(л. р҃ѕ) Знамєна́нїѧ пе́рвагѡ посла́нїѧ къ корі́нѳѧнѡмъ.

[а҃] Ѡ҆ є҆́же не бы́ти ра́спрѣ дрꙋ́гꙋ со дрꙋ́гомъ ѿ славолю́бїѧ, є҆́же ѡ҆ человѣ́честѣй мꙋ́дрости.

[а҃] Въ не́мже ѡ҆ бж҃їей премꙋ́дрости.

[в҃] Ѡ҆ слꙋже́нїихъ.

[г҃] Ѡ҆ є҆́же не досто́итъ сꙋди́ти ᲂу҆чи́телей.

[д҃] Ѡ҆ є҆́же не досто́итъ горди́тисѧ.

[в҃] Ѡ҆ блꙋдницѣ́хъ и҆ ѡ҆ блꙋдѣ̀, и҆ ѡ҆ соѻбща́ющихсѧ и҆̀мъ.

[г҃] Ѡ҆ є҆́же не подоба́етъ прѣ́тисѧ пред̾ невѣ́рными.

[а҃] Въ не́мже, ꙗ҆́кѡ не подоба́етъ блꙋда̀ твори́ти.

[д҃] Ѡ҆ жени́твѣ, и҆ вдовствѣ̀, и҆ безбра́чїи.

[а҃] Въ не́мже, ꙗ҆́кѡ не подоба́етъ разлꙋча́тисѧ мꙋ́жємъ ѿ же́нъ, и҆ жена́мъ ѿ мꙋже́й, а҆́ще и҆ невѣ́рни сꙋ́ть.

[в҃] Ѡ҆ чистотѣ̀ и҆ двоебра́чїи.

[є҃] Ѡ҆ разли́чїи бра́шенъ, и҆ ѡ҆ ѿстꙋпле́нїи бѣсо́вскагѡ чти́лища.

[а҃] Въ не́мже ѡ҆ схожде́нїи.

[в҃] Ѡ҆ є҆́же є҆гѡ̀ многоѻбра́знѣмъ схожде́нїи.

[г҃] Ѡ҆ є҆́же не соѡбща́тисѧ де́мѡнѡмъ.

[ѕ҃] Ѡ҆ бл҃гоѻбра́зїи мꙋже́й и҆ же́нъ въ мл҃твахъ и҆ прⷪ҇ро́чествахъ.

[з҃] Ѡ҆ соѻбще́нїи бг҃олѣ́пномъ.

[и҃] Ѡ҆ разли́чїи дарова́нїй и҆ строе́нїй.

[а҃] Въ не́мже ѡ҆ любвѝ вели́комъ дарова́нїи.

[в҃] Ѡ҆ проро́чествѣ.

[ѳ҃] Ѡ҆ собо́рнѣмъ воскресе́нїи тѣле́съ.

[а҃] Въ не́мже ѡ҆ хрⷭ҇то́вѣ и҆справле́нїи и҆ строе́нїи.

[в҃] Ѡ҆ подо́бїи востаю́щихъ растꙋ́щихъ сѣ́менъ.

[г҃] Ѡ҆ и҆змѣне́нїи въ сла́вꙋ и҆ си́лꙋ. (л. р҃ѕ ѡ҆б.)

Сказа́нїе къ корі́нѳѧнѡмъ пе́рвагѡ посла́нїѧ ст҃а́гѡ а҆пⷭ҇ла па́ѵла.

Сїѐ посыла́етъ ѿ є҆фе́са а҆сі́йскагѡ, ви́дѣвъ ᲂу҆жѐ и҆̀хъ и҆ наꙋчи́въ, и҆ воспомина́етъ и҆̀мъ посла́нїемъ си́мъ. И҆звѣ́тъ же посла́нїѧ се́й є҆́сть: корі́нѳѧне ѿ любопрѣ́нїѧ води́ми, раздѣлѧ́хꙋсѧ ра́зꙋмы, и҆ бѣ́ша про́чыѧ въ ни́хъ раско́лы: и҆ сꙋ́щымъ раско́лѡмъ, презира́хꙋ пое́мшаго ма́чехꙋ свою̀. И҆ні́и же хотѧ́хꙋ ѡ҆ставлѧ́ти жєны̀ своѧ̀, и҆звѣ́томъ воздержа́нїѧ. Нѣ́цыи же въ тре́бищахъ і҆́дѡльскихъ ꙗ҆дѧ́хꙋ, ꙗ҆́кѡ непови̑ннымъ сꙋ́щымъ і҆дѡложе́ртвєннымъ. И҆ні́и же и҆ны́хъ ᲂу҆́бѡ ᲂу҆ничижа́хꙋ, а҆ гл҃ющихъ разли́чными ѧ҆зы́ки хвалѧ́хꙋ, и҆ коне́чнѣ прельща́хꙋсѧ: и҆ ѡ҆ та́инствѣ воскрⷭ҇нїѧ, гл҃юще не воста́ти пло́ти се́й. Си̑мъ всѣ̑мъ въ корі́нѳѣ дви̑жимымъ, пи́шꙋтъ лю́дїе ко а҆пⷭ҇лꙋ, и҆ про́чее проти́вꙋ всѣ́хъ тѣ́хъ восписꙋ́етъ. И҆ пе́рвѣе ᲂу҆́бѡ свидѣ́тельствꙋетъ и҆̀мъ, ꙗ҆́кѡ и҆ мꙋ́дри и҆ разꙋ́мни сꙋ́ть, не хва́литъ же и҆̀хъ творѧ́щихъ раско́лы, и҆ совѣ́тꙋетъ не въ сло́вѣ, но въ дѣ́лѣ и҆ си́лѣ добродѣ́тель мнѣ́ти бы́ти. Та́же запрети́въ пои́мшемꙋ ма́чехꙋ, и҆ поꙋчи́въ не и҆мѣ́ти тѧжбы̀ дрꙋ́гъ ко дрꙋ́гꙋ, ѿвѣщава́етъ про́чее ѡ҆ ни́хже писа́ша, ѡ҆ жени́твѣ ᲂу҆́бѡ ᲂу҆чѧ̀, не распрѧ́жнꙋ бы́ти спрѧже́нїю, и҆ на вре́мѧ то́чїю воздержа́тисѧ мл҃твы ра́ди. А҆ за є҆́же люби́ти и҆̀мъ воздержа́нїе, пи́шетъ ѡ҆ дѣ́вствѣ, ꙗ҆́кѡ не по нꙋ́жди, но по и҆зволе́нїю семꙋ̀ бы́ти подоба́етъ. Та́же ѡ҆ і҆дѡложе́ртвенныхъ завѣщава́етъ, да не надыма́ютсѧ ра́зꙋмомъ, но любо́вїю и҆ смиреномꙋ́дрїемъ да жи́тельствꙋютъ. Возбранѧ́етъ же въ тре́бищахъ і҆́дѡльскихъ пирова́ти, да не соблазнѧ́ютсѧ ма́лїи. Та́же ѡ҆ (л. р҃з) дх҃о́вныхъ дарова́нїихъ, да не ра́знствꙋютъ въ дарова́нїихъ, нижѐ да предпочита́ютъ и҆мꙋ́щаго дарова́нїе сїѐ, ѿ и҆мꙋ́щагѡ ѻ҆́но: всѣ̑мъ бо тогѡ́же дх҃а бы́ти глаго́летъ. И҆ про́чее ѡ҆ воскрⷭ҇нїи ᲂу҆чи́тъ, ꙗ҆́кѡ пло́ть востае́тъ: ᲂу҆мира́ющи бо тлѣ́нна, востаю́щи же нетлѣ́нна по бл҃года́ти гдⷭ҇ни. Воскрⷭ҇нїе же составлѧ́етъ тѣ́мъ, ꙗ҆́кѡ и҆ хрⷭ҇то́съ воскре́се. И҆ коне́цъ, ᲂу҆чи́тєльна словеса̀ ко и҆справле́нїю нра́вѡвъ пи́шетъ: и҆ ѡ҆ млⷭ҇тыни є҆́же ко ст҃ы́мъ завѣщава́етъ, и҆ си́це скончава́етъ посла́нїе. (л. р҃з ѡ҆б.)

КЪ КОРІ́НѲѦНѠМЪ ПЕ́РВОЕ

ПОСЛА́НІЕ СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇ рк҃в) сⷯ а҃ Па́ѵелъ зва́нъ Во вто́рникъ ѕ҃ недѣ́ли: Па́ѵелъ зва́нъ а҆пⷭ҇лъ і҆и҃съ хрⷭ҇то́въ, во́лею бж҃їею, и҆ сѡсѳе́нъ бра́тъ: в҃ Цр҃кви бж҃їей сꙋ́щей въ корі́нѳѣ, ѡ҆свѧщє́ннымъ ѡ҆ хрⷭ҇тѣ̀ і҆и҃сѣ, зва́ннымъ ст҃ы̑мъ, со всѣ́ми призыва́ющими и҆́мѧ гдⷭ҇а на́шегѡ і҆и҃са хрⷭ҇та̀, во всѧ́комъ мѣ́стѣ, тѣ́хъ же и҆ на́шемъ.

(заⷱ҇ рк҃г) г҃ Бл҃года́ть ва́мъ ꙳꙳ Сꙋббѡ́та а҃і: Бра́тїе, бл҃года́ть ва́мъ ꙳꙳ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. д҃ Благодарю̀ бг҃а моего̀ всегда̀ ѡ҆ ва́съ, ѡ҆ бл҃года́ти бж҃їей да́ннѣй ва́мъ ѡ҆ хрⷭ҇тѣ̀ і҆и҃сѣ: є҃ Ꙗ҆́кѡ во все́мъ ѡ҆богати́стесѧ ѡ҆ не́мъ, во всѧ́комъ сло́вѣ, и҆ всѧ́комъ ра́зꙋмѣ, ѕ҃ Ꙗ҆́коже свидѣ́тельство хрⷭ҇то́во и҆звѣсти́сѧ въ ва́съ: з҃ Ꙗ҆́кѡ ва́мъ не лиши́тисѧ ни во є҆ди́номъ дарова́нїи, ча́ющымъ ѿкрове́нїѧ гдⷭ҇а на́шегѡ і҆и҃са хрⷭ҇та̀: и҃ И҆́же и҆ ᲂу҆тверди́тъ ва́съ да́же до конца̀ непови́нны, въ де́нь гдⷭ҇а на́шегѡ (л. р҃и) і҆и҃са хрⷭ҇та̀. ѳ҃ Вѣ́ренъ бг҃ъ, и҆́мже зва́ни бы́сте во ѻ҆бще́нїе сн҃а є҆гѡ̀ і҆и҃са хрⷭ҇та̀ гдⷭ҇а на́шегѡ.

Коне́цъ вто́рникꙋ, и҆ сꙋббѡ́тѣ.

(заⷱ҇ рк҃д) [а҃] і҃ Молю́ же вы̀ бра́тїе, и҆́менемъ Недѣ́лѧ и҃: Бра́тїе, молю́ вы и҆́менемъ гдⷭ҇а на́шегѡ і҆и҃са хрⷭ҇та̀, да то́жде глаго́лете всѝ, и҆ да не сꙋ́ть въ ва́съ ра̑спри: да є҆сте́ же ᲂу҆твержде́ни въ то́мже разꙋмѣ́нїи, и҆ въ то́йже мы́сли. а҃і Возвѣсти́сѧ бо мѝ ѡ҆ ва́съ, бра́тїе моѧ̀, ꙾по́сланными ѿ хло́иса꙾꙾ѿ дома́шнихъ хло́иса꙾, ꙗ҆́кѡ рвє́нїѧ въ ва́съ сꙋ́ть. в҃і Глаго́лю же сѐ, ꙗ҆́кѡ ко́йждо ва́съ глаго́летъ: а҆́зъ ᲂу҆́бѡ є҆́смь па́ѵловъ, а҆́зъ же а҆поллѡ́совъ, а҆́зъ же ки́финъ, а҆́зъ же хрⷭ҇то́въ. г҃і Є҆да̀ раздѣли́сѧ хрⷭ҇то́съ; є҆да̀ па́ѵелъ распѧ́тсѧ по ва́съ; и҆лѝ во и҆́мѧ па́ѵлово крⷭ҇ти́стесѧ; д҃і Благодарю̀ бг҃а, ꙗ҆́кѡ ни є҆ди́наго ѿ ва́съ крⷭ҇ти́хъ, то́чїю крі́спа и҆ га́їа: є҃і Да никто́же рече́тъ, ꙗ҆́кѡ въ моѐ и҆́мѧ крⷭ҇ти́хъ. ѕ҃і Крⷭ҇ти́хъ же и҆ стефани́новъ до́мъ: про́чее не вѣ́мъ, а҆́ще кого̀ и҆на́го крⷭ҇ти́хъ. з҃і Не посла́ бо менѐ хрⷭ҇то́съ крⷭ҇ти́ти, но бл҃говѣсти́ти: не въ премꙋ́дрости сло́ва, да не и҆спраздни́тсѧ крⷭ҇тъ хрⷭ҇то́въ.

(заⷱ҇ рк҃є) [а҃] и҃і Сло́во бо крⷭ҇тное, ꙳꙳ Въ пѧто́къ вели́кїй: Бра́тїе, сло́во кре́стное, ꙳꙳ Сїе́ же и҆ на воздви́женїе крⷭ҇та̀. погиба́ющымъ ᲂу҆́бѡ ю҆ро́дство є҆́сть, а҆ спаса́ємымъ на́мъ си́ла бж҃їѧ є҆́сть.

Коне́цъ недѣ́ли.

ѳ҃і Пи́сано бо є҆́сть: погꙋблю̀ премꙋ́дрость премꙋ́дрыхъ, и҆ ра́зꙋмъ разꙋ́мныхъ ѿве́ргꙋ. к҃ Гдѣ̀ премꙋ́дръ; гдѣ̀ (л. р҃и ѡ҆б.) кни́жникъ; гдѣ̀ совопро́сникъ вѣ́ка сегѡ̀; не ѡ҆бꙋи́ ли бг҃ъ премꙋ́дрость мі́ра сегѡ̀; к҃а Поне́же бо въ премꙋ́дрости бж҃їей не разꙋмѣ̀ мі́ръ премꙋ́дростїю бг҃а, бл҃гоизво́лилъ бг҃ъ бꙋ́йствомъ про́повѣди спастѝ вѣ́рꙋющихъ. к҃в Поне́же и҆ і҆ꙋде́є зна́менїѧ про́сѧтъ и҆ є҆́ллини премꙋ́дрости и҆́щꙋтъ: к҃г Мы́ же проповѣ́дꙋемъ хрⷭ҇та̀ ра́спѧта, і҆ꙋде́ємъ ᲂу҆́бѡ собла́знъ, є҆́ллинѡмъ же безꙋ́мїе: к҃д Самѣ́мъ же зва̑ннымъ, і҆ꙋде́ємъ же и҆ є҆́ллинѡмъ, хрⷭ҇та̀, бж҃їю си́лꙋ и҆ бж҃їю премꙋ́дрость.

Коне́цъ крⷭ҇тꙋ̀.

к҃є Занѐ бꙋ́ее бж҃їе, премꙋ́дрѣе человѣ̑къ є҆́сть: и҆ немощно́е бж҃їе, крѣпча́е человѣ̑къ є҆́сть.

(заⷱ҇) к҃ѕ Ви́дите бо зва́нїе ва́ше бра́тїе, Въ сꙋббѡ́тꙋ в҃і: Бра́тїе, ви́дите зва́нїе ва́ше, ꙳ Сїе́ же и҆ сꙋббѡ́та по воздви́женїи. ꙗ҆́кѡ не мно́зи ли премꙋ́дри по пло́ти; не мно́зи ли си́льни; не мно́зи ли бл҃горо́дни; (сꙋⷠ҇) к҃з Но бꙋ́ѧѧ мі́ра и҆збра̀ бг҃ъ, да премꙋ́дрыѧ посрами́тъ: и҆ не́мѡщнаѧ мі́ра и҆збра̀ бг҃ъ, да посрами́тъ крѣ̑пкаѧ: к҃и И҆ хꙋдорѡ́днаѧ мі́ра, и҆ ᲂу҆ничижє́ннаѧ и҆збра̀ бг҃ъ, и҆ не сꙋ́щаѧ, да сꙋ̑щаѧ ᲂу҆праздни́тъ: к҃ѳ Ꙗ҆́кѡ да не похва́литсѧ всѧ́ка пло́ть пред̾ бг҃омъ.

Коне́цъ сꙋббѡ́тѣ.

л҃ И҆з̾ негѡ́же вы̀ є҆стѐ ѡ҆ хрⷭ҇тѣ̀ і҆и҃сѣ, и҆́же бы́сть на́мъ премꙋ́дрость ѿ бг҃а, пра́вда же и҆ ѡ҆свѧще́нїе, и҆ и҆збавле́нїе: л҃а Да, ꙗ҆́коже пи́шетсѧ, хвалѧ́йсѧ, ѡ҆ гдⷭ҇ѣ да хва́литсѧ. (л. р҃ѳ)

Глава̀ втора́ѧ.

сⷯ а҃ И҆ а҆́зъ прише́дъ къ ва́мъ бра́тїе, прїидо́хъ не по превосхо́дномꙋ словесѝ, и҆лѝ премꙋ́дрости, возвѣща́ѧ ва́мъ свидѣ́тельство бж҃їе. в҃ Не сꙋди́хъ бо вѣ́дѣти что̀ въ ва́съ, то́чїю і҆и҃са хрⷭ҇та̀, и҆ сего̀ ра́спѧта.

Коне́цъ вели́комꙋ пѧткꙋ̀.

г҃ И҆ а҆́зъ въ не́мощи, и҆ стра́сѣ, и҆ тре́петѣ мно́зѣ бы́хъ въ ва́съ: д҃ И҆ сло́во моѐ, и҆ про́повѣдь моѧ̀ не въ препрѣ́тельныхъ человѣ́ческїѧ премꙋ́дрости словесѣ́хъ, но въ ꙗ҆вле́нїи дх҃а и҆ си́лы: є҃ Да вѣ́ра ва́ша не въ мꙋ́дрости человѣ́честѣй, но въ си́лѣ бж҃їей бꙋ́детъ.

(заⷱ҇ рк҃ѕ) ѕ҃ Премꙋ́дрость же Въ сꙋббѡ́тꙋ г҃і: Бра́тїе, премꙋ́дрость ꙳ Сїе́ же и҆ сꙋббѡ́та пред̾ воздви́женїемъ. глаго́лемъ въ соверше́нныхъ: премꙋ́дрость же не вѣ́ка сегѡ̀, ни кнѧзе́й вѣ́ка сегѡ̀ престаю́щихъ: з҃ Но глаго́лемъ премꙋ́дрость бж҃їю въ та́йнѣ сокрове́ннꙋю, и҆́же пред̾ꙋста́ви бг҃ъ пре́жде вѣ̑къ въ сла́вꙋ на́шꙋ: и҃ Ю҆́же никто́же ѿ кнѧзе́й вѣ́ка сегѡ̀ разꙋмѣ̀. а҆́ще бо бы́ша разꙋмѣ́ли, не бы́ша гдⷭ҇а сла́вы ра́спѧли. ѳ҃ Но ꙗ҆́коже є҆́сть пи́сано:

(заⷱ҇ рк҃з) И҆́хже ѻ҆́ко не ви́дѣ, ꙳꙳ Въ сре́дꙋ ѕ҃ недѣ́ли: Бра́тїе, и҆́хже ѻ҆́ко не ви́дѣ ꙳꙳ и҆ ᲂу҆́хо не слы́ша, и҆ на се́рдце, человѣ́кꙋ не взыдо́ша, ꙗ҆̀же ᲂу҆гото́ва бг҃ъ лю́бѧщымъ є҆го̀.

Коне́цъ сꙋббѡ́тѣ.

і҃ На́мъ же бг҃ъ ѿкры́лъ є҆́сть дх҃омъ свои́мъ: дх҃ъ бо всѧ̑ и҆спытꙋ́етъ, и҆ глꙋбины̑ бж҃їѧ. а҃і Кто́ бо вѣ́сть ѿ человѣ̑къ, ꙗ҆̀же въ человѣ́цѣ, то́чїю дх҃ъ чл҃вѣ́ка живꙋ́щїй въ не́мъ; та́коже и҆ бж҃їѧ никто́же вѣ́сть, то́чїю дх҃ъ бж҃їй. в҃і Мы́ же не дꙋ́хъ мі́ра сегѡ̀ прїѧ́хомъ, но дх҃ъ и҆́же ѿ бг҃а, да вѣ́мы ꙗ҆̀же ѿ бг҃а дарова̑ннаѧ на́мъ. г҃і Ꙗ҆̀же и҆ глаго́лемъ, не въ наꙋче́ныхъ чл҃вѣ́ческїѧ премꙋ́дрости словесѣ́хъ, но въ наꙋче́ныхъ дх҃а ст҃а́гѡ, дꙋхѡ́внаѧ дꙋхо́вными сразсꙋжда́юще. д҃і Дꙋше́венъ же человѣ́къ не прїе́млетъ ꙗ҆̀же дх҃а бж҃їѧ: ю҆ро́дство бо є҆мꙋ̀ є҆́сть, и҆ не мо́жетъ разꙋмѣ́ти, занѐ дꙋхо́внѣ востѧзꙋ́етсѧ. є҃і Дꙋхо́вный же востѧзꙋ́етъ ᲂу҆́бѡ всѧ̑, а҆ са́мъ то́й ни ѿ є҆ди́нагѡ востѧзꙋ́етсѧ. ѕ҃і Кто́ бо разꙋмѣ̀ ᲂу҆́мъ гдⷭ҇нь, и҆́же и҆з̾ѧсни́тъ и҆̀; мы́ же ᲂу҆́мъ хрⷭ҇то́въ и҆́мамы.

Глава̀ тре́тїѧ.

сⷯ а҃ И҆ а҆́зъ бра́тїе, не мого́хъ ва́мъ глаго́лати ꙗ҆́кѡ дꙋхѡ́внымъ, но ꙗ҆́кѡ плѡ́тѧнымъ, ꙗ҆́кѡ младе́нцємъ ѡ҆ хрⷭ҇тѣ̀. в҃ Млеко́мъ вы̀ напои́хъ, а҆ не бра́шномъ: не ᲂу҆́бѡ можа́сте, но ни є҆щѐ мо́жете ны́нѣ: г҃ Є҆ще́ бо пло́тстїи є҆стѐ. и҆дѣ́же бо въ ва́съ за̑висти, и҆ рвє́нїѧ, и҆ ра̑спри, не пло́тстїи ли є҆стѐ, и҆ по человѣ́кꙋ хо́дите; д҃ Є҆гда́ бо глаго́летъ кто̀: а҆́зъ ᲂу҆́бѡ є҆́смь па́ѵловъ: дрꙋгі́й же, а҆́зъ а҆поллѡ́совъ: не пло́тстїи ли є҆стѐ; [в҃] є҃ Кто̀ ᲂу҆́бѡ є҆́сть па́ѵелъ; кто́ же ли а҆поллѡ́съ; но то́чїю слꙋжи́телє, и҆́миже вѣ́ровасте, и҆ комꙋ́ждо ꙗ҆́коже гдⷭ҇ь дадѐ. ѕ҃ А҆́зъ насади́хъ, а҆поллѡ́съ напоѝ: бг҃ъ же возрастѝ. (л. р҃і) з҃ Тѣ́мже ни насажда́ѧй є҆́сть что̀, ни напаѧ́ѧй, но возраща́ѧй бг҃ъ. и҃ Насажда́ѧй же и҆ напаѧ́ѧй, є҆ди́но є҆ста̀, кі́йждо же свою̀ мздꙋ̀ прїи́метъ по своемꙋ̀ трꙋдꙋ̀.

Коне́цъ средѣ̀.

(заⷱ҇ рк҃и) ѳ҃ Бг҃ꙋ бо є҆смы̀ Недѣ́лѧ ѳ҃: Бра́тїе, бг҃ꙋ є҆смы̀ поспѣ́шницы: бж҃їе тѧжа́нїе, бж҃їе зда́нїе є҆стѐ. і҃ По благода́ти бж҃їей да́ннѣй мнѣ̀, ꙗ҆́кѡ премꙋ́дръ а҆рхїте́ктѡнъ ѡ҆снова́нїе положи́хъ, и҆́нъ же назида́етъ: кі́йждо же да блюде́тъ, ка́кѡ назида́етъ. а҃і Ѡ҆снова́нїѧ бо и҆на́гѡ никто́же мо́жетъ положи́ти па́че лежа́щагѡ, є҆́же є҆́сть і҆и҃съ хрⷭ҇то́съ. в҃і А҆́ще ли кто̀ назида́етъ на ѡ҆снова́нїи се́мъ, зла́то, сребро̀, ка́менїе честно́е: дрова̀, сѣ́но, тро́стїе: г҃і Когѡ́ждо дѣ́ло ꙗ҆вле́но бꙋ́детъ, де́нь бо ꙗ҆ви́тъ, занѐ ѻ҆гне́мъ ѿкрыва́етсѧ, и҆ когѡ́ждо дѣ́ло ꙗ҆ково́же є҆́сть, ѻ҆́гнь и҆скꙋ́ситъ. д҃і И҆ є҆гѡ́же а҆́ще дѣ́ло пребꙋ́детъ, є҆го́же назда̀, мздꙋ̀ прїи́метъ. є҃і А҆ є҆гѡ́же дѣ́ло сгори́тъ, ѿтщети́тсѧ: са́мъ же спасе́тсѧ, та́кожде ꙗ҆́коже ѻ҆гне́мъ. ѕ҃і Не вѣ́сте ли, ꙗ҆́кѡ хра́мъ бж҃їй є҆стѐ, и҆ дх҃ъ бж҃їй живе́тъ въ ва́съ; з҃і А҆́ще кто̀ бж҃їй хра́мъ растли́тъ, растли́тъ сего̀ бг҃ъ: хра́мъ бо бж҃їй ст҃ъ є҆́сть, и҆́же є҆стѐ вы̀.

Коне́цъ недѣ́ли.

(заⷱ҇ рк҃ѳ) и҃і Никто́же себѐ ꙳꙳ Въ четверто́къ ѕ҃-ѧ недѣ́ли: Бра́тїе, никто́же себѐ ꙳꙳ да прельща́етъ. а҆́ще кто̀ мни́тсѧ мꙋ́дръ бы́ти въ ва́съ въ вѣ́цѣ се́мъ, бꙋ́й да (л. р҃і ѡ҆б.) быва́етъ, ꙗ҆́кѡ да премꙋ́дръ бꙋ́детъ. ѳ҃і Премꙋ́дрость бо мі́ра сегѡ̀, бꙋ́йство ᲂу҆ бг҃а є҆́сть. пи́сано бо є҆́сть: запина́ѧй премꙋ̑дрымъ въ кова́рствѣ и҆́хъ. к҃ И҆ па́ки: гдⷭ҇ь вѣ́сть помышлє́нїѧ ꙾человѣ́ческа꙾꙾мꙋ́дрыхъ꙾, ꙗ҆́кѡ сꙋ́ть сꙋ́єтна. к҃а Тѣ́мже никто́же да хва́литсѧ въ человѣ́цѣхъ: всѧ̑ бо ва́ша сꙋ́ть. к҃в А҆́ще па́ѵелъ, и҆лѝ а҆поллѡ́съ, и҆лѝ ки́фа, и҆лѝ мі́ръ, и҆лѝ живо́тъ, и҆лѝ сме́рть, и҆лѝ настоѧ̑щаѧ, и҆лѝ бꙋ̑дꙋщаѧ, всѧ̑ ва́ша сꙋ́ть. к҃г Вы́ же хрⷭ҇то́вы, хрⷭ҇то́съ же бж҃їй.

Коне́цъ четверткꙋ̀.

Глава̀ четве́ртаѧ.

(заⷱ҇ р҃л) [г҃] сⷯ а҃ Та́кѡ на́съ Въ сꙋббѡ́тꙋ д҃і: Бра́тїе, та́кѡ на́съ да непщꙋ́етъ человѣ́къ, ꙗ҆́кѡ слꙋги̑ хрⷭ҇то́вы, и҆ строи́тели та́йнамъ бж҃їимъ. в҃ А҆ є҆́же про́чее и҆́щетсѧ въ строи́телехъ, да вѣ́ренъ кто̀ ѡ҆брѧ́щетсѧ. г҃ Мнѣ́ же не вели́ко є҆́сть, да ѿ ва́съ и҆стѧжꙋ́сѧ, и҆лѝ ѿ человѣ́ческагѡ ꙳днѐ꙳꙳сꙋда̀꙳: но ни са́мъ себѐ востѧзꙋ́ю. д҃ Ничесо́же бо себѐ свѣ́мъ: но ни ѡ҆ се́мъ ѡ҆правда́юсѧ: востѧзꙋ́ѧй же мѧ̀ гдⷭ҇ь є҆́сть

(заⷱ҇) є҃ Тѣ́мже пре́жде вре́мене ꙳꙳ Въ пѧто́къ ѕ҃-ѧ недѣ́ли: Бра́тїе, пре́жде вре́мене ꙳꙳ ничто́же сꙋди́те, до́ндеже прїи́детъ гдⷭ҇ь, и҆́же во свѣ́тѣ приведе́тъ та̑йнаѧ тмы̀, и҆ ѡ҆б̾ѧви́тъ совѣ́ты сердє́чныѧ: и҆ тогда̀ похвала̀ бꙋ́детъ комꙋ́ждо ѿ бг҃а.

Коне́цъ сꙋббѡ́тѣ. (л. ра҃і)

[д҃] ѕ҃ Сїѧ̑ же бра́тїе моѧ̀, преѡбрази́хъ на себѐ и҆ а҆поллѡ́са, ва́съ ра́ди: да ѿ на́ю наꙋчите́сѧ, не па́че напи́санныхъ мꙋ́дрствовати, да не є҆ди́нъ по є҆ди́номꙋ гордите́сѧ на дрꙋга́го. з҃ Кто́ бо тѧ̀ разсꙋжда́етъ; что́ же и҆́маши, є҆гѡ́же нѣ́си прїѧ́лъ; а҆́ще же и҆ прїѧ́лъ є҆сѝ, что̀ хва́лишисѧ ꙗ҆́кѡ не прїе́мъ; и҃ Сѐ сы́ти є҆стѐ, сѐ ѡ҆богати́стесѧ, без̾ на́съ ца́рствовасте: и҆ є҆щѐ ᲂу҆́бѡ да воцарите́сѧ, да и҆ мы̀ бы́хомъ съ ва́ми ца́рствовали.

Коне́цъ пѧткꙋ̀.

(заⷱ҇ рл҃а) ѳ҃ Мню́ бо, ꙗ҆́кѡ бг҃ъ ны̀ Недѣ́лѧ і҃: Бра́тїе, бг҃ъ ны̀ ꙳ Сїе́ же и҆ а҆пⷭ҇лѡмъ. посла́нники послѣ́днїѧ ꙗ҆вѝ ꙗ҆́кѡ насме́ртники: занѐ позо́ръ бы́хомъ мі́рꙋ, и҆ а҆́гг҃лѡмъ, и҆ человѣ́кѡмъ. і҃ Мы̀ ᲂу҆́бѡ бꙋ́и хрⷭ҇та̀ ра́ди, вы́ же мꙋ́дри ѡ҆ хрⷭ҇тѣ̀: мы̀ не́мощни, вы́ же крѣ́пцы: вы̀ сла́вни, мы́ же безче́стни. а҃і До ны́нѣшнѧгѡ часа̀ и҆ а҆́лчемъ, и҆ жа́ждемъ, и҆ наготꙋ́емъ, и҆ стра́ждемъ, и҆ скита́емсѧ, в҃і И҆ трꙋжда́емсѧ, дѣ́лающе свои́ми рꙋка́ми: ᲂу҆корѧ́еми, бл҃гословлѧ́емъ: гони́ми, терпи́мъ: г҃і Хꙋ́лими, ꙾ᲂу҆тѣша́емсѧ꙾꙾мо́лимъ꙾: ꙗ҆́коже ѻ҆тре́би мі́рꙋ бы́хомъ, всѣ̑мъ попра́нїе досе́лѣ. д҃і Не срамлѧ́ѧ ва́съ сїѧ̑ пишꙋ̀, но ꙗ҆́коже ча̑да моѧ̀ возлю́блєннаѧ наказꙋ́ю. є҃і А҆́ще бо и҆ мно́ги пѣ́стꙋны и҆́мате ѡ҆ хрⷭ҇тѣ̀, но не мно́ги ѻ҆тцы̀: ѡ҆ хрⷭ҇тѣ́ бо і҆и҃сѣ благовѣствова́нїемъ а҆́зъ вы̀ роди́хъ. ѕ҃і Молю́ же ва́съ: подо́бни мнѣ̀ быва́йте, ꙗ҆́коже а҆́зъ хрⷭ҇тꙋ̀.

Коне́цъ недѣ́ли, и҆ а҆пⷭ҇лѡмъ. (л. ра҃і ѡ҆б.)

(заⷱ҇ рл҃в) з҃і Сегѡ̀ ра́ди посла́хъ Сꙋббѡ́та є҃і: Бра́тїе, посла́хъ къ ва́мъ тїмоѳе́а, и҆́же мѝ є҆́сть ча́до возлю́блено и҆ вѣ́рно ѡ҆ гдⷭ҇ѣ: и҆́же ва́мъ воспомѧ́нетъ пꙋти̑ моѧ̀, ꙗ҆̀же ѡ҆ хрⷭ҇тѣ̀ і҆и҃сѣ, ꙗ҆́коже вездѣ̀ и҆ во всѧ́кой цр҃кви ᲂу҆чꙋ̀. и҃і Ꙗ҆́кѡ не грѧдꙋ́щꙋ мѝ къ ва́мъ, разгордѣ́шасѧ нѣ́цыи. ѳ҃і Прїидꙋ́ же ско́рѡ къ ва́мъ, а҆́ще гдⷭ҇ь восхо́щетъ, и҆ ᲂу҆разꙋмѣ́ю не сло́во разгордѣ́вшихсѧ, но си́лꙋ. к҃ Не въ словеси́ бо црⷭ҇тво бж҃їе, но въ си́лѣ. [в҃] к҃а Что̀ хо́щете; съ па́лицею ли прїидꙋ̀ къ ва́мъ, и҆лѝ съ любо́вїю, и҆ дх҃омъ кро́тости;

Глава̀ пѧ́таѧ.

сⷯ а҃ Ѿню́дъ слы́шитсѧ въ ва́съ блꙋже́нїе: и҆ таково̀ блꙋже́нїе, ꙗ҆ково́ же ни во ꙗ҆зы́цѣхъ и҆менꙋ́етсѧ, ꙗ҆́кѡ нѣ́коемꙋ и҆мѣ́ти женꙋ̀ ѻ҆́тчꙋю. в҃ И҆ вы̀ разгордѣ́сте, и҆ не па́че пла́касте, да и҆́зметсѧ ѿ среды̀ ва́съ содѣ́ѧвый дѣ́ло сїѐ. г҃ А҆́зъ ᲂу҆̀бо ꙗ҆́кѡ не ᲂу҆ ва́съ сы́й тѣ́ломъ, тꙋ́ же живы́й дх҃омъ, ᲂу҆жѐ сꙋди́хъ ꙗ҆́кѡ та́мѡ сы́й, содѣ́ѧвшаго си́це сїѐ, д҃ Ѡ҆ и҆́мени гдⷭ҇а на́шегѡ і҆и҃са хрⷭ҇та̀, собра́вшымсѧ ва́мъ и҆ моемꙋ̀ дх҃ꙋ, съ си́лою гдⷭ҇а на́шегѡ і҆и҃са хрⷭ҇та̀, є҃ Преда́ти такова́го сатанѣ̀ во и҆зможде́нїе пло́ти, да дꙋ́хъ спасе́тсѧ въ де́нь гдⷭ҇а на́шегѡ і҆и҃са хрⷭ҇та̀

Коне́цъ сꙋббѡ́тѣ.

ѕ҃ Не добра̀ похвала̀ ва́ша. (л. рв҃і)

(заⷱ҇ рл҃г) Не вѣ́сте ли, ꙗ҆́кѡ ма́лъ ква́съ Во ст҃ꙋ́ю и҆ вели́кꙋю сꙋббѡ́тꙋ на ᲂу҆́трени: Бра́тїе, ма́лъ ква́съ всѐ смѣше́нїе ква́ситъ; з҃ Ѡ҆чи́стите ᲂу҆̀бо ве́тхїй ква́съ, да бꙋ́дете но́во смѣше́нїе, ꙗ҆́коже є҆стѐ безква́сни: и҆́бо па́сха на́ша за ны̀ пожре́нъ бы́сть хрⷭ҇то́съ. и҃ Тѣ́мже да пра́зднꙋемъ, не въ ква́сѣ ве́тсѣ, ни въ ква́сѣ ѕло́бы и҆ лꙋка́вства, но въ безква́сїихъ чистоты̀ и҆ и҆́стины.

Престꙋпѝ вели́кой сꙋббѡ́тѣ, въ зача́ла с҃ѕ: Хрⷭ҇то́съ ны̀ и҆скꙋпѝ:

(заⷱ҇ рл҃д) ѳ҃ Писа́хъ ва́мъ ꙳꙳ Въ понедѣ́льникъ з҃-ѧ недѣ́ли: Бра́тїе, писа́хъ ва́мъ ꙳꙳ въ посла́нїи, не примѣша́тисѧ блꙋдникѡ́мъ. і҃ И҆ не всѧ́кѡ блꙋдникѡ́мъ мі́ра сегѡ̀, и҆лѝ лихои́мцємъ, и҆лѝ хи́щникѡмъ, и҆лѝ і҆дѡлослꙋжи́телємъ: поне́же ᲂу҆́бѡ до́лжни є҆стѐ ѿ мі́ра сегѡ̀ и҆зы́ти. (нлⷣѧ) а҃і Ны́нѣ же писа́хъ ва́мъ, не примѣша́тисѧ: а҆́ще нѣ́кїй бра́тъ и҆менꙋ́емь бꙋ́детъ блꙋдни́къ, и҆лѝ лихои́мецъ, и҆лѝ і҆дѡлослꙋжи́тель, и҆лѝ досади́тель, и҆лѝ пїѧ́ница, и҆лѝ хи́щникъ: съ таковы́мъ нижѐ ꙗ҆́сти. в҃і Что́ бо мѝ и҆ внѣ́шнихъ сꙋди́ти; не внꙋ́трєннимъ ли вы̀ сꙋ́дите; Внѣ̑шнимъ же бг҃ъ сꙋ́дитъ: и҆ и҆зми́те ѕла́го ѿ ва́съ самѣ́хъ.

Глава̀ шеста́ѧ.

[г҃] сⷯ а҃ Смѣ́етъ ли кто̀ ѿ ва́съ, ве́щь и҆мѣ́ѧ ко и҆но́мꙋ, сꙋди́тисѧ ѿ непра́ведныхъ, а҆ не ѿ свѧты́хъ; в҃ Не вѣ́сте ли, ꙗ҆́кѡ ст҃і́и мі́рови (л. рв҃і ѡ҆б.) хотѧ́тъ сꙋди́ти; и҆ а҆́ще ва́ми сꙋ́дъ прїи́метъ мі́ръ, недосто́йни є҆стѐ сꙋди́щємъ хꙋды́мъ: г҃ Не вѣ́сте ли, ꙗ҆́кѡ а҆́ггелѡмъ сꙋди́ти хо́щемъ, а҆ не то́чїю житє́йскимъ; д҃ Житє́йскаѧ бо сꙋди̑ща а҆́ще и҆́мате, ᲂу҆ничиже́ныхъ въ цр҃кви, си́хъ посажда́йте. є҃ Къ сра́мꙋ ва́мъ глаго́лю: та́кѡ ли нѣ́сть въ ва́съ мꙋ́дръ ни є҆ди́нъ, и҆́же мо́жетъ разсꙋди́ти междꙋ̀ бра́тїй свои́хъ; ѕ҃ Но бра́тъ съ бра́томъ сꙋ́дитсѧ, и҆ то̀ пред̾ невѣ́рными. з҃ Оу҆жѐ ᲂу҆́бѡ ѿню́дъ ва́мъ сра́мъ є҆́сть, ꙗ҆́кѡ тѧжбы̑ и҆́мате междꙋ̀ собо́ю. почто̀ не па́че ѡ҆би́дими є҆стѐ; почто̀ не па́че лише́ни быва́ете; и҃ Но вы̀ са́ми ѡ҆би́дите, и҆ лиша́ете, да є҆щѐ бра́тїю. ѳ҃ И҆лѝ не вѣ́сте, ꙗ҆́кѡ непра́ведницы црⷭ҇твїѧ бж҃їѧ не наслѣ́дѧтъ; не льсти́те себѐ, ни блꙋдницы̀, ни і҆дѡлослꙋжи́тели, ни прелюбодѣ́и, ни скверни́тели, ни малакі́и, ни мꙋжело́жницы, і҃ Ни лихои́мцы, ни та́тїе, ни пїѧ́ницы, ни досади́тели, ни хи́щницы црⷭ҇твїѧ бж҃їѧ не наслѣ́дѧтъ. а҃і И҆ си́ми ᲂу҆́бѡ нѣ́цыи бѣ́сте: но ѡ҆мы́стесѧ, но ѡ҆свѧти́стесѧ, но ѡ҆правди́стесѧ и҆́менемъ гдⷭ҇а на́шегѡ і҆и҃са хрⷭ҇та̀, и҆ дх҃омъ бг҃а на́шегѡ.

Коне́цъ понедѣ́льникꙋ.

(заⷱ҇ рл҃є) в҃і Всѧ̑ мѝ Недѣ́лѧ л҃д ѡ҆ блꙋ́дномъ: Бра́тїе, всѧ̑ мѝ лѣ́ть сꙋ́ть, но не всѧ̑ на по́льзꙋ: всѧ̑ мѝ лѣ́ть сꙋ́ть, но не а҆́зъ ѡ҆блада́нъ бꙋ́дꙋ ѿ когѡ̀. г҃і Бра̑шна чре́вꙋ, и҆ чре́во бра́шнѡмъ: бг҃ъ же и҆ сїѐ и҆ сїѧ̑ да ᲂу҆праздни́тъ: тѣ́ло же не блꙋже́нїю, (л. рг҃і) но гдⷭ҇ви, и҆ гдⷭ҇ь тѣ́лꙋ. д҃і Бг҃ъ же и҆ гдⷭ҇а воздви́же, и҆ на́съ воздви́гнетъ си́лою свое́ю. є҃і Не вѣ́сте ли, ꙗ҆́кѡ тѣлеса̀ ва́ша ᲂу҆́дове хрⷭ҇то́вы сꙋ́ть; взе́мъ ли ᲂу҆̀бо ᲂу҆́ды хрⷭ҇то́вы, сотворю̀ ᲂу҆́ды блꙋдни́чи; да не бꙋ́детъ. [а҃] ѕ҃і И҆лѝ не вѣ́сте, ꙗ҆́кѡ прилѣплѧ́ѧйсѧ сквернодѣ́йцѣ, є҆ди́но тѣ́ло є҆́сть [съ блꙋдодѣ́йцею]; бꙋ́дета бо, речѐ, ѻ҆́ба въ пло́ть є҆ди́нꙋ. з҃і Прилѣплѧ́ѧйсѧ же гдⷭ҇ви, є҆ди́нъ дх҃ъ є҆́сть съ гдⷭ҇емъ. и҃і Бѣ́гайте блꙋдодѣѧ́нїѧ: всѧ́къ бо грѣ́хъ, є҆го́же а҆́ще сотвори́тъ чл҃вѣ́къ, кромѣ̀ тѣ́ла є҆́сть: а҆ блꙋдѧ́й, во своѐ тѣ́ло согрѣша́етъ. ѳ҃і И҆лѝ не вѣ́сте, ꙗ҆́кѡ тѣлеса̀ ва́ша хра́мъ живꙋ́щагѡ въ ва́съ ст҃а́гѡ дх҃а сꙋ́ть, є҆го́же и҆́мате ѿ бг҃а, и҆ нѣ́сте своѝ; к҃ Кꙋ́плени бо є҆стѐ цѣно́ю.

(заⷱ҇ рл҃ѕ) Просла́вите ᲂу҆̀бо бг҃а Во вто́рникъ з҃-ѧ недѣ́ли: Бра́тїе, просла́вите бг҃а въ тѣлесѣ́хъ ва́шихъ, и҆ въ дꙋша́хъ ва́шихъ, ꙗ҆̀же сꙋ́ть бж҃їѧ.

Коне́цъ недѣ́ли.

Глава̀ седма́ѧ.

[д҃] сⷯ а҃ А҆ ѡ҆ ни́хже писа́сте мѝ, добро̀ человѣ́кꙋ женѣ̀ не прикаса́тисѧ. в҃ Но блꙋдодѣѧ́нїѧ ра́ди, кі́йждо свою̀ женꙋ̀ да и҆́мать, и҆ ка́ѧждо жена̀ своего̀ мꙋ́жа да и҆́мать. г҃ Женѣ̀ мꙋ́жъ до́лжнꙋю любо́вь да воздае́тъ, та́кожде и҆ жена̀ мꙋ́жꙋ. д҃ Жена̀ свои́мъ тѣ́ломъ не владѣ́етъ, но мꙋ́жъ: та́кожде и҆ мꙋ́жъ свои́мъ тѣ́ломъ не владѣ́етъ, но жена̀. є҃ Не лиша́йте себѐ дрꙋгъдрꙋ́га, то́чїю по согла́сїю ко (л. рг҃і) вре́мени, да пребыва́ете въ постѣ̀ и҆ моли́твѣ: и҆ па́ки вкꙋ́пѣ собира́йтесѧ, да не и҆скꙋша́етъ ва́съ сатана̀ невоздержа́нїемъ ва́шимъ. ѕ҃ Сїе́ же глаго́лю по совѣ́тꙋ, а҆ не по повелѣ́нїю. з҃ Хощꙋ́ бо, да всѝ человѣ́цы бꙋ́дꙋтъ ꙗ҆́коже и҆ а҆́зъ: но ко́ждо своѐ дарова́нїе и҆́мать ѿ бг҃а, ѻ҆́въ ᲂу҆́бѡ си́це, ѻ҆́въ же си́це. и҃ Глаго́лю же безбра̑чнымъ и҆ вдови́цамъ: добро̀ и҆̀мъ є҆́сть, а҆́ще пребꙋ́дꙋтъ ꙗ҆́коже и҆ а҆́зъ. ѳ҃ А҆́ще ли не ᲂу҆держа́тсѧ, да посѧга́ютъ: лꙋ́чше бо є҆́сть жени́тисѧ, не́жели разжиза́тисѧ. [а҃] і҃ А҆ ѡ҆жени́вшымсѧ завѣщава́ю, не а҆́зъ, но гдⷭ҇ь: женѣ̀ ѿ мꙋ́жа не разлꙋча́тисѧ. а҃і А҆́ще ли же и҆ разлꙋчи́тсѧ, да пребыва́етъ безбра́чна, и҆лѝ да смири́тсѧ съ мꙋ́жемъ свои́мъ: и҆ мꙋ́жꙋ жены̀ не ѿпꙋща́ти. в҃і Про́чымъ же а҆́зъ глаго́лю, а҆ не гдⷭ҇ь:

(заⷱ҇ рл҃з) А҆́ще Въ сре́дꙋ з҃-ѧ недѣ́ли: Бра́тїе, а҆́ще кото́рый бра́тъ женꙋ̀ и҆́мать невѣ́рнꙋ, и҆ та̀ благоволи́тъ жи́ти съ ни́мъ, да не ѡ҆ставлѧ́етъ є҆ѧ̀.

Коне́цъ вто́рникꙋ.

г҃і И҆ жена̀ а҆́ще и҆́мать мꙋ́жа невѣ́рна, и҆ то́й благоволи́тъ жи́ти съ не́ю, да не ѡ҆ставлѧ́етъ є҆гѡ̀. д҃і Свѧти́тсѧ бо мꙋ́жъ невѣ́ренъ, ѡ҆ женѣ̀ вѣ́рнѣ, и҆ свѧти́тсѧ жена̀ невѣ́рна, ѡ҆ мꙋ́жи вѣ́рнѣ: и҆на́че бо ча̑да ва́ша нечи́ста бы́ли бы, ны́нѣ же ст҃а сꙋ́ть. є҃і А҆́ще ли невѣ́рный ѿлꙋча́етсѧ, да разлꙋчи́тсѧ: не порабо́тисѧ бо бра́тъ и҆лѝ сестра̀ въ таковы́хъ: въ ми́ръ бо призва̀ на́съ гдⷭ҇ь бг҃ъ. ѕ҃і Что́ бо вѣ́си, же́но, (л. рд҃і) а҆́ще мꙋ́жа спасе́ши; и҆лѝ что̀ вѣ́си, мꙋ́жꙋ, а҆́ще женꙋ̀ спасе́ши; з҃і То́чїю коемꙋ́ждо ꙗ҆́коже раздѣли́лъ є҆́сть бг҃ъ, кі́йждо ꙗ҆́коже при́званъ бы́сть гдⷭ҇емъ, та́кѡ да хо́дитъ: и҆ та́кѡ во всѣ́хъ цр҃квахъ повелѣва́ю. и҃і Во ѡ҆брѣ́занїи ли кто̀ при́званъ бы́сть; ꙾да не ѿто́ргнетсѧ꙾꙾да не твори́тъ себѣ̀ неѡбрѣ́занїѧ ꙾: въ неѡбрѣ́занїи ли кто̀ при́званъ бы́сть; да не ѡ҆брѣ́зꙋетсѧ. ѳ҃і Ѡ҆брѣ́занїе ничто́же є҆́сть, и҆ неѡбрѣ́занїе ничто́же є҆́сть: но соблюде́нїе за́повѣдей бж҃їихъ. к҃ Кі́йждо въ зва́нїи, въ не́мже при́званъ бы́сть, въ то́мъ да пребыва́етъ. к҃а Ра́бъ ли при́званъ бы́лъ є҆сѝ; ꙳да не неради́ши꙳꙳да не печа́лишисѧ꙳: но а҆́ще и҆ мо́жеши свобо́денъ бы́ти, бо́льши порабо́ти себѐ. к҃в При́званный бо ѡ҆ гдⷭ҇ѣ ра́бъ, свобо́дникъ гдⷭ҇нь є҆́сть: та́кожде и҆ при́званный свобо́дникъ, ра́бъ є҆́сть хрⷭ҇то́въ. к҃г Цѣно́ю кꙋ́плени є҆стѐ: не бꙋ́дите рабѝ человѣ́кѡмъ.

(заⷱ҇ рл҃и) [в҃] к҃д Кі́йждо въ не́мже при́званъ бы́сть бра́тїе, Въ четверто́къ з҃-ѧ недѣ́ли: Бра́тїе, кі́йждо въ не́мже при́званъ бы́сть, въ то́мъ да пребыва́етъ пред̾ бг҃омъ.

Коне́цъ средѣ̀.

к҃є Ѡ҆ дѣ́вахъ же повелѣ́нїѧ гдⷭ҇нѧ не и҆́мамъ: совѣ́тъ же даю̀, ꙗ҆́кѡ поми́лованъ ѿ гдⷭ҇а вѣ́ренъ бы́ти. к҃ѕ Мню̀ ᲂу҆̀бо сїѐ добро̀ бы́ти за настоѧ́щꙋю нꙋ́ждꙋ: ꙗ҆́кѡ добро̀ человѣ́кꙋ та́кѡ бы́ти. к҃з Привѧза́лъ ли сѧ є҆сѝ женѣ̀; не и҆щѝ разрѣше́нїѧ: ѿрѣши́лъ ли сѧ є҆сѝ жены̀; не и҆щѝ жены̀. к҃и А҆́ще ли же и҆ ѡ҆же́нишисѧ, не согрѣши́лъ є҆сѝ: и҆ а҆́ще посѧ́гнетъ дѣ́ва, не (л. рд҃і ѡ҆б.) согрѣши́ла є҆́сть. ско́рбь же пло́ти и҆мѣ́ти бꙋ́дꙋтъ такові́и, а҆́зъ же вы̀ щаждꙋ̀. к҃ѳ Сїе́ же глаго́лю бра́тїе, ꙗ҆́кѡ вре́мѧ прекраще́но є҆́сть про́чее, да и҆ и҆мꙋ́щїи жєны̀, ꙗ҆́коже не и҆мꙋ́щїи бꙋ́дꙋтъ. л҃ И҆ пла́чꙋщїисѧ, ꙗ҆́коже не пла́чꙋщїи, и҆ ра́дꙋющїисѧ, ꙗ҆́коже не ра́дꙋющесѧ: и҆ кꙋпꙋ́ющїи, ꙗ҆́кѡ не содержа́ще. л҃а И҆ тре́бꙋющїи мі́ра сегѡ̀, ꙗ҆́кѡ не тре́бꙋюще: прехо́дитъ бо ѻ҆́бразъ мі́ра сегѡ̀. л҃в Хощꙋ́ же ва́съ безпеча́льны бы́ти. не ѡ҆жени́выйсѧ пече́тсѧ ѡ҆ гдⷭ҇нихъ, ка́кѡ ᲂу҆годи́ти гдⷭ҇ви: л҃г А҆ ѡ҆жени́выйсѧ пече́тсѧ ѡ҆ мїрски́хъ, ка́кѡ ᲂу҆годи́ти женѣ̀. раздѣли́сѧ жена̀ и҆ дѣ́ва. л҃д Не посѧ́гшаѧ пече́тсѧ ѡ҆ гдⷭ҇нихъ, да є҆́сть ст҃а̀ и҆ тѣ́ломъ и҆ дх҃омъ: а҆ посѧ́гшаѧ пече́тсѧ ѡ҆ мїрски́хъ, ка́кѡ ᲂу҆годи́ти мꙋ́жꙋ.

(заⷱ҇ рл҃ѳ) л҃є Сїе́ же на по́льзꙋ Въ пѧто́къ з҃ недѣ́ли: Бра́тїе, къ по́льзѣ ва́мъ самѣ́мъ глаго́лю, не да сило̀ ва́мъ наложꙋ̀, но къ бл҃гоѻбра́зїю и҆ бл҃гопристꙋпа́нїю гдⷭ҇ви безмо́лвнꙋ.

Коне́цъ четверткꙋ̀.

л҃ѕ А҆́ще ли же кто̀ без̾ѡбрази́ти ѡ҆ дѣ́вѣ свое́й непщꙋ́етъ, а҆́ще є҆́сть превозра́стна, и҆ та́кѡ должна̀ є҆́сть бы́ти: є҆́же хо́щетъ да твори́тъ, не согрѣша́етъ, а҆́ще посѧ́гнетъ. л҃з А҆ и҆́же стои́тъ тве́рдѡ се́рдцемъ, не и҆мы́й нꙋ́жды, вла́сть же и҆́мать ѡ҆ свое́й во́ли, и҆ сѐ разсꙋди́лъ є҆́сть въ се́рдцѣ свое́мъ блюстѝ дѣ́вꙋ свою̀, до́брѣ твори́тъ. л҃и Тѣ́мже и҆ вдаѧ́й бра́кꙋ свою̀ дѣ́вꙋ, до́брѣ твори́тъ: и҆ не (л. рє҃і) вдаѧ́й, лꙋ́чше твори́тъ. л҃ѳ Жена̀ привѧ́зана є҆́сть зако́номъ, въ є҆ли́ко вре́мѧ живе́тъ мꙋ́жъ є҆ѧ̀. а҆́ще же ᲂу҆́мретъ мꙋ́жъ є҆ѧ̀, свобо́дна є҆́сть за него́же хо́щетъ посѧ́гнꙋти, то́чїю ѡ҆ гдⷭ҇ѣ. м҃ Бл҃же́ннѣйша же є҆́сть, а҆́ще та́кѡ пребꙋ́детъ, по моемꙋ̀ совѣ́тꙋ: мню́ бо сѧ и҆ а҆́зъ дх҃а бж҃їѧ и҆мѣ́ти.

Глава̀ ѻ҆сма́ѧ.

[є҃] сⷯ а҃ Ѡ҆ і҆дѡложе́ртвенныхъ же вѣ́мы, ꙗ҆́кѡ всѝ ра́зꙋмъ и҆́мамы: ра́зꙋмъ ᲂу҆́бѡ кичи́тъ, а҆ любы̀ созида́етъ. в҃ А҆́ще ли кто̀ мни́тсѧ вѣ́дѣти что̀, не ᲂу҆̀ что̀ разꙋмѣ̀, ꙗ҆́коже подоба́етъ разꙋмѣ́ти. г҃ А҆́ще же кто̀ лю́битъ бг҃а, се́й позна́нъ бы́сть ѿ негѡ̀. д҃ Ѡ҆ ꙗ҆де́нїи же і҆дѡложе́ртвенныхъ вѣ́мы, ꙗ҆́кѡ і҆́дѡлъ ничто́же є҆́сть въ мі́рѣ, и҆ ꙗ҆́кѡ никто́же бг҃ъ и҆́нъ, то́кмѡ є҆ди́нъ. є҃ А҆́ще бо и҆ сꙋ́ть глаго́лемїи бо́зи и҆лѝ на нб҃сѝ, и҆лѝ на землѝ, [ꙗ҆́коже сꙋ́ть бо́зи мно́зи, и҆ госпо́дїе мно́зи:] ѕ҃ Но на́мъ є҆ди́нъ бг҃ъ ѻ҆ц҃ъ, и҆з̾ негѡ́же всѧ̑, и҆ мы̀ ᲂу҆ негѡ̀: и҆ є҆ди́нъ гдⷭ҇ь і҆и҃съ хрⷭ҇то́съ, и҆́мже всѧ̑, и҆ мы̀ тѣ́мъ. (пнⷣе) з҃ Но не во всѣ́хъ ра́зꙋмъ: нѣ́цыи же со́вѣстїю і҆́дѡльскою, да́же досе́лѣ ꙗ҆́коже і҆дѡложе́ртвенное ꙗ҆дѧ́тъ, и҆ со́вѣсть и҆́хъ немощна̀ сꙋ́щи, скверни́тсѧ.

Коне́цъ пѧткꙋ̀.

(заⷱ҇ р҃м) и҃ Бра́шно же Недѣ́лѧ л҃є, мѧсопꙋ́стнаѧ: Бра́тїе, бра́шно на́съ не поста́витъ пред̾ бг҃омъ: ниже́ бо а҆́ще ꙗ҆́мы, и҆збы́точествꙋемъ, нижѐ а҆́ще не (л. рє҃і ѡ҆б.) ꙗ҆́мы, лиша́емсѧ. ѳ҃ Блюди́те же, да не ка́кѡ вла́сть ва́ша сїѧ̀ преткнове́нїе бꙋ́детъ немощны̑мъ. і҃ А҆́ще бо кто̀ ви́дитъ тѧ̀ и҆мꙋ́ща ра́зꙋмъ, въ тре́бищи возлежа́ща, не со́вѣсть ли є҆гѡ̀ немощна̀ сꙋ́щи сози́ждетсѧ і҆дѡложе́ртвєннаѧ ꙗ҆́сти; а҃і И҆ поги́бнетъ немощны́й бра́тъ въ твое́мъ ра́зꙋмѣ, є҆гѡ́же ра́ди хрⷭ҇то́съ ᲂу҆́мре. в҃і Та́коже согрѣша́юще въ бра́тїю, и҆ бїю́ще и҆́хъ со́вѣсть не́мощнꙋ сꙋ́щꙋ, во хрⷭ҇та̀ согрѣша́ете. г҃і Тѣ́мже а҆́ще бра́шно соблазнѧ́етъ бра́та моего̀, не и҆́мамъ ꙗ҆́сти мѧ́са во вѣ́ки, да не соблазню̀ бра́та моегѡ̀.

Глава̀ девѧ́таѧ.

сⷯ а҃ Нѣ́смь ли а҆пⷭ҇лъ; нѣ́смь ли свобо́дь; не і҆и҃са хрⷭ҇та́ ли гдⷭ҇а на́шего ви́дѣхъ; не дѣ́ло ли моѐ вы̀ є҆стѐ ѡ҆ гдⷭ҇ѣ; в҃ А҆́ще ᲂу҆́бѡ и҆ны̑мъ нѣ́смь а҆пⷭ҇лъ, но ᲂу҆́бѡ ва́мъ є҆́смь.

(заⷱ҇ рм҃а) Печа́ть бо моегѡ̀ Недѣ́лѧ а҃і: Бра́тїе, печа́ть моегѡ̀ а҆пⷭ҇льства, вы̀ є҆стѐ ѡ҆ гдⷭ҇ѣ.

Коне́цъ недѣ́ли мѧсопꙋ́стной.

[а҃] г҃ Мо́й ѿвѣ́тъ востѧзꙋ́ющымъ менѐ, се́й є҆́сть: д҃ Є҆да̀ не и҆́мамы вла́сти, ꙗ҆́сти и҆ пи́ти; є҃ Є҆да̀ не и҆́мамы вла́сти, сестрꙋ̀ женꙋ̀ води́ти, ꙗ҆́кѡ и҆ про́чїи а҆пⷭ҇ли и҆ бра́тїѧ гдⷭ҇нѧ, и҆ ки́фа; ѕ҃ И҆лѝ є҆ди́нъ а҆́зъ и҆ варна́ва не и҆́мамы вла́сти є҆́же не дѣ́лати; з҃ Кто̀ во́инствꙋетъ свои́ми ѻ҆бро́ки когда̀; и҆лѝ кто̀ насажда́етъ (л. рѕ҃і) вїногра́дъ, и҆ ѿ плода̀ є҆гѡ̀ не ꙗ҆́стъ; и҆лѝ кто̀ пасе́тъ ста́до, и҆ ѿ млека̀ ста́да не ꙗ҆́стъ; и҃ Є҆да̀ по человѣ́кꙋ сїѧ̑ глаго́лю; не и҆ зако́нъ ли сїѧ̑ глаго́летъ; ѳ҃ Въ мѡѷсе́овѣ бо зако́нѣ пи́шетъ: да не загради́ши ᲂу҆стнꙋ̀ вола̀ молотѧ́ща. є҆да̀ ѡ҆ воло́вѣхъ ради́тъ бг҃ъ; і҃ И҆лѝ на́съ ра́ди, всѧ́кѡ глаго́летъ; на́съ бо ра́ди вписа́сѧ, ꙗ҆́кѡ ѡ҆ наде́жди до́лженъ є҆́сть ѡ҆рѧ́й ѡ҆ра́ти: и҆ молотѧ́й, съ наде́ждею своегѡ̀ ᲂу҆пова́нїѧ причаща́тисѧ. а҃і А҆́ще мы̀ дꙋхѡ́внаѧ сѣ́ѧхомъ ва́мъ: вели́ко ли, а҆́ще мы̀ ва́ша тѣлє́снаѧ по́жнемъ; в҃і А҆́ще и҆ні́и вла́сти ва́шеѧ причаща́ютсѧ, не па́че ли мы̀; но не сотвори́хомъ по ѻ҆́бласти се́й, но всѧ̑ терпи́мъ, да не прекраще́нїе ко́е да́мы бл҃говѣствова́нїю хрⷭ҇то́вꙋ.

Коне́цъ недѣ́ли.

(заⷱ҇ рм҃в) г҃і Не вѣ́сте ли, Въ понедѣ́льникъ и҃ недѣ́ли: Бра́тїе, не вѣ́сте ли, ꙗ҆́кѡ дѣ́лающїи свѧщє́ннаѧ, ѿ свѧти́лища ꙗ҆дѧ́тъ, и҆ слꙋжа́щїи ѻ҆лтарю̀, со ѻ҆лтаре́мъ сдѣлѧ́ютсѧ; д҃і Та́кѡ и҆ гдⷭ҇ь повелѣ̀ проповѣ́дающымъ бл҃говѣ́стїе, ѿ бл҃говѣ́стїѧ жи́ти. є҃і А҆́зъ же ни є҆ди́но сотвори́хъ ѿ си́хъ: не писа́хъ же сїѧ̑, да та́кѡ бꙋ́детъ ѡ҆ мнѣ̀: до́брѣе бо мнѣ̀ па́че ᲂу҆мре́ти, не́жели похвалꙋ̀ мою̀ кто̀ да и҆спраздни́тъ. ѕ҃і А҆́ще бо бл҃говѣствꙋ́ю, нѣ́сть мѝ похвалы̀: нꙋ́жда бо мѝ належи́тъ. го́ре же мнѣ̀ є҆́сть, а҆́ще не бл҃говѣствꙋ́ю. з҃і А҆́ще ᲂу҆́бѡ во́лею сїѐ творю̀, мздꙋ̀ и҆́мамъ: а҆́ще ли нево́лею, строе́нїе мѝ є҆́сть предано̀. и҃і Ка́ѧ (л. рѕ҃і ѡ҆б.) ᲂу҆́бѡ мѝ є҆́сть мзда̀; да благовѣствꙋ́ѧй без̾ мзды̀ положꙋ̀ благовѣ́стїе хрⷭ҇то́во, во є҆́же не твори́ти мѝ по ѻ҆́бласти мое́й въ благовѣствова́нїи.

Коне́цъ понедѣ́льникꙋ.

(заⷱ҇ рм҃г) [в҃] ѳ҃і Свобо́денъ бо сы́й ѿ всѣ́хъ, Въ на́вечерїи просвѣще́нїѧ: Бра́тїе, свобо́денъ сы́й ѿ всѣ́хъ, всѣ́мъ себѐ порабо́тихъ, да множа́йшыѧ прїѡбрѧ́щꙋ. к҃ Бы́хъ і҆ꙋде́ємъ, ꙗ҆́кѡ і҆ꙋде́й, да і҆ꙋдє́и прїѡбрѧ́щꙋ: подзакѡ́ннымъ, ꙗ҆́кѡ подзако́ненъ, да подзакѡ́нныѧ прїѡбрѧ́щꙋ. к҃а Беззакѡ́ннымъ, ꙗ҆́кѡ беззако́ненъ, [не сы́й беззако́нникъ бг҃ꙋ, но зако́нникъ хрⷭ҇тꙋ̀,] да прїѡбрѧ́щꙋ беззакѡ́нныѧ. к҃в Бы́хъ немѡщны́мъ ꙗ҆́кѡ не́мощенъ, да немѡщны́ѧ прїѡбрѧ́щꙋ: всѣ́мъ бы́хъ всѧ̑, да всѧ́кѡ нѣ̑кїѧ спасꙋ̀. к҃г Сїе́ же творю̀ за благовѣ́стїе, да соѻ́бщникъ є҆мꙋ̀ бꙋ́дꙋ. к҃д Не вѣ́сте ли, ꙗ҆́кѡ текꙋ́щїи въ позо́рищи, всѝ ᲂу҆́бѡ текꙋ́тъ, є҆ди́нъ же прїе́млетъ по́честь; та́кѡ тецы́те, да пости́гнете. к҃є Всѧ́къ же подвиза́ѧйсѧ, ѿ всѣ́хъ воздержи́тсѧ: и҆ ѻ҆нѝ ᲂу҆́бѡ да и҆стлѣ́ненъ вѣне́цъ прїи́мꙋтъ, мы́ же неистлѣ́ненъ. к҃ѕ А҆́зъ ᲂу҆̀бо та́кѡ текꙋ̀, не ꙗ҆́кѡ безвѣ́стнѡ: та́кѡ подвиза́юсѧ, не ꙗ҆́кѡ воздꙋ́хъ бїѧ́й: к҃з Но ᲂу҆мерщвлѧ́ю тѣ́ло моѐ и҆ порабоща́ю, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́дꙋ.

Коне́цъ на́вечерїю, є҆гда̀ по́стъ є҆́сть. (л. рз҃і)

Глава̀ десѧ́таѧ.

(заⷱ҇) сⷯ а҃ Не хощꙋ́ же ва́съ не вѣ́дѣти, бра́тїе, На ѡ҆свѧще́нїе воды̀: Бра́тїе, не хощꙋ̀ ва́съ не вѣ́дѣти, ꙗ҆́кѡ ѻ҆тцы̀ на́ши всѝ под̾ ѻ҆́блакомъ бы́ша, и҆ всѝ сквозѣ̀ мо́ре проидо́ша: в҃ И҆ всѝ въ мѡѷсе́а крести́шасѧ во ѻ҆́блацѣ и҆ въ мо́ри: г҃ И҆ всѝ то́жде бра́шно дꙋхо́вное ꙗ҆до́ша: д҃ И҆ всѝ то́жде пи́во дꙋхо́вное пи́ша: пїѧ́хꙋ бо ѿ дꙋхо́внагѡ послѣ́дꙋющагѡ ка́мене, ка́мень же бѣ̀ хрⷭ҇то́съ.

Коне́цъ на́вечерїю, є҆гда̀ нѣ́сть по́стъ, и҆ ѡ҆свѧще́нїю воды̀.

(заⷱ҇ рм҃д) є҃ Но не во множа́йшихъ ꙳꙳ Во вто́рникъ и҃ недѣ́ли: Бра́тїе, не во множа́йшихъ ꙳꙳ и҆́хъ благоволѝ бг҃ъ: пораже́ни бо бы́ша въ пꙋсты́ни. ѕ҃ Сїѧ̑ же ѻ҆́бразы на́мъ бы́ша, ꙗ҆́кѡ не бы́ти на́мъ похотникѡ́мъ ѕлы́хъ, ꙗ҆́коже и҆ ѻ҆нѝ похотѣ́ша. з҃ Ни і҆дѡлослꙋжи́тели быва́йте, ꙗ҆́коже нѣ́цыи ѿ ни́хъ, ꙗ҆́коже є҆́сть пи́сано: сѣдо́ша лю́дїе ꙗ҆́сти и҆ пи́ти, и҆ воста́ша и҆гра́ти. и҃ Нижѐ соблꙋ́димъ, ꙗ҆́коже нѣ́цыи ѿ ни́хъ соблꙋди́ша, и҆ падо́ша во є҆ди́нъ де́нь два́десѧть трѝ ты́сѧщи. ѳ҃ Ни да и҆скꙋша́имъ хрⷭ҇та̀, ꙗ҆́коже нѣ́цыи ѿ ни́хъ и҆скꙋси́ша, и҆ ѿ ѕмі́й погибо́ша. і҃ Ни ропщи́те, ꙗ҆́коже нѣ́цыи ѿ ни́хъ ропта́ша, и҆ погибо́ша ѿ всегꙋби́телѧ. а҃і Сїѧ̑ же всѧ̑ ѻ҆́брази прилꙋча́хꙋсѧ ѻ҆́нѣмъ: пи́сана же бы́ша въ наꙋче́нїе на́ше, въ ни́хже концы̀ вѣ̑къ достиго́ша. (л. рз҃і ѡ҆б.)

(заⷱ҇ рм҃є) в҃і Тѣ́мже мнѧ́йсѧ Въ сре́дꙋ и҃-ѧ недѣ́ли: Бра́тїе, мнѧ́йсѧ стоѧ́ти, да блюде́тсѧ, да не паде́тъ.

Коне́цъ вто́рникꙋ.

г҃і И҆скꙋше́нїе ва́съ не дости́же, то́чїю человѣ́ческое: вѣ́ренъ же бг҃ъ, и҆́же не ѡ҆ста́витъ ва́съ и҆скꙋси́тисѧ па́че, є҆́же мо́жете, но сотвори́тъ со и҆скꙋше́нїемъ и҆ и҆збы́тїе, ꙗ҆́кѡ возмощѝ ва́мъ понестѝ. [г҃] д҃ Тѣ́мже бра́тїе моѧ̀ возлю́бленнаѧ, бѣ́гайте ѿ і҆дѡлослꙋже́нїѧ. є҃і Ꙗ҆́кѡ мꙋ̑дрымъ глаго́лю: сꙋди́те вы̀, є҆́же глаго́лю. ѕ҃і Ча́ша благослове́нїѧ, ю҆́же благословлѧ́емъ, не ѡ҆бще́нїе ли кро́ве хрⷭ҇то́вы є҆́сть; хлѣ́бъ, є҆го́же ло́мимъ, не ѡ҆бще́нїе ли тѣ́ла хрⷭ҇то́ва є҆́сть; з҃і Ꙗ҆́кѡ є҆ди́нъ хлѣ́бъ, є҆ди́но тѣ́ло є҆смы̀ мно́зи: вси́ бо ѿ є҆ди́нагѡ хлѣ́ба причаща́емсѧ. и҃і Ви́дите і҆и҃лѧ по пло́ти: не ꙗ҆дꙋ́щїи ли жє́ртвы, ѻ҆́бщницы ѻ҆лтаре́ви сꙋ́ть; ѳ҃і Что̀ ᲂу҆̀бо глаго́лю; ꙗ҆́кѡ і҆́дѡлъ что́ є҆сть; и҆лѝ і҆дѡложе́ртвенное что́ є҆сть; к҃ Но занѐ ꙗ҆̀же жрꙋ́тъ ꙗ҆зы́цы, бѣсѡ́мъ жрꙋ́тъ, а҆ не бг҃ови: не хощꙋ́ же ва́съ ѻ҆́бщникѡвъ бы́ти бѣсѡ́мъ. к҃а Не мо́жете ча́шꙋ гдⷭ҇ню пи́ти, и҆ ча́шꙋ бѣсо́вскꙋю: не мо́жете трапе́зѣ гдⷭ҇ней причаща́тисѧ, и҆ трапе́зѣ бѣсо́встѣй. к҃в И҆лѝ раздража́емъ гдⷭ҇а; є҆да̀ крѣпча́йши є҆гѡ̀ є҆смы̀;

Коне́цъ средѣ̀.

(заⷱ҇ рм҃ѕ) к҃г Всѧ̑ мѝ ꙳꙳ Сꙋббѡ́та ѕ҃і- ѧ: Бра́тїе, всѧ́ ми ꙳꙳ Сїе́ же и҆ сꙋббѡ́та мѧсопꙋ́стнаѧ. лѣ́ть сꙋ́ть, но не всѧ̑ на по́льзꙋ: всѧ̑ мѝ лѣ́ть сꙋ́ть, но не всѧ̀ назида́ютъ. к҃д Никто́же (л. ри҃і) своегѡ̀ сѝ да и҆́щетъ, но є҆́же бли́жнѧгѡ ко́йждо. к҃є Всѐ, є҆́же на то́ржищи продае́мое, ꙗ҆ди́те, ничто́же сꙋмнѧ́щесѧ за со́вѣсть. к҃ѕ Гдⷭ҇нѧ бо землѧ̀, и҆ и҆сполне́нїе є҆ѧ̀. к҃з А҆́ще ли кто̀ ѿ невѣ́рныхъ призыва́етъ вы̀, и҆ хо́щете и҆тѝ, всѐ предлага́емое ва́мъ ꙗ҆ди́те, ничто́же сꙋмнѧ́щесѧ за со́вѣсть.

(заⷱ҇ рм҃з) к҃и А҆́ще ли же кто̀ ва́мъ Въ четверто́къ и҃-ѧ недѣ́ли: Бра́тїе, а҆́ще кто̀ ва́мъ рече́тъ: сїѐ і҆дѡложе́ртвенно є҆́сть: не ꙗ҆ди́те, за ѻ҆́ного повѣ́давшаго и҆ со́вѣсть: гдⷭ҇нѧ бо землѧ̀, и҆ и҆сполне́нїе є҆ѧ̀.

Коне́цъ сꙋббѡ́тѣ.

к҃ѳ Со́вѣсть же глаго́лю не свою̀, но дрꙋга́гѡ: вскꙋ́ю бо свобо́да моѧ̀ сꙋ́дитсѧ ѿ и҆ны́ѧ со́вѣсти; л҃ А҆́ще а҆́зъ бл҃года́тїю причаща́юсѧ, почто̀ хꙋлꙋ̀ прїе́млю, ѡ҆ не́мже а҆́зъ благодарю̀; л҃а А҆́ще ᲂу҆̀бо ꙗ҆́сте, а҆́ще ли пїетѐ, а҆́ще ли и҆́но что̀ творитѐ, всѧ̑ въ сла́вꙋ бж҃їю твори́те. л҃в Безпреткнове́ни быва́йте і҆ꙋде́ємъ, и҆ є҆́ллинѡмъ, и҆ це́ркви бж҃їей. л҃г Ꙗ҆́коже и҆ а҆́зъ во все́мъ всѣ̑мъ ᲂу҆гожда́ю, не и҆скі́й своеѧ̀ по́льзы, но мно́гихъ, да спасꙋ́тсѧ.

Глава̀ перваѧна́десѧть.

сⷯ а҃ Подража́тели мнѣ̀ быва́йте, ꙗ҆́коже и҆ а҆́зъ хрⷭ҇тꙋ̀. [ѕ҃] в҃ Хвалю́ же вы̀ бра́тїе, ꙗ҆́кѡ всѧ̑ моѧ̀ по́мните, и҆ ꙗ҆́коже преда́хъ ва́мъ, преда̑нїѧ держитѐ. г҃ Хощꙋ́ же ва́съ вѣ́дѣти, ꙗ҆́кѡ всѧ́комꙋ мꙋ́жꙋ глава̀, хрⷭ҇то́съ є҆́сть: глава́ же женѣ̀, мꙋ́жъ: (л. ри҃і ѡ҆б.) глава́ же хрⷭ҇тꙋ̀, бг҃ъ. д҃ Всѧ́къ мꙋ́жъ моли́твꙋ дѣ́ѧй, и҆лѝ проро́чествꙋѧй покры́тою главо́ю, срамлѧ́етъ главꙋ̀ свою̀. є҃ И҆ всѧ́ка жена̀ моли́твꙋ дѣ́ющаѧ, и҆лѝ проро́чествꙋющаѧ ѿкрове́нною главо́ю, срамлѧ́етъ главꙋ̀ свою̀: є҆ди́но бо є҆́сть и҆ то́жде ꙾ ꙾꙾є҆́же бы́ти꙾ ѡ҆стри́женнѣй. ѕ҃ А҆́ще ᲂу҆́бѡ не покрыва́етсѧ жена̀, да стриже́тсѧ: а҆́ще ли же сра́мъ женѣ̀ стри́щисѧ и҆лѝ бри́тисѧ, да покрыва́етсѧ. з҃ Мꙋ́жъ бо не до́лженъ є҆́сть покрыва́ти главꙋ̀, ѻ҆́бразъ и҆ сла́ва бж҃їѧ сы́й: жена́ же сла́ва мꙋ́жꙋ є҆́сть.

Коне́цъ четверткꙋ̀.

(заⷱ҇ рм҃и) и҃ Нѣ́сть бо мꙋ́жъ Въ пѧто́къ и҃-ѧ недѣ́ли: Бра́тїе, нѣ́сть мꙋ́жъ ѿ жены̀, но жена̀ ѿ мꙋ́жа: ѳ҃ И҆́бо не со́зданъ бы́сть мꙋ́жъ жены̀ ра́ди, но жена̀ мꙋ́жа ра́ди. і҃ Сегѡ̀ ра́ди должна̀ є҆́сть жена̀ вла́сть и҆мѣ́ти на главѣ̀, а҆́гг҃лъ ра́ди. а҃і Ѻ҆ба́че ни мꙋ́жъ без̾ жены̀, ни жена̀ без̾ мꙋ́жа ѡ҆ гдⷭ҇ѣ. в҃і Ꙗ҆́коже бо жена̀ ѿ мꙋ́жа, си́це и҆ мꙋ́жъ жено́ю: всѧ̑ же ѿ бг҃а. г҃і Въ ва́съ самѣ́хъ сꙋди́те: лѣ́по ли є҆́сть женѣ̀ ѿкрове́ннѣ бг҃ꙋ моли́тисѧ; д҃і И҆лѝ и҆ не са́мое є҆стество̀ ᲂу҆чи́тъ вы̀, ꙗ҆́кѡ мꙋ́жъ ᲂу҆́бѡ а҆́ще власы̀ расти́тъ, безче́стїе є҆мꙋ̀ є҆́сть. є҃і Жена́ же а҆́ще власы̀ расти́тъ, сла́ва є҆́й є҆́сть: занѐ растѣ́нїе власѡ́въ, вмѣ́стѡ ѡ҆дѣѧ́нїѧ дано̀ бы́сть є҆́й. ѕ҃і А҆́ще ли кто̀ мни́тсѧ спо́рливъ бы́ти, мы̀ такова́гѡ ѻ҆бы́чаѧ не и҆́мамы, нижѐ цр҃кви бж҃їѧ. [з҃] з҃і Сїе́ же завѣщава́ѧ, не хвалю̀, ꙗ҆́кѡ не на лꙋ́чшее, но на хꙋ́дшее сбира́етесѧ. (л. рѳ҃і) и҃і Пе́рвое ᲂу҆́бѡ, сходѧ́щымсѧ ва́мъ въ цр҃ковь, слы́шꙋ въ ва́съ ра̑спри сꙋ́щѧ, и҆ ча́сть нѣ́кꙋю си́хъ вѣ́рꙋю. ѳ҃і Подоба́етъ бо и҆ є҆ресє́мъ въ ва́съ бы́ти, да и҆скꙋ́снїи ꙗ҆вле́ни быва́ютъ въ ва́съ. к҃ Сходѧ́щымсѧ ᲂу҆́бѡ ва́мъ вкꙋ́пѣ, нѣ́сть госпо́дскꙋю ве́черю ꙗ҆́сти: к҃а Ко́ждо бо свою̀ ве́черю предварѧ́етъ въ снѣде́нїе: и҆ ѻ҆́въ ᲂу҆́бѡ а҆́лчетъ, ѻ҆́въ же ᲂу҆пива́етсѧ. (втоⷬ҇) к҃в Є҆да́ бо домѡ́въ не и҆́мате, во є҆́же ꙗ҆́сти и҆ пи́ти; и҆лѝ ѡ҆ цр҃кви бж҃їей нерадитѐ, и҆ срамлѧ́ете не и҆мꙋ́щыѧ; что̀ ва́мъ рекꙋ̀; похвалю́ ли вы̀ ѡ҆ се́мъ; не похвалю̀.

Коне́цъ пѧткꙋ̀.

(заⷱ҇ рм҃ѳ) к҃г А҆́зъ бо прїѧ́хъ Въ четверто́къ вели́кїй: Бра́тїе, а҆́зъ прїѧ́хъ ѿ гдⷭ҇а, є҆́же и҆ преда́хъ ва́мъ: ꙗ҆́кѡ гдⷭ҇ь і҆и҃съ, въ но́щь, въ ню́же пре́данъ быва́ше, прїе́мъ хлѣ́бъ, к҃д И҆ благодари́въ, преломѝ, и҆ речѐ: прїими́те, ꙗ҆ди́те: сїѐ є҆́сть тѣ́ло моѐ, є҆́же за вы̀ ломи́мое: сїѐ твори́те въ моѐ воспомина́нїе. к҃є Та́кожде и҆ ча́шꙋ по ве́чери, глаго́лѧ: сїѧ̀ ча́ша но́вый завѣ́тъ є҆́сть въ мое́й кро́ви: сїѐ твори́те, є҆ли́жды а҆́ще пїе́те, въ моѐ воспомина́нїе. к҃ѕ Є҆ли́жды бо а҆́ще ꙗ҆́сте хлѣ́бъ се́й, и҆ ча́шꙋ сїю̀ пїе́те, сме́рть гдⷭ҇ню возвѣща́ете, до́ндеже ᲂу҆́бѡ прїи́детъ. к҃з Тѣ́мже и҆́же а҆́ще ꙗ҆́стъ хлѣ́бъ се́й, и҆лѝ пїе́тъ ча́шꙋ гдⷭ҇ню недосто́йнѣ, пови́ненъ бꙋ́детъ тѣ́лꙋ и҆ кро́ви гдⷭ҇ни. к҃и Да и҆скꙋша́етъ же человѣ́къ себѐ, и҆ та́кѡ ѿ хлѣ́ба да ꙗ҆́стъ, и҆ ѿ ча́ши да пїе́тъ. к҃ѳ Ꙗ҆ды́й бо и҆ пїѧ́й недосто́йнѣ, сꙋ́дъ себѣ̀ ꙗ҆́стъ и҆ пїе́тъ, не разсꙋжда́ѧ (л. рѳ҃і ѡ҆б.) тѣ́ла гдⷭ҇нѧ. л҃ Сегѡ̀ ра́ди въ ва́съ мно́зи не́мощни и҆ недꙋ́жливи и҆ ꙾спѧ́тъ꙾꙾ᲂу҆сыпа́ютъ꙾ дово́льни.

(заⷱ҇ р҃н) л҃а А҆́ще бо бы́хомъ Въ понедѣ́льникъ ѳ҃ недѣ́ли: Бра́тїе, а҆́ще бы́хомъ са́ми себѐ разсꙋжда́ли, не бы́хомъ ѡ҆сꙋжде́ни бы́ли. л҃в Сꙋди́ми же ѿ гдⷭ҇а, наказꙋ́емсѧ, да не съ мі́ромъ ѡ҆сꙋ́димсѧ.

Коне́цъ вели́комꙋ четверткꙋ̀.

л҃г Тѣ́мже бра́тїе моѧ̀, сходѧ́щесѧ ꙗ҆́сти, дрꙋгъдрꙋ́га жди́те. л҃д А҆́ще ли кто̀ а҆́лчетъ, въ домꙋ̀ да ꙗ҆́стъ, да не въ грѣ́хъ схо́дитесѧ. ѡ҆ про́чихъ же, є҆гда̀ прїидꙋ̀, ᲂу҆стро́ю.

Глава̀ втораѧна́десѧть.

[и҃] сⷯ а҃ Ѡ҆ дꙋхо́вныхъ же бра́тїе, не хощꙋ̀ ва́съ не вѣ́дѣти. в҃ Вѣ́сте, ꙗ҆́кѡ є҆гда̀ невѣ́рни бѣ́сте, ко і҆́дѡлѡмъ безгла́снымъ ꙗ҆́кѡ ведо́ми ведо́стесѧ. г҃ Тѣ́мже сказꙋ́ю ва́мъ, ꙗ҆́кѡ никто́же дх҃омъ бж҃їимъ глаго́лѧй, рече́тъ а҆на́ѳема і҆и҃са: и҆ никто́же мо́жетъ рещѝ гдⷭ҇а і҆и҃са, то́чїю дх҃омъ ст҃ы́мъ. д҃ Раздѣлє́нїѧ же дарова́нїй сꙋ́ть, а҆ то́йжде дх҃ъ: є҃ И҆ раздѣлє́нїѧ слꙋже́нїй сꙋ́ть, а҆ то́йжде гдⷭ҇ь: ѕ҃ И҆ раздѣлє́нїѧ дѣ́йствъ сꙋ́ть, а҆ то́йжде є҆́сть бг҃ъ, дѣ́йствꙋѧй всѧ̑ во всѣ́хъ.

Коне́цъ понедѣ́льникꙋ.

(заⷱ҇ рн҃а) з҃ Комꙋ́ждо же ꙳꙳ Ное́мврїа з҃і, ст҃о́мꙋ григо́рїю: Бра́тїе, комꙋ́ждо ꙳꙳ дае́тсѧ ꙗ҆вле́нїе дх҃а на по́льзꙋ. и҃ Ѻ҆́вомꙋ бо дх҃омъ дае́тсѧ сло́во премꙋ́дрости: (л. р҃к) и҆но́мꙋ же сло́во ра́зꙋма, ѡ҆ то́мже дс҃ѣ: ѳ҃ Дрꙋго́мꙋ же вѣ́ра, тѣ́мже дх҃омъ: и҆но́мꙋ же дарова̑нїѧ и҆сцѣле́нїй, ѡ҆ то́мже дс҃ѣ. і҃ Дрꙋго́мꙋ же дѣ̑йствїѧ си́лъ, и҆но́мꙋ же прⷪ҇ро́чество, дрꙋго́мꙋ же разсꙋждє́нїѧ дꙋховѡ́мъ, и҆но́мꙋ же ро́ди ѧ҆зы́кѡвъ, дрꙋго́мꙋ же сказа̑нїѧ ѧ҆зы́кѡвъ. а҃і Всѧ̑ же сїѧ̑ дѣ́йствꙋетъ є҆ди́нъ и҆ то́йжде дх҃ъ, раздѣлѧ́ѧ вла́стїю коемꙋ́ждо, ꙗ҆́коже хо́щетъ.

Коне́цъ ст҃о́мꙋ.

(заⷱ҇ рн҃в) в҃і Ꙗ҆́коже бо тѣ́ло Во вто́рникъ ѳ҃ недѣ́ли: Бра́тїе, ꙗ҆́коже тѣ́ло є҆ди́но є҆́сть, и҆ ᲂу҆́ды и҆́мать мно́ги: вси́ же ᲂу҆́ды є҆ди́нагѡ тѣ́ла, мно́зи сꙋ́ще, є҆ди́но сꙋ́ть тѣ́ло, та́кѡ и҆ хрⷭ҇то́съ. г҃і И҆́бо є҆ди́нѣмъ дх҃омъ мы̀ всѝ во є҆ди́но тѣ́ло крⷭ҇ти́хомсѧ, а҆́ще і҆ꙋдє́и, а҆́ще є҆́ллини, и҆лѝ рабѝ, и҆лѝ свобо́дни: и҆ всѝ є҆ди́нѣмъ дх҃омъ напои́хомсѧ. д҃і И҆́бо тѣ́ло нѣ́сть є҆ди́нъ ᲂу҆́дъ, но мно́зи. є҃і А҆́ще рече́тъ нога̀, ꙗ҆́кѡ нѣ́смь рꙋка̀, нѣ́смь ѿ тѣ́ла: є҆да̀ сегѡ̀ ра́ди нѣ́сть ѿ тѣ́ла; ѕ҃і И҆ а҆́ще рече́тъ ᲂу҆́хо, ꙗ҆́кѡ нѣ́смь ѻ҆́ко, нѣ́смь ѿ тѣ́ла: є҆да̀ сегѡ̀ ра́ди нѣ́сть ѿ тѣ́ла; а҆́ще всѐ тѣ́ло ѻ҆́ко, гдѣ̀ слꙋ́хъ; з҃і А҆́ще же всѐ слꙋ́хъ, гдѣ̀ ᲂу҆ха́нїе; и҃і Ны́нѣ же положѝ бг҃ъ ᲂу҆́ды, є҆ди́наго коего́ждо и҆́хъ въ тѣлесѝ, ꙗ҆́коже и҆зво́ли. ѳ҃і А҆́ще ли бы́ша всѝ є҆ди́нъ ᲂу҆́дъ, гдѣ̀ тѣ́ло; к҃ Ны́нѣ же мно́зи ᲂу҆́бѡ ᲂу҆́дове, є҆ди́но же тѣ́ло. к҃а Не мо́жетъ же ѻ҆́ко рещѝ рꙋцѣ̀: не тре́бѣ мѝ є҆сѝ. и҆лѝ па́ки глава̀ нога́ма, не тре́бѣ мѝ є҆стѐ. к҃в Но мно́гѡ (л. р҃к ѡ҆б.) па́че мнѧ́щїисѧ ᲂу҆́ди тѣ́ла немощнѣ́йши бы́ти, нꙋ́жнѣйши сꙋ́ть: к҃г И҆ и҆̀хже мни́мъ безче́стнѣйшихъ бы́ти тѣ́ла, си́мъ че́сть мно́жайшꙋю прилага́емъ: к҃д И҆ неблагоѻбра́знїи на́ши, благоѻбра́зїе мно́жайше и҆́мꙋтъ: а҆ благоѻбра́знїи на́ши, не тре́бѣ и҆́мꙋтъ. но бг҃ъ растворѝ тѣ́ло, хꙋдѣ́йшемꙋ бо́льшꙋ да́въ че́сть: к҃є Да не бꙋ́детъ ра́спри въ тѣлесѝ. но ꙾да то́жде въ себѣ̀꙾꙾ да ра́внѡ є҆ди́нъ ѡ҆ дрꙋго́мъ꙾ пекꙋ́тсѧ ᲂу҆́ди. к҃ѕ И҆ а҆́ще стра́ждетъ є҆ди́нъ ᲂу҆́дъ, съ ни́мъ стра́ждꙋтъ всѝ ᲂу҆́ди: а҆́ще ли же сла́витсѧ є҆ди́нъ ᲂу҆́дъ, съ ни́мъ ра́дꙋютсѧ всѝ ᲂу҆́ди.

Коне́цъ вто́рникꙋ.

(заⷱ҇ рн҃г) к҃з Вы́ же є҆стѐ Ст҃ы̑мъ безсре́бреникѡмъ: Бра́тїе, вы̀ є҆стѐ тѣ́ло хрⷭ҇то́во, и҆ ᲂу҆́ди ѿ ча́сти. к҃и И҆ ѻ҆́вы ᲂу҆́бѡ положѝ бг҃ъ въ цр҃кви, пе́рвѣе а҆пⷭ҇лы, второ́е прⷪ҇ро́ки, тре́тїе ᲂу҆чи́тели: пото́мже си̑лы, та́же дарова̑нїѧ и҆сцѣле́нїй, застꙋплє́нїѧ, правлє́нїѧ, ро́ди ѧ҆зы́кѡвъ: к҃ѳ Є҆да̀ всѝ а҆пⷭ҇ли; є҆да̀ всѝ прⷪ҇ро́цы; є҆да̀ всѝ ᲂу҆чи́тели; є҆да̀ всѝ си̑лы; л҃ Є҆да̀ всѝ дарова̑нїѧ и҆́мꙋтъ и҆сцѣле́нїй; є҆да̀ всѝ ѧ҆зы̑ки глаго́лютъ; є҆да̀ всѝ сказꙋ́ютъ; л҃а Ревнꙋ́йте же дарова́нїй бо́льшихъ: и҆ є҆щѐ по превосхожде́нїю пꙋ́ть ва́мъ показꙋ́ю.

Глава̀ третїѧна́десѧть.

[а҃] сⷯ а҃ А҆́ще ѧ҆зы̑ки человѣ́ческими глаго́лю и҆ а҆́гг҃льскими, любве́ же не и҆́мамъ, бы́хъ [ꙗ҆́кѡ] мѣ́дь звенѧ́щи, и҆лѝ кѷмва́лъ звѧца́ѧй. в҃ И҆ а҆́ще и҆́мамъ проро́чество, и҆ вѣ́мъ та̑йны всѧ̀, и҆ (л. рк҃а) ве́сь ра́зꙋмъ: и҆ а҆́ще и҆́мамъ всю̀ вѣ́рꙋ, ꙗ҆́кѡ и҆ го́ры преставлѧ́ти, любве́ же не и҆́мамъ, ничто́же є҆́смь. г҃ И҆ а҆́ще разда́мъ всѧ̀ и҆мѣ̑нїѧ моѧ̀, и҆ а҆́ще преда́мъ тѣ́ло моѐ во є҆́же сжещѝ є҆̀, любве́ же не и҆́мамъ, ника́ѧ по́льза мѝ є҆́сть.

(заⷱ҇ рн҃д) д҃ Любы̀ Въ сре́дꙋ ѳ҃-ѧ недѣ́ли: Бра́тїе, любы̀ долготерпи́тъ, млⷭ҇рдствꙋетъ: любы̀ не зави́дитъ: любы̀ не превозно́ситсѧ, не горди́тсѧ: є҃ Ни безчи́нствꙋетъ, не и҆́щетъ своѧ́ си, не раздража́етсѧ, не мы́слитъ ѕла̀: ѕ҃ Не ра́дꙋетсѧ ѡ҆ непра́вдѣ, ра́дꙋетсѧ же ѡ҆ и҆́стинѣ: з҃ Всѧ̑ ꙾лю́битъ꙾꙾ покрыва́етъ ꙾, всемꙋ̀ вѣ́рꙋ є҆́млетъ, всѧ̑ ᲂу҆пова́етъ, всѧ̑ терпи́тъ: и҃ Любы̀ николи́же ѿпа́даетъ,

Коне́цъ ст҃ы̑мъ.

а҆́ще же проро́чєствїѧ ᲂу҆празднѧ́тсѧ, а҆́ще ли ѧ҆зы́цы ᲂу҆мо́лкнꙋтъ, а҆́ще ра́зꙋмъ и҆спраздни́тсѧ. ѳ҃ Ѿча́сти бо разꙋмѣва́емъ, и҆ ѿ ча́сти проро́чествꙋемъ. і҃ Є҆гда́ же прїи́детъ соверше́нное, тогда̀ є҆́же ѿ ча́сти, ᲂу҆праздни́тсѧ.

(заⷱ҇) а҃і Є҆гда̀ бѣ́хъ ꙳꙳ Ки́рѷкꙋ и҆ і҆ꙋли́ттѣ: Бра́тїе, є҆гда̀ бѣ́хъ ꙳꙳ млⷣнецъ, ꙗ҆́кѡ млⷣнецъ глаго́лахъ, ꙗ҆́кѡ младе́нецъ мꙋ́дрствовахъ, ꙗ҆́кѡ младе́нецъ смышлѧ́хъ: є҆гда́ же бы́хъ мꙋ́жъ, ѿверго́хъ млⷣнчєскаѧ. в҃і Ви́димъ бо ны́нѣ ꙗ҆́коже зерца́ломъ въ гада́нїи тогда́ же лице́мъ къ лицꙋ̀: ны́нѣ разꙋмѣ́ю ѿ ча́сти тогда́ же позна́ю, ꙗ҆́коже и҆ позна́нъ бы́хъ. г҃і Ны́нѣ же пребыва́ютъ вѣ́ра, наде́жда, любы̀, трѝ сїѧ̀: бо́льши же си́хъ, любы̀. (л. рк҃а ѡ҆б.)

Глава̀ четвертаѧна́десѧть.

сⷯ а҃ Держи́тесѧ любвѐ: ревнꙋ́йте же дꙋхѡ́внымъ, па́че же да проро́чествꙋете. в҃ Глаго́лѧй бо ѧ҆зы́ки, не человѣ́кѡмъ глаго́летъ, но бг҃ꙋ: никто́же бо слы́шитъ, дх҃омъ же глаго́летъ та̑йны. г҃ Проро́чествꙋѧй же, человѣ́кѡмъ глаго́летъ созида́нїе, и҆ ᲂу҆тѣше́нїе, и҆ ᲂу҆твержде́нїе. [в҃] д҃ Глаго́лѧй бо ѧ҆зы́ки, себѐ зи́ждетъ: а҆ проро́чествꙋѧй, цр҃ковь зи́ждетъ. є҃ Хощꙋ́ же всѣ́хъ ва́съ глаго́лати ѧ҆зы́ки, па́че же да прорица́ете: бо́лїй бо проро́чествꙋѧй, не́жели глаго́лѧй ѧ҆зы́ки, ра́звѣ а҆́ще кто̀ сказꙋ́етъ, да цр҃ковь созида́нїе прїе́млетъ.

Коне́цъ средѣ̀ и҆ ки́рѷкꙋ.

(заⷱ҇ рн҃є) ѕ҃ Ны́нѣ же бра́тїе, а҆́ще Въ четверто́къ ѳ҃-ѧ недѣ́ли: Бра́тїе, а҆́ще прїидꙋ̀ къ ва́мъ ѧ҆зы́ки глаго́лѧ, кꙋ́ю ва́мъ по́льзꙋ сотворю̀, а҆́ще ва́мъ не глаго́лю и҆лѝ во ѿкрове́нїи, и҆лѝ въ ра́зꙋмѣ, и҆лѝ въ проро́чествїи, и҆лѝ въ наꙋче́нїи; з҃ Ѻ҆ба́че бездꙋ̑шнаѧ гла́съ даю́щаѧ, а҆́ще сопѣ́ль, а҆́ще гꙋ́сли, а҆́ще ра́знствїѧ писка́нїємъ не дадѧ́тъ, ка́кѡ разꙋ́мно бꙋ́детъ писка́нїе, и҆лѝ гꙋде́нїе; и҃ И҆́бо а҆́ще безвѣ́стенъ гла́съ трꙋба̀ да́стъ, кто̀ ᲂу҆гото́витсѧ на бра́нь; ѳ҃ Та́кѡ и҆ вы̀ а҆́ще неблагоразꙋ́мно сло́во дадитѐ ѧ҆зы́комъ, ка́кѡ ᲂу҆разꙋмѣ́етсѧ глаго́лемое, бꙋ́дете бо въ воздꙋ́хъ глаго́люще. і҃ Толи́ки ᲂу҆́бѡ, а҆́ще ключи́тсѧ, ро́ди гласѡ́въ сꙋ́ть въ мі́рѣ, и҆ ни є҆ди́нъ и҆́хъ (л. рк҃в) безгла́сенъ. а҃і А҆́ще ᲂу҆̀бо не ᲂу҆вѣ́мъ си́лы гла́са, бꙋ́дꙋ глаго́лющемꙋ и҆ноѧзы́чникъ: и҆ глаго́лющїй, мнѣ̀ и҆ноѧзы́чникъ. в҃і Та́кѡ и҆ вы̀, поне́же ревни́тели є҆стѐ дх҃овѡ́мъ, ꙗ҆̀же къ созда́нїю цр҃кве ꙾проси́те꙾꙾ и҆щи́те ꙾, да и҆збы́точествꙋете. г҃і Тѣ́мже глаго́лѧй ѧ҆зы́комъ, да мо́литсѧ, да сказꙋ́етъ. д҃і А҆́ще бо молю́сѧ ѧ҆зы́комъ, дх҃ъ мо́й мо́литсѧ, а҆ ᲂу҆́мъ мо́й без̾ плода̀ є҆́сть. є҃і Что̀ ᲂу҆̀бо є҆́сть; помолю́сѧ дх҃омъ, помолю́сѧ же и҆ ᲂу҆мо́мъ: воспою̀ дх҃омъ, воспою́ же и҆ ᲂу҆мо́мъ. ѕ҃і Поне́же а҆́ще бл҃гослови́ши дх҃омъ, и҆сполнѧ́ѧй мѣ́сто невѣ́жды, ка́кѡ рече́тъ, а҆ми́нь, по твоемꙋ̀ благодаре́нїю: поне́же не вѣ́сть, что̀ глаго́леши. з҃і Ты̀ ᲂу҆́бѡ до́брѣ бл҃годари́ши: но дрꙋгі́й не созида́етсѧ. и҃і Благодарю̀ бг҃а моего̀, па́че всѣ́хъ ва́съ ѧ҆зы́ки глаго́лѧ: ѳ҃і Но въ цр҃кви хощꙋ̀ пѧ́ть слове́съ ᲂу҆мо́мъ мои́мъ глаго́лати, да и҆ и҆́ны по́льзꙋю, не́жели тмы̑ слове́съ ѧ҆зы́комъ.

Коне́цъ четверткꙋ̀.

(заⷱ҇ рн҃ѕ) к҃ Бра́тїе, не дѣ́ти Въ сꙋббѡ́тꙋ з҃і-ю: Бра́тїе, не дѣ́ти быва́йте ᲂу҆мы̀, но ѕло́бою младе́нствꙋйте, ᲂу҆мы́ же соверше́ни быва́йте. к҃а Въ зако́нѣ пи́шетъ: ꙗ҆́кѡ и҆ны́ми ѧ҆зы́ки, и҆ ᲂу҆стны̀ и҆ны́ми возглаго́лю лю́демъ си́мъ: и҆ ни та́кѡ послꙋ́шаютъ менѐ, глаго́летъ гдⷭ҇ь. к҃в Тѣ́мже ѧ҆зы́цы въ зна́менїе сꙋ́ть, не вѣ́рꙋющымъ, но невѣ̑рнымъ: а҆ проро́чество, не невѣ̑рнымъ, но вѣ́рꙋющымъ. к҃г А҆́ще ᲂу҆́бѡ сни́детсѧ цр҃ковь всѧ̀ вкꙋ́пѣ, и҆ всѝ ѧ҆зы́ки глаго́лютъ: вни́дꙋтъ же и҆ неразꙋ́мивїи, и҆лѝ (л. рк҃в) невѣ́рнїи, не рекꙋ́тъ ли, ꙗ҆́кѡ бѣснꙋ́етесѧ: к҃д А҆́ще же всѝ проро́чествꙋютъ, вни́детъ же нѣ́кїй невѣ́ренъ, и҆лѝ невѣ́жда: ѡ҆блича́етсѧ всѣ́ми, и҆ и҆стѧзꙋ́етсѧ ѿ всѣ́хъ. (срⷣе) к҃є И҆ си́це та̑йнаѧ се́рдца є҆гѡ̀ ꙗ҆влє́на быва́ютъ: и҆ та́кѡ па́дъ ни́цъ, покло́нитсѧ бг҃ови, возвѣща́ѧ, ꙗ҆́кѡ вои́стиннꙋ бг҃ъ съ ва́ми є҆́сть.

Коне́цъ сꙋббѡ́тѣ.

(заⷱ҇ рн҃з) к҃ѕ Что̀ ᲂу҆̀бо є҆́сть бра́тїе; є҆гда̀ схо́дитесѧ, Въ пѧто́къ ѳ҃-ѧ недѣ́ли: Бра́тїе, є҆гда̀ схо́дитесѧ, ко́ждо ва́съ ѱало́мъ и҆́мать, ᲂу҆че́нїе и҆́мать, ѧ҆зы́къ и҆́мать, ѿкрове́нїе и҆́мать, сказа́нїе и҆́мать: всѧ̑ же къ созда́нїю да быва́ютъ. к҃з А҆́ще ѧ҆зы́комъ кто̀ глаго́летъ, по двѣма̀, и҆лѝ мно́жае по трїе́мъ, и҆ по ча́сти, и҆ є҆ди́нъ да сказꙋ́етъ. к҃и А҆́ще ли не бꙋ́детъ сказа́тель, да молчи́тъ въ цр҃кви, себѣ́ же да глаго́летъ и҆ бг҃ови. к҃ѳ Прⷪ҇ро́цы же два̀ и҆лѝ трїѐ да глаго́лютъ, и҆ дрꙋзі́и да разсꙋжда́ютъ. л҃ А҆́ще ли и҆но́мꙋ ѿкры́етсѧ сѣдѧ́щꙋ, пе́рвый да молчи́тъ. л҃а Мо́жете бо всѝ по є҆ди́номꙋ проро́чествовати, да всѝ ᲂу҆ча́тсѧ, и҆ всѝ ᲂу҆тѣша́ютсѧ. л҃в И҆ дꙋ́си проро́честїи, проро́кѡмъ повинꙋ́ютсѧ. л҃г Нѣ́сть бо нестрое́нїѧ бг҃ъ, но ми́ра, ꙗ҆́кѡ во всѣ́хъ цр҃квахъ ст҃ы́хъ. л҃д Жєны̀ ва́шѧ въ цр҃квахъ да молча́тъ, не повелѣ́сѧ бо и҆̀мъ глаго́лати, но повинова́тисѧ, ꙗ҆́коже и҆ зако́нъ глаго́летъ. л҃є А҆́ще ли чесомꙋ̀ наꙋчи́тисѧ хотѧ́тъ, въ домꙋ̀ свои́хъ мꙋже́й да вопроша́ютъ: сра́мно бо є҆́сть женѣ̀ въ цр҃кви глаго́лати. л҃ѕ И҆лѝ ѿ ва́съ сло́во бж҃їе (л. рк҃г) и҆зы́де; и҆лѝ въ ва́съ є҆ди́ныхъ дости́же; л҃з А҆́ще кто̀ мни́тсѧ проро́къ бы́ти и҆лѝ дꙋхо́венъ, да разꙋмѣ́етъ, ꙗ҆̀же пишꙋ̀ ва́мъ, занѐ гдⷭ҇ни сꙋ́ть за́пѡвѣди. л҃и А҆́ще ли кто̀ не разꙋмѣ́етъ, да не разꙋмѣва́етъ. л҃ѳ Тѣ́мже, бра́тїе моѧ̀, ревнꙋ́йте є҆́же проро́чествовати: и҆ є҆́же глаго́лати ѧ҆зы́ки не возбранѧ́йте. м҃ Всѧ̑ же благоѻбра́знѡ и҆ по чи́нꙋ да быва́ютъ.

Коне́цъ пѧткꙋ̀.

Глава̀ пѧтаѧна́десѧть.

(заⷱ҇ рн҃и) [ѳ҃] сⷯ а҃ Сказꙋ́ю же ва́мъ бра́тїе, Недѣ́лѧ в҃і: Бра́тїе, сказꙋ́ю ва́мъ благовѣствова́нїе, є҆́же благовѣсти́хъ ва́мъ, є҆́же и҆ прїѧ́сте, въ не́мже и҆ стоитѐ: в҃ И҆́мже и҆ спаса́етесѧ, ка́цѣмъ сло́вомъ благовѣсти́хъ ва́мъ, а҆́ще содержитѐ, ра́звѣ а҆́ще не всꙋ́е вѣ́ровасте. г҃ Преда́хъ бо ва́мъ и҆спе́рва, є҆́же и҆ прїѧ́хъ, ꙗ҆́кѡ хрⷭ҇то́съ ᲂу҆́мре грѣ̑хъ на́шихъ ра́ди, по писа́нїємъ, д҃ И҆ ꙗ҆́кѡ погребе́нъ бы́сть, и҆ ꙗ҆́кѡ воста̀ въ тре́тїй де́нь, по писа́нїємъ. є҃ И҆ ꙗ҆́кѡ ꙗ҆ви́сѧ ки́фѣ, та́же є҆динона́десѧтимъ. ѕ҃ Пото́мъ же ꙗ҆ви́сѧ бо́ле пѧтѝ сѡ́тъ бра́тїѧмъ є҆ди́ною, ѿ ни́хже мно́жайшїи пребыва́ютъ досе́лѣ, нѣ́цыи же и҆ почи́ша. з҃ Пото́мъ же ꙗ҆ви́сѧ і҆а́кѡвꙋ: та́же а҆пⷭ҇лѡмъ всѣ́мъ. и҃ Послѣди́ же всѣ́хъ, ꙗ҆́кѡ нѣ́коемꙋ и҆́звергꙋ, ꙗ҆ви́сѧ и҆ мнѣ̀. ѳ҃ А҆́зъ бо є҆́смь мні́й а҆пⷭ҇лѡвъ, и҆́же нѣ́смь досто́инъ нарещи́сѧ а҆пⷭ҇лъ, занѐ гони́хъ цр҃ковь бж҃їю. і҃ Бл҃года́тїю же (л. рк҃г ѡ҆б.) бж҃їею є҆́смь, є҆́же є҆́смь, и҆ бл҃года́ть є҆гѡ̀, ꙗ҆́же во мнѣ̀, не тща̀ бы́сть, но па́че всѣ́хъ и҆́хъ потрꙋди́хсѧ: не а҆́зъ же, но благода́ть бж҃їѧ, ꙗ҆́же со мно́ю. а҃і А҆́ще ᲂу҆́бѡ а҆́зъ, а҆́ще ли ѻ҆нѝ, та́кѡ проповѣ́дꙋемъ, и҆ та́кѡ вѣ́ровасте.

Коне́цъ недѣ́ли.

(заⷱ҇ рн҃ѳ) [а҃] в҃і А҆́ще же хрⷭ҇то́съ Въ понедѣ́льникъ і҃-ѧ недѣ́ли: Бра́тїе, а҆́ще хрⷭ҇то́съ проповѣ́дꙋетсѧ, ꙗ҆́кѡ и҆з̾ ме́ртвыхъ воста̀, ка́кѡ глаго́лютъ нѣ́цыи въ ва́съ, ꙗ҆́кѡ воскрⷭ҇нїѧ ме́ртвыхъ нѣ́сть; г҃і И҆ а҆́ще воскрⷭ҇нїѧ ме́ртвыхъ нѣ́сть, то̀ ни хрⷭ҇то́съ воста̀. д҃і А҆́ще же хрⷭ҇то́съ не воста̀, тщѐ ᲂу҆̀бо проповѣ́данїе на́ше, тща́ же и҆ вѣ́ра ва́ша. є҃і Ѡ҆брѣта́емсѧ же и҆ лжесвидѣ́телє бж҃їи, ꙗ҆́кѡ послꙋшествова́хомъ на бг҃а, ꙗ҆́кѡ воскресѝ хрⷭ҇та̀, є҆гѡ́же не воскресѝ, а҆́ще ᲂу҆́бѡ ме́ртвїи не востаю́тъ: ѕ҃і А҆́ще бо ме́ртвїи не востаю́тъ, то̀ ни хрⷭ҇то́съ воста̀. з҃і А҆́ще же хрⷭ҇то́съ не воста̀, сꙋ́етна вѣ́ра ва́ша, є҆щѐ є҆стѐ во грѣсѣ́хъ ва́шихъ. и҃і Оу҆̀бо и҆ ᲂу҆ме́ршїи ѡ҆ хрⷭ҇тѣ̀, погибо́ша. ѳ҃і И҆ а҆́ще въ животѣ̀ се́мъ ᲂу҆пова́юще є҆смы̀ во хрⷭ҇та̀ то́чїю, ѻ҆каѧ́ннѣйши всѣ́хъ человѣ̑къ є҆смы̀.

Коне́цъ понедѣ́льникꙋ.

(заⷱ҇ р҃ѯ) к҃ Ны́нѣ же хрⷭ҇то́съ ꙳꙳ Въ па́мѧть ᲂу҆ме́ршихъ: Бра́тїе, хрⷭ҇то́съ ꙳꙳ воста̀ ѿ ме́ртвыхъ, нача́токъ ᲂу҆ме́ршымъ бы́сть: к҃а Поне́же бо чл҃вѣ́комъ сме́рть бы́сть, и҆ чл҃вѣ́комъ воскрⷭ҇нїе ме́ртвыхъ. к҃в Ꙗ҆́коже бо ѡ҆ а҆да́мѣ всѝ ᲂу҆мира́ютъ, та́кожде и҆ ѡ҆ хрⷭ҇тѣ̀ всѝ ѡ҆живꙋ́тъ. к҃г Ко́ждо же во свое́мъ чинꙋ̀: (л. рк҃д) нача́токъ хрⷭ҇то́съ, пото́мъ же хрⷭ҇тꙋ̀ вѣ́ровавшїи, въ прише́ствїи є҆гѡ̀. к҃д Та́же кончи́на, є҆гда̀ преда́стъ црⷭ҇тво бг҃ꙋ и҆ ѻ҆ц҃ꙋ̀: є҆гда̀ и҆спраздни́тъ всѧ́ко нача́льство, и҆ всѧ́кꙋ вла́сть и҆ си́лꙋ. к҃є Подоба́етъ бо є҆мꙋ̀ ца́рствовати, до́ндеже положи́тъ всѧ̀ врагѝ под̾ нога́ма свои́ма. к҃ѕ Послѣ́днїй же вра́гъ и҆спраздни́тсѧ сме́рть: к҃з Всѧ̑ бо покорѝ под̾ но́зѣ є҆гѡ̀, внегда́ же рещѝ, ꙗ҆́кѡ всѧ̑ покорє́на сꙋ́ть є҆мꙋ̀, ꙗ҆́вѣ ꙗ҆́кѡ ра́звѣ поко́ршагѡ є҆мꙋ̀ всѧ̑. к҃и Є҆гда́ же покори́тъ є҆мꙋ̀ всѧ́чєскаѧ, тогда̀ и҆ са́мъ сн҃ъ покори́тсѧ поко́ршемꙋ є҆мꙋ̀ всѧ́чєскаѧ, да бꙋ́детъ бг҃ъ всѧ́чєскаѧ во всѣ́хъ.

Коне́цъ мє́ртвымъ.

к҃ѳ Поне́же

(заⷱ҇ рѯ҃а) Что̀ сотворѧ́тъ Во вто́рникъ і҃-ѧ недѣ́ли: Бра́тїе, что̀ сотворѧ́тъ крестѧ́щїисѧ ме́ртвыхъ ра́ди; а҆́ще ѿню́дъ ме́ртвїи не востаю́тъ, что̀ и҆ креща́ютсѧ ме́ртвыхъ ра́ди; л҃ Почто́ же и҆ мы̀ бѣды̑ прїе́млемъ на всѧ́къ ча́съ; л҃а По всѧ̀ днѝ ᲂу҆мира́ю, та́кѡ мѝ ва́ша похвала̀ бра́тїе, ю҆́же и҆́мамъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ. л҃в А҆́ще бо по человѣ́кꙋ со ѕвѣ́ремъ борѧ́хсѧ въ є҆фе́сѣ, ка́ѧ мѝ по́льза, а҆́ще ме́ртвїи не востаю́тъ; да ꙗ҆́мы и҆ пїе́мъ, ᲂу҆́трѣ бо ᲂу҆́мремъ. л҃г Не льсти́тесѧ: тлѧ́тъ ѻ҆бы́чаи бла́ги бесѣ́ды ѕлы̑. л҃д И҆стрезви́тесѧ пра́веднѡ, и҆ не согрѣша́йте: невѣ́дѣнїе бо бж҃їе нѣ́цыи и҆́мꙋтъ: къ сра́мꙋ ва́мъ глаго́лю. [в҃] л҃є Но рече́тъ нѣ́кто: ка́кѡ воста́нꙋтъ ме́ртвїи; ко́имъ же тѣ́ломъ прїи́дꙋтъ; л҃ѕ Безꙋ́мне, (л. рк҃д ѡ҆б.) ты̀ є҆́же сѣ́еши, не ѡ҆живе́тъ, а҆́ще не ᲂу҆́мретъ. л҃з И҆ є҆́же сѣ́еши, не тѣ́ло бꙋ́дꙋщее сѣ́еши, но голо̀ зе́рно, а҆́ще слꙋчи́тсѧ, пшени́цы и҆лѝ и҆но́го ѿ про́чихъ: л҃и Бг҃ъ же дае́тъ є҆мꙋ̀ тѣ́ло, ꙗ҆́коже восхо́щетъ, и҆ коемꙋ́ждо сѣ́мени своѐ тѣ́ло.

Коне́цъ вто́рникꙋ.

(заⷱ҇ рѯ҃в) л҃ѳ Не всѧ́ка пло́ть, Въ сꙋббѡ́тꙋ и҃і-ю: Бра́тїе, не всѧ́ка пло́ть та́ же пло́ть: но и҆́на ᲂу҆́бѡ пло́ть человѣ́кѡмъ, и҆́на же пло́ть скотѡ́мъ, и҆́на же ры́бамъ, и҆́на же пти́цамъ. м҃ И҆ тѣлеса̀ нбⷭ҇наѧ, и҆ тѣлеса̀ земна́ѧ: но и҆́на ᲂу҆́бѡ нбⷭ҇нымъ сла́ва, и҆ и҆́на земны̑мъ. м҃а И҆́на сла́ва со́лнцꙋ, и҆ и҆́на сла́ва лꙋнѣ̀, и҆ и҆́на сла́ва ѕвѣзда́мъ: ѕвѣзда́ бо ѿ ѕвѣзды̀ ра́знствꙋетъ во сла́вѣ. м҃в Та́кожде и҆ воскрⷭ҇нїе ме́ртвыхъ: сѣ́етсѧ въ тлѣ́нїе, востае́тъ въ нетлѣ́нїи: м҃г Сѣ́етсѧ не въ че́сть, востае́тъ въ сла́вѣ: сѣ́етсѧ въ не́мощи, востае́тъ въ си́лѣ: м҃д Сѣ́етсѧ тѣ́ло дꙋше́вное, востае́тъ тѣ́ло дх҃о́вное: є҆́сть тѣ́ло дꙋше́вное, и҆ є҆́сть тѣ́ло дх҃о́вное. м҃є Та́кѡ и҆ пи́сано є҆́сть: бы́сть пе́рвый чл҃вѣ́къ а҆да́мъ въ дꙋ́шꙋ жи́вꙋ, послѣ́днїй а҆да́мъ, въ дх҃ъ животворѧ́щъ.

Коне́цъ сꙋббѡ́тѣ.

м҃ѕ Но не пре́жде дх҃о́вный, но дꙋше́вный: пото́мъ же дх҃о́вный.

(заⷱ҇ рѯ҃г) м҃з Пе́рвый ꙳꙳ Въ па́мѧть ᲂу҆ме́ршихъ: Бра́тїе, пе́рвый ꙳꙳ человѣ́къ ѿ землѝ пе́рстенъ, вторы́й чл҃вѣ́къ гдⷭ҇ь съ нб҃сѐ. м҃и Ꙗ҆ко́въ пе́рстный, таковѝ и҆ пе́рстнїи: и҆ ꙗ҆ко́въ нбⷭ҇ный, та́цы же и҆ нбⷭ҇нїи. (л. рк҃є) м҃ѳ И҆ ꙗ҆́коже ѡ҆блеко́хомсѧ во ѻ҆́бразъ пе́рстнагѡ, да ѡ҆блече́мсѧ и҆ во ѻ҆́бразъ нбⷭ҇нагѡ. н҃ Сїе́ же глаго́лю, бра́тїе, ꙗ҆́кѡ пло́ть и҆ кро́вь црⷭ҇твїѧ бж҃їѧ наслѣ́дити не мо́гꙋтъ, нижѐ тлѣ́нїе нетлѣ́нїѧ наслѣ́дствꙋетъ. [г҃] н҃а Сѐ та́йнꙋ ва́мъ глаго́лю: вси́ бо не ᲂу҆́спнемъ, вси́ же и҆змѣни́мсѧ, н҃в Вско́рѣ, во мгнове́нїи ѻ҆́ка, въ послѣ́днѣй трꙋбѣ̀: вострꙋ́битъ бо, и҆ ме́ртвїи воста́нꙋтъ нетлѣ́нни, и҆ мы̀ и҆змѣни́мсѧ. н҃г Подоба́етъ бо тлѣ́нномꙋ семꙋ̀ ѡ҆блещи́сѧ въ нетлѣ́нїе, и҆ ме́ртвенномꙋ семꙋ̀ ѡ҆блещи́сѧ въ безсме́ртїе. н҃д Є҆гда́ же тлѣ́нное сїѐ ѡ҆блече́тсѧ въ нетлѣ́нїе, и҆ сме́ртное сїѐ ѡ҆блече́тсѧ въ безсме́ртїе, тогда̀ бꙋ́детъ сло́во напи́санное: поже́рта бы́сть сме́рть побѣ́дою. (чеⷦ҇) н҃є Гдѣ́ ти сме́рте, жа́ло; гдѣ́ ти а҆́де, побѣ́да; н҃ѕ Жа́ло же сме́рти, грѣ́хъ: си́ла же грѣха̀, зако́нъ. н҃з Бг҃ꙋ же благодаре́нїе, да́вшемꙋ на́мъ побѣ́дꙋ гдⷭ҇емъ на́шимъ і҆и҃съ хрⷭ҇то́мъ.

Коне́цъ мє́ртвымъ.

(заⷱ҇ рѯ҃д) н҃и Тѣ́мже, бра́тїе моѧ̀ возлю́блєннаѧ, тве́рди быва́йте, Въ сꙋббѡ́тꙋ ѳ҃і- ю: Бра́тїе, тве́рди быва́йте, непостꙋ́пни, и҆збы́точествꙋюще въ дѣ́лѣ гдⷭ҇ни всегда̀: вѣ́дѧще, ꙗ҆́кѡ трꙋ́дъ ва́шъ нѣ́сть то́щъ пред̾ гдⷭ҇емъ.

Глава̀ шестаѧна́десѧть.

сⷯ а҃ Ѡ҆ ми́лостыни же, ꙗ҆́же ко ст҃ы̑мъ, ꙗ҆́коже ᲂу҆стро́ихъ цр҃квамъ галаті́йскимъ, та́кѡ и҆ вы̀ сотворѧ́йте. в҃ По є҆ди́нѣй ѿ сꙋббѡ́тъ (л. рк҃є ѡ҆б.) ко́ждо ва́съ да полага́етъ ᲂу҆ себѐ, сохранѧ́ѧ є҆́же а҆́ще что̀ бл҃го поспѣши́тсѧ: да не є҆гда̀ прїидꙋ̀, тогда̀ собра̑нїѧ быва́ютъ. г҃ Є҆гда́ же прїидꙋ̀, и҆̀хже а҆́ще и҆скꙋ́сите посла́ньми, си́хъ послю̀ ѿнестѝ блгⷣть ва́шꙋ во і҆ерꙋсали́мъ.

Коне́цъ сꙋббѡ́тѣ.

(заⷱ҇ рѯ҃є) д҃ А҆́ще же Въ сре́дꙋ і҃- ѧ недѣ́ли: Бра́тїе, а҆́ще досто́йно бꙋ́детъ и҆ мнѣ̀ и҆тѝ, со мно́ю по́йдꙋтъ. є҃ Прїидꙋ́ же къ ва́мъ, є҆гда̀ македо́нїю прейдꙋ̀: [македо́нїю бо прохождꙋ̀.] ѕ҃ Оу҆ ва́съ же, а҆́ще слꙋчи́тсѧ мнѣ̀, пребꙋ́дꙋ, и҆лѝ и҆ ѡ҆зимѣ́ю, да вы́ мѧ прово́дите, а҆́може а҆́ще поидꙋ̀. з҃ Не хощꙋ́ бо ва́съ ны́нѣ въ мимохожде́нїи ви́дѣти: ᲂу҆пова́ю же вре́мѧ нѣ́кое пребы́ти ᲂу҆ ва́съ, а҆́ще гдⷭ҇ь повели́тъ. и҃ Пребꙋ́дꙋ же во є҆фе́сѣ до пентїко́стїи: ѳ҃ Две́рь бо мѝ ѿве́рзесѧ вели́ка и҆ поспѣ́шна, и҆ сопроти́внїи мно́зи. і҃ А҆́ще же прїи́детъ тїмоѳе́й, блюди́те, да без̾ стра́ха бꙋ́детъ ᲂу҆ ва́съ: дѣ́ло бо гдⷭ҇не дѣ́лаетъ, ꙗ҆́коже и҆ а҆́зъ. а҃і Да никто́же ᲂу҆̀бо є҆го̀ ᲂу҆ничижи́тъ: проводи́те же є҆го̀ съ ми́ромъ, да прїи́детъ ко мнѣ̀: ждꙋ́ бо є҆го̀ съ бра́тїею. в҃і Ѡ҆ а҆поллѡ́сѣ же бра́тѣ, мно́гѡ моли́хъ є҆го̀, да прїи́детъ къ ва́мъ съ бра́тїею: и҆ всѧ́кѡ не бѣ̀ во́лѧ, да ны́нѣ прїи́детъ: прїи́детъ же, є҆гда̀ ᲂу҆праздни́тсѧ.

Коне́цъ средѣ̀.

(заⷱ҇ рѯ҃ѕ) г҃і Бо́дрствꙋйте, ꙳꙳ Недѣ́лѧ г҃і: Бра́тїе, бо́дрствꙋйте, ꙳꙳ сто́йте въ вѣ́рѣ, мꙋжа́йтесѧ ᲂу҆твержда́йтесѧ. д҃і Всѧ̑ ва́мъ любо́вїю да быва́ютъ. (л. рк҃ѕ) є҃і Молю́ же вы̀ бра́тїе: вѣ́сте до́мъ стефани́новъ, ꙗ҆́кѡ є҆́сть нача́токъ а҆ха́їи, и҆ въ слꙋже́нїе ст҃ы̑мъ ᲂу҆чини́ша себѐ: ѕ҃і Да и҆ вы̀ повинꙋ́йтесѧ таковы̑мъ, и҆ всѧ́комꙋ споспѣ́шствꙋющꙋ и҆ трꙋжда́ющꙋсѧ. з҃і Возра́довахсѧ же ѡ҆ прише́ствїи стефани́новѣ, и҆ фꙋртꙋна́товѣ, и҆ а҆ха́їковѣ, ꙗ҆́кѡ ва́ше лише́нїе сі́и и҆спо́лниша. и҃і Поко́иша бо мо́й дꙋ́хъ и҆ ва́шъ: познава́йте ᲂу҆̀бо таковы̑ѧ. ѳ҃і Цѣлꙋ́ютъ вы̀ цр҃кви а҆сі́йскїѧ. цѣлꙋ́ютъ вы̀ ѡ҆ гдⷭ҇ѣ мно́гѡ а҆кѵ́ла и҆ прїскі́лла, съ дома́шнею и҆́хъ цр҃ковїю. к҃ Цѣлꙋ́ютъ вы̀ бра́тїѧ всѧ̀. цѣлꙋ́йте дрꙋгъдрꙋ́га лобза́нїемъ ст҃ы́мъ. к҃а Цѣлова́нїе мое́ю рꙋко́ю па́ѵлею. к҃в А҆́ще кто̀ не лю́битъ гдⷭ҇а і҆и҃са хрⷭ҇та̀, да бꙋ́детъ про́клѧтъ: ꙾мара́н а҆ѳа̀꙾꙾гдⷭ҇ь на́шъ прїи́де꙾ [сѵ́рскїй гла́съ].. к҃г Бл҃года́ть гдⷭ҇а на́шегѡ і҆и҃са хрⷭ҇та̀ съ ва́ми: к҃д И҆ любы̀ моѧ̀ со всѣ́ми ва́ми, ѡ҆ хрⷭ҇тѣ̀ і҆и҃сѣ, а҆ми́нь.

Коне́цъ недѣ́ли.

Коне́цъ пе́рвагѡ посла́нїѧ къ корі́нѳѧнѡмъ, є҆́же написа́сѧ ѿ фїлі̑ппъ, стефани́номъ, и҆ фꙋртꙋна́томъ, и҆ а҆ха́їкомъ, и҆ тїмоѳе́емъ: и҆́мать въ себѣ̀ гла́въ, ѕ҃і: зача́лъ цр҃ко́вныхъ м҃з: стїхѡ́въ ул҃з: знамена́нїй че́рныхъ, ѳ҃: послѣ́дꙋющихъ же и҆̀мъ червле́ныхъ, є҃і.


Комментарии для сайта Cackle