Источник

Свиток. Сочинения Старца Архимандрита Отца нашего Паисия

Разделен на главы, об умной молитве

Противу хульника некоего суетоумного Философа монаха, пребывающего в Мошенских горах; пиcaн еще в Дрогомирнском монастыре

Предислoвие Старца Паисия

Понеже дойде в слух мне последнему, яко нецыи от монашеского чина дерзают хулити божественную, приснопамятную и Боготворную Иисусову, в сердце умом священнодействуемую, молитву, назидающе на песце суемудрия, кроме всякого свидетельства, таковое свое языкоболие, врагу их на сие, дерзаю рещи, вооружающу, да, аки орудием своим, их языки возможет опорочита пренепорочное и Божественное сие дело и слепотою их разума помрачити мысленное сие солнце: того ради, оплакав их таковое зломудрие, заблуждающих от чрева и глаголющих лжу, и бояся, да не кто от неутвержденных разумом, таковая их баснословия слыша, в подобный им падет ров злохуления и смертне пред Богом согрешит, похулив учение премногих Богоносных Отец наших, от просвещения Божественныя благодати о сей Божественней молитве свидетельствующих и учащих, ктому же и не терпя более слышати на прененорочное сие делание хульныя глаголы, еще же и моление ревнителей по сем душеспасительном делании убеждаем, умыслих, аще и превосходит немощный мой ум и силу, сладчайшаго моего Иисуса, без Него же никто же может что творити, призвав на помощь, к возражению лжеименного разума суетоумов и утверждение Богоизбранного стада о имени Христове собравшихся во обители нашей братии, написати малое некое о Божественней молитве умней от учения Святых Отец списания к твердому, непоколебимому и несумненному о сей извещению.

Прах убо аз сый и пепел, мысленная колена сердца моего преклонив пред неприступным величеством Божественной славы Твоея, молю Тя, всесладчайший мой Иисусе, Единородный Сыне и Слове Божий, Сияние славы и Образе Ипостаси Отчи, просветивый слепорожденного, просвети помраченный мои ум и помысл, и подаждь юже от Тебе благодать окаянней души моей, да будет сей мой труд во славу пресвятого Твоего имене, и в пользу хотящим чрез умное и священное молитвы делание, умне тебе прилеплятися Богу нашему, и тебе, бесценного бисера, в сердце и душе своей выну носити, и во исправление от крайняго своего неведения Божественное сие делание дерзнувших похулити.

Блаженныя памяти отца нашего Старца Паисия. Главы о умней молитве

Глава 1

Яко умная молитва делание есть древних Святых отец, и на хулителей священныя сея и пренепорочныя молитвы

Вестно убо да будет, яко сие Божественное священныя умныя молитвы делание, дело бяше непрестанное древних Богоносных Отец наших, и на многих местех пустынных и во общежительных монастырех в монасех, аки солнце, возсияваше. В Синайстей горе, в Ските Египетском, в Нитрийской горе, во Иерусалиме и в монастырех иже окрест Иерусалима, и просте рещи, во всем Востоце: в Царьграде же, и во Святей горе Афонстей, и на Островех морских, в последняя же времена, благодатию Христовой, и в Великой России. Сим убо умным священныя молитвы вниманием мнози от Богоносных Отец наших, Серафимским к Богу и по Бозе к ближнему любве разжегшеся пламенем, всеопаснейшии заповедей Божиих хранителие быша, и очистивше души своя и сердца от всех ветхого человека пороков, сосуди избраннии Духу Святому удостоишася быти: Его же различных Божественных дарований исполнишеся, аки светила и столпы огненнии в мире, житием своим показашеся, чудеса безчисленная сотворше делом и словом, множество неисчетное душ человеческих ко спасению приведоша. От нихже мнози тайным Божественным подвигшеся вдохновением, о сей Божественней умней молитве, по силе Божественных писаний Ветхого и Нового Завета, написаша книги святых своих учений, исполнены премудрости Духа Святого. Сие же бысть Божиим особным Промыслом, да не како в последняя времена в забвение приидет Божественное сие дело, от нихже многия сиречь книги, Божиим, грех ради наших, попущением, от Сарацын, поработивших Греческое царство, и истребишася, некия же смотрением Божиим даже и до нынешних времен сохраняются.

На предреченное убо сие Божественное умное сердечного рая делание и хранение никтоже от правоверных дерзнув когда похулити; но в великой чести и крайнем благоговении, аки вещь всякия духовныя пользы преисполненну, имеяху. Начальник же злобы и супостат всякому делу благому диавол, видя, яко наипаче чрез сие умное молитвы делание, монашеский чин благую часть избирая, неотторжною любовью приседит ногам Иисусовым, совершенное в Божественных его заповедех предуспеяние имея, и сего ради свет и просвещение миру бывая, начат таяти завистию и вся своя употребляти козни, во еже опорочити и похулити душеспасительное сие дело, и до конца, аще бы возможно, от лица земли истребити; ово якоже прежде речеся, чрез во всем ему подобныя сарацины книг истреблением; ово же, в чистую и небесную делания сего пшеницу привсевая своя душетленныя плевелы, да самочинником, делания сего коснувшимся, возношения ради своего терние вместо пшеницы пожавшим, вместо же спасения погибель обретшим, хула привнидет от неимущих рассуждения на спасительное сие дело. Еще же и сими диавол не бывая доволен, обрет в Италийских странах Калаврийского змия, предтечу антихристова, гордостию диаволу во всем подобна, еретика Варлаама, и вселься к оне со всею своею силою, подвиже его православную нашу хулити веру, яко же в Триоди постной во Синаксаре вторыя святого великого поста недели о сем тонкочастно пишется. К сим же многоразличне и языком и рукою хулити и отвергати дерзнув и священную умную молитву, якоже о сем во священней своей книзе в главе 31 пишет иже во Святых Отец наш Симеон, Фессалонитский Архиепископ, его же и самая словеса зде предлагаю, глаголющая тако:

«Сей окаянный Варлаам множайшая и на священную молитву хуляше же и писаше, и на Божественную еже на Фаворе47 благодать же и осияние. Еже бо: непрестанно молитеся48, не разумев, ниже могий разумети (како бо постигнет сие иже умом суетствуяй и гордому в мечтании мысли соединен?) Ниже еже: помолюся духом, помолюся же и умом49; ниже еже поюще и воспевающе в сердцах наших Господеви50; и, яко посла Бог, Духа Сына своего сиречь благодать в сердца ваша, вопиюща: Авва Отче51, и, хошу пять словес умом моим глаголати нежели тмы словес языком»52; темже и умную молитву отверже, и паче же призывание Господне, еже убо и исповедание есть Петра проповедавша: ты еси Христос, Сын Бога живаго53, и предание есть Самого Господа, глаголюща во Евангелии: еже аще что просите от Отца во Имя Мое, дасть вам54 и о Имени Моем бесы ижденут55, и прочая. Понеже и Имя Его живот вечный есть56:сия бо, рече, писана быша, да веруете, яко Иисус есть Христос Сын Божий, и да верующе живот имате во Имя Его57; и Духа Святого подательно есть призывание Христово: никтоже может рещи Господа Иисуса, точию Духом Святым58, рече, и тмами о сем».

До зде св. Симеон.

Что же началозлобный змий с сыном погибели треклятым еретиком Варлаамом, егоже на хулу противу священныя умныя наусти, якоже рех, молитвы, успе своим начинанием? Возможели его злохулением свет умного сего делания помрачити, и, якоже надежду имеяше, в конец потребити? Никакоже, но болезнь его обратися на главу его. В тое бо время Великий благочестия поборник и предстатель, пресветлый во Святых Отец наш Григорий, Архиепископ Фессалонитский Палама, иже во святей горе Афонстей в совершенном послушании и непрестанном умныя молитвы священном упражнении, аки солнце, просия в дарованиях Святого Духа, еще прежде архиерейского на престол тоя Церкве возвождения, в царство Божественнейшаго царя Андроника Палеолога, в царствующем граде, в преименитом великом Премудрости Божия Храме, на собравшемся великом противу предреченного еретика Варлаама Соборе, Духа Божия исполнися и в силу непреборимую свыше облекся, уста его на Бога отверстая загради и до конца посрами, и огнедухновенными словесы и списаньми хврастныя его ереси и вся хуления сжег, яко пепел сотвори: в от всея Соборныя Божия Церкве сей Варлаам еретик со Акиндуном в всеми своими еднномысленники трижды анафеме предадеся; но и доныне от тояжде Церкве на всякое лето в неделю Православия с прочими еретики проклинаем бывает, сице: Варлааму и Акиндину и последователем и преемником их анафема, трижды.

Зрите зде, о друзи, дерзающие хулити умную молитву и разсмотрите, кто сея первый бысть хулитель: не еретик ли Варлаам, трижды от Церкве анафеме преданный и во веки проклинатися имущий? Не сообщаетеся ли и вы вашим злохулением сему еретику и его единомысленником? Не трепещете ли душею вашею, подпасти подобньй им Церковной клятве и отчужденными быти от Бога? Не ужасаетеся ли, возстающе на священнейшее дело и вашим злохулением соблазняюще души неутвержденных в разуме ближних ваших, страшного за сие во Евангелии Божия прещения? Не боитеся ли, по глаголу Апостольскому: страшно есть впасти в руце Бога Живого59, и временно и вечно за сие, аще не покаетеся, казненными быти ? Кую вину благословну изобретосте похулити пренепорочную и треблаженную сию вещь? Отнюд аз недоумею. Призывание ли Имене Иисусова мнится вам быти не полезно? Но и спастися о ином ком несть возможно, точию о Имени Господа нашего Иисуса Христа. Ум ли человеч, им же действует молитва, есть порочен? Но сие невозможно: Бог бо созда человека по образу Своему и по подобию; образ же Божий и подобие душа есть человеча, яже по созданию Божию чиста есть и непорочна: убо и ум, начальнейшее, сый чувство душевное, якоже и в телеси зрение, такожде есть непорочен. Но сердце ли хуле есть достойно, на немже, аки на жертвеннице, Богу ум тайную молитвы жертву священнодействует? Никако же. Божие бо создание, яко же и все тело человече суще, зело есть добро. Аще убо призывание Иисусово есть спасительное, ум же и сердце человече Божшии рук есть дело: то кий есть порок человеку от глубины сердца умом к сладчайшему Иисусу возсылати молитву и милости от него просити? Или не за сие ли хулите и отвергнете умную молитву, яко Бог, не мнится ли вам, яко неслышит тайныя в сердце бываемыя молитвы, но тую точию слышит, яже усты произносится? Но сие хула есть на Бога: Богь бо сердцеведец есть и самыя тончайшия в сердце бываемыя помыслы, или помыслитися имущия вся опасно весть, и вся весть, яко Бог и Всеведец: и Сам же таковыя тайныя, аки жертвы чистые и непорочныя, от глубины сердца возсылаемыя ищет молитвы, заповедав: ты же, егда молишися, вниди в клеть твою, и затворив двери твоя, помолися Отцу твоему иже в тайне: и Отец твой, видяй втайне, воздаст тебе яве60; еже Христова уста, светило всемирное, Вселенский Учитель, Святый Иоанн Златоуст, в беседе девятьнадесятой на Евангелие еже от Матфея, Богоданною Духа Святого Премудростью61 толкует не о сей, усты точию и языком произносимей молитве, но о самей тайней, безгласней, от глубины сердца возсылаемей молитве, юже научает творити не образом телесе, ниже вопиением гласа, но усерднейшим произволением, с тихостию всякою и сокрушением мысленным и слезами внутренними и болезнию душевною, мысленных дверей затворением. И приводит во свидетельство от Божественного писания о сей тайней молитве Боговидца Моисея, и Святую Анну, и праведного Авеля, глаголя тако: не болезнуеши ли душею? Не можеши убо и не вопити: ибо зело болезнующаго есть еже сице молитися и просити, якоже рех. Понеже и Моисей болезнуя сице моляшеся, и болезнь его слышашеся, сего ради я глаголаше к нему Бог: что вопиеши ко мне?62 и Анна же паки, гласу ея не слышащуся, вся соверши, елика восхоте: понеже сердце ея вопияше. Авель ли не молчал, но и скончався моляшеся? И кровь его трубы светлейший испущаше глас. Стени убо и ты сице, яко же святый Моисей, не возбраняю. Раздери, яко же пророк повеле, сердце твое, а не ризы; из глубины призови Бога: из глубины бо, рече, воззвах к тебе Господи; от долу: от сердца привлецы глас; таинство сотвори твою молитву. И низше: ниже бо человеком молишися, но Богу везде сущему, и прежде гласа слышащему, и нереченное мысли сведящему: аще сице молишися, многу приимеши мзду. Отец бо твой, рече, видей втайне, воздаст тебе яве. И низше: Понеже убо Той есть невидим, и молитву твою такову быти хощет.

До зде св. Златоуст.

Видите ли, о друзи! Яко по свидетельству Столпа Православия непреборимого, есть и иная, кроме усты произносимая, тайная, невидимая, безгласная, от глубины сердца возносимая к Богу молитва, юже, аки жертву чисту, в воню благоухания духовного приемлет Господь, радуется же о ней и веселится, видя ум, его же наипаче Богу должно освящати, молитвою Себе соединяем. Почто убо на сию молитву, христовыми усты, Святым, глаголю, Иоанном Златоустом свидетельствуемую, свой хулой вооружисте язык, хуляще, злословяще, ненавидяще, ругующеся, отмещуще и аки скверныя некия отвращающеся вещи и, вкратце рещи, ниже слышати терпяще. Ужас и трепет мя объемлет о таковом безсловесном вашем начинании!

Но и еще вопрошаю вас, ища винословия хуле вашей: не за сия ли хулите спасительннейшую сию молитву, яко негли случися вам видети, или слышати кого от делателей сея молитвы, яко умом изступи, или прелесть некую прият вместо истины, или кий-либо душевный пострада вред, и за cиe возмнеся вам, аки бы умная молитва виною есть таковому вреду? Но несть сие, несть; не тако бо вещь имати священная бо умная молитва, по силе писаний Богоносных Отец, действуема благодатию Божиею, очищает человека от всех страстей, ко усерднейшему же хранению заповедей Божиих возбуждает, и от всех стрел вражиих и прелестей хранит невредима. Аще же кто дерзнет сию молитву действовати самочинно, не по силе Святых Отец учения, без вопроса и совета искусных, презорлив, страстен и немощен сый, без послушания и повиновения ходя, да еще же гоня и единственное пустынное житие, егоже и следа за самочиние свое недостоин видети; таковый, воистинну и аз исповедую, удобно падает во вся сети и прелести диаволи. Что же, молитва ли сия прелести сей виновна? Да не будет. Аще же вы за сие порочите мысленнную молитву, то да будет порочен вам и нож, еще бы малу отроку случилося играющу себе онем несмысльства ради своего, заклати. Такожде по вам да не будет во употреблении воином и меч воинский, его же противу врагов приемлютаще бы случилося некоему безумному воину мечем своим себе заклати; но яко же нож и меч не суть ни единого порока виновни, но безумие точию себе онеми заклавших; тако и меч духовный, священная, глаголю, умная молитва неповинна есть ни единому пороку, но самочиние и гордыня самочинников виновна суть прелестем бесовским и всякому душевному вреду. Но что еще, аки непоумеяся надолзе, вопрошаю вас вины на священную сию молитву злохуления вашего? Вем известно, о друзи! Вем существенную самую вину языкоболию вашего: 1-е, не по заповеди Христовой, то есть, без испытания, чтение ваше Священных Писаний; 2-е, недоверие учению Святых Отец наших, о сей божественней умней молитве Богоданною себе Духа премудростью, по силе Священных Писаний, учащих; 3-е, еще же и крайняя грубость ваша, негли ниже видевших, ниже слышавших о сей писания Богоносных Отец наших, или, аще не сие, то отнюд силы Богомудрых словес их неразумеющих, есть самая сущая вина таковому зломудрию вашему.

Зане, аще бы вы со страхом Божиим и крепким вниманием, и несумненною верою, с трудолюбным испытанием и смиренномудрием прочитали книги отеческия, яже наипаче единому приличествуют к чтению монашескому чину, весь разум жития Евангельского в себе содержания, и якоже дыхание нужно есть к составлению человеческия жизни, тако нужны сущия монахом отеческия, глаголю, книги к пользе душевней и исправлению, и ко истинному здравому непрелестному и смиренномудрому разуму; то никогда же бы вам Бог попустил в таковый ров злохуления пасти. Но и разжегл бы вас своею Божественною благодатию чрез сие делание к неизреченней Своей любви, яке и вам со апостолом возопити: кто ны разлучит от любве Христовы63, в нюже сподобихомся мысленным сея молитвы деланием доспети; и не точию на ню не хулили, но и душу бы свою за ню усердствовали положити, самым делом и искусом ощутивше умным сим вниманием неизреченную душам своим пользу. А понеже книги Преподобных Отец наших со несумненною верою не прочитуете, и чтуще же, якоже от плодов хуления вашего познаваем, не доверяете, или отнюдь чести пренебрегаете: того ради и в толикое Богопротивное впадосте мудрование, яко, аки бы вам ниже слышавшим писаний Христианских, хулити и отвергати от всего Святого Писания, по Богомудрому Святых Отец толкованию, свидетельствуемую священную сию молитву. А во еже бы избавитися вам и всем о сей сумнящимся от такового душевного вреда, иного врачевания приличнейшего не обретаю, точию, елико Господь мне своею благодатию поспешит и поможет, потщуся указати, яко Богоноснии Отцы наша на недвижимом камени писания Святого, от просвещения Божественныя благодати, о сей всесвященней, умом в сердце тайносовершаемой, молитве здание душеполезного своего учения утверждают: да и сами вы явленно и ясно истину учения Святых Отец, коснувшейся тайно душ ваших Благодати Божией, увидевше и от душевного вашего сего недуга исцелевше, искреннее Богови о вашем поползновении принесете покаяние, и милости Его Божественныя и совершенного погрешению вашему сподобитеся прощения.

Глава 2

Откуду сия Божественная умная молитва начало имать, и кая свидетельства Богоноснии Отцы о сей от Святого Писания приводят

Прежде неже указати ми, откуду сия Божественная молитва самое первейшее начало имать, должно некая к ведению предложити. Известно убо да будет, яко по писанию Святых и Богоносных Отец наших, две суть умныя молитвы, едина новоначальных, подобающая деянию, другая же совершенных, подобающая видению: она убо начало, сия же конец: деяние бо есть видения восхождение. Должно же ведети: яко по Святому Григорию Синаиту, первых видений суть осмь, яже считая глаголет сице: Осмь первых видений глаголем быти: первое, еже о Бозе, безвидное и безначальное и несозданное и всем виновное Троичное Едино и превыше-существенное Божество; второе, умных сил чин и устроение; третье, сущих составление; четвертое, смотрительное Слова снизхождение, пятое, всемирное воскресение; шестое, страшное и второе Христово пришествие, седмое, вечную муку; осмое, Царствие небесное, не имущее конца. Сие предложив, по худости моего немощного разума, к коей силе деяние и видение разумети должно, извещаю. Ведомо убо буди (к препростым мне подобным глаголю), яко весь монашескийй подвиг, имже бы кто, Богу помоществующу, подвизался на любовь ближняго и Божию, на кротость, смирение и терпение, и на прочия вся Божия и Святых Отец заповеди, на совершенное душею и телом по Богу повиновение, на пост, бдение, слезы, и поклоны и прочее тела утомление, на всеусердное церковного и келлейного правила совершение, на умное тайное молитвы приседение, на плач же, и о смерти размышление, то весь таковый подвиг, Дóндеже еще ум самовластием человечим и произволением окормляем есть, негли известне нарицается деяние: видение же никако же. Аще же бы где и таковый умный молитвы подвиг в писании Святых Отец зрением и порицался, то простым точию словом, понеже ум, яко душевное око, зрением есть нарицаем.

Егда же, Божию помощио и предреченным повигом, паче же всех, глубочайшим смирением очистит кто душу свою и сердце от всякия душевных и телесных страстей скверны ; тогда благодать Божия, общая всех мати, вземши ум тою очищенный, аки отроча за руку, возводит, аки по степенем, на предреченная видения духовная, по мере очищения ума открывая ему неизреченные и умом непостижимыя Божественныя тайны, и сие нарицается воистину истинное видение духовное: еже есть зрительная, или, по святому Исааку, чистая молитва, от неяже ужас и видение: на няже нет возможно никому же своим самовластно произвольным подвигом взыти, аще не кого Бог присетит и благодатию Своею на ня возведет: кроме же света благодати Божия дерзаяй кто на таковая видения восходити, таковый, по Святому Григорио Синаиту64, да весть, мечтания воображая, а не видения, мечтательными духом мечтаем и мечтая. Тако кому убо разсуждению о деятельней и зрительней молитве предложену сущу, время уже настоит показати, откуду Божественная умная молитва свое начало имать.

Ведомо же буди, яко, по не ложному свидетельству Богомудрого, Преподобного и Богоносного Отца нашего Нила, постника Синайского, еще в раи от Самого Бога дадеся первозданному человеку умная, совершенным приличествующая, Божественная молитва. Святый бо Нил, помолившимся усердне, мужески плод молитвенный хранити, да не труд их всуе будет, глаголет сице65: помолився, якоже подобает, ожидай тех, яже не подобают, и стани мужески, храни плод твой. На сие бо от начала учинен был еси: делати и хранити, да не убо соделав, оставиши содеянное не хранимо: аще ли же ни, то ничимже спользовался еси моляся.

Сия же словеса Российское светило, Преподобный Нил пустынный Сорский, аки солнце, умным молитвы деланием, якоже в Богомудрой его книзе явно есть, в великой Росси просиявый, толкуя, глаголет сице: и се уба святый сей от Ветхих приведе: еже делати и хранити; глаголет бо Писание: яко сотвори Бог Адама, и положи его в рай, делати и хранити рай. И зде убо дело райское сей Святый Нил Синайский молитву нарече: хранение же, по молитве соблюдение от злых помыслов. Такожде и Преподобный Дорофей глаголет; яко первозданный человек положен от Бога в рай, бе в молитве, якоже в первом своем поучении пишет. От сих свидетельств явно есть, яко Бог, создав человека по образу Своему и по подобию, введе его в рай сладости, делати сады безсмертныя, сиречь мысли Божественныя чистейшия, высочайшия и совершенныя, по Святому Григорию Богослову. Еже не ино что есть, точию пребывати ему, аки чисту душею и сердцем сущу, в зрительной, умом единем священнодействуемей благодатней молитве, сиречь в сладчайшем видении Бога, и мужески хранити сию, аки райское дело сущу, яко зеницу ока, да никогдаже от души и сердца оскудеет. Велия убо слава есть священныя и Божественныя умныя молитвы, еяже край и верх, сиречь начало и совершение, в раи от Бога дадеся человеку: оттуду убо и начало свое имать. Но несравненно большую стяжа славу, егда паче всех Святых Святейшая, честнейшая Херувим и славнейшая без сравнения Серафим, Пресвятая Дева Богородица, во Святая Святых пребывающи, умною молитвою на крайнюю высоту Боговидения возшедши, сподобися пространное селение Невместимому всею тварью, Ипостасне в Ню вместившемуся Божию Слову быти, и от нея человеческого ради спасения безсеменно родитися: якоже свидетельствует непреоборимый столп Православия66, иже во Святых Отец наш Григорий Палама, Архиепископ Фессалонитский, в слове на вход во храм Пресвятыя Владычицы нашея, Богородицы, и Приснодевы Марии; глаголет бо: яко Пресвятая Дева Богородица, во Святая Святых пребывающи, и от Писания Святого, по вся субботы чтомого, совершенне о погибающем преслушания ради роде человеческом уразумевши, и крайнее о нем милование приемши, умную восприят молитву к Богу, во еже вскоре помиловати и спасти род человеческий. Сего же паки Св. Григория и самыя глаголы Ангельского разума достойныя, малыя от многих, предлагаю, глаголющего тако: Понеже Богоотроковица сия Дева услыша же и виде, милование приемши общаго рода, и смотряющи исцеление и врачбу обрести, толикия страсти противообразну: к Богу абие всем умом обратитися усмотре, юже о нас восприемши молитву, еже понудити Непонужденного и к нам привлещи вскоре, яко да клятву Сам Той от среды истребит, и пажить уставит души растлевающаго огня, и Себе сосвяжет создание, немощное исцелив. Но сице убо благодатная Дева разсмотревши себе приличнейшая и свойственнейшая во всяком естестве, умную молитву, яко чудну и преславную и всякаго слова лучшу, полагаше: ищущи уже, како художне и свойственне побеседует Богу, к нему же Саморукоположная, паче же Богоизбранная прихождаше молитвенница. И низше: Елма убо ничтоже усмотряше от сущих, лучше сея прибывших человеком: к молению простирающися крепко со опасством, новотворит большая и совершеннейшая, и изобретает, и действует, и сущим иже по сих преподавает деяние убо, к видению восхождение высочайшее; видение же толико большее от прежде рекомого, елико мечтания высши есть истина. Но совокупльшеся убо вси в себе, и ум очистивше, услышите уже таинства величество; ибо пользующее все убо Христоименитое исполнение, наипаче же отрекшимся мира слово хощу рещи. Отречения же ради вкусивший уже что будущих онех благ, иже и со Ангелы стает, и жительство на небесех стяжавает: сей подражати да восхощет по силе первую и Едину от младенства отрекшуюся о мире мира присно Девую Невесту. И низше: сие убо ищущи Дева, яко нужднейшее молитвенником к собеседованию, имже бывает молитва, священное безмолвие обретает: безмолвие ума, и мира разстояние, забвение дольних и таинника горних разумение на лучшее преложение: сие бо деяние, яко поистине восхождение к видению Сущаго поистине, или, паче истиннейше рещи, к Боговидению, есть аки кратко указание душе стяжавшаго е поистине. Добродетель же убо всяка ина, якоже врачевание есть применительно недугов душевных и от уныния вкорененных лукавых страстей: Боговидение же есть здравствующая души плод, аки некоторое совершение конечное суще и образ Богодеяний. Сего ради убо Боготворится человек не от словес, или от видимых смотрительного умерения, землено бо сие, и смирено, и человеческо; но от еже в безмолвии пребываания, яко того ради отрешаемся и отпущаемся дольних, и восходим к Богу. И якоже на горнице безмолвного жития, нощию же и днию молитвами и моленми претерпевающе, приближаемся некако и приступаем к Неприступному оному и Блаженному Естеству. И сице сиречь терпящим тем срастворившуся неизреченно Сущему паче чувства и ума Святу, в себе, якоже в зерцале, зрят Бога, сердце священным безмолвием очистивши. Еже скорое и сокращенно указание, яко успешнейшее и Богу соединяющее, наипаче держащихся того по всему отнюд. А яже от мягких, якоже рещи, ногтей, сему спребывающая Дева, Сия что? Сия, понеже от тако зело детского возраста превышеестественне безмолвствоваше, того ради Едина от всех Богочеловека Слово неискусомужно породи. И низше: сего ради и Пречистая, от самого якоже рещи житейского пребывания и молвы отрицающися, от человек преселися и виновна го исбегши жития, невидимую всем и несочетанную изволяше жизнь, пребывающи в невходных: в нихже вещного всякого союза разрешившися, и всякое приобщение и любовь ко всем оттрясши, и того самого еже к телеси своему милования превозшедши, совокупи ум к самому Того сообращению и пребыванию и вниманию и непрестанней Божественней молитве. И тоя ради сама в себе бывши, и многообразнаго мятежа и помышлений и просто всякого вида и вещи превыше устроившися, нов и неизречен путь на небеса творяше, иже есть, да сице реку, мысленное молчание. И сему прилежащи и внимающи умом, вся прелетает создания и твари, и лучше паче, нежели по Моисею, славу зрит Божию, и Божественную назирает благодать, никакоже чувства силе подлежащую, душ же и умов нескверных благорадостное и священное видение, емуже причастившися, по Божественным Песнопевцем, светлый облак бывает сушия поистине живыя воды, Заря же мысленного дне, и огнеобразная Колесница Слова.

До зде св. Григорий.

От сих словес Божественного Григория Паламы ум имущему паче солнца яснейше мощно разумети, яко Пресвятая Дева Богородица, во Святая Святых пребывающи, умною молитвою на крайнюю высоту Боговидения взыде, Божественному Ангельскому монашескому чину, ко опасному по внутреннему человеку житию, о мире мира отречением, священным ума безмолвием, мысленным молчанием и к непрестанней Божественней молитве и вниманию ума совокуплением, деяния же к Боговидению восхождением сама собою образ давши: да на Ню отрекшиися мира монаси взирающе; в предреченных монашеских умных трудех и потех усердно тщатся, елико по силе, молитвами Ея, Ея подражательми быти. И кто возможет ко достоянию Божественную умную похвалити молитву, еяже и сама Мати Божия, якоже речеся, руководствием Святого Духа наставляема, во образ пользы и успеяния монахов, делательница бяше! Во утверждение же и несумненное извещение о сей сумнящимся, аки бы не свидетельствованной и неизвестной вещи, время уже указати, кая о ней свидетельства Богоноснии Отцы, от просвещения Божественныя благодати написавшии, от Священного Писания приводят. Основние непоколебимое Божественная умная молитва имать на словесах Господа нашего Иисуса Христа67: ты же, егда молишися, вниди в клеть твою, и затворив двери твоя, помолися Отцу твоему иже в тайне: и Отец твой, видяй в тайне, воздаст тебо яве. Сия словеса, якоже уже в первой главе речеся, всемирное светило, святый Иоанн Златоустый Богоданною премудростью толкует о безгласной, тайной, от глубины сердца возсылаемой молитве, привед во свидетельство от Святого Писания Боговидца Моисея, и Святую Анну, матерь Самуила Пророка, и Праведного Авеля и кровь его от земли вопиющую, яко в молитве их ниединого гласа испустившим, услышаны от Бога быша. Еще же сей, Христова уста, Великий вселенныя Учитель, Святый Иоанн Златоустый и особне, в триех словесех, о Божественной сей научает молитве: якоже о сем неложный свидетель, Блаженнейший Симеон, Архиепископ Фессалонитский, в книзе своей, юже вся святая Соборная Восточная Церковь, аки столп и утверждение истины в великом почтении имать, в главе 294-й пишет.

Огненный же столп., и огненная Духа Святого уста, око Церковное, Василий, глаголю, Великий, толкуя речи Божественного Писания68 (22): благословлю Господа на всякое время, выну хвала его во устех моих, о умных устех и действе умном, сиречь о умней молитве прекрасне научает, от Священного Писания приводя свидетельство, его же и самыя Божественныя премудрости исполненныя глаголы представляю сия: выну хвала Его во устех моих. Мнится, невозможно еже глаголет Пророк, како выну хваление Божие во устех человеческих быти может. Егда беседует человек обычныя житейския беседы, не имать хвалу Божию во устех; егда спит, молчит всяко; ядущу и пиющу, како действуют уста его хвалу? К сим же глаголем, яко суть убо умная уста внутреннейшего человека, ими же питаяся, причащается Слову Божию животному, иже есть Хлеб, сшедый с Небесе. О онех устех глоголет Пророк: уста моя отверзох, и привлекох Дух; о´на уста и Господь призывает нас широка имети ко приятию пищи истинныя: разшири, рече, уста твоя, и исполню я. Может бо единою вообразованная и назнаменанная владычнему душа яже о Бозе мысль, хвала именоватися, от Бога выну бываемая в души: может бо, и по Апостольскому глаголу, тщаливый вся творити во славу Божию. Якоже всякое делание, и всяк глагол, и всякое действо, умное, хваления имать силу. Аще бо яст праведный, аще пиет, аще что ино творит, вся во славу Божию творит: такового и спяща сердце бдит. До зде св. Василий. От его же словес явлено есть, яко и кроме уст телесных умная суть уста и действо есть умное, и хваление, во внутреннем человеце мысленне выну бываемое. Блаженству же тезоименитый Египетское, паче же рещи, вселенныя солнце, и паче солнца в неизреченных Духа Святого дарованиях просиявый, небесный человек, Великий, глаголю, Макарий, в небесных своих словесех о сей святей молитве глаголет тако: Христиаин должен есть всегда память имети о Бозе, писано бо есть: Возлюбиши Господа Бога твоего от всего сердца твоего, да не точию, егда входит в молитвенницу, любит Господа, но и ходя, и беседуя, и ядя, и пия да имать память о Бозе, и любовь и желание; глаголет бо: идеже есть сокровище ваше, ту будет и сердце ваше, и прочая.

Преподобный же и Богоносный древнш Отец святый, Иссайя постник, о сокровенном поучении, сиречь Иисусовой, мыслью в сердце совершаемой, молитве свидетельство приводит глаголы Божественного Писания сия: согреяся сердце мое во мне, и в поучении моем разгорится огнь.

Преподобный же Симеон, в предреченной Блаженнейшаго Симеона Фессалонитского книзе свидетельствуемый, иже посреде царствующего града умною молитвою, аки солнце, в неизреченных дарованиях Пресвятого Духа просиявый, и сих ради от всея Церкве Новый Богослов нареченный, сей в слое своем еже о триех образах молитвы, о умней молитве и внимании пишет сия: яко Святии наши Отцы, слышавше Господа глаголюща69: яко от сердца исходят помышления злая, убийства, прелюбодеяния, любодеяния, татьбы, лжесвидетельства, хулы, и та суть сквернящая человека, и внутреннее очистити сткляница научивша70, да и внешнее ея будет чисто, оставление всякого иного делания умысл, в сем хранении сердца подвизашася, известно ведяще, яко с сим всякое ино делание без труда удержат, кроме же сего делания добродетель пребывати не может. От сих словес Преподобного сего ясне указуется, яко предреченная словеса Господня Божественнии Отцы о хранении сердца, сиречь о мысленном Иисуса призывании, во свидетельство и основание себе положиша. Еще же Преподобный сей, во свидетельство Божественныя умныя молитвы, и ина приводит словеса от Священного Писания, глаголя: о сем рече Екклисиаст: веселися юноше в юности твоей, и ходи в путех сердца твоего непорочен, и остави ярость от сердца твоего71: и аще Дух Владеющаго найдет на тя, места твоего не остави72; место же рек, сердце показа: якоже и Господь рече: от сердца исходят помышления злая73. И паки: и не возноситеся74; и паки: что тесная врата и прискорбен путь вводяй в живот75? И: блаженни нищии Духом76, сиречь иже ни едину мысль века сего в себе имущии. Глаголет же и Апостол Петр77: трезвитеся, бодрствуйте, зане супостат ваш диавол, яко лев рыкая ходит, иский кого поглотити. И Апостол Павел явленнейше о сердечнем хранении к Ефесеем пишет78: несть нам брань к крови и плоти, но к началом и ко властем и к миродержателем тмы века сего, к духовом злобы поднебесным.

Преподобный же Исихий пресвитер, Богослов и Учитель Иерусалимския Церкве, друг и собеседник Преподобного и Богоносного Отца нашего Евфимия Великого, о сем всесвященном мысленном в сердце Иисуса призывании, сиречь о умней молитве, книгу двесте глав от просвещения Божественныя благодати Богомудре написавый, приводит о сем свидетельства от Божественного Писания сия: блажени чистии сердцем, яко тии Бога узрят79; и паки: внемли себе, да не будет слово тайно в сердце твоем беззакония80; и паки: Во утриих предстану ти, и узриши мя81; и паки: блажен, иже иметь и разбиет младенцы твоя о камень82; и паки: Во утрия избивах вся грешныя земли, еже потребити от града Господня вся делающия беззакония83, и паки: Уготовися Израилю призывати Имя Господа Бога твоего84; и Апостол: непрестанно молитеся85; и Сам Господь наш глаголет86: Без Мене не можете творити ничесоже. Иже будет во Мне, и Аз в нем, сей сотворит плод мног87; и паки: аще кто во Мне не пребудет, извержется вон, якоже розга88; и паки: от сердца исходят помышления злая: убийства, прелюбодеяния, и та суть сквернящая человека, и паки: еже сотворити волю Твою, Боже мой, восхотех: и закон Твой посреде чрева моего89, и прочая, яже долготы ради оставляю.

Божественный же и Богоносный Отец наш Иоанн Лествичник о священней сей молитве и истинном ума безмолвии, от Божественного Писания сия свидетельства приводит, глаголя: Великий великая и совершенныя молитвы делатель рече: хощу пять словес умом моим рещи, и прочая; и паки: готово сердце мое Боже, готово сердце мое; и паки: аз сплю, сердце же мое бдит; и паки: воззвах, рече, всем сердцем моим, сиречь телом и душею, и прочая.

Богоносный же отец наш Филофей, игумен обители Купины Пресвятыя Богородицы, яже в Синаи, о мысленном сердца хранении малую главизн книжицу составивый безценных Божественныя Премудрости. маргаритов, небесныя неизреченныя Духа Святого сладости преисполненных, своих, глаголю, словес основание непоколебимое полагает Священного Писания словеса: Во утрия избивах вся грешныя земли90, и прочая; и: царствие Божие внутрь вас есть91; и: Уподобися царствие небесное зерну горушечну, и бисеру, и квасу; и паки: без Мене не можете творити ничесоже92; и паки: всяким хранением соблюдай твое сердце93; и: очисти внутреннее сткляницы да будет и внешнее ея чисто94, и: несть наша брань к крови и плоти, но к началом и ко властем и к миродержителем тмы века сего, к духовом злобы поднебесным95; и паки: Трезвитеся, бодрствуйте: зане супостат ваш диавол, яко лев рыкая ходит, иский кого поглотити: емуже противитеся тверди верою96; и паки: соуслаждаюся бо закону Божию во внутреннем человеце: вижду же ин закон сопротив воюющ закону ума моего, и пленяюще мя97, в прочая.

Божественный же во Святых Отец наш Диадох, Епископ Фотикийский, в книзе предреченного Святителя Христова Симеона Фессалонитского свидетельствованный, словесам своим о умней Иисусовой в сердце священносовершаемой молитве, духовныя премудрости исполненным, яже в Божественней его книзе сто главизн обретаются, основание от Божественного Писания полагает сие: Никтоже может рещи Господа Иисуса, точию Духом Святым98: и от притчи Евангельския о купце, ищущем добрыя бисеры, приводит сими словесы: Сей есть бисер многоценный, его же, продав имение свое все кто, стяжати может, и имети неизглаголанную о обретении Его радость, и прочая.

Преподобный же Отец наш Никифор постник, в тойжде книзе предреченного Святителя Симеона свидетельствуемый, в слове своем, еже о хранении сердца написа, духовныя пользы преисполненном, Божественное сие мысленное в сердце делание молитвы уподобляет сокровищу сокровенному на селе, и светильником горящим нарицает, привед словеса Священного Писаниия: Царствие Божие внутрь вас есть99; и: несть наша брань к крови и плоти100; и паки: еже делати и хранити, и прочая.

Божественный же и Богоносный Отец наш Григорий Синаит, иже деланием сея Божественныя молитвы во Святей горе Афонстей и на прочиих местех в крайнее Боговидение возшедый, и аки солнце в дарованиях Пресвятого Духа возсиявый, Божественною премудростию Троичны, яже по всей вселенней по вся недели, по Троичном каноне, во Святей Соборней Восточней Церкви поются, такожде и канон Животворящему Кресту сложивый, всех Духоносных Отец объем писания, сложи книгу всякия духовныя преисполненну пользы, в нейже паче прочих Святых по тонку о сей Божественней, умом в сердце священнодействуемей молитве научает, от Божественного Писания словесем своим привед свидетельство: поминай Господа Бога твоего выну101; и паки: В заутрии сей семя твое, и в вечер да не оставляет рука твоя102, и прочая; и паки: аще бо молюся (зри, яко уста и язык и дух, и глас едино есть), языком, то есть усты, дух мой молится, сиречь глас мои; ум же мой без плода есть103: помолюся убо усты, помолюся же и умом, и хощу рещи пять словес умом104, и прочая: свидетеля привед и Лествичника, о молитве сия словеса разумевающа; и паки: нуждно есть Царствие Небесное, и нуждницы восхищают е; и паки: никтоже может рещи Господа Иисуса, точию Духом Святым105, и прочая.

Апостольским же стопам последователь, непреоборимый столп Православные веры, на соборищи Флорентийском Духоборныя Латинов ереси огненным Духа мечем и истиною православных догматов, аки паучиныя сети, растерзавый, Марко, глаголю, всесвященнейший, премудрейший и словеснейший Митрополит Ефесский, в начале толкования церковного изследования, пишет о Божественней Иисусовей, умом в сердце тайно совершаемей молитве, употребляя от Божественного Писания свидетельства, егоже и самыя Богомудрыя предлагаю глаголы, иже суть ми: Подобаше убо, по повелевающей заповеди, непрестанно молитися, и духом и истиною поклонение Богу возноситн: но к житейским помыслом прилежания и о теле попечении уза отводит многих и отставляет Царствия Божия, внутрь нас сущаго, якоже Господне слово обдержит, и запинает умному приседети жертвеннику, духовныя и словесная приносящим жертвы от себе Богу, по Божественному Апостолу: яко есмы храм Бога живущаго в нас, и Дух Его Божественный живет в нас. И дивно ничтоже, аще на многих по плоти живущих сие случатися обыче, егда и отрекшися мирских вещей монахов неких зрим, за еже помысленне боримым быти предприятиями страстей и мног отсюду мятеж воздвизати, помрачающ словесную часть души у могущих достигнути истинныя молитвы, и много хотящим. Сладка есть яже в сердце чистая и непрестанная Иисусова память, и от нея бывающее неизреченное просвещение.

Преподобный же отец наш Российский, Святый Нил Сорский, от учения Богоносных Отец, напиаче же от Святого Григория Синаита, о мысленном сердца хранении книгу свою составивый, свидетельств от Священного употребляет Писания сих: от сердца исходят помышления злая, и сквернят человека106: и, очисти внутреннее сткляницы107, и сие; духом и истиною подобает Отцу кланятися: и: аще молюся языком, и прочая. И: хощу пять словес умом моим рещи, нежели тмы словес языком108: и прочая.

Светило же паки Российское, Святитель Христов Димитрий, Митрополит Ростовский, заблуждения раскольническая и Богопротивный и растленный их Писанию Святому противный разум, аки паучинныя соти, Духовным мечем слова растерзавый и многая учения на пользу Церкви святой, премудрости Духа Святого исполненная, написавый, и о внутреннем молитвы мысленном делании слово, духовныя преисполнено пользы, сложивый, свидетельств от Священного Писания употребляет сих: ты же, егда молишися, вниди в клеть твою, и прочая; и паки: тебе рече сердце мое: Господа взыщу: взыска тебе лице мое: Лица Твоего Господи взыщу; и паки: имже образом желает елень на источники водныя, сице желает душа моя к Тебе Боже: и паки: Царствие Божие внутрь вас есть109: и паки: всякою молитвою и молением молящеся на всяко время духом. И аще молюся языком, дух мой молится, а ум мой без плода есть 110; и паки: помолюся духом, помолюся же и умом: воспою духом, воспою и умом, и прочая. Сия словеса, со Святым Иоанном Лествичником, и Григорием Синаитом и Преподобным Нилом Сорским, о умней молитве разумеет.

Еще же и Устав Церковный, в царствующем великом граде Москве напечатан, о поклонех и молитве церковное законоположение предлагая, о сей Божественней молитве во свидетельство приводит от Священного Писания глоголы сия: Бог Дух есть; духом и истиною кланяющихся хощет111. И: аще помолюся языком, дух мой молится, а ум мой без плода есть112. Что убо есть помолюся духом, помолюся и умом, воспою духом, воспою и умом113? И паки: хощу, рече, в церкви пять словес умом моим глаголати, нежели тмы словес языком114. Приведе же во свидетельство в Святых Отец: Святого Иоанна Лествичника, и Божественного Григория Синаита, и Святого Антиоха от части о сей умней молитве, и Божественная их учения, яже окончив глаголет: и се убо зде о святей, священней и приснопамятней умней молитве конец творим: таже представляет и о святей, всем единой молитве, яже в церковном чиноположении лежит.

Се уже благодатию Божиею указася, яко Богоноснии Отцы, Духа Святого просвещением умудряеми, основание учения своего о священнодействии мысленнем тайносовершаемыя по внутреннему человеку молитвы на недвижимом камени Божественного Нового и Ветхого Заветов Писания полагают, оттуду, аки от неисчерпаемого источника, толика премногая свидетельства приемлюще.

Кто убо от правоверующих христиан, видящи сие, могл бы поне мало приити во усумнение о сей Божественней вещи, разве повинующиеся духу нечувствия, слышащий и видящий, разумети же и ведети не хотящий ? Бога же боящииеся и здрав имущии разум, толиких свидетелей и таковая свидетельства зряще, единодушне исповедят Божественное сие дело быти паче всех подвигов монашеских свойственнейшее и приличнейшее. Ангельскому монашескому чину. Сиречь о делании сем многая и достослышанная вышереченнии и прочии премногии Божественнии Отцы наши во своих списаниих, паче меда и сота сладчайшая, духовныя премудрости исполненная своя предлагают словеса: о внутреннем, мысленном на мысленныя и невидимыя враги подвиге научающе: како должно меч сей духовный и пламенное сие непобедимое Имене Иисусова оружие, хранящее врат сердечных, на них обращати: сиречь, како должно есть умом в сердце сию Божественную Иисусову священнодействовати молитву.

О коем священнодействии сия священныя молитвы, паче же о самых ея начатках и искусе, как должно есть новоначальным сея обучатися, аз последнейший, по силе моего немощного ума, хотя поне мало нечто, Богу укрепляющу мя, от учения Святых Отец написати должен есмь: и первее о сем, яко сия Божественная молитва есть художество духовное: таже и о предуготовлении к деланию тоя, по учению Святых Отец, объявити.

Глава 3

Яко сия священная молитва есть художество духовное

Известно же да будет, яко Божественнии Отцы наша сие священное мысленное молитвы делание художеством нарицают. Святый Иоанн Лествичник в слове 25 о безмолвии, о таинстве умныя сея молитвы научая, глаголет: Аще художеству сему искусно научился еси, то не не веси глаголемое. Седя на высоте блюди, аще убо и веси: и тогда узриши, како, и когда, и откуду, и колицы и кии татие внити и украсти гвоздие грядут. Утрудився страж сей, востав помолится: и паки сед, первого делания мужественне держится. Святый же Исихий, Пресвитер Иерусалимский, о сей же священней молитве глаголет115: трезвение есть художество духовное от страстных помышлений и словес и лукавых дел, все отнюд человека с Богом избавляюща.

Святый же Никифор Постник, о тойжде научая, глаголет: приидите, и повем вам вечного, паче же небесного жития художество паче нежели хитрость, безтрудно в безстрастия пристанище и безпотно своего делателя вводящее. Художеством же сим святую молитву предреченнии Святии Отцы якоже указася, нарицают, мню того ради, что якоже художества не может сам о себе человек искусно без художника научитися: тако и сему мысленному молитвы деланию, без искусного наставника, навыкнути не возможно; но исправление сие, по Святому Никифору, от учения паче многим, или и всем прибывает; редцыи же сие неученне, нуждею делания и теплотою веры, от Бога прияша.

Церковное бо по уставу правило, еже по священным церковным книгам, аки дань, подобающую Царю небесному, должны суть Православнии Христиане мирстии н монаси на всяк день воздавати, всяк умеющий писание может усты чести и совершати без всякого научения. Умом же в сердце таинственную молитвы жертву Богу приносити, понеже духовное есть художество, без научения, якоже предуказася, есть невозможно.

Сие же духовное художество сущее есть и непрестанное монахов дело, да не точию отречением мира и яже в мире, пременением же на постризе имене и отменными одеждами; безбрачным, девственным, чистым, в самопроизвольной нищете житием, и отменною пищею и места вселением; но и самым мысленным духовным по внутреннему человеку вниманием и молитвою, отменное и превосходящее паче мирских человек монаси дела-ние имут.

Глава 4

Кое предуготовление должен есть имети хотяй сие Божественное проходити делание

Елико же сия Божественная молитва есть большая, паче всякого монашеского подвига, и по Святым Отцем верх есть исправлений, и добродетелем источник, тончайшее же и невидимое во глубине сердца ума делание: толике и невидимыя, тонкия, и уму человеческому едва постижимыя, от невидимого врага спасению нашему на ню многообразных его прелестей и мечтаний поставляются сети. Того ради нуждно есть усердствующему сему Божественному обучатися деланию, по Святому Симеону Новому Богослову, предати себе в сущее по Святому Писанию душею и телом послушание, сиречь, воли своея и разсуждения совершенное отсечение, человеку боящемуся Бога и Божественных Его заповедей усердному хранителю и в мысленном сем подвизе не неискусну, могущему, по писанию Святых Отец, незаблуден путь ко спасению умного сего делания, сиречь умом в сердце тайно соверщаемыя молитвы, повинующемуся показати; да истинным по разуму послушанием может от всех молв и попечений и пристрастий мира сего и тела свободь быти. Како бо свободь и не будет, на Бога и по Бозе на своего отца, о душе и теле своем всякую печаль возложивый; смирением же (по Святого Иоанна Лествичника и многих Святых Отец свидетельству), раждающимся от послушания, возможет от всех прелестей и сетей диавольских убежати, тихо же и безмолвно без всякого вреда, с велиим души своея успеянием в мысленном сем выну упражнятися деле. Аще же и в послушание по Бозе себе предав, не обрел бы отца своего самым делом и искусом в сей Божественной умной молитве искусна наставника быти: в нынешнее бо время (увы, многого плача и рыдания достойныя вещи) до конца сему деланию искуснии наставницы оскудевают: то не должен есть о сем отчаяватися, но во истинном по заповедем Божиим послушанием и со смирением и страхом Божиим, а не в самочинном и особо своевольном без послушания житии, ему же прелесть последовати обыче, пребывая, всю на Бога надежду возложив, вкупе со Отцем своим, вместо истинного наставника, верою и любовию повинутися учению Преподобных Отец наших, о сем Божественном делании, просвещением Божия благодати, тонкочастне научающих, и оттуду о молитве сей научатися: и всяко благодать Божия поспешит и наставит, молитвами Святых Отец, Божественному сему без всякого сумнения научитися делу.

Глава 5

Что есть по качеству и действу своему сия священная Иucycoвa молитва

Таковому убо предуготовлению сея Божественныя молитвы, сиречь треблаженному послушанию, аки некоему твердому и непоколебимому основанию положену сущу: время уже настоит, от учения Святых Отец указати, что есть по качеству и действу своему сия священная молитва, да хотяй сея духовному обучатися деланию, и виде к таковому велику и неизреченну успеянию различных добродетелей возводящую подвижника; с большим усердием и Божественною ревностию возжелает сему всесвященному мысленныя молитвы прилепитися делу. Святый убо Иоанн Лествичник в слове 28 о молитве, в начале глаголет: Молитва есть, по качеству убо своему, сопребывание и соединение человека и Бога: по действу же, мира состояние, Божие примирение, слез мати и паки дщи, о гресех умилостивление, искушений мост, скорбей средостение, браней сокрушение, Ангел дело, безплотных всех пища, будущее веселие, безконечное делание, добродетелей источник, дарований виновна, предуспеяние невидимо, пища души, ума просвещение, отчаянию секира, надежды указание, печали решение, богатство монахов, безмолвников сокровище, ярости умаление, зерцало предуспеяния, мира явление, устроения изъявление, будущих возвеститель, славы знаменание. Молитва есть воистинну молящемуся судилище, и судище, и Престол судища Господень, прежде будущего Престола.

Святый же Григорий Синаит в главе 113 краегранесия глаголет: Молитва есть, в новоначальных убо, яко огнь веселия от сердца издаваем: в совершенных же, яко свет благоухая действуем; или паки: молитва есть Апостолов проповедание, веры действо, паче же вера неходатайственна, уповаемых ипостась, действуема любы, Ангельское движение, сила безплотных, дело и веселее их, благовествование Божие, извещение сердца, спасения надежда, освящения знамение, святости образование, Божие познание, крещения явление, бани очищение, Духа Свята обручение, Иисусово радование, веселие души, милость Божия, примирения знамение, Христова печать, луча мысленного солнца, денница сердец, Христианству утверждение, примирения Божия явление, благодать Божия, премудрость Божия, паче же самопремудрости начало, Божие явлениие, монахов дело, безмолвствующих жительство, паче же безмолвию вина, Ангельского жительства знамение.

Блаженный же велпкш Макарий глаголет116: глава всякого тщания благого и верх всех направлений есть, еже претерпевати в молитве, еюже и прочие добродетели прошением от Бога всегда пристяжавати можем: отсюду бо бывает в сподобляющихся приобщение святости Божия и духовного действа, и соединение завещания ума еже ко Господу неизреченною любовию: иже бо себе всегда в молитве претерпевати понуждаяй, в рачение божественно и в желание разжженно от духовныя любве возгарается к Богу, и благодать Духовнаго освятительного совершенства по мере подъемлет.

Святый же Исихий, пресвитер Иерусалимский, глаголет117: светородно и молние родно и светоиспущающо и огненосно хранение ума, приличие и тезоимение да нарицается. Превосходит бо, воистинну рещи, безчисленны и многи телесные добродетели. Сего убо ради честными имены нарицати подобает сию добродетель, за раждаемыя из нея светозарныя светы, ея же вожделевший из грешных и непотребных и сквернавых и невежд и неразумных и неправедных, праведны, благопотребны, чисты, святы и разумны чрез Иисуса Христа могут быти: и не точию сие, но и таинственна Божественна зрети и богословити: и зрительни бывше, к чистейшему и безконечному Свету сему преплавают, и приближаются к Нему неизреченными приближеньми, и воистинну с ним вселяются и жительствуют: понеже вкусиша яко благ Господь118: якоже исполнятися яве в таковых первоангелех Давидовому119: обаче праведнии исповедятся Имени Твоему, и вселятся правии с Лицем Твоим, воистинну бо, воистинну сии едини известно призывают и исповедаются Богови, с нимже и любят беседовати выну, любяще Его.

Святый же Симеон120, Архиепископ Фессалонитский, о сей же священней молитве глаголет:

Сия убо Божественная молитва, Спаса нашего призывание: Господи Иисусе Христе, Сыне Божий, помилуй мя, и молитва есть, и моление и исповедание веры, и Духа Святаго подательница, и даров Божественных дарователь, и очищение сердца, и изгнание бесов, и веселие Ииисус Христово, и духовных мыслей и помыслов Божественных источник, и грьехов избавление, и душ и телес врачевание, и просвещения Божественного податель, и милости Божия источник, и откровений и тайн Божественных смиренным дарователь, и самое спасение, понеже и спасительное носит в себе Бога нашего Имя: еже самое Имя есть нареченное на нас Иисуса Христа, Сына Божия.

До зде св. Симеона.

Такожде и прочии Богоноснии Отцы, о сей святей молитве пишуще, о действии оныя и неизреченней от нея происходящей духовней пользе и в Божественных Духа Святого дарованиих чрез ню предуспеяние Премудрости Божия исполненным своим учением изъявляют.

Кто убо, видя сию священнейшую молитву, к таковому различных добродетелей небесному сокровищу приводящую подвижника, ревностию Божиею ко всегдашнему деланию молитвы не разжжется, да тою всесладчайшого Иисуса в души и сердце своем выну сокровиществуяй, непрестанно Вседражайшее Его Имя в себе поминает, неизреченне к любви Его сею разжизаем121. Разве к житейским помыслов прилежанием и о теле попечений узою, отводящей многих и отставляющею Царствия Божия, внутрь нас сущаго, объят быв, еще же самым делом и искусом неизреченныя Божественныя сладости сего всеполезнейшаго делания гортанем душевным не искусив, и не уведев, коликую внутрь Себе сия вещь имать сокровенную духовную пользу, той точию к таковому мысленному мысленныя молитвы не возусердствует коснутися делу. Хотящии же со Сладчайшим Иисусом любовно соединенны быти, вся красная мира сего и наслаждения и покой телесный оплевание, ничтоже ино в житии сем имети восхощут, точию в райском сей молитвы делании выну упражнятися.

Глава 6

О начале, како подобает обучатися действовати умом в сердце сию Божественную молитву

Понеже в древняя времена сие всесвятое умныя молитвы делание на многих, идеже Святии Отцы пребывание имеяху, возсияваше местех, и мнозии тогда сему духовному деланию учителие бяху: того ради и святии отцы наши, пишуще о нем, изъявляли точию о неизреченной от него духовней происходящей пользе: нужды, якоже мню, не имуще о самом новоначальным приличествующем искусе сего делания писати. Аще же где отчасти и писали, то и сие ведущим убо искус сего делания зело есть ясно, неведящим же покровенно. Нецыи же от них, егда увидеша, яко истинне и непрелестне делания сего наставницы начата по премногу умалятися, Божиим подвижеми Духом, да не оскудеет о начале сея мысленные молитвы истинное учение, написаша и самое начало в искусе, как должно обучатися новоначальным, и умом входити во страны сердечныя, и истинно и непрелестно тамо умом действовати молитву: ихже и самое о сем Божественное учение на среду предложити должно.

Святый Симеон Новый Богослов о начале сего делания глаголет тако122: Истинное и непрелестное внимание и молитва есть: еже сердце блюсти уму, внегда молитися, и внутрь сего присно обращатися, и от оныя глубины моления ко Господу возсылати. Зде убо вкусив, яко благ Господь, не ктому от обители сердца изводится; возглаголет бо и той со Апостолом: Еже добро есть нам зде быти, и выну тамошняя места обзирая, всеваемыя помыслы вражия низлагая изгоняет. И низше о сем же и еще яснейше глаголет тако: Сед в келлии безмолвней, и во едином особь угле, внемли творити, еже глаголю тебе: затвори дверь, и возми ум твой от всея суеты, таже утверди к персем твою браду, движа чувственное око со умом. Придави же и ноздренного духа влечение, еже не дерзостно отдыхати: и испытай мысленне внутрь во утробе обрести место сердечное, идеже любопребывати естество имут вся душевныя силы: и первее убо тму обрящеши и дебелство неослабно. Пребывающу же тебе, и сие дела нощь и день творящу, обрящеши, о чудесе! непрестанное веселие. Купно бо егда обрящет ум место сердечное, абие видит, яже никогда же видяше: видит бо посреде сердца воздух, и себе светла всего и разсуждения исполненна. И оттоле, отонуду же приникнет помысл, прежде даже не совершитися, или идолосотворитися, призыванием Иисуса Христа отгоняет сего и потребляет. Отсюду ум злопомня на бесы воздвизает еже по естеству на ня гнев, и гоня низлагает мысленныя супостаты. И иным научишися со Богом блюдением ума, Иисуса в сердце держа.

Преподобный же Никифор Постник, о входе умом в сердце и еще яснейше научая, глаголет: да будет тебе первее житие безмолвно, безпечально и со всема мирно. Таже вшед в клеть твою, затвори себе, и сед во едином угле, сотвори, еже глаголю тебе: веси, яко дыхание, имже воздыхаем, воздух сей есть; отдыхаем же сей, не за ино что, точию сердца ради; сие бо есть жизни виновно и теплоты телу. Привлачит убо сердце воздух, да свою убо теплоту вонь дыханием изреет, себе же благорастворение подаст. Виновно же такового строения, или паче рещи, служитель, легкое есть, еже редкое от Содетеля создано бывше, якоже некий мех, неоскудно вводит и изводит обдержащее, сиречь дух. Тако сердце хладное убо влекущо духом, теплое же изреяющо, чин сиречь, егоже ради устроено бысть к состоянию животнаго, непрестанно соблюдает. Ты убо сед, и собрав ум твой, вовведи его в ноздренный путь, идеже дух в сердце входит, и порей его, и понуди вкупе снити с воздыхаемым духом в сердце. Вшедшу же тамо, не ктому невесела, ниже нерадостна будут яже по сих. И низше: Сего ради, брате, обыкнути ум сотвори, еже не скоро оггуду исходити: зело бо в началех унывает от внутренних созатворения и тесноты. Повнегда же обыкнет, не ктому пребывает во внешних обхождениих: Царствие бо небесное внутрь нас есть: еже тамо обзирая, и чистою молитвою сего взыскуя, внешняя вся мерзская вменятся и ненавистна. Аще убо исперва, яко же речеся, умом внидеши в сердечное место, еже ти показах: воздаждь блогодарение Богу, и прослави, и взыграй, и держися сего делания выну, и сие имать научити тя тем, яже не веси. Подобает же тебе и сие уразумети, яко тамо уму твоему сущу, не молчащу и праздну оттоле стояти, но, Господи Иисусе Христе Сыне Божий, помилуй мя, имети дело и поучение непрестанно, и никогдаже от сего преставати: сие бо невысим содержащо ум, не ята показует его и неприкосновенна прилоги вражиими, а в любовь и в желание Божественно повседневное возводит. Аще ли же много потрудився, о брате, не можеши внити во страны сердца, якоже тебе уставихом: сотвори еже глаголю ти: и имаши, Богу содействующу ти, обрести искомое.

Веси ли, яко словесное всякого человека в персех есть? внутрь бо персей, и молчащим устнам, тамо глаголем и советуем, и молитвы уставляем и Псалмы и ина некая. Сему бо словесному, всяк помысл от него отъем (можеши бо, аще хощеши), даждь глаголати: Господи Иисусе Христе Сыне Божий, помилуй мя, и понудися сие, вместо всякия иныя мысли, всегда внутрь вопити. Сие же на время держав, отверзется тебе сим и сердечный вход, яко же тебе написахом, кроме всякого сумнения, яко же в мы искусом познахом. Приидет тебе, со многовожделенным и сладким вниманием, и весь добродетелей лик: любы, радость, мир, и прочая.

Божественный же Григорий Синаит, такожде уча, како подобает умом действовати в сердце спасительнейшее Господне призывание, глаголет123: От утра убо седя на пядном седалищи, придави ум от владычественного в сердце, и держи его в том. Преклонься же с трудом, и персми, рамены же и выею зело боля, пребывательно зови умно, или душевно, еже: Господи Иисусе Христе, помилуй мя. Таже тесного ради и приболезненного, негли и несладостно частости ради имея: (еже несть единыя ради снеди Триименного, часто ядомыя: Ядущии бо мя, глаголет, еще взалчут): пременяя ум во другую половину, глаголи: Сыне Божий помилуй мя. И многащи глаголя половину сию, часто не должен еси от лености и стужения пременяти сея: не вкореневаются бо садове часто пресаждаеми. Держи и отдыхание легкого, да не дерзостне дышеши. Ибо дхновение духов, от сердца воздаваемо, помрачает ум, к сердцу возбраняя, или не допуская, а развевает мысль. Оттуду того возбраняя, или забвению пленника предает, или иным вместо тех поучатися того устрояет, нечувственне в киих не подобает обретающася. Аще же увидиша нечистоты лукавых духов, сиречь помыслы возницаемы, или преобразуемы во уме твоем, не ужаснися, ни удивися; аще и блага разумения вещей неких являются ти, не внимай тем: но держа воздыхание, якоже мощно ти, и ум в сердце затворяя, и призывание Господа Иисуса часто и пребывательно действуя, скоро попалиши и истребиши сии, язвя их невидимо Божественным Именем. Глаголет бо Лествичник: Иисусовым Именем бий ратники: ниедино бо крепчайше оружие есть на небеси и на земли.

И паки сей же Святый, о безмолвии и молитве, како в нем подобает седети, уча, глаголет124: Овогда убо на стульце множайше труда ради: овогда же и на постели мало во время, отрады ради. В терпении же должно быти сидение твое, рекшаго ради: в молитве претерпевающе, и не скоро воставати, пренемогая притрудныя ради болезни, и умнаго вопития ума и частаго водружения. Се бо глаголет Пророк: болезни объяша мя, якоже раждающую: но понича долу, п ум в сердце собирая, и аще убо отверзеся, призывай Господа Иисуса на помощь: боля же рамены, и главою многажды болезнуя, терпи притрудне и рачительне в тех, ища в сердце Господа: нудящихся бо есть Царствие Божие, и нуждницы восхищают е, и прочая. И еще же како подобает действовати молитву Глаголет125: Сице рекоша Отцы: Ов убо: Господи Иисусе Христе Сыне Божий, помилуй мя, всю. Ов же пол: Иисусе Сыне Божий, помилуй мя, еже и удобнейше есть за умное еще младенчество и немощь. Ниже бо может кто о себе тайно без Духа един рещи Господа Иисуса, точию Духом Святым, чисте и совершенне; но яко отроча немотствуя, еще совершити сию со члены не могий. Не должен же есть часто пременяти призывания имене пренемогания ради, но косно содержания ради. Паки: ови убо усты, ови же умом учат глаголати ту; аз же обоя полагаю. Овогда убо ум изнемогает глаголати унывая, овогда же уста: и сего ради обоими подобает молитву деяти, и усты и умом: обаче безмолвно и несмущенно подобает вопити, яко да не чувство душевное и внимание ума, гласом смущаемо, возбраняется, Дóндеже ум обыкнув в деле предуспеет и силу приимет от Духа, во еже крепце и всячески молитися. Тогда бо не требует глаголати усты, ниже может, доволен сый точию умом совершенное творити делание.

Се убо вышереченное сии Святии Отцы, якоже указася, зело ясное учение и искус обучения умного делания новоначальным представляют: от ихже учения и прочиих Святых о сем делании учение, аще и покровеннейше реченное, уразумети возможно есть.

Конец шести глав. Богу премилостивому слава, честь, поклонение и благодарение в безконечныя веки. Аминь.

(Сим главам совершеннаго конца не обретается и в подлинним).

* * *

61

Свт. Златоуст

64

Глава 130

65

Глава 49

80

Второзакон. 15: 9

87

Тако в книзе Св. Исихия

93

Премуд. Сол. 4: 23

101

Второзакон. 8: 18

105

!Кор. 12: 3

115

Сотниц, 1-ая, глава 1

116

Беседа 40, число 2

117

Сотница 2-ая, гл. 71

120

Глав. 296

122

Слово о трех образех внимания и молитвы

123

О безмолвии 15-я главизны 2-я глава

124

Последних седми глав первая

125

Глава 2-я


Источник: Житие и писания молдавского старца Паvсiя Величковского. - Репр. изд. - Козельск : Свято-Введ. Оптина Пустынь, 2001. - XVI, 355 С., [3] л. портр. ISBN 5-86594-059-7

Комментарии для сайта Cackle