѧ бла́гости по́слетсѧ на́мъ видѣ́нїе когда̀, и҆ не прїе́млемъ то́е, не ᲂу҆́бѡ на ны̀ и҆́же многолюби́мый і҆и҃съ гдⷭ҇ь прогнѣ́ваетсѧ за сїѐ: вѣ́сть бо, ꙗ҆́кѡ прельще́нїй ра́ди бѣсо́вскихъ въ сїѐ прихо́димъ. Предрече́нное ᲂу҆̀бо разсꙋжде́нїе ꙗ҆́вственно є҆́сть, прилꙋча́етсѧ же и҆ ѿ совосхище́нїѧ нѣ́коегѡ невѣ́дѣтельнѣ ѡ҆скверни́тисѧ дꙋшѝ: є҆гѡ́же и҆ кромѣ̀ никто́же, ꙗ҆́коже мню̀, ѡ҆брѧ́щетсѧ погꙋби́ти слѣ́дъ ѻ҆па́снагѡ разꙋмѣ́нїѧ, и҆ вѣ́ровати ѕлы̑мъ ꙗ҆́кѡ дѡ́брымъ.

л҃ѳ. Да бꙋ́детъ же ко ᲂу҆каза́нїю на́мъ ве́щь при́тчею: ра́бъ, ѿ влады́ки въ нощѝ по ѿше́ствїи и҆з̾ до́мꙋ своегѡ̀, и҆ по мно́зѣмъ коснѣ́нїи пред̾ враты̀ хра́мины зовꙋ́щїй, и҆ и҆звѣ́стнѣ не познава́ѧ, є҆мꙋ́же ѿверзе́нїе двере́й весьма̀ ѿве́рже ра́бъ: боѧ́шесѧ бо, да не подо́бїемъ тогѡ̀ гла́са совосхи́тивсѧ, ѕлодѣ́ѧ прїи́метъ, и҆ преда́тель ꙗ҆ви́тсѧ, и҆́же є҆мꙋ̀ ввѣ́ренныхъ и҆мѣ́нїй. На́ньже не то́кмѡ не разгнѣ́васѧ господи́нъ є҆гѡ̀, дне́ви бы́вшꙋ, но и҆ мнѡ́гимъ похвала́мъ сподо́би, ꙗ҆́кѡ и҆ влады́чный гла́съ, пре́лесть бы́ти непщева̀, не хотѧ̀ что̀ тогѡ̀ и҆мѣ́нїй погꙋби́ти.

м҃. Є҆гда́ бо ᲂу҆́мъ начне́тъ ча́стѡ ѿ бж҃е́ственнагѡ свѣ́та дѣ́йствоватисѧ ꙗ҆вле́ннѣ, тако́въ ве́сь быва́етъ, ꙗ҆́коже сво́й свѣ́тъ са́мый бога́тнѣ зрѣ́ти, не подоба́етъ ѡ҆ то́мъ сомнѣ́тисѧ: сїе́ бо весьма̀ быва́етъ, є҆гда̀ си́ла дꙋшѝ воз̾ѡблада́етъ страстьмѝ. А҆ и҆́же всѧ́кѡ є҆́же во ѡ҆́бразѣ томꙋ̀ ꙗ҆влѧ́емо, и҆лѝ свѣ́тъ и҆лѝ ꙗ҆́кѡ ѻ҆́гнь, ѿ вра́жїѧ ѕлохи́трства быва́етъ: бж҃е́ственный бо па́ѵелъ сказꙋ́етъ ꙗ҆́вѣ, во а҆́гг҃ла свѣ́тла того̀, глаго́летъ, преѡбража́тисѧ¹¹⁵¹. Не подоба́етъ ѡ҆ таково́й наде́жди комꙋ̀ ᲂу҆твержда́тисѧ по́стническое провожда́ющымъ житїѐ, да не сатана̀ гото́вꙋ ѡ҆брѧ́щетъ дꙋ́шꙋ ѿсю́дꙋ въ восхище́нїе: но да доспѣ́емъ то́чїю во всѧ́комъ чꙋ́вствѣ и҆ и҆звѣще́нїи се́рдца возлюби́ти бг҃а, є҆́же є҆́сть все́ю дꙋше́ю, и҆ всѣ́мъ се́рдцемъ, и҆ все́ю мы́слїю. И҆́же бо въ сїѐ доспѣ́вый, благода́ти бж҃їей содѣ́йствꙋющей, таковы́й ѿхо́дитъ мі́ра, а҆́ще и҆ посредѣ̀ мі́ра хо́дитъ.

м҃а. Послꙋша́нїе, пе́рвое ᲂу҆́бѡ во всѣ́хъ за́повѣдехъ новонача̑льнымъ, добро̀ є҆́сть разꙋмѣ́ти: поне́же бо ѿлага́етъ киче́нїе, ражда́етъ же на́мъ смиренномꙋ́дрїе: тѣ́мже вхо́дъ и҆ две́рь быва́етъ, и҆́же тогѡ̀ держа́щымсѧ сла́дцѣ, є҆́же ко бг҃ꙋ любвѐ. Сїѐ ѿложѝ а҆да́мъ, во глꙋбо́кїй поползе́сѧ та́ртаръ: семꙋ́же рачи́тель бы́въ гдⷭ҇ь, смотре́нїѧ сло́вомъ да́же до крⷭ҇та̀ и҆ сме́рти послꙋшли́въ бы́въ своемꙋ̀ ѻ҆ц҃ꙋ̀¹¹⁵², а҆́ще и҆ ни въ чесо́мже сы́й ме́нши тогѡ́жде вели́чествїѧ бж҃ества̀: но да человѣ́чєскаѧ согрѣшє́нїѧ ѿ преслꙋша́нїѧ, своегѡ̀ ра́ди послꙋша́нїѧ, разрꙋши́въ, во блаже́ннꙋю и҆ вѣ́чнꙋющꙋю, и҆́же въ послꙋша́нїи жи́вшыѧ возведе́тъ жи́знь. Пре́жде ᲂу҆́бѡ семꙋ̀ прилѣжа́ти подоба́етъ, и҆̀же ко горды́ни дїа́вольской прїе́млющымъ борьбꙋ̀: пока́жетъ бо ꙗ҆́вѣ на́мъ се́й предводи́тель, непреле́стнѣ всѧ̑кїѧ стєзѝ добродѣ́тели.

м҃в. Воздержа́нїе, ѻ҆́бщее є҆́сть всѣ́хъ добродѣ́телей тезоимени́тство: подоба́етъ ᲂу҆̀бо воздержа́щемꙋсѧ, всегда̀ воздержа́тисѧ. Ꙗ҆́коже бо человѣ́кꙋ что́либо тонча́йшихъ ᲂу҆дѡ́въ ѿѧ́то бꙋ́детъ, всѐ человѣ́кꙋ, а҆́ще и҆ ма́лѡ бꙋ́детъ лиша́емо ѡ҆́браза, нелѣ́па всего̀ содѣ́ловаетъ: си́це и҆ є҆ди́нꙋ добродѣ́тель ѡ҆ставлѧ́ѧ, всѐ, ꙗ҆́кѡ не вѣ́сть воздержа́нїѧ, потреблѧ́етъ благолѣ́пїе. Потре́ба є҆́сть ᲂу҆̀бо не то́кмѡ ѡ҆ тѣле́сныхъ люботрꙋди́тисѧ добродѣ́телехъ, но и҆ ѡ҆ ꙗ҆̀же внꙋ́треннѧго на́шего человѣ́ка ѡ҆чи́стити могꙋ́щихъ. Ка́ѧ бо по́льза бꙋ́детъ, и҆́же тѣ́ло сохрани́вшꙋ дѣ́вственнѡ, а҆́ще дꙋше́ю прелюбодѣ́йствꙋетъ ѿ прельще́нїѧ бѣсо́вскагѡ; И҆лѝ ка́кѡ вѣнча́етсѧ, и҆́же чревоѡб̾ѧде́нїѧ ᲂу҆́бѡ и҆ всѧ́кагѡ тѣле́снагѡ похотѣ́нїѧ ᲂу҆держа́всѧ, горды́ни же и҆ славолю́бїѧ не потща́лсѧ и҆стреби́ти; нижѐ ма́лꙋю терпѧ̀ ско́рбь, ꙗ҆̀же свѣ́тъ пра́вєднымъ хо́щетъ ѡ҆цѣнѧ́ти въ мѣ́рилѣ, и҆̀же дѣла̀ пра́вды содѣ́ѧвшымъ въ дꙋ́сѣ смире́нїѧ;

м҃г. Всѧ̑ ᲂу҆́бѡ безсловє́снаѧ похотѣ̑нїѧ та́кѡ подоба́етъ возненави́дѣти подвиза́ющымсѧ, ꙗ҆́кѡ во ѻ҆бы́чаи є҆́же къ тѣ̑мъ не́нависть стѧжа́ти. А҆ є҆́же ѡ҆ бра́шнѣхъ воздержа́нїѧ, си́це подоба́етъ сохранѧ́ти, да не въ ме́рзость нѣ́которыхъ прїи́детъ кто̀ когда̀: сїе́ бо и҆ про́клѧто є҆́сть, и҆ бѣсо́вское ᲂу҆мышле́нїе. Не бо̀ ꙗ҆́кѡ ѕлы́хъ тѣ́хъ ѿме́щемъ, не бꙋ́ди то̀: но да мно́гихъ пи́щь себѐ ᲂу҆далѧ́юще, пали̑мыѧ ᲂу҆́ды пло́ти на́шеѧ въ мѣ́рꙋ томи́мъ. Про́чее же, да на́ше, є҆́же преизли́шнее во ᲂу҆потребле́нїе дово́льно бꙋ́детъ ни́щымъ, є҆́же є҆́сть любвѐ чи́стыѧ зна́менїе.

м҃д. Є҆́же ѿ всѣ́хъ представлѧ́емыхъ, и҆лѝ че́рплемыхъ ꙗ҆́стїй и҆ пи́тїй, благодарѧ́щымъ бг҃а, ника́коже пра́вилы ра́зꙋма ра́дꙋютсѧ, всѧ̑ бо добра̑ ѕѣлѡ̀: а҆ є҆́же сла́дкихъ и҆ масти́тыхъ сла́дцѣ ᲂу҆клонѧ́тисѧ, разсꙋди́тельнѣйшихъ є҆́сть и҆ разꙋ́мнѣйшихъ: не ᲂу҆̀бо же настоѧ̑щаѧ сла̑дкаѧ сла́дцѣ преѡби́димъ, а҆́ще же бж҃їѧ сла́дости всѣ́мъ ра́зꙋмомъ и҆ и҆звѣще́нїемъ вкꙋ́симъ.

м҃є. И҆́мже ѡ҆́бразомъ ѿ мно́жества снѣ́дей ѡ҆тѧгчава́емо тѣ́ло, боѧ́знивъ нѣ́кїй, и҆ ѕлодви́жимь, ᲂу҆́мъ содѣва́етъ: си́це и҆знемога́емый ᲂу҆́мъ ѿ мно́га воздержа́нїѧ, дрѧ́хлꙋ нѣ́кꙋю и҆ нелюби́тельнꙋ сло́ва, зри́тельнꙋю дꙋшѝ накончава́етъ ча́сть. Подоба́етъ ᲂу҆̀бо прѧ́мѡ тѣле́сныхъ движе́нїй, и҆ пи́щꙋ благоꙋстроѧ́ти, да є҆гда̀ ᲂу҆́бѡ здра́вствꙋетъ, ᲂу҆томлѧ́ти пома́лꙋ: є҆гда́ же ли боли́тъ, да ѡ҆тꙋчнева́етсѧ ᲂу҆мѣ́реннѣ. Не подоба́етъ бо ѡ҆слабѣва́ти тѣ́ломъ подвиза́ющемꙋсѧ, но є҆ли́кѡ мощѝ къ по́двигꙋ довлѣ́ти, да понѐ трꙋды̀ тѣле́сными дꙋша̀ лѣ́потнѣ ѡ҆чища́етсѧ.

м҃ѕ. Є҆гда̀ тщесла́вїе вельмѝ воспалѧ́етсѧ на ны̀ поще́нїѧ ра́ди, и҆ бра́тїи нѣ́коеѧ прише́ствїемъ стꙋжа́ѧ на́мъ, и҆лѝ каково́либо стра́нно въ винꙋ̀ своеѧ̀ ѕло́бы и҆з̾ѡбрѣта́ѧ, и҆ подстрѣка́ѧ, да не разори́мъ ᲂу҆ста́ва своегѡ̀, добро̀ тогда̀ є҆́же ᲂу҆мѣ́ренное ѡ҆ставлѧ́ти, и҆ ѡ҆бы́чномꙋ пи́щи ᲂу҆ста́вꙋ ᲂу҆сꙋгꙋ́бити: и҆́бо и҆ бѣсѡ́вска начина̑нїѧ бездѣ̑льна па́че и҆ рыда́ющѧ ѿсле́мъ, и҆ ᲂу҆ста́въ любвѐ лꙋ́чше и҆ны́хъ и҆спо́лнимъ: и҆ та́йнꙋ воздержа́нїѧ неѧвле́ннꙋ схожде́нїѧ ра́ди сохрани́мъ.

м҃з. По́стъ и҆́мать ᲂу҆́бѡ по себѣ̀ похвалꙋ̀, но не ко бг҃ꙋ: дѣ́лательница бо є҆́сть ꙗ҆́кѡ въ цѣломꙋ́дрїе вчинѧ́ѧ и҆з̾ѧвлѧ́ющихъ є҆го̀, не подоба́етъ же ᲂу҆́бѡ ѡ҆ то́мъ великомꙋ́дрствовати, и҆́же благоче́стїѧ подви́жникѡмъ: ѡ҆жида́ти же то́кмѡ въ вѣ́рѣ бж҃їей, коне́цъ на́шеѧ мы́сли. Ниже́ бо хꙋдѡ́жницы каковы́хъ ли́бо хи́тростей, ѿ ѻ҆рꙋ́дїѧ ѡ҆бѣща́нїѧ соверше́нїе хва́лѧтъ когда̀, но ѡ҆жида́етъ си́хъ кі́йждо, ви́да начина́нїѧ, да ѿ ѻ҆́нагѡ є҆́же и҆звѣ́стное хи́трости пока́жетсѧ.

м҃и. И҆́мже ѡ҆́бразомъ землѧ̀ въ мѣ́рꙋ ᲂу҆̀бо напаѧ́ема, чи́стое же вмѣта́емо въ тꙋ́ю сѣ́мѧ, со мно́гимъ прибы́ткомъ пло́дъ воздае́тъ: ѿ мно́гихъ же ᲂу҆поѧ́ема дождє́въ, те́рнїе и҆зно́ситъ то́кмѡ и҆ волче́цъ. Си́це и҆ землѧ̀ серде́чнаѧ, а҆́ще ᲂу҆́бѡ въ мѣ́рꙋ питїѐ прїе́млетъ, чи̑ста є҆сте́ствєннаѧ своѧ̑ показꙋ́етъ сѣ́мена, и҆ ꙗ҆̀же ѿ ст҃а́гѡ дх҃а въ тꙋ́ю вмѣта̑емаѧ, прозѧба́етъ ѕѣлѡ̀, и҆ и҆зно́ситъ многоплѡ́днаѧ: а҆́ще ли же преѡдожде́нна ѿ мно́гагѡ питїѧ̀ бꙋ́детъ, те́рнїе вои́стиннꙋ и҆зноси́ти на́чнꙋтъ всѧ̑ є҆ѧ̀ помышлє́нїѧ и҆ волче́цъ.

м҃ѳ. Є҆гда́ бо ᲂу҆́мъ на́шъ, и҆́же мно́гагѡ питїѧ̀ погрꙋжа́етсѧ волна́ми, не то́чїю є҆́же ѿ бѣсѡ́въ во снѣ̀ и҆з̾ѡбража́ємыѧ кꙋмі́ры стра́стнѣ зри́тъ, но и҆ въ себѣ̀ зра́ки нѣ̑кїѧ притворѧ́ѧ неподѡ́бныѧ, свои́ми мечта́нми ꙗ҆́кѡ рачи́тельными нѣ́кїими и҆́мать раждеже́нїе. Разжиза̑емымъ же смѣси̑тельнымъ ᲂу҆дѡ́мъ ѿ ві́нныѧ теплоты̀, нꙋ́жда всѧ́кѡ предста́вити самомꙋ̀ ᲂу҆мꙋ̀ сѣ́нь стра́сти сла́достїю. Подоба́етъ ᲂу҆̀бо ᲂу҆мѣ́ренное на́мъ прїима́ти, є҆́же бы ѿ преꙋмноже́нїѧ ᲂу҆бѣжа́ти врежде́нїѧ. Є҆гда́ бо не и҆́мать ᲂу҆́мъ подвжига́ющїѧ тогѡ̀ сла́дости къ живописа́нїю грѣха̀, немечта́теленъ ве́сь пребыва́етъ: и҆ є҆́же лꙋ́чше, и҆ несла́достенъ.

н҃. Всѧ̑ ꙗ҆̀же сострѡ́еннаѧ питїѧ̑, и҆́хже предпи̑внаѧ нари́чꙋтъ, и҆̀же сегѡ̀ хитрецы̀ ᲂу҆мышле́нїѧ, ꙗ҆́кѡ мни́тсѧ за є҆́же наставлѧ́ти во ᲂу҆тро́бꙋ мно́жество бра́шенъ: не подоба́етъ та̑ гони́ти, хотѧ́щымъ сла̑стныѧ ᲂу҆́ды тѣ́ла смири́ти. Не бо̀ то́кмѡ ка́чество си́хъ на вре́дъ подвиза́ющымсѧ тѣлесє́мъ быва́етъ, но и҆ са́мое то̀ чрез̾ слове́сное си́хъ растворе́нїе, смꙋща́етъ ѕѣлѡ̀ бг҃оно́снꙋю со́вѣсть. Что́ бо є҆́сть, є҆гѡ́же лиша́емо ᲂу҆́бѡ ві́нное є҆стество̀; то́кмѡ да разли́чныхъ сла́достей примѣше́нїе, сегѡ̀ крѣ́пость ᲂу҆мѧгчи́тъ.

н҃а. Гдⷭ҇ь на́шъ, и҆ сегѡ̀ сщ҃е́ннагѡ жи́тельства ᲂу҆чи́тель і҆и҃съ хрⷭ҇то́съ, ѻ҆́цтомъ напое́нъ бы́сть во вре́мѧ страда́нїѧ своегѡ̀, ѿ слꙋжа́щихъ дїа́вольскомꙋ повелѣ́нїю: мнѣ̀ мни́тсѧ, да ѡ҆ста́витъ ꙗ҆́вѣ на́мъ ѡ҆́бразъ, сщ҃е́нныхъ зало́га. Не подоба́етъ бо, речѐ, сла̑дкаѧ прїима́ти питїѧ̑, и҆лѝ снѣ́дїй, подвиза́ющымъ тѧ̀ на грѣ́хъ, но па́че го́рестныѧ бра́ни съ терпѣ́нїемъ держа́тисѧ: приложи́сѧ же и҆ ѵ҆ссѡ́пъ гꙋ́бѣ досажде́нїѧ, ꙗ҆́кѡ ᲂу҆́бѡ да соверше́ннѣ внесе́тсѧ со прикла́домъ ѡ҆́бразъ на́шегѡ ѡ҆чище́нїѧ, ѻ҆́во бо, лю́тое по́двигѡвъ сво́йственно: ѻ҆́во же, чисти́тельное сама́гѡ соверше́нїѧ.

н҃в. Є҆́же въ ба́ню приходи́ти, не ᲂу҆̀бо то̀ грѣшно̀, и҆лѝ чрезслове́сно ꙗ҆влѧ́етсѧ: а҆ є҆́же ᲂу҆́бѡ воздержа́нїѧ ра́ди и҆ сеѧ̀ ᲂу҆далѧ́тисѧ, и҆ мꙋ́жественно, глаго́лю, и҆ цѣломꙋ́дренно. Ниже́ бо тѣ́ло на́ше ѡ҆слабѣва́етъ сла́достною ѻ҆́ною мокро́тою, нижѐ ᲂу҆́бѡ на воспомина́нїе прихо́димъ безсла́внагѡ по́та а҆да́мова, но да ѡ҆ тогѡ̀ ли́ствїи попече́мсѧ непщева́нїй, во є҆́же покры́ти вторы́й стꙋ́дъ: а҆ наипа́че и҆́же ѿ мїрска́гѡ ны́нѣ прише́дшихъ заблꙋжде́нїѧ, и҆ незрѣ́нїѧ ра́ди своеѧ̀ наготы̀, добро́тѣ цѣломꙋ́дрїѧ прїедини́тисѧ до́лжни є҆смы̀.

н҃г. Врачѝ призыва́ти во вре́мѧ недꙋ́га, ничто́же є҆́сть возбранѧ́емо, поне́же бо хотѧ́шесѧ и҆ногда̀ и҆ ѿ человѣ́ческагѡ и҆скꙋ́са собира́тисѧ хи́трости, тогѡ̀ ра́ди пре́дани бы́ша лѣчбы̑: ѻ҆ба́че не тре́бѣ є҆́сть на тѣ́хъ и҆мѣ́ти наде́ждꙋ и҆сцѣле́нїѧ, но на и҆́стиннаго на́шего сп҃са и҆ врача̀ і҆и҃са хрⷭ҇та̀. Сїѧ̑ же глаго́лю, и҆̀же во ѻ҆бщежи́тельствѣ, и҆лѝ во гра́дѣхъ мы́сль воздержа́нїѧ и҆справлѧ́ющымъ, за є҆́же не возмо́жно тѣ̑мъ ѿ приключа́ющихсѧ напа́стей непреста́ннѡ и҆мѣ́ти любвѐ ра́ди дѣ́йство вѣ́ры: дрꙋго́е же, за є҆́же и҆ во тщесла́вїе и҆ и҆скꙋше́нїе дїа́вольское тѣ̑мъ не впада́ти, ѿ ни́хже нѣ́цыи тѣ́хъ враче́й не тре́бовати при мно́зѣхъ ѡ҆бѣщава́ютсѧ. А҆́ще же кто̀ ѿше́лническое житїѐ въ пꙋсты́нныхъ мѣ́стѣхъ посредѣ̀ двою̀ и҆лѝ трїе́хъ є҆диномы́сленныхъ бра́тїй и҆справлѧ́етъ, гдⷭ҇ви цѣлѧ́щемꙋ на́шъ всѧ́къ недꙋ́гъ и҆ всѧ́кꙋ ꙗ҆́зю, въ вѣ́рꙋ себѐ да приво́дитъ, а҆́ще кі́имлибо ѡ҆держи́мь бꙋ́детъ недꙋ́гомъ. И҆́мать бо болѣ́знемъ свои̑мъ дово́льное ᲂу҆тѣше́нїе пꙋсты́ню по гдⷭ҇ѣ, тѣ́мже таковы́й нижѐ дѣ́йствїѧ вѣ́ры лиша́етсѧ когда̀: поне́же сокрове́ннѣ и҆ неѧвле́ннѣ, є҆́же ѿ терпѣ́нїѧ ѡ҆брѣта́ютъ добродѣ́тель, пꙋсты́ню и҆мѣ́етъ до́брый кро́въ: си́хъ бо ра́ди гдⷭ҇ь вселѧ́етъ є҆диномы̑сленныѧ въ до́мъ.¹¹⁵³

н҃д. Є҆гда̀ ѡ҆ приключа́ющихсѧ на́мъ тѣ́лꙋ стро́потныхъ скорби́мъ, вѣ́дѣти подоба́етъ, ꙗ҆́кѡ дꙋша̀ на́ша є҆щѐ порабоща́етсѧ похотѣ́нми тѣле́сными: тѣ́мже ᲂу҆́бѡ вє́щнаѧ жела́ющїй благодє́нствїѧ, нижѐ ѡ҆ста́вити жите́йскихъ бла̑гъ хо́щетъ: но и҆ нꙋ́ждꙋ вели́кꙋ вмѣнѧ́етъ є҆́же не мощѝ ра́ди недꙋ́га прїима́ти земна̑ѧ сла̑дкаѧ. А҆́ще ли же благода́рнѣ прїе́млетъ недꙋ́ги и҆ болѣ̑зни, таковы́й не дале́че сꙋ́щи безстра́стїѧ предѣ́лѡвъ показꙋ́етсѧ: тѣ́мже и҆ сме́рть ꙗ҆́кѡ па́че вино́внꙋ сꙋ́щꙋ живота̀ и҆́стиннагѡ тогда̀ ча́етъ.

н҃є. Не ᲂу҆̀бо вожделѣ́етъ дꙋша̀ разлꙋчи́тисѧ тѣ́ла, а҆́ще нѣ́кїй зало́гъ къ воздꙋ́хꙋ семꙋ̀ и҆мѣ́ти бꙋ́детъ, всѧ̑ бо чꙋ̑вства тѣлє́снаѧ вѣ́рѣ сопротивлѧ́ютсѧ: поне́же сїѧ̑ ᲂу҆́бѡ настоѧ́щихъ ра́ди быва́ютъ: ѻ҆́ваѧ же бꙋ́дꙋщихъ бла̑гъ ѡ҆бѣщава́ютъ бога́тство. Прикла́днѡ ᲂу҆̀бо подвиза́ющемꙋсѧ, не ѡ҆ древесѣ́хъ нѣ́кїихъ благовѣ́твенныхъ и҆лѝ сѣ́нныхъ, и҆лѝ и҆сто́чницѣхъ, доброто́чныхъ и҆лѝ ѡ҆ ѻ҆во́щницѣхъ разли́чныхъ и҆ благоцвѣ́тныхъ, и҆лѝ пала́тахъ благолѣ́пныхъ: нижѐ ѡ҆ сро́дническихъ досто́инствахъ воспомина́ти когда̀, нижѐ торже́ственными ᲂу҆чрежда́тисѧ любоче́стїи, но держа́тисѧ ᲂу҆́бѡ нꙋ́ждныхъ благода́рственнѣ, пꙋ́ть же а҆́ки нѣ́кїй стра́ненъ вмѣнѧ́ти житїѐ сїѐ, всѧ́кагѡ ᲂу҆гожде́нїѧ плотска́гѡ пꙋ́стъ. Си́це бо а҆́ще весьма̀ стѣсни́мъ на́шꙋ мы́сль, во слѣ́дъ тꙋ́ю всю̀ ѡ҆брати́мъ вѣ́чныѧ жи́зни.

н҃ѕ. Ꙗ҆́кѡ ᲂу҆́бѡ вкꙋше́нїю видѣ́нїе предхо́дитъ, си́це и҆ прѡ́чаѧ чꙋ́вствєннаѧ помрача́ютъ па́мѧть серде́чнꙋю, є҆гда̀ сїѧ̑ неразсꙋ́днѣ прїе́млемъ, пе́рваѧ є҆́ѵа на́мъ и҆сповѣ́дꙋетъ таково́е. До́ндеже бо не воззрѣ̀ ѻ҆чи́ма на заповѣ́данное дре́во сла́дцѣ¹¹⁵⁴, па́мѧтоваше бж҃е́ственное повелѣ́нїе прилѣ́жнѣ: сегѡ̀ ра́ди ꙗ҆́коже крило́ма є҆щѐ бж҃е́ственнымъ рачи́тельствомъ покрыва́шесѧ, ѿсю́дꙋ своеѧ̀ не разꙋмѣ́ющи наготы̀. А҆ є҆гда̀ смотри́вши дре́во пристра́стнѣ, и҆ со мно́гимъ томꙋ̀ прикоснꙋ́сѧ жела́нїемъ, и҆ про́чее є҆́же ѿ тогѡ̀ плода̀ содѣ́йствꙋющею нѣ́коею сла́стїю вкꙋси́вши, а҆́бїе ᲂу҆́бѡ ᲂу҆слади́сѧ къ тѣле́сномꙋ приплете́нїю, ꙗ҆́кѡ ѡ҆бнажи́сѧ ѻ҆́нагѡ покро́ва, и҆ стра́сти совокꙋ́пльшисѧ: всѐ своѐ жела́нїе, въ настоѧ́щихъ попече́нїе ѿдадѐ, примѣси́вши плодо́мъ сластоѧвле́ннымъ своемꙋ̀ и҆ а҆да́мовꙋ согрѣше́нїю: тѣ́мже неꙋдо́бь человѣ́ческїй ᲂу҆́мъ помѧнꙋ́ти бг҃а мо́жетъ, и҆лѝ тогѡ̀ за́пѡвѣди. Мы̀ ᲂу҆́бѡ во глꙋбинꙋ̀ при́снѡ се́рдца зрѧ́ще, съ па́мѧтїю непреста́нною гдⷭ҇а і҆и҃са взыскꙋ́емъ, мі́рови семꙋ̀ не внима́юще, ꙗ҆́кѡ ѡ҆слѣпле́нными зра́ки, въ любопреле́стнѣмъ се́мъ да пребыва́емъ житїѝ. Любомꙋ́дрїѧ бо вои́стиннꙋ дꙋхо́внагѡ сво́йственно, не воскривле́нно при́снѡ рачи́тельство сохранѧ́ти зра́къ: сїе́ же и҆ многоискꙋ́сный і҆́ѡвъ ᲂу҆́читъ глаго́лѧ: а҆́ще и҆ ѻ҆чи́ма мои́ма послѣ́дова се́рдце моѐ, вои́стиннꙋ коне́чнагѡ воздержа́нїѧ є҆́сть вина̀ сказꙋ́емое.

н҃з. И҆́же вхо́дитъ при́снѡ во своѐ се́рдце, и҆з̾е́млетсѧ всѧ́кѡ жите́йскихъ красо́тъ, въ дꙋ́сѣ бо ходѧ́й плотски́хъ жела́нїй вѣ́дѣти не мо́жетъ: поне́же про́чее во зри́тельнѣмъ ᲂу҆строе́нїи хожде́нїе твори́тъ, сїѐ ꙗ҆́кѡ две́рника добродѣ́телємъ и҆мѣ́ѧ, забве́нїе гражда́нства и҆ досто́инства земна́гѡ. Сегѡ̀ ра́ди ᲂу҆жѐ и҆ бездѣ́льна про́чее ꙗ҆̀же ѿ бѣсѡ́въ кова̑рствїѧ быва́ютъ на того̀, а҆́ще да́же и҆ до ѻ҆ко́нєцъ є҆сте́ственныхъ подстрѣка́юще мїрски́мъ рачи́тельствомъ, пꙋща́ютъ на́нь стрѣ́лы.

н҃и. Є҆гда̀ на́чнетъ на́ша дꙋша̀ ѡ҆ставлѧ́ти похотѣ̑нїѧ земны́хъ пристра́стїй, тогда̀ ᲂу҆ны́теленъ нѣ́который ꙗ҆́кѡ на мно́зѣ ᲂу҆́мъ се́й подхо́дитъ, нижѐ слꙋже́нїю ѡ҆ставлѧ́ѧ сла́дцѣ послꙋжи́ти, нижѐ ꙗ҆́снѡ бꙋ́дꙋщихъ бла̑гъ жела́нїе се́й попꙋща́ѧ и҆мѣ́ти: но и҆ вре́меннꙋю сїю̀ жи́знь безмѣ́рнѣ непотре́бнꙋ творѧ̀, ꙗ҆́кѡ неимꙋ́щꙋю дѣ́ла добродѣ́тели досто́йна, и҆ са́мый то́й ра́зꙋмъ ᲂу҆ничижа́ѧ, ꙗ҆́кѡ и҆ дрꙋги̑мъ ᲂу҆жѐ мнѡ́гимъ да́нный, и҆лѝ ни є҆ди́но что̀ соверше́нное завѣщава́ющъ на́мъ. Сеѧ́ же врѧ́щїѧ и҆ ᲂу҆нылотво́рныѧ и҆збѣжи́мъ стра́сти, а҆́ще ᲂу҆́бѡ въ тѣ́сныхъ и҆ ѕѣлѡ̀ приско́рбныхъ предѣ́лѣхъ поста́вимъ на́шꙋ мы́сль, ко є҆ди́ной па́мѧти бж҃їей взира́юще: си́це бо то́чїю ᲂу҆́мъ восте́къ во свою̀ теплотꙋ̀, нечꙋ́вствїѧ ѻ҆́нагѡ безслове́снагѡ свободи́тисѧ возмо́жетъ.

н҃ѳ. Про́ситъ на́шъ всѧ́кѡ ᲂу҆́мъ, є҆гда̀ томꙋ̀ всѧ̑ и҆схо́ды затвори́мъ па́мѧтїю бж҃їею, дѣ́ло до́лжное є҆мꙋ̀ и҆звѣсти́ти скоротече́нїѧ. Подоба́етъ ᲂу҆̀бо томꙋ̀ дава́ти, є҆́же гдⷭ҇и і҆и҃се то́чїю во всецѣ́лое дѣ́ло мы́сли: никто́же бо, речѐ, глаго́летъ гдⷭ҇а і҆и҃са, то́чїю дх҃омъ ст҃ы́мъ¹¹⁵⁵. Но си́це тѣ́снѣ рече́нїе вы́нꙋ во свое́мъ сокро́вищи да зри́тсѧ, да не въ мєчта́нїѧ нѣ̑каѧ преврати́тсѧ. Є҆ли́цы бо семꙋ̀ ст҃о́мꙋ и҆ сла́вномꙋ и҆́мени во глꙋбинѣ̀ свое́й серде́чнѣй непреста́ннѡ поꙋча́ютсѧ, сі́и свѣ́тъ своегѡ̀ ᲂу҆ма̀ мо́гꙋтъ нѣ́когда зрѣ́ти: тѣ́сною бо па́мѧтїю ѿ мы́сли содержи́мь, всю̀ приближа́емꙋю скве́рнꙋ дꙋшѝ въ чꙋ́вствѣ дово́льнѣ попалѧ́етъ, и҆́бо бг҃ъ на́шъ, речѐ, ѻ҆́гнь поѧда́ѧй ѕло́бꙋ¹¹⁵⁶. Тѣ́мже про́чее въ любо́вь мно́гꙋ своеѧ̀ сла́вы призыва́етъ гдⷭ҇ь: закоснѣва́ѧ бо сла́вное ѻ҆́ное и҆ многолюби́мое и҆́мѧ па́мѧтїю ᲂу҆ма̀ въ теплотѣ̀ серде́чнѣй, ѻ҆бы́чай на́мъ всѧ́кѡ твори́тъ во є҆́же люби́ти тогѡ̀ благосты́ню, ничесомꙋ́ бо про́чее спо́нꙋ творѧ́щꙋ. Се́й бо є҆́сть би́серъ многоцѣ́нный, є҆го́же, прода́въ всѧ̑ и҆мѣ̑нїѧ своѧ̑ кто̀, стѧжа́ти мо́жетъ, и҆ и҆мѣ́ти неизглаго́ланнꙋю ѡ҆ ѡ҆брѣ́тенїи є҆гѡ̀ ра́дость.

ѯ҃. И҆́на є҆́сть новонача́льнаѧ ра́дость, и҆ и҆́на совершеннотво́рнаѧ: ѻ҆́ва ᲂу҆́бѡ мечта́нїю не быва́етъ неприча́стна, ѻ҆́ва же смиренномꙋ́дрїѧ и҆́мать си́лꙋ: посредѣ́ же си́хъ печа́ль боголюби́ва, и҆ неболѣ́зненнаѧ слеза̀. Во мно́жествѣ бо вои́стиннꙋ мꙋ́дрости, мно́жество ра́зꙋма, и҆ прилага́емꙋ ра́зꙋмꙋ, прилага́ютсѧ болѣ̑зни¹¹⁵⁷. Сегѡ̀ ра́ди ᲂу҆́бѡ пе́рвѣе подоба́етъ новонача́льною ра́достїю къ подвигѡ́мъ призва́ти дꙋ́шꙋ, и҆ ѡ҆бличи́ти тꙋ́ю, и҆ и҆скꙋси́ти про́чее ѿ и҆́стины ст҃а́гѡ дх҃а, ѡ҆ и҆́хже содѣ́ѧ ѕлы́хъ, и҆лѝ и҆ є҆щѐ дѣ́етъ киче́нїемъ води́мь: во ѡ҆бличе́нїи бо, речѐ, ѡ҆ беззако́нїи наказа́лъ є҆сѝ человѣ́ка, и҆ и҆ста́ѧлъ є҆сѝ ꙗ҆́кѡ паꙋчи́нꙋ дꙋ́шꙋ є҆гѡ̀¹¹⁵⁸: да бж҃е́ственномꙋ тꙋ́ю ѡ҆бличе́нїю и҆скꙋси́вшꙋ, ꙗ҆́коже въ горни́лѣ, си́це дѣ́йствїе прїи́метъ немечта́тельныѧ ра́дости, во те́плѣй па́мѧти бж҃їей.

ѯ҃а. Є҆гда̀ ѿ гнѣ́ва дꙋша̀ смꙋща́етсѧ, и҆лѝ ѿ пи́щъ мѧте́тсѧ, и҆лѝ ѿ лютоѧ́ростїѧ мо́лвитсѧ, не мо́жетъ ᲂу҆́мъ держа́тель бы́ти бж҃їѧ па́мѧти, а҆́ще и҆ всѧ́кими ѡ҆́бразы себѐ нꙋ́дитъ: потемнѣва́емый бо ве́сь сы́й ѿ лю́тости страсте́й, чꙋ́ждь своегѡ̀ быва́етъ чꙋ́вства. Тогѡ̀ ра́ди не и҆́мать жела́нїѧ гдѣ̀ воѡбрази́ти свою̀ печа́ть, да внесе́тъ ᲂу҆́мъ неѡскꙋдѣва́емый ви́дъ поꙋче́нїѧ, ѡ҆жесточе́ннѣй па́мѧти мы́слей ѿ стра́сти бы́вшей сꙋровства̀. А҆́ще ли же си́хъ кромѣ̀ бꙋ́детъ, а҆́ще ма́лѡ ѿ забве́нїѧ и҆ ᲂу҆кра́детсѧ жела́емое, а҆́бїе па́ки ᲂу҆́мъ своѐ тече́нїе прїе́мъ, те́плѣе є҆́млетсѧ многолюби́мыѧ ѻ҆́ныѧ и҆ спаси́тельныѧ лови́твы: и҆́мать бо са́мꙋю тꙋ́ю благода́ть, споꙋчава́ющꙋю сїю̀ дꙋ́шꙋ, и҆ совзыва́ющꙋю, є҆́же, гдⷭ҇и і҆и҃се. Ꙗ҆́коже ᲂу҆́бѡ ма́ти ᲂу҆чи́тъ и҆ па́ки споꙋчава́етъ своего̀ ѻ҆троча́те, є҆́же ѻ҆́тчее и҆́мѧ, до́ндеже во ѻ҆бы́чай то́е приведе́тъ, вмѣ́стѡ и҆ны́ѧ каковы́ѧлюбо младоподо́бныѧ бесѣ́ды, ꙗ҆́снѣ ѻ҆тца̀, а҆́ще и҆ спи́тъ, нарица́ти. Сегѡ̀ ра́ди а҆по́столъ глаго́летъ, си́це же и҆ дх҃ъ спосо́бствꙋетъ на́мъ въ не́мощехъ на́шихъ: ѡ҆ чесо́мъ бо помо́лимсѧ, ꙗ҆́коже подоба́етъ, не вѣ́мы, но са́мъ дх҃ъ хода́тайствꙋетъ ѡ҆ на́съ воздыха́нїи неизглаго́ланными¹¹⁵⁹. Поне́же мы̀ младе́нчествꙋемъ къ моли́твѣ и҆ добродѣ́тели соверше́нїю, тогѡ̀ всѧ́чески тре́бꙋемъ по́мощи: да ѿ тогѡ̀ неизглаго́ланныѧ сла́дости помыслѡ́мъ на́шымъ содержи̑мымъ и҆ ᲂу҆слажда́ємымъ, ѿ всегѡ̀ жела́нїѧ ко гдⷭ҇а и҆ ѻ҆ц҃а̀ на́шегѡ па́мѧти и҆ любвѝ прїитѝ возмо́жемъ. Сегѡ̀ ра́ди въ то́мжде, ꙗ҆́коже са́мъ ди́вный па́ѵелъ речѐ, зове́мъ є҆гда̀ самѣ́мъ тѣ́мъ бг҃а ѻ҆ц҃а̀: благовчинѧ́емсѧ нарица́ти непреста́ннѡ, а҆́вва ѻ҆ц҃ъ.

ѯ҃в. Ꙗ҆́рость ве́щныхъ страсте́й смꙋща́ти ѡ҆бы́че и҆ мѧте́жити дꙋ́шꙋ, є҆́сть же є҆гда̀ и҆ вели́кѡ по́льзꙋютъ тꙋ́ю. Є҆гда́ бо на нече́ствꙋющаго, и҆лѝ ка́кѡ лю́бо безстꙋ́дствꙋющаго, не мѧте́жнѣ прїе́млемъ ꙗ҆́рость, да и҆лѝ спасе́тсѧ, и҆лѝ постыди́тсѧ, прибы́токъ семꙋ̀ и҆схода́тайствꙋемъ кро́тости: мы́слїю бо всѧ́кѡ пра́вдѣ и҆ бла́гости бж҃їей споспѣша́емъ, но и҆ сла́бость є҆гѡ̀, тѧ́жцѣ гнѣ́вающесѧ на грѣ́хъ, на мꙋ́жество подви́гнемъ мно́гажды: а҆ наипа́че, и҆ самомꙋ̀ тлѣ́нїѧ дх҃ꙋ запреща́юще, є҆гда̀ во мно́зѣ безгнѣ́вїи є҆смы̀, сме́ртною мꙋ́дрствꙋемъ похвало́ю. Не подоба́етъ бо двоемы́сленнꙋ бы́ти ᲂу҆мꙋ̀, є҆́же бо и҆ гдⷭ҇ь сотворѝ, да наꙋ́читъ на́съ: два́жды въ дс҃ѣ а҆́дꙋ запрети́въ и҆ возмꙋти́въ себѐ, но немѧте́жнымъ хотѣ́нїемъ, то́кмѡ всѧ̑ є҆ли̑ка хо́щетъ творѧ́й, си́це и҆ ла́заревꙋ дꙋ́шꙋ возвратѝ тѣ́лꙋ. Ꙗ҆́коже мнѣ̀ мни́тсѧ, во ѻ҆рꙋ́жїе па́че пра́вды є҆стествꙋ̀ на́шемꙋ цѣломꙋ́дреннаѧ ꙗ҆́рость, ѿ созда́вшагѡ на́съ бг҃а даде́сѧ: ю҆́же а҆́ще бы на ѕмі́ѧ є҆́ѵа прїѧ́ла тꙋ́ю, не бы̀ ᲂу҆́бѡ ѿ ѻ҆́ныѧ стра́стныѧ побѣди́ласѧ сла́дости, ꙗ҆́коже мнѣ̀ мни́тсѧ. И҆́же бо рве́нїѧ ра́ди благоче́стїѧ ꙗ҆́рость цѣломꙋ́дреннѣ и҆́мать, и҆скꙋ́снѣйшїй всѧ́кѡ ѡ҆брѧ́щетсѧ въ воздаѧ́нїи мѣ́рила, ѿ и҆́же ника́коже движе́нїѧ ᲂу҆́мнагѡ къ ꙗ҆́рости и҆мꙋ́щагѡ: ѻ҆́въ бо неѡбꙋче́нна человѣ́ческихъ нра́вѡвъ вса́дника и҆мѣ́ти мни́тсѧ, ѻ҆́въ же на ко́нехъ добродѣ́тели подви́жникъ но́ситсѧ посредѣ̀ бѣсо́вскагѡ полка̀, воздержа́нїѧ при́снѡ ѡ҆бꙋчава́ѧ въ стра́сѣ бж҃їи четвероко́нницꙋ, ю҆́же колесни́цꙋ і҆сра́илевꙋ въ вознесе́нїи ди́внагѡ и҆лїѝ ѿ писа́нїѧ рече́ннꙋю ѡ҆брѣта́емъ. Поне́же пє́рвымъ і҆ꙋде́ѡмъ ѡ҆ четы́рехъ добродѣ́телехъ разли́чнѣ ꙗ҆влѧ́етсѧ бесѣ́довавъ бг҃ъ: сегѡ̀ ра́ди ве́сь и҆ на колесни́цѣ ѻ҆́гненнѣй вознесе́сѧ, и҆́же толи́кїй мꙋ́дрости, и҆ мꙋ́жества, и҆ пра́вды воспита́тель, ꙗ҆́коже ко́ими мнѣ̀ мни́тсѧ свои́ми цѣломꙋ́дренными добродѣ́тельми прїѧ́тъ бы́въ, внегда̀ восхище́нꙋ томꙋ̀ бы́вшꙋ въ дыха́нїи ѻ҆гнѧ̀ дꙋ́хомъ.

ѯ҃г. И҆́же ра́зꙋмꙋ прїѡбщи́всѧ ст҃о́мꙋ, и҆ сла́дости вкꙋси́вый бж҃їѧ, нижѐ сꙋди́ти до́лженъ є҆́сть, нижѐ двиза́ти сꙋ́дъ ѿню́дъ къ нѣ́коемꙋ, а҆́ще и҆ са́мꙋю ю҆́же ѡ҆блачи́тъ ри́зꙋ во́зметъ кто̀: кнѧзе́й бо вѣ́ка сегѡ̀ пра́вда, побѣжда́етсѧ всѧ́кѡ пра́вдою бж҃їею, па́че же ничто́же є҆́сть ра́вно пра́вдѣ бж҃їей. Поне́же коли́кое ра́знство посредѣ̀ ча̑дъ бж҃їихъ, и҆ вѣ́ка сегѡ̀ человѣ̑къ: ра́звѣ є҆́же си́хъ пра́ведное несоверше́нно сꙋ́щи, є҆́же ко ѻ҆́нѣхъ пра́вдѣ мни́тсѧ: тѣ́мже ᲂу҆̀бо, ѻ҆́во глаго́летъ человѣ́ческое пра́ведное, ѻ҆́во же бж҃е́ственнаѧ пра́вда. Си́це ᲂу҆̀бо гдⷭ҇ь і҆и҃съ нижѐ нарꙋга́емь ѿвѣщава́ше, нижѐ стражда̀ преща́ше, но и҆ взѧ́тїе ри́зъ молчѧ̀ терпѧ́ше: да бо́льшее же рекꙋ̀, и҆ ѡ҆ спасе́нїи ѕлодѣ́йствꙋющихъ є҆мꙋ̀, ѻ҆ц҃а̀ молѧ́ше. Мїрсті́и же человѣ́цы не ᲂу҆̀бо потѧза́тисѧ преста́нꙋтъ, а҆́ще не съ прибы́ткомъ нѣ́кїимъ сꙋди́мыхъ прїи́мꙋтъ вє́щи: наипа́че є҆гда̀ пре́жде до́лга ли́хвы и҆стѧзꙋ́ютъ, ꙗ҆́кѡ бы́ти и҆̀мъ винѡ́внымъ, вмѣ́стѡ пра́веднагѡ, нача́ло мно́гажды вели́кой непра́вдѣ.

ѯ҃д. Слы́шахъ, речѐ, нѣ́которыхъ глаго́лющихъ благоговѣ́йныхъ, ꙗ҆́кѡ нѐ подоба́етъ ѡ҆ставлѧ́ти кѡ́имлибо расхища́ти ꙗ҆̀же на свою̀ потре́бꙋ, и҆лѝ къ поко́ю ᲂу҆бѡ́гимъ и҆́мамы: наипа́че же, а҆́ще ѿ хрїстїа́нъ сїѐ стра́ждемъ, да не грѣхꙋ̀ хода́таи ѡ҆би́дѧщымъ на́съ ѡ҆брѧ́щемсѧ, и҆́хже и҆ неѕлопо́мними пребꙋ́демъ: сїе́ же ничто́же и҆́но є҆́сть, ра́звѣ во́ли своеѧ̀ и҆сполне́нїе со безслове́снымъ и҆звѣ́томъ. А҆́ще бо ѡ҆ста́вль ꙗ҆̀же моли́тисѧ, и҆ внима́ти своемꙋ̀ се́рдцꙋ, сꙋ́дъ же глаго́лати къ хотѧ́щымъ напа́ствовати, пома́лѣ же начнꙋ̀ и҆ сꙋди̑щнымъ дворѡ́мъ присѣдѣ́ти, ꙗ҆́вѣ, ꙗ҆́кѡ предречє́ннаѧ бѡ́льша вмѣнѧ́ю, па́че своегѡ̀ спасе́нїѧ, да не рекꙋ̀ и҆ самагѡ̀ сп҃си́телѧ за́повѣдей. Ка́кѡ бо послѣ́дꙋю є҆ѵⷢ҇льскомꙋ повелѣ́нїю, повелѣва́ющемꙋ мнѣ̀ и҆ ѿ взе́млющагѡ моѧ̑ ѿню́дъ не и҆стѧза́ти; а҆́ще не съ ра́достїю терпѧ̀ по а҆по́стольскомꙋ словесѝ, сꙋ́щихъ мѝ и҆мѣ́нїй расхище́нїе, є҆гда̀ и҆ кромѣ̀ сꙋда̀ кто̀ прїи́мъ, є҆ли́кѡ ᲂу҆жѐ хотѧ́ше, грѣха̀ лихои́мства не свобожда́етсѧ: поне́же тлѣ̑ннаѧ сꙋди̑лища, нетлѣ́нное бж҃їе сꙋди́ще ѡ҆предѣлѧ́ти не мо́гꙋтъ. Сїе́ бо всѧ́кѡ зако́ны винѡ́вны¹¹⁶⁰ и҆сполнѧ́ти, ѿ ни́хже и҆ не хотѧ̀ ѿвѣща́ти томꙋ̀ слꙋча́етсѧ: тѣ́мже добро̀ є҆́же ѿ хотѧ́щихъ на́съ ѡ҆би́дѣти, терпѣ́ти нꙋ́ждꙋ, и҆ моли́тисѧ ѡ҆ ни́хъ, да покаѧ́нїѧ ра́ди ѿпꙋ́ститсѧ и҆̀мъ лихои́мства прегрѣше́нїе, а҆ не воздаѧ́нїѧ ра́ди, и҆́мже на́съ ѡ҆би́дѣша. Сїе́ бо хо́щетъ пра́вда бж҃їѧ да не лихои́мственнѡ прїи́метъ когда̀: но да лихои́мца ѿ прегрѣше́нїѧ, покаѧ́нїѧ ра́ди свобо́дна сотвори́тъ.

ѯ҃є. Ѕѣлѡ̀ прикла́дно и҆ во все́мъ поле́зно позна́вшымъ на́мъ пꙋ́ть благоче́стїѧ, а҆́ще всѧ̑ сꙋ̑щаѧ на̑ша прода́ти, и҆ ꙗ҆̀же ѿ си́хъ и҆мѣ̑нїѧ разда́ти по за́повѣди гдⷭ҇ни¹¹⁶¹, и҆ не и҆звѣ́томъ ꙗ҆́кобы всегда̀ хотѣ́ти ми́лостыню твори́ти и҆ преслꙋ́шати сп҃си́телево повелѣ́нїе: бꙋ́детъ бо на́мъ ѿ сегѡ̀, пе́рвое ᲂу҆́бѡ коемꙋ́ждо до́брое безпеча́лїе, и҆ ѿсю́дꙋ про́чее ненавѣ́стно ᲂу҆бо́жество, є҆́же всѧ́кїѧ непра́вды, и҆ всѧ́кагѡ сꙋда̀ вы́шше мꙋ́дрствꙋетъ, за є҆́же не и҆мѣ́ти на́мъ ктомꙋ̀ ве́щь, ѻ҆́гнь лихои́мцєвъ воспалѧ́ющꙋю. Согрѣ́етъ же на́съ тогда̀ вѧ́щше добродѣ́тель смиренномꙋ́дрїѧ, и҆ во свои́хъ нѣ́дрѣхъ ꙗ҆́кѡ наги́хъ сꙋ́щихъ ᲂу҆поко́итъ: ꙗ҆́коже ма́ти своѧ̑ дѣ́ти на свои́хъ рꙋка́хъ предвзе́млющи ѡ҆б̾е́млетъ, є҆гда̀ младе́нческїѧ ра́ди простоты̀, свою̀ совле́кши ри́зꙋ дале́че нѣ́гдѣ пове́ргнетъ, нагото́ю па́че мно́гагѡ ра́ди безѕло́бїѧ, не́жели разли́чїемъ ри́зъ красꙋ́ѧсѧ: храни́тъ бо, речѐ, младе́нцы гдⷭ҇ь: смири́хсѧ, и҆ спасе́ мѧ¹¹⁶².

ѯ҃ѕ. Поне́же и҆́мамы, всѧ́кѡ гдⷭ҇ь ѿ на́съ и҆стѧ́жетъ ми́лостыни сло́во, а҆ не ꙗ҆́коже не и҆́мамы: а҆́ще ᲂу҆̀бо є҆́же и҆мѣ́хъ даѧ́ти во мнѡ́га лѣ̑та, сїѧ̑ въ ма́лѣ вре́мени стра́ха ра́ди бж҃їѧ благи́мъ произволе́нїемъ расточꙋ̀: ѡ҆ чесо́мъ и҆ є҆щѐ ᲂу҆корю́сѧ, ничесо́же и҆мѣ́ѧ; Но рече́тъ кто̀: ѿкꙋ́дꙋ ᲂу҆́бѡ поми́ловани бꙋ́дꙋтъ про́чее, и҆̀же ѿ на́шихъ подаѧ́нїй ѡ҆бы́кшїи пома́лꙋ корми́тисѧ ᲂу҆бо́зїи; Да навы́кнетъ таковы́й, и҆звѣ́томъ своегѡ̀ любоимѣ́нїѧ, не поноша́ти бг҃ꙋ: не лиши́тъ бо бг҃ъ свою̀ тва́рь ꙗ҆́коже и҆знача́ла ᲂу҆строѧ́ющи, ниже́ бо пре́жде сегѡ̀ и҆лѝ ѻ҆́нагѡ, даю́щихъ ми́лостыню, лиша́еми бѧ́хꙋ пи́щи, и҆лѝ кро́ва ни́щїи. Добро̀ ᲂу҆́бѡ є҆́же ѿ са́магѡ ра́зꙋма и҆́стины, со благи́мъ слꙋже́нїемъ ѿврещѝ, є҆́же ѿ бога́тства безслове́сное же мꙋдрова́нїе и҆ похвалꙋ̀, своѧ̑ похотѣ̑нїѧ возненави́дѣвшꙋ, є҆́же є҆́сть взыска́ти свою̀ дꙋ́шꙋ, да не ктомꙋ̀ ра́дꙋющесѧ ѡ҆ всегда́шнемъ подаѧ́нїи, и҆ ᲂу҆ничижи́мъ са́ми себѐ ѕѣлѡ̀, ꙗ҆́кѡ ничесо́же добра̀ творѧ́ще. До́ндеже ᲂу҆̀бо во и҆мѣ́нїи, бла́гѡ и҆мꙋ́ще є҆смы̀ пребыва́емъ, но вели́ко ᲂу҆́бѡ є҆́сть въ на́съ благоде́нствїе, а҆́ще ра́дꙋемсѧ ѡ҆ си́хъ расточе́нїи, ꙗ҆́кѡ ти́хѡ слꙋжа́ще бж҃е́ственномꙋ повелѣ́нїю: и҆ поне́же ᲂу҆́бѡ всѧ̑ и҆стощи́хомъ, смире́нїе на́мъ безмѣ́рное и҆ ᲂу҆миле́нїе привхо́дитъ, ꙗ҆́кѡ ничесо́же пра́вды досто́йно дѣ́ющымъ. Тѣ́мже про́чее въ себѣ̀ ѡ҆браща́етсѧ дꙋша̀, во мно́зѣ смире́нїи и҆ сокрꙋше́нїи, да є҆́же не и҆́мать притѧжава́ти на всѧ́къ де́нь ми́лостынею, сїѐ ѿ трꙋ́дныѧ моли́твы и҆ терпѣ́нїѧ и҆ смиренномꙋ́дрїѧ по́слѣжде себѣ̀ притвори́тъ. Ни́щъ бо и҆ ᲂу҆бо́гъ восхва́лѧтъ и҆́мѧ твоѐ гдⷭ҇и¹¹⁶³. Нижѐ ᲂу҆̀бо сло́ва дарова́нїе ᲂу҆готовлѧ́етсѧ комꙋ̀ ѿ бг҃а, а҆́ще кто̀ себѐ не ᲂу҆гото́витъ всѣ́хъ свои́хъ сꙋ́щихъ ѿрещи́сѧ, сла́вы ра́ди є҆ѵⷢ҇лїѧ бж҃їѧ: да въ бг҃олю́бномъ ᲂу҆бо́жествѣ, благовѣствꙋ́етсѧ бога́тство црⷭ҇твїѧ бж҃їѧ. Рекі́й бо: ᲂу҆гото́валъ є҆сѝ бла́гостїю твое́ю ни́щемꙋ бж҃е. И҆ па́ки наведѐ: Гдⷭ҇ь да́стъ глаго́лъ благовѣствꙋ́ющымъ си́лою мно́гою¹¹⁶⁴: сїѐ ꙗ҆́вѣ назна́менꙋетъ.

ѯ҃з. Всѧ̑ ᲂу҆̀бо дарова̑нїѧ бг҃а на́шегѡ, дѡбра̀ ѕѣлѡ̀, и҆ всѧ́кїѧ бла́гости пода́тєльна: но ничто́же си́це воспалѧ́етъ и҆ дви́жетъ на́ше се́рдце въ любо́вь тогѡ̀ бла́гости, ꙗ҆́коже богосло́вїе: пло́дъ бо сꙋ́щи се́й ра́венъ бж҃е́ственныѧ благода́ти, прє́днѧѧ и҆з̾ѧвлѧ́етъ, и҆ да́ръ да́рꙋетъ дꙋшѝ. Пе́рвѣе бо ᲂу҆строѧ́етъ на́съ, всѧ́кое жите́йское любле́нїе съ ра́достїю преѡби́дѣти, ꙗ҆́кѡ и҆мꙋ́ще вмѣ́стѡ тлѣ́нныхъ жела́нїй, неизглаго́ланное бога́тство словесѐ бж҃їѧ: та́же ѻ҆гне́мъ и҆змѣне́нїѧ ᲂу҆́мъ на́шъ ѡ҆зарѧ́етъ, тѣ́мже того̀ и҆ прича́стника слꙋже́бнымъ дх҃овѡ́мъ твори́тъ. И҆́скреннѣ ᲂу҆́бѡ и҆̀же въ сїѐ пред̾ꙋгото́вльшїисѧ, сицевꙋ́ю добродѣ́тель вожделѣ́имъ, возлю́бленнїи, благолѣ́потнꙋю, всезри́тельнꙋю, всѧ́кагѡ безпеча́лїѧ хода́тайственнꙋю, во ѡ҆заре́нїи свѣ́та неизрече́ннагѡ ᲂу҆́мъ пита́ющꙋю, сло́ва бж҃їѧ, бг҃а сло́ва: да не мнѡ́гаѧ глаго́лю, слове́сныѧ дꙋшѝ да́ромъ проро́чества почти́вши, и҆ ко ѡ҆бще́нїю сочета́вши нераздѣ́льнѡ, ѽ чꙋдесѐ! да и҆ ѿ человѣ̑къ, богови̑дныѧ вѣща́тели жениховво́дница сочета́етъ, бж҃е́ствєннаѧ ꙗ҆́снѡ пою́ще вели̑чїѧ бж҃їѧ.

ѯ҃и. Оу҆́мъ на́шъ, мнѡ́гаѧ ᲂу҆́бѡ, ꙗ҆̀же въ моли́твѣ, ᲂу҆пражднє́нїѧ ѕлострада́тельнѣ и҆́мать, тѣсноты̀ ра́ди и҆ собра́нїѧ моли́твенныѧ добродѣ́тели: въ богосло́вїе же ра́дꙋѧсѧ себѐ предае́тъ, простра́нства ра́ди и҆ свобо́дности бж҃е́ственныхъ богоглаго́ланїй. Да не ᲂу҆̀бо пꙋ́ть томꙋ̀ да́мы, є҆́же мно́гѡ глаго́лати, и҆лѝ па́че мѣ́ры воскрилѧ́тисѧ того̀ ѡ҆ста́вимъ ра́достїю, но моли́твою вѧ́щше и҆ пѣ́нїемъ, и҆ писа́нїй прочита́нїемъ ᲂу҆праздни́мъ: нижѐ любослове́сныхъ мꙋже́й творе́нїе презира́юще, и҆́хже вѣ́ра словесы̑ познава́етсѧ: ниже́ бо ѿ себѐ ᲂу҆строѧ́юще глаго́лы, примета́ти словесє́мъ благѡда́тнымъ: нижѐ ᲂу҆́бѡ ѿ тщесла́вїѧ влещи́сѧ, и҆ разсы́патисѧ, мно́гїѧ ра́ди сла́дости и҆ многосло́вїѧ, попꙋ́стимъ, но и҆ всѧ́кагѡ мечта́нїѧ кромѣ̀, то́й во вре́мѧ видѣ́нїѧ сохрани́мъ: и҆ про́стѡ рещѝ, слє́зныѧ томꙋ̀ всѧ́кѡ ѿ сегѡ̀ мы̑сли сотвори́мъ. Почива́ѧй бо во временѣ́хъ молча́нїѧ, и҆ ᲂу҆слажда́емь ѿ моли́твы па́че сла́дости, не то́кмѡ предрече́нныхъ ви́нъ кромѣ̀ быва́етъ, но вѧ́щше и҆ вѧ́щше поновлѧ́етсѧ, во є҆́же бы́стрѣ и҆ без̾ трꙋда̀ бж҃е́ственнымъ прилага́тисѧ видѣ́нїємъ, и҆ постига́ти въ разсꙋжде́нїе, и҆ пред̾ꙋспѣва́ти во мно́зѣ смире́нїи: ѻ҆ба́че подоба́етъ вѣ́дѣти, ꙗ҆́кѡ моли́тва всѧ́кїѧ широты̀ вы́шши є҆́сть: и҆ сїѧ̀ ѻ҆́нѣхъ є҆ди́ныхъ є҆́сть, и҆̀же во всѧ́комъ чꙋ́вствѣ и҆ и҆звѣще́нїи и҆скꙋ́сныхъ, и҆спо́лненныхъ ст҃ы́ѧ благода́ти.

ѯ҃ѳ. Благода́ть въ нача́лѣ ра́зꙋмомъ мно́гимъ дꙋ́шꙋ свои́мъ ѡ҆бы́че ѡ҆зарѧ́ти свѣ́томъ, пред̾идꙋ́щымъ же по́двигѡмъ, недовѣ́домѣ мнѡ́гаѧ дѣ́йствꙋетъ богосло́внѣй дꙋшѝ своеѧ̀ та̑инства: тогда̀ ᲂу҆́бѡ на́съ ра́дꙋющихсѧ, во слѣ́дъ приложи́тъ бж҃е́ственныхъ видѣ́нїй, ꙗ҆́кѡ ѿ невѣ́дѣнїѧ въ ра́зꙋмъ призыва́емыхъ, посредѣ́ же пѡ́двигъ, не тщесла́венъ на́шъ ра́зꙋмъ сохранѧ́етъ. Подоба́етъ ᲂу҆̀бо скорбѣ́ти на́мъ въ мѣ́рꙋ ꙗ҆́кѡ ѡ҆ста́влєннымъ, да вѧ́щше смири́мсѧ и҆ покори́мсѧ сла́вѣ гдⷭ҇ни: ра́доватисѧ же благовре́меннѣ, благо́ю наде́ждою воскрилѧ́ємымъ: ꙗ҆́коже бо мно́гаѧ ско́рбь въ безнаде́жїе и҆ невѣ́рїе дꙋ́шꙋ поверга́етъ, си́це и҆ мно́гаѧ ра́дость, въ киче́нїе тꙋ́ю призыва́етъ. Ѡ҆ и҆̀же бо є҆щѐ младе́нчествꙋющихъ глаго́лю, просвѣще́нїѧ и҆ ѡ҆ставле́нїѧ среда̀, и҆скꙋше́нїе: ско́рби же и҆ ра́дости среда̀, наде́жда: терпѧ́ бо, речѐ, потерпѣ́хъ гдⷭ҇а, и҆ внѧ́тъ мѝ¹¹⁶⁵. И҆ па́ки: по мно́жествꙋ болѣ́зней мои́хъ, ᲂу҆тѣшє́нїѧ твоѧ̑ возвесели́ша дꙋ́шꙋ мою̀¹¹⁶⁶.

ѻ҃. Ꙗ҆́коже въ ба́ни ча́стѡ ѿверза̑емымъ две́ремъ, ю҆́же внꙋ́трь теплотꙋ̀ и҆згонѧ́етъ во́нъ: си́це и҆ дꙋша̀, є҆гда̀ хо́щетъ мно́гѡ глаго́лати, а҆́ще и҆ всѧ̑ дѡ́браѧ глаго́летъ, свою̀ па́мѧть гла́сными враты̑ разно́ситъ, тѣ́мже про́чее ᲂу҆̀бо лиша́етсѧ чистѣ́йшихъ мы́слей: са́мою же слове́съ ꙗ҆́звою мѧте́жнѣ нѣ́какѡ ко прилꙋ́чшымсѧ бесѣ́дꙋетъ, поне́же нижѐ ст҃а́гѡ дх҃а про́чее и҆́мать, не мечта́тельнꙋ въ то́й соблюда́юща мы́сль: бѣжи́тъ бо при́снѡ благо́е многосло́вїѧ, ꙗ҆́кѡ мѧте́жа сꙋ́щи и҆ всѧ́кагѡ мечта́нїѧ вино́вно. Добро̀ ᲂу҆̀бо благовре́менно молча́нїе, ничто́же и҆́но сꙋ́щи, ра́звѣ ма́ти мꙋ̑дрымъ помыслѡ́мъ.

ѻ҃а. Мно́гѡ ᲂу҆́бѡ богосло́внꙋю дꙋ́шꙋ въ нача́лѣ мо́лвѧтъ, са́мое на́съ сло́во ра́зꙋма ᲂу҆чи́тъ, стра́сти: вѧ́щше же всѣ́хъ ꙗ҆́рость, и҆ нена́висть, сїе́ же стра́ждетъ, не толи́кѡ ра́ди дѣ́йствꙋющихъ сїѧ̑ бѣсѡ́въ, є҆ли́кѡ своегѡ̀ ра́ди пред̾ꙋспѣ́ѧнїѧ. Доне́лѣже бо мі́ра сегѡ̀ мꙋдрова́нїемъ во́дитсѧ: а҆́ще и҆ ви́дитъ каково̀ ᲂу҆́бѡ пра́ведное ѿ нѣ́которыхъ попира́емо, недви́жима и҆ немѧте́жна пребыва́етъ: свои́ми бо похотьмѝ пекꙋ́щисѧ, ѡ҆ пра́веднѣмъ неради́тъ. Є҆гда́ же вы́шше свои́хъ страсте́й на́чнетъ быва́ти, преѡби́дѣнїѧ ра́ди настоѧ́щихъ, и҆ любвѐ ра́ди бж҃їѧ, нижѐ во снѣ̀ само́мъ, то́е пра́ведное презира́емо ви́дѣти те́рпитъ: но гнѣ́ваетсѧ на ѕлодѣ́йствꙋющыѧ, до́ндеже ви́дитъ досади́тели пра́вды, благочести́вымъ по́мысломъ сеѧ̀ покори́вшихсѧ досто́инствꙋ: сегѡ̀ ра́ди ᲂу҆́бѡ неправди̑выѧ ненави́дитъ, пра́вєдныѧ же па́че лю́битъ. Не совосхище́нно бо всѧ́чески ѻ҆́ко дꙋше́вное быва́етъ, внегда̀ свою̀ завѣ́сꙋ, тѣ́ло глаго́лю, въ то́нкость вели́кꙋ воздержа́нїемъ и҆зтче́тъ: ѻ҆ба́че бо́льше є҆́сть, и҆ наипа́че ненавидѣ́нїѧ непра́ведныхъ, є҆́же пла́кати тѣ́хъ нечꙋ́вство: а҆́ще бо ѻ҆нѝ и҆ ненавидѣ́нїѧ сꙋ́ть досто́йни, но боголюби́вой дꙋшѣ̀ ᲂу҆́мъ не хо́щетъ ѿ не́нависти мѧте́житисѧ, зане́же присꙋ́щей не́нависти въ дꙋшѣ̀, не дѣ́йствꙋетъ ра́зꙋмъ.

ѻ҃в. Богосло́вецъ ѿ са́мыхъ слове́съ бж҃їихъ ᲂу҆слажда́ѧ дꙋ́шꙋ и҆ разжиза́ѧ, и҆́же ко безстра́стїѧ приме́щетсѧ мѣ́рамъ во благовре́менныхъ широта́хъ: словеса́ бо гдⷭ҇нѧ, словеса̀ чи̑ста, сребро̀ разжже́но, и҆скꙋше́но землѝ¹¹⁶⁷. Разꙋ́мный бо, и҆́же по дѣ́йствꙋ ѿ и҆скꙋ́са и҆звѣща́емь, вы́шше страсте́й быва́етъ: полꙋчи́тъ же и҆ богосло́вецъ, а҆́ще ᲂу҆̀бо смире́ннѣйша себѐ положи́тъ и҆скꙋ́са разꙋми́чнагѡ. И҆ разꙋ́мный, а҆́ще непогрѣши́тельнꙋ въ разсꙋжде́нїи и҆́мать ча́сть дꙋшѝ, ви́дѣтельныѧ пома́лꙋ добродѣ́тели причаща́етсѧ. Двꙋ́хъ бо не слꙋча́етсѧ коемꙋ́ждо ѿ соверше́нныхъ пристѧжа́ти дарова́нїй, да ѻ҆бои́ма чꙋдѧ́щемасѧ, во є҆́же кі́йждо коего́ждо и҆зли́шествꙋетъ, смиреномꙋ́дрїе бо въ тѣ́хъ со рве́нїемъ пра́вды ᲂу҆множа́етсѧ. Сегѡ̀ ра́ди а҆пⷭ҇лъ глаго́летъ: ѻ҆́вомꙋ ᲂу҆́бѡ дае́тсѧ дꙋ́хомъ сло́во премꙋ́дрости, дрꙋго́мꙋ же сло́во ра́зꙋма, ѡ҆ то́мже дс҃ѣ¹¹⁶⁸.

ѻ҃г. Є҆гда̀ въ гобзова́нїи бꙋ́детъ дꙋша̀ є҆сте́ственныхъ плодѡ́въ, велегла́снѣйше и҆ пѣ́нїе твори́тъ, и҆ гласѡ́мъ па́че хо́щетъ моли́тисѧ, є҆гда́ же ли ѿ ст҃а́гѡ дх҃а воздѣ́йствꙋетсѧ, со всѧ́кою ѿра́дою и҆ сла́достїю помо́литсѧ во є҆ди́номъ се́рдцѣ: послѣ́дꙋетъ же ѻ҆́номꙋ зало́гꙋ, ра́дость мечта́тельна, ѻ҆́вомꙋ же дꙋхо́внаѧ слеза̀, и҆ по си́хъ весе́лїе нѣ́кое любомечта́тельно. Те́плаѧ бо па́мѧть гла́сныѧ ра́ди мѣ́ры пребыва́ющи, слезови̑дныѧ нѣ̑кїѧ и҆ крѡ́ткїѧ мы̑сли въ се́рдцѣ всегда̀ ᲂу҆строѧ́етъ носи́ти: тѣ́мже вои́стиннꙋ є҆́сть ви́дѣти сѣ́мена моли́твы сѣ́єма въ землѝ серде́чнѣй, наде́жды, ра́ди жа́твенныѧ ра́дости. Ѻ҆ба́че є҆гда̀ ѿ многопеча́лїѧ ѡ҆тѧгчава́еми є҆смы̀, подоба́етъ ма́лѡ бо́льшимъ гла́сомъ твори́ти на́мъ пѣ́нїе, наде́жды ра́достїю вѣща́нїѧ дꙋ́шꙋ воз̾ꙋдарѧ́ющымъ, до́ндеже ѻ҆́блакъ ѻ҆́ный тѧ́жкїй ѿ вѣ́трѡвъ гла́са разждене́тсѧ.

ѻ҃д. Є҆гда̀ во свое́мъ ра́зꙋмѣ дꙋша̀ бꙋ́детъ, и҆зно́ситъ и҆з̾ себѐ теплотꙋ̀ нѣ́кꙋю и҆ боголюбе́зное стыдѣ́нїе: не смꙋща́ема бо ѿ печа́лей жите́йскихъ, рачи́телѧ нѣ́коегѡ ражда́етъ смире́нїѧ, по мѣ́рѣ бг҃а взыскꙋ́ющымъ, да́рꙋетсѧ смире́нїе: но сїѐ ᲂу҆̀бо вско́рѣ и҆змѣнѧ́етсѧ, и҆лѝ ѿ чꙋ́вствъ предае́мѣй па́мѧти, и҆лѝ и҆ поѧда́ющꙋ є҆стествꙋ̀ вско́рѣ свое́ си ᲂу҆бо́жествомъ до́брыхъ дѣѧ́нїй. Тѣ́мже и҆̀же ѿ є҆́ллинъ премꙋ́дрїи сїѐ воздержа́нїѧ ра́ди полꙋчи́ти непщева́хꙋ, є҆́же не и҆мѣ́ша, ꙗ҆́коже подоба́ше: за є҆́же не дѣ́йствоватисѧ ᲂу҆мꙋ̀ и҆́хъ ѿ при́сныѧ и҆ всеи́стинныѧ премꙋ́дрости. А҆ ꙗ҆́же ѿ всест҃а́гѡ дх҃а теплота̀ приноси́маѧ се́рдцꙋ, пе́рвѣе ᲂу҆́бѡ ми́рна є҆́сть всѧ̀, и҆ непрестаю́ща, и҆ всѣ̀ ча̑сти дꙋшѝ въ бж҃їю любо́вь призыва́юща, и҆ нижѐ внѣꙋ́дꙋ се́рдца разꙋмѣва́ема, собо́ю же па́че всегѡ̀ человѣ́ка, въ любо́вь нѣ́кꙋю безмѣ́рнꙋю влекꙋ́щи и҆ ра́дость: подоба́етъ ᲂу҆̀бо разꙋмѣ́вшымъ ѻ҆́нꙋ, въ са́мꙋю тꙋ̀ доспѣ́ти, здра́вствꙋющагѡ бо, ка́кѡ ᲂу҆́бѡ воздержа́нїемъ є҆стества̀, позна́нїе є҆́сть є҆сте́ственныѧ любвѐ, распали́ти же ᲂу҆́мъ въ безстра́стїе, ꙗ҆́коже дꙋхо́внаѧ любо́вь, не мо́жетъ.

ѻ҃є. Ꙗ҆́коже воздꙋ́хъ се́й, и҆́же ра́ди на́съ сотворе́нный, ды́шꙋщꙋ сѣ́верꙋ, чи́стъ пребыва́етъ, вѣ́треннагѡ ра́ди то́нка нѣ́коегѡ и҆ чи́ста є҆стества̀: ю҆́гꙋ же ды́шꙋщꙋ, ве́сь ꙗ҆́коже дебе́лъ быва́етъ вѣ́тра сегѡ̀ мглотво́рнымъ є҆стество́мъ, сло́гомъ нѣ́кїимъ сро́дства, ѿ свои́хъ є҆мꙋ̀ ча̑стыѧ ѻ҆́блаки наносѧ́щꙋ на всю̀ вселе́ннꙋю. Си́це и҆ дꙋша̀, є҆гда̀ ᲂу҆̀бо ѿ и҆́стиннагѡ и҆ всест҃а́гѡ дх҃а дыха́нїе дѣ́йствꙋетсѧ, кромѣ̀ бѣсо́вскїѧ всѧ́кїѧ мглы̀ ѡ҆брѣта́етсѧ: є҆гда́ же ѿ дꙋ́ха льсти́ва ѕѣ́льнѣ ды́шꙋщаѧ, ѿ ѻ҆́блака грѣхо́внагѡ всѧ̀ покрыва́етсѧ. Потре́ба ᲂу҆̀бо на́мъ предложе́нїе при́снѡ ѿ всеѧ̀ крѣ́пости ѡ҆браща́ти, къ чисти́тельномꙋ и҆ животво́рномꙋ дыха́нїю всест҃а́гѡ дх҃а, си́рѣчь, є҆́же ви́дѣ проро́къ і҆езекі́иль, ѿ сѣ́вера грѧдꙋ́щь во свѣ́тѣ ра́зꙋма¹¹⁶⁹, да чиста̀ на́ша при́снѡ дꙋшезри́телнаѧ наипа́че пребыва́етъ ча́сть, є҆́же не ле́стнѣ на́мъ приходи́ти ко бж҃е́ствєннымъ видѣ́нїємъ, въ воздꙋ́сѣ свѣтоза́рнѣ, ꙗ҆́же просвѣща́етъ зрѧ́щихъ: се́й бо є҆́сть свѣ́тъ и҆́стиннагѡ ра́зꙋма.

ѻ҃ѕ. Нѣ́цыи ᲂу҆мышлѧ́юще благода́ть вкꙋ́пѣ и҆ грѣ́хъ, си́рѣчь, дꙋ́хъ и҆́стины, и҆ дꙋ́хъ ле́сти, при креща́емыхъ сокрыва́тисѧ во ᲂу҆мѣ̀: тѣ́мже рече́сѧ, є҆ди́но ᲂу҆̀бо лицѐ въ дѡ́браѧ призыва́етъ ᲂу҆́мъ, дрꙋго́е же а҆́бїе къ сопроти̑внымъ. А҆́зъ же ѿ бж҃е́ственныхъ писа́нїй, и҆ ѿ са́магѡ разꙋмѣ́нїѧ ᲂу҆ма̀ постиго́хъ, ꙗ҆́кѡ пре́жде ᲂу҆́бѡ ст҃а́гѡ креще́нїѧ ѿ внѣꙋ́дꙋ благода́ть къ дѡ́брымъ преꙋбѣжда́етъ дꙋ́шꙋ: непрїѧ́знь же гнѣзди́тсѧ въ са́мыхъ глꙋбина́хъ, всѧ̑ десны̑ѧ и҆схо́ды ᲂу҆мꙋ̀ затворѧ́ти тщи́тсѧ. Ѿ са́магѡ бо тогѡ̀ часа̀, во́ньже ᲂу҆́бѡ породи́мсѧ, и҆звнѣ̀ ᲂу҆̀бо непрїѧ́знь быва́етъ, внꙋ́трь же благода́ть: тѣ́мже ѡ҆брѣта́емъ, занѐ ꙗ҆́коже пре́жде ѡ҆блада́ше ле́сть дꙋ́шꙋ, си́це по креще́нїи тоѧ̀, ѡ҆блада́етъ и҆́стина. Дѣ́йствꙋетъ же и҆ непрїѧ́знь дꙋше́ю, и҆ по се́мъ ꙗ҆́коже и҆ пре́жде и҆ го́рше мно́жае, но не ꙗ҆́кѡ сꙋ́щи со благода́тїю, не бꙋ́ди то̀, но ꙗ҆́кѡ воздымлѧ́ѧ ᲂу҆мꙋ̀ сла́бостїю тѣле́сною, сла́дость безслове́сныхъ сласте́й: попꙋще́нїе же бж҃їе сїѐ быва́етъ, да мѧте́жемъ и҆ ѻ҆гне́мъ и҆ и҆скꙋше́нїемъ проходѧ̀ человѣ́къ, си́це а҆́ще хо́щетъ въ воспрїѧ́тїи бꙋ́детъ блага́гѡ: проидо́хомъ бо, речѐ, сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й¹¹⁷⁰.

ѻ҃з. Благода́ть, ꙗ҆́коже рѣ́хъ, ѿ са́магѡ тогѡ̀ часа̀, въ ѻ҆́ньже креща́емсѧ, въ са́мой то́й глꙋбинѣ̀ ᲂу҆ма̀ скрыва́етсѧ, въ са́момъ чꙋ́вствѣ є҆гѡ̀ кры́ющи своѐ прише́ствїе: є҆гда́ же ᲂу҆́бѡ начина́етъ кто̀ ѿ всегѡ̀ предложе́нїѧ жела́ти бг҃а, тогда̀ неизрече́ннымъ нѣ́кїимъ сло́вомъ, ᲂу҆́мнагѡ ра́ди ра́зꙋма бесѣ́дꙋетъ дꙋшѝ ча́сть нѣ́котораѧ свои́хъ є҆ѧ̀ бла̑гъ, тѣ́мже въ жела́нїе про́чее ѡ҆брѣ́тенїѧ прихо́дитъ. И҆́же сїѐ ѿню́дъ хотѧ́й ѻ҆па́снѡ держа́ти, є҆́же всѧ̑ настоѧ̑щаѧ блага̑ѧ со мно́ю ра́достїю до́лженъ ѿврещѝ, да село̀ сꙋ́щи стѧ́жетъ, въ не́мже ѡ҆брѣта́етсѧ сокрове́нно сокро́вище жи́зни. Є҆гда́ бо кто̀ всѐ ѿложи́тъ жите́йское бога́тство, тогда̀ ѡ҆брѣта́етъ мѣ́сто, въ не́мже благода́ть бж҃їѧ кры́етсѧ: по преспѣ́ѧнїю бо дꙋшѝ, и҆ бж҃е́ственное дарова́нїе ᲂу҆мꙋ̀ свою̀ ꙗ҆влѧ́етъ благосты́ню. Вѧ́щше же тогда̀ ѿ бѣсѡ́въ дꙋ́шꙋ смꙋща́ти попꙋща́етъ гдⷭ҇ь, да и҆ разсꙋжде́нїю тꙋ́ю подо́бнѣ наꙋчи́тъ, добрꙋ́ же и҆ ѕлꙋ̀ и҆ смире́ннѣйшꙋ тꙋ̀ содѣ́лаетъ: за є҆́же мно́го є҆́й стыдѣ́нїе, є҆гда̀ разꙋмѣва́етъ ѿ бѣсо́вскихъ бы́ти пѡ́мыслъ приноси́мꙋю ме́рзость.

ѻ҃и. По ѡ҆́бразꙋ є҆смы̀ бж҃їю ᲂу҆́мнымъ дꙋшѝ движе́нїемъ: тѣ́ло бо ꙗ҆́коже до́мъ се́й є҆́сть, поне́же ѿ престꙋпле́нїѧ а҆да́мова, не то́кмѡ ѡ҆́брази начерта́нїѧ дꙋше́внагѡ ѡ҆скверни́шасѧ, но и҆ тѣ́ло на́ше тлѣ́нїю подпадѐ. Сегѡ̀ ра́ди ст҃о́е бж҃їе сло́во воплоти́сѧ, во́дꙋ на́мъ спасе́нїѧ свои́мъ креще́нїемъ ꙗ҆́кѡ бг҃ъ въ порожде́нїе дарова́въ, да породи́мсѧ же водо́ю, дѣ́йствїемъ ст҃а́гѡ и҆ животворѧ́щагѡ дх҃а: тѣ́мже а҆́бїе и҆ дꙋ́шꙋ и҆ тѣ́ло, а҆́ще ᲂу҆́бѡ ѿ всецѣ́лагѡ зало́га прихо́дитъ кто̀ къ бг҃ꙋ, ѡ҆чища́емъ: ст҃о́мꙋ ᲂу҆́бѡ дх҃ꙋ въ на́съ вселѧ́ющꙋсѧ, грѣхꙋ́ же ѿ тогѡ̀ бѣжа́щꙋ. Не бо̀ є҆́сть мо́щно є҆ди́номꙋ сꙋ́щꙋ, и҆ про́стꙋ начерта́нїю дꙋшѝ, двѣма̀ ли́цами въ то́й бы́ти, ꙗ҆́коже нѣ́цыи непщева́ша: бж҃е́ственнѣй бо благода́ти сочетава́ющей себѐ ст҃ы́мъ креще́нїемъ, въ любвѝ нѣ́коей непостижи́мѣй, по ѡ҆́бразꙋ, и҆́же при ѡ҆брꙋче́нїи, ꙗ҆́коже писа́нїемъ ᲂу҆твержда́ющесѧ, гдѣ̀ та́мѡ мо́жетъ вмѣсти́ти лꙋка́вое лицѐ, ни є҆ди́номꙋ наипа́че прїѻбще́нїю свѣ́та ко тьмѣ̀ сꙋ́щи: вѣ́рꙋемъ ᲂу҆̀бо и҆зврещи́сѧ томꙋ̀ ѿ сокро́вищь ᲂу҆ма̀, ба́ни ра́ди нетлѣ́нїѧ. А҆ и҆̀же свѧще́нныхъ пѡ́двигъ тща́телїе ᲂу҆се́рднїи, та́кѡ и҆ ѕмі́и многоѡбра́знїи и҆ не чꙋди́мсѧ, чесѡ̀ ра́ди по креще́нїи па́ки, съ до́брыми ѕла̑ѧ помышлѧ́емъ: ба́нѧ бо свѧты́ни ѻ҆́во ᲂу҆̀бо ѿе́млетъ ѿ на́съ скве́рнꙋ согрѣше́нїй, ѻ҆́во же сꙋгꙋ́бое во́ли на́шеѧ ны́нѣ не и҆змѣнѧ́етъ. Нижѐ ᲂу҆̀бо бѣсѡ́мъ є҆́же бори́ти на́съ, и҆лѝ лє́стныѧ провѣщава́ти глаго́лы возбранѧ́етъ: да ꙗ҆̀же не сохрани́хомъ є҆сте́ственнѡ сꙋ́ще, ѻ҆рꙋ́жїе пра́вды прїе́мше сїѧ̑ въ си́лѣ бж҃їей сохрани́мъ.

ѻ҃ѳ. Сатана̀, ꙗ҆́коже рѣ́хъ, ст҃ы́мъ креще́нїемъ и҆зверга́етсѧ ѿ дꙋшѝ, попꙋща́етсѧ же томꙋ̀ предрече́нныхъ ра́ди ви́нъ, дѣ́йствовати своѧ̑ кѡ́зни над̾ ѻ҆́ною чрез̾ тѣ́ло: благода́ть во бж҃їѧ въ са́мꙋю тꙋ̀ глꙋбинꙋ̀ дꙋшѝ, си́рѣчь во ᲂу҆́мъ вселѧ́етсѧ: всѧ́ бо, речѐ, сла́ва дще́ре цр҃е́вы внꙋтрьꙋ́дꙋ¹¹⁷¹, не ꙗ҆влѧ́ема бѣсѡ́мъ. Тѣ́мже ѿ са́мыѧ тоѧ̀ глꙋбины̀ се́рдца на́шегѡ, разꙋмѣва́емъ ꙗ҆́коже текꙋ́щꙋю бж҃е́ственнꙋю любо́вь, є҆гда̀ те́плѣ бг҃а воспомина́емъ: лꙋка́вїи же дꙋ́си про́чее чꙋ́вствы тѣле́сными вхо́дѧтъ и҆ гнѣздѧ́тсѧ, сла́бости ра́ди плотскі́ѧ дѣ́йствꙋюще, при и҆̀же є҆щѐ младе́нчествꙋющихъ дꙋше́ю: си́це ᲂу҆̀бо ᲂу҆́мъ на́шъ при́снѡ по а҆пⷭ҇лꙋ наслажда́етсѧ зако́номъ дꙋхо́внымъ, чꙋ́вствїѧ же пло́ти ᲂу҆мѧгче́нными сластьмѝ соѿводи́тисѧ во́лѧще¹¹⁷². Тѣ́мже ᲂу҆̀бо благода́ть ᲂу҆́мнагѡ ра́ди чꙋ́вствїѧ, тѣ́ло въ ра́дость неизрече́ннꙋю преитѝ, пред̾ꙋспѣва́ющихъ ра́зꙋмомъ весели́тъ: бѣ́сове же чꙋ́вствы тѣле́сными, наипа́че є҆гда̀ на́съ ѡ҆брѧ́щꙋтъ малодꙋ́шнѣ тече́нїе благоче́стїѧ ше́ствꙋющихъ, дꙋ́шꙋ плѣнѧ́ютъ, нꙋ́жднѣ тꙋ́ю, во ꙗ҆̀же не хо́щетъ, подви́жꙋще ᲂу҆бі́йцы.

п҃. Глаго́лющыѧ вкꙋ́пѣ два̀ лица̑, благода́ти, и҆ грѣха̀ вѣ̑рнымъ въ сердца́хъ бы́ти, ѿ є҆́же рещѝ є҆ѵⷢ҇лі́стꙋ, свѣ́тъ во тьмѣ̀ свѣ́титсѧ, и҆ тьма̀ є҆гѡ̀ не ѡ҆б̾ѧ́тъ¹¹⁷³, ѿ тогѡ̀ составлѧ́ти хотѧ́тъ своѐ мнѣ́нїе, глаго́люще: ника́коже бж҃е́ственнѣй свѣ́тлости ѿ є҆́же лꙋка́вомꙋ сопребыва́нїѧ скверни́тисѧ, а҆́ще каковы́млюбо ѡ҆́бразомъ и҆ приближа́етсѧ, речѐ, въ дꙋшѝ свѣ́тъ бж҃е́ственный тьмѣ̀ бѣсо́встѣй. Ѿ са́магѡ же рече́нїѧ є҆ѵⷢ҇льскагѡ, ѡ҆блича́ютсѧ внѣ̀ ст҃ы́хъ писа́нїй мꙋ́дрствꙋющїи: поне́же бо сло́во бж҃їе свѣ́тъ и҆́стинный, во пло́ти ꙗ҆ви́тисѧ и҆зво́ли свое́й тва́ри, безмѣ́рнымъ свои́мъ человѣколю́бїемъ свѣ́тъ сво́й въ на́съ вже́гъ ст҃а́гѡ ра́зꙋма: мꙋдрова́нїе же мїрско́е, свѣ́та бж҃їѧ не пости́же: поне́же мꙋдрова́нїе плотско́е вражда̀ на бг҃а¹¹⁷⁴: тогѡ̀ ра́ди богосло́въ таковы́й прїѧ́тъ глаго́лъ. Тѣ́мже пома́лѣ ди́вный, ꙗ҆снѣ́йше на средꙋ̀ и҆зносѧ̀, наведѐ: Бѣ̀, речѐ, свѣ́тъ и҆́стинный, и҆́же просвѣща́етъ всѧ́каго человѣ́ка грѧдꙋ́щаго въ мі́ръ¹¹⁷⁵: вмѣ́стѡ є҆́же настае́тъ и҆ животвори́тъ. Въ мі́рѣ бѣ̀, и҆ мі́ръ тѣ́мъ бы́сть, и҆ мі́ръ є҆гѡ̀ не позна̀. Во своѧ̑ прїи́де, и҆ своѝ є҆гѡ̀ не прїѧ́ша. Є҆ли́цы же прїѧ́ша є҆го̀, дадѐ и҆̀мъ вла́сть ча́дѡмъ бж҃їимъ бы́ти, вѣ́рꙋющымъ во и҆́мѧ є҆гѡ̀. Глаго́летъ же и҆ премꙋ́дрый па́ѵелъ, сказꙋ́ѧ є҆́же не пости́же, не ꙗ҆́кѡ ᲂу҆жѐ прїѧ́хъ, и҆лѝ є҆́же соверши́хъ, гоню́ же, речѐ, да дости́гнꙋ, въ не́мже и҆ пости́же и҆ постиже́нъ бы́хъ ѿ хрⷭ҇та̀ і҆и҃са¹¹⁷⁶: Тѣ́мже сатанꙋ̀, глаго́летъ благовѣ́стникъ, не пости́гнꙋти свѣ́тъ и҆́стины, и҆з̾ нача́ла во чꙋ́ждь тогѡ̀ є҆́сть: поне́же въ то́мъ нижѐ свѣ́титъ, но слы́шащыѧ человѣ́ки си̑лы и҆ чꙋдеса̀ бж҃їѧ, не хотѧ́щыѧ же прибли́житисѧ потемне́ннагѡ ра́ди и҆́хъ се́рдца свѣ́тꙋ ра́зꙋма є҆гѡ̀¹¹⁷⁷, сло́вомъ досто́йнѣ безче́ствꙋетъ.

п҃а. Два̀ ро́да бы́ти. ꙗ҆́коже сло́во на́съ ᲂу҆чи́тъ ра́зꙋма, лꙋка́выхъ дꙋхѡ́въ, ѻ҆́ва ᲂу҆̀бо ѿ тѣ́хъ сꙋ́ть тонча̑йша, ѻ҆́ва же веще́ствєннѣйша: тонча̑йшаѧ ᲂу҆́бѡ дꙋ́шꙋ бори́ти, и҆́ннаѧ¹¹⁷⁸ же пло́ть ᲂу҆маще́нными нѣ́которыми ᲂу҆тѣше́ньми плѣнѧ́ти ѡ҆быко́ша, тѣ́мже и҆ сопроти́внѣ и҆́мꙋтъ къ себѣ̀ раздѣле́нїе, и҆̀же дꙋ́шꙋ борю́щїи бѣ́сове и҆ и҆́же тѣ́ло: а҆ во є҆́же вреди́ти человѣ́ки, ра́внѡ и҆́мꙋтъ предложе́нїе. Є҆гда̀ ᲂу҆́бѡ благода́ть не водворѧ́етсѧ въ человѣ́цѣ, тогда̀ во глꙋбинꙋ̀ се́рдца ѡ҆́бразомъ сꙋ́щи ѕмїє́въ возгнѣздѧ́тсѧ, не ѡ҆ставлѧ́юще ѿню́дъ воззрѣ́ти дꙋ́шꙋ ко жела́нїю до́брагѡ: є҆гда́ же во ᲂу҆мѣ̀ благода́ть сокрыва́етсѧ, тогда̀ ᲂу҆́бѡ ꙗ҆́кѡ ѻ҆́блацы нѣ́цыи мра́чнїи, про́чее частьмѝ серде́чными расти́чꙋтсѧ во стра́сть грѣха̀, и҆ въ возношє́нїѧ разли̑чнаѧ преѡбразꙋ́ющыѧсѧ, да па́мѧть ᲂу҆ма̀ смꙋща́юще, є҆́же ко благода́ти тогѡ̀ бесѣ́ды ѿто́ргнꙋтъ. Є҆гда̀ ᲂу҆́бѡ мы̀ ѿ бѣсѡ́въ, и҆̀же дꙋ́шꙋ смꙋща́ющихъ, въ дꙋшє́вныѧ возгара́емсѧ стра̑сти, наипа́че въ горды́ню, є҆́же є҆́сть ма́ти всѣ́хъ страсте́й, тогда̀ разрꙋше́нїе тѣ́ла на́шегѡ помышлѧ́юще, ѻ҆́нꙋю высотꙋ̀ славолю́бїѧ посрами́мъ: то́жде же подоба́етъ твори́ти, є҆гда̀ и҆̀же и҆ тѣ́ло ра́тꙋющїи бѣ́сове, въ стꙋ̑днаѧ похотѣ̑нїѧ се́рдце на́ше возвари́ти ᲂу҆строѧ́ютъ: сїе́ бо, всѧ́кое разли́чїе лꙋка́выхъ дꙋхѡ́въ, є҆ди́но воспомина́нїе и҆́мене бж҃їѧ въ тре́звѣй па́мѧти ᲂу҆праздни́ти мо́жетъ. А҆́ще ли же ѿ тогѡ̀ воспомѧнꙋ́тїѧ па́ки хꙋ́дость на́мъ безмѣ́рнꙋ человѣ́ческагѡ є҆стества̀, подлага́ти и҆́мꙋтъ дꙋше́внїи бѣ́сове, ꙗ҆́кѡ ничесогѡ̀ сꙋ́щꙋ досто́йнꙋ: ѿча́ѧнїѧ бо ра́ди сїѐ лю́бѧтъ твори́ти: є҆гда́ бо тѣ́хъ кто̀ прехитри́ти хо́щетъ, сицево́ю мы́слїю про́чее небе́снагѡ ца́рствїѧ че́сть и҆ сла́вꙋ да воспомина́емъ: нижѐ го́ркое и҆ гро́зное нелицемѣ́рное сꙋди́ще да забыва́емъ, да ѻ҆́вѣмъ ᲂу҆́бѡ печа́ль на́шꙋ ᲂу҆тѣша́юще, ѻ҆́вѣмъ же поползнове́нїе пло́ти на́шеѧ востѧ́гнемъ.

п҃в. Гдⷭ҇ь во благовѣ́стїи на́съ ᲂу҆́читъ, ꙗ҆́кѡ, є҆гда̀ ᲂу҆́бѡ возврати́тсѧ, ѡ҆брѧ́щетъ помете́нъ и҆ ᲂу҆праздне́нъ сво́й до́мъ, си́рѣчь непло́дное се́рдце, сатана̀, тогда̀ пое́млетъ дрꙋги́хъ се́дмь дꙋхѡ́въ, и҆ вхо́дитъ въ то́й, и҆ возгнѣзди́тсѧ: и҆ го́ршее пе́рвыхъ, ꙗ҆̀же послѣ̑днѧѧ человѣ́кꙋ творѧ́ше¹¹⁷⁹. Тѣ́мже подоба́етъ разꙋмѣ́ти, є҆ли́кѡ дх҃ъ ст҃ы́й въ на́съ пребыва́етъ, не мо́жетъ сатана̀ вше́дъ во глꙋбинꙋ̀ дꙋшѝ пребыва́ти. Но и҆ бж҃е́ственный па́ѵелъ ꙗ҆́вѣ на́съ таково́мꙋ ᲂу҆чи́тъ ᲂу҆ма̀ видѣ́нїю, ѿ подви́жнагѡ бо и҆скꙋ́са разꙋмѣ́въ ѡ҆́бразъ вины̀, си́це глаго́летъ: Соꙋслажда́юсѧ бо зако́нꙋ бж҃їю по внꙋ́треннемꙋ человѣ́кꙋ, ви́ждꙋ же и҆́нъ зако́нъ во ᲂу҆́дѣхъ мои́хъ, проти́вꙋ вою́ющъ зако́нꙋ ᲂу҆ма̀ моегѡ̀, и҆ плѣнѧ́ющъ мѧ̀ зако́номъ грѣхо́внымъ сꙋ́щимъ во ᲂу҆́дѣхъ мои́хъ¹¹⁸⁰. Наверша́етъ же: Ни є҆ди́но ᲂу҆̀бо ны́нѣ, речѐ, ѡ҆сꙋжде́нїе сꙋ́щымъ ѡ҆ хрⷭ҇тѣ̀ і҆и҃сѣ, не по пло́ти ходѧ́щымъ, но по дꙋ́хꙋ: зако́нъ бо дꙋ́ха жи́зни ѡ҆ хрⷭ҇тѣ̀ і҆и҃сѣ свободи́лъ мѧ̀ є҆́сть ѿ зако́на грѣхо́внагѡ и҆ сме́рти¹¹⁸¹. Глаго́летъ же и҆ и҆́ндѣ: да па́ки наꙋчи́тъ на́съ, ꙗ҆́кѡ чрез̾ тѣ́ло ра́тꙋетъ сатана̀ дꙋ́шꙋ прїѡбща́ющꙋюсѧ ст҃о́мꙋ дх҃ꙋ. Ста́ните ᲂу҆́бѡ, речѐ, препоѧ́савше чресла̀ ва̑ша и҆́стиною, и҆ ѡ҆бо́лкшесѧ въ бронѧ̀ пра́вды и҆ ѡ҆бꙋ́вше но́зѣ во ᲂу҆гото́ванїе благовѣствова́нїѧ ми́ра: над̾ всѣ́ми же си́ми воспрїи́мше щи́тъ вѣ́ры, въ не́мже возмо́жете всѧ̑ стрѣ́лы лꙋка́вагѡ разжє́нныѧ ᲂу҆гаси́ти: и҆ шле́мъ спасе́нїѧ воспрїими́те, и҆ ме́чь дꙋхо́вный, и҆́же є҆́сть глаго́лъ бж҃їй¹¹⁸². И҆́но є҆́сть плѣне́нїе, и҆ и҆́но борьба̀: поне́же ѻ҆́во ᲂу҆́бѡ нꙋ́жднагѡ ѿведе́нїѧ є҆́сть назна́менательно, ѻ҆́во же равномо́щнагѡ нѣ́коегѡ по́двига ꙗ҆ви́тельно: сегѡ́ бо ра́ди и҆ стрѣла́ми разжже́нными на хрⷭ҇толюби̑выѧ дꙋ́шы находи́ти дїа́вола, глаго́летъ а҆по́столъ. И҆́же во не могі́й срази́тисѧ и҆ побѣди́ти своего̀ противоподви́жника, тогда̀ стрѣ́лы на того̀ ᲂу҆потреблѧ́етъ да є҆́же и҆здале́че томꙋ̀ ра́тꙋемое, крило́мъ ᲂу҆лови́ти стрѣ́льнымъ возмо́жетъ: поне́же прише́ствїѧ ра́ди благода́ти, возгнѣзди́тисѧ ꙗ҆́коже пре́жде въ подвиза́ющихсѧ ᲂу҆́мъ не мо́жетъ, сла́стїю про́чее лета́етъ, и҆ возгнѣздѧ́етсѧ въ тѣ́ло, да тогѡ̀ пра́здностїю дꙋ́шꙋ ᲂу҆льсти́тъ. Тогѡ̀ ра́ди подоба́етъ ᲂу҆дрꙋча́ти то́е въ мѣ́рꙋ, да не тогѡ̀ сла́стїю поползне́тсѧ ᲂу҆́мъ въ масти́тныѧ сла́дѡсти. Ѿ тогѡ́ бо а҆по́стольскагѡ рече́нїѧ прикла́дно є҆́сть разꙋмѣва́ти, ꙗ҆́кѡ ᲂу҆́мъ ᲂу҆́бѡ подви́жникъ ѿ бж҃е́ственнагѡ свѣ́та дѣ́йствꙋетсѧ, тѣ́мже и҆ бж҃е́ственномꙋ зако́нꙋ рабо́таетъ и҆ ᲂу҆слажда́етсѧ: пло́ть же въ лꙋка̑ваѧ слади́тсѧ, и҆ ты̑ѧ ᲂу҆до́бнѣ прїе́млетъ дꙋ́хи, сегѡ̀ ра́ди и҆ привлачи́тсѧ нѣ́когда рабо́тати тѣ́хъ лꙋка́вствїю. Тѣ́мже па́че мни́тсѧ, не бы́ти ѻ҆́бщее ко́е селе́нїе ᲂу҆́мъ бг҃ꙋ, и҆ дїа́волꙋ: поне́же, ка́кѡ бы ᲂу҆мо́мъ рабо́талъ зако́нꙋ бж҃їю, пло́тїю же зако́нꙋ грѣхо́вномꙋ, а҆́ще не бы̀ ᲂу҆́мъ мо́й во всѧ́кой свобо́дѣ стоѧ́лъ къ борьбѣ̀ бѣсо́встѣй, бла́гостїю благода́ти сла́дцѣ порабоща́емь; тѣ́ло же сла́дцѣ воню̀ прїе́млетъ безслове́сныхъ сласте́й, за є҆́же къ томꙋ̀, ꙗ҆́коже рече́сѧ, попꙋсти́тисѧ, приплѣта́тисѧ при подвиза́ющихсѧ лꙋка́выѧ пре́лести дꙋховѡ́мъ: вѣ́мъ, речѐ, ꙗ҆́кѡ не живе́тъ во мнѣ̀, си́рѣчь во пло́ти мое́й благо́е¹¹⁸³, но ꙗ҆́коже посредѣ̀ нѣ́кїѧ ра́ти, по́двизи сопроти́вѧщихсѧ грѣхꙋ̀. Не ѿ себе́ бо сїѐ глаго́летъ а҆по́столъ, ꙗ҆́кѡ ᲂу҆́мъ ᲂу҆́бѡ ра́тꙋютъ бѣ́сове, пло́ть же масти́тыми ᲂу҆тѣше́ньми къ мѧ́гкомꙋ сласте́й начина́ютъ преклонѧ́ти: попꙋсти́сѧ бо сїѐ є҆ди́ною по пра́ведномъ сꙋдѣ̀ бж҃їи, проница́ти и҆̀мъ во глꙋбины̑ тѣлє́сныѧ, при и҆̀же и҆ крѣ́пцѣ подвиза́ющихсѧ на грѣ́хъ: за є҆́же под̾ и҆скꙋ́сомъ бы́ти при́снѡ самовла́стномꙋ человѣ́ческагѡ мꙋдрова́нїѧ. А҆́ще же возмо́жетъ кто̀, жи́въ є҆щѐ въ житїѝ се́мъ, трꙋдѡ́въ ра́ди ᲂу҆мре́ти, про́чее ве́сь быва́етъ до́мъ ст҃а́гѡ дх҃а: пре́жде бо ᲂу҆ме́ртвїѧ таковы́й ᲂу҆жѐ воскре́се, како́въ бѣ̀ и҆ са́мъ блаже́нный па́ѵелъ, и҆ є҆ли́цы соверше́ннѣ подвиза́шасѧ, и҆ подвиза́ютсѧ проти́вꙋ грѣха̀.

п҃г. И҆зно́ситъ ᲂу҆́бѡ се́рдце и҆ ѿ себѐ по́мыслы дѡ́брыѧ же и҆ недѡ́брыѧ, не є҆стество́мъ же плодоно́ствꙋѧ є҆́же не дѡ́брыѧ мы̑сли: но ꙗ҆́коже во ѻ҆бы́чаи и҆мѣ́ѧ пе́рвыѧ ра́ди є҆ди́ныѧ пре́лести, па́мѧть недо́брагѡ, а҆ мнѡ́гїѧ же и҆ лꙋка̑выѧ, ѿ бѣсо́вскїѧ зачина́етъ го́рести, всѣ́хъ же мы̀, ꙗ҆́кѡ ѿ се́рдца происходѧ́щихъ разꙋмѣва́емъ: и҆ сегѡ̀ ра́ди нѣ́цыи ᲂу҆мы́слиша, во ᲂу҆мѣ̀ бы́ти вкꙋ́пѣ со влады́кою и҆ грѣ́хъ. Сегѡ̀ ра́ди глаго́лютъ и҆ гдⷭ҇а ре́кша: и҆сходѧ̑щаѧ ѿ ᲂу҆́стъ, ѿ се́рдца и҆схо́дѧтъ, и҆ та̑ѧ сквернѧ́тъ человѣ́ка: ѿ се́рдца бо и҆схо́дѧтъ помышлє́нїѧ лꙋка̑ваѧ, любодѣ̑йства, прелюбодѣѧ̑нїѧ¹¹⁸⁴, и҆ прѡ́чаѧ. Не разꙋмѣ́ша же, ꙗ҆́кѡ ᲂу҆́мъ на́шъ, то́нка нѣ́коегѡ чꙋ́вства и҆мѣ́ѧ дѣ́йство, са́мый же ѿ лꙋка́выхъ дꙋхѡ́въ подлага́емый томꙋ̀ по́мыслъ ᲂу҆своѧ́етъ, вѧ́щше сїѧ̑ приносѧ́ще растворе́нїѧ ра́ди дꙋшѝ, ꙗ҆́коже не вѣ́мы, ꙗ҆́коже и҆ пло́тїю, дѣ́йство ᲂу҆до́бное тѣ́лꙋ: поне́же безмѣ́рнѣ лю́битъ пло́ть, є҆́же ѿ пре́лести ласка́тисѧ, и҆ сегѡ̀ ра́ди и҆̀же и҆ ѿ бѣсѡ́въ всѣва́емїи по́мыслы, ѿ се́рдца и҆сходи́ти мнѧ́тсѧ, свои́ми же щита́емъ тѣ́хъ вои́стиннꙋ, є҆гда̀ ᲂу҆́бѡ тѣ́ми соꙋслажда́тисѧ хо́щемъ, є҆́же и҆ гдⷭ҇ь ᲂу҆корѧ́ѧ, ꙗ҆́коже са́мое то́е бж҃е́ственное ꙗ҆влѧ́етъ сло́во, предрече́нный глаго́лъ прїе́мь, речѐ: соꙋслажда́ѧйсѧ бо и҆̀же ѿ лꙋка́вствїѧ сатани́нскагѡ томꙋ̀ подлага́ємымъ помыслѡ́мъ, и҆ па́мѧть и҆́хъ ꙗ҆́коже написꙋ́ѧ во свое́мъ се́рдцѣ, не неѧвле́ннѡ про́чее, ꙗ҆́кѡ ѿ своеѧ̀ тѣ́хъ плодоно́сствꙋетъ мы́сли.

п҃д. Глаго́летъ во благовѣ́стїи гдⷭ҇ь, ꙗ҆́кѡ не возмо́жно и҆згна́ти крѣ́пкаго и҆з̾ до́мꙋ є҆гѡ̀, а҆́ще не крѣпча́йшїй є҆гѡ̀ свѧза́въ того̀ и҆ плѣни́въ, и҆ждене́тъ¹¹⁸⁵. Ка́кѡ ᲂу҆́бѡ мо́жетъ и҆́же съ толи́кимъ стꙋдо́мъ и҆зве́рженный, па́ки вни́ти, и҆ сопребыва́ти, и҆́стинномꙋ до́мꙋ влⷣцѣ, во свое́мъ, ꙗ҆́коже хо́щетъ, почива́емꙋ до́мѣ: ниже́ бо ца́рь, сопроти́вѧщагосѧ томꙋ̀ непрїѧ́телѧ побѣди́въ, па́ки сопребыва́ти того̀ себѣ̀ во ца́рскихъ дво́рѣхъ ᲂу҆стро́итъ, но па́че а҆́бїе зако́летъ, и҆лѝ свѧза́вши ко коснѣ́йшемꙋ мꙋче́нїю, и҆ нꙋ́жнѣйшей сме́рти, ѻ҆каѧ́ннѣ преда́стъ свои́мъ во́ємъ.

п҃є. А҆́ще кто̀, за є҆́же дѡ́браѧ на́мъ вкꙋ́пѣ и҆ ѕла̑ѧ помышлѧ́ти, ст҃о́мꙋ дх҃ꙋ, и҆ дїа́волꙋ вкꙋ́пѣ жи́ти во ᲂу҆мѣ̀ мни́тъ: да навы́кнетъ таковы́й, ꙗ҆́кѡ сїѐ быва́етъ, за є҆́же не ᲂу҆̀ на́мъ вкꙋси́ти, и҆ ви́дѣти ꙗ҆́кѡ бла́гъ гдⷭ҇ь¹¹⁸⁶. Пе́рвѣе ᲂу҆́бѡ, ꙗ҆́коже и҆ вы́шше рѣ́хъ, сокрыва́етъ своѐ прише́ствїе при креща́емыхъ благода́ть, ѡ҆жида́ющи дꙋше́вное предложе́нїе: є҆гда́ же ᲂу҆́бѡ ѡ҆брати́тсѧ ве́сь человѣ́къ ко гдⷭ҇ꙋ, тогда̀ неизрече́ннымъ нѣ́кїимъ чꙋ́вствомъ прише́ствїе своѐ ꙗ҆влѧ́етъ се́рдцꙋ, и҆ па́ки ѡ҆жида́етъ дꙋше́внагѡ движе́нїѧ, попꙋща́ющи ᲂу҆́бѡ бѣсѡ́вскїѧ стрѣ́лы, да́же до глꙋбо́кагѡ є҆ѧ̀ доспѣ́ти чꙋ́вства, да теплѣ́йшимъ предложе́нїемъ и҆ смире́ннымъ зало́гомъ взы́щетъ бг҃а. А҆́ще ли ᲂу҆́бѡ на́чнетъ про́чее присходи́ти хране́нїемъ за́повѣдей, и҆ непреста́ннѡ призыва́ти гдⷭ҇а і҆и҃са, тогда̀ и҆ ѡ҆ внѣ́шнихъ чꙋ́вствахъ се́рдца ѻ҆́гнь возгори́тсѧ ст҃ы́ѧ благода́ти, те́рнїе человѣ́ческїѧ землѝ и҆звѣ́стнѣ попалѧ́ющъ: тѣ́мже и҆ бѣсо́встїи навѣ́ты дале́че нѣ́гдѣ тогда̀ ѿстꙋпа́ютъ ѻ҆́нѣхъ мѣ́стъ, ти́хѡ про́чее подстрѣка́юще стра́стное дꙋшѝ. Є҆гда́ же всѧ̑кїѧ добродѣ́тєли и҆́же въ по́двизѣ человѣ́къ и҆спра́витъ, наипа́че же соверше́нное нестѧжа́нїе, тогда̀ всѐ є҆гѡ̀ є҆стество̀ глꙋбоча́йшимъ ра́зꙋмомъ ѡ҆зари́тъ, въ любо́вь тогѡ̀ про́чее мно́гꙋю согрѣва́ющи бж҃їю, тѣ́мже и҆ внѣꙋ́дꙋ тѣле́снагѡ чꙋ́вства тогда̀ бѣсѡ́вскаѧ стрѣлѧ́нїѧ погаса́ютъ: дыха́нїе бо всест҃а́гѡ дх҃а, къ вѣ́трѡмъ смире́нїѧ подви́жетъ се́рдце, и҆́же ѻ҆гнено́снагѡ бѣ́са на воздꙋ́сѣ є҆щѐ носи̑мыѧ погаша́етъ стрѣ́лы. Ѻ҆ба́че и҆́же и҆ въ сїю̀ мѣ́рꙋ доспѣ́вшаго, попꙋща́етъ нѣ́когда бг҃ъ ѕло́бѣ бѣсо́встѣй приплѣта́тисѧ, не просвѣще́нъ тогѡ̀ тогда̀ ᲂу҆́мъ ѡ҆ставлѧ́етъ, да самовла́стное на́ше во все́мъ не бꙋ́детъ свѧ́зано ᲂу҆́зами благода́ти: не то́кмѡ за є҆́же ѿ по́двигъ побѣди́ти грѣ́хъ, но за є҆́же до́лжно бы́ти и҆ є҆щѐ предꙋспѣва́ти въ дꙋхо́вный и҆скꙋ́съ человѣ́кꙋ. А҆́ще бо наказꙋ́еми, мни́мое соверше́нное, несоверше́ннѡ є҆щѐ непщꙋ́емъ къ бога́тствꙋ наказꙋ́ющемꙋ бг҃ꙋ, въ любвѝ є҆гѡ̀ благоче́стїѧ: а҆́ще и҆ всю̀, и҆́же і҆а́кѡвꙋ пока́заннꙋю лѣ́ствицꙋ, взы́ти кто̀ возмо́жетъ преꙋспѣ́ѧнїемъ трꙋдѡ́въ.

п҃ѕ. Гдⷭ҇ь са́мъ глаго́летъ, сатанꙋ̀ съ небе́съ ꙗ҆́кѡ мо́лнїю спа́сти¹¹⁸⁷, да не зри́тъ ме́рзостный въ селє́нїѧ свѧты́хъ а҆́гг҃лъ. И҆ а҆́ще ᲂу҆́бѡ до́брыхъ рабѡ́въ ѻ҆бще́нїѧ не сподоблѧ́емь, ка́кѡ мо́жетъ ѻ҆́бщее жили́ще съ бг҃омъ человѣ́ческїй ᲂу҆́мъ и҆мѣ́ти; Но рекꙋ́тъ, ꙗ҆́кѡ по попꙋще́нїю сїѐ быва́етъ; вѧ́щше же ничто́же рекꙋ́тъ: но ᲂу҆́бѡ и҆ наказа́тельное попꙋще́нїе ника́коже дꙋ́шꙋ бж҃е́ственнагѡ свѣ́та лиша́етъ, сокрыва́етъ же то́кмѡ своѐ прише́ствїе благода́ть, ꙗ҆́кѡ ᲂу҆жѐ и҆ рѣ́хъ, но дѣ́йствꙋ своегѡ̀ вели́чествїѧ, да ꙗ҆́кѡ подве́ргнетъ дꙋ́шꙋ го́рести бѣсо́встѣй, за є҆́же бы со всѧ́кимъ стра́хомъ, и҆ мно́гимъ смире́нїемъ взыска́ти то́й по́мощи ѿ бг҃а, и҆ ꙗ҆снѣ́е врага̀ своегѡ̀ разꙋмѣва́ти ѕло́бꙋ. И҆́мже ᲂу҆́бѡ ѡ҆́бразомъ ма́ти, безчи́ннꙋющее своѐ ѻ҆троча̀ ѡ҆ ᲂу҆ста́вѣхъ млекопита́нїѧ, ма́лѡ свои́хъ рꙋ́къ ѿрѣва́етъ, да, ᲂу҆страша́емо ѿ нѣ́которыхъ предстоѧ́щихъ томꙋ̀ ѕлови́дныхъ человѣ̑къ, и҆лѝ ѕвѣре́й каковы́хълибо, со стра́хомъ мно́гимъ и҆ слеза́ми ко ма́тєрнимъ возврати́тсѧ нѣ́дрѡмъ: а҆ є҆́же по ѿвраще́нїю быва́емое попꙋще́нїе, ꙗ҆́кѡ свѧ́зника предае́тъ бѣсовѡ́мъ не хотѧ́щꙋю дꙋ́шꙋ и҆мѣ́ти бг҃а. Мы́ же нѣ́смы стра́хꙋ ча̑да, да не бꙋ́детъ: но ѻ҆троча̑та бли̑жнѧѧ бж҃їѧ благода́ти бы́ти вѣ́рꙋемъ, ма́лыми попꙋще́ньми, и҆ ча́стыми ᲂу҆тѣше́ньми ѿ неѧ̀ ꙗ҆́коже млеко́мъ пита́еми: да тоѧ̀ бла́гостїю ѡ҆кормлѧ́еми, доспѣ́емъ прїитѝ въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва¹¹⁸⁸.

п҃з. Наказа́тельное попꙋще́нїе прино́ситъ ᲂу҆́бѡ ско́рбь мно́гꙋ и҆ смире́нїе, и҆ бездерзнове́нїе ᲂу҆мѣ́ренное дꙋшѝ, да ꙗ҆́же славолю́бнаѧ тоѧ̀ и҆ ᲂу҆до́бь де́рзаѧ ча́сть, ᲂу҆до́бнѣ во смире́нїе прїи́детъ, а҆́бїе же стра́хъ бж҃їй и҆ слеза̀ и҆сповѣ́данїѧ на́йдетъ се́рдцꙋ, и҆ до́брагѡ молча́нїѧ мно́гое жела́нїе: а҆ є҆́же по ѿвраще́нїю бж҃їю быва́емое, безнаде́ждїѧ вкꙋ́пѣ и҆ невѣ́рїѧ, и҆ го́рдости и҆ гнѣ́ва дꙋ́шꙋ и҆спо́лнитисѧ попꙋща́етъ. Подоба́етъ ᲂу҆̀бо на́мъ вѣ́дѧщымъ и҆скꙋ́съ ѻ҆бою̀ попꙋще́нїю, по коегѡ́ждо ѡ҆́бразꙋ приходи́ти къ бг҃ови, ѻ҆на́мѡ ᲂу҆́бѡ благодаре́нїе со ѿвѣща́нїемъ приноси́ти до́лжни є҆смы̀ томꙋ̀, ꙗ҆́кѡ нра́ва на́шегѡ блꙋ́дное, ᲂу҆праждне́нїемъ¹¹⁸⁹ ᲂу҆тѣше́нїѧ мꙋ́чащꙋ, да добродѣ́тели и҆ ѕло́бы, ꙗ҆́кѡ ѻ҆те́цъ бла́гъ наꙋчи́тъ на́съ разли́чїю, здѣ́ же, и҆сповѣ́данїе согрѣше́нїи непреста́ннѡ, и҆ слезꙋ̀ неѡскꙋ́днꙋ, и҆ ᲂу҆едине́нїе вѧ́щше: ꙗ҆́кѡ да си́це ᲂу҆́бѡ возмо́жемъ приложе́нїемъ трꙋдѡ́въ ᲂу҆моли́ти бг҃а, призрѣ́ти ꙗ҆́коже пре́жде въ сердца̀ на̑ша. Ѻ҆ба́че подоба́етъ вѣ́дѣти ꙗ҆́кѡ проти́въ дꙋше́внагѡ мꙋ́жества, и҆ сатанѣ̀ ра́товати попꙋска́етсѧ: при наказа́тельномъ, глаго́лю попꙋще́нїи, скрыва́етъ ᲂу҆́бѡ благода́ть себѐ, ꙗ҆́коже рѣ́хъ, невѣ́домѣ же дꙋшѝ споспѣшествꙋ́етъ по́мощїю, да побѣ́дꙋ дꙋшѝ бы́ти є҆ди́ныѧ пока́жетъ врагѡ́мъ є҆ѧ̀.

п҃и. Ꙗ҆́коже є҆гда̀ кто̀ въ зи́мнее вре́мѧ, въ непокрове́ннѣ ста́въ гдѣ̀ мѣ́стѣ, зрѧ́ же къ восто́кѡмъ ве́сь де́нь: ѿ ᲂу҆́тра ᲂу҆́бѡ прє́днїѧ тогѡ̀ ча̑сти всѧ̑ ѿ со́лнца согрѣва́ютсѧ, за̑днѧѧ же тогѡ̀ всѧ̑ лиша́єма сꙋ́ть теплоты̀, за є҆́же не бы́ти над̾ главо́ю є҆гѡ̀ со́лнцꙋ. Си́це и҆ и҆́же въ нача́лѣ сꙋ́щи дꙋхо́внагѡ дѣ́йствїѧ, согрѣва́етсѧ ᲂу҆́бѡ ѿ ча́сти и҆ногда̀ ѿ свѧты́ѧ благода́ти се́рдце, тѣ́мъ же и҆ дꙋхѡ́внаѧ тогда̀ ᲂу҆́мъ и҆́хъ плодоноси́ти на́чнетъ мꙋдрова̑нїѧ: ви̑димыѧ тогѡ̀ ча̑сти пребыва́ютъ по пло́ти мꙋ́дрствꙋюще, за є҆́же не ᲂу҆̀ всѣ̑мъ ᲂу҆дѡ́мъ сердє́чнымъ во глꙋбо́цѣ ра́зꙋмѣ ѿ свѧта́гѡ свѣ́та благода́ти ѡ҆зари́тисѧ, є҆́же нѣ́цыи не разꙋмѣ́вше два̀ сѡста́ва непщева́ша въ себѣ̀, ꙗ҆́коже сопроти́въ стоѧ́щихъ во ᲂу҆мѣ̀ подвиза́ющихсѧ бы́ти. Си́це ᲂу҆̀бо и҆ въ са́мое то́е мгнове́нїе, и҆ дѡ́браѧ и҆ не дѡ́браѧ прилꙋча́ютсѧ дꙋшѝ помышлѧ́ти, по ѡ҆́бразꙋ вышепи́санныѧ при́тчи: человѣ́къ, речѐ, въ са́момъ приближе́нїи, и҆ стꙋденѣ́етъ, и҆ согрѣва́етсѧ. Ѿне́лѣже бо ᲂу҆́мъ на́шъ въ сꙋгꙋ́бное ра́зꙋма поползе́сѧ, нꙋ́ждꙋ и҆́мать ѿто́лѣ, а҆́ще и҆ не хо́щетъ, въ са́мый то́й часе́цъ, и҆ дѡ́браѧ и҆ ѕла̑ѧ и҆зноси́ти размышлє́нїѧ: наипа́че же при ѻ҆́нѣхъ, и҆̀же въ то́нкость разсꙋжде́нїѧ приходѧ́щихъ, ꙗ҆́коже бо спѣши́тсѧ при́снѡ є҆́же до́брое помышлѧ́ти, а҆́бїе и҆ ѕло́е по́мнитъ: поне́же въ сꙋгꙋ́бнꙋю нѣ́которꙋю мы́сль раздѣли́сѧ па́мѧть ѿ а҆да́мова преслꙋша́нїѧ. А҆́ще ᲂу҆́бѡ на́чнемъ те́плымъ рве́нїемъ за́пѡвѣди бж҃їѧ твори́ти, всѧ̑ на̑ша про́чее чꙋ̑вства въ глꙋбо́цѣ нѣ́коемъ ра́зꙋмѣ просвѣща́ющи благода́ть, грѣхѡ́внаѧ ᲂу҆́бѡ ꙗ҆́коже ѻ҆́гнь попалѧ́етъ воспомина̑нїѧ, ᲂу҆слажда́ющи же на̑ша сердца̀ во смире́нїи нѣ́коемъ любле́нїѧ непреста́ннагѡ, дꙋхѡ́внаѧ нѣ̑каѧ и҆ не ктомꙋ̀ по пло́ти помышлѧ́ти на́съ ᲂу҆строѧ́етъ: сїе́ же приближа́ющымсѧ къ соверше́нїю ча́стѡ ѕѣлѡ̀ слꙋча́етсѧ, и҆̀же непреста́ннѡ и҆́мꙋтъ въ се́рдцѣ па́мѧть гдⷭ҇а і҆и҃са.

п҃ѳ. Два̀ на́мъ до́брѣ свѧта́ѧ благода́ть креще́нїемъ притворѧ́етъ порождє́нїѧ, ѿ ни́хже є҆ди́но безмѣ́рнѡ дрꙋга́гѡ превосхо́дитъ, но ᲂу҆́бѡ є҆ди́но а҆́бїе да́рꙋетсѧ: ѡ҆бновлѧ́етъ бо на́съ въ са́мой то́й водѣ̀, и҆ всѧ̑ ѡ҆́бразы дꙋшє́вныѧ, си́рѣчь, є҆́же по ѡ҆́бразꙋ, свѣтлѣ́е всѧ́кїѧ сквє́рныѧ прегрѣшє́нїѧ на̑ша ѡ҆мыва́ѧ: дрꙋго́е же ѡ҆жида́етъ, да съ на́ми дѣ́йствꙋетсѧ, є҆́же є҆́сть по подо́бїю. Є҆гда̀ ᲂу҆́бѡ на́чнетъ ᲂу҆́мъ во мно́зѣ ра́зꙋмѣ бы́ти благода́ти прест҃а́гѡ дх҃а, тогда̀ до́лжни є҆смы̀ вѣ́дѣти, ꙗ҆́кѡ начина́етъ благода́ть ꙗ҆́кѡ живописа́ти, є҆́же по ѡ҆́бразꙋ и҆ по подо́бїю: и҆́мже бо ѡ҆́бразомъ живопи́сцы, пе́рвѣе ᲂу҆́бѡ є҆ди́нымъ ша́ромъ начертава́ютъ ѡ҆́бразъ человѣ́ка: ша́ръ же ша́ромъ пома́лꙋ разцвѣча́юще, си́це и҆́же подобопи́шемагѡ, да́же и҆ до вла̑съ пости́жетъ ви́дъ. Та́кѡ и҆ ст҃а́ѧ благода́ть бж҃їѧ, пе́рвѣе ᲂу҆́бѡ креще́нїемъ во є҆́же бѣ̀, пре́жде престꙋпле́нїѧ почте́нъ бы́сть человѣ́къ, благовчинѧ́етъ є҆́же по ѡ҆́бразꙋ: є҆гда́ же на́съ ви́дитъ ѿ всегѡ̀ предложе́нїѧ жела́ющихъ добро́ты подо́бїѧ, и҆ стоѧ́щихъ на́зѣхъ, и҆ мꙋ́жественнѣ воѡрꙋжи́вшихсѧ є҆́же къ тоѧ̀ подвигѡ́мъ: тогда̀ добродѣ́телїю добродѣ́тель нацвѣта́ющи, и҆ ѿ сла́вы во сла́вꙋ дꙋше́вный ви́дъ возносѧ́щи, начерта́нїе подо́бїѧ се́й притворѧ́етъ¹¹⁹⁰: тѣ́мже ᲂу҆́бѡ ра́зꙋмъ ꙗ҆влѧ́етъ на́мъ и҆з̾ѡбрази́ти є҆́же по подо́бїю, а҆ є҆́же соверше́нное подо́бїе, ѿ просвѣще́нїѧ да разꙋмѣ́емъ. Всѧ́кїй бо добродѣ́тели ви́дъ, ᲂу҆́мъ по мѣ́рѣ нѣ́коей и҆ благовчине́нїи неизрече́ннѣмъ, ра́зꙋмомъ пред̾ꙋспѣва́ѧ воспрїе́млетъ: дꙋхо́внꙋю же любо́вь не мо́жетъ кто̀ стѧжа́ти, а҆́ще не во всѧ́комъ и҆звѣще́нїи просвѣти́тсѧ ѿ ст҃а́гѡ дх҃а. А҆́ще бо несоверше́ннѣ є҆́же по подо́бїю бж҃е́ственный свѣ́тъ прїи́метъ ᲂу҆́мъ, всѧ̑кїѧ ᲂу҆́бѡ и҆ны̑ѧ добродѣ́тєли по рѧ́дꙋ и҆мѣ́ти мо́жетъ, соверше́нныѧ же любвѐ, є҆щѐ не прича́стенъ пребыва́етъ: є҆гда́ же ᲂу҆́бѡ ᲂу҆подо́битсѧ добродѣ́телїю бг҃ꙋ, ꙗ҆́коже мо́жетъ человѣ́къ, глаго́лю, ᲂу҆подо́битисѧ бг҃ꙋ: тогда̀ и҆ бж҃е́ственныѧ любвѐ но́ситъ подо́бїе. Ꙗ҆́коже при подобопи́шемыхъ, є҆́же свѣтлѣ́йшее всѣ́хъ шарѡ́въ, приложе́нное ѡ҆́бразꙋ и҆скꙋ́сство хꙋдо́жества, да́же и҆ возскла́битисѧ пости́жетъ подобопи́шемагѡ подо́бїе: си́це и҆ при и҆̀же во бж҃е́ственное подо́бїе ѿ бж҃е́ственныѧ благода́ти живопи́шемыхъ, просвѣще́нїе любвѐ приложи́сѧ, въ подо́бїе всесоверше́ннагѡ благолѣ́пїѧ, ꙗ҆влѧ́етъ бы́ти є҆́же по ѡ҆́бразꙋ и҆ по подо́бїю. Ниже́ бо безстра́стїе и҆на́ѧ добродѣ́тель мо́жетъ притвори́ти дꙋшѝ, ра́звѣ любо́вь є҆ди́наѧ, и҆сполне́нїе по зако́нꙋ любы̀¹¹⁹¹: тѣ́мже ᲂу҆́бѡ ѡ҆бновлѧ́етсѧ де́нь ѿ днѐ внꙋ́треннїй на́шъ человѣ́къ во вкꙋше́нїи любвѐ, и҆ восхо́дитъ є҆́ю, и҆ постиза́етъ ве́рхъ соверше́нїѧ.

ч҃. Вкꙋша́ти ᲂу҆̀бо твори́тъ прест҃ы́й дх҃ъ, въ нача́лѣ пред̾ꙋспѣ́ѧнїѧ, а҆́ще ᲂу҆́бѡ те́плѣ вожделѣ́емъ добродѣ́тели бж҃їѧ, дꙋ́шꙋ во всѧ́комъ ра́зꙋмѣ и҆ и҆звѣще́нїи сла́дости бж҃їѧ, да и҆́мать вѣ́дѣти ᲂу҆́мъ во ѻ҆па́снѣ разꙋмѣ́нїи соверше́нное натрижне́нїе боголюби́выхъ трꙋдѡ́въ: скрыва́етъ же про́чее на мно́зѣ животво́рнагѡ сегѡ̀ да́ра бога́тство, да а҆́ще ᲂу҆́бѡ и҆ны̑ѧ добродѣ́тєли всѧ̑ содѣ́лаемъ, ничесо́же ѿню́дъ себѐ разꙋмѣ́емъ бы́ти: за є҆́же бо не ᲂу҆̀ ꙗ҆́коже во ѻ҆бы́чаи и҆мѣ́ти ст҃ꙋ́ю любо́вь, си́це тогда̀ вѧ́щше, и҆́же не́нависти бѣ́съ стꙋжа́етъ подвиза́ющымсѧ дꙋша́мъ, ꙗ҆́кѡ и҆ са̑мыѧ лю́бѧщыѧ тѣ́хъ ко не́нависти ѡ҆клеветова́ти: и҆ про́стѡ рещѝ, да́же и҆ до цѣлова́нїѧ носи́ти тлѣтво́рное не́нависти дѣ́йствїе. Тѣ́мже вѧ́щше болѣ́знꙋетъ дꙋша̀, носѧ́щи ᲂу҆́бѡ па́мѧть дꙋхо́вныѧ любвѐ, не могꙋ́щи же тꙋ́ю въ чꙋ́вствѣ стѧжа́ти соверше́нныхъ ра́ди трꙋдѡ́въ ѡ҆скꙋдѣ́нїѧ: потре́ба ᲂу҆̀бо по нꙋ́ждѣ тꙋ́ю ꙗ҆́кѡ бы содѣ́ловати, да во вкꙋше́нїе тоѧ̀ во всѧ́комъ ра́зꙋмѣ и҆ и҆звѣще́нїи дости́гнемъ. Є҆́же бо соверше́нное тоѧ̀ никто́же во пло́ти сы́й: сїѐ мо́жетъ стѧжа́ти, ра́звѣ є҆ди́нїи и҆̀же да́же до мꙋче́нїѧ и҆ соверше́ннагѡ и҆сповѣ́данїѧ прише́дшїи свѧті́и: поне́же сїѐ полꙋчи́вый, и҆змѣнѧ́етсѧ ѿню́дъ, и҆ нижѐ пи́щи ᲂу҆до́бнѣ жела́етъ: ѿ бж҃е́ственныѧ бо любвѐ пита́емꙋ, ко́е є҆́сть похотѣ́нїе и҆̀же въ мі́рѣ до́брыхъ; Сегѡ̀ ра́ди премꙋ́дрый па́ѵелъ, вели́кое прїѧ́телище ра́зꙋма, бꙋ́дꙋщей пи́щи пра́ведныхъ, на́съ ѿ своегѡ̀ и҆звѣ́стїѧ наꙋчи́ти благовѣствꙋ́ѧ, си́це глаго́летъ: Нѣ́сть црⷭ҇твїе нбⷭ҇ное бра́шно и҆ питїѐ, но пра́вда и҆ ми́ръ и҆ ра́дость въ дс҃ѣ ст҃ѣ, ꙗ҆̀же сꙋ́ть пло́дъ соверше́нныѧ любвѐ¹¹⁹². Тѣ́мже ᲂу҆́бѡ вкꙋша́ти тоѧ̀ ѿсю́дꙋ ча́стѡ, и҆̀же въ соверше́нїе пред̾ꙋспѣва́ющїи мо́гꙋтъ: соверше́ннѣ же тꙋ́ю никто́же мо́жетъ стѧжа́ти, а҆́ще ᲂу҆́бѡ не пожре́тсѧ соверше́ннѣ ме́ртвенное ѿ живота̀.

ч҃а. Повѣ́да мѝ нѣ́кто ѿ и҆̀же несы́тымъ нѣ́кїимъ нра́вомъ любѧ́щихъ бг҃а, ꙗ҆́кѡ вожделѣ́вшꙋ мѝ, речѐ, и҆ногда̀ и҆звѣ́стнѡ разꙋмѣ́ти любо́вь бж҃їю: и҆ подаде́ ми сїѐ въ чꙋ́вствѣ мно́зѣ и҆ и҆звѣще́нїи благі́й гдⷭ҇ь. И҆ толи́кѡ, речѐ, такова́гѡ дѣ́йствїѧ разꙋмѣ́хъ ꙗ҆́кѡ тща́тисѧ ᲂу҆́бѡ нѣ́когда дꙋшѝ съ неизглаго́ланною нѣ́коею ра́достїю и҆ любо́вїю, и҆зы́ти ѿ тѣ́ла, и҆ ѿитѝ ко гдⷭ҇ꙋ, ꙗ҆́коже не вѣ́дѣти ѡ҆́браза вре́менныѧ сеѧ̀ жи́зни. А҆ и҆́же бо сеѧ̀ любвѐ во и҆скꙋ́сѣ бы́въ, а҆́ще и҆ тьма́ми ѿ нѣ́коегѡ досади́тсѧ, и҆лѝ ѿтщети́тсѧ, да́же а҆́ще и҆ приключи́тсѧ и҆мѣ́ти томꙋ̀ є҆щѐ таково́е нѣ́которое хотѧ́щее болѣ́знь приноси́ти, не гнѣ́ваетсѧ на того̀: но пребыва́етъ ꙗ҆́коже прилѣпле́нъ досажда́ющемꙋ и҆ ѿтщети́вшемꙋ є҆го̀ дꙋшѝ. На ѻ҆́нѣхъ же є҆ди́ныхъ возгара́етсѧ, и҆̀же и҆лѝ на ᲂу҆бѡ́гїѧ нахо́дѧтъ, и҆лѝ на бг҃а, ꙗ҆́коже глаго́летъ ст҃о́е писа́нїе, глаго́лютъ непра́вдꙋ¹¹⁹³, и҆лѝ и҆́накѡ ка́кѡ живꙋ́ще лꙋка́внѣ. И҆́же бо па́че себѐ любѧ́й бг҃а, па́че же и҆ не ктомꙋ̀ себѐ любѧ́й, но бг҃а є҆ди́наго, таковы́й не ктомꙋ̀ за свою̀ че́сть ѿмща́етъ, но то́кмѡ поче́тшагѡ того̀ че́стїю вѣ́чною, хо́щетъ почита́ти пра́вдꙋ: сїе́ же не ктомꙋ̀ ѿ ма́ла нѣ́коегѡ хотѣ́нїѧ и҆́мать, но ꙗ҆́коже во ѻ҆бы́чаи про́чее и҆́мать таковы́й зало́гъ, мно́гагѡ ра́ди и҆скꙋ́са бж҃їѧ любвѐ. Къ си̑мъ же подоба́етъ вѣ́дѣти, ꙗ҆́кѡ и҆́же въ толи́кꙋ любо́вь дѣ́йствꙋемь ѿ бг҃а, вы́шше и҆ вѣ́ры быва́етъ во вре́мѧ такова́гѡ дѣ́йствїѧ, ꙗ҆́кѡ въ чꙋ́вствѣ про́чее серде́чнѣмъ держа̀ мно́гїѧ ра́ди любвѐ вѣ́рою поче́тшаго, є҆́же на́мъ назна́менꙋетъ ꙗ҆вле́ннѣ ст҃ы́й па́ѵелъ глаго́лѧ: ны́нѣ же, речѐ, пребыва́ютъ трѝ сїѧ̑, вѣ́ра, наде́жда, любы̀, бо́льши же си́хъ любо́вь¹¹⁹⁴. И҆́же бо въ бога́тствѣ любвѐ, ꙗ҆́коже рѣ́хъ, держа́й бг҃а, бо́лїй є҆́сть мно́гѡ тогда̀ своеѧ̀ вѣ́ры, ꙗ҆́кѡ ве́сь сы́й въ любвѝ.

ч҃в. Среда̀ дѣ́йства ст҃а́гѡ ра́зꙋма, не ма́лѡ на́съ скорбѣ́ти ᲂу҆строѧ́етъ, є҆гда̀ ѿ раздраже́нїѧ нѣ́коегѡ досади́вше нѣ́которомꙋ, врага̀ того̀ ᲂу҆стро́имъ себѣ̀, тѣ́мже ᲂу҆́бѡ никогда̀ престае́тъ подстрѣка́ющи со́вѣсть на́шꙋ, доне́лиже мно́гагѡ ра́ди и҆звѣще́нїѧ во дре́внѣй возведе́мъ зало́гъ досади́вшаго: а҆ є҆́же коне́чнѣе сегѡ̀ ᲂу҆миле́нїе прихо́дитъ, є҆гда̀ и҆ непра́веднѣ кто̀ ѿ человѣ̑къ на на́съ прогнѣ́ваетсѧ, печа́литисѧ на́мъ и҆ пещи́сѧ ѡ҆ не́мъ ѕѣлѡ̀ твори́тъ: поне́же ѿню́дъ непщꙋ́емъ преткнове́нїе нѣ́кое ѡ҆ на́шегѡ праздносло́вїѧ пода́ти томꙋ̀, тѣ́мже и҆ пра́зденъ тогда̀ ѡ҆ видѣ́нїи ᲂу҆́мъ быва́етъ. Любве́ бо сꙋ́щи разꙋ́мныѧ, сло́во всѐ не ѡ҆ставлѧ́етъ мы́сль разшири́тисѧ къ зача́тїю видѣ́нїй бж҃е́ственныхъ, а҆́ще не пре́жде прїи́мемъ въ любвѝ, и҆́же и҆ всꙋ́е гнѣ́вающасѧ на ны̀: а҆́ще ли же ѻ҆́нъ не хо́щетъ семꙋ̀ бы́ти, и҆лѝ ѿстꙋ́питъ на́шихъ жили́щъ, тогда̀ про́чее начерта́нїемъ тогѡ̀ лица̀ прикла́днѡ въ нелицемѣ́рнѣмъ дꙋшѝ и҆зли́тїи, приложи́ти того̀ своемꙋ̀ зало́гꙋ любвѐ: си́це во глꙋбинѣ̀ се́рдца, любвѐ и҆спо́лнити зако́нъ. Подоба́етъ бо, речѐ, и҆ гнѣ́вающихсѧ безвре́меннѣ ли́ца, не мѧте́жною мы́слїю во свое́мъ зрѣ́ти по́мыслѣ, хотѧ́щымъ и҆мѣ́ти ра́зꙋмъ бж҃їй: семꙋ́ же бы́вшꙋ, не то́кмѡ ѡ҆ бг҃осло́вїи ᲂу҆́мъ на́шъ не согрѣ́шнѣ подви́гнетсѧ, но и҆ въ любо́вь бж҃їю со мно́гимъ дерзнове́нїемъ взы́детъ, ꙗ҆́кѡ ѿ ни́жнѧгѡ сте́пене, на вы́шшїй без̾ препѧ́тствїѧ восходѧ̀.

ч҃г. Добродѣ́тели пꙋ́ть, начина́ющымъ ᲂу҆́бѡ жела́ти пра́вды, же́стокъ и҆ дрѧ́хлъ мни́тсѧ, не за є҆́же ѻ҆́номꙋ таково́мꙋ бы́ти, но за є҆́же человѣ́ческомꙋ є҆стествꙋ̀ а҆́бїе ѿ чре́ва ма́тернѧ, простра́нствомъ сласте́й жи́ти сво́йственно: сꙋ́щымъ же средꙋ̀ тогѡ̀ преше́дшымъ, сла́докъ ве́сь и҆ ѿра́денъ показꙋ́етсѧ. До́брымъ ѻ҆бы́чаемъ ѕло́е покоре́но дѣ́йствїѧ ра́ди блага́гѡ, безслове́сное сласте́й заглажда́етсѧ въ па́мѧти: тѣ́мже про́чее сла́дцѣ дꙋша̀ прохо́дитъ всѧ́кїѧ стєзѝ добродѣ́телей. Сегѡ̀ ра́ди гдⷭ҇ь вводѧ̀ на́съ въ пꙋ́ть спасе́нїѧ глаго́летъ, что̀ тѣ̑снаѧ врата̀ и҆ приско́рбный пꙋ́ть, вводѧ́й въ жи́знь, и҆ ма́лы тѣ́мъ по́йдꙋтъ¹¹⁹⁵: къ хотѧ́щымъ же тве́рдымъ предложе́нїемъ проходи́ти ст҃ы́хъ є҆гѡ̀ за́повѣдей хране́нїе, речѐ: и҆́го моѐ бла́го, и҆ бре́мѧ моѐ легко̀ є҆́сть¹¹⁹⁶. Подоба́етъ ᲂу҆̀бо ѿ нача́ла по́двига, нꙋ́жднымъ нѣ́кїимъ хотѣ́нїемъ, ст҃ы̑ѧ бж҃їѧ содѣ́ловати за́пѡвѣди: да ви́дѣвъ благі́й гдⷭ҇ь мы́сль на́шꙋ и҆ трꙋ́дъ и҆ попече́нїе ѡ҆ то́мъ, сла́дцѣ ѕѣлѡ̀ низпо́слетъ хотѣ́нїе прилѣжа́ти того̀ за́повѣдемъ: ѿ гдⷭ҇а бо тогда̀ ᲂу҆готовлѧ́етсѧ хотѣ́нїе¹¹⁹⁷, ꙗ҆́кѡ во мно́зѣй нѣ́коей ра́дости содѣ́ловати на́мъ непреста́ннѡ благо́е: тогда́ бо вои́стиннꙋ разꙋмѣ́емъ, ꙗ҆́кѡ бг҃ъ є҆́сть дѣ́йствꙋѧй въ на́съ, и҆ є҆́же хотѣ́ти, и҆ є҆́же дѣ́ѧти ѡ҆ благоволе́нїи бж҃їи¹¹⁹⁸.

ч҃д. И҆́мже ѡ҆́бразомъ не разгрѣ́ѧнъ и҆ неꙋмѧгче́нъ во́скъ, свѣ́тлѡ не мо́жетъ налага́емꙋю томꙋ̀ печа́ть и҆з̾ѡбрази́ти: си́це и҆ человѣ́къ, а҆́ще не трꙋды̀ и҆ не́мощми и҆скꙋ́ситсѧ, не мо́жетъ вмѣсти́ти бж҃їѧ добродѣ́тели печа́ть: сегѡ̀ ра́ди ᲂу҆̀бо гдⷭ҇ь глаго́летъ бж҃е́ственномꙋ па́ѵлꙋ: довлѣ́етъ тѝ благода́ть моѧ̀: си́ла бо моѧ̀ въ не́мощи соверша́етсѧ¹¹⁹⁹. Са́мъ же а҆пⷭ҇лъ хва́литсѧ глаго́лѧ: Сла́дцѣ ᲂу҆́бѡ похвалю́сѧ па́че въ не́мощехъ мои́хъ, да всели́тсѧ въ мѧ̀ си́ла хрⷭ҇то́ва. Но и҆ во при́тчахъ пи́сано є҆́сть: є҆го́же лю́битъ гдⷭ҇ь, наказꙋ́етъ: бїе́тъ же всѧ́каго сы́на, є҆го́же прїе́млетъ¹²⁰⁰. и҆ а҆пⷭ҇лъ ᲂу҆́бѡ не́мѡщи, глаго́летъ, воста̑нїѧ вра̑гъ крⷭ҇та̀ ꙗ҆́же ча́стѡ томꙋ̀, и҆ всѣ̑мъ тогда̀ ст҃ы̑мъ прилꙋча́хꙋсѧ, да не превозно́сѧтсѧ, ꙗ҆́коже са́мъ глаго́летъ, превосхожде́нїемъ ѿкрове́нїй¹²⁰¹: но па́че да пребыва́ютъ смире́нїѧ ра́ди во ѡ҆́бразѣ соверше́нїѧ ча́стыхъ ра́ди ᲂу҆ничиже́нїй, бж҃е́ственный да́ръ преподо́бнѣ соблюда́юще: мы́ же ны́нѣ не́мѡщи, лꙋка̑выѧ по́мыслы глаго́лемъ, и҆ тѣлє́снаѧ подстрека́тєльства. Тогда́ бо, поне́же ꙗ҆́звамъ смертонѡ́снымъ, и҆ разли̑чнымъ и҆ны̑мъ ско́рбемъ тѣлеса̀, и҆̀же на грѣ́хъ подвиза́ющихсѧ ст҃ы́хъ предава́хꙋсѧ, вы́шше бѧ́хꙋ страсте́й, и҆́же человѣ́ческомꙋ є҆стествꙋ̀ ѿ грѣха̀ привше́дшихъ: ны́нѣ же поне́же ми́ръ церква́мъ мно́житсѧ ѡ҆ гдⷭ҇ѣ, тогѡ̀ ра́ди подоба́етъ ча́стыми подстрѣка́тельствы тѣ́лꙋ, по́мыслы же лꙋка́выми дꙋша́мъ подви́жникѡвъ благоче́стїѧ и҆скꙋша́тисѧ: наипа́че же въ ни́хже ра́зꙋмъ во всѧ́комъ чꙋ́вствѣ и҆ и҆звѣще́нїи дѣ́йствꙋетъ, да и҆ всѧ́кагѡ тщесла́вїѧ и҆ киче́нїѧ кромѣ̀ бꙋ́дꙋтъ: и҆ возмо́гꙋтъ вмѣсти́ти въ сердца̀ своѝ ꙗ҆́коже рече́сѧ, мно́гимъ смире́нїемъ бж҃е́ственныѧ добро́ты печа́ть, по глаго́лющемꙋ проро́кꙋ: Зна́менасѧ на на́съ свѣ́тъ лица̀ твоегѡ̀ гдⷭ҇и¹²⁰². Подоба́етъ ᲂу҆́бѡ со благодаре́нїемъ терпѣ́ти совѣ́тъ гдⷭ҇нь: тогда́ бо на́мъ вмѣ́стѡ втора́гѡ мꙋче́нїѧ вмѣни́тсѧ, є҆́же ча̑стыѧ недꙋ́ги, и҆ ꙗ҆́же къ бѣсови̑днымъ помыслѡ́мъ бра́нь. Глаго́лѧй бо тогда̀ ст҃ы̑мъ мꙋ́ченикѡмъ, беззако́нными ѻ҆́ными кнѧ́зи ѿрещи́сѧ хрⷭ҇та̀, возлюби́ти же жите́йскꙋю сла́вꙋ, и҆ ны́нѣ настои́тъ собо́ю рабѡ́мъ бж҃їимъ, та̑ѧжде непреста́ннѡ глаго́лѧ. И҆́же тогда̀ ᲂу҆ѧзвлѧ́ѧй тѣлеса̀ пра́ведныхъ, и҆ досажда́ѧй честны̑мъ ᲂу҆чи́телємъ, чрез̾ слꙋжа́щихъ дїа́вольскомꙋ ѻ҆́номꙋ мꙋдрова́нїю, то́йже и҆ ны́нѣ благоче́стїѧ и҆сповѣ́дникѡмъ наво́дитъ разли̑чныѧ стра̑сти¹²⁰³, съ досажде́ньми мно́гими и҆ ᲂу҆ничиже́ньми: наипа́че же, є҆гда̀ мно́гою си́лою ѡ҆би̑димымъ ᲂу҆бѡ́гимъ сла́вы ра́ди гдⷭ҇ни помога́ютъ. И҆ сегѡ̀ ра́ди потре́ба со ѻ҆па́сствомъ и҆ терпѣ́нїемъ, мꙋче́нїе на́шеѧ со́вѣсти содѣ́ловати пред̾ бг҃омъ. Терпѧ́ бо, речѐ, потерпѣ́хъ гдⷭ҇а, и҆ внѧ́тъ мѝ¹²⁰⁴.

ч҃є. Не ᲂу҆до́бь приходи́маѧ ве́щь смиренномꙋ́дрїе: є҆ли́кѡ бо вели́ко є҆́сть, толи́кѡ со мно́гими по́двиги и҆справлѧ́етсѧ, прихо́дитъ же прича́стникѡмъ ст҃а́гѡ ра́зꙋма по двою̀ ѡ҆́бразꙋ: є҆гда̀ ᲂу҆́бѡ во средѣ̀ є҆́сть дꙋхо́внагѡ и҆скꙋ́са и҆́же благоче́стїѧ подви́жникъ, тогда̀ и҆лѝ не́мощи ра́ди тѣле́сныѧ, и҆лѝ враждꙋ́ющихъ ра́ди безвре́меннѡ, за є҆́же пра́ведное томꙋ̀ мꙋ́дрствовати, и҆лѝ лꙋка́выхъ ра́ди помышле́нїй, смире́ннѣйшее нѣ́какѡ и҆́мать мꙋдрова́нїе. Є҆гда́ же въ ра́зꙋмѣ мно́зѣ и҆ и҆звѣще́нїи ᲂу҆́мъ ѿ ст҃ы́ѧ благода́ти ѡ҆зари́тсѧ, тогда̀, ꙗ҆́коже є҆стество̀, и҆́мать смиренномꙋ́дрїе дꙋша̀: напоѧ́ема бо ѿ бж҃е́ственныѧ благода́ти, не мо́жетъ къ томꙋ̀ въ высотꙋ̀ славолю́бїѧ возноси́тисѧ, а҆́ще и҆ непреста́ннѡ содѣва́етъ за́пѡвѣди бж҃їѧ, смире́ннѣйшꙋю же себѐ па́че всѣ́хъ вмѣнѧ́етъ, бж҃е́ственныѧ ра́ди кро́тости прїѡбще́нїѧ: и҆́мать же ѻ҆́ное ᲂу҆́бѡ смиренномꙋ́дрїе, ско́рбь по мно́гꙋ и҆ печа́ль, сїе́ же ра́дость со стыдѣ́нїемъ всемꙋ́дрымъ. Тѣ́мже ѻ҆́во ᲂу҆́бѡ ꙗ҆́коже рече́сѧ, и҆́же во средѣ̀ по́двигѡвъ сꙋ́щымъ пребыва́етъ: ѻ҆́во же приближа́ющымсѧ соверше́нїю низпосыла́етсѧ. Сегѡ̀ ра́ди ѻ҆́во ᲂу҆́бѡ ѿ жите́йскихъ благодѣѧ́нїй мно́гажды препина́етсѧ: сїе́ же, а҆́ще и҆ всѧ̑ ца̑рствїѧ мі́ра къ томꙋ̀ приведе́тъ, нижѐ бои́тсѧ, нижѐ ѿню́дъ стрѣ́лъ грѣхо́вныхъ ѡ҆щꙋща́етъ: дꙋхо́венъ бо ве́сь бы́въ, не разꙋмѣва́етъ всѧ́кѡ тѣле́сныѧ сла́вы. Подоба́етъ ᲂу҆́бѡ ѿ ѻ҆́нагѡ всѧ́кимъ ѡ҆́бразомъ преше́дшемꙋ подви́жникꙋ, на сїѐ прїитѝ: а҆́ще бо не ѻ҆́нагѡ наноше́нїемъ наказа́тельныхъ страсте́й¹²⁰⁵ и҆скꙋси́тельнѣ, а҆ не нꙋ́жднѣ, самовла́стное на́ше проꙋмѧгчи́тъ благода́ть: сегѡ̀ ᲂу҆́бѡ на́мъ не да́рꙋетсѧ бога́тство.

ч҃ѕ. И҆̀же настоѧ́щагѡ житїѧ̀ сладостра́стнагѡ дрꙋ́зи, ѿ пѡ́мыслъ на согрѣшє́нїѧ прихо́дѧтъ: неразсꙋ́днымъ бо нра́вомъ носи́ми, всѧ̑ своѧ̑, си́рѣчь, стра̑стныѧ мы̑сли, во словеса̀ беззакѡ́нныѧ и҆ дѣла̀ непреподѡ́бнаѧ лю́бѧтъ преноси́ти: а҆ и҆̀же по́стническое начина́ющїи и҆справлѧ́ти житїѐ, ѿ согрѣше́нїй въ лꙋка̑выѧ по́мыслы, и҆лѝ въ лꙋка̑выѧ нѣ̑кїѧ и҆ па́кѡстныѧ прихо́дѧтъ глаго́лы. А҆́ще бо бѣ́сове таковы́хъ ви́дѧтъ и҆̀хъ, и҆лѝ рꙋга́тисѧ дрꙋги̑мъ и҆мꙋ́щихъ сла́дцѣ, и҆лѝ пра́здна нѣ̑каѧ и҆ безгѡ́днаѧ бесѣ́дꙋющихъ, и҆лѝ смѣю́щихсѧ, ꙗ҆́коже не подоба́етъ, и҆лѝ ꙗ҆рѧ́щихсѧ безмѣ́рнѡ, и҆лѝ тщі́ѧ и҆ сꙋ́етныѧ жела́ющихъ сла́вы, тогда̀ на ни́хъ є҆динодꙋ́шнѡ ѡ҆полча́ютсѧ: славолю́бїе бо наипа́че ꙗ҆́кѡ ѡ҆́бразъ своеѧ̀ и҆́хъ ѕло́бы прїе́млюще, то́ю ꙗ҆́кѡ нѣ́коею сква́жиною те́мною вскочи́вше, дꙋ́шꙋ расхища́ютъ. Потре́ба ᲂу҆̀бо хотѧ́щымъ сочета́тисѧ мно́жествꙋ добродѣ́телей, нижѐ сла́вы жела́ти, нижѐ мно́гагѡ глаго́ланїѧ, нижѐ и҆схожде́нїѧ ча́стѡ и҆мѣ́ти, и҆лѝ рꙋга́тисѧ нѣ̑кїимъ, а҆́ще и҆ досто́йни сꙋ́ть нарꙋга́нїѧ рꙋга́емїи, нижѐ мно́гѡ бесѣ́довати, а҆́ще и҆ всѧ̑ дѡ́браѧ глаго́лати мо́гꙋтъ: многосло́вїе бо безмѣ́рное разсѣва́етъ ᲂу҆́мъ, не то́чїю ко дꙋхо́вномꙋ дѣ́ланїю пра́здна того̀ содѣ́ловаетъ, но и҆ ᲂу҆ны́нїѧ бѣ́сꙋ того̀ предае́тъ: и҆́же є҆го̀ погрꙋжа́ѧ безмѣ́рнѣ, послѣди́ же сꙋ́щымъ печа́ли и҆ гнѣ́ва про́чее предае́тъ бѣсовѡ́мъ. Подоба́етъ ᲂу҆̀бо при́снѡ въ хране́нїи за́повѣдей ст҃ы́хъ ᲂу҆пражнѧ́ти ᲂу҆́мъ, и҆ во глꙋбо́цѣй па́мѧти гдⷭ҇а і҆и҃са сла́вы: хранѧ́й бо, речѐ, за́пѡвѣди, не ᲂу҆вѣ́сть глаго́лъ лꙋка́въ¹²⁰⁶, си́рѣчь во ѕлы̑ѧ по́мыслы и҆лѝ словеса̀ не преврати́тсѧ.

ч҃з. Є҆гда̀ съ те́плою нѣ́которою болѣ́знїю се́рдца прїе́млетъ стрѣлѧ́нїѧ бѣсѡ́вскаѧ, ꙗ҆́кѡ мнѣ́ти сїѧ̑ терпѣ́ти стрѣ́лы ра́тꙋемомꙋ, ненави́дитъ со трꙋдо́мъ дꙋша̀ стра̑сти: ꙗ҆́кѡ начина́ющаѧ ѡ҆чища́тисѧ: а҆́ще не поболи́тъ вельмѝ ѡ҆ безстꙋ́дствѣ грѣхо́внѣмъ, не возмо́жетъ возра́доватисѧ бога́тнѣ ѡ҆ пра́вдѣ бла́гости. И҆́же ᲂу҆́бѡ хотѧ́й своѐ ѡ҆чи́стити се́рдце, па́мѧтїю гдⷭ҇а і҆и҃са всегда̀ раждиза́й то́е, сїѐ є҆ди́но поꙋче́нїе и҆ дѣ́ло непреста́ннѡ и҆мѣ́й: не бо̀, когда̀ ᲂу҆́бѡ моли́тисѧ подоба́етъ, ѻ҆вогда́ же нѝ, свою̀ гни́лость ѿврещѝ хотѧ́щымъ: но при́снѡ въ мл҃твѣ ᲂу҆пражнѧ́тисѧ во блюде́нїи ᲂу҆ма̀, а҆́ще и҆ внѣ̀ водворѧ́етсѧ нѣ́гдѣ моли́твенныхъ храмѡ́въ. И҆́мже ѡ҆́бразомъ и҆́же хотѧ́й ѡ҆чи́стити зла́то, а҆́ще и҆ вма́лѣ ѡ҆ста́витъ ѻ҆́гнь ᲂу҆праздни́тисѧ ѿ горни́ла, ѡ҆жестѣ́нїе па́ки чистѧ́щейсѧ ве́щи твори́тъ: си́це и҆ и҆́же ѻ҆вогда̀ ᲂу҆́бѡ воспомина́ѧй бг҃а, ѻ҆вогда́ же нѝ, и҆ є҆́же мни́тсѧ стѧжа́ти моли́твою, сїѐ погꙋби́тъ пра́здностїю. Мꙋ́жꙋ бо любодобродѣ́тельнꙋ сво́йственно є҆́сть, є҆́же при́снѡ па́мѧтїю бж҃їею земно́е мꙋдрова́нїе се́рдца потреблѧ́ти: да си́це поѧда́емꙋ ѕло́мꙋ, ѿ ѻ҆гнѧ̀ блага́гѡ па́мѧти гдⷭ҇а і҆и҃са, дꙋша̀ соверше́ннѣ съ вѧ́щшею сла́вою во свою̀ є҆сте́ственнꙋю взы́детъ свѣ́тлость.

ч҃и. Безстра́стїе є҆́сть, не є҆́же не бори́тисѧ ѿ бѣсѡ́въ, поне́же ᲂу҆́бѡ до́лжни є҆смы̀ и҆зы́ти по а҆по́столꙋ ѿ мі́ра¹²⁰⁷, но є҆́же ра́тꙋємымъ ѿ ни́хъ, не пребори̑мымъ пребы́ти. И҆́бо желѣзноно́снїи ра́тницы, стрѣлѧ́ютсѧ ᲂу҆́бѡ ѿ сопротивобѡ́рникъ, и҆ шꙋ́мъ стрѣлѧ́нїѧ слы́шатъ, но и҆ са̑мыѧ на ни́хъ посыла́ємыѧ стрѣ́лы всѧ̑ ꙗ҆́снѡ ви́дитъ, не ᲂу҆ѧзвлѧ́ютсѧ же ра́тническихъ ра́ди ѻ҆де́ждъ тве́рдости: но ѻ҆нѝ ᲂу҆́бѡ желѣ́зомъ храни́ми внегда̀ бра́тисѧ, є҆́же непобори́мое и҆́мꙋтъ, мы́ же ст҃а́гѡ свѣ́та ѻ҆рꙋ́жїемъ, спасе́нїѧ шле́момъ, всѣ́хъ ра́ди до́брыхъ дѣ́лъ воѡрꙋ́жшесѧ, тє́мныѧ полкѝ бѣсѡ́въ разсѣце́мъ. Не бо̀, є҆́же то́чїю не твори́ти ктомꙋ̀ ѕла̑ѧ, чистотꙋ̀ прино́ситъ: но прилѣжа́нїемъ до́брыхъ, все́ю си́лою ѿри́нꙋти ѕла̑ѧ.

ч҃ѳ. Є҆гда̀ ᲂу҆́бѡ ᲂу҆стро́итсѧ, си́рѣчь, всѧ̑ стра̑сти побѣди́тъ бж҃їй человѣ́къ, два̀ бѣ̑са съ ни́мъ ѡ҆стаю́тъ ра́тꙋющесѧ, ѿ ни́хже ѻ҆́въ ᲂу҆́бѡ дꙋшѝ стꙋжа́етъ, ѿ мно́гагѡ бг҃олю́бїѧ рве́нїе безго́дное приносѧ̀, ꙗ҆́кѡ хотѣ́ти є҆мꙋ̀ всѣ́хъ превзы́ти ᲂу҆гожде́нїемъ бг҃ови: ѻ҆́въ же тѣ́ло въ по́хоть смѣше́нїѧ тоѧ̀, ѻ҆́гненнымъ нѣ́которымъ подви́жетъ дѣ́йствомъ. Сїе́ же приключа́етсѧ тѣ́лꙋ, пе́рвѣе ᲂу҆́бѡ за є҆́же є҆стества̀ бы́ти сїѧ̀ сла́сть сво́йственнаѧ, ꙗ҆́коже дѣторо́дїѧ ра́ди, и҆ сегѡ̀ ра́ди ᲂу҆до́бнѣ побѣжда́емꙋ: про́чее же и҆ попꙋще́нїѧ ра́ди бж҃їѧ, є҆гда̀ ви́дитъ кого̀ ѿ подви́жныхъ гдⷭ҇ь вельмѝ гобзꙋ́юща добродѣ́телей мно́жествомъ, попꙋща́етъ того̀ нѣ́когда ѿ такова́гѡ скверни́тисѧ бѣ́са, да всѣ́хъ живꙋ́щихъ человѣ̑къ хꙋдѣ́йша себѐ непщꙋ́етъ: тѣ́мже и҆лѝ послѣ́дꙋетъ мѧте́жъ стра́стный и҆справле́нїємъ, и҆лѝ и҆ предварѧ́етъ сїѧ̑ когда̀, да приложе́нїемъ и҆ наноше́нїемъ стра́сти, неключи́мꙋю сотвори́тъ дꙋ́шꙋ мнѣ́тисѧ, а҆́ще и҆ какова̀ вели́ка бꙋ́дꙋтъ тоѧ̀ и҆справлє́нїѧ. Но ѻ҆́ваго ᲂу҆́бѡ, во смиренномꙋ́дрїи мно́зѣ и҆ любвѝ, да ра́тꙋемъ: ѻ҆́ваго же, воздержа́нїемъ и҆ безгнѣ́вїемъ, и҆ глꙋбо́кимъ помышле́нїемъ сме́рти: да непреста́ннѡ ѿсю́дꙋ, дѣ̑йствїѧ разꙋмѣва́юще прест҃а́гѡ дх҃а, вы́шше и҆ си́хъ страсте́й бꙋ́демъ ѡ҆ гдⷭ҇ѣ.

р҃. Є҆ли́цы ст҃а́гѡ ра́зꙋма быва́емъ прича́стницы, и҆ ѡ҆ нево́льныхъ паре́нїихъ ѿвѣ́тъ возда́мы: рече́ бо і҆́ѡвъ, назна́меновахъ бо, что̀ и҆ нево́лею престꙋпи́хъ, и҆ во пра́вдꙋ. А҆́ще бо не бы̀ преста́лъ кто̀ є҆́же при́снѡ воспомина́ти бг҃а, и҆ ст҃ы̑мъ є҆гѡ̀ не не прилѣжа́ти за́повѣдемъ: не бы̀ ᲂу҆̀бо и҆лѝ во́льномꙋ и҆лѝ нево́льномꙋ подпада́лъ согрѣше́нїю. Подоба́етъ ᲂу҆́бѡ а҆́бїе и҆ ѡ҆ нево́льныхъ прегрѣше́нїихъ и҆сповѣ́данїе съ крѣ́постїю приноси́ти бг҃ови, си́рѣчь ѡ҆ соверше́нїи ѻ҆бы́чнагѡ пра́вила. Не возмо́жно бо є҆́сть человѣ́кꙋ сꙋ́щꙋ, не согрѣша́ти человѣ́чєскаѧ, до́ндеже и҆звѣсти́тсѧ со́вѣсть на́ша во слеза́хъ любвѐ ѡ҆ си́хъ ѡ҆ставле́нїе: а҆́ще бо, речѐ, и҆сповѣ́дꙋемъ согрѣшє́нїѧ на̑ша, вѣ́ренъ є҆́сть и҆ пра́веденъ, да ѡ҆ста́витъ на́мъ сїѧ̑, и҆ ѡ҆чи́ститъ на́съ ѿ всѧ́кїѧ непра́вды¹²⁰⁸. Внима́ти же подоба́етъ неѡскꙋ́днѣ ра́зꙋмꙋ и҆сповѣ́данїѧ, да не ка́кѡ ᲂу҆́бѡ со́вѣсть на́ша ѡ҆ себѣ̀ лже́тъ, непщева́вши дово́льно бы́ти и҆сповѣ́датисѧ бг҃ови: ꙗ҆́кѡ мно́гѡ бо́льши є҆́сть бж҃їй сꙋ́дъ па́че на́шеѧ со́вѣсти, а҆́ще и҆ ничесѡ́же себѐ кто̀ во все́мъ вѣ́сть и҆звѣще́нїи, ꙗ҆́коже мꙋ́дрый на́съ па́ѵелъ ᲂу҆чи́тъ глаго́лѧ: но ничесѡ́же себѐ сꙋждꙋ̀: ничто́же бо себѐ свѣ́мъ, но ни ѡ҆ се́мъ ѡ҆правда́юсѧ: сꙋдѧ́й мѧ̀, є҆́сть бг҃ъ¹²⁰⁹. А҆́ще бо несоверше́ннѣ и҆ ѡ҆ тѣ́хъ и҆сповѣ́мысѧ, боѧ́знь нѣ́кꙋю неѧвле́ннꙋ во вре́мѧ и҆схо́да на́шегѡ ѿ ни́хъ ѡ҆брѧ́щемъ. Потре́ба же на́мъ моли́тисѧ лю́бѧщымъ гдⷭ҇а, кромѣ̀ всѧ́кагѡ стра́ха тогда̀ ѡ҆брѣта́тисѧ: и҆́же бо во стра́сѣ ѡ҆брѣта́ѧйсѧ тогда̀, свобо́днымъ ѡ҆́бразомъ та̑ртарскїѧ кнѧ́зи не пре́йдетъ, ꙗ҆́кѡ бо споспѣ́шника и҆́мꙋтъ свое́й ѕло́бѣ, ѻ҆́нꙋю дꙋ́шꙋ ꙗ҆́же боѧ́знь и҆мꙋ́щи. А҆ ꙗ҆́же въ любвѝ бж҃їей ра́дꙋющисѧ дꙋша̀, въ ча́съ разлꙋче́нїѧ ѿ тѣлесѐ вы́шше всѣ́хъ те́мныхъ ѡ҆полче́нїй, со а҆́гг҃лы ми́ра но́ситсѧ: воскрилѧ́етсѧ бо ꙗ҆́кѡ крила́ми дꙋхо́вною любо́вїю, ꙗ҆́кѡ неѻскꙋ́днѣ носѧ́щи и҆сполне́нїе зако́нное любо́вь: тѣ́мже и҆ во прише́ствїе гдⷭ҇не со всѣ́ми ст҃ы́ми, и҆̀же съ таковы́мъ дерзнове́нїемъ и҆сходѧ́щїи ѿ житїѧ̀ сегѡ̀, восхи́тѧтсѧ. А҆ и҆́же а҆́ще и҆ ма́лѡ боѧ́щесѧ во вре́мѧ сме́рти, во мно́жествѣ всѣ́хъ и҆ны́хъ человѣ̑къ ѡ҆ставлѧ́ютсѧ, ꙗ҆́коже под̾ сꙋдо́мъ сꙋ́ще: да на сꙋдѣ̀ и҆скꙋси́вшесѧ, по и҆́хъ дѣѧ́нїю, до́лжный и҆̀мъ прїи́мꙋтъ жре́бїй, ѿ блага́гѡ бг҃а и҆ цр҃ѧ̀ на́шегѡ і҆и҃са хрⷭ҇та̀ ꙗ҆́кѡ то́й є҆́сть бг҃ъ пра́вды, и҆ тогѡ̀ є҆́сть на на́съ лю́бѧщихъ є҆го̀ бога́тство бла́гости ца́рствїѧ є҆гѡ̀ во вѣ́къ, и҆ во вѣ́ки вѣкѡ́въ, а҆ми́нь.

Нїки́та, преподо́бнѣйшїй пресвѵ́теръ стꙋді́йскїѧ ѻ҆би́тели, и҆́же и҆ стиѳа́тъ нарица́емый, бѣ̀ въ лѣ́то ѿ ржⷭ҇тва̀ хрⷭ҇то́ва ты́сѧща тре́хъ со́тое, ᲂу҆чени́къ сы́й сѷмеѡ́на но́вагѡ бг҃осло́ва ближа́йшъ. Ѿ негѡ́же мнѡ́гимъ наꙋче́нъ бѣ̀ дꙋхо́внагѡ любомꙋ́дрїѧ та́инствєннымъ ᲂу҆че́нїѧмъ, и҆ толи́кѡ тогѡ̀ подража̀ добродѣ́телѧмъ, ꙗ҆́кѡ дрꙋго́мꙋ вои́стиннꙋ ꙗ҆ви́тисѧ ᲂу҆чи́телѧ со́лнцꙋ, всѣ́ми, ꙗ҆́кѡ да рече́мъ, лꙋчеза́рными преломле́нїи тогѡ̀ дарѡ́въ и҆ поꙋче́нїй въ дꙋшѣ̀ є҆гѡ̀ возсїѧ́вшꙋ. Оу҆ негѡ́жде трꙋды̀ неꙋтоми́мыми въ бж҃е́ственныхъ любомꙋ́дрствꙋѧ писа́нїѧхъ, премнѡ́гаѧ и҆ и҆зрѧ̑днѣйшаѧ мнѣ̑нїѧ собра́въ, сꙋ́ть же ꙗ҆̀же и҆ и҆скꙋ́сомъ и҆ блаже́ннымъ ревнова́нїемъ не то́чїю и҆зꙋчи́въ, но и҆ ѡ҆щꙋти́въ та̑, и҆ ꙗ҆́кѡ сꙋ́щїй бж҃е́ственныхъ и҆ преесте́ственныхъ мы́слей сво́й ра́зꙋмъ ѿ всѣ́хъ си́хъ содѣ́лавъ: высѡ́каѧ и҆ премꙋ́дрѣйшаѧ творє́нїѧ ꙗ҆вѝ, ꙗ҆́кѡ мо́щно сꙋди́ти хотѧ́щымъ и҆з̾ предлежа́щихъ тре́хъ со́тницъ є҆гѡ̀. И҆́хже и҆звѣ́стно пра́вило дѣѧ́нїѧ и҆ жи́зни бг҃олюбе́знѣйшїѧ соверше́нїе, и҆ собо́рнѣ рещѝ, храни́лище богатѣ́йшее нравоꙋче́нїѧ, и҆ и҆носказа́тельна ѡ҆́браза нарекі́й кто̀, всю̀ рече́тъ и҆́стинꙋ. Та́кѡ бо сꙋ́ть высо́ки мы́слѧми: та́коже великосказа́тельны благорѣ́чїемъ слове́съ, ꙗ҆́кѡ сꙋмнѣ́ннꙋ бы́ти, ѿ сꙋ́щагѡ ли въ ни́хъ смы́сла, и҆лѝ ѿ лѣ́поты рече́нїе толи́кꙋ весе́лїю ражда́тисѧ въ дꙋшѣ̀ чтꙋ́щагѡ.

а҃. Четы́ре непщꙋ́ю вины̑ бы́ти въ трⷪ҇цѣ соверше́ннѣй добродѣ́телей, подви̑жꙋщаѧ ко є҆́же писа́ти полє́знаѧ, ны́нѣ сре́днее нача́ла превозни́кшагѡ, и҆ къ трⷪ҇цѣ та́инственнагѡ дости́гшагѡ бг҃осло́вїѧ. И҆ пе́рвꙋю ᲂу҆́бѡ бы́ти свобо́дꙋ, са́мо то̀ глаго́лю безстра́стїе дꙋшѝ ѿ приболѣ́зненна дѣѧ́нїѧ на є҆сте́ственное пред̾ꙋспѣ́вшее видѣ́нїе тва́ри, и҆ во мра́къ бг҃осло́вїѧ вше́дшее ѿѻнꙋ́дꙋ. Вторꙋ́ю же, ꙗ҆́же ѿ сле́зъ и҆ моли́твы ᲂу҆ма̀ чистотꙋ̀: ѿ негѡ́же сло́во ражда́етсѧ благода́ти, и҆ стрꙋи̑ и҆стека́ютъ разꙋмѣ́нїй. Тре́тїю, є҆́же въ на́съ ст҃ы́ѧ трⷪ҇цы вселе́нїе: ѿ негѡ́же свѣтоли̑тїѧ дх҃а на по́льзꙋ въ ко́емждо ѡ҆чища́емыхъ быва̑ющаѧ, ꙗ҆вле́нїе та̑инъ ца́рствїѧ небе́снагѡ, и҆ ѿкрове́нїе сокрове́нныхъ въ дꙋшѝ сокро́вищъ бж҃їихъ. Четве́ртꙋю, належа́щꙋю нꙋ́ждꙋ всѧ́комꙋ прїе́мшемꙋ тала́нтъ сло́ва ра́зꙋма, преще́нїѧ бж҃їѧ, лꙋка́вый ра́бе, глаго́лющагѡ, и҆ лѣни́вый, подоба́ше тебѣ̀ вда́ти сребро̀ моѐ торжникѡ́мъ: и҆ а҆́зъ прише́дъ, и҆стѧза́лъ бы́хъ своѐ съ ли́хвою¹²¹⁰. є҆гѡ́же ра́ди ᲂу҆́бѡ и҆ даві́дъ па́че боѧ́сѧ, глаго́лаше: Сѐ ᲂу҆стна́мъ мои̑мъ не возбраню̀: гдⷭ҇и, ты̀ разꙋмѣ́лъ є҆сѝ. Пра́вдꙋ твою̀ не скры́хъ въ се́рдцѣ мое́мъ, и҆́стинꙋ твою̀ и҆ спасе́нїе твоѐ рѣ́хъ, не скры́хъ ми́лость твою̀ и҆ и҆́стинꙋ твою̀ ѿ со́нма мно́га¹²¹¹.

в҃. Нача́ло є҆́же по бз҃ѣ житїѧ̀, соверше́нно мі́ра бѣ́гство: се́ же є҆́сть ѿверже́нїе во́лей дꙋшѝ, и҆ пе́рстнагѡ мꙋдрова́нїѧ преложе́нїе. И҆́мже на бж҃е́ственное восходѧ́ще мꙋдрова́нїе, дꙋхо́вни ѿ плотски́хъ быва́емъ: ᲂу҆мерщвлѧ́еми ᲂу҆́бѡ пло́ти и҆ мі́рови, животвори́ми же дꙋше́ю и҆ дх҃омъ ѡ҆ хрⷭ҇тѣ̀.

г҃. Вѣ́дѣнїе дꙋшѝ ѡ҆ бз҃ѣ не ло́жно, и҆ вѣ́ра завѣща́тельна, презрѣ́нїемъ ви́димыхъ, и҆ дѣѧ́нїе добродѣ́телей, самолю́бїѧ всѧ́кагѡ ѿлꙋче́ннѡ, треплете́на, по соломѡ́нꙋ, ве́рвь¹²¹², ꙗ҆́же ско́рѡ не расто́ргнетсѧ ѿ дꙋхѡ́въ лꙋка́вствїѧ.

д҃. Вѣ́рою возмє́здїѧ трꙋдѡ́въ воспрїѧ́ти ᲂу҆пова́емъ: тѣ́мже и҆ те́рпимъ трꙋды̀ ᲂу҆до́бнѣ добродѣ́телей, ѿ бж҃е́ственнагѡ и҆звѣствꙋ́еми дх҃а любо́вїю воскрилѧ́емсѧ къ бг҃ꙋ.

є҃. Не є҆гда̀ ѿ пѡ́мыслъ стꙋжа́еми є҆смы̀ нечи́стыхъ, ᲂу҆жѐ и҆ дѣ́йствꙋющихъ ѕла̑ѧ, чи́сти быва́емъ. Но є҆гда̀ ѿ крѣ́пости своеѧ̀ ѡ҆слабѣ́вши дꙋша̀, и҆ ᲂу҆́мъ ѿ вознерадѣ́нна и҆ невозде́ржна пребыва́нїѧ, смꙋще́нна и҆мѣ́ти бꙋ́детъ и҆ сѣно́вна мечта̑нїѧ, и҆ трꙋды̀ добродѣ́тели лѣ́ностїю прилѣжа́нїѧ и҆ моли́твы прїѡскꙋдѣ́ютъ: тогда̀ и҆ не дѣ́ющи ѕла̑ѧ, въ странѣ̀ въ сласте́хъ во́лею блатовалѧ́ющихсѧ вчини́мсѧ.

ѕ҃. Разрѣшє́ннымъ же бы́вшымъ брозда́мъ влады́чественнѣйшихъ чꙋ́вствъ, а҆́бїе и҆ страсте́й воста́нїе быва́етъ, и҆ раболѣ́пнѣйшихъ чꙋ́вствъ дви́жетсѧ дѣ́йство: ѡ҆бы́че бо нѣ́какѡ си́хъ безслове́сїе, воздержа́нїѧ разрѣши́вшосѧ ᲂу҆́зъ, къ вина́мъ прилага́тисѧ страсте́й, и҆ ꙗ҆́коже въ сме́ртныхъ въ тѣ́хъ пасти́сѧ па́житехъ, и҆ толи́кѡ па́че, є҆ли́кѡ и҆ ѡ҆слабѣ́нїе косни́тельнѣе протѧза́етсѧ: не бо̀ терпи́тъ, на нѧ́же є҆сте́ственнѣ и҆́мать похотѣ́нїе, разрѣши́вшосѧ бро́здъ, прїѻбще́нїе ѿрази́ти.

з҃. Ѿ чꙋ́вствъ ѻ҆́ва ᲂу҆́бѡ и҆́хъ словє́сна сꙋ́ть, зрѣ́нїе, слꙋ́хъ, и҆ и҆ны́хъ любомꙋдрѣ́йша же и҆ влады́чественнѣйша: ѻ҆́ва же безсловє́сна и҆ скѡ́тна, вкꙋ́съ, ѡ҆бонѧ́нїе, ѡ҆сѧза́нїе, къ послꙋже́нїю слове́сныхъ: зри́мъ бо пе́рвѣе и҆ слы́шимъ, и҆ та́кѡ сло́вомъ дви́жимсѧ, прикаса́емсѧ же предлежа́щагѡ: и҆ ѡ҆бонѧ́юще вкꙋше́нїю дае́мъ. Тѣ́мже и҆ двою̀ скѡ́тнѣйша сꙋ́ть трѝ, и҆ ꙗ҆́вственнѣ раболѣ̑пнѣйша. Ѡ҆ ни́хже ѿ па́ственныхъ и҆ ѕвѣре́й чревонеи́стовнѣйшаѧ и҆ сочета́тельнѣйшаѧ трꙋдѧ́тсѧ па́че: чрез̾ ве́сь бо де́нь и҆ но́щь, и҆лѝ пи́щи несы́тнѣ насыщева́ютсѧ, и҆лѝ къ сочета́нїємъ ᲂу҆стремлѧ́ютсѧ.

и҃. И҆́же дѣ̑йствїѧ внѣ́шнихъ чꙋ́вствъ ко внꙋ̑треннимъ преложи́вый чꙋ́вствамъ, и҆ зрѣ́нїе ᲂу҆́бѡ, ко ᲂу҆мꙋ̀ зрѧ́щемꙋ свѣ́тъ живота̀ простры́й, слꙋ́хъ же, къ ра́зꙋмꙋ дꙋшѝ, вкꙋ́съ же, къ разсꙋжде́нїю словесѐ, ѡ҆бонѧ́нїе же къ мы́сли ᲂу҆ма̀, ѡ҆сѧза́нїе же, къ серде́чной предви́гнꙋвый бо́дрости: а҆́гг҃льскꙋ жи́знь на землѝ соверша́етъ, человѣ́къ ᲂу҆́бѡ человѣ́кѡмъ и҆ сы́й и҆ ви́димь: А҆́гг҃лъ же а҆́гг҃лѡмъ спребыва́ѧ и҆ разꙋмѣва́емь.

ѳ҃. Ви́дѧщымъ ᲂу҆́бѡ ᲂу҆мо́мъ свѣ́тъ бж҃е́ственныѧ жи́зни, сокрове́нныхъ та̑инъ бж҃їихъ ра́зꙋмъ прїе́млемъ: ра́зꙋмомъ же дꙋшѝ, восхожде́нїѧ въ се́рдцѣ пѡ́мыслъ располага́емъ съ вѣ́дѣнїемъ, различа́юще ѿ лꙋ́чшихъ го́ршыѧ, разсꙋжде́нїемъ же сло́ва, ви́ды разꙋмѣ́нїй вкꙋша́емъ. И҆ ꙗ҆̀же ᲂу҆́бѡ ѿ го́рька и҆зраста̑ющаѧ ко́рене, и҆лѝ претворѧ́емъ на сла́дкое и҆зваре́нїе дꙋшѝ, и҆лѝ всѧ́чески ѿме́щемъ, сꙋ́щыѧ же ѿ бы́лїѧ прили̑чна и҆ ѕла̑чна прїе́млемъ: всѧ́ко разꙋмѣ́нїе плѣнѧ́юще въ послꙋша́нїе хрⷭ҇то́во. Мы́слїю же ᲂу҆ма̀, мы́сленное мѵ́рѡ дꙋхо́вныѧ благода́ти ѡ҆бонѧ́емъ, весе́лїѧ и҆ ра́дованїѧ серде́чнагѡ и҆сполнѧ́ющесѧ. Бо́дрымъ же се́рдцемъ, ѡ҆роша́ющагѡ свы́ше дх҃а пла́мень жела́нїѧ на́съ до́брыхъ, и҆лѝ согрѣва́ющагѡ и҆зстꙋди́вшыѧсѧ си́лы на́шѧ хла́домъ страсте́й, благора́зꙋмнѡ ѡ҆щꙋща́емъ.

і҃. Ꙗ҆́коже тѣлесѝ на́шемꙋ чꙋ̑вства сꙋ́ть пѧ́ть: зрѣ́нїе, слꙋ́хъ, вкꙋ́съ, ѡ҆бонѧ́нїе, ѡ҆сѧза́нїе: та́кѡ и҆ дꙋшѣ̀ по томꙋ́жде числꙋ̀ пѧ́ть чꙋ́вствъ сꙋ́ть: ᲂу҆́мъ, сло́во, чꙋ́вство ᲂу҆́мно, ра́зꙋмъ, и҆ вѣ́жество: въ три́ же въ дꙋшѣ̀ дѣ̑йства сїѧ̑ собира́ютсѧ: во ᲂу҆́мъ, въ сло́во, въ чꙋ́вство. И҆ ᲂу҆мо́мъ ᲂу҆́бѡ размышле́нїѧ, сло́вомъ же сказа̑нїѧ, чꙋ́вствомъ же мечта̑нїѧ бж҃е́ственнагѡ вѣ́жества и҆ ра́зꙋма прїе́млемъ.

а҃і. И҆́же ᲂу҆́мъ и҆мы́й размышлє́нїѧ по́мыслѡвъ благоразсꙋжда́ющъ, и҆ бж҃е́ствєннаѧ разꙋмѣ̑нїѧ чи́стѣ прїе́млющъ, сло́во же и҆столкꙋ́ющо є҆стє́ственнаѧ движє́нїѧ ви́димагѡ всегѡ̀ созда́нїѧ, вины̑ си́рѣчь сꙋ́щихъ ᲂу҆ѧснѧ́ющо, ᲂу҆́мное же чꙋ́вство, под̾е́млющее небе́сныѧ премꙋ́дрости и҆ ра́зꙋма вѣ́жество, ѡ҆сїѧ́ньми со́лнца пра́вды, всѧ́ко преше́дъ чꙋ́вство, во є҆́же па́че чꙋ́вства дости́же, и҆ неви́димыхъ наслажда́етсѧ сла́дости.

в҃і. Нача́льнѣйшыѧ си̑лы ᲂу҆ма̀ сꙋ́ть четы́ре: ра́зꙋмъ, ѻ҆строꙋ́мїе, постиза́нїе, и҆ твердомы́слїе. И҆́же бо си̑мъ присовокꙋпи́вый пе́рвѣйшыѧ дꙋшѝ добродѣ́тєли, и҆ ра́зꙋмꙋ ᲂу҆́бѡ ᲂу҆ма̀ цѣломꙋ́дрїе дꙋшѝ приложи́вый, ѻ҆строꙋ́мїю же мꙋ́дрость, постиза́нїю же пра́вдꙋ: твердомы́слїю же мꙋ́жество соедини́вый, колесни́цꙋ пла́меннꙋ и҆ неботе́чнꙋ себѣ̀ сꙋгꙋ́бѡ соста́ви, на трѝ пє́рвѣйшаѧ нача̑ла и҆ си̑лы ѡ҆полчє́нїѧ страсте́й: сребролю́бїѧ, сластолю́бїѧ, и҆ славолю́бїѧ.

г҃і. И҆́же сребролю́бїе постиже́нїемъ зако́нныѧ пра́вды, ꙗ҆́же є҆́сть къ тождеро́дномꙋ ми́лостивно сострада́нїе, побѣди́вый, сластолю́бїе же, благоразꙋ́мнымъ цѣломꙋ́дрїемъ, є҆́же є҆́сть ѡ҆бдержи́тельное воздержа́нїе, ѡ҆долѣ́вый, славолю́бїе же ѻ҆строꙋ́мїемъ и҆ мꙋ́дростїю, є҆́же є҆́сть благоразꙋ́мное разсꙋжде́нїе бж҃е́ственныхъ и҆ человѣ́ческихъ веще́й, ꙗ҆́кѡ немощнѣ́йшее потреби́вый, и҆ кра́сными нога́ми ꙗ҆́кѡ пе́рстно сїѐ, и҆ ничесомꙋ́же досто́йно попра́вый, пе́рстное мꙋдрова́нїе ѡ҆долѣ̀ пло́ти, и҆ толи́кѡ, ꙗ҆́кѡ зако́нъ дꙋ́ха жи́зни преложи́ти то̀, и҆ зако́на мꙋчи́тельствꙋющїѧ пло́ти, свобо́днѡ содѣ́лати и҆ рещѝ: Благодарю̀ бг҃а, ꙗ҆́кѡ зако́нъ дх҃а жи́зни свободи́лъ мѧ̀ є҆́сть ѿ зако́на рабо́ты сме́рти¹²¹³.

д҃і. И҆́же сла́вꙋ человѣ́ческꙋ ꙗ҆́кѡ сꙋ́щꙋ, ника́коже сꙋ́щꙋ ᲂу҆своѧ́ѧй, и҆ сластолю́бїе несы́тства ра́ди дꙋшѝ ѡ҆б̾е́млѧй, и҆ сребролю́бїѧ лихои́мства ра́ди держа́йсѧ, и҆лѝ бѣсо́вственъ мнѣ́нїемъ и҆ горды́нею сотворѧ́етсѧ, и҆лѝ ско́тенъ сластьмѝ чре́ва и҆ подчре́вныхъ содѣ́ловаетсѧ, и҆лѝ ѕвѣ́рственъ быва́етъ бли̑жнимъ, лихои́мственнымъ и҆ безчеловѣ́чнымъ сребролю́бїемъ. Ѿпа́даѧ ᲂу҆́бѡ ѿ ꙗ҆́же къ бг҃ꙋ вѣ́ры, за є҆́же прїима́ти сла́вꙋ ѿ человѣ̑къ по словесѝ гдⷭ҇ню, и҆ ᲂу҆клонѧ́ѧсѧ ѿ цѣломꙋ́дрїѧ и҆ чистоты̀, за є҆́же возжига́ти несы́тствомъ подчрє́внаѧ, и҆ безчи̑ннымъ покарѧ́тисѧ стремле́нїемъ, и҆ ᲂу҆клонѧ́ѧсѧ ѿ любвѐ, за є҆́же є҆ди́номꙋ себѣ̀ храни́ти и҆ не даѧ́ти пѣ́нѧзи тре́бꙋющымъ бли̑жнимъ. И҆ та́кѡ многоѡбра́зенъ нѣ́кїй ѕвѣ́рь ѿ мно́гихъ сложе́ныхъ самѣ́мъ себѣ̀ сопроти́вныхъ таковы́й ви́димь є҆́сть, бг҃ꙋ и҆ человѣ́кѡмъ и҆ скотѡ́мъ непримири́теленъ.

є҃і. Ꙗ҆́рость и҆ жела́нїе и҆ слове́ство ᲂу҆ма̀, а҆́ще ᲂу҆́бѡ по є҆стествꙋ̀ въ себѣ̀ стоѧ́тъ и҆ дви́жꙋтсѧ, всегѡ̀ бж҃е́ственна нѣ́коего и҆ бг҃ови́дна человѣ́ка содѣ́ловаютъ, здра́вѡ си́рѣчь дви̑жима, и҆ ника́колюбо ѿ є҆сте́ственнагѡ стоѧ́нїѧ ᲂу҆клонѧ́ющасѧ. А҆́ще ли же проти́вꙋ є҆стества̀ ѿ подо́бнагѡ превратѧ́тсѧ, и҆ ѿ своегѡ̀ ѿдви́гнꙋтсѧ є҆стества̀ многоѡбра́зна нѣ́коегѡ сегѡ̀ (человѣ́ка), ꙗ҆́коже рече́сѧ, и҆ ѿ мно́гихъ самѣ́хъ себѣ̀ сопротивлѧ́ющихсѧ сложе́нна показꙋ́ютъ.

ѕ҃і. Ꙗ҆́рость, междопредѣ́лїе є҆́сть жела́нїѧ и҆ слове́ства дꙋшѝ, ꙗ҆́коже ѻ҆рꙋ́жїе комꙋ́ждо сꙋ́щи во є҆́же проти́вꙋ є҆стества̀ и҆лѝ и҆ по є҆стествꙋ̀ движе́нїи свое́мъ. Дви́жимꙋ бо жела́нїю и҆ слове́ствꙋ по є҆стествꙋ̀ на бж҃е́ствєннаѧ, ѻ҆рꙋ́жїе є҆́сть ꙗ҆́рость комꙋ́ждо пра́вды на є҆ди́наго свирѣ́пѣющаго и҆ нало́гствꙋющаго тѣ́мъ ѕмі́ѧ причаще́нїе сласте́й пло́ти, и҆ сла́вы человѣ́ческїѧ наслажде́нїе: превраща́ющымъ же ѿ є҆́же по є҆стествꙋ̀ движє́нїѧ, и҆ прелага́ющымъ во є҆́же проти́вꙋ є҆стества̀ си́лꙋ, и҆ ѿ ᲂу҆праздне́нїѧ ѡ҆ бж҃е́ственныхъ веще́хъ на человѣ́чєскаѧ преноси̑мымъ: ѻ҆рꙋ́жїе є҆́сть непра́вды въ грѣ́хъ, то́ю ра́тꙋющымъ и҆ напада́ющымъ на воспѧща́ющыѧ стремлє́нїѧ и҆ похотѣ̑нїѧ и҆́хъ. Ꙗ҆́кѡ ѿсю́дꙋ и҆лѝ дѣ́ѧтельнꙋ и҆ зри́тельнꙋ и҆ бг҃ослове́снѣйшꙋ показа́тисѧ человѣ́кꙋ томꙋ̀, посредѣ̀ це́ркве вѣ́рныхъ, по є҆стествꙋ̀ дви́жимꙋ, и҆лѝ ско́тнꙋ и҆ ѕвѣ́рственнꙋ и҆ бѣсо́вственнꙋ, во є҆́же проти́вꙋ є҆стества̀ прелага́ющꙋсѧ.

з҃і. А҆́ще кто̀ не пе́рвѣе си́лы дꙋшѝ своеѧ̀ приболѣ́зненнымъ покаѧ́нїемъ и҆ крѣ́пкимъ прилѣжа́нїемъ таковы̀ ѡ҆брати́въ соверши́тъ, ꙗ҆ковы̀ на́мъ ѿ нача́ла дадѐ бг҃ъ, а҆да́ма созда́въ, и҆ дыха́нїе жи́зни вдꙋ́нꙋвъ во́нь: нижѐ себѐ позна́ти возмо́жетъ когда̀, нижѐ по́мысла самоде́ржца страсте́мъ, без̾ киче́нїѧ, не любопы́тна, не лꙋка́вна, про́ста, смиренномꙋ́дра, за́висти и҆ клеветы̀ чꙋ́жда, стѧжа́ти: всѧ́ко разꙋмѣ́нїе плѣнѧ́юща въ послꙋша́нїе хрⷭ҇то́во. Но нижѐ дꙋ́шꙋ свою̀ возжига́емꙋ, и҆ воспалѧ́емꙋ ѡ҆брѧ́щетъ въ любо́вь бж҃їю, нижѐ предѣ́лы воздержа́нїѧ превосходѧ́щꙋ, и҆ дово́льнꙋ сꙋ́щꙋ предлежа́щими, и҆ ст҃ы́хъ жела́ющꙋ ᲂу҆покое́нїѧ. И҆ а҆́ще не си́це стѧ́жетъ сїѧ̑: ни се́рдце своѐ кро́тко, ми́рно, безгнѣ́вно, бла́го, нера́тꙋемо, и҆спо́лнено ми́лости и҆ ти́хости, стѧжа́ти когда̀ возмо́жетъ. Та́кѡ крамо́льствꙋющей на себѐ дꙋшѝ, и҆ смꙋще́нїѧ ра́ди си́лъ, невмѣща́тельной пребыва́ющей лꙋче́й дꙋ́ха.

и҃і. И҆́же не си́це дре́внѧгѡ благоро́дїѧ воспрїе́млѧй въ себѣ̀ благолѣ́тїе, и҆ начерта́нїѧ не воз̾ѡбража́ѧй при́снѡ ѡ҆́браза, и҆́же ѿ нача́ла тогѡ̀ по подо́бно своемꙋ̀ созда́вшагѡ, ка́кѡ мо́щно когда̀ соедини́тисѧ съ тѣ́мъ, є҆гѡ́же разлꙋчѝ себѐ, начерта́нїй неподо́бїемъ: и҆ є҆мꙋ́же свѣ́тъ вои́стиннꙋ ᲂу҆гаше́нъ бы́сть, свѣ́тꙋ проти́вное въ себѐ прито́рже. Не соедини́всѧ же съ тѣ́мъ, ѿ негѡ́же нача́ло и҆́мать соста́ва, и҆ ѿ негѡ́же ѿ не сꙋ́щихъ воззва́сѧ¹²¹⁴, и҆ сꙋ́щими ѡ҆блада́етъ, се́й ᲂу҆́бѡ посѣ́ченъ бы́въ, ꙗ҆́кѡ не подо́бенъ сотво́ршемꙋ вве́рженъ бꙋ́детъ, вѣ́стно є҆́сть зрѧ́щымъ, а҆́ще и҆ а҆́зъ ᲂу҆молчꙋ̀.

ѳ҃і. До́ндеже ᲂу҆́бѡ вещества̀ въ себѣ̀ и҆́мамы страсте́й и҆ вины̀ си́хъ самохо́тнѣ храни́мъ, ѿтрѧстѝ си́хъ не произволѧ́юще: возмога́етъ тѣ́хъ на ны̀ и҆ си́ла, крѣ́пость прїе́млюще си́рѣчь ѿ на́съ. Повнегда́ же сїѧ̑ ѿ себѐ ѿве́ржемъ, и҆ се́рдце слеза́ми покаѧ́нїѧ ѡ҆чи́стимъ возненави́дѣвше и҆ ви́димыхъ пре́лесть, тогда̀ ᲂу҆тѣ́шителева прише́ствїѧ въ причаще́нїи быва́емъ: бг҃а зрѧ́ще, въ свѣ́тѣ присносꙋ́щнѣ, и҆ зри́ми ѿ негѡ̀.

к҃. И҆́же всемі́рнагѡ чꙋ́вства разто́ргшїи ᲂу҆́зы, въ свобо́дѣ всѧ́кїѧ рабо́ты пребыва́ютъ чꙋ́вствъ, є҆ди́номꙋ дꙋ́хови живꙋ́ще, и҆ томꙋ̀ собесѣ́дꙋюще, ꙗ҆́кѡ ѿ ѻ҆́нагѡ дви́жими. И҆̀мже и҆ съ соединосꙋ́щныма ѻ҆ц҃е́мъ и҆ сло́вомъ соединѧ́тисѧ нѣ́какѡ ѡ҆быко́ша, и҆ є҆ди́нъ дꙋ́хъ, по па́ѵлꙋ, соверша́тисѧ. И҆̀же и҆ не то́чїю не ꙗ҆́ти сꙋ́ть бѣ́сы, но и҆ стра́шни, ꙗ҆́кѡ причасти́вшесѧ бж҃е́ственнагѡ ѻ҆гнѧ̀, и҆ ѻ҆́гнь вои́стиннꙋ бы́вше.

к҃а. Ѡ҆сѧза́нїе, не ѿ ча́сти что̀ є҆́сть въ тѣлесѝ во є҆ди́ной ча́сти своѐ дѣ́йство ꙗ҆́коже прѡ́чаѧ ѿ чꙋ́вствъ и҆мꙋ́що, но ѡ҆бдержи́тельно нѣ́кое, и҆ по всемꙋ̀ тѣлесѝ. Є҆гда̀ ᲂу҆́бѡ не по потре́бѣ прико́снетсѧ чесогѡ̀, є҆щѐ стра́ждꙋщо къ гла́дкостемъ, колеба́тисѧ ᲂу҆мꙋ̀ ѿ пѡ́мыслъ встра́ственныхъ, содѣ́ловаетъ: є҆гда́ же по потре́бѣ нꙋ́жднѣй є҆стествꙋ̀, нѣ́жностей ѿрече́тсѧ, и҆ чꙋ́вство превозни́кнетъ, не ѡ҆бы́че колеба́ти дꙋшє́внаѧ чꙋ̑вства.

к҃в. Оу҆мꙋ̀ во ꙗ҆̀же па́че є҆стества̀ прише́дшꙋ, чꙋ̑вства по є҆стествꙋ̀ стоѧ́ща, безстра́стнѣ съ вина́ми соѡбраща́ютсѧ: словеса̀ то́кмѡ и҆ є҆стества̀ и҆́хъ и҆спытꙋ́юща, и҆ нело́жнѡ разсꙋжда́юща дѣ̑йствїѧ си́хъ вкꙋ́пѣ и҆ ка́чєства. Не пристра́ствꙋюща, и҆лѝ ᲂу҆свои́тельнѣ проти́вꙋ є҆стества̀ дви́жима къ ни̑мъ.

к҃г. По́двизи и҆ трꙋды̀ дꙋхо́внїи ражда́ютъ дꙋшѣ̀ весе́лїе, ми́рꙋ си́рѣчь предвари́вшꙋ стра̑сти. Є҆́же ᲂу҆́бѡ сꙋ́щымъ под̾ чꙋ́вствомъ неꙋдо́бно: сїѐ дꙋшѣ̀ трꙋжда́ющейсѧ, и҆ любо́вь ѿ свѧще́нныхъ по́двигѡвъ къ бг҃ꙋ стѧжа́вшей, и҆ ᲂу҆ѧ́звленной бж҃е́ственна ра́зꙋма раче́нїемъ, ᲂу҆до́бное, и҆ па́че сладча́йше. Ѻ҆́нѣмъ бо ᲂу҆́бѡ трꙋды̀ и҆ по́двизи добродѣ́тели, а҆́ки поко́ю тѣ́ла и҆ сласте́й наслажде́нїю прилѣжа́щымъ неꙋдо́бни сꙋ́ть, и҆ ѕѣлѡ̀ мнѧ́тсѧ бы́ти жесто́цы, не предпоꙋчи́вшымсѧ сла́ность сласте́й потопи́ти стрꙋѧ́ми сле́зъ. Се́й же возгнꙋша́вшейсѧ сласте́й, вино́вныхъ болѣ́зней, и҆ благостра́стїе ѿтрѧ́сшей, съ самолю́бїемъ тѣле́снымъ, є҆ди́но печа́льно, ѡ҆сла́ба трꙋдѡ́въ, и҆ по́двигѡвъ пра́здность. Є҆́же ᲂу҆́бѡ вино́вно ѻ҆́нѣмъ є҆́сть въ весе́лїе тѣле́сно, сїѐ дꙋшѣ̀ преложи́вшей жела̑нїѧ на бж҃е́ствєннаѧ, печа́ли вино́вно: и҆ є҆́же се́й весе́лїѧ вино́вно дꙋхо́вна, ѻ҆́нѣмъ воздыха́нїй и҆ болѣ́зни є҆́сть вино́вно.

к҃д. Трꙋды̀, мнѧ́тсѧ ᲂу҆́бѡ ѿ нача́лъ, болѣ́зней бы́ти и҆сто́чницы всѣ̑мъ вводи̑мымъ въ по́ты и҆ по́двиги дꙋхо́вны. тща́щымсѧ же къ прїꙋмноже́нїю добродѣ́тели и҆ къ средѣ̀ простира́ющымсѧ тоѧ̀ сла́дости нѣ́кїѧ и҆ чꙋ́дныѧ ѿра́ды. Внегда́ же ме́ртвенное сїѐ пожре́тсѧ мꙋдрова́нїе пло́ти ѿ безсме́ртнагѡ живота̀ прибыва́ющагѡ прише́ствїемъ дꙋ́ха въ простира́ющихсѧ вои́стиннꙋ къ конце́мъ добродѣ́телей трꙋда́ми, ра́дости неизрече́нныѧ и҆ весе́лїѧ: разшири́вшꙋсѧ тѣ́мъ си́рѣчь и҆сто́чникꙋ чи́стомꙋ сле́зъ, и҆ сла́дкой стрꙋѝ свы́ше на нѧ̀ ѡ҆дожди́вшейсѧ ᲂу҆миле́нїѧ.

к҃є. А҆́ще хо́щеши на предѣ́лы взы́ти добродѣ́тели, и҆ къ бг҃ꙋ ведꙋ́щїй пꙋ́ть ѡ҆брѣстѝ незаблꙋ́днѣ, не да́ждь сна̀ ѻ҆чи́ма твои́ма, ни дрема́нїѧ вѣ́ждома твои́ма, и҆лѝ поко́ѧ скранїа́ма твои́ма, до́ндеже трꙋды̀ мно́гими и҆ слеза́ми мѣ́сто безстра́стїѧ ѡ҆брѧ́щеши ᲂу҆дрꙋче́нной дꙋшѝ твое́й, и҆ вни́деши во свѧти́лище ра́зꙋма бж҃їѧ и҆ ѵ҆поста́сною премꙋ́дростїю є҆гѡ̀ въ послѣ̑днѧѧ кончи́ны человѣ́ческихъ веще́й съ ра́зꙋмомъ позри́ши, и҆ дѡ́лнѧѧ презрѣ́въ, на высѡ́кїѧ го́ры видѣ́нїѧ, ꙗ҆́коже є҆ле́нь, и҆ са́мъ жа́жднѣйше востече́ши.

к҃ѕ. Пꙋ́ть ско́ръ къ вознесе́нїю добродѣ́тели, молча́нїе є҆́сть новонача̑льнымъ ᲂу҆сте́нъ, и҆ смѣже́нїе ѻ҆́чїю, и҆ ᲂу҆́шїю глꙋхота̀: прїе́мь бо ѿсю́дꙋ ᲂу҆́мъ си́хъ пра́здность, внѣ̑шнїѧ въ себѣ̀ затвори́въ вхо́ды, смотрѣ́ти себѐ начина́етъ, и҆ своѧ̑ движє́нїѧ. И҆ ка́ѧ ᲂу҆́бѡ сꙋ́ть а҆́бїе и҆спытꙋ́етъ ꙗ҆̀же въ мы́сленнѣмъ мо́ри по́мыслѡвъ пла̑вающаѧ помышлє́нїѧ; Ка́ѧ же ꙗ҆̀же въ горни́ло мы́сли є҆гѡ̀ влага́ємаѧ разꙋмѣ̑нїѧ; Чиста́ ли же и҆ не примѣ́сна сѣ́менъ го́рькихъ, и҆ ѿ а҆́гг҃ла свѣ́та, и҆лѝ пле́вели примѣ́сни же и҆ плѣ́вни и҆ ѿ сопроти́вныхъ свѣ́тꙋ. И҆ си́це ꙗ҆́коже нѣ́кїй влады́ка самоде́ржецъ посредѣ̀ стоѧ̀, мы́слемъ сꙋдѧ̀, и҆ раздѣлѧ́ѧ лꙋ́чшыѧ по́мыслы ѿ го́ршихъ. И҆ ѻ҆́ва ᲂу҆́бѡ, ѿ влага́емыхъ прїе́млѧ є҆́же ѿ негѡ̀ ѡ҆бꙋче́нїемъ и҆ движе́нїемъ во ᲂу҆́мныѧ влага́етъ жи̑тницы, ѻ҆гне́мъ и҆спе́кшасѧ дꙋ́ха и҆ воды̀ бж҃е́ственныѧ и҆спѡ́лненна, ѿ ни́хже и҆ пита́емь, возмога́етъ и҆ и҆сполнѧ́етсѧ свѣ́та: ѻ҆́ва же ѿсыла́етъ во глꙋбинꙋ̀ забве́нїѧ, го́ресть си́хъ ѿтрѧса́ѧ. Се́ же є҆ди́нагѡ дѣ́ло є҆́сть ѻ҆́нагѡ ᲂу҆́мнѣ коснꙋ́вшагѡсѧ ведꙋ́щагѡ къ небесе́мъ и҆ бг҃ꙋ незаблꙋ́днѡ, и҆ плаче́вныѧ ри́зы те́мныхъ совле́кшагѡсѧ страсте́й.

к҃з. Дꙋша̀ ꙗ҆́же є҆ди́ною ѿве́ргшаѧ лꙋка́вство и҆ любопы́тное мꙋдрова́нїе ѕлѣ́йшагѡ киче́нїѧ, просты́мъ же и҆ неѕло́бивымъ се́рдцемъ ѿ прише́ствїѧ ᲂу҆тѣ́шителѧ ѡ҆богатѣ́вшаѧ, а҆́бїе въ бз҃ѣ же и҆ въ себѣ̀ быва́етъ. И҆ ꙗ҆̀же зри́тъ и҆ слы́шитъ, вѣ́рна и҆ и҆́стинна непщꙋ́етъ несꙋмнѣ́ннѡ, ꙗ҆́кѡ превозше́дшаѧ лю̑тыѧ невѣ́рїѧ прѡ́пасти, и҆ вы́ше а҆́да за́висти носи́маѧ.

к҃и. Всѣ̀ добродѣ̑тели предварѧ́етъ и҆звѣще́ннаѧ вѣ́ра, є҆гда̀ несꙋмнѣ́ненъ совѣ́тъ прино́ситъ дꙋша̀, и҆ всѧ́чески ѿме́щетъ самолю́бїе. Ничто́же бо та́кѡ и҆́но си́льно є҆́сть ны́нѣ къ по́двигѡмъ совле́кшагосѧ возбранѧ́ти ѿ дѣ́ланїѧ за́повѣдей, ꙗ҆́коже всеѕло́бнѣйшее самолю́бїе. Сїѐ є҆́сть препѧ́тїе предспѣ́ѧнїѧ тщали́выхъ. Сїѐ недꙋ́ги тѣ́мъ подме́щетъ, и҆ неꙋдобоисцѣ̑льны стра̑сти тѣ́ла, и҆́миже теплотꙋ̀ дꙋшѝ стꙋде́нꙋ содѣ́ловаетъ, и҆ є҆́же ѕлопострада́ти ѡ҆ добродѣ́тели нꙋ́дитъ ѡ҆ставлѧ́ти ꙗ҆́кѡ навѣ́тъ благопоко́йныѧ жи́зни. Самолю́бїе же є҆́сть, безслове́сное любле́нїе тѣ́ла: є҆́же и҆ самолюби́ва сотворѧ́ющи и҆́нока, си́рѣчь, дꙋшелюби́ва и҆ тѣлолюби́ва, ᲂу҆далѧ́етъ є҆го̀ ѿ бг҃а и҆ ца́рствїѧ є҆гѡ̀, по преподо́бномꙋ словесѝ: и҆́же лю́битъ дꙋ́шꙋ свою̀, погꙋби́тъ ю҆̀¹²¹⁵.

к҃ѳ. И҆́же болѣ́зненнѣ наче́ншїй дѣ́ланїе за́повѣдей бж҃їихъ, и҆ те́плымъ раче́нїемъ ле́гкїй ꙗ҆ре́мъ и҆́ночества на вы́ю взе́мшїй, не щади́тъ здра́вїѧ тѣле́сна, ни въ жесто́кости дѣ́лъ добродѣ́тели и҆знемога́етъ, ни въ трꙋдѣ́хъ печа́лꙋетъ, не зри́тъ къ и҆но́мꙋ комꙋ̀ ᲂу҆ны́лѡ ѡ҆ по́двизѣхъ и҆ неради́вѣ мы́слѧщꙋ: но горѧ́щею любо́вїю браздꙋ̀ сѣче́тъ добродѣ́телей во всѧ́комъ ѕлострада́нїи, къ себѣ̀ то́кмѡ зрѧ̀, и҆ къ бж҃їимъ за́повѣдемъ: и҆ на всѧ́къ де́нь со слеза́ми сѣ́мена своѧ̑ до́лꙋ мета́етъ во стра́нѣ живы́хъ, до́ндеже прозѧ́бнетъ томꙋ̀ ѕла́къ безстра́стїѧ, и҆ въ сте́бль возрасте́тъ ра́зꙋма бж҃е́ственна, и҆ кла́съ принесе́тъ зе́рно сло́ва приносѧ́щь, и҆ прїи́дꙋтъ жи̑та пра́вды є҆гѡ̀.

л҃. Ни ѿкꙋ́дꙋ же та́кѡ мню̀ предспѣ́ѧнїю бы́ти дꙋшѝ ско́рꙋ и҆ сокраще́ннꙋ, ꙗ҆́коже ѿ є҆ди́ныѧ вѣ́ры, вѣ́ры же, ни ꙗ҆́же въ бг҃а то́кмѡ, и҆ въ є҆диноро́днаго є҆го̀ сн҃а, но и҆ и҆звѣще́нныѧ: съ не́юже вѣ́рꙋемъ и҆́стинна бы́ти ѡ҆бѣтова̑нїѧ хрⷭ҇тѡ́ва, ꙗ҆̀же ѡ҆бѣща̀ и҆ ᲂу҆гото́ва лю́бѧщымъ є҆го̀, и҆ прещє́нїѧ и҆ мꙋ̑ки а҆́дѡвы ᲂу҆готѡ́ванныѧ дїа́волꙋ и҆ дѣ́лателємъ є҆гѡ̀. Сїѧ̀ вѣ́ра и҆звѣствꙋ́етъ дꙋ́шꙋ ᲂу҆пова́ти въ по́двизѣ сꙋ́щꙋ полꙋчи́ти ᲂу҆строе́нїе ст҃ы́хъ, блаже́нное и҆́хъ безстра́стїе, и҆ востещѝ къ высотѣ̀ свѧты́ни и҆́хъ, и҆ наслѣ́дницѣ є҆́й съ ни́ми бы́ти ца́рствїѧ бж҃їѧ. Си́це же и҆звѣствꙋ́ема, рачи́тельнѣ къ дѣ́ланїю за́повѣдей ᲂу҆стремлѧ́етсѧ, не сомнѧ́щисѧ въ себѣ̀, но подража́ющи трꙋда́мъ ѻ҆́нѣхъ, и҆ подо́бными по́двиги гонѧ́щи пости́гнꙋти соверше́нство и҆́хъ.

л҃а. Соизмѣнѧ́тисѧ ѻ҆бы́че внѣ́шнее лица̀ ᲂу҆строе́нїе съ внꙋ́треннимъ дꙋшѝ ᲂу҆строе́нїемъ, ꙗ҆ково́ бо ᲂу҆́мное движе́нїе є҆ѧ̀ дѣ́ланїе и҆́мать, таково̀ и҆ зра́къ лица̀ зрѧ́щымъ и҆з̾ѧвлѧ́етъ своѐ расположе́нїе: съ дѣ́йствꙋющими бо по́мыслы созавѣщаваѧ́йсѧ и҆ соизмѣнѧ́емь, ѻ҆вогда̀ ᲂу҆́бѡ зри́тсѧ свѣ́телъ, се́рдцꙋ веселѧ́щꙋсѧ, ѡ҆ восхожде́нїи благи́хъ помышле́нїй и҆ размышле́нїй ѡ҆ бз҃ѣ: ѻ҆вогда́ же дрѧ́хлъ и҆ мра́ченъ, ѡ҆ по́мыслѣхъ безмѣ́стїѧ ѡ҆горчава́емь. Въ ни́хже и҆ ᲂу҆таи́тисѧ нѣ́сть возмо́жно дѣ́йствꙋемомꙋ ѿ и҆мꙋ́щихъ чꙋ́вства дꙋшѝ ѡ҆бꙋчє́нна: занѐ, и҆лѝ и҆змѣ́на є҆́сть десни́цы вы́шнѧгѡ: ꙗ҆́вна є҆́сть тѣ́мъ, ꙗ҆́кѡ зна́ема и҆ любе́зна, є҆́юже поро́ждшесѧ ѿ дх҃а свы́ше, свѣ́тъ и҆ со́ль бы́ша бли̑жнимъ. И҆лѝ крамолы̀ є҆́сть си́лъ и҆ смꙋще́нїѧ помыслѡ́въ: ꙗ҆́вственно нѣ́кое є҆́сть си̑мъ, си́рѣчь, ѿме́щꙋщымъ то̀, и҆ начерта́нїе ѡ҆́браза сн҃а бж҃їѧ на себѣ̀ носѧ́щымъ свѣтлѣ́йшо бж҃е́ственными дарова́нїи.

л҃в. Внꙋ́треннее дѣ́ланїе, и҆лѝ вѣнцє́въ вино́вно быва́етъ дꙋшѝ, и҆лѝ томле́нїй и҆ мꙋ́къ: занѐ а҆́ще ᲂу҆́бѡ ѡ҆ бж҃е́ственныхъ ве́щехъ ᲂу҆пражнѧ́етсѧ, и҆ смиренномꙋ́дрїѧ любоꙋдобрѧ́етъ мѣста̀: и҆́мать напое́нїе свы́ше сле́зное, и҆ воздѣ́ловаетъ любо́вь ꙗ҆́же къ бг҃ꙋ, и҆ вѣ́рꙋ, и҆ є҆́же къ бли́жнемꙋ сострада́нїе. И҆́миже дꙋша̀ воз̾ѡбразꙋ́ющисѧ въ добро́тꙋ ѡ҆́браза хрⷭ҇то́ва, свѣ́тъ быва́етъ человѣ́кѡмъ, и҆ лꙋча́ми добродѣ́телей привлачи́тъ къ себѣ̀ зрѣ̑нїѧ и҆́хъ, и҆ подви́житъ всѣ́хъ къ славосло́вїю бж҃їю. А҆́ще же ѡ҆ до́льныхъ и҆ человѣ́ческихъ, и҆ ровє́нныѧ мѣста̀ возмꙋща́етъ и҆ возжиза́етъ грѣ́хъ, сни́зꙋ и҆мꙋ́щи ѕлосмра́дїе и҆ мра́къ: воздѣ́ловаетъ не́нависть и҆ ѿвраще́нїе блага́гѡ и҆́мже, пе́рстнымъ воѡбразꙋ́ющисѧ и҆ без̾ѡбра́знымъ ѡ҆́бразомъ ве́тхагѡ, тьма̀ всѧ́чески приближа́ющымсѧ быва́етъ: и҆ дѣ́ланїемъ ѕлы́хъ, и҆ бесѣ́дою растлѣва́етъ дꙋ́шы неле́стны и҆ неꙋтвержде́ны, и҆ подви́жетъ на бг҃а хꙋлꙋ̀. И҆ та́кѡ въ ни́хже ᲂу҆̀бо сме́ртїю постиже́на бꙋ́детъ дꙋша̀, и҆ воздаѧ́нїе по ра́венствꙋ ѡ҆брѣта́етъ.

л҃г. Воздѣ́лователь ѕлы́хъ мы́слей, мра́чны своѧ̑ твори́тъ и҆ дрѧ́хлы внѣ̑шнїѧ зра́ки, и҆ безгла́сенъ ѧ҆зы́къ и҆́мать бж҃е́ственныхъ пѣ́сней, и҆ неꙋдобосрѣ́тенъ є҆́сть всѣ̑мъ въ бесѣ́дꙋ. Воздѣ́латель же благи́хъ и҆ безсме́ртныхъ садѡ́въ се́рдца, радостовзо́рно и҆ возра́дованно и҆́мать лицѐ, сладкопѣ́снивъ же въ молє́нїѧ ѧ҆зы́къ сво́й, и҆ всего̀ себѐ въ бесѣ́дꙋ сладча́йша. Ꙗ҆́кѡ ꙗ҆вле́ннꙋ бы́ти и҆ быва́ти зрѧ́щымъ ѿсю́дꙋ до́брѣ и҆ самомꙋ̀ томꙋ̀ под̾ рабо́тою є҆щѐ нечи́стыхъ сꙋ́щемꙋ страсте́й, и҆ под̾ нꙋ́ждою зако́на сꙋ́щемꙋ земна́гѡ мꙋдрова́нїѧ: и҆ свобо́ждшемꙋсѧ таковы́ѧ рабо́ты, зако́номъ дꙋ́ха, по премꙋ́дромꙋ соломѡ́нꙋ: се́рдцꙋ веселѧ́щꙋсѧ, цвѣте́тъ лицѐ: въ печа́лехъ же сꙋ́щꙋ, сѣ́тꙋетъ¹²¹⁶.

л҃д. Дѣ́ѧтельнѣ соверша́ємыѧ стра̑сти, дѣ́ѧтельнѣ и҆ и҆сцѣлѧ́ютсѧ. Ꙗ҆́коже бо невоздержа́нїе сла́сть, и҆ ѡ҆б̾ѧде́нїе и҆ житїѐ неради́во и҆ разлїѧ́нно, ѡ҆стра́ственнѣйшее навыкнове́нїе соверша́ютъ въ дꙋшѝ, и҆ надѣ̑ѧнїѧ безмѣ̑стна тꙋ̀ ведꙋ́тъ: та́кѡ ᲂу҆тѣсне́нїе и҆ воздержа́нїе, трꙋды̀ и҆ по́двизи дꙋхо́внїи, безстра́стїе снабдѣва́ютъ є҆́й, и҆ ѿ пристра́стїѧ въ безстра́стїе тꙋ̀ приво́дѧтъ.

л҃є. Є҆гда̀, ѿ приболѣ́зненна кто̀ и҆ крѣ́пка подви́жничества, дарова́нїй вели́кихъ ѿ бг҃а смиренномꙋ́дрїемъ сподо́битсѧ, та́же низвлече́нъ бы́въ ѿѻнꙋ́дꙋ, страсте́мъ пре́данъ бꙋ́детъ и҆ бѣсѡ́мъ: наказа́телемъ да вѣ́сть себѐ возвы́сившасѧ, и҆ вели̑ка ѡ҆ себѣ̀ возмнѣ́вша, и҆ на и҆нѣ́хъ возне́сшасѧ. Ни ѿкꙋ́дꙋ же ᲂу҆̀бо ѿи́нꙋдꙋ таковы́й ѡ҆брѧ́щетъ и҆сцѣле́нїе и҆ свобожде́нїе ѿ содержа́щихъ живо́тъ є҆гѡ̀, ра́звѣ то́чїю ѡ҆ є҆́же востещѝ є҆мꙋ̀ покаѧ́нїемъ въ пе́рвое ᲂу҆строе́нїе, и҆ ᲂу҆потреби́ти хода́таѧ до́брѣ, смире́нїе и҆ позна́нїе свои́хъ мѣ́ръ: и҆́миже всѧ́къ стоѧ́й до́брѣ на ѡ҆снова́нїи добродѣ́телей, и҆́мать себѐ под̾ все́ю тва́рїю.

л҃ѕ. Ра́вно ѕло̀ є҆́сть пред̾ бг҃омъ и҆ человѣ́ки живꙋ́щими по бз҃ѣ, є҆́же и҆ встра́ственнꙋ комꙋ̀ бы́ти дѣѧ́нїи произволе́нїѧ неꙋдержа́нїемъ, и҆ возгордѣ́вшꙋсѧ въ добродѣ́телехъ дꙋ́хомъ мнѣ́нїѧ. И҆́мже бо ѡ҆́бразомъ пе́рвагѡ дѣ́ѧтельнѣ и҆ ѻ҆́тай быва́ющаѧ сра́мно є҆́сть и҆ глаго́лати: та́кѡ и҆ втора́гѡ возвыше́нїѧ се́рдца, ме́рзѡсти сꙋ́ть пред̾ бг҃омъ. И҆ ꙗ҆́коже ѻ҆́нъ ненави́димь є҆́сть бг҃ꙋ въ поко́й, за є҆́же бы́ти є҆мꙋ̀ пло́ть по бж҃е́ственномꙋ словесѝ: та́кѡ и҆ се́й пред̾ гдⷭ҇емъ нечи́стъ, за є҆́же бы́ти є҆мꙋ̀ го́рдꙋ.

л҃з. Не бо̀ є҆́же є҆́сть стра́сть, сїѐ и҆ дѣ́ѧтеленъ грѣ́хъ, но и҆́но сїѐ, и҆ дрꙋго́е ѻ҆́но. Про́чее стра́сть ᲂу҆́бѡ є҆́сть, въ дꙋшѝ дви́жимаѧ: дѣѧ́нїе же грѣха̀ въ тѣлесѝ зри́мое. Си́рѣчь, сластолю́бїе, сребролю́бїе и҆ славолю́бїе, стра́сти лю́ты сꙋ́ть дꙋшѝ: блꙋ́дъ же и҆ лихои́мство и҆ ѻ҆би́да, дѣѧ̑нїѧ грѣ̑шна пло́ти. Вожделѣ́нїе, ꙗ҆́рость, и҆ горды́нѧ стра̑сти сꙋ́ть дꙋшѝ, внѣ̀ є҆стества̀ си́ламъ є҆ѧ̀ дви́жꙋщымсѧ: прелюбодѣѧ́нїе же, и҆ ᲂу҆бі́йство, и҆ татьба̀, и҆ пїѧ́нство, и҆ а҆́ще что̀ и҆́но тѣ́ломъ содѣва́емо, дѣѧ̑нїѧ грѣ̑шна, и҆ люта̀ сꙋ́ть пло́ти.

л҃и. Трѝ сꙋ́ть пе́рвѣйшїи всѣ́хъ страсте́й нача̑льницы, и҆ трѝ ꙗ҆̀же на ни́хъ ѡ҆полчє́нїѧ, и҆ трѝ побѣжда́ющїи же си́хъ и҆ низлага́ющїи, новонача́льный, сре́днїй, соверше́нный, сластолю́бїѧ, сребролю́бїѧ и҆ славолю́бїѧ, трегла́внагѡ ѕмі́ѧ.

л҃ѳ. Не є҆ди́нъ и҆ то́йжде по́двигъ трїе́мъ над̾ тремѧ̀ нача́лами и҆ си́лами ѡ҆блада́ющагѡ дꙋ́ха, но и҆́нъ, и҆ и҆́нъ. И҆на́кѡ вою́емꙋ є҆ди́номꙋ и҆ є҆ди́номꙋ си́хъ нача́лꙋ, кі́имждо проти́внѡ бра́ни тогѡ̀ стоѧ́щымъ и҆ воѡрꙋжа́ющымсѧ є҆сте́ственнѣ пра́ведною ꙗ҆́ростїю.

м҃. И҆́же пе́рвѣе къ подвигѡ́мъ благоче́стїѧ совлекі́йсѧ и҆ вводи́мь сы́й ко ѡ҆полче́нїю на стра̑сти, на дꙋ́ха сластолю́бїѧ всю̀ взе́млетъ бра́нь свою̀, и҆ си́льнѣ всѧ́кимъ ѕлострада́нїемъ на́нь вою́етъ. Пло́ть ᲂу҆́бѡ неѧде́нїемъ и҆стаева́ѧ, до́лꙋ лега́нїемъ, бдѣ́нїемъ, и҆ всено́щными моле́нми: дꙋ́шꙋ же сокрꙋша́ѧ па́мѧтїю а҆́довыхъ томле́нїй, и҆ размышле́нїемъ сме́рти, и҆ се́рдце ѡ҆чища́ѧ ѿ скве́рны и҆ сочета́нїй и҆ сосложе́нїй слеза́ми покаѧ́нїѧ.

м҃а. И҆́же къ средѣ̀, нача́ла преложи́вый восхоже́нїе, и҆ по́двиги, и҆́же на сластолюби́ваго дꙋ́ха гꙋ́бою пе́рвагѡ безстра́стїѧ ѡ҆те́рый, ны́нѣ же ѻ҆чи́ма є҆гѡ̀ ѿкрове́но бы́сть, и҆ є҆стества̀ зрѣ́ти сꙋ́щихъ нача́вый: на дꙋ́ха невѣ́рнаго сребролю́бїѧ взе́млетъ ѻ҆рꙋ̑жїѧ вѣ́ры. Оу҆́мъ бо возвыша́ѧ сво́й полꙋче́нїемъ бж҃е́ственныхъ веще́й, сло́вомъ же прикаса́ѧсѧ словесє́мъ тва́ри, и҆ во є҆́же є҆стества̀ и҆́хъ ска́зовати ᲂу҆ѧснѧ́ѧ: дꙋ́шꙋ же возводѧ̀ вѣ́рою ѿ ви́димыхъ, на высѡты̀ неви́димыхъ, и҆ вѣ́рꙋѧ, самаго̀ бы́ти промышлѧ́юща ѡ҆ дѣ́лѣхъ свои́хъ, и҆́же ѿ небытїѧ̀ въ бытїѐ всѧ̀ приве́дшаго бг҃а, и҆ всю̀ наде́ждꙋ творѧ̀ бж҃е́ственныѧ жи́зни.

м҃в. И҆́же сре́дꙋ видѣ́нїемъ и҆ безстра́стїемъ преше́дый, и҆ преле́стное возни́кїй всемі́рнагѡ чꙋ́вства, ны́нѣ же сло́вомъ ра́зꙋма и҆ ѵ҆поста́сныѧ бж҃їѧ премꙋ́дрости, во мра́къ бг҃осло́вїѧ вше́дый, на дꙋ́ха славолю́бїѧ взе́млетъ си́лою смиренномꙋ́дрїѧ ѻ҆рꙋ́жїѧ. Дꙋ́шꙋ свѧще́нными ѿкрове́нми ᲂу҆милѧ́ѧ, и҆ сле́зы пролива́ти неболѣ́зненни творѧ̀: мꙋдрова́нїе же є҆ѧ̀ па́мѧтїю низздага́ѧ человѣ́ческїѧ не́мощи, и҆ возвыша́ѧ то̀ бж҃е́ственнагѡ ра́зꙋма разꙋмѣ́нїй.

м҃г. Поще́нми ᲂу҆́бѡ и҆ бдѣ́нми и҆ моли́твами, долꙋлега́нми же и҆ трꙋды̀ тѣле́сными, и҆ ѿсѣче́нїемъ во́лей во смире́нїи дꙋшѝ, недѣ́йственна содѣва́емъ дꙋ́ха сластолю́бїѧ. Є҆́млемъ же є҆го̀ слеза́ми покаѧ́нїѧ, и҆ ко ᲂу҆зи́лищи ведꙋ́ще воздержа́нїѧ, недви́жна сего̀ и҆ недѣ́йственна соверша́емъ, во тщали́выхъ, си́рѣчь, двиза́ющихсѧ стоѧ́ще ѡ҆полче́нїи.

м҃д. Вѣ́ры ѻ҆рꙋ́жїемъ и҆ мече́мъ дꙋхо́внымъ, и҆́же є҆́сть глаго́лъ бж҃їй, дꙋ́ха среролю́бїѧ побѣди́вше, закала́емъ: ны́нѣ къ видѣ́нїю сꙋ́щихъ сло́вомъ премꙋ́дрости восте́кше, и҆ превы́шше смире́нїѧ бы́вше ви́димыхъ сло́вомъ ра́зꙋма, и҆ въ ца́рскихъ домѣ́хъ любвѐ съ многобога́тными сокро́вищи наде́жды ꙗ҆́же на бг҃а внꙋ́трь почи́вше.

м҃є. Крилы̀ безстра́стїѧ и҆ смиренномꙋ́дрїѧ на воздꙋ́сѣ та́интвеннагѡ бг҃осло́вїѧ пла́вающе, и҆ въ го́рнюю глꙋбинꙋ̀ ра́зꙋма та́инъ бж҃їихъ съ бж҃е́ственнымъ дх҃омъ входѧ́ще, мо́лнїѧми бж҃е́ственныхъ догма́тъ и҆ разꙋмѣ́нїй, славолю́бїѧ попалѧ́емъ дꙋ́ха. Тꙋ́чами же слѣ́зъ и҆ рѣка́ми ᲂу҆миле́нїѧ на кончи̑ны человѣ́ческихъ веще́й зрѧ́ще, трїста́ты є҆гѡ̀ потоплѧ́емъ бѣ́сы, мнѣ́нїемъ и҆ тщесла́вїемъ и҆ горды́нею на ны̀ вою́ющыѧ.

м҃ѕ. И҆́же по́хоть плотскꙋ́ю, и҆ по́хоть ѻ҆че́съ, и҆ го́рдость жите́йскꙋю, мїрскі̑ѧ сїѧ̑ непра̑вды, и҆́хже любле́нїемъ вразѝ быва́емъ бг҃ꙋ, ѿ дꙋшѝ возненави́дѣвый, и҆ си́хъ ѿрекі́йсѧ: мі́рꙋ себѐ распѧ̀, и҆ то́й распѧ́сѧ є҆мꙋ̀, разори́въ бы́вшꙋю междꙋ̀ бг҃омъ и҆ дꙋше́ю враждꙋ̀ во пло́ти свое́й, и҆ сотвори́въ во ѻ҆бои́хъ ми́ръ: и҆́же бо си́мъ въ совлече́нїи плотска́гѡ мꙋдрова́нїѧ ᲂу҆мертви́выйсѧ, примири́сѧ съ бг҃омъ, ᲂу҆би́въ враждꙋ̀ мі́ра ᲂу҆мерщвле́нїемъ сласте́й, распѧ́тою мі́рови жи́знїю, и҆ любо́вь со і҆и҃сомъ лобыза̀. Не ктомꙋ̀ ᲂу҆̀бо таковы́й вра́гъ, ꙗ҆́кѡ дрꙋ́гъ мі́рови, но дрꙋ́гъ бж҃їй быва́етъ, ꙗ҆́кѡ распѧ́сѧ мі́рови, и҆ могі́й глаго́лати: мнѣ̀ мі́ръ распѧ́сѧ, а҆ а҆́зъ мі́рꙋ¹²¹⁷.

м҃з. Всѧ́кѡ подвиза́ющымсѧ попꙋще́нїе си́хъ ра́ди быва́ти ѡ҆бы́че: тщесла́вїѧ ра́ди, ѡ҆сꙋжде́нїѧ ра́ди ко бли́жнемꙋ, и҆ возноше́нїѧ ра́ди є҆́же ѡ҆ добродѣ́телехъ. А҆́ще ᲂу҆́бѡ что̀ ѿ си́хъ въ дꙋша́хъ подвиза́ющихсѧ прибли́жившисѧ предвари́тъ, ѿ бг҃а си́мъ ѡ҆ставле́нїѧ вино́ю быва́етъ. И҆ сегѡ̀ ᲂу҆́бѡ пра́веднагѡ ѡ҆ паде́нїихъ не и҆збѣжа́тъ сꙋда̀, до́ндеже предвари́вшꙋю винꙋ̀ ѡ҆ставле́нїѧ ѿве́ргше, къ хра́мꙋ смиренномꙋ́дрїѧ прибѣ́гнꙋтъ.

м҃и. Не бо̀ є҆́же не бы́ти чи́стꙋ ѿ встра́ственныхъ помышле́нїй, сїѐ є҆́сть то́чїю се́рдца нечистота̀, и҆ скве́рна дꙋшѝ: но и҆ є҆́же ѡ҆ мно́жествѣ и҆справле́нїй возноси́тисѧ, и҆ є҆́же ѡ҆ добродѣ́телехъ кичи́тисѧ, и҆ є҆́же ве́лїѧ мнѣ́ти себѐ ѡ҆ премꙋ́дрости и҆ ра́зꙋмѣ бж҃їи, и҆ є҆́же ᲂу҆корѧ́ти ѿ бра́тїи лѣни̑выѧ и҆ неради̑выѧ: и҆ ѻ҆но̀ ᲂу҆́бѡ ꙗ҆́вственно є҆́сть ѿ фарїсе́евы и҆ мытаре́вы при́тчи.

м҃ѳ. Не мнѝ ѿ страсте́й ѡ҆сла́бꙋ прїѧ́ти, и҆ бы́вшихъ ѿѻнꙋ́дꙋ стра́стныхъ помышле́нїй скве́рны и҆збѣжа́ти, го́рдо є҆щѐ и҆мы́й мꙋдрова́нїе и҆ надмѣва́ющеесѧ ѡ҆ добродѣ́телехъ. Не бо̀ ᲂу҆́зриши ми́ра до́мъ, во благосты́ни помыслѡ́въ, нижѐ во хра́мъ любвѐ вни́деши съ ра́достїю во всѧ́кой бла́гости и҆ тишинѣ̀ се́рдца, до́ндеже на себѐ надѣ́ешисѧ и҆ на дѣла̀ твоѧ̑.

н҃. А҆́ще къ благоша́рїємъ тѣле́съ привлека́етсѧ дꙋша̀ твоѧ̀ стра́стнѣ, и҆ а҆́кибы ѿ ражда́ющихсѧ ѿѻнꙋ́дꙋ къ тебѣ̀ стра́стныхъ помыслѡ́въ мꙋчи́тельствꙋема є҆́сть, не мнѝ сїѧ̑ бы́ти вины̀ сꙋ́щагѡ въ тебѣ̀ смꙋще́нїѧ и҆ пристра́стнагѡ сїѧ̑ бы́ти движє́нїѧ: но сокрове́ннꙋ вѣ́ждь бы́ти винꙋ̀ внꙋ́трь дꙋшѝ твоеѧ̀, ꙗ҆́коже нѣ́кїй ка́мень магни́тъ, влекꙋ́щꙋ къ себѣ̀ си́лою навыкнове́нїѧ стра́стнагѡ и҆ лꙋка́ва ѻ҆бы́чаѧ вре́дъ ѿ ли́цъ, ꙗ҆́коже желѣ́зо. Занѐ и҆ созда̑нїѧ бж҃їѧ сꙋ́ть всѧ̑, и҆ ѕѣлѡ̀ свои́мъ сло́вомъ дѡбра̀, ни є҆ди́но же сло́во порица́тельно и҆мꙋ́ща на творе́нїе бж҃їе.

н҃а. Ꙗ҆́коже преходѧ́щїи мо́ре и҆ блюю́щїи, не ѿ є҆стества̀ мо́рѧ стра́ждꙋтъ сїѐ, но ѿ є҆стества̀ внꙋтрьꙋ́дꙋ предхрани̑мыѧ вины̀ согни́вшихъ мокро́тъ: та́кѡ и҆ дꙋша̀ не ѿ вины̀ ли́цъ, но ѿ вины̀ внꙋ́трь сокрове́ннагѡ є҆щѐ навыкнове́нїѧ ѕла́гѡ, въ себѣ̀ пристра́стнѣйшее те́рпитъ колеба́нїе и҆ смꙋще́нїе.

н҃в. Согла́снѡ внꙋ́треннемꙋ настрое́нїю дꙋшѝ, и҆змѣнѧ́тисѧ ѡ҆бы́че и҆ са́мое є҆стество̀ веще́й. Є҆гда̀ ᲂу҆́бѡ по є҆стествꙋ̀ стоѧ́тъ въ не́й ᲂу҆́мнаѧ чꙋ̑вства, и҆ ᲂу҆́мъ ѡ҆ словесѣ́хъ бы́вшихъ тва́рей незаблꙋ́днѡ ше́ствꙋетъ, сло́во и҆мѣ́ѧ и҆з̾ѧснѧ́ющее є҆стества̑ и҆ движє́нїѧ си́хъ, по є҆стествꙋ̀ зрѧ́тсѧ є҆́й и҆ ве́щы и҆ ли́ца, и҆ всѧ́ко є҆стество̀ веще́ственныхъ тѣле́съ, и҆ неимꙋ́ща нѣ́кꙋю тлѝ и҆лѝ вре́да внꙋ́трь сокрове́ннꙋю винꙋ̀. Є҆гда́ же проти́вꙋ є҆стества̀ тоѧ̀ си́лы дви́жꙋтсѧ са́ми на себѐ крамо́льствꙋюще, проти́вꙋ є҆стества̀ то́й и҆ сїѧ̑ зрѧ́тсѧ: не є҆сте́ственною свое́ю добро́тою къ ᲂу҆разꙋмѣ́нїю родосодѣ́телѧ сїю̀ возводѧ́ща, но стра́ственнѣйшимъ навыкнове́нїемъ є҆ѧ̀ во глꙋбинꙋ̀ поги́бели низводѧ́ща.

н҃г. А҆́ще па́лъ є҆сѝ ѡ҆ста́вленъ бы́въ паде́нїемъ пло́ти, и҆лѝ ѧ҆зы́ка, и҆лѝ по́мысла, приболѣ́зненнѡ влекі́й и҆ жесточа́йше житїѐ, да не стра́нно и҆ ᲂу҆диви́тельно тебѣ̀ ꙗ҆ви́тсѧ: твое́ бо є҆́сть паде́нїе и҆ ѿ твоеѧ̀ вины̀. А҆́ще бо не бы̀ са́мъ и҆лѝ но́во что̀ пе́рвѣе и҆ надме́нїѧ и҆спо́лненно, ꙗ҆́коже не до́лжно бѧ́ше, возмнѣ́лъ є҆сѝ ѡ҆ себѣ̀, и҆лѝ возне́слсѧ є҆сѝ на и҆но́го кичи́тельнымъ мꙋдрова́нїемъ, и҆лѝ ѡ҆сꙋди́лъ є҆сѝ въ не́мощи є҆стества̀ человѣ́ческа кого̀, не бы̀ ѡ҆ста́вленъ бы́въ сꙋдо́мъ пра́веднымъ бж҃їимъ, свою̀ позна́лъ є҆сѝ не́мощь. Позна́лъ же є҆сѝ, да ѿсю́дꙋ наꙋчи́шисѧ не ѡ҆сꙋжда́ти и҆ не мꙋ́дрствовати па́че, є҆́же подоба́етъ мꙋ́дрствовати, нижѐ над̾ кѣ́мъ возноси́тисѧ.

н҃д. Па́дъ во глꙋбины̑ ѕѡ́лъ, ника́коже воззва́нїѧ да ѿча́ешисѧ, а҆́ще и҆ во глꙋбинꙋ̀ низведе́нъ бы́лъ є҆сѝ послѣ́днюю а҆́да ѕло́бы. А҆́ще бо дѣ́ѧтельными добродѣ́тельми предхрани́мо те́плѣ ѡ҆снова́нїе и҆́маши ᲂу҆ тебѐ благоче́стїѧ, а҆́ще и҆ паде́нїе пострада̀ поколеба́вшеесѧ со́зданное сегѡ̀ жили́ще тобо́ю ѿ разли́чныхъ ка́меней добродѣ́тели, да́же до помо́ста стра́ственнѣйшїѧ землѝ ѕѡ́лъ, но не забꙋ́детъ дре́внихъ твои́хъ трꙋдѡ́въ и҆ по́двигѡвъ бг҃ъ, а҆́ще сокрꙋше́нно ѡ҆ паде́нїихъ твои́хъ се́рдце и҆́маши, помина́ющо дни̑ дрє́внїѧ и҆ своѐ воззыва́ющо паде́нїе съ воздыха́нїи пред̾ ни́мъ. Призира́ѧ бо при́зритъ скорѣ́е на тѧ̀ трепе́щꙋща слове́съ є҆гѡ̀, и҆ прико́снетсѧ ѻ҆́чїю твоє́ю неви́димѡ печа́льнагѡ се́рдца, и҆ на предположе́нномъ тобо́ю ѡ҆снова́нїи добродѣ́тели съ трꙋда́ми поста́витъ, и҆ да́стъ тѝ па́че пре́жнїѧ крѣ́пости, лꙋ́чшꙋ же и҆ соверше́ннѣйшꙋ крѣ́пость, съ теплото́ю горѧ́щагѡ дꙋ́ха, во є҆́же па́ки возстѧжа́ти низложє́ннаѧ за́вистїю лꙋка́вагѡ, съ терпѣ́нїемъ дѣ́лъ добродѣ́тели, и҆ воздви́гнꙋти въ дꙋ́сѣ смире́нїѧ до́мъ є҆ѧ̀ пре́жнѧгѡ свѣтлѣ́йшїй, въ поко́й, по пи́санномꙋ, вѣ́ченъ є҆гѡ̀¹²¹⁸.

н҃є. Всѧ̑ къ безче́стїю на́мъ приключа̑ющаѧсѧ, и҆лѝ ѿ человѣ̑къ и҆лѝ ѿ бѣсѡ́въ, сꙋдо́мъ пра́веднымъ бж҃їимъ по смотре́нїю приключа́ютсѧ къ смире́нїю сꙋ́етнагѡ дме́нїѧ дꙋ́шъ на́шихъ. Намѣ́ренїе бо є҆́сть бг҃ови ѡ҆корми́телю жи́зни на́шеѧ, є҆́же при́снѡ смире́ннымъ на́мъ бы́ти, и҆ не мꙋ́дрствовати па́че є҆́же подоба́етъ мꙋ́дрствовати¹²¹⁹, но мꙋ́дрствовати въ цѣломꙋ́дрїи. Нижѐ мнѣ́ти вели̑ка ѡ҆ себѣ̀, но къ немꙋ̀ взира́ти, и҆ подража́ти тогѡ̀ по возмо́жности блаже́нномꙋ смире́нїю. Поне́же кро́токъ бѣ̀ и҆ смире́нъ се́рдцемъ, таковы́хъ и҆ на́съ бы́ти жела́етъ претерпѣ́вый за ны̀ сме́рть непра́веднꙋ же и҆ безче́стнꙋ. Ничто́же бо и҆́но та́кѡ любе́зно томꙋ̀ и҆ ᲂу҆своѧ́емо во всѧ́цѣй вои́стиннꙋ добродѣ́тели, и҆ могꙋ́щее ѿ гно́ища страсте́й возвыша́ти, ꙗ҆́коже кро́тость и҆ смире́нїе и҆ любо́вь ко бли́жнемꙋ. Си̑мъ же не сꙋ́щымъ съ на́ми дѣ́лающими добродѣ́тєли, всѐ дѣ́ланїе на́ше сꙋ́етно, и҆ ве́сь трꙋ́дъ подви́жничества безполе́зенъ и҆ непрїѧ́тенъ.

н҃ѕ. Вводи̑мымъ ᲂу҆̀бо въ добродѣ́тельное житїѐ, стра́хъ мꙋче́нїй содѣ́йствꙋетъ къ дѣ́ланїю за́повѣдей, и҆ ᲂу҆клоне́нїю ѿ ѕѡ́лъ. Пред̾ꙋспѣ́вшымъ же добродѣ́телїю къ видѣ́нїю сла́вы бж҃їѧ, и҆́нъ подо́бнѣ припослѣ́дствꙋетъ стра́хъ, ѕѣлѡ̀ сы́й тѣ́мъ стра́шенъ ѿ любвѐ чи́стый, и҆́же и҆ содѣ́йствꙋетъ си̑мъ въ пребыва́нїи непоколеби́мѡ стоѧ́ти любвѐ бж҃їѧ, боѧ́щымсѧ ѿ сеѧ̀ стра́шнѣйшагѡ поползнове́нїѧ: ѻ҆́нѣмъ ᲂу҆́бѡ па́дшымъ ѿ сꙋ́щагѡ въ рꙋцѣ̀ намѣ́ренїѧ, раскаѧва́ющымсѧ и҆ па́ки востаю́щымъ, пе́рвый стра́хъ припослѣ́дствꙋетъ со ᲂу҆пова́нїи благи́ми. Си́мъ же за́вистїю сꙋпоста́та погрѣши́вшымъ паде́нїемъ, ѿ высоты̀ видѣ́нїѧ бж҃їѧ, не а҆́бїе вторы́й послѣ́дꙋетъ: но мгла̀ нѣ́каѧ и҆ тьма̀ ѡ҆сѧза́ема тѣ́хъ прее́млетъ, и҆спо́лнь сꙋ́щи печа́ли и҆ болѣ́зней и҆ го́рести съ пе́рвымъ мꙋче́нїй стра́хомъ. И҆ а҆́ще не бы̀ гдⷭ҇ь саваѡ́ѳъ дни̑ ѻ҆́ны пресѣ́клъ несно́сныѧ сеѧ̀ болѣ́зни, не бы̀ спа́слсѧ всѧ́къ и҆спада́ѧй ѿтꙋ́дꙋ.

н҃з. Внегда̀ пребыва́тельнагѡ стра́ственныхъ пѡ́мыслъ стꙋже́нїѧ дꙋша̀ ѡ҆сла́бꙋ прїи́метъ, и҆ пла́мень мꙋчи́тель пло́ти ᲂу҆вѧ́нетъ, бꙋ́ди тогда̀ вѣ́дый наи́тїю бы́ти ст҃а́гѡ дх҃а въ ны̀, возвѣща́ющꙋ ѡ҆ставле́нїе пре́жде согрѣше́нныхъ, и҆ да́рꙋющꙋ на́мъ безстра́стїе. А҆ доне́лѣже воню̀ и҆́хъ ча́стымъ стꙋже́нїемъ ѡ҆щꙋща́етъ, и҆ подчрє́внаѧ распалѧ́ютсѧ пло́ти, дале́че вѣ́ждь, ѿ сеѧ̀ бы́ти благово́нїю ст҃а́гѡ дх҃а, и҆ всю̀ под̾ ᲂу҆́зами держи́мꙋ бы́ти нерѣши́мыми страсте́й же и҆ чꙋ́вствъ.

н҃и. Ви́дѣхъ под̾ со́лнцемъ, глаго́летъ премꙋ́дрый, мꙋ́жа непщева́вша себѐ мꙋ́дра бы́ти¹²²⁰, є҆го́же ви́дѣхъ и҆ а҆́зъ въ жи́зни человѣ́честѣй ᲂу҆пова́юща на дѣла̀ своѧ̑, и҆ вє́лїѧ мꙋ́дрствꙋюща ѡ҆ человѣ́честѣй премꙋ́дрости и҆ земно́й и҆ дꙋше́вной. И҆ не то́чїю сеѧ̀ ра́ди над̾ неле́стными взе́млющасѧ: но и҆ сꙋ́щымъ въ бж҃е́ственномъ поко́и ᲂу҆чи́телємъ хрⷭ҇тѡ́вымъ подсмѣва́ющасѧ же вкꙋ́пѣ и҆ рꙋга́ющасѧ за рече́нїѧ и҆́хъ грꙋбоѡбра́зность, и҆ занѐ не восхотѣ́ша послѣ́довати и҆збра́нїемъ ᲂу҆кра́шенныхъ рече́нїй внѣ́шнѧгѡ ра́зꙋма, нижѐ ѡ҆ благовчине́нїи положе́нїѧ и҆́хъ потща́шасѧ въ напи́санныхъ ᲂу҆че́нїихъ свои́хъ. Є҆мꙋ́же ꙗ҆́кѡ не ᲂу҆вѣ́дѣвшꙋ ꙗ҆́кѡ ᲂу҆бо́га, ни и҆зѡбрѣта́тели рече́нїй, ни благогла́сность гласѡ́въ, но благознамени́тельность предпочита́тельнѣйша є҆́сть и҆ любе́знѣйша разꙋмѣ́нїй. Сїю̀ прирекꙋ̀ при́тчꙋ: пе́съ живы́й, то́й бла́гъ па́че льва̀ ме́ртвагѡ¹²²¹: и҆, бла́гъ ѻ҆́трокъ ни́щъ и҆ мꙋ́дръ, па́че царѧ̀ ста́ра и҆ безꙋ́мна, и҆́же не разꙋмѣ̀ внима́ти є҆щѐ¹²²².

н҃ѳ. Люта̀ и҆ неꙋдобопобѣжда́ема є҆́сть стра́сть хꙋлы̀, и҆́мать же вины̀ ѿ го́рдыѧ мы́сли сатанины̀, ꙗ҆́же и҆ всѣ̑мъ ᲂу҆́бѡ по бз҃ѣ живꙋ́щымъ въ добродѣ́тели стꙋжа́етъ, мно́га же пред̾ꙋспѣва́ющымъ въ моли́твꙋ и҆ въ видѣ́нїе бж҃е́ственныхъ веще́й, є҆гѡ́же ра́ди подоба́етъ всѧ́цѣмъ хране́нїемъ чꙋ̑вства блюстѝ, и҆ благоговѣ́ѧти ѡ҆ всѣ́хъ стра́шныхъ та̑инъ бж҃їихъ, и҆ сщ҃е́нныхъ и҆зѡбраже́нїй и҆ слове́съ, и҆ внима́ти ѡ҆ наше́ствїи дꙋ́ха сегѡ̀: присѣди́тъ бо молѧ́щымсѧ и҆ пою́щымъ на́мъ, и҆ ѿрыга́етъ ѻ҆вогда̀ ᲂу҆стна́ми на́шими не внима́ющымъ, клѧ̑твы на ны̀ и҆ хꙋлы̑ неподѡ́бны на бг҃а вы́шнѧго, стїхо́мъ ѱалмѡ́въ и҆ глаго́ломъ мл҃твы приводѧ̀ ты̑ѧ, но ѡ҆браща́ти подоба́етъ на́нь сло́во хрⷭ҇то́во, внегда̀ таково̀ что̀ прино́ситъ во ᲂу҆стнѣ̀, и҆лѝ подсѣва́етъ въ мы̑сли на́шѧ. И҆, и҆дѝ за мно́ю сатано̀, рце́мъ къ немꙋ̀, всѧ́кагѡ ѕлосмра́дїѧ и҆спо́лненне и҆ пови́нне ѻ҆гню̀ вѣ́чномꙋ: на главꙋ̀ твою̀ хꙋла̀ твоѧ̀ да бꙋ́детъ: и҆ а҆́бїе ᲂу҆́мъ ѡ҆ и҆но́й ко́ей ве́щи бж҃е́ственной и҆лѝ чл҃вѣ́ческой ны́нѣ плѣне́нїемъ ᲂу҆праздни́мъ, и҆лѝ и҆ со слеза́ми къ небесє́мъ тогѡ̀, и҆ къ бг҃ꙋ возвы́симъ: и҆ та́кѡ, бг҃ꙋ помога́ющꙋ на́мъ, и҆зба́вимсѧ ѿ тѧготы̀ хꙋ́льныѧ.

ѯ҃. Тлѣтво́рна є҆́сть стра́сть печа́ль въ дꙋшѣ̀ и҆ тѣ́лѣ, и҆ самѣ́хъ каса́ющаѧсѧ мозгѡ́въ. Но ꙗ҆́же є҆́сть мі́ра сегѡ̀ привре́менныхъ ра́ди человѣ́кѡмъ прикаса́ющаѧсѧ, ꙗ҆́же мно́жицею тѣ̑мъ и҆ сме́рти вино́вна быва́етъ. Печа́ль же по бз҃ѣ, спаси́тельна же вкꙋ́пѣ, и҆ ѕѣлѡ̀ поле́зна сꙋ́щи, терпѣ́нїе въ болѣ́знехъ и҆ и҆скꙋше́нїѧхъ содѣ́ловаетъ, и҆сто́чникъ ᲂу҆миле́нїѧ разширѧ́ющи подвиза́ющемꙋсѧ, и҆ жа́ждꙋщемꙋ пра́вды бж҃їѧ, и҆ пита́ющи слеза́ми се́рдце є҆гѡ̀, ꙗ҆́коже и҆сполнѧ́тисѧ дв҃довꙋ на ѻ҆́нѣхъ словесѝ: Напита́еши на́съ, глаго́летъ, хлѣ́бомъ сле́знымъ, и҆ напои́ши на́съ слеза́ми въ мѣ́рꙋ, вїно́мъ ᲂу҆миле́нїѧ¹²²³.

ѯ҃а. Снизпа́дшїѧ ча́сти дꙋшѝ ѿ ѕлы́хъ дѣ́ланїѧ, ѕѣлѡ̀ ꙗ҆́же по бз҃ѣ печа́ль востѧжава́етъ, и҆ во є҆́же по є҆стествꙋ̀ воззыва́етъ. Толи́кѡ бо зи́мꙋ страсте́й, и҆ ѻ҆́блаки грѣха̀ и҆стончава́етъ слеза́ми, и҆ ѿ мы́сленнагѡ дꙋшѝ ѿгонѧ́етъ воздꙋ́ха, ꙗ҆́кѡ ве́дрꙋ въ по́мыслѣхъ а҆́бїе ᲂу҆ма̀ на́шегѡ быва́ти, и҆ тишинѣ̀ въ мо́ри мы́сли, и҆ весе́лїю въ сердца́хъ на́шихъ, и҆ и҆змѣне́нїю на ꙗ҆вле́нїи лица̀ на́шегѡ: на не́же до́брѣ зрѧ́щїи, ꙗ҆́коже зра́ки и҆ завѣща́нїѧ своѧ̑ прїꙋпокоѧ́юще та́кѡ по дв҃дꙋ взыва́ютъ: сїѧ̀ и҆змѣ́на десни́цы вы́шнѧгѡ¹²²⁴.

ѯ҃в. Не прїе́мли ѿ мнѣ́нїй подвсѣва́ємыѧ тѝ по́мыслы на бли́жнѧго: сꙋ́ть бо ло́жни и҆ гꙋби́тельни, и҆ всѧ́чески прельсти́тельни. Вѣ́ждь ᲂу҆̀бо, ꙗ҆́кѡ си́мъ намѣ́ренїемъ покꙋша́ютсѧ бѣ́сове въ ро́въ поги́бели ври́нꙋти дꙋ́шы творѧ́щихъ ᲂу҆жѐ предспѣ̑ѧнїѧ въ добродѣ́телехъ: и҆́нагѡ бо во глꙋбинꙋ̀ ѡ҆сꙋжде́нїѧ и҆ грѣха̀ дѣ́ѧтельна ѿ подвиза́ющихсѧ кого̀ воврещѝ не мо́гꙋтъ, а҆́ще не повинꙋ́тъ того̀ прїѧ́ти подзрѣва̑нїѧ лꙋка̑выѧ ѿ внѣ́шнихъ нра́вѡвъ же и҆ ᲂу҆строе́нїй бли́жнѧгѡ. Та́кѡ бо под̾ сꙋдо́мъ и҆ паде́нїемъ грѣха̀ сегѡ̀ сотво́рше, соѡсꙋди́тисѧ съ мі́ромъ дѣ́лаютъ, по преподо́бномꙋ словесѝ: а҆́ще бо бы́хомъ себѐ, глаго́летъ писа́нїе, разсꙋжда́ли, не бы́хомъ ѡ҆сꙋжде́ни бы́ли: сꙋди́ми же ѿ гдⷭ҇а наказꙋ́емсѧ, да не съ мі́ромъ ѡ҆сꙋ́димсѧ¹²²⁵.

ѯ҃г. Є҆гда̀ ѿ ᲂу҆ны́нїѧ мѣ́сто дади́мъ бѣсовѡ́мъ глаго́лати во ᲂу҆́хо на́ше, ꙗ҆̀же на бра́тїю на́шꙋ подозрѣ̑нїѧ, не хранѧ́щесѧ си́рѣчь ѡ҆ движе́нїихъ ѻ҆́чїю, тогда̀ и҆ во є҆́же ѡ҆сꙋжда́ти поꙋща́еми є҆смы̀ ѿ ни́хъ, ѻ҆вогда̀ и҆ соверше́нныхъ добродѣ́телїю. А҆́ще бо радостовзо́рнѣ зрѧ́й ѡ҆склаблѧ́ющимсѧ лице́мъ, и҆ ᲂу҆добопристꙋ́пный всѣ̑мъ въ бесѣ́дꙋ сосложи́теленъ къ сласте́мъ и҆ страсте́мъ тебѣ̀ мни́тсѧ, да бꙋ́детъ тѝ всѧ́къ и҆ сѣ́тованнѡ зрѧ́й и҆ дрѧ́хлѡ, ꙗ҆́ростїю дыха́ѧ и҆ горды́ни и҆спо́лненъ. Но не подоба́етъ человѣ́чєскимъ внима́ти сво́йствамъ, погрѣ́шенъ бо є҆́сть всѣ́ми, и҆́же ѡ҆ таковы́хъ сꙋ́дъ. Сꙋ́ть бо человѣ́кѡмъ мнѡ́га вои́стиннꙋ разли̑чїѧ є҆сте́ствъ и҆ навыкнове́нїй и҆ тѣле́сныхъ положе́нїй, ꙗ҆̀же є҆ди́нѣмъ ѻ҆́нѣмъ въ лѣ́потꙋ сꙋ́ть под̾ видѣ́нїемъ и҆ сꙋдо́мъ и҆́стиннымъ чи́стѡ стѧжа́вшымъ ᲂу҆́мное ѻ҆́ко дꙋшѝ мно́гимъ ᲂу҆миле́нїемъ, и҆ все́льника и҆мꙋ́щымъ безконе́чный свѣ́тъ бж҃е́ственныѧ жи́зни: и҆̀мже и҆ вѣ́дѣти дано̀ є҆́сть та̑йны црⷭ҇твїѧ бж҃їѧ.

ѯ҃д. Самодѣ́лателїе ѕлы́хъ дѣ́лъ быва́юще пло́ти, сꙋ́щемꙋ проти́вꙋ є҆стества̀ жела́нїю и҆ ꙗ҆́рости дꙋше́внѣй слꙋ́жимъ: пло́ть ᲂу҆́бѡ сквернѧ́ще ѕлы́ми тече́нїи грѣха̀, дꙋ́шꙋ же го́рестїю ꙗ҆́рости помрача́юще, и҆ ѿчꙋжда́ющесѧ сн҃а бж҃їѧ. Подоба́етъ про́чее скве́рнꙋ ᲂу҆́бѡ сꙋще́ственнагѡ ѿ тѣлесѐ тече́нїѧ, пото́ки сꙋще́ственныхъ сле́зъ ѡ҆чища́ти. Да є҆́же сла́сть тече́нїемъ є҆сте́ственнымъ ѡ҆сквернѝ тѣ́ло, сїѐ болѣ́знь печа́ли тече́нїемъ па́ки сле́зъ є҆сте́ственнымъ ѡ҆чища́етъ. Мра́къ же дꙋшѝ, и҆́же ѿ го́рести ꙗ҆́ростныѧ свѣ́томъ ᲂу҆миле́нїѧ и҆ сла́достїю любвѐ, ꙗ҆́же по бз҃ѣ, ѿгонѧ́ти и҆ соединѧ́тисѧ па́ки съ тѣ́мъ, ѿ негѡ́же пе́рвѣе ѻ҆́нѣми ѿчꙋжди́хомсѧ.

ѯ҃є. Ꙗ҆́коже скве́рна, ꙗ҆́же ѿ сла́сти сатани́нское раче́нїе предвари́вшее и҆́мать во и҆сполне́нїе ѕло́бы: та́кѡ и҆ ѡ҆чище́нїе, є҆́же ѿ болѣ́зненныѧ печа́ли, теплотꙋ̀ и҆́мать покаѧ́нїѧ предварѧ́ющꙋю во и҆сполне́нїе пла́ча и҆ сле́зъ. И҆ сїѐ смотре́нїе є҆́сть, ꙗ҆́же къ на́мъ бж҃їѧ бла́гости, да трꙋды̀ болѣ́зненными трꙋ́дъ сла́сти, и҆ тече́нїи сле́зъ тече́нїе стꙋ́днѣйшее пло́ти ѿража́юще же и҆ ѡ҆чища́юще, и҆з̾ѡбражє́нїѧ ѕлы́хъ ѿ ᲂу҆ма̀, и҆ без̾ѡбра̑зныѧ ѡ҆́бразы ѿ дꙋшѝ безвѣ̑стны сотвори́мъ, и҆ свѣтлѣ́йшꙋ сїю̀ добро́тою є҆сте́ственною пока́жемъ.

ѯ҃ѕ. И҆́мже ѡ҆́бразомъ лꙋка́вымъ дꙋ́хомъ дѣ́йствꙋемь блꙋдѧ́й, мздꙋ̀ ѡ҆б̾е́млетъ сла́сть плотскꙋ́ю, и҆ коне́цъ тоѧ̀ ѕлы́хъ, скве́рна. Та́кѡ, и҆́же дх҃омъ свы́ше дѣ́йствꙋемый ст҃ы́мъ, мздꙋ̀ ѡ҆б̾е́млетъ ра́дость дꙋше́внꙋю: и҆ коне́цъ тогѡ̀ до́брыхъ, є҆́же ѿ сле́зъ ѡ҆чище́нїе и҆ порожде́нїе, и҆ є҆́же къ бг҃ꙋ соедине́нїе и҆ сопрѧже́нїе.

ѯ҃з. Двꙋ́мъ сꙋ́щымъ въ на́съ, ѿ тогѡ́жде сꙋщества̀, є҆сте́ствєннымъ тече́нїємъ сѣ́мене и҆ сле́зъ, и҆́мже на ри́зѣ дꙋше́внѣй ѡ҆сквернѧ́емсѧ, и҆ и҆́миже па́ки на то́й ѡ҆чища́емсѧ: нꙋ́жда є҆́сть сꙋ́щꙋю ѿ сꙋщества̀ на́шегѡ скве́рнꙋ ѡ҆мы́ти дви́жимыми ѿ тогѡ́жде сꙋщества̀ слеза́ми: и҆́накѡ бо сꙋ́щꙋю ѿ є҆стества̀ скве́рнꙋ ѡ҆чи́стити не возмо́жно.

ѯ҃и. Всѧ́ко дꙋшѝ согрѣша́ющїѧ ᲂу҆строе́нїе, ѕло́бою дви́жимо нра́вѡвъ, въ сла́сти кра́тцѣй разорѧ́етъ трꙋ́дъ: всѧ́ка же ѡ҆чища́ема дꙋша̀ ѕла́гѡ ѡ҆бы́чаѧ и҆ ᲂу҆строе́нїѧ, въ до́лгꙋ сла́сть весе́лїѧ простира́етъ трꙋды̀. И҆ чꙋ́до, ка́кѡ сла́сть, сла́сть ᲂу҆кроща́ющи, ражда́емꙋю ѿ сла́сти ᲂу҆слажда́етъ болѣ́знь.

ѯ҃ѳ. Ѻ҆вогда̀ ᲂу҆́бѡ го́ресть и҆ болѣ́знь прибыва́етъ ᲂу҆́мномꙋ се́рдца чꙋ́вствꙋ ѿ тече́нїѧ сле́зъ, ѻ҆вогда́ же весе́лїе и҆ ра́дованїе. Є҆гда̀ ᲂу҆́бѡ ѡ҆чища́емсѧ покаѧ́нїемъ ржѝ, и҆ скве́рны грѣха̀ теплото́ю ѻ҆гнѧ̀, подѡ́бны и҆мꙋ́ще ѿ сегѡ̀ сле́зы ѿ бж҃е́ственнагѡ ѻ҆гнѧ̀ разжига́еми, и҆ а҆́кибы млаты̑ тѧ́жкими на по́мыслѣ ᲂу҆ѧзвлѧ́еми, возсыла́еми и҆з̾ глꙋбины̀ воздыха́нїи серде́чными, го́рести и҆ бѡлѣ́зни ᲂу҆́мнѣ же и҆ чꙋ́вственнѣ ѡ҆щꙋща́емъ. Внегда́ же сицевы́ми дово́льнѣ ѡ҆чи́щшесѧ слеза́ми, въ свобо́дꙋ дости́гнемъ страсте́й, тогда̀ ѿ бж҃е́ственнагѡ ᲂу҆тѣша́еми дх҃а, ꙗ҆́кѡ ти́хо и҆ чи́сто се́рдце стѧжа́вшїи, сла́сти и҆ ра́дости неизрече́нныѧ и҆сполнѧ́емсѧ ѿ радостотво́рныхъ сле́зъ ᲂу҆миле́нїѧ.

ѻ҃. И҆́ны сле́зы сꙋ́ть, ꙗ҆̀же ѿ покаѧ́нїѧ, и҆ и҆́ны ꙗ҆̀же ѿ бж҃е́ственна пролива́ємыѧ ᲂу҆миле́нїѧ. Занѐ ѻ҆́во ᲂу҆́бѡ ꙗ҆́кѡ рѣка̀ потоплѧ́ющи и҆ низвлача́щи всѧ̑ грѣха̀ тверды̑ни: ѻ҆́вы же, ꙗ҆́кѡ тꙋ́ча на трѡ́стїѧ прихо́дѧтъ въ дꙋ́шꙋ, и҆ ꙗ҆́кѡ и҆́ней на сѣ́но: кла́съ ра́зꙋма воспитова́юще, и҆ плодови́та сего̀, и҆ плодоно́сна соверша́юще.

ѻ҃а. Не бо̀ є҆́же є҆́сть слеза̀, сїѐ и҆ ᲂу҆миле́нїе, но мно́го посре́дство сле́зъ и҆ ᲂу҆миле́нїѧ. Занѐ ѻ҆́ва ᲂу҆́бѡ ѿ раска́ѧнїѧ нра́вѡвъ, и҆ па́мѧти дре́внихъ дꙋшѝ паде́нїй прихо́дитъ, ꙗ҆́кѡ ѿ ѻ҆гнѧ̀ и҆ горѧ́щїѧ воды̀ ѡ҆чище́нїе се́рдца. Ѻ҆́во же, свы́ше ѿ бж҃е́ственныѧ росы̀ дꙋ́ха, во ᲂу҆тѣше́нїе и҆ прохлажде́нїе схо́дитъ дꙋшѝ, но́во во глꙋбинꙋ̀ смиренномꙋ́дрїѧ те́плѣ вше́дшїѧ, и҆ наслажда́ющїѧсѧ видѣ́нїй непристꙋ́пнагѡ свѣ́та, и҆ къ бг҃ꙋ си́це вопїю́щїѧ дв҃дски съ ра́достїю: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й¹²²⁶.

ѻ҃в. Слы́шахъ глаго́лющихъ: не мо́щно комꙋ̀ въ навыкнове́нїе прїитѝ добродѣ́тели без̾ ѿше́льствїѧ дале́ка, и҆ бѣ́гства въ пꙋсты́ню, и҆ ᲂу҆диви́хсѧ, ка́кѡ неѡпредѣле́нное и҆зво́лисѧ тѣ̑мъ въ мѣ́стѣ ѡ҆предѣлѧ́ти. А҆́ще бо навыкнове́нїе добродѣ́тели, возпоставле́нїе є҆́сть си́лъ дꙋше́вныхъ въ дре́внее благоро́дство, и҆ вкꙋ́пѣ собра́нїе пе́рвѣйшихъ добродѣ́телей въ дѣ́йство є҆́же по є҆стествꙋ̀. Сїѧ̑ же ѿ внѣꙋ́дꙋ а҆́ки привводи̑ма, къ на́мъ прибыва́ютъ, но сꙋ́ть съ на́ми ѿ содѣ́тельства бж҃е́ственнымъ и҆ ᲂу҆́мнымъ чꙋ́вствомъ: и҆́миже и҆ съ ни́ми же по є҆стествꙋ̀ дви́жими, вхо́димъ въ ца́рствїе небе́сное. А҆́ще же внꙋ́трь на́съ є҆́сть по гла́сꙋ гдⷭ҇ню: ᲂу҆̀бо и҆зли́шнѧѧ ве́щь є҆́сть пꙋсты́нѧ, входѧ́щымъ на́мъ въ нѐ и҆ без̾ тоѧ̀ покаѧ́нїемъ и҆ всѧ́цѣмъ хране́нїемъ за́повѣдей бж҃їихъ. Є҆́же и҆ на всѧ́комъ мѣ́стѣ влады́чества є҆гѡ̀ по бж҃е́ственномꙋ дв҃дꙋ мо́жетъ бы́ти: бл҃гослови́ бо, глаго́летъ, дꙋшѐ моѧ̀, гдⷭ҇а на всѧ́комъ мѣ́стѣ влады́чества є҆гѡ̀¹²²⁷.

ѻ҃г. И҆́же посредѣ̀ ца́рскагѡ ѡ҆полче́нїѧ под̾ воево́дами и҆ чинонача́льники защища́емый же и҆ вчинѧ́емый, не возмогі́й во бра́ни сꙋпоста́тѡвъ дерзнове́ннѡ что̀, и҆ хра́брѡ на сꙋпоста́ты показа́ти, и҆лѝ понѐ є҆ди́нагѡ ѿ си́хъ побѣди́ти, ка́кѡ є҆динора́товати и҆́мать, и҆ посредѣ̀ мно́гихъ тє́мъ врагѡ́въ воево́дственно нѣ́кое дѣ́ло пока́жетъ неискꙋ́сенъ сы́й во бра́ни; А҆́ще же сїѐ въ человѣ́ческихъ не возмо́жно є҆́сть: мно́гѡ па́че въ бж҃е́ственныхъ. Кто́ бо въ пꙋсты́ню бѣжа́въ натечє́нїѧ бѣсѡ́въ, и҆ страсте́й нашє́ствїѧ, безвѣ̑стнаѧ и҆ проѧвлє́ннаѧ позна́етъ: и҆лѝ нападе́нїе сотвори́тъ на тѣ́хъ, не пе́рвѣе до́брѣ ѡ҆бꙋчи́всѧ ѿсѣче́нїѧ во́ли посредѣ̀ собо́ра бра́тїй, под̾ и҆скꙋ́снымъ началовожде́мъ таковы́ѧ бра́ни, неви́димыѧ вои́стиннꙋ и҆ мы́сленныѧ; А҆́ще же сїѐ не возмо́жно є҆́сть, ᲂу҆̀бо ѿню́дъ не возмо́жно є҆́сть, ꙗ҆́кѡ да и҆нѣ́хъ таковы́й побѣди́тъ, и҆ и҆нѣ́хъ наꙋ́читъ на неви̑димыѧ врагѝ побѣ́дамъ.

ѻ҃д. Ѿимѝ ѿ себѐ поно́съ нерадѣ́нїѧ, и҆ ᲂу҆ничиже́нїе презрѣ́нїѧ за́повѣдей бж҃їихъ: ѿве́ржи самолю́бїе, и҆ на пло́ть неща́днѡ ᲂу҆стреми́сѧ: взыщѝ ѡ҆правда́нїй гдⷭ҇нихъ и҆ свидѣ́нїй є҆гѡ̀: пренебрезѝ сла́вꙋ и҆ безче́стїе: возненави́ждь сла̑стнаѧ похотѣ̑нїѧ тѣлесѐ: бѣжѝ сы́тости, є҆́юже подчрє́внаѧ распалѧ́ютсѧ: лобжѝ ᲂу҆бо́жество, ѕлострада́нїе: ста́ни проти́вꙋ страсте́й: ѡ҆братѝ чꙋ̑вства твоѧ̑ ко внꙋ́трєннимъ дꙋшѝ: воззрѝ внꙋ́трь къ дѣ́ланїю лꙋ́чшагѡ: ѡ҆гло́хни ѿ человѣ́ческихъ веще́й: и҆стощѝ всю̀ твою̀ крѣ́пость на дѣ́ланїе за́повѣдей: пла́чи, долꙋлега́й, пости́сѧ, ѕлопостраждѝ, безмо́лвствꙋй, ᲂу҆вѣ́ждь коне́чное, не ꙗ҆̀же ѡ҆ тебѣ̀, но самаго̀ себѐ: превы́шше смире́нїѧ ви́димыхъ бꙋ́ди: прострѝ ᲂу҆́мное твоѐ ѻ҆́ко къ видѣ́нїю бж҃їю, и҆ ви́ждь сла́дость гдⷭ҇ню ѿ добро́ты созда́нїй. И҆ ѿтꙋ́дꙋ сше́дъ повѣ́ждь бра́тїи твое́й, ꙗ҆̀же вѣ́чныѧ жи́зни, и҆ та̑йны црⷭ҇твїѧ бж҃їѧ. И҆ сѐ є҆́сть дѣ́ло бѣ́гства ѿ человѣ̑къ соверше́ннымъ прилѣжа́нїемъ, и҆ коне́цъ є҆́же въ пꙋсты́ни пребыва́нїѧ.

ѻ҃є. А҆́ще хо́щеши ᲂу҆ви́дѣти блага̑ѧ, ꙗ҆̀же ᲂу҆гото́ва бг҃ъ лю́бѧщымъ є҆го̀, въ пꙋсты́ни бꙋ́ди ѿверже́нїѧ своеѧ̀ во́ли и҆ бѣжѝ мі́ра. Кото́рагѡ же сегѡ̀; По́хоти ѻ҆че́съ, пло́ти, го́рдости по́мыслѡвъ, и҆ пре́лести ви́димыхъ. Сегѡ́ бо а҆́ще бѣжи́ши мі́ра, ра́нѡ возсїѧ́етъ на тѧ̀ свѣ́тъ¹²²⁸, ᲂу҆зрѣ́нїемъ бж҃е́ственныѧ жи́зни, и҆ и҆сцѣлє́нїѧ дꙋшѝ твоеѧ̀, глаго́лю же, сле́зы ско́рѡ возсїѧ́ютъ, и҆ и҆змѣне́нїемъ и҆змѣни́шисѧ десни́цы вы́шнѧгѡ, и҆ ра́на ѿто́лѣ страсте́й не прибли́житсѧ тѣлесѝ твоемꙋ̀¹²²⁹. И҆ та́кѡ посредѣ̀ мі́ра и҆ люде́й пребыва́ѧ, бꙋ́деши ꙗ҆́кѡ въ пꙋсты́ни живꙋ́щъ, и҆ человѣ́ка не ви́дѧ. А҆́ще ли же сегѡ̀ не та́кѡ бѣжи́ши мі́ра, ничто́же тебѣ̀ ѿ бѣ́гства є҆ди́нагѡ ви́димагѡ мі́ра къ соверше́нствꙋ добродѣ́телей и҆ соедине́нїю бж҃їю прибꙋ́детъ.

ѻ҃ѕ. Є҆́же бы́ти и҆́нокꙋ, не є҆́же внѣ̀ человѣ̑къ и҆ мі́ра бы́ти є҆́сть: но є҆́же ѡ҆ста́вити себѐ, внѣ̀ по́хотей пло́ти бы́ти, и҆ пойтѝ въ пꙋсты́ню страсте́й. А҆́ще бо и҆ къ вели́комꙋ ѻ҆́номꙋ рече́сѧ: бѣ́гай человѣ̑къ, и҆ спасе́шисѧ, но си́мъ ѡ҆́бразомъ рече́сѧ: занѐ и҆ по є҆́же бѣжа́ти ѻ҆́номꙋ, посредѣ̀ человѣ̑къ водворѧ́шесѧ, и҆ въ населє́ннаѧ приходѧ̀ бѣ̀, и҆ со ᲂу҆ченикѝ живѧ́ше: но мы́сленнымъ бѣ́гствомъ въ чꙋ́вственномъ спѣ́шнѡ бѣжа́въ, ничто́же ѿ человѣ́ческагѡ сочета́нїѧ поврежда́шесѧ: сїе́ же и҆ и҆́нъ нѣ́кто ѿ вели́кихъ вопїѧ́ше ѿ собра́нїѧ и҆сходѧ̀: бѣ́гайте бра́тїе, на ᲂу҆ста̀ пока́зоваше, вопроша́емь вины̀.

ѻ҃з. Є҆́же вкꙋ́пѣ во ѻ҆бщежи́тїи житїѐ, ᲂу҆едине́нїѧ є҆́сть ᲂу҆твержде́ннѣйше: занѐ ѡ҆ нꙋ́жднѣмъ ᲂу҆́бѡ є҆́же вкꙋ́пѣ житїѧ̀, свидѣ́тель є҆́сть свѧще́нное сло́во і҆и҃са и҆ бг҃а: и҆дѣ́же бо є҆ста̀ два̀ и҆лѝ трїѐ со́брани, глаго́летъ, во и҆́мѧ моѐ, тꙋ̀ є҆́смь посредѣ̀ и҆́хъ¹²³⁰. Ѡ҆ прибѣ́дственности же ᲂу҆едине́нїѧ соломѡ́нъ, го́ре є҆ди́номꙋ, глаго́летъ, ꙗ҆́кѡ, є҆гда̀ паде́тъ, нѣ́сть воздви́жай є҆го̀¹²³¹. И҆́бо въ любвѝ и҆ є҆диномы́слїи бг҃а пою́щихъ, и҆ даві́дъ ᲂу҆блажа́етъ: блаже́ни, вопїѧ̀, лю́дїе вѣ́дꙋщїи воскликнове́нїе¹²³². И҆ є҆́же вкꙋ́пѣ житїѐ похвалѧ́етъ, глаго́лѧ: сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ¹²³³; И҆ во ᲂу҆ченицѣ́хъ гдⷭ҇нихъ, є҆ди́на бѣ̀ въ ни́хъ дꙋша̀ и҆ се́рдце¹²³⁴. Но и҆ є҆́же къ на́мъ бж҃їе соше́ствїе, не въ пꙋсты́ни бы́сть, но въ населе́нныхъ и҆ посредѣ̀ человѣ̑къ грѣ́шныхъ. Нꙋ́жно ᲂу҆̀бо є҆́сть є҆диномы́слїе, є҆́же вкꙋ́пѣ жи́зни: погрѣ́шно же ᲂу҆едине́нїе и҆ прибѣ́дственно.

ѻ҃и. Нꙋ́жда (є҆́сть) прїитѝ собла́знѡмъ, глаго́летъ гдⷭ҇ь, но го́ре томꙋ̀, и҆́мже собла́знъ прихо́дитъ¹²³⁵. И҆́же ᲂу҆́бѡ благоговѣ́нїе погꙋби́вый, и҆ съ пренебреже́нїемъ и҆ безстра́шїемъ бж҃їимъ посредѣ̀ собо́ра бра́тїй пребыва́ѧй, мнѡ́гимъ ѿ простѣ́йшихъ дае́тъ собла́зны. Ѻ҆́во ᲂу҆́бѡ дѣ́лы, и҆ ѡ҆́бразы, и҆ ѕлѣ́йшими нра̑вы: ѻ҆́во же словесы̑ и҆ бесѣ́дою растлѣ́нною, и҆ растлѣва́етъ дꙋ́шы и҆ нра́вы бла́ги и҆ добры̀.

ѻ҃ѳ. Блюды́й за́пѡвѣди бж҃їѧ, не ка́мень собла́зна быва́етъ человѣ́кѡмъ, занѐ нижѐ собла́знъ є҆́сть въ не́мъ: ми́ръ бо мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна¹²³⁶: но свѣ́тъ, и҆ со́ль и҆ жи́знь, по гдⷭ҇ню гла́сꙋ: вы̀ є҆стѐ свѣ́тъ мі́ра, и҆ со́ль жи́зни¹²³⁷. Свѣ́тъ ᲂу҆́бѡ, ꙗ҆́кѡ житїе́мъ добродѣ́теленъ, и҆ свѣ́телъ сло́вомъ, и҆ премꙋ́дръ ᲂу҆мо́мъ: со́ль же, ꙗ҆́кѡ въ ра́зꙋмѣ бж҃е́ственномъ мно́гъ, и҆ си́ленъ въ премꙋ́дрости бж҃їей. Жи́знь же, ꙗ҆́кѡ глаго́лы бесѣ́ды своеѧ̀ животворѧ́й ᲂу҆мерщвле́нныхъ страстьмѝ, и҆ си́хъ ѿ а҆́да возставлѧ́ѧй ѿча́ѧнїѧ, и҆ свѣ́томъ ᲂу҆́бѡ дѣ́лъ свои́хъ пра́вды сїѧ́ѧй пред̾ человѣ́ки, и҆ просвѣща́ѧй и҆̀хъ. Сла́достїю же и҆ те́рпкостїю слове́съ, востѧга́ѧй тѣ́хъ ѿ разслабле́нїѧ, и҆ и҆збавлѧ́ѧй ѿ согни́тїѧ страсте́й: жи́знїю же глагѡ́лъ свои́хъ живо́тъ даѧ́й ᲂу҆мерщвлє́ннымъ ѿ грѣха̀ дꙋша́мъ.

п҃. Стра́сть тщесла́вїѧ треѻ́стенъ волче́цъ є҆́сть, тщесла́вїемъ и҆ мнѣ́нїемъ и҆ горды́нею ѿ бѣсѡ́въ разжига́емь же и҆ и҆ско́вываемь: но водворѧ́ющимисѧ въ кро́вѣ бг҃а небе́снагѡ, ви́димь быва́етъ, и҆ ѻ҆стны̀ сегѡ̀ сокрꙋша́ютсѧ, превозлета́ющими си́рѣчь сїѧ̑ смире́нїемъ, и҆ въ са́дѣ жи́зни внꙋ́трь почива́ющими.

п҃а. Внегда̀ нечи́стый се́й и҆ многоко́зненный бѣ́съ прило́гствꙋетъ тѝ предспѣ́ѧнїѧ творѧ́щꙋ въ добродѣ́тели, и҆ предгада́етъ тѝ престо́лѡвъ высотꙋ̀, ᲂу҆мышле́нїи, въ па́мѧтствованїе возводѧ̀ и҆ возносѧ̀ дѣ́ланїе твоѐ, ꙗ҆́кѡ превы́шше лежа́щее про́чихъ, но и҆ дꙋ́шы води́ти дово́льна тѧ̀ совѣ́тꙋетъ бы́ти: ᲂу҆держа́въ є҆го̀ мы́сленнѡ, не ѡ҆ста́ви ᲂу҆бѣ́гнꙋти, а҆́ще ᲂу҆́бѡ си́лꙋ прїѧ́лъ є҆сѝ съ высоты̀ та́кѡ твори́ти. И҆ пое́мь, пойдѝ мы́слїю, и҆ мнѣ́нїемъ къ нѣ́чесомꙋ нѣ́когда содѣ́ѧнномꙋ тобо́ю ѕлꙋ̀, и҆ сїѐ пред̾ ни́мъ ѡ҆бнажи́въ, рцы̀ къ немꙋ̀: дѣ́ющїи такѡва́ѧ досто́йни ли сꙋ́ть на таковꙋ̀ взы́ти предсѣда́нїѧ высотꙋ̀; и҆ довѡ́льны ли ті́и мнѧ́тсѧ бы́ти води́ти дꙋ́шы, и҆ приводи́ти спасє́ны ко хрⷭ҇тꙋ̀; ты̀ да рече́ши, а҆́зъ бо молчꙋ̀. Не и҆мѣ́ѧ ᲂу҆́бѡ ѻ҆́нъ что̀ ѿвѣща́ти тебѣ̀, ꙗ҆́кѡ ды́мъ ѿ стꙋда̀ ѿи́детъ, и҆ не ктомꙋ̀ съ си́лою стꙋжи́тъ тѝ. А҆́ще ли же что̀ содѣ́ѧнно, и҆лѝ глаго́ланно ѿ ѕлы́хъ нѣ́сть въ тебѣ̀, преми́рною жи́знїю твое́ю, то̀ понѐ за́повѣдьми себѐ и҆ страстьмѝ восприложѝ гдⷭ҇ꙋ: и҆ толи́кѡ себѐ ѡ҆брѧ́щеши соверше́нства недоста́точна сꙋ́ща, є҆ли́кѡ кꙋпѣ́ль воднꙋ́ю недоста́точнꙋ сꙋ́щꙋ мо́рѧ. Пра́вда бо человѣ́ческаѧ толи́кѡ пра́вды ѡ҆скꙋдѣва́етъ бж҃їѧ, є҆ли́кѡ къ вели́чествꙋ землѧ̀ небесѐ, и҆ кома́ръ льва̀.

п҃в. И҆́же во глꙋбинꙋ̀ ᲂу҆ѧзви́выйсѧ ѿ любвѐ бж҃їѧ, ѡ҆скꙋдѣва́ющꙋ и҆́мать предложе́нїѧ тѣле́снꙋю си́лꙋ: не бо̀ є҆́сть сы́тость сегѡ̀ предложе́нїю въ трꙋдѣ́хъ и҆ по́тѣхъ и҆́ночества. Подо́бнѡ бо томи̑мымъ жа́ждою сꙋ́щꙋ, разпале́нїе къ подви́жничествꙋ нѣ́сть врачество̀ въ сы́тость, но чрез̾ ве́сь де́нь же и҆ но́щь жа́ждетъ, є҆́же трꙋди́тисѧ, и҆ си́лою тѣлесѐ побѣжда́етсѧ. Мню́ же, ꙗ҆́кѡ па́че є҆сте́ственною се́ю стра́стїю и҆ мꙋ́чєницы хрⷭ҇тѡ́вы ѡ҆б̾ѧ́ти бы́вше, мꙋ́къ не ѡ҆щꙋща́хꙋ, и҆ сы́тости не и҆мѣ́ѧхꙋ си̑мъ прїѡбща́ющесѧ: но побѣжда́хꙋ са́ми себѐ распале́ннымъ къ бг҃ꙋ раче́нїемъ, и҆ при́снѡ ѡ҆стаю́щихсѧ зрѧ́хꙋ ѿ разжже́ннагѡ по є҆́же пострада́ти предложе́нїѧ.

п҃г. И҆́же себѐ по каково́мꙋлибо ѡ҆́бразꙋ примѣрѧ́ѧй ѿ подви́жничествꙋющихъ, и҆лѝ пребыва́ющихъ съ ни́мъ бра́тїй, ᲂу҆таи́сѧ ᲂу҆мопрельща́ѧ себѐ и҆ стра́ннымъ ѿ бг҃а ходѧ̀ пꙋте́мъ: занѐ и҆лѝ себѐ таковы́й не позна̀, и҆лѝ ᲂу҆клони́сѧ ѿ ведꙋ́щагѡ къ небесє́мъ. И҆́мже тщали́вїи долꙋпове́рженнымъ мꙋдрова́нїемъ текꙋ́тъ, и҆́мже и҆ сѣ̑ти превозлета́юще врага̀, въ мы́сленъ воздꙋ́хъ кри́лы безстра́стїѧ вхо́дѧтъ, и҆ въ свѣ́тлыхъ вѣснꙋ́ютъ мѣ́стехъ мѣрномꙋ́дрїемъ ᲂу҆кра́шени.

п҃д. Напыще́нный и҆ чрез̾ возноше́нїе ᲂу҆мо́мъ прельща́ѧйсѧ, никогда́ же смире́нїѧ во свѣ́тѣ ᲂу҆миле́нїѧ полꙋ́читъ благода́ть, є҆́юже любода́рствꙋетсѧ свѣ́тъ премꙋ́дрости бж҃їѧ сокрꙋше́ннымъ се́рдцемъ, по пи́санномꙋ: Во свѣ́тѣ твое́мъ ᲂу҆́зримъ свѣ́тъ: но но́щь того̀ покры́етъ страсте́й, въ не́йже всѝ ѕвѣ́рїе дꙋбра́внїи человѣ́ческагѡ є҆стества̀ прохо́дѧтъ, и҆ ски́мни мнѣ́нїѧ, тщесла́вїѧ, глаго́лю, и҆ блꙋда̀ бѣ́съ, рыка́юще и҆́щꙋтъ кого̀ поглоти́ти, и҆ во чре́во ѿча́ѧнїѧ воврещѝ.

п҃є. Живꙋ́щемꙋ по человѣ́кѡмъ и҆ дви́жимомꙋ дꙋ́хомъ мнѣ́нїѧ, мо́ре ѕѡ́лъ житїѐ сїѐ и҆ настоѧ́щаѧ жи́знь быва́етъ, полива́ющее ᲂу҆́мнꙋю ча́сть дꙋшѝ є҆гѡ̀ сла́ностїю сласте́й, и҆ свирѣ́пыми волна́ми страсте́й трича́стїе є҆гѡ̀ бїю́щее, ѿ дꙋхѡ́въ си́рѣчь лꙋка́вствїѧ неи́стовствꙋющеесѧ, на́нь же лю́тое недоꙋмѣ́нїе велича́йшїѧ печа́ли воспростира́етсѧ, внегда̀ ладїѧ̀ є҆гѡ̀ и҆ корми́ло дꙋше́вное ѿ сласте́й сокрꙋша́ютсѧ пло́ти, и҆ ко́рмчїй ᲂу҆́мъ под̾ глꙋбино́ю грѣха̀, и҆ мы́сленною сме́ртїю быва́етъ. До́ндеже мо́ре ᲂу҆́бѡ ѕѡ́лъ, въ бе́зднꙋ смире́нїѧ и҆ тишинꙋ̀ є҆мꙋ̀ ᲂу҆кроти́тъ во́лны: сла́ность же сласте́й въ тꙋ̑чи сле́зъ тече́нїѧ ѡ҆брати́тъ, и҆ въ сла́дость прело́житъ свѣтови́днѡ ᲂу҆миле́нїѧ.

п҃ѕ. Въ сы́тость сласте́мъ тѣ́ла и҆ дѣѧ́нїємъ того̀ порабо́тавъ, въ сы́тость ᲂу҆потребѝ и҆ трꙋдѡ́въ по́стничества въ по́тѣхъ ѕлострада́нїѧ: да сы́тость сы́тостїю, и҆ сла́сть болѣ́знїю, и҆ ѡ҆сла́ба трꙋды̑ тѣле́сными ѿрази́ттисѧ, и҆ сы́тость весе́лїѧ и҆ ра́дованїѧ во ᲂу҆покое́нїе ѡ҆брѧ́щеши: та́кѡ бо и҆ чистоты̀ наслади́шисѧ благоꙋха́нїѧ, и҆ цѣломꙋ́дрїѧ, и҆ сла́сти наслади́шисѧ неизрече́нныѧ безсме́ртныхъ плодѡ́въ дꙋхо́вныхъ. Поне́же и҆ ѡ҆чища̑ющаѧ бы̑лїѧ по подо́бїю ѡ҆быко́хомъ, на сквє́рны ри́зъ, во ѡ҆чище́нїе и҆́хъ налага́ти, внегда̀ скве́рною во глꙋбинꙋ̀ ѡ҆непотре́бствꙋютсѧ.

п҃з. Поле́зни сꙋ́ть недꙋ́зи вводи̑мымъ є҆щѐ къ добродѣ́тельномꙋ житїю̀, содѣ́йствꙋюще си̑мъ ко и҆ста́ѧнїю и҆ смире́нїю разжиза́емыѧ пло́ти: сі́и бо си́лꙋ ᲂу҆́бѡ пло́ти немощнѣ́йшꙋ дѣ́лаютъ, пе́рстное же мꙋдрова́нїе дꙋшѝ ѡ҆тончава́ютъ, са́мꙋ же тꙋ̀ крѣ́пость є҆ѧ̀, крѣ́пльшꙋ же и҆ си́льнѣйшꙋ по бж҃е́ственномꙋ соверша́ютъ а҆пⷭ҇лꙋ: є҆гда́ бо, глаго́летъ немоществꙋ́ю, тогда̀ си́ленъ є҆́смь¹²³⁸. Но є҆ли́кѡ сі́и си̑мъ сꙋ́ть поле́зни, толи́кѡ привре́дни пред̾ꙋспѣ́вшымъ въ трꙋдѣ́хъ добродѣ́телей, и҆ ны́нѣ чꙋ́вство превозни́кшымъ, и҆ въ небє́снаѧ видѣ̑нїѧ вше́дшымъ: возбранѧ́ютъ бо тѣ́мъ ѿ ᲂу҆праждне́нїѧ ѡ҆ бж҃е́ственныхъ, и҆ ѡ҆дебелѧ́ютъ болѣ́зньми и҆ ѡ҆бстоѧ́нїи по́мысленное дꙋшѝ и҆́хъ: и҆ ѻ҆́блакомъ печа́ли возмꙋща́ютъ то̀, и҆ ᲂу҆миле́нїе сꙋ́шею болѣ́зней и҆зсꙋша́ютъ. Є҆́же па́ѵелъ вѣ́дый прилѣжѧ̀ до́брѣ ѡ҆ себѣ̀, зако́номъ разсꙋжде́нїѧ глаго́лаше: ᲂу҆мерщвлѧ́ю тѣ́ло моѐ по́двигами трꙋдѡ́въ, порабоща́ю є҆̀ послꙋша́нїѧмъ, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́дꙋ¹²³⁹.

п҃и. Ѿ нестро́йнагѡ и҆ ра́вности неимꙋ́щагѡ ᲂу҆ста́ва пи́щи, мно́жицею ражда́ютсѧ мнѡ́гимъ недꙋ́зи: и҆лѝ къ кра́йнемꙋ неѧде́нїю тщали́вомꙋ, и҆лѝ къ трꙋдѡ́мъ добродѣ́телей безмѣ́рнѡ и҆ неразсꙋ́днѡ просте́ршꙋсѧ, и҆лѝ къ ѡ҆б̾ѧде́нїю и҆ сы́тости ᲂу҆кло́ншꙋсѧ є҆стествꙋ̀ сꙋпоста́тꙋ. Нꙋ́ждно ᲂу҆̀бо и҆ вводи̑мымъ къ добродѣ́тели є҆́сть воздержа́нїе, и҆ вы́шше среды̀ прело́жшымъ по́двиги къ соверше́ннѣйшемꙋ видѣ́нїѧ восхожде́нїю: ма́ти бо здра́вїѧ є҆́сть сїѐ, дрꙋ́гъ чистоты̀, и҆ смиренномꙋ́дрїѧ бла́гъ сожи́тель.

п҃ѳ. Сꙋгꙋ́бо бы́ти безстра́стїе вѣ́ждь, и҆ сꙋгꙋ́бо во тщали́выхъ па́че быва́ти: и҆ пе́рвѣе ᲂу҆́бѡ, ѿ конца̀ дѣ́ѧтельнагѡ любомꙋ́дрїѧ пе́рвое быва́етъ тщали̑вымъ безстра́стїе, є҆́же ѿ зако́ннагѡ по́двига трꙋды̀ многоѡбра́знѡ пред̾ꙋспѣ́вшымъ, ᲂу҆мерщвлѧ́ти ᲂу҆́бѡ вѣ́сть а҆́бїе стра̑сти, и҆ стремлє́нїѧ пло́ти недѣ́йствєнна поставлѧ́ти, и҆ двиза́тисѧ ко є҆́же по є҆стествꙋ̀ дꙋшє́внымъ си́ламъ твори́тъ, и҆ ᲂу҆́мъ въ поꙋче́нїи бж҃е́ственныхъ съ ра́зꙋмомъ воспоставлѧ́етъ. Та́же ѿ нача́ла є҆сте́ственнагѡ видѣ́нїѧ, второ́е и҆ соверше́ннѣйшее премꙋ́дрѣ тѣ́мъ прибыва́етъ. Є҆́же ѿ ᲂу҆́мнагѡ безмо́лвїѧ помыслѡ́въ, въ ми́рное ᲂу҆ма̀ возвы́сившосѧ ᲂу҆строе́нїе, прозри́тельнѣйшъ же и҆ предзри́тельнѣйшъ вѣ́сть ᲂу҆́мъ содѣ́ловати. Прозри́тельнѣйшъ ᲂу҆́бѡ, въ ве́щехъ бж҃е́ственныхъ, и҆ во видѣ́нїихъ лꙋ́чшагѡ, и҆ въ ѿкрове́нїихъ та̑инъ бж҃їихъ: презри́тельнѣйшъ же, въ ве́щехъ человѣ́ческихъ, ѿдале́че грѧдꙋ́щихъ, и҆ и҆мꙋ́щихъ быва́ти, въ ни́хже є҆ди́нъ и҆ то́йжде дꙋ́хъ дѣ́йствꙋѧй є҆́сть, держа́й ᲂу҆́бѡ и҆ содержа́й по пе́рвомꙋ безстра́стїю, ѿпꙋща́ѧй же по второ́мꙋ въ свобо́дꙋ вѣ́чныѧ жи́зни, ꙗ҆́коже па́ѵелъ глаго́летъ¹²⁴⁰.

ч҃. И҆́же безстра́стїѧ прибли́живыйсѧ предѣ́лѡмъ, и҆́стинна ᲂу҆́бѡ ѡ҆ бз҃ѣ, и҆ ѡ҆ є҆стества́хъ сꙋ́щихъ, творѧ̀ зрѣ̑нїѧ, ѿ добро́ты созда́нїй по мѣ́рѣ своеѧ̀ чистоты̀ ко творцꙋ̀ востека́ѧ, прїе́млетъ свѣтоли̑тїѧ дх҃а: бла̑га же мнѣ̑нїѧ и҆мѣ́ѧ ѡ҆ всѣ́хъ, приснопомышлѧ́етъ ѡ҆ всѣ́хъ дѡ́браѧ: ст҃ы́ми же всѣ́хъ зри́тъ и҆ чи́стыми, и҆ ѡ҆ бж҃е́ственныхъ и҆ человѣ́ческихъ ве́щехъ сꙋ́дъ пра́въ и҆зно́ситъ: и҆ рачи́тельствꙋетъ ᲂу҆́бѡ ничесогѡ́же ѿ ꙗ҆̀же ѡ҆ веществѣ̀ мі́ра и҆ человѣ́кѡмъ тщи́мыхъ. И҆зше́дъ же ᲂу҆мо́мъ всемі́рнагѡ чꙋ́вства, къ небесє́мъ и҆ бг҃ꙋ востече́тъ чи́стъ всѧ́кїѧ ти́ны, и҆ всѧ́кїѧ рабо́ты свобо́дь, и҆ ве́сь быва́етъ мы́сленныхъ бж҃їихъ благи́хъ во є҆ди́номъ дс҃ѣ, и҆ бж҃е́ственнꙋю добро́тꙋ зри́тъ и҆ бг҃олѣ́пнѡ пребыва́етъ въ бж҃е́ственныхъ мѣ́стѣхъ блаже́нныѧ бж҃їѧ сла́вы въ неизрече́ннѣмъ молча́нїи и҆ ра́дости: и҆ чꙋ́вствами всѣ́ми и҆змѣне́нъ бы́въ, ꙗ҆́кѡ а҆́гг҃лъ въ веще́ственнѣмъ тѣ́лѣ невеще́ственъ съ человѣ́ки соѡбраща́етсѧ.

ч҃а. Чꙋ̑вства вѣ́сть сло́во пѧ́ть и҆ ѡ҆бꙋчє́нїѧ: бдѣ́нїе, поꙋче́нїе, моли́твꙋ, воздержа́нїе, и҆ безмо́лвїе. Си̑мъ чꙋ̑вства своѧ̑ присовокꙋпи́вый: зрѣ́нїе ᲂу҆́бѡ, бдѣ́нїю: слꙋ́хъ же поꙋче́нїю: ѡ҆бонѧ́нїе мл҃твѣ: вкꙋ́съ, воздержа́нїю: и҆ ѡ҆сѧза́нїе спрѧгі́й безмо́лвїю, ско́рѡ ѡ҆чища́етъ ᲂу҆́мъ своеѧ̀ дꙋшѝ, и҆ ѡ҆тончи́въ си́ми є҆го̀, безстра́стна и҆ прозри́тельна є҆го̀ содѣ́ловаетъ.

ч҃в. Оу҆́мъ безстра́стенъ є҆́сть, своѧ̑ побѣди́вый стра̑сти, и҆ превы́ше печа́ли и҆ ра́дости бы́вый, и҆́же ни ѡ҆ печа́лехъ, ꙗ҆̀же ѿ нанесе́нїй, ᲂу҆ныва́етъ, ни ра́достїю ꙗ҆̀же ѿ благодꙋ́шїѧ, разлива́етсѧ: но во ско́рбехъ ᲂу҆́бѡ ра́дꙋющꙋюсѧ и҆мѣ́ѧ дꙋ́шꙋ, во благодꙋ́шїихъ же воздержа́ющꙋюсѧ, и҆ не внѣ̀ мѣ́ры дѣ́йствꙋющꙋю.

ч҃г. Мно́го на творѧ́щихъ въ видѣ́нїе предспѣ́ѧнїѧ неи́стовство бѣсѡ́въ: подсѣда́ютъ бо на тѣ́хъ но́щь и҆ де́нь. И҆ пребыва́ющими ᲂу҆́бѡ съ ни́ми, и҆скꙋшє́нїѧ лю̑та на нѧ̀ воздвиза́ютъ: собо́ю же то́поты творѧ́тъ въ страхова́нїе, и҆ на спѧ́щихъ си́хъ навѣ́тꙋютъ, ѻ҆тра́дѣ и҆́хъ зави́дѧще, и҆ разли́чнѡ ѡ҆печалѧ́ютъ и҆̀хъ, а҆́ще и҆ не мо́гꙋтъ ѡ҆би́дѣти прилѣпле́нныхъ сꙋ́щихъ бг҃ꙋ. И҆ а҆́ще не бы̀ а҆́гг҃лъ гдⷭ҇а вседержи́телѧ хранѧ́й и҆̀хъ бы́лъ, не бы́ша навѣ́та и҆́хъ и҆ сме́ртныхъ сѣ́тей ᲂу҆гонзнꙋ́ли.

ч҃д. Подвиза́ѧйсѧ въ дѣ́ѧтельнѣмъ любомꙋ́дрїи добродѣ́тели, внемлѝ и҆звѣ́стнѡ ѡ҆ навѣ́тѣхъ гꙋби́тельныхъ бѣсѡ́въ: є҆ли́кѡ бо восхождє́нїѧ предспѣ́ѧнїй въ высѡ́кїѧ добродѣ́тєли полага́еши, и҆ свѣ́тъ ᲂу҆множа́еттисѧ бж҃е́ственный въ моли́твахъ, и҆ ко ѿкрове́нїѧмъ грѧде́ши и҆ видѣ́нїѧмъ неизречє́ннымъ, дх҃омъ: толи́кѡ ѻ҆нѝ, восходѧ́ща тѧ̀ зрѧ́ще на не́бо, скреже́щꙋтъ зꙋбы̑, и҆ ѕло́бы своеѧ̀ многоплетє́нныѧ мрє́жи по мы́сленномꙋ воздꙋ́хꙋ тща́тельнѡ простира́ютъ. Не то́чїю бо по́хотнїи и҆ ꙗ҆́ростнїи и҆ плотолюби́вїи же и҆ ѕвѣ́рстїи на тѧ̀ дхнꙋ́тъ бѣ́си, но и҆ хꙋле́нїѧ за́вистїю го́рькою на тѧ̀ воста́нꙋтъ. И҆ къ си̑мъ ꙗ҆вле́ннѡ же и҆ неѧвле́ннѡ воздꙋ́шнїи и҆ нача̑ла и҆ вла̑сти летѧ́щїи, по мечта́нїю є҆ди́номꙋ въ ви́дахъ стра́нныхъ и҆ стра́шныхъ представлѧ́ющїисѧ, во ѡ҆ѕлобле́нїе твоѐ, є҆ли́кѡ мо́щно є҆́сть тѣ̑мъ, воздви́гнꙋтсѧ. Но во ᲂу҆́мномъ дѣ́ланїи моли́твы бо́дрымъ ѻ҆́комъ ᲂу҆ма̀ ᲂу҆пражнѧ́ѧсѧ, и҆ мы́слѧми є҆сте́ственнагѡ ᲂу҆мозрѣ́нїѧ въ творе́нїихъ бж҃їихъ поꙋча́ѧсѧ, не ᲂу҆бои́шисѧ ѿ стрѣлы̀ и҆́хъ летѧ́щїѧ во днѝ: ниже́ бо тѣлесѝ твоемꙋ̀ приближа́тисѧ возмо́гꙋтъ, ѿ сꙋ́щагѡ въ тебѣ̀ свѣ́та ꙗ҆́кѡ тьма̀ прогонѧ́еми, и҆ ѿ бж҃е́ственнагѡ ѻ҆гнѧ̀ пожига́еми.

ч҃є. Благода́ти бж҃е́ственнагѡ дх҃а боѧ́тсѧ ѕѣлѡ̀ лꙋка́вїи дꙋ́си, и҆ наипа́че є҆гда̀ бога́тнѣ на́йдетъ на ны̀ ѡ҆чища́ющихсѧ поꙋче́нїемъ и҆ чи́стою моли́твою: не дерза́юще бо прибли́житисѧ тѣлесѝ ѡ҆сїѧва́емыхъ ѿѻнꙋ́дꙋ, є҆ди́нѣми мечта́нїи и҆ стра́шными то́поты, и҆ безвѣ́стными гла̑сы ᲂу҆страша́ти и҆ смꙋща́ти покꙋша́ютсѧ, и҆ ѿ дѣ́лъ ѿводи́ти бдѣ́нїѧ и҆ моли́твы. Но и҆ спѧ́щымъ тѣ̑мъ на землѝ не щадѧ́тъ, и҆ зави́дѧще кратча́йшемꙋ трꙋдѡ́въ и҆́хъ поко́ю навѣ́тꙋютъ, и҆ торга́нїи нѣ́кїими взе́млютъ со́нъ ѿ вѣ́ждей и҆́хъ, притрꙋ́днѣйшїй си́хъ живо́тъ и҆ болѣ́зни и҆спо́лненъ твори́ти таковы́ми ᲂу҆мышлѧ́юще.

ч҃ѕ. Ѡ҆тѣлесѣва́тисѧ мнѧ́тсѧ то́нцѣ нѣ́какѡ дꙋ́си тьмы̀, ꙗ҆́коже сло́во ѿ и҆скꙋ́са мнѣ́ти дае́тъ. И҆лѝ сїѐ мечта́ющи чꙋ́вствꙋ подꙋкра́дꙋемꙋ, и҆лѝ въ сїѐ и҆ ѡ҆сꙋжде́нни бы́вше, ѿ дре́внѧгѡ ѿпаде́нїѧ. Но ѻ҆ба́че сосража́тисѧ съ подви́жною ᲂу҆стремлѧ́ютсѧ дꙋше́ю, клонѧ́щꙋсѧ тоѧ̀ ко снꙋ̀ ле́стномꙋ тѣ́лꙋ, є҆́же и҆ и҆скꙋше́нїе нѣ́кое мни́тмисѧ бы́ти дꙋшѝ, ны́нѣ быва́ющїѧ превы́шше смире́нїѧ тѣлесѐ, ꙗ҆́кѡ да ꙗ҆рови́дное тоѧ̀ и҆ мꙋ́жественное, ка́кѡ є҆́сть, на таковы́хъ пока́жетсѧ, претѧ́щымъ то́й стра́шными съ ꙗ҆́ростїю и҆ неи́стовствомъ мно́гимъ. И҆́миже въ раче́нїе ᲂу҆ѧ́звленна бж҃їе, и҆ ѡ҆бдержи́тельными добродѣ́тельми ѡ҆б̾ѧ́та дꙋша̀, не то́чїю пра́ведною ꙗ҆́ростїю сопротивлѧ́етсѧ, но и҆ бїе́тъ си́хъ, а҆́ще ко́е тѣ̑мъ є҆́сть чꙋ́вство, ꙗ҆́коже мни́тсѧ, неща́днѡ ѡ҆землени́вшымсѧ ѿпаде́нїемъ пе́рвагѡ и҆ бж҃е́ственнагѡ свѣ́та.

ч҃з. Пре́жде сраже́нїѧ и҆ побѣ́ды мно́жицею бѣ́сове чꙋ́вство дꙋшѝ смꙋща́ютъ, и҆ со́нъ ѿ вѣ́ждей восхища́ютъ. Но де́рзости и҆ мꙋ́жества ѿ дх҃а ст҃а́гѡ и҆спо́лненнаѧ дꙋша̀ небреже́тъ ᲂу҆́бѡ си́хъ нахожде́нїѧ и҆ го́рькагѡ неи́стовства: животворѧ́щымъ же то́чїю воѡбраже́нїемъ, и҆ призыва́нїемъ і҆и҃са и҆ бг҃а, и҆ мечта̑нїѧ и҆́хъ разрꙋша́етъ, и҆ си́хъ кꙋ́пнѡ бѣглецы̀ соверша́етъ.

ч҃и. А҆́ще коры̑сти плѣни́ти сꙋпоста́тныхъ дꙋхѡ́въ ѿ дѣ́ѧтельнагѡ и҆зше́лъ є҆сѝ любомꙋ́дрїѧ, зрѝ и҆ внемлѝ, ѻ҆рꙋ́жїи себѐ ѿвсю́дꙋ дꙋхо́вными воѡрꙋжи́въ. Вѣ́си бо, кі́ихъ сосꙋ́ды расхи́тити воз̾ꙋсе́рдствовалъ є҆сѝ. Сꙋпоста̑тъ ᲂу҆́бѡ, но мы́сленныхъ и҆ безпло́тныхъ, съ тѣ́ломъ є҆щѐ царе́ви дꙋхѡ́въ и҆ бг҃ꙋ во́инствꙋѧй. Вѣ́ждь бо, ꙗ҆́кѡ горча́е, не́жели пе́рвѣе вою́ютъ на тѧ̀, и҆ мно́зи на тѧ̀ прїи́дꙋтъ ко́зньми: до́ндеже и҆лѝ ᲂу҆таи́вшесѧ, внегда̀ коры́сти припогꙋблѧ́ти, съ си́ми тѧ̀ плѣ́нника восхи́тѧтъ и҆ мно́гїѧ го́рести дꙋ́шꙋ твою̀ и҆спо́лнѧтъ, и҆лѝ ѕлы̑мъ тѧ̀ и҆ болѣ́знєннымъ подве́ргнꙋтъ и҆скꙋше́нїѧмъ, во ѡ҆скорбле́нїе пло́ти твоеѧ̀ и҆ ѡ҆ѕлобле́нїе.

ч҃ѳ. Не мо́жетъ и҆сто́чникъ бла́гъ, во́ды мꙋ̑тны и҆ смра̑дны и҆сточа́ти, вещество́мъ мїрски́мъ смердѧ́щѧ: нижѐ се́рдце, внѣ̀ ца́рствїѧ сꙋ́ще небе́снагѡ, стрꙋи̑ жи́зни когда̀ бж҃е́ствєннаѧ и҆сточа́ти, благоꙋха́нїе мѵ́ра мы́сленна возсыла́ющыѧ. Є҆да́ ли бо, глаго́летъ, и҆сто́чникъ ѿ є҆ди́нагѡ ᲂу҆́стїѧ и҆сточа́етъ сла́дкое и҆ го́рькое¹²⁴¹; Є҆да̀ мо́жетъ кꙋпина̀ ма̑слины сотвори́ти, и҆лѝ же́лꙋди ма́слина; Та́кѡ нижѐ и҆сто́чникъ є҆ди́нъ се́рдца, лꙋка́въ и҆ бла́гъ вкꙋ́пѣ роди́ти ра́зꙋмъ. Но благі́й ᲂу҆́бѡ человѣ́къ ѿ блага́гѡ сокро́вища се́рдца своегѡ̀ и҆зно́ситъ блага̑ѧ: лꙋка́вый же ѿ лꙋка́вагѡ сокро́вища се́рдца своегѡ̀ и҆зно́ситъ лꙋка̑ва, по гдⷭ҇ню гла́сꙋ¹²⁴².

р҃. Ꙗ҆́коже невозмо́жно є҆́сть без̾ є҆ле́а и҆ ѻ҆гнѧ̀ свѣти́льникꙋ горѣ́ти, и҆ свѣти́ти сꙋ́щымъ въ хра́минѣ: та́кѡ и҆ дꙋшѝ не возмо́жно є҆́сть без̾ бж҃е́ственна дх҃а и҆ ѻ҆гнѧ̀, бж҃е́ствєннаѧ ꙗ҆вле́ннѣе вѣща́ти, и҆ просвѣща́ти человѣ́ки: всѧ́къ бо да́ръ соверше́нъ свы́ше є҆́сть ѿ ѻ҆ц҃а̀ свѣ́тѡвъ, раздѣлѧ́емь всѧ́кой бг҃олюби́вой дꙋшѝ: въ не́мже нѣ́сть, по словесѝ, и҆змѣне́нїѧ и҆лѝ преложе́нїѧ сѣ́нь.

Тогѡ́жде втора́ѧ є҆сте́ственныхъ глави́знъ со́тница, ѡ҆ ѡ҆чище́нїи ᲂу҆ма̀.

а҃. Нача́ло ᲂу҆́бѡ любвѐ бж҃їѧ, ви́димыхъ и҆ человѣ́ческихъ веще́й презрѣ́нїе, среда́ же, се́рдца и҆ ᲂу҆ма̀ ѡ҆чище́нїе, ѿ негѡ́же ᲂу҆́мное мы́слєнною ѻ҆́чїю ѿкрове́нїе и҆ позна́нїе сокрове́ннагѡ въ на́съ нбⷭ҇нагѡ црⷭ҇твїѧ: коне́цъ же, неꙋдержи́мо раче́нїе сꙋ́щихъ па́че є҆стества̀ бж҃їихъ дарѡ́въ, и҆ є҆сте́ственно жела́нїе, є҆́же съ бг҃омъ соедине́нїѧ є҆ѧ̀, (и҆) є҆́же въ не́мъ ᲂу҆покое́нїѧ.

в҃. И҆дѣ́же раче́нїе бж҃їе, и҆ мы́сленныхъ веще́й дѣ́ланїе, и҆ прича́стїе непристꙋ́пнагѡ свѣ́та: та́мѡ си́лъ дꙋше́вныхъ ми́ръ, и҆ ᲂу҆ма̀ ѡ҆чище́нїе, и҆ вселе́нїе ст҃ы́ѧ трⷪ҇цы. Любѧ́й бо мѧ̀, глаго́летъ, сло́во моѐ соблюде́тъ: и҆ ѻ҆ц҃ъ мо́й возлю́битъ є҆го̀, и҆ къ немꙋ̀ прїи́демъ, и҆ ѻ҆би́тель ᲂу҆ негѡ̀ сотвори́мъ¹²⁴³.

г҃. Трѝ вѣ́сть сло́во ᲂу҆строє́нїѧ житїѧ̀: пло́тско, дꙋше́вно, и҆ дꙋхо́вно. Ѿ си́хъ ко́еждо своѐ и҆́мать завѣща́нїе жи́зни, разлꙋче́нно къ себѣ̀, и҆ и҆нѣ̑мъ неподо́бно.

д҃. Плотско́е житїѧ̀ ᲂу҆строе́нїе, всѐ всѧ́чески ѡ҆ сласте́хъ и҆ наслажде́нїихъ настоѧ́щїѧ жи́зни ᲂу҆пражнѧ́етсѧ: ничто́же и҆лѝ ѿ дꙋше́внагѡ ᲂу҆строе́нїѧ, и҆лѝ ѿ дꙋхо́внагѡ въ себѣ̀ и҆мꙋ́що, и҆лѝ понѐ ѿню́дъ хотѧ́що притѧжа́ти. Дꙋше́вное же междопредѣ́льно нѣ́кое сꙋ́що ѕло́бы и҆ добродѣ́тели, къ прилѣжа́нїю тѣ́ла и҆ здра́вїю зри́тъ, и҆ къ похвалѣ̀ человѣ́честѣй, ра́внѣ и҆ трꙋды̀ ѿме́щꙋщо добродѣ́тели, и҆ дѣѧ́нїй бѣ́гающо пло́ти, не прилѣжа́що ѕло́бѣ и҆лѝ добродѣ́тели за ꙗ҆̀же въ ни́хъ сопроти́вныѧ вины̀: добродѣ́тели ᲂу҆́бѡ за жесто́кость сеѧ̀ вкꙋ́пѣ и҆ притрꙋ́дность: ѕло́бѣ же, за є҆́же не припогꙋби́ти человѣ́ческихъ похва́лъ. дꙋхо́вное же житїѧ̀ ᲂу҆строе́нїе, ѿ си́хъ ᲂу҆́бѡ нижѐ є҆ди́но и҆мѣ́ти и҆зволѧ́етъ, нижѐ въ си́це ѕлы́хъ ᲂу҆пражнѧ́тисѧ ѻ҆бои́хъ, но всѐ по всемꙋ̀ свобо́дно є҆́сть сегѡ̀ и҆ ѻ҆́нагѡ, крило́ма посре́бренѣма любвѐ и҆ безстра́стїѧ, прелетѣ́вши ѻ҆боѧ̀: ни дѣ́юще что̀ ѿ возбране́нныхъ, и҆ пра́здности ѿбѣга́ющи ѕлы́хъ.

є҃. И҆́же пло́тски живꙋ́щїи, и҆ мно́гѡ мꙋдрова́нїе пло́ти належа́щее въ себѣ̀ и҆мꙋ́щїи, пло́тни сꙋ́ще ѿню́дъ не мо́гꙋтъ ᲂу҆годи́ти бг҃ꙋ: те́мни бо сꙋ́ть мꙋдрова́нїи, и҆ лꙋче́й бж҃е́ственнагѡ свѣ́та ѿню́дъ всѧ́кѡ неприча́стни. Належа́щыѧ бо ѻ҆́блаки страсте́й, ꙗ҆́коже высѡ́ки стѣ́ны ѡ҆стѣнѧ́ющѧ и҆мꙋ́ще лꙋчѝ дꙋхѡ́вныѧ, непросвѣще́нни пребыва́ютъ. Слѣ́пы же чꙋ̑вствы сꙋ́ще свои́хъ дꙋ́шъ, не мо́гꙋтъ къ мы́слєннымъ добро́тамъ бж҃їимъ возни́кнꙋти, и҆ свѣ́тъ ᲂу҆ви́дѣти и҆́стинныѧ вои́стиннꙋ жи́зни, и҆ превы́ше бы́ти ви́димыхъ смире́нїѧ. Но ꙗ҆́коже ско́тни сотво́ршесѧ, и҆ чꙋ́вство бы́вше мі́ра, къ чꙋ́вствєннымъ и҆ человѣ́чєскимъ веще́мъ словесѐ прилага́ютъ досто́инство, и҆ по́двигъ ве́сь къ ви̑димымъ и҆ тлѣ̑емымъ и҆́мꙋтъ, дрꙋ́гъ со дрꙋ́гомъ за сїѧ̑ сварѧ́щесѧ. И҆ ѿ таковы́хъ ѻ҆вогда̀ и҆ дꙋ́шы своѧ̑ полага́юще, держа́щесѧ и҆мѣ́нїй, сла́вы и҆ сласте́й пло́ти, и҆ тщетꙋ̀ вели́кꙋ лише́нїе таковы́хъ вмѣнѧ́юще. Къ ни̑мже пра́веднѡ ꙗ҆́кѡ ѿ лица̀ бж҃їѧ проро́ческое ѻ҆́но глаго́летсѧ сло́во: Не и҆́мать дх҃ъ мо́й пребыва́ти въ человѣ́цѣхъ си́хъ, занѐ сꙋ́ть пло́ть¹²⁴⁴.

ѕ҃. Дꙋше́внѣ живꙋ́щїи, и҆ сегѡ̀ ра́ди нарица́еми дꙋше́внїи полꙋча́стни нѣ́цыи, и҆ ꙗ҆́коже разсла́блени ᲂу҆десы̀ сꙋ́ть: ни потрꙋди́тисѧ когда̀ ѡ҆ добродѣ́тели, и҆ за́повѣди бж҃їей ᲂу҆се́рдствꙋюще, и҆ ᲂу҆кори́зненныхъ дѣѧ́нїй сла́вы человѣ́ческїѧ ра́ди ѿбѣга́юще. Самолю́бїемъ же, пита́телемъ па́гꙋбныхъ страсте́й ѡ҆держи́ми, всѧ́ко врачева́нїе здра́вїѧ ра́ди и҆ наслажде́нїѧ пло́ти ᲂу҆своѧ́ютъ, и҆ всѧ́кꙋ ско́рбь и҆ всѧ́кꙋ болѣ́знь и҆ всѧ́ко ѕлострада́нїе ѡ҆ добродѣ́тели ѿтрѧса́ютъ сꙋпоста́тное вы́ше подоба́ющагѡ грѣ́юще тѣ́ло. Си́це же житїѐ и҆ пребыва́нїе и҆мꙋ́ще, ѡ҆земленѧ́ютъ ᲂу҆́мъ страстьмѝ ѡ҆дебелѣ́вшъ, и҆ не прїе́млютъ мы́сленныхъ и҆ бж҃е́ственныхъ веще́й, и҆́миже дꙋша̀ ѿ вещества̀ восхища́етсѧ, и҆ всѧ̀ въ мы́сленныхъ внꙋ́трь пребыва́етъ небесѣ́хъ. Се́ же стра́ждꙋтъ ѿ веще́ственнагѡ є҆щѐ содержи́ми дꙋ́ха, ꙗ҆́кѡ своѧ̑ лю́бѧще дꙋ́шы, и҆ твори́ти во́ли своѧ̑ произволѧ́юще: тщи́ бо сꙋ́ще дх҃а ст҃а, неприча́стни сꙋ́ть и҆ дарова́нїй є҆гѡ̀. Тѣ́мже ни плода̀ бж҃е́ственна мо́щно є҆́сть ᲂу҆ви́дѣти въ ни́хъ, ни любвѐ ко бли́жнемꙋ, и҆лѝ ра́дости въ нищетѣ̀ и҆ ско́рбѣхъ, и҆лѝ ми́ра дꙋшѝ, и҆лѝ и҆звѣще́нїѧ вѣ́ры, и҆лѝ ѡ҆бдержи́тельна воздержа́нїѧ: но нижѐ ᲂу҆миле́нїѧ, и҆лѝ слезы̀, и҆лѝ смире́нїѧ и҆ милосе́рдїѧ, всѧ̑ же напыще́нїѧ го́рдости пѡ́лна. Тѣ́мже и҆ погрꙋзи́тисѧ во глꙋбины̑ дꙋ́ха ѿ себѐ си́лы скꙋ́дни сꙋ́ть: ниже́ бо є҆́сть въ ни́хъ наставлѧ́ѧй свѣ́тъ, и҆ ѿверза́ѧй ᲂу҆́мъ, во є҆́же разꙋмѣ́ти писа̑нїѧ. Но ᲂу҆̀бо нижѐ и҆нѣ̑мъ повѣ́дающымъ ᲂу҆слы́шати сїѧ̑ те́рпѧтъ: вои́стиннꙋ ᲂу҆̀бо и҆ ѡ҆ сицевы́хъ а҆пⷭ҇лъ и҆зречѐ: дꙋше́венъ же человѣ́къ не прїе́млетъ ꙗ҆̀же дꙋ́ха, ю҆ро́дство бо є҆мꙋ̀ є҆́сть¹²⁴⁵. И҆ не вѣ́сть, ꙗ҆́кѡ зако́нъ дꙋхо́венъ є҆́сть, и҆ дꙋхо́внѣ востѧзꙋ́етсѧ¹²⁴⁶.

з҃. Дꙋ́хомъ ходѧ́щїи, и҆ дꙋхо́внꙋю воспрїе́мшїи всегда̀ жи́знь, бг҃оꙋго́дни сꙋ́ть бг҃ови, томꙋ̀ ꙗ҆́кѡ назѡре́и привозложе́ни сꙋ́ще: при́снѡ бо трꙋда́ми своѧ̑ ѡ҆чища́ютъ дꙋ́шы, и҆ за́пѡвѣди гдⷭ҇ни соблюда́ютъ, и҆стощава́юще крѡ́ви своѧ̑ за любо́вь є҆гѡ̀: ѡ҆чища́ютъ пло́ть поще́ньми и҆ бдѣ́ньми: слеза́ми дебе́лость ѡ҆тончава́ютъ се́рдца, ѕлострада́ньми ᲂу҆мерщвлѧ́ютъ ᲂу҆́ды, моли́твою и҆ поꙋче́нїемъ ᲂу҆́мъ и҆сполнѧ́ютъ свѣ́та, и҆ свѣ́тла того̀ содѣ́ловаютъ, ѿверже́нїемъ во́лей, ѿлꙋча́ютъ своѧ̑ дꙋ́шы ѿ пристра́стїѧ тѣлесѐ, и҆ всѝ є҆ди́нагѡ дꙋ́ха быва́ютъ: Тѣ́мже и҆ дꙋхо́вни не то́чїю познава́ютсѧ, но и҆ нарица́ютсѧ ѿ всѣ́хъ пра́веднѣ. Сі́и къ безстра́стїю, и҆ любвѝ грѧдꙋ́ще, къ видѣ́нїю воскрилѧ́ютсѧ тва́ри, и҆ ра́зꙋмъ ѿѻнꙋ́дꙋ сꙋ́щи премꙋ́дростїю прїе́млютъ сокрове́нною въ бз҃ѣ, є҆ди́нѣмъ дае́мꙋю превы́шше бы́вшымъ смире́нїѧ тѣлесѐ. Тѣ́мже и҆ всѧ́ко чꙋ́вство мі́ра преше́дше, и҆ мы́слїю просвѣще́нною во є҆́же па́че чꙋ́вства прише́дше, и҆з̾ѧснѧ́ютъ сло́во. И҆ посредѣ̀ це́ркве бж҃їѧ и҆ собо́ра мно́га вѣ́рныхъ, словеса̀ бла̑га ѿ чи́ста се́рдца ѿрыга́ютъ, и҆ быва́ютъ человѣ́кѡмъ со́ль и҆ свѣ́тъ, ꙗ҆́коже и҆ гдⷭ҇ь къ ни̑мъ провѣщава́етъ: Вы̀ є҆стѐ свѣ́тъ мі́ра, и҆ со́ль землѝ¹²⁴⁷.

и҃. Оу҆праздни́тесѧ и҆ разꙋмѣ́йте, ꙗ҆́кѡ а҆́зъ є҆́смь бг҃ъ¹²⁴⁸: бж҃е́ственнагѡ сло́ва се́й є҆́сть гла́съ, и҆ дѣ́ѧтельнѣ хотѧ́щими познава́етсѧ. Поле́зно ᲂу҆̀бо є҆́сть є҆ди́ною ѿре́кшемꙋсѧ многосмꙋще́нныѧ житїѧ̀ (сегѡ̀) и҆ лю́тыѧ сꙋеты̀, внима́нїемъ мно́гимъ себѐ и҆ безмо́лвїемъ внѣ́шнихъ веще́й прилѣ́жнѡ посѣща́ти, и҆ бг҃а въ себѣ̀ и҆ска́ти, и҆ позна́ти внꙋ́трь на́съ сꙋ́щꙋ црⷭ҇твїю є҆гѡ̀. Є҆два́ бо та́кѡ творѧ̀ кто̀, мно́гими прохожде́ньми вре́мене, ѡ҆́бразы ѕло́бы и҆згла́дити ѿ дꙋшѝ возмо́глъ бы и҆ дре́внюю добро́тꙋ да́вшемꙋ чи́стѣ сохрани́ти.

ѳ҃. Предсохране́нъ бы́въ ꙗ҆́дъ въ на́съ ѕло́бы, мно́гъ сꙋ́щь, мно́га и҆ ѻ҆гнѧ̀ вои́стиннꙋ чисти́тельнагѡ слеза́ми тре́бꙋетъ покаѧ́нїѧ, и҆ во́льныхъ подви́жничества трꙋдѡ́въ: поне́же и҆лѝ во́льными трꙋды̑ ѡ҆чища́емсѧ ѿ скве́рнъ грѣха̀, и҆лѝ нево́льными поноше́ньми (лю́тыхъ). Вѡ́льнымъ бо предварѧ́ющымъ, не ᲂу҆срѣта́ютъ невѡ́льнаѧ: ѻ҆́нѣмъ же не дѣ́йствꙋющымъ ѡ҆чище́нїѧ внꙋ́треннїѧ стклѧ́ницы и҆ блю́да, сїѧ̑ ѕѣ́льнѣе дѣ́йствꙋютъ на́ше къ дре́внемꙋ воз̾ꙋстрое́нїе. Та́кѡ хитрецꙋ̀ ᲂу҆чини́вшꙋ¹²⁴⁹.

і҃. И҆гра́ютъ благоче́стїемъ, и҆ и҆гра́еми сꙋ́ть ѿ веще́й, и҆̀же не по сло́вꙋ своѐ сотво́ршїи ѿрече́нїе, нижѐ ᲂу҆чи́телѧ и҆мѣ́ти и҆ наста́вника восхотѣ́вшїи ѿ нача́тѡкъ, но своемꙋ̀ ра́зꙋмꙋ послѣ́довавшїи, и҆ ꙗ҆́вльшїисѧ пред̾ собо́ю разꙋ́мни.

а҃і. Нижѐ тѣле́сныхъ недꙋ́гѡвъ недꙋготворѧ́щыѧ вины̑ мо́жетъ кто̀ и҆звѣ́стнѡ вѣ́дѣти и҆ цѣлє́нїѧ и҆́хъ без̾ и҆скꙋ́са многовраче́бнагѡ хꙋдо́жества, нижѐ дꙋше́вныхъ без̾ мно́гагѡ ѡ҆ си́хъ ѡ҆бꙋче́нїѧ. Поне́же ꙗ҆́коже погрѣ́шно мни́тсѧ и҆́мъ и҆ ма́лѣми ѕѣлѡ̀ ᲂу҆доборазꙋмѣва́емо тѣле́сныхъ недꙋ́гѡвъ разпозна́нїе, въ не́мже враче́й ᲂу҆пражнѧ́етсѧ хꙋдо́жество, та́кѡ погрѣши́тельнѣе, и҆ мно́гѡ па́че не́жели ѻ҆́но, є҆́же є҆́сть дꙋше́вныхъ. Є҆ли́кѡ бо дꙋша̀ ѿ тѣ́ла є҆́сть лꙋ́чша, толи́кѡ бо́льши ѻ҆́ныѧ и҆ неꙋдобопобѣжда́еми стра̑сти, не́жели ви́димагѡ всѣ́ми чꙋ́вственнѣ сегѡ̀ тѣ́ла.

в҃і. Є҆стество́мъ съ человѣ́ки пе́рвѣйшыѧ и҆ нача́льствꙋющыѧ про́чїими добродѣ́тєли созда́шасѧ, ѿ ни́хже ꙗ҆́кѡ ѿ четы́рехъ нача̑лъ рѣ́ки и҆ны́хъ всѣ́хъ добродѣ́телей наполнѧ́ютсѧ во́дъ, и҆ напаѧ́ютъ гра́дъ бж҃їй, и҆́же є҆́сть ѡ҆чища́емое се́рдце и҆ ᲂу҆тѣша́емое слеза́ми. Сїѧ̑ соблю́дшїй незы́блємы ѿ дꙋхѡ́въ лꙋка́вствїѧ, и҆лѝ вкꙋ́пѣ па́дшыѧ трꙋды̀ мно́гими покаѧ́нїѧ воздви́гнꙋвый, до́мъ себѐ ца́рскъ и҆ пала́тꙋ воздви́же, въ не́йже ѻ҆би́тель твори́тъ цр҃ь всегѡ̀, и҆ высѡ́кїѧ да́ры своѧ̑ си́це себѣ̀ ᲂу҆гото́вавшымъ и҆з̾ѻби́льнѡ раздѣлѧ́етъ и҆ дае́тъ.

г҃і. Кра́тко є҆́сть сїѐ житїѐ, до́лгъ бꙋ́дꙋщїй вѣ́къ, и҆ ма́ло разстоѧ́нїе настоѧ́щїѧ жи́зни. Человѣ́къ же ве́лїе и҆ ма́лое сїѐ живо́тно, є҆мꙋ́же тѣ́сно настоѧ́щее даде́сѧ вре́мѧ, не́мощенъ є҆́сть. И҆ ѻ҆́но ᲂу҆́бѡ є҆́сть тѣ́сно: се́й же не́мощенъ, предлежа́щїй же по́двигъ въ возме́здїе трꙋдѡ́въ вели́къ є҆́сть, безчи́слєнны и҆мѣ́ѧ ѻ҆стны̀, и҆ въ кротча́йшꙋ бѣ́дствꙋѧ жи́знь.

д҃і. Не хо́щетъ тщали́выхъ дѣ́ланїе бг҃ъ не и҆скꙋше́нно бы́ти, но и҆ ѕѣлѡ̀ и҆скꙋше́но. Сегѡ̀ ра́ди ᲂу҆́бѡ ѻ҆́гнь на тѣ́хъ напꙋща́етъ и҆скꙋше́нїй, и҆ благода́ть сокрыва́етъ вма́лѣ дае́мꙋю тѣ̑мъ свы́ше, и҆ по́мыслѡвъ тишинѣ̀ ѿ дꙋхѡ́въ лꙋка́вствїѧ возволнова́тисѧ на вре́мѧ попꙋща́етъ, да ви́дитъ ᲂу҆клоне́нїе дꙋшѝ, комꙋ̀ мно́жайшее да́рꙋетъ. Самомꙋ́ ли творцꙋ̀ и҆ благодѣ́телю своемꙋ̀, и҆лѝ чꙋ́вствꙋ мі́ра и҆ гла́дности сла́сти; И҆ та́кѡ, и҆лѝ благода́ть ᲂу҆сꙋгꙋблѧ́етъ тѣ́мъ, предспѣ́ющꙋ въ любо́вь є҆гѡ̀: и҆лѝ ᲂу҆ѧзвлѧ́етъ си́хъ и҆скꙋше́нїи и҆ скорбмѝ прилѣжа́щихъ веще́мъ, до́ндеже не́нависть прїи́мꙋтъ ви́димыхъ нестоѧ́тельнагѡ ѡ҆бноше́нїѧ, и҆ го́ресть сꙋ́щихъ ѿѻнꙋ́дꙋ сласте́й слеза́ми пото́пѧтъ.

є҃і. Ми́рꙋ по́мыслѡвъ ѿ дꙋхѡ́въ лꙋка́вствїѧ смꙋти́вшꙋсѧ а҆́бїе и҆ разжжє́нныѧ стрѣ́лы по́хоти на бы́стрѡ текꙋ́щаго къ высота́мъ ᲂу҆ма̀, ѿ лови́телей и҆ плотолю́бныхъ бѣсѡ́въ и҆спꙋща́ютсѧ ча́стѡ. Оу҆́мъ же ѿ є҆́же къ гѡ́рнимъ движе́нїѧ ѿсѣ́ксѧ, въ нелѣ̑потна движє́нїѧ и҆ смѣ́шєна впада́етъ: и҆ та́кѡ безчи́ннѣ пло́ть воста́нїе твори́ти на дꙋ́хъ начина́етъ, скокта́ньми ᲂу҆́мъ и҆ разже́ньми низвлекꙋ́щи, и҆ въ ро́вѣ сла́сти погребстѝ є҆го̀ жела́ющи. И҆ а҆́ще не бы̀ саваѡ́ѳъ прекрати́лъ дни̑ ѻ҆́ны, и҆ си́лꙋ терпѣ́нїѧ свои̑мъ дарова́лъ рабѡ́мъ, не бы̀ спасла́сѧ всѧ́ка пло́ть, ѿ го́ршагѡ ᲂу҆де́ржана бы́вши.

ѕ҃і. Бѣ́съ блꙋда̀ многоискꙋ́сенъ и҆ многоко́зненъ сы́й, ѻ҆́вѣмъ ᲂу҆́бѡ паде́нїе и҆ ро́въ тимѣ́нїѧ быва́етъ: ѻ҆́вѣмъ же ра́на и҆ же́злъ пра́веденъ: ѻ҆́вѣмъ же и҆скꙋше́нїе и҆ дꙋшѝ томле́нїе. Ѿ си́хъ ѻ҆́во ᲂу҆́бѡ, ѡ҆ вводи́мыхъ, є҆щѐ ꙗ҆ре́мъ влекꙋ́щихъ подви́жничества сла́бѣ и҆ лѣни́вѣ, зри́тсѧ: ѻ҆́во же, ѡ҆ и҆мꙋ́щихъ средꙋ̀ предспѣ́ѧнїѧ въ добродѣ́тель, и҆ коснѣ́е къ не́й простира́ющихсѧ. Ѻ҆́во же, ѿ и҆̀же къ видѣ́нїю ᲂу҆жѐ крило̀ протѧ́гшихъ ᲂу҆ма̀, и҆ ны́нѣ до́брѣ дости́гшихъ къ соверше́ннѣйшемꙋ безстра́стїю. Комꙋ́ждо къ полє́знымъ ꙗ҆́вѣ ꙗ҆́кѡ стро́имꙋ свы́ше.

з҃і. Паде́нїе и҆ ро́въ тимѣ́нїѧ во всѧ́цѣмъ небреже́нїи и҆́ноческое соверша́ющымъ житїѐ, блꙋ́дный быва́етъ бѣ́съ: ᲂу҆́ды си́хъ блꙋда̀ пла́менемъ и҆ по́хотїю распалѧ́ѧ, и҆ разли̑чны кѡ́зни подаѧ̀ и҆̀мъ, во є҆́же твори́ти по́хоть пло́ти и҆ без̾ сочета́нїѧ и҆ны́ѧ пло́ти, ѡ҆ ни́хже сра́мно є҆́сть и҆ глаго́лати. Сі́и и҆ пло́ть, по ре́кшемꙋ, сквернѧ́тъ, и҆ плоды̀ снѣда́ютъ сла́ныѧ сла́сти, и҆ мра́ка на зра́цѣхъ и҆сполнѧ́ютсѧ, и҆ лꙋ́чшихъ пра́веднѡ лиша́ютсѧ. И҆́мже цѣльба̀ хотѧ́щымъ бꙋ́детъ, покаѧ́нїѧ теплота̀, и҆ ᲂу҆миле́нїе ѿ сегѡ̀ сле́зное, є҆́же и҆ ᲂу҆клоне́нїе ѿ ѕла̀ твори́тъ, и҆ дꙋ́шꙋ ѡ҆чища́етъ ѿ скве́рнъ, и҆ наслѣ́дницꙋ тꙋ̀ ми́лости бж҃їѧ содѣ́ловаетъ. Є҆́же пра́веднѣ и҆ премꙋ́дрый гада́тельствꙋѧ соломѡ́нъ, цѣле́нїе речѐ, ᲂу҆толѧ́етъ грѣхѝ вели́ки¹²⁵⁰.

и҃і. Би́чь и҆ же́злъ быва́етъ пра́веднѡ се́й дꙋ́хъ въ пе́рвомъ безстра́стїи соверша́ємымъ чрез̾ дѣ́ѧтельное любомꙋ́дрїе, и҆ творѧ́щымъ ны́нѣ предспѣ̑ѧнїѧ въ прє́днѧѧ и҆ совершє́ннаѧ: внегда́ бо крѣ́пости держи́магѡ подви́жничества ᲂу҆ны́нїемъ посла́бѧтъ, и҆ къ неѡхрани́мꙋ видѣ́нїѧ мїрска́гѡ чꙋ́вства ма́лѡ ᲂу҆кло́нѧтсѧ, и҆ человѣ́ческихъ веще́й въ жела́нїи бꙋ́дꙋтъ: тогда̀ и҆ ᲂу҆ранѧ́ѧй се́й на тѧ̀ напꙋща́етсѧ ѿ кра́йнїѧ бж҃їѧ къ ни̑мъ бла́гости, и҆ би́ти слове́сно сїѐ начина́етъ, по́мыслы по́хоти плотскі́ѧ, ꙗ҆́кѡ да не терпѧ́ще, въ своѐ стра́жбище па́ки востекꙋ́тъ тща́тельнѣ крѣ́пкагѡ дѣ́ланїѧ и҆ внима́нїѧ, и҆ ᲂу҆се́рднѣе спаса́ющихъ и҆́хъ дѣ́лъ приболѣ́знѣйшимъ пребыва́нїемъ и҆́мꙋтсѧ. Не хо́щетъ бо бг҃ъ благолю́бецъ сы́й въ сїѐ дости́гшей дꙋшѝ всѧ́чески къ чꙋ́вствꙋ мі́ра возвраща́тисѧ, но и҆тѝ въ прє́днѧѧ при́снѡ, и҆ соверше́ннѣйшихъ дѣ́лъ рачи́тельнѣ каса́тисѧ, да не ра́на ѕло́бы прибли́житсѧ сеѧ̀ тѣлесѝ.

ѳ҃і. И҆скꙋше́нїе и҆ ѻ҆сте́нъ и҆ томле́нїе по смотре́нїю ѻ҆́нѣмъ се́й дꙋ́хъ быва́етъ, и҆́мже пе́рвое ко второ́мꙋ безстра́стїю дости́же: да си́мъ стꙋжа́еми є҆сте́ственнꙋю помина́ютъ не́мощь, и҆ не премно́жествомъ быва́ющихъ ѿ видѣ́нїѧ ѿкрове́нїй, по словесѝ, превозно́сѧтсѧ. Но противовою́ющїй зако́нъ зако́нꙋ ви́дѧще ᲂу҆ма̀ своегѡ̀, и҆ то́нкꙋю ѿтрѧса́ютъ па́мѧть грѣха̀: стра́хомъ є҆́же не прїѧ́ти чꙋ́вства внꙋ́трь ражда́ющагѡсѧ вре́да ѿ па́мѧти є҆гѡ̀ и҆ ѿ высоты̀ видѣ́нїѧ не ѡ҆сла́бѧтъ зри́тельное ᲂу҆ма̀ своегѡ̀.

к҃. Є҆ди́ни то́нкїѧ па́мѧти грѣха̀ ᲂу҆́мъ сво́й без̾ стꙋже́нїѧ соблюстѝ возмого́ша, є҆ли́цы животворѧ́щꙋю гдⷭ҇ню ме́ртвость во ᲂу҆десѣ́хъ свои́хъ и҆ разꙋмѣ́нїихъ свы́ше прїѧ́ти дꙋ́хомъ сподо́бишасѧ. И҆ пло́ть ᲂу҆́бѡ ме́ртвꙋ грѣхꙋ̀ ѡ҆бно́сѧтъ, дꙋ́хъ же жи́знїю пра́вды ра́ди ꙗ҆́же ѡ҆ хрⷭ҇тѣ̀ і҆и҃сѣ ѡ҆богати́ша. И҆ є҆ли́цѣмъ ᲂу҆́мъ даде́сѧ хрⷭ҇то́въ сло́вомъ премꙋ́дрости, си̑мъ и҆ нестꙋжа́емаѧ животворѧ́щаѧ ме́ртвость въ ра́зꙋмѣ ѡ҆брѣ́тесѧ бж҃їи.

к҃а. На ѡ҆чища́ємыѧ ны́нѣ дꙋ́шы ѡ҆бы́че нѣ́какѡ дꙋ́хъ по́хоти и҆ ꙗ҆́рости находи́ти. Кі́имъ ѡ҆́бразомъ; да плоды̀ и҆стрѧсе́тъ дх҃а ст҃а́гѡ тѧготѣ́юща въ ни́хъ. А҆ занѐ и҆ ра́дость свобо́ды, разлїѧ́нїе нѣ́кое дѣ́лаетъ въ таковы́хъ дꙋша́хъ, всѧ̑ на по́льзꙋ ᲂу҆строѧ́ющаѧ премꙋ́дрость, къ себѣ̀ при́снѡ хотѧ́щи свои́ми дарова́нїи влещѝ и҆́хъ мы́сль, и҆ пребыва́ти тѣ̑мъ въ смиренномꙋ́дрїи непоколеби̑мымъ, да не мно́гою свобо́дою и҆ бога́тствомъ дарова́нїй на и҆нѣ́хъ вознесꙋ́тсѧ, и҆лѝ и҆ возмни́тсѧ свое́ю си́лою и҆ ра́зꙋмомъ, вели́кꙋю стѧжа́ти сїю̀ пала́тꙋ ми́ра, дае́тъ си̑мъ мѣ́сто дꙋховѡ́мъ напада́ти на нѧ̀ въ сопрѧ́танїи є҆ѧ̀: да стра́хомъ ᲂу҆ѧзвлѧ́еми паде́нїѧ, въ свое́мъ стоѧ́тъ хране́нїи блаже́ннагѡ смиренномꙋ́дрїѧ, и҆ да ᲂу҆разꙋмѣ́вше, ꙗ҆́кѡ пло́ти и҆ кро́ви привѧ́зани сꙋ́ть, взы́щꙋтъ є҆сте́ственнѣ своегѡ̀ стра́жбища, въ не́мже безврє́дны мо́гꙋтъ сохрани́тисѧ си́лою дꙋ́ха.

к҃в. Ко ѡ҆блада́ющемꙋ страсте́й недꙋ́гꙋ, и҆ внꙋ́трь лежа́щемꙋ въ на́съ согни́тїю грѣха̀, (и҆) и҆скꙋше́нїй нанесе́нїе быва́етъ, и҆ ча́ша пелы́нѧ сꙋде́бъ бж҃їихъ, и҆лѝ лютѣ́е растворѧ́етсѧ на́мъ, и҆лѝ милосе́рднѣе. Занѐ а҆́ще ᲂу҆́бѡ и҆сцѣ́льно нѣ́кое бꙋ́детъ, и҆ ᲂу҆дововрачꙋ́емо внꙋ́трь лежа́щее въ на́съ вещество̀ грѣха̀, ѿ пѡ́мыслъ си́рѣчь сластолюби́выхъ, и҆лѝ жизнолюби́выхъ, растворе́нна милосе́рдїемъ ча́ша и҆скꙋше́нїй ѿ врача̀ дꙋ́шъ на́шихъ дае́тсѧ, ꙗ҆́кѡ въ человѣ́ческихъ и҆стѧзꙋ́емыхъ недꙋ́зѣхъ, и҆ є҆щѐ человѣ́чєскаѧ стра́ждꙋщымъ. А҆́ще ли же неꙋдобоисцѣ́льно нѣ́кое бꙋ́детъ и҆ лежа́щее во глꙋбинѣ̀, и҆ є҆́же къ сме́рти содѣ́ловаетъ согни́тїе ѿ пѡ́мыслъ киче́нїѧ и҆ го́рдости послѣ́днїѧ, нерастворе́на въ лю́тости ꙗ҆́рости дае́тсѧ: да ѻ҆гне́мъ ча́стыхъ вкꙋ́пѣ и҆скꙋше́нїе и҆ста́ѧвъ и҆ и҆стончи́всѧ недꙋ́гъ, смире́нїемъ ѿи́детъ ѿ дꙋ́шъ на́шихъ, и҆ сла̑ныѧ по́мыслы слеза́ми пото́пимъ, и҆ чи́сти ꙗ҆ви́мсѧ во свѣ́тѣ смире́нїѧ врачꙋ̀ дꙋ́шъ на́шихъ

к҃г. Нѣ́сть мо́щно и҆на́кѡ подвиза́ющымсѧ и҆збѣ́гнꙋти ча́стости и҆скꙋше́нїй, а҆́ще не́мощи своеѧ̀ не позна́ютъ, и҆ стра́нныхъ всѧ́кїѧ пра́вды себѐ не вмѣнѧ́тъ, и҆ всѧ́кагѡ ᲂу҆тѣше́нїѧ досто́йныхъ, всѧ́кїѧ че́сти, всѧ́кагѡ поко́ѧ: намѣ́ренїе бо є҆́сть бг҃ꙋ врачꙋ̀ дꙋ́шъ на́шихъ, при́снѡ смирє́ннымъ на́мъ бы́ти и҆ сокрꙋшє́ннымъ, стра̑ннымъ ѿ всѧ́кагѡ человѣ́ка, и҆ подража́телємъ тогѡ̀ страда́нїй: кро́токъ бо бѣ̀ и҆ смире́нъ се́рдцемъ, и҆ кро́тостїю и҆ смире́нїемъ се́рдца хо́щетъ на́съ тещѝ тече́нїемъ за́повѣдей.

к҃д. Смире́нїе не сотре́нїемъ вы́и, и҆лѝ брꙋ́дными власы̑, и҆лѝ ри́зою пренебреже́нною и҆ жесточа́йшею и҆ хꙋдо́ю и҆справлѧ́етсѧ, и҆̀мже мно́зїи ѡ҆бдержи́тельность добродѣ́тели приписꙋ́ютъ: но сокрꙋше́ннымъ се́рдцемъ и҆ дꙋ́хомъ смире́нїѧ, по даві́дꙋ ре́кшемꙋ: Дꙋ́хъ сокрꙋше́нъ, се́рдце сокрꙋше́нно и҆ смире́нно бг҃ъ не ᲂу҆ничижи́тъ¹²⁵¹.

к҃є. И҆́но смиреносло́вїе, и҆ и҆́но смире́нїе, и҆́но смиреномꙋ́дрїе: занѐ смиреносло́вїе ᲂу҆́бѡ и҆ смире́нїе, всѧ́цѣмъ ѕлострада́нїемъ и҆ внѣ́шними трꙋды̑ добродѣ́тели и҆справлѧ́ютсѧ подвиза́ющимисѧ, ѡ҆ є҆ди́номъ тѣле́сномъ дѣ́ланїи и҆ ѡ҆бꙋче́нїи собира́емо и҆мꙋ́ще. Тѣ́мже не сꙋ́щей дꙋшѝ мно́гажды во ᲂу҆строе́нїи, и҆скꙋше́нїю ᲂу҆срѣ́тшꙋ, смꙋща́етсѧ. Смиренномꙋ́дрїе же, бж҃е́ственна нѣ́каѧ ве́щь сꙋ́щи и҆ высока̀, ѿ є҆ди́нагѡ прибыва́етъ средꙋ̀ преше́дшымъ. Оу҆тѣ́шителева прише́ствїѧ: и҆ предше́ствовавшымъ, си́рѣчь, всѧ́цѣмъ смире́нїемъ, пꙋ́ть жесточа́йшїй добродѣ́тели.

к҃ѕ. Смиреномꙋ́дрїе во глꙋбины̑ дꙋшѝ вше́дшо, и҆ ꙗ҆́кѡ ка́мень тѧ́жекъ напа́дшо на ню̀, толи́кѡ сїю̀ и҆згнѣта́етъ и҆ и҆стиснѧ́етъ си́лою, ꙗ҆́коже и҆стощи́тисѧ все́й тоѧ̀ крѣ́пости, неꙋдержи́мымъ стремле́нїемъ сле́зъ, и҆ скве́рны всѧ́кїѧ помыслѡ́въ ѡ҆чи́ститисѧ ᲂу҆мꙋ̀, и҆ во видѣ́нїи бы́ти, по и҆са́їи проро́цѣ бж҃їи. И҆ та́кѡ рещѝ дѣ́йствꙋемꙋ и҆ томꙋ̀: ѽ ѻ҆каѧ́нный а҆́зъ, ꙗ҆́кѡ ᲂу҆мили́хсѧ ꙗ҆́кѡ человѣ́къ сы́й, и҆ нечи́сты ᲂу҆стнѣ̀ и҆мы́й, посредѣ̀ люде́й нечи̑стыѧ ᲂу҆стнѣ̀ и҆мꙋ́щихъ а҆́зъ живꙋ̀, и҆ цр҃ѧ̀ гдⷭ҇а саваѡ́ѳа ви́дѣхъ ѻ҆чи́ма мои́ма¹²⁵².

к҃з. Є҆гда̀ во глꙋбинꙋ̀ смиреносло́вїе тебѣ̀ привни́детъ, тогда̀ высокорѣ́чїе ѿи́детъ ѿ тебѐ. Є҆гда́ же во глꙋбинꙋ̀ смире́нїе вкорени́тсѧ се́рдца твоегѡ̀, тогда̀ и҆ пове́рхнее и҆лѝ (и҆) во глꙋбинꙋ̀ смиреносло́вїе ѿрази́ттисѧ. Внегда́ же свы́ше смиреномꙋ́дрїемъ ѡ҆богатѣ́еши, тогда̀ и҆ са́мо то̀ внѣ́шнее смире́нїе, и҆ ѧ҆зы́ка смиреносло́вїе соверше́ннѣ тебѣ̀ ᲂу҆праздни́тсѧ, по глаго́лющемꙋ та́кѡ па́ѵлꙋ: Є҆гда́ же прїи́детъ соверше́нное, є҆́же ѿ ча́сти ᲂу҆праздни́тсѧ¹²⁵³.

к҃и. Є҆ли́кѡ ѿстоѧ́тъ восто́цы ѿ за́падъ, толи́кѡ ѿстои́тъ и҆́стинное смиреносло́вїе ѿ и҆́стиннагѡ смире́нїѧ. Є҆ли́кѡ же бо́льше землѝ нб҃о, и҆ дꙋша̀ тѣ́ла, толи́кѡ дх҃омъ ст҃ы́мъ дае́мое соверше́ннымъ смиреномꙋ́дрїе, и҆ соверше́ннѣйше и҆ бо́льше є҆́сть и҆́стиннагѡ смире́нїѧ.

к҃ѳ. Нижѐ смирє́ннаѧ вѣща́ющаго ѡ҆́бразомъ и҆ ѡ҆дѣѧ́нїемъ смире́нїѧ, смире́на бы́ти се́рдцемъ ᲂу҆до́бь да вознепщꙋ́еши. Нижѐ того̀, и҆́же высѡ́каѧ и҆ возвы́шєннаѧ, киче́нїѧ и҆ го́рдости полна̀, кромѣ̀ є҆́же ѡ҆ си́хъ и҆стѧза́нїѧ: ѿ плѡ́дъ же и҆́хъ позна́еши и҆̀хъ.

л҃. Пло́дъ дх҃а ст҃а́гѡ є҆́сть любы̀, ра́дость, ми́ръ, милосе́рдїе, долготерпѣ́нїе, бла́гость, вѣ́ра, кро́тость, воздержа́нїе. Сопроти́внагѡ же дꙋ́ха пло́дъ є҆́сть не́нависть, печа́ль мїрска́ѧ, неꙋстрое́нїе дꙋше́вно, смꙋще́нїе се́рдца, лꙋка́вство, любопы́тно мꙋдрова́нїе, пренемога́нїе, гнѣ́въ, невѣ́рїе, за́висть, ѡ҆б̾ѧде́нїе, пїѧ́нство, досажде́нїе, ѡ҆сꙋжде́нїе, по́хоть ѻ҆че́съ, киче́нїе и҆ горды́нѧ дꙋшѝ. Ѿ таковы́хъ ᲂу҆̀бо плодѡ́въ дре́во да бꙋ́детъ тѝ познава́емо, и҆ си́це всѧ́кѡ вѣ́дый бꙋ́деши, ко́егѡ дꙋ́ха є҆́сть бесѣ́дꙋѧй съ тобо́ю. И҆́маши бо зна́мєнїѧ си́хъ и҆ ѿ гдⷭ҇нѧ гла́са ꙗ҆́вственнѣе: благі́й, глаго́летъ, человѣ́къ, ѿ блага́гѡ сокро́вища се́рдца своегѡ̀ и҆зно́ситъ блага̑ѧ: лꙋка́вый же ѿ лꙋка́вагѡ сокро́вища се́рдца своегѡ̀ и҆зно́ситъ лꙋка̑ваѧ¹²⁵⁴: поне́же по дре́вꙋ и҆ пло́дъ є҆гѡ̀.

л҃а. Въ ни́хже ᲂу҆́бѡ сꙋ́ть и҆ ᲂу҆сма́триваютсѧ, ꙗ҆̀же ст҃а́гѡ дх҃а, въ тѣ́хъ є҆́сть и҆ вселе́нїе бж҃їе. Ѿ си́хъ и҆ немꙋ́тный и҆сто́чникъ сло́ва съ премꙋ́дростїю и҆ ра́зꙋмомъ: а҆́ще смиреносло́вѧще слы́шими сꙋ́ть, а҆́ще высѡ́ка глаго́люще. А҆ въ ни́хже не ᲂу҆сма́триваютсѧ плоды̀ и҆ дарова̑нїѧ сегѡ̀, но ꙗ҆̀же сꙋ́ть сопроти́внагѡ дꙋ́ха, въ тѣ́хъ тьма̀ є҆́сть невѣ́дѣнїѧ бг҃а, и҆ собра́нїе страсте́й, и҆ вселе́нїе сꙋпоста́тныхъ дꙋхѡ́въ. И҆лѝ смирє́нна вѣща́юще и҆ носѧ́ще зрѧ́тсѧ, и҆лѝ высѡ́ка со ᲂу҆краше́нїемъ разли́чнымъ и҆ ви́димою че́стностїю.

л҃в. Не ли́цы и҆лѝ ѡ҆́бразы и҆лѝ словесы̑ начертава́етсѧ и҆́стина, нижѐ въ си́хъ бг҃ъ почива́етъ, но въ сердца́хъ сокрꙋше́нныхъ и҆ дꙋ́сѣхъ смире́нїѧ, и҆ дꙋша́хъ просвѣще́нныхъ ра́зꙋмомъ бж҃їимъ. Ѻ҆вогда́ бо повинꙋ́ющасѧ кого̀ словесы̀ ви́димъ внѣ̀, и҆ смире́нный по всемꙋ̀ ᲂу҆потреблѧ́юща глаго́лъ, похвалꙋ̀ ᲂу҆ловлѧ́юща человѣ́ческꙋю: внꙋ́трь же мнѣ́нїѧ по́лна сꙋ́ща ле́сти и҆ за́висти, и҆ къ бли́жнемꙋ ѕлопомнѣ́нїѧ. И҆ ѻ҆вогда̀ пра́вды ра́ди ра́тꙋющасѧ проти́вꙋ кого̀ словесы̀ высо́кими премꙋ́дрости ви́димъ внѣ̀, и҆ проти́вꙋ лжѝ, и҆лѝ престꙋпле́нїю бж҃е́ственныхъ зако́нѡвъ стоѧ́ща, и҆ къ є҆ди́ной зрѧ́ща си́рѣчь и҆́стинѣ, и҆ внꙋ́трь всѧ́кагѡ (и҆спо́лнь) сꙋ́ща мѣрномꙋ́дрїѧ, смире́нїѧ и҆ любвѐ къ бли́жнемꙋ, ѻ҆вогда̀ и҆ хва́лѧщасѧ ѡ҆ гдⷭ҇ѣ, по та́кѡ глаго́лющемꙋ па́ѵлꙋ. и҆ хва́лѧщемꙋсѧ ѡ҆ гдⷭ҇ѣ: Похвалю́сѧ въ не́мощехъ мои́хъ¹²⁵⁵.

л҃г. Не пове́рхность ѿ на́съ глаго́лемыхъ и҆лѝ содѣва́емыхъ зри́тъ бг҃ъ: но хотѣ́нїе дꙋ́шъ и҆ намѣ́ренїе, є҆гѡ́же ра́ди и҆лѝ содѣва́емъ что̀ ѿ ви́димыхъ, и҆лѝ глаго́лемъ что̀ ѿ разꙋмѣва́емыхъ. Ꙗ҆́коже и҆ си̑лы слове́съ и҆ концы̀ дѣ́лъ, ра́зꙋмомъ про́чїихъ превосходѧ́щїи зрѧ́тъ па́че, и҆ сꙋды̀ си́хъ творѧ́тъ непогрѣ̑шны. Ꙗ҆́коже и҆ человѣ́къ ᲂу҆́бѡ на лицѐ, бг҃ъ же на се́рдце зри́тъ¹²⁵⁶.

л҃д. Є҆да́ ли не подоба́ше, дабы̀ сꙋждено̀ бы́ло бг҃омъ въ ро́дѣхъ и҆ ро́дѣхъ. Проро́кѡмъ є҆гѡ̀ и҆ дрꙋгѡ́мъ ᲂу҆строева́ємымъ бы́ти дх҃омъ, въ соверше́нїе це́ркве є҆гѡ̀. А҆́ще бо дре́внїй ѕмі́й не ѡ҆ста́ви влага́ти ꙗ҆́дъ грѣха̀ въ слꙋ́хи человѣ́кѡвъ, и҆̀мже па́ки дꙋше́внаѧ прихо́дитъ поги́бель: ка́кѡ созда́вый на є҆динѣ̀ сердца̀ на̑ша, ᲂу҆бо́га ѿ землѝ смире́нїѧ не возста́витъ, и҆ ѿ гно́ища страсте́й не воздви́гнетъ ни́ща, дꙋхо́внꙋю приносѧ́ща си́лꙋ, и҆́же є҆́сть глаго́лъ бж҃їй, въ по́мощь достоѧ́нїѧ своегѡ̀; Вои́стиннꙋ ᲂу҆́бѡ ѿ смире́нїѧ начина́юще; на высотꙋ̀ востека́ютъ ра́зꙋма, и҆ дае́тсѧ тѣ̑мъ свы́ше глаго́лъ премꙋ́дрости си́лою бж҃їею, ꙗ҆́кѡ благовѣствꙋ́ющымъ спасе́нїе це́ркви є҆гѡ̀.

л҃є. Позна́й самаго̀ себѐ: и҆ сѐ є҆́сть и҆́стинное вои́стиннꙋ смире́нїе, смиренномꙋ́дрствовати наꙋча́ющее, сокрꙋша́ющее се́рдце, и҆ са́мо сїѐ є҆́сть (є҆́же) дѣ́лати и҆ храни́ти. А҆́ще же не ᲂу҆̀ позна́лъ є҆сѝ себѐ: нижѐ что̀ є҆́сть смире́нїе, вѣ́си, нижѐ коснꙋ́лсѧ є҆сѝ и҆́стиннагѡ дѣ́ланїѧ и҆ хране́нїѧ: є҆́же во себѐ позна́ти, коне́цъ є҆́сть дѣ́ланїѧ добродѣ́телей.

л҃ѕ. И҆́же ѿ чистоты̀ въ ра́зꙋмъ сꙋ́щихъ дости́гнꙋвый, позна̀ себѐ, по рече́нномꙋ: позна́й себѐ. А҆ и҆́же не ᲂу҆̀ въ ра́зꙋмъ дости́гнꙋвый, самѣ́хъ же (тѣ́хъ) слове́съ тва́ри, и҆ бж҃е́ственныхъ и҆ человѣ́ческихъ веще́й: позна̀ ᲂу҆́бѡ ꙗ҆̀же ѡ҆ себѣ̀, и҆ ꙗ҆̀же внѣ̀ себѐ, себе́ же ника́коже.

л҃з. Не є҆́же є҆́сть а҆́зъ, сїѐ всѧ́ко и҆ ꙗ҆̀же на мнѣ̀: ни є҆́же ꙗ҆̀же на мнѣ̀, сїѐ и҆ ꙗ҆̀же ѡ҆ мнѣ̀. Ни є҆́же ꙗ҆̀же ѡ҆ мнѣ̀, сїѐ и҆ ꙗ҆̀же внѣ̀ менѐ: но и҆́но сїѧ̑, и҆ и҆́но и҆ и҆́но. Занѐ а҆́зъ ᲂу҆́бѡ ѡ҆́бразъ є҆́смь бж҃їй, въ дꙋшѝ ᲂу҆́мнѣй же и҆ безсме́ртнѣй и҆ слове́снѣй зри́мь, ꙗ҆́кѡ ᲂу҆́мъ и҆мы́й сло́во ѻ҆ц҃а̀, и҆ дꙋшѝ нераздѣ́ленъ же и҆ є҆диносꙋ́щенъ. А҆ ꙗ҆̀же на мнѣ̀, ца́рское є҆́сть, нача́льное, слове́сное же и҆ самовла́стное. А҆ ꙗ҆̀же ѡ҆ мнѣ̀, є҆ли̑ка ѿ произволе́нїѧ и҆зволи́тєльна: є҆́же земледѣ́льцꙋ бы́ти, и҆лѝ кꙋпцꙋ̀, и҆лѝ ᲂу҆чи́тельнꙋ, и҆лѝ любомꙋ́дрцꙋ. А҆ ꙗ҆̀же внѣ̀ менѐ, є҆ли̑ка же ѡ҆ любоче́стїи житїѧ̀ и҆ до́льнѣмъ благоро́дствѣ: бога́тство, сла́ва, че́сть, благоде́нство и҆ высота̀ са́нѡвъ, и҆лѝ сопроти́вное, ᲂу҆бо́жество, безсла́вїе, безче́стїе и҆ ѕлополꙋ́чїе.

л҃и. Всѧ́къ себѐ позна́вый, почѝ ѿ всѣ́хъ дѣ́лъ свои́хъ, ꙗ҆̀же по бз҃ѣ, и҆ вни́де во свѧти́лище бж҃їе, ᲂу҆́мнꙋю дꙋ́ха слꙋ́жбꙋ, и҆ въ приста́нище бж҃е́ственно безстра́стїѧ и҆ смире́нїѧ. А҆ и҆́же не ᲂу҆̀ себѐ смиреномꙋ́дрїемъ и҆ ра́зꙋмомъ позна́вый, въ трꙋдѣ̀ є҆щѐ и҆ по́тѣ въ житїѝ се́мъ ше́ствꙋетъ. Сїе́ бо и҆ дв҃дъ гада́тельствꙋѧ глаго́лаше: Сїѐ трꙋ́дъ є҆́сть предо мно́ю, до́ндеже вни́дꙋ во свѧти́ло бж҃їе¹²⁵⁷.

л҃ѳ. Внегда̀ позна́етъ кто̀ себѐ, сїе́ же мно́гагѡ тре́бꙋетъ внѣ́шнѧгѡ хране́нїѧ, и҆ ѿ мїрски́хъ веще́й ᲂу҆праздне́нїѧ, и҆ самагѡ̀ (тогѡ̀) со́вѣсти и҆спыта́нїѧ: а҆́бїе и҆ бж҃е́ственно нѣ́кое внеза́пꙋ дꙋшѣ̀ смире́нїе па́че сло́ва прихо́дитъ, сокрꙋше́нїе приносѧ́щее се́рдцꙋ, и҆ сле́зы тє́плы ᲂу҆миле́нїѧ, ꙗ҆́коже тогда̀ вмѣнѧ́ти ѿ тогѡ̀ дѣ́йствꙋемомꙋ зе́млю себѐ, и҆ пе́пелъ и҆ че́рвѧ, а҆ не человѣ́ка: и҆ къ томꙋ̀ нижѐ ско́тскагѡ сегѡ̀ живота̀ досто́йна, за превосхо́дность да́ра сегѡ̀ бж҃їѧ. Въ не́мже ᲂу҆коснѣ́ти сподо́бивыйсѧ, пїѧ́нства и҆на́гѡ неизрече́нна и҆сполнѧ́етсѧ ᲂу҆миле́нїѧ, и҆ въ глꙋбинꙋ̀ смиренномꙋ́дрїѧ вхо́дитъ: и҆ и҆зстꙋпи́въ себѐ, всѧ̑ презира́етъ внѣ̑шнѧѧ бра̑шна, питїѐ и҆ ѡ҆дѣѧ̑нїѧ, тѣлесѐ не превосходѧ̀ потре́бы ꙗ҆́кѡ и҆змѣни́всѧ до́брымъ и҆змѣне́нїемъ десни́цы вы́шнѧгѡ.

м҃. Ве́щь велича́йша є҆́сть въ добродѣ́телехъ, смире́нїе. Сїе́ бо, въ ни́хже а҆́ще вни́детъ покаѧ́нїемъ чи́стымъ, и҆ моли́твꙋ спꙋ́тницꙋ съ воздержа́нїемъ прїи́метъ, страсте́й ᲂу҆́бѡ а҆́бїе рабо́ты свобѡ́дны тѣ́хъ содѣ́ловаетъ: ми́ръ же си́ламъ дꙋшѝ и҆́хъ подае́тъ, и҆ се́рдце ѡ҆чища́етъ слеза́ми, и҆ и҆сполнѧ́етъ є҆̀ тишины̀ прише́ствїемъ дх҃а. И҆ та́кѡ си̑мъ завѣща́нїе воз̾имѣ́вшымъ, ᲂу҆ѧснѧ́етсѧ сло́во ѿсю́дꙋ тѣ́мъ ра́зꙋма бж҃їѧ, и҆ во видѣ́нїе прихо́дѧтъ та̑инъ ца́рствїѧ небе́снагѡ, и҆ са́мыхъ тѣ́хъ слове́съ тва́ри. Поели́кꙋ же во глꙋбины̑ дꙋ́ха воглꙋблѧ́ютсѧ, потоли́кꙋ и҆ въ смиреномꙋ́дрїѧ глꙋбинꙋ̀ погрꙋжа́ютсѧ: ѿ сегѡ́ же возраста́етъ тѣ̑мъ позна́нїе свои́хъ мѣ́ръ, познава́етсѧ не́мощь человѣ́ческагѡ є҆стества̀ и҆ любы̀ бж҃їѧ и҆ бли́жнихъ мно́житсѧ. ꙗ҆́кѡ ѡ҆свѣще́нїе вмѣнѧ́ти тѣ̑мъ почерпа́ти ѿ є҆ди́нагѡ цѣлова́нїѧ¹²⁵⁸, и҆ соѡбраща́ющихсѧ приближе́нїѧ.

м҃а. Ничто́же си́це и҆́но къ раче́нїю бж҃їю и҆ любвѝ человѣ́честѣй воскрилѧ́етъ дꙋ́шꙋ, ꙗ҆́коже смиреномꙋ́дрїе, ᲂу҆миле́нїе, и҆ моли́тва чи́ста. Занѐ ѻ҆́во ᲂу҆́бѡ сокрꙋша́етъ дꙋ́хъ, и҆ сле́зъ и҆сточа́етъ ка̑пли, и҆ человѣ́ческой назрѣ́нїемъ кра́ткости ведꙋ́щей свои́хъ мѣ́ръ ᲂу҆вѣ́дѣти не́мощь наꙋча́етъ: ѻ҆́во же, ѡ҆чища́етъ ѿ вещества̀ ᲂу҆́мъ, и҆ просвѣща́етъ серде́чное ѻ҆́ко, и҆ всесїѧ́тельнꙋ дꙋ́шꙋ содѣ́ловаетъ: ѻ҆́ва же, совокꙋплѧ́етъ всего̀ человѣ́ка бг҃ови, и҆ сегѡ̀ а҆́гг҃лѡмъ твори́тъ вкꙋ́пѣ пребыва́тельна, и҆ сла́дости вѣ́чныхъ бж҃їихъ бла̑гъ вкꙋша́ти твори́тъ, и҆ сокрѡ́вища томꙋ̀ дае́тъ та́инствъ вели́кихъ, и҆ распалѧ́ющи любо́вїю, дерза́ти положи́ти того̀ повинꙋ́етъ дꙋ́шꙋ свою̀ за дрꙋ́ги своѧ̑, ꙗ҆́кѡ превы́шше бы́вша предѣ̑лъ смире́нїѧ тѣлесѐ.

м҃в. Храни́ ми до́брый зало́гъ бг҃отво́рнагѡ смире́нїѧ, въ не́мже любвѐ сокровє́ннаѧ сокрѡ́вища внꙋ́трь храни̑ма сꙋ́ть, въ не́мже ᲂу҆миле́нїѧ би́серїе сокрове́нни сꙋ́ть, и҆ цр҃ь хрⷭ҇то́съ бг҃ъ ꙗ҆́кѡ на прⷭ҇то́лѣ почива́етъ позлаще́ннѣ, да́ры раздаѧ̀ ст҃а́гѡ своегѡ̀ дх҃а пито́мцємъ є҆гѡ̀, и҆ вели̑каѧ своѧ̑ си̑мъ да́рꙋѧ достѡ́инства: сло́во ра́зꙋма своегѡ̀, премꙋ́дрость свою̀ неизрече́ннꙋю, бж҃е́ственныхъ веще́й прозрѣ́нїе, человѣ́ческихъ веще́й предзрѣ́нїе, животворѧ́щꙋю безстра́стїемъ ме́ртвость, и҆ є҆́же съ ни́мъ соедине́нїе, во є҆́же ца́рствовати съ ни́мъ въ црⷭ҇твїи бг҃а и҆ ѻ҆ц҃а̀, ꙗ҆́коже са́мъ къ немꙋ̀ моле́нїе твори́тъ, глаго́лѧ ѡ҆ на́съ: Ѻ҆́ч҃е! и҆̀хже да́лъ є҆сѝ мнѣ̀, хощꙋ̀, да и҆дѣ́же є҆́смь а҆́зъ, и҆ ті́и бꙋ́дꙋтъ¹²⁵⁹.

м҃г. Є҆гда̀ дѣ́ѧтельнѣ трꙋдѧ́сѧ кто̀ въ дѣ́ланїи за́повѣдей, внеза́пꙋ въ неизглаго́ланнѣй и҆ неизрече́ннѣй ра́дости бꙋ́детъ, ꙗ҆́коже и҆змѣни́тисѧ є҆мꙋ̀ стра́ннымъ и҆ па́че сло́ва и҆змѣне́нїемъ, и҆ тѧ́жесть ᲂу҆́бѡ ѿложи́ти тѣле́снꙋю, забы́ти же пи́щи, сна̀, и҆ и҆ны́хъ є҆стества̀ нꙋ́ждъ: да вѣ́сть сїю̀ бы́ти бж҃їе прише́ствїе къ немꙋ̀, творѧ́щее въ подвиза́ющихсѧ животворѧ́щꙋю ме́ртвость, и҆ да́рꙋющее тѣ̑мъ ѿсю́дꙋ ᲂу҆жѐ безпло́тныхъ ᲂу҆строе́нїе. Сеѧ̀ блаже́нныѧ жи́зни вино́вно є҆́сть смире́нїе: пита́тельница же и҆ ма́ти ст҃о́е ᲂу҆миле́нїе: дрꙋги́нѧ же и҆ сестра̀, бж҃е́ственнагѡ свѣ́та видѣ́нїе: престо́лъ, безстра́стїе: и҆ коне́цъ, ст҃а́ѧ трⷪ҇ца бг҃ъ.

м҃д. И҆́же сїѐ постигі́й краегра́дїе, не мо́жетъ под̾ ᲂу҆́зами держа́тисѧ чꙋ́вства всѣ́хъ. Не зри́тъ что̀ ѿ кра́сныхъ житїѧ̀ сегѡ̀, не раздѣлѧ́етъ ѿ непреподо́бнагѡ преподо́бнагѡ: но ꙗ҆́коже бг҃ъ ра́внѡ дожди́тъ и҆ возсїѧва́етъ со́лнце на пра́вєдныѧ и҆ на непра́вєдныѧ, на ѕлы̑ѧ же и҆ благі̑ѧ: та́кѡ ра́внѡ и҆ то́й любвѝ возсїѧва́етъ и҆ простира́етъ ко всѣ̑мъ лꙋчѝ: и҆ не ᲂу҆тѣснѧ́етсѧ ᲂу҆тро́бою, всѣ́хъ внꙋ́трь чревоносѧ̀ любо́вїю, и҆ ᲂу҆тѣснѧ́етсѧ и҆ наси́лꙋетсѧ не є҆ли́кѡ мо́щно благодѣ́тельствꙋѧ. Ѿ сегѡ̀ и҆сто́чникъ нѣ́кїй ꙗ҆́коже и҆з̾ є҆де́ма дрꙋгі́й и҆схо́дитъ ᲂу҆миле́нїѧ, въ четы́ре раздѣлѧ́ѧсѧ нача̑ла: въ смиренномꙋ́дрїе, въ чистотꙋ̀, въ безстра́стїе, и҆ въ высотꙋ̀ безмо́лвныѧ мл҃твы, и҆ напаѧ́етъ лицѐ всеѧ̀ мы́сленныѧ тва́ри бж҃їѧ.

м҃є. Не вкꙋси́вшїи сла́дости сле́зъ ᲂу҆миле́нїѧ, нижѐ вѣ́дꙋщїи, ка́ѧ є҆́сть благода́ть тогѡ̀, и҆ ко́е є҆́сть дѣ́йство: ничи́мже ѿ пролива́емыхъ над̾ ᲂу҆ме́ршими сле́зъ сїѧ̑ ра́знствовати мнѧ́тъ, приназида́юще себѐ, но нѣ̑каѧ ᲂу҆жѐ ѿ сꙋ́етныхъ и҆звѣ́тѡвъ мнѡ́га, и҆ недоꙋмѣ́нїй заключє́нїѧ. Сїѧ́ же є҆сте́ственнѣ въ на́съ сꙋ́ть. И҆ внегда̀ го́рдость ны́нѣ ᲂу҆ма̀ къ смире́нїю преклонѧ́етсѧ, смѣжи́тъ же дꙋша̀ и҆ зрѣ́нїѧ своѧ̑ ѿ пре́лести ви́димыхъ, и҆ сїѧ̑ къ є҆ди́номꙋ видѣ́нїю невеще́ственнагѡ и҆ пе́рвагѡ свѣ́та простре́тъ, всѐ ѿрѧ́сши мі́ра сегѡ̀ чꙋ́вство, и҆ полꙋ́читъ ѻ҆́но свы́ше дꙋ́ха ᲂу҆тѣше́нїе: а҆́бїе сле́зы ꙗ҆́кѡ во́ды и҆сто́чника и҆стека́ютъ и҆з̾ неѧ̀, и҆ чꙋ̑вства сеѧ̀ ᲂу҆слажда́ютъ, всѧ́кагѡ весе́лїѧ и҆сполнѧ́юще тоѧ̀ мы́сль и҆ бж҃е́ственнагѡ свѣ́та. Не то́чїю (же) но ᲂу҆́бѡ сокрꙋша́ютъ и҆ се́рдце, и҆ ᲂу҆́мъ смиренномꙋ́дръ во видѣ́нїи лꙋ́чшагѡ содѣ́ловаютъ. И҆̀мже бы́ти не возмо́жно є҆́сть, во и҆на́кѡ пла́чꙋщихъ и҆ рыда́ющихъ.

м҃ѕ. Не возмо́жно є҆́сть и҆на́кѡ и҆сто́чникъ сле́зъ разве́рсти комꙋ̀, кромѣ̀ глꙋбоча́йша смиренномꙋ́дрїѧ: нижѐ напроти́въ, смиренномꙋ́дрꙋ бы́ти, без̾ внꙋ́трь быва́ющагѡ ѿ прише́ствїѧ дꙋ́ха ᲂу҆миле́нїѧ: ᲂу҆миле́нїе бо, смиренномꙋ́дрїе: и҆ смиренномꙋ́дрїе ᲂу҆миле́нїе ст҃ы́мъ порожда́етъ дх҃омъ. Ꙗ҆́коже во нѣ́каѧ ве́рвь дрꙋ́гъ дрꙋ́га сїѧ̑ держа́щасѧ, и҆ є҆ди́ною благода́тїю сосвѧзꙋ́ема, не растерза́емь сою́зъ дꙋ́ха и҆́мꙋтъ.

м҃з. И҆́же ѿ бж҃е́ственнагѡ дх҃а внꙋ́трь быва́ющїй свѣ́тъ въ дꙋшѝ, ти́хѡ ѿходи́ти ѡ҆бы́че ѿ ᲂу҆ны́нїѧ и҆ нерадѣ́нїѧ и҆ ѿ нера́знства є҆́же ѿ слове́съ и҆ бра́шенъ. И҆ бра́шенъ бо нера́знство, и҆ мо́крость пи́щи, и҆ сама̀ та̀ неꙋде́ржность ѧ҆зы́ка, и҆ ѻ҆́чїю нехрани́тельность прогонѧ́ти того̀ ѿ неѧ̀ ѡ҆быко́ша и҆ те́мныхъ на́съ содѣ́ловати. Тьмы́ же и҆спо́лнившымсѧ на́мъ, всѝ ѕвѣ́рїе се́льнїи се́рдца на́шегѡ, и҆ скѵ́мни по́мыслы страсте́й а҆́бїе прохо́дѧтъ рыка́юще въ не́й, взыскꙋ́юще пи́щи встра́ствованїѧ, и҆ восхи́тити храни́мое въ на́съ ѿ дх҃а сокро́вище, но любе́зное вои́стиннꙋ воздержа́нїе, и҆ а҆гг҃лотво́рнаѧ моли́тва, не то́чїю ничесомꙋ́же ѿ таковы́хъ попꙋща́етъ въ дꙋ́шы проитѝ, но и҆ сїѧ́нїе неꙋгаси́мо дꙋ́ха во ᲂу҆мѣ̀ соблюда́етъ, и҆ се́рдце ти́хо соверша́етъ и҆ чи́сто, и҆сточа́етъ бж҃е́ственное ᲂу҆миле́нїе, и҆ дꙋ́шꙋ въ любо́вь разширѧ́етъ бж҃їю, и҆ всю̀ тꙋ̀ всемꙋ̀ весе́лїемъ и҆ дѣ́вствомъ сопрѧга́етъ хрⷭ҇тꙋ̀.

м҃и. Ничто́же та́кѡ и҆́но сво́йственно є҆́сть сло́вꙋ, ꙗ҆́коже чистота̀ и҆ цѣломꙋ́дрїе дꙋшѝ. Си́хъ же ма́ти є҆́сть ѡ҆бдержи́тельное и҆ любе́зное воздержа́нїе: сегѡ́ же ѻ҆те́цъ є҆́сть стра́хъ. Се́й же въ любо́вь прело́жьсѧ, и҆ жела́нїю бж҃е́ственныхъ совокꙋ́пльсѧ веще́й, небоѧ́зненнꙋ содѣ́ловаетъ дꙋ́шꙋ, и҆ и҆спо́лненнꙋ любвѐ бж҃їѧ, и҆ бж҃е́ственнагѡ сло́ва роди́тельницꙋ.

м҃ѳ. Стра́хъ ᲂу҆́бѡ пе́рвѣе совокꙋ́пльсѧ дꙋшѝ, непра́зднꙋ сло́вомъ сꙋда̀ тꙋ̀ покаѧ́нїемъ твори́тъ: ю҆́же бѡлѣ́зни а҆́дѡвы мꙋ́къ ѡ҆бхо́дѧтъ а҆́бїе, воздыха́нїѧ же и҆ бѡлѣ́зни съ сѣ́тованїемъ се́рдца и҆знꙋрѧ́ютъ, помышлѧ́ющꙋ бꙋ́дꙋщее ѡ҆ ѕлы́хъ воздаѧ́нїе. Та́же мно́гими слеза́ми и҆ болѣ́зньми сїѧ̑ во чре́вѣ ᲂу҆ма̀ заче́ншисѧ соверши́вши дꙋ́хъ спасе́нїѧ на землѝ, ражда́етъ се́рдца своегѡ̀, и҆ болѣ́зней свобо́ждшꙋсѧ а҆́довыхъ, и҆ воздыха́нїй и҆зба́вльшꙋсѧ сꙋда̀, жела́нїе и҆ ра́дость бꙋ́дꙋщихъ бла̑гъ тꙋ̀ прїе́млетъ и҆ прїꙋсрѣта́етъ тꙋ̀ люби́маѧ съ цѣломꙋ́дрїемъ чистота̀, и҆ раче́нїемъ тꙋ̀ присовокꙋплѧ́етъ бг҃ꙋ. Семꙋ́ же дꙋша̀ совокꙋ́пльшисѧ, неизрече́ннꙋ сла́дость ѡ҆щꙋща́етъ: ꙗ҆́кѡ ѿсю́дꙋ и҆злива́ти со сла́стїю и҆ сла́достїю сле́зы ᲂу҆миле́нїѧ, и҆ внѣ̀ быва́ти то́й всемі́рнагѡ чꙋ́вства, и҆ ꙗ҆́кѡ и҆зстꙋпи́вшей въ слѣ́дъ жениха̀ тещѝ, и҆ та́кѡ зва́ти гла̑сы неглаго́льними: Въ слѣ́дъ тебѐ текꙋ̀, въ воню̀ мѵ́ра твоегѡ̀. Возвѣстѝ мѝ, є҆го́же возлюбѝ и҆звѣ́ствованїе моѐ, гдѣ̀ пасе́ши; гдѣ̀ почива́еши въ полꙋ́днѣ чи́стагѡ видѣ́нїѧ; да не когда̀ бꙋ́дꙋ ꙗ҆́кѡ ѡ҆блага́ющаѧсѧ над̾ ста́ды пра́вєдникъ¹²⁶⁰. Ѡ҆сїѧ̑нїѧ сꙋ́ть ᲂу҆ тебѐ та́инствъ вели́кихъ, ю҆́же вве́дъ жени́хъ въ черто́гъ сокрове́нныхъ свои́хъ та̑инъ, зри́тельнꙋ тꙋ̀ слове́съ тва́ри съ премꙋ́дростїю соверша́етъ.

н҃. Да не рече́ши въ се́рдцѣ твое́мъ, чистотꙋ̀ дѣ́вства не возмо́жно мѝ є҆́сть про́чее пристѧжа́ти, тлѣ́нїю и҆ неи́стовствꙋ тѣле́сномꙋ разли́чнѡ подпа́дшꙋ: и҆дѣ́же бо бѡлѣ́зни покаѧ́нїѧ со ѕлострада́нїемъ, и҆ теплото́ю дꙋшѝ положены̀ бꙋ́дꙋтъ, и҆ сле́зъ рѣ́ки ѿ ᲂу҆миле́нїѧ потекꙋ́тъ: та́мѡ всѣ̀ грѣха̀ тверды̑ни низвраща́ютсѧ и҆ всѧ́къ пожа́ръ страсте́й ᲂу҆гаса́етъ, и҆ соверша́етсѧ є҆́же свы́ше порожде́нїе прише́ствїемъ ᲂу҆тѣ́шителѧ, и҆ па́ки чистоты̀ и҆ дѣ́вства пала́та дꙋша̀ быва́етъ. Въ ню́же пачеесте́ственный бг҃ъ соше́дъ свѣ́томъ и҆ ра́достїю неизрече́нною, и҆ ꙗ҆́кѡ на престо́лѣ сла́вы, на высотѣ̀ сѣ́дъ ᲂу҆ма̀ є҆ѧ̀, дае́тъ ми́ръ ꙗ҆̀же въ не́й си́ламъ, та́кѡ глаго́лѧ: ми́ръ ва́мъ ѿ сꙋпоста́тныхъ страсте́й. Ми́ръ мо́й даю̀ ва́мъ, во є҆́же по є҆стествꙋ̀ двиза́тисѧ, ми́ръ мо́й ѡ҆ставлѧ́ю ва́мъ, во є҆́же па́че є҆стества̀ соверши́тисѧ. Тро́йственнымъ ᲂу҆̀бо ми́рнагѡ дарова́нїѧ, трича́стїе и҆сцѣли́въ тоѧ̀ и҆ въ тро́ичное соверше́нїе возве́дъ, и҆ соедини́въ ю҆̀ себѣ̀, всю̀ дѣ́вꙋ ᲂу҆жѐ и҆ добрꙋ̀ и҆ краснꙋ̀ во благоꙋха́нїи мѵ́ра чистоты̀ па́ки разгрѣва́ѧ соверша́етъ, и҆ глаго́летъ къ не́й: Воста́ни, прїидѝ бли́жнѧѧ моѧ̀, до́браѧ моѧ̀, голꙋби́це моѧ̀, дѣ́ѧтельнымъ любомꙋ́дрїемъ. ꙗ҆́кѡ сѐ зима̀ страсте́й пре́йде, до́ждь сластолюби́выхъ пѡ́мыслъ ѿи́де, ѿи́де себѣ̀. Цвѣ́ти добродѣ́телей ꙗ҆ви́шасѧ со благоꙋха́нїемъ разꙋмѣ́нїй на землѝ се́рдца твоегѡ̀. Воста́ни, прїидѝ бли́жнѧѧ моѧ̀, въ ра́зꙋмъ є҆сте́ственна видѣ́нїѧ. И҆ прїидѝ ты̀ голꙋби́це моѧ̀¹²⁶¹ тѣ́мъ въ покро́въ и҆ мра́къ та́йнагѡ бг҃осло́вїѧ и҆ вѣ́ры тве́рдагѡ во мнѣ̀ бз҃ѣ ка́мене.

н҃а. Блаже́нъ мѝ є҆́сть до́брагѡ ра́ди и҆змѣне́нїѧ же и҆ восхожде́нїѧ, и҆́же дѣ́ѧтельнымъ любомꙋ́дрїемъ стѣ́нꙋ встра́ственнѣйшагѡ навыкнове́нїѧ превозше́дый, и҆ ѿѻнꙋ́дꙋ крило́ма безстра́стїѧ посре́бреныма ра́зꙋмомъ, въ мы́сленный воздꙋ́хъ видѣ́нїѧ сꙋ́щихъ превознесы́йсѧ, и҆ ѿсю́дꙋ во мра́къ бг҃осло́вїѧ вше́дый, и҆ почи́вый ѿ всѣ́хъ си́хъ дѣ́лъ свои́хъ въ бз҃ѣ блаже́нною жи́знїю: ꙗ҆́кѡ а҆́гг҃лъ зе́менъ и҆ небе́сенъ человѣ́къ соверши́всѧ, просла́ви бг҃а въ себѣ̀, и҆ бг҃ъ просла́витъ є҆го̀.

н҃в. Ми́ръ мно́гъ лю́бѧщымъ зако́нъ бж҃їй, и҆ нѣ́сть и҆̀мъ собла́зна¹²⁶². Поне́же не є҆ли̑ка ᲂу҆́бѡ ᲂу҆гѡ́дна сꙋ́ть человѣ́кѡмъ, сїѧ̑ и҆ бг҃ꙋ: но є҆ли̑ка мнѧ́тсѧ ᲂу҆́бѡ не бы́ти дѡбра̀, сꙋ́ть же и҆ ѕѣлѡ̀ є҆стество́мъ дѡбра̀ вѣ́дꙋщемꙋ словеса̀ сꙋ́щихъ и҆ бы́вшихъ.

н҃г. Добро̀ є҆́сть ᲂу҆мре́ти мі́рови, жи́вꙋ же бы́ти хрⷭ҇то́ви: и҆на́кѡ бо не мо́жетъ кто̀ свы́ше роди́тисѧ по гдⷭ҇ню гла́сꙋ: А҆́ще же не свы́ше роди́тсѧ, нижѐ въ ца́рствїе мо́жетъ небе́сное вни́ти. Сїе́ же рожде́нїе, ѿ повинове́нїѧ ѻ҆тє́цъ дꙋхо́вныхъ быва́ти ѡ҆бы́че. А҆́ще бо не пе́рвѣе сѣ́мѧ сло́ва ᲂу҆че́нїемъ ѻ҆тє́цъ во чре́вѣ прїи́мемъ, и҆ сы́нове сотвори́мсѧ бг҃ови тѣ́ми, не мо́жемъ свы́ше роди́тисѧ. Та́кѡ бо двана́десѧть ᲂу҆́бѡ, ѿ є҆ди́нагѡ хрⷭ҇та̀: се́дмьдесѧть же, ѿ двоюна́десѧте роди́шасѧ, и҆ ᲂу҆сынови́шасѧ бг҃ꙋ и҆ ѻ҆ц҃ꙋ̀ по рече́нномꙋ ѿ гдⷭ҇а: Вы̀ є҆стѐ сы́нове ѻ҆ц҃а̀ моегѡ̀ и҆́же на небесѣ́хъ. Тѣ́мже и҆ къ на́мъ па́ѵелъ глаго́летъ: А҆́ще бо и҆ мнѡ́ги пѣ́стꙋны и҆́мате, но не мнѡ́ги ѻ҆тцы̀: а҆́зъ вы̀ роди́хъ, подо́бни мнѣ̀ быва́йте¹²⁶³.

н҃д. Є҆́же не повинꙋ́тисѧ ѻ҆тцꙋ̀ дꙋхо́внꙋ по подража́нно, да́же до сме́рти и҆ крⷭ҇та̀ повинꙋ́вшагѡсѧ сы́на ѻ҆тцꙋ̀, є҆́же не роди́тисѧ свы́ше є҆́сть. Не бы́вый же сы́нъ возлю́бленъ ѻ҆тца̀ бла́га, ка́кѡ ѻ҆те́цъ ᲂу҆́бѡ не сло́вомъ и҆ дꙋ́хомъ роди́всѧ свы́ше, сынѡ́въ благи́хъ и҆ то́й бꙋ́детъ бла́гъ ѻ҆те́цъ, и҆ бла̑га роди́тъ ча̑да бла́гости ѻ҆тца̀ и҆́хъ соѡбра́зна. А҆́ще же не та́кѡ, по дре́вꙋ є҆́сть и҆ пло́дъ є҆гѡ̀.

н҃є. Ѕло̀ є҆́сть невѣ́рїе, лꙋка́вагѡ сребролю́бїѧ и҆ за́висти лꙋка́внѣйшее чревоноше́нїе. А҆́ще же сїѐ є҆́сть ѕло̀, кольмѝ па́че ражда́ющее. Занѐ любо́вь зла́та, любвѐ хрⷭ҇то́вы предпочте́ннѣйшꙋ въ сынѣ́хъ человѣ́ческихъ дѣ́лаетъ, и҆ содѣ́телѧ ме́ньша вещества̀ своегѡ̀ вмѣнѧ́етъ, томꙋ̀ слꙋжи́ти па́че, не́же бг҃ꙋ покарѧ́етъ, тва́ри па́че творца̀ слꙋже́нїе ѿдаю́щихъ, и҆ бж҃їю и҆́стинꙋ премѣнѧ́ющихъ во лжꙋ̀. А҆́ще же толи́кѡ недꙋ́гъ се́й є҆́сть ѕло̀, ꙗ҆́кѡ и҆ втора́гѡ томꙋ̀ і҆дѡлослꙋже́нїѧ жре́бїемъ прїѧ́ти и҆́мѧ, ко́еѧ не превосхо́дитъ ѕло́бы превосхожде́нїе недꙋ́гꙋющаѧ си́мъ во́лею дꙋша̀.

н҃ѕ. А҆́ще ᲂу҆́бѡ хрⷭ҇тꙋ̀ дрꙋ́гъ бы́ти лю́биши, возненави́диши ᲂу҆́бѡ зла́то, и҆ сегѡ̀ несы́тꙋю дрꙋ́жбꙋ, ꙗ҆́кѡ мы́сль ѡ҆браща́ющꙋю къ себѣ̀ лю́бѧщагѡ, и҆ ѿтерза́ющꙋю тꙋ̀ ѿ сладча́йшїѧ любвѐ і҆и҃совы: ꙗ҆́же не въ ви́дѣ сло́ва ви́дитсѧ мни́тмисѧ, но въ ви́дѣ дѣѧ́нїѧ за́повѣдей є҆гѡ̀. А҆́ще ли же зла́та жела́еши, ᲂу҆вы̀! прїѡбрѧ́щеши ᲂу҆́бѡ погреба́ѧ то̀ ны́нѣ, а҆́ще прїѡбрѣ́тенїе, а҆ не тщетꙋ̀ послѣ́днюю и҆́маши тогѡ̀ любле́нїе, предпочита́ѧ то̀ па́че хрⷭ҇та̀. Ѻ҆́нагѡ же, вѣ́ждь, ѿтщети́шисѧ, и҆ припогꙋби́ши къ тщетѣ̀: и҆ є҆гѡ́же и҆́маши главꙋ̀, бг҃а, без̾ негѡ́же нѣ́сть человѣ́кѡмъ живота̀ спасе́нїѧ.

н҃з. А҆́ще лю́биши зла́то, хрⷭ҇та̀ не лю́биши. А҆́ще же хрⷭ҇та̀ не лю́биши, лю́биши же зла́то, зрѝ, комꙋ́ тѧ мꙋчи́тель се́й ᲂу҆подоблѧ́тисѧ сотворѧ́етъ: ѻ҆́номꙋ ᲂу҆ченико́ви ᲂу҆́бѡ, но невѣ́рнꙋ: и҆ дрꙋ́гꙋ, но навѣ́тникꙋ ꙗ҆́вльшꙋсѧ, и҆ ѕлѣ̀ проти́вꙋ ѻ҆́бщемꙋ влⷣцѣ досади́вшꙋ, и҆ ѻ҆каѧ́ннѣ и҆спа́дшꙋ вѣ́ры кꙋ́пнѡ и҆ любвѐ, ꙗ҆́же ко ѻ҆́номꙋ, и҆ во глꙋбинꙋ̀ погрѧ́зшꙋ ѿча́ѧнїѧ. Є҆гѡ́же ты̀ ᲂу҆боѧ́всѧ примѣ́ра бѣ́гай зла́та, мнѣ̀ повинꙋ́ѧсѧ, и҆ сегѡ̀ любвѐ, да возмо́жеши прїѡбрѣстѝ хрⷭ҇та̀, во є҆́же люби́ти тѧ̀ томꙋ̀. А҆́ще ли ᲂу҆́бѡ нѝ, но вѣ́си мѣ́сто и҆зпа́дшагѡ сво́йственное.

н҃и. Да не зла́томъ и҆лѝ по́мощїю человѣ̑къ и҆ ᲂу҆моле́нїемъ полꙋчи́ти предсѣда́тельство потщи́шисѧ когда̀, а҆́ще и҆ разсмотрѧ́еши себѐ могꙋ́ща ᲂу҆по́льзовати дꙋ́шы без̾ свы́шнѧгѡ зва́нїѧ. Занѐ трѝ сїѧ̑ прїꙋсрѧ́щꙋтъ тѧ̀, и҆ ѿ си́хъ є҆ди́но сбꙋ́детсѧ: и҆лѝ во негодова́нїе ѿ бг҃а на тѧ̀ на́йдетъ, и҆ гнѣ́въ разли́чными нанесе́ньми и҆ ѡ҆бстоѧ́ньми: возра́тꙋютъ бо на тѧ̀ не человѣ́цы то́чїю, но и҆ тва́рь без̾ ма́ла всѧ̀, и҆ бꙋ́детъ тѝ многовоздыха́ненъ се́й живо́тъ: и҆лѝ съ мно́гимъ безче́стїемъ ѿѻнꙋ́дꙋ и҆зве́рженъ бꙋ́деши превозмо́гшими на тѧ̀: и҆лѝ ᲂу҆́мреши не во вре́мѧ твоѐ, ѿсѣ́ченъ бы́въ настоѧ́щїѧ жи́зни.

н҃ѳ. Нѣ́сть мо́щно презрѣ́ти сла́вꙋ и҆ безче́стїе, и҆ превы́шше бы́ти болѣ́зни и҆ сла́сти, а҆́ще кто̀ не на кончи̑ны веще́й зрѣ́ти сподо́битсѧ, внегда̀ во всѧ́кїѧ сла́вы, и҆ сла́сти, наслажде́нїѧ, и҆ бога́тства, и҆ благоде́нства концы̀ нивочто́же ᲂу҆ви́дитъ приходѧ́ща, сме́рти сїѧ̑ прїе́млющей и҆ растлѣва́ющей: тогда̀ всѣ́хъ зазрѣ́въ человѣ́ческихъ веще́й ꙗ҆́внꙋ сꙋетꙋ̀, прелага́етъ чꙋ̑вства своѧ̑ къ концє́мъ бж҃е́ственныхъ веще́й. И҆ сꙋ́щихъ ᲂу҆́бѡ и҆ ника́коже растли́тисѧ могꙋ́щихъ, де́ржитсѧ: и҆ сїѧ̑ ᲂу҆своѧ́ѧ, болѣ́зни и҆ сла́сти превы́шше быва́етъ: болѣ́зни ᲂу҆́бѡ, ꙗ҆́кѡ сластолюби́вое и҆ славолюби́вое и҆ сребролюби́вое побѣди́въ дꙋшѝ: сла́сти же, ꙗ҆́кѡ мі́ра сегѡ̀ ѿтрѧ́съ чꙋ́вство, тѣ́мже и҆ почита́емь и҆ безче́стимь то́йжде є҆́сть. Болѣ́зньми же и҆ ѿра́дами низлага́емь тѣ́ла, во всѣ́хъ благодари́тъ бг҃а и҆ не низвлеко́мь є҆́сть по́мысломъ.

ѯ҃. Мо́щно є҆́сть и҆ ѿ со́нїй движє́нїѧ дꙋшѝ и҆ расположє́нїѧ разсмотрѣва́ти тщали́вомꙋ, и҆ ѡ҆ состоѧ́нїи прилѣжа́ти свое́мъ: по расположе́нїю бо внꙋ́треннѧгѡ человѣ́ка и҆ попече́нїй є҆гѡ̀, сꙋ́ть и҆ движє́нїѧ тѣ́ла и҆ ᲂу҆ма̀ мечта̑нїѧ. А҆́ще ᲂу҆́бѡ кто̀ веществолюби́вꙋ и҆ сластолюби́вꙋ дꙋ́шꙋ и҆́мать, стѧжа́нїе веще́й и҆ пѣ́нѧзей и҆з̾ѻби́лїе мечта́етъ, и҆ зра́ки жє́нскїѧ и҆ сплетє́нїѧ встра́ствєнна, ѿ ни́хже ѡ҆скверне́ннаѧ томꙋ̀ ри́за и҆ ѡ҆скверне́нїе пло́ти прибыва́етъ. А҆́ще же лихои́мственнꙋ и҆ сребролюби́вꙋ: зла́то ви́дитъ по всемꙋ̀, и҆ сегѡ̀ и҆стѧзꙋ́етъ, и҆ ᲂу҆множа́етъ ли́хвами, и҆ въ сокрѡ́вища ѿлага́етъ, и҆ ꙗ҆́кѡ немилосе́рдъ ѡ҆сꙋжда́етсѧ. А҆́ще же ꙗ҆́ростнꙋ и҆ зави́стнꙋ: ѕвѣрьмѝ и҆ ꙗ҆дови́тыми гони́ма є҆́сть пресмыка́ющимисѧ, и҆ страхова́нїємъ и҆ боѧ́зни подверга́етсѧ. А҆́ще же напыще́ннꙋ сꙋ́етною сла́вою: благорѣ́чїѧ, и҆ прїꙋсрѣ́тенїѧ люде́й, престо́лы, нача́льства и҆ власти́тельства мечта́етъ: и҆ ѡ҆ не ᲂу҆̀ сꙋ́щихъ є҆мꙋ̀ ꙗ҆́кѡ ѡ҆ сꙋ́щихъ, и҆лѝ всѧ́кѡ бꙋ́дꙋщихъ, и҆ бдѧ̀ хотѣ́нїе и҆́мать. А҆́ще же го́рдостнꙋ и҆ киче́нїѧ по́лнꙋ: на колесни́цахъ носи́ма свѣтлѣ́йшихъ зри́тъ себѐ, и҆ крило́ма ѻ҆вогда̀ на воздꙋ́сѣ лета́юща, и҆ всѣ́хъ превосхожде́нїѧ трепе́щꙋщихъ вла́сти є҆гѡ̀. Та́кѡ же и҆ бг҃олюби́въ человѣ́къ тщали́въ сы́й ѡ҆ дѣ́ланїи добродѣ́тели, и҆ пра́веденъ во благоче́стїѧ по́двизѣхъ, и҆ чи́стꙋ вещества̀ носѧ̀ дꙋ́шꙋ: бꙋ́дꙋщихъ веще́й сбы́тїѧ во снѣ́хъ зри́тъ, и҆ стра́шныхъ видѣ́нїй ѿкрове́нїѧ: и҆ при́снѡ молѧ́щасѧ себѐ со ᲂу҆миле́нїемъ и҆ ми́рнымъ ᲂу҆строе́нїемъ дꙋши́ же и҆ тѣ́ла ѿ сна̀ возбꙋжда́ѧсѧ разꙋмѣва́етъ, ꙗ҆́коже бы́ти ᲂу҆́бѡ на лани́тѣхъ є҆гѡ̀ слеза́мъ, во ᲂу҆стнꙋ̑ же, є҆́же съ бг҃омъ бесѣ́дѣ.

ѯ҃а. Ѿ ꙗ҆̀же во снѣ́хъ мечта́емыхъ, ѻ҆́ва ᲂу҆́бѡ ѿ ни́хъ сꙋ́ть, сѡ́нїѧ: ѻ҆́ва же, зрѣ̑нїѧ: ѻ҆́ва же, ѿкровє́нїѧ. И҆ сѡ́нїѧ ᲂу҆́бѡ сꙋ́ть, є҆ли̑ка не пребыва́ютъ въ мечта́тельности ᲂу҆ма̀ неизмѣ̑нна: но смꙋще́нно и҆ ча́стѡ и҆змѣнѧ́емо ѿ и҆ны́ѧ ве́щи во и҆́нꙋ не сꙋ́ть мечта́нїе, ѿ ни́хже ни є҆ди́на мечта́емыхъ прибыва́етъ по́льза. И҆ са́мо то̀ мечта́нїе по возбꙋжде́нїи ѿ сна̀ погиба́етъ, є҆́же и҆ презира́ти тщали́вїи до́лжни сꙋ́ть. Зрѣ̑нїѧ же сꙋ́ть, є҆ли̑ка неизмѣ̑нна сꙋ́ть, и҆ не ѿ сегѡ̀ во и҆́но преѡбразꙋ́ютсѧ, но пребыва́ютъ воѡбраже́нни во ᲂу҆мѣ̀ на мнѡ́га ѡ҆бхождє́нїѧ лѣ́тъ и҆ незабы̑тна. И҆ є҆ли̑ка бꙋ́дꙋщихъ веще́й сбытїѧ̑ показꙋ́ютъ, и҆ дꙋше́вныѧ по́льзы ѿ ᲂу҆миле́нїѧ винѡ́вна быва́ютъ, и҆ стра́шныхъ видѣ́нїй: посꙋ́плена же и҆ тре́петна зрѧ́щаго ѿ зри́мыхъ неизмѣ́ннагѡ стра́шнагѡ видѣ́нїѧ сотворѧ́ютъ, и҆̀хже и҆ за вели́кꙋ ве́щь вмѣнѧ́ти подоба́етъ тщали̑вымъ видѣ́нїѧ. Ѿкровє́нїѧ же сꙋ́ть, ꙗ҆̀же па́че всѧ́кагѡ чꙋ́вства быва́ющаѧ видѣ̑нїѧ чистѣ́йшїѧ и҆ просвѣще́нныѧ дꙋшѝ, ꙗ҆̀же стра́нныхъ нѣ́кихъ бж҃е́ственныхъ веще́й и҆ разꙋмѣ́нїй но́сѧтъ си́лꙋ, и҆ сокрове́нныхъ та́инъ бж҃їихъ та́йнѡ ᲂу҆че́нїе и҆ сбытїѧ̀ велича́йшихъ ѿ на́съ дѣ́лъ, и҆ ѻ҆́бще премѣне́нїе въ мїрски́хъ и҆ человѣ́ческихъ ве́щехъ.

ѯ҃в. Ѿ рече́нныхъ, ѻ҆́ва (сѡ́нїѧ) ᲂу҆́бѡ сꙋ́ть дебе́лыхъ и҆ плотолюби́выхъ мꙋже́й, и҆́хже бг҃ъ чре́во, и҆ доса́да сы́тости: и҆́хже мра́чность ᲂу҆ма̀ є҆́сть, ѿ житїѧ̀ неради́ва и҆ сотре́нна страстьмѝ, и҆̀хже и҆ мечта́ютъ же и҆ наи́грываютъ бѣ́си. Ѻ҆́ва же (зрѣ̑нїѧ) тщали́выхъ и҆ ѡ҆чища́ющихъ дꙋшє́вныѧ чꙋ̑вства, и҆ зри́мыми благодѣ́емыхъ въ бж҃е́ственныхъ веще́й постиза́нїе, и҆ въ прїꙋмноже́нїи восхожде́нїѧ. Ѻ҆́ва же (ѿкровє́нїѧ) соверше́нныхъ, бж҃е́ственнымъ дѣ́йствꙋемыхъ дх҃омъ, и҆ соедине́нныхъ съ бг҃омъ бг҃осло́вною дꙋше́ю.

ѯ҃г. Не всѣ́хъ ꙗ҆̀же во снѣ́хъ зрѣ̑нїѧ сꙋ́ть и҆́стинна, нижѐ во всѣ́хъ влады́чественнѣмъ ᲂу҆ма̀ воѡбразꙋ́ютсѧ, но є҆ди́нѣхъ ѻ҆́ныхъ ѡ҆чище́нныхъ ᲂу҆мо́мъ, и҆ ᲂу҆ѧсне́нныхъ чꙋ̑вствы дꙋше́вными, и҆ къ є҆сте́ственнꙋ восте́кшихъ видѣ́нїю: и҆̀мже ни є҆ди́но є҆́сть попече́нїе веще́й жите́йскихъ, нижѐ ко́е попече́нїе настоѧ́щїѧ жи́зни: и҆́хже дѡ́лгаѧ безснѣ̑дїѧ во ѡ҆бдержи́тельнѣмъ воздержа́нїи ста́ша, и҆ и҆̀же по бз҃ѣ по́двизи и҆ трꙋды̀, во свѧти́лищи бж҃їи ра́зꙋмъ сꙋ́щихъ ѻ҆би́телище ѡ҆брѣто́ша съ премꙋ́дростїю лꙋ́чшею, и҆́хже житїѐ а҆́гг҃льско и҆ живо́тъ ны́нѣ въ бз҃ѣ сокрове́нъ є҆́сть, и҆ предспѣ́ѧнїе ѿ свѧще́ннагѡ безмо́лвїѧ на престо́лъ прорѡ́къ це́ркве бж҃їѧ взы́де. Ѡ҆ ни́хже и҆ въ мѡѷсе́и глаго́ла бг҃ъ: А҆́ще бꙋ́детъ проро́къ въ ва́съ, во снѣ̀ ꙗ҆влю́сѧ є҆мꙋ̀, и҆ во видѣ́нїи возглаго́лю къ немꙋ̀¹²⁶⁴. И҆ во і҆ѡ́или: и҆ бꙋ́детъ по си́хъ, и҆злїю̀ ѿ дх҃а моегѡ̀ на всѧ́кꙋ пло́ть, и҆ прорекꙋ́тъ сы́нове ва́ши, и҆ дщє́ри ва́ши и҆ ста́рцы ва́ши сїѡ́нїѧ ᲂу҆́зрѧтъ, и҆ ю҆́нѡты ва́ши видѣ̑нїѧ ᲂу҆ви́дѧтъ¹²⁶⁵.

ѯ҃д. Безмо́лвїе є҆́сть ᲂу҆ма̀ ᲂу҆строе́нїе нестꙋжа́емо, тишина̀ свобо́днаѧ и҆ ра́дꙋющїѧсѧ дꙋшѝ, се́рдца въ бз҃ѣ стоѧ́нїе несмꙋ́тно и҆ невла́емо, видѣ́нїе свѣ́та, ра́зꙋмъ бж҃їихъ та́инствъ. сло́во премꙋ́дрости ѿ чи́стыѧ мы́сли, бе́здна разꙋмѣ́нїй бж҃їихъ, восхище́нїе ᲂу҆ма̀, бесѣ́да бж҃їѧ, неꙋсы́пно ѻ҆́ко, моли́тва ᲂу҆́мна, безтрꙋ́денъ въ трꙋдѣ́хъ вели́кихъ поко́й, и҆ коне́цъ, соедине́нїе съ бг҃омъ и҆ совокꙋпле́нїе.

ѯ҃є. До́ндеже дꙋша̀ крамо́льствꙋетъ въ себѣ̀, безчи́ннѡ дви́жꙋщымсѧ є҆ѧ̀ си́ламъ, и҆ не ᲂу҆̀ вмѣсти́тельна бы́сть бж҃е́ственныхъ лꙋче́й, нижѐ свобо́ды сподо́бисѧ ѿ рабо́ты мꙋдрова́нїѧ пло́ти, нижѐ ми́ра наслади́сѧ ны́нѣ, преста́вшей то́й бра́ни неꙋдержи́мыхъ страсте́й: мно́га тре́бꙋетъ молча́нїѧ ᲂу҆сте́нъ, ꙗ҆́коже глаго́лати и҆ то́й со дв҃домъ: а҆́зъ же ꙗ҆́кѡ глꙋ́хъ не слы́шахъ, и҆ ꙗ҆́кѡ нѣ́мъ не ѿверза́ѧй ᲂу҆́стъ свои́хъ¹²⁶⁶. При́снѡ же сѣ́тꙋющей бы́ти подоба́етъ, и҆ сокрꙋше́ннѣй ходи́ти пꙋте́мъ за́повѣдей хрⷭ҇то́выхъ, внегда̀ ѡ҆скорблѧ́тисѧ ѿ врага̀, и҆ ча́ѧти прише́ствїѧ ᲂу҆тѣ́шителѧ, и҆́мже се́й ᲂу҆милѧ́емѣй и҆ ѡ҆мыва́емѣй слеза́ми и҆́стиннаѧ свобо́да да́рꙋетсѧ.

ѯ҃ѕ. Внегда̀ въ безмо́лвїи ме́дъ добродѣ́телей дѣ́лаѧй, превы́шше смире́нїѧ бꙋ́детъ пло́ти ѿ пѡ́двигъ любомꙋ́дрїѧ, и҆ во є҆́же по є҆стествꙋ̀ прїи́дꙋтъ ꙗ҆̀же си́лъ дꙋшѝ є҆гѡ̀ ѿ до́лꙋ пове́ржєнна мꙋдрова̑нїѧ, и҆ вмѣсти́тъ лꙋчѝ дꙋ́ха, слеза́ми ѡ҆чи́стивсѧ се́рдцемъ, и҆ животворѧ́щїѧ ме́ртвости хрⷭ҇то́вы въ нетлѣ́нїе ѡ҆блече́тсѧ, и҆ ᲂу҆тѣ́шителѧ на го́рницѣ безмо́лвїѧ сѣдѧ̀, съ ѻ҆́гненнымъ ѧ҆зы́комъ, то́й прїи́метъ: тогда̀ глаго́лати съ дерзнове́нїемъ вели̑чїѧ бж҃їѧ до́лженъ є҆́сть, и҆ въ це́ркви вели́цѣй пра́вдꙋ є҆гѡ̀ благовѣсти́ти, ꙗ҆́кѡ посредѣ̀ чре́ва прїе́мь зако́нъ дꙋ́ха, да не ꙗ҆́кѡ лꙋка́вый ра́бъ ѻ҆́нъ, тала́нтъ своегѡ̀ сокрыва́ѧй влⷣки, во ѻ҆́гнь вве́ржетсѧ вѣ́чный. Та́кѡ бо и҆ дв҃дъ грѣ́хъ ѡ҆мы́въ покаѧ́нїемъ, и҆ проро́ческое па́ки воспрїе́мъ дарова́нїе, ꙗ҆́кѡ не могі́й благодѣѧ́нїѧ сокрыва́ти, глаго́лаше къ бг҃ꙋ: Сѐ ᲂу҆стна́мъ мои̑мъ не возбраню̀, гдⷭ҇и, ты̀ разꙋмѣ́лъ є҆сѝ. Пра́вдꙋ твою̀ не скры́хъ въ се́рдцѣ мое́мъ, и҆́стинꙋ твою̀ и҆ спасе́нїе твоѐ рѣ́хъ, не скры́хъ ми́лость твою̀ и҆ и҆́стинꙋ твою̀ ѿ со́нма мно́га¹²⁶⁷.

ѯ҃з. Оу҆́мъ тимѣ́нїѧ всѧ́кагѡ ѡ҆чище́нъ бы́въ, не́бо ѕвѣ́здно со свѣ́тлымъ и҆ свѣтлѣ́йшими разꙋмѣ́нїи быва́етъ дꙋшѣ̀, со́лнца пра́вды и҆мѣ́ѧ сїѧ́юща въ себѣ̀, и҆ свѣ́тлы лꙋчѝ бг҃осло́вїѧ въ ми́рѣ и҆спꙋща́юща: сло́во же семꙋ̀ чи́сто бы́вшее ѿ бе́здны премꙋ́дрости, про́сты и҆ несмѣ́сны ѿѻнꙋ́дꙋ возво́дитъ къ себѣ̀ ви́ды веще́й и҆ ѿкровє́нїѧ сокрове́нныхъ и҆з̾ѧснє́нна: во є҆́же вѣ́дѣти, ка́ѧ є҆́сть глꙋбина̀ и҆ высота̀ и҆ широта̀ ра́зꙋма бж҃їѧ. Сїѧ́ же є҆сте́ственнѣ ѻ҆́нъ внѣ́дривъ, и҆з̾ѧснѧ́етъ глꙋбины̑ дꙋ́ха сло́вомъ всѣ̑мъ и҆мꙋ́щымъ дх҃а бж҃е́ственна во ᲂу҆тро́бѣ, и҆ ѡ҆б̾ѧвлѧ́етъ бѣсѡ́въ лє́сти, и҆ та̑йны повѣ́даетъ ца́рствїѧ небе́снагѡ.

ѯ҃и. Тѣлє́снаѧ ᲂу҆́бѡ похотѣ̑нїѧ и҆ взыгра̑нїѧ пло́ти, ᲂу҆толѧ́етъ воздержа́нїе и҆ поще́нїе и҆ по́двизи дꙋхо́внїи: разжжє́нїѧ же дꙋшѝ, и҆ надмѣ̑нїѧ се́рдца, ᲂу҆стꙋжа́етъ бж҃е́ственныхъ писа́нїй чте́нїе, и҆ смирѧ́етъ непреста́ннаѧ моли́тва, и҆ а҆́ки є҆ле́й ᲂу҆маща́етъ ѧ҆̀ ᲂу҆миле́нїе.

ѯ҃ѳ. Ничто́же та́кѡ и҆́но, ꙗ҆́коже моли́тва чиста́ же и҆ невеще́ственна, собесѣ́дника бг҃ови человѣ́ка содѣ́ловаетъ, и҆ соединѧ́ти вѣ́сть того̀ сло́вꙋ, безмо́лвнѡ съ дꙋ́хомъ молѧ́щасѧ. Внегда̀ и҆ слеза́ми ѡ҆чища́емꙋ и҆́мать свою̀ дꙋ́шꙋ, и҆ сла́достїю же ᲂу҆слажда́емꙋ ᲂу҆миле́нїѧ, и҆ свѣ́томъ просвѣща́емꙋ дꙋ́ха.

ѻ҃. И҆ коли́чество въ моли́твенныхъ пѣ́нїихъ и҆зѧ́щнѣйше є҆́сть, внегда̀ сїѐ пожда́нїе предварѧ́етъ, и҆ внима́нїе. Но ка́чество є҆́сть ѡ҆живлѧ́ющее дꙋ́шꙋ, є҆́же и҆ вино́вно є҆́сть плода̀: ка́чество же пѣ́нїѧ и҆ моли́твы є҆́сть, є҆́же съ дꙋ́хомъ моли́тисѧ и҆ ᲂу҆мо́мъ. Мо́литсѧ же кто̀ ᲂу҆мо́мъ, є҆гда̀ молѧ́сѧ и҆ поѧ̀, разсмотрѧ́етъ ра́зꙋмъ сꙋ́щїй въ бж҃е́ственнѣмъ писа́нїи, и҆ прїе́млетъ восхождє́нїѧ ѿѻнꙋ́дꙋ разꙋмѣ́нїй въ се́рдцѣ свое́мъ ѿ бг҃олѣ́пныхъ мы́слей, и҆́миже восхища́ема ᲂу҆́мнѡ дꙋша̀ въ воздꙋ́хъ свѣ́та ѡ҆сїѧва́етсѧ ꙗ҆́снѣ, и҆ ѡ҆чища́етсѧ мно́жае, и҆ къ небесє́мъ всѧ̀ возвы́шена быва́етъ, и҆ ѿложе́нныхъ ст҃ы̑мъ бла̑гъ созерца́етъ добрѡ́ты: и҆́хже жела́нїемъ возгара́ема пло́дъ а҆́бїе моли́твы и҆спꙋща́етъ ѿ ѻ҆́чїю, и҆ стрꙋю̀ сле́зъ и҆сточа́етъ ѿ свѣтотворѧ́щагѡ дѣ́йства ст҃а́гѡ дх҃а, и҆́хже вкꙋ́съ толи́кѡ є҆́сть сла́докъ, ꙗ҆́кѡ и҆ тѣле́сныѧ пи́щи ѻ҆вогда̀, въ прича́стїи си́хъ бы́вшемꙋ, забыва́ти. И҆ сїѐ є҆́сть пло́дъ моли́твы, ѿ ка́чества пѣ́нїѧ быва́ющїй въ дꙋша́хъ молѧ́щихсѧ.

ѻ҃а. И҆дѣ́же пло́дъ се́й ᲂу҆сма́триваетсѧ дꙋ́ха, та́мѡ и҆ ка́чество є҆́сть моли́твы: а҆ и҆дѣ́же є҆́сть ка́чество, та́мѡ и҆зѧ́щнѣйшее є҆́сть и҆ коли́чество пѣ́нїѧ: плодꙋ́ же не ви́дѧщꙋсѧ, не вла́жно є҆́сть и҆ ка́чество. А҆́ще же сїѐ є҆́сть сꙋ́хо, и҆зли́шно є҆́сть коли́чество: є҆́же а҆́ще и҆ тѣле́сно ѡ҆бꙋче́нїе прино́ситъ, но ᲂу҆́бѡ всѧ́чески мнѡ́гимъ без̾ прїѡбрѣ́тенїѧ є҆́сть.

ѻ҃в. Зрѝ ле́сть молѧ́сѧ и҆ поѧ̀ ѱалмы̀ гдⷭ҇ви. И҆ли́ бо и҆́на вмѣ́стѡ и҆ны́хъ бѣ́сове, чꙋ́вство дꙋшѝ под̾ꙋкрада́юще, глаго́лати на́съ прельщева́ютъ, стїхѝ въ хꙋлꙋ̀ прелага́юще ѱалмѡ́въ, ꙗ҆́кѡ рещѝ на́мъ ᲂу҆сты̑ ꙗ҆̀же не подоба́етъ: и҆лѝ нача́ло ѱалмѡ́въ наче́ншымъ, на концѣ̀ творѧ́тъ сло́во на́ше, ꙗ҆̀же посредѣ̀ расточа́юще ѿ ᲂу҆ма̀. И҆лѝ на то́жде мѣ́сто є҆ди́нъ сті́хъ при́снѡ привоз̾ѡбраща́ютъ, не ѡ҆ставлѧ́юще забве́нїемъ прибли́жность ѡ҆брѣстѝ ѱалма̀: внеза́пꙋ взе́млютъ ᲂу҆ма̀ па́мѧть всю̀ ѿ совокꙋ́пленныхъ стїхѡ́въ, ꙗ҆́кѡ нижѐ па́мѧтовати на́мъ, ка̑ѧ во ᲂу҆стѣ́хъ и҆́мамы ѿ ѱалмопѣ́нїѧ, нижѐ могꙋ́щымъ ѡ҆брѣстѝ сїѧ̑ и҆ повтори́ти ѧ҆зы́комъ. Сїе́ же творѧ́тъ, ꙗ҆́коже вве́ргнꙋти на́съ въ малодꙋ́шїе и҆ ᲂу҆ны́нїе, и҆ да ᲂу҆празднѧ́тъ на́шеѧ моли́твы плоды̀, коснѣ́нїе вре́мене подме́щꙋще. Но сопроти́въ ста́ни ты̀ си́льнѣ, и҆ ѱалмѡ́въ коснѣ́е и҆ми́сѧ, да по́льзꙋ моли́твы ѿ стїхѡ́въ видѣ́нїемъ прїи́меши, и҆ просвѣще́нїемъ ст҃а́гѡ дх҃а ѡ҆богатѣ́еши, быва́ющимъ въ дꙋша́хъ молѧ́щихсѧ.

ѻ҃г. Є҆гда̀ что̀ сицево̀ приключи́тсѧ тебѣ̀ пою́щꙋ разꙋ́мнѡ, да не малодꙋ́шествовавъ ᲂу҆ны́еши, нижѐ поко́й тѣ́ла па́че дꙋше́вныѧ по́льзы твоеѧ̀ предпочте́ши, коснѣ́нїе вре́мени смотрѧ́ѧ: но и҆дѣ́же тѧ̀ плѣне́нїе ᲂу҆ма̀ пости́гнетъ, ста́ни. А҆́ще и҆ на концѣ̀ бꙋ́детъ ѱалма̀, ты̀ къ нача́лꙋ ᲂу҆се́рднѡ востецы̀, и҆ прїе́мъ то̀, па́ки и҆ми́сѧ ѱалма̀ по пꙋтѝ, а҆́ще и҆ мно́гажды во є҆ди́нъ ча́съ плѣне́нїе прїꙋсрѧ́щетъ: сїе́ бо творѧ́щꙋ тебѣ̀, не терпѧ́ще терпѣ́нїѧ, твоегѡ̀ пожда́нїѧ бѣ́сове, и҆ крѣ́пости ᲂу҆се́рдїѧ твоегѡ̀, стꙋда̀ и҆спо́лнишесѧ, и҆сче́знꙋтъ ѿ тебѐ.

ѻ҃д. Непреста́ннꙋ моли́твꙋ ѻ҆́нꙋ бы́ти вѣ́ждь ᲂу҆твержде́ннѡ, непрестаю́щꙋю ѿ дꙋшѝ чрез̾ ве́сь де́нь же и҆ но́щь. Ꙗ҆́же не въ протѧже́нїи рꙋ́къ, и҆лѝ предстоѧ́нїи тѣ́ла, и҆ ѧ҆зы́ка гла́сѣ зрѧ́щымъ ви́дитсѧ: но въ ᲂу҆́мнѣмъ поꙋче́нїи дѣ́ланїѧ ᲂу҆ма̀ и҆ бж҃їѧ па́мѧти пребыва́тельнымъ ᲂу҆миле́нїемъ разꙋмѣва́ти вѣ́дꙋщымъ разꙋмѣ́етсѧ.

ѻ҃є. Мо́жетъ при́снѡ внима́ти моли́твѣ, внегда̀ кто̀ своѧ̑ по́мыслы сѡ́браны и҆́мать во влады́чествѣ ᲂу҆ма̀ съ ми́ромъ и҆ благоговѣ́нїемъ мно́гимъ глꙋбины̑ бж҃їѧ копа́юща, и҆ и҆́щꙋща ѿѻнꙋ́дꙋ вкꙋси́ти сладча́йшꙋю во́дꙋ видѣ́нїѧ. Ми́рꙋ же таковꙋ̀ ѿсꙋ́тствꙋющꙋ, не мо́жетъ: є҆мꙋ́же бо дꙋшє́вныѧ си̑лы ра́зꙋмомъ примири́шасѧ, семꙋ̀ и҆ всегда́шнѧѧ моли́тва и҆спра́висѧ.

ѻ҃ѕ. А҆́ще пое́ши пѣ́снь моли́твы бг҃ови, и҆ бра́тъ предста́нетъ толкі́й во двє́ри ке́ллїи твоеѧ̀, да не предпочте́ши дѣ́ла моли́твы па́че дѣ́ла любвѐ, и҆ пре́зриши толкꙋ́ща бра́та твоего̀: се́ бо нѣ́сть любе́зно бг҃ꙋ. Ми́лости бо любвѐ хо́щетъ, а҆ не же́ртвы моли́твы: но да́ръ ѡ҆ста́вль моли́твы, да́ждь бесѣ́дꙋ любвѐ бра́тꙋ, ᲂу҆поко́ивъ є҆го̀. И҆ тогда̀ возврати́всѧ, принесѝ да́ръ тво́й ѻ҆ц҃ꙋ̀ дꙋховѡ́мъ со слеза́ми, и҆ сокрꙋше́ннымъ се́рдцемъ, и҆ дꙋ́хъ пра́въ ѡ҆бнови́тсѧ во ᲂу҆тро́бѣ твое́й.

ѻ҃з. Не во ᲂу҆ста́вленнѣ вре́мени и҆ мѣ́стѣ та́инство мл҃твы соверша́етсѧ. А҆́ще во ᲂу҆ставлѧ́еши ꙗ҆̀же моли́твы въ часѣ́хъ и҆ вре́менехъ и҆ мѣ́стѣхъ: ᲂу҆̀бо вре́мѧ, є҆́же внѣ̀ си́хъ, ᲂу҆пражнѧ́етсѧ во и҆ны́хъ ве́щехъ сꙋ́етства. Предѣ́лъ бо моли́твы сїѐ є҆́сть, є҆́же ѡ҆ бз҃ѣ приснодви́жное ᲂу҆ма̀. Дѣ́ло же, є҆́же въ бж҃е́ственныхъ ве́щехъ ѡ҆браща́тисѧ дꙋшѝ. Коне́цъ же, є҆́же прилѣпи́тисѧ бг҃ꙋ ᲂу҆мо́мъ, и҆ є҆ди́нъ дꙋ́хъ съ ни́мъ бы́ти¹²⁶⁸, по ѡ҆предѣле́нїю и҆ сло́вꙋ а҆пⷭ҇ловꙋ.

ѻ҃и. А҆́ще и҆ ᲂу҆десы̑ плотски́ми ᲂу҆мертви́лсѧ є҆сѝ, и҆ дꙋше́ю ѡ҆животвори́лсѧ є҆сѝ дꙋ́хомъ, и҆ преесте́ственныхъ дарова́нїй сподо́билсѧ є҆сѝ ѿ бг҃а, но ты̀ ᲂу҆́бѡ да не ѻ҆сла́бнѡ ѡ҆ста́виши по́мысленное дꙋшѝ твоеѧ̀: ѡ҆браща́тисѧ же при́снѡ сїѐ ѡ҆бꙋча́й въ па́мѧти нѣ́когда тобо́ю согрѣше́нныхъ, и҆ ꙗ҆́же во а҆́дѣ томле́нїй, ꙗ҆́кѡ ѡ҆сꙋ́жденника ᲂу҆́мнѡ себѐ смотрѧ́й. Си́це же ѡ҆браща́ѧ въ си́хъ ᲂу҆́мъ, и҆ си́це смотрѧ́ѧ себѐ, сокрꙋше́нъ сохрани́ши дꙋ́хъ, и҆ и҆сто́чникъ и҆сточа́ющъ и҆мѣ́ти бꙋ́деши ᲂу҆миле́нїѧ стрꙋи̑ бж҃е́ственныѧ благода́ти, и҆ бг҃а зрѧ́ща на тѧ̀, и҆ даю́ща тѝ дꙋ́ха во ᲂу҆твержде́нїе се́рдца твоегѡ̀.

ѻ҃ѳ. Поще́нїе съ разсмотре́нїемъ, бдѣ́нїе съ поꙋче́нїемъ и҆ моли́твою прїе́мшо спꙋ́тника, ско́рѡ на предѣ́лы безстра́стїѧ взы́ти твори́тъ дѣ́лателѧ своего̀, внегда̀ сегѡ̀ и҆ дꙋ́шꙋ за превосхожде́нїе смире́нїѧ ѡ҆моча́емꙋ и҆мꙋ́ща слеза́ми и҆мѣ́ти бꙋ́детъ, и҆ ѿ любвѐ бж҃їѧ воспалѧ́емꙋ. Въ сїе́ же прише́дша, къ ми́рꙋ того̀ дꙋхо́внꙋ приво́дитъ, всѧ́къ ᲂу҆́мъ свобо́денъ преимꙋ́щемꙋ, и҆ любо́вїю хва́литъ бг҃а.

п҃. Не та́кѡ ца́рь ѡ҆ сла́вѣ и҆ ца́рствѣ велемꙋ́дрствꙋетъ, и҆ ѡ҆ держа́вѣ похвалѧ́ѧсѧ ра́дꙋетсѧ, ꙗ҆́коже и҆́нокъ ѡ҆ дꙋше́внѣмъ безстра́стїи и҆ слеза́хъ ᲂу҆миле́нїѧ. То́й ᲂу҆́бѡ соꙋвѧда́емо и҆́мать съ ца́рствомъ мꙋдрова́нїе: се́й же соѿходѧ́що та́мѡ и҆ пребыва́ющо съ весе́лїемъ блаже́нное безстра́стїе въ безконє́чны вѣ́ки. Ꙗ҆́коже бо ко́ло посредѣ̀ человѣ̑къ ѡ҆браща́етсѧ въ настоѧ́щей таковы́й жи́зни, ма́лѡ ᲂу҆́бѡ къ землѝ и҆ сꙋ́щымъ на не́й приближа́ѧсѧ за нꙋ́ждꙋ є҆стества̀: ве́сь же крꙋглови́днѡ на воздꙋ́хъ носи́мь мы́сленнѡ, воз̾ѡкрꙋжа́емо въ себѣ̀ но́ситъ нача́ло къ концꙋ̀, и҆ ви́ды дарова́нїй и҆зваѧ̑нны въ вѣнцѣ̀ смире́нїѧ. Є҆мꙋ́же и҆спо́лнь є҆́сть трапе́за видѣ́нїе сꙋ́щихъ, питїе́ же, ча́ша премꙋ́дрости, и҆ поко́й є҆́сть бг҃ъ

п҃а. И҆́же трꙋдѡ́мъ добродѣ́телей себѐ во́лею преда́вый и҆ по́двига и҆́ноческагѡ тече́нїе те́плѣ соверша́ѧй, вели́кихъ сподоблѧ́етсѧ ѿ бг҃а дарѡ́въ. Ѿсю́дꙋ же и҆ къ средѣ̀ пред̾ꙋспѣва́ѧ, въ бж҃е́ствєнна ѿкровє́нїѧ и҆ видѣ̑нїѧ прихо́дитъ. И҆ толи́кѡ ве́сь свѣтови́дѣнъ и҆ премꙋ́дръ быва́етъ, є҆ли́кѡ и҆ по́двигѡвъ тѣ́мъ трꙋ́дъ простира́етсѧ. Є҆ли́кѡ же къ высотѣ̀ восхо́дитъ видѣ́нїѧ, толи́кѡ и҆ за́висть мно́гꙋ гꙋби́тельныхъ де́мѡнѡвъ воздви́жетъ на сѧ̀: ниже́ бо те́рпѧтъ зрѣ́ти человѣ́ка во а҆́гг҃лово є҆стество̀ прелага́ема, є҆гѡ́же ра́ди и҆ ѻ҆́тай ѻ҆́стрꙋю возноше́нїѧ стрѣлꙋ̀ прїꙋстремлѧ́ютъ на́нь. И҆ а҆́ще ᲂу҆́бѡ ле́сть разꙋмѣ́въ, въ тверды́ню прибѣ́гнетъ смире́нїѧ зазрѣ́въ себѐ: и҆збѣга́етъ поги́бели го́рдости, и҆ въ приста́нище вво́дитсѧ спасе́нїѧ. А҆́ще ли же нѝ, то̀ ѡ҆ста́вленъ бы́въ свы́ше, дꙋхѡ́мъ и҆спроша́ющымъ (є҆го̀) предае́тсѧ въ нево́льно наказа́нїе, занѐ во́льнымъ себѐ не и҆скꙋсѝ. Сі́и же сꙋ́ть сластолюби́ви и҆ плотолюби́ви, лꙋка́ви и҆ ꙗ҆́ростни, и҆̀же и҆ смирѧ́ютъ є҆го̀ нанесе́ньми лю́тѣ, до́ндеже позна́етъ свою̀ не́мощь, и҆ пла́кавъ, ѿло́житъ томле́нїе, и҆ рече́тъ со даві́домъ и҆ то́й: бла́го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ¹²⁶⁹.

п҃в. Бг҃ъ не хо́щетъ на́мъ бы́ти страстьмѝ при́снѡ смирє́ннымъ, и҆ ѿ ни́хъ гони̑мымъ, ꙗ҆́кѡ за́ѧцємъ положи́ти то́чїю ка́мень прибѣ́жище себѣ̀, занѐ не бы̀ рѣ́клъ: а҆́зъ рѣ́хъ: бо́зи є҆стѐ, и҆ сы́нове вы́шнѧгѡ всѝ¹²⁷⁰: но и҆ ꙗ҆́кѡ є҆ле́нємъ на го́ры высѡ́кїѧ за́повѣдей є҆гѡ̀ востека́ти, и҆ жа́жднѣйшымъ быва́ти животворѧ́щихъ во́дъ дꙋ́ха. Да ꙗ҆́коже ѻ҆нѝ є҆стество́мъ ѕмїи̑ ꙗ҆дꙋ́ще, горѧ́честїю, ꙗ҆́же ѿ мно́гагѡ тече́нїѧ, ꙗ҆дови́тое є҆стество̀ ѕмїє́въ во вкꙋ́съ пресла́внѡ, ꙗ҆́коже глаго́лютъ, претворѧ́ютъ, ничто́же ѿѻнꙋ́дꙋ вредѧ́щесѧ: та́кѡ и҆ мы̀ всѧ́къ по́мыслъ встра́стїѧ во чре́вѣ мы́сли прїе́млюще, разжже́ннымъ тече́нїемъ за́повѣдей бж҃їихъ и҆ си́лою дꙋ́ха претворѧ́емъ плѣне́нїемъ въ благово́нно и҆ спаси́тельно дѣѧ́нїе добродѣ́тели: да всѧ́къ ра́зꙋмъ плѣнѧ́ти ꙗ҆ви́мсѧ дѣѧ́нїемъ въ послꙋша́нїе хрⷭ҇то́во¹²⁷¹. Го́рнїй бо мі́ръ не пе́рстными и҆ несоверше́нными мꙋ́жи, но дꙋхо́вными и҆ соверше́нными, и҆ въ мꙋ́жа соверше́нна восте́кшими и҆сполне́нїѧ хрⷭ҇то́ва¹²⁷², и҆спо́лнитисѧ тре́бꙋетъ.

п҃г. И҆́же при́снѡ въ то́мжде ѡ҆браща́ѧсѧ, а҆ не далеча́е дви́гнꙋтисѧ хотѧ̀ мскꙋ̀ ѻ҆́крестъ маши́ны въ то́мжде мѣ́стѣ дви́жимꙋ ᲂу҆подо́бисѧ. И҆́же бо при́снѡ ра́тꙋѧйсѧ съ пло́тїю, и҆ во є҆ди́номъ ѡ҆бꙋче́нїи тѣле́сномъ ᲂу҆пражнѧ́ѧйсѧ всѧ́цѣмъ ѕлострада́нїемъ: не ᲂу҆разꙋмѣ̀ себѐ въ велича́йшихъ ѿтщетѣва́ѧсѧ, ꙗ҆́кѡ не пости́гъ ра́зꙋма бж҃е́ственнагѡ хотѣ́нїѧ: тѣле́сное бо ѡ҆бꙋче́нїе, по па́ѵлꙋ, вма́лѣ є҆́сть поле́зно¹²⁷³: до́ндеже пе́рстное мꙋдрова́нїе поже́рто бꙋ́детъ пло́ти, стрꙋѧ́ми сле́зъ покаѧ́нїѧ, и҆ животво́рное дꙋхо́вное ᲂу҆мерщвле́нїе тѣлесѝ прибꙋ́детъ, и҆ зако́нъ дꙋ́ха воцари́тсѧ въ ме́ртвеннѣй пло́ти на́шей: благоче́стїе же дꙋшѝ, ра́зꙋмомъ сꙋ́щихъ, и҆ безсме́ртными сады̀ бж҃е́ственными помышле́ньми, глаго́лю, зри́мое ꙗ҆́коже дре́во жи́зни во ᲂу҆́мнѣмъ ᲂу҆ма̀ дѣ́ланїи, вездѣ̀ и҆ во всѣ́хъ поле́зно є҆́сть: ꙗ҆́кѡ чистотꙋ̀ се́рдца дѣ́лающее, ꙗ҆́кѡ ми́ръ творѧ́щее въ си́лахъ є҆ѧ̀: ᲂу҆ма̀ просвѣще́нїе, чистотꙋ̀ тѣ́ла, цѣломꙋ́дрїе, ѡ҆бдержи́тельно воздержа́нїе, смиренномꙋ́дрїе, ᲂу҆миле́нїе, любо́вь, ѡ҆свѧще́нїе, ра́зꙋмъ небе́сенъ, премꙋ́дрость сло́ва, и҆ видѣ́нїе бж҃їе. И҆́же ᲂу҆́бѡ ѿ мно́га ѡ҆бꙋче́нїѧ востечѐ въ таково́е соверше́нство благоче́стїѧ: че́рмное страсте́й преше́дъ мо́ре, въ зе́млю ѡ҆бѣтова́нїѧ вни́де, и҆з̾ неѧ́же тече́тъ млеко̀ и҆ ме́дъ ра́зꙋма бж҃їѧ, неиждива́емое ст҃ы́хъ наслажде́нїе.

п҃д. И҆́же ᲂу҆́бѡ не произволѧ́ѧй ѿ ча́стныхъ и҆ вма́лѣ поле́зныхъ, взы́ти къ соверше́ннѣ полє́знымъ, є҆щѐ ѡ҆трꙋбѧ́нный хлѣ́бъ ꙗ҆́стъ въ по́тѣ лица̀ своегѡ̀, по сꙋ́щемꙋ ѿ нача́ла и҆зрече́нїю бж҃їю: тѣ́мже и҆ непожела́тельнꙋ и҆́мать дꙋ́шꙋ мы́сленныѧ ма́нны, и҆ са́магѡ тогѡ̀ ме́да, и҆сте́кшагѡ ѿ разсѣ́дшагѡсѧ ка́мене і҆и҃лю¹²⁷⁴. Слы́шавый же, воста́ните, и҆́демъ ѿсю́дꙋ, и҆ ѿ ᲂу҆чи́телева гла́са воста́въ ѿ приболѣ́зненнагѡ дѣ́ланїѧ, и҆ ꙗ҆́сти хлѣ́бъ болѣ́зни ѡ҆ста́вль, чꙋ́вство ѿтрѧсѐ, и҆ ѿ ча́ши премꙋ́дрости бж҃їѧ вкꙋсѝ: се́й позна̀, ꙗ҆́кѡ бла́гъ гдⷭ҇ь, ꙗ҆́кѡ и҆спо́лнивый ᲂу҆́бѡ зако́нъ за́повѣдей слꙋже́нїемъ сло́ва, возше́дъ же на го́рницꙋ прише́ствїѧ ѡ҆жида́ѧ ᲂу҆тѣ́шителева.

п҃є. Чи́ны и҆ степе́ньми влюбомꙋ́дренныѧ жи́зни, подоба́етъ всѧ́кѡ на́мъ ше́ствовати въ прє́днѧѧ, и҆ къ вышележа́щемꙋ рачи́тельнѣ востека́ти: ꙗ҆́кѡ приснодви̑жимымъ сꙋ́щымъ ѡ҆ бз҃ѣ, и҆ стоѧ́нїѧ невѣ́дѧщымъ когда̀ до́брагѡ. Ѿсю́дꙋ, и҆ ѿ дѣ́ѧтельнагѡ ᲂу҆́бѡ ѡ҆бꙋче́нїѧ, на є҆сте́ственное видѣ́нїе тва́ри: ѿ сегѡ́ же, на та́инственное сло́во бг҃осло́вїе восходи́ти подоба́етъ, и҆ ᲂу҆спокоѧ́тисѧ въ то́мъ ѿ всѣ́хъ дѣ́лъ тѣле́снагѡ ѡ҆бꙋче́нїѧ, ꙗ҆́кѡ превы́шше бы́вшымъ смире́нїѧ тѣлесѐ, и҆ и҆́стиннагѡ разсꙋжде́нїѧ ра́зꙋмъ прїе́мшымъ благоразсꙋ́дный. А҆́ще ли же не ᲂу҆̀ сегѡ̀ разсꙋжде́нїѧ прїѧ́хомъ ра́зꙋмъ, нижѐ си́це ше́ствовати въ прє́днѧѧ, и҆ къ соверше́ннѣйшемꙋ вѣ́мы простира́тисѧ: го́рши є҆щѐ ѿ сꙋ́щихъ въ мі́рѣ є҆смы̀, и҆̀же предѣ́ла не вѣ́дѧтъ предспѣ́ѧнїѧ сꙋ́щагѡ досто́инства, нижѐ стоѧ́нїѧ возхожде́нїѧ, до́ндеже къ превышележа́щемꙋ и҆ны́хъ досто́инствъ взы́дꙋтъ, и҆ є҆́же ѡ҆ се́мъ жела́нїе въ то́мъ ᲂу҆поко́ѧтъ.

п҃ѕ. Крѣ́пцѣ теплото́ю ѡ҆чища́емаѧ дꙋша̀ трꙋда́ми ѡ҆бꙋче́нїѧ, ѡ҆зарѧ́етсѧ ѿ бж҃е́ственнагѡ свѣ́та, и҆ зрѣ́ти пома́лꙋ начина́етъ є҆сте́ственнѣ да́ннꙋю себѣ̀ добро́тꙋ съ нача́ла ѿ бг҃а, и҆ пространѧ́тисѧ въ любо́вь сотво́ршагѡ ю҆̀. Поели́кꙋ же ᲂу҆ѧснѧ́ютсѧ є҆́й ѿ ѡ҆чище́нїѧ лꙋчы̀ со́лнца пра́вды, и҆ є҆сте́ственнаѧ та̀ добро́та ꙗ҆́вственна быва́етъ є҆́й и҆ познава́етсѧ, потоли́кꙋ и҆ трꙋды̀ ѡ҆бꙋче́нїѧ и҆ та̀ ᲂу҆множа́етъ во множа́йшее ѡ҆чище́нїе своѐ: да чи́стѣ, є҆гѡ́же сподо́бисѧ да́ра, ᲂу҆разꙋмѣ́етъ сла́вꙋ, и҆ дре́внее благоро́дїе воспрїи́метъ, и҆ ѡ҆́бразъ чи́стъ и҆ непримѣ́сенъ вещества̀ принесе́тъ сотво́ршемꙋ, и҆ ника́коже ѿ прило́га трꙋдѡ́въ послаблѧ́етъ, до́ндеже нечистоты̀ всѧ́кїѧ и҆ скве́рны себѐ ѡ҆чи́ститъ, и҆ досто́йнꙋ въ видѣ́нїе и҆ бесѣ́дꙋ бж҃їю содѣ́лаетъ.

п҃з. Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀¹²⁷⁵, ѿ мглы̀ є҆щѐ землена́гѡ мꙋдрова́нїѧ покрыва́емый, вопїе́тъ къ бг҃ꙋ. Невѣ́дѣнїе бо пе́рстнагѡ ᲂу҆ма̀, мгла̀ сꙋ́щи и҆ мра́къ глꙋбо́къ, видѣ́нїѧ дꙋшѝ покрыва́ющи, те́мнꙋ тꙋ̀ и҆ мра́чнꙋ во є҆́же разꙋмѣ́ти бж҃е́ствєннаѧ же и҆ человѣ́чєскаѧ содѣ́ловаетъ, не могꙋ́щꙋ къ лꙋча́мъ бж҃е́ственнагѡ свѣ́та взира́ти, и҆лѝ въ наслажде́нїи быва́ти бла̑гъ ѻ҆́ныхъ, и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша¹²⁷⁶: сїѧ́ же, ѿкрыва́ема сꙋ́щи покаѧ́нїемъ, ѻ҆чи́ма зри́тъ чи́стѣ, слы́шитъ въ ра́зꙋмѣ, и҆ разꙋмѣ́етъ разꙋ́мнѡ. Не то́чїю же, но и҆ восхождє́нїѧ ѡ҆ си́хъ полага́етъ разꙋмѣ́нїй въ се́рдцѣ свое́мъ. Ѿсю́дꙋ же и҆ вкꙋси́вши сла́дости тѣ́хъ, ᲂу҆ѧснѧ́етъ ра́зꙋмомъ, и҆ сло́вомъ премꙋ́дрости бж҃їѧ повѣ́даетъ всѣ̑мъ чꙋдеса̀ бж҃їѧ: блага̑ѧ, ꙗ҆̀же ᲂу҆гото́ва бг҃ъ лю́бѧщымъ є҆го̀, и҆ всѣ́хъ въ прича́стїе таковы́хъ подвиза́етъ мно́гими пѡ́двиги и҆ слеза́ми прїитѝ.

п҃и. Седмѝ дарова́нїємъ сꙋ́щымъ дх҃а, свы́ше сло́во начина́ющо ѿ премꙋ́дрости счислѧ́етъ та̀, и҆ низво́дитъ коне́цъ на бж҃е́ственный стра́хъ дх҃а: дх҃ъ, глаго́лѧ, премꙋ́дрости и҆ ра́зꙋма, дх҃ъ совѣ́та и҆ крѣ́пости, дх҃ъ вѣ́дѣнїѧ и҆ благоче́стїѧ, дх҃ъ стра́ха бж҃їѧ¹²⁷⁷. На́мъ же подоба́етъ ѿ стра́ха ѡ҆чища́ющагѡ начина́ти, и҆́же є҆́сть мꙋ́къ: да си́мъ до́брѣ пе́рвѣе ᲂу҆дале́нїе ѿ ѕла́гѡ сотво́рше, и҆ покаѧ́нїемъ пред̾ѡчи́стившесѧ ѿ скве́рнъ грѣха̀, ко стра́хꙋ дꙋ́ха чи́стомꙋ дости́гнемъ семꙋ̀, по пꙋтѝ грѧдꙋ́ще къ немꙋ̀, и҆ ᲂу҆покоѧ́юще въ не́мъ всѧ́ко дѣ́ланїе добродѣ́тели.

п҃ѳ. И҆́же ѿ стра́ха сꙋда̀ нача́вый, и҆ въ чистотꙋ̀ се́рдца слеза́ми пред̾ꙋспѣва́ѧй покаѧ́нїѧ, и҆сполнѧ́етсѧ, пе́рвѣе премꙋ́дрости, поне́же и҆ нача́ло сеѧ̀ стра́хъ по рече́нномꙋ є҆́сть. Та́же ра́зꙋма, кꙋ́пнѡ и҆ съ совѣ́томъ, и҆́мже себѣ̀ полє́знаѧ совѣ́товати лю́битъ, и҆ и҆ска́ти ца́рствїѧ бж҃їѧ и҆ пра́вды є҆гѡ̀. Въ сїе́ же пред̾ꙋспѣ́въ дѣ́ланїемъ за́повѣдей, въ ра́зꙋмъ сꙋ́щихъ восхо́дитъ, и҆ прїе́млетъ бж҃е́ственныхъ и҆ человѣ́ческихъ веще́й и҆звѣ́стнѣйшее вѣ́дѣнїе. Ѿсю́дꙋ же ве́сь благоче́стїѧ бы́въ жили́ще, на любвѐ верхогра́дїе возше́дъ соверше́нъ быва́етъ, и҆ а҆́бїе чи́стый дꙋ́ха стра́хъ прїе́млетъ є҆го̀, во є҆́же храни́ти внꙋ́трь ѿложе́нное въ не́мъ сокро́вище ца́рствїѧ небе́снагѡ. Се́й стра́хъ ѕѣлѡ̀ спаси́теленъ, на ве́рхъ любвѐ возвы́шеннаго тре́петна твори́тъ и҆ пристра́шна, стра́хомъ є҆́же не ѿпа́сти таковы́ѧ высоты̀ любвѐ бж҃їѧ, и҆ па́ки во стра́хъ ѿве́рженꙋ бы́ти стра́шныѧ мꙋ́ки.

ч҃. И҆на́кѡ вводи́мымъ въ житїѐ благоче́стїѧ писа́нїй чте́нїе быва́етъ, и҆ и҆на́кѡ къ средѣ̀ пред̾ꙋспѣ́вшымъ, и҆ и҆на́кѡ къ соверше́нствꙋ востека́ющымъ. Занѐ ѻ҆́вѣмъ ᲂу҆́бѡ, хлѣ́бъ быва́етъ трапе́зы бж҃їѧ ᲂу҆крѣплѧ́ющъ сердца̀ и҆́хъ во свѧще́нныхъ по́двизѣхъ добродѣ́тели, и҆́же и҆ си́лꙋ крѣ́пости подае́тъ тѣ̑мъ къ сраже́нїю съ дѣ́йствꙋющими стра̑сти, дꙋ́хи, и҆ ратобо́рцы мꙋ́жественны на бѣ́сы тѣ́хъ соверша́етъ, ꙗ҆́коже глаго́лати тѣ̑мъ: Оу҆гото́валъ є҆сѝ предо мно́ю трапе́зꙋ сопроти́въ стꙋжа́ющымъ мнѣ̀¹²⁷⁸. Ѻ҆́вѣмъ же, вїно̀ ча́ши бж҃їѧ веселѧ́щее сердца̀ и҆́хъ, и҆ ᲂу҆жаса́ющее тѣ́хъ си́лою разꙋмѣ́нїй, и҆ ᲂу҆́мъ взе́млющее и҆́хъ ѿ пи́смене ᲂу҆бива́ющагѡ, и҆ во глꙋбины̀ дꙋ́ха и҆спыта́тельнѣ вводѧ́щее, и҆ всего̀ ражда́тельна же и҆ и҆з̾ѡбрѣта́тельна разꙋмѣ́нїй содѣ́ловаѧ, ꙗ҆́коже и҆ тѣ̑мъ сво́йственно глаго́лати: И҆ ча́ша твоѧ̀ ᲂу҆поѧва́ющи мѧ̀ ꙗ҆́кѡ держа́вна¹²⁷⁹. Ѻ҆́вѣмъ же, є҆ле́й бж҃е́ственнагѡ дꙋ́ха ᲂу҆маща́ющъ и҆́хъ дꙋ́шꙋ, и҆ ᲂу҆кроща́ющъ и҆ смирѧ́ющъ ю҆̀ превосхожде́нїемъ бж҃е́ственныхъ ѡ҆сїѧ́нїй, и҆ всю̀ превы́шше творѧ́щъ смире́нїѧ тѣ́ла, ꙗ҆́коже и҆ то́й хва́лѧщейсѧ воспѣ́ти: Оу҆ма́стилъ є҆сѝ є҆ле́омъ главꙋ̀ мою̀, и҆ ми́лость твоѧ̀ пожене́тъ мѧ̀ всѧ̑ дни̑ живота̀ моегѡ̀¹²⁸⁰.

ч҃а. До́ндеже притрꙋ́днѡ дѣ́ѧтельнымъ любомꙋ́дрїемъ въ по́тѣ лица̀ и҆справлѧ́емсѧ ко бг҃ꙋ, стра̑сти плѡтскі́ѧ ᲂу҆малѧ́юще, насꙋ́щнымъ хлѣ́бомъ воздѣ́ловаемымъ воздѣ́ланїемъ добродѣ́телей, и҆ сердца̀ человѣ̑къ ᲂу҆крѣплѧ́ющимъ, пита́етсѧ гдⷭ҇ь съ на́ми на трапе́зѣ дарова́нїй свои́хъ. Є҆гда́ же безстра́стїемъ ѡ҆ст҃и́тсѧ въ на́съ и҆́мѧ є҆гѡ̀, и҆ са́мъ воцр҃и́тсѧ во всѣ́хъ на́шихъ си́лахъ дꙋше́вныхъ, покори́въ и҆ ᲂу҆мири́въ разстоѧ̑щаѧ, глаго́лю же, го́ршее лꙋ́чшемꙋ по́мыслꙋ, и҆ во́лѧ є҆гѡ̀ бꙋ́детъ ꙗ҆́кѡ на небесѝ и҆ въ на́съ: тогда̀ пи́во но́во па́че сло́ва премꙋ́дрости словесѐ, че́рпаемо во ᲂу҆миле́нїи и҆ ра́зꙋмѣ та̑инъ вели́кихъ, пїе́тъ съ на́ми въ ца́рствїи свое́мъ въ на́съ сꙋ́щемъ. Въ прича́стїи же дх҃а быва́ющымъ на́мъ ст҃а́гѡ, и҆ до́брымъ и҆змѣнѧ́емымъ на́мъ и҆змѣне́нїемъ во ѡ҆бновле́нїи ᲂу҆ма̀ на́шегѡ: тогда̀ бг҃ъ сы́й, съ бо́ги бꙋ́детъ съ на́ми, ꙗ҆́кѡ безсме́ртно творѧ̀ прїѧ́тїе.

ч҃в. Є҆гда̀ неꙋдержи́маѧ вода̀ встра́ственныхъ ᲂу҆ма̀ пѡ́мыслъ прише́ствїемъ ᲂу҆де́ржана бꙋ́детъ ст҃а́гѡ дх҃а, и҆ сла́наѧ неподо́бныхъ мы́слей же и҆ помышле́нїй бе́здна воздержа́нїемъ и҆ размышле́нїемъ сме́рти ѡ҆бꙋзда́етсѧ: тогда̀ вѣ́етъ бж҃е́ственный дꙋ́хъ покаѧ́нїѧ, и҆схо́дѧтъ ᲂу҆миле́нїѧ во́ды, ꙗ҆̀же бг҃ъ и҆ влⷣка во ᲂу҆мыва́льницꙋ влїѧ́въ покаѧ́нїѧ, мы̑сленныѧ на́ши ѡ҆чища́етъ но́ги, и҆ ходи́ти достѡ́йны ѧ҆̀ твори́тъ во дворѣ̀ ца́рствїѧ своегѡ̀.

ч҃г. Сло́во бж҃їе бы́вши пло́ть, и҆ на́ше є҆стество̀ въ себѣ̀ соста́вльши, и҆ человѣ́къ соверше́нъ бы́вше кромѣ̀ грѣха̀ ꙗ҆́кѡ бг҃ъ соверше́нъ, сїѐ возсозда́вши, ѡ҆божѝ. Сло́во же сꙋ́щи пе́рвагѡ ᲂу҆ма̀ и҆ бг҃а, слове́ствꙋ сегѡ̀ соедини́сѧ, и҆ сїѐ бж҃е́ствєннаѧ мꙋ́дрствовати и҆ помышлѧ́ти на высотꙋ̀ воскрилѝ. Но и҆ ѻ҆́гнь сꙋ́щи, ѻ҆гне́мъ сꙋще́ственнымъ и҆ бж҃е́ственнымъ, ꙗ҆́ростное сегѡ̀ на сопротивобѡ́рныѧ стра̑сти и҆ бѣ́сы бы́стрѣ наѡстрѝ. Жела́нїе же сꙋ́щи всѧ́кагѡ слове́сна є҆стества̀, и҆ поко́й жела́нїѧ, жела́тельное сегѡ̀, въ прича́стїе бла̑гъ ѻ҆́ныхъ вѣ́чныѧ жи́зни съ завѣща́тельною любо́вїю разширѝ. И҆ та́кѡ всего̀ человѣ́ка въ себѣ̀ воз̾ѡбно́вльши, но́ва ѿ ве́тха содѣ́ла, ниеди́но ѡ҆глаго́ланїѧ сло́во на содѣ́телѧ сло́ва ѡ҆ возсозда́нїи наносѧ́ща.

ч҃д. Свѧщеннодѣ́йствовавши сло́во въ себѣ̀ на́ше возсозда́нїе, са́мо за ны̀ себѐ кресто́мъ и҆ сме́ртїю же́ртвꙋ сотворѝ, и҆ жре́тисѧ при́снѡ дае́тъ пречи́стое своѐ тѣ́ло, и҆ въ дꙋшепита́тельно всѐ пи́ршество предлага́етъ то̀ на всѧ́къ де́нь на́мъ: ꙗ҆́кѡ да сїѐ ꙗ҆дꙋ́ще, и҆ пїю́ще честнꙋ́ю є҆гѡ̀ кро́вь, въ чꙋ́вствѣ дꙋшѝ бꙋ́демъ причаще́нїемъ лꙋ́чши, не́жели є҆́же є҆смы̀, растворѧ́еми си́ми и҆ претворѧ́еми на бо́льшее ѿ ме́ньшагѡ, и҆ є҆ди́но твори́ми съ сꙋгꙋ́бымъ сло́вомъ сꙋгꙋ́бѡ, тѣ́ломъ и҆ дꙋше́ю слове́сною, ꙗ҆́кѡ съ воплоще́ннымъ бг҃омъ, и҆ на́мъ по пло́ти є҆диносꙋ́щнымъ. Ꙗ҆́коже не свои́мъ бы́ти, но є҆ди́но сотво́ршаго на ны̀ съ собо́ю безсме́ртною трапе́зою, и҆ сїѐ сотво́ршагѡ бы́ти положе́нїемъ, є҆́же то̀ по є҆стествꙋ̀ є҆́сть.

ч҃є. А҆́ще ᲂу҆́бѡ и҆скꙋше́нни трꙋда́ми добродѣ́телей, и҆ пред̾ѡчище́нни слеза́ми, пристꙋпа́юще ꙗ҆́мы ѿ хлѣ́ба сегѡ̀ и҆ ѿ сеѧ̀ ча́ши пїе́мъ, двѣма̀ є҆сте́ственными си́лами, сꙋгꙋ́бо сло́во кро́тостїю съ на́ми растворѧ́етсѧ, всѧ́кѡ претворѧ́ющи на́съ самѣ́хъ съ собо́ю, ꙗ҆́кѡ вопло́щшеесѧ, и҆ на́мъ по человѣ́чествꙋ є҆диносꙋ́щное, и҆ всѣ́хъ бг҃отворѧ́щее сло́вомъ ра́зꙋма, и҆ себѣ́ ны а҆́ки соѡбра̑зны и҆ бра́тїю ᲂу҆своѧ́ющее ꙗ҆́кѡ бг҃ъ, и҆ ѻ҆ц҃ꙋ̀ є҆диносꙋ́щное. А҆́ще же смѣ́шени съ вещество́мъ страсте́й, и҆ ѡ҆скверне́нни скве́рною грѣха̀ пристꙋпа́емъ: є҆сте́ственнымъ ѻ҆гне́мъ потреби́тельнымъ ѕло́бы, приближа́ющисѧ къ на́мъ пожига́етъ и҆ попалѧ́етъ всѣ́хъ на́съ, и҆ ꙗ҆̀же жи́зни подсѣца́етъ на́шеѧ, не своеѧ̀ бла́гости во́лею, но пренебреже́нїемъ нечꙋ́вствїѧ на́шегѡ понꙋжда́емо сꙋ́щи.

ч҃ѕ. Ко всѣ̑мъ по дѣ́ѧтельномꙋ любомꙋ́дрїю пꙋ́ть наче́ншымъ ходи́ти за́повѣдей хрⷭ҇то́выхъ, гдⷭ҇ь неви́димѡ приближа́ѧсѧ, несоверше́нно и҆мꙋ́щымъ є҆щѐ мꙋдрова́нїе, и҆ сꙋмнѧ́щꙋюсѧ дꙋ́шꙋ ѡ҆ словесѝ добродѣ́тели, и҆́детъ съ ни́ми. И҆́хже ᲂу҆́бѡ пра́веднѡ и҆ ѻ҆́чи дꙋше́внїи держа́тсѧ ны́нѣ, є҆́же не позна́ти своѐ предспѣ́ѧнїе, внегда̀ и҆тѝ съ ни́ми гдⷭ҇ꙋ, и҆ содѣ́йствовати ᲂу҆́бѡ во и҆збавле́нїе ѿ страсте́й, подава́ти же рꙋ́кꙋ по́мощи во и҆справле́нїе всѧ́кїѧ добродѣ́тели. Творѧ́щымъ же предспѣ́ѧнїе въ по́двиги благоче́стїѧ, и҆ къ безстра́стїю смире́нїемъ грѧдꙋ́щымъ тѣ̑мъ, не хо́щетъ сло́во, да́же до сегѡ̀ ста́ти тѣ̑мъ ᲂу҆трꙋждє́ннымъ трꙋда́ми добродѣ́телей: но далеча́е и҆тѝ, и҆ къ видѣ́нїю возводи́тисѧ, ѿѻнꙋ́дꙋ же и҆ напита́въ и҆̀хъ въ мѣ́рꙋ хлѣ́ба дово́льна сле́зъ, свѣ́томъ ᲂу҆миле́нїѧ благословлѧ́етъ, и҆ ᲂу҆́мъ и҆́хъ ѿверза́етъ во є҆́же разꙋмѣ́ти глꙋбинꙋ̀ бж҃е́ственныхъ писа́нїй, и҆ ѿѻнꙋ́дꙋ є҆стества̀ и҆ словеса̀ ᲂу҆зрѣ́ти сꙋ́щихъ: и҆ сопрѧ́таетъ а҆́бїе ѿ ни́хъ себе́ бо є҆́же воста́ти тѣ̑мъ, и҆ рачи́тельнѣе взыска́ти наꙋчи́тисѧ, кі́й є҆́сть ра́зꙋмъ сꙋ́щихъ, и҆ ко́е є҆́сть є҆́же ѿ сегѡ̀ возвыше́нїе. И҆̀же и҆ тща́тельнѡ взыска́вше, на вы́шшее восхо́дѧтъ сло́ва слꙋже́нїе, и҆ проповѣ́даютъ всѣ̑мъ є҆́же ѿ дѣѧ́нїѧ и҆ видѣ́нїѧ сло́ва воскресе́нїе.

ч҃з. Пра́веднѣ сло́во ко́сность поноша́етъ коснѧ́щымъ въ трꙋдѣ́хъ дѣ́ѧтельнагѡ ѡ҆бꙋче́нїѧ, и҆ не хотѧ́щымъ преложи́тисѧ ѿѻнꙋ́дꙋ, и҆ къ вы́шшемꙋ взы́ти видѣ́нїѧ восхожде́нїю, глаго́лѧ и҆̀мъ: ѽ несмы́сленнїи и҆ ко́снїи се́рдцемъ, є҆́же не вѣ́ровати на могꙋ́щее ѿкры́ти сло́во, є҆сте́ственнагѡ видѣ́нїѧ ходѧ́щымъ по дꙋ́хꙋ глꙋбины̀ дꙋ́ха. Є҆́же бо не хотѣ́ти ѿ вводи́тельнѣйшихъ пѡ́двигъ на соверше́ннѣйшыѧ преходи́ти, и҆ ѿ глаго́ла тѣлесѐ бж҃е́ственнагѡ писа́нїѧ, на ᲂу҆́мъ и҆ ра́зꙋмъ сло́ва приходи́ти: зна́менїе є҆́сть дꙋшѝ ᲂу҆ны́лыѧ и҆ не ѡ҆щꙋща́ющїѧ дꙋхо́вныѧ по́льзы, и҆ зави́дѧщїѧ лю́тѣ своемꙋ̀ предспѣ́ѧнїю. Є҆́йже не то́чїю рече́тсѧ, ꙗ҆́кѡ ᲂу҆гаше́нъ носѧ́щей сво́й свѣти́льникъ: и҆дѝ, кꙋпѝ є҆ле́й ѿ продаю́щихъ, но къ семꙋ̀ є҆́же затвори́тисѧ є҆́й черто́гꙋ, и҆ ѿидѝ, не вѣ́мъ тѧ̀, ѿкꙋ́дꙋ є҆сѝ.

ч҃и. Є҆гда̀ сло́во бж҃їе въ па́дшꙋю дꙋ́шꙋ, ꙗ҆́коже во гра́дъ прїи́детъ Виѳа́нїю, ᲂу҆ме́ршїй ѿ грѣха̀ ᲂу҆́мъ є҆ѧ̀ и҆ погребе́нный тле́ю страсте́й воскреша́ѧ: тогда̀ мꙋ́дрость и҆ пра́вда печа́лїю погрꙋже́ннѣ ѡ҆ ᲂу҆мерщвле́нїи ᲂу҆ма̀, ꙗ҆́коже пла́чꙋще ᲂу҆срѣта́ютъ є҆го̀, и҆ глаго́лютъ: а҆́ще бы є҆сѝ здѣ̀ бы́лъ въ на́съ, блюдо́мь же и҆ храни́мь, не бы̀ бра́тъ на́шъ ᲂу҆́мъ ᲂу҆́мерлъ ѿ грѣха̀. Ѿсю́дꙋ пра́вда ᲂу҆́бѡ напита́ти сло́во мно́гимъ попече́нїемъ и҆ дѣ́ланїемъ тщи́тсѧ добродѣ́телей, и҆ трапе́зꙋ томꙋ̀ разли́чнꙋ и҆ многови́днꙋ ѕлострада́нїѧ предложи́ти любоче́ствꙋетсѧ: мꙋ́дрость же и҆ны́хъ всѣ́хъ небре́гши попече́нїй, и҆ притрꙋ́днагѡ ѕлострада́нїѧ, при ᲂу҆́мномъ дѣ́ланїи, и҆ ᲂу҆́мныхъ движе́нїѧхъ сло́ва, и҆ разꙋмѣ́нїй видѣ́нїѧ є҆гѡ̀ слы́шанїи присѣдѣ́ти и҆збра̀. Тѣ́мже и҆ тꙋ̀ ᲂу҆́бѡ прїе́млетъ до́брѣ подвиза́ющꙋсѧ сло́во, напита́ти то̀ трапе́зою любоче́стнѣ многови́днагѡ и҆ дѣ́ѧтельнагѡ любомꙋ́дрїѧ: но ѡ҆ мно́зѣхъ пекꙋ́щꙋсѧ ви́дѣвъ ѕлострада́нїѧ, и҆ ѡ҆ вма́лѣ поле́зномъ ᲂу҆пражнѧ́ющꙋсѧ при́снѡ порица́етъ, є҆ди́нꙋ сꙋ́щꙋ и҆ско́момꙋ на потре́бꙋ и҆ послꙋже́нїе сло́ва: є҆́же лꙋ́чшемꙋ по́мыслꙋ покори́ти го́ршее, и҆ пе́рстное мꙋдрова́нїе дꙋшѝ преложи́ти въ дꙋхѡ́вны пѡ́двиги добродѣ́тели. Сїю́ же и҆ припохвалѧ́етъ, и҆ є҆сте́ственнѡ ᲂу҆своѧ́етъ, ꙗ҆́кѡ и҆збра́вшꙋ благꙋ́ю ча́сть дꙋхо́внагѡ ра́зꙋма, и҆́мже человѣ́ческїѧ превозлета́ющи ве́щи, въ бж҃е́ствєнныѧ глꙋбины̑ вхо́дитъ бж҃їѧ, и҆ би́серъ ѿѻнꙋ́дꙋ сло́ва до́брѣ прїѡбрѣта́етъ: и҆ на сокровє́ннаѧ сокрѡ́вища взира́етъ дꙋ́ха, и҆ несказа́ннаѧ є҆́й ра́дость прибыва́етъ, ꙗ҆́же не ѿи́метсѧ ѿ неѧ̀.

ч҃ѳ. Оу҆́мъ ᲂу҆мертви́выйсѧ страстьмѝ, и҆ прише́ствїемъ ѡ҆животвори́выйсѧ сло́ва бж҃їѧ, ка́мень нечꙋ́вствїѧ ѿложи́въ, разрѣша́етсѧ плени́цъ грѣха̀ и҆ тлетво́рныхъ пѡ́мыслъ ѿ слꙋ́гъ сло́ва: стра́ха, глаго́лю, мꙋ́ки, и҆ трꙋдѡ́въ добродѣ́тели, и҆ свѣ́та бꙋ́дꙋщїѧ наслади́всѧ жи́зни, ѿпꙋща́етсѧ въ безстра́стїе. И҆ ѿѻнꙋ́дꙋ на престо́лѣ сѣ́дъ чꙋ́вствъ, и҆ свѧщеннодѣ́йствовавъ чи́стѣ видѣ́нїѧ та́инство, соснѣ́дникъ быва́етъ сло́вꙋ, и҆ соѿше́дъ съ ни́мъ ѿ землѝ на небеса̀, ца́рствꙋетъ со хрⷭ҇то́мъ въ ца́рствїи бг҃а и҆ ѻ҆ц҃а̀, ᲂу҆поко́ивъ жела̑нїѧ своѧ̑ всѧ̑.

р҃. По разрѣше́нїи тѣлесѐ та́мошнее воз̾ꙋстрое́нїе комꙋ́ждо ѿ тщали́выхъ зако́ннѡ подвиза́ющꙋсѧ и҆ къ средѣ̀ предспѣ́ющꙋ, и҆ соверша́емꙋ въ мѣ́рꙋ во́зраста и҆сполне́нїѧ хрⷭ҇то́ва, ꙗ҆́сно и҆ ꙗ҆́вственно быва́етъ и҆звѣ́ствованїемъ и҆ дѣ́йствованїемъ дх҃а. Ра́дость же вѣ́чна є҆́сть во свѣ́тѣ присносꙋ́щнѣмъ, блаже́нство ѻ҆́нагѡ поко́ѧ. Ра́дость же непреста́нна ѡ҆б̾е́млетъ сердца̀ подвиза́ющихсѧ зако́ннѡ здѣ̀, и҆ лобза́етъ тѣ́хъ весе́лїе ст҃а́гѡ дх҃а, є҆́же, по словесѝ гдⷭ҇ню, не ѿи́метсѧ ѿ ни́хъ. Сподо́бивыйсѧ ᲂу҆̀бо прише́ствїѧ ᲂу҆тѣ́шителева ѿсю́дꙋ, и҆ плодѡ́въ наслади́выйсѧ є҆гѡ̀ воздѣ́ланїемъ добродѣ́телей, и҆ ѡ҆богатѣ́вый бж҃е́ственными є҆гѡ̀ дарова́нїи, ра́дости и҆спо́лнь сы́й и҆ всѧ́кїѧ любвѐ, стра́хꙋ всѧ́комꙋ си́рѣчь бѣжа́вшꙋ, съ ра́достїю ᲂу҆́зъ тѣле́сныхъ разрѣша́етсѧ, и҆ съ ра́достїю ѿхо́дитъ ѿ ви́димыхъ, и҆̀хже и҆ жи́въ сы́й чꙋ́вства пре́жде забы̀, и҆ въ ра́дости неизглаго́ланнѣй почива́етъ свѣ́та, и҆дѣ́же всѣ́хъ веселѧ́щихсѧ жили́ще, а҆́ще тѣ́ло мно́жицею и҆ болѣ́знь въ разрѣше́нїи и҆ сѣче́нїи соедине́нїѧ въ нѣ́кихъ стра́ждетъ, ꙗ҆́коже неꙋдоборажда́ющїѧ жены̀.

Тре́тїѧ со́тница глави́знъ ѡ҆ любвѝ и҆ соверше́нствѣ житїѧ̀, тогѡ́жде.

а҃. Оу҆́мъ безстра́стенъ є҆́сть бг҃ъ, па́че всѧ́кагѡ ᲂу҆ма̀ и҆ всѧ́кагѡ безстра́стїѧ свѣ́тъ, и҆ и҆сто́чникъ свѣ́та бла́га: премꙋ́дрость, сло́во и҆ ра́зꙋмъ, и҆ премꙋ́дрости сло́ва и҆ ра́зꙋма пода́тель. И҆̀мже ᲂу҆́бѡ да́шасѧ сїѧ̑ чистоты̀ ра́ди, и҆ въ ни́хже ᲂу҆смотрѣва́ютсѧ бога́тнѣ, си́ми воспасо́шасѧ, и҆ є҆́же по ѡ҆́бразꙋ соблюде́сѧ, ꙗ҆́коже бы́ти тѣ̑мъ ѿсю́дꙋ сынѡ́мъ бж҃їимъ води̑мымъ, по рече́нномꙋ, ѿ дх҃а: Є҆ли́цы дх҃омъ бж҃їимъ во́дѧтсѧ, сі́и сꙋ́ть сы́нове бж҃їи¹²⁸¹.

в҃. Є҆ли́цы трꙋды̀ ѡ҆бꙋче́нїѧ чи́стыхъ себѐ содѣ́лаша ѿ всѧ́кїѧ скве́рны пло́ти и҆ дꙋ́ха, прїѧ́тєлища безсме́ртнагѡ бы́ша є҆стества̀ дарова́нїй дх҃а. Доспѣ́вшїи же въ сїѐ, свѣ́та сꙋ́ть бла́га и҆спо́лненни, ѿ негѡ́же тишины̀ въ ми́рѣ се́рдцемъ и҆сполнѧ́еми, ѿрыга́ютъ словеса̀ бла̑га, и҆ премꙋ́дрость бж҃їѧ и҆стека́етъ ѿ ᲂу҆сте́нъ и҆́хъ съ ра́зꙋмомъ бж҃е́ственныхъ и҆ человѣ́ческихъ веще́й, и҆ сло́во и҆́хъ не мꙋ́тно глꙋбины̑ дх҃а сказꙋ́ющо: На таковы́хъ нѣ́сть зако́на¹²⁸² є҆ди́ною соедини́вшихсѧ бг҃ови, и҆ до́брымъ и҆змѣни́вшихсѧ и҆змѣне́нїемъ.

г҃. И҆́же ᲂу҆се́рднымъ тща́нїемъ къ бг҃ꙋ и҆справлѧ́ѧйсѧ притрꙋ́днѡ, и҆з̾ѡбраже́нїе ѡ҆́браза ѻ҆́нагѡ добродѣ́тельми дꙋшѝ и҆ тѣ́ла быва́етъ: то́й ᲂу҆́бѡ въ бз҃ѣ, и҆ бг҃ъ въ не́мъ почива́ѧ по растворе́нїю. Ꙗ҆́коже бы́ти и҆ ви́дѣтисѧ томꙋ̀ ᲂу҆́бѡ ѿсю́дꙋ, ѡ҆́бразꙋ бж҃е́ственнагѡ блаже́нства въ бога́тствѣ дарова́нїй дх҃а, и҆ положе́нїемъ бг҃ꙋ: Бг҃ꙋ же тайнонача́льникꙋ соверше́нства є҆гѡ̀.

д҃. Не ѿ члено́внагѡ тѣлесѐ положе́нїѧ невѣ́жествомъ води́мь да рече́тъ кто̀, по ѡ҆́бразꙋ бж҃їю бы́ти человѣ́кꙋ, но ѿ ᲂу҆́мнагѡ є҆стества̀ ᲂу҆ма̀, не ѡ҆писꙋ́емагѡ ѿ тѧготѣ́ющагѡ до́лꙋ тѣ́ла. Ꙗ҆́коже бо бж҃е́ственное є҆стество̀ внѣ̀ всѧ́кїѧ тва́ри и҆ дебельства̀ сꙋ́ще не ѡ҆писꙋ́етсѧ, безпредѣ́льно и҆ безтѣле́сно сꙋ́ще, и҆ па́че сꙋщества̀ и҆ сло́ва всѧ́кагѡ нека́чественно, неприкоснове́нно, неколи́чественно, неви́димо, безсме́ртно, непостижи́мо, неразꙋмѣва́емо ѿню́дъ ѿ на́съ: та́кѡ и҆ да́нное ѿ негѡ̀ на́мъ ᲂу҆́мное є҆стество̀ неѡпи́санно сꙋ́ще и҆ кромѣ̀ дебельства̀ сегѡ̀ безтѣле́снѡ є҆́сть, неви́димо, неприкоснове́нно, непостижи́мо, и҆ ѡ҆́бразъ безсме́ртныѧ и҆ присносꙋ́щныѧ сла́вы є҆гѡ̀.

є҃. Оу҆́мъ пе́рвый сы́й бг҃ъ, ꙗ҆́кѡ ца́рь всегѡ̀, є҆диносꙋ́щное въ себѣ̀ и҆́мать сло́во и҆ со дх҃омъ соприсносꙋ́щное. Нижѐ без̾ сло́ва и҆ дх҃а сы́й когда̀ за є҆стества̀ нераздѣ́льное, нижѐ слива́емь съ ни́ми, за неслїѧ́нное ра́знства сꙋ́щихъ въ не́мъ ѵ҆поста́сей. Тѣ́мже и҆ сло́во ѿ сꙋщества̀ своегѡ̀ є҆сте́ственнѣ ражда́ѧ, са́мъ себѣ̀ раздѣлѧ́етсѧ, нераздѣ́ленъ сы́й себѣ̀. И҆́мать же соесте́ственнаго, собезнача́льнаго своего̀ дх҃а ѿ ѻ҆ц҃а̀ и҆сходѧ́щаго предвѣ́чнѣ соприсносꙋ́щное сло́во, и҆ ро́ждшаго не ѿсѣца́етсѧ: є҆ди́но бо є҆́сть ѻ҆бои̑мъ є҆стество̀ и҆ нераздѣ́льнѡ, а҆́ще и҆ ра́знствомъ ѵ҆поста́сей, раздѣлѧ́етсѧ на ли́ца, и҆ тро́ичнѣ воспѣва́етсѧ ѻ҆ц҃ъ, сн҃ъ и҆ ст҃ы́й дх҃ъ. И҆ никогда́же сїѧ̑ ꙗ҆́кѡ є҆ди́но є҆стество̀, и҆ бг҃ъ є҆ди́нъ соприсносꙋ́щнагѡ раздѣлѧ́ютсѧ сꙋщества̀ и҆ є҆стества̀. Сегѡ̀ ᲂу҆́бѡ трїѷпоста́снагѡ и҆ є҆ди́нственнагѡ є҆стества̀ ѡ҆́бразъ мѝ ви́ждь, по разꙋмѣва́емомꙋ созда́ннаго ѿ негѡ̀ человѣ́ка, а҆ не по ви́димомꙋ по безсме́ртномꙋ и҆ при́снѡ та́кожде сꙋ́щемꙋ, а҆ не по ме́ртвенномꙋ и҆ разрѣша́емомꙋ.

ѕ҃. Ꙗ҆́коже ᲂу҆́мъ сы́й и҆ превы́шше премꙋ́дростїю тѣ́мъ содѣ́тельствованныхъ созда́нїй бг҃ъ ражда́ѧ нете́чно сло́во, къ си́хъ пребыва́нїю, и҆ къ си́лѣ и҆́хъ и҆спꙋща́ѧ, ꙗ҆́коже пи́сано є҆́сть, прест҃а́го дх҃а, внѣ̀ є҆́сть и҆ внꙋ́трь всегѡ̀: та́кѡ и҆ бж҃е́ственнагѡ є҆гѡ̀ є҆стества̀ прича́стникъ человѣ́къ, ѡ҆́бразъ сы́й є҆гѡ̀ по разꙋмѣва́емомꙋ ᲂу҆́мныѧ и҆ безтѣле́сныѧ и҆ безсме́ртныѧ дꙋшѝ, и҆ ᲂу҆́мъ и҆мѣ́ѧ є҆сте́ственнѣ сло́во ражда́ющъ ѿ сꙋщества̀ своегѡ̀, и҆́миже всѧ̀ си́ла соблюда́етсѧ тѣлесѐ, внѣ̀ є҆́сть и҆ внꙋ́трь вещества̀ и҆ ви́димыхъ си́хъ. И҆ ꙗ҆́коже созда́вый є҆го̀ нераздѣ́ленъ є҆́сть свои́хъ ѵ҆поста́сей, сло́ва глаго́лю и҆ дх҃а: та́кѡ и҆ то́й по дꙋшѝ нераздѣ́ленъ є҆́сть ᲂу҆ма̀ и҆ сло́ва є҆ди́нагѡ є҆стества̀ и҆ сꙋщества̀, неѡпи́саннагѡ тѣ́ломъ.

з҃. Трїѷпоста́сно є҆́сть бж҃ество̀ во ѻ҆ц҃ѣ̀ и҆ сн҃ѣ и҆ ст҃ѣ́мъ дс҃ѣ покланѧ́емое. Во трїе́хъ зри́тсѧ раздѣле́нїихъ и҆ созда́нный ѿ негѡ̀ ѡ҆́бразъ, человѣ́къ въ дꙋшѝ, ᲂу҆мѣ̀ и҆ сло́вѣ, покланѧ́ѧйсѧ самомꙋ̀ ѿ не сꙋ́щихъ всѧ̑ сотво́ршемꙋ бг҃ꙋ: ꙗ҆̀же ᲂу҆́бѡ бг҃ꙋ по є҆стествꙋ̀ соприсносꙋ́щна же сꙋ́ть и҆ є҆диносꙋ́щна, сїѧ̑ и҆ ѡ҆́бразꙋ є҆гѡ̀ по є҆стествꙋ̀ соесте́ствєнна же сꙋ́ть и҆ є҆диносꙋ́щна, ѿ ни́хже є҆́же по ѡ҆́бразꙋ въ на́съ зри́тсѧ, и҆ и҆́миже ѡ҆́бразъ є҆́смь бж҃їй, а҆́ще и҆ бре́нїю и҆ пра́хꙋ смѣша́юсѧ.

и҃. И҆́но є҆́сть ѡ҆́бразъ бж҃їй, а҆ и҆́но ви̑димаѧ на ѡ҆́бразѣ. Ѡ҆́бразъ бо бж҃їй є҆́сть, дꙋша̀ ᲂу҆́мна, ᲂу҆́мъ и҆ сло́во, є҆ди́ное и҆ нераздѣ́льное є҆стество̀: ви̑димаѧ же на ѡ҆́бразѣ, нача́льственное є҆́сть и҆ ца́рское и҆ самовла́стное. Си́це и҆ сла́ва, и҆́но є҆́сть ᲂу҆ма̀, и҆́но же досто́инство: и҆ и҆́но же по ѡ҆́бразꙋ бж҃їю, и҆ и҆́но є҆́же по подо́бїю. И҆ сла́ва ᲂу҆́бѡ ᲂу҆ма̀ є҆́сть: горѣно́сное, приснодви́жное къ гѡ́рнимъ, ѻ҆́строе, чи́стое, разꙋ́мное, премꙋ́дрое, безсме́ртное. Досто́инство же слове́сное: ца́рское, нача́льственное же и҆ самовла́стное. А҆ є҆́же по ѡ҆́бразꙋ бж҃їю є҆́сть, є҆́же ѡ҆ дꙋшѝ и҆ ᲂу҆мѣ̀ и҆ сло́вѣ тождеѷпоста́сное же и҆ є҆диносꙋ́щное, нераздѣ́льное же и҆ неразлꙋ́чное: дꙋши́ бо є҆́сть ᲂу҆́мъ и҆ сло́во безпло́тныѧ и҆ безсме́ртныѧ, и҆ бж҃е́ственныѧ, и҆ ᲂу҆́мныѧ, ꙗ҆̀же и҆ є҆диносꙋ̑щна сꙋ́ть и҆ соприсносꙋ̑щна, несѣкѡ́ма никогда́же ѿ себѐ, и҆лѝ разлꙋчи́тисѧ могꙋ̑ща. А҆ є҆́же по подо́бїю є҆́сть: пра́ведное, и҆́стинное, благоꙋтро́бное, милосе́рдое и҆ человѣколюби́вое. Въ ни́хже ᲂу҆́бѡ сїѧ̑ дѣ́йствꙋютсѧ и҆ хранѧ́тсѧ, въ тѣ́хъ зри́тсѧ ꙗ҆́снѡ и҆ є҆́же по ѡ҆́бразꙋ и҆ по подо́бїю. По є҆стествꙋ̀ ᲂу҆́бѡ ꙗ҆́ственнѡ дви́жимыхъ: по досто́инствꙋ же, па́че и҆ны́хъ вы́шше лежа́щихъ.

ѳ҃. Слове́снѣй дꙋшѝ въ трѝ раздѣлѧ́емѣй, и҆ во двою̀ зри́мѣй: ѻ҆́во ᲂу҆́бѡ є҆ѧ̀ слове́сно є҆́сть, ѻ҆́во же страда́тельно. И҆ слове́сное ᲂу҆́бѡ є҆ѧ̀ по ѡ҆́бразꙋ созда́вшагѡ ю҆̀ сꙋ́ще, неꙋдержи́мо є҆́сть и҆ неви́димо, и҆ неѡпредѣле́нно чꙋ́вствами, ꙗ҆́кѡ внѣ̀ и҆ внꙋ́трь сꙋ́ще и҆́хъ. Си̑мъ спрїѡбща́ющисѧ ᲂу҆́мнымъ и҆ бж҃е́ствєннымъ си́ламъ по є҆стествꙋ̀, къ бг҃ꙋ ꙗ҆́кѡ къ первоѡбра́зїю свѧще́ннымъ ра́зꙋмомъ сꙋ́щихъ востека́етъ, и҆ бж҃е́ственнагѡ є҆гѡ̀ въ наслажде́нїи быва́етъ є҆стества̀: страда́тельное же є҆ѧ̀ раздѣлѧ́етсѧ чꙋ́вствами, страсте́мъ и҆ ѿра́дамъ подлежа́ще. Си́мъ чꙋвстви́тельномꙋ пита́тельномꙋ же и҆ расти́тельномꙋ спрїѡбща́ющисѧ є҆стествꙋ̀, воздꙋ́хъ прїе́млетъ, хла́дъ же и҆ теплотꙋ̀, и҆ пи̑щи въ пребыва́нїе, въ живо́тъ, раще́нїе и҆ здра́вїе. Тѣ́мже и҆ си́мъ соизмѣнѧ́емо, ѻ҆вогда̀ ᲂу҆́бѡ жела́етъ безслове́снѡ по́хоти, ѿ є҆́же по є҆стествꙋ̀ движе́нїѧ предви́гшесѧ, ѻ҆вогда́ же раздража́етсѧ, и҆ безслове́сною ꙗ҆́ростїю но́ситсѧ: а҆лка́ти же твори́тъ и҆ жажда́ти, ѡ҆печалѧ́тисѧ, болѣ́зновати, и҆ напроти́въ ᲂу҆слажда́тисѧ. Ꙗ҆́кѡ ѿра́дами ᲂу҆́бѡ ᲂу҆слажда́емо, скорбьми́ же мꙋ́чимо: є҆́же и҆ страда́тельна ча́сть є҆ѧ̀ пра́веднѣ нарица́етсѧ, ꙗ҆́кѡ и҆стѧза́ема страстьмѝ. Є҆гда̀ ᲂу҆̀бо ме́ртвенное сїѐ поже́рто бꙋ́детъ сло́ва живото́мъ, лꙋ́чшемꙋ побѣди́вшꙋ: тогда̀ и҆ живо́тъ і҆и҃совъ ꙗ҆ви́тсѧ въ ме́ртвеннѣй пло́ти на́шей¹²⁸³, животво́рнꙋю ме́ртвость въ на́съ творѧ̀ безстра́стїѧ и҆ нетлѣ́нїе безсме́ртїѧ подаѧ̀, прише́ствїемъ дх҃а.

і҃. Ꙗ҆́коже содѣ́тель всегѡ̀ и҆ пре́жде не́же всѧ̑ ѿ не сꙋ́щихъ сотвори́ти, ра́зꙋмъ, є҆стєства̀, и҆ словеса̀ всѣ́хъ сꙋ́щихъ и҆мѣ́ѧше ꙗ҆́кѡ цр҃ь вѣкѡ́въ и҆ прови́дѣцъ въ себѣ̀: та́кѡ и҆ по ѡ҆́бразꙋ своемꙋ̀ созда́ннаго въ царѧ̀ тва́ри человѣ́ка, всѣ́хъ и҆мѣ́ти сотворѝ сꙋ́щихъ словеса̀, є҆стєства̀, и҆ ра́зꙋмъ въ себѣ̀. Тѣ́мже и҆ сꙋхо́е ᲂу҆́бѡ и҆ хла́дное вла́ги ѿ землѝ и҆́мать по созда́нїю своемꙋ̀: те́плое же кро́ве и҆ вла́жное ѿ воздꙋ́ха и҆ ѿ ѻ҆гнѧ̀: вла́жное же фле́гмы и҆ хла́дное ѿ воды̀, и҆ ѿ садѡ́въ ᲂу҆́бѡ расти́тельное: ѿ животносадо́вныхъ же, пита́тельное: ѿ безслове́сныхъ же живо́тныхъ, страда́тельное: ѿ а҆́гг҃лѡвъ, ᲂу҆́мное же и҆ слове́сное: ѿ бг҃а же дыха́нїе: са́мꙋ тꙋ̀ невеще́ственнꙋю, безтѣле́снꙋю и҆ безсме́ртнꙋю дꙋ́шꙋ во ᲂу҆мѣ̀ и҆ сло́вѣ зри́мꙋю, и҆ си́лою дх҃а ст҃а въ сꙋществѣ̀ и҆ жи́зни.

а҃і. По подо́бїю є҆смы̀ бг҃а, созда́вшагѡ ны̀ по ѡ҆́бразꙋ своемꙋ̀ и҆ по подо́бїю, добродѣ́телїю и҆ ра́зꙋмомъ: покры́ бо небеса̀ добродѣ́тель є҆гѡ̀, и҆ хвале́нїѧ є҆гѡ̀ и҆спо́лнь землѧ̀¹²⁸⁴. Добродѣ́тель же бж҃їѧ є҆́сть, пра́вда, и҆ преподо́бїе, и҆ и҆́стина, ꙗ҆́коже глаго́летъ даві́дъ: си́ленъ є҆сѝ гдⷭ҇и, и҆ и҆́стина твоѧ̀ ѻ҆́крестъ тебѐ¹²⁸⁵. И҆ па́ки: Пра́веденъ и҆ преподо́бенъ гдⷭ҇ь. Пра́востїю и҆ бла́гостїю: бла́гъ бо и҆ пра́въ гдⷭ҇ь, сло́вомъ премꙋ́дрости и҆ сло́вомъ вѣ́дѣнїѧ: въ то́мъ бо сꙋ́ть сїѧ̑, и҆ премꙋ́дрость и҆ сло́во нарица́етсѧ. Свѧты́нею и҆ соверше́нствомъ, ꙗ҆́коже са́мъ глаго́летъ: Бꙋ́дите соверше́ни, ꙗ҆́коже ѻ҆ц҃ъ ва́шъ небе́сный соверше́нъ є҆́сть¹²⁸⁶. Бꙋ́дите свѧ́ти, ꙗ҆́коже а҆́зъ ст҃ъ є҆́смь. Смире́нїемъ и҆ кро́тостїю: Наꙋчи́тесѧ ѿ менѐ, глаго́летъ, ꙗ҆́кѡ кро́токъ є҆́смь и҆ смире́нъ се́рдцемъ: и҆ ѡ҆брѧ́щете поко́й дꙋша́мъ ва́шымъ¹²⁸⁷.

в҃і. Ѡ҆́бразъ бж҃їй ᲂу҆́мъ на́шъ сво́йственное въ себѣ̀ и҆́мать, є҆гда̀ во свои́хъ пребыва́етъ и҆ не дале́че досто́инства своегѡ̀ дви́житсѧ, въ бз҃ѣ пребыва́ти и҆ томꙋ̀ соединѧ́тисѧ и҆́щетъ, ѿ негѡ́же нача́ло и҆́мать, и҆́мже и҆ дви́житсѧ, къ немꙋ́же и҆ востека́етъ є҆сте́ственными сво́йствы, и҆ того̀ подража́ти жела́етъ человѣколю́бїемъ, кро́тостїю и҆ простото́ю. Тѣ́мже и҆ са́мъ сло́во ражда́ѧ, ꙗ҆́кѡ и҆́на небеса̀ дꙋшѝ па́ки созида́етъ є҆диноплеме́нныхъ человѣ̑къ, и҆ крѣ́пки ты̑ѧ терпѣ́нїемъ дѣ́ѧтельныхъ соверша́етъ добродѣ́телей, и҆ животвори́тъ сїѧ̑ дх҃омъ ᲂу҆́стъ свои́хъ, си́лꙋ на гꙋби̑тельныѧ стра̑сти подаѧ̀ въ нѧ̀. И҆ та́кѡ ви́димь є҆́сть содѣ́тель и҆ то́й мы́сленныѧ тва́ри, и҆ вели́кагѡ мі́ра, своего̀ подража́ѧ влѣ́потꙋ бг҃а, и҆ слы́шитъ ꙗ҆́снѣ свы́ше: и҆зводѧ́й досто́йна ѿ недосто́йныхъ, ꙗ҆́кѡ ᲂу҆ста̀ моѧ̑ бꙋ́детъ.

г҃і. И҆́же въ тѣ́хъ ꙗ҆̀же по є҆стествꙋ̀ движе́нїихъ ᲂу҆ма̀ и҆ досто́инствѣ пребыва́ѧй сло́ва, чи́стъ ѿ вещества̀ соблюда́етсѧ, и҆ ᲂу҆краша́етсѧ кро́тостїю. смиренномꙋ́дрїемъ, любо́вїю и҆ милосе́рдїемъ, и҆ ѡ҆сїѧ́нїи ст҃а́гѡ просвѣща́етсѧ дх҃а. На высѡ́ка же видѣ̑нїѧ взира́ѧ, въ ра́зꙋмѣ быва́етъ сокрове́нныхъ бж҃їихъ та́инствъ. И҆ сло́вомъ премꙋ́дрости, могꙋ́щимъ слы́шати сїѧ̑, благолюби́вѡ слꙋ́житъ: не себѣ̀ то́чїю многоꙋмножа́ѧ тала́нтъ, но и҆ бли̑жнимъ сегѡ̀ преподаѧ̀ наслажде́нїе.

д҃і. И҆́же є҆ди́но па́че дво́ицы превозвы́сивый, и҆ ѿ сеѧ̀ свобо́дно содѣ́лавый сегѡ̀ благоро́дїе, невеще́ственно ѡ҆брѣ́те междꙋ̀ невеще́ственными дꙋ́хи жи́тельство, дꙋ́хъ и҆ са́мъ мы́сленъ бы́въ, а҆́ще и҆ посредѣ̀ ви́димь є҆́сть и҆нѣ́хъ человѣ̑къ соѡбраща́ѧсѧ тѣ́ломъ.

є҃і. И҆́же є҆ди́наго досто́инствꙋ и҆ є҆стествꙋ̀ дво́ицы покори́вый рабо́тꙋ, всю̀ тва́рь бг҃ови покорѝ, во є҆ди́но разстоѧ̑щаѧсѧ совокꙋпи́въ, и҆ ᲂу҆миротвори́въ всѧ́чєскаѧ.

ѕ҃і. До́ндеже проти́въ себѐ є҆стество̀ сꙋ́щихъ въ на́съ си́лъ безчи́нствꙋетъ, и҆ во мнѡ́га и҆на́чєвства расточа́етсѧ: неприча́стни є҆смы̀ и҆ преесте́ственныхъ дарѡ́въ бж҃їихъ. Си́хъ же сꙋ́ще неприча́стни, дале́че нѣ́гдѣ, и҆ та́инственнагѡ сщ҃еннодѣ́йства нбⷭ҇нагѡ же́ртвенника въ мы́сленномъ ᲂу҆ма̀ дѣ́ланїи соверша́емагѡ, стои́мъ. Повнегда́ же мно́гимъ тща́нїемъ сщ҃е́нныхъ пѡ́двигъ ѿ привеще́ственныѧ ѕло́бы ѡ҆чи́стимсѧ, и҆ во є҆ди́но и҆на́чєвства на̑ша си́лою дꙋ́ха присобере́мъ: тогда̀ и҆ неизрече́нныхъ бла̑гъ бж҃їихъ въ прича́стїи быва́емъ, и҆ бж҃е́ствєннаѧ та̑инства, та́инственнагѡ сщ҃еннодѣ́йства ᲂу҆ма̀ на пренебе́сный и҆ мы́сленный бж҃їй же́ртвенникъ досто́йнѡ сло́вꙋ и҆ бг҃ꙋ возно́симъ: ꙗ҆́кѡ зри́тели и҆ свѧще́нницы безсме́ртныхъ та̑инъ є҆гѡ̀.

з҃і. Пло́ть похотствꙋ́етъ на дꙋ́ха, и҆ дꙋ́хъ на пло́ть¹²⁸⁸. Ра́ть нѣ́каѧ є҆́сть во ѻ҆бои́хъ непримири́тельна: ка́кѡ є҆ди́но на дрꙋго́е побѣди́тєльнаѧ и҆мѣ́ти бꙋ́детъ, и҆ под̾ свою̀ держа́вꙋ приведе́тъ. Сїѐ и҆на́чевство въ на́съ глаго́летсѧ и҆ крамола̀, и҆ преклоне́нїе, и҆ мѣ́рило, и҆ ѻ҆бою́дна бра́нь, и҆́мже дꙋша̀ раздѣлѧ́етсѧ, гдѣ́либо преклоне́нїе ᲂу҆́мъ да́стъ въ ве́щь и҆ стра́сть человѣ́ческꙋ.

и҃і. До́ндеже нестоѧ́тельными пѡ́мыслы раздѣлѧ́емсѧ, и҆ зако́нъ пло́ти въ на́съ держи́тсѧ и҆ блюде́тсѧ: во мнѡ́гїѧ же ча̑сти расточа́емсѧ, и҆ ѿ бж҃е́ственныѧ є҆ди́ницы и҆зме́щеми є҆смы̀, ꙗ҆́кѡ не ѡ҆богатѣ́вше сеѧ̀ є҆ди́нствомъ. Внегда́ же ме́ртвенное сїѐ поже́рто бꙋ́детъ є҆динотво́рною си́лою и҆ преесте́ственнымъ безпопече́нїемъ, и҆ ᲂу҆́мъ самагѡ̀ себѐ бꙋ́детъ, премꙋдротво́рными ѡ҆сїѧ́нїи и҆ разꙋмѣ́нїи ѡ҆заре́нъ бы́въ: сплета́ема въ є҆ди́ницꙋ бг҃ови́днѣ дꙋша̀, є҆ди́но вмѣ́стѡ мно́гихъ и҆на́чевствъ быва́етъ, и҆ бж҃е́ственнѣй совокꙋ́пльшисѧ є҆ди́ницѣ, простото́ю бг҃оподража́тельнѣ соединѧ́етсѧ. И҆ сѐ є҆́сть є҆́же во дре́внее дꙋшѝ па́ки ᲂу҆строе́нїе, и҆ є҆́же на лꙋ́чшее на́ше ѡ҆бновле́нїе.

ѳ҃і. Лю́то є҆́сть невѣ́жество, и҆ па́че лю́тыхъ, са́мою ве́щїю тьма̀ сꙋ́щи ѡ҆сѧза́ема, и҆ дꙋ́шы, въ ни́хже ни бꙋ́детъ, мра̑чны сотворѧ́ющо, и҆ на мнѡ́га по́мысленное раздѣлѧ́ющо, и҆ ѿ є҆́же съ бг҃омъ соедине́нїѧ дꙋ́шꙋ ѿсѣца́ющо. Сегѡ̀ всѐ собира́емое, безслове́сїе є҆́сть: безслове́сна бо и҆ нечꙋ́вственна всего̀ содѣ́ловаетъ человѣ́ка. И҆ и҆́мже ѡ҆́бразомъ невѣ́жество въ дебе́лость возлїѧ́вшисѧ мно́гꙋ, глꙋбина̀ а҆́дова быва́етъ си́мъ покрыва́емой дꙋшѝ, въ не́йже всѧ́ко томле́нїе и҆ болѣ́знь, печа́ль и҆ воздыха́нїе є҆́сть: та́кѡ и҆ бж҃е́ственный ра́зꙋмъ свѣ́телъ нѣ́какѡ и҆ безмѣ́ренъ въ свѣтолїѧ́нїе сы́й, свѣтови́дны дꙋ́шы, въ ни́хже чрез̾ чистотꙋ̀ ни бꙋ́детъ, бг҃олѣ́пнѡ содѣ́ловаетъ, и҆ и҆сполнѧ́етъ сїѧ̑ ми́ра, тишины̀, ра́дости, премꙋ́дрости неизрече́нныѧ, и҆ соверше́нныѧ любвѐ.

к҃. Прише́ствїе бж҃е́ственнагѡ свѣ́та про́сто и҆ є҆ди́нственно сꙋ́щи, къ себѣ̀ собира́етъ прича̑стницы своѧ̑ дꙋ́шы, и҆ къ себѣ̀ ѡ҆браща́етъ, и҆ соединѧ́етъ ѧ҆̀ своемꙋ̀ є҆ди́нствꙋ, и҆ соверша́етъ свои́мъ соверше́нствомъ, и҆ къ глꙋбина́мъ бж҃їимъ возво́дитъ зри́тельное ᲂу҆ма̀ и҆́хъ, и҆ та̑инъ вели́кихъ зри́тєльницы и҆ таи̑нницы и҆ тайноводи́тєльницы ты̑ѧ содѣ́ловаетъ. Ѡ҆чи́ститисѧ ᲂу҆̀бо восхощѝ трꙋды̑ вконе́цъ, и҆ ᲂу҆́зриши глаго́лемыхъ въ тебѣ̀ ꙗ҆́вственнѡ любе́зное бг҃ꙋ дѣ́йство.

к҃а. Приходѧ̑щаѧ ра́зꙋмомъ ко ѡ҆чищє́ннымъ дꙋша́мъ ѡ҆сїѧ̑нїѧ пе́рвагѡ свѣ́та, не то́чїю ты̑ѧ бла̑ги сотворѧ́ютъ и҆ свѣтови̑дны содѣ́ловаютъ: но и҆ возво́дѧтъ є҆сте́ственнымъ видѣ́нїемъ на мы́слєннаѧ небеса̀. И҆ ни си́це си̑мъ ꙗ҆̀же бж҃е́ственнагѡ сто́ѧтъ дѣ́йства: но да́же дото́лѣ та́мѡ соверша́ютсѧ, до́ндеже съ є҆ди́нѣмъ премꙋ́дростїю и҆ ра́зꙋмомъ неизрече́нныхъ соединѧ́тсѧ, є҆ди́но вмѣ́стѡ мно́гихъ въ не́мъ бꙋ́дꙋтъ

к҃в. Пе́рвѣе ᲂу҆́бѡ непримѣ̑снымъ и҆ немꙋ̑тнымъ на́мъ подоба́етъ бы́ти ѡ҆чисти́тельнымъ чи́номъ ѿ привеще́ственныѧ ѕло́бы мы́сленныхъ. Та́же просвѣщє́ннымъ и҆ присносїѧ́тєльнымъ, и҆ны́мъ чи́номъ просвѣти̑тельнымъ ᲂу҆́мными ѻ҆чесы̑, и҆́же та́инственною соверша́етсѧ и҆ въ бз҃ѣ сокрове́нною премꙋ́дростїю. И҆ та́кѡ востещѝ во свѧще́нныхъ ра́зꙋмѡвъ вѣ́дѣнїе нѡ́ваѧ и҆ вє́тхаѧ сло́вомъ и҆мꙋ́щымъ ᲂу҆́ши слꙋжа́щее, и҆ препода́тєльнымъ бы́ти сокрове́нныхъ тогѡ̀ та́инственныхъ разꙋмѣ́нїй, въ несквє́рныѧ та̑ ꙗ҆́вѣ ꙗ҆́кѡ преводѧ́щимъ слꙋ́хи, и҆ ѿ несоверше́ннѣйшихъ сокрыва́ющимъ, да не ст҃а̑ѧ даю́тсѧ псѡ́мъ, нижѐ би́серъ сло́ва поме́щетсѧ во сви́нствєнныѧ дꙋ́шы непотре́бенъ творѧ́щыѧ є҆го̀.

к҃г. Є҆гда̀ кто̀ горѧ́честь дꙋшѝ своеѧ̀ въ зало́гственной вѣ́рѣ зри́тъ разширѧ́емꙋ, и҆ бж҃їю любо́вь: тогда̀ хрⷭ҇та̀ носи́ти да вѣ́сть въ себѣ̀, є҆́же ѿ землѝ и҆ ви́димыхъ дѣ́йствꙋюща возвыше́нїе дꙋшѝ є҆гѡ̀, и҆ на небесѣ́хъ жили́ще ᲂу҆готовлѧ́юща є҆́й. Є҆гда́ же ра́дости и҆сполнѧ́тисѧ се́рдце своѐ ᲂу҆смотрѣва́етъ, и҆ въ жела́нїи бы́ти неизрече́нныхъ бж҃їихъ бла̑гъ со ᲂу҆миле́нїемъ: тогда̀ вѣ́дый да бꙋ́детъ ѿ бж҃е́ственна дѣ́йствꙋема себѐ дꙋ́ха. Є҆гда́ же свѣ́та неизрече́нна и҆сполнѧ́емь ѡ҆щꙋти́тъ сво́й ᲂу҆́мъ, и҆ разꙋмѣ́нїй премꙋ́дрости лꙋ́чшїѧ: тогда̀ да вѣ́сть прише́ствїю бы́ти и҆ быва́ти ᲂу҆тѣ́шителѧ въ дꙋшѝ свое́й, въ ꙗ҆вле́нїе сокрове́нныхъ въ не́мъ сокро́вищъ ца́рствїѧ небе́снагѡ. И҆ ꙗ҆́коже пала́тꙋ бж҃їю и҆ жили́ще дх҃а, и҆звѣ́стнѡ себѐ да храни́тъ.

к҃д. Хране́нїе сокрове́нныхъ дꙋ́ха сокро́вищъ, ᲂу҆праздне́нїе ѿ человѣ́ческихъ веще́й є҆́сть: є҆́же вои́стиннꙋ и҆ безмо́лвїе сло́во нарица́етъ. Сїе́ же раче́нїе любвѐ бж҃їѧ ѿ чистоты̀ се́рдца и҆ сла́дости ᲂу҆миле́нїѧ ѕѣ́льнѣе возжига́ющи, разрѣша́етъ дꙋ́шꙋ ѿ ᲂу҆́зъ чꙋ́вствъ, и҆ свобо́дꙋ нра́вѡвъ покарѧ́етъ лобыза́ти. Си́лы же тоѧ̀ прело́жши, ко є҆́же по є҆стествꙋ̀ воззыва́етъ, и҆ дре́внее тѣ́мъ па́ки ᲂу҆строе́нїе дае́тъ, во є҆́же не бы́ти ѕло́бы ко́емꙋ порече́нїю на содѣ́телѧ до́брыхъ ѿ є҆́же на го́ршее ѡ҆́браза превраще́нїѧ и҆ движе́нїѧ.

к҃є. Во свѧще́нное сїѐ и҆ бж҃е́ственное соверше́нство, благосло́вное возво́дитъ и҆ хꙋдо́жное свѣ́тлѣ безмо́лвїе, ѡ҆бꙋча́емо си́рѣчь и҆ проходи́мо зако́ннѣ. А҆́ще же не въ толи́цѣ возвыше́нїе и҆́мать и҆ соверше́нство мнѧ́йсѧ безмо́лвствовати: ᲂу҆̀бо мы́сленнымъ є҆щѐ и҆ соверше́ннымъ не безмо́лвствова безмо́лвїемъ, но нижѐ безмо́лвствꙋетъ ѿ внꙋ́треннїѧ бꙋ́ри неꙋдержи́мыхъ страсте́й, до́ндеже на сїю̀ востече́тъ высотꙋ̀, но то́чїю тѣ́ло стѣна́ми ѡ҆предѣлѧ́емо и҆лѝ про́пастьми и҆ верте́пы и҆мѣ́ти бꙋ́детъ, ᲂу҆мо́мъ безчи́ннымъ и҆ скита́ющимсѧ и҆знꙋрѧ́емо.

к҃ѕ. Дꙋ́шы на ве́рхъ чистоты̀ дости́гшыѧ, и҆ на высотꙋ̀ восте́кшыѧ ве́лїю премꙋ́дрости и҆ ра́зꙋма херꙋві́мѡмъ подо́бны сꙋ́ть, несре́дственнѣ нѣ́какѡ вѣ́дѣнїемъ свои́мъ ко и҆сто́чникꙋ приближа́ющесѧ до́брыхъ. И҆ ѿѻнꙋ́дꙋ пра́вагѡ видѣ́нїѧ и҆з̾ѧвле́нїе чи́стѣ внꙋ́трь прїе́млюще, а҆́ще и҆ є҆ди́ны херꙋві́мѡвъ си̑лы несре́дственнѣ ѿ бг҃онача́лїѧ са́магѡ ѡ҆сїѧва́ютсѧ мно́гѡ, ꙗ҆́коже речѐ нѣ́кто ѿ бж҃е́ственныхъ зри́тєль, по превысоча́йшꙋ возпросте́ртїю.

к҃з. Ꙗ҆́коже пє́рвыѧ гѡ́рнїѧ си̑лы, ѻ҆́вы ᲂу҆́бѡ ѿ ни́хъ теплѣ́йши сꙋ́ть и҆ быстрѣ́йши ѡ҆ бж҃е́ственныхъ, и҆ непреста́ннꙋ ѡ҆ си́хъ приснодви́жность и҆мꙋ́ще: ѻ҆́вы же бг҃ови́днѣйши, разꙋ́мны и҆ премꙋ́дрѣйши. И҆ сїѧ̀ ве́щь бж҃е́ственное навыкнове́нїе є҆́сть, є҆́же тѣ́мъ ѡ҆ си́хъ двиза́тисѧ при́снѡ. Та́кѡ и҆ сицевы̑ѧ дꙋ́шы теплѣ́йши сꙋ́ть ѡ҆ бж҃е́ственныхъ, и҆ ѕѣлѡ̀ быстрѣ́йши, премꙋ́дры же и҆ разꙋ́мны, та́инственными видѣ́нїи возпросте́ртѣйши. И҆̀мже сво́йственно є҆́сть по си́лѣ и҆ бж҃е́ственнꙋ навыкнове́нїю, ꙗ҆̀же къ бг҃ꙋ приснодви́жность и҆ неꙋкло́нно водрꙋже́нїе и҆ пребыва́нїе. И҆ къ си̑мъ, преима́тельное ѡ҆сїѧ́нїй навыкнове́нїе, съ ни́мже сꙋ́щагѡ прича̑стницы быва́ютъ, и҆ препосыла́ютъ ко и҆нѣ́мъ и҆з̾ѻби́льнѡ сло́вомъ свѣтолїѧ́нїѧ сегѡ̀ и҆ благода́ти.

к҃и. Оу҆́мъ є҆́сть бг҃ъ, и҆ вина̀ приснодви́жности всегѡ̀. И҆ всѝ ᲂу҆́мове въ са́момъ то́мъ пе́рвомъ ᲂу҆мѣ̀ и҆ стоѧ́нїе и҆́мꙋтъ пребыва́тельно, и҆ движе́нїе непреста́нно. Сїе́ же стра́ждꙋтъ, є҆ли́цы не привеще́ственно нѣ́кое движе́нїе и҆ примѣ́сно, но немꙋ́тно свѧще́нными и҆́мꙋтъ по́двиги, стра́ждꙋтъ же сїѐ по раче́нїю бж҃е́ственнꙋ прїѻбща́юще дрꙋ́гъ дрꙋ́гꙋ и҆ са́ми себѣ̀ ѿ бг҃онача́лїѧ и҆спꙋща́ємаѧ благода́тельнѣ ѡ҆сїѧ̑нїѧ, и҆ сокрове́ннꙋю въ си́хъ премꙋ́дрость та́инъ бж҃їихъ, и҆ и҆нѣ̑мъ благолюби́вѡ преподаю́ще во хвале́нїе непреста́нно любвѐ бж҃їѧ.

к҃ѳ. Стоѧ́тъ и҆ дви́жꙋтсѧ ѻ҆́крестъ въ бз҃ѣ дꙋ́шы, є҆ли́ки помы́сленное легко̀ ѿ вещества̀ содѣ́лаша, и҆ ра́тꙋющꙋюсѧ съ тобо́ю по всемꙋ̀ дво́ицꙋ, колесни́цꙋ си́мъ благоꙋправлѧ́емꙋ текꙋ́щꙋ на небеса̀ соста́виша. И҆ ѻ҆́крестъ ᲂу҆́бѡ непреста́ннѡ дви́жꙋтсѧ въ бз҃ѣ ꙗ҆́коже при ѻ҆стнѣ̀, и҆ движе́нїѧ крꙋ́га вино́внѣмъ: стоѧ́тъ же пребыва́тельнѣ и҆ неꙋкло́ннѣ ꙗ҆́кѡ въ крꙋ́зѣ, расточи́тисѧ не могꙋ́ще ѿ своегѡ̀ въ то́мжде мѣ́стѣ содержа́нїѧ къ чꙋ́вствꙋ и҆ до́льнѣй пре́лести человѣ́ческихъ веще́й. Се́й ᲂу҆́бѡ є҆́сть соверше́нный коне́цъ безмо́лвїѧ, въ сїѐ ведꙋ́щъ безмо́лвствꙋющихъ вои́стиннꙋ: ꙗ҆́коже дви̑жимымъ стоѧ́ти, и҆ пребыва́тельнѣ стоѧ́щымъ двиза́тисѧ ѡ҆ бж҃е́ственныхъ. И҆ до́ндеже ᲂу҆́бѡ сїѐ не бꙋ́детъ, мни́мымъ на́шимъ безмо́лвїемъ, не возмо́жно є҆́сть внѣ̀ вещества̀ и҆ пре́лести бы́ти на́шемꙋ ᲂу҆мꙋ̀.

л҃. Внегда̀ ко дре́внѣй добро́тѣ сло́ва всѧ́кимъ прилѣжа́нїемъ же и҆ тща́нїемъ прїи́демъ, и҆ свы́ше дае́мыѧ на́мъ премꙋ́дрости и҆ ра́зꙋма прише́ствїемъ дꙋ́ха благꙋ́ю ча́сть полꙋ́чимъ: тогда̀ пе́рвый и҆сто́чникъ и҆ вина̀ всѣ́хъ произведе́нїѧ премꙋ́дра и҆ добра̀ на́ми могꙋ́щымъ зрѣ́ти є҆сте́ственнѣ познава́етсѧ: ничто́же порица́тельно на себѐ въ на́съ носѧ́щи ѿ прише́дшїѧ ѕло́бы созда́нїю, превраще́нїемъ на гѡ́ршаѧ. Внегда̀ ѻ҆́во ᲂу҆́бѡ и҆ ѿто́ргшисѧ превознесе́сѧ, и҆ ѿ дре́внїѧ добро́ты и҆сте́кши, ѿпадѐ ѡ҆боже́нїѧ: ѻ҆́во же на сїѐ наше́дши, безслове́сный тогѡ̀ зра́къ внꙋ́трь сотворѝ.

л҃а. Є҆ди́нъ и҆ пе́рвый сте́пень простира́ющихсѧ въ предспѣ̑ѧнїѧ є҆́сть ра́зꙋмъ сꙋ́щихъ ѿ дѣ́ѧтельнагѡ прибыва́ѧй тѣ́мъ любомꙋ́дрїѧ. Вторы́й сокрове́нныхъ та́инъ бж҃їихъ позна́нїе ѿ є҆сте́ственнагѡ видѣ́нїѧ тайноꙋчи́мо и҆̀мъ. И҆ тре́тїй съ пе́рвымъ свѣ́томъ совокꙋпле́нїе и҆ растворе́нїе, въ не́мже всѧ́кагѡ предспѣ́ѧнїѧ любомꙋ́дрена и҆ видѣ́нїѧ поко́й.

л҃в. Всѝ ᲂу҆́мове са́ми же въ себѣ̀ и҆ къ себѣ̀ и҆ къ вои́стиннꙋ сꙋ́щемꙋ тре́ми є҆динови́днѣ носи́ми собира́ютсѧ, и҆ бли́жнихъ просвѣща́юще тайнонаꙋча́ютъ бж҃е́ствєннымъ, и҆ соверша́ютъ ꙗ҆́кѡ ѡ҆чище́нни дꙋ́си небе́сною премꙋ́дростїю, тѣ́хъ съ собо́ю и҆ съ є҆ди́ницею є҆динотворѧ́ще.

л҃г. Ѡ҆боже́нїе є҆́сть въ житїѝ, ᲂу҆́мное и҆ бж҃е́ственное вои́стиннꙋ свѧщеннодѣ́йство, въ не́мже свѧщеннодѣ́йствꙋетсѧ сло́во неизрече́нныѧ премꙋ́дрости, и҆ ᲂу҆гото́вльшымъ себѐ, є҆ли́кѡ мо́щно, преподае́тсѧ. Сїѐ благолѣ́пнѡ бг҃ъ слове́сномꙋ є҆стествꙋ̀ свы́ше дарова̀ во є҆ди́нство вѣ́ры. Да ѻ҆́ви ᲂу҆́бѡ, є҆ли́цы за чистотꙋ̀ досто́инства тогѡ̀ ра́зꙋмомъ бж҃е́ственныхъ въ прича́стїи бы́ша, ᲂу҆подоблѧ́ютсѧ бг҃ꙋ, соѡбра́зни ѡ҆́бразꙋ сн҃а є҆гѡ̀ бы́вше, высо́кими и҆ ᲂу҆́мными свои́ми ѡ҆ бж҃е́ственныхъ движе́нми. И҆ та́кѡ положе́нїемъ бо́зи бꙋ́дꙋтъ и҆нѣ̑мъ человѣ́кѡмъ на землѝ: ѻ҆́ви же ѡ҆чище́нїемъ чрез̾ бж҃е́ственное и҆́хъ сло́во и҆ свѧще́нное сочета́нїе соверша́ютсѧ къ добродѣ́тели, и҆ по мѣ́рѣ своегѡ̀ предспѣ́ѧнїѧ и҆ ѡ҆чище́нїѧ въ прича́стїи ѡ҆боже́нїѧ си́хъ быва́ютъ, и҆ прїѡбща́ютсѧ съ ни́ми въ бз҃ѣ соедине́нїѧ: ꙗ҆́кѡ да всѝ во є҆ди́но соединѧ́еми же и҆ соѡб̾е́млеми є҆ди́нствомъ любвѐ съ є҆ди́нѣмъ бг҃омъ соединѧ́тсѧ непреста́ннѡ: и҆ бꙋ́детъ бг҃ъ посредѣ̀ богѡ́въ благи́хъ дѣ́лъ вино́венъ, и҆́же є҆стество́мъ, сꙋ́щихъ положе́нїемъ, ничто́же порица́тельно на себѐ носѧ̀ ѿ созда́нїѧ.

л҃д. Є҆́же къ бг҃ꙋ ᲂу҆подобле́нїе, є҆ли́кѡ на́мъ мо́щно дости́гнꙋти, не возмо́жно є҆́сть полꙋчи́ти тщали́вомꙋ, а҆́ще не пе́рвѣе надлежа́щагѡ ѕлы́хъ тимѣ́нїѧ слеза́ми те́плыми без̾ѡбра́зїе ѿло́житъ, и҆ свѧщеннодѣ́йствїѧ ко́снетсѧ свѧще́нныхъ хрⷭ҇то́выхъ за́повѣдей: и҆на́кѡ бо въ причаще́нїи неизрече́нныхъ бж҃їихъ бла̑гъ бы́ти семꙋ̀ не возмо́жно. Жела́ѧй бо вкꙋси́ти бж҃е́ственныѧ ᲂу҆́мнѣ ᲂу҆́мныхъ сла́дости же и҆ сла́сти, всѧ́кагѡ ѿхо́дитъ мїрска́гѡ по всемꙋ̀ чꙋ́вства, и҆ жела́нїемъ ѿложе́нныхъ ст҃ы̑мъ бла̑гъ въ видѣ́нїи сꙋ́щихъ при́снѡ поꙋча́ющꙋсѧ и҆́мать свою̀ дꙋ́шꙋ.

л҃є. Є҆́же бг҃ови́дное ᲂу҆подобле́нїе неизмѣ́нное самѣ́мъ себѣ̀ соблюстѝ, ѿ кра́йнѣйшагѡ прибыва́ющее ѡ҆чище́нїѧ мно́гїѧ любвѐ бж҃їѧ, є҆ди́нагѡ є҆́сть къ бг҃ꙋ при́снагѡ горѣ̀ зрѣ́нїѧ, и҆ воспротѧже́нїѧ зри́тельнѣйшагѡ ᲂу҆ма̀. Є҆́же прибыва́ти ѡ҆бы́че дꙋшѝ ѿ пребыва́тельнагѡ добродѣ́телей безмо́лвїѧ, ѿ невеще́ственныѧ и҆ непари́тельныѧ и҆ всегда́шнїѧ моли́твы, ѿ ѡ҆бдержи́тельнагѡ воздержа́нїѧ и҆ ча́стагѡ писа́нїй чте́нїѧ.

л҃ѕ. Не є҆́же въ ми́ръ то́чїю прїитѝ сꙋ́щихъ въ на́съ си́лъ тща́тисѧ подоба́етъ: но є҆́же и҆ въ жела́нїе дости́гнꙋти ᲂу҆́мнагѡ поко́ѧ, и҆́же всѧ́кѡ вѣ́сть ѡ҆ благи́хъ жела́нїе тишино́ю ᲂу҆покоева́ти помыслѡ́въ, и҆ съ небесѐ сходѧ́щею бж҃е́ственною росо́ю ᲂу҆ѧ́звленное и҆сцѣлѧ́ти и҆ прохлажда́ти се́рдце, ѿ ѻ҆гнѧ̀ свы́ше вверга́емагѡ и҆ возгара́ющагѡсѧ ѿ дх҃а.

л҃з. Не мо́жетъ во глꙋбинꙋ̀ ᲂу҆ѧ́звленна бы́вши дꙋша̀ раче́нїемъ бж҃їимъ, по вкꙋ́сѣ мы́сленныхъ сла́дости є҆гѡ̀ дарѡ́въ, ѿню́дъ въ себѣ̀ стоѧ́ти, и҆лѝ пребыва́ти въ то́мжде, а҆ не въ прє́днѧѧ тѣ́хъ ꙗ҆̀же на небеса̀ восхожде́нїй возпростира́тисѧ. Є҆ли́кѡ бо восхождє́нїѧ своѧ̑ прохо́дитъ дꙋ́хомъ, и҆ во глꙋбины̑ прихо́дитъ бж҃їѧ: толи́кѡ воспалѧ́етсѧ ѻ҆гне́мъ жела́нїѧ, и҆ є҆щѐ глꙋбоча́йшихъ є҆гѡ̀ та̑инъ вели́чїе и҆спытꙋ́етъ, и҆ прибли́житисѧ блаже́нномꙋ свѣ́тꙋ поспѣша́етъ, и҆дѣ́же всѧ́кѡ ᲂу҆ма̀ и҆зстꙋпле́нїе стои́тъ, да свои́хъ тече́нїй преста́тїе въ весе́лїи ᲂу҆поко́итъ се́рдца.

л҃и. Внегда̀ бꙋ́детъ кто̀ въ причаще́нїи ст҃а́гѡ дх҃а, и҆ наи́тїе сегѡ̀ нѣ́кимъ неизрече́ннымъ въ себѣ̀ позна́етъ дѣ́йствомъ и҆ благоꙋха́нїемъ, ꙗ҆́коже протещѝ благоꙋха́нїю є҆гѡ̀ и҆ на пове́рхность тѣ́ла: тогда̀ пребыва́ти таковы́й въ предѣ́лѣхъ є҆стества̀ про́чее не те́рпитъ, но до́брымъ и҆змѣне́нїемъ десни́цы вы́шнѧгѡ и҆змѣни́всѧ, забыва́етъ пи́щꙋ, со́нъ, презира́етъ тѣлє́снаѧ, небреже́тъ ѡ҆ поко́и, и҆ ве́сь де́нь въ трꙋдѣ́хъ сы́й и҆ по́тѣхъ и҆́ноческихъ, трꙋда̀ ко́егѡ, и҆лѝ є҆сте́ственныѧ нꙋ́жды не ѡ҆щꙋща́етъ, а҆́лчбы, и҆лѝ жа́жды, и҆лѝ сна̀, и҆лѝ и҆ны́хъ є҆стества̀ нꙋ́ждъ: и҆злїѧ́сѧ бо неви́димѡ любы̀ бж҃їѧ съ ра́достїю неизрече́нною въ се́рдце є҆гѡ̀, и҆ всю̀ но́щь въ просвѣще́нїи ѻ҆гнѧ̀ претерпѣва́ѧ, ᲂу҆́мное въ тѣле́снѣмъ ѡ҆бꙋче́нїи дѣ́ланїе дѣ́лаетъ, и҆ безсме́ртнагѡ наслажда́етсѧ всепи́ршества, безсме́ртныхъ мы́сленнагѡ раѧ̀ садѡ́въ, во́ньже и҆ па́ѵелъ восхище́нъ бы́въ, слы́ша неизречє́нныѧ глаго́лы, и҆́хже не лѣ́ть є҆́сть человѣ́кꙋ ᲂу҆слы́шати, къ чꙋ́вствꙋ ви́димыхъ пристра́стїе и҆мꙋ́щꙋ.

л҃ѳ. Є҆ди́ною тѣ́ло разже́но ѻ҆гне́мъ подви́жничества, и҆ водо́ю ѡ҆роше́нно сле́зъ, не ктомꙋ̀ трꙋда́ми немощнѣ́йше быва́етъ ѿ мно́гихъ преста́вши по́тѡвъ, ꙗ҆́кѡ вы́шше дѣ́ѧтельнагѡ бы́вши си́рѣчь тща́нїѧ: но тишинꙋ̀ и҆ молча́нїе ми́ра прїе́мши внꙋ́трь ᲂу҆́дꙋ, и҆спо́лнь наипа́че и҆ны́ѧ си́лы быва́етъ, и҆на́гѡ благомо́щїѧ, и҆ны́ѧ крѣ́пости дꙋ́ха. Такѡвы́мъ же содѣ́йствꙋющымъ дꙋша̀ ѡ҆богатѣ́вши тѣ́ломъ, и҆ вы́шше тѣле́снагѡ ѡ҆бꙋче́нїѧ ѡ҆брѣ́тши сегѡ̀ ᲂу҆строе́нїе, въ мы́слєнныѧ по́двиги є҆сте́ствєннаѧ премѣнѧ́етъ движє́нїѧ, и҆ ᲂу҆́мное дѣ́ланїе бы́стрѣ дѣ́лающи, храни́тъ безсме́ртныхъ садѡ́въ себѣ̀ плоды̀ въ мы́сленномъ раѝ: ѿѻнꙋ́дꙋже и҆сто́чникъ бг҃олѣ́пныхъ разꙋмѣ́нїй, ꙗ҆́коже рѣка̀ и҆стека́етъ: въ не́мже и҆ са́дъ ра́зꙋма бж҃їѧ стои́тъ, приносѧ̀ премꙋ́дрости плоды̀, ра́дости, ми́ра, бла́гости, милосе́рдїѧ, долготерпѣ́нїѧ и҆ любвѐ неизрече́нныѧ. Та́кѡ же тщали́вѡ дѣ́лающи, и҆ та́кѡ хранѧ́щи, и҆схо́дитъ ѿ тѣлесѐ, и҆ въ мра́къ вхо́дитъ бг҃осло́вїѧ, и҆зстꙋпа́етъ всегѡ̀ ꙗ҆́кѡ ничи́мже держи́ма ви́димыхъ, и҆ бг҃ꙋ соедини́вшисѧ, трꙋдѡ́въ престае́тъ и҆ жела́нїѧ.

м҃. Что̀ ѿ сꙋ́щихъ въ на́съ є҆́сть вы́шше, сло́во глаго́летъ на́мъ тщали̑вымъ, ви́димое ли, и҆лѝ мы́сленное. А҆́ще ᲂу҆́бѡ ви́димое: то̀ ничто́же ᲂу҆́бѡ па́че тли́мыхъ бꙋ́детъ на́мъ предпочита́тельно и҆лѝ и҆ люби́мо, нижѐ лꙋ́чша па́че тѣ́ла дꙋша̀. А҆́ще же мы́сленное: то̀ дх҃ъ є҆́сть бг҃ъ, и҆ и҆́же кла́нѧетсѧ є҆мꙋ̀, дх҃омъ и҆ и҆́стиною досто́итъ кла́нѧтисѧ¹²⁸⁹. И҆ та́кѡ, и҆зли́шне є҆́сть тѣле́сное ѡ҆бꙋче́нїе, внегда̀ здра́вствꙋетъ ᲂу҆́мное дꙋшѝ дѣ́ланїе, тѧготѣ́ющее до́лꙋ ѡ҆блегчава́ющо, и҆ всѐ є҆гѡ̀ содѣ́ловающо дꙋхо́вно соедине́нїемъ лꙋ́чшагѡ.

м҃а. Трѝ сꙋ́ть чи́ни междꙋ̀ творѧ́щими предспѣ̑ѧнїѧ совершенотво́рныхъ восхожде́нїй: чисти́теленъ, просвѣти́теленъ, та́инственъ, и҆́же є҆́сть и҆ совершенотво́ренъ. И҆ ѻ҆́въ ᲂу҆́бѡ є҆́сть вводи́мыхъ, ѻ҆́въ же сре́днихъ, ѻ҆́въ же соверше́нныхъ. Тре́ми бо си́ми по чи́нꙋ восходѧ̀ тщали́вый, расте́тъ и҆́же ко хрⷭ҇тꙋ̀ во́зрастомъ, и҆ прихо́дитъ въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва.

м҃в. Чисти́тельный, къ подвигѡ́мъ ᲂу҆жѐ свѧщє́ннымъ вводи́мыхъ є҆́сть. И҆ сво́йственно ᲂу҆̀бо є҆́сть тѣ̑мъ, ѿложе́нїе зра́ка пе́рстнагѡ человѣ́ка, и҆збавле́нїе всѧ́кїѧ привеще́ственныѧ ѕло́бы, и҆ ѡ҆дѣѧ́нїе но́вагѡ человѣ́ка дх҃омъ ѡ҆бновлѧ́емагѡ ст҃ы́мъ. Дѣ́ло же, не́нависть вещества̀, и҆ста́ѧнїе пло́ти, и҆ ᲂу҆клоне́нїе ѿ всѧ́кїѧ вины̀ поѡщрѧ́ющїѧ къ стра́сти, по́мысленное раска́ѧнїѧ ѡ҆ содѣ́ѧнныхъ: къ семꙋ́ же, є҆́же слеза́ми потопи́ти сла́ность грѣха̀, є҆́же нра́вы бла́гостїю ᲂу҆стро́ити дꙋ́ха, и҆ внꙋ́треннее стклѧ́ницы, си́рѣчь ᲂу҆́мъ, ᲂу҆миле́нїемъ ѡ҆чи́стити ѿ всѧ́кїѧ скве́рны, пло́ти же и҆ дꙋ́ха: и҆ та́кѡ вїно̀ сло́ва влїѧ́ти во́нь веселѧ́щагѡ се́рдце человѣ́ка ѡ҆чища́ема, и҆ принестѝ цр҃е́ви дх҃ѡ́въ на вкꙋше́нїе. Коне́цъ же, є҆́же разжещи́сѧ дѣ́ѧтельнѣ ѻ҆гне́мъ по́стничества, и҆ трꙋда́ми по́двигѡвъ всѧ́кїй ꙗ҆́дъ ѿри́нꙋти грѣха̀: и҆ ᲂу҆крѣпи́тисѧ до́брѣ, и҆ напои́тисѧ водо́ю ᲂу҆миле́нїѧ, и҆ ме́чь соверши́тисѧ посѣца́ющъ стра̑сти и҆ бѣ́сы, є҆ли́кѡ по си́лѣ. И҆́же въ сїѐ дости́гїй мно́гими по́двиги по́стничества, ᲂу҆гасѝ си́лꙋ є҆сте́ственнагѡ ѻ҆гнѧ̀: заградѝ ᲂу҆ста̀ львѡ́въ, свирѣ́пыхъ страсте́й: возмо́же дх҃омъ ѿ не́мощи, бы́сть крѣ́покъ, и҆ ꙗ҆́коже и҆́нъ нѣ́кїй а҆ѵсїтїді́тѧнинъ ѡ҆долѣ́нїѧ терпѣ́нїе поста́ви, побѣди́въ и҆скꙋша́ющаго.

м҃г. Просвѣти́тельный, свѧще́нными по́двиги пред̾ꙋспѣ́вшихъ є҆́сть въ пе́рвое безстра́стїе. И҆ сво́йственно ᲂу҆́бѡ є҆́сть тѣ̑мъ ра́зꙋмъ сꙋ́щихъ, видѣ́нїе слове́съ тва́ри, и҆ прича́стїе ст҃а́гѡ дх҃а: дѣ́ло же, ѡ҆чище́нїе ᲂу҆ма̀ ѻ҆гне́мъ быва́ющее бж҃е́ственнымъ, ᲂу҆́мное ѻ҆́чїю се́рдца ѿкрове́нїе, и҆ сло́ва рожде́нїе съ высо́кими помышле́нїи ра́зꙋма. Коне́цъ же, ᲂу҆ѧснѧ́ющее сло́во премꙋ́дрости є҆стества̀ сꙋ́щихъ: позна́нїе бж҃е́ственныхъ и҆ человѣ́ческихъ веще́й, и҆ ѿкрове́нїе та̑инъ ца́рствїѧ небе́снагѡ. И҆́же въ сїѐ дости́гїй ᲂу҆́мнымъ ᲂу҆ма̀ дѣ́ланїемъ, на колесни́цѣ ѻ҆́гненнѣй носи́мь є҆́сть четвери́цею добродѣ́телей, ꙗ҆́коже а҆́ще кто̀ и҆́нъ ѳесві́тѧнинъ. И҆ є҆щѐ жи́въ сы́й, на воздꙋ́хъ мы́сленный взе́млетсѧ, и҆ ѡ҆бхо́дитъ небє́снаѧ, превы́ше смире́нїѧ тѣлесѐ бы́въ.

м҃д. Та́инственный и҆ совершенотво́рный чи́нъ, всѧ̑ ᲂу҆жѐ прете́кшихъ є҆́сть, и҆ въ мѣ́рꙋ во́зраста прише́дшихъ хрⷭ҇то́ва. И҆ сво́йственно ᲂу҆́бѡ є҆́сть тѣ̑мъ, є҆́же пресѣщѝ воздꙋ́хъ, и҆ всегѡ̀ превозни́кнꙋти, є҆́же въ го́рнихъ чи́нѣхъ бы́ти небе́сныхъ, и҆ пе́рвомꙋ свѣ́тꙋ прибли́житисѧ, и҆ глꙋбины̑ бж҃їѧ и҆спыта́ти дх҃омъ. Дѣ́ло же, є҆́же и҆спо́лнити зри́телѧ таковы́хъ ᲂу҆ма̀ словесы̀, ꙗ҆̀же ѡ҆ про́мыслѣ, ꙗ҆̀же ѡ҆ пра́вдѣ и҆ и҆́стинѣ, ꙗ҆̀же ѡ҆ разрѣше́нїи гада́нїй и҆ при́тчъ и҆ те́мныхъ слове́съ бж҃е́ственнагѡ писа́нїѧ. Коне́цъ же, є҆́же тайнонаꙋчи́ти та́кѡ соверше́ннаго сокровє́ннымъ та́йнамъ бж҃їимъ: є҆́же премꙋ́дрости того̀ неизрече́нныѧ и҆спо́лнити сочета́нїемъ ст҃а́гѡ дх҃а, и҆ премꙋ́дра бг҃осло́ва посредѣ̀ це́ркве вели́кїѧ бж҃їѧ показа́ти, сло́вомъ бг҃осло́вїѧ человѣ́ки просвѣща́юща. И҆́же въ сїѐ дости́гїй глꙋбоча́йшимъ смиренномꙋ́дрїемъ и҆ ᲂу҆миле́нїемъ, на тре́тїе не́бо взѧ́тъ бы́сть бг҃осло́вїѧ, ꙗ҆́коже а҆́ще кто̀ и҆́нъ па́ѵелъ, и҆ глаго́лы ᲂу҆слы́ша неизречє́нныѧ, и҆́хже не лѣ́ть є҆́сть человѣ́кꙋ под̾ чꙋ́вствомъ сꙋ́щꙋ ᲂу҆слы́шати, и҆ неизрече́нныхъ бла̑гъ, и҆́хже ѻ҆́ко не ви́дѣ, и҆ ᲂу҆́хо не слы́ша, вкꙋсѝ, и҆ слꙋжи́тель бы́сть та̑инъ бж҃їихъ, ᲂу҆ста̀ бы́въ тогѡ̀, слꙋжа̀ сїѧ̑ человѣ́кѡмъ сло́вомъ, и҆ почива́ѧ въ се́мъ блаже́ннымъ поко́емъ, соверше́нъ въ соверше́нномъ бз҃ѣ: совокꙋ́пльсѧ съ бг҃осло́вы превысоча́йшымъ си́ламъ херꙋві́мѡвъ же и҆ серафі́мѡвъ, и҆́хже и҆ сло́во премꙋ́дрости є҆́сть вкꙋ́пѣ и҆ ра́зꙋма.

м҃є. На два̀ раздѣлѧ́емо человѣ́ческое житїѐ, въ трѝ чи́ны и҆́мать концы̀ собира́емы сегѡ̀, и҆ ѻ҆́во ᲂу҆́бѡ є҆гѡ̀ ѻ҆бщи́тельно є҆́сть и҆ мі́рско: ѻ҆́во же неѻбщи́тельно и҆ премі́рно. И҆ ѻ҆бщи́тельное ᲂу҆́бѡ, въ цѣломꙋ́дрїе раздѣлѧ́етсѧ, и҆ несы́тство: неѻбщи́тельное же, въ любомꙋ́дрїе, въ є҆сте́ственно бѣ́жество, и҆ въ па́че є҆стества̀ дѣ́йство. Ѿ си́хъ ѻ҆́во ᲂу҆́бѡ, и҆лѝ пра́вдѣ совокꙋплѧ́етсѧ по є҆стествꙋ̀ грѧдꙋ́що: и҆лѝ непра́вдѣ, и҆ въ непра́вдꙋ ѿхо́дитъ, заблꙋ́ждшо ѿ є҆́же по є҆стествꙋ̀ движе́нїѧ: ѻ҆́во же, а҆́ще ᲂу҆́бѡ къ намѣ́ренїю тещѝ бꙋ́детъ пра́виломъ и҆справлѧ́емо, въ безконе́чно скончава́ющосѧ є҆стество̀, па́че є҆стества̀ соверши́вшосѧ бꙋ́детъ. А҆́ще же по любоче́стїю ѡ҆бꙋча́ющосѧ намѣ́ренїѧ погрѣши́тъ, въ неискꙋ́сенъ скончава́етсѧ ᲂу҆́мъ, и҆ ꙗ҆́кѡ не соверше́нно, въ лѣ́потꙋ и҆зме́щетсѧ соверше́ннагѡ.

м҃ѕ. Свѣ́тъ и҆ живо́тъ и҆ ми́ръ є҆́сть дх҃ъ. Ѿ бж҃е́ственнагѡ ᲂу҆́бѡ просвѣща́емый дх҃а, ти́хꙋ ми́рствꙋѧ соверша́етъ жи́знь. Ѿсю́дꙋ же ра́зꙋмъ томꙋ̀ сꙋ́щихъ, и҆ премꙋ́дрость сло́ва и҆стека́етъ. Се́й вѣ́сть та̑йны ца́рствїѧ, во глꙋбины̑ вхо́дитъ бж҃їѧ, и҆ де́нь днѝ ѿрыга́етъ словеса̀ жи́зни ѿ невла́ема и҆ просвѣще́нна се́рдца бла́га человѣ́кѡмъ: поне́же бла́гъ є҆́сть бл҃га́го и҆мѣ́ѧ, глаго́люща въ себѣ̀ нѡ́ваѧ же и҆ вє́тхаѧ.

м҃з. Премꙋ́дрость є҆́сть бг҃ъ, и҆ сло́вомъ и҆ премꙋ́дростїю ходѧ́щихъ, ра́зꙋмомъ небе́сныхъ бг҃отворѧ̀, соединѧ́етъ тѣ́хъ себѣ̀ свѣ́томъ, и҆ положе́нїемъ бо́ги содѣ́ловаетъ. И҆ ꙗ҆́коже са́мъ ѿ не сꙋ́щагѡ премꙋ́дростїю всѧ̑ сотвори́въ, премꙋ́дростїю сꙋ̑щаѧ въ мі́рѣ наставлѧ́етъ, и҆ ᲂу҆правлѧ́етъ и҆ спасе́нїе всѣ́хъ приближа́ющихсѧ є҆мꙋ̀ ѡ҆браще́нїемъ, та́кожде при́снѡ премꙋ́дростїю дѣ́лаетъ: та́кѡ и҆ сподо́бивыйсѧ го́рнѣйшїѧ бы́ти премꙋ́дрости чистото́ю прича́стникъ, при́снѡ ꙗ҆́кѡ ѡ҆́бразъ бж҃їй, и҆ то́й премꙋ́дростїю твори́тъ и҆ дѣ́лаетъ, ꙗ҆̀же сꙋ́ть бж҃е́ственныѧ во́ли. Собира́ѧ же всегда̀ и҆ воспростира́ѧ по́мысленное своѐ ра́зꙋмомъ неизрече́нныхъ ко а҆́гг҃льскомꙋ вои́стиннꙋ животꙋ̀, и҆ є҆динови́днꙋ, є҆ли́кѡ дости́гнꙋти мо́щно, жи́знь свою̀ дѣ́лаѧ, соединѧ́етъ гѡ́рнимъ си́ламъ себѐ, є҆ди́нственнѣ ѡ҆ бз҃ѣ дви́жимымъ, и҆ тѣ́ми къ пе́рвомꙋ нача́лꙋ и҆ винѣ̀ ꙗ҆́кѡ благи́ми вождьмѝ возво́дитсѧ.

м҃и. И҆́же премꙋ́дростїю лꙋ́чшею себѐ соедини́вый гѡ́рнимъ си́ламъ, и҆ сегѡ̀ ра́ди бг҃ови соедини́выйсѧ, по подо́бїю сы́й бж҃їю, со всѣ́ми сло́вомъ и҆ сочета́нїемъ любопремꙋ́дростнѣ бесѣ́дꙋѧ, ѿсѣца́етъ хотѧ́щихъ бж҃е́ственною си́лою навыкновє́нїѧ, ѿ внѣ́шнихъ и҆ раздѣле́нныхъ, и҆ къ є҆динови́дной жи́зни, ꙗ҆́коже себѐ, ꙗ҆́кѡ бж҃їй подража́тель и҆ тѣ́хъ собира́ѧ дꙋ́хомъ, возво́дитъ премꙋ́дростїю и҆ ра́зꙋмомъ, и҆ сокрове́нныхъ ѡ҆сїѧ́нїемъ къ видѣ́нїю сла́вы є҆ди́нагѡ и҆ пе́рвагѡ свѣ́та: и҆ соедини́въ тѣ́хъ, ꙗ҆̀же ѡ҆ бз҃ѣ сꙋществѡ́мъ и҆ чинѡ́мъ, въ є҆ди́нство приво́дитъ бж҃їе всесїѧ̑тельны бы́вшѧ ѡ҆сїѧ́нїемъ дх҃а.

м҃ѳ. Четвери́цѣ добродѣ́телей ѻ҆смери́ца спослѣ́дствꙋетъ є҆сте́ственныхъ же и҆ пе́рвѣйшихъ добродѣ́телей, къ є҆ди́ной ѿ си́хъ ко́ейждо ѿ є҆ди́ныѧ и҆ дрꙋгі́ѧ страны̀ двѣма̀ привозсїѧва́ющема: ꙗ҆́коже и҆ то́й ко́ейждо быва́ти въ трⷪ҇цꙋ. Мꙋ́дрости ᲂу҆́бѡ, ра́зꙋмъ привозсїѧва́етъ и҆ премꙋ́дрости видѣ́нїе, пра́вдѣ разсꙋжде́нїе и҆ благосострада́теленъ совѣ́тъ: мꙋ́жествꙋ, терпѣ́нїе и҆ сопротивле́нїе крѣ́пко: цѣломꙋ́дрїю, чистота̀ и҆ дѣ́вство. Сеѧ̀ тро́ичныѧ дванадесѧ́тницы, ꙗ҆́коже нѣ́кїй зижди́тель и҆ тайноводи́тель бг҃ъ, премꙋ́дростїю превы́шше сѣди́тъ на прⷭ҇то́лѣ ᲂу҆ма̀, сло́во посыла́ѧ, въ содѣ́тельство мі́ра добродѣ́телей, є҆́же и҆ прїе́млющо ѿ подлежа́щихъ нача̑лъ, вещество̀ ѿ є҆ди́ныѧ и҆ дрꙋгі́ѧ рече́нныхъ, мы́сленный благоче́стїѧ мі́ръ содѣ́тельствꙋетъ въ дꙋшѝ. И҆ ꙗ҆́коже ᲂу҆́бѡ не́бо простира́етъ въ не́й мꙋ́дрость, всю̀ ѕвѣ́зднꙋ во всесїѧ́тельнꙋ жи́знь: въ не́йже ꙗ҆́коже два̀ свѣти̑ла вели̑ка, бж҃е́ственный ра́зꙋмъ и҆ є҆сте́ственное видѣ́нїе сїѧ́ти и҆ просвѣща́ти сїю̀ твори́тъ, и҆ ꙗ҆́коже зе́млю ѡ҆сно́вываетъ пра́вдꙋ въ не́й, во всепи́ршество неиждива́емо: и҆ ꙗ҆́коже воздꙋ́хъ простира́етъ цѣломꙋ́дрїе, въ прохлажде́нїе и҆ ро́сꙋ чистѣ́йшїѧ жи́зни: и҆ ꙗ҆́коже мо́ре мꙋ́жество ѡ҆предѣлѧ́етъ въ не́мощи є҆стества̀, на разоре́нїе тве́рдємъ и҆ возноше́нїємъ сопроти́внагѡ. Се́й ᲂу҆́бѡ та́кѡ мі́ръ сло́во созида́ѧ, си́лꙋ влага́етъ въ ню̀ дх҃ъ, въ движе́нїе ᲂу҆́бѡ мы́сленно и҆ приснодви́жно, и҆ въ содержа́нїе нерасточа́емо же и҆ пребыва́тельно, по рече́нномꙋ бж҃е́ственнымъ даві́домъ сло́вомъ гдⷭ҇нимъ небеса̀ ᲂу҆тверди́шасѧ, и҆ дх҃омъ ᲂу҆́стъ є҆гѡ̀ всѧ̀ си́ла и҆́хъ¹²⁹⁰.

н҃. Съ дꙋхо́вными превозра́стїи тщали́выхъ совозраста́ти ѡ҆бы́че и҆ гдⷭ҇ь на́шъ і҆и҃съ хрⷭ҇то́съ. И҆ є҆гда̀ ᲂу҆́бѡ младе́нцы сꙋ́ть тре́бꙋюще млека̀, сса́ти глаго́летсѧ млеко̀ вводи́тельныхъ добродѣ́телей ѡ҆бꙋче́нїѧ тѣле́снагѡ: є҆гѡ́же поле́зное, вма́лѣ є҆́сть возраста́ющымъ добродѣ́телїю, и҆ пома́лꙋ ѿлага́ющымъ младе́нчество. Є҆гда́ же въ ю҆́ношы взы́дꙋтъ, и҆ тве́рдою пи́щею пита́ютсѧ видѣ́нїѧ сꙋ́щихъ, ꙗ҆́кѡ ѡ҆бꙋче́нни дꙋше́вными чꙋ́вствы: преспѣва́ти, глаго́летсѧ, во́зрастомъ и҆ благода́тїю, и҆ посредѣ̀ ста́рєцъ сѣдѣ́ти, и҆ ѿкрыва́ти тѣ̑мъ глꙋбѡ́каѧ ѿ тьмы̀. Є҆гда́ же въ мꙋ́жа соверше́нна въ мѣ́рꙋ во́зраста соверша́тсѧ и҆сполне́нїѧ хрⷭ҇то́ва: проповѣ́дати, глаго́летсѧ, сло́во всѣ̑мъ покаѧ́нїѧ, и҆ ᲂу҆чи́ти люде́й, ꙗ҆̀же ѡ҆ црⷭ҇твїи нбⷭ҇нѣмъ, и҆ ко є҆́же пострада́ти спѣши́тисѧ: се́й бо є҆́сть коне́цъ всѧ́кагѡ соверши́вшагосѧ въ добродѣ́телехъ, да всѧ̑ проше́дъ во́зрасты хрⷭ҇тѡ́вы, ко стра́сти дости́гнетъ и҆скꙋше́нїй по крⷭ҇тꙋ̀ ѻ҆́нагѡ.

н҃а. До́ндеже под̾ стїхі́ами ѡ҆бꙋче́нїѧ є҆смы̀, ѡ҆хранѧ́еми каса́тисѧ бра́шенъ, и҆лѝ приближа́тисѧ ѡ҆сѧза́нїю, и҆лѝ взира́ти на красѡты̀, и҆лѝ пѣ̑сни слы́шати, и҆лѝ мѵ́ры ѡ҆бонѧ́ти, под̾ повели́тели є҆смы̀ и҆ приста́вники ꙗ҆́кѡ є҆щѐ младе́нцы, а҆́ще и҆ наслѣ̑дницы є҆смы̀, и҆ госпо́дїе всѣ́хъ ѻ҆́тчихъ. Є҆гда́ же прїи́детъ кончи́на вре́мене тогѡ̀ (ѡ҆бꙋче́нїѧ), и҆ безстра́стїемъ и҆спо́лнитсѧ: тогда̀ ражда́етсѧ сло́во въ на́съ ѿ чи́стыѧ мы́сли, и҆ быва́етъ под̾ зако́номъ дꙋ́ха, да под̾ зако́номъ ны̀ плотска́гѡ мꙋдрова́нїѧ сꙋ́щыѧ и҆скꙋ́питъ, и҆ сыноположе́нїе на́мъ да́рꙋетъ. Семꙋ́ же бы́вшꙋ, тогда̀ вопїе́тъ дх҃ъ въ сердца́хъ на́шихъ: а҆́вва ѻ҆́ч҃е! показꙋ́ѧ, и҆ ꙗ҆вле́но творѧ̀ на́мъ сыновство̀, и҆ є҆́же ко ѻ҆ц҃ꙋ̀ и҆ бг҃ꙋ дерзнове́нїе, и҆ ꙗ҆́коже съ сы́ны и҆ наслѣ́дники бж҃їими хрⷭ҇то́мъ, съ на́ми пребыва́етъ и҆ бесѣ́дꙋетъ, недержи́мыми рабо́тою чꙋ́вствъ.

н҃в. Пред̾ꙋспѣ́вшымъ въ вѣ́рѣ ꙗ҆́коже пе́тръ, и҆ ꙗ҆́коже і҆а́кѡвъ въ наде́ждꙋ возше́дшымъ, и҆ ꙗ҆́коже і҆ѡа́ннъ въ любвѝ совершє́ннымъ бы́вшымъ, преѡбразꙋ́етсѧ, на горꙋ̀ высокꙋ̀ возше́дъ бг҃осло́вїѧ гдⷭ҇ь. И҆ просвѣща́етсѧ ᲂу҆́бѡ тѣ́мъ, ꙗ҆вле́нїемъ и҆ начерта́нїемъ чи́стагѡ сло́ва ꙗ҆́кѡ со́лнце: разꙋмѣ́нїи же неизрече́нныѧ премꙋ́дрости быва́етъ свѣ́телъ свѣ́телъ ꙗ҆́кѡ свѣ́тъ: и҆ зри́тсѧ сло́во междꙋ̀ си́ми, посредѣ̀ стоѧ̀ зако́на и҆ проро́чества: ѻ҆́ва ᲂу҆́бѡ законополага́ѧ и҆ ᲂу҆чѧ̀, ѻ҆́ва же и҆ ѿкрыва́ѧ ѿ глꙋбо́кихъ и҆ сокрове́нныхъ сокро́вищъ премꙋ́дрости. Ѻ҆вогда́ же и҆ предви́дѧ и҆ предглаго́лѧ, и҆̀хже и҆ ꙗ҆́кѡ ѻ҆́блакъ свѣ́телъ ѡ҆сѣнѝ дх҃ъ, и҆ гла́съ та́инственнагѡ бг҃осло́вїѧ ѿѻнꙋ́дꙋ къ ни̑мъ прихо́дитъ, ᲂу҆ча́щъ и҆̀хъ та́инствꙋ трїѷпоста́снагѡ бж҃ества̀ и҆ та́кѡ глаго́лющъ: се́й є҆́сть возлю́бленный мо́й предѣ́лъ сло́ва соверше́нства, ѡ҆ не́мже благоволи́хъ: бꙋ́дите мнѣ̀ въ соверше́нны сы́ны въ соверше́ннѣ дс҃ѣ.

н҃г. Дꙋша̀ до́лꙋ ревнꙋ́емаѧ всѧ̑ пренебре́гши, и҆ всѧ́кѡ раче́нїемъ ᲂу҆ѧзви́вшисѧ бж҃їимъ, и҆зстꙋпле́нїе нѣ́кое стра́нно и҆ бж҃е́ственно под̾е́млетъ. По є҆́же во ᲂу҆ви́дѣти ꙗ҆́снѡ є҆стєства̀ сꙋ́щихъ, и҆ словеса̀ и҆́хъ, и҆ концы̀ человѣ́ческихъ пости́гнꙋти веще́й, внꙋ́трь не те́рпитъ всегѡ̀ ѿто́лѣ бы́ти, и҆ ѡ҆бдержа́щимъ ѡ҆пи́соватисѧ: но свои́хъ предѣ̑лъ и҆зстꙋ́пльши, и҆ ᲂу҆́зы ᲂу҆мꙋчи́тельствовавши чꙋ́вства, є҆стества̀ всѣ́хъ преше́дши, во мра́къ бг҃осло́вїѧ съ неизрече́ннымъ молча́нїемъ вхо́дитъ, и҆ добро́тꙋ смотрѧ́етъ сꙋ́щагѡ во свѣ́тѣ разꙋмѣ́нїй несказа́нныѧ премꙋ́дрости, є҆ли́кѡ то́й по благода́ти ѿѻнꙋ́дꙋ да́стсѧ. Бг҃олѣ́пнѡ же разꙋмѣ́нїи во видѣ́нїе є҆гѡ̀ воглꙋблѧ́ющисѧ, наслажда́етсѧ безсме́ртныхъ садѡ́въ плода́ми, любвѐ стра́хомъ бж҃е́ственныхъ мы́слей, глаго́лю, разꙋмѣ́нїй, и҆́хже никогда́же сопрѧ́тꙋющисѧ къ себѣ̀ мо́жетъ соверше́ннѣ сказа́ти великолѣ́пное же и҆ сла́вное. Но ꙗ҆́коже дѣ́йствꙋема стра́ннѡ ѿ дх҃а, похва́льнꙋю ᲂу҆́бѡ стра́сть въ неизрече́ннѣй вѣ́сть ра́дости и҆ молча́нїи: а҆ є҆́же ка́кѡ дѣ́йствꙋетсѧ, и҆лѝ что̀ є҆́сть дви́жꙋщее и҆ зри́мое, и҆ глаго́лющее то́й та́инственнѡ неизречє́ннаѧ, не возмога́етъ и҆сповѣ́дати.

н҃д. Сѣ́ѧй себѐ во пра́вдꙋ сле́зы ᲂу҆миле́нїѧ, ѡ҆бира́етъ въ пло́дъ жи́зни ра́дость неизглаго́ланнꙋю: взыскꙋ́ѧй же и҆ терпѧ́й гдⷭ҇а, до́ндеже прїи́дꙋтъ жи̑та пра́вды є҆гѡ̀, се́й пожне́тъ многопло́денъ кла́съ ра́зꙋма бж҃їѧ, и҆ свѣ́тъ премꙋ́дрости того̀ просвѣти́тъ, и҆ свѣти́льникъ свѣ́та присносꙋ́щна бꙋ́детъ, во є҆́же просвѣща́ти всѧ̑ человѣ́ки. И҆ не бꙋ́детъ зави́дѣти себѣ̀ и҆ бли̑жнимъ, под̾ спꙋ́домъ за́висти покрыва́ѧ да́нный себѣ̀ свѣ́тъ премꙋ́дрости: но въ це́ркви вѣ́рныхъ ѿры́гнетъ словеса̀ бла̑га на по́льзꙋ мно́гихъ, и҆ провѣща́етъ гана̑нїѧ и҆спе́рва: є҆ли̑ка же слы́ша свы́ше бж҃е́ственнымъ ѡ҆глаша́емь дх҃омъ, и҆ є҆ли̑ка позна̀ во видѣ́нїи сꙋ́щихъ ᲂу҆пражнѧ́ѧсѧ, и҆ ѻ҆тцы̀ є҆гѡ̀ повѣ́даша є҆мꙋ̀.

н҃є. Бꙋ́детъ всѧ́комꙋ тщали́вꙋ въ де́нь соверше́нства є҆гѡ̀ въ добродѣ́тели, и҆ска́плютъ є҆мꙋ̀ го́ры дѣ́ланїѧ за́повѣдей бж҃їихъ сла́дость весе́лїѧ, ца́рствꙋющꙋ въ сїѡ́нѣ въ чи́стомъ ᲂу҆мѣ̀, и҆ хо́лми словеса̀ добродѣ́телей и҆сточа́тъ млеко̀, пи́щꙋ томꙋ̀, почива́ющꙋ на ло́жи безстра́стїѧ, приносѧ́ще, и҆ всѝ и҆сто́чницы і҆ꙋ̑дины, вѣ́ры же є҆гѡ̀ глаго́лю, и҆ ра́зꙋма и҆сточа́тъ во́ды, велѣ̑нїѧ си́рѣчь и҆ при̑тчи и҆ гада̑нїѧ бж҃е́ственныхъ веще́й: и҆ и҆сто́чникъ премꙋ́дрости неизрече́нныѧ ѿ се́рдца є҆гѡ̀, ꙗ҆́кѡ ѿ до́мꙋ гдⷭ҇нѧ и҆зы́детъ, и҆ напои́тъ пото́къ зи́мнїй¹²⁹¹, са́мыѧ ты́ѧ си́рѣчь сꙋ́шею и҆ зно́емъ страсте́й и҆зсо́хшыѧ человѣ́ки. И҆ тогда̀ ᲂу҆разꙋмѣ́етъ и҆́стинное сбытїѐ въ себѣ̀ слове́съ гдⷭ҇нихъ, глаго́летъ бо: вѣ́рꙋѧй въ мѧ̀, рѣ́ки ѿ чре́ва є҆гѡ̀ и҆стекꙋ́тъ воды̀ жи́вы¹²⁹².

н҃ѕ. Возсїѧ́етъ въ боѧ́щихсѧ менѐ, глаго́летъ бг҃ъ, со́лнце пра́вды, и҆ и҆сцѣле́нїе въ дѣѧ́нїихъ и҆́хъ: и҆ и҆з̾ темни́цы страсте́й и҆зы́дꙋтъ, и҆ взыгра́ютсѧ ꙗ҆́коже тельцы̀ ѿ ᲂу҆́зъ грѣха̀ разрѣше́ни: и҆ поперꙋ́тъ беззако́нныхъ мꙋже́й и҆ бѣсѡ́въ под̾ нога́ми свои́ми а҆́ки пе́пелъ въ де́нь па́ки ᲂу҆строе́нїѧ своегѡ̀, во́ньже а҆́зъ сотворю̀, глаго́летъ гдⷭ҇ь вседержи́тель¹²⁹³. Внегда̀ всѣ́ми вознесꙋ́тсѧ добродѣ́тельми ꙗ҆́вѣ, ꙗ҆́кѡ и҆ соверше́ни бꙋ́дꙋтъ премꙋ́дростїю и҆ ра́зꙋмомъ въ прича́стїи дꙋ́ха.

н҃з. Є҆гда̀ на горѣ̀ ра́внѣ мі́ра сегѡ̀ це́ркви хрⷭ҇то́вой ра́зꙋма но́вагѡ свы́ше во́змеши зна́менїе, и҆ возвы́сиши гла́съ сво́й, по ре́кшемꙋ, да́нныѧ тебѣ̀ премꙋ́дрости ѿ бг҃а: побꙋжда́ѧ сло́вомъ, и҆ ᲂу҆чѧ̀ бра́тїю твою̀ ѿверза́ѧ тѣ́мъ ра́зꙋмъ бж҃е́ственнагѡ писа́нїѧ во ᲂу҆разꙋмѣ́нїе ди́вныхъ дарѡ́въ бж҃їихъ, и҆ ᲂу҆вѣщева́ѧ тѣ́хъ на дѣ́ланїе за́повѣдей є҆гѡ̀¹²⁹⁴: да не ᲂу҆бои́шисѧ ѿ зави́дѧщихъ си́лѣ слове́съ твои́хъ, и҆ развраща́ющихъ всѐ бж҃е́ственно писа́нїе, тщи́хъ сꙋ́щихъ и҆ неключи́мыхъ и҆ гото́выхъ въ жили́ще дїа́волꙋ. Вчини́тъ бо ꙗ҆̀же ᲂу҆сте́нъ твои́хъ бг҃ъ въ кни́зѣ живы́хъ, и҆ не бꙋ́детъ тѝ вреда̀, ѿ таковы́хъ, ꙗ҆́коже ни петрꙋ̀ ѿ сі́мѡна. Рече́ши же па́че и҆ са́мъ со проро́комъ въ де́нь ѻ҆́нъ, во́ньже сотворѧ́ющихъ ви́диши таковы́хъ на тѧ̀ собла́зны стези̑: Сѐ бг҃ъ мо́й, сп҃съ мо́й гдⷭ҇ь, и҆ ᲂу҆пова́ѧ бꙋ́дꙋ на него̀, и҆ спасꙋ́сѧ и҆́мъ и҆ не ᲂу҆бою́сѧ: занѐ сла́ва моѧ̀, и҆ хвале́нїе моѐ гдⷭ҇ь, и҆ бы́сть мнѣ̀ сп҃си́тель, и҆ не преста́нꙋ возвѣща́ти сла̑внаѧ є҆гѡ̀ по все́й землѝ.

н҃и. А҆́ще позна́лъ є҆сѝ, ꙗ҆́кѡ стремле́нїе дѣ́йствїѧ страсте́й є҆́сть въ тебѣ̀ недѣ́ѧтельно, и҆ ᲂу҆миле́нїе ѿ смиренномꙋ́дрїѧ и҆стека́етъ ѿ ѻ҆́чїю твоє́ю, разꙋмѣ́й, ꙗ҆́кѡ прїи́де ца́рствїе бж҃їе въ тебѐ, и҆ и҆спо́лненъ бы́лъ є҆сѝ ст҃а́гѡ дх҃а. А҆́ще же и҆ дѣ́йствꙋюща дви́жима же и҆ глаго́люща дх҃а разꙋмѣ́еши во ᲂу҆тро́бѣ твое́й, и҆ возбꙋжда́юща тѧ̀ глаго́лати въ це́ркви вели́цѣй спасе́нїе и҆ и҆́стинꙋ бж҃їю, да не возбрани́ши ᲂу҆стна́мъ твои̑мъ за́висти ра́ди і҆ꙋдеемꙋ́дренныхъ мꙋже́й: но сѣ́дъ, напишѝ на дщи́цѣ¹²⁹⁵, ꙗ҆́коже глаго́летъ и҆са́їа, ꙗ҆̀же дх҃ъ тебѣ̀ глаго́летъ: ꙗ҆́кѡ бꙋ́дꙋтъ сїѧ̑ во дни̑ време́нъ, и҆ да́же до вѣ́ка, по та́кѡ ре́кшемꙋ: за́вистїю бо чревоболѧ́щїи лю́дїе непокори́ви сꙋ́ть, сы́нове лжи́вїи, и҆̀мже нѣ́сть вѣ́ры: и҆̀же не хотѧ́тъ слы́шати, ꙗ҆́кѡ є҆щѐ є҆ѵⷢ҇лїе дѣ́йствꙋетъ, и҆ дрꙋ́ги бж҃їѧ и҆ проро́ки сотворѧ́етъ: но глаго́лютъ проро́кѡмъ и҆ ᲂу҆чи́телємъ це́ркве, не повѣ́дайте на́мъ премꙋ́дрости бж҃їѧ, и҆ видѣ́нїѧ є҆сте́ственнагѡ видѣ́нїѧ ви́дѧщымъ, не глаго́лите на́мъ: но глаго́лите и҆ возвѣща́йте на́мъ и҆но́е прельще́нїе, є҆́же мі́ръ лю́битъ, и҆ ѿими́те ѿ на́съ сꙋ́дъ і҆зра́илевъ. Да не ᲂу҆́бѡ во́нмеши за́висти и҆ словесє́мъ и҆́хъ: ᲂу҆слы́шатъ бо ѡ҆глаша́ємаѧ тебѣ̀ къ по́льзѣ мно́гихъ свы́ше, глꙋ́си въ коне́цъ, и҆ и҆̀же во тьмѣ̀ житїѧ̀ сегѡ̀, и҆ и҆̀же во мглѣ̀ грѣха̀ ѻ҆́чи слѣпы́хъ, ᲂу҆́зрѧтъ слове́съ твои́хъ свѣ́тъ¹²⁹⁶: и҆ возра́дꙋютсѧ ѡ҆ ни́хъ ни́щїи дꙋ́хомъ, и҆ ѿча́ѧннїи человѣ́цы и҆спо́лнѧтсѧ весе́лїѧ, и҆ ᲂу҆разꙋмѣ́ютъ прельща́емїи дꙋ́хомъ ра́зꙋмъ во словесѣ́хъ твои́хъ, и҆ ро́пщꙋщїи на тѧ̀ наꙋча́тсѧ послꙋ́шати слове́съ дꙋ́ха, и҆ ѧ҆зы́ки коснѧ́щїи, глаго́лати ми́ръ, наꙋча́тсѧ.

н҃ѳ. Блаже́нъ, и҆́же и҆́мать въ сїѡ́нѣ въ це́ркви бж҃їей сѣ́мѧ ᲂу҆чи́тельства слове́съ твои́хъ¹²⁹⁷, глаго́летъ и҆са́їа, и҆ сы́ны своѧ̑ съ собо́ю и҆ дꙋ́хомъ въ вы́шнемъ перворо́дныхъ і҆ерꙋсали́мѣ. Бꙋ́детъ бо человѣ́къ ѻ҆́нъ сокрыва́ѧ во вре́мѧ¹²⁹⁸, глаго́летъ, словеса̀ своѧ̑, и҆ скры́етсѧ, а҆́ки ѿ воды̀ носи́мыѧ: и҆ напослѣ́докъ ꙗ҆ви́тсѧ въ сїѡ́нѣ, въ це́ркви вѣ́рныхъ, ꙗ҆́кѡ рѣка̀ текꙋ́щаѧ сла́вна въ землѝ жа́ждꙋщей стрꙋѧ́ми премꙋ́дрости своеѧ̀. И҆ къ семꙋ̀ не бꙋ́дꙋтъ ѿ зави́дѧщихъ, низлага́емїи ᲂу҆пова́юще на нѧ̀, но ᲂу҆́ши своѧ̑ вдадѧ́тъ на слы́шанїе слове́съ человѣ́ка ѻ҆́нагѡ, и҆ се́рдце дꙋше́ю и҆знемо́гшихъ во́нметъ послꙋ́шати. И҆ къ семꙋ̀ не рекꙋ́тъ слꙋги̑ за́висти, молчѝ, поне́же благочести́въ сы́й, смы́сленнѣ совѣща̀, а҆ не ꙗ҆́коже ю҆ро́дивїи мі́ра мꙋдрецы̀, ю҆рѡ́диваѧ глаго́ла, нижѐ се́рдце є҆гѡ̀ ᲂу҆разꙋмѣ̀ сꙋ́єтнаѧ, є҆́же соверша́ти беззакѡ́ннаѧ, и҆ глаго́лати на бг҃а пре́лесть, ꙗ҆́кѡ да расточи́тъ дꙋ́шы а҆́лчныѧ, и҆ дꙋ́шы жа́ждꙋщыѧ тщѝ сотвори́тъ. Сегѡ̀ ра́ди словеса̀ є҆гѡ̀ пребꙋ́дꙋтъ на по́льзꙋ мно́гихъ, а҆́ще и҆ неꙋго́дно є҆́сть зави́дѧщымъ.

ѯ҃. Въ высо́цѣ пеще́рѣ ка́мене крѣ́пкагѡ¹²⁹⁹ вселѧ́ющемꙋсѧ хлѣ́бъ въ насыще́нїе да́стсѧ ра́зꙋма, и҆ ча́ша премꙋ́дрости въ пїѧ́нство, и҆ та́кѡ бꙋ́детъ вѣ́рна вода̀ є҆гѡ̀. Цр҃ѧ̀ со сла́вою ᲂу҆́зритъ, и҆ ѻ҆́чи є҆гѡ̀ зе́млю и҆здале́ча ᲂу҆́зрѧтъ, дꙋша̀ є҆гѡ̀ поꙋчи́тсѧ премꙋ́дрости, и҆ возвѣсти́тъ всѣ̑мъ мѣ́сто вѣ́чное, є҆гѡ́же предѣ́лѡвъ внѣ̀ ничто́же є҆́сть.

ѯ҃а. А҆́ще ᲂу҆́бѡ наказа́нїе гдⷭ҇не ѿверза́етъ ᲂу҆́ши¹³⁰⁰ всѧ́кагѡ боѧ́щагѡсѧ є҆гѡ̀, и҆ прилага́етъ ᲂу҆́хо є҆мꙋ̀, є҆́же слы́шати, и҆ ѧ҆зы́къ дае́тъ наꙋчє́нїѧ, є҆́же разꙋмѣ́ти, є҆гда̀ подоба́етъ рещѝ сло́во: кто̀ є҆́сть и҆́нъ ѿвраща́ѧй разꙋ́мныхъ и҆ мꙋ́дрыхъ мі́ра сегѡ̀ вспѧ́ть, и҆ премꙋ́дрость и҆́хъ ѡ҆бꙋева́ѧй, поставлѧ́ѧй же то́чїю глаго́лы рабѡ́въ свои́хъ, ра́звѣ то́чїю са́мъ творѧ́й нѡ́ваѧ и҆ пресла̑внаѧ во сла́вꙋ свою̀; творѧ́й въ пꙋсто́мъ и҆ сꙋхо́мъ се́рдцѣ пꙋ́ть смире́нїѧ и҆ кро́тости, и҆ въ невла́жномъ и҆ безво́дномъ ᲂу҆мѣ̀ рѣ́ки премꙋ́дрости неизрече́нныѧ: во є҆́же напои́ти ро́дъ є҆гѡ̀ и҆збра́нный, лю́ди ꙗ҆̀же снабдѣ̀, добродѣ̑тели є҆гѡ̀ повѣ́дати¹³⁰¹. Пред̾ лю́бѧщими бо и҆ боѧ́щимисѧ є҆гѡ̀ хо́дитъ, и҆ го́ры страсте́й ᲂу҆равнѧ́етъ, и҆ врата̀ мѣ̑дѧнаѧ невѣ́дѣнїѧ сокрꙋша́етъ, и҆ ѿверза́етъ ра́зꙋма своегѡ̀ двє́ри, и҆ ѿкрыва́етъ тѣ̑мъ сокрѡ́вища є҆гѡ̀ тє́мна, сокровє́нна же и҆ неви̑дима: да ᲂу҆вѣ́дѧтъ, ꙗ҆́кѡ то́й є҆́сть гдⷭ҇ь бг҃ъ прозыва́ѧй и҆́мѧ и҆́хъ і҆зра́иль¹³⁰².

ѯ҃в. Кто́ є҆сть смꙋща́ѧй мо́ре страсте́й, и҆ ᲂу҆толѧ́ѧй во́лны є҆гѡ̀, и҆збавлѧ́ѧй лю́бѧщыѧ є҆го̀ ѿ бѣды̀ грѣха̀, и҆ бꙋ́рю по́мыслѡвъ въ тишинꙋ̀ творѧ́й; Гдⷭ҇ь саваѡ́ѳъ, словеса̀ своѧ̑ положи́вый во ᲂу҆ста̀ и҆́хъ, и҆ покрыва́ѧй тѣ́хъ под̾ сѣ́нїю рꙋкꙋ̀ своє́ю, є҆́юже соста́ви не́бо, и҆ зе́млю ѡ҆снова̀. То́й боѧ́щымсѧ є҆гѡ̀ дае́тъ ѧ҆зы́къ наꙋче́нїѧ, и҆ ᲂу҆́хо ра́зꙋма, во є҆́же слы́шати свы́ше гла́съ є҆гѡ̀, и҆ возвѣща́ти въ домꙋ̀ і҆а́кѡвли въ це́ркви вѣ́рныхъ повелѣ̑нїѧ є҆гѡ̀. А҆ и҆̀мже нѣ́сть ѻ҆чесѐ, во є҆́же ви́дѣти лꙋчѝ со́лнца пра́вды, и҆ ᲂу҆́ха, во є҆́же слы́шати сла̑внаѧ бж҃їѧ: тьма̀ є҆́сть ᲂу҆ча́стїе невѣ́дѣнїѧ, и҆ наде́жда со словесы̀ сꙋ́етна. Ѿ си́хъ никто́же глаго́летъ пра́вєднаѧ, нижѐ є҆́сть сꙋ́дъ въ ни́хъ и҆́стины: ᲂу҆пова́ютъ бо на сꙋ́єтнаѧ, и҆ глаго́лютъ тщє́тнаѧ: чревоно́сѧтъ за́висть, и҆ ражда́ютъ клеветꙋ̀. Занѐ не ѡ҆брѣ̑зана сꙋ́ть ᲂу҆шеса̀ и҆́хъ, и҆ не мо́гꙋтъ слы́шати: и҆ сегѡ̀ ра́ди бы́сть и҆̀мъ сло́во ра́зꙋма бж҃їѧ въ поноше́нїе, и҆ не восхотѧ́тъ є҆гѡ̀ ᲂу҆слы́шати¹³⁰³.

ѯ҃г. Премꙋ́дрость ка́ѧ є҆́сть во чревоболѧ́щихъ за́вистїю на бли́жнѧго; ка́кѡ бо рекꙋ́тъ зави́стницы, глаго́летъ і҆еремі́а, ꙗ҆́кѡ премꙋ́дри є҆смы̀ мы̀, и҆ зако́нъ гдⷭ҇нь съ на́ми є҆́сть, є҆гда̀ и҆стаѧва́ютъ рве́нїемъ на прїе́мшыѧ благода́ть дх҃а премꙋ́дростїю и҆ ра́зꙋмомъ бж҃їимъ, но всꙋ́е бы́сть ра́зꙋмъ ло́женъ книго́чїѧмъ и҆ премꙋ̑дрымъ мі́ра, и҆́стиннагѡ погрѣши́вшымъ ра́зꙋма. Сегѡ̀ ра́ди постыдѣ́шасѧ мꙋдрецы̀, и҆спа́дше ѿ премꙋ́дрости ᲂу҆тѣ́шителевы, сїю̀ въ сынѣ́хъ ловє́цъ ᲂу҆множа́емꙋ ви́дѧще, и҆ ᲂу҆боѧ́шасѧ си́лы слове́съ и҆́хъ, и҆ ꙗ҆́ти бы́ша мре́жами разꙋмѣ́нїй свои́хъ. Поне́же и҆́стиннꙋю премꙋ́дрость и҆ ра́зꙋмъ гдⷭ҇нь ѿверго́ша.

ѯ҃д. Почто̀ рве́нїемъ и҆ста́ѧша зави́стницы на ѡ҆богатѣ́вшихъ благода́тїю дх҃а, на прїе́мшихъ ѧ҆зы́къ ѻ҆́гненъ ꙗ҆́кѡ тро́сть кни́жника скоропи́сца, и҆сто́чникъ ѡ҆ста́вльше премꙋ́дрости бж҃їѧ; а҆́ще бо бы́ша пꙋте́мъ бж҃їимъ ходи́ли, по́жили ᲂу҆́бѡ бы́ша въ мі́рѣ безстра́стїѧ во вѣ́чное вре́мѧ: ᲂу҆разꙋмѣ́ли бы́ша, гдѣ̀ є҆́сть мꙋ́дрость, гдѣ̀ є҆́сть крѣ́пость, гдѣ̀ є҆́сть ра́зꙋмъ и҆ позна́нїе сꙋ́щихъ, гдѣ̀ є҆́сть долгожи́тїе и҆ живо́тъ, гдѣ̀ є҆́сть свѣ́тъ ѻ҆́чїю, и҆ премꙋ́дрость съ ми́ромъ. Оу҆разꙋмѣ́ли бы́ша, кто̀ ѡ҆брѣта́етъ мѣ́сто є҆ѧ̀, и҆ кто̀ въ сокрѡ́вища є҆ѧ̀ вхо́дитъ. И҆ ка́кѡ заповѣ́даетъ бг҃ъ чрез̾ проро́ка таи́нникѡмъ сло́ва, глаго́лѧ: проро́къ, и҆́же и҆́мать сновидѣ́нїе ѿкрове́нїѧ, да вѣща́етъ сновидѣ̑нїѧ видѣ́нїѧ своегѡ̀. И҆ и҆́же и҆́мать сло́во моѐ къ немꙋ̀, да глаго́летъ сло́во моѐ во и҆́стинѣ. И҆ па́ки: напишѝ себѣ̀ всѧ̑ словеса̀, ꙗ҆̀же соглаго́лахъ къ тебѣ̀ въ кни́гꙋ: и҆ никогда́же за́вистїю на таковы́хъ и҆стаѧва́ли бы́ша.

ѯ҃є. А҆́ще премѣни́тъ є҆ѳїо́плѧнинъ ко́жꙋ свою̀, и҆ ры́сь пестрѡты̀ своѧ̑¹³⁰⁴, и҆ зави́стницы возмо́гꙋтъ бла́го рещѝ, и҆ совѣ́товати поꙋчи́вшесѧ ѕлы́мъ: запина́нїемъ бо запина́ютъ бли́жнихъ свои́хъ, поне́же льсти́внѡ хо́дѧтъ, и҆ рꙋга́ютсѧ дрꙋгѡ́мъ свои̑мъ, и҆́стины не глаго́люще: зане́же наꙋчи́сѧ ѧ҆зы́къ и҆́хъ глаго́лати сꙋ́єтна и҆ лѡ́жна. Разꙋмѣ́й ᲂу҆́бѡ и҆́же ра́зꙋма ра́ди бж҃їѧ и҆ сло́ва ѿ ни́хъ зави́димый же и҆ рꙋга́емый, и҆ прилѣ́жнѡ помоли́сѧ, ꙗ҆́коже і҆еремі́а, и҆ рцы̀: Гдⷭ҇и воспомѧни́ мѧ, и҆ посѣти́ мѧ, и҆ защити́ мѧ ѿ гонѧ́щихъ мѧ̀ зави́стныхъ мꙋже́й, не въ долготерпѣ́нїе твоѐ положѝ мѧ̀, и҆скꙋси́ти мѧ̀ хотѧ̀ на мно́зѣ: вѣ́ждь, ꙗ҆́кѡ прїѧ́хъ нарꙋга́нїе ѿ ѿверга́ющихъ ра́зꙋмъ тво́й: Сконча́й и҆̀хъ во рве́нїи и҆́хъ, и҆ бꙋ́детъ сло́во мнѣ̀ ра́зꙋма твоегѡ̀ въ ра́дость и҆ въ весе́лїе се́рдца моегѡ̀¹³⁰⁵: ниже́ бо сѣдо́хъ въ со́нмѣ съ рꙋга́ющимисѧ ра́зꙋмꙋ твоемꙋ̀, но боѧ́хсѧ ѿ лица̀ рꙋкѝ твоеѧ̀: и҆ сѣдѧ̀ наединѣ̀, ꙗ҆́кѡ го́рести ѿ за́висти и҆́хъ и҆спо́лнихсѧ. И҆ ᲂу҆слы́шиши, до́брѣ вѣ́мъ: а҆́ще ѡ҆брати́ши заблꙋ́ждша ѿ пꙋтѝ є҆гѡ̀, возста́влю тѧ̀ междꙋ̀ дрꙋ́ги мои́ми, пред̾ лице́мъ мои́мъ ста́неши: и҆ а҆́ще и҆зведе́ши честно́е ѿ недосто́йнагѡ, ꙗ҆́кѡ ᲂу҆ста̀ моѧ̑ бꙋ́деши: и҆ и҆зба́влю тѧ̀ ѿ рꙋкѝ зави́стныхъ гꙋби́телей, глаго́летъ гдⷭ҇ь бг҃ъ і҆и҃левъ¹³⁰⁶.

ѯ҃ѕ. Коне́цъ сло́ва, всѣ̀ зави́стнїи мꙋдрецы̀ да слы́шатъ: ѡ҆чи́стишасѧ назѡре́и бж҃їи трꙋда́ми па́че снѣ́га, просвѣти́шасѧ житїе́мъ па́че млека̀, па́че ка́мене сапфі́ра ви́дъ премꙋ́дрости и҆́хъ¹³⁰⁷, и҆ па́че би́сера чи́ста начерта́нїе слове́съ и҆́хъ. Ꙗ҆дꙋ́щїи же сла́достное мїрска́гѡ ра́зꙋма, погибо́ша во и҆схо́дѣхъ дꙋ́ха. Пита́емїи на багрѧни́цѣ премꙋ́дростїю є҆́ллинскою, въ гно́й неразꙋ́мїѧ ѡ҆дѣ́ѧшасѧ. И҆ даны̀ бы́ша на мѧ̀ ᲂу҆́зы, и҆ свѧза́шасѧ и҆́ми: свѧза́сѧ бо ѧ҆зы́къ и҆́хъ въ горта́ни и҆́хъ, и҆ ѡ҆гло́хнꙋша: поне́же и҆́стиннꙋю премꙋ́дрость и҆ ра́зꙋмъ бж҃е́ственнагѡ ѿверго́ша дх҃а, трꙋда́ми се́й прїѧ́ти не восхотѣ́вше.

ѯ҃з. Бг҃ъ смирѧ́ѧй дре́во высо́кое, и҆ возносѧ́й дре́во смире́нное, и҆ и҆зсꙋша́ѧй дре́во зеле́ное, и҆ прораща́ѧй дре́во сꙋхо́е¹³⁰⁸: то́й є҆́сть даѧ́й ᲂу҆ста̀ ѿвє́рста посредѣ̀ со́нма мно́га рабѡ́мъ свои̑мъ, и҆ глаго́лъ благовѣствꙋ́ющымъ си́лою мно́гою. Ꙗ҆́кѡ премꙋ́дрость ра́зꙋмъ и҆ крѣ́пость тогѡ̀ є҆́сть, и҆ то́й и҆змѣнѧ́етъ ꙗ҆́коже времена̀ и҆ лѣ̑та, та́кѡ и҆ дꙋ́шы и҆́щꙋщыѧ и҆ жела́ющыѧ є҆го̀. Поставлѧ́етъ над̾ страстьмѝ царѝ, и҆ преставлѧ́етъ ѿ живота̀ въ живо́тъ, даѧ̀ премꙋ́дрость премꙋ̑дрымъ дꙋ́хомъ, и҆ мꙋ́дрость вѣ́дꙋщымъ ра́зꙋмъ. То́й ѿкрыва́етъ глꙋбо́ки и҆ сокровє́нны и҆спытꙋ́ющымъ глꙋбины̑ бж҃їѧ, и҆ вѣ́дѣти дае́тъ тѣ́мъ, ꙗ҆̀же во тьмѣ̀ гада́нїй: ꙗ҆́кѡ свѣ́тъ премꙋ́дрости и҆ ра́зꙋма съ ни́мъ є҆́сть, и҆ є҆мꙋ́же хо́щетъ, дае́тъ є҆го̀.

ѯ҃и. Всѧ́комꙋ по терпѣ́нїю дѣ́лающемꙋ за́пѡвѣди¹³⁰⁹ по внѣ́шнемꙋ и҆ внꙋ́треннемꙋ человѣ́кꙋ, и҆ къ є҆ди́ной взира́ющемꙋ сла́вѣ бж҃їей, че́сть дае́тсѧ ра́зꙋма небе́снагѡ, ми́ръ дꙋшѝ и҆ нетлѣ́нїе, ꙗ҆́кѡ не слы́шателю, но творцꙋ̀ зако́на благода́ти. Є҆гѡ́же и҆ ра́зꙋмъ свидѣ́тельствованъ сꙋ́щъ ѿ дѣ́лъ не безче́ствꙋетъ бг҃ъ: но спрославлѧ́етъ со словесы̀ ра́зꙋма, премꙋ́дростїю є҆гѡ̀ просїѧ́вшихъ въ це́ркви вѣ́рныхъ: поне́же на лица̀ зрѣ́нїѧ нѣ́сть ᲂу҆ негѡ̀: а҆ и҆́же по рве́нїю подвиза́ющемꙋсѧ, и҆ противлѧ́ющемꙋсѧ ᲂу҆́бѡ словесє́мъ води́мымъ дх҃омъ, повинꙋ́ющемꙋсѧ же своемꙋ̀ ра́зꙋмꙋ, и҆ прельсти́тєльнымъ словесе́мъ ѡ҆блага́емыхъ ѡ҆́бразомъ є҆ди́нѣмъ благоче́стїѧ, и҆ води́мыхъ славолюби́вымъ и҆ сластолюби́вымъ дꙋ́хомъ: ско́рбь и҆ тѣснота̀ дае́тсѧ, за́висть и҆ ꙗ҆́рость и҆ гнѣ́въ. Ны́нѣ ᲂу҆́бѡ въ возме́здїе пре́лести є҆гѡ̀, наконе́цъ же въ порица́нїе, междꙋ̀ собо́ю ѡ҆сꙋжда́ющымъ и҆лѝ ѿвѣща́ющымъ є҆гѡ̀ помыслѡ́мъ, въ де́нь, во́ньже сꙋди́ти и҆́мать бг҃ъ та̑йнаѧ человѣ́кѡмъ, и҆ возда́стъ комꙋ́ждо по дѣлѡ́мъ є҆гѡ̀¹³¹⁰.

ѯ҃ѳ. Ꙗ҆́коже нѣ́сть і҆ꙋде́й и҆́же ꙗ҆́вѣ, по ре́кшемꙋ, ни є҆́же ꙗ҆́вѣ во пло́ти ѡ҆брѣ́занїе: но є҆́же въ та́йнѣ і҆ꙋде́й, и҆ ѡ҆брѣ́занїе се́рдца дꙋ́хомъ, а҆ не пи́сменемъ: та́кѡ нижѐ соверше́нъ є҆́сть мꙋ́жъ ра́зꙋмомъ и҆ премꙋ́дростїю, и҆́же ꙗ҆вле́ннымъ то́чїю и҆ глаго́лемымъ сло́вомъ є҆́сть си́ленъ¹³¹¹. Нижѐ тщали́въ соверше́ннѣ, и҆́же въ тѣле́снѣмъ и҆ ꙗ҆вле́ннѣмъ є҆́сть ѡ҆бꙋче́нїи трꙋдѡ́въ: но и҆́же въ та́йнѣмъ и҆ ᲂу҆́мнѣмъ дѣ́ланїи є҆́сть тщали́въ, и҆ и҆́же ѿ чи́ста и҆ бла́га се́рдца дх҃омъ бг҃ꙋ глаго́лѧй, а҆ не пи́смены є҆́сть премꙋ́дръ въ ра́зꙋмѣ и҆ соверше́нъ: є҆мꙋ́же и҆ похвала̀ не ѿ человѣ̑къ, но ѿ бг҃а. Ꙗ҆́кѡ не вѣ́домꙋ ᲂу҆́бѡ, и҆лѝ и҆ зави́димꙋ человѣ́ки, є҆ди́номꙋ же бг҃ꙋ, и҆ дви́жимымъ тѣ́мже дх҃омъ, люби́мꙋ же и҆ зна́емꙋ.

ѻ҃. А҆́ще ѿ дѣ́лъ зако́на не ѡ҆правди́тсѧ всѧ́ка пло́ть пред̾ бг҃омъ¹³¹², по ре́кшемꙋ: кто̀ ѿ пѡ́двигъ и҆ трꙋдѡ́въ ѡ҆бꙋче́нїѧ то́чїю соверше́нъ бꙋ́детъ пред̾ бг҃омъ; дѣѧ́нїемъ бо въ навыкнове́нїе добродѣ́тели прихо́димъ, и҆ преста́ти твори́мъ дѣ́йствꙋ страсте́й: а҆ не ᲂу҆́бѡ и҆ соверше́ни быва́емъ є҆ди́нѣмъ тѣ́мъ во и҆сполне́нїи хрⷭ҇то́вѣ. Что̀ ᲂу҆́бѡ є҆́сть возводѧ́щее ны̀ въ соверше́нство; Взало́гственнаѧ къ бг҃ꙋ вѣ́ра, ꙗ҆́же є҆́сть ᲂу҆пова́емыхъ и҆звѣще́нїе¹³¹³, є҆́юже а҆́вель мно́жайшꙋю же́ртвꙋ па́че ка́їна принесѐ бг҃ꙋ, и҆ свидѣ́тельствованъ бы́сть бы́ти пра́ведникъ. И҆ а҆враа́мъ зово́мъ послꙋ́ша и҆зы́ти, и҆ прїитѝ на зе́млю ѡ҆бѣтова́нїѧ. Сїѧ̀ возво́дитъ вои́стиннꙋ тща́щихсѧ во ᲂу҆пова̑нїѧ вели̑ка высо́кихъ бж҃їихъ дарѡ́въ, и҆ ѿѻнꙋ́дꙋ въ ра́зꙋмъ сꙋ́щихъ, и҆ дае́тъ и҆̀мъ сокрѡ́вища неистощи̑ма въ се́рдце дꙋхѡ́внаѧ во є҆́же и҆зноси́ти ѿѻнꙋ́дꙋ нѡ́ваѧ и҆ вє́тхаѧ та̑инства бж҃їѧ и҆ даѧ́ти тре́бꙋющымъ. Сїю̀ ᲂу҆́бѡ благополꙋчи́вый взы́де и҆ соверши́сѧ любо́вїю въ ра́зꙋмъ бж҃їй, и҆ вни́де въ поко́й є҆гѡ̀ почи́въ и҆ са́мъ ѿ всѣ́хъ дѣ́лъ свои́хъ, ꙗ҆́коже и҆ ѿ свои́хъ бг҃ъ.¹³¹⁴

ѻ҃а. А҆́ще проти́вльшымсѧ клѧ́лсѧ бг҃ъ дре́вле не вни́ти въ поко́й є҆гѡ̀, тѣ́мже нижѐ возмого́ша за невѣ́рствїе вни́ти: ка́кѡ ᲂу҆́бѡ нѣ́цыи є҆ди́нѣмъ ѡ҆бꙋче́нїемъ тѣле́снымъ без̾ вѣ́ры возмо́гꙋтъ вни́ти въ безстра́стїѧ поко́й, и҆ ра́зꙋма соверше́нство, внегда̀ мно́гихъ ви́димъ не возмо́гшихъ та́кѡ вни́ти, и҆ внꙋ́трь почи́ти ѿ всѣ́хъ трꙋдѡ́въ свои́хъ; Смотрѣ́ти ᲂу҆́бѡ комꙋ́ждо подоба́етъ, да не когда̀ є҆́сть въ не́мъ се́рдце лꙋка́во и҆спо́лнено невѣ́рїѧ, и҆ сегѡ̀ ра́ди лиша́етсѧ, во мно́зѣхъ трꙋдѣ́хъ сы́й, поко́ѧ и҆ соверше́нства є҆гѡ̀: є҆гѡ́же ра́ди и҆ при́снѡ дѣ́лы трꙋжда́етсѧ дѣ́ѧтельныѧ [добродѣ́тели] и҆ хлѣ́бъ болѣ́зни ꙗ҆́стъ, а҆́ще и҆ ѡ҆ста́влено є҆́сть и҆ є҆щѐ сꙋббѡ́тство є҆мꙋ̀, потща́тисѧ вни́ти вѣ́рою въ безстра́стїѧ поко́й, и҆ въ соверше́нство ра́зꙋма: да не въ ве́тхꙋю при́тчꙋ противле́нїѧ впаде́тъ, и҆ та̑ѧжде со дре́вле проти́вльшимисѧ постра́ждетъ.

ѻ҃в. Чꙋ́вствени сꙋ́ще, слове́сни же и҆ мы́слени, десѧти́нꙋ нѣ́кꙋю и҆ мы̀ ѿ себѐ до́лжни є҆смы̀ приноси́ти бг҃ꙋ. И҆ ꙗ҆́коже ᲂу҆́бѡ чꙋ́вственни, до́брѣ чꙋ́ствовати чꙋ́вствєнныѧ вє́щи, и҆ добро́тою таковы́хъ востека́ти, и҆ возводи́ти си́хъ непогрѣ́шный ра́зꙋмъ къ содѣ́телю. А҆ ꙗ҆́коже слове́сни, бла́го глаго́лати ѡ҆ бж҃е́ственныхъ и҆ человѣ́ческихъ ве́щехъ. А҆ ꙗ҆́коже мы́слени: непогрѣ́шнѡ разꙋмѣ́ти ѡ҆ бз҃ѣ, ѡ҆ жи́зни вѣ́чнѣй, ѡ҆ небе́снѣмъ ца́рствѣ, и҆ ѡ҆ сокрове́нныхъ въ не́мъ та́инствахъ дх҃а. Да и҆ є҆́же чꙋ́вствовати, и҆ є҆́же глаго́лати, и҆ є҆́же разꙋмѣ́ти здра́вѡ и҆ непоро́чнѡ, по бз҃ѣ и҆стѧ́жетсѧ, ꙗ҆́же є҆́сть и҆́стинна вои́стиннꙋ и҆ бж҃е́ственна мѣ́ра, и҆ свѧще́нно бг҃ови приноше́нїе.

ѻ҃г. Десѧти́на вои́стиннꙋ є҆́сть къ бг҃ꙋ, дꙋше́внаѧ па́сха: си́рѣчь прише́ствїе всѧ́кагѡ встра́ственна навыкнове́нїѧ, и҆ всѧ́кагѡ безслове́снагѡ чꙋ́вства. Въ не́йже жре́тсѧ ᲂу҆́бѡ сло́во, видѣ́нїемъ сꙋ́щихъ: ꙗ҆́стсѧ же то́жде въ хлѣ́бѣ ра́зꙋма, и҆ пїе́тсѧ честна́ѧ є҆гѡ̀ кро́вь въ ча́ши неизрече́нныѧ премꙋ́дрости. Сїю̀ ᲂу҆́бѡ ꙗ҆́дшїи и҆ па́сховствовавый па́схꙋ, пожрѐ себѣ̀ а҆́гнца, взе́млющаго грѣ́хъ мі́ра. И҆ ктомꙋ̀ не ᲂу҆́мретъ, но, по гла́сꙋ гдⷭ҇ню, жи́въ бꙋ́детъ во вѣ́къ.

ѻ҃д. Воста́вый ѿ ме́ртвыхъ дѣ́лъ, со хрⷭ҇то́мъ воскре́се. А҆́ще же со хрⷭ҇то́мъ воскре́се ра́зꙋмомъ, хрⷭ҇то́съ же ктомꙋ̀ не ᲂу҆мира́етъ, нижѐ тѣ́мъ сме́рть неразꙋ́мїѧ ѡ҆блада́ти и҆́мать¹³¹⁵. Є҆́же бо ᲂу҆́мре дре́вле грѣхо́мъ, предви́гнꙋвсѧ ѿ є҆́же по є҆стествꙋ̀ движе́нїѧ, ᲂу҆́мре є҆ди́ною: а҆ є҆́же ны́нѣ живе́тъ, живе́тъ бг҃ови свобо́дою ст҃а́гѡ дх҃а, воздви́гшагѡ є҆го̀ ѿ ме́ртвыхъ дѣ́лъ грѣха̀, ꙗ҆́коже не ктомꙋ̀ живе́тъ то́й пло́ти и҆ мі́рови, ᲂу҆мертви́всѧ ᲂу҆десє́мъ тѣ́ла своегѡ̀, и҆ веще́мъ житїѧ̑ сегѡ̀: но живе́тъ въ не́мъ хрⷭ҇то́съ, ꙗ҆́кѡ под̾ благода́тїю бы́вшемъ дх҃а ст҃а, и҆ не сꙋ́щемъ под̾ зако́номъ пло́ти: ѻ҆рꙋ̑жїѧ пра́вды ᲂу҆́ды своѧ̑ ꙗ҆́вѣ ꙗ҆́кѡ приносѧ́щемъ бг҃ꙋ и҆ ѻ҆ц҃ꙋ̀.

ѻ҃є. И҆́же ѿ рабо́ты страсте́й свободи́вый ᲂу҆́ды своѧ̑, и҆ рабо́тѣ пра́вды предста́вивый ѧ҆̀, ко ѡ҆свѧще́нїю дх҃а ст҃а прибли́жисѧ, вы́шше зако́на пло́ти бы́въ: и҆ ктомꙋ̀ грѣ́хъ не и҆́мать ѡ҆блада́ти и҆́мъ, въ свобо́дѣ и҆ зако́нѣ пребыва́ющимъ дх҃а. Не бо̀ ꙗ҆́коже кончи̑ны рабо́ты страсте́й, та́кѡ и҆ кончи̑ны рабо́ты пра́вды: занѐ ѻ҆́ны ᲂу҆́бѡ въ мы́сленнꙋ поги́бель ѡ҆быко́ша ѡ҆кончава́тисѧ дꙋшѝ: сїѧ̑ же въ жи́знь вѣ́чнꙋ скончава́ютсѧ сокрове́ннꙋю во хрⷭ҇тѣ̀ і҆и҃сѣ гдⷭ҇ѣ на́шемъ¹³¹⁶.

ѻ҃ѕ. Зако́нъ пло́ти, во є҆ли́ко вре́мѧ живе́тъ человѣ́къ пло́тски, ѡ҆блада́етъ над̾ ни́мъ: а҆́ще же ᲂу҆́мретъ и҆ ᲂу҆мертви́тсѧ мі́рови, разрѣша́етсѧ ѿ зако́на є҆ѧ̀. и҆́накѡ же ᲂу҆мертви́тисѧ мі́рови, нѣ́сть возмо́жно, а҆́ще не ᲂу҆десє́мъ ᲂу҆мертви́мсѧ тѣ́ла. Оу҆мерщвлѧ́емсѧ же си̑мъ, є҆гда̀ прича̑стницы ст҃а́гѡ дх҃а бꙋ́демъ. Дх҃а же ст҃а́гѡ тогда̀ бы́ти познава́емсѧ прича̑стницы, є҆гда̀ плоды̀ достѡ́йны дꙋ́ха прино́симъ бг҃ови: любо́вь къ бг҃ꙋ ѿ всеѧ̀ дꙋшѝ, и҆ къ бли́жнемꙋ ѿ завѣща́нїѧ, ра́дость се́рдца ѿ чи́стыѧ со́вѣсти, ми́ръ дꙋшѝ ѿ безстра́стїѧ и҆ смире́нїѧ. Милосе́рдїе по́мыслѡвъ ᲂу҆ма̀, долготерпѣ́нїе въ ско́рбехъ и҆ и҆скꙋше́нїихъ, бла́гость во ᲂу҆краше́нїи нра́вѡвъ, вѣ́рꙋ и҆звѣще́ннꙋ къ бг҃ꙋ, и҆ несꙋмнѧ́щꙋсѧ ѡ҆ чесо́мъ, кро́тость ѿ смиренномꙋ́дрїѧ и҆ ᲂу҆миле́нїѧ, и҆ ѡ҆бдержи́тельно воздержа́нїе чꙋ́вствъ. Є҆гда̀ та́кѡ плодопринесе́мъ бг҃ови, внѣ̀ зако́на є҆смы̀ пло́ти. И҆ не ктомꙋ̀ на ны̀ бꙋ́детъ зако́нъ мꙋ́чащъ ны̀ за плоды̀, и҆̀хже є҆щѐ живꙋ́ще пло́ти, принесо́хомъ сме́рти: ᲂу҆праздни́хомбосѧ ѿ зако́на є҆ѧ̀, ꙗ҆́кѡ ѿ ме́ртвыхъ дѣ́лъ воскре́снꙋвше со хрⷭ҇то́мъ свобо́дою дꙋ́ха.

ѻ҃з. Нача́токъ дꙋ́ха па́ки бытїе́мъ ба́ни и҆мꙋ́щїи и҆ соблю́дшїи то́й неꙋгаси́мь, ті́и тѧгото́ю пло́ти ѡ҆тѧгча́еми, са́ми въ себѣ̀ воздыха́ютъ, всыновле́нїѧ и҆сполне́нїѧ ᲂу҆тѣ́шителева ча́юще, да и҆збавле́нїе своемꙋ̀ и҆́хъ тѣ́лꙋ ѿ рабо́ты и҆стлѣ́нїѧ ᲂу҆ви́дѧтъ¹³¹⁷. Спосо́бствꙋетъ бо тѣ́мъ въ є҆сте́ственныхъ и҆́хъ не́мощехъ дꙋ́хъ, и҆ хода́тайствꙋетъ ѡ҆ ни́хъ воздыха́нїи неизглаго́ланными: занѐ по бз҃ѣ є҆́сть мꙋдрова́нїе и҆́хъ, и҆ ᲂу҆пова́нїе и҆́хъ ѿкрове́нїе ча́етъ ᲂу҆ви́дѣти въ ме́ртвеннѣй свое́й и҆́хъ пло́ти сынѡ́въ бж҃їихъ: є҆́же є҆́сть животво́рнаѧ і҆и҃сова ме́ртвость. Да сы́нове бж҃їи ꙗ҆́кѡ дх҃омъ ст҃ы́мъ води́ми бꙋ́дꙋтъ и҆ ті́и, и҆ свободѧ́тсѧ ѿ рабо́ты пло́ти, и҆ дости́гнꙋтъ въ свобо́дꙋ сла́вы ча̑дъ бж҃їихъ: и҆̀мже ꙗ҆́кѡ лю́бѧщымъ бг҃а, всѧ̑ поспѣшествꙋ́ютъ во благо́е.

ѻ҃и. Дꙋхо́внѣ постиза́емомꙋ бж҃е́ственномꙋ писа́нїю, и҆ дꙋхѡ́внымъ ѿкрыва́ємымъ ꙗ҆̀же въ не́мъ сокро́вищамъ дх҃омъ ст҃ы́мъ: не мо́жетъ дꙋше́венъ человѣ́къ ѿкрове́нїе си́хъ прїѧ́ти мно́жае послѣ́дованїѧ свои́хъ пѡ́мыслъ¹³¹⁸, не прїе́млѧ и҆́но что̀ разꙋмѣ́ти, и҆лѝ ᲂу҆слы́шати ѿ и҆но́гѡ глаго́лемо. Ниже́ бо и҆́мать дх҃а бж҃їѧ въ себѣ̀ и҆спытꙋ́ющагѡ глꙋбины̑ бж҃їѧ, и҆ вѣ́дꙋщагѡ бж҃їѧ: но дꙋ́ха мі́ра, (сегѡ̀) веще́ственнагѡ рве́нїѧ и҆ за́висти по́лнагѡ, при́ же и҆ ра́спри и҆спо́лненнагѡ: є҆гѡ́же ра́ди и҆ ю҆ро́дство є҆мꙋ̀ є҆́сть, є҆́же ра́зꙋмъ и҆спы́товати, и҆ ᲂу҆́мъ и҆зслѣ́довати пи́сьмене. Разꙋмѣ́ти же не могі́й, ꙗ҆́кѡ дꙋхо́внѣ востѧзꙋ́ютсѧ всѧ̑ ꙗ҆̀же бж҃е́ственнагѡ писа́нїѧ: проти́вꙋ бж҃е́ствєннымъ и҆ человѣ́чєскимъ веще́мъ, рꙋга́етсѧ сразсꙋжда́ющымъ сїѧ̑ дꙋхо́внѣ, и҆ не дꙋхѡ́вны, нижѐ бж҃е́ственнымъ дх҃омъ води́мы, но возводи́тєльны таковы́хъ нарица́ѧ. Є҆ли́кѡ є҆мꙋ̀ мо́щно развраща́ѧ и҆ низвраща́ѧ, ꙗ҆́коже дима́съ ѻ҆́нъ словеса̀ и҆́хъ и҆ бж҃е́ствєннаѧ разꙋмѣ̑нїѧ. Дꙋхо́вный же не та́кѡ: но востѧзꙋ́етъ ᲂу҆́бѡ всѧ̑, бж҃е́ственнымъ дѣ́йствꙋемь дх҃омъ, а҆ са́мъ то́й ни ѿ є҆ди́нагѡ востѧза́тисѧ мо́жетъ: поне́же ᲂу҆́мъ є҆́сть въ не́мъ хрⷭ҇то́въ, є҆гѡ́же никто́же и҆з̾ѧсни́ти возмо́жетъ.

ѻ҃ѳ. Ѻ҆гне́мъ ѿкрыва́ющꙋсѧ послѣ́днемꙋ дню̀, и҆ ѻ҆гне́мъ тогда̀ и҆скꙋша́емꙋ когѡ́ждо дѣѧ́нїю¹³¹⁹, глаго́летъ па́ѵелъ ꙗ҆́вѣ, ꙗ҆́кѡ є҆гѡ́же дѣ́ло нетлѣ́ннагѡ сꙋщества̀ є҆́сть, є҆́же себѣ̀ ко зда́нїю внꙋ́трь ѿложѝ: пребꙋ́детъ посредѣ̀ ѻ҆гнѧ̀ нетлѣ́нно, и҆ не то́чїю не сгори́тъ, но и҆ просвѣти́тсѧ, и҆ ма́лагѡ не́гли ѡ҆чища́емо всеконе́чнѣ тимѣ́нїѧ. А҆ є҆гѡ́же дѣ́ло тлѣ́емагѡ вещества̀ є҆́сть, є҆́же себѣ̀ во вре́мѧ свѧза̀: возже́гшосѧ сгори́тъ, и҆ тща̀ того̀ посредѣ̀ ѻ҆гнѧ̀ ѡ҆ста́витъ. Дѣ́ло же нетлѣ́нно и҆ пребыва́ющо є҆́сть: сле́зы покаѧ́нїѧ, ми́лостынѧ, милосе́рдїе, моли́тва, смире́нїе, вѣ́ра, наде́жда, любы̀, и҆ что́либо и҆́но ра́зꙋмомъ благоче́стїѧ содѣва́етсѧ: ꙗ҆̀же и҆ живꙋ́щꙋ человѣ́кꙋ вкꙋ́пѣ зи́ждꙋтсѧ во хра́мъ бж҃їй, и҆ ᲂу҆мира́ющꙋ соѿхо́дѧтъ, и҆ спребыва́ютъ нетлѣ̑нна во вѣ́ки. Ѻ҆гне́мъ же ѻ҆́нѣмъ и҆стлѣва́емое дѣ́ло, ꙗ҆́вственно всѣ̑мъ є҆́сть: сластолю́бїе, славолю́бїе, сребролю́бїе, не́нависть, за́висть, татьба̀, пїѧ́нство, досажде́нїе, ѡ҆сꙋжде́нїе, и҆ ко́елибо ѕло̀ тѣ́ломъ по по́хоти и҆лѝ ꙗ҆́рости дѣ́йствꙋетсѧ. Сїѧ̑ и҆ живꙋ́щꙋ человѣ́кꙋ срастлѣва́ютсѧ, возжиза́ющꙋсѧ ѻ҆гне́мъ по́хоти, и҆ ѿторга́ющꙋсѧ тѣ́ла соѡхо́дѧтъ, не спребыва́ютъ же: но погꙋ́бльши дѣ́лателѧ своего̀, посредѣ̀ ѻ҆гнѧ̀ ѡ҆ставлѧ́ютъ во вѣ́ки вѣкѡ́въ безсме́ртнѡ мꙋ́чима.

п҃. Позна́нїе бг҃а, є҆́же позна́нꙋ бы́ти ѿ бг҃а, зна́менаетъ созда́вшемꙋсѧ на се́мъ (позна́нїи) смиренномꙋ́дрїемъ и҆ моли́твою, и҆ ра́зꙋмомъ нело́жнымъ ѡ҆богатѣ́ти ѿ бг҃а вышеесте́ственныхъ є҆гѡ̀ та̑инъ¹³²⁰. А҆́ще же напыще́нїе ви́дитсѧ въ не́мъ, не созда́сѧ си́ми на то́мъ, но дꙋ́хомъ мі́ра сегѡ̀ веще́ственнымъ во́дитсѧ: сегѡ̀ ра́ди и҆ вѣ́дѣти что̀ мни́тсѧ таковы́й, ничто́же вѣ́дый ѿ бж҃е́ственныхъ веще́й, ꙗ҆́коже вѣ́дѣти подоба́етъ. Бг҃а же любѧ́й, и҆ ничто́же вмѣнѧ́ѧй предпочита́тельнѣйше па́че любвѐ є҆гѡ̀, и҆ бли́жнѧгѡ ѻ҆́нъ ᲂу҆вѣ́дѣ и҆ глꙋбины̑ бж҃їѧ, и҆ та̑йны ца́рствїѧ є҆гѡ̀, ꙗ҆́коже подоба́етъ вѣ́дѣти бж҃е́ственнымъ дви́жимомꙋ дх҃омъ, и҆ позна́нъ бы́сть ѿ бг҃а дѣ́латель и҆́стиненъ раѧ̀ це́ркве є҆гѡ̀, и҆́же дѣ́лаетъ любо́вїю во́лю бж҃їю: ѡ҆браща́ѧ си́рѣчь дꙋ́шы, и҆ досто́йныхъ и҆зводѧ̀ ѿ недосто́йныхъ сло́вомъ да́ннымъ є҆мꙋ̀ дх҃омъ ст҃ы́мъ, и҆ храни́тъ дѣ́ло є҆гѡ̀ смиренномꙋ́дрїемъ и҆ ᲂу҆миле́нїемъ некра́домо.

п҃а. Всѝ во хрⷭ҇та̀ крести́хомсѧ водо́ю и҆ дх҃омъ ст҃ы́мъ, и҆ всѝ то́жде бра́шно дꙋхо́вное ꙗ҆́мы, и҆ всѝ то́жде пи́во дꙋхо́вное пїе́мъ, сїѧ̑ же сꙋ́ть хрⷭ҇то́съ¹³²¹. Но не во мно́жайшихъ на́съ благоволи́тъ бг҃ъ. Мно́зи бо ѿ вѣ́рныхъ и҆ тщали́выхъ мно́гими трꙋды̑ и҆́ночества и҆ ѡ҆бꙋче́нїѧ тѣле́снагѡ своѧ̑ ᲂу҆дрꙋчи́ша и҆ ᲂу҆тончи́ша тѣлеса̀, но за є҆́же не и҆мѣ́ти тѣ̑мъ ᲂу҆миле́нїѧ ѿ сокрꙋше́нны и҆ благолюби́вы мы́сли, и҆ милосе́рдїѧ ѿ любвѐ ко бли̑жнимъ и҆ къ себѣ̀: тщы̀ и҆сполне́нїѧ ст҃а́гѡ дх҃а ѡ҆ста́влени бы́ша, и҆ дале́че ѿ ра́зꙋма бж҃їѧ бы́ша, ложесна̀ мы́сли неплѡ́дна и҆мꙋ́ще, и҆ сло́во безсо́льно и҆ непросвѣще́нно.

п҃в. Не є҆́же взы́ти на сїна́йскꙋ дѣѧ́нїемъ го́рꙋ, є҆́сть и҆ско́мое назѡре́ємъ ѿ сло́ва¹³²². Ни є҆́же ѡ҆чи́ститисѧ пре́жде возше́ствїѧ, и҆ ри̑зы и҆спра́ти, и҆ не сни́тисѧ съ жено́ю: но и҆ є҆́же ᲂу҆зрѣ́ти, не за̑днѧѧ бж҃їѧ¹³²³, но са́маго бг҃а во сла́вѣ є҆гѡ̀, благоволѧ́ща ѡ҆ ни́хъ, и҆ скрижа̑ли си̑мъ даю́ща ра́зꙋма, и҆ посыла́юща и҆́хъ на созида́нїе люде́й свои́хъ.

п҃г. Не всѧ̑ слꙋги̑ своѧ̑ и҆ ᲂу҆ченикѝ сло́во въ сокрове́нныхъ и҆ бо́льшихъ та̑инъ свои́хъ ѿкрове́нїю съ собо́ю приво́дитъ: но нѣ̑кїѧ, и҆ є҆ли̑кимъ приложи́сѧ ᲂу҆́хо, и҆ ѿве́рзесѧ ѻ҆́ко видѣ́нїѧ, и҆ ѧ҆зы́къ то́щь ᲂу҆ѧсни́сѧ. При си́хъ є҆щѐ прїе́мь и҆ ѿлꙋчи́въ ѿ про́чїихъ. И҆ тѣ̑мъ та́кожде ᲂу҆ченикѡ́мъ сꙋ́щымъ, на ѳавѡ́рскꙋю видѣ́нїѧ восхо́дитъ го́рꙋ, и҆ преѡбразꙋ́етсѧ пред̾ ни́ми. Не ктомꙋ̀ тайноꙋча̀ и҆̀хъ тѣ́мъ ꙗ҆̀же ца́рствїѧ нбⷭ҇нагѡ: но показꙋ́ѧ тѣ́мъ бж҃ества̀ сла́вꙋ же и҆ свѣ́тлость. И҆ ѡ҆́бразꙋ ᲂу҆́бѡ житїѧ̀ и҆ сло́ва и҆́хъ сїѧ́ти ѿ себѐ дае́тъ, ꙗ҆́коже со́лнцꙋ посредѣ̀ це́ркве вѣ́рныхъ: разꙋмѣ̑нїѧ же и҆́хъ претворѧ́етъ въ бѣ́лость и҆ чистотꙋ̀ свѣ́та пресвѣ́тла. И҆ ᲂу҆́мъ сво́й въ ни́хъ влага́етъ, и҆ вноси́ти ѡ҆ставлѧ́етъ ᲂу҆сты̀ нѡ́ваѧ же и҆ вє́тхаѧ въ созида́нїе це́ркве є҆гѡ̀.

п҃д. Мно́зи ни̑вы своѧ̑ съ прилѣжа́нїемъ мно́гимъ воздѣ́лаша, и҆ сѣ́мѧ чи́сто въ нѧ̀ поверго́ша, тє́рнїѧ предпосѣ́кше, и҆ волчцы̀ ѻ҆гне́мъ покаѧ́нїѧ поже́гше: но за є҆́же не ѡ҆дожди́ти на нѧ̀ бж҃е́ственномꙋ дождю̀ дх҃а ст҃а ѿ ᲂу҆миле́нїѧ, ничто́же ѿѻнꙋ́дꙋ пожа́ша, сꙋ́шею бо и҆зсхо́ша, и҆ кла́съ многопло́дный не принесо́ша себѣ̀ ра́зꙋма бж҃їѧ. Тѣ́мже а҆́ще и҆ не гла́домъ сло́ва бж҃їѧ, но ᲂу҆бо́зи сꙋ́ще ра́зꙋма бж҃їѧ, и҆ тщѝ рꙋка́ми и҆здхо́ша: ма́лѣми нѣ́кими въ пропита́нїе ѿ пи́ра напꙋ́тьствовавше себѐ.

п҃є. Всѧ́къ и҆зносѧ́й словеса̀ по́льзы ᲂу҆сты̀ къ созида́нїю бли́жнѧгѡ, ѿ сокро́вищъ се́рдца благи́хъ и҆зно́ситъ ѧ҆̀, бла́гъ сы́й по гла́сꙋ гдⷭ҇ню. Но никто́же мо́жетъ въ бг҃осло́вїе дви́гнꙋтисѧ, и҆ рещѝ ꙗ҆̀же ѡ҆ бз҃ѣ, то́чїю дх҃омъ ст҃ы́мъ. И҆ никто́же дх҃омъ бж҃їимъ глаго́лѧ, глаго́летъ проти̑внаѧ вѣ́рѣ ꙗ҆́же во хрⷭ҇та̀: но є҆ли̑ка созида́ютъ, є҆ли̑ка къ бг҃ꙋ возво́дѧтъ и҆ црⷭ҇твїю є҆гѡ̀, и҆ во дре́внее благоро́дство па́ки ᲂу҆строѧ́ютъ, и҆ совокꙋплѧ́ютъ съ бг҃омъ ѿ спаса́ющихсѧ нѣ̑кїѧ. А҆́ще же и҆ ꙗ҆вле́нїе дх҃а комꙋ́ждо дае́тсѧ на по́льзꙋ: ᲂу҆̀бо сло́вомъ ѡ҆богатѣ́вый премꙋ́дрости бж҃їѧ, и҆ сло́во ра́зꙋма благополꙋчи́вый, бж҃е́ственнымъ дх҃омъ дѣ́йствꙋемь є҆́сть, и҆ до́мъ є҆́сть неистощава́емыхъ сокро́вищъ бж҃їихъ.

п҃ѕ. Неприча́стенъ бы́ти не ѡ҆ставлѧ́етсѧ благода́ти всѧ́къ во хрⷭ҇та̀ крести́выйсѧ, и҆ вѣ́ровавый: а҆́ще нѣ́гдѣ и҆зда́нна себѐ во всѧ́ко дѣ́йство сопроти́внагѡ предадѐ дꙋ́ха, и҆ вѣ́рꙋ дѣ́лы ѡ҆сквернѝ, и҆лѝ со ᲂу҆ны́нїемъ и҆ нерадѣ́нїемъ живе́тъ. Занѐ соблю́дшемꙋ нача́токъ ст҃а́гѡ дх҃а неꙋгаси́мь є҆гѡ́же креще́нїѧ прїѧ́тъ, и҆лѝ ᲂу҆гаше́нъ возже́гшемꙋ дѣ́лы пра́вды: не ктомꙋ̀ мо́щно є҆́сть и҆ и҆сполне́нїѧ тогѡ̀ свы́ше не прїѧ́ти. И҆ли́ бо до́брѣ подвиза́ѧсѧ, сло́ва премꙋ́дрости бж҃їѧ и҆сполне́нїемъ сподоблѧ́етсѧ дх҃а во ᲂу҆чи́тельство це́ркве: и҆лѝ сло́ва ра́зꙋма та́инъ бж҃їихъ, ѡ҆ то́мже дꙋ́сѣ¹³²⁴, во є҆́же вѣ́дѣти та̑йны црⷭ҇твїѧ нбⷭ҇нагѡ: и҆лѝ завѣща́тельныѧ вѣ́ры тѣ́мже дꙋ́хомъ, во є҆́же вѣ́ровати ѡ҆бѣтова́нїѧмъ бж҃їимъ, по а҆враа́мꙋ: и҆лѝ дарова̑нїѧ и҆сцѣле́нїй, ѡ҆ то́мже дс҃ѣ, во є҆́же и҆сцѣлѧ́ти недꙋ́ги: и҆лѝ дѣ̑йствїѧ си́лъ, во є҆́же бѣ́сы и҆згонѧ́ти, и҆ зна́мєнїѧ твори́ти: и҆лѝ прорѡ́чества, во є҆́же прозира́ти и҆ предглаго́лати бꙋ̑дꙋщаѧ: и҆лѝ разсꙋждє́нїѧ дꙋховѡ́мъ, во є҆́же разсꙋжда́ти, кто̀ дꙋ́хомъ бж҃їимъ глаго́летъ, и҆ кто̀ нѝ: и҆лѝ сказа̑нїѧ разли́чныхъ ꙗ҆зы́кѡвъ, и҆лѝ застꙋпле́нїе наси́лꙋемыхъ, и҆лѝ правлє́нїѧ ста́дъ бж҃їихъ и҆ люде́й: и҆лѝ любвѐ ꙗ҆́же ко всѣ̑мъ, и҆ дарова́нїй є҆ѧ̀, долготерпѣ́нїѧ, бла́гости, и҆ про́чїихъ вкꙋ́пѣ. А҆́ще же ѿ всѣ́хъ си́хъ неприча́стенъ ѡ҆брѧ́щетсѧ кто̀, не и҆́мамъ ка́кѡ рекꙋ̀ такова́го вѣ́рна, и҆лѝ ѿ числа̀ ѡ҆блече́нныхъ во хрⷭ҇та̀ бж҃е́ственнымъ креще́нїемъ.

п҃з. И҆мѣ́ѧй любо́вь, не вѣ́сть рве́нїѧ ра́ди за́висти, не превозно́ситсѧ ꙗ҆́кѡ превознесе́нъ и҆ проде́рзокъ, не горди́тсѧ на кого̀, не безчи́нствꙋетъ, неподѡ́бнаѧ проти́вꙋ бли́жнемꙋ творѧ̀, не и҆́щетъ свои́хъ сѝ поле́зныхъ то́чїю¹³²⁵, но и҆ ꙗ҆̀же бли́жнѧгѡ, не раздража́етсѧ ско́рѡ на ѡ҆печалѧ́ющыѧ, не мы́слитъ ѕла̀, а҆́ще постра́ждетъ когда̀ что̀ ѕло̀, не ра́дꙋетсѧ ѡ҆ непра́вдѣ дрꙋгѡ́въ, ра́дꙋетсѧ же ѡ҆ и҆́стинѣ пра́вды и҆́хъ, всѧ̑ лю́битъ находѧ̑щаѧ на́нь печа̑льнаѧ, всемꙋ̀ ѿ простоты̀, и҆ неѕло́бїѧ вѣ́рꙋ є҆́млетъ, всѧ̑ ѡ҆бѣтова̑ннаѧ на́мъ ѿ бг҃а ᲂу҆пова́етъ воспрїѧ́ти, всѧ̑ терпи́тъ ꙗ҆̀же и҆скꙋше́нїй, не воздаѧ̀ ѕла̀ за ѕло̀. И҆ николи́же ѿ любвѐ бли́жнѧгѡ ѿпада́етъ дѣ́латель любвѐ.

п҃и. Ѡ҆ сподо́бльшихсѧ ꙗ҆́же свы́ше благода́ти ст҃а́гѡ дх҃а разли́чными дарова́ньми, ѻ҆́ви ᲂу҆́бѡ сꙋ́ть є҆щѐ младе́нцы и҆ несоверше́нни въ бж҃е́ственныхъ дарова́нїихъ: ѻ҆́ви же, мꙋ́жи и҆ соверше́нни во и҆сполне́нїи си́хъ¹³²⁶. И҆ ѻ҆́ви ᲂу҆́бѡ къ дѣ́ланїю бж҃е́ственныхъ простира́ющесѧ за́повѣдей, и҆ возраста́ютъ въ си́хъ, и҆ и҆сполнѧ́ющесѧ бо́льшихъ дарѡ́въ дх҃а, ᲂу҆празднѧ́ютъ за̑днѧѧ младе́нчества дарова̑нїѧ: ѻ҆́ви же, вконе́цъ дости́гше любвѐ бж҃їѧ и҆ ра́зꙋма, престаю́тъ ѿ про́чїихъ ꙗ҆̀же ѿ ча́сти дарова́нїй: а҆́ще проро́чєствїѧ сꙋ́ть, ꙗ҆́коже сло́во глаго́летъ: а҆́ще разсꙋждє́нїѧ дꙋховѡ́мъ, а҆́ще застꙋплє́нїѧ, а҆́ще правлє́нїѧ, и҆ прѡ́чаѧ. Вше́дый бо въ черто́гъ любвѐ, не ктомꙋ̀ ѿ ча́сти разꙋмѣ́етъ бг҃а любо́вь, но лице́мъ къ лицꙋ̀ бесѣ́дꙋѧ съ ни́мъ, познава́етъ є҆го̀, ꙗ҆́коже и҆ то́й ѿ негѡ̀ позна́нъ бы́сть.

п҃ѳ. И҆́же ѿ ре́вности дꙋхо́вныхъ дарова́нїй любо́вь погна́вый и҆ постигі́й, не терпи́тъ є҆ди́номꙋ себѣ̀ глаго́лати моли́твою и҆ чте́нїемъ къ созида́нїю¹³²⁷. Глаго́лѧй бо ѧ҆зы́комъ то́чїю бг҃ꙋ мл҃твою и҆ пѣ́нїемъ, себѐ зи́ждетъ, ꙗ҆́коже глаго́летъ па́ѵелъ. Но и҆ проро́чествовати потомꙋ̀ тщи́тсѧ къ созида́нїю це́ркве бж҃їѧ: си́рѣчь ᲂу҆чи́ти бли́жнихъ дѣ́ланїю за́повѣдей бж҃їихъ, и҆ ка́кѡ подоба́етъ тща́тисѧ, во є҆́же благоꙋгоди́ти бг҃ꙋ. Чи́мъ бо и҆спо́льзовати нѣ̑кїѧ возмо́глъ предстоѧ́тель, себѣ̀ и҆ бг҃ꙋ є҆ди́номꙋ глаго́лѧй моли́твою и҆ пѣ́нїемъ при́снѡ а҆́ще не бꙋ́детъ глаго́лати и҆ сꙋ́щымъ под̾ собо́ю, и҆лѝ во ѿкрове́нїи дх҃а ст҃а, и҆лѝ въ ра́зꙋмѣ та̑инъ бж҃їихъ, и҆лѝ въ прозри́тельномъ дарова́нїи проро́чествїѧ, и҆лѝ въ наꙋче́нїи сло́ва премꙋ́дрости бж҃їѧ: кто́ бо ѿ послꙋ́шникѡвъ ᲂу҆гото́витсѧ на бра́нь проти́вꙋ страсте́й и҆ бѣсѡ́въ, а҆́ще не благознамена́тельно ᲂу҆чи́тельства сло́во да́стъ напи́саннѣ, и҆лѝ и҆ живы́мъ гла́сомъ. Вои́стиннꙋ а҆́ще не къ созида́нїю ста́да своегѡ̀ и҆́щетъ па́стырь, да и҆збы́точествꙋетъ сло́вомъ ᲂу҆чи́тельства и҆ ра́зꙋмомъ дꙋ́ха: не ктомꙋ̀ ревни́тель є҆́сть бж҃їихъ дарова́нїй. Ѿ є҆́же бо то́чїю моли́тисѧ и҆ пѣ́ти ѧ҆зы́комъ мно́гѡ: дх҃омъ, си́рѣчь дꙋше́ю молѧ́сѧ себѐ созида́етъ, а҆ ᲂу҆́мъ є҆гѡ̀ без̾ плода̀ є҆́сть: не проро́чествꙋѧ ᲂу҆чи́тельства сло́вомъ, и҆ не созида́ѧ це́рковь бж҃їю. А҆́ще же па́ѵелъ и҆́же па́че всѣ́хъ человѣ̑къ наипа́че моли́твою совокꙋплѧ́ѧсѧ бѣ̀ бг҃ови, пѧ́ть слове́съ плодови́тымъ ᲂу҆мо́мъ свои́мъ па́че восхотѣ̀ рещѝ въ це́ркви, да и҆ и҆́ны по́льзꙋетъ, не́жели тьмы̑ слове́съ пѣ́нїѧ ѧ҆зы́комъ: ᲂу҆̀бо заблꙋди́ша ѿ любвѐ над̾ и҆нѣ́ми нача́льствꙋющїи, и҆ пѣ́нїемъ є҆ди́нѣмъ со чте́нїемъ преда́вшїи па́стырское досто́инство.

ч҃. И҆́же є҆́же бы́ти да́вый на́мъ ѿ подлежа́ща вещества̀ и҆ ᲂу҆́мна сꙋщества̀, и҆ во є҆ди́но проти̑внаѧ є҆стество́мъ сама̑ съ собо́ю пресла́внѡ сочета́вый и҆ соста́вивый: и҆ бла́го бы́ти дадѐ сло́вомъ премꙋ́дрости своеѧ̀, и҆ сло́вомъ ра́зꙋма. Да ѻ҆́во ᲂу҆́бѡ, ᲂу҆вѣ́мы ра́зꙋмомъ дꙋ́ха, дарова̑ннаѧ на́мъ сокровє́ннаѧ ᲂу҆ негѡ̀ сокрѡ́вища црⷭ҇твїѧ нбⷭ҇нагѡ: ѻ҆́во же и҆ ска́жемъ бли̑жнимъ премꙋ́дростїю сло́ва, бла́гости є҆гѡ̀ бога́тство, и҆ блага̑ѧ вѣ́чныѧ жи́зни, ꙗ҆̀же ᲂу҆гото́ва въ наслажде́нїе лю́бѧщымъ є҆го̀.

ч҃а. И҆́же вы́шше преще́нїй и҆ ѡ҆бѣтова́нїй трїе́хъ бы́вый зако́нѡвъ, въ неподлежа́щꙋю зако́нꙋ жи́знь вни́де: зако́нъ бы́въ це́ркве, а҆ не нача́льствꙋемь ѿ зако́на. А҆́ще же свобо́дна є҆́сть неподлежа́щаѧ зако́нꙋ жи́знь, ᲂу҆̀бо всѧ́кїѧ є҆сте́ственныѧ нꙋ́жды и҆ превраще́нїѧ превы́шше є҆́сть, и҆ вше́дый въ ню̀ свобо́денъ бы́сть: ꙗ҆́кѡ внѣ̀ пло́ти и҆ ѻ҆́гнь бы́въ прича́стїемъ дꙋ́ха, по всемꙋ̀ и҆ са́мъ съ превы́шшимъ всѧ́кагѡ є҆стества̀ соедини́сѧ хрⷭ҇то́мъ, ᲂу҆праздни́вшꙋсѧ въ не́мъ томꙋ̀ є҆́же ѿ ча́сти.

ч҃в. И҆́же пе́рвагѡ ᲂу҆ма̀ ра́зꙋмъ прїе́мый, и҆́же є҆́сть всѣ́хъ нача́ло и҆ коне́цъ, и҆ безпредѣ́ленъ по себѣ̀, и҆ и҆ны́хъ всѣ́хъ є҆́сть внꙋ́трь и҆ внѣ̀: вѣ́сть и҆ є҆ди́нъ ᲂу҆единѧ́тисѧ, и҆ посредѣ̀ є҆ди́ныхъ ᲂу҆единѧ́тисѧ. Ꙗ҆́кѡ ни є҆́же є҆ди́нꙋ бы́ти соверше́нства тщетꙋ̀ терпѣ́ти: ни є҆́же со мно́зѣми ᲂу҆едине́нїѧ. Но бы́ти томꙋ́жде вездѣ̀ и҆ во всѣ́хъ є҆ди́нꙋ: ꙗ҆́кѡ нача́лꙋ ᲂу҆́бѡ ко є҆́же ᲂу҆единѧ́тисѧ и҆нѣ̑мъ сꙋ́щꙋ движе́нїѧ: концꙋ́ же предлежа́щꙋ добродѣ́тели соверше́ннѣйшꙋ.

ч҃г. Неслїѧ́нное соедине́нїе и҆ совокꙋпле́нїе дꙋшѝ и҆ тѣ́ла согласꙋ́ющее въ себѣ̀, є҆ди́но дѣ́ло соверша́етъ, и҆лѝ вещества̀ и҆лѝ є҆стества̀. Несогласꙋ́ющо же, жела́нїе побѣ́ды воздви́жетъ междꙋꙋсо́бно, но сло́во прише́дшо и҆ ѻ҆́бласть прїе́мшо, рѣши́тъ ᲂу҆́бѡ а҆́бїе рве́нїе: и҆схода́тайствовавшо же согла́сїе, всѣ̀ дѣла̀ є҆стествꙋ̀ и҆ дꙋ́хови раздае́тъ.

ч҃д. Трїе́мъ сꙋ́щымъ въ на́съ госпо́дственнѣйшымъ, ѻ҆́во ᲂу҆́бѡ ѿ ни́хъ нача́льствꙋетъ, не нача́льствꙋемо же є҆́сть, ѻ҆́во же нача́льствꙋетъ, и҆ нача́льствꙋемо же є҆́сть: ѻ҆́во же не нача́льствꙋетъ, нача́льствꙋемо же є҆́сть. Є҆гда̀ ᲂу҆́бѡ нача́льствꙋющее под̾ и҆ны́мъ бꙋ́детъ ѿ нача́льствꙋемыхъ нача́льствомъ: рабо́тно є҆́же є҆стество́мъ свобо́дное сꙋ́щымъ є҆стество́мъ рабо́мъ зри́тсѧ, и҆ своегѡ̀ и҆зстꙋпа́етъ нача́льства же и҆ є҆стества̀, и҆ крамола̀ въ си́хъ вели́ка є҆́сть. Крамолѣ́ же таково́й въ си́хъ сꙋ́щей, не ᲂу҆̀ всѧ̑ покорє́на ви́димъ сло́вꙋ. Внегда́ же нача́льствꙋющее над̾ и҆нѣ́ми ѡ҆блада́ти бꙋ́детъ, и҆ под̾ свои́мъ нача́льствомъ и҆ влады́чествомъ води́ти бꙋ́детъ сїѧ̑: тогда̀ во є҆ди́но сте́кшасѧ разстоѧ̑щаѧсѧ и҆ є҆диногла̑сна бы́вша, ми́ръ и҆́мꙋтъ въ тѣ́хъ, ꙗ҆̀же ко бг҃ꙋ, и҆ всѣ̑мъ покори́вшымсѧ сло́вꙋ, предае́тсѧ ца́рство ѿ негѡ̀ бг҃ꙋ и҆ ѻ҆ц҃ꙋ̀.

ч҃є. Четы́ремъ нача́лѡмъ пе́рвѣйшихъ добродѣ́телей пѧтери́ца чꙋ́вствъ повинꙋ́вшисѧ, и҆ сохра́нши та̀ благопокоре́нїе ѿ четы́рехъ стїхі́й созда́нное є҆стество̀ тѣ́ла, несмꙋще́ннѡ двиза́тисѧ ѻ҆́крестъ ко́ла житїѧ̀ сотворѧ́етъ. Та́кѡ же дви́жимꙋ томꙋ̀, си́лы къ себѣ̀ не крамо́льствꙋютъ: но страда́тельной ча́сти жела́нїѧ и҆ ꙗ҆́рости со слове́сною совокꙋ́пльшейсѧ, воспрїе́мь є҆сте́ственнꙋю держа́вꙋ ᲂу҆́мъ, колесни́цꙋ ᲂу҆́бѡ себѣ̀ добродѣ́тели твори́тъ, си́рѣчь нача̑ла, престо́лъ же рабо́тнꙋю пѧтери́цꙋ. И҆ мꙋчи́тельнѣ ѡ҆блада́ющꙋю покори́въ пло́ть, четвероко́ненъ на небеса̀ восхища́емь взе́млетсѧ. И҆ цр҃ю̀ предста́въ вѣкѡ́въ, вѣнча́етсѧ побѣ́ды вѣнце́мъ, и҆ въ не́мъ ᲂу҆покоѧ́етъ всѐ тече́нїе своѐ.

ч҃ѕ. Совершє́ннымъ быва́ющымъ во вре́мѧ видѣ́нїѧ, и҆ на столпѣ́хъ ᲂу҆твержда́ющымсѧ дх҃а, ча́ша растворѧ́етсѧ, и҆ хлѣ́бъ ѿ ца́рскагѡ предлага́етсѧ всепи́ршества: престо́лъ во ᲂу҆покое́нїе, и҆ въ бога́тство сребро̀: и҆ сокро́вище би́серей и҆ ка́меней драги́хъ при две́рехъ ѡ҆брѣта́етсѧ, и҆ бога́тство тѣ̑мъ неисче́тно въ рꙋ́ки дае́тсѧ. Сїѧ̑ прозри́тельны мꙋ́жи дѣѧ́нїе соверши́вше, скорѣ́йшымъ сꙋ́щымъ на дѣла̀ пред̾ царе́мъ, а҆ не пред̾ мꙋ́жи лѣ́ностными предста́ти сотворѧ́етъ.

ч҃з. Ца́рствїе небе́сное здѣ́ ли ᲂу҆жѐ всѣ̑мъ дае́тсѧ тщали̑вымъ, и҆лѝ по разрѣше́нїи ѿ тѣ́ла; а҆́ще ᲂу҆́бѡ здѣ̀, то̀ побѣ́да є҆́сть непобори́ма, ра́дость неизглаго́ланна, и҆ восхо́дъ на́шъ къ раю̀ свобо́денъ: стои́тъ бо сы́й на бж҃е́ственныхъ несре́дственнѣ восто́цѣхъ. А҆́ще ли же по сме́рти и҆ разрѣше́нїи: взыска́ти подоба́етъ, без̾ стра́ха ли и҆схо́дъ ѻ҆́нъ быва́етъ, и҆ что̀ є҆́сть ца́рство нбⷭ҇ное и҆ ца́рство бж҃їе, и҆ ра́й, наꙋчи́мсѧ. И҆ чи́мъ ѿ є҆ди́нагѡ ра́знствꙋетъ дрꙋго́е, и҆ ко́е вре́мѧ си́хъ коегѡ́ждо, и҆ во ѻ҆бою́ ли быва́емъ, и҆ ка́кѡ, и҆ когда̀, и҆ по коли́цѣ вре́мени. И҆́же бо внꙋ́трь пе́рвагѡ дости́гїй, є҆щѐ жи́въ сы́й и҆ пло́ть носѧ̀, дрꙋги́мъ нѣ́сть погрѣши́лъ.

ч҃и. Вы́шнїй мі́ръ несоверше́нъ є҆щѐ сы́й, жде́тъ и҆сполне́нїѧ, во є҆́же прїѧ́ти своѐ ᲂу҆строе́нїе перворо́дными і҆и҃левыми зрѧ́щими бг҃а: ѿ востека́ющихъ бо въ ра́зꙋмъ бж҃їй и҆сполнѧ́емь соверша́етсѧ, и҆ соверше́нъ бы́въ, до́льный мі́ръ вѣ́рныхъ и҆ невѣ́рныхъ, ѡ҆предѣлѧ́ѧ кончи́ны, є҆ди́нъ въ себѣ̀ твори́тъ собо́ръ, ѡ҆предѣлѧ́ѧ комꙋ́ждо сво́й сте́пень, и҆ раздѣлѧ́ѧ є҆ди́но ѿ дрꙋги́хъ несобира́ємаѧ съ собо́ю. И҆ ꙗ҆̀же ᲂу҆́бѡ ѿ негѡ̀ и҆нѣ́хъ нача̑ла и҆ концы̀, веде́тъ къ себѣ̀, и҆ ꙗ҆́кѡ предѣ́лъ сы́й безпредѣ́ленъ ѡ҆предѣлѧ́етъ сїѧ̑: са́мъ же ѿ и҆но́гѡ нача́ла нижѐ во́дитсѧ, но нижѐ ѡ҆предѣлѧ́етсѧ ꙗ҆́кѡ носи́мь: сво́йственнѡ бо приснодви́жное и҆́мать. Ꙗ҆́кѡ нижѐ сопрѧ́татисѧ семꙋ̀ въ себѣ̀, нижѐ па́че свои́хъ предѣ̑лъ простира́тисѧ: но бы́ти про́чїихъ сꙋббѡ́тствꙋ и҆ поко́ю всѧ́кагѡ нача́ла и҆ движе́нїѧ.

ч҃ѳ. Девѧти́ца вы́шнихъ си́лъ, ꙗ҆́кѡ пѣснопѣ́вица и҆ пѣ́сней нача́льница сꙋ́щи, тро́йчески твори́тъ ликостоѧ́щїи чи́ны, и҆ тро́йчески трⷪ҇цѣ предстоѧ́щи, со стра́хомъ слꙋжа́щи привозно́ситъ пѣ́снь. Ѿ си́хъ, ѻ҆́вы ᲂу҆̀бо под̾ нача́ломъ и҆ всѣ́хъ вино́ю простира́ютсѧ, ѿ негѡ́же нача́льствꙋемы сꙋ́ть, є҆ли́цы бли́жни сꙋ́ть и҆ над̾ пѣ́снми нача́льствꙋюще: Престо́ли, херꙋві́ми, серафі́ми, сїѧ̑ и҆́менемъ, и҆̀мже сво́йственно є҆́сть, ѻ҆́гньственнаѧ премꙋ́дрость, и҆ ра́зꙋмъ небе́сныхъ, и҆ коне́цъ, бг҃олѣ́пнаѧ пѣ́снь: ге́лъ, по є҆вре́йскомꙋ гла́сꙋ. Ѻ҆́вы же посредѣ̀ си́хъ и҆ припослѣ́дствꙋющихъ чи́на ѻ҆́крестъ бг҃а стоѧ́тъ: вла̑сти, гдⷭ҇ьства и҆ си̑лы, и҆̀мже сво́йственно є҆́сть вели́кихъ веще́й ᲂу҆правлє́нїѧ, чꙋде́съ дѣ̑йства, и҆ зна́менїй чꙋдодѣ̑йствїѧ, и҆ коне́цъ, трист҃а́ѧ пѣ́снь: ст҃ъ, ст҃ъ, ст҃ъ! Ѻ҆́вы же къ на́мъ достиза́юще, превы́шше ᲂу҆́бѡ ѿ на́съ, ни́зши же сꙋ́ще го́рнихъ, ѻ҆́крестъ бг҃а стоѧ́тъ: нача̑ла, а҆рха́гг҃ли, а҆́гг҃ли, и҆̀мже сво́йственно є҆́сть слꙋжи́тельное въ слꙋ́жбахъ, и҆ коне́цъ, сщ҃е́ннаѧ пѣ́снь: а҆ллилꙋ́їа! Си̑мъ слове́сное человѣ́кѡвъ є҆стество̀ всѧ́кою добродѣ́телїю соверша́емо, и҆ всѧ́кимъ ра́зꙋмомъ и҆ премꙋ́дростїю возвыша́емо дх҃а и҆ бж҃е́ственнагѡ ѻ҆гнѧ̀, ᲂу҆своѧ́етсѧ бж҃е́ственными дарова́нїи, ꙗ҆́кѡ сво́йственное чистото́ю прїе́млющо всѣ́хъ. Занѐ ѻ҆́вымъ ᲂу҆̀бо, слꙋ́жбою и҆ слꙋже́нїемъ за́повѣдей бж҃їихъ: ѻ҆́вымъ же милосе́рдїемъ и҆ предста́тельствомъ є҆диноплеме́нныхъ, є҆ще́ же вели́кихъ и҆ бж҃е́ственныхъ веще́й строе́нїемъ и҆ дѣ́йствы дх҃а: ѻ҆́вымъ же ѻ҆́гньственною премꙋ́дростїю сло́ва и҆ ра́зꙋмомъ бж҃е́ственныхъ и҆ человѣ́ческихъ веще́й спрїѡбща́етсѧ: та́кѡ соверша́емо и҆ да́ры воздаю́що є҆сте́ствєнныѧ десѧти́цѣ бг҃ꙋ си́ми совокꙋплѧ́етсѧ, ꙗ҆́кѡ нача́токъ десѧти́ны то́й прине́сши ѿ себѐ.

р҃. Бг҃ъ є҆ди́ница и҆ трⷪ҇ца ѿ є҆ди́ницы начина́емь въ себѣ̀ а҆́ки десѧти́ца ѻ҆крꙋ́жнѣ ѡ҆ка́нчиваетсѧ. Се́й всѣ́хъ нача̑ла и҆ концы̀ внꙋ́трь и҆́мать: є҆́сть же всѣ́хъ внѣ̀, ꙗ҆́кѡ превы́шше сы́й всѣ́хъ. Сегѡ̀ внꙋ́трь бы́вый, внꙋ́трь словеса̀ и҆ ра́зꙋмъ сꙋ́щихъ прїѧ́тъ: и҆ внѣ̀ всѣ́хъ стоѧ̀, внꙋ́трь всѣ́хъ водворѧ́етсѧ, нача̑ла вѣ́дый и҆ концы̀ си́хъ, ꙗ҆́кѡ со ѻ҆ц҃е́мъ, сло́вомъ совокꙋпле́нїе ᲂу҆́мнѡ прїе́мый, и҆ соверше́нъ бы́въ дх҃омъ, самѣ́й всесоверше́ннѣй и҆ нераздѣ́льнѣй трⷪ҇цѣ и҆ є҆диносꙋ́щнѣй, во ѻ҆ц҃ѣ̀ и҆ сн҃ѣ и҆ ст҃ѣ́мъ дс҃ѣ покланѧ́емѣй, и҆ во є҆ди́номъ сла́вимѣй є҆стествѣ̀ и҆ ца́рствѣ и҆ си́лѣ бж҃ества̀ да бꙋ́детъ держа́ва во вѣ́ки, а҆ми́нь.

а҃. Всѧ́ко живо́тно, ѿ рожде́ннагѡ, лꙋ́чшимъ є҆сте́ственнымъ свои́мъ дѣ́йствомъ, и҆ поко́ѧ причаща́етсѧ, и҆ сла́дости ра́вныѧ, и҆ ѡ҆ се́мъ ра́дꙋетсѧ, и҆ пристра́ствꙋетъ си́хъ ра́ди. Тѣ́мже и҆ человѣ́къ, а҆́ки ᲂу҆́мъ и҆мы́й, и҆ то є҆́же помышлѧ́ти, є҆сте́ственнѣ живо́тъ: па́че ᲂу҆слажда́етсѧ, и҆ поко́ѧ въ прича́стїи быва́етъ и҆́стиннѣмъ, внегда̀ лꙋ̑чшаѧ помышлѧ́етъ, и҆ ꙗ҆̀же и҆лѝ блага̑ѧ хо́щетъ кто̀ глаго́лати, и҆лѝ дѡ́браѧ ѡ҆ себѣ̀. Є҆́же быва́етъ вои́стиннꙋ, бг҃а и҆мѣ́ѧ во ᲂу҆мѣ̀, и҆ добродѣ́тєли є҆гѡ̀ помышлѧ́ѧ кра́ю сꙋ́щꙋ и҆ па́че ᲂу҆ма̀ мы́сленномꙋ, и҆ кра́йнѣ лю́бѧщꙋю и҆ па́че ᲂу҆ма̀ человѣ́ка: кра́йнїѧ и҆ по́чести и҆ па́че ᲂу҆ма̀ блага̑ѧ и҆ дѡ́браѧ свои̑мъ сѝ ᲂу҆готовлѧ́етъ, и҆ сїѧ̑ вѣ́чнѣ наипа́че.

в҃. А҆́ще всѧ́ко рожде́нїе прїꙋподоблѧ́тисѧ твори́тъ ражда́ющемꙋ рожде́нное, ꙗ҆́коже речѐ гдⷭ҇ь: ꙗ҆́кѡ рожде́нное ѿ пло́ти пло́ть є҆́сть: и҆ рожде́нное ѿ дх҃а, дх҃ъ є҆́сть¹³²⁸. А҆́ще ᲂу҆́бѡ дх҃ъ є҆́сть рожде́нный ѿ дх҃а: ꙗ҆́вѣ, ꙗ҆́кѡ и҆ бг҃ъ бꙋ́детъ по ро́ждшемꙋ дх҃ꙋ. Поне́же и҆ бг҃ъ и҆́стиненъ є҆́сть дх҃ъ, ѿ негѡ́же по благода́ти роди́сѧ прича́стникъ дх҃а. А҆́ще таковы́й бг҃ъ є҆́сть и҆ зри́теленъ преѧвле́ннѡ мо́глъ бы бы́ти, влѣ́потꙋ. И҆́бо ѿ є҆́же зрѣ́ти бг҃ъ рече́сѧ бг҃ъ. Тѣ́мже ᲂу҆̀бо не зрѧ́й, и҆лѝ дꙋхо́внагѡ рожде́нїѧ и҆ прича́стїѧ не ᲂу҆̀ полꙋчѝ: и҆лѝ полꙋчи́въ є҆̀, смѣжава́етъ ѿ невѣ́жества зри́тельнꙋю свою̀ си́лꙋ, и҆ мы́сленныхъ ѻ҆́крестъ мы́сленнагѡ пра́вды со́лнца бж҃е́ственныхъ лꙋче́й ѿвраща́етсѧ ненака́заннѣ, и҆ зри́тельныѧ си́лы прича́стникъ бы́въ, дѣ́йствїѧ сеѧ̀ лиша́етсѧ ѻ҆каѧ́ннѣ, а҆́ще и҆ къ ст҃ы́ни горѣ̀ простира́етсѧ.

г҃. Всѧ̑ сꙋ̑щаѧ ѿ сотво́ршагѡ ѧ҆̀ по сло́вꙋ свое́ си прїѧ́ша движе́нїе, и҆ є҆сте́ственное. сво́йство: тѣ́мже послѣ́дованнѡ и҆ ᲂу҆́мъ. Но движе́нїе ᲂу҆ма̀ и҆́мать при́сное. При́сное же, безконе́чно є҆́сть и҆ безпредѣ́льно. Проти́вꙋ своемꙋ̀ ᲂу҆̀бо досто́инствꙋ и҆ є҆стествꙋ̀ вои́стиннꙋ є҆мꙋ̀ бꙋ́детъ, дви́жимꙋ коне́чнѡ и҆лѝ предѣ́льнѡ. Сїе́ же постра́ждетъ, а҆́ще въ коне́чныхъ двиза́лсѧ бы и҆ предѣ́льныхъ. Не бо̀ возмо́жно є҆́сть бы́ти ᲂу҆́бѡ ве́щи се́й коне́чнѣй и҆лѝ предѣ́льнѣй, движе́нїю же ᲂу҆ма̀ є҆́же къ не́й, и҆лѝ ѻ҆́крестъ є҆ѧ̀ происходи́ти въ безконе́чное. Тре́бꙋетъ же ᲂу҆̀бо приснодви́жное ᲂу҆ма̀ вои́стиннꙋ безконе́чнаѧ и҆ безпредѣ́льна чесогѡ̀, къ немꙋ́же по сло́вꙋ и҆ своѐ є҆гѡ̀ є҆стество̀ бы́ло бы двиза́ющосѧ. Но ᲂу҆̀бо безконе́чно и҆ вои́стиннꙋ безпредѣ́льно ничто́же є҆́сть кромѣ̀ бг҃а, є҆стество́мъ и҆ вои́стиннꙋ сꙋ́щагѡ є҆ди́на. Къ вои́стиннꙋ ᲂу҆̀бо безконе́чнꙋ є҆ди́номꙋ, си́рѣчь къ бг҃ꙋ горѣ̀ простре́тисѧ, и҆ взира́ти и҆ двиза́тисѧ ᲂу҆мꙋ̀ подоба́етъ: сїе́ бо вои́стиннꙋ є҆́сть є҆мꙋ̀ є҆стество̀.

д҃. Безконє́чна сꙋ́ть и҆ безпредѣ̑льна и҆ ꙗ҆̀же ѡ҆ бз҃ѣ зри̑маѧ, но ѻ҆ба́че нижѐ въ си́хъ соверше́ннѣ ра́доватисѧ мо́жетъ ᲂу҆́мъ, и҆ща̀ тогѡ̀, ѿ негѡ́же бы́сть. И҆́бо, поне́же ѡ҆ подо́бнѣмъ себѣ̀ ко́еждо є҆сте́ственнѣ ра́дꙋетсѧ, є҆ди́нъ сы́й ᲂу҆́мъ є҆стество́мъ, а҆́ще и҆ мнѡ́га сꙋ́ть помышлє́нїѧ, горѣ̀ простира́ѧсѧ, и҆ а҆́ки двиза́ѧсѧ къ бг҃ꙋ, є҆ди́номꙋ є҆стество́мъ, и҆ мнѡ́га дѣ́йствїемъ, невозмо́жно є҆́сть ра́доватисѧ всесоверше́ннѣ, пре́жде да́же въ є҆сте́ственнѣ безпредѣ́льномъ є҆ди́нымъ дх҃омъ не бꙋ́детъ, ѿ мно́гихъ а҆́ки преше́дъ, въ є҆ди́нѣмъ ᲂу҆̀бо ᲂу҆́мъ двиза́ѧсѧ бз҃ѣ, є҆сте́ственнѣ ра́доватисѧ мо́жетъ всесоверше́ннѣ, но ѻ҆ба́че ѿ сꙋ́щихъ ко́еждо, наипа́че ѡ҆ сво́йствѣ ра́дꙋетсѧ є҆сте́ственнѣмъ. Є҆сте́ственно ᲂу҆̀бо сво́йство є҆́сть ᲂу҆мꙋ̀, и҆ наипа́че, є҆́же въ само́мъ бз҃ѣ, про́стѣ и҆ безпредѣ́льнѣ є҆ди́нѣмъ, и҆ двиза́тисѧ и҆ горѣ̀ простира́тисѧ и҆ быва́ти и҆ ра́доватисѧ всесоверше́ннѡ.

є҃. Всѧ́ко какова́либо зда́нна движе́нїе, є҆ще́ же и҆ са́магѡ ᲂу҆ма̀ къ ста́тїю и҆ почи́тїю вои́стиннꙋ тщи́тсѧ и҆ взира́етъ, и҆ є҆́же ста́ти и҆ почи́ти ѿ негѡ̀, и҆ коне́цъ є҆́сть, и҆ по ра́вности поко́й зда́нномꙋ. Но ѻ҆ба́че ᲂу҆́мъ є҆ди́нъ сы́й ѿ зда́нныхъ, въ зда́нныхъ двиза́ѧсѧ, стоѧ́нїѧ и҆ почи́тїѧ причасти́тисѧ не мо́жетъ. (Зда́ннѣй бо ве́щи прили́чнѣ прїе́мшей коне́цъ и҆мѣ́ти, а҆́ки наче́ншейсѧ, приснодви́жное ᲂу҆ма̀ пра́веднѣ ѡ҆ста́лосѧ бы, и҆ послѣ́дованнѣ взыска́ло бы, гдѣ̀ двиза́тисѧ и҆́мать: и҆ ника́коже ѿню́дъ и҆мѣ́ти бꙋ́детъ, є҆́же престава́ти, и҆лѝ сво́й коне́цъ полꙋчи́ти, и҆лѝ приснодви́жное не бꙋ́детъ и҆мѣ́ти съ собо́ю по подлежа́щымъ, а҆́ще соѡб̾ѧ́тъ бꙋ́детъ ѡ҆предѣле́нными и҆ коне́цъ и҆мꙋ́щими, є҆́же дале́че є҆́сть є҆сте́ственнагѡ сво́йства ᲂу҆ма̀, преѧвле́ннѣ приснодви́жна сꙋ́ща.) Нѣ́сть ᲂу҆̀бо влѣ́потꙋ ѡ҆брѣстѝ є҆́же престава́ти, и҆лѝ ста́ти ᲂу҆мꙋ̀, въ зда́нныхъ си́рѣчь ѡ҆брѣта́ющꙋсѧ. Гдѣ̀ ᲂу҆̀бо возмо́глъ бы ᲂу҆́мъ ᲂу҆потреби́ти свое́ си сво́йство, є҆́же движе́нїемъ стоѧ́ти, си́рѣчь и҆ та́кѡ безмо́лвствовати, и҆ ми́ръ и҆мѣ́ти, и҆ поко́ѧ прїѧ́ти чꙋ́вство ᲂу҆твержде́ннѣ, а҆́ще бы въ незда́нное и҆ неѡпи́санное не дости́глъ: сїе́ же є҆́сть бг҃ъ, вои́стиннꙋ и҆ премі́рнѣ є҆ди́но сы́й. Въ сїѐ ᲂу҆̀бо є҆ди́ное и҆ неѡпи́санное дости́гнꙋти движе́нїемъ ᲂу҆мꙋ̀ подоба́етъ, да є҆сте́ственнꙋю свою̀ тишинꙋ̀ ѡ҆брѣ́тъ, въ поко́й ста́нетъ ᲂу҆́мнѣ влѣ́потꙋ. Та́мѡ бо є҆́сть стоѧ́нїе дх҃омъ и҆ странноѡбра́зенъ поко́й, и҆ всѣ́хъ коне́цъ безконе́чный, и҆ движе́нїе во є҆ди́но дости́гшꙋ ѻ҆́но не ѡ҆скꙋдѣва́етъ ника́коже, всѧ́комꙋ ᲂу҆мꙋ̀ безпредѣ́льное и҆ безконе́чное дости́гшꙋ, и҆ неѡпи́санное, безви́дное, и҆ невоѡбраже́нное, и҆ соверше́ннѣ про́стое: таково́ бо є҆́сть рече́нное є҆ди́но, си́рѣчь бг҃ъ.

ѕ҃. А҆́ще твори́тъ бг҃ъ, по даві́дꙋ, а҆́гг҃лы своѧ̑ дх҃и, но и҆ и҆̀же ѿ человѣ̑къ ражда́етъ дх҃ъ, дх҃а твори́тъ и҆̀хъ¹³²⁹. ꙗ҆́коже речѐ гдⷭ҇ь: А҆́гг҃лъ ᲂу҆̀бо и҆́нъ є҆́сть человѣ́къ рожде́нный ѿ дх҃а ꙗ҆́вственнымъ прича́стїемъ є҆гѡ̀. Но ᲂу҆́бѡ а҆́гг҃лъ дѣ́ло є҆́сть, є҆́же вы́нꙋ зрѣ́ти лицѐ ѻ҆ц҃а̀ на́шегѡ, и҆́же на небесѣ́хъ¹³³⁰, ꙗ҆́коже и҆ сїѐ речѐ гдⷭ҇ь. Тѣ́мже и҆ свѣ́тломꙋ дх҃а ст҃а прича́стникꙋ подоба́етъ зрѣ́ти, горѣ̀ простира́ющꙋсѧ, ꙗ҆́коже лѣ́потствꙋетъ, лицѐ бж҃їе. Тѣ́мже ᲂу҆чи́тъ ꙗ҆́вѣ и҆ даві́дъ: взыщи́те, глаго́лѧ, гдⷭ҇а, и҆ ᲂу҆тверди́тесѧ: взыщи́те лица̀ є҆гѡ̀ вы́нꙋ¹³³¹. Не блюде́тъ ᲂу҆̀бо лѣ́потное и҆ подоба́ющее бы́вый прича́стникъ ст҃а́гѡ и҆ животворѧ́щагѡ и҆ просвѣти́тельнагѡ и҆ рачи́телѧ дх҃а, и҆ во и҆скꙋ́съ неизрече́ннагѡ рожде́нїѧ прише́дый сꙋ́щагѡ ѿ дх҃а, и҆ къ досто́инствꙋ а҆́гг҃лъ востекі́й: та́же ꙗ҆́коже прилꙋчи́сѧ за и҆зли́шнее говѣ́инство смѣжава́ти творѧ́й къ бг҃ꙋ ᲂу҆́мное чꙋ́вство своѐ, и҆ не хотѣ́ти къ бг҃ꙋ горѣ̀ простира́тисѧ и҆ къ бж҃е́ствєннымъ: па́че же сп҃си́телю повелѣва́ющꙋ пребыва́ти въ не́мъ, занѐ и҆ то́й пребыва́етъ въ на́съ. И҆ даві́дꙋ глаго́лющꙋ: пристꙋпи́те къ немꙋ̀, и҆ просвѣти́тесѧ. И҆ вои́стиннꙋ а҆́ще хо́щемъ твори́ти подоба̑ющаѧ и҆ слѣ̑дꙋющаѧ, во свѣ́тѣ бг҃а ѻ҆ц҃а̀, глаго́лю же дх҃а ст҃а́гѡ: ᲂу҆́зримъ свѣ́тъ и҆́же ѡ҆ бз҃ѣ, си́рѣчь бж҃е́ственнꙋю и҆́стинꙋ, а҆́ще не нѣ́какѡ невѣ́жественнѣ прїи́мемъ къ бж҃е́ствєннымъ лꙋча́мъ не ѡ҆браща́тисѧ.

з҃. Тремѝ ѡ҆́бразы восхо́дитъ ᲂу҆́мъ къ видѣ́нїю бж҃їю: самодви́жнѣ, и҆нодви́жнѣ, и҆ междꙋ̀ си́ми. И҆ самодви́жный ᲂу҆́бѡ ѡ҆́бразъ, ѿ є҆стества̀ ᲂу҆ма̀ то́чїю соверша́етсѧ хотѣ́нїе своѐ мечта́нїемъ ᲂу҆потреблѧ́ющъ, є҆гѡ́же коне́цъ є҆́сть видѣ́нїе сꙋ́щихъ ѡ҆ бз҃ѣ: ꙗ҆̀же и҆ є҆́ллини нѣ́какѡ мечта́ша. Вторы́й є҆́сть преесте́ственъ, хотѣ́нїемъ, и҆ просвѣще́нїемъ то́чїю бж҃їимъ быва́ющъ: тѣ́мже и҆ под̾ бж҃е́ственнымъ содержа́нїемъ тогда̀ ᲂу҆́мъ ве́сь ѡ҆брѣта́етсѧ, и҆ въ бж҃є́ственна ѿкровє́нїѧ восхища́етсѧ, и҆ неизрече́нныхъ вкꙋша́етъ бж҃їихъ та̑инъ, и҆ бꙋ́дꙋщихъ сбытїѧ̑ зри́тъ. Ѡ҆́бразъ же, и҆́же междꙋ̀ си́ми, двѣма̀ по ча́сти совокꙋплѧ́етсѧ. Занѐ є҆ли́кѡ ᲂу҆́бѡ хотѣ́нїемъ и҆ мечта́нїемъ свои́мъ дѣ́лаетъ, самодви́жномꙋ согла́сенъ показꙋ́етсѧ: и҆нодви́жномꙋ же прїѡбща́етсѧ, поне́же ѿ бж҃е́ственнагѡ соединѧ́етсѧ къ себѣ̀ самомꙋ̀ просвѣще́нїѧ, неизрече́ннѡ ви́дитъ бг҃а вы́шше своегѡ̀ ᲂу҆́мнагѡ соедине́нїѧ. Всѣ́хъ бо ѡ҆ бз҃ѣ ви́димыхъ и҆ глаго́лемыхъ внѣ̀ быва́етъ тогда̀, нижѐ благонача́лїе и҆лѝ ѡ҆боже́нїе, нижѐ премꙋ́дрость и҆лѝ силотво́рнꙋ держа́вꙋ, и҆лѝ про́мыслъ, и҆лѝ и҆́но что̀ ѿ бж҃е́ственныхъ зрѧ̀, и҆спо́лненъ быва́ѧ наипа́че ᲂу҆́мна свѣ́та, є҆ще́ же и҆ ра́дости дѣ́йствꙋемыѧ ѿ бж҃е́ственна ѻ҆гнѧ̀ любо́вїю срастворе́нна.

и҃. Оу҆́мъ, своѐ мечта́нїе ко є҆́же зрѣ́ти неви̑димаѧ ᲂу҆потреблѧ́ѧ, вѣ́рою наставлѧ́етсѧ, ѡ҆сїѧва́емь же ѿ бл҃года́ти, наде́ждею ᲂу҆твержда́етсѧ. Ѿ бж҃е́ственнагѡ же свѣ́та восхища́емь, сокро́вище любвѐ быва́етъ человѣ́ческїѧ, и҆ мно́гѡ же па́че бж҃їѧ. Та́кѡ тро́йственный ᲂу҆ма̀ чи́нъ, и҆ движе́нїе въ вѣ́рѣ и҆ наде́ждѣ и҆ любвѝ соверше́ннѣй, и҆ бг҃отво́ренъ, и҆ тве́рдъ же и҆ непрекло́ненъ быва́етъ: и҆ сегѡ̀ дости́гши простра́нства верхогра́дїѧ, ꙗ҆́коже бы кто̀ ре́клъ, въ стра́жбищи любвѐ себѐ ᲂу҆твердѝ. Ѿ є҆ѧ́же вины̀ є҆́сть, є҆́же глаго́летсѧ ѿ Па́ѵла: любы̀ всѧ̑ терпи́тъ, всѧ̑ претерпѣва́етъ за бла́гость вѣ́ры и҆ наде́жды. Любы̀, глаго́летъ, николи́же ѿпа́даетъ, за разжже́нное своѐ съ бг҃омъ соедине́нїе и҆ совокꙋпле́нїе неизрече́нное.

ѳ҃. Ни въ чесо́мъ зда́нномъ и҆зрѧ́днѣ є҆́сть є҆ди́ное: ꙗ҆́кѡ бо ра́знствꙋетъ ко́еждо когѡ́ждо, по нѣ́коемꙋ ѡ҆́бразꙋ сво́йства не возмо́жно не вѣ́дѣти. А҆ ꙗ҆́кѡ сꙋ́ть зда́нна ко́еждо когѡ́ждо не ра́знствꙋетъ, наче́ншосѧ же сꙋ́що, и҆ коне́цъ и҆мꙋ́що, и҆ под̾ є҆стество́мъ сꙋ́що, и҆ не сꙋ́що вои́стиннꙋ про́сто є҆ди́но. То́чїю бо є҆ди́но вои́стиннꙋ є҆́сть несозда́нное, ꙗ҆́кѡ про́сто, ꙗ҆́кѡ безнача́льно, ꙗ҆́кѡ конца̀ не и҆мꙋ́що и҆ безпредѣ́льно, и҆ сегѡ̀ ра́ди безконе́чно, є҆́же є҆́сть бг҃ъ. Къ немꙋ́же а҆́ще бы ᲂу҆́мъ зрѣ́лъ съ прича́стїемъ и҆ посо́бїемъ дх҃а животворѧ́щагѡ, вы́нꙋ прили́чествꙋющее своѐ раще́нїе прїе́млетъ, соеди́ненъ сы́й и҆ просте́ртъ, и҆ бг҃отво́рна держа́сѧ ᲂу҆строе́нїѧ. Є҆ще́ же и҆ ѕѣлѡ̀ разꙋмѣ̀ ꙗ҆́снѣ, ꙗ҆́кѡ кромѣ̀ є҆ди́нагѡ, и҆ є҆́же къ немꙋ̀ дꙋ́хомъ взира́нїѧ, ᲂу҆мꙋ̀ лꙋ́чшꙋ бы́ти невозмо́жно є҆́сть. Ѻ҆́во ᲂу҆́бѡ ꙗ҆́кѡ ᲂу҆́мъ расточи́сѧ, многоча́стномꙋ мі́рꙋ и҆ страсте́мъ повинꙋ́всѧ, и҆ тре́бꙋетъ прили́чнѣ премі́рны си́лы, и҆ послѣ́дованнѡ преесте́ственна є҆ди́нагѡ ко взира́нїю: да та́кѡ ѿ раздѣ́льныхъ восхище́нъ бы́въ, внѣ̀ бꙋ́детъ страсте́й и҆ раздѣле́нїѧ, и҆ та́кѡ полꙋчи́лъ бы бг҃ови́дное. Сегѡ̀ ра́ди и҆ гдⷭ҇ь моле́нїе твори́тъ ко ѻ҆ц҃ꙋ̀, да бꙋ́демъ є҆ди́но вѣ́рнїи во ѻ҆ц҃ѣ̀, и҆ въ не́мъ сн҃ѣ дх҃омъ, и҆ та́кѡ є҆ди́но, ꙗ҆́коже и҆ ті́и сꙋ́ть є҆ди́но (не ѕлосло́внѣ си́рѣчь, ꙗ҆́коже саве́ллїй речѐ є҆ди́ное) ꙗ҆́кѡ да бꙋ́демъ, ꙗ҆́коже подоба́етъ, соверше́ни сꙋ́ще и҆ благода́тїю соединѧ́ющагѡ дх҃а, и҆ видѣ́нїемъ є҆динови́днымъ во є҆ди́номъ бз҃ѣ. Сїѐ на́мъ ꙗ҆́вѣ є҆́сть и҆́стинное предспѣ́ѧнїе на лꙋ́чшее: и҆ се́й коне́цъ, и҆ и҆́стиненъ и҆ є҆ди́нъ поко́й. Сегѡ̀ ра́ди и҆ зави́стнаѧ и҆ человѣконенави́стнаѧ бѣсо́вскаѧ дрꙋжи́на, на мно́гихъ богѡ́въ, є҆́же ѽ дабы̀ не бы́ло! чествова́нїе расточи́вши, въ пре́лесть посѣ́ѧ є҆ди́нственное ᲂу҆ма̀, и҆ не ѡ҆ста́ви сїѐ и҆мѣ́ти, мечта́нїе є҆ди́нагѡ премі́рнагѡ. Ꙗ҆́кѡ да на мнѡ́ги бо́ги слꙋже́нїемъ, взира́нїемъ же и҆ раздѣле́нїемъ проти́вꙋ своемꙋ́ си є҆стествꙋ̀ повинꙋ́въ двиза́тисѧ ᲂу҆мꙋ̀, всѧ́ческихъ страсте́й жела́телѧ пока́жетъ и҆ лжѝ, вмѣ́стѡ и҆́стины и҆ добродѣ́тели. Тѣ́мже дх҃ъ ст҃ы́й завѣщава́етъ проро́комъ: Пристꙋпи́те глаго́лѧ, къ немꙋ̀, къ є҆ди́номꙋ си́рѣчь, и҆ просвѣти́тесѧ. И҆ є҆щѐ и҆́ндѣ: а҆́зъ бг҃ъ пе́рвый, и҆ а҆́зъ по си́хъ, и҆ кромѣ̀ менѐ нѣ́сть и҆но́гѡ бг҃а¹³³². И҆ па́ки: слы́ши і҆сра́илю, гдⷭ҇ь бг҃ъ тво́й, гдⷭ҇ь є҆ди́нъ є҆́сть¹³³³. Не бо̀ трїѷпоста́сное є҆ди́нагѡ бж҃ества̀ є҆ди́ное раздѣлѧ́етсѧ гдⷭ҇ьство, но и҆ трѝ сꙋ́ть ѻ҆па́снѣ ли́ца и҆ ничи́мже мнѣ́е є҆ди́но сꙋщество́мъ же и҆ си́лою, хотѣ́нїемъ же и҆ дѣ́йствомъ, и҆ и҆нѣ́ми сꙋще́ственными благи́ми. Оу҆̀бо є҆́же слꙋжи́ти є҆ди́нствꙋ бж҃їю, и҆ взира́ти, и҆ собира́тисѧ є҆ли́ка си́ла къ немꙋ̀ ѿ мно́гихъ, во́лѧ бж҃їѧ є҆́сть, и҆ ᲂу҆ма̀ пред̾ꙋспѣ́ѧнїе на лꙋ́чшее, ꙗ҆́кѡ и҆́стины ѡ҆брѣ́тенїе, и҆ бж҃е́ственна раче́нїѧ, и҆ послѣ́дованнѡ ѡ҆боже́нїѧ пло́дъ.

і҃. А҆́ще лжа̀ ᲂу҆́бѡ є҆́сть многоча́стна, є҆ди́но же и҆́стина: ᲂу҆̀бо ᲂу҆́мъ дꙋ́хомъ къ є҆ди́номꙋ горѣ̀ простира́ющїйсѧ, къ превосходѧ́щемꙋ, премі́рномꙋ па́че всѣ́хъ, къ томꙋ̀, ѿ негѡ́же мнѡ́гаѧ, къ са́мой то́й вои́стиннꙋ и҆́стинѣ горѣ̀ простира́етсѧ. Но ᲂу҆̀бо не мо́жетъ бы́ти ᲂу҆́мъ свобо́денъ ѿ страсте́й, а҆́ще не и҆́стина свободи́тъ є҆го̀¹³³⁴: ᲂу҆́мъ ᲂу҆̀бо страсте́й свобо́денъ быва́етъ зрѧ̀ и҆ горѣ̀ простира́ѧсѧ є҆ди́нственнымъ ѡ҆́бразомъ къ є҆ди́номꙋ премі́рномꙋ. Прили́чествꙋетъ же и҆́стина ᲂу҆мꙋ̀ къ безстра́стїю, и҆ бг҃ови́днꙋ ᲂу҆строе́нїю и҆ сыноположе́нїю дꙋхо́внꙋ наипа́че, ника́коже ра́бство: зане́же ра́бъ, глаго́летъ, не вѣ́сть что̀ твори́тъ гдⷭ҇ь є҆гѡ̀¹³³⁵. А҆́ще же невѣ́жество ра́бїе є҆́сть, ꙗ҆́вѣ ꙗ҆́кѡ прича́стникъ сы́й свобо́ды, вѣ́сть та̑йны ѻ҆ц҃а̀, и҆ взы́ти подо́бнѣ бы́сть є҆мꙋ̀ бла́го и҆ до́брѣ на досто́инство сыноположе́нїѧ. Ꙗ҆́коже бо є҆́же не вѣ́дѣти семꙋ̀ є҆́же вѣ́дѣти проти́вно є҆́сть преѧвле́ннѣ, та́кѡ вои́стиннꙋ и҆ ра́бїй чи́нъ, сопроти́внѣ є҆́сть къ сыно́вню ꙗ҆́вѣ. И҆ а҆́ще не вѣ́дый, ра́бъ є҆́сть: вѣ́дый же вои́стиннꙋ нѣ́сть ра́бъ, но свобо́денъ, и҆лѝ да рекꙋ̀ сы́нъ. И҆́бо дꙋ́хъ и҆́стины свобожда́ѧ вои́стиннꙋ, са́мъ се́й сынополага́етъ бг҃ови тѣ́хъ, въ ни́хже бы прише́лъ: є҆ли́цы бо, глаго́летъ, дх҃омъ бж҃їимъ во́дѧтсѧ, сі́и сꙋ́ть сы́нове бж҃їи¹³³⁶. А҆́ще бо къ пресꙋ́щественнꙋ є҆ди́номꙋ взира́ти, и҆́стины бы́ти є҆́сть: и҆́стина же свобо́дꙋ ᲂу҆мꙋ̀ подае́тъ: свобо́да же, сыноположе́нїѧ бж҃е́ственна зна́менїе є҆́сть ꙗ҆́вно: сегѡ́ же да́ра сыноположе́нїѧ, ничто́же нижѐ бо́льше є҆́сть, нижѐ ᲂу҆́бѡ є҆стествꙋ̀ слове́снꙋ па́че прили́чествꙋющо и҆́но: ѕѣлѡ̀ смы́сленно и҆ ѕѣлѡ̀ ѿ нꙋ́ждныхъ бы́ло бы вои́стиннꙋ, є҆́же горѣ̀ простре́тисѧ и҆ взира́ти и҆ собира́тисѧ дꙋхоно́снѣ ᲂу҆мꙋ̀, є҆ли́ка си́ла къ є҆ди́номꙋ премі́рнꙋ, си́рѣчь къ бг҃ꙋ.

а҃і. Гдⷭ҇ь бг҃ъ тво́й, глаго́летъ дх҃а ст҃ы́й, гдⷭ҇ь є҆ди́нъ є҆́сть. Толи́ко попече́нїе є҆́сть бж҃ествꙋ̀ дх҃а возводи́ти ᲂу҆́мъ къ є҆ди́номꙋ премі́рномꙋ. И҆ не ᲂу҆̀бо ꙗ҆́кѡ є҆ди́ное проповѣ́даетъ, ᲂу҆ма́ же къ немꙋ̀ ѡ҆браще́нїе и҆ взира́нїе не лю́битъ, лѣ́ть є҆́сть глаго́лати. Є҆́же бо ст҃ы́й глаго́летъ дх҃ъ, семꙋ̀ и҆ помышлѧ́тисѧ хо́щетъ: и҆ є҆́же помышлѧ́етсѧ, къ семꙋ̀ и҆ ᲂу҆мꙋ̀ ѡ҆браща́тисѧ. Ѿсꙋ́тствꙋющꙋ бо ᲂу҆ма̀ ѡ҆браще́нїю къ помы́сленномꙋ, и҆ є҆́же мо́глъ бы помы́слити ᲂу҆́мъ, ѿсꙋ́тствꙋетъ. И҆ є҆́сть по нꙋ́ждѣ всꙋ́е рече́но проповѣ́данїе є҆ди́нственнагѡ: и҆ сегѡ̀ ра́ди и҆ вѣ́ра. А҆́ще же сїѐ безмѣ́стно: ᲂу҆̀бо и҆ є҆́же не размышлѧ́ти є҆ди́ное ѡ҆браща́ющꙋсѧ ᲂу҆мꙋ̀ къ немꙋ̀ и҆ горѣ̀ простира́ющꙋсѧ, безмѣ́стно є҆́сть.

в҃і. А҆́ще є҆стество̀ є҆́сть къ вини̑мымъ и҆ па́че же словє́снымъ къ вино́вномꙋ горѣ̀ простре́тисѧ и҆ взира́ти ѡ҆браща́тельнѣ. Ѿ вины́ же всѧ̑ произведо́шасѧ бг҃а, и҆ ѿ негѡ́же и҆ ᲂу҆́мъ: Бг҃ъ же є҆́сть верхо́вное и҆ про́стѣ є҆ди́ное: ᲂу҆̀бо є҆стество̀ є҆́сть ᲂу҆мꙋ̀, къ верхо́вномꙋ и҆ про́стѣ є҆ди́номꙋ ꙗ҆́кѡ къ вино́вномꙋ ѡ҆браща́ющꙋсѧ, горѣ̀ простре́тисѧ и҆ взира́ти.

г҃і. А҆́ще и҆з̾ тогѡ̀ и҆ тѣ́мъ и҆ въ не́мъ всѧ́чєскаѧ¹³³⁷: є҆́сть же и҆ ᲂу҆́мъ ѿ всѣ́хъ є҆ди́но, ᲂу҆̀бо и҆з̾ тогѡ̀ и҆ тѣ́мъ и҆ се́й є҆́сть, па́че же ближа́е и҆з̾ тогѡ̀ и҆ тѣ́мъ то́й, за бг҃оподо́бное. Тѣ́мже и҆ па́че се́й взира́ти до́лженъ є҆́сть къ немꙋ̀. Глаго́лемое же къ немꙋ̀, ꙗ҆влѧ́етъ, ꙗ҆́кѡ на премі́рное є҆ди́нагѡ подоба́етъ ꙗ҆вле́нїе ѡ҆браща́тельнѣ взира́ти. На є҆ди́ное ᲂу҆̀бо ᲂу҆́мъ до́лженъ є҆́сть взира́ти.

д҃і. Ѿ є҆ди́нагѡ происхо́дѧтъ мнѡ́гаѧ, не ктомꙋ́ же ѿ мно́гихъ є҆ди́ное. Но ᲂу҆̀бо тва́рь є҆́сть мнѡ́гаѧ, тѣ́мже ѿ є҆ди́нагѡ є҆́сть тва́рь ꙗ҆́вѣ. Бꙋ́детъ же па́че тва́ри ꙗ҆́кѡ творе́цъ и҆ содѣ́тель ѻ҆́но є҆ди́ное. Зрѧ́й ᲂу҆̀бо тва́рь ꙗ҆́коже подоба́етъ, по нꙋ́ждѣ къ премі́рномꙋ є҆ди́номꙋ и҆мѣ́ти бꙋ́детъ видѣ́нїѧ своегѡ̀ заключе́нїе: поне́же и҆ сꙋ́ть въ вино́вныхъ премнѡ́га вино́внагѡ а҆́ки и҆зглашє́нїѧ, и҆́миже познава́етсѧ и҆́же хꙋдо́жествомъ и҆ премꙋ́дростїю, и҆ си́лою, и҆ бла́гостїю промысли́тельнѣ всѧ̑ произведы́й, ꙗ҆́коже восхотѣ̀. Сегѡ̀ ра́ди и҆ и҆са́їа дх҃омъ, возведи́те, глаго́летъ, ѻ҆́чи ва́ши, и҆ ви́дите, кто̀ сотворѝ сїѧ̑ всѧ̑¹³³⁸; Сїѧ̑ ᲂу҆́бѡ всѧ̑ мно́гихъ ра́ди, ре́къ, вини́мыхъ: сїе́ же, кто̀; Къ томꙋ̀ ѿ негѡ́же сїѧ̑ сꙋ́ть, є҆́же є҆́сть про́стѣ по є҆стествꙋ̀ є҆ди́но, возводѧ̀ ᲂу҆́мъ.

є҃і. Собира́етсѧ и҆ тва́рь во є҆ди́но, но сло́жно и҆ многоча́стно, и҆ не безнача́льно, а҆́ки зда́нно. Зи́ждꙋщее же є҆́сть є҆ди́но: не то́кмѡ є҆ди́но ꙗ҆́кѡ мно́гихъ и҆ разли́чныхъ согла́сїѧ въ є҆ди́но содхнове́нїе всегѡ̀ и҆ намѣ́ренїе твори́тельно, но є҆щѐ про́чее и҆ несозда́нно, ꙗ҆́кѡ преднача́льно вино́вно. Восходѧ́ бо на послѣ́дствꙋющее ᲂу҆́мъ нꙋ́жда є҆́сть дости́гнꙋти къ нѣ́чесомꙋ є҆ди́нꙋ, нача́льнꙋ же и҆ ᲂу҆строѧ́ющꙋ сегѡ̀ ви́димагѡ сꙋ́щихъ чи́на и҆ бытїѧ̀, составле́нїѧ же и҆ содхнове́нїѧ є҆́же во є҆ди́но: и҆лѝ а҆́ще не сїѐ, въ безконе́чность произше́лъ бы, є҆́же є҆́сть безвѣ́стно. Все́ бо дви́жимое и҆ быва́юще є҆́сть, є҆гда̀ не бѣ̀, и҆ не сꙋ́що нача́тсѧ. А҆́ще же нача́сѧ, то̀ и҆ подви́гнꙋсѧ: подоба́етъ ᲂу҆́бѡ и҆ска́ти, что̀ є҆́сть подви́гнꙋвшее и҆ въ бытїѐ приве́дшее: є҆́же бꙋ́детъ ᲂу҆́бѡ и҆ недви́жно, поели́кꙋ є҆́сть дви́жꙋщо. А҆́ще бо нѝ, то̀ что́ є҆сть дви́жꙋщее, є҆́же не под̾ и҆нѣ́мъ нача́ломъ сꙋ́щее, поне́же є҆́сть безнача́льно; А҆́ще же недви́жно є҆́сть, то̀ и҆ непрело́жно. А҆́ще ли же ᲂу҆́бѡ сїѐ, то̀ ѿню́дъ и҆ про́сто, да несло́жно сꙋ́ще преложи́тсѧ, є҆щѐ непрело́жно на́мъ ꙗ҆ви́сѧ. Сложе́нїе бо нача́ло є҆́сть крамолы̀: сїѧ̑ же, рѣше́нїѧ, є҆́же движе́нїѧ є҆́сть послѣ́днее. Ника́коже ᲂу҆́бѡ та́мѡ є҆́сть сложе́нїе, да не и҆ крамола̀: нижѐ крамола̀, да не и҆ рѣше́нїе: нижѐ рѣше́нїе, да не и҆ прело́гъ, и҆ движе́нїе ѡ҆ непрело́жнѣмъ ꙗ҆ви́тсѧ и҆ недви́жнѣмъ, ꙗ҆́кѡ дви́жꙋщемъ, а҆ не дви́жимѣмъ, и҆ въ бытїѐ ведꙋ́щемъ, не бы́вшемъ, и҆лѝ быва́ющемъ. А҆́ще ᲂу҆́бѡ є҆́сть непрело́жно и҆ недви́жно, по нꙋ́ждѣ є҆́сть (и҆) несло́жно, и҆ сегѡ̀ ра́ди простѣ́йшо и҆ соверше́ннѣ є҆ди́но премі́рно. Къ немꙋ́же горѣ̀ простира́ющїйсѧ ᲂу҆́мъ, всѣ́хъ всѧ́цѣмъ ѡ҆́бразомъ внѣ̀ быва́етъ, взира́нїѧ ра́ди є҆́же и҆́мать къ предобро́тномꙋ, и҆ жела́нїѧ ра́ди ѡ҆ сꙋ́щемъ па́че всегѡ̀, па́че же ѡ҆ то́мъ, ѿ негѡ́же всѐ, и҆ къ немꙋ́же всѧ̑ є҆сте́ственнѣ горѣ̀ простира́ютсѧ. Семꙋ́ же быва́ющꙋ, по сло́вꙋ прили́чествꙋющꙋ, и҆ страсте́й внѣ̀ быва́етъ. Превы́ше бо и҆ предобро́тныхъ препростира́ѧйсѧ и҆ быва́ющїй, ника́коже бы сотвори́лсѧ пребы́ти въ стꙋдѣ̀ страсте́й. Сегѡ̀ ра́ди томꙋ̀ є҆ди́номꙋ послꙋ́жиши¹³³⁹, є҆ди́номꙋ си́рѣчь, свѧще́нный глаго́летъ зако́нъ. Къ є҆ди́номꙋ ᲂу҆̀бо верхо́вномꙋ горѣ̀ простре́тисѧ подоба́етъ, а҆́ще хо́щемъ и҆ зако́нъ бж҃їй и҆сполнѧ́ти, и҆ превы́ше страсте́й ѡ҆брѣта́тисѧ.

ѕ҃і. Гдⷭ҇ь, глаго́летъ, є҆ди́нъ вожда́ше и҆̀хъ, и҆ не бѣ̀ съ ни́ми бг҃ъ чꙋ́ждь¹³⁴⁰. Зри́ши ли є҆ди́нственнагѡ и҆ є҆ди́нагѡ си́лꙋ, ка́кѡ не бѣ̀ съ ни́ми бг҃ъ чꙋ́ждь: поне́же є҆ди́нъ вожда́ше и҆̀хъ гдⷭ҇ь. Но ᲂу҆́бѡ гдⷭ҇ь послѣ́дꙋющыѧ, а҆ не ѿвраща́ющыѧсѧ во́дитъ. А҆ є҆мꙋ́же кто̀ послѣ́дꙋетъ, къ томꙋ̀ и҆ ѡ҆брати́сѧ. Тѣ́мже а҆́ще не хо́щемъ бо́га и҆на́гѡ, бѣ́са и҆лѝ стра́сть съ на́ми и҆мѣ́ти, возпослѣ́дꙋимъ са́момꙋ и҆ є҆ди́номꙋ ѡ҆браще́нїемъ ᲂу҆́мнымъ: ꙗ҆́кѡ да и҆ ѡ҆ на́съ не неподо́бнѣ глаго́лано бы́ти возмни́тсѧ, ꙗ҆́кѡ гдⷭ҇ь є҆ди́нъ во́дитъ и҆̀хъ. Тѣ́мже и҆ бг҃ъ чꙋ́ждь нѣ́сть съ ни́ми.

з҃і. А҆́ще и҆ ѿ є҆ди́нагѡ, но разли́чнѣ сꙋ́ть мнѡ́гаѧ: занѐ вои́стиннꙋ и҆ сꙋ́щихъ ѡ҆́бразъ, по немꙋ́ же сїѧ̑ ѿ пе́рвыѧ є҆ди́ницы происхо́дѧтъ, є҆́сть разли́ченъ. Занѐ ѻ҆́ва ᲂу҆́бѡ ѿ си́хъ наче́ншасѧ сꙋ́ть и҆зда̑нна, ѻ҆́ва же незда̑нна, и҆ словесѐ вре́меннагѡ нача́ла и҆збѣ́гша, и҆ всѣ̑мъ ᲂу҆́бѡ всѧ́цѣмъ ѡ҆́бразомъ, вино́вно пресꙋ́щественное є҆ди́но, но ѻ҆́вѣмъ ᲂу҆́бѡ содѣ́тельнѣ, ѻ҆́вѣмъ же є҆сте́ственнѣ. И҆ сегѡ̀ ра́ди не ко всѣ̑мъ си̑мъ є҆ди́ною ра́внѣ пристꙋпа́ти, и҆ си́хъ держа́тисѧ подоба́етъ. Но къ под̾ нача́ломъ ᲂу҆́бѡ и҆ созда́нїемъ сꙋ́щымъ пристꙋпа́ти подоба́етъ за и҆́но (нѣ́что) а҆ не наро́чнѡ, ꙗ҆́коже къ зерца́лꙋ за воѡбража́емое въ не́мъ и҆лѝ показꙋ́емое. И҆на́кѡ бо тва́рь къ преспѣ́ѧнїю на лꙋ́чшее непристꙋпа́тельна є҆́сть, то́чїю за пред̾ѧвлѧ́ющеесѧ въ не́й кра́йнѧгѡ є҆ди́нагѡ: къ безнача̑льнымъ же пристꙋпа́емъ и҆ є҆сте́ствєннымъ, не за и҆́но (нѣ́что), но за та̑ и҆ за то̀ ѿ негѡ́же сꙋ́ть. Ѻ҆́на бо сꙋ́ть вои́стиннꙋ пристꙋпа́тєльна наро́чнѡ, и҆ ѻ҆́нѣхъ є҆́сть бли́зъ же и҆ є҆сте́ственнѣ верхо́вное є҆ди́ное, па́че же ᲂу҆̀бо кра́йнѧгѡ и҆ верхо́внагѡ сїѧ̑ сꙋ́ть є҆ди́нагѡ бли́зъ и҆ ꙗ҆́коже глаго́ласѧ є҆сте́ственнѣ. Подоба́етъ ᲂу҆̀бо не то́кмѡ къ си̑мъ пристꙋпа́ти, но и҆ прилѣплѧ́тисѧ, и҆ ко ᲂу҆подобле́нїю пе́рвагѡ и҆ є҆ди́нагѡ добра̀ си́ми тща́тисѧ и҆з̾ѡбража́тисѧ: да содѣ́йствїемъ и҆ по́мощїю благода́ти, сꙋ́щїѧ по ѡ҆́бразꙋ и҆ по подо́бїю сла́вы бж҃їѧ и҆мѣ́ти бꙋ́демъ досто́инство. Ѿ сеѧ̀ вины̀ разсмотрѧ́ющымъ пра́во, содѣ́тельнѣ ᲂу҆́бѡ вини́мыми, слꙋча́етсѧ: зри́тельнѣ возводи́ти ᲂу҆́мъ къ созерца́нїю є҆ди́нагѡ, и҆ соединѧ́ти є҆го̀ въ є҆ди́нственнꙋю мы́сль, и҆́же па́че ᲂу҆ма̀ є҆ди́нагѡ соверше́ннѣ же и҆ про́стѣ, а҆́ще ᲂу҆́бѡ въ сїѧ̑ ᲂу҆́мъ взира́етъ, ꙗ҆́коже подоба́етъ. А҆ и҆́мже є҆стество́мъ є҆́сть вино́вное дѣйстви́тельствꙋющꙋсѧ ᲂу҆мꙋ̀ си́ми, и҆лѝ по ни́мъ воѡбража́ющꙋсѧ, си́ми мо́щно є҆́сть соединѧ́ти къ вои́стиннꙋ є҆ди́номꙋ ѻ҆́номꙋ себѐ. Тѣ́мже ѿ каковыхли́бо всѣ́хъ и҆лѝ є҆сте́ственныхъ, и҆лѝ содѣ́тельныхъ сꙋ́щихъ вини́мыхъ, къ разли́чнѣ є҆ди́номꙋ вино́вномꙋ, ᲂу҆́мъ собира́тисѧ ѡ҆бы́че є҆сте́ственнѣ, и҆лѝ дѣйстви́тельнѣ, и҆лѝ зри́тельнѣ. И҆ є҆́же ᲂу҆́мъ и҆лѝ є҆ди́но, и҆лѝ мнѡ́жайша содѣ́тєльна, и҆лѝ є҆сте́ствєнна ᲂу҆потреблѧ́ѧ, не є҆ди́нагѡ ра́ди ᲂу҆потреблѧ́етъ, нижѐ да къ пе́рвомꙋ є҆ди́номꙋ собра́въ себѐ приво́дитъ, и҆ ѿню́дъ ко ѻ҆́номꙋ взира́етъ ст҃ы́мъ прича́стїемъ и҆ посо́бїемъ просвѣща́ющаго дх҃а, про́стѣ є҆динови́днѣ же и҆ є҆динственнови́днѣ, въ грѣ́хъ є҆мꙋ̀ сїѐ вмѣнѧ́етсѧ: а҆́ще и҆ мечта́нїе и҆́мать добра̀ сїѐ ᲂу҆потребле́нїе є҆гѡ̀. Сꙋ̑щаѧ бо ѿ є҆ди́нагѡ на є҆ди́ное води́ти є҆стество̀ и҆́мꙋтъ ᲂу҆потреблѧ́ющихъ сїѧ̑, ꙗ҆́коже подоба́етъ. Всѧ́ко бо, ꙗ҆́коже глаго́летъ вели́кїй дїонѵ́сїй, ѿ ѻ҆ц҃а̀ дви́жима свѣтоѧвле́нїѧ происхожде́нїе въ на́съ благодѣ́тельнѣ приходѧ́ще, па́ки ꙗ҆́кѡ є҆динотво́рна си́ла воспростира́тельнѣ на́съ и҆сполнѧ́етъ, и҆ ѡ҆браща́етъ къ собира́телѧ ѻ҆ц҃а̀ є҆ди́нствꙋ, и҆ бг҃отво́рной простотѣ̀: и҆з̾ тогѡ́ бо и҆ въ не́мъ всѧ́чєскаѧ¹³⁴¹. А҆́ще же не возво́дитъ къ семꙋ̀, внѣ̀ є҆стества̀ є҆́сть и҆ подоба́ющагѡ ᲂу҆потребле́нїе сїѐ внѣ̀ быва́етъ не та́кѡ быва́юще.

и҃і. Є҆́сть дѣѧ́нїе, предварѧ́юще видѣ̑нїѧ, и҆ є҆́сть дѣѧ́нїе, послѣ́дꙋюще зри́тельномꙋ. Пе́рвое ᲂу҆́бѡ соверша́етсѧ тѣле́снѣ, ꙗ҆́кѡ да стремлє́нїѧ тѣлесѐ ѡ҆бꙋзда́вшемꙋ, и҆ благочи́ннѣ води́тисѧ ᲂу҆стро́ившемꙋ съ разсмотре́нїемъ, возмогло́ бы си́це да́ти ᲂу҆мꙋ̀ свобо́дною ного́ю прейтѝ во своѧ̑, ꙗ҆̀же сꙋ́ть мы́слєннаѧ, и҆ та́мѡ бы свою̀ по́льзꙋ до́брѣ дѣ́лалъ: второ́е же ѿ ᲂу҆ма̀ начина́ющесѧ, и҆ ѿ є҆́же помышлѧ́ти въ дс҃ѣ, собира́етсѧ къ сꙋ́щемꙋ па́че ᲂу҆ма̀, є҆́же є҆́сть бг҃ъ. Къ немꙋ́же прибли́живсѧ ᲂу҆́мъ во є҆ди́но достиза́етъ: є҆ди́но бо, бг҃ъ є҆́сть. Про́чее ᲂу҆жѐ и҆ ᲂу҆́мъ соединѧ́етсѧ въ себѣ̀ во є҆ди́но, и҆ нераздѣ́ленъ па́ки быва́етъ. Є҆ди́ницы бо вино́вно є҆́сть є҆ди́ное и҆ простоты̀ бг҃ови́дны зри́мо. Не соста́вно бо є҆́сть є҆ди́ное зрѧ́щꙋ ᲂу҆мꙋ̀, не бы́ти и҆ томꙋ̀ є҆ди́но и҆ про́сто. Раздѣлє́нна же зрѧ́щꙋ и҆ слѡ́жна, нꙋ́жда є҆́сть раздѣлѧ́тисѧ же и҆ разли́чнꙋ быва́ти. Рече́сѧ же мно́ю є҆ди́но про́стѣ, є҆́же са́мо ѡ҆ себѣ̀ ѡ҆сꙋществова́нное про́стое. Поне́же бо что́ бы ни бы́лъ ᲂу҆́мъ, и҆змѣне́нїѧ стра́ждетъ по дѣ́йствꙋ, то́йже є҆́сть про́стъ, нꙋ́жда (ᲂу҆̀бо) є҆́сть є҆ди́но бы́ти и҆ по дѣ́йствꙋ є҆ди́ное зрѧ̀. А҆́ще же бы є҆ди́ное ᲂу҆́бѡ зрѣ́лъ, то́й же бы раздѣли́лсѧ на дво́ицꙋ, є҆́же є҆́сть малѣ́йшее, что́ бы была̀ дѣ́лающи го́лень є҆гѡ̀ раздѣле́на сꙋ́щи ѿ зрѧ́щагѡ є҆ди́ное: и҆ли́ бо зри́тъ и҆́но что̀, и҆лѝ не зри́тъ. И҆ сїѐ дво́йственнѣ: и҆лѝ не хотѧ́щи, и҆лѝ притꙋплѧ́ющисѧ, и҆лѝ не́гли ко и҆но́мꙋ нѣ́коемꙋ дѣ́ланїю и҆мꙋ́щи є҆стество̀, а҆ не ко є҆́же зрѣ́ти. Но а҆́ще ᲂу҆́бѡ и҆́но что̀ подложи́лъ бы кто̀ зрѣ́ти, ви́ждь, ꙗ҆́кѡ ᲂу҆́мъ не зри́тъ є҆ди́ное про́стѣ, но два̀ внѣ̀ слѡ́ва, и҆ два̀ зрѧ̀, є҆ди́но бы́ти не мо́жетъ. Сѣче́тсѧ бо, ꙗ҆́коже показа́сѧ, на та̑, ꙗ҆̀же ви́дитъ. А҆́ще же не ви́дитъ, а҆́ще ᲂу҆́бѡ не хотѣ́лъ бы сїѐ, не возмо́жно є҆́сть. Не мо́щно бо є҆́сть недѣ́йство и҆ въ са́момъ то́мъ кратча́йшемъ мгнове́нїи (вре́мене) ᲂу҆мꙋ̀ слове́сномꙋ пострада́ти. Но нижѐ притꙋплѧ́етсѧ го́лень сїѧ̀ ᲂу҆ма̀, но бы́стрꙋ сїю̀ и҆́мать. И҆лѝ си́це сло́женъ бы бы́лъ, и҆лѝ не про́стъ, ѿ неподобноча́стїй нѣ́кихъ составлѧ́емь, ꙗ҆́коже слꙋчи́тсѧ. И҆ а҆́ще ᲂу҆́бѡ є҆ди́на ча́сть го́лени зри́тъ, дрꙋга́ѧ же ко и҆но́мꙋ нѣ́коемꙋ ви́дꙋ дѣ́йства ᲂу҆чини́сѧ, сложе́нїѧ (же) и҆ сїѐ, є҆́сть порече́нїе: є҆́же ѡ҆ простотѣ̀ ᲂу҆ма̀ рещѝ, ѕѣлѡ̀ є҆́сть непрїѧ́тно. За сїѧ̑ ᲂу҆̀бо є҆ди́нственное и҆ про́стое ᲂу҆ма̀, а҆́ще бы про́стѣ є҆ди́ное смотрѣ́ло, є҆ди́но и҆ то̀ дѣ́йствомъ быва́етъ. И҆ а҆́ще бы є҆ди́но бы́ло про́стѣ, про́стое є҆ди́но зри́тъ. Тѣ́мже ᲂу҆̀бо каково́либо дѣѧ́нїе и҆лѝ видѣ́нїе, по нꙋ́ждѣ ви́димо бы́ти до́лжно є҆́сть къ па́че ᲂу҆ма̀ є҆ди́номꙋ: а҆́ще ли же нѝ, не соверши́тъ ничто́же, но всꙋ́е ꙗ҆ви́тсѧ дѣ́ѧ и҆лѝ зрѧ̀ ᲂу҆́мъ. Бꙋ́детъ бо дѣйстви́тельнѣ под̾ раздѣле́нїемъ страсте́й лежа́щъ. Не пригвожда́етсѧ чꙋ́вствомъ дꙋшѝ къ па́че ᲂу҆ма̀ є҆ди́нагѡ є҆динови́днѣ соедине́нїю. Є҆́же ᲂу҆́бѡ соедине́нїе процѣжда́ти вѣ́сть и҆ ѡ҆чища́ти зри́тельное ᲂу҆ма̀, ко ѻ҆́номꙋ є҆ди́номꙋ возвыша́емо и҆ взира́ющо, и҆ ко ѻ҆́номꙋ пристра́ждꙋщо, ѿ негѡ́же всѧ̑, и҆́мже и҆ въ не́мже всѧ̑ и҆ на не́же и҆ быва́ютъ, и҆ сꙋ́ть и҆ въ сꙋщество̀ произведє́на сꙋ́ть.

ѳ҃і. Всѣ́хъ жела́нїй кра́й є҆́сть бж҃е́ственное съ дꙋше́ю и҆ па́че ᲂу҆ма̀ соедине́нїе: (и҆) бж҃е́ственнагѡ ра́ди соедине́нїѧ, нꙋ́ждно є҆́сть бж҃е́ственное подо́бїе: бж҃е́ственнагѡ (же) ра́ди подо́бїѧ, нꙋ́ждно є҆́сть є҆́же ᲂу҆мо́мъ дѣ́йствовати, си́рѣчь зрѣ́ти. Таково́ бо и҆ бж҃е́ственное є҆́сть, ѿ чегѡ̀ и҆ и҆́мѧ, бг҃ъ, къ семꙋ̀ ѡ҆предѣли́сѧ. Но ᲂу҆́бѡ є҆́же зрѣ́ти а҆́бїе на мы́сль бг҃а восхо́дитъ. Вездѣ́ бо, и҆ во всѣ́хъ, а҆́ки нѣ̑кїѧ лꙋчы̀ влага́етъ бг҃ъ во зри́тельный ᲂу҆́мъ, и҆ ᲂу҆́мъ зри́теленъ прѧмополо́жна и҆́мать бг҃а, бг҃ъ же є҆́сть є҆ди́но премі́рно. Є҆́сть же и҆ є҆стество̀ ᲂу҆ма̀ быва́ти тако́въ дѣ́йствомъ, ꙗ҆кова̀ зри́тъ, ꙗ҆́коже бг҃осло́вный ѧ҆зы́къ бж҃е́ственнѣйшагѡ григо́рїа ꙗ҆влѧ́етъ: свѣ́тлость бж҃їю, глаго́лющъ, и҆ ви́дѣти и҆ пострада́ти. Є҆́же бо ᲂу҆́мъ ви́дѣ, сїѐ и҆ пострада̀, ᲂу҆жѐ тако́въ и҆ бы́сть: ѡ҆шарѧ́етсѧ во ᲂу҆́мъ, глаго́летъ пе́тръ и҆́же ѿ дама́ска, по ви̑димымъ и҆́мъ. И҆ ꙗ҆́коже въ раздѣле́нныхъ зрѧ̀ и҆ разли́чныхъ, разли́ченъ быва́етъ и҆ раздѣлѧ́етсѧ: та́кѡ и҆ къ взира́нїю премі́рнагѡ и҆ про́стѣ є҆ди́нагѡ возше́дъ, послѣ́дованнѣ є҆ди́но быва́етъ, ꙗ҆́коже мно́ю глаго́ласѧ напре́дъ. Повнегда́ же бы во є҆ди́номъ бы́лъ, безнача́льное и҆ безконе́чное зри́тъ и҆ невоѡбраже́нное и҆ про́стое, таково́ бо є҆́сть є҆ди́ное. [зрѝ] Тѣ́мже про́чее и҆ то́й безнача́ленъ, безконе́ченъ и҆ невоѡбраже́нъ, и҆ про́стъ по дѣ́йствꙋ быва́етъ. Сїе́ же пострада́въ, и҆ си́це и҆змѣне́нъ бы́въ, во ᲂу҆подобле́нїи по ча́сти бж҃їи, поели́кꙋ мо́щно є҆́сть, ѡ҆брѣта́етсѧ. И҆ ѿсю́дꙋ востека́етъ ко всѣ́хъ жела́нїй кра́ю, къ бж҃е́ственномꙋ (си́рѣчь) и҆ па́че ᲂу҆ма̀ и҆ неизрече́нномꙋ соедине́нїю, є҆́же є҆́сть, кра́йнее по бг҃ꙋ намѣ́ренїе. Подоба́етъ же ᲂу҆́бѡ си́хъ ра́ди ᲂу҆мꙋ̀ тща́тисѧ всѧ́цѣмъ ᲂу҆хищре́нїемъ горѣ̀ прострѣ́тисѧ и҆ взира́ти дꙋ́хомъ къ премі́рнагѡ и҆ є҆ди́нагѡ видѣ́нїю и҆ взира́нїю.

к҃. Є҆гда̀ ᲂу҆́мъ во мно́гихъ, и҆лѝ є҆́же малѣ́йшее бꙋ́детъ понѐ во двою̀, ꙗ҆́вѣ ꙗ҆́кѡ не про́стѣ є҆ди́ное зри́тъ, сегѡ̀ ра́ди ѡ҆предѣле́нъ же є҆́сть и҆ коне́ченъ. Ꙗ҆̀же бо несоверше́ннѡ прѡ́ста, такова̑ сꙋ́ть. [зрѝ] Внегда́ же вои́стиннꙋ є҆ди́нагѡ во ѡ҆сѧза́нїи бꙋ́детъ неѡсѧ́жнѣмъ по ᲂу҆́мномꙋ на сїѐ дꙋ́хомъ взира́нїю без̾ѻче́снѣ воззрѣ́въ, безнача́ленъ, безконе́ченъ, безпридѣ́ленъ, невоѡбраже́нъ же и҆ безви́дѣнъ быва́етъ, и҆ въ неглаго́ланїе ѡ҆блека́етсѧ, и҆ є҆́же молча́ти ѡ҆бꙋча́етсѧ со ᲂу҆́жасомъ, и҆ и҆сполнѧ́етсѧ весе́лїѧ, и҆ стра́ждетъ неизглагѡ́ланнаѧ. [зрѝ] Безнача́льна же и҆ безконє́чна и҆ безпредѣ́льна да не по сꙋществꙋ́ мѧ возмни́ши глаго́люща быва́ти, но по дѣ́йствꙋ. Занѐ и҆ въ не́же прелага́етсѧ ᲂу҆́мъ, не сꙋщество̀ є҆гѡ̀ є҆́сть, но дѣ́йство. А҆́ще бо бы по сꙋществꙋ̀ и҆змѣни́лсѧ ви́дѣвъ и҆ пострада́въ ѡ҆боже́нїе, си́рѣчь, ѡ҆боже́нъ бы́въ ѿ є҆́же бг҃а ви́дѣти, бы́лъ бы по сꙋществꙋ̀ бг҃ъ. Но ᲂу҆́бѡ нѣ́сть сїѐ, ни ѿ а҆́гг҃лъ никто́же, ра́звѣ са́магѡ и҆ кра́йнѧгѡ и҆ є҆ди́нагѡ бг҃а, є҆́же по сꙋществꙋ̀ бы́ти бг҃ъ. А҆́ще ᲂу҆́бѡ по сꙋществꙋ̀ ѡ҆божа́тисѧ ᲂу҆мꙋ̀ рещѝ є҆́сть безмѣ́стно, ѡ҆стае́тсѧ глаго́лати сїѐ страда́ти є҆мꙋ̀ самѣ́мъ тѣ́мъ є҆́же зрѣ́ти. Не ᲂу҆́бѡ є҆стество̀ и҆́мать и҆змѣнѧ́тисѧ на сꙋществѣ̀ томꙋ̀, но на дѣ́йствѣ. Па́че же а҆́ще и҆ и҆змѣнѧ́етсѧ є҆сте́ственнѣ ᲂу҆́мъ, ꙗ҆́коже рече́сѧ, по ви́димымъ и҆́мъ, но ѿню́дъ ника́коже зри́тъ бж҃е́ственное сꙋщество̀, но дѣ́йствїе, ᲂу҆́бѡ ни то́й по сꙋществꙋ̀ и҆змѣни́тсѧ, но по дѣ́йствꙋ.

к҃а. Всѧ̑ ѿ премі́рнагѡ є҆ди́нагѡ ꙗ҆́кѡ возсїѧ́вша не ѿстꙋпи́ша, ѿѻнꙋ́дꙋже прїѧ́ша бытїѐ всѧ́цѣмъ ѡ҆́бразомъ. Но въ не́мъ ꙗ҆́коже бы́ша, та́кѡ и҆ содержа́тсѧ и҆ соверша́ютсѧ: и҆ ничто́же є҆́сть ни въ чесо́мъ ѿ всѣ́хъ, въ не́мже нѣ́сть и҆злїѧ́нїѧ, и҆ а҆́ки нѣ́каѧ вонѧ̀ ѻ҆́нагѡ твори́тельнагѡ и҆ сꙋ́щагѡ є҆ди́нагѡ, и҆ всѧ̀ сꙋ́щагѡ причаща́ющаѧсѧ то́кмѡ не гла́съ и҆спꙋща́ютъ въ себѣ̀ показꙋ́юща, не премі́рное є҆ди́но: сїе́ бо превы́ше сѣди́тъ всѧ́кагѡ какова́гѡлибо а҆́ще видѣ́нїѧ, а҆́ще помышле́нїѧ: но нѣ́кꙋю лꙋчꙋ̀ є҆ди́нагѡ премі́рнагѡ. Тѣ́мже, поне́же всѣ́ми призыва́етсѧ є҆ди́ное, и҆ всѧ̑ зрѧ́тъ къ є҆ди́номꙋ, и҆ са́мо то̀ є҆ди́ное премі́рное всѣ́ми сꙋ́щими проѧвлѧ́етъ себѐ ᲂу҆мꙋ̀: нꙋ́жда є҆́сть рꙋководи́тисѧ и҆ наставлѧ́тисѧ и҆ води́тисѧ ᲂу҆мꙋ̀ къ є҆ди́номꙋ премі́рномꙋ. Ѻ҆́во ᲂу҆́бѡ мно́гихъ сꙋ́щихъ ᲂу҆вѣ́томъ понꙋжда́емꙋ: ѻ҆́во же и҆ ꙗ҆́кѡ зи́ждꙋщее є҆ди́но: (ѡ҆ не́мже на́мъ ны́нѣ сло́во є҆́сть) хо́щетъ зрѣ́тисѧ ѿ ᲂу҆ма̀ и҆збы́точествомъ бла́гости, да въ се́мъ ᲂу҆́мъ стра́ждетъ є҆́же жи́ти, ꙗ҆́коже са́мо то̀ глаго́летъ неизрече́нное є҆ди́но: а҆́зъ є҆́смь живо́тъ¹³⁴². И҆, сѐ є҆́сть живо́тъ вѣ́чный, да зна́ютъ тебѐ є҆ди́наго и҆́стиннаго бг҃а¹³⁴³. И҆ и҆́ндѣ: взыщи́те гдⷭ҇а, и҆ жива̀ бꙋ́детъ дꙋша̀ ва́ша¹³⁴⁴: ѿ взыска́нїѧ бо є҆́сть видѣ́нїе, ѿ сегѡ́же живо́тъ. И҆ ꙗ҆́кѡ да ра́дꙋетсѧ и҆ просвѣща́етсѧ и҆ весели́тсѧ, ꙗ҆́коже даві́дъ глаго́летъ: ꙗ҆́кѡ веселѧ́щихсѧ всѣ́хъ жили́ще въ тебѣ̀¹³⁴⁵. И҆, во свѣ́тѣ твое́мъ ᲂу҆́зримъ свѣ́тъ¹³⁴⁶. И҆лѝ ка́кѡ ᲂу҆́мъ ᲂу҆́бѡ созда̀ зри́теленъ, своѧ̑ же во всѣ́хъ сꙋ́щихъ разсѣ́ѧ: и҆́миже а҆́ки нѣ́кїими ѻ҆́кнами ѡ҆заре́нїемъ ᲂу҆́мнымъ ᲂу҆мꙋ̀ показꙋ́ѧсѧ, привлачи́тъ дви́жима сего̀ къ себѣ̀ просвѣща́ема.

к҃в. Бг҃ъ, (є҆́же є҆́сть тро́ическое благо́е є҆ди́но) є҆́же сотворѝ, хотѧ́й сотворѝ. Но ᲂу҆́бѡ є҆́же бг҃ъ хо́щетъ, кра́йнее є҆́сть бла́го. Є҆стество́ бо є҆́сть ᲂу҆мꙋ̀ бла́гость: сотворѝ ᲂу҆̀бо ᲂу҆ма̀ самаго̀ себѐ, и҆лѝ свои́хъ сѝ зри́тельна, є҆́же собира́ти вѣ́сть зрѧ́щаго къ є҆ди́номꙋ: ᲂу҆го́дно ᲂу҆̀бо є҆́сть бг҃ови зри́тельнꙋ бы́ти ᲂу҆мꙋ̀ самагѡ̀ є҆гѡ̀: и҆ сїѐ є҆мꙋ̀ є҆́сть кра́йнѣ благо́е. Бг҃ъ же є҆́сть вои́стиннꙋ и҆ про́стѣ є҆ди́ное, къ немꙋ́же взира́ти и҆ собира́тисѧ є҆динови́днѣ, кра́йнѣ є҆́сть бла́го, ꙗ҆́коже показа́сѧ.

к҃г. А҆́ще є҆ди́но є҆́сть, и҆ соедине́нно раче́нїе, собо́рное по бг҃омꙋ́дрыхъ сказа́нїю, є҆ди́но є҆́сть ꙗ҆́вѣ ꙗ҆́кѡ и҆ рачи́тельствꙋемое. А҆́ще бо бы́ли бы́ста два̀ є҆́же малѣ́йшее, рачи́тельствꙋємаѧ: и҆лѝ два̀ бы́ли бы́ста рачє́нїѧ, и҆лѝ на два̀ раздѣли́лосѧ бы є҆ди́ное раче́нїе, и҆ ника́коже бы и҆менова́лосѧ є҆ди́но и҆ со́брано: ны́нѣ же є҆ди́но бы́ти глаго́лемо и҆ со́брано собо́рное раче́нїе, ꙗ҆́снѣ разꙋмѣ́ти подоба́етъ є҆ди́но бы́ти и҆ рачи́тельствꙋемое. Но ᲂу҆́бѡ преимꙋ́ществꙋетъ рачи́тельствꙋемое є҆́же ѻ҆́крестъ себѐ раче́нїѧ. И҆ не возмо́жно є҆́сть ѿню́дъ, пре́жде да́же кто̀ не ꙗ҆́лсѧ бы за рачи́тельствꙋемаго, ка́кѡлибо дабы̀ возмо́глъ и҆мѣ́ти раче́нїе є҆гѡ̀. Є҆́сть же раче́нїе сїѐ, протѧже́на любы̀, ю҆́же къ бг҃ꙋ и҆мѣ́ти, є҆сте́ственный же и҆ пи́санный зако́нъ бж҃їй и҆стѧзꙋ́етъ ѿ на́съ. Ѻ҆́въ ᲂу҆́бѡ, кра́йнѣ ᲂу҆́мъ добротолю́бенъ сꙋ́щꙋ ᲂу҆вѣщава́ѧ ꙗ҆́тисѧ за лꙋ́чшее, є҆́же є҆́сть бг҃ъ: се́й же, возлю́биши, глаго́лѧ, гдⷭ҇а бг҃а твоего̀ ѿ всеѧ̀ дꙋшѝ твоеѧ̀, и҆ ѿ всегѡ̀ се́рдца твоегѡ̀, и҆ всѣ́мъ помышле́нїемъ твои́мъ¹³⁴⁷. И҆ гдⷭ҇ь же бг҃ъ тво́й, гдⷭ҇ь є҆ди́нъ є҆́сть. Є҆ди́но ᲂу҆́бѡ є҆́сть рачи́тельствꙋемое: є҆́же є҆́сть тро́ическаѧ є҆ди́ница, є҆́йже вои́стиннꙋ и҆ пре́жде бы́ти подоба́етъ во ᲂу҆мѣ̀ є҆́же ѻ҆́крестъ є҆ѧ̀ раче́нїѧ. Къ премі́рномꙋ ᲂу҆́бѡ є҆ди́номꙋ горѣ̀ прострѣ́тисѧ ᲂу҆мꙋ̀ жела́ти подоба́етъ. Ꙗ҆́кѡ да ѡ҆брѣ́тенїемъ и҆ видѣ́нїемъ сегѡ̀, возсїѧ́етъ и҆ є҆́же ѻ҆́крестъ є҆гѡ̀ раче́нїе, и҆ и҆сполни́тель человѣ́къ бы́ти возмо́глъ бы и҆ зако́на и҆ за́повѣди, возлюби́въ, по рече́ннымъ, гдⷭ҇а бг҃а своего̀.

к҃д. Не возмо́жно є҆́сть возше́дшꙋ ᲂу҆мꙋ̀ къ па́че ᲂу҆ма̀ є҆ди́номꙋ нерачи́тельнꙋ нѣ́какѡ бы́ти є҆гѡ̀: добро́тꙋ бо неизрече́ннꙋ и҆ недомы́сленнꙋ произница́ющꙋ и҆з̾ негѡ̀, ꙗ҆́кѡ ѿ вседержи́тельна ко́рене ᲂу҆срѣта́етъ: є҆гда̀ и҆ а҆́ки мре́жа раздра́тисѧ бѣ́дствꙋющи ѡ҆брѣ́тенїемъ мно́гихъ ры́бъ и҆ влече́нїемъ, ѿ бж҃е́ственныхъ просвѣще́нїй ᲂу҆́мъ ѡ҆брѣта́етсѧ: и҆ ю҆́же па́че ᲂу҆ма̀ добро́тꙋ зрѧ̀ ᲂу҆жаса́етсѧ, и҆ а҆́ки ѿ вїна̀ ᲂу҆пива́етсѧ, и҆ ꙗ҆́кѡ безꙋ́мный и҆зстꙋпа́етъ, и҆ є҆́же па́че мы́сли стра́ждетъ ᲂу҆дивле́нїе, ᲂу҆жа́сныѧ добро́ты па́че добро́тное видѣ́нїе не вмѣща́ѧ взира́ти. Тѣ́мже вои́стиннꙋ и҆ ᲂу҆́зами любвѐ содержи́мь є҆́сть, и҆ а҆́ки ѿ жа́жды ѡ҆брѣта́етсѧ ѡ҆палѧ́емь. Є҆ди́но бо є҆́сть є҆́же па́че ᲂу҆ма̀ є҆ди́ное. Но ѿ всѣ́хъ проповѣ́дꙋетсѧ ꙗ҆́кѡ всѣ́хъ преднача́ло вино́вно, ꙗ҆́кѡ нача́ло и҆ ꙗ҆́кѡ коне́цъ, ꙗ҆́кѡ содержа́нїе всегѡ̀. Но до́брыхъ и҆ благи́хъ всѣ́хъ добрѡ́ты и҆ бла́гости преисточе́нїемъ добрототво́рныѧ си́лы са́мо произведѐ, превы́ше всѧ́кїѧ добро́ты, и҆ всѧ́кїѧ бла́гости безконечнокра́тнѣ безконе́чнѡ внꙋ́трь сѣдѧ́що, и҆ без̾ сравне́нїѧ є҆ди́но сꙋ́що премі́рно: є҆ди́но є҆стество́мъ рачи́тельствꙋемо па́че всѧ́кагѡ рачи́тельствꙋема, ꙗ҆́кѡ є҆ди́но вои́стиннꙋ добро̀ и҆ бла́го, превы́шше сꙋ́що всѧ́кагѡ добра̀ и҆ бла́га, и҆ є҆ди́но зако́номъ є҆стества́ же и҆ чи́на вои́стиннꙋ возлю́блено, ꙗ҆́кѡ всѣ́хъ вино́вно, и҆ ꙗ҆́кѡ толи́кѡ, є҆ли́кѡ возлю́бленнаѧ всѧ̑ и҆ рачи́тельствꙋєма превосхожде́нїемъ добро́ты и҆ бла́гости превозше́дшо: и҆ є҆ди́но премі́рно вои́стиннꙋ, ꙗ҆́кѡ є҆ди́но вои́стиннꙋ сꙋ́що, и҆ всѣ́хъ сꙋ́щихъ производи́тельно. Ѡ҆браща́тисѧ ᲂу҆́бѡ подоба́етъ съ благи́мъ полꙋче́нїемъ, є҆́же глаго́летсѧ, дх҃омъ къ са́магѡ є҆ди́нагѡ ѡ҆брѣ́тенїю и҆ ра́зꙋмꙋ: ѿѻнꙋ́дꙋ же всѣ́хъ нача̑ла, и҆ и҆дѣ́же всѣ́хъ концы̀, и҆ всѧ́кѡ сама̀ ѡ҆ себѣ̀ бж҃е́ственныѧ любвѐ две́рь на́мъ благода́тїю хрⷭ҇то́вою ѿверза́етсѧ, и҆ вни́демъ въ поко́й гдⷭ҇а на́шегѡ въ весе́лїи и҆ ра́дованїи мно́зѣ, и҆ сла́дость тогѡ̀ є҆ди́нагѡ позна́емъ, и҆ бж҃е́ственна наслажде́нїѧ во и҆скꙋ́сѣ бꙋ́демъ, є҆ди́но и҆ са́ми бы́вше, а҆ не на мнѡ́га раздира́ющесѧ, и҆лѝ раздѣлѧ́ющесѧ, по сп҃си́телѧ ко ѻ҆ц҃ꙋ̀ моле́нїю, да бꙋ́дꙋтъ, глаго́лющагѡ, є҆ди́но, ꙗ҆́коже и҆ мы̀ є҆ди́но є҆смы̀¹³⁴⁸. Тогда̀ ᲂу҆́бѡ и҆ за́повѣди ѻ҆па́сни бꙋ́демъ храни́тели: возлю́биши, глаго́лющїѧ, гдⷭ҇а бг҃а твоего̀ ѿ всеѧ̀ дꙋшѝ твоеѧ̀, и҆ бли́жнѧго своего̀ ꙗ҆́кѡ са́мъ себѐ¹³⁴⁹, и҆ є҆́же по человѣ́кꙋ соверше́нства и҆́мемсѧ, є҆ли́кѡ дости́гнꙋти мо́щно. Коне́цъ бо зако́на любы̀ є҆́сть, въ не́йже не то́кмѡ ве́сь зако́нъ и҆ проро́цы, но и҆ всѝ ви́сѧтъ соверше́ни бы́вшїи по бг҃ꙋ во хрⷭ҇тѣ̀.

к҃є. Всѧ́кагѡ є҆стества̀ и҆мꙋ́щагѡ соединѧ́тисѧ съ дх҃омъ, ᲂу҆мале́нїе є҆́сть раздѣле́нїе. Тѣ́мже ᲂу҆́бѡ и҆ ᲂу҆́мъ, дѣ́йствомъ а҆́ще бы нѣ́что и҆ раздѣлѧ́лсѧ, внѣ̀ є҆́сть послѣ́дствꙋющагѡ є҆мꙋ̀ по благода́ти. Сїе́ же стра́ждетъ разли̑чна нѣ̑каѧ зрѧ̀: нѣ́сть бо мо́щно въ разли́чныхъ взира́нїихъ и҆мѣ́ти нераздѣ́льность. А҆́ще бо бы кто̀ (семꙋ̀) ᲂу҆чи́лъ не ѡ҆брѧ́щетъ со ᲂу҆до́бствомъ возда́ть сло́во. Чесогѡ̀ ра́ди ᲂу҆́мъ безмо́лвїѧ, и҆́нъ є҆́сть па́че (ᲂу҆ма̀) слїѧ́нїѧ, и҆ ᲂу҆́мъ ли бг҃обоѧ́щихсѧ стꙋжа́емомꙋ ѿ (непостоѧ́нства) страсте́й подо́бенъ бы́ти дока́жетъ, є҆́же є҆́сть безмѣ́стно. Тако́въ быва́ѧ всѧ́къ ᲂу҆́мъ дѣ́йствомъ ꙗ҆кѡва̀ зри́тъ, по нꙋ́ждѣ зрѧ̀ слѡ́жна, и҆ то́й разли́ченъ быва́етъ: и҆ простоты̀ и҆спа́даѧ, нѣ́сть возмо́жно, дабы̀ возмо́глъ и҆мѣ́ти въ се́мъ нераздѣ́льное. Под̾ раздѣле́нїемъ же лежа́щїй, ѿню́дъ ника́коже є҆́сть ѿ грѣха̀ чи́стъ, внегда̀ и҆ са́мо то̀ є҆́же раздѣлѧ́тисѧ ѡ҆ себѣ̀, возмо́гшими созира́ти ѡ҆ таковы́хъ, грѣ́хъ сꙋди́сѧ. Поне́же ᲂу҆́мнаѧ ᲂу҆ма̀ ве́щь къ высоча́йшемꙋ и҆ премі́рномꙋ є҆ди́номꙋ горѣ̀ взира́нїемъ, пачеесте́ственнагѡ вкꙋси́ти ᲂу҆́мнымъ чꙋ́вствомъ добра̀ должна̀ сꙋ́щи, въ раздѣле́нїе є҆́же внѣ̀ благода́ти и҆зстꙋ́пльши є҆́сть ᲂу҆жѐ. Подоба́етъ же ᲂу҆́бѡ премі́рнагѡ є҆ди́нагѡ держа́тисѧ, и҆ горѣ̀ простре́тисѧ, и҆ взира́ти къ немꙋ̀, и҆ то́чїю и҆ є҆ди́нственнѣ все́ю дꙋше́ю, а҆́ще и҆збѣ́гнꙋти хо́щемъ раздѣле́нїѧ и҆ и҆́нства. Не то́кмѡ же, но нижѐ а҆́ще бы къ є҆ди́номꙋ ᲂу҆́бѡ взира́лъ, зда́ннꙋ же, нераздѣле́нъ мо́жетъ бы́ти ᲂу҆́мъ. Є҆ди́но бо зда́нно, не мо́жетъ глаго́латисѧ вои́стиннꙋ про́сто: предѣ́льно бо є҆́сть и҆ сло́жно, и҆ ѡ҆пи́сано: и҆ сегѡ̀ ра́ди нижѐ про́стѣ є҆ди́ное и҆мѣ́ти пра́веднѣ є҆́сть и҆менова́тисѧ, нижѐ про́стѡ и҆мѣ́ти бꙋ́детъ и҆ є҆динови́дно ᲂу҆́мъ своѐ дѣ́йство къ семꙋ̀ неꙋкло́ннѣ взира́ѧ: бꙋ́детъ бо предѣ́льно и҆ ѡ҆пи́сано взира́нїе сегѡ̀ со сложе́нїемъ, ꙗ҆ково̀ є҆́сть и҆ зри́мое ѿ негѡ̀, и҆ бг҃ови́дныѧ благода́ти про́ста, и҆ безнача́льна, безпредѣ́льна же и҆ неѡпи́сана ᲂу҆строѧ́ющїѧ є҆го̀ ѿпаде́тъ, и҆ та́йнагѡ, и҆ па́че ᲂу҆ма̀ є҆ди́нагѡ внѣ̀ бꙋ́детъ. И҆ своеѧ̀ сла́вы, ꙗ҆́же є҆́сть наслажде́нїе є҆динонача́льна сво́йства, и҆ безнача́лїѧ безпредѣ́лїе и҆ простота̀, въ безви́дномъ є҆динови́днѣ быва́ющи, лиши́лсѧ є҆́сть. И҆ преесте́ственныѧ и҆ неизрече́ннѣйшїѧ добро́ты не достиза́етъ мечта́нїе пострада́ти. Подоба́етъ же ᲂу҆́бѡ ᲂу҆мꙋ̀ къ безнача́льномꙋ про́стомꙋ и҆ безпредѣ́льномꙋ и҆ вои́стиннꙋ є҆ди́номꙋ взира́ти, и҆ горѣ̀ простира́тисѧ: и҆ та́мѡ тща́тисѧ ѡ҆сїѧва́тисѧ, (и҆) съ началособира́тельною є҆ди́ницею соединѧ́тисѧ, и҆ сегѡ̀ ра́ди съ собо́ю, да не то́кмѡ возлю́бленъ бꙋ́детъ ѿ лꙋ́чшагѡ, ꙗ҆́кѡ ᲂу҆подо́билсѧ є҆мꙋ̀, є҆ли́ко є҆́сть возмо́жно, безпредѣ́лїемъ же и҆ простото́ю, безви́дїемъ и҆ невоѡбраже́нїемъ: но да и҆ са́мъ бж҃е́ственнꙋю и҆ предобро́тнꙋю добро́тꙋ и҆ преесте́ственнꙋю возлюби́ти возмо́жетъ, ꙗ҆́кѡ восте́къ, по речє́ннымъ, ко ᲂу҆подобле́нїю. Поне́же бо подо́бнымъ быва́ти є҆сте́ственнѣ ѡ҆бы́че люби́тельно завѣща́нїе къ подѡ́бнымъ, ꙗ҆́вѣ є҆́сть вои́стиннꙋ, ꙗ҆́кѡ возлю́бленъ бꙋ́детъ, и҆ взаи́мъ возлю́битъ ᲂу҆́мъ бг҃а: подо́бное бо подо́бномꙋ є҆́сть подо́бно. И҆ ꙗ҆́коже подо́бїе и҆́мать є҆́же воз̾ѡбраща́тисѧ, ѿню́дъ и҆мѣ́ти бꙋ́детъ си́це, и҆ ко є҆́же люби́ти, є҆́же взаи́мъ люби́мꙋ бы́ти. Па́че чесогѡ̀ бо́льша страда́нїѧ междꙋ̀ бг҃омъ и҆ дꙋше́ю ничто́же є҆́сть.

к҃ѕ. Па́че своегѡ̀ сѝ є҆стества̀ тогда̀ ᲂу҆́мъ быва́етъ, є҆гда̀ въ сꙋ́щемъ па́че ᲂу҆ма̀ ѿню́дъ бꙋ́детъ, безви́денъ же и҆ без̾ѡбра́зенъ, и҆ ѿню́дъ ѡ҆боже́ннѣ невоѡбраже́нъ бы́въ, безнача́ленъ же и҆ безконе́ченъ, и҆ ꙗ҆́коже сло́вомъ рещѝ, па́че своегѡ̀ соедине́нїѧ. Є҆гда́ же по́мысленное своѐ и҆́мать съ собо́ю, и҆ въ бж҃е́ственныхъ бы́лъ бы и҆ мы́сленныхъ ᲂу҆пражднѧ́ѧсѧ, тогда̀ є҆сте́ственнѣ глаго́летсѧ, и҆ двиза́тисѧ и҆ дѣ́йствовати, и҆ во свое́мъ сѝ є҆стествѣ̀ стоѧ́ти. Помно́гꙋ же превы́ше є҆́сть є҆́же па́че є҆стества̀ тогѡ̀, є҆́же по є҆стествꙋ̀, и҆ є҆́сть ѕѣлѡ̀ вы́шше. Подоба́етъ ᲂу҆́бѡ люби́ти тща́тисѧ бы́ти тогѡ̀, є҆́же па́че є҆стества̀, ꙗ҆́кѡ наипа́че лꙋ́чшагѡ, по глаго́лющей за́повѣди, ревнова́ти бо́льшихъ дарова́нїй. Но ᲂу҆́бѡ ꙗ҆́вѣ ꙗ҆́кѡ ᲂу҆́мъ въ пачеесте́ственнѣмъ сы́й въ бз҃ѣ є҆́сть, (кромѣ́шнїй бо є҆́сть всѧ́кагѡ є҆стества̀ бг҃ъ, и҆́же вои́стиннꙋ є҆́сть дре́внѣйшее и҆ про́стѣ є҆ди́ное) подоба́етъ ᲂу҆́бѡ къ дре́внѣйшемꙋ и҆ про́стѣ є҆ди́номꙋ ᲂу҆мꙋ̀ горѣ̀ простира́тисѧ, и҆ тща́тисѧ взира́ти и҆ возводи́тисѧ а҆́ки въ преесте́ственное є҆ди́но, да па́че своегѡ̀ є҆сте́ственнагѡ дѣ́йства возше́дшꙋ, лꙋ́чше бꙋ́детъ є҆мꙋ̀, не́жели во свое́мъ сѝ по є҆стествꙋ̀ стоѧ́щꙋ.

к҃з. Ко́еждо ѿ сꙋ́щихъ во свои́хъ сѝ сво́йственныхъ ра́дꙋетсѧ же и҆ почива́етъ є҆сте́ственнѣ: ꙗ҆̀же всѧ̑ во дре́внѣйшемъ вино́внѣмъ предсоста́вишасѧ по винѣ̀ є҆динови́днѣй. Тогда̀ ᲂу҆́бѡ во и҆́стинна весє́лїѧ ᲂу҆́мъ прїи́детъ є҆сте́ственнѣ, и҆ ра́дость и҆мѣ́ти бꙋ́детъ не ма́лꙋ, и҆ почі́етъ ѿню́дъ, є҆гда̀ всѧ̑ прише́дъ и҆ ѡ҆ста́вль, къ є҆динонача́льнѣй ѻ҆́нѣй и҆ пе́рвѣйшей винѣ̀ горѣ̀ просте́рлсѧ бы, и҆ та́мѡ бы дости́глъ ѡ҆браще́нїемъ ᲂу҆́мнымъ, ѿ неѧ́же всѧ̑ же сꙋ́ть, и҆ ꙗ҆̀же всѣ́хъ, си́рѣчь нача̑ла же и҆ среды̀ и҆ концы̀, и҆ въ не́йже всѧ̑ соста́вишасѧ и҆ соде́ржатсѧ, и҆ є҆́юже къ концꙋ̀ своемꙋ̀ во́дѧтсѧ соверша́ємаѧ: и҆ є҆ѧ́же ра́ди благостра́ждꙋтъ благостра́ждꙋщаѧ: ѿ неѧ́же и҆ са́мъ то́й ᲂу҆жѐ ᲂу҆́мъ, и҆ како́въ є҆́сть, созда́сѧ: ѡ҆́бразомъ нѣ́кимъ самомꙋ̀ къ себѣ̀ мо́щно є҆́сть ᲂу҆мꙋ̀ ѡ҆браща́тисѧ, ко ѻ҆́нѣй и҆́стиннѣй и҆ всѣ́хъ винѣ̀ ѡ҆браща́емꙋ, сꙋ́щей є҆гѡ̀ и҆́стинномꙋ первоѡбра́зїю. А҆ поне́же ко́еждо са́мо себѐ лю́битъ є҆сте́ственнѣ, и҆ наина́че же ᲂу҆́мъ сїѐ стра́ждетъ, ꙗ҆́кѡ недости́жныѧ добро́ты па́че ᲂу҆ма̀ є҆ди́нагѡ ѡ҆́бразъ сы́й предобро́тенъ: ѕѣлѡ̀ лю́битъ ѡ҆браще́нїемъ взира́ѧ къ своемꙋ̀ сѝ вино́вномꙋ, занѐ, ꙗ҆́коже рече́сѧ, самаго̀ себѐ зри́тъ та́мѡ зрѧ̀, и҆ превозлюблѧ́етъ. И҆ и҆́накѡ же, ꙗ҆́кѡ и҆ сїѐ любы̀ нѣ́каѧ є҆́сть тѣ́мъ, и҆з̾ негѡ́ же къ томꙋ̀ ѿ негѡ́же є҆сте́ственнѣ люби́тельна, ꙗ҆́коже и҆ напроти́въ, раче́нїе ѡ҆бдержи́тсѧ въ роди́телехъ къ рождє́ннымъ. Сегѡ̀ ра́ди мно́га нѣ́каѧ возница́етъ и҆ неизрече́нна сла́дость къ всѣ́хъ вино́вномꙋ возвраща́ющꙋсѧ є҆ди́номꙋ. Къ томꙋ́ бо и҆з̾ негѡ́же є҆́сть, ѡ҆браща́етсѧ, и҆ къ самомꙋ̀ себѣ̀, ꙗ҆́коже рече́сѧ. Та́мѡ бо предсоста́вишасѧ сло́вомъ вины̑ всѧ̑, тѣ́мже и҆ ᲂу҆́мъ ꙗ҆́кѡ ѿ всѣ́хъ сы́й є҆ди́но, во є҆́же бы́ти є҆́сть въ па́че ᲂу҆ма̀ є҆ди́номъ, ꙗ҆́кѡ вино́внѣмъ первоѡбра́знѣмъ.

к҃и. Ꙗ҆́коже ѿ па́че сꙋщества̀ сꙋ́щагѡ всѧ́ко сꙋщество̀, и҆ є҆стество̀ всѧ́ко ѿ и҆́же па́че є҆стества̀, и҆ ѿ безлѣ́тнагѡ и҆ несло́жнагѡ, ꙗ҆̀же во вре́мени же и҆ слѡ́жнаѧ, є҆ще́ же ᲂу҆́бѡ ѿ незда́ннагѡ, зда̑ннаѧ бы́ти є҆стество̀ и҆́мꙋтъ: та́къ и҆ всѧ́къ ви́дъ ѿ безви́днагѡ бы́сть и҆ ѿ премі́рнагѡ є҆ди́нагѡ, мнѡ́гаѧ и҆ ви̑димаѧ. Оу҆̀бо къ є҆ди́номꙋ безви́дномꙋ не ᲂу҆пражнѧ́ѧйсѧ, и҆ взира́ѧй, и҆ а҆́ки ѿ ѻ҆́нагѡ зави́сѧй, но ко и҆но́мꙋ чесомꙋ̀ въ ви́дѣ и҆ тва́ри зри́мыхъ: се́й несравне́нною мѣ́рою ᲂу҆ма́ленное превышесꙋ́щагѡ пе́рвѣйшее положѝ, и҆ і҆дѡлослꙋжи́телей не́гли бли́зъ стои́тъ: въ не́мже бо ᲂу҆пражнѧ́етсѧ кто̀, и҆ къ немꙋ́же взира́етъ, сегѡ̀ и҆ жела́етъ, и҆ є҆гѡ́же жела́етъ, си́мъ и҆ побѣжда́етсѧ, и҆ и҆́мже побѣжде́нъ быва́етъ, си́мъ и҆ порабо́тисѧ. Си́це слꙋ́житъ се́й тва́ри па́че творца̀. Си́мъ во ᲂу҆́мъ коегѡ́ждо и҆ порабо́тисѧ и҆ слꙋ́житъ є҆мꙋ̀, и҆ лю́битъ (є҆̀) є҆́же взира́етъ, и҆ въ не́мже ᲂу҆пражднѧ́етсѧ. А҆́ще же кромѣ̀ є҆ди́нагѡ про́стагѡ и҆ безви́днагѡ ᲂу҆праждне́нїе и҆ взира́нїе толи́кѡ пополза́тисѧ твори́тъ: къ є҆ди́номꙋ безви́дномꙋ про́стомꙋ (да бꙋ́детъ) на́мъ тща́нїе, и҆ позна́нїе ѡ҆браще́нїемъ: и҆ горѣ̀ просте́ртїемъ ᲂу҆́мнымъ, и҆дѣ́же сокрѡ́вища всѧ́кагѡ сꙋ́ть ра́зꙋма, и҆ и҆дѣ́же дости́гшымъ, всѧ́кагѡ видѣ́нїѧ поко́й и҆лѝ почи́тїе, и҆ ѿ є҆́же помышлѧ́ти преста́тїе, и҆ па́че ᲂу҆ма̀ молча́нїе, и҆ неисповѣди́мо ра́дованїе во мно́зѣ ᲂу҆дивле́нїи.

к҃ѳ. А҆́ще всѧ̑ сꙋ̑щаѧ є҆́же бы́ти жела́ютъ: є҆́сть же всѣ́хъ є҆́же бы́ти, по винѣ̀, въ па́че є҆́же бы́ти є҆ди́номъ, всѧ̑ ᲂу҆́бѡ и҆ па́че же словє́снаѧ, ѿ сꙋ́щихъ, пра́вѡ и҆ ꙗ҆́коже подоба́етъ дви́жꙋщасѧ, па́че є҆́же бы́ти и҆ є҆ди́нагѡ жела́ютъ, є҆́же бы́ти жела́ющаѧ, ᲂу҆̀бо не къ па́че є҆́же бы́ти є҆ди́номꙋ горѣ̀ простира́ѧйсѧ ᲂу҆́мъ, нижѐ сегѡ̀ жела́ѧй, развращє́нна и҆ погрѣ̑шна ᲂу҆потреблѧ́етъ движє́нїѧ, и҆ своегѡ̀ и҆спа́даетъ досто́инства, є҆́же є҆́сть па́че є҆́же бы́ти є҆ди́нагѡ позна́нїе, и҆ бж҃е́ственнѣйшее къ немꙋ̀ па́че ᲂу҆ма̀ є҆динови́дное соедине́нїе и҆ возлюбле́нїе.

л҃. Винѡ́внаѧ и҆зли́шше и҆́мꙋтъ добрѡ́ты вини́мыхъ: вино́вное же всѣ́хъ ѻ҆́бще, є҆ди́ное пресꙋ́щественное. А҆́ще ᲂу҆́бѡ ᲂу҆́мъ прилѣпи́лсѧ бы къ нѣ́чесомꙋ ѿ ꙗ҆̀же по є҆ди́нѣмъ пресꙋ́щественнѣмъ, ꙗ҆́кѡ къ добрꙋ̀, и҆лѝ ꙗ҆́кѡ ка́кѡ ли́бо ᲂу҆́мна досто́йнꙋ привлече́нїѧ, ꙗ҆́вѣ погрѣшѝ намѣ́ренїе є҆гѡ̀. Добротолю́бенъ ᲂу҆̀бо сы́й, но не къ пе́рвомꙋ и҆ и҆́стинномꙋ (ѿ негѡ́же всѧ̑ дѡ́браѧ прича́стїемъ сꙋ́ть дѡбра̀) пресꙋ́щественномꙋ є҆ди́номꙋ: но къ прича̑стнымъ сꙋ́щымъ ѿ ѻ҆́нагѡ добро́ты ᲂу҆ны́нїемъ и҆лѝ невѣ́жествомъ дви́жимь. Оу҆лꙋче́ннѣ же разсмотрева́ющїй ᲂу҆́мъ, къ є҆ди́номꙋ пресꙋ́щественномꙋ своѐ простира́етъ мы́сли взира́нїе: разсꙋжда́ѧ ꙗ҆́снѣ, ꙗ҆́кѡ ли́шше полꙋ́читъ то̀, є҆гѡ́же жела́етъ, ꙗ҆́кѡ въ вино́вно во ѻ҆́но ᲂу҆́мно взира́нїе дости́гъ: и҆ ꙗ҆́кѡ ничто́же є҆́сть свои́хъ, и҆лѝ какова̀ ли́бо добра̀ препода́тельно, то́чїю пресꙋ́щественное є҆ди́но. А҆́ще бо нѣ́каѧ и҆ мнѣ́ласѧ бы́ша си́лы сꙋ́ща предпода̑тельныѧ свои́хъ, но не вы́нꙋ пребыва́ти и҆́мꙋтъ є҆стество̀ сїѧ̀ въ рачи́тельнѣмъ ᲂу҆мѣ̀: є҆ди́номꙋ бо сїѧ̀ ст҃о́мꙋ дх҃ꙋ твори́ти вѣ́рꙋетсѧ, и҆ ꙗ҆́коже бы хотѣ́лъ дѣ́йствовати, и҆ гдѣ́ либо, ꙗ҆́кѡ гдⷭ҇ь сы́й, и҆ є҆стества̀ сы́й влⷣчнѧ, и҆ лицѐ трїѷпоста́сныѧ є҆ди́ницы. Къ пресꙋ́щественномꙋ ᲂу҆̀бо є҆ди́номꙋ ѡ҆браща́тисѧ подоба́етъ ᲂу҆мꙋ̀, и҆дѣ́же не то́кмѡ и҆сто́чникъ каковы́хъ ли́бо бла̑гъ, но и҆ дарова́нїй неѿе́млемое є҆́сть раздаѧ́нїе.

л҃а. Всѧ̑ сꙋ̑щаѧ жела́ютъ є҆сте́ственнѣ блага́гѡ: є҆ди́но же є҆́сть вои́стиннꙋ бла́го, а҆́ще и҆ мнѡ́гимъ глаго́лємымъ благи̑мъ. Про́стѣ бо бла́го, и҆ а҆́ки всесоверше́нно во мно́гихъ не ѡ҆брѧ́щеши ничесо́же. Но по нѣ́коемꙋ бла́га прича́стїю глаго́лемо бла́го нѣ́какѡ, ѿ є҆ди́на пресꙋ́щественнагѡ причаща́ющосѧ блага́гѡ, ника́коже сїѐ и҆мꙋ́що ѿ себѐ. Ѻ҆́но бо то́кмѡ є҆ди́но пресꙋ́щественное, бла́го є҆́сть про́стѣ и҆ пребла́го, и҆ и҆сто́чникъ всѧ́кїѧ бла́гости, и҆ свои́хъ сѝ препода́тельно, и҆ къ самомꙋ̀ себѣ̀ є҆сте́ственнѣ ѡ҆брати́тельно, всѧ́кагѡ сꙋщества̀, бытїѧ̀, навыкнове́нїѧ, си́лы, движе́нїѧ, дѣ́йства, сво́йства, и҆ каковы́ѧ ли́бо добро́ты и҆ бла́гости: и҆ про́стѣ сꙋ̑щаѧ всѧ̑, и҆ всѧ̑ ѻ҆́крестъ сꙋ́щихъ ви̑димаѧ, ѿѻнꙋ́дꙋ ѿ є҆ди́нагѡ пресꙋ́щественнагѡ прїѧ́ша ꙗ҆вле́нїе твори́тельнѣ. Сегѡ̀ ра́ди ᲂу҆́мъ къ и҆но́мꙋ чесомꙋ̀, а҆ не къ пресꙋ́щественномꙋ про́стꙋ є҆ди́нꙋ носи́мь, погрѣ́шно и҆́мать движе́нїе, двиза́ѧсѧ ᲂу҆́бѡ не́гли ко бла́гꙋ, не къ вои́стиннꙋ же и҆ про́стѣ бла́гꙋ. Нижѐ ко ᲂу҆благода́тствꙋющемꙋ и҆ лꙋ́чша сотворѧ́ющемꙋ, и҆ и҆на̑ѧ превосхожде́нїемъ благотвѡ́рна преизлїѧ́нїѧ ᲂу҆благода́тствованїѧ и҆ лꙋ́чшинства тре́бꙋющаѧ.

л҃в. Оу҆́мъ ᲂу҆́бѡ мно́гихъ под̾ раздѣле́нїемъ ѿ безꙋ́мїѧ лежа́щъ и҆ а҆́ки растерзава́емь ѿ мно́гихъ, не вѣ́сть благо́е про́стѣ є҆ди́ное: нижѐ ᲂу҆́бѡ и҆́щетъ, нижѐ ᲂу҆пражднѧ́етсѧ къ немꙋ̀. Ѡ҆ ни́хже глаго́летъ и҆́же въ дв҃дѣ дх҃ъ: Мно́зи глаго́лютъ: кто̀ ꙗ҆ви́тъ на́мъ блага̑ѧ¹³⁵⁰; а҆ не благо́е, и҆ влѣ́потꙋ: ѡ҆ мно́гихъ пекꙋ́щесѧ и҆ мо́лвѧще, невѣ́дꙋще ꙗ҆́кѡ є҆ди́нагѡ є҆́сть и҆ска́ти потре́ба. Є҆гѡ́же ча́сть, ꙗ҆́же ст҃ы́мъ бж҃їимъ сло́вомъ бла́га и҆зрече́сѧ, и҆лѝ не разꙋмѣ́вше претеко́ша, и҆лѝ вознеради́вше ѿтщети́шасѧ (є҆ѧ̀) ни понѐ во ᲂу҆́мъ полага́юще взыска́ти па́че всѣ́хъ взыска́тисѧ досто́йнѣйшагѡ: води́ми же бы́вшїи дв҃домъ наказа́телемъ, и҆ ꙗ҆́кѡ стопа́мъ ѻ҆́нагѡ послѣ́довати подоба́етъ сꙋди́вшїи: зна́менасѧ на на́съ, глаго́лютъ, свѣ́тъ лица̀ твоегѡ̀ гдⷭ҇и: си́рѣчь ра́зꙋмъ є҆ди́нственныѧ сла́вы твоеѧ̀ зна́менасѧ ꙗ҆́кѡ въ зерца́лѣ въ на́съ. Та́кѡ во мно́гихъ ра́дꙋютсѧ и҆зѻби́льнїи и҆ мно́зи лю́дїе благи́хъ. Си́це внꙋ́трь ѡ҆зарѧ́ютсѧ живꙋ́щїи дꙋхо́внѡ є҆ди́нственнагѡ и҆ про́стѣ блага́гѡ вѣ́дѣнїемъ ѿ дх҃а премі́рнѣ просвѣща́еми.

л҃г. Ꙗ҆́коже влече́нїе водна́гѡ тече́нїѧ бо́льше бы бы́ло є҆динови́днѣ пролїва́емо, не́жели раздѣлѧ́емо и҆ раскала́емо на мнѡ́га. Та́кѡ и҆ взира́нїе ᲂу҆ма̀, и҆ движе́нїе же є҆гѡ̀ и҆ жела́нїе ѕѣ́льнѣйше бꙋ́детъ ᲂу҆́бѡ, взира́ющо не многоча́стнѣ, ни многоѡбра́знѣ, но є҆динови́днѣ и҆ без̾ раздѣле́нїѧ, є҆́же быва́ти є҆стество̀ и҆́мать къ премі́рномꙋ и҆ про́стѣ є҆ди́номꙋ горѣ̀ протѧже́нїемъ и҆ взира́нїемъ и҆ видѣ́нїемъ. Собира́тельно бо є҆́сть вои́стиннꙋ премі́рное и҆ простѣ́йшее є҆ди́но. И҆ сїѐ зрѣ́ти ᲂу҆́мъ сподо́бисѧ, не мо́щно є҆́сть не воѡбрази́тисѧ ꙗ҆́коже подоба́етъ подо́бнѣ томꙋ̀ а҆́ки ѡ҆́бразъ, и҆ не бы́ти безви́денъ, въ чинꙋ̀ є҆динови́днѣмъ, про́стъ, безша́ренъ, безви́денъ, безка́чественъ, неѡсѧ́женъ, безпредѣ́ленъ, безконе́ченъ, безѡбра́зенъ: и҆ є҆щѐ про́стѣ є҆ди́но премі́рно, лꙋча́ми бж҃е́ственна и҆ премі́рна раче́нїѧ просвѣще́нъ во ѿкрове́нїи ра́зꙋма та́инственна, безгла́сїемъ и҆ неразꙋ́мїемъ, па́че сло́ва и҆ помышле́нїѧ ᲂу҆вѣнча́нъ бы́въ, наслажда́ѧсѧ дꙋхо́вна ра́дованїѧ, и҆ весе́лїѧ небе́сна. И҆ є҆щѐ и҆змѣнѧ́етсѧ на бж҃е́ственнѣйшее и҆ въ бж҃е́ственный ѡ҆́бразъ ѡ҆блека́етсѧ, въ про́стое и҆ безконе́чное, и҆ безѡбра́зное, и҆ безви́дное, и҆ є҆ди́ное, и҆ въ предречє́ннаѧ и҆на̑ѧ дꙋхо́внѣ воѡбразꙋ́емь. И҆ а҆́ще бы ᲂу҆́бѡ не сїѐ томꙋ̀ бы́ло и҆ не пострада́лъ бы таково́е бж҃е́ственно и҆змѣне́нїе во ѡ҆сѧза́нїе и҆ мечта́нїе є҆ди́нагѡ премі́рнагѡ, ника́коже дости́же. Є҆ди́ница бо є҆динотво́рна є҆́сть бг҃ъ, и҆ ᲂу҆́мъ па́че помышле́нїѧ, и҆ тогда̀ є҆ли́кѡ мо́щно є҆́сть ᲂу҆́мъ премі́рнѣ сего̀ мечта́етъ: є҆гда̀ съ глаго́ланными и҆ є҆ди́но па́че помышле́нїѧ бꙋ́детъ, бж҃е́ственнымъ мечта́нїемъ сїѐ пострада́въ.

л҃д. Тро́ическое пресꙋ́щественнагѡ бж҃ества̀ въ є҆ди́нственное собра́сѧ преесте́ственнѣ. Є҆ди́ница бо трїѷпоста́снаѧ є҆́сть бг҃ъ. Нѣ́сть ᲂу҆̀бо мо́щно въ подо́бїи прїи́скреннѣмъ бж҃їи бы́ти дꙋшѝ ѡ҆бра́знѣ, не и҆ то́й сꙋ́щей трича́стнѣй, къ себѣ̀ бы́вшей преесте́ственнѣ є҆ди́но: глаго́лю же трича́стнꙋю дꙋ́шꙋ: не по слове́ственнѣй и҆ похотѣ́тельнѣй и҆ ꙗ҆́ростнѣй ча́сти: и҆́стиннѡ бо не въ се́мъ є҆́сть трича́стна дꙋша̀: не бо̀ ᲂу҆свое́ннѣ ѡ҆брѣта́етсѧ слове́сна дꙋша̀ къ по́хоти и҆ ꙗ҆́рости: сꙋ́ть бо сїѧ̑ ѿ безслове́сныѧ ча́сти привзѧ̑та настоѧ́щагѡ ра́ди ско́тнагѡ житїѧ̀ приподстоѧ̑ща, безсловє́сна и҆ тє́мна ѡ҆ себѣ̀. Дꙋша́ же и҆ слове́сна є҆́сть, и҆ є҆стество̀ є҆ѧ̀ и҆спо́лнь є҆́сть свѣ́та ᲂу҆́мна. И҆ подоба́етъ вои́стиннꙋ ѻ҆́на глаго́лати бы́ти є҆ѧ̀, и҆́хже кромѣ̀ дѣ́йствовати свое́ си не мо́жетъ дѣ́йство. Но ᲂу҆́бѡ без̾ ꙗ҆́рости и҆ по́хоти дѣ́йствꙋетъ, и҆ наипа́че тогда̀ вои́стиннꙋ дѣ́йствꙋетъ, є҆гда̀ без̾ си́хъ дѣ́йствꙋетъ. Не вои́стиннꙋ ᲂу҆́бѡ ча̑сти сїѧ̑ є҆ѧ̀ сꙋ́ть, но ꙗ҆́коже рѣ́хъ, ско́тнагѡ и҆ до́льнагѡ слꙋ́чаѧ си̑лы сꙋ́ть, то́й приподста́вше. Дꙋша́ бо слове́сна, ᲂу҆́мнѣ вы̑шнѧѧ разсмотрѧ́ющи, и҆ мечта́ющи мы́слєннаѧ, и҆ па́че себѐ горѣ̀ простира́ющисѧ: и҆, ꙗ҆́коже рещѝ, возска́чꙋщи, дале́че нѣ́гдѣ поверга́етъ ꙗ҆́кѡ бꙋесло́вїе сꙋ́етно по́хоть и҆ ꙗ҆́рость, не и҆мꙋ́щи въ нѧ́же сїѧ̑ да ᲂу҆потреби́тъ, (та́мѡ) и҆дѣ́же простота̀ и҆ безви́дное, и҆ безѡбра́зное, безша́рное же и҆ невоѡбраже́нное, и҆ и҆на̑ѧ є҆ли̑ка ᲂу҆́мъ свобо́денъ и҆ є҆динови́денъ и҆ соедине́нъ къ себѣ̀, и҆ ѿню́дъ про́стъ и҆стѧзꙋ́ютъ. Но є҆́сть трича́стна сво́йственнѣ свое́ю простото́ю дꙋша̀ ᲂу҆́мъ сꙋ́щи, ᲂу҆потреблѧ́ющи сло́во и҆ дꙋ́хъ своѧ̑ си сво́йствєннѣйшаѧ, и҆ простотꙋ̀ є҆ѧ̀ ѿню́дъ ника́коже поврежда̑ющаѧ. Занѐ нижѐ тро́йственное є҆динонача́льнагѡ бж҃ества̀, є҆гѡ́же ѡ҆́бразъ подо́бенъ є҆́сть дꙋша̀, своемꙋ̀ є҆ди́нственномꙋ и҆ про́стомꙋ препѧ́тственнѣ стои́тъ, но є҆́сть и҆ про́сто є҆диноизвѣ́стнѣ бж҃ество̀ пресꙋ́щественно, и҆ па́ки ничто́же мнѣ́е, и҆ та́кѡ ᲂу҆твержде́ннѣ трⷪ҇ца. Сїѧ̑ ᲂу҆́бѡ, дꙋша̀, (си́рѣчь ᲂу҆́мъ, ᲂу҆́мъ бо є҆́сть, и҆ всѐ ᲂу҆́мъ, дꙋша̀,) сло́во, и҆ дꙋ́хъ, преесте́ственнѣ бы́ша є҆ди́но, и҆́стинное подо́бїе подаю́тъ на́мъ трїѷпоста́снагѡ є҆ди́нагѡ бж҃ества̀. Сїе́ же не ѿи́нꙋдꙋ мо́щно є҆́сть бы́ти, то́чїю ѿ горѣ̀ зрѣ́нїѧ и҆ видѣ́нїѧ преесте́ственныѧ тро́ическїѧ є҆ди́ницы. сїѧ́ бо є҆́сть дꙋ́шꙋ таковꙋ̀ сотво́ршаѧ, и҆ ѡ҆браща́ющаѧ сїю̀ на сїѐ, ѿпа́дшꙋ: и҆ кромѣ̀ є҆́же къ не́й зрѣ́нїѧ и҆ видѣ́нїѧ семꙋ̀ бы́ти дꙋшѝ не возмо́жно є҆́сть. Є҆мꙋ́же не бы́вшꙋ, нижѐ возвра́щшꙋсѧ подо́бїю, и҆ си́мъ ѡ҆́бразомъ скꙋ́дни ꙗ҆ви́мсѧ, и҆ па́че же на зри́тельнѣй ча́сти, и҆ на и҆́стинѣ, ꙗ҆̀же наипа́че тща́нїю достѡ́йнѣйша. И҆ без̾ ни́хже, въ безстра́стно ᲂу҆строе́нїе дости́гнꙋти на́мъ нѣ́сть возмо́жно. Ꙗ҆́коже бо во благо́мъ дѣ́йственнѣ на́мъ бы́ти подоба́етъ, да бꙋ́демъ ѿ безстра́стныхъ. Та́кѡ и҆ ко и҆́стинѣ зри́тельнѣ, да бꙋ́демъ бг҃ови́дни, бг҃ꙋ и҆́же над̾ всѣ́ми слꙋжа́ще и҆ бо́зи положе́нїемъ и҆ сотвори́тисѧ, и҆ бы́ти по возмо́жномꙋ подо́бїю началоѡбра́зїѧ жела́юще. А҆́ще же є҆ди́но бы́ти нꙋ́жно є҆́сть на́мъ за первоѡбра́знагѡ премі́рнагѡ є҆ди́нагѡ подо́бїе, сїе́ же є҆́же къ са́момꙋ томꙋ̀ премі́рномꙋ є҆ди́номꙋ горѣ̀ зрѣ́нїе и҆ видѣ́нїе и҆ горѣ̀ просте́ртїе и҆ ᲂу҆́мнѡ ѡ҆браще́нїе є҆стество̀ и҆́мꙋтъ твори́ти на́мъ, и҆ є҆́же къ са́момꙋ томꙋ̀ є҆ди́номꙋ неꙋкло́ннѣ смотрѣ́ти. Всѧ́цѣмъ ᲂу҆́бѡ ѡ҆́бразомъ подоба́етъ покꙋша́тисѧ взира́ти къ па́че ᲂу҆ма̀ є҆ди́номꙋ премі́рномꙋ, и҆ та́мѡ завѣща́ти всѣ́хъ себѐ всѧ́цѣмъ тща́нїемъ, и҆ всѣ́мъ се́рдцемъ и҆ дꙋше́ю, и҆ пита́ти въ себѣ̀ препросте́ртое є҆ди́нагѡ и҆ са́магѡ премі́рнагѡ раче́нїе, ꙗ҆́кѡ да са́мо раче́нїе є҆гѡ̀ вмѣ́стѡ кри́лъ ст҃ы́хъ бꙋ́детъ є҆́же къ немꙋ̀ ᲂу҆́мномꙋ горѣноше́нїю на́шемꙋ. И҆ та́кѡ всегда̀ ꙗ҆́кѡ на воздꙋ́сѣ въ безви́днѣмъ ᲂу҆строе́нїи є҆динови́днѣмъ съ гдⷭ҇емъ бꙋ́демъ вои́стиннꙋ є҆ди́нѣмъ, тро́ичнѣ тро́ицꙋ ᲂу҆́мнѣ, слове́снѣ же и҆ дꙋхо́внѣ воспѣва́юще, и҆ къ не́й ꙗ҆́кѡ вои́стиннꙋ возсїѧ́юще и҆ ᲂу҆жаса́ющесѧ, и҆ є҆́же по си́лѣ на́шей соедине́нїемъ съ є҆ди́нѣмъ соединѧ́еми є҆динови́днѣ па́че соедине́нїѧ.

л҃є. Є҆ди́ница чꙋ́вствена, всѧ́кагѡ чи́слимагѡ мно́жества є҆́сть нача́ло. И҆ є҆ди́ница премі́рна всегѡ̀ ви́димагѡ же и҆ помышлѧ́емагѡ мно́жества, и҆ всегѡ̀ сꙋ́щагѡ, нача́ло є҆́сть. Ꙗ҆́коже ᲂу҆̀бо всѧ́ко число̀ ѿ є҆ди́ницы и҆́мать нача́ло, та́кѡ всѐ сꙋ́щее ка́колибо, ѿ премі́рнагѡ пролива́етсѧ є҆ди́нагѡ, по винѣ̀ и҆лѝ є҆сте́ственнѣй и҆лѝ твори́тельнѣй. Ѻ҆ба́че чи́слимыѧ ᲂу҆́бѡ є҆ди́ницы положе́нїе, є҆ли́кѡ чꙋ́вствена є҆́сть, є҆стествꙋ̀ своемꙋ̀ послѣ́дованнѣ послѣ́дствꙋетъ. Нача́ло бо сꙋ́щихъ всѣ́хъ ꙗ҆̀же под̾ число́мъ, и҆ чꙋ́вство (сїѐ) пе́рво полага́етъ ю҆̀ чи́слѧщи. На премі́рномъ же є҆ди́номъ, занѐ є҆́сть па́че ᲂу҆ма̀, сопроти́вное зри́тсѧ. Є҆сте́ственнѣ бо сꙋ́щи є҆ди́ница, пе́рвѣйшаѧ всѣ́хъ, ᲂу҆́мъ сїю̀ по всѣ́хъ полага́етъ. Ни є҆ди́нъ бо возмо́же ᲂу҆́мъ, премі́рное є҆ди́но сотвори́ти нача́ло, ѿ сегѡ̀ происходи́ти на мнѡ́гаѧ, но проти́вное, ѿ мно́гихъ, ко ѻ҆́номꙋ восхо́дитъ и҆ собира́етсѧ. И҆ та́кѡ ᲂу҆́бѡ нꙋ́жно є҆́сть чꙋ́вствꙋ чи́слимое є҆ди́но, за происхо́дна мнѡ́гаѧ, и҆́накѡ не сꙋ́ще мо́щно чи́слити, и҆лѝ пред̾итѝ ꙗ҆́коже хо́щетъ. Здѣ́ же нꙋ̑ждна сꙋ́ть ᲂу҆мꙋ̀ мнѡ́гаѧ, ра́ди ко премі́рномꙋ є҆ди́номꙋ си́ми возвожде́нїѧ, и҆ а҆́ки сама́гѡ себѐ собра́нїе, ѿи́нꙋдꙋ взы́ти ꙗ҆́коже хо́щетъ на мечта́нїе є҆ди́нагѡ премі́рнагѡ ни ѿкꙋ́дꙋ могі́й. Та́кѡ ᲂу҆́бѡ ᲂу҆́мъ чи́нъ и҆ пꙋ́ть себѣ̀ сво́йственъ ᲂу҆потреблѧ́ѧ, начина́етъ ᲂу҆́бѡ ѿ мно́гихъ, коне́цъ же твори́тъ премі́рное и҆ верхо́внѣйшее є҆ди́но. Поне́же бо ᲂу҆добопости́жно є҆́сть и҆ ᲂу҆добопредѣ́льно чи́слимое по чꙋ́вствꙋ є҆ди́но, є҆сте́ственнѣ чꙋ́вство, сїѐ полага́етъ, ꙗ҆́коже є҆стество̀ є҆гѡ̀ и҆стѧзꙋ́етъ, и҆ положе́нїемъ пе́рвѣйше. И҆ско́маѧ же ᲂу҆мо́мъ є҆ди́ница премі́рна и҆ преесте́ственна же сꙋ́щи, и҆ є҆́же помышлѧ́ема бы́ти и҆збѣга́ющи, дале́че нѣ́гдѣ є҆́сть, и҆ своегѡ̀ є҆́же по є҆стествꙋ̀ положе́нїѧ, ꙗ҆́коже ѿ ѻ҆́ныѧ ᲂу҆мꙋ̀ начина́ти, но па́че ꙗ҆́кѡ преесте́ственнꙋ преесте́ственнѣ не нача́ло, но коне́цъ тꙋ̀ ѡ҆брѣта́етъ ᲂу҆́мъ, по преше́ствїи, и҆ да си́це рекꙋ̀ и҆счисле́нїи мно́гихъ. Поне́же бо ᲂу҆́мъ є҆стество̀ и҆́мать є҆́же помышлѧ́ти, премі́рное же є҆ди́но є҆́сть ѡ҆ себѣ̀ непости́жно и҆ непристꙋ́пно, ко мнѡ́гимъ и҆ не хотѧ́що ᲂу҆потребле́нїе прекланѧ́етсѧ ᲂу҆ма̀, нижѐ пра́зденъ бы́ти ѿ є҆́же помышлѧ́ти могі́й ᲂу҆́мъ, нижѐ верхо́вное и҆ премі́рное є҆ди́но и҆мѣ́ѧ крѣ́пость ѡ҆б̾ѧ́ти. Взира́ѧ ᲂу҆̀бо на мнѡ́гаѧ, въ ко́емждо ѿ всѣ́хъ взира́етъ мы́сленно (нѣ́что), не є҆́же что̀ є҆́сть бы́ти, но є҆́же є҆́сть нѣ́коегѡ є҆ди́нагѡ. Та́же собира́ѧ ѿ коегѡ́ждо ви́дима ко́еждо мы́сленно пред̾ѧвлѧ́емо, и҆ междꙋ̀ собо́ю сїѧ̑ согла̑сна сꙋ́ща, а҆ не проти̑вна зрѧ̀, и҆ всѧ̑ а҆́ки є҆ди́нагѡ ко́рене и҆ и҆зраще́нїѧ цвѣ́ты, послѣ́дованнѡ происхо́дитъ ѿ мно́гихъ на є҆ди́но верхо́внѣйшее, и҆з̾ негѡ́же сꙋ́ть мнѡ́гаѧ и҆ всѧ̑ є҆сте́ственнѣ собира́етсѧ ѿ є҆сте́ственныхъ сꙋ́щихъ въ чи́нъ преесте́ственъ, преесте́ственное и҆ пресꙋ́щественное а҆́ки въ зерца́лѣ зрѧ̀ є҆ди́ное, ꙗ҆́коже и҆́мать є҆стество̀ є҆́же па́че є҆стества̀ ѿ сꙋ́щихъ по є҆стествꙋ̀ зрѣ́тисѧ є҆динови́днѣ. Тогда̀ ᲂу҆̀бо ᲂу҆́мъ и҆сточи́тельное бла́гостей и҆ всѣ́хъ добро́тъ происточе́нїе, и҆ твори́тельно неизрече́ннѣ взира́ѧ, и҆ насла́ждсѧ пресꙋ́щественнагѡ є҆ди́на, не самово́ленъ ѡ҆браща́етсѧ на мнѡ́гаѧ, а҆́ще сꙋ́ща и҆ дѡбра̀ и҆ ча́сти благі́ѧ прича̑стна. Добротолюби́въ бо сы́й наипа́че, є҆сте́ственнѣ нево́лею ѿстои́тъ ѿ є҆́же па́че всѣ́хъ, а҆́ще не ка́кѡ по ѡ҆бстоѧ́нїю нѣ́коемꙋ слꙋчи́лосѧ бы є҆мꙋ̀ сїѐ. Но поне́же ѡ҆́бразъ сꙋ́щихъ є҆́сть разли́ченъ, и҆ разли́чно и҆́мать ᲂу҆́мное взира́нїе, и҆ разли́чнѣ ᲂу҆́мъ си́ми на премі́рное є҆ди́но, и҆ преесте́ственное востека́етъ: подоба́етъ ꙗ҆́коже а҆́зъ мню̀, ма́лѡ нѣ́кое ᲂу҆хи́трити мно́гими къ пресꙋ́щественномꙋ премі́рномꙋ є҆ди́номꙋ пꙋтѝ прїѡбрѣ́тенїе: ꙗ҆́кѡ да а҆́ки по лѣ́ствицѣ ᲂу҆́мъ восходѧ̀ ᲂу҆твержде́ннѣйше своѐ твори́тъ движе́нїе, и҆ познава́етъ, а҆́ще бы что̀ когда̀ въ не́мъ ѡ҆скꙋдѣва́ло: и҆лѝ є҆́стьли когда̀ въ не́мже подоба́етъ бы́ти, и҆ всѣ́мъ нѣ́коликѡ наслажда́етсѧ ли, и҆ что̀ є҆́сть низме́щꙋщее и҆ ѿставлѧ́ющее є҆го̀ добро́ты ѻ҆́ныѧ и҆ восхожде́нїѧ и҆лѝ бж҃е́ственнагѡ пирова́нїѧ: и҆ ка́кѡ па́ки мо́щно бы бы́ло є҆мꙋ̀ возврати́тисѧ, ѿѻнꙋ́дꙋже поползе́сѧ. Ѿсю́дꙋ позна́етъ и҆ мглꙋ̀ страсте́й: и҆ чи́стагѡ се́рдца ѡ҆заре́нїе и҆ позна́нїе и҆́стины каково̀ нѣ́кое є҆́сть возмо́глъ вы̀ зрѣ́ти ꙗ҆́кѡ въ зерца́лѣ, и҆ небе́сныхъ зри́тельствъ прича́стникъ бꙋ́детъ, и҆ бж҃е́ственное чꙋ́вство ᲂу҆вѣ́сть, и҆ не та́йно бꙋ́детъ є҆мꙋ̀, расте́тъ ли, и҆лѝ ко ᲂу҆мале́нїю и҆́детъ. И҆ мно́гихъ досточꙋ́дныхъ въ разꙋмѣ́нїи возмо́глъ бы бы́ти, и҆ намѣ́ренїе безмо́лвїѧ, ко́е є҆́сть, ᲂу҆разꙋмѣ́етъ, и҆ затво́ра. Глаго́лемъ ᲂу҆́бѡ та́кѡ: всѧ̑ сꙋ̑щаѧ, раздѣли́шасѧ на чꙋ́вствєнна зда̑нна, и҆ на зда̑нна мы́слєнна на мы́слєнна не зда̑нна, и҆ на незда́нно па́че ᲂу҆ма̀ є҆ди́но пресꙋ́щественно. Въ си́хъ ѻ҆́ко дꙋше́вное ѡ҆браща́ѧсѧ, си́рѣчь ᲂу҆́мъ, и҆ ча́стѣ взира́ѧ, и҆ въ по́стничествѣ є҆́же безмо́лвствовати и҆зволѧ́ѧ, воздви́жетсѧ ѿ є҆́же подоба̑ющаѧ на є҆динѣ̀ дѣ́ѧти, ꙗ҆́кѡ ѿ сте́пене нѣ́коегѡ во є҆́же зрѣ́ти, и҆ въ вои́стиннꙋ сꙋ́щемъ ᲂу҆пражнѧ́тисѧ небе́сныхъ, и҆ лꙋча́ми и҆́стины ᲂу҆вѣнчава́тисѧ, и҆ ра́доватисѧ, и҆ богатѣ́ти безконе́чнѣ присносꙋ́щными, и҆ чꙋ́днѣ весели́тисѧ и҆ ᲂу҆слажда́тисѧ, не́гли же содѣ́йствомъ благода́ти, и҆ ѿ землѝ восхища́тисѧ пред̾идꙋ́щꙋ вре́мени, и҆ ᲂу҆тверди́вшꙋсѧ ᲂу҆́мномꙋ свѣ́тꙋ по навыкнове́нїю, и҆ не чꙋ́вствовати сꙋ́щихъ здѣ̀ содержа́нїемъ сꙋ́щагѡ па́че ᲂу҆ма̀, и҆ мечта́нїемъ сꙋ́щагѡ па́че всѧ́кагѡ добра̀ несравне́ннѡ. Пѧточа́стнѣ же сщ҃е́ннѣй се́й лѣ́ствицѣ раздѣле́ннѣ сꙋ́щей, и҆ ꙗ҆́кѡ степе́нми восходѧ́щей на кра́йнее намѣ́ренїе, не мѣ́стно и҆́мать разстоѧ́нїе сте́пень ѿ сте́пене: но ра́знство, и҆ є҆́же разстои́тъ ѿ дрꙋга́гѡ, и҆́нъ чи́нъ є҆́сть, а҆́ки ка́чества, и҆лѝ сво́йства нѣ́коегѡ. Ꙗ҆́коже, сꙋ́ща ᲂу҆́бѡ, сꙋ́ть ра́внѣ: чꙋ́вствєннаѧ зда̑нна, и҆ зда̑ннаѧ мы́слєнна, но втора̑ѧ, мно́гою мѣ́рою пе́рвѣйшихъ превыша́ютъ, є҆ли́кѡ чꙋ́вство ᲂу҆́мъ, сво́йственнымъ добро́мъ: па́ки же превосхо́дѧтъ по мно́гꙋ незда̑нна мы́слєнна, мы́сленныхъ зда́нныхъ, ѻ҆боемꙋ̀ си́хъ чи́нꙋ въ сꙋ́щихъ ꙗ҆вле́нꙋ сꙋ́щꙋ: ѻ҆ба́че ни̑зша сꙋ́ть сꙋ̑щаѧ незда̑нна мы́слєнна пред̾ па́че ᲂу҆ма̀ незда́ннымъ є҆ди́нымъ. И҆ є҆́сть ѿсю́дꙋ ꙗ҆́вѣ, ꙗ҆́кѡ є҆́же въ превосходѧ́щемъ всѣ́хъ сꙋ́щихъ стоѧ́ти прише́дшꙋ ᲂу҆мꙋ̀ ѿ дѣѧ́нїѧ, и҆ во ѻ҆́нѣмъ верхо́внѣйшемъ сокрове́нствѣ превы́ше лежа́щемъ всѣ́хъ чꙋ́вственныхъ же и҆ мы́сленныхъ бы́ти лꙋ́чшее є҆́сть взира́нїе є҆гѡ̀ и҆ видѣ́нїе, ꙗ҆́коже смире́ннѣйшее въ чꙋ́вственныхъ зда́нныхъ и҆лѝ и҆ па́че въ дѣ́лательствѣ. Подоба́етъ ᲂу҆̀бо добротолю́бнꙋ сꙋ́щꙋ є҆мꙋ̀ є҆стество́мъ, всѧ́цѣмъ ѡ҆́бразомъ лꙋ́чшагѡ жела́ти, не то́чїю да наслади́тсѧ, но да и҆ постра́ждетъ лꙋ́чшее и҆ па́че ᲂу҆ма̀, ꙗ҆́коже подоба́етъ, и҆змѣне́нїе. Поне́же ꙗ҆́коже глаго́ласѧ, ꙗ҆кѡва̀ ᲂу҆́мъ зри́тъ, и҆ въ ꙗ҆ковы́хъ наслажда́етсѧ: таково̀ прїе́млетъ и҆ и҆змѣне́нїе. Ѻ҆ба́че поне́же сплете́нный съ є҆стество́мъ ᲂу҆ма̀ прело́гъ, никогда́же преста́нетъ ѿ негѡ̀, до́ндеже дне́шнее бꙋ́детъ, и҆ по глаго́лющемꙋ, до́ндеже дви́гнꙋтсѧ сѣ̑ни, то̀ є҆́сть, до́ндеже пре́йдемъ ѿ настоѧ́щїѧ жи́зни, показꙋ́ющїѧ а҆́ки въ зерца́лѣ и҆ гада́нїи ѡ҆сѣне́ннѣ и҆́стинꙋ: подоба́етъ препа́дающымъ ѿ видѣ́нїѧ и҆ взира́нїѧ, є҆ди́нагѡ па́че ᲂу҆ма̀ незда́ннагѡ, ᲂу҆хищрѧ́тисѧ стоѧ́ти, ꙗ҆́кѡ въ бли́жнемъ въ мы́сленныхъ незда́нныхъ, ꙗ҆́кѡ да па́ки скорѣ́е къ є҆ди́номꙋ па́че ᲂу҆ма̀ незда́нномꙋ бꙋ́детъ на́мъ возвраще́нїе. Дебе́льшей же напа́дшей мглѣ̀, и҆ є҆́же помышлѧ́ти помрача́ющей, и҆ ᲂу҆ны́нїе возлива́ющей ко є҆́же зрѣ́ти на ᲂу҆́мъ, на моли̑твы дѣ́ѧтельнѣ съ се́рдцемъ смире́ннымъ ѡ҆браща́ти подоба́етъ на́мъ є҆го̀, и҆ тьмѣ̀ си́лою моли́твы преше́дшей, па́ки ꙗ҆́коже ѡ҆снова́нїе нѣ́кое твори́ти чꙋ́вствєннаѧ зда̑нна: предживꙋ́щꙋ въ се́рдцѣ дѣ́йствомъ дꙋхо́внымъ сꙋще́ственнымъ свѣ́тꙋ ᲂу҆́мнꙋ, и҆ предсодержа́щꙋ ᲂу҆мꙋ̀ ꙗ҆́вѣ ꙗ҆́кѡ дѣ́ѧтельныѧ разꙋ́мнѡ ѕѣлѡ̀ держа́вꙋ. Ꙗ҆́кѡ восходи́ти ᲂу҆́мъ є҆стество̀ и҆́мать а҆́ки на нѣ́кое верхого́рїе, и҆лѝ смотри́лище вои́стиннꙋ, и҆ зрѣ́ти мно́гими не то́кмѡ неви̑дима, но и҆ неискѡ́ма и҆ недомы́слєнна: и҆ є҆гѡ́же кромѣ̀ никто́же ᲂу҆́зритъ, нижѐ самого̀ себѐ, нижѐ и҆ наипа́че бг҃а. Ѡ҆ кото́рой дѣ́ѧтельнѣ (добродѣ́тели) мимоше́ственнѣ ны́нѣ ᲂу҆жѐ рещѝ не́гли не дале́че намѣ́ренїѧ бꙋ́детъ.

л҃ѕ. Трѝ дꙋша̀ внꙋтрьꙋ́дꙋ и҆́мать тре́бꙋюща дѣѧ̑нїѧ, слове́снꙋ (ча́сть), жела́тельнꙋ, и҆ ꙗ҆́ростнꙋ. И҆ трѝ внѣꙋ́дꙋ, жела́нїе сла́вы, сла́сти, и҆ мно́гшагѡ. Сі́и ᲂу҆̀бо двѣ̀ тро́йцѣ разꙋ́мнѡ дꙋша̀ взира́ющи на є҆́же во пло́ти жи́тельство і҆и҃са хрⷭ҇та̀ четы́рми свои́ми собо́рными добродѣ́тельми, мꙋ́дростїю, си́рѣчь пра́вдою, цѣломꙋ́дрїемъ, и҆ мꙋ́жествомъ, благода́тїю гдⷭ҇а і҆и҃са и҆сцѣлѧ́етъ, и҆ дае́тъ ᲂу҆мꙋ̀ своемꙋ̀ неѡмраче́ннѣ возвыша́тисѧ, и҆ бж҃е́ствєннаѧ разсмотрѣва́ти, и҆ зрѣ́ти бг҃а. Є҆гда́ бо гдⷭ҇ь і҆и҃съ веде́нъ бы́сть въ пꙋсты́ню дꙋ́хомъ, и҆мѣ́ѧ боре́нїемъ побѣди́ти дїа́вола, посто́мъ ᲂу҆́бѡ похотѣ́тельнꙋю ча́сть и҆сцѣлѝ: бдѣ́нїемъ же и҆ безмо́лвною моли́твою, слове́ственнꙋю: ꙗ҆́ростнꙋю же сопротиворѣ́чїемъ: сластолю́бїе же, славолю́бїе, и҆ сребролю́бїе: тѣ́ми, и҆́миже а҆лча̀ не взыска̀, ꙗ҆́коже дїа́волъ совѣ́товаше, да ка́менїе хлѣ́бы бꙋ́дꙋтъ, нижѐ ве́ржесѧ ни́зꙋ ѿ крила̀ церко́внагѡ, да ѿ наро́да ничто́же пострада́въ низпаде́нїемъ просла́витсѧ, нижѐ поклони́тисѧ повинꙋ́сѧ ѡ҆бѣща́нїѧ ра́ди взѧ́тїѧ бога́тства всѣ́хъ ца́рствъ: но сопротиворѣ́чїемъ ꙗ҆рови́днымъ, мꙋ́дрымъ, и҆ пра́веднымъ, цѣломꙋ́дрымъ же, и҆ мꙋ́жественнымъ, сатанꙋ̀ ѿразѝ, и҆ на́съ си́мъ ᲂу҆ча̀ побѣжде́нїю є҆гѡ̀ проти́вꙋ всѧ́комꙋ наше́ствїю. Сїѐ ᲂу҆́бѡ и҆́стое кто̀ и҆ при крⷭ҇тѣ̀ сп҃совѣ ᲂу҆́зритъ и҆ ᲂу҆вѣ́сть: и҆́бо мо́литсѧ ли въ тогда́шнее вре́мѧ сп҃съ, ᲂу҆ченикѡ́въ ᲂу҆дали́всѧ: Сїѐ и҆сцѣле́нїе слове́ственныѧ ча́сти є҆́сть. Бо́дрствꙋетъ ли и҆ бди́тъ, и҆ жа́ждꙋ терпи́тъ на крестѣ̀; сїѐ врачба̀ є҆́сть похотѣ́тельныѧ. Не вопрекѝ глаго́летъ, нижѐ ᲂу҆́бѡ при́тсѧ и҆ вопїе́тъ, да є҆щѐ ѡ҆болгава́емь, и҆ ѡ҆ стꙋжа́ющихъ мо́литсѧ ли; Сїѐ бл҃гочи́нїѧ є҆́сть ꙗ҆́ростныѧ: дїа́вола ᲂу҆́бѡ сопротиворѣ́чїемъ ᲂу҆дарѧ́ти, человѣ́кѡмъ же стꙋжа́ющымъ, ꙗ҆́кѡ и҆ тѣ̑мъ стꙋжа́ємымъ ѿ сатаны̀ (ѿпꙋща́ти) молча́нїемъ, долготерпѣ́нїемъ, и҆ ѡ҆ ни́хъ воздава́ти моли́твою. Ѡ҆плева́емь ли є҆́сть, заꙋше́нїе прїе́млетъ, терпи́тъ подсмѣва̑нїѧ и҆ порꙋга́нїе; сїѐ и҆сцѣле́нїе є҆́сть сластолю́бїѧ, ѻ҆́цтомъ ли напоѧ́етсѧ, же́лчїю напитова́етсѧ, копїе́мъ пробода́етсѧ; сїѐ врачба̀ є҆́сть сластолю́бїѧ. На́гъ ли повѣ́шаваетсѧ подвоздꙋ́шенъ, бездо́менъ на крестѣ̀, презрѣ́нъ всѣ́ми а҆́ки нѣ́кїй ни́щъ и҆ ᲂу҆бо́гъ; сїѐ є҆́сть сребролюби́вагѡ завѣща́нїѧ ᲂу҆праздне́нїе. Внꙋ́треннихъ ᲂу҆̀бо страсте́й и҆ внѣ́шнихъ сп҃си́тель два́жды показа̀ врачбꙋ̀: є҆гда̀ въ мі́рѣ ꙗ҆влѧ́тисѧ съ тѣ́ломъ нача́тъ, и҆ є҆гда̀ ѿ мі́ра ѿитѝ и҆мѣ́ѧше. Тѣ́мже и҆ къ немꙋ̀, и҆ ко ᲂу҆че́нїю є҆гѡ̀ и҆ ко крестꙋ̀ зрѧ́й, поели́кꙋ є҆́сть мо́щно себѐ подража́нїе є҆гѡ̀ творѧ̀, мꙋ́дрѣ и҆ пра́веднѣ, цѣломꙋ́дреннѣ же и҆ мꙋ́жественнѣ ꙗ҆́коже ѻ҆́нъ ᲂу҆праздни́тъ ᲂу҆́бѡ є҆́же на ѕло̀ дѣ́йствїе страсте́й си́хъ, и҆ всѣ́хъ си́ми: ᲂу҆потреби́тъ же сїѧ̑, ꙗ҆́коже подоба́етъ, и҆ по си́хъ всѧ̑, и҆ дѣ́ѧтеленъ мꙋ́жъ бꙋ́детъ вои́стиннꙋ, и҆ ко є҆́же зрѣ́ти, и҆ къ бг҃ꙋ горѣ̀ простира́тисѧ и҆ ᲂу҆пражнѧ́тисѧ во ᲂу҆́мнѣмъ зри́тельствѣ гото́вѣйшъ. И҆ та́кѡ ᲂу҆́бѡ ѿ мно́гихъ ᲂу҆́мъ є҆гѡ̀ чꙋ́вственныхъ зда́нныхъ наче́нъ, и҆ ᲂу҆ви́дѣвъ добродѣ́лїѧ и҆́хъ благополꙋ́чїе, и҆ разꙋмѣ́въ зда̑ннаѧ мы́слєнна, и҆ на мы́слєннаѧ незда̑нна преше́дъ, ꙗ҆́кѡ на лѣ́ствицѣ степе́ни ᲂу҆жѐ пре́йде четы́ри. По си́хъ же бж҃е́ственное и҆ па́че ᲂу҆ма̀ послѣ́дствꙋетъ є҆мꙋ̀ невѣща́нїе и҆ молча́нїе и҆ ᲂу҆́жасъ, и҆ вкра́тцѣ рещѝ, є҆ди́нагѡ премі́рнагѡ взира́нїе и҆ видѣ́нїе, и҆ па́че помышле́нїѧ соедине́нїе. Є҆́же є҆́сть безмо́лвїѧ ве́рхъ: кра́йнее и҆ соверше́нное жела́нїе є҆ли́кѡ въ настоѧ́щей жи́зни: и҆́стины предѣ́лъ: вѣ́ры припло́дїе: свѣ́тлое просвѣще́нїе надѣ́емыѧ сла́вы: ѡ҆снова́нїе любвѐ: пра́вило ᲂу҆ма̀: стоѧ́нїе приснодвиже́нїѧ є҆гѡ̀, и҆ недомы́сленно почи́тїе, и҆ є҆динови́дно ᲂу҆строе́нїе: є҆́же ꙗ҆́кѡ во ѡ҆брꙋче́нїи дѣ́ланїе є҆́сть бꙋ́дꙋщагѡ вѣ́ка: вина̀ безмечта́нныѧ ра́дости: ло́жница ми́ра: ᲂу҆гаше́нїе мꙋдрова́нїй пло́ти: ѿвраще́нїе настоѧ́щагѡ вѣ́ка: пристра́стїе бꙋ́дꙋщагѡ, кни́га распꙋ́стнаѧ стра́стныѧ жи́зни, соесте́ствїе безстра́стїѧ: дꙋшѝ весе́лое ра́дованїе, и҆ свои́хъ є҆ѧ̀ движе́нїй и҆ си́лъ собра́нїе, поко́й же и҆ стра́жа: и҆ все́мственнѣ рещѝ, бж҃е́ственный ра́зꙋмъ и҆ безстра́стїе. Подоба́етъ же смотрѣ́ти, свои́мъ ᲂу҆ны́нїемъ и҆лѝ внѣ́шнимъ нѣ́кимъ ѡ҆бстоѧ́нїемъ ꙗ҆́тꙋ бы́вшꙋ ᲂу҆мꙋ̀, па́ки на своѐ возвраща́тисѧ видѣ́нїѧ добро̀ сопроти́въ стоѧ́щїѧ стра́сти, и҆ дале́че творѧ́щїѧ є҆го̀ своегѡ̀ намѣ́ренїѧ ѿверже́нїемъ, и҆ коли́кѡ ѿстои́тъ кра́йнѧгѡ жела́емагѡ; и҆ почто̀; и҆ въ чꙋ́вственныхъ ли зда́нныхъ, и҆лѝ зда́нныхъ мы́сленныхъ, и҆лѝ мы́сленныхъ незда́нныхъ є҆́сть своѐ є҆гѡ̀ зрѧ́щее; и҆лѝ пѡ́мыслы сꙋ́етными, и҆лѝ потре́бы ра́ди нѣ́кїѧ раздѣлѧ́етсѧ ѿ предлежа́щагѡ, и҆ са́магѡ вои́стиннꙋ, и҆ є҆ди́нагѡ па́че всѧ́кагѡ є҆ди́нагѡ премі́рнагѡ, и҆ ѿѧ́ти си́це ꙗ҆̀же посредѣ̀ возбране́нїѧ; Да па́ки возврати́тисѧ є҆динови́днѣ, ꙗ҆́коже са́мъ то́й чи́нъ и҆стѧзꙋ́етъ, къ є҆ди́нагѡ премі́рнагѡ видѣ́нїю и҆ взира́нїю. Внѣ́ бо нѣ́гдѣ премі́рнагѡ назда́ннагѡ па́че ᲂу҆ма̀ ᲂу҆́мъ ѡ҆брѣта́ѧсѧ под̾ раздѣле́нїемъ є҆́сть, и҆ не въ вои́стиннꙋ до́брѣмъ, а҆́ще бы и҆ двиза́лсѧ до́брѣ. Сїе́ бо є҆́сть верхо́вное добро̀, є҆́же па́че ᲂу҆ма̀ пресꙋ́щественное незда́нное и҆ про́стое є҆ди́но: и҆ се́й є҆́сть вои́стиннꙋ кра́йнїй прѧ́мѡ ᲂу҆ма̀ лежа́щъ коне́цъ. И҆ ᲂу҆̀бо здра́вѡ двиза́ѧсѧ ᲂу҆́мъ та́мѡ рече́нными ѡ҆брѣта́етсѧ восходѧ̀, и҆ є҆́же па́че ᲂу҆ма̀ стра́ждетъ соедине́нїе. Гони́ти ᲂу҆́бѡ подоба́етъ, є҆ли́ка си́ла, безконе́чное, и҆ и҆спытова́ти є҆́же па́че ᲂу҆ма̀, и҆ зрѣ́ти безви́дное є҆ди́но, и҆ постиза́ти наше́ствїемъ непости́жное, да возмо́жемъ полꙋчи́ти є҆ди́нственное є҆ди́нагѡ наслѣ́дїе кра́йнѧгѡ бг҃а, благода́тїю гдⷭ҇а на́шегѡ і҆и҃са, и҆ животворѧ́щаго дх҃а, и҆́мже просвѣща́еми зри́тельныѧ сподоблѧ́емсѧ благода́ти, и҆ бо́зи положе́нїемъ бг҃осодѣ́лавшесѧ быва́емъ да́ромъ бж҃їимъ.

л҃з. Въ мѣ́сто бж҃е́ственнагѡ сокрове́нства возше́дъ ᲂу҆́мъ, є҆сте́ственнѣ молча́нїю прилѣжи́тъ соедини́всѧ простотѣ̀, и҆ послѣ́дованнѡ є҆ди́нственнѣ є҆́же па́че мы́сли є҆ди́номꙋ, ѡ҆сїѧва́емь прича́стїемъ дх҃а. Что́ бо и҆ возглаго́лалъ бы превы́ше своегѡ̀ ᲂу҆́мствованїѧ дости́гши, и҆ внѣ̀ всѧ́кагѡ помышле́нїѧ бы́въ, и҆ на́гъ ѿню́дъ ꙗ҆́кѡ па́че є҆́же помышлѧ́ти; А҆́ще бо сло́во ꙗ҆́коже глаго́лати є҆щѐ є҆мꙋ̀ ѡ҆стае́тсѧ, ꙗ҆́вѣ є҆́сть, ꙗ҆́кѡ и҆ помышлѧ́етъ: всѧ́ко бо сло́во є҆́сть по помышле́нїи, и҆ а҆́ще что̀ помышлѧ́етъ, ка́кѡ въ мѣ́стѣ сокрове́нства ста̀; не бо̀ є҆́сть та́йно вои́стиннꙋ, є҆́же и҆но́мꙋ не ви́дѧщꙋ са́мъ то́й ᲂу҆́мъ ви́дитъ. Занѐ та́кѡ ᲂу҆́бѡ мнѡ́га глаго́лаласѧ бы́ша та̑йна, ꙗ҆́кѡ премнѡ́га, и҆лѝ да си́це рекꙋ̀, всѧ̑ є҆ли̑ка ᲂу҆́мъ ви́дитъ, не вѣ́дꙋщꙋ и҆но́мꙋ є҆́же ви́дитъ, сїѐ ви́дитъ. Бꙋ́дꙋтъ ᲂу҆̀бо си́це та̑йнаѧ и҆ безконе́чнагѡ бли́зъ: є҆́же є҆́сть безмѣ́стно. Є҆ди́но бо є҆́сть вои́стиннꙋ та́йное, въ не́мже ᲂу҆́мъ по всѣ́хъ восхо́дитъ, ꙗ҆́кѡ въ то̀, ѿ негѡ́же всѐ є҆́сть, а҆́ще ви́димое, а҆́ще помышлѧ́емое. Тѣ́мже и҆ то́й, ꙗ҆́кѡ ко є҆́же па́че всѣ́хъ восте́къ, и҆ ви́димыхъ, и҆ глаго́лемыхъ, и҆ помышлѧ́емыхъ, внѣ̀ и҆ є҆́же помышлѧ́ти и҆ ви́дѣти и҆ глаго́лати быва́етъ. И҆ не ᲂу҆̀ на толи́ко взы́де, нижѐ въ бж҃е́ственное дости́же сокрове́нство, до́ндеже бы глаго́лати мо́глъ: помышлѧ́етъ бо. Но ѻ҆ба́че та́йное недомы́сленно, ᲂу҆̀бо и҆ па́че сло́ва є҆́сть. Оу҆̀бо ᲂу҆́мъ въ мѣ́сто бж҃е́ственнагѡ сокрове́нства возше́дъ и҆ соедини́всѧ, послѣ́дованнѡ молча́нїю прилѣжи́тъ не во́лею, но є҆сте́ственнѡ и҆ є҆ди́нственнѡ па́че мы́сли є҆ди́нымъ ѡ҆сїѧва́емь.

л҃и. А҆́ще напре́дъ пред̾итѝ и҆ пред̾ꙋспѣва́ти твори́ти ᲂу҆́мъ словеса̀ є҆стество̀ и҆́мꙋтъ, ᲂу҆̀бо возведꙋ́тъ є҆го̀ пред̾ꙋспѣ́вша, и҆дѣ́же сло́во не достиза́етъ въ ве́щь ꙗ҆́вѣ ꙗ҆́кѡ соверша́емꙋ молча́нїемъ. А҆́ще ли же при́снѡ словеса̀ бы́ли бы́ша ᲂу҆мꙋ̀, и҆ при́снѡ тре́бꙋетъ и҆́хъ дꙋша̀, а҆́зъ не ви́ждꙋ, ко́е є҆́сть ᲂу҆́мное ѿ є҆́же глаго́лати предспѣ́ѧнїе: є҆́же бо глаго́лати, не то́кмѡ є҆́сть, во є҆́же дѣ́ѧти поле́зно, но ничто́же мнѣ́е и҆ во є҆́же ви́дѣти. Въ ню́же ча́сть ᲂу҆́мъ восхо́дитъ ѿ ꙗ҆̀же во ѡ҆́бразѣ слове́съ сꙋ́щихъ, къ про́стѣ па́че сло́ва без̾ѡбра́зномꙋ, и҆ соверше́ннѡ и҆ вои́стиннꙋ є҆ди́номꙋ, внегда̀ и҆ всѧ́ко сло́во мни́тсѧ (бы́ти) чрездѣ́льно, и҆лѝ и҆́стиннѣйше рещѝ, є҆́сть на препѧ́тїе. Словеса́ бо, по всемꙋ̀, въ прехожде́нїи сꙋ́ть ѿ помышле́нїѧ не́гли на и҆́но помышле́нїе: про́стое же и҆ соверше́нное, и҆ безпредѣ́льное и҆ без̾ѡбра́зное, и҆ ѿню́дъ є҆ди́но вои́стиннꙋ и҆ па́че сло́ва сꙋ́щее, ка́кѡ слове́съ востре́бꙋетъ, да нѣ́гдѣ пре́йдетъ; и҆лѝ ка́кѡ возмогло́ бы ѡ҆б̾ѧ́то бы́ти; ѡ҆б̾ѧ́тїе бо нѣ́какѡ сло́во твори́ти ѻ҆бы́чай и҆́мать: неѡб̾ѧ́тїе же, ꙗ҆́кѡ безпредѣ́льно и҆ без̾ѡбра́зно є҆́сть. А҆́ще же сло́во не бы̀ прили́чествовало та́йномꙋ па́че ᲂу҆ма̀ є҆ди́номꙋ, не ѡ҆б̾ѧ́тꙋ же сꙋ́щꙋ и҆ без̾ѡбра́знꙋ: вои́стиннꙋ восприли́чествꙋетъ молча́нїе, ᲂу҆̀бо є҆́же глаго́лати, ѡ҆конча́ти пред̾ꙋспѣ́вшымъ подоба́етъ ко є҆́же молча́ти, поне́же ко є҆́же про́стѣ зрѣ́ти, и҆ невоѡбраже́ннѣ, и҆ без̾ѡбра́знѣ, пред̾ꙋспѣ́ша.

л҃ѳ. А҆́ще словеса̀ сꙋ́ть ᲂу҆вѣ́дѣнныхъ (веще́й), та́йное же є҆́сть невѣ́домо: ᲂу҆̀бо внѣ̀ сло́ва є҆́сть та́йное. А҆́ще бо вы́шше вѣ́дѣнїѧ невѣ́дѣнїе та́йнагѡ є҆́сть, вы́шшее же вѣ́дѣнїѧ ника́коже тре́бꙋетъ вѣ́дѣнїѧ, мно́гѡ мнѣ́е сло́ва востре́бꙋетъ. Къ та́йномꙋ ᲂу҆̀бо про́стѣ є҆ди́номꙋ возше́дъ ᲂу҆́мъ, молча́нїю прилѣжи́тъ є҆сте́ственнѣ, и҆ а҆́ще не бы̀ є҆стество́мъ и҆ не ᲂу҆хищре́ннѣ молча́лъ, не ᲂу҆̀ въ та́йное и҆ препро́стое є҆ди́но дости́же возше́дъ.

м҃. Ꙗ҆́коже безмо́лвїю прилѣжа́ще человѣ́цы, и҆ ѿ ке́ллїи ѻ҆вогда̀ и҆схо́дѧтъ, и҆ са́мымъ и҆скꙋ́сомъ ра́знство сидѣ́нїѧ и҆ и҆схожде́нїѧ разсꙋжда́ютъ. Та́кѡ вои́стиннꙋ и҆ є҆́же молча́ти стра́ждꙋще, и҆ є҆́же глаго́лати по́слѣжде приходѧ́ще зри́тельнѣ сла́вѣ бж҃їей присѣдѧ́щїи, вѣ́дѧтъ себѐ, что̀ за ᲂу҆строе́нїе сꙋ́ть, (є҆гда̀) є҆́же молча́ти напа́даетъ на нѧ̀ є҆стество́мъ, а҆ не произволе́нїемъ. И҆ что̀ сꙋ́ть, є҆гда̀ ко є҆́же глаго́лати прекланѧ́ютсѧ; И҆ є҆щѐ, а҆́ще є҆стество́мъ на́йде на нѧ̀ є҆́же молча́ти, мо́лѧтсѧ ли, и҆лѝ ѿню́дъ нижѐ ᲂу҆́стъ ѿве́рсти бы́сть и҆̀мъ когда̀, стоѧ́щымъ во ѻ҆́номъ ᲂу҆строе́нїи; А҆́гг҃ли бо сꙋ́ть на землѝ и҆ні́и, є҆динови́днѡ, безви́днѡ, без̾ѻче́снѡ, без̾ѡбра́знѡ, и҆ про́стѣ непрехо́дными ᲂу҆ма̀ взира́нїи и҆́стинѣ совокꙋплѧ́еми, то́чїю съ собо́ю и҆мꙋ́ще ᲂу҆́жасъ и҆ ᲂу҆дивле́нїе без̾ є҆́же помышлѧ́ти что̀. Па́че же по є҆́же без̾ѻче́снѣ взира́ти на безнача̑льнаѧ и҆ бж҃е́ствєннаѧ ѡ҆сїѧ̑нїѧ, и҆ ѿѻнꙋ́дꙋ сше́дшꙋ ᲂу҆мꙋ̀ ꙗ҆́кѡ и҆мꙋ́щемꙋ прело́гъ, достиза́ютъ ко є҆́же глаго́лати и҆ преходи́ти ᲂу҆́мнѣ во мнѡ́га и҆ разли̑чна прехождє́нїѧ: и҆ да па́ки тѣ́мъ є҆́же молча́ти ᲂу҆строе́нїе возврати́тсѧ, ꙗ҆́кѡ лꙋ́чше мно́гѡ па́че є҆́же глаго́лати сꙋ́щее, безмо́лвїе лобыза́ютъ и҆ хранѧ́тсѧ съ чꙋ́вственными чꙋ́вствъ, и҆ всѧ́ко ᲂу҆хищре́нїе ᲂу҆потреблѧ́ютъ, ка́кѡ бы возмоглѝ бѣжа́ти со є҆́же глаго́лати и҆ самагѡ̀ тогѡ̀ є҆́же помышлѧ́ти. Да мо́гꙋтъ глаго́лати и҆ ті́и съ даві́домъ: ѡ҆нѣмѣ́хъ и҆ смири́хсѧ, и҆ ᲂу҆моча́хъ ѿ бла̑гъ¹³⁵¹. И҆́бо и҆ блага̑ѧ глаго́лати, ни́жше є҆́сть молча́нїѧ съ разсꙋжде́нїемъ.

м҃а. Нижѐ всѧ́чески и҆з̾ѧвле́но є҆́сть бж҃е́ственное, нижѐ па́ки та́йно, но ꙗ҆́кѡ ᲂу҆́бѡ є҆́сть, и҆з̾ѧви́сѧ и҆ ѕѣлѡ̀ ꙗ҆́снѣ: что́ же є҆́сть по сꙋществꙋ̀, є҆́сть та́йно. Ѕѣлѡ́ же ра́знствꙋетъ вѣ́дѣти, є҆́же что́ є҆сть, ѿ тогѡ̀, ꙗ҆́кѡ є҆́сть. Занѐ то̀ ᲂу҆́бѡ, ѿ дѣ́йствїѧ ꙗ҆влѧ́етсѧ: сїе́ же, что́ є҆сть, ѿ сꙋщества̀ є҆́сть. Є҆́же вои́стиннꙋ и҆ а҆́гг҃лѡмъ въ бз҃ѣ вѣ́дѣти ѿча́ѧно є҆́сть. Є҆́сть бо бг҃ъ па́че всѧ́кагѡ сꙋщества̀ безконечнокра́тнѣ безконе́чный: и҆ па́че всѧ́кагѡ ᲂу҆ма̀, и҆ па́че є҆́же помышлѧ́емь бы́ти. Внегда̀ ᲂу҆́бѡ ᲂу҆́мъ дости́глъ бы въ ꙗ҆влѧ̑ющаѧ, ꙗ҆́кѡ є҆́сть бг҃ъ, тогда̀ мнѡ́га мо́жетъ глаго́лати, и҆ любомꙋ́дрствовати и҆зрѧ́днѣйше, и҆ любомꙋ́дръ мо́жетъ глаго́латисѧ и҆ бг҃осло́венъ. Є҆гда́ же превозни́къ и҆ превозше́дъ ѿ тогѡ̀, ꙗ҆́кѡ є҆́сть бж҃е́ственнымъ ѡ҆б̾ѧ́тъ бы́въ сокрове́нствомъ, мечта́нїемъ тогѡ̀, что́ є҆сть дѣ́йствꙋемь, и҆ ѿню́дъ безви́денъ и҆ неѡсѧ́женъ, и҆ без̾ѻче́сенъ, ꙗ҆́коже подоба́етъ, бꙋ́детъ благода́тїю, всѧ́ко сло́во глаго́лати ѡ҆ бз҃ѣ что̀ могꙋ́щее, пребыва́етъ недѣ́йственно, и҆ недви́жимь пребыва́етъ ᲂу҆́мъ є҆ди́нствꙋемь, (и҆) вше́дъ въ недомы́сленное. И҆ тогда̀ ве́сь тогѡ̀, є҆́же всѣ́хъ внѣ̀ є҆́сть, быва́етъ, и҆дѣ́же ни сло́во, ни помышле́нїе, ни ᲂу҆мышле́нїе ко́е пред̾ꙋспѣва́етъ разли́чествꙋющо, но простота̀ и҆ непости́жность: безгла́сїе же и҆ ᲂу҆́жасъ, без̾ѡбра́зное и҆ безконе́чное и҆ безпредѣ́льное: и҆ неви́димагѡ стра́ннымъ ѡ҆́бразомъ ви́дитъ видѣ́нїе, и҆ безви́дный ви́дъ, ѿрѣше́нъ и҆ то́й и҆ безви́денъ въ правотѣ̀ бы́въ, и҆ по неви́димѡ ви́димымъ и҆́мъ, и҆ без̾ѻче́снѡ зри́мымъ, вкра́тцѣ рещѝ, въ себѣ̀ бж҃е́ственною и҆ преесте́ственною добро́тою ѡ҆шарѧ́емь, и҆ созда́вшаго сего̀ такова̀, прославлѧ́ѧ бг҃а.

м҃в. Не то́кмѡ ꙗ҆́кѡ про́стъ є҆́сть бг҃ъ па́че всѧ́кагѡ сы́й сложе́нїѧ глаго́летсѧ є҆ди́но, но ꙗ҆́кѡ и҆ вои́стиннꙋ сы́й є҆ди́нъ то́й во всѣ́хъ сꙋ́щихъ глаго́лемыхъ, и҆мꙋ́щихъ же є҆́же бы́ти ѿ негѡ̀. Не вои́стиннꙋ бо и҆ про́стѣ сꙋ́щее, нѣ́сть є҆ди́но. И҆ ꙗ҆́кѡ та́кожде сы́й вездѣ̀ неѡб̾ѧ́тнѣ, и҆ ꙗ҆́кѡ є҆ди́нъ Всѣ̑мъ неподо́бенъ, и҆ чи́стѣ всѣ́хъ внѣ̀. И҆ ꙗ҆́кѡ присносꙋ́щенъ, нижѐ наче́нсѧ, нижѐ престаю́щъ. И҆ ꙗ҆́кѡ во всѣ́хъ бж҃е́ственнꙋю про́мысла своегѡ̀ лꙋчꙋ̀ пречи́стѣ возсїѧва́ющъ ра́внѣ: а҆́ще и҆ не подо́бнѣ всѧ̑ сїю̀ прїе́млютъ. Є҆ще́ же ᲂу҆́бѡ и҆ ꙗ҆́кѡ во всѣ́хъ неѡдержи́мѡ познава́емь, ᲂу҆ма̀ неразли́чна, безви́дна, безѡбра́зна, безша́рна, всѣ́хъ ка́колибо сꙋ́щихъ некаса́тельна, и҆ ѿню́дъ ѿрѣше́нна, въ безконе́чность безпредѣ́лїѧ, вре́мене же и҆ мѣ́ста и҆ є҆стества̀, и҆ сꙋ́щихъ ѡ҆ є҆стествѣ̀ вышевосходѧ́ща и҆стѧзꙋ́ющъ, во є҆́же ѡ҆́бразомъ нѣ́кїимъ ви́дѣтисѧ (ѿ негѡ̀) є҆динови́днѣ па́че соедине́нїѧ ᲂу҆́мна.

м҃г. Є҆гда̀ па́че є҆́же помышлѧ́тисѧ быва́ющее междꙋ̀ бг҃омъ и҆ ᲂу҆мо́мъ дꙋхо́вное совокꙋпле́нїе быва́етъ, глаго́летсѧ бы́ти тогда̀ во є҆́же па́че своегѡ̀ (є҆стества̀) ᲂу҆́мъ, преесте́ственное, та́йное є҆ди́но чꙋ́вствомъ ᲂу҆́мнымъ соверше́ннѡ мечта́ѧ. Ѻ҆ба́че са́мъ ᲂу҆́мъ, є҆́же стра́ждетъ, по своемꙋ̀ є҆стествꙋ̀ є҆́сть (стражда̀) ѡ҆чи́щшемꙋсѧ благода́тїю: сїе́ бо є҆́сть є҆́же помышлѧ́ти ᲂу҆мꙋ̀, є҆́же ѻ҆́кꙋ зрѣ́ти. Ꙗ҆́коже ᲂу҆̀бо внꙋ́трь во тьмѣ̀ ви́дѧй, ви́дитъ ᲂу҆̀бо ничто́же, ѻ҆ба́че ви́дитъ а҆́ки є҆ди́но ѻ҆́нꙋ тьмꙋ̀, и҆ ви́дитъ, ꙗ҆́кѡ не ви́дитъ. А҆́ще бо бы покрове́нъ бы́лъ на ѻ҆́чїю, не́гли бы и҆ свѣ́тъ бы́ти вознепщева́лъ ѻ҆́крестъ себѐ и҆ ѿ веще́й нѣ̑каѧ. Ны́нѣ же ви́дѧ, ꙗ҆́снѣ ви́дитъ, ꙗ҆́кѡ не ви́дитъ, и҆ є҆́же ᲂу҆́бѡ, внꙋ́трь тьмы̀ зри́тельнѣй пройтѝ си́лѣ, и҆ ᲂу҆вѣ́дѣти сокровє́ннаѧ, па́че є҆стества̀ ѻ҆чесѐ є҆́сть: а҆ не ᲂу҆́бѡ, є҆́же ви́дѣти, ꙗ҆́кѡ не ви́дитъ. Та́кѡ вои́стиннꙋ, и҆ на ᲂу҆мѣ̀ въ бж҃е́ственнꙋю восте́кшемъ сокрове́нность, и҆ є҆́же помышлѧ́ти вы́ше бы́вшемъ, ви́дитъ ᲂу҆́бѡ ничто́же. Ѿкꙋ́дꙋ бо; Ѻ҆ба́че ви́дитъ, ꙗ҆́кѡ не ви́дитъ. И҆ ꙗ҆́кѡ є҆́же не ви́дитъ є҆ди́но є҆́сть, ꙗ҆́кѡ во мра́цѣ нѣ́коемъ сокрове́нно: ѿ негѡ́же пролива́етсѧ всѐ кі́имлибо ѡ҆́бразомъ сꙋ́щее, и҆лѝ ви́димое, и҆лѝ помышлѧ́емое, а҆́ще съ тва́рїю счислѧ́емое, а҆́ще присносꙋ́щнѣ сꙋ́щее незда́нно. И҆ а҆́ще бы не ви́дѣлъ, не бы̀ вы́ше себѐ ви́дѣлъ себѐ препростира́ема. Ны́нѣ же ви́дѧ, ꙗ҆вле́ннѣйше ви́дитъ, ꙗ҆́кѡ не ви́дитъ, сы́й па́че є҆́же ви́дѣти. И҆ ꙗ҆́кѡ ви́дѣтисѧ не возмо́жно є҆́сть (томꙋ̀) є҆́же не ви́дитъ. И҆ внꙋ́трь ᲂу҆́бѡ бж҃е́ственнагѡ и҆ па́че ᲂу҆ма̀ є҆ди́нственнагѡ сокрове́нства вни́ти и҆ зрѣ́ти, па́че є҆стества̀ ᲂу҆ма̀ є҆́сть. А҆ є҆́же, воззрѣ́ти на бж҃е́ственный мра́къ ѻ҆́нагѡ сокрове́нства, и҆ возмечта́ти неизрече́ннꙋю є҆ди́ницꙋ въ неизглаго́ланнѣ та́инствѣ превышележа́щꙋю па́че всѣ́хъ, и҆ ᲂу҆ви́дѣти ꙗ҆́кѡ не ви́дитъ внꙋ́трь бж҃е́ственнагѡ мра́ка ничто́же, и҆ ѕѣлѡ̀ чи́ста ᲂу҆ма̀ сво́йственно є҆́сть зрѧ́щагѡ въ дс҃ѣ. Не бо̀ затворе́но и҆́мать и҆ смѣжа́ющеесѧ ᲂу҆́мное взира́нїе и҆ недѣ́йственно ᲂу҆́мъ є҆гда̀ ви́дитъ, ꙗ҆́кѡ не ви́дитъ, ра́звѣ то́чїю, (ꙗ҆́кѡ ви́дитъ) бж҃е́ственное и҆ про́стѣ въ сокрове́нствѣ є҆ди́но: сїе́ бо невѣ́дѣнїѧ є҆́сть зна́менїе. Но є҆гда̀ па́че ꙗ҆́вѣ зрѣ́ти и҆́мать, тогда̀ во є҆́же па́че ᲂу҆ма̀ вости́четъ, и҆ тогда̀ зри́тъ своѐ незрѣ́нїе въ простѣ́йшагѡ є҆ди́нагѡ сокрове́нность зрѧ̀. А҆́ще и҆ ꙗ҆́кѡ є҆ди́но є҆́сть то̀, ѿ негѡ́же всѧ̑, и҆ ꙗ҆́кѡ та́йнѡ, и҆ ѕѣлѡ̀ ꙗ҆́снѣ ви́дитъ: что́ же є҆́сть, не ви́дитъ. И҆ за сїѧ̑ глаго́летсѧ бы́ти ᲂу҆́мъ во ꙗ҆̀же па́че є҆стества̀ своегѡ̀, поне́же въ простѣ́йшее бж҃їе взира́етъ сокрове́нство. Сїе́ же бы́ти є҆мꙋ̀, по є҆стествꙋ̀ є҆́сть чи́стꙋ бы́вшꙋ, и҆ ꙗ҆́коже рещѝ, по є҆стествꙋ̀ є҆́сть є҆мꙋ̀ въ то́мъ, є҆́же па́че є҆стества̀ бы́ти безѻче́снѣ: то́ є҆сть недомы́сленнѣ взира́ти на бж҃е́ственное и҆ препросте́ртое па́че ᲂу҆ма̀ є҆ди́нственное сокрове́нство. Не бо̀ и҆́мать тогда̀ каково́либо разꙋмѣ́тельное постиже́нїе, ра́звѣ то́чїю неисхо́днагѡ преесте́ственнагѡ є҆ди́нагѡ. И҆ тꙋ̀ ᲂу҆́бѡ дости́гъ сво́йственнымъ себѣ̀ движе́нїемъ, въ стоѧ́нїе ѡ҆ка́нчиваетсѧ и҆ преста́тїе. Не стоѧ́нїе глаго́лю ѿ є҆́же зрѣ́ти, сїе́ бо є҆́сть неи́стовна стра́сть: но стоѧ́нїе и҆ преста́тїе ѿ є҆́же преходи́ти ѿ помышле́нїѧ въ помышле́нїе, и҆лѝ зри́тельство. Оу҆́мъ бо та́мѡ воскочи́въ, поне́же во глꙋбинꙋ̀ безконе́чїѧ, и҆ безпредѣ́лїѧ па́даетъ во свѣ́тъ ᲂу҆́менъ, въ непости́жное прише́дъ бж҃е́ственнагѡ ѻ҆́нагѡ неѡбозри́магѡ сокрове́нства, ꙗ҆́коже рещѝ, и҆счеза́етъ и҆ стои́тъ, ничто́же и҆́но то́чїю ᲂу҆́жасъ во свѣ́тлости стражда̀ ᲂу҆́мнѣй, а҆́ще и҆ не преходѧ̀, ѻ҆ба́че ᲂу҆́мнымъ просвѣще́нїемъ дѣ́йствꙋетсѧ взира́ѧ недви́жнѡ въ пресꙋ́щественное сокрове́нство, є҆ди́нственнѣ же и҆ є҆динови́днѣ ѡ҆ непристꙋ́пнѣй внꙋ́тренности неисходи́магѡ ѡ҆заре́нїѧ недоꙋмѣва́ѧсѧ и҆ ᲂу҆добрѧ́ѧсѧ. А҆́ще ли же бы бы́лъ ѿ є҆́же зрѣ́ти недѣ́йственъ, ка́кѡ бы страда́лъ, є҆́же ᲂу҆жаса́тисѧ и҆ просвѣща́тисѧ; но си́мъ ѡ҆́бразомъ глаго́летсѧ стоѧ́ти та́мѡ дости́гшꙋ ᲂу҆мꙋ̀, ꙗ҆́кѡ не прехо́дитъ є҆ди́ное зрѧ̀, и҆ къ є҆ди́нагѡ свѣ́тлости и҆ пристражда̀ и҆ ра́дꙋѧсѧ и҆ просвѣща́ѧсѧ, и҆ стои́тъ недви́жимь, ника́коже смѣжава́ѧ своѐ видѣ́нїѧ наслажде́нїе. Сїѧ́ бо бѣ́гательна стра́сть, а҆ не похва́льна, и҆ тьмы̀ невѣ́дѣнїѧ и҆спо́лнь, нигдѣ́же ника́коже зрѣ́ти: рече́нное же стоѧ́нїе ᲂу҆ма̀, по непристꙋ́пнꙋ свѣ́та ѡ҆сїѧ́нїю быва́етъ. И҆ видѣ́нїе є҆́сть не и҆́щꙋщо прехожде́нїѧ, но почи́тїѧ и҆ стоѧ́нїѧ. Безконе́чно бо є҆́сть ѻ҆́но преесте́ственное и҆ сокровеннота́йное пресꙋ́щественное є҆ди́но и҆ непрохо́дно всѧ́комꙋ ᲂу҆мꙋ̀, и҆ и҆́ндѣ нѣ́гдѣ зрѣ́ти не попꙋща́етъ зрѧ́щаго є҆̀ ᲂу҆ма̀. Поели́кꙋ бы́лъ бы причаще́нъ ᲂу҆́мъ подоба́ющагѡ є҆мꙋ̀ ѡ҆чище́нїѧ и҆ бж҃е́ственныѧ по́мощи, и҆ не и҆́накѡ припа́даетъ ѿ бж҃е́ственнагѡ сегѡ̀ видѣ́нїѧ и҆ предобро́тныѧ свѣ́тлости и҆ безконе́чїѧ, то́чїю привлачи́мь ѿ нѣ́чесогѡ пристра́стїѧ и҆мѣ́ѧ, и҆лѝ прїѧ́тїемъ, и҆лѝ ѿ є҆сте́ственнагѡ є҆гѡ́же стра́ждетъ прело́га.

м҃д. Оу҆мꙋ̀ є҆стество̀ є҆́сть є҆́же помышлѧ́ти. А҆ є҆́же помышлѧ́ти, во движе́нїи є҆́сть и҆ прехожде́нїи. А҆ поне́же ᲂу҆́мъ въ бг҃ѣ быва́ѧ, превы́ше помышле́нїѧ ѡ҆брѣта́етсѧ и҆ движе́нїѧ, въ лѣ́потꙋ си́це бы мо́глъ глаго́латисѧ ᲂу҆́мъ во є҆́же па́че є҆стества̀ своегѡ̀ бы́ти, соверше́ннѡ бг҃а мечта́ѧ. Всѧ́ко во помышле́нїе, ꙗ҆́вѣ ꙗ҆́кѡ ѿ ве́щи быва́ти є҆стество̀ и҆́мать: а҆ и҆дѣ́же ве́щь не зри́тсѧ, помышле́нїе нижѐ ражда́етсѧ, нижѐ ᲂу҆́бѡ ѡ҆брѣта́етсѧ. Бг҃ъ ᲂу҆́бѡ и҆́же никаковы́мъ ѡ҆́бразомъ могі́й зрѣ́тисѧ ве́щнѣ, мечта́етъ ᲂу҆́мъ є҆сте́ственнѣ ѿ ꙗ҆̀же ѻ҆́крестъ себѐ, ꙗ҆̀же си́рѣчь дѣ́йствꙋетъ: ꙗ҆̀же мѣ́сто содержа́тъ си̑лы ѿ нѣ́коегѡ происходѧ́щыѧ си́льна. Поне́же ᲂу҆́бѡ ᲂу҆́мъ во и҆ны́хъ всѣ́хъ ѡ҆бы́че си́лы съ могꙋ́щими зрѣ́ти, сїѐ и҆́щетъ и҆ на бз҃ѣ пострада́ти, и҆ не могі́й вои́стиннꙋ (па́че бо є҆стества̀ сїѐ всѧ́кагѡ зда́нна ᲂу҆ма̀ є҆́сть) ꙗ҆́же ѻ҆́крестъ бг҃а зри́тъ, и҆ бг҃а безѻче́снѣ, є҆́же глаго́летсѧ, просто́ю мечта́етъ и҆ вкꙋ́пѣ со́бранною мы́слїю. Безмо́лвна же воздꙋ́ха є҆́мсѧ, и҆ бж҃е́ственныѧ прїѧ́зни бы́въ полꙋчи́тель, и҆ дѣ́йствꙋющꙋ въ не́мъ бж҃е́ственномꙋ и҆ покло́нномꙋ дх҃ꙋ, ѿ є҆́же помышлѧ́ти ча́стѣе восхища́етсѧ въ безви́дно и҆ не ка́чественно и҆ про́сто ᲂу҆строе́нїе, внꙋ́трь се́рдца ско́рѡ входѧ̀ си́лою дх҃а преесте́ственною, и҆ стоѧ̀ въ мечта́нїи бг҃а, и҆ ничто́же помышлѧ́ѧ, но превы́ше є҆́же помышлѧ́ти быва́ѧ. Ѿ чесогѡ̀ си́рѣчь ѿ є҆́же ꙗ҆̀же ѻ҆́крестъ бг҃а помышлѧ́ти, восхо́дитъ въ бж҃е́ственно мечта́нїе, ꙗ҆́коже рече́сѧ, про́стъ бы́въ, (и҆) глаго́летсѧ, ꙗ҆́кѡ въ превы́шшемъ є҆стества̀ своегѡ̀ є҆́сть, ꙗ҆́кѡ быва́етъ превы́ше є҆́же помышлѧ́ти.

м҃є. Всѧ́комꙋ чесомꙋ́либо глаго́лемꙋ та́йнꙋ и҆мѣ́ти нꙋ́жда є҆́сть нѣ́что пред̾ѧвлѧ́емо, ѿѻнꙋ́дꙋже ꙗ҆́кѡ сїѐ є҆́сть та́йно разꙋмѣва́етсѧ. А҆́ще бо нѝ, не сꙋ́щемꙋ подо́бно є҆́сть наипа́че. Соверше́ннѣ бо не даю́щее ꙗ҆вле́нїѧ разꙋмѣва́тельна сꙋществова́нїѧ ка́колибо, ра́внѡ возмнѣ́лосѧ бы ѿню́дъ ника́коже сꙋ́щемꙋ. Тѣ́мже вои́стиннꙋ и҆ съ та́йностїю бж҃їею вкꙋ́пѣ сꙋ́ть нѣ̑каѧ пред̾ѧвлѧ́єма. И҆̀мже а҆́ки припослѣ́дствꙋѧ ᲂу҆́мъ, бж҃е́ственнагѡ сокрове́нства чꙋ́вство прїе́млетъ, пости́жнымъ бж҃їимъ восходѧ̀ къ непости́жномꙋ, въ не́же дости́гъ вѣ́сть, ꙗ҆́кѡ є҆́сть нѣ́что и҆звѣ́стнѣ, є҆́же и҆збѣга́етъ своегѡ̀ є҆гѡ̀ є҆сте́ственнагѡ постиже́нїѧ, превы́ше сꙋ́ще всѧ́кагѡ ᲂу҆́мнагѡ постиже́нїѧ, и҆ а҆́гг҃льска какова́либо, ꙗ҆́кѡ сꙋ́щагѡ превы́ше свѣ́та, и҆ всѧ́кагѡ ᲂу҆́бѡ є҆стества̀ и҆ сꙋщества̀, и҆ сꙋ́ща всегѡ̀ вино́ю, и҆ нача́ло и҆ коне́цъ то́же преесте́ственно, и҆ пресꙋ́щественно всѧ́кагѡ превы́ше сꙋ́ще безконе́чнѣ сꙋщества̀, нерожде́нно же и҆ безнача́льно и҆ безпредѣ́льно, и҆ є҆стество́мъ и҆ мѣ́стомъ и҆ вре́менемъ про́стѣ неѡб̾е́млемо, и҆ сїѐ є҆́сть є҆ди́ное та́йное па́че ᲂу҆ма̀. И҆ є҆́сть бж҃е́ственнаѧ пости́жность є҆сте́ственнѡ и҆з̾ тогѡ̀ происходѧ́щи, премно́га нѣ́каѧ сꙋ́щи, и҆ на́съ па́ки ѿ себѐ къ себѣ̀ горѣ̀ простира́ющи, и҆ а҆́ки воз̾ѡкрꙋжа́ющи ᲂу҆́мными рꙋковожде́нїи, и҆ горѣ̀ просте́ртїи къ нача́лꙋ та́йномꙋ преесте́ственнꙋ є҆ди́нꙋ, толи́кѡ соединѧ́ющи ны̀ съ ни́мъ, є҆ли́кѡ ᲂу҆разꙋмѣ́ти ꙗ҆́кѡ є҆́сть, и҆ ꙗ҆́кѡ є҆ди́но є҆́сть, є҆ще́ же ᲂу҆́бѡ и҆ ꙗ҆́кѡ всѧ́цемъ ѡ҆́бразомъ недомы́сленно є҆́сть є҆́же вѣ́дѣти, что̀ є҆́сть, по сꙋществꙋ̀ сїѐ та́йное є҆ди́но. Превы́ше же ᲂу҆ма̀ ѡ҆брѣ́тенное и҆ и҆збѣга́ющее ра́зꙋма ка́кѡ бы сло́во проходи́ти возмогло̀. Сло́во же проходи́ти не возмо́же, мы́сленное. Невѣща́ннѣ (же) и҆ неизрече́ннѣ и҆ въ молча́нїи ᲂу҆мꙋ̀ па́че мы́сли є҆динови́днѣ взира́ти ꙗ҆́кѡ та́йнѡ, и҆ ра́доватисѧ ꙗ҆́кѡ ѡ҆ вино́внѣ и҆ промы́сленницѣ, и҆ ᲂу҆жаса́тисѧ ꙗ҆́кѡ ѡ҆ превы́шшемъ свѣ́та и҆ превы́шшемъ бла́гости, превы́шшемъ премꙋ́дрости же и҆ превы́шшемъ си́лы, и҆ бж҃е́ственна наслажда́тисѧ ѿ сегѡ̀ ра́дованїѧ, та́кожде и҆ ѡ҆ сꙋ́щихъ безконе́чныхъ и҆ безпредѣ́льныхъ всѣ́хъ, и҆́миже зри́тсѧ пресꙋ́щественное та́йное є҆ди́но, ѿню́дъ є҆стества̀ слове́сна є҆́сть послѣ́дованїе. Непослѣ́довано же є҆́сть, въ таковы́хъ сꙋ́щꙋ ᲂу҆мꙋ̀, слове́съ ᲂу҆потреблѧ́ти и҆ проходи́ти преходѧ́щꙋ: ᲂу҆потреблѧ́ѧй ᲂу҆̀бо не є҆́же молча́ти, но є҆́же глаго́лати, соверше́ннагѡ ѡ҆скꙋдѣва́етъ ᲂу҆строе́нїѧ ᲂу҆ма̀. Сїе́ бо є҆́сть кра́йнее сегѡ̀ ᲂу҆строе́нїе, ꙗ҆́коже и҆ ѡ҆ ничто́же па́че и҆́стины предпочита́ющихъ могло́ бы и҆сповѣ́стисѧ, є҆́же въ кра́йнѣйшее дѣ́йства своегѡ̀ дости́гнꙋти: кра́йнѣйшее же є҆́сть є҆́же къ кра́йнѣйшемꙋ взира́нїе є҆гѡ̀: є҆́же и҆ без̾ѻче́снѣ соверша́тисѧ глаго́летсѧ: мно́гѡ ᲂу҆́бѡ мнѣ́е и҆ неглаго́льно.

м҃ѕ. Взира́ѧ ᲂу҆́мъ без̾ѻче́снѡ на бж҃е́ственнѣйшее є҆ди́нственное пренача́льное, и҆ верхо́внѣйшее сокрове́нство, (и҆) прїѧ́тїе, и҆ сїѐ без̾ѻче́снѣ ѿѻнꙋ́дꙋ нахо́дитъ на ᲂу҆́мъ є҆динови́днѡ, и҆ є҆динственнови́днѡ, предобрѡ́тныѧ и҆ пресвѣ́тлыѧ и҆ неизрече́нныѧ свѣ́тлости и҆спо́лненъ, и҆ въ глꙋбинꙋ̀ ᲂу҆дивле́нїѧ и҆ ᲂу҆́жаса призыва́юще ᲂу҆́мъ въ молча́нїи. И҆ предꙋдержава́юще се́рдце дѣ́йствомъ дꙋхо́внымъ и҆ ра́достїю сла́достною, ѻ҆но̀ быва́етъ ᲂу҆мꙋ̀ ᲂу҆́мно просвѣще́нїе, ѡ҆сїѧ́нїе, и҆ бж҃е́ственно по мѣ́рѣ раче́нїе, и҆ свѣ́тло ра́дованїе: и҆́мать же винꙋ̀ ѿ бг҃а, ѿѻнꙋ́дꙋже всѧ́кое даѧ́нїе бла́го, за чистотꙋ̀ ᲂу҆ма̀, и҆ ꙗ҆́коже бы ре́клъ кто̀ за вещество̀, є҆́же ѿ бж҃е́ственныхъ по ча́сти ꙗ҆вле́нїй писа́нїй, и҆ сꙋ́щихъ, и҆ ᲂу҆ви́дѣнныхъ разꙋ́мнѡ съ правото́ю въ безмо́лвїи и҆ моли́твѣ. Не бо̀ ꙗ҆́коже бы приключи́лосѧ, взира́етсѧ та́йное внꙋ́треннѣйшее бж҃їе є҆ди́но па́че мы́сли, но въ происходѧ́щей ѿѻнꙋ́дꙋ свѣ́тлости є҆динови́днѣй, взира́нїе и҆ видѣ́нїе преисполнѧ́ющей ᲂу҆́мное, є҆́же не пострада́вый слове́снѣ же и҆ разꙋ́мнѣ, ѿвнѣꙋ́дꙋ восхо́дитъ къ преесте́ственномꙋ и҆ та́йнꙋ про́стꙋ є҆ди́номꙋ, не серде́чнѣ дѣ́йствꙋемь, нижѐ ᲂу҆̀бо ᲂу҆́мнѣ ѡ҆сїѧва́емь.

м҃з. Свѣтлѣ́йшее є҆динови́дное же и҆ є҆динственнови́дное ᲂу҆ма̀ въ бз҃ѣ видѣ́нїе взира́ющо на є҆ди́нственнꙋю бж҃е́ственнꙋю сокрове́нность, и҆ на и҆зблистава́ющее и҆з̾ неѧ̀ сїѧ́нїе бж҃е́ственно ѡ҆заре́нїе прїе́мшо безнача́льна и҆ безконе́чна свѣтоиспꙋще́нїѧ, не то́кмѡ ᲂу҆́стъ молча́нїе и҆стѧзꙋ́етъ, но и҆ ᲂу҆ма̀. Мо́щно бо є҆́сть и҆ ᲂу҆стѡ́мъ молча́щымъ, внꙋ́трь ᲂу҆мꙋ̀ завѣщава́тисѧ, и҆ въ по́мыслы и҆ разꙋмѣ̑нїѧ преходи́ти и҆ ᲂу҆пещрѧ́тисѧ: є҆́же сїѐ сло́во бы могло̀ бы́ти завѣща́тельно, є҆гѡ́же дале́че є҆́сть ᲂу҆́мъ восте́кшъ къ препросте́ртой бж҃е́ственныѧ є҆ди́ницы невоѡбраже́нной сокрове́нности. И҆́но бо є҆́сть зри́тельное ᲂу҆ма̀, а҆ и҆́но є҆́же завѣщава́тисѧ и҆ размышлѧ́ти, є҆́же є҆́сть завѣща́тельна сло́ва. Ѿ сеѧ̀ вины̀, созда́нна и҆лѝ сло́жна, и҆лѝ и҆́накѡ нѣ́кагѡ разли́чна дости́гъ ᲂу҆́мъ дѣ́ла, пе́рвѣе ви́дитъ, та́же и҆ размышлѧ́етъ ᲂу҆пещрѧ́емь. И҆ є҆щѐ въ ве́щи мно́жицею є҆ди́нѣй, возмо́глъ бы ѡ҆брѣстѝ не ма́ла разꙋмѣ́нїѧ: въ є҆ди́нственнѣмъ же и҆ є҆динови́днѣмъ ѻ҆́нѣмъ и҆ внꙋ́треннѣйшемъ бж҃е́ственнѣмъ сокрове́нствѣ, воспротѧза́етъ ᲂу҆́бѡ и҆ воспростира́етъ зри́тельное своѐ ѻ҆́ко, и҆ простото́ю бж҃е́ственныѧ лꙋчѝ ѡ҆сїѧва́етъ, ѿню́дъ же не мо́жетъ размышлѧ́ти завѣщава́ѧсѧ: и҆збѣга́етъ бо є҆ди́нственнаѧ простота̀ ᲂу҆́мнагѡ какова́либо прехожде́нїѧ, и҆лѝ разли́чна завѣща́нїѧ. Ꙗ҆́коже бо є҆́сть та́йность, что̀ размышле́нна (и҆) рещѝ завѣща́нїемъ и҆ ᲂу҆сты̀. Си́хъ ра́ди ᲂу҆̀бо молча́нїю прилѣжи́тъ є҆сте́ственнѡ и҆ ᲂу҆сты̀ и҆ ᲂу҆мо́мъ, въ є҆ди́нственное внꙋ́треннѣйшее бж҃е́ственное сокрове́нство ᲂу҆́мнѣ человѣ́къ восте́къ.

м҃и. Внегда̀ ѡ҆браще́нїе ᲂу҆ма̀ воззри́тъ соверше́ннѣ къ бг҃ꙋ и҆ поже́рто бꙋ́детъ зри́тельное є҆гѡ̀ пресвѣтлѣ́йшими бж҃е́ственныѧ добро́ты лꙋча́ми, и҆ без̾ѡбра́знѣ въ простотꙋ̀ є҆ди́нагѡ та́йнагѡ безви́дна взы́детъ и҆ безпредѣ́лїе, и҆ бꙋ́детъ то́й съ собо́ю є҆ди́нъ свои́мъ къ є҆ди́номꙋ горѣ̀ просте́ртїемъ и҆ взира́нїемъ дꙋхнове́нїемъ на́нь дꙋ́ха: тогда̀ младе́нческагѡ быва́етъ ꙗ҆́вѣ ᲂу҆строе́нїѧ, на са́мѣмъ мꙋдрова́нїи, и҆ ца́рствїѧ бж҃їѧ неизрече́ннагѡ и҆ преесте́ственнагѡ вкꙋша́етъ, по словесѝ гдⷭ҇ню: а҆́ще не ѡ҆братите́сѧ, глаго́лющемꙋ, и҆ бꙋ́дете ꙗ҆́кѡ дѣ́ти, не вни́дете въ ца́рство небе́сное¹³⁵²: свобо́денъ бо тогда̀ и҆ неѡдержи́мь ѿню́дъ ѿ всѣ́хъ ᲂу҆́мъ быва́етъ всѧ́кагѡ ра́зꙋма, всѧ́ческагѡ какова́гѡлибо разꙋмѣ́нїѧ, всѧ́кагѡ сложе́нїѧ, и҆ пестроты̀ предѣ́лы превозше́дъ, и҆ горѣ̀ простира́ѧсѧ къ невѣща́нномꙋ и҆ па́че ᲂу҆ма̀ невѣ́домомꙋ. Тѣ́мже вои́стиннꙋ и҆ молчи́тъ є҆сте́ственнѡ, занѐ то́кмѡ па́че сло́ва, но и҆ па́че ᲂу҆́мна дѣ́йства своѐ ᲂу҆строе́нїе, и҆мꙋ́щее съ та́йнымъ и҆ безви́днымъ пресвѣ́тлое и҆ ра́достное и҆ сла́дкое є҆ли́кѡ ко ᲂу҆́мнꙋ наслажде́нїю.

м҃ѳ. Въ ви́дѣ безви́днѣмъ, и҆ пресвѣ́тлѣйшей невеще́ственнѣй и҆ несло́жнѣй добро́тѣ въ лицѣ̀ простѣ́йшемъ бг҃а зрѧ́тъ зри́тельнїи є҆динови́днѣ є҆ди́но, безконе́чными благи́ми ѻ҆́крестъ ᲂу҆вѣнча́нна: безчи́сленными до́брыми ᲂу҆кра́шенна: ᲂу҆́мъ свѣтови́дными добро́тами а҆́ки лꙋчеви́днѣ ѻ҆́крестъ ѡ҆зарѧ́ющїй всѧ̑: блаже́нство неизрече́нно и҆ неисповѣди́мо: благи́хъ и҆ до́брыхъ и҆сточа́тельно, и҆з̾ѻби́лїе безконе́чно точа́ще и҆ присноте́чно: сла́вы сокро́вище па́че и҆счерпа́нїѧ бездо́нно, и҆ неистощи́мо. Мнѡ́га ѕѣлѡ̀ весє́лїѧ. преисполнѧ́юща без̾ѻчє́сныѧ ᲂу҆мы̀. Ра́дости и҆ дꙋше́внѣй сла́дости съ весе́лїемъ нетлѣ́ннымъ по тече́нїю присноте́чнꙋ ѻ҆́крестъ текꙋ́щꙋ та́инственнѡ ѿ бж҃е́ственныѧ ѻ҆́ныѧ и҆ превышесвѣ́тлыѧ є҆ди́ницы въ невхо́днѣмъ превы́ше сꙋ́щїѧ сокрове́нствѣ: и҆ є҆щѐ (зрѧ́тъ) коли́ка и҆ є҆ли́ка неизслѣ́дна пролива́етсѧ пꙋчи́на ѿ ѻ҆́ныѧ неѡб̾е́млема бла́гости неизрече́нныѧ, и҆ любвѐ несказа́нныѧ, и҆ про́мысла недомы́сленна въ си́лѣ безпредѣ́льнѣй и҆ премꙋ́дрости неизрече́ннѣй, и҆ а҆́гг҃лы, и҆ самѣ́ми серафі́мы недомы́сленна, па́че всѧ́кагѡ ᲂу҆ма̀ сꙋ́ща: є҆ще́ же и҆ ꙗ҆̀же ѿ настоѧ́щагѡ вѣ́ка въ на́съ а҆́ки зачина́єма неизрече́ннымъ сло́вомъ, въ бꙋ́дꙋщемъ же воз̾ꙋстроѧ́єма, и҆ а҆́ки па́ки ражда́єма и҆ соверша́єма, ꙗ҆̀же и҆ херꙋві́мскъ ᲂу҆́мъ ᲂу҆жаса́ютъ, и҆ то́чїю нѣ́какѡ неѧ́снѣ ѡ҆ се́мъ помы́слити предложе́нїе и҆мꙋ́щь. ѽ благосты́ни и҆ совѣ́та бж҃їѧ и҆ любвѐ и҆ бла́гости, си́лы же и҆ премꙋ́дрости и҆ про́мысла бж҃е́ственна! вои́стиннꙋ блаже́ни, и҆́хже ѡ҆ста́вишасѧ беззакѡ́нїѧ, и҆ и҆́хже покры́шасѧ грѣсѝ¹³⁵³: и҆ блаже́нъ человѣ́къ, є҆го́же а҆́ще нака́жетъ гдⷭ҇ь, и҆ ѿ зако́на своегѡ̀ и҆ дх҃а наꙋчи́тъ є҆го̀¹³⁵⁴.

н҃. Дꙋ́хомъ и҆ и҆́стиною ѿкрыва́ютсѧ въ мі́рѣ ᲂу҆́бѡ сꙋ́щими неви̑димыѧ немогꙋ́щимъ дх҃а прїѧ́ти ст҃а́гѡ, ꙗ҆́коже гдⷭ҇ь и҆зречѐ. А҆ и҆̀мже є҆́же ѿше́льствовати предпочита́тельнѣйше є҆́сть, и҆ дале́че ѿ мі́ра сидѣ́ти, и҆ сꙋ́щихъ въ мі́рѣ, и҆ бж҃е́ственною благода́тїю просвѣтѝ мы́сленъ свѣ́тъ ѻ҆чеса̀ се́рдца и҆́хъ восто́къ съ высоты̀ со́лнца мы́сленнагѡ, и҆ бы́сть застꙋпле́нїе и҆̀мъ ᲂу҆ бг҃а, ꙗ҆́коже восхождє́нїѧ въ сердца́хъ свои́хъ полага́ти, и҆ просвѣща́тисѧ бг҃озри́тельными ѡ҆сїѧ́нїи ꙗ҆́коже подоба́етъ, въ си́хъ и҆ ѕѣлѡ̀ ꙗ҆́снѣ зрѧ́тсѧ и҆ и҆́на и҆ премнѡ́га бж҃е́ствєнна и҆ мы́слєнна, и҆ дꙋхѡ́вна взира́нїѧ достѡ́йна: є҆ще́ же и҆ бꙋ́дꙋщее вѣ́чное и҆ неꙋкло́нное воз̾ꙋстрое́нїе преподо́бнѣ пожи́вшымъ ка́кѡ бꙋ́детъ, не то́кмѡ чꙋ́вственнѡ, но ᲂу҆жѐ и҆ па́че ᲂу҆ма̀. Ѿню́дъ бо и҆змѣнѧ́тсѧ тогда̀ всѝ сꙋ́щагѡ па́че ᲂу҆ма̀ быва́юще, и҆ сꙋ́щагѡ па́че всѧ́кїѧ мы́сли и҆ живота̀ и҆ наслажде́нїѧ: ꙗ҆́коже бо́зи положе́нїемъ, пред̾ сꙋ́щимъ ѿ є҆стества̀ бг҃омъ, наслажда́ющесѧ и҆ ра́дꙋющесѧ ѡ҆ сꙋ́щихъ па́че є҆стества̀ бл҃ги́хъ произска́чꙋщихъ ѿ кра́йнѧгѡ и҆ є҆ди́нагѡ є҆стество́мъ бг҃а, ѻ҆́крестъ сегѡ̀ ѡ҆бстоѧ́ще, и҆ всесвѧще́ннѣ соверша́юще чи́стѣ ѕѣлѡ̀ бж҃е́ственный и҆ па́че ᲂу҆ма̀ пра́здникъ: и҆ є҆ди́нꙋ поставлѧ́юще прехва́льнагѡ ѻ҆́нагѡ весе́лїѧ превесе́лꙋю ра́дость и҆ торжество̀, со всѣ́ми мы́сленными а҆́гг҃лѡвъ ᲂу҆краше́нїи. Мно́го нѣ́кое є҆́сть и҆ недомы́сленно тече́нїе ѻ҆́но, нетлѣ́ннагѡ предобро́тныхъ ра́дованїѧ. А҆́ще бо чꙋ́вственна добро́та чꙋ́вствы ко ᲂу҆мꙋ̀ прибли́жшисѧ, сꙋ́щи предѣ́льна и҆ скороте́чна, нижѐ проста̀, нижѐ назда́нна, сла́дости ѻ҆ба́че небезра́достны вино́вна быва́ти ѡ҆бы́че, въ дꙋшѝ разсмотрѣ́ти не дале́че є҆́сть и҆ разꙋмѣ́ти ᲂу҆́мъ и҆мꙋ́щымъ и҆ возсло́вное разсмотрѧ́ющымъ, что́бы моглѝ бы́ти, не въ мы́слєнна, но и҆ па́че ᲂу҆ма̀ безпредѣ́льна сꙋ́ща и҆ (не) те́чна достиза́юще: незда́нна не наче́ншасѧ, и҆стека́юща ѿ бг҃а, ѿ негѡ́же сꙋ́ть всѧ̑ дѡ́браѧ и҆ блага̑ѧ, па́че же весе́лїѧ ра́ди и҆ ра́дованїѧ и҆ бж҃е́ственныѧ жи́зни, и҆ досто́йнѣ вѣ́ка ѻ҆́нагѡ и҆ ᲂу҆строе́нїѧ.

н҃а. Вре́меннымъ же и҆ мѣ́стнымъ разстоѧ́тельнымъ протѧже́нїемъ и҆ ѡ҆предѣли́тельнымъ є҆сте́ствъ сво́йствамъ ра́доватисѧ ре́къ, и҆ си́хъ происте́къ ᲂу҆́мъ, на́гъ быва́етъ вои́стиннꙋ є҆динови́дною простото́ю и҆ жи́знїю безхꙋдо́жною и҆ безви́дною и҆ без̾ всѧ́кагѡ прикро́ва и҆ ѡ҆дѣѧ́нїѧ безпомышле́нїемъ и҆ не глаго́ланїемъ, въ безнача́лїе и҆ неѡб̾ѧ́тїе, безконе́чїе же и҆ безпредѣ́лїе преесте́ственнѣ возше́дъ се́рдцемъ дх҃одви́жнымъ, бж҃е́ственною си́лою и҆ ѡ҆сїѧ́нїемъ, къ безконе́чїю мнѧ́щымсѧ и҆ съ сами́мъ тѣ́мъ видѣ́нїемъ ᲂу҆ма̀ спростира́тисѧ. Тогда̀ ми́ръ бж҃їй въ дꙋшѝ возсїѧва́етъ и҆ неизрече́ннаѧ ст҃а́гѡ дх҃а ра́дость и҆ несказа́нное весе́лїе лїе́тсѧ въ ню̀. И҆ и҆́же превы́ше ра́зꙋма ᲂу҆́жасъ соде́ржитъ ю҆̀ ѻ҆́тай воспѣва́ющꙋ: не ꙗ҆ви́тсѧ, но зри́тсѧ бг҃ъ богѡ́въ въ сїѡ́нѣ во ᲂу҆мѣ̀ выспрехо́днѣ и҆ высокозри́тельнѣ: гдⷭ҇и бж҃е си́лъ, блаже́нъ человѣ́къ ᲂу҆пова́ѧй на тѧ̀¹³⁵⁵.

н҃в. Внегда̀ ᲂу҆́мъ во ᲂу҆́жасѣхъ ѡ҆брѣта́етсѧ просвѣще́нъ недомы́слєнна неглагѡ́ланїѧ, междꙋ̀ бг҃омъ и҆ бж҃е́ственными себѐ зрѧ̀, тогда̀ ꙗ҆́стъ, ꙗ҆́коже є҆́сть пра́ведно дꙋхо́внагѡ ра́зꙋма и҆́стинныѧ плоды̀, и҆ бг҃одѣ́йствꙋетсѧ, и҆ ра́дꙋетсѧ, и҆ въ бж҃е́ствєнна предꙋспѣва́етъ рачє́нїѧ: глаго́лѧ ᲂу҆́бѡ ника́коже ничто́же, нижѐ преходѧ̀ нѣ́какѡ ни внꙋ́трь ни внѣ̀ по завѣща́нїю, но нижѐ размышлѧ́ѧ: но зрѧ̀ ᲂу҆́мнѣ є҆ди́нственнѣ во свѣ́тѣ и҆́стины и҆ дꙋ́ха, и҆ наслажде́нїе непреходнотворѧ̀ зри̑маѧ.

н҃г. Є҆гда̀ лицѐ ᲂу҆ма̀ зрѧ́що внꙋ́трь се́рдца, ви́дитъ просвѣще́нїе дх҃а и҆з̾ негѡ̀ присното́чнѣ точа́щесѧ, тогда̀ ѕѣлѡ̀ вре́мѧ є҆́сть молча́ти.

н҃д. Є҆гда̀ всѐ ᲂу҆́мное лицѐ ви́дѣти бꙋ́детъ бг҃а, па́че же ᲂу҆́бѡ є҆гда̀ ве́сь ᲂу҆́мъ внꙋ́трь дости́гнетъ бг҃а, и҆лѝ да та́кѡ рекꙋ̀, є҆гда̀ бг҃ъ во все́мъ ᲂу҆мѣ̀ бꙋ́детъ, тогда̀ ѕѣлѡ̀ и҆ бо́лѣе є҆сте́ственнѣ вре́мѧ є҆́сть молча́ти.

н҃є. Є҆гда̀ ᲂу҆́мъ прича́стїемъ дꙋ́ха зри́тельнѣ вои́стиннꙋ бг҃ꙋ предстоѧ̀, сла́вы же ѿ лица̀ бж҃їѧ и҆ свѣ́тлости, ѡ҆́бразомъ подоба́ющимъ наслажда́етсѧ, подоба́етъ и҆ ѕѣлѡ̀ влѣ́потꙋ молча́ти, безмо́лвнѣ же и҆ несмꙋти́тельнѣ зрѣ́ти. А҆́ще же нѣ́каѧ тьма̀ мра́чна каковы́млибо ѡ҆́бразомъ междꙋ̀ ᲂу҆мо́мъ и҆ бг҃омъ припаде́тъ, внеза́пꙋ а҆́ки нѣ́кїй свѣтови́денъ и҆ горѧ́щъ по є҆сте́ственнꙋ сло́вꙋ ѻ҆́гнь, мета́ти проти́вꙋ тьмѣ̀ сло́во краткоглаго́льно ᲂу҆́бѡ, ѻ҆ба́че бж҃е́ственна ꙗ҆вле́нїѧ: да та́кѡ скорѣ́е тьмꙋ̀ и҆стреби́въ свѣ́томъ, и҆ теплото́ю мглꙋ̀, и҆ ретѧ́щїйсѧ въ по́двизѣ ᲂу҆́мъ просвѣти́въ же и҆ согрѣ́ѧвъ самѣ́мъ си́мъ, да па́ки мо́жетъ вкꙋ́пѣ бы́ти, ꙗ҆́коже пре́жде съ бг҃омъ, и҆ зрѣ́ти добро́тꙋ є҆гѡ̀, и҆ ꙗ҆́коже подоба́етъ, наслажда́тисѧ є҆гѡ̀, и҆ ᲂу҆добрѧ́тисѧ и҆ страда́ти: вкра́тцѣ рещѝ, ꙗ҆̀же по ᲂу҆́мнꙋ взира́нїю соверша́ютсѧ, прїѧ́тїемъ животворѧ́щагѡ дх҃а, ѿ бг҃а. И҆ є҆щѐ вои́стиннꙋ прострѣ́тисѧ и҆ ѿпꙋща́тисѧ и҆́стиною и҆ дх҃омъ съ бг҃омъ ѿ всѣ́хъ, и҆ сами́хъ тѣ́хъ, ꙗ҆̀же ѻ҆́крестъ бг҃а. Сїѐ ᲂу҆́бѡ влѣ́потꙋ и҆ прили́чнѣ зри́тельный соверша́етъ, ѻ҆ба́че є҆ди́номꙋ внима́ѧй дѣѧ́нїю, ника́коже такова́гѡ да держи́тсѧ ᲂу҆строе́нїѧ: не ᲂу҆̀ ѕѣлѡ̀ ꙗ҆́снѣ къ себѣ̀, и҆ собо́ю къ бг҃ꙋ соедини́сѧ. Не ᲂу҆́бѡ є҆́сть чꙋ́до, семꙋ̀ ѿ бж҃е́ственныхъ пѣ́ти и҆лѝ глаго́лати ка́колибо, и҆ мнѡ́га же, и҆ ча́стѣ, ча́стыми всѧ́кѡ ѿсю́дꙋ а҆́ки ᲂу҆́бѡ сраже́нїи, и҆ ᲂу҆страша́ѧ и҆ ѿгонѧ́ѧ враждꙋ́ющаго на ны̀ мно́гѡ и҆ ра́тꙋющаго ᲂу҆се́рднѡ: и҆́бо прїи́детъ и҆ семꙋ̀ послѣ́даванно вре́мѧ, терпѧ́щемꙋ ѿ дх҃нове́нїѧ вои́стиннꙋ на́нь дꙋхо́вна, внегда̀ мно́гихъ бж҃е́ственныхъ пѣ́сней и҆ пѣ́нїй и҆ слове́съ а҆́ки и҆ скорови̑дна ѡ҆зарє́нїѧ соберꙋ́тсѧ во є҆ди́нꙋ вои́стиннꙋ свѣ́тлость ѻ҆гнѧ̀: є҆гда̀ и҆ врага̀ ᲂу҆до́бь и҆ сме́ртною ꙗ҆́звою ᲂу҆ѧзви́тъ, пожига́ѧ, си́рѣчь и҆ разсѣца́ѧ, и҆лѝ па́че и҆стреблѧ́ѧ тьмꙋ̀ ѻ҆́нагѡ, себе́ же свѣ́тлостїю ѻ҆гнѧ̀ и҆ согрѣва́ѧ же и҆ къ бж҃е́ственномꙋ наипа́че воздви́жѧ раче́нїю: и҆ къ самомꙋ̀ бг҃ꙋ серде́чнꙋю въ молча́нїи пѣ́снь и҆ ᲂу҆́жасъ возносѧ̀: и҆ та̑инъ показꙋ́ѧ ди́вна себѣ̀ ѕѣлѡ̀ чꙋдеса̀: не непра́веднѡ бо терпѧ́щїи гдⷭ҇а ᲂу҆блажа́ютсѧ, то́чїю ꙗ҆́кѡ пред̾идꙋ́щꙋ вре́мени наслѣ́дствꙋютъ ꙗ҆́кѡ кро́тцы сꙋ́ще мы́сленнꙋю ѡ҆бѣтова́нїѧ зе́млю, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

н҃ѕ. Є҆гда̀ ᲂу҆́мъ кі́имждо ѿ свѣтолїѧ́нїй дх҃а ѡ҆сїѧва́емь, ѡ҆мрача́етсѧ и҆ недоꙋмѣва́етъ, и҆ къ безконе́чномꙋ и҆ безпредѣ́льномꙋ себѐ разꙋмѣва́етъ простира́ющасѧ и҆ и҆змѣнѧ́ема, тогда̀ вре́мѧ є҆́сть молча́ти.

н҃з. Є҆гда́ же а҆́ки свѣтлѣ́йшими взира́нїи и҆знемо́гша ѡ҆щꙋща́етъ, и҆ сло́во произнестѝ хотѧ́ща, да ѿ крѣ́пости ѡ҆слабѣ́въ, ѡ҆́бразомъ си́мъ полꙋ́читъ поко́й: тогда̀ є҆сте́ственнѣ вре́мѧ є҆́сть глаго́лати, ѻ҆ба́че краткоглагѡ́льна и҆ сво́йствєнна бж҃е́ствєнна ѡ҆сїѧ̑нїѧ.

н҃и. Внегда̀ ᲂу҆́мъ посредѣ̀ во́дъ и҆збѣга́ѧ мы́сленнагѡ фараѡ́на, про́йдетъ свою̀ но́щь просвѣще́нїемъ ѻ҆гнѧ̀, и҆ покро́вомъ ѻ҆́блака сво́й де́нь, тогда̀ благосло́внѣ молча́нїѧ вре́мѧ настои́тъ и҆ безмо́лвїѧ, и҆ нача́ло вои́стиннꙋ дꙋшѝ ѡ҆чище́нїѧ: є҆гда́ же семꙋ̀ лю́тый мы́сленный а҆мали́къ сопротивлѧ́етсѧ, и҆ послѣ́дꙋющїи є҆мꙋ̀ ꙗ҆зы́цы возбранѧ́юще прехо́дъ къ землѝ ѡ҆бѣтова́нїѧ, тогда̀ вре́мѧ прили́чествꙋющее є҆́сть є҆́же глаго́лати: но къ бг҃ꙋ дѣѧ́нїемъ ᲂу҆́мнымъ и҆ сво́йственнымъ видѣ́нїемъ поддержи̑мымъ є҆гѡ̀ рꙋка́мъ, ꙗ҆́коже мѡѷсе́євымъ дре́вле ѿ а҆арѡ́на и҆ ѡ҆́ра.

н҃ѳ. Внегда̀ ѿ бе́здны и҆сточа́тельны бж҃е́ственны, и҆ мы́сленна взира́нїѧ ѿ се́рдца то́читсѧ си́ла дꙋхо́вна и҆стека́ющи, настои́тъ є҆сте́ственнѣ вре́мѧ є҆́же молча́ти. Тогда́ бо неизрече́ннѡ соверша́етсѧ слꙋ́жба, є҆ще́ же и҆ поклоне́нїе ᲂу҆мо́мъ бж҃їе, и҆ и҆́стиною и҆ дꙋ́хомъ: и҆ сїѐ и҆́стиннымъ чꙋ́вствомъ ᲂу҆́мнымъ.

ѯ҃. Внегда̀ ѿ взира́нїѧ къ бг҃ꙋ ᲂу҆́мна, ѿню́дъ слове́снаѧ ᲂу҆́бѡ ча́сть дꙋшѝ и҆спо́лнисѧ бж҃е́ственна ᲂу҆́жаса, ᲂу҆́мнаѧ же видѣ̑нїѧ, є҆ще́ же и҆ ра́дованїѧ дꙋша̀, несомнѣ́ннѡ тогда̀ є҆́сть вре́мѧ молча́ти: дꙋ́хомъ бо благочꙋ́вственнѡ и҆́стинꙋ собра́ннѣ ᲂу҆́мъ взира́етъ, и҆ почита́етъ покланѧ́ѧсѧ со ᲂу҆́жасомъ возсїѧва́емомꙋ въ не́мъ бг҃ꙋ.

ѯ҃а. Дх҃омъ и҆ и҆́стиною прили́чнѣ бг҃ꙋ покланѧ́ющїисѧ и҆ томꙋ̀ слꙋжа́щїи, ꙗ҆́коже подоба́етъ, не то́кмѡ не въ мѣ́стѣ покланѧ́ютсѧ и҆ слꙋ́жатъ, но ничто́же мнѣ́е сра́вна, нижѐ сло́вомъ є҆́же въ произноше́нїи. Ꙗ҆́коже бо ѿ правоты̀ вои́стиннꙋ возне́сшеесѧ мы́сленно чꙋ́вство къ неѡпи́санномꙋ, и҆ є҆гѡ́же ниеди́но мѣ́сто є҆́сть поко́ѧ: ника́коже хо́щетъ въ мѣ́стѣ покланѧ́тисѧ, та́кѡ вои́стиннꙋ подоба́ющее блюдꙋ́що, ꙗ҆́кѡ и҆́стинѣ соедине́нно безконе́чномꙋ и҆ безпредѣ́льномꙋ, безнача́льномꙋ же и҆ безви́дномꙋ и҆ соверше́ннѣ просто́мꙋ и҆ всѧ́чески рещѝ па́че ᲂу҆ма̀, слове́съ разли́чїемъ и҆ предѣ́ломъ произноше́нїѧ покланѧ́тисѧ и҆ послѣ́дованнѡ слꙋжи́ти, ника́коже ѿню́дъ є҆сте́ственнѣ терпи́тъ, є҆гда̀ си́рѣчь вре́мѧ прїи́детъ во ᲂу҆мѣ̀ ѿ посо́бїѧ и҆ надꙋнове́нїѧ дх҃а ра́зꙋмꙋ и҆́стины є҆динови́днѣ ѡ҆зарѧ́тисѧ: въ не́же вре́мѧ ѿню́дъ по всемꙋ̀ всѣ́хъ ѿрѣше́нъ ᲂу҆́мъ бы́въ, є҆ще́ же и҆ самагѡ̀ себѐ и҆зше́дъ нѣ́какѡ не то́кмѡ неглаго́ланїю, но и҆ безпомышле́нїю благосло́внѡ про́чее прилѣжи́тъ, ꙗ҆́кѡ на вы̑шшаѧ и҆ сло́ва и҆ ᲂу҆ма̀ ᲂу҆́мнымъ свѣ́томъ съ весе́лїемъ и҆ ᲂу҆́жасомъ ᲂу҆пражнѧ́ѧсѧ и҆ зрѧ̀: неви́димь и҆ непрехо́денъ неꙋхищре́ннѣ без̾ѻче́снымъ взира́нїемъ по ѡ҆́бразꙋ нѣ́коемꙋ бы́въ соедине́нїемъ є҆́же превы́ше себѐ.

ѯ҃в. Подоба́етъ ᲂу҆мꙋ̀ себѣ̀ внима́ющꙋ съ наблюде́нїемъ ᲂу҆правлѧ́ти своѐ ᲂу҆́мное ᲂу҆строе́нїе разꙋ́мнѣ же и҆ премꙋ́дрѣ съ разсꙋжде́нїемъ, и҆ є҆гда̀ ѡ҆щꙋща́етъ себѐ зрѧ́ща прѡ́стыѧ и҆ невоѡбраже́нныѧ бг҃осло́вїѧ та́йны, въ молча́нїи безмо́лвнѣ стоѧ́ти: а҆́бїе не без̾ ᲂу҆дивле́нїѧ, нижѐ ᲂу҆́бѡ дале́че своегѡ̀ се́рдца дѣ́йствꙋема дꙋ́хомъ, є҆ще́ же и҆ ѡ҆сїѧва́ема. Вре́мѧ бо є҆́сть тогда̀ не то́кмѡ безмо́лвїѧ всѣ́хъ чꙋ́вствъ ѿ чꙋ́вственныхъ ѿню́дъ, но и҆ молча́нїѧ ничто́же мнѣ́е ѿ коегѡ́либо происходѧ́ща сло́ва. Па́че же ᲂу҆́бѡ разꙋмѣ́тельнымъ, а҆́ще что̀ подоба́етъ рещѝ, и҆ ᲂу҆́мна ѻ҆бы́чна безмо́лвїѧ и҆ невидѣ́нїѧ вре́мѧ. Ѿню́дъ бо недвиже́нїю (с/ 1001) ѡ҆бꙋча́тисѧ подоба́етъ, въ чꙋ́вствахъ, въ словесѣ́хъ, въ помышле́нїихъ, да ᲂу҆́мъ примѣта́тельнѡ, и҆ ꙗ҆́коже подоба́етъ, є҆ди́нъ сы́й взира́нїемъ є҆динови́днымъ и҆ є҆динственнови́днымъ є҆ди́нагѡ и҆ то́чїю тро́йственна бг҃а мо́жетъ свобо́днѣ ѡ҆́бразомъ мо́щнымъ є҆́же па́че мы́сли безконе́чїе и҆ безнача́лїе, є҆ще́ же и҆ не ѡ҆б̾ѧ́тїе, и҆ и҆на̑ѧ, є҆ди́ною рещѝ, бж҃е́ствєннаѧ и҆ непрелѡ́жнаѧ и҆ ѿрѣшє́ннаѧ взира́ти, и҆ соединѧ́тисѧ соизмѣне́нъ сы́й съ видѣ́нїемъ и҆ просте́ртъ, и҆ ѿню́дъ бг҃ови́денъ бы́въ бж҃е́ственною благода́тїю съ весе́лїемъ и҆ ᲂу҆дивле́нїемъ. А҆ поне́же ᲂу҆́мъ такова́гѡ держа́тисѧ ᲂу҆строе́нїѧ хотѣ́лъ бы при́снѡ, а҆́ще бы бы́ло мо́щно, но ника́коже мо́жетъ, прело́женъ же сы́й и҆ съ прело́жными живы́й, и҆ соста́вленъ нѣ́какѡ съ тѣ́ломъ и҆ вещьмѝ ѡ҆бстоѧ́тельными разꙋ́мнѣ подоба́етъ не ѿлꙋча́тисѧ дале́че є҆динови́днагѡ взира́нїѧ ѿпа́дъ, нижѐ многоглаго́лати, но ма̑ла ᲂу҆́бѡ глаго́лати, и҆ сїѧ̑ же ѿ бж҃е́ственныхъ въ не́мъ ѡ҆заре́нїй, да не то́кмѡ скорѣ́е мо́жетъ къ бж҃їю є҆́же па́че ᲂу҆ма̀ соедине́нїю па́ки ѡ҆браща́тисѧ, но и҆ свѣтлѣ́йше ѡ҆щꙋти́тъ соедине́нїе, и҆ ничто́же мнѣ́е и҆ пребыва́тельнѣйше. Є҆ли́кѡ бо ᲂу҆́мъ со́бранное храни́тъ и҆ неразлїѧ́нное каковы́млибо ѡ҆́бразомъ, толи́кѡ ѡ҆браще́нїе є҆гѡ̀ є҆́же къ бж҃е́ственномꙋ соедине́нїю скорѣ́е быва́етъ, и҆ свѣтлѣ́йшымъ соединѧ́етсѧ свѣ́тлостємъ: є҆ще́ же и҆ благопло́днѣе ча́стомꙋ ѿню́дъ къ бж҃е́ствєннымъ навыкнове́нїю.

ѯ҃г. Внегда̀ къ бж҃е́ственномꙋ є҆динови́дномꙋ и҆з̾ѧвле́нїю ѿ ᲂу҆́мна взира́нїѧ ᲂу҆́мъ пристра́жда и҆змѣни́сѧ, и҆ недоразꙋмѣва́емымъ ѡ҆зарѧ́етсѧ превы́шшимъ всѧ́кагѡ ра́зꙋма, и҆ нераздѣ́ленъ быва́етъ, и҆ про́стъ и҆ безпредѣ́ленъ, а҆́ки ѿ мра́ка є҆ди́нственнѣ ѡ҆сїѧва́емь: добро́тꙋ неѡпи́саннꙋ зрѧ̀ за простоты̀ превосхожде́нїе: безви́днꙋ, за всѧ́кагѡ ви́да преимꙋ́щество: безнача́льнꙋ, за превышеположе́нїе всѧ́кагѡ нача́ла каковы́млибо ѡ҆́бразомъ: са́мꙋ ᲂу҆́бѡ неѡб̾ѧ́тнꙋ: всѣ́хъ же предѣ́лы и҆ каково́либо ѡ҆бдержа́нїе (и҆) є҆ди́нство въ себѣ̀ (ѡ҆бдержа́щꙋ всѧ̑ и҆сполнѧ́ющꙋ ꙗ҆́кѡ преиспо́лненꙋ: са́мꙋ же безконе́чнꙋ сꙋ́щꙋ: и҆ вкра́тцѣ рещѝ, внегда̀ за всѣ́хъ сꙋ́щихъ презрѣ́нїе взира́нїемъ є҆ди́нагѡ всѧ̑ ᲂу҆́зритъ неизрече́ннымъ сло́вомъ си́лы ᲂу҆́мственныѧ превы́ше помышле́нїѧ: тогда̀ вре́мѧ є҆́же молча́ти и҆ та́инственнѡ и҆ преми́рнѡ, и҆ да та́кѡ рекꙋ̀ без̾ѻче́снѡ и҆ неглаго́льнѡ є҆динови́днагѡ наслажда́тисѧ бж҃е́ственнѣйшимъ тайноꙋче́нїемъ и҆́стины наслажде́нїѧ. Внегда́ же речє́ннаѧ ѿстꙋпа́ютъ ѿ ᲂу҆ма̀ и҆ ѻ҆́крестъ є҆гѡ̀ зри́тсѧ раздѣле́нїе: тогда̀ вре́мѧ є҆́же глаго́лати ѻ҆ба́че глаго́лати досто́йна возвожде́нїѧ къ молча́нїю: лꙋ́чше бо мно́гимъ превосхожде́нїемъ є҆́же па́че сло́ва благовре́менное могло́ бы глаго́латисѧ и҆ ѕѣлѡ̀ влѣ́потꙋ молча́нїе сло́ва всѧ́кагѡ. Ꙗ҆́коже и҆ соломѡ́нъ ди́вный пред̾ꙋчини́въ сїѐ: вре́мѧ молча́ти, та́же вре́мѧ глаго́лати¹³⁵⁶, глаго́летъ: добрѣ́йше ᲂу҆̀бо є҆́сть и҆ пе́рвыѧ вои́стиннꙋ ча́сти, молча́нїе води́ти благовре́меннѡ: а҆́ще ли же не ᲂу҆̀ присꙋ́тствꙋетъ сїѐ, нижѐ ᲂу҆́бѡ во ꙗ҆̀же па́че сло́ва ᲂу҆́мъ є҆динови́днѣ мо́глъ бы взира́ти: то̀ ᲂу҆́бѡ є҆́же глаго́лати благовре́меннѡ да бꙋ́детъ второ́е: и҆ да сро́дно бꙋ́детъ глаго́ланїе, и҆ къ молча́нїю бли́жнее, ꙗ҆́коже молча́нїе, та́къ и҆ глаго́ланїе благовре́менно да соверша́етсѧ: и҆ къ неглаго́ланїю прїитѝ да дости́гнетъ¹³⁵⁷, си́мъ є҆́же бж҃е́ствєннаѧ глаго́лати и҆ размышлѧ́ти вы́нꙋ, и҆ зрѣ́ти тва́рь. И҆ творца̀ є҆ѧ̀ а҆́ки въ зерца́лѣ зрѣ́ти є҆ли́ка си́ла повѣ́дающаѧ ѡ҆ не́мъ. И҆ сѐ є҆́сть є҆́же благовре́меннѡ глаго́лати. Подоба́етъ же ꙗ҆́коже мни́тсѧ и҆ та́кѡ нѣ́какѡ ѡ҆б̾е́мшꙋ приназна́менати.

ѯ҃д. Внегда̀ всѧ̑ ᲂу҆́мъ преше́дъ здѣ̑шнѧѧ, и҆ превозше́дъ є҆сте́ственнымъ ѡ҆́бразомъ ра́достнѣ молчи́тъ, тогда̀ вре́мѧ наслажда́тисѧ премі́рными и҆ неизглаго́ланными: вре́мѧ ѡ҆сїѧ́нїѧ и҆ свѣ́та ᲂу҆́мна, соедине́нїѧ же ᲂу҆ма̀ и҆ видѣ́нїѧ простоты̀, безпредѣ́лїѧ же и҆ безконе́чїѧ, и҆ пресвѣ́тла ра́зꙋма: и҆ въ кра́ткости рещѝ, вре́мѧ воспрїѧ́тїѧ и҆ причаще́нїѧ премꙋ́дрости дꙋхо́вныѧ, є҆́юже ᲂу҆́мъ соверше́нъ быва́етъ во ᲂу҆праздне́нїи и҆ молча́нїи, несказа́нное прїе́мь во ᲂу҆́жасѣ ра́дованїе.

ѯ҃є. Є҆гда̀ дꙋша̀ и҆́стины чꙋ́вствомъ себѐ ча́шею благода́ти ꙗ҆́кѡ держа́вною ᲂу҆поева́емꙋ ѡ҆щꙋща́етъ¹³⁵⁸, и҆ безꙋ́мнꙋ быва́ющꙋ, ꙗ҆́вѣ ꙗ҆́кѡ тогда̀ вре́мѧ є҆́сть молча́ти.

ѯ҃ѕ. Є҆гда̀ внꙋ́треннѧгѡ человѣ́ка завѣща́нїе хо́щетъ вопи́ти, гдⷭ҇и, что́ сѧ ᲂу҆мно́жиша стꙋжа́ющїи мѝ; мно́зи востаю́тъ на мѧ̀¹³⁵⁹: вре́мѧ є҆́сть глаго́лати: глаго́лати же ꙗ҆́коже подоба́етъ, не сꙋ́єтнаѧ на врагѝ, ѻ҆ба́че мѣ̑рна и҆ прили́чєствꙋюща, ꙗ҆́коже подоба́етъ.

ѯ҃з. Є҆гда̀ свѣ́тъ лица̀ гдⷭ҇нѧ зна́менасѧ¹³⁶⁰ на дꙋшѝ, ꙗ҆́коже ѿсю́дꙋ ᲂу҆добрѧ́тисѧ и҆ просвѣща́тисѧ, и҆ возлїѧ́нїю бж҃е́ственна весе́лїѧ возлива́тисѧ на ню̀: тогда̀ вои́стиннꙋ вре́мѧ є҆́сть молча́ти.

ѯ҃и. Є҆гда̀ востаю́щихъ зрѣ́ла бы на ню̀ непра́ведныхъ свидѣ́телей, и҆ ꙗ҆̀же не вѣ́сть вопроша́ющихъ ю҆̀ и҆ смꙋща́ющихъ¹³⁶¹: тогда̀ вре́мѧ є҆́сть вои́стиннꙋ глаго́лати, є҆ще́ же ᲂу҆́бѡ и҆ проти́вꙋ вѣща́ти.

ѯ҃ѳ. Верхо́внѣйше, и҆ ꙗ҆́коже рещѝ, кра́йнѣйше, про́чее и҆ вы́шнее добро̀ є҆ще́ же и҆ бла́го є҆́сть бг҃ъ, во всѣ́хъ сꙋ́щихъ и҆ разꙋмѣва́емыхъ: во всѣ́хъ же ви́димыхъ мно́гимъ посре́дствомъ лꙋ́чшее є҆стество́мъ є҆́сть человѣ́къ, и҆ и҆зрѧ́днѣйшъ ᲂу҆вѣща́тельнѣ без̾ сравне́нїѧ: благода́тїю же вои́стиннꙋ и҆ всѣ́хъ а҆́гг҃лѡвъ превы́шшїй. Премно́гими ᲂу҆́бѡ ᲂу҆́мъ зри́тельнѣ ꙗ҆̀же междꙋ̀ бг҃омъ и҆ человѣ́комъ къ сꙋ́щемꙋ превы́ше мы́сли приближа́ѧсѧ ᲂу҆жа́сенъ быва́етъ, внегда̀ є҆щѐ и҆з̾ѻби́льны просвѣти́тельныѧ благода́ти не прїѧ́тъ и҆скꙋ́са: є҆ѧ́же дѣ́йственною въ се́рдцѣ дꙋхо́вною си́лою вкꙋси́въ, ре́клъ бы́хъ, не́гли: къ кра́йнѣйшемꙋ восхо́дитъ добрꙋ̀ и҆ бла́гꙋ, (си́рѣчь) къ бг҃ꙋ, и҆ во́нь по да́рꙋ бж҃е́ственнѣйшꙋ вхо́дитъ, и҆ зри́тъ є҆динови́днѣ, и҆ ᲂу҆жаса́етсѧ во глꙋбинѣ̀ ꙗ҆̀же па́че ᲂу҆ма̀ водворѧ́ѧсѧ въ молча́нїи. И҆ сїѐ є҆́сть вои́стиннꙋ пе́рвагѡ сꙋббѡ́тства, ꙗ҆́коже бы и҆менова́лъ кто̀ не́гли зало́гъ, є҆гѡ́же ѡ҆́бразъ созда́нїѧ сꙋ́щихъ сꙋббѡ́тство є҆́сть бж҃їе: дрꙋга́гѡ же (є҆гѡ́же нело́женъ є҆́сть прїꙋка́зъ, ѡ҆ста́вленное сꙋббѡ́тство лю́демъ бж҃їимъ) бо́льша и҆ и҆на́гѡ сꙋббѡ́тства проѧвле́ннѡ наслажда́етсѧ, въ себѣ̀ ѡ҆браща́ѧсѧ ѿ бг҃а: и҆ себѐ позна́въ ꙗ҆́кѡ ѡ҆́бразъ по первоѡбра́зїи, и҆ ѿню́дъ посре́днѧѧ бг҃а и҆ человѣ̑къ, какѡва́ бы ни бы́ли, не то́кмѡ во ꙗ҆̀же па́че ᲂу҆ма̀ и҆ мы́сли прехо́дитъ ѡ҆́бразомъ прили́чнымъ съ чꙋ́днымъ ᲂу҆́жасомъ: но и҆ ра́дость, не ꙗ҆́коже бы мо́глъ кто̀ рещѝ, и҆́мать, и҆ дꙋхо́вна и҆сполнѧ́етсѧ ра́дованїѧ, ра́дꙋѧсѧ вои́стиннꙋ въ молча́нїи ѡ҆ бг҃озри́тельныхъ на себѣ̀ ѡ҆сїѧ́нїихъ и҆ бг҃одѣ́йствѣхъ, и҆ соединѧ́емь си́мъ ѡ҆́бразомъ бж҃е́ственнагѡ и҆ преесте́ственнагѡ бж҃ества̀ є҆ди́ницѣ ѡ҆ хрⷭ҇тѣ̀ і҆и҃сѣ.

ѻ҃. Внегда̀ всѣ́хъ виносло́внѣ бы́вшихъ твори́тъ ѿѧ́тїе, ꙗ҆́кѡ не сꙋ́щымъ сꙋ́щымъ, сꙋ́щее вои́стиннꙋ тогда̀ неизрече́ннѣ мечта́етъ па́че ᲂу҆́мна дѣ́йства же и҆ соедине́нїѧ ᲂу҆́мъ зрѧ̀ и҆́стиною и҆ дꙋ́хомъ превосхожде́нїемъ безчи́сленнымъ бж҃е́ственныхъ ѻ҆́крестъ, сꙋ́щихъ, нѣ́каковымъ ѡ҆́бразомъ зри́мыхъ, и҆ быва́етъ є҆динови́дѣнъ, и҆лѝ є҆ди́но, да та́кѡ рекꙋ̀, неглаго́ланїемъ содержи́мь, и҆спо́лнь любвѐ, и҆спо́лнь ра́дости, ѻ҆ба́че не про́стѣ, но сꙋ́щїѧ ѿ дѣ́йства дх҃а: ра́внагѡ а҆́гг҃лѡвъ наслажде́нїѧ.

ѻ҃а. Ꙗ҆́коже весьма̀ ника́коже ѿню́дъ гдⷭ҇и є҆сѝ сꙋщество́мъ постижи́мь никі́имже нѣ́кимъ каковы́млибо є҆стество́мъ слове́снымъ же и҆ ᲂу҆́мнымъ, и҆лѝ ѿню́дъ, ра́зꙋмомъ зда́ннымъ, ни понѐ херꙋві́мскимъ, но превы́ше ѿстои́ши безконечнокра́тнѣ безконе́чнѡ всѧ́кагѡ ра́зꙋма: та́кѡ влⷣко и҆ ꙗ҆̀же ѻ҆́крестъ тебѐ ѿню́дъ безконє́чна и҆ безпредѣ̑льна. А҆́бїе ᲂу҆́бѡ сꙋ́ща и҆ глаго́люща самаго̀ тебѐ превосходѧ́щимъ попече́нїемъ законополо́жникꙋ ве́тхагѡ завѣ́та мѡѷсе́ю проповѣ́дати повелѣ́лъ є҆сѝ: но и҆ та́кѡ ты̀ па́ки нело́жнѣйшїй, є҆ди́на кра́йнѧѧ и҆́стина, ре́клъ є҆сѝ ѡ҆ нѣ́кїихъ твои́хъ, є҆гда̀ ꙗ҆ви́лсѧ є҆сѝ и҆̀мъ: ѻ҆ба́че и҆́мене твоегѡ̀ не ѿкры́лъ є҆сѝ: є҆́сть бо па́че всѧ́кагѡ без̾ сравне́нїѧ и҆́мене, не то́кмѡ ѿ тѣ́хъ, є҆ли̑ка на землѝ, но и҆ ѿ тѣ́хъ є҆ли̑ка сꙋ́ть на небесѝ: сꙋщество́ бо тѧ̀ представлѧ́ютъ по́лни сꙋ́щїи свѣ́та твоегѡ̀, но без̾ вподлежа́щагѡ: вои́стиннꙋ да си́це послѣ́довано пресꙋ́щественъ ꙗ҆ви́шисѧ, и҆ помышле́нїе не и҆мꙋ́щее ѿню́дъ, нѣ́что подлежа́щее, да преѧвле́ннѡ и҆ па́че помышле́нїѧ, и҆ всѣ́хъ разꙋмѣ́тисѧ си́лꙋ и҆мꙋ́щихъ безконечнокра́тнѣ недоразꙋмѣва́емь, и҆ превы́шшїй познава́ешисѧ: вре́мене соверше́ннѡ зри́шисѧ вы́шшїй, безнача́ленъ, саможиво́тъ сы́й, и҆ безконе́ченъ. Мѣ́стна всесоверше́ннѣ ѻ҆́тай и҆збѣга́еши разꙋмѣ́нїѧ, вездѣ̀ внеза́пꙋ сы́й и҆ превы́ше всегѡ̀, ꙗ҆́кѡ всегѡ̀ вкꙋ́пѣ собра́нїѧ творе́цъ и҆ є҆ди́нъ: а҆́ще и҆ ᲂу҆́мныхъ є҆сте́ствъ ѡ҆бдержа́нїе и҆ мѣ́сто сы́й непрохо́дно, ᲂу҆ма̀ ско́рость превосходѧ́щъ предпостиза́ющихъ є҆гѡ̀ ᲂу҆мышле́нїе, а҆́ки превы́ше всегѡ̀ и҆ рꙋка̀ вседержи́тельна всегѡ̀ ѡ҆брѣта́ющьсѧ ѡ҆́бразомъ неисповѣ́даннымъ: є҆ще́ же нижѐ є҆стества̀, и҆ по прилꙋ́чаю предѣ́лѡмъ подлежи́ши: и҆́бо безпредѣ́ленъ ты̀ є҆сѝ, не то́кмѡ є҆стество́мъ преестестве́ннѣ неподви́жимь, но и҆ ꙗ҆̀же ѻ҆́крестъ тебѐ є҆сте́ственными, ꙗ҆́кѡ премꙋ́дрость превы́ше премꙋ́дрости, и҆ си́ла превы́ше си́лы, и҆ любы̀ и҆ бла́гость превы́ше всѧ́кїѧ мы́сли и҆ любвѐ и҆ бла́гости. Что́ бы кто̀ наре́клъ тѧ̀; Не свѣ́тъ ли глаго́лемь непристꙋ́пенъ; тѣ́мже вои́стиннꙋ превы́ше свѣ́та є҆сѝ. Что̀, сꙋдїю́ ли; не всѧ̑ ли вѣ́дꙋща и҆ пре́жде бытїѧ̀; Гдѣ̀ сꙋ́ть сїѧ̑ сꙋдїѝ; тѣ́мже вои́стиннꙋ па́че сꙋдїѝ мно́гимъ посре́дствомъ. Какова́ же тѧ̀ содѣ́телѧ и҆ нарече́тъ; мгнове́нїемъ во́ли сами́мъ зи́ждꙋща, па́че же є҆ди́нѣмъ, мнѡ́га и҆ разли̑чна веще́ствєннаѧ; Въ невеще́ственныхъ же, ѽле глꙋбины̀ превосхожде́нїѧ! да та́кѡ рекꙋ̀, є҆ди́нѣмъ мгнове́нїемъ ма́нїѧ ꙗ҆̀же є҆ди́нагѡ є҆стества̀. Дꙋхѡ́вна бо сꙋ́ть, мно́га же и҆ премно́га завѣща́нїй, а҆́ще ли же хо́щеши, и҆ ли́цъ разли́чїю, чꙋ́дное ѿню́дъ и҆ всѧ́кїѧ помышлѧ́ющагѡ по превосхожде́нїю и҆збѣга́ющо мы́сли. Оу҆̀бо ли сїѧ̑ сꙋ́ть содѣ́телѧ; Ника́коже. Тѣ́мже вои́стиннꙋ па́че содѣ́телѧ созда́тель и҆менꙋ́ешисѧ, и҆ хꙋдо́жникъ проповѣ́дꙋешисѧ: и҆ кото́рый зда́тель без̾ ѡ҆снова́нїѧ на ни є҆ди́номъ стоѧ́нїи зи́ждетъ понѐ и҆ малѣ́йшее, ꙗ҆́коже ты̀ влⷣко толи́кꙋю же зе́млю, съ толи́кими же гора́ми є҆ѧ̀, и҆ ка́менїи, и҆ лѣсы̀ многоразли́чными, ѡ҆снова́ѧ ю҆̀ на ничесо́мъ, па́че же толи́кѡ ᲂу҆твержде́ннѣ; И҆лѝ кі́й хꙋдо́жникъ ѿ нигдѣ́же ника́коже сꙋ́щихъ произво́дитъ, па́че же во мгнове́нїи по сло́вꙋ, какова̀ то́ль ᲂу҆хꙋдо́жествєннаѧ, ꙗ҆́коже произво́диши ты̀; Оу҆̀бо ли зда́телева и҆лѝ хꙋдо́жникова сꙋ́ть твоѧ̑: кто̀ ре́къ подоба̑ющаѧ рече́тъ; Ѿню́дъ ника́коже вои́стиннꙋ: тѣ́мже па́че зда́телѧ и҆ хꙋдо́жника мно́зѣмъ безконе́чїемъ є҆сѝ бж҃е. Како́въ ви́дъ любвѐ когда̀, и҆лѝ ᲂу҆вѣ́дѣти кто̀ мо́глъ бы, и҆лѝ ᲂу҆слы́шати, и҆лѝ понѐ ка́кѡ ли́бо возмечта́ти, ꙗ҆ко́въ всечꙋ́днаѧ твоѧ̀ бла́гость со ѕѣлѡ̀ крѣ́пкими завѣща́нїи показа̀ на́мъ въ прїѧ́тїи є҆́же по на́мъ ѕѣлѡ̀ человѣколю́бнѣ ко́ль па́че всѣ́хъ наде́ждъ, є҆́же вои́стиннꙋ зрѧ́ще, и҆̀мже зрѣ́ти мо́щно є҆́сть благода́тїю, въ просте́ртꙋ вхо́дѧтъ ꙗ҆́вѣ любвѐ и҆ про́мысла странноѡбра́зна пꙋчи́нꙋ: и҆ вои́стиннꙋ внѣ̀ себѐ быва́ютъ, съ лютѣ́йшими раче́ньми прили́чнѣ, и҆ ꙗ҆̀же смотре́нїѧ сво́йственнѣ наименова́ти сего̀ вои́стиннꙋ не вѣ́дѧтъ: превосхо́дѧтъ бо ѿ мно́жайша превосхожде́нїѧ и҆ ᲂу҆́мъ, и҆ сло́во, и҆ всѧ́къ слꙋ́хъ, и҆ мы́сль, завѣща́нїѧ вочеловѣ́ченїѧ твоегѡ̀ бж҃е пребла́же. Ѻ҆ц҃ъ всѣ́хъ є҆сѝ, и҆ нарица́ешисѧ: но неизрече́ннѣ ѻ҆те́чество каково́либо превосхо́диши, и҆ вино́ю, и҆ вла́стїю, и҆ про́мысломъ, и҆ содержа́нїемъ. Ца́рь и҆менꙋ́ешисѧ: но ника́коже въ настоѧ́щемъ мно́жае, мнѣ́е же въ бꙋ́дꙋщемъ: нижѐ ᲂу҆́бѡ ка́колибо по преше́дшемꙋ. Но ка́кѡ; Чꙋ́денъ ѿрѣше́ннѡ и҆ про́стѡ: ца́рство бо твоѐ, ца́рство всѣ́хъ вѣкѡ́въ, є҆ди́нѣмъ гла́сомъ ра́внѣ настоѧ́щагѡ, преше́дшагѡ и҆ бꙋ́дꙋщагѡ, и҆ влады́чество твоѐ во всѧ́комъ ро́дѣ и҆ ро́дѣ. Та́кѡ во всѣ́хъ ѿню́дъ по всемꙋ̀ безконе́чными мѣ́рами превы́ше є҆сѝ, про́стѡ и҆ ѿрѣше́ннѡ всѧ́кагѡ ча́стнагѡ ра́зꙋма, да рекꙋ̀ вкра́тцѣ подо́бнѣ, ѕѣлѡ̀ и҆ безконе́чнѣ превознесе́нъ, и҆ ты̀ непостижи́ме гдⷭ҇и, и҆ ꙗ҆̀же ѻ҆́крестъ тебѐ, ꙗ҆̀же мечта́ѧ нѣ́какѡ ᲂу҆́мъ, ᲂу҆тѣше́нїе и҆́мать ѡ҆ дости́жнѣмъ по си́лѣ твое́мъ зрѣ́нїи, и҆ ве́сь содх҃нове́нїемъ на́нь дх҃а бы́въ, ꙗ҆́кѡ во мра́къ вхо́дитъ та́инственнѡ, нижѐ соверше́ннѣ могі́й зрѣ́ти тѧ̀ за сла́вы безконе́чное и҆ непристꙋ́пное, и҆́мже ѡ҆́бразомъ премі́рнымъ поко́емъ ᲂу҆покоѧ́еши неизрече́ннѡ зрѧ́щыѧ и҆ лю́бѧщыѧ тѧ̀ чꙋ́днѡ, нижѐ всесоверше́ннѡ без̾ є҆́же зрѣ́ти тѧ̀ сы́й: тѣ́мже ᲂу҆покое́нїемъ бж҃е́ственнымъ и҆ преесте́ственнымъ па́ки ᲂу҆покоѧ́еши и҆̀хъ, неизрече́ннѣ, недомы́сленнѣ, неѡпи́саннѣ, неѡб̾ѧ́тнѣ, и҆ вкра́тцѣ рещѝ, всебезконе́чнѣ, сꙋщество́мъ ꙗ҆́вѣ ꙗ҆́кѡ и҆ дѣ́йствомъ, а҆ми́нь.

ѻ҃в. Є҆гда̀ ᲂу҆́мъ дале́че ѿ многоꙋ́мїѧ, и҆на́чевства и҆ многоча̑стны мы̑сли ѿтрѧ́съ, превы́ше ѡ҆брѣта́етсѧ ᲂу҆́мнагѡ расточе́нїѧ дх҃нове́нїемъ на́нь и҆ прича́стїемъ ст҃а́гѡ дх҃а, соединѧ́ющагѡ и҆̀, и҆ на се́рдце вы́нꙋ и҆ присното́чнѣ ды́шꙋщагѡ и҆ въ бж҃е́ственныхъ мѣ́стѣхъ ча́стѣ любопребыва́ѧ, ꙗ҆́же ѡ҆ бз҃ѣ мечта́нїи а҆́ки вкачестви́тсѧ, ꙗ҆́кѡ є҆ди́нымъ взира́нїемъ ᲂу҆́мнымъ, внеза́пꙋ то́ль вели́ка, є҆ли́ка ѻ҆́крестъ бг҃а є҆динови́днѣ а҆́ки въ зерца́лѣ зрѣ́ти, и҆ неизрече́ннѣ рачи́тельнѣ: тогда̀ бж҃е́ственнагѡ поко́ѧ достиза́етъ преѧвле́ннѡ, по́мощи и҆ бж҃е́ственна мі́ра наслажда́ѧсѧ, и҆ серде́чна ст҃а безмо́лвна мно́жицею поко́ѧ, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

ѻ҃г. Є҆гда̀ ᲂу҆́мъ бесѣ́дꙋетъ бг҃ꙋ, и҆ мо́литсѧ ꙗ҆́кѡ нѣ́кїй сы́нъ чадолюби́вѣйшемꙋ ѻ҆ц҃ꙋ̀ завѣща́нїи, и҆ свѣ́тъ і҆и҃совъ зрѧ̀, неизрече́ннѣ весели́тсѧ ᲂу҆дивлѧ́ѧсѧ ѕѣлѡ̀ рачи́тельнѣ, раче́нїе ꙗ҆́вѣ бж҃е́ственно и҆ преесте́ственно дѣ́йство ст҃а́гѡ дх҃а поразꙋмѣва́ѧ въ се́рдцѣ свое́мъ, и҆ превы́ше бж҃е́ственныхъ ꙗ҆вле́нїй и҆ соверше́нствъ превозлета́ти хо́щетъ та́инственнѡ и҆ премі́рнѡ, тогда̀ вои́стиннꙋ почива́етъ ѿ всѣ́хъ дѣ́лъ свои́хъ, превы́ше є҆́же помышлѧ́ти по є҆́же помышлѧ́ти быва́ѧ, и҆ чꙋ́днѣ наслажда́ѧсѧ, и҆ вои́стиннꙋ почива́ѧ въ ми́рѣ животворѧ́щагѡ дх҃а хрⷭ҇то́ва.

ѻ҃д. Почѝ бг҃ъ ѿ всѣ́хъ дѣ́лъ, ꙗ҆̀же нача́тъ твори́ти¹³⁶²: но по и҆сполне́нїи сло́вомъ и҆ дꙋ́хомъ бы́вшихъ. Ра́внымъ ѡ҆́бразомъ и҆ бг҃оподо́бенъ ᲂу҆́мъ почива́етъ ѿ всѣ́хъ дѣ́лъ свои́хъ, ꙗ҆̀же нача́тъ въ нача́лѣхъ твори́ти въ соисполне́нїи мі́ра, и҆́же по добродѣ́тели мы́сленнагѡ, но по є҆́же возразсмотрѣ́ти и҆ а҆́ки возсодѣ́лати сло́вомъ бж҃їимъ и҆ дх҃омъ животворѧ́щимъ вкꙋ́пѣ ве́сь мі́ръ, и҆ ꙗ҆̀же въ не́мъ мы́слєннаѧ дово́льнѡ: и҆ ѿ си́хъ взы́ти па́ки сло́вомъ бж҃їимъ и҆ дꙋ́хомъ въ речє́ннаѧ ѿ нѣ́кихъ, мета̀ та̀ фѷзїка̀, си́рѣчь, во ꙗ҆̀же по є҆сте́ственныхъ, и҆ превозни́кнꙋти въ прѡ́стаѧ и҆ ѿрѣшє́ннаѧ бг҃осло́вїѧ та̑инственнаѧ чꙋдеса̀: тогда̀ въ почи́тїи, поко́ѧ же и҆ мі́ра ᲂу҆́мною и҆́стиною ѕѣлѡ̀ мно́га наслажда́етсѧ, є҆ще́ же и҆ ѡ҆бнажа́етсѧ свѣ́томъ ра́зꙋма и҆ дх҃а животворѧ́ща прича́стїемъ, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

ѻ҃є. Ꙗ҆́коже почи́въ бг҃ъ, ника́коже ѿ всѣ́хъ дѣ́лъ свои́хъ почѝ, но то́чїю, ꙗ҆̀же нача́тъ твори́ти. Ѻ҆ба́че ѿ безнача́льныхъ и҆ незда́нныхъ, и҆ а҆́ки є҆сте́ственныхъ сꙋ́щихъ є҆мꙋ̀ дѣ́лъ не преста̀: та́кѡ сра́вна бг҃оподража́ннѣ ᲂу҆́мъ, сло́вомъ бж҃е́ственнымъ и҆ дх҃омъ животворѧ́щимъ и҆спыта́въ, и҆ преше́дъ ви́димꙋю тва́рь, ника́коже ѿ дѣ́лъ є҆сте́ственнѣ сꙋ́щихъ є҆мꙋ̀ и҆ нижѐ наче́ншихсѧ, нижѐ ᲂу҆́бѡ престаю́щихъ почива́етъ ѿню́дъ, но ѿ ви́димыхъ дѣ́лъ почива́етъ, начина́ющихсѧ же и҆ престаю́щихъ. Ѿ сеѧ̀ вины̀ и҆ тѣле́сномꙋ почи́тїю по недвиже́нїю припослѣ́дствꙋющꙋ ᲂу҆поко́ившемꙋ, небе́сномꙋ послѣ́дꙋетъ ᲂу҆ма̀ ᲂу҆строе́нїю. А҆́ще бо приснодви́женъ бы не бы́лъ дꙋхнове́нїемъ на́нь животворѧ́щимъ дх҃а при́снымъ во взира́нїи ви́димымъ разꙋмѣ́тельнѣмъ, нижѐ а҆́ще є҆́сть ᲂу҆́мно почи́тїе ᲂу҆вѣ́сть, приснодви́жнѣ ѻ҆́крестъ є҆ди́нагѡ бг҃а є҆динови́днѣ ѡ҆браща́емо, и҆ ѡ҆божа́ющо своего̀ прича́стника ᲂу҆покое́нїемъ є҆́же ѡ҆ хрⷭ҇тѣ̀ несказа́ннымъ же и҆ неизрече́ннымъ.

ѻ҃ѕ. Не ско́ръ бꙋ́ди, глаго́летъ соломѡ́нъ, и҆зноси́ти сло́во пред̾ лице́мъ гдⷭ҇нимъ¹³⁶³: ꙗ҆́кѡ бг҃ъ на нб҃сѝ горѣ̀, ты́ же на землѝ до́лꙋ, ко́ль ѕѣлѡ̀ ꙗ҆́снѣ и҆ пра́вѡ предае́тъ же и҆ и҆з̾ѧснѧ́етъ, ко́е є҆́сть вре́мѧ молча́ти глаго́летъ бо ꙗ҆́вѣ: поне́же ты̀ до́лꙋ сы́й на землѝ пред̾ лице́мъ гдⷭ҇а сꙋ́щагѡ на небесѣ́хъ горѣ̀ є҆сѝ, и҆ толи́кїѧ сподо́билсѧ є҆сѝ благода́ти, ꙗ҆́кѡ до́льный гѡ́рнѧѧ мꙋ́дрствовати и҆ ѡ҆бзира́ти, и҆ ᲂу҆́мнѣ взира́ѧ стоѧ́ти пред̾ лице́мъ гдⷭ҇нимъ: не ско́ръ бꙋ́ди и҆знестѝ сло́во, вре́мѧ во молча́ти. Не хощѝ си́рѣчь, и҆знестѝ сло́во ᲂу҆́мнѣ дѣ́йствꙋемь ѿ и҆́стины и҆ є҆динови́днѣ и҆ бг҃ови́днѣ: (сїе́ бо є҆́сть пред̾ лице́мъ гдⷭ҇нимъ бы́ти) є҆гда̀ мнѡ́гаѧ ѻ҆́крестъ бг҃а сꙋ̑щаѧ є҆динови́днѣ ᲂу҆́мъ зри́тъ про́стымъ и҆ є҆ди́нственнымъ взира́нїемъ въ бз҃ѣ. Не ᲂу҆́бѡ сїѐ стражда̀ и҆ пред̾ лице́мъ гдⷭ҇нимъ предстоѧ̀ сло́во произноси́ти ско́ръ бꙋ́ди. И҆лѝ ꙗ҆́коже бы приключи́лосѧ себѐ невѣ́жественнѣ во́лею ᲂу҆ма́лити и҆ и҆знестѝ, ᲂу҆скорѧ́лъ бы є҆сѝ. Вои́стиннꙋ же и҆ та́кѡ рещѝ мо́щно бы бы́ло глаго́ла сегѡ̀ сказꙋ́ющымъ разꙋмѣ́нїе: бѣ̀, є҆гда̀ бѣ̀ человѣ́ческое є҆стество̀ неврежде́нно, и҆ сегѡ̀ ра́ди пра́веднѣ дале́че ѿ ѕѡ́лъ, бли́зъ сꙋ́ще бг҃а, бг҃а же зрѧ́ще, добро́тꙋ лица̀ є҆гѡ̀ во а҆да́мѣ пра́ѻтцѣ, наслажда́ющосѧ съ ра́достїю съ чꙋдесе́мъ невеще́ственна наслажде́нїѧ, Оу҆́мна, небе́сна, нетлѣ́нна. И҆́бо мно́га ᲂу҆́бѡ благода́ть въ дꙋшѝ пе́рвагѡ человѣ́ка и҆злива́шесѧ, мно́гими же бг҃ови́дный ᲂу҆́мъ ѻ҆́нагѡ ѡ҆блива́шесѧ разꙋмѣ́тельными видѣ́нїи и҆ горѣ̀ просте́ртїи ко бг҃ꙋ, въ чꙋ́вственнѣ раѝ, наслажде́нїе и҆мѣ́вшагѡ мы́сленнѣ, и҆ да си́це наименꙋ́ю блаже́ннꙋ жи́знь: съ самѣ́мъ собо́ю вои́стиннꙋ соедине́нна и҆ съ бг҃омъ, въ себѣ́ же пребыва́юща и҆ въ бз҃ѣ, ꙗ҆́коже подоба́етъ є҆динови́днагѡ держа́щасѧ ᲂу҆строе́нїѧ и҆ бг҃ови́днагѡ вои́стиннꙋ: и҆ ѕѣлѡ̀ влѣ́потꙋ, ꙗ҆́кѡ по ѡ҆́бразꙋ бж҃їю бы́сть. Но сїѧ̑ ᲂу҆́бѡ та́кѡ ѡ҆ на́съ, да ꙗ҆́коже вкра́тцѣ рещѝ, ѿ бг҃а блага̑ѧ: враждꙋ́ющемꙋ же благожре́бїю, и҆ сла́вѣ на́шей нечести́вомꙋ бѣ́сꙋ ᲂу҆ѧ́звеннꙋ за́вистїю, стерпи́мо сїѐ не бѣ̀, ка́кѡ бо; и҆ ᲂу҆́бѡ мно́гѡ всегꙋби́тельный се́й бы́сть прельща́ѧ и҆ повѣща́ѧ наде́ждꙋ на́шꙋ, благосло́вными а҆́ки бы совѣ́ты, и҆ воздвиза́ѧ жела́нїе къ вы́шнемꙋ, не́жели є҆́же и҆мѣ́ѧхомъ, ѡ҆боже́нїю, за́пѡвѣди бж҃їѧ, перводѣ́тель ѕло́бы, ѡ҆болга́въ пра́вое. Ѿ негѡ́же вои́стиннꙋ поги́бель пре́лести ѻ҆каѧ́ннѣ пострада́хомъ, и҆ бг҃а, и҆ бж҃е́ственна наслажде́нїѧ и҆згна́ни бы́хомъ, и҆ є҆динови́дныѧ ᲂу҆́мныѧ дꙋхо́вныѧ жи́зни, и҆ ѿ є҆́же зрѣ́ти мощѝ лицѐ бж҃їе, и҆ прославлѧ́тисѧ и҆змѣне́ннымъ лꙋче́ю бж҃е́ственныѧ добро́ты ѻ҆каѧ́ннѣ ѿпадо́хомъ, и҆ ѡ҆брѣто́хомсѧ, ꙗ҆́коже не подоба́ше, раздѣле́нни и҆ раздра́нни на нѣ̑каѧ мнѡ́га, и҆ ѡ҆ раздѣ́льныхъ жи́знѣхъ же и҆ и҆на́чевствахъ, ꙗ҆́коже не подоба́ше, ра́дꙋющесѧ, ꙗ҆́коже и҆ мнѡ́ги бо́ги, и҆ разстоѧ́щѧ вмѣ́стѡ є҆ди́нагѡ почита́ти трїѷпоста́снагѡ бж҃ества̀, вои́стиннꙋ не сꙋ́щыѧ бо́ги, но преле́стны бѣ́сы, и҆ тли́тельны и҆ вражде́бны, погꙋби́хомъ є҆ди́ное и҆ и҆́стинное (є҆ди́нꙋ же) и҆ є҆ди́нственнꙋю жи́знь и҆ чи́нъ, и҆ раздра́хомсѧ на мнѡ́га и҆ разли̑чна, и҆ крѣ́пость на́ша ᲂу҆́мнаѧ и҆ си́ла, и҆лѝ па́че горѣ̀ просте́ртїе рещѝ сво́йственнѣе и҆счезѐ, не нелѣ́потнѣ, и҆ во глꙋбинꙋ̀ прїидо́хомъ, ника́коже и҆змѣ́рна ѕла̀, и҆ дѡ́лнѧѧ ѡ҆́бразы бж҃їи, и҆ го́рнѧгѡ ѡ҆бита́нїѧ, и҆ небе́снагѡ недосто́йни, безꙋ́мнѡ мꙋ́дрствовати произво́лихомъ. А҆ поне́же не непрело́жно, нижѐ ᲂу҆́бѡ непрекло́нно є҆́сть на́ше, мо́щно є҆́сть ѿню́дъ, и҆ сїѐ благосло́внѣ, ꙗ҆́коже ѿ премно́гїѧ сла́вы ѻ҆́ныѧ въ далеча́йшее безсла́вїе ѻ҆каѧ́ннѣ поползо́хомсѧ па́ки возврати́тисѧ и҆ возни́кнꙋти, и҆ па́ки ᲂу҆ви́дѣти честнѣ́йшее бж҃їе лицѐ, не ᲂу҆̀бо ꙗ҆́коже пре́жде толи́кѡ ближа́йше: ѻ҆ба́че далеча́е, и҆ ᲂу҆ви́дѣти и҆ добро́ты є҆гѡ̀ пострада́ти свѣ́тлость. Тѣ́мже и҆ мѡѷсе́й бж҃е́ственнѣйшїй, и҆ всѐ ко́елибо проро́кѡвъ число̀, и҆ є҆ще́ же и҆ ѻ҆тцы̀, и҆̀же пре́жде си́хъ, а҆враа́мъ ꙗ҆́вѣ ꙗ҆́кѡ и҆ подо́бнїи є҆мꙋ̀, ви́дѣша сїѐ ꙗ҆́коже дости́гнꙋти мо́щно бѣ̀ и҆ ѕѣлѡ̀ ꙗ҆́снѣ, и҆ свѣ́тлости ꙗ҆́же ѿ ѻ҆́ныѧ добро́ты наслади́шасѧ дово́льнѣ: є҆ще́ же, и҆ ᲂу҆жа́сшесѧ ѡ҆ непристꙋ́пнѣй сла́вѣ є҆гѡ̀, ѻ҆́ви ᲂу҆́бѡ себѐ ѡ҆каѧ́ша, ѻ҆́ви же зе́млю себѐ и҆ пе́пелъ вмѣни́ша и҆ нареко́ша: и҆ні́и же ни понѐ зи́нꙋти возмого́ша, ѡ҆ превосхожде́нїи сла́вы ᲂу҆ви́дѣннагѡ, є҆гѡ́же ра́ди ᲂу҆́бѡ хꙋдогла́сїю и҆ косноѧзы́чїю зазрѣ́ша своемꙋ̀. И҆ и҆́ны нѣ̑кїѧ свѣ́тлостїю сꙋ́щагѡ превы́ше добро́ты видѣ̑нїѧ ѻ҆́нагѡ, похва́льны ѕѣлѡ̀ и҆ блаже́нны стра́сти пострада́ша сла́внѡ, ѿ сегѡ̀ вои́стиннꙋ и҆ даві́дъ бж҃е́ственный, жела́ѧ свѣ́тлости добро́ты лица̀ гдⷭ҇нѧ, вопїе́тъ къ бг҃ꙋ молѧ́сѧ: Когда̀ прїидꙋ̀ и҆ ꙗ҆влю́сѧ лицꙋ̀ бг҃а моегѡ̀¹³⁶⁴: и҆ є҆ще́ же ᲂу҆строе́нїе дꙋшѝ, въ не́мже ᲂу҆ви́дѣсѧ лицѐ гдⷭ҇не показа́ти восхотѣ́въ: Вселѧ́тсѧ пра́вїи, глаго́летъ ко бг҃ꙋ, съ лице́мъ твои́мъ¹³⁶⁵: и҆ крѣ́пость же є҆ли́кꙋ дꙋшѝ подае́тъ лицѐ бж҃їе зри́мое, разꙋ́мнѣ показꙋ́ѧ: ѿврати́лъ є҆сѝ, глаго́летъ, лицѐ твоѐ, и҆ бы́хъ смꙋще́нъ¹³⁶⁶. А҆́ще же ѿвраще́нїемъ бж҃е́ственнагѡ лица̀ слꙋча́етсѧ смꙋще́нїе, ᲂу҆̀бо присꙋ́тствїемъ сегѡ̀ и҆ призрѣ́нїемъ ми́ръ послѣ́дствꙋетъ дꙋхо́венъ дꙋшѝ, да́ръ толи́кѡ велича́йшъ сы́й, ꙗ҆́коже по бж҃е́ственнѣй любвѝ и҆ ра́дости ꙗ҆влѧ́тисѧ дх҃ѡ́внымъ и҆лѝ дарова̑нїѧ подоба́етъ глаго́лати и҆лѝ понѐ плоды̀: и҆ ст҃ѡ же живꙋ́щыѧ и҆ пра́веднѡ, во свѣ́тѣ лица̀ гдⷭ҇нѧ ꙗ҆влѧ́етъ ходи́ти: гдⷭ҇и, глаго́лѧ, во свѣ́тѣ лица̀ твоегѡ̀ по́йдꙋтъ: и҆ ѡ҆ и҆́мени твое́мъ возра́дꙋютсѧ ве́сь де́нь¹³⁶⁷, дꙋхо́вный ѻ҆́нъ ꙗ҆́вѣ ꙗ҆́кѡ, поели́кꙋ посыла́етъ внꙋ́треннемꙋ человѣ́кꙋ мы́сленное и҆ неизрече́нное со́лнце пречⷭ҇тыѧ и҆ животворѧ́щыѧ лꙋчы̀ своѧ̑, и҆ просвѣща́етсѧ во ᲂу҆мѣ̀ премі́рныхъ чꙋ́вство: въ не́же вре́мѧ взе́млетсѧ ѿ землѝ, и҆ на нб҃о прелага́етсѧ всѧ̀ дꙋше́внаѧ па́мѧть, и҆ человѣ́къ то́й ра́дꙋетсѧ и҆ взыграва́етсѧ, и҆ пѣ̑сни ꙗ҆́коже подоба́етъ, поставлѧ́етъ, и҆ весели́тсѧ ра́дованїемъ и҆ красова́нїемъ и҆ дꙋше́вною сла́достїю, коли́кою кто́ бы возмо́глъ рещѝ, свѣтѧ́сѧ и҆ просвѣща́ѧсѧ свѣ́тлостїю лица̀ гдⷭ҇нѧ. Тѣ́мже и҆́ндѣ мо́литъ бг҃а: Не ѿвратѝ, глаго́лѧ, лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ¹³⁶⁸. Тьмы́ бо вина̀ є҆́сть ѿвраще́нїе лица̀ гдⷭ҇нѧ: ѡ҆браще́нїе же всѧ́кагѡ ᲂу҆́мнагѡ свѣ́та, тѣ́мже влѣ́потꙋ, и҆ ра́дости дх҃о́вныѧ ꙗ҆́коже и҆ ѡ҆ себѣ̀ глаго́летъ: зна́менасѧ на мѧ̀ свѣ́тъ лица̀ твоегѡ̀: и҆ снаво́дитъ: да́лъ є҆сѝ весе́лїе въ се́рдцѣ мое́мъ¹³⁶⁹. Па́ки ѿ просвѣще́нїѧ лица̀ гдⷭ҇нѧ дх҃о́вный бж҃е́ственныѧ благода́ти бы́ти въ себѣ̀ свидѣ́тельствꙋетъ да́ръ. И҆ кі́и бы ᲂу҆́бѡ бы́ли пред̾ лице́мъ гдⷭ҇нимъ стоѧ́щїи, и҆ є҆мꙋ̀ молѧ́щїисѧ, глаго́летъ, ꙗ҆́кѡ сꙋ́ть мы́сленнѣ люде́й бж҃їихъ бога́тїи. Свѧ́ти бо ᲂу҆́бѡ вои́стиннꙋ, и҆ человѣ́цы бж҃їи мно́зи сꙋ́ть: ѻ҆ба́че не всѣ̑мъ воѻбщѐ бж҃їе зрѣ́ти мо́щно є҆́сть лицѐ, и҆ жи́ти житїѐ а҆́гг҃льско, на землѝ є҆щѐ живꙋ́щымъ, ника́коже. Є҆ди́нѣхъ бо є҆́сть сїѐ и҆́же съ премꙋ́дростїю бж҃е́ственною и҆ ра́зꙋмомъ слꙋжи́ма бы́ти бг҃а непщꙋ́ющихъ, и҆ покланѧ́ема и҆́стиною и҆ дх҃омъ: и҆̀же вои́стиннꙋ и҆ бога́тїи лю́дстїи глаго́лалисѧ бы влѣ́потꙋ бж҃їи, мно́гихъ зрѣ́нїй внꙋ́трь ѡ҆зари́вшесѧ та́инствы, и҆ мно́гїѧ премꙋ́дрости и҆ ра́зꙋма, и҆́же по па́ѵлꙋ ника́коже всѣ́хъ є҆́сть, бж҃е́ственна и҆ дꙋхо́вна глꙋбина̀ и҆мꙋ́щъ бога́тства. Тѣ́мже лицꙋ̀ твоемꙋ̀, чꙋ́дный глаго́летъ ко бг҃ꙋ, ꙗ҆́коже рече́сѧ, даві́дъ, помо́лѧтсѧ бога́тїи лю́дстїи¹³⁷⁰. Сегѡ̀ ра́ди сїѧ̑ па́че всѣ́хъ вѣ́дый, ꙗ҆́кѡ па́че всѣ́хъ бж҃е́ственныѧ премꙋ́дрости и҆спо́лненъ соломѡ́нъ ѕѣ́льный, благоприли́чнѣ ѕѣлѡ̀ ᲂу҆ча̀ глаго́летъ: не ско́ръ бꙋ́ди и҆зноси́ти сло́во пред̾ лице́мъ гдⷭ҇нимъ: ꙗ҆́кѡ бг҃ъ на небесѝ горѣ̀, ты́ же на землѝ до́лꙋ. Внегда̀ по бж҃е́ственнꙋ да́рꙋ прише́лъ бы є҆сѝ пред̾ лицѐ гдⷭ҇не, въ бж҃е́ственно и҆ є҆динови́дно мечта́нїе возше́дшꙋ ꙗ҆́вѣ ꙗ҆́кѡ видѣ́нїю ᲂу҆ма̀: (тогда̀) вре́мѧ є҆́сть молча́ти. Да не ᲂу҆́бѡ произноси́ти сло́во ни понѐ є҆ди́но ско́ръ бꙋ́ди, сꙋ́етнѣ глаго́лательнꙋ ѻ҆бы́чаю послѣ́дствꙋѧ: ꙗ҆́кѡ не вре́мѧ тогда̀ глаго́лати: бо́гъ бо быва́еши и҆ ты̀, на землѝ є҆щѐ сы́й, бг҃а сꙋ́щагѡ на небесѣ́хъ зрѧ̀ а҆гг҃лоподража́тельнѣ лицѐ. И҆́бо и҆ а҆́гг҃ли, ꙗ҆́коже сп҃си́тель речѐ, вы́нꙋ ви́дѧтъ лицѐ небе́снагѡ ва́шегѡ ѻ҆ц҃а̀¹³⁷¹. Тѣ́мже є҆гда̀ и҆ во и҆но́мъ мѣ́стѣ глаго́люща слы́шиши соломѡ́на, свѣ́тъ пра́вєднымъ вы́нꙋ, ѿ свѣтлолїѧ́нїѧ лица̀ гдⷭ҇нѧ се́й страда́ти и҆̀мъ влѣ́потꙋ да не вознепщꙋ́еши смотрѧ́ѧ, а҆гг҃лови́днѣ бж҃е́ственною бл҃года́тїю вы́нꙋ ви́дѧщымъ лицѐ гдⷭ҇не. Ѿ негѡ́же и҆сточа́тельный и҆злива́етсѧ свѣ́тъ: а҆́гг҃лъ бо и҆́нъ, да не глаго́лю бо́гъ, человѣ́къ то́й быва́етъ и҆ є҆́сть на землѝ. Тѣ́мже и҆ на смотри́тельный благода́ти гдⷭ҇нѧ да́ръ возвраща́ешисѧ, быва́ѧ є҆́же бг҃ъ горѣ̀, сїѐ ты̀ на землѝ до́лꙋ, бо́гъ си́рѣчь, є҆́же є҆́сть чꙋ́дно: не происходѧ̀ сло́вомъ, нижѐ помышле́нїемъ преходѧ̀ и҆ двиза́ѧ своѐ по́мысленное, а҆́ки ᲂу҆́мнѣ раздѣлѧ́ѧсѧ, но є҆динови́днѣ взира́ѧ, и҆ а҆́ки бо́гъ зрѧ̀ без̾ѻче́снѣ, и҆ недви́жнѣ по про́стꙋ и҆ є҆ди́нственнꙋ взира́нїю, є҆ще́ же и҆ наслажда́ѧсѧ ѿ лица̀ гдⷭ҇нѧ и҆зска́чꙋщею свѣтлѣ́йшею лꙋче́ю и҆ непристꙋ́пною. Сїѐ ᲂу҆́бѡ є҆́сть верхо́вное и҆ блаже́нное ᲂу҆мои́мцємъ ᲂу҆ма̀ къ бг҃ꙋ ᲂу҆строе́нїе, ꙗ҆́коже рещѝ цвѣ́тъ ᲂу҆́мныѧ чистоты̀, вожделѣ́нное є҆ди́нство вѣ́ры, соверша́емо въ прїѡбще́нїи дх҃а, бж҃е́ственныѧ и҆ бг҃отворѧ́щїѧ премꙋ́дрости благосла́вный пло́дъ, ѡ҆снова́нїе дꙋхо́внагѡ ми́ра, ѡ҆бита́лище безмечта́нныѧ ра́дости, любвѐ бж҃їѧ две́рь, ѻ҆́трасль просвѣще́нїѧ, вина̀ и҆сточа́нїѧ ѿ се́рдца неистощава́емыхъ во́дъ дх҃а, ѡ҆бра́зныѧ нѣ́когда ма́нны вои́стиннꙋ ни́ща же и҆ наслажде́нїе дꙋшѝ, и҆ раще́нїе и҆ и҆змѣне́нїе бж҃е́ственныхъ и҆ неизглаго́ланныхъ та̑инъ, и҆ ѿкрове́нїй нача́ло. Є҆ди́ныѧ и҆ пе́рвыѧ и҆́стины заключе́нїе, кі́ихлибо пѡ́мыслъ потребле́нїе, всѣ́хъ помышле́нїй преста́тїе, настоѧ́тельство превы́ше є҆́же помышлѧ́ти, вина̀ ᲂу҆́жаса. Къ про́стомꙋ и҆ безпредѣ́льномꙋ и҆ неѡб̾име́нномꙋ, безви́дномꙋ же и҆ без̾ѡбра́зномꙋ, нека́чественномꙋ, неѧко́вственномꙋ, неколи́чественномꙋ, неприкоснове́нномꙋ и҆ премі́рномꙋ, ᲂу҆ма̀ претворе́нїе па́че ᲂу҆ма̀ и҆ и҆змѣне́нїе, и҆ ѿню́дъ къ бг҃ови́дномꙋ воз̾ꙋстрое́нїе. Ника́коже ᲂу҆̀бо ѿ невѣ́жества, въ сїѐ прише́дъ ᲂу҆строе́нїе, и҆ ѡ҆́бразомъ нѣ́кимъ бг҃одѣ́йствꙋемь человѣколю́бїемъ благода́ти, ско́ръ бꙋ́ди и҆знестѝ сло́во понѐ є҆ди́но пред̾ лице́мъ гдⷭ҇нимъ: ꙗ҆́кѡ томꙋ̀ є҆ди́наѧ и҆ про́стаѧ сла́ва є҆́сть, и҆ во вѣ́ки бꙋ́детъ.

ѻ҃з. Оу҆́мъ зрѣ́ти хотѧ̀ ꙗ҆̀же превы́ше себѐ мы́слєннаѧ, а҆́ще и҆ не бж҃е́ственною благода́тїю содѣ́йствꙋюще къ семꙋ̀ и҆мѣ́лъ бы и҆ своѐ се́рдце, недѣ́йствєнна и҆ непросвѣщє́нна и҆ слїѧ̑нна зри́тъ, сегѡ̀ ра́ди и҆ своеѧ̀ сла́дости сво́йственнѣйшїѧ ѡ҆скꙋдѣва́етъ. А҆́ще невѣ́дѣнїѧ ра́ди и҆ мни́тсѧ ᲂу҆слажда́тисѧ, а҆́ки не ᲂу҆̀ вкꙋси́вый сеѧ̀. Ꙗ҆́коже ᲂу҆́бѡ мни́тсѧ нѣ́какѡ ᲂу҆слажда́тисѧ и҆ ꙗ҆чме́нный ꙗ҆ды́й хлѣ́бъ, а҆́ще и҆ премно́гѡ хлѣ́бныѧ сла́дости ѡ҆скꙋдѣва́ющъ: ѻ҆ба́че за невѣ́дѣнїе вкꙋ́са семїда́льнагѡ хлѣ́ба.

ѻ҃и. По ᲂу҆́мномъ се́рдца бл҃года́тїю соедине́нїи, незаблꙋ́днѣ во свѣ́тѣ дꙋхо́внѣ ᲂу҆́мъ зри́тъ, и҆ простира́етсѧ къ своемꙋ̀ жела́нїю, є҆́же є҆́сть бг҃ъ: внѣ̀ ѿню́дъ бы́въ чꙋ́вства, безша́ренъ ꙗ҆́вѣ, ꙗ҆́кѡ и҆ нека́чественъ, и҆ безмечта́ненъ па́ки бы́въ мечта́нїй чꙋ́вственныхъ.

ѻ҃ѳ. Оу҆́мъ ѿ благода́ти ко є҆́же зрѣ́ти наставлѧ́емь, вои́стиннꙋ ма́ннꙋ вы́нꙋ ꙗ҆́стъ дꙋхо́внꙋ. Чꙋ́вственнаѧ во ма́нна ю҆́же і҆зра́иль ꙗ҆дѧ́ше, и҆мѣ́ѧше ᲂу҆́бѡ сла́стнꙋ достосла́внꙋ си́лꙋ тѣ́ло пита́ющꙋ: что́ же сꙋщество́мъ ѻ҆на̀ бѣ̀, невѣ́домо бѣ̀: тѣ́мже и҆ ма́нна нарица́шесѧ, ꙗ҆влѧ́ющꙋ рече́нїю незна́емое. Что́ бо є҆́сть сїѐ; рече́нїе ꙗ҆влѧ́етъ: и҆ ю҆́же зрѧ́хꙋ ꙗ҆дꙋ́ще сꙋщества̀ сеѧ̀ не ᲂу҆вѣ́дѣвше, недоꙋмѣ́тельнѣ, что́ є҆сть сїѐ, глаго́лахꙋ; Вы́нꙋ ᲂу҆̀бо и҆ зри́тельный ᲂу҆дивлѧ́етсѧ во ᲂу҆мѣ̀, и҆ къ себѣ̀, что̀ є҆́сть сїѐ; глаго́летъ, є҆́же весели́тъ ᲂу҆́бѡ зри́мо, и҆ ᲂу҆тꙋчнѧ́етъ ᲂу҆́мъ дꙋхо́внѣ ꙗ҆до́мо: превосхо́дитъ же ѿ є҆́же разꙋмѣ́тисѧ ѡ҆ себѣ̀, ꙗ҆́кѡ бж҃е́ственно сꙋ́ще и҆ преесте́ственно: и҆ пита́юще чꙋ́днѡ, и҆ напоѧ́юще ᲂу҆́мъ постиже́нїѧ ᲂу҆ма̀ ѻ҆́тай и҆збѣга́етъ, не то́кмѡ ꙗ҆́кѡ непостижи́мо непостижи́мо сꙋщество́мъ, но и҆ ꙗ҆́кѡ безконе́чно и҆ безпредѣ́льно.

п҃. Трѝ сꙋ́ть свидѣ̑тельствꙋющаѧ и҆́стинѣ, ре́клъ бы́хъ и҆ а҆́зъ влѣ́потꙋ: тва́рь, писа́нїе, въ дꙋ́сѣ: ѿ писа́нїѧ бо и҆ тва́ри дꙋхо́внѣ зри́мыхъ, зри́тсѧ є҆ди́наѧ про́стаѧ и҆́стина, и҆ ѿ сеѧ̀ сло́жнаѧ. И҆ рече́нными тремѝ прише́дъ въ слѣ̑дꙋющаѧ два̀, и҆ стоѧ̀ въ ни́хъ ᲂу҆́мъ незаблꙋ́денъ, ѡ҆брѣ́те хрⷭ҇то́вою благода́тїю пꙋ́ть. Полꙋчи́ бо ѿ про́стыѧ ᲂу҆́бѡ и҆́стины высотꙋ̀ мы́сленнꙋ, и҆ глꙋбинꙋ̀, є҆ще́ же и҆ широтꙋ̀ безконе́чнꙋ: и҆́хже ра́ди и҆ во ᲂу҆́жасѣ бы́въ, пристра́шенъ сы́й пое́тъ. Ѿ сло́жныѧ же къ речє́ннымъ, и҆ серде́ченъ ѡ҆брѣ́те ми́ръ и҆ любо́вь и҆ ра́дость. Тѣ́мже ᲂу҆жа́сенъ сы́й пое́тъ люби́тельнѣ. Тре́бꙋетъ же человѣ́къ вре́менна мно́га разстоѧ́нїѧ, и҆ трꙋда̀ и҆ терпѣ́нїѧ, ꙗ҆́кѡ да чꙋ̑вства ѡ҆́бразомъ нѣ́кимъ ѿлага́ѧ, и҆ ᲂу҆мо́мъ расто́ргъ чꙋ́вствєннаѧ, ста́нетъ въ мы́сленныхъ: по ни́хже видѣ́нїе и҆́стины возсїѧва́етъ въ дꙋшѝ. Не ᲂу҆́бѡ и҆́стинꙋ глаго́лю тре́бовати въ своѐ и҆з̾ѡбрѣ́тенїе таковы́хъ, си́рѣчь вре́меннагѡ ко є҆́же пости́гнꙋтисѧ разстоѧ́нїѧ, и҆лѝ трꙋда̀ и҆ терпѣ́нїѧ, но человѣ́ка тре́бовати си́хъ реко́хъ. Поне́же и҆́стина ᲂу҆́бѡ є҆ди́но є҆́сть и҆ про́сто, а҆́ще и҆ сꙋгꙋ́бѡ ви́дима показꙋ́етсѧ, и҆ ма́лѡ не ѿвсю́дꙋ вопїе́тъ себѐ ви́дѣти хотѧ́щымъ свидѣ́тельствꙋющи: человѣ́къ же сло́женъ сы́й, и҆ съ чꙋ́вствы сплете́нъ, є҆ще́ же (и҆) и҆змѣне́нїємъ подлежа́щъ и҆ прело́гꙋ, и҆схо́дитъ ѻ҆вогда̀ и҆з̾ себѐ: и҆ ѡ҆́бразомъ нѣ́кимъ и҆ са́мъ проти́вꙋ себѐ ꙗ҆́коже не вѣ́сть быва́етъ, ѿ мнѣ́нїѧ лꙋка́внꙋѧ и҆ невѣ́рїемъ недꙋ́гꙋѧ: и҆ тремѝ ᲂу҆́бѡ си́ми, мнѣ́нїемъ, глаго́лю, лꙋка́вствомъ же и҆ невѣ́рїемъ, свидѣ́тельствꙋемыѧ ѿ трїе́хъ ѻ҆́нѣхъ и҆́стины, ѿ писа́нїѧ и҆ тва́ри и҆ дꙋ́ха си́рѣчь, ѻ҆каѧ́ннѣ ѿпа́даетъ. Тѣ́мже и҆ тре́бꙋетъ ко ѿверже́нїю лю́тагѡ мнѣ́нїѧ, и҆ и҆ны́хъ и҆́хже тре́бовати рѣ́хъ, (и҆) ꙗ҆́кѡ да смири́всѧ ᲂу҆́мъ вѣ́ровати и҆́мать простото́ю: и҆ пото́мъ си́це кꙋ́пнѡ а҆́бїе писа́нїемъ и҆ тва́рїю въ дꙋ́сѣ, да ᲂу҆вѣ́сть ꙗ҆́снѣ не то́кмѡ простѣ́йшꙋю и҆́стинꙋ, но и҆ сло́жнꙋю ѿ неѧ̀: є҆ще́ же что̀ и҆ возбранѧ́ющее є҆го̀ бѣ̀ и҆ и҆́стиннагѡ видѣ́нїѧ, приложи́лъ же бы́хъ, ꙗ҆́кѡ и҆ наслажде́нїѧ разставлѧ́ющее. Є҆ди́но ᲂу҆̀бо є҆́сть и҆ є҆ди́нственно є҆стество́мъ про́сто пе́рваѧ и҆́стина: по не́йже и҆ ꙗ҆́же ѿ сеѧ̀ на́съ ра́ди сло́жныхъ сло́жнаѧ. И҆ сїѐ є҆́сть ᲂу҆ма̀ на́шегѡ послѣ́днее и҆ и҆зрѧ́днѣйшее прѧ́мѡ лежа́щее: къ немꙋ́ же тщи́тсѧ всѧ́ко жи́тельство и҆ по́стничество води́мыхъ по ра́зꙋмꙋ дꙋ́ха, ꙗ҆́кѡ да ᲂу҆́мъ на́гъ, є҆ли́кѡ мо́щно, ᲂу҆ви́дитъ и҆ наслади́тсѧ свѣ́тлости ꙗ҆́же ѿ пе́рвыѧ и҆ є҆ди́ныѧ (и҆́стины,) и҆ сло́жныѧ и҆з̾ неѧ̀ ѡ҆́бразомъ чꙋ́днымъ: є҆́же не бы̀ когда̀ и҆́накѡ могло̀ бы́ти, то́кмѡ смире́нїемъ и҆ простото́ю съ вѣ́рою свидѣ́тельствомъ писа́нїѧ и҆ тва́ри въ дꙋ́сѣ. Внегда́ же и҆́стинꙋ ᲂу҆́мъ въ трїе́хъ свои́хъ си́лахъ, ꙗ҆́коже рѣ́хъ, ꙗ҆́кѡ въ зерца́лѣ ᲂу҆́зритъ свидѣ́тельствомъ вышерече́нныхъ трїе́хъ, тогда̀ па́ки а҆́ки ѿ сегѡ̀ возвраща́ѧсѧ са́мъ въ себѣ̀ быва́етъ мно́зѣмъ смире́ннѣйшъ и҆ простѣ́йшъ и҆ ᲂу҆твержде́ннѣ вѣ́ренъ: и҆ ѿ сегѡ̀ ра́достною ного́ю є҆́же ᲂу҆́бѡ глаго́летсѧ къ видѣ́нїю и҆́стины восхо́дитъ, лꙋча́ми ѻ҆́ныѧ внꙋ́трь ѡ҆зарѧ́емь свѣтлѣ́е: и҆́мже ѡ҆браща́ѧсѧ въ себѐ за вели́чество сла́вы ᲂу҆ви́дѣнное ѿ негѡ̀, схо́дитъ на смире́ннѣйшее, и҆ простѣ́йшее, и҆ ᲂу҆жаса́етсѧ вѣ́рою ѡ҆бдержи́мь бы́въ, и҆ та́кѡ а҆́ки нѣ́кїй бж҃е́ственный крꙋ́гъ воз̾ѡкрꙋжа́ѧ и҆ ѡ҆бходѧ̀ смире́нїемъ, простото́ю же и҆ вѣ́рою восходѧ̀ и҆ зрѧ̀ и҆́стинꙋ, и҆ свѣ́тлостїю и҆́стины къ смире́нїю води́мь мно́гшꙋ, и҆ простѣ́йшъ въ вѣ́рѣ наипа́че быва́ѧ, непрестае́тъ соверша́ѧ тече́нїе сїѐ, до́ндеже бы глаго́лалосѧ сїѐ: дне́сь со смире́нїемъ и҆ простото́ю и҆ вѣ́рою, свидѣ́тельствомъ писа́нїѧ и҆ тва́ри, въ дꙋ́сѣ зрѧ̀ и҆́стинꙋ, и҆ па́ки возвраща́ѧсѧ на та̑, ѿѻнꙋ́дꙋже подви́жесѧ: и҆ та́кѡ ѡ҆божа́емь всегда̀ благода́тїю, и҆ тѣ́ми ꙗ҆̀же па́че ᲂу҆ма̀ ѡ҆сїѧва́емь, и҆ живо́тъ живы́й и҆спо́лнь всѧ́кїѧ ра́дости ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, ꙗ҆́кѡ въ ѡ҆брꙋче́нїи вкꙋша́етъ наслаждє́нїѧ бꙋ́дꙋщихъ вѣ́чныхъ бла̑гъ.

п҃а. Зри́тельное житїѐ тремѝ си́ми составлѧ́тисѧ преесте́ственнѣ ѡ҆бы́че, чи́сто же и҆ незазо́рно, глаго́лю же вѣ́рою, прича́стїемъ ꙗ҆́вственнымъ животворѧ́щагѡ дх҃а, и҆ вѣ́дѣнїемъ премꙋ́дрости. Видѣ́нїе бо є҆́сть, ꙗ҆́коже въ предѣ́лѣ рещѝ, ра́зꙋмъ мы́сленныхъ въ чꙋ́вственныхъ ѻ҆вогда́ же и҆ то́нкихъ мы́сленныхъ разлꙋче́нныхъ чꙋ́вства, въ прише́дшихъ въ предспѣ̑ѧнїѧ. Ѿ сеѧ̀ ᲂу҆́бѡ вины̀ тре́бѣ є҆́сть вѣ́ры: а҆́ще бо не ᲂу҆вѣ́рите, глаго́летъ, нижѐ и҆́мате ᲂу҆разꙋмѣ́ти. Та́кожде потре́ба є҆́сть и҆ дꙋ́ха, поне́же дꙋ́хъ всѧ̑ и҆спытꙋ́етъ, и҆ глꙋбины̑ бж҃їѧ¹³⁷². Тѣ́мже бж҃е́ственный речѐ і҆́ѡвъ: дыха́нїе вседержи́телево є҆́сть наꙋча́ющее мѧ̀¹³⁷³. Та́же є҆сте́ственнѣ сегѡ̀ въ се́рдцѣ ꙗ҆́вѣ воскипѣва́ющее, и҆лѝ, да та́кѡ рекꙋ̀, живꙋ́щее и҆ по послѣ́дованїю ѡ҆живлѧ́ющее, премі́рнѣ бж҃е́ственное дѣ́йство къ себѣ̀ сплета́етъ, неизрече́ннѣ собира́ющо ᲂу҆́мъ, и҆ ѿ всѧ́кагѡ паре́нїѧ возбранѧ́етъ є҆го̀, и҆ подае́тъ съ тишино́ю и҆ мно́гою дꙋше́вною сла́достїю и҆ ᲂу҆тѣше́нїемъ, є҆ще́ же и҆ бж҃е́ственною любо́вїю ᲂу҆до́бнѣйше бж҃е́ствєннаѧ зрѣ́ти, и҆ ѻ҆́крестъ и҆́хъ ѡ҆браща́тисѧ, и҆ бг҃а мечта́ти новоѡбра́знѣ, и҆ по ра́вности ѡ҆ се́мъ весели́тисѧ, съ бо́льшими нестерпи́мыми раче́нїи, и҆ прили́чнымъ ра́дованїемъ. Тре́бꙋетъ же и҆ премꙋ́дрости, ꙗ҆́коже рѣ́хъ: ꙗ҆́кѡ премꙋ́дрость, глаго́летъ писа́нїе, просвѣти́тъ лицѐ человѣ́ка: просвѣти́тъ, ко є҆́же ѿ чꙋ́вства прейтѝ въ разꙋмѣ́нїе ᲂу҆до́бь, и҆ ѿ чꙋ́вственныхъ въ мы́слєннаѧ и҆ бж҃е́ствєннаѧ зри́тєльства взы́ти, и҆ во ѿкрове́нїи ᲂу҆́мнѣмъ неизречє́нна ᲂу҆ви́дѣти: просвѣти́тъ, ко є҆́же ᲂу҆зрѣ́ти зри́тельнѣ, и҆ є҆динови́днѣ возмечта́ти бг҃а пресꙋ́щественна. Вои́стиннꙋ блаже́нъ человѣ́къ, є҆го́же а҆́ще нака́жеши гдⷭ҇и, и҆ ѿ зако́на твоегѡ̀ наꙋчи́ши є҆го̀¹³⁷⁴: ꙗ҆́кѡ се́й є҆́сть вои́стиннꙋ премꙋ́дрый, наказа́нїемъ въ вѣ́рꙋ прише́дый, и҆ ᲂу҆че́нїемъ дꙋ́ха наꙋча́емый неизречє́ннымъ бж҃їимъ. Ве́лїѧ ве́щь є҆́сть, вои́стиннꙋ премꙋ́дрый, вѣ́рою ходѧ́й въ соедине́нїи и҆ прїѡбще́нїи преесте́ственнѣмъ дꙋ́ха! И҆ вои́стиннꙋ трѝ сꙋ́ть, по ре́кшемꙋ ѻ҆́номꙋ, неꙋдержи́ма, бг҃ъ, и҆ а҆́гг҃лъ, и҆ человѣ́къ любомꙋ́дръ: а҆́гг҃лъ и҆́нъ на землѝ странноѡбра́зенъ назира́тель вои́стиннꙋ ви́димыѧ тва́ри, и҆ и҆́скрененъ таи́нникъ бж҃е́ственныхъ бж҃їихъ незда́нныхъ происхожде́нїй, и҆лѝ ᲂу҆́бѡ дарѡ́въ хотѣ́лъ бы кто̀ глаго́лати. Є҆́млѧсѧ нѣ́какѡ и҆ сама́гѡ неви́димагѡ всѧ́цѣмъ ѡ҆́бразомъ, по внеза́пнꙋ взира́нїю а҆гг҃лоподража́тельнѣ позна́нїѧ бг҃а. Тако́въ є҆́сть, ꙗ҆́коже и҆ въ сѣнописа́нїи рещѝ, вѣ́рою и҆ ст҃ы́мъ и҆ животворѧ́щимъ дх҃омъ премꙋ́дрый, и҆ си́це блаже́нъ. А҆́ще и҆ дово́льнѡ бѧ́ше несомнѣ́нно, ꙗ҆̀же лꙋка̀ въ є҆ѵⷢ҇лїи повѣ́даетъ ре́кшꙋ мнѣ̀ ѡ҆ і҆и҃сѣ гдⷭ҇ѣ, и҆зба́вишисѧ трꙋдѡ́въ, ꙗ҆́кѡ и҆сповѣ́сти премꙋ́дрости и҆ благода́ти си́лꙋ и҆ похвалы̑: та́кѡ бо се́й на мѣ́стѣ полага́етъ, пиша̀ ꙗ҆́кѡ і҆и҃съ преспѣва́ше премꙋ́дростїю, и҆ во́зрастомъ, и҆ благода́тїю. И҆ па́ки, ꙗ҆́кѡ растѧ́ше и҆ крѣплѧ́шесѧ дх҃омъ, и҆сполнѧ́ѧсѧ премꙋ́дрости¹³⁷⁵: ны́нѣ же ꙗ҆́вственнѣе ѡ҆ предлежа́щихъ рещѝ, ᲂу҆стремлѧ́ющꙋсѧ предлага́ю, и҆ є҆́же глаго́летъ свѧще́нный соломѡ́нъ къ бг҃ꙋ: ꙗ҆̀же на небесѣ́хъ кто̀ и҆зслѣ́ди; во́лю же твою̀ кто̀ позна̀, а҆́ще бы не ты̀ да́лъ є҆сѝ премꙋ́дрость, и҆ посла́лъ є҆сѝ дх҃а ст҃а́го твоего̀ ѿ высоты̀; И҆ та́кѡ и҆спра́вишасѧ стєзѝ сꙋ́щихъ на землѝ, и҆ ꙗ҆̀же тебѣ̀ ᲂу҆гѡ́дна, наꙋчи́шасѧ человѣ́цы, и҆ премꙋ́дростїю твое́ю спасо́шасѧ¹³⁷⁶. Зри́ши ли; Премꙋ́дрость съ прича́стїемъ дх҃а на є҆ли́кꙋ достиза́етъ си́лꙋ, и҆ ка́кѡ дале́че ѿ спасе́нїѧ тече́тъ, премꙋ́дрости и҆ дх҃а ѿ бг҃а не и҆мы́й, и҆ нижѐ ѿ премꙋ́дра и҆ прича́стника дх҃а наставлѧ́емый; А҆́ще ѡ҆ сп҃си́тели, въ не́мже поживѐ всѧ́ко и҆сполне́нїе бж҃ества̀, такова̑ пи̑сана бы́ша, послѣ́дованнѡ соѡб̾ѧ́тнѣ и҆ всегѡ̀ вкꙋ́пѣ человѣ́ческагѡ ро́да разꙋмѣ́ти не ѿстои́тъ: ко́ль премꙋ́дрость съ посо́бїемъ дх҃а є҆́сть нꙋжна̀, и҆ є҆ли́кꙋ ми́лостїю си́лꙋ и҆ предспѣ́ѧнїе полꙋчѝ ѿ дꙋшелю́бца бг҃а дꙋхо́вный мꙋдре́цъ, ꙗ҆̀же на небесѣ́хъ и҆зслѣ́дꙋѧ, и҆ приходѧ̀ къ ра́зꙋмꙋ совѣ́та вы́шнѧгѡ, ве́щь ᲂу҆жа́снаѧ! И҆ сїѧ̑ ᲂу҆́бѡ та́кѡ: но поне́же толи́ка же ны́нѣ проидо́хомъ ѡ҆ зри́тельнѣмъ, подоба́ло бы рещѝ и҆ не лѣни́тисѧ понѐ нѣ́коликѡ и҆ ѡ҆ видѣ́нїи сказа́ти, и҆ ѿ ча́сти подви́гнꙋти, и҆ по́мысленное и҆́же съ любо́вїю слы́шателѧ нѣ́какѡ напита́ти. Сїе́ бо ѿню́дъ повелѣва́етъ бг҃ъ словє́снымъ преподава́ти: ꙗ҆́вѣ ꙗ҆́кѡ незави́стно ни́жшымъ, и҆ ѿ вы́шнихъ съ благоговѣ́нїемъ причаща́тисѧ дости́гнꙋтисѧ мо́щнымъ бж҃е́ственнагѡ просвѣще́нїѧ и҆ веще́й мы́сленныхъ. Ѻ҆ба́че къ тождечи̑ннымъ, прїѡбщи́тельнѣ и҆ нелюбопоказа́тельнѣ срѣ́тєнїѧ твори́ти, и҆ бесѣ̑ды ꙗ҆̀же ѡ҆ мы́сленныхъ и҆ ѡ҆ бз҃ѣ. Та́кѡ бо не то́кмѡ пра́вое же и҆ непогрѣ́шное въ це́ркви бг҃а жи́ва просїѧ́ло бы ѕѣлѡ̀ свѣ́тлѣ, но и҆ преподо́бное любвѐ и҆ предобро́тнѣйшее лицѐ, познава́тельство ᲂу҆ченикѡ́въ хрⷭ҇то́выхъ, просвѣти́лосѧ бы вы́нꙋ въ сердца́хъ на́шихъ, ст҃ы́мъ дх҃омъ въ ны̀ и҆злїю́щимсѧ въ соверше́ннꙋ и҆ про́стꙋ любо́вь бг҃а и҆ человѣ̑къ. И҆ та́кѡ пожи́ли бы́хомъ на землѝ житїѐ а҆гг҃лови́дно и҆ вои́стиннꙋ блаже́нно, и҆ ничи́мже мнѣ́е и҆ предсладча́йше, ꙗ҆́кѡ ѿ бж҃е́ственныѧ, на не́йже ви́сѧтъ ве́сь зако́нъ и҆ проро́цы, и҆ бг҃отво́рныѧ двора́сленныѧ любвѐ зави́сѧще: є҆ѧ́же ничто́же каково́либо дꙋшѣ̀ сла́ждше, и҆ па́че же є҆гда̀ ѿ бж҃їѧ и҆ бж҃е́ственныхъ видѣ́нїѧ и҆ ра́зꙋма, то́жде же рещѝ просвѣти́тельныѧ благода́ти бли́зъ и҆́мать происхожде́нїе. Тѣ́мже и҆́же по намѣ́ренїю взы́ти бла́го и҆ до́брѣ дѣ́ло полага́ѧй къ бг҃ꙋ, ꙗ҆́коже соедини́тисѧ съ ни́мъ и҆ вои́стиннꙋ ѡ҆божи́тисѧ, ра́внѣ же рещѝ, спасти́сѧ: поне́же без̾ є҆́же ᲂу҆мꙋ̀ ѡ҆божи́тисѧ, спасти́сѧ человѣ́кꙋ не возмо́жно є҆́сть по бг҃оглаго́ливыхъ и҆з̾ѧвле́нїю, съ дости́жнымъ за́повѣдей гдⷭ҇нихъ дѣѧ́нїемъ, къ сꙋ́щихъ и҆ ви́димыхъ прихо́дитъ видѣ́нїю возмо́жномꙋ, ни дѣѧ́нїе и҆мѣ́ѧ слѣ́по а҆́ки видѣ́нїѧ ᲂу҆едине́нно, нижѐ ᲂу҆́бѡ видѣ́нїе бездꙋ́шно и҆мѣ́ѧ а҆́ки вои́стиннꙋ без̾ дѣѧ́нїѧ. Ѿсю́дꙋ си́це съ сꙋ́щею по сло́вꙋ и҆ ᲂу҆мꙋ̀ премꙋ́дростїю, и҆ писа́тельнымъ свѧще́ннымъ вѣ́дѣнїемъ, благи́мъ движе́нїемъ, є҆́же глаго́летсѧ, взира́ти праволꙋ́чнѣ начина́етъ въ ми́ръ со сло́вомъ чꙋ́вственныхъ, ꙗ҆вле́нїемъ безконечноси́льна и҆ безконечнопремꙋ́дра содѣ́телѧ, и҆ послѣ́дованнѡ къ безконє́чнымъ си́лою же и҆ всѣ́мъ разли́чїемъ є҆ли́кѡ по взира́нїю достиза́етъ, и҆ наслажда́етсѧ и҆ пита́етсѧ подо́бнѣ ᲂу҆мо́мъ въ та́йнѣ та́йными. И҆ вре́мени же пред̾идꙋ́щꙋ, и҆ безмѧте́жнымъ житїе́мъ пожи́въ безмо́лвнѣ, и҆ въ бж҃е́ственныхъ є҆ди́нѣхъ любомꙋ́дрствꙋѧ писа́нїемъ и҆ ви́димыми, подвиза́етсѧ, ꙗ҆́коже є҆́сть мо́щно согла́снꙋ ᲂу҆зрѣ́ти дх҃о́внѣ писа́нїю тва́рь: и҆ и҆́стиннѣ зна́менїѧ є҆ди́нственнѣйшимъ видѣ́нїемъ. Є҆мꙋ́же бы́вшꙋ, ᲂу҆́мъ ѿсю́дꙋ съ любо́вїю покло́ннагѡ дх҃а, и҆ дѣ́йствїемъ є҆ѧ̀, возво́дитсѧ въ видѣ́нїе же и҆ позна́нїе свѧще́нныѧ и҆́стины, ꙗ҆́коже вели́кїй глаго́летъ дїонѵ́сїй, на сте́пень свѧще́нный видѣ́нїѧ, ро́днѣ рещѝ вторы́й, то́ є҆сть въ бж҃е́ствєннаѧ зрѣ̑нїѧ и҆ помышлє́нїѧ, без̾ покро́вѡвъ и҆ ѡ҆́бразѡвъ. Ѿсю́дꙋ про́чее а҆́ки на́гъ ᲂу҆́мъ къ мы́слєннымъ взира́ѧ наги̑мъ, и҆ бж҃е́ствєннаѧ ꙗ҆влє́нїѧ въ себѣ̀ мнѡ́жайша любѧ̀, свое́ю чистото́ю и҆ къ бг҃ꙋ горѣ̀ протѧже́нїемъ, но́ситъ въ себѣ̀ ꙗ҆́кѡ въ свѣтлѣ́йшемъ зерца́лѣ нѣ́коемъ со́лнєчныѧ пресїѧ́ющыѧ лꙋчѝ, и҆ ѿ благода́ти по пꙋтѝ па́ки напита́нъ бы́въ, ꙗ҆̀же по си́лѣ дости́жными прили́чными, прихо́дитъ а҆́ки къ тре́тїемꙋ сте́пени ко мнѡ́гимъ ѻ҆́нымъ видѣ́нїѧмъ блажє́ннымъ: (и҆) бж҃е́ствєннаѧ происхождє́нїѧ є҆динови́днѣе и҆ собра́ннѣ ѿ мно́гихъ и҆на́чевствъ въ неизрече́нное непрелѡ́жныѧ и҆ та̑йныѧ є҆ди́ницы возводѧ̀ благовзира́тельнѣ неизрече́нно раче́нїе, со всѣ́мъ вкꙋ́пѣ ᲂу҆́мнымъ чꙋ́вствомъ, а҆́ки преѡбразꙋ́емь зри́тельный ѿ просвѣща́ющагѡ дх҃а и҆́стиною и҆ воспомина́нїемъ, во ѻ҆́гнь и҆ серде́чно бж҃їе бг҃одѣ́йно раче́нїе: и҆ со́лнце є҆́сть, по вели́комꙋ па́ки дїонѵ́сїю, є҆динови́днагѡ соверше́нїѧ бж҃е́ственное прича́стїе са́могѡ є҆ди́нагѡ, є҆ли́кѡ мо́щно дости́гнꙋти. На таковы̀ ᲂу҆́бѡ сте́пєни трїѷпоста́снагѡ та́йнагѡ є҆динови́днагѡ прича́стїѧ, треблаже́ннѣ бг҃оно́сный и҆ бг҃омꙋ́дренный ᲂу҆́мъ возлета́ѧ, и҆ нестерпи́мыхъ ѻ҆стє́нъ бж҃е́ственна ᲂу҆пое́нїѧ и҆ неи́стовныхъ є҆гѡ̀ раче́нїй ꙗ҆́вѣ и҆ пресвѣ́тлѣ наслажда́ѧсѧ, и҆ ᲂу҆ѧ́звлена любо́вїю, и҆ а҆́ки возгара́ема себѐ разꙋмѣва́ѧ преѧвле́ннѣ ѿ и҆́стиннагѡ завѣща́нїѧ, бг҃одꙋхнове́ннѣ дѣ́йствꙋемь є҆́сть и҆ вои́стиннꙋ и҆зстꙋпа́етъ, вше́дъ во и҆з̾ѧви́тєльныѧ бг҃осло́вїѧ свѣ́тлымъ лице́мъ та̑йны. Оу҆чрежда́ѧсѧ безѻче́сными взира́нми, безконе́чнымъ и҆ безнача́льнымъ, неѡб̾ѧ́тнымъ же и҆ все́мственнѣ несказа́ннымъ, и҆ ѿню́дъ недомы́сленнымъ, и҆ мечта́ѧ бж҃їю а҆́ки нѣ́кꙋю пꙋчи́нꙋ сꙋщества̀ безконе́чнꙋ и҆ непрохо́днꙋ, всѧ́кꙋ превосходѧ́щꙋ мы́сль и҆ вре́мене и҆ є҆стества̀, по бг҃осло́вꙋ ре́кшемꙋ¹³⁷⁷. И҆ сїѐ є҆́сть, ꙗ҆́коже є҆щѐ свѧще́нный глаго́летъ дїонѵ́сїй, пирова́нїе взира́нїѧ пита́ющо мы́сленнѣ и҆ ѡ҆божа́ющо всѧ́каго къ немꙋ̀ горѣ̀ простира́ющагосѧ, начина́ющаго ѻ҆ба́че ѿ видѣ́нїѧ сꙋ́щихъ и҆ ра́зꙋма: ꙗ҆́коже ѻ҆на́мѡ се́й сщ҃е́нныхъ та̑инъ ꙗ҆ви́тель глаго́летъ, и҆дѣ́же сщ҃е́ннаѧ на́шегѡ сщ҃еннонача́льства и҆з̾ѧснѧ́етъ зна́мєнїѧ. Ꙗ҆́коже ᲂу҆́бѡ и҆ вели́кїй васі́лїй повѣ́даетъ глаго́лѧ: внегда̀ кто̀ зри́теленъ ю҆́же въ ви́димыхъ добро́тꙋ превозше́дъ самомꙋ̀ предста́нетъ бг҃ови, є҆гѡ́же видѣ́нїе въ є҆ди́ныхъ чи́стыхъ сердца́хъ ꙗ҆влѧ́тисѧ ѡ҆бы́че, тогда̀ къ вы́шшымъ бг҃осло́вїѧ пред̾ꙋспѣ́въ, и҆ зри́теленъ бы́ти мо́жетъ. И҆ па́ки, на глаго́лъ ѻ҆́нъ: заꙋ́тра предста́нꙋ тѝ, и҆ ᲂу҆зрю̀, глаго́лющагѡ дх҃омъ даві́да, вели́кїй се́й глаго́летъ: внегда̀ предста́нꙋ тѝ, и҆ къ са́момꙋ ѡ҆ тебѣ̀ видѣ́нїю ᲂу҆мо́мъ прибли́жꙋсѧ, тогда̀ зри́тельное дѣ́йство просвѣще́нїемъ ра́зꙋма воспрїимꙋ̀. Мо́щно же є҆́сть ᲂу҆слы́шати подо́бнѣ глаго́люща такова̑ѧ маѯі́ма сщ҃е́ннаго, и҆ показꙋ́юща ꙗ҆́вѣ, ко́ль вели́ка є҆́сть ве́щь предспѣ́ѧнїе видѣ́нїѧ и҆ ра́зꙋмъ бж҃їй, писа́нїемъ и҆ и҆ тва́рїю, и҆ ꙗ҆́кѡ просвѣще́нїе ра́зꙋма ѿсю́дꙋ быва́ти ѡ҆бы́че, и҆́мже по взира́нїю блаже́нное (быва́етъ) ѡ҆боже́нїе: ве́щь а҆́ще и҆ нѣ́когда, (то̀ па́че) и҆ ны́нѣ рѣдка̀ и҆ неꙋдо́бь ѡ҆брѣта́ема въ безмо́лвницѣхъ, скꙋ́дости ра́ди тогѡ̀, и҆́же ѿ содержа́нїѧ благода́ти и҆скꙋ́сомъ возмо́глъ бы наꙋчи́ти, ꙗ҆́коже кра́йнїй безмо́лвїѧ ᲂу҆чи́тель глаго́летъ сѵ́рїнъ ст҃ы́й і҆саа́къ въ сло́вѣ, въ не́мже ѡ҆ дх҃о́внѣмъ чꙋ́вствѣ начина́етъ а҆́бїе глаго́лати и҆ си́лѣ зри́тельнѣй. Глаго́летъ ᲂу҆́бѡ маѯі́мъ сщ҃е́нный: <((>бг҃одѣ́йственны свѣ́ты глаго́лемъ, ᲂу҆чє́нїѧ ст҃ы́хъ, ꙗ҆́кѡ свѣ́тъ ра́зꙋма сотворѧ̑ющаѧ и҆ ѡ҆божа̑ющаѧ повинꙋ́ющихсѧ:<))> согласꙋ́ѧ ꙗ҆́вѣ всесвѧще́нномꙋ дїонѵ́сїю глаго́лющемꙋ: <((>є҆ли́ки и҆́ны бг҃одѣ́йственны свѣ́ты словесє́мъ послѣ́дованнѡ та́йное бж҃е́ственныхъ на́шихъ наста̑вникъ преда́нїе и҆з̾ѧви́тельнѣ на́мъ дарова̀, си́мъ и҆ мы̀ тайнонаꙋчи́хомсѧ<))>. И҆ и҆́ндѣ глаго́летъ: <((>бж҃е́ственный ра́зꙋмъ, къ немꙋ̀ ꙗ҆́коже мо́щно є҆́сть горѣ̀ зрѧ́щыѧ, по мѣ́рѣ и҆́хъ горѣ̀ простира́етъ и҆ є҆динотвори́тъ по простира́тельномꙋ своемꙋ̀ соедине́нїю<))>. И҆ па́ки: <((>всѧ́ко ѿ ѻ҆ц҃а̀ дви́жима свѣтоѧвле́нїѧ происхожде́нїе въ ны̀ благодаѧ́тельнѣ приходѧ́ще, па́ки ꙗ҆́кѡ є҆динотво́рна си́ла возводи́тельнѣ на́съ возво́дитъ и҆ ѡ҆браща́етъ къ собира́телѧ ѻ҆ц҃а̀ є҆ди́нствꙋ, и҆ бг҃отво́рной простотѣ̀: и҆з̾ тогѡ́ бо и҆ въ не́мъ всѧ́чєскаѧ<))>¹³⁷⁸. Разꙋмѣ́еши ли, ка́кѡ возводи́тельнѣ по ѡ҆браще́нїю, си́рѣчь бж҃е́ственнꙋ взира́нїю къ бг҃ꙋ премꙋ́дрѣ прострѣ́выйсѧ: и҆лѝ ѿ сꙋ́щихъ, бг҃а горѣ̀ простира́ѧсѧ ви́дитъ, и҆лѝ ѿ писа́нїѧ, и҆лѝ зна́менательна, и҆лѝ каковы́млибо ѡ҆́бразомъ бж҃е́ственна, соединѧ́етсѧ съ бг҃омъ и҆ бг҃отвори́мь є҆́сть, не то́кмѡ же, но и҆ бо́гъ рече́сѧ по и҆́мени таковы́й; є҆ли́цы бо, глаго́летъ, ᲂу҆́мныхъ и҆ слове́сныхъ къ бг҃онача́льнагѡ сокрове́нства соедине́нїю, є҆ли́ка си́ла по всемꙋ̀ ѡ҆брати́шасѧ, и҆ къ бж҃е́ствєннымъ є҆гѡ̀ ѡ҆сїѧ́нїѧмъ є҆ли́кѡ дости́гнꙋти мо́щно, непреста́ннѡ горѣ̀ простира́ютсѧ, є҆́же по си́лѣ а҆́ще лѣ́ть є҆́сть рещѝ бг҃оподража́нїемъ, и҆ бж҃ескагѡ тождеиме́нства сподо́бишасѧ. Ꙗ҆́коже и҆ григо́рїа ѕѣ́льнагѡ бг҃осло́вный ѧ҆зы́къ глаго́летъ ꙗ҆́вѣ: живо́тное здѣ̀ ᲂу҆строѧ́емо, и҆ и҆на́мѡ преставлѧ́емо, ѡ҆ человѣ́цѣ глаго́лющъ, и҆ коне́цъ та́йны, къ бг҃ꙋ ма́нїемъ ѡ҆божа́емо¹³⁷⁹. И҆ сщ҃е́нный маѯі́мъ, мы́сленный бж҃е́ственнагѡ писа́нїѧ, глаго́летъ, ви́дъ, премꙋ́дростїю разꙋмѣва́тєльнаѧ преѡбража́етъ ко ѡ҆боже́нїю, ѿ є҆́же въ ни́хъ преѡбраже́нїѧ слове́сства, ѿкрове́ннымъ лице́мъ сла́вꙋ гдⷭ҇ню взира́ющыѧ. Та́кѡ житїѐ зри́тельное тре́бꙋетъ трїе́хъ, ꙗ҆̀же предреко́хъ, вѣ́ры, и҆ дх҃о́вна прича́стїѧ и҆ вѣ́дѣнїѧ премꙋ́дрости, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

п҃в. Зри́тельное съ животворѧ́щимъ дх҃омъ житїѐ, мно́гихъ нѣ́кїихъ и҆ досточꙋ́дныхъ видѣ́нїй мы́сленныхъ зри́телѧ и҆сполнѧ́етъ вта́йнѣ, нижѐ тождеча́стнѣ, нижѐ ᲂу҆́бѡ внеза́пнѡ: но вре́менемъ и҆ до́лгимъ любомꙋ́дрїемъ, та́кожде и҆ по чи́нꙋ, и҆ а҆́ки по лѣ́ствицѣ. И҆ ѻ҆вогда̀ ᲂу҆́бѡ сего̀ ᲂу҆слы́шалъ бы є҆сѝ глаго́люща зрѧ́ща превосхо́дствомъ безмо́лвїѧ, и҆ ѿбѣ́гства всѣ́хъ, кромѣ̀ бг҃а є҆ди́нъ є҆́смь а҆́зъ, до́ндеже прейдꙋ̀¹³⁸⁰. И҆ногда́ же па́ки разꙋмѣва́тельнагѡ ра́ди є҆́же къ сꙋ́щымъ ѡ҆браще́нїѧ: ꙗ҆́кѡ возвели́чишасѧ дѣла̀ твоѧ̑, гдⷭ҇и; всѧ̑ премꙋ́дростїю сотвори́лъ є҆сѝ¹³⁸¹. И҆ сїѐ: вонѧ̀ ри́зъ твои́хъ¹³⁸², ꙗ҆́кѡ вонѧ̀ ни́вы и҆спо́лнены, ю҆́же благослови́лъ є҆сѝ гдⷭ҇и¹³⁸³. Ѻ҆вогда̀ возводи́тельнѣе взира́ти творѧ́що, и҆ въ мы́слєннаѧ входи́ти восхождє́нїѧ внꙋ́трь дѣ́йствꙋющо, повинꙋ́етъ глаго́лати: въ воню̀ мѵ̑ръ твои́хъ въ слѣ́дъ тещѝ и҆́мамъ ко бг҃ꙋ¹³⁸⁴. И҆ сїѐ: вознесꙋ́ тѧ, бж҃е мо́й, цр҃ю̀ мо́й, и҆ благословлю̀ и҆́мѧ твоѐ въ вѣ́къ и҆ въ вѣ́къ вѣ́ка. Ве́лїй гдⷭ҇ь и҆ хва́ленъ ѕѣлѡ̀, и҆ вели́чїю є҆гѡ̀ нѣ́сть конца̀¹³⁸⁵. Оу҆диви́сѧ ра́зꙋмъ тво́й ѿ менѐ: ᲂу҆тверди́сѧ, не возмогꙋ̀ къ немꙋ̀¹³⁸⁶. Во и҆ны́хъ же є҆щѐ: ты́ же вы́шнїй во вѣ́къ гдⷭ҇и¹³⁸⁷, и҆ па́мѧть твоѧ̀ въ ро́дъ и҆ ро́дъ¹³⁸⁸: ѕѣлѡ̀ превозне́слсѧ є҆сѝ над̾ всѣ́ми бо́ги¹³⁸⁹: ѡ҆ пресꙋ́щественномъ зрѣ́нїи пѣ́ти ᲂу҆готовлѧ́етъ горѣ̀ простира́ющыѧсѧ зри́тели. И҆ногда́ же во и҆зрече́нїе подвиза́етъ преѧ́вственнѡ зовꙋ́щыѧ: нѣ́сть подо́бенъ тебѣ̀ въ бозѣ́хъ гдⷭ҇и, и҆ нѣ́сть по дѣлѡ́мъ твои̑мъ¹³⁹⁰. Є҆ще́ же го́рꙋ разꙋ́мнꙋ, и҆ мѣ́сто бг҃а ст҃а дх҃о́внѣ зрѧ́щымъ показꙋ́етъ, на ню́же восхо́дѧтъ, и҆ на не́мже стоѧ́тъ непови́ннїи рꙋка́ма и҆ чи́стїи се́рдцемъ. Не то́чїю же, но и҆ восхождє́нїѧ си́це до небе́съ, и҆ низхождє́нїѧ до бе́зднъ высо́кихъ и҆ глꙋбо́кихъ, си́рѣчь, та̑йнъ дх҃а подае́тъ ви́дѣти. И҆ ѻ҆вогда̀ ᲂу҆́бѡ къ видѣ́нїю ли́чнагѡ въ трⷪ҇цѣ зри́тельства приво́дитъ чꙋ́днѣ: ѻ҆вогда́ же въ видѣ́нїе і҆и҃са, и҆ смотре́нїѧ є҆гѡ̀ є҆́же во пло́ти, и҆ послѣ́дствꙋющихъ є҆мꙋ̀ та̑инъ преесте́ственныхъ со ᲂу҆́жасомъ взира́ти ѡ҆бꙋча́етъ. И҆ тогда̀ ѿню́дъ по мно́гихъ и҆ бл҃же́нныхъ видѣ́нїихъ, ника́коже ѡ҆ставлѧ́етъ зрѧ́щаго, а҆́ще не и҆ въ са̑маѧ нѣ̑дра бж҃їѧ невоѡбра́знѣ, ѽле благода́ти! введе́тъ просвѣще́ннаго во и҆́стиненъ поко́й несказа́ненъ, и҆ наслажде́нїе дх҃о́вно преесте́ственно. Да не въ пїѧ́нство глаго́лю до́брыхъ бж҃їихъ и҆ бж҃е́ственнѣйшее и҆зстꙋпле́нїе, въ нѣ̑дра ѻ҆́на преблагословє́нна: мно́гꙋ глꙋбинꙋ̀ и҆мꙋ́ща бж҃е́ственныхъ та̑инъ, и҆ дово́льнѣ ко ѡ҆щꙋще́нїю пресꙋ́щества бж҃їѧ приближа́ющасѧ. Ꙗ҆̀же нѣ̑дра наслѣ́дїе ѿ нача́ла и҆мѣ̀ и҆ а҆враа́мъ, внегда̀ и҆ са́мъ бг҃ъ жре́бїй бы́сть а҆враа́мовъ, по є҆́же: а҆́зъ є҆́смь бг҃ъ а҆враа́мовъ¹³⁹¹. Бг҃ъ ᲂу҆̀бо и҆зрѧ́днѣ а҆враа́мовъ сы́й бг҃ъ, послѣ́дованнѡ и҆ бж҃їѧ нѣ̑дра, нѣ̑дра а҆враа́мѡва сꙋ́ть. И҆ въ нѣ̑дра ᲂу҆̀бо бж҃їѧ, и҆лѝ нѣ̑дра а҆враа̑млѧ хотѣ́лъ бы кто̀ глаго́лати возводѧ̀, вво́дитъ со всѧ́кою простото́ю, съ преѕѣлѡ̀ люби́тельнымъ весе́лїемъ, (и҆) ѡ҆божа́етъ вои́стиннꙋ, и҆ блаже́нна воз̾ꙋстроѧ́етъ съ дꙋше́вною сла́достїю и҆ ѕѣ́льнымъ красова́нїемъ неизрече́ннымъ, житїѐ зри́тельное въ дс҃ѣ, ᲂу҆́мъ премꙋ́дрости прїе́мшагѡ и҆ поꙋче́нїе ѕѣлѡ̀ творѧ́щагѡ горѣ̀ зрѣ́ти, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, а҆ми́нь.

п҃г. Поне́же и҆ тва́рь и҆ писа́нїе бж҃їимъ сло́вомъ простро́шасѧ, и҆ дх҃о́внѣ зри̑ма, ᲂу҆́мъ и҆ всѧ̑ си̑лы є҆гѡ̀ ᲂу҆твержда́ютъ къ бж҃їю взира́нїю, и҆ разꙋмѣ́нїю, пре́жде дѣ́йствꙋемꙋ се́рдцꙋ и҆ предподви́женꙋ дх҃о́внѣ: премꙋ́дрѣ ѕѣлѡ̀ глаго́летъ ᲂу҆чѧ̀ сщ҃е́нный дв҃дъ, когда̀ сло́вомъ гдⷭ҇нимъ ᲂу҆твержда́ютсѧ ᲂу҆́мове, и҆̀хже ны́нѣ небеса̀ нарица́етъ, и҆ всѧ̀ си́ла и҆́хъ дх҃омъ ᲂу҆́стъ є҆гѡ̀. Когда̀ ᲂу҆̀бо; внегда̀ ꙗ҆влѧ́етсѧ и҆спо́лнь мы́сленнаѧ землѧ̀, си́рѣчь се́рдце на́ше ми́лости гдⷭ҇ни, дх҃одви́жныѧ си́рѣчь си́лы и҆ дѣ́йства и҆ движе́нїѧ благоѡщꙋти́тельнѣ и҆ ꙗ҆́вѣ. Пре́жде же да́же дѣ́йство и҆ си́лꙋ и҆ движе́нїе въ се́рдцѣ ᲂу҆́мъ не ѡ҆щꙋти́тъ, не то́кмѡ не бꙋ́детъ и҆мѣ́ти крѣ́пости ѿ є҆́же тва́рь и҆ бж҃е́ственное писа́нїе зри́тельнѣ и҆ дх҃о́внѣ разсмотрѣва́ти, и҆ совокꙋплѧ́ти во є҆ди́нъ ра́зꙋмъ ꙗ҆̀же въ ни́хъ, но и҆ стра́хъ ѕѣлѡ̀ мно́жайшъ и҆зли́шше быва́етъ, да не когда̀ поги́бнетъ ѕлѣ̀ возмечта́въ. Тѣ́мже ᲂу҆́бѡ а҆́ще что̀ хотѣ́ли бы́хомъ восприлѣжа́ти є҆́же бг҃а ѿ писа́нїѧ зрѣ́ти и҆ тва́ри, є҆динови́днѣ же и҆ є҆динственнови́днѣ мнѡ́гїѧ вины̑ сꙋ́щихъ и҆ зри́тельства въ є҆ди́нъ ра́зꙋмъ и҆ дх҃ъ собира́юще, є҆динови́дно и҆ про́сто безви́дно видѣ́нїе зрѧ́ще съ безпредѣ́лїемъ и҆ безконе́чїемъ и҆ безнача́лїемъ: є҆́же внꙋ́трь се́рдца на́шегѡ пе́рвѣе ѡ҆брѣстѝ взы́щемъ сокро́вище, и҆ помо́лимъ бг҃а ст҃а, и҆спо́лнити зе́млю на́шꙋ ми́лости своеѧ̀: и҆ тогда̀ а҆́ще бы была̀ ка́ѧ си́ла горѣ̀, ѡ҆ста́вимъ свобо́днѣ ᲂу҆́мъ къ бж҃їю разꙋмѣ́нїю є҆динови́днꙋ, ꙗ҆́коже рече́сѧ и҆ є҆динственнови́днꙋ, про́стꙋ, безви́днꙋ, присносꙋ́щнꙋ, безконе́чнꙋ и҆ безпредѣ́льнꙋ, видѣ́нїемъ и҆ по́мощїю сло́ва же и҆ дх҃а.

п҃д. Внегда̀ чꙋ́вствами и҆ просты́ми завѣща́нїи дꙋшѝ, є҆́же по за́повѣдемъ тече́нїе добродѣ́тельми съ мꙋдрова́нїемъ смире́ннымъ, въ терпѣ́нїи и҆ ᲂу҆пова́нїи, сꙋ́щемъ вѣ́рою соверша́ющꙋ человѣ́кꙋ, животворѧ́щаѧ и҆ присноисточа́ющаѧсѧ ст҃а́гѡ дх҃а си́ла, не́гли и҆ дѣ́йство въ се́рдце прїи́детъ просвѣща́ющи вои́стиннꙋ си̑лы дꙋшє́вныѧ, є҆сте́ственнѣ дви́жима преѧвле́ннѡ и҆ подвиза́ющи къ себѣ̀ призыва́етъ, и҆́же дѣ́йствомъ ᲂу҆́мъ ѕѣлѡ̀ скорѣ́йше, и҆ неизрече́ннѡ соединѧ́етсѧ съ ни́мъ, ꙗ҆́коже бы́ти вои́стиннꙋ ᲂу҆мꙋ̀ и҆ благода́ти тогда̀ безпрекосло́внѡ во є҆ди́нъ дꙋ́хъ: тогда̀ вои́стиннꙋ, тогда̀ ᲂу҆́мъ са́мъ ѡ҆ себѣ̀ прихо́дитъ дх҃нове́нїемъ на́нь благода́ти помоществꙋ́емь ко є҆́же зрѣ́ти, ста́въ ꙗ҆́вѣ ꙗ҆́кѡ несказа́нно ѿ здѣ́шнѧгѡ ѡ҆бноше́нїѧ и҆ ѻ҆́крестъ скита́нїѧ дѣ́йствїемъ и҆ свѣ́томъ животворѧ́щагѡ и҆ ст҃а́гѡ дх҃а: и҆ во ѿкрове́нїѧ прихо́дитъ та̑инъ бж҃е́ственныхъ мы́сленныхъ, и҆ молча́нїемъ всѧ́чески и҆ безмо́лвнымъ свои́мъ є҆сте́ственнымъ взо́ромъ входи́ти достиза́етъ въ преесте́ствєнна неизречє́нна: и҆ толи́кѡ па́че зри́тъ, и҆ бг҃ое́млемь быва́етъ, и҆ ко є҆́же бг҃а, є҆ли́кѡ мо́щно, зрѣ́ти горѣ̀ простира́етсѧ съ вѣ́жествомъ бж҃е́ственныхъ, ѿ сщ҃е́нныхъ со́бранныхъ чте́нїй, є҆ли́кѡ по сравне́нїю безмо́лвствꙋетъ смирѧ́ѧсѧ и҆ молѧ́сѧ дѣ́йствꙋемый ѿ бг҃а ст҃ы́мъ дх҃омъ. Тогда̀ ᲂу҆̀бо ни ѿ є҆́же бг҃осло́вити є҆́сть кромѣ̀, но кꙋ́пнѡ а҆́бїе є҆́сть са́мою ве́щїю бг҃осло́въ, и҆ не бг҃осло́вити не терпи́тъ, и҆ вы́нꙋ. Без̾ да́ра же небе́сна рече́ннагѡ, и҆ без̾ дх҃а ꙗ҆́вѣ приснодви́жнѣ ды́шꙋщагѡ въ се́рдцѣ, ѽле! є҆ли́кѡ ᲂу҆́мъ зри́тъ, мечта̑нїѧ сегѡ̀ сꙋ́ть: и҆ є҆ли̑ка бг҃осло́витъ, словеса̀ сꙋ́етнѣ сꙋ́ть на воздꙋ́хъ пролива́єма, чꙋ́вство дꙋшѝ не возбꙋжда́юща ꙗ҆́коже подоба́етъ, и҆ ѿ слꙋ́ха дѣ́йствꙋемь є҆́сть, и҆ слове́съ приходѧ́щихъ ѿвнѣꙋ́дꙋ: ѿѻнꙋ́дꙋже вселю́таѧ пре́лесть мы́сленныхъ и҆ са́магѡ бг҃осло́вїѧ преѕѣлѡ̀ ѕлѣ̀ прїѧ́тъ вхо́дъ, не въ се́рдцѣ дѣ́йствꙋема ѿ просвѣща́ющагѡ дх҃а, ѿѻнꙋ́дꙋже мы́сленныхъ є҆динови́днаѧ и҆ бг҃осло́вїѧ непрело́жнаѧ є҆́сть и҆́стина. И҆́бо въ не́мже, собо́рнѣ рещѝ, се́рдцѣ не присꙋ́тствꙋетъ ꙗ҆́вѣ прича́стникꙋ животворѧ́щаѧ и҆ просвѣти́тельнаѧ дх҃а си́ла, и҆ дѣ́йствомъ присноистека́тельнѣ и҆лѝ ды́шꙋщи, хотѣ́лъ бы кто̀ глаго́лати, и҆лѝ текꙋ́щи: соедине́нїѧ нѣ́сть та́мѡ мы́сленна, но па́че раздѣле́нїе, ни си́ла и҆ стоѧ́нїе, но не́мощь и҆ прело́гъ: нижѐ ᲂу҆́бѡ подо́бнѣ свѣ́тъ и҆ зрѣ́нїе и҆́стины, но па́че тьма̀ и҆ мечта́нїѧ сꙋ́етное воѡбраже́нїе, и҆ ѿню́дъ безслове́сїѧ и҆ пре́лести пꙋ́ть. И҆́бо въ трїе́хъ чи́нѣхъ, и҆лѝ пꙋте́хъ, по ѻ҆тцє́мъ, проходи́ти могі́й ᲂу҆́мъ, є҆сте́ственнѣ си́рѣчь, превышеесте́ственнѣ, и҆ проти́вꙋ є҆стествꙋ̀: є҆гда̀ въ подлежа́щемъ нѣ́что мы́сленно ᲂу҆́мъ ви́дитъ, по є҆стествꙋ̀ зри́тъ, ѻ҆ба́че съ дѣ́йствомъ превышеесте́ственнымъ дх҃а: є҆гда́ же ѵ҆поста́снѣ зри́тъ, а҆ не въ подлежа́щемъ, бѣ́са не́гли, и҆лѝ а҆́гг҃ла, а҆́ще ᲂу҆́бѡ соедине́нъ бы́сть ᲂу҆́мъ въ мі́рѣ, и҆ просвѣще́нїе дх҃а возжига́етсѧ ѕѣ́льнѣе, преесте́ственнѣ зри́тъ, ꙗ҆́вѣ же ꙗ҆́кѡ и҆ непреле́стнѣ. А҆́ще же зри̑маѧ зрѧ̀, раздѣлѧ́етсѧ и҆ помрача́етсѧ ᲂу҆́мъ, и҆ си́ла животворѧ́щаѧ ᲂу҆гаша́етсѧ, проти́вꙋ є҆стества̀ зри́тъ, и҆ пре́лесть є҆́сть ѻ҆́но зрѣ́нїе. Сегѡ̀ ра́ди горѣ̀ простира́тисѧ ᲂу҆мꙋ̀ къ зрѣ́нїю дх҃о́внꙋ ѵ҆поста́снѣ не подоба́етъ, нижѐ зрѣ́нїю вѣ́ровати и҆ кі́имлибо ѡ҆́бразомъ, не дѣ́йствꙋемꙋ по предлежа́щымъ се́рдцꙋ, и҆ не дви́жимꙋ ѿ си́лы ст҃а́гѡ дх҃а, а҆́ще хотѣ́ли бы́хомъ здра́вствꙋюща бы́ти ᲂу҆ма̀ и҆ цѣломꙋ́дренна.

п҃є. Нѣ́цыи небе́сною росо́ю благода́ти распале́нїе свои́хъ страсте́й преѕѣлѡ̀ до́брѣ творѧ́ще и҆сцѣлѧ́ти покꙋша́ютсѧ. Ѡ҆ ни́хже вои́стиннꙋ пи́сано є҆́сть: роса̀, ꙗ҆́же ѿ тебѐ, и҆сцѣле́нїе на́мъ бꙋ́детъ¹³⁹². Нѣ̑кїимъ же сїѧ̑ рече́ннаѧ роса̀, бо́льшимъ нѣ́какѡ застꙋпле́нїемъ бж҃е́ственнымъ соедини́сѧ, и҆ въ ма́ннꙋ претвори́сѧ, и҆ а҆́ки нѣ́какѡ ѿ нѣ́кїѧ пшени́цы хлѣботвори́сѧ сокрꙋше́нїемъ серде́чнагѡ смире́нїѧ, и҆ водо́ю сле́зъ, и҆ ѻ҆гне́мъ дх҃о́вна ра́зꙋма: досто́йнѣ сїѐ и҆ ѕѣлѡ̀ влѣ́потꙋ пострада́вши, и҆ въ снѣ́дь а҆гг҃лови́днꙋ прили́чествꙋющꙋ бы́вши. Ѡ҆ ни́хже благосло́внѡ ꙗ҆́кѡ наимно́жайше рече́сѧ: хлѣ́бъ а҆́гг҃льскїй ꙗ҆дѐ человѣ́къ¹³⁹³. Сꙋ́ть и҆̀мже по предспѣ́ѧнїю вы́шшимъ нѣ́кїимъ ѡ҆́бразомъ, бы́сть и҆ ви́дитсѧ своѐ и҆́хъ є҆стество̀ ма́нна ꙗ҆́вѣ. Ѡ҆ ни́хже є҆ѵⷢ҇лїе глаго́летъ: рожде́нное ѿ дх҃а дх҃ъ є҆́сть¹³⁹⁴. Пе́рвый чи́нъ є҆́сть безмѡ́лвникъ премꙋ́дрыхъ: (а҆) и҆́же по не́мъ, и҆ молча́нїю прилѣжа́щихъ съ бж҃е́ственнымъ ра́зꙋмомъ: тре́тїй же, просте́ртыхъ по всемꙋ̀ и҆ и҆змѣне́нныхъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

п҃ѕ. И҆збѣ́гъ благода́тїю, ꙗ҆́коже подоба́етъ, фараѡ́на и҆ є҆гѵ́пта, и҆ та́мошнихъ лю́тыхъ и҆ притрꙋ́дныхъ мы́сленнѣ ᲂу҆́мъ є҆ще́ же и҆ вла́ющагѡ вѡ́лны стра̑стны го́рести, и҆ сла́ныѧ ѕло́бы плотска́гѡ житїѧ̀: и҆ въ мы́сленнꙋю пꙋсты́ню прише́дъ, ꙗ҆́вѣ ꙗ҆́кѡ въ навыкнове́нїе и҆зба́вльшеесѧ фараѡни̑тъ мы́сленныхъ: и҆ соѡб̾ѧ́тнѣ рещѝ, приключа̑ющаѧсѧ тогда̀ є҆вре́ємъ по чꙋ́вствꙋ лю̑таѧ мы́сленнѣ и҆ пострада́въ и҆ и҆зба́вльсѧ, ма́ннꙋ по послѣ́дованїю ꙗ҆́стъ мы́сленнꙋ чꙋ́вствомъ дꙋшѝ тве́рдѡ, є҆ѧ́же ѡ҆́бразъ дре́вле ꙗ҆дѧ́ше і҆сра́иль чꙋ́вственнѡ. И҆ въ нача́лѣхъ ᲂу҆́бѡ ѻ҆вогда̀ воспомѧнꙋ́въ жела́етъ мы́сленныхъ, ꙗ҆́коже чꙋ́вственныхъ ѻ҆нѝ мѧ́съ, же́ртвъ є҆гѵ́петскихъ, прибѣ́дственнѡ ꙗ҆́кѡ наимно́жайше, и҆ ничто́же мнѣ́е и҆ погрѣши́тельнѡ, и҆ бж҃е́ственна ᲂу҆̀бо и҆скꙋ́съ прїе́млетъ ѿвраще́нїѧ, до́ндеже бы мольбо́ю пакиѡбра́тнагѡ покаѧ́нїѧ бг҃а прили́чнѣ ᲂу҆ми́лостивилъ. И҆ про́чее ᲂу҆́бѡ а҆́ще ма́нны ча́стѣе насыща́етсѧ съ безмо́лвїемъ, вре́мени пред̾идꙋ́щꙋ и҆ благода́ти є҆мꙋ̀ прило́жшей посо́бїе же и҆ си́лꙋ, мы́сленнꙋю пло́ть свою̀ въ є҆стество̀ ма́нны ѡ҆́бразомъ си́мъ прело́жшꙋюсѧ, ꙗ҆́коже бы кто̀ ре́клъ, ꙗ҆́вѣ зри́тъ ѕѣлѡ̀ ꙗ҆́снѣ. Сꙋ́ть же таково́мꙋ ꙗ҆дꙋ́щемꙋ ма́ннꙋ, вѣсы̀ дꙋхо́вны, и҆́миже прїе́млѧ мѣ́рою ма́ннꙋ, мно́жае ника́коже собира́етъ дневны́ѧ своеѧ̀ пи́щи: да не возчерви́вшисѧ, ꙗ҆́кѡ превы́ше ᲂу҆мѣ́ренности, всѧ̑ погꙋби́тъ: и҆ спогиба́етъ съ не́ю безпи́щїемъ, ᲂу҆мѣ́ренности не блюды́й ᲂу҆́мъ. Ꙗ҆вле́нъ же ᲂу҆́бѡ бы́лъ бы ма́ннꙋ ꙗ҆ды́й ᲂу҆́мъ, занѐ ничто́же каково́либо и҆́но ꙗ҆ды́й, жи́знь живе́тъ проѧвле́ннѣ лꙋ́чшꙋ, всѧ́кагѡ что́либо и҆ каково́либо ꙗ҆дꙋ́щагѡ, глаго́лю же мы́сленнѣ. Ѻ҆ба́че ꙗ҆́коже преложи́сѧ нѣ́какѡ и҆ то́й навыкнове́нїемъ пита́нїѧ въ ка́чество ꙗ҆́коже рещѝ ма́нны, зна́менїе є҆́сть непохотѣ́нїе каковы́хлибо чꙋ́ждихъ, и҆́хже бѣ̀ жела́ѧ пе́рвѣе, и҆ є҆гда̀ вездѣ̀ ма́ннꙋ ꙗ҆́сти мо́жетъ, и҆ младе́нецъ бꙋ́детъ бг҃оче́стїю прилѣпи́всѧ. Ѻ҆ба́че же не чꙋ́дно преложи́тисѧ комꙋ̀ въ ка́чество (тогѡ̀), є҆гѡ́же ча́стѣ кꙋша́етъ, и҆ вре́менемъ насыща́етсѧ до́лгимъ: нижѐ въ ка́чество ма́нны ᲂу҆ма̀ претворе́нїе ка́колибо па́че подоба́ющагѡ могло́ бы бы́ти. Є҆сте́ственнѣ бо ча́стѡ прїе́млемаѧ пи́ща, прелага́ти ѡ҆бы́че къ себѣ̀ пита́емое. Тогда́ же не то́кмѡ а҆́гг҃ла чи́нъ соде́ржитъ ᲂу҆́мъ ꙗ҆́вѣ, но и҆ бж҃е́ственнагѡ сыноположе́нїѧ прича́стникъ быва́етъ, достовѣ́рнѡ ѿ сла́вы дꙋхо́вныѧ въ сла́вꙋ приводи́мь. Не то́кмѡ къ є҆ди́номꙋ взира́ѧ, но и҆ са́мъ къ себѣ̀ быва́ѧ є҆ди́но, и҆ въ се́мъ живы́й и҆ премі́рнѣ наслажда́ѧсѧ. И҆ да си́це рекꙋ̀ наслажда́ѧсѧ та́инственныхъ неизглаго́ланныхъ бг҃ови́днѣ и҆ бг҃олю́бнѣ во ст҃ѣ́мъ дс҃ѣ. И҆ ᲂу҆́бѡ нѣ́какѡ по ви̑димымъ и҆ поє́мымъ вои́стиннꙋ быва́ѧ, ꙗ҆́коже и҆ въ ка́чествѣ ма́нны зрѣ́ти себѐ. Ѻ҆ба́че се́й чи́нъ вы́шшїй є҆́сть и҆ честнѣ́йшїй мно́гѡ, позна́вшагѡ себѐ ма́ннꙋ ᲂу҆́бѡ ꙗ҆дꙋ́ща, не ᲂу҆̀бо же и҆ въ ка́чество нѣ́кое ма́нны себѐ преложе́нна. Занѐ пе́рвое ᲂу҆́бѡ мо́щно є҆́сть не́гли пострада́ти въ нача́лѣхъ въ себѣ̀ мы́сленнымъ соедине́нїемъ ᲂу҆мꙋ̀ собра́вшꙋсѧ: второ́е же ꙗ҆́вственнѣйша соедине́нїѧ, и҆ разꙋ́мныхъ та̑инъ ѿкрове́нїе, и҆ кра́йнѧ ѿрѣше́нїѧ є҆́же ѿ всѣ́хъ, и҆ препросте́рта ᲂу҆́мствованїѧ ꙗ҆вле́нїе є҆́сть ꙗ҆́сно.

п҃з. Про́стъ є҆́сть є҆стество́мъ ᲂу҆́мъ, занѐ и҆ то̀, є҆гѡ́же є҆́сть ѡ҆́бразъ, про́сто є҆́сть, ꙗ҆́вѣ же ꙗ҆́кѡ бж҃е́ственное. Сы́й ᲂу҆́бѡ тако́въ, про́стѡ и҆ дѣ́йствовати лю́битъ. Всѧ́кѡ бо, то́жде є҆стество́мъ, лю́битъ. Разли́ченъ же ѻ҆ба́че быва́етъ не себѐ ра́ди, но чꙋ́вствъ ра́ди и҆ чꙋ́вственныхъ, и҆́миже семꙋ̀ сꙋ́ть мы́сленныхъ преє́мства. Внегда́ же сло́во своѐ междꙋ̀ собо́ю и҆ чꙋ́вствами съ чꙋ́вственными поста́витъ и҆стѧзꙋ́юще и҆ сꙋдѧ́ще разꙋ́мнѣ, є҆ли́кѡ мо́щно, нижѐ чꙋ̑вства немощнѣ́йша прили́чествꙋющагѡ поставлѧ́юще нижѐ добрѡ́ты чꙋ́вственныхъ, и҆лѝ помрача́юще ᲂу҆ны́лѡ, и҆лѝ предпочита́юще недо́бльственнѡ, и҆ ᲂу҆ма̀ держа́вꙋ си̑мъ до́лꙋ подме́щꙋще, раздѣлѧ́юще же цѣломꙋ́дреннѡ прили́чествꙋющее комꙋ́ждо: тогда̀ а҆́бїе ᲂу҆́мъ самагѡ̀ себѐ быва́етъ є҆ди́нственъ и҆ про́стъ, ꙗ҆́коже є҆́сть є҆стество́мъ, па́ки быва́ѧ, и҆ раздѣ́льныхъ ѿстоѧ̀, и҆ па́ки є҆сте́ственнѣ начина́етъ люби́ти є҆ди́ное и҆ про́стое и҆ є҆ди́нственнѣ и҆ про́стѡ дѣ́йствовати: є҆́же ᲂу҆́бѡ любѧ̀, и҆́щетъ: и҆ и҆ща̀, лета́нїе своѐ превы́ше всѧ́кагѡ сотворѧ́етъ сложе́нїѧ, до́ндеже бы ѡ҆брѣ́лъ вои́стиннꙋ и҆ сво́йственнѣ є҆ди́ное и҆ про́стое, є҆́же є҆́сть бг҃ъ: є҆гда̀ вои́стиннꙋ и҆ под̾ є҆ди́нѣма сегѡ̀ крыло́ма ны́нѣ ᲂу҆́бѡ покрыва́емь, ѻ҆вогда́ же возвыша́емь весели́тсѧ, ꙗ҆́коже подоба́етъ весели́тисѧ бг҃острего́мꙋ и҆ бг҃оноси́мꙋ ᲂу҆мꙋ̀.

п҃и. На разсмотри́тельное дꙋшѝ а҆́ки мра́чна нѣ́каѧ дебе́лость напа́дши ꙗ҆́же ѿ страсте́й, и҆́на зрѣ́ти вмѣ́стѡ сꙋ́щагѡ сотворѝ: є҆гда́ же ча́стою моли́твою и҆ и҆сполне́нїемъ за́повѣдей, и҆ горѣ̀ протѧже́нїемъ къ видѣ́нїю бж҃їю благода́тїю ᲂу҆́мъ раздѣли́тъ рече́ннꙋю мра́чнꙋ дебе́лость ѿ себѐ, ꙗ҆́вѣ зри́тъ ꙗ҆́кѡ зри́тъ бг҃а, сказа́телѧ ника́коже ѡ҆ се́мъ тре́бꙋѧ, ꙗ҆́коже не тре́бꙋетъ и҆мꙋ́щагѡ наꙋчи́ти зрѧ́щїй чꙋ́вственнѡ, а҆́ще стꙋжа́ющїѧ и҆ ѡ҆сѣнѧ́ющїѧ ве́щи не и҆́мать на зѣ́ницѣ ѻ҆чесѐ. Ꙗ҆́коже бо прїꙋсвоѧ́ютсѧ чꙋ́вствєннаѧ чꙋ́вствамъ здра̑вымъ сꙋ́щымъ, си́це мы́слєннаѧ помышле́нїємъ ᲂу҆своѧ́ютсѧ, чи̑стымъ сꙋ́щымъ ѿ ѻ҆́блака страсте́й: и҆ ꙗ҆́коже ѿ чꙋвстви́тельна понѧ́тїѧ чꙋ́вственныхъ є҆́сть постиже́нїе, та́кѡ ѿ мы́сленнагѡ взира́нїѧ мы́сленныхъ зрѣ́нїе быва́ти ѡ҆бы́че: по ни́хже безви́дное благода́тїю и҆ нека́чественное и҆ безмечта́нное и҆ про́стое видѣ́нїе: є҆́же ᲂу҆держа́нна и҆мꙋ́ще ᲂу҆ма̀, всѣ́хъ чꙋ́вственныхъ же и҆ мы́сленныхъ каковы́хлибо ѿрѣше́нна твори́тъ. Въ безконе́чїѧ неѡб̾ѧ́тїѧ же и҆ безпредѣ́лїѧ глꙋбинꙋ̀ є҆гѡ̀ со ᲂу҆́жасомъ и҆ ᲂу҆дивле́нїемъ, ꙗ҆́коже не возмо́жно є҆́сть сказа́тисѧ сло́вомъ, заключа́юще.

п҃ѳ. Ѽ влⷣко всѣ́хъ ви́димыхъ и҆ разꙋмѣва́емыхъ сы́й нача́ло, вседержи́телю! нача́ло и҆мѣ́ѧ безнача́льность несозда́нне, и҆ ѡ҆предѣле́нїе безпредѣ́льность безконе́чне, и҆ є҆стество̀ преесте́ственность неѡб̾ѧ́те, и҆ сꙋщество̀ пресꙋще́ственность неѻбы́шне, и҆ ви́дъ ᲂу҆́бѡ безви́дїе неви́диме, и҆ сво́йство присносꙋ́щность нетлѣ́нне, и҆ ѡ҆́бразъ неѡбра́зїе неизслѣ́дне, и҆ мѣ́сто неѡпи́санность безпредѣ́льне, постиже́нїе же непости́жность неиспы́танне, и҆ ра́зꙋмъ и҆ видѣ́нїе, неви́димость же и҆ несказа́нность непристꙋ́пне и҆ неѡбмы́сленне, и҆ сло́во невѣща́нность неисповѣди́ме, и҆ сказа́нїе несказа́нность неизглаго́ланне, и҆ недомы́сленность разꙋмѣ́нїе недомы́сленне, и҆ ѿню́дъ положе́нїе є҆́же па́че всѣ́хъ ѿѧ́тїе. ѽ пребла́же! ве́сь є҆сѝ чꙋ́до и҆ ти́хость и҆ дерзнове́нїе и҆ любы̀, и҆ сла́дость и҆ дꙋшевесе́лїе, и҆ ᲂу҆пова́нїе вкꙋ́пѣ во всѣ́хъ и҆ вои́стиннꙋ безпопече́нїе и҆ ра́дость воѷпоста́снаѧ є҆ди́на сла́ва, и҆ ца́рство и҆ премꙋ́дрость и҆ си́ла сегѡ̀ ра́ди и҆зстꙋпле́нїе ѿ всѣ́хъ ви́димыхъ, и҆ поко́й ѿ всѣ́хъ разꙋмѣва́емыхъ є҆сте́ственнѣ неизрече́ннѡ є҆сѝ, и҆ ᲂу҆покое́нїе къ тебѣ̀ чꙋ́дно зрѧ́щымъ тѧ̀ съ прича́стїемъ ст҃а́гѡ твоегѡ̀ дх҃а. ѽ несказа́нне бж҃е!

ч҃. Чꙋди́мо же, бж҃е́ственное си́рѣчь, лю́битсѧ вѧ́щше: люби́мое же, ѡ҆чища́етъ, глаго́летъ бг҃осло́вный григо́рїа гла́съ: ѡ҆чища́ющее же, бг҃ови́дны содѣва́етъ: такѡвы́мъ же бы́вшымъ, ꙗ҆́кѡ свои̑мъ ᲂу҆жѐ прибесѣ́дꙋетъ. Но не то́кмѡ си́це бг҃ъ, но и҆ ѡ҆чи́щшїисѧ ѿню́дъ, ꙗ҆́кѡ свои́мъ дꙋ́хомъ и҆ и҆́стиною бж҃е́ствєннымъ и҆ бг҃ꙋ собесѣ́дꙋютъ. Тѣ́мже и҆ бг҃осло́въ наво́дитъ: бг҃ъ богѡ́мъ соединѧ́ѧсѧ же и҆ познава́ѧсѧ. Зри́ши ли чꙋ́дное соедине́нїѧ; бг҃ъ бо, глаго́летъ, богѡ́мъ соединѧ́ѧсѧ. А҆́ще же тѣ́хжде нѣ́какѡ є҆́сть соедине́нїе, ꙗ҆́вѣ ꙗ҆́кѡ и҆ соедине́нїѧ завѣща́нїѧ и҆ наслажде́нїѧ подо́бнѣ сꙋ́ть та̑ѧжде. Тѣ́мже глаго́летъ, и҆ познава́ѧсѧ. Та́кожде ᲂу҆́бѡ и҆ бг҃ови́днїи и҆ бо́зи благода́тїю, ꙗ҆́кѡ свои̑мъ бж҃е́ствєннымъ и҆ къ бг҃ꙋ бесѣ́дꙋютъ и҆ познава́ютъ, ꙗ҆́коже бг҃ъ ѡ҆́бразомъ ра́внымъ зри́тъ, и҆ прибесѣ́дꙋетъ, и҆ соединѧ́етсѧ, по рече́нномꙋ, бг҃ови̑днымъ сꙋ́щымъ и҆ богѡ́мъ ѿ сеѧ̀ вины̀ вели́кїй прилага́етъ, и҆ не нелѣ́потнѡ, въ ꙗ҆вле́нїе: и҆ толи́кѡ не́гли зна́емь бг҃ъ чи́стыми и҆ бо́ги си́ми, є҆ли́кѡ ᲂу҆жѐ зна́етъ и҆̀хъ ра́внымъ ѡ҆́бразомъ, и҆́же є҆стество́мъ, сꙋ́щыѧ положе́нїе бо́ги. Коли́кѡ ᲂу҆́бѡ ᲂу҆подо́билъ бы є҆сѝ, подо́бїе помышлѧ́ѧ; Мно́гѡ вои́стиннꙋ блаже́ни сꙋ́ть къ бж҃їимъ зрѣ́нїємъ и҆ видѣ́нїємъ прили́чнѣ горѣ̀ простира́ющїисѧ со все́ю крѣ́постїю дꙋшѝ и҆ вѣ́дѣнїемъ дꙋхо́внымъ внегда̀ зри́ши непости́жностїю бг҃а, за є҆́же ѻ҆́крестъ є҆гѡ̀ безнача́лїе и҆ неѡб̾ѧ́тїе и҆ неѡпи́санность, и҆ ѿню́дъ присносꙋ́щїе и҆ безконе́чїе всѧ̑ чꙋдесѐ є҆́же въ бз҃ѣ бы́вшѧ пречꙋ̑дна и҆ є҆ли́ка (и҆) ꙗ҆кова̀ ᲂу҆́жаса: ѿто́лѣ дꙋша̀ и҆́хъ рачи́тельнѣ въ слѣ́дъ прилѣплѧ́етсѧ бг҃а, и҆ жела́нїе ѕѣлѡ̀ нестерпи́мо, внегда̀ ви́дѣти бж҃е́ственное лицѐ, и҆ добро́тꙋ є҆гѡ̀ бг҃олѣ́потнꙋю, и҆ста́ѧвше и҆ блаже́ннѡ стра́ждꙋтъ. И҆ тогда̀ про́чее послѣ́дованнѡ си́це ѡ҆чища́ютсѧ и҆ бг҃одѣ́йствїѧ и҆ бг҃ови́дни быва́ютъ и҆ бо́зи, и҆ съ бг҃омъ вои́стиннꙋ соединѧ́ютсѧ. И҆́же вои́стиннꙋ и҆ превосхожде́нїемъ ᲂу҆ви́дѣнныхъ, и҆ послѣ́дованїемъ преесте́ственнагѡ и҆́хъ да́ра ѡ҆боже́нїѧ и҆ бж҃е́ственнагѡ соедине́нїѧ зна́емь бы́въ, чꙋ́днѣ свосхища́етъ предобро́тою, си́хъ всѧ́ко ᲂу҆́мное чꙋ́вство, и҆ всѧ́ко жела́нїе, и҆ ѻ҆́крестъ себѐ ᲂу҆слажда́ющихсѧ и҆́мать, ꙗ҆́кѡ и҆нѣ́хъ а҆́гг҃єлъ неизбѣ́жнѡ пою́щихъ и҆ ѕѣлѡ̀ влѣ́потꙋ: бг҃ъ ста̀ въ со́нмѣ богѡ́въ, посредѣ́ же бо́ги разсꙋ́дитъ¹³⁹⁵. И҆ сїѐ: бг҃ъ богѡ́въ гдⷭ҇и глаго́ла, и҆ призва̀ зе́млю, то́ є҆сть земнорѡ́дныѧ, ѿ востѡ́къ со́лнца до за̑падъ¹³⁹⁶: тѣ́мже и҆ кнѧ́зи лю́дстїи собра́шасѧ съ бг҃омъ а҆враа́млимъ¹³⁹⁷, и҆ по послѣ́дованїю ста́ша ѻ҆́крестъ бг҃а, ꙗ҆́коже серафі́ми стоѧ́хꙋ ѻ҆́крестъ є҆гѡ̀, бж҃е́ствєнна ѡ҆сїѧ̑нїѧ премі́рныхъ та̑инъ прїе́млюще, и҆ держа́щесѧ неѿто́ржнѣ бг҃а, всѣ́хъ безконечнокра́тнѣ и҆з̾ѧ́та сꙋ́ща безконе́чнѣ. А҆́ще ᲂу҆́бѡ чи́стїи се́рдцемъ, по бж҃їю и҆зрече́нїю, блаже́ни, ꙗ҆́кѡ ті́и бг҃а ᲂу҆́зрѧтъ: ка́кѡ не преѧвле́ннѡ блаже́ни зри́тельнїи, ѡ҆чища́еми є҆́же ѿ бж҃їѧ ра́зꙋма ᲂу҆дивле́нїемъ, и҆ къ бж҃їю досто́инствꙋ предспѣ́ѧнїемъ восходѧ́ще; подоба́етъ ᲂу҆̀бо жела́ющымъ блаже́нства, пострада́ти и҆ ѡ҆боже́нїе, и҆ та́кѡ недви́жнѡ ста́ти херꙋві́мски ѻ҆́крестъ бг҃а, (и҆,) зри́тельнагѡ держа́тисѧ всѣ́мъ тща́нїемъ и҆ вѣ́жества и҆ дѣѧ́нїѧ ѡ҆ хрⷭ҇тѣ̀ і҆и҃сѣ гдⷭ҇ѣ.

ч҃а. Оу҆ви́дѣти тѧ̀ и҆ ѕѣлѡ̀ хощꙋ̀, и҆ послѣ́дованнѡ про́чее воспѣ́ти животворѧ́щихъ животѐ, зрѧ́щихъ тѧ̀ нѣ́какѡ гдⷭ҇и бж҃е мо́й. Но (и҆) хотѧ̀ не могꙋ̀, ꙗ҆́коже є҆́сть досто́йно, да рекꙋ̀, и҆ недоꙋмѣ́ю вои́стиннꙋ и҆ сѣ́тꙋю. Ка́кѡ ᲂу҆своѧ́етсѧ ᲂу҆́мъ тебѣ̀, влⷣко тво́рче всепремꙋ́дре! и҆ тѧ̀ є҆ди́наго зрѧ̀, ми́ра наслажда́етсѧ и҆ поко́ѧ є҆мꙋ̀ прили́чна. И҆́бо жела́етъ є҆сте́ственнѣ, ꙗ҆́кѡ ᲂу҆́мъ сы́й, внѣ́шнѧгѡ и҆ ви́димагѡ ѡ҆бноше́нїѧ свобо́ждьсѧ и҆ ᲂу҆праздни́всѧ, ѡ҆ себѣ̀ помышлѧ́ти, и҆ па́че же размышлѧ́ти є҆ди́нственною ско́ростїю вы̑шшаѧ, и҆ прилага́тисѧ вои́стиннꙋ сꙋ́щагѡ въ себѣ̀ невеще́ствїѧ то́ншымъ. Тѣ́мже сло́вомъ є҆сте́ственнымъ са́мъ ѡ҆ себѣ̀ а҆́ки востека́етъ къ всѣ́хъ превы́шшемꙋ, и҆ всѧ́кагѡ невеще́ствїѧ вы́шшемꙋ ꙗ҆́вѣ ꙗ҆́кѡ къ тебѣ̀: и҆ наипа́че же дх҃а ст҃а посо́бїемъ вѣ́рою ꙗ҆́коже лѣ́по є҆́сть помоществꙋ́емь, и҆ си́це про́чее горѣ̀ простира́ѧйсѧ, и҆лѝ па́че вои́стиннꙋ ꙗ҆́кѡ ᲂу҆́мъ сы́й, ѿ мы́сленныхъ, сꙋ́щихъ ѻ҆́крестъ тебѐ а҆́ки ѿ нѣ́кихъ сро́дныхъ горѣ̀ влеко́мь, жела́етъ тѧ̀ и҆ ѕѣлѡ̀ ᲂу҆ви́дѣти со всѧ́цѣмъ ᲂу҆се́рдїемъ дꙋше́внымъ. Какѡва́ же стра́ждетъ чꙋ̑дна и҆ блажє́нна є҆сте́ственнѡ! и҆́бо поне́же є҆стество̀ є҆мꙋ̀, ꙗ҆́коже рѣ́хъ, ᲂу҆́мно сꙋ́ще, и҆ всѣ́хъ созда́нїи наипа́че пари́тельно є҆́сть и҆ ско́ро, и҆ жела́нїе прили́чнѣ и҆́мать мы́слєннаѧ си́рѣчь помышлѧ́ти, ꙗ҆́коже живѡ́тна чꙋ́вствєннаѧ ꙗ҆́сти. Сїе́ бо ѡ҆́бразомъ ра́внымъ є҆́сть є҆́же помышлѧ́ти ᲂу҆мꙋ̀, (ꙗ҆́коже) є҆́же ꙗ҆́сти живѡ́тнымъ чꙋвстви́тєльнымъ. Ѿ є҆́же бо помышлѧ́ти и҆ жи́ти сво́йственнѣ, и҆ растѝ, и҆ наслажда́тисѧ и҆ весели́тисѧ быва́етъ ᲂу҆мꙋ̀, ꙗ҆́коже и҆ чꙋвстви́тєльнымъ живѡ́тнымъ є҆́сть ѿ є҆́же ꙗ҆́сти. Такова́ же стра́ждетъ вои́стиннꙋ ѿ є҆́же дѣ́йствовати, си́рѣчь, ѿ є҆́же помышлѧ́ти: и҆ превосходи́тельнѣ наипа́че, внегда̀ дости́гнетъ дꙋхо́вною твое́ю бла́гостїю несказа́ннѡ, въ тебѣ̀ бы́въ во ᲂу҆слажде́нїе неизрече́нныѧ сла́вы твоеѧ̀ смѣси́вшеесѧ жела́нїе є҆гѡ̀. И҆мꙋ́щее бо къ нѣ́чемꙋ жела́нїе сво́йственно, что́ бы могло̀ и҆ сотвори́ти, влѣ́потꙋ, дости́гше къ привлачи́тельномꙋ чесомꙋ̀, и҆ па́че же таково́мꙋ, ꙗ҆ко́въ ты̀, да є҆щѐ и҆ про́мысла твоегѡ̀ къ то́ль вели́комꙋ, ꙗ҆́коже ты̀, жела́емомꙋ; Ты́ бо цр҃ю̀ всепремꙋ́дре, всеси́льне, преблагі́й гдⷭ҇и, созда́въ живо́тное мы́сленно ᲂу҆́мъ, тако́въ зи́ждеши, ꙗ҆ково́мꙋ ѡ҆ твои́хъ превесели́тисѧ є҆сте́ственнѣ є҆́сть, и҆ неизрече́ннѡ во ᲂу҆держа́нїи бж҃е́ственнагѡ твоегѡ̀ бы́ти со и҆зстꙋпле́нїемъ рече́нїѧ, и҆ а҆́ки неи́стовнѣ нѣ́какѡ завѣща́нїе и҆мѣ́ти къ тебѣ̀ ѿ подо́бна пїѧ́нства бж҃е́ственна вдохнове́нїѧ. И҆ ᲂу҆́мъ ᲂу҆́бѡ та́кѡ добротолюби́бъ кра́йнѣ со́зданъ бы́въ, ѡ҆брѣта́етсѧ: и҆ за є҆́же добротолюби́въ бы́ти ѕѣлѡ̀, по є҆стествꙋ̀ ѿ про́мысла, дѡбрѣ́йшаѧ послѣ́дованнѣ помышлѧ́ти жела́нїе и҆́мать, и҆ при́снѡ вы́шшихъ и҆ пре́днихъ жела́ти, и҆ прира́доватисѧ вои́стиннꙋ ѿ лꙋ́чшихъ. Како́въ же ты̀ семꙋ̀ ꙗ҆влѧ́ешисѧ, и҆ ка́кѡ свосхища́еши є҆го̀ премꙋ́дрѣ, наипа́че раче́нїемъ твоегѡ̀ видѣ́нїѧ ᲂу҆слажда́ема, и҆ всѣ́хъ вкꙋ́пѣ ѿню́дъ кромѣ̀ є҆ди́нагѡ тебѐ и҆зстꙋпа́юща со всѧ́кимъ завѣща́нїемъ дꙋшѝ! Нижѐ разли́ченъ то́кмѡ зри́шисѧ, сладча́йшїй, нижѐ про́стъ: нижѐ ѡ҆б̾ѧ́тъ, ни не ѡ҆б̾ѧ́тъ: нижѐ стра́шенъ ни кро́токъ: не ны́нѣ ᲂу҆́бѡ сїѐ, ны́нѣ же ѻ҆́но: да си́це вои́стиннꙋ ѿсю́дꙋ, (и҆) ѿѻнꙋ́дꙋ, движе́нїе ᲂу҆ма̀ є҆ще́ же и҆ прело́гъ, ничи́мже мо́жетъ ᲂу҆клонѧ́тисѧ къ є҆ди́номꙋ чесомꙋ̀ ѿ сꙋ́щихъ внѣ̀ тебѐ за разли́чїе а҆́кибы, и҆лѝ за простотꙋ̀: за непостиже́нїѧ жела́нїе и҆лѝ постиже́нїѧ: за стра́шность и҆лѝ кро́тость: и҆ ѿню́дъ є҆ди́но бла́го и҆ добро̀ ѡ҆б̾ѧ́тельнѣ сы́й, и҆ всѣ́хъ благи́хъ и҆ до́брыхъ твори́тельно нача́ло пребла́го и҆ предобро̀, ни въ чесо́мъ и҆но́мъ мо́щно є҆́сть вои́стиннꙋ ᲂу҆мꙋ̀ зрѣ́ти и҆ пребыва́ти, и҆ разли́чнѣ и҆ многоѡбра́знѣ весели́тисѧ, то́чїю въ тебѣ̀. Ты́ бо всѧ́чєскаѧ виносло́внѣ и҆́маши въ себѣ̀, и҆ превы́ше всѣ́хъ ѡ҆брѣта́ешисѧ, а҆́ки содѣ́тель предо́бръ безконечнокра́тнѣ безконе́чнѡ. Ѿ сеѧ̀ вины̀ є҆ди́нъ сы́й бж҃е по сꙋществꙋ̀, разли́ченъ зри́шисѧ дѣ́йствы за мно́жество и҆́хъ, и҆ па́ки за вели́чїе и҆́хъ мно́гъ. И҆́бо є҆́же є҆́сть чꙋ́днѣйшее и҆ ᲂу҆жа́сное, ꙗ҆́кѡ а҆́ще и҆ быва́еши ꙗ҆́вѣ постижи́мь: ѿсю́дꙋ па́ки непостижи́мь ѡ҆́бразомъ си́мъ быва́еши. И҆́же бо по сꙋществꙋ̀ ты̀ неѡб̾ѧ́тенъ ѿню́дъ, и҆ по дѣ́йствꙋ, и҆ къ семꙋ̀ (и҆) по си́лѣ не ѡ҆б̾е́млешисѧ нѣ́какѡ. Мѣ́рꙋ бо си́лы твоеѧ̀ кто̀ ѡ҆брѣ́те; Премꙋ́дрость же твою̀, кто̀ ᲂу҆вѣ́де; Бла́гости же твоеѧ̀ пꙋчи́нꙋ кто̀ и҆зслѣ́дова; И҆ ѿню́дъ твои́хъ чесогѡ̀ кто̀ кра́йнѣ чꙋ́вство прїѧ́тъ; а҆́ще по си́мъ и҆нѣ́мъ ѡ҆́бразомъ и҆ постижи́мь сы́й нѣ́какѡ. Тѣ́мже про́чее ᲂу҆́мъ зрѣ́ти ѿ мы́сленныхъ ꙗ҆̀же въ ви́димыхъ начина́ѧ, ше́дъ восхо́дитъ послѣ́дованнѡ ко є҆́же ѻ҆́крестъ тебѐ, сп҃се є҆ди́нственномꙋ, и҆ непости́жномꙋ: и҆ за сла́дкое и҆ ѕѣлѡ̀ весе́лое пости́жнагѡ, и҆ за є҆́же добротолю́бенъ бы́ти, тщи́тсѧ всѣ́мъ тща́нїемъ, и҆ любопри́тсѧ нѣ́какѡ є҆щѐ восходи́ти, є҆ли́кѡ є҆́сть мо́щно высоча́е: а҆ поне́же не дово́ленъ є҆́сть дости́гнꙋти далеча́е, разсмотрѧ́ѧ, ꙗ҆́коже подоба́етъ, и҆збѣга́ющее несꙋмнѣ́ннѡ ꙗ҆́кѡ превышележа́щее, и҆ лꙋ́чшее, мно́га нѣ́какѡ ᲂу҆де́ржанъ послѣ́дованнѡ раченоѧ́тїѧ быва́етъ, и҆ ра́внѣ неи́стовнѣ и҆знеистовлѧ́етсѧ къ тебѣ̀, и҆ жела̑нїѧ воздꙋва́етъ разжжє́нна въ дꙋшѝ, поджо́гъ бж҃е́ственныѧ любвѐ пости́жное непости́жнагѡ творѧ̀: и҆ недоꙋмѣ́нїе, прїѡбрѣ́тенїе раче́нїй вмѣнѧ́ѧ: не па́че ᲂу҆слажда́ющꙋ є҆́же ѻ҆́крестъ тебѐ всепремꙋ́дре пости́жномꙋ, не́жели возжига́ющꙋ пробѣга́ющемꙋ, и҆ недости́жнымъ ра́зꙋма и҆ чꙋди́мꙋ бы́ти ѕѣлѡ̀ и҆ жела́тисѧ ᲂу҆строѧ́ющꙋ. Не то́кмѡ бо что̀ ты̀ є҆сѝ по сꙋществꙋ̀, сїе́ бо всѧ́комꙋ, и҆ ѿню́дъ, и҆ каковы́млибо ѡ҆́бразомъ по преизли́шествꙋ недоꙋмѣ́нно: но (и҆) сꙋще́ственныѧ бж҃е́ственныѧ си́лы и҆ дѣ́йства, и҆ ѿню́дъ зри́мыхъ ѻ҆́крестъ тебѐ бж҃е мы́сленныхъ и҆ бг҃осло́вимыхъ, непости́жное є҆́сть: безконє́чнымъ ꙗ҆́коже рече́сѧ, за вели́чїе, и҆ неиспы́таннымъ сꙋ́щимъ за мно́жество. И҆́бо си̑мъ, а҆́ще и҆ ѿню́дъ въ коне́цъ пости́гнꙋтисѧ не возмо́жно є҆́сть а҆́ки безконє́чнымъ, но мо́щно є҆́же чрез̾ ѡ҆чище́нїе приближе́нїемъ къ тебѣ̀, и҆ взира́нїемъ добро́ты твоеѧ̀, къ свѣтлѣ́йшымъ и҆ проза́рнѣйшымъ зрѣ́нїємъ сꙋ́щихъ ѻ҆́крестъ тебѐ приходи́ти и҆ ѡ҆божа́тисѧ прили́чнѣ. Тѣ́мже и҆ ѡ҆палѧ́еши ᲂу҆ѧзвле́нїемъ рачи́тельнымъ присѣдѧ́ща тебѣ̀ ᲂу҆ма̀ присто́йнѡ, ѡ҆зарѧ́ѧ па́че и҆ па́че є҆го̀, и҆ вои́стиннꙋ вводѧ̀ въ нѣ̑каѧ въ невхѡ́дна та̑йна видѣ̑нїѧ пренебє́сна. ѽ є҆ди́нице препѣ́таѧ, и҆ трⷪ҇це пречестна́ѧ, си́лы и҆ премꙋ́дрости бездо́ннаѧ глꙋбино̀! ка́кѡ ѿ са́магѡ и҆лѝ нача́ла хотѣ́лъ бы кто̀ глаго́лати, и҆лѝ ᲂу҆́бѡ черты̀ въ бж҃е́ственнѣйшїй тво́й вводи́ти мра́къ ѡ҆чище́нна зако́ннѡ ᲂу҆ма̀: преводѧ́щи сегѡ̀ ѿ сла́вы въ сла́вꙋ, мно́жицею ѻ҆ба́че и҆ внꙋ́трь пребыва́юща пресвѣ́тлагѡ мра́ка, не вѣ́мъ, ꙗ҆́коже ты̀ вѣ́си, и҆лѝ во́ньже введе́нъ бы́сть мѡѷсе́й дре́вле, и҆лѝ ꙗ҆́кѡ се́й ѻ҆́нагѡ ѡ҆́бразъ, и҆лѝ ᲂу҆́бѡ сегѡ̀ ѻ҆́нъ: ѻ҆ба́че ꙗ҆́кѡ се́й преѧвле́ннѡ мы́сленъ мра́къ є҆́сть, и҆ ꙗ҆́кѡ въ не́мъ соверша́ютсѧ бж҃е́ственнѣ и҆ преесте́ственнѣ въ та́йнѣмъ дꙋшѝ неизрече́ннѡ дх҃о́внагѡ соедине́нїѧ и҆ любвѐ та̑инства: вводи́мїи со ѡ҆сїѧ́нїемъ просвѣща́ющагѡ дх҃а ѕѣлѡ̀ свѣ́тлѣ ви́дѧтъ.

ч҃в. Кто́ тѧ любо́внѣ гдⷭ҇и трⷪ҇це зрѧ̀ не ра́дꙋетсѧ, цр҃ѧ̀ и҆ непреста́нна ᲂу҆прави́телѧ и҆ раздаѧ́телѧ всѧ́кагѡ коегѡ́либо да́ра и҆ бла́га, и҆ и҆сточа́тельна всѣ́хъ си́хъ сꙋ́щагѡ; И҆ кто̀ ѡ҆ видѣ́нїи вседержи́тельнагѡ влады́чества твоегѡ̀ ра́доватисѧ не мо́жетъ ра́достїю и҆́стинною; Ꙗ҆́вѣ ꙗ҆́кѡ никто́же ника́коже. Ра́звѣ сегѡ̀ ра́ди вои́стиннꙋ блаже́ни чи́стїи се́рдцемъ, ꙗ҆́кѡ ті́и тѧ̀ зрѧ́тъ ѻ҆́комъ дꙋшѝ, ра́дость самове́щнѣ сꙋ́щагѡ и҆зрѧ́днѣ дх҃о́внꙋ. И҆ ра́дꙋютсѧ вои́стиннꙋ съ ра́достїю и҆ мно́гою дꙋшесла́достїю, и҆ несно́сныхъ раче́нїй и҆сполнѧ́ютсѧ мно́жицею, (а҆́ще) и҆ съ тѣле́сными борю́щесѧ ѡ҆бстоѧ́ньми, и҆ бѣсѡ́вскаѧ нашє́ствїѧ стра́ждꙋще. Дх҃о́вный бо свѣ́тъ добро́ты лица̀ твоегѡ̀ гдⷭ҇и, безконечнокра́тнѣ безконе́чнѡ преиз̾ѧ́тъ є҆́сть, є҆́же и҆ ка́колибо къ печа́ли пристꙋпа́ти мїрско́й, є҆мꙋ́же ѡ҆сїѧва́тисѧ въ ни́хъ быва́етъ благода́тїю. Сегѡ̀ ра́ди сла́дость всѧ̀ предхо́дитъ со всѣ́мъ вожделѣ́нїемъ, и҆ ст҃о́е жела́нїе, и҆ неизрече́нное раче́нїе. Ѿ сеѧ̀ вины̀ любы̀ твоѧ̀ нестерпи́мыми преесте́ственными ѻ҆стны̀ ᲂу҆ѧ́звлєны сотворѧ́етъ зрѧ́щыѧ тѧ̀ по нѣ́коемꙋ то́нкꙋ помышле́нїю: ѿ сеѧ̀ вины̀ въ воню̀ мѵ́ръ твои́хъ въ слѣ́дъ тебѐ и҆дꙋ́ще текꙋ́тъ ѕѣ́льною и҆ неѡсла́бною крѣ́постїю дꙋ́шы тѣ́хъ, ѿ ни́хже зри́шисѧ неизрече́нный бж҃е, и҆ въ са́мыѧ себѐ привлека́ти тѧ̀ всѧ́кимъ покꙋша́ютсѧ ᲂу҆хищре́нїемъ, побѣжде́ны ѿню́дъ и҆ и҆ста́ѧвше жела́нїемъ твои́мъ чꙋ́днѣ. Тѣ́мже незабве́ннѣ и҆́мꙋтъ тѧ̀ во ᲂу҆мѣ̀, зави́сѧще ѿ добро́ты твоеѧ̀ преесте́ственныѧ. Па́че же ᲂу҆́бѡ вы́нꙋ и҆ дх҃о́внѣ пе́рвѣе содержи́ши сердца̀ и҆̀хъ и҆ но́щїю вои́стиннꙋ и҆ во днѝ, и҆ со́нъ ѿлетѣ̀ ѿ вѣ́ждей и҆́хъ.

Пе́рвѣе всѣ́хъ начина́ютъ въ тѣлесѝ подвиза́ющагѡсѧ и҆ внима́ющагѡ моли́твѣ движє́нїѧ нѣ̑каѧ а҆́ки взыгра̑нїѧ под̾ ко́жею, ꙗ҆̀же мнѧ́тсѧ нѣ̑кїимъ бы́ти пре́лесть. Прихо́дитъ (же) и҆ теплота̀ ѿ по́чекъ ꙗ҆́кѡ ѡ҆поѧсꙋ́ющи та̑, мни́тсѧ и҆ та̀ пре́лесть бы́ти. Сїѧ̑ же не сꙋ́ть пре́лести, но є҆стества̀ сꙋ́ть, ꙗ҆́коже свѡ́йства ражда́єма ѿ по́двига ѻ҆́нагѡ. А҆́ще ли же кто̀ сла́витъ сїѧ̑, ꙗ҆́кѡ ѿ благода́ти сꙋ́ть, а҆ не ѿ є҆стества̀, сїѐ є҆́сть вои́стиннꙋ пре́лесть. Сїѧ̑ же какѡва́либо (сꙋ́ть) до́лжно є҆́сть подвиза́ющемꙋсѧ не люби́ти си́хъ, но ѿража́ти ѧ҆̀, прихо́дитъ же и҆ и҆́на теплота̀ ѿ се́рдца, и҆ а҆́ще ᲂу҆́бѡ снизхо́дитъ ᲂу҆́мъ въ блꙋ̑дныѧ по́мыслы, пре́лесть є҆́сть вои́стиннꙋ: а҆́ще ли же тѣ́ло ᲂу҆́бѡ всѐ ѿ се́рдца растеплева́етсѧ, ᲂу҆́мъ же є҆́сть чи́стъ и҆ безстра́стенъ, и҆ а҆́кибы прилѣ́пленъ є҆́сть во внꙋ́треннѣйшей глꙋбинѣ̀ се́рдца, сїѐ є҆́сть вои́стиннꙋ благода́ти, а҆ не ѿ пре́лести. Ѻ҆вогда̀ ᲂу҆̀бо быва́етъ въ та́кѡ ѡ҆брѣта́ющемсѧ и҆ по́тъ ѿ мно́гїѧ теплоты̀ быва́ющїѧ въ тѣлесѝ и҆схо́дитъ, и҆ тогда̀ подви́жетсѧ ѿ се́рдца свѧто́е дѣ́йство, взе́млющо а҆́ки ли́стъ нѣ́кїй ѿ се́рдца, и҆ дви́жꙋщо ᲂу҆́мъ ѿ внꙋ́треннѣйшихъ, ꙗ҆́кѡ прилѣ́пши самомꙋ̀ томꙋ̀ бж҃е́ственномꙋ дѣ́йствꙋ, ꙗ҆́коже вопи́ти ча́стѡ: І҆и҃се мо́й, і҆и҃се мо́й. А҆́бїе бо во ѿверзе́нїи се́рдца, сїѐ то́чїю вопїе́тъ ᲂу҆́мъ: І҆и҃се мо́й, и҆ не мо́жетъ всѐ рещѝ ᲂу҆́мъ, є҆́же: Гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀, ѿ ча́стыхъ ѿверзе́нїй се́рдца, но то́чїю, і҆и҃се мо́й. Глаго́лющїи же, ꙗ҆́кѡ всю̀ соверша́ютъ моли́твꙋ во ᲂу҆строе́нїи таково́мъ, прельща́ютсѧ: внегда́ бо прилѣпи́тсѧ ᲂу҆́мъ, ꙗ҆́коже рѣ́хомъ, бж҃е́ственномꙋ дѣ́йствꙋ во внꙋ́треннѣйшее прише́дъ се́рдце, не мо́жетъ мно́жае вопи́ти, ра́звѣ то́чїю, і҆и҃се мо́й. Тогда̀ ᲂу҆̀бо быва́етъ ѿ ст҃ы́ѧ сеѧ̀ моли́твы, и҆ ᲂу҆́жасъ ѿ се́рдца, є҆гда̀ ѿ ст҃а́гѡ дѣ́йства ᲂу҆тѣше́нїе быва́етъ ве́лїе. И҆ тогда̀ ска́четъ, и҆ и҆стека́етъ со сла́достїю и҆ слеза̀ ѿ се́рдца, и҆ тече́тъ ѿ ѻ҆́чїю сладча́йше, и҆ сѐ є҆́сть радостопеча́лїе. Возврѣва́етъ же тогда̀ се́рдце ѿ мно́гагѡ ѻ҆́нагѡ свѧще́ннагѡ дѣ́йства, и҆ быва́етъ всѐ тѣ́ло распале́нно. И҆ вопїе́тъ ᲂу҆́мъ ᲂу҆жаса́емь: Гдⷭ҇и поми́лꙋй. И҆ ꙗ҆́коже є҆ле́й въ сосꙋ́дѣ по́лнѣ разгрѣва́емь ѿ ѻ҆гнѧ̀ ѕѣ́льнѣ, ѿ мно́гагѡ врѣ́нїѧ и҆злива́етсѧ и҆ внѣꙋ́дꙋ: та́кѡ быва́етъ и҆ на се́рдцѣ, внегда̀ возври́тъ сїѐ ѿ бж҃е́ственнагѡ дѣ́йства, и҆злива́етъ и҆ въ тѣлесѝ теплотꙋ̀, и҆ твори́тъ є҆̀ распале́но. И҆ тогда̀ стражда́й сїѐ разꙋмѣ́етъ, ꙗ҆́кѡ внꙋ́трєннѧѧ є҆гѡ̀ ꙗ҆́снѣ и҆зска́чꙋтъ во́нъ. Быва́ютъ же и҆ и҆́на нѣ̑каѧ пресла̑внаѧ на и҆мꙋ́щемъ рече́нное ᲂу҆строе́нїе, є҆́сть є҆гда̀ и҆ свѣ́тъ) тѣ́мже и҆ просвѣще́нїе внꙋтрьꙋ́дꙋ таковы́й смотрѧ́етъ просвѣща́ющо є҆го̀ па́че со́лнца, и҆ ѿ се́рдца и҆сточа́ющо свѣ́тъ. Быва́ютъ же внꙋ́трь се́рдца и҆ и҆́на та̑инства, ꙗ҆̀же не мо́щно и҆ писа́нїю преда́ти: ви́дитъ бо ᲂу҆́мъ тва́рь всю̀, и҆ ᲂу҆жаса́емь ѿ движе́нїѧ ст҃а́гѡ дѣ́йства, и҆ ѿ смотрѧ́емыхъ бж҃е́ственныхъ та́инствъ, возсыла́етъ и҆з̾ глꙋбины̀ се́рдца славослѡ́вїѧ, ꙗ҆̀же не могꙋ̀ писа́нїемъ и҆з̾ѧви́ти. Ве́сь бо быва́етъ человѣ́къ тогда̀ ѡ҆боже́нъ ѿ бж҃е́ственнагѡ ѻ҆́нагѡ движе́нїѧ: внѣ́ же всѧ́кагѡ ве́щнагѡ и҆ чꙋ́вственнагѡ всегѡ̀. И҆ ꙗ҆́кѡ неꙋдержи́мь ѿ ра́дости, ꙗ҆́коже нѣ́кїй мно́гимъ вїно́мъ погрꙋже́нъ. Та́же по си́хъ восхища́етсѧ во видѣ̑нїѧ бж҃е́ствєнна, и҆ ви́дитъ та̑инства стра̑шна, ꙗ҆̀же не могꙋ̀ написа́ти тонкоча́стнѣ: ви́дитъ бо ᲂу҆́мъ видѣ̑нїѧ бж҃е́ствєнна, ви́дитъ же и҆ наслаждє́нїѧ пра́ведныхъ, и҆ ра̑йскїѧ добрѡ́ты. И҆ є҆щѐ высоча́йше восхища́емь ᲂу҆мо́мъ, ви́дитъ на небесѝ ᲂу҆жа̑снаѧ и҆ пресла̑внаѧ та̑инства, и҆ є҆ли́кѡ ѡ҆чища́етсѧ человѣ́къ ѿ прилѡ́гъ сопроти́вныхъ, толи́кѡ є҆щѐ ви́дитъ и҆ бѡ́льша си́хъ, ꙗ҆́коже є҆мꙋ̀ дарова́лъ всест҃ы́й дх҃ъ, є҆мꙋ́же сла́ва во вѣ́ки, а҆ми́нь.

Моли́тва непреста́нна є҆́сть, є҆́же призыва́ти и҆́мѧ бж҃їе вы́нꙋ. А҆́ще ᲂу҆́бѡ бесѣ́дꙋетъ кто̀, а҆́ще сѣди́тъ, а҆́ще хо́дитъ, а҆́ще дѣ́лаетъ, а҆́ще ꙗ҆́стъ, а҆́ще что̀ и҆́но твори́тъ. На всѧ́ко бо вре́мѧ, и҆ на всѧ́комъ мѣ́стѣ подоба́етъ призыва́ти и҆́мѧ бж҃їе, ꙗ҆́коже пи́шетъ: непреста́ннѡ моли́тесѧ¹³⁹⁸. Си́це бо потреблѧ́етсѧ и҆скꙋше́нїе вра́жїе: моли́тисѧ же тре́бѣ є҆́сть комꙋ̀ се́рдцемъ, пѣ́ти и҆ ᲂу҆сты̀, є҆гда̀ наединѣ̀ є҆́сть. А҆́ще ли же кто̀ є҆́сть на кꙋпи́лищи, и҆лѝ съ нѣ́кїими ѡ҆брѣта́ѧсѧ, не тре́бѣ є҆́сть ᲂу҆сты̀ пѣ́ти, но є҆ди́ною мы́слїю. Подоба́етъ же и҆ ѻ҆́чи блюстѝ, и҆ до́лꙋ зрѣ́ти ра́ди паре́нїѧ, и҆ сѣ́тей вра́жїихъ. Мл҃тва бо соверше́нна є҆́сть є҆́же глаго́лати къ бг҃ꙋ без̾ паре́нїѧ ᲂу҆́мнагѡ, внегда̀ собира́ти всѧ̑ помышлє́нїѧ съ чꙋ́вствами. Наставлѧ́етъ же въ сїѐ человѣ́ка, є҆́же ᲂу҆мертви́тисѧ ѿ всѧ́кагѡ человѣ́ка и҆ мі́ра, и҆ всѣ́хъ ꙗ҆̀же въ не́мъ: моли́тва же разꙋмѣва́етсѧ, ꙗ҆́кѡ премѣнѧ́етъ смꙋщє́нїѧ, є҆гда̀ ви́дитъ, ꙗ҆́кѡ весели́тсѧ ᲂу҆́мъ просвѣ́щьсѧ ѡ҆ гдⷭ҇ѣ, зна́менїе же є҆́сть, а҆́ще коснꙋ́сѧ комꙋ̀, ꙗ҆́кѡ къ томꙋ̀ не смꙋща́етсѧ, а҆́ще напа́ствꙋетъ є҆гѡ̀ и҆ ве́сь мі́ръ: И҆́бо соверше́ннѣ молѧ́йсѧ, ᲂу҆мерщвлѧ́етсѧ поко́ю своемꙋ̀ и҆ мі́рꙋ. Моли́тва бо со смире́нїемъ и҆ трꙋдо́мъ и҆ слеза́ми, и҆ є҆́же не твори́ти во́лю свою̀, пресѣка́етъ воспомина́нїе, ꙗ҆̀же (кто̀) что̀ содѣ́ѧ, и҆лѝ ви́дѣ, и҆лѝ слы́ша, и҆лѝ глаго́ла: и҆́бо и҆спра́вивше сїѧ̑ ѻ҆тцы̀, кромѣ́ же трꙋда̀ и҆ сле́зъ, и҆ ѿсѣче́нїѧ во́лѧмъ не и҆спра́виша. Моли́твѣ и҆ пѣ́нїю не то́чїю ᲂу҆мо́мъ подоба́етъ быва́ти, но и҆ ᲂу҆стна́ми. И҆́бо проро́къ дв҃дъ глаго́летъ: Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀¹³⁹⁹, и҆ а҆по́столъ показꙋ́ѧ, ꙗ҆́кѡ и҆́щꙋтсѧ и҆ ᲂу҆стнѣ̀, речѐ, се́рдце и҆ пло́дъ ᲂу҆сте́нъ¹⁴⁰⁰, и҆ ꙗ҆̀же по си́хъ.

Преподо́бный ѻ҆те́цъ на́шъ фїлимо́нъ, и҆з̾ бг҃оно́сныхъ ѻ҆тє́цъ тре́звеннѣйшїй и҆ плачли́вѣйшїй бѧ́ше: въ кі́ихъ же процвѣтѐ лѣ́тѣхъ, по́вѣсть на́мъ ѡ҆ се́мъ не и҆з̾ѧвѝ. А҆ ꙗ҆́кѡ благоговѣ́йнѣйшїй и҆ многоискꙋ́снѣйшїй, и҆ безмо́лвїе, а҆́ще и҆́нъ кто̀ ѿ ста́рєцъ, ѕѣлѡ̀ лю́бѧщїй бѧ́ше, и҆ вели́кагѡ а҆рсе́нїа и҆́скреннѣйшїй подража́тель, ѿ настоѧ́щагѡ сло́ва хотѧ́щымъ ви́дѣти мо́щно.

Въ моли́твахъ бо и҆ моле́нїихъ но́щь и҆ де́нь, въ свое́й ѿше́льнической кꙋ́щи, ꙗ҆́кѡ въ нѣ́коемъ простра́нномъ черто́зѣ пребыва́ѧ, и҆ приснотекꙋ́щими сле́зъ и҆ рыда́нїй и҆сто́чниками, ча́стѣ ѡ҆мыва́ѧ себѐ, не то́кмѡ, є҆́же кі́йлибо въ себѣ̀ поро́къ и҆мѣ́ѧше, но и҆ є҆́же добрѣ́йшїѧ бѧ́ше ча́сти, и҆ всѧ̑ вкꙋ́пѣ чꙋ́вствєннаѧ и҆ мы́слєннаѧ бг҃олю́бнѣ превозше́дъ, а҆́ки глꙋ́хъ и҆ нѣ́мъ предстоѧ́ше бг҃ꙋ, и҆ ди́внагѡ бж҃е́ственныѧ тогѡ̀ бл҃года́ти сподо́бисѧ прича́стникъ бы́ти просвѣще́нїѧ, ѿ негѡ́же а҆́ки ѿ со́лнечнагѡ сїѧ́нїѧ, и҆спыта́нїемъ, разсꙋжде́нїемъ, прови́дѣнїемъ, и҆ прозорли́вствомъ, кра́йнѣйшемꙋ прилѣжа̀ безмо́лвїю и҆ молча́нїю, ѻ҆би́льнѡ ѡ҆богатѝ себѐ, присносла́вимый фїлимо́нъ преподо́бный: свидѣ́тель же рече́нныхъ достовѣ́рный предлежа́щее сїѐ ѡ҆ не́мъ сло́во, въ не́мже сщ҃е́ннагѡ трезве́нїѧ разсꙋди́тельнѣйшее ᲂу҆че́нїе, а҆́ще и҆ во и҆но́мъ ко́емъ сло́вѣ, а҆́ки и҆спещре́нна и҆ бг҃оистка́нна порфѵ́ра въ и҆зѧ́щнѣйшꙋю сотчева́етсѧ добро́тꙋ. Є҆ли́кѡ и҆ къ дѣѧ́нїю сопростира́етсѧ, и҆ є҆ли́кѡ ᲂу҆мозрѣ́нїю сопоспѣшествꙋ́етъ, долговре́меннымъ дѣ́лы и҆спыта́нїемъ и҆́стинꙋ ᲂу҆твержда́ѧ. А҆́ще ᲂу҆́бѡ комꙋ̀ вожделѣ́нно є҆́сть, ѡ҆скверне́нныѧ, и҆ без̾ѡбра́зныѧ страсте́й ѻ҆де́жды, є҆́же то́жде рещѝ, ве́тхагѡ совлещи́сѧ человѣ́ка, въ свѣ́тлое же безстра́стїѧ и҆ благода́ти ѡ҆блещи́сѧ ѡ҆дѣѧ́нїе, є҆́же є҆́сть но́вый во хрⷭ҇тѣ̀ і҆и҃сѣ человѣ́къ, то́й ѡ҆ се́мъ ча́стѣ поꙋча́ѧйсѧ, и҆ по си́лѣ сами́мъ поꙋча́ємаѧ дѣ́ломъ и҆сполнѧ́ѧй, жела́емое ᲂу҆до́бь полꙋчи́ти и҆́мать.

Рѣ́хъ ѡ҆ а҆́ввѣ фїлимо́нѣ ѿше́лницѣ, ꙗ҆́кѡ заключѝ себѐ въ нѣ́коей пеще́рѣ ма́лѡ ѿстоѧ́щей ѿ ла́ѵры, рѡмі́ева и҆менꙋ́емой: и҆ трꙋжда́шесѧ въ моли́твенныхъ по́двигахъ, ѻ҆́ное въ мы́сли свое́й себѣ̀ приповѣ́дꙋѧ, є҆́же вели́каго а҆рсе́нїа слы́ша къ себѣ̀ самомꙋ̀ глаго́люща: Фїлимо́не, чесѡ̀ ра́ди и҆зше́лъ є҆сѝ; Пребыва́ше ᲂу҆́бѡ въ пеще́рѣ вре́мѧ дово́льно дѣ́лаѧ ве́рвь, и҆ плетѧ̀ кѡ́шницы, даѧ́ше і҆кѡно́мꙋ, и҆ ѿ негѡ̀ прїима́ше хлѣ́бы ма́лы въ пи́щꙋ: ничесѡ́же бо ꙗ҆дѧ́ше, кромѣ̀ хлѣ́ба съ со́лїю, и҆ сїѐ чрез̾ мнѡ́ги дни̑. Ѿсю́дꙋ ꙗ҆́вѣ є҆́сть, ꙗ҆́кѡ ѿню́дъ пло́ти промышле́нїѧ не творѧ́ше: внꙋ́трь бж҃е́ственнагѡ бы́сть просвѣще́нїѧ. И҆ ѿтꙋ́дꙋ неизрече́ннагѡ тайновѣ́дѣнїѧ сподоблѧ́ѧсѧ, въ весе́лїи пребыва́ше. Въ це́рковь въ сꙋббѡ́тꙋ и҆ въ недѣ́лю, є҆ди́нъ и҆ въ размышле́нїи хожда́ше, никомꙋ́же попꙋща́ѧ приближа́тисѧ къ себѣ̀, во є҆́же не ѿто́рженнꙋ бы́ти ᲂу҆мꙋ̀ є҆гѡ̀ ѿ дѣ́ланїѧ, є҆́же и҆мѣ́ѧше. Въ це́ркви же ста́въ въ ᲂу҆глꙋ̀, и҆ лице́мъ до́лꙋ пони́къ, и҆сто́чники сле́зъ и҆спꙋща́ше, непреста́нное и҆мѣ́ѧ сѣ́тованїе, и҆ па́мѧть сме́рти, и҆ ѡ҆́бразъ ст҃ы́хъ ѻ҆тє́цъ, и҆ наипа́че а҆рсе́нїа вели́кагѡ, є҆мꙋ́же и҆ послѣ́довати тща́шесѧ. Бы́вшей же є҆́реси во а҆леѯандрі́и, и҆ во ѻ҆кре́стныхъ тоѧ̀ мѣ́стѣхъ, ᲂу҆дали́сѧ, и҆ ѿи́де въ ла́ѵрꙋ нїкано́рова и҆менꙋ́емꙋю. И҆ воспрїѧ́въ є҆го̀ паѵлі́нъ бг҃олюби́вѣйшїй, и҆ ѡ҆предѣли́въ є҆мꙋ̀ въ ѻ҆со́бь ѿстоѧ́щемъ ѿ себѐ бы́ти мѣ́стѣ, во всѧ́комъ є҆го̀ ᲂу҆строѧ́етъ безмо́лвїи. Чрез̾ цѣ́лой бо го́дъ никомꙋ́же попꙋстѝ ѿню́дъ приходи́ти къ немꙋ̀, но нижѐ са́мъ стꙋжѝ є҆мꙋ̀ когда̀, то́чїю во вре́мѧ, въ не́же нꙋ́ждный хлѣ́бъ даѧ́ше. Наста́вшꙋ ᲂу҆́бѡ ст҃о́мꙋ хрⷭ҇то́вꙋ воскресе́нїю, въ собра́нїи бы́въ посредѣ̀ и҆́хъ, и҆дѣ́же бы́вшꙋ ѡ҆ пꙋсты́нномъ житїѝ разглаго́льствїю, и҆ разꙋмѣ̀ паѵлі́нъ блаже́нный, ꙗ҆́кѡ и҆ благоговѣ́йнѣйшемꙋ бра́тꙋ, сїѐ є҆́сть намѣ́ренїе и҆зѧ́щнѣйшее, словеса̀ є҆мꙋ̀ внꙋша́етъ подви́жничєскаѧ ѿ ѻ҆тє́цъ прє́даннаѧ, пи̑саннаѧ и҆ непи̑саннаѧ, всѣ́ми показꙋ́ѧ, ꙗ҆́кѡ кромѣ̀ соверше́ннагѡ безмо́лвїѧ, не возмо́жно ᲂу҆годи́ти бг҃ꙋ, ꙗ҆́коже нѣ́гдѣ и҆ мѡѷсе́й бж҃е́ственный ѻ҆те́цъ любомꙋ́дрствоваше: ꙗ҆́кѡ безмо́лвїе ражда́етъ по́двигъ: по́двигъ же ражда́етъ пла́чь: пла́чь же, стра́хъ: стра́хъ же, смире́нїе: смире́нїе, прозрѣ́нїе: прозрѣ́нїе, любо́вь: любо́вь же твори́тъ дꙋ́шꙋ безболѣ́зненнꙋ и҆ безстра́стнꙋ, и҆ тогда̀ познае́тъ человѣ́къ, ꙗ҆́кѡ не дале́че є҆́сть ѿ бг҃а. Речѐ ᲂу҆́бѡ є҆мꙋ̀: подоба́етъ тѝ безмо́лвїемъ соверше́ннѡ ѡ҆чи́стити ᲂу҆́мъ, и҆ да́ти є҆мꙋ̀ непреста́нное дѣ́ланїе дх҃о́вное. Ꙗ҆́коже бо ѻ҆́ко взира́етъ на чꙋ́вствєннаѧ, и҆ ᲂу҆дивлѧ́етсѧ ви́димой ве́щи: си́це и҆ чи́стый ᲂу҆́мъ взира́етъ на ᲂу҆́мнаѧ, и҆ ѿ дꙋхо́внагѡ видѣ́нїѧ восхища́етсѧ, и҆ неꙋдо́бь ѿто́рженъ быва́етъ. И҆ є҆ли́кѡ безмо́лвїемъ ѡ҆бнажа́етсѧ страсте́й, и҆ ѡ҆чища́етсѧ, толи́кѡ сподоблѧ́етсѧ разꙋмѣ́нїѧ. Тогда́ же соверше́нъ є҆́сть ᲂу҆́мъ, є҆гда̀ є҆сте́ственный сво́й ра́зꙋмъ попере́тъ, и҆ соедини́тсѧ съ бг҃омъ. Занѐ ца́рское и҆мѣ́ѧ досто́инство, ѡ҆бнища́ти къ томꙋ̀ не те́рпитъ, нижѐ совоздвиза́етсѧ до́льными вожделѣ́нїи, а҆́ще и҆ всѧ̑ є҆мꙋ̀ ца̑рствїѧ да́рствꙋеши. А҆́ще ᲂу҆́бѡ хо́щеши на всѧ̑ сїѧ̑ взы́ти добродѣ́тєли, не бꙋ́ди попечи́теленъ ни ѡ҆ є҆ди́номъ же человѣ́цѣ. Бѣжа̀ бѣ́гай мі́ра, и҆ ше́ствꙋй ᲂу҆се́рднѡ пꙋте́мъ ст҃ы́хъ, и҆ и҆мѣ́й ѡ҆́бразъ небрего́мый, и҆ ѻ҆де́ждꙋ смире́ннꙋ и҆ хꙋ́дꙋ: и҆ нра́въ про́стъ, и҆ сло́во про́сто, и҆ стꙋпа́нїе нетщесла́вно, и҆ непритво́рный гла́съ, и҆ въ нищетѣ̀ жи́ти, и҆ презрѣ́ннꙋ бы́ти ѿ всѣ́хъ, и҆ па́че всегѡ̀ хране́нїе и҆ трезвѣ́нїе ᲂу҆ма̀, и҆ во всѣ́хъ тѣснота́хъ терпѣ́нїе, и҆ всѧ̑, ꙗ҆̀же сꙋ́ть блага̑ѧ, невреди̑ма храни́ти и҆ недви̑жима. И҆ блюдѝ ѻ҆па́снѡ ничто́же ѿ привходѧ́щихъ сласте́й прїима́ти: дꙋшє́вныѧ бо стра̑сти, безмо́лвїемъ ᲂу҆крощава́ютсѧ, возжига́ємыѧ же и҆ возбꙋжда́ємыѧ па́че свирѣ́пствовати ѡ҆быко́ша, и҆ и҆мꙋ́щихъ ты̑ѧ мно́жае согрѣша́ти понꙋжда́ютъ. И҆ ꙗ҆́коже тѣлє́сныѧ ра̑ны поврежда́емы и҆ раздира́емы неꙋдо́вь и҆злѣчи́мы быва́ютъ: мо́жетъ ᲂу҆́бѡ и҆ сло́во пра́здно ᲂу҆дали́ти ᲂу҆́мъ ѿ па́мѧти бж҃їей, бѣсѡ́мъ на сїѐ нꙋ́дѧщымъ, и҆ чꙋ́вствамъ тѣ̑мъ повинꙋ́ющымсѧ: вели́къ бо по́двигъ и҆ стра́хъ дꙋ́шꙋ храни́ти. Подоба́етъ ᲂу҆̀бо тебѣ̀ ᲂу҆дали́тисѧ ѿ всегѡ̀ мі́ра, и҆ ѿто́ргнꙋти дꙋ́шꙋ ѿ любле́нїѧ тѣлесѐ, ничесогѡ̀ и҆мꙋ́щꙋ своегѡ̀, ни гра́да, ни ке́ллїи, и҆ бы́ти несребролюби́вꙋ, нестѧжа́тельнꙋ, непопечи́тельнꙋ, недрꙋжелю́бнꙋ, человѣ̑ческимъ дѣлѡ́мъ неѡбꙋче́ннꙋ, смиренномꙋ́дрꙋ, милосе́рдꙋ, бла́гꙋ, кро́ткꙋ, безмо́лвнꙋ, гото́вꙋ воспрїѧ́ти се́рдцемъ привходѧ̑щаѧ впечатлѣ̑нїѧ ѿ бж҃е́ственнагѡ ра́зꙋма. Не бо̀ на воскꙋ̀ возмо́жно писа́ти, не пре́жде загла́дившꙋ лежа́щыѧ черты̑: семꙋ́ бо на́съ наꙋча́етъ вели́кїй васі́лїй. Таковы́й бы́сть ли́къ ст҃ы́хъ, соверше́ннѡ мїрска́гѡ жи́тельства ᲂу҆дале́нный, и҆ небе́сное мꙋдрова́нїе несмꙋще́нно въ себѣ̀ хранѧ́ще, бж҃е́ственными зако́ны просвѣти́шасѧ, и҆ благочести́выми дѣ́лы и҆ словесы̀ ѡ҆блиста́ша, ᲂу҆мертви́въ ᲂу҆́ды, ꙗ҆̀же на землѝ, воздержа́нїемъ, и҆ стра́хомъ бж҃їимъ и҆ любо́вїю. Непреста́нною бо моли́твою, и҆ поꙋче́нїемъ бж҃е́ственныхъ писа́нїй ѿверза́ютсѧ дꙋшѝ ᲂу҆́мныѧ ѻ҆́чи, и҆ зрѧ́тъ цр҃ѧ̀ си́лъ, и҆ быва́етъ ра́дость ве́лїѧ, и҆ жела́нїе горѧ́щее возжиза́емое въ дꙋшѝ ѕѣ́льнѣ: взима́ющейсѧ и҆ пло́ти ѿ дх҃а, быва́етъ человѣ́къ ве́сь дꙋхо́венъ. Сїѧ̑ блаже́ннагѡ безмо́лвїѧ, и҆ тѣснѣ́йшагѡ подви́жническагѡ житїѧ̀ дѣ̑латели, и҆̀же ѿ всѧ́кагѡ человѣ́ческагѡ ᲂу҆тѣше́нїѧ себѐ сами́хъ ᲂу҆дали́вше, є҆ди́ни съ є҆ди́нѣмъ, и҆́же на нб҃сѣ́хъ, влⷣкою чи́стѣ разглаго́льствꙋютъ. Сїѧ̑ ᲂу҆слы́шавъ то́й бг҃олюби́вый бра́тъ, и҆ бж҃е́ственною любо́вїю ᲂу҆ѧзви́вши дꙋ́шꙋ, постиза́етъ съ ни́мъ ски́тъ, и҆дѣ́же вели́цыи ѿ ст҃ы́хъ ѻ҆тє́цъ благоче́стїѧ тече́нїе соверши́ша: жи́ша же въ ла́ѵрѣ ст҃а́гѡ і҆ѡа́нна ко́лова, попече́нїе ѡ҆ себѣ̀ преда́вше строи́телю ла́ѵры, за є҆́же хотѣ́ти и҆̀мъ безмо́лвнѡ пребыва́ти: и҆ пребыва́хꙋ бж҃їею благода́тїю во всѧ́комъ безмо́лвїи, и҆схождє́нїѧ неизмѣ́ннѡ творѧ́ще въ сꙋббѡ́тꙋ и҆ недѣ́лю: прѡ́чїѧ же дни̑ седми́цы, въ ке́ллїи пребыва́хꙋ, моли̑твы и҆ слꙋжє́нїѧ кі́йждо ѻ҆со́бь творѧ́ще. Бѧ́ше же ст҃а́гѡ ста́рца слꙋже́нїе сицево̀: въ нощѝ ᲂу҆́бѡ поѧ́ше всю̀ ѱалти́рь, и҆ пѣ̑сни безмѧте́жнѡ, и҆ глаго́ла є҆ди́но зача́ло ѿ є҆ѵⷢ҇лїа. И҆ пото́мъ сѣдѧ́ше, внꙋ́трь себѐ глаго́лѧ: гдⷭ҇и поми́лꙋй, непреста́ннѡ си́це и҆ на мно́го вре́мѧ, ꙗ҆́кѡ ᲂу҆жѐ не мощѝ ктомꙋ̀ гла́снѣ рещѝ, и҆ а҆́бїе сна̀ прїѡбща́шесѧ. И҆ си́це па́ки во ᲂу҆́трїи поѧ́ше пе́рвый ча́съ, сѣдѧ́ше же на мѣ́стѣ свое́мъ зрѧ̀ къ восто́кꙋ, и҆ поѧ̀ премѣ́ннѣ: и҆ па́ки и҆з̾ꙋ́стнѡ чтѧ̀ ѿ а҆по́стола, и҆ ѿ є҆ѵⷢ҇лїа. И҆ си́це соверша́ше по всѧ́къ де́нь непреста́ннѡ поѧ̀ и҆ молѧ́сѧ, и҆ небе́снагѡ наслажда́ѧсѧ видѣ́нїѧ, ꙗ҆́коже мно́гажды къ видѣ́нїю ᲂу҆мꙋ̀ є҆гѡ̀ возводи́тисѧ и҆ не вѣ́дѣти, а҆́ще на землѝ бѧ́ше. Ви́дѧ ᲂу҆́бѡ є҆го̀ бра́тъ си́це въ непреста́нномъ бг҃ослꙋже́нїи трꙋжда́ющасѧ, и҆ бж҃е́ственными помышле́нїи всѧ́чески и҆змѣнѧ́ющасѧ, речѐ къ немꙋ̀: ты́ ли ѻ҆́тче, въ толи́цѣй ста́рости та́кѡ трꙋди́шисѧ, ᲂу҆мерщвлѧ́ѧ тѣ́ло своѐ и҆ порабоща́ѧ є҆̀; Ѻ҆́нъ же ѿвѣща́въ, речѐ: вѣ́рꙋй ча́до, толи́ко ᲂу҆се́рдїе и҆ жела́нїе къ слꙋже́нїю вложѝ бг҃ъ въ дꙋ́шꙋ мою̀, ꙗ҆́кѡ не могꙋ̀ ѕѣ́льнагѡ тоѧ̀ напрѧже́нїѧ и҆спо́лнити. Любо́вь же ꙗ҆́же къ бг҃ꙋ, и҆ бꙋ́дꙋщихъ бла̑гъ ᲂу҆пова́нїе, тѣле́снꙋю не́мощь побѣжда́ютъ. Си́це всѐ жела́нїе воскриле́нно во ᲂу҆мѣ̀ и҆мѧ́ше на не́бо: и҆ не во и҆на̑ѧ то́чїю времена̀, но и҆ въ са́мое трапе́зы вре́мѧ. Нѣ́когда ᲂу҆́бѡ сожи́тельствꙋѧ съ ни́мъ бра́тъ нѣ́кїй, вопросѝ є҆го̀: ка́ѧ бы видѣ́нїѧ была̀ та́йна; Є҆гда́ же ᲂу҆вѣ́дѣти хотѧ́ща, и҆ прилѣжа́ща є҆го̀ ви́дѣ, речѐ къ немꙋ̀: глаго́лю тѝ, ча́до, ꙗ҆́кѡ а҆́ще кі́йлибо ᲂу҆́мъ ѡ҆чи́ститсѧ соверше́ннѣ, са́мыхъ слꙋже́бныхъ си́лъ, и҆ чинѡ́въ видѣ̑нїѧ ѿкрыва́етъ томꙋ̀ бг҃ъ. Вопроси́ же є҆го̀ и҆ ѡ҆ се́мъ: чесѡ̀ ра́ди ѻ҆́тче, па́че всѧ́кагѡ бж҃е́ственнагѡ писа́нїѧ ѱалти́рїю соꙋслажда́ешисѧ, и҆ чесѡ̀ ра́ди, поѧ̀ ти́хѡ, ꙗ҆́кѡ съ нѣ́кїимъ разглаго́льствꙋѧ словесы̀ мни́шисѧ; Ѻ҆́нъ же къ немꙋ̀ речѐ: глаго́лю тѝ, ча́до, си́це пред̾изѡбразѝ бг҃ъ си́лꙋ ѱалмѡ́въ въ смире́ннѣй дꙋшѝ мое́й, ꙗ҆́коже и҆ во проро́цѣ дв҃дѣ: и҆ ѿлꙋчи́тисѧ ѿ сла́дости многоразли́чныхъ, ꙗ҆̀же въ ни́хъ, видѣ́нїи не могꙋ̀, все́ бо бж҃е́ственное писа́нїе ѡ҆б̾е́млютъ. И҆ сїѧ̑ ᲂу҆́бѡ мно́гѡ принꙋжда́емь по́льзы ра́ди, со мно́гимъ смиренномꙋ́дрїемъ, вопроси́вшемꙋ и҆сповѣ́да. Бра́тъ нѣ́кїй и҆́менемъ і҆ѡа́ннъ, ѿ страны̀ примо́рскихъ, прише́дъ пристꙋпѝ къ ст҃о́мꙋ семꙋ̀ и҆ вели́комꙋ ѻ҆тцꙋ̀ фїлимо́нꙋ, и҆ держа́въ є҆го̀ за но́зѣ, речѐ къ немꙋ̀: что̀ сотворю̀ ѻ҆́тче, да спасꙋ́сѧ; зрю́ бо, ꙗ҆́кѡ ᲂу҆́мъ ѡ҆бхо́дитъ и҆ пари́тъ сѣ́мѡ и҆ ѻ҆ва́мѡ, въ нѧ̑же не подоба́етъ. Ѻ҆́нъ же ма́лѡ помолча́въ, речѐ: сїѧ̀ стра́сть ѿ внѣ́шнихъ є҆́сть, и҆ пребыва́етъ: поне́же є҆щѐ не и҆́маши соверше́нныѧ любвѐ къ бг҃ꙋ, є҆ще́ бо не прише́лъ є҆сѝ въ теплотꙋ̀ любвѐ и҆ позна́нїѧ є҆гѡ̀. Глаго́летъ бра́тъ: и҆ что̀ сотворю̀ ѻ҆́тче; Глаго́ла є҆мꙋ̀: и҆дѝ ᲂу҆жѐ, и҆мѣ́й сокрове́нно поꙋче́нїе въ се́рдцѣ твое́мъ, є҆́же мо́жетъ ᲂу҆́мъ тво́й ѡ҆чи́стити ѿ си́хъ. Бра́тъ не ᲂу҆разꙋмѣ́въ глаго́лемыхъ, ненаꙋче́нъ сы́й, глаго́ла ста́рцꙋ: что́ є҆сть сокрове́нное поꙋче́нїе ѻ҆́тче; И҆ глаго́ла къ немꙋ̀: и҆дѝ, трезви́сѧ въ се́рдцѣ твое́мъ, и҆ въ мы́сли твое́й тре́звеннѣй со стра́хомъ и҆ тре́петомъ глаго́ли: гдⷭ҇и і҆и҃се хрⷭ҇тѐ поми́лꙋй мѧ̀! И҆́бо и҆ блаже́нный дїадо́хъ новонача̑льнымъ си́це предаѧ́ше. Ѿше́дъ ᲂу҆̀бо, и҆ содѣ́йствомъ бж҃їимъ, и҆ ѻ҆тца̀ моли́твами безмо́лствовавъ, ᲂу҆слади́сѧ сицевы́мъ поꙋче́нїемъ вма́лѣ. Ꙗ҆́коже а҆́бїе ѿстꙋпѝ ѿ негѡ̀, и҆ не можа́ше сїѐ тре́звеннѣ твори́ти и҆ моли́тисѧ, прише́дъ па́ки къ ста́рцꙋ, слꙋчи́вшеесѧ є҆мꙋ̀ возвѣстѝ. Ѻ҆́нъ же глаго́ла є҆мꙋ̀: сѐ ᲂу҆жѐ позна́лъ є҆сѝ стезю̀ безмо́лвїѧ и҆ дѣ́ланїѧ, и҆ ꙗ҆́же ѿ сегѡ̀ сла́дость и҆скꙋси́лъ є҆сѝ, и҆мѣ́й ᲂу҆̀бо въ се́рдцѣ твое́мъ сїѐ всегда̀: а҆́ще ꙗ҆́си, а҆́ще пїе́ши, а҆́ще въ бесѣ́дѣ съ нѣ́кїими ѡ҆брѣта́ешисѧ, а҆́ще внѣ̀ ке́ллїи, а҆́ще на пꙋтѝ, да не мимои́детъ тебѐ, тре́звенною мы́слїю и҆ непреле́стнымъ ᲂу҆мо́мъ, се́ю моли́твою моли́тисѧ, и҆ пѣ́ти и҆ поꙋча́тисѧ въ моли́твмъ и҆ ѱалмѣ́хъ. Но и҆ въ са́мой нꙋ́жднѣй потре́бѣ твое́й, да не пра́здненъ бꙋ́детъ ᲂу҆́мъ тво́й, сокрове́ннѡ поꙋча́ѧсѧ и҆ молѧ́сѧ. Си́це бо возмо́жеши ᲂу҆разꙋмѣ́ти глꙋбины̑ бж҃е́ственнагѡ писа́нїѧ, и҆ ꙗ҆́же въ не́мъ сокрове́ннꙋю си́лꙋ, и҆ да́ти непреста́нное ᲂу҆мꙋ̀ дѣ́ланїе, ꙗ҆́кѡ да и҆спо́лниши а҆по́стольско сло́во сказꙋ́ющее: непреста́ннѡ моли́тесѧ¹⁴⁰¹. Внима́й ᲂу҆́бѡ прилѣ́жнѡ, и҆ хранѝ се́рдце твоѐ є҆́же не прїѧ́ти лꙋка́вы по́мыслы, и҆лѝ какѡвы́ѧ когда́либо сꙋ́єтныѧ и҆ неполє́зныѧ: но всегда̀ и҆ спѧ̀, и҆ востаѧ̀, и҆ ꙗ҆дѧ̀, и҆ пїѧ̀, и҆ бесѣ́дꙋѧ, се́рдце твоѐ сокрове́ннѡ въ мы́сли, ѻ҆вогда̀ ᲂу҆́бѡ да поꙋча́етсѧ во ѱалмѣ́хъ, ѻ҆вогда́ же да мо́литсѧ си́це: гдⷭ҇и і҆и҃се хрⷭ҇тѐ, сн҃е бж҃їй, поми́лꙋй мѧ̀! И҆ па́ки: є҆гда̀ пое́ши ѧ҆зы́комъ, внима́й не и҆на̑ѧ глаго́лати ᲂу҆сты̀, и҆ во и҆ны́хъ пари́ти мы́слїю. И҆ па́ки вопросѝ бра́тъ: мнѡ́гаѧ во снѣ́хъ тщє́тнаѧ мечта̑нїѧ зрю̀. Ста́рецъ же къ немꙋ̀ речѐ: не ѡ҆блѣни́шисѧ, нижѐ вознеради́ши: но пре́жде не́же ᲂу҆́снеши, мнѡ́гїѧ моли̑твы сотворѝ въ се́рдцѣ твое́мъ, и҆ проти́вꙋ ста́ни по́мысламъ, да не всю́дꙋ води́мь бꙋ́деши хотѣ́нїи дїа́воли, да бг҃ъ воспрїи́метъ тѧ̀. Є҆ли́ка же си́ла въ тебѣ̀, подвиза́йсѧ, да во ѱалмѣ́хъ и҆ ᲂу҆́мнѣмъ поꙋче́нїи ᲂу҆́снеши, и҆ да не вознеради́ши и҆ попꙋ́стиши мы́сли твое́й воспрїѧ́ти чꙋ̑ждыѧ по́мыслы: но въ ни́хже моли́лсѧ є҆сѝ, въ тѣ́хже и҆ поꙋча́ѧсѧ восклони́сѧ, ꙗ҆́кѡ да спѧ́щꙋ тѝ соꙋстро́итсѧ, и҆ востаю́щꙋ соглаго́летъ тѝ. Глаго́ли же и҆ ст҃ы́й сѷмво́лъ правосла́вныѧ вѣ́ры пре́жде не́же ᲂу҆снꙋ́ти тебѣ̀. Є҆́же бо ѡ҆ бз҃ѣ пра́вѡ мы́слити, и҆сто́чникъ є҆́сть и҆ хране́нїе всѣ́хъ бла̑гъ. Па́ки вопросѝ є҆го̀ глаго́лѧ: сотворѝ любо́вь ѻ҆́тче, рцы́ ми, ко́е дѣ́ланїе и҆́мать ᲂу҆́мъ тво́й; наꙋчи́ мѧ, да и҆ а҆́зъ спасꙋ́сѧ. Ѻ҆́нъ же глаго́ла: что̀ хо́щеши сїѧ̑ и҆спы́товати; Ѻ҆́нъ же воста́въ, и҆ держа̀ но́зѣ ст҃а́гѡ лобыза́ѧ, молѧ́ше и҆зрещѝ є҆мꙋ̀. По мно́гихъ же часѣ́хъ речѐ: не мо́жеши носи́ти є҆щѐ, мꙋ́жа бо є҆́сть въ навыкнове́нїи благи́хъ сꙋ́щагѡ, є҆́же разда́ти коемꙋ́ждо чꙋ́вствꙋ подоба́ющее дѣ́ло, не бо̀ мо́щно є҆́сть комꙋ̀, не ѡ҆чи́щшꙋсѧ соверше́ннѣ ѿ сꙋ́етныхъ помышле́нїй мі́ра, сподо́битисѧ сицева́гѡ дарова́нїѧ. Тѣ́мже, а҆́ще сицевы́хъ жела́тель є҆сѝ, и҆мѣ́й сокрове́нное поꙋче́нїе въ чи́стомъ се́рдцѣ. А҆́ще бо пребꙋ́детъ непреста́ннаѧ твоѧ̀ моли́тва, и҆ поꙋче́нїе писа́нїй, ѿве́рзꙋтсѧ тѝ ᲂу҆́мныѧ твоѧ̑ ѻ҆́чи дꙋшѝ, и҆ бꙋ́детъ є҆́й ра́дость ве́лїѧ, и҆ жела́нїе нѣ́кое неизрече́нно и҆ крѣ́пко, возжиза́емѣй и҆ пло́ти ѿ дꙋ́ха, ꙗ҆́кѡ всемꙋ̀ человѣ́кꙋ бы́ти дꙋхо́внꙋ. А҆́ще ᲂу҆́бѡ въ нощѝ, а҆́ще во днѝ сподо́битъ тѧ̀ бг҃ъ чи́стымъ ᲂу҆мо́мъ помоли́тисѧ чи́стѣ, да не вне́млеши своемꙋ̀ пра́вилꙋ: но є҆ли́ка тѝ си́ла є҆́сть, сопростира́йсѧ прилѣплѧ́тисѧ бг҃ꙋ, и҆ то́й просвѣти́тъ се́рдце твоѐ въ дх҃о́внѣмъ, є҆́же нача́лъ є҆сѝ, дѣ́ланїи. И҆ сїѐ та́кожде приложѝ, ꙗ҆́кѡ прїи́де ко мнѣ̀ и҆ногда̀ нѣ́кїй ста́рецъ и҆ вопроше́нъ бы́въ ѿ менѐ ѡ҆ ᲂу҆строе́нїи ᲂу҆ма̀, речѐ: ꙗ҆́кѡ два̀ лѣ̑та пребы́хъ молѧ̀ бг҃а ѿ всегѡ̀ се́рдца, просѧ̀ неѡсла́бнѡ, да да́стъ мѝ вы́нꙋ и҆ немѧте́жнѡ, впечатлѣва́тисѧ въ се́рдцѣ мое́мъ моли́твѣ, ю҆́же предадѐ са́мъ свои̑мъ ᲂу҆ченикѡ́мъ: и҆ ви́дѣвъ трꙋ́дъ мо́й и҆ терпѣ́нїе, подадѐ проше́нїе великодарови́тый гдⷭ҇ь. Рече́ же и҆ сїѐ, ꙗ҆́кѡ сꙋ́щыѧ въ мы́сли ѡ҆ сꙋ́етныхъ (веще́хъ) по́мыслы, недꙋ́гъ є҆́сть пра́здныѧ и҆ ᲂу҆ны́лыѧ дꙋшѝ. Подоба́етъ ᲂу҆́бѡ по пи́санномꙋ, всѧ́цѣмъ хране́нїемъ блюстѝ на́мъ ᲂу҆́мъ сво́й, и҆ непреста́ннѡ пѣ́ти въ ра́зꙋмѣ, и҆ чи́стымъ ᲂу҆мо́мъ моли́тисѧ. Тѣ́мже ᲂу҆̀бо бра́тїе, хо́щетъ на́съ бг҃ъ, пе́рвѣе въ трꙋдѣ́хъ, та́же въ любвѝ и҆ непреста́ннѣ моли́твѣ ꙗ҆влѧ́ти къ немꙋ̀ тща́нїе, и҆ то́й пода́стъ пꙋ́ть спасе́нїѧ. Ꙗ҆́вѣ же ꙗ҆́кѡ не и҆́нъ пꙋ́ть къ нб҃сѝ возводѧ́щїй, ра́звѣ соверше́нное безмо́лвїе, и҆ всѣ́хъ ѕлы́хъ ᲂу҆дале́нїе, и҆ благи́хъ стѧжа́нїе, и҆ соверше́нна къ бг҃ꙋ любо́вь, и҆ є҆́же бы́ти съ бг҃омъ въ преподо́бїи и҆ пра́вдѣ: и҆ а҆́ще кто̀ въ си́хъ бꙋ́детъ, ѕѣлѡ̀ вско́рѣ къ небе́сномꙋ востече́тъ ли́кꙋ. Подоба́етъ же всѧ́кѡ на сїю̀ взы́ти высотꙋ̀ жела́ющемꙋ, ᲂу҆мертви́ти ᲂу҆́ды, ꙗ҆̀же на землѝ. Є҆гда́ бо дꙋша̀ на́ша видѣ́нїемъ и҆́стиннагѡ бла́га ᲂу҆слажда́етсѧ, ни къ є҆ди́ной же ѿ дѣ́йствꙋемыхъ сла́стїю страсте́й ᲂу҆клонѧ́етсѧ: но всѧ́кагѡ ѿврати́вшисѧ тѣле́снагѡ сладостра́стїѧ, чи́стою и҆ нескве́рною мы́слїю прїе́млетъ ꙗ҆вле́нїе бг҃а. Мно́га ᲂу҆̀бо на́мъ потре́ба хране́нїѧ, и҆ трꙋдѡ́въ тѣле́сныхъ, и҆ ѡ҆чище́нїѧ дꙋшѝ, да всели́мъ бг҃а въ сердца̀ на̑ша: да про́чее безгрѣ́шнѡ соверши́мъ бж҃е́ствєнныѧ є҆гѡ̀ за́пѡвѣди, и҆ са́мъ ѻ҆́нъ ᲂу҆́читъ ны̀ тве́рдѡ зако́ны є҆гѡ̀ храни́ти, ꙗ҆́коже лꙋчѝ со́лнечны своѧ̑ дѣ̑йствїѧ и҆спꙋска́ѧ, низпосла́нною дх҃а благода́тїю. Трꙋда́ми бо и҆ и҆скꙋше́нїѧми подоба́етъ ѡ҆чи́стити на́мъ ѡ҆́бразъ, по немꙋ́же бы́хомъ слове́сни, и҆ всѧ́кагѡ ра́зꙋма и҆ подо́бїѧ бж҃їѧ прїѧ́тельни: всѧ́кой скве́рнѣ не примѣ̑сна и҆ нѣ́кїимъ ѡ҆́бразомъ ѻ҆гне́мъ и҆скꙋше́нїй а҆́ки новопрекѡ́вана чꙋ̑вства и҆мꙋ́ще, и҆ въ ца́рское досто́инство претворѧ́еми. Всѧ́кагѡ бо бла́га прича́стно и҆ человѣ́ческое є҆стество̀ содѣ́ла бг҃ъ, могꙋ́щее ᲂу҆́мнѣ зрѣ́ти а҆́гг҃лъ ликова̑нїѧ, сла́вꙋ госпо́дствїй, си̑лы, нача̑ла, вла̑сти, свѣ́тъ непристꙋ́пный, сла́вꙋ преѡблиста́ющꙋю. Є҆гда́ же и҆спра́виши добродѣ́тель, да не вознесе́шисѧ по́мысломъ твои́мъ на бра́та, ꙗ҆́кѡ тебѣ̀ и҆спра́вившꙋ, томꙋ́ же вознерадѣ́вшꙋ: нача́ло бо го́рдости сїѐ є҆́сть. Все́ю си́лою блюдѝ ничесо́же твори́ти человѣкоꙋго́дїѧ ра́ди. А҆́ще же подвиза́ешисѧ на стра́сть, да не возскорби́ши, нижѐ да ᲂу҆ны́еши, а҆́ще не престае́тъ бра́нь: но воста́въ пове́рзи себѐ пред̾ бг҃омъ всѣ́мъ се́рдцемъ, со проро́комъ глаго́лѧ: Сꙋдѝ гдⷭ҇и ѡ҆би́дѧщыѧ мѧ̀¹⁴⁰², а҆́зъ бо не могꙋ̀ проти́вꙋ и҆́хъ. И҆ то́й зрѧ̀ твоѐ смире́нїе, а҆́бїе по́слетъ по́мощь свою̀. Є҆гда́ же хо́диши съ кѣ́млибо въ пꙋтѝ, не воспрїимѝ сꙋ́етныѧ бесѣ́ды, но да́ждь ᲂу҆мꙋ̀ дх҃о́вное, є҆́же и҆мѣ̀, дѣ́ланїе, да бꙋ́детъ є҆мꙋ̀ ѻ҆бы́чай бла́гъ, и҆ забве́нїе сла́достей мїрски́хъ, и҆ въ приста̑нища безстра́стїѧ дости́гнетъ. Си́ми и҆ мно́жайшими словесы̀ поꙋчи́въ бра́та, ѿпꙋстѝ. По ма́лѣ же вре́мени па́ки прїи́де къ немꙋ̀, и҆ вопроси́въ речѐ: что̀ сотворю̀ ѻ҆́тче, ꙗ҆́кѡ въ нощнѣ́мъ мое́мъ слꙋже́нїи со́нъ ѡ҆тѧгча́етъ мѧ̀, и҆ не попꙋща́етъ тре́звеннѡ моли́тисѧ, нижѐ бдѣ́ти мно́жайше, и҆ хощꙋ̀ рꙋкодѣ́лїѧ коснꙋ́тисѧ, є҆гда̀ пою̀; Ѻ҆́нъ же речѐ, є҆гда̀ мо́жеши тре́звеннѡ моли́тисѧ, да не каса́ешисѧ рꙋкодѣ́лїѧ. А҆́ще же ᲂу҆ны́нїемъ ѡ҆держи́мь бꙋ́деши, ма́лѡ подви́гнисѧ претѧ́щи по́мыслꙋ, и҆ косни́сѧ рꙋкодѣ́лїѧ. Ѻ҆́нъ же па́ки речѐ къ немꙋ̀: ты̀ са́мъ ѻ҆́тче, не ѡ҆тѧгча́ешисѧ ли сно́мъ въ слꙋже́нїи твое́мъ; Глаго́ла є҆мꙋ̀: не ᲂу҆до́бь ᲂу҆́бѡ, ѻ҆ба́че, а҆́ще прїи́детъ и҆ногда̀, ма́лѡ дви́жꙋсѧ, и҆ глаго́лю зача́ло ѿ є҆ѵⷢ҇лїа і҆ѡа́нна, возводѧ̀ къ бг҃ꙋ ѻ҆́ко ᲂу҆ма̀, и҆ а҆́бїе и҆счеза́етъ. Подо́бнѣ же и҆ съ по́мыслы творю̀. Є҆гда́ бо прїи́детъ, срѣта́ю є҆го̀ ꙗ҆́кѡ ѻ҆́гнь со слеза́ми, и҆ и҆счеза́етъ. Ты́ же є҆щѐ си́це не мо́жеши воѡрꙋжа́тисѧ: но па́че держѝ всегда̀ сокрове́нное поꙋче́нїе, и҆ и҆з̾ѡбражє́нныѧ ѿ свѧты́хъ ѻ҆тє́цъ дневны̑ѧ моли̑твы, глаго́лю же: тре́тїй, шесты́й, и҆ девѧ́тый (ча́съ), вечє́рнѧѧ и҆ нощна̑ѧ слꙋжє́нїѧ потщи́сѧ соверша́ти: все́ю же си́лою блюдѝ, ничесо́же твори́ти ра́ди человѣкоꙋго́дїѧ: нижѐ и҆мѣ́й когда̀ враждꙋ̀ на бра́та твоего̀, да не ѿлꙋчи́ши себѐ ѿ бг҃а твоегѡ̀. Тщи́сѧ невозносли́вꙋ мы́сль блюстѝ, прилѣжа́щꙋ ко внѣ̑шнимъ по́мыслѡмъ. Є҆гда̀ въ це́ркви сы́й, восхо́щеши причасти́тисѧ бж҃е́ственныхъ хрⷭ҇то́выхъ та̑инъ, да не и҆зы́деши, до́ндеже а҆́ще прїи́меши соверше́нный ми́ръ: на є҆ди́нѣмъ мѣ́стѣ стоѧ́й да не ѿстꙋ́пиши ѿтꙋ́да да́же до ѿпꙋ́ста. Мни́ же себѐ на небесѝ стоѧ́ти, и҆ со ст҃ы́ми а҆́гг҃лы бг҃ꙋ предстоѧ́ти, и҆ сего̀ воспрїима́ти въ се́рдцѣ. Со стра́хомъ ᲂу҆̀бо и҆ тре́петомъ мно́гимъ гото́висѧ, да не недосто́йнѣ ᲂу҆ча́стникомъ бꙋ́деши ст҃ы́хъ си́лъ. И҆ въ си́хъ до́бри воѡрꙋжи́въ бра́та, гдⷭ҇ꙋ и҆ дх҃ꙋ благода́ти є҆гѡ̀, сего̀ врꙋчи́въ, ѿпꙋстѝ. Къ си́мже повѣствова́ше є҆щѐ и҆ сꙋ́щїй съ ни́мъ бра́тъ сїѧ̑, ꙗ҆́кѡ сѣдѧ́щꙋ мѝ и҆ногда̀ бли́зъ є҆гѡ̀, вопроси́хъ є҆го̀: а҆́ще и҆скꙋси́сѧ побѣжда́ти навѣ́ты дїа́вѡли въ пꙋсты́ни сѣдѧ̀; Ѻ҆́нъ же глаго́ла: простѝ бра́те, а҆́ще попꙋ́ститъ бг҃ъ прїитѝ на тѧ̀, ꙗ҆̀же претерпѣ́хъ и҆скꙋшє́нїѧ ѿ дїа́вола, не мню̀ мощѝ тебѣ̀ понестѝ го́ресть си́хъ. Седмьдесѧ́тое сїѐ лѣ́то и҆́мамъ, и҆лѝ и҆ бо́лѣе, во и҆скꙋше́нїихъ терпѧ̀, и҆ въ разли́чныхъ ѡ҆бита́хъ пꙋсты́нѧхъ въ безмо́лвїи кра́йнѣйшемъ: толи́кими и҆скꙋси́хсѧ, и҆ претерпѣ́хъ ѿ ни́хъ, ꙗ҆̀же не по́льзꙋютъ є҆щѐ не прїѧ́вшымъ и҆скꙋ́са безмо́лвїѧ, повѣствова́ти го́ресть си́хъ. Сїе́ же вы́нꙋ во и҆скꙋше́нїихъ творѧ́хъ, всю̀ наде́ждꙋ мою̀ возлага́хъ на бг҃а, пред̾ ни́мже и҆ ѻ҆бѣ́ты ѿрече́нїѧ сотвори́хъ. И҆ то́й а҆́бїе всѧ́кїѧ ско́рби и҆збавлѧ́ше мѧ̀. Тѣ́мже бра́те, не ктомꙋ̀ ѡ҆ себѣ̀ промышле́нїе творю̀. Вѣ́мъ бо тогѡ̀ ѡ҆ мнѣ̀ промышлѧ́юща, и҆ легча́йше несꙋ̀ наводи̑маѧ мѝ и҆скꙋшє́нїѧ. Сїе́ же є҆ди́но ѿ себѐ приношꙋ̀, є҆́же непреста́ннѡ моли́тисѧ. Вѣ́мъ бо, ꙗ҆́кѡ є҆ли́кѡ возстаю́тъ лю̑таѧ, толи́кѡ гото́вѧтсѧ вѣнцы̀ терпѧ́щемꙋ: зало́ги бо сїѧ̑ сꙋ́ть ᲂу҆ пра́веднагѡ сꙋдїѝ. Сїѧ̑ ᲂу҆̀бо вѣ́дый бра́те, да не ᲂу҆ны́нїемъ низпаде́ши, вѣ́дѧ, ꙗ҆́кѡ посредѣ̀ бра́ни стои́ши подвиза́ѧсѧ: и҆ ꙗ҆́кѡ мно́жайшїи сꙋ́ть ѡ҆ на́съ проти́вꙋ врага̀ бж҃їѧ ра́тꙋющїи. Ка́кѡ бо возмо́жно бы́ло бы на́мъ дерза́ти проти́вꙋ та́кѡ стра́шнагѡ проти́вника на́шегѡ ро́да, а҆́ще не бы̀ держа́внѣйшаѧ десни́ца бг҃а сло́ва, содержа́ла на́съ ѡ҆гражда́ющи и҆ покрыва́ющи; Ка́кѡ претерпѣ́ло бы человѣ́ческое є҆стество̀ навѣ́ты є҆гѡ̀; Кто́ бо, глаго́летъ, ѿкры́етъ лицѐ ѡ҆блече́нїѧ є҆гѡ̀; Въ согбе́нїе же пе́рсей є҆гѡ̀ кто̀ вни́детъ; И҆з̾ ᲂу҆́стъ є҆гѡ̀ и҆схо́дѧтъ а҆́ки свѣщы̀ горѧ́щыѧ, и҆ разме́щꙋтсѧ а҆́ки и҆́скры ѻ҆́гненни: и҆з̾ ноздре́й є҆гѡ̀ и҆схо́дитъ ды́мъ пе́щи горѧ́щїѧ ѻ҆гне́мъ ᲂу҆́глїѧ: дꙋша́ же є҆гѡ̀ ꙗ҆́кѡ ᲂу҆́глїе, и҆ ꙗ҆́кѡ пла́мы и҆з̾ ᲂу҆́стъ є҆гѡ̀ и҆схо́дѧтъ: на вы́и же є҆гѡ̀ водворѧ́етсѧ си́ла. Пред̾ ни́мъ тече́тъ па́гꙋба: се́рдце є҆гѡ̀ ѡ҆жестѣ̀ ꙗ҆́кѡ ка́мень, стои́тъ же а҆́ки на́ковальнѧ неподви́жна. Возжиза́етъ бе́зднꙋ, ꙗ҆́кѡ пе́щь мѣ́днꙋю: мни́тъ же мо́ре ꙗ҆́кѡ мѷрова́рницꙋ, и҆ та́ртаръ бе́здны, ꙗ҆́коже плѣ́нника. Всѐ высо́кое зри́тъ: са́мъ же ца́рь всѣ̑мъ сꙋ́щымъ въ вода́хъ¹⁴⁰³. Проти́вꙋ сегѡ̀ бра́нь на́мъ бра́те. Такова́го и҆ толи́каго ѡ҆писа̀ сло́во мꙋчи́телѧ. Но над̾ ѻ҆́нымъ побѣ́да зако́ннѡ и҆́ноческое житїѐ воспрїи́мшымъ быва́етъ ᲂу҆до́бна, за є҆́же не и҆мѣ́ти и҆̀мъ что́либо ѿ сꙋ́щихъ є҆гѡ̀, ѿверже́нїемъ мі́ра и҆ вели́чествомъ добродѣ́телей, па́че же ꙗ҆́кѡ и҆́мамы побора́ющаго по на́съ. Кто́ бо прише́дъ ко гдⷭ҇ꙋ, рцы́ ми, и҆ стра́хъ є҆гѡ̀ во ᲂу҆мѣ̀ прїе́мъ, не преложи́сѧ є҆стество́мъ; и҆ бж҃е́ственными зако́ны и҆ дѣ́лы просвѣти́въ себѐ, свѣ́тлꙋ не содѣ́ла дꙋ́шꙋ; и҆ бж҃е́ственными разꙋмѣ́ньми, и҆ помышле́ньми ѡ҆блистава́ти не ᲂу҆стро́и; пра́зднꙋ же ю҆̀ не попꙋща́етъ бы́ти; И҆́мать бо бг҃а возбꙋжда́юща ᲂу҆́мъ, ненасы́тимѡ жела́ти свѣ́та. И҆ ча́стѣ дѣ́йствꙋема такова̀ дꙋша̀ не попꙋща́етсѧ ѿ дх҃а страстьмѝ разслаблѧ́тисѧ. Но ꙗ҆́коже нѣ́кїй ца́рь же́стокѡ и҆ стра́шнѡ проти́вꙋ врагѡ́въ дышѧ̀, посѣка́ѧ же неща́днѡ, и҆ ника́коже вспѧ́ть возвраща́ѧсѧ: но дѣ́йственнѡ рꙋ́цѣ на не́бо воздѣва́ѧ, и҆ моли́твꙋ ᲂу҆́мнꙋю творѧ̀, побѣжда́етъ врага̀. Повѣ́даше же па́ки и҆ сїѐ бра́тъ то́й, ꙗ҆́кѡ ко и҆нѣ̑мъ є҆гѡ̀ добродѣ́телємъ, и҆ сїю̀ стѧжа̀: нижѐ когда́либо пра́здно терпѧ́ше слы́шати сло́во. А҆́ще же кто̀ ѿ невнима́нїѧ повѣ́даше ве́щь не на по́льзꙋ дꙋшѝ, нижѐ ѿню́дъ ѿвѣщава́ше. Но нижѐ, ѿходѧ́щꙋ мѝ и҆ногда̀ на послꙋже́нїе, вопроша́ше, чесѡ̀ ра́ди ѿхо́диши; и҆лѝ па́ки приходѧ́щꙋ мѝ, глаго́ла: гдѣ̀ бы́лъ є҆сѝ, и҆ ка́кѡ, и҆лѝ что̀ сотвори́лъ є҆сѝ; Нѣ́когда ѿплы́вшꙋ мѝ во а҆леѯандрі́ю ра́ди нꙋ́ждныѧ потре́бы, и҆ ѿтꙋ́дꙋ взыдо́хъ въ ца́рствꙋющїй гра́дъ ра́ди церко́вныѧ кꙋ́пли, и҆ посѣти́въ та́мѡ сꙋ́щꙋю благоговѣ́йнѣйшꙋю бра́тїю, возврати́хсѧ, ниеди́нагѡ ѿвѣ́та возда́въ слꙋжи́телю бж҃їю. Пребы́въ ᲂу҆́бѡ та́мѡ вре́мѧ дово́льно, возврати́хсѧ па́ки въ ски́тъ къ немꙋ̀. Ѻ҆́нъ же ви́дѣвъ мѧ̀, и҆ ѡ҆бра́дованъ бѣ̀, и҆ цѣлова́ мѧ, сотвори́въ моли́твꙋ сѣ́де: ничесѡ́же ѿню́дъ вопроси́ мѧ, но въ видѣ́нїи ᲂу҆пражнѧ́ѧсѧ пребыва́ше. И҆ногда̀ ᲂу҆́бѡ и҆скꙋси́ти є҆го̀ хотѧ̀ пребыва́хъ дни̑ нѣ̑кїѧ, не пода́въ є҆мꙋ̀ хлѣ́ба ꙗ҆́сти. Ѻ҆́нъ же не взыска́ше, нижѐ речѐ что̀. А҆́зъ же по си́хъ, поклони́всѧ є҆мꙋ̀ реко́хъ къ немꙋ̀: сотворѝ любо́вь ѻ҆́тче, и҆ рцы́ ми, не ѡ҆скорби́лсѧ ли є҆сѝ, ꙗ҆́кѡ не принесо́хъ тѝ по ѻ҆бы́чаю ꙗ҆́сти; Ѻ҆́нъ же речѐ, простѝ бра́те: два́десѧть дне́й а҆́ще не да́си мѝ хлѣ́ба ꙗ҆́сти, не ктомꙋ̀ взыщꙋ̀ ѿ тебѐ: доне́лѣже бо терплю̀ дꙋше́ю, си́це и҆ тѣ́ломъ. Толи́кѡ бѣ̀ въ видѣ́нїи и҆́стиннагѡ бла́га ᲂу҆пражнѧ́ѧсѧ. Глаго́ла же, ꙗ҆́кѡ ѿне́лѣже прїидо́хъ въ ски́тъ, не попꙋсти́хъ по́мыслꙋ моемꙋ̀ и҆зы́ти внѣ̀ ке́ллїи: и҆ нижѐ и҆́нъ по́мыслъ въ мы́сль мою̀ воспрїѧ́хъ, кромѣ̀ стра́ха бж҃їѧ и҆ сꙋди́лищъ бꙋ́дꙋщагѡ вѣ́ка, помышлѧ́ѧ грѣ́шникѡмъ преще́нїе сꙋда̀, и҆ ѻ҆́гнь вѣ́чный, и҆ кромѣ́шнꙋю тьмꙋ̀. И҆ ка́кѡ грѣ́шныхъ дꙋ́шы ѡ҆бита́ютъ, и҆ пра́ведныхъ: и҆ ꙗ҆̀же пра́вєднымъ ᲂу҆готѡ́ваннаѧ блага̑ѧ, и҆ коего́ждо прїе́млюща свою̀ мздꙋ̀ по своемꙋ̀ трꙋдꙋ̀: ѻ҆́ваго ᲂу҆́бѡ за мнѡ́гїѧ по́двиги трꙋдѡ́въ: ѻ҆́ваго же, за ми́лостыню, и҆ любо́вь нелицемѣ́рнꙋ: ѻ҆́ваго же, за нестѧжа́нїе, и҆ ѿрече́нїе всегѡ̀ мі́ра: и҆на́го, за смиреномꙋ́дрїе, и҆ соверше́нное безмо́лвїе: и҆на́го, за и҆́стинное повинове́нїе: дрꙋга́го, за страннолю́бїе. Сїѧ̑ всѧ̑ размышлѧ́ѧ, не попꙋсти́хъ и҆но́мꙋ по́мыслꙋ дѣ́йствовати во мнѣ̀, нижѐ могꙋ̀ ктомꙋ̀ съ человѣ́ки бы́ти, и҆лѝ съ тѣ́ми ᲂу҆пражднѧ́ти ᲂу҆́мъ мо́й, да не ѿ бж҃е́ственнѣйшихъ помышле́нїй ѿлꙋчꙋ́сѧ. Приложѝ къ си̑мъ и҆ по́вѣсть ѡ҆ є҆ди́номъ нѣ́коемъ и҆́ночествꙋющемъ, и҆ глаго́ла: ꙗ҆́кѡ къ безстра́стїю бѣ̀ дости́гъ, и҆ ѿ рꙋкѝ а҆́гг҃ла хлѣ́бъ прїима́ше въ пи́щꙋ, и҆ нерадѣ́нїемъ че́сти сеѧ̀ ѿщети́сѧ. Є҆гда́ бо дꙋша̀ крѣ́пость и҆ тве́рдость ᲂу҆ма̀ посла́битъ, тогда̀ ѡ҆б̾е́млетъ дꙋ́шꙋ но́щь. И҆дѣ́же бо бг҃ъ не возсїѧва́етъ, всѧ̑ ꙗ҆́кѡ во мра́цѣ расторга́ютсѧ, и҆ не мо́жетъ къ бг҃ꙋ є҆ди́номꙋ взира́ти, и҆ трепета́ти слове́съ є҆гѡ̀: бг҃ъ бо приближа́ѧйсѧ а҆́зъ є҆́смь, глаго́летъ гдⷭ҇а, а҆ не бг҃ъ и҆здале́ча. И҆лѝ ᲂу҆таи́тсѧ человѣ́къ въ сокрове́нныхъ, и҆ а҆́зъ не ᲂу҆зрю̀ ли є҆го̀; Є҆да̀ не́бо и҆ зе́млю не а҆́зъ наполнѧ́ю, речѐ гдⷭ҇ь¹⁴⁰⁴; И҆ ѡ҆ и҆нѣ́хъ мно́зѣхъ воспомѧнꙋ̀ подѡ́бнаѧ пострада́вшихъ. Къ си̑мъ же и҆ соломѡ́ново приведѐ паде́нїе, и҆́же толи́кꙋю, речѐ, прїѧ̀ премꙋ́дрость, и҆ ѡ҆ всѣ́хъ сла́вимь бѧ́ше: бѣ́ бо ꙗ҆́кѡ денни́ца ᲂу҆́трѡ восходѧ́щаѧ, свѣ́тлостїю премꙋ́дрости всѣ́хъ просвѣща́ѧй, но ма́лыѧ ра́ди сла́сти сла́вꙋ погꙋбѝ. Стра́шно ᲂу҆̀бо є҆́сть нерадѣ́ти. Непреста́ннѡ подоба́етъ моли́тисѧ, да не и҆́нъ по́мыслъ наше́дъ ѿлꙋчи́тъ ны̀ ѿ бг҃а, и҆ что́либо ᲂу҆мꙋ̀ на́шемꙋ представлѧ́емое. Чи́сто бо се́рдце, всѐ бы́въ дх҃а ст҃а́гѡ вмѣсти́лище, всего̀ самаго̀ чи́стѣ зри́тъ бг҃а. Сїѧ̑ ᲂу҆́бѡ слы́ша а҆́зъ, речѐ, и҆ дѣ́лы самѣ́ми ᲂу҆разꙋмѣ́хъ, ꙗ҆́кѡ недѣ́йствєнны въ не́мъ ѿню́дъ сꙋ́ть плотскі̑ѧ стра̑сти: вожделѣ́тель же лꙋ́чшихъ всѧ́чески бѣ̀, ꙗ҆́кѡ всегда̀ зрѣ́тисѧ є҆мꙋ̀ бж҃е́ственнымъ дх҃омъ ѡ҆бразꙋ́емꙋ, и҆ воздыха́ющꙋ воздыха́ньми неизглаго́ланными, и҆ въ себѣ̀ ѡ҆браща́ющꙋсѧ, и҆ себѐ самаго̀ разсꙋжда́ющꙋ, и҆ боѧ́щꙋсѧ, да не ка́кѡ что̀ привше́дшее чистотꙋ̀ ᲂу҆ма̀ возмꙋти́тъ, и҆ скве́рна нѣ́каѧ та́йнѡ прибꙋ́детъ є҆мꙋ̀. Зрѧ̀ ᲂу҆́бѡ а҆́зъ сїѧ̑, жи́тельствꙋѧй съ ни́мъ бра́тъ, речѐ, и҆ ꙗ҆́кѡ къ подража́нїю подо́бныхъ добродѣ́телей возбꙋжда́емый, неѿстꙋ́пнѡ настоѧ́хъ, и҆ ча̑стыѧ къ немꙋ̀ вопрошє́нїѧ творѧ́хъ. Ка́кѡ могꙋ̀, глаго́лѧ, стѧжа́ти чи́стый ᲂу҆́мъ, ꙗ҆́коже и҆ ты̀; Ѻ҆́нъ же речѐ: и҆дѝ, трꙋди́сѧ: трꙋда́ бо потре́ба, и҆ болѣ́зни се́рдца. Не бо̀ спѧ́щымъ на́мъ и҆ ѡ҆слабѣва́ющымъ, достѡ́йнаѧ тща́нїѧ и҆ трꙋда̀ прибыва́ютъ: є҆гда̀ нижѐ ꙗ҆̀же на землѝ блага̑ѧ, без̾ трꙋда̀ ѡ҆брѣстѝ кто̀ мо́жетъ. Подоба́етъ ᲂу҆̀бо хотѧ́щемꙋ прїитѝ въ дх҃о́вное преспѣ́ѧнїе, пре́жде всегѡ̀ ѿрещи́сѧ свои́хъ хотѣ́нїй, и҆ и҆мѣ́ти всегда̀ пла́чь, и҆ нестѧжа́нїе: не внима́ти прегрѣше́нїѧмъ и҆ны́хъ, но свои̑мъ то́чїю, и҆ ѡ҆ си́хъ пла́кати де́нь и҆ но́щь, и҆ не и҆мѣ́ти дрꙋ́жбы съ человѣ́комъ. Дꙋша́ бо скорбѧ́щаѧ ѡ҆ свое́мъ бѣ́дствїи, и҆ па́мѧтїю прегрѣше́нїй ᲂу҆ѧзвлѧ́емаѧ, мертва̀ быва́етъ мі́рꙋ, и҆ мі́ръ є҆́й ме́ртвъ быва́етъ: си́рѣчь недѣ́йственни быва́ютъ плотскі̑ѧ стра̑сти, и҆ человѣ́къ страстє́мъ. И҆́бо ѿре́кшїйсѧ мі́ра и҆ сочета́выйсѧ хрⷭ҇тꙋ̀, и҆ въ безмо́лвїи пребыва́ющїй, лю́битъ бг҃а, и҆ храни́тъ ѡ҆́бразъ, и҆ подо́бїе богати́тъ. Свы́ше бо прїе́млетъ ѿ негѡ̀ ѻ҆би́лїе дх҃а: и҆ быва́етъ до́мъ бж҃їй, дѣла̀ пра́вєдна представлѧ́ѧй бг҃ꙋ. И҆ дꙋша̀ ѡ҆чище́нна житїе́мъ, и҆ свобо́дна ѿ ѡ҆скверне́нїй пло́ти, не и҆мꙋ́ща скве́рны и҆лѝ поро́ка, ᲂу҆краси́тсѧ вѣнце́мъ пра́вды, сїѧ́ѧ благовидѣ́нїемъ добродѣ́тели. Въ не́мже бо въ нача́лѣ ѿверже́нїѧ не быва́етъ пла́чь въ се́рдцѣ, нижѐ сле́зы дх҃ѡ́вны, нижѐ па́мѧть вѣ́чнагѡ мꙋче́нїѧ, нижѐ безмо́лвїе и҆́стинное, нижѐ непреста́ннаѧ моли́тва, нижѐ ѱалмопѣ́нїе и҆ поꙋче́нїе бж҃е́ственныхъ писа́нїй, и҆ нижѐ во ѻ҆бы́чаи бы́сть, да непреста́ннымъ терпѣ́нїемъ понꙋ́дитсѧ, и҆ не хотѧ́щꙋ є҆мꙋ̀, ѿ ᲂу҆ма̀ сїѧ̑ дѣ́ѧти, и҆ не пребыва́етъ стра́хъ бж҃їй въ мы́сли є҆гѡ̀: є҆щѐ въ любвѝ мі́ра таковы́й поко́итсѧ, и҆ не мо́жетъ стѧжа́ти чи́стагѡ ᲂу҆ма̀ въ моли́твѣ. Благоче́стїе бо, и҆ стра́хъ бж҃їй, ѡ҆чища́етъ дꙋ́шꙋ ѿ страсте́й, и҆ ᲂу҆́мъ свобо́денъ ᲂу҆строѧ́етъ бы́ти, и҆ къ є҆сте́ственномꙋ видѣ́нїю веде́тъ, и҆ бг҃осло́вїѧ каса́тисѧ твори́тъ, є҆́же во ѡ҆́бразѣ блаже́нства воспрїе́млетъ, и҆ проходѧ́щымъ є҆̀ ѿсю́дꙋ ѡ҆брꙋче́нїѧ подае́тъ, и҆ неподви́жнꙋ сїю̀ храни́тъ. Все́ю ᲂу҆̀бо си́лою да прилежи́мъ дѣ́йственномꙋ дѣ́ланїю, и҆́мже ко благоче́стїю возво́димсѧ є҆́же є҆́сть въ мы́сли чистота̀, є҆ѧ́же пло́дъ є҆сте́ственное и҆ бг҃осло́вное видѣ́нїе: дѣѧ́нїе бо, восхожде́нїе видѣ́нїѧ, ꙗ҆́коже прозри́тельный и҆ бг҃осло́внѣйшїй глаго́летъ григо́рїа ᲂу҆́мъ. А҆́ще ᲂу҆̀бо дѣѧ́нїи вознеради́въ, всѧ́кагѡ чꙋ́жди бꙋ́демъ любомꙋ́дрїѧ. А҆́ще бо кто̀ и҆ кра́йнѣйшꙋю пости́же добродѣ́тель, ѻ҆ба́че тре́бꙋетъ по́стническагѡ трꙋда̀ ѡ҆бꙋздава́ющагѡ безчи̑нныѧ тѣлесѐ стремлє́нїѧ, и҆ наблюде́нїе по́мыслѡвъ и҆мѣ́ти. Та́кѡ бо є҆два̀ возмо́жемъ вселе́нїе полꙋчи́ти хрⷭ҇то́во. Є҆ли́кѡ бо въ на́съ и҆збы́точествꙋетъ пра́вда, толи́кѡ дх҃о́вное мꙋ́жество прибыва́етъ. И҆ въ соверше́нство прише́дъ ᲂу҆́мъ ве́сь къ бг҃ꙋ прилѣплѧ́етсѧ, и҆ бж҃е́ственнымъ свѣ́томъ ѡ҆сїѧва́етсѧ, и҆ неизречє́ннаѧ ѿкрыва́ютсѧ та̑инства. И҆ тогда̀ наꙋча́етсѧ и҆́стиннѡ, гдѣ̀ є҆́сть мꙋ́дрость, гдѣ̀ є҆́сть си́ла, гдѣ̀ ра́зꙋмъ, є҆́же разꙋмѣ́ти всѧ̑, гдѣ̀ долголѣ́тїе и҆ живо́тъ, гдѣ̀ свѣ́тъ ѻ҆че́съ, и҆ ми́ръ: доко́лѣ бо во бра́ни страсте́й ѡ҆браща́етсѧ, є҆щѐ не мо́жетъ къ наслажде́нїю си́ми ᲂу҆до́бно и҆мѣ́ти вре́мѧ. Добродѣ́тєли бо и҆ ѕлѡ́бы слѣ́пъ содѣ́ловаютъ ᲂу҆́мъ. Ті́и бо, да не ви́дитъ добродѣ́телей: сі́и же, да не ви́дитъ ѕло́бы. Є҆гда́ же бра́ни прекраще́нїе воспрїи́метъ, и҆ дх҃о́вныхъ сподо́битсѧ дарова́нїй, тогда̀ ве́сь свѣтови́дѣнъ быва́етъ, ча́стѣ споспѣшествꙋ́емь благода́тїю, и҆ непоколеби́мъ въ видѣ́нїи дх҃о́вныхъ пребыва́етъ: сицевы́й не пригвожде́нъ є҆́сть къ здѣ̑шнимъ, но пре́йде ѿ сме́рти въ живо́тъ. Подоба́етъ ᲂу҆̀бо достоподража́тельнагѡ житїѧ̀ жела́ющемꙋ, и҆ приходѧ́щемꙋ къ бг҃ꙋ, непоро́чное и҆мѣ́ти се́рдце, и҆ ᲂу҆ста̀ чи̑сты: ꙗ҆́кѡ да чи́сто сло́во ѿ ᲂу҆сте́нъ происходѧ́щее, досто́йнѡ возмо́жетъ воспѣ́ти бг҃а. Прилѣпи́вшаѧсѧ бо дꙋша̀ къ бг҃ꙋ, непреста́ннѡ къ немꙋ̀ разглаго́льствꙋетъ. Потщи́мсѧ ᲂу҆̀бо бра́тїѧ ѻ҆́ный ве́рхъ дости́гнꙋти добродѣ́телей, и҆ не пребꙋ́димъ на землѝ пригвозди́вшесѧ страстє́мъ. Подвиза́ющїйсѧ бо, и҆ дости́гнꙋвый прибли́житисѧ къ бг҃ꙋ, и҆ въ прича́стїи ст҃а́гѡ свѣ́та бы́ти, и҆ любо́вїю тогѡ̀ ᲂу҆ѧзви́тисѧ, наслажда́етсѧ дх҃о́внымъ нѣ́кїимъ и҆ непостижи́мымъ весе́лїемъ гдⷭ҇а, ꙗ҆́коже глаго́летъ бж҃е́ственный ѱало́мникъ: Наслади́сѧ гдⷭ҇ви, и҆ да́стъ тѝ проше́нїе се́рдца твоегѡ̀: и҆ и҆зведе́тъ ꙗ҆́кѡ свѣ́тъ пра́вдꙋ твою̀, и҆ сꙋдьбꙋ̀ твою̀ ꙗ҆́кѡ полꙋ́дне¹⁴⁰⁵. Ка́ѧ бо любо́вь дꙋшѝ сто́ль ѕѣ́льна, и҆ нестерпи́ма, ꙗ҆́коже ꙗ҆́же ѿ бг҃а ражда́етсѧ въ дꙋшѝ, ѿ всѧ́кагѡ поро́ка ѡ҆чище́ннѣй; и҆ ѿ и҆́стиннагѡ ᲂу҆се́рдїѧ глаго́лющей: ᲂу҆ѧ́звлена є҆́сть любо́вїю а҆́зъ¹⁴⁰⁶. Неизглагѡ́ланна ѿню́дъ, и҆ неисповѣди̑ма бж҃е́ственныѧ добро́ты ѡ҆блиста̑нїѧ, не и҆з̾ѧвлѧ́етъ сло́во, не прїе́млетъ слꙋ́хъ: а҆́ще и҆ денни́цы ѡ҆зарє́нїѧ рече́ши, а҆́ще и҆ лꙋны̀ свѣ́тлость, а҆́ще и҆ со́лнца свѣ́тъ, всѧ̑ недостѡ́йна сꙋ́ть къ подо́бїю сла́вы ѻ҆́ныѧ, и҆ мно́жае къ сравне́нїю и҆́стиннагѡ свѣ́та ѡ҆скꙋдѣва́ющаѧ, не́жели є҆ли́кѡ глꙋбо́каѧ но́щь, и҆лѝ стра́шнаѧ тьма̀ чистѣ́йшагѡ полꙋ́дне. Си́це бо и҆ васі́лїй, во ᲂу҆чи́телехъ бж҃е́ственный, и҆скꙋ́сомъ прїе́мъ, и҆ наꙋчи́всѧ предадѐ на́мъ. Сїѧ̑ ᲂу҆́бѡ и҆ мнѡ́жайшаѧ си́хъ сожи́тельствꙋѧй є҆мꙋ̀ бра́тъ повѣ́да. Но и҆ семꙋ̀ та́кожде кто̀ въ не́мъ не подиви́тсѧ, и҆мѣ́ѧ вели́кое є҆гѡ̀ смиренномꙋ́дрїѧ зна́менїе; И҆зда́вна бо пресвѵ́терства сподо́бивсѧ, и҆ небе́сныхъ житїе́мъ и҆ ра́зꙋмомъ коснꙋ́всѧ, си́це бж҃е́ственныхъ свѧщеннодѣ́йствїй ᲂу҆бѣга́ше вре́мене, ꙗ҆́кѡ во мно́жайшихъ є҆гѡ̀ по́двигѡвъ лѣ́тѣхъ не и҆зволѧ́ти къ свѧще́ннѣй понѐ прибли́житисѧ трапе́зѣ, и҆ бж҃е́ственныхъ причаще́нїю та̑инъ сподо́битисѧ. Съ толи́кимъ ѻ҆па́сствомъ жи́тельствꙋѧ, є҆гда̀ къ человѣ́кѡмъ собесѣ́дованїе творѧ́ше, не причаща́шесѧ: а҆́ще и҆ ничесомꙋ̀ земно́мꙋ глаго́лемꙋ ѿ негѡ̀, но на по́льзꙋ тре́бꙋющихъ бесѣ́доваше. Хотѧ́й же бж҃е́ственныхъ причасти́тисѧ та̑инъ, моли́твами, и҆ ѱалмопѣ́нїи, и҆ и҆сповѣ́данїи бг҃а ᲂу҆милостивлѧ́ше. Оу҆жаса́шесѧ бо і҆ере́ова гла́са, та́кѡ при се́мъ возглаша́юща и҆ глаго́люща: Ст҃а̑ѧ ст҃ы̑мъ. Глаго́лаше бо, всю̀ це́рковь и҆сполнѧ́тисѧ ст҃ы́хъ а҆́гг҃лъ, и҆ самого́ же царѧ̀ си́лъ та́инственнѣ свѧщеннодѣ́йствꙋема, и҆ претворѧ́ема въ тѣ́ло и҆ кро́вь въ сердца́хъ на́шихъ. Тѣ́мже и҆ глаго́лаше: подоба́етъ на́мъ непоро́чнѡ и҆ чи́стѡ: и҆ ꙗ҆́кѡ внѣ̀ пло́ти сꙋ́щымъ, кромѣ̀ всѧ́кагѡ сомнѣ́нїѧ и҆ смꙋще́нїѧ, со дерзнове́нїемъ пристꙋпа́ти ко ст҃о́мꙋ причаще́нїю пречи́стыхъ хрⷭ҇то́выхъ та̑инъ, ꙗ҆́кѡ да ѿ тѣ́хъ просвѣще́нїѧ бꙋ́демъ прича̑стницы. Мно́зи бо ѿ ст҃ы́хъ ѻ҆те́цъ ви́дѧхꙋ а҆́гг҃лы хранѧ́щыѧ и҆̀хъ: тѣ́мже и҆ молча́нїемъ блюдо́ша себѐ, ни къ комꙋ́же разглаго́льствꙋще. Глаго́лаше же и҆ сїѐ: ꙗ҆́кѡ а҆́ще потре́бно бѧ́ше, самомꙋ̀ продаѧ́ти своѐ рꙋкодѣ́лїе, да не ѿ глаго́ланїѧ и҆ ѿвѣща́нїѧ, ло́жь ка́ѧ, и҆лѝ клѧ́тва, и҆лѝ многосло́вїе, и҆лѝ и҆́нъ ви́дъ грѣха̀ послѣ́дꙋетъ, ю҆ро́дъ бы́ти притворѧ́ѧсѧ стоѧ́ше, и҆ всѧ́къ хотѧ́й кꙋпи́ти, взима́ше ѿ негѡ̀ и҆ подаѧ́ше є҆мꙋ̀, є҆́же хотѧ́ше. Дѣ́лаше же ѻ҆́нъ нѣ́кое тка́нїе, прїима́ше же дае́мое благода́рнѣ, ничто́же ѿню́дъ глаго́лѧ се́й вои́стиннꙋ любомꙋ́дрый мꙋ́жъ.

И҆́же во ст҃ы́хъ ѻ҆те́цъ на́шъ ѳео́дѡръ бѣ̀ при ца́рствованїи и҆ра́клїа, и҆ кѡнстанті́на брада́тагѡ, къ ше́сть сѡ́тъ шестьдесѧ́тое лѣ́то, пе́рвѣе же по́стническимъ житїе́мъ подвиза́всѧ въ ѻ҆би́тели ст҃а́гѡ са́ввы, по́слѣжде и҆збра́нїемъ бж҃е́ственнымъ на є҆пі́скопскїй престо́лъ гра́да є҆де́са возведе́сѧ, и҆ мно́гихъ чꙋде́съ самодѣ́латель бы́въ въ живы́хъ є҆щѐ, и҆ по сме́рти, и҆ бж҃е́ственными свои́ми ᲂу҆че́ньми, мно́гихъ мꙋ́ченикѡвъ и҆ спаса́емыхъ показа́въ, въ є҆динонадесѧ́тый де́нь і҆ꙋ́лїа въ вѣ̑чнымъ ѻ҆би́телємъ преста́висѧ, ꙗ҆́коже въ кни́зѣ нарица́емѣй калокаїри́ни житїѐ є҆гѡ̀ списа́сѧ. Писа̑нїѧ же а҆́ще ѡ҆ста́ви и҆ и҆́на нѣ̑каѧ, и҆звѣ́стнѡ ѡ҆ се́мъ сказа́ти не мо́жемъ. Настоѧ́щыѧ же сто̀ гла́въ, є҆гѡ̀ трꙋда́ми сочинє́нныѧ, въ число̀ про́чихъ по́стническихъ кни́гъ включены̀ сꙋ́ть. Многоѻби́льный бо главы̑ сїѧ̑ сщ҃е́ннагѡ трезвѣ́нїѧ и҆ дх҃о́вныѧ по́льзы пло́дъ предлага́ютъ чтꙋ́щымъ съ разсꙋжде́нїемъ, и҆ спасе́нїѧ себѣ̀ жела́ющымъ: прїиди́те и҆ ѻ҆би́льнѣйшїй пло́дъ ѡ҆б̾ими́те. Въ концѣ́ же настоѧ́щихъ си́хъ гла́въ и҆ ᲂу҆мозри́тельное списа́нїе и҆мꙋ́щее и҆́мѧ ѳео́дѡра приложи́сѧ, є҆́же тогѡ́жде со глава́ми тре́звеннагѡ ра́зꙋма бы́ти, и҆ тѣ́мжде сло́вомъ послѣ́довати ᲂу҆смотрѧ́юще, ꙗ҆́кѡ ѿ нѣ́кихъ ѡ҆бразѡ́въ и҆ зна́менїй, и҆́стинномꙋ бы́ти произведе́нїю тогѡ́жде ѳео́дѡра заключа́емъ.

а҃. Поне́же ᲂу҆́бѡ блага́гѡ бг҃а благода́тїю ѿве́ргшесѧ сатаны̀ и҆ дѣ́лъ є҆гѡ̀ лꙋка́выхъ, ко хрⷭ҇тꙋ̀ приложи́хомсѧ ба́нею пакибытїѧ̀, и҆ ны́нѣ па́ки и҆́ноческимъ ѡ҆бѣща́нїемъ, соблюде́мъ за́пѡвѣди є҆гѡ̀: сегѡ́ бо ѿ на́съ тре́бꙋетъ, не то́чїю сꙋгꙋ́бое ѡ҆бѣща́нїе, но и҆ є҆сте́ственный до́лгъ, и҆́мже со́зданы бы́вше бг҃омъ пе́рвѣе добрѝ ѕѣлѡ̀, таковы̀ и҆ до́лжны є҆смы̀ бы́ти. А҆́ще бо и҆ грѣ́хъ вше́дъ ѿ невнима́нїѧ на́шегѡ є҆́же чрез̾ є҆стество̀ введе́нъ, но и҆ па́ки при́званы бы́хомъ милосе́рдїѧ ра́ди ми́лости бг҃а на́шегѡ, и҆ ѡ҆бновлены̀ бы́хомъ стра́стїю безстра́стнагѡ, и҆ цѣно́ю и҆скꙋ́плены бы́хомъ, кро́вїю хрⷭ҇то́вою. И҆зба́влены бы́вше дре́внѧгѡ престꙋпле́нїѧ праѻте́ческагѡ, то̀ ᲂу҆жѐ а҆́ще бꙋ́демъ пра́ведни, ничто́же чꙋ́дно: но є҆́же ѿпа́сти ѿ пра́вды, сѐ ѻ҆каѧ́нно, и҆ всѧ́кагѡ рыда́нїѧ досто́йно.

в҃. Ꙗ҆́коже дѣ́ло бла́го, кромѣ̀ пра́выѧ вѣ́ры быва́ющее, мертво̀ є҆́сть, и҆ ѿню́дъ недѣ́йственно: та́кожде и҆ вѣ́ра є҆ди́на, без̾ дѣ́лъ пра́ведныхъ, не и҆зба́витъ на́съ вѣ́чнагѡ ѻ҆гнѧ̀. Любѧ́й бо мѧ̀, речѐ гдⷭ҇ь, и҆ за́пѡвѣди моѧ̑ соблюда́етъ. И҆ а҆́ще ᲂу҆́бѡ лю́бимъ бг҃а и҆ вѣ́рꙋемъ во́нь, проти́вꙋ за́повѣдемъ є҆гѡ̀ дѣ́ланїе сотвори́мъ, да жи́знь прїи́мемъ вѣ́чнꙋю. А҆́ще ли пре́зримъ за́повѣдей є҆гѡ̀ соблюде́нїе, є҆мꙋ́же всѧ̀ повинꙋ́етсѧ тва́рь, ка́кѡ вѣ́рными себѐ нарече́мъ; Почте́ны сꙋ́ще па́че всѧ́кїѧ тва́ри, и҆ непокори́вѣйшїи всѣ́хъ ѡ҆брѣта́емсѧ всесотво́ршагѡ повелѣ́нїю, и҆ невозблагода́тны ѡ҆ благода́ти ꙗ҆влѧ́ющесѧ.

г҃. За́пѡвѣди хрⷭ҇тѡ́вы блюдꙋ́ще, ничесо́же томꙋ̀ подае́мъ, не тре́бꙋющꙋ, и҆ всѣ́хъ благи́хъ пода́телю, но себѣ̀ благодѣ́емъ, вѣ́чный себѣ̀ и҆схода́тайствꙋюще живо́тъ, и҆ наслажде́нїе неизглаго́ланныхъ бла̑гъ.

д҃. Всѧ́къ противлѧ́ѧйсѧ на́мъ на и҆справле́нїе за́повѣдей бж҃їихъ, а҆́ще и҆ ѻ҆те́цъ є҆́сть, и҆лѝ ма́ти, и҆лѝ и҆́нъ кто́либо, ме́рзокъ на́мъ бꙋ́ди и҆ ненави́стенъ, да не ᲂу҆слы́шимъ: любѧ́й ѻ҆тца̀ и҆лѝ ма́терь па́че менѐ, нѣ́сть менѐ досто́инъ.

є҃. Со все́ю ᲂу҆̀бо си́лою понꙋ́димъ себѐ на дѣ́ланїе за́повѣдей гдⷭ҇нихъ, да не ᲂу҆́зами неразрѣши́мыми похоте́й лꙋка́выхъ и҆ сласте́й дꙋшегꙋби́тельныхъ стѧ́гнемсѧ, и҆ рече́но бꙋ́детъ ѡ҆ на́съ безпло́дныѧ смоко́вницы ѡ҆сꙋжде́нїе: Посѣцы̀ ю҆̀, да не всꙋ́е и҆ мѣ́сто ᲂу҆пражнѧ́етъ: всѧ́къ бо, речѐ, не творѧ́й плода̀ добра̀ посѣка́етсѧ, и҆ во ѻ҆́гнь вмета́етсѧ¹⁴⁰⁷.

ѕ҃. Похотьмѝ и҆ сластьмѝ побѣжда́ѧйсѧ и҆ въ мі́рѣ живы́й, ско́рѡ въ грѣхѡ́вныѧ впа́даетъ мрє́жи: грѣ́хъ же є҆ди́ною сотворе́нъ бы́въ, ѻ҆́гнь є҆́сть въ тро́стїи, и҆ ка́мень съ горы̀ свалѧ́ѧсѧ, ро́вище водно́е бы́ти претворѧ́ѧ. Сїѧ̑ ᲂу҆́бѡ речє́ннаѧ, всѧ́кими ѡ҆́бразы стѧжа́вшемꙋ и҆́хъ дѣ́лаютъ поги́бель.

з҃. Дꙋша̀ ᲂу҆́бѡ є҆ли́жды разсверѣ́пѣетъ, на чрез̾єстество̀ ѿто́ргшисѧ въ сла̑сти, жили́ще є҆́сть стра́шныхъ ѕвѣре́й, по рече́нномꙋ: тꙋ̀ почі́ютъ, речѐ, і҆ппокента́ври, тꙋ̀ вогнѣздѧ́тсѧ є҆хі̑дны, и҆ сти́чꙋтсѧ бѣ́си і҆ппокента́вры, ꙗ҆̀же сꙋ́ть разли̑чныѧ стра̑сти безче́стїѧ. Да а҆́ще на є҆сте́ственное взы́детъ, мо́жетъ побѣди́ти є҆гда̀ хо́щетъ, до́ндеже съ пло́тїю сопрѧже́нна є҆́сть, и҆ ᲂу҆крѣпи́тъ себѐ любодѣ́ланїемъ, и҆ та́кѡ въ є҆стество̀ прїи́детъ, и҆ въ зако́нѣ бж҃їи поживе́тъ: пре́жде же ᲂу҆гнѣзди́вшїисѧ ѕвѣ́рїе побѣ́гнꙋтъ, и҆ живота̀ на́шегѡ стра́жїе а҆́гг҃ли прїи́дꙋтъ, де́нь весе́лїѧ творѧ́ще ѡ҆ ѡ҆браще́нїи є҆ѧ̀, и҆ дх҃а благода́ть прихо́дитъ въ ню̀, ᲂу҆чѧ̀ ю҆̀ ра́зꙋмꙋ: ꙗ҆́кѡ да сохранена̀ бꙋ́детъ во благи́хъ, и҆ на бѡ́льшаѧ взы́детъ.

и҃. Ѻ҆рꙋ́жїе ѻ҆тцы̀ дꙋхо́вное, моли́твꙋ ᲂу҆ставлѧ́ютъ, и҆ нѣ́сть мо́щно ра́звѣ тоѧ̀ на бра́нь и҆сходи́ти, да не въ странꙋ̀ врагѡ́въ ꙗ҆́кѡ коры́сть плѣне́ны бꙋ́демъ: моли́твы ᲂу҆́бѡ чи́стыѧ нѣ́сть стѧжа́ти, не пострада́вшемꙋ ко бг҃ꙋ пра́вымъ се́рдцемъ, то́й бо є҆́сть даѧ́й человѣ́кꙋ ра́зꙋмъ.

ѳ҃. Є҆́же стꙋжа́тисѧ дꙋшѝ ѿ страсте́й, и҆ влага́тисѧ то́й въ сва́ры и҆ не хотѧ́щей, ничто́же є҆́сть чꙋ́дно: а҆ є҆́же коснѣ́ти въ на́съ помыслѡ́мъ и҆́хъ и҆ стра̑сти подвиза́ти, ꙗ҆̀же въ на́съ сꙋ́ть. Пе́рвое ᲂу҆́бѡ безгрѣ́шно є҆́сть, второ́е же а҆́ще мꙋ́жески проти́вꙋ бра́вшесѧ побѣди́мъ, вѣне́цъ прїѧ́ти сподо́бимсѧ: а҆́ще ли сла́бостїю и҆ ᲂу҆страше́нїемъ побѣжде́ни бꙋ́демъ, мꙋ́къ и҆ томле́нїѧ досто́йни бꙋ́демъ.

і҃. Трѝ ᲂу҆́бѡ сꙋ́ть рожде́ствєнныѧ стра̑сти, и҆́хже ра́ди быва́ютъ всѧ̑. Сластолю́бїе, сребролю́бїе, и҆ славолю́бїе, и҆̀мже послѣ́дꙋютъ дрꙋги́хъ пѧ́ть дꙋхѡ́въ лꙋка́выхъ, и҆ къ томꙋ̀ ѿ тѣ́хъ мно́гое быва́етъ мно́жество страсте́й, и҆ ви́ды различноѡбра́зныѧ ѕло́бы. Побѣди́вый ᲂу҆́бѡ трѝ нача́льники старѣ́йшыѧ, разрꙋши́лъ є҆́сть и҆ пѧ́ть, посе́мъ и҆ всѧ̑ побѣдѝ стра̑сти.

а҃і. Є҆ли́кѡ ᲂу҆́бѡ стра̑сти содѣ́ѧхомъ, си́хъ па́мѧть дꙋ́шꙋ стра́стнѣ мꙋ́читъ: є҆гда́ же стра̑стнаѧ помышлє́нїѧ ѿню́дъ ѿ се́рдца ѡ҆чи́стѧтсѧ, ꙗ҆́кѡ нижѐ прилага́тисѧ къ немꙋ̀, тогда̀ зна́менїе ꙗ҆влѧ́етсѧ ѿпꙋще́нїѧ пре́жнихъ грѣхѡ́въ. До́ндеже ᲂу҆̀бо стра́стнѣ дꙋша̀ подвиза́етсѧ, пови́нна ꙗ҆влѧ́етсѧ, и҆ грѣхо́вное въ не́й познава́етсѧ ѡ҆держа́нїе.

в҃і. Тѣлє́снымъ ᲂу҆́бѡ и҆ плотски̑мъ страстє́мъ, тѣле́сными ѕлострада́нїи ᲂу҆малѧ́тисѧ подоба́етъ: дꙋшє́внымъ же и҆ не ꙗ҆влє́ннымъ смире́нною мꙋ́дростїю, и҆ кро́тостїю, и҆ любо́вїю разорѧ́тисѧ.

г҃і. По́хоть ᲂу҆́бѡ стра́стнꙋ ᲂу҆вѧда́етъ воздержа́нїе со смире́нїемъ, ꙗ҆́рость же палѧ́щꙋю ᲂу҆кроща́етъ любы̀. По́мыслы лꙋка̑выѧ собира́етъ моли́тва просте́рта съ па́мѧтїю бж҃їею, и҆ та́кѡ трича́стное дꙋшѝ ѡ҆чища́етсѧ: се́ бо и҆справлѧ́ѧ бж҃е́ственный а҆пⷭ҇лъ речѐ: ми́ръ гони́те и҆ свѧты́ню, без̾ неѧ́же никто́же ᲂу҆́зритъ гдⷭ҇а¹⁴⁰⁸.

д҃і. Нѣ́цыи ᲂу҆́бѡ недоꙋмѣ́ша ре́кше, ꙗ҆́кѡ по́мыслъ ли стра̑сти воздвиза́етъ, и҆лѝ стра̑сти по́мыслы; И҆ ѻ҆́вѣмъ ᲂу҆́бѡ сѐ глаго́лющымъ, нѣ̑кїимъ же ѻ҆́но, а҆́зъ же глаго́лю, ѿ страсте́й помыслѡ́мъ подвиза́тисѧ: а҆́ще бо не бы́ша бы́ли въ дꙋшѝ стра̑сти, то̀ не бы́ша тѣ́хъ помышлє́нїѧ стꙋжа́ли є҆́й.

є҃і. Ѻ҆бы́чай є҆́сть при́снѡ борю́щымсѧ съ на́ми врагѡ́мъ, возмѡ́жныѧ и҆ готѡ́выѧ на́мъ добродѣ́тєли возбранѧ́ти, невозмѡ́жныѧ же и҆ неꙋтверждє́нныѧ любо́вїю крѣ́пкою на́мъ твори́ти влага́ютъ: молчали̑вымъ ᲂу҆́бѡ и҆ ѿше́льникѡмъ, жела́нїе ѻ҆́бщагѡ житїѧ̀ пра̑вила влага́ютъ, под̾ вла́стїю же преꙋспѣва́ющихъ, молчали́выхъ дѣла̀ дѣ́лати понꙋжда́ютъ: и҆ се́ю ᲂу҆́бѡ ле́стїю на кꙋ́юждо добродѣ́тель превзима́ютсѧ: но мы̀ ᲂу҆́бѡ ра́зꙋма не не вѣ́мы, всѧ̑ дѡ́браѧ и҆́хже вѣ́дѧще, во вре́мѧ и҆́хъ и҆ въ мѣ́рꙋ твори́мъ: па́ки же вре́дное, безмѣ́рное и҆ неꙋтвержде́нное до конца̀ возненави́димъ.

ѕ҃і. Въ мі́рѣ живꙋ́щымъ и҆ приближа́ющымсѧ къ веще́мъ страсте́й, бра́нїю по дѣѧ́нїю бѣ́си вою́ютъ и҆ бо́рютсѧ, сꙋ́щымъ же въ пꙋсты́нѧхъ, веще́й ра́ди недоста́тка, помышле́ньми стꙋжа́ютъ: ѕѣлѡ́ же лютѣ́йши пе́рвыѧ втора́ѧ бра́нь бы́сть. Ѻ҆́на бо, ве́щи ра́ди, вре́мене тре́бꙋетъ и҆ мѣ́ста гото́вагѡ, сїѧ́ же ᲂу҆ма̀ благоподви́жна нѣ́какѡ и҆ нелѣ́ностна: проти́вꙋ то́йже безпло́тнѣй бра́ни, проти́внаѧ бра́нь, на́мъ чи́стаѧ моли́тва дана̀ є҆́сть. Тѣ́мъ и҆ побѣди́тельна сїѧ̀ взаконе́нна є҆́сть, воѡрꙋжа́ющымсѧ то́ю къ бра́немъ мы̑сленнымъ.

з҃і. Кончи́нꙋ ᲂу҆́бѡ страсте́мъ, ме́ртвость бж҃е́ственный а҆по́столъ ꙗ҆влѧ́ѧ, речѐ: и҆̀же сꙋ́ть хрⷭ҇тѡ́вы, пло́ть распѧ́ша со страстьмѝ и҆ похотьмѝ¹⁴⁰⁹. Є҆гда̀ ᲂу҆́бѡ стра̑сти ᲂу҆мертви́мъ и҆ по́хѡти погꙋби́мъ, и҆ плотскі́й смы́слъ повине́мъ дх҃ови, тогда̀ во́змемъ кре́стъ, и҆ въ слѣ́дъ по́йдемъ хрⷭ҇та̀. Ничто́же бо и҆́но ѿхожде́нїе ѿ мі́ра є҆́сть, но ᲂу҆мерщвле́нїе страсте́й, и҆ ꙗ҆вле́нїе во хрⷭ҇тѣ̀ сокрове́ннагѡ живота̀.

и҃і. Ѿ воста́нїѧ тѣлесѐ сме́рти сеѧ̀ стра́ждꙋщїи, и҆ на бра́нь по всѧ̑ часы̀ на ню̀ воѡрꙋжа́ющїисѧ, не пло́ть, но себѐ да порица́ютъ. А҆́ще бо ті́и не да́ли бы́ша крѣ́пость и҆ посла́бїе то́й, и҆ во́лю є҆ѧ̀ твори́ли, то̀ не бы́ша толи́кѡ ѿ неѧ̀ страда́ли. И҆лѝ не вѣ́даютъ распе́ншихъ ю҆̀ со страстьмѝ и҆ похотьмѝ, носѧ́ще тꙋ̀ ꙗ҆́кѡ да поспѣ́шницꙋ па́че ко благи̑мъ притѧ́жꙋтъ, а҆ не къ сопроти̑внымъ, и҆ повинꙋ́ша ю҆̀ пребыва́ти въ бж҃їи зако́нѣ; И҆ ті́и ᲂу҆́бѡ та́кожде да творѧ́тъ, и҆ тогѡ́жде, є҆гѡ́же и҆ предрече́ннїи насладѧ́тсѧ поко́ѧ: да́ждь бо, речѐ, кро́вь, и҆ прїимѝ дх҃ъ.

ѳ҃і. Всѧ́кое сложе́нїе по́мысла, къ нѣ́коей ѿрече́ннѣй по́хоти, ре́кше манове́нїе сла́стное, грѣ́хъ є҆́сть и҆́нокꙋ. Пе́рвѣе ᲂу҆́бѡ по́мыслъ прихо́дитъ стра́стною ча́стїю ᲂу҆́мъ ѡ҆мрача́ѧ, та́же посе́мъ прекланѧ́етсѧ дꙋша̀ къ сла́сти, не держа́щисѧ бра́ни, и҆ къ томꙋ̀ сложе́нїе нари́четсѧ, є҆́же ꙗ҆́коже рече́сѧ грѣ́хъ є҆́сть, поне́же подвиза́етъ глаго́лемꙋю стра́сть, посе́мъ пома́лꙋ прихо́дитъ и҆ въ дѣ́ѧтельное дѣѧ́нїе. Сегѡ̀ ра́ди ᲂу҆блажа́етъ проро́къ вавѷлѡ́нскїѧ младе́нцы разби́вшихъ ѡ҆ ка́мень¹⁴¹⁰, да ᲂу҆вѣ́дѧтъ и҆̀же а҆лфави́тꙋ семꙋ̀ ᲂу҆чи́вшїисѧ рече́нное.

к҃. Любвѐ ми́ра а҆́гг҃ли слꙋжи́телїе сꙋ́ще, ра́дꙋютсѧ ѡ҆ на́шемъ покаѧ́нїи, и҆ предꙋспѣ́ѧнїи въ добродѣ́тели, и҆ ѿсю́дꙋ тща́тсѧ дх҃о́вныхъ и҆спо́лнитисѧ на́мъ бг҃овидѣ́нїй, и҆ поспѣшествꙋ́ютъ на всѧ́ко бла́го. Бѣ́сы же гнѣ́ва и҆ ѕло́бы сꙋ́ще содѣ́тели, ра́дꙋютсѧ разорѧ́емꙋ ви́дѧще добродѣ́тель, и҆ дѣла̀ благослѡ́вна подвлага́ютъ, во є҆́же въ сра̑мнаѧ мечта̑нїѧ дꙋ́шы на́шѧ ᲂу҆клони́ти.

к҃а. Вѣ́ра є҆́сть завѣща́нїе бла́го, та́ бо ражда́етъ на́мъ стра́хъ бж҃їй: то́й же наꙋча́етъ на́съ за́повѣдей соблюде́нїю, є҆́же глаго́летсѧ дѣ́йственно, ѿ негѡ́же возраста́етъ на́мъ блаже́нное безстра́стїе: любы́ же соверше́нїе всѣ́хъ сꙋ́щи за́повѣдей, всѧ̑ сосвѧзꙋ́етъ и҆ ᲂу҆твержда́етъ.

к҃в. Ꙗ҆́коже тѣле́сное чꙋ́вство здра́во быва́ѧ, ѡ҆щꙋща́етъ нѣ́кїй ѡ҆держа́щїй є҆го̀ недꙋ́гъ, не разꙋмѣва́ѧй же, нечꙋ́вствїемъ недꙋ́гꙋетъ. Та́кожде и҆ ᲂу҆́мъ, свою̀ дѣ́тель спаса́емꙋ а҆́ще стѧ́жетъ, разꙋмѣва́етъ свою̀ си́лꙋ: и҆ вѣ́сть ѿкꙋ́дꙋ є҆мꙋ̀ стра̑сти мꙋчи́тельнѣ прихо́дѧтъ, и҆ къ ни̑мъ крѣ́пкꙋю воздвиза́етъ бра́нь. Лю́то же а҆́ще не чꙋ́вствꙋѧ провожда́етъ дни̑, съ но́щїю борю́щемꙋсѧ ᲂу҆подо́бльсѧ, сѡ́нїѧ по́мыслы бра̑нныѧ вмѣнѧ́ѧ.

к҃г. Є҆гда̀ слове́сное на́ше неѻсла́бнѡ прилага́етсѧ къ бг҃овидѣ́нїѧ добродѣ́тели, и҆ по́хотное къ самомꙋ̀ жела́ющи да́телю благи́хъ хрⷭ҇тꙋ̀, ꙗ҆́ростное же на бѣ́сы воѡрꙋжа́етсѧ, тогда̀ по є҆стествꙋ̀ первозда́нномꙋ си̑лы на́шѧ дѣ́йствꙋютъ.

к҃д. Трича́стна є҆́сть всѧ́ка слове́снаѧ дꙋша̀, по бг҃осло́вꙋ григо́рїю, въ слове́снѣмъ составлѧ́ющейсѧ добродѣ́тели, смы́слъ наречѐ и҆ ра́зꙋмъ и҆ мꙋ́дрость. Въ ꙗ҆́ростнѣмъ же мꙋ́жество и҆ терпѣ́нїе, въ по́хотнѣмъ же любо́вь и҆ цѣломꙋ́дрїе, и҆ воздержа́нїе. Пра́вда же во всѣ́хъ си́хъ несѣ́ѧнна бы́сть досто́йнѣ дѣ́йствовати ᲂу҆строѧ́ѧ. И҆ смы́сломъ ᲂу҆́бѡ сопроти̑вныѧ покорѧ́ти си̑лы, и҆ спѣши́ти къ добродѣ́телемъ. Цѣломꙋ́дрїемъ же безстра́стнѣ всѧ̑ созерцава́ти. Любо́вїю всѧ̑ человѣ́ки ꙗ҆́кѡ и҆ самаго̀ себѐ люби́ти. Воздержа́нїемъ ко всѧ́кой сла́сти па́кость творѧ́щей, мꙋ́жествомъ же и҆ терпѣ́нїемъ на неви́димꙋю бра́нь воѡрꙋжа́тисѧ. Сѐ составле́нїе бг҃ослове́сныѧ дꙋшѝ ѧ҆зы́къ и҆звѣщава́етъ.

к҃є. Цѣломꙋ́дрїю прилѣжа́й, блаже́ннꙋю лю́битъ чистотꙋ̀, ю҆́же никто́же погрѣши́тъ безстра́стїемъ тꙋ̀ наре́къ. Да ᲂу҆держи́тъ ᲂу҆́бѡ и҆ порабо́титъ пло́ть, смире́ннымъ по́мысломъ бж҃е́ственнꙋю призыва́ѧ благода́ть, и҆ жела́ємаѧ полꙋ́читъ. Пита́ѧй же тѣ́ло въ невоздержа́нїи бра́шенъ, дх҃омъ блꙋда̀ болѣ́зненъ бꙋ́детъ. Ꙗ҆́коже вода̀ мно́га ᲂу҆гаша́етъ пла́мень, та́кѡ раждеже́нїе пло́ти и҆ мечта̑нїѧ сра̑мна, погꙋблѧ́етъ а҆лка́нїе со смире́нїемъ.

к҃ѕ. Ѕлопомнѣ́нїѧ стра́сть, ѿню́дъ да ѿстꙋ́питъ ѿ дꙋшѝ твоеѧ̀, ѽ хрⷭ҇толю́бче! ника́коже да́ждь мѣ́сто враждѣ̀: ꙗ҆́коже бо ѻ҆́гнь сокрове́нъ въ коноплѧ́хъ, та́кѡ и҆ ѕлопомнѣ́нїе гнѣздѧ́сѧ въ се́рдцы, па́че же моли́сѧ за ѡ҆скорби́вшаго тѧ̀ те́плѣ, и҆ добро̀ творѝ є҆мꙋ̀, є҆ли́кѡ а҆́ще рꙋка̀ твоѧ̀ мо́жетъ, ꙗ҆́кѡ да и҆зба́виши дꙋ́шꙋ твою̀ ѿ стра́сти, и҆ не без̾ дерзнове́нїѧ бꙋ́деши во вре́мѧ моли́твы твоеѧ̀.

к҃з. Въ се́рдцы смире́нныхъ почі́етъ гдⷭ҇ь. Въ се́рдцы же го́рдыхъ стра̑сти безче́стїѧ. Ничто́же бо та́кѡ си́льнѡ возмога́етъ на ны̀, ꙗ҆́коже го́рдостнїи по́мыслы. Ничто́же си́це и҆скоренѧ́етъ ѕло́е бы́лїе дꙋше́вное, ꙗ҆́коже блаже́нное смире́нїе, тѣ́мже и҆ страстоꙋбі́йца въ пра́вдꙋ нарече́нно бы́сть.

к҃и. Ѿ пѡ́мыслъ ѕлы́хъ дꙋша̀ твоѧ̀ да ѡ҆чища́етсѧ, и҆ въ до́брыхъ да просвѣща́етсѧ ра́зꙋмѣхъ, и҆мѣ́ѧ при́снѡ во ᲂу҆мѣ̀ рече́нное: ꙗ҆́кѡ сластолюби́во се́рдце, темни́ца и҆ вери́га є҆́сть во вре́мѧ и҆схо́да: трꙋдолюби́во же две́рь ѿве́рзенна. Дꙋ́шꙋ бо вои́стиннꙋ чи́стꙋ и҆сходѧ́щꙋ ѿ тѣлесѐ а҆́гг҃ли наставлѧ́ютъ къ блаже́нномꙋ ведꙋ́ще животꙋ̀, ѡ҆скверне́ннꙋ же и҆ не пока́ѧвшꙋсѧ, ᲂу҆вы̀ мнѣ̀, бѣ́сы прїи́мꙋтъ.

к҃ѳ. Красна̀ ᲂу҆́бѡ глава̀ ᲂу҆кра́шенна вѣнце́мъ многоцѣ́ннымъ, ка́менїемъ і҆нді́йскимъ и҆ би́серы свѣтѧ́щисѧ. Краснѣ́йша же несказа́ннѡ дꙋша̀ богатѧ́щаѧсѧ ра́зꙋмомъ бж҃їимъ, и҆ свѣ́тлыми бг҃овидѣ́нїи просвѣще́нна, все́льшїйсѧ и҆мꙋ́щи въ ню̀ ст҃ы́й дх҃ъ. И҆ кто̀ и҆сповѣ́сть добро́тꙋ блаже́нныѧ тоѧ̀ дꙋшѝ.

л҃. Ꙗ҆́рости и҆ гнѣ́вꙋ, ѽ мни́ше! не да́ждь водвори́тисѧ въ тѧ̀. Мꙋ́жъ бо ꙗ҆́ръ, не благоѡбра́зенъ. Въ сердцы́ же кро́ткихъ, почі́етъ мꙋ́дрость. А҆́ще ли гнѣ́ва стра́сть ѡ҆блада́етъ дꙋше́ю твое́ю, лꙋ́чшїи тебѐ ѡ҆брѧ́щꙋтсѧ въ мі́рѣ живꙋ́щїи, и҆ посра́мленъ и҆ небрего́мь бꙋ́деши мни́хъ.

л҃а. Во всѧ́кой напа́сти и҆ во всѧ́кой бра́ни, моли́твꙋ стѧжѝ, непобѣди́мое ѻ҆рꙋ́жїе, и҆ хрⷭ҇то́вою побѣди́ши благода́тїю. Чиста́ же сїѧ̀ да бꙋ́детъ, ꙗ҆́коже мꙋ́дрый на́мъ ᲂу҆чи́тель вопїе́тъ: хощꙋ́ бо, речѐ, мѡли́твы твори́ти мꙋжє́мъ на всѧ́комъ мѣ́стѣ, воздѣ́юще преподѡ́бныѧ рꙋ́ки без̾ гнѣ́ва и҆ размышле́нїѧ¹⁴¹¹. Таковѣ́й же не прилѣжа́й моли́твѣ, пре́данъ є҆́сть напа́стємъ и҆ страстє́мъ.

л҃в. Вїнꙋ̀ ᲂу҆́бѡ, весели́ти се́рдце человѣ́кꙋ¹⁴¹², пи́сано є҆́сть, ты́ же пла́кати и҆ рыда́ти ѡ҆бѣща́всѧ, такова́гѡ ᲂу҆клони́сѧ весе́лїѧ, и҆ возвесели́шисѧ дарова́нїи дх҃о́вными, веселѧ́сѧ же вїно́мъ, со сра́мными поживе́ши по́мыслы и҆ во мнѡ́ги впаде́ши скѡ́рби.

л҃г. Пра́здники не вїнопи́тїемъ творѝ, но ѡ҆бновле́нїемъ ᲂу҆ма̀, и҆ дꙋшѝ чистото́ю, ѡ҆б̾ѧда́ѧйсѧ же и҆ вїно̀ пїѧ́й, прогнѣ́ваеши па́че пра́здникѡмъ нача́льника.

л҃д. Бдѣ́ти въ моли́твахъ и҆ во чте́нїѧхъ всегда̀ ᲂу҆́бѡ, въ пра́здники же па́че повелѣно̀ на́мъ є҆́сть. Бо́дръ ᲂу҆́бѡ и҆́нокъ тни́тъ ра́зꙋмъ сво́й къ бг҃ꙋ въ видѣ́нїѧхъ дꙋ́шꙋ свою̀ насыща́ѧ. со́нъ же мно́гъ ᲂу҆́мъ ѡ҆дебелѣва́етъ: но блюди́сѧ не вда́ти себѐ во бдѣ́нїе неподо́бно пѡ́мыслъ ѕлы́хъ, лꙋ́чше бо є҆́сть спа́ти, не́жели въ словесѣ́хъ и҆ по́мыслехъ бдѣ́ти сꙋ́етныхъ.

л҃є. Ѕмїю̀ пита́ѧ на ло́нѣ, и҆ по́мыслъ лꙋка́въ въ се́рдцы, ᲂу҆мерщвле́нна бꙋ́дета: ѻ҆́во ᲂу҆́бѡ тѣ́ло ᲂу҆ѧзвѝ жа́ломъ ꙗ҆дови́тымъ, ѻ҆́въ же въ дꙋшѝ положи́въ ꙗ҆́дъ смертоно́сенъ. Но и҆сча̑дїѧ ѕмїи̑на ско́рѡ ᲂу҆бїе́мъ, и҆ по́мыслы лꙋка́выми въ сердца́хъ не боли́мъ, да не го́рцѣ болѣ́ти и҆́мамы.

л҃ѕ. Дꙋша̀ чиста̀ сосꙋ́дъ и҆збра́нъ пра́вды нарече́нна бꙋ́детъ, и҆ ѻ҆гра́дъ заключе́нъ, и҆ и҆сто́чникъ запечатлѣ́нъ, и҆ престо́лъ чꙋ́вства. Скве́рнами же нечи́стыми ѡ҆сквернѧ́ющїйсѧ ска́редїѧ и҆ ѕлосмра́дїѧ и҆спо́лнитсѧ.

л҃з. Оу҆добре́нїемъ ри́зъ, и҆сполне́нїемъ чре́ва, и҆ ѿ бесѣ́дъ вре́дныхъ, ѕлы̑мъ ражда́тисѧ помыслѡ́мъ въ дꙋшѝ, ѿ и҆скꙋ́сныхъ и҆ дѣ́лательныхъ ѻ҆тє́цъ слы́шахомъ.

л҃и. По́хоть и҆мѣ́нїѧ въ дꙋша́хъ и҆́нокѡвъ да не водворѧ́етсѧ, многоимѣ́нный бо мона́хъ, кора́бль є҆́сть во́дъ и҆спо́лненъ, волна́ми печа́ли трꙋжда́ѧсѧ, и҆ въ ско́рбнѣй глꙋбинѣ̀ погрꙋжа́ѧсѧ, мнѡ́гимъ бо страстє́мъ сребролю́бїе роди́тельница є҆́сть. Тѣ́мже и҆ ко́рень всемꙋ̀ ѕлꙋ̀¹⁴¹³, въ пра́вдꙋ нарица́етсѧ.

л҃ѳ. Неимѣ́нїе и҆ молча́нїе, сокро́вище є҆́сть сокрове́нно на селѣ̀ мона́шескагѡ житїѧ̀, ше́дъ ᲂу҆́бѡ прода́ждь и҆мѣ́нїе твоѐ и҆ да́ждь ᲂу҆бѡ́гимъ, и҆ сѐ кꙋпѝ село̀, и҆ сокро́вище вскопа́въ себѣ̀ некра́домо сохранѝ, да ѡ҆богатѣ́еши бога́тствомъ неистоща́емымъ.

м҃. Со ѻ҆тце́мъ дх҃о́внымъ всели́всѧ, и҆ по́льзꙋ ѡ҆щꙋти́въ ѿ негѡ̀, никто́же тѧ̀ да ѿлꙋчи́тъ ѿ любвѐ є҆гѡ̀ и҆ совокꙋпле́нїѧ, не ѡ҆сꙋдѝ є҆гѡ̀, ни въ че́мже не ѕлосло́ви ѡ҆блича́емь, и҆лѝ бїе́мь, не вда́ждь слꙋ́ха твоегѡ̀ никомꙋ́же на́нь глаго́лющꙋ, не сочета́йсѧ съ клевета́ющимъ на́нь, да не прогнѣ́ваетсѧ на тѧ̀ гдⷭ҇ь, и҆ потреби́тъ тѧ̀ ѿ кни́гъ живо́тныхъ.

м҃а. Ѿрече́нїѧ по́двигъ, покоре́нїемъ, ꙗ҆́коже и҆ ѿ и҆скꙋ́са навыко́хомъ, сегѡ́ же преходѧ́й, тремѝ да ѡ҆гради́тсѧ зна́менїи ѻ҆рꙋ́жїѧ, вѣ́рою, рекꙋ̀, и҆ наде́ждою, и҆ любо́вїю, и҆ по́двигомъ до́брымъ подвиза́всѧ, пра́вды прїи́метъ вѣне́цъ.

м҃в. Не бꙋ́ди дѣлѡ́мъ ѻ҆тца̀ твоегѡ̀ сꙋдїѧ̀, но за́повѣдємъ соверши́тель, ѻ҆бы́чай бо бѣсовѡ́мъ тогѡ̀ недоста́тки пока́зовати тебѣ̀, да твоѝ ᲂу҆́ши ѡ҆глꙋша́тъ къ глаго́лємымъ (ѿ негѡ̀) и҆лѝ на бра́ни не крѣ́пка тѧ̀ и҆ страшли́ва пока́жꙋтъ во́ина, и҆лѝ пребыва́ти въ невѣ́рствїѧ по́мыслѣхъ, и҆ разсла́бивше тѧ̀ повинꙋ́ющасѧ и҆̀мъ сла́ба сотворѧ́тъ ко всѧ́кїѧ добродѣ́тели ѡ҆́бразꙋ.

м҃г. Ѻ҆те́ческихъ преслꙋша́ѧйсѧ за́повѣдей, пе́рвыхъ ѡ҆бѣ́тѡвъ ѿрече́нїѧ престꙋ́пникъ ѡ҆брѣта́етсѧ: послꙋша́нїе же прїе́мый и҆ свою̀ во́лю мече́мъ смире́ннагѡ смы́сла ѿсѣ́къ: се́й ѡ҆бѣща́нїе и҆спо́лни, є҆́же пред̾ мно́гими по́слꙋхи хрⷭ҇то́ви ѡ҆бѣща́сѧ.

м҃д. Назна́меновавше разꙋмѣ́хомъ, и҆ ꙗ҆́снѡ наꙋчи́хомсѧ, ꙗ҆́кѡ въ покоре́нїи ѻ҆те́честѣмъ пребыва́ющымъ, ѕѣлѡ̀ зави́дѧтъ вразѝ живота̀ на́шегѡ бѣ́си, скреже́щꙋще зꙋбы̀ свои́ми на нѧ̀, и҆ всѧ̑кїѧ ᲂу҆хищрѧ́юще кѡ́зни, є҆́же ѿстꙋпи́ти и҆̀мъ и҆ лиши́тисѧ ѻ҆те́ческихъ нѣ́дръ. И҆ вины̑ показꙋ́ютъ и҆̀мъ а҆́ки благосло́вны, раздражє́нїѧ приво́дѧтъ, не́нависть на ѻ҆тца̀ возставлѧ́ютъ, тогѡ̀ наказа̑нїѧ ꙗ҆́кѡ бꙋеслѡ́вїѧ ꙗ҆влѧ́ютъ, ѡ҆бличє́нїѧ же ꙗ҆́кѡ стрѣ́лы и҆з̾ѡщре́нны подтыка́ютъ. И҆ что̀ речѐ свобо́дь сы́й, и҆ ра́бъ бы́сть, и҆ па́че ра́бъ неми́лостивагѡ, и҆ неразꙋ́мнагѡ, и҆ невѣ́жды, и҆ неразсꙋди́тельнагѡ, и҆ ꙗ҆́ростнагѡ сегѡ̀ бы́сть человѣ́ка сꙋ́ща по всемꙋ̀ тебѣ̀ подо́бна, доко́лѣ же и҆́гомъ рабо́тнымъ стира́ешисѧ, и҆ свобо́днагѡ свѣ́та не ᲂу҆̀ зри́ши. Посе́мъ гости̑нницы, и҆ недꙋ́жныхъ посѣщє́нїѧ, и҆ ᲂу҆бо́гихъ ми́лѡванїѧ влага́ютъ. Посе́мъ коне́чнагѡ молча́нїѧ, и҆ по́двиги и҆́нѡческїѧ ꙗ҆̀же въ молча́нїи, дѣ́лати похвалѧ́ютъ, и҆ всѣ́хъ ѕлы́хъ пле́велъ ѡ҆́бразъ въ се́рдце насѣва́ютъ страда́льца и҆ во́ина хрⷭ҇то́ва благочести́вагѡ, да то́кмѡ ѿ дх҃о́вныѧ ѡ҆гра́ды того̀ и҆жденꙋ́тъ, и҆ ѿ безмо́лвїѧ тишины̀ и҆звле́кше, къ мѧтꙋ́щейсѧ дꙋшѣ̀ па́гꙋбнѣй бꙋ́ри въ мо́ре вве́ргнꙋтъ. Посе́мъ ꙗ҆́кѡ плѣ́нника въ свою̀ вла́сть прїе́мше, по ѕлѣ́й тѣ́хъ во́ли послѣ́довати сотворѧ́тъ.

м҃є. Тебѣ́ же въ покоре́нїи ѻ҆́ч҃и сꙋ́щꙋ, вра́жїѧ борю́щаѧ тѧ̀ ле́сть да не ᲂу҆таи́тсѧ, ни ѡ҆бѣща́нїѧ своегѡ̀ є҆́же къ бг҃ꙋ забыва́й, ни бѣсѡ́вскимъ нарꙋга́нїемъ побѣжде́нъ быва́й, ни ѡ҆бличе́нїѧ, ни ᲂу҆коре́нїѧ ѿбѣга́й, ни влага́нїю ѕлы́хъ пѡ́мыслъ повинꙋ́йсѧ, ни лю́тости ѻ҆те́ческїѧ бѣ́гай, ни самоꙋго́дїѧ и҆ самово́лїѧ де́рзостїю, смиренномы́сленномꙋ и҆ бл҃го́мꙋ безче́ствꙋй и҆́гꙋ, но влады́чнее въ се́рдцы положи́въ сло́во: ꙗ҆́кѡ претерпѣ́вый до конца̀, то́й спасе́нъ бꙋ́детъ. Съ терпѣ́нїемъ тецы̀ на предлежа́щїй тѝ по́двигъ, взира́ѧ на нача́льника вѣ́ры и҆ соверши́телѧ і҆и҃са¹⁴¹⁴.

м҃ѕ. Злата́рь ᲂу҆́бѡ зла́то въ горни́ло вложи́въ, чистѣ́йше твори́тъ є҆̀, и҆ новонача́льный и҆́нокъ, покоре́нїѧ страда́нїемъ себѐ вда́въ, и҆ всѣ̑мъ скѡ́рбнымъ по бж҃е́ственныхъ за́повѣдехъ разжига́ѧсѧ, по трꙋдѣ́хъ же и҆ терпѣ́нїи и҆ ско́рбехъ ѻ҆бы̑чаи ѕлы̑ѧ погрꙋ́жъ, и҆ послꙋша́нїѧ навы́къ, свѣ́телъ ᲂу҆строѧ́етсѧ, и҆ досто́инъ быва́етъ небе́сныхъ сокро́вищъ, и҆ неги́бнꙋщагѡ пребыва́нїѧ и҆ бл҃же́нныѧ кончи́ны, ѿѻнꙋ́дꙋже ѿи́де болѣ́знь всѧ́ка, печа́ль, и҆ воздыха́нїе, весе́лїе же и҆ вы́нꙋ благоꙋха́нїе насажде́нно є҆́сть.

м҃з. Вѣ́ра пра́ва, и҆ соблюде́нїе за́повѣдей, ражда́етъ бж҃їй стра́хъ, и҆дѣ́же бо бж҃їй стра́хъ, тꙋ̀ и҆ за́повѣдємъ соблюде́нїе, ѿ соблюде́нїѧ за́повѣдей, составлѧ́етсѧ дѣ́йственнаѧ добродѣ́тель, сеѧ́ же пло́дъ є҆́сть чи́стаѧ моли́тва, и҆ бг҃овидѣ́нїю нача́ло, безстра́стїе же достигі́й, въ любѡ́вныѧ двє́ри вни́де, ѡ҆ любви́ же возлю́бленный ᲂу҆чени́къ предгласѝ: бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ¹⁴¹⁵. Благосочета́ннꙋ нѣ́кꙋю глави́знꙋ глаго́лющꙋ нѣ́коемꙋ слы́шахъ: ꙗ҆́кѡ ничто́же речѐ ѡ҆ ѡ҆чища́ющихъ тѣлеса̀ составлѧ́етсѧ посе́мъ со ѡ҆чи́щшимисѧ, добродѣ́тели же кꙋ́пнѡ ѡ҆чища́ютъ дꙋ́шꙋ, и҆ со ѡ҆чище́нными спребыва́ютъ.

м҃и. Ꙗ҆́кѡ красно̀ вои́стиннꙋ и҆ добро̀ мни́шеское житїѐ, поне́же за́повѣдємъ и҆ зако́нꙋ, и҆̀мже нача́льницы а҆пⷭ҇ли, тогѡ̀ сама́гѡ влⷣки, ѿ ст҃а́гѡ дх҃а наꙋчи́шасѧ, и҆сполни́тели быва́ютъ. хрⷭ҇то́вꙋ бо во́инꙋ невеще́ственнꙋ подоба́етъ бы́ти, и҆ безпеча́льнꙋ ѿ всѧ́кагѡ мꙋдрова́нїѧ и҆ дѣѧ́нїѧ мїрска́гѡ, ꙗ҆́коже речѐ а҆пⷭ҇лъ: никто́же во́инъ быва́ѧ, ѡ҆бѧзꙋ́етсѧ кꙋ́плѧми жите́йскими, да воево́дѣ ᲂу҆го́денъ бꙋ́детъ¹⁴¹⁶.

м҃ѳ. Подоба́етъ ᲂу҆́бѡ мни́хꙋ невеще́ственнꙋ бы́ти, безстра́стнꙋ, всѧ́кїѧ по́хоти ѕлы́ѧ кромѣ̀, не пита́тельнꙋ, не пїѧ́ницѣ, не закосни́вꙋ, не лѣни́вꙋ, не сребролюби́вꙋ, не сластолюби́вꙋ. А҆́ще бо кто̀ ѿ си́хъ не ᲂу҆дали́тсѧ, не мо́жетъ а҆́гг҃льскагѡ житїѧ̀ и҆спра́вити, сїе́ же да́рꙋетсѧ предречє́ннаѧ тща́щымсѧ и҆спра́вити и҆́го благо́е и҆ бре́мѧ ле́гкое, бж҃е́ственной наде́ждѣ ѡ҆блегча́ющей сїѧ̑, и҆ всѐ безстра́стнѣ и҆ съ поко́емъ дѣ́йствовати. Сла́дко пои́стиннѣ таково̀ житїѐ, и҆ дѣ́ланїе красно̀, и҆ ча́сть блага́ѧ, ꙗ҆́же не ѿи́метсѧ ѿ дꙋшѝ стѧжа́вшей сїѧ̑.

н҃. Жите́йскїѧ ѿстꙋпи́вый печа́ли, и҆ во и҆́ноческїй вше́дъ по́двигъ, не восхощѝ бога́тства на раздаѧ́нїе ᲂу҆бѡ́гимъ, є҆́сть бо и҆ сїѧ̀ ле́сть лꙋка́вагѡ къ тщесла́вїю приводѧ́щаѧ, ꙗ҆́кѡ да въ многопита́нїе вло́житъ тѝ ᲂу҆́мъ. А҆́ще бо и҆ хлѣ́бъ то́кмѡ и҆́маши и҆ во́дꙋ, мо́жеши и҆ си́ми страннолю́бїѧ твори́ти дѣ́ло, а҆́ще ли и҆ сегѡ̀ не и҆́маши, то́кмѡ предложе́нїемъ благи́мъ прїимѝ стра́ннаго, и҆ сло́во ᲂу҆тѣше́нїѧ да́въ є҆мꙋ̀: та́кѡ мо́жеши страннолю́бїѧ мздꙋ̀ прїѧ́ти. И҆́маши бо и҆ въ є҆ѵⷢ҇лїи ѿ гдⷭ҇а свидѣ́тельствꙋемꙋю вдови́цꙋ¹⁴¹⁷, двѣма̀ ца́тама то́кмѡ превозше́дшꙋю бога́тыхъ мно́гое подаѧ́нїе.

н҃а. Сїѧ̑ же речє́ннаѧ въ молча́нїи сѣдѧ́щымъ заповѣ́дащасѧ, сꙋ́щымъ же въ покоре́нїи ѻ҆́ч҃емъ, є҆ди́но то́чїю тѣ̑мъ во ᲂу҆мѣ̀ и҆мѣ́ти досто́итъ, є҆́же ни въ є҆ди́ной ѿню́дъ дѣ́лательныѧ за́повѣди ѿпада́ти, сїе́ бо и҆справлѧ́ющїи, всѐ сꙋ́ть и҆спра́вльше, ꙗ҆́коже па́ки и҆ сопроти́вное разꙋмѣва́й, а҆́ще ѿ такова́гѡ ѿпадꙋ́тъ житїѧ̀ и҆ ѻ҆пасе́нїѧ небрего́мы по всѧ́комꙋ ѡ҆́бразꙋ добродѣ́телей и҆ житїѧ̀ дх҃о́внагѡ бꙋ́дꙋтъ.

н҃в. Прїимѝ мо́й совѣ́тъ ѽ хрⷭ҇толю́бче, и҆ возлюбѝ стра́нствїе и҆ любы̀: сїѧ̑ бо тѧ̀ и҆змѣнѧ́тъ твоегѡ̀ ѻ҆те́чества печа́ли. Роди́тельными печа́льми, и҆ бли́жнихъ любо́вїю не прельща́йсѧ, пребыва́нїй ꙗ҆̀же во гра́дѣхъ бѣ́гай, въ пꙋсты́ни же па́че терпѝ глаго́лѧ съ дв҃домъ: сѐ ᲂу҆дали́хсѧ бѣ́гаѧ, и҆ водвори́хсѧ въ пꙋсты́ни¹⁴¹⁸.

н҃г. Ѻ҆со́бна и҆ ᲂу҆дале́нна ѿ мі́ра гонѝ мѣста̀, а҆́ще и҆ скꙋ́дость нꙋ́жныхъ и҆́мꙋтъ, и҆ а҆́ще ѡ҆бстꙋ́пѧтъ тѧ̀ вразѝ ꙗ҆́кѡ пче́лы и҆ ѕлы̑ѧ ѻ҆́сы, всѧ̑кїѧ тѝ прилага́юще бра̑ни, не ѿстꙋпа́й, ни ᲂу҆страша́йсѧ, не преклонѝ и҆̀мъ добропослꙋшли́ва слꙋ́ха, ни ѿбѣга́й по́стническагѡ по́двига, долготерпѣли́внѡ же па́че постраждѝ, поѧ̀ въ себѣ̀ и҆ глаго́лѧ: терпѧ̀ потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша моли́твꙋ мою̀¹⁴¹⁹. И҆ тогда̀ ᲂу҆́зриши бж҃їѧ вели́чїѧ застꙋпле́нїе, строе́нїе и҆ и҆́нъ всѧ́къ на спасе́нїе про́мыслъ.

н҃д. Дрꙋ́ги и҆мѣ́ти тѝ подоба́етъ ѽ хрⷭ҇толю́бче, полє́зныѧ слага́ющыѧсѧ къ житїю̀ дѣ́лы: мꙋ́жїе бо речѐ, ми́рны да бꙋ́дꙋтъ дрꙋ́ги твоѝ, и҆ бра́тїѧ дх҃о́вна, ѻ҆тцы̀ ст҃і́и, ѡ҆ ни́хже речѐ гдⷭ҇ь: ма́ти моѧ̀ и҆ бра́тїѧ моѧ̑ сі́и сꙋ́ть, творѧ́щїи во́лю ѻ҆ц҃а̀ моегѡ̀, и҆́же є҆́сть на нб҃сѣ́хъ.

н҃є. Не бꙋ́ди похотни́къ бра́шнѡмъ разли̑чнымъ и҆ и҆зрѧ̑днымъ, и҆ ѡ҆б̾ѧде́нїи смертоно́сныхъ, и҆ тѣ́хже ѻ҆бы́чныхъ, а҆́ще мо́щно є҆́сть, ѿрица́йсѧ сы́тости, рече́но бо є҆́сть: не прельща́йтесѧ сы́тостїю чре́ва.

н҃ѕ. Внѣ̀ ке́ллїи ча́стое пребыва́нїе, да бꙋ́детъ тѝ ѿрече́нно, (па́че же молча́ти и҆зво́ли,) є҆́сть бо тще́тно ѕѣлѡ̀: ѿе́млетъ благода́ть, ѡ҆мрача́етъ смы́слъ, ᲂу҆вѧда́етъ жела́нїе: сегѡ̀ ра́ди рече́но є҆́сть: паре́нїе по́хоти премѣнѧ́етъ ᲂу҆́мъ неѕло́бивъ¹⁴²⁰, и҆ пресѣка́етъ мно́гихъ блага̑ѧ стремлє́нїѧ: да не бꙋ́детъ ᲂу҆̀бо ᲂу҆́мъ тво́й преклоне́нъ, и҆ возмѧте́нъ молча́нїѧ ѡ҆́бразъ.

н҃з. Сѣдѧ́й въ ке́ллїи свое́й небезслове́сно и҆ пра́здности и҆спо́лненно творѝ своѐ дѣ́ло, без̾ ра́зꙋма ше́ствꙋѧй речѐ, всꙋ́е трꙋди́тсѧ: но стѧжѝ дѣ́ланїе бла́го, и҆ соберѝ сво́й ᲂу҆́мъ, (и҆) пред̾ ѻ҆чи́ма кончи́нꙋ и҆мѣ́ѧ, помѧнѝ мїрскꙋ́ю сꙋетꙋ̀, ꙗ҆́кѡ преле́стна є҆́сть, и҆ ничто́же сꙋ́ща, разꙋмѣ́й стра́шнагѡ словаположе́нїѧ ѿвѣ́тъ, ка́кѡ хотѧ́тъ на́съ го́рцыи сопроти́вницы, и҆ живота̀ на́шегѡ вразѝ, по ѡ҆́бразꙋ представлѧ́ти дѣѧ̑нїѧ на̑ша и҆ словеса̀ и҆ помышлє́нїѧ лꙋка̑ваѧ, ꙗ҆̀же мы̀ прїе́млѧхомъ, тѣ́мъ сїѧ̑ влага́ютъ. Помина́й и҆ во а҆́дѣ сꙋ́щыѧ мꙋ̑ки, ка́кѡ ᲂу҆̀бо сꙋ́ть та́мѡ затворє́нныѧ дꙋ́шы, въ каковѣ̀ стра́сѣ и҆ болѣ́зни, помина́й и҆ во ѻ҆́номъ послѣ́днѣмъ воскресе́нїи, хотѧ́щихъ слы́шати стра́шное ѡ҆сꙋжде́нїе, нелицемѣ́рнагѡ сꙋдїѝ: помина́й стꙋ́дъ прїе́млющъ грѣ̑шныѧ, помышлѧ́й поноше́нїе, ѡ҆бличе́нїе со́вѣсти, є҆́же тоѧ̀ ѡ҆бличе́нїемъ и҆зриновє́ннымъ бы́ти ѿ бг҃а, и҆ вве́ржєннымъ бы́ти въ вѣ́чный ѻ҆́гнь, и҆дѣ́же пла́чь и҆ скре́жетъ зꙋбѡ́мъ, и҆ дрꙋгі̑ѧ мꙋ̑ки всѧ̑ воспомина́ти не преста́й, и҆ тече́нїемъ сле́зъ ѡ҆блива́й лицѐ въ ра́зꙋмѣ, и҆лѝ стои́ши, и҆лѝ сѣди́ши: си́ми бо по́мыслы мно́ги ви́дѣхъ мно́жество сле́зъ стѧжа́вшихъ, и҆ дꙋшє́вныѧ си̑лы до конца̀ ꙗ҆́снѡ ѡ҆чи́стившихъ.

н҃и. Но и҆ пра́вєднымъ щади̑маѧ блага̑ѧ размышлѧ́й, ѡ҆деснꙋ́ю хрⷭ҇та̀ предстоѧ́нїе, бл҃гослове́нный гла́съ влⷣчень, и҆ наслѣ́дїе небе́снагѡ ца́рствїѧ, къ си̑мже и҆ дарова̑нїѧ, и҆ ра́дость конца̀ не и҆мꙋ́щꙋю, и҆ не преторга́емꙋ печа́лїю, и҆ ѻ҆би́тєли ѻ҆́ныѧ небє́сныѧ, и҆ со а҆́гг҃лы пребыва́нїе, и҆ и҆́на всѧ̑ ѡ҆бѣща̑ннаѧ гдⷭ҇а лю́бѧщымъ.

н҃ѳ. Сі́и же по́мыслы да пребыва́ютъ съ тобо́ю, да спѧ́тъ съ тобо́ю, и҆ совостаю́тъ. Зрѝ ᲂу҆́бѡ, и҆ не забыва́й си́хъ николи́же: но и҆дѣ́желибо а҆́ще є҆сѝ, ѿ ѻ҆́нѣхъ па́мѧти не и҆зводѝ свою̀ дꙋ́шꙋ, да и҆ ѕлі́и до конца̀ ѿбѣжа́тъ по́мыслы, и҆ ᲂу҆тѣше́нїѧ бж҃е́ственнагѡ и҆спо́лненъ бꙋ́деши. Си́ми бо дѣ́лы не ѡ҆гражде́нна дꙋша̀, молча́нїѧ и҆спра́вити не мо́жетъ: и҆сто́чникъ бо воды̀ не и҆мы́й, сꙋ́етно стѧжа̀ и҆́мѧ.

ѯ҃. И҆ сѐ ᲂу҆ста́въ молча̑льнымъ и҆спра́вити взако́нисѧ: по́стъ є҆ли́кѡ мо́щно проти́вꙋ си́лы, бдѣ́нїе же и҆ на землѝ лежа́нїе, и҆ и҆́но всѧ́ко ѕлострада́нїе бꙋ́дꙋщагѡ ра́ди поко́ѧ: недостѡ́йна бо, речѐ, страда́нїѧ ны́нѣшнѧгѡ вре́мене къ хотѧ́щей сла́вѣ ѿкры́тисѧ въ на́съ¹⁴²¹. И҆зрѧ́днѡ же моли́тва чи́стаѧ непреста́нна и҆ неѡскꙋ́дна, сїѧ̀ ᲂу҆́бѡ стѣна̀ є҆́сть тве́рдаѧ, и҆ приста́нище ти́хое, и҆ дѡ́брымъ дѣлѡ́мъ храни́ло, страсте́мъ разоре́нїе, дꙋшѝ блага́ѧ по́мощь, ᲂу҆мꙋ̀ чистота̀, трꙋжда́ющымсѧ поко́й, пла́чꙋщымсѧ ᲂу҆тѣше́нїе, а҆́гг҃льское пребыва́нїе. Моли́сѧ ᲂу҆̀бо, ѽ по́стниче! де́нь и҆ но́щь, со стра́хомъ и҆ тре́петомъ, тре́звымъ ᲂу҆мо́мъ и҆ бо́дрымъ, да моли́тва твоѧ̀ прїѧ́тна бꙋ́детъ гдⷭ҇еви: ѻ҆́чи бо, речѐ, гдⷭ҇ни на пра́ведныхъ, и҆ ᲂу҆́ши є҆гѡ̀ въ моли́твꙋ и҆́хъ.

ѯ҃а. Рече́но бы́сть нѣ́коемꙋ ѿ дре́внихъ ѕѣлѡ̀ и҆скꙋ́снѣ, и҆ влѣ́потꙋ, ꙗ҆́кѡ ѿ сопроти́вныхъ на́мъ бѣсѡ́въ, речѐ, пе́рвїи въ бра́ни нача́льницы, и҆̀же на́съ всѧ̑ сопроти̑внаѧ дѣ́йствовати потыка́юще, сꙋ́ть сі́и: похотѣ́нїѧ, чревоѡб̾ѧде́нїѧ дꙋ́хъ, и҆ сребролю́бїѧ, и҆ тщесла́вїѧ, и҆ні́и же про́чїи возслѣ́дꙋюще си̑мъ хо́дѧтъ, всѧ̑ па́кѡсти дꙋша́мъ на́шымъ и҆схода́тайствꙋюще.

ѯ҃в. И҆ вои́стиннꙋ ѿ и҆скꙋ́са разꙋмѣ́хомъ, ꙗ҆́кѡ нѣ́сть человѣ́кꙋ впа́сти въ грѣ́хъ, и҆лѝ въ кото́рꙋю либо стра́сть, а҆́ще не пе́рвѣе ѿ нѣ́коегѡ трїе́хъ си́хъ и҆споли̑нъ ᲂу҆ѧ́звленъ бꙋ́детъ, и҆ и҆на́кѡ нѣ́сть. Тѣ́мже и҆ трѝ сїѧ̑ по́мыслы дїа́волъ и҆ногда̀ сп҃сꙋ принесѐ, и҆́хже гдⷭ҇ь на́шъ бо́лїй ꙗ҆́вльсѧ, вспѧ́ть ѿлꙋчи́тисѧ дїа́волꙋ повелѣ̀. И҆ да́стъ на́мъ побѣ́дꙋ на ни́хъ, ꙗ҆́кѡ бла́гъ и҆ человѣколю́бецъ влⷣка, по всемꙋ̀ въ подобостра́стное на́мъ тѣ́ло ѡ҆бле́кшисѧ кромѣ̀ грѣха̀, показа́въ на́мъ безгрѣ́шнꙋю и҆ неле́стнꙋю стезю̀, по не́йже ходѧ́ще воѡбража́емъ но́ваго человѣ́ка въ себѣ̀, ѡ҆бновлѧ́юще по ѡ҆́бразꙋ созда́вшагѡ и҆̀.

ѯ҃г. Соверше́нною не́навистїю ненави́дѣти бѣ́сы, ꙗ҆́кѡ спасе́нїѧ на́шегѡ врагѝ, дв҃дское ᲂу҆́читъ сло́во, и҆ є҆́сть сѐ къ добродѣ́тели ѕѣлѡ̀ поле́зно. Но ᲂу҆́бѡ кто́ є҆сть соверше́нною не́навистїю ненави́дѧй врагѝ, и҆́же ни въ дѣ́лѣ ни въ помышле́нїи согрѣши́въ; А҆́ще ᲂу҆́бѡ помышле́нїй сосꙋ́ды въ на́съ сꙋ́ть, ка́кѡ къ ни̑мъ соверше́ннꙋ не́нависть и҆спра́вимъ; сластолюби́вое бо се́рдце си́хъ николи́же возненави́дѣти мо́жетъ.

ѯ҃д. Ѻ҆де́жда бра́чна є҆́сть, безстра́стїе дꙋшѝ слове́сныѧ, ѿ мїрски́хъ ѿлꙋчи́вшїѧсѧ страсте́й, и҆ всѣ́хъ ѿве́ргшїѧсѧ ѕлы́хъ по́хотей, ᲂу҆́мъ бг҃олюби́вый, бг҃овидѣ́нїи свѣ́тлыми свѣтѧ́щїйсѧ. Оу҆́мъ же подавлѧ́емь ѿ безчи́сленныхъ страсте́й, и҆ къ си̑мъ сла́дцѣ прилежа́й, совлачи́тсѧ ри́зы цѣломꙋ́дрїѧ, и҆ ѡ҆блачи́тсѧ рꙋ́бищи сра́мными и҆ ѡ҆скверне́нными, и҆ постыди́тсѧ, ꙗ҆́коже и҆ во є҆ѵⷢ҇лїи рꙋка́ма и҆ нога́ма свѧ́занный во тьмꙋ̀ кромѣ́шнꙋю вмета́емый¹⁴²²: занѐ ѿ таковы́хъ пѡ́мыслъ и҆ дѣѧ́нїй, и҆стка̀ себѣ̀ ѻ҆де́ждꙋ, ю҆́же недосто́йнꙋ бж҃е́ственныхъ слове́съ, сло́во ѡ҆сꙋдѝ бы́ти.

ѯ҃є. Є҆́же ѡ҆ самолю́бїи лꙋка́вомъ и҆ ненави́стнѣмъ всемꙋ́дръ нѣ́кто впра́вдꙋ провѣща̀: пе́рваѧ ᲂу҆́бѡ є҆́сть всѣ́хъ пѡ́мыслъ, лю́та сїѧ̀ самолю́бїѧ бра́нь, ꙗ҆́коже нѣ́кїй лю́тый мꙋчи́тель, съ ни́мже и҆ трїѐ, и҆ по си́хъ пѧ́ть, та́же и҆ всѝ ᲂу҆́мъ на́шъ восхища́ютъ.

ѯ҃ѕ. Дивлю́сѧ, а҆́ще кто̀ бра́шны насыща́ѧсѧ, мо́жетъ безстра́стїе стѧжа́ти: безстра́стїе же глаго́лю не то́чїю ѿ грѣха̀ ѡ҆чи́ститисѧ по дѣ́йствꙋ, сїе́ бо воздержа́нїе глаго́летсѧ: но є҆́же и҆ ᲂу҆ма̀ ѿ стра́стныхъ ка́пищъ и҆ і҆́дѡлъ нечи́стыхъ и҆ скве́рныхъ востѧ́гнꙋти, и҆ на не́бо возвестѝ, є҆́же и҆ впра́вдꙋ чистота̀ сердца̀ и҆менꙋ́етсѧ.

ѯ҃з. Оу҆до́бь нечи́стꙋю ѡ҆чи́стити дꙋ́шꙋ, и҆лѝ ѡ҆чище́ннꙋ па́ки ѡ҆скверни́ти: ѿре́кшымсѧ же мїрска́гѡ смꙋще́нїѧ, и҆ не вкꙋси́вшымъ сла́дости бж҃е́ственныѧ въ дꙋшѝ, и҆ въ нѣ̑кїѧ впа́сти и҆̀мъ грѣхѝ нѣ́сть сѐ чꙋ́дно. Чꙋ́дно же, пои́стиннѣ чꙋ́дно, вкꙋси́вшымъ сла́дкихъ бж҃їихъ глагѡ́лъ, и҆ чꙋ́вствовавшымъ въ дꙋша́хъ свои́хъ нѣ́кое бж҃е́ственное посѣще́нїе, и҆ ходи́вшымъ по пꙋте́хъ спасе́нїѧ, и҆ посе́мъ па́ки ѡ҆бра́щшымсѧ ко грѣхꙋ̀, не ᲂу҆до́бь въ пе́рвый чи́нъ прїитѝ мню̀. Пе́рвый ᲂу҆́бѡ ѿ невѣ́дѣнїѧ пра́выѧ стезѝ, прилꙋ̑чшаѧсѧ пострада̀: се́й же, бѣ́сꙋ ско́рбь при́снѡ є҆мꙋ̀ въ зѣ́ницы ѻ҆́чїю влага́ющꙋ, и҆ неми́лостива бг҃а є҆мꙋ̀ творѧ́щꙋ, и҆ грѣхо́вный во ᲂу҆мѣ̀ приносѧ́щꙋ є҆мꙋ̀ кꙋмі́ръ, тща́щисѧ въ ро́въ ѿча́ѧнїѧ ври́нꙋти и҆̀. Мꙋ́жественнаѧ же дꙋша̀ и҆ трꙋдолюби́ваѧ ѕѣлѡ̀ и҆спра́витъ сїѧ̑ бж҃е́ственнымъ поспѣше́нїемъ долготерпѣли́внѡ человѣколю́бствꙋющꙋ ѡ҆ на́съ, и҆ ѡ҆браща́ѧсѧ ᲂу҆тро́бою неизрече́нныхъ щедро́тъ, прїе́млетъ на́съ, ꙗ҆́коже во є҆ѵⷢ҇лїи блꙋ́днагѡ ра́ди сы́на, при́тчи наꙋчи́хомсѧ.

ѯ҃и. Ни є҆ди́нъ же на́съ свое́ю крѣ́постїю мо́жетъ преѡдолѣ́ти ко́знемъ и҆ хꙋдо́жествамъ лꙋка́вагѡ, но непобѣди́мою си́лою хрⷭ҇то́вою. Всꙋ́е ᲂу҆́бѡ прельсти́шасѧ є҆стествосло́вцы твори́мыхъ ра́ди въ ни́хъ поще́нїй, свое́ю си́лою ᲂу҆праздни́ти грѣ́хъ помышлѧ́юще, є҆ди́нѣмъ бж҃їимъ хотѣ́нїемъ ᲂу҆пражнѧ́емый, занѐ ᲂу҆пражне́нъ бы́сть та́инства ра́ди є҆́же на крⷭ҇тѣ̀. Сегѡ̀ ра́ди и҆ церко́вный свѣти́льникъ і҆ѡа́ннъ златоꙋ́стый глаго́летъ, ꙗ҆́кѡ не довлѣ́етъ произволе́нїе человѣ́ческое са́мо ѡ҆ себѣ̀, а҆́ще не свы́ше кто̀ прїи́метъ по́мощь. Ꙗ҆́коже па́ки ничесо́же ᲂу҆спѣ́етъ ѿ вы́шнїѧ по́мощи, не сꙋ́щꙋ произволе́нїю: ѻ҆бое́ бо показа̀ і҆ꙋ́да и҆ пе́тръ, ѻ҆́въ ᲂу҆́бѡ жела́нїе своѐ и҆спо́лнивъ наслади́сѧ, и҆ ѡ҆брати́тисѧ не хотѣ̀, и҆ не сꙋ́щꙋ тогѡ̀ произволе́нїю, ничто́же свы́ше ᲂу҆спѣ̀. Пе́тръ же по ѿверже́нїи пла́касѧ го́рцѣ, и҆ свы́ше по́мощь прїѧ́тъ. Тѣ́мже молю́сѧ, речѐ, ни всѧ̑ на бг҃а возве́ргшымъ спа́ти, ни тща́щымсѧ мнѣ́ти свои́ми трꙋды̀ всѧ̑ и҆спра́вити: но показꙋ́ющымъ бг҃ови произволе́нїе, и҆ ѿ тогѡ̀ по́мощи просѧ́щымъ до́брѣ, ꙗ҆́коже и҆ ѱалмопѣ́вецъ ᲂу҆чи́тъ: А҆́ще не гдⷭ҇ь, глаго́лѧ, сози́ждетъ до́мъ, и҆лѝ сохрани́тъ гра́дъ, всꙋ́е бди́тъ стрегі́й и҆ зи́ждай¹⁴²³.

ѯ҃ѳ. Не безбѣ́дно є҆́сть настꙋпа́ти на а҆́спїда и҆ васїлі́ска, льва́ же и҆ ѕмі́ѧ попра́ти, а҆́ще не пе́рвѣе ѡ҆чи́ститсѧ человѣ́къ, ꙗ҆́коже досто́итъ, и҆ по́мощь прїи́метъ ѿ ре́кшагѡ а҆по́столѡмъ: Сѐ да́хъ ва́мъ вла́сть настꙋпа́ти на ѕмїю̀ и҆ на скорпі́ю, и҆ на всю̀ си́лꙋ вра́жїю¹⁴²⁴: тѣ́мже въ моли́твѣ повелѣ́но на́мъ є҆́сть, моли́тисѧ, не вни́ти въ напа́сть, но и҆зба́витисѧ ѿ лꙋка́вагѡ. А҆́ще бо не си́лою по́мощи хрⷭ҇то́вы, и҆зба́вимсѧ раздеже́нныхъ стрѣ́лъ непрїѧ́зненныхъ, всꙋ́е мни́мъ ѿ своеѧ̀ си́лы и҆спра́вити что̀. Хотѧ́й бо кѡ́зни дїа́воли недѣ́йственны показа́ти, и҆ бж҃е́ственныѧ сла́вы прича́стникъ бы́ти, до́лженъ є҆́сть слеза́ми и҆ воздыха́нїемъ и҆ безмо́лвїемъ въ нощѝ и҆ во днѝ и҆ска́ти бж҃е́ственныѧ по́мощи и҆ застꙋпле́нїѧ: тогѡ́ же хотѧ̀ причасти́тисѧ, чи́стꙋ да стѧ́жетъ дꙋ́шꙋ свою̀ ѿ всѧ́кїѧ сла́дости мїрскі́ѧ и҆ и҆мѣ́нїѧ. Ѡ҆ таковы́хъ бо дꙋша́хъ речѐ гдⷭ҇ь: Любѧ́й мѧ̀, за́пѡвѣди моѧ̑ соблюде́тъ, и҆ ѻ҆ц҃ъ мо́й возлю́битъ є҆го̀, и҆ прїи́демъ къ немꙋ̀, и҆ ѻ҆би́тель ᲂу҆ негѡ̀ сотвори́мъ¹⁴²⁵.

ѻ҃. Разꙋ́мно ѕѣлѡ̀ и҆ благопрїѧ́тно сло́во ѡ҆ по́мыслѣхъ глаго́ла нѣ́кто ѿ дре́внихъ: Сꙋдѝ, речѐ, по́мыслы на сꙋди́щи се́рдца, а҆́ще на́ши сꙋ́ть, и҆лѝ ѿ сꙋпоста̑тъ на́шихъ. И҆ своѧ̑ ᲂу҆́бѡ на́мъ благі̑ѧ, во внꙋ́треннѣй дꙋшѝ храни́тельницѣ положѝ, въ некра́домомъ сокро́вищи сїѧ̑ хранѧ̀: сопроти̑вныѧ же ра́нами слове́снагѡ ᲂу҆ма̀ мꙋ́чивъ и҆згонѝ, и҆ не дава́й мѣ́ста тѣ̑мъ во ѻ҆кре́стныхъ дꙋшѝ твоеѧ̀: и҆́бо се́й, речѐ, и҆звѣ́стный по́мыслѡвъ и҆спыта́тель, є҆́сть и҆́стинный за́повѣдей рачи́тель.

ѻ҃а. Вою́ющыѧ на сѧ̀ стра̑сти и҆ стꙋжа́ющыѧ тща́йсѧ побѣди́ти, про́чыѧ посо́бники да прїи́метъ, и҆ съ ни́ми да соѡполчи́тсѧ на бра́нь, смире́нїе дꙋшѝ, рекꙋ́ же, трꙋ́дъ тѣле́сный, и҆ ѿ ско́рбна се́рдца со мно́жествомъ сле́зъ моли́твꙋ. Ꙗ҆́коже пое́тъ даві́дъ, ви́ждь, глаго́лѧ, смире́нїе моѐ и҆ трꙋ́дъ мо́й, и҆ ѿпꙋстѝ всѧ̑ грѣхѝ моѧ̑¹⁴²⁶. И҆ па́ки: Бы́ша сле́зы моѧ̑ мнѣ̀ хлѣ́бъ де́нь и но́щь, и҆ питїѐ моѐ съ пла́чемъ растворѧ́хъ¹⁴²⁷.

ѻ҃в. Сꙋпоста́тъ ᲂу҆́бѡ живота̀ на́шегѡ ᲂу҆малѧ́етъ мно́гащи, и҆ забве́нїемъ на́ши грѣхѝ покрыва́етъ. И҆ по́мыслы покꙋша́етсѧ хвали́ти на́съ въ се́рдцы, и҆ безстра́стны и҆ пра́ведны твори́ти на́съ, и҆ непщева́ти ѡ҆ соблажне́нїихъ на́шихъ пла́ча. Мы́ же бра́тїе помина́имъ соблажнє́ннаѧ, а҆́ще и҆ мни́мъ покаѧ́нїемъ тѣ̑мъ ѡ҆чищє́ннымъ бы́ти. Но помина́емъ при́снѡ согрѣшє́нїѧ, и҆ ѡ҆ тѣ́хъ непреста́ннѡ пла́чимсѧ, да смире́нїе сожи́телѧ бла́га стѧжа́вше, тщесла́вныхъ и҆ го́рдостныхъ ᲂу҆бѣжи́мъ сѣте́й.

ѻ҃г. Ниеди́нъ же ѿ своеѧ̀ си́лы трꙋды̀ претерпѣва́ти, и҆ добродѣ́тєли и҆спра́вити да мни́тъ: вина́ бо всѣ́хъ до́брыхъ на́мъ є҆́сть бг҃ъ, ꙗ҆́коже и҆ ѕлы́хъ, дꙋша́мъ на́шымъ преле́стникъ. Є҆́же бо твори́ти тѝ блага̑ѧ, дѡ́брымъ вино́вномꙋ благодаре́нїе приносѝ: а҆ є҆́же стꙋжа́тисѧ тѝ ѕлы́ми, нача́льникꙋ тьмы̀ та̑ примета́й.

ѻ҃д. Дѣ́тельнꙋю си́лꙋ къ разꙋ́мнѣй сопрѧгі́й, дѣ́латель є҆́сть похва́ленъ, ѿ двою̀ сла̑дкою и҆стѡ́чникꙋ дꙋше́внꙋю свою̀ ни́вꙋ напаѧ́етъ. Разꙋ̑мнаѧ бо возвыша́етъ чи́стое сꙋщество̀, лꙋ́чшихъ видѣ́нїемъ: дѣ́тельнаѧ же ᲂу҆мерщвлѧ́етъ ᲂу҆́ды сꙋ́щыѧ на землѝ, блꙋ́дъ, нечистотꙋ̀, по́хоть ѕлꙋ́ю, нечи́стꙋю стра́сть. Си̑мъ же ᲂу҆мерщвлє́ннымъ, добродѣ́телей цвѣты̀ кра́снѣ процвѣта́ютъ, плодѧ́ще дꙋхо́вный пло́дъ: любы̀, ра́дость, ми́ръ, долготерпѣ́нїе, бла́гость, милосе́рдїе, вѣ́рꙋ, кро́тость, воздержа́нїе. Таковы́й же рече́тъ съ бг҃оно́снымъ проповѣ́дникомъ: живꙋ́ же а҆́зъ не ктомꙋ̀, но живе́тъ во мнѣ̀ хрⷭ҇то́съ. А҆ є҆́же ны́нѣ живꙋ̀, вѣ́рою живꙋ̀ сн҃а бж҃їѧ, возлю́бльшагѡ мѧ̀ и҆ преда́вшагѡ себѐ по мнѣ̀.

ѻ҃є. И҆ се́ же ѿ тебѐ, ѽ хрⷭ҇толю́бче, да не ᲂу҆таи́тсѧ, ꙗ҆́кѡ стра́сть є҆ди́но мѣ́сто ѡ҆брѣ́тши въ тебѣ̀, и҆ ѻ҆бы́чаемъ вкорени́вшисѧ, и҆ и҆́ныѧ въ то́жде мѣ́сто вво́дитъ: а҆́ще бо и҆ є҆ди́на дрꙋзѣ́й проти́вѧтсѧ стра̑сти, сїѧ̑ бо и҆з̾ѡбрѣто́ша бѣ́си, но на́шеѧ поги́бели всѝ согла́снѡ взыскꙋ́ютъ.

ѻ҃ѕ. Поще́нїѧ болѣ́зни скончава́ютсѧ въ безстра́стїѧ поко́и, пи́щнїи же ѡ҆́брази постиза́ютъ въ безмѣ̑стныѧ стра̑сти.

ѻ҃з. Цвѣ́тъ плотскі́й поще́нїемъ ᲂу҆вѧда́ѧй, и҆ во́лю ѿсѣка́ѧй но́ситъ ꙗ҆́звы хрⷭ҇тѡ́вы на ме́ртвеннѣй пло́ти свое́й.

ѻ҃и. Не и҆счита́й мно́гихъ лѣ́тъ и҆́ноческагѡ житїѧ̀ твоегѡ̀, ни терпѣ́нїе пꙋсты́нное, ни жесто́кихъ твои́хъ пѡ́двигъ ᲂу҆ловле́нъ бꙋ́ди похвало́ю, но влады́чнее при́снѡ во ᲂу҆мѣ̀ и҆мѣ́й сло́во, є҆́же рабꙋ̀ бы́ти неключи́мꙋ, не ᲂу҆̀ до́лгъ и҆спо́лнившꙋ: и҆ є҆ще́ бо въ ны́нѣшнемъ житїѝ є҆смы̀, не ᲂу҆̀ къ і҆ерꙋсали́мꙋ при́званы бы́хомъ, но и҆ є҆щѐ на рѣцѣ̀ вавѷлѡ́нстѣй сѣди́мъ: и҆ є҆щѐ во є҆гѵ́петстѣй рабо́тѣ стра́ждемъ, не ᲂу҆̀ є҆щѐ зе́млю ѡ҆бѣтова́ннꙋю ви́дѣвше. Тѣ́мже ᲂу҆́бѡ слези́ти досто́итъ, и҆ моли́тисѧ могꙋ́щемꙋ спастѝ на́съ ѿ рабо́ты го́рькагѡ фараѡ́на, и҆ и҆з̾ѧ̑тымъ бы́ти лю́тагѡ мꙋче́нїѧ, и҆ возвестѝ на́съ въ зе́млю ѡ҆бѣтова́ннꙋю, и҆ почи́ти во ст҃и́лищи бж҃їи: си́хъ же па́че ᲂу҆ма̀ дарѡ́въ полꙋчи́ти на́мъ, не ѿ дѣ́лъ пра́ведныхъ, и҆̀хже мни́мсѧ сотво́рше, но безчи́сленною млⷭ҇тїю бж҃їею, непреста́ннѡ мо́лимсѧ, дні́ю же и҆ но́щїю слезѧ́ще, по глаго́лющемꙋ: ᲂу҆трꙋди́хсѧ воздыха́нїемъ мои́мъ, и҆змы́ю на всѧ́кꙋ но́щь ло́же моѐ, и҆ слеза́ми мои́ми посте́лю мою̀ ѡ҆мочꙋ̀¹⁴²⁸: сѣ́ющїи бо слеза́ми, ра́достїю пожнꙋ́тъ¹⁴²⁹.

ѻ҃ѳ. Дале́че ѿ себѐ многорѣчи́вый ѿгонѝ дꙋ́хъ, занѐ ѿ негѡ̀ всѧ́ка лю́та стра́сть ражда́тисѧ ѡ҆бы́че. Ѿсю́дꙋ лжа̀, ѿсю́дꙋ де́рзость, ѿсю́дꙋ бꙋ́есть, ѿсю́дꙋ смѣ́хъ, ѿсю́дꙋ ѡ҆клевета́нїе, ѿсю́дꙋ ѡ҆глаго́ланїе, ѿсю́дꙋ срамота̀, ѿсю́дꙋ бꙋесло́вїе, и҆ да не мно́гѡ глаго́лю, ѿ многоглаго́ланїѧ не ᲂу҆бѣжи́ши грѣха̀. Мꙋ́жъ же молчали́въ, премꙋ́дрости сы́нъ, тѣ́мже ѕѣлѡ̀ поле́зно є҆́сть молча́нїе.

п҃. Ѡ҆клевета́ющихъ на́съ, и҆ ᲂу҆корѧ́ющихъ, хвали́ти па́че и҆ благослови́ти повелѣно̀ на́мъ є҆́сть. Є҆гда́ бо съ человѣ́ки смирѧ́емсѧ, бо́ремсѧ со бѣ́сы, и҆̀хже соверше́нною не́навистїю возненави́дѣти наꙋчи́хомсѧ.

п҃а. Бѣ́гай запѧ́ти бли́жнемꙋ ѧ҆зы́комъ льсти́вымъ, да не ѿ гꙋби́телѧ запне́шисѧ. Слы́ши ѡ҆ се́мъ проро́ка вопїю́ща и҆ глаго́люща: Мꙋ́жа крове́й и҆ льсти́ва гнꙋша́етсѧ гдⷭ҇ь¹⁴³⁰. И҆, потреби́тъ гдⷭ҇ь всѧ̑ ᲂу҆стны̀ льсти̑выѧ, ѧ҆зы́къ велерѣ́чивъ¹⁴³¹. Та́кожде бѣ́гай поноси́ти прегрѣше́нїю бра́та твоегѡ̀, да не ѿ бл҃госты́ни ѿпаде́ши: не и҆мѣ́ѧй бо любвѐ къ бра́тꙋ своемꙋ̀, не ᲂу҆̀ позна̀ бг҃а, ꙗ҆́кѡ бг҃ъ любы̀ є҆́сть. Ꙗ҆́коже і҆ѡа́ннъ сы́нъ гро́мовъ вопїе́тъ: а҆́ще бо, речѐ, хрⷭ҇то́съ дꙋ́шꙋ свою̀ положѝ за ны̀, и҆ мы̀ дрꙋ́гъ за дрꙋ́га дꙋ́шꙋ свою̀ положи́ти до́лжни є҆смы̀¹⁴³².

п҃в. Впра́вдꙋ нарече́на є҆́сть любы̀, добродѣ́телей митропо́лїѧ, глава́ же зако́нꙋ и҆ проро́кѡмъ. Тѣ́мже тоѧ̀ ра́ди всѧ́къ трꙋ́дъ показꙋ́емъ, занѐ любы̀ бг҃ъ є҆́сть, и҆ и҆мѣ́ѧй любо́вь, бг҃а и҆́мать въ себѣ̀: то́й же не сꙋ́щей, по́льза на́мъ є҆́сть ника́ѧже. Глаго́летъ бо возлю́бленный: Бг҃а никто́же ви́дѣ нигдѣ́же, а҆́ще же лю́бимъ дрꙋ́гъ дрꙋ́га, бг҃ъ въ на́съ пребыва́етъ, и҆ любы̀ є҆гѡ̀ соверше́нна є҆́сть въ на́съ. Ѿсю́дꙋ ᲂу҆̀бо ꙗ҆́вѣ є҆́сть, ꙗ҆́кѡ любы̀ ве́щь є҆́сть, благи́хъ содержа́щаѧ, и҆ тꙋ̀ коне́цъ ст҃ы̑мъ писа́нїемъ ᲂу҆ста́вленꙋ ѡ҆брѣта́емъ: и҆ нѣ́сть добродѣ́тели ѡ҆́бразъ, и҆́мже человѣ́къ приближа́етсѧ къ бг҃ꙋ, а҆́ще не любо́вїю соверша́етсѧ, и҆ ѿ неѧ̀ прїе́млетсѧ неизрече́ннымъ сло́вомъ содержи́мь и҆ соблюда́емь.

п҃г. Приходѧ́щꙋю къ на́мъ прїе́млюще бра́тїю, ни стꙋже́нїе, ни па́кость сѐ молча́нїю да мни́мъ, да не ѿ ᲂу҆ста́ва любвѐ ѿпаде́мъ. И҆ не ꙗ҆́кѡ благода́ть и҆̀мъ даю́ще прїи́мемъ, но ꙗ҆́кѡ мы̀ па́че прїе́млюще благода́ть, съ мольбо́ю и҆ ти́хостїю и҆́хъ прїи́мемъ, ꙗ҆́коже а҆враа́мъ патрїа́рхъ показа̀. Сегѡ̀ ра́ди бг҃ослове́снѣйшїй вопїе́тъ ᲂу҆́мъ: Ча̑дца, глаго́лѧ, не лю́бимъ сло́вомъ, ни ѧ҆зы́комъ, но дѣ́ломъ и҆ и҆́стиною¹⁴³³. И҆ ѡ҆ се́мъ разꙋмѣ́емъ, ꙗ҆́кѡ ѿ и҆́стины є҆смы̀.

п҃д. Патрїа́рхъ страннолю́бїѧ содѣ́ла дѣ́ло, и҆ пред̾ хра́момъ сѣдѧ́ще мимоходѧ́щыѧ призыва́ѧ, и҆ всѣ̑мъ поставлѧ́ѧ трапе́зꙋ, нечести̑вымъ же и҆ и҆ноплеме́нникѡмъ нелицемѣ́рнѣ: тѣ́мже ᲂу҆̀бо и҆ ди́внагѡ ѻ҆́нагѡ соѡбѣтова́нїѧ сподо́бисѧ, прїе́мь со а҆́гг҃лома влады́кꙋ. И҆ мы̀ ᲂу҆̀бо томꙋ̀ ᲂу҆подо́бимсѧ, да не то́кмѡ а҆́гг҃лы, но и҆ бг҃а прїи́мемъ¹⁴³⁴: поне́же бо, речѐ гдⷭ҇а, сотвори́сте є҆ди́номꙋ ѿ си́хъ ме́ншихъ, мнѣ̀ сотвори́сте¹⁴³⁵. Всѣ̑мъ ᲂу҆̀бо бл҃готвори́ти добро̀, па́че же немогꙋ́щымъ возда́ти.

п҃є. Є҆гѡ́же се́рдце непоро́чно ѡ҆ ѿмета́нїи за́повѣди бж҃їѧ, и҆лѝ помышле́нїѧ проти́внагѡ прїѧ́тїемъ, то́й ᲂу҆́бѡ нарече́тсѧ чи́стъ се́рдцемъ, и҆ влѣ́потꙋ, и҆ сподо́битсѧ слы́шати: бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ¹⁴³⁶.

п҃ѕ. Сло́вомъ нака́зовати чꙋ̑вствїѧ и҆спра́вити потщи́мсѧ, па́че же ѻ҆́чи, и҆ ᲂу҆́ши, и҆ ѧ҆зы́къ не стра́стнѡ, но на прїѡбрѣ́тенїе на́ше зрѣ́ти и҆ слы́шати потщи́мсѧ и҆ глаго́лати направлѧ́юще сїѧ̑. Ничто́же бо ѿ соста̑въ тѣ́хъ на грѣ́хъ ᲂу҆до́бь поползнове́ннѣйше, а҆́ще и҆ ненаста́вѧтсѧ сло́вомъ, и҆ ничто́же па́ки къ спасе́нїю и҆́хъ гото́вѣйше, влады́чествꙋющꙋ и҆́ми сло́вꙋ и҆ пра́вѧщꙋ, и҆ на нѧ́же подоба́етъ и҆ хо́щетъ водѧ́щꙋ. Безчи́нствꙋющее же, и҆ ѡ҆бонѧ́нїе смꙋща́етсѧ, и҆ ѡ҆сѧза́нїе сꙋ́рово простира́етсѧ, и҆ безчи́сленныхъ страсте́й мно́жество прихо́дитъ, и҆ творѧ́тъ въ ни́хъ, є҆́же хотѧ́тъ: благочи́ннѡ же сло́вомъ повелѣва̑емымъ и҆̀мъ, мно́гъ нѣ́каковъ ми́ръ и҆ тишина̀ ꙗ҆влѧ́етсѧ.

п҃з. Ꙗ҆́коже мѵ́ро многоцѣ́нно а҆́ще и҆ въ сосꙋ́дѣ затче́нно бꙋ́детъ, воздꙋ́хъ наполнѧ́етъ своегѡ̀ благоꙋха́нїѧ, не бли́зъ стоѧ́щыѧ то́кмѡ, но и҆ и҆́ны дале́че стоѧ́щыѧ мно́ги наполнѧ́етъ сла́дости: та́кѡ и҆ добродѣ́тельныѧ дꙋшѝ благоꙋха́нїе и҆з̾ всѣ́хъ чꙋ́вствъ и҆сходѧ̀ ѿ тѣлесѐ, показꙋ́етъ всѣ̑мъ зрѧ́щымъ добродѣ́тель. Кто́ бо ви́дѧ ѧ҆зы́къ ничесо́же лжи́во и҆ несочета́нное вѣща́ющь, но́зѣ кра́снѣ ходѧ́щѣ, лицѐ къ слеза́мъ и҆ къ пла́чꙋ при́снѡ ᲂу҆гото́вленно, не позна́етъ внꙋ́трь сꙋ́щее въ дꙋшѝ благоꙋха́нїе. Тѣ́мже и҆ сп҃съ глаго́летъ: та́кѡ да просвѣти́тсѧ свѣ́чъ ва́шъ пред̾ человѣ́ки, ꙗ҆́кѡ да ви́дѧтъ ва̑ша дѡ́браѧ дѣла̀, и҆ просла́вѧтъ ѻ҆ц҃а̀ ва́шего, и҆́же є҆́сть на небесѣ́хъ¹⁴³⁷.

п҃и. Є҆́же во є҆ѵⷢ҇лїи хрⷭ҇то́съ и҆ бг҃ъ на́шъ, тѣ́сный и҆ приско́рбный сказа̀ пꙋ́ть¹⁴³⁸, и҆ па́ки то́йжде, и҆́го бла́го и҆ бре́мѧ легко̀¹⁴³⁹, речѐ: ка́кѡ ᲂу҆́бѡ ѻ҆боѐ совокꙋпи́тсѧ: сопроти̑внымъ мню̀ бы́ти си̑мъ: є҆́й ѻ҆боѐ совокꙋплѧ́етсѧ, и҆справлѧ́ющымъ сїѧ̑ съ произволе́нїемъ, и҆ наде́ждею, благолюбє́зна сꙋ́ть и҆ рачи́тєльна, и҆ сла́дость па́че, а҆ не ско́рбь, любодобродѣ̑тельнымъ и҆схода́тайствꙋютъ дꙋша́мъ. Послꙋ́шай же бл҃же́ннаго лꙋкꙋ̀ глаго́люща, ꙗ҆́кѡ бїе́ны бы́вше, речѐ а҆по́столи ѿхожда́хꙋ ѿ лица̀ собо́ра ра́дꙋющесѧ: пре́жде бо во всѧ́кой ве́щи прихо́дитъ ско́рбь, та́же пото́мъ весе́лїе и҆ ра́дость. Ꙗ҆́коже и҆ ѿ даві́да: ве́черъ водворѧ́лсѧ пла́чь, и҆ заꙋ́тра ра́дость, ꙗ҆́снѣ наꙋчи́хомсѧ глаго́люща. Сеѧ̀ глави́зны и҆ дрꙋгі́й коне́цъ ѡ҆брѣто́хъ, сице́въ: Ꙗ҆́кѡ бїе́ни бы́вше, речѐ, а҆по́столи ѿхожда́хꙋ ѿ лица̀ собо́ра ра́дꙋющесѧ¹⁴⁴⁰, и҆́бо не таково́е ра́нъ є҆стество̀, не ра́дость бо, но болѣ́знь ѡ҆бы́че дѣ́лати. Но ра́нъ ᲂу҆́бѡ є҆стество̀ не таково̀, ꙗ҆́коже и҆ є҆стествꙋ̀ є҆гѡ̀ ве́щи ѡ҆держа́ти. А҆́ще ра̑ны хрⷭ҇та̀ ра́ди сла́дость роди́ша, то̀ что̀ ди́вно, а҆́ще и҆ про́чее ѕлострада́нїе, и҆ ᲂу҆держа́нїе тѣле́сное то́же дѣ́лаетъ тогѡ̀ ра́ди;

п҃ѳ. Мꙋ́чими и҆ плѣнѧ́еми ѿ страсте́й не домышлѧ́емсѧ мно́гащи ѡ҆ себѣ̀, сїѧ̑ чесѡ̀ ра́ди стра́ждемъ; Подоба́етъ ᲂу҆̀бо вѣ́дѣти, ꙗ҆́кѡ занѐ ᲂу҆далѧ́тисѧ на́мъ ѿ бг҃овидѣ́нїѧ, такова̑ быва́ютъ на́мъ плѣнє́нїѧ. А҆́ще ли же кто̀ пригвозди́тъ ᲂу҆́мъ сво́й ко влⷣцѣ и҆ бг҃ꙋ на́шемꙋ, таковы́й де́рзнетъ со проро́комъ рещѝ: предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ¹⁴⁴¹. Что́ же твердѣ́е и҆лѝ сладча́е, є҆́же и҆мѣ́ти при́снѡ гдⷭ҇а ѡ҆деснꙋ́ю, покрыва́юща и҆ блюдꙋ́ща, и҆ не даю́ща подвижа́тисѧ; а҆ є҆́же сегѡ̀ полꙋчи́ти, въ на́шемъ произволе́нїи є҆́сть.

ч҃. До́брѣ реко́ша ѻ҆тцы̀ и҆ со ѡ҆пасе́нїемъ, ꙗ҆́кѡ не ѡ҆брѣта́етъ человѣ́къ и҆́накѡ поко́ѧ, а҆́ще не такова̀ крѣ́пка стѧ́жетъ ᲂу҆ма̀, ꙗ҆́кѡ ѻ҆́нъ то́кмѡ и҆ бг҃ъ є҆́сть въ мі́рѣ, ни на чесо́же ѿню́дъ ᲂу҆́мъ прельща́юще. Но того̀ є҆ди́наго любѧ̀, и҆ къ томꙋ̀ є҆ди́номꙋ прилѣплѧ́ѧсѧ, таковы́й въ себѣ̀ ѡ҆брѧ́щетъ и҆́стинный поко́й, и҆ свобожде́нїе стра́стнагѡ мꙋче́нїѧ, и҆ сподо́битсѧ воспѣ́ти: прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̑¹⁴⁴².

ч҃а. Самолю́бїе, и҆ славолю́бїе, и҆ сластолю́бїе, бж҃їю па́мѧть ѿ дꙋшѝ ѿго́нѧтъ. Самолю́бїе бо несказа́нныхъ ѕѡ́лъ роди́тельница є҆́сть, не сꙋ́щи бо па́мѧти бж҃їей, мно́гїй и҆ стра́стный мѧте́жъ, въ на́съ мѣ́сто прїе́млетъ.

ч҃в. И҆́же самолю́бїе своеѧ̀ дꙋшѝ чи́стѡ восто́ргнꙋвый, ᲂу҆до́бь и҆ про́чїими страстьмѝ ѡ҆блада́ти и҆́мать, благода́ти поспѣшествꙋ́ющи. Ꙗ҆́коже па́ки гнѣ́вомъ и҆ печа́лїю, ѕлопомнѣ́нїемъ и҆ сластолю́бїемъ, де́рзостїю и҆ про́чїими побѣжда́ѧйсѧ, ѿ си́хъ и҆ ѡ҆блада́нъ бꙋ́детъ. Самолю́бїе же, глаго́лемъ, є҆́же къ тѣ́лꙋ стра́стное прилѣжа́нїе и҆ любле́нїе, и҆ плотски́хъ во́ль и҆сполне́нїе.

ч҃г. И҆́же а҆́ще что̀ лю́битъ, съ тѣ́мъ несꙋмнѣ́ннѡ и҆ неразлꙋ́чнѣ всѧ́кѡ хо́щетъ бы́ти, и҆ всѧ̑ возбранѧ̑ющѧ є҆мꙋ̀, дрꙋ́жнѧ бесѣ́ды не хо́щетъ ни понѐ слы́шати, и҆ совокꙋпле́нїѧ и҆́хъ ѿвраща́етсѧ: си́це и҆ дꙋша̀ ꙗ҆́вѣ лю́бѧщаѧ бг҃а, жела́етъ вы́нꙋ къ немꙋ̀ прибли́житисѧ, и҆ съ ни́мъ бы́ти. Сїе́ же въ на́съ быва́етъ, чи́стою моли́твою є҆ли́кѡ по си́лѣ, и҆ прилѣжа́нїемъ къ бг҃ꙋ при́снымъ: та́ бо приближа́етъ на́съ ко влⷣцѣ, ꙗ҆́кѡ и҆ на́мъ глаго́лати: бж҃е, бж҃е мо́й, къ тебѣ̀ ᲂу҆́тренюю, занѐ тебѐ є҆ди́наго дꙋша̀ моѧ̀ возжада̀¹⁴⁴³. Оу҆́тренюетъ бо всегда̀ ко бг҃ꙋ, ᲂу҆дали́вый сво́й ᲂу҆́мъ ѿ всѧ́кїѧ ѕло́бы, и҆ непреста́ннѡ бж҃е́ственною любо́вїю ᲂу҆ѧ́звленъ.

ч҃д. Ѿ воздержа́нїѧ и҆ смире́нїѧ, безстра́стїю навыко́хомъ, а҆ ѿ дѣ́лъ ра́зꙋмꙋ быва́ти: ѿ ни́хже въ разсꙋжде́нїе и҆ любо́вь дꙋша̀ преспѣва́етъ. Бж҃е́ственною же ѡ҆б̾е́мшисѧ любо́вїю, крило́ма чи́стыѧ моли́твы къ тоѧ̀ высотѣ̀ непреста́ннѡ восхо́дитъ, до́ндеже пости́гнетъ въ ра́зꙋмъ бж҃їй, ꙗ҆́коже речѐ а҆по́столъ: въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва¹⁴⁴⁴.

ч҃ѕ. Дѣ́лательнымъ ᲂу҆́бѡ и҆ добронра́внымъ порабоща́етсѧ похо́ть и҆ ꙗ҆́рость ѡ҆бꙋздава́етсѧ: ра́зꙋмомъ же и҆ бг҃овидѣ́нїемъ ᲂу҆́мъ возвыша́етсѧ, и҆ возне́сшсѧ ѿ плотски́хъ, приложи́тсѧ къ бг҃ꙋ и҆́стинное полꙋчи́въ блаже́нство.

ч҃ѕ. Сѐ на́мъ пе́рвый по́двигъ є҆́сть, разори́ти стра̑сти, и҆ держа́внѣ побѣди́ти сїѧ̑. Вторы́й же по́двигъ, є҆́же стѧжа́ти добродѣ́тєли, и҆ не тщꙋ̀, ни недѣ́тельнꙋ дꙋ́шꙋ на́шꙋ ѡ҆ста́вити. Тре́тїй же по́двигъ, є҆́же тре́звеннѣ храни́ти дѣ́ланїй на́шихъ и҆ трꙋдѡ́въ плоды̀: не дѣ́лати бо на́мъ то́чїю трꙋды̀, но бдѣ́нїемъ сїѧ̑ храни́ти повелѣ́нно є҆́сть.

ч҃з. Да бꙋ́дꙋтъ чресла̀ ва̑ша препоѧ̑сана, и҆ свѣти́льницы горѧ́щїи¹⁴⁴⁵, речѐ гдⷭ҇ь: та́кѡ себѐ ᲂу҆гото́вившїи, подо́бни сꙋ́ть вои́стиннꙋ человѣ́кѡмъ ча́ющымъ гдⷭ҇а своегѡ̀, да прише́дшꙋ и҆ толкнꙋ́вшꙋ є҆мꙋ̀, а҆́бїе ѿве́рзꙋтъ: и҆ вше́дъ со ѻ҆ц҃е́мъ ᲂу҆́бѡ и҆ со ст҃ы́мъ дх҃омъ, ѻ҆би́тель въ ни́хъ сотвори́тъ. И҆ блаже́ни рабѝ ті́и, и҆̀хже прише́дъ гдⷭ҇ь, ѡ҆брѧ́щетъ та́кѡ творѧ́щѧ¹⁴⁴⁶.

ч҃и. Подоба́етъ ᲂу҆́бѡ и҆́нокꙋ, ꙗ҆́коже сы́нꙋ, ѿ всегѡ̀ се́рдца, и҆ ѿ всегѡ̀ помышле́нїѧ люби́ти бг҃а, и҆ ꙗ҆́кѡ рабꙋ̀ говѣ́ти и҆ боѧ́тисѧ и҆ слꙋ́шати є҆го̀, и҆ разсꙋжда́ти себѐ на всѧ́къ де́нь ѡ҆ по́мыслѣхъ ѕлы́хъ и҆ дѣѧ́нїихъ лꙋка́выхъ, и҆ недоста́точныѧ наполнѧ́ти, ѡ҆ и҆справле́нїихъ же не возвыша́тисѧ: но раба̀ неключи́ма себѐ нарица́ти, ѕѣлѡ̀ лиша́ющасѧ ко и҆сполне́нїю до́лжныхъ: хвали́ти же бг҃а, и҆ тогѡ̀ благода́ти и҆справлє́нїѧ напи́совати: и҆ ѿню́дъ по тщесла́вїю и҆лѝ человѣкоꙋго́дїю не твори́ти что̀, но въ та́йнѣ твори́ти всѧ̑, и҆ то́кмѡ ѿ є҆ди́нагѡ бг҃а хвалы̀ и҆ска́ти. Пре́жде же всѣ́хъ и҆ над̾ всѣ́ми, пра́вою вѣ́рою ѡ҆гради́ти свою̀ дꙋ́шꙋ, по бж҃е́ственномꙋ велѣ́нїю собо́рныѧ це́ркви, проповѣ́данною ѿ ст҃ы́хъ ѻ҆тє́цъ, и҆ бг҃опроповѣ́дныхъ а҆по́стѡлъ. Живꙋ́щымъ ᲂу҆́бѡ та́кѡ воздаѧ́нїе мно́го, жи́знь безконе́чнаѧ, ѻ҆би́тель неразори́ма ѻ҆ц҃а̀, и҆ сн҃а, и҆ ст҃а́гѡ дх҃а, є҆диносꙋ́щнагѡ, и҆ трїѷпоста́снагѡ бж҃ества̀, ѻ҆би́льнѡ подае́тсѧ.

ч҃ѳ. Коне́цъ сло́вꙋ, всѧ̑ слы́ши, речѐ церко́вникъ, бг҃а бо́йсѧ, и҆ за́пѡвѣди є҆гѡ̀ хранѝ¹⁴⁴⁷. А҆́зъ бо тѝ, речѐ, гла́вный и҆ ско́рый пꙋ́ть спасе́нїѧ показꙋ́ю: бг҃а бо́йсѧ, и҆ за́пѡвѣди є҆гѡ̀ соблюдѝ. Стра́хомъ невво́днымъ мꙋ́къ ра́ди, но соверше́ннымъ соверше́нїе творѧ́щимъ, є҆гѡ́же любвѐ ра́ди повелѣ́вшагѡ и҆мѣ́ти до́лжни є҆смы̀. А҆́ще бо стра́ха ра́ди мꙋче́нїѧ не сотворѧ́емъ грѣхѡ́въ, ꙗ҆́вѣ ꙗ҆́кѡ а҆́ще не предлежа́ли бы́ша на́мъ ꙗ҆̀же ѡ҆ мꙋче́нїи, то̀ всѧ̑ ꙗ҆̀же ко грѣхꙋ̀ твори́ли бы́хомъ, грѣхолюби́во и҆мꙋ́ще произволе́нїе. А҆́ще ли же не преще́нїѧ ра́ди мꙋ́къ, возненави́дѣвше ѕла̑ѧ, ѿ си́хъ воздержи́мсѧ, любле́нїемъ ко влⷣцѣ содѣ́лаемъ добродѣ́тєли, боѧ́щесѧ, да не ѿпаде́мъ внегда̀ дѣ́лати є҆́же боѧ́тисѧ, да ничто́же ѿ заповѣ́данныхъ пре́зримъ, се́й стра́хъ чи́стъ є҆́сть, тогѡ̀ ра́ди вино́венъ до́брагѡ быва́ѧй, и҆ ѡ҆чища́етъ дꙋ́шы на́шѧ, равномо́щенъ сы́й любвѝ. И҆мѣ́ѧй же се́й стра́хъ, и҆ съ ни́мъ за́пѡвѣди хранѧ́й, се́й є҆́сть ве́сь соверше́нъ человѣ́къ, и҆ неѡскꙋ́денъ ни въ чесо́мже.

р҃. Мꙋ́жественнаѧ дꙋша̀, ꙗ҆́же во все́мъ свое́мъ житїѝ ꙗ҆́кѡ два̀ свѣти̑ла дѣ́лательное и҆ бг҃ови́дѣтельное и҆мѣ́етъ горѧ́щи, и҆ тѣ́мъ потрє́бнаѧ твори́тъ: немꙋ́жественнаѧ же па́че и҆знемога́етъ сластьмѝ. Сїѧ̑ ᲂу҆́бѡ разꙋмѣ́вше, (бра́тїе) бг҃а ᲂу҆бои́мсѧ и҆ за́пѡвѣди є҆гѡ̀ сохрани́мъ, да соверше́нны бꙋ́демъ и҆ ᲂу҆стро́енны въ добродѣ́телехъ, и҆мꙋ́ще смы́слъ смире́нъ, и҆ сокрꙋше́нно се́рдце, и҆ лани̑ты своѧ̑ по всѧ̑ часы̀ слеза́ми ѡ҆мака́юще, и҆ непреста́ннѡ ꙗ҆́же ѿ вели́кагѡ а҆рсе́нїа рече́ннꙋю моли́твꙋ пою́ще гдⷭ҇ни: бж҃е, бж҃е мо́й, не ѡ҆ста́ви менѐ, ничесо́же бо бла́го сотвори́хъ пред̾ тобо́ю, но да́ждь мѝ милосе́рдїѧ твоегѡ̀ ра́ди, ѿ ны́нѣ сотвори́ти нача́ло: все́ бо на́ше спасе́нїе, въ щедро́тахъ лежи́тъ, и҆ бж҃їи человѣколю́бїи. Є҆мꙋ́же сла́ва во вѣ́ки вѣкѡ́въ, а҆ми́нь.

Коли́кѡ ве́лїй є҆́сть по́двигъ, расто́ргнꙋти крѣ̑пкїѧ сі́и ᲂу҆́зы, и҆ свободи́тисѧ рабо́ты веще́ственныѧ, и҆ навыкнове́нїе благо́е стѧжа́ти. Вои́стиннꙋ си́льныѧ потре́ба и҆ мꙋ́жественныѧ дꙋшѝ ко ᲂу҆дале́нїю вещества̀. Є҆́сть же и҆ско́мое, не страсте́й то́чїю ѡ҆чище́нїе, не бо̀ сїѐ са́мо въ себѣ̀ є҆́сть добродѣ́тель сво́йственнѣ, но прїꙋготовле́нїе то́кмѡ къ добродѣ́тели. Потре́бно же, кромѣ̀ ѡ҆чище́нїѧ лꙋка́выхъ навыкнове́нїй, и҆ стѧжа́нїе добродѣ́телей. Ѡ҆чище́нїе же дꙋшѝ є҆́сть, слове́сныѧ ча́сти, до́льныхъ ѡ҆бразова́нїй, и҆ преле́стныхъ, по гла́сꙋ бг҃осло́ва, жите́йскихъ, глаго́лю, попече́нїй, и҆ мѧте́жей, и҆ лꙋка́выхъ ᲂу҆клоне́нїй, си́рѣчь безмѣ́стныхъ предпрїѧ́тїй премѣне́нїе, и҆ соверше́нное тѣ́хъ ѡ҆ставле́нїе: жела́тельныѧ же ча́сти, ѿню́дъ къ веществꙋ̀ не ᲂу҆стремлѧ́тисѧ, нижѐ къ чꙋ́вствꙋ взира́ти, но сло́вꙋ бы́ти послꙋ́шнѣй: ꙗ҆́ростныѧ же послѣ́довательнѣ ча́сти є҆́сть ничи́мже смꙋща́тисѧ ѿ прилꙋча́ющихсѧ. По ѡ҆чище́нїи же се́мъ, и҆ нечи́стыхъ си́лъ ᲂу҆мерщвле́нїи, и҆лѝ благоꙋстрое́нїи, потре́бно и҆ восхожде́нїе и҆ ѡ҆боже́нїе: потре́бно бо ᲂу҆клонѧ́ющемꙋсѧ ѿ ѕла̀, твори́ти благо́е. Кромѣ́ же сегѡ̀, пе́рвѣе и҆ ѿрещи́сѧ себѐ, та́же, кре́стъ взе́мшꙋ, послѣ́довати влⷣцѣ къ кра́йнѣйшемꙋ ѡ҆боже́нїѧ ᲂу҆строе́нїю. Ꙗ҆ково́же є҆́сть восхожде́нїе и҆ ѡ҆боже́нїе: ᲂу҆ма̀, соверше́ннѣйшїй ра́зꙋмъ сꙋ́щихъ, и҆ сꙋ́щагѡ превы́ше всѣ́хъ (тва́рей,) є҆ли́кѡ пости́жно человѣ́ческомꙋ є҆стествꙋ̀: жела́тельныѧ же (ча́сти,) къ пе́рвомꙋ добрꙋ̀ всеконе́чное и҆ непреста́нное восхище́нїе, и҆ движе́нїе: ꙗ҆́ростныѧ же ча́сти, дѣ́йственнѣйшее и҆ дѣ́ѧтельнѣйшее къ жела́емомꙋ движе́нїе, и҆ неѿторга́емое и҆ неѻсла́бное, и҆ ни є҆ди́нѣмъ ѿ прилꙋча́ющихсѧ приско́рбныхъ на предлежа̑щаѧ пресѣца́емое, но дерзнове́ннѡ и҆ несовра́тнѡ ше́ствꙋющее. Толи́кѡ же подоба́етъ ѻ҆стрѣ́йшꙋ бы́ти ко благи̑мъ движе́нїю дꙋшѝ, па́че движе́нїѧ є҆ѧ̀ къ ѕлы̑мъ, є҆ли́кѡ ᲂу҆́мныѧ красоты̑ превосхо́дѧтъ чꙋ́вствєнныѧ. Толи́кѡ же къ тѣ́лꙋ твори́ти подоба́етъ ѡ҆браще́нїе, є҆ли́кѡ дово́льно къ попече́нїю и҆ сниска́нїю нꙋ́жныхъ къ составле́нїю, да не нꙋ́ждею ᲂу҆мре́ти живо́тнꙋ: сїѧ̑ же и҆спра́вити ᲂу҆до́бно, дѣ́лати же трꙋднѣ́йше. Не бо̀ без̾ трꙋда̀ неꙋдобьистреблѧ̑емыѧ навыкновє́нїѧ ѻ҆́ныѧ и҆скоренѧ́ти ѿ дꙋшѝ мо́щно, нижѐ стѧжа́нїе ра́зꙋма быва́етъ без̾ по́двига. И҆ вои́стиннꙋ къ блаже́нномꙋ сꙋществꙋ̀ прилѣ́жное взира́нїе и҆ ᲂу҆стремле́нїе мно́гими быва́етъ трꙋды̀ и҆ вре́менемъ до́лгимъ, до́ндеже въ навыкнове́нїе такова́гѡ стремле́нїѧ хотѣ́нїе прїи́детъ съ послѣ́дꙋющимъ томꙋ̀: и҆ мно́гое потре́бно и҆мѣ́ти ᲂу҆мꙋ̀ сопротивле́нїе проти́вꙋ чꙋ́вства влекꙋ́щагѡ къ дѡ́льнымъ: и҆ сїѐ є҆́сть ра́ть и҆ бра́нь съ тѣ́ломъ, ꙗ҆́же до сме́рти є҆́сть непреста́ннаѧ, а҆́ще и҆ ᲂу҆малѧ́тисѧ мни́тсѧ ᲂу҆кроще́нїемъ ꙗ҆́рости и҆ по́хоти, и҆ покоре́нїемъ чꙋ́вствъ превосходѧ́щемꙋ разꙋмѣ́нїю ᲂу҆ма̀: ѻ҆ба́че сїѐ вѣ́дѣти подоба́етъ, ꙗ҆́кѡ дꙋша̀ не просвѣще́нна, занѐ не быва́етъ ѿ бг҃а вспомощствꙋ́ема, нижѐ ѡ҆чи́ститисѧ и҆́стиннѡ, нижѐ къ бж҃е́ственномꙋ свѣ́тꙋ взы́ти мо́жетъ, ꙗ҆́коже рече́сѧ. Предречє́ннаѧ бо ѡ҆ вѣ́рныхъ речє́на бы́ти, мнѣ́ти подоба́етъ, къ вѧ́щшемꙋ же си́хъ ѡ҆б̾ѧсне́нїю вкра́тцѣ рещѝ ѡ҆ разли́чїи ра́зꙋма: ра́зꙋмъ бо си́хъ ѻ҆́во є҆́сть по є҆стествꙋ̀, ѻ҆́во же па́че є҆стества̀: ꙗ҆́вно же є҆́сть второ́е ѿ пе́рвагѡ. По є҆стествꙋ̀ ᲂу҆́бѡ глаго́лемъ вѣ́дѣнїе, є҆ли́ко мо́жетъ полꙋчи́ти дꙋша̀ и҆спыта́нїемъ и҆ и҆зыска́нїемъ є҆сте́ственныхъ ᲂу҆потреблѧ́ѧ часте́й и҆ си́лъ, ѡ҆ тва́ри и҆ творцѣ̀ тва́ри, си́рѣчь є҆ли́кѡ пости́жнѡ свѧ́занной съ пло́тїю дꙋшѣ̀. Рече́сѧ бо ѡ҆ чꙋ́вствѣ и҆ воѡбраже́нїи, и҆ ᲂу҆мѣ̀, ꙗ҆́кѡ притꙋплѧ́етсѧ дѣ́йство ᲂу҆ма̀ ѿ соедине́нїѧ съ тѣ́ломъ и҆ сорастворе́нїѧ: и҆ ѿсю́дꙋ не мо́гꙋтъ ᲂу҆́мныѧ ви́ды бы́ти ѡ҆сѧза́емы: но тре́бꙋетсѧ къ помышле́нїю воѡбраже́нїе сꙋ́щее во ѡ҆́бразѣхъ є҆стество̀, и҆ веще́ственное разли́чїе, и҆ дебе́лость часте́й. Тре́бꙋютсѧ ᲂу҆́бѡ соразмѣ̑рныѧ ви́ды ᲂу҆мꙋ̀ во пло́ти, да ты̑ѧ мо́жетъ воспрїѧ́ти. Си́це ᲂу҆̀бо сꙋ́щь ᲂу҆́мъ, є҆ли́кѡ прїи́метъ ра́зꙋмъ по своемꙋ̀ хꙋдо́жествꙋ є҆сте́ственнꙋ, таковы́й ра́зꙋмъ є҆сте́ственный нарица́емъ: преесте́ственный же ра́зꙋмъ є҆́сть быва́ющее во ᲂу҆мѣ̀ па́че хꙋдо́жества є҆гѡ̀ и҆ си́лы, и҆лѝ є҆гда̀ разꙋмѣва̑емаѧ мѣ́рꙋ превосхо́дѧтъ сꙋ́щагѡ со пло́тїю ᲂу҆ма̀ ꙗ҆́коже бы́ти ра́зꙋмꙋ, є҆́же кромѣ̀ тѣ́ла ᲂу҆мꙋ̀ прили́чествꙋетъ. Се́й же ѿ є҆ди́нагѡ быва́етъ бг҃а, є҆гда̀ ѕѣлѡ̀ ѡ҆чище́нъ ѡ҆брѧ́щетъ ѻ҆́нъ таковы́й ᲂу҆́мъ ѿ всѧ́кагѡ веще́ственнагѡ пристра́стїѧ, и҆ бж҃е́ственною любо́вїю ѡ҆б̾ѧ́тъ. Не ра́зꙋмъ же то́чїю си́це раздѣлѧ́етсѧ, но и҆ добродѣ́тель. И҆́на бо є҆́сть, є҆ли́ка є҆стество̀ не превосхо́дитъ, ꙗ҆́же и҆ є҆сте́ственна пра́веднѡ глаго́летсѧ: и҆́на же ѿ є҆ди́нагѡ дѣ́йствꙋема пе́рвагѡ добра̀, сꙋ́щаѧ па́че є҆сте́ственныѧ си́лы и҆ ᲂу҆строе́нїѧ сꙋ́щи, ю҆́же преесте́ственнꙋ нарещѝ прили́чнѣ подоба́етъ. Та́кѡ ᲂу҆́бѡ си̑мъ раздѣлє́ннымъ, є҆сте́ственный ра́зꙋмъ и҆ добродѣ́тель и҆мѣ́ти ра́внѡ мо́жетъ и҆ непросвѣще́нный, преесте́ственнꙋ же ника́коже. Ка́кѡ бо не прича́стенъ сы́й дѣ́йствꙋющагѡ бж҃ества̀ и҆мѣ́ти тꙋ̀ мо́жетъ; Просвѣще́нный же ѻ҆боѧ̑ и҆́мать, па́че же преесте́ственнꙋ добродѣ́тель нестѧ́жетъ всѧ́кѡ, не стѧжа́вый пе́рвѣе добродѣ́тель по є҆стествꙋ̀. Преесте́ственнагѡ же ра́зꙋма прича́стнꙋ бы́ти кромѣ̀ ра́зꙋма по є҆стествꙋ̀, ничто́же є҆́сть возбранѧ́ющее. Ѻ҆ба́че сїѐ вѣ́дати подоба́етъ, ꙗ҆́коже чꙋ́вство и҆ мечта́нїе и҆лѝ воѡбраже́нїе и҆́мꙋтъ и҆ безсловє́снаѧ, и҆́мать же и҆ человѣ́къ си́лы сїѧ̑, мно́гѡ лꙋ́чшыѧ и҆ вы́шшыѧ: си́це и҆ въ є҆сте́ственныхъ добродѣ́телехъ и҆ разꙋмѣ́нїихъ, а҆́ще и҆ ѻ҆боѧ̑ глаго́лютсѧ и҆мѣ́ти, но мно́гѡ лꙋ́чше и҆ вы́ше и҆́мать ѻ҆́наѧ просвѣще́нный непросвѣще́ннагѡ. Є҆ще́ же є҆сте́ственное предрече́нный ра́зꙋмъ, є҆́же въ добродѣ́телехъ и҆ проти́вныхъ навыкнове́нїѧхъ быва́етъ, сꙋгꙋ́бъ бы́ти мни́тсѧ. Ѻ҆́въ ᲂу҆́бѡ є҆́сть просты́й, є҆гда̀ и҆скꙋ́сомъ не дозна̀ любомꙋ́дрствꙋѧй сицевы́хъ ᲂу҆строе́нїй, и҆́же быва́етъ, є҆гда̀ то́й сꙋмни́тсѧ: ѻ҆́въ дѣ́йственный, и҆ ꙗ҆́кѡ рещѝ ѡ҆дꙋшевле́нный, є҆гда̀ и҆скꙋ́сомъ таковы́хъ ᲂу҆строе́нїй ра́зꙋмъ ᲂу҆твержда́етсѧ, и҆́же ꙗ҆́венъ є҆́сть, и҆ вѣ́ренъ, нижѐ ѿню́дъ сꙋмнѣ́нїе, и҆ ѻ҆бою́дное мнѣ́нїе прїе́млющь. Си̑мъ та́кѡ сꙋ́щымъ, четы́ре нѣ̑каѧ бы́ти мнѧ́тсѧ проти̑вѧщаѧсѧ ᲂу҆мꙋ̀ къ стѧжа́нїю добродѣ́тели: пе́рвое, предпрїѧ́тїе проти́вныхъ навыкнове́нїй, ꙗ҆́коже предрече́сѧ, ᲂу҆вѣщава́ти начина́етъ долговре́меннымъ ѻ҆бы́чаемъ, къ земны̑мъ ᲂу҆клонѧ́тисѧ: дрꙋго́е, дѣ́йство чꙋ́вства въ чꙋ́вственныхъ добро́тахъ ꙗ҆влѧ́ющеесѧ, и҆ привлека́ющее ᲂу҆́мъ къ себѣ̀: тре́тїе же, ме́дленность ᲂу҆́мнагѡ дѣ́йства, ю҆́же соедине́нїѧ ра́ди ᲂу҆́мъ съ тѣ́ломъ и҆́мать. Не бо̀, ꙗ҆ково̀ є҆́сть видѣ́нїе къ ви́димомꙋ, и҆ вкра́тцѣ рещѝ, чꙋ́вство къ чꙋ́вственномꙋ, сице́въ ᲂу҆́мъ къ разꙋмѣва́емомꙋ: ᲂу҆́мъ же глаго́лю дꙋшѝ є҆щѐ во пло́ти сꙋ́щїѧ. Поне́же невеще́ственнїи ᲂу҆мы̀ дѣ́йственнѣе постиза́ютъ ᲂу҆́мствєннаѧ, не́жели зрѣ́нїе зри́тъ ви̑димаѧ. Но ꙗ҆́коже зрѣ́нїе тꙋпо́е, не ꙗ҆́вныѧ и҆ ꙗ҆́сныѧ па́че же смꙋ̑тныѧ и҆ неѧ̑сныѧ ви́димыхъ веще́й воѡбража́етъ ви́ды ѻ҆быкнове́ннѡ: та́кѡ и҆ сꙋ́щь въ на́съ ᲂу҆́мъ постиза́етъ ᲂу҆́мнаѧ: не могі́й же ᲂу҆́мныхъ добро́тъ созерца́ти ꙗ҆́вственнѡ, не мо́жетъ потомꙋ̀ и҆ жела́ти ѿ тѣ́хъ ничто́же: по мѣ́рѣ бо ра́зꙋма быва́етъ и҆ мѣ́ра жела́нїѧ, къ чꙋ́вствєннымъ ѿвлека́етсѧ добро́тамъ, ꙗ҆снѣ́е томꙋ̀ представлѧ́ющымсѧ. Подоба́етъ бо є҆ди́нѣмъ є҆мꙋ̀ воѡбража́емымъ и҆сполнѧ́тисѧ бла́гомъ, а҆́ще и҆́стиннымъ, а҆́ще ли же и҆ нѝ. Кромѣ́ же си́хъ є҆щѐ нечи́стыхъ и҆ человѣконенави́стныхъ дꙋхѡ́въ кова́рства коли́ки и҆ каковы̀, рещѝ нѣ́сть мо́щно: по всемꙋ̀ пꙋтѝ, ᲂу҆вы̀! дꙋша́мъ поставлѧ́етъ многови́днѡ и҆ многоѡбра́знѡ, чꙋ́вствы, сло́вомъ, ᲂу҆мо́мъ, всѣ́ми, ꙗ҆́коже рещѝ. И҆ а҆́ще не бы̀ на ра́мо воспрїе́мый заблꙋ́ждшее ѻ҆вча̀, неизрече́ннымъ про́мысломъ зрѧ́щихъ на него̀ содѣ́ловалъ вы́шшими, не и҆збѣ́гла бы ника́коже сѣ́тей ѻ҆́нѣхъ ни є҆ди́на дꙋша̀. И҆ дабы̀ всѣ́хъ тѣ́хъ и҆збѣжа́ти, трѝ на́мъ сїѧ̑ потрє́бна сꙋ́ть: ѿ ни́хже пе́рвое и҆ велича́йшее є҆́сть, ко бг҃ꙋ вседꙋ́шнѡ взира́ти и҆ ѿ негѡ̀ рꙋ́кꙋ по́мощи проси́ти, всю̀ на него̀ наде́ждꙋ возло́жшымъ, и҆ соверше́ннѡ ᲂу҆вѣ́рєннымъ: ꙗ҆́кѡ а҆́ще не бы̀ то́й споспѣшествова́лъ, непреминꙋ́ема бы настоѧ́ла нꙋ́жда держи̑мымъ на́мъ бы́ти влекꙋ́щими на́съ во ѻ҆́ныѧ. Второ́е, є҆́же и҆ пе́рвагѡ мню̀ бы́ти вино́вно, непреста́нное ᲂу҆ма̀ разꙋмѣ́нїемъ пита́нїе. Ра́зꙋмъ же, глаго́лю, всѣ́хъ сꙋ́щихъ чꙋ́вственныхъ и҆ ᲂу҆́мныхъ, а҆́ще са́ми по себѣ̀ сꙋ́ть ѻ҆́ныѧ, и҆ каково̀ и҆́мꙋтъ ѿноше́нїе къ пе́рвомꙋ нача́лꙋ, ꙗ҆́кѡ ѿтꙋ́дꙋ, и҆ къ томꙋ́жде восходѧ́щыѧ, и҆ къ видѣ́нїю вино́внагѡ сꙋ́щихъ, ѿ са́магѡ тѣ́хъ созерца́нїѧ, є҆ли́кѡ постиза́ти мо́щно. И҆спытова́нїе бо є҆стества̀ веще́й ѡ҆чища́етъ ᲂу҆́мъ ѿ стра́стнагѡ къ ѻ҆́нымъ вожделѣ́нїѧ, и҆ ѿ тѣ́хъ свобожда́етъ пре́лести, и҆ къ всѣ́хъ нача́лꙋ возво́дитъ, ѿ до́брыхъ и҆ чꙋде́сныхъ и҆ вели́кихъ, добрѣ́йшее и҆ чꙋде́снѣйшее и҆ велича́йшее, па́че же, є҆́же вы́ше добро́ты, и҆ чꙋдесѐ и҆ вели́чества є҆́сть, а҆́ки въ зерца́лѣ ви́дѣти даѧ̀. Въ си́хже ᲂу҆мꙋ̀ при́снѡ ѡ҆браща́ющꙋсѧ, ка́кѡ мо́щно не возжела́ти и҆́стиннагѡ бла́га. А҆́ще бо къ чꙋжде́мꙋ стреми́тсѧ ᲂу҆́мъ, мно́гѡ па́че къ своемꙋ̀. Си́хъ же любо́вїю ѡ҆держи́ма сꙋ́щи дꙋша̀, чесомꙋ̀ ѿ до́лнихъ, и҆ ѿ люби́телѧ ѿвлека́ти ѡ҆бы́кшихъ прилѣжа́ти восхо́щетъ: но и҆ жи́знїю, ꙗ҆́же во пло́ти, ѡ҆горчава́тисѧ бꙋ́детъ, ꙗ҆́кѡ ко благи̑мъ препита́тельною. А҆́ще бо и҆ не ꙗ҆́снѡ, ꙗ҆́коже рече́сѧ, ᲂу҆́мъ во пло́ти сꙋ́щь, взира́етъ на ᲂу҆́мнꙋю красотꙋ̀, но сицева̑ и҆ толи̑ка сꙋ́ть ᲂу҆́мнаѧ блага̑ѧ, ꙗ҆́кѡ и҆ ма́лое нѣ́кое и҆стече́нїе, и҆ тонча́йшее ꙗ҆вле́нїе велича́йшїѧ ѻ҆́ныѧ добро́ты ᲂу҆вѣщава́етъ ᲂу҆́мъ, ꙗ҆́кѡ всѧ̑ мо́жетъ прелетѣ́ти веще́ствєннаѧ, и҆ ко ѻ҆́нымъ то́чїю стреми́тисѧ, нижѐ всѧ́кѡ ѿ сла́дости ѻ҆́ныѧ ѿстꙋпа́ти, а҆́ще и҆ въ нѣ̑каѧ гѡ́рестнаѧ впа́сти прилꙋчи́тсѧ. Тре́тїе же, бы́ти подоба́етъ ᲂу҆мерщвле́нїю сопрѧже́ннагѡ тѣ́ла: и҆на́кѡ бо не мо́щно видѣ̑нїѧ ѻ҆́ныѧ прїима́ти ꙗ҆́сныѧ и҆ ꙗ҆́вствєнныѧ. Оу҆мерщвлѧ́етсѧ же пло́ть поще́нїемъ, бдѣ́нїемъ и҆ долꙋлега́нїемъ, и҆ сꙋро́вою нꙋ́ждною ѻ҆де́ждою, и҆ трꙋды̀ и҆ ѕлострада́нїи. Си́це ᲂу҆мерщвлѧ́етсѧ пло́ть: па́че же сораспина́етсѧ хрⷭ҇тꙋ̀, и҆стончева́етсѧ же и҆ ѡ҆чища́етсѧ, и҆ легка̀, и҆ благоꙋстро́енна сꙋ́щи, движе́нїѧмъ ᲂу҆ма̀ послѣ́дꙋетъ без̾ сопротивле́нїѧ, и҆ совозвыша́етсѧ высо́комꙋ ᲂу҆до́бнѡ. Кромѣ́ же сегѡ̀, всѧ́кѡ тща́нїе сꙋ́етно ѡ҆блича́етсѧ. Сїѧ̑ честна́ѧ тро́ица, є҆гда̀ въ себѣ̀ само́й бꙋ́детъ согласова́ти, ражда́етъ въ дꙋшѝ ли́къ блаже́нныхъ добродѣ́телей. Нѣ́сть бо мо́щно во ᲂу҆кра́шенныхъ се́ю тро́ицею, и҆лѝ слѣ́дъ ѕло́бы ѡ҆брѣстѝ, и҆лѝ не бы́ти нѣ́коей ѿ добродѣ́телей: но не смꙋща́етъ ли ᲂу҆́мъ ѿверже́нїе стѧжа́нїй, и҆ сла́вы презрѣ́нїе. И҆́бо до́ндеже прилѣ́пленна є҆́сть къ си̑мъ дꙋша̀, мно́гими ᲂу҆ѧзвлѧ́етсѧ страстьмѝ. А҆́зъ же, ꙗ҆́кѡ невозмо́жно возлетѣ́ти дꙋшѣ̀ пригвожде́ннѣй бога́тствꙋ и҆ сла́вѣ, ѕѣлѡ̀ ᲂу҆твержда́ю. Не глаго́лю же, ꙗ҆́кѡ мо́щно си̑мъ прилѣжа́ти є҆́й, дово́льнѡ въ рече́нныхъ тре́хъ подвиза́вшейсѧ, ꙗ҆́коже въ навыкнове́нїе тѣ́хъ прїитѝ. А҆́ще бо ниеди́но вѣ́сть вои́стиннꙋ добро̀, то́чїю є҆́же па́че всѧ́кагѡ добра̀, ѿ дрꙋги́хъ же лꙋ́чшее то̀, є҆́же подо́бнѣйше пе́рвомꙋ бы́ти ᲂу҆вѣ́рена є҆́сть, и҆ си́це да́же до послѣ́днихъ: ка́кѡ ᲂу҆́бѡ сребро̀, и҆лѝ зла́то, и҆лѝ и҆́но что̀ ѿ пресмыка́ющихсѧ по землѝ возлю́битъ, и҆ восхва́литъ; Сїѧ́ же и҆ ѡ҆ сла́вѣ речє́на да бꙋ́дꙋтъ: но нижѐ крѣпча́йша ве́щь, попече́нїѧ глаго́лю, сопроти́вꙋ стоѧ́ти сло́вꙋ. Ѡ҆ чесо́мъ бо попече́тсѧ ни къ чесомꙋ́ же ѿ здѣ́шнихъ возбꙋжда́ѧйсѧ, и҆ ѡ҆браща́ѧйсѧ; Попече́нїй бо ѻ҆́блакъ, а҆́ки ѿ воскꙋре́нїѧ нѣ́коегѡ, ѿ пе́рвѣйшихъ страсте́й, сластолю́бїѧ, глаго́лю, сребролю́бїѧ, и҆ славолю́бїѧ, составлѧ́етсѧ. И҆́бо си́хъ свобо́дный, и҆ попече́нїѧ чꙋ́ждъ. Но нижѐ прозорли́вость ра́зꙋма и҆́но бы́ти ѿ премꙋ́дрости почита́ема, пе́рвѣйша сꙋ́щи возносѧ́щихъ горѣ̀, къ речє́ннымъ не доста́точествꙋетъ. Въ разꙋмѣ́нїи бо добродѣ́телей содержа́тисѧ и҆ ра́зꙋмъ бла́га и҆ проти́внагѡ ѻ҆па́снѣйшее разсꙋжде́нїе. И҆́хже ра́ди прозорли́вость ᲂу҆ма̀ тре́бꙋетъ: ѡ҆́бразꙋ же ᲂу҆потребле́нїѧ и҆ боре́нїю, и҆скꙋ́съ и҆ съ тѣ́ломъ боре́нїе наꙋ́читъ: вина́ же стра́ха, не ѡ҆скꙋдѣва́етъ сло́вꙋ. Є҆ли́кѡ бо бо́льши є҆́сть любы̀, толи́кѡ и҆ стра́хъ прїꙋмно́житсѧ: є҆ли́ка наде́жда є҆́сть полꙋчи́ти бла́го, толи́къ стра́хъ не полꙋчи́ти. Є҆́же па́че ѡ҆бы́че ᲂу҆грыза́ти ᲂу҆ѧ́звлєнныѧ, не́же тьмочи́сленныхъ мꙋ́къ прещє́нїѧ. Полꙋчи́ти бо блаже́ннѣйше, не полꙋчи́ти же ѻ҆каѧ́ннѣйше. Да сло́во же на́ше пра́вымъ и҆ и҆на́мѡ пꙋте́мъ произы́детъ, ѿ конца̀ нача́ти подоба́етъ. Си́це бо всѐ быва́ющее и҆ ѿ своегѡ̀ конца̀ мни́тсѧ и҆ часте́й раздѣле́нїе, и҆ чи́нъ ѻ҆́ныхъ прїима́ти. Коне́цъ ᲂу҆́бѡ живота̀ на́шегѡ є҆́сть блаже́нство, є҆́же то́жде рещѝ, и҆ ца́рство небе́сное, и҆лѝ бж҃їе. Сїе́ же нѣ́сть зрѣ́ти влады́чественнѣйшꙋю то́кмѡ рещѝ, трⷪ҇цꙋ: но кромѣ̀ сегѡ̀ и҆ бж҃е́ственное прїима́ти влїѧ́нїе, и҆ ꙗ҆́кѡ рещѝ ѡ҆боже́нїе: и҆ є҆́же въ на́съ недоста́точное, и҆ несоверше́нное и҆сполнѧ́тисѧ томꙋ̀, и соверша́тисѧ влїѧ́нїемъ. И҆ сїѐ є҆́сть ᲂу҆́мныхъ пи́ща, недоста́точествꙋющагѡ бж҃е́ственнымъ ѻ҆́нымъ влїѧ́нїемъ и҆сполне́нїе, и҆ є҆́сть крꙋ́гъ нѣ́кїй непреста́нный, ѿ тогѡ́жде начина́ѧйсѧ, и҆ тѣ́мжде скончава́ѧйсѧ. Є҆ли́кѡ бо разꙋмѣва́етъ, жела́етъ: и҆ є҆ли́кѡ жела́етъ, наслажда́етсѧ: є҆ли́кѡ же наслажда́етсѧ, къ разꙋмѣ́нїю па́ки ᲂу҆крѣплѧ́етсѧ: и҆ па́ки начина́етъ недви́жимое движе́нїе, и҆лѝ недви́жимꙋю недви́жность. Коне́цъ ᲂу҆́бѡ, є҆ли́кѡ пости́жно на́мъ, сицевы́й є҆́сть. Ка́кѡ же къ семꙋ̀ концꙋ̀ ше́ствовати, разсмотрѣ́ти подоба́етъ: слове́снымъ дꙋша́мъ ᲂу҆́мнымъ сꙋ́щымъ сꙋщества́мъ, и҆ ма́лѡ ѿстоѧ́щымъ ѿ а҆́гг҃льскихъ ᲂу҆мѡ́въ, здѣ̀ сꙋ́щее во пло́ти житїѐ въ трꙋ́дъ дано̀ є҆́сть, и҆ по́двигъ. Мзда́ же по́двига є҆́сть рече́нное состоѧ́нїе, да́ръ кꙋ́пнѡ и҆ бла́гости бж҃їѧ, и҆ пра́вды досто́йный: пра́вды ᲂу҆́бѡ ꙗ҆́кѡ ѿ свои́хъ по́двигѡвъ мни́тсѧ полꙋчи́ти сїѧ̑ блага̑ѧ бла́гости же, ꙗ҆́кѡ всѧ́кїй трꙋ́дъ неизрече́ннѡ дарови́таѧ си́ла превосхо́дитъ. Прито́мъ же, ꙗ҆́кѡ и҆ то̀ са́мое, є҆́же мощѝ содѣ́ѧти бла́го, бж҃їй є҆́сть да́ръ. Кі́й ᲂу҆́бѡ здѣ̀ по́двигъ; Дꙋша̀ слове́снаѧ съ живо́тнымъ сопрѧже́сѧ тѣ́ломъ, ѿ землѝ бытїѐ и҆мꙋ́щимъ, и҆ къ до́льнимъ клонѧ́щимсѧ: си́це же съ си́мъ сраствори́сѧ, ꙗ҆́кѡ є҆ди́номꙋ бы́ти ѿ двꙋ́хъ си́хъ себѣ̀ проти́вныхъ, дꙋшѝ и҆ тѣ́ла, не послѣ́дꙋющꙋ преѡбраще́нїю, и҆лѝ смѣше́нїю часте́й, да не бꙋ́детъ; но ѿ двꙋ́хъ по є҆стествꙋ̀ разли́чныхъ сꙋ́щихъ є҆ди́номꙋ лицꙋ̀ бы́ти въ двꙋ́хъ соверше́нныхъ є҆стества́хъ. Та́кѡ ᲂу҆́бѡ сꙋгꙋбоесте́ственное нѣ́какѡ бы́вши смѣ́шенное сїѐ живо́тно человѣ́къ, сво́йствєннаѧ ка́ждомꙋ є҆стествꙋ̀ ѿ ча́сти ѡ҆бы́че твори́ти, и҆ тѣ́лꙋ ᲂу҆́бѡ є҆сте́ственнѡ подо́бныхъ жела́ти. Жела́нїе бо сїѐ є҆сте́ственно є҆́сть веще́мъ къ подѡ́бнымъ себѣ̀, ꙗ҆́кѡ вспомоществꙋ́емꙋ, сі́есть ѿ соедине́нїѧ подо́бныхъ бытїю̀: тѣ́мже и҆ наслажда́тисѧ ѻ҆́ными чꙋ́вствомъ є҆сте́ственно є҆́сть. Є҆ще́ же тѧ́жкꙋ сꙋ́щꙋ томꙋ̀, поле́зно быва́етъ ѡ҆слабле́нїе: живо́тнꙋ ᲂу҆́бѡ є҆стествꙋ̀ є҆стє́ственна и҆ жела̑тельна сꙋ́ть сїѧ̑. Слове́сной же дꙋшѝ, ꙗ҆́кѡ ᲂу҆́мномꙋ сꙋществꙋ̀, є҆сте́ствєнна и҆ жела́тєльна сꙋ́ть всѧ̑ ᲂу҆́мнаѧ, и҆ тѣ́хъ наслажде́нїе сво́йственнымъ є҆́й ѡ҆́бразомъ. Пре́жде же всѣ́хъ и҆ над̾ всѣ́ми, любо́вь къ бг҃ꙋ въ не́й є҆сте́ственнѣ вкорене́на є҆́сть. И҆ хо́щетъ ᲂу҆́бѡ тѣ́мъ наслажда́тисѧ, и҆ и҆ны́ми ᲂу҆́мными сꙋщества́ми: но не мо́жетъ безпрепѧ́тственнѡ сїѐ твори́ти. Пе́рвый ᲂу҆̀бо человѣ́къ безпрепѧ́тственнѡ, ꙗ҆́коже чꙋ́вствомъ чꙋ́вствєннаѧ, си́це ᲂу҆мо́мъ, ᲂу҆́мнаѧ воспрїима́ти и҆ тѣ́хъ наслажда́тисѧ можа́ше. Но потре́бно бѣ̀ ѻ҆́номꙋ, не въ хꙋ́ждшихъ, но въ лꙋ́чшихъ ᲂу҆пражнѧ́тисѧ. Ѻ҆боѧ́ бо бѣ̀ могі́й, а҆́ще ли съ ᲂу҆́мными пребыва́ти ᲂу҆мо́мъ, а҆́ще ли съ чꙋ́вственными чꙋ́вствомъ. Глаго́лю же, не ꙗ҆́кѡ не до́лженъ бѣ̀ а҆да́мъ ᲂу҆потреблѧ́ти чꙋ̑вства, не бо̀ всꙋ́е ѡ҆бложе́нъ бѣ̀ тѣ́ломъ, но ꙗ҆́кѡ чꙋ́вственными ᲂу҆слажда́тисѧ не подоба́ше: но красотꙋ̀ тва́рей воспрїе́млющемꙋ къ вино́вникꙋ востека́ти потре́бно бѧ́ше, и҆ тѣ́мъ и҆ ѿсю́дꙋ ᲂу҆слажда́тисѧ со ᲂу҆дивле́нїемъ сꙋгꙋ̑бы и҆мꙋ́щꙋ вины̀ ᲂу҆дивлѧ́тисѧ созда́вшемꙋ: а҆ не къ чꙋ̑вственнымъ пригвожда́тисѧ, и҆ си̑мъ ᲂу҆дивлѧ́тисѧ ᲂу҆́мнꙋю ѡ҆ста́вивъ добро́тꙋ. А҆да́мъ ᲂу҆́бѡ та́кѡ: є҆гда́ же ѕлѣ̀ ѻ҆́нъ чꙋ́вство ᲂу҆потреби́въ, чꙋ́вственнѣй ᲂу҆диви́сѧ добро́тѣ, краснꙋ̀ ꙗ҆ви́вшꙋсѧ плодꙋ̀ къ видѣ̑нїѧ є҆гѡ̀ и҆ добрꙋ̀ въ снѣ́дь, є҆гѡ́же вкꙋси́въ, ѡ҆ста́ви наслажде́нїе ᲂу҆́мныхъ. Тѣ́мже пра́ведный сꙋдїѧ̀, недосто́йна є҆го̀ сꙋди́въ тѣ́хъ, ꙗ҆̀же презрѣ̀, видѣ́нїѧ глаго́лю, бж҃їѧ и҆ сꙋ́щихъ, и҆згна̀ є҆го̀, положи́въ тьмꙋ̀ кромѣ́шнꙋ, междꙋ̀ тѣ́мъ и҆ безпло́тными сꙋществы̀: не подоба́ше бо нечи̑стымъ ѡ҆ста́вити свѧта̑ѧ, но ꙗ҆̀же возлюбѝ, тѣ́ми попꙋстѝ наслажда́тисѧ, да́въ жи́ти чꙋ́вствомъ, и҆ ма́лыми ᲂу҆ма̀ слѣда́ми. Ѿсю́дꙋ на́мъ по́двигъ къ ᲂу҆́мнымъ чꙋ́вствамъ тѧгча́йшъ содѣ́ласѧ: не бо̀ во вла́сти на́шей ᲂу҆́мными наслажда́тисѧ, ꙗ҆́коже чꙋ́вственными чꙋ́вствомъ, по рече́нномꙋ. А҆́ще и҆ креще́нїемъ вспомоществꙋ́еми є҆смы̀ ѡ҆чища́еми, и҆ возвыша́еми: ѻ҆ба́че є҆ли́кѡ возмо́жно на́мъ, въ мы́сленныхъ ᲂу҆пражнѧ́тисѧ подоба́етъ, а҆ не въ чꙋ́вственныхъ, и҆ тѣ́мъ ᲂу҆дивлѧ́тисѧ, и҆ та̑ѧ хотѣ́ти: ѿ чꙋ́вственныхъ же не чесомꙋ́же сво́йственнѣ ᲂу҆дивлѧ́тисѧ, нижѐ наслади́тисѧ восхотѣ́ти. Вои́стиннꙋ бо таковы́й ни є҆ди́нагѡ къ ᲂу҆́мнымъ сло́ва и҆мѣ́ти мни́тсѧ. Є҆ли́кѡ же сꙋщество̀ сꙋщества̀ толи́кѡ и҆ добро́та добро́ты чꙋ́днѣйша є҆́сть. Вмѣ́стѡ же благолѣ́пнѣйшагѡ стꙋ́днѣйшее, и҆ вмѣ́стѡ честнѣ́йшагѡ безче́стнѣйшее жела́ти, ко́е не превосхо́дитъ безꙋ́мїе; И҆ сїѧ̑ ᲂу҆́бѡ ѿ ѻ҆бои́хъ тва́рехъ чꙋ́вственныхъ и҆ ᲂу҆́мныхъ. Что́ же рещѝ мо́жемъ ѡ҆ сꙋ́щемъ превы́ше си́хъ є҆гда̀ и҆ семꙋ̀ предполага́емъ безѡбра́зное вещество̀, и҆ не благолѣ́пное; Се́й ᲂу҆́бѡ є҆́сть по́двигъ, є҆́же внима́ти себѣ̀ со ѻ҆па́сствомъ, да ᲂу҆́мныхъ при́снѡ наслажда́емсѧ, къ тѣ̑мъ и҆ ᲂу҆́мъ и҆ жела́нїе простира́юще, да николи́же ѿ си́хъ ѡ҆крада́еми бꙋ́демъ чꙋ́вственныхъ, ѿвле́кшесѧ ктомꙋ̀ чꙋ́вствомъ, ꙗ҆́кѡ ᲂу҆дивлѧ́тисѧ веще́мъ ѡ҆ себѣ̀ самы́хъ сꙋ́щымъ. Но а҆́ще и҆ чꙋ́вство подоба́етъ ᲂу҆потреби́ти, сегѡ̀ ра́ди ᲂу҆потреби́ти подоба́етъ, да ѿ тва́рей творца̀ позна́емъ, въ тѣ́хъ зрѧ́ще ѻ҆́нагѡ ꙗ҆́кѡ въ вода́хъ со́лнце. Занѐ ѡ҆́брази сꙋ́ть въ сꙋ́щихъ пе́рвагѡ всѣ́хъ вино́вника, є҆ли́кѡ ѻ҆́нымъ вмѣсти́тельно. Сїѐ ᲂу҆́бѡ є҆́сть и҆справле́нїе на́ше: ка́кѡ же то̀ и҆спра́вити, разсмотрѣ́ти подоба́етъ. Рече́но бо є҆́сть, ꙗ҆́кѡ тѣ́ло наслажда́тисѧ жела́етъ сво́йственными себѣ̀ вещьмѝ посре́дствомъ чꙋ́вствъ, є҆́же проти́вно є҆́сть произволе́нїю дꙋшѝ: и҆ є҆ли́кѡ бо́лѣе ᲂу҆крѣплѧ́етсѧ тѣ́ло, бо́лѣе жела́етъ. Сегѡ̀ ᲂу҆́бѡ ра́ди да пече́тсѧ дꙋша̀, всѣ̑мъ чꙋ́вствамъ ᲂу҆здꙋ̀ наложи́ти, да не чꙋ́вственными наслажда́емсѧ, ꙗ҆́коже рече́сѧ. Зане́же па́че ᲂу҆крѣплѧ́ѧсѧ тѣ́ло, па́че ᲂу҆стремлѧ́етсѧ: па́че же ᲂу҆стремлѧ́етсѧ, неꙋдободержи́мо быва́етъ: тща́тисѧ ᲂу҆́бѡ подоба́етъ дꙋшѣ̀, ѡ҆ ᲂу҆мерщвле́нїи ѻ҆́нагѡ посто́мъ, бдѣ́нїемъ, стоѧ́нїемъ, долꙋлега́нїемъ, не ѡ҆мове́нїемъ, и҆ всѧ́кимъ и҆ны́мъ ѕлострада́нїемъ, да ᲂу҆вѧди́въ си́лꙋ тогѡ̀, ᲂу҆до́бь ᲂу҆правлѧ́емо и҆́мать и҆ благопослꙋ́шно къ ᲂу҆́мнымъ свои̑мъ дѣѧ́нїѧмъ. Сїе́ бо бѣ̀ предлежа́щее ко и҆справле́нїю: но занѐ сїѧ̑ жела́ти ᲂу҆́бѡ ᲂу҆до́бно, твори́ти же не ᲂу҆до́бно, и҆ многоразли̑чны сꙋ́ть си́хъ и҆справле́нїй погрѣшє́нїѧ, а҆́ще и҆ вельмѝ вне́млетъ кто̀, ча́стѡ чꙋ́вствꙋ ѡ҆крада́ющꙋ: тре́тїе ᲂу҆мы́слисѧ врачевство̀ моли́тва, и҆ сле́зы. Мл҃тва бо бл҃годаре́нїе и҆́мать ѡ҆ да́нныхъ благи́хъ, и҆ проше́нїе ѡ҆ставле́нїѧ грѣхѡ́въ, и҆ ᲂу҆крѣплѧ́ющыѧ впре́дь си́лы. И҆́бо кромѣ̀ бж҃е́ственныѧ по́мощи, ꙗ҆́коже и҆ пре́жде рече́сѧ, ничто́же мо́жетъ и҆спра́вити дꙋша̀, є҆ще́ же соедине́нїе съ жела́емымъ, и҆ наслажде́нїе, и҆ соверше́нное жела́тельныѧ си́лы ко ѻ҆́номꙋ наклоне́нїе. Є҆́же и҆справле́нїѧ ча́сть є҆́сть и҆зрѧ́днѣйшаѧ, дабы̀ ᲂу҆вѣща́ти хотѣ́нїе, сїѧ̑, є҆ли́кѡ возмо́жно, ѕѣлѡ̀ хотѣ́ти. Сле́зы же мно́гꙋ и҆́мꙋтъ си́лꙋ, и҆ ѡ҆ грѣсѣ́хъ бо ᲂу҆милостивлѧ́ютъ влⷣкꙋ, и҆ прибыва́ющыѧ на́мъ ѿ чꙋ́вственныѧ сла́сти сквє́рны ѡ҆чища́ютъ, и҆ къ гѡ́рнимъ воскрилѧ́ютъ жела́нїе: и҆ сїѧ̑ сꙋ́ть та́кѡ. Послѣ́дꙋющее ᲂу҆̀бо ѿ тѣ́хъ и҆справле́нїе, є҆́сть ᲂу҆́мныхъ видѣ́нїе, и҆ жела́нїе соверше́нное. Ѿсю́дꙋ же пло́ти ᲂу҆кроще́нїе, є҆гѡ́же ча́сти, и҆ поще́нїе, и҆ цѣломꙋ́дрїе, и҆ про́чее всѐ є҆ди́но ра́ди дрꙋга́гѡ соверша́емое: ра́ди си́хъ и҆ съ си́ми моли́тва. Всѧ́кое же ѿ тѣ́хъ на мно́жайшыѧ ча̑сти раздѣлѧ́етсѧ. Ꙗ҆́коже бо та̑ и҆ны́хъ ра́ди быва́ютъ, та́кѡ и҆на̑ѧ тѣ́хъ ра́ди. Никто́же да мни́тъ славолю́бїе и҆ сребролю́бїе тѣ́лꙋ прили́чествовати: тѣ́лꙋ бо сластолю́бїе то́чїю прили́чествꙋетъ: є҆мꙋ́же врачевство̀ поле́зно ѡ҆брѣ́тесѧ, ᲂу҆мерщвле́нїе тѣ́ла. Речє́ннаѧ же ѻ҆боѧ̀ славолю́бїе, глаго́лю, и҆ сребролю́бїе, порождє́нїѧ сꙋ́ть неразꙋ́мїѧ. Ѿ неискꙋ́са бо и҆́стинныхъ бла̑гъ дꙋша̀ и҆ невѣ́дѣнїѧ ᲂу҆́мныхъ, лѡ́жнаѧ вы́мысли блага̑ѧ. Бога́тствомъ мнѧ́щисѧ воспо́лнити лише́нїе: вкꙋ́пѣ же и҆ сластолю́бїѧ и҆ славолю́бїѧ ра́ди ѡ҆ бога́тствѣ пече́тсѧ, є҆́же са́мо по себѣ̀ ꙗ҆́коже и҆ и҆́но ко́елибо добро̀, ѻ҆ба́че не и҆́стинное, ѡ҆ не́мже глаго́лемъ, ꙗ҆́кѡ ѿ невѣ́дѣнїѧ и҆́стинныхъ бла̑гъ быва́етъ сїѐ. Славолю́бїе же, не скꙋ́дости ра́ди тѣле́сныѧ: ни ма́лагѡ бо въ лише́нїи тѣле́сныхъ потре́бъ ᲂу҆тѣше́нїѧ ѡ҆ тогѡ̀ не быва́етъ. Но ѿ неискꙋ́са и҆ невѣ́дѣнїѧ пе́рвагѡ добра̀, и҆ и҆́стинныѧ сла́вы. И҆ сегѡ̀ вино́вно, и҆ вкра́тцѣ рещѝ, всѣ́хъ ѕѡ́лъ ко́рень є҆́сть неразꙋ́мїе. Не возмо́жно бо веще́й є҆стество̀, ꙗ҆́коже подоба́етъ, пости́гшꙋ, ѿкꙋ́дꙋ произы́де ка́ждое, и҆ ка́мѡ ѡ҆браща́етсѧ, та́же сво́й коне́цъ презрѣ́вшꙋ, къ земны̑мъ стреми́тисѧ: не бо̀ хо́щетъ дꙋша̀ ви́димагѡ добра̀: а҆́ще же ѿ навыкнове́нїѧ и҆ мꙋ́чима быва́етъ: но и҆ навыкнове́нїе побѣди́ти мо́жетъ ѻ҆на̀. Но ѻ҆ба́че, є҆гда̀ є҆щѐ не бѣ̀ навыкнове́нїе, по невѣ́дѣнїю прельща́шесѧ. Тѣ́мже ѿ пе́рвѣйшихъ пе́рвѣе тща́тисѧ подоба́етъ, и҆ ѡ҆ сꙋ́щихъ пра́вѡ мы́слити, та́же послѣ́довательнѣ хотѣ́нїе къ пе́рвомꙋ добрꙋ̀ возвыша́ти: всѧ̑ же ви̑димаѧ презрѣ́ти, позна́вшемꙋ мно́гꙋ си́хъ сꙋетꙋ̀. Что́ бо къ на́шемꙋ концꙋ̀ спосо́бствꙋетъ; И҆ да рекꙋ̀ всѐ вкра́тцѣ: є҆ди́но то́чїю є҆́сть дѣ́ло слове́сныѧ въ тѣ́лѣ дꙋшѝ, своегѡ̀ конца̀ жела́ти. Занѐ хотѣ́нїѧ дѣ́йство кромѣ̀ ра́зꙋма не дви́жимо є҆́сть. Сегѡ̀ ра́ди ᲂу҆́мнѣ дѣ́йствовати воспрїѧ́хомъ. А҆́ще ли ᲂу҆̀бо хотѣ́нїѧ ра́ди разꙋмѣва́ти, а҆́ще ли же и҆ тогѡ̀ самогѡ̀ ра́ди, и҆ хотѣ́нїѧ ра́ди є҆́же и҆ па́че мни́тсѧ. Бл҃же́нство бо, є҆гѡ́же не то́чїю вино́вно, но и҆ ѡ҆́бразъ здѣ́шнее подви́жническое житїѐ. Ѻ҆боѧ̑ и҆́мать дѣ̑йства, разꙋмѣ́нїе же и҆ хотѣ́нїе, си́рѣчь, любо́вь и҆ сла́дость. А҆́ще ли ᲂу҆́бѡ ѻ҆́ба дѣ̑йства, а҆́ще ли є҆ди́но ѿ двꙋ́хъ є҆́сть гла́внѣйшее, да любомꙋ́дрствꙋютъ ѡ҆ се́мъ хотѧ́щїе. Ны́нѣ же ѻ҆боѧ̑ полага́емъ дѣ̑йства, ѿ ни́хже ѻ҆́во ᲂу҆́бѡ видѣ́нїе, ѻ҆́во же дѣѧ́нїе нарица́емъ. Не возмо́жно же є҆ди́но ѿ двꙋ́хъ без̾ дрꙋга́гѡ ѡ҆брѣстѝ въ высоча́йшихъ си́хъ дѣ́йствахъ: въ ни́жнихъ же и҆ послѣ́дꙋющихъ ѻ҆́нымъ, возмо́жно. Є҆ли̑ка же возбранѧ́ютъ си̑мъ дѣ́йствамъ, и҆лѝ и҆ къ сопроти̑внымъ ᲂу҆клонѧ́ютсѧ, ѕлѡ́бы нарица́емъ: є҆ли̑ка же вспомоществꙋ́ютъ, и҆лѝ и҆ препѧ́тствїй свобожда́ютъ, добродѣ̑тели: дѣ̑йства же, ꙗ҆̀же ѿ добродѣ́телей, и҆справлє́нїѧ: а҆ ꙗ҆̀же ѿ проти́вныхъ, престꙋплє́нїѧ и҆ прегрѣшє́нїѧ. Всѧ́кагѡ же дѣ́йства видотво́рное, а҆́ще ли къ го́ршемꙋ, а҆́ще ли къ лꙋ́чшемꙋ, намѣ́ренїе кра́йнѣйшее, є҆́же дѣ́йство є҆́сть сложе́но ѿ разꙋмѣ́нїѧ и҆ хотѣ́нїѧ бы́ти.

Бж҃е́ственный се́й ѻ҆те́цъ и҆лїа̀, и҆́же и҆ є҆́кдикъ (защи́титель) нарече́нъ бы́сть, а҆́ще и҆лїа̀ кри́тскїй, и҆́же бѣ̀ ᲂу҆чени́къ слове́съ григо́рїа бг҃осло́ва, се́й є҆́сть и҆лѝ и҆́нъ нѣ́кто, на́мъ неизвѣ́стно. Є҆ли́кѡ же ѻ҆́нъ настоѧ́щихъ глави́знъ, ꙗ҆́кѡ ѿ нѣ́кїихъ дѣ́лъ познава́ти мо́щно дѣ́лателѧ, мꙋ́жъ бѣ̀, а҆́ще и҆ и҆́нъ кто̀ возше́дый на ве́рхъ премꙋ́дрости внѣ́шнїѧ, и҆ мно́гѡ па́че дх҃о́вныѧ, и҆ то̀ лꙋ́чшїѧ, си́лꙋ бо въ словесѣ́хъ и҆ преиз̾ѡби́лꙋющꙋю є҆мꙋ̀ сла́вꙋ добродѣ́тели, ᲂу҆до́бнѡ всѧ́къ разсꙋди́тельный въ тѣ́хъ ᲂу҆разꙋмѣ́етъ. Ꙗ҆̀же и҆ мы̀ ᲂу҆вѣ́дѣвше, и҆ многоѻби́льномꙋ плодꙋ̀ нра́вственнагѡ и҆ разꙋмѣ́тельнагѡ ᲂу҆че́нїѧ ᲂу҆ди́вльшесѧ, и҆ тѣ́ми по и҆́стинѣ ᲂу҆слади́вшесѧ, ꙗ҆́кѡ нѣ́кїимъ ли́ствїемъ покро́въ плодꙋ̀ и҆ красотꙋ̀ благолѣ́пнѣйшꙋ подаю́щымъ подо́бїи глаго́лю, и҆ рече́нїи добро́тами, и҆́миже на ѻ҆бѣ́дъ ѻ҆ц҃ъ тѣ́хъ прїꙋгото́вѧ чте́нїе лю́бѧщымъ ко ᲂу҆дово́льствїю предлага́емъ, и҆ съ любо́вїю въ кра́сный се́й и҆ благово́нный цвѣтни́къ мно́гими и҆ высо́кими произрастѣ́нїѧми слове́съ дꙋхо́вныхъ насажде́нный и҆ сладча́йшими стрꙋѧ́ми премꙋ́дрости напое́нный вни́ти, и҆ под̾ сѣ́нїю тогѡ̀ сѣ́сти про́симъ, да и҆ ті́и не то́чїю ѿ пото́кѡвъ дѣ́ѧтельнагѡ любомꙋ́дрїѧ насладѧ́тсѧ, но и҆ плодѡ́въ ᲂу҆мозрѣ́нїѧ до сы́тости вкꙋ́сѧтъ. И҆звѣтосло́вїе совѣща́тельное тщали́выхъ любомꙋ́дрцєвъ тща́нїемъ и҆ трꙋдо́мъ и҆лѝ смире́ннѣйшагѡ пресвѵ́тера сочине́нное и҆сто́чникъ ᲂу҆чи́тельныхъ ро́сꙋ слове́съ точа́щїй здѣ̀ ѡ҆брѧ́щеши, а҆́ще и҆́скреннѣ прочте́ши.

Совѣ́товательно любомꙋдрецє́въ тщали́выхъ, и҆злюбомꙋ́дрствовано и҆ сотворено̀ и҆лїе́ю малѣ́йшимъ пресвѵ́теромъ и҆ є҆́кдикомъ. И҆сто́чникъ точа́щъ нравоꙋчи́тельныхъ ро́сꙋ слове́съ здѣ̀ и҆з̾ѡбрѧ́щеши, а҆́ще про́йдеши зако́ннѡ.

а҃. Досто́йно всѧ́комꙋ хрїстїа́нинꙋ пра́вѡ вѣ́рꙋющемꙋ въ бг҃а, не бы́ти без̾ попече́нїѧ, но всегда̀ ча́ѧти и҆ ѡ҆жида́ти и҆скꙋше́нїѧ. Да є҆гда̀ прїи́детъ, не ᲂу҆жаса́етсѧ, нижѐ смꙋща́етсѧ, но благода́рнѣ те́рпитъ трꙋ́дъ, скѡ́рби, и҆ разꙋмѣ́етъ, что̀ поѧ̀ съ проро́комъ глаго́летъ: и҆скꙋси́ мѧ гдⷭ҇и, и҆ и҆спыта́й мѧ̀¹⁴⁴⁸. И҆ не речѐ, ꙗ҆́кѡ наказа́нїе твоѐ низвратѝ, но и҆спра́ви мѧ̀ въ коне́цъ.

в҃. Нача́ло ᲂу҆́бѡ до́брыхъ, стра́хъ бж҃їй: коне́цъ же любы̀ є҆гѡ̀.

г҃. Нача́ло всѧ́кагѡ бла́га сло́во дѣ́ѧтельно, и҆ дѣѧ́нїе слове́сно, тѣ́мже ни дѣѧ́нїе без̾ сло́ва бла́го, ни сло́во без̾ дѣѧ́нїѧ происходѧ́щее.

д҃. Дѣѧ́нїе є҆́сть тѣлесѐ ᲂу҆́бѡ, по́стъ и҆ бдѣ́нїе: ᲂу҆́стъ же пѣ́нїе, и҆ моли́тва, и҆ молча́нїе, сло́ва честнѣ́йша. И҆ рꙋкꙋ̀ дѣѧ́нїе, є҆́же ѻ҆́нѣми без̾ ропта́нїѧ быва́ющее: но́гꙋ же, є҆́же тѣ́ми ѿ пе́рвагѡ побꙋжде́нїѧ соверша́емое.

є҃. Предварѧ́етъ всѣ́хъ си́хъ ми́лость и҆ и҆́стина, и҆́хже зача́тїе є҆́сть смире́нїе, и҆ є҆́же ѿ сегѡ̀ по ѻ҆тцє́мъ пребыва́ющее разсꙋжде́нїе, без̾ негѡ́же ни є҆ди́но, ни дрꙋго́е сво́й ᲂу҆ви́дѣти коне́цъ возмо́жетъ. Дѣѧ́нїе ᲂу҆́бѡ вѣ́съ словесѐ безче́ствꙋющо, здѣ̀ и҆ ѻ҆́ндѣ въ безполе́зныхъ а҆́ки нѣ́каѧ ю҆́ница ѻ҆́крестъ заблꙋжда́ющо ѡ҆брѣта́етсѧ. Сло́во же дѣ́ѧтельныѧ добродѣ́тели честны́ѧ ри́зы ѿме́щꙋщо, нѣ́сть благоѡбра́зно, а҆́ще и҆ таково̀ бы́ти нѣ́какѡ мнѣ́нїемъ воѡбразꙋ́етсѧ.

ѕ҃. Мꙋ́жественнаѧ дꙋша̀ ꙗ҆́кѡ жена̀ во все́мъ свое́мъ житїѝ, а҆́ки два̀ свѣти̑льника, дѣѧ́нїе же и҆ видѣ́нїе горѧ́ща содержа́щи, содѣва́етъ дѡ́лжнаѧ: сопроти́внаѧ же напроти́въ, разсла́бленна сластьмѝ.

з҃. Не довлѣ́етъ дꙋшѝ къ соверше́нномꙋ ѕло́бы и҆збавле́нїю, во́льное ѕлострада́нїе, а҆́ще и҆ нево́льнымъ разжига́ема не и҆ста́етъ. Ꙗ҆́коже бо нѣ́кїй ме́чь дꙋша̀, а҆́ще не сквозѣ̀ ѻ҆́гнь про́йдетъ и҆ во́дꙋ, си́рѣчь, сквозѣ̀ вѡ́льныѧ болѣ̑зни и҆ невѡ́льныѧ, не сло́млена сопротивле́нїи приключа́ющихсѧ не соблюда́етсѧ.

и҃. Ꙗ҆́коже во́льныхъ и҆скꙋше́нїй трѝ сꙋ́ть собо́рнѣйшыѧ вины̑: здра́вїе, бога́тство и҆ сла́ва: та́кѡ и҆ нево́льныхъ трѝ сꙋ́ть: тщєты̀, дѡса́ды и҆ не́мѡщи. Быва́ютъ же нѣ̑кїимъ ᲂу҆́бѡ на созида́нїе, нѣ̑кїимъ же на низложе́нїе.

ѳ҃. Приподсꙋ́дствꙋетъ дꙋшѝ ᲂу҆́бѡ, жела́нїе и҆ печа́ль: тѣ́лꙋ же, сла́сть и҆ болѣ́знь. Вина́ же болѣ́зни ᲂу҆́бѡ є҆́сть сла́сть: хотѧ́ще бо и҆збѣ́гнꙋти є҆́же въ болѣ́зни приболѣ́зненнагѡ чꙋ́вства къ сла́сти прибѣга́емъ: печа́ли же жела́нїе.

і҃. Завѣща́тельно ᲂу҆́бѡ добродѣ́тельный и҆́мать до́брое, вы́мышленное же тщесла́вный. Ѕло́е же тщали́вый ᲂу҆́бѡ, све́рхꙋ и҆́мать, глꙋбо́ко же, сластолюби́вый.

а҃і. Дѣѧ́нїе дꙋшѝ є҆́сть, воздержа́нїе простото́ю, и҆ простота̀ воздержа́нїемъ дѣ́йствꙋема.

в҃і. Оу҆ма̀ дѣѧ́нїе ꙗ҆́же въ ра́зꙋмѣ моли́тва, и҆ въ моли́твѣ ра́зꙋмъ.

г҃і. Ма́лижды ᲂу҆́бѡ и҆ неприлѣ́жнѡ въ ѕло́мъ ѡ҆брѣта́етсѧ, сїѧ̑ ненави́дѧй: многшекра́тнѣ же и҆ внима́тельнѣе, и҆́же къ вина́мъ ѻ҆́нагѡ приближа́ѧйсѧ.

д҃і. И҆̀мже не по предложе́нїюо є҆́сть, є҆́же клѧ́тисѧ, си́мъ ча́стѣ и҆ є҆́же прегрѣша́ти. А҆ и҆̀мже без̾ предложе́нїѧ є҆́сть є҆́же согрѣша́ти, и҆звѣ́ствованно є҆́сть покаѧ́нїе: и҆ вина̀ сегѡ̀ не ча́ста.

є҃і. Чꙋ́вство и҆ со́вѣсть со сло́вомъ на произноше́нїи да собира́ютсѧ. Ꙗ҆́кѡ да ми́рное и҆ бж҃е́ственное сло́во посредѣ̀ си́хъ ѡ҆брѣта́тисѧ не постыжда́етсѧ проде́рзостїю, и҆лѝ безмѣ́рїемъ глаго́лемыхъ.

ѕ҃і. Не и҆́же дѣла́ми не ѡ҆би́дѧй дꙋ́шꙋ свою̀, се́й и҆ словесы̀ нескве́рнꙋ тꙋ̀ соблюдѐ. Нижѐ и҆́же си́ми хранѧ́й, ᲂу҆жѐ и҆ скве́рнами не ѡ҆сквернѝ: тро́йственнѣ бо є҆́же согрѣша́ти быва́етъ.

з҃і. Не возмо́жеши лицѐ добродѣ́тели ᲂу҆ви́дѣти, сла́дцѣ є҆щѐ лицѐ ѕло́бы смотрѧ́ѧ. Ненави́димо же тебѣ̀ тогда̀ ꙗ҆ви́тсѧ второ́е, є҆гда̀ наслажде́нїѧ вожделѣ́ннагѡ вкꙋ́съ, и҆ такова́гѡ видѣ́нїѧ ᲂу҆страни́ши взо́ръ.

и҃і. По́мыслы, а҆ не дѣ́лы предвари́тельнѣ ра́тꙋютъ бѣ́сове дꙋ́шꙋ. Са̑маѧ бо та̑ ѡ҆ себѣ̀ ра́тꙋютъ дѣла̀. И҆ дѣ́лъ ᲂу҆́бѡ, слꙋ́хъ вино́венъ и҆ зрѣ́нїе: по́мыслѡвъ же ѻ҆бы́чай и҆ бѣ́сове.

ѳ҃і. Тро́йственнꙋ ᲂу҆́бѡ согрѣша́тельность дꙋшѝ ѡ҆брѣта́емъ: дѣ́лы, словесы̀, и҆ помышле́нїи, и҆ ѡ҆би́дѧщꙋ безгрѣ́шїѧ добро́тꙋ: без̾ погрѣше́нїѧ бо, пѧ́ть чꙋ́вствъ и҆ произно́сное подоба́етъ соблюда́ти сло́во. И҆́мже не согрѣша́ѧй, мꙋ́жъ є҆́сть соверше́нъ, си́ленъ ѡ҆бꙋзда́ти и҆ прѡ́чїѧ ча̑сти дꙋшѝ¹⁴⁴⁹.

к҃. Шестери́чнѡ раздѣлѧ́етсѧ безслове́снаѧ ча́сть дꙋшѝ. На пѧ́ть чꙋ́вствъ, и҆ на сло́во є҆́же по произноше́нїю: є҆́же съ стра́ждꙋщимъ, не раздѣ́льнѣ соблюда́етсѧ безстра́стнѡ сꙋ́щее, ѡ҆чища́етъ же тогѡ̀ ѕло́бꙋ, страда́тельнѡ ѡ҆брѣта́ющеесѧ.

к҃а. Ни тѣ́ло без̾ поста̀ и҆ бдѣ́нїѧ ѡ҆чи́ститсѧ, ни без̾ ми́лости и҆ и҆́стины дꙋша̀. Но нижѐ ᲂу҆́мъ без̾ бесѣ́ды и҆ видѣ́нїѧ бж҃їѧ. Сїѧ̑ бо сопрѧже́нїѧ си́хъ нарѡ́читѣйша сꙋ́ть.

к҃в. Согражда́емаѧ рече́нными добродѣ́тельми дꙋша̀ непреѡбори́мь ѿ и҆скꙋше́нїй сохранѧ́етъ гра́дъ сво́й, є҆́же є҆́сть терпѣ́нїе. Въ терпѣ́нїи бо ва́шемъ стѧжи́те дꙋ́ши ва́шѧ¹⁴⁵⁰, глаго́летъ сло́во. А҆́ще же и҆на́кѡ и҆мѣ́єма бꙋ́дꙋтъ: ꙗ҆́коже гра́дъ нѣ́кїй неѡгражде́нъ, и҆ ѿ ѿдале́ннагѡ шꙋ́ма вереѧ́ми боѧ́зни потрѧса́єма бꙋ́дꙋтъ.

к҃г. Не є҆ли́цы, ꙗ҆̀же по сло́вꙋ сꙋ́ть мꙋ́дри, сі́и и҆ во ꙗ҆̀же по ра́зꙋмꙋ. Нижѐ є҆ли́цы и҆ во ꙗ҆̀же по ра́зꙋмꙋ, сі́и и҆ во ꙗ҆̀же по чꙋ́вствꙋ ѡ҆брѧ́щꙋтсѧ внѣ́шнемꙋ. А҆́ще бо и҆ всѣ́хъ подвла́стными и҆́мать чꙋ́вство, но не ра́внѣ томꙋ̀, да̑ни даю́тъ. Ѿ простоты̀ бо мно́жайшїи во ꙗ҆̀же по немꙋ̀ почита́ти то̀ ꙗ҆́коже то̀ и҆стѧзꙋ́етъ, не вѣ́даютъ.

к҃д. По є҆стествꙋ̀ несѣко́ма сꙋ́щи мꙋ́дрость, сѣче́тсѧ и҆лѝ раздѣлѧ́етсѧ на разли̑чныѧ ча̑сти. Ѻ҆́вомꙋ бо тоѧ̀ дае́тсѧ вѧ́щше, ѻ҆́вомꙋ же ме́нше: доне́лѣже возра́стши дѣ́ѧтельнаѧ добродѣ́тель, соедини́вшыѧсѧ и҆мꙋ́щи себѣ̀ нача̑льныѧ добродѣ̑тели, прили́чное ка́ждой и҆спо́лнитъ бла́го. Мно́зи бо по ѡ҆скꙋдѣ́нїю дѣ́ѧтельныѧ жи́зни, и҆ мꙋ́дрствованїѧ наслѣ́доваша ѡ҆скꙋдѣ́нїе.

к҃є. Въ сво́йственныхъ є҆стествꙋ̀ не мно́зи мꙋ́дри ѡ҆брѧ́щꙋтсѧ: въ є҆сте́ственныхъ же мно́зи: стра́хомъ бо къ тѣ́мъ всеесте́ственное мꙋдрова́нїе ѡ҆ста́вивше, та́мѡ ᲂу҆́бѡ ма́лое, въ неподоба́ющихъ же и҆ не по є҆стествꙋ̀ и҆ не похва́льныхъ мно́жайшее и҆́мꙋтъ ᲂу҆́мствованїе.

к҃ѕ. Благосло́внагѡ молча́нїѧ вре́мѧ и҆ мѣ́ра сꙋ́ть сопирѡ́вницы: пирова́нїе же тогѡ̀ быва́етъ и҆́стина. Є҆ѧ́же ра́ди ничто́же ѿ и҆ско́мыхъ ѡ҆брѣта́етъ входѧ́й лжѝ ѻ҆те́цъ въ ѿходѧ́щꙋю дꙋ́шꙋ.

к҃з. Ми́лостивъ и҆́стиннѡ, не и҆́же подаѧ́й и҆зли̑шнѧѧ, но попꙋща́ѧй нꙋ̑жднаѧ восхища́ющымъ.

к҃и. Ѻ҆́ви ᲂу҆́бѡ веще́ственнымъ бога́тствомъ прїѡбрѣта́ютъ невеще́ственное, ми́лостыни зако́нами: ѻ҆́ви же невеще́ственнымъ ѿстѧжава́ютъ веще́ственное, въ чꙋ́вствѣ неѡскꙋдѣва́ющагѡ быва́юще.

к҃ѳ. Любе́зно ᲂу҆́бѡ всѧ́комꙋ богатѣ́ти во благи́хъ, но прико́рбно бж҃е́ственнѣ ѡ҆богати́вшемꙋсѧ, не попꙋща́емꙋ бы́ти є҆мꙋ̀ мно́жае возвесели́тисѧ ѡ҆ то́мъ.

л҃. И҆звнѣ̀ ᲂу҆́бѡ здра́вїе непщꙋ́етсѧ бы́ти въ дꙋшѣ̀: внꙋ́трь же во глꙋбинѣ̀ чꙋ́вства ѡ҆бы́че кры́тисѧ недꙋ́гъ є҆ѧ̀. А҆́ще ли же подоба́етъ всѧ́кѡ и҆звнѣ̀ ᲂу҆́бѡ недꙋ́гꙋ ѻ҆́номꙋ пожа́тꙋ ѡ҆бличе́нїи бы́ти: внꙋ́трь же здра́вїю, ꙗ҆́вѣ ꙗ҆́кѡ семꙋ̀ ѡ҆бновле́нїемъ ᲂу҆ма̀: безꙋ́менъ є҆́сть ѡ҆бличє́нїѧ ѿрѣва́ѧй, въ непоболѣ́нїѧ всегда̀ возлежа́ти больни́цѣ не стыдѧ́йсѧ.

л҃а. Да не ѡ҆жесточи́шисѧ на нево́льнѣ тѧ̀ рꙋкодѣ́йствовавшаго, но на и҆сточи́вшꙋюсѧ гнꙋ́сность воззрѣ́въ, ѡ҆ка́й ᲂу҆́бѡ самаго̀ себѐ: ᲂу҆блажи́ же вино́внаго тебѣ̀ сеѧ̀ бы́вшаго по́льзы смотрѣ́нїемъ бж҃їимъ.

л҃в. Да ничесогѡ̀ ра́ди лю́тагѡ ѿча́ешисѧ недꙋ́га твоегѡ̀, но дѣ́йственнѣйшими трꙋдолю́бїѧ лѣчба́ми дале́че бꙋ́ди сегѡ̀, ѡ҆ дꙋше́внѣмъ здра́вїи прилѣжа́й.

л҃г. Да не смꙋти́шисѧ ѿ благовре́меннѡ тѧ̀ ᲂу҆ѧзвлѧ́ющагѡ. Но пристꙋпѝ къ семꙋ̀, и҆ пока́жетъ тѝ, є҆ли́кѡ ти́хѡ жгꙋ́щее чꙋ́вство твоѐ є҆́сть добро̀, и҆ ꙗ҆́сти и҆́маши твоѐ приснѣ́дїе, сла́дко ѿ здра́вїѧ, по є҆́же и҆стреби́тисѧ, є҆́же ѿ го́рести ѿме́тномꙋ.

л҃д. Є҆ли́кѡ ѡ҆щꙋща́еши болѣ̑зни, толи́кѡ прїе́мли показꙋ́ющаго тѝ сїѧ̑ ѡ҆бличе́нїи. Ѡ҆чище́нїѧ бо соверше́нна, вино́венъ тѝ быва́етъ, без̾ негѡ́же въ чи́стѣ мѣ́стѣ моли́твеннѣмъ не мо́жетъ бы́ти ᲂу҆́мъ.

л҃є. Внегда̀ ѡ҆блича́емꙋ бы́ти, и҆лѝ молча́ти подоба́етъ, и҆лѝ кро́тцѣ ѿвѣ́тствовати повѣ́дающемꙋ. Не за є҆́же соста́вити своѧ̑ ѡ҆блича́емомꙋ, но за є҆́же возста́вити не́гли преткнꙋ́вшасѧ въ невѣ́дѣнїи ѡ҆блича́ющагѡ.

л҃ѕ. Ѡ҆печа́лившемꙋ пра́веднѡ, и҆́же пре́жде, не́же при́званꙋ бы́ти ѿ негѡ̀, ка́ѧйсѧ, ничи́мже ѿ прили́чествꙋющихъ ѿтщети́сѧ. А҆ и҆́же по ᲂу҆тѣше́нїи, ѿ гобзова́нїѧ по́лъ прїѡбрѣта́етъ: ѻ҆ба́че пре́жде пове́рженное, и҆́же никогда́же печа́ли ра́ди ѿлꙋче́нъ ѿ со́нмища ѡ҆брѣта́ѧйсѧ. Прилага́етъ же и҆ мздꙋ̀ себѣ̀, и҆́же согрѣше́нїе полага́ѧй верхꙋ̀ себѐ во все́мъ.

л҃з. Ни высокомꙋ́дрый познава́етъ, ꙗ҆кѡва̀ сꙋ́ть своѧ̑ є҆гѡ̀ ᲂу҆малє́нїѧ, ни своѧ̑ смиренномꙋ́дрый дѡ́браѧ. Покрыва́етъ бо того̀ ᲂу҆́бѡ безꙋ́мїе ѕло́е, сего́ же благоꙋго́дное смире́нїе.

л҃и. Съ равноче́стными го́рдый въ до́брыхъ сравни́тисѧ не хо́щетъ, въ сопроти́вныхъ же, и҆ преимꙋ́щымъ сно́сно своѐ сѝ прилага́ѧ вмѣнѧ́етъ ᲂу҆мале́нїе.

л҃ѳ. Оу҆ко́ръ ᲂу҆̀бо крѣ́пкꙋ, разсла́бленнꙋ же похвала̀ дꙋ́шꙋ содѣ́ловаетъ, и҆ ко́снѣйшꙋ къ дѡ́брымъ.

м҃. Соста́въ ᲂу҆̀бо бога́тства є҆́сть зла́то, добродѣ́тели же смире́нїе. Ꙗ҆́коже ᲂу҆́бѡ зла́та лиша́ѧйсѧ ᲂу҆бо́гъ є҆́сть, а҆́ще внѣ̑шнимъ и҆ свѣтлѣ́йшїй є҆́сть: та́кѡ без̾ смире́нїѧ добродѣ́теленъ не бꙋ́детъ подвиза́ющїйсѧ.

м҃а. Ꙗ҆́коже кꙋпе́цъ без̾ зла́та нѣ́сть кꙋпе́цъ, а҆́ще и҆ ѕѣлѡ̀ къ кꙋ́пли є҆́сть прили́ченъ: та́кѡ ни без̾ смиренномꙋ́дрїѧ во ѡ҆держа́нїи сла́дкихъ, добродѣ́тели ѡ҆брѧ́щетсѧ ѡ҆бꙋча́ѧйсѧ, а҆́ще и҆ ѕѣлѡ̀ на мꙋ́дрость свою̀ ᲂу҆пова́етъ.

м҃в. И҆́же ѡ҆ смиренномꙋ́дрїи скорбѧ́й, ни́жшїй своегѡ̀ возноше́нїѧ быва́етъ: вы́шшїй же, и҆́же без̾ ѻ҆́нагѡ, нижѐ равнѧ́тисѧ съ малѣ́йшими во́лею те́рпитъ, и҆ сегѡ̀ ра́ди ѡ҆ первовозлега́нїихъ печа́ль показꙋ́етъ.

м҃г. Добро̀ подви́жникꙋ мꙋ́дрствовати ᲂу҆́бѡ мє́нша па́че дѣ́ланїѧ своегѡ̀, содѣва́ти же лꙋ̑чша па́че боѧ́зни своеѧ̀. Та́кѡ бо человѣ́кѡмъ ᲂу҆́бѡ че́стенъ, и҆ бг҃ꙋ дѣ́латель ѡ҆брѣта́етсѧ непосты́денъ.

м҃д. И҆лѝ направлѧ́тисѧ подоба́етъ ко всѣ̑мъ за́повѣдемъ бж҃їимъ, и҆лѝ є҆ди́но ᲂу҆сво́ити смиренномꙋ́дрїе. Боѧ́щемꙋсѧ не стра́ннꙋ въ невѣ́стницѣ возлежа́щихъ ꙗ҆ви́тисѧ.

м҃є. Соединѝ простотѣ̀ воздержа́нїе, и҆ спрѧжѝ со смиренномꙋ́дрїемъ и҆́стинꙋ, и҆ ꙗ҆ви́шисѧ пра́вдѣ сопи́ршественникъ: на є҆ѧ́же трапе́зѣ и҆́на всѧ́ка лю́битъ собира́тисѧ добродѣ́тель.

м҃ѕ. Слѣпа̀ є҆́сть без̾ смиренномꙋ́дрїѧ и҆́стина: сегѡ̀ ра́ди и҆ прекосло́вїе ᲂу҆потреблѧ́етъ рꙋководи́телѧ, и҆ ᲂу҆тверди́тисѧ то́й ᲂу҆́бѡ на нѣ́чесомъ трꙋдѧ́щейсѧ. Не ѡ҆брѣта́ющей же то́чїю на тверды́ни ѕлопомнѣ́нїѧ.

м҃з. Нра́въ бла́гъ красотꙋ̀ свидѣ́тельствꙋетъ добродѣ́тели: ᲂу҆де́съ благосостоѧ́нїе, ми́рнꙋ дꙋ́шꙋ.

м҃и. Пе́рвое ᲂу҆́бѡ є҆́сть добро̀, є҆́же ни въ є҆ди́ной ча́сти согрѣша́ти: второ́е же, є҆́же стыдѣ́нїемъ не покрыва́ти согрѣше́нїѧ своегѡ̀. Нижѐ ᲂу҆́бѡ возвыша́тисѧ ѻ҆́нѣмъ: па́че же смирѧ́тисѧ. Ко ѡ҆глаго́лꙋемꙋ самаго̀ себѐ соѡглаго́ловати, и҆ прїима́ти съ ра́достїю запреще́нїе. Семꙋ́ же не быва́ющꙋ, не крѣ́пко є҆́сть всѐ бг҃ови приноси́мое.

м҃ѳ. Къ во́льномꙋ ѕлострада́нїю подоба́етъ, и҆ нево́льное прїима́ти, є҆́же ѿ дїа́вѡлъ глаго́лю, тще́тъ же и҆ не́мощей. Сїѧ̑ бо не прїе́млѧй, но негодꙋ́ѧй, подо́бенъ є҆́сть, и҆́же не съ со́лїю, съ ме́домъ же то́чїю хотѧ́щемꙋ ꙗ҆́сти хлѣ́бъ сво́й. И҆́же не всегда̀ ᲂу҆́бѡ сла́сть и҆́мать своспи́таннꙋ, сы́тость же при́снѡ сосѣ́да и҆́мать.

н҃. Влады́ка сы́й, въ ра́бїй ѡ҆́бразъ¹⁴⁵¹, ѡ҆дѣѧ́йсѧ ви́дитсѧ, и҆́же раздра́ннꙋю ѡ҆мыва́ѧ бли́жнѧгѡ словесы̀ бж҃е́ственными ри́зꙋ, и҆лѝ сшива́ѧ подаѧ́нїи: да смотрѧ́етъ же сїѐ творѧ́й, да не когда̀, за є҆́же не ꙗ҆́кѡ ра́бъ сїѐ соверши́тъ, спогꙋби́тъ и҆ мздꙋ̀, и҆ присꙋ́щее томꙋ̀ вла́сти досто́инство ра́ди тщесла́вїѧ.

н҃а. Ꙗ҆́коже вѣ́ра ᲂу҆пова́емыхъ и҆звѣще́нїе є҆́сть: та́кѡ дꙋшѝ ᲂу҆́бѡ мꙋ́дрость, добродѣ́тели же смире́нїе¹⁴⁵². И҆ чꙋ́до, ка́кѡ самосовершє́ннаѧ, без̾ слꙋ́чаєвъ несовершє́нна бы́ша.

н҃в. Гдⷭ҇ь сохрани́тъ вхожде́нїе твоѐ¹⁴⁵³, глаго́летъ, и҆ и҆схожде́нїе твоѐ, бра́шенъ ꙗ҆́вѣ ꙗ҆́кѡ и҆ глагѡ́лъ воздержа́нїемъ. Возде́ржнѣ бо и҆мы́й ѿ бра́шенъ и҆ глагѡ́лъ, ѡ҆ вхожде́нїи же и҆ и҆схожде́нїи, по́хоти ᲂу҆́бѡ ꙗ҆́же ѿ ѻ҆́чїю ᲂу҆бѣга́етъ: ꙗ҆́рость же ꙗ҆́же ѿ го́рдости ᲂу҆крощева́етъ. Ѡ҆ ни́хже и҆ подоба́етъ пре́жде всѣ́хъ твори́ти прилѣжа́нїе подвиза́ющемꙋсѧ, и҆ всѧ́кимъ ѡ҆́бразомъ тща́тисѧ подоба́етъ. Си́ми бо дѣѧ́нїе ᲂу҆́бѡ здра́вствꙋетъ, видѣ́нїе же ᲂу҆твержда́етсѧ.

н҃г. Нѣ́цыи ѡ҆ вхожде́нїи ᲂу҆́бѡ бра́шенъ мно́го творѧ́тъ прилѣжа́нїе: ѡ҆ и҆схожде́нїи же глагѡ́лъ, неради́вѡ зало́гъ и҆́мꙋтъ. Такові́и не вѣ́даютъ ѿрѣва́ти ꙗ҆́рость ѿ се́рдца, и҆ по́хоть ѿ пло́ти, по є҆кклесїа́стꙋ: и҆́миже чи́стое се́рдце созида́тисѧ ѡ҆бы́че ѿ ѡ҆бнови́телѧ дх҃а¹⁴⁵⁴.

н҃д. Бра́шенъ ᲂу҆́бѡ не и҆зли́шнее, ѡ҆ ме́ншемъ пи́щи ка́чествѣ: глагѡ́лъ же непови́нное ѡ҆ лꙋ́чшемъ молча́нїѧ ка́чествѣ ѡ҆брѧ́щетсѧ.

н҃є. Разжзѝ ᲂу҆трѡ́бы твоѧ̑ неѧде́нїемъ бра́шенъ, и҆ и҆стѧжѝ се́рдце твоѐ воздержа́нїемъ глагѡ́лъ, и҆ и҆мѣ́ти бꙋ́деши на послꙋже́нїе до́брыхъ, жела́тельное же и҆ ꙗ҆́ростное.

н҃ѕ. Сла́сть ᲂу҆́бѡ подчре́вныхъ низпада́етъ въ по́стничествꙋющихъ, тѣ́лꙋ состарѣ́вшꙋсѧ: є҆ще́ же пребыва́етъ горта́ни, въ недости́гшемъ сїю̀ пра́веднѡ ᲂу҆мꙋ́чити. Потща́тисѧ ᲂу҆́бѡ подоба́етъ ѿ вино́вныѧ вини́магѡ поноше́нїе и҆сте́рти: ꙗ҆́кѡ да не стра́ненъ та́мѡ ꙗ҆̀же въ воздержа́нїи добродѣ́тели ѡ҆брѣ́тсѧ, стꙋдо́мъ ѡ҆дѣ́ешисѧ.

н҃з. Нꙋ́жно є҆́сть вѣ́дѣти по́стникꙋ, когда̀ и҆ кі́ими бра́шны подоба́етъ тѣ́ло ꙗ҆́кѡ врага̀ пита́ти: когда́ же ꙗ҆́кѡ дрꙋ́га ᲂу҆тѣша́ти, и҆ когда̀ ᲂу҆тѣша́ти, ꙗ҆́кѡ не́мощно. Да не ᲂу҆таѧ́тсѧ вра̑жїѧ ᲂу҆́бѡ дрꙋ́гꙋ, дрꙋ̑жнѧѧ же врагꙋ̀. И҆ ꙗ҆̀же сегѡ̀ па́ки немощно́мꙋ прилага́ѧ, и҆ ѻ҆бои́хъ ꙗ҆́кѡ соблазни́въ, во вре́мѧ и҆скꙋше́нїѧ ѡ҆брѧ́щетъ ра́тꙋющихъ є҆го̀.

н҃и. Є҆гда̀ па́че наслажде́нїѧ, пи́щꙋ пита́ѧйсѧ предпочте́ннѣйшꙋ сотвори́тъ, тогда̀ благода́ть сле́зъ прише́дши къ немꙋ̀, ᲂу҆тѣша́ти начина́етъ. И҆ и҆́ныѧ всѧ̑кїѧ сла́дѡсти забыва́ти, ꙗ҆́кѡ ᲂу҆жѐ без̾ сравне́нїѧ сла́достїю си́хъ поглоще́ннѣй бы́вшей.

н҃ѳ. Разширѧ́емомꙋ ᲂу҆́бѡ человѣ́кꙋ спрѧ́ташасѧ сле́зы: и҆сточи́шасѧ же сїѧ̑ тѣ́сный пꙋ́ть возлюби́вшемꙋ.

ѯ҃. Нѣ́сть без̾ печа́ли ни грѣ́шникъ, ни пра́ведникъ. Но то́й ᲂу҆́бѡ, ꙗ҆́кѡ не ѿню́дъ ѡ҆ста́ви ѕло́е: се́й же ꙗ҆́кѡ не ᲂу҆̀ соверше́нства коснꙋ́сѧ.

ѯ҃а. Ꙗ҆̀же ѿ на́съ, по си́лѣ добродѣ́тєли, моли́тва же и҆ молча́нїе: а҆ ꙗ҆̀же не въ на́съ, но ꙗ҆́кѡ мно́гажды тѣле́снагѡ сложе́нїѧ, по́стъ и҆ бдѣ́нїе сꙋ́ть. Є҆́же ᲂу҆́бѡ подви́жникꙋ ᲂу҆до́бнѣйшее є҆́сть, сїѐ проходи́ти подоба́етъ.

ѯ҃в. До́мъ ᲂу҆́бѡ дꙋшѝ є҆́сть, терпѣ́нїе: ѡ҆бдержи́тсѧ бо въ не́мъ. И҆мѣ́нїе же, смире́нїе: пита́етсѧ бо тѣ́мъ.

ѯ҃г. Во трꙋдѣ́хъ не терпѧ̀, похвала́ми почте́нъ не бꙋ́деши: пре́жде же сла́сти болѣ́знь ᲂу҆смотрева́ѧ, и҆збѣжи́ши сеѧ̀ печа́льнагѡ.

ѯ҃д. Да не свѧ́жешисѧ ма́лымъ, и҆ не порабо́таеши бо́льшемꙋ: не бо̀ ѡ҆бы́че ѕло̀ бо́льшее, пре́жде ма́лагѡ содѣ́ловатисѧ.

ѯ҃є. Взира́ѧ къ бо́льшымъ, стра́шенъ бꙋ́деши мє́ншымъ: ᲂу҆добопрезрѣ́нъ же си́ми ꙗ҆ви́шисѧ, ко ѻ҆́нѣмъ ѿре́ксѧ.

ѯ҃ѕ. Не возмо́жеши на бѡ́льшаѧ дости́гнꙋти добродѣ̑тели, не постиза́ѧ верха̀ сꙋ́щымъ по си́лѣ.

ѯ҃з. Въ ни́хже ѡ҆блада́етъ ми́лость и҆ и҆́стина, во ѻ҆́нѣхъ и҆ всѐ что́либо є҆́сть бг҃оꙋго́дно: та̀ ᲂу҆́бѡ никого́же сꙋ́дитъ без̾ ми́лости, сїѧ́ же человѣколю́бствꙋетъ ни ѡ҆ є҆ди́номъ без̾ и҆́стины.

ѯ҃и. Съ простото́ю раствори́въ воздержа́нїе, во ѡ҆бдержа́нїи бꙋ́деши та́мошнѧгѡ блаже́нства.

ѯ҃ѳ. Не ᲂу҆́зриши ѿню́дъ ра́тꙋющыѧ тѧ̀ стра̑сти, а҆́ще не пе́рвѣе зе́млю, ѿ неѧ́же пита́хꙋсѧ, ѡ҆ста́виши неѡра́ннꙋ.

ѻ҃. Ѻ҆́ви ᲂу҆́бѡ тѣлесѐ скве́рнꙋ то́чїю ѡ҆чи́стити тща́тсѧ: ѻ҆́ви же, и҆ дꙋшѝ. Ѻ҆́ви бо ᲂу҆́бѡ проти́вꙋ є҆ди́нагѡ по дѣ́йствꙋ грѣха̀ мꙋ́жество прїѧ́ша, ѻ҆́ви же проти́вꙋ стра́сти: проти́вꙋ же по́хоти, ѕѣлѡ̀ ма́лѣйшїи.

ѻ҃а. Вещество̀ лꙋка́во є҆́сть, тѣ́ла встра́стїе: дꙋши́ же сладостра́стїе: пристра́стїе же ᲂу҆ма̀. Порица́етсѧ же ѻ҆́нагѡ ᲂу҆́бѡ ѡ҆сѧза́нїе: сегѡ́ же прѡ́чаѧ чꙋ̑вства: коне́чнагѡ же сопроти́вно завѣща́нїе.

ѻ҃в. Сладостра́стный ᲂу҆́бѡ, бли́зъ є҆́сть стра́стнагѡ: пристра́стный же сладостра́стнагѡ: дале́че же ѿ ѻ҆бою̀ безстра́стный.

ѻ҃г. Встра́стенъ є҆́сть, и҆́же согрѣша́тельное слове́ство наси́льствꙋющо и҆мы́й, а҆́ще є҆щѐ и҆ не согрѣша́етъ внѣ̀. Сладостра́стенъ же, и҆́же дѣ́йство грѣха̀ и҆мы́й немощнѣ́йше слове́ства, а҆́ще и҆ стра́ждетъ внꙋ́трь. Пристра́стенъ же и҆́же въ свобо́дѣ па́че, не́жели въ рабо́тѣ сре́днихъ пребыва́ѧй. Безстра́стенъ же ᲂу҆́бѡ є҆́сть, и҆́же всѣ́хъ си́хъ ра́знствїѧ не вѣ́дый.

ѻ҃д. Погиба́етъ ѿ дꙋшѝ встра́стїе ᲂу҆́бѡ посто́мъ и҆ моли́твою: сладостра́стїе же бдѣ́нїемъ и҆ молча́нїемъ: пристра́стїе же безмо́лвїемъ и҆ внима́нїемъ: безстра́стїе же составлѧ́етсѧ ѿ па́мѧти бж҃їѧ.

ѻ҃є. Ѿ ᲂу҆сте́нъ безстра́стїѧ, ꙗ҆́коже со́тове ме́двеннїи словеса̀ вѣ́чнагѡ живота̀ и҆ска́паютъ¹⁴⁵⁵. Кто̀ ᲂу҆́бѡ сподо́билсѧ бы ᲂу҆стна́мъ ѻ҆́нагѡ прикоснꙋ́тисѧ, и҆ посредѣ̀ сосцꙋ̑ ѻ҆́нагѡ водвори́тисѧ, и҆ вонѝ сла́дкїѧ причасти́тисѧ ри́зъ ѻ҆́нагѡ, си́рѣчь зако́ны ᲂу҆слади́тисѧ добродѣ́телей, сꙋ́щихъ па́че всѣ́хъ, глаго́летъ, а҆рѡма̑тъ чꙋвстви́тельнагѡ разсꙋжде́нїѧ.

ѻ҃ѕ. На́зи самолю́бїѧ ᲂу҆́бѡ ри̑зы, не́гли сꙋ́ть мно́зи: любоꙋкраше́нїѧ же ри̑зы ма́ли сꙋ́ть: тщесла́вїѧ же ри̑зы, ꙗ҆̀же и҆ послѣ̑днѧѧ глаго́летсѧ, на́зѣхъ ѡ҆брѧ́щеши безстра́стныхъ.

ѻ҃з. Ви́димагѡ ᲂу҆́бѡ тѣ́ла, всѧ́ка дꙋша̀ ѡ҆бнажи́тсѧ: грѣхо́внагѡ же, ꙗ҆́же здѣ́шнѧгѡ живота̀, ма́лѡ сла́дкихъ прича̑стницы бы́вшїѧ.

ѻ҃и. Ме́ртвїи ᲂу҆́бѡ ѿ живы́хъ, всѝ ви́дѣни бꙋ́дꙋтъ: ᲂу҆мерщвле́ни же бꙋ́дꙋтъ грѣхꙋ̀ є҆ди́ни ѡ҆ завѣща́нїѧ се́й возненави́дѣвшїи.

ѻ҃ѳ. Кто̀ себѐ пре́жде ѻ҆́бщїѧ сме́рти тѣле́сныѧ ᲂу҆ви́дѣлъ є҆́сть грѣха̀ на́га, и҆ кто̀ є҆́сть позна́вый себе́ же, и҆ своѐ є҆стество̀, ꙗ҆ково̀ є҆́сть, пре́жде бꙋ́дꙋщагѡ ѡ҆блаже́нїѧ;

Ѡ҆ моли́твѣ.

п҃. Є҆гда̀ посредѝ чꙋ́вственнагѡ и҆ ᲂу҆́мнагѡ свѣ́та слове́снаѧ стои́тъ дꙋша̀, даде́сѧ ᲂу҆́бѡ є҆́й, по чꙋ́вственномꙋ свѣ́тꙋ твори́ти, ꙗ҆̀же сꙋ́ть тѣ́ла: по ᲂу҆́мномꙋ же, ꙗ҆̀же сꙋ́ть дх҃а. Но поне́же помрачи́сѧ ᲂу҆́бѡ въ не́й свѣ́тъ ᲂу҆́мный: ᲂу҆ѧсни́сѧ же дре́внѧгѡ ра́ди ѻ҆бы́чаѧ свѣ́тъ чꙋ́вственный, а҆́ще всѧ́кѡ съ ᲂу҆́мнымъ въ моли́твѣ не бꙋ́детъ се́й, ѿню́дъ на бж҃е́ствєннаѧ взира́ти не мо́жетъ. Нꙋ́жда же дꙋшѣ̀ средѝ тьмы̀ и҆ свѣ́та бы́ти: средѝ ᲂу҆́бѡ тьмы̀ по мечта́нїю, среди́ же свѣ́та по навыкнове́нїю ѡ҆браща́ющейсѧ.

п҃а. Внꙋ́трь ᲂу҆́зкихъ моли́твы вра́тъ, ᲂу҆́мъ стра́стный вни́ти не мо́жетъ, пре́жде не́же ѡ҆ста́вити, є҆́же по навыкнове́нїю, попече́нїе: поболи́тъ же трꙋдѧ́сѧ непреста́ннѡ при сѣ́нехъ попече́нїѧ ѻ҆́нагѡ.

п҃в. Да спребыва́етъ во ᲂу҆мѣ̀ моли́тва, ꙗ҆́коже въ со́лнцѣ лꙋча̀, без̾ неѧ́же чꙋ́вствєннаѧ попечє́нїѧ, а҆́ки нѣ́цыи безво́днїи ѻ҆́блацы ѻ҆́крестъ лета́юще, ᲂу҆́мъ возбранѧ́ютъ ѿ своеѧ̀ є҆гѡ̀ свѣ́тлости.

п҃г. Си́ла ᲂу҆́бѡ моли́твы є҆́сть, а҆́лчба бра́шенъ во́льна: а҆́лчбы же є҆́же не слы́шати, ни ви́дѣти: ꙗ҆́кѡ не всѧ́ка нꙋ́жда сꙋ́щихъ въ мі́рѣ є҆́сть ничто́же. Ѡ҆ си́хъ не творѧ́й промышле́нїѧ, зда́нїе ᲂу҆́бѡ поста̀ не ᲂу҆тверди́лъ є҆́сть: моли́твы же зда́нїю на не́мъ распа́стисѧ сотвори́лъ є҆́сть.

п҃д. А҆́ще ѿлꙋче́нъ ѿ всѣ́хъ ᲂу҆́мъ, ꙗ҆̀же по чꙋ́вствꙋ не бꙋ́детъ, горено́сенъ бы́ти не мо́жетъ, и҆ своѐ позна́ти досто́инство.

п҃є. Днѐ ᲂу҆́бѡ зна́менїе є҆́сть по́стъ, за ꙗ҆́вственное, но́щи же за неѧ́вственное моли́тва. Ѻ҆боѧ̑ ᲂу҆́бѡ сїѧ̑ во ѻ҆бое́мъ пра́веднѡ проходѧ́й, въ намѣ́ренный дости́гнетъ гра́дъ, въ не́мже ѿбѣжѐ болѣ́знь и҆ печа́ль и҆ воздыха́нїе.

п҃ѕ. Дх҃о́вное дѣ́ланїе, и҆ без̾ тѣле́снагѡ притрꙋ́днагѡ составлѧ́тисѧ ѡ҆бы́че. Блаже́нъ ᲂу҆́бѡ є҆́сть, и҆́же лꙋ́чшее па́че веще́ственнагѡ дѣ́ла невеще́ственное вмѣни́вый дѣ́ланїе: тѣ́мъ бо дѣ́ла и҆спо́лнилъ є҆́сть ѡ҆скꙋдѣ́нїе, пожи́въ сокрове́нною жи́знїю моли́твы, и҆ ꙗ҆́вною бг҃ови.

п҃з. Терпѣ́ти ᲂу҆́бѡ на́съ въ вѣ́рѣ, мо́литъ бж҃е́ственный а҆по́столъ: ра́доватисѧ же ᲂу҆пова́нїемъ: въ моли́твѣ же пребыва́ти¹⁴⁵⁶, да ра́дости въ на́съ пребꙋ́детъ до́брое: а҆́ще же сїѐ, ᲂу҆́бѡ не терпѧ́й, нѣ́сть вѣ́ренъ. Не ра́дꙋѧйсѧ же, не благонаде́женъ: ѿве́рже бо винꙋ̀ ра́дости моли́твꙋ, внегда̀ не пребыва́ти въ не́й.

п҃и. Въ мїрски́хъ по́мыслѣхъ ᲂу҆́мъ съ нача́ла спребы́въ толи́кое съ тѣ́ми любле́нїе стѧжа̀, коли́ко ᲂу҆свое́нїе не стѧжа́лъ бы съ моли́твою ча́стою. И҆́бо въ ни́хже, глаго́летъ, косни́тъ, въ тѣ́хъ и҆ разширѧ́тисѧ ѡ҆бы́че.

п҃ѳ. Ꙗ҆́коже своегѡ̀ жили́ща дре́вле раздѣли́всѧ ᲂу҆́мъ, та́мошнюю свѣ́тлость забы́лъ є҆́сть: та́кѡ подоба́етъ семꙋ̀ па́ки въ забве́нїи здѣ́шнихъ бы́вшꙋ ко ѻ҆́нѣмъ востещѝ моли́твою.

ч҃. Ꙗ҆́коже нѣ́кїй младе́нецъ сосца̀ ᲂу҆мє́рша ма́тєрнѧ, ѡ҆брѧ́щетъ ᲂу҆́мъ моли́твꙋ, не могꙋ́щꙋю ᲂу҆тѣ́шити є҆го̀. Во и҆на́ко же сꙋ́щей, ꙗ҆́кѡ ѻ҆троча̀ ѿ сла́сти ᲂу҆сыпа́ющее на ѡ҆б̾ѧ́тїѧхъ є҆ѧ̀.

ч҃а. Та́мѡ, глаго́летъ, на плаче́внѣмъ, си́рѣчь, ѻ҆дрѣ̀ добродѣ́тельныѧ жи́зни. По слова́мъ въ пѣ́снѧхъ пѣ́сней, рекла́ бы и҆ невѣ́ста моли́тва къ своемꙋ̀ рачи́телю: да́мъ сосца̑ моѧ̑ тебѣ̀¹⁴⁵⁷, а҆́ще при́снѡ мнѣ̀ возложи́шисѧ.

ч҃в. Любле́нїѧ съ моли́твою и҆мѣ́ти не мо́жетъ, и҆́же всѧ́кагѡ не ѿрекі́йсѧ вещества̀.

ч҃г. Ра́звѣ жи́зни и҆ дыха́нїѧ, внѣ̀ и҆ны́хъ бꙋ́ди въ моли́твѣ, а҆́ще хо́щеши съ є҆ди́нымъ бы́ти ᲂу҆мо́мъ.

ч҃д. Оу҆ма̀ бг҃олюби́ва свидѣ́тельство моли́тва мы́сленнаѧ, и҆ сло́во благовре́менно, разꙋ́мна по́мысла, и҆ є҆динови́дѣнъ вкꙋ́съ свобо́днагѡ да бꙋ́детъ чꙋ́вства. Въ си́хъ ᲂу҆́бѡ трїе́хъ (си́лахъ) здра́вствовати дꙋшє́внаѧ глаго́лютсѧ.

ч҃є. Оу҆гла́дитисѧ до́брѣ подоба́етъ и҆ ᲂу҆мѧгчи́тисѧ, ꙗ҆́коже дѣте́й є҆стествꙋ̀ молѧ́щагѡсѧ. Ꙗ҆́кѡ да по є҆стествꙋ̀ ѻ҆́нѣхъ, и҆ сегѡ̀ є҆стество̀ благопоко́рнѣ прїи́метъ ѿ моли́твы вчинѧ́емое и҆з̾ѧсне́нїе. Тѣ́мже да не неради́тъ, и҆́же совокꙋпи́тисѧ съ не́ю любѧ́й.

ч҃ѕ. Не всѝ то́жде намѣ́ренїе въ моли́твѣ и҆́мꙋтъ, но ѻ҆́въ ᲂу҆́бѡ сїѐ, ѻ҆́въ же и҆́но, ѻ҆́въ ᲂу҆́бѡ мо́литсѧ, а҆́ще мо́щно, съ моли́твою бы́ти се́рдцꙋ є҆гѡ̀ всегда̀: ѻ҆́въ же, во є҆́же и҆ превзы́ти то̀. Ѻ҆́въ же да не по́мыслы въ моли́твѣ просѣца́етсѧ. Вси́ же мо́лѧтсѧ, и҆лѝ соблюде́ни бы́ти во благи́хъ, и҆лѝ не свѣ́дѣни бы́ти ѕлы́ми.

ч҃з. А҆́ще ѿ моли́твы никто́же не смире́нъ быва́етъ. И҆́бо сокрꙋша́етсѧ со смире́нїемъ молѧ́йсѧ. Не ᲂу҆́бѡ со смире́нїемъ мо́литсѧ, и҆́же и҆звнѣꙋ́дꙋ дерза́ѧй.

ч҃и. Къ вдови́цѣ, ꙗ҆́же сꙋро́ваго ѡ҆ ѿмще́нїи подвиза́ше сꙋдїю̀, взира́й молѧ́сѧ¹⁴⁵⁸, не стꙋжи́тъ сѝ, когда̀ закоснѣ́нїе благи́хъ ѡ҆бѣтова́нїй.

ч҃ѳ. Не пребꙋ́детъ съ тобо́ю моли́тва, въ помышлѧ́емыхъ внꙋ́трь ᲂу҆́дꙋ, и҆ глаго́лемыхъ внѣ̀ ᲂу҆́дꙋ, ме́длющꙋ тѝ. Та́ѧжде же ᲂу҆́зритсѧ ѡ҆браща́ющаѧсѧ ко ѿсѣца́ющемꙋ є҆ѧ̀ ра́ди мно́гшаѧ.

р҃. А҆́ще не внꙋ́трь дꙋшѝ вхо́дѧтъ глаго́лы мл҃твы, не ᲂу҆́бѡ на лани́тѣ лица̀ сле́зы ѻ҆́крестъ и҆злива́тисѧ попꙋще́ни бꙋ́дꙋтъ.

р҃а. Прозѧ́бнꙋтъ земледѣ́льцꙋ ᲂу҆́бѡ рꙋкоѧ̑тїѧ не на лицѐ сѣ́менамъ пове́рженнымъ землѝ. И҆́нокꙋ же сле́зы и҆стекꙋ́тъ, не без̾ трꙋда̀ дѣ́йствꙋющемꙋ глаго́лы моли́твы.

р҃в. Клю́чь небе́снагѡ ца́рства, є҆́сть моли́тва. Сїю̀ держа́й, ꙗ҆́коже подоба́етъ, зри́тъ въ не́й ѿложє́ннаѧ блага̑ѧ дрꙋгѡ́мъ є҆ѧ̀: є҆ди̑на же настоѧ̑щаѧ ѡ҆бсмотрѧ́етъ, и҆́же дерзнове́нїѧ во ѻ҆́нѣй не и҆мы́й.

р҃г. Не мо́жетъ ᲂу҆́мъ во вре́мѧ моли́твы со дерзнове́нїемъ глаго́лати къ бг҃ꙋ: растерза́лъ є҆сѝ ᲂу҆́зы моѧ̑, тебѣ̀ пожрꙋ̀ же́ртвꙋ хвалы̀¹⁴⁵⁹, а҆́ще не боѧ́зни, и҆ ᲂу҆ны́нїѧ, многоспа́нїѧ и҆ сладоѧ́стїѧ, ѿ ни́хже є҆́же согрѣша́ти, жела́нїемъ лꙋ́чшихъ не ѿто́ргнетсѧ.

р҃д. Внѣ̀ пе́рвыѧ завѣ́сы стои́тъ, въ мл҃твѣ парѧ́й: внꙋ́трь же быва́етъ, и҆́же є҆динодви́жнꙋ соверша́ѧй тꙋ̀. Є҆ди́нъ же во ст҃а̑ѧ ст҃ы́хъ прини́че, и҆́же съ ми́ромъ є҆сте́ственныхъ пѡ́мыслъ, и҆ ꙗ҆̀же ѡ҆ всѧ́къ ᲂу҆́мъ преимꙋ́щъ, разсмотрѧ́ѧй, и҆ нѣ́коегѡ ѿѻнꙋ́дꙋ бг҃оѧвле́нїѧ сподоблѧ́емь.

р҃є. Внегда̀ ѿ внѣ́шнихъ ᲂу҆праздни́вшисѧ дꙋша̀ совокꙋпи́тсѧ съ моли́твою, тогда̀ а҆́ки нѣ́кїй пла́мень ѡ҆крꙋжи́вши сїю̀, ѻ҆на̀ ꙗ҆́кѡ желѣ́зо ѻ҆́гнь, разже́ннꙋ всю̀ содѣ́ловаетъ, и҆ є҆́сть дꙋша̀ ᲂу҆́бѡ та́ѧжде, не ктомꙋ́же ѡ҆сѧза́ема. Ниже́ бо разже́нное желѣ́зо внѣ́шними прикоснове́нїи ѡ҆сѧза́емо є҆́сть.

р҃ѕ. Бл҃же́нъ є҆́сть, и҆́же въ житїѝ се́мъ та́кѡ зри́теленъ бы́ти сподо́бивыйсѧ, и҆ своѐ є҆стество́мъ бре́нное человѣкоподо́бїе, благода́тїю ѻ҆́гненнѡ ᲂу҆ви́дѣвъ.

р҃з. Вводи̑мымъ ᲂу҆́бѡ тѧ́жекъ, ꙗ҆́коже нѣ́кїй влⷣка зако́нъ налага́етсѧ моли́твы: пред̾ꙋспѣ́вшымъ же, ꙗ҆́кѡ раче́нїе спорѣва́ющее а҆́лчꙋщаго, ꙗ҆́коже къ пирова́нїю многоижди́внꙋ.

р҃и. До́брѣ проходѧ́щымъ дѣ́ѧтельнꙋю добродѣ́тель, ѻ҆вогда̀ ᲂу҆́бѡ моли́тва, ꙗ҆́кѡ ѻ҆́блакъ ѡ҆сѣнѧ́ющи, пали̑тельныѧ возбранѧ́етъ ѿ ни́хъ по́мыслы: ѻ҆вогда́ же а҆́ки ка́плѧми сле́зъ си́хъ ѡ҆роша́ющи, показꙋ́етъ дх҃ѡ́внаѧ видѣ̑нїѧ.

р҃ѳ. Сладка̀ ᲂу҆́бѡ сла́дость гꙋ́слемъ ᲂу҆дарѧ́емымъ ѿ нѣ́коегѡ, внѣꙋ́дꙋ ѡ҆брѧ́щетсѧ: дꙋша́ же несогласꙋ́ющꙋ съ не́ю въ моли́твѣ та́инственномꙋ въ дꙋ́сѣ приглаше́нїю, благоꙋмиле́нна не ѡ҆бы́че быва́ти. Ѡ҆ чесо́мъ бо помо́лимсѧ, ꙗ҆́коже подоба́етъ, не вѣ́мы¹⁴⁶⁰, и҆ прѡ́чаѧ, въ сїѐ вво́дитъ молѧ́щагосѧ.

Тогѡ́жде разꙋмѣ́тельны.

Просвѣща́етсѧ ᲂу҆́мъ, разꙋмѣ́тельнагѡ видѣ́нїѧ къ высотѣ̀ взѧ́тъ бы́въ, сїѧ̑ проче́тъ словеса̀: помрача́етсѧ же па́ки впада́ѧй въ стра́сть.

а҃. Нꙋ́жно є҆́сть вѣ́дѣти разꙋмѣ́тельномꙋ, когда̀ ᲂу҆́бѡ ᲂу҆́мъ є҆гѡ̀ во странѣ̀ разꙋмѣ́нїй є҆́сть: когда́ же во странѣ̀ по́мыслѡвъ, и҆ когда̀ въ странѣ̀ чꙋ́вственнѣй. И҆ въ се́й па́ки, въ сꙋ́щихъ ли во вре́мѧ, и҆лѝ въ чрезвре́менныхъ па́че ѡ҆брѣта́етсѧ.

в҃. Въ разꙋмѣ́нїихъ не сы́й ᲂу҆́мъ, въ по́мыслѣхъ всѧ́ко є҆́сть: въ по́мыслѣхъ же сы́й, въ разꙋмѣ́нїихъ нѣ́сть: въ чꙋ́вствѣ же быва́ѧ, со всѣ́ми є҆́сть.

г҃. Чрез̾ разꙋмѣ́нїе ᲂу҆́бѡ ᲂу҆́мъ прехо́дитъ къ мы́слєннымъ, чрез̾ по́мыслъ же къ словє́снымъ сло́во: къ дѣ̑ѧтельнымъ же, чрез̾ мечта́нїе чꙋ́вство.

д҃. Са́мъ въ себѣ̀ ᲂу҆́мъ собира́емь, ничто́же ни ѿ сꙋ́щихъ по чꙋ́вствꙋ, ни ѿ сꙋ́щихъ по по́мыслꙋ ви́дитъ: на́ги бо ᲂу҆мы̀ и҆ бж҃е́ственны лꙋчы̀ точа́щыѧ ми́ръ же и҆ ра́дость.

є҃. И҆́но є҆́сть ᲂу҆́мъ ве́щи, и҆ и҆́но сло́во є҆гѡ̀, и҆ и҆́но є҆́же чꙋ́вствомъ возводи́мое, и҆ то̀ ᲂу҆́бѡ є҆́сть є҆стество̀, сїе́ же слꙋ́чай: сегѡ́ же разли́чїе подлежа́щагѡ.

ѕ҃. Мнѡ́ги пꙋти̑ проходѧ̀ ᲂу҆́мъ, несы́тенъ показꙋ́етсѧ. Къ є҆ди́номꙋ же пꙋтѝ собира́емь моли́твы, пре́жде соверше́нства ᲂу҆тѣснѧ́емь ви́дитсѧ молѧ́сѧ, прича́стникꙋ ѿпꙋще́нꙋ бы́ти къ тѣ̑мъ, ѿ ни́хже и҆зы́де.

з҃. Свы́ше низведе́нъ бы́въ ᲂу҆́мъ, не востека́етъ па́ки та́мѡ, а҆́ще не соверше́нное до́льныхъ сотвори́тъ презрѣ́нїе, ѡ҆ бж҃е́ственныхъ ᲂу҆праждне́нїемъ.

и҃. А҆́ще дꙋ́шꙋ твою̀ не мо́жеши съ є҆ди́нѣми сотвори́ти сꙋ́щими въ не́й по́мыслы, понѐ тѣ́ло твоѐ ᲂу҆единѧ́тисѧ понꙋ́ди, є҆́же ѡ҆ не́мъ ѕлострада́нїе вы́нꙋ помышлѧ́ѧ: та́кѡ бо со вре́менемъ ми́лостїю бж҃їею, и҆ на пе́рвое востещѝ возмо́жеши благоро́дства досто́инство.

ѳ҃. Дѣ́ѧтельный ᲂу҆́бѡ, покарѧ́ти ᲂу҆́мъ ᲂу҆до́бнѣ мо́жетъ моли́твѣ: зри́тельный же, моли́твꙋ ᲂу҆мꙋ̀. То́й ᲂу҆́бѡ ѿ ви́димыхъ собира́ѧ ѡ҆бразѡ́въ чꙋ́вство: се́й же дꙋ́шꙋ къ сокровє́ннымъ во ѡ҆́бразѣхъ словесе́мъ преводѧ̀, и҆ то́й ᲂу҆́бѡ тѣле́съ повинꙋ́етъ ᲂу҆́мъ словеса̀ не вѣ́дѣти: се́й же безтѣле́сныхъ словеса̀ разꙋмѣва́ти. Безтѣле́сныхъ же сꙋ́ть словеса̀ тѣле́съ, сво́йства же и҆ сꙋщества̀ и҆́хъ.

і҃. Є҆гда̀ ᲂу҆́мъ тво́й тѣле́съ, и҆ и҆мѣ́нїй, и҆ бра́шенъ сладостра́стїѧ свободи́ши: тогда̀ и҆ є҆́же а҆́ще твори́ши, да́ръ чи́стъ бг҃ови вмѣни́тсѧ. Возда́стсѧ же тебѣ̀, є҆́же ѿве́рстисѧ се́рдца твоегѡ̀ ѻ҆чесе́мъ, и҆ ꙗ҆́снѣ поꙋча́тисѧ внꙋ́трь напи̑саннымъ во ᲂу҆мѣ̀ словесе́мъ бж҃їимъ, ꙗ҆̀же па́че ме́да и҆ со́та, мы́сленномꙋ твоемꙋ̀ вмѣнѧ́тсѧ горта́ни, и҆здава́емою ѿ ни́хъ сла́достїю.

а҃і. Не возмо́жеши тѣле́съ, и҆ и҆мѣ́нїй, и҆ ненꙋ́жныхъ бра́шенъ, жела́нїѧ вы́шшїй сотвори́ти ᲂу҆́мъ, а҆́ще не въ чи́стое пра́ведныхъ мѣ́сто введе́ши є҆го̀. Въ не́мже сме́рти же и҆ бг҃а па́мѧть, па́ки и҆сте́кши ѿ земна́гѡ се́рдца и҆згла́дитъ всѐ жела́нїѧ воста́нїе.

в҃і. Ничто́же, ни мы́сли сме́ртныѧ страшнѣ́йшее, ни бж҃їѧ па́мѧти ди́внѣйшее. Та́ бо ᲂу҆́бѡ є҆́сть печа́ли спаси́тельныѧ пода́тельна, сїѧ́ же весе́лїѧ дарова́тельна: помѧнꙋ́хъ бо, глаго́летъ проро́къ бг҃а, и҆ возвесели́хсѧ¹⁴⁶¹. И҆ премꙋ́дрый: помина́й послѣ̑днѧѧ твоѧ̑, и҆ во вѣ́ки не согрѣши́ши¹⁴⁶². Не возмо́жно же втора́гѡ комꙋ̀ во ᲂу҆свое́нїи бы́ти, и҆скꙋ́са те́рпкости пе́рвагѡ не прїе́мшꙋ.

г҃і. До́ндеже сла́вꙋ бж҃їю ѿкрове́нныхъ лице́мъ не ᲂу҆ви́дитъ ᲂу҆́мъ, не мо́жетъ дꙋша̀ глаго́лати въ чꙋ́вствѣ свое́мъ: а҆́зъ же возра́дꙋюсѧ ѡ҆ гдⷭ҇ѣ, возвеселю́сѧ ѡ҆ спасе́нїи є҆гѡ̀¹⁴⁶³. Покро́въ бо лежи́тъ самолю́бїѧ на се́рдцѣ є҆ѧ̀, ко є҆́же не ѿкры́тисѧ є҆́й ѡ҆снова́нїемъ вселе́нныѧ, ꙗ҆̀же сꙋ́ть словеса̀ бы́вшихъ, є҆́же не ѿе́млетсѧ ѿ неѧ̀, кромѣ̀ во́льныхъ и҆ нево́льныхъ трꙋдѡ́въ.

д҃і. Не по бѣ́гствѣ ѿ є҆гѵ́пта, и҆́же є҆́сть по дѣ́йствꙋ грѣ́хъ: нижѐ по преше́ствїи мо́рѧ, рабо́ты, глаго́лю, ꙗ҆́же по ᲂу҆свое́нїю: но по пребыва́нїи, є҆́же въ пꙋсты́ни, посредѝ лежа́щей дѣ́йствъ и҆ движе́нїй ѕло́бы, і҆зра́илевъ народоводи́тель соглѧ́дати мо́жетъ зе́млю ѡ҆бѣтова́нїѧ, ꙗ҆́же є҆́сть безстра́стїѧ: зри́тельнꙋю посыла́ѧ и҆ назира́тельнꙋю свою̀ си́лꙋ.

є҃і. Сѣдѧ́щїй ᲂу҆́бѡ въ пꙋсты́ни, си́рѣчь въ недѣ́йствїи страсте́й, слꙋ́хомъ є҆ди́нѣмъ бл҃же́нныѧ ѻ҆́ныѧ и҆́мꙋтъ блага̑ѧ землѝ. А҆ ꙗ҆̀же въ не́й смотри́вшїи въ ра́зꙋмѣ, ꙗ҆́вѣ ꙗ҆́кѡ то́нцѣ ви́димыхъ видѣ́нїѧ бы́ша. Сподо́бльшїисѧ же въ ню̀ вни́ти, всѣ́мъ чꙋ́вствомъ и҆стека́ющихъ ѿ неѧ̀, ꙗ҆́кѡ млеко̀ и҆ ме́дъ, пе́рвагѡ, глаго́лю, и҆ втора́гѡ видѣ́нїѧ слове́съ насы́тишасѧ.

ѕ҃і. Не ᲂу҆̀ сраспѧ́тсѧ хрⷭ҇тꙋ̀, є҆щѐ є҆сте́ствєнна движє́нїѧ и҆мы́й пло́ти. Нижѐ спогребе́сѧ дꙋше́вными помышле́нїи привлека́емый. Ка́кѡ ᲂу҆̀бо воскре́снетъ съ ни́мъ таковы́й во ѡ҆бновле́нїи жи́зни жи́ти;

з҃і. Трїе́мъ сꙋ́щымъ въ дꙋшѝ ѡ҆бде́ржнѣйшымъ добродѣ́телемъ: постꙋ̀, моли́твѣ же и҆ молча́нїю: нꙋ́ждно є҆́сть сꙋ́щемꙋ ᲂу҆́бѡ ѿ моли́твы, и҆зба́витисѧ хотѧ́щꙋ, въ нѣ́коемъ є҆сте́ственномъ видѣ́нїи почива́ти. Сꙋ́щемꙋ же ѿ молча́нїѧ во правоꙋчи́тельной бесѣ́дѣ, во второ́й же благода́тнѣй пи́щи постѧ́щемꙋсѧ.

и҃і. До́ндеже въ бж҃е́ственныхъ є҆́сть ᲂу҆́мъ, спаса́етъ є҆́же по подо́бїю, бла́гъ же и҆ милосе́рдъ ѡ҆брѣта́ѧсѧ. Въ сꙋ́щихъ же по чꙋ́вствꙋ бы́въ, а҆́ще ᲂу҆́бѡ благовре́меннѣ, и҆ прили́чнѣ схо́дитъ, и҆скꙋ́съ даѧ̀ и҆ прїе́млѧ во ѻ҆́нѣхъ, благода́рствꙋѧ па́ки къ себѣ̀ возвраща́етсѧ. Внѣ̀ вре́мене же, и҆ потре́бы, ꙗ҆́коже нѣ́кїй воево́да не ѡ҆смотрели́въ ѡ҆брѧ́щетсѧ, мно́гое своеѧ̀ пресѣца́ѧ си́лы, внегда̀ ра́товатисѧ.

ѳ҃і. Внꙋ́трь сокрове́нный въ на́съ безстра́стїѧ ра́й, ѡ҆́бразъ є҆́сть и҆мꙋ́щагѡ пра́ведники прїѧ́ти. Ѻ҆ба́че не всѝ внѣ̀ ѻ҆́нагѡ ѡ҆брѧ́щꙋтсѧ, є҆ли́цы внꙋ́трь содержи́магѡ бы́ти не возмого́ша.

к҃. Чꙋ́вственное ᲂу҆́бѡ со́лнце, стра́нны своѧ̑ лꙋчы̀ ѿ хра́мины затворє́нныѧ сотворѧ́етъ: мы́сленное же не мо́жетъ и҆спꙋсти́ти сла́дкихъ лꙋче́й на дꙋ́шꙋ ѡ҆жида́ющꙋю, но не и҆мꙋ́щꙋю чꙋ́вствъ затворе́нныхъ ѿ ви́димыхъ.

к҃а. Разꙋмѣ́теленъ є҆́сть, и҆́же схождє́нїѧ ᲂу҆́бѡ своѧ̑ велелѣ́пнѡ, дꙋши́ же восхождє́нїѧ смиренномꙋ́дреннѣ располага́ѧй.

к҃в. Пчела̀ ᲂу҆́бѡ цвѣтникѝ ѡ҆блета́ющи, ѿѻнꙋ́дꙋ ме́дꙋ вины̀ прїѡбрѣта́етъ: дꙋша́ же вѣ́ки ѡ҆бходѧ́щи разли́чны, ѿсю́дꙋ сла́дость во ᲂу҆́мъ пꙋща́етъ.

к҃г. Поѧ́дшїй ᲂу҆́бѡ є҆ле́нь ѕмїє́въ, ꙗ҆́дъ ᲂу҆гаси́ти къ водны̑мъ тече́тъ и҆сто́чникѡмъ: дꙋша́ же стрѣла́ми бж҃е́ственными ᲂу҆ѧ́звленна, непреста́ннагѡ влече́тсѧ ко ᲂу҆ѧзви́вшемꙋ раче́нїемъ.

к҃д. То́нцыи ᲂу҆́бѡ по́мыслы во ᲂу҆едине́нной жи́зни прозѧба́ютъ: ᲂу҆мышлє́нїѧ же въ раздѣ́льной: во многобезмо́лвнѣй же дꙋшѝ, по́мыслы ᲂу҆́бѡ ѿгна́шасѧ: ᲂу҆́ми же то́чїю на́зи тѣле́съ къ то́й приближа́ютъ, и҆̀же ѡ҆ про́мыслѣ и҆ сꙋдѣ̀ словеса̀, а҆́ки нѣ̑каѧ ѡ҆снова̑нїѧ землѝ ѿкрыва́юще, то́й и҆з̾ѧвлѧ́ютъ.

к҃є. Въ раздѣ́льной жи́зни мꙋ́жескїй по́лъ и҆ же́нскїй, про́стѣ ви́дѣтисѧ не ѡ҆бы́че. Сїе́ бо во и҆́ноческой ѡ҆брѧ́щетсѧ, въ не́й же мꙋ́жа и҆ жены̀ разли́чїе, за є҆́же по подо́бїю во хрⷭ҇тѣ̀ і҆и҃сѣ, не познае́тсѧ.

к҃ѕ. По́мыслы, нижѐ безслове́сныѧ ча́сти сꙋ́ть дꙋшѝ (не бо̀ є҆́сть въ безслове́сныхъ по́мыслъ) нижѐ ᲂу҆́мныѧ: занѐ ни во а҆́гг҃лѣхъ є҆́сть: са̑мыѧ же тоѧ̑ словє́сныѧ сꙋ́ще рождє́нїѧ, ꙗ҆́кѡ лѣ́ствицꙋ мечта́нїе ᲂу҆потреблѧ́юще, восхо́дѧтъ ᲂу҆́бѡ къ ᲂу҆мꙋ̀ ѿ чꙋ́вства, ꙗ҆̀же сꙋ́ть ѻ҆́нагѡ, томꙋ̀ возвѣща́юще: низхо́дѧтъ къ немꙋ̀ ѿ негѡ̀, ꙗ҆̀же сꙋ́ть ѻ҆́нагѡ, совѣ́тꙋюще.

к҃з. Ꙗ҆́коже нѣ́цыи и҆з̾ глꙋбины̀ возводи́ми, и҆ нѣ́чесогѡ въ по́мощь ꙗ҆́тисѧ покꙋша́ющесѧ, лꙋка́вїи по́мыслы ѡ҆брѧ́щꙋтсѧ, ꙗ҆́коже кораблю̀ бѣ́дствꙋющей ѕло́бѣ сле́зъ пото́помъ.

к҃и. По подлежа́щемꙋ ка́чествꙋ дꙋшѝ, и҆лѝ ꙗ҆́кѡ морсті́и разбо́йницы потоплѧ́ти, и҆лѝ ꙗ҆́кѡ гребцы̀ спомоществова́ти бѣ́дствꙋющей, и҆̀же ѡ҆ не́й собира́ютсѧ по́мыслы. Ѻ҆́ви ᲂу҆́бѡ въ пꙋчи́нꙋ влекꙋ́щи неподо́бныхъ пѡ́мыслъ: ѻ҆́ви же ближа́йшїй пꙋ́ть и҆збира́юще, къ ти̑химъ брегѡ́мъ кора́бль ᲂу҆клонѧ́ютъ.

к҃ѳ. Седмо́мꙋ тщесла́вїѧ по́мыслꙋ сꙋ́щꙋ жела́ющаѧ, ꙗ҆́кѡ послѣ́днѧѧ, ѿри́нꙋти дꙋша̀, а҆́ще не тѣ́хъ, и҆̀же пре́жде є҆гѡ̀, совлече́тсѧ. Не возмо́жетъ въ ѻ҆сма́го и҆́же по тѣ́хъ ѡ҆блещи́сѧ, є҆го́же и҆ жили́ще небе́сно нарица́ти вѣ́сть бж҃е́ственный а҆по́столъ, и҆ воздыха́нми ѡ҆блещи́сѧ¹⁴⁶⁴, мощѝ є҆гѡ̀ ра́ди веще́ствꙋющихъ наги̑мъ сꙋ́щымъ.

л҃. Къ соверше́ннѣй ᲂу҆́бѡ моли́твѣ, а҆́гг҃льстїи приходи́ти ѡ҆быко́ша по́мыслы: къ сре́днѣй же, дх҃о́внїи: къ води́тельнѣй же, є҆стествосло́внїи.

л҃а. Ꙗ҆́коже благоро́дное зерна̀ кла́сомъ, та́кѡ и҆ чистота̀ видѣ́нїѧ, моли́твою ꙗ҆влѧ́тисѧ ѡ҆бы́че. И҆́мꙋтъ же ѻ҆́въ ᲂу҆́бѡ къ возбране́нїю пти́цъ сѣменособира́тельныхъ, а҆́ки нѣ̑каѧ кѡ́пїѧ, ѡ҆крꙋжа́ющыѧ ѻ҆́сти: ѻ҆́въ же, любомꙋ́дрствꙋющыѧ во и҆скꙋше́нїѧхъ по́мыслы ко ѻ҆́нѣхъ потребле́нїю.

л҃в. Ви̑димаѧ ᲂу҆́бѡ дꙋшє́внаѧ, дѣѧ̑нїѧ ра́ди посре́брена, ꙗ҆́коже крилѣ̀ голꙋби̑нѣ сꙋ́ть: разꙋмѣва́ємаѧ же, глаго́лю же междора̑мїѧ, видѣ́нїѧ ра́ди ꙗ҆́кѡ въ блеща́нїи зла́та сꙋ́ть¹⁴⁶⁵. Не ᲂу҆краси́вшаѧсѧ бо дꙋша̀ полетѣ́ти и҆ почи́ти не мо́жетъ, и҆дѣ́же всѣ́хъ веселѧ́щихсѧ жили́ще є҆́сть.

Тогѡ́жде глави̑зны дѣ́ѧтельны и҆ зри́тельны.

По́ле здѣ̀ плодѡ́въ и҆спо́лнено дꙋхо́внагѡ дѣѧ́нїѧ и҆ видѣ́нїѧ.

л҃г. Нача̑тки гꙋмна̀ и҆ точи́ла, дре́вле ᲂу҆́бѡ дрє́внимъ приноси́ти во хра́мъ повелѣ́но бы́сть: ны́нѣ же мы̀ дѣ́ѧтельныѧ ᲂу҆́бѡ (добродѣ́тели) нача́тки воздержа́нїе подоба́етъ бг҃ꙋ приноси́ти, и҆ и҆́стинꙋ: зри́тельныѧ же добродѣ́тели, любо́вь, и҆ моли́твꙋ. Ѻ҆́ными ᲂу҆́бѡ, по́хоти безслове́сныѧ и҆ ꙗ҆́рости вины̀ пресѣца́юще: си́ми же мы̑сли тщє́тныѧ, и҆ ꙗ҆̀же ѿ бли́жнѧгѡ навѣ́ты.

л҃д. Дѣ́ѧтельныѧ ᲂу҆́бѡ (добродѣ́тели) нача́ло, воздержа́нїе и҆ и҆́стина: среда́ же, цѣломꙋ́дрїе и҆ смиренномꙋ́дрїе: коне́цъ же є҆ѧ̀, по́мыслѡвъ ми́ръ и҆ ст҃ы́нѧ тѣ́ла.

л҃є. Дѣѧ́нїе є҆́сть, не є҆́же дѣ́ѧти про́стѣ мощѝ дѡ́браѧ, но и҆ є҆́же ꙗ҆́коже подоба́етъ дѣ̑ѧти та̀, вре́мѧ и҆ мѣ́рꙋ и҆ дѣ̑емымъ сприносѧ́щꙋ дѣ́ющемꙋ.

л҃ѕ. Видѣ́нїе є҆́сть, не є҆́же ви́дѣти то́чїю, ꙗ҆́коже сꙋ́ть тѣлеса̀ є҆стество́мъ, но є҆́же и҆ словеса̀ и҆́хъ къ чесомꙋ̀ зрѧ́тъ.

л҃з. Нѣ́сть ни дѣѧ́нїе ᲂу҆твержде́нно без̾ видѣ́нїѧ, ни видѣ́нїе и҆́стинно без̾ дѣѧ́нїѧ. Подоба́етъ бо и҆ дѣѧ́нїю достосло́внꙋ бы́ти, и҆ видѣ́нїю дѣ́ѧтельнꙋ: да тѣ́мъ ᲂу҆́бѡ некрѣпка̀ ѡ҆брѣта́етсѧ ѕло́ба, си́мъ же си́льна добродѣ́тель, во благоволе́нїи бла́гости.

л҃и. Коне́цъ ᲂу҆́бѡ дѣ́ѧтельныхъ, ᲂу҆мерщвле́нїе страсте́й: коне́цъ же разꙋмѣва́емыхъ, видѣ́нїе добродѣ́телей.

л҃ѳ. Ꙗ҆́коже вещество̀ зрѣ́нїю ѻ҆че́съ, та́кѡ дѣѧ́нїе зрѣ́нїю ᲂу҆ма̀: и҆ ꙗ҆́коже ѻ҆́ко лицꙋ̀, та́кѡ ᲂу҆мозрѣ́нїе дѣѧ́нїю ꙗ҆влѧ́етсѧ.

м҃. Въ по́прищи дѣ́ѧтельныѧ добродѣ́тели, мно́зи ᲂу҆́бѡ текꙋ́тъ: є҆ди́нъ же прїе́млетъ по́честь, пре́жде конца̀ тоѧ̀ прїитѝ во видѣ́нїе жела́ѧй.

м҃а. Оу҆миле́нїе ᲂу҆́бѡ питїѐ прїе́млетъ дѣ́ѧтельный въ моли́твѣ: ча́шею же держа́вною ᲂу҆поева́етсѧ зри́тельный. То́й ᲂу҆́бѡ во ꙗ҆̀же по є҆стествꙋ̀ любомꙋ́дрствꙋѧй: се́й же и҆ себѐ не вѣ́дый внегда̀ моли́тисѧ.

м҃в. Не попꙋща́емь є҆́сть дѣ́ѧтельный въ дꙋхо́внѣ видѣ́нїи намно́зѣ терпѣ́ти: ѡ҆брѣта́етсѧ бо ꙗ҆́кѡ страннопрїѧ́тъ бы́въ нѣ́кїимъ, и҆ ѿ ѻ҆́нагѡ хра́мины ско́рѡ ѻ҆́тай и҆сходѧ̀.

м҃г. Ꙗ҆́кѡ во врата̀ ᲂу҆́бѡ вхо́дѧтъ дѣ́ѧтельнїи за́повѣдей бж҃їихъ, внегда̀ моли́тисѧ: ꙗ҆́кѡ во дворы́ же добродѣ́телей съ пѣ́сньми зри́тельнїи благодарѧ́ще: ѻ҆́ви ᲂу҆́бѡ ꙗ҆́кѡ разрѣше́нни бы́ша ѿ ᲂу҆́зъ: ѻ҆́ви же ꙗ҆́кѡ и҆ плѣ́нники ꙗ҆́ша ра́тꙋющыѧ и҆́хъ.

м҃д. Подоба́етъ по держа́вѣ дѣ́ѧтельныѧ (добродѣ́тели) и҆ держа́вѣ видѣ́нїѧ ѡ҆брѣта́тисѧ. Да не по подо́бїю кораблѧ̀ нера̑внаѧ вѣ́трила ѡ҆бносѧ́щꙋ, и҆лѝ бѣдꙋ̀ прете́рпитъ вѣ́трѡвъ ѕѣ́льностїю, за неꙋмѣ́ренность и҆́хъ, и҆лѝ тщетꙋ̀ дꙋхѡ́въ за ма́лость ꙗ҆́же въ ладїѝ.

м҃є. Гребцы̀ ᲂу҆́бѡ мы́сленнагѡ кораблѧ̀, разꙋмѣ́й благочести̑выѧ по́мыслы: ве́сла же, живо́тныѧ си̑лы дꙋшє́вныѧ, ꙗ҆́рость, и҆ жела́нїе, хотѣ́нїе и҆ произволе́нїе. Си́хъ дѣ́ѧтельный ᲂу҆́бѡ въ тре́бованїи є҆́сть всегда̀: не всегда́ же и҆ зри́тельный. Во вре́мѧ бо моли́твы ра́доватисѧ се́й всѣ̑мъ ре́къ, са́мъ себѐ на корми́лѣхъ ра́зꙋмомъ посажда́ѧ, чрез̾ всю̀ бо́дрствоваше въ видѣ́нїи но́щь, хвалє́нїѧ приносѧ̀ содержи́телю всегѡ̀. А҆́ще нѣ́гдѣ и҆ пѣ́снь нѣ́кꙋю рачи́тельнꙋ воспрїе́млѧ къ свое́й напѣва́етъ дꙋшѝ, и҆но́гѡ мо́рѧ ѿ дале́че смотрѧ̀ возвышє́нїѧ, и҆ шꙋ̑мнаѧ движє́нїѧ, бж҃е́ственными ᲂу҆жаса́емь сꙋдьба́ми же и҆ ѡ҆правда́нїи.

м҃ѕ. И҆́же посредѣ̀ сы́й дѣѧ́нїѧ и҆ видѣ́нїѧ, нижѐ всѧ́ко ве́слами ꙗ҆́коже кора́бленницы, твори́тъ пла́ванїе, нижѐ всѧ́кѡ мы́сленными вѣ́трилами: но ѻ҆бѣ́ма потре́бꙋ ᲂу҆добопла́ванїѧ дѣ́лаетъ, сла́дцѣ носѧ̀ и҆ трꙋды̀ дѣѧ́нїѧ, мѣ́ры ра́ди видѣ́нїѧ: и҆ словеса̀ несоверше́ннагѡ видѣ́нїѧ, ра́ди по́мощи ѿ дѣѧ́нїѧ.

м҃з. Зри́тельный ᲂу҆́бѡ съ произволе́нїемъ є҆стество̀ и҆мѣ́ѧ стекꙋ́щее, ꙗ҆́коже нѣ́каково тече́нїе без̾ трꙋда̀ твори́тъ пла́ванїе: дѣ́ѧтельный же сопротивлѧ́ющеесѧ ѡ҆брѣта́ѧ произволе́нїю ᲂу҆свое́нїе, мно́гꙋ по́мыслѡвъ те́рпитъ бꙋ́рю, и҆ ма́лѡ не во ѿча́ѧнїе бѣ́дствꙋетъ тѧ́жести ра́ди прїитѝ.

м҃и. Нижѐ ни́ва не до́брѣ воздѣ́лана бы́вши, мно́гѡ гобзова́тельно и҆ чи́сто воздаѧ́ти сѣ́мѧ сѣ́ющемꙋ ѡ҆бы́че: нижѐ дѣ́ѧтельнꙋю (добродѣ́тель) проходѧ́й, а҆́ще не прилѣ́жнѣ сїю̀ и҆ без̾ ꙗ҆влѧ́тельства прохо́дитъ, и҆́же ѡ҆ мл҃твы ᲂу҆́зритъ пло́дъ мно́гъ же и҆ чи́стъ.

м҃ѳ. Попира́емой ча́стѣ, подо́бна є҆́сть землѝ мы́сль, непреста́нными моли́твами слѣда́ми ᲂу҆тира́ема. Ѻ҆́наѧ бо гла́дка бꙋ́детъ, и҆ сїѧ̀ пра́ва къ под̾ѧ́тїю: ѻ҆́на ᲂу҆́бѡ но́гъ мѧ́гкихъ, а҆ сїѧ̀ моли́твъ чи́стыхъ.

н҃. Во веще́ственныхъ ᲂу҆́мъ споспѣ́шника и҆́мать по́мысла: въ невеще́ственныхъ же, а҆́ще тогѡ̀ не ѡ҆ста́витъ, па́костника и҆мѣ́ти бꙋ́детъ па́кѡсти дѣ́ющаго.

н҃а. Покро́въ ᲂу҆́бѡ и҆́мать дѣ́ѧтельный на се́рдцѣ свое́мъ въ моли́твѣ, ра́зꙋмъ чꙋ́вственныхъ, ѿкры́тисѧ за ᲂу҆свое́нїе не могꙋ́щїй: є҆ди́нъ же зри́тельный за неѡде́ржное, ѿкрове́ннымъ лице́мъ зрѣ́ти ѿ ча́сти мо́жетъ сла́вꙋ бж҃їю.

н҃в. Моли́тва ꙗ҆́же съ дꙋхо́внымъ видѣ́нїемъ, землѧ̀ ѡ҆бѣтова́ннаѧ є҆́сть: въ не́йже тече́тъ ꙗ҆́кѡ млеко̀ и҆ ме́дъ, ра́зꙋмъ ꙗ҆́же ѡ҆ про́мыслѣ и҆ сꙋдѣ̀ слове́съ бж҃їихъ. А҆ є҆́же съ нѣ́кимъ є҆сте́ственнымъ (видѣ́нїемъ) є҆гѵ́петъ є҆́сть, въ не́мже дебелѣ́йшихъ по́хотей па́мѧть въ молѧ́щихсѧ быва́етъ. Проста́ѧ же (моли́тва) ма́нна є҆́сть ꙗ҆́же въ пꙋсты́ни, ꙗ҆́же за є҆динови́дное нетерпѣли́вымъ ᲂу҆́бѡ затворѧ́ющи жела́нїемъ ѡ҆бѣтова́нныхъ до́браѧ. Терпѧ́щымъ же въ таково́й ᲂу҆тѣсне́нной пи́щи, вино́вна быва́ющи лꙋ́чшагѡ вкꙋ́са и҆ пребыва́ющагѡ.

н҃г. Дѣѧ́нїе съ видѣ́нїемъ ᲂу҆́бѡ, ꙗ҆́кѡ тѣ́ло съ дꙋ́хомъ влады́чественнымъ: без̾ видѣ́нїѧ же, ꙗ҆́кѡ пло́ть съ дх҃омъ произволи́тельнымъ вмѣни́тсѧ.

н҃д. Слове́сныѧ дꙋшѝ дво́ръ ᲂу҆́бѡ є҆́сть чꙋ́вство: хра́мъ же мы́сль: а҆рхїере́й же ᲂу҆́мъ. Во дворѣ̀ ᲂу҆̀бо стои́тъ ᲂу҆́мъ, ѿ безслове́сныхъ пресѣца́емый пѡ́мыслъ: во хра́мѣ же, и҆́же ѿ благовре́менныхъ: ни ѿ є҆ди́нагѡ же ѿ си́хъ, и҆́же въ бж҃е́ственное ст҃и́лище сподо́бивыйсѧ вни́ти.

н҃є. Пла́чь ᲂу҆́бѡ и҆ пѣ́снь, и҆ го́ре, въ домꙋ̀ дѣ́ѧтельныѧ дꙋшѝ трꙋда̀ ра́ди ѡ҆брѣта́етсѧ: гла́съ же ра́дованїѧ и҆ и҆сповѣ́данїѧ¹⁴⁶⁶ ра́зꙋма ра́ди, въ домꙋ̀ зри́тельныѧ слы́шитсѧ.

н҃ѕ. Дѣ́ѧтельный ᲂу҆́бѡ, жела́етъ разрѣши́тисѧ трꙋдѡ́въ ра́ди, и҆ со хрⷭ҇то́мъ бы́ти: зри́тельный же благоволи́тъ па́че во пло́ти пребыва́ти¹⁴⁶⁷. И҆ за ра́дость ю҆́же прїе́млетъ ѿ моли́твы, и҆ за бли́жнѧгѡ пребыва́ющꙋю по́льзꙋ.

н҃з. Въ слове́снѣйшихъ ᲂу҆́бѡ, видѣ́нїе предварѧ́етъ дѣѧ̑нїѧ: въ простѣ́йшихъ же, видѣ̑нїѧ дѣѧ́нїе, во є҆ди́нъ ᲂу҆́бѡ коне́цъ ѻ҆боѧ̀ ѡ҆канчава̑ющасѧ. Сокраще́нѣйшее же сїѐ ꙗ҆ви́тсѧ, въ ни́хже видѣ́нїе предварѧ́етъ дѣѧ̑нїѧ.

н҃и. Ра́й є҆́сть видѣ́нїе мы́сленныхъ. Въ се́й ᲂу҆́бѡ разꙋмѣ́тельный, ꙗ҆́кѡ во сво́й до́мъ внꙋ́трь вхо́дитъ моли́твою: дѣ́ѧтельный же ꙗ҆́кѡ пꙋ́тникъ ꙗ҆ви́тсѧ, жела́ѧ ᲂу҆́бѡ внꙋ́трь прини́кнꙋти. Не попꙋща́емъ же, за є҆́же превзы́ти ѻ҆пло́тꙋ па́че дх҃о́внагѡ во́зраста є҆гѡ̀.

н҃ѳ. Тѣлє́сныѧ ᲂу҆́бѡ стра̑сти, ѕвѣрє́мъ подо́бни сꙋ́ть, пти́цамъ же дꙋшє́вныѧ: и҆ ѻ҆́вы ᲂу҆́бѡ ѡ҆сѣнѧ́етъ ѿ слове́снагѡ вїногра́да дѣ́ѧтельный, не ктомꙋ́же и҆ пти̑чныѧ, а҆́ще во видѣ́нїи дх҃о́внѣ не бꙋ́детъ. А҆́ще и҆ ꙗ҆́кѡ наипа́че твори́тъ тща́нїе ѡ҆ внꙋ́треннихъ хране́нїи.

ѯ҃. И҆́же во нра́вномъ благолѣ́пїи лꙋ́чшїй є҆́сть, дѣ́ѧтеленъ бы́ти не мо́жетъ. А҆́ще и҆ то́й по патрїа́рхꙋ а҆враа́мꙋ не внѣ̀ бꙋ́детъ, ꙗ҆́кѡ ᲂу҆́бѡ землѝ своеѧ̀ є҆сте́ственнагѡ зако́на: а҆ ꙗ҆́кѡ сродства̀ све́рстныѧ себѣ̀ по ᲂу҆свое́нїю жи́зни. Та́кѡ бо и҆ се́й ꙗ҆́кѡ печа́ть прїи́метъ врожде́нныѧ сла́сти ѿѧ́тїе: на не́йже и҆́же ѿ рожде́нїѧ покро́вꙋ ѡ҆блежа́щꙋ, соверше́нной свобо́дѣ не попꙋща́етъ пода́тисѧ на́мъ.

ѯ҃а. Нижѐ жребѧ̀ весно́ю при ꙗ҆́слехъ бы́ти, и҆ ꙗ҆̀же въ ни́хъ ꙗ҆́сти претерпѣва́етъ: нижѐ новоѡбꙋча́емый ᲂу҆́мъ стѣсне́нїе ѿ моли́твы на до́лзѣ терпѣ́ти мо́жетъ, сла́дцѣ па́че хотѧ̀ ꙗ҆́коже жребѧ̀ на широтꙋ̀ є҆сте́ственнагѡ и҆сходи́ти вѣ́дѣнїѧ, не́жели во ѱалмопѣ́нїи и҆ чте́нїи ѡ҆брѣта́емагѡ.

ѯ҃в. Ꙗ҆́коже чрє́сла ᲂу҆̀бо и҆́мать препоѧ̑сана¹⁴⁶⁸ посто́мъ и҆ бдѣ́нїемъ дѣ́ѧтельнаѧ добродѣ́тель живѡ́тныѧ си̑лы своѧ̑: и҆ ꙗ҆́коже свѣти́льники горѧ̑щѧ, молча́нїемъ же и҆ моли́твою разꙋмѣ́тельныѧ зри́тельнаѧ добродѣ́тель поставлѧ́ющи мы̑сленныѧ си̑лы: то̀ ᲂу҆́бѡ ѻ҆́нѣмъ слове́ство ꙗ҆́кѡ пѣ́стꙋна, сїѧ́ же си́мъ ꙗ҆́кѡ невѣстокраси́телѧ сло́во взало́гственное.

ѯ҃г. Несоверше́нный ᲂу҆́мъ въ плодови́тый вїногра́дъ моли́твы не попꙋща́етсѧ входи́ти, въ є҆ди́на же и҆ є҆два̀ ꙗ҆́кѡ къ верхогро́здїйцамъ ни́щъ прѡ́стаѧ ѱалмѡ́въ и҆зглашє́нїѧ.

ѯ҃д. Ꙗ҆́коже не всѝ къ бесѣ́дѣ царѧ̀ входи́ти соѡбѣ́довати съ ни́мъ мо́гꙋтъ: та́кѡ нижѐ къ бесѣ́дѣ мл҃твы и҆дꙋ́щїи во видѣ́нїи є҆́же во ѻ҆́нѣй ᲂу҆ви́дѣни бꙋ́дꙋтъ.

ѯ҃є. Ꙗ҆́рости ᲂу҆́бѡ ᲂу҆зда̀ благовре́менное быва́етъ молча́нїе: жела́нїѧ же безслове́сна, соꙋмѣ́реннаѧ снѣ́дь: не ᲂу҆дободе́ржна же по́мысла є҆диномы́сленнаѧ моли́тва.

ѯ҃ѕ. И҆́же въ до́льнюю глꙋбинꙋ̀ понырѧ́ѧй чꙋ́вственнагѡ ра́ди, и҆ и҆́же въ разꙋмѣ́тельнꙋю мы́сленнагѡ ра́ди би́сера, да того̀ и҆знесе́тъ, а҆́ще не ѡ҆бнажи́тсѧ ѻ҆́въ ᲂу҆́бѡ ѻ҆де́жды, се́й же чꙋ́вства, ѻ҆́ба взыскꙋ́емагѡ погрѣша́етъ.

ѯ҃з. Внꙋ́трь ᲂу҆́бѡ мы́сли своеѧ̀ входѧ́й ᲂу҆́мъ внегда̀ моли́тисѧ, ꙗ҆́кѡ съ невѣ́стою жени́хъ въ черто́зѣ бесѣ́дꙋѧ. ѡ҆брѧ́щетсѧ. Непопꙋща́емый же вни́ти, внѣ̀ стоѧ̀ стенѧ̀ вопїе́тъ: кто̀ введе́тъ мѧ̀ во гра́дъ ѡ҆гражде́нїѧ; и҆лѝ кто̀ наста́витъ мѧ̀¹⁴⁶⁹, до є҆́же не зрѣ́ти въ сꙋеты̀ и҆ неистовлє́нїѧ лѡ́жнаѧ¹⁴⁷⁰, внегда̀ моли́тисѧ мѝ;

ѯ҃и. Ꙗ҆кова̀ без̾ со́ли горта́ни вмѣнѧ́емаѧ є҆́сть пи́ща, такова̀ и҆ без̾ ᲂу҆миле́нїѧ вмѣни́тсѧ ᲂу҆мꙋ̀ дѣ́йствꙋемаѧ моли́тва.

ѯ҃ѳ. Взыскꙋ́ющаѧ ᲂу҆̀бо є҆щѐ дꙋша̀ моли́твꙋ, болѧ́щей при рожде́нїи є҆́сть подо́бна: пости́гшаѧ же ро́ждшей, и҆спо́лнь бы́вшей ѡ҆ рождествѣ̀ ра́дости.

ѻ҃. Дре́вле ᲂу҆́бѡ а҆мѡре́й на горѣ̀ сїѡ́нѣ жи́тельствꙋѧй¹⁴⁷¹, и҆сходѧ̀ поража́ше нꙋ́дѧщихсѧ проходи́ти¹⁴⁷², ны́нѣ же лꙋка́вое забве́нїе возбранѧ́етъ покꙋша́ющихсѧ пре́жде чистоты̀ на вы́шшꙋю и҆ безмо́лвнѣйшꙋю взы́ти моли́твꙋ.

ѻ҃а. Чи̑стыѧ моли̑твы во враждѣ̀ мно́зѣ ѡ҆быко́ша бы́ти бѣ́сове. Оу҆жаса́етъ же си́хъ не мно́жество ѱалмѡ́въ, ꙗ҆́коже внѣ̑шнїѧ сопꙋста́ты во́инство, но трїе́хъ согла́сїе, ᲂу҆ма̀ къ сло́вꙋ, и҆ сло́ва къ чꙋ́вствꙋ.

ѻ҃в. Проста́ѧ ᲂу҆̀бо моли́тва, ꙗ҆́кѡ хлѣ́бъ ꙗ҆ви́тсѧ молѧ́щымсѧ, ᲂу҆крѣплѧ́ющи: а҆ ꙗ҆́же съ нѣ́кимъ видѣ́нїемъ, ꙗ҆́кѡ є҆ле́й ᲂу҆тꙋчна́ющи: безви́днаѧ же ꙗ҆́кѡ вїно̀ благово́нно: є҆гѡ́же насыща́ющїисѧ несы́тнѡ и҆зстꙋпа́ютъ.

ѻ҃г. Ди́вїй ᲂу҆́бѡ ѻ҆се́лъ, гра́да глаго́летсѧ, мно́гꙋ наро́дꙋ смѣѧ́тисѧ, и҆ є҆диноро́гъ же ни ѿ когѡ̀ привѧ́зоватисѧ могі́й. Оу҆́мъ же, над̾ є҆стество́мъ и҆ над̾ противꙋесте́ственными воцари́всѧ словесы̀, сꙋетѣ̀ ᲂу҆́бѡ насмѣва́етсѧ пѡ́мыслъ: молѧ́сѧ, и҆ ни ѿ чесогѡ̀, мо́жетъ ꙗ҆̀же под̾ чꙋ́вствомъ ѡ҆блада́емь бы́ти.

ѻ҃д. Же́злъ ᲂу҆́бѡ на псы̀ потрѧса́ѧй, разсвирѣ́питъ на себѐ: бѣ́сы же, чи́стѣ понꙋжда́ѧйсѧ моли́тисѧ.

ѻ҃є. Подоба́етъ подвиза́ющемꙋсѧ чꙋ́вство ᲂу҆́бѡ своѐ въ є҆динови́днꙋю состѧ́говати пи́щꙋ: ᲂу҆́мъ же въ є҆динопо́мысленнꙋю моли́твꙋ. Та́кѡ бо не ᲂу҆держи́мь бы́въ ѿ страсте́й, и҆ во є҆́же восхища́тисѧ ко гдⷭ҇ꙋ прїи́детъ внегда̀ моли́тисѧ.

ѻ҃ѕ. Сладостра́стнїи молѧ́щесѧ а҆́ки бла́тни сꙋ́ще, ꙗ҆́коже жа̑бы и҆́мꙋтъ развлека́ющыѧ и҆̀хъ по́мыслы: мѣрностра́стнїи же, ᲂу҆мозрѣ́нїѧ ꙗ҆́кѡ сла́вїи ᲂу҆слажда́ющыѧ въ є҆ди́ной на дрꙋгꙋ́ю вѣ́твь, си́ є҆сть въ разли̑чнаѧ ᲂу҆мозрѣ̑нїѧ прехожде́нїемъ: молча́нїе же сво́йственно є҆́сть безстра̑стнымъ, и҆ мно́га тишина̀ по́мыслѡвъ, и҆ мы́слей, внегда̀ моли́тисѧ и҆̀мъ.

ѻ҃з. Дре́вле ᲂу҆́бѡ мѡѷсе́ова марїа́мъ сꙋпоста́тѡвъ паде́нїе ви́дѣвши, тѷмпа́нъ взе́мши, преднача̀ пою́щымъ побѣди́тєльнаѧ¹⁴⁷³: ны́нѣ же въ благохвале́нїи побѣ́ждшыѧ стра̑сти дꙋшѝ, лꙋ́чшаѧ въ добродѣ́телехъ любы̀ возста́вши, гꙋ́сль ꙗ҆́же съ пѣ́снїю ꙗ҆́кѡ нѣ́кое видѣ́нїе ᲂу҆смотрѧ́ющи, таковы́мъ ѡ҆́бразомъ дре́вле содѣ́ѧннꙋю ѿ добро́ты превосхожде́нїй, не престае́тъ ѡ҆ ꙗ҆̀же ѡ҆ не́й ра́дꙋющихсѧ хвали́те бг҃а.

ѻ҃и. Внегда̀ ча́стостїю ꙗ҆́же въ моли́твѣ, ᲂу҆дє́ржана бꙋ́дꙋтъ словеса̀ ѱалмѡ́въ къ се́рдцѣ молѧ́щагѡсѧ: тогда̀ и҆ то̀ ꙗ҆́кѡ землѧ̀ бла́га, начина́етъ са́мо ѡ҆ себѣ̀ и҆зноси́ти: ꙗ҆́кѡ ши́пки, видѣ́нїе безтѣле́сныхъ: и҆ ꙗ҆́кѡ крі́ны, свѣ̑тлаѧ тѣлеса̀, и҆ ꙗ҆́кѡ цвѣты̀ мѷродыха́нны, разли́чное бж҃е́ственныхъ сꙋде́бъ и҆ неꙋдобозри́мое и҆зноси́ти начина́етъ.

ѻ҃ѳ. Съ вещество́мъ ᲂу҆̀бо свѧза́всѧ пла́мень, свѣтоно́сенъ быва́етъ, ѿ вещества́ же разрѣши́вшисѧ дꙋша̀, бг҃оно́сна ѡ҆брѣта́етсѧ. И҆ ѻ҆́нъ взима́тисѧ ѡ҆бы́че да́же до подгнѣ́та: сїѧ́ же да́же до заключе́нїѧ є҆́же въ бж҃е́ственномъ раче́нїи.

п҃. Соверше́ннѡ ѿре́кшаѧсѧ себѐ дꙋша̀, и҆ всѧ́кѡ къ моли́твѣ просте́ршаѧсѧ, не є҆гда̀ хо́щетъ быва́етъ до́лꙋ, вы́ше тва́ри ѡ҆брѣта́ющаѧсѧ: но є҆гда̀ пра́веднѡ бы́ти возмни́тсѧ всѧ̑ на̑ша вѣ́сомъ и҆ мѣ́рою ᲂу҆правлѧ́ющемꙋ.

п҃а. Є҆гда̀ ѿ дꙋшѝ ᲂу҆́бѡ ᲂу҆ны́нїе ѿгна́но бꙋ́детъ, ѿ мы́сли же лꙋка́вство и҆зве́ржетсѧ: тогда̀ ᲂу҆́мъ на́гъ бы́въ простото́ю, и҆ жи́знїю безхꙋдо́жною, и҆ без̾ всѧ́кагѡ на стꙋдѣ̀ прикрове́нїѧ, пѣ́снь ᲂу҆̀бо пое́тъ и҆ се́й но́вꙋ бг҃ови, бл҃годари́тъ же пѣ́снь брѧца́ѧ съ весе́лїемъ, се́ю бꙋ́дꙋщагѡ ѡ҆бновле́нїѧ пра́зднꙋетъ житїѧ̀.

п҃в. Є҆гда̀ въ бж҃е́ствєннаѧ дѣ̑йства дѣ́йствоватисѧ начина́етъ молѧ́щаѧсѧ дꙋша̀, тогда̀ подо́бнѣ и҆ та̀ ꙗ҆́коже въ пѣ́снехъ невѣ́ста къ подобонра̑внымъ, сицєва́ѧ возглаша́етъ: Бра́тъ мо́й посла̀ рꙋ́кꙋ свою̀ сквозѣ̀ сква́жню, и҆ чре́во моѐ вострепета̀ ѿ негѡ̀¹⁴⁷⁴.

п҃г. И҆ во́инъ ѿ бра́ни возврати́всѧ, тѧ́жесть ѻ҆рꙋ́жїй ѿлага́етъ. И҆ дѣ́ѧтеленъ по́мыслы, во видѣ́нїе грѧды́й. Ниже́ бо то́й ра́звѣ то́чїю во бра́ни потре́бꙋ и҆́мать ѻ҆рꙋ́жїй: нижѐ се́й по́мыслѡвъ, а҆́ще не ѻ҆́тай пребыва́етъ въ тѣ́хъ, во ꙗ҆̀же под̾ чꙋ́вствомъ.

п҃д. Дѣ́ѧтельнїи ᲂу҆̀бо въ каково́мъ сꙋ́ть положе́нїи, зрѧ́тъ тѣлеса̀: зри́тельный же въ каково́мъ є҆стествѣ̀. Є҆ди́ни же прозри́тельни сꙋ́ще зрѧ́тъ сво́йство ѻ҆бои́хъ.

п҃є. Въ сво́йствахъ ᲂу҆́бѡ тѣле́сныхъ познаю́тсѧ безтѣлє́снаѧ: въ безтѣле́сныхъ же сло́во пресꙋ́щное: къ немꙋ́же разрѣши́тисѧ всѧ́каѧ до́браѧ дꙋша̀ тщи́тсѧ.

п҃ѕ. Словеса̀ безтѣле́сныхъ, ꙗ҆́коже кѡ́сти сꙋ́ть чꙋ́вственными прикрыва́еми, и҆̀хже никто́же ᲂу҆ви́дитъ, внѣ̀ не бы́вшихъ пристра́стїѧ чꙋ́вственныхъ.

п҃з. Ѿлага́етъ и҆ во́инъ ѻ҆рꙋ̑жїѧ, ѡ҆ста́вивъ бра́нь: и҆ зри́тельный, по́мыслы, восходѧ̀ ко гдⷭ҇ꙋ.

п҃и. И҆ военача́льникъ на бра́ни лиша́сь коры́сти, въ печа́ли пребыва́етъ: и҆ дѣ́ѧтельный въ моли́твѣ видѣ́нїѧ дх҃о́внагѡ.

п҃ѳ. Є҆ле́нь ᲂу҆́бѡ на тѣлє́сныѧ во́дъ тече́тъ и҆сто́чники, ѿ ѕвѣ́рѧ ᲂу҆грызе́нъ бы́вши, дꙋша́ же сладча́йшею стрѣло́ю ᲂу҆ѧзви́вшисѧ моли́твенною, на безтѣле́сныхъ лꙋчы̀.

ч҃. Нижѐ тѣле́сное ѻ҆́ко зе́рно пшени́чное ᲂу҆ви́дѣти мо́жетъ, нижѐ ᲂу҆́мъ дѣ́ѧтеленъ є҆стество̀ своѐ. А҆́ще не ѡ҆бнажи́тсѧ: ѻ҆но̀ ᲂу҆́бѡ влага́лища: се́й же ᲂу҆свое́нїѧ ѻ҆́крестъ покрыва́ющагѡ є҆го̀.

ч҃а. Скрыва́ютсѧ ѕвѣ́зды при восхожде́нїи со́лнца: по́мыслы же ѡ҆скꙋдѣва́ютъ, ᲂу҆мꙋ̀ къ ца́рствїю своемꙋ̀ возвраща́ющꙋсѧ.

ч҃в. По концѣ̀ дѣ́ѧтельности, дх҃ѡ́внаѧ видѣ̑нїѧ ѡ҆блїѧ́вше ᲂу҆́мъ, а҆́ки нѣ̑каѧ сѡ́лнечныѧ лꙋчы̀ ѿ ѡ҆предѣлѧ́ющагѡ превозни́кша, мнѧ́тсѧ и҆звнѣꙋ́дꙋ є҆гѡ̀ приходи́ти сво́йственна сꙋ́ща, и҆ за чистотꙋ̀ тогѡ̀ ѡ҆б̾е́млюща.

ч҃г. Такѡва̀ и҆ ᲂу҆́мъ зри́теленъ и҆зглаго́лати мо́жетъ, є҆гда̀ свы́ше съ небе́съ сни́детъ є҆стества̀ нꙋ́ждами преклоне́нъ, ꙗ҆́коже и҆ вѣща́вый: бж҃е́ственныѧ добро́ты что́ є҆сть чꙋ́днѣйшее; и҆ ка́ѧ мы́сль бж҃їѧ велелѣ́пїѧ ѡ҆бра́дованнѣйша; Ка́ѧ же та́кѡ любы̀ ѕѣ́льна и҆ нестерпи́ма, ꙗ҆́кѡ ѿ бг҃а быва́ющаѧ во ѡ҆чище́ннѣй ѿ всѧ́кїѧ ѕло́бы дꙋшѝ, и҆ ѿ завѣща́нїѧ глаго́лющей: ꙗ҆́кѡ ᲂу҆ѧ́звленна є҆́смь любо́вїю а҆́зъ¹⁴⁷⁵.

ч҃д. Ѻ҆́нагѡ є҆́сть є҆́же глаго́лати: согрѣ́ѧсѧ се́рдце моѐ во мнѣ̀, и҆ въ поꙋче́нїи мое́мъ разгори́тсѧ ѻ҆́гнь¹⁴⁷⁶, не ᲂу҆трꙋжда́ющагѡсѧ въ слѣ́дъ бг҃а послѣ́довати моли́твою, нижѐ де́нь человѣ́чь жела́ющагѡ ᲂу҆ви́дѣти.

ч҃є. Да глаго́летъ и҆ дѣ́ѧтельнаѧ дꙋша̀ по ѿложе́нїи ѕлы́хъ, ꙗ҆́коже ѻ҆́наѧ въ пѣ́сни къ лꙋка̑вымъ де́мѡнѡмъ и҆ помыслѡ́мъ, взира́ти на сꙋеты̑ и҆ неистовлє́нїѧ лѡ́жнаѧ ю҆̀ па́ки нꙋ́дѧщымъ: Совлеко́хсѧ ри́зы моеѧ̀, ка́кѡ ѡ҆блекꙋ́сѧ въ ню̀; Оу҆мы́хъ но́зѣ моѝ, ка́кѡ ѡ҆скверню̀ и҆̀хъ¹⁴⁷⁷;

ч҃ѕ. Дꙋшѝ бл҃голюби́выѧ є҆́сть глаго́лати дерза́ющїѧ къ бг҃ꙋ: возвѣсти́ ми па́стырю до́брый, гдѣ̀ пасе́ши ѻ҆́вцы твоѧ̑, и҆ гдѣ̀ почива́ти твори́ши въ полꙋ́днѣ а҆́гнцємъ твои̑мъ; да си̑мъ послѣ́дꙋющи, не бꙋ́дꙋ ꙗ҆́кѡ ѡ҆блага́ющаѧсѧ над̾ ста́ды дрꙋгѡ́въ твои́хъ¹⁴⁷⁸.

ч҃з. И҆́щꙋщїи моли́твенное дѣ́ѧтельнаѧ ᲂу҆держа́ти сло́во дꙋша̀, и҆ не могꙋ́щи, такова̀ ꙗ҆́коже ꙗ҆̀же въ пѣ́снехъ и҆ та̀ вопїе́тъ: На ло́жи мое́мъ въ но́щехъ и҆ска́хъ, є҆гѡ́же возлюби́хъ: и҆ска́хъ, и҆ не ѡ҆брѣто́хъ є҆гѡ̀, воззва́хъ є҆го̀, и҆ не послꙋ́ша менѐ¹⁴⁷⁹. Воста́нꙋ ᲂу҆́бѡ моли́твою притрꙋ́днѣйшею, и҆ ѡ҆бше́дше во гра́дѣ, на сто́гнахъ, и҆ на то́ржищахъ, поищꙋ̀ є҆го́же возлюби́хъ, не́гли ѡ҆брѧ́щетсѧ мно́ю, и҆́же во все́мъ се́мъ сы́й, и҆ всегѡ̀ внѣ̀. Насы́щꙋсѧ внегда̀ ꙗ҆ви́тимисѧ сла́вѣ твое́й¹⁴⁸⁰.

ч҃и. Є҆гда̀ всѧ̑ сле́зна ѿ ра́дости ꙗ҆́же въ моли́твѣ на́чнетъ быва́ти дꙋша̀, тогда̀ и҆ та̀ не ѡ҆бинꙋ́ющисѧ, ꙗ҆́кѡ къ своемꙋ̀ сѝ женихꙋ̀ невѣ́ста вопїе́тъ: Да сни́детъ бра́тъ мо́й въ вертогра́дъ сво́й, и҆ да ꙗ҆́стъ сле́зъ мои́хъ, ꙗ҆́кѡ плодѡ́въ древе́сныхъ¹⁴⁸¹, содѣ́ѧнное ᲂу҆тѣше́нїе.

ч҃ѳ. Є҆гда̀ дѣ́ѧтельнаѧ дꙋша̀ ѿ мно́жества и҆ добро́ты тва́рей чꙋди́тисѧ на́чнетъ творцꙋ̀, и҆ наслажда́тисѧ сꙋ́щею ѿ ни́хъ сла́достїю, си́ми и҆ та̀ ᲂу҆жа́сшисѧ вопїе́тъ: Что̀ ᲂу҆краси́лсѧ є҆сѝ женишѐ, раю̀ ѻ҆ц҃а̀ твоегѡ̀; цвѣ́тъ по́лный и҆ ке́дръ є҆гѡ̀, ꙗ҆́коже ке́дры лїва́нстїи. Под̾ сѣ́нь є҆гѡ̀ восхотѣ́хъ и҆ сѣдо́хъ, и҆ пло́дъ є҆гѡ̀ ꙗ҆ви́сѧ сла́докъ въ горта́ни мое́мъ¹⁴⁸².

р҃. А҆́ще царѧ̀ под̾е́млѧй въ до́мъ сво́й, та́кѡ свѣ́телъ ѡ҆брѣта́етсѧ и҆ знамени́тъ, и҆ всѧ́кїѧ ра́дости и҆спо́лнь, кольмѝ па́че дꙋша̀ цр҃ѧ̀ царе́й внегда̀ ѡ҆чи́ститисѧ є҆́й под̾е́мшаѧ по нело́жномꙋ ѻ҆́нагѡ ѡ҆бѣща́нїю. Ѻ҆ба́че благоговѣ́йнѡ ѕѣлѡ̀ такова́ѧ себѣ̀ ᲂу҆держа́ти должна̀ є҆́сть. Внѣ̀ ᲂу҆́бѡ поме́щꙋщи всѐ є҆́же не ко ᲂу҆покое́нїю ѻ҆́нагѡ мнѧ́щеесѧ: внꙋ́трь же вводѧ́щи всѐ є҆го̀ ко ѻ҆́нагѡ ᲂу҆гожде́нїю.

р҃а. Ѡ҆жида́ѧй зва́нъ бы́ти ѿ царѧ̀ воꙋ́трїе, ѡ҆ чесо́мъ въ попече́нїи и҆но́мъ ви́дѣнъ бꙋ́детъ, то́чїю ѡ҆ поꙋче́нїи слове́съ ко ѻ҆́нагѡ сꙋ́щихъ ᲂу҆гожде́нїю. Сїѐ блюдꙋ́щи дꙋша̀, не ꙗ҆ви́тсѧ не ᲂу҆гото́вленна къ та́мошнемꙋ сꙋди́щꙋ.

р҃в. Блаже́нна дꙋша̀, ꙗ҆́же, за ꙗ҆̀же дне́сь прїитѝ ча́ѧти гдⷭ҇а своего̀, ничто́же вмѣнѧ́ющаѧ ве́сь трꙋ́дъ дневны́й нижѐ нощны́й за є҆́же а҆́бїе воꙋ́трїе сегѡ̀ ча́ѧти ꙗ҆влѧ́тисѧ.

р҃г. Всѧ̑ ᲂу҆̀бо ви́дитъ бг҃ъ, зрѧ́тъ же бг҃а, зрѧ́щїи ничто́же внегда̀ моли́тисѧ. И҆ є҆ли́цы ᲂу҆́бѡ зрѧ́тъ бг҃а, и҆ ᲂу҆слы́шаваеми сꙋ́ть ѿ негѡ̀, є҆ли́цы же не сꙋ́ть ᲂу҆слы́шаваеми, нижѐ зрѧ́тъ є҆го̀, блаже́нъ же вѣ́рꙋѧй, ꙗ҆́кѡ ви́димь є҆́сть ѿ бг҃а: не подви́гнетсѧ бо нога̀ є҆гѡ̀ без̾ ᲂу҆гожде́нїѧ ѻ҆́нагѡ.

р҃д. Внꙋ́трь на́съ сꙋ́щагѡ ца́рствїѧ¹⁴⁸³ блага̑ѧ, и҆̀хже добролюби́во ѻ҆́ко не ви́дѣ, и҆ слꙋ́хъ честолюби́въ не слы́ша, и҆ на се́рдце тщѐ дх҃а ст҃а не взыдо́ша, ѡ҆брꙋче́нїѧ сꙋ́ть и҆мꙋ́щихъ даѧ́тисѧ пра́ведникѡмъ бла̑гъ, въ бꙋ́дꙋщемъ ца́рствїи ѿ бг҃а, и҆ и҆́же въ си́хъ не наслажда́ѧйсѧ, и҆̀же сꙋ́ть плоды̀ дх҃а, въ наслажде́нїи ѻ҆́нѣхъ бы́ти не мо́жетъ.

р҃є. Дѣ́ѧтельныхъ по́мыслы, є҆ле́нѧмъ ᲂу҆подо́бишасѧ. Ꙗ҆́коже бо сі́и ѻ҆вогда̀ горѣ̀ сꙋ́ть на высота́хъ, ра́ди стра́ха ловцє́въ: ѻ҆вогда́ же ни́зꙋ во ᲂу҆до́лїѧхъ ра́ди жела́нїѧ сꙋ́щихъ въ ни́хъ: та́кѡ и҆ ті́и, нижѐ всегда̀ въ видѣ́нїи дх҃о́внѣмъ бы́ти мо́гꙋтъ ра́ди не́мощи и҆́хъ: нижѐ при́снѡ въ є҆сте́ственнѣмъ, зане́же не при́снѡ поко́ѧ и҆́щꙋтъ. Ѻ҆ба́че зри́тельнїи земны́хъ видѣ́нїй презри́тели быва́ютъ.

р҃ѕ. Ка̑пли ᲂу҆̀бо росы̀, землѝ ᲂу҆поева́ютъ бразды̑: завѣща̑нїѧ же дꙋше́внаѧ въ моли́твѣ, слє́знаѧ воздыха̑нїѧ ѿ се́рдца и҆здаю́тъ.

р҃з. Разꙋмѣва́емаго въ трⷪ҇цѣ бж҃ества̀, никто́же ᲂу҆́зритъ въ видѣ́нїи, веще́ственныѧ дво́ицы, и҆ бли́зкїѧ то́й є҆ди́ницы превы́ше не ꙗ҆ви́выйсѧ, нижѐ сеѧ̀ бꙋ́детъ вы́шшїй, не содѣ́лавъ сво́й є҆ди́нъ въ познава́емыхъ ᲂу҆́мъ.

р҃и. Не толи́кѡ не ᲂу҆до́бнѡ ѡ҆брѧ́щетсѧ пресѣщѝ пꙋ́ть рѣкѝ, дабы̀ не стреми́тисѧ до́лꙋ, коли́кѡ стремле́нїе ᲂу҆ма̀ ᲂу҆держа́ти, да въ ви́димыхъ не разсѣва́етсѧ, къ гѡ́рнимъ же и҆ срѡ́днымъ молѧ́щемꙋсѧ, є҆гда̀ восхо́щетъ, совозво́дитсѧ: а҆́ще сїѐ ᲂу҆́бѡ и҆ по є҆стествꙋ̀, то́же па́че є҆стества̀ быва́етъ.

р҃ѳ. Ѡ҆чища́емїи внꙋ́трь въ ви̑димаѧ ᲂу҆́мъ направлѧ́юще, толи́кагѡ и҆сполнѧ́ютсѧ ᲂу҆́жаса, и҆ толи́кїѧ ра́дости, ꙗ҆́кѡ ничто́же и҆́но ѿ земны́хъ вмѣсти́ти мо́гꙋтъ, нижѐ а҆́ще бы и҆ всѧ̑ стека́лисѧ къ ни̑мъ вожделѣ̑ннаѧ.

р҃і. Довлѣ́ютъ то́чїю рече́нїи зако́ны є҆стества̀, да чꙋди́мсѧ ѻ҆́нѣмъ: разсꙋжда́емїи же вертогра́ди ѡ҆брѧ́щꙋтсѧ благоцвѣ́тнїи, ꙗ҆́коже ѿ небе́снагѡ сладкопи́тїѧ чи́стыми цвѣ́ты точа́ще дх҃о́внагѡ пирова́нїѧ сла́дость.

ра҃і. Роси́стыми ᲂу҆́бѡ цвѣ́ты цвѣтникѡ́въ цари́цꙋ роѧ̀ ѡ҆крꙋжа́ютъ пче́лы: во ᲂу҆миле́нїи же быва́ющемъ непреста́ннѡ дꙋ́шы, ꙗ҆́кѡ сво́йственны ᲂу҆́мныѧ си̑лы ѡ҆крꙋжа́юще, вкꙋ́пѣ содѣ́ловаютъ жела́тєльнаѧ.

рв҃і. Во ви́димѣмъ ᲂу҆̀бо мі́рѣ, ꙗ҆́кѡ и҆́нъ нѣ́кїй ви́димь є҆́сть мі́ръ человѣ́къ. Въ разꙋмѣва́емѣмъ же по́мыслъ, небесе́ бо и҆ землѝ, и҆ сꙋ́щихъ посредѣ̀, се́й ѻ҆́нѣхъ є҆́сть возвѣсти́тель. Оу҆ма́ же и҆ чꙋ́вства, и҆ є҆́же ѻ҆́нѣмъ и҆сповѣ́датель є҆́сть по́мыслъ, и҆́хже кромѣ̀, ѻ҆́ба мі́ра глꙋ́ха бы́ли бы́ша.

рг҃і. Не та́кѡ съ ра́достїю ѿпꙋще́нъ бы́въ плѣ́нникъ вре́менемъ ше́ствꙋетъ ꙗ҆́кѡ ᲂу҆́мъ ᲂу҆свое́нїѧ свобожде́нъ бы́въ къ небє́снымъ ꙗ҆́кѡ ко свои̑мъ ше́ствꙋетъ ра́дꙋющеюсѧ ного́ю.

рд҃і. Не со внима́нїемъ молѧ́щемꙋсѧ, и҆ноѧзы́чникъ ᲂу҆́бѡ ѱало́мъ вмѣни́тсѧ, и҆ то́й ѱалмꙋ̀ ꙗ҆́кѡ и҆ноѧзы́чникъ, и҆ ꙗ҆́кѡ неи́стовѧщесѧ ѻ҆́ба бѣ́сомъ.

рє҃і. Не то́жде є҆́сть, и҆́мже мі́ръ распѧ́тсѧ, и҆ и҆̀же мі́рꙋ: ѻ҆́вымъ бо гво́здїѧ, по́стъ, и҆ бдѣ́нїе: ѻ҆́вымъ же нестѧжа́нїе, и҆ ᲂу҆ничиже́нїе. Кромѣ́ же вторы́хъ, трꙋды̀ пе́рвыхъ безполе́зни.

рѕ҃і. Никто́же чи́стѣ помоли́тисѧ мо́жетъ, добротолюби́вою стра́стїю и҆ честолюби́вою держи́мь: си́хъ бо ѡ҆держа́нїемъ, и҆ сꙋ́етства по́мыслы ᲂу҆свое́нїе и҆мꙋ́ще, а҆́ки ᲂу҆́жи ѻ҆́нѣмъ сплета́ющесѧ быва́ютъ, низвлача́ще а҆́ки пти́цꙋ свѧ́зани возлетѣ́ти покꙋша́ющсѧ ᲂу҆́мъ во вре́мѧ моли́твы.

рз҃і. Не возмо́жно во вре́мѧ моли́твы ми́рнꙋ бы́ти ᲂу҆мо́мъ, дрꙋги́ню не стѧжа́вшемꙋ воздержа́нїе и҆ любо́вь: то́ бо ю҆́же на дꙋ́шꙋ ѿ тѣ́ла враждꙋ̀ разори́ти приподвиза́етсѧ: сїѧ́ же ю҆́же на бли́жнѧго гдⷭ҇а ра́ди и҆ ѿсю́дꙋ преимꙋ́щїй всѧ́къ ᲂу҆́мъ ми́ръ приходѧ́щъ ѻ҆би́тель твори́ти въ та́кѡ ᲂу҆мири́вшемсѧ ѡ҆бѣщава́етсѧ.

ри҃і. Нꙋ́ждно є҆́сть въ црⷭ҇твїе бж҃їе подвиза́ющꙋсѧ вни́ти¹⁴⁸⁴, и҆збы́точествовати во благи́хъ дѣ́лꙋ пра́вды є҆гѡ̀, въ ми́лостынѧхъ ᲂу҆́бѡ ѿ лише́нїѧ подаѧ́нїемъ, во трꙋдѣ́хъ же и҆́же ѡ҆ ми́рѣ и҆зрече́нїемъ є҆́же ѡ҆ гдⷭ҇ѣ терпѣ́нїѧ.

рѳ҃і. Нижѐ ѡ҆скꙋдѣва́й въ добродѣ́тели за нерадѣ́нїе, нижѐ и҆збы́точествꙋѧй за возноше́нїе, внꙋ́трь приста́нища є҆́же въ безстра́стїи ѡ҆брѧ́щꙋтсѧ: ни є҆ди́нъ бо, ни дрꙋгі́й, ꙗ҆̀же ѿ пра́вды въ наслажде́нїи бы́сть благи́хъ, сре́дственникꙋ ѡ҆брѣта́ющꙋсѧ въ ни́хъ, ѡ҆скꙋдѣ́нїю, и҆ превосхожде́нїю.

р҃к. Нижѐ землѧ̀, а҆́ще не ᲂу҆мно́жено земледѣ́льцеви сѣ́мѧ, дарова́ти и҆́мать, бога́та мо́жетъ содѣ́лати є҆го̀, то́чїю на сѣ́мѧ подаю́щи, и҆лѝ и҆ ма́лъ нѣ́кїй прило́гъ. Нижѐ дѣ́ѧтельными соверша́емое, а҆́ще не лꙋ́чшее па́че произволе́нїѧ є҆гѡ̀ тща́нїе ко бг҃ꙋ ѡ҆брѧ́щетсѧ, пра́ведна содѣ́лати мо́жетъ.

рк҃а. Не всѝ не лю́бѧщїи бли́жнѧго ненави́дѣти мо́гꙋтъ, нижѐ не ненави́дѧщїи є҆го̀ люби́ти. И҆ и҆́но ᲂу҆́бѡ є҆́сть є҆́же зави́дѣти ѻ҆́наго предспѣ́ѧнїю: и҆́но же є҆́же предпѧ́тїемъ томꙋ̀ не быва́ти къ предспѣ́ѧнїю. Послѣ́днїѧ же ѕло́бы сте́пень ѡ҆брѧ́щетсѧ, є҆́же не то́кмѡ ᲂу҆грыза́емꙋ бы́ти ѡ҆ ѻ҆́нагѡ предпочте́нїихъ, но и҆ ѡ҆болгова́ти ѻ҆́нагѡ дѡ́браѧ, ꙗ҆́кѡ не такова̑ сꙋ̑ща.

рк҃в. И҆́ны сꙋ́ть тѣлє́сныѧ стра̑сти, и҆ и҆́ны дꙋшє́вныѧ. И҆́ны же по є҆стествꙋ̀, и҆ и҆́ны ꙗ҆̀же проти́вꙋ є҆стества̀. И҆ и҆́же ѻ҆́вы ᲂу҆́бѡ ѿрѣва́ѧй, ѡ҆ ѻ҆́вѣхъ же про́мысла не творѧ́й, подо́бенъ є҆́сть человѣ́кꙋ, ѻ҆пло́тъ ᲂу҆́бѡ высо́къ покрове́нъ на ѕвѣ́ри поставлѧ́ющꙋ, соꙋслажда́ющꙋсѧ же пти́цамъ ꙗ҆дꙋ́щымъ мы́сленнагѡ вїногра́да грѡ́здїѧ, вои́стиннꙋ свѣ̑тлаѧ.

рк҃г. Вопе́рвыхъ дꙋша̀ въ мечта́нїи быва́етъ ѕла́гѡ, та́же въ жела́нїи, посе́мъ въ сла́сти, и҆лѝ въ печа́ли, та́же си́це въ чꙋ́вствѣ, и҆ посе́мъ во ѡ҆сѧза́нїи ви́димомъ, и҆ неѧ́вномъ во всѣ́хъ, съ послѣ́дꙋющимъ, по́мысломъ, кромѣ̀ пе́рвагѡ движе́нїѧ, є҆мꙋ́же прїѧ́тꙋ не бы́вшꙋ, всѐ є҆́же по не́мъ ѕло̀ недѣ́йственно ѡ҆брѧ́щетсѧ.

рк҃д. Приближа́ющїисѧ ᲂу҆́бѡ къ безстра́стїю, мечта́нїи є҆ди́нѣми коле́блеми сꙋ́ть, жела́нїи же, ᲂу҆мѣ́реннѡ стра́стнїи, въ чꙋ́вствѣ же быва́ютъ ѕла́гѡ. Ѕлоꙋпотреблѧ́ющїи ᲂу҆́бѡ потрє́бнаѧ, но скорбѧ́щїи, во ѡ҆сѧза́нїи же сопребыва́ющїи съ ни́мъ безпеча́льнѡ.

рк҃є. Сла́сть во всѣ́хъ ᲂу҆́бѡ тѣле́сныхъ сѣда́лище и҆́мать ᲂу҆десѣ́хъ, не всѣ̑мъ же та́кожде стꙋжа́ющи ви́дитсѧ, но ѻ҆́вѣмъ ᲂу҆́бѡ наипа́че въ жела́тельной ча́сти дꙋшѝ, ѻ҆́вѣмъ же въ ꙗ҆́ростной, и҆нѣ́мъ же въ слове́снѣй, чревобѣ́сїемъ, ꙗ҆́ростїю и҆ лꙋка́вствомъ, вино́ю всѣ́хъ скве́рныхъ страсте́й.

рк҃ѕ. Нꙋ́ждно ᲂу҆̀бо є҆́сть чꙋ̑вства ꙗ҆́кѡ врата̀ ѿверза́ти гра́да: нꙋ́ждно же не попꙋща́ти во ѿверзе́нїи нꙋ́ждныхъ совходи́ти ꙗ҆зы́кѡмъ, хотѧ́щымъ бра́ней и҆ ра́ти винѡ́внымъ быва́ющїѧ.

рк҃з. Сла́сть ᲂу҆́бѡ, ма́ти жела́нїѧ: ꙗ҆́рости же ѡ҆строже́лчїе, за́висти же лꙋка́вство быва́етъ: не и҆́мать же ми́ра съ послѣ́дними, проти́вꙋ нача́льныхъ не подвиза́ѧйсѧ, нижѐ въ приста́нище ᲂу҆мѣренностра́стїѧ мо́жетъ входи́ти нꙋ́ждею за́пѡвѣди дѣ́лаѧ.

рк҃и. Прило́ги ѿража́ющїи не попꙋща́ютъ внꙋ́трь слове́снагѡ вїногра́да, ꙗ҆́кѡ ѕвѣрє́мъ, помыслѡ́мъ входи́ти, и҆ сꙋ́щихъ є҆гѡ̀ на вре́дъ быва́ти. Сочетава́ющїисѧ же ᲂу҆́бѡ, но не соꙋслажда́ющїисѧ, про́стѣ входи́ти тѣ̑мъ попꙋща́ютъ. Не каса́тисѧ же ничесогѡ̀ сꙋ́щихъ є҆гѡ̀, сла́дцѣ же ᲂу҆́бѡ сочетава́ющїисѧ со страстьмѝ чрез̾ по́мыслы, въ сосложе́нїе же не приходѧ́щїи, ᲂу҆подо́бишасѧ ѡ҆ста́вльшымъ вє́при ди̑вїѧ внꙋ́трь села̀, и҆ ѻ҆пло́та вни́ти, въ сы́тости же тогѡ̀ вїногра́дныхъ бы́ти гро́здїй не попꙋсти́вшымъ. Та́же ѡ҆брѣто́ша того̀ си́лы своеѧ̀ крѣ́пльша, въ сосложе́нїи мно́жицею страсте́й ѡ҆брѣта́ющеесѧ.

рк҃ѳ. Не ᲂу҆̀ дости́же въ простотꙋ̀ є҆щѐ тре́бꙋѧй прилѣжа́нїѧ ѡ҆ ѻ҆пло́тѣ воздержа́нїѧ: соверше́нный бо, глаго́летъ, не возде́ржитсѧ, но є҆щѐ подвиза́ѧйсѧ. Подо́бенъ же є҆́сть и҆мꙋ́щемꙋ вїногра́дъ и҆лѝ ни́вꙋ, не посредѣ̀ мно́гихъ и҆ны́хъ вїногра̑дъ и҆лѝ ни́въ, но во ᲂу҆́глѣ нѣ́гдѣ: и҆ сегѡ̀ ра́ди тре́бꙋющемꙋ мно́га хране́нїѧ, и҆ трезве́нїѧ. Въ простотꙋ́ бо прише́дшагѡ ѿ всегѡ̀ вїногра́дъ неприкоснове́нъ быва́етъ. Ꙗ҆́коже царю̀ и҆лѝ и҆но́мꙋ комꙋ̀ вкꙋ́пѣ нача́льствꙋющꙋ стра́шнꙋ, и҆ ѿ є҆ди́нагѡ слꙋ́ха, татє́мъ же и҆ приходѧ́щымъ, ᲂу҆жаса́тисѧ творѧ́щымъ начина́нїе.

р҃л. Мно́зи ᲂу҆́бѡ на кре́стъ ѕлострада́нїѧ восхо́дѧтъ, ма́ли же и҆ гвѡ́здїѧ є҆гѡ̀ прїе́млютъ: трꙋдѡ́въ бо и҆ скорбе́й ꙗ҆̀же по произволе́нїю послꙋшли́ви мно́зи, без̾ произволе́нїѧ же приходѧ́щихъ, є҆ди́ни мі́рꙋ семꙋ̀ соверше́ннѣ ᲂу҆ме́ршїи и҆ поко́ю є҆гѡ̀.

рл҃а. Всѣ́хъ ᲂу҆́бѡ ко́жаныхъ ри́зъ мно́зи совлеко́шасѧ, послѣ́днїѧ же ꙗ҆̀же тщесла́вїѧ, є҆ди́ни и҆̀же ма́тери є҆гѡ̀ самоꙋго́дїѧ возгнꙋша́вшїисѧ.

рл҃в. Похвалꙋ̀ человѣ̑къ и҆ ѻ҆тра́дꙋ тѣ́ла прїе́млѧй, ᲂу҆́бѡ не стерпѣва́ѧй же, се́й послѣ́днїѧ тщесла́вїѧ ри́зы на́гъ бы́въ, со мно́гими воздыха́нїи взыскꙋ́емагѡ жили́ща нбⷭ҇нагѡ въ свѣ́тлость ѿсю́дꙋ сподо́бисѧ ѡ҆блещи́сѧ.

рл҃г. И҆́но дѣ́йство, и҆ и҆́но дѣ́йстованїе, и҆ сїѐ ᲂу҆́бѡ грѣха̀ соверши́вшагѡсѧ є҆́сть показа́тельно, то́ же сладостра́стїѧ є҆ди́нагѡ внꙋтрьꙋ́дꙋ дѣ́йствꙋемагѡ, но не внѣ̀: ꙗ҆́коже ѿ своеѧ̀ ᲂу҆́бѡ не преходѧ́щїи землѝ, да́нь же носѧ́щїи ѻ҆ба́че нача́льствꙋющымъ тоѧ̀ жела́ннꙋю.

рл҃д. Вкꙋ́сꙋ держа́щꙋсѧ въ сласте́хъ, не возмо́жно и҆ всѣ̑мъ чꙋ́вствамъ не спослѣ́дствовати, а҆́ще хла́днѣйшихъ и҆ ми́рна бы́ти мнѧ́тсѧ подчрє́внаѧ, ꙗ҆́коже ꙗ҆̀же состарѣ́вшихсѧ, разжже́нїѧ не стра́ждꙋщихъ ѿ ᲂу҆вѧде́нїѧ. Но не за є҆́же не ражда́ти цѣломꙋ́дренна непло́ды прелюбодѣ́йствꙋющи сꙋжде́на бꙋ́детъ. Цѣломꙋ́дрствовати же всѧ́каго не стра́ждꙋщаго внꙋ́трь, реклѝ бы́хомъ ни зрѣ́нїемъ ᲂу҆слажда́ющагосѧ.

рл҃є. Въ пи́щи и҆ зрѣ́нїи и҆ гла́сѣхъ жела́тельное дꙋшѝ ѡ҆блича́етсѧ, ꙗ҆ково̀ є҆́сть: ᲂу҆слади́тельными же и҆ и҆́накѡ сꙋ́щими во вкꙋ́сѣ, и҆ зрѣ́нїи, и҆ слꙋ́хѣ, и҆лѝ ꙗ҆́кѡ ᲂу҆потреблѧ́юще и҆̀хъ, и҆лѝ ꙗ҆́кѡ ѕлоꙋпотреблѧ́юще, и҆лѝ сре́дственнѡ ко ѻ҆бои́мъ ѡ҆брѣта́ющесѧ.

рл҃ѕ. Въ ни́хже стра́хъ не предварѧ́етъ, ꙗ҆́кѡ ѻ҆́вцы, не и҆мꙋ́ще па́стырѧ въ смꙋще́нїи по́мыслы ѡ҆брѧ́щꙋтсѧ, во благочи́нїи же и҆ внꙋ́трь ѡ҆гра́ды сꙋ́щыѧ по благозако́нїю, послѣ́дꙋющꙋ и҆лѝ пред̾идꙋ́щꙋ є҆мꙋ̀.

рл҃з. Вѣ́ры сы́нъ є҆́сть стра́хъ, за́повѣдей же се́й є҆́сть па́житникъ: и҆ и҆́же ма́терь не стѧжа́вый, ѻ҆вча̀ ꙗ҆ви́тсѧ, ꙗ҆́же ѡ҆ гдⷭ҇ѣ па́жити не сподо́битсѧ.

рл҃и. Ѻ҆́ви ᲂу҆́бѡ нача̑ла є҆ди̑на и҆́мꙋтъ до́брыхъ, ѻ҆́ви же и҆ си́хъ среды̑ ѻ҆́ви же и҆ концы̀ и҆́хъ: без̾ ни́хже ꙗ҆́кѡ во́инъ на́гъ кі́йждо ѡ҆брѧ́щетсѧ, и҆лѝ сано́вникъ без̾ ѻ҆бро́кѡвъ. И҆ сегѡ̀ ра́ди то́й ᲂу҆́бѡ свою̀ то́кмѡ хра́минꙋ, ѿ начина́ющихъ тѣ́й стꙋжа́ти соблюда́ѧ, се́й же не въ че́сти прили́чнѣ ѡ҆брѣта́ѧсѧ, съ ни́миже а҆́ще собира́етсѧ.

рл҃ѳ. Подꙋща́ющїи на́съ со сластьмѝ ходи́ти горта́нїю несоверше́нныхъ сꙋ́щихъ, подо́бно нѣ́что творѧ́тъ срѣ́зовати побꙋжда́ющымъ ра̑ны во здра́вїе ᲂу҆жѐ прише́дшыѧ, и҆лѝ кра́сты за сла́дость чеса́ти, и҆лѝ возжига̑ющаѧ ѻ҆гне́вицꙋ ꙗ҆́сти, и҆лѝ разгражда́ти вїногра́дъ сво́й, и҆ попꙋща́ти входи́ти ꙗ҆́кѡ ве́прю ди́вїю мꙋдрова́нїю пло́ти, и҆ мы̑сли благі̑ѧ ꙗ҆́кѡ грѡ́здїѧ поѧда́ти, и҆̀мже повинова́тисѧ не подоба́етъ, нижѐ безвре́менными прекланѧ́тисѧ ласка́нїи, человѣ̑къ же и҆ страсте́й, ᲂу҆крѣплѧ́ти же па́че ѻ҆пло́тъ воздержа́нїемъ, до́ндеже преста́нꙋтъ и҆ ѕвѣ́рїе плотскі̑ѧ стра̑сти рыка́ти, и҆ ꙗ҆́кѡ пти́цы по́мыслы не сходи́ти гꙋби́ти вїногра́дъ, гобзꙋ́ющꙋ дꙋ́шꙋ видѣ́нїи, ꙗ҆́же во хрⷭ҇тѣ̀ і҆и҃сѣ гдⷭ҇ѣ на́шемъ, є҆мꙋ́же сла́ва во вѣ́ки, а҆ми́нь.

Преподо́бный ѻ҆те́цъ на́шъ кассїа́нъ ри́млѧнинъ живѧ́ше въ ца́рство ѳеодо́сїа ю҆нѣ́йшагѡ, въ лѣ́то ѿ хрⷭ҇та̀ четы́реста три́десѧть тре́тїе. Ѿ трꙋдолю́бнѡ сочине́нныхъ и҆́мъ сло́въ, ѡ҆ ѻ҆смѝ по́мыслѣхъ, и҆ ѡ҆ разсꙋжде́нїи здѣ̀ положи́шасѧ, ꙗ҆́кѡ всѧ́кꙋ по́льзꙋ и҆ благода́ть и҆сточа́ющыѧ. Помина́етъ же ѡ҆ си́хъ и҆ премꙋ́дрѣйшїй фѡ́тїй си́ми словесы̀ глаго́лѧ: въ чте́нїи рч҃з, страни́цѣ сѯ҃є и҆ сѯ҃ѕ. И҆ второ́е, речѐ, є҆́сть преподо́бнагѡ кассїа́на сло́во, ѡ҆ ѻ҆смѝ по́мыслѣхъ: на чревобѣ́сїе, блꙋ́дъ, сребролю́бїе, гнѣ́въ, печа́ль и҆ ᲂу҆ны́нїе, тщесла́вїѧ же и҆ горды́ни каса́етсѧ. Поле́зна же, а҆́ще что̀ и҆́но сꙋ́ть словеса̀ сїѧ̑ и҆зволѧ́ющымъ трꙋдолю́бный воспрїѧ́ти по́двигъ. И҆ тре́тїе же съ си́ми кꙋ́пнѡ сло́во прочтено̀ на́ми. Оу҆́читъ ѻ҆́нъ въ то́мъ, что̀ є҆́сть разсꙋжде́нїе, и҆ ꙗ҆́кѡ сїѐ бо́льшее є҆́сть и҆ны́хъ добродѣ́телей, и҆ ѿкꙋ́дꙋ ражда́етсѧ, и҆ ꙗ҆́кѡ мно́жае свы́ше сходѧ́щь є҆́сть да́ръ, и҆ прѡ́чаѧ.

Ѡ҆ се́мъ преподо́бномъ и҆ цр҃ковь, к҃ѳ феврꙋа́рїа мцⷭ҇а творѧ̀ па́мѧть, честьми́ же и҆ хвала́ми ᲂу҆блажа́етъ є҆го̀.

Пред̾ си́мъ ѡ҆ ѡ҆́бразѣ ѻ҆бщежи́тїй сочини́вше сло́во, па́ки въ настоѧ́щемъ на ва́ши дерзнꙋ́вше моли́твы, предпрїѧ́хомъ написа́ти ѡ҆ ѻ҆смѝ по́мыслѣхъ грѣха̀: ѡ҆ ѡ҆б̾ѧде́нїи глаго́лю, и҆ блꙋдѣ̀, ѡ҆ сребролю́бїи, гнѣ́вѣ, печа́ли, ᲂу҆ны́нїи, тщесла́вїи и҆ горды́ни.

Ѡ҆ воздержа́нїи чре́ва.

Первонача́льнѣ ѡ҆ воздержа́нїи чре́ва на́ми рече́тсѧ, противолежа́щемъ чревоѡб̾ѧде́нїю: ѡ҆ ѡ҆́бразѣ поще́нїѧ и҆ ка́чествѣ и҆ коли́чествѣ бра́шенъ: и҆ сїѧ̑ не ѿ себѐ рече́мъ, но ꙗ҆̀же прїѧ́хомъ ѿ ст҃ы́хъ ѻ҆тє́цъ. Ѻ҆нѝ ᲂу҆́бѡ не є҆ди́но пра́вило поще́нїѧ, нижѐ є҆ди́нъ ѡ҆́бразъ прїѧ́тїѧ пи́щи, ни тꙋ́южде мѣ́рꙋ преда́ша: за є҆́же не всѣ̑мъ тꙋ́южде и҆мѣ́ти крѣ́пость, и҆лѝ во́зраста ра́ди, и҆лѝ не́мощи ра́ди, и҆лѝ по навыкнове́нїю ра́ди сво́йства тѣ́ла. Въ є҆ди́номъ же всѣ́мъ то̀ преда́ша намѣ́ренїи, бѣ́гати многоѧ́стїѧ, и҆ ѿвраща́тисѧ и҆зли́шества бра́шенъ. Повседне́вное съ ᲂу҆мѣ́ренностїю прїѧ́тїе пи́щи поле́знѣйшее и҆скꙋси́ша бы́ти, и҆ чистотѣ̀ споспѣшествꙋ́ющее па́че, не́жели чрез̾ трѝ и҆лѝ четы́ре дни̑, и҆лѝ до седми́цы простира́ющеесѧ поще́нїе. И҆́бо, речѐ, безмѣ́рнѣ простира́ющїйсѧ на поще́нїе, вы́ше мѣ́ры пото́мъ ча́стѣ ᲂу҆потреблѧ́етъ пи́щꙋ: ꙗ҆́кѡ ѿ сегѡ̀, ѻ҆вогда̀ ᲂу҆́бѡ ѿ чрезмѣ́рнагѡ неѧде́нїѧ и҆знемога́етъ тѣ́ло, и҆ къ дх҃о́внымъ слꙋже́нїємъ лѣни́вѣйшее быва́етъ: ѻ҆вогда́ же мно́жествомъ ꙗ҆́ствъ ѡ҆тѧгча́емое, ᲂу҆ны́нїе и҆ разслабле́нїе твори́тъ въ дꙋшѣ̀. И҆ па́ки: не всѣ̑мъ прили́чно бы́ти и҆скꙋси́ша ᲂу҆потребле́нїе ѕѣ́лїй и҆ ѻ҆воще́й, нижѐ всѣ̑мъ мощѝ ᲂу҆потреблѧ́ти пи́щꙋ сꙋ́хагѡ хлѣ́ба. И҆ и҆но́мꙋ ᲂу҆́бѡ рѣ́ша, двѣ̀ ли̑трѣ ꙗ҆дꙋ́щꙋ хлѣ́ба є҆щѐ а҆лка́ти: и҆но́мꙋ же ꙗ҆дꙋ́щꙋ ли́трꙋ и҆лѝ ше́сть ᲂу҆́нгїй, насыща́тисѧ. Всѣ̑мъ ᲂу҆́бѡ, ꙗ҆́коже предрече́сѧ, є҆ди́нъ предѣ́лъ воздержа́нїѧ преда́ша, є҆́же не прельща́тисѧ насыще́нїемъ чре́ва, нижѐ привлека́тисѧ сла́стїю горта́ни. Ниже́ бо разли́чїе ка́чества бра́шенъ то́чїю, но и҆ коли́чество мно́жества ѻ҆́нѣхъ разжжє́нныѧ стрѣ́лы блꙋда̀ ѡ҆бы́че возжига́ти. Ꙗ҆ковы́ѧлибо когда̀ пи́щи наполнѧ́емо чре́во, блꙋ́дное сѣ́мѧ ражда́етъ. И҆ па́ки, не то́чїю пїѧ́нство вїна̀ мы́сль ᲂу҆поева́ти ѡ҆бы́че, но и҆ сы́тость воды̀, и҆ всѧ́кихъ бра́шенъ и҆збы́токъ ѡ҆тѧгче́ннꙋ и҆ дре́млющꙋ тꙋ̀ содѣ́ловаетъ. Содо́млѧнѡмъ не вїна̀ и҆ разли́чныхъ бра́шенъ пїѧ́нство низвраще́нїѧ бы́сть вїна̀, но хлѣ́ба сы́тость, по проро́кꙋ¹⁴⁸⁵. Не́мощь тѣле́снаѧ чистотѣ̀ се́рдца не сопротивлѧ́етсѧ, є҆гда̀ подае́мъ тѣ́лꙋ, ꙗ҆̀же не́мощь тре́бꙋетъ, а҆ не ꙗ҆̀же сла́сть хо́щетъ. Бра́шенъ ᲂу҆потребле́нїе, є҆ли́кѡ послꙋжи́ти къ житїю̀ прїе́млетсѧ, а҆ не є҆ли́кѡ рабо́тати стремле́нїємъ по́хоти. Оу҆мѣ́ренное и҆ съ ра́зꙋмомъ пи́щи прїѧ́тїе здра́вїѧ прича́стно быва́етъ тѣле́снагѡ, а҆ не свѧты́ню ѿе́млетъ. Предѣ́лъ воздержа́нїѧ, и҆ пра́вило пре́данно ѿ ѻ҆тє́цъ и҆звѣ́стно є҆́сть сїѐ: вкꙋша́ющемꙋ каковꙋ́юлибо пи́щꙋ, є҆щѐ жела́нїю въ не́мъ сꙋ́щꙋ, ѿ тоѧ̀ воздержа́тисѧ, и҆ не ѡ҆жида́ти насыще́нїѧ. И҆ а҆по́столъ ре́кшїй, пло́ти ᲂу҆го́дїѧ не твори́ти въ по́хоти¹⁴⁸⁶, не нꙋ́жное жи́зни ѡ҆кормле́нїе возбранѝ, но сластолю́бное прилѣжа́нїе ѿречѐ. Прито́мъ же къ чистотѣ̀ соверше́ннѣй дꙋшѝ, є҆ди́но воздержа́нїе бра́шенъ не си́льно, а҆́ще не и҆ про́чыѧ добродѣ̑тели соединѧ́тсѧ. Тѣ́мже смире́нїе съ послꙋша́нїемъ и҆ тѣ́ла ᲂу҆дрꙋче́нїемъ мно́гѡ на́мъ посо́бствꙋютъ. Воздержа́нїе ѿ сребролю́бїѧ, не то́чїю, є҆́же не и҆мѣ́ти сребра̀, но и҆ не вожделѣ́ти стѧжа́ти ѻ҆́ное, къ чистотѣ̀ дꙋшѝ пꙋтево́дствꙋетъ. Гнѣ́ва ᲂу҆дале́нїе, печа́ли, тщесла́вїѧ, горды́ни, всѧ̑ сїѧ̑ гла́внꙋю дꙋшѝ чистотꙋ̀ содѣ́ловаютъ. Ча́стнꙋ же цѣломꙋ́дрїемъ, сі́есть, чистотꙋ̀ дꙋшѝ и҆зрѧ́днѡ воздержа́нїе и҆ по́стъ и҆справлѧ́етъ. Не возмо́жно бо чре́вомъ насыще́нномꙋ проти́вꙋ дꙋ́ха блꙋда̀ ра́товати въ мы́сли. Тѣ́мже пе́рвый на́мъ да бꙋ́детъ по́двигъ, є҆́же ѡ҆блада́ти чре́вомъ, и҆ порабоща́ти тѣ́ло: не то́чїю посто́мъ, но и҆ бдѣ́нїемъ, и҆ трꙋдо́мъ, и҆ чте́нїемъ, и҆ є҆́же собира́ти се́рдце въ стра́хъ гее́нны, и҆ въ жела́нїе ца́рствїѧ небе́снагѡ.

Ѡ҆ стра́сти блꙋ́днѣй и҆ по́хоти плотстѣ́й.

Вторы́й на́мъ по́двигъ є҆́сть проти́вꙋ стра́сти блꙋда̀, и҆ по́хоти пло́ти: сїѧ̀ по́хоть ѿ пе́рвагѡ во́зраста начина́етъ стꙋжа́ти человѣ́кꙋ. Вели́кїй се́й по́двигъ и҆ лю́тъ, и҆ сꙋгꙋ́бꙋ и҆мꙋ́щъ борьбꙋ̀. Поне́же и҆ны̑мъ поро́камъ въ дꙋшѣ̀ то́чїю и҆мꙋ́щымъ бра́нь, се́й же сꙋгꙋ́бꙋ є҆́сть въ дꙋшѣ̀ и҆ тѣ́лѣ составлѧ́емый: и҆ сегѡ̀ ра́ди сꙋгꙋ́бо боре́нїе воспрїѧ́ти подоба́етъ. Ни бо̀ дово́льно є҆́сть є҆ди́но тѣле́сное поще́нїе къ стѧжа́нїю соверше́ннагѡ цѣломꙋ́дрїѧ и҆ и҆́стинныѧ чистоты̀, а҆́ще и҆ се́рдца не бꙋ́детъ сокрꙋше́нїе, и҆ моли́тва къ бг҃ꙋ непреста́ннаѧ, и҆ ча́стое писа́нїй поꙋче́нїе, и҆ трꙋ́дъ, и҆ рꙋкодѣ́лїе: ꙗ҆̀же мо́гꙋтъ непостоѧ́ннаѧ дꙋшѝ стремлє́нїѧ ᲂу҆де́рживати, и҆ ѿ скве́рныхъ мечта́нїй возвраща́ти ю҆̀. Пре́жде же всѣ́хъ споспѣшествꙋ́етъ смире́нїе дꙋшѝ, є҆гѡ́же кромѣ̀, ни блꙋ́дъ, ни и҆́но что̀ возмо́жетъ кто̀ побѣди́ти. Предвари́тельнѣ ᲂу҆́бѡ подоба́етъ всѧ́кимъ хране́нїемъ блюстѝ се́рдце ѿ скве́рныхъ по́мыслѡвъ: ѿ сегѡ́ бо происхо́дѧтъ, по гдⷭ҇ню сло́вꙋ, помышлє́нїѧ ѕла̑ѧ, ᲂу҆бі̑йства, прелюбодѣѧ̑нїѧ, любодѣѧ̑нїѧ¹⁴⁸⁷, и҆ прѡ́чаѧ. И҆́бо и҆ поще́нїе, не то́чїю къ ᲂу҆дрꙋче́нїю тѣ́ла на́мъ ᲂу҆зако́нено є҆́сть, но и҆ къ трезвѣ́нїю ᲂу҆ма̀, да не мно́жествомъ бра́шенъ помрачи́всѧ и҆знемо́жетъ къ наблюде́нїю по́мыслѡвъ. Подоба́етъ ᲂу҆́бѡ не то́чїю въ тѣле́сномъ поще́нїи всѧ́ко тща́нїе ꙗ҆влѧ́ти, но и҆ во внима́нїи по́мыслѡвъ, и҆ въ дх҃о́вномъ поꙋче́нїи: и҆́хже кромѣ̀ не возмо́жнѡ къ высотѣ̀ и҆́стиннагѡ цѣломꙋ́дрїѧ и҆ чистоты̀ взы́ти. Прили́чествꙋетъ ᲂу҆́бѡ на́мъ ѡ҆чища́ти пе́рвѣе, по гдⷭ҇ню сло́вꙋ, внꙋ́треннее стклѧ́ницы и҆ блю́да, да бꙋ́детъ и҆ внѣ́шнее чи́сто¹⁴⁸⁸. Сегѡ́ же ра́ди а҆́ще є҆́сть въ на́съ тща́нїе по а҆пⷭ҇лꙋ, зако́ннѡ подвиза́тисѧ и҆ ᲂу҆вѣнча́тисѧ побѣди́вшымъ нечи́стаго бѣ́са блꙋ́днаго, не ѡ҆ на́шей си́лѣ и҆ по́двизѣ дерза́имъ, но ѡ҆ по́мощи влⷣки на́шегѡ бг҃а: не престае́тъ бо человѣ́къ ра́тꙋемь бы́ти ѿ дꙋ́ха сегѡ̀, до́ндеже вои́стиннꙋ вѣ́ровати бꙋ́детъ, ꙗ҆́кѡ не свои́мъ тща́нїемъ, ни свои́мъ трꙋдо́мъ, но бж҃їимъ покро́вомъ и҆ по́мощїю и҆збавлѧ́етсѧ сегѡ̀ недꙋ́га, и҆ на высотꙋ̀ чистоты̀ восхо́дитъ: и҆ па́че є҆стества̀ є҆́сть ве́щь, и҆ нѣ́кїимъ ѡ҆́бразомъ внѣ̀ тѣ́ла быва́етъ, и҆́же разжє́нїѧ пло́ти и҆ сла̑сти тоѧ̑ попра́вый. И҆ сегѡ̀ ра́ди, не возмо́жно є҆́сть человѣ́кꙋ (да та́кѡ рекꙋ̀) свои́ма крыло́ма къ высо́кой се́й, и҆ небе́сной по́чести ст҃ы́ни возлетѣ́ти, и҆ подража́телю а҆́гг҃лъ бы́ти, а҆́ще не благода́ть бж҃їѧ, сего̀ ѿ землѝ и҆ бла́та возведе́тъ. Ни є҆ди́ною бо и҆но́ю добродѣ́телїю ѡ҆бложе́нные пло́тїю человѣ́цы дꙋхѡ́внымъ па́че подо́бѧтсѧ а҆́гг҃лѡмъ, ꙗ҆́коже цѣломꙋ́дрїемъ. Се́ю бо є҆щѐ на землѝ сꙋ́ще и҆ пребыва́юще, и҆́мꙋтъ по а҆по́столꙋ житїѐ на нб҃сѣ́хъ¹⁴⁸⁹. Зна́менїе же, є҆́же добродѣ́тель сїю̀ соверше́ннѡ стѧжа́ти на́мъ, є҆́сть, є҆гда̀ ни є҆ди́номꙋ ѡ҆́бразꙋ скве́рнагѡ мечта́нїѧ во снѣ́хъ дꙋша̀ внима́етъ. А҆́ще бо и҆ не вмѣнѧ́етсѧ въ грѣ́хъ таково́е движе́нїе, ѻ҆ба́че зна́менїе є҆́сть, ꙗ҆́кѡ недꙋ́гꙋетъ дꙋша̀, и҆ стра́сти не и҆зба́висѧ. И҆ сегѡ̀ ра́ди слꙋча́ющаѧсѧ на́мъ во снѣ́хъ сквє́рнаѧ мечта̑нїѧ, ѡ҆бличе́нїе бы́ти предвари́вшагѡ ᲂу҆ны́нїѧ, и҆ сꙋ́щїѧ въ на́съ не́мощи, вѣ́ровати до́лжни є҆смы̀: сокрове́нный въ та́йностѣхъ дꙋшѝ недꙋ́гъ ꙗ҆вле́нъ творѧ́щꙋ, слꙋча́ющꙋсѧ въ со́нномъ видѣ́нїи скве́рномꙋ и҆скꙋше́нїю. Тѣ́мже и҆ вра́чь дꙋ́шъ на́шихъ, въ та́йныхъ дꙋшѝ цѣльбꙋ̀ положѝ, и҆дѣ́же и҆ вины̑ недꙋ́га вѣ́дѧше бы́ти, глаго́лѧ: ꙗ҆́кѡ всѧ́къ, и҆́же воззри́тъ на женꙋ̀, ко є҆́же вожделѣ́ти є҆ѧ̀, ᲂу҆жѐ любодѣ́йствова съ не́ю въ се́рдцѣ свое́мъ¹⁴⁹⁰: не толи́кѡ любопы̑тныѧ, и҆ блꙋ̑дныѧ ѻ҆́чи и҆справлѧ́ѧ, є҆ли́кѡ внꙋ́трь водрꙋже́ннꙋю дꙋ́шꙋ, ꙗ҆́же да̑нныѧ на бла́го ѿ бг҃а ѻ҆́чи, ѕлѣ̀ ᲂу҆потребѝ. Сегѡ̀ ра́ди и҆ премꙋ́драѧ при́тча не глаго́летъ: всѧ́цѣмъ хране́нїемъ блюдѝ твоѝ ѻ҆́чи, но всѧ́цѣмъ хране́нїемъ блюдѝ се́рдце¹⁴⁹¹: ѻ҆́номꙋ наипа́че нало́жиши врачевство̀ хране́нїѧ, во є҆́же хо́щетъ ѻ҆чеса̀ ᲂу҆потреблѧ́ющемꙋ. Тѣ́мже сїѐ да бꙋ́детъ се́рдца на́шегѡ пред̾ѡхране́нїе: да є҆гда̀ въ на́шей мы́сли па́мѧть бꙋ́детъ жены̀, дїа́вольскимъ ѕлодѣ́йствомъ произра́стшаѧ, а҆́ще слꙋчи́тсѧ ма́тере, и҆лѝ сестры̀, и҆лѝ и҆нѣ́хъ нѣ́кїихъ же́нъ благоговѣ́йныхъ, ско́рѡ сїю̀ и҆зго́нимъ ѿ се́рдца: да не на мно́зѣ пребыва́ющымъ на́мъ въ се́й па́мѧти, ѕлы́хъ преле́стникъ ѿ си́хъ ли́цъ низведе́тъ и҆ низри́нетъ мы́сль въ сквє́рнаѧ и҆ врє́днаѧ помышлє́нїѧ. Ꙗ҆́коже и҆ ѿ бг҃а къ первозда́нномꙋ да́ннаѧ за́повѣдь повелѣва́етъ блюстѝ главꙋ̀ ѕмі́евꙋ¹⁴⁹²: сі́есть вре́дныхъ по́мыслѡвъ нача̑ла, и҆́миже ползстѝ въ дꙋ́шы на́шѧ покꙋша́етсѧ: да не главы̀ прїѧ́тїемъ, ꙗ҆́же є҆́сть прило́гъ по́мысла, про́чее тѣ́ло ѕмі́ѧ, сі́есть, сла́сти сосложе́нїе прїи́мемъ. И҆ ѿ сегѡ̀ а҆́бїе на беззако́нное дѣѧ́нїе низведе́тъ мы́сль. Но прили́чествꙋетъ по пи́санномꙋ, во ᲂу҆́трїѧ и҆збива́ти всѧ̑ грѣ̑шныѧ землѝ¹⁴⁹³. си́рѣчь свѣ́томъ ра́зꙋма разсꙋжда́ти и҆ потреблѧ́ти грѣхѡ́вныѧ по́мыслы ѿ землѝ, ꙗ҆́же є҆́сть се́рдце на́ше, по ᲂу҆че́нїю гдⷭ҇ню: и҆ доко́лѣ є҆щѐ младе́нцы сꙋ́ть сы́ны вавѷлѡ́нскїи, ѕлы́и, глаго́лю, по́мыслы, си́хъ разбива́ти и҆ сокрꙋша́ти ѡ҆ ка́мень, и҆́же є҆́сть хрⷭ҇то́съ¹⁴⁹⁴. А҆́ще во на́шимъ сосложе́нїемъ возмꙋжа́ютъ, не без̾ вели́ка воздыха́нїѧ и҆ трꙋда̀ побѣжде́ни бы́ти мо́гꙋтъ. Къ речє́ннымъ же ѡ҆ бж҃е́ственнагѡ писа́нїѧ, добро̀ є҆́сть и҆ словеса̀ ст҃ы́хъ ѻ҆тє́цъ воспомѧнꙋ́ти. Рече́но бы́сть ᲂу҆̀бо ст҃ы́мъ васі́лїемъ, є҆пі́скопомъ кесарі́и каппадокі́йскїѧ: и҆ жены̀ не зна́ю, и҆ дѣ́вственникъ нѣ́смь. Толи́кѡ вѣ́дѧше, ꙗ҆́кѡ не въ тѣле́снѣмъ то́чїю воздержа́нїи ѿ жены̀, да́ръ дѣ́вства и҆справлѧ́етсѧ, є҆ли́кѡ въ дꙋше́внѣй свѧ́тости и҆ чистотѣ̀, ꙗ҆́же стра́хомъ бж҃їимъ и҆справлѧ́тисѧ ѡ҆бы́че. Глаго́лютъ же и҆ сїѐ ѻ҆тцы̀: ꙗ҆́ко не возмо́жно на́мъ добродѣ́тель чистоты̀ соверше́ннѡ стѧжа́ти, а҆́ще не пе́рвѣе и҆́стинное смиренномꙋ́дрїе въ се́рдцѣ на́шемъ стѧ́жемъ: ни ра́зꙋма и҆́стиннагѡ сподо́битисѧ, доко́лѣ въ та́йныхъ дꙋшѝ стра́сть блꙋ́днаѧ присѣди́тъ. Но, да ꙗ҆̀же сꙋ́ть, и҆справле́нїѧ цѣломꙋ́дрїѧ, и҆ ѿ а҆по́стола пока́жемъ, є҆ди́но є҆гѡ̀ воспомѧнꙋ́вше рече́нїе, ѡ҆ко́нчимъ сло́во: ми́ръ и҆мѣ́йте и҆ ст҃ы́ню со всѣ́ми, и҆́хже кромѣ̀ никто́же ᲂу҆́зритъ гдⷭ҇а¹⁴⁹⁵. Ꙗ҆́коже бо ѡ҆ се́мъ глаго́летъ ꙗ҆́вѣ, ѿ ни́хже приложѝ рекі́й: да никто́же блꙋдодѣ́й, и҆лѝ скверни́тель, ꙗ҆́коже и҆са́ѵъ¹⁴⁹⁶. Є҆ли́кѡ ᲂу҆́бѡ небе́сное и҆ а҆́гг҃льское є҆́сть и҆справле́нїе ст҃ы́ни, толи́кѡ тѧ́жшими сопроти́вникѡвъ навѣ́ты ра́тꙋемо є҆́сть. И҆ сегѡ̀ ра́ди тща́тисѧ до́лжни є҆смы̀, не то́чїю воздержа́нїю тѣле́сномꙋ ѡ҆бꙋча́тисѧ, но и҆ сокрꙋше́нїю се́рдца, и҆ ча́стымъ моли́твамъ со воздыха́нїи: ꙗ҆́кѡ да пе́щь на́шеѧ пло́ти, ю҆́же вавѷлѡ́нскїй ца́рь по́хотными разже́нїи возжига́етъ на всѧ́къ де́нь, росо́ю прише́ствїѧ ст҃а́гѡ дꙋ́ха ᲂу҆гаси́мъ. Къ си́мъ вели́ко на́мъ ѻ҆рꙋ́жїе бра́ни є҆́сть, є҆́сть по бг҃ꙋ бдѣ́нїе. Ꙗ҆́коже бо сохране́нїе днѧ̀ нощнꙋ́ю ᲂу҆строѧ́етъ свѧты́ню: си́це и҆ нощно́е по бг҃ꙋ бдѣ́нїе, дневнꙋ́ю дꙋшѝ пред̾ꙋготовлѧ́етъ чистотꙋ̀.

Ѡ҆ сребролю́бїи.

Тре́тїй на́шъ по́двигъ, проти́вꙋ дꙋ́ха сребролю́бїѧ. Стра́нна сїѧ̀ бра́нь, и҆ и҆звнѣ̀ є҆стества̀ познава́ема, ѿ невѣ́рїѧ винꙋ̀ во и҆́ноцѣ ѡ҆брѣта́ющи. И҆́бо и҆ны́хъ страсте́й, ꙗ҆́рости, глаго́лю, и҆ вожделѣ́нїѧ, раздраже́нїе ѿ тѣ́ла мни́тсѧ и҆мѣ́ти вины̀, и҆ нѣ̑кїимъ ѡ҆́бразомъ, ꙗ҆́кѡ врожде́нные, ѿ рожде́нїѧ и҆мꙋ́ще нача́ло: тѣ́мже и҆ мно́гимъ вре́менемъ побѣжда́ютсѧ: сребролю́бїѧ же недꙋ́гъ и҆звнѣ̀ приходѧ́щъ, ᲂу҆до́бѣе ѿсѣца́тисѧ мо́жетъ, а҆́ще прилѣжа́нїе полꙋ́читъ и҆ внима́нїе. Вознерадѣ́нъ же бы́въ, па́гꙋбнѣйшїй и҆ны́хъ страсте́й, и҆ неꙋдобоѿме́тенъ быва́етъ. Ко́рень бо всѣ̑мъ ѕлы̑мъ сребролю́бїе є҆́сть¹⁴⁹⁷, по а҆по́столꙋ. Смотрѧ́имъ же си́це: тѣлесѐ є҆сте́ствєннаѧ движє́нїѧ, не то́чїю въ дѣ́тѧхъ зрѧ́тсѧ, въ ни́хже не ᲂу҆̀ разꙋмѣ́нїе добра́ же и҆ ѕла̀ є҆́сть, но и҆ въ малѣ́йшихъ и҆ млекопита́емыхъ младе́нцахъ, и҆̀же нижѐ слѣ́да сла́сти въ себѣ̀ и҆мꙋ́ще є҆сте́ственное ѻ҆ба́че во пло́ти ѡ҆знача́ютъ движе́нїе. Подо́бнѡ и҆ ꙗ҆́рости ѻ҆строта̀ во младе́нцѣхъ ви́дима є҆́сть, є҆гда̀ сопротивоѧрѧ́щихсѧ и҆̀хъ ко ѡ҆скорби́вшымъ зри́мъ. И҆ сїѧ̑ глаго́лю не є҆стество̀ порица́ѧ, ꙗ҆́кѡ грѣхꙋ̀ вино́вно, да не бꙋ́детъ. Но да покажꙋ̀, ꙗ҆́кѡ ꙗ҆́рость и҆ жела́нїе, а҆́ще и҆ на бла́го ѿ содѣ́телѧ врожде́ны человѣ́кꙋ, но ѻ҆ба́че мни́тсѧ, ꙗ҆́кѡ ѡ҆ є҆сте́ственныхъ нѣ́какѡ въ сопротивоесте́ствєннаѧ ѿпа́даютъ небреже́нїемъ. И҆́бо тѣле́сное движе́нїе, къ чадоро́дїю, и҆ пото́мственномꙋ ро́да пребыва́нїю, не къ блꙋдꙋ̀ ѿ содѣ́телѧ даде́сѧ: и҆ ꙗ҆́рости же движе́нїе, спаси́тельнѣ на́мъ всѣ́ѧсѧ ꙗ҆ри́тисѧ на ѕло́бꙋ, а҆ не на є҆диноплеме́ннаго свирѣ́пствовати. Не ᲂу҆́бѡ, а҆́ще и҆ ѕлѣ̀ сїѧ̑ ᲂу҆потреблѧ́емъ, грѣшно̀ є҆́сть є҆стество̀, и҆лѝ содѣ́телѧ ѡ҆бвини́мъ: ꙗ҆́коже ни да́вшагѡ но́жъ къ нꙋ́ждной и҆ поле́зной потре́бѣ, а҆́ще прїе́мый и҆ къ содѣ́ѧнїю ᲂу҆бі́йства то́й ᲂу҆потребѝ. Сїѧ̑ же рѣ́хомъ показа́ти хотѧ́ще, ꙗ҆́кѡ сребролю́бїѧ стра́сть, не ѿ є҆стества̀ винꙋ̀ и҆́мать, но ѿ є҆ди́нагѡ ѕла́гѡ и҆ растлѣ́ннагѡ произволе́нїѧ. Се́й бо недꙋ́гъ, є҆гда̀ хла́днꙋ и҆ невѣ́рнꙋ въ нача́лѣ и҆́ночества ѡ҆брѧ́щетъ дꙋ́шꙋ, пра́ведныѧ нѣ́кїѧ и҆ по ви́димомꙋ благосло́вныѧ нѣ́кїѧ вины̀ ѻ҆́ной подме́щетъ, ко є҆́же ᲂу҆держа́ти что́либо ѿ ни́хже стѧжа̀. Написꙋ́етъ бо въ мы́сли и҆́нокꙋ ста́рости долготꙋ̀, и҆ не́мощь тѣ́ла, и҆ ꙗ҆́кѡ дає́мыѧ потрє́бы ѿ ѻ҆бщежи́тїѧ не сꙋ́ть дово́льни ко ᲂу҆тѣше́нїю, не глаго́лю, немощствꙋ́ющꙋ, но и҆ здра́вомꙋ, и҆ ꙗ҆́кѡ здѣ̀ не быва́етъ попече́нїе по достоѧ́нїю ѡ҆ недꙋ́гꙋющихъ, но и҆ ѕѣлѡ̀ вознерадѣ́нно, и҆ ꙗ҆́кѡ, а҆́ще не и҆́мать сокрове́нно зла́то, ѻ҆каѧ́ннѣ ᲂу҆́мретъ. Послѣди́ же подме́щетъ, ни пребыва́ти мощѝ намно́зѣ въ монастырѣ̀ тѧготы̀ ра́ди дѣ́лъ, и҆ ѻ҆те́ческїѧ ра́ди стро́гости. И҆ є҆гда̀ таковы́ми помышле́ньми прельсти́тъ мы́сль, ко є҆́же а҆́ще и҆ є҆ди́нъ пѣ́нѧзь ᲂу҆держа́ти: тогда̀ склонѧ́етъ є҆го̀ и҆ рꙋкодѣ́лїю ѻ҆́тай а҆́ввы наꙋчи́тисѧ, ѿ негѡ́же возмо́жетъ жела́емое себѣ̀ сребро̀ ᲂу҆мно́жити. Тѣ́мже и҆ наде́ждами безвѣ́стными прельща́етъ ѻ҆каѧ́ннаго, предлага́ѧ томꙋ̀ ѿ рꙋкодѣ́лїѧ прїѡбрѣ́тенїе, и҆ ѿ сегѡ̀ ѡ҆сла́бꙋ и҆ безпеча́лїе, и҆ ве́сь помышле́нїю ѡ҆ прїѡбрѣ́тенїи вда́всѧ, ничесо́же ѿ сопроти́вныхъ сматрѧ́етъ: ни гнѣ́ва неи́стовство, а҆́ще когда̀ слꙋчи́тсѧ є҆мꙋ̀ въ ᲂу҆бы́токъ впа́сти: ни помраче́нїе ѿ печа́ли, а҆́ще лиши́тсѧ наде́жды прїѡбрѣ́тенїѧ: но быва́етъ, ꙗ҆́коже и҆ны̑мъ чре́во бг҃ъ, та́кѡ семꙋ̀ зла́то. Тѣ́мже и҆ блаже́нный а҆пⷭ҇лъ сїѐ вѣ́дый, не то́чїю ко́рень всѣ̑мъ ѕлы̑мъ¹⁴⁹⁸, но і҆дѡлослꙋже́нїе то̀ наречѐ. Зри́мъ ᲂу҆́бѡ, въ ко́ль вели́къ грѣ́хъ недꙋ́гъ се́й человѣ́ка влече́тъ, ꙗ҆́кѡ и҆ во і҆дѡлослꙋже́нїе¹⁴⁹⁹, вве́ргнꙋти є҆го̀: ѿврати́въ бо сребролю́бецъ ᲂу҆́мъ сво́й ѿ любвѐ бж҃їѧ, і҆́дѡлы человѣ̑ческїѧ, и҆зва̑ѧнныѧ зла́томъ лю́битъ. Си́ми же по́мыслы и҆́нокъ помрачи́всѧ, и҆ на го́ршее простира́ѧсѧ, ни є҆ди́но ᲂу҆жѐ послꙋша́нїе и҆мѣ́ти мо́жетъ: но негодꙋ́етъ, смꙋща́етсѧ, и҆ проти́вꙋ коегѡ́ждо дѣ́ла ро́пщетъ, прекосло́витъ, и҆ ниеди́номꙋ же про́чее благоговѣ́инствꙋ въ не́мъ храни́мꙋ, ꙗ҆́коже ко́нь жесточа́йшъ по стремни́намъ но́ситсѧ: ни повседне́вною пи́щею дово́льствꙋѧсѧ, ꙗ҆́внѡ ѡ҆ себѣ̀ повѣ́даетъ, ꙗ҆́кѡ ѿню́дъ сегѡ̀ ѻ҆́нъ терпѣ́ти не мо́жетъ, и҆ бг҃а не та́мѡ то́чїю бы́ти глаго́летъ, ни своемꙋ̀ спасе́нїю во ѻ҆́номъ заключе́ннꙋ мѣ́стѣ: и҆ ꙗ҆́кѡ, а҆́ще не ᲂу҆дали́тсѧ ѿ монастырѧ̀ ѻ҆́нагѡ, поги́бнетъ. И҆ та́кѡ растлѣ́нномꙋ семꙋ̀ мнѣ́нїю, содѣ́йственника и҆мѣ́ѧ сохране́нны сре́бренники, ꙗ҆́коже кри́лы си́ми лего́къ бы́въ, и҆ и҆зше́ствїю ѿ монастырѧ̀ поꙋча́ѧсѧ: тѣ́мже гордели́вѡ и҆ же́стокѡ проти́вꙋ всѣ̑мъ завѣща́нїѧмъ ѿвѣщава́етъ, и҆ ꙗ҆́кѡ стра́нна, и҆ ѿнѣ́кꙋдꙋ прише́дша себѐ вмѣнѧ́ѧ, а҆́ще что́либо ᲂу҆ви́дитъ въ монастырѣ̀ и҆справле́нїѧ тре́бꙋющее, небреже́тъ и҆ презира́етъ, и҆ порица́етъ всѧ̑ въ монастырѣ̀ быва̑ющаѧ. Та́же вины̑ взыскꙋ́етъ, и҆́миже бы прогнѣ́валсѧ, и҆лѝ ѡ҆скорби́лсѧ, да не пока́жетсѧ легкомы́сленнымъ, є҆гда̀ без̾ вины̀ и҆з̾ монастырѧ̀ и҆зы́детъ. А҆́ще же и҆ и҆но́го кого̀ возмо́жетъ шепта́ньми и҆ сꙋесло́вїи прельсти́въ, и҆звестѝ и҆з̾ монастырѧ̀, нижѐ сїѐ ѿрица́етсѧ сотвори́ти, хотѧ̀ и҆мѣ́ти своеѧ̀ сла́бости споспѣ́шника. Си́це же возжига́емь ѻ҆гне́мъ свои́хъ пѣ́нѧзей сребролюби́вый, никогда́же безмо́лвствовати возмо́жетъ въ монастырѣ̀, и҆лѝ под̾ пра́виломъ жи́тельствовати. Є҆гда́ же сего̀ бѣ́съ, ꙗ҆́коже во́лкъ, и҆з̾ ѻ҆гра́ды восхи́титъ, и҆ ѿлꙋчи́въ ста́да, гото́ва къ снѣде́нїю по́йметъ: тогда̀ дѣла̀, ꙗ҆̀же во ѻ҆бщежи́тїи во ᲂу҆ста̑вленныѧ часы̀ творѧ́ше неради́вѡ, та̑ въ ке́ллїи но́щь и҆ де́нь со мно́гимъ ᲂу҆се́рдїемъ твори́ти є҆го̀ ᲂу҆строѧ́етъ. И҆ ни моли́твъ ѻ҆быкнове́нїѧ, ни поще́нїй ѡ҆́бразъ, ни бдѣ́нїй пра́вило храни́ти попꙋща́етъ: но сребролю́бїѧ неи́стовствомъ сего̀ свѧза́въ, всѧ́ко тща́нїе ѡ҆ рꙋкодѣ́лїи и҆мѣ́ти ᲂу҆вѣщава́етъ. Недꙋ́га же сегѡ̀ трѝ сꙋ́ть ѡ҆́брази, и҆̀хже ра́внѡ ѿверга́етъ бж҃е́ственное писа́нїе, и҆ ᲂу҆че́нїе ѻ҆тє́цъ. Є҆ди́нъ ᲂу҆́бѡ, и҆́же ᲂу҆строѧ́етъ ѻ҆каѧ́нные и҆́ноки, ꙗ҆̀же въ мі́рѣ не и҆мѣ́ѧхꙋ, сїѧ̑ стѧжа́ти и҆ собра́ти. Дрꙋгі́й же, и҆́же раскаѧва́тисѧ твори́тъ и҆мѣ́нїй є҆ди́ною ѿре́кшихсѧ, побꙋжда́ѧ и҆̀хъ и҆ска́ти, ꙗ҆̀же бг҃ꙋ принесо́ша. Тре́тїй же, въ нача́лѣ невѣ́рїемъ и҆ хла́дностїю и҆́нока свѧза́въ, не попꙋща́етъ є҆мꙋ̀ соверше́ннѡ ѿрещи́сѧ веще́й мі́ра: стра́хъ представлѧ́ѧ ᲂу҆бо́жества, и҆ невѣ́рїе бж҃їѧ про́мысла: и҆ престꙋ́пника показꙋ́ѧ свои́хъ ѡ҆бѣ́тѡвъ, ꙗ҆̀же и҆сповѣ́да ѿрица́ѧсѧ мі́ра. Си́хъ же трїе́хъ ѡ҆бразѡ́въ примѣ́ры въ бж҃е́ственномъ писа́нїи, ꙗ҆́коже рече́сѧ, ѡ҆сꙋжде́нны ѡ҆брѣто́хомъ. И҆́бо гїезі́и¹⁵⁰⁰, и҆мѣ̑нїѧ, ꙗ҆̀же пе́рвѣе не и҆мѣ̀, восхотѣ́въ стѧжа́ти, ѿпадѐ проро́ческїѧ благода́ти, ю҆́же ᲂу҆чи́тель въ чи́нѣ наслѣ́дїѧ ѡ҆ста́вити є҆мꙋ̀ хотѧ́ше: и҆ вмѣ́стѡ благослове́нїѧ, вѣ́чнꙋ прока́зꙋ проро́ческою клѧ́твою наслѣ́дствова. И҆ і҆ꙋ́да восхотѣ́въ взѧ́ти и҆мѣ̑нїѧ, ꙗ҆̀же пе́рвѣе ѡ҆ста́ви хрⷭ҇тꙋ̀ послѣ́дꙋѧ, не то́чїю къ преда́нїю влⷣки поползнꙋ́всѧ¹⁵⁰¹, ли́ка а҆пⷭ҇льскагѡ ѿпадѐ, но и҆ са́мꙋ во пло́ти жи́знь свою̀ наси́льственною сме́ртїю сконча̀. А҆на́нїа же и҆ сапфі́ра¹⁵⁰², сохра́нше нѣ̑каѧ ѿ тѣ́хъ, ꙗ҆̀же стѧжа́хꙋ, а҆пⷭ҇льскими ᲂу҆сты̀ сме́ртїю наказꙋ́ютсѧ. Мѡѷсе́й же вели́кїй во второзако́нїи та́инственнѣ заповѣ́даетъ ѡ҆бѣщава́ющымсѧ ѿрещи́сѧ мі́ра, и҆ стра́хомъ невѣ́рїѧ па́ки держа́щымсѧ земны́хъ веще́й: а҆́ще кі́й, речѐ, человѣ́къ страшли́въ, и҆ сла́бъ се́рдцемъ, да не и҆схо́дитъ на бра́нь: да и҆́детъ и҆ возврати́тсѧ въ до́мъ сво́й, да не когда̀ ᲂу҆страши́тисѧ сотвори́тъ сердца̀ бра́тїй свои́хъ¹⁵⁰³. Є҆́сть ли сегѡ̀ свидѣ́тельства твердѣ́йше что̀, и҆лѝ ꙗ҆снѣ́йше; не си́ми ли ᲂу҆́бѡ ᲂу҆́чимсѧ ѿрица́ющїисѧ мі́ра, соверше́ннѣ ѿрица́тисѧ, и҆ та́кѡ на бра́нь и҆сходи́ти, да не полага́юще нача́ло сла́бо и҆ растлѣ́нно, ѿвраща́емъ и҆нѣ́хъ ѿ є҆ѵⷢ҇льскагѡ соверше́нства, и҆ боѧ́знь и҆̀мъ влага́емъ; а҆ поне́же до́брѣ рече́нное бж҃е́ственнымъ писа́нїемъ, блаже́ннѣе є҆́сть па́че даѧ́ти не́жели прїима́ти¹⁵⁰⁴, ѕлѣ̀ толкꙋ́ютъ, нꙋ́дѧще то̀ къ свое́й пре́лести, и҆ къ сребролю́бїѧ жела́нїю. мы́сль рече́ннагѡ превраща́юще, и҆ гдⷭ҇не ᲂу҆че́нїе глаго́лющее: а҆́ще хо́щеши соверше́нъ бы́ти, прода́ждь и҆мѣ́нїе твоѐ, и҆ да́ждь ни́щымъ, и҆ и҆мѣ́ти и҆́маши сокро́вище на небесѝ, и҆ грѧдѝ въ слѣ́дъ менѐ¹⁵⁰⁵: и҆ сꙋ́дѧтъ не стѧжа́нїѧ бы́ти блаже́ннѣйше свои́мъ владѣ́ти бога́тствомъ, и҆ ѿ и҆збы́тка тогѡ̀ даѧ́ти тре́бꙋющымъ. Да вѣ́дѧтъ такові́и, ꙗ҆́кѡ не ᲂу҆̀ ѿтреко́шасѧ мі́ра, нижѐ взыдо́ша на и҆́ноческое соверше́нство, поне́же стыдѧ́тсѧ ѡ҆ хрⷭ҇тѣ̀ со а҆пⷭ҇ломъ воспрїѧ́ти нищетꙋ̀, и҆ дѣ́ланїемъ рꙋ́къ себѣ̀ и҆ тре́бꙋющымъ слꙋжи́ти, дѣ́ломъ и҆спо́лнити и҆́ноческїй ѻ҆бѣ́тъ, и҆ со а҆по́столомъ просла́витисѧ, расточи́вшымъ пре́жнее бога́тство, во а҆́лчбѣ и҆ жа́ждѣ, въ зимѣ̀ и҆ наготѣ̀¹⁵⁰⁶, съ па́ѵломъ да подвиза́ютсѧ до́брымъ по́двигомъ. И҆́бо а҆́ще бы и҆мѣ́ли пре́жнее бога́тство нꙋ́жднѣйшее къ соверше́нствꙋ разꙋмѣ́лъ са́мъ а҆по́столъ, не бы̀ пренебре́глъ пе́рвый сво́й са́нъ: наро́чита бо себѐ глаго́летъ бы́ти и҆ граждани́на ри̑млѧнъ. И҆ во і҆ерꙋсали́мѣ, и҆̀же продаѧ́хꙋ до́мы своѧ̑ и҆ се́ла, и҆ полага́хꙋ цѣ́ны ѻ҆́нѣхъ при нога́хъ а҆по́стѡлъ, не бы̀ сїѐ твори́ли, а҆́ще бы сꙋжде́но вѣ́дѣли ѿ а҆пⷭ҇лъ, блаже́ннѣйше бы́ти свои́ми и҆мѣ́нїи пита́тисѧ, а҆ не трꙋдо́мъ свои́мъ, и҆ ѿ ꙗ҆зы̑къ приноше́нїемъ. Ꙗ҆снѣ́е же ꙗ҆влѧ́етъ ѡ҆ си́хъ рече́нный а҆по́столъ въ посла́нїи къ ри́млѧнѡмъ, та́кѡ глаго́лѧ: Ны́нѣ же грѧдꙋ̀ во і҆ерꙋсали́мъ послꙋжи́ти ст҃ы̑мъ, бл҃говоли́ша бо, и҆ до́лжни и҆̀мъ сꙋ́ть¹⁵⁰⁷. И҆ са́мъ та́кожде ᲂу҆́замъ и҆ темни́цамъ и҆ стꙋже́нїю пꙋтеше́ствїѧ ча́стѣ подве́рженъ бы́въ, и҆ припина́емь ѿ сегѡ̀, ꙗ҆́кѡ ѡ҆бы́че свои́ма рꙋка́ма прїѡбрѣта́ти себѣ̀ потрє́бнаѧ, и҆ и҆звѣща́етъ, ꙗ҆́кѡ трє́бованїѧ сїѧ̑ прїѧ̀, ѿ бра́тїй прише́дшихъ къ немꙋ̀ ѿ македо́нїи, глаго́лѧ: скꙋ́дость бо мою̀ и҆спо́лниша бра́тїѧ прише́дше ѿ македо́нїи¹⁵⁰⁸. И҆ фїлїппїсі́ємъ пишѧ̀ глаго́летъ: вѣ́сте же и҆ вы̀ фїлїппїсі́ане, ꙗ҆́кѡ и҆зше́дшымъ на́мъ ѿ македо́нїи, ни є҆ди́на це́рковь ѡ҆бщева́сѧ въ сло́во даѧ́нїѧ и҆ прїѧ́тїѧ, то́чїю вы̀ є҆ди́ни. Ꙗ҆́кѡ и҆ въ солꙋ́нь и҆ є҆ди́ною, и҆ два́щи въ тре́бованїе моѐ посла́сте мѝ¹⁵⁰⁹. Да бꙋ́дꙋтъ ᲂу҆́бѡ по мнѣ́нїю сребролюби́выхъ и҆ сі́и блаже́ннѣйшїи а҆по́стола, поне́же ѿ свои́хъ и҆мѣ́нїй є҆мꙋ̀ ѻ҆нѝ подаѧ́хꙋ тре́бѡванїѧ. Но никто̀ ра́звѣ въ послѣ́днее безꙋ́мїе прише́дъ, рещѝ де́рзнетъ сїѐ. А҆́ще ᲂу҆́бѡ хо́щемъ є҆ѵⷢ҇льскомꙋ повелѣ́нїю, и҆ все́й ѻ҆́ной ѿ нача́ла на а҆пⷭ҇лѣхъ ѡ҆сно́ванной це́ркви послѣ́довати, не на́шымъ мнѣ́нїємъ повинꙋ́имсѧ, нижѐ до́брѣ речє́ннаѧ ѕлѣ̀ разꙋмѣ́имъ: но ѿве́ргше хла́дное и҆ невѣ́рное мнѣ́нїе, воспрїи́мимъ и҆́стинꙋ є҆ѵⷢ҇лїа. Та́кѡ бо возмо́жемъ и҆ ѻ҆те́чєскимъ стопа́мъ послѣ́довати, и҆ ᲂу҆че́нїѧ ѻ҆бщежи́тельнагѡ никогда́же ѿстꙋпи́ти, и҆ сегѡ̀ мі́ра вои́стиннꙋ ѿрещи́сѧ. Бла́го ᲂу҆̀бо є҆́сть здѣ̀ и҆ сло́во ст҃а́гѡ воспомѧнꙋ́ти. Глаго́лютъ, ст҃о́мꙋ васі́лїю є҆пі́скопꙋ кесарі́и каппадокі́йскїѧ къ нѣ́коемꙋ сѷгклі́тикꙋ хла́днѣ ѿре́кшемꙋсѧ мі́ра, и҆ и҆мѣ́вшꙋ нѣ̑каѧ ѿ свои́хъ и҆мѣ́нїй, глаго́лъ тако́въ рещѝ: и҆ сѷгклі́тика погꙋби́лъ, и҆ и҆́нока не сотвори́лъ є҆сѝ. Подоба́етъ ᲂу҆́бѡ всѧ́кимъ тща́нїемъ и҆зсѣца́ти ѿ на́шеѧ дꙋшѝ ко́рень всѣ̑мъ ѕлы̑мъ, и҆́же є҆́сть сребролю́бїе, и҆звѣ́стнѡ вѣ́дꙋщымъ, ꙗ҆́кѡ пребыва́ющꙋ ко́реню, ᲂу҆до́бно вѣ̑тви возраста́ютъ. Добродѣ́тель же нестѧжа́нїѧ и҆спра́вити неꙋдо́бно є҆́сть не во ѻ҆бщежи́тїи пребыва́ющымъ: въ то́мъ бо и҆ ѡ҆ са́мыхъ нꙋ́жныхъ потре́бахъ не пече́мсѧ. Ѡ҆сꙋжде́нїе ᲂу҆́бѡ а҆на́нїи и҆ сапфі́ры пред̾ ѻ҆чи́ма и҆мꙋ́ще, ᲂу҆жасни́мсѧ ѡ҆ставлѧ́ти себѣ̀ что̀ когда̀ ѿ пре́жнѧгѡ и҆мѣ́нїѧ: подо́бнѣ гїезі́ева ᲂу҆боѧ́вшесѧ наказа́нїѧ, и҆́же за сребролю́бїе вѣ́чнѣй прока́зѣ пре́данъ, блюде́мсѧ не собира́ти себѣ̀ и҆мѣ́нїй, ꙗ҆̀же ни въ мі́рѣ и҆мѣ́ѧхомъ Є҆ще́ же і҆ꙋ́динꙋ помышлѧ́юще ᲂу҆давле́нїемъ кончи́нꙋ, ᲂу҆бои́мсѧ воспрїима́ти что̀ когда̀, ꙗ҆̀же ѿрица́ющесѧ презрѣ́хомъ. Над̾ всѣ́ми же си́ми, пред̾ ѻ҆ча́ми и҆мꙋ́ще при́снѡ безвѣ́стность сме́рти, да не ка́кѡ, въ ѻ҆́нъ же ча́съ не ча́емъ, прїи́детъ гдⷭ҇ь на́шъ, и҆ ѡ҆брѧ́щетъ ѡ҆скверне́ннꙋ сребролю́бїемъ со́вѣсть на́шꙋ, и҆ рече́тъ на́мъ, ꙗ҆̀же во є҆ѵⷢ҇лїи речє́на бы́ша бога́томꙋ ѻ҆́номꙋ: безꙋ́мне, въ сїю̀ но́щь дꙋ́шꙋ твою̀ и҆стѧ́жꙋтъ ѿ тебѐ, а҆ ꙗ҆̀же ᲂу҆гото́валъ є҆сѝ, комꙋ̀ бꙋ́дꙋтъ¹⁵¹⁰;

Ѡ҆ гнѣ́вѣ.

Четве́ртый на́мъ по́двигъ проти́вꙋ дꙋ́ха гнѣ́ва. И҆ потре́ба є҆́сть, да съ бг҃омъ смертоно́сенъ ꙗ҆́дъ сегѡ̀ и҆з̾ глꙋбины̀ дꙋшѝ на́шеѧ и҆зсѣче́мъ. Семꙋ́ бо въ се́рдцѣ на́шемъ присѣдѧ́щꙋ, и҆ ѻ҆чеса̀ се́рдца на́шегѡ те́мными смꙋще́нми ѡ҆слѣплѧ́ющꙋ, ни разсꙋжде́нїе поле́зныхъ стѧжа́ти мо́жемъ, ни дх҃о́внагѡ ра́зꙋма ѡ҆брѣстѝ постиже́нїе, ни совѣ́та бла́га соверше́нство ᲂу҆держа́ти, ни жи́зни и҆́стинныѧ бы́ти прича̑стницы, ни зрѣ́нїѧ бж҃е́ственнагѡ и҆ и҆́стиннагѡ свѣ́та прїима́теленъ ᲂу҆́мъ на́шъ бꙋ́детъ. Смѧте́сѧ бо, глаго́летъ, ѿ ꙗ҆́рости ѻ҆́ко моѐ¹⁵¹¹: но нижѐ бж҃е́ственныѧ премꙋ́дрости прича̑стницы бꙋ́демъ, а҆́ще и҆ ѕѣлѡ̀ мꙋ́дри по мнѣ́нїю ѿ всѣ́хъ почита́емсѧ. Поне́же, пи́сано є҆́сть, ꙗ҆́рость въ нѣ́дрѣ безꙋ́мныхъ водворѧ́етсѧ¹⁵¹²: но нижѐ спаси́тельныѧ разсꙋждє́нїѧ и҆ совѣ́ты стѧжа́ти мо́жемъ, а҆́ще и҆ мꙋ́дри ѿ человѣ̑къ мни́мсѧ: пи́сано бо є҆́сть, гнѣ́въ и҆ мꙋ́дрыхъ погꙋблѧ́етъ: не ѡ҆кормле́нїѧ пра́вды тре́звеннымъ се́рдцемъ ᲂу҆держа́ти возмо́жемъ: пи́сано бо є҆́сть, ꙗ҆́кѡ гнѣ́въ мꙋ́жа пра́вды бж҃їѧ не содѣ́ловаетъ¹⁵¹³: но нижѐ ѿ всѣ́хъ похвалѧ́емꙋю кро́тость и҆ благоѡбра́зїе мо́жемъ стѧжа́ти: пи́сано бо є҆́сть, мꙋ́жъ ꙗ҆́рый не благоѡбра́зенъ¹⁵¹⁴. Хотѧ́й ᲂу҆́бѡ къ соверше́нствꙋ прїитѝ, и҆ жела́ѧ дх҃о́внымъ по́двигомъ зако́ннѡ подвиза́тисѧ, всѧ́кагѡ поро́ка, гнѣ́ва же и҆ ꙗ҆́рости чꙋ́ждъ да бꙋ́детъ. И҆ да слы́шитъ, что̀ томꙋ̀ сосꙋ́дъ и҆збра́нный заповѣ́даетъ: Всѧ́ка, глаго́летъ, го́ресть и҆ гнѣ́въ и҆ ꙗ҆́рость, и҆ кли́чь и҆ хꙋла̀, да во́зметсѧ ѿ ва́съ, со всѧ́кою ѕло́бою¹⁵¹⁵. Є҆гда́ же речѐ, всѧ́ка, ни є҆ди́нꙋ винꙋ̀ ꙗ҆́рости, и҆лѝ ꙗ҆́кѡ нꙋ́жднꙋ, и҆лѝ благосло́внꙋ на́мъ ѡ҆ста́ви. Хотѧ́й ᲂу҆́бѡ согрѣша́юща бра́та и҆спра́вити, и҆лѝ запреще́нїе томꙋ̀ пода́ти, да тщи́тсѧ себѐ несмꙋще́нна храни́ти, да не когда̀ и҆но́го ᲂу҆врачева́ти хотѧ̀, себѣ̀ недꙋ́гъ навлече́тъ, и҆ рече́тсѧ є҆мꙋ̀ є҆ѵⷢ҇льскїй ѻ҆́ный глаго́лъ: Врачꙋ̀ и҆сцѣли́сѧ са́мъ¹⁵¹⁶. И҆ па́ки: Что̀ ви́диши сꙋче́цъ, и҆́же во ѻ҆́цѣ бра́та твоегѡ̀, бервна́ же є҆́же є҆́сть во ѻ҆́цѣ твое́мъ, не чꙋ́еши¹⁵¹⁷. Ѿ каковы́ѧлибо когда̀ вины̀ движе́нїѧ гнѣ́ва воспали́вшисѧ ѡ҆слѣплѧ́етъ ѻ҆́чи дꙋшє́вныѧ, и҆ не ѡ҆ставлѧ́етъ ᲂу҆ви́дѣти со́лнце пра́вды, ꙗ҆́коже положи́вый на ѻ҆́чїю златы̑ѧ листы̀, и҆лѝ ѻ҆ловѧ̑нныѧ, ра́внѡ возбранѝ зри́тельнꙋю си́лꙋ, и҆ ника́коже дра́гость злата́го листа̀ разли́чїе сотворѝ: си́це ѿ коеѧ́либо когда̀ вины̀ благосло́вныѧ си́рѣчь, и҆лѝ не благосло́вныѧ гнѣ́вꙋ возже́гшꙋсѧ зри́тельнаѧ си́ла дꙋшѝ помрача́етсѧ. Тогда̀ то́чїю по є҆стествꙋ̀ ꙗ҆́рость ᲂу҆потреблѧ́имъ, є҆гда̀ проти́вꙋ страстны̑мъ и҆ сластолюби̑вымъ помыслѡ́мъ сїю̀ подвиза́емъ. Си́це бо на́съ и҆ проро́къ ᲂу҆́читъ глаго́лѧ: Гнѣ́вайтесѧ, и҆ не согрѣша́йте¹⁵¹⁸, сі́есть, на своѧ̑ стра̑сти гнѣ́въ подвиза́йте. И҆ на лꙋка̑выѧ по́мыслы, и҆ не соверша́юще подмета̑емаѧ ѿ си́хъ, согрѣша́йте. И҆ сїю̀ ꙗ҆́вѣ мы́сль ꙗ҆влѧ́етъ приложе́нное: є҆́же бо глаго́лете въ сердца́хъ ва́шихъ на ло́жахъ ва́шихъ ᲂу҆мили́тесѧ: то́ є҆сть, є҆гда̀ прїи́дꙋтъ въ се́рдце ва́ше лꙋка́вїи по́мыслы, и҆згонѧ́ще ты̑ѧ гнѣ́вомъ, и҆̀же проти́вꙋ тѣ̑мъ, по и҆згна́нїи же ѻ҆́ныхъ а҆́ки на ло́жи безмо́лвїѧ дꙋшѝ ѡ҆брѣта́ющесѧ, тогда̀ ᲂу҆мили́тесѧ къ покаѧ́нїю. Согласꙋ́етъ же семꙋ̀ и҆ блаже́нный па́ѵелъ, ᲂу҆потреби́въ свидѣ́тельство рече́нїѧ сегѡ̀, и҆ приложи́въ: Со́лнце да не за́йдетъ въ гнѣ́вѣ ва́шемъ: нижѐ дади́те мѣ́ста дїа́волꙋ¹⁵¹⁹. Сі́есть, не содѣ́лайте, да со́лнце пра́вды хрⷭ҇то́съ, прогнѣвле́нїемъ и҆ сосложе́нїемъ ѕлы́хъ помыслѡ́въ за́йдетъ ѿ серде́цъ ва́шихъ: да не ѿхожде́нїемъ сегѡ̀ ѡ҆брѧ́щетъ въ ва́съ мѣ́сто дїа́волъ. Ѡ҆ се́мъ со́лнцѣ и҆ бг҃ъ чрез̾ проро́ка глаго́летъ: боѧ́щымсѧ же и҆́мене моегѡ̀, возсїѧ́етъ со́лнце пра́вды: и҆ и҆сцѣле́нїе въ крилꙋ̑ є҆гѡ̀ бꙋ́детъ: а҆́ще же и҆ по пи́смени разꙋмѣ́ти бꙋ́демъ рече́нное, ни до захожде́нїѧ со́лнечнагѡ попꙋще́но є҆́сть на́мъ храни́ти гнѣ́въ. Что̀ ᲂу҆́бѡ ѡ҆ си́хъ рече́мъ: и҆̀же свирѣ́пствомъ и҆ неи́стовствомъ стра́стнагѡ ᲂу҆строе́нїѧ, не то́чїю да́же до захожде́нїѧ сегѡ̀ со́лнца соблюда́ютъ гнѣ́въ, но и҆ на мно́жайши дни̑ простира́юще ѻ҆́ный ᲂу҆молчава́ютъ дрꙋ́гъ ѿ дрꙋ́га, не ктомꙋ̀ ᲂу҆́бѡ глаго́лы и҆зносѧ́ще є҆го̀: молча́нїемъ же дрꙋ́гъ ко дрꙋ́гꙋ ꙗ҆́дъ ѕлопомнѣ́нїѧ въ па́гꙋбꙋ свою̀ ᲂу҆множа́юще: не вѣ́дѧще, ꙗ҆́кѡ подоба́етъ, не то́чїю ѿ быва́ющагѡ по дѣ́йствꙋ, но и҆ ѿ сꙋ́щагѡ въ мы́сли гнѣ́ва воздержа́тисѧ: да не тьмо́ю ѕлопомнѣ́нїѧ ᲂу҆́мъ помрачи́всѧ, ѿпаде́тъ свѣ́та ра́зꙋма и҆ разсꙋжде́нїѧ, и҆ лиши́тсѧ ѡ҆бита́нїѧ ст҃а́гѡ дх҃а. Сегѡ́ бо ра́ди и҆ гдⷭ҇ь во є҆ѵⷢ҇лїихъ повелѣва́етъ ѡ҆ста́вити да́ръ пред̾ ѻ҆лтаре́мъ, и҆ смири́тисѧ съ бра́томъ¹⁵²⁰: занѐ нѣ́сть мо́щно семꙋ̀ благопрїѧ́тнꙋ бы́ти, ꙗ҆́рости и҆ ѕлопомнѣ́нно храни̑мымъ въ на́съ. И҆ а҆по́столъ та́кожде глаго́лѧ: Непреста́ннѡ моли́тесѧ¹⁵²¹: и҆ на всѧ́комъ мѣ́стѣ воздѣва́ти преподѡ́бныѧ рꙋ́ки без̾ гнѣ́ва, и҆ размышле́нїѧ семꙋ̀ на́съ поꙋча́етъ. Ѡ҆стае́тсѧ ᲂу҆́бѡ, и҆лѝ никогда́же моли́тисѧ, и҆ по томꙋ̀ пови̑ннымъ бы́ти а҆по́стольскомꙋ заповѣ́данїю, и҆лѝ тща́щымсѧ храни́ти повелѣ̑ннаѧ, без̾ гнѣ́ва и҆ ѕлопомнѣ́нїѧ сїѐ твори́ти¹⁵²². И҆ поне́же мно́жицею ѡ҆скорби́вшꙋюсѧ бра́тїю, и҆лѝ смꙋти́вшꙋюсѧ презира́емъ, глаго́люще, не ѿ на́шеѧ вины̀ скорбѧ́тъ ѻ҆нѝ: вра́чь дꙋ́шъ и҆звѣ́ты дꙋшѝ и҆з̾ ко́рене ѿ се́рдца и҆зто́ргнꙋти хотѧ̀, не то́чїю а҆́ще мы̀ бꙋ́демъ ѡ҆скорбле́ни на бра́та, повелѣва́етъ ѡ҆ста́вити да́ръ и҆ смири́тисѧ, но а҆́ще и҆ то́й ѡ҆скорби́тсѧ на ны̀ пра́веднѡ и҆лѝ непра́веднѡ, ѡ҆правда́нїемъ врачева́ти є҆го̀, и҆ тогда̀ приноси́ти да́ръ. Но что̀ на мно́зѣ во є҆ѵⷢ҇льскихъ и҆ а҆по́стольскихъ заповѣ́данїѧхъ ᲂу҆коснѣва́емъ: мо́щно є҆́сть и҆ ѿ ве́тхагѡ зако́на семꙋ̀ наꙋчи́тисѧ, и҆́же и҆ снизхожде́нїе во и҆стѧза́нїи и҆мѣ́ти мнѧ́йсѧ, сїѧ̑ глаго́летъ: Да не возненави́диши бра́та твоегѡ̀ въ се́рдцѣ твое́мъ¹⁵²³. И҆ па́ки: пꙋтїѐ ѕлопомни́телей въ сме́рть, и҆ здѣ̀ не то́чїю, и҆́же по дѣ́йствꙋ гнѣ́въ возбранѧ́етъ, но и҆ и҆́же въ мы́сли наказꙋ́етъ. Тѣ́мже подоба́етъ бж҃е́ственномꙋ зако́нꙋ послѣ́дꙋющымъ, все́ю си́лою подвиза́тисѧ проти́вꙋ дꙋ́ха гнѣ́ва, и҆ проти́вꙋ внꙋ́трь на́съ кры́ющагѡсѧ недꙋ́га, а҆ не проти́вꙋ человѣ̑къ ꙗ҆́рость подвиза́ющымъ, въ пꙋсты́ню и҆ ᲂу҆едине́нїе ѿходи́ти, ꙗ҆́кѡ та́мѡ, си́рѣчь не сꙋ́щꙋ подви́жꙋщемꙋ ны̀ на гнѣ́въ, и҆ ꙗ҆́кѡ ᲂу҆до́бнѡ во ᲂу҆едине́нїи добродѣ́тель долготерпѣ́нїѧ и҆спра́вити. Ѿ го́рдости бо и҆ ѿ є҆́же не хотѣ́ти себѐ ᲂу҆корѧ́ти, и҆ припи́совати своемꙋ̀ нерадѣ́нїю вины̀ смꙋще́нїѧ, ѿ бра́тїи ѿитѝ жела́емъ. Доне́лѣ же ᲂу҆́бѡ на́шеѧ не́мощи вины̀ и҆нѣ́мъ приписꙋ́емъ, не возмо́жно є҆́сть на́мъ къ соверше́нствꙋ долготерпѣ́нїѧ дости́гнꙋти. Нача́ло ᲂу҆́бѡ на́шегѡ и҆справле́нїѧ и҆ ми́ра, не ѡ҆ долготерпѣ́нїѧ бли́жнѧгѡ къ на́мъ сꙋ́щагѡ и҆справлѧ́етсѧ, но ѿ на́шегѡ къ бли́жнемꙋ неѕло́бїѧ. Є҆гда́ же по́двига долготерпѣ́нїѧ ᲂу҆далѧ́ющесѧ, въ пꙋсты́ню ѿхо́димъ и҆ ᲂу҆едине́нїе: є҆ли́ки ѿ на́шихъ страсте́й не ᲂу҆врачева́нны, тꙋды̀ ѿнесе́мъ, покрове́нны, а҆ не и҆стреблены̀ сꙋ́ть. И҆́бо пꙋсты́нѧ и҆ ѿше́льство страсте́й не и҆зба́вльшимсѧ, не то́чїю храни́ти ты̑ѧ вѣ́сть, но и҆ прикрыва́ти ѻ҆́ныѧ зна́етъ, и҆ не ѡ҆щꙋща́ти самы́мъ въ себѣ̀, ко́ею стра́стїю побѣжда́ютсѧ, попꙋща́етъ. Напроти́въ же, мечта́нїе добродѣ́тели таковы̑мъ подме́щетъ, и҆ ꙗ҆́кѡ долготерпѣ́нїе и҆ смире́нїе и҆спра́виша, ᲂу҆вѣрѧ́етъ и҆̀хъ, до́ндеже нѣ́сть раздража́ѧй и҆ и҆скꙋша́ѧй и҆̀хъ Є҆гда́ же слꙋчи́тсѧ вина̀ нѣ́каѧ подви́жꙋщаѧ и҆̀хъ и҆ возбꙋжда́ющаѧ, а҆́бїе внꙋ́трь кры́емыѧ стра́сти, и҆ пре́жде таѧ́щїѧсѧ, ꙗ҆́коже ко́ни не ѡ҆бꙋ́зданны ѿ свои́хъ ста́ней и҆зскочи́вше, и҆ въ до́лгомъ безмо́лвїи и҆ пра́здности пита́вшесѧ, ѕѣ́льнѣе и҆ свирѣ́пѣе къ ги́бели влекꙋ́тъ своего̀ вса́дника. Мно́жае бо въ на́съ свирѣ́пѣютъ стра́сти не и҆мꙋ́ще ѿ человѣ̑къ ѡ҆бꙋче́нїѧ, и҆ са́мꙋ тꙋ̀ сѣ́нь терпѣ́нїѧ и҆ долготерпѣ́нїѧ, ю҆́же ѡ҆бра́знѡ непщева́хомъ, смѣше́ни бы́вше съ бра́тїею и҆мѣ́ти, небреже́нїемъ по́двига и҆ ᲂу҆едине́нїѧ погꙋблѧ́емъ. Ꙗ҆́коже бо ѕвѣ́рїе ꙗ҆доме́тнїи, въ пꙋсты́ни и҆ во свои́хъ ло́жахъ поко́ѧщесѧ, тогда̀ своѐ неи́стовство показꙋ́ютъ, є҆гда̀ ѡ҆щꙋтѧ́тъ кого̀ приближа́ющасѧ: та́кѡ и҆ стра́стнїи человѣ́цы, не по любвѝ къ добродѣ́тели, но нꙋ́ждою пꙋсты́ни безмо́лвствꙋюще, тогда̀ дꙋше́вный ꙗ҆́дъ и҆зрыга́ютъ, є҆гда̀ прїи́мꙋтъ приближа́ющагосѧ и҆ раздража́ющаго. И҆ сегѡ̀ ра́ди соверше́нство кро́тости взыскꙋ́ющымъ, всѧ́ко тща́нїе должно̀ бы́ти, не то́чїю на человѣ́ки не гнѣ́ватисѧ, но нижѐ на безсловє́сныѧ, ни на бездꙋ̑шныѧ вє́щи. По́мню бо себѐ, є҆гда̀ въ пꙋсты́ни пребыва́хъ, на тро́сть пи́шꙋщꙋю ꙗ҆́ростїю подви́гшись, на дебе́лость тоѧ̀, и҆лѝ то́нкость прогнѣвлѧ́хсѧ: и҆ на дре́во па́ки, є҆гда̀ посѣщѝ сїѐ восхотѣ́въ, не ско́рѡ возмого́хъ. И҆ па́ки, на ка́мень ѻ҆гнеиспꙋща́теленъ, є҆гда̀ тща́щꙋсѧ мѝ и҆звестѝ ѻ҆́гнь, не ско́рѡ ѻ҆́гнь и҆зкочѝ. Та́кѡ гнѣ́вꙋ распросте́ршꙋсѧ, ꙗ҆́кѡ и҆ на нечꙋ̑вственныѧ вє́щи и҆зноси́ти ѻ҆́ный. А҆́ще ᲂу҆̀бо жела́емъ полꙋчи́ти блаже́нство гдⷭ҇не, не то́чїю, и҆́же по дѣ́йствꙋ гнѣ́въ, ꙗ҆́коже рече́сѧ, до́лжни є҆смы̀ ᲂу҆де́рживати, но и҆ и҆́же въ мы́сли. Ниже́ бо толи́кѡ по́льзꙋетъ, ѡ҆бꙋздова́ти ᲂу҆ста̀ во вре́мѧ ꙗ҆́рости, и҆ не и҆зноси́ти глаго́лы неи̑стовы: є҆ли́кѡ, ѡ҆чища́ти се́рдце ѿ памѧтоѕло́бїѧ, и҆ не ѡ҆браща́ти въ мы́сли свое́й лꙋка́выхъ по́мыслѡвъ на бра́та. Корє́нїѧ бо согрѣше́нїй ѿсѣца́ти заповѣ́дꙋетъ є҆ѵⷢ҇льское ᲂу҆че́нїе, па́че, не́жели плоды̑. Ко́реню бо ꙗ҆́рости и҆зсѣ́ченꙋ ѿ се́рдца, ни не́нависть, ни за́висть дѣ́ломъ содѣ́етсѧ. И҆́бо ненави́дѧй бра́та своего̀, человѣкоꙋбі́йца рече́сѧ¹⁵²⁴: ᲂу҆бива́ѧ є҆го̀ воѡбраже́нїемъ не́нависти въ мы́сли, є҆го́же кро́вь, не мече́мъ и҆злїѧ́ннꙋ человѣ́цы ви́дѧтъ, но мы́слїю и҆ расположе́нїемъ ᲂу҆бїе́нное бг҃ъ зри́тъ. И҆́же не то́чїю ѡ҆ дѣѧ́нїихъ, но и҆ ѡ҆ по́мыслѣхъ и҆ произволе́нїи є҆ди́номꙋ коемꙋ́ждо и҆лѝ вѣнцы̀ и҆лѝ мꙋ́ки воздае́тъ, ꙗ҆́коже са́мъ чрез̾ проро́ка глаго́летъ: Сѐ а҆́зъ грѧдꙋ̀ собра́ти дѣла̀ и҆ помышлє́нїѧ и҆́хъ. И҆ па́ки а҆по́столъ глаго́летъ: междꙋ̀ собо́ю помыслѡ́мъ ѡ҆сꙋжда́ющымъ и҆ ѿвѣщава́ющымъ, въ де́нь, є҆гда̀ сꙋ́дитъ бг҃ъ та̑йнаѧ человѣ́кѡмъ¹⁵²⁵. Са́мъ же влⷣка ᲂу҆ча̀ ны̀, ꙗ҆́кѡ подоба́етъ всѧ́къ гнѣ́въ ѿлага́ти, глаго́летъ во є҆ѵⷢ҇лїихъ: Гнѣ́ваѧйсѧ на бра́та своего̀ всꙋ́е, пови́ненъ є҆́сть сꙋдꙋ̀¹⁵²⁶. Та́кѡ бо вѣ̑рнаѧ преписа̑нїѧ ѡ҆бде́ржатъ. Є҆́же бо всꙋ́е, ѿ прило́га положено̀ є҆́сть, ꙗ҆́вѣ, ꙗ҆́кѡ ѿ предлежа́щїѧ во́ли припи́совавшагѡ. Намѣ́ренїе бо гдⷭ҇не, ко́рень и҆ и҆́скрꙋ гнѣ́ва ѿсѣца́ти всѣ́ми ѡ҆́бразы на́мъ хо́щетъ, и҆ ни є҆ди́нꙋ винꙋ̀ гнѣ́ва себѣ̀ храни́ти: да не благосло́внѡ, си́рѣчь въ нача́лѣ дви́жими, послѣди́ же въ неи́стовство безслове́сныѧ ꙗ҆́рости впаде́мъ. Недꙋ́га же сегѡ̀ соверше́нное врачевство̀ сїѐ є҆́сть: да вѣ́рꙋемъ, ꙗ҆́кѡ ни въ пра́вдѣ, ни въ непра́вдѣ лѣ́ть є҆́сть на́мъ подвиза́ти ꙗ҆́рость. Дꙋ́хꙋ бо гнѣ́ва мы́сль помрачи́вшꙋ, ни разсꙋжде́нїѧ свѣ́тъ, ни пра́вагѡ совѣ́та ᲂу҆твержде́нїе, ни пра́вды ᲂу҆правле́нїе въ на́съ ѡ҆брѧ́щетсѧ: нижѐ и҆ хра́момъ ст҃а́гѡ дх҃а дꙋшѝ на́шей бы́ти мо́щно, дꙋ́хꙋ гнѣ́ва мы́сль помрачи́вшꙋ и҆ воз̾ѡблада́вшꙋ на́ми. Наконе́цъ же всегѡ̀, подоба́етъ безвѣ́стное сме́рти на всѧ́къ де́нь пред̾ ѻ҆чи́ма и҆мꙋ́щымъ храни́ти себѐ ѿ гнѣ́ва, и҆ вѣ́дѣти, ꙗ҆́кѡ ни цѣломꙋ́дрїѧ, ни ѿрече́нїѧ всѧ́кагѡ вещества̀, ни поще́нїй же и҆ бдѣ́нїй ка́ѧлибо по́льза, а҆́ще ѿ гнѣ́ва и҆ не́нависти держи́ми, пови́нни сꙋдꙋ̀ ѡ҆брѧ́щемсѧ.

Ѡ҆ печа́ли.

Пѧ́тый на́мъ по́двигъ є҆́сть проти́вꙋ дꙋ́ха печа́ли, помрача́ющагѡ дꙋ́шꙋ ѿ всѧ́кагѡ дх҃о́внагѡ зрѣ́нїѧ, и҆ возбранѧ́ющагѡ ю҆̀ ѿ всѧ́кагѡ благодѣ́ланїѧ. Є҆гда́ бо лꙋка́вый се́й дꙋ́хъ ѡ҆б̾и́метъ дꙋ́шꙋ, и҆ всю̀ тꙋ̀ помрачи́тъ: ни мл҃твы со ᲂу҆се́рдїемъ соверша́ти попꙋща́етъ: ни въ по́льзѣ свѧще́нныхъ чте́нїй пребыва́ти: кро́ткꙋ и҆ благоꙋмиле́ннꙋ къ бра́тїи человѣ́кꙋ бы́ти, не те́рпитъ: и҆ ко всѣ̑мъ дѣ́лъ начина́нїѧмъ, и҆ къ самомꙋ̀ житїѧ̀ ѻ҆бѣ́тꙋ не́нависть влага́етъ. И҆ всѧ̑ про́стѣ спаси̑тельныѧ совѣ́ты дꙋшє́вныѧ печа́ль смꙋти́вши, и҆ крѣ́пость є҆ѧ̀ и҆ терпѣ́нїе разсла́бивши, ꙗ҆́кѡ бе́зднꙋ и҆ безчꙋ́вственнꙋ содѣ́ловаетъ, ѿча́ѧнїѧ свѧза́вши по́мысломъ. Сегѡ̀ ра́ди, а҆́ще намѣ́ренїе є҆́сть на́мъ подвиза́тисѧ дх҃о́внымъ по́двигомъ, и҆ побѣди́ти съ бг҃омъ дꙋ́хи лꙋка́вствїѧ, всѧ́цѣмъ хране́нїемъ соблюда́имъ своѐ се́рдце ѿ дꙋ́ха печа́ли. Ꙗ҆́коже бо мо́ль ри́зꙋ, и҆ че́рвь дре́во, си́це печа́ль дꙋ́шꙋ человѣ́ческꙋю поѧда́етъ: ᲂу҆клонѧ́тисѧ всѧ́кїѧ благі́ѧ бесѣ́ды ᲂу҆вѣщава́ющи, и҆ ни ѿ и҆́скреннихъ дрꙋгѡ́въ сло́во совѣ́та прїима́ти ѡ҆ставлѧ́ющи, ни бла́гъ ѿвѣ́тъ и҆лѝ ми́ренъ и҆̀мъ пода́ти попꙋща́ющи: но всю̀ дꙋ́шꙋ ѡ҆б̾е́мши, го́рести тꙋ̀ и҆ ᲂу҆ны́нїѧ и҆сполнѧ́етъ. И҆ наконе́цъ предлага́етъ є҆́й бѣ́гати человѣ̑къ, ꙗ҆́кѡ вино́вныхъ є҆ѧ̀ смꙋще́нїѧ бы́вшихъ. И҆ не ѡ҆ставлѧ́етъ тꙋ̀ позна́ти, ꙗ҆́кѡ не ѿ внѣ̀: но внꙋ́трь и҆́мать кры́ющїйсѧ недꙋ́гъ, и҆́же тогда̀ ꙗ҆влѧ́етсѧ, є҆гда̀ и҆скꙋшє́нїѧ предста́вше, движе́нїемъ въ ꙗ҆вле́нїе ѻ҆́ный произведꙋ́тъ. Никогда́же бо ѿ и҆на́гѡ повреди́тсѧ человѣ́къ, а҆́ще не внꙋ́трь и҆́мать храни̑мы страсте́й вины̑. И҆ сегѡ̀ ра́ди всѣ́хъ содѣ́тель, и҆ вра́чъ дꙋ́шъ на́шихъ бг҃ъ, є҆ди́нъ и҆звѣ́стнѡ вѣ́дый ꙗ҆́звы дꙋшє́вныѧ, не сопребыва́нїѧ съ человѣ́ки заповѣ́даетъ ѡ҆ставлѧ́ти, но сꙋ́щыѧ въ на́съ поро́кѡвъ ѿсѣца́ти вины̑. И҆ вѣ́дѣти, ꙗ҆́кѡ дꙋше́вное здра́вїе, не въ ᲂу҆дале́нїи ѿ человѣ̑къ и҆справлѧ́етсѧ, но въ пребыва́нїи съ добродѣ́тельными и҆ по́двизѣ. Є҆гда̀ ᲂу҆́бѡ за нѣ̑кїѧ благосло́вныѧ а҆́кибы вины̑ бра́тїю ѡ҆ставлѧ́емъ, не вины̑ печа́ли ѿсѣко́хомъ, но то́чїю и҆̀хъ премѣни́хомъ кры́ющꙋсѧ внꙋ́трь недꙋ́гꙋ, и҆ и҆нѣ́ми вещьмѝ ты̑ѧ возбꙋжда́ющꙋ. Сегѡ̀ ра́ди проти́вꙋ внꙋ́треннихъ страсте́й всѧ́кїй на́мъ да бꙋ́детъ по́двигъ. Си́мъ бо благода́тїю и҆ содѣ́йствомъ бж҃їимъ ѿ се́рдца и҆звє́рженнымъ бы́вшымъ, не глаго́лю съ человѣ́ки, но и҆ съ ди́вїими ѕвѣрьмѝ ᲂу҆до́бнѡ поживе́мъ, по рече́нномꙋ ѿ бл҃же́ннагѡ і҆́ѡва: ѕвѣ́рїе ди́вїи примирѧ́тсѧ тебѣ̀¹⁵²⁷. Предвари́тельнѡ ᲂу҆́бѡ подвиза́тисѧ подоба́етъ проти́вꙋ дꙋ́ха печа́ли, вверга́юща дꙋ́шꙋ въ ѿча́ѧнїе, ꙗ҆́кѡ да ѿжене́мъ сего̀ ѿ на́шегѡ се́рдца. Се́й бо ка́їнꙋ не попꙋстѝ по братоꙋбі́йствѣ пока́ѧтисѧ, нижѐ і҆ꙋ́дѣ по преда́нїи влⷣки. Въ ѻ҆́ной то́чїю печа́ли пребыва́имъ, ꙗ҆́же ѡ҆ покаѧ́нїи согрѣше́нїй, съ наде́ждою благо́ю быва́емой: ѡ҆ не́йже а҆по́столъ речѐ: Ꙗ҆́кѡ печа́ль, ꙗ҆́же по бз҃ѣ, покаѧ́нїе нераска́ѧнно во спасе́нїе содѣ́ловаетъ¹⁵²⁸. Печа́ль бо ꙗ҆́же по бз҃ѣ, наде́ждою покаѧ́нїѧ пита́ющаѧ дꙋ́шꙋ, съ ра́достїю соедине́нна є҆́сть. Тѣ́мже ко всѧ́комꙋ благо́мꙋ дѣ́ланїю ᲂу҆се́рдна и҆ послꙋ́шна ᲂу҆строѧ́етъ человѣ́ка, ᲂу҆добопристꙋ́пна, смире́нна, кро́тка, неѕло́бива, ко всѧ́комꙋ трꙋдꙋ̀ благо́мꙋ и҆ ѕлострада́нїю терпѣли́ва, ꙗ҆́кѡ сі́есть печа́ль по бз҃ѣ сꙋ́щи, и҆ ѿ сегѡ̀ плоды̀ дх҃а ст҃а́гѡ познава́ютсѧ въ человѣ́цѣ, си́рѣчь, ра́дость, любы̀, ми́ръ, долготерпѣ́нїе, бла́гость, вѣ́ра, воздержа́нїе: ѿ сопроти́вныѧ же печа́ли плоды̀ познава́емъ лꙋка́вагѡ дꙋ́ха, и҆̀же сꙋ́ть: ᲂу҆ны́нїе, нетерпѣ́нїе, ꙗ҆́рость, не́нависть, прекосло́вїе, ѿча́ѧнїе, къ моли́твѣ лѣ́ность. Ко́еѧ печа́ли та́кѡ до́лжни є҆смы̀ ᲂу҆клонѧ́тисѧ, ꙗ҆́коже блꙋда̀ и҆ сребролю́бїѧ, и҆ ꙗ҆́рости: и҆ про́чихъ страсте́й. Врачꙋ́етсѧ же ѻ҆на̀ моли́твою, и҆ на бг҃а наде́ждою, и҆ поꙋче́нїемъ бж҃е́ственныхъ слове́съ, и҆ съ человѣ́ки благоговѣ́йными пребыва́нїемъ.

Ѡ҆ ᲂу҆ны́нїи.

Шесты́й на́мъ по́двигъ є҆́сть проти́вꙋ дꙋ́ха ᲂу҆ны́нїѧ, сопрѧже́ннагѡ и҆ содѣ́йствꙋющагѡ дꙋ́хꙋ печа́ли. Лю́тъ се́й и҆ тѧ́жкїй бѣ́съ, и҆ и҆́ноки при́снѡ ра́тꙋѧ, и҆́же въ шесты́й ча́съ напада́етъ на и҆́ноки разслабле́нїе и҆ ᲂу҆́жасъ томꙋ̀ влага́ѧ, и҆ не́нависть дѣ́лаѧ, и҆ къ самомꙋ̀ томꙋ̀ мѣ́стꙋ и҆ къ сожи́тельствꙋющымъ бра́тїѧмъ и҆ ко всѧ́комꙋ дѣ́ланїю и҆ къ самомꙋ̀ бж҃е́ственныхъ писа́нїй чте́нїю, подме́ща є҆мꙋ̀ и҆ по́мыслы прехожде́нїѧ, и҆ ꙗ҆́кѡ, а҆́ще не пресели́тсѧ ко и҆ны̑мъ мѣста́мъ, сꙋ́етенъ є҆мꙋ̀ ве́сь трꙋ́дъ и҆ вре́мѧ бꙋ́детъ. Къ си̑мъ всѣ̑мъ и҆ гла́дъ томꙋ̀ влага́етъ ѡ҆ шесто́мъ часѣ̀, є҆ли́къ не бы̀ слꙋчи́лсѧ є҆мꙋ̀ ѿ тридне́внагѡ поще́нїѧ, и҆лѝ должа́йшагѡ пꙋтѝ, и҆лѝ тѧгча́йшагѡ трꙋда̀. Та́же по́мыслы томꙋ̀ влага́етъ, ꙗ҆́кѡ никі́имъ же и҆нѣ́мъ ѡ҆́бразомъ возмо́жетъ недꙋ́га сегѡ̀, и҆ тѧ́жести и҆зба́витисѧ, то́чїю за є҆́же и҆сходи́ти ча́стѡ, и҆ приходи́ти ко бра́тїи а҆́кибы по́льзы ра́ди, и҆лѝ посѣще́нїѧ болѧ́щихъ. Є҆гда́ же не возмо́жетъ си́ми того̀ прельсти́ти дꙋ́хъ ѻ҆́ный, тогда̀ сно́мъ тѧгча́йшимъ погрꙋзи́въ є҆го̀, ѕѣ́льнѣйшїй и҆ крѣ́пльшїй на него̀ быва́етъ, не и҆на́кѡ низлага́емый, то́чїю моли́твою, и҆ ᲂу҆дале́нїемъ праздносло́вїѧ, и҆ поꙋче́нїемъ бж҃е́ственныхъ слове́съ, и҆ во и҆скꙋше́нїихъ терпѣ́нїемъ. А҆́ще бо не си́ми ѻ҆рꙋ́жїи ᲂу҆твержде́нна ѡ҆брѧ́щетъ ѻ҆́нъ и҆́нока, ᲂу҆стрѣли́въ свои́ми є҆го̀ стрѣла́ми, непостоѧ́нна того̀ показꙋ́етъ, и҆ скита́телѧ содѣ́ловаетъ, и҆ ᲂу҆ны́ла и҆ пра́здна, и҆ монастырѝ мно́ги ѡ҆бходи́ти ᲂу҆строѧ́етъ: и҆ ни ѡ҆ че́мъ же и҆но́мъ пещи́сѧ, ра́звѣ, є҆́же смотрѧ́ти, гдѣ̀ ѡ҆бѣ́ды и҆ пиры̀ быва́ютъ. Ничто́же бо и҆́но мы́сль ᲂу҆ны́лагѡ мечта́етъ, то́чїю ꙗ҆̀же ѿ си́хъ глꙋмлє́нїѧ. И҆ та́кѡ ѿ си́хъ и҆ въ мїрскі̑ѧ вє́щи є҆го̀ вплета́етъ, и҆ пома́лꙋ льсти́тъ таковы́ми привре́дными ᲂу҆праждне́ньми, до́ндеже и҆ ѿ самагѡ̀ тогѡ̀ и҆́ноческагѡ ѻ҆бѣ́та соверше́ннѡ є҆го̀ и҆зведе́тъ. Се́й недꙋ́гъ тѧгча́йшъ бы́ти бж҃е́ственный а҆по́столъ свѣ́дый, и҆ хотѧ̀ є҆го̀ ѿ дꙋ́шъ на́шихъ, ꙗ҆́кѡ премꙋ́дръ вра́чь, и҆з̾ ко́рене и҆сто́ргнꙋти, вины̑ наипа́че, ѿ ни́хже ражда́етсѧ, показꙋ́етъ, и҆ сїѧ̑ глаго́летъ: повелѣва́емъ ва́мъ, бра́тїе, ѡ҆ и҆́мени гдⷭ҇а на́шегѡ і҆и҃са хрⷭ҇та̀, ѿлꙋча́тисѧ ва́мъ ѿ всѧ́кагѡ бра́та безчи́ннѡ ходѧ́ща, а҆ не по преда́нїю, є҆́же прїѧ́ша ѿ на́съ. Са́ми бо вѣ́сте, ка́кѡ лѣ́по є҆́сть (ва́мъ) подо́битисѧ на́мъ: ꙗ҆́кѡ не безчи́нновахомъ ᲂу҆ ва́съ, нижѐ тꙋ́не хлѣ́бъ ꙗ҆до́хомъ ᲂу҆ когѡ̀, но въ трꙋдѣ̀ и҆ по́двизѣ, но́щь и҆ де́нь дѣ́лающе, во є҆́же не ѡ҆тѧгчи́ти никогѡ́же ѿ ва́съ: не ꙗ҆́кѡ не и҆́мамы вла́сти, но да себѐ ѡ҆́бразъ да́мы ва́мъ, во є҆́же ᲂу҆подо́битисѧ на́мъ. И҆́бо є҆гда̀ бѣ́хомъ ᲂу҆ ва́съ, сїѐ завѣщава́хомъ ва́мъ, ꙗ҆́кѡ а҆́ще кто̀ не хо́щетъ дѣ́лати, нижѐ да ꙗ҆́стъ. Слы́шимъ бо нѣ̑кїѧ безчи́ннѡ ходѧ́щыѧ ᲂу҆ ва́съ, ничто́же дѣ́лающыѧ, но лꙋка́внѡ ѡ҆бходѧ́щыѧ. Таковы̑мъ повелѣва́емъ, и҆ мо́лимъ ѡ҆ хрⷭ҇тѣ̀ і҆и҃сѣ, да съ безмо́лвїемъ дѣ́лающе, сво́й хлѣ́бъ ꙗ҆дѧ́тъ¹⁵²⁹. Слы́шимъ, ка́кѡ ꙗ҆́вѣ на́мъ показꙋ́етъ вины̑ ᲂу҆ны́нїѧ а҆по́столъ, безчи́нными бо нарица́етъ, не дѣ́лающыѧ: є҆ди́нѣмъ си́мъ глаго́ломъ, мно́гꙋ ѕло́бꙋ ꙗ҆влѧ́ѧ. безчи́нный бо, и҆ неблагоговѣ́инъ є҆́сть, и҆ проде́рзливъ въ словесѣ́хъ, и҆ на ᲂу҆коре́нїе ско́ръ, и҆ сегѡ̀ ра́ди къ безмо́лвїю неспосо́бенъ, и҆ ᲂу҆ны́нїѧ ра́бъ. Повелѣва́етъ ᲂу҆́бѡ ѿлꙋча́тисѧ ѿ си́хъ, то́ є҆сть ᲂу҆далѧ́тисѧ ꙗ҆́кѡ ѿ гꙋби́тельнагѡ недꙋ́га. И҆ не по преда́нїю, є҆́же прїѧ́ша ѿ на́съ: рече́нїемъ си́мъ ꙗ҆влѧ́ѧ го́рдыхъ тѣ́хъ бы́ти, и҆ презри́телей, и҆ а҆по́стольскихъ преда́нїй разрꙋши́телей. И҆ па́ки глаго́летъ: ни тꙋ́не хлѣ́бъ ꙗ҆до́хомъ ᲂу҆ когѡ̀, но въ трꙋдѣ̀, и҆ по́двизѣ, но́щь и҆ де́нь дѣ́лающе¹⁵³⁰. Оу҆чи́тель ꙗ҆зы́кѡвъ, проповѣ́дникъ є҆ѵⷢ҇лїа, восхище́нный до тре́тїѧгѡ небесѐ, глаго́лѧй гдⷭ҇а повелѣ́вша проповѣ́дающымъ благовѣ́стїе, ѿ благовѣ́стїѧ жи́ти, въ трꙋдѣ̀ и҆ по́двизѣ но́щь и҆ де́нь дѣ́лаетъ, во є҆́же бы не ѡ҆тѧгчи́ти никогѡ́же. Что̀ ᲂу҆́бѡ мы̀ сотвори́мъ ᲂу҆ныва́юще ѿ дѣ́ла, и҆ тѣле́сенъ поко́й гонѧ́ще: и҆̀мже ни це́рквей попече́нїе, ни про́повѣдь є҆ѵⷢ҇лїа врꙋчена̀ є҆́сть, но своеѧ̀ то́чїю дꙋшѝ попече́нїе: та́же ꙗ҆́внѣе показꙋ́ѧ ражда́емый вре́дъ ѿ пра́здности, нано́ситъ: ничто́же дѣ́лающыѧ, но лꙋка́внѡ ѡ҆бходѧ́щыѧ: ѿ пра́здности бо лꙋка́вное ѡ҆бхожде́нїе, сі́есть, любопы́тство: ѿ такова́гѡ ѡ҆бхожде́нїѧ безчи́нїе, ѿ безчи́нїѧ всѧ́ка ѕло́ба. Оу҆строѧ́ѧ же па́ки цѣльбꙋ̀ и҆̀мъ, прилага́етъ: таковы̑мъ повелѣва́емъ въ безмо́лвїи дѣ́лающымъ сво́й хлѣ́бъ ꙗ҆́сти. И҆ призапрети́тельнѣе же глаго́летъ: а҆́ще кто̀ не хо́щетъ дѣ́лати, нижѐ да ꙗ҆́стъ¹⁵³¹. Си́ми а҆по́стольскими ᲂу҆че́нїи, и҆̀же во є҆гѵ́птѣ ст҃і́и ѻ҆тцы̀ нака́зани бы́вше, ни во є҆ди́но вре́мѧ пра̑зднымъ бы́ти и҆́нокѡмъ попꙋща́ютъ, а҆ наипа́че ю҆́нымъ: вѣ́дѧще, ꙗ҆́кѡ терпѣ́нїемъ дѣ́ланїѧ и҆ ᲂу҆ны́нїе ѿгонѧ́ютъ, и҆ пи́щꙋ себѣ̀ прїѡбрѣта́ютъ, и҆ тре́бꙋющымъ помога́ютъ. Не то́чїю бо своеѧ̀ ра́ди потре́бы дѣ́лаютъ, но и҆ стра̑ннымъ, и҆ ни́щымъ, и҆ сꙋ́щымъ въ темни́цахъ ѿ своегѡ̀ трꙋда̀ подава́ютъ, вѣ́рꙋюще таково́е благотворе́нїе же́ртвꙋ свѧ́тꙋ, бл҃гопрїѧ́тнꙋ бы́ти бг҃ови. И҆ сїе́ же глаго́лютъ ѻ҆тцы̀, ꙗ҆́кѡ дѣ́лаѧй со є҆ди́нѣмъ бѣ́сомъ бра́нь твори́тъ, и҆ ѿ негѡ̀ ѡ҆скорблѧ́етсѧ: пра́здный же, ѡ҆ мно́жайшихъ дꙋхѡ́въ плѣнѧ́емь быва́етъ. Добро́ же є҆́сть къ си̑мъ, и҆ сло́во воспомѧнꙋ́ти а҆́ввы мѡѷсе́а и҆скꙋ́снѣйша во ѻ҆тцѣ́хъ, є҆́же ко мнѣ̀ провѣща̀. Бы́вшꙋ бо мѝ ма́ло вре́мѧ въ пꙋсты́ни, стꙋжи́мь бы́въ ѿ ᲂу҆ны́нїѧ, и҆ прише́дъ къ немꙋ̀ и҆ рѣ́хъ, ꙗ҆́кѡ вчера̀ ѕѣлѡ̀ стꙋжи́мь бы́хъ ѿ ᲂу҆ны́нїѧ, и҆ и҆знемо́гшїй ѕѣлѡ̀ не пе́рвѣе и҆зба́вилъ бы́хъ сѧ̀ тогѡ̀, а҆́ще не бы́хъ ше́лъ и҆ прише́лъ ко а҆́ввѣ па́ѵлꙋ. Ѿвѣща́ же мѝ на сїѐ а҆́вва мѡѷсе́й, и҆ речѐ: не та́кѡ: не свободи́лъ є҆сѝ себѐ ѿ сегѡ̀, но па́че пре́далъ є҆сѝ себѐ томꙋ̀, и҆ порабо́тилъ. Вѣ́ждь ᲂу҆̀бо, ꙗ҆́кѡ тѧгча́е тѧ̀, ꙗ҆́кѡ чи́нъ сво́й ѡ҆ста́вивша, ра́товати и҆́мать, а҆́ще наконе́цъ терпѣ́нїемъ и҆ моли́твою и҆ рꙋкодѣ́лїемъ то̀ побѣди́ти не потщи́шисѧ.

Ѡ҆ тщесла́вїи.

Седмы́й на́мъ по́двигъ проти́вꙋ дꙋ́ха тщесла́вїѧ. Многоѡбра́зна сїѧ̀ и҆ тонча́йша стра́сть, и҆ не ско́рѡ ни ѿ самагѡ̀ и҆скꙋша́емагѡ постиза́ема. И҆́бо и҆нѣ́хъ страсте́й прило́зи ꙗ҆вле́ннѣйши сꙋ́ть, и҆ ᲂу҆до́бнѣйшꙋ нѣ́какѡ къ ни̑мъ бра́нь и҆́мꙋтъ, дꙋшѝ познаю́щей сꙋпоста́та, и҆ сопротиворѣ́чїемъ, и҆ моли́твою сего̀ а҆́бїе низлага́ющей. Тщесла́вїѧ же ѕло́ба, многоѡбра́зна сꙋ́щи, ꙗ҆́коже рече́сѧ, неꙋдобопобѣжда́ема є҆́сть. И҆́бо во всѧ́комъ начина́нїи, и҆ въ зра́цѣ, и҆ въ сло́вѣ, и҆ молча́нїи, и҆ въ дѣ́лѣ, и҆ въ бдѣ́нїихъ, и҆ въ поще́нїихъ, и҆ моли́твѣ, и҆ въ чте́нїихъ, и҆ въ безмо́лвїи, и҆ долготерпѣ́нїи. Всѣ́ми бо си́ми покꙋша́етсѧ во́ина хрⷭ҇то́ва ᲂу҆стрѣли́ти. И҆́бо є҆го́же не возмо́жетъ многоцѣ́нными ѻ҆де́ждами къ тщесла́вїю прельсти́ти, сего̀ хꙋдо́ю ри́зою покꙋша́етсѧ и҆скꙋша́ти. И҆ є҆го́же не возмо́же че́стїю возвы́сити, сего̀ а҆́кибы терпѣ́нїемъ безче́стїѧ въ горды́ню возно́ситъ. И҆ є҆го́же не возмо́же склони́ти и҆скꙋ́ства ра́ди слове́съ тщесла́витисѧ, сего̀ молча́нїемъ ꙗ҆́кѡ безмо́лвника си́рѣчь льсти́тъ. И҆ є҆го́же не возмо́же склони́ти многоцѣ́нными бра́шны разсла́битисѧ, сего̀ поще́нїемъ къ похвалѣ̀ разслаблѧ́етъ. И҆ про́стѣ, всѧ́ко дѣ́ло, всѧ́ко начина́нїе винꙋ̀ бра́ни подае́тъ лꙋка́вомꙋ семꙋ̀ бѣ́сꙋ. Є҆ще́ же къ си̑мъ, и҆ ѡ҆ досто́инствѣ мечта́ти подме́щетъ. По́мню бо нѣ́коего ста́рца, є҆гда̀ въ ски́тѣ пребыва́хъ, ше́дша въ ке́ллїю нѣ́коегѡ бра́та посѣще́нїѧ ра́ди, и҆́же прибли́живсѧ къ две́ри є҆гѡ̀, слы́шитъ внꙋ́трь глаго́люща є҆го̀: и҆ возмнѣ́въ ста́рецъ, ꙗ҆́кѡ ѿ писа́нїѧ поꙋча́етсѧ ѻ҆́нъ, ста̀ послꙋ́шати: и҆ ѡ҆щꙋща́етъ и҆зꙋмлѧ́ющасѧ ѿ тщесла́вїѧ, и҆ себѐ самаго̀ рꙋкополага́юща во дїа́кона, и҆ ѡ҆глашє́ннымъ ѿпꙋ́стъ подаю́ща. Ꙗ҆́кѡ ᲂу҆́бѡ слы́ша сїѧ̑ ста́рецъ, толкнꙋ́въ во две́рь, вни́де, и҆ срѣ́тъ є҆го̀ бра́тъ поклони́сѧ по ѻ҆бы́чаю, и҆ молѧ́ше ᲂу҆разꙋмѣ́ти ѿ негѡ̀, а҆́ще мно́гъ ча́съ и҆́мать пред̾ две́рїю стоѧ̀. Ста́рецъ же прїѧ́тнѡ къ немꙋ̀ ѿвѣща̀: ны́нѣ, глаго́летъ, прїидо́хъ, є҆гда̀ ты̀ ѿпꙋ́стъ ѡ҆глашє́ннымъ соверша́лъ є҆сѝ. Бра́тъ же сїѧ̑ слы́шавъ падѐ при ногꙋ̑ ста́рца, и҆ молѧ́ше є҆го̀ моли́тисѧ ѡ҆ не́мъ, ꙗ҆́кѡ да и҆зба́витсѧ ѿ сеѧ̀ пре́лести. Сїѧ̑ же воспомѧнꙋ́хъ показа́ти хотѧ̀, въ коли́кое нечꙋ́вствїе приво́дитъ человѣ́ка се́й бѣ́съ. Хотѧ́й ᲂу҆̀бо соверше́ннѡ подвиза́тисѧ, и҆ вѣнце́мъ пра́вды ᲂу҆вѧзи́тисѧ, всѣ́ми ѡ҆́бразы да потщи́тсѧ многоѡбра́знаго сего̀ ѕвѣ́рѧ побѣди́ти, пред̾ ѻ҆чи́ма и҆мѣ́ѧ всегда̀ дв҃домъ рече́нное: гдⷭ҇ь разсы́па кѡ́сти человѣкоꙋго́дникѡвъ¹⁵³²: и҆ ничто́же да твори́тъ ѡ҆бзира́ѧ человѣ́ческꙋю похвалꙋ̀, но ѿ гдⷭ҇а мзды̀ то́чїю да взыскꙋ́етъ. И҆ ѿверга́ѧ при́сно приходѧ́щыѧ въ се́рдце є҆гѡ̀ по́мыслы, и҆ похвалѧ́ющыѧ є҆го̀ да ᲂу҆ничижа́етъ себѐ пред̾ бг҃омъ: та́кѡ бо возмо́жетъ съ бг҃омъ и҆зба́витсѧ дꙋ́ха тщесла́вїѧ.

Ѡ҆ горды́ни.

Ѻ҆смы́й на́мъ по́двигъ є҆́сть проти́вꙋ дꙋ́ха горды́ни. Лютѣ́йшїй се́й, и҆ всѣ́хъ пе́рвыхъ свирѣ́пѣйшїй. Соверше́нныхъ наипа́че ра́тꙋѧ, и҆ є҆два̀ не на высотꙋ̀ добродѣ́телей возше́дшыѧ покꙋша́ѧсѧ низврати́ти. Ꙗ҆́коже недꙋ́гъ гꙋби́теленъ и҆ тлетво́ренъ, не є҆ди́нъ ᲂу҆́дъ тѣ́ла, но всѐ растлѣва́етъ: та́кѡ и҆ горды́нѧ, не ча́сть дꙋшѝ, но всю̀ тꙋ̀ растлѣва́етъ. И҆ ѿ и҆нѣ́хъ ᲂу҆́бѡ страсте́й ка́ѧждо а҆́ще и҆ смꙋща́етъ дꙋ́шꙋ, но къ є҆ди́ной сопротивлѧ́ющейсѧ є҆́й добродѣ́тели бра́нь творѧ̀: и҆ сїю̀ побѣди́ти любопрѧ́щисѧ, ѿ ча́сти помрача́етъ дꙋ́шꙋ и҆ смꙋща́етъ ю҆̀. Горды́ни же стра́сть всю̀ тꙋ̀ помрача́етъ, и҆ въ послѣ́днее паде́нїе низво́дитъ. И҆ да ꙗ҆снѣ́е ᲂу҆разꙋмѣ́емъ рече́нное, смо́тримъ си́це: чревобѣ́сїе, воздержа́нїе тщи́тсѧ растли́ти: блꙋ́дъ, цѣломꙋ́дрїе: сребролю́бїе, нестѧжа́нїе: ꙗ҆́рость, кро́тость, и҆ про́чїи ѕло́бы ви́ды сопроти̑вныѧ тѣ́мъ добродѣ́тєли. Ѕло́ба же горды́ни, є҆гда̀ поѡблада́етъ ѻ҆каѧ́ннꙋю дꙋ́шꙋ, ꙗ҆́коже нѣ́кїй лютѣ́йшїй мꙋчи́тель, вели́къ гра́дъ и҆ высо́къ прїе́мъ, ве́сь то́й низвраща́етъ, и҆ до ѡ҆снова́нїѧ раско́пываетъ. И҆ свидѣ́тель сегѡ̀ а҆́ггелъ ѻ҆́ный пады́й съ небесѐ го́рдости ра́ди: и҆́же ѿ бг҃а со́зданъ бы́въ, и҆ всѧ́кою добродѣ́телїю, и҆ премꙋ́дростїю ᲂу҆кра́шенъ, не влⷣчнѣй благода́ти восхотѣ̀ сїѧ̑ приписа́ти, но своемꙋ̀ є҆стествꙋ̀. Тѣ́мже и҆ ра́вна себѐ мнѧ́ше бы́ти бг҃ꙋ. И҆ сїю̀ є҆гѡ̀ мы́сль ѡ҆блича́ѧ проро́къ глаго́летъ: Ре́клъ є҆сѝ въ се́рдцѣ твое́мъ: сѧ́дꙋ на горѣ̀ высо́цѣ, поста́влю престо́лъ мо́й на ѻ҆́блацѣхъ, и҆ бꙋ́дꙋ подо́бенъ вы́шнемꙋ¹⁵³³. Ты́ же человѣ́къ є҆сѝ, а҆ не бг҃ъ. И҆ па́ки и҆́нъ проро́къ глаго́летъ: Что̀ хва́лишисѧ во ѕло́бѣ си́льне¹⁵³⁴; и҆ прѡ́чаѧ ѱалма̀. Сїѧ̑ ᲂу҆́бѡ вѣ́дѧще, ᲂу҆бои́мсѧ, и҆ всѧ́цѣмъ хране́нїемъ соблюде́мъ своѐ се́рдце ѿ смертоно́снагѡ дꙋ́ха горды́ни, при́снѡ къ себѣ̀ а҆по́столово, є҆гда̀ добродѣ́тель нѣ́кꙋю и҆спра́вимъ, глаго́люще сїѐ: не а҆́зъ же, но благода́ть бж҃їѧ, ꙗ҆́же со мно́ю¹⁵³⁵. И҆ сїѐ ѿ гдⷭ҇а рече́нное: Ꙗ҆́кѡ без̾ менѐ не мо́жете твори́ти ничесо́же¹⁵³⁶. И҆ є҆́же ѿ проро́ка: а҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи¹⁵³⁷. И҆ є҆́же: ни хотѧ́щагѡ, ни текꙋ́щагѡ, но ми́лꙋющагѡ бг҃а¹⁵³⁸. И҆́бо а҆́ще и҆ наипа́че бꙋ́детъ кто̀ воспале́нъ ᲂу҆се́рдїемъ, и҆ тща́теленъ произволе́нїемъ, пло́тїю ѡ҆бложе́нный и҆ кро́вїю, не возмо́жетъ къ соверше́нствꙋ дости́гнꙋти, то́чїю ми́лостїю хрⷭ҇то́вою и҆ благода́тїю є҆гѡ̀. И҆́бо и҆ і҆а́кѡвъ глаго́летъ: всѧ́ко даѧ́нїе бла́го свы́ше є҆́сть¹⁵³⁹. И҆ а҆по́столъ па́ѵелъ, что́ бо и҆́маши, є҆гѡ́же нѣ́си прїѧ́лъ; а҆́ще же и҆ прїѧ́лъ є҆сѝ, что̀ хва́лишисѧ, ꙗ҆́кѡ не прїе́мь¹⁵⁴⁰, но ꙗ҆́кѡ ѡ҆ свои́хъ возносѧ́йсѧ; А҆ ꙗ҆́кѡ благода́тїю и҆ ми́лостїю бж҃їею спасе́нїе на́мъ быва́етъ: свидѣ́тель и҆́стиненъ разбо́йникъ ѻ҆́ный, и҆́же не добродѣ́тели возме́здїе ца́рствїе небе́сное прїѧ́тъ, но благода́тїю бж҃їею и҆ ми́лостїю. Сїѧ̑ ѻ҆тцы̀ на́ши вѣ́дѧще, всѝ є҆диномы́сленнѡ преда́ша, не и҆на́кѡ мощѝ къ соверше́нствꙋ добродѣ́тели дости́гнꙋти, то́чїю смире́нїемъ, є҆́же ѿ вѣ́ры, и҆ стра́ха бж҃їѧ и҆ кро́тости, и҆ соверше́нна нестѧжа́нїѧ прибыва́ти ѡ҆бы́че: и҆́миже и҆ соверше́ннаѧ любы̀ и҆справлѧ́етсѧ, благода́тїю и҆ человѣколю́бїемъ гдⷭ҇а на́шегѡ і҆и҃са хрⷭ҇та̀, є҆мꙋ́же сла́ва во вѣ́ки вѣкѡ́въ, а҆ми́нь.

Тогѡ́жде преподо́бнагѡ кассїа́на къ леонті́нꙋ и҆гꙋ́менꙋ, ѡ҆ ст҃ы́хъ ѻ҆тцѣ́хъ, и҆̀же въ ски́тѣ, и҆ ѡ҆ разсꙋжде́нїи, сло́во по́льзы мно́гїѧ и҆спо́лнено.

Є҆гда̀ ᲂу҆́бѡ въ пꙋсты́ню ски́та, и҆дѣ́же ѿ и҆́нѡкъ и҆скꙋ́снѣйшїи ѻ҆тцы̀, прибы́хомъ, а҆́зъ же и҆ свѧты́й ге́рманъ, и҆́же ѿ пе́рвагѡ во́зраста дрꙋ́гъ мо́й дꙋхо́вный бы́сть во ᲂу҆чи́лищахъ, и҆ въ во́инствѣ, и҆ въ и҆́ноческомъ житїѝ: ᲂу҆зрѣ́хомъ а҆́ввꙋ мѡѷсе́а, мꙋ́жа свѧ́та не то́чїю дѣ́ѧтельными добродѣ́тели, но и҆ бг҃овидѣ́нїемъ дꙋхо́внымъ сїѧ́юща. Сего̀ ᲂу҆̀бо моли́хомъ со слеза́ми, рещѝ на́мъ сло́во назида́нїѧ, и҆́мже возмо́жемъ дости́гнꙋти соверше́нства. И҆́же мно́гѡ моли́мь бы́въ, речѐ: ча̑да, всѣ̀, глаго́летъ, добродѣ́тєли и҆ начина̑нїѧ намѣ́ренїе нѣ́кое и҆́мꙋтъ: къ немꙋ́же взира́ющїи сами́хъ себѐ ᲂу҆правлѧ́юще, жела́емагѡ конца̀ достиза́ютъ. И҆́бо земледѣ́лецъ, ѻ҆вогда̀ со́лнца зно́й, ѻ҆вогда́ же мра́за хла́дъ терпѧ́щи, ᲂу҆се́рднѡ зе́млю воздѣ́лываетъ, намѣ́ренїе и҆мꙋ́щи чи́стꙋ тꙋ̀ ѿ те́рнїѧ и҆ бы́лїѧ показа́ти: коне́цъ же, є҆́же ѿ плодѡ́въ наслажде́нїе. И҆ кꙋ́плю дѣ́ющїй, ни ꙗ҆̀же ѿ мо́рѧ, ни ꙗ҆̀же ѿ землѝ бѣ́дъ боѧ́щисѧ, ᲂу҆се́рднѡ себѐ предае́тъ кꙋ́плѣ: намѣ́ренїе и҆мꙋ́щи, є҆́же ѿ тоѧ̀ прїѡбрѣ́тенїе: коне́цъ же, є҆́же ѿ прїѡбрѣ́тенїѧ наслажде́нїе. И҆ во́инствꙋющїи ни на бѣды̑, ꙗ҆̀же ѿ бра́ней, ни на ѕлострада̑нїѧ, ꙗ҆̀же ѿ стра́нствованїѧ зрѧ́тъ, намѣ́ренїе и҆мꙋ́ще, є҆́же ѿ мꙋ́жества, ᲂу҆спѣ́ѧнїе въ досто́инствѣ: коне́цъ же, є҆́же ѿ досто́инства прїѡбрѣ́тенїе. И҆́мать ᲂу҆́бѡ и҆ на́шъ ѻ҆бѣ́тъ намѣ́ренїе и҆ коне́цъ сво́й, ѡ҆ не́мже всѧ́кїй трꙋ́дъ и҆ по́двигъ претерпѣва́емъ ᲂу҆се́рднѡ. Сегѡ́ бо ра́ди по́стъ и҆ неѧде́нїе не стꙋжа́етъ на́мъ: бдѣ́нїй трꙋ́дъ ᲂу҆слажда́етъ, чте́нїе и҆ поꙋче́нїе писа́нїй любе́зно быва́етъ: трꙋ́дъ дѣ́ла, и҆ повинове́нїе, и҆ всѣ́хъ земны́хъ веще́й ѡ҆бнаже́нїе, и҆ въ се́й пꙋсты́ни пребыва́нїе сла́достнѡ соверша́ютсѧ. Вы́ же, презрѣ́вше ѻ҆те́чество, и҆ ро́дъ, и҆ ве́сь мі́ръ, и҆ стра́нствованїе воспрїѧ́вше, и҆ къ на́мъ человѣ́кѡмъ грꙋ̑бымъ и҆ невѣ́ждамъ прише́дше, рцы́те мѝ, ко́е є҆́сть ва́ше намѣ́ренїе, и҆ на каковы́й коне́цъ зрѧ́ще, сїѐ сотвори́сте; Ѿвѣща́вше же рѣ́хомъ: ца́рствїѧ ра́ди небе́снагѡ. Ничто̀ а҆́вва мѡѷсе́й, добро̀, глаго́летъ, ѡ҆ концѣ̀ реко́сте. Ко́е же є҆́сть намѣ́ренїе, на не́же зрѧ́ще и҆ не ᲂу҆клонѧ́ющесѧ ѿ пра́вагѡ пꙋтѝ, мо́жемъ дости́гнꙋти ца́рствїѧ небе́снагѡ, не реко́сте. И҆ є҆гда̀ не вѣ́дѣти и҆сповѣ́дахомъ, ста́рецъ ѿвѣща̀: коне́цъ ᲂу҆̀бо на́шегѡ ѻ҆бѣ́та, ꙗ҆́коже рече́сѧ, ца́рствїе є҆́сть бж҃їе, намѣ́ренїе же, се́рдца чистота̀, без̾ неѧ́же не возмо́жно є҆́сть ѻ҆́нагѡ конца̀ дости́гнꙋти. Въ се́мъ ᲂу҆̀бо намѣ́ренїи всегда̀ на́шъ ᲂу҆́мъ да бꙋ́детъ: и҆ а҆́ще когда̀ слꙋчи́тсѧ на ма́ло вре́мѧ се́рдцꙋ ѿ пра́вагѡ ᲂу҆клони́тисѧ пꙋтѝ, а҆́бїе є҆го̀ да возведе́мъ, ꙗ҆́коже тектони́ческимъ пра́виломъ намѣ́ренїе ᲂу҆правлѧ́юще. Сїѐ и҆ блаже́нный па́ѵелъ свѣ́дый глаго́летъ: за̑днѧѧ ᲂу҆́бѡ забыва́ѧ, въ прє́днѧѧ же простира́ѧсѧ, къ намѣ́ренномꙋ текꙋ̀, къ по́чести вы́шнѧгѡ зва́нїѧ бж҃їѧ¹⁵⁴¹.

Сегѡ̀ ᲂу҆̀бо ра́ди намѣ́ренїѧ и҆ мы̀ всѧ̑ содѣва́емъ, сегѡ̀ ра́ди всѧ̑ презира́емъ, и҆ ѻ҆те́чество и҆ ро́дъ, и҆ бога́тство и҆ ве́сь мі́ръ, да чистотꙋ̀ се́рдца стѧ́жемъ. А҆́ще же намѣ́ренїѧ сегѡ̀ забве́нїе сотвори́мъ, нꙋ́ждно є҆́сть, ꙗ҆́кѡ во тьмѣ̀ ходѧ́щымъ, и҆ кромѣ̀ пра́вагѡ пꙋтѝ ше́ствꙋющымъ, мно́гѡ претыка́тисѧ, и҆ мно́гѡ заблꙋжда́ти. Сїе́ бо мнѡ́гимъ прилꙋчи́сѧ, и҆̀же въ нача́лѣ ѿрече́нїѧ, презрѣ́вшїе бога́тство, и҆ сребро̀, и҆ ве́сь мі́ръ, а҆́бїе ѡ҆ киркѣ̀, и҆ и҆глѣ̀, и҆ тро́сти, и҆ кни́зѣ воздвиза́ютъ ꙗ҆́рость и҆ гнѣ́въ: не бы́ же пострада́ли, а҆́ще бы по́мнили намѣ́ренїе, ко́егѡ ра́ди всѧ̑ вє́щи презрѣ́ша. Ра́ди бо бли́жнихъ любвѝ бога́тство презира́емъ, да не ѡ҆ се́мъ тѧ́жꙋщесѧ, и҆ гнѣ́ва стра́сть ᲂу҆множа́юще, ѿпаде́мъ любвѐ. Є҆гда̀ ᲂу҆́бѡ въ ма́лыхъ ве́щехъ ѕлѡ́бы гнѣ́ва показꙋ́емъ къ бра́тꙋ, ѿпадо́хомъ намѣ́ренїѧ, и҆ по́льза ни є҆ди́на на́мъ ѿрече́нїѧ. Є҆́же и҆ блаже́нный а҆по́столъ свѣ́дый речѐ: а҆́ще преда́мъ тѣ́ло моѐ во є҆́же сжещѝ є҆̀, любве́ же не и҆́мамъ, ника́ѧ по́льза мѝ є҆́сть¹⁵⁴². Тѣ́мже наꙋча́емсѧ, ꙗ҆́кѡ не а҆́бїе лише́нїю и҆ ѡ҆ставле́нїю веще́й соверше́нство послѣ́дствꙋетъ: но по и҆справле́нїи любвѝ, є҆ѧ́же свѡ́йства са́мъ а҆по́столъ ѡ҆писꙋ́етъ: любы̀, глаго́лѧ, не зави́дитъ, не превозно́ситсѧ, не горди́тсѧ: не и҆́щетъ свои́хъ сѝ, не раздража́етсѧ, не мы́слитъ ѕла̀¹⁵⁴³. Сїѧ́ же всѧ̑ чистотꙋ̀ содѣва́ютъ се́рдца. Сеѧ̀ ра́ди подоба́етъ всѧ̑ твори́ти: и҆ бога́тство презрѣ́ти, и҆ пощє́нїѧ и҆ бдѣ̑нїѧ сла́достнѡ претерпѣва́ти, и҆ въ чте́нїихъ и҆ ѱалмѣ́хъ пребыва́ти. Ѻ҆ба́че ра́ди предрече́нныхъ не пренебрещѝ ѻ҆́нꙋю, а҆́ще когда̀ слꙋчи́тсѧ по нѣ́коемꙋ нꙋ́жномꙋ, и҆ по бз҃ѣ ᲂу҆пражне́нїю ѿ ѻ҆бы́чнагѡ поста̀ воспѧти́тисѧ. Не толи́къ бо є҆́сть прибы́токъ ѿ поста̀, коли́ка тщета̀ ѿ гнѣ́ва: нижѐ толи́ка ѿ чте́нїѧ по́льза, коли́къ вре́дъ, презрѣ́ти бра́та и҆ ѡ҆печа́лити є҆го̀. И҆́бо посты̀, и҆ бдѣ̑нїѧ, и҆ поꙋче́нїе писа́нїй, и҆ лише́нїе бога́тства, и҆ ѿрече́нїе всегѡ̀ мі́ра, нѣ́сть соверше́нство, ꙗ҆́коже рече́сѧ, по соверше́нства ѻ҆рꙋ̑дїѧ. Поне́же не въ си́хъ ѡ҆брѣта́етсѧ соверше́нство, но си́ми прїѡбрѣта́етсѧ. Всꙋ́е ᲂу҆̀бо посто́мъ и҆ бдѣ́нїемъ и҆ нестѧжа́нїемъ и҆ чте́нїемъ писа́нїй хва́лимсѧ, є҆гда̀ ни ꙗ҆́же къ бг҃ꙋ, ни ꙗ҆́же къ бли́жнемꙋ, любвѝ не и҆спра́вихомъ. И҆спра́вивый бо любо́вь, въ себѣ̀ и҆́мать бг҃а, и҆ ᲂу҆́мъ є҆гѡ̀ при́снѡ съ бг҃омъ є҆́сть.

На сїѐ ге́рманъ: и҆ кто̀ мо́жетъ пло́ти се́й сопрѧже́нный и҆мѣ́ти ᲂу҆́мъ при́снѡ съ бг҃омъ, ꙗ҆́кѡ да ничто́же и҆́но помышлѧ́етъ, ни ѡ҆ посѣще́нїи больны́хъ, ни ѡ҆ прїѧ́тїи стра́нныхъ, ни ѡ҆ рꙋкодѣ́лїи, ни ѡ҆ про́чихъ тре́бованїѧхъ тѣ́ла, нꙋ́ждныхъ сꙋ́щихъ и҆ непремѣ́нныхъ: наконе́цъ, ка́кѡ возмо́жетъ ᲂу҆́мъ человѣ́ка, неви́димаго и҆ непостижи́маго бг҃а при́снѡ зрѣ́ти, и҆ неѿлꙋче́нъ ѿ негѡ̀ бы́ти; Мѡѷсе́й речѐ: зрѣ́ти при́снѡ бг҃а и҆ неѿлꙋче́ннꙋ ѿ негѡ̀ бы́ти, тѣ́мъ и҆́мже непщꙋ́ете ѡ҆́бразомъ, не возмо́жно человѣ́кꙋ пло́ть носѧ́щемꙋ и҆ не́мощи сопрѧже́нномꙋ: и҆нѣ́мъ же ѡ҆́бразомъ возмо́жно зрѣ́ти бг҃а, бг҃а бо видѣ́нїе многоѡбра́знѡ постиза́етсѧ и҆ зри́тсѧ. И҆́бо бг҃ъ не въ є҆ди́номъ блаже́нномъ и҆ непостижи́момъ є҆гѡ̀ сꙋществѣ̀ познава́етсѧ: сїе́ бо въ бꙋ́дꙋщемъ вѣ́цѣ свѧты̑мъ є҆гѡ̀ є҆ди̑нымъ предоста́висѧ: но ѿ вели́чества и҆ добро́ты є҆гѡ̀ тва́рей, и҆ ѿ быва́емагѡ по всѧ́къ де́нь ᲂу҆строе́нїѧ є҆гѡ̀ и҆ промышле́нїѧ познае́тсѧ: и҆ ѿ пра́вды є҆гѡ̀, и҆ ѿ чꙋде́съ, ꙗ҆̀же во всѧ́комъ ро́дѣ во свѧты́хъ свои́хъ ꙗ҆влѧ́етъ. Є҆гда́ бо помы́слимъ неизмѣ́римꙋю є҆гѡ̀ си́лꙋ, и҆ недре́млющее є҆гѡ̀ ѻ҆́ко, та̑йнаѧ серде́цъ зрѧ́щее, и҆ ꙗ҆́кѡ ѿ негѡ̀ ничто́же сокрове́нно бы́ти мо́жетъ: тогда̀ стра́хомъ се́рдца ѡ҆держи́ми, ᲂу҆дивлѧ́емсѧ и҆ покланѧ́емсѧ є҆мꙋ̀. Є҆гда̀ помы́слимъ, ꙗ҆́кѡ и҆зочтены̀ ᲂу҆ негѡ̀ сꙋ́ть ка̑пли дождѧ̀, песо́къ мо́рѧ, и҆ ѕвѣ́зды не́ба, ᲂу҆жаса́емсѧ ѡ҆ вели́чїи є҆стества̀ и҆ премꙋ́дрости є҆гѡ̀. Є҆гда̀ помы́слимъ ѡ҆ неизглаго́ланнѣй и҆ неисповѣди́мѣй є҆гѡ̀ премꙋ́дрости и҆ человѣколю́бїи, и҆ ѡ҆ непостижи́мѣмъ долготерпѣ́нїи, носѧ́щемъ безчи́слєннаѧ беззакѡ́нїѧ грѣ́шникѡвъ, прославлѧ́емъ є҆го̀. Є҆гда̀ помы́слимъ ѡ҆ вели́цѣй є҆гѡ̀ къ на́мъ любвѝ, ꙗ҆́кѡ ничто́же бла́го сотво́ршымъ на́мъ, благоизво́ли человѣ́къ бы́ти, бг҃ъ сы́й, да спасе́тъ ны̀ ѿ пре́лести: возбꙋжда́емсѧ къ любле́нїю є҆гѡ̀. Є҆гда̀ помы́слимъ, ꙗ҆́кѡ врага̀ на́шего дїа́вола са́мъ въ на́съ побѣжда́ѧ, за є҆ди́но на́ше произволе́нїе и҆ ко благо́мꙋ преклоне́нїе, вѣ́чнꙋю на́мъ да́рствꙋетъ жи́знь, покланѧ́емсѧ є҆мꙋ̀. Сꙋ́ть же и҆ и҆́на такова̑ѧ неисчє́тнаѧ бг҃озрѣ̑нїѧ, ꙗ҆̀же по мѣ́рѣ дѣ́ланїѧ на́шегѡ, и҆ по мѣ́рѣ ѡ҆чище́нїѧ, въ на́съ возражда́ютсѧ, и҆́миже зри́тсѧ бг҃ъ и҆ познава́етсѧ. Па́ки вопросѝ ге́рманъ: ѿкꙋ́дꙋ быва́етъ сїѐ, ꙗ҆́кѡ мно́гажды не хотѧ́щымъ на́мъ мнѡ́гаѧ помышлє́нїѧ и҆ ѕлы́е по́мыслы стꙋжа́ютъ, и҆ вма́лѣ невѣ́дꙋщымъ на́мъ, та́йнѡ и҆ то́нкѡ привходѧ́ще, ꙗ҆́кѡ не то́чїю не мощѝ возбрани́ти вни́ти и҆̀мъ, но и҆ затрꙋдне́нїю мно́гомꙋ бы́ти, познава́ти ѻ҆́ныѧ; и҆ а҆́ще возмо́жно мы́сли всеконе́чнѡ пра́здной и҆ ника́кѡ нестꙋжи́мой бы́ти ѿ си́хъ, наꙋчи́тисѧ хо́щемъ; Мѡѷсе́й речѐ: мы́сли нестꙋжи́мѣй бы́ти помышле́ньми си́ми, невозмо́жно: прїѧ́ти же сїѧ̑, и҆ пребыва́ти въ ни́хъ, и҆лѝ ѿве́ргнꙋти ѧ҆̀, всѧ́комꙋ тща́щемꙋсѧ возмо́жно. Ꙗ҆́коже бо прїитѝ тѣ́мъ, нѣ́сть ѿ на́съ: си́це ѿгна́нїе ѻ҆́ныхъ, во вла́сти на́шей є҆́сть. Та́кожде и҆ и҆справле́нїе на́шеѧ мы́сли въ на́шемъ є҆́сть и҆зволе́нїи и҆ тща́нїи. Є҆гда́ бо разꙋ́мнѡ и҆ ча́стѡ поꙋча́емсѧ зако́нꙋ бж҃їю, во ѱалмѣ́хъ же и҆ пѣ́снехъ глаго́лемъ, въ постѣ́хъ же и҆ бдѣ́нїихъ пребыва́емъ, и҆ помина́емъ ча́стѡ бꙋ̑дꙋщаѧ, ца́рствїе небе́сное, и҆ гее́нны ѻ҆́гнь, и҆ всѧ̑ дѣла̀ бж҃їѧ, тогда̀ по́мыслы ᲂу҆малѧ́ютсѧ, и҆ мѣ́ста не ѡ҆брѣта́ютъ. Є҆гда́ же въ мїрски́хъ попече́нїихъ и҆ плотски́хъ ве́щехъ пребыва́емъ, и҆ бесѣ́дамъ сꙋ̑етнымъ и҆ пра̑зднымъ себѐ предае́мъ, мно́жатсѧ въ на́съ ѕлы́е по́мыслы. Ꙗ҆́коже бо ме́льницѣ ѿ во́дъ дви́жимѣй, не возмо́жно преста́ти ѿ движе́нїѧ: во вла́сти же є҆́сть приста́вника ме́льницею жи́то моло́ти и҆лѝ кꙋ́коль: си́це мы́сль на́ша приснодви́жима сꙋ́щи не мо́жетъ преста́ти ѿ по́мыслѡвъ. Въ на́съ же є҆́сть да́ти є҆́й и҆лѝ дꙋхо́вное поꙋче́нїе, и҆лѝ тѣле́сное дѣ́ланїе. На сїѧ̑ дивѧ́щихсѧ на́съ ви́дѧ ста́рецъ и҆ и҆зꙋмѣва́ющихъ, и҆ ко словесє́мъ є҆гѡ̀ несы́тымъ жела́нїемъ расположе́нныхъ, не мно́гѡ ᲂу҆молча́въ, па́ки речѐ: поне́же въ долготꙋ̀ толи́кꙋ сло́во прострѐ ва́ша любо́вь, и҆ є҆щѐ послꙋ́шати жела́ете: и҆ ѿ сегѡ̀ непщꙋ́ю, ꙗ҆́кѡ вои́стиннꙋ ᲂу҆че́нїѧ соверше́нства жа́ждете. Хощꙋ̀ ᲂу҆̀бо ва́мъ ѡ҆ и҆зрѧ́днѣйшей добродѣ́тели, ѡ҆ разсꙋжде́нїи сі́есть глаго́лати, ꙗ҆́же междꙋ̀ и҆нѣ́ми добродѣ́тельми, а҆́ки гра́дъ верхꙋ̀ стоѧ́щъ, и҆ цари́ца є҆́сть: и҆ показа́ти преимꙋ́щество тоѧ̀, и҆ высотꙋ̀, и҆ по́льзꙋ, не то́чїю на́шими словесы̀, но и҆ дре́вними мнѣ́нїи ѻ҆тє́цъ, гдⷭ҇ꙋ благода́ть по достоѧ́нїю и҆ жела́нїю слы́шащихъ, повѣ́дающымъ подаю́щꙋ. Є҆́сть бо не ма́ла добродѣ́тель, но ѿ наро́читѣйшихъ ст҃а́гѡ дх҃а дарова́нїй сꙋ́щаѧ, ѡ҆ ни́хже глаго́летъ а҆по́столъ: ѻ҆́вомꙋ дае́тсѧ дх҃омъ сло́во премꙋ́дрости, и҆но́мꙋ же сло́во ра́зꙋма, ѡ҆ то́мже дс҃ѣ, дрꙋго́мꙋ же вѣ́ра тѣ́мъ же дх҃омъ, и҆но́мꙋ дарова̑нїѧ и҆сцѣле́нїй, дрꙋго́мꙋ же разсꙋждє́нїѧ дꙋховѡ́мъ¹⁵⁴⁴. Та́же и҆спо́лншꙋсѧ и҆счисле́нїю дꙋхо́вныхъ дарова́нїй, присовокꙋплѧ́етъ: всѧ̑ же сїѧ̑ дѣ́йствꙋетъ є҆ди́нъ и҆ то́йже дх҃ъ. Зри́те ᲂу҆̀бо, не земны́й, нижѐ ма́лый є҆́сть разсꙋжде́нїѧ да́ръ, но бж҃їѧ благода́ти велича́йшїй да́ръ. Є҆мꙋ́же а҆́ще и҆́нокъ все́ю си́лою и҆ тща́нїемъ не послѣ́дꙋетъ, и҆ входѧ́щихъ въ него̀ дꙋхѡ́въ разсꙋжде́нїю тве́рдымъ по́мысломъ не навы́кнетъ, нꙋ́жно є҆́сть є҆мꙋ̀ ꙗ҆́кѡ въ нощѝ заблꙋ́ждшемꙋ, не то́чїю въ лютѣ́йшыѧ ѕло́бы ꙗ҆́мы впада́ти, но и҆ на ра́вныхъ и҆ пра́выхъ мѣ́стѣхъ претыка́тисѧ. На па́мѧть ᲂу҆̀бо мнѣ̀ прїи́де и҆ногда̀ въ лѣ́тѣхъ ю҆́ности моеѧ̀, въ предѣ́лѣхъ ѳиваі́ды, и҆дѣ́же блаже́нный а҆нтѡ́нїй пребыва́ше, ста́рцємъ собра́вшымсѧ къ немꙋ̀, и҆ взыска́нїе съ ни́мъ творѧ́щымъ ѡ҆ соверше́нствѣ добродѣ́тели: ка́ѧ сі́есть всѣ́хъ была́ бы бо́льшаѧ добродѣ́телей, и҆ могꙋ́щаѧ и҆́нока ѿ сѣ́тей дїа́вола, и҆ пре́лести є҆гѡ̀ безвре́дна сохрани́ти. Кі́йждо ᲂу҆̀бо по понѧ́тїю своеѧ̀ мы́сли дава́ше мнѣ́нїе. И҆ ѻ҆́вїи глаго́лахꙋ по́стъ и҆ бдѣ́нїе: ꙗ҆́кѡ си́ми и҆стончава́ющейсѧ мы́сли и҆ чистотѣ̀ присꙋ́щей, ᲂу҆до́бѣе къ бг҃ꙋ мощѝ прибли́житисѧ. Ѻ҆́вїи же, нестѧжа́нїе и҆ презрѣ́нїе свои́хъ веще́й: ꙗ҆́кѡ ѿ сегѡ̀ мы́сли многоплете́нныхъ ве́рвїй мїрска́гѡ попече́нїѧ и҆зба́вльшейсѧ, ᲂу҆до́бѣе мо́щно къ бг҃ꙋ прибли́житисѧ. Ѻ҆́вїи же ми́лостыни добродѣ́тель предпочто́ша, ꙗ҆́коже гдⷭ҇ꙋ во є҆ѵⷢ҇лїи глаго́лющꙋ: прїиди́те благослове́ннїи ѻ҆ц҃а̀ моегѡ̀, наслѣ́дꙋйте ᲂу҆гото́ванное ва́мъ ца́рствїе ѿ сложе́нїѧ мі́ра: взалка́хсѧ бо, и҆ да́сте мѝ ꙗ҆́сти ¹⁵⁴⁵, и҆ прѡ́чаѧ. И҆ є҆гда̀ си́мъ ѡ҆́бразомъ разли́чными добродѣ́тельми кі́йждо по своемꙋ̀ мнѣ́нїю глаго́лаше па́че мощѝ человѣ́кꙋ прибли́житисѧ къ бг҃ꙋ, мимои́де мно́га ча́сть но́щи въ прѣ́нїи се́мъ. По́слѣжде всѣ́хъ блаже́нный а҆нтѡ́нїй ѿвѣща̀: сїѧ̑ всѧ̑, ꙗ҆̀же реко́сте, и҆ нꙋ̑жна сꙋ́ть и҆ полє́зна и҆́щꙋщымъ бг҃а, и҆ къ немꙋ̀ прїитѝ жела́ющымъ: но си́мъ добродѣ́телемъ прїимꙋ́щества пода́ти не попꙋща́етъ на́мъ то̀, ꙗ҆́кѡ ѡ҆брѣто́хомъ мы̀ мно́гихъ и҆ въ постѣ́хъ и҆ бдѣ́нїихъ ходи́вшихъ, и҆ въ пꙋсты́ню сами́хъ себѐ ѿлꙋчи́вшихъ, и҆ въ нестѧжа́нїи кра́йнѣйшемъ претерпѣ́вшихъ та́кѡ, ꙗ҆́кѡ нижѐ дневны́ѧ пи́щи себѣ̀ ѡ҆ста́вити: и҆ ми́лостыню и҆спра́вившихъ толи́кѡ, ꙗ҆́кѡ не довлѣ́ти и҆̀мъ и҆мѣ́нїй къ раздаѧ́нїю: и҆ по си́хъ ѻ҆каѧ́ннѡ ѿпа́дшихъ добродѣ́тели, и҆ къ нече́стїю попо́лзшихсѧ, что̀ ᲂу҆́бѡ и҆̀хъ соврати́тисѧ пра́вагѡ пꙋтѝ содѣ́ла; Не и҆́но что̀, по моемꙋ̀ мнѣ́нїю, ра́звѣ ꙗ҆́кѡ не и҆мѣ́ѧхꙋ ѻ҆нѝ дарова́нїѧ разсꙋжде́нїѧ. Сїе́ бо ᲂу҆́читъ человѣ́ка ѡ҆ставлѧ́ти въ ѻ҆бое́мъ безмѣ́рїе, и҆ пꙋте́мъ ца́рскимъ ше́ствовати: и҆ не попꙋща́етъ, да ѿ десны́ѧ страны̀ ѡ҆крада́емь бꙋ́детъ безмѣ́рнымъ воздержа́нїемъ, нижѐ да ѿ страны̀ шꙋ́їѧ къ нерадѣ́нїю низвлече́нъ бꙋ́детъ и҆ разслабле́нїю. И҆́бо ѻ҆́ко нѣ́кое дꙋшѝ и҆ свѣти́льникъ разсꙋжде́нїе є҆́сть, по ѻ҆́номꙋ є҆ѵⷢ҇льскомꙋ гла́сꙋ глаго́лющемꙋ: свѣти́льникъ тѣ́лꙋ є҆́сть ѻ҆́ко: а҆́ще ᲂу҆́бѡ ѻ҆́ко твоѐ про́сто бꙋ́детъ, всѐ тѣ́ло твоѐ свѣ́тло бꙋ́детъ: а҆́ще же ѻ҆́ко твоѐ те́мно бꙋ́детъ, всѐ тѣ́ло твоѐ те́мно бꙋ́детъ. И҆́бо та́кѡ и҆́мать: занѐ всѧ̑ помышлє́нїѧ и҆ дѣѧ̑нїѧ разсꙋжде́нїе человѣ́ка и҆спытꙋ́ющи, раздѣлѧ́етъ, и҆ ѿлꙋча́етъ всѧ́кое лꙋка́вое и҆ бг҃ꙋ неꙋго́дное дѣ́ло, и҆ дале́кꙋ ѿ негѡ̀ твори́тъ пре́лесть. И҆ семꙋ̀ наꙋчи́тисѧ кі́йждо мо́жетъ и҆ ѿ повѣствꙋ́емыхъ бж҃е́ственныхъ писа́нїй. Саꙋ́лъ бо ѻ҆́ный пе́рвый воспрїѧ́вый ца́рство і҆сра́илево, поне́же не и҆мѣ́ѧше ѻ҆чесѐ разсꙋжде́нїѧ, ѡ҆мрачи́всѧ мы́слїю, не разꙋмѣ̀ разсꙋди́ти, ꙗ҆́кѡ па́че приноше́нїѧ же́ртвы, ᲂу҆го́дно бѣ̀ бг҃ови повинꙋ́тисѧ заповѣ́данїю ст҃а́гѡ самꙋ́ила¹⁵⁴⁶. И҆ ѿ ни́хже непщева̀ ᲂу҆годи́ти бг҃ꙋ, си́ми прогнѣвлѧ́етъ є҆го̀, и҆ ѿве́рженъ быва́етъ ца́рства¹⁵⁴⁷. Не бы̀ сїѐ претерпѣ́лъ, а҆́ще бы свѣ́тъ разсꙋжде́нїѧ въ себѣ̀ стѧжа́лъ. Сїѐ и҆ а҆по́столъ со́лнце и҆менꙋ́етъ, по рече́нномꙋ ѿ негѡ̀: со́лнце да не за́йдетъ во гнѣ́вѣ ва́шемъ¹⁵⁴⁸. Сїѐ и҆ на́шеѧ жи́зни глаго́летсѧ ѡ҆кормле́нїе, по пи́санномꙋ: въ ни́хже нѣ́сть ѡ҆кормле́нїѧ, па́даютъ ꙗ҆́кѡ ли́ствїе¹⁵⁴⁹. Сїѐ совѣ́томъ въ писа́нїи глаго́летсѧ, є҆гѡ́же кромѣ̀ да ничесѡ́же твори́мъ, ѿ писа́нїѧ наꙋча́емсѧ. И҆ нижѐ сїѐ дх҃о́вное вїно̀, є҆́же весели́тъ се́рдце человѣ́ка, без̾ совѣ́та пи́ти ѡ҆ставлѧ́етсѧ, по глаго́лющемꙋ: съ совѣ́томъ вїно̀ пі́й ¹⁵⁵⁰: и҆ па́ки, ꙗ҆́коже глаго́летъ, гра́дъ стѣна́ми разоре́нъ, и҆ неѡгражде́нъ, та́кѡ мꙋ́жъ творѧ́й что̀ без̾ совѣ́та¹⁵⁵¹. Въ се́мъ премꙋ́дрость, въ се́мъ ра́зꙋмъ и҆ чꙋ́вство состоѧ́тъ, и҆́хже кромѣ̀ нижѐ внꙋ́треннїй на́шъ до́мъ зи́ждитисѧ мо́жетъ, нижѐ дх҃о́вное бога́тство со́брано бы́ти, по рече́нномꙋ: съ премꙋ́дростїю зи́ждетсѧ до́мъ и҆ съ ра́зꙋмомъ и҆справлѧ́етсѧ, и҆ съ чꙋ́вствїемъ и҆сполнѧ́ютсѧ сокрѡ́вища бога́тства¹⁵⁵². Сїѐ рече́сѧ и҆ тве́рдаѧ пи́ща и҆мꙋ́щихъ чꙋ́вствїѧ ѡ҆бꙋчє́нна до́лгимъ ᲂу҆че́нїемъ въ разсꙋжде́нїи добра́ же и҆ ѕла̀. Си́ми ᲂу҆̀бо ꙗ҆́вственнѣ показꙋ́етсѧ, ꙗ҆́кѡ ниеди́на без̾ дарова́нїѧ разсꙋжде́нїѧ добродѣ́тель соста́витисѧ, и҆лѝ тверда̀ до конца̀ пребы́ти мо́жетъ. Всѣ́хъ бо добродѣ́телей ма́терь и҆ храни́тельница є҆́сть разсꙋжде́нїе. Сїѐ ᲂу҆̀бо положе́нїе и҆ мнѣ́нїе а҆нтѡ́нїа, є҆мꙋ́же соединомы́сленни и҆ про́чїи ѻ҆тцы̀ бы́ша. Но да и҆ ѿ новѣ́йшихъ и҆ въ на̑ша времена̀ бы́вшихъ ᲂу҆каза́нїй ᲂу҆тверди́мъ положе́нїе ст҃а́гѡ а҆нтѡ́нїа. Воспомѧни́те и҆ вы̀ ста́рца и҆ро́на, и҆ ѻ҆каѧ́нное паде́нїе, є҆́же пострада̀ пре́жде ма́лыхъ си́хъ дне́й пред̾ ѻ҆чи́ма на́шима. Кі́имъ ѡ҆́бразомъ; посмѣѧ́нїемъ дїа́вола ѿ высоты̀ ѻ҆́ныѧ житїѧ̀ во глꙋбинꙋ̀ сме́рти сведе́сѧ. Сего́ бо по́мнимъ пѧтдесѧ́тъ лѣ́тъ въ пꙋсты́ни пребы́вша, вели́кꙋю жесто́кость житїѧ̀ и҆ крѣ́пкое воздержа́нїе стѧжа́вша, и҆ въ глꙋбоча́йшей пꙋсты́ни, па́че всѣ́хъ, и҆̀же здѣ̀, пребы́вша, и҆ ᲂу҆едине́нїе возлю́бльша. И҆ по толи́цѣхъ трꙋдѣ́хъ и҆ по́двизѣхъ порꙋ́ганъ ѿ дїа́вола, и҆ въ тѧгча́йшее паде́нїе поползнꙋ́всѧ, всѧ̑ и҆̀же въ пꙋсты́ни ѻ҆тцы̀ и҆ бра́тїю въ неꙋтѣ́шный пла́чь вве́рже. Не бы̀ сїѐ претерпѣ́лъ бы́хъ, а҆́ще бы бы́лъ ᲂу҆твержде́нъ разсꙋжде́нїѧ добродѣ́телїю, ꙗ҆́же наꙋчи́ла бы є҆го̀ не своемꙋ̀ по́мыслꙋ, но совѣ́тꙋ ѻ҆тє́цъ и҆ бра́тїй повинꙋ́тисѧ: толи́кѡ бо своемꙋ̀ по́мыслꙋ послѣ́дꙋѧ, поще́нїе и҆ ѿлꙋче́нїе ѿ человѣ̑къ люблѧ́ше, ꙗ҆́кѡ нижѐ въ пра́здникъ ст҃ы́ѧ па́схи прибы́ти въ це́рковь, да не прише́дъ въ собра́нїе и҆ со ѻ҆тцы̀ и҆ бра́тїею, ꙗ҆ды́й съ ни́ми кꙋ́пнѡ, понꙋжде́нъ бꙋ́детъ прїѧ́ти ѻ҆вощѝ, и҆лѝ и҆́но что̀, приноси́мое на трапе́зꙋ, и҆ возмни́тъ себѐ ѿпа́дша своегѡ̀ намѣ́ренїѧ и҆ пра́вила. Си́це ᲂу҆̀бо намно́зѣ свои́мъ хотѣ́нїемъ прельсти́всѧ, а҆́ггела, сатанина̀ прїе́мь, семꙋ̀ ꙗ҆́кѡ а҆́гг҃лꙋ свѣ́та поклони́сѧ: и҆́же повелѣ̀ є҆мꙋ̀ въ полꙋ́нощи въ глꙋбоча́йшїй кла́дезь воврещѝ себѐ, да позна́етъ и҆скꙋ́сомъ, ꙗ҆́кѡ ника́коже каково́йлибо ᲂу҆жѐ бѣдѣ̀ подпаде́тъ, вели́кихъ ра́ди є҆гѡ̀ добродѣ́телей, и҆ бг҃оꙋго́дныхъ трꙋдѡ́въ. Се́й же не разсꙋди́въ по́мысломъ совѣщава́ющагѡ сїѧ̑, но помрачи́всѧ мы́слїю, вве́рже себѐ въ полꙋ́нощи въ кла́дезь. И҆ не по мно́зѣ, ᲂу҆вѣ́дѣвше бра́тїѧ слꙋчи́вшеесѧ, є҆два̀ со мно́гимъ трꙋдо́мъ возмого́ша є҆́ле жи́ва сꙋ́ща и҆звлещѝ є҆го̀. И҆ по и҆звлече́нїи жи́въ два̀ дни̑, въ тре́тїй ᲂу҆́мре, ѡ҆ста́вивъ бра́тїй и҆ ста́рцꙋ пафнꙋ́тїю пла́чь неꙋтѣ́шный: и҆́же человѣколю́бїемъ подви́гсѧ мно́гимъ, и҆ помѧнꙋ́въ мнѡ́гїѧ є҆гѡ̀ трꙋды̀, и҆ многочи́сленны лѣ́ты, ꙗ҆̀же въ пꙋсты́ни претерпѣ̀, не ѿлꙋчѝ є҆гѡ̀ ѿ поминове́нїѧ, и҆ приноше́нїѧ почи́вшихъ, ꙗ҆́кѡ да не причте́тсѧ къ ᲂу҆ме́ршымъ наси́льственнѡ. Что̀ рекꙋ̀ ѡ҆ ѻ҆́нѣхъ двꙋ́хъ бра́тѣхъ, и҆̀же пребыва́хꙋ ѡ҆б̾ ѻ҆́нъ по́лъ пꙋсты́ни ѳиваі́ды, и҆дѣ́же и҆ногда̀ блаже́нный а҆нтѡ́нїй пребыва́ше. Сі́и бо неразсꙋ́днымъ по́мысломъ подви́гшесѧ, взѧ́ша себѣ̀ мнѣ́нїе и҆дтѝ во внꙋ́треннѣйшꙋ пꙋсты́ню вели́кꙋ сꙋ́щꙋ, и҆ невоздѣ́ланнꙋ, сꙋ́ждше въ сами́хъ себѣ̀ не прїѧ́ти пи́щи ѿ человѣ́ка, а҆́ще не ю҆́же и҆̀мъ гдⷭ҇и чꙋдодѣ́йствꙋѧ пода́стъ. И҆ є҆гда̀ заблꙋжда́ющихъ ѻ҆́нѣхъ по пꙋсты́ни, и҆ и҆знемога́ющихъ гла́домъ, и҆здале́ча мазі́ки ᲂу҆зрѣ́ша, се́й же ꙗ҆зы́къ, ма́лѡ не всѣ́хъ ди́кихъ ꙗ҆зы́кѡвъ па́че ди́вїй и҆ жесточа́йшъ є҆́сть, преложи́вше ѿ бж҃е́ственнагѡ промышле́нїѧ, сро́днꙋю жесто́кость въ человѣколю́бїе, съ хлѣ́бы срѣто́ша и҆̀хъ: є҆ди́нъ ᲂу҆́бѡ ѿ предрече́нныхъ двꙋ́хъ бра́тѡвъ, разсꙋжде́нїю є҆мꙋ̀ прише́дшꙋ, съ ра́достїю и҆ благодаре́нїемъ воспрїѧ̀ хлѣ́бы, помы́сливъ, ꙗ҆́кѡ не бы̀ та́кѡ сі́и жесто́ки и҆ ди́вїи и҆ при́снѡ ра́дꙋющїисѧ ѡ҆ кро́ви человѣ́честѣй сострада́ли и҆̀мъ и҆знемо́гшымъ ᲂу҆жѐ, и҆ пи́щꙋ принеслѝ, а҆́ще бы не бг҃ъ подви́глъ и҆̀хъ на сїѐ. Дрꙋгі́й же пи́щꙋ ѿве́ргши, ꙗ҆́кѡ ѿ человѣ̑къ є҆мꙋ̀ принесе́ннꙋ, и҆ пребы́въ въ неразсꙋ́дномъ совѣ́тѣ, не́мощїю неѧде́нїѧ и҆́здше. А҆́ще ᲂу҆́бѡ въ нача́лѣ и҆ ѕѣлѡ̀ ѕлѣ̀ ѻ҆боѐ совѣща́вше, безслове́снꙋ и҆ ги́бельнꙋ мы́сль себѣ̀ прїѧ́ша, ѻ҆ба́че є҆ди́нъ, привше́дшꙋ є҆мꙋ̀ разсꙋжде́нїю, сїѐ, є҆́же де́рзостнѣ и҆ неразꙋми́вѣ ѡ҆предѣлѝ, до́брѣ и҆спра́ви: дрꙋгі́й же въ неразꙋ́мномъ предпрїѧ́тїи пребы́въ, и҆ разсꙋжде́нїѧ кромѣ̀ ѡ҆брѣ́тшисѧ, сме́рть, ю҆́же гдⷭ҇ь ѿврати́ти восхотѣ̀ са́мъ себѣ̀ навлечѐ. Что́ же рекꙋ̀ и҆ ѡ҆ ѻ҆́номъ; є҆гѡ́же и҆́мѧ не хощꙋ̀ рещѝ, занѐ є҆щѐ жи́въ є҆́сть: и҆́же де́мѡна мно́гажды, ꙗ҆́кѡ а҆́гг҃ла воспрїи́мъ, и҆ ѿкровє́нїѧ ѿ негѡ̀ прїе́млѧй, и҆ свѣ́тъ ча́стѡ свѣ́щный въ ке́ллїи свое́й зрѧ́щи, послѣди́ же повелѣва́етъ є҆мꙋ̀ своего̀ сы́на сопребыва́юща є҆мꙋ̀ въ монастырѣ̀ въ же́ртвꙋ принестѝ бг҃ꙋ, ꙗ҆́кѡ ѿ сегѡ̀ ра́вныѧ патрїа́рхꙋ а҆враа́мꙋ че́сти сподо́битисѧ и҆мꙋ́щїй. Є҆гѡ́же совѣща́нїемъ толи́кѡ сведе́сѧ, ꙗ҆́кѡ дѣ́ломъ закла́нїе сы́на соверши́лъ бы, а҆́ще не бы̀ сегѡ̀ ᲂу҆зрѣ́въ сы́нъ кромѣ̀ ѻ҆бы́чаѧ но́жъ и҆з̾ѡстрѧ́юща, и҆ ᲂу҆́зы гото́влѧща, и҆́миже є҆го̀ ꙗ҆́кѡ всесожже́нїе свѧза́ти хотѧ́ше, бѣ́гствомъ спасе́нїе ᲂу҆лꙋчи́лъ. Мно́гѡ бы бы́ло пре́лесть ѻ҆́нꙋю месопота́мина повѣствова́ти, и҆́же толи́ко воздержа́нїе показа́въ, и҆ въ ке́ллїи заключе́нъ лѣ̑та мнѡ́га бы́въ, та́кѡ послѣдѝ дїа́вольскими ѿкрове́нїи и҆ сновидѣ́нїи посмѣ́ѧнъ бы́сть, ꙗ҆́кѡ по толи́цѣхъ трꙋдѣ́хъ, и҆ добродѣ́телехъ, и҆́миже всѧ̑ та́мѡ сꙋ́щыѧ и҆́ноки превосходѧ́ше, во і҆ꙋде́йство и҆ ѡ҆брѣ́занїе впадѐ. И҆́бо хотѧ́й є҆го̀ дїа́волъ прельсти́ти, мно́гажды ꙗ҆влѧ́ше є҆мꙋ̀ и҆́стиннаѧ сновидѣ̑нїѧ: да си́ми благопрїѧ́тнꙋ сотвори́тъ, ю҆́же хотѧ́ше, напослѣ́докъ предложи́ти є҆мꙋ̀, пре́лесть, показꙋ́етъ ᲂу҆́бѡ є҆мꙋ̀ во є҆ди́нꙋ но́щь наро́дъ хрїстїа́нскїй со а҆по́столы и҆ мꙋ́ченики: мра́ченъ и҆ всѧ́кагѡ сра́ма преиспо́лненъ, и҆ въ ско́рби и҆ пла́чѣ и҆ста́ѧвшїй: и҆ вопрекѝ і҆ꙋде́йскїй наро́дъ съ мѡѷсе́емъ и҆ проро́ки свѣ́тлымъ ѻ҆гне́мъ ѡ҆сїѧва́емый, и҆ въ ра́дости и҆ весе́лїи пребыва́ющїй: совѣща̀ преле́стникъ, ꙗ҆́кѡ а҆́ще хо́щетъ блаже́нства и҆ ра́дости наро́да і҆ꙋде́йскагѡ причасти́тисѧ, ѡ҆брѣ́занїе є҆мꙋ̀ прїѧ́ти: є҆́же ᲂу҆́бѡ прельще́нъ и҆ сотворѝ. Ꙗ҆́вѣ ᲂу҆̀бо ѿ всѣ́хъ рече́нныхъ, ꙗ҆́кѡ не бы̀ та́кѡ ѻ҆каѧ́ннѡ и҆ бѣ́днѡ ѡ҆смѣ́ѧни бы́ша рече́нши всѝ, а҆́ще бы дарова́нїе разсꙋжде́нїѧ бы́ша стѧжа́ли. На сїѧ̑ ге́рманъ речѐ: и҆ но́выми ᲂу҆каза́нїи, и҆ положе́нїи дре́внихъ ѻ҆тє́цъ дово́льнѡ показа́сѧ разсꙋжде́нїю и҆сто́чникомъ и҆ ко́ренемъ и҆ главо́ю и҆ сою́зомъ бы́ти всѣ́хъ добродѣ́телей. Но кі́имъ ѡ҆́бразомъ мо́жетъ то̀ стѧжа́ти, жела́емъ наꙋчи́тисѧ: и҆ ка́кѡ ᲂу҆разꙋмѣ́ти и҆́стинное и҆ є҆́же ѿ бг҃а разсꙋжде́нїе и҆ лжеиме́нное и҆ притво́рное, дїа́вольское; Тогда̀ а҆́вва мѡѷсе́й речѐ: и҆́стинное разсꙋжде́нїе не прихо́дитъ, а҆́ще не ѿ и҆́стиннагѡ смире́нїѧ, да не то́чїю ꙗ҆̀же твори́мъ, но и҆ ꙗ҆̀же помышлѧ́емъ, ѿкрыва́емъ ѻ҆тцє́мъ: и҆ да ни въ че́мъ же своемꙋ̀ по́мыслꙋ вѣ́рꙋемъ, но и҆ во все́мъ словесє́мъ ста́рєцъ да послѣ́дꙋемъ, и҆ ѻ҆но̀ бы́ти добро̀ вѣ́рꙋемъ, є҆́же а҆́ще ѻ҆нѝ и҆скꙋ́сѧтъ. Сїе́ же дѣ́ланїе не то́чїю и҆́стиннымъ разсꙋжде́нїемъ и҆ пра́вымъ пꙋте́мъ и҆́нока невреди́ма пребыва́ти ᲂу҆строѧ́етъ, но и҆ ѿ всѣ́хъ сѣ́тей дїа́вольскихъ безвре́дна того̀ сохранѧ́етъ. Не возмо́жно бо є҆́сть сꙋдо́мъ и҆ совѣ́томъ предꙋспѣ́вшихъ свою̀ ᲂу҆правлѧ́ющемꙋ жи́знь, пре́лестїю бѣсо́вскою па́сти: и҆́бо и҆ пре́жде не́же сподо́битисѧ комꙋ̀ да́ра разсꙋжде́нїѧ, са́мо то̀ є҆́же ꙗ҆влѧ́ти и҆ ѿкрыва́ти ѕлы̑ѧ по́мыслы ѻ҆тцє́мъ, ᲂу҆вѧда́етъ ѻ҆́ныѧ, и҆ немощнѣ́йшыѧ твори́тъ. Ꙗ҆́коже бо ѕмі́й ѿ те́мныѧ норы̀ и҆знесе́нный на свѣ́тъ, тщи́тсѧ бѣ́гство ᲂу҆потреби́ти и҆ сокры́тїе: та́кѡ и҆ лꙋка̑выѧ по́мыслы и҆зрѧ́днѣйшею и҆́сповѣдїю и҆ и҆зглаго́ланїемъ ꙗ҆вле́ни бы́вше, тща́тсѧ бѣжа́ти ѿ человѣ́ка: и҆ да добродѣ́тель сїю̀ и҆звѣ́стнѣе и҆ ѿ примѣ́ра ᲂу҆вѣ́сте, а҆́ввы серапїѡ́на дѣ́ло, є҆́же то́й приходѧ́щымъ пред̾ѡхране́нїѧ ра́ди произносѧ́ше ча́стѡ, повѣ́мъ. Глаго́лаше бо та́кѡ: є҆гда̀ бѣ́хъ ю҆нѣ́йшїй, сопребыва́хъ со а҆́ввою мои́мъ, и҆ ꙗ҆́коже ꙗ҆до́хомъ воста́въ ѿ трапе́зы, по дѣ́йствꙋ бѣсо́вскомꙋ крадѧ́хъ пакса́мъ, и҆ сего̀ ꙗ҆дѧ́хъ ѻ҆́тай а҆́ввы моегѡ̀. Ꙗ҆́коже ᲂу҆́бѡ пребыва́хъ сїѐ творѧ́й вре́мѧ нема́ло, воз̾ѡблада́нъ бы́въ не мого́хъ побѣди́ти, то́чїю ѡ҆сꙋжда́емь бы́хъ ѿ своеѧ̀ со́вѣсти, ста́рцꙋ же стыдѧ́хсѧ рещѝ. Слꙋчи́сѧ же по смотре́нїю человѣколю́бца бг҃а бра́тїи нѣ́коей прїитѝ къ ста́рцꙋ по́льзы ра́ди, и҆ вопроси́ша є҆го̀ ѡ҆ свои́хъ по́мыслѣхъ. Ѿвѣща́ же ста́рецъ: ꙗ҆́кѡ ничесо́же та́кѡ вреди́тъ и҆́ноки, и҆ радостотвори́тъ бѣ́сы, ꙗ҆́кѡже таи́ти своѧ̑ по́мыслы ѿ дꙋхо́вныхъ ѻ҆тє́цъ, глаго́лаше же и҆̀мъ и҆ ѡ҆ воздержа́нїи. Си̑мъ же глаго́лємымъ въ себѐ прише́дъ и҆ помы́сливъ, ꙗ҆́кѡ бг҃ъ ѿкры̀ ста́рцꙋ согрѣшє́нїѧ моѧ̑: ᲂу҆мили́всѧ нача́хъ пла́кати, и҆ и҆зверго́хъ пакса́мъ ѿ нѣ́дра моегѡ̀, є҆го́же ѕлѣ̀ прїѡбыко́хъ кра́сти: ве́ргнꙋвъ же себѐ на зе́млю, проси́хъ проще́нїѧ ѡ҆ проше́дшихъ, и҆ моли́твы ѡ҆ ᲂу҆твержде́нїи бꙋ́дꙋщихъ. Тогда̀ глаго́ла ста́рецъ: ча́до, свободи́ло тѧ̀ и҆ мнѣ̀ молча́щꙋ и҆сповѣ́данїе твоѐ, и҆ ᲂу҆ѧзвлѧ́ющаго тѧ̀ бѣ́са молча́нїемъ, и҆зре́кши ꙗ҆̀же въ тебѣ̀ закла́лъ є҆сѝ, є҆го́же да́же до ны́нѣ ѡ҆блада́ти тобо́ю сотвори́лъ є҆сѝ, ни противꙋглаго́лѧ, ни ѡ҆блича́ѧ є҆гѡ̀: не ктомꙋ̀ ᲂу҆жѐ ѿ ны́нѣ мѣ́сто и҆мѣ́ти бꙋ́детъ въ тебѣ̀, ѿ се́рдца твоегѡ̀ въ ꙗ҆вле́нїе и҆зведе́нъ бы́въ. Є҆ще́ же не сконча̀ ста́рецъ глаго́лѧ, и҆ сѐ дѣ́йствїе ви́дѣно бы́сть, ꙗ҆́кѡ свѣща̀ ѻ҆́гненна и҆звлека́емаѧ ѿ нѣ́дра моегѡ̀, и҆ и҆спо́лни до́мъ ѕлово́нїѧ, ꙗ҆́коже непщева́ти присꙋ́щымъ, ꙗ҆́кѡ мно́жество жꙋ́пела є҆́сть горѧ́щее. Тогда̀ ᲂу҆́бѡ речѐ ста́рецъ: сѐ мои́хъ слове́съ и҆ твоегѡ̀ свобожде́нїѧ подадѐ гдⷭ҇ь ᲂу҆каза́нїе бы́вшихъ зна́менїемъ. Та́кѡ ᲂу҆̀бо ѿстꙋпѝ ѿ менѐ и҆́сповѣдїю стра́сть чревобѣ́сїѧ и҆ дїа́вольское дѣ́йствїе ѻ҆́но, ꙗ҆́коже ктомꙋ̀ нижѐ въ мы́сль мнѣ̀ прїитѝ такова́гѡ жела́нїѧ. Сѐ ᲂу҆̀бо и҆ ѿ рече́нныхъ ѿ а҆́ввы серапїѡ́на наꙋча́емсѧ, ꙗ҆́кѡ тогда̀ сподоблѧ́емсѧ дарова́нїѧ и҆́стиннагѡ разсꙋжде́нїѧ, є҆гда̀ не сꙋди́щꙋ мы́сли своеѧ̀ повѣрѧ́ти и҆́мамы, но ᲂу҆че́нїю и҆ и҆з̾ѡбраже́нїю ѻ҆тє́цъ. И҆́бо не и҆нѣ́мъ поро́комъ си́це дїа́волъ по стремни́намъ несе́тъ и҆́нока, ꙗ҆́коже си́мъ, дабы̀ повинꙋ́ти є҆го̀ ѿмета́ти совѣ̑тованїѧ ѻ҆тє́цъ, своемꙋ́ же послѣ́довати мнѣ́нїю, и҆ свое́й во́ли. Подоба́ше же на́мъ и҆ ѿ человѣ́ческихъ хꙋдо́жествъ и҆ зна́нїй примѣ́ры прїе́млющымъ нака́зоватисѧ. А҆́ще бо сїѧ̑ и҆ рꙋка́ма ѡ҆сѧза́юще, и҆ ѻ҆чи́ма ви́дѧще, и҆ ᲂу҆ши́ма слы́шаше, са́ми ѿ себѐ и҆спра́вити не мо́жемъ: но тре́бꙋемъ до́брѣ ᲂу҆ча́щагѡ и҆ ᲂу҆правлѧ́ющагѡ: ка́кѡ не безꙋ́мно дх҃о́вномꙋ хꙋдо́жествꙋ, всѣ́хъ хꙋдо́жествъ трꙋднѣ́йшемꙋ, непщева́ти не тре́бовати ᲂу҆чи́телѧ; є҆́же и҆ неви́димо, и҆ сокрове́нно є҆́сть, и҆ є҆ди́ною чистото́ю се́рдца зри́мо: сегѡ̀ хꙋдо́жества неимѣ́нїе, не привре́меннꙋ тщетꙋ̀, но дꙋшѝ поги́бель ражда́етъ и҆ сме́рть вѣ́чнꙋ. Ге́рманъ речѐ: и҆звѣ́тъ на́мъ стыда̀ и҆ прикры́тїе привре́дныѧ боѧ́зни ражда́ти ѡ҆бы́че, ꙗ҆́кѡ мно́гажды нѣ́цыи ѿ ѻ҆тє́цъ слы́шавше ѿ бра́тїи по́мыслы, не то́чїю си́хъ не и҆сцѣли́ша, но и҆ ᲂу҆кори́ша и҆̀хъ, и҆ въ ѿча́ѧнїе вверго́ша: ꙗ҆́коже бо и҆ мы̀ са́ми сїѐ ᲂу҆вѣ́дѣхомъ слꙋ́чшеесѧ въ частѧ́хъ сѷрі́и. Бра́тъ бо нѣ́кїй нѣ́коемꙋ и҆з̾ сꙋ́щихъ та́мѡ ста́рєцъ и҆зречѐ своѧ̑ по́мыслы со всѧ́кою простото́ю и҆ и҆́стиною не стыждѧ́сѧ ѡ҆бнажи́въ та̑йнаѧ своегѡ̀ се́рдца. Ѻ҆́нъ же а҆́бїе ᲂу҆слы́шавъ, нача́тъ негодова́ти, и҆ смꙋща́тисѧ проти́вꙋ бра́та, ᲂу҆корѧ́ѧ є҆го̀ ѡ҆ таковы́хъ ѕлы́хъ по́мыслѣхъ, ꙗ҆́кѡ ѿ сегѡ̀ мнѡ́гимъ ѡ҆ се́мъ слы́шавшымъ стыди́тисѧ и҆звѣщава́ти своѧ̑ по́мыслы ста́рцємъ. А҆́вва мѡѷсе́й речѐ: добро̀ ᲂу҆̀бо є҆́сть, ꙗ҆́коже предрѣ́хъ, не таи́ти своѧ̑ по́мыслы ѿ ѻ҆тє́цъ: ѻ҆ба́че не кі́имлибо глаго́лати, но ста́рцємъ дх҃ѡ́внымъ и҆ разсꙋжде́нїе и҆мꙋ́щымъ и҆звѣщава́ти, не лѣ́тъ ра́ди посѣдѣ́вшымъ: поне́же мно́гїе на во́зрастъ ста́рости зрѧ́ще, и҆ своѧ̑ по́мыслы и҆зре́кше, вмѣ́стѡ врачевства̀ неискꙋ́сствомъ слы́шащихъ въ ѿча́ѧнїе впадо́ша. Бѣ́ бо нѣ́кїй ѿ бра́тїй ѕѣлѡ̀ тщали́въ, и҆ ѕѣлѡ̀ ѿ бѣ́са блꙋ́днагѡ стꙋжа́емь, прїи́де къ нѣ́коемꙋ ста́рцꙋ, и҆ возвѣстѝ є҆мꙋ̀ своѧ̑ по́мыслы: ѻ҆́нъ же ᲂу҆слы́шавъ неискꙋ́сенъ сы́й, негодꙋ́ѧ, ѻ҆каѧ́нна глаго́лаше бы́ти бра́та, и҆ недосто́йна и҆́ноческагѡ ѡ҆́браза, ꙗ҆́кѡ таковы̑ѧ прїи́мша по́мыслы. Сїѧ̑ ᲂу҆слы́шавъ бра́тъ ѿча́ѧвсѧ, и҆ ѡ҆ста́вивъ свою̀ ке́ллїю, въ мі́ръ возврати́сѧ. По бж҃їю же смотре́нїю срѣта́етъ є҆го̀ а҆́вва а҆поллѡ́съ ѿ ста́рєцъ и҆скꙋ́снѣйшїй: и҆ ви́дѧ є҆го̀ смꙋще́нна, и҆ ѕѣлѡ̀ дрѧ́хла, вопросѝ є҆го̀, глаго́лѧ: ча́до! ка́ѧ вина̀ толи́кїѧ ско́рби; Ѻ҆́нъ же въ нача́лѣ ѿ мно́гагѡ ᲂу҆ны́нїѧ ничесо́же ѿвѣща̀. Послѣди́ же мно́гѡ моли́мь бы́въ ѿ ста́рца, ꙗ҆́же съ ни́мъ бы̑вшаѧ и҆зречѐ, глаго́лѧ: ꙗ҆́кѡ по́мыслы мно́гажды стꙋжа́ютъ мѝ, и҆ ше́дъ повѣ́дахъ нѣ́коемꙋ ста́рцꙋ, и҆ по сло́вꙋ є҆гѡ̀ нѣ́сть мѝ спасе́нїѧ наде́жды: ѿча́ѧвсѧ ᲂу҆́бѡ ѿхожꙋ̀ въ мі́ръ. Сїѧ̑ ѻ҆те́цъ а҆поллѡ́съ ᲂу҆слы́шавъ, мно́го молѧ́ше и҆ ᲂу҆вѣщава́ше бра́та глаго́лѧ: не диви́сѧ, ча́до, нижѐ ѿчаѧва́йсѧ. А҆́зъ бо въ толи́цѣмъ во́зрастѣ и҆ сѣди́нѣ сы́й, ѕѣлѡ̀ ѿ си́хъ по́мыслѡвъ стꙋжа́юсѧ. Не ѿчаѧва́йсѧ ᲂу҆́бѡ ѡ҆ толи́цѣмъ раждеже́нїи, є҆́же не толи́кѡ человѣ́ческимъ тща́нїемъ врачꙋ́етсѧ, є҆ли́кѡ бж҃їимъ человѣколю́бїемъ: то́чїю послꙋ́шай мѧ̀ дне́сь, и҆ возврати́сѧ въ ке́ллїю твою̀: сотвори́ же бра́тъ си́це. И҆ ѿше́дъ ѿ негѡ̀ а҆́вва а҆поллѡ́съ, и҆́де въ ке́ллїю къ запрети́вшемꙋ бра́та ста́рцꙋ, и҆ ста́въ внѣ̀, молѝ бг҃а со слеза́ми глаго́лѧ: гдⷭ҇и! и҆скꙋшє́нїѧ по́льзы ра́ди наводѧ́й, ѡ҆братѝ бра́нь бра́та на сего̀ ста́рца: да и҆скꙋ́сомъ въ ста́рости свое́й наꙋ́читсѧ, и҆́мже въ до́лгомъ вре́мени не наꙋчи́сѧ, ꙗ҆́кѡ да состра́ждетъ ра́тꙋємымъ. Є҆гда́ же моли́твꙋ сконча̀, зри́тъ є҆ѳїо́па стоѧ́ща бли́зъ ке́ллїи, и҆ стрѣ́лы пꙋща́юща на ста́рца: ѿ ни́хже ᲂу҆ѧ́звленъ а҆́ки ѿ пїѧ́нства сѣ́мѡ и҆ ѻ҆ва́мѡ ѡ҆браща́шесѧ, не могі́й же терпѣ́ти, и҆зше́дъ и҆з̾ ке́ллїи, тѣ́мже пꙋте́мъ, и҆́мже и҆ мла́дшїй, въ мі́ръ и҆дѧ́ше. А҆́вва же а҆поллѡ́съ разꙋмѣ́въ бы́вшее, срѣ́те є҆го̀, глаго́лѧ: ка́мѡ и҆́деши; Ка́ѧ же вина̀ ѡ҆б̾е́млющагѡ тѧ̀ смꙋще́нїѧ сегѡ̀; Оу҆вѣ́дѣвъ же, ꙗ҆́кѡ позна̑на сꙋ́ть ꙗ҆̀же ѡ҆ не́мъ ст҃о́мꙋ, стыда̀ ра́ди ничесо́же глаго́лаше. Рече́ же є҆мꙋ̀ а҆́вва а҆поллѡ́съ: возврати́сѧ въ ке́ллїю твою̀, и҆ ктомꙋ̀ ᲂу҆разꙋмѣ́й не́мощь твою̀: и҆ и҆мѣ́й и҆лѝ непозна́нна себѐ бы́ти ѿ дїа́вола, и҆лѝ презрѣ́нна: занѐ не сподо́билсѧ є҆сѝ, ꙗ҆̀же проти́вꙋ негѡ̀ бра́ни. Что̀ глаго́лю бра́ни; Прираже́нїѧ є҆гѡ̀ ни до є҆ди́нагѡ днѐ понестѝ возмо́глъ є҆сѝ. Сїе́ же тебѣ̀ слꙋчи́сѧ, ꙗ҆́кѡ ю҆нѣ́йша ѿ ѻ҆́бщагѡ врага̀ ра́тꙋема прїѧ́въ, вмѣ́стѡ є҆́же на по́двигъ поѡщрѧ́ти є҆го̀, въ ѿча́ѧнїе вве́рглъ є҆сѝ: не помы́сливъ премꙋ́дрое ѻ҆́ное заповѣ́данїе глаго́лющее: и҆зба́вити ведо́мыхъ на сме́рть, и҆ и҆скꙋпи́ти ᲂу҆быва́емыхъ не пощади́ши. Но нижѐ при́тчꙋ сп҃си́телѧ на́шегѡ глаго́лющꙋю: тро́сти сокрꙋше́нны не прело́миши, и҆ ле́на вне́мшасѧ не ᲂу҆гаси́ши¹⁵⁵³. Никто́же бо вра̑жїѧ снестѝ возмо́глъ бы навѣ́ты, нижѐ горѧ́щее є҆стества̀ раждеже́нїе ᲂу҆гаси́ти, а҆́ще бы не бж҃їѧ благода́ть сохранѧ́ла человѣ́ческꙋю не́мощь. Тѣ́мже и҆спо́лнившꙋсѧ є҆́же ѡ҆ на́съ спаси́тельномꙋ семꙋ̀ смотре́нїю ѻ҆́бщими моли́твами бг҃а мо́лимъ, ꙗ҆́кѡ да на тѧ̀ пꙋще́нный би́чь ѿведе́тъ. Ѻ҆́нъ бо сокрꙋша́тисѧ твори́тъ, и҆ па́ки возставлѧ́етъ: поразѝ, и҆ рꙋ́цѣ є҆гѡ̀ и҆сцѣли́ша: смирѧ́етъ и҆ вы́ситъ: мертви́тъ и҆ живи́тъ: низво́дитъ во а҆́дъ, и҆ возво́дитъ. Сїѧ̑ ре́къ, и҆ помоли́всѧ, а҆́бїе ѿ наведе́нныѧ є҆мꙋ̀ бра́ни и҆зба́ви: совѣ́това є҆мꙋ̀ проси́ти ѿ бг҃а, да да́стсѧ є҆мꙋ̀ ѧ҆зы́къ ᲂу҆че́нїѧ, є҆́же разꙋмѣ́ти во вре́мѧ, є҆гда̀ подоба́етъ рещѝ сло́во. Ѿ всѣ́хъ ᲂу҆́бѡ рече́нныхъ наꙋча́емсѧ, ꙗ҆́кѡ не и҆́нъ ѡ҆брѧ́щетсѧ пꙋ́ть спасе́нїѧ непреткнове́ненъ, ꙗ҆́коже и҆звѣщава́ти по́мыслы своѧ̑ разсꙋди́тельнѣйшымъ ѻ҆тцє́мъ, и҆ ѿ си́хъ къ добродѣ́тели ᲂу҆правлѧ́ємымъ бы́ти, а҆ не по́мыслꙋ своемꙋ̀ и҆ разсꙋжде́нїю послѣ́довати. Ниже́ бо а҆́ще бы по слꙋ́чаю слꙋчи́лосѧ комꙋ̀ бы́ти ᲂу҆ є҆ди́нагѡ ста́рца простѣ́йша, и҆лѝ ᲂу҆ не мно́гихъ неискꙋ́сныхъ, ра́ди сегѡ̀ подоба́етъ бѣ́гати, и҆звѣщава́ти по́мыслы своѧ̑ и҆скꙋ́снѣйшымъ ѻ҆тцє́мъ и҆ презира́ти преда́нїе пре́дкѡвъ. Ꙗ҆́кѡ бо и҆ ті́и не са́ми ѿ себѐ дви́жими, но ѿ бг҃а и҆ бж҃е́ственныхъ писа́нїй преда́ша послѣ́днемꙋ ро́дꙋ вопроша́ти пред̾ꙋспѣ́вшихъ. Мо́щно є҆́сть и҆ ѿ и҆ны́хъ мно́гихъ въ бг҃одꙋхнове́нномъ писа́нїи ѡ҆брѣта́емыхъ наꙋчи́тисѧ: и҆зрѧ́днѣе же и҆ ѿ по́вѣсти, ꙗ҆́же ѡ҆ ст҃ѣ́мъ самꙋи́лѣ, и҆́же ѿ младе́нчества возложе́нъ бы́въ бг҃ови ма́терїю, и҆ сподо́бивсѧ бж҃е́ственныѧ бесѣ́ды, не вѣ́рова своемꙋ̀ по́мыслꙋ, но є҆ди́ною и҆ два́жды зва́нъ бы́въ ѿ бг҃а, востека́етъ ко ста́рцꙋ и҆лїю̀, и҆ ᲂу҆че́нїемъ тогѡ̀ ѡ҆бразꙋ́етсѧ, и҆ наставлѧ́етсѧ, ка́кѡ подоба́етъ ѿвѣщава́ти бг҃ови: и҆ є҆го́же свои́мъ зва́нїемъ досто́йна себѐ бг҃ъ сꙋдѝ, семꙋ̀ хо́щетъ ѡ҆бразова́нїемъ и҆ повелѣ́нїемъ ста́рца наꙋче́нꙋ бы́ти, ꙗ҆́кѡ ѿ негѡ̀ си́рѣчь ко смире́нїю наста́витисѧ и҆мꙋ́щꙋ. И҆ па́ѵла та́кожде собо́ю призыва́ѧ и҆ предразглаго́льствꙋѧ хрⷭ҇то́съ, могі́й а҆́бїе ѿве́рсти ѻ҆́чи є҆гѡ̀, и҆ соверше́нства пꙋ́ть сказа́ти, ко а҆на́нїи посыла́етъ, и҆ ѿ негѡ̀ повелѣва́етъ наꙋчи́тисѧ пꙋтѝ и҆́стины, глаго́лѧ: воста́ни, вни́ди во гра́дъ, и҆ та́мѡ рече́тсѧ тѝ, что̀ тѝ подоба́етъ твори́ти¹⁵⁵⁴: ᲂу҆ча́ ны си́ми пꙋтево́дствꙋ пред̾ꙋспѣ́вшихъ послѣ́довати: да не когда̀ ѡ҆ па́ѵлѣ до́брѣ глаго́ланное, ѕлѣ̀ разꙋмѣ́емое, примѣ́ръ къ самонра́вїю бꙋ́детъ пото́мственномꙋ ро́дꙋ, комꙋ́ждо хотѧ́щꙋ подо́бнѣ па́ѵлꙋ ѿ бг҃а, а҆ не ѿ ѻ҆тє́цъ на и҆́стинꙋ наставлѧ́тисѧ. А҆ ꙗ҆́кѡ сїѧ̑ та́кѡ сꙋ́ть, мо́щно є҆́сть не ѿ рече́нныхъ то́чїю наꙋчи́тисѧ, но и҆ ѿ тѣ́хъ, ꙗ҆̀же дѣ́лы самѣ́ми показа̀ се́й а҆по́столъ, въ ни́хже пи́шетъ, глаго́лѧ: Ꙗ҆́кѡ взыдо́хъ во і҆ерꙋсали́мъ соглѧда́ти петра̀ и҆ і҆а́кѡва, и҆ предложи́хъ и҆̀мъ благовѣствова́нїе, є҆́же проповѣ́дꙋю, да не ка́кѡ вотщѐ текꙋ̀, и҆лѝ теко́хъ, а҆́ще и҆ споспѣшествова́вшей є҆мꙋ̀ благода́ти ст҃а́гѡ дх҃а си́лою зна́менїй, ꙗ҆̀же творѧ́ше¹⁵⁵⁵. Кто̀ ᲂу҆́бѡ си́це го́рдъ, и҆ кичли́въ є҆́сть, да по своемꙋ̀ мнѣ́нїю и҆ разꙋмѣ́нїю хо́дитъ, є҆гда̀ сосꙋ́дъ и҆збра́нный, ꙗ҆́кѡ тре́боваше са́мъ совѣ́та ѿ пре́днихъ є҆гѡ̀ а҆по́стѡлъ, и҆сповѣ́даетъ. Ꙗ҆́вѣ ᲂу҆́бѡ си́ми доказа́сѧ, ꙗ҆́кѡ никомꙋ́же пꙋ́ть соверше́нства гдⷭ҇ь ѿкрыва́етъ, то́чїю дх҃о́вными ѻ҆тцы̀ на ѻ҆́ный наставлѧ́ємымъ. Ꙗ҆́коже и҆ проро́къ глаго́летъ: вопросѝ ѻ҆тца̀ твоего̀, и҆ возвѣсти́тъ тебѣ̀, ста́рцы твоѧ̑, и҆ рекꙋ́тъ тебѣ̀¹⁵⁵⁶. Все́ю ᲂу҆̀бо си́лою и҆ всѧ́цѣмъ тща́нїемъ благо́е разсꙋжде́нїѧ дарова́нїе въ себѣ̀ до́лжни є҆смы̀ стѧжа́ти, є҆́же возмо́жетъ ны̀ ѿ ѻ҆боегѡ̀ преизли́шества невреди́мы сохрани́ти. И҆́бо, ꙗ҆́коже глаго́лютъ ѻ҆тцы̀, кра́йнѡсти ѻ҆бою̀ странꙋ̀ ра́внѡ вредѧ́тъ: и҆ и҆збы́токъ поста̀, и҆ насыще́нїе чре́ва, и҆ безмѣ́рїе бдѣ́нїѧ, и҆ сы́тость сна̀, и҆ прѡ́чаѧ и҆збы́точєствїѧ. И҆́бо ᲂу҆вѣ́дѣхомъ нѣ́кихъ чревобѣ́сїемъ ᲂу҆́бѡ не побѣжде́нныхъ, безмѣ́рнымъ же посто́мъ низве́рженныхъ, и҆ къ то́йже стра́сти чревобѣ́сїѧ попо́лзшихсѧ за приходѧ́щꙋю ѿ безмѣ́рнагѡ поста̀ не́мощь. И҆ а҆́зъ бо по́мню и҆ногда̀ таково̀ нѣ́что себѐ пострада́вша, и҆ на толи́цѣ воздержа́всѧ, ꙗ҆́коже мѝ забы́ти жела́нїѧ пи́щи: и҆ два̀ и҆ трѝ дни̑ пребыва́ющꙋ мѝ без̾ снѣ́ди, и҆ нижѐ ѿню́дъ пи́щи жела́ющꙋ, а҆́ще бы не бы́ша и҆ні́и къ то́й мѧ̀ побꙋди́ли. И҆ па́ки ѿ ѻ҆́чїю моє́ю, навѣ́томъ дїа́волимъ, та́кѡ со́нъ ѿстꙋпѝ, ꙗ҆́кѡ на мно́жайшы но́щи без̾ сна̀ пребыва́ѧ, моли́хъ гдⷭ҇а ма́лѡ сна̀ прїѧ́ти мѝ, и҆ тѧжча́е бѣ́дствовахъ безмѣ́рнагѡ ра́ди неѧде́нїѧ и҆ бдѣ́нїѧ, не́жели чревоѡб̾ѧде́нїѧ ра́ди и҆ и҆сполне́нїѧ сна̀. Таковы́ми и҆ толи́кими ᲂу҆че́нїи на́съ ст҃ы́й мѡѷсе́й возвеселѝ, ꙗ҆́коже на́мъ воспо́льзовавшымсѧ сла́вити гдⷭ҇а, толи́кꙋ премꙋ́дрость подаю́щаго боѧ́щымсѧ є҆гѡ̀. Є҆мꙋ́же подоба́етъ че́сть, и҆ держа́ва во вѣ́ки, а҆ми́нь.

Преподо́бномꙋ ні́лꙋ ѻ҆те́чество бѣ̀ кѡнстантїнопо́ль, наста́вникъ же бж҃е́ственный златоꙋ́стъ. Лѣ́то же, въ не́же процвѣтѐ, четы́реста четы́редесѧть второ́е. Бл҃горо́дствомъ и҆ бога́тствомъ и҆з̾ѡби́ловаше мно́гимъ, и҆ предсѣда́тель поста́вленъ бы́сть ѻ҆те́чества. Но та́же всѧ̑ ѡ҆ста́вивъ, и҆ прише́дъ въ сїна́йскꙋю го́рꙋ, по́стническое и҆збра̀ житїѐ. Мно́гъ же сы́й въ мꙋ́дрости и҆ внѣ́шней и҆ дх҃о́внѣй, разли́чнаѧ писа́нїѧ ѡ҆ста́ви дх҃о́вныѧ мꙋ́дрости, и҆ неизрече́нныѧ благода́ти и҆спо́лнєннаѧ. Ѿ ни́хже мы̀ по ѡ҆́бразꙋ пчелы̀, собра́вше ѡ҆ моли́твѣ сло́во, на сто̀ пѧтдесѧ́тъ трѝ главы̑ раздѣле́нное, и҆ надписа́нїе ѡ҆ по́стническомъ по́двигѣ и҆мꙋ́щее: си́ми ꙗ҆́кѡ нѣ́кїими пче́льными со́тами чтꙋ́щихъ ᲂу҆чрежда́емъ. Ме́да бо вои́стиннꙋ и҆ а҆мвро́сїи, и҆ не́ктара сла́дость и҆сточа́ютъ, и҆ многоѻби́льныѧ по́льзы и҆з̾ѧвлѧ́ютъ пло́дъ. Оу҆помина́етъ ѡ҆ се́мъ и҆ премꙋ́дрѣйшїй фѡ́тїй въ чте́нїи с҃а, на страни́цѣ сѯ҃ѕ, си́це глаго́лѧ: и҆ ні́ла мона́ха сло́во прочтено̀, на сто̀ пѧтдесѧ́тъ трѝ главы̑ раздѣлѧ́ющеесѧ. Въ си́хъ бж҃е́ственный мꙋ́жъ и҆з̾ѧвлѧ́етъ мл҃твы ѡ҆́бразъ. Мнѡ́га же и҆ и҆́на сꙋ́ть достохва̑льнаѧ є҆гѡ̀ въ дѣла́хъ соверше́нство, и҆ въ словесѣ́хъ си́лꙋ свидѣ̑тельствꙋющаѧ.

Жего́ма мѧ̀ пла́менемъ нечи́стыхъ страсте́й бл҃гопрїѧ́зненнѣ прохлади́лъ є҆сѝ прикоснове́нїемъ бг҃олюби́выхъ твои́хъ писа́нїй, и҆знемога́ющїй мо́й ᲂу҆́мъ въ сра́мнѣйшихъ ᲂу҆тѣ́шивъ, подража́ѧ вели́комꙋ наста́вникꙋ и҆ ᲂу҆чи́телю бл҃же́ннѣ. И҆ не ди́вно. Тебѣ́ бо при́снѡ ча́сть бы́сть назна́менаннаѧ, ꙗ҆́коже и҆ бл҃гослове́нномꙋ і҆а́кѡвꙋ. До́брѣ бо послꙋжи́въ рахи́ли ра́ди, и҆ прїѧ́въ лі́ю, взыскꙋ́еши и҆ вожделѣ́емꙋю, ꙗ҆́коже и҆ сеѧ̀, сі́есть, и҆спо́лнивъ седми́ны¹⁵⁵⁷. А҆́зъ же не могꙋ̀ ѿврещи́сѧ, ꙗ҆́кѡ всю̀ но́щь трꙋ́ждьсѧ ничесо́же ꙗ҆́хъ: ѻ҆ба́че по глаго́лꙋ твоемꙋ̀, вве́ргъ мре́жꙋ, ѡ҆брѣто́хъ ры́бъ мно́жество¹⁵⁵⁸, не мню̀ ᲂу҆́бѡ ꙗ҆́кѡ вели́кихъ, ѻ҆ба́че сто̀ и҆ пѧтдесѧ́тъ и҆ трѝ. И҆ сїѧ̀ посла́въ въ ко́шницѣ любвѝ, равночи́сленными глава́ми повелѣ́нїе сотвори́въ. Дивлю́сѧ же тебѣ̀ и҆ ѕѣлѡ̀ ᲂу҆бл҃жа́ю и҆зрѧ́днѣйшее твоѐ произволе́нїе, ꙗ҆́кѡ глави̑зны ѡ҆ мл҃твѣ ви́дѣти хо́щеши. Не про́стѡ бо тѣ́хъ хо́щеши, ѿ рꙋ́къ, и҆ на хартїѝ черни́ломъ напи́санныхъ, но въ ᲂу҆мѣ̀ любо́вїю и҆ неѕлопомнѣ́нїемъ водрꙋже́нныхъ. Но поне́же всѧ̑ сꙋ́ть дво́йствєнна, ѿ ни́хже є҆ди́но проти́вно є҆ди́номꙋ, по глаго́лꙋ премꙋ́драгѡ сїра́ха, воспрїимѝ къ пи́смени, и҆ дꙋ́хомъ ᲂу҆разꙋмѣ́й, ꙗ҆́кѡ всѧ́комꙋ пи́смени ᲂу҆́мъ предше́ствꙋетъ. Не сꙋ́щꙋ бо семꙋ̀, нижѐ пи́смѧ бꙋ́детъ. Тѣ́мже и҆ моли́твы дво́йственъ ѡ҆́бразъ: є҆ди́нъ ᲂу҆́бѡ дѣ́ѧтельный, дрꙋгі́й же ᲂу҆мозри́тельный: си́це и҆ числа̀: са́мое ᲂу҆́бѡ число̀ є҆́сть коли́чество, зна́менꙋемое же число́мъ є҆́сть ка́чество. На сто́ бо и҆ пѧтдесѧ́тъ трѝ главы̑ сло́во ѡ҆ моли́твѣ раздѣли́вши, є҆ѵⷢ҇льскїй ѻ҆бро́къ тебѣ̀ посла́хомъ, да ѡ҆брѧ́щеши сѷмволи́ческагѡ числа̀ сла́дость, и҆ ѡ҆́бразъ треꙋго́льный, и҆ шестиꙋго́льный: ѻ҆́во ᲂу҆́бѡ благоче́стное позна́нїе тро́ицы, ѻ҆́во же и҆ ѡ҆писа́нїе мі́ра сегѡ̀ и҆з̾ѧвлѧ́ющъ. Но и҆ со́тное число̀ по себѣ̀ четвероꙋго́льно є҆́сть: пѧтдесѧ́тное же три́щи, треꙋго́льно и҆ крꙋ́гло. Двадесѧтьосмери́чное ᲂу҆́бѡ треꙋго́льно: крꙋ́глое же двадесѧтопѧтери́чное: пѧ́ть бо кра́тъ пѧ́ть, два́десѧть пѧ́ть. Тѣ́мже и҆́маши четвероꙋго́льный. ѡ҆́бразъ, не то́чїю четвери́цею добродѣ́телей, но и҆ вѣ́ка сегѡ̀ мꙋ́дрое позна́нїе два́десѧть пѧ́томꙋ числꙋ̀ подо́бное, ра́ди крꙋглоты̀ време́нъ. Седми́ца бо по седми́цѣ, и҆ мѣ́сѧцъ по мѣ́сѧцѣ дви́житсѧ и҆ ѿ го́да въ го́дъ лѣ́то ѡ҆браща́етсѧ, и҆ вре́мѧ по вре́мени, ꙗ҆́коже въ движе́нїи со́лнца и҆ лꙋны̀ весны̀ и҆ лѣ́та, и҆ ꙗ҆̀же пото́мъ зри́мъ. Треꙋго́льное же зна́меновати мо́жетъ тебѣ̀ ст҃ы́ѧ трⷪ҇цы позна́нїе. И҆на́кѡ: а҆́ще во мно́жествѣ, число̀ прїѧ́ти ста̀ пѧти́десѧти трїе́хъ, треꙋго́льное сꙋ́що разꙋмѣ́й, дѣ́ѧтельное, є҆сте́ственное, и҆ бг҃осло́вное: и҆лѝ, вѣ́рꙋ, наде́ждꙋ, и҆ любо́вь: зла́то, сребро̀, ка́менїе честно́е: но число̀ ᲂу҆́бѡ сицево̀, гла́въ же скꙋ́дость да не пре́зриши, ꙗ҆́кѡ вѣ́дый насыща́тисѧ и҆ лиша́тисѧ. Є҆́й ᲂу҆́бѡ, и҆ ꙗ҆́кѡ по́мнѧщїй два̀ вдови́цы лє́пта неѿве́ргшаго, но и҆ па́че бога́тства мно́гихъ и҆ны́хъ воспрїи́мшаго ѻ҆́ныѧ: тѣ́мъ же благоволе́нїѧ и҆ любвѝ пло́дъ вѣ́дый сохрани́ти при̑снымъ твои̑мъ бра́тїѧмъ, моли́сѧ ѡ҆ болѧ́щемъ, ꙗ҆́кѡ да здра́въ бꙋ́детъ, и҆ взѧ́въ про́чее ѻ҆́дръ, да хо́дитъ благода́тїю хрⷭ҇то́вою, а҆ми́нь.

а҃. А҆́ще кто̀ восхотѣ́лъ бы благово́нный ѳѷмїа́мъ ᲂу҆стро́ити, чи́стый лїва́нъ, и҆ кассі́ю, и҆ ѻ҆́нихъ, и҆ ста́ктꙋ, ра́внѡ да сло́житъ по зако́нꙋ¹⁵⁵⁹. Сїѧ̑ же сꙋ́ть четвери́ца добродѣ́тели: а҆́ще бо и҆спо́лнены и҆ ра́вны сꙋ́ть, не пре́данъ бꙋ́детъ ᲂу҆́мъ.

в҃. Ѡ҆чи́щшисѧ дꙋша̀ и҆сполне́нїемъ за́повѣдей, непоколеби́мь чи́нъ ᲂу҆ма̀ ᲂу҆строѧ́етъ, прїѧ́теленъ то́й творѧ́щи и҆ско́магѡ ᲂу҆строе́нїѧ.

г҃. Моли́тва є҆́сть бесѣ́да ᲂу҆ма̀ къ бг҃ꙋ. Какова̀ ᲂу҆́бѡ тре́бꙋетъ ᲂу҆строе́нїѧ ᲂу҆́мъ, да возмо́жетъ не и҆змѣ́ннѡ воспростира́тисѧ къ своемꙋ̀ влⷣцѣ, и҆ собесѣ́довати є҆мꙋ̀ ничесомꙋ́же посредѝ сꙋ́щꙋ.

д҃. А҆́ще къ сꙋ́щей на землѝ кꙋпинѣ̀ горѧ́щей прибли́житисѧ покꙋси́выйсѧ мѡѷсе́й возбранѧ́етсѧ, до́ндеже и҆ззꙋ́етъ сапогѝ ѿ но́гъ¹⁵⁶⁰: ка́кѡ ты̀ всѧ́кое чꙋ́вство и҆ помышле́нїе превозходѧ́щаго ви́дѣти, и҆ собесѣ́дникъ томꙋ̀ бы́ти хотѧ́й, не ѿрѣши́ши ѿ себѐ всѧ́ко помышле́нїе пристра́стно;

є҃. Пе́рвѣе ѡ҆ прїѧ́тїи сле́зъ моли́сѧ, ꙗ҆́кѡ да пла́чемъ ᲂу҆мѧгчи́ши сꙋ́щꙋю въ дꙋшѣ̀ твое́й жесто́кость, и҆ и҆сповѣ́давъ на тѧ̀ беззакѡ́нїѧ твоѧ̑ гдⷭ҇ви, ѿпꙋще́нїе ѿ негѡ̀ полꙋчи́ши.

ѕ҃. И҆сточа́й сле́зы ко и҆справле́нїю всѧ́кагѡ проше́нїѧ: ѕѣлѡ́ бо ра́дꙋетсѧ влⷣка, со слеза́ми молѧ́щꙋсѧ тебѣ̀.

з҃. А҆́ще и҆сто́чникъ сле́зъ и҆злива́еши въ моли́твѣ твое́й, ника́коже возноси́сѧ въ себѣ̀, ꙗ҆́кѡ па́че мно́гихъ сы́й. По́мощь бо воспрїѧ̀ моли́тва твоѧ̀, ꙗ҆́кѡ да возмо́жеши ᲂу҆се́рднѡ и҆сповѣ́дати твоѧ̑ прегрѣшє́нїѧ, и҆ ᲂу҆ми́лостивити влⷣкꙋ слеза́ми. Да не въ стра́сть ᲂу҆̀бо преложи́ши страсте́й ѿвраще́нїе, да не мно́жае прогнѣ́ваеши да́вшаго тѝ благода́ть.

и҃. Мно́зи слезѧ́ще ѡ҆ грѣсѣ́хъ, забы́вше сле́зъ намѣ́ренїе, вознеи́стовствоваше соврати́шасѧ.

ѳ҃. Сто́й терпѣли́внѣ, и҆ моли́сѧ крѣ́пцѣ, и҆ ѿвраща́йсѧ попече́нїй и҆ по́мыслѡвъ нахожде́нїѧ: смꙋща́ютъ бо и҆ стꙋжа́ютъ тѝ, да крѣ́пость разсла́бѧтъ.

і҃. Є҆гда̀ зрѧ́тъ тебѐ бѣ́сове ᲂу҆се́рдствꙋюща и҆́стиннѡ моли́тисѧ: тогда̀ влага́ютъ помышлє́нїѧ нѣ́кїихъ потре́бъ а҆́кибы нꙋ́ждныхъ, и҆ пома́лѣ возбꙋжда́ютъ ѡ҆ ни́хъ па́мѧть, дви́жꙋще ᲂу҆́мъ ко взыска́нїю тѣ́хъ, и҆ ꙗ҆́кѡ не ѡ҆брѣта́ѧ, ѕѣлѡ̀ ᲂу҆ныва́етъ и҆ печа́лꙋетъ. Є҆гда́ же ста́нетъ на моли́твꙋ, воспомина́ютъ є҆мꙋ̀ ѡ҆ взыска́нныхъ и҆ воспомѧне́нныхъ, ꙗ҆́кѡ да подви́гшисѧ ᲂу҆́мъ къ ᲂу҆вѣ́дѣнїю ѻ҆́нѣхъ, погꙋби́тъ пло́дъ моли́твы.

а҃і. Подвиза́йсѧ ᲂу҆строева́ти ᲂу҆́мъ тво́й во вре́мѧ моли́твы, да бꙋ́детъ глꙋ́хъ и҆ нѣ́мъ, и҆ возмо́жеши помоли́тисѧ.

в҃і. Є҆гда̀ а҆́ще срѧ́щетъ тѧ̀ и҆скꙋше́нїе, и҆лѝ прекосло́вїе раздражи́тъ, и҆лѝ къ сопроти́вномꙋ вкꙋ́пѣ подви́гнꙋти ꙗ҆́рость, и҆лѝ нѣ́кїй нелѣ́пый и҆знестѝ глаго́лъ, помѧнѝ моли́твꙋ, проти́вꙋ ѻ҆́нагѡ сꙋ́дъ, и҆ а҆́бїе безчи́нное въ тебѣ̀ движе́нїе ᲂу҆кроти́тсѧ.

г҃і. Є҆ли̑ка а҆́ще сотвори́ши ко ѿмще́нїю бра́та ѡ҆би́дѧщагѡ тѧ̀, всѧ̑ въ собла́знъ тебѣ̀ бꙋ́дꙋтъ во вре́мѧ мл҃твы.

д҃і. Мл҃тва є҆́сть, кро́тости и҆ безгнѣ́вїѧ прозѧбе́нїе.

є҃і. Мл҃тва є҆́сть, ра́дости и҆ бл҃годаре́нїѧ предложе́нїе.

ѕ҃і. Мл҃тва є҆́сть, печа́ли и҆ ᲂу҆ны́нїѧ ѿгна́нїе.

з҃і. Ше́дъ, прода́ждь и҆мѣ́нїе твоѐ, и҆ да́ждь ни́щымъ, и҆ взе́мъ кре́стъ ѿве́ржисѧ себѐ¹⁵⁶¹, да возмо́жеши безмѧте́жнѡ помоли́тисѧ.

и҃і. А҆́ще хо́щеши похва́льнѣ моли́тисѧ, ѿве́ржисѧ себѐ¹⁵⁶², во вре́мѧ моли́твы, и҆ мнѡ́гаѧ лю̑таѧ терпѧ̀, ѡ҆ моли́твѣ любомꙋ́дрствꙋй.

ѳ҃і. Є҆́же а҆́ще приско́рбнѡ терпѧ̀ любомꙋ́дрствовати бꙋ́деши, сегѡ̀ пло́дъ во вре́мѧ моли́твы ѡ҆брѧ́щеши.

к҃. Хотѧ̀ помоли́тисѧ ꙗ҆́коже подоба́етъ, да не ѡ҆печа́лиши дꙋ́шꙋ: а҆́ще же нѝ, всꙋ́е тече́ши.

к҃а. Ѡ҆ста́ви да́ръ тво́й, глаго́летъ, пред̾ ѻ҆лтаре́мъ и҆ ше́дъ пре́жде смири́сѧ съ бра́томъ твои́мъ¹⁵⁶³, и҆ тогда̀ прише́дъ помо́лишисѧ без̾ смꙋще́нїѧ: ѕлопомнѣ́нїе бо помрача́етъ ᲂу҆́мъ молѧ́щагѡсѧ, и҆ потемнѧ́етъ є҆гѡ̀ моли̑твы.

к҃в. Печа̑ли и҆ ѕлопомнѣ̑нїѧ себѣ̀ собира́ющїи, подо́бни сꙋ́ть во́дꙋ че́рплющымъ, и҆ въ ка́дь продо́лбленнꙋю влива́ющымъ.

к҃г. А҆́ще терпѣли́въ є҆сѝ, при́снѡ съ ра́достїю помо́лишисѧ.

к҃д. Молѧ́щꙋсѧ тебѣ̀ лѣпоподо́бнѡ, сицевы̑ѧ тѧ̀ срѧ́щꙋтъ вє́щи, ꙗ҆́кѡ да вознепщꙋ́еши пра́веднѡ бы́ти всѧ́чески на ꙗ҆́рость возбꙋжда́тисѧ: нѣ́сть же пра́ведна ꙗ҆́рость проти́вꙋ бли́жнѧгѡ ѿню́дъ. А҆́ще бо пои́щеши, ѡ҆брѧ́щеши ꙗ҆́кѡ мо́щно и҆ кромѣ̀ ꙗ҆́рости, до́брѣ бы́ти ве́щи. Всѧ́ко ᲂу҆́бѡ ᲂу҆потреблѧ́й тща́нїе, да не подви́жешисѧ на ꙗ҆́рость.

к҃є. Зрѝ, да не мнѧ́йсѧ и҆на́го врачева́ти, са́мъ неисцѣ́ленъ бꙋ́деши, и҆ да́си препина́нїе моли́твѣ твое́й.

к҃ѕ. Щадѧ́й ꙗ҆́рость, пощадѣ́нїе ѡ҆брѧ́щеши, и҆ мꙋ́дра себѐ пока́жеши, и҆ въ молѧ́щихсѧ бꙋ́деши.

к҃з. Проти́вꙋ ꙗ҆́рости ѡ҆полча́ѧйсѧ, похотѣ́нїѧ не поте́рпитъ когда́либо, то́ бо вины̀ да́стъ ꙗ҆́рости, и҆ та̀ смꙋща́етъ ᲂу҆́мное ѻ҆́ко, поврежда́ѧ ᲂу҆строе́нїе моли́твы.

к҃и. Не є҆ди́ными внѣ́шними ѡ҆́бразы моли́сѧ, но возбꙋжда́й ᲂу҆́мъ тво́й къ чꙋ́вствованїю дх҃о́вныѧ моли́твы со мно́гимъ стра́хомъ.

к҃ѳ. Ѻ҆вогда̀ ᲂу҆́бѡ внеза́пꙋ ста́въ на моли́твꙋ до́брѣ помо́лишисѧ: ѻ҆вогда́ же и҆ ѕѣлѡ̀ трꙋди́всѧ, не ᲂу҆лꙋ́чиши намѣ́ренїѧ, ꙗ҆́кѡ да є҆щѐ па́че пои́щеши, и҆ прїе́мъ бꙋ́деши и҆мѣ́ти неѿе́млемое и҆справле́нїе.

л҃. Предста́вшꙋ а҆́гг҃лꙋ, внеза́пꙋ всѝ ѿстꙋпа́ютъ стꙋжа́ющїи на́мъ, и҆ ѡ҆брѣта́етсѧ ᲂу҆́мъ во мно́зѣй ѡ҆сла́бѣ здра́вѡ молѧ́сѧ: ѻ҆вогда́ же ѻ҆бы́чнѣй бра́ни на́мъ належа́щей: бо́ретсѧ ᲂу҆́мъ, и҆ не попꙋща́етсѧ возни́кнꙋти многоразли́чными страстьмѝ. Ѻ҆ба́че на мно́зѣ и҆ща̀ ѡ҆брѧ́щетъ и҆ толкꙋ́щꙋ ѿве́рзетсѧ є҆мꙋ̀.

л҃а. Не моли́сѧ твои̑мъ бы́ти хотѣ́нїѧмъ не бо̀ всѧ́кѡ согласꙋ́ютъ хотѣ́нїю бж҃їю. Но па́че, ꙗ҆́коже наꙋчи́лсѧ є҆сѝ, моли́сѧ, глаго́лѧ: да бꙋ́детъ во мнѣ̀ во́лѧ твоѧ̀. И҆ во всѧ́комъ дѣ́лѣ та́кѡ є҆го̀ просѝ, да бꙋ́детъ во́лѧ є҆гѡ̀¹⁵⁶⁴. Хо́щетъ бо благо́е и҆ поле́зное дꙋшѝ твое́й, ты́ же не всѧ́кѡ сегѡ̀ взыскꙋ́еши.

л҃в. Мно́жицею помоли́всѧ, проси́хъ бы́ти мѝ, є҆́же непщева́хъ добро̀ бы́ти, и҆ пребыва́хъ въ проше́нїи безслове́снѡ нꙋ́дѧщи во́лю бж҃їю: и҆ не ѿда́въ є҆мꙋ̀, да є҆́же вѣ́сть поле́зное, то па́че ᲂу҆стро́итъ, и҆ прїе́мь ᲂу҆́бѡ, возскорбѣ́хъ послѣдѝ ѕѣлѡ̀, занѐ не па́че во́ли бж҃їей проси́хъ бы́ти: не бо̀ сицева̀ мѝ слꙋчи́сѧ ве́щь, ꙗ҆ковꙋ̀ мнѣ́хъ.

л҃г. Что́ є҆сть бла́го, ра́звѣ бг҃ъ: тѣ́мже ᲂу҆̀бо томꙋ̀ ѿдади́мъ всѧ̑ ꙗ҆̀же ѡ҆ на́съ, и҆ бла́го на́мъ бꙋ́детъ. Благі́й бо всѧ́кѡ, и҆ благи́хъ дарѡ́въ є҆́сть пода́тель.

л҃д. Не скорбѝ, не прїе́млѧ а҆́бїе ѿ бг҃а проше́нїе, є҆́же про́сиши. Хо́щетъ бо тебѐ мно́жае ѡ҆благодѣ́тельствовати, пристꙋжа́ща є҆мꙋ̀ въ моли́твѣ. Что́ бо є҆́сть вы́ше; ꙗ҆́кѡ є҆́же собесѣ́довати бг҃ꙋ, и҆ къ немꙋ̀ соедине́нїемъ ѡ҆б̾ѧ́тꙋ бы́ти.

л҃є. Безмѧте́жнаѧ моли́тва є҆́сть, кра́йнее разꙋмѣ́нїе ᲂу҆ма̀.

л҃ѕ. Моли́тва є҆́сть восхожде́нїе ᲂу҆ма̀ къ бг҃ꙋ.

л҃з. А҆́ще помоли́тисѧ вожделѣ́еши, ѡ҆ста́ви всѧ̑, да всѧ̑ наслѣ́диши.

л҃и. Моли́сѧ пе́рвѣе, ѡ҆ є҆́же ѡ҆чи́ститисѧ страсте́й: второ́е, ѡ҆ є҆́же и҆зба́витисѧ ѿ невѣ́дѣнїѧ и҆ забве́нїѧ: тре́тїе, ѡ҆ є҆́же не бы́ти и҆скꙋше́нꙋ и҆ ѡ҆ста́вленꙋ.

л҃ѳ. Є҆ди́ныѧ и҆щѝ въ моли́твѣ твое́й пра́вды, и҆ ца́рствїѧ, сі́есть добродѣ́тели и҆ ра́зꙋма: и҆ прѡ́чаѧ всѧ̑ приложа́тсѧ тѝ.

м҃. Пра́ведно не то́чїю ѡ҆ свое́мъ ѡ҆чище́нїи моли́тисѧ, но и҆ ѡ҆ ѡ҆чище́нїи всѧ́кагѡ є҆диноплеме́ннагѡ, да а҆́гг҃льскомꙋ подража́еши ѡ҆́бразꙋ.

м҃а. Зрѝ а҆́ще вои́стиннꙋ бг҃ꙋ предстои́ши въ мл҃твѣ твое́й, не похвало́ю ли человѣ́ческою побѣжда́ешисѧ, и҆ сїю̀ ᲂу҆ловлѧ́ти тщи́шисѧ, ꙗ҆́коже прикрове́нїе и҆мѣ́ѧ протѧже́нїе моли́твы;

м҃в. А҆́ще съ бра́тїею, а҆́ще наединѣ̀ мо́лишисѧ, подвиза́йсѧ, не ѻ҆бы́чаемъ, но чꙋ́вствїемъ моли́тисѧ.

м҃г. Чꙋ́вствїе є҆́сть моли́твы, внима́нїе со благоговѣ́нїемъ, и҆ ᲂу҆миле́нїемъ, и҆ болѣ́знїю дꙋшѝ, во и҆сповѣ́данїи прегрѣше́нїй съ воздыха́нми сокрове́нными.

м҃д. А҆́ще ѡ҆крада́емь быва́етъ ᲂу҆́мъ тво́й є҆щѐ во вре́мѧ моли́твы, не ᲂу҆̀ разꙋмѣ̀ ꙗ҆́кѡ и҆́нокъ мо́литсѧ, но є҆щѐ мїрѧни́нъ є҆́сть, внѣ́шнюю хра́минꙋ ᲂу҆краша́ющїй.

м҃є. Молѧ́сѧ, па́мѧть твою̀ си́лою хранѝ, да не своѧ̑ приложи́тъ тебѣ̀, но къ ра́зꙋмꙋ предстоѧ́нїѧ себѐ подвиза́й. Ѕѣлѡ́ бо ѡ҆бы́че ᲂу҆́мъ ѡ҆крада́емь бы́ти ѿ па́мѧти во вре́мѧ моли́твы.

м҃ѕ. И҆лѝ дре́внихъ дѣ́лъ мечта̑нїѧ приво́дитъ тебѣ̀ па́мѧть молѧ́щꙋсѧ, и҆лѝ нѡ́выѧ попечє́нїѧ, и҆лѝ лицѐ ѡ҆скорби́вшагѡ.

м҃з. ѕѣлѡ̀ зави́дꙋетъ бѣ́съ человѣ́кꙋ молѧ́щемꙋсѧ, и҆ всѧ́кꙋ ᲂу҆потреблѧ́етъ ко́знь повреди́ти тогѡ̀ намѣ́ренїе. Не преста́етъ ᲂу҆́бѡ помышлє́нїѧ ѡ҆ ве́щехъ подвиза́ти па́мѧтїю, и҆ всѧ̑ стра̑сти возбꙋжда́ти пло́тїю, да воспѧти́ти возмо́жетъ и҆зѧ́щнѣйшемꙋ є҆гѡ̀ тече́нїю и҆ ше́ствїю къ бг҃ꙋ.

м҃и. Є҆гда̀ мнѡ́гаѧ содѣ́ѧвъ вселꙋка́вый бѣ́съ, не возмо́жетъ воспѧти́ти пра́веднагѡ моли́твѣ, ма́лѡ послаблѧ́етъ, и҆ послѣдѝ ѿмщева́етъ є҆мꙋ̀ помоли́вшꙋсѧ. И҆ли́ бо на гнѣ́въ того̀ воспали́въ, собира́емое ѿ моли́твы и҆зрѧ́днѣйшее въ не́мъ ᲂу҆строе́нїе и҆стреблѧ́етъ, и҆лѝ къ сла́дости безслове́снѣй подви́гнꙋвъ, ѡ҆скорблѧ́етъ ᲂу҆́мъ.

м҃ѳ. Помоли́всѧ ꙗ҆́коже подоба́етъ, ѡ҆жида́й ꙗ҆̀же не подоба́етъ, и҆ сто́й мꙋ́жественнѡ хранѧ̀ пло́дъ тво́й. На сїе́ бо ѿ нача́ла вчини́лсѧ є҆сѝ, дѣ́лати и҆ храни́ти. Не ᲂу҆́бѡ содѣ́лавъ ѡ҆ста́виши нестрего́мъ трꙋ́дъ: а҆́ще же нѝ, ничто́же по́льзовалсѧ є҆сѝ молѧ́сѧ.

н҃. Всѧ́ка составлѧ́емаѧ бра́нь междꙋ̀ на́ми и҆ нечи́стыми бѣ́сы, не ѡ҆ и҆но́мъ быва́етъ, ра́звѣ ѡ҆ дꙋхо́внѣй моли́твѣ. Ѕѣлѡ́ бо сопроти́вна и҆̀мъ є҆́сть и҆ ненави́стна: на́мъ же спаси́тельна, благода́тнѣйша.

н҃а. Что̀ хо́щꙋтъ бѣ́си содѣва́ти въ на́съ; чревонеи́стовство, блꙋ́дъ, сребролю́бїе, гнѣ́въ, и҆ ѕлопомнѣ́нїе, и҆ прѡ́чаѧ стра̑сти, да ѡ҆дебелѣ́въ ѡ҆ ни́хъ ᲂу҆́мъ, не возмо́жетъ, ꙗ҆́коже подоба́етъ, помоли́тисѧ. Безслове́сной бо ча́сти стра̑сти нача́льство прїи́мше, не попꙋща́ютъ томꙋ̀ слове́снѡ дви́житисѧ.

н҃в. Добродѣ̑тели прохо́димъ по словеса́мъ бы́вшихъ, и҆ словеса̀ по ѡ҆сꙋществова́вшемꙋ сло́вꙋ: сло́во же въ ᲂу҆строе́нїи моли́твы ꙗ҆влѧ́тисѧ ѡ҆бы́че.

н҃г. Оу҆строе́нїе моли́твы є҆́сть, навыкнове́нїе безстра́стное, кра́йнѣйшимъ раче́нїемъ на высотꙋ̀ мы́сленнꙋ восхища́ющее любомꙋ́дрствꙋющїй ᲂу҆́мъ.

н҃д. Не то́чїю над̾ ꙗ҆́ростїю и҆ вожделѣ́нїемъ подоба́етъ влады́чествовати вои́стиннꙋ моли́тисѧ хотѧ́щемꙋ, но и҆ внѣ̀ помышле́нїѧ пристра́стнагѡ бы́ти.

н҃є. Любѧ́й бг҃а, съ ни́мъ ꙗ҆́кѡ со ѻ҆ц҃е́мъ при́снѡ бесѣ́дꙋетъ, ѿвраща́ѧсѧ всѧ́кагѡ помышле́нїѧ стра́стна.

н҃ѕ. Не и҆́же полꙋчѝ, безстра́стїе, ᲂу҆жѐ и҆ мо́литсѧ и҆́стиннѡ. Мо́жетъ бо въ просты́хъ помышле́нїихъ бы́ти, и҆ въ разсмотре́нїи тѣ́хъ пребыва́ти, и҆ дале́че ѿстоѧ́ти ѿ бг҃а.

н҃з. Не є҆гда̀ не косни́тъ ᲂу҆́мъ въ просты́хъ помышле́нїихъ веще́й, ᲂу҆жѐ и҆ мл҃твы мѣ́ста дости́же: мо́жетъ бо въ видѣ́нїи при́снѡ бы́ти веще́й, и҆ въ размышле́нїихъ ѡ҆ тѣ́хъ поꙋча́тисѧ, ꙗ҆́же а҆́ще и҆ про́сти глаго́лы сꙋ́ть, но ꙗ҆́кѡ веще́й сꙋ̑щаѧ ᲂу҆мозрѣ̑нїѧ воѡбража́ютъ и҆ ѡ҆бразꙋ́ютъ ᲂу҆́мъ, и҆ дале́че ѿво́дѧтъ є҆го̀ ѿ бг҃а.

н҃и. А҆́ще не вы́ше видѣ́нїѧ тѣле́снагѡ є҆стества̀ ᲂу҆́мъ бꙋ́детъ, не ᲂу҆̀ соверше́нное бж҃їе мѣ́сто ви́дѣ: мо́жетъ бо въ ра́зꙋмѣ мы́сленныхъ бы́ти, и҆ пестри́тисѧ тѣ́ми.

н҃ѳ. А҆́ще моли́тисѧ хо́щеши, бг҃а потре́ба даю́щагѡ мл҃твꙋ молѧ́щемꙋсѧ. Тѣ́мже призыва́й є҆го̀ глаго́лѧ: да свѧти́тсѧ и҆́мѧ твоѐ, да прїи́детъ ца́рствїе твоѐ¹⁵⁶⁵: то́ є҆сть, ст҃ы́й дх҃ъ, и҆ є҆диноро́дный тво́й сн҃ъ. Си́це бо ѡ҆бꙋчѝ, глаго́лѧ: дх҃омъ и҆ и҆́стиною кла́нѧтисѧ ѻ҆ц҃ꙋ̀¹⁵⁶⁶.

ѯ҃. Дх҃омъ и҆ и҆́стиною молѧ́йсѧ, не ктомꙋ̀ ѿ тва́ри творца̀ чествꙋ́етъ, но ѿ самогѡ̀ тогѡ̀ воспѣва́етъ.

ѯ҃а. А҆́ще бг҃осло́въ є҆сѝ, и҆́маши моли́тисѧ и҆́стиннѡ: и҆ а҆́ще и҆́стиннѡ мо́лишисѧ, бг҃осло́въ є҆сѝ.

ѯ҃в. Є҆гда̀ ᲂу҆́мъ тво́й мно́гимъ къ бг҃ꙋ жела́нїемъ, пома́лꙋ а҆́ки ᲂу҆далѧ́етсѧ ѿ пло́ти, и҆ всѣ́хъ, ꙗ҆̀же ѿ чꙋ́вства, и҆лѝ па́мѧти, и҆лѝ растворе́нїѧ ѿвраща́етсѧ помышле́нїй, благоговѣ́нїѧ кꙋ́пнѡ и҆ ра́дости бы́въ и҆спо́лненъ: тогда̀ непщꙋ́й прибли́жившасѧ того̀ къ предѣ́ламъ моли́твы бы́ти.

ѯ҃г. Ст҃ы́й дх҃ъ состра́ждꙋщъ на́шей не́мощи, и҆ къ нечи̑стымъ сꙋ́щымъ на́мъ прихо́дитъ: и҆ а҆́ще ѡ҆брѧ́щетъ ᲂу҆́мъ то́чїю и҆стиннолю́бнѡ є҆мꙋ̀ молѧ́щїйсѧ, нахо́дитъ на него̀, и҆ всѐ ѡ҆крꙋжа́ющее є҆го̀ по́мыслѡвъ, и҆лѝ помышле́нїй ѡ҆полче́нїе прогонѧ́етъ, возбꙋжда́ѧ того̀ къ любвѝ дх҃о́вныѧ мл҃твы.

ѯ҃д. И҆ні́и ᲂу҆́бѡ и҆змѣне́нїемъ тѣ́ла, водворѧ́ютъ во ᲂу҆́мъ по́мыслы, и҆лѝ помышлє́нїѧ, и҆лѝ видѣ̑нїѧ: гдⷭ҇ь же напроти́въ твори́тъ, въ са́мый ᲂу҆́мъ входѧ̀ влага́етъ томꙋ̀ ра́зꙋмъ, и҆́хже хо́щетъ, и҆ ᲂу҆мо́мъ невоздержа́нїе тѣ́ла ᲂу҆кроща́етъ.

ѯ҃є. Никто̀ лю́бѧщїй и҆́стиннꙋю моли́твꙋ, и҆ гнѣ́ваѧйсѧ, и҆лѝ ѕлопо́мнѧщїй, внѣ̀ є҆́сть порица́нїѧ: подо́бенъ бо є҆́сть ѻ҆стрѡ̀ зрѣ́ти хотѧ́щемꙋ, и҆ своѧ̑ ѻ҆чеса̀ смꙋща́ющемꙋ.

ѯ҃ѕ. А҆́ще моли́тисѧ жела́еши, ничто́же ѡ҆ сопротивлѧ́ющихсѧ моли́твѣ творѝ: да бг҃ъ прибли́живсѧ, сопꙋ́тствовати бꙋ́детъ тебѣ̀.

ѯ҃з. Да не ѡ҆бразꙋ́еши бж҃ество̀ въ себѣ̀ молѧ́сѧ, нижѐ ко ѡ҆́бразꙋ ко́емꙋ попꙋ́стиши воѡбража́тисѧ твоемꙋ̀ ᲂу҆мꙋ̀, но невеще́ственнѣ къ невеще́ственномꙋ пристꙋпѝ и҆ ᲂу҆разꙋмѣ́еши.

ѯ҃и. Блюди́сѧ сѣте́й проти́вникѡвъ. Быва́етъ бо внегда̀ моли́тисѧ тѝ чи́стѡ и҆ несмꙋще́ннѡ, внеза́пꙋ предста́ти тебѣ̀ ѡ҆́бразꙋ нѣ́коемꙋ стра́ннꙋ и҆ чꙋ́ждꙋ, во є҆́же мнѣ́нїе тебѐ привестѝ непщꙋ́юща бж҃ество̀ бы́ти та́мѡ: да внеза́пꙋ ѿкрове́нное, коли́чественно бж҃ество̀ бы́ти ᲂу҆вѣ́ришисѧ: не коли́чественно же є҆́сть бж҃ество̀ и҆ неѡбразова́нно.

ѯ҃ѳ. Є҆гда̀ не возмо́жетъ па́мѧть подви́гнꙋти въ моли́твѣ зави́стливый бѣ́съ, тогда̀ растворе́нїе тѣ́ла возбꙋжда́етъ, во є҆́же сотвори́ти стра́нно нѣ́кое мечта́нїе ᲂу҆мꙋ̀, и҆ ѡ҆бразова́ти є҆го̀. Ѻ҆бы́чай же и҆мѣ́ѧй въ помышле́нїихъ бы́ти, ᲂу҆до́бнѡ преклонѧ́етсѧ: и҆ къ невеще́ственномꙋ ра́зꙋмꙋ, и҆ безви́дномꙋ тща́йсѧ, прельща́етсѧ, ды́мъ вмѣ́стѡ свѣ́та ѡ҆б̾е́млѧ.

ѻ҃. Ста́ни на стра́жи твое́й стрежа̀ ᲂу҆́мъ тво́й ѿ помышле́нїй во вре́мѧ моли́твы: проше́нїе и҆спо́лнити, и҆ ста́ти въ свое́й тишинѣ̀: да состра́ждꙋщъ невѣ́дꙋщымъ, и҆ къ тебѣ̀ прїи́детъ: и҆ тогда̀ прїи́меши да́ръ моли́твы благосла́внѣйшїй.

ѻ҃а. Не возмо́жеши чи́стѡ моли́тисѧ дѣ́лы соплета́емь веще́ственными, и҆ попече́нїи непреста́нными коле́блемь: моли́тва бо є҆́сть ѿложе́нїе помышле́нїй.

ѻ҃в. Не мо́жетъ свѧ́занный тещѝ, нижѐ ᲂу҆́мъ стра́сти рабо́тающїй, моли́твы дх҃о́вныѧ мѣ́сто ви́дѣти: влеко́мь бо и҆ носи́мь быва́етъ ѿ стра́стнагѡ по́мысла, и҆ не воз̾имѣ́етъ стоѧ́нїѧ незы́блемагѡ.

ѻ҃г. Є҆гда̀ чи́стѣ ᲂу҆жѐ и҆ безстра́стнѣ ᲂу҆́мъ мо́литсѧ, тогда̀ не ктомꙋ̀ ѿ шꙋ́їихъ прихо́дѧтъ къ немꙋ̀ бѣ́си, но ѿ десны́хъ. Предлага́ютъ бо є҆мꙋ̀ сла́вꙋ бж҃їю и҆ ѡ҆бразова̑нїѧ нѣ̑каѧ чꙋ́вствꙋ прїѧ̑тнаѧ, ꙗ҆́кѡ возмнѣ́ти коне́чнѣ полꙋчи́ти є҆мꙋ̀ є҆́же ѡ҆ моли́твѣ предвоспрїѧ́тїе. Сїе́ же сказа̀ прозорли́вый мꙋ́жъ ѿ стра́сти тщесла́вїѧ быва́ти, и҆ ѿ бѣ́са прикаса́ющагѡсѧ сꙋ́щемꙋ въ главно́мъ мо́згѣ мѣ́стꙋ.

ѻ҃д. Мню̀ бѣ́са прикаса́ющагосѧ рече́нномꙋ мѣ́стꙋ ѡ҆браща́ти свѣ́тъ и҆́же ѻ҆́крестъ ᲂу҆ма̀, ꙗ҆́коже хо́щетъ: и҆ си́це дви́жимѣй бы́ти стра́сти тщесла́вїѧ, въ по́мыслѣ ѡ҆бразꙋ́ющемъ ᲂу҆́мъ легкомы́сленнѣ къ достиже́нїю бж҃е́ственнагѡ и҆ сꙋще́ственнагѡ ра́зꙋма. Не стꙋжа́емь же сицевы́й ѿ плотски́хъ и҆ нечи́стыхъ страсте́й, но чи́стѣ ᲂу҆́бѡ предста́въ, мни́тъ не ктомꙋ̀ дѣ́йствꙋ нѣ́коемꙋ проти́внꙋ бы́ти въ не́мъ. Тѣ́мже непщꙋ́етъ бж҃е́ственно бы́ти ꙗ҆вле́нїе, быва́емое є҆мꙋ̀ ѿ бѣ́са, мно́гꙋ ѕѣлѡ̀ хи́трость ᲂу҆потреблѧ́ющагѡ, и҆ чрез̾ мо́згъ сопрѧже́нный томꙋ̀ свѣ́тъ премѣнѧ́ющагѡ и҆ ѡ҆бразꙋ́ющагѡ ѻ҆́ный, ꙗ҆́коже предрѣ́хомъ.

ѻ҃є. Бж҃їй а҆́гг҃лъ предста́въ, сло́вомъ є҆ди́нымъ всѐ сопротивꙋлежа́щее дѣ́йство ѿгонѧ́етъ ѿ на́съ, и҆ дви́житъ свѣ́тъ ᲂу҆ма̀ непреле́стнѡ дѣ́йствовати.

ѻ҃ѕ. Є҆́же глаго́летсѧ во ѿкрове́нїи, взѧ́ти а҆́гг҃лꙋ ѳѷмїа́мъ, да да́стъ моли́твамъ ст҃ы́хъ¹⁵⁶⁷, мню̀ благода́ти бы́ти чрез̾ а҆́гг҃ла дѣ́йствꙋемѣй: ра́зꙋмъ бо влага́етъ и҆́стинныѧ мѡли́твы, во є҆́же ста́ти про́чее внѣ̀ всѧ́кагѡ смꙋще́нїѧ, ᲂу҆ны́нїѧ же и҆ лѣ́ности ᲂу҆мꙋ̀.

ѻ҃з. Фїа́лы съ ѳѷмїа́мы, моли̑твы бы́ти глаго́лютсѧ ст҃ы́хъ, ꙗ҆̀же два́десѧть и҆ четы́ре ста́рцы приноша́хꙋ¹⁵⁶⁸. Фїа́лъ же разꙋмѣ́етсѧ дрꙋ́жество, є҆́же къ бг҃ꙋ, и҆лѝ соверше́нна и҆ дх҃о́вна любо́вь, въ не́йже моли́тва дѣ́йствꙋетсѧ дꙋ́хомъ и҆ и҆́стиною.

ѻ҃и. Є҆гда̀ непщꙋ́еши не тре́бовати тебѣ̀ сле́зъ въ моли́твѣ твое́й ѡ҆ грѣсѣ́хъ, зрѝ, коли́кѡ ѿстои́ши ѿ бг҃а, до́лженъ сы́й вы́нꙋ бы́ти въ не́мъ, и҆ те́пльше прослези́шисѧ.

ѻ҃ѳ. Вои́стиннꙋ вѣ́дый мѣ̑ры твоѧ̑, сла́дцѣ да воспла́чеши, ѡ҆каева́ѧ себѐ по и҆са́їю: ка́кѡ нечи́сты ᲂу҆стнѣ̀ и҆мы́й, и҆ посредѣ̀ сицевы́хъ, си́рѣчь, сопроти́вныхъ люде́й сы́й, дерза́еши ко гдⷭ҇ꙋ саваѡ́ѳꙋ предста́ти¹⁵⁶⁹.

п҃. А҆́ще и҆́стиннѡ мо́лишисѧ, мно́гое и҆звѣще́нїе ѡ҆брѧ́щеши: и҆ а҆́гг҃ли прїи́дꙋтъ къ тебѣ̀ ꙗ҆́коже и҆ къ данїи́лꙋ¹⁵⁷⁰, и҆ вины̑ быва́емыхъ возвѣстѧ́тъ тѝ.

п҃а. Вѣ́ждь, ꙗ҆́кѡ ст҃і́и а҆́гг҃ли ᲂу҆вѣщава́ютъ на́съ къ моли́твѣ, и҆ сопредстоѧ́тъ на́мъ ра́дꙋющесѧ вкꙋ́пѣ, и҆ молѧ́щесѧ ѡ҆ на́съ. А҆́ще ᲂу҆́бѡ вознеради́мъ, и҆ прїи́мемъ по́мыслы проти̑вныѧ, ѕѣлѡ̀ раздража́емъ и҆̀хъ, ꙗ҆́кѡ ті́и ѡ҆ на́съ подвиза́ютсѧ толи́кѡ: мы́ же нижѐ ѡ҆ себѣ̀ хо́щемъ ᲂу҆милостивлѧ́ти бг҃а, но презира́юще своѐ слꙋже́нїе, и҆ тѣ́хъ влⷣкꙋ и҆ бг҃а ѡ҆ставлѧ́юще, бѣсѡ́мъ нечи̑стымъ собесѣ́дꙋемъ.

п҃в. Моли́сѧ кро́ткѡ и҆ несмꙋще́ннѡ, и҆ по́й разꙋ́мнѡ и҆ согла́снѡ, и҆ бꙋ́деши ꙗ҆́кѡ птене́цъ ѻ҆́рлїй въ высотꙋ̀ взе́млемый.

п҃г. Ѱалмопѣ́нїе ᲂу҆́бѡ стра̑сти ᲂу҆кроща́етъ, и҆ невоздержа́нїю тѣ́ла ми́рствовати содѣ́ловаетъ: моли́тва же своѐ ᲂу҆мꙋ̀ дѣ́йствїе дѣ́йствовати ᲂу҆строѧ́етъ.

п҃д. Моли́тва є҆́сть, подоба́ющее досто́инствꙋ ᲂу҆ма̀ дѣ́йствїе, и҆лѝ лꙋ́чшее и҆ чи́стое тогѡ̀ ᲂу҆потребле́нїе.

п҃є. Ѱалмопѣ́нїе ᲂу҆́бѡ многоразли́чныѧ премꙋ́дрости є҆́сть: моли́тва же, предначина́нїе є҆́сть невеще́ственнагѡ и҆ многоразли́чнагѡ ра́зꙋма.

п҃ѕ. Ра́зꙋмъ и҆зрѧ́днѣйшїй є҆́сть: споспѣ́шникъ бо є҆́сть моли́твы, мы́сленнꙋю си́лꙋ ᲂу҆ма̀ возбꙋжда́ющїй къ видѣ́нїю бж҃е́ственнагѡ ра́зꙋма.

п҃з. А҆́ще не ᲂу҆̀ прїѧ́лъ є҆сѝ дарова́нїе моли́твы, и҆лѝ ѱалмопѣ́нїѧ, просѝ неѿстꙋ́пнѡ, и҆ воспрїи́меши.

п҃и. Рече́ же и҆̀мъ и҆ при́тчꙋ, ка́кѡ подоба́етъ и҆̀мъ всегда̀ моли́тисѧ, и҆ не стꙋжа́ти сѝ¹⁵⁷¹. Тѣ́мже не ᲂу҆ныва́й, нижѐ и҆знемога́й, ꙗ҆́кѡ не прїе́мый: прїи́меши бо послѣдѝ. И҆ приложѝ при́тчѣ: а҆́ще и҆ бг҃а, речѐ, не бою́сѧ, и҆ человѣ̑къ не срамлѧ́юсѧ, но занѐ трꙋды̀ мѝ дае́тъ жена̀, сотворю̀ сꙋ́дъ є҆ѧ̀¹⁵⁷². Си́це ᲂу҆́бѡ и҆ бг҃ъ сотвори́тъ ѿмще́нїе вопїю́щихъ къ немꙋ̀ де́нь и҆ но́щь вско́рѣ. Благодꙋ́шествꙋй ᲂу҆̀бо терпѧ̀ крѣ́пцѣ въ свѧтѣ́й моли́твѣ.

п҃ѳ. Не хощѝ, ꙗ҆́коже тѝ мни́тсѧ, но ꙗ҆́коже бг҃ꙋ ᲂу҆го́дно, бы́ти ꙗ҆́же ѡ҆ тебѣ̀: и҆ бꙋ́деши не смꙋще́нъ и҆ бл҃года́ренъ въ моли́твѣ твое́й.

ч҃. А҆́ще и҆ съ бг҃омъ мни́шисѧ бы́ти, блюди́сѧ ѿ бѣ́са блꙋ́днагѡ: ѕѣлѡ́ бо є҆́сть преле́стникъ, и҆ зави́стнѣйшїй, и҆ хо́щетъ крѣпча́йшъ бы́ти по́двига, и҆ трезвѣ́нїѧ ᲂу҆ма̀ твоегѡ̀, ꙗ҆́кѡ и҆ ѿ бг҃а ѿвлещѝ того̀ со благоговѣ́нїемъ и҆ стра́хомъ предстоѧ́ща є҆мꙋ̀.

ч҃а. А҆́ще моли́твѣ прилѣжи́ши, ᲂу҆гото́висѧ проти́вѡ нападе́нїй бѣсо́вскихъ, и҆ терпѣли́внѡ бїє́нїѧ и҆́хъ сносѝ. Ꙗ҆́кѡ бо ѕвѣ́ри ди́вїи на́йдꙋтъ на тѧ̀, и҆ всѐ твоѐ ѡ҆ѕло́бѧтъ тѣ́ло.

ч҃в. Оу҆стро́й себѐ, ꙗ҆́кѡ и҆скꙋ́сный подви́жникъ: а҆́ще внеза́пꙋ ᲂу҆́зриши мечта́нїе, не коле́блисѧ, а҆́ще ме́чь проти́вꙋ тебѧ̀ и҆звлече́нный, и҆лѝ свѣщꙋ̀ горѧ́щꙋю, не смꙋща́йсѧ, а҆́ще зра́къ нѣ́кїй стꙋ́дный и҆ крова́вый, ника́коже низпа́дай дꙋше́ю: но сто́й и҆сповѣ́даѧ до́брое и҆сповѣ́данїе, и҆ небоѧ́зненнѡ воззри́ши на врагѝ твоѧ̑.

ч҃г. Скѡ́рбнаѧ терпѧ́й, и҆ ра́дѡстнаѧ полꙋ́читъ: и҆ въ го́рестныхъ пребыва́ѧй, сла́достныхъ не лиши́тсѧ.

ч҃д. Зрѝ, да не прельстѧ́тъ тѧ̀ нѣ́кїимъ видѣ́нїемъ лꙋка́вїи бѣ́си, но бꙋ́ди внима́ѧ, ѡ҆брати́сѧ на моли́твꙋ и҆ призыва́й бг҃а, да, а҆́ще ѿ негѡ̀ є҆́сть по́мыслъ, са́мъ тѧ̀ просвѣти́тъ: а҆́ще же нѝ, а҆́бїе преле́стника ѿжене́тъ ѿ тебѐ, и҆ дерза́й, ꙗ҆́кѡ не постоѧ́тъ псѝ, тебѣ̀ те́плѣ къ бг҃ꙋ моле́нїемъ притека́ющꙋ. А҆́бїе бо неви́димѡ и҆ неѧвле́ннѡ бж҃їею си́лою бїе́ми дале́че прого́нѧтсѧ.

ч҃є. Пра́ведно є҆́сть, нижѐ кова́рства сегѡ̀ тебѣ̀ не вѣ́дѣти ꙗ҆́кѡ и҆ногда̀ раздѣлѧ́ютъ себѐ бѣ́си: и҆ а҆́ще возмни́ши по́мощи взы́сковати, вхо́дѧтъ про́чїи во ѡ҆́бразѣхъ а҆́гг҃льскихъ, пе́рвыхъ ѿгонѧ́юще, во є҆́же тѝ прельсти́тисѧ ѿ ни́хъ мы́слїю, а҆́ки вои́стиннꙋ сꙋ́щымъ а҆́гг҃лѡмъ.

ч҃ѕ. Смиренномꙋ́дрїю мно́гомꙋ прилѣжѝ и҆ мꙋ́жествꙋ, и҆ не прико́снетсѧ дꙋшѝ твое́й прило́гъ бѣсо́вскїй, и҆ ра́на не прибли́житсѧ тѣлесѝ твоемꙋ̀, ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀¹⁵⁷³, и҆ неви́димѡ всѧ́кое сопротиволежа́щее дѣ́йство ѿженꙋ́тъ ѿ тебѐ.

ч҃з. Шꙋ́мы, то́поты, во́пли и҆ бїє́нїѧ ѿ бѣсѡ́въ ᲂу҆слы́шитъ, чи́стѣй прилѣжа́й моли́твѣ: но не паде́тъ, нижѐ преда́стъ по́мыслъ, глаго́лѧ къ бг҃ꙋ: не ᲂу҆бою́сѧ ѕла̀, ꙗ҆́кѡ ты̀ со мно́ю є҆сѝ¹⁵⁷⁴ и҆ подѡ́бнаѧ.

ч҃и. Во вре́мѧ сицевы́хъ и҆скꙋше́нїй кра́ткꙋю, но непреры́внꙋю моли́твꙋ и҆мѣ́й.

ч҃ѳ. А҆́ще прети́ти бꙋ́дꙋтъ тѝ бѣ́сове внеза́пꙋ ѿ воздꙋ́ха проѧви́вшесѧ, и҆ ᲂу҆жаси́ти тебѐ, и҆ восхи́тити ᲂу҆́мъ тво́й, да не ᲂу҆бои́шисѧ и҆́хъ, нижѐ всѧ́кѡ смꙋти́шисѧ ѡ҆ и҆́хъ преще́нїи. Оу҆страша́ютъ бо тебѐ и҆скꙋша́юще, є҆да̀ ка́кѡ внима́еши и҆̀мъ, и҆лѝ коне́чнѡ и҆̀хъ презрѣ́лъ є҆сѝ.

р҃. А҆́ще бг҃ꙋ вседержи́телю, и҆ содѣ́телю, и҆ промысли́телю вселе́нныѧ предста́лъ є҆сѝ въ моли́твѣ, что̀ си́це безслове́снѡ предстои́ши, ꙗ҆́кѡ ми́мѡ прейтѝ тебѣ̀ непреѡбори́мый стра́хъ є҆гѡ̀, и҆ комарѡ́въ и҆ жꙋ́кѡвъ боѧ́тисѧ; И҆лѝ не слы́шалъ є҆сѝ глаго́лющагѡ: гдⷭ҇а бг҃а твоегѡ̀ да ᲂу҆бои́шисѧ¹⁵⁷⁵; и҆ па́ки: Є҆гѡ́же всѧ̑ боѧ́тсѧ, и҆ трепе́щꙋтъ ѿ лица̀ си́лы є҆гѡ̀¹⁵⁷⁶ и҆ прѡ́чаѧ.

р҃а. Ꙗ҆́коже хлѣ́бъ пи́ща є҆́сть тѣлесѝ, и҆ добродѣ́тель дꙋшѝ, си́це и҆ ᲂу҆мꙋ̀ дх҃о́внаѧ моли́тва, пи́ща є҆́сть.

р҃в. Не фарїсе́йски, но мыта́рски моли́сѧ въ сщ҃е́ннѣмъ мѣ́стѣ моли́твы: да и҆ ты̀ ѡ҆правди́шисѧ ѿ гдⷭ҇а.

р҃г. Подвиза́йсѧ не проклина́ти кого̀ въ моли́твѣ твое́й, да не ꙗ҆̀же зи́ждеши, разори́ши, ненави́стнꙋ творѧ̀ моли́твꙋ твою̀.

р҃д. Должни́къ тьмо́ю тала̑нтъ, да нака́жетъ тѧ̀ ꙗ҆́кѡ а҆́ще не ѡ҆ста́виши клевре́тꙋ, нижѐ са́мъ полꙋчи́ши ѡ҆ставле́нїе: предаде́ бо є҆го̀, глаго́летъ, мꙋчи́телѧмъ¹⁵⁷⁷.

р҃є. Ѡ҆ста́ви потрє́бы тѣ́ла во вре́мѧ стоѧ́нїѧ на моли́твѣ: да не бодо́мь ѿ блохѝ, и҆лѝ вши́цы, и҆лѝ комара̀, и҆лѝ мꙋ́хи, ѿтщети́щисѧ вели́кагѡ прибы́тка моли́твы твоеѧ̀.

р҃ѕ. До́йде до на́съ, ꙗ҆́кѡ нѣ́коемꙋ ѿ ст҃ы́хъ молѧ́щꙋсѧ, толи́кѡ противꙋста̀ лꙋка́вый, ꙗ҆́кѡ вкꙋ́пѣ внегда̀ воздѣва́ти рꙋ́цѣ, томꙋ̀ ꙗ҆́кѡ львꙋ̀ преѡбрази́тисѧ, и҆ воздви́гнꙋти прѧ́мѡ пре́днїѧ но́ги и҆ своѧ̑ ко́хти ѿ ѻ҆бои́хъ стра́нъ въ два̀ чрє́сла вонзнꙋ́ти подви́жника, и҆ не ѿстꙋпи́ти, пре́жде а҆́ще рꙋ́цѣ ѡ҆пꙋ́ститъ: то́йже ника́коже ѡ҆сла́би сїѧ̑, до́ндеже ѡ҆бы̑чныѧ мѡли́твы и҆спо́лнилъ є҆́сть.

р҃з. Сицева́го ᲂу҆вѣ́дѣхомъ и҆ въ ро́вѣ безмо́лвствовавшаго і҆ѡа́нна ма́лаго, па́че же преве́лїѧго и҆́нока, и҆́же не дви́жимь пребы́сть ѿ бж҃їѧгѡ собесѣ́дованїѧ, бѣ́сꙋ въ ви́дѣ ѕмі́ѧ ѡ҆бви́вшꙋсѧ ѡ҆крꙋ́гъ є҆гѡ̀, и҆ ꙗ҆дꙋ́щꙋ є҆гѡ̀ пло́ть, и҆ въ лицѐ є҆гѡ̀ и҆зрыга́ющꙋ.

р҃и. Чита́лъ є҆сѝ всѧ́кѡ и҆ житїѧ̑ ски́тскихъ и҆́нокѡвъ, ꙗ҆́коже речѐ, ꙗ҆́кѡ глаго́лющꙋ а҆́ввѣ ѳео́дѡрꙋ сло́во бра́тїи, прїидо́ша двѣ̀ є҆хі̑дны под̾ но́зѣ є҆гѡ̀: ѻ҆́нъ же несмꙋще́ннѡ сотвори́въ ты̑ѧ ꙗ҆́кѡ кома́рꙋ, прїѧ̀ ѻ҆́ныѧ внꙋ́трь, до́ндеже преста̀ глаго́лати сло́во: и҆ тогда̀ ѻ҆́ныѧ показа̀ бра́тїи, повѣствꙋ́ѧ ѡ҆ ни́хъ.

р҃ѳ. Ѡ҆ и҆нѣ́мъ па́ки что́хомъ дх҃о́внѣмъ бра́тѣ, ꙗ҆́кѡ молѧ́щꙋсѧ є҆мꙋ̀, є҆хі́дна прише́дши коснꙋ́сѧ ногѝ є҆гѡ̀: ѻ҆́нъ же не пре́жде ѿпꙋстѝ рꙋ́цѣ, до́ндеже ѻ҆бы́чнꙋю совершѝ моли́твꙋ, и҆ ничто́же врежде́нъ бы́сть возлюби́въ бг҃а па́че себѐ.

р҃і. Не высокопа́рно ѻ҆́ко и҆мѣ́й въ моли́твѣ твое́й, и҆ ѿве́ргсѧ своеѧ̀ пло́ти и҆ дꙋшѝ, по ᲂу҆мꙋ̀ живѝ.

ра҃і. И҆но́мꙋ нѣ́коемꙋ крѣ́пкѡ молѧ́щꙋсѧ ст҃о́мꙋ въ пꙋсты́ни безмо́лвствꙋющꙋ, бѣ́си предстоѧ́вшїи чрез̾ двѣ̀ седми̑цы, ѡ҆браща́хꙋ и҆ потрѧса́хꙋ на воздꙋ́хъ взе́млюще є҆го̀ на рогози́нѣ, и҆ нижѐ всѧ́кѡ моглѝ свестѝ ᲂу҆́мъ є҆гѡ̀ ѿ горѧча́йшїѧ моли́твы.

рв҃і. И҆но́мꙋ па́ки бг҃олюби́вꙋ, и҆ моли́твꙋ мы́слїю творѧ́щꙋ, въ пꙋсты́ню ходѧ́щꙋ а҆́гг҃ли предста́ша два̀, и҆ є҆мꙋ̀, и҆мꙋ́ще є҆го̀ посредѣ̀, сопꙋ́тствовахꙋ: ѻ҆́нъ же нижѐ си́мъ внѧ́тъ всѧ́кѡ, да не лꙋ́чшагѡ ѿтщети́тсѧ. По́мнѧше бо а҆по́стольское сло́во глаго́лющее: ни а҆́гг҃ли, ни нача̑ла, нижѐ си̑лы возмо́гꙋтъ на́съ разлꙋчи́ти ѿ любвѐ хрⷭ҇то́вы¹⁵⁷⁸.

рг҃і. Равноа́гг҃льный быва́етъ и҆́нокъ моли́твою, жела́ющїй ви́дѣти лицѐ ѻ҆ц҃а̀, и҆́же на нб҃сѣ́хъ.

рд҃і. Не и҆щѝ ѿню́дъ зра́ка и҆лѝ ѡ҆́браза прїѧ́ти во вре́мѧ моли́твы.

рє҃і. Не жела́й а҆́гг҃лы ви́дѣти, и҆лѝ си̑лы, и҆лѝ хрⷭ҇та̀ чꙋ́вственнѣ, да не коне́чнѣ несмы́сленъ бꙋ́деши, во́лка вмѣ́стѡ па́стырѧ прїе́млѧ, и҆ враждє́бнымъ бѣсѡ́мъ покланѧ́ѧсѧ.

рѕ҃і. Нача́ло пре́лести ᲂу҆ма̀, тщесла́вїе, ѿ негѡ́же дви́жимый ᲂу҆́мъ во ѡ҆́бразѣхъ и҆ зра́цѣхъ покꙋша́етсѧ ѡ҆писа́ти бж҃ество̀.

рз҃і. А҆́зъ моѐ возглаго́лю, є҆́же и҆ ю҆нѣ́йшымъ реко́хъ: блаже́нъ ᲂу҆́мъ, и҆́же во вре́мѧ моли́твы соверше́нное безви́дїе стѧжа̀.

ри҃і. Блаже́нъ є҆́сть ᲂу҆́мъ, и҆́же безмо́лвнѡ молѧ́сѧ, мно́жайшее жела́нїе при́снѡ къ бг҃ꙋ прїе́млетъ.

рѳ҃і. Блаже́нъ є҆́сть ᲂу҆́мъ, и҆́же во вре́мѧ моли́твы невеще́ственъ и҆ нестѧжа́теленъ быва́етъ.

р҃к. Блаже́нъ є҆́сть ᲂу҆́мъ, во вре́мѧ моли́твы соверше́нное терпѣ́нїе стѧжа́вый.

рк҃а. Блаже́нъ є҆́сть и҆́нокъ, всѧ̑ человѣ́ки ꙗ҆́кѡ бг҃а, по бз҃ѣ разꙋмѣва́ѧй.

рк҃в. Блаже́нъ є҆́сть и҆́нокъ, всѣ́хъ спасе́нїе и҆ преспѣ́ѧнїе ꙗ҆́кѡ своѐ, со всѧ́кою ра́достїю зрѧ́й.

рк҃г. Блаже́нъ є҆́сть и҆́нокъ, всѣ́хъ ѻ҆тре́бїе себѐ бы́ти непщꙋ́ѧй.

рк҃д. И҆́нокъ є҆́сть ѿ всѣ́хъ ѿлꙋчи́вшїйсѧ, и҆ ко всѣ̑мъ присоедине́нный.

рк҃є. И҆́нокъ є҆́сть є҆ди́наго себѐ со всѣ́ми непщꙋ́ѧй, занѐ въ ко́емждо себѐ неиз̾е́млемо мни́тсѧ зрѣ́ти.

рк҃ѕ. Се́й моли́твꙋ соверша́етъ, и҆́же при́снѡ всѐ первомы́слїе своѐ бг҃ови плодоно́ситъ.

рк҃з. Всѧ́кꙋ ло́жь, и҆ всѧ́кꙋ клѧ́твꙋ ѿве́ргни ꙗ҆́кѡ и҆́нокъ, моли́тисѧ хотѧ́й: а҆́ще же нѝ, всꙋ́е воѡбража́еши несво́йственное.

рк҃и. А҆́ще дх҃омъ моли́тисѧ хо́щеши, ничесо́же да воспрїи́меши ѿ пло́ти, и҆ не бꙋ́деши и҆мѣ́ти ѻ҆́блакъ противꙋѡмрача́ющїй тебѐ во вре́мѧ моли́твы.

рк҃ѳ. Ввѣ́ри бг҃ꙋ потре́бꙋ тѣ́ла, и҆ ꙗ҆вле́нъ бꙋ́деши, ꙗ҆́кѡ и҆ дх҃а потре́бꙋ ввѣрѧ́еши є҆мꙋ̀.

р҃а. А҆́ще полꙋчи́ши ѡ҆бѣтова̑нїѧ, ца́рствовати бꙋ́деши. Къ тѣ̑мъ ᲂу҆́бѡ взира́ѧ, сла́достно понесе́ши настоѧ́щꙋю нищетꙋ̀.

рл҃а. Не ѿрица́йсѧ нищеты̀ и҆ ско́рби, вещества̀ свобо́дныѧ моли́твы.

рл҃в. Да бꙋ́дꙋтъ тебѣ̀ тѣлє́сныѧ добродѣ́тєли въ зало́гъ дꙋшє́внымъ, и҆ дꙋшє́вныѧ дх҃ѡ́внымъ, и҆ сі́и невеще́ственномꙋ и҆ сꙋще́ственномꙋ позна́нїю.

рл҃г. Блюдѝ молѧ́сѧ ѡ҆ по́мыслѣ: а҆́ще ᲂу҆до́бнѡ ᲂу҆тиши́тсѧ, ѿкꙋ́дꙋ бы́сть то̀: да не ѻ҆́тай нападе́нїе прете́рпиши, и҆ прельсти́всѧ преда́си себѐ.

рл҃д. Ѻ҆вогда̀ бѣ́си подме́щꙋтъ тебѣ̀ по́мыслы, и҆ па́ки возбꙋжда́ютъ тебѐ сі́есть моли́тисѧ на ни́хъ, и҆лѝ прекосло́вити и҆̀мъ, и҆ самоизво́льнѡ ᲂу҆стꙋпа́ютъ, да прельсти́шисѧ, возмечта́въ ѡ҆ себѣ̀, ꙗ҆́кѡ на́чалъ є҆сѝ побѣжда́ти по́мыслы и҆ ᲂу҆страша́ти бѣ́сы.

рл҃є. А҆́ще мо́лишисѧ на стра́сть и҆лѝ бѣ́са стꙋжа́ющаго тѝ, помѧнѝ глаго́лющаго: Поженꙋ̀ врагѝ моѧ̑, и҆ пости́гнꙋ ѧ҆̀, и҆ не возвращꙋ́сѧ, до́ндеже сконча́ютсѧ: ѡ҆скорблю̀ и҆̀хъ, и҆ не возмо́гꙋтъ ста́ти: падꙋ́тъ под̾ нога́ма мои́ма¹⁵⁷⁹, и҆ прѡ́чаѧ. Сїѧ̑ же благовре́меннѡ возглаго́леши, смиренномꙋ́дрїемъ себѐ воѡрꙋжа́ѧ проти́вꙋ сопротивобо́рцєвъ.

рл҃ѕ. Не мнѝ стѧжа́ти добродѣ́тель, пре́жде не́же да́же до кро́ве є҆ѧ̀ ра́ди ѡ҆полчи́лсѧ є҆сѝ. Подоба́етъ бо да́же до сме́рти проти́витисѧ грѣхꙋ̀ мꙋ́жественно и҆ непоро́чнѡ¹⁵⁸⁰, по бж҃е́ственномꙋ а҆по́столꙋ.

рл҃з. А҆́ще воспо́льзꙋеши кого̀, повреди́шисѧ ѿ и҆на́гѡ: ꙗ҆́кѡ да ѡ҆ѕлоблѧ́емый рече́ши, и҆лѝ сотвори́ши что́либо безмѣ́стное: и҆ ѕлѣ̀ расточи́ши, ꙗ҆̀же до́брѣ собра́лъ є҆сѝ: то́ бо є҆́сть намѣ́ренїе лꙋка́выхъ бѣсѡ́въ. Тѣ́мже внима́ти подоба́етъ разꙋ́мнѡ.

рл҃и. Нападє́нїѧ ѿ бѣсѡ́въ наведє́ннаѧ прїе́мли, тща́сѧ, ка́кѡ и҆зба́витисѧ ѿ порабоще́нїѧ и҆́хъ.

рл҃ѳ. Но́щїю ᲂу҆́бѡ возмꙋща́ти чрез̾ самѣ́хъ себѐ и҆́щꙋтъ дх҃о́внаго ᲂу҆чи́телѧ лꙋка́вїи бѣ́си: и҆ дне́мъ чрез̾ человѣ́ки, ѡ҆бстоѧ́нїи, и҆ клевета́ми, и҆ ѕлоключе́нїѧми є҆го̀ ѡ҆крꙋжа́юще.

р҃м. Не ѿверга́й ᲂу҆смаре́й: а҆́ще бо и҆ бїю́ще попира́ютъ, и҆ растѧга́юще строга́ютъ, но ѻ҆́нѣми ѡ҆дѣѧ́нїе твоѐ свѣ́тло быва́етъ.

рм҃а. Є҆ли́кѡ не ѿве́рглсѧ є҆сѝ страсте́й, но ᲂу҆́мъ тво́й сопротивлѧ́етсѧ добродѣ́тели и҆ и҆́стинѣ, не ѡ҆брѧ́щеши благово́нна ѳѷмїа́ма въ нѣ́дрѣ твое́мъ.

рм҃в. Помоли́тисѧ ли хо́щеши: преста́вѧсѧ ѿ здѣ̀ сꙋ́щихъ, жи́тельство на небесѣ́хъ и҆мѣ́й вы́нꙋ, не сло́вомъ про́стѣ наги́мъ, но дѣѧ́нїемъ а҆́гг҃льскимъ, и҆ ра́зꙋмомъ бж҃е́ственнѣйшимъ.

рм҃г. А҆́ще бѣ́дствꙋѧ то́кмѡ по́мниши сꙋдїю̀, ꙗ҆́кѡ стра́шенъ и҆ неꙋмы́тный є҆́сть, не ᲂу҆̀ наꙋчи́лсѧ є҆сѝ рабо́тати гдⷭ҇ни со стра́хомъ и҆ ра́доватисѧ є҆мꙋ̀ съ тре́петомъ¹⁵⁸¹. Вѣ́ждь бо, ꙗ҆́кѡ и҆ въ дх҃о́вныхъ ѡ҆сла́бахъ и҆ пирова́нїихъ, па́че со стра́хомъ и҆ благоговѣ́нїемъ слꙋжи́ти є҆мꙋ̀ подоба́етъ.

рм҃д. Вѣ́дꙋщїй мꙋ́жъ, не пре́жде коне́чнагѡ покаѧ́нїѧ воздержа́сѧ ѿ печа́льныѧ па́мѧти прегрѣше́нїй, и҆ бꙋ́дꙋщагѡ въ вѣ́чномъ ѻ҆гнѣ̀ пра́веднагѡ ѡ҆ тѣ́хъ и҆стѧза́нїѧ.

рм҃є. Прегрѣше́ньми ѡ҆держи́мый и҆ распале́нїемъ гнѣ́ва, и҆ дерза́ѧй неблагоговѣ́йнѡ простре́тисѧ къ позна́нїю бж҃е́ственнѣйшихъ веще́й, и҆лѝ и҆ къ невеще́ственнѣй пристꙋпи́ти моли́твѣ, се́й да прїи́метъ а҆пⷭ҇льское запреще́нїе, ꙗ҆́кѡ нѣ́сть безбѣ́дно є҆мꙋ̀, наго́ю и҆ непокрове́нною главо́ю моли́тисѧ¹⁵⁸². Должна́ бо, глаго́летъ, сицева́ѧ дꙋша̀ на главѣ̀ вла́сть и҆мѣ́ти предстоѧ́щихъ ра́ди а҆́гг҃лъ, благоговѣ́нїемъ и҆ смиренномꙋ́дрїемъ подоба́ющимъ ѡ҆дѣ́ѧнна.

рм҃ѕ. Ꙗ҆́коже болѧ́щемꙋ ѻ҆чи́ма не воспо́льзꙋетъ въ постоѧ́нномъ полꙋ́дни и҆ ѕѣ́льнѣйшемъ зно́и, непокрове́нное и҆ напрѧже́нное со́лнца зрѣ́нїе: си́це и҆ стра́стномꙋ и҆ нечи́стомꙋ ᲂу҆мꙋ̀, сꙋ́щїѧ въ дꙋ́сѣ и҆ и҆́стиннѣ стра́шныѧ и҆ преесте́ственныѧ моли́твы воѡбраже́нїе ника́коже воспо́льзовати мо́жетъ: но и҆ напроти́въ, къ негодова́нїю проти́вꙋ себѐ таковы́й возбꙋжда́етъ бж҃ество̀¹⁵⁸³.

рм҃з. А҆́ще съ да́ромъ прише́дшаго ко ѻ҆лтарю̀, не прїѧ̀ ничто́же прїе́млѧй, и҆ ничесѡ́же тре́бꙋѧй, до́ндеже смири́тсѧ съ бли́жнимъ скорбѧ́щимъ на него̀: смотрѝ, коли́кагѡ хране́нїѧ, и҆ разсꙋжде́нїѧ потре́ба, да благопрїѧ́тный бг҃ꙋ на мы́сленномъ же́ртвенницѣ ѳѷмїа́мъ принесе́мъ.

рм҃и. Не бꙋ́ди словолюби́въ, нижѐ славолюби́въ: а҆́ще же нѝ: не ктомꙋ̀ на хребтѣ̀ твое́мъ, но на лицѣ̀ твое́мъ дѣ́лаютъ грѣ̑шницы: и҆ бꙋ́деши пора́дованїе и҆̀мъ во вре́мѧ моли́твы, влеко́мь и҆ прельща́емь ѿ ни́хъ по́мыслы безмѣ́стными.

рм҃ѳ. Внима́нїе моли́твы и҆́щꙋщее моли́твꙋ ѡ҆брѧ́щетъ: моли́твѣ бо и҆ нѣ́что и҆́но па́че внима́нїѧ послѣ́дствꙋетъ, ѡ҆ не́мже тща́тисѧ подоба́етъ.

р҃н. Ꙗ҆́коже всѣ́хъ чꙋ́вствъ лꙋ́чшее є҆́сть зрѣ́нїе: си́це и҆ всѣ́хъ добродѣ́телей, моли́тва є҆́сть бж҃е́ственнѣйша¹⁵⁸⁴.

рн҃а. Моли́твы похвала̀ не про́стѡ, коли́чество, но ка́чество: и҆ сїѐ ꙗ҆́вѣ творѧ́тъ вше́дшїи въ цр҃ковь помоли́тисѧ: и҆, вы́ же молѧ́щесѧ не ли́шше глаго́лите, и҆ прѡ́чаѧ¹⁵⁸⁵.

рн҃в. Є҆ли́ко ᲂу҆гожде́нїю вне́млеши тѣ́ла, и҆ ᲂу҆́мъ тво́й, кра̑снаѧ ѡ҆б̾е́млетъ житїѧ̀ сегѡ̀, не ᲂу҆̀ моли́твы ᲂу҆зрѣ́лъ є҆сѝ мѣ́сто: но є҆щѐ дале́че блаже́нный тоѧ̀ пꙋ́ть ѿстои́тъ ѿ тебѐ.

рн҃г. Є҆гда̀ ста́въ на моли́твꙋ вы́ше всѧ́кїѧ и҆ны́ѧ ра́дости бꙋ́деши, тогда̀ вои́стиннꙋ ѡ҆брѣ́лъ є҆сѝ моли́твꙋ.

Тогѡ́жде прпⷣбнагѡ и҆ бг҃оно́снагѡ ѻ҆тца̀ на́шегѡ ні́ла по́стника, сло́во по́стническое, ѕѣлѡ̀ нꙋ́ждное и҆ преполе́зное.

Любомꙋ́дрствовати покꙋси́шасѧ и҆ ѿ є҆́ллинъ мно́зи, и҆ ѿ і҆ꙋде́євъ не ма́лѡ. Є҆ди́ни же и҆́стиннѣй премꙋ́дрости поревнова́ша ᲂу҆ченицы̀ хрⷭ҇тѡ́вы. Поне́же є҆ди́ни ѻ҆нѝ премꙋ́дрость и҆мѣ́ѧхꙋ ᲂу҆чи́тельницꙋ, дѣ́ломъ подоба́ющее сицево́мꙋ начина́нїю житїѐ показꙋ́ющꙋю. Пе́рвїи бо ꙗ҆́коже на позо́рищи и҆грали́щное дѣ́йствїе притворѧ́юще, чꙋжди́мъ себѐ ᲂу҆краша́ли ѡ҆бли́чїемъ: и҆́мѧ тще́тно взе́млюще, любомꙋ́дрїѧ и҆́стиннагѡ не и҆мꙋ́ще: въ хлами́дѣ, и҆ брадѣ̀, и҆ жезлѣ̀ любомꙋ́дрїе показꙋ́юще: тѣ́лꙋ ᲂу҆гожда́юще, и҆ по́хотемъ ꙗ҆́кѡ влады́чицамъ слꙋжа́ще: чре́вꙋ сꙋ́ще рабѝ, и҆ подчрє́внымъ сласте́мъ, ꙗ҆́кѡ дѣ́ло є҆сте́ственно прїе́млюще ѻ҆́ныѧ: гнѣ́вꙋ повинꙋ́ющесѧ, и҆ сла́вѣ чꙋдѧ́щесѧ, къ бога̑тымъ трапе́замъ ꙗ҆́кѡ пси́чища а҆́лчнѡ наска́чꙋще, не вѣ́дѧще, ꙗ҆́кѡ пре́жде всегѡ̀ свобо́днꙋ бы́ти подоба́етъ любомꙋ́дрцꙋ: и҆ па́че бѣ́гати, да не ра́бъ бꙋ́детъ страсте́мъ: не́жели да не ра́бъ бꙋ́детъ комꙋ̀ кꙋ́пленный: человѣ́кꙋ бо бы́ти рабо́мъ, ничи́мже мню̀ не повредѝ пра́во живꙋ́щагѡ: страсте́мъ же ꙗ҆́кѡ влады́ки и҆мꙋ́щꙋ слꙋжи́ти сласте́мъ, сра́мъ нанесѐ и҆ смѣ́хъ мно́гъ. Сꙋ́ть ᲂу҆́бѡ ᲂу҆ ни́хъ ѿню́дъ ѡ҆ дѣѧ́нїи вознерадѣ́вшїи, слове́сное любомꙋ́дрїе, ꙗ҆́коже мнѧ́тъ, воспрїѧ́вшїи: высокомꙋ́дрцы нѣ́цыи сꙋ́ще, и҆ неꙋдобвѣ́рꙋемыхъ сказа́телє. И҆ небесѐ вели́чество, и҆ со́лнца мѣ́ры, и҆ звѣ́здъ дѣ̑йствїѧ вѣ́дѣти возвѣща́юще, ѻ҆вогда́ же и҆ бг҃осло́вствовати покꙋша́ющїисѧ, и҆дѣ́же и҆ и҆́стина непости́жна, и҆ гада́нїе прибѣ́дственно, живꙋ́ще же валѧ́ющихсѧ сви́нїй безче́стнѣе. А҆́ще же и҆ нѣ́цыи бы́ша дѣ́ѧтельнїи, си́хъ бы́ша хꙋ́дшїи, сла́вамъ и҆ хвала́мъ прода́вшїи трꙋды̀. Ничесогѡ́ бо и҆на́гѡ ра́ди, ра́звѣ показа́нїѧ и҆ тщесла́вїѧ ра́ди, ᲂу҆мышлѧ́хꙋ сі́и ѻ҆каѧ́ннїи мнѡ́гаѧ: и҆ ма́лость и҆ ᲂу҆ничиже́нїе, за сицево́е премѣнѧ́юще ѕлострада́нїе. Сїе́ бо, є҆́же молча́ти всегда̀, и҆ бы́лїемъ пита́тисѧ, и҆ рꙋ́бищами власѧны́ми покрыва́ти тѣ́ло, и҆ въ де́львѣ заключи́вшымсѧ пребыва́ти, ни є҆ди́нагѡ воздаѧ́нїѧ по сме́рти ча́ющымъ, всѧ́кагѡ безꙋ́мїѧ є҆́сть далеча́е. Вкꙋ́пѣ съ се́ю жи́знїю ѡ҆кончава́ти воздаѧ́нїѧ добродѣ́тели, и҆ по́двигъ предложи́ти вѣнцє́въ вре́мѧ себѣ̀ неимꙋ́щїй, и҆ борьбꙋ̀ всегда́шнюю, по́честей лише́ннꙋю и҆ потыка́нїѧ, ничто́же кромѣ̀ по́тѡвъ и҆мꙋ́щаѧ.

Ѿ і҆ꙋдє́й же є҆ли́цы сїѐ и҆збра́ша житїѐ, сꙋ́ть і҆ѡнада́ва сы́ны, всѣ́хъ си́це жи́ти хотѧ́щихъ предаю́щихсѧ, въ то́жде возво́дѧтъ жи́тельство: въ кꙋ́щахъ ѡ҆бита́ютъ всегда̀¹⁵⁸⁶: ѿ вїна́ же и҆ всѣ́хъ къ сластолю́бїю влекꙋ́щихъ воздержава́ющесѧ, и҆ пи́щꙋ и҆мꙋ́ще простꙋ́ю, и҆ потре́бꙋ тѣ́ла ᲂу҆мѣ́реннꙋ: ѕѣлѡ̀ ᲂу҆́бѡ прилѣжа́ще правоꙋчи́тельномꙋ навыкнове́нїю, въ ᲂу҆мозрѣ́нїи мно́жае пребыва́ютъ: ѿсю́дꙋ же и҆ є҆ссе́и и҆менꙋ́ютсѧ, сїѐ ꙗ҆влѧ́ющꙋ и҆́мени. И҆ про́стѣ, є҆́сть ᲂу҆ ни́хъ и҆справлѧ́емо любомꙋ́дрїѧ намѣ́ренїе, ника́коже дѣлѡ́мъ проти̑внымъ сꙋ́щымъ ѻ҆бѣ́тꙋ. Но ка́ѧ по́двигѡвъ по́льза и҆̀мъ, и҆ притрꙋ́днагѡ пребыва́нїѧ, подвигополо́жника, ᲂу҆би́вшымъ хрⷭ҇та̀, и҆ си́мъ бо подо́бнѣ трꙋдѡ́въ погиба́етъ мзда̀, ѿве́ргшымсѧ раздаѧ́телѧ по́честей, и҆ и҆́стинныѧ жи́зни: и҆ сегѡ̀ ра́ди въ любомꙋ́дрїи погрѣши́вшымъ. Любомꙋ́дрїе бо є҆́сть нра́вѡвъ ᲂу҆строе́нїе, со мнѣ́нїемъ и҆́стиннагѡ ѡ҆ бж҃ествѣ̀ позна́нїѧ. Въ се́мъ же погрѣши́ша ѻ҆боѧ̀, і҆ꙋде́и и҆ є҆́ллини, прише́дшꙋю съ небе́съ премꙋ́дрость ѿри́нꙋвшїи, и҆ кромѣ̀ хрⷭ҇та̀ любомꙋ́дрствовати покꙋси́вшесѧ, томꙋ̀ є҆ди́номꙋ дѣ́ломъ и҆ сло́вомъ и҆́стинное любомꙋ́дрїе показа́вшꙋ. Се́й бо пе́рвый къ томꙋ̀ житїе́мъ пꙋ́ть ѿкры̀, жи́тельство показа́вый чи́сто, и҆ вы́шшꙋ при́снѡ тѣле́сныхъ страсте́й дꙋ́шꙋ носѧ̀: послѣди́ же и҆ сїю̀ презрѣ́въ, є҆гда̀ ᲂу҆строѧ́емое ѿ негѡ̀ спасе́нїе человѣ́кѡвъ взы́скиваше сме́рти. Оу҆ча̀ си́ми, ꙗ҆́кѡ подоба́етъ любомꙋ́дрствовати пра́вѡ и҆зволѧ́ющꙋ, ѿрещи́сѧ всѣ́хъ сла́достныхъ житїѧ̀, трꙋды́ же и҆ стра̑сти до́блественнѡ побѣжда́ти, презира́ющꙋ тѣ́ло: и҆мѣ́ти же нижѐ дꙋ́шꙋ че́стнꙋ: и҆ сїю̀ ᲂу҆се́рднѣ предава́ти, є҆гда̀ ра́ди показа́нїѧ добродѣ́тели, ѿложи́ти бы ю҆̀ потре́бно бы́ло. И҆ семꙋ̀, воспрїи́мше, подража́ша житїю̀ ст҃і́и а҆пⷭ҇ли, вкꙋ́пѣ внегда̀ зва̑ннымъ и҆̀мъ бы́ти, ѿве́ргшесѧ живота̀, и҆ презрѣ́вше ѻ҆те́чество, ро́дъ, и҆мѣ́нїе, къ жесто́комꙋ и҆ притрꙋ́дномꙋ а҆́бїе премѣни́шасѧ житїю̀, скво́зь всѧ̑ проше́дше неꙋдѡ́бства, ѡ҆скорблѧ́еми, ѡ҆ѕлоблѧ́еми, гони́ми, наготꙋ́юще, са́мыхъ нꙋ́ждныхъ не и҆мꙋ́ще, послѣди́ же и҆ на сме́рть дерзнꙋ́ша, до́брѣ во все́мъ ᲂу҆чи́телю подража́вше, и҆ житїе́мъ ѡ҆ста́вивше и҆зрѧ́днѣйшїй ѡ҆́бразъ жи́тельства. Но є҆гда̀ напи́совати ѿ сегѡ̀ ѡ҆́браза хрⷭ҇тїа́не своѐ житїѐ до́лженствꙋюще, и҆лѝ не восхотѣ́ша, и҆лѝ и҆знемого́ша къ подража́нїю: не мно́зи же нѣ́цыи возмого́ша вы́ше мїрски́хъ возни́кнꙋти смꙋще́нїй, и҆ и҆збѣ́гнꙋти сꙋ́щїѧ во гра́дѣхъ бꙋ́ри, и҆ си́це внѣ̀ мо́лвъ бы́вше, ᲂу҆едине́нное ѡ҆блобыза́ти житїѐ: и҆зѡбраже́нїе а҆пⷭ҇льскїѧ сотвори́ша добродѣ́тели: стѧжа́нїю нестѧжа́нїе предсꙋ́ждше, безпеча́лїѧ ра́ди: пи́щи же прїꙋмаще́ннѣй про́стѣ ᲂу҆гото́ваннꙋю предпоче́тше ра́ди ᲂу҆кроще́нїѧ страсте́й, ма́лою пи́щею потре́бꙋ и҆спо́лниша тѣ́ла: ѻ҆де́ждъ мѧ́гкихъ и҆ кромѣ̀ потре́бы, ꙗ҆́кѡ человѣ́ческагѡ сластолю́бїѧ ᲂу҆мышле́нїе презрѣ́вше, простꙋ́ю нꙋ́жды ра́ди тѣ́ла и҆ неизбра́ннꙋю ᲂу҆потреблѧ́хꙋ ри́зꙋ, не любомꙋ́дро бы́ти непщева́вше попече́нїе є҆́же ѡ҆ небе́сныхъ, къ до́лꙋ лежа́щымъ, и҆ ѕвѣрє́мъ без̾ трꙋда̀ прибыва́ющымъ ѡ҆браща́ти: не вѣ́дѣша ᲂу҆краше́нїѧ, внѣ̀ чл҃вѣ́ческихъ бы́вше страсте́й, не бѧ́ше ᲂу҆ ни́хъ лихои́мствꙋѧй, и҆лѝ лихои́мствꙋемый, сꙋдѧ́й и҆лѝ сꙋди́мый: и҆мѧ́ше бо кі́йждо сꙋдїю̀ неꙋмы́тнаго свою̀ со́вѣсть, не и҆́нъ ᲂу҆́бѡ богатѧ́шесѧ, и҆́нъ же нище́тствоваше: нижѐ и҆́нъ ᲂу҆́бѡ и҆стаѧва́ше гла́домъ, и҆́нъ же расторга́шесѧ пресыще́нїемъ: восполнѧ́ше бо ѡ҆скꙋдѣва́ющихъ потре́бꙋ и҆збы́точествꙋющихъ щедролю́бїе. И҆ бѧ́ше ра́венство, и҆ равножи́тельство, ра́ди преимꙋ́ществꙋющихъ къ смире́ннѣйшымъ доброво́льнагѡ ѡ҆бще́нїѧ и҆зве́рженнꙋ сꙋ́щꙋ нера́венствꙋ: па́че же нижѐ тогда̀ бѣ̀ ра́венство: творѧ́ше бо и҆ тогда̀ нера́венство, смирѧ́тисѧ па́че тща́щихсѧ ᲂу҆се́рдїе: ꙗ҆́коже твори́тъ ны́нѣ па́че просла́витисѧ любопрѧ́щихсѧ безꙋ́мїе. И҆зве́рженна бѣ̀ тогда̀ за́висть, и҆згна́нна не́нависть, ᲂу҆далено̀ тщесла́вїе, и҆стреблена̀ го́рдость, разрꙋше́но всѐ крамолы̀ вино́вное: къ ᲂу҆множе́нїю бо страсте́й ме́ртвы нѣ́какѡ бы́ша, и҆ нечꙋ́вственни: нижѐ во снѣ̀ мечта́нїе тѣ́хъ прїе́млюще, зане́же до́брѣ съ нача́ла ѿврати́тисѧ и҆̀мъ си́хъ воспомина́нїѧ: ѿ повседне́внагѡ по́двига, и҆ терпѣ́нїѧ, на сицево́е навыкнове́нїе возше́дшїи. И҆ про́стѣ, свѣти́льники бы́ша во тьмѣ̀ свѣтѧ́щїи, и҆ ѕвѣ́зды постоѧ́нныѧ мра́чнꙋю житїѧ̀ но́щь просвѣща́ющыѧ: и҆ приста́нищъ защи́тницы въ себѣ̀ не ѡ҆бꙋрева́емїи: всѣ̑мъ ᲂу҆до́бно показꙋ́ющїи и҆збѣга́ти прираже́нїѧ страсте́й безвре́днѡ. Но небла́зненное ѻ҆́но жи́тельство, и҆ є҆́же на нб҃сѣ́хъ пребыва́нїе, ꙗ҆́коже ѡ҆́бразъ вре́менемъ ѿ нерадѣ́нїѧ спи́сывающихъ, по ма́лꙋ ᲂу҆малѧ́емый, въ кра́йнее неподо́бїе прихо́дитъ, и҆ дале́че ѿ первонача́льнагѡ ѡ҆́браза ѿстои́тъ. Па́ки бо распе́ншїисѧ мі́рꙋ, и҆ ѿве́ргшїи житїѐ, и҆ ѿре́кшїисѧ бы́ти человѣ́ки, и҆ ко безтѣле́сныхъ є҆стествꙋ̀ безстра́стїѧ є҆диноѡбра́зїемъ востекатѝ подвиза́ющїисѧ, возврати́хомсѧ вспѧ́ть кꙋ́плѧми жите́йскими, и҆ прїѡбрѣ́тенїи безче́стнѣйшими, помрача́юще до́брѣ пожи́вшихъ, цѣломꙋ́дрїе, и҆ бл҃гохвали́мыхъ бы́ти могꙋ́щихъ ра́ди своеѧ̀ добродѣ́тели, хꙋли́мымъ бы́ти творѧ́ще свои́мъ невнима́нїемъ¹⁵⁸⁷. И҆ рꙋкоѧ́ть ра́ла держи́мъ, ѡ҆́бразъ хранѧ́ще че́стенъ: ᲂу҆пра́влени же не быва́юще въ ца́рствїи небе́сное за ѡ҆браще́нїе вспѧ́ть, и҆ за бытїѐ до́лжныхъ со мно́гимъ проти́вѧщесѧ тща́нїемъ. Не ктомꙋ̀ во ᲂу҆до́бь продае́мое и҆ ᲂу҆до́бь ѡ҆брѣта́емое къ жи́зни ᲂу҆ на́съ въ тща́нїи є҆́сть, нижѐ безмо́лвїе, ко ᲂу҆дале́нїи ѿ дре́внихъ скве́рнъ поле́зное ᲂу҆чреждено̀ є҆́сть. Стꙋже́нїе же дѣ́лъ, ко и҆́стинномꙋ намѣ́ренїю безполе́зно и҆мꙋ́щее тща́нїе предпочте́сѧ: и҆ ѡ҆ веществѣ̀ попече́нїе, сп҃си̑тельнаѧ побѣдѝ ᲂу҆вѣща̑нїѧ¹⁵⁸⁸. Гдⷭ҇ꙋ бо всѧ́кѡ ѿ попече́нїѧ ѡ҆ земны́хъ ѿводѧ́щꙋ, и҆ є҆ди́нагѡ и҆ска́ти црⷭ҇твїѧ нбⷭ҇нагѡ повелѣ́вшꙋ, ꙗ҆́кѡ проти́внымъ пꙋте́мъ потша́вшесѧ ше́ствовати, пренебрего́хомъ влады́чни за́пѡвѣди: и҆ ѿ промышле́нїѧ ѻ҆́нагѡ ѿстꙋ́пльше, въ рꙋка́хъ положи́хомъ наде́ждꙋ. Томꙋ́ бо глаго́лющꙋ¹⁵⁸⁹: Воззри́те на пти̑цы нбⷭ҇ныѧ, ꙗ҆́кѡ не сѣ́ютъ, ни жнꙋ́тъ, ни собира́ютъ въ жи̑тницы, и҆ ѻ҆ц҃ъ на́шъ нбⷭ҇ный пита́етъ и҆̀хъ¹⁵⁹⁰. И҆ па́ки: Смотри́те кри́нъ се́льныхъ, ка́кѡ растꙋ́тъ, не трꙋжда́ютсѧ, не прѧдꙋ́тъ¹⁵⁹¹. Но и҆ пи́ры, и҆ влага̑лища и҆ жезла̀ носи́ти возбрани́вшꙋ, и҆ є҆ди́нѣмъ ходи́ти непрело́жнѣйшимъ повелѣ́вшꙋ ѡ҆бѣтова́нїемъ, є҆́же а҆пⷭ҇лѡмъ во бл҃готворе́нїе про́чихъ человѣ̑къ посыла́емымъ заповѣ́да ре́къ¹⁵⁹²: Досто́инъ дѣ́латель мзды̀ своеѧ̀: и҆звѣ́стнѣйшее въ промышле́нїи подоба́ющихъ ѡ҆бѣтова́нїе ѻ҆́ное па́че на́шегѡ попече́нїѧ вѣ́дый. Мы́ же зе́млю, є҆ли́кꙋ а҆́ще мо́жемъ стѧжа́ти, не ѿрица́емсѧ: ѻ҆ве́цъ же стада̀, и҆ волы̀ ѡ҆рю́щыѧ, ви́домъ и҆ вели́чествомъ добры̀, и҆ ѻ҆слы̀ ᲂу҆пита̑нныѧ кꙋпꙋ́емъ: да ты́ѧ ᲂу҆̀бо подаю́тъ во́лнꙋ къ потре́бѣ и҆зоби́льнѡ: волы́ же, сꙋ́щымъ ѿ земледѣ́лїѧ прїꙋготовле́нїѧмъ слꙋжа́ще, на́мъ ᲂу҆́бѡ пи́щꙋ, себѣ́ же и҆ прѡ́чимъ живо́тнымъ ко́рмъ подаю́тъ: бременоносѧ̑щаѧ же под̾ѧрє́мнаѧ, свое́й странѣ̀ ѡ҆скꙋдѣва̑ющаѧ, ѿ да́льныѧ страны̀ привози́мыми восполнѧ̑ющаѧ: нꙋ́жнꙋю пи́щꙋ да прїꙋготовлѧ́ютъ неслади́тельнѡ на́мъ соꙋмножа̑ющаѧ житїѐ: не то́чїю же, но и҆ ѿ хꙋдо́жествъ и҆збира́емъ прибы́точнѣйшаѧ, и҆ ѿню́дъ не подаю́щыѧ вре́мене па́мѧти бж҃їѧ всѐ къ себѣ̀ влекꙋ́щаѧ ᲂу҆пражне́нїе, ѡ҆сꙋди́вше, ꙗ҆́коже мни́тсѧ, промысли́телѧ не́мощь, и҆лѝ себѐ ѡ҆ пе́рвомъ ѻ҆бѣ́тѣ. А҆́ще бо и҆ не сло́вомъ сїѐ и҆сповѣ́дꙋемъ, ꙗ҆влѧ́емъ дѣ́лы, ра́дꙋющесѧ жите́йскихъ человѣ̑къ пребыва́нїю, є҆гда̀ та́ѧжде, ꙗ҆̀же и҆ ѻ҆нѝ ᲂу҆мышлѧ́емъ. Є҆да̀ ка́кѡ и҆ мно́жае въ тѣле́сныхъ пребыва́емъ трꙋдолю́бїихъ, ꙗ҆́кѡ ᲂу҆жѐ мнѡ́гимъ прїѡбрѣ́тенїе непщева́ти благоче́стїе, и҆ ни чесогѡ̀ и҆на́гѡ ра́ди дре́внее ѻ҆́ное ᲂу҆мышлѧ́ти безмо́лвное и҆ блаже́нное житїѐ, то́чїю, ꙗ҆́кѡ да притво́рнымъ благоче́стїемъ, притрꙋ́дныхъ слꙋже́нїй и҆збѣ́гнемъ: свобо́дꙋ же наслажде́нїѧ стѧжа́вше, невозбра́ннѡ на ᲂу҆гѡ́днаѧ на́мъ стремле́нїе простре́мъ: со мно́гимъ безстꙋ́дїемъ кича́щесѧ пред̾ простѣ́йшими, ѻ҆вогда́ же и҆ пред̾ преимꙋ́щими, ꙗ҆́кѡ винꙋ̀ на́глства, а҆ не смире́нїѧ и҆ кро́тости, вознепщева́вше бы́ти добродѣ́тельное житїѐ. Сегѡ̀ ра́ди и҆ ѿчествова́ти на́съ до́лженствꙋющихъ, ꙗ҆́кѡ просты́й наро́дъ зри́мсѧ: и҆ ѿ прише́льцѡвъ и҆ всѧ́кихъ человѣ̑къ: наипа́че на то́ржищахъ смѣ́шени быва́емъ: ничто́же па́че про́чихъ, ꙗ҆́коже подоба́ше, и҆зрѧ́дно и҆мꙋ́ще: не ѿ жи́тельства, но ѿ ѡ҆́браза познава́тисѧ хотѧ́ще, и҆ сꙋ́щихъ въ добродѣ́тели ѿрица́ющесѧ трꙋдѡ́въ, за ты́ѧ сла́вы безꙋ́мнѡ жела́емъ. Сѣ́нь бы́вшїѧ нѣ́когда и҆́стины показꙋ́юще. И҆ ны́нѣ нѣ́кто воспрїѧ́въ почте́нный се́й ѡ҆́бразъ, и҆ ника́коже скве́рны дꙋшѝ ѡ҆мы́въ, нижѐ впечатлѣ́нныѧ ѡ҆́бразы ве́тхихъ прегрѣше́нїй и҆згла́дивъ и҆з̾ мы́сли своеѧ̀, но є҆щѐ, є҆да̀ ка́кѡ си́хъ мечта́ньми безстꙋ́дствꙋѧ, и҆ нра́въ не ᲂу҆̀ во ᲂу҆гожде́нїе ѻ҆бѣ́тꙋ наста́вивъ, нижѐ ᲂу҆вѣ́дѣвъ, что̀ є҆́сть, є҆́же по бз҃ѣ любомꙋ́дрїѧ намѣ́ренїе, ᲂу҆жѐ фарїсе́йскꙋ бро́вь притворѝ, велемꙋ́дрствꙋѧ ѡ҆́бразомъ: и҆ ѡ҆бхо́дитъ ѻ҆рꙋ̑дїѧ носѧ̀, и҆́хже хꙋдо́жествꙋ не наꙋчи́сѧ: и҆ вѣ́дѣнїе возвѣща́етъ ꙗ҆влѧ́емымъ ѡ҆́бразомъ, є҆гѡ́же нижѐ кра́емъ ᲂу҆́стъ вкꙋсѝ: ка́мень вмѣ́стѡ приста́нища, и҆ вмѣ́стѡ хра́ма гро́бъ пова́пленный: и҆ вмѣ́стѡ ѻ҆вцы̀ во́лкъ, на па́гꙋбꙋ прельще́нныхъ ѡ҆брѣта́ѧсѧ ꙗ҆вле́нїемъ. Є҆гда́ бо сицеві́и и҆з̾ монастыре́й и҆збѣ́гше, зане́же жесто́кости житїѧ̀ понестѝ не восхотѣ́ша, пи́ршествꙋютъ во гра́дѣхъ, тогда̀ про́чее ѿ нꙋ́жды чре́вныѧ преклонѧ́юще вы́ю, на ѡ҆больще́нїе и҆ны́хъ, ѡ҆́бразъ благоче́стїѧ ꙗ҆́кѡ пре́лесть ѡ҆бно́сѧтъ, всѧ̑ дѣ́ѧти терпѧ́ще, є҆ли̑ка потре́ба понꙋжда́етъ тѣ́ла. Ничто́же бо нꙋ́жды є҆сте́ственныѧ наси́лованнѣе, къ непристꙋ́пнымъ при́стꙋпъ ᲂу҆до́бенъ ᲂу҆мышлѧ́ющїѧ: наипа́че є҆гда̀ и҆ пра́здность прибꙋ́детъ къ томꙋ̀. Поꙋчи́всѧ, ка́кѡ и҆ кова́рнѣе ᲂу҆мышлє́нїѧ ᲂу҆спѣва́ютъ почита́ютъ ᲂу҆́бѡ сі́и до́мы бога́тыхъ, не ме́нѣе ласка́телей: на то́ржищахъ же ꙗ҆́кѡ рабы̀ кꙋ́пленные къ ни̑мъ притека́ютъ, приближа́ющихсѧ ѿгонѧ́юще, ѿрѣва́юще же всѣ́хъ, ᲂу҆до́бный прохо́дъ и҆̀мъ пода́ти тща́тсѧ, и҆ сїѧ̑ творѧ́тъ трапе́зы ра́ди, къ сла̑достнымъ ꙗ҆́ствїѧмъ жела́нїѧ ᲂу҆крощава́ти не ѡ҆бꙋчи́вшесѧ: и҆ ѿ мѡѷсе́а заповѣ́данный потре́бы ра́ди ры́лецъ за по́ѧсомъ носи́ти не восхотѣ́вше. Вѣ́дѣли бо бы сїѐ стѧжа́вшїи, ꙗ҆́кѡ всѧ́кагѡ ᲂу҆слажде́нїѧ бра́шенъ предѣ́лъ, гла́дъ быва́етъ, и҆ проста́ѧ снѣ́дь потре́бꙋ и҆сполнѧ́ющаѧ тѣ́ла, безвре́меннагѡ вожделѣ́нїѧ прикрыва́етъ безѡбра́зїе¹⁵⁹³. Сегѡ̀ ра́ди и҆́мѧ бж҃їе хꙋ́литсѧ, и҆ превожделѣ́нное житїѐ ѕѣлѡ̀ бы́сть презрѣ́нно: и҆ и҆́стиннѡ по добродѣ́тели живꙋ́щихъ стѧжа́нїе, пре́лесть возмнѣ́сѧ. И҆ ѡ҆тѧгчава́ютсѧ ᲂу҆̀бо гра́ды ѿ всꙋ́е ѡ҆бходѧ́щихъ: стꙋжа́еми же быва́ютъ сꙋ́щїи въ домѣ́хъ, и҆ са́мый и҆́хъ зра́къ и҆̀мъ непрїѧ́тенъ, зрѧ́щимъ и҆̀хъ безстꙋ́днѣе ни́щихъ при вратѣ́хъ пребыва́ющихъ. Мно́зи же и҆ прїѧ́ты въ до́мы, и҆ благоче́стїе нѣ́кое притворѧ́юще, и҆ мы́сль кова́рнꙋю притво́рства личи́ною прикры́вше, послѣди́ же ѡ҆кра́дше тѣ́хъ ѿидо́ша, ꙗ҆́коже на всю̀ и҆́хъ жи́знь безче́стїю разли́тисѧ ᲂу҆стро́ивше. Сі́и ᲂу҆̀бо ꙗ҆́кѡ гꙋби́тели и҆згонѧ́ютсѧ и҆з̾ градѡ́въ, сꙋ́щїи и҆ногда̀ цѣломꙋ́дренницы: и҆ ꙗ҆́кѡ нечи́стїи, ненави́дими быва́ютъ не ме́нѣе прока́зою ѡ҆держи́мыхъ: и҆ разбо́йникѡмъ, и҆ стѣ́нъ прокопа́телємъ восхотѣ́лъ бы кто̀ вѣ́рити па́че, не́же и҆́ноческое житїѐ проходѧ́щымъ: ᲂу҆до́бѣе къ предохране́нїю ꙗ҆́внꙋю хи́трость, не́же въ та́йнѣ ѕлоꙋмы́шленное достовѣ́рїе непщꙋ́юще. И҆ си́хъ ᲂу҆̀бо, нижѐ нача́вшихъ благоче́стїе, нижѐ ᲂу҆вѣ́дѣвшихъ сꙋ́щее ѿ безмо́лвїѧ прїѡбрѣ́тенїе, ѿ нꙋ́жды є҆гда̀ ка́кѡ нѣ́кїѧ понꙋжде́нныхъ къ и҆́ноческомꙋ житїю̀ безразсꙋ́днѡ: и҆ кꙋ́пли винꙋ̀ къ сниска́нїю нꙋ́жныхъ непщꙋ́ющыѧ ве́щь, є҆́же бы, мню̀, честнѣ́е проходи́ли бы́ша, не ко всѣ́хъ две́рємъ приходѧ́ще, но бо́льшее прїѧ́тїй стыдѣ́нїе пока́зовали бы ѡ҆́бразомъ, и҆ хотѧ́щихъ подаѧ́нїе тѣ́лꙋ нꙋ́ждно прїѧ́ти: неизвѣ́стно, а҆́ще любосла́ствꙋющихъ безмѣ̑рнаѧ вожделѣ̑нїѧ возѡбнови́ло ла́комство, и҆ неисцѣ́льнѣ болѧ́щихъ и҆сцѣли́ти трꙋ́дно. Ка́кѡ бо бы кто̀ и҆ мо́глъ сказа́ти здра́вїѧ по́льзꙋ, во здра́вїи никогда́же бы́вшымъ, но ѿ са́мыхъ пеле́нъ въ разслаблѧ́ющемъ совоспи́таннымъ недꙋ́зѣ, и҆ неблагополꙋ́чїе є҆стества̀ ѻ҆бы́чай бы́ти непщꙋ́ющымъ, ничи́мже разли́чествовати томꙋ̀ ѿ є҆сте́ственныѧ си́лы мнѧ́ще. И҆зли́шно бо ко и҆справле́нїю всѧ́кое сло́во, є҆гда̀ слы́шащихъ ᲂу҆клонѧ́ющеесѧ къ хꙋ́ждшемꙋ тща́нїе, словесє́мъ полє́знаѧ совѣща́ющымъ сопротивлѧ́етсѧ: и҆ наипа́че є҆гда̀ коры́сти наде́жда пита́етъ вожделѣ́нїе, загражда́етъ совѣ́тꙋ слꙋ́хъ всѧ́чески стра́сть, ꙗ҆́кѡ ни є҆ди́нагѡ цѣломꙋ́дреннымъ наставле́нїѧмъ ѡ҆брѣта́ти вхо́да, ѡ҆браще́ннѣй сꙋ́щей къ вожделѣ́нїю скверноприбы́точества мы́сли. Мы́ же, ѽ возлю́бленнїи, и҆̀же любо́вїю добродѣ́тели непщꙋ́емъ ѡ҆ста́вивше житїѐ, и҆ ѿве́ргшесѧ мїрски́хъ похоте́й, и҆ послѣ́довати ѡ҆бѣща́вшесѧ хрⷭ҇тꙋ̀, что̀ па́ки свѧзꙋ́емсѧ жите́йскими попече́ньми; и҆ ѕлѣ̀ зи́ждемъ ꙗ҆̀же до́брѣ разори́хомъ пе́рвѣе; Что̀ неприли́чнѣ проходѧ́щихъ зва́нїе своѐ ѕлосовѣ́тїю прїѡбща́емсѧ, немощнѣ́йшихъ жела̑нїѧ возжига́юще, свои́мъ ѡ҆ сꙋ́етныхъ тща́нїемъ, и҆ бы́хомъ неискꙋ́снѣйшымъ лихоима́нїѧ пꙋ́ть; Врачева́ти бо, не поврежда́ти ᲂу҆добьпоползнове́нныхъ, и҆ вмѣ́стѡ, є҆́же ᲂу҆го́дно на́мъ, поле́зное и҆̀мъ предлага́ти, ѿ гдⷭ҇а повелѣ́сѧ на́мъ: ꙗ҆́кѡ да не безразсꙋ́днымъ свои̑мъ мы̀ слѣ́дꙋюще хотѣ́нїѧмъ, мно́гихъ ѿ простѣ́йшихъ преткнꙋ́тисѧ сотвори́мъ, вина̀ и҆̀мъ люботща́тельнагѡ ѡ҆ земны́хъ попече́нїѧ сꙋ́ще. Почто̀ за вели́ко вмѣнѧ́емъ вещество̀, є҆́же презира́ти наꙋчи́хомсѧ; бога́тствомъ и҆ стѧжа́ньми ѡ҆бдержа́щесѧ, и҆ на мнѡ́гаѧ и҆ неполє́знаѧ попечє́нїѧ ᲂу҆́мъ раздѣлѧ́юще: и҆́хже тща́нїе на́съ ᲂу҆́бѡ ᲂу҆далѧ́етъ ѿ нꙋ́жднѣйшагѡ внима́нїѧ, и҆ нерадѣ́ти ѡ҆ дꙋше́вныхъ бл҃ги́хъ ᲂу҆строѧ́етъ: въ ве́лїю же поги́бель веде́тъ зїѧ́ющихъ къ жите́йскимъ веще́мъ, свѣ́тлое и҆ высоча́йшее непщꙋ́ющихъ блаже́нство бы́ти, є҆́же ѿ бога́тства наслажде́нїе: любомꙋ́дрствовати ѡ҆бѣщава́ющихсѧ, и҆ превы́ше сласте́й бы́ти хва́лѧщихсѧ, но па́че и҆́хъ самѣ́хъ ѡ҆ си́хъ тща́щихсѧ; Ничесо́же си́це въ мꙋче́нїе влече́тъ неизбѣ́жно, ꙗ҆́кѡ є҆́же мнѡ́гїѧ свои́хъ твори́ти ѕѡ́лъ ревни́тели: быва́етъ бо подража́вшихъ поги́бель, приложе́нїе мꙋче́нїѧ ᲂу҆чи́вшемꙋ: и҆ не ѿве́ргшихъ, ꙗ҆́кѡ сра́мно подража́нїе, ѡ҆сꙋжде́нїе не ма́ло, ꙗ҆́кѡ ᲂу҆чи́тели ѕѡ́лъ бы́ша: и҆́хже ᲂу҆че́нїе поно́снѣйшее сꙋди́вше и҆збѣга́ли, цѣломꙋ́дренный ᲂу҆потреби́вше по́мыслъ. Тѣ́мже никто́же да смꙋща́етсѧ глаго́лемыми, и҆лѝ и҆спра́вите погрѣши́тельнѣ, мно́гихъ ра́ди нерадѣ́нїѧ, къ срамотѣ̀ и҆́мени быва́ємаѧ, и҆лѝ и҆ и҆́мени ѿве́ргнитесѧ. А҆́ще бо любомꙋ́дрствовати предлежи́тъ, и҆зли̑шна сꙋ́ть стѧжа̑нїѧ, любомꙋ́дрїю и҆ са́магѡ тѣ́ла ѿчꙋжде́нїе чистоты̀ ра́ди дꙋшѝ ᲂу҆вѣща́ющꙋ. А҆́ще же стѧжава́ти и҆ сла̑дкаѧ житїѧ̀ прїѧ́ти нѣ̑кїимъ є҆́сть ѕѣлѡ̀ вожделѣ́нно: почто̀ сло́вомъ любомꙋ́дрїе чествꙋ́ютъ, дѣ́ломъ ѿчꙋжде́нїе къ ѻ҆́номꙋ произволѧ́юще, и҆ дѣѧ̑нїѧ ѻ҆бѣ́та чꙋ̑ждаѧ содѣва́юще, честны́ми ᲂу҆краша́юще себѐ и҆менова́нїи; Є҆да̀ не сра́мно бы́ти мни́мъ, ѡ҆ ме́ншихъ, и҆̀хже мїрски́ми и҆менꙋ́емъ, ѡ҆ престꙋпле́нїи законоположе́нїй спаси́телѧ поноша́еми, пренебреже́ннымъ є҆гѡ̀ за́повѣдемъ ѿ долженствꙋ́ющихъ ᲂу҆чи́тисѧ, ᲂу҆чи́мы быва́юще; Є҆гда́ бо прѧ́щымсѧ на́мъ глаго́лютъ: рабꙋ̀ хрⷭ҇то́вꙋ не подоба́етъ свари́тисѧ, но кро́ткꙋ бы́ти ко всѣ̑мъ: и҆ па́ки любопрѧ́щымсѧ ѡ҆ и҆мѣ́нїихъ, и҆лѝ стѧжа́нїихъ: а҆́ще взе́млетъ ри́зꙋ твою̀ кто̀, глаго́летъ, и҆ срачи́цꙋ взѧ́ти ѡ҆ста́ви є҆мꙋ̀¹⁵⁹⁴: что̀ и҆́но творѧ́тъ ра́звѣ ᲂу҆корѧ́юще на́съ, посмѣва́ютсѧ и҆ рꙋга́ютсѧ, сопроти̑внаѧ ѡ҆бѣ́тꙋ на́шемꙋ ви́дѧще дѣла̀ на̑ша. И҆ли́ бо не нꙋ́ждно прѣ́тисѧ, стѧжа̑нїѧ притѧзꙋ́ющымъ, и҆ всѧ̑ є҆ли̑ка ѡ҆ тѣ́хъ попече́нїе нꙋ́дитъ содѣва́ти. Разорѝ кто̀ предѣ́лъ вїногра́да, и҆ къ свое́й присовокꙋпѝ странѣ̀: и҆́нъ впꙋстѝ ско́тъ, и҆́нъ во́дꙋ текꙋ́щꙋю въ вертогра́дъ ѿведѐ и҆́нꙋды: и҆́бо ꙗ҆ри́тисѧ подоба́етъ, и҆ неи́стовствꙋющихъ хꙋ́ждшемꙋ бы́ти, си̑мъ всѣ̑мъ ѿмще́нїе даю́щꙋ: и҆ къ сꙋди́лищамъ пригвожде́нꙋ бы́ти, въ видѣ́нїи сꙋ́щихъ ᲂу҆пражнѧ́тисѧ до́лженствꙋющемꙋ ᲂу҆мꙋ̀, и҆ въ ѕлохи́трство дѣ́ѧтельно прелага́ти си́лꙋ зри́тельнꙋ, да на́мъ ничто́же на́съ по́льзꙋющихъ благоꙋспѣва́етъ ѻ҆би́лїе веще́й. Почто̀ чꙋжда̑ѧ ꙗ҆́кѡ своѧ̑ притѧжа́емъ, тѧ́жки себѣ̀ ѻ҆ко́вы вещества̀ ᲂу҆строѧ́юще, ѡ҆каева́ющаго сицевы́хъ не слы́шаще; Го́ре бо, глаго́летъ проро́къ, ᲂу҆множа́ющемꙋ себѣ̀ не сꙋ̑щаѧ є҆гѡ̀, и҆ ѡ҆тѧгча́ющемꙋ ᲂу҆́зꙋ свою̀ тѧ́жцѣ¹⁵⁹⁵. А҆́ще бо ле́гки сꙋ́ть гонѧ́щїи, по глаго́лющемꙋ: скорѣ́йшїи бы́ша гонѧ́щїи ва́съ па́че ѻ҆рлѡ́въ небе́сныхъ¹⁵⁹⁶: мы́ же ѡ҆тѧгча́емъ себѐ мїрски́ми вещмѝ, ꙗ҆́вѣ ꙗ҆́кѡ ко́снѣе дви́жꙋщесѧ къ тече́нїю, ᲂу҆до́бнѡ ѿ врагѡ́въ ꙗ҆́ты бꙋ́демъ. И҆̀хже бѣ́гати наꙋчи́ ны па́ѵелъ глаго́лѧ: бѣ́гайте лихоима́нїѧ¹⁵⁹⁷: є҆гда̀ и҆ благоꙋстро́еннїи, внегда̀ тещѝ и҆̀мъ къ по́чести а҆́ще не крѣ́пкою си́лою текꙋ́тъ, мно́гѡ ѿ постиже́нїѧ ѡ҆стаю́тсѧ гонѧ́щихъ врагѡ́въ, скорѣ́йшыѧ є҆да̀ ка́кѡ стѡпы̀ и҆мꙋ́щихъ. Вели́кое къ добродѣ́тели тща́щымсѧ є҆́сть препѧ́тїе, къ мїрски̑мъ веще́мъ пристра́стїе, и҆ дꙋшѝ и҆ тѣ́лꙋ мно́жицею поги́бель содѣва́ющее. Что́ бо навꙋѳе́а і҆и҃льтѧнина погꙋбѝ, не вїногра́дъ ли зави́стный вино́венъ є҆мꙋ̀ сме́рти бы́сть, къ за́висти подви́гнꙋвъ проти́вꙋ негѡ̀ сосѣ́да а҆хаа́ва¹⁵⁹⁸; Что́ же два̀ полꙋпле́мена внѣ̀ землѝ ѡ҆бѣтова́нїѧ пребы́ти ᲂу҆стро́и, не мно́жество ли скотѡ́въ; Что́ же и҆ лѡ́та ѿ а҆враа́ма ѿлꙋчѝ, не пасо́мыхъ ли мно́жество, непреста́нныѧ пастꙋхѡ́мъ воздви́жꙋщее сва́ры¹⁵⁹⁹, послѣдѝ дрꙋ́гъ ѿ дрꙋ́га ѿто́ргшее и҆̀хъ; А҆́ще ᲂу҆̀бо не то́кмѡ къ за́висти и҆ рве́нїю раздража́ютъ зави́стливыхъ проти́вꙋ стѧжа́нїѧ и҆мꙋ́щымъ: но и҆ ѿ лꙋ́чшихъ ѿво́дѧтъ стѧжа́вшихъ та̑, и҆ сродство̀ пресѣка́ютъ, и҆ на дрꙋ́ги и҆мѣ́ти враждꙋ̀ ᲂу҆строѧ́ютъ: и҆ къ бꙋ́дꙋщей жи́зни ничи́мже ѻ҆́бще, и҆ къ настоѧ́щей ничи́мже ѻ҆со́бнѡ по́льзꙋютъ: почто̀ слꙋже́нїѧ бж҃їѧ ᲂу҆дали́вшесѧ, всѝ быва́емъ сꙋ́етни; є҆да́ бо мы̀ є҆смы̀ соверша́ющїи жи́знь свою̀; Бг҃ъ є҆́сть сїю̀ ᲂу҆строева́ѧй, и҆ человѣ́ческое ᲂу҆́бѡ тща́нїе не ᲂу҆лꙋчи́вшее бж҃їѧ по́мощи, по нꙋ́ждѣ не достиза́етъ конца̀: бж҃їе же смотре́нїе, и҆ кромѣ̀ человѣ́ческагѡ содѣ́йствїѧ, соверше́ннаѧ подае́тъ блага̑ѧ. Что̀ по́льзова ѻ҆́нѣхъ своѐ тща́нїе, къ ни̑мже глаго́лаше бг҃ъ: сѣ́ѧсте мно́гѡ, и҆ внесо́сте ма́лѡ¹⁶⁰⁰, ѿдꙋ́нꙋхъ ѧ҆̀¹⁶⁰¹ ѿ рꙋкꙋ̀ ва́шєю; Что́же по добродѣ́тели жи́вшымъ ѡ҆скꙋдѣ̀ ѿ нꙋ́ждныхъ, нижѐ ѿню́дъ пекꙋ́щымсѧ ѡ҆ тѣ́хъ; Не четы́редесѧтъ ли лѣ́тъ въ пꙋсты́нѣ і҆сра́иль пита́шесѧ¹⁶⁰², ничи́мже ѿ тѣ́хъ ꙗ҆̀же ѿ земледѣ́лїѧ наслажда́ющесѧ; И҆ не востре́боваша бра́шна: мо́ре новосодѣ́ловаше пи́щꙋ неча́емꙋ, кра́стєли и҆зрыга́ѧ: не́бо же ма́ннꙋ низводѧ̀¹⁶⁰³, до́ждь неѻбы́чный и҆ стра́нный. Ка́мень же вла́ги неприча́стный расто́рженъ подаѧ́ше стрꙋи̑ во́дъ ѻ҆би́льны: ри̑зы же и҆ сапогѝ слꙋжа́хꙋ всѐ вре́мѧ неветша́еми. Кі́имъ же земледѣ́лїемъ при пото́цѣ и҆лїа̀ пита́шесѧ; не вра́ны ли є҆мꙋ̀ приноша́хꙋ пи́щꙋ¹⁶⁰⁴; Не въ саре́птꙋ ли прише́дшꙋ вдови́ца, и҆ нꙋ́жныхъ тре́бꙋющаѧ, хлѣ́бъ подаѧ́ше, ѿ ᲂу҆́стъ ча̑дъ свои́хъ ѿѧ́вши; Да пока́жетъ, ꙗ҆́кѡ и҆ є҆стествꙋ̀ предпочте́ннѣйша є҆́сть добродѣ́тель. И҆ сїѧ̑ преди̑вна ᲂу҆́бѡ, ѻ҆ба́че не неꙋдѡ́бна: мо́щно бо и҆ не ꙗ҆дꙋ́щꙋ жи́ти, є҆гда̀ хо́щетъ бг҃ъ. Ка́кѡ бо и҆лїа̀ четы́редесѧти дне́й пꙋ́ть совершѝ въ крѣ́пости ꙗ҆́ди є҆ди́ныѧ; Ка́кѡ же мѡѷсе́й во́семьдесѧть дне́й на горѣ̀ молѧ́сѧ бг҃ꙋ, человѣ́ческїѧ не вкꙋ́шъ пи́щи пребы́сть¹⁶⁰⁵; по четы́редесѧти дне́хъ снизше́дъ, и҆ ѡ҆ сотворе́нїи слїѧ́нїѧ те́лчнагѡ раз̾ѧри́всѧ, а҆́бїе сокрꙋши́въ скрижа̑ли, на го́рꙋ востечѐ, и҆ толи́кожде па́ки дне́й пребы́въ на горѣ̀, си́це вторы̑ѧ скрижа̑ли прїе́мь сни́де къ лю́демъ¹⁶⁰⁶; Кі́й же по́мыслъ человѣ́чь винꙋ̀ чꙋдесѐ сегѡ̀ предста́вити мо́жетъ; Ка́кѡ сла́бое тѣ́ла є҆стество̀, толи́кѡ дви́жимо ᲂу҆крѣпи́сѧ, ничесомꙋ́же восполнѧ́ющꙋ и҆стощава́емꙋю по всѧ́къ де́нь дыха́нїемъ си́лꙋ; Разрѣша́етъ же сїѐ недоꙋмѣ́нїе бж҃е́ственное сло́во, є҆гда̀ глаго́летъ: не ѡ҆ хлѣ́бѣ є҆ди́номъ жи́въ бꙋ́детъ человѣ́къ, но ѡ҆ всѧ́комъ глаго́лѣ, и҆сходѧ́щемъ и҆зо ᲂу҆́стъ бж҃їихъ¹⁶⁰⁷. Почто̀ ᲂу҆́бѡ небе́сное жи́тельство на зе́млю низверга́емъ, въ веще́ственныхъ ᲂу҆глꙋблѧ́ющесѧ попече́нїѧхъ, и҆ въ гно́й ѡ҆дѣва́емсѧ, пита́емїи нѣ́когда на багрѧни́цахъ¹⁶⁰⁸; ꙗ҆́коже ѡ҆ нѣ́кїихъ і҆еремі́а рыда́ѧ глаго́лаше. Є҆гда́ бо свѣ́тлыми и҆ разжже́нными ко бг҃ꙋ восхо́димъ мы́сльми, на багрѧни́цахъ пита́емсѧ: є҆гда́ же сицево̀ ѡ҆ста́вивше ᲂу҆строе́нїе, зємны́мъ примѣша́емсѧ веще́мъ, въ гно́й ѡ҆блача́емсѧ. Почто̀ наде́ждꙋ на бг҃а ѡ҆ста́вльше, пло́ть мы́шцы ᲂу҆твержда́емъ, влады́чне промышле́нїе свои̑мъ приписꙋ́юще рꙋка́мъ, є҆́же въ велича́йшїй грѣ́хъ себѣ̀ вмѣни́тисѧ і҆́ѡвъ заклѧ̀, наложи́вшаго рꙋ́кꙋ на ᲂу҆ста̀ ѡ҆блобыза́ти¹⁶⁰⁹; Мы̀ сїѐ твори́ти ны́нѣ не страши́мсѧ. Ѻ҆бы́чай бо мнѡ́гимъ, рꙋ́цѣ лобыза́ти, ѿ ѻ҆́нѣхъ и҆мѣ́ти дово́льство глаго́люще: и҆̀хже гада́тельнѣ назна́менꙋѧ зако́нъ глаго́летъ: и҆́же хо́дитъ на ла́пахъ, нечи́стъ: и҆ и҆́же хо́дитъ на четы́рехъ всегда̀, нечи́стъ¹⁶¹⁰. На ла́пахъ же хо́дитъ, на рꙋ́ки ѡ҆пира́ющїйсѧ, и҆ всю̀ на ни́хъ наде́ждꙋ и҆мꙋ́щїй: на четы́рехъ же хо́дитъ, на чꙋ́вствєнныѧ ве́щы ᲂу҆пова́ющїй, и҆ къ ᲂу҆пражне́нїю въ тѣ́хъ непреста́нномꙋ сво́й ᲂу҆́мъ пригвожда́ющїй. Ѡ҆ мно́гихъ же нога́хъ є҆́сть, крѣ́пкѡ тѣле́сныхъ держа́йсѧ. Сегѡ̀ ра́ди премꙋ́дрый при́точникъ, не двѣ̀ нѡгѝ и҆мѣ́ти соверше́нномꙋ хо́щетъ, но є҆ди́нꙋ, и҆ сїю̀ не ча́стѣ къ тѣлє́снымъ веще́мъ дви́жимꙋ. Не ᲂу҆чаща́й, глаго́летъ, вноси́ти но́гꙋ твою̀ къ дрꙋ́гꙋ твоемꙋ̀, да не когда̀ насы́щьсѧ тебѐ, возненави́дитъ тѧ̀¹⁶¹¹. А҆́ще бо не ча́стѣ хрⷭ҇тꙋ̀ ѡ҆ потре́бѣ тѣ́ла стꙋжа́ющїй, то́ бо є҆́сть сицевы́хъ дрꙋгѡ́въ намѣ́ренїе, ꙗ҆́коже къ свои̑мъ ᲂу҆ченика́мъ глаго́летъ сп҃си́тель: вы̀ дрꙋ́зи моѝ є҆стѐ¹⁶¹²: а҆́ще сїѐ поча́стꙋ твори́тъ, ненави́стенъ быва́етъ. Что̀ ᲂу҆́бѡ постра́ждетъ, и҆ ка́кѡ не ме́рзокъ бꙋ́детъ, въ си́хъ непреста́ннѡ ᲂу҆пражнѧ́ющїйсѧ потре́бахъ, и҆ ника́коже къ го́рнѣй возбꙋжда́ющїисѧ жи́зни; Поне́же не и҆мѣ́етъ го́леней верхꙋ̀ но́гъ, дабы̀ скака́ти на ни́хъ ѿ землѝ. Ꙗ҆́коже бо го́лєни соедине́нїемъ всѣ̀ ᲂу҆́бѡ прїе́млютъ пе́рвѣе на себѐ бре́мѧ тѣ́ла, ма́лѡ же прибли̑жшаѧсѧ землѝ, а҆́бїе ввы́спрь воскочи́ти ᲂу҆строѧ́ютъ: си́це разсмотрѧ́ющїй сво́йство веще́й по́мыслъ, є҆гда̀ потре́бы ра́ди тѣ́ла смири́тсѧ, а҆́бїе пото́мъ горѣ̀ ле́гкое возсыла́етъ мꙋдрова́нїе, ничто́же ѿ бре́нныхъ съ тѣ́мъ возвыша́ѧ по́мыслѡвъ. Є҆́же бо и҆мѣ́ти пра̑выѧ го́лєни, быва́етъ и҆ не ѕѣлѡ̀ сластолюби̑вымъ, и҆ до́лꙋ лежа́щымъ всегда̀: но быва́етъ и҆ ст҃ы̑мъ си́ламъ, занѐ нижѐ всѧ́чески тре́бовати и҆̀мъ тѣле́сныхъ, нижѐ своѐ къ тѣ̑мъ и҆мѣ́ти соизволе́нїе. Сїе́ бо предзнаменꙋ́ѧ вели́кїй і҆езекі́иль глаго́летъ: ꙗ҆́кѡ бѣ́ша го́лєни и҆́хъ пра́вы, и҆ перна́ты но́зѣ и҆́хъ¹⁶¹³: є҆́же ꙗ҆влѧ́етъ непоколеби́мꙋ мы́сль, и҆ быстродви́жимое къ ᲂу҆́мнымъ сꙋщества́мъ ѻ҆́нѣмъ стремле́нїе. Человѣ́кѡмъ же довлѣ́етъ го́лєни и҆мѣ́ти преклонѧ́ємыѧ, и҆ ѻ҆вогда̀ ᲂу҆́бѡ къ тѣлє́снымъ нꙋ́ждамъ, ѻ҆вогда́ же къ горѣ̀ стремѧ́щымсѧ дꙋшє́внымъ ᲂу҆пражне́нїѧмъ ᲂу҆потреблѧ́ти ѻ҆́ныѧ. Ра́ди ᲂу҆́бѡ сꙋ́щагѡ съ го́рними си́лами сро́дства дꙋшѝ, частокра́тнѡ къ ѻ҆́нѣмъ восходи́ти: ра́ди же тѣ́ла, толи́кое ѡ҆ земны́хъ попече́нїе и҆мѣ́ти, є҆ли́кѡ потре́ба принꙋжда́етъ. Всегда́ же наслади́тельныхъ приготовле́нїй жела́ти, не чи́сто є҆́сть вои́стиннꙋ, и҆ неприли́чно человѣ́кꙋ, благослове́сное и҆скꙋси́вшемꙋ позна́нїе. Ѡ҆предѣле́ннѣ бо, и҆ на четы́рехъ ходѧ́щее, а҆ не про́стѡ речѐ, нечи́сто бы́ти, но а҆́ще всегда̀ на четы́рехъ ходи́ло бы. Даде́ бо сꙋ́щымъ въ тѣ́лѣ вре́мѧ низходи́ти къ потре́бѣ тѣ́ла. И҆́бо і҆ѡнаѳа́нъ съ наа́сомъ бра́нь и҆мы́й а҆ммані́тѡмъ, на четы́рехъ ходи́въ побѣдѝ¹⁶¹⁴, занѐ нꙋ́ждѣ є҆стества̀ то́чїю слꙋжа́ше: подоба́ше бо бра́нь и҆мꙋ́щꙋ съ плѣ́жꙋщимъ на пе́рсѣхъ ѕмі́емъ, (то́ бо на́съ толкꙋ́етсѧ) нѣ́кое вма́лѣ хожде́нїемъ на четы́рехъ ѡ҆бразова́ти къ немꙋ̀ подо́бїе: и҆ си́це воста́вшꙋ въ правотꙋ̀ свою̀, покори́ти того̀ со мно́гою ᲂу҆до́бностїю. Что̀ та́кожде и҆ ѡ҆ і҆евосѳе́и по́вѣсть не наказꙋ́етъ ли на́съ ѡ҆ тѣле́сныхъ не ѕѣлѡ̀ пещи́сѧ, нижѐ чꙋ́вствꙋ своѐ врꙋчи́ти хране́нїе¹⁶¹⁵: се́й бо ца́рь сы́й, и҆ на ѻ҆дрѣ̀ свое́мъ почива́ѧй, женѣ̀ две́рь стрещѝ, повелѣ̀, прїидо́ша же рїха́въ и҆ ваа́на, и҆ ѡ҆брѣ́тше вра́тника пшени́цꙋ ѡ҆чища́юща и҆ дре́млюща: ᲂу҆таи́вшесѧ внидо́ста, и҆ ᲂу҆би́ста і҆евосѳе́а¹⁶¹⁶. Всѧ̑ бо спѧ́тъ, и҆ ᲂу҆́мъ, и҆ дꙋша̀, и҆ чꙋ́вство, тѣлє́снымъ прилѣжа́щихъ. Є҆́же бо вра́тникꙋ ѡ҆чища́ти пшени́цꙋ, показꙋ́етъ прилѣ́жное мы́сли въ тѣле́сныхъ ᲂу҆пражне́нїе. И҆ не про́стѣ, но съ нѣ́кїимъ тѣ́хъ чистотꙋ̀ ᲂу҆мышлѧ́ющыѧ тща́нїемъ. Ꙗ҆́кѡ бо не въ ви́дѣ по́вѣсти семꙋ̀ ᲂу҆́читъ писа́нїе, ꙗ҆́вѣ ѿтꙋ́дꙋ: ка́кѡ бо ца́рь женꙋ̀ вра́тника и҆мѣ̀, до́лженъ сы́й ѿ мно́жества ѻ҆рꙋжено́сцєвъ сохранѧ́емь бы́ти, и҆ всѧ́кꙋ ѻ҆́крестъ себѣ̀ и҆мѣ́ти досто́инства сѣ́нь: И҆лѝ ка́кѡ си́це бѣ̀ ᲂу҆бо́гъ, ꙗ҆́кѡ є҆́ю пшени́цꙋ ѡ҆чища́ше; Но мно́жицею къ по́вѣсти примѣша́етсѧ є҆́же па́че сло́ва, ра́ди и҆́стины по́вѣстїю зна́менꙋемыхъ. Коегѡ́ждо бо ᲂу҆́мъ, ꙗ҆́коже ца́рь внꙋ́трь пребыва́етъ, вра́тника чꙋ́вствъ и҆мѣ́ѧ мы́сль: ꙗ҆́же є҆гда̀ тѣлє́снымъ себѣ̀ ввѣ́ритъ, тѣле́сное же є҆́сть, ѡ҆чища́ти пшени́цꙋ: ᲂу҆до́бнѡ ᲂу҆таи́вшесѧ навѣ́тницы, ᲂу҆мерщвѧ́ютъ ᲂу҆́мъ. Сегѡ̀ ра́ди вели́къ въ пра́ѻтцѣхъ а҆враа́мъ, не ввѣрѧ́етъ женѣ̀ стрещѝ две́рь, вѣ́дый ᲂу҆добопрельща́емое чꙋ́вство, ꙗ҆́кѡ зрѣ́нїемъ чꙋ́вственныхъ ᲂу҆слажда́емо, раздвоѧ́етъ ᲂу҆́мъ, и҆ ᲂу҆вѣщава́етъ сопричасти́тисѧ сла́дкихъ съ тѣ́мъ кꙋ́пнѡ, а҆́ще и҆ неизбѣ́дно бы́ло бы причаще́нїе то ꙗ҆́внѡ. Но са́мъ ѻ҆́нъ присѣди́тъ бж҃е́ствєннымъ ᲂу҆́бѡ помышле́нїѧмъ ѿве́рстый подаѧ̀ вхо́дъ, мїрски̑мъ же попече́нїѧмъ заключа́ѧ две́рь. Что́ бо на́мъ ѿ сꙋ́етнагѡ въ си́хъ трꙋда̀ въ жи́знь по́льзы прихо́дитъ; Не ве́сь ли трꙋ́дъ человѣ́чь, по є҆кклесїа́стꙋ, во ᲂу҆ста̀ є҆гѡ̀¹⁶¹⁷, пи́ща же и҆ ѡ҆дѣѧ́нїе, по а҆пⷭ҇лꙋ, довѡ́льна къ снабдѣ́нїю ѻ҆каѧ́нныѧ пло́ти¹⁶¹⁸; Что̀ ᲂу҆́бѡ безконє́чнаѧ твори́мъ, и҆ трꙋди́мсѧ на вѣ́тръ, ꙗ҆́коже глаго́летъ соломѡ́нъ¹⁶¹⁹; Тща́нїемъ ѡ҆ земны́хъ, возбранѧ́юще дꙋ́шы къ бж҃е́ственныхъ бла̑гъ наслажде́нїю и҆ пло́ть лю́бѧще и҆ грѣ́юще мно́жае потре́бнагѡ, а҆́ки врага̀ ѿ бли́жнихъ и҆ проти́вныхъ тꙋ̀ пита́емъ, ꙗ҆́кѡ не то́чїю ѻ҆бою́дной тоѧ̀ бы́ти бра́ни, но ѿ мно́гагѡ преизбы́точества и҆ крѣпча́йше є҆́й подвиза́ющейсѧ проти́вꙋ дꙋшѝ, по́честей и҆ вѣнцє́въ жела́ти; Ка́ѧ бо є҆́сть потре́ба тѣлесѐ, ꙗ҆́кѡ тѣ́мъ и҆звѣ́тъ творѧ́ще въ нерѣши́маѧ недоꙋмѣ́нїѧ жела́нїе своѐ протѧза́емъ; Хлѣ́бъ є҆́сть всѧ́ко и҆ вода̀: не не и҆сто́чницы ли ᲂу҆́бѡ и҆з̾ѡби́льное подаю́тъ питїѐ; хлѣ́бъ же не ᲂу҆добьсни́скиваемь ли є҆́сть рꙋ́цѣ и҆мꙋ́щымъ, и҆ ѿ таковы́хъ трꙋдѡ́въ и҆збы́точествовати мо́жемъ, ѿ ни́хже и҆ потре́ба и҆сполнѧ́етсѧ тѣлесѐ и҆ ма́лѡ, и҆лѝ ничто́же ѿню́дъ ѡ҆бремѣнѧ́ющее; Ѡ҆дѣѧ́нїе ли мно́гъ подае́тъ трꙋ́дъ; Нижѐ сїѐ, а҆́ще не къ ѻ҆бы́чномꙋ киче́нїю, но къ потре́бѣ взира́емъ є҆ди́нѣй. Кі̑ѧ бо мѧ̑гкїѧ ѻ҆дє́жды, кі́й же вїссо́нъ и҆лѝ порфѵ́рꙋ, и҆лѝ хламѵ́дꙋ пе́рвый носѧ́ше человѣ́къ; Не ѿ ко́жъ ли є҆мꙋ̀ ѡ҆дѣѧ́нїе и҆мѣ́ти¹⁶²⁰, и҆ не бы́лїемъ ли пита́тисѧ созда́тель заповѣ́да; Сїѧ̑ положи́въ предѣ́лы потре́бѣ тѣ́ла, си́це повелѣ́въ и҆ и҆здале́че ѿвраща́ѧ ны́нѣ ѡ҆казꙋ́емꙋю въ жи́тельствѣ нелѣ́потꙋ человѣ́ка. Не глаго́лю же, ꙗ҆́кѡ и҆ ны́нѣ пита́ти бꙋ́детъ всѧ́кѡ бл҃гоче́ствꙋющихъ на́съ, и҆́же пти̑цы пита́тъ небє́сныѧ: и҆ ѡ҆дѣ́етъ, и҆́же крі́ны сє́льныѧ толи́кою ѡ҆дѣ́ѧ сла́вою. Занѐ ника́коже ᲂу҆вѣща́ти мо́щно мно́гѡ ѿстоѧ́щихъ сеѧ̀ вѣ́ры. Кто́ бо не со смире́нїемъ пода́стъ нꙋ̑жнаѧ по добродѣ́тели живꙋ́щемꙋ; А҆́ще бо человѣ́цы ва́рвары, и҆ бра́ни зако́номъ плѣни́вшїи і҆ерꙋсали́мъ, вавѷлѡ́нѧне, добродѣ́тель почто́ша і҆еремі́и, и҆ всѧ́кое є҆мꙋ̀ подава́хꙋ слꙋже́нїе тѣле́сное и҆з̾ѡби́льнѣ, не то́чїю къ пи́щи потрє́бнаѧ да́вше, но и҆ сосꙋ́ды, и҆́миже ѻ҆бы́чай слꙋжи́ти ꙗ҆дꙋ́щымъ: ка́кѡ не почтꙋ́тъ житїѐ добродѣ́тельно є҆диноплеме́нники, и҆ по́мыслъ ѿ наказа́нїѧ ва́рварскагѡ па́че ѡ҆чи́стившїи къ разꙋмѣ́нїю благи́хъ, и҆ добродѣ́тели ревни́тели! а҆́ще бо и҆ не возмого́ша тоѧ̀ дѣ́латели бы́ти за не́мощь є҆стества̀, но ѻ҆ба́че почита́ютъ добродѣ́тель, и҆ подви́жникѡмъ ѻ҆́ныѧ ᲂу҆дивлѧ́ютсѧ. Кто̀ ᲂу҆вѣща̀ сѡмані́тѧнинꙋ сотвори́ти є҆лїссе́ю го́рницꙋ, и҆ поста́вити трапе́зꙋ та́мѡ, и҆ престо́лъ и҆ свѣ́щникъ¹⁶²¹; Не добродѣ́тель ли мꙋ́жа; Что́ же вдови́цꙋ ѻ҆́нꙋ преклонѝ, гла́дꙋ всю̀ странꙋ̀ потреблѧ́ющꙋ, свое́й потре́бѣ предпочти́ти проро́ка слꙋже́нїе¹⁶²²; Вои́стиннꙋ, а҆́ще не бы̀ любомꙋ́дрїемъ и҆лїѝ восхищена̀ была̀, не бы̀ ма́лое ᲂу҆тѣше́нїе жи́зни своеѧ̀ и҆ ча̑дъ ѿе́мши, ᲂу҆стꙋпи́ла бы томꙋ̀. Ю҆́же бо ма́лѡ пото́мъ помышлѧ́ше сме́рть, пре́жде вре́мени сїю̀ и҆збра̀, да щедролю́бнѡ ᲂу҆чреди́тъ стра́ннаго. Сотвори́ же таковы́ми и҆̀хъ до́блество, и҆ въ трꙋда́хъ неѡсла́бность, и҆ жите́йскихъ веще́й презрѣ́нїе. Нищетꙋ́ бо стѧжа́вше, и҆ въ то́мъ да́же ничесѡ́же тре́бовати преꙋспѣ́вше, безтѣлє́снымъ си́ламъ ᲂу҆подо́бишасѧ. Тѣ́мже и҆ незнамени́ты сꙋ́ще по тѣле́сномꙋ, и҆ несла́вны, всѧ̑ содержа́щихъ, и҆ дѣ́йствꙋющихъ бы́ша крѣ́пльши, съ толи́кимъ дерзнове́нїемъ, ца́рскимъ вѣнце́мъ съ ᲂу҆краше́нными разглаго́льствꙋюще, съ є҆ли́кимъ нижѐ ті́и съ подрꙋ́чными себѣ̀. На ка̑ѧ бо ѻ҆рꙋ̑жїѧ надѣ́ѧсѧ, на кꙋ́ю же си́лꙋ ко а҆хаа́вꙋ глаго́лаше и҆лїа̀: Не развраща́ю а҆́зъ і҆сра́илѧ, но ра́звѣ ты̀, и҆ до́мъ ѻ҆тца̀ твоегѡ̀¹⁶²³; Ка́кѡ же мѡѷсе́й ста̀ на бра́нь проти́вꙋ фараѡ́нꙋ, ничто́же и҆мѣ́ѧ, кромѣ̀ добродѣ́тели, де́рзости поможе́нїе; Ка́кѡ же є҆лїссе́й собра́вшꙋсѧ на бра́нь во́инствꙋ и҆ двꙋ́мъ царє́мъ і҆сра́илевꙋ и҆ і҆ꙋ́динꙋ, глаго́ла і҆ѡра́мꙋ: Жи́въ гдⷭ҇ь си́лъ, є҆мꙋ́же предстою̀ пред̾ ни́мъ: ꙗ҆́кѡ а҆́ще бы́хъ не лицѐ і҆ѡсафа́та царѧ̀ і҆ꙋ́дина а҆́зъ прїѧ́лъ, то̀ воззрѣ́лъ ли бы́хъ на тѧ̀, и҆ ви́дѣлъ ли бы́хъ тѧ̀¹⁶²⁴; Нижѐ во́инства подви́гшагѡсѧ ᲂу҆боѧ́всѧ, нижѐ ꙗ҆́рости ᲂу҆страши́всѧ царе́вы, є҆мꙋ́же во вре́мѧ бра́ни вѣроѧ́тно и҆ безслове́сное воз̾имѣ́ти стремле́нїе по́мыслꙋ по́двига ра́ди смꙋще́нꙋ бы́вшꙋ, что́ бо мо́жетъ таково̀ ца́рь, каково̀ добродѣ́тель; Ка́ѧ порфѵ́ра расто́рже рѣкꙋ̀, ꙗ҆́коже ми́лѡть и҆лїѝ; Ка́ѧ же дїади́ма болѣ̑зни и҆сцѣлѝ, ꙗ҆́коже а҆по́стольстїи сꙋдарѝ; Ѡ҆бличѝ и҆ногда̀ проро́къ царѧ̀ законопрестꙋ́пльша є҆ди́нъ, со всѣ́мъ сꙋ́ща во́инствомъ. И҆ поне́же ꙗ҆́рость ѡ҆бличе́нїе возбꙋдѝ, просте́ръ ца́рь рꙋ́кꙋ ко проро́кꙋ и҆ є҆гѡ̀ не ꙗ҆́тъ, и҆ рꙋ́кꙋ и҆зсо́хшꙋю не возмо́же возврати́ти къ себѣ̀¹⁶²⁵. И҆ бѣ̀ по́двигъ добродѣ́тели, и҆ вла́сти ца́рскїѧ. И҆ побѣ́да добродѣ́тели бы́сть. Не бра́сѧ проро́къ, и҆ добродѣ́тель низложѝ проти́вника. Пра́зденъ бѧ́ше подви́жникъ, и҆ вѣ́ра дѣ́лаше. Спобо́рники царе́вы свидѣ́тели по́двига бы́ша. И҆ рꙋка̀ ста̀ свидѣ́тельствꙋющаѧ добродѣ́тели побѣ́дꙋ. Сїѧ̑ же творѧ́хꙋ, занѐ дꙋшѝ є҆ди́нѣй жи́ти пред̾избра́ша, тѣ́ла и҆ тѣле́сныхъ потре́бъ ѿвраща́ющесѧ: и҆ всегѡ̀ вы́шшими и҆̀хъ творѧ́ше, є҆́же ни въ чесо́мже потре́бꙋ и҆мѣ́ти. Па́че бо ѡ҆ста́вити тѣ́ло и҆зволѧ́хꙋ, и҆ ꙗ҆̀же во пло́ти жи́зни свободи́тисѧ, не́же преда́ти добродѣ́тели досто́инство, и҆ потре́бы ра́ди тѣле́сныѧ ласка́ти кого̀ ѿ бога́тыхъ. Мы́ же є҆гда̀ въ тре́бованїи чесогѡ̀ быва́емъ, ѡ҆ста́вивъ до́блественнѡ подвиза́тисѧ къ ско́рбныхъ, ꙗ҆́коже пси́чища съ весе́лымъ двиза́нїемъ хвоста̀, ласка́ютсѧ къ поверга́ющымъ ко́сть въ ма́лѣ не нагꙋ́ю, и҆лѝ крꙋпи̑цы: си́це къ бога̑тымъ прибѣга́емъ, благодѣ́тельми и҆̀хъ на́шими и҆ хрїстїа́нъ попечи́тельми нарица́юще, и҆ всѧ́кꙋю и҆̀хъ без̾из̾ѧ́тнѡ похвалѧ́юще добродѣ́тель, а҆́ще и҆ въ кра́йнемъ сꙋ́ть нече́стїи, да соверша́тъ и҆ско́мое, не и҆спытꙋ́юще ст҃ы́хъ житїѧ̀, и҆́хже си́рѣчь ревнова́ти добродѣ́тели предположи́хомъ. Прїи́де къ є҆лїссе́ю неема́нъ кнѧ́зь си́лы сѷрі́йскїѧ¹⁶²⁶, мно́ги прине́съ да́ры съ собо́ю. Что̀ ᲂу҆́бѡ проро́къ; є҆да́ ли срѣ́те; є҆да́ ли притечѐ; Не чрез̾ є҆ди́наго ли ѻ҆́трока потре́бꙋ, є҆ѧ́же ра́ди прїи́де, сказа̀; нижѐ пред̾ лицѐ прїѧ́тъ є҆го̀¹⁶²⁷, да не принесе́нныхъ ра́ди и҆сцѣле́нїе пода́ти возмни́тсѧ. Сїѧ̑ же реко́шасѧ, не да наꙋ́чимсѧ го́рдости, но да не потре́бы ра́ди ласка́емъ лю́бѧщихъ ѻ҆́наѧ, ꙗ҆̀же мы̀ презира́ти ѡ҆бѣщава́емсѧ. Почто̀ ᲂу҆́бѡ мы̀ ѡ҆ста́вивъ намѣ́ренїе фїлосо́фїи, земледѣ́лїю и҆ кꙋ́пли прилѣжи́мъ; Что̀ ве́лїе пред̾ бг҃омъ, а҆́ще своѐ въ то́мъ мы̀ є҆мꙋ̀ привно́симъ попече́нїе, да и҆ ѻ҆́бщее та́кожде съ ни́мъ на́ше бꙋ́детъ земледѣ́лїю прилѣжа́нїе; Человѣ́ческое тща́нїе зе́млю разсѣка́етъ и҆ сѣ́мена вмета́етъ: Бг҃ъ же дождѧ́ми благовре́менными напоева́етъ сѣ́мена въ мѧ́гкихъ нѣ́драхъ землѝ коре́нїю распростира́тисѧ ᲂу҆строева́ѧ: со́лнце возсїѧва́етъ согрѣва́ющее зе́млю, и҆ теплото́ю вы́спрь возводѧ́щее растѣ̑нїѧ, дыха̑нїѧ вѣ́трѡвъ посыла́етъ во́зрастꙋ пита́емыхъ плодѡ́въ соразмѣ̑рнаѧ: то́нкими ᲂу҆́бѡ дыха́ньми подꙋва́ѧ въ нача́лѣ на зеленѣ́ющее по́ле, да не зно́йными поглажда́ємаѧ дꙋнове́нїи, ѡ҆палѧ́тсѧ посѣ̑ѧннаѧ: крѣпча́йшими же прираже́нїи вѣ́трѡвъ, во влага́лищахъ мле́чный со́къ зе́рна въ созрѣ́нїе приводѧ̀, во вре́мѧ млаче́нїѧ зно́й подаѧ̀ подоба́ющїй: во вре́мѧ же вѣ́ѧнїѧ спосѡ́бныѧ вѣ́тры: и҆ а҆́ще бы є҆ди́но что̀ ѿ си́хъ ѡ҆скꙋдѣ́ло, сꙋ́етенъ ꙗ҆ви́лсѧ бы человѣ́ческїй трꙋ́дъ, и҆ пра́здно бы́ло бы на́ше тща́нїе, не запечатлѣ́нно бж҃їими дара́ми. Мно́гажды же и҆ ѿ си́хъ къ соверше́нїю ѡ҆скꙋдѣ̀ ничто́же: ѻ҆ба́че до́ждь вели́къ и҆ безвре́мененъ бы́въ, и҆лѝ млачи́мый є҆щѐ кла́съ, и҆лѝ и҆ чи́стꙋ согромажде́ннꙋ пшени́цꙋ ᲂу҆влечѐ. Ѻ҆вогда́ же и҆ въ са́мой жи́тницѣ че́рвь растлѝ, и҆з̾ са́мыхъ ᲂу҆́стъ, ꙗ҆́коже рещѝ, гото́вꙋ похи́тивъ пи́щꙋ. Гдѣ̀ ᲂу҆́бѡ на́мъ, и҆ къ чесомꙋ̀ поле́зно на́ше тща́нїе, бг҃ꙋ корми́ло веще́й держа́щꙋ, и҆ всѧ̑ дѣ́йствꙋющꙋ, ꙗ҆́коже хо́щетъ, и҆ стро́ѧщꙋ; Но въ не́мощехъ ᲂу҆тѣше́нїѧ тре́бꙋетъ тѣ́ло, рече́тъ кто̀: и҆ є҆ли́ко лꙋ́чше є҆́сть ᲂу҆мре́ти, не́же содѣ́ѧти что̀ ѡ҆бѣ́тꙋ неподоба́ющее. Всѧ́чески же, а҆́ще жи́ти на́мъ є҆щѐ хо́щетъ бг҃ъ, то̀ и҆лѝ си́лꙋ подае́тъ тѣ́лꙋ, ꙗ҆́кѡ и҆ трꙋ́дъ ѿ недꙋ́га нестѝ могꙋ́щꙋю: и҆лѝ и҆ вѣнцы̀ прїѧ́ти за до́блесть: и҆лѝ сре́дство и҆з̾ѡбрѧ́щетъ ко ᲂу҆тѣше́нїю и҆знемога́ющагѡ: и҆ не ѡ҆скꙋдѣ́етъ и҆з̾ѡбрѣ́тенїе и҆сто́чникꙋ премꙋ́дрости. До́брѣ ᲂу҆́бѡ возлю́бленнїи, и҆ ѕѣлѡ̀ до́брѣ, къ дре́внемꙋ взы́ти блаже́нствꙋ, и҆ дре́внихъ ꙗ҆́тисѧ жи́тельства: бꙋ́детъ бо то̀ всѣ̑мъ, ꙗ҆́коже мню̀ восхотѣ́вшымъ ᲂу҆до́бно. А҆́ще же и҆ бꙋ́детъ трꙋ́дъ нѣ́кїй, не безпло́денъ бꙋ́детъ, дово́льное и҆мѣ́ѧй ᲂу҆тѣше́нїе, предпꙋтеше́ствовавшихъ благохвале́нїе, и҆ и҆̀мъ послѣ́дствꙋющихъ и҆справле́нїе. Не ма́лое та́кожде бꙋ́детъ прїѡбрѣ́тенїе нача́вшымъ сицево̀ житїѐ, и҆ пото́мствꙋ ѡ҆ста́вльшымъ жи́тельства и҆зѧ́щнагѡ ѡ҆́бразъ, и҆знемо́гшихъ ѡ҆бодре́нїе. Да бѣжи́мъ ꙗ҆̀же во гра́дѣхъ и҆ ве́сехъ пребыва́нїй, да сꙋ́щїи во гра́дѣхъ и҆ ве́сехъ текꙋ́тъ къ на́мъ. Пꙋсты̑ни возлю́бимъ, да привлече́мъ ны́нѣ бѣгꙋ́щыѧ ѿ на́съ, а҆́ще любе́зно всѧ́чески сїѐ нѣ̑кїимъ. И҆́бо ѡ҆ и҆нѣ́хъ съ похвало́ю пи́сано є҆́сть, ꙗ҆́кѡ ѡ҆ста́виша гра́ды и҆ ѡ҆бита́ша на ка́менехъ, и҆ бы́ша ꙗ҆́кѡ го́рлицы скорбѧ́ще¹⁶²⁸: и҆ крести́тель і҆ѡа́ннъ въ пꙋсты́ни ѡ҆бита́ше, и҆ всѝ къ немꙋ̀ и҆схожда́хꙋ живꙋ́щїи во гра́дѣхъ¹⁶²⁹, и҆ ко зрѣ́нїю ᲂу҆сме́нна по́ѧса потща́шасѧ въ ше́лкѡвыѧ ѡ҆дѣ́ѧни ѻ҆дє́жды: и҆ непокрове́нное и҆збира́хꙋ ѕлострада́нїе, позлащє́нныѧ и҆мꙋ́щїи до́мы, и҆ на ᲂу҆кра́шенныхъ многоцѣ́нными ка́менїи ѻ҆дра́хъ ᲂу҆покое́нїю возлега́нїе на песцѣ̀ предпочита́шесѧ. И҆ всѧ̑ и҆̀мъ бы́ша стерпи̑ма, а҆́ще и҆ па́че ѻ҆бы́чаѧ быва̑ющаѧ, ѡ҆блегчава́ше бо въ приско́рбныхъ чꙋ́вствїе, жела́нїе ви́дѣти человѣ́ка: жесто́кагѡ житїѧ̀ трꙋ́дъ ѿе́млѧше чꙋ́до добродѣ́тели. Толи́кѡ є҆́сть добродѣ́тель бога́тства честнѣ́йши, и҆ житїѐ безмо́лвно и҆мѣ́нїй мно́гихъ сла́внѣше. Коли́ки во ѻ҆́но вре́мѧ бѣ́ша бога́тїи, и҆ высокомꙋ́дрствꙋющїи ѡ҆ сла́вѣ, и҆ ᲂу҆мо́лчани сꙋ́ть: и҆ чꙋ́до несла́внагѡ да́же до ны́нѣ воспѣва́етсѧ, и҆ па́мѧть пꙋстынножи́телѧ всѣ̑мъ є҆́сть любе́зна. Приснопое́маѧ бо добродѣ́тели сла́ва, вѣ́сть посыла́етъ своѧ̑ добрѡ́ты возвѣща́ющꙋю. Ѿрече́мсѧ ᲂу҆̀бо скотопа́сства, да па́стырскїй чи́нъ воспрїи́мемъ: ѡ҆ста́вимъ кꙋ́плю поноси́мꙋ, да многоцѣ́ннꙋю стѧ́жемъ маргарі́тꙋ: бѣжи́мъ дѣ́ланїѧ землѝ, те́рнїе и҆ волче́цъ возраща́ющїѧ, да дѣ́латели и҆ храни́тели раѧ̀ бꙋ́демъ. Всѧ̑ ѿве́ргнемъ, и҆ безмо́лвное и҆збере́мъ житїѐ, да посрами́мъ ны́нѣ на́мъ въ поноше́нїе стѧжа́нїе вмѣнѧ́ющихъ: ничто́ бо та́кѡ постыжда́етъ порица́ющихъ, ꙗ҆́кѡ въ поноша́емыхъ и҆справле́нїе съ кро́тостїю. Быва́етъ бо поноша́емыхъ премѣне́нїе, поноша́ющымъ посрамле́нїе. Сра́мно же и҆ сїѐ непщꙋ́ю, и҆ є҆́сть сра́мно вои́стиннꙋ, ѡ҆ не́мже и҆ ѿ всѣ́хъ досто́йнѡ посмѣва́еми быва́емъ. Ны́нѣ бо нѣ́кто прише́дъ къ и҆́ноческомꙋ житїю̀, и҆ ѻ҆бы́чаи то́чїю по́двига ᲂу҆вѣ́давъ, ка́кѡ мо́лѧтсѧ, сі́есть, и҆ когда̀, и҆ ко́е є҆́сть жи́тельства ᲂу҆становле́нїе, ᲂу҆чи́тель а҆́бїе, и҆̀мже не наꙋчи́сѧ, быва́етъ, и҆ и҆схо́дитъ, мно́жество ᲂу҆ченикѡ́въ привлека́ѧ, са́мъ є҆щѐ тре́бꙋющїй ᲂу҆че́нїѧ, и҆ толи́кѡ па́че, є҆ли́кѡ ᲂу҆до́бнѣе сїѐ дѣ́ло вознепщева̀: не вѣ́дый, ꙗ҆́кѡ всѣ́хъ є҆́сть тѧгча́йшее ѡ҆ дꙋша́хъ прилѣжа́нїе, тре́бꙋющихъ пе́рвѣе ѡ҆чище́нїѧ ве́тхихъ скве́рнъ, послѣди́ же мно́гагѡ внима́нїѧ, дабы̀ воѡбраже́нїѧ ᲂу҆че́нїй прїѧ́ти добродѣ́тели, ничесѡ́же па́че тѣле́сна по́двига мечта́вый, ка́кѡ и҆спра́витъ нра́вы подчине́нныхъ, ка́кѡ премѣни́тъ лꙋка́вымъ ѻ҆бы́чаемъ ѡ҆держи́мыхъ; Ка́кѡ ра́тꙋємымъ ѿ страсте́й помо́жетъ, нижѐ ѿню́дъ мы́сленнꙋю бра́нь вѣ́дый; И҆лѝ ка́кѡ на бра́ни прилꙋча́ющыѧсѧ ра́ны ᲂу҆врачꙋ́етъ, са́мъ є҆щѐ лежа́й въ ра́нахъ, и҆ ѡ҆бвѧза́нїй тре́бꙋѧй; И҆лѝ всѧ́кое ᲂу҆́бѡ хꙋдо́жество вре́мене и҆ ᲂу҆че́нїѧ тре́бꙋетъ мно́гагѡ ко и҆справле́нїю: є҆ди́но ли хꙋдо́жество хꙋдо́жествъ без̾ ᲂу҆че́нїѧ сни́скиваетсѧ: и҆ къ земледѣ́лїю не дерзне́тъ пристꙋпи́ти неискꙋ́сный, нижѐ враче́бной хи́трости ненаꙋче́нъ пристꙋ́питъ ко врачє́бнымъ дѣлѡ́мъ. Ѡ҆бличи́тсѧ бо се́й, ꙗ҆́кѡ не то́кмѡ ничто́же по́льзовавый болѧ́щихъ: но и҆ тѧ́жшꙋю ᲂу҆стро́ивый болѣ́знь: то́й же ѡ҆ри́мꙋю зе́млю ѡ҆лѧденѣ́вшею и҆ бы́лїемъ заро́стшею содѣ́лавый: къ є҆ди́номꙋ же бг҃оче́стїю ꙗ҆́кѡ всѣ́хъ легча́йшемꙋ дѣ́лꙋ дерзнове́ннѡ пристꙋпа́ютъ то́мꙋ не ѡ҆бꙋчи́вшїисѧ: и҆ неꙋдо́бь и҆справлѧ́емое, ᲂу҆до́бно возмнѣ́сѧ бы́ти мнѡ́гимъ: и҆ є҆́же не ᲂу҆̀ себѐ, па́ѵелъ глаго́летъ, дости́гша соверше́ннѡ¹⁶³⁰, то̀ ѻ҆нѝ позна́вшихъ себѐ ᲂу҆твержда́ютъ, нижѐ са́мое то̀, ꙗ҆́кѡ не зна́ютъ вѣ́дꙋщїи. Сегѡ̀ ра́ди ᲂу҆до́бь призира́емо житїѐ бы́сть, и҆ проходѧ́щїи є҆̀ ѿ всѣ́хъ поноша́еми быва́ютъ. Кто́ бо не посмѣе́тсѧ, вчера̀ въ корче́мницѣ ви́дѧ во́дꙋ носѧ́ща, дне́сь ꙗ҆́кѡ ᲂу҆чи́телѧ добродѣ́тели, ѿ ᲂу҆чени̑къ ѡ҆крꙋжа́ема: и҆лѝ не вда́внѣ бѣ́дъ гра́дскихъ ᲂу҆дали́вшасѧ, ны́нѣ со мно́жествомъ ᲂу҆ченикѡ́въ чрез̾ всѐ съ го́рдостїю то́ржище и҆дꙋ́ща: а҆́ще же бы́ша бы́ли ᲂу҆вѣ́рены и҆звѣ́стнѡ, ꙗ҆́кѡ мно́гъ є҆́сть трꙋ́дъ наставлѧ́ти про́чихъ во благоче́стїи, и҆ послѣ́дꙋющее томꙋ̀ ᲂу҆ви́дѣли бы бѣ́дствїе соверше́ннѡ, всѧ́кѡ бы ꙗ҆́кѡ превосходѧ́щагѡ и҆́хъ си́лꙋ ѿрекли́сѧ дѣ́ла: но доне́лѣже сегѡ̀ не вѣ́дѧтъ, и҆ сла́вꙋ непщꙋ́ютъ бы́ти нача́льствовати над̾ и҆ны́ми, доброво́льнѡ па́даютъ въ ро́въ, и҆ въ горѧ́щꙋю пе́щь вскочи́ти легко̀ бы́ти мнѧ́тъ, на смѣ́хъ ᲂу҆́бѡ подвиза́юще вѣ́дѧщихъ вчера́шнее и҆́хъ житїѐ, бг҃а же къ негодова́нїю ѡ҆ сицево́й и҆́хъ де́рзости. А҆́ще бо и҆лі́а ничто́же и҆зба́ви ѿ гнѣ́ва бж҃їѧ, ни ста́рость честна̀, ни пре́жднее дерзнове́нїе, ни свѧще́нническое досто́инство, пренебре́гшаго ча̑дъ и҆справле́нїе: ка́кѡ что̀ и҆́зметъ ны́нѣ ѿ сицева́гѡ негодова́нїѧ, ни ѿ пре́жнихъ дѣ́лъ достовѣ́рїе и҆мꙋ́щихъ ᲂу҆ бг҃а, нижѐ вѣ́дѧщихъ ни грѣха̀ сво́йство, и҆лѝ и҆справле́нїѧ ѡ҆́бразъ: но неискꙋ́снѡ любле́нїѧ ра́ди сла́вы пристꙋпа́ющихъ къ бѣ́дственномꙋ дѣ́лꙋ; Сегѡ̀ ра́ди по видѣ́нїю фарїсе́ѧми ᲂу҆чи́телей гдⷭ҇ь нарица́ше: го́ре ва́мъ, глаго́лѧ, кни̑жницы и҆ фарїсе́є лицемѣ́ри, ꙗ҆́кѡ прехо́дите мо́ре и҆ сꙋ́шꙋ, сотвори́ти є҆ди́наго прише́льца, и҆ є҆гда̀ бꙋ́детъ, творитѐ є҆го̀ сы́на гее́нны сꙋгꙋ́бѣйша ва́съ¹⁶³¹: са́мою же и҆́стиною, ѻ҆́ныхъ ᲂу҆коре́нїемъ предвѣща́ѧ ѡ҆ и҆мꙋ́щихъ по́слѣжде тѣ́мижде ᲂу҆лови́тисѧ прегрѣше́ньми: да семꙋ̀ вне́млюще, го́ре, ᲂу҆держа́тъ себѐ ѿ безвре́меннагѡ жела́нїѧ человѣ́ческїѧ сла́вы, стра́шное помышлѧ́юще ѻ҆каѧ́нство своѐ. Да ᲂу҆вѣща́етъ та́кожде и҆ і҆́ѡвъ и҆́хъ, и҆лѝ подо́бнѣ є҆мꙋ̀ пещи́сѧ ѡ҆ подчине́нныхъ, и҆лѝ ѿрѣщи́сѧ сицева́гѡ нача́льства, є҆гда̀ та̑ѧжде ꙗ҆̀же и҆ ѻ҆́нъ твори́ти не вѣ́дѧтъ, нижѐ то́ежде ѡ҆ ввѣ́ренныхъ себѣ̀ тща́нїе и҆мѣ́ти хо́щꙋтъ. А҆́ще бо ѻ҆́нъ, и҆ ѿ сꙋ́щихъ въ мы́сли скве́рнъ сыновѡ́мъ чи̑стымъ бы́ти хотѧ́й, жє́ртвы всѧ̑ дни̑ ѡ҆ ни́хъ приноша́ше, глаго́лѧ: не́гли когда̀ сы́нове моѝ согрѣши́ша, и҆ въ мы́сли свое́й ѕла̑ѧ помы́слиша проти́вꙋ бг҃а¹⁶³²: ка́кѡ сі́и и҆ ꙗ҆́вныхъ прегрѣше́нїй разсматрѧ́ти невѣ́дꙋщїи, ра́ди сꙋ́щагѡ є҆щѐ въ по́мыслѣ и҆́хъ ѿ борьбы̀ со страстьмѝ помраче́нїѧ, пристꙋпа́ютъ къ нача́льствованїю над̾ дрꙋги́ми, и҆ врачева́нїе и҆ны́хъ прїе́млютъ не ᲂу҆̀ своѧ̑ стра̑сти и҆сцѣли́вше: нижѐ свое́ю побѣ́дою и҆ны́хъ къ подо́бномꙋ побѣжде́нїю наста́вити могꙋ́ще; Подоба́етъ бо пе́рвѣе бра́тисѧ со страстьмѝ, и҆ во мно́гомъ трезвѣ́нїи слꙋча̑ющаѧсѧ на бра́ни па́мѧти предава́ти: и҆ та́кѡ ѿ своегѡ̀ и҆скꙋ́са и҆ны́хъ ᲂу҆чи́ти боре́нїю, и҆ побѣ́дꙋ и҆̀мъ ᲂу҆до́бнѣйшꙋ твори́ти, ѡ҆ ѡ҆́бразѣхъ бра́ни сказа́въ пре́жде. Сꙋ́ть бо нѣ́цыи ѡ҆долѣ́вшїи страсте́мъ вели́кїѧ ра́ди, мню̀, жесто́кости житїѧ̀, и҆ не вѣ́дѧще ѡ҆́браза побѣ́ды, занѐ а҆́ки въ нощно́й бра́ни послѣ́доваша сраже́нїѧмъ, нижѐ вра̑жїѧ навѣ́ты разсмотрѧ́хꙋ ᲂу҆мо́мъ. Сїѐ гада́тельнѣ творѧ́ше и҆ і҆исꙋ́съ, въ нощѝ і҆ѻрда́нъ преходѧ́щемꙋ во́инствꙋ, повелѣ́въ и҆з̾ рѣкѝ ка́менїе взима́ти¹⁶³³, и҆ внѣ̀ рѣкѝ столпоѡбра́знѡ поста́вивъ, ѡ҆бѣли́ти и҆ написа́ти, ꙗ҆́кѡ преидо́ша і҆ѻрда́нъ, назна́менꙋѧ, ꙗ҆́кѡ подоба́етъ та̑йнаѧ пристра́стнагѡ житїѧ̀ помышлє́нїѧ въ ꙗ҆вле́нїе и҆зводи́ти, и҆ ꙗ҆́вѣ твори́ти, и҆ не зави́ствовати и҆ны́хъ зна́нїю, да не то́чїю преше́дый разꙋмѣ́етъ ѡ҆́бразъ прехожде́нїѧ, но да и҆ то́жде твори́ти и҆зволѧ́ющїи, ᲂу҆до́бное по ѻ҆́номꙋ ᲂу҆че́нїю прехожде́нїе сотворѧ́тъ, и҆ и҆ны́хъ и҆скꙋ́съ да бꙋ́детъ и҆ и҆ны̑мъ ᲂу҆че́нїе. Но сїѧ̑ ᲂу҆́бѡ нижѐ зрѧ́тъ ті́и, нижѐ и҆ны́хъ глаго́лющихъ слы́шатъ: є҆ди́номꙋ же тѣ́хъ вне́млюще ᲂу҆вѣре́нїю, ꙗ҆́коже нае́мникѡмъ ра̑бскаѧ повелѣва́ютъ слꙋжє́нїѧ бра́тїѧмъ, въ се́мъ всю̀ сла́вꙋ полага́юще, да нача́льствꙋютъ мно́жайшими. И҆ є҆́сть и҆̀мъ ревнова́нїе, да не ме́ньше про́чихъ ѻ҆бщежи́тельствъ во и҆схожде́нїихъ и҆́хъ ꙗ҆́кѡ рабѝ послѣ́дствꙋютъ и҆̀мъ, торжникѡ́въ па́че, не́же ᲂу҆чи́телей ѡ҆́бразъ показꙋ́юще: є҆гда́ бо сло́вомъ повелѣва́ти ᲂу҆до́бно бы́ти непщꙋ́ютъ, а҆́ще бы и҆ тѧ̑жка бы́ша повелѣва́ємаѧ, дѣ́ломъ же ᲂу҆чи́ти нижѐ ма́лѡ те́рпѧтъ, ꙗ҆́вно всѣ̑мъ своѐ творѧ́тъ намѣ́ренїе, ꙗ҆́кѡ не по́льзовати приходѧ́щыѧ, но свою̀ стра́сть соверши́ти тща́щесѧ, нача́льство воспрїима́ютъ сїѐ. Да наꙋча́тсѧ же ті́и, а҆́ще хо́щꙋтъ, ѿ гедеѡ́на¹⁶³⁴, и҆ а҆вїмеле́ха¹⁶³⁵, ꙗ҆́кѡ не сло́во, но дѣ́ло возбꙋжда́етъ подвла́стныхъ къ подража́нїю: семꙋ̀ ᲂу҆́бѡ сотво́ршꙋ себѣ̀ вре́мѧ, дре́во, та́же носѧ́щꙋ то̀ и҆ глаго́лющꙋ: є҆́же ви́дѣсте мѧ̀ творѧ́ща, сотвори́те и҆ вы̀. Сїе́ же дѣ́ло предлага́ѧ ѻ҆́нъ всѣ̑мъ ѻ҆́бщее, и҆ себѐ предвчинѧ́ѧ въ дѣ́ланїе, и҆ глаго́лѧ, ѿ менѐ ви́дите, и҆ си́це твори́те. И҆ а҆по́столъ глаго́лѧй, ꙗ҆́кѡ тре́бованїю моемꙋ̀, и҆ сꙋ́щымъ со мно́ю, послꙋжи́стѣ рꙋ́цѣ моѝ сі́и¹⁶³⁶: и҆ са́мъ гдⷭ҇ь творѧ́й и҆ тогда̀ ᲂу҆ча́й¹⁶³⁷: когѡ̀ не ᲂу҆вѣрѧ́ютъ, за достовѣ́рнѣйшее почита́ти є҆́же дѣ́лы, не́же є҆́же словесы̀ быва́етъ ᲂу҆че́нїе; Сі́и же къ сицєвы́мъ ᲂу҆́бѡ ѡ҆бразѡ́мъ смѣжа́ютъ ѻ҆́чи своѝ, гордели́вѡ же ꙗ҆̀же подоба́етъ дѣ́лати, повелѣва́ютъ. Є҆гда́ же ᲂу҆вѣ́дѣти что̀ себѐ ѿ си́хъ возмнѧ́тъ слы́шанїемъ, ꙗ҆́коже ᲂу҆корѧ́емїи ѿ проро́ка ѡ҆ неискꙋ́сствѣ свое́мъ па́стыри, ме́чь на мы́шцѣ но́сѧтъ. Тѣ́мже и҆ мы́шца и҆́хъ и҆зсыха́етъ, и҆ десно́е ѻ҆́ко и҆́хъ ѡ҆слѣплѧ́етсѧ. Неради́мо бо горды́нь ра́ди десно́е дѣѧ́нїе, вкꙋ́пѣ съ собо́ю погаша́етъ и҆ свѣ́тъ видѣ́нїѧ. Сїе́ же же́стокѡ и҆ безчеловѣ́чнѡ пасꙋ́щїи стра́ждꙋтъ, є҆гда̀ ско́рꙋ ко ѿмще́нїю и҆́мꙋтъ си́лꙋ: а҆́бїе бо зри́тєльнаѧ помышлє́нїѧ ѿ десны́хъ, Оу҆гаса́ютъ: па́ки же дѣѧ̑нїѧ не и҆мꙋ̑щаѧ видѣ́нїѧ, ᲂу҆вѧда́ютъ, нижѐ дѣ́ѧти что̀, нижѐ зрѣ́ти могꙋ́щымъ, не по бедрѣ̀, но на мы́шцѣ ме́чь препоѧ́савшымъ. На бедрѣ́ бо но́сѧчъ ме́чь¹⁶³⁸, ᲂу҆потреблѧ́ющїи сѣкꙋ́щее своѧ̑ со́бствєнныѧ стра̑сти сло́во: на мы́шцѣ же, ка́знь ско́рꙋ и҆мꙋ́щїи на чꙋ̑ждаѧ прегрѣшє́нїѧ. Си́це бо и҆ наа́съ а҆мані́тѧнинъ¹⁶³⁹, и҆́же сказꙋ́етсѧ ѕмі́й, претѧ̀ прозорли́вомꙋ і҆сра́илю, и҆звертѣ́ти всѐ десно́е є҆гѡ̀ ѻ҆́ко, да ни є҆ди́но помышле́нїе десно́е въ не́мъ сꙋ́щее, къ десно́мꙋ дѣѧ́нїю веде́тъ стѧжа́вшаго є҆̀, вѣ́дый вино́вно сїѐ вели́кагѡ преспѣ́ѧнїѧ ѿ видѣ́нїѧ къ дѣѧ́нїю грѧдꙋ́щымъ: быва́етъ бо сицевы̑мъ неви́нно содѣ́ѧнное и҆́ми, ѻ҆строзри́тельными вѣ́дѣнїѧ и҆́хъ ѻ҆чесы̀ предꙋсмо́тренное. А҆ ꙗ҆́кѡ легкомы́сленныхъ человѣ̑къ и҆ ниеди́ныѧ ѿ себѐ по́льзы и҆мꙋ́щихъ, є҆́сть є҆́же над̾ и҆ны́ми воспрїѧ́ти нача́льство, ꙗ҆́вно и҆ ѿ и҆скꙋ́са: не бо̀ и҆збра́лъ бы кто̀ безмо́лвїѧ и҆ видѣ́нїѧ вкꙋси́вый, нѣ́коликѡ безмо́лвствовати наче́ншїй, жите́йскими попече́ньми свѧза́ти ᲂу҆́мъ: ᲂу҆дали́въ є҆го̀ ѿ вѣ́дѣнїѧ, и҆ горѣ̀ сꙋ́ща, мнѡ́гаѧ постиза́юща, къ зємны́мъ низвлещи́сѧ ве́щемъ: ꙗ҆́внѣе же и҆ ѿ сла́вныѧ при́чти ѻ҆́ныѧ, ю҆́же і҆ѡаѳа́мъ мꙋже́мъ сѷхє́мскимъ предложѝ, глаго́лѧ: и҆дꙋ́ще и҆до́ша древа̀ дꙋбра́внїи пома́зати себѣ̀ царѧ̀¹⁶⁴⁰, и҆ рѣ́ша вїногра́дꙋ, ца́рствꙋй над̾ на́ми¹⁶⁴¹, и҆ речѐ и҆̀мъ лоза̀ вїногра́днаѧ: є҆да̀ ѡ҆ста́влю пло́дъ мо́й бла́гъ, є҆го́же просла́ви бг҃ъ и҆ человѣ́цы, и҆ пойдꙋ̀ владѣ́ти древа́ми¹⁶⁴²; Подо́бнѣ же и҆ смоко́вницѣ ра́ди своеѧ̀ сла́дости, и҆ ма́сличинѣ ра́ди своеѧ̀ тꙋ́чности ѿве́ргшымсѧ¹⁶⁴³, те́рнїе, дре́во безпло́дное и҆ боди́стое, си́хъ нача́льство воспрїѧ̀¹⁶⁴⁴, нижѐ свою̀ и҆мꙋ́щее тꙋ́чность, нижѐ подчине́нныхъ дре́въ. Не бо̀ ра̑йскаѧ древа̀, но дꙋбра̑внаѧ просѧ̑щаѧ нача́льства, речѐ при́тча. Ꙗ҆́кѡ бо вїногра́дъ, и҆ смоко́вница и҆ ма́слина ѿреко́шасѧ нача́льствовати над̾ древа́ми дꙋбра́вными, па́че свои́мъ веселѧ́щыѧсѧ плодо́мъ, не́же нача́льства досто́инствомъ: си́це въ себѣ̀ нѣ́кїй зрѧ́щїи пло́дъ добродѣ́тели, и҆ ѿ сегѡ̀ по́льзꙋ ѡ҆щꙋща́ющїи, а҆́ще и҆ мно́зи къ сицево́мꙋ нача́льствꙋ понꙋжда́ютъ, ѿрека́ютсѧ, свою̀ ꙗ҆́же ѿ мно́гихъ че́сти по́льзꙋ предпочита́юще. А҆ є҆́же кленѧ́ше въ при́тчѣ древа́мъ, сїѐ и҆ человѣ́кѡмъ, кꙋ́плѧми ѡ҆бѧзꙋ́ющымсѧ, ꙗ҆́коже древа́мъ ѻ҆́нѣмъ прилꙋча́етсѧ подо́бнѣ: и҆ли́ бо да и҆зы́детъ, речѐ, ѻ҆́гнь и҆з̾ те́рнїѧ, и҆ поѧ́стъ древа̀ дꙋбра̑внаѧ¹⁶⁴⁵, и҆лѝ ѿ дре́въ да и҆зы́детъ и҆ поѧ́стъ те́рнїе. Завѣ́тѡмъ бо сꙋ́щымъ безполе́знымъ, нꙋ́жно бѣ́дствїю воспослѣ́довати покарѧ́ющымъ себѐ наста́вникꙋ неискꙋ́снꙋ, и҆ самѣ́мъ нача́льство воспрїе́млющымъ ѡ҆ неповинове́нїѧ ᲂу҆ча́щихсѧ. И҆́бо ᲂу҆чи́телѧ неискꙋ́сство погꙋблѧ́етъ ᲂу҆ча́щыѧсѧ. И҆ ᲂу҆чени́ческое нерадѣ́нїе, бѣ́дствїе прино́ситъ ᲂу҆чи́телю, и҆ наипа́че є҆гда̀ ѿ невѣ́жества є҆гѡ̀ ѡ҆слабѣва́ютъ ѻ҆нѝ. Ниже́ бо пред̾ ᲂу҆чи́телемъ сокрове́нно что̀ бы́ти до́лженствꙋетъ ко и҆справле́нїю поднача́льныхъ ѿносѧ́щеесѧ, нижѐ ѻ҆нѝ презира́ти что̀ ѿ заповѣ́данїй ᲂу҆чи́телѧ своегѡ̀ до́лжни сꙋ́ть. И҆́бо и҆ си̑мъ, дабы̀ ᲂу҆стро́ити себѐ, и҆ томꙋ̀, є҆гда̀ пре́зритъ согрѣша́ющихъ, тѧ́жко є҆́сть, и҆ бѣ́дственно. Нижѐ да вознепщꙋ́ютъ ѿра́ды и҆ наслажде́нїѧ и҆звѣ́тъ бы́ти ве́щь: всѣ́хъ бо є҆́сть притрꙋ́днѣйше ᲂу҆правлѧ́ти дꙋша́ми. Безслове́сными бо ᲂу҆правлѧ́ющїи и҆ скота́ми, ни въ че́мже проти́вѧщыѧсѧ и҆́мꙋтъ стада̀, и҆ сегѡ̀ ра́ди и҆̀мъ нача́льство благоспѣ́шно быва́етъ мно́жицею: над̾ людьми́ же нача́льствꙋющымъ разли́чїе нра́вѡвъ, и҆ лꙋка́вство се́рдца и҆́хъ, трꙋ́днѣйшее творѧ́тъ нача́льство. И҆ подоба́етъ воспрїе́млющымъ ѻ҆́ное, ꙗ҆́кѡ на по́двигъ притрꙋ́дный и҆дꙋ́щымъ ᲂу҆крѣпи́тисѧ, да и҆ всѣ́хъ прегрѣшє́нїѧ со мно́гими понесꙋ́тъ неѕло́бїемъ, и҆ въ неизвѣ́стныхъ невѣ́дѣнїѧ и҆́хъ ра́ди, ᲂу҆́чатъ и҆̀хъ долготерпѣли́вѡ. Сегѡ́ бо ра́ди, кꙋпѣ́ль волы̀ во хра́мѣ на себѣ̀ де́ржатъ, свѣ́щникъ же ве́сь тве́рдъ и҆ ѡ҆бто́ченъ бы́сть ᲂу҆стро́енъ: ꙗ҆влѧ́ющꙋ ᲂу҆́бѡ свѣ́щникꙋ, ꙗ҆́кѡ свѣти́ти и҆ны̑мъ предпрїе́млѧй, до́лженъ всѣ́ми тве́рдъ бы́ти частьмѝ, и҆ ничто́же ле́гко и҆мѣ́ти и҆лѝ тще́тно: и҆ всѧ̑ ѡ҆бточи́ти и҆зли̑шнѧѧ, є҆ли̑ка не и҆мѣ́ѧхꙋ ᲂу҆каза́нїемъ жи́тельства непоро́чнагѡ по́льзовати зрѧ́щихъ. Под̾ кꙋпѣ́лїю же тельцє́мъ ꙗ҆влѧ́ющымъ, ꙗ҆́кѡ ничесогѡ́же ѿ находѧ́щихъ прїи́мшꙋ сицево̀ дѣ́ло ѿрица́тисѧ подоба́етъ: но и҆ бремена̀ и҆ скве́рнꙋ носи́ти ме́ньшихъ, до́ндеже безбѣ́дственно є҆́сть носи́ти. Всѧ́кѡ бо, а҆́ще хо́щетъ кто̀ чи́ста содѣ́лати дѣѧ̑нїѧ приходѧ́щихъ, нꙋ́жно и҆ самомꙋ̀ нѣ́коей прїѡбщи́тисѧ скве́рнѣ. Занѐ и҆ кꙋпѣ́ль ѡ҆чища́ющи ѡ҆мыва́емыхъ рꙋ́цѣ, сама̀ прїе́млетъ ѻ҆́нѣхъ скве́рнꙋ. Ѡ҆ страсте́хъ бо разглаго́льствꙋющꙋ, и҆ и҆ны̑ѧ ѿ сицевы́хъ скве́рнъ ѡ҆чища́ющꙋ, не возмо́жно не ѡ҆скверне́нꙋ прейтѝ. Са́маѧ бо па́мѧть ѡ҆сквернѧ́ти мы́сль глаго́лющагѡ ѡ҆бы́че. И҆ а҆́ще же и҆ не глꙋбо́кѡ, гнꙋ́сными ва́пами назна́менꙋетъ начерта̑нїѧ, но ѻ҆ба́че лицѐ ᲂу҆ма̀ скверни́тъ словесѐ и҆схожде́нїемъ, а҆́ки ша́рами нечи́стыми возмꙋща́ющи. Подоба́етъ же и҆ нача́льникꙋ си́це бы́ти вѣ́дꙋщꙋ, ꙗ҆́кѡ да ничто́же ѿ ᲂу҆мышле́нїй вра́жїихъ ᲂу҆тае́но бꙋ́детъ пред̾ ни́мъ. Да та̑йнаѧ ввѣ́рєннымъ є҆мꙋ̀ борє́нїѧ ѿкрове́ннѡ пока́жетъ, и҆ ѡ҆ навѣ́тахъ проти́вника предглаго́лѧ, без̾ трꙋда̀ побѣ́дꙋ и҆̀мъ пода́стъ, и҆ вѣнцено́сцы ѿ по́двига возведе́тъ и҆̀хъ. Но не мно́зи сицевы́и и҆ не ᲂу҆до́бь ѡ҆брѣта́емы сꙋ́ть. Вели́кїй ᲂу҆̀бо па́ѵелъ ѡ҆ себѣ̀ сїѐ свидѣ́тельствꙋетъ, глаго́лѧ: не не разꙋмѣва́емъ бо ᲂу҆мышле́нїй є҆гѡ̀¹⁶⁴⁶. Чꙋ́дный та́кожде і҆́ѡвъ недоꙋмѣ́ѧ ѡ҆ сицево́мъ, глаго́летъ: кто̀ ѿкры́етъ лицѐ ѡ҆бличе́нїѧ є҆гѡ̀; въ согбе́нїе же пе́рсей є҆гѡ̀ кто̀ вни́детъ; двє́ри же лица̀ є҆гѡ̀ кто̀ ѿве́рзетъ¹⁶⁴⁷; А҆ є҆́же глаго́летъ, сїе́ є҆сть: нѣ́сть, глаго́летъ, ви́димое лицѐ на не́мъ, мно́гими бо ѻ҆де́ждами покрыва́етъ лꙋка́вство: льстѧ̀ ви́домъ преле́стнѡ, присѣди́тъ же ѻ҆́тай стро́ѧ поги́бель. И҆ да не и҆ себѐ сопричи́слитъ къ невѣ́дꙋщымъ, ꙗ҆̀же въ не́мъ, глаго́летъ зна́мєнїѧ є҆гѡ̀ ꙗ҆́вѣ, вѣ́дый чꙋ́дное въ не́мъ всѐ дѣ́йство. Ѻ҆́чи є҆гѡ̀, глаго́летъ, видѣ́нїе денни́цы, ᲂу҆тро́ба же є҆гѡ̀ щиты̀ мѣ́дѧны¹⁶⁴⁸. И҆ сїѧ̑ глаго́летъ, ѡ҆блича́ѧ є҆гѡ̀ кова́рство: ꙗ҆́кѡ да прїе́млѧ ѻ҆́нъ ѡ҆́бразъ на себѐ свѣтоно́сца, привлека́етъ къ себѣ̀ зрѧ́щыѧ, ᲂу҆хищрѧ́ющꙋ є҆мꙋ̀ сїѐ: внꙋ́тренними же щиты̀ сме́рть приближа́ющымсѧ содѣ́ловающꙋ. И҆ при́тча та́кожде бѣ́дственнꙋ бы́ти ве́щь ѡ҆блича́ющи, глаго́летъ: разсѣца́ѧй дрова̀, бѣдꙋ̀ прїи́метъ въ ни́хъ, а҆́ще спаде́тъ сѣ́чиво¹⁶⁴⁹: раздѣлѧ́ѧй бо сло́вомъ вє́щи, и҆ непщꙋ́ємаѧ соедини́тисѧ ѿлꙋча́ѧй ѿ соедине́нїѧ, и҆ чꙋ̑жда всѧ́чески є҆ди́но ѿ дрꙋга́гѡ показа́ти хотѧ́й, и҆́стиннаѧ блага̑ѧ ѿ мни́мыхъ таковы́хъ, а҆́ще не ѿвсю́дꙋ ᲂу҆твержде́но и҆́мать сло́во, бѣдꙋ̀ прїе́млетъ въ слꙋ́шающихъ, ѿпа́дшꙋ ᲂу҆твержде́нїѧ сло́вꙋ, собла́зна винꙋ̀ слы́шащымъ подаю́щꙋ. Си́це нѣ́кто ѿ прише́дшихъ къ є҆лїссе́ю, сѣкі́й дре́во при і҆ѻрда́нѣ, и҆ сѣки́рѣ въ рѣкꙋ̀ впа́дшей, бѣ́дство зрѧ́й, ко ᲂу҆чи́телю возопѝ глаго́лѧ: го́ре мѝ господи́не, и҆ сїѐ зае́мное¹⁶⁵⁰. Сїе́ же стра́ждꙋтъ неискꙋ́снымъ ᲂу҆че́нїемъ ᲂу҆чи́ти покꙋша́ющїисѧ, и҆ къ концꙋ̀ прїитѝ не могꙋ́щїе, занѐ не по си́лѣ свое́й глаго́лютъ. Є҆гда́ же посредѣ̀ слы́шащихъ въ сопроти́вномъ предлежа́щемꙋ чесо́млибо ѡ҆бличе́ни бꙋ́дꙋтъ глаго́лющїи, тогда̀ невѣ́дѣнїе своѐ и҆сповѣ́дꙋютъ ѡ҆ ᲂу҆потребле́нномъ и҆́ми глаго́лѣ скорбѧ́ще: тѣ́мже и҆ вели́кїй є҆лїссе́й, дре́во во глꙋбинꙋ̀ вве́рже, и҆ на ве́рхъ всплы́ти желѣ́зо сотворѝ¹⁶⁵¹, недоꙋмѣва́емое ѿ ᲂу҆ченика̀ и҆ во глꙋбинѣ̀ кры́тисѧ непщꙋ́емое ѿкры́въ помышле́нїе, и҆ пред̾ ѻ҆́чи слы́шащихъ то̀ предста́вивъ. І҆ѻрда́нъ же покаѧ́нїе зна́менꙋетъ. Та́мѡ бо соверша́шесѧ ѿ і҆ѡа́нна креще́нїе покаѧ́нїѧ: ѡ҆ покаѧ́нїи без̾ и҆спыта́нїѧ рекі́й, и҆ ѿкры́тїемъ сокрове́нныѧ бла́гости въ презрѣ́нїе прїитѝ слы́шащымъ ᲂу҆стро́ивый. Во і҆ѻрда́нѣ взѧ̀ сѣки́рꙋ, до́брѣ вои́стиннꙋ и҆ ꙗ҆ви́вшесѧ дре́во и҆зно́ситъ ѿ глꙋбины̀ желѣ́зо, и҆ на ве́рхъ всплы́ти твори́тъ. Пре́жде ᲂу҆̀бо креста̀ сокрове́нно бы́сть ѡ҆ покаѧ́нїи сло́во. Тѣ́мже и҆ восхотѣ́вый рещѝ что̀ ѡ҆ не́мъ, ѡ҆бличи́сѧ безразсꙋ́днѡ дерзнꙋ́въ. По́слѣ же креста̀ ꙗ҆́внѡ всѣ̑мъ бы́сть во своѐ вре́мѧ дре́вомъ пока́занное. Сїѧ̑ же глаго́лю, не ѿвраща́ѧ ѿ нача́льствованїѧ над̾ и҆ны́ми, нижѐ возбранѧ́ѧ наставлѧ́ти нѣ́кїихъ и҆з̾ новонача́льныхъ ко благоче́стїю: но ᲂу҆вѣщава́ѧ пе́рвѣе навы́кнꙋти добродѣ́тели, разсмотрѧ́ѧ вели́чество ве́щи, и҆ не ско́рѡ предава́ти себѐ намѣ́ренїю: прїѧ́тнаѧ ᲂу҆́бѡ помышлѧ́юще, и҆ ѿ ᲂу҆чєни́къ почте́нїе, и҆ ѿ внѣ́шнихъ сла́вꙋ: ѡ҆ послѣ́дꙋющемъ же бѣ́дствїи не разсꙋжда́юще, и҆ не пре́жде ми́рнагѡ состоѧ́нїѧ бра̑ннаѧ ѻ҆рꙋ̑дїѧ въ сосꙋ́ды претворѧ́ти земледѣ́льчєскїѧ. Повнегда́ бо всѧ̑ покори́ти стра̑сти, и҆ ниѿкꙋ́дꙋже ктомꙋ̀ бра́немъ стꙋжа́ти, нижѐ ко ᲂу҆потребле́нїю защити́тельныхъ ѻ҆рꙋ́дїй нꙋ́ждꙋ и҆мѣ́ти, добро̀ є҆́сть воздѣ́ловати и҆ны̑ѧ: но є҆гда̀ ѡ҆блада́ютъ стра̑сти, и҆ востае́тъ бра́нь пло́ти, по мꙋдрова́нїю пло́ти, не подоба́етъ ᲂу҆де́рживати рꙋ́къ ѿ ѻ҆рꙋ́жїй, но въ тѣ́хъ непреста́ннѡ и҆мѣ́ти ѻ҆́наѧ: да не вре́мѧ къ нападе́нїю, на́шꙋ прїи́мше ѡ҆сла́бꙋ навѣ̑тницы, без̾ трꙋда̀ ѡ҆долѣ́ютъ на́съ. Ꙗ҆́кѡ бо до́брѣ ѡ҆ добродѣ́тели подвиза́ющымсѧ, и҆ ра́ди мно́гагѡ смиренномꙋ́дрїѧ, не ᲂу҆̀ побѣди́ти мнѧ́щымъ, глаго́летъ ᲂу҆вѣща́тельнѣ сло́во: Раскꙋ́йте мечѝ ва́шѧ на ра̑ла, и҆ кѡ́пїѧ ва̑ша на серпы̀¹⁶⁵². Совѣщава́ѧ и҆̀мъ, да побѣди́въ врагѡ́въ, не всꙋ́е про́чее ᲂу҆пражнѧ́ютъ себѐ, но на по́льзꙋ и҆ны́хъ ѿ бра́ннагѡ ᲂу҆строе́нїѧ ѡ҆браща́ютъ си̑лы дꙋшє́вныѧ къ воздѣ́ланїю ѻ҆́нѣхъ, є҆ли́цы є҆щѐ въ дѣ́лѣхъ ѕло́бы и҆збы́точествꙋютъ: та́кѡ пре́жде сицева́гѡ ᲂу҆строе́нїѧ, и҆лѝ ра́ди неискꙋ́са, и҆лѝ высокоꙋ́мїѧ ра́ди предпрїѧ́вшымъ па́че своеѧ̀ си́лы, совѣ́тꙋетъ проти́вное, глаго́лѧ: Разсѣцы́те ра̑ла ва̑ша на мечѝ, и҆ серпы̀ ва́шѧ на ко́пїѧ¹⁶⁵³. Ка́ѧ бо и҆ по́льза земледѣ́лїѧ, бра́ни зе́млю ѡ҆бдержа́щей, и҆ наслажде́нїе плодѡ́въ врагѡ́мъ па́че, не́же трꙋди́вшымсѧ ѻ҆би́льнѡ подаю́щей: сегѡ̀ ра́ди є҆да̀ ка́кѡ и҆ сꙋ́щымъ є҆щѐ въ пꙋсты́ни и҆ съ разли́чными бра́нь и҆мꙋ́щымъ ꙗ҆зы́ки і҆сра́ильтѧнѡмъ, не повелѣва́етъ къ земледѣ́лїю прилѣжа́ти, да не бра̑ннымъ воспѧти́тъ ѡ҆бꙋче́нїѧмъ. Во вре́мѧ же ми́ра ѿ врагѡ́въ, сїѐ ᲂу҆потреблѧ́ти совѣ́тꙋетъ глаго́лѧ: Є҆гда̀ вни́дете въ зе́млю, ю҆́же а҆́зъ да́хъ ва́мъ, и҆ почі́етъ землѧ̀¹⁶⁵⁴, не бꙋ́дете сѣ́ѧти: повинꙋ́етсѧ бо сїѐ ᲂу҆ негѡ̀: и҆ пра́ведно, пре́жде бо соверше́нїѧ насажда́ємаѧ не быва́ютъ и҆звѣ̑стна, коле́блющымсѧ є҆щѐ въ непостоѧ́нномъ ѻ҆бы́чаѣ насажда́ти до́лженствꙋющымъ. Чи́нъ бо и҆ послѣ́дованїе, а҆́ще во и҆но́мъ чесо́мъ, то̀ и҆ въ дѣ́лѣхъ благоче́стїѧ є҆́сть, и҆ подоба́етъ ѿ нача́лъ приводи́ти. Презрѣ́вшїи бо нача́ло, и҆ любосла́стнѣйшими прельсти́вшесѧ, и҆ по нꙋждѣ̀ ходи́ти послѣ́дованїемъ чи́на ᲂу҆вѣщава́ютсѧ. Ꙗ҆́коже і҆а́кѡвъ красото́ю рахі́ли привлече́нный, презрѣ̀ болѣ́знь лі́иныхъ ѻ҆че́съ¹⁶⁵⁵, ѻ҆ба́че не и҆збы̀ въ стѧжа́нїи сицевы́ѧ добродѣ́тели трꙋда̀: и҆спо́лни седми́ны и҆ сеѧ̀¹⁶⁵⁶. Подоба́етъ ᲂу҆́бѡ зако́ннѡ по́двигъ проходи́ти хотѧ́щемꙋ, не ѿ конца̀ къ нача́лѡмъ ни возводи́тисѧ, но ѿ нача́ла преꙋспѣва́ти къ соверше́нствꙋ: та́кѡ бо и҆ са́мъ полꙋ́читъ и҆ско́мое, и҆ зна́емыхъ не ᲂу҆ко́рнѡ наста́витъ къ соверше́нствꙋ добродѣ́тели. Но мно́зи ни є҆ди́нагѡ трꙋда̀ сопривне́сше, нижѐ ма́ло и҆лѝ вели́ко дѣ́ло бл҃гоче́стїѧ и҆спра́вивше, без̾ разсꙋжде́нїѧ на и҆́мѧ текꙋ́тъ, не бѣ́дственно то̀ бы́ти непщꙋ́юще. И҆ не то́чїю не ѿрица́ютсѧ поѡщрѧ́ющымъ и҆̀хъ нѣ̑кїимъ къ дѣ́лꙋ, но и҆ ѡ҆бходѧ́ще сто́гны всѣ́хъ влекꙋ́тъ прилꙋча́ющихсѧ, всѧ́кое ѡ҆бѣщава́юще ᲂу҆гожде́нїе, ꙗ҆́коже съ нае́мники завѣ́тъ ѡ҆ пи́щи и҆ ѡ҆ ѻ҆де́ждѣ поло́жше. Нꙋ́жда же та́кѡ лю́бѧщымъ нача́льство, и҆ хотѧ́щымъ со мно́жествомъ во и҆схо́дѣхъ ꙗ҆влѧ́тисѧ и҆ на рꙋководѧ́щихъ почива́ти, и҆ всѧ́кѡ ви́дъ ꙗ҆влѧ́ти наста́вникѡвъ, ꙗ҆́кѡ притво́рный ѡ҆́бразъ взе́мшымъ, дабы̀ не ѡ҆ста́влєнымъ бы́ти ѿ ꙗ҆влѧ́ющихъ сїѐ и҆̀мъ слꙋже́нїе: ᲂу҆гожда́ти мно́гѡ сласте́мъ и҆́хъ, и҆ похотьмѝ носи́тисѧ невозбра́ннѡ по про́пастемъ, ꙗ҆́коже вса́дникѡмъ пꙋсти́вшымъ ᲂу҆здꙋ̀, и҆ самопроизво́льное и҆̀мъ тече́нїе попꙋсти́вшымъ, ꙗ҆́коже ѿ сегѡ̀ по стремни́намъ носи́тисѧ: и҆ на всѧ́каго напада́ти стоѧ́щаго на нога́хъ, никомꙋ́же сꙋ́щꙋ ѿража́ющꙋ и҆ безчи̑ннымъ стремле́нїѧмъ воспѧща́ющꙋ. Но да послꙋ́шаютъ сицеві́и блаже́ннагѡ є҆зекі́илѧ, ѡ҆каѧва́ющагѡ и҆ны́хъ сластє́мъ вещества̀ подаю́щихъ: и҆ за ᲂу҆гожде́нїе коегѡ́ждо хотѣ́нїємъ, себѣ̀ го́ре сокро́виществꙋющихъ: глаго́летъ бо: Го́ре сшива́ющымъ возгла̑вицы под̾ всѧ́кїй ла́коть рꙋкѝ, и҆ сотворѧ́ющымъ покрыва̑ла над̾ всѧ́кꙋю главꙋ̀ всѧ́кагѡ во́зраста, є҆́же разврати́ти дꙋ́шы¹⁶⁵⁷ го́рсти ра́ди ꙗ҆чме́не, и҆ ра́ди ᲂу҆крꙋ́ха хлѣ́ба. Си́це же и҆ ті́и потрє́бнаѧ тѣ́лꙋ ѿ подаѧ́нїй собира́юще, и҆ въ шве́нныхъ ꙗ҆́кѡ ѿ рꙋ́бищъ тка́нїѧхъ воз̾ꙋпокоева́ющесѧ, ѿкрове́нною главо́ю моли́тисѧ, и҆лѝ проро́чествовати до́лжныхъ сꙋ́щихъ, покрыва́лами срамлѧ́ютъ мꙋ́жественное ᲂу҆строе́нїе возложе́нїемъ покрове́нїй въ же́нское претворѧ́юще, и҆ дꙋ́шы погꙋблѧ́юще, и҆̀мже не подоба́ше ᲂу҆мре́ти. И҆ наипа́че подоба́ше послꙋ́шающымъ и҆́стиннагѡ ᲂу҆чи́телѧ хрⷭ҇та̀ ѿрещи́сѧ, є҆ли́ка си́ла, и҆ны́хъ ᲂу҆правлє́нїѧ. Глаго́летъ бо къ свои̑мъ ᲂу҆ченика́мъ: вы́ же не нарица́йтесѧ ᲂу҆чи́тели¹⁶⁵⁸. А҆́ще же петрꙋ̀ и҆ і҆ѡа́ннꙋ и҆ всемꙋ̀ ли́кꙋ а҆по́стольскомꙋ совѣ́товаше дале́че бы́ти сицева́гѡ дѣ́ла, и҆ недовлѣ́ющихъ себѐ непщева́ти къ сицево́мꙋ досто́инствꙋ: кто̀ ᲂу҆́бѡ бꙋ́детъ про́чее, па́че ѻ҆́нѣхъ ѡ҆ себѣ̀ мечта́ѧй и҆ досто́инствꙋ прїѡбща́ѧйсѧ, є҆гѡ́же возбране́ни бы́ша а҆по́столи: и҆лѝ не́гли глаго́лѧй, не нарица́йтесѧ ᲂу҆чи́тели, не да бꙋ́дꙋтъ, но да не нарица́ютсѧ, возбранѧ́етъ. А҆́ще же бы кто̀ не по своемꙋ̀ хотѣ́нїю, занѐ є҆ди́наго и҆лѝ дрꙋга́го воспрїѧ̀, принꙋжде́нъ бы́лъ и҆ мно́жайшыѧ наставлѧ́ти: пе́рвѣе себѐ ѻ҆па́снѡ да и҆скꙋ́ситъ, а҆́ще мо́щенъ є҆́сть, дѣ́ломъ па́че, не́же сло́вомъ ᲂу҆чи́ти, ꙗ҆̀же подоба́етъ твори́ти, ѡ҆́бразъ всѧ́кїѧ добродѣ́тели своѐ житїѐ предлага́ѧ ᲂу҆ча́щымсѧ. Да не преписꙋ́юще ѿтꙋ́дꙋ безѡбра́зїемъ паде́нїѧ помрача́тъ красотꙋ̀ добродѣ́тели, пото́мъ да вѣ́сть, ꙗ҆́кѡ не ме́нѣе ѡ҆ поднача́льныхъ, ка́къ и҆ ѡ҆ себѣ̀ подвиза́тисѧ до́лженъ. Ꙗ҆́коже бо ѡ҆ себѣ̀, та́кѡ и҆ ѡ҆ тѣ́хъ возда́стъ сло́во, є҆ди́ною воспрїѧ́вый спасе́нїе и҆́хъ. И҆́бо ст҃ы̑мъ тща́нїе бы́сть, дабы̀ не ме́ньшими себѧ̀ ѡ҆ста́вить въ добродѣ́телѧхъ ᲂу҆ченикѡ́въ, но ѿ пе́рвагѡ состоѧ́нїѧ преводи́ти въ лꙋ́чшее состоѧ́нїе. Та́кѡ а҆по́столъ па́ѵелъ ѻ҆ни́сїма ѿ бѣглеца̀ (слꙋгѝ) мꙋ́ченика сотворѝ. И҆лїа́ же ѿ ѡ҆ра́телѧ проро́ка є҆лїссе́а поста́ви. Мѡѷсе́й же і҆исꙋ́са всѣ́хъ ю҆нѣ́йша на лꙋ́чшее ᲂу҆стро́и. И҆лі́й же самꙋ́ила, и҆ бо́льшаго себѐ показа̀. Є҆́стьли же и҆ си́хъ тща́нїе содѣ́йствова и҆̀мъ къ стѧжа́нїю добродѣ́тели: но по всемꙋ̀ вино́вно предспѣ́ѧнїѧ и҆̀мъ бы́сть, є҆́же и҆мѣ́ти ᲂу҆чи́телей, возмо́гшихъ возже́ннꙋю и҆́скрꙋ ᲂу҆се́рдїѧ въ бо́льшее предспѣ́ѧнїе возвѣ́ѧти и҆ возсїѧ́ти сотвори́ти. Сегѡ̀ ра́ди и҆ ᲂу҆ста̀ бж҃їѧ бы́ша, є҆гѡ̀ хотѣ̑нїѧ человѣ́кѡмъ завѣща́вшїй. Слы́шаша бо сего̀ глаго́люща: А҆́ще и҆зведе́ши честно́е ѿ недосто́йнагѡ, ꙗ҆́кѡ ᲂу҆ста̀ моѧ̑ бꙋ́деши: Чи́нъ же ᲂу҆чи́телѧ и҆ є҆зекі́илю бг҃ъ предлага́етъ, наꙋча́ѧ каковы́хъ и҆ и҆з̾ каковы́хъ подоба́етъ ᲂу҆ченикѡ́въ прїꙋготовлѧ́ти. Сы́не бо, глаго́летъ, человѣ́чь, возмѝ себѣ̀ плі́нѳꙋ, и҆ положи́ши ю҆̀ пред̾ лице́мъ твои́мъ, и҆ да напи́шеши на не́й гра́дъ і҆ерꙋсали́мъ¹⁶⁵⁹. Зна́менꙋѧ, ꙗ҆́кѡ ѿ пе́рсти хра́мъ ст҃ы́й, ᲂу҆ченика̀ ᲂу҆чи́тель содѣ́ловаетъ. Добро́ же и҆ сїѐ: положи́ши є҆го̀ пред̾ лице́мъ твои́мъ. Та́кѡ бо ско́рый ᲂу҆спѣ́хъ бꙋ́детъ ᲂу҆ченикꙋ̀, є҆́жели пред̾ лице́мъ ᲂу҆чи́телѧ бꙋ́детъ всегда̀. Ча̑стыѧ бо до́брыхъ примѣ́рѡвъ дѣ̑йствїѧ, подѡ́бныѧ ѡ҆́бразы начертава́ютъ не ѕѣлѡ̀ въ жесто́кихъ и҆ затвердѣ́лыхъ дꙋша́хъ. Сегѡ̀ ра́ди гїезі́й и҆ і҆ꙋ́да подпадо́ша, ѻ҆́въ ᲂу҆́бѡ татьбѣ̀, ѻ҆́въ же преда́тельствꙋ. Поне́же ᲂу҆дали́шасѧ ѿ ѻ҆че́й наста́вника, ꙗ҆́кѡ а҆́ще бы пребы́ша ᲂу҆ цѣломꙋ́дренныхъ, не бы̀ прегрѣши́ша, поне́же ѻ҆па́сность слѣ́дꙋетъ наста́вникꙋ ѿ нерадѣ́нїѧ ᲂу҆ченикѡ́въ, ѡ҆ че́мъ въ слѣ́дꙋющемъ ѡ҆б̾ѧсни́лъ говорѧ̀: И҆ положи́ши сковрадꙋ̀ желѣ́знꙋ междꙋ̀ тобо́ю и҆ междꙋ̀ плі́нѳою, и҆ бꙋ́детъ стѣна̀ междꙋ̀ тобо́ю и҆ междꙋ̀ є҆ѧ̀¹⁶⁶⁰. Не хотѧ́щїй бо препода́ти лѣнѧ́щемꙋсѧ наказа́нїе, по є҆́же сотвори́ти є҆мꙋ̀ ѿ пе́рсти гра́дъ, вспѧ́ть бѣгꙋ́щымъ ѿ сицева́гѡ ᲂу҆строе́нїѧ преще́нныѧ мꙋ́ки приглаго́лати до́лженъ. Да ѻ҆́ныѧ сꙋ́ще стѣна̀ разлꙋчи́тъ невино́внаго ѿ вино́внагѡ. Сїѐ повелѣва́ѧ бг҃ъ є҆зекі́илю, глаго́летъ: Сы́не человѣ́чь, стра́жа да́хъ тѧ̀ до́мꙋ і҆сра́илевꙋ. И҆ а҆́ще ви́диши ме́чь грѧдꙋ́щь, и҆ не проповѣ́си и҆̀мъ, прїи́метъ же нѣ́коего ѿ ни́хъ, дꙋ́шꙋ є҆гѡ̀ ꙗ҆́кѡ ѿ рꙋкѝ твоеѧ̀ взыщꙋ̀¹⁶⁶¹. Сицевꙋ̀ стѣ́нꙋ положѝ и҆ мѡѷсе́й себѣ̀, глаго́лѧ і҆сра́ильтѧнѡмъ: Внемлѝ себѣ̀, да не взы́щеши послѣ́довати и҆̀мъ, по є҆́же и҆стреби́ти и҆̀хъ ѿ тебѐ: быва́етъ бо и҆́же не ради́вѣйше мы́сли вне́млющымъ свое́й, по́слѣ ѿсѣче́нїѧ страсте́й, ꙗ҆́кѡ вѣ̑тви нѣ̑кїѧ возница́ти начина́ютъ ѡ҆́бразы дре́внихъ мечта́нїй: и҆̀мже а҆́ще да́стъ кто̀ мѣ́сто ча́стѣ напада́ти на влады́чество, и҆ не возбрани́тъ вхо́дъ и҆̀мъ, а҆́бїе воспрїи́метъ стра̑сти, подви́жническое себѣ̀ по побѣ́дѣ па́ки творѧ̀ житїѐ. Быва́етъ бо, что̀ и҆ ᲂу҆крощє́нныѧ стра̑сти, ра́внѡ ка́къ и҆ волы̀ привы́кшїе травꙋ̀ ꙗ҆́сти, чрез̾ нерадѣ́нїе ᲂу҆крощева́ющагѡ, па́ки содѣ́ловаютсѧ ди́кими, и҆ подо́бнꙋю ѕвѣрѧ́мъ воспрїе́млютъ жесто́кость. А҆ дабы̀ сїѐ не могло̀ бы́ть, глаго́летъ: не взы́щеши слѣ́довати и҆̀мъ, по и҆стребле́нїи и҆́хъ ѿ тебѐ, дабы̀ чрез̾ взыска́нїе дꙋша̀ навы́кши ѻ҆́ныхъ ᲂу҆слажда́тисѧ таковы́ми мечта́ньми, на прє́жнїѧ па́ки не возврати́ласѧ ѕлодѣѧ̑нїѧ. Сїѧ̑ вѣ́даѧ блаже́нный і҆а́кѡвъ быва́єма ꙗ҆́кѡ ви̑дима и҆ ча́стѣ размышлѧ́єма, такѡва́ѧ па́че вредѧ́тъ мы́сль, впечатлѣва́ѧ на не́й ꙗ҆снѣ́йшыѧ и҆ ꙗ҆́внѣйшыѧ ѡ҆́бразы сра́мныхъ мечта́нїй въ сѷки́махъ скрыва́етъ бо́ги чꙋжды̑ѧ¹⁶⁶². И҆́бо трꙋ́дъ и҆ждива́емый длѧ страсте́й сокрыва́етъ и҆ погꙋблѧ́етъ ѻ҆́ныѧ не на кра́ткое нѣ́кое вре́мѧ, но да́же до дне́шнѧгѡ днѐ, сі́есть, всѐ вре́мѧ. Поне́же всемꙋ̀ вѣ́кꙋ сораспростира́етсѧ сло́во сїѐ, ны́нѣ, настоѧ́щее всегда̀ зна́менꙋѧ вре́мѧ. Сѷки́ма же мы́шца сказꙋ́етсѧ, є҆́же ꙗ҆влѧ́етъ ѡ҆ страстѧ́хъ трꙋ́дъ. Тѣ́мже дае́тъ и҆ і҆ѡ́сифꙋ сѷки́мꙋ¹⁶⁶³ и҆зрѧ́дный на стра̑сти ра́тꙋющемꙋ въ ни́хъ трꙋ́дъ. И҆́бо си́ми, і҆а́кѡвъ, мече́мъ и҆ лꙋ́комъ, взѧ́ти глаго́лѧй сѷки́мꙋ, показꙋ́етъ, ꙗ҆́кѡ бра́нїю и҆ трꙋдо́мъ ѡ҆блада̀ стра̑сти, сокры́въ ѻ҆́ныѧ въ сѷки́мстѣй землѝ. Мни́тсѧ же, ка́кѡ проти́вно ꙗ҆влѧ́тисѧ, є҆́же бо́ги скры́ти въ сѷки́мѣхъ, и҆ є҆́же полага́ти і҆́дѡла въ та́йнѣ. То̀ ᲂу҆́бѡ є҆́сть похва́льно, є҆́же въ сѷки́мѣхъ скрыва́ти, сїе́ же ᲂу҆кори́зненно, є҆́же полага́ти і҆́дѡла въ та́йнѣ. Си́це ᲂу҆̀бо и҆ съ клѧ́твою положѝ сїѐ рекі́й, про́клѧтъ положи́вый і҆́дѡла въ та́йнѣ. Не сегѡ́ бо мо́щно въ землѝ всѧ́чески скры́ти, и҆ положи́ти въ та́йнѣ. И҆́бо въ землѝ сокры́тое, и҆ не ктомꙋ̀ чꙋ́вствꙋ ꙗ҆влѧ́емо, вре́менемъ и҆ ѿ па́мѧти и҆зглажда́етсѧ, а҆ є҆́же въ та́йнѣ положе́нное, ѿ дрꙋги́хъ мо́жетъ бы́ть сокрове́нно, ѿ самагѡ́же положи́вшагѡ зри́мо при́снѡ, па́мѧть воз̾ѡбновлѧ́етъ і҆дѡлоноси́мо ѻ҆́тай. Всѧ́кїй бо по́мыслъ сра́мный воѡбража́емъ въ мы́сли, и҆зва́ѧнно є҆́сть та́йнѡ: си́це ᲂу҆́бѡ сра́мъ є҆́сть на средꙋ̀ предлага́ти сицєвы́ѧ помышлє́нїѧ. Сомни́тельно ᲂу҆̀бо и҆ въ та́йнѣ полага́ти и҆зва́ѧнно, сомни́тельнѣйше же и҆ слѣ́довати и҆ и҆спы́товати ᲂу҆жѐ и҆згла́жєнныѧ ѡ҆́бразы, ᲂу҆до́бно мы́сли па́ки ᲂу҆клонѧ́ющейсѧ ко ѿри́нꙋтой стра́сти, и҆ сласте́й ча́шицꙋ вѣсѡ́въ, ѡ҆тѧгча́ющей да́же до землѝ. Сицево́ бо навыкнове́нїе добродѣ́тели є҆́сть нѣ́что ᲂу҆добопрекло́нное ѕѣлѡ̀, а҆́ще вознеради́тъ, ко сопрѡти́внымъ преклонѧ́ющисѧ. Сїе́ бо въ гада́нїи на́мъ зна́менати ѡ҆бы́че писа́нїе, є҆гда̀ глаго́летъ, землѧ̀, въ ню́же и҆́дете, передвига́ема є҆́сть въ передвига́нїи люде́й ꙗ҆зы́ческихъ. Вкꙋ́пѣ бо а҆́ще подви́гнетъ ко проти̑внымъ навыкнове́нїе и҆мꙋ́щи добродѣ́тели, сподви́жесѧ и҆ сїѧ̀. Землѧ́ бо передвига́ема є҆́сть. Тѣ́мже нꙋ́жно въ нача́лѣ не дава́ти привхо́да въ мы́сль мечта́нїѧмъ по́мыслѡвъ ѡ҆бы́кшихъ вреди́ти, нижѐ попꙋща́ти є҆́й нисходи́ти во є҆гѵ́петъ, ѿѻнꙋ́дꙋ бо ко а҆ссѷрі́анамъ низво́дитсѧ. А҆́ще бо въ помраче́нїе нечи́стыхъ по́мыслѡвъ сни́детъ мы́сль, сїе́ бо є҆гѵ́петъ сказꙋ́етсѧ, нꙋ́ждею про́чее и҆ нехотѧ́щаѧ ѿ страсте́й къ дѣ́ланїю влече́тсѧ. Сегѡ̀ ра́ди въ гада́нїи и҆ законополо́жникъ запреща́ѧ та́йное въ сла́сть вхожде́нїе, главꙋ̀ ѕмі́ѧ блюстѝ повелѣ̀, занѐ и҆ то́й пѧ́тꙋ блюде́тъ¹⁶⁶⁴. Томꙋ̀ ᲂу҆́бѡ намѣ́ренїе, а҆ семꙋ̀ дѣ́йствїе предлежи́тъ, є҆гѡ́же а҆́ще не воспрїи́метъ вложи́ти ᲂу҆грызе́нїемъ ꙗ҆́дъ не ᲂу҆до́бнѡ мо́жетъ. На́мъ же тща́нїе са́мое, сломи́ти прираже́нїе сла́сти. Се́й бо сокрꙋше́ннѣй, сла́бое є҆́сть дѣ́йствїе. А҆ посемꙋ̀ мо́жетъ бы́ть и҆ самѱѡ́нъ не заже́глъ бы и҆ноплеме́нныхъ ни̑вы, є҆́стьлибы ѡ҆братѧ̀ главы̑ лиси́цъ, не свѧза́лъ ѻ҆́шибъ ко ѻ҆́шибꙋ, (хвосты̀)¹⁶⁶⁵. Возмогі́й бо лꙋка́выхъ по́мыслѡвъ ѿ привхо́дѡвъ ᲂу҆разꙋмѣ́ти кова́рство, и҆ начина̑нїѧ презрѣ́въ, кото́рыѧ по́мыслы ᲂу҆хищре́ннѡ стара́ютсѧ пови́димомꙋ содѣ́лать начина̑нїѧ честны́ми, дабы̀ воспрїѧ́ти коне́цъ. И҆ ѿ сравне́нїѧ концє́въ, взаи́мнѡ съ дрꙋги́ми дока́зываетсѧ непристо́йность по́мыслѡвъ. Свѧза̀ ѻ҆́шибъ ко ѻ҆́шибꙋ¹⁶⁶⁶, и҆ ᲂу҆стро́и междꙋ̀ ѻ҆́нѣми свѣщꙋ̀ ѡ҆бличе́нїе. И҆ да ꙗ҆снѣ́е бꙋ́детъ глаго́лемое: въ двꙋ́хъ разсꙋжде́нїѧхъ ѿкро́ю рече́нное. Бꙋ́детъ бо сїѐ и҆ ѡ҆ про́чихъ ᲂу҆вѣре́нїе и҆́стинное. Мно́гажды ѿ тщесла́вїѧ прихо́дитъ по́мыслъ блꙋда̀, и҆ хотѧ̀ чєстны́ѧ показꙋ́етъ преддвє́рїѧ во а҆́дъ ведꙋ́щихъ пꙋте́й: ѻ҆дна́кѡ скрыва́етъ ги́бєльныѧ мѣста̀, и҆́миже въ та̑йныѧ селє́нїѧ сме́рти низво́дитъ слѣ́дꙋющихъ безразсꙋ́днѡ за ѻ҆́нымъ: предполага́етъ бо ѻ҆вогда̀ ᲂу҆́бѡ свѧще́нство, ѻ҆вогда́ же житїѐ и҆́нока соверше́нно. Мно́гихъ же длѧ по́льзы приходѧ́щихъ твори́тъ къ немꙋ̀, и҆ благохвале́нїе ѿ сло́ва же и҆ дѣѧ́нїѧ є҆гѡ̀ мечта́ти ᲂу҆готовлѧ́етъ (ᲂу҆строева́етъ). И҆ є҆гда̀ дово́льнѡ є҆го̀ си́ми прельсти́въ по́мыслы, ѿлꙋчи́тъ мно́гѡ ѿ є҆сте́ственнагѡ трезве́нїѧ, тогда̀ собесѣ́дованїе честны́ѧ си́рѣчь жены̀ пред̾изѡбрази́въ, къ согла́сїю на скве́рное дѣ́ло влече́тъ, со́вѣсти дерзнове́нїе въ кра́йнїй низводѧ̀ сра́мъ. И҆ та́къ, хотѧ́щїй ѻ҆́шибы свѧза́ти, да взира́етъ на концы̀ по́мыслѡвъ: тщесла́вїѧ ᲂу҆́бѡ мздꙋ̀, и҆ блꙋда̀ безче́стїе, и҆ є҆гда̀ сопротивлѧ́ющыѧсѧ ѻ҆боѧ̀ зри́тъ ꙗ҆́снѣ, тогда̀ да помышлѧ́етъ, что̀ сотвори́лъ самѱѡ́нъ, па́ки чревобѣ́сїѧ по́мыслъ коне́цъ и҆́мать блꙋда̀, по́мыслъ же блꙋда̀ коне́цъ и҆́мать печа́ли: а҆́бїе бо ᲂу҆ны́нїе и҆ печа́ль слѣ́дꙋетъ за побѣжде́ннымъ сицевы́ми по́мыслы, по и҆стребле́нїи да помышлѧ́етъ ᲂу҆́бѡ подвиза́ющїйсѧ не ѡ҆ наслажде́нїи бра́шенъ, нижѐ ѡ҆ ра́дости ро́скоши, но ѡ҆ конца́хъ ѻ҆бои́хъ, и҆ є҆гда̀ ѡ҆брѧ́щетъ ско́рбь послѣ́дꙋющꙋю за ѻ҆бои́ми, да вѣ́сть ѻ҆́шибомъ ѻ҆́шибъ свѧза́вый, и҆ ѡ҆бличе́нїе и҆ноплеме́нныхъ потреби́въ ни̑вы. А҆́ще ᲂу҆́бѡ толи́кагѡ вѣ́дѣнїѧ и҆ ѻ҆́пыта тре́бꙋетъ на стра́сти бра́нь, да разꙋмѣ́ютъ воспрїѧ́вшїи над̾ дрꙋги́ми нача́льство, коли́кагѡ и҆̀мъ потре́ба ра́зꙋма, да и҆ въ послꙋша́нїи сꙋ́щихъ, мꙋ́дреннѡ ведꙋ́тъ къ по́чести вы́шнѧгѡ зва́нїѧ, и҆ всемꙋ̀ къ бра́ни надлежа́щемꙋ ꙗ҆́внѣ да ᲂу҆́чатъ, ꙗ҆́кѡ не то́чїю ма́нїемъ рꙋ́къ на воздꙋ́сѣ побѣ́дꙋ ѡ҆бразова́ти, но и҆ на са́мой проти́вꙋ врага̀ бра́ни благовре́мєнныѧ наноси́ти є҆мꙋ̀ поражє́нїѧ, да не всꙋ́е простира́ютъ на воздꙋ́хъ рꙋ́цѣ, но самаго̀ ᲂу҆тѣснѧ́тъ противобо́рца: нага́гѡ бо по́двига, се́й по́двигъ (є҆́сть) трꙋ́днѣйшїй. Та́мѡ бо подви́жникѡвъ тѣлеса̀ преклонѧ́ютсѧ, ᲂу҆до́бнѡ могꙋ́щыѧ воста́ти: здѣ́ же дꙋ́шы низпа́даютъ, ꙗ҆̀же є҆ди́ною низложє́нныѧ, не ᲂу҆до́бь є҆́сть воздви́гнꙋти. А҆́ще же кто̀ ктомꙋ̀ пристра́стнѡ житїѐ гонѧ́щи, и҆ ѡ҆багре́нъ въ кровѝ, предпрїѧ́лъ бы хра́мъ бг҃а и҆з̾ разꙋ́мныхъ дꙋ́шъ созда́ти, всѧ́кѡ ᲂу҆слы́шитъ се́й: ꙗ҆́кѡ не ты̀ сози́ждеши мнѣ̀ до́мъ¹⁶⁶⁷, ꙗ҆́кѡ мꙋ́жъ крове́й є҆сѝ ты̀: ми́рнагѡ бо є҆́сть ᲂу҆строе́нїѧ созида́ти хра́мъ бг҃ꙋ. И҆ мѡѷсе́й прїе́мъ ски́нїю, внѣ̀ ста́на водрꙋзи́вый, ꙗ҆влѧ́етъ, ꙗ҆́кѡ далеча́йше ѿ бра́ннагѡ смѧте́нїѧ подоба́етъ бы́ти наста́вникꙋ, и҆ дале́че смѧте́ннагѡ жи́ти во́инства, къ ми́рномꙋ и҆ небра́нномꙋ пресели́вшꙋсѧ житїю̀. Но є҆гда̀ ѡ҆брѧ́щꙋтсѧ такѡвы́ѧ наста́вники, тре́бꙋютъ ᲂу҆ченикѡ́въ та́кѡ ѿве́ргшихсѧ себѐ, и҆ свои́хъ хотѣ́нїй, во є҆́же ничесѡ̀ бездꙋ́шна тѣ́ла и҆̀мъ носи́ти, и҆лѝ вещества̀ подлежа́щагѡ хꙋдо́жникꙋ. Да ꙗ҆́коже дꙋша̀ въ тѣ́лѣ дѣ́йствꙋетъ, є҆́же хо́щетъ, ничто́же тѣ́лꙋ противотворѧ́щꙋ, и҆лѝ, ꙗ҆́коже хꙋдо́жникъ въ веществѣ̀ своѐ показꙋ́етъ хꙋдо́жество, ничи́мже ѿ вещества̀ воспѧща́емый къ намѣ́ренїю своемꙋ̀: та́кѡ наста́вникъ ᲂу҆ченика́мъ добродѣ́тели вѣ́рꙋ да содѣ́лаетъ, и҆мꙋ́щїй повинꙋ́ющыѧсѧ, и҆ ничемꙋ̀ не прекосло́вѧщыѧ: є҆́же бо и҆спы́товати наста́вника ᲂу҆строє́нїѧ, и҆ и҆спы́товати хотѣ́ть повелѣ̑нїѧ, є҆́сть воспѧща́ти своемꙋ̀ предспѣ́ѧнїю. Не бо̀ соверше́нно, є҆́же благосло́вно и҆ вѣ́рно ꙗ҆влѧ́етсѧ неискꙋ́снꙋ, сїѐ и҆ и҆́стиннѡ благосло́вно є҆́сть. И҆на́кѡ бо хꙋдо́жникъ, и҆ и҆на́кѡ не хꙋдо́жный сꙋ́дитъ ѡ҆ принадлежа́щемъ къ хꙋдо́жествꙋ. И҆́бо за пра́вило то́тъ наꙋ́кꙋ, а҆ се́й правдоподо́бїе ᲂу҆потреблѧ́етъ, кото́рое рѣ́дкѡ сбыва́етсѧ и҆́стиною, а҆ мно́гажды наипа́че ѿстои́тъ ѿ правоты̀, въ пре́лести и҆мꙋ́щи сво́йство. Что́ бо, по ви́димомꙋ, ка́жетсѧ ме́ньше сегѡ̀, ка́къ то̀, когда̀ ко́рмщикъ во вре́мѧ непрѧма́гѡ ноше́нїѧ кораблѧ̀, по мнѣ́нїю зна́ющихъ прѧмо́е пла́ванїе, вели́тъ сѣ́сть на потоплѧ́емꙋю странꙋ̀, ѡ҆ста́вивъ возвы́шеннꙋю; и҆ вѣ́трꙋ на тꙋ̀ странꙋ̀ па́че стремѧ́щꙋсѧ и҆ ѡ҆браща́ющꙋсѧ, кото́рꙋю ѡ҆тѧготи́ть повелѣ́лъ; и҆ не присто́йнѣе ли бы каза́лось повелѣ́ть возвы́шеннꙋю стѣ́нꙋ ѡ҆бремени́ть, и҆ не переходи́ть на находѧ́щꙋюсѧ въ ѻ҆па́сности; Но ѻ҆дна́кѡ ко́рмщикꙋ па́че ввѣрѧ́ютсѧ плывꙋ́щїе, не́жели свои̑мъ мнѣ́нїѧмъ: и҆́бо ᲂу҆бѣжда́етъ и҆̀хъ нꙋ́жда, повинова́тисѧ и҆скꙋ́сствꙋ въ рꙋка́хъ вла́сть и҆мꙋ́щагѡ, хотѧ́ бы тако́е ᲂу҆бѣжде́нїе по ви́димомꙋ и҆ не и҆мѣ́ло своегѡ̀ собы́тїѧ. Оу҆̀бо ввѣ́рившїе и҆ны̑мъ своѐ спасе́нїе, ѡ҆ста́вивъ правдоподѡ́бнаѧ, и҆скꙋ́сствꙋ ведꙋ́щагѡ да повинꙋ́ютсѧ, свои́хъ по́мыслѡвъ ѻ҆́ныхъ вѣ́дѣнїе достовѣ́рнѣйшимъ сꙋдѧ́ще. И҆ пе́рвѣе ᲂу҆́бѡ ѿрица́ющїисѧ, ничесогѡ̀ внѣ̀ да не ѡ҆ставлѧ́ютъ, а҆на́нїи ᲂу҆боѧ́вшесѧ тѧгча́йшагѡ примѣ́ра, кото́рый ѿ человѣ̑къ возмнѣ́въ ᲂу҆таи́ти ѿдѣле́нїемъ (мзды̀)¹⁶⁶⁸, ѿ бг҃а въ татьбѣ̀ ѡ҆сꙋжде́нїе прїѧ́тъ. Но ꙗ҆́коже себѐ, та́кѡ и҆ своѧ̑ всѧ̑ да предадѧ́тъ, до́брѣ вѣ́дѣвше, ꙗ҆́кѡ ᲂу҆держа́нное ча́стѡ къ себѣ̀ мы́сль влекꙋ́щи, ко мно́гомꙋ ᲂу҆́бѡ привлече́тъ лꙋ́чшихъ: послѣди́ же и҆ всѧ́чески и҆зведе́тъ ѿ бра́тства. Сегѡ́ бо ра́ди житїѧ̑ дре́внихъ написа̀ дх҃ъ ст҃ы́й, да коего́ждо, ꙗ҆ково̀ ᲂу҆́бѡ начина́ющихъ житїѐ, ѿ свои́хъ примѣ́рѡвъ приведе́тъ къ и҆́стинѣ: ка́кѡ ᲂу҆́бѡ є҆лїссе́й, прилѣпи́вшись ᲂу҆чи́телю, ѡ҆ста́ви мі́ръ; Си́ла, глаго́летъ, въ волѣ́хъ: и҆ двана́десѧть сꙋпрꙋ̑гъ волѡ́въ пред̾ ни́мъ, и҆ закла̀ волы̀, и҆ и҆спечѐ ѧ҆̀ въ сосꙋ́дѣхъ воло́выхъ¹⁶⁶⁹. Сїе́ же теплотꙋ̀ ᲂу҆се́рдїѧ въ гада́нїѧхъ предлага́етъ. Не рече́ бо, прода́мъ сосꙋ́ды, волѡ́въ до́лжнымъ ᲂу҆стро́ю ѡ҆́бразомъ: нижѐ, ꙗ҆́кѡ прѡ́даннаѧ сїѧ̑ бо́льшꙋю потре́бꙋ принестѝ и҆мѣ́ѧхꙋ, помышлѧ́ше. Ве́сь же бы́въ жела́нїѧ влекꙋ́щагѡ є҆го̀ къ собесѣ́дованїю ᲂу҆чи́телѧ, презрѣ̀ ви̑димаѧ, и҆ па́че, ꙗ҆́кѡ ѿвлека̑ющаѧ ѿ пра́вагѡ и҆зволе́нїѧ, ѿрещи́сѧ си́хъ тща́шесѧ, вѣ́дѣвъ ме́дленность и҆ раска́ѧнїѧ винꙋ̀ мно́гажды. Ка́кѡ ᲂу҆́бѡ гдⷭ҇ь бога́томꙋ соверше́нство, є҆́же по бз҃ѣ предлага́ющи житїѧ̀, прода́ти и҆мѣ̑нїѧ, и҆ да́ти ни́щымъ повелѣ̀¹⁶⁷⁰, и҆ ничто́же себѣ̀ ѡ҆ста́вити, а҆́ще бы не вѣ́далъ, что̀ ѡ҆ставлѧ́емое та́коже всѧ́комꙋ развлече́нїю мы́слей быва́етъ вино́вно; Мню́ же, ꙗ҆́кѡ длѧ сегѡ̀ и҆ мѡѷсе́й, ѡ҆чи́стити себѐ хотѧ́щымъ вели́кою моли́твою, повелѣ́лъ всѐ и҆знꙋри́ти тѣ́ло, и҆ соверше́ннѡ ѿложи́ти попече́нїе ѡ҆б̾ и҆мѣ́нїѧхъ. Второ́е же, сро́дство и҆ сво́йство си́це да забꙋ́дꙋтъ, ꙗ҆́кѡ ника́коже ѡ҆ ни́хъ и҆мѣ́ти помышле́нїе. А҆́ще бо кра̑вы въ колесни́цꙋ впрѧжє́нныѧ кївѡ́та, забы́ти є҆стество̀ кївѡ́тъ сотворѝ: и҆ телѧ́тѡмъ и҆́хъ заключє́ннымъ въ до́мѣ, и҆ никомꙋ̀ сꙋ́щꙋ понꙋжда́ющꙋ, безжа́лобнѡ соверши́ша пꙋ́ть, не ᲂу҆клонѧ́ющесѧ на десна̑ѧ и҆лѝ шꙋ́ѧѧ, нижѐ рыка́нїемъ въ разлꙋче́нїи ча́дъ болѣ́знь ꙗ҆ви̑вшыѧ, но и҆ тѧ́жестїю кївѡ́та ѡ҆скорблѧ̑емыѧ и҆ наси́лїемъ є҆стества̀ вы́ею пони̑клыѧ, ꙗ҆́кѡ по пра́вилꙋ ше́ствꙋющыѧ ко пра́вꙋ ᲂу҆клонѧ́хꙋсѧ, побѣжде́ни чествова́нїемъ на ни́хъ лежа́щагѡ кївѡ́та. А҆́ще ᲂу҆́бѡ кра̑вы ѻ҆́ныѧ та́кѡ расположены̀ бы́ша, чесѡ̀ ра́ди и҆ и҆̀же ᲂу҆́мный кївѡ́тъ под̾ѧ́ти и҆мꙋ́щымъ, то́ежде не подоба́етъ твори́ти; Подоба́ше ᲂу҆́бѡ и҆ па́че, да не ѿ безслове́снагѡ є҆стества̀ въ потре́бныхъ дѣ́лѣхъ, слове́сною сла́вою побѣжде́нно ѡ҆бличи́тсѧ, є҆́же не твори́ти ѻ҆́наѧ ра́зꙋмомъ, ꙗ҆̀же по нꙋ́ждѣ творѧ́тъ безсловє́снаѧ. Мо́жетъ бы́ть и҆ і҆ѡ́сифъ сегѡ̀ ра́ди заблꙋжда́етъ на по́ли, поне́же въ и҆мена́хъ сро́дства и҆ска́ше соверше́нства предѣ́ла: потомꙋ̀ человѣ́къ жела́ющїй зна́ть и҆́стинꙋ, спра́шиваетъ ᲂу҆ негѡ̀ причи́ны заблꙋжде́нїѧ, и҆ ᲂу҆знае́тъ, что̀ причи́ною томꙋ̀ є҆́сть къ свои̑мъ пристра́стїе: и҆́бо не ре́клъ бы пастѝ и҆̀хъ, но и҆мѣ́ть ѡ҆ ни́хъ попече́нїе, а҆́ще не бы̀ и҆мѣ́лъ погрѣши́тельнагѡ ѡ҆ хи́трости сꙋжде́нїѧ. Глаго́летъ бо къ немꙋ̀: ѿидо́ша ѿсю́дꙋ, слы́шахъ бо и҆̀хъ глаго́лющихъ, по́йдемъ въ доѳаи́мъ¹⁶⁷¹: Доѳаи́мъ же сказꙋ́етсѧ, ѡ҆скꙋдѣ́нїе мно́гое, наꙋча́ѧ є҆щѐ заблꙋжда́ющаго въ тѣле́сныхъ сладостра́стїѧхъ. Поне́же и҆на́кѡ не мо́жно полꙋчи́ти соверше́нства, ра́звѣ ѡ҆ста́вивъ совсѣ́мъ сво́йственное тѣ́лꙋ пристра́стїе. И҆ а҆́ще бо ѡ҆ста́витъ кто̀ харра́нъ¹⁶⁷², є҆́же зна́менꙋетъ чꙋ̑вства: пещє́ры бо сказꙋ́ютсѧ, и҆ ѿ ю҆до́ли хеврѡ́ни и҆зы́детъ смире́нныхъ дѣ́лъ, и҆ ѿ пꙋсты́ни¹⁶⁷³, въ не́йже заблꙋжде́нїе быва́етъ взыскꙋ́ющемꙋ соверше́нства, въ дово́льное же ѡ҆скꙋдѣ́нїе не пресели́тсѧ, ни є҆ди́на по́льза є҆мꙋ̀ быва́етъ ѿ сꙋ́етнагѡ трꙋда̀, ра́ди скло́нности (любвѝ) къ сро́дствꙋ лиша́ющемꙋсѧ соверше́нства. Не то́чїю же, но и҆ гдⷭ҇ь запреща́ѧ бцⷣѣ марі́и въ сро́дницѣхъ и҆́щꙋщей є҆гѡ̀, и҆ лю́бѧщаго ѻ҆тца̀ и҆лѝ ма́ть па́че є҆гѡ̀, недосто́йна себѐ сꙋдѧ́щи¹⁶⁷⁴: привно́ситсѧ присто́йнѡ чрез̾ то̀ не и҆мѣ́ти сро́дническихъ свѧ́зей. По́слѣ же си́хъ и҆справле́нїе совѣ́товати подоба́етъ и҆̀мъ, є҆́стьли бы є҆щѐ нѣ́которые бы́ли вно́вѣ мѧте́жей (мі́ра) ᲂу҆дали́вшїесѧ, безмо́лвїе води́ти, и҆ не ча́стыми привхо́ды (по́мыслѡвъ) чрез̾ чꙋ̑вства быва́ємыѧ ра̑ны мы́слїю па́ки раздира́ти, нижѐ вє́тхимъ прегрѣше́нїй і҆́дѡламъ привноси́ти и҆ны̑ѧ ѡ҆́бразы: но ᲂу҆клонѧ́тисѧ ѿ прибавле́нїѧ но́выхъ, и҆мѣ́ти же всѧ́кое тща́нїе ко и҆зглажде́нїю дре́внихъ мечта́нїй. Притрꙋ́дно бо вно́вь ѿре́кшымсѧ безмо́лвїе: тогда́ бо па́мѧть и҆мѣ́ѧ вре́мѧ, всѧ́кꙋю воздвиза́етъ внꙋ́трь лежа́щꙋю нечистотꙋ̀, не пра́здна сꙋ́щи пе́рвѣе сїѐ твори́ти, ра́ди мно́жества и҆зли́шнихъ веще́й: и҆́мать бо съ трꙋдо́мъ и҆ поле́зное, ᲂу҆далѧ́ющи ᲂу҆́мъ вре́менемъ ѿ стꙋже́нїѧ сра́мныхъ по́мыслѡвъ. А҆́ще бо и҆̀мъ и҆змы́ти предлежи́тъ дꙋ́шꙋ, и҆ ѡ҆чи́стити ѿ всѣ́хъ скве́рнъ: ᲂу҆далѧ́тисѧ всѧ́чески ѿ веще́й до́лжны, и҆́миже скве́рна ᲂу҆множа́етсѧ, и҆ мно́гое благоразꙋ́мномꙋ да́ти ᲂу҆тѣше́нїе, и҆ дале́че ѿ раздража́ющихъ бы́ти, и҆ безразсꙋ́днѣйшихъ люде́й и҆збѣга́ти сожи́тельства, ᲂу҆едине́нїе лобыза́ющымъ любомꙋ́дрїѧ ма́терь. Є҆́сть же ᲂу҆до́бно па́ки тѣ́мже подпа́сти сѣтѧ́мъ, и҆́хже и҆зба́витисѧ вознепщева́ша, є҆гда̀ безбоѧ́зненнѡ въ смѧте́нныхъ наро́дѣхъ сопребыва́ти тща́тсѧ. Безполе́зно бо пресели́вшемꙋсѧ къ добродѣ́тели, въ тѣ́хже веща́хъ находи́ть ᲂу҆веселе́нїе, ꙗ҆̀же презрѣ́въ, ᲂу҆дали́сѧ. Привлека́тельна бо ѻ҆быкнове́ннѡ быва́етъ привы́чка: да не ѿ мно́гагѡ тща́нїѧ быва́емое безмо́лвїе, сра̑мныѧ начина̑нїѧ па́ки воз̾ѡбновѧ́тъ, и҆ па́мѧти забве́нныхъ ѕлы́хъ дѣ́лъ содѣ́лаютъ. Подо́бенъ: бо є҆́сть ᲂу҆́мъ неда́внѡ ѿ ѕло́бы ᲂу҆дали́вшихсѧ, тѣ́лꙋ по́слѣ до́лгїѧ болѣ́зни востава́ти нача́вшꙋ, є҆мꙋ́же и҆ ма́лый слꙋ́чай къ воспрїѧ́тїю болѣ́зни причи́ною быва́етъ, не ᲂу҆̀ въ си́лѣ ᲂу҆тверди́вшꙋсѧ держа́внѣй: ѡ҆скꙋдѣва́ютъ бо и҆ сегѡ̀ мы́слєнныѧ си̑лы, и҆ разбива́ютсѧ, ꙗ҆́коже подоба́етъ бы́ти, не па́ки тещѝ стра́сти ѻ҆бы́чай и҆мꙋ́щїѧ въ многолю́дствѣ смꙋще́нїемъ раздража́тисѧ. Сегѡ̀ ра́ди пребыва́ти внꙋ́трь ке́ллїи, дабы̀ ничегѡ̀ не пострада́ти ѿ всегꙋби́телѧ, хотѧ́щымъ мѡѷсе́й повелѣ̀, глаго́лющи: да не и҆зы́дете кі́йждо ѿ двере́й до́мꙋ ва́шегѡ, да не всегꙋби́тель ко́снетсѧ ва́съ. І҆еремі́а же сїѐ повелѣва́ти ѡ҆бы́че, є҆гда̀ глаго́летъ: Не и҆сходи́те на ни̑вы, и҆ на пꙋтѝ не ходи́те, поне́же ме́чь вра́жїй ѡ҆бита́етъ ѻ҆́крестъ¹⁶⁷⁵: до́блественныхъ бо подви́жникѡвъ дѣ́ло є҆́сть, є҆́же вкꙋ́пѣ ᲂу҆стꙋпа́ти врагѡ́мъ. А҆́ще же кто̀ бы́лъ бы ѿ немогꙋ́щихъ во́все бра́тисѧ, безѻпа́снѡ въ до́мѣ пребыва́етъ, ᲂу҆твержде́нїе безбѣ́дное ѿ безмо́лвїѧ себѣ̀ подаю́щи¹⁶⁷⁶. Тако́въ бѣ̀ і҆исꙋ́съ наѵи́нъ, ѡ҆ не́мже пи́сано є҆́сть: слꙋга́ же і҆исꙋ́съ (сы́нъ наѵи́нъ) ю҆́ноша не и҆схожда́ше и҆з̾ ски́нїи[в҃ Мѡѷс. гл. л҃г, ст. а҃і.. Вѣ́дѧше бо во ѻ҆́трочествѣ и҆сходѧ́щихъ, ѿ бра́тїй тѣ́ла и҆ пло́ти дрꙋгѡ́въ, ра́ди ᲂу҆́треннїѧ бра́ни ᲂу҆бива́емыхъ, наꙋча́сь и҆з̾ по́вѣсти ѡ҆ а҆́велѣ: не ме́ньше же и҆ ѿ і҆сто́рїи ѡ҆ ди́нѣ мо́щно є҆́сть соверше́ннѡ семꙋ̀ наꙋчи́тисѧ, ꙗ҆́кѡ ю҆́ныѧ вои́стиннꙋ и҆ же́нскїѧ мы́сли є҆́сть, све́рхъ своегѡ̀ состоѧ́нїѧ дѣ́ло предпринима́ти, и҆ ѡ҆ себѣ̀, ꙗ҆́кѡ дово́льныхъ, предразсꙋжде́нїемъ прельща́тисѧ. И҆́бо є҆́стьли бы ѻ҆на̀ безразсꙋ́днѡ не предпрїѧ́ла ᲂу҆зна́ть дрꙋги́хъ дома̑шнїѧ дѣла̀, ꙗ҆́кѡ могꙋ́щаѧ, то́ є҆сть, и҆ ника́коже помышлѧ́ла ѡ҆ тѣ́хъ и҆мѣ́ти ᲂу҆тѣше́нїе, не бы̀ безвре́меннѡ растли́сѧ крити́ческаѧ привлека́тельность дꙋшѝ, прельще́ннаѧ воѡбраже́нїемъ чꙋ́вствъ, не ᲂу҆̀ зако́ннымъ и҆ мꙋ́жественнымъ бесѣ́довавши сло́вомъ. Сїю̀ стра́сть сожи́тельствꙋющꙋю (ро́днꙋю) человѣ́кѡмъ вѣ́дѣвъ бг҃ъ, мнѣ́нїе ѡ҆ себѣ̀ глаго́лю, и҆ хотѧ́щїи и҆скоренѧ́ѧ сїѐ и҆сто́ргнꙋти ѿ навыкнове́нїѧ на́шегѡ, глаго́летъ къ мѡѷсе́ю: благочи́нны сотворѝ сы́ны і҆сра́илєвы. Ꙗ҆́кѡ є҆́же безразсꙋ́днѡ начина́ти бра̑ни све́рхъ си́лы, чꙋ́ждь є҆́сть благочи́нїѧ ѻ҆бы́чай. Тѣ́мже не подоба́етъ присоединѧ́ти себѐ пре́жде навыкнове́нїѧ гра̑дскимъ возмꙋще́нїѧмъ, но далеча́йше ᲂу҆бѣга́ти подоба́етъ, дале́че ѿ ѡ҆глаша́ющихъ звꙋ́кѡвъ представлѧ́ющихъ мы̑сли. Не мно́га бо є҆́сть по́льза ѿ веще́й ᲂу҆дали́вшымсѧ, и҆ пото́мъ занима́ющымсѧ ѡ҆б̾ ни́хъ слꙋ́хами: и҆ гра́дъ ѡ҆ста́вившымъ, дѣ́йствїй при вратѣ́хъ, ꙗ҆́коже лѡ́тъ, присѣдѣ́ти¹⁶⁷⁷, сꙋ́щагѡ та́мѡ и҆спо́лнєннымъ смꙋще́нїѧ: внѣ́ же по вели́комꙋ мѡѷсе́ю ᲂу҆далѧ́тисѧ подоба́етъ, да не то́чїю дѣла̀, но и҆ гла́си преста́нꙋтъ си́хъ, ꙗ҆́коже глаго́летъ: є҆гда̀ и҆зы́дꙋ и҆з̾ гра́да, прострꙋ̀ рꙋ́цѣ моѝ ко гдⷭ҇ꙋ, и҆ гро́ми преста́нꙋтъ¹⁶⁷⁸. Тогда́ бо и҆́стинное безмо́лвїе, є҆гда̀ не то́чїю дѣ́йства, но и҆ ꙗ҆̀же ѻ҆́крестъ и҆́хъ па́мѧти ᲂу҆пражнѧ́ющїисѧ, вре́мѧ подаю́тъ дꙋшѝ впечатлѣ́нныѧ ѡ҆́бразы зрѣ́ти, и҆ проти́вꙋ коегѡ́ждо подвиза́тисѧ, и҆ и҆зсѣца́ти и҆з̾ мы́сли. Привходѧ́щымъ же и҆ и҆ны́мъ воѡбраже́нїѧмъ, не мо́жно пре́жде бы́вшыѧ воѡбражє́нїѧ и҆згла́дити, когда̀ разсꙋжде́нїе є҆щѐ занима́етсѧ настоѧ́щими, и҆ трꙋ́дъ и҆́хъ ко и҆стребле́нїю страсте́й до́лженъ бы́ти тѧгча́йшїй, прїѧ́вшихъ си́лꙋ (страсте́й) ѿ вре́меннагѡ ᲂу҆множе́нїѧ, и҆ по подо́бїю и҆сто́чника непреста́ннымъ стремле́нїемъ, привходѧ́щими мечта́ньми зри́тельность дꙋшѝ наводнѧ́ющыѧ. Ꙗ҆́коже бо и҆сто́чника тече́нїе сꙋ́хо ви́дѣти хотѧ́щїи, съ намѣ́ренїемъ ви́дѣть нѣ̑которыѧ вє́щи позна́нїѧ достѡ́йныѧ въ не́мъ лежа́щыѧ, никако́й по́льзы не полꙋча́ютъ, и҆зчерпа́ѧ въ ѻ҆́номъ мѣ́стѣ во́дꙋ, въ кото́ромъ и҆ско́мое положе́ннымъ бы́ти мнѧ́тъ: потомꙋ̀ что̀ и҆зчерпа́емое мѣ́сто вдрꙋ́гъ наводнѧ́етсѧ и҆сто́чникомъ. Но когда̀ вы́шшее тече́нїе воспѧщено̀ бꙋ́детъ, без̾ трꙋда̀ и҆̀мъ дно̀ ꙗ҆влѧ́етсѧ, ѡ҆скꙋдѣ́вшей водѣ̀ само́й ѿстꙋпа́ющей, и҆ сꙋ́хꙋ и҆̀мъ подаю́щей зе́млю къ позна́нїю жела́емыхъ веще́й. Та́кѡ и҆ ᲂу҆праздни́ти и҆ дѣ́ѧтельное страсте́й воѡбраже́нїе ᲂу҆до́бнѡ быва́етъ, когда̀ ѻ҆нѝ и҆звнѣ̀ ничегѡ̀ чꙋ́вствамъ не приподаю́тъ: си́мъ же привносѧ́щымъ по подо́бїю тече́нїѧ, чꙋ́вства, не то́чїю трꙋ́дно, но и҆ всѧ́чески не возмо́жно ѡ҆чи́стить ᲂу҆́мъ ѿ толи́кагѡ волне́нїѧ. А҆́ще бо и҆ не стꙋжа́ютъ стра̑сти ра́ди ча́стыхъ собесѣ́дованїй, вре́мени движе́нїѧ не ѡ҆брѣта́юще, но ᲂу҆́бѡ въ та́йнѣ ѡ҆браща́ющесѧ, па́че возраста́ютъ, си́лꙋ свою̀ ѿ вре́мени прїе́млющыѧ. И҆ ꙗ҆́коже ча́стѡ попира́ема землѧ̀, а҆́ще и҆ те́рнїѧ и҆́мать, не и҆зпꙋща́етъ ᲂу҆́бѡ ѻ҆́ныѧ: возбранѧ́етъ бо є҆стествꙋ̀ попира́нїе но́гъ, глꙋбо́ки же въ нѣ́дрѣхъ сеѧ̀ (землѝ) корє́нїѧ просте́рши, крѣ́пки и҆ ѕѣлѡ̀ разцвѣ́тшыѧ, є҆гда̀ вре́мени попꙋща́ющꙋ восхожде́нїе полꙋча́етъ, произраста́етъ. Си́це и҆ стра̑сти ча́стыми собесѣ́дованїѧми возни́кнꙋти въ ꙗ҆вле́нїе возбранѧ́емы, крѣ́пльши быва́ютъ, и҆ безмо́лвїе дово́льнѡ пода́вши, со мно́гою си́лою настꙋпа́ютъ, тѧ́жкꙋю и҆ прибѣ́дственнꙋю въ нача́лѣ вознерадѣ́вшымъ ѡ҆ бра́ни проти́вꙋ и҆́хъ творѧ́ще бра́нь. Сегѡ̀ ра́ди и҆ проро́къ погꙋби́ти сѣ́мѧ ѿ вавѷлѡ́на повелѣва́етъ, ꙗ҆́кѡ є҆щѐ во влага́лищахъ чꙋ́вствъ сꙋ́ть ѡ҆́бразы, и҆стреби́ти совѣщава́ющи и҆́хъ, да не па́дши на зе́млю мы̑сли произрастꙋ́тъ, и҆ ѻ҆би́льными и҆ безполе́зными дождѧ́ми непреста́ннагѡ поꙋче́нїѧ ᲂу҆пое́нны, мно́гъ ѕло́бы принесꙋ́тъ пло́дъ. И҆́нъ же проро́къ и҆ ᲂу҆блажа́етъ не дожида́ющыѧ цвѣ́та страсте́й, но ᲂу҆ са́магѡ є҆щѐ сосца̀ присꙋ́щыѧ (прирождє́нныѧ) растлѣва́ющыѧ: блаже́нъ, глаго́лѧ, и҆̀же и҆ме́тъ и҆ разбїе́тъ младе́нцы твоѧ̑ ѡ҆ ка́мень¹⁶⁷⁹. То́же и҆ вели́кїй і҆́ѡвъ любомꙋ́дрствꙋѧ ѡ҆ себѣ̀, сицево̀ нѣ́что гада́тельствꙋетъ: въ водѣ̀ ᲂу҆́бѡ цвѣстѝ папи́рꙋ и҆ бꙋто́мꙋ (ро́дъ тра́въ) глаго́лющи, и҆ всѧ́комꙋ ѕла́кꙋ, лиши́вшемꙋсѧ и҆сто́чника, и҆зсꙋша́тисѧ, и҆ є҆́же, мѷрмико́леонъ (ле́въ мра́вїєвъ) поги́бе, ѿ неимѣ́нїѧ па́жити, сицево̀ нѣ́что зна́меновати ѡ҆бы́че. Восхотѣ́вый бо вели́кїй і҆́ѡвъ навѣ́тъ стра́сти показа́ти, соꙋразꙋмѣ̀ є҆ѧ̀ бесѣ́дꙋ, ѿ де́рзостнѣйшагѡ льва̀, и҆ ѡ҆ и҆́же всѣ́хъ слабѣ́йшагѡ мра́вїѧ сложи́въ и҆́мѧ. Приражє́нїѧ бо страсте́й ѿ ма́лыхъ начина́ютсѧ мечта́нїй, по примѣ́рꙋ мра́вїѧ, скры́тнѣ припо́лзающе: конє́чнаѧ же къ вели́кой возно́сѧтсѧ тѧ́жести, ꙗ҆́кѡ не ме́ньшее льва̀ нападе́нїѧ прилꙋчи́вшꙋсѧ пода́ти бѣ́дствїе. Тѣ́мже подоба́етъ подви́жникꙋ тогда̀ сража́тисѧ со страстьмѝ, є҆гда̀ ꙗ҆́кѡ мра́вїй прихо́дитъ, въ прима́нъ ма́лꙋю пи́щꙋ подме́щꙋщи. А҆́ще бо до льви́ныѧ дости́гнꙋтъ крѣ́пости прїитѝ, не ᲂу҆до́бь побѣжда́емы быва́ютъ, и҆лѝ пи́щꙋ и҆̀мъ не пода́ти. Пи́ща же и҆́хъ, ꙗ҆́кѡ ᲂу҆жѐ мно́жицею рече́сѧ, чрез̾ чꙋ́вства привходѧ́щїи чꙋ́вственныхъ (веще́й) ѡ҆́бразы. Сі́и бо пита́ютъ стра̑сти, ко́еждо мечта́нїе но воспрїѧ́тїи. воѡрꙋжа́юще проти́вꙋ дꙋшѝ. Сегѡ̀ ра́ди и҆ хра́мꙋ ѻ҆по́ны законополо́жникъ ᲂу҆стро́и, зна́менꙋѧ, ꙗ҆́кѡ подоба́етъ, ꙗ҆́кѡ хра́мъ чи́стꙋ свою̀ мы́сль блюстѝ хотѧ́щымъ¹⁶⁸⁰: ꙗ҆́коже та́мѡ сѣ́ть на ѻ҆́кнахъ, дабы̀ ничто̀ ѿ нечи́стыхъ не могло̀ вползтѝ, ᲂу҆стро́исѧ, та́кѡ и҆ чꙋ́вствамъ возбранє́нїѧ по́мыслѡвъ вплета́ти, не ᲂу҆до́бный бꙋ́дꙋщагѡ сꙋжде́нїѧ впо́лзающымъ нечи̑стымъ мечта́нїѧмъ загражда̑юща вхо́дъ. И҆ є҆да̀ не сегѡ́ ли ра́ди ѻ҆хозі́а разболѣ́сѧ, занѐ ѿ ѻ҆по́ны падѐ; Є҆́же бо воздаѧ́нїѧ словеса̀ во вре́мѧ и҆скꙋше́нїй скрыва́ти (ло́жно ᲂу҆́мствовати), низведе́нномꙋ ко страсте́мъ ѿ ѻ҆по́ны па́сти є҆́сть¹⁶⁸¹. Что́ же сеѧ̀ болѣ́зни є҆́сть трꙋ́днѣйше; тѣлесе́ бо є҆́сть болѣ́знь, є҆́же па́че є҆стества̀ и҆мѣ́ти стїхі́й равновѣ̑сїѧ, ѿ є҆ди́ныѧ си́лы въ и҆но́е па́че є҆стества̀ преложи́вшїѧсѧ: дꙋши́ же, є҆́же ᲂу҆клони́тисѧ пра́вагѡ по́мысла недꙋготво́рными побѣжде́нныѧ страстьмѝ. Сицевы̀ сѣ́ти видѣ́нїемъ, є҆́же слы́шати могꙋща́го соплетѐ соломѡ́нъ, глаго́лющи: Ѻ҆́чи твоѝ є҆гда̀ ᲂу҆́зрѧтъ чꙋждꙋ́ю, ᲂу҆ста̀ твоѧ̑ тогда̀ возглаго́лютъ сквє́рнаѧ¹⁶⁸². Сквє́рнаѧ глаго́лющи, ꙗ҆̀же по грѣсѣ̀ срѣ́титисѧ и҆мꙋ̑щаѧ во вре́мѧ воздаѧ́нїѧ, сїѧ̑ бо помы́шлєннаѧ съ подоба́ющимъ ᲂу҆строе́нїемъ, ᲂу҆де́рживаютъ всѧ́ко прибѣ́дственнѡ ѻ҆че́съ зрѣ́нїе: а҆́ще же и҆ ᲂу҆строе́нїе по́мысла, каково́мꙋ бы́ти подоба́етъ во вре́мѧ ѻ҆́но. Возлежи́ши бо, глаго́летъ, ꙗ҆́кѡ въ се́рдцѣ мо́рѧ, и҆ ꙗ҆́кѡ ко́рмчїй во мно́зѣй бꙋ́рѣ¹⁶⁸³. А҆́ще бо возмо́жетъ кто̀ во вре́мени съ разжиза́ющимъ зрѣ́нїемъ бра́нь и҆мѣ́ти, та́кѡ подви́жна себѐ сотвори́тъ въ преще́нныхъ наказа́нїѧхъ, ꙗ҆́коже въ мо́ри ѡ҆бꙋрева́емый: без̾ трꙋда́ бо побѣди́тъ бра́нь творѧ́щихъ, не ѡ҆щꙋща́ѧ наноси́мыхъ ра́нъ. Ꙗ҆́коже рещѝ: бїю́тъ мѧ̀, и҆ не ᲂу҆трꙋди́хсѧ, разсѣко́ша мѧ̀, а҆́зъ же не вѣ́дѣхъ. Ті́и бо бїѧ́хꙋ, глаго́летъ, и҆ посмѣва́тисѧ непщева́хꙋ, а҆́зъ же нижѐ заꙋше́нїѧ ѡ҆щꙋща́хъ. Стрѣ́лы бо младе́нєцъ бы́ша, нижѐ ко пре́лестѧмъ и҆́хъ ѡ҆брати́хсѧ, ꙗ҆́кѡ нижѐ бы́ти и҆̀хъ вмѣнѧ́ѧ. Та́кѡ и҆ дв҃дъ презира́ѧ сицевы́хъ проти́вникѡвъ глаго́лаше: ᲂу҆клонѧ́ющагѡсѧ ѿ менѐ лꙋка́вагѡ не позна́хъ, нижѐ, є҆гда̀ прихожда́ше, глаго́летъ, нижѐ, є҆гда̀ ᲂу҆далѧ́шесѧ, ѡ҆щꙋще́нїе прїѧ́хъ¹⁶⁸⁴. А҆ и҆́же нижѐ сїѐ са́мое свѣ́дый, ꙗ҆́кѡ чꙋ́вствамъ къ чꙋ́вствꙋємымъ ѡ҆бще́нїе ᲂу҆́бѡ є҆́сть мно́го, преле́сть же ѿ ѡ҆бще́нїѧ ᲂу҆до́бнѡ быва́етъ: и҆ не ꙗ҆́же ѿ си́хъ тщетꙋ̀ предви́дѧщїй, но небре́жнѡ вдава́ющїйсѧ и҆̀мъ, ка́кѡ во вре́мѧ пре́лести ᲂу҆разꙋмѣ́етъ навѣ́тъ, не бы́въ пре́жде наꙋче́нъ си́хъ разсꙋжде́нїю; ꙗ҆́кѡ бо чꙋ́вствамъ бра́нь быва́етъ съ чꙋ́вственными, и҆ да̑ни возлага́ютъ чꙋ̑вственнаѧ на побѣждє́нныѧ чꙋ̑вства. Сїѐ ꙗ҆́вно є҆́сть ѿ а҆ссѷрі́анъ съ содомлѧ́нами. Повѣствова́тельнѡ писа́нїе четыре́хъ царе́й а҆ссѷрі́йска ѧ҆зы́ка вво́дитъ къ пѧтѝ царє́мъ, и҆̀же ѻ҆́крестъ содо́ма, пе́рвѣе ᲂу҆́бѡ согла́сїе, и҆ сою́зы, и҆ жє́ртвы ми̑рныѧ на мо́рѣ сла́номъ: пото́мъ ра́бство пѧтѝ, на двана́десѧть лѣ́тъ: пото́мъ въ тре́тїемъ на́десѧть ѿстꙋпле́нїе¹⁶⁸⁵: въ четве́ртомъ же на́десѧть бра́нь возложе́ннꙋю ѿ четы́рехъ на пѧ́ть, и҆ плѣ́нныхъ взе́млющихъ и҆̀хъ¹⁶⁸⁶. И҆ повѣствова́нїе ᲂу҆́бѡ здѣ̀ коне́цъ и҆́мать. Мы́ же ѿ сеѧ по́вѣсти наꙋча́емсѧ, є҆́же въ на́съ, и҆ ꙗ҆̀же чꙋ́вствъ на чꙋ́вствєннаѧ бра̑ни. Кі́йждо бо и҆з̾ на́съ ѿ рожде́нїѧ да́же до двꙋна́десѧть лѣ́тъ не ᲂу҆̀ разсꙋжде́нїе ѡ҆чи́стивый, покорѧ́етъ без̾ разбо́рꙋ чꙋ̑вства чꙋ́вствєннымъ, ꙗ҆́коже влады́камъ слꙋжа́щыѧ къ повелѣва́ємымъ. Зрѣ́нїе ᲂу҆́бѡ ви̑димымъ, слы́шанїе же гласѡ́мъ, вкꙋ́съ же вла̑жнымъ, пара́мъ же ѡ҆бонѧ́нїе, ѡ҆сѧза́нїе же, тро́гати ѡ҆бы́кшымъ ѻ҆́ное чꙋ́вствєннымъ. Не могꙋ́щїй ѡ҆брѣстѝ ниеди́нагѡ воспѧще́нїѧ съ разсꙋжде́нїемъ воспрїѧ́ти ѻ҆́ныѧ по причи́нѣ ю҆́ношества, є҆гда́ же разсꙋ́докъ въ зрѣ́лость прїи́детъ, и҆ вре́дъ начне́тъ ѡ҆щꙋща́ти, ѡ҆ ѿринове́нїи а҆́бїе помышлѧ́етъ, и҆ бѣ́гствѣ ѿ сицева́гѡ порабоще́нїѧ. И҆ а҆́ще крѣ́пкїй бы́въ разсꙋжде́нїемъ сїю̀ ᲂу҆тверди́тъ мы́сль, свобо́денъ всѧ́чески пребыва́етъ жесто́кихъ и҆збѣжа́въ влады́къ. А҆́ще же немощнѣ́йшее бꙋ́детъ и҆мѣ́ть въ предпрїѧ́тїи разсꙋжде́нїе, па́ки плѣнє́нныѧ чꙋ̑вства преда́стъ побѣждє́нныѧ госпо́дствꙋ чꙋ́вственныхъ, и҆ ра́бство про́чее мꙋчи́тельное терпѧ́щыѧ кромѣ̀ кі́ѧлибо благі́ѧ наде́жды. Сегѡ́ бо ра́ди и҆ въ повѣствова́нїи пѧ́ть царѝ побѣжде́нные ѿ четы́рехъ, совверга́ютсѧ въ кла̑дѧзи смолѧны̑ѧ¹⁶⁸⁷: да мы̀ наꙋчи́мсѧ, ꙗ҆́кѡ чꙋ́вственными побѣжде́нные, ꙗ҆́кѡ во рва́хъ, и҆лѝ кла́дѧзѣхъ ка́ждымъ чꙋ́вствомъ, є҆́же по не́мъ (по чꙋ́вствѣ) ѡ҆браща́ютсѧ въ чꙋ́вственномъ. Ничесо́же па́че ви́димыхъ помышлѧ́юще про́чее, за є҆́же земны́ми свѧза́ти жела́нїе, и҆ наслажде́нїе, ꙗ҆̀же здѣ̀ веще́й возлюби́ти па́че, не́же ᲂу҆́мныхъ. Та́кѡ и҆ возлюби́вый господи́на своего̀ ра́бъ, и҆ женꙋ̀ и҆ дѣ́ти, ѿверга́ющїйсѧ и҆́стинныѧ свобо́ды ра́ди тѣле́снагѡ сродства̀, ра́бъ во вѣ́ки быва́етъ прове́рченное ши́ломъ и҆мѣ́ѧ ᲂу҆́хо¹⁶⁸⁸: да не є҆сте́ственною слꙋ́ха слꙋ́шающи сква́жиною прїи́метъ и҆ногда̀ сло́во свобо́ды, но ра́бъ пребꙋ́детъ всегда̀, возлюби́вый настоѧ̑щаѧ. Сегѡ̀ ра́ди и҆ рꙋ́кꙋ є҆́мшїѧ за ꙗ҆́тра жены̀, внегда̀ би́тисѧ двꙋ́мъ мꙋжє́мъ, ѿсѣца́ти зако́нъ повелѣ̀¹⁶⁸⁹. Ꙗ҆́кѡ бра́ни сꙋ́щей помыслѡ́въ ѡ҆ и҆збра́нїи мїрски́хъ и҆ небе́сныхъ бла̑гъ ѡ҆ста́вивъ и҆збра́нїе небе́сныхъ, ражда́ющихсѧ и҆ тлѣ́нїѧ сꙋ́щихъ є҆́млесѧ: ра́ди рожде́нныхъ бо, рожде́нїѧ ꙗ҆вѝ ве́щи. Ника́ѧ ᲂу҆́бѡ по́льза ѿрещи́сѧ веще́й, не пребыва́ющымъ въ разсꙋжде́нїи, но влекѡ́мымъ, и҆ ѡ҆ставлѧ́ющымъ по́мыслꙋ, и҆ за є҆́же ча́стѡ ко ѡ҆ста́вленнымъ возвраща́тисѧ ко ѻ҆́нымъ ꙗ҆влѧ́ющымъ пристра́стїе, ꙗ҆́коже жена̀ лѡ́това. Ѡ҆брати́вшисѧ бо стои́тъ, да́же до ны́нѣ примѣ́ръ невѣ́рꙋющымъ, превраще́нна въ сто́лпъ сла́ный¹⁶⁹⁰. Толи́ко бо ѻ҆бы́чай, є҆гѡ́же ѡ҆́бразъ сїѧ̑, не возвра́тнѡ хотѧ́щыѧ ᲂу҆дали́тисѧ, къ себѣ̀ ѡ҆браща́ющи. Чесо́же и҆ повелѣва́ющїй зако́нъ входѧ́щемꙋ во хра́мъ, по соверше́нїи моли́твы, не во ѻ҆́нꙋю возвраща́тисѧ две́рь, є҆́юже вни́де: но проти́вною и҆сходи́ти, не возвра́тнѡ є҆́же пра́во ше́ствїе творѧ́щꙋ: ра́звѣ є҆́же не подоба́етъ ᲂу҆си́лїю правоты̀ въ добродѣ́тели, проти́вными ᲂу҆клонѧ́тисѧ недоꙋмѣ́ньми. Ча́стыѧ бо къ тѣ́мъ, ѿ ни́хже и҆зыдо́хомъ, восклонє́нїѧ всѧ́чески ѿ ѻ҆быкнове́нїѧ къ за̑днимъ влекꙋ́тъ, и҆ пре́днее ѡ҆сла́бивъ стре́мленїе всѐ противꙋвлекꙋ́тъ, и҆ возврати́тисѧ ко дрє́внимъ ᲂу҆строева́ютъ ѕлы̑мъ. Лю́то во ѻ҆бы́чай ᲂу҆держа́ти ᲂу҆ себѐ, и҆ не попꙋсти́ти па́ки къ пе́рвомꙋ навыкнове́нїю воста́ти добродѣ́тели. Навыкнове́нїе бо ѿ ѻ҆бы́чаѧ, ѿ навыкнове́нїѧ же є҆стество̀ быва́етъ: є҆стество́ же преложи́ти, и҆ премѣни́ти трꙋ́дно. А҆́ще бо и҆ ᲂу҆клони́тсѧ ма́лѡ нꙋ́ждею, а҆́бїе къ себѣ̀ возвраща́етсѧ. Дви́жимое ᲂу҆́бѡ ѿ свои́хъ предѣ́лѡвъ, не всѧ́чески прехо́дитъ, а҆́ще не па́ки мно́гъ трꙋ́дъ ѻ҆́ное тѣ́мже пꙋте́мъ вспѧ́ть тещѝ ᲂу҆стро́итъ, ꙗ҆́кѡ ко ѡ҆ста́вленномꙋ ѿ ѻ҆бы́чаѧ па́ки прїитѝ. Зри́ бо ѻ҆бы́чаѧмъ послѣ́дꙋющꙋю дꙋ́шꙋ, ка́кѡ і҆́дѡламъ присѣди́тъ, прилѣпи́въ себѐ неѡбра̑знымъ вещества́мъ: и҆ при хотѧ́щемъ на высоча̑йшаѧ рꙋководи́ти сло́вѣ, не присѣдѧ́щи, ѿверга́етъ совосхожде́нїе, глаго́лющи: не могꙋ̀ воста́ти пред̾ тобо́ю, ꙗ҆́кѡ ѻ҆бы̑чнаѧ жє́нскаѧ мѝ сꙋ́ть¹⁶⁹¹. Ꙗ҆́же бо житє́йскимъ веща́мъ приꙋспокоева́ющаѧсѧ ѿ мно́га вре́мене дꙋша̀ присѣди́тъ, сами́мъ ᲂу҆́бѡ по себѣ̀ без̾ѡбра̑знымъ, хꙋдо́жествомъ же человѣ́ческимъ, ѡ҆́бразъ прїе́млющымъ. Ка́ѧ бо небез̾ѡбра́зна ве́щь бога́тство, и҆ сла́ва, и҆ прѡ́чїѧ житїѧ̀ ве́щы ничесо́же и҆мꙋ́щыѧ ꙗ҆́внѡ, нижѐ раздѣ́льнѡ, подо́бїемъ же ᲂу҆добоѻбма́нчивымъ представлѧ́ющыѧ и҆́стинꙋ въ принѧ́тїи по всѧ̑ дни̑ на себѧ̀ разли́чныхъ премѣне́нїй. Ѡ҆́бразъ же налага́емъ мы̀ веща́мъ, є҆гда̀ къ ничесомꙋ́же полє́знымъ вымышлѧ́емъ ви́дъ поле́зныхъ веще́й по́мысламъ человѣ̑ческимъ. Є҆гда́ бо нꙋ́жнꙋю тѣ́ла потре́бꙋ вы́мыслами въ непристо́йное распространѧ́емъ многоцѣ́нїе, пи́щꙋ ᲂу҆́бѡ безчи́сленными приправлѧ́юще сластьмѝ и҆ ᲂу҆готовлѧ́юще, ѻ҆дє́жды же къ ро́скоши и҆ ᲂу҆дово́льствїю любоче́стнѡ распещрѧ́юще. А҆́бїе ѡ҆сꙋжда́еми ѡ҆ сꙋетѣ̀ се́й, ꙗ҆́кѡ всꙋ́е и҆ тще́тнѡ, ма́лыми могꙋ́щей и҆сполнѧ́тисѧ потре́бѣ, сла́достными и҆ждиве́нїи пиры̀ ᲂу҆краша́юще, ѡ҆правда̑нїѧ ꙗ҆́кѡ ѡ҆ подоба́ющихъ твори́мъ. Что̀ и҆́но; Ра́звѣ без̾ѡбра́зными веществы̀ ѡ҆́бразъ ѡ҆бложи́ти любопри́мсѧ: до́брѣ же и҆ є҆́же, присѣдѧ́щꙋю си́мъ реко́хомъ сицевꙋ̀ дꙋ́шꙋ. Ꙗ҆́же бо ѡ҆ рече́нныхъ сицевы́ѧ ᲂу҆ себѐ сꙋждє́нїѧ ᲂу҆тверди́вшаѧ, прилѣпи́сѧ си̑мъ веще́мъ, ѻ҆бы́чаю про́чее, и҆ не и҆́стинѣ слꙋжа́щи: и҆ ѻ҆быкнове́нїи, ꙗ҆́кѡ мѣ́сѧчною ничистото́ю си́хъ ѡ҆сквернѧ́ющи є҆стество̀. Є҆́же бо сидѣ́ти, пра́здность благи́хъ, и҆ сластолю́бїе, писа́нїе здѣ̀ глаго́летъ: пра́здность ᲂу҆́бѡ, є҆гда̀ глаго́летъ, сѣдѧ́щихъ во тьмѣ̀, и҆ сѣ́ни сме́ртнѣй, свѧ́занныхъ нището́ю и҆ желѣ́зомъ¹⁶⁹²: тьма́ бо и҆ пꙋ́ты возбране́нїѧ дѣ̑ланїѧ сꙋ́ть: сластолю́бїе же, є҆гда̀ речѐ ѿ ѡ҆брати́вшихсѧ се́рдцемъ во є҆гѵ́петъ, и҆ дрꙋ́гъ ко дрꙋ́гꙋ глаго́лющихъ: воспомѧнꙋ́хомъ, є҆гда̀ сѣдо́хомъ над̾ котлы̀ мѧсны́ми, и҆ ꙗ҆до́хомъ мѧса̀ до сы́тости¹⁶⁹³. Вои́стиннꙋ бо над̾ котлы̀ сѣдѧ́тъ сластолю́бцы, сладостра́стнымъ и҆ непреста́ннымъ жа́ромъ жела́нїѧ возжиза́юще, сластолю́бїѧ же чревобѣ́сїе ма́терь. Сїѧ́ бо ражда́етъ сластолю́бїе, а҆ вско́рѣ и҆ мнѡ́гїѧ и҆ны̑ѧ стра̑сти. Ѿ сегѡ́ бо, ꙗ҆́кѡ ѿ ко́рене, восхо́дѧтъ произраста́ющыѧ прѡ́чїѧ стра̑сти, и҆ пома́лꙋ къ ро́ждшемꙋ (сластолю́бїю) присоедини́вшесѧ, до небесѐ досѧза́емыѧ и҆спꙋща́ютъ ѕлѡ́бы. Сребролю́бїе бо, и҆ ꙗ҆́рость, и҆ печа́ль, чревобѣ́сїѧ сꙋ́ть и҆зча̑дїѧ и҆ ѿра̑сли. Потре́ба бо пе́рвѣе бога́тства ѡ҆бжо́рливомꙋ вожделѣ́нїе при́снѡ пребыва́ющее и҆спо́лнити, а҆́ще и҆ сїѐ николи́же и҆сполнѧ́етсѧ. Къ возбранѧ́ющымъ же стѧжа́нїю си́хъ нꙋ́жно дви́гатисѧ ꙗ҆́рости. Печа́ль же неминꙋ́емѡ слѣ́дꙋетъ ꙗ҆́рости не прише́дшей въ дѣ́йство ра́ди не́мощи. И҆́бо на пе́рсехъ и҆ чре́вѣ ходѧ́щїй, є҆гда̀ ᲂу҆́бѡ и҆́мать твори̑тельныѧ сласте́й вещества̀, на чре́вѣ хо́дитъ, є҆гда́ же си́хъ не и҆́мать на пе́рсѣхъ, и҆дѣ́же ꙗ҆́рость. Сластолюби́вїи бо лиша́еми сласте́й гнѣ́ваютсѧ и҆ ѡ҆горча́ютсѧ. Тѣ́мже вели́кїй мѡѷсе́й сло́во сꙋ́дное возлага́етъ на пе́рсехъ свѧще́нника¹⁶⁹⁴, въ гада́нїи ꙗ҆влѧ́ющи, ꙗ҆́кѡ подоба́етъ та́йнѡ стремле́нїѧ ꙗ҆́ростныѧ стра́сти ᲂу҆правлѧ́ти по́мысломъ: сло́во бо сꙋ́дное, є҆́сть сло́во разсꙋжде́нїѧ. И҆ се́й ᲂу҆́бѡ сло́вомъ де́ржитъ стра́сть, несоверше́нъ бо є҆́сть: соверше́нный же мѡѷсе́й всѐ взе́млетъ ꙗ҆́ростное: не бо̀ сло́во но́ситъ, но са́мꙋ грꙋ́дь взе́млетъ. Взѧ́въ бо, глаго́летъ, мѡѷсе́й грꙋ́дь, ѿлꙋчѝ ю҆̀ возложе́нїе пред̾ гдⷭ҇емъ¹⁶⁹⁵. И҆ны́и же сꙋ́ть, и҆̀же нижѐ всю̀ ѿсѣ́кнꙋвъ ꙗ҆́рость, нижѐ сло́вомъ держа́ще стра́сть, но трꙋдо́мъ побѣжда́юще. Сі́и же сꙋ́ть, и҆̀же ма́лꙋю пе́рсь съ мы́шцею ѿе́млющїи: мы́шца бо трꙋда̀ и҆ дѣ́ланїѧ зна́менїе. Та́кожде и҆ є҆́же на чре́вѣ ходи́ти, сла́сть, и҆́стиннѣйшее подо́бїе є҆́сть, поне́же бо вина̀ сласте́й сїѐ (чре́во): и҆спо́лнившꙋсѧ бо чре́вꙋ, жела́нїѧ и҆ и҆ны́хъ страсте́й быва́ютъ крѣ́пльшыѧ, въ скꙋ́дости же сꙋ́щемꙋ, ми́рныѧ и҆ споко́йнѣйшыѧ: и҆ здѣ̀ ᲂу҆́бѡ є҆́сть разли́чїе предспѣва́ющагѡ и҆ соверше́ннагѡ. Мѡѷсе́й бо ᲂу҆́бѡ соверше́ннѡ сла́сть бра́шенъ ѿверга́ющи, и҆змы̀ ᲂу҆тро́бꙋ и҆ но́ги водо́ю¹⁶⁹⁶: ᲂу҆тро́бꙋ ᲂу҆́бѡ сла́сть, но́ги же восхожде́нїѧ и҆ преꙋспѣ́ѧнїѧ въ гада́нїи показꙋ́ющїй: преꙋспѣва́ющїй же, ꙗ҆̀же во чре́вѣ мы́етъ, не чре́во всѐ. И҆ сїе́ же: и҆змы́ же, и҆ є҆́же, мы́ютъ, мно́гое и҆́мꙋтъ разли́чїе. Ѻ҆́во ᲂу҆́бѡ є҆́сть произво́льно, ѻ҆́во же ѿ повелѣ́нїѧ быва́емое. Подоба́етъ бо соверше́нномꙋ самопроизво́льнымъ ᲂу҆се́рдїемъ дви́гатисѧ къ дѣѧ́нїѧмъ добродѣ́тели, преꙋспѣва́ющемꙋ же ᲂу҆вѣща́нїемъ наста́вника ᲂу҆вѣрѧ́емꙋ: ѕѣлѡ́ же прилѣ́жнѡ наблюда́ть сїѐ: ꙗ҆́кѡ ма́лꙋ грꙋ́дь всю̀ ѿе́млетъ, ᲂу҆тро́бꙋ же не взе́млетъ, мы́етъ же. Мꙋ́дрый бо всю̀ ꙗ҆́рость мо́жетъ ѿри́нꙋти, и҆ ѿсѣщѝ: ᲂу҆тро́бꙋ же ѿсѣщѝ не мо́жетъ. Нꙋ̑жныѧ бо бра́шна є҆стество̀ нꙋ́дитъ ᲂу҆потреблѧ́ти, и҆ возде́ржнѣйшаго: не ходѧ́щыѧ же пра́вымъ и҆ тве́рдымъ сло́вомъ дꙋшѝ, но блꙋ́дными поврежде́нныѧ сластьмѝ, сегѡ̀ ра́ди разгара́етсѧ чре́во. Поне́же а҆́ще и҆ вмѣсти̑лища тѣ́ла и҆сполнѧ́ютсѧ, пребыва́етъ жа́ждꙋщее вожделѣ́нїе, послѣ́дꙋетъ же за возгорѣ́нїемъ чре́ва па́сти стегнꙋ̀¹⁶⁹⁷. Немощна́ бо быва́етъ мы́сль къ произведе́нїю до́брыхъ дѣ́лъ, горѧ́щꙋ чре́вꙋ ѿ мно́жества бра́шенъ, и҆ дх҃о́вныѧ разорѧ́етъ трꙋды̀. Сїѧ́ бо стегно́мъ зако́нное въ гада́нїи предста́ви сло́во. Тѣ́мже ᲂу҆́бѡ сластолюби́вый на чре́вѣ хо́дитъ ве́сь, къ наслади̑тельнымъ ᲂу҆клонѧ́ющисѧ сласте́мъ: нача́вшїй же добродѣ́тельно житїѐ, тꙋ́къ чре́ва ѿе́млетъ, ᲂу҆тꙋчнѧ́ющихъ тѣ́ло пи́щей ѿрица́ющисѧ: преꙋспѣва́ющїй же, ꙗ҆̀же сꙋ́ть въ чре́вѣ, мы́етъ: соверше́нный же всѐ и҆змыва́етъ чре́во, и҆зли́шнѧѧ ѿ нꙋ́жныѧ потре́бы всѧ́чески ѿмета́ющи, ѕѣлѡ́ же прили́чно и҆́же на пе́рси и҆ чре́вѣ прилѣжи́тъ, сїѐ, по́йдеши: сла́сть бо не стоѧ́щымъ и҆ поко́ѧщымсѧ, но дви́жꙋщымсѧ и҆ смꙋще́нїѧ и҆спо́лнєннымъ сво́йственна є҆́сть, па́че же над̾ си́лою чревобѣ́сїѧ сво́йственнѣйше є҆́сть по́хотей движе́нїе блꙋ́дныхъ. Тѣ́мже и҆ є҆стество̀ сво́йства си́хъ показа́ти хотѧ́щи страсте́й, под̾ чре́вомъ ᲂу҆дѡ́бныѧ къ сои́тїю положѝ ᲂу҆́ды, бли́зости сво́йство показꙋ́ющи. А҆́ще бо немощна̀ є҆́сть сїѧ̑ стра́сть, ѿ недоста́тка превышележа́щагѡ немоществꙋ́етсѧ, а҆́ще же воспалѧ́етсѧ и҆ подви́гнꙋсѧ, ѿтꙋ́дꙋже рꙋково́дствꙋемꙋ и҆́мать си́лꙋ. Не то́чїю же си́хъ, чревобѣ́сїе пита́тельно є҆́сть, и҆ корми́тельно, но и҆ всѣ́хъ бла̑гъ и҆стреби́тельно быва́етъ, ѡ҆бдержа́щей бо се́й стра́сти, и҆ нача́ло воспрїѧ́вшей, па́дати и҆ и҆зтреблѧ́тисѧ благі̑ѧ ѻ҆бы̑чаи и҆́мꙋтъ, воздержа́нїе, цѣломꙋ́дрїе, мꙋ́жество, терпѣ́нїе, и҆ про́чыѧ всѣ̀ добродѣ́тели: сїе́ бо въ гада́нїи і҆еремі́а ꙗ҆́вѣ рекі́й: Ꙗ҆́кѡ разрꙋшѝ ѻ҆́крестъ стѣ́нꙋ і҆ерⷭ҇ли́ма а҆рхїмаги́ръ вавѷлѡ́нскїй¹⁶⁹⁸, стра́сть чревобѣ́сїѧ а҆рхїмаги́ра прорекі́й. Ꙗ҆́коже бо а҆рхїмаги́ръ всѧ́ко и҆́мать тща́нїе, чре́вꙋ рабо́тати, и҆ хꙋдо́жества и҆з̾ѡбрѣта́етъ, безчи̑сленныѧ сла̑сти ᲂу҆строѧ́ющи: та́кѡ чревобѣ́сїе всѧ́ко дви́жетъ ᲂу҆хищре́нїе, слꙋжа́щи ꙗ҆́же къ горта́ни сла́сти, ѿе́млетъ же и҆ низлага́етъ ѻ҆пло́тъ добродѣ́телей, бра́шенъ многоразли́чїе. Сла́сти бо и҆ приправлє́нїѧ, (бра́шенъ) ꙗ҆̀же ᲂу҆жѐ до́брѣ ᲂу҆крѣпле́нныѧ добродѣ́тели навѣ́ты и҆ разорє́нїѧ быва́ютъ, крѣ́пость ѻ҆́ныѧ и҆ тве́рдость потрѧса́ющыѧ, и҆ до́лꙋ низверга́ющыѧ. Ꙗ҆́коже и҆зли́шество и҆стреблѧ́етъ добродѣ́тєли, та́кѡ и҆ ᲂу҆мѣ́ренность ѻ҆быкнове́ннѡ разрꙋша́етъ ѻ҆пло́тъ ѕлы́хъ дѣ́лъ: ꙗ҆́коже бо стѣ́нꙋ і҆ерꙋсали́ма, ми́рныѧ дꙋшѝ вавѷлѡ́нскїй разорѝ а҆рхїмаги́ръ, сла̑сти плотскі̑ѧ хꙋдо́жествомъ ᲂу҆строе́нїѧ бра́шенъ возбꙋди́въ: та́кѡ и҆ сосꙋ́дъ длѧ кваше́нїѧ хлѣ́ба ꙗ҆чме́нна і҆зра́ильтѧнъ ѡ҆браща́ющисѧ, ски́нїи низложѝ мадїани́тѡвъ. Проста́ѧ бо пи́ща ѡ҆браща́ема и҆ преꙋспѣва́ющи на мно́зѣ, разрꙋша́етъ жела̑нїѧ блꙋда̀. Мадїани́ты бо страсте́й блꙋда̀ несꙋ́тъ зна́менїе: сі́и бо сꙋ́ть и҆̀же блꙋды̀ привве́дшїи і҆зра́илю, и҆ мно́гое мно́жество прельсти́вшїи ю҆́ношей. Ѕѣлѡ́ же прили́чно ски́нїи ᲂу҆́бѡ и҆́мать писа́нїе мадїани́тъ, стѣ́нꙋ же і҆ерꙋсали́мъ: всѧ́ бо ѡ҆бдержа́щаѧ добродѣ́тель, тверда̀ и҆ и҆звѣ́стна. Содержа́щаѧ же ѕло́бꙋ, ѡ҆́бразъ є҆́сть и҆ сѣ́нь, ѿ мечта́нїѧ ничи́мже разли́чествꙋющаѧ. Сегѡ̀ ра́ди градѡ́въ бѣ́гаша ст҃і́и и҆ собесѣ́дованїѧ мно́гихъ ᲂу҆клони́шасѧ па́че же ꙗ҆звоно́сныѧ болѣ́зни тлетво́рное вѣ́дѧще развра́тныхъ люде́й сожи́тїе. Сегѡ̀ ра́ди ничесѡ̀ прїе́млюще ѻ҆внопита́льны стѧжа́нїѧ ѡ҆ста́виша, ѿрица́ющесѧ є҆́же ѿ си́хъ попече́нїѧ (развлече́нїѧ). Сегѡ̀ ра́ди и҆лїа̀ ᲂу҆́бѡ ѡ҆ста́вивъ і҆ꙋде́ю, ѡ҆бита́ше въ карми́льстѣй горѣ̀¹⁶⁹⁹, пꙋсты́ннѣй и҆ ѕвѣре́й и҆спо́лненнѣй, и҆ кромѣ̀ дре́въ въ ᲂу҆тѣше́нїе пи́щи нечегѡ̀ неимꙋ́щей. Дово́льствовасѧ ᲂу҆́бѡ плода́ми си́хъ, потре́бꙋ є҆стества̀ и҆сполнѧ́ющи. Є҆лїссе́й же подо́бнѡ то́ежде и҆мѣ̀ житїѐ, съ и҆ны́ми благи́ми, и҆ є҆́же въ пꙋсты́нѣхъ ᲂу҆се́рднѡ жи́ти ѿ ᲂу҆чи́телѧ воспрїѧ́въ, и҆ і҆ѡа́ннъ же въ пꙋсты́ни ѡ҆бита́ющи і҆ѻрда́на, а҆крі́ды ꙗ҆дѧ́ше, и҆ ме́дъ ди́вїй, показꙋ́ющи мнѡ́гимъ, какова̀ є҆́сть безмѧте́жнаѧ потре́ба тѣлесѐ, и҆ поноша́ѧ и҆̀мъ попечи́тельное наслажде́нїе. Не́гли же и҆ воѻбщѐ сицевы́й мѡѷсе́й полага́етъ зако́нъ, ѡ҆ ма́ннѣ і҆зра́ильтѧнѡмъ заповѣ́дꙋѧ, є҆́же дово́льное дню̀ собира́ти то́чїю¹⁷⁰⁰: дне́внꙋ та́йнѡ бы́ти повелѣва́ѧ человѣ́ческꙋ житїю̀, и҆ не приꙋготовлѧ́емꙋ, почита́ѧ сїѐ за подоба́ющее слове́сномꙋ є҆стествꙋ̀, дово́льнымъ бы́ти прилꙋчи́вшимисѧ, про́чихъ же веще́й раздаѧ́телемъ и҆сповѣ́дати бг҃а. И҆лѝ тѣ̀, ко́и впре́дъ дѣ́лаютъ приꙋготовлє́нїѧ, ка́жꙋтсѧ не вѣ́рити про́мыслꙋ и҆ благода́ти бж҃їей, ꙗ҆́кѡ не всегда̀ и҆сточа́ющей на человѣ́ки при̑сныѧ да́ры. И҆ вкра́тцѣ рещѝ, сегѡ̀ ра́ди всѝ ст҃і́и, и҆́хже не бѣ̀ досто́инъ ве́сь мі́ръ, ѡ҆ста́виша вселе́ннꙋю, въ пꙋсты́нѧхъ скита́ющесѧ и҆ въ гора́хъ и҆ въ верте́пахъ, и҆ въ про́пастехъ земны́хъ, и҆ проидо́ша въ ми́лѡтехъ, и҆ въ ко́зїихъ ко́жахъ, лише́ни, скорбѧ́ще, ѡ҆ѕло́блени¹⁷⁰¹, ѕлонра́внѣйшихъ человѣ́ческихъ ѿбѣга́юще ѕло́бъ, и҆ ꙗ҆̀же во гра́дѣхъ волнꙋ́ющихъ и҆ премѣнѧ́ющихсѧ веще́й. Ꙗ҆́кѡ да не ᲂу҆си́лїемъ стремле́нїѧ, ꙗ҆́коже ѿ наси́лїѧ и҆сто́чника, внесены̀ бꙋ́дꙋтъ въ неразлича́ющее мно́гихъ веще́й смѣше́нїе, ра́дꙋющесѧ же сожи́тїю со ѕвѣрьмѝ, ꙗ҆́кѡ ѿ си́хъ вре́дъ ме́ньшїй, не́жели ѿ человѣ̑къ, быва́етъ: сꙋди́ша ᲂу҆̀бо, па́че человѣ̑къ ꙗ҆́кѡ навѣ́тныхъ бѣ́гати, ввѣрѧ́тисѧ же ѕвѣрє́мъ ꙗ҆́кѡ дрꙋгѡ́мъ: ниже́ бо сі́и ᲂу҆́чатъ ѕло́бѣ, ѻ҆нѝ и҆ добродѣ́тели чꙋдѧ́тсѧ, и҆ ѻ҆́нꙋю чтꙋ́тъ. Си́це ᲂу҆́бѡ данїи́ла погꙋби́ша, ꙗ҆́коже мнѣ́ша, человѣ́цы, спасо́ша же львы̀, и҆̀же ѿ не́нависти непра́веднѡ ѡ҆сꙋжде́нна, сі́и сохра́нше, и҆ пра́вдꙋ въ человѣ́цѣхъ без̾ мзды̀ ѡ҆ста́вленнꙋю, сі́и пра́вый ѡ҆ непра́веднѡ ѡ҆сꙋжде́нномъ сꙋ́дъ возвѣсти́вшїи, и҆ бы́сть добродѣ́тель мꙋ́жа человѣ́кѡмъ ᲂу҆́бѡ не́нависти и҆ вражды̀ слꙋ́чай, ѕвѣрє́мъ же стыдѣ́нїѧ и҆ чествова́нїѧ вина̀. Є҆ли́цѣмъ ᲂу҆́бѡ любо́вь къ лꙋ́чшей жи́зни привсели́сѧ, поревнꙋ́имъ добродѣ́телємъ ст҃ы́хъ, и҆ ᲂу҆дали́вшесѧ повелѣ́нїй ра́бскихъ тѣ́ла, свобо́дꙋ го́нимъ: и҆ ѿ зижди́телѧ въ пꙋсты́нѣ ѡ҆ста́вленнаго ди́вїѧго ѻ҆сла̀¹⁷⁰², и҆ ᲂу҆коре́нїѧ тре́бꙋющаго да́ни, не слы́шащаго, и҆ посмѣва́ющагосѧ мно́гꙋ наро́дꙋ гра́да, а҆́ще и҆ до ны́нѣ бре́мѧ носи́ти, ᲂу҆стро́ихомъ того̀, страсте́мъ и҆ ѕло́бамъ подпрѧ́гнꙋвши, но ны́нѣ ᲂу҆́бѡ разрѣши́мъ ѿ ᲂу҆́зъ, а҆́ще и҆ прекосло́вѧтъ, не є҆стество́мъ госпо́дїе, но ѿ ѻ҆бы́чаѧ госпо́дство притѧжа́вшїи: всѧ́чески слꙋ́шающе, не ѧ҆зы́комъ є҆ди́нѣмъ, и҆ просты́мъ гла́сомъ, но расположе́нїемъ глаго́люще на́мъ: ꙗ҆́кѡ гдⷭ҇ь є҆го̀ тре́бꙋетъ¹⁷⁰³, а҆́бїе же по́слютъ ѧ҆̀, да ᲂу҆кра́шенный а҆по́стольскими ѻ҆де́ждами, колесни́ца сло́ва бꙋ́детъ: и҆лѝ на пре́жней ѡ҆ста́вленный па́жити, созадѝ всѧ́кагѡ цвѣтꙋ́щагѡ да и҆́щетъ, є҆́же є҆́сть процвѣта́ющымъ бж҃е́ственнагѡ писа́нїѧ слѣ́дꙋѧ глаго́ламъ, рꙋководи́тисѧ въ чꙋ́дное житїѐ, и҆ пи́щꙋ вкꙋ́пѣ и҆ ᲂу҆веселе́нїе плодоносѧ́щее мно́гое. Вкꙋ́пѣ же и҆ и҆ска́ти подоба́етъ, ка́кѡ созадѝ всѧ́кагѡ цвѣтꙋ́щагѡ и҆́щетъ, и҆́же въ пꙋсты́ни ѡ҆ста́вленный ѿ бг҃а ди́вїй ѻ҆се́лъ, пи́щꙋ и҆мѣ́ѧ пꙋсты́ннꙋ, и҆ сѣ́нь и҆мꙋ́щїй, сла́ность сла́ности и҆ пꙋсты́ни, ꙗ҆́кѡ бо́льшею ча́стїю не совсѣ́мъ къ произрастѣ́нїю ѕла́ка сꙋ́щей ᲂу҆до́бнѣй; А҆́ще не ᲂу҆́бѡ кто̀ рече́тъ, не и҆мѣ́ти страсте́й, дово́льно є҆́сть, и҆ска́ти видѣ́нїѧ въ бж҃е́ственныхъ словесѣ́хъ, ко и҆зсꙋше́нїю вла́ги страсте́й. Ѡ҆ста́вимъ житє́йскїѧ вє́щи, и҆ ко бла́гамъ дꙋшѝ возни́кнемъ. Доко́лѣ въ дѣ́тскихъ ᲂу҆веселе́нїихъ пребыва́емъ, мꙋ́жественнагѡ николи́же воспрїе́млюще мꙋдрова́нїѧ; Доко́лѣ тща́нїемъ сла́бльше ѻ҆трокѡ́въ дѣ́емъ, нижѐ ѿ ни́хъ въ преспѣ́ѧнїе бо́льшихъ дѣ́лъ рꙋководи́ми быва́емъ; Ѻ҆нѝ премѣнѧ́ѧ во́зрасты, и҆ ᲂу҆строє́нїѧ ко и҆гра́мъ премѣнѧ́ютъ, и҆ є҆́же къ вещества́мъ ᲂу҆до́бнѡ ѡ҆ставлѧ́ютъ пристра́стїе¹⁷⁰⁴. Ка́рїи бо не́гли и҆̀мъ и҆ лоды́жки и҆ шары̀, и҆гры̀ є҆́сть вещества̀, и҆ къ си̑мъ пристра́стны сꙋ́ть, до́ндеже є҆щѐ несоверше́нно мꙋдрова́нїе и҆́мꙋтъ, и҆ чє́стна непщꙋ́ютъ сїѧ̑: а҆́ще же преꙋспѣ́ѧвъ кто̀ бꙋ́детъ мꙋ́жъ, ѿве́ргши ѻ҆́наѧ, и҆ ѡ҆ дѣ́лѣхъ со мно́гимъ тща́нїемъ прилѣжа́ти бꙋ́детъ: мы́ же пребы́хомъ въ ѻ҆́трочествѣ, ᲂу҆дивлѧ́ющесѧ достѡ́йнымъ и҆гры̀ и҆ смѣ́ха, и҆ коснꙋ́тисѧ тща́нїѧ лꙋ́чшихъ веще́й, и҆ воспрїѧ́ти по́мыслъ мꙋжє́мъ подоба́ющїй ѡ҆ста́вивъ, въ земны́хъ ᲂу҆слажде́нїихъ пребыва́емъ, смѣ́хъ подаю́ще разсꙋжда́ющымъ вє́щи по слѣ́дствїю є҆стества̀. Ꙗ҆́коже бо сра́мно мꙋ́жа соверше́нна зрѣ́ти въ пе́рсти сѣдѧ́ща, и҆ на песцѣ̀ ᲂу҆тѣ̑хи дѣ̑тскїѧ пи́шꙋща, си́це сра́мно, и҆ мно́гѡ сра́мнѣе є҆́сть наслажде́нїе вѣ́чныхъ бла̑гъ содѣ́ловающихъ, въ пе́рсти валѧ́ющихсѧ зрѣ́ти, непристо́йностїю предначина́нїй посрамлѧ́ющихъ соверше́нство ѡ҆бѣтова́нїѧ. Сегѡ́ же на́мъ вино́вно, ꙗ҆́коже ѡ҆бы́че, є҆́же ничесо́же помышлѧ́ти бо́льши зри́мыхъ, нижѐ ѿ сравне́нїѧ скꙋ́дости настоѧ́щихъ, преимꙋ́щество позна́ти ꙗ҆̀же та́мѡ бла̑гъ, пре́жде ѡ҆сїѧ́ннымъ на́мъ ѿ свѣ́тлости ꙗ҆̀же здѣ̀ мни́мыхъ честны́хъ ѡ҆бдержа́тисѧ, и҆ къ си̑мъ пригвожда́ти вожделѣ́нїе. При́снѡ бо за неимѣ́нїемъ лꙋ́чшихъ, почита́ютсѧ хꙋ̑ждшаѧ, ѻ҆́ныхъ наслѣ́дствꙋюще мѣ́сто. Ꙗ҆́кѡ а҆́ще бы и҆мѣ́ли бы́хомъ высоча́йшее ѡ҆ бꙋ́дꙋщихъ понѧ́тїе, не бы̀ къ си̑мъ зїѧ́юще пребы́хомъ. Начне́мъ ᲂу҆̀бо ᲂу҆странѧ́тисѧ настоѧ́щихъ, презира́имъ стѧжа̑нїѧ, и҆ бога́тство, и҆ всѧ̑ потоплѧ́ющаѧ по́мыслъ, и҆ погрꙋже́нъ низносѧ̑щаѧ ѻ҆́ный: ѿри́немъ ѡ҆бремене́нїе, и҆ да ма́лѡ возни́кнетъ кора́бль, и҆зве́ржемъ ѡ҆бꙋрева́еми и҆ ѿ сосꙋ́дѡвъ мнѡ́гїѧ, дабы̀ ко́рмчїй ᲂу҆́мъ, съ соплывꙋ́щими спасти́сѧ мо́глъ по́мыслы. А҆́ще бо на мо́ри плывꙋ́щїе, ѡ҆бꙋрева́еми презира́ютъ и҆мѣ́нїе, и҆ тѧ́жесть свои́ми рꙋка́ми въ мо́ре вверга́ютъ, за второ́е и҆мѣ́нїе жи́знь сꙋдѧ́ще: и҆ да не напо́лненный кора́бль бѣ́дствꙋетъ тѧ́гостїю бре́мене подавлѧ́емый, ѡ҆блегча́ютъ се́й, лꙋ̑чшаѧ почтѝ и҆з̾ веще́й во глꙋбинꙋ̀ ме́щꙋще. Чесѡ́ же ра́ди и҆ мы̀, ра́ди лꙋ́чшїѧ жи́зни, не презира́емъ влекꙋ̑щаѧ въ бе́зднꙋ дꙋ́шꙋ; чесѡ̀ ра́ди не мо́жетъ стра́хъ бж҃їй, є҆ли́кѡ мо́жетъ мо́рѧ стра́хъ; Ті́и вожделѣ́юще привре́менныѧ жи́зни, тщетꙋ̀ кꙋ́пли не за вели́ко сꙋ́дѧтъ: мы́ же вѣ́чныѧ жи́зни вожделѣ́ти глаго́лющесѧ, нижѐ вре́мєннаѧ презира́емъ: но жела́емъ па́че съ бре́менемъ поги́бнꙋти, не́жели спасти́сѧ, ѻ҆́ныхъ лиша́еми. Совлече́мъ, молю̀, всѧ̑: на̑гъ бо стои́тъ проти́вникъ. Ниже́ бо борю́щїисѧ ѡ҆блече́нни бо́рютсѧ, наги́хъ ѻ҆́ныхъ на по́прище подви́жническїй выво́дитъ зако́нъ: а҆́ще жа́ръ, и҆лѝ а҆́ще хла́дъ, та́кѡ вхо́дѧтъ ѻ҆дє́жды внѣ̀ ѡ҆ставлѧ́юще. А҆́ще же кто̀ ѿ ѻ҆́ныхъ ѡ҆бнаже́нїѧ ѿрече́тсѧ, и҆ по́двига ѿрече́сѧ: мы́ же подвиза́тисѧ заповѣ́дꙋеми, и҆ со врага́ми мно́гѡ чꙋ́вственныхъ ѕѣ́льнѣйшими борю́щїисѧ, не то́чїю не совлекли́сѧ, но и҆ безчи́сленныѧ на ра́менахъ бремена̀ носѧ́ще покꙋша́емсѧ подвиза́тисѧ, мнѡ́гїѧ врагѡ́мъ проти́вꙋ сами́хъ себѐ подаю́ще прїѧ̑тїѧ. Ка́кѡ бо бра́тисѧ бꙋ́детъ къ дꙋховѡ́мъ ѕло́бы, вожделѣ́ющїй стѧжа́нїй, ѿвсю́дꙋ ᲂу҆до́бнѡ заꙋша́емый; ка́кѡ же бра́тисѧ бꙋ́детъ проти́въ дꙋ́ха сребролю́бїѧ, ѡ҆блада́емый бога́тствомъ; ка́кѡ же потече́тъ на нагі̑ѧ всѧ́кагѡ попече́нїѧ бѣ́сы, безчи́сленными попече́ньми свѧ́занный, бж҃е́ственномꙋ глаго́лющꙋ писа́нїю: на́гъ побѣ́гнетъ въ то́й де́нь¹⁷⁰⁵; Нагі́й, не ѻ҆де́ждами многошве́нными попече́нїѧ жите́йскихъ дѣ́лъ свѧ́занный: нагі́й, не стѧжа́нїй и҆ бога́тства многовеще́ственными къ тече́нїю воспѧща́емый по́мыслы: не ᲂу҆до́бь плѣни́мь бо, и҆лѝ не плѣни́мь, навѣ́тꙋющымъ є҆́сть нагі́й. Ꙗ҆́кѡ а҆́ще бы бы́лъ на́гъ вели́кїй і҆ѡ́сифъ, не ѡ҆брѣла́ бы за ꙗ҆̀же ᲂу҆хвати́ти є҆гѵ́птѧнка, ꙗ҆́коже глаго́летъ бж҃їе сло́во, ꙗ҆́кѡ ᲂу҆хватѝ є҆го̀ за ри̑зы, глаго́лющи: лѧ́зи со мно́ю¹⁷⁰⁶. Ри̑зы же сꙋ́ть вє́щи тѣлє́сныѧ, чрез̾ ни́хже влече́тъ держа́щаѧ сла́сть: и҆ ѡ҆бдержи́момꙋ си́ми нꙋ́ждно борю́щꙋсѧ привлека́тисѧ взе́млющими. Се́й ᲂу҆́бѡ цѣломꙋ́дрїѧ подви́жникъ, ꙗ҆́коже ви́дѣ и҆ ѿ нꙋ́ждныѧ потре́бы тѣ́ла влеко́ма себѐ наси́лїемъ къ ѻ҆бще́нїю и҆ соедине́нїю сла́сти, ᲂу҆зна́въ, ꙗ҆́кѡ наго́мꙋ подоба́ше сопребыва́ти могꙋ́щей ᲂу҆держа́ти госпожѣ̀, и҆ наси́ловати, ѡ҆ста́вивъ ри́зы ᲂу҆бѣжѐ, и҆ и҆зы́де во́нъ, ꙗ҆́коже въ раю̀, добродѣ́телїю на́гъ ходѧ́щїй въ подража́нїе первосозда́ннагѡ, и҆́же и҆зрѧ́днꙋю че́сть ѿ бг҃а наготꙋ̀ прїѧ́въ и҆мѣ̀, доко́лѣ чрез̾ преслꙋша́нїе потре́бꙋ ѻ҆де́ждъ воз̾имѣ̀. Доко́лѣ ᲂу҆́бѡ подвиза́лсѧ со врагѝ совѣ́тꙋющими разрꙋши́ти за́повѣдь бж҃їю, на́гъ ꙗ҆́кѡ подви́жникъ на по́прищѣ бы́сть: побѣжде́нъ же и҆ боѧ́зненъ бы́въ по достоѧ́нїю ѡ҆бле́ксѧ, наготꙋ̀ съ подви́жническимъ чи́номъ ѿложи́въ. Сегѡ̀ ра́ди при́точникъ къ ᲂу҆стро́ителю по́двигѡвъ сло́во глаго́летъ: возмѝ ри́зꙋ є҆гѡ̀, прїи́де бо¹⁷⁰⁷. Доко́лѣ ᲂу҆̀бо бѣ̀ внѣ̀ по́прища, до́брѣ ри̑зы не подвиза́ющихсѧ ᲂу҆потреблѧ́ше, подви́жническое мꙋ́жество ри́зами чꙋ́вственными прикрыва́ющи. Но поне́же на по́двигъ прїи́де, взе́мли ри́зꙋ є҆гѡ̀: на́гꙋ бо подвиза́тисѧ подоба́етъ, па́че же не на́гꙋ то́чїю, но и҆ є҆ле́емъ ѡ҆блїѧ́ннꙋ. Є҆́же бо ѡ҆бнаже́ннꙋ бы́ти, не ᲂу҆добое́млема твори́тъ проти́вникꙋ подви́жника: є҆ле́й же, а҆́ще и҆ схва́ченъ бꙋ́детъ когда̀, и҆збѣ́гнꙋти и҆з̾ ѡ҆б̾ѧ́тїѧ ᲂу҆строѧ́етъ. И҆ сегѡ̀ ра́ди проти́вники пе́рстїю ѡ҆сыпа́ти тща́тсѧ проти́вникѡвъ, да пе́рстїю ско́льзкость є҆ле́а ѡ҆жесточи́въ, ᲂу҆добое́млемы ты̑ѧ къ поима́нїю содѣ́лаютъ. А҆ є҆́же є҆́сть та́мѡ пе́рсть, сїѐ въ на́шемъ по́двигѣ зємны́ѧ вє́щи: и҆ є҆́же є҆́сть та́мѡ є҆ле́й, сїѐ здѣ̀ нерадѣ́нїе ѡ҆ веща́хъ: и҆ ꙗ҆́коже та́мѡ ѡ҆блїѧ́нный є҆ле́емъ ᲂу҆до́бнѡ разрꙋша́етъ глаго́лемыѧ ᲂу҆ ни́хъ свѧза́нїѧ и҆лѝ соплете́нїѧ сѣ́ти: а҆́ще же воспрїи́метъ пе́рсть, не ᲂу҆до́бь и҆збѣ́глъ бы рꙋкѝ приража́ющагѡсѧ: та́кѡ здѣ̀, ни ѡ҆ чесо́мже пекꙋ́щїйсѧ неꙋдобоꙋловлѧ́емь є҆́сть ѿ дїа́вола, пекꙋ́щїйсѧ же и҆ попече́ньми ꙗ҆́кѡ пе́рстїю нѣ́коею ѡ҆жесточа́ющїй ле́гкость ᲂу҆ма̀, неꙋдо́бь и҆збѣ́гнетъ рꙋкѝ ѻ҆́нагѡ. Соверше́нныѧ дꙋшѝ є҆́сть, безпопече́нїе, несоверше́нныѧ же, попече́ньми ᲂу҆дрꙋча́тисѧ: ѡ҆ соверше́ннѣй бо дꙋшѣ̀ рече́но, ꙗ҆́кѡ крі́нъ є҆́сть въ те́рнїи¹⁷⁰⁸. Сїе́ же со многопекꙋ́щимисѧ безпопечи́тельнѡ живꙋ́щꙋю дꙋ́шꙋ ꙗ҆влѧ́етъ. Крі́нъ бо и҆ во є҆ѵⷢ҇лїи безпопечи́тельнꙋю ѡ҆знача́етъ дꙋ́шꙋ: ни трꙋжда́етсѧ бо, глаго́летъ, ни прѧде́тъ, и҆ бо́льшею соломѡ́на ѡ҆блече́сѧ сла́вою¹⁷⁰⁹: ѡ҆ и҆мꙋ́щихъ же мно́гое попече́нїе въ тѣле́сныхъ, всѧ́ко житїѐ нечести́во въ попече́нїи. И҆́бо вои́стиннꙋ є҆́сть нечести́во, є҆́же всемꙋ̀ житїю̀ сопростира́ти попече́нїе ѡ҆ тѣле́сныхъ, и҆ ни є҆ди́ное ѡ҆ бꙋ́дꙋщихъ ꙗ҆влѧ́ти тща́нїе: и҆ ра́ди тѣ́ла ᲂу҆́бѡ, хотѧ̀ не мно́гагѡ тре́бꙋющагѡ вре́мени, всѐ и҆ждива́ти вре́мѧ: дꙋши́ же ра́ди толи́кꙋю и҆мꙋ́щей долготꙋ̀ преспѣ́ѧнїѧ, ꙗ҆́кѡ не довлѣ́ти всемꙋ̀ житїю̀ къ соверше́нствꙋ є҆ѧ̀, нижѐ ма́лѡ вре́мени ᲂу҆дѣлѧ́ти. А҆́ще же и҆ нѣ́кое (вре́мѧ) возмни́мсѧ ᲂу҆дѣлѧ́ти, не тща́тельнѡ и҆ неради́вѡ ѻ҆́ной сїѐ подае́мъ, ѿ тщесла́вїѧ ви́димыхъ прельща́еми, и҆ подо́бнѡ стра́ждꙋще тѣ̑мъ, и҆̀же ѿ скверноѡбра́зныхъ блꙋдни́цъ привлека́ютсѧ, ꙗ҆̀же неимѣ́нїемъ приро́дныѧ красоты̀, ло́жнꙋю хи́тростнѡ длѧ зрѧ́щихъ ᲂу҆строева́ютъ, вымышле́нїи притира́нїй неблагоѡбра́зїе и҆спра́влѧюще: є҆ди́ножды бо сꙋето́ю настоѧ́щихъ побѣжде́нни сра́мъ вещества̀ зрѣ́ти не мо́жемъ, ѿ пристра́стїѧ ѡ҆больща́еми. И҆ сегѡ̀ ра́ди при нꙋ́жднѣй не пребыва́емъ потре́бѣ: сы́тость же стꙋжа́ющꙋю житїю̀ предпоста́вивъ, разли́чными стѧжа́нїѧми ᲂу҆спокоева́емсѧ не зрѧ́ще, ꙗ҆́кѡ мѣ́ра стѧжа́нїѧ, є҆́сть потре́ба тѣлесѐ: превосходѧ́щее же сїю̀, неꙋкраше́нїе про́чее, и҆ не ктомꙋ̀ потре́ба є҆́сть. Ꙗ҆́коже бо соразмѣ́рный тѣ́лꙋ хїтѡ́нъ, и҆ потре́ба и҆ ᲂу҆краше́нїе є҆́сть: ѿвсю́дꙋ же до́лгїй, и҆ нога́мъ соплета́ющїйсѧ, и҆ влекꙋ́щїйсѧ по землѣ̀, кромѣ̀ нелѣ́пости и҆ воспѧще́нїе ко всѧ́комꙋ дѣ́ланїю быва́етъ: та́кѡ превосходѧ́щее потре́бꙋ тѣ́ла стѧжа́нїе, и҆ къ добродѣ́тели є҆́сть препѧ́тїе, и҆ мно́гое и҆́мать ѡ҆сꙋжде́нїе ᲂу҆ могꙋ́щихъ распознава́ти є҆стество̀ веще́й. Ниже́ бо ѿ чꙋ́вственныхъ прельщє́ннымъ внима́ти подоба́етъ, нижѐ ра́ди непребыва́нїѧ въ мы́сленныхъ, пристра́стнымъ къ дѡ́льнымъ послѣ́довати безразсꙋ́днѡ подоба́етъ: то́ежде бо є҆́сть, сꙋде́й слѣпы́хъ и҆мѣ́ти ра́ди цвѣтѡ́въ, и҆лѝ глꙋхи́хъ длѧ звꙋ́кѡвъ мꙋсїкі́йскихъ, лише́нныхъ ѻ҆рꙋ́дїй къ разсꙋжде́нїю веще́й. И҆ си̑мъ вѣ́рити, ꙗ҆́кѡ по разсꙋжде́нїю и҆збра́вшымъ наслажде́нїе настоѧ́щихъ: слѣ́пи бо сꙋ́ть, нꙋ́жднѣйшагѡ ѻ҆рꙋ́дїѧ разсꙋ́дка лише́ны, ко́имъ ѻ҆быкнове́ннѡ разсꙋжда́емы быва́ютъ вє́щи тща́тельнѡ и҆ безпристра́стнѡ. Є҆ди́нъ ѿ си́хъ бѣ̀ а҆ха́ръ, сы́нъ хармі́и, и҆сповѣ́дꙋющїй і҆исꙋ́сꙋ въ ски́нїи пред̾ наро́домъ, ꙗ҆́кѡ ᲂу҆кра́дєннаѧ сокры̀ въ землѝ, и҆ сребро̀ сокрове́нно под̾ ни́ми¹⁷¹⁰: многоразли̑чнаѧ бо вещества̀, и҆ свѣ̑тлаѧ за вы́шшаѧ сꙋди́въ, ра́зꙋмъ же под̾ ни́ми сокры́въ, пра́веднѡ прельща́етсѧ по подо́бїю безслове́снагѡ, покарѧ́ѧсѧ и҆ предаѧ́сѧ мечта́нїю ᲂу҆го́днагѡ, за є҆́же сни́ти разсꙋ́дкꙋ ѿ госпо́дственныхъ престо́лѡвъ, и҆ въ чи́нѣ рабѡ́въ па́че ѡ҆сꙋжде́нныхъ бы́ти: а҆́ще бо бы́лъ се́й въ свое́мъ поста́вленъ чи́нѣ, и҆ сꙋ́дъ ввѣ́ренный себѣ̀ производи́лъ над̾ ꙗ҆влѧ́емыми веща́ми, и҆́стинное и҆ справедли́вое и҆зре́клъ бы ѡ҆предѣле́нїе, возбрани́въ текꙋ́щее стремле́нїе къ прелє́стнымъ. Добро̀ ᲂу҆̀бо въ предѣ́лѣхъ потре́бы пребыва́ти, и҆ стара́тисѧ все́ю си́лою сїѧ̑ не превосходи́ти. А҆́ще бо кто̀ ма́лѡ преведе́тсѧ ѿ жела́нїѧ къ сла́достѧмъ житє́йскимъ, ни є҆ди́но про́чее сло́во ᲂу҆де́рживаетъ къ прє́днимъ стремле́нїе. Є҆́же бо па́че потре́бы, предѣ́лъ ни є҆ди́нъ. Но неразꙋ́мное тща́нїе и҆ неконча́емый сꙋ́етный трꙋ́дъ, є҆́же къ си̑мъ жела́нїе ᲂу҆множа́етъ винꙋ̀, ꙗ҆́коже пла́мѧ приложе́нїемъ вещества̀ пита́ющїй вожделѣ́нїе. Є҆гда́ бо є҆ди́но предѣ́лы преше́дше є҆сте́ственныѧ нꙋ́жды, въ веще́ственномъ начнꙋ́тъ ᲂу҆спѣва́ти житїѝ, къ хлѣ́бꙋ ᲂу҆́бѡ прилага́ти сла́дкое прибавле́нїе хотѧ́тъ: къ водѣ́ же потре́бное вїно̀, и҆ ѿ сегѡ̀ многоцѣ́нное: въ ѻ҆де́ждахъ же потре́бныхъ ходи́ти не те́рпѧтъ, но пе́рвѣе ᲂу҆́бѡ ѿ во́лнъ свѣ̑тлыѧ кꙋпꙋ́ютъ, са́мой цвѣ́тъ во́лны и҆збира́юще: а҆́бїе прехо́дѧтъ ѿ си́хъ къ сотка̑ннымъ ѿ льна̀, и҆ во́лны и҆мꙋ́щымъ ᲂу҆строе́нїе: а҆́бїе ше́лкѡвыѧ содѣва́ютъ, и҆ сїѧ̑ просты̑ѧ ᲂу҆́бѡ пе́рвѣе, а҆́бїе же и҆зпещрє́ннаѧ бра́ньми, и҆ ѕвѣрьмѝ, и҆ повѣствова́нїи многоразли́чными. Сосꙋ́ды же сре́брѧны, и҆ позлаще́ны ᲂу҆строѧ́ютъ, не то́чїю ꙗ҆́ствамъ слꙋжа́щыѧ, но и҆ живѡ́тнымъ и҆ ѻ҆дра́мъ и҆зли́шнѡ предлежа́щыѧ. И҆ что̀ потре́бно неꙋмѣ́ренное ѻ҆́ныхъ бо́лѣе предлага́ти любоче́стїе, когда̀ и҆ до нече́стнѣйшихъ да́же потре́бъ сїѐ простира́ютъ: нижѐ сосꙋ́ды и҆спражне́нїѧ ᲂу҆достоева́юще ѿ и҆на́гѡ вещества̀ стро́ити, а҆́ще не и҆ семꙋ̀ сра́мномꙋ дѣ́лꙋ слꙋжи́ти бꙋ́детъ сребро̀. Тако́гѡ бо сла́сть да́же до послѣ́днихъ себѐ простира́ющи, и҆ безчє́стнаѧ и҆здѣ̑лїѧ многоцѣ́нїемъ вещества̀ почита́етъ: сїе́ же па́че є҆стества̀ є҆́сть и҆мѣ́ти про́чее. Є҆́же бо по є҆стествꙋ̀ житїѐ, на́мъ же и҆ живѡ́тнымъ, то́ежде ᲂу҆ста́влено ѿ творца̀. Се́ бо да́хъ ва́мъ, глаго́летъ бг҃ъ человѣ́кꙋ, всѧ́кꙋ травꙋ̀ сѣ́меннꙋю, ва́мъ бꙋ́детъ въ снѣ́дь, и҆ всѣ̑мъ ѕвѣрє́мъ¹⁷¹¹. Ѻ҆́бщꙋю ᲂу҆́бѡ прїѧ́вши съ безслове́сными пи́щꙋ, и҆ сїю̀ вымышле́ньми къ ро́скоши ѡ҆брати́вши, ка́кѡ не безслове́снѣйшими почтены̀ бы́ли благосло́внѡ ѻ҆́ныхъ; А҆́ще же ѕвѣ́ри пребыва́ютъ въ предѣ́лѣхъ є҆стества̀, ничто́же преложи́вше ѿ повелѣ́нїй бж҃їихъ: мы́ же ра́зꙋмомъ почте́нные соверше́ннѡ дре́внѧгѡ ᲂу҆клони́лисѧ законоположе́нїѧ. Какі̑ѧ бо ᲂу҆ безслове́сныхъ ꙗ҆́ствы, какі̑ѧ хлѣ́бникѡвъ и҆ поварѡ́въ хꙋдо́жєства, бѣ́дномꙋ чре́вꙋ ᲂу҆строѧ́ютъ сла̑сти: не пре́жнюю ли простотꙋ̀ лю́бѧтъ, травꙋ̀ ꙗ҆дꙋ́ще, и҆ ма́лыми дово́льствꙋемы, и҆ ѿ и҆сто́чника ᲂу҆потреблѧ́ющаѧ питїѐ, и҆ сїѐ почтѝ не ча́стѣ: тѣ́мже и҆ подчре́вныѧ сла̑сти ᲂу҆малѧ́ютъ, ни є҆ди́ною тꙋ́чною пи́щею жела́нїѧ привоспалѧ́юще, нижѐ мꙋ́жа и҆ жены̀ вѣ́дѧще разли́чїе. Є҆ди́но бо и҆̀мъ вре́мѧ лѣ́та сїѐ подае́тъ чꙋ́вствїе, є҆гда̀ є҆стества̀ зако́нъ къ сѣ́ѧнїю подо́бнагѡ сои́тїе и҆̀мъ въ продолже́нїи ро́да и҆з̾ѡбрѣ́те. Въ и҆но́е же вре́мѧ та́кѡ дрꙋ́гъ дрꙋ́га чꙋжда́ютсѧ, ꙗ҆́кѡ забве́нїе прїѧ́ти соверше́ннѡ такова́гѡ жела́нїѧ. Человѣ́кѡмъ же ѿ многоцѣ́нїѧ бра́шенъ, блꙋ́днаѧ ненасы́тимаѧ стра́сть совозраста́ющи, неи́стѡвыѧ привсѣ́ѧ жела̑нїѧ, ни є҆ди́но вре́мѧ поко́итисѧ ѡ҆ставлѧ́ющи стра̑сти. Поне́же ᲂу҆́бѡ мно́гъ въ стѧжа́нїѧхъ вре́дъ припослѣ́дꙋетъ, и҆ всѣ̑мъ страсте́мъ, ꙗ҆́кѡ недꙋготво́рнаѧ вина̀, подае́тъ слꙋ́чай: сїю̀ и҆стреби́мъ винꙋ̀, а҆́ще промышлѧ́емъ ѡ҆ дꙋше́вномъ благоꙋстрое́нїи, не стѧжа́нїемъ стра́сть сребролю́бїѧ и҆сцѣли́мъ: бѣжи́мъ безполе́зныхъ человѣ́кѡвъ собра́нїй, ᲂу҆едине́нїе лобыза́юще. Привре́дно бо и҆ ми́рномꙋ ᲂу҆строе́нїю тлетво́рно быва́етъ съ сꙋ́етнѣйшими сожи́тїе. Ꙗ҆́коже бо на воздꙋ́хѣ зарази́тельномъ быва́емые, всѧ́чески недꙋ́гꙋютъ: та́кѡ и҆ въ человѣ́цѣхъ неради́выхъ соприбыва́ющїе ᲂу҆ча́ствꙋютъ въ ѕло́бѣ ѻ҆́ныхъ. Что́ бо къ томꙋ̀ ѻ҆́бщее и҆́мꙋтъ въ мі́рѣ, ѿре́кшїесѧ мі́ра; Никто́же бо во́инъ быва́ѧ ѡ҆бѧзꙋ́етсѧ кꙋ́плѧми жите́йскими, да воево́дѣ ᲂу҆го́денъ бꙋ́детъ¹⁷¹². И҆́бо въ кꙋ́плѣ ᲂу҆пражне́нїе бра́нныѧ возбранѧ́етъ по́двиги. И҆скꙋ́сны же и҆скꙋ́сными во бране́хъ сража́ющесѧ, ка́кѡ ста́немъ; Па́че же, а҆́ще подоба́етъ и҆́стиннѡ рещѝ, та́кѡ лѣ́ностнѡ и҆ неради́вѡ бо́ремсѧ, ꙗ҆́кѡ нижѐ лежа́щемꙋ врагꙋ̀ мо́жемъ проти́витисѧ, и҆ стоѧ́щїе на па́дшаго врага̀ навѣ́товать: є҆́же бо стра́ждꙋтъ и҆̀же на бра́нѣхъ ра́ди сребролю́бїѧ, ᲂу҆бїе́нныхъ совлача́юще, по побѣ́дѣ мно́жицею ᲂу҆бива́еми ѿ лежа́щихъ: и҆ ра́ди скве́рнагѡ прибы́тка по́слѣ по́честей погиба́юще: бѣ́днѣ стра́ждемъ, лежа́щꙋ врагꙋ̀ и҆ и҆здыха́ющꙋ приближа́ющесѧ. Ꙗ҆́коже бо ті́и жела́нїемъ бога́тства и҆спы́товающе ме́ртвыхъ, мно́жицею къ полꙋме́ртвомꙋ нѣ́коемꙋ прише́дше, и҆ совлача́юще, та́йнѡ прїѧ́въ смертоно́сное пораже́нїе, падо́ша, сла́вꙋ ꙗ҆́же при побѣ́дѣ прїѧ́ша безразсꙋ́днѡ посрами́въ: та́кѡ мы̀, є҆гда̀ цѣломꙋ́дрїемъ и҆ воздержа́нїемъ пове́ргли ва́рвара, и҆лѝ мни́мсѧ низве́ргнꙋти, тогда̀ возлюби́вше ѻ҆дє́жды ꙗ҆̀же ѻ҆́крестъ є҆гѡ̀, є҆́же є҆́сть ᲂу҆ человѣ̑къ чє́стна, бога́тства, си́лы, благоꙋстрое́нїѧ сла́вы: приближа́емсѧ къ немꙋ̀ прїѧ́ти что́либо жела́юще ѿ негѡ̀, и҆ та́кѡ ᲂу҆мира́емъ, сами́хъ себѐ на заколе́нїе ведꙋ́ще. Та́кѡ погибо́ша пѧ́ть дѣ́въ чистото́ю ᲂу҆́бѡ погꙋби́вшыѧ врага̀, немилосе́рдїѧ же ра́ди, є҆́же сребролю́бїе ражда́етъ, сами́хъ себѐ на ме́чь є҆гѡ̀ ᲂу҆стреми́вшыѧ, кото́рый лежа̀ погꙋби́ти стоѧ́вшыѧ не мо́гъ. Ничегѡ̀ ᲂу҆̀бо ѿ негѡ̀ да не восхо́щемъ, да не вкꙋ́пѣ съ є҆гѡ̀ вещьмѝ и҆ дꙋ́шꙋ погꙋби́мъ. Зове́тъ бо и҆ ны́нѣ къ ѻ҆́нымъ, и҆ склонѧ́етъ всѣ́хъ, а҆́ще ѡ҆брѧ́щетъ наипа́че преклонѧ́емыхъ. А҆́ще бо самаго̀ гдⷭ҇а призыва́ше глаго́лющи: сїѧ̑ всѧ̑ тебѣ̀ да́мъ, а҆́ще па́дъ поклони́шисѧ мѝ¹⁷¹³: и҆ прельсти́ти покꙋша́етсѧ мни́мыми въ житїѝ свѣ́тлыми таковы́хъ не тре́бꙋющагѡ: ка́кѡ же ᲂу҆добое́млемыхъ человѣ̑къ не возмни́тъ прельсти́ти, скло́нныхъ сꙋ́щихъ къ наслажде́нїю чꙋ́вственныхъ веще́й; Оу҆пражни́мъ, (подви́гнемъ) ᲂу҆́мъ ко благоче́стїю, а҆́ще же тѣле́сный и҆спра́висѧ по́двигъ (ѡ҆бꙋче́нїе) тѣле́сный бо по́двигъ въ ма́лѣ є҆́сть поле́зенъ, ѻ҆́трочєскимъ прили́ченъ ᲂу҆че́нїѧмъ: благоче́стїе же на всѐ поле́зно є҆́сть¹⁷¹⁴, ᲂу҆строѧ́ющее въ дꙋшѝ благострое́нїе жела́ющымъ проти́вꙋ врагѡ́въ страсте́й побѣ́ды. Ꙗ҆́коже бо въ ѻ҆́троческихъ и҆гра́хъ бѣ́гающымъ подви́жникѡмъ тѣ́ло ᲂу҆пражнѧ́ти, и҆ чле́ны дви́гати ча́стѣ, мꙋ́жествꙋ же и҆ подви́жническїѧ крѣ́пости до́блественнѡ прилѣжа́ти, и҆ къ свѧщє́ннымъ прїꙋготовлѧ́тисѧ подвигѡ́мъ, благопристо́йно є҆́сть: та́кѡ начина́ющымъ благоче́стїе, прилѣ́жнѡ дѣ́йствїѧ (страсте́й) возбранѧ́ти. Люби́тельно бо быва́етъ, а҆́ще ѡ҆держа́тъ вла́сть над̾ страстьмѝ возжига́еми бꙋ́дꙋчи ѿ совоспи́танныхъ сласте́й, и҆ ѿ навыкнове́нїѧ ко ѕлы̑мъ нево́лею почтѝ нꙋ́дими: сꙋ́щымъ же въ чи́нѣ дѣ́ѧтельныѧ добродѣ́тели, и҆ ѡ҆ ᲂу҆правле́нїи помышле́нїѧ про́чее пекꙋ́щымсѧ, всѧ́кимъ тща́нїемъ храни́ти подоба́етъ ра́зꙋмъ, ꙗ҆́кѡ да не стро́йнѡ дви́женъ бы́въ, низведе́тсѧ къ чемꙋ́либо ѿ несоверше́нныхъ. И҆ про́стѡ рещѝ: ѻ҆́вымъ ᲂу҆́бѡ є҆́сть тща́нїе, тѣле́сныѧ ᲂу҆правлѧ́ти движє́нїѧ: ѻ҆́вымъ же стремлє́нїѧ ᲂу҆де́рживати по́мысла, къ є҆ди́номꙋ любомꙋ́дренномꙋ прили́чно склонѧ́тисѧ житїю̀: ниеди́номꙋ мїрско́мꙋ мечта́нїю развлека́ющꙋ ѿ бж҃е́ственныхъ размышле́нїй ра́зꙋмъ. Подоба́етъ бо ᲂу҆стремле́нномꙋ бы́ти всемꙋ̀ жела́нїѧ бг҃очести́вагѡ къ вожделѣ́нномꙋ, ꙗ҆́кѡ ѿню́дъ не ѡ҆брѣта́ти вре́мене человѣ́чєскимъ помыслѡ́мъ дѣ́йствовати своѧ̑ стра̑сти. А҆́ще бо всѧ́каѧ стра́сть, є҆гда̀ во ѡ҆бдержи́момъ дви́жетсѧ, соде́ржитъ по́мыслъ плѣне́нъ: чегѡ́ же ра́ди и҆ ре́вность къ добродѣ́тели пра́зднꙋ сꙋ́щꙋ ѿ про́чихъ мы́сль не ᲂу҆держи́тъ; Ко́е бо чꙋ́вствїе внѣ́шнихъ ꙗ҆рѧ́щїйсѧ прїе́млетъ, съ мечта́нїемъ ѡ҆скорби́вшагѡ въ мы́сли борю́щїйсѧ; Жела́ющїй бога́тства, є҆гда̀ совосхища́емь ѿ мечта́нїѧ, на приносѧ́щыѧ прибы́токъ вещества̀ прилѣ́жнѡ взира́етъ, ненака́занный же, мно́жицею и҆ собесѣ́дꙋѧ ѡ҆ че́мъ съ нѣ́кїими, скрыва́етъ въ себѣ̀ чꙋ̑вства, и҆ вожделѣ́нный ѡ҆́бразъ въ мы́сли прїѧ́въ съ ѻ҆́нымъ разглаго́льствꙋетъ, забы́въ настоѧ̑щаѧ, и҆ сто́лпъ сѣди́тъ безгла́сный, ничегѡ̀ не вѣ́даѧ ѿ быва́емыхъ во ѻ҆чесѣ́хъ, и҆лѝ постига́емыхъ, ᲂу҆глꙋби́вшисѧ же во внꙋ́трєннѧѧ ве́сь є҆́сть мечта́нїѧ. Таковꙋ́ю дꙋ́шꙋ почтѝ ѿдѣле́ннѡ сидѧ́щꙋю и҆менꙋ́етъ зако́нъ, є҆гда̀ дале́кѡ ѿ чꙋ́вствъ сидѧ́щи составлѧ́етъ своѐ дѣ́йствїе, ничесѡ́же соверше́ннѡ ѿ внѣ́шнихъ воспрїе́млющи, ра́ди ѡ҆бдержа́щагѡ ю҆̀ скве́рнагѡ мечта́нїѧ. А҆́ще же сїѧ̑ та́кѡ ѡ҆бдержа́тъ по́мыслъ ра́ди пристра́стїѧ, и҆ пра́здны бы́ти чꙋ̑вства ᲂу҆строева́етъ, кольмѝ па́че любомꙋ́дрїѧ раче́нїѧ ѿрещи́сѧ, и҆ чꙋ́вственныхъ, и҆ чꙋ́вствъ сотвори́тъ ᲂу҆́мъ, превы́спренна восхища́ющи є҆го̀, въ видѣ́нїи ᲂу҆́мныхъ ᲂу҆пражнѧ́ѧ, ꙗ҆́коже бо сѣко́мꙋ, и҆лѝ жего́мꙋ, не бы̀ вше́лъ по́мыслъ, ра́звѣ стѣснѧ́ющїѧ стра́сти, ра́ди ѡ҆бдержа́щїѧ болѣ́зни: та́кѡ нижѐ что́либо пристра́стнѡ помышлѧ́ющꙋ, є҆щѐ помы́слити мо́щно и҆но́е что̀, ра́звѣ ѡ҆бдержа́щїѧ стра́сти мы́сль, ве́сь по́мыслъ свои́мъ ка́чествомъ занѧ́вшїѧ. Болѣ́знь во не прїе́млетъ трꙋда̀, нижѐ печа́ль ра́дости, нижѐ ᲂу҆ны́лость весе́лїѧ, нижѐ па́ки трꙋ́дъ си́льный твори́тъ сла́дость, нижѐ ѡ҆б̾е́млющаѧ печа́ль ра́дость и҆́мать припрѧже́ннꙋ себѣ̀, нижѐ ᲂу҆ны́лость соединена̀ съ весе́лїемъ: но вкꙋ́пѣ и҆́мꙋтъ є҆ди́на къ дрꙋго́й проти́вныѧ стра̑сти, и҆ въ то́ежде не соединѧ́ютсѧ никогда́же, нижѐ преклонѧ́ютсѧ къ дрꙋ́жескомꙋ соѡбще́нїю, ра́ди ѿ є҆стества̀ въ ни́хъ непримири́мыѧ вражды̀ и҆ чꙋжде́нїѧ. Да не ᲂу҆́бѡ чистота̀ добродѣ́тели по́мыслы мїрски́хъ веще́й потемни́тсѧ: нижѐ воѡбраже́нїѧ ꙗ҆́сность, тѣле́сными да возмꙋти́тсѧ попече́ньми: да ѡ҆́бразъ и҆́стиннагѡ любомꙋ́дрїѧ сїѧ́ющїй свое́ю красото́ю, не ктомꙋ̀ поноша́етсѧ ѿ дерзнове́нныхъ ᲂу҆сте́нъ: нижѐ вина̀ посмѣѧ́нїѧ невѣ́дѣнїѧ ра́ди пи́шꙋщихъ да бꙋ́детъ, но да хва́литсѧ: а҆́ще не ѿ человѣ̑къ, но ᲂу҆́бѡ ѿ вы́шнихъ си́лъ, и҆лѝ ѿ самагѡ̀ влⷣки хрⷭ҇та̀, ѿ негѡ́же и҆ ст҃і́и и҆ска́ша хвалы̀: ꙗ҆́кѡ вели́кїй дв҃дъ, попра́вый человѣ́ческꙋю сла́вꙋ, и҆ ѿ бг҃а хвалы̀ и҆щѧ̀, ѿ тебѐ хвала̀ моѧ̀, глаго́лющи, и҆ ѡ҆ гдⷭ҇ѣ похва́литсѧ дꙋша̀ моѧ̀. Человѣ́цы бо мно́жицею, и҆ по за́висти ѡ҆клеве́тываютъ блага̑ѧ: вы́шнее же позо́рище нелицепрїѧ́тнѡ сꙋ́дитъ дѣла̀, и҆ и҆́стиною быва́ємыѧ награжда́етъ по́двиги. Сїѐ ᲂу҆̀бо на́съ, что̀ и҆ нꙋ́жно є҆́сть, ᲂу҆слади́ти прїѧ́тностїю дѣ́лъ, да ᲂу҆слади́тъ зрѣ́лище: ѡ҆ человѣ́цѣхъ же, ко́и, ка́къ за дѡ́брыѧ дѣла̀ воздаѧ́нїѧ ᲂу҆чини́ть, та́къ и҆ за хꙋды̑ѧ наказа́ть не мо́гꙋтъ, не мно́гѡ глаго́лати потре́бно, хотѧ̀ ѻ҆нѝ и҆лѝ по за́висти, и҆лѝ по пристра́стїю добродѣ́тєльныѧ дѣла̀ хꙋды́ми наименова́нїѧми помрача́ютъ, бг҃ꙋ и҆ а҆́гг҃лѡмъ и҆звѣ́стное житїѐ погрѣши́тельными ѡ҆глаго́лꙋютъ хꙋле́ньми. Воспослѣ́дꙋетъ бо вои́стиннꙋ во вре́мѧ воздаѧ́нїѧ добродѣ́тельнѡ живꙋ́щымъ, не ѡ҆ предразсꙋжде́нїѧ человѣ̑къ, но ѿ са́мыѧ дѣ́лъ и҆́стины, награжде́нїе вѣ́чныхъ бла̑гъ: и҆́хже да бꙋ́детъ всѣ̑мъ на́мъ ᲂу҆лꙋчи́ти, благода́тїю и҆ человѣколю́бїемъ гдⷭ҇а на́шегѡ і҆и҃са хрⷭ҇та̀, съ ни́мже ѻ҆ц҃ꙋ̀ сла́ва, вкꙋ́пѣ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.