КАНОНЫ БОЖИЕЙ МАТЕРИ НА КАЖДЫЙ ДЕНЬ

Расположенные по гласам и дням седмицы

ГЛАС ПЕРВЫЙ

В СУББОТУ27

Канон Пресвятей Богородице

Песнь 1

Ирмос: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря потопля́ема, песнь я́ко благоде́телю пое́т Бо́гу, чудоде́ющему мы́шцею высо́кою, я́ко просла́вися.

Припев: Пресвята́я Богоро́дице, спаси́ нас.

Ужасо́шася стра́хом, Всецари́це, а́нгельская чинонача́лия, хва́ляще Тя: пое́т же бла́гости ра́ди всяк ум, я́ко Ма́терь Зижди́теля: похвалы́ бо вся́кия превозшла́ еси́ чин, Христа́ ро́ждши.

Лю́тыми напа́стьми томи́мь и от враг стужае́мь, окая́нный, с пла́чем приглаша́ю: свы́ше мне простри́, Пребога́тая, ру́ку Твою́, избавля́ющи мя, и безбе́дно пожи́ти сподо́би моли́твами Твои́ми.

Слава: Души́ та́йная прегреше́ния лечбо́ю милосе́рдия исцели́ и ути́ши плотско́е стремле́ние, Богоро́дице: и враго́в ко́пия и стре́лы возвра́щши, кре́пко в сердца́ их вонзи́.

И ныне: Па́жить дре́внюю потреби́ человекоуби́йственную утро́ба Деви́ча, Христа́ ро́ждши: те́мже вся тварь ра́дуется ны́не, Пречи́стая, я́ко ожи́вльшися: и согласно воспева́ет Твоего́ Сы́на и Бо́га.

Песнь 3

Ирмос: Не му́дростию и бога́тством да хва́лится сме́ртный свои́м, но ве́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́х за́поведей утверди́ мя, Влады́ко.

Иа́ков вели́кий на пути́ спя иногда́, низходя́щия свы́ше ле́ствицею, Де́во, на зе́млю а́нгелы ви́дя, дивля́шеся: и возбну́в, прописа́ я́ве Дверь Тя Небе́сную.

Вре́менным удержа́нием, в напа́сти вве́ржен окая́нный аз, и бу́рями напа́стными томи́мь, увы́ мне, вопи́ю: Яже Бо́га ро́ждшая и возне́сшая рог наш, спаси́ мя моли́твами Твои́ми.

Слава: С Небесе́ ру́ку кре́пкую просте́р, о всех Царю́ Христе́, чу́вственных и мы́сленных, Иису́се мой, главы́ враго́в под но́зе положи́, Богоро́дицу Ма́терь Твою́ ве́рно пропове́дающих.

И ныне: Иса́ия дре́вле, очи́щся у́глем Ду́ха, от Твоея́ утро́бы я́ве, Пребога́тая Де́во, Сы́ну взыва́ше роди́тися: Его́же в после́дняя времена́, мене́ ра́ди, без му́жа родила́ еси́.

Песнь 4

Ирмос: Слы́ша дре́вле Авваку́м, Христе́, чу́дный Твой слух и стра́хом взыва́ше: от ю́га Бог прии́дет, и Святы́й от горы́ приосене́нныя ча́щи, спасти́ пома́занныя: сла́ва си́ле Твое́й, Го́споди.

Тебе́ я́ко су́щую в жена́х красну́ и прече́стну, я́ко из пусты́ни восходя́щу, и Отрасль Христа́ на руку́ нося́щу, Ма́ти Бо́жия, прообража́ше миронача́льник, вопия́: сла́ва си́ле Твое́й, Го́споди.

Приклони́ ми у́хо Твое́, Блага́я, и виждь мое́ озлобле́ние и бед умноже́ние: к Тебе́ бо, Влады́чице, душе́вное о́ко просте́р и с пла́чем коле́на прикло́нь, ны́не молю́, вопия́: уста́ви ми напа́стей смуще́ние.

Слава: Сте́ну Тя необори́мую ве́дый, привлече́н мольбо́ю, Твой раб ны́не к Тебе́ прибега́ю и стре́лы вра́жия, я́ко младе́нческия вменя́ю неде́йственны, о Пребога́тая! Те́мже и ра́дуяся вопию́: сла́ва, Богома́ти, Рождеству́ Твоему́.

И ныне: Си́ла Вы́шняго Тя, Де́во, осени́ наи́тием Боже́ственнаго Ду́ха: и тогда́ па́че естества́ вся́ческих Госпо́дь, плоть и ду́шу оживотвори́в, приедини́ Себе́, пребы́в в то́мжде естестве́.

Песнь 5

Ирмос: Свет Твой незаходи́мый возсия́й, Христе́, в сердца́ ве́рно пою́щих Тя, мир подава́яй нам па́че ума́. Тем от но́щи неве́дения ко дню све́том Твои́м теку́ще, славосло́влю Тя, Человеколю́бче.

Боже́ственную Тя прови́дев иногда́ Дании́л, несеко́мую го́ру, Препе́тая, вопия́ше проявле́нне, усещи́ся от Тебе́ ка́меню Богоро́дия, Христу́ Спа́су ми́ра: Его́же, ве́рнии, ны́не чту́ще, восхваля́ем Тя, Богоневе́сто.

Напа́стьми окая́нный мно́гими па́дся, с боле́знию и пла́чем се́рдца моля́ся, безсту́дно служи́тель Твой, вопию́: изба́ви, Богороди́тельнице, от бед одержа́щих мое́ смире́ние и весе́лия мя испо́лни.

Слава: Страсте́й мои́х свире́пую пучи́ну ути́ши кре́пкою Твое́ю моли́твою, Блага́я, Яже страсте́й кроме́ ро́ждшая Христа́: я́ко да в тишине́ души́ ны́не живы́й, про́чее жи́зни моея́, в пе́снех воспева́ю Тя.

И ныне: Бо́га ка́ко на руку́ но́сиши, рцы? И ка́ко дои́ши, вся́ческая руко́ю Содержа́щего, о Де́во Всеблаже́нная, аз, рече́, чиста́ пребыва́ю и по Рождестве́, Христа́ Бо́га ро́ждши, Ада́мов долг и прама́терний отъе́мши.

Песнь 6

Ирмос: Весь от страсте́й безме́рных содержу́ся и ки́том зол сниспадо́х: но возведи́ из истле́ния мя, Бо́же, я́коже пре́жде Ио́ну, и ве́рою безстра́стие ми да́руй, я́ко да во гла́се хвале́ния и спасе́ния ду́хом пожру́ Ти.

Седе́ния не отсту́пль недр Роди́теля в не́дрех Ма́терних Сын Предле́тный: напосле́док же, Иже пре́жде век сый со Отце́м, из утро́бы Де́вы произы́де, вся к жи́зни безсме́ртней возводя́ неизрече́нною бла́гостию.

Вери́гами свя́зан вра́жиями от озлобле́ния, во а́дския вереи́, увы́ мне, низверго́хся: но предста́ни, с Небесе́ я́вльшися, Богоотрокови́це Чи́стая, возставля́ющи мя Твои́ми моли́твами, служи́теля Твоего́, и ру́ку по́мощи даждь пою́щему Боже́ственное Твое́ Рождество́.

Слава: В ров поги́белей окая́нный впадо́х, и зве́рие мно́зи окроча́ют мя: но Влады́чице, моли́твами Твои́ми ка́мения отврати́, и невреди́ма Твоего́ раба́ соблюди́: Ка́мень бо краеуго́льный, Христа́, в ложесна́х Твои́х носи́ла еси́.

И ныне: Дре́вле проро́к Боже́ственных лик провозгласи́, Де́во, Рождества́ Твоего́ о́бразы: све́тел о́блак Тя, и све́щник, и ста́мну, и трапе́зу, и Небе́сную ро́су, хлеб, ма́нну же и дверь, престо́л, и пала́ту, жезл, рай, я́ко Христа́ ро́ждшую.

 

Таже: Го́споди поми́луй, трижды. Слава, и ны́не

Седален, глас 1:

Ма́терь Тя Бо́жию све́мы вси, Де́ву вои́стинну, и по Рождестве́ я́вльшуюся, любо́вию прибега́юще к Твое́й бла́гости: Тебе́ бо и́мамы, гре́шнии, предста́тельницу и Тебе́ стяжа́хом в напа́стех спасе́ние, Еди́ну Всенепоро́чную.

Песнь 7

Ирмос: Проидо́ша, я́ко черто́г, пе́щный пла́мень нестерпи́мый, и́же за благоче́стие иногда́ о́троцы святи́и показа́вшеся я́ве, и согла́сно воспева́юще, песнь пояху́: отце́в Бо́же, благослове́н еси́.

Ше́ствуя Преве́чный две́рьми непрохо́дными Твои́ми, Всецари́це, чи́ста Твоя́ зна́мения и це́ла сохрани́, чи́ста и по Рождестве́: те́мже вопие́м: оте́ц на́ших Бо́же, благослове́н еси́.

В пещь вве́ржен, седмочи́сленными пла́меньми опаля́юся от душеуби́йственных бед: но Сама́ ро́су ми одожди́, Влады́чице Блага́я, Твои́ми мольба́ми, да вопию́: благослове́н Бог оте́ц на́ших.

Слава: Страстьми́ престаре́вся, и неосла́бными напа́стьми и скорбьми́, и доспе́в к за́падом жития́ моего́, доброде́телем неприча́стен, ле́ностию снеде́н быв, вопию́ Ти, Влады́чице: утеше́ние земны́м, поми́луй мя!

И ныне: Тро́ице во Еди́нстве правосла́вно служа́ще, Тя, Ма́ти Де́во Чи́стая, я́ко Бо́га пло́тию ро́ждшую пропове́дающе земни́и, боже́ственне пое́м: оте́ц на́ших Бо́же, благослове́н еси́.

Песнь 8

Ирмос: Чу́да преесте́ственнаго показа́ о́браз огнеро́сная пещь дре́вле: огнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Тем воспева́юще воспои́м: да благослови́т тварь вся Го́спода и превозно́сит во вся ве́ки.

Сло́во всеи́стинное свяще́нника вообрази́ Рождество́ Твое́, Де́во: вои́стинну бо родила́ еси́ Сло́во Бо́жие, и ложесна́ не разве́рзе, Де́во, и́миже про́йде Бог. Тем ра́дующеся Богоро́дицу Тя по до́лгу согла́сно воспева́ем и превозно́сим Чи́стую во вся ве́ки.

Те́рние возра́стшее в души́ мое́й неде́йственно, Боже́ственным огне́м попали́, Пречи́стая, и Твои́ми моли́твами на доброде́тели возста́ви мя, твори́ти плодоно́сие Христу́: из Тебе́ бо Цвет при́сно живы́й прора́стши, тварь всю украси́. Тем Тя Богороди́тельницу Чи́стую почита́ем во вся ве́ки.

Слава: Исцеле́ние в лю́тых, Богороди́тельнице, неболе́зненно пода́ждь ми вско́ре: впад бо в ско́рби и беды́, Твою́ ско́рость в заступле́ние окая́нный призыва́ю, рыда́я. Те́мже, Пречи́стая, ускори́ изъя́ти мя и спаси́ от вся́кия му́ки, я́ко да благословя́ воспева́ю Твое́ Рождество́.

И ныне: Дре́вле Тя прозя́бший Ааро́нов жезл вообрази́, Де́во: Ты бо Еди́на родила́ еси́ прозябе́нием без му́жа, Небе́сный ны́не дождь прие́мши во чре́ве. Тем веселя́щеся, Тя Богоро́дицу по до́лгу согла́сно вси пое́м и превозно́сим во вся ве́ки.

Песнь 9

Ирмос: Неизглаго́ланное Де́вы та́инство: Не́бо бо Сия́, и престо́л Херуви́мский, и светоно́сный черто́г показа́ся Христа́ Бо́га Вседержи́теля. Сию́ благоче́стно я́ко Богоро́дицу велича́ем.

Пресла́вно Де́вы та́инство: Его́же бо не вмести́ша вышенебе́сная вели́чия, вмести́ во чре́ве. Те́мже соше́дшеся ублажа́ем Ю, и ве́рно веселя́щеся велича́ем.

Ви́дяще Тя Еди́ну, я́ко вы́шшую небе́с, Бо́жию зарю́, нескве́рная, престо́л херуви́мский, и черто́г, и одр свят, земни́и восхваля́юще, Христа́ Бо́га на́шего велича́ем: Его́же от чресл чи́стых родила́ еси́.

Слава: Окрест мене́ ско́рби мно́ги, и злы напа́сти ны́не напа́дающе, боле́зни же и лю́тыя грехи́ в ров вверго́ша. Те́мже Тя молю́ в го́рести души́ моея́, Пресвята́я Богоро́дице, избавле́ние обрести́ ми.

И ныне: Умири́ мир, Христе́, мольба́ми Чи́стыя Богоотрокови́цы, низлага́я вра́жию си́лу и тишину́ неизглаго́ланную нам устроя́я, во ве́ки сохрани́.

В НЕДЕЛЮ

Канон молебный Пресвятей Богородице

Песнь 1

Ирмос: Твоя победи́тельная десни́ца, боголе́пно в кре́пости просла́вися: та бо, Безсме́ртне, я́ко всемогу́щая, проти́вныя сотре́, изра́ильтяном путь глубины́ новосоде́лавшая.

Припев: Пресвята́я Богоро́дице, спаси́ нас.

Неизглаго́ланно зачала́ еси́ Бо́га и па́че естества́ родила́ еси́, Влады́чице Пречи́стая, земны́я от прегреше́ний Изме́ншаго. Те́мже молю́ Тя: мно́гих мя прегреше́ний изба́ви.

Пучи́ною погружа́емь, беда́ми грехо́в неизче́тных и скорбе́й, но окормле́нием Твои́м си́льным и моли́твою, Всенепоро́чная, к тишине́ Боже́ственней покая́ния напра́ви.

Слава: Всея́ моея́ жи́зни Предста́тельнице, от бед мно́гих изба́ви мя, да благода́рственный глас воспева́ю Ти, Богоро́дице чи́стая, и бу́дущия мя исхити́ му́ки.

И ныне: Обстоя́тельная нахожде́ния и напа́стей бу́рю утоли́, Ма́ти Всенепоро́чная Изба́вителя и Зижди́теля и Бо́га на́шего, благода́ть спасе́ния и очище́ния ми подаю́щи.

Песнь 3

Ирмос: Еди́не ве́дый челове́ческаго существа́ не́мощь и ми́лостивно в не́ вообра́жься, препоя́ши мя с высоты́ си́лою, е́же вопи́ти Тебе́: Свят одушевле́нный Храм неизрече́нныя сла́вы Твоея́, Человеколю́бче.

Виде́ние зра́ка Твоего́ чи́стаго а́нгелом у́бо сла́достно, челове́ком же есть спаси́тельно, духово́м же лука́вствия стра́шно: е́же ве́рою почита́юще и целу́юще, Богоро́дице, ду́шу просвеща́ем.

Кровьми́ из Тебе́ деви́ческими плоть Свою́ обложи́ Соде́тель и Госпо́дь: Его́же моли́, Всенепоро́чная, растле́вша мя безме́стными дея́ньми, уще́дрити за неизрече́нную ми́лость.

Слава: Жи́зни стяжа́в Тя храни́тельницу, и сте́ну необори́му, молю́ и по кончи́не покро́в Тя обрести́, и засту́пницу непобеди́му, к Бо́гу вводя́щу и живо́т подаю́щу ве́чный и сла́ву, Пренепоро́чная.

И ныне: Зача́тие безсе́менно, Чи́стая, и Рождество́ нетле́нно: Бог бо бе я́ве рожде́йся, челове́ческаго естества́ паде́ние призыва́я. Те́мже Богоро́дицу Тя и́стинную и су́щую воспева́ем.

Песнь 4

Ирмос: Го́ру Тя благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Неудержа́нное стремле́ние к злу влече́т мя, де́йствием врага́ и обы́чаем лука́вым: помози́ ми, Влады́чице, да не до конца́ всепа́губный нападе́т на мя, сме́ртию возбраня́я ми к покая́нию.

Все вре́мя живота́ моего́ ижди́х в блуде́х злых и я́звах лю́тых, и ны́не веду́т смире́нную ду́шу мою́ сих де́латели: Богороди́тельнице Де́во, помози́ ми.

Слава: Услы́ши глас мой боле́зненный, Всенепоро́чная, и́же из глубины́ души́ привноша́ю стена́ньми, и разреше́ние пода́ждь ми долго́в, и́хже соде́ях окая́нный мы́слию и нра́вом несмы́сленным.

И ныне: Влады́чице ми́ра Богоро́дице, помози́ ми, прелука́вый враг поглоща́ет мя зе́льне лю́тыми воспомина́нии и помышле́нии, я́же от Бо́га мя разлуча́ют. Не оста́ви у́бо мене́, ниже́ пре́зри.

Песнь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия правосла́вно пою́щих Тя.

Се гото́ву ко спасе́нию по́мощь стяжа́х, сего́ ра́ди Тебе́ припа́даю и зову́ со слеза́ми: Богоро́дице, изба́ви мя от стрел чужда́го, и бу́дущаго истяза́ния.

Ты кре́пость моя́, Ты похвала́ и ра́дование, и храни́тельница ми еси́, и заступле́ние, и прибе́жище, и предста́тельница непобеди́ма, Пресвята́я Богоро́дице Де́во. Те́мже спаси́ раба́ Твоего́.

Cлава: Оскве́рншуюся окая́нную мою́ ду́шу страстьми́, окропле́нием Боже́ственныя Твоея́ моли́твы очи́сти, Богоро́дице Пречи́стая, подаю́щи спасе́ния Твоего́ све́тлую оде́жду.

И ныне: В жи́зни мое́й тве́рдое ми окормле́ние еси́, треволне́ния избавля́ющи мно́гих обстоя́ний, и во исхо́де мое́м, молю́ Тя, предста́ни ми спаса́ющи, Ма́ти Христа́ Бо́га.

Песнь 6

Ирмос: Обы́де нас после́дняя бе́здна, несть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же наш: Ты бо кре́пость немощству́ющих и исправле́ние.

Безневе́стная Богороди́тельнице Пречи́стая, ру́ку Твою́ простри́ ми и исхити́ из глубины́ зол, я́же безу́мием исхода́таих мое́й души́ стра́стней, преокая́нный.

Воста́ни, Чи́стая, на по́мощь рабу́ Твоему́, иму́щему наде́жду свою́ с Бо́гом, к Твоему́ заступле́нию непобеди́мому: да не враг, возмо́г, во́змет и погуби́т мя.

Слава: Боля́щих цели́тельницу, па́дающих воста́ние, согреша́ющих очище́ние, Богоро́дице, Тебе́ молю́, со слеза́ми припа́даю и зову́ Ти: я́ко си́льна, Сама́ мя спаси́ погиба́ющаго.

И ныне: Поми́луй, Чи́стая, смире́нную мою́ ду́шу, предвари́ и восхи́ти, изъе́млющи ю́ от лука́ваго: тщи́тся бо в про́пасть посла́ти ю́ злых ра́ди, я́же ле́ность мно́гая соде́ла.

 

Таже: Го́споди поми́луй, трижды. Слава, и ныне

Седален, глас 1.

Подобен: Гроб Твой, Спасе:

Моли́твенницу ко Го́споду стяжа́хом Тя вси, Чи́стая, и притека́ем в це́рковь Твою́ святу́ю, прося́ще по́мощи от Тебе́, Присноде́во: изба́ви у́бо нас от бесо́вския зло́бы и муче́ния, и осужде́ния стра́шнаго, Тя блажа́щия.

Песнь 7

Ирмос: Тебе́ у́мную, Богоро́дице, пещь разсмотря́ем ве́рнии: я́коже бо о́троки спасе́ три Превозноси́мый, мир обнови́, во чре́ве Твое́м всеце́л, хва́льный отце́в Бог и препросла́влен.

Боже́ственная ски́ния, Влады́чице была́ еси́, я́ко заче́нши во чре́ве и ро́ждши Сего́ пло́тию, Еди́на непоро́чная. Те́мже нас изба́ви страсте́й, и боле́зней, и скорбе́й, и долго́в: я́ко и́маши кре́пость и си́лу мно́гу.

Уста́ви, Чи́стая, боле́знь нестерпи́мую преокая́нныя моея́ души́, ра́дость ми и́стинную, Влады́чице, подаю́щи, реша́щи прегреше́ний мои́х мно́гих му́тную волну́: Ты бо ми еси́ прибе́жище и избавле́ние.

Слава: Все на Тя упова́ние положи́х спасе́ния моего́: Тя бо стяжа́х по́мощь, и непобори́мь столп, и утвержде́ние, и тве́рдости извеще́ние, и Тобо́ю Ца́рство получи́ти наде́юся, Влады́чице.

И ныне: Восто́к со́лнца была́ еси́ сла́вы, Влады́чице Чи́стая: Тобо́ю бо Явле́йся, вся свободи́ тли и неве́дения, и смра́дных прегреше́ний. Те́мже вопию́ Ти: вне́шния мя тьмы свободи́.

Песнь 8

Ирмос: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те, вся дела́ Госпо́дня, Го́спода, по́йте и превозноси́те во вся ве́ки.

Страсте́й смуще́ние лю́те оскорбля́ет ду́шу мою́, Богоро́дице: тишины́ же и ми́ра Яже Вино́вника, Чи́стая, и Пода́теля ро́ждши, в ми́рне устрое́нии соблюда́ющи, ти́хостныя мя испо́лни ра́дости и весе́лия.

Спасе́ния хода́таица нам яви́лася еси́, Богоро́дице, ро́ждшая Спа́са и Влады́ку вся́ческих. Те́мже молю́ Тя: спасе́ния сподо́би смире́нную мою́ ду́шу, песносло́вити Тя ве́рно во вся ве́ки.

Слава: Яже Зижди́теля всех и Бо́га неизглаго́ланно заче́нши, спаси́ мя от тли и вся́каго искуше́ния и дава́й вопи́ти при́сно: благослови́те, вся дела́, Го́спода, по́йте и превозноси́те Его́ во ве́ки.

И ныне: Вся́ческих Зижди́теля и Бо́га родила́ еси́, Де́во, Его́же моли́ дарова́ти прегреше́ний очище́ние и скорбе́й избавле́ние и напа́стей, и ве́чнаго огня́, и осужде́ния, славосло́вящим непреста́нно Твою́ сла́ву.

Песнь 9

Ирмос: Образ чи́стаго Рождества́ Твоего́, огнепали́мая купина́ показа́ неопа́льная: и ныне на нас напа́стей свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Ма́ти Бо́жия Всенепоро́чная, ми́лостивную Твою́ утро́бу мне отве́рзи и от уст мы́сленнаго во́лка изба́ви мя, и́щущаго погуби́ти и растли́ти мя: поми́луй, молю́ Тя, не возврати́ мене́ посра́млена, раба́ Твоего́.

Всея́ моея́ жи́зни бу́ди предста́тельница и тве́рдое заступле́ние: и изба́ви мя, Всечи́стая, мно́гих напа́стей и печа́лей, и враго́в языкобо́лия28, но и огня́ ве́чнаго изба́ви мя.

Слава: Еди́на боля́щих посеще́ние, Еди́на па́дших исправле́ние Влады́чице, Еди́на к Бо́гу руководи́тельница и вход, Еди́на хода́таица ве́чных благ, поми́луй мя еди́наго па́че всех согреши́вшаго.

И ныне: Приими́ мою́ сле́зную ны́не моли́тву, и пода́ждь ми оставле́ние согреше́ний и мно́гих злых, я́же соде́ях, Богоро́дице, Всепе́тая Влады́чице: до конца́ бо погиба́ю от безме́рнаго отча́яния.

В ПОНЕДЕЛЬНИК

Канон Пресвятей Богородице

Песнь 1

Ирмос: Песнь побе́дную пои́м вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Пресвята́я Богоро́дице, спаси́ нас.

Свяще́ние Пречи́стое, ра́дуйся, Де́во, а́нгелов украше́ние и прия́телище Ду́ха, Неве́сто Непоро́чная Отца́ Безнача́льна и Ма́ти Сло́ва Бо́жия.

Цари́ца еси́, я́ко Царе́ва Дщи, прозя́бши, Богоро́дице Влады́чице, и Царя́ Бо́га ро́ждши пло́тию, и с Ним ца́рствуеши.

Слава: Пое́т Рождество́ Твое́ Дави́д певе́ц, превоспева́ет же Иса́иа утро́бу Твою́ пречи́стую, Мари́е Всечи́стая, христиа́нстии же лю́дие сла́вят Рождество́ Твое́.

И ныне: Пропове́дует Це́рковь Рождество́ Твое́, Де́во Богоневе́сто, правосла́вными уче́нии и вещьми́ Боже́ственными, о́бразом бо воплоще́ния Сы́на Твоего́ покланя́ется.

Песнь 3

Ирмос: Ка́мень, его́же небрего́ша зи́ждущии, сей бысть во главу́ у́гла: той есть ка́мень, на не́мже утверди́ Це́рковь Христо́с, ю́же от язы́к искупи́.

Сла́ву де́вства иму́щи, облекла́ся еси́ благода́тию Ду́ха Свята́го, Пречи́стая Мари́е, я́вльшися Богоро́дица, но́вое та́инство и сокро́ве́нное: ка́ко бо, Бо́га пло́тию ро́ждши, де́вствуеши?

Де́ло, е́же соде́лал еси́, Го́споди, кто ска́жет? Юже бо прокля́т в печа́лех роди́ти ча́да, Сын показа́лся еси́ Сея́, и ра́дуется же́нское па́дшее естество́ о Тебе́, Бо́зе, Богоро́дицы ра́ди.

Слава: Бу́ря прегреше́ний реши́ся ми́ру Тобо́ю, Пречи́стая Мари́е Богоро́дице Еди́на. Тем Тя, я́ко приста́нище спасе́ния иму́ще, восхваля́ем ве́рнии, пою́ще вели́чия Твоя́.

И ны́не: Воспе́т де́вству проро́ки дре́вле, роди́ти Тя Безле́тнаго в ле́та, и па́че сло́ва Сло́во, Еди́наго от Тро́ицы Христа́ Бо́га на́шего: Его́же Це́рковь, Ма́ти Чи́стая, почита́ет о́бразы.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

Седмосве́тлое зерца́ло Боже́ственных проро́к многообра́зно пое́т образова́ния Твоя́: мы же де́лом зна́мения исхо́да Твоего́ восприе́мше, Богоро́дицу Тя вои́стинну, вещьми́ ви́дяще, ве́руем.

Бо́жию Тя досто́йно Ма́терь вои́стинну, Де́во Чи́стая, чту́ще, сла́вим мы, сво́йственный принося́ще глас Тебе́, в зако́не и проро́цех пропове́данней: ра́дуйся, Обра́дованная, Госпо́дь с Тобо́ю.

Слава: Се Боже́ственная Гора́, Юже ви́де Авваку́м, доброде́телей сень су́щи я́ве, Богоро́дица просия́ в ми́ре, Еюже дре́вле отсту́пльшии преступле́нием а́бие Бо́гу прибли́жихомся.

И ныне: Блаже́н язык, Препе́тая Чи́стая, и́же чести́ сподо́бися Рождество́ Твое́ ве́рно, правосла́вием и уче́нием и де́лы, и́стинне являя́ вся о́бразы воплоще́ния Сы́на Твоего́.

Песнь 5

Ирмос: От но́щи у́тренююще, воспева́ем Тя, Христе́ Бо́же, обнища́вшаго нас ра́ди, и Крест, и смерть пло́тию претерпе́вшаго.

Сокрове́нно та́йне явля́ше Тя купину́ Моисе́й неопали́мую, Богоро́дице Влады́чице: веще́ственная бо Твоя́ ложесна́ не опали́шася Божество́м.

Словесе́ Бо́жия Тя Ма́терь воспева́юще, Богоро́дице Чи́стая, слове́сное прино́сим цвету́щее дарова́ние Тебе́, о не́мже ра́доватися ве́руем.

Слава: От скве́рных усте́н не отврати́ похвале́ния, Богоро́дице Пречи́стая: несть бо на земли́, и́же Тя по достоя́нию воспе́ти дерза́ет.

И ныне: Еди́н есть во двою́ существу́, Иже от Де́вы рожде́йся, я́ко Бог неви́димый и я́ко Челове́к, во́лею нас ра́ди уподо́бивыйся челове́ком.

Песнь 6

Ирмос: Проро́ка Ио́ну подра́жая, вопию́: живо́т мой, Бла́же, свободи́ из тли и спаси́ мя, Спа́се ми́ра, зову́ща: сла́ва Тебе́.

Мы́сленный Тя све́щник, Де́во, и седмосия́нный зрит проро́к, показу́я я́ве Ду́ха де́йствия, блеща́щася в Тебе́.

Дре́во Ты яви́лася еси́, Де́во, живоно́сное вои́стинну, плодо́м Твои́м льсти́ваго зми́я умори́вшее, челове́ком же Живо́т ро́ждши, Христа́ Бо́га.

Слава: Не красна́ похвала́ от скве́рных усте́н Тебе́ прино́сится, Ма́ти Бо́га на́шего Чи́стая: но виждь души́ моея́ жела́ние, и сие́ приими́.

И ныне: Шата́ются беззако́ннии в молве́ го́рькаго неве́рия, егда́ то́кмо ви́дят правосла́ных собо́ры, лобыза́ющих Твой, Де́во, о́браз.

 

Таже: Го́споди поми́луй, трижды. Слава, и ныне

Седален, глас 1.

Подобен: Гроб Твой:

Окорми́, Чи́стая, окая́нную мою́ жизнь и уще́дри, Всенепоро́чная, ду́шу, попо́лзшуюся мно́гими прегреше́нии во глубину́ поги́бели, и в час мя сме́ртный свободи́ клеве́щущих бесо́в и стра́шнаго отве́та.

Песнь 7

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ огнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бог оте́ц на́ших.

Преукраше́нна яви́ся доброде́тельми, Богоневе́сто, сла́вою и че́стию де́вства: красне́йша бо благоле́пием добро́та Твоя́ вои́стинну, рачи́тель Госпо́дь Тебе́ приведе́ Ма́терь Боже́ственную Себе́.

Жезл, Чи́стая, пра́вости я́ве была́ еси́, жезл ца́рствия Пречестне́йший. Те́мже Плод Бо́жия Словесе́ прозя́бла еси́, Еже и чу́до издале́ча Ааро́нов я́ве жезл прообрази́.

Слава: Теле́сными страстьми́ мно́гими оскверни́в те́ло же и сло́во и ду́шу, ка́ко Твою́, Чи́стая, доброде́телей воспою́ красоту́? Недоуме́ю и устраша́юся: но Сама́ мне бу́ди Твои́ми моли́твами по́мощь.

И ныне: Твоего́, Христе́, воплоще́ния чту соедине́ние, и сего́ о́бразу покланя́юся боголе́пно, я́ко Бог сый предве́чный, от Де́вы бысть Челове́к непреме́нен, Сам во Обою́ соверше́н.

Песнь 8

Ирмос: Его́же ужаса́ются а́нгели и вся во́инства, я́ко Творца́ и Го́спода, по́йте свяще́нницы, просла́вите, о́троцы, благослови́те, лю́дие и превозноси́те во вся ве́ки.

Боже́ственное свяще́ние да воспое́тся Бо́жие, и́мже изба́вися мир от тли. Воста́ните, вси па́дшии иногда́: Мари́я бо роди́ Христа́ спасе́ние.

Пое́м Тя, Пречи́стая и Ма́ти Бо́жия: и кто не сла́вит Тя, вои́стинну благу́ю, су́щую наде́жду душ на́ших? Те́мже, Пресвята́я, мольбу́ мою́ приими́.

Слава: Уясни́теся днесь пе́сньми ве́рнии: просла́вите, а́нгели и челове́цы вку́пе, я́ко диа́вол па́дает и отча́яние: Мари́я бо роди́ нам Наде́жду спасе́ния.

И ныне: Не опису́ю Божества́, не лжи́те слепи́и: про́сте бо неви́димо и незри́тельно есть: пло́ти же о́браз вообразу́я, покланя́юся и ве́рою сла́влю ро́ждшую Го́спода Де́ву.

Песнь 9

Ирмос: Светоно́сный о́блак, в о́ньже всех Влады́ка, я́ко дождь с небесе́ на руно́, сни́де и воплоти́ся нас ра́ди, быв Челове́к, Безнача́льный, велича́ем вси я́ко Ма́терь Бо́га на́шего Чи́стую.

Ра́дуйся Мари́е, вели́кое всея́ тва́ри чу́до. Ра́дуйся, Дщи у́бо Дави́дова, Госпо́дня же Ма́ти. Ра́дуйся, пе́ние Гаврии́лово. Ра́дуйся, прибе́жище и утвержде́ние, и по́мощь всем, Пресвята́я, су́щим на земли́ гре́шником.

Пое́т Ду́хом Боже́ственным и воспева́ет благода́рственную песнь Иоаки́м чу́дный и Боже́ственная Анна, я́ко ви́дяше на земли́ Ма́терь Созда́теля, Юже роди́ша Дщерь Мари́ю: Ея́же моли́твами всех спаси́ нас я́ко Бог.

Слава: О Пресвята́я Де́во, Ма́ти Бо́га Вы́шняго! Твое́ Рождество́ на земли́ спасе́ние яви́ся гре́шным и смире́нным: о Тебе́ бо спасо́хомся, ве́ровавше, но спаса́еши мя и ны́не, и во вся ве́ки жи́зненныя.

И ныне: Воплоще́нна Сло́ва, но непрело́жна вем. Те́мже воспева́ю Его́ ве́рно, во двою́ у́бо Существу́, Ипоста́си же Еди́ней: Его́же вои́стинну я́ко Бо́га и Челове́ка пропове́дая, пе́снь соверша́ю.

ВО ВТОРНИК

Канон Пресвятей Богородице

Песнь 1

Ирмос: Твоя́ победи́тельная десни́ца Боголе́пно в кре́пости просла́вися: та бо, Бессме́ртие, я́ко всемогу́щая, проти́вныя сотре́, изра́ильтяном путь глубины́ новосоде́лавшая.

Припев: Пресвята́я Богоро́дице, спаси́ нас.

Иже во́инством Небе́сным Недове́домый, Отрокови́це Всенепоро́чная, плоть прия́т от пло́ти Твоея́ и обнови́ истле́вшую преступле́нием пе́рвым.

Пе́сньми ублажи́м, ве́рнии, Бо́жия Сло́ва па́че сло́весе́ Роди́тельницу: Сия бо Пренепоро́чная, земны́м яви́ся украше́ние, и всем согреша́ющим предста́тельница бысть.

Слава: Яви́лася еси́ простра́ннейши небе́с, Творца́ бо вся́ческих вме́щши, Ма́ти Присноде́во. Те́мже вопию́ Ти: тесноты́ вся́кия мя смерторо́дныя изба́ви, Богора́дованная.

И ныне: Даждь нам по́мощь, Чи́стая, обурева́емым мольбо́ю скорбе́й, низложи́ враго́в на́ших лука́вая возноше́ния, и пода́ждь всем спасе́ние благоче́стно Тя сла́вящим.

Песнь 3

Ирмос: Еди́не ве́дый челове́ческаго существа́ не́мощь и ми́лостивно в не́ вообра́жься, препоя́ши мя с высоты́ си́лою, е́же вопи́ти Тебе́: Свят одушевле́нный Храм неизрече́нныя сла́вы Твоея́, Человеколю́бче.

По́лный истощава́ется нас ра́ди, и прие́млет Безнача́льный от Тебе́ нача́ло, Де́во Пренепоро́чная, и ви́дится Неви́димый, и Пита́яй вся́ческая млеко́м пита́ется, обнови́ти челове́ки промышля́я.

Исцели́ сокруше́ние на́ше Де́во Неискусобра́чная, Исцели́теля ро́ждшая и Го́спода, вход нам в жизнь показа́вшаго благода́тию: Его́же непреста́нно моли́ уще́дрити и спасти́ рабы́ Твоя́.

Слава: Яже Еди́на естество́ челове́ков обожи́вшая, па́че естества́ Всенепоро́чная, Ро́ждшемуся из Тебе́ моли́ся согреше́ний на́ших проще́ние да́ти и ра́дование ве́чное, Пресвята́я Де́во Всепе́тая.

И ныне: В ле́ности ижди́в жизнь, припа́даю Ти, Пречи́стая, я́же к Бо́гу при́сными моли́твами Твои́ми воздви́гни мой ум и просвети́ все́го мя очерне́ннаго покая́ния светлостьми́, да ве́рою и любо́вию сла́влю Тя.

Песнь 4

Ирмос: Го́ру Тя благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Боже́ственную Тя Пала́ту Сло́ва зна́ем, в Ню́же всели́ся пло́тию, обнови́ нас истле́вших страстьми́. Те́мже, Чи́стая, Бо́жию Ма́терь Тя чтим, и от Тебе́ Ро́ждшагося сла́вим.

Всели́ся во утро́бу Твою́ Де́во, Сло́во вопло́щшееся, и все́льшуюся пре́жде кля́тву в естество́ челове́ческое изгна́, и Свои́м Боже́ственным совокупле́нием обожи́ боголе́пно, сего́ ра́ди Тя воспева́ем.

Слава: Ме́ртвость подъя́т Ада́м, Всенепоро́чная, отне́леже вкуси́ плода́ тле́ннаго: ны́не же Твои́м Рождество́м оживе́ и в селе́ниих ра́йских водворя́ется. Сего́ ра́ди Тя по до́лгу воспева́ем.

И ныне: Уста́вила еси́ ток сме́ртный, ро́ждши безсме́ртия Исто́чник Христа́ Бо́га, Чи́стая. Того́ у́бо моли́, Богоблагода́тная, души́ моея́ умори́вшия исцели́ти стра́сти и спасти́ мя.

Песнь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия правосла́вно пою́щих Тя.

Возсия́ от чре́ва Твоего́ незаходи́мое Со́лнце, Пренепоро́чная, и тьму до конца́ потреби́, и зе́млю уясни́ ра́зумы Боже́ственными: те́мже ве́рно воспева́ем Тя.

Ра́дуйся, а́нгельский глас взыва́ем Ти, Пречи́стая: родила́ бо еси́ Вели́каго Сове́та Ангела, и Отцу́ собезнача́льна, плоть бы́вшаго, Де́во, за е́же спасти́ челове́ка.

Слава: Госпо́дь все́лься, Чи́стая, во чре́во Твое́, Иже благоче́стно в Него́ ве́рующия изба́вил есть от влады́чествия вра́жия: те́мже велегла́сно вси воспева́ем Тя, Пречи́стая.

И ныне: Обле́кся в мя Влады́ка из Тебе́ про́йде, Всенепоро́чная, и истле́вшее естество́ обожи́: но Того́ моли́, Богороди́тельнице, на́га вся́каго греха́ сотвори́ти мя.

Песнь 6

Ирмос: Обы́де нас после́дняя бе́здна, несть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же наш: Ты бо кре́пость немощству́ющих и исправле́ние.

Без се́мене Бо́га во чре́ве зачала́ еси́, и по Рождестве́ стра́ннем Де́ва пребыла́ еси́ Всенепоро́чна: те́мже хвала́ми сла́вим Тя, и́же Тобо́ю, Пречи́стая, изба́вльшеся кля́твы.

Ле́ствица, ю́же Яков ви́де: гора́ присе́нная29: всесве́тлый о́блак Боже́ственнаго све́та: Дверь, Еюже Бог Еди́н про́йде: благослове́нная в жена́х Ты еси́, Пренепоро́чная.

Слава: Зако́нов есте́твенных кроме́ родила́ еси́, Де́во неискусобра́чная, Сло́во Бо́жие ипоста́сное, исцеля́ющее на́ше сокруше́ние: Его́же приле́жно моли́ спасти́ всех нас.

И ныне: Боле́вшую мою́ ду́шу преступле́ньми прине́с, взыва́ю Ти, Всесвята́я, Пресла́вная, Чи́стая: исцели́ и спаси́ мя хода́тайством Твои́м, я́ко да воспою́ и велича́ю заступле́ние Твое́.

 

Таже: Го́споди поми́луй, трижды. Слава, и ныне

Седален, глас 1:

Твое́ предста́тельство иму́ще, Пречи́стая, и Твои́ми моли́твами лю́тых избавля́еми, Кресто́м Сы́на Твоего́ ве́зде соблюда́еми, по до́лгу Тя вси́ благоче́стно велича́ем.

Песнь 7

Ирмос: Тебе́ у́мную, Богоро́дице, пещь разсмотря́ем ве́рнии: я́коже бо о́троки спасе́ три Превозноси́мый, мир обнови́, во чре́ве Твое́м всеце́л, хва́льный отце́в Бог и препросла́влен.

Зако́на се́ни и пре́дняя гада́ния Богогла́сных проро́ков Твое́ безсе́менное Рождество́ я́ве провозвести́ша, Пречи́стая Всенепоро́чная: е́же воспева́юще, зове́м воспе́таго отце́в Бо́га и препросла́вленнаго.

Восто́к со́лнца родила́ еси́, Богоблагода́тная Чи́стая, просве́щшаго ве́рных всех исполне́ния, нощь же ума́льшаго злоче́стия. Те́мже чтим воспе́таго отце́в Бо́га и препросла́вленнаго.

Слава: Купина́ иногда́ неопа́льная, Всенепоро́чная, Твое́ вообража́ше чре́во, и́бо не опали́ Тя отню́д огнь Божества́. Те́мже молю́ Тя, огня́ негаси́маго изба́ви мя, я́ко да пою́ немо́лчно, Чи́стая, вели́чия Твоя́.

И ныне: Ма́ти Бо́жия, ве́рных по́моще, согреша́ющих очище́ние, благи́х всех пода́тельнице, приими́ мя благоутро́бием Твои́м ми́лостивным, припа́дающа и приходя́ща к Тебе́ с пла́чем, и прося́щаго разреше́ния согреше́ний мои́х.

Песнь 8

Ирмос: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся дела́ Госпо́дня Го́спода, по́йте и превозноси́те во вся ве́ки.

Зако́ннии о́брази и пре́дняя гада́ния, Де́во, Госпо́дню Тя Чи́стую Ма́терь предска́заша я́ве: мы же, сбытие́ веще́й ны́не ви́дяще, пое́м Тя согла́сно и славосло́вим во вся ве́ки.

Укра́сися Боже́ственными добро́тами, без разсужде́ния в добро́тах, Сло́во Бо́жие ро́ждши, Всенепоро́чная, красо́тами Боже́ственными всех сердца́ уясня́ющее, ве́рою песносло́вящих Его во вся ве́ки.

Слава: Свяще́нными гла́сы издале́ча сказа́ша проро́цы Ма́терь Тя бы́ти, Всенепоро́чная Влады́чице, Бо́гу, Ему́же вси зове́м: благослови́те, вся дела́, Го́спода, по́йте и превозноси́те Его во ве́ки.

И ныне: Яко красна́, я́ко предобра́, Де́во, Кра́снаго в добро́тах, па́че вины́ родила́ еси́ Христа́, Ему́же вси зове́м: благослови́те, вся дела́, Го́спода, по́йте и превозноси́те Его во ве́ки.

Песнь 9

Ирмос: Образ чи́стаго Рождества́ Твоего́ огнепали́мая купина́ показа́ неопа́льная: и ны́не на нас напа́стей свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Естество́ земны́х, е́же пре́жде осужде́нное, Де́во, преесте́ственным Твои́м Боже́ственным Рождество́м безсме́ртие улучи́ и добро́ту пре́жнюю восприя́т, пою́ще Тя согла́сно ра́достными пе́сньми.

Но́сиши вся Нося́щаго и млеко́м пита́еши всем пи́щу Даю́щаго: ве́лие и стра́шное, е́же па́че ума́, Твое́ та́инство, ковче́же честна́го свяще́нства, Де́во Богоро́дице. Те́мже Тя вси ублажа́ем.

Слава: Свет мне, лежа́щу, Пречи́стая, в ле́ности тьмы, ны́не возсия́й, ослепля́ющия ми по́мыслы страсте́й реша́щи и мир глубо́к, Всенепоро́чная, при́сно содева́ющи в души́ мое́й, сла́вити Тя.

И ныне: Страшу́ся суди́ща неумы́тнаго, и Судии́ незабве́ннаго, Всенепоро́чная: и́мам бо мно́жество согреше́ний безчи́сленное, в ле́ности жив всестра́стный: те́мже мя, Богоро́дице, уще́дривши поми́луй.

В СРЕДУ

Канон Пресвятей Богородице

Песнь 1

Ирмос: Песнь после́днюю пои́м вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Пресвята́я Богоро́дице, спаси́ нас.

Купина́ Тя вообража́ше, Богороди́тельнице: Огнь бо носи́ла еси́ вои́стинну непостоя́нный, пребы́вши неопа́льна. Те́мже Тя ве́рными гла́сы песносло́вим при́сно.

Обо́лкся в челове́ка Бог Сло́во, из Тебе́ па́че смы́сла воплоти́ся, Пречи́стая. Тем Тя вся́кое дыха́ние славосло́вит, и покланя́ется Тебе́, и по до́лгу чтит.

Слава: Зачала́ еси́, Пречи́стая, неизрече́нное Сло́во, вся содержа́щее земны́я концы́, и Сие́ родила́ еси́: Его́же моли́ приле́жно поми́ловати нас.

И ны́не: Яже Еди́на безле́тнаго Бо́га в ле́то ро́ждши воплоще́нна, Пречи́стая Влады́чице, стра́стныя моея́ души́ вселе́тныя стра́сти исцели́.

Песнь 2

Ирмос: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е, и основа́вый на вода́х зе́млю, Всеси́льне.

Да обожи́т челове́чество, Бог бысть Челове́к, из Тебе́, Де́во Чи́стая, па́че сло́ва и смы́сла: сего́ ра́ди Тя согла́сно, ве́рнии, ублажа́ем.

Иже естество́м неопи́санный, вопло́щься из Тебе́ написа́ся, Богоблагода́тная Чи́стая: Его́же непреста́нно моли́ уще́дрити и просвети́ти ду́ши блажа́щих Тя.

Слава: Непло́дствовавшия мы́сли моея́ непло́дия вся отжени́ и плодо́носну доброде́тельми ду́шу мою́ покажи́, Пресвята́я Богоро́дице, ве́рных помо́щнице.

И ныне: Изба́ви мя Пренепоро́чная вся́каго обстоя́ния и мно́гих собла́зн змие́вых, ве́чнующаго огня́ и тьмы́, Яже Свет ро́ждшая нам невече́рний.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися, внегда́ приити́ вре́мени, пока́жешися: сла́ва си́ле Твое́й, Го́споди.

В Пречи́стое Твое́ чре́во всели́ся Христо́с, Всесвята́я Влады́чице, обожи́ нас, плоть прие́м одушевле́нну. Тем Тя Чи́стую Ма́терь правосла́вно воспева́ем, Влады́чице, ми́ру помо́щнице.

Свята́я Богоро́дице, освяти́ нас, Яже Пресвята́го ро́ждшая пло́тию, уподо́битися хоте́вша челове́ком: и Небе́сного Ца́рствия всех яви́, Пречи́стая, прича́стники моли́твами Твои́ми.

Слава: Де́во Богоро́дице, нескве́рная се́не, оскве́рншагося прегреше́ньми очи́сти мя ны́не щедро́т Твои́х чи́стыми заря́ми, и даждь ми ру́ку по́мощи, да зову́: сла́ва си́ле Твое́й, Го́споди.

И ныне: Це́рковь освяще́нная Бо́гови яви́лася еси́, в Тя Все́льшемуся, Де́во, па́че ума́: Того́ моли́, грехо́в на́ших скве́рну очи́стити: я́ко да хра́мы пока́жемся и жилища́ Ду́ху.

Песнь 5

Ирмос: Твой мир даждь нам, Сы́не Бо́жий, ино́го бо ра́зве Тебе́ Бо́га не зна́ем, имя Твое́ имену́ем, я́ко Бог живы́х и ме́ртвых еси́.

Ме́ртва мя соде́ла иногда́ во Еде́ме вкуше́ние лука́вое: Живо́т же ро́ждши, Чи́стая, и́же дре́вом дре́вле умерщвле́ннаго оживотвори́, да Тя славосло́вя воспева́ю.

Спаси́ мя, Всечи́стая, от бед лю́тых: воздви́гни от страсте́й гно́йных, изба́ви мя плене́ния и озлобле́ния лука́вых бесо́в, любо́вию чту́щаго Тя.

Слава: Облак и рай, и дверь Све́та, трапе́зу и руно́ зна́ем Тя, и ста́мну, внутрь Ма́нну нося́щу, Сла́дость ми́ра, Чи́стая Де́во Ма́ти.

И ныне: Ро́ждши, Пренепоро́чная, Бо́га Емману́ила, Челове́ка я́ве за милосе́рдие бы́вшаго: Сего́ моли́ я́ко Человеколю́бца, Чи́стая, уще́дрити лю́ди согре́шшия.

Песнь 6

Ирмос: Яко Ио́ну проро́ка, возведи́, Христе́ Бо́же, живо́т мой от тли, вопию́ Ти, Человеколю́бче, я́ко жизнь у Тебе́ есть, и нетле́ние, и си́ла.

Оскверне́ннаго мя мно́гими грехи́, молю́ Тя су́щую благу́ю и нескве́рную ски́нию: омы́й от вся́кия скве́рны, хода́тайством Твои́м.

Окормле́ние ми бу́ди, Чи́стая, в лю́тей пучи́не жите́йских напа́стей обурева́емому, и наста́ви к спаси́тельному приста́нищу и спаси́ мя.

Слава: Треволне́ния по́мысл, и страсте́й наведе́ния, и глубина́ грехо́в окая́нную мою́ ду́шу обурева́ют: помози́ ми, Свята́я Влады́чице.

И ны́не: Свяще́ния сень, пронарече́нная Мари́е, оскверне́нную сластьми́ окая́нную мою́ ду́шу освяти́, и Боже́ственныя сла́вы прича́стника мя сотвори́.

 

Таже: Го́споди поми́луй, трижды. Слава, и ныне

Седален, глас 1.

Подобен: Гроб Твой:

Де́во и пита́тельнице Еди́ному от Тро́ицы, раю́ кра́сный, земны́х спасе́ние, покро́вом Твои́м спаса́й благоче́стно воспева́ющих Тя: Ты бо родила́ еси́ во проро́цех Глаго́лавшаго, Ты носи́ла еси́ Содержа́щаго вся́ческая, я́ко Ма́ти Христа́ Бо́га.

Песнь 7

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ огнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бог оте́ц на́ших.

Безнача́льнаго Отца́ Сын во чре́во Твое́ всели́ся, прии́м нача́ло: я́ко да нас изба́вит, я́ко Бог, от лука́вых нача́л тьмы, Богороди́тельнице Чи́стая, кла́няющихся Ему́.

Испещре́на Боже́ственными доброде́тельми, Чи́стая Де́во, родила́ еси́ Сло́во, собезнача́льное Отцу́, доброде́тельми небеса́ вои́стинну покры́вшее: Его́же моли́ при́сно уще́дрити нас.

Слава: Освяти́ на́ша помышле́ния, утверди́ всех ду́ши, Ма́ти Бо́жия, твори́ти до́бре оправда́ния, за милосе́рдие неизрече́нное, Воплоще́ннаго из Тебе́, Де́во, Сло́ва Безнача́льнаго Отца́.

И ныне: Умерщвле́нный страстьми́ мно́гими, Пренепоро́чная, оживи́ ум мой, и Богоуго́дная твори́ти укрепи́ мя, да велича́ю Тя я́ко засту́пницу при́сно христиа́н и упова́ние.

Песнь 8

Ирмос: Его́же ужаса́ются а́нгели и вся во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся ве́ки.

Избавля́емся, Пренепоро́чная, Твои́ми к Бо́гу бде́нными моли́твами вся́ческих искуше́ний, Тя Богоро́дицу зна́ющии Благослове́нную и Прера́дованную.

Воплоща́ется Безпло́тный из Тебе́ боголе́пно: Его́же моли́, Пречи́стая, стра́сти пло́ти моея́ умертви́ти и оживи́ти мою́ ду́шу, умерщвле́нную грехи́.

Слава: Исцели́вшаго сокруше́ние Ада́ма пе́рстнаго Спа́са ро́ждшая, Пречи́стая, и Бо́га: Его́же моли́ я́звы души́ моея́ исцели́ти, неисце́льно боля́щия.

И ныне: Возста́ви лежа́щаго во глуби́не́ зол, и я́же ны́не борю́щия мя победи́ враги́, сне́дшия безме́стными сластьми́ ду́шу мою́: не пре́зри мене́, Чи́стая, но уще́дри и спаси́ мя.

Песнь 9

Ирмос: Светоно́сный о́блак, в о́ньже всех Влады́ка, я́ко дождь с небесе́ на руно́, сни́де, и воплоти́ся нас ра́ди, быв Челове́к, Безнача́льный, велича́ем вси, я́ко Ма́терь Бо́га на́шего Чи́стую.

Свет Боже́ственный ро́ждшая, Пренепоро́чная, от Отца́ возсия́вший, омраче́нную мою́ ду́шу лестьми́ жития́ и бы́вшую враго́м посме́х, уще́дри и све́ту покая́ния спаси́тельнаго сподо́би, Чи́стая.

Светови́дный Тя о́блак, Пренепоро́чная, Иса́иа зря́ше, из него́же возсия́ нам Со́лнце пра́ведное, та́йно тварь просвети́: сего́ ра́ди Тя ве́рою воспева́ем, до́брую в жена́х.

Слава: Грехолюби́в сый, в ле́ности живу́, и суди́ща, Чи́стая, неумы́тнаго трепе́щу, на не́мже мя соблюди́, Твои́ми Святы́ми мольба́ми, Де́во Богоневе́сто, неосужде́ннаго: да я́ко засту́пницу ублажа́ю Тя при́сно.

И ны́не: Трепещу́ суди́ща, Де́во, и незабы́тнаго очесе́ Твоего́ Сы́на, соде́лав мно́ги грехи́ на земли́. И сего́ ра́ди Тебе́ вопию́: Всеми́лостивая Влады́чице, помози́ ми, и тогда́шния мя ну́жды изми́ неосужде́ннаго, Чи́стая.

В ЧЕТВЕРТОК

Канон Пресвятей Богородице

Песнь 1

Ирмос: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря потопля́ема, песнь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Припев: Пресвята́я Богоро́дице, спаси́ нас.

Во отча́янии одержи́мь есмь, мно́жество помышля́ю прегреше́ний мои́х, и Судии́ отве́т, Влады́чице Богоро́дице: но Ты ми бу́ди Боже́ственная Хода́таица, пременя́ющи Его милосе́рдием Твои́м.

Христиа́нское прибе́жище, па́дающих исправле́ние, Пречи́стая, согреша́ющих очище́ние, изба́ви мя при30 стра́шныя, и огня́ негаси́маго, жизнь ве́чную подаю́щи ми.

Слава: Тебе́, Де́во, Еди́ну вси ве́рнии стяжа́хом засту́пницу тве́рду, Ты бо Бо́га родила́ еси́. Те́мже хвала́ми вси, Чи́стая, Тя ублажа́ем, ро́ди вси земни́и по глаго́лу Твоему́.

И ныне: На Кресте́ ви́девши, Чи́стая, Зижди́теля и Сы́на Твоего́, Всенепоро́чная, у́жаса испо́лншися, глаго́лаше: что сие́, Ча́до, я́ко злочести́вии возда́ша Ти зла́я воз блага́я, я́же яви́л еси́ им?

Песнь 3

Ирмос: Пре́жде век от Отца́ рожде́нному нетле́нно Сы́ну, и в после́дняя от Де́вы воплоще́нному безсе́менно Христу́ Бо́гу возопии́м: вознесы́й рог наш, Свят еси́, Го́споди.

Вси проро́цы Тя Ма́терь Бо́жию пропове́даху о́бразы пресла́вными: мы, сбытие́ я́сно ви́дяще, ве́руем и про́сим улучи́ти Тобо́ю Боже́ственныя ти́хости.

Влады́чице ми́ра, спасе́ние ве́рных и заступле́ние, я́же из глубины́ се́рдца воздыха́ния моя́ воспуща́ема, Чи́стая, и слез то́ки прие́мши, свя́заннаго прегреше́нии мно́гими изба́ви и спаси́ мя.

Слава: И́му́щи я́ко Ма́ти дерзнове́ние, Чи́стая, ко Христу́ Бо́гу, от ага́рянских чад изба́витися нам моли́ при́сно и от вся́каго вре́да и благода́рно сла́вити Его́, Пренепоро́чная, утверди́.

И ныне: На Кресте́ вознесе́на Сы́на Своего́ зря́щи, Пречи́стая, восклица́ше и в боле́зни се́рдца возглаша́ше, вопию́щи: Сы́не, что Ти соде́яша насы́щшиися Твои́х даро́в злочести́вии и беззако́ннии?

Песнь 4

Ирмос: Жезл из ко́рене Иессе́ова, и Цвет от него́, Христе́, от Де́вы прозя́бл еси́, из горы́, хва́льный, приосенене́нныя ча́щи, прише́л еси́ вопло́щся от неискусому́жныя, невеще́ственный и Бо́же, сла́ва си́ле Твое́й, Го́споди.

Низложи́ суровство́ лука́вых враг и кова́рства, я́же приноси́мая на мя: и облецы́ мя Твое́ю кре́постию, Всенепоро́чная, невреди́ма при́сно соблюда́ющи, це́ла и непоколеби́ма, све́тло Тя воспева́ющаго.

Побежде́н зако́ном пло́ти, безме́стная де́лаю беззако́ния всестра́стный, и вся́чески не сме́ю возвести́ о́ко мое́, Влады́чице Чи́стая, к Тебе́: но Ты зако́ном милосе́рдия Твоего́ спаси́ мя окая́ннаго, спаси́ мя.

Слава: Еди́ну Тя, ве́рнии с Бо́гом упова́ние непосты́дно и заступле́ние и́мамы, Влады́чице: Твои́ми моли́твами изба́ви нас от вся́ких враг: ви́димых и неви́димых, вре́да и искуше́ний, да Тя непреста́нно сла́вим.

И ныне: Без се́мене Его́же родила́ еси́ Сы́на, зря́щи, Всенепоро́чная, на Кресте́ пригвожде́нна, восклица́ше ма́терски и, рыда́ющи, глаго́лаше: Что е́же на Тебе́, Сы́не Мой, ви́жу но́вое и пресла́вное, и недове́домое чу́до?

Песнь 5

Ирмос: Бог сый ми́ра, Оте́ц щедро́т, Вели́каго Сове́та Твоего́ Ангела, мир подава́юща посла́л еси́ нам. Тем Богоразу́мия к све́ту наста́вльшеся, от но́щи у́тренююще, славосло́вим Тя, Человеколю́бче.

Моли́тву неусы́пну иму́щи и те́плое заступле́ние о рабе́х Твои́х, во вся́ких напа́ствуемых жития́ беда́х предвари́вши, Де́во, исхити́ и спаси́, да не печа́лию поже́рты бу́дем и истле́ем.

Ма́рие, Бо́жие жили́ще, мене́ жили́ще бы́вша лука́вых духо́в де́лы скве́рными и сих исполня́ющаго во́лю безу́мно, покая́нием яви́ Бо́гу жили́ще.

Слава: Боля́щия ны лю́те душе́ю вку́пе и те́лом, страстьми́ грехо́вными, исцели́ я́ко милосе́рдая и Бо́га Ма́ти: Ты бо вели́каго вои́стинну душа́м же и те́лом Врача́ родила́ е́си Христа́, неоску́дный Исто́чник жи́зни.

И ны́не: На Дре́ве кре́стнем зря́ще Сы́на, разлива́шеся утро́бою и со слеза́ми взыва́ше Пренепоро́чная: ужаса́юся Твоего́ долготерпе́ния, Сы́не Мой, но́вое ви́дящи чу́до: ка́ко, безгре́шен Сый, непра́ведную терпи́ши смерть?

Песнь 6

Ирмос: Из утро́бы Ио́ну младе́нца изблева́ морски́й зверь, якова́ прия́т: в Де́ву же все́льшееся Сло́во, и плоть прие́мшее, про́йде сохра́ншее нетле́нну: Его́же бо не пострада́ истле́ния, Ро́ждшую сохрани́ неврежде́нну.

Ми́ра мы́сленнаго прия́телище была́ еси́, всю зе́млю облагоуха́вшаго Божества́ благи́ми воня́ми, Пресвята́я Богоневе́сто. Те́мже благоуха́нием моли́твы Твоея́ вся́кое злосмра́дие потреби́ от души́ мои́х прегреше́ний.

Огнь сласте́й зело́ опаля́ет мя, и оскорбля́ет смире́нное мое́ се́рдце, и к безме́стному де́ланию совокупля́ет мя беззако́нно. Потщи́ся сей угаси́ти, Яже Огнь Боже́ственный ро́ждшая, спасе́ние мое́, Богоневе́стная.

Слава: Изба́ви нас, Де́во Всепе́тая, от напа́стей враг ви́димых и невиди́мых, и соблюди́, Ма́ти Бо́жия, правосла́вною ве́рою вои́стинну Богоро́дицу Тя испове́дающих: и́маши бо при́сно мощь, я́ко ро́ждши Созда́вшаго вся́ческая.

И ны́не: При Кресте́ стоя́щи и ви́дящи Своего́ Сы́на, пло́тию ви́сима, Пренепоро́чная, распала́ше печа́лию утро́бу Свою́ и, слеза́ми облива́ющи, взыва́ше: Ча́до, вои́стинну неизглаго́ланно на вся челове́ки Твое́ благоутро́бие.

 

Таже: Го́споди поми́луй, трижды. Слава, и ныне

Седален, глас 1.

Подобен: Гроб Твой:

Нескве́рная Агница, Агнца и Па́стыря ви́сяща ме́ртва на дре́ве зря́щи, рыда́ющи веща́ше, ма́терски восклица́ющи: Ка́ко претерплю́ Твое́, е́же па́че сло́ва, Сы́не мой, сни́тие и во́льныя стра́сти, Бо́же Преблаги́й?

Песнь 7

Ирмос: Отроцы благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но посреди́ пла́мени стоя́ще, поя́ху: отце́в Бо́же, благослове́н еси́.

Не терплю́ бесо́вскаго прило́га и молвы́, помрача́ет бо ми ум пла́мень сласте́й плотски́х: но не пре́зри мене́, Свята́я Богоро́дице, упова́ние мое́ на Тя возложи́вшаго.

Безневе́стная Де́во, Всесвята́я Богоневе́сто Влады́чице, прегреше́ний мои́х плени́цы разреши́ моли́твами Твои́ми, и сою́з любве́ Христо́вы присовокупи́, доброде́тельныя плоды́ принести́ ми.

Слава: Яже всем су́щим в ми́ре засту́пница еси́ и стена́ христиа́ном, и прибе́жище непосты́дно, Чи́стая Мари́е: те́мже ве́рою Тя чту́ще, вопие́м Христу́: оте́ц на́ших Бо́же, благослове́н еси́.

И ныне: Пресвята́я Де́ва зря́щи Сы́на Своего́ ви́сима на Кресте́, ужа́сно дивля́шеся, и глаго́лаше: Ка́ко претерплю́ умерщвле́на ви́дящи Тя, Нача́льника жи́зни и Жизнода́вца?

Песнь 8

Ирмос: Чу́да преесте́ственнаго показа́ о́браз огнеро́сная пещь дре́вле: огнь бо не опали́ ю́ныя де́ти, Христо́во явля́я безсе́менное от Де́вы Боже́ственное Рождество́. Тем воспева́юще, воспои́м: да благослови́т тварь вся Го́спода и превозно́сит во вся ве́ки.

Влады́чице ми́ра Богоро́дице, во глуби́не́ зол поги́бели мене́ погруже́ннаго злоу́мне сластьми́ плотски́ми и пристра́стием вещьми́ жития́, возведи́ Еди́на милосе́рдием Твои́м. Не и́мам бо наде́жды спасе́ния отню́д: весь бо есмь, Чи́стая, во отча́янии.

Ты еси́ спасе́ние всех челове́ков, Яже Бо́га ро́ждши неизрече́нным о́бразом: Ты ве́рных спаси́тельница, Богоро́дице, и слепы́х наста́вница, и па́дающих исправле́ние. Те́мже Тя восхваля́юще Христу́ зове́м: благослови́те, вся дела́, Го́спода, по́йте и превозноси́те Его́ во ве́ки.

Слава: Сте́ну претве́рду Тя стяжа́вше, спасе́ния на́шего наде́жду на Тя возложи́хом, Богома́ти. Но Ты бу́ди рабо́м Твои́м приста́нище и стена́ необори́ма, и ко е́же вопи́ти непреста́нно напра́ви: да благослови́т тварь вся́кая Го́спода и прево́зносит Его́ во ве́ки.

И ныне: Утро́бою ма́терски растерза́ема и слеза́ми мно́гими исполня́ема, Яже чи́сто ро́ждшая Тя зря́щи на Кресте́, стена́ньми неуте́шными взыва́ше: Боле́зни избе́гши в Рождестве́ Твое́м, Сы́не Мой, боле́знию ны́не одержи́ма есмь, ви́дящи зрак Твой безче́стен.

Песнь 9

Ирмос: Неизглаго́ланное Де́вы та́инство: Не́бо бо Сия́, и престо́л Херуви́мский, и светоно́сный черто́г показа́ся Христа́ Бо́га Вседержи́теля. Сию́ благоче́стно я́ко Богоро́дицу велича́ем.

Окаля́х безче́стия страстьми́ ду́шу мою́ окая́нный, всю же душетле́нными страстьми́ оскверни́х плоть: но я́ко Чи́стая же и нескве́рная, Ты мя очи́сти мно́жеством ми́лости Твоея́.

Не стяжа́х ра́зве Тебе́, Чи́стая, прибе́жища, не зна́ю, Влады́чице, и́ны на земли́ засту́пницы тве́рдыя и покро́ва: те́мже к Тебе́ те́пле притеко́х, прося́ Тобо́ю прия́ти согреше́ний избавле́ние.

Слава: Всепе́тая, Твоя́ рабы́ ны́не ми́лостивно зри́ши свы́ше, ве́рою благоче́стною соблюда́ющи и Твои́ми моли́твами вся́ческих избавля́ющи нас обстоя́ний, и́стинную Тя чту́щих Богоро́дицу Чи́стую.

И ныне: Яже безсе́менное рожде́ние позна́вшая, Тя Человеколю́бче, на Дре́ве кре́стнем пове́шена я́ко ви́де, вопия́ше: Сы́не и Бо́же мой Всеси́льне, челове́ки спасти́ хотя́й, ка́ко прия́л еси́ ны́не распя́тие?

В ПЯТОК

Канон Пресвятей Богородице

Песнь 1

Ирмос: Песнь побе́дную пои́м вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Пресвята́я Богоро́дице, спаси́ нас.

Спаси́тельное еси́ приста́нище и покро́в призыва́ющим Тя, Богоро́дице Пречи́стая. Те́мже и аз от души́ призыва́ю Тя те́пле: Влады́чице, спаси́ мя.

Мари́е Пречи́стая, Зижди́теля Ма́ти, истле́вшую страстьми́ и прегреше́ньми смире́нную мою́ ду́шу исцели́, я́ко Блага́я и Благопреме́нная.

Слава: Безневе́стная Влады́чице, не отступа́й моля́щи всегда́ Творца́ моего́ и Бо́га, о притека́ющем при́сно к покро́ву Твоему́, улучи́ти ми́лость.

И ныне: Пала́то одушевле́нная Царе́ва, и престо́ле огнеобра́зный, со святы́ми му́ченики и апо́столы Христа́ при́сно моли́ от напа́стей нас изба́вити.

Песнь 3

Ирмос: Ка́мень, Его́же небрего́ша зи́ждущии, Сей бысть во главу́ у́гла: Той есть Ка́мень, на Не́мже утверди́ Це́рковь Христо́с, ю́же от язы́к искупи́.

Тьма прегреше́ний обдержи́т мое́ се́рдце, Влады́чице, и не сме́ю воззре́ти на не́бо очи́ма, те́мже зову́: просвети́ веле́ньми Христо́выми ум и ду́шу, и се́рдце мое́.

Взира́ю на Боже́ственный Твой о́браз, и печа́ть Тя Влады́чню, и Пречи́стую Ма́терь, я́ко Первообра́зну чту: и Сию́ лобыза́ю, и покланя́юся, и хвалю́, Еди́ну Ве́дый Твою́, и Того́ честь.

Слава: Уста́ви лю́тая стремле́ния теле́сная, угаси́ и пла́мень страсте́й, Де́во: и́миже согреше́ний плени́цу многоплете́нную ми соплета́ет змий лю́тый, хотя́ восхи́тити к поги́бели.

И ныне: Весь во Ада́ма облече́ся из Тебе́ Богоро́дице, всетелоно́сно проше́д Сло́во. Того́ у́бо моли́ страсте́й нас изба́вите, и напа́стей разли́чных, и огня́ ве́чнующаго.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́ вопия́: внегда́ прибли́житися ле́том, позна́ешися: внегда́ приити́ вре́мени, пока́жешися: Сла́ва си́ле Твое́й, Го́споди.

Ро́ждши Зижди́теля и всех Творца́, си́лу неизрече́нну и непобеди́му кре́пость и́маши, Де́во, и спаса́еши ве́рою к Тебе́ приходя́щия. Сего́ ра́ди зову́ Ти: Влады́чице ми́ра, помози́ ми.

Бра́ни неви́димых враг мы́сленных низложи́, Влады́чице, всу́е на мое́ напа́дающих окая́нное се́рдце, тишину́ Боже́ственную и мир да́рующи: я́ко да ве́село воспева́ю Тя.

Слава: Наде́жде ненаде́жных, помо́щнице ни́щих, пла́чущих уте́ха, согреша́ющих очище́ние, руководи́тельница заблу́ждших, боля́щих целе́бница и исправле́ние па́дающих.

И ныне: Чи́стая и Благослове́нная, Яже Еди́на кля́твы всех измени́вшая, Де́во Мари́е, со апо́столы, и му́ченики, и проро́ки моли́ из чре́ва Твоего́ Проше́дшаго спасти́ ду́ши пою́щих Тя.

Песнь 5

Ирмос: Твой мир даждь нам, Сы́не Бо́жий, ино́го бо ра́зве Тебе́ Бо́га не зна́ем, и́мя Твое́ имену́ем, я́ко Бог живы́х и ме́ртвых еси́.

Спаси́ мя, Влады́чице, из глубины́ напа́стей, и скорбе́й, и печа́лей, и страсте́й теле́сных: и в тишине́ Боже́ственней сохрани́ ду́шу мою́.

Ты ми еси́ те́плое хране́ние и тве́рдое во всей жи́зни, Пренепоро́чная. Те́мже молю́ Тя, и по сме́рти Твое́ мне милосе́рдие простри́ бога́тое.

Слава: Яже Зижди́теля ро́ждшая и Изба́вителя всех, изба́ви мя страсте́й теле́сных, опаля́ющих се́рдце мое́ и привлача́ющих к дело́м неподо́бным.

И ныне: Яко ме́сто свяще́ния я́вльшися мы́сленнаго, всего́ мя освяти́, Влады́чице, и со святы́ми моли́ся и му́дрыми апо́столы спасти́ мя, Де́во.

Песнь 6

Ирмос: Проро́ка Ио́ну подража́я, вопию́: живо́т мой, Бла́же, свободи́ из тли и спаси́ мя, Спа́се ми́ра, зову́ща: сла́ва Тебе́.

Ты жи́ва мя соблюда́еши, избавля́ющи напа́стей: Ты, и от земли́ отходя́ща, к ве́чней жи́зни преста́ви, Де́во Ма́ти, милосе́рдием Твои́м.

Ты еси́ стена́ неруши́ма, Ты еси́ покро́в тверд, Богоро́дице Блага́я, Ты предста́тельница крепка́ рабу́ Твоему́: и сего́ ра́ди Тя призыва́ю при́сно.

Слава: Ты моли́тву си́льну стяжа́вши к Бо́гу, Богоро́дице Блага́я, не пре́зри мене́ те́пле к покро́ву Твоему́ притека́ющаго и вопию́щаго: поми́луй мя, Ма́ти всех Бо́га.

И ныне: Не отри́ни мене́ Христе́, не гнуша́йся мене́, Спа́се, мо́лит Тя Агница ро́ждшая Тя пло́тию, со апо́столы, и со проро́ки, и со страстоте́рпцы Твои́ми.

 

Таже: Го́споди поми́луй, трижды. Слава, и ныне

Седален, глас 1:

Облак Тя Све́та Бо́жия присносу́щнаго, Де́во, и ковче́г, и све́щник, и ста́мну, и го́ру несеко́мую, проро́цы прорица́ху, Отрокови́це Пречи́стая: из Тебе́ бо про́йде без се́мене в после́дняя Христо́с Бог наш, я́коже Оте́ц благоизво́ли.

Песнь 7

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ огнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бог оте́ц на́ших.

Отча́янна су́ща мя, Чи́стая, прегреше́нии и сластьми́ плотски́ми, и ко глубине́ порева́ема поги́бели, приспе́вши, изба́ви мя, Пречи́стая Влады́чице, милосе́рдием Твои́м.

Прибе́жище и покро́в держа́вен, и избавле́ние, Богоро́дице, всем ве́рным: Ты ми бу́ди руководи́тельница ко Творцу́, прегреше́ний избавле́ние подаю́щи ми, благоутро́бием Твои́м.

Слава: Ты кля́тву потреби́ла еси́, Чи́стая, ра́дость ро́ждшая Христа́: Ты и кля́тву, от греха́ прибы́вшую ми, разреши́ си́лою Твое́ю, Пренепоро́чная, и да́руй ми ра́дость.

И ныне: Тя, Пресвята́я Чи́стая, раби́ Твои́ мо́лим всегда́ день и нощь, моля́щеся сокруше́нною мы́слию: избавле́ние согреше́ний на́ших да́руй Твои́ми моли́твами.

Песнь 8

Ирмос: Его́же ужаса́ются а́нгели и вся во́инства, я́ко Творца́ и Го́спода, по́йте, свяще́нницы: просла́вите, о́троцы: благослови́те, лю́дие и превозноси́те во вся ве́ки.

Воста́ни, предвари́, ра́туй враги́, и́же всу́е смуща́ющия и оскорбля́ющия нас, Твою́ си́лу явля́ющи, Свята́я Де́во, помо́щнице ми́ра.

Мир спасла́ еси́ от сме́рти и тли Боже́ственным Рождество́м Твои́м, Де́во Блага́я: и ны́не же моли́твами Твои́ми и нас, восхваля́ющих Тя, от страсте́й исхити́ и спаси́.

Слава: Мно́гая Твоя́ и неизрече́нная, Де́во, кре́пость, мно́ги и непобеди́мы Боже́ственныя щедро́ты и благоутро́бие. Те́мже спаса́й нас, вои́стинну Тя призыва́ющих.

И ныне: Яко одушевле́н виногра́д, Де́во, прорасти́ла еси́ нам Грозд зре́лый, источи́вший вино́ оставле́ния и грехо́вное изсуши́вший пия́нство.

Песнь 9

Ирмос: Светоно́сный о́блак, в о́ньже всех Влады́ка, я́ко дождь с небесе́ на руно́, сни́де и воплоти́ся нас ра́ди, быв Челове́к, Безнача́льный, велича́ем вси я́ко Ма́терь Бо́га на́шего Чи́стую.

В мо́ри жития́ обурева́емь зело сластьми́ плотски́ми, Тебе́ припа́даю и вопию́: поми́луй мя, к Тебе́ притека́ющаго, Влады́чице, и ру́ку ми спасе́ния пода́ждь, избавля́ющи поги́бельныя глубины́.

Тебе́ моя́ грехи́ испове́дую, Де́во, Твоему́ лицу́ мой представля́ю студ, и вопию́ от души́: поми́луй и уще́дри, Пречи́стая, я́ко на Тя упова́ние с Бо́гом возложи́х тве́рдое.

Слава: Тя, без се́мене ро́ждшую Творца́ и Влады́ку, призыва́ю от души́ и зову́ приле́жно: Ты мя спаси́ от тли мно́гих прегреше́ний и изба́ви огня́ негаси́маго, Пресвята́я Богоро́дице Блага́я.

И ныне: Непроходи́мая две́ре, ра́йская врата́, спаса́емым путь, спасе́ния стезя́, с му́ченики и проро́ки, с пра́ведными же и преподо́бными, и с Боже́ственными апо́столы моли́ся, Чи́стая, спасти́ся душа́м на́шим.

ГЛАС ВТОРЫЙ

В СУББОТУ31

Канон Пресвятей Богородице

Егоже и от оклеветания, в печалех и напастех сущии да поют

Песнь 1

Ирмос: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Яже всем удо́бь послу́шная в ско́рби и в печа́ли помога́ющая, Богоро́дице Блага́я, благода́ть пода́ждь пе́ти Тя дерза́ющим, Влады́чице, скорбя́щих ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою, пресла́вно изми́ мя от напа́стей, убо́гаго раба́ Твоего́, скорбя́щих ра́досте.

Слава: От враг ви́димых и неви́димых изба́ви, мо́лимся, к Тебе́ прибега́ющих Богоро́дице, и разори́ всяк сове́т борю́щих нас.

И ныне: Отыми́ поноше́ние челове́ческое и клеветы́ наве́тник от мене́, Богоро́дице, молю́ Тя: да усе́рдно сла́влю Го́спода, Его́же пита́ла еси́.

Песнь 3

Ирмос: Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас пою́щих Тя.

Враго́в наве́ты разори́ су́етныя, Всепе́тая Богоро́дице: не оскуде́й моли́твами Твои́ми, снабдя́щи нас, восхваля́ющих Тя.

При́зри, Чи́стая, ми́лостивным Твои́м о́ком, и изба́ви мя вся́каго наве́та ви́димых и неви́димых враго́в, ослепи́вши зени́цы оче́с их.

Слава: Зло́е нападе́ние враго́в, я́ко огнь паля́щее, и́щущих всегда́ погуби́ти нас, Де́во, росо́ю моли́тв Твои́х угаси́.

И ныне: Неугаси́мая лампа́до, заря́ присносия́тельная, но́щию мя скорбе́й одержи́ма, просвети́ моли́твами Твои́ми, ро́ждшая Со́лнце сла́вы, Христа́.

Песнь 4

Ирмос: Услы́шах, Го́споди, глас Твой, его́же ре́кл еси́, глас вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, весь быв соше́дшаго Ду́ха, возопи́: Ты еси́ Христо́с, Бо́жия му́дрость и си́ла.

Спасе́ния Тя мост, моли́тву неусы́пну, заступле́ние тве́рдо мо́лим: умилосе́рдися и виждь на́шу нестерпи́мую печа́ль, боле́зни, ско́рби, стра́сти, и благопреме́нно посети́, Ма́ти Бо́жия, ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех: те́мже и ны́не нам помози́ вско́ре, лю́те обурева́емым ру́ку простира́ющи, Чи́стая: бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Слава: Не упова́ша, Влады́чице, на Тя беззако́ннующии, но упова́ша на язы́к велере́чив, на язы́к челове́чь, при́сно зави́стно излия́вшийся, непра́ведно пролия́ти кровь и́скренняго, рыка́юще: Ты же, Чи́стая, че́люсти их сокруши́.

И ныне: Смири́, Влады́чице, враго́в вознесе́нную вы́ю велере́чующих, сове́ты и злонра́вия, и сердца́ поуча́ющаяся злым на мя по вся дни: кре́пость же и побе́ду пода́ждь призыва́ющим Тя, Ма́ти Бо́жия, ра́дость ско́рую подаю́щи.

Песнь 5

Ирмос: Угль Иса́ии проявле́йся, Со́лнце из де́вственныя утро́бы возсия́, во тьме заблу́ждшим, Богоразу́мия просвеще́ние да́руя.

Моли́твеннице нело́жная, упова́ние христиа́н, обра́дованная, приими́ мольбы́ от нас, приле́жно призыва́ющих и моля́щихся Тебе́.

Исто́чник Тя жи́зни су́щи, Чи́стая, безсме́ртия источа́ющий во́ды, земноро́днии позна́вше, ублажа́ем.

Слава: Вооружи́ся на ны лука́вно враг, язы́ком, я́коже мече́м, погуби́ти хотя́: но Твое́ю, Богороди́тельнице, кре́постию предвари́.

И ныне: Пучи́ну, Чи́стая, заступле́нию кто изочте́т си́лы Твоея́? Те́мже нас су́щих в нужде́ ско́ро предвари́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Целому́дрия су́щи хода́таица, призыва́ющим Тя ны́не яви́ся и от вся́ких изба́ви напа́стей и бед, Богоневе́сто.

Злоде́йства вра́жия разори́ и клеветы́ непра́ведныя уста́ви, благослове́нная Пречи́стая, избавля́ющи непови́нныя от ско́рби.

Слава: Лю́тыми грехи́ окруже́ни и напа́стными беда́ми потопля́еми, под боже́ственный покро́в Твой прибега́ем, Ма́ти Христа́ Бо́га.

И ныне: Неискусому́жно ро́ждши Го́спода, яви́ся по Рождестве́ па́ки де́вствующи: О пресла́внаго чудесе́, в Тебе́ соде́ланнаго, Богоневе́сто!

 

Таже: Го́споди поми́луй, трижды. Слава, и ныне

Седален, глас 2:

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти: Богоро́дице Влады́чице, предвари́ и от бед изба́ви нас, Еди́на вско́ре предста́тельствующая.

Песнь 7

Ирмос: Да пресла́вное Рождество́ Твое́, Христе́, е́же от Де́вы, прообрази́ши я́ве, неопали́мы в пещи́ о́троки сохрани́л еси́, пе́сньми пою́щия Тебе́: отце́в Бо́же, благослове́н еси́.

От благоутро́бия Твоего́, Де́во Чи́стая! реши́ши бо безме́рныя печа́ли и напа́сти призыва́ющим в ну́жде и обстоя́нии: те́мже и ны́не помози́, Благослове́нная, Тя восхваля́ющим.

Покажи́ ско́рое Твое́ заступле́ние, покажи́, я́ко мо́жеши, я́ко Ма́ти Бо́гу, призыва́ем Тя от се́рдца, со слеза́ми припа́дающе, скорбь укроти́ и боле́знь рабо́в Твои́х вско́ре.

Слава: Уста́ челове́ком я́ко львом лю́тым, гро́ба тяжча́йше отверзо́шася, го́рько поглоти́ти мя: но Ты, Богоро́дице, яви́ся наде́жда ненаде́ющимся и низложи́ кре́пость их, Благослове́нная.

И ныне: Да у́зрят врази́ и постыдя́тся, да разуме́ют и ви́дят Твою́, е́же по нам сопроти́в борю́щую си́лу, и в про́пасть преиспо́днюю низложи́ их, Благослове́нная, наде́ждо ненаде́ющихся.

Песнь 8

Ирмос: Пещь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся дела́ Госпо́дня, Го́спода.

Прибе́жище на́ше и ми́ру ра́дование, Богороди́тельнице, умилосе́рдитися потщи́ся, и спе́шно благода́ть Твою́ пода́ждь нам оскорбле́нным, и заступи́, Блага́я, Твоя́ рабы́.

Сове́т су́етен совеща́ша лю́те на ны безбо́жных со́нмища, я́коже пре́жде Ахитофе́л. Но вопи́ем: Твои́ми моли́твами сей разори́, низло́жши сих кре́пость, Богоро́дице.

Слава: Призыва́ющих Тя, Богоро́дице, от души́ нело́жно, во всяко́й ско́рби и в боле́знех разли́чных, и беда́х лю́тых, спе́шно услы́ши, Влады́чице, сих избавля́ющи при́сно моли́твами Твои́ми.

И ныне: Да и́мя Твое́, Богоро́дице, на земли́ славосло́вится, Иже из Тебе́ возсия́в, гре́шником держа́вную наде́жду и сте́ну Тя дарова́: Тобо́ю бо вся́кое дыха́ние к Бо́гу притека́ет.

Песнь 9

Ирмос: Недоуме́ет всяк язы́к благохвали́ти по достоя́нию, изумева́ет же ум и преми́рный пе́ти Тя, Богоро́дице: оба́че Блага́я су́щи, ве́ру приими́, я́ко любо́вь ве́си боже́ственную на́шу, Ты бо христиа́н еси́ предста́тельница, Тя велича́ем.

Да загради́тся всяк язы́к, лука́вым поуча́яйся: да молча́т устна́ льсти́вая и уста́ непра́ведно глаго́лющая на пра́веднаго беззако́ние, горды́нею и за́вистию вражде́бною вку́пе, Богоро́дицы моли́твою, и святы́х Христо́вых.

Иже в моли́твах бо́друю, Чи́стую Богоро́дицу призыва́ем вси боле́знию и ско́рбию одержи́ми, взыва́юще: Влады́чице Чи́стая, ско́ро изба́ви от одержа́щих боле́зней рабы́ Твоя́ при́сно, я́ко по Бо́зе засту́пницы ины́я не и́мамы.

Слава: Отча́явшихся ве́лие прибе́жище, обурева́емых ти́хое приста́нище Ты еси́, Богоро́дице. Те́мже и мы притека́ем, взыва́юще: да не постыди́мся, Ма́ти и́стиннаго Живота́, но да благодаря́ще усе́рдно Тя велича́ем.

И ныне: Приими́, Отрокови́це Пречи́стая, боже́ственную песнь, воздава́ющи благода́ть на Тя наде́ющимся, и мир испроси́ Це́рквам при́сно посла́ти, да христиа́нский всяк язы́к Тя велича́ет.

В НЕДЕЛЮ

Канон похвальнай Пресвятей Богородице32

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть, препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Вообра́жься из Тебе́ по нам Со́лнце невече́рнее, Тя слове́сное Не́бо и светле́йшее я́вственне показа́. Те́мже мя изба́ви стра́стнаго смра́да: я́ко да воспою́ любо́вию Тя, Еди́ну Ма́терь Де́ву.

Иже Исто́чник ми́лости Христа́, Пречи́стая, ро́ждши и Еде́м челове́ком отве́рзши, две́ри отве́рзи ми ми́лости Твоея́, Богоро́дице, и да́руй согреше́ний проще́ние, Влады́чице ми́ру.

Слава: Клещу́, мы́сленный Угль носи́вшую и челове́ческое естество́ очи́стившую, молю́ Тя, Влады́чице: мно́гих мои́х прегреше́ний скве́рну омы́й и от оскверня́ющих страсте́й изба́ви мя моли́твами Твои́ми.

И ныне: Мои́х прегреше́ний плени́цы расто́ргни, Влады́чице, Твоего́ Сы́на и Бо́га моля́щи, и томя́щий мя грех низложи́ Присноде́во: я́ко да воспою́ Тя всегда́ Пренепоро́чная, спаса́емь.

Песнь 3

Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́, возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

Мглу страсте́й мои́х и омраче́ние отжени́ заря́ми моли́тв Твои́х и просвети́ мя, Пречи́стая Влады́чице, ро́ждшая возсия́вшаго пре́жде денни́цы Христа́, от со́лнца Со́лнце незаходи́мое.

Прогоня́ющее ору́жие грехи́ и стра́сти ду́ши моея́ бу́ди, Де́во: и покажи́ мя я́коже други́й рай, безнаве́тен и соблюде́н Тобо́ю и принося́щ цветы́ Ду́ха.

Слава: Возста́вила еси́, Пречи́стая, Твои́м Рождество́м ски́нию па́дшую и сокруше́нную, Дави́да Твоего́ пра́отца: те́мже возста́ви, Богоро́дице, и мене́, раба́ Твоего́, сокруше́ннаго страстьми́ и прегреше́нии.

И ныне: Просте́рши ру́ку благоутро́бия, приими́ мя, Богороди́тельнице: и вся́каго исхити́ осужде́ния к Тебе́ прибега́ющего, и Тебе́ припа́дающа, и призыва́ющаго Твою́ по́мощь.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ищя́ заблу́ждшаго. Тем мно́гое Твое́ снизхожде́ние, е́же на мя, прославля́ю, Многоми́лостиве.

Квас челове́ческаго естества́ нескве́рный и святы́й, от него́же прие́м те́сто, созда́ его́ Зижди́тель, и мне страсте́й скве́рну омы́й, и кал прегреше́ний мои́х очи́сти.

Плени́цу страсте́й мои́х разреши́, Влады́чице, и вери́ги грехо́в мои́х расто́ргни ору́жием моли́тв Твои́х, Христа́ ро́ждшая, подаю́щаго избавле́ние свя́занным во а́де.

Слава: Лечбо́ю моли́тв Твои́х Влады́чице, и пла́стырем и ма́слом души́ моея́ стру́пы и я́звы грехо́вныя ны́не исцели́, Чи́стая, я́ко ро́ждши Богонача́льную Цельбу́ естества́.

И ныне: Стра́сти души́ моея́ исцели́, омрачи́вшия мя преокая́нне: и по́мысл просвети́, дале́че отгоня́ющи, Чи́стая, тьмы бесо́в, оскорбля́ющих мя и по вся дни се́ти простира́ющих мне.

Песнь 4

Ирмос: Просвеще́ние во тьме лежа́щих, спасе́ние отча́янных, Христе́ Спа́се мой, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ Бо́га не зна́ю.

От кля́твы дре́вния мир я́ко изба́вила еси́, Влады́чице, ми́ру благослове́ние, Христа́ ро́ждшая: помышле́нии безме́стных изба́ви мя и вся́кия печа́ли, Еди́на бо еси́ ве́рных ра́дование.

Бу́ря лю́та развраще́ний, духо́в лука́вствия, мою́ мысль смуща́ет: предвари́ ско́ро и ути́ши сию́, ро́ждшая вся́кия тва́ри Еди́наго Ко́рмчия, Христа́ всеси́льнаго.

Слава: Возсия́й ми свет покая́ния, Богороди́тельнице, во тьме поги́бельней затворе́нному: да́руй ру́ку по́мощи лежа́щему и Твои́ми моли́твами воздви́гни мя, Чи́стая, твори́ти Бо́жия опра́вда́ния.

И ныне: Окружа́ет бесо́вский полк град души́ моея́ и разплени́ти зело́ покуша́ется: пресла́вная Влады́чице, гра́де всех Царя́, огради́ мя сто́лпными стена́ми, Твои́ми моли́твами, и спаси́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Яко Жизнь ве́чную ро́ждши, Пречи́стая, от те́ла души́ моея́ исходя́щей, смерть Твои́ми моли́твами умертви́.

Стропо́тныя стези́ ше́ствовавшаго к пра́вей стези́ наста́ви, Яже Путь жи́зни ро́ждшая, Христа́ Бо́га на́шего.

Слава: Ло́вит, искуша́я, мя змий человеконенави́стный: сего́ упраздни́, Влады́чице, я́ко ро́ждши главы́ Сокру́шшаго змие́в.

И ныне: Души́ моея́ стра́сти исцели́ и печа́ли недоуме́ние победи́, Яже Бо́га ро́ждшая на спасе́ние челове́ком, Пречи́стая.

Тоже: Го́споди поми́луй, трижды. Слава, и ныне

Седален, самоподобен. Глас 2:

Милосе́рдия су́щи исто́чник, ми́лости сподо́би нас, Богоро́дице, при́зри на лю́ди согреши́вшия, яви́ я́ко при́сно си́лу Твою́: на Тя бо упова́юще, ра́дуйся, вопие́м Ти, я́коже иногда́ Гаврии́л, безпло́тных Архистрати́г.

Песнь 7

Ирмос: Те́лу злато́му прему́дрыя де́ти не послужи́ша и в пла́мень са́ми поидо́ша, и бо́ги их обруга́ша, среди́ пла́мене возопи́ша, и ороси́ я́ а́нгел: услы́шася уже́ уст ва́ших моли́тва.

Тя дверь ве́дый мы́сленнаго Восто́ка, с Небесе́ я́вльшуюся, вни́ти в Небеса́ Тобою́, Де́во, раб Твой молю́ся: те́мже приими́ мя, Влады́чице, и све́том наста́ви.

Смуща́ет ми ум и коле́блет ду́шу волна́ страсте́й: но ро́ждшая мо́ре волну́ющееся повеле́нием Боже́ственным Обуздава́ющаго, Де́во, к тишине́ преложи́ безстра́стия и плотско́е уста́ви смуще́ние.

Слава: Не преста́й, Чи́стая, моля́щи от Тебе́ ро́ждшагося Бо́га о и́же ве́рою притека́ющих к Тебе́ и прося́щих избавле́ния, Еди́на засту́пнице ми́ру, отча́янным наде́жда и заступле́ние, обурева́емым в лю́тых при́сно по́мощь.

И ны́не: На Кресте́ Христо́с Сын Твой распе́нся во́лею, нача́ла тьмы посрами́ и сме́ртную разруши́ тлетво́рную си́лу: Имже, Влады́чице Пречи́стая, стра́стное мое́ пло́ти мудрова́ние умертви́.

Песнь 8

Ирмос: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся тварь и превозно́сит во вся ве́ки.

Вода́ми живо́тными, изсо́хшее мое́ се́рдце грехо́вным пла́менем, Ты напой, Де́во Богоро́дице, во умиле́нии всегда́ соблюда́ющи мя, со стра́хом пою́ща: да пое́т Го́спода вся тварь и превозно́сит Его во ве́ки.

Боже́ственный Ковче́г носи́вши и Скрижа́ли Заве́та, неопи́саннаго Сы́на Твоего́ Христа́, Де́во, Сло́во Бо́жие Пречи́стое, Сему́ написа́тися, я́коже на дсце души́ моея́ сотвори́ персто́м Бо́жиим, Твои́ми моли́твами.

Слава: Богоде́ланная ски́ние, су́щая Свята́го святы́х, показа́вшаго дре́вния ски́нии о́браз, Архиере́а вели́ка внутрь иму́щи, мое́ се́рдце, Де́во, яви́ Вы́шняго и всех Царя́ Христа́ ски́нию свя́ту.

И ны́не: Усече́ся от Твои́х ложе́сн, Пренепоро́чная Влады́чице, я́ко от горы́, честны́й Ка́мень, и столпы́ вся́кия пре́лести, я́ко Вседержи́тель Еди́н Всеси́льный сокруши́: Имже ны́не о́бразы страсте́м потреби́ души́ моея́, мы́сленных враг сокруши́вши че́люсти.

Песнь 9

Ирмос: Яже пре́жде со́лнца свети́льника Бо́га возсия́вшаго, пло́тски к нам прише́дшаго, из боку́ Деви́чу неизрече́нно воплоти́вшая, благослове́нная Всепе́тая, Тя, Богоро́дице, велича́ем.

Иже безпло́тных существа́ я́ко Бог составле́й, из Тебе́ Де́во Отрокови́це, воплоти́ся. Те́мже изба́ви мя плотска́го страсте́й обстоя́ния и плотска́го мудрова́ния, Твоего́ раба́ Твои́ми моли́твами.

Пра́вды Со́лнце, Чи́стая, Христа́ возсия́ла еси́, и Не́бо показа́ся пресве́тло, Имже нощь страсте́й мои́х Твои́ми моли́твами разори́, и ду́шу мою́ просвети́, и се́рдце мое́ озари́ и уясни́.

Слава: Суди́, Богоро́дице, и препри́ лю́таго моего́ сопоста́та, и от того́ мя оскорбле́ния изба́ви: Судию́ бо Блага́го и Пра́веднаго родила́ еси́, Иже в не́дрех Божества́ Осуди́вшаго смерть.

И ны́не: Разруши́ла еси́ Евину печа́ль, Ада́ма Но́ваго ро́ждши, пре́жде Ада́мово естество́ Созда́вшаго. Те́мже разреши́ и мои́х прегреше́ний рукописа́ние, напа́стей и скорбе́й и страсте́й мя свобожда́ющи.

В ПОНЕДЕЛЬНИК

Канон Пресвятей Богородице33

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть, препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Похвале́ния Ти при́сноцвету́щий вене́ц, его́же прозябе́ Ду́хом Це́рковь, Чи́стая, прино́сит пе́сненно Тебе́ со арха́нгелом Гаврии́лом Богоневе́стней, ра́дуяся, пою́щи и Тя че́стно венча́ющи.

Возде́лавши живоно́сный Виногра́д, Ма́ти Бо́жия Препе́тая, Христа́ Бо́га, земле́ Свята́я Отча яви́ся па́че смы́сла, Богоблагода́тная, и весь мир напои́ пи́ва живоно́снаго, Чи́стая.

Слава: Волну́ющагося лю́те прегреше́нии всего́ ми́ра, и потопля́емаго, родила́ еси́, Пречи́стая, Бо́га и Го́спода всех нас и окорми́теля Христа́, ко спаси́тельному приста́нищу нас направля́юща ве́рно.

И ныне: Прибе́жище и спасе́ния гра́де, вси ве́рно мо́лим Тя, Мари́е Ма́ти Бо́жия, и ми́ли де́емся те́пле: приими́ мольбы́ на́ша, Твои́х ве́рных раб, и разреши́ вся ны от прегреше́ний осужде́ния.

Песнь 3

Ирмос: Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас, пою́щих Тя.

Нача́ло отвраще́ния Бо́га бысть к челове́ком Евино прельще́ние: Свята́я же Богоро́дица приведе́ па́ки Бо́га к нам.

Жи́зни Тя Сокро́вище, Препе́тая, ражда́ет ми́рови, и ра́дуется благоча́дию сла́вный Иоаки́м о Тебе́, я́ко непло́дными отцы́ прише́дши наде́жда.

Слава: От Анны ра́дость ро́ду процвете́, ражда́еши Де́вою Царя́: и сра́дуются Рождеству́ Твоему́ жены́, разре́шшася Тобо́ю кля́твы.

И ныне: Купина́ в Сина́и прообража́ше Твое́, Де́во, пресла́вное Рождество́: и́бо огне́м Божества́ не опали́ся, в ложесна́х прие́мши, Чи́стая.

Песнь 4

Ирмос: Услы́шах, Го́споди, сла́вное Твое́ смотре́ние и просла́вих, Человеколю́бче, непостижи́мую Твою́ си́лу.

Иа́ков Тя я́ко ле́ствицу боголе́пно прови́дяше, Де́во, на ея́же версе́ Бог утвержда́шеся.

Ангельское сни́тие, е́же к нам Сло́ва прише́ствие Тобо́ю, Пречи́стая, прояви́ся.

Слава: Утро́ба Твоя́ препе́тая и сосца́ блаже́нна, Де́во: тех бо ра́ди жизнь вси обрето́хом.

И ныне: Та́инственно воспева́ем Тя, Ма́ти Бо́жия, гла́сами Правосла́вия, Его́же Це́ркви соблюда́й моли́твами Твои́ми.

Песнь 5

Ирмос: Просвеще́ние во тьме лежа́щих, спасе́ние отча́янных, Христе́ Спа́се мой, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ Бо́га не зна́ю.

Зако́на и ковче́га честне́йшу Тя воспева́ем, Богоро́дице Мари́е: и́бо всех Зижди́теля и Бо́га, я́ко скрижа́ли, носи́ла еси́, Препе́тая.

Престо́л Тя Бо́жия Сло́ва прославля́ем, Богоро́дице, на не́мже я́ко Челове́к Бог седя́ яви́ся, и бысть херу́вимов превы́шши.

Слава: Разреши́ла еси́, Де́во, от го́рькия рабо́ты весь род челове́чь, и свобо́дою Христо́вою естество́ же́нское почти́ла еси́, в Боже́ственнем Твое́м Рождестве́.

И ныне: Родила́ еси́ Сы́на Де́ва, и побежда́ют жены́ врага́ я́ве: те́мже и притека́ют Отрокови́це, де́вство держа́ще.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Яже ми́ру ра́дость, Богоро́дице Чи́стая, ра́дуйся, Тебе́, Де́во, зове́м со а́нгелом ве́рно, Твоея́ ра́дости сподо́би, и печа́ль на́шу разори́.

Ра́дости неотъе́млемыя жили́ще Тя восхваля́юще ве́рно, Ма́ти Присноде́во, Твоея́ ра́дости сподо́би и печа́ль на́шу разори́.

Слава: Не́бо небе́с вы́шшее яви́лася еси́, Богоневе́стная, Боже́ственною Твое́ю сла́вою: в Тя Бог наш всели́вся, яви́ся ми.

И ныне: Ны́не естество́ же́нское возра́довася, ны́не печа́ль преста́, ра́дость процвете́: я́ко Мари́я роди́ Ра́дость, Спа́са Христа́ Бо́га.

 

Таже: Го́споди поми́луй, трижды. Слава, и ныне

Седален, глас 2

Подобен: Милосердия сущи:

Души́ моея́ ле́ность лю́тую и се́рдца моего́ пренемога́ние, Ма́ти Бо́жия, воззре́вши, исцели́ моли́твами Твои́ми и спасе́нных мя ча́сти сподо́би, избавля́ющи мя тьмы и муче́ния, я́ко Еди́на упова́ние мое́ и утеше́ние.

Песнь 7

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Руно́ иногда́ Гедео́ново, е́же на Тя, Чи́стая, Бо́жия Сло́ва прообрази́ сни́тие: я́коже бо ро́су, зача́тие прия́т, нетле́нная Де́во. Те́мже вси Тебе́ зове́м: благослове́н Плод Твоего́ чре́ва, Чи́стая.

Но́ва и стра́шна, и ве́рна и чу́дна Твоя́ та́инства, Мари́е, Ма́ти Христа́ Бо́га на́шего: я́ко Тобо́ю примири́хомся еси́ Бо́гови и Влады́це, и со а́нгелы ны́не пое́м: благослове́н Плод Твоего́ чре́ва, Чи́стая.

Слава: Иже пре́жде Гедео́н предвеству́ет Тебе́, Чи́стая, Боже́ственное Рождество́ я́ве: окри́н приноша́ет испо́лнен воды́ от оцежде́ния руно́внаго: весь бо в Тя Боже́ственно всели́ся, Пречи́стая: благослове́н Плод Твоего́ чре́ва, Чи́стая.

И ныне: Ро́ждши Бо́га и Спа́са вся́ческих Мари́е, была́ еси́ отча́янных исправле́ние, гре́шников обновле́ние, и ненаде́жных наде́жда, и пою́щих по́мощь: благослове́н Плод Твоего́ чре́ва, Чи́стая.

Песнь 8

Ирмос: В пещь о́гненную ко отро́ко́м евре́йским снизше́дшаго, и пла́мень на ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Нов рай нам яви́лася еси́, Пресвята́я Богоро́дице, не сме́ртное дре́во, но живо́тное, я́ко сад, без се́мене прорасти́вши Го́спода, Имже безсме́ртною жи́знию пита́емся вси.

Воспева́ет вся Христо́ва Це́рковь, Богоро́дице, Твое́ Рождество́, я́ко спаса́ются гре́шнии вси и ни́щии, и́же любо́вию к Тебе́ прибега́юще: прии́де бо Христо́с на зе́млю челове́ки спасти́.

Слава: Свобожда́ется осужде́ния пра́баба Тобо́ю Богоро́дице Де́во: и се ны́не жены́ стра́ждут по Христе́ и ра́дуется естество́ же́нское, я́коже первому́ченица вопие́т Фе́кла.

И ны́не: Никто́же поги́бе, Чи́стая, и́же ве́ры наде́жду стяжа́ к Тебе́ правосла́вно, Де́во Ма́ти Бо́жия, ра́зве то́чию за́вистию отмета́яйся, Твоему́ не покланя́тися о́бразу начерта́нному.

Песнь 9

Ирмос: Яже пре́жде со́лнца Свети́льника Бо́га возсия́вшаго, пло́тски к нам прише́дшаго из боку́ Деви́чу, неизрече́нно воплоти́вшая, благослове́нная Всечи́стая, Тя, Богоро́дице, велича́ем.

Приклони́ ми у́хо Твое́, Де́во Пресвята́я, воспева́ющему ве́рно похва́льными словесы́ Твое́ Рождество́: и, я́ко да́ры вдови́чи, песнь усте́н мои́х прие́мши, проси́ грехо́в мои́х проще́ния.

Сия́ет добро́та Твоя́, блиста́ет чистоты́ све́тлость, Чи́стая, и пресия́т па́че сих Твое́ Рождество́: Бог бо, Творе́ц со́лнца и тва́ри всея́, из Тебе́ роди́ся: те́мже Тя вси велича́ем.

Слава: Свет Тя чистоты́, и жезл де́вства, и Ма́терь Бо́жию боголе́пно в пе́снех пою́ще, Богоро́дице, со гла́сом хвале́ния мо́лимся Ти: в де́встве утверди́ нас и в чистоте́ сохрани́.

И ныне: Те́ло и ду́шу нескве́рну Бо́гови соблю́дши, Чи́стая, Царь восхоте́ Твоея́ добро́ты Христо́с, и Ма́терь Своего́ воплоще́ния показа́, Мари́е пресла́вная, спасе́ние мое́ соверша́я.

ВО ВТОРНИК

Канон Пресвятей Богородице

Песнь 1

Ирмос: Гряди́те лю́дие, пои́м песнь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Пресвята́я Богоро́дице, спаси́ нас.

Сло́во моего́ приобрете́ния отню́д несть к песносло́вию, Всечи́стая, я́ко покрыва́ет мя грехо́в мои́х тьма: но, о Богороди́тельнице! утесня́ема приими́ мя.

Под Твой покро́в прибега́ю, Пречи́стая, от грех безчи́сленных в коне́ц, и Бо́га и Влады́ку благопреме́нна сотвори́, Чи́стая, и спаси́ мя.

Слава: Ты мне, Влады́чице, те́плое очисти́лище, к Тебе́ прибега́я, спасу́ся и приобря́щу душе́вное спасе́ние: мо́жеши бо вся, я́ко су́щи Ма́ти всех Бо́га.

И ныне: Иже душа́м льсте́ц, привлече́ мя в поги́бельный ров: но мне простри́ держа́вную Твою́ ру́ку, Богоро́дице Де́во, и ско́ро ко све́ту возведи́.

Песнь 3

Ирмос: Утверди́ нас в Тебе́, Го́споди, дре́вом умерщвле́й грех, и страх Твой всади́ в сердца́ нас, пою́щих Тя.

Во мно́гия впад разбо́йники, окая́нный, обнаже́н бых, уя́звлен же и оста́влен: но Ты, Богоро́дице Чи́стая, не пре́зри мене́.

Обнажи́ Ада́ма пре́жде змий, прельсти́в дре́вом, ны́не же удо́бно плени́ ду́шу мою́: молю́ся Ти, Влады́чице, уще́дри мя.

Слава: Ны́не Тебе́ моя́ приношу́ та́йная, и́стинней Предста́тельнице моей и покро́ву: я́ко да сия́ мне не обличи́т Сын Твой, на Суде́ пра́веднем Свое́м.

И ныне: Поми́луй нас, Чи́стая, поми́луй: и́бо от дел спасе́ния отню́д несть нам. Те́мже ве́рою те́плою к Тебе́ вопие́м: поми́луй рабы́ Твоя́.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся, до мене́ бо и́деши, мене́ ищя́ заблу́ждшаго. Тем мно́гое Твое́ снизхожде́ние, е́же на мя, прославля́ю, Многоми́лостиве.

Боля́ща мя неисце́льно, Влады́чице, и обнища́вша не пре́зри: но даждь ми еле́й бла́гости Твоея́, Де́во, и Твои́ми промышле́ньми обогати́ мя, е́же от Бо́га зла́том нетле́нным.

До́брых всех обнажи́хся и лежу́ во злых, обо́лкся па́че всех дре́вле па́дших: и ны́не пре́жними украси́ мя и вторы́х изба́ви, Богоневе́сто.

Слава: Блудни́цу превзыдо́х в блуде́х, и мытаря́ лихои́мством всегда́, сло́вом и изволе́нием: но у́бо обою́ покая́ние пре́жде конца́ стяжа́ти ми, Влады́чице, сподо́би.

И ныне: Водвори́хся в пусты́ни печа́льней, удали́хся от Тебе́, Богороди́тельнице, кто даст ми криле́, и полещу́, и прииду́ к Тебе́, наде́жди мое́й, спаса́ющей малоду́шие мене́ окая́ннаго?

Песнь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви нас: ра́зве бо Тебе́, ино́го Бо́га не зна́ем.

Яко невече́рний Свет от чре́ва Твоего́, Влады́чице, су́щим на земли́ возсия́вший, смра́дную ду́шу мою́ озари́, Чи́стая, и отжени́ вся́ку мглу се́рдца моего́.

Нощь мя покрыва́ет лю́тая лука́вых мои́х и злых дея́ний, но вопию́ Ти, Влады́чице: наста́ви мя к свету Боже́ственному Твоего́ Сы́на и Влады́ки, Всепе́тая.

Слава: И мене́ приими́, Чи́стая, я́коже блу́днаго сы́на прия́т Твой Сын и Зижди́тель вся́ческих, вопию́щаго с ним: согреши́х вои́стину, и спаси́ мя, Влады́чице.

И ныне: Уязви́вшееся мое́ се́рдце прило́ги лука́ваго, Пречи́стая, я́ко ми́лостива исцели́, на Кресте́ пло́тию Уя́звленнаго неизглаго́ланно ро́ждши.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

В ров грехо́вный впадо́х, и к незабыва́ющему не взира́ю Бо́гу, стра́хом одержи́мь: но к Тебе́ примета́юся, Богоневе́сто.

Покры́вшееся лю́те се́рдце мое́ недове́домых прегреше́ний волно́ю, всеси́льною Твое́ю моли́твою, Богоро́дице Де́во, окорми́.

Слава: Красоту́ мне ви́дети сла́вы Твоея́ сподо́би, егда́ от пло́ти моея́ хощу́ разлучи́тися, я́ко утвержде́ние мое́, Влады́чице: да отсю́ду уве́м оставле́ние.

И ныне: Напа́стей и бед и скорбе́й изба́ви рабы́ Твоя́, Свята́я Влады́чице, я́же к Бо́гу Твои́ми моли́твами, ве́рою к Тебе́ прибега́ющия.

 

Таже: Го́споди поми́луй, трижды. Слава, и ныне

Ceдален, глас 2:

Тя велича́ем, Богоро́дице, вопию́ще: ра́дуйся, же́зле, от него́же безсе́менно Бог прозябы́й, погуби́ на Дре́ве смерть.

Песнь 7

Ирмос: Образу злато́му на по́ле Деи́ре служи́му, трие́ Твоя́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Ны́не тщи́тся зия́я враг прия́ти мя во утро́бу свою́: и́бо приноша́ет ми отвсю́ду искуше́ния и се́ти, весь пресека́я спех мой: но предвари́вши, изба́ви мя, Де́во Ма́ти, от того́ наве́та лука́ваго.

Оскверня́ет и смуща́ет чу́вствия и ум сопоста́т, и в ров отча́яния свести́ мя тщи́тся. Те́мже вопию́ Ти Еди́ней: прибе́жище мое́, Богоневе́сто, изба́ви мя от руки́ сего́ льсти́ваго.

Слава: Иже дре́вле три ю́ноши от пе́щи горя́щия, Христе́ мой, избавле́й, Сам, Сло́ве, и мене́ мольба́ми неискусобра́чныя Ма́тере Твоея́ от пла́мене, его́же разжего́х безме́рными злы́ми, изба́ви и ороси́.

И ныне: Ве́щно обре́т се́рдце мое́ тли́тель, умертви́ е́: но Ты мя у́бо си́лою Боже́ственною одожди́, неискусобра́чная Ма́ти, и победи́ти ми сподо́би сего́, я́ко да ве́рою зову́ Ти: Благослове́нная, Яже Бо́га пло́тию ро́ждшая.

Песнь 8

Ирмос: В пещь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Мно́гими злы́ми мои́ми погорбле́н быв лю́те, мно́жеством тяго́т, и о́ко мое́ отню́д на небеса́ не сме́ю возвести́, но вопию́ Ти: поми́луй, Еди́на Богоро́дице, мене́ па́дшаго.

В о́ньже впадо́х гнев Твоего́ Сы́на и Бо́га, Чи́стая, изба́ви мя: и в час, в о́ньже хо́щет твори́ти испыта́ние, бу́ди ми по́мощь, Пречи́стая, и от шу́их ко́злищ изба́ви мя.

Слава: Умерщвле́ннаго мя мы́сленно от безчи́сленных мои́х зол, воздви́гни Богоневе́сто Отрокови́це: и мольбо́ю Твое́ю изба́ви мя от вся́кия пре́лести душетле́ннаго врага́ и уби́йцы.

И ныне: Злонеиспра́вленная душе́, ка́ко очерни́ла еси́ зле пе́рвую добро́ту? Ка́ко отве́ргла еси́ вся, я́же к Зижди́телю Твоему́, обе́ты и прия́ла еси́ зло́бная? Но гряди́ и притецы́ благоче́стно к Богоро́дице.

Песнь 9

Ирмос: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии единому́дренно пе́сньми велича́ем.

Де́лы тя́жкими чу́вства оскверни́х вои́стинну, и всего́ студодея́ния испо́лнен есмь: но очи́сти у́бо, Пречи́стая, вре́мя мне испроша́ющи благоумиле́ния, да непреста́нно Тя велича́ю.

Ты мя, Богоро́дице, опра́вда́й, егда́ явя́тся дела́ сокрове́нная коего́ждо я́ве, и́маши бо вои́стину си́лу: и тьмы мя изба́ви и во стране́ учини́ све́та моли́твами Твои́ми, иде́же есть ра́дость неизглаго́ланная.

Слава: Молю́ Тя, Сло́ве, пре́жде прише́ствия конца́ покая́ние ми да́руй те́плое, и умиле́ние слеза́м, целому́дрие вку́пе и смире́ние, и любо́вь Боже́ственную, и ста́ду Твоему́ устрое́ние, мольба́ми ро́ждшия Тя.

И ныне: Умных же и чу́вственных премину́вши, Де́во, сла́вою и че́стию, ра́зве Бо́га, не омерзи́ мене́, премину́вшаго в прегреше́ниих ве́тхих же и но́вых челове́к, согре́шших на земли́: но Твое́ю моли́твою спаси́ мя.

В СРЕДУ

Канон молебный Пресвятей Богородице

Песнь 1

Ирмос: Гряди́те, лю́дие, пои́м песнь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Пресвята́я Богоро́дице, спаси́ нас.

Иже благоче́стно Тя, Чи́стая, су́щую Богоро́дицу испове́дающаго душе́ю и усты́, от лю́тых бед, и неду́г и прегреше́ний ны́не спаси́, Пречи́стая.

Всю в Тебе́ благода́тей бе́здну лежа́щу уве́дехом: те́мже прибега́юще, Богоро́дице, усе́рдно к покро́ву Твоему́ Боже́ственному, спаса́емся.

Слава: О нас, Тя пою́щих, Пречи́стая, моли́ Воплоще́ннаго от пречи́стых Твои́х и честны́х крове́й, изба́витися от прегреше́ний и боле́зней го́рьких.

И ныне: Тя похвалу́, ве́рнии, вси стяжа́хом, прибе́жище и утвержде́ние и ра́дование, и душа́м спасе́ние, наде́жду же и сте́ну, Богоблагода́тная.

Песнь 3

Ирмос: Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас пою́щих Тя.

Моли́твами Твои́ми, Чи́стая, Бо́га, Его́же родила́ еси́, пода́ждь благопреме́нна Твои́м рабо́м, притека́ющим к покро́ву Твоему́, и ве́рно кла́няющимся Твоему́ Рождеству́.

Глаго́лы моея́ моли́твы услы́ши, Де́во, из глубины́ моего́ се́рдца, я́же приношу́ Ти, Препе́тая, и от страсте́й и напа́стей спаси́ мя.

Слава: Всю мою́ жизнь окорми́, Де́во, упова́ние мое́ и предста́тельнице, искуше́ний и наи́тия34 избавля́ющи, и ну́жных35 Богоневе́сто.

И ныне: Прему́дрость Бо́жию ипоста́сную на руку́ я́ко носи́вши, Богома́ти, от неве́дения и заблужде́ния изба́витися нам моли́ся.

Песнь 4

Ирмос: Услы́шах Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Язвам мои́м душе́вным и плотски́м скве́рнам, Яже Бо́га ро́ждшая, Влады́чице, разреше́ние пода́ждь.

Оскверне́ннаго мя страстьми́, и помышле́нии, и жития́ треволне́нии, упова́нием, Де́во, и ве́рою утверди́.

Слава: От наи́тия изба́ви мя, Ма́ти Бо́жия, и бу́ри, и бед Твои́ми моли́твами, Еди́на Препе́тая.

И ныне: Обурева́ема волна́ми жите́йскими, исхити́, Де́во, к Твоему́ приста́нищу наставля́ющи мя.

Песнь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви нас: ра́зве бо Тебе́, ино́го Бо́га не зна́ем.

Ору́жие непобеди́мое иму́ще на разли́чная искуше́ния вра́жия, вся́каго озлобле́ния избавля́емся я́ве, и́же Тя Богоро́дицу Чи́стую ве́дущии.

Зако́на исполне́ние, вы́шшая херуви́м, родила́ еси́ Бо́жия Сло́ва воплоще́нна, Сы́на Единоро́дна: Его́же о рабе́х Твои́х умоли́.

Слава: Вся́ческих Творца́ на руку́ Твое́ю, Чи́стая, нося́щи, Сего́ нам Твои́ми моли́твами благопреме́нна дава́й, ны́не всем се́рдцем к Тебе́ прибега́ющим.

И ныне: От утесне́ния и боле́зни души́, мольбу́ приношу́ Ти, окая́нный: щедро́т Еди́на ро́ждшая вино́вное Сло́во, уще́дрив, спаси́ мя.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну, от тли, Бо́же, мя возведи́.

Спасе́ния приста́нище ве́дый Тя, пла́вая многопеча́льнаго жития́ мо́ре, призыва́ю, Влады́чице: окорми́тельница души́ мое́й бу́ди.

Обнажи́хся оде́жды целому́дрия моего́, озло́блен быв, но, Ма́ти Присноде́во, Бо́га ро́ждшая, ра́дости оде́жду пода́ждь ми.

Слава: Чи́стаго жития́ отпадо́х, в ле́ности жив, стра́стный: но возведи́, Благослове́нная Влады́чице, повеле́нием Сы́на Твоего́ сочта́вши36.

И ныне: Ми́лости Твоея́, Богоро́дице, сподо́би мя, Преми́лостиваго Сло́ва поро́ждшая, Свое́ю кро́вию от тли челове́ки изба́вльшаго.

 

Таже: Го́споди поми́луй, трижды. Слава, и ныне

Сеадлен, глас 2.

Подобен: Божественнаго быхом:

Боже́ственнаго мя вхо́да, Чи́стая, сподо́би, моли́твами Твои́ми, Присноде́во, и соу́зы лю́тых страсте́й расто́ргши, пла́мене бу́дущаго мя свободи́.

Песнь 7

Ирмос: Образу злато́му на по́ле деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

На Кресте́ пригво́ждься, Иже из Тебе́ воплоти́выйся, Богороди́тельнице, Ада́мово раздра́ рукописа́ние: Его́же ны́не, Де́во, моли́ вся́кия зло́бы изба́витися ве́рою зову́щим: благослове́нная, Яже Бо́га пло́тию ро́ждшая.

Наде́жда блага́я, засту́пница же ве́рных еси́, Влады́чице: и ны́не мо́лимся Тебе́ дарова́ти ми́лости пучи́ну всем на Тя наде́ющимся и зову́щим Ти: благослове́нная, Яже Бо́га пло́тию ро́ждшая.

Слава: Тьмо́ю лю́тою жития́ объя́т быв, соскорбя́щаго и сболе́знующаго не обрето́х: Твое́ю, Де́во, све́тлостию разреши́ тьму прегреше́ний, и озари́ пе́ти Тебе́, Благослове́нная, Яже Бо́га пло́тию ро́ждшая.

И ныне: В кра́сную оде́жду спаси́тельных за́поведей креще́нием оде́явся, очерни́х ле́ностию, окая́нный, ны́не же к Тебе́ притека́ю, Де́во, во оде́жду прося́ спасе́ния Тобо́ю па́ки облещи́ся.

Песнь 8

Ирмос: В пещь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся ве́ки.

Изнемога́ет мой ны́не ум, во глубину́ впад безче́стия, я́ко отвсю́ду разли́чными объя́т есмь злы́ми: но Ты, Де́во, исцели́, безстра́стия све́том оде́явши.

Столп кре́пости тверд, и степе́нь, и храни́тельницу, и засту́пницу стяжа́вше Тя ве́рою, спаса́емся ны́не, пою́ще Рождество́ Твое́, Пречи́стая, и превознося́ще его́ во вся ве́ки.

Слава: Безсме́ртия зарю́, и исто́чник ве́мы Тя, Богоро́дице, я́ко ро́ждшую Сло́во безсме́ртнаго Отца́, вся от сме́рти избавля́ющее превознося́щия Его́ во вся ве́ки.

И ныне: Струи́ исцеле́ний нам всегда́ ве́рным, Чи́стая, источа́еши, Его́же незави́стную благода́ть взе́млюще, воспева́ем Рождество́ Твое́, Чи́стая, и превозно́сим во вся ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии, единому́дренно пе́сньми велича́ем.

Богоблаже́нная Отрокови́це, наде́жду мою всю усе́рдно возложи́х на Тя: спаси́ мя, Ма́ти и́стиннаго Живота́, и пи́щи присносу́щныя насы́титися моли́, Чи́стая, ве́рою Тя и любо́вию пе́сньми велича́ющему.

Явльшися, Де́во, Дверь Боже́ственнаго Све́та, души́ моея́ мглу све́том Твои́м невеще́ственным и блиста́нии озари́, и от ве́чнаго огня́ изба́витися ми сподо́би Чи́стая, хода́тайствы Твои́ми: я́ко да непреста́нно велича́ю Тя.

Слава: Боля́щия зря́щи душе́ю и те́лом, и вве́рженныя в стра́сти лю́тыя, благоутро́бием Твои́м, Влады́чице, исцели́вши разреши́, и́же ны́не стужа́емыя печа́льми: да ве́рою и любо́вию Тя пе́сньми велича́ют.

И ныне: Во чре́во Твое́ всели́ся, Его́же из Чре́ва преве́чный Оте́ц роди́ Сы́на, соверше́н бысть Челове́к, и исто́чник благода́тей Тя, Богома́ти, показа́ нам, ве́рно кла́няющимся несказа́нному Твоему́ Рождеству́.

В ЧЕТВЕРТОК

Канон молебный Пресвятей Богородице

Песнь 1

Ирмос: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть, препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Яко кра́сную, я́ко предо́брую всю, я́ко непоро́чную в жена́х, Бог Тя избра́, и во утро́бу Твою́ всели́ся непоро́чную: Его́же моли́, Всенепоро́чная, поро́ка грехо́в изба́вите вся пою́щия Тя.

Псало́мски, Чи́стая, одесну́ю, я́коже Цари́ца, от Твоея́ утро́бы возсия́вшаго Царя́ предста́: Его́же моли́, Всенепоро́чная, да десна́го предста́теля пока́жет мя в День воздая́ния.

Слава: Пресо́хшее естество́ челове́ческое безме́стными де́лы, ро́ждшая Дождь Небе́сный, вся обнови́: те́мже молю́ся, души́ моея́ бразду́ изсо́хшую покажи́ плодоно́сну, Богоневе́сто.

И ныне: Умертви́вшеся са́дом ра́зума, дре́вом же жи́зни, Чи́стая, к жи́зни ве́чней при́звани бы́хом, от Тебе́, Богоро́дице, процве́тшим па́че смы́сла Христом Бо́гом: Его́же со дерзнове́нием моли́ спасти́ся душа́м на́шим.

Песнь 3

Ирмос: Процвела́ есть пусты́ня, я́ко крин, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Облече́ся в мя челове́ка, от чре́ва Твоего́ проше́д Творе́ц, Пречи́стая, нетле́ния оде́жду да́руя обна́жшемуся мно́гими злоде́йствы.

Пречестно́е родила́ еси́ Бо́га Сло́во, Влады́чице: Его́же приле́жно моли́ уще́дрити смире́нную мою́ ду́шу, сла́достными безче́стии се́тующую.

Слава: Язвы исцели́ души́ моея́, Пречи́стая, и смире́нное се́рдце мое́, огорче́нное я́дом змии́ным, де́йственною Твое́ю лечбо́ю уврачу́й.

И ныне: Яко Ма́ти, иму́щи дерзнове́ние, Влады́чице, к Сы́ну Твоему́, проси́ по́мощь озло́бленным лю́дем, беззако́нных же низложи́ шата́ние.

Песнь 4

Ирмос: Прише́л еси́ от Де́вы, не хода́тай, ни а́нгел, но сам, Го́споди, вопло́щься, и спасл еси́ всего́ мя челове́ка. Тем зову́ Ти: сла́ва си́ле Твое́й, Го́споди.

Ка́плю ми умиле́ния одожди́, Влады́чице, отъе́млющи весь се́рдца моего́ вар, и печа́ль мою́, и па́костныя прило́ги отгоня́ющи.

Ору́жием мя сла́стным уя́звлена и лежа́ща в ра́нах, Пречи́стая, не пре́зри, но исцели́ копие́м и кро́вию распе́ншагося Сы́на Твоего́ и Бо́га на́шего.

Слава: Обогаще́нная Влады́чним вся́ким зда́нием, лю́те мя обнища́вша, благода́ти Боже́ственныя сподо́би: я́ко да велича́ю Тя, я́ко благу́ю мою́ засту́пницу, Всенепоро́чная.

И ныне: Возсия́ из утро́бы Твоея́, Отрокови́це неискусобра́чная, Отчая Заря́ Христо́с, и просвети́ вселе́нную, распина́емь, и бесо́вскую тьму потреби́.

Песнь 5

Ирмос: Хода́тай Бо́гу и челове́ком был еси́, Христе́ Бо́же: Тобо́ю бо Влады́ко, к Светонача́льнику Отцу́ Твоему́ от но́щи неве́дения, приведе́ние и́мамы.

Путь жи́зни ро́ждшая, Пречи́стая, наста́ви мя ны́не на путь пра́вый, в безпу́тие и в брег лю́тых паде́ний безслове́сно низринове́ннаго.

Устра́нся без ума́ от ра́зума Бо́жия, блу́дно пожи́х, во стране́ да́льней страсте́й заблуди́в: но возвра́щши, Де́во Чи́стая, спаси́ Твои́м утеше́нием.

Слава: Вода́ми Твои́ми живо́тными напо́й раба́ Твоего́, пла́менем разжига́емаго грехо́вным, и опаля́емаго прило́ги бесо́вскими, Де́во Ма́ти Пречи́стая.

И ныне: Се́ во чре́ве Богоро́дице Пречи́стая, Христа́ Бо́га па́че сло́ва име́ла еси́, я́коже Иса́иа провозгласи́, и па́че естества́ Сего́, Богороди́тельнице, родила́ еси́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Не яви́ мене́ бесо́м в ра́дость на суди́щи бу́дущем, Влады́чице: но благопреме́нно воззре́вши на мя, Судию́ и Сы́на Твоего́ умоли́.

По́мыслы прогне́вав Тя, Го́споди, и лука́выми и нечи́стыми мои́ми дея́ньми, в моли́тву привожду́ Ти Ма́терь Твою́, уще́дрив, спаси́ мя.

Слава: Осужде́ния изба́ви мя, Влады́чице, самоосужде́нна су́ща прегреше́ньми, я́ко Судию́ ро́ждшая и Бо́га вся́ческих, Препе́тая.

И ныне: Иису́са Спа́са моли́, Его́же па́че естества́ пло́тию родила́ еси́, Де́во Ма́ти Пречи́стая, изба́витися от бед рабо́м Твои́м.

 

Таже: Го́споди поми́луй, трижды. Слава, и ныне

Седален, глас 2.

Подобен: Милосердия сущи:

Де́ва и Ма́ти Твоя́, Христе́, на Дре́ве зря́щи Тя ме́ртва просте́рта, пла́чущи, го́рько глаго́лаше: Сы́не Мой, что стра́нное сие́ та́инство, всем да́руяй жизнь ве́чную, во́лею на Кресте́ ка́ко умира́еши сме́ртию поно́сною?

Песнь 7

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ есть: Христо́с же простре́ благочести́вым отроко́м ро́су духо́вную, Сый благослове́н и препросла́влен.

Кре́пость моя́ и пе́ние, и спасе́ние, и тве́рдое заступле́ние, и стена́ непобеди́ма су́щи, Влады́чице, борю́щия мя бе́сы победи́, при́сно и́щущия умертви́ти мя.

Бо́га вопло́щши деви́ческими Твои́ми кровьми́, обожи́ла еси́, Де́во, челове́чество: те́мже молю́ся Ти страстьми́ оскверне́ннаго мя и растле́ннаго вра́жиими кова́рствы изба́ви моли́твами Твои́ми.

Слава: Пещь прообразова́ше Рождество́ Твое́, Всенепоро́чная, о́троки бо не опали́, я́коже ни ложесна́ Твоя́ Огнь непостоя́нный: те́мже мо́лим Тя, изба́ви рабы́ Твоя́ огня́ ве́чнаго.

И ныне: Пречи́стое зача́тие и нетле́нное Рождество́, Ты Еди́на яви́ла еси́, де́вою пребы́вши: Христа́ бо заче́нши, Чи́стая, над все́ми Бо́га, Челове́ка бы́вша, ве́рным на спасе́ние и избавле́ние.

Песнь 8

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся дела́ Госпо́дня, Го́спода.

Ревну́й до́брым, злых уда́льшися, попече́нием Боже́ственных дея́ний, душе́ моя́, моля́щуюся о Тебе́ Богороди́тельницу и всех непосты́дную иму́щи засту́пницу, я́ко ми́лостиву и благолюби́ву.

Разреши́ла еси́ соу́з челове́ческий дре́вняго осужде́ния: те́мже молю́ Тя, Богороди́тельнице, разреши́ всяк соу́з зло́бный се́рдца моего́, связа́вши мя, Пречи́стая, Боже́ственною любо́вию Зижди́теля.

Слава: Сла́вы Отчую Зарю́ ро́ждши, Богоро́дице, безсла́вием прегреше́ний се́тующее се́рдце мое́ уясни́ и сла́вы присносу́щныя покажи́ мя прича́стника, я́ко да ве́рою сла́влю Тя.

И ныне: Яви́ся нам из Тебе́, Богороди́тельнице, пра́вды и́стинное Со́лнце, просвеща́я вся́ческая луча́ми Божества́, вопло́щся Вы́шний, Его́же песносло́вим.

Песнь 9

Ирмос: Безнача́льна Роди́теля Сын, Бог и Госпо́дь, вопло́щся от Де́вы, нам яви́ся, омраче́нная просвети́ти, собра́ти расточе́нная: тем всепе́тую Богоро́дицу велича́ем.

Вкуси́в Ада́м снедь, приме́сную сме́рти, от дре́ва го́ресть объя́т: на Дре́ве же пригво́ждься, Сын Твой, Пречи́стая, сла́дость безсме́ртия источи́: сего́ ра́ди Тя восхваля́ем.

Цари́ца еси́, Царя́ Христа́ и Го́спода па́че сло́ва ро́ждши, разо́ршаго а́дова ца́рства: Его́же приле́жно моли́, Отрокови́це, вы́шняго Ца́рствия сподо́бити вся чту́щия Тя.

Слава: Ублажи́, Влады́чице, смире́нное се́рдце мое́, озло́бленное сластны́ми затво́ры, я́ко Блага́го Роди́тельница, и Блага́я су́щи вся: и к покая́нию мя благи́х двере́й введи́.

И ныне: Мертв быв на Крест возноси́мь, сим умори́вый зми́я. Те́мже зову́ Ти: умерщвле́нную ду́шу мою́ лука́выми де́лы, поми́луй, Сло́ве, и оживи́ моли́твами Ро́ждшия Тя.

В ПЯТОК

Канон молебный Пресвятей Богородице

Песнь 1

Ирмос: Гряди́те, лю́дие, пои́м песнь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Пресвята́я Богоро́дице, спаси́ нас.

Жи́зни исто́чник еси́, Де́во Ма́ти Чи́стая, Нача́льника и Го́спода ро́ждши, Жизнь вся́ческих, ороша́ющи ве́рою славосло́вящия Тя.

Тя утвержде́ние и предста́тельницу, обога́щшеся, и́мамы, и́же Богоро́дицу, Пречи́стая, испове́дающии Тя, от треволне́ния жития́, Всенепоро́чная Де́во, спаса́емся.

Слава: Яже Исто́чник безсме́ртия ро́ждши, уя́звленаго мя страстьми́, Отрокови́це, исцели́ и огня́ ве́чнаго исхити́, Еди́на Богоблагода́ная.

И ныне: Яже ве́рным прибе́жище, Присноде́во, держа́вная по́мощь притека́ющим Ти, от вся́кия ну́жды и вре́да сопроти́внаго нас спаси́.

Песнь 3

Ирмос: Утверди́ нас в Тебе́, Го́споди, дре́вом умерщвле́й грех, и страх Твой всади́ в сердца́ нас, пою́щих Тя.

Злату́ю я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́сну Бо́жию, Тя, Де́во, имену́ем.

Це́рковь и свяще́нное жили́ще Сло́ва су́щи, Богоро́дице, прегреше́ний очище́ние бу́ди мне при́сно, Пресвята́я Де́во.

Слава: Ни язы́к зе́млен, ни ум безпло́тных возмо́жет Рождество́ Твое́ сказа́ти: па́че естества́ бо и смы́сла, Богоро́дице, Зижди́теля родила́ еси́.

И ныне: Утвержде́ние бу́ди и прибе́жище и покро́в, Де́во Богороди́тельнице, ве́рою к Тебе́ прибега́ющим, и Бо́жию Тя Ма́терь испове́дающим.

Песнь 4

Ирмос: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.

Тя, Богоро́дице, стяжа́хом христиа́не по́мощь ве́лию, от лю́тых бед нас исхити́.

Неискусобра́чная Влады́чице, Яже Бо́га во утро́бе заче́нши, напа́стей и печа́лей всех нас изба́ви.

Слава: Непобеди́мую сте́ну Тя и держа́вную наде́жду Богоро́дице, ве́рнии стяжа́хом в напа́стех Чи́стая.

И ныне: Моли́тву Твою́, Влады́чице, я́ко тверд степе́нь стяжа́вше, разли́чных скорбе́й избавля́емся.

Песнь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви нас: ра́зве бо Тебе́, ино́го Бо́га не зна́ем.

Воплоще́нна из Тебе́, Богороди́тельнице, ве́рнии позна́хом, без се́мене Сы́на рожде́нна, Бо́га и́стинна, и Челове́ка естество́м: те́мже Тя сла́вим.

Под кров Твой и заступле́ние, Пречи́стая, ве́рнии всегда́ прибега́юще ве́рою, избавля́емся Тобо́ю, Богоро́дице, вся́каго тя́жкаго наше́ствия.

Слава: Изба́ви нас от напа́стей и бу́ри помышле́ний, Пречи́стая, вся́каго гне́ва, вся́каго греха́, гла́да же и губи́тельства, и ве́чнаго, Де́во, муче́ния.

И ныне: Засту́пница на́ша и спасе́ние и наде́жда, Влады́чице, христиа́н су́щи, спаси́ любо́вию Тя при́сно ве́рно воспева́ющих, Де́во Всепе́тая.

Песнь 6

Ирмос: В бе́здне грехо́вней валя́яся, неизеле́дную милосе́рдия Твоего́ призыва́ю бе́здну: от тли, Бо́же, мя возведи́.

Иже во́лею вся содева́яй, в ложесна́ Неискусобра́чныя во́лею всели́вся, тле́ю боля́щия нетле́нием обогати́в, я́ко Милосе́рд.

Вы́шша Вы́шних Сил и святе́йша еси́, Всенепоро́чная, па́че естества́ вме́щши невмести́мое Сло́во в ложесна́ Твоя́.

Слава: На пути́ жития́ заблужде́ннаго мя и безпу́тием ча́сто па́дающа во гресе́х, Влады́чице, к покая́ния стезя́м наста́ви.

И ныне: Не пре́зри, Чи́стая, мольбы́ на́ша, на Тя поло́жших наде́жду раб Твои́х: прибе́жище бо, Влады́чице, и душа́м очище́ние еси́.

Таже: Го́споди поми́луй, трижды. Слава, и ныне

Седален, глас 2:

Сло́во без се́мене зачала́ еси́, Сы́на же Еди́наго Христа́ родила́ еси́: Ты бо роди́ но́во Отроча́, Зижди́теля Твоего́. Тем Тя, Богоро́дице, велича́ем.

Песнь 7

Ирмос: Образу злато́му на по́ле Деи́ре служи́му, трие́ Твоя́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Отцу́ соесте́ственна разу́мнаго Сы́на, си́лою Ду́ха Пресвята́го воплоти́ла еси́, Богоблагода́тная Влады́чице. Сего́ у́бо непреста́нно моли́ уще́дрити пою́щия: Благослове́нная, Яже Бо́га пло́тию ро́ждшая.

Де́во Чи́стая, неискусобра́чная, Свята́я Благослове́нная, па́дающих исправле́ние, согреша́ющих избавле́ние: спаси́ мя, блу́днаго, спаси́, Сы́ну Твоему́ зову́ща: Благослове́нная, Яже Бо́га пло́тию ро́ждшая.

Слава: Приста́нище тве́рдо, предста́тельница стра́шна и стена́ необори́ма в ну́ждах бе́дствующим и обурева́емым в печа́ли, и я́же к Сы́ну Твоему́ моли́твами, Богоро́дице, су́щи, от многообра́зных искуше́ний спаси́ рабы́ Твоя́.

И ныне: Яже Еди́но упова́ние и по́мощь ве́рных, Богороди́тельнице, потщи́ся помощи́ рабо́м Твои́м, погружа́емым скорбьми́, отвсю́ду недоуме́емым, и в боле́знех су́щим, и прибега́ющим к Тебе́ любо́вию ду́ши.

Песнь 8

Ирмос: В пещь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся ве́ки.

Живы́й су́щий исто́чник, я́ко Во́ду жи́зни ро́ждши, ду́шу мою́, иста́явшую греха́ пла́менем, Де́во Богоро́дице, ороси́, да Тя сла́влю во вся ве́ки.

Умерщвле́нных и к пе́рсти сме́ртней и тле́нней сведе́нных, возста́вила еси́ Еди́на, Нача́льника жи́зни ро́ждши, Христа́ Бо́га на́шего, Влады́чице, Де́во Чи́стая и Благослове́нная.

Слава: Изба́ви мя, Влады́чице Чи́стая, ве́чнаго огня́ и осужде́ния, и изми́ мя от челове́к злотворя́щих и и́щущих запя́ти37 мне: я́ко да ублажа́ю Тя при́сно, Юже вся тварь Боже́ственне ублажа́ет.

И ны́не: В подо́бии пло́ти Пребоже́ственный из Тебе́ ви́ден бысть, Чи́стая Де́во: Его́же непреста́нно моли́ поми́ловати нас, в зло́бе живу́щих и трепе́щущих ве́чнующаго муче́ния.

Песнь 9

Ирмос: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии, единому́дренно пе́сньми велича́ем.

Челове́колю́бия Боже́ственнаго сподо́би мя, Отрокови́це, Яже Еди́на Человеколю́бца Бо́га плоть от Тебе́ взаимова́вша, и неизглаго́ланно ро́ждшая, изба́ви мя бу́дущаго пла́мене и му́ки вся́кия, любо́вию Тя сла́вящаго.

Яко кре́пкую засту́пницу, я́ко наде́жду и сте́ну и основа́ние, и покро́в тверд, и непобеди́мо утвержде́ние, и небу́рно приста́нище, и единодержа́вное прибе́жище стяжа́вше Тя, вси спаса́емся, Препе́тая.

Слава: Светороди́тельнице Де́во, души́ моея́ о́блаки отжени́: и пода́й чи́сто узре́ти Влады́чице, спаси́тельную добро́ту, возсия́вшую неизглаго́ланно из Твоея́ Пресвяты́я утро́бы, во свет язы́ков, Препе́тая.

И ны́не: Свет ро́ждшая Боже́ственный, мно́гими страстьми́ наведе́ния помраче́нное се́рдце мое́, и по́мысл очужда́ющих, просвети́, Отрокови́це, ка́плю ми подаю́щи при́сно слез, скве́рны греха́, Де́во, очища́ющую ми.

ГЛАС ТРЕТИЙ

В СУББОТУ38

Канон Пресвятей Богородице

Песнь 1

Ирмос: Во́ды дре́вле, ма́нием Боже́ственным, во Еди́но со́нмище совокупи́вый, и раздели́вый мо́ре изра́ильтеским лю́дем, Сей Бог наш, препросла́влен есть: Тому Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Яко Ма́терь Бо́жию Тя, Ду́хом Боже́ственным, Отца же благоволе́нием я́вльшуюся, ве́рнии, пе́сньми чи́стыми венча́им, Пречи́стая Богоневе́сто: и целу́ем Тя пе́ньми со арха́нгелом, во спасе́ние на́ше.

От ре́бр у́бо Ада́мовых созида́ется Ева, дре́вним Богозда́нием: от утро́бы же Богоро́дицы яви́ся Христо́с, Сый Бог наш, вочелове́чся непрело́жно, вре́менен бысть Преве́чный.

Слава: Иже Евину утро́бу осу́ждь в печа́лех, роди́ти плоды́ в боле́зни, во чре́во Твое́ всели́ся, Де́во Чи́стая, Сый Бог наш, пло́тию яви́ся па́че сло́ва, и прама́терний разреши́ долг.

И ныне: В неча́яния глубину́ впа́дше тягота́ми, приле́жно зове́м, Богороди́тельнице, к Тебе́: Влады́чице, помози́ потопля́емым де́лы лука́вых прегреше́ний, Тя бо Еди́ну и́мамы наде́жду по Бо́зе.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в любви́ Твое́й утверди́ мене́.

Тя проявля́ше жезл Ааро́нов, без напое́ния процве́тший, Богоро́дице Пречи́стая, без се́мене ро́ждши вопло́щшагося Бо́га непреме́нно.

Боже́ственный огнь Тя нося́щу, я́ко свети́льник, Пречи́стая, прови́де проро́к Ду́хом, благоуха́ние нося́щую су́щим в ми́ре и жизнь ве́чную.

Слава: Ко арха́нгелу присту́пим Гаврии́лу, ра́дуйся, веща́юще Де́ве пе́сньми: Тобо́ю бо разреши́тся осужде́ния пра́дедняя кля́тва.

И ныне: Тя, Пресвята́я Богоро́дице, я́ко сте́ну спасе́ния иму́ще гре́шнии спаса́емся: не пре́зри, Влады́чице, и не посрами́ на́ша моле́ния.

Песнь 4

Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Го́ру мы́сленную, доброде́телей сень, Ду́хом дре́вле Авваку́м богови́дно Тя ви́дев, пропове́даше, Пречи́стая: я́ко от ю́га прише́дша от Тебе́ Сло́во плоть прие́мша.

Го́ру Тя вели́ю несеко́мую Дании́л Ду́хом ви́де, не новосеко́му явля́я чистоту́ де́вства Твоего́, Влады́чице: от Нея́же Ка́мень усече́ся, Христо́с Сло́во, ле́сти низлага́я и́дольския.

Слава: Го́ру Тя Дави́д чу́дну и ту́чну прорече́: Единоро́дный бо от Отца́ Сын в Тя благоволи́ Чи́стая, всели́тися воплоща́емь. Тем Ти: ра́дуйся, ду́хом зове́м.

И ныне: Вся блага́я и те́плая засту́пница су́щи гре́шником и смире́нным, Богороди́тельнице Пречи́стая Влады́чице, от бед, и скорбе́й, и грехо́в спаса́й рабы́ Твоя́.

Песнь 5

Ирмос: Яко ви́де Иса́ия обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, аз: прови́дех бо воплоща́ема Бо́га, Све́та невече́рня, и ми́ром влады́чествующа.

Израсти́ жезл Иессе́ев цвет неувяда́емый, Де́ва Мари́я Бо́га безнача́льнаго, без се́мене, от Ду́ха Боже́ственнаго и Отча, ца́рства держа́вная язы́ческая облада́вшаго, на Него́же язы́цы упова́ша.

Князь ми́рный прии́де на престо́л Дави́дов, ца́рствуя из Тебе́, Богоро́дице, Бог воплоща́емь. О чудо! И, брань разре́шь, потче́39 кня́зи моави́тския, и Тебе́, ро́ждшую, Цари́цу показа́.

Слава: Непоро́чную Твою́ добро́ту, от нея́же Христо́с в плоть облече́ся без се́мене, Де́во, Иса́иа явля́я, зове́т вопия́: Госпо́дь сла́вы гряде́т на о́блаце ле́гце и, пре́лести тьму отгоня́я, просвети́т нас.

И ныне: От Ду́ха Свя́та заче́нши Сло́во Единосу́щное Отцу́, Де́во, Сие́ родила́ еси́ во дву естеству́ су́ща, Бо́га соверше́нна и соверше́нна Челове́ка: Его́же ве́рою почита́ем плотско́е явле́ние.

Песнь 6

Ирмос: Бе́здна после́дняя грехо́в обы́де мя, и исчеза́ет дух мой: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Одр Тя пе́сньми прему́дрый40 преднапису́ет, Всепе́тая, на не́мже почи́ Бог воплоща́емь во ипоста́си из Тебе́, и просла́ви Тя, несме́сно ражда́емь.

Бысть Сло́ву я́ко избра́нная, Де́во Всепе́тая, избра́нная оде́жда: я́ко порфи́ру Боже́ственную, из Тебе́ плоть прие́м, воцари́ся, Боголе́пно оде́явся.

Слава: Бысть соедине́ния Боже́ственнаго вмести́лище, Богоневе́сто, зла́та светле́йши: Тобо́ю бо бысть Бог я́ко Челове́к, и бесе́дова челове́ком Бог, я́ко Челове́к.

И ныне: Умертви́ нече́ствующих в Тя, Де́во Всепе́тая, зло́бы е́ресь: я́ко за́вистию та́ют, пресла́вное Твоего́ о́браза ви́дяще подо́бие.

 

Таже: Го́споди поми́луй, трижды. Слава, и ныне

Седален, глас 3:

От теплоты́ ве́ры вопию́ Ти, Богоро́дице, недосто́йными усты́ и скве́рным се́рдцем: спаси́ мя, погруже́ннаго греха́ми, уще́дри умерщвле́ннаго отча́янием, да зову́ Ти, спаса́емь: ра́дуйся, Де́во, христиа́ном помо́щнице.

Песнь 7

Ирмос: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же, благослове́н еси́.

Купина́ и пла́мень сообра́зне совоку́пльшеся, и нетле́нна обоя́ я́вльшеся, Тя, Де́во, я́сно проявля́ют: и́бо родила́ еси́ Бо́га, и де́вствуеши.

Руно́ и роса́ Гедео́ну во измене́нии образу́ема, Рождество́ Твое́ предпи́шут: Ты бо Еди́на Боже́ственное Сло́во но́сиши во чре́ве, я́ко дождь, Де́во Ма́ти.

Слава: Греха́ моего́ огнь па́че гее́нскаго пла́мень мне содева́ет, сий угаси́, Чи́стая, Твое́ю ми́лостию, покая́нием мя ко све́ту наставля́ющи.

И ныне: Твоего́ зра́ка явле́ние, Богоро́дице Пречи́стая, чту́ще я́ко пе́рвый о́браз, Тя засту́пницу при́сно и покро́в благопреме́нен к Бо́гу и́мамы вси.

Песнь 8

Ирмос: Вавило́нская пещь о́троки не опали́, ниже́ Божества́ огнь Де́ву растли́. Тем со о́троки, ве́рнии, возопии́м: благослови́те, дела́ Госпо́дня, Го́спода.

Тя Оте́ц изво́ли, Неве́сту неискусобра́чную, я́ко крин пресве́тлый посреде́ те́рния обре́т, све́тлостию добро́ты блиста́ющую Ду́хом Боже́ственным, Сыну в жили́ще.

Святе́йшую вы́шних сил Де́ву Пренепоро́чную, без разсужде́ния сла́влю я́ве: Творца́ бо сих во чре́ве понесе́, несме́сным соедине́нием плоть прие́мша от Тебе́.

Слава: Де́вство некра́домо, Де́во, сохра́нши, Ма́ти яви́лася еси́ Сы́на Бо́жия вои́стинну, Отца́ благоволе́нием Неве́ста бы́вши и прия́телище сла́вы Ду́ха нетле́нно.

И ныне: Иже естество́м невеще́ственный Бог и неви́димый, про́сто и неизрече́нно па́че естества́ ражда́ется Челове́к от Святы́я Де́вы, сугу́б зримь во Еди́ной ипоста́си, в не́йже ви́димь есть писа́ньми.

Песнь 9

Ирмос: Но́вое чу́до и Боголе́пное: деви́ческую бо дверь затворе́нную я́ве прохо́дит Госпо́дь, наг во вхо́де, и плотоно́сец яви́ся во исхо́де Бог, и пребыва́ет дверь затворе́на. Сию́ неизрече́нно я́ко Богома́терь велича́ем.

Свята́го ко́рене Свят плод: непло́дныя бо, освяще́нныя зако́ном Бо́жиим о́тчиим, неувяда́емую жизнь соверша́ющую Богоро́дица Отрокови́ца процвете́: и ра́дуется Анна, прие́мши отроча́ в ста́рости, Бо́жию Ма́терь, Юже сла́вим.

Но́во Рождество́ и Богови́дно Свята́го Твоего́ и Богоно́снаго чре́ва, Чи́стая: в нем бо написа́ся о́браз в Челове́ка Отчиим пе́рстом, Сын вопло́щься Свят Ду́хом Святы́м. Его́же несме́сно я́ко Бо́га и Челове́ка велича́ем.

Слава: Вопие́т всяк суд на мя: дела́ бо грехо́вных дея́ний вопль содева́ют мне претя́ще, и душа́ вся весть, и́миже препре́на бу́дет, и трепе́щет пла́мене гее́нскаго: от него́же пре́жде конца́ моли́твами Твои́ми изба́ви мя, Влады́чице.

И ныне: По Рождестве́ яви́ся нетле́нна, Чи́стая: неизме́нно бо Зижди́теля всех пло́тию, Богоро́дице, родила́ еси́ Челове́ка па́че естества́, Отча Существа́ не отсту́пльша, и а́бие пребы́сть Де́ва Ду́хом Боже́ственным. Те́мже сла́вяще Тя, песнь соверша́ем.

В НЕДЕЛЮ

Канон молебный ко Пресвятей Богородице

Песнь 1

Ирмос:: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, Сей Бог наш, препросла́влен есть: Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Великоимени́тая Еди́на, Пресвята́я Де́во Мари́е, херуви́м сла́внейшая Дави́дова дщи и добро́та Иа́ковля, Ма́ти Бо́га на́шего: возвели́чися зело́ сла́ва Твоя́, и мы вси Тя ве́рою сла́вим.

Пропе́ншаго Сло́вом не́бо я́ко ко́жу, Твои́ма рука́ма я́ко Челове́ка носи́ла еси́: Сего́ у́бо моли́ неизме́нно, Чи́стая, страсте́й безслове́сия ду́шу мою́ изба́вити, и от вся́кия ско́рби.

Слава: Яже пре́жде всех век, пронарече́нная Де́во, Царя́ сла́вы порфи́ра Пречи́стая: в ню́же обле́клся в после́дняя времена́, покры́ ко́жныя ри́зы Ада́ма пра́отца, и мене́ ны́не покры́й.

И ныне: Тлю творя́щий дре́вле грех ро́ду челове́ческому, Де́во, Христа́ ро́ждши, нестерпи́мый огнь изсуши́л еси́: те́мже страсте́й пото́ки души́ моея́ изсуши́ Твои́ми моли́твами.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

Иже о́гненным влады́чеством Влады́ка и Госпо́дь Твой Сын нарече́ся, Чи́стая: те́мже изба́ви мя, Влады́чице, стра́стных рабо́т Твои́ми моли́твами.

От бу́ри плотски́х страсте́й изба́ви мя, раба́ Твоего́, ско́ро, Пречи́стая, Тишину́ ро́ждши спасе́ния и Исто́чник безстра́стия.

Слава: Све́та незаходи́маго свети́льник светоза́рен бы́вши, Пречи́стая, мир просвети́ла еси́: те́мже заря́ми Твои́ми души́ моея́ разори́ о́блак.

И ныне: Ме́ртва мя су́ща душе́ю, от мно́жества злых страсте́й, оживотвори́, Влады́чице, Яже ро́ждшая живода́вца Христа́ несказа́нно.

Песнь 4

Ирмос: Положи́л еси́ к нам тве́рдую люво́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Прии́де на мя плотска́го мудрова́ния брань, и пленя́ет мою́ ду́шу: но Иже всяк ум преиму́щий Мир ро́ждшая, Твой мир, Влады́чице, пода́ждь ми.

Ми́ро у́мное из чре́ва источи́ла еси́ ми́ру: те́мже от скверн страсте́й ду́шу мою́ свободи́, и да́ждь ми, Пречи́стая, безстра́стия ми́ро Твои́ми моли́твами.

Слава: Ста́мну Тя злату́ю, жи́зни Ма́нну носи́вшую, Богому́жнаго Христа́, я́ве ве́дый молю́: накорми́ ду́шу мою́, та́ющую гла́дом, и пото́ком напой Ду́ха.

И ны́не: Ева у́бо пре́жде неудержа́нно введе́ смерть: Ты же де́вством чи́стым и́стинную Жизнь ввела́ еси́. Те́мже сме́рти мя грехо́вныя изба́ви Твои́ми моли́твами.

Песнь 5

Ирмос: На земли́ неви́димый яви́лся еси́ и челове́ком во́лею сожи́л еси́, Непостижи́мый, и к Тебе́ у́тренююще, воспева́ем Тя, Человеколю́бче.

Избавле́ние нам быв Сын Твой, Де́во, вся от тли изба́ви: те́мже изба́ви мя плотска́го мудрова́ния и страсте́й настоя́ния.

Огне́м Твои́х моли́тв, Богоро́дице, стра́стных помышле́ний те́рние все попали́, Яже клеща́ у́гля, челове́ка очи́стившая.

Слава: Ты Бо́жия еси́ Юница41, нас ра́ди пожре́ннаго человеколю́бно, Боже́ственнаго Юнца́: Его́же Боже́ственною кро́вию се́рдце мое́ очи́сти.

И ныне: Кра́сную пре́жде стяжа́х доброде́телей оде́жду, ея́же совлеко́хся ле́ностию мое́ю: Ты же, Де́во, ны́не мя облецы́ в светле́йшу, Твои́ми моли́твами.

Песнь 6

Ирмос: Бе́здна после́дняя грехо́в обы́де мя, и исчеза́ет дух мой: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Поколеба́ли храм души́ моея́ зло́бы лю́тая кова́рства: но я́ко утверди́вшаго зе́млю на вода́х Христа́ ро́ждшая, Твои́ми моли́твами утверди́.

Разреши́ла еси́ долг земноро́дных, Би́сера многоце́ннаго ро́ждши. Те́мже разреши́, Пречи́стая, скоре́е плени́цы прегреше́ний мои́х, и страсте́й, и скорбе́й.

Слава: Даде́ ве́рным Тя прибе́жище и Боже́ственный покро́в, рожде́йся из ложе́сн Твои́х Бог преблаги́й. Те́мже, Пречи́стая, и мене́ покры́й Твои́ма дла́ньма и соблюди́.

И ныне: Волна́ми жития́ умовре́дно аз, окая́нный, ча́сто погружа́емь и рабо́тами вра́жиими всегда́ обурева́емь, ны́не зову́ Ти: Богоро́дице, помози́ ми.

 

Таже: Го́споди поми́луй, трижды. Слава, и ныне

Седален, глас 3.

Подобен: Божественныя:

Боже́ственная была́ еси́ сень Сло́ва, Еди́на Пречи́стая Де́во Ма́ти, чистото́ю ангелы превозше́дшая: па́че всех бы́вша мя оскверне́на плотски́ми прегреше́нии, очи́сти моли́тв Твои́х Боже́ственными вода́ми, подаю́щи, Чи́стая, ве́лию ми́лость.

Песнь 7

Ирмос: Якоже дре́вле благочести́выя три о́троки ороси́л еси́ в пла́мени халде́йстем, све́тлым Божества́ огне́м и нас озари́, благослове́н еси́, взыва́ющий, Бо́же оте́ц на́ших.

Собо́ри лука́вых бесо́в обыдо́ша мя и плотсти́и со́нми страсте́й: но я́ко кре́пкаго во бране́х Христа́ ро́ждшая, изба́ви мя ча́стых печа́лей и лю́тых напада́ний.

Еди́ный херуви́мским существо́м непристу́пный и стра́шный а́нгельским чино́м, всели́ся в Тя, Чи́стая, и нас обнови́: Имже покажи́ мя, Влады́чице, стра́шна неви́димым враго́м.

Слава: Рай слове́сен, Де́во, Ты была́ еси́, прозя́бший Дре́во жи́зни: Его́же прича́щся, Ада́м сме́ртнаго плода́ изба́вися. Те́мже и мене́ ны́не услади́ и страсте́й изба́ви вкуше́ния.

И ныне: Ка́ла мя страсте́й теле́снаго изба́ви и искуше́ний бесо́вских, Яже Изба́вителя ро́ждшая челове́ком, вы́шняго Селе́ние и Храм освяще́н, Бо́га оте́ц на́ших.

Песнь 8

Ирмос: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: благослови́те, вся дела́ Госпо́дня, Го́спода и превозноси́те во вся ве́ки.

Облаче све́та, свети́ла сотво́ршаго в ми́ре ве́лия, дневно́е же и нощно́е, вся́ко помраче́ние разори́, Твои́ми заря́ми, всех страсте́й и прегреше́ний мои́х: и покажи́ мя Сы́на све́та, Богороди́тельнице.

С Небесе́ соше́дшим Дожде́м во чре́во Твое́, Богоро́дице, ду́шу мою́ и се́рдце мое́ просвети́ и ороси́: и пла́мень угаси́ страсте́й и скорбе́й, да Тя сла́влю те́пле во вся ве́ки.

Слава: Неизглаго́ланно, Чи́стая, Прему́дрость Бо́жию, вся от не су́щих Небе́сное и земно́е естество́ совоку́пльшую, Ты родила́ еси́, Ея́же Сло́вом даждь ми му́дрость и ра́зум, я́ко да воспо́ю я́ве Боже́ственное Твое́ Рождество́.

И ныне: Ороси́тися, Влады́чице ми́ру, Твои́ми моли́твами души́ мое́й и те́лу, вопию́ и молю́ся: и боле́зней грехо́вных и страсте́й зло́бы изба́витися вско́ре: Ты бо еси́ всех челове́ков исцеле́ние.

Песнь 9

Ирмос: На Сина́йстей горе́ ви́дя Тя в купине́ Моисе́й, неопа́льно Огнь Божества́ заче́ншую во чре́ве: Дании́л же Тя ви́де го́ру несеко́мую: жезл прозя́бший, Иса́иа взыва́ше, от ко́рене Дави́дова.

Поста́в Христу́ боготка́н яви́лася еси́, от него́же оде́жду плоть Богонача́льнейшу Ду́ха проугото́ва: облецы́ у́бо мене́ во оде́жду целому́дрия, Чи́стая, Твои́ми моли́твами.

Мы́сленный виногра́де, израсти́вший нам Грозд Боже́ственный, от Него́же напая́емся водо́ю нетле́ния, источи́ моея́ души́ умиле́ние и вино́ очище́ния, Твои́ми мольба́ми.

Слава: Чи́стый и святы́й черто́же, и́мже естество́м Бог челове́ком уневе́сти естество́, молю́ Тя: совокупи́ мя Твоему́ Сы́ну и присво́й Боже́ственною жи́знию, Твои́ми мольба́ми.

И ныне: Па́жить тле́ния челове́ческаго существа́, нетле́ния Исто́чника Христа́ ро́ждши Де́во, претвори́ла еси́: умертви́ ми у́бо опаля́ющее и бу́рное стремле́ние страсте́й, Твои́ми мольба́ми.

В ПОНЕДЕЛЬНИК

Канон Пресвятей Богородице

Песнь 1

Ирмос: Воды́ дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, сей Бог наш, препросла́влен есть: Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

В ле́ности житие́ сконча́в, прибли́жихся к концу́ жития́ моего́: но Сама́, Пречи́стая, поне́ в после́днее вре́мя, даждь ми умиле́ние, молю́ся, я́ко да пла́чуся го́рько о безме́рных мои́х прегреше́ниих.

Оскверни́в безу́мно, ю́же по обра́зу, красоту́ страстьми́ пло́ти моея́, Де́во, Бо́жияго устраши́хся негодова́ния и ужа́снаго о́гненнаго преще́ния: но Сама́ поми́луй мя, прибега́ющаго к Тебе́

Слава: Коле́на преклони́в, окая́нный, Твою́ прошу́ по́мощь, Пресвята́я Де́во: но Ты услы́ши боля́щую ду́шу и належа́щий о́блак печа́ли моея́ разори́ заре́ю Твои́х моли́тв.

И ныне: Напои́тися бога́тно слеза́ми даждь бразда́м стра́стныя моея́ души́ и плод принести́ ми стори́чный, Влады́чице, сподо́би, и се́рдце мое́ вся́каго весе́лия испо́лни, да сла́влю Тя.

Песнь 3

Ирмос: Иже от не су́щих вся приве́дши, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

Слез ту́чу пода́ждь ми, Блага́я Богоро́дице, и си́ми угаси́ страсте́й мои́х пещь, и вся́кия омы́й душе́вныя моя́ скве́рны.

В беззако́ниих оскверни́х благоро́дие души́, Пречи́стая, и трепе́щу истяза́ния, егда́ истя́жет мя о́браза достоя́ния Сло́во.

Слава: Бу́ря прегреше́ний объе́мши мя ны́не, во глубину́ отча́яния сведе́: но даждь ми ру́ку, Чи́стая, и на покая́ние мя наста́ви.

И ныне: Изба́ви гее́нны и вся́каго ина́го преще́ния в час суда́ раба́ Твоего́, Пренепоро́чная, и прича́стника сотвори́ Сы́на и Бо́га Твоего́ Ца́рствию.

Песнь 4

Ирмос: Положи́л еси́ к нам тве́рдую любо́вь Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Приидо́ша, Чи́стая, безме́стных дел во́ды до окая́нныя моея́ души́. Те́мже, по́мыслы бре́ния одержи́мь, вопию́ с боле́знию: не пре́зри мене́, Влады́чице, раба́ Твоего́.

Зве́рие мы́сленни ны́не неми́лостивно обыдо́ша мя, тща́щеся восхи́тити неща́дно смире́нную мою́ ду́шу, Всенепоро́чная: но сим, Пречи́стая, сокруши́ душетле́нныя че́люсти.

Слава: Ми́лостива бу́ди Твоему́ рабу́, Влады́чице, молю́ся, и ча́емаго преще́ния лю́ди Твоя́ исхити́, Всечи́стая, да зове́м Ти, благодаря́ще: сла́ва Тебе́, всех Цари́це.

И ныне: Егда́ в нощи́ Жени́х прии́дет суди́ти земли́, тогда́ во сре́тение Его́ со све́тлою свеще́ю благоволи́, Пречи́стая, изы́ти ми и поклони́тися Того́ прише́ствию.

Песнь 5

Ирмос: На земли́ неви́димый яви́лся еси́, и челове́ком во́лею сожи́л еси́, Непостижи́мый, и к Тебе́ у́тренююще, воспева́ем Тя, Человеколю́бче.

Пси мно́зи одержа́ша мя вои́стину, сонм лука́вых духо́в обы́де мя: но сих Пречи́стая, сове́ты ны́не разори́.

Ров мне ны́не лука́вый изры́в, воврещи́ мя в онь покуша́ется: но Твое́ю десни́цею, Влады́чице, да впаде́т в я́му, ю́же сотвори́.

Слава: Да не я́ростию Сы́на Твоего́ обличе́н бу́ду во вре́мя прише́ствия Его́, ни гне́вом Его́ накажу́ся, Всепе́тая: но спаси́ мя мольба́ми Твои́ми.

И ны́не: Виждь, Чи́стая, не́мощь, виждь смире́ние окая́нныя моея́ души́, и безпло́тных враг воста́ние: и сих вре́да изба́ви мя.

Песнь 6

Ирмос: Бе́здна после́дняя грехо́в обы́де мя, и исчеза́ет дух мой: но простры́й Влады́ко высо́кую Твою́ мы́шцу, я́ко Петра́ мя, Упра́вителю, спаси́.

Ма́нием всех Зижди́теля, егда́ хо́щет душа́ моя́ разлучи́тися от пло́ти, Всенепоро́чная, свободи́ мя руки́ ненави́дящих мя, Богоро́дице Всепе́тая.

Изсуши́ му́тныя ре́ки, Богороди́тельнице, лука́вых мои́х дея́ний струя́ми умиле́ния, и напра́ви к воде́ осла́бы в день суда́.

Слава: Ве́си мою́ не́мощь душе́вную и ума́ моего́ некре́пость, Пречи́стая, и пло́ти неможе́ние. Те́мже спаси́ раба́ Твоего́: Тя бо стяжа́х засту́пницу непобеди́мую.

И ныне: Струи́ мне слез духо́вных пода́ждь, Отрокови́це, и́миже измы́ю ти́ну прегреше́ний мои́х и страсте́й молву́, Пренепоро́чная, и скве́рны теле́сныя.

 

Таже: Го́споди поми́луй, трижды, слава, и ныне

Седален, глас 3.

Подобен: Красоте девства:

Ми́лостиваго во чре́ве носи́вшая, прибега́ющаго под кров Твой и прося́ща от души́ Боже́ственную Твою́ по́мощь, Влады́чице, уще́дри и ми́лости сподо́би, егда́ предста́нем Влады́це тва́ри, изба́ви, Чи́стая, огня́ ве́чнаго и вся́каго осужде́ния.

Песнь 7

Ирмос: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же, благослове́н еси́.

Излия́шася на мя, Чи́стая, прегреше́ний во́ды до души́ моея́, бе́здна же обы́де мя после́дняя: но сего́ изми́ треволне́ния.

Окропи́ мя, Чи́стая, кро́вию из ребр Рождества́ Твоего́, мно́жеством ми́лости Твоея́: омы́й же мя сле́зными струя́ми и очи́сти мя от вся́кия скве́рны.

Слава: Сокруше́ние мое́й души́, смире́ние же се́рдцу даждь, Всечи́стая, я́ко да вся́каго изба́влюся кова́рства, при́сно мя неща́дно ловя́щих.

И ныне: Яко ми́лостива, Ма́ти Бо́жия, рабы́ Твоя́, Влады́чице, ми́лости сподо́би, и́же ве́рою Сы́ну Твоему́ вопию́щия: отце́в Бо́же, благослове́н еси́.

Песнь 8

Ирмос: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: благослови́те, вся дела́ Госпо́дня, Го́спода и превозноси́те во вся ве́ки.

Стре́лы стрельца́ сокруши́, Чи́стая, держа́вою Сы́на Твоего́, и сего́ непра́вда ны́не да сни́дет на верх его́, да воспою́: вся дела́ Госпо́дня Го́спода по́йте и превозноси́те Его́ во ве́ки.

Све́том Твои́м озари́ Отрокови́це, омраче́нное мое́ се́рдце, и ору́жием све́та све́ту две́ри отве́рзи ми зову́щу: благослови́те вся дела́ Госпо́дня, Го́спода, по́йте и превозноси́те Его́ во ве́ки.

Слава: Усну́в в сме́рти, лежу́ во гро́бе отча́яния, но Сама́ мя возста́ви, Де́во, и бо́дренно пе́ти сподо́би: благослови́те, вся дела́ Госпо́дня, Го́спода, по́йте и превозноси́те Его́ во ве́ки.

И ныне: Не преста́й, Чи́стая, моля́щи о чту́щих Тя во умиле́нии, изба́витися сете́й диа́вольских, Сы́ну Твоему́ вопию́щих: благослови́те, вся дела́ Госпо́дня, Го́спода, по́йте и превозноси́те Его́ во ве́ки.

Песнь 9

Ирмос: В зако́не се́ни и писа́ний о́браз ви́дим, ве́рнии: всяк му́жеский пол, ложесна́ разверза́я, свят Бо́гу: тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Обурева́ет страсте́й волне́ние и смуще́ние скве́рных помышле́ний ду́шу мою́, и лука́вых челове́к бу́ря при́сно мя смуща́ет: но я́ко человеколюби́ва, Де́во, одержи́мыя ну́жды вско́ре мя изба́ви.

Душе́ смире́нная, отступи́ лука́вых твои́х дея́ний и преста́ни от зло́бы и е́же прогне́вати Бо́га, восприими́ же усе́рдно за́поведи Его́: Богоро́дицу бо и́маши, пути́ твоя́ направля́ющую.

Слава: Яко ро́ждшая всех Го́спода, страсте́й мя свободи́ и лю́тых грехо́в, и всего́ мя де́лы благи́ми за мно́гое милосе́рдие Твое́ обогати́: да ра́дуяся любо́вию велича́ю Тя, Всенепоро́чная.

И ныне: Приближа́ется душе́ коне́ц, при две́рех суди́ще, отступи́ дел сту́дных и приими́ся за благо́е житие́: и́маши бо побо́рницу Богоро́дицу, избавля́ющую тя от вся́каго озлобле́ния.

ВО ВТОРНИК

Канон Пресвятей Богородице

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, сей Бог наш, препросла́влен есть: Тому Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Яко исто́чник милосе́рдия и ми́лости ве́дый Тя, Бо́жию Ма́терь, присту́пль молю́ся Твое́й бла́гости, да́ти ми умиле́ние, я́ко да се́тую и пла́чуся прегреше́ний мои́х, Всечи́стая Влады́чице.

Душе́вных ми слез даждь ка́плю, омыва́ющу скве́рну всю мои́х дея́ний и лука́вая помышле́ния, и очища́ющую души́ моея́ нечистоту́, и це́рковь творя́щую мя Бо́жия Ду́ха.

Слава: Обурева́емь волно́ю и треволне́нием мои́х прегреше́ний, и лю́те всегда́ борца́ рабо́тами потопля́емь, и во глубину́ поги́бели ны́не: отпуще́н, вопию́ Ти, Пренепоро́чная: спаси́ мя.

И ныне: Милосе́рдия ра́ди ми́лости, Влады́чице всех, поми́луй окая́нную мою́ ду́шу и огня́ изба́ви мя ве́чнующаго, и бесо́вскаго напа́дания, под кров Твой, Богоро́дице ны́не прибега́ющего.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

Све́том Боже́ственным озари́, Всепе́тая, омраче́нный ум мой злы́ми по́мыслы: Ты бо Свет родила́ еси́, возсия́вший от Отца присносу́щный.

Запе́н души́ мое́й стопы́, и́же пра́ведных враг, к земли́ прирази́: но Твое́ю десни́цею, Влады́чице Чи́стая, возста́ви мя.

Слава: Мытаре́выми гла́сы, окая́нный аз зову́ Ти: очи́сти мя, Влады́чице, и прегреше́ний оставле́ние, Твое́ю моли́твою, пода́ждь рабу́ Твоему́.

И ныне: Исцели́ я́звы душе́вныя, и многому́тное помышле́ний волне́ние, Влады́чице, утиши́: и ми́рное ми устрое́ние даждь.

Песнь 4

Ирмос: Положи́л еси́ к нам тве́рдую любо́вь Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Плоть сластьми́ и сладостра́стием оскверни́х, и души́ моея́ чистоту́ скве́рными мы́сльми окаля́х, и ум помрачи́х, не пре́зри у́бо, Влады́чице, раба́ Твоего́.

Избавле́ние ми бу́ди, и прибе́жище и держа́ва, рог же спасе́ния, Чи́стая, и засту́пница, вся́кия мя ско́рби избавля́ющи всегда́, и враги́ моя́ вся посрамля́ющи.

Слава: Мно́гими напа́стьми ны́не одержи́мь есмь окая́нный, и бесо́вскими кова́рствы при́сно погружа́емь, прибега́ю Ти ны́не: те́плою Твое́ю моли́твою спаси́ мя, раба́ Твоего́.

И ныне: Нощь мя несветла́ страсте́й одержи́т окая́ннаго: но све́том Твои́м, Блага́я, души́ моея́ о́блаки разжени́, и к све́ту наста́ви повеле́ний Бо́жиих, Всенепоро́чная.

Песнь 5

Ирмос: Яко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, аз: прови́дех бо воплоща́ема Бо́га, Све́та невече́рня, и ми́ром влады́чествующа.

Вре́мя живота́ моего́ я́ко дым исчезе́, и к сме́ртным две́рем прибли́жихся, и ужаса́юся бесо́вскаго напада́ния: дела́ бо тех де́ях всегда́: Всенепоро́чная, уще́дри и спаси́ мя.

Изсуша́ющи, Де́во, зол мои́х бе́здну, пода́ждь ми ре́ки слез, и угаси́ весь страсте́й мои́х пла́мень, Отрокови́це, и сподо́би изба́витися огня́ и про́чих муче́ний в день су́дный.

Слава: Боле́вшую ду́шу мою́ грехи́, Пречи́стая, исцели́ Твои́м ми́лованием, и сподо́би мя твори́ти во смире́нии Сы́на Твоего́ повеле́ния при́сно, я́ко да восприиму́ Сего́ бла́гость.

И ныне: Овдове́вшая, Сы́не Мой, неве́стныя оде́жды, Боже́ственная Це́рковь Твоя́, от ребр Святы́я кро́ве оде́яся. Аз же боле́зную, вся боле́зни Твоя́ зря́щи на Кресте́, яже Сло́ва́ Ма́ти рыда́ющи глаго́лаше.

Песнь 6

Ирмос: Бе́здна после́дняя грехо́в обы́де мя, и исчеза́ет дух мой: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

Вели́кое Тя Бо́жий Сын гре́шником прибе́жище показа́, вопло́щся, Богоневе́сто, от чи́стых крове́й Твои́х: те́мже ми́лостива Твои́м рабо́м бу́ди.

Просвети́ заре́ю Твое́ю, Блага́я, омраче́нныя се́рдца моего́ о́чи по́мыслы неподо́бными: и све́ту сы́на сотвори́, и в ме́сто све́тло мя всели́.

Слава: Во́лны стра́стных помышле́ний всегда́ мя смуща́ют, Пречи́стая, лука́вых же духо́в бу́ря погружа́ет: но утверди́ мя на ка́мени безстра́стия.

И ныне: Усну́х к сме́рти душе́вней, и во гро́бе лежу́ отча́яния: но даждь ми ру́ку и воздви́гни, молю́ся, к покая́нию жи́зни наставля́ющи мя.

 

Таже: Го́споди поми́луй, трижды. Слава, и ныне

Седален, глас 3:

Жезл си́лы стяжа́вшии, Крест Сы́на Твоего́, Богоро́дице, тем низлага́ем враго́в шата́ния, любо́вию Тя непреста́нно велича́юще.

Песнь 7

Ирмос: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пе́щи: отце́в Бо́же, благослове́н еси́.

Кре́постию препоя́ши, Чи́стая, ду́шу мою́, изнемо́гшую грехи́, и вопию́ща Сы́ну Твоему́ спаси́ мя: оте́ц на́ших Бо́же, благослове́н еси́.

Сме́ртнаго часа́ убоя́вся, безсме́ртнаго ра́ди и ве́чнаго муче́ния, Тебе́ припа́даю: спаси́ мя, Отрокови́це, от се́ти ловя́щих, Богороди́тельнице.

Слава: Яже невмести́маго Бо́га во чре́во вмести́вшая, мно́гими прегреше́нии утесня́емый ум мой, Богоро́дице, свободи́ сих осужде́ния.

И ныне: Род челове́ческий Тя мо́лит, Богоро́дице: Влады́чице, поми́луй рабы́ Твоя́, ве́рою Сы́ну Твоему́ вопию́щия: оте́ц на́ших Бо́же, благослове́н еси́.

Песнь 8

Ирмос: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: благослови́те, вся дела́ Госпо́дня, Го́спода и превозноси́те во вся ве́ки.

Позави́дев блу́дному вои́стину, и житие́ мое́ все сконча́в во гресе́х, ны́не зову́: согреши́х Ти, сотвори́ мя, Отрокови́це, я́ко еди́наго от нае́мник Сы́на и Зижди́теля Твоего́, да Тя сла́влю во вся ве́ки.

Напо́лнися зол душа́ моя́, и привмене́н бых со все́ми, в ров низходя́щими: но Ты мя, Богоро́дице Де́во, изведи́ из я́мы стра́стныя, и от бре́ния тиме́нна зол мои́х.

Слава: Моли́ся Христу́, ро́ждшая Сего́ от святы́х Твои́х чресл, Богоро́дице, мно́гих ми прегреше́ний да́ти проще́ние, да пою́: вся дела́ Госпо́дня, Го́спода по́йте, и превозноси́те Его́ во ве́ки.

И ныне: Егда́ Бо́жиим повеле́нием хо́щет душа́ моя́ от жития́ сего́ отыти́, от се́ти ловя́щих исхити́, Пречи́стая, Тебе́ вопию́щих: вся дела́ Госпо́дня, Го́спода по́йте и превозноси́те Его во ве́ки.

Песнь 9

Ирмос: В зако́не се́ни и писа́ний о́браз ви́дим, ве́рнии: всяк му́жеский пол, ложесна́ разверза́я, свят Бо́гу: тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Род челове́ческий Всенепоро́чная, Твое́ю непобеди́мою моли́твою ны́не обога́щься, вопие́т день и нощь: не преста́й всегда́ моля́щися Творцу́ и Сы́ну Твоему́, уще́дрити пою́щия Тя.

Стре́лы страсте́й безме́стных ду́шу мою́ уязви́ша бесо́вскими прило́ги, сопроти́вными стрела́ми помышле́ний всегда́ ум мой смуща́ют: те́мже исцели́, Отрокови́це, неисце́льныя моя́ я́звы.

Слава: Отыми́, Чи́стая Богоневе́сто, от мене́ борю́щих враг ра́ны вско́ре, воста́ния бо тех и мно́гаго лука́вства, и на́глости ктому́ не терплю́, окая́нный: но потщи́ся изба́вити мя.

И ныне: Ты неможе́ние ве́си смире́ннаго моего́ телесе́, я́звы души́ моея́, се́рдца моего́ стена́ние и ума́ моего́ заблужде́ние и пре́лести: те́мже Твои́м милосе́рдием обою́ду даждь исцеле́ние.

В СРЕДУ

Канон молебный к Пресвятей Богородице

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вши и раздели́вый мо́ре изра́ильтеским лю́дем, Сей Бог наш, препросла́влен есть: Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Стена́ние ми у́бо пода́ждь, Богоро́дице, сокруше́нное, и сле́зу душе́вную, я́ко да мои́х мно́гих прегреше́ний пла́чуся и со́вести неисправле́ния, Отрокови́це, и умолю́ милосе́рдие Твое́.

По́мыслы пополза́яся, и впада́я в бе́здну поги́бели, Твое́, Де́во, ны́не молю́ заступле́ние: утверди́ непоколеби́мо неможе́ние ума́ моего́ на ка́мени тве́рдем Бо́жиих за́поведей.

Слава: Смоко́вницу ношу́ безпло́дия и бою́ся посече́ния и при, да не во огнь по́слет мя Зижди́тель мой Бог. Влады́чице, предвари́вши, покая́ния мя де́лы плодоно́сна сотвори́, да сла́влю Тя.

И ныне: Яко непоро́чен Храм Царе́в, страстьми́ безме́стными оскве́рншееся се́рдце мое́, молю́ся, очи́сти, Пречи́стая, целому́дрием же и чистым житие́м, и де́лы обогати́, Богоблагода́тная.

Песнь3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

Борю́щии и оскорбля́ющии мя мно́зи суть, и несть осла́бы обрести́ избавле́ния от обыше́дших мя: но не пре́зри, Чи́стая, моле́ния моего́.

Отягче́н мно́жеством злых и мно́гими прегреше́нии мои́ми, к высоте́ небе́сней воззре́ти не могу́, но Ты оставле́ние ми пода́ждь, Пречи́стая.

Слава: Расто́ргнути смире́нную мою́ ду́шу змий лука́вый по вся дни покуша́ется: но сему́ сокруши́, Богоро́дице, душетле́нныя зу́бы.

И ныне: Изба́ви мя, Богоро́дице, вся́кия одержа́щия беды́ и грехо́вныя бу́ри, раба́ Твоего́: и к спаси́тельному мя приста́нищу напра́ви Твои́ми моли́твами.

Песнь 4

Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Трепе́щу, помышля́я грехо́в мои́х пучи́ну и сопроти́вных помышле́ний лю́тое и вели́кое волне́ние: но Ты окорми́ и к тишине́ напра́ви мя, Пречи́стая.

Недове́дение тя́жкое ду́шу мою́ ны́не пости́же, неразу́мие и забве́ние злых, я́же в житии́ соде́ях: но Ты у́бо, Пречи́стая, на покая́ние соде́янных мно́ю наведи́ мя.

Слава: Огнь страсте́й сле́зными струя́ми угаси́, и удавля́ющее мой ум жите́йское треволне́ние, и те́рние попали́ огне́м Ду́ха, Богороди́тельнице: Ты бо покро́в ми еси́ и похвала́.

И ныне: Молво́ю напа́стей и треволне́ний весь потопля́емь есмь лука́выми по́мыслы, и во глубину́ отча́яния при́сно низвлеко́мь, вопию́ Ти: Влады́чице, спаси́ мя, раба́ Твоего́.

Песнь 5

Ирмос: Яко ви́де Иса́иа обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, аз: прови́дех бо воплоща́ема Бо́га, Све́та невече́рня, и ми́ром влады́чествующа.

Души́ моея́ боле́зни и пло́ти неможе́ние ве́си, Влады́чице, и ума́ моего́ гни́лость и непостоя́тельное. Те́мже сподо́би мя ми́лости и благода́ти Твоея́, да Тя сла́влю, спаса́емь кро́вом Твои́м.

Не затвори́ ми милосе́рдия щедро́т Твои́х, Влады́чице Всенепоро́чная: но во умиле́нии приходя́щему к Тебе́ пода́ждь Твоя́ ми́лости, и лю́тых премене́ние и проще́ние, я́ко да благода́рно пою́ вели́чия Твоя́.

Слава: Умно́жишася, Де́во, ненави́дящии мя всу́е и оскорбля́ющии ны́не, па́че влас главы́ моея́, Чи́стая, и́щуще расто́ргнути, и снедь сотвори́ти себе́: сих у́бо, студа́ испо́лнши, возврати́.

И ныне: Яже ми́рови мир и спасе́ние всем пода́вшая, я́ко Боже́ственный Мир поро́ждши, Де́во, брань страсте́й души́ моея́ и те́ла, Чи́стая, умири́ стра́хом и любо́вию Спа́са Христа́.

Песнь 6

Ирмос: Бе́здна после́дняя грехо́в обы́де мя, и исчеза́ет дух мой: но простры́й Влады́ко высо́кую Твою́ мы́шцу, я́ко Петра́ мя, Упра́вителю, спаси́.

В де́ле и сло́ве, и дея́нии несть зле пожи́вша на земли́, я́коже аз: те́мже Твоего́ прошу́, Влады́чице, человеколю́бия улучи́ти ми́лости.

Дея́ния злых прегреше́ний печа́ли ражда́ют всем, те́мже го́рькими напа́стьми одержи́ми есмы́ ны́не: помози́ нам, Яже Еди́на христиа́ном спасе́ние.

Слава: И ражда́еши, и чиста́ по Рождестве́ яви́лася еси́, Богоро́дице Де́во. Те́мже моли́ Твое́ Рождество́ при́сно, да изба́вимся от вся́каго вре́да вражия Твои́ раби́.

И ныне: Моли́твами пречи́стыя Ма́тере Твоея́, и всех проро́к и му́ченик, и свяще́нных уче́ни́к, Сло́ве Бо́жий, пода́ждь нам мир и очище́ние прегреше́ний.

 

Таже: Го́споди поми́луй, трижды. Слава, и ны́не

Седален, глас 3:

Все житие́ мое́ в ле́ности мно́зе преидо́х, Пречи́стая, и ны́не прибли́жихся ко исхо́ду моего́ вре́мене, и устраши́хся от враго́в мои́х, да не расто́ргнут ду́шу мою́, Всенепоро́чная, и в поги́бели мя глубину́ отпу́стят: но уще́дри раба́ Твоего́, Де́во, и изба́ви мя сих озлобле́ния.

Песнь 7

Ирмос: Якоже дре́вле благочести́выя три о́троки ороси́л еси́ в пла́мени халде́йстем, све́тлым Божества́ огне́м и нас озари́, благослове́н еси́, взыва́ющия, Бо́же оте́ц на́ших.

Тебе́, Ма́терь Бо́жию Чи́стую и Непоро́чную, оскверне́нный те́лом и душе́ю и окаля́нный дея́ньми нечи́стыми, молю́, Влады́чице, наде́яся на ми́лость Твою́: уще́дри мя, Пречи́стая.

Прегреше́ний мои́х мно́жество и злых испыта́ние, недоуме́нием мя препира́ет зело́, и во отча́яния влече́т мя глуби́ну́: но Ты, Пречи́стая Влады́чице, спаси́ мя погиба́ющаго и лю́те потопля́ема.

Слава: Мно́жеством щедро́т Твоея́ бла́гости, грехо́в на́ших мно́жество пре́зри, Бла́же, и благопреме́нен бу́ди немо́лчно зову́щим: благослове́н еси́, Го́споди Бо́же оте́ц на́ших.

И ныне: От бре́ния страсте́й и глубины́ скорбе́й, и напа́стей жите́йских привлецы́ нас к безстра́стию, Чи́стая, и ра́достному весе́лию, Благослове́нная, зову́щих: Ты еси́ Еди́на Богоблагода́тная.

Песнь 8

Ирмос: Веще́ственнаго огня́ пла́мень невеще́ственным увяди́ша Богозри́мии о́троцы и поя́ху: благослови́те, вся дела́ Госпо́дня, Го́спода.

Сласте́й го́ресть чу́вства вся теле́сная проше́дши, ду́шу мою́ безме́стно окаля́ет и в смерть влече́т: Влады́чице ми́ра, бу́ди ми спасе́ние.

На Тя ду́шу и се́рдце, и те́ло возложих: не и́мам бо ины́я наде́жды, ра́зве Тебе́, Влады́чице, е́юже получу́ ми́лости. Те́мже ми пода́ждь бога́тую Твою́ ми́лость и благода́ть.

Слава: Змий мя я́дом приползну́в, плотско́ю сла́стию окая́нную ду́шу мою́ лю́те умори́: но оживи́ сию́ сопроти́вными лечба́ми, Чи́стая, Твои́ми моли́твами.

И ныне: Яже Бо́га и Спа́са ро́ждшая, Миронача́льника, Того́ моли́ мир ми́рови посла́ти вско́ре, я́ко да в ми́ре Того́ славосло́вим.

Песнь 9

Ирмос: Тебе́ Неопали́мую Купину́, и Святу́ю Де́ву, Ма́терь Све́та, и Богоро́дицу, наде́жду всех нас велича́ем.

Скве́рну стра́стных помышле́ний моего́ ума́ очи́сти, Чи́стая, в безстра́стия ри́зу све́тлую одева́ющи мя.

Отве́рзи ми, Де́во, Боже́ственныя вхо́ды покая́ния, вхо́ды страсте́й и сласте́й мои́х загражда́ющи и возбраня́ющи си́лою Твое́ю.

Слава: Услы́ши глас стена́ния моего́ и глас пла́ча моего́, и пода́ждь очище́ние и спасе́ние окая́нней мое́й души́, Де́во Всенепоро́чная.

И ныне: Ви́де Дании́л проро́к Твое́ Рождество́, Де́во, ви́де реснотивно42 вои́стинну, и́же на престо́ле ви́де Его́же де́ньми Ве́тхаго возгласи́.

В ЧЕТВЕРТОК

Канон Пресвятей Богородице

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, Сей Бог наш, препросла́влен есть: Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Присе́нную Тя го́ру, ю́же прови́де Ду́хом Авваку́м проро́к, молю́, Пречи́стая, осени́ти мя, страстьми́ озное́ннаго, и от се́ни сме́ртныя лю́тых бед изба́витися.

Окропле́нием Боже́ственныя кро́ве, излия́нныя от Боже́ственных ре́бр, Чи́стая, Сы́на Твоего́, моего́ се́рдца омы́й ра́ны, я́ко да велича́ю Тя и по до́лгу сла́влю, Присноблаже́нную и Пренепоро́чную.

Слава: Равноде́тельное Отцу́ родила́ еси́ Сло́во, обожи́вшее челове́ков существо́: Того́ моли́ недоуме́ннаго мя и изнемо́гшаго вра́жиими кова́рствы Боже́ственныя уте́хи сподо́бити, Чи́стая.

И ныне: Очище́ние ми пода́ждь прегреше́ний Боже́ственными Твои́ми моли́твами, Де́во, си́льную бо и́маши моли́тву, Влады́чице: и Тебе́ пою́щия изба́ви от прегреше́ний и страсте́й, и скорбе́й, и обстоя́ния.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

В ми́лости Неизрече́ннаго и в щедро́тах су́ща Бога́таго, ми́лостива су́щи, Пречи́стая, помоли́ уще́дрити ны озло́бленныя.

Храм су́щи вся́ческих Творца́, помоли́ся всели́тися в мя Уте́шителю, бы́вша мя верте́п душетле́нных разбо́йников, Чи́стая Де́во.

Слава: Ма́нием вся нося́щаго Бо́жески, на руку́ я́ко носи́ла еси́, Богоро́дице, при́зри на мя и изба́ви мя, е́же к страсте́м зре́ния неподо́бнаго.

И ныне: Милосе́рдие ми́лости Твоея́, молю́, отве́рзи ми, Богоро́дице Пречи́стая, и те́плая ми яви́ся в напа́стех помо́щница и спасе́ние.

Песнь 4

Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Ра́ны, Христе́, и заколе́ние, во́лею я́ко Бог претерпе́вый, ура́ненную мою́ ду́шу разбо́йми бесо́вских озлобле́ний моли́твами Тебе́ Ро́ждшия исцели́, Еди́не многоми́лостиве.

Де́ло Твое́ю руку́, Зижди́телю есмь и творе́ние: зло́ба же змии́на сластьми́ жития́ сокруши́ мя. Те́мже, Христе́, обнови́ мя, Тебе́ Ро́ждшия, Слове, мольба́ми.

Слава: Сло́во Отчее па́че сло́ва родила́ еси́, реша́щее вся́каго безслове́сия челове́ки: Его́же приле́жно моли́ безслове́сными мя сластьми́ порабоще́нна свободи́ти, Еди́на Присноде́во.

И ныне: Исцеле́ние нам от дла́ни то́чиши всегда́, Всеосвяще́нная се́не, вся све́та су́щи испо́лнена, всем источа́ющи ми́ро благово́нно, Всечи́стая Богоневе́сто.

Песнь 5

Ирмос: Яко ви́де Иса́ия обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, аз: прови́дех бо воплоща́ема Бо́га, Све́та невече́рня, и ми́ром влады́чествующа.

Пло́ти моея́ боле́зни, и душе́вную ми печа́ль претвори́ и уны́ния о́блаки отжени́, Де́во, Све́та о́блаче, и здра́вие и боле́зней премене́ние даждь ми пою́щему и любо́вию Тя славя́щему.

Тя хода́таицу и моли́твенницу ко из Тебе́ Ро́ждшемуся ны́не предлага́ю, вся́каго греха́ испо́лнен сый: Де́во, бу́ди ми жития́ исправле́ние и наста́вница к стези́ Боже́ственнаго Ра́зума.

Слава: Освяти́ ум мой, Де́во, и ду́шу просвети́, и Боже́ственныя сла́вы прича́стника сотвори́: се бо зол напо́лнихся, и вся́кими порабо́тихся сластьми́, и оскверне́ну приношу́ со́весть.

И ныне: Виногра́д Боже́ственный, Яже кра́сный Грозд возрасти́вшая, Иже душа́м даю́щий питие́ незави́стное: Де́во Свята́я Отрокови́це, Ты мя напо́й сла́дости Его́ и сласте́й пия́нство отыми́, и спаси́ мя.

Песнь 6

Ирмос: Иже в концы́ веко́в доше́дшия, Человеколю́бче, и треволне́ньми напа́стей поги́бнути бе́дствующия, вопию́щия не пре́зри: спаси́, Спа́се, я́коже спасл еси́ от зве́ря проро́ка.

Фарисе́я, вознесе́ннаго умо́м, превзыдо́х, возноша́емь при́сно, и про́пастем соедини́хся безме́рных прегреше́ний: смири́вшагося лю́те, Еди́на Чи́стая, изба́ви и уще́дри мя.

Иже пречу́дное Зача́тие име́вши и Рождество́, Твоя́ ми́лости на мне окая́ннем ны́не удиви́: и́бо в беззако́ниих зача́хся, и роди́хся, и сластьми́ поработи́хся.

Слава: Рыда́ю и пла́чу, и стеню́, егда́ суди́ще стра́шное воспомяну́, лука́вая бо дела́ стяжа́х: но Ты ми, неискусому́жная Де́во, Ма́ти Бо́жия, в час стра́шный предста́ни.

И ныне: Разуме́ти и глаго́лати не мо́жет всяк ум, Де́во Чи́стая, соде́янное на Тебе́ чу́до стра́нное и пресла́вное: ка́ко родила́ еси́, и пребыва́еши па́ки чиста́? Бог есть Рожде́йся по Существу́.

 

Таже: Го́споди поми́луй, трижды. Слава, и ныне

Седален, глас 3:

Неискусобра́чная Чи́стая Ма́ти Твоя́, Христе́, зря́щи Тя ме́ртва, пове́шена на Древе́, ма́терски рыда́ющи, глаго́лаше: что Ти воздаде́ евре́йский беззако́нный собо́р и безблагода́тный, и́же мно́гих и вели́ких Твои́х даров наслади́выйся, Сы́не Мой? Пою Твое́ Боже́ственное сни́тие.

Песнь 7

Ирмос: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

От дел спасе́ния несть ми, Влады́чице, грехи́ бо прилага́ю ко грехо́м и к зло́бе зло́бу: моли́твою у́бо Твое́ю Чи́стая, предвари́ и спаси́ мя.

Суд при две́рех, и суди́ще гото́во, гото́вися, смире́нная душе́, и возопи́й: егда́ су́диши ми, Сло́ве, не осуди́ мене́, моли́твами Ро́ждшия Тя.

Слава: Объе́м грехо́вныя плоды́, умертви́хся, и приноша́ю ду́шу непло́дну, и зову́ Ти, Пречи́стая: плодоно́сна мя покажи́, Яже Плодо́м Твои́м тлю потре́бльшая.

И ныне: О стра́ннаго та́инства! О ужа́снаго ра́зума! Ка́ко Бог на земли́ яви́ся я́ко челове́к? Яко весть, я́ко хо́щет, я́ко благоволи́т, и де́йствует, я́коже и хо́щет.

Песнь 8

Ирмос: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: благослови́те, вся дела́ Госпо́дня, Го́спода и превозноси́те во вся ве́ки.

Вся я́ко до́бра, я́ко бли́жняя всех Царю́ бы́вши, Богоро́дице, напо́лни мя благи́х дел, в зло́бе пожи́вшаго и в ле́ности все житие́ сконча́вшаго, я́ко да Тя сла́влю во вся ве́ки.

Ки́товы утро́бы, я́коже изба́вил еси́ дре́вле проро́ка пресла́вно, Бо́жий Сло́ве: та́ко изба́ви, Спа́се, ны́не ду́шу мою́, попо́лзшуюся во глубину́ поги́бели, име́я моля́щую Тя неискусобра́чно ро́ждшую Тя Де́ву.

Слава: Кра́сною оде́ждею облече́на обре́тше мя зло́бы де́латели, и сея́ совлеко́ша мя: но Сама́ мя, Богороди́тельнице Де́во, Боже́ственными оде́ждами уясни́ покая́нием, моли́твами Твои́ми, Богоро́дице.

И ны́не: Его́же трепе́щет вся́ко созда́ние, Сего́, Чи́стая, на руку́ име́ла еси́, за милосе́рдие нас ра́ди Младе́нца бы́вша, Сего́ моли́ спасти́ вся ве́рою зову́щия: Тя превозно́сим, Пречи́стая, во вся ве́ки.

Песнь 9

Ирмос: В Зако́не се́ни и Писа́ний о́браз ви́дим, ве́рнии: всяк му́жеский пол, ложесна́ разверза́я, свят Бо́гу: тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Истле́вша умо́м и душе́ю и со́весть зло́бою оскверни́вша, и на́га всех благи́х я́вльшагося, Де́во нетле́нная, непоро́чная, не пре́зри мене́, но де́лы благоче́стия украси́.

Напо́лнихся зол, напо́лнихся помышле́ний, отчужда́ющих мя от Тебе́ Человеколю́бца, сего́ ра́ди стеню́ и вопию́: ка́ющася приими́ мя и не отри́ни мене́ Тебе́ Ро́ждшия мольба́ми, Благода́телю многоми́лостиве.

Слава: Да изба́влюся Твои́ми моли́твами, Всенепоро́чная Отрокови́це, от вся́каго гне́ва и страсте́й смертоно́сных лю́таго гее́нскаго огня́, от челове́к непра́ведных и от враг злых, прибеги́й в кров Твой и зовы́й Тя на по́мощь.

И ныне: Красну́ душе́ю, красну́ помышле́ньми, красну́ те́лом обре́т Тя Прекра́сный, от чресл Твои́х деви́ческих воплоти́ся, я́коже весть, безобра́зие на́ше украша́я, Де́во, Его́же моли́ спасти́ся нам.

В ПЯТОК

Канон Пресвятей Богородице

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, Сей Бог наш, препросла́влен есть: Тому Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Спасе́нию Нача́льника и Жизнода́вца ро́ждшая па́че смы́сла всего́, соу́з разреши́ла еси́ осужде́ния Евы прама́тере. Те́мже тварь вся блажи́т Тя, Богороди́тельнице Чи́стая.

Озло́бленнаго лю́тыми боле́зньми, душе́ю и те́лом, Пресвята́я Де́во, исхити́ от глуби́ны неча́яния, все́х ну́ждных избавля́ющи мя: Ты бо еси́, Пречи́стая, милосе́рдия исто́чник.

Слава: Совлеко́хся оде́жды весе́лия, в скорбь впад и боле́знь, и лю́те уязви́хся отвсю́ду: предвари́ и изба́ви мя от одержа́щия пре́лести: Ты бо ми еси́, Влады́чице, прибе́жище и наде́жда.

И ны́не: Предста́тельницу Тя тве́рду стяжа́в, Богоневе́сто, ко Твоему́ покро́ву притека́ю, моля́ся: не пре́зри мя, Твоего́ раба́, мно́гими страстьми́ и боле́зньми и скорбьми́ отягче́на, но моли́твами Твои́ми исцели́, Ма́ти Бо́жия.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

В недоуме́нии и ско́рби боле́зненне есмь, окая́нный, во след себе́ смерть зря: те́мже, Пречи́стая, Твое́ю моли́твою спаси́ мя.

Все́ житие́, растле́нно злы́ми и блу́дными дея́нии, клеве́щет на мя и отчая́нием мя погружа́ет: Чи́стая, спаси́ мя.

Слава: Щедро́т Твои́х бе́здна, всю́ду пролива́ема, Влады́чице, Еди́ныя ра́ди бла́гости, во еле́и масти́те умаща́ет всех при́сно Тя пою́щих.

И ныне: Яко от нача́ла Тя естества́ на́шего прие́м, Богоневе́сто, Сын Твой и Госпо́дь, совокупля́ет моли́твами Твои́ми Тебе́ пою́щия.

Песнь 4

Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Всю на Тя наде́жду положи́х, Влады́чице, молю́ся и припа́даю от души́: смертоно́сныя изба́ви боле́зни, возводя́щи мя к жи́зни спасе́ния, Яже Жизнь ро́ждшая.

Исцели́ мя, Чи́стая, моли́твами Твои́ми, отча́яннаго раба́ Твоего́ подо́бием лю́тых и растле́нных ран: Врача́ бо родила́ еси́, в ми́лости бога́таго Бо́га на́шего.

Слава: В стра́сти лю́тыя впа́дшаго мя изба́ви, и весе́лия оде́жду посеще́нием Твои́м Боже́ственным пода́ждь ми, я́же преиму́щую всяк ум Ра́дость Де́во, прорасти́вшая.

И ныне: Друго́е Не́бо, Богоро́дице, яви́лася еси́, Со́лнце пра́вды несказа́нно на земли́, Чи́стая, возсия́вшая: Имже нам возсия́ Богоразу́мия свет присносу́щный.

Песнь 5

Ирмос: К Тебе́ у́тренюю всех Творцу́, преиму́щему всяк ум ми́рови: зане́ свет повеле́ния Твоя́, в ни́хже наста́ви мя.

Ме́ртвость творя́щий и стра́сти прибли́жихся, от мои́х безме́рных грехо́в: Ма́ти Бо́жия, Тя избавле́ние мно́гих злых мои́х бы́ти, молю́ приле́жно.

Душе́внии мои́ ру́це простира́ю к Тебе́, Чи́стая, плотски́ми бо разслабе́х окая́нный: но Ты от мно́гих ран изба́ви мя, подаю́щи исцеле́ние.

Слава: Совлеко́хся здра́выя оде́жды, и плаче́вную ри́зу в боле́знех обле́к: Тебе́ молю́ся, Влады́чице, облецы́ мя во здра́вие.

И ныне: Яко му́чеников и апо́столов свяще́нное су́щи благоле́пие, Богоро́дице, и ве́рных заступле́ние, вси досто́йно Тя сла́вим.

Песнь 6

Ирмос: Возведи́ от тли мя, Го́споди Бо́же мой, Ио́на вопия́ше. И аз вопию́ Ти: из глубины́ изба́ви мя, Спа́се, мно́гих мои́х зол, и к све́ту Твоему́, молю́ся, наста́ви.

Напряже́ на мя мно́жество боле́зней от мои́х безме́рных согреше́ний тлетво́рный, и умерщвле́нием мя обложи́ша: но Ты Сама́, Богоро́дице, от сих мя изба́ви и вся́кия ну́жды исхити́.

Вве́ржен бых во глубину́ прегреше́ний и боле́зней, и скорбе́й безме́рных, и в сих ны́не отню́д подавля́юся: но Ты, Богороди́тельнице, просте́рши ру́ку, ко спасе́нию возведи́ мя.

Слава: Тя основа́ние тве́рдое вем, Богоро́дице, и держа́вную по́мощь су́щим в ско́рби: те́мже к Твоему́ покро́ву прибе́г, молю́ Тя: от лю́тых бед изба́ви мя и от тя́жких боле́зней.

И ныне: Бразду́, Боже́ственный Клас прора́стшую, Имже ве́рных сердца́ пита́ются ве́рою, и мы́сленный глад преста́, Бо́жий Ковче́г воспои́м, я́ко Де́ву Богома́терь.

 

Таже: Го́споди поми́луй, трижды. Слава, и ныне

Седален, глас 3:

Боже́ственнаго Естества́ не отлучи́ся, плоть быв во чре́ве Твое́м: но Бог вочелове́чися и пребы́сть, Иже по Рождестве́ Ма́терь Тя Де́ву, я́ко пре́жде Рождества́ сохрани́в Всенепоро́чну Еди́н Госпо́дь: Того́ приле́жно моли́ дарова́ти нам ве́лию ми́лость.

Песнь 7

Ирмос: Якоже дре́вле благочести́выя три о́троки ороси́л еси́ в пла́мени халде́йстем, све́тлым Божества́ огне́м и нас озари́, благослове́н еси́, взыва́ющия, Бо́же оте́ц на́ших.

Умилосе́рдися на мя Де́во Богоневе́сто, во отча́яния глубину́ попо́лзшася: Тебе́ тишину́ бы́ти ми, молю́, Пречи́стая, спасе́ний бо еси приста́нище су́щим в ну́ждах при́сно.

Неизглаго́ланно па́че ума́ Му́дрость и Си́лу Бо́жию родила́ еси́, Христа́: те́мже си́льна в ми́лости и ще́дра су́щи, даждь ми спаси́тельныя цельбы́ Твоя́ Богоро́дице, наде́ждо ве́рных.

Слава: Обогати́вши Боже́ственным Рождество́м концы́, нетле́ния сла́достию от тлетво́рныя мя боле́зни и го́рьких страсте́й свободи́ и спасе́ние пода́ждь, Бо́жия Ма́ти пресла́вная.

И ныне: Иже дверь Тя та́йную Себе́ предложи́в, и засту́пницу ди́вную су́щим на земли́, Тобо́ю, Чи́стая, дверь подаде́ челове́ком, в ве́чную жизнь всех вводя́щу, я́ко щедр и всех Бог.

Песнь 8

Ирмос: Вавило́нская пещь о́троки не опали́, ниже́ Божества́ огнь Де́ву растли́. Тем со о́троки, ве́рнии, возопии́м: благослови́те, дела́ Госпо́дня, Го́спода.

Прегреше́ний неизче́тную пучи́ну стяжа́в, ны́не соудавля́юся, Чи́стая, в боле́знех погружа́емы. Те́мже ми ру́ку по́мощи просте́рши, из глубины́ боле́зней возведи́, молю́ся.

Престо́л Бо́гу земле́ный, Дверь же Небе́сная яви́лася еси́, Присноде́во Чи́стая, Богоро́дице Всепе́тая. Те́мже ми спасе́ния дверь отве́рзи, Богома́ти, и тьмы страсте́й свободи́.

Слава: Яко виногра́д возрасти́ла еси́, Грозд невозде́лан, Чи́стая, вино́ источа́ющ душа́м, веселя́щее ве́рно пою́щих Его́, Всенепоро́чная.

И ныне: Яже по Рождестве́ нетле́нна пребы́вши, Всенепоро́чная, мо́лимся, Чи́стая, изба́ви от тли рабы́ Твоя́, ве́рно пою́щия единомышле́нием души́: благослови́те, вся дела́, Го́спода и превозноси́те Его́ во ве́ки.

Песнь 9

Ирмос: На Сина́йстей горе́ ви́дя Тя в купине́ Моисе́й, неопа́льно Огнь Божества́ заче́ншую во чре́ве: Дании́л же Тя ви́де го́ру несеко́мую: жезл прозя́бший, Иса́иа взыва́ше, от ко́рене Дави́дова.

О Де́во Блага́я! О ми́ра ра́досте и прибе́жище! О храни́лище ве́рных и избавле́ние скорбе́й! Ты предста́ни ми в час сме́рти и изба́ви от бесо́в, и́щущих растли́ти мя.

Яко Зижди́теля и Бо́га заче́нши во утро́бе, Де́во Ма́ти Чи́стая, си́лою я́же в Тебе́ низложи́ бесо́в шата́ния, и вознеси́ рог пою́щих держа́ву Твою́ Боже́ственную, и ве́рно покланя́ющихся о́бразу Твоему́.

Слава: Новосоде́лав на́ше естество́, Иже от Тебе́ воплоще́йся, Де́во Чи́стая, но́во де́лает и обновля́ет, Ма́тернею Твое́ю моли́твою, све́тлую и бо́друю засту́пницу и су́щую Богоро́дицу в пе́снех непреста́нно Тя велича́ющих.

И ны́не: Ты а́нгелов ра́дость, Ты пра́ведников добро́та, Ты ве́рных наде́жда, Ты соблюде́ние на́ше: Ты мост, и́же к жи́зни несостаре́ющейся преводя́щий ве́рою и любо́вию Тя велича́ющия.

ГЛАС ЧЕТВЕРТЫЙ

В СУББОТУ43

Канон Пресвятей Богородице

Песнь 1

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Припев: Пресвята́я Богоро́дице, спаси́ нас.

Яже Еди́на в напа́стех и ско́рбех защища́ющая, под кров Твой, Пречи́стая, прибега́ющих те́пле приими́, я́ко Преблага́я, я́же от се́рдца моле́ния.

Приста́нище невла́емое44 обре́т Тя неразу́мный, напа́стныя же и ну́ждныя прило́ги отрева́я, благода́рное пою́ Ти воспева́ние, Богому́жная Роди́тельнице.

Слава: Ми́лостивным и кро́тким Твои́м о́ком, Богороди́тельнице, зря́щи мя во обстоя́нии и ско́рби одержи́ма, вско́ре свободи́: Тя бо призыва́ю на по́мощь.

И ныне: Преклоне́на мя, Влады́чице, скорбьми́ ну́ждными лю́те, я́ко ми́лостива Еди́на Блага́я Предста́тельница рабо́в Твои́х, ру́ку мольбы́ простри́ и лю́тых бед изба́ви мя.

Песнь 3

Ирмос: Лук си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.

Ору́жие кре́пко, и сте́ну Тя стяжа́в аз, побежда́ю сопроти́вных полки́, и пою́ вели́чия Твоя́, Богоро́дице неискусобра́чная.

Пещь разоря́еши печа́лей и погаша́еши отчая́ния зной: кто бо та́ко, я́коже Ты, Де́во Богоро́дице, упова́ние на́ше?

Слава: Внуши́ глас раба́ Твоего́, Твоея́ тре́бующаго по́мощи, Богома́ти: упова́ние мое́, услы́ши мя, и напа́стей исхити́.

И ныне: Прии́де от прегреше́ний мно́жества мучи́тельство нам, нося́ смерть па́губную: но спаси́ Твоя́ рабы́, Богоро́дице, Ты бо мо́жеши.

Песнь 4

Ирмос: Вознесе́на Тя ви́девши Це́рковь на Кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Побе́ждши вражду́ющих мне всу́е, я́ко ду́шу мою́ тща́щихся лю́те прия́ти, сохрани́ мя, Влады́чице, поми́луй и спаси́: к Тебе́ бо прибега́ю, раб Твой.

Избавля́ющи мя от язы́ка льстивоглаго́лива, Блага́я засту́пнице моя́, безпа́костна покажи́ и жите́йских дея́ний: мно́го бо мо́жеши, я́ко Зижди́теля Ма́ти су́щи.

Слава: Безболе́зненну ве́дый Тя целе́бницу немощны́й, ду́хом и усты́ зову́: исцели́ мя, Влады́чице, поми́луй и спаси́: к Тебе́ бо прибега́ю, раб Твой.

И ныне: Не оста́ви мене́ напа́стем пре́дану бы́ти, Ма́ти Бо́га на́шего, но от вся́кия ско́рби и зло́бы челове́чи сохрани́ неврежде́на: Ты бо еси́ помо́щница всем нам.

Песнь 5

Ирмос: Ты, Го́споди мой, Свет в мир прише́л еси́, Свет святы́й, обраща́яй из мра́чна неве́дения, ве́рою воспева́юшия Тя.

Испра́ви, Чи́стая, моли́тву paба́ Твоего́ ко Го́споду, Сы́ну Твоему́: да обря́щу разреше́ние мно́гих мои́х прегреше́ний.

Изба́ви мя страсте́й и бед, Богоневе́сто: Тя бо положи́ Бог очище́ние вои́стину моему́ смире́нию.

Слава: Покро́в мой Ты еси́ и при́сное хвале́ние, о Влады́чице Богоро́дице! Ника́коже бо презира́еши к Тебе́ прибега́ющих.

И ныне: Поми́луй, Чи́стая, чту́щих Рождество́ Твое́ и изба́ви мучи́тельства и го́рести челове́ческия: и́бо и́маши е́же мощи́.

Песнь 6

Ирмос: Пожру́ Ти со гла́сом хвале́ния Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею кро́вию.

Кре́пость ми Сама́ еси́, Пречи́стая Влады́чице, во обре́тших мя зело ненача́янных ско́рбех, и вопию́ Ти: я́ко ве́лия еси́ Покрови́тельница рабу́ Твоему́.

Исцели́ душе́вныя моя́ я́звы, Пречи́стая, заступи́ мя, Де́во, и изба́ви раба́ Твоего́ от оклевета́ния, наве́та же и развраще́ния непра́ведна.

Слава: Сокруши́ на мя, при́сно прибега́ющего к Тебе́, наве́тники неправе́дныя, и не оста́ви мя поги́бнути: я́ко вся Тебе́ возмо́жна, Чи́стая, я́ко Богоотрокови́це.

И ныне: Победи́ души́ моея́ свире́пую волну́: я́ко мно́жество прегреше́ний, напа́стей и скорбе́й, Влады́чице, воста́ша на мя, но Сама́ мя спаси́.

 

Таже: Го́споди поми́луй, трижды. Слава, и ныне

Седален, глас 4:

Мно́гими прегреше́нии аз, блу́дный, ум помрачи́в, вопию́ Твоему́ кре́пкому заступле́нию, Богоро́дице: просвети́ души́ моея́ зе́ницы, возсия́й ми покая́ния све́тлую зарю́ и облецы́ мя во ору́жие све́та, Богороди́тельнице Чи́стая.

Песнь 7

Ирмос: Спасы́й во огни́ авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди Бо́же оте́ц на́ших, благослове́н еси́.

Иже от ага́рян наси́лование ско́ро потре́бльши мече́м моли́тв Твои́х, Мари́е, лю́ди и ста́до Твое́ сохрани́, Сы́ну Твоему́ зову́щия: Бо́же оте́ц на́ших, благослове́н еси́.

Равноле́пная ски́ния, приими́ мя, к Тебе́ прибега́ющего, да не прии́мет мя враг, погуби́ти хотя́, зову́щаго: превозноси́мый оте́ц на́ших Бо́же, благослове́н еси́.

Слава: Богороди́тельнице Мари́е, предвари́ раба́ Твоего́ вско́ре, в треволне́ниих напа́стей потопля́емаго, не иму́щаго по́мощи, к Тебе́ же зову́ща: упова́ние конце́в, поми́луй мя.

И ныне: Челове́ческия по́мыслы я́ко грехо́м вино́вны, ны́не, Богоро́дице Блага́я, разори́, Боже́ственными Твои́ми моли́твами, и рабы́ Твоя́ изба́ви боле́зненныя напа́сти и вся́каго вре́да.

Песнь 8

Ирмоc: Изба́вителю всех всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси пе́ти: вся дела́, благослови́те, по́йте Го́спода.

На́йде на ны язы́к беззако́нен, хваля́ся погуби́ти служи́тели Твоя́: его́же потре́бльши, Пречи́стая, покры́й взыва́ющия: вся дела́, благослови́те, Госпо́дня, Го́спода.

Мно́гия Твоя́ щедро́ты ми́лостивно нас спаса́ют, Еди́на Богома́ти, от грехо́внаго суда́ и разли́чных напа́стей: Ты бо, ро́ждши Бо́га, ми́луеши мир Его.

Слава: Яко Ты еси́ кре́пость и по́мощь, не бою́ся враго́в негодова́ния, но пою́ Тя, Влады́чице, и вопию́ Сы́ну Твоему́: благослови́те, вся дела́ Госпо́дня, Го́спода.

И ныне: На мольбу́ мою́ ны́не умилосе́рдися, и ра́дость в печа́ли ме́сто да́руй ми: да пою́ Тя, Влады́чице, и вопию́ Сы́ну Твоему́: благослови́те, вся дела Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла есть: Ты же, Де́во Богоро́дице, прозябе́нием чревоноше́ния ми́рови благослове́ние процвела́ еси́, тем Тя вси велича́ем.

Ору́жие у́бо на ны обостри́в, совещава́ет льсти́вый ара́влянин беззако́нный: Ты же, Де́во Богоро́дице, си́лою Креста́ и моли́тв Твои́х вооружа́еши на него́ рабы́ Твоя́. Те́мже пропове́даем сла́ву Твою́.

Кре́пость Тебе́ на враги́ даде́ся, Влады́чице, и избавле́ние ми от бед: что же аз Тебе́ принесу́, не дове́м45. Оба́че, е́же и́мам, благодаре́ние приношу́ Ти: приими́ сие́ ны́не и спаси́ мя.

Слава: О Ма́ти вся́ческих Творца́ всесве́тлая, печа́льных уте́ха, потопля́емых предста́тельница и пренемога́ющихся засту́пница, до живота́ моего́ Ты мя сохрани́.

И ныне: Утесня́ема мя грехи́ мно́гими и беда́ми, не пре́зри мене́, Всепе́тая, ны́не, Тебе́ хвале́ния же́ртву приношу́, приле́жно взыва́я Ти: Свята́я Богоро́дице, помози́ ми, Тя бо сла́вя песнь скончава́ю.

В НЕДЕЛЮ

Канон Пресвятей Богородице

Песнь 1

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Припев: Пресвята́я Богоро́дице, спаси́ нас.

Приими́ е́же от души́ моле́ние мое́, Пречи́стая Влады́чице, Яже Бо́га ро́ждши пло́тию: к Тебе́ бо прибего́х, к держа́вней по́мощи, да не погрешу́ наде́жды моея́.

Припа́даю раболе́пно к Тебе́, Пречи́стая Богороди́тельнице, я́ко дерзнове́ние иму́щи мно́го, от вся́ких мя скорбе́й Твои́ми моли́твами изба́ви, к Сы́ну Твоему́ хода́тайствующи.

Слава: Мо́ря жите́йскаго волна́ми потопля́емь и напа́стьми лю́тыми одержи́мь, ко приста́нищу устреми́хся невла́емому, покро́ву Твоему́: те́мже мя изба́ви, Богоро́дице, от лю́тых.

И ны́не: Благоутро́бным и ти́хим Твои́м о́ком воззри́ на раба́ Твоего́ и услы́шати потщи́ся, Блага́я, исполня́ющи мольбу́ Твоего́ ра́ба, Пречи́стая, и разоря́ющи сове́ты лука́выя.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи: Ты моя́ кре́пость, Го́споди, и прибе́жище, и утвержде́ние.

Помо́щница на враги́, и в бра́нех побо́рница, Влады́чице, Ты ве́рным еси́, и прибе́жище су́щим в печа́лех.

Его́же родила́ еси́ пло́тию Бо́га всех, я́ко Сы́на, моли́ разреше́ние зол мои́х да́ти ми от жите́йских настоя́ний.

Слава: При́зри ми́лостивно на смире́ние на́ше, Влады́чице, во е́же гне́ва належа́щаго изба́витися рабо́м Твои́м.

И ныне: Кро́вом Твои́м, Влады́чице Блага́я, спаса́еми при́сно от вся́ких скорбе́й, хвалу́ Сы́ну Твоему́ приноша́ем.

Песнь 4

Ирмос: Услы́шах слух Твой и убоя́хся, разуме́х дела́ Твоя́ и ужасо́хся, Го́споди.

Яко иму́щи дерзнове́ние, Чи́стая Богороди́тельнице, к Сы́ну Твоему́, настоящаго мя премени́ искуше́ния, разруша́ющи сове́ты ча́стыя враго́в, при́сно борю́щих мя.

Ли́цы вы́шних чино́в, муче́ницы и пра́ведницы, со апо́столы, проро́к Боже́ственных собо́р и преподо́бных, с Богоро́дицею и Ма́терию о нас Христа́ моли́те.

Слава: Пресла́вную Твою́ Ма́терь, Христе́, приими́ моля́щуюся о ми́ре, ми́лостивно Тебе́ зову́щую: Сы́не Мой, приими́ мольбу́ Мою́ и утиши́ гнев належа́щий земли́.

И ныне: Припа́даю Ти, Богоро́дице, и молю́ся из глубины́ се́рдца моего́: настоя́щаго мя премени́ искуше́ния, я́ко да изба́влься от лю́тых, песнь принесу́ Твое́й све́тлости.

Песнь 5

Ирмос: Нечести́вии не у́зрят сла́вы Твоея́, Христе́, но мы Тя, Единоро́дне, Оте́ческия сла́вы сия́ние Божества́, от но́щи у́тренююще, воспева́ем Тя, Человеколю́бче.

Упова́ние земны́м и заступле́ние, Чи́стая, умилосе́рдися на на́ше смире́ние, мо́лимся, и настоя́щаго гне́ва свободи́ нас.

Сте́ну необори́му, Чи́стая, моли́тву Твою́ держа́ще, вопие́м Ти: умилосе́рдися, о Влады́чице, и ви́димыя враги́ прожени́.

Слава: Хва́лящиися при́сно упова́нием е́же к Тебе́, Пречи́стая, да не постыди́мся, мо́лимся со слеза́ми и покланя́емся Твое́й бла́гости.

И ныне: Пречи́стою Твое́ю руко́ю, Препе́тая, разжени́ враги́, на ны востаю́щия: и да разуме́ют окая́ннии, я́ко на Тя упова́ние возложи́хом.

Песнь 6

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли изба́ви мя, Иису́се Царю́ Сил.

Очи́сти на́ша грехи́, Человеколю́бче, мо́лимся, моли́твами без се́мене Ро́ждшия Тя: нас бо ра́ди, Сло́ве, Твою́ честну́ю кровь пролия́л еси́.

Собо́рище на ны лука́вное собра́ся непра́ведно борю́щих нас, Богоневе́сто: но сих низложи́, я́ко Си́мона волхва́ дре́вле.

Слава: Услы́ши на́шу мольбу́, Влады́чице, мо́лимся, и бу́ри во́лны утиши́ разли́чных боле́зней, и́миже врази́ на ны собра́шася.

И ныне: Печа́ль мою́ на ра́дость преложи́, я́ко щедр, и плач в весе́лие премени́, и умилосе́рдися Богоро́дицы ра́ди, Иже во́ду в вино́ в Ка́не Галиле́йстей претвори́вый, Христе́.

 

Таже: Го́споди поми́луй, трижды. Слава, и ныне

Седален, глас 4:

Мно́гими прегреше́нии аз, блу́дный, ум помрачи́в, вопию́ Твоему́ кре́пкому заступле́нию, Богоро́дице: просвети́ души́ моея́ зе́ницы и возсия́й ми покая́ния све́тлую зарю́, и облецы́ мя во ору́жие све́та, Богороди́тельнице Чи́стая.

Песнь 7

Ирмос: He преда́ждь нас до конца́, и́мене Твоего́ ра́ди, и не разори́ заве́та Твоего́, и не отста́ви ми́лости Твоея́ от нас, Го́споди Бо́же оте́ц на́ших, препе́тый во ве́ки.

Иже в разли́чных напа́стех и ско́рбех сый, к Тебе́, Чи́стая, спасе́нию моему́, ны́не прибего́х, вопию́, да не возвращу́ся посра́млен от ча́яния моего́: но услы́ши и изба́ви мя сете́й ловя́щих.

Раболе́пно вы́ю преклоня́ю, окая́нный, и от се́рдца моего́ вопию́: ру́це просте́р, коле́на преклоня́ю и молю́ Тя, Пречи́стую Де́ву, изба́витися скорбе́й, при́сно находя́щих мне от наве́та чужда́го.

Слава: Пресла́вная Чи́стая Мари́е, земны́х похвало́, мо́лимся, пода́ждь Твою́ по́мощь нам, моля́щимся и кла́няющимся благоче́стно Рождеству́ Твоему́, я́ко ины́я не стяжа́хом наде́жды и засту́пницы ра́зве Тебе́.

И ны́не: Яже па́че ума́ Бо́га ро́ждши неискусому́жная Мари́е, и па́че вся́каго естества́, засту́пнице ве́рных, напра́сных искуше́ний чту́щия Тя изба́ви чи́сты, и без вре́да от враг вся́ческих, ви́димых и неви́димых.

Песнь 8

Ирмос: Ру́це распросте́р Дании́л, львов зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся дела́ Госпо́дня, Го́спода.

Ру́це возде́ти не сме́ю к Сы́ну Твоему́, Чи́стая, весь бо есмь оскверне́н: те́мже дерза́ю к Тебе́, Влады́чице, прибе́гнути: хода́тайствуй к Ще́дрому Бо́гу и благопреме́нному изба́витися нам сопроти́вных враг, оскорбля́ющих нас.

Очи и се́рдце и ду́шу на Тя, Пречи́стая, возложи́х: те́мже умилосе́рдися Влады́чице Чи́стая, Ще́дрому припа́дающи о мне, худе́м и нетерпели́вем, да спасе́т мя от вся́кия ну́жды и я́зи, и печа́ли.

Слава: Ору́жием Твои́м, я́ко си́лен, борю́щия нас попери́, Го́споди, и побе́ду да́руй, Влады́ко, ве́рою наде́ющимся на Тя, Богоро́дице моли́тся с Предте́чею Иоа́нном, и апо́стольский лик и мученик Твои́х.

И ныне: Ра́дость Благове́щения иногда́ Гаврии́л Тебе́, Чи́стая Де́во, принесе́, и прама́тернее се́тование разруши́ся Рождество́м Твои́м: те́мже Сама́ и моея́ души́ уны́ние очи́стивши, покажи́ мя моли́твами Твои́ми непосра́млена.

Песнь 9

Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́: тем веселя́щеся, Тя, Богоро́дице велича́ем.

Яви́, Богоро́дице Де́во, Твою́ по́мощь вско́ре: приклони́ же усе́рдно у́хо Твое́ и вопию́щих те́пле услы́ши и лю́тых измени́, избавля́ющи нас моли́твами Твои́ми.

Весь ле́ностию одержи́мь и во отча́янии есмь глубины́ мои́х прегреше́ний: те́мже ми, Де́во Ма́ти, ру́ку простри́, я́ко Петру́ Христо́с, и из глубины́ прегреше́ний изба́ви мя.

Слава: Язы́к необу́здан и велере́чив укроти́, Де́во, изощре́нный, я́ко стрела́, устрели́ти хотя́щ и умори́ти мя, я́ко воск разле́й, и сове́т его́ су́етен сотвори́.

И ныне: Разруши́ сове́ты вся, я́же на ны вооруже́нных, Ма́ти Бо́га Вы́шняго, ра́дости же испо́лни упова́ющих на Тя: да усе́рдно вси Твое́ пропове́мы заступле́ние.

В ПОНЕДЕЛЬНИК

Канон Пресвятей Богородице

Песнь 1

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Припев: Пресвята́я Богоро́дице, спаси́ нас.

Яже Еди́на в напа́стех и ско́рбех защища́ющая под кров Твой, Пречи́стая, прибега́ющих те́пле, приими́, я́ко Преблага́я, я́же от се́рдца на́шего моле́ния.

Приста́нище невла́емое обрето́х Тя, окая́нный, напа́стныя же и ну́ждныя прило́ги отрева́я, благодарно́е пою́ Ти воспева́ние, Богому́жная Богороди́тельнице.

Слава: Ми́лостивным и кро́тким Твои́м о́ком, Богороди́тельнице, зря́щи мя, во обстоя́нии и ско́рби одержи́ма, вско́ре свободи́: Тя бо призыва́ю на по́мощь.

И ныне: Ева осужде́ния изба́вися и Ада́м Тобо́ю, Чи́стая, с ни́миже и аз припа́даю Ти: печа́льныя ми сле́зы ны́не на ра́дость преложи́ и от напа́стей свободи́.

Песнь 3

Ирмос: Лук си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.

Ору́жие кре́пко и сте́ну Тя стяжа́в аз, побежда́ю сопроти́вных полки́ и пою́ вели́чия Твоя́, Богоро́дице неискусобра́чная.

Пещь разоря́еши печа́лей и погаша́еши отча́яния зной: кто бо та́ко, я́коже Ты, Де́во Богоро́дице, упова́ние наше?

Слава: Внуши́ вопль раба́ Твоего́, Твоея́ тре́бующаго по́мощи, Богома́ти: упова́ние мое́, услы́ши мя и потщи́ся спасти́ мя.

И ныне: При́зри, Чи́стая, спасти́ мя: ибо Боже́ственным ма́нием вся содержа́щего воплоти́ла еси́, Бо́жие Сло́во, па́че сло́ва и смы́сла.

Песнь 4

Ирмос: Вознесе́на Тя ви́девши Це́рковь на Кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Побе́ждши вражду́ющих мне всу́е, я́ко ду́шу мою тща́щихся лю́те прия́ти, сохрани́ мя, Влады́чице, ненаве́тна, да ра́дуяся сла́влю Тя.

Избавля́ющи мя от язы́ка льстивоглаго́ливаго, я́ко Блага́я предста́тельница, безпа́костна покажи́ от жите́йских дея́ний: мно́го бо мо́жеши, я́ко Ма́ти Зижди́теля су́щи.

Слава: Безболе́зненну ве́дый Тя целе́бницу, немощны́й, ду́хом и усты́ зову́: исцели́ мя, Влады́чице, поми́луй и спаси́ мя, к Тебе́ бо прибега́ю, раб Твой.

И ныне: Яко похвалу́ а́нгелов и челове́ков, Тя воспева́ем вси, Де́во Мари́е, и ве́рно мо́лимся: моли́ся, Влады́чице, от вся́кия ско́рби изба́вится нам.

Песнь 5

Ирмос: Ты Го́споди мой, свет, в мир прише́л еси́, Свет святы́й, обраща́яй из мра́чна неве́дения ве́рою воспева́ющия Тя.

Испра́ви Чи́стая, моли́тву раба́ Твоего́ ко Го́споду, Сы́ну Твоему́: да обря́щу разреше́ние мно́гих прегреше́ний.

Изба́ви мя страсте́й и бед, Богоневе́сто: Тя бо положи́ Бог к Нему́ хода́таицу о мое́м смире́нии.

Слава: Покрови́тельница мне Ты еси́ и непреста́нное хвале́ние, о Влады́чице Богоро́дице, не пре́зриши бо ника́коже одержи́маго в печа́лех.

И ныне: Ны́не испроси́ нам прегреше́ний оставле́ние и изба́ви от напа́стей и страсте́й нечи́стых, моли́твами Твои́ми, Препе́тая.

Песнь 6

Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею кро́вию.

Кре́пость моя́ Сама́ еси́, Пречи́стая Влады́чице, во обре́тших мя зело́ ненача́янных ско́рбех, и вопию́ Ти: я́ко ве́лия еси́ Помо́щница рабу́ Твоему́.

Исцели́ душе́вныя моя́ я́звы, Влады́чице, заступи́ мя, Де́во, и изба́ви раба́ Твоего́ от оклевета́ния, наве́та же и развраще́ния непра́ведна.

Слава: Сокруши́ наве́тники непра́ведныя, и́же на мя, при́сно прибега́ющего к Тебе́, Чи́стая, и не оста́ви мене́ поги́бнути, я́ко вся Тебе́ возмо́жна, Богоотрокови́це.

И ныне: Успи́ души́ моея́ свире́пую волну́, я́ко мно́жество прегреше́ний, искуше́ния и печа́ли воста́ша на мя: но Сама́ мя, Влады́чице, спаси́.

 

Таже: Го́споди поми́луй, трижды. Слава, и ныне

Седален, глас 4:

В кров Твой, Де́во, вси прибега́юще, вопие́м Ти: мольбу́ приими́ от нас и не преста́й моля́щися Человеколю́бцу спасти́ся рабо́м Твои́м.

Песнь 7

Ирмос: Спасы́й во огни́ авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди Бо́же оте́ц на́ших, благослове́н еси́.

Еже от ага́рян наси́лование ско́ро потре́бльши мече́м моли́тв Твои́х, Мари́е, лю́ди и ста́до Твое́ сохрани́, Сы́ну Твоему́ зову́щее: Бо́же оте́ц на́ших, благослове́н еси́.

Равноле́пная Ски́ние, приими́ мя, к Тебе́ прибега́ющаго, да не прии́мет мя враг, погуби́ти изгоня́я, пою́ща Сы́ну Твоему́, Богома́ти: оте́ц на́ших Бо́же, благослове́н еси́.

Слава: Богороди́тельнице Мари́е, предвари́ раба́ Твоего́ вско́ре, в треволне́ниих напа́стей потопля́емаго, и не иму́ща по́мощи. К Тебе́ бо зову́: упова́ние мое́, Богоро́дице, поми́луй мя.

И ныне: Челове́ческия напа́сти, я́ко грехо́м вино́вны, ны́не, Богоро́дице Блага́я, разори́ Боже́ственными моли́твами Твои́ми, и рабы́ Твоя́ изба́ви боле́зненных прегреше́ний и вся́кия напа́сти.

Песнь 8

Ирмос: Изба́вителю всех всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся дела́, благослови́те, по́йте Го́спода.

Воста́ на ны язы́к беззако́нен, хваля́ся погуби́ти служи́тели Твоя́, его́же потре́бльши, Пречи́стая, зову́щия покры́й: вся дела́, благослови́те, Госпо́дня, Го́спода.

Мно́гая Твоя́ щедро́ты, Еди́на Богома́ти, нас ми́лостивно спаса́ют от грехо́внаго суда́ и разли́чных напа́стей: Ты бо ро́ждши Бо́га, и ми́луеши мир Его́.

Слава: На моле́ние мое́ ны́не умилосе́рдися, и ра́дость ми в печа́ли ме́сто да́руй, да пою́ Тя, Влады́чице, и вопию́ Сы́ну Твоему́: вся дела́, благослови́те, Госпо́дня, Го́спода.

И ныне: Яко Ты мне еси́ кре́пость и помо́щница, не убою́ся враго́в негодова́ния, но воспева́ю тя, Влады́чице, и вопию́ Сы́ну Твоему́: вся дела́, благослови́те, Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла есть: Ты же, Де́во Богоро́дице, прозябе́нием чревоноше́ния ми́рови благослове́ние процвела́ еси́, тем Тя вси велича́ем.

Ору́жие у́бо на ны обостри́в, совещава́ет льсти́вый ара́влянин беззако́нный: Ты же, Де́во Богоро́дице, си́лою Креста́ Сы́на Твоего́ и моли́тв Твои́х, вооружа́еши на него́ рабы́ Твоя́: те́мже пропове́даем сла́ву Твою́.

Кре́пость у́бо Ты мне на враги́ даде́ся, и избавле́ние в напа́стех: что же Ти аз принесу́, Чи́стая? Не дове́м. Оба́че, е́же и́мам, благодаре́ние приношу́ Ти, Влады́чице: приими́ сие́ от раба́ Твоего́ и спаси́ мя.

Слава: О Ма́ти вся́ческих Творца́! О Всечи́стая, скорбя́щих уте́хо, потопля́емых предста́тельнице и побежда́емых засту́пнице, до живота́ моего́ Ты мя сохрани́.

И ныне: Утесня́емь грехи́ мно́гими, Препе́тая, и напа́стьми лю́тыми, ны́не Тебе́ хвале́ния же́ртву приношу́ и приле́жно взыва́ю Ти: Свята́я Богоро́дице, помози́ ми, Тебе́ бо сла́вя, песнь скончава́ю.

ВО ВТОРНИК

Канон Пресвятей Богородице

Песнь 1

Ирмос: Отве́рзу уста́ моя́, и напо́лнятся Ду́ха, и Сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Припев: Пресвята́я Богоро́дице, спаси́ нас.

Неизме́рную Бо́жию му́дрость и си́лу ро́ждши Пренепоро́чная, Христа́ без се́мене пло́тию, держа́ву кре́пости и Боже́ственное вели́чие стяжа́ла еси́ Рождество́м Твои́м, Богороди́тельнице.

О па́че ума́ Рождества́ Твоего́, Пречи́стая, и́мже обогати́ся земны́х мно́жество нетле́нием, и Тя ны́не блажи́т досто́йно, Хода́таицу обновле́ния.

Слава: Боля́щаго исцели́ душе́ю и те́лом, Де́во, раба́ Твоего́ осене́нием Твои́м: Тя бо Предста́тельницу всем су́щим в печа́ли позна́х, я́ко ро́ждшую Спасе́ние на́ше.

И ныне: Лю́те погружа́ему в пучи́не скорбе́й и бу́рею безме́рных обстоя́ний, спасе́ния просте́рши ми ру́ку, изведи́, Влады́чице, из глубины́ зол.

Песнь 3

Ирмос: Твоя́ песносло́вцы, Богоро́дице, живы́й и незави́стный исто́чниче, лик себе́ совоку́пльшия духо́вно утверди́ в Боже́ственней Твое́й сла́ве, венце́в сла́вы сподо́би.

Кропи́ши исцеле́ний струи́ боля́щим Де́во, всю́ду: Тя бо исто́чника показа́ милосе́рдия, Влады́чице, Иже ми́лости Госпо́дь, из Тебе́ рожде́йся па́че ума́.

Красе́н черто́г Боже́ственному Сло́ву и Боже́ственный Неве́стник вы́ше естества́, Де́во Ма́ти, была́ еси́: те́мже ми́лости Твои́х щедро́т отве́рзи ми, ко спасе́нию возводя́щи.

Слава: Умертви́ся вся кре́пость моя́ от мно́жества безме́рных зол: мно́гими у́бо скорбьми́ отча́яхся. Помози́ ми, Госпоже́, Яже Жизнь ро́ждшая и пла́чущим Утеше́ние.

И ныне: Поми́луй, Еди́на Богома́ти, поми́луй и уще́дри ду́шу мою́ окая́нную, потопля́емую бе́сы лука́выми и страстьми́, и пре́жде вре́мене сме́рти моея́ сию́ очи́стити умилосе́рдися.

Песнь 4

Ирмос: Неизсле́дный Бо́жий сове́т, е́же от Де́вы воплоще́ния Тебе́ Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Ко́рене и чресл Тя Ца́рских, всех Царь я́ко су́щу вожделе́в, вы́шшу херуви́м и серафи́м соде́ла, весь, Богоро́дице, все́лься в Тя.

Челове́ческаго ра́ди порожде́ния Соде́тель воплоща́емь, из Тебе́ роди́ся и Предста́тельницу нело́жну христиа́ном Тя показа́: те́мже к Твоему́ кро́ву прибега́ю, Чи́стая.

Слава: Кров и заступле́ние, и прибе́жище бу́ди ми, Де́во, рабу́ Твоему́, и исцели́ мя от безме́рных зол, воспева́ти Тя, Пречи́стая: сла́ва неизрече́нному Рождеству́ Твоему́.

И ныне: Недоуме́юся, и слезю́, и стеню́ от стра́стных мои́х помышле́ний, и Тя молю́: я́ко еси́ исто́чник ми́лости, от боле́зней мои́х изба́ви мя, веду́щи к Боже́ственному умиле́нию.

Песнь 5

Ирмос: Ужасо́шася вся́ческая о Боже́ственней сла́ве Твое́й: Ты бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, всем воспева́ющим Тя мир подава́ющая.

Исцеле́ний во́ды то́чиши при́сно, Де́во, всем боля́щим, я́ко о́блак одушевле́н сый Царя́ Христа́. Те́мже молю́ Тя приле́жно: ро́су исцеле́ния мне боля́щему низпосли́.

Не преста́й моля́щи, Его́же родила́ еси́, Богоневе́сто Де́во, я́ко Спа́са и Влады́ку, разреше́ние ми даждь скорбе́й и боле́зней, и к ра́дости нетле́нней мя возведи́, проща́я ми прегреше́ния.

Слава: Упова́ние ми еси́, Пречи́стая, и спасе́нию похвала́. Те́мже прибега́ю к Твоему́ покро́ву: не гнуша́йся мене́, грехи́ мно́гими и боле́зньми ско́рбными ны́не поглоще́ннаго, но предвари́ и спаси́ мя.

И ныне: Грозд зре́лый, ка́ко на Дре́ве ви́сиши? Со́лнце сла́вы, ка́ко воздви́глся еси́, свет со́лнца помрачи́вый в стра́сти Твое́й? Спа́се, ро́ждшая Тя Агница дре́вле вопия́ше Ти, ма́терски восклица́ющи.

Песнь 6

Ирмос: Приидо́х во глубины́ морски́я, и потопи́ла мя есть бу́ря мно́гих грехо́в: но я́ко Бог из глубины́ возведи́ живо́т мой, Многоми́лостиве.

Зрак восприя́т ра́бий от Тебе́, Де́во, всех Царь и Бог наш и вы́шшу Тя я́ко Богоро́дицу показа́ херуви́м и стра́шных серафи́м.

Яже Еди́на ро́ждши Бо́жию Жизнь, и всем спасе́ние даю́щаго, отча́янна мя су́ща спасе́нию сподо́би и страсте́й мои́х воста́ние пресецы́.

Слава: Твою́ пода́ждь по́мощь и изба́ви мя бед и скорбе́й, избавля́ющи мя напа́стей и прегреше́ний мои́х, Яже всех ро́ждшая Избавле́ние.

И ныне: О Тебе́ Де́во, хва́лимся, и Тобо́ю лю́тых избавля́емся: наде́ющеся на Тя, нахожде́ния не бои́мся злочести́вых ва́рвар, воспева́ющии Тя.

 

Таже: Го́споди поми́луй, трижды. Слава, и ныне

Седален, глас 4:

Де́во Пренепоро́чная Ма́ти Христа́ Бо́га, ору́жие про́йде Твою́ Пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́: Его́же, Преблагослове́нная, моля́щи не преста́й проще́ние прегреше́ний нам дарова́ти.

Песнь 7

Ирмос: Не послужи́ша тва́ри богому́дрии па́че Созда́вшего, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бог, благослове́н еси́.

Изсше, я́ко скуде́ль, страстьми́ вся кре́пость моя́, и се а́ду прибли́жихся: от уз всепа́губных предвари́, Ма́ти Бо́жия, и исхити́ от одержа́щих печа́лей руко́ю ми́лости Твоея́.

Растерза́еме утро́бе мое́й от злоб многообра́зных, и е́же жи́ти растерза́юся мно́жеством прегреше́ний и боле́зней мои́х: но изба́ви мя от обои́х, Пречи́стая, Жизнь нам ро́ждшая.

Слава: Ца́рства Христо́ва всеще́драго, Де́во Пречи́стая, отве́рсти ми я́ко Блага́я сподо́би, и боле́зней душетле́нных и нахожде́ний изба́вити, Твои́ми моли́твами, Благослове́нная.

И ныне: Обощре́ны боле́зни ра́нам мои́м от безме́рных мои́х прегреше́ний, веду́т в смерть душе́вную и теле́сную: но исхити́ мя, Влады́чице, я́ко си́льна, от вся́ких скорбе́й и неду́гов.

Песнь 8

Ирмос: Отроки благочести́выя в пещи́ Рождество́ Богоро́дичо спасло́ есть: тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́ и превозноси́те Его во вся ве́ки.

Вещь страсте́й терноно́сных стяжа́х, и жа́лом сих пробода́емь есмь: те́мже отча́яхся, у́зами подавля́емь есмь и напа́стьми, Пречи́стая Ма́ти Христа́ Бо́га, от ни́хже мя избавля́ющи, пода́ждь всех прегреше́ний проще́ние Твои́ми моли́твами.

Све́щнице Све́та трисо́лнечнаго су́щи, заре́ю благоутро́бия Твоего́ тьму отыми́ прегреше́ний мои́х, Богороди́тельнице, избавле́ние ну́ждных боле́зней подаю́щи, ве́рою пою́щему и превознося́щему Пречи́стое Твое́ Рождество́.

Слава: Весь все́лься во чре́во Твое́, неизглаго́ланно воплоти́ся пресу́щный Бог Присноде́во, ми́ру засту́пницу Тя и о́бщую по́мощь соде́лав: те́мже молю́ Тя изба́витися лю́тых страсте́й мои́х и уз прегреше́ний.

И ныне: В час, Де́во, кончи́ны моея́, руки́ бесо́вския и осужде́ния, и отве́та и стра́шнаго испыта́ния, и мыта́рств го́рьких, и кня́зя лю́таго, и огня́ ве́чнаго исхити́ мя, Богома́ти.

Песнь 9

Ирмос: Всяк земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Род земны́й вознесе́ся Рождество́м Твои́м, сыноположе́ние взем Боже́ственным совокупле́нием: и слику́ет Небе́сное мно́жество со земны́ми, пою́ще Тя достодо́лжно, Чи́стая, я́ко Ма́терь су́шу Бо́га на́шего, и ми́ру всему́ прибе́жище.

Весь быв отню́д стя́гнут грехи́ мои́ми, от безме́рных ран и боле́зней, Твою́ по́мощь призыва́ю, Влады́чице, и заступле́ние, е́же пода́ждь, всех избавля́ющи мя лю́тых бед и скорбе́й.

Слава: Пе́ние с пе́снею и хвале́ние сплете́ния ны́не от боле́зненныя души́ приноша́ю с любо́вию Тебе́, ро́ждшей естество́м Христа́ Бо́га, Его́же благопребы́тна прии́мши и проше́ния моя́, Богоро́дице, вся испо́лнши, моли́твами Твои́ми соблюди́.

И ныне: Просвети́, Чи́стая Богороди́тельнице, души́ моея́ о́чи, да не пости́гнет мене́ грехо́вная тьма тя́жкая, ниже́ глубина́ покры́ет мя отча́яния: но Сама́ мя спаси́ и окорми́, Предста́тельнице ве́рных непосты́дная.

В СРЕДУ

Канон Пресвятей Богородице

Песнь 1

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Припев: Пресвята́я Богоро́дице, спаси́ нас.

Вои́стинну и вресноту́46 родила́ еси́ Бо́га и Го́спода, и Богоро́дица Еди́на вои́стинну и вресноту́ нарекла́ся еси́, Чи́стая. Те́мже Тя ве́рно воспева́ем и по до́лгу сла́вим.

Звезда́, Яже от Иа́кова, возсия́ из Тебе́, Пречи́стая, изчита́яй мно́жество звезд, я́ко Бог. Те́мже Того́ сия́ньми отыми́ мои́х грехо́в тьму.

Слава: Неве́стник слове́сен вем Тя я́ве Бо́жия воплоще́ния, Чи́стая и Всенепоро́чная: молю́ Тя изба́вити мя страсте́й плотски́х и скорбе́й, и искуше́ний, и обстоя́ний.

И ныне: Яко Ле́ствица, Яже к нам прише́ствия Вседержи́телева, Еюже Бог сни́де на зе́млю, от землены́х страсте́й плотски́х к Небеси́ вознеси́ мя и к Бо́гу приведи́.

Песнь 3

Ирмос: Не му́дростию и си́лою и бога́тством хва́лимся, но Тобо́ю, Отчею ипоста́сною му́дростию, Христе́: несть бо Свят, па́че Тебе́, Человеколю́бче.

Теку́щий исто́чник, скорбя́щих утеше́ние еси́: те́мже, Влады́чице, и мне моли́твенных Твои́х вод исто́чник источи́ и угаси́ страсте́й пещь.

Уя́звена мя по́мыслы безме́стными исцели́, Чи́стая, Яже естества́ на́шего исцели́вшая я́зву лю́тую, ро́ждши Зижди́теля и Го́спода.

Слава: В пучи́не мно́гих мои́х прегреше́ний и страсте́й и искуше́ний обурева́ема, к ти́хому зело́ приста́нищу, Всенепоро́чная, устреми́ Твои́м заступле́нием.

И ныне: Иже я́ко на руно́ дожде́м Боже́ственным, во утро́бу Твою́ соше́дшим, опламене́нное огне́м страсте́й мое́ се́рдце ороси́ Твои́ми мольба́ми.

Песнь 4

Ирмос: Вознесе́на Тя ви́девши Це́рковь на Кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

От мир Сы́на Твоего́ теку́щих, благоуха́нием жи́зни всех, ми́ро безстра́стия источи́ души́ мое́й, Чи́стая, и весь кал стра́сти ея́ потреби́.

Оскверне́ннаго мя ка́лом греха́, моли́тв Твои́х окропи́ иссо́пом и омы́й, и скве́рну страсте́й мои́х очи́сти, Влады́чице, и яви́ Христу́ жили́ще.

Слава: Напи́сану Тя кни́гу пе́рстом Боже́ственным, запеча́тану, Пречи́стая молю́, пе́рсты Твои́х моли́тв напиши́ мне прегреше́ний оставле́ние и напа́стей изба́ви.

И ныне: Иже от коне́ц гор святы́х всех храм Бо́гу бы́вши, я́коже пре́жде проро́к рече́, Христу́ чист покажи́ мя храм, Влады́чице, Твои́ми заступле́ньми.

Песнь 5

Ирмос: Ты Го́споди мой, свет, в мир прише́л еси́, Свет святы́й, обраща́яй из мра́чна неве́дения ве́рою воспева́юшия Тя.

Тя ро́су Аермо́нску, на Сио́н соше́дшую, ве́дый, Богороди́тельнице, молю́ угаси́ти пло́ти моея́ запале́ние.

Рай жи́зни су́щи, Богоро́дице, сме́рти грехо́вныя и страсте́й многообра́зных изба́ви мя вско́ре.

Слава: Алава́стр мы́сленный, Чи́стая, Ты еси́ Ми́ра, излия́вшагося на зе́млю с Небесе́: мене́ ны́не благоуха́ния испо́лни.

И ныне: Прекло́ншагося ко тле́нию обнови́ла еси́ челове́ка: изведи́ у́бо и мене́ ны́не, Богоневе́сто, из глубины́ прегреше́ний и страсте́й.

Песнь 6

Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею кро́вию.

Пала́та прекра́сна, сла́вная Влады́чице, Царя́ Сла́вы бы́вши, просла́вила еси́ челове́ки: те́мже сла́вы нетле́нныя и мене́ сподо́би.

Ути́шила еси́ тлю поро́чную естества́ чи́стым нетле́нием, но изсуши́, Пречи́стая, страсте́й мои́х пото́ки, и плотски́я му́дрости ре́ки.

Слава: Успи́ стра́стная движе́ния телесе́ и взыгра́ния моя́ плотска́я уму́ повини́, я́ко жребя́, успи́вши, Чи́стая, сном Твои́х моли́тв.

И ныне: Пою́ Тя, Бо́га Препе́таго ро́ждшую, и молю́ Тя, Отрокови́це: стра́шныя мя при и ве́чнаго, Богоро́дице, осужде́ния изба́ви и спаси́ мя.

 

Таже: Го́споди поми́луй, трижды. Слава, и ныне

Седален, глас 4:

Предста́тельнице нера́тная, Богороди́тельнице, и моли́твеннице гото́вая притека́ющим к Тебе́, от бед мя изба́ви: да не пре́зриши мене́, всех засту́пнице.

Песнь 7

Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Яко огнено́сна и Богоприе́мна су́щи купина́, Чи́стая, попали́ помышле́ний те́рние лука́вых, души́ моея́ озари́ мысль и страсте́й бе́здну изсуши́.

Вели́чествие от ве́ка и Боже́ственную сла́ву Ты Еди́на я́ве обрела́ еси́ на земли́, Не́бо я́вльшися второ́е: Ты у́бо упраздни́ велере́чивыя враги́ моя́ бе́сы.

Слава: Боже́ственный окри́не47 милосе́рдия и бла́гости, источи́ ми оби́льно бога́тство Твои́х щедро́т и, скве́рну прегреше́ний мои́х омыва́ющи, плотско́е угаси́ разжже́ние.

И ныне: Да́нное ми от Бо́га бога́тство духо́вное пре́жде, жив блу́дно всегда́, сластьми́ изжди́х теле́сными: но я́ко блу́днаго, Твои́ми моли́твами, Де́во, оправди́.

Песнь 8

Ирмос: Ру́це распросте́р Дании́л, львов зия́ния в ро́ве затче́: о́гненную же си́лу угаси́ша, доброде́телию препоя́савшеся благоче́стия рачи́тели о́троцы, взыва́юще: благослови́те, вся дела́ Госпо́дня, Го́спода.

Расто́ргни прегреше́ний мои́х плени́цу, и теле́сная стремле́ния утиши́, лука́вствия же умышле́ний посецы́, и очи́сти от та́йных помышле́ний ско́ро раба́ Твоего́, Богоро́дице, всех Предста́тельнице ве́рных и заступле́ние.

Гора́ Бо́жия явле́на, и несеко́ма, и ту́чна, Пречи́стая, часта́ и осене́нная, покры́й мя се́нию Твои́х моли́тв и от се́ти лове́ц изба́ви, и сохрани́ от стрел бесо́вских и скве́рных помышле́ний.

Слава: Страх Боже́ственный прия́ти ми, Влады́чице, и дух умиле́ния во утро́бе мое́й, и роди́ти житие́ доброде́тельно, и стра́шна лука́вым бесо́м, Пречи́стая, сотвори́, и Боже́ственныя сла́вы а́нгельских лик собесе́дника.

И ныне: Отве́рзи ми две́ри жи́зненныя вско́ре, врата́ упова́ния моего́, и наста́ви, Пречи́стая, к жи́зни неконча́емей, и Ца́рствия Небе́снаго покажи́ мя, раба́ Твоего́, насле́дника и Боже́ственныя сла́вы святы́х соприча́стника.

Песнь 9

Ирмос: Ева у́бо неду́гом преслуша́ния кля́тву всели́ла есть: Ты же, Де́во Богоро́дице, прозябе́нием чревоноше́ния ми́рови благослове́ние процвела́ еси́, тем Тя вси велича́ем.

Воззри́ моли́твами Твои́ми, Чи́стая, на раба́ Твоего́, и вско́ре предвари́, и оскорбля́ющих и озлобля́ющих враг неви́димых изба́ви мя: спаси́ от бед и скорбе́й, и многообра́зных обстоя́ний.

Всего́ мя я́звами грехо́вными су́ща уя́звлена и осуждена́, исцели́, Де́во, и изба́ви лука́вых помышле́ний, Яже Сло́во Всеси́льное ро́ждшая, Блага́го же и Человеколю́бца.

Слава: Па́дшаго ра́ди пре́жде Ада́ма в смерть, сме́рти причасти́ся, Иже живото́м и сме́ртию облада́яй Твой Сын, Преблага́я: те́мже мя страсте́й и паде́ния Твои́ми мольба́ми воздви́гни.

И ныне: Спаси́, Богоро́дице, к Тебе́ прибега́ющих от бед и паде́жа, греха́ и бу́ри, и теле́сных страсте́й, и волне́ния, и жития́ ну́ждных печа́лей, и зло́бы лука́вствия.

В ЧЕТВЕРТОК

Канон Пресвятей Богородице

Песнь 1

Ирмос: Отве́рзу уста́ моя́, и напо́лнятся Ду́ха, и Сло́во отры́гну Цари́це Ма́тери, и явлю́ся све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ нас.

Ты Еди́на заступле́ние, прибе́жище и храни́тельница рабо́в Твои́х еси́, Богороди́тельнице Чи́стая. Сего́ ра́ди припа́даю Ти и зову́: спаси́ мя, окая́ннаго, я́ко ми́лостива.

Дея́ния скве́рная со́весть мою́ ра́нят, пред лице́м нося́щую сих обличе́ние: ускори́, Влады́чице, и по́мощь бу́ди ми, и пре́жде кончины́ изба́ви, и спаси́ мя.

Слава: Освяти́, Влады́чице, оскверне́нное се́рдце мое́, Яже Пресвято́е Сло́во ро́ждшая, и су́щая всех святе́йшая вы́шних сил, Еди́на Всепе́тая.

И ныне: На Тя наде́жду моего́ спасе́ния возложи́х, и к Тебе́, благоутро́бней, ве́рою прибего́х: не пре́зри мене́, наде́ждо ненаде́жных, ниже́ яви́ мя обра́дование бесо́м.

Песнь 3

Ирмос: Твоя́ песносло́вцы, Богоро́дице, живы́й и незави́стный исто́чниче, лик себе́ совоку́пльшия духо́вно утверди́ в Боже́ственней Твое́й сла́ве, венце́в сла́вы сподо́би.

Ро́су Твоего́ благоутро́бия пода́ждь ми, Пренепоро́чная Чи́стая, грехо́вным зно́ем та́ющему, и печа́ль Сама́ устужа́ющи ми и ра́дость Боже́ственную подаю́щи.

Ума́ моего́ тьму разруши́, Богоро́дице, све́том, и́же в Тебе́, я́ко Блага́я: и молю́ся, покая́ния мя о́бразы утверди́ти, я́ко ще́дра и многоми́лостива, да спаса́емь ублажа́ю Тя.

Слава: Кропле́нием ми́лости Твоея́, Де́во Богора́дованная, у́глие погаси́ мои́х страсте́й, и уга́сший свети́льник се́рдца моего́ возжзи́, златы́й све́щниче, Всенепоро́чная.

И ныне: Потопля́ет мя волна́ грехо́вная и бу́ря безме́стных помышле́ний: но умилосе́рдися, Всенепоро́чная, и ру́ку ми по́мощи, я́ко ми́лостива, простри́, да спасаемь ублажа́ю Тя.

Песнь 4

Ирмос: Неизсле́дный Бо́жий сове́т, е́же от Де́вы воплоще́ния Тебе́ Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Яже Всепречу́дная Ма́ти Бо́жия, возсия́й ми покая́ния зари́, и разреши́ мрак окая́нныя моея́ души́, и отжени́, Де́во, лука́вая помышле́ния се́рдца моего́.

Тя очисти́лище всех челове́ков ве́рою молю́, Благослове́нная, и прошу́: ми́лостива ми Суди́ю Сы́на Твоего́ сотвори́, я́ко да хвала́ми прославля́ю Тя.

Слава: Смире́нное, Еди́на Чи́стая, и прокаже́нное се́рдце мое́ нечи́стыми страсте́й наведе́нии, я́ко врач исцели́ и от руки́ бесо́вския исхити́.

И ныне: Глаго́лом Богодохнове́нным пре́жде блаже́нный Авваку́м, го́ру Тя Чи́стую и присе́нную нарече́, Прише́дшаго от ю́га и Тобо́ю воплоща́ема, Влады́чице, возвеща́я явле́ннейше.

Песнь 5

Ирмос: Ужасо́шася вся́ческая о Боже́ственней сла́ве Твое́й! Ты бо, неискусобра́чная Де́во, име́ла еси́ во утро́бе над все́ми Бо́га и родила́ еси́ безле́тнаго Сы́на, всем воспева́ющим Тя мир подава́ющая.

Умерщвле́н страстьми́ и помышле́нии, Всенепоро́чная, к щедро́там Твои́м прибега́ю, и к те́плому Твоему́ притека́ю, Влады́чице, покро́ву и по́мощи: Яже Жизнь Еди́на ро́ждшая, се́рдце мое́ оживи́.

Ору́жием снеде́на мя грехо́вным, исцели́ де́йственною Твое́ю лечбо́ю, Яже Спа́са ро́ждшая Го́спода, копие́м уя́звленнаго мене́ ра́ди, Пречи́стая, и уязви́вшаго се́рдце зми́ево.

Слава: Ума́ моего́ уврачу́й сокруше́ния, Пренепоро́чная, и исцели́ стра́сти души́ моея́, и уны́ния тьму потреби́, я́ко да во хвале́нии Тя пою́, При́сноблаже́нную, Богоро́дице Всепе́тая.

И ныне: Грозд виногра́да, Его́же возрасти́, Де́во, на Дре́ве ви́сяща ви́девши, вопия́ше: Ча́до, мсто48 иска́паеши, пия́нство отпуща́я враго́м, всу́е распе́ншим Тя, во всем долготерпели́ваго.

Песнь 6

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Яже Еди́на всем по́мощь, помози́ нам бе́дствующим и ру́ку пода́ждь, и к приста́нищу напра́ви спаси́тельному, Еди́на Богоблагода́тная.

Истяза́ния мя, Пречи́стая, в час стра́шный Ты исхити́, от бесо́в злы́я пре́лести, и суда́, и огня́, и тьмы, и му́ки.

Слава: Песносло́влю Тя, Всепе́тая, сла́влю честна́я вели́чия Твоя́: Ты же нечи́стых мя страсте́й свободи́ и ве́чныя сла́вы сподо́би.

И ныне: Пе́ти Тя до́лжни есмы́, но вои́стинну по достоя́нию не мо́жем: те́мже пое́м Тя, молча́нием чту́ще несказа́нное, е́же на Тебе́, Де́во, соде́янное Та́инство.

 

Таже: Го́споди поми́луй, трижды. Слава, и ныне

Седален, глас 4:

На Кресте́ Тя возвы́шена, я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что но́вое и стра́нное сие́ чу́до, Сы́не Мой? Ка́ко, Жизнь всех, вкуша́еши сме́рти, оживи́ти ме́ртвыя хотя́, я́ко Милосе́рд?

Песнь 7

Ирмос: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бог, благослове́н еси́.

Непреме́ннаго ро́ждши, Еди́на Богоблагода́тная, моли́ся, Чи́стая, десни́цею Его́ премени́ти мой ум к лу́чшим, лю́те премене́нный бесо́вскими искуше́нии.

Цари́це Де́во, ро́ждшая Царя́ Христа́, уще́дри и спаси́ мя, страстьми́ преклоне́ннаго: ве́рою утверди́, и наста́ви мя ко спасе́ния стези́, ве́рных спасе́ние.

Слава: Моли́твенница ми бу́ди, Пренепоро́чная, к Ро́ждшемуся из Тебе́: и оставле́ние лю́тых долго́в пода́ждь ми, и Ца́рствия Бо́жия Боже́ственный вход, и пи́щи восприя́тия, и све́та прича́стие.

И ныне: Всенепоро́чная Мари́е, Де́во неискусобра́чная Чи́стая, безме́рная бла́гостию, Яже Бо́га пло́тию ро́ждшая, Того́ моли́ вся́кия нас изба́вити печа́ли и греха́.

Песнь 8

Ирмос: Отроки благочести́выя в пещи́ Рождество́ Богоро́дичо спасло́ есть: тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́ и превозноси́те Его́ во вся ве́ки.

Блу́дно житие́ ижди́в и вся́ку скве́рну соде́лав, трепе́щу суди́ща, трепе́щу истяза́ния, трепе́щу и отве́та осужде́ния моего́: поми́луй ду́шу мою́ окая́нную, Чи́стая, и пре́жде сме́рти просвеще́ние ми пода́ждь.

На Тя всю наде́жду спасе́ния моего́ возложи́х, Богома́ти неискусобра́чная, и Тебе́ на по́мощь призыва́ю всегда́: спаси́ мя от печа́лей и напа́стей вра́жиих, и разреши́ плени́цы зол мои́х и от ве́чныя тьмы исхити́ мя.

Слава: Яви́лася еси́ а́нгел вы́шши, Бо́га неизрече́нно воплоти́вши: Сего́ у́бо моли́, Влады́чице Всенепоро́чная, плотски́х искуше́ний вы́шшу бы́ти ми и суда́ бу́дущаго изба́витися, Де́во, и ве́чныя му́ки.

И ныне: Вод Боже́ственных испо́лни мя Де́во, Яже Исто́чник во чре́ве носи́вшая: изба́ви от гно́я грехо́в мои́х и к жи́зни наста́ви спасе́ния, Чи́стая, и уны́ния души́ моея́ окая́нныя отжени́, Де́во, и от бесо́в изба́ви.

Песнь 9

Ирмос: Всяк земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Разруши́ па́жить греха́, оскверне́нныя моея́ души́ и телесе́, Богора́дованная Пречи́стая Влады́чице, си́льною моли́твою Твое́ю, о Всенепоро́чная, исцеле́ние да́вши спаси́тельное, Влады́чний страх пречи́стый.

Ты мне просвеще́ние, Ты ми избавле́ние и ра́дование, Ты побо́рница моя́, Ты моя́ сла́ва и похвала́, и наде́жда, и спасе́ние мое́ еси́, Пренепоро́чная, и Тебе́ ве́рно покланя́юся и вопию́ Ти: спаси́ мя, окая́ннаго раба́ Твоего́, и от а́довых врат исхити́ мя.

Слава: Спаси́ мя Чи́стая, Спа́са ро́ждшая всеще́драго, и уще́дри раба́ Твоего́, и к покая́ния пути́ наста́ви, лука́ваго собла́зны от среды́ отжени́, и того́ ловле́ния изба́ви мя, и огня́ ве́чнаго, Пренепоро́чная, исхити́ мя.

И ныне: Пло́тию, е́же из Тебе́, Сло́во, Пренепоро́чная, оде́явся, воплоти́вся же поживе́ в ми́ре, я́ко милосе́рд, пребы́в не ху́ждши, Иже пре́жде безпло́тный: и и́же дре́вле всех му́чившаго, Боже́ственною си́лою низложи́.

В ПЯТОК

Канон Пресвятей Богородице

Песнь 1

Ирмос: Триста́ты кре́пкия, Рожде́йся от Де́вы, безстра́стия во глубине́ души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Пресвята́я Богоро́дице, спаси́ нас.

От ка́ла страсте́й, от помышле́ний треволне́ния и от стрел лука́ваго, и от вся́каго прило́га сопроти́внаго спаси́ ду́шу мою́ окая́нную, Пречи́стая Богороди́тельнице, и огня́ ве́чнаго исхити́ мя.

Возведи́ мя, Чи́стая, из глубины́ прегреше́ний, и наста́ви к све́ту Боже́ственных за́поведей Спа́са Христа́ и Бо́га: возсия́й ми покая́ния спаси́тельную зарю́ и пода́ждь жизнь ве́чную.

Слава: В ти́ну лука́вую впа́дся зол мои́х, удавля́юся вельми́ делесы́ лука́выми, и несть постоя́ния: Влады́чице Де́во Ма́ти, Твое́ю си́лою возведи́ мя, и огня́ и му́ки изба́ви мя.

И ныне: Смерть и тлю потреби́ла еси́, Богоро́дице Всепе́тая, нетле́ния Исто́чник ро́ждши Христа́, безсме́ртием украси́вша и благода́тию челове́ческое естество́, Пренепоро́чная.

Песнь 3

Ирмос: Не му́дростию и си́лою и бога́тством хва́лимся, но Тобо́ю, Отчею ипоста́сною му́дростию, Христе́: несть бо свят, па́че Тебе́, Человеколю́бче.

Явльшися, Чи́стая Де́во, души́ моея́ тьму отыми́, и грехо́вныя плени́цы расто́ргни, и спаси́ мя, молю́ся, заступле́нием Твои́м.

Коле́блющееся прило́ги стра́стными се́рдце мое́ в страх Бо́жий чисте́йший утверди́, Де́во Пренепоро́чная, благоутро́бием Твои́м.

Слава: Отча́явся по́мощи вся́кия, к Тебе́, Пренепоро́чная, держа́вней храни́тельнице и покро́ву притеко́х: не отри́ни у́бо мене́ от Боже́ственнаго покро́ва Твоего́.

И ныне: Испещре́на ря́снами златы́ми я́ко Цари́ца, Царя́ и Бо́га одесну́ю ны́не предстои́ши, Влады́чице, моля́щи о рабе́х Твои́х.

Песнь 4

Ирмос: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Уны́нием одержи́ма мя и страсте́й омраче́нием всего́ потемне́на, и грехо́м порабоще́на, Богоблаже́нная Отрокови́це, свободи́, и присво́й Твоему́ Сы́ну и Бо́гу на́шему.

Умерщвле́на мя зло́бою льсти́ваго, Пренепоро́чная, я́ко Жизнь ро́ждшая, оживи́, к Тебе́ бо прибего́х: и погруже́нна во глубине́ паде́жей возведи́, я́ко ми́лостива, Всенепоро́чная.

Слава: Во гро́бе безме́рных сласте́й мои́х низлежу́, уны́нием и ле́ностию одержи́мь есмь: но ро́ждшая всех Возставле́ние, оживи́ мя, Блага́я, и спаси́.

И ныне: Свяще́нную Тя дре́вле проро́к го́ру Боже́ственную нарече́, Де́во Чи́стая, доброде́тельми всю осене́ну, из Нея́же спаси́тельное Сло́во яви́ся, в созда́ние и просвеще́ние душ на́ших.

Песнь 5

Ирмос: Нечести́вии не у́зрят сла́вы Твоея́, Христе́, но мы Тя, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя, Человеколю́бче.

Да возвесели́тся, Влады́чице, душа́ моя́ смире́нная: боя́тися Твоего́ Сы́на и твори́ти повеле́ния Его́ от се́рдца, Всенепоро́чная Пречи́стая, моли́твами Твои́ми наста́ви.

Всем се́рдцем мои́м, Влады́чице Блага́я, испове́датися Изба́вителю сподо́би ду́шу мою́ стра́стную, отгоня́щи неве́дение се́рдца моего́, Всенепоро́чная.

Слава: Ду́шу мою́ сохрани́, я́ко зе́ницу о́ка, под кро́вом крилу́ Твое́ю, Блага́я Пречи́стая, и духо́в от лука́вых томле́ния и муче́ния изба́ви.

И ныне: Избавля́ющи, яви́ся, Пречи́стая, от страсте́й наведе́ния и бесо́в лука́вых Твоего́ раба́, стяжа́вшаго Тя держа́вное заступле́ние и предста́тельницу непосты́дную.

Песнь 6

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли изба́ви мя, Иису́се, Царю́ Сил.

Низложи́ и́же при́сно борю́щия мя, Влады́чице, и о́блак лука́вых помышле́ний разори́, Со́лнца Пра́веднаго су́щи Дверь, Богома́ти.

Возсия́й ми покая́ния зарю́, Влады́чице, и о́блаки злых помышле́ний мои́х разруши́, лю́тыми прельще́нии привлеко́ма же и растлева́ема.

Слава: Утоли́ страсте́й мои́х свире́пую волну́ и бу́рю злых помышле́ний потреби́, тве́рдая всех предста́тельнице и покро́ве, Пренепоро́чная.

И ныне: Умно́жишася па́че песка́ морска́го прегреше́ния души́ моея́, и я́ко бре́мя тя́жкое низлага́ет мя: но Ты, Де́во, пре́жде конца́ уще́дривши, спаси́ мя.

 

Таже: Го́споди поми́луй, трижды. Слава, и ныне

Седален, глас 4:

Те́плое заступле́ние, е́же в беда́х, и помо́щницу на́шу, и к Бо́гу премене́ние, Еюже тли изба́вихомся, Богоро́дицу, ве́рнии, ублажа́ем.

Песнь 7

Ирмос: Авраа́мстии иногда́ в Вавило́не о́троцы, пе́щный пла́мень попра́ша, пе́сньми взыва́юще: оте́ц на́ших Бо́же благослове́н еси́.

Тя Богоро́дице Чи́стая, призыва́ю ве́рно: смире́нное мое́ соблюди́ се́рдце, и изба́ви мя пла́мене муче́ния, и тьмы ве́чныя.

Раздери́ Де́во Чи́стая, Сы́на Твоего́ копие́м мои́х прегреше́ний рукописа́ние, и изба́ви мя молю́ся, одержа́ния вся́каго, в час кончи́ны моея́.

Слава: Угаси́, Де́во Чи́стая, мои́х слез струя́ми, и Твои́х щедро́т одожде́нием пещь, ю́же ми исхода́таи зол мои́х мно́жество, бесо́вским де́йством.

И ныне: Изба́ви нас искуше́ний находя́щих, Еди́на Сло́ва Ма́ти Присноде́во, и вся́каго муче́ния, вои́стинну Тя разу́мно пою́щих во вся ве́ки.

Песнь 8

Ирмос: Изба́вителю всех Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся дела́, благослови́те, по́йте Го́спода.

Ду́шу мою́ боля́щую исцели́ и ум омраче́нный просвети́, и огня́ исхити́, и ве́чных неизглаго́ланных мук, Богоро́дице Де́во Богоневе́сто.

Прекло́нься безслове́сными страстьми́, во глубину́ поги́бели снидо́х и пла́меню сожже́ние сам ся соде́лах, от ни́хже мя изба́ви, Богоро́дице Де́во, раба́ Твоего́.

Слава: Зол мои́х пучи́ну изсуши́, милосе́рдия ро́ждши пучину́ Изба́вителя и Го́спода, и плени́цы зол мои́х разреши́ пре́жде кончи́ны, Яже Спа́са всех ро́ждшая.

И ныне: Вопло́щься от утро́бы Твоея́ Госпо́дь, госпо́дьствуяй тва́рию, и Тебе́, Де́во, Госпожу́ показа́, ви́димым же всем и неви́димым, я́ко Ма́терь прославля́я непоро́чную.

Песнь 9

Ирмос: Ева у́бо неду́гом преслуша́ния кля́тву всели́ла есть: Ты же, Де́во Богоро́дице, прозябе́нием чревоноше́ния ми́рови благослове́ние процвела́ еси́, тем Тя вси велича́ем.

Непло́дное бы́вшее Боже́ственных доброде́телей се́рдце мое́, Пречи́стая Богоро́дице Де́во, покажи́ плодоно́сно, Яже от непло́дныя ро́ждшаяся, хоте́нием вся Претворя́ющего ма́нием, да пою́ Тя, Всепе́тую.

Све́том Твои́м озари́ мя, Пренепоро́чная, ро́ждшая Свет Непристу́пный, разжени́ о́блаки страсте́й мои́х, и от тьмы несве́тлыя исхити́ мя, и Боже́ственнаго Све́та сподо́би: я́ко да пою́ Тя, Ма́ти Де́во.

Слава: Кропле́нием, Чи́стая, Твои́х щедро́т омы́й гное́ния се́рдца моего́, источа́ти ми при́сно сподо́би струи́ слез мои́х, пото́ки страсте́й укроча́ющи и му́ки избавля́ющи.

И ныне: Благолюби́ваго Бо́га ро́ждши, благолюби́вая Богоро́дице, любве́ мя плотски́я лука́выя ны́не вско́ре свободи́, Влады́чице, и поработи́ Боже́ственней во́ли, ле́ностию погиба́ющаго.

ГЛАС ПЯТЫЙ

В СУББОТУ49

Канон Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Песнь Ти по достоя́нию приноси́ти, Влады́чице, недоуме́ем вси: сла́ва бо па́че всех Твоя́. Но оба́че, Богоневе́сто, не омерзи́ моле́ние, приноси́мое со стра́хом и любо́вию Тебе́.

Вси к воде́ Твоего́ неоску́днаго исто́чника, Богоро́дице Де́во, притека́ем, зову́ще: Еди́на Ра́досте ро́ду на́шему, Пречи́стая, испроси́ мир Це́рквам Твои́м.

Слава: Положи́ Тя приста́нище су́щим в беда́х, Чи́стая, Бог, Иже от Тебе́ благоволи́вый восприя́ти плоть. Те́мже Ти припа́дающе взыва́ем: да́руй Твои́м рабо́м Твою́ по́мощь.

И ныне: Облегче́ние Твоя́ моли́тва, Де́во Пречи́стая, Твои́м рабо́м да бу́дет, страсте́й отгна́ние, грехо́в разруше́ние и вся́ческих боле́зней, Богороди́тельнице, очище́ние.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Ты еси́ земноро́дных упова́ние, и по́мощь и ра́дость, покро́в и прибе́жище, Влады́чице Ма́ти Живота́. Те́мже Тя мо́лим: Твою́ по́мощь низпосли́ всем пою́щим Тя, Пречи́стая.

Неду́гующии, и напа́стьми лю́тыми одержи́мии, Вседе́телю Ще́дрый, Иже вся́ческих, Бо́же, Пречи́стую сень Твою́ Ма́терь, Спа́се, на мольбу́ Ти приво́дим: разреши́ плени́цы прегреше́ний на́ших.

Слава: Всех Содержи́теля и Зижди́теля и Го́спода ро́ждшая Еди́на, и де́вствующи, и́же вои́стинну Тя Бо́жию Ма́терь сла́вят, спасе́ние Богоневе́сто, пода́ждь свы́ше рабо́м Твои́м.

И ны́не: Вод животво́рных мя испо́лни, Влады́чице, Боже́ственную во́ду ми́рови источи́вшая: и беззако́ний мои́х лю́тыя пото́ки и се́рдца моего́ во́лны Боже́ственною Твое́ю тишино́ю укроти́.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ помаза́нныя Твоя прише́л еси́.

Яко всех вы́шшу су́щую тва́рей, Тя Бог су́щим на земли́ дарова́, е́же к Нему́ хода́тайствы вино́вну, Богоро́дице Препе́тая.

Це́рковь Тя Бо́жию ве́дуще, Де́во Ма́ти, приле́жно мо́лимся, Тебе́ чту́щии: не затвори́ рабо́м Твои́м, Богоро́дице, Твоея́ ми́лости две́рей.

Слава: Тя вси Бо́жию ве́дуще преукра́шену вои́стинну оде́жду, Ма́ти браконеиску́сная, и́же Тя чту́щии про́сим: во оставле́ния оде́жду облецы́ нас.

И ныне: Мир в Рождестве́ Твое́м, Пречи́стая, весь испо́лнися ра́дости: отне́леже, е́же ра́дуйся, вели́кий Тебе́, Де́во Ма́ти Мари́е, свы́ше Гаврии́л возгласи́.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Вои́стину наказу́емся, не по ра́венству же до́лга согреше́ний на́ших: но, о Де́во Ма́ти Пречи́стая, отврати́ весь гнев Сы́на Твоего́ от нас.

Еди́наго изве́дшаго свет от тьмы, Чи́стая, Бо́га ро́ждши неискусобра́чно, приле́жно моли́ Его́ низпосла́ти Боже́ственный свет рабо́м Твои́м.

Слава: О каже́ния моли́твы Твоея́, Чи́стая и Боже́ственная Неве́сто от Лива́на, Юже Соломо́н прорече́, рабы́ Твоя́ Ма́ти Зижди́теля, благоуха́й.

И ныне: Ты Пра́вду же и Избавле́ние нам ро́ждши, Христа́, без се́мене, свобо́дно соде́яла еси́, Богоро́дице, от кля́твы естество́ пра́деднее.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Богоро́дице Влады́чице, ро́ждшая Соде́теля, Твои́м рабо́м испроси́ оставле́ние и держа́вны нас воздви́гни, во е́же пе́ти Тя.

Бу́ди нам по́мощь, Твои́м рабо́м, Влады́чице Чи́стая, ве́рно моля́щим Тя, я́ко ми́лостива: и держа́вны нас воздви́гни, во е́же пе́ти Тя.

Слава: По достоя́нию иму́щи, е́же мощи́, Влады́чице Чи́стая, Твои́м ми́лостивным о́ком при́зри и от тли нас, Твоя́ рабы́, возведи́.

И ныне: Непреста́нно точа́щи щедро́т струи́, Блага́я, прося́щим, одожди́ и мне свет за́поведей Твоего́ Сы́на, Пренепоро́чная.

 

Таже: Го́споди поми́луй, трижды. Слава, и ныне

Седален, глас 5:

Всесвята́я Де́во, поми́луй нас, прибега́ющих ве́рою к Тебе́, милосе́рдой, и прося́щих те́плаго Твоего́ заступле́ния: мо́жеши бо всех спасти́, я́ко Блага́я су́щи, Ма́ти Бо́га Вы́шняго, Ма́терними Твои́ми моли́твами при́сно объе́мши, Де́во Богора́дованная.

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Неизсле́дная Бо́жия Му́дросте, Христе́, рабы́ Твоя́ уще́дри, Ро́ждшия Тя ра́ди, непреста́нно пою́щия: Бо́же, благослове́н еси́.

Твою́ бла́гость мо́лим, Го́споди, я́зву исцели́ Ро́ждшия Тя ра́ди со стра́хом пою́щих: Бо́же, благослове́н еси́.

Слава: Оком ми́лостивным Твои́м, Богома́ти, при́зри и изба́ви рабы́ Твоя́ вся́каго обстоя́ния, ве́рою пою́щия: Бо́же, благослове́н еси́.

И ныне: Зло де́лающе, Влады́чице, от Тебе́ отпадо́хом: но обрето́хом Пречи́стая, а́бие по́мощь Твою́, внегда́ зва́ти: Бо́же, благослове́н еси́.

Песнь 8

Ирмос: Из Отца пре́жде век рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы, по́йте, лю́дие, превозноси́те во вся ве́ки.

Влады́чице на́ша, благи́х пода́тельнице, рабо́м Твои́м да́руй страсте́й исцеле́ние: я́ко да непреста́нно пое́м Тя, Де́во, и превозно́сим во ве́ки.

Неизглаго́ланно, Чи́стая, Изба́вителя ро́ждши, несказа́нно дои́ла еси́, Дева пребы́вши. Его́же у́бо моли́ о пою́щих Тя и славосло́вящих во вся ве́ки.

Слава: Тебе́ све́тлому Изба́вителя све́щнику, прекра́сный спле́тше лик, пое́м: вся дела́ Госпо́дня, по́йте непреста́нно Де́ву Мари́ю и превозноси́те Ю во ве́ки.

И ныне: Чи́стая Агнице, Де́во Ма́ти Отрокови́це, чи́ста мя сотвори́ от страсте́й теле́сных, я́ко да льсти́ваго изба́влюся сете́й, песносло́вя Тя, Богора́дованная.

Песнь 9

Ирмос: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к имя Ему́: Его́же велича́юще, Де́ву ублажа́ем.

Соверша́ется пе́ние у́бо, наде́жда же, Влады́ко Христе́, непрехо́дна, я́же к Тебе́ Соде́телю, я́коже и благода́ть Твоя́: но отобою́ду си́лу кре́пку дава́й рабо́м Твои́м, моли́твами Ро́ждшия Тя.

Неду́гующим си́ла и боля́щим близ Ты, Чи́стая, еси́, я́ко и́стинная Ма́ти Жи́зни: те́мже к Тебе́ прибега́юще, премене́ние всех ско́рбных обрето́хом, Влады́чице, и кро́вом Твои́м спасо́хомся.

Слава: Твой Боже́ственный ви́дяще обра́зно, Влады́чице, зрак, зрим Тя в нем я́коже я́ве, вся́ко ненави́дяще ерети́к безу́мие на земли́: ему́же припа́дающе, исцеле́ние прие́млем.

И ныне: Исцеле́нием бе́здну, и благода́тем пучи́ну, Чи́стая, позна́хом Тя мы гре́шнии. Те́мже Ти мо́лимся: от ну́ждных всех изми́, Еди́на Пречи́стая, притека́ющих к покро́ву Твоему́.

В НЕДЕЛЮ

Канон молебный Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Чу́до в Тебе́ соверша́ется, Де́во, вои́стинну ужа́сно: я́ко во утро́бе Твое́й ника́коже Вмести́маго име́ла еси́ и несказа́нно родила́ еси́, Присноде́вою пребы́вши.

Одожди́ ми, Влады́чице, прегреше́ний оставле́ние, Яже Дождь Небе́сный, прише́дший к Тебе́, неизглаго́ланно вмести́ла еси́ и Де́вою пребыла́ еси́ по Рождестве́ непости́жнем.

Слава: Еди́на благослове́нная и Богора́дованная, Яже ра́дость челове́ком ро́ждшая неизрече́нную, печа́ли отыми́ души́ моея́, молю́ся, и возвесели́ се́рдце мое́.

И ныне: Весь жела́ние и сла́дость жи́зни, Иже от Тебе́ возсия́вый за премно́гую бла́гость, Де́во Пренепоро́чная: Его́же моли́ спасти́ мя, непреста́нно ны́не Тя сла́вящаго.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Преидо́ша се́нем законотвори́мая: Законода́вца бо Христа́ родила́ еси́ Пречи́стая, благода́ть очище́ния и просвеще́ния нам взако́нившаго, и от кля́твы изъе́мшаго, Де́во Всенепоро́чная.

Роди́ся от Тебе́, Чи́стая, Бог воплоща́емь, и пло́тию ви́ден бысть, Иже прежде невиди́мый. Сего у́бо моли́ приле́жно, Отрокови́це, от ви́димых и неви́димых враг мя изба́вити, све́тло Тя сла́вящаго.

Слава: Страсте́й мя лю́та обурева́ет волна́, лука́вых духо́в глубина́ одержи́т мя, грехо́вная бу́ря смуща́ет ми се́рдце: Богороди́тельнице, Ты мя утверди́, све́тло Тя пою́щаго.

И ныне: Боже́ственнаго Гаврии́ла чинонача́льника иму́ще, благогове́йно е́же ра́дуйся, ве́рою приво́дим согла́сно, неискусобра́чней Ма́тери Богоро́дице верно: Еюже бед же и скорбе́й, и неду́г избавля́емся.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Истка́вшая внутрь от крове́й Твои́х деви́ческих Не́бо о́блаки, Де́во, Одева́юща оде́ждею нетле́ния, пре́жде ле́стию обнаже́ннаго мя облецы́.

Утро́ба Твоя́, Де́во, пала́та свята́ Царя́ и Бо́га несказа́нна бысть, в ню́же всели́вся, це́ркви нас соде́ла.

Слава: Уще́дри, ще́дра су́щи преокая́нную мою́ ду́шу, Богороди́тельнице Всенепоро́чная, ю́же от страсте́й и греха́ лю́те очерне́вшую и оцепене́вшую.

И ныне: Нетле́ннаго Ца́рства возсия́ла еси́, ски́петро, от ко́рене Иессе́ова, и ражда́еши Отроча́ безму́жно, Чи́стая, Ада́мова и Дави́дова Бо́га, вку́пе и Зижди́теля и Го́спода.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Пребыва́еши по Рождестве́ Де́ва нетле́нна, истле́вших всех челове́к к жи́зни приво́диши и нетле́нием осиява́еши, Пренепоро́чная.

Но́во родила́ еси́, я́ко мла́дя, Пречи́стая, Предве́чнаго от Отца́ безле́тно возсия́вшаго, Его́же о ми́ре моли́, Богоневе́сто.

Слава: Да обря́щу Тя помо́щницу, Де́во, изыма́ющу мя в час пре́ния су́днаго, егда́ на суди́щи предста́ну от Тебе́ Ро́ждшагося.

И ныне: Вся, Бли́жняя Моя́ добра́ и непоро́чна50, от Лива́на, Де́во Богоневе́сто: Святы́м Ду́хом в Тебе́ проуве́деся воплоще́ние Сы́на Бо́жия.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Неискусо́мужно родила́ еси́, Богоро́дице, Емману́ила, на́ше смире́ние уще́дрившаго: те́мже приснодо́лжно Тя сла́вим.

Па́че ума́ безле́тнаго, па́че сло́ва Зижди́теля, Пресвята́я, родила́ еси́, избавля́ющаго вся́кия тли Богоро́дицу Тя пою́щих.

Слава: Блага́го ро́ждши Благоде́теля и Зижди́теля, Пресвята́я Влады́чице благолюби́вая, ду́шу мою́ озло́бленную ублажи́.

И ныне: Но́вое Тебе́ похвале́ние и дре́внее прино́сим, Всечи́стая: лу́чше бо не и́мамы к похвале́нию, разве, ра́дуйся, е́же с Гаврии́лом Тебе́ воспева́ем.

Таже, Го́споди поми́луй, трижды. Слава, и ныне

Седален, глас 5:

Себе́ пре́жде суда́ ны́не пла́чу, помышля́я моя́ дела́ лука́вая и лю́тая, и прегреше́ний глубину́, одержа́щую мя от ю́ности и подавля́ющу ум: но Твои́м, Чи́стая, предста́нием оставле́ние ми пода́ждь и спасе́ние улучи́ти сподо́би.

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Изба́ви мя, Пречи́стая, зла́го уны́ния и страсте́й омраче́ния, и осужде́ния ве́чнующаго: яко да ве́рою Тя сла́влю.

Умертви́ стра́сти моя́, Яже Жизнь ро́ждшая: воздви́гни мя, Богоневе́сто, лежа́щаго, из гро́ба нечу́вствия, да любо́вию Тя сла́влю.

Слава: Пло́тию обложе́на Бо́га безпло́тнаго, Пренепоро́чная, родила́ еси́, нас избавля́ющего, со стра́хом пою́щих: Бо́же, благослове́н еси́.

И ныне: Исцеле́ние безме́здно, Чи́стую Твою́ моли́тву обре́тше, Де́во, про́сим, пою́ще, души́ благопремене́ния и телеси́ здра́вия.

Песнь 8

Ирмос: Тебе́, Вседе́телю, в пещи́ о́троцы, всеми́рный лик спле́тше, поя́ху: дела́ вся́кая, Го́спода по́йте и превозноси́те во вся ве́ки.

Две́ре све́та, покая́ния ми две́ри светоза́рныя отве́рзи, показу́ющи всяк пра́вый путь пра́вды, вводя́щ в Боже́ственныя во́ли вхо́ды.

Но́во на земли́, Де́во Ма́ти, Отроча́, Отцу́ собезнача́льнаго Сы́на родила́ еси́, за милосе́рдие неизрече́нное уподо́бльшагося нам, истле́вшим под грехо́м.

Слава: Вся избра́нна, вся преукра́шенна, Бог Юже возлюби́, Юже избра́, яви́лася еси́, Де́во, при́сно препросла́вленная: те́мже Тя пое́м, Чи́стая, во ве́ки.

И ныне: Вся Чи́стая и Боже́ственныя сла́вы испо́лнена, Бли́жняя Моя́, рече́ Дух Бо́жий, Тя провозвеща́я, Пречи́стая, Юже пе́сньми воспева́ем, пою́ще: Тебе́ подоба́ет ра́доватися, Бо́га Челове́ка ро́ждшей.

Песнь 9

Ирмос: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему: Его́же велича́юще, Де́ву ублажа́ем.

Твои́х притека́телей, Всечи́стая, не отри́ни ны́не: воздыха́ния, но воззри́ на ны су́щих в ско́рбех, плач преложи́ на ра́дость и умиле́ние в весе́лие, в пе́снех Тя пою́щих.

Основа́ние еси́ недви́жимо, Спа́са ро́ждши, Чи́стая, на вода́х зе́млю Боже́ственными веле́нии основа́вшаго: на не́мже нас све́тло, Тя блажа́щих, утверди́ти моли́ся.

Слава: Па́че ума́ Рождество́ Твое́, Богоро́дице, без му́жа бо зача́тие в Тебе́, и де́вственно Рождество́ Твое́ бысть: и́бо Бог есть рожде́йся, Его́же велича́юще, ро́ждшую Тя ублажа́ем.

И ныне: Стра́шен еси́, Го́споди, и кто у́бо тогда́ постои́т преще́ния Твоего́, Христе́, Еди́не Царю́, суд творя́щу Ти? Те́мже пощади́ и спаси́ мя, Спа́се, Ро́ждшия Тя благоприя́тными мольба́ми.

В ПОНЕДЕЛЬНИК

Канон Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Дух сокруше́н пода́ждь ми, Блага́я, смире́ние се́рдцу, уму́ же чистоту́, и житию́ исправле́ние, и прегреше́ний оставле́ние, и слез исто́чники, Пренепоро́чная.

Виждь мою́ беду́ и умиле́ние, и дре́вних прегреше́ний исцели́ стру́пы, и вре́мя ми покая́ния да́руй, и грехо́в испове́дание.

Слава: Себе́ пла́чу пре́жде исхо́да моего́, помышля́я зол мои́х бе́здну, Всенепоро́чная. Те́мже молю́ся Ти: Сы́на Твоего́ умоли́ изба́вите мя му́ки.

И ныне: Иму́щи покая́ния вре́мя, отступи́ от вся́кия зло́бы, душе́ моя́, и Зижди́телю Твоему́ со слеза́ми возопи́й: Бо́же мой, спаси́ мя мольба́ми Ро́ждшия Тя.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Страсте́й мои́х нача́льницы объя́ша мя, Пречи́стая и, е́же по о́бразу и по подо́бию сотворе́ннаго мя Бо́жию, испо́лниша студа́: но сих вре́да изба́ви мя, во умиле́нии пою́щаго Тя.

Лука́вно враг улови́ти мя тщи́тся, ве́чнующаго пла́мене попале́ние показа́ти мя хотя́, Пречи́стая: но сего́ кова́рствия и сове́ты разори́, да Тя сла́влю, ра́дуяся.

Слава: В ров преиспо́дний льсти́вно мя положи́ша мно́гих согреше́ний врази́ пра́ведных: я́ко безпомо́щен же ны́не, и уя́звлен весь, призыва́ю моли́тву Твою́, Влады́чице Пренепоро́чная, спаси́ мя.

И ныне: В ле́ности жизнь ижди́х окая́нный, ны́не к сме́ртным две́рем прибли́жихся, и вра́жиих наве́т ужаса́яся, вопию́ Ти: искуше́ний сих изба́ви мя, да Тя сла́влю, спаса́емь.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ помаза́нныя Твоя прише́л еси́.

Уязви́хся стрела́ми грехо́вными, и всего́ телесе́ ра́ну ны́не обношу́. Те́мже зову́ Ти, Пречи́стая: Твои́х моли́тв ско́ростию я́звы души́ моея́ исцели́.

Поми́луй, Чи́стая, рабы́ Твоя: Тебе́ бо хода́таицу к Бо́гу стяжа́хом, и мо́лимся изба́витися вся́кия ну́жды и ве́чнующаго муче́ния.

Слава: Наде́жда и щит и утвержде́ние Ты мне еси́, Блага́я, и лю́тых избавле́ние, и просвеще́ние души́ мое́й, и хвала́, и стена́, и держа́ва.

И ныне: Блу́дно расточи́х бога́тство до́брых дел, е́же ми Христо́с, я́ко благ, дарова́: да не пре́зриши у́бо мене́, Пречи́стая Отрокови́це, гла́дом погиба́ющаго.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Виждь, Влады́чице, не́мощь смире́нныя моея́ души́ и пло́ти моея́ изнеможе́ние, и ума́ моего́ плене́ние, и ненаде́жнаго спаси́ мя.

Бо́га, Его́же родила́ еси́, моли́ всегда́ спасти́ всех нас, Богоро́дицу Тя испове́дующих, и славосло́вящих Рождество́ Твое́, Пречи́стая.

Слава: Кто не блажи́т Тебе́, Всенепоро́чную? Творца́ бо всего́ ми́ра Спа́са Христа́ и Еди́наго Влады́ку несказа́нно родила́ еси́.

И ныне: Струи́ мне низпосли́ слез, Пречи́стая, и́миже скве́рны и вра́ски51 грехо́в мои́х омы́в, пою́ мно́жество Твоея́ бла́гости.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Во глубину́ вверго́хся прегреше́ний и беззако́ний: но простри́ ру́ку Твою́, Всенепоро́чная, и от а́да возведи́ мя неча́яния.

Мно́жество ве́си согреше́ний и по́мысл, смуща́ющих мя: те́мже ускори́ и изба́ви мя сих, Пречи́стая.

Слава: Пощади́ мя раба́ Твоего́, Влады́ко Христе́, мольба́ми чи́сто Ро́ждшия Тя, егда́ хо́щеши суди́ти ми́ру, его́же созда́л еси́.

И ныне: Во глубину́ низвлече́ся прегреше́ний, Влады́чице Чи́стая, душа́ моя́, снедь бы́вши бесо́м: те́мже ненаде́жно спаси́ мя.

 

Таже: Го́споди поми́луй, трижды. Слава, и ныне

Седален, глас 5:

Подобен: Собезначальное Слово:

Души́ моея́ стра́сти многоболе́зненныя и пло́ти моея́ неду́ги вско́ре исцели́, ума́ моего́ блуже́ния уста́ви, Пренепоро́чная. И в тишине́ по́мысла моли́твы принести́ чи́сты Царю́ вся́ческим сподо́би, Богоро́дице, и испроси́ти согреше́ний оставле́ние.

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Егда́ прииму́ во ум мой безме́стных мои́х дея́ний мно́жество прегреше́ний, Всенепоро́чная, бою́ся и ужаса́юся: от ни́хже мя Твои́ми моли́твами свободи́, Де́во.

Червь неусы́пный и огнь неугаси́мый, истаива́ет мя всегда́ и снеда́ет мою́ ду́шу, да не прииму́ сих иску́са, Пресвята́я Богоро́дице.

Слава: Тьмы кроме́шния и стра́шнаго муче́ния, раба́ Твоего́, изба́ви мя, Де́во Всенепоро́чная, вопию́ща Сы́ну Твоему́: Бо́же, благослове́н еси́.

И ныне: Плоть у́бо оскверни́х сра́мными страстьми́, ум же помрачи́х скве́рными мы́сльми: но уще́дри, Чи́стая, и спаси́ мя, непотре́бнаго раба́ Твоего́.

Песнь 8

Ирмос: Тебе́, Вседе́телю, в пещи́ о́троцы, всеми́рный лик спле́тше, поя́ху: дела́ вся́кая, Го́спода по́йте и превозноси́те во вся ве́ки.

Тебе́, Богоро́дице, немощно́е смире́нныя моея́ души́ приношу́, и се́рдца моего́ неможе́ние, и ума́ моего́ пре́лесть возвеща́ю, Твоея́ по́мощи прося́, Де́во.

Ми́лостив бу́ди Твои́м рабо́м, Сло́ве, моли́твами Ро́ждшия Тя, и спаси́ пою́щия: вся дела́ Госпо́дня, Го́спода по́йте и превозноси́те Его́ во ве́ки.

Слава: Иже Воли́теля Ро́ждшая ми́лости, поми́луй всех, ве́рою пою́щих: вся дела́ Госпо́дня, Го́спода по́йте и превозноси́те Его́ во ве́ки.

И ныне: Изба́ви мя кроме́шния тьмы и неусыпа́ющаго че́рвия, Блага́я Де́во: Ты бо родила́ еси́ Творца́ ми́ру: вся бо, ели́ка хо́щет, и твори́т Твои́ми моли́твами.

Песнь 9

Ирмос: Иса́ие, лику́й: Дева име́ во чре́ве и роди́ Сы́на Емману́ила, Бо́га же и Челове́ка, Восто́к имя Ему: Его́же велича́юще, Де́ву ублажа́ем.

Бо́га, Его́же родила́ еси́ неизрече́нно, Влады́чице Чи́стая, моли́ приле́жно изба́вити нас от бед и скорбе́й, и бу́дущаго Суда́ стра́шнаго: и све́тлости святы́х Его́ сподо́би.

Па́че всех согреши́х, преслу́шав Твоя́ за́поведи, Христе́, животво́рныя, и уподо́бихся безслове́сным ското́м: но Твоея́ Ма́тере, Сло́ве, моли́твами, непока́янна от жития́ не исто́ргни мене́.

Слава: Яко ми́лости бе́здну ро́ждшая Сло́ва Бо́жия, поми́луй, Блага́я, всех ду́ши, под кров Твой прибега́ющих: Тя бо к Бо́гу вси стяжа́хом предста́тельницу непосты́дну.

И ныне: Очище́ние и оставле́ние прегреше́ний испроси́ нам, и всех ну́ждных премене́ние, и жития́ исправле́ние ны́не чи́сто и светови́дно: да просла́вляем, Богома́ти, мно́гую Твою бла́гость.

ВО ВТОРНИК

Канон Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Твои́х раб из глубины́ се́рдца моли́твы ве́рно приноси́мыя Ти, Богоро́дице, прие́мли: и сия́ принося́щи Сы́ну Твоему́, пода́ждь прегреше́ний оставле́ние.

Яко вои́стинну Благода́тельница су́щи, богатя́щи земноро́дных и, спасе́ния Две́ре, к жи́зни вводя́щи, Де́во Богома́ти, предстоя́щи всегда́, не преста́й о моля́щих Тя.

Слава: Ны́не прекло́ншися певе́ц Твои́х мольба́ми, я́ко держа́вна ко спасе́нию су́щи по́мощь: от бед моли́твами Твои́ми изъе́мши, Влады́чице, це́лы сохрани́ почита́ющия Тя.

И ныне: Предвари́вши вско́ре и предстоя́щи те́пле, Пресвята́я Де́во, зело́ одержи́мых нас лю́тыми обстоя́нии, умили́вшися, изба́ви и от печа́ли свободи́.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Све́та Твоего́ бо́дренною Боже́ственною мольбо́ю те́мный о́блак се́рдца моего́, Ма́ти Бо́жия, озари́вши, Сы́на дне пока́жи мя, до́бро де́тельми просвеще́на, Световоди́тельнице душа́м на́шим.

Пе́ти Тя по достоя́нию жела́юще при́сно оба́че недоуме́юще, хвалу́ от усте́н прино́сим худы́х, ю́же благопреме́нно приими́ и мольба́м послу́шница бу́ди ве́рно моля́щимся Ти.

Слава: Добропло́дны непло́дныя ду́ши показу́ющи и олядене́вшее очища́ющи Твое́ю моли́твою, и мою́ ду́шу плод даю́щую ве́ру и житие́ нескве́рно, Ты, Богороди́тельнице, покажи́.

И ныне: Иже всея́ земли́ го́рстию Содержа́й концы́, ка́ко Ма́терними не́драми объе́млется? Мле́ком же пита́ется от сосе́ц, насыща́я вся́ко живо́тно благоволе́ния: и бога́тый излия́нием обнищава́ет, воплоща́емь.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Яко Еди́ну Тя к Бо́гу хода́таицу ве́дуще, согреше́ний до́лги разреша́ющую пови́нным, Пречи́стая, хвала́ми и пе́сньми почита́ем.

Це́рковь освяще́нную Тя показа́, все́лься в Тя Бог, Де́во Пренепоро́чная: Его́же при́сно моли́ соблюсти́ невре́дны рабы́ Твоя́.

Слава: Мольбу́ ни́щих услы́ши, упова́ющих на Тя, Богоро́дице, и ускори́ от бед изба́вити нас Ма́терними Твои́ми дерзнове́нии.

И ныне: В ско́рбех сла́дкое утеше́ние и в напа́стех по́мощь, и в беда́х предста́тельницу Тя, Ма́ти Бо́жия, стяжа́вше, озлобле́ний вся́ких избавля́емся.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Един Благоутро́бен.

Иже Первонача́льнаго в ле́то поро́ждши, во опи́санней пло́ти, вои́стинну естество́м неопи́саннаго: Того́ моли́ непреста́нно о рабе́х Твои́х.

Ты приближа́ешися вско́ре су́щим в ну́ждах, при́сно помога́ющи и управля́ющи призыва́ющия Тя во искуше́ниих ко спасе́нию, Пречи́стая.

Слава: Ми́лостива естество́м, милосе́рдаго Бо́га моли́твами показа́вши, пода́ждь Твои́м рабо́м ми́рну жизнь и прегреше́ний избавле́ние Пренепоро́чная.

И ныне: Угль ро́ждшая, Его́же узре́ Иса́иа, попали́ ми ве́щи, Всенепоро́чная, согреше́ний и просвети́ мя, молю́ся.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Умерщвле́нных нас страстьми́ греха́, Влады́чице, возста́вивши, оживи́ моли́твами Твои́ми, я́ко тли Потреби́теля ро́ждшая.

Неле́стно упова́ние Тя, и необори́му сте́ну на враги́, и тве́рду иму́ще по́мощь, на ны наве́тов не убои́мся.

Слава: Земноро́дным предста́ни в боле́знех при́сно, Чи́стая: и лю́тых увяда́ющих Твоя́ служи́тели невре́дны сохрани́.

И ны́не: Ду́шу мою́ просвети́, омрачи́вшуюся о́блаком помышле́ний, находя́щих ми, Богоневе́сто, наве́том человекоуби́йцы бе́са.

 

Таже: Го́споди поми́луй, трижды. Слава, и ныне

Седален, глас 5:

Кресто́м Сы́на Твоего́, Богоблагода́тная, и́дольская пре́лесть вся упраздни́ся, и де́монская кре́пость попра́ся. Сего́ ра́ди, ве́рнии, по до́лгу Тя при́сно пое́м и благослови́м и, Богоро́дицу вои́стинну испове́дающе, Тя велича́ем.

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Приими́ Влады́чице ве́рных Твои́х проше́ния раб, напа́стей изыма́ющи, и от скорбе́й спаса́ющи ве́рно пою́щих: Бо́же, благослове́н еси́.

Иже благи́х Де́лателя Бо́га нам ро́ждшая, Того́ умоли́ Ма́терними мольба́ми Чи́стая, уще́дрити о Тебе́ хва́лящихся.

Слава: Предста́тельницу непобеди́мую и основа́ние непоколе́блемо Тя стяжа́вше, и Твои́м оде́явшеся заступле́нием, Влады́чице, побежда́ем стрельца́, я́же на ны, кова́рствия.

И ны́не: Виждь смире́ние Твоего́ раба́, Влады́чице, и ве́чнаго огня́ свободи́ мя, непреста́нно пою́щаго: Бо́же, благослове́н еси́.

Песнь 8

Ирмос: Тебе́, Вседе́телю в пещи́ о́троцы, всеми́рный лик спле́тше, пояху́: дела́ вся́кая Го́спода по́йте и превозноси́те во вся ве́ки.

Глаго́лы вку́пе и мы́сльми хвалу́, Де́во, Тебе́ плету́ще, ве́рнии, взыва́ем: Го́спода по́йте и превозноси́те Его́ во ве́ки.

Всю Тебе́ добро́ту Соломо́н бли́жнюю Бо́гу преднаписа́, я́ко ближа́йшу су́щую Сему́, Ма́терним, Деви́це, дерзнове́нием су́щих в ми́ре избавля́ющи.

Слава: Тя по Бо́зе упова́ние спасе́ния в напа́стех иму́ще, ве́рнии, взыва́ем: вся дела́ Госпо́дня, Го́спода по́йте и превозноси́те Его́ во ве́ки.

И ныне: Приими́ песнь от худы́х усте́н, Де́во Всепе́тая, вопию́щих Ти: ра́дуйся, боля́щим тело́м врачевство́ и отча́янным душа́м спасе́ние.

Песнь 9

Ирмос: Иса́ие лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему: Его́же велича́юще, Де́ву ублажа́ем.

К Тебе́ пролива́ем, ю́же от боле́зни моли́тву на́шу: поми́луй нас гре́шных, да не посрами́мся в день искуше́ния, Тя Всемилосе́рдую Богоро́дицу призыва́ющии.

Пе́рстное сро́дство не пре́зри, Влады́чице Чи́стая, но бу́ди помо́щница, покрыва́ющи, в печа́лех укрепля́ющи и избавля́ющи всех неду́жных: на Тя бо упова́ем, гото́вую, во е́же спасти́ нас.

Слава: Бо́же, услы́ши люде́й Твои́х моли́тву ны́не и изба́ви нас вре́да вра́жия: се Тебе́ приво́дим и́стинное очище́ние, Тебе́ ро́ждшую, Юже любо́вию ублажа́ем.

И ныне: Под держа́ву кре́пости Твоея́, Влады́чице, притека́ем то́щно вси земноро́днии, прося́ще ми́лости и щедро́ты Твоя́ ми́лостивыя, я́же пролия́вши, всех нас освяти́.

В СРЕДУ

Канон молебный Пресвятей Богородице

Песнь 1

Ирмос: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Светоно́сная ски́ние Царя́ Христа́, озари́ мою́ мысль, омраче́нную ле́стию борца́ и тьмо́ю ослепле́нную прегреше́ний мои́х.

Помышле́ний лука́вых смире́нную мою́ ду́шу, Богороди́тельнице, свободи́ и жили́ще Бо́гу сию́ соде́лай, да по до́лгу Тя сла́влю все́гда.

Слава: Егда́, повеле́нием Бо́жиим, от вре́менныя жи́зни отыти́ хощу́, Пречи́стая, бесо́вския ру́ки покажи́ мя вы́шша, а́нгелы подаю́щи спу́тники мне.

И ныне: Вску́ю, о душе́, во уны́нии мно́зе все житие́ ижди́ла еси́? Потщи́ся у́бо про́чее и возопи́й Госпо́дни Ма́тери: очи́сти и спаси́ мя, Богороди́тельнице.

Песнь 3

Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити тридне́вное Твое́ Воскресе́ние.

Из ро́ва страсте́й и муче́ний возведи́ мя, несумне́нно пою́ща Тя, Богоро́дице Всеблаже́нная.

Вре́тище мое́ расто́ргни безме́рных прегреше́ний мои́х, и весе́лием опоя́ши доброде́телей, Богоблагода́тная.

Слава: Ка́плю ми, Чи́стая, слез пода́ждь, я́ко да отжену́ се́рдца моего́ недоуме́ние и приле́жно воспою́ Тя.

И ны́не: Низложи́, Пренепоро́чная, враг безпло́тных шата́ние, и тех томле́ния вско́ре свободи́ мя.

Песнь 4

Ирмос: Услы́шах слух си́лы Креста́, я́ко рай отве́рзеся им, и возопи́х: сла́ва си́ле Твое́й, Го́споди.

Вску́ю уподо́билася еси́, душе́, непло́дней смоко́внице, ника́коже боя́щися посече́ния и пла́мене ве́чнаго? Ускори́ у́бо пре́жде конца́ и возни́кни.

Кий язы́к изрече́т соде́янных мои́х зол безме́рное мо́ре и глуби́ну́ прегреше́ний? Спаси́ мя, Де́во Пренепоро́чная, отча́яннаго.

Слава: Себе́ пла́чу, егда́ во ум прииду́ мно́гих мои́х прегреше́ний и огня́ негаси́маго, и молю́ Тя, да́ти ми вре́мя покая́ния, Чи́стая.

И ныне: Да не восхи́тит, я́ко лев, стропти́вый враг окая́нную мою́ ду́шу: но Твое́ю си́лою душетле́нныя сокруши́ зу́бы его, Блага́я.

Песнь 5

Ирмос: Утренююще вопие́м Ти, Го́споди, спаси́ ны: Ты бо еси́ Бог наш, ра́зве бо Тебе́, ино́го не зна́ем.

При́зри и услы́ши, Влады́чице, глас мой, и изба́ви мя, молю́ся, ве́чнаго осужде́ния.

Уязви́хся греха́ стрела́ми и вопию́ Ти: уврачу́й, Пречи́стая, се́рдца моего́ я́звы.

Слава: Поми́луй мя, Еди́не Человеколю́бче Ще́дрый, моли́твами Ро́ждшия Тя: Ты бо ми еси́ Бог и Госпо́дь.

И ныне: Поми́луй мя, Еди́на Всепе́тая, молю́ Твою́ бла́гость, и ми́лости сподо́би.

Песнь 6

Ирмос: Обы́де мя бе́здна, гроб мне кит бысть, аз же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Яко лев рыка́я, льсти́вый и́щет мя расто́ргнути и показа́ти снедь свое́й зло́бе, Чи́стая: но сего́ вре́да свободи́ мя.

Очи́сти, Человеколю́бче, моли́твами чи́сто Ро́ждшия Тя, и изба́ви мир Твой от вся́кия ско́рби и ве́чныя сла́вы сподо́би.

Слава: Обы́де мя бе́здна прегреше́ний, во глубину́ низве́дши отчая́ния: молю́ся, Чи́стая, возведи́ от преиспо́дняго а́да, Тебе́ сла́вящаго.

И ныне: Житие́ мое́ испо́лнися прегреше́ний и вся́кия ле́ности, те́мже к покая́нию пре́жде кончи́ны моея́, Чи́стая, обрати́ и спаси́ мя Препе́тая.

 

Таже: Го́споди поми́луй, трижды. Слава, и ныне

Седален, глас 5:

Подобен: Собезначальное Слово:

Ра́дуйся, стено́ тве́рдая Богопобе́дная, ра́дуйся, паде́ние ва́рваров всевоева́нное, ра́дуйся, возведе́ние ве́рных царе́й, Богоро́дице, вои́стинну упова́ющих на Тя, моли́твами Твои́ми избавля́ющи нас от бед вся́ческих и от безбо́жных враг.

Песнь 7

Ирмос: В пещи́ о́гненней песносло́вцы спасы́й о́троки, благослове́н Бог оте́ц на́ших.

Нево́льных зол и во́льных проще́ние Твое́ю бла́гостию, Влады́чице, пода́ждь ми.

Изнемога́ет мой ум, прило́ги нече́стия лука́вых по́мысл: помози́ ми, Блага́я.

Слава: Душе́вных мои́х страсте́й ра́ны, Богоро́дице, Твои́х моли́тв лечба́ми ны́не исцели́.

И ныне: Сокруше́нну ду́шу и по́мысл смире́н, пода́ждь ми, Блага́я: я́ко да сла́влю Тя.

Песнь 8

Ирмос: Из Отца́ пре́жде век рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы, по́йте, лю́дие, превозноси́те во вся ве́ки.

В ле́ности житие́ сконча́в окая́нный, и приближи́вся к концу́ живота́ моего́, взыва́ю Ти, Богоро́дице: сопроти́вных исхити́ сете́й смире́нную мою́ ду́шу.

Теле́сных боле́зней, ран лю́тых душе́вных и страсте́й настоя́ния истязу́ему, Твоего́ Ца́рствия си́лу ми пода́ждь, я́ко Еди́на ми́лостива.

Слава: В пучи́не жития́ обурева́ема и бесо́вскими волна́ми погружа́ема, спаси́, Чи́стая, и Боже́ственному устремле́нию, к благоуго́дному житию́ введи́ мя, Отрокови́це.

И ныне: Яко в неве́стный черто́г входя́, Де́во, Гаврии́л по́слан: ра́дуйся, возопи́, глаго́ля, пресла́вная Пала́то всех Царя́ Христа́, в Ню́же все́лься, земны́я вся обожи́.

Песнь 9

Ирмос: Тя па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии, единому́дренно велича́ем.

Тя, Юже Бо́га несказа́нно ро́ждшую, засту́пницу стяжа́хом и сте́ну недви́жиму, и душа́м спасе́ние, и чудесе́м исто́чник.

Ми́лостив бу́ди ми, Сло́ве и́стиннаго Бо́га, в день суда́, мольба́ми Ро́ждшия Тя: и су́щим одесну́ю Тебе́ сочета́й.

Слава: Изба́ви мя, Чи́стая, огня ве́чнующаго и неусыпа́ющаго че́рвия, и вся́кия му́ки, на Тя наде́жду возло́жшаго.

И ныне: Егда́ хо́щет душа́ моя́ разлучи́тися от окая́ннаго моего́ телесе́, невиди́мых враг томи́тельства изба́ви мя, Богоневе́стная.

В ЧЕТВЕРТОК

Канон Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Други́й рай зна́ем Тя мы́сленный без сравне́ния, Де́во Богоневе́сто, одолева́ющий и́же во Еде́ме раю́, Богома́ти: Ты бо нетле́ние челове́ком прозябла́ еси́.

Дре́во жи́зни объя́ти в раи́ Ада́м возбране́н бысть, от дре́ва причасти́вся разу́мнаго: беземе́ртие же подаде́ плоть от Тебе́, Де́во, Прие́мый.

Слава: Пе́рвее от земли́ созда́н бысть Ада́м, Пречи́стыма рука́ма Вседержи́теля: от Тебе́ же, Богоро́дице Де́во, роди́ся без се́мене но́вый Ада́м, Зижди́тель челове́чества.

И ныне: Бе́здна после́дняя обы́де мя безме́рных прегреше́ний, и во глубину́ низво́дит мя лю́таго отча́яния: Ро́ждшая бе́здну милосе́рдия, ускори́ и спаси́ мя.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Иже живо́тным садо́м зе́млю сотвори́вый роди́тельницу, не су́щим на ней пе́рвее, от Неискусому́жныя Жены́ а́бие, я́ко от земли́, безсе́менный воплоща́емь прише́л еси́, Сло́ве Бо́жий неизме́нный.

Ты еси́ земноро́дных наде́жда и по́мощь, и ра́дость, и покро́в, и прибе́жище, Влады́чице Ма́ти Живота́. Те́мже мо́лим: Твою́ по́мощь низпосли́ всем пою́щим Тя.

Слава: Неду́гующии, напа́стьми лю́тыми одержи́ми, Вседе́телю Ще́дре, Иже вся́ческих Бо́же, Трисвя́тую Твою́ Ски́нию приво́дим Ти вси в моли́тву и вопие́м Ти; разреши́ обдержа́ния раб Твои́х.

И ныне: Смуща́ет мя лю́те грехо́вная волна́, во глубину́ прегреше́ний низвлеча́, Пречи́стая, и бу́ря сопроти́вных помышле́ний обурева́ет ду́шу мою: Окорми́теля ро́ждшая, ускори́ изъя́ти раба́ Твоего́.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ помаза́нныя Твоя́ прише́л еси́.

Ева повину́вшися зми́ю, роди́ печа́ль жена́м: Ты же, Де́во, ве́ровавши Бо́жиим веща́нием, всему́ ми́ру ра́дость процвела́ еси́.

Пе́рвее от ребр Ада́мовых рожде́на Ева: ны́не же Бог от Ма́тере Богоневе́сты, Его́же воплоще́нна Де́ва без отца́ родила́ есть.

Слава: Ева ра́дуется, дре́вняго бо прама́терня осужде́ния свобожде́ну Отрокови́ца показа́, Яже Судию́ заче́ншая нетле́нно и ро́ждшая Милосе́рдаго.

И ныне: Житие́ мое́ прегреше́ний испо́лнися, по́мысл же стра́стен, и душа́ моя́ осужде́на: те́мже Твои́м благоутро́бием поми́луй и спаси́ мя, Влады́чице.

Песнь 5

Ирмос: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Столп и о́блак све́та Тя обре́тше, Де́во Ма́ти Светода́вца, и́же по пусты́ни ле́стней ходя́щии, от лют избега́ем.

Ра́дуйся, ро́ждшая Бо́га пло́тию, пре́жде век рожде́ннаго от Отца́ безпло́тне, яви́тися же а́бие нам изво́лившаго.

Слава: Со́лнце победи́ся Твое́ю све́тлостию, Мари́е: Ты бо свети́лы не́бо Украси́вшаго рука́ма объяла́ еси́ и от Твое́ю сосцу́ пита́ла еси́.

И ныне: Да не осу́диши мене́ во огнь негаси́мый, Христе́ Спа́се мой, мольба́ми Чи́стыя, ро́ждшия Тя.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Иже в ки́те спа́сшаго проро́ка дре́вле Ио́ну, невре́дно носи́ла еси́ во утро́бе Твое́ю чу́днаго Бо́га, Чи́стая Присноде́во.

Держа́щаго Го́спода моря́, Пречи́стая Де́во, Бо́га небу́рно, я́коже си́лы нося́щи, сла́ное возмуще́ния льсти успи́ла еси́.

Слава: Вся́ческих тишину́ ро́ждши, Пречи́стая, Христа́, Яже к Нему́ благоукроти́ моли́твами Твои́ми, ю́же на мя страсте́й непостоя́нную бу́рю.

И ныне: В день печа́ли, егда́ хощу́ теле́сных соу́з разреши́тися, предста́ни ми и обдержа́ния бесо́вскаго исхити́.

 

Таже: Го́споди поми́луй, трижды. Слава, и ныне

Седален, глас 5:

На Кресте́ зря́щи Тя, Христе́, Ма́ти Твоя́, во́лею посреде́ разбо́йнику ви́сяща, растерза́ющися ма́терски утро́бою, глаго́лаше: безгре́шне Сы́не, ка́ко непра́ведно на Кресте́ я́коже злоде́й распя́тся, Иже челове́ческий оживи́ти хотя́ род, я́ко Преблаги́й?

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Иже к пра́отцу Авраа́му прише́ствие Бог соверши́, Сын Твой быв: и се́мя его́ во язы́ки благослови́, Благослове́нная.

Ты Ле́ствица еси́ Иа́ковля нескве́рная: Ма́терь бо Еди́ну Тя Бог написа́, Ея́же ра́ди Бог совокупи́ о́наго исча́дия.

Слава: Превозноси́мый со Отце́м и Ду́хом Сын, избра́в Тебе́, Чи́стая, зело́ возлюби́ в жили́ще Себе́ воплоща́емь.

И ныне: Бо́га, Его́же родила́ еси́, всегда́ моли́ отчая́ннаго мя спасти́ и улучи́ти просты́ню52, ве́рою вопию́щему: Бо́же, благослове́н еси́.

Песнь 8

Ирмос: Тебе́, Вседе́телю, в пещи́ о́троцы, всеми́рный лик спле́тше, поя́ху: дела́ вся́кая, Го́спода по́йте, и превозноси́те во вся ве́ки.

Испыта́ния Твое́ убега́ет Рождество́ Де́во, ве́рою же явля́ется вопию́щим: вся дела́ Госпо́дня, Го́спода по́йте и превозноси́те Его во ве́ки.

Вся́ко деви́ческия не отпа́дши сла́вы, ма́терскою обогати́лася еси́ че́стию, Безневе́стная: весть Иже сия́ я́ве чудоде́йствовавый, Его́же превозно́сим во ве́ки.

Слава: Виждь, Блага́я Пречи́стая, смире́нныя моея́ души́ озлобле́ние, и боле́знь премени́ вско́ре: да Тя сла́влю во ве́ки.

И ныне: Приими́ ми́лостивно Твою́ Ма́терь, Сло́ве, моля́щуюся спасти́ Твоя́ лю́ди, Бла́же, я́же стяжа́л еси́ честно́ю Твое́ю кро́вию: да Тебе́ благослови́м во вся ве́ки.

Песнь 9

Ирмос: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к имя Ему: Его́же велича́юще, Де́ву ублажа́ем.

Богоро́дице Влады́чице, умоли́ покланя́емую Тро́ицу, от Нея́же безстра́стно Еди́наго пло́тию нам родила́ еси́, умири́ти су́щия на земли́, и разреше́нию прегреше́ний пою́щим Тя дарова́тися.

Аще и Еди́н разуме́ется Лице́м Емману́ил, но Естество́м сугу́б: се бо две возвеща́я во́ли, я́же в Нем и де́йства, Его́же Роди́тельницу Богоро́дицу испове́дуем.

Слава: Себе́ рыда́ю помышля́я мои́х грехо́в мно́жество и страсте́й возше́ствия, души́ моея́ уны́ния и ума́ моего́ изступле́ния, отча́яннаго мя, спасе́ния сподо́би.

И ныне: Врази́ мои́ наше́дше, Го́споди, я́коже разбо́йницы, вы́шнюю све́тлую и светови́дную оде́жду совле́кше, и ра́ны ми наложи́ша мно́ги: Ты, предста́вши, е́ле жи́ва возста́ви.

В ПЯТОК

Канон молебный Пресвятей Богородице

Песнь 1

Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную песнь пою́ща.

Припев: Пресвята́я Богоро́дице, спаси́ нас.

Вси Тя челове́честии ро́ди хва́лят, я́ко дре́вле, Де́во, проро́чески прорекла́ еси́: и мене́ у́бо приими́ пою́ща Тя, Влады́чице, и просвети́, и вразуми́.

Притупи́ла еси́ сме́рти жа́ло и мирски́й грех Де́во, и́стинную ро́ждши Жизнь, ея́же ра́ди, Влады́чице, притупи́ страсте́й мои́х о́стрыя стре́лы вско́ре.

Слава: Еди́на испещре́на деви́ческими ря́снами от ве́ка я́вльшися, смоко́вную ри́зу Ада́мову Ты расто́ргнула еси́: те́мже мя ны́не облецы́ целому́дрия оде́ждею моли́твами Твои́ми.

И ныне: Бога́тство и Боже́ственную сла́ву стяжа́ша у́бо мно́ги дще́ри пре́жде я́ве, но без сравне́ния, Влады́чице, Ты всех превозшла́ еси́. Те́мже мя ны́не обогати́ Небе́сными и Боже́ственными благода́тьми.

Песнь 3

Ирмос: Водрузи́вый на ничесо́мже зе́млю повеле́нием Твои́м и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

Глубина́ и высота́ в Тебе́ познава́шеся, Де́во Пречи́стая, Бо́жией Му́дрости непостижи́мей, от Твои́х ложе́сн ро́ждшейся: е́юже глубины́ се́рдце мое́ изба́ви мудрова́ний змии́ных.

Иже пре́жде перна́тыя, и га́ды, от воды́ соста́вил еси́ сло́вом, не су́щия пре́жде: Ты а́бие, Христе́, от кро́ве Чи́стыя Де́вы Боже́ственнаго Твоего́ воплоще́ния оде́жду стра́нну устро́ил еси́.

Слава: Ты Еди́на очище́ние яви́лася еси́ естеству́, Пречи́стая, в Ню́же огнь Боже́ственный неопа́льно все́лься, сие очи́сти я́ве: Ты у́бо согреше́ний и страсте́й мои́х скве́рну очи́сти и Твои́ми моли́твами просвети́ мя.

И ныне: Ча́шу но́ваго виногра́да ро́ждия, напоя́ющую я́ве ве́рныя во оставле́ние согреше́ний, Тя, Пречи́стая, ве́дый, молю: испуще́нием Боже́ственныя воды́ напо́й се́рдце мое́.

Песнь 4

Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ помаза́нныя Твоя́ прише́л еси́.

Неора́нна Ты яви́лася еси́ бразда́, несе́янный Боже́ственный прозя́бшая Клас, Имже а́лчуща мя накорми́ Боже́ственными дарова́ньми же и благода́тьми.

Боля́ща мя и́скренно сме́ртне и душе́вных страсте́й огне́м содержи́ма, Влады́чице, моли́тв Твои́х водо́ю напои́вши, вско́ре возста́ви.

Слава: Яко су́щий Бо́жий Град одушевле́н, его́же ре́ки мы́сленныя веселя́т стремле́ния, моли́тв Твои́х столпо́м души́ моея́ хра́мину утверди́.

И ныне: Облак Тя ве́дый, одожди́вший Пра́вду и́стинную, молю́, Пречи́стая Влады́чице, от всех оби́дящих мя изба́вити раба́ Твоего́ вско́ре.

Песнь 5

Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную Христе́, я́ко Еди́н Благоутро́бен.

Возмуще́ние и во́лну греха́, и страсте́й мои́х, Де́во Влады́чице, до конца́ утиши́, безстра́стия ро́ждши Вино́внаго.

Поста́в53 сый свы́ше Христо́в яви́ся благоле́пия оде́жды Боже́ственныя, доброде́телей оде́ждею Чи́стая, обнаже́нную ду́шу мою́ облецы́.

Слава: Очище́ние ми да́руй согреше́ний Твои́ми мольба́ми, Чи́стая Де́во, Яже очище́ние Боже́ственное ро́ждшая нам Христа́ и Го́спода.

И ныне: Стру́пы, я́звы и гное́ния грехо́вная, рукоде́йствия моли́твами потреби́ ми, Де́во, и си́лу рабу́ Твоему́ пода́ждь.

Песнь 6

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Яже Свет ро́ждшая свети́лам твори́тельный, ду́шу мою́ ны́не просвети́, и изба́ви от страсте́й омраче́ния, Всесве́тлая.

Ме́рры Услади́вшаго во́ды пре́жде Богоро́дице, Твоего́ Сы́на моли́ изба́вити мя стра́сти лю́тыя и го́рести вско́ре.

Слава: Возмуща́ет пото́к страсте́й ду́шу мою́, Пречи́стая: но сего́ изсуши́ моли́твами Твои́ми и по́мыслы лука́выя потреби́.

И ныне: Христо́с, избавля́я челове́ки, прии́де от Сио́на, из чре́ва Твоего́, Влады́чице Пренепоро́чная: Имже и мене́ от напа́стей изба́ви и скорбе́й.

 

Таже: Го́споди поми́луй, трижды. Слава, и ныне

Седален, глас 5:

Вску́ю уныва́ющи, душе́ стра́стная, забы́ла еси́ Бо́га Твоего́, ми́лующаго тя? И повеле́ния Его преоби́девши, в блуде́ житие́ скончава́еши умовре́дно: отступи́ от зло́бы, Богоро́дице вопию́щи: отча́янную ду́шу мою́ поми́луй.

Песнь 7

Ирмос: Превозноси́мый отце́в Госпо́дь пла́мень угаси́, о́троки ороси́ согла́сно пою́щия: Бо́же, благослове́н еси́.

Ужаса́ются и трепе́щут Твоего́ призыва́ния, Пречи́стая, бесо́встии полцы́: от ни́хже избавля́ющи мя спаси́ и соблюди́, покрыва́ющи от вся́каго вре́да.

Неизглаго́ланная Сла́ва Твоя́, Де́во, сла́вы бо Го́спода родила́ еси́: те́мже мя сподо́би сла́вы Сы́на Твоего́ и Бо́га моего́, Твои́ми моли́твами.

Слава: Преклони́ся к мольба́м Твоего́ раба́, Влады́чице, и изба́ви мя вско́ре бед и скорбе́й, и вся́ких искуше́ний, ви́димых и неви́димых.

И ныне: Всего́ мя страстьми́ студа́, Пречи́стая, окаля́вшася и оскверни́вшася, чистото́ю омы́й и уясни́ Де́во моли́твами Твои́х окропле́ний.

Песнь 8

Ирмос: Тебе́, Вседе́телю, в пещи́ о́троцы, всеми́рный лик спле́тше поя́ху: дела́ вся́кая Го́спода по́йте и превозноси́те во вся ве́ки.

Вода́ непло́дствия стра́стна, души́ моея́ ложесна́ непло́дна сотвори́ и изсуши́: одожди́ ми, ле́гкий Облаче, Боже́ственную ро́су, я́ко да возращу́ плоды́ покая́ния.

Во́лну помышле́ний стра́стных и бу́рю ути́ши, Пречи́стая, Твои́ми моли́твами: напра́ви же мя к тече́нию безстра́стия, да Тя сла́влю те́пле во ве́ки вся.

Слава: Две́ре мы́сленная и затворе́нная врата́, и́миже Еди́н про́йде Бог, две́ри загради́ и заключи́ страсте́й мои́х и упова́ния отве́рзи ми врата́.

И ныне: Возми́ от мене́ прегреше́ний бре́мя, Ма́ти Де́во, Яже Еди́на взе́млющаго ми́ра всего́ весь грех ро́ждшая несказа́нно Агнца Бо́жия и Сло́ва.

Песнь 9

Ирмос: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему: Его́же велича́юще, Де́ву ублажа́ем.

Оскверни́в я́ко челове́к ду́шу мою́ прегреше́ньми мно́гими и страстьми́ плотски́ми окаля́вся, Тя молю́ ны́не приле́жно и мил ся де́ю: очи́сти мя, Чи́стая, Твои́ми моли́твами от вся́кия зло́бы.

Воли́теля ми́лости родила́ еси́, щедро́т Человеколю́бца Бо́га, Еди́наго блага́го, долготерпели́ваго и благоутро́бнаго: Его́же благопреме́нна покажи́ ми, Чи́стая, Твои́ми мольба́ми, и согреше́ний разреше́ние пода́ждь.

Слава: Дрема́нием одержи́ма уны́ния, и сластьми́ спя́ща мя ны́не, Влады́чице, раба́ Твоего́ воздви́гни к доброде́телем дея́ний благи́х, неусы́пными Твои́ми Ма́терними моли́твами.

И ны́не: Благословя́ благословлю́ Тя, Пречи́стая, и велича́ю те́пле: благослови́ мя у́бо Твоего́ певца́, и вся́ческих ну́ждных и печа́льных изба́ви, и сохрани́ Твои́ма дла́ньма непобеди́ма.

ГЛАС ШЕСТОЙ

В СУББОТУ54

Канон Пресвятей Богородице

Песнь 1

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дну песнь пои́м вопия́ше.

Припев: Пресвята́я Богоро́дице, спаси́ нас.

Неоску́дну благода́ть иму́щи я́ко Боже́ственную, Ма́ти безневе́стная, к Тебе́ прибега́ющих не пре́зри, от бед и скорбе́й при́сно спаса́ющи.

Се вре́мя наста́ моего́ уны́ния, воста́ни, Пречи́стая Влады́чице, и по́мощи даждь ми ру́ку: Ты бо мир Боже́ственнаго весе́лия испо́лнила еси́.

Слава: Держа́вный Твой покро́в, Богороди́тельнице, я́ко засту́пница су́щи, даждь ми вско́ре напа́стьми одержи́му, и невре́дна от сих сохрани́ мя.

И ныне: Души́ мое́й смерть притека́ет, искуше́ния же ненави́дящих, я́ко а́спиды, обыдо́ша погуби́ти мя: но Сама́ мя, Богоро́дице, спаси́.

Песнь 3

Ирмос: Разшири́шася на враги́ моя́ уста́ моя́, я́ко утверди́ся о Го́споде се́рдце мое́.

Умерщвле́нную ду́шу мою́ прегреше́ньми, Живо́т я́ко ро́ждшая, Богоро́дице, оживи́.

От вся́каго искуше́ния соблюди́ к Тебе́ прибега́ющих, Богоро́дице, упова́ние на́ше.

Слава: От востаю́щих на мя напа́стей го́рько спаси́ мя, Ма́ти Го́спода моего́ Пренепоро́чная.

И ныне: Яже ми́рови спасе́ние подаю́щи Боже́ственным Рождество́м Твои́м, от бед мя премени́.

Песнь 4

Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и Челове́ком яви́тися, и глаго́лаше: услы́шах слух Твой и убоя́хся, сла́ва си́ле Твое́й, Го́споди.

Изнемо́же нището́ю кре́пость души́ моея́, Богороди́тельнице, и лю́тое на мя омраче́ние нападе́, от прегреше́ний иму́щее нахо́д: при́зри, я́ко светоно́сный о́блак Бо́жий, и просвети́ мя, молю́ся.

Бу́ри зол мои́х и смуще́ние прегреше́ний, преложи́ в тишину́ спасе́ния, я́ко су́щи приста́нище, Всенепоро́чная: ры́кающе и́щут мя, я́ко льво́ве, пожре́ти, па́губы тех изба́ви мя, молю́ся.

Слава: В нощи́ и во дни, на земли́ же и в мо́ри, и на вся́ком ме́сте спасе́ние тве́рдо су́щи, Богоро́дице покро́ве непобеди́мый, спаса́й мя: по Бо́зе бо на Тя вои́стинну христиа́не упова́ем.

И ныне: От вели́ких и разли́чных прегреше́ний же и напа́стей всегда́ спаса́еши мя: те́мже яко ро́ждшую Тя Го́спода молю́, и к Тебе́ прибега́ю, непобеди́мей по́мощи скорбя́щим: от бед изведи́ мольба́ми Твои́ми.

Песнь 5

Ирмос: Свет возсия́й ми́ру, Христе́, просвети́ се́рдце мое́, от но́щи Тебе́ зову́ща, и спаси́ мя.

Спасе́ния Тя покро́в сла́вим, Сло́ва Ма́ти, Всенепоро́чная, наве́т не боя́щеся челове́ческих.

Имуще Тя сте́ну необори́му, искуше́ний же и печа́ли воста́ния избавля́емся, Пречи́стая.

Слава: Изми́ мя от злых челове́к язы́ка, Чи́стая: я́коже бо бри́тва изостри́ся, погуби́те иски́й ду́шу мою́ го́рько.

И ныне: Приле́жно Ти припа́даю, моля́ся: яко Ма́ти Зижди́теля моего́, одержа́щих мя бед свободи́.

Песнь 6

Ирмос: Ки́том пожре́н грехо́вным, вопию́ Тебе́, Христе́: я́ко проро́ка из истле́ния мя свободи́.

Го́рести вкус прие́м, Боже́ственныя сла́дости отчуждихся, Пречи́стая. Те́мже вопию́ Ти: да́руй ми по́мощь.

Омраче́ние страсте́й раба́ мя тли соде́ла: те́мже, Свет ро́ждшая, свободи́ мя, Влады́чице.

Слава: Согла́сно Тебе́ и ве́рно испове́даюся, Пречи́стая, и пожру́ Ти же́ртву, Тобо́ю изба́влься ско́рби.

И ныне: Отверзо́шася на мя непра́вды уста́, Влады́чице: те́мже мя, я́ко засту́пница, сих вско́ре свободи́.

 

Таже: Го́споди поми́луй, трижды. Слава, и ныне

Кондак, глас 6:

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы: но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

Песнь 7

Ирмос: Росода́тельну у́бо пещь соде́ла а́нгел преподо́бным отро́ком, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Искуше́ния души́ моея́, ю́же ту́чнии юнцы́ ны́не обыдо́ша, Пресвята́я Де́во, Сама́ мя сих свободи́.

Защища́ющи то́щно в беде́ су́щих и в печа́ли, ра́дость, Богоро́дице, подае́ши всегда́.

Слава: Побежде́на мя всего́ отча́янием дел и печа́ли огради́ мя, Де́во, я́ко покро́в всем неруши́мый.

И ныне: Предста́тельством Твои́м избавля́емся бед и скорбе́й и обрета́ем бога́тство ве́лие неистоща́емо.

Песнь 8

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся бо твори́ши, Христе́, то́кмо е́же хоте́ти, Тя превозно́сим во вся ве́ки.

От челове́ческих снеда́юся озлобле́ний и молю́ся, Богоро́дице: изба́ви мя су́етнаго сове́та их.

Победи́хся в печа́лех искуше́нии мои́ми и молю́ся, Влады́чице: от сих мя спаси́ невреди́ма.

Слава: Спаси́ мя, Чи́стая, от челове́ка льсти́ва, и язы́ка, и уст, и мучи́тельства, и вся́кия ну́жды.

И ныне: Иже нра́вом прельща́ем е́смь, без отве́та сый, к Богоро́дице зову́: вся́ческих мя изба́ви зол.

Песнь 9

Ирмос: Еже, ра́дуйся, от ангела прии́мшая и ро́ждшая Созда́теля Своего́, Де́во, спаси́ Тя велича́ющия.

Моли́тва ми в печа́лех жития́, Богоро́дице, бу́ди, и спаси́ от бед, ны́не прибега́ющаго к Тебе́.

Вои́стинну Еди́на на земли́ и в мо́ри яви́лася еси́, Чи́стая, кров неразори́мь, прибега́ющим Ти несумне́нною душе́ю.

Слава: Без ума́ себе́ вся́ческими порабо́тившу лю́тыми паде́ньми, мольба́ми Твои́ми свобо́ду пода́ждь ми, Всепе́тая.

И ныне: Тя наде́жду и заступле́ние тве́рдо стяжа́в, Чи́стая, велича́я Тя, я́ко Богоро́дицу, песнь ве́рою скончава́ю.

В НЕДЕЛЮ

Канон Пресвятей Богородице

Песнь 1

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дну песнь пои́м вопия́ше.

Припев: Пресвята́я Богоро́дице, спаси́ нас.

Моего́ ума́ о́блак страсте́й отжени, Чи́стая, и возсия́й ми свет, ро́ждшая, Пречи́стая, Сы́на, сия́ние Отчее, я́ко да воспою́ Тя.

Яко Гаврии́л Де́ве, прииди́те, ве́рнии, и мы вопие́м благогове́нием душе́вным: вои́стинну укра́шена, Чи́стая, ро́ждшая Ра́дость: ра́дуйся, Пречи́стая.

Слава: Иже безстра́стно пре́жде век от Отца рожде́ннаго, Пречи́стая, в после́дняя дни во утро́бе нося́щи Сы́на, родила́ еси́ сугу́ба, Бо́га и Челове́ка.

И ныне: Бо́га родила́ еси́ Еди́наго без тли и Де́ва пребыла́ еси́ по Рождестве́, я́коже бе и пре́жде Рождества́, Пречи́стая: сего́ ра́ди, ве́рнии, ра́дуйся, Тебе́ зове́м.

Песнь 3

Ирмос: Несть Свят, я́коже Ты Го́споди Бо́же мой, вознесы́й рог ве́рных Твои́х, Бла́же, и утверди́вый Нас на ка́мени испове́дания Твоего́.

Несть непоро́чны, я́коже Ты, Пречи́стая Богоро́дице, ро́ждшая Зижди́теля и Влады́ку вся́ческим: те́мже Ти вси ве́рнии благода́рственно, ра́дуйся, взыва́ем.

Страсте́й смуща́ет мя лю́тое волне́ние, Чи́стая, и го́рестьми мно́гих паде́ний во глубину́ помета́емь вои́стинну злых мои́х, даждь ми ру́ку, Чи́стая, и спаси́ мя.

Слава: Тьму разруши́ мои́х прегреше́ний, Де́во, и озари́ све́том безстра́стия жизнь несказа́нно, Чи́стая, ро́ждшая Со́лнце неприкоснове́нное.

И ныне: Огне́м стра́ха Бо́жия очи́стивши мя, Отрокови́це, от прегреше́ний и скве́рны, облецы́ светоза́рною оде́ждею добродете́лей и ли́ком святы́х сочета́й.

Песнь 4

Ирмос: Христо́с моя́ си́ла, Бог и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста, о Го́споде пра́зднующи.

Свет ро́ждшая, тьму разруши́ мно́гих мои́х прегреше́ний Твое́ю заре́ю, Пренепоро́чная Влады́чице, Яже Со́лнце пра́вды ве́рным возсия́вшая.

Наде́жду Тебе́, Пречи́стая, ны́не предлага́ю моего́ неможе́ния: да от Тебе́ не неде́йствован отыду, спасе́ние же получи́в, воспою́, ра́дуяся.

Слава: Бога́тыя щедро́ты Твоя́ да́руй нам, Пречи́стая, ве́рою и любо́вию в Твой храм притека́ющим, и от вся́ких искуше́ний и скорбе́й изба́ви.

И ныне: Сло́во, Пречи́стая, в Тя всели́ся, безелове́сия страсте́й мир избавля́я, Влады́чице, и Ца́рствия Небе́снаго сподобля́я воспева́ющия Тя.

Песнь 5

Ирмос: Бо́жиим све́том Твои́м Бла́же, у́тренюющих Ти души́ любо́вию озари́, молю́ся: Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Боже́ственною заре́ю от Твои́х чресл возсия́вшаго, мою́ ду́шу, во тьме спя́щую, просвети́, Де́во, и грехо́вную мглу отжени́, све́том мя Твои́м просвеща́ющи.

Ду́шу мою́ исцели́, Блага́я, впа́дающу в разбо́йники, ми́лостивне еле́й иска́пающи, и вино́ благосе́рдия Твоего́, ра́зумы незави́стно подаю́щими.

Слава: Плотски́я неду́ги и душе́вныя исцели́ нам, к Тебе́ прибега́ющим, Всепе́тая: кре́пость бо еси́ притека́ющим под кров Твоея́ моли́твы, Богороди́тельнице.

И ныне: Боже́ственный Дух Святы́й все́лься, Пресвята́я Чи́стая, в Твое́ чре́во, осени́в Тя показа́ Дом Тро́ицы, благоволе́нием Отчим Сло́во заче́нши и Сего́ ро́ждши.

Песнь 6

Ирмос: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Тьму разруши́ окая́нныя моея́ души́ и све́том просвети́ мя, Пречи́стая, возсия́вшим от Твои́х ложе́сн и все челове́ческое естество́ озари́вшим.

Враг ви́димых и неви́димых наве́та изба́ви мя, Чи́стая, и пода́ждь ми кров держа́вный Твоего́ заступле́ния: к Тебе́ бо, Де́во, ныне прибего́х.

Слава: Созда́вый вся́ческая, в после́дния дни от святы́я утро́бы Твоея́ воплоти́ся, челове́ческое естество́, е́же от Ада́ма лю́те попо́лзшееся, устро́ив, мир обнови́.

И ныне: Святы́х а́нгел благоле́пие пое́т Тя, и аз молю́, Пренепоро́чная: отыми́ от мене́ неле́пая бесо́в мечта́ния, в тишине́ соблюда́ющи се́рдце мое́.

 

Таже: Го́споди поми́луй, трижды. Слава, и ныне

Седален, глас 6:

Прило́зи сопроти́вных бо́рют достоя́ние Твое́, Влады́чице Чи́стая, разори́ тех кова́рствия и низложи́ на зе́млю горды́нное шата́ние: Ты бо еси́ засту́пница ве́рно моля́щимся Ти.

Песнь 7

Ирмос: Росода́тельну у́бо пещь соде́ла а́нгел преподо́бным отро́ком, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Просвети́вши мя Све́том Непристу́пным, Пречи́стая, во тьме неразуме́ния, и к Све́ту наста́ви ве́рно вопи́ти Сы́ну Твоему́ благоче́стно: благослове́н Бог оте́ц на́ших.

Омраче́нный о́блак отжени́ от души́ моея́, Богороди́тельнице, осия́вши све́том всех Творца́: прия́телище бо еси́ Све́та Преве́чнаго, от Отца́ безстра́стно возсия́вшаго.

Слава: Приклони́ся на́шим мольба́м, Чи́стая Богороди́тельнице, моли́твою ми́лостивно подви́гнися к Бо́гу: и Сего ми́лостива сотвори́ нам, на Тя, Блага́я, при́сно наде́ющимся.

И ныне: Оскверне́на мя су́ща страстьми́ лука́вых дея́ний, очисти́лище даждь ми, Чи́стая, слез ка́пли отмыва́ющи студ лука́вый греха́ моего́, окая́ния исто́чник.

Песнь 8

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся бо твори́ши, Христе́, то́кмо е́же хоте́ти, Тя превозно́сим во вся ве́ки.

Яже Влады́ку всех пло́тию ро́ждшая, наси́льствия страсте́й исхити́ мя, Отрокови́це, и Творцу́ вся́ческих присво́й любо́вию, пою́щаго во вся ве́ки.

На одре́ боле́зненне слежа́щу ми, посеще́нием Твои́м, Отрокови́це, возста́ви мя и душе́вное и теле́сное да́руй ми здра́вие, воспева́ющу Христа́ во ве́ки.

Слава: Страсте́й мои́х пла́мень угаси́ росо́ю моли́тв Твои́х, Влады́чице, и мене́ спаси́, я́коже пре́жде Сын Твой изба́ви о́троки, превознося́щия Его́ во ве́ки.

И ныне: Не ужаса́юся ла́яния борца́, на Тя упова́ние ча́яния моего́ имы́й, Блага́я: заступа́еши бо всегда́, спаса́ющи от бед Тя восхваля́ющих.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя ублажа́ем.

Зол вся́ческих изба́ви к Тебе́ прибега́ющаго ве́рою, Де́во Пречи́стая, и здра́вие даждь ми, прибе́гшему в покро́в Твой, Отрокови́це, и лю́тых избавле́ние: я́ко да во гла́сех благода́рственно при́сно сла́влю Тя.

Кля́тву печа́ли разруши́ла еси́, Чи́стая, и ра́дость источи́ла еси́ ми́ру Рождество́м Твои́м, благослове́ния Исто́чник ро́ждши. Те́мже восхваля́юще Тя Всепе́тую, вси благода́рственно ве́рнии ублажа́ем при́сно.

Слава: Све́та прия́телище, Богороди́тельнице, Твое́ чрево бысть, Всепе́тая, от Отца́ Возсия́вшаго пре́жде всех век. Те́мже Тя Богоро́дицу вси сла́вим: Сего́ я́ко Сы́на Твоего́ и Бо́га велича́ем.

И ныне: Сы́на безле́тна, от Отца́ возсия́вшаго, Еди́на Чи́стая, родила́ еси́ в ле́то, Ду́ха наи́тием Боже́ственнаго. Те́мже Тя, Пречи́стая, Богоро́дицу неискусому́жную вси язы́ком и се́рдцем ве́рнии испове́дуем.

В ПОНЕДЕЛЬНИК

Канон Пресвятей Богородице

Песнь 1

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дну песнь пои́м вопия́ше.

Припев: Пресвята́я Богоро́дице, спаси́ нас.

Преклоне́н мно́жеством искуше́ний и лю́тых дея́ний, вы́ю душе́вную и теле́сную преклоня́ю Тебе́, Чи́стая, и вопию́ Ти приле́жно: Ты мя испра́ви.

О Всенепоро́чная Отрокови́це, кре́пкая ве́рных по́мощь и упова́ние христиа́н! Ты мя свободи́ плотски́х сласте́й же и страсте́й, борю́щихся со мно́ю.

Слава: Световоди́тельница су́щим во тьме: Свет мы́сленный ро́ждши, Пречи́стая, просвети́ мою́ ду́шу, и ум освяти́, страсте́й и прегреше́ний тьму реша́щи.

И ныне: Омраче́нныя души́ моея́ наведе́ньми безме́стных помышле́ний тьму разруши́, Богоро́дице Влады́чице, све́том святы́х за́поведей Воплоще́ннаго из Тебе́.

Песнь 3

Ирмос: Несть Свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

На Тя, Чи́стая и Пречи́стая, наде́явся, да не отпаду́ е́же к Тебе́ ча́яния, я́ко Ма́ти Челове́колюбца Бо́га ми́лостива, сете́й мя вра́жиих изба́ви.

Мари́е, Ма́ти Бо́жия, Спасе́ния две́ре, Еюже про́йде Еди́н Иже всех Творе́ц, покая́ния ны́не Боже́ственныя две́ри отве́рзи ми, Пречи́стая.

Слава: Приста́нище бу́ди ми и храни́тельница, Чи́стая, лю́тыми треволне́нии страсте́й обурева́емому всегда́ в мо́ри жития́, Еди́на Присноде́во.

И ныне: Мари́е, Ма́ти Бо́жия, просвети́ ду́шу мою́ помраче́нную лю́те мно́гими грехи́, и стрело́ю лука́ваго уя́звленную, и изнемо́гшую.

Песнь 4

Ирмос: Христо́с моя́ си́ла, Бог и Госпо́дь, честна́я Це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.

Кре́пость моя́, Пречи́стая, и прибе́жище, и необори́мая стена́, и к Бо́гу моли́твенница су́щи, ве́чнующаго пла́мене и гее́нны свободи́ мя.

Мари́е Всечи́стая, страсте́й молву́ моего́ ума́, и искуше́ний бу́рю разори́, Яже безстра́стия Исто́чник ро́ждши, Ма́ти Присноде́во.

Слава: Чи́стая и Всенепоро́чная, Яже чистоты́ бы́вши прия́телище вме́стне55, Боже́ственнаго вселе́ния, душе́вную мою́ скве́рну и нечистоту́ потреби́.

И ныне: Еди́ну Пречи́стую, Еди́ну нескве́рную молю́ Тя, Отрокови́це, сла́достными оскверни́вшася страстьми́ и окаля́вша ду́шу Твои́ми моли́твами очи́сти.

Песнь 5

Ирмос: Бо́жиим све́том Твои́м, Бла́же, у́тренюющих Ти души́ любо́вию озари́, молю́ся: Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Оскверне́н по́мыслом и окаля́н мно́гими паде́ньми, Ма́ти Бо́жия, Тя молю́, Еди́на нескве́рная, уще́дри и спаси́ мя хода́тайством Твои́м.

Боже́ственным сия́нием Твои́м, Блага́я, просвети́ ду́шу мою́, омраче́нную сладостьми́, и к спасе́ния стези́ напра́ви, Еди́на Спа́са Христа́ ро́ждшая.

Слава: Грехо́вныя ми плени́цы расто́ргни Твои́м хода́тайством, Де́во, и заступле́нием, и ра́дости Боже́ственныя тишины́ испо́лни ду́шу мою́ окая́нную и тьмы изба́ви.

И ныне: Тя Еди́ну Боже́ственное прибе́жище ны́не стяжа́в, Блага́я, зову́ Ти и ве́рно припа́даю: Ты мне заступле́ние и покро́в спасе́ния бу́ди, Влады́чице ми́ра, и спаси́ мя.

Песнь 6

Ирмос: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Пови́нен сый греха́ми, и лю́те уязви́хся, окая́нный, к Тебе́, Богома́ти ми́лостивей прибега́ю, моля́ся: нападе́ния потреби́ прегреше́ний мои́х.

Две́ре благода́тная, отве́рзшая ве́рным дверь Небе́сную, покая́ния дверь све́тлую отве́рзи ми, Влады́чице, и врат сме́ртных свободи́.

Слава: Страстьми́ мя преклоне́на от сопроти́вных прило́г, Ма́ти Бо́жия, утверди́, Яже безстра́стия ро́ждши Исто́чник: к Тебе́ бо прибего́х, окая́нныя моея́ души́ уте́шительнице.

И ныне: При́зри, Влады́чице, на мя смире́ннаго, и ненаде́ждно спаси́ мя: Ты бо еси́ упова́ние и покро́в ми, жизнь и свет се́рдцу моему́, Богоро́дице, и утвержде́ние.

 

Таже: Го́споди поми́луй, трижды. Слава, и ныне

Седален, глас 6:

Безпомо́щным кре́пость Ты вои́стинну, Пресвята́я Де́во Ма́ти, отсю́ду, смире́ннии, Тобо́ю возвыша́емся, о Тебе́ высо́це держи́мся: всем Ты еси́ покро́в, и к Бо́гу хода́таица.

Песнь 7

Ирмос: Росода́тельну у́бо пещь соде́ла а́нгел преподо́бным отро́ком, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Очище́ние и́мамы Тя всегда́ к Бо́гу, Пренепоро́чная: те́мже испроси́ изба́вити всех, Пречи́стая, та́мо муче́ний стра́шных, Богоро́дицу вои́стинну испове́дающих Тя.

Ле́ностию мя одержи́ма, воздви́гни к де́ланию, Пречи́стая, Боже́ственных дея́ний, укрепля́ющи мя на враги́, при́сно борю́щия мя лю́те, и сопроти́вными помышле́нии прельща́ющия.

Слава: Не оста́ви мене́, Де́во, погиба́ти, ни попусти́ снедь бы́ти при́сно жа́ждущему мою́ па́губу зми́ю лю́тому: но пода́ждь ми Твою́ бога́тую ми́лость.

И ныне: Моля́щи не преста́й Челове́колюбца Бо́га на́шего, Всенепоро́чная, я́ко да прии́мем соверше́нное проще́ние, Чи́стая, и улучи́м Небе́сных угото́ванных благ и неотъе́млемую ра́дость.

Песнь 8

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся бо твори́ши Христе́, то́кмо е́же хоте́ти, Тя превозно́сим во вся ве́ки.

Якоже Рождество́м Твои́м, Всечи́стая, благи́х дел покажи́ плодоно́сно непло́дное се́рдце мое́, Бо́га умоля́ющи.

Мольбу́, Де́во, Бо́гу принеси́, ду́ши на́ша спасти́, Богоблагода́тная, и страсте́й прия́тия изба́ви нас, и от бесо́в зла́го искуше́ния.

Слава: К Твоему́ прибега́ю покро́ву, Всенепоро́чная, и предста́тельницу живота́ моего́ ны́не предлага́ю, изба́ви мя, Отрокови́це, суда́ стра́шнаго и испыта́ния, и огня́ ве́чнаго.

И ныне: Поколеба́вшуюся зло́бою борца́ ду́шу мою́ утверди́, Де́во Чи́стая, и о́гненнаго изми́ мя муче́ния, и ко́злищ боле́зненныя ча́сти.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя ублажа́ем.

Страсте́й волне́ние смуща́ет мя и сластьми́ погружа́ет мя, Де́во Пренепоро́чная, Яже ко́рмчию Христа́ ро́ждшая: ру́ку ми по́мощи простри́ и спаси́ мя, Еди́на спасе́ние ве́рою блажа́щих Тя.

Черто́же и престо́ле Ца́рствующаго, горо́ Бо́жия и гра́де избра́нный, и раю́ со́лнца о́блаче всесве́тлый, просвети́ ду́шу мою́, о́блак отгоня́ющи грехо́в мои́х мно́гих, Богоблагода́тная.

Слава: Чи́стая Де́во Богообра́дованная, две́ре Све́та, две́ри души́ моея́ отве́рзи, греха́ вход заключа́ющи: да мя не прии́мет рука́ льсти́ваго, веду́щи лю́те ко всепа́губней и стра́шней му́це.

И ныне: Душе́, возни́кни и побди́ в моли́твах и во всебла́гих попече́ниих, уны́ния сон отгоня́ющи, бо́друю засту́пницу иму́щи всегда́, Чи́стую Ма́терь Бо́жию Всеще́друю.

ВО ВТОРНИК

Канон Пресвятей Богородице

Песнь 1

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дну песнь пои́м вопия́ше.

Припев: Пресвята́я Богоро́дице, спаси́ нас.

Вся́ко моего́ рыда́ю жития́ скве́рнаго и мно́жества безме́рных ми зол: что же испове́м Ти, Чи́стая? Недоуме́ю и ужаса́юся: но помози́ ми, Влады́чице.

Отку́ду начну́ глаго́лати лука́вая и лю́тая моя́ паде́ния, стра́стный аз? Увы́ мне, что бу́ду про́чее? Но, Влады́чице, пре́жде конца́ уще́дри мя.

Слава: Сме́ртный у́бо час, и суди́ще стра́шное всегда́ помышля́ю, Пречи́стая, обы́чаем же всезлы́м прельща́юся лю́те: но помози́ ми.

И ныне: Благи́х тли́тель, смотря́я мя ны́не на́га Боже́ственных добродете́лей и дале́че отсту́пльша и отчужде́на от Бо́га, поглоти́ти мя устремля́ется: Влады́чице, предвари́.

Песнь 3

Ирмос: Несть Свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Ду́шу окаля́х скве́рно от безме́рных зол мои́х стра́стный аз, Богоро́дице Влады́чице: и ка́мо про́чее пойду́, отча́янием весь одержи́мь?

И е́же по о́бразу себе́ окаля́х блу́днаго, увы́ мне, Чи́стая, высокому́дренною во́лею: по подо́бию бо и де́лом, и сло́вом, и по́мыслом соде́ях безме́стная.

Слава: Несть ин в челове́цех, иже неподо́бная соде́яв, ни роди́ся в ми́ре, я́коже аз, Блага́я, помраче́н умо́м: ибо́ Креще́ние Боже́ственное оскверни́х.

И ныне: На коне́ц достиго́х злых, Пресвята́я Де́во, Ты помози́ ми вско́ре: не́бо и земля́ вопию́т го́рце, от безме́стных дея́ний неподо́бных.

Песнь 4

Ирмос: Христо́с моя́ си́ла, Бог и Госпо́дь, честна́я Це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.

Ангельстии чи́нове и во́инства Небе́сных Сил Твоего́ Сы́на ужаса́ются держа́вы, Чи́стая: ны́не же аз отча́явся, безстра́шием одержи́мь есмь.

Удиви́ся вся земля́ и ужасе́ся, зря́щи лю́тая и зла́я творя́щу ми, и безме́стная: и Твоего́ Сы́на мно́гому милосе́рдию чуди́тся.

Слава: Це́рковь оскверни́х зле теле́сную, и це́рковь Госпо́дню, в ню́же челове́цы трепе́щуще вхо́дят: аз же, блу́дный, без студа́ вхожду́, увы́ мне!

И ныне: Не яви́, Влады́чице, не яви́ стра́нна мя, устра́ншася кро́ва Сы́на Твоего́, вся́ко недосто́йнаго: но омы́й мене́ от скве́рны прегреше́ний мои́х.

Песнь 5

Ирмос: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся: Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Боже́ственным сия́нием Твои́м, Блага́я, исцели́ душе́вныя моя́ стра́сти, я́же ми тли́тель все́я, и изба́ви мя сего́ плене́ния го́рькаго: смее́тся бо, зря мене́ без заступле́ния.

Ада́м преступи́ у́бо за́поведь еди́ну Сы́на Твоего́, Де́во, и во изгна́ние впаде́: ка́ко же рыда́ю прегреше́ний мои́х бе́здну, аз престу́пный и отсту́пник Его́?

Слава: Уби́йца у́бо я́влься дре́вле и братоуби́йца Ка́ин, Бо́гом прокля́т бысть: что же сотворю́ аз вседе́рзый, ду́шу у́бо уби́в ны́не, и не стыжду́ся?

И ныне: Иса́ву поревнова́х лю́тому, чревообъяде́нием и сы́тостию весь. Ду́шу оскверни́х пия́нством, и ласкосе́рдством житие́ мое́, и кто мене́ не пла́чет стра́стнаго? Увы́ мне!

Песнь 6

Ирмос: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Житие́ мое́ блу́дно, душа́ моя скверна́ва, и живо́т весь окая́нен, те́ло же мое́ все во злых лю́те окаля́х. Те́мже потщи́ся, Де́во, помощи́ ми.

Коне́ц предста́, и не терплю́, Блага́я, со́весть облича́ет мя: предстоя́т бо ми дея́ния лука́вая и жития́ блу́дное: и суди́ща ужаса́юся Сы́на Твоего́, Чи́стая.

Слава: Пло́ти моея́ разжже́ние, река́ о́гненная стра́шна и неугаси́ма ждет вои́стину, и червь неусыпа́яй: но угаси́ ми сия́ моли́твами Твои́ми, Пречи́стая.

И ныне: Ны́не тре́петом одержи́мь есмь, Блага́я, и ужаса́юся лука́ваго ловле́ния. Пре́жде бо конца́ хо́щет мя тли́тель уби́ти, держя́ мя я́ко плене́на всего́ и на́га доброде́телей.

 

Таже: Го́споди поми́луй, трижды. Слава, и ныне

Седален, глас 6:

Упова́ние и стена́, и приста́нище лю́дем Твои́м, Де́во, из Нея́же роди́ся безстра́стно Спас вся́ческих, и спасе́ упова́ющия на Тя: я́коже пла́чася Твоего́ Сы́на при Кресте́, Того и ны́не моли́ изба́вити от тли вся пою́щия Тя.

Песнь 7

Ирмос: Росода́тельну у́бо пещь соде́ла а́нгел преподо́бным отро́ком, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Седмь седми́цею пла́мень разжже́ ми страстьми́ лука́вый, и любоде́яньми се́рдце мое́ всегда́ умерщвля́ет: те́мже то́ками мои́х слез угаси́ его, Ма́ти Бо́жия, и спаси́ мя.

Окаля́ема ти́ною прегреше́ний мои́х, не отри́ни мене́, Влады́чице Блага́я: и́бо зря мя, во отча́янии су́ща, смее́тся прелука́вый враг: но Сама́ Твое́ю держа́вною руко́ю возста́ви.

Слава: Стра́шное у́бо суди́ще, стра́стная душе́ моя́ и нечу́вственная, и муче́ние же неконча́емое и гро́зное: но оба́че ны́не припади́ к Ма́тери Судии́ Твоего́ и Бо́га, и не отча́йся сама́.

И ныне: Омрачи́хся стра́стный мно́жеством безме́рных зол, и оскверни́х ду́шу и те́ло же и ум: те́мже, Пречи́стая, све́том Твои́х сия́ний к безстра́стию сла́дости ско́ро введи́ мя.

Песнь 8

Ирмос: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся бо твори́ши, Христе́, то́кмо еже хоте́ти, Тя превозно́сим во вся ве́ки.

Яже от Тро́ицы Еди́наго Бо́га ро́ждшая и на руку́ носи́вшая, Де́во Ма́ти, угаси́ страсте́й огнепа́льную пещь и сле́зными то́ки омы́й ду́шу мою́.

Прихо́да сме́ртнаго ужаса́юся, Пречи́стая, и суда́ о́наго весь ны́не убоя́хся, де́я же зла́я, ника́коже стыжду́ся: уще́дри мя пре́жде конца́ моли́твами Твои́ми, Де́во.

Слава: Стена́ния немо́лчная, Влады́чице, да́руй ми, и слез ту́чы даждь, да отмы́ю моя́ прегреше́ния мно́гая и неисце́льныя я́звы: я́ко да улучу́ жизнь ве́чную.

И ныне: Зол мои́х мно́жество Тебе́ испове́дах, Влады́чице, я́ко ни еди́н в ми́ре ин прогне́ва та́ко Бо́га, Сы́на и Го́спода Твоего́: Сего́ ми на ми́лость вско́ре премени́, Де́во.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя ублажа́ем.

Се прихожду́ Ти, Пречи́стая, со стра́хом мно́гим и любо́вию, кре́пость ве́дый мно́гия моли́твы Твоея́, раб Твой: мно́го бо мо́жет вои́стинну, Влады́чице, мольба́ Ма́терня к Сы́ну: милосе́рдием бо преклоня́ется.

Ли́ки приими́ арха́нгел же и мно́жество вы́шних во́инств Зижди́теля моего́: апо́стол же и проро́к собо́ры, и муче́ники, и преподо́бныя, и священномуче́ники: и моли́тву сотвори́, Чи́стая, за нас к Бо́гу.

Слава: И ны́не и тогда́ Твою́ по́мощь да обря́щу, Чи́стая, в час, в о́ньже изы́дет дух мой, вско́ре изыма́ющи, изба́ви мя бесо́вскаго мучи́тельства, Пренепоро́чная, и не оста́ви мене́, Блага́я, пре́дану бы́ти им.

И ныне: Судии́ Ще́драго ча́ю, и Человеколюби́ваго Твоего́ Сы́на, Чи́стая не пре́зри мене́: но Того́ ми сотвори́ благопреме́нна, поста́вити мене́ одесну́ю тогда́, Всенепоро́чная, Пречи́стому суди́щу Его́, на Тя бо упова́х.

В СРЕДУ

Канон молебный Пресвятей Богородице56

Песнь 1

Ирмос: Помо́щник и покро́витель бысть мне во спасе́ние, Сей мой Бог, и просла́влю Его́, Бог отца́ моего́, и вознесу́ Его́, сла́вно бо просла́вися.

Припев: Пресвята́я Богоро́дице, спаси́ нас.

Ка́ко приступлю́ к Тебе́, Чи́стая, отча́ян окая́нный аз, весь стра́стен нечистота́ми быв? Но уще́дривши, спаси́ окая́нную мою́ ду́шу, Богороди́тельнице Пречи́стая.

Воста́вши, смире́нная душе́, от глубины́ безче́стия, возопи́й те́пле к Еди́ней Чи́стей: поми́луй мя, Отрокови́це Пренепоро́чная Чи́стая, и страсте́й мя изба́ви.

Слава: Бу́рею напа́стей потопле́н бых грехи́: простри́ ми ны́не по́мощи ру́ку, Чи́стая, и изба́ви безче́стия страсте́й, я́ко да при́сно сла́влю Тя.

И ныне: Греха́ лю́тыя бу́ри изба́ви мя, Богороди́тельнице, от нея́же весь скве́рнен есмь. Те́мже Ти притека́ю, облегчи́ ми ны́не тяготу́ прегреше́ний мои́х.

Песнь 3

Ирмос: Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свят еси́ и Госпо́дь.

Состаре́вшася страстьми́ безче́стными греха́, мла́да сотвори́ мя, Пренепоро́чная, соу́зы прегреше́ний облегча́ющи.

От бре́ния мя очи́сти и ти́ны грехо́вныя, и храм мя Боже́ственный сотвори́, Богоро́дице, чи́сте к Тебе́ прибега́ющаго.

Слава: Возни́кни, окая́нныя душе́, от сна уны́ния: очи́ма же воззри́ к Еди́ней спаса́ющей Тя, Отрокови́це Богоневе́стней.

И ныне: Прихожду́, Влады́чице, отча́ян и сокруше́н, и к моли́тве Твое́й те́плей прибега́ю: спаси́ мя, Чи́стая, раба́ Твоего́.

Песнь 4

Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и Челове́ком яви́тися, и глаго́лаше: услы́шах слух Твой и убоя́хся: сла́ва си́ле Твое́й, Го́споди.

Глаго́л же и веще́й, пра́во хощу́ суди́тися, Богороди́тельнице, к Твоему́ Сыну, Пренепоро́чная, да обря́щу Тя тогда́ прибе́жище и заступле́ние держа́внейшее, мук всех избавля́ющее мя.

Житие́ мое́ окаля́но, нечи́ст же нрав греха́ми, весь стра́стен бых, Чи́стая: очи́сти мя от скве́рны прегреше́ний и убели́, я́ко снег, Твои́м хода́тайством к Бо́гу Благосе́рдому.

Слава: Плени́цами мои́х согреше́ний стя́гнут есмь отвсю́ду, к покая́нным путе́м уклоня́тися не моги́й: простри́ ми ру́ку, Пренепоро́чная, упра́ви же ми стезю́ к спасе́ния пути́ наставля́ющую мя.

И ныне: Лю́тых мя мук, и тьмы кроме́шния, и гее́нны Твои́ми моли́твами свободи́, Де́во: и́маши бо во́лю и си́лу, Го́спода ро́ждшая Еди́наго Преблага́го.

Песнь 5

Ирмос: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя Спа́се, твори́ти во́лю Твою́.

В День Суда́ яви́ся, Влады́чице, и предста́ни ми, му́ки и огня́ свобожда́ющи: да, спа́сся, воспою́ Твою́ необори́мую благода́ть.

Устра́ншася, Влады́чице, кро́ва Твоего́, враг ви́дя мя, ври́ну во глубину́ прегреше́ний ду́шу мою́, и зря мя, смее́тся: но помози́ ми.

Слава: Возни́ Твоим бысть, Чи́стая, окая́нную и стра́стную мою́ ду́шу, молю́ Тя, Пренепоро́чная, и изми́ тяготы́ ея́, мно́гих грехо́в.

И ныне: Мольбу́ приношу́ Ти, Пренепоро́чная, от скве́рных и окаянных и нечи́стых мои́х усте́н: уще́дри мя Твое́ю моли́твою, молю́ Тя.

Песнь 6

Ирмос: Возопи́х всем се́рдцем мои́м к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.

Блу́днаго мене́ и преокая́ннаго приими́, Влады́ко Христе́, и му́ки изба́ви, мольба́ми Тебе́ ро́ждшия, и шу́ия ча́сти изба́ви мя.

Те́мный а́да одержи́т мя страх, Чи́стая, и ко́злищ часть смуща́ет мя: ея́же изба́ви мя, Пречи́стая Богоро́дице, молю́ Тя.

Слава: Умертви́вши пло́ти моея́ стра́стное, Влады́чице Богоро́дице, оживотвори́ мою́, Чи́стая, ду́шу преокая́нную, и на путь пра́вый наста́ви мя.

И ныне: Ра́бское приноша́ю Ти моле́ние, неразу́мный аз, и к Твоему́ прибега́ю благоутро́бному милосе́рдию: не возврати́ мене́, Чи́стая, посра́млена.

Тоже: Го́споди поми́луй, трижды. Слава, и ныне

Седален, глас 6:

От се́рдца стена́ние и от утро́бы приноша́ю Ти, Пренепоро́чная, Твоего́ прося́ благопребы́тнаго заступле́ния: поми́луй всестра́стную мою́ ду́шу, умилосе́рди многоми́лостиваго Бо́га, изба́вити мя суда́ и е́зера о́гненнаго, Еди́на Благослове́нная.

Песнь 7

Ирмос: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ нам: но не преда́ждь нас до конца́, отце́в Бо́же.

Яко ми́лостиву, я́ко благолюби́ву Де́ву Ма́терь, всю Тя, я́ко Чи́стую све́дый, прибега́ю аз окая́нный: но не отврати́ мене́, Всенепоро́чная, посра́млена от Тебе́.

Возни́кни, о стра́стная душе́, и воста́ни окая́нная: бий из глубины́ в пе́рси и испусти́ слез исто́чники, да тя поми́лует, окая́нную, милосе́рдия Ма́ти, Христа́ и Бо́га.

Слава: Храм Бо́жий быв, от Креще́ния Боже́ственнаго дре́вле, весь оскверни́хся окая́нный, и низлежу́ ужа́сно паде́нием лю́те: но Ты мя возста́ви, Пренепоро́чная, отча́янных наде́жда.

И ныне: Облак тя́жек покры́ преокая́нное мое́ се́рдце: тьма и мрак на́йде на стра́стную мою́ ду́шу, Богоневе́сто: покая́ния луча́ми озари́ мя, да сла́влю Тя.

Песнь 8

Ирмос: Его́же во́инства Небе́сная сла́вят, и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозноси́те во вся ве́ки.

Река́ о́гненная смуща́ет, и мрак несвети́мый всего́ мя коле́блет, червь мя ужаса́ет и скре́жет зу́бный, Де́во: да обря́щу Тя тогда́ засту́пницу Держа́вну.

Возгнеще́ние огню́ да не бу́ду, Го́споди, ни да услы́шу глас преще́ния Твоего́, име́я моля́щую Тя, Твою́ Чи́стую Ма́терь: Ея́же мольба́ми поми́луй мя, взыва́ю Ти.

Слава: Боже́ственнаго гла́са услы́шати сотвори́ мя, и стоя́ния избра́нных покажи́ мя, Христе́, прича́стника: да не плаче́вное ме́сто мя прии́мет, иму́ща моля́щую Тя о сем Богоро́дицу.

И ныне: Струи́ слез ны́не низпосли́ ми, и стена́ние от души́ сотвори́ во мне, Чи́стая, всегда́ припа́дати Твоему́ покро́ву, я́ко да обря́щу разреше́ние грехо́в мои́х Твое́ю моли́твою.

Песнь 9

Ирмос: Безсе́меннаго зача́тия Рождество́ несказа́нное, Ма́тере безму́жныя нетле́нен Плод: Бо́жие бо Рожде́ние обновля́ет естества́. Те́мже Тя вси ро́ди, я́ко Богоневе́стную Ма́терь, правосла́вно велича́ем.

День суда́ стра́шный смуща́ет мя, Де́во, скре́жет зубо́в тлит се́рдце мое́, стоя́ние ко́злищ ужаса́ет мя: но по́мощь в лю́тых да обря́щу Тя Богоро́дицу, егда́ хощу́ осуди́тися.

Ны́не тре́пет содержи́т мя: и страх смуща́ет мя гее́нский. И что соде́яти, не вем окая́нный и осужде́нный: те́мже притека́ю к Тебе́ и те́плым умиле́нием вопию́ Ти: не пре́зри мене́, Пречи́стая.

Слава: Зря суди́ще и помышля́я суд Твой, Христе́ мой, в не́мже хощу́ суди́тися, пра́ведно о де́лех осужде́нный. Но и́мам моле́бницу тогда́, к щедро́там Твои́м мно́гим моля́щую Богоневе́стную Ма́терь Твою́.

И ныне: Мы́сленно прикаса́яся Твои́м стопа́м, Всенепоро́чная, молю́ Тя: приими́ рыда́ние мое́, пе́ние внуши́ и прегреше́ний разреше́ние пода́ждь ми, вопию́ Ти, моли́твами Твои́ми, Де́во, да любо́вию Тя велича́ю.

В ЧЕТВЕРТОК

Канон Пресвятей Богородице57

Песнь 1

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дну песнь пои́м вопия́ше.

Припев: Пресвята́я Богоро́дице, спаси́ нас.

Приими́, Де́во, мольбу́ мою́ из уст недосто́йных, от скве́рных усте́н дерзнове́нно приноси́ти устреми́вшагося: и свет умиле́ния, Чи́стая, озари́ рабу́ Твоему́.

Ту́чи слез ми пода́ждь Твои́ми моли́твами, Де́во Ма́ти Чи́стая: я́ко да пла́чу те́пле, о и́хже соде́лах на земли́, и убе́гну Тобо́ю му́ки вся́кия.

Слава: Моего́ рыда́ния не отри́ни, Яже Исто́чник Милосе́рдия ро́ждшая: но ми́лостивно, Блага́я, Твои́м ми́лостивным о́ком, Богоро́дице, души́ моея́ стра́сти исцели́.

И ныне: Стена́нием пла́чися, душе́ моя́, и себе́ отню́д рыда́й, покланя́ющися Ма́тери Бо́жии и глаго́лющи: мене́, пови́ннаго, изба́ви му́ки стра́шныя.

Песнь 3

Ирмос: Несть Свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Несть ин, я́коже аз, прегреши́в, Пресвята́я Чи́стая, порабо́щся зло́бами безме́рных помышле́ний: но на Тя наде́явся, молю́: сих мя исхити́.

Се наидо́ша на мя я́ко ра́ны, вся вра́жия зло́бы отяготе́вше, и зело́ возсмерде́ша, и ду́шу веду́т на вся́ко паде́ние.

Слава: Мно́гое мно́жество мои́х прегреше́ний: сего́ ра́ди, Пресвята́я, ве́рою припа́дая, вопию́ Ти смире́нный: в час стра́шный умоли́ти, Его́же воплоти́ла еси́.

И ныне: Свята́я Богоро́дице, мене́ пови́ннаго вся́кому осужде́нию изми́, дерзнове́ние к Бо́гу я́ко иму́щи Ма́терне, и черто́гу Сего́ учини́ мя.

Песнь 4

Ирмос: Христо́с моя́ си́ла, Бог и Госпо́дь, честна́я Це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.

Исто́чник ми слез да́руй, Влады́чице, я́ко да отмы́ю скве́рну смире́нныя души́ моея́ и обря́щу добро́ту, ю́же погуби́х сове́том змии́ным.

Бо́же мой Милосе́рде, Бо́же Человеколю́бче, воли́телю ми́лости, ны́не на мя изли́й Твою́ ми́лость: мо́лит Тя наде́жда и засту́пница моя́, Ма́ти Твоя́.

Слава: Мене́ блу́днаго, мене́ ужа́снаго, без ума́ и безсту́дно мно́го согре́шша к Тебе́, Пренепоро́чная, уще́дривши, спаси́ и гее́нны свободи́.

И ныне: Па́жить потреби́ сме́рти, ро́ждши Жизнь вся́ческих. Те́мже и аз зову Ти: согреши́х, спаси́ мя, Чи́стая, Ма́терними Твои́ми мольба́ми.

Песнь 5

Ирмос: Бо́жиим све́том Твои́м Бла́же, у́тренюющих Ти ду́ши любо́вию озари́, молю́ся: Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Поми́луй мя Чи́стая, на Тя всю наде́жду мою́ возложи́вшаго: и уще́дри, ве́рою взыва́ю Ти, презре́вши души́ моея́ вся стра́сти лю́тыя.

Спаси́ мя от страсте́й, ско́рби и вре́да, лука́вых сопроти́вных, и изба́ви сих ла́яния смире́нную мою́ ду́шу, да не реку́т, Де́во: укрепи́хомся нань.

Слава: Чиста́ те́лом и душе́ю, Пречи́стая, я́вльшися, ду́шу мою́ от скве́рны свободи́, дая́ ми чи́сто жи́ти, и наста́ви твори́ти ми Госпо́дню Боже́ственную во́лю.

И ныне: Тя Еди́ну и́мам прибе́жище, и к Бо́гу премене́ние, и́же во мно́гих прегреше́ниих все житие́ мое́ ижди́х. Те́мже мя, Богоро́дице, Ты уще́дри.

Песнь 6

Ирмос: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Испра́ви, Влады́чице, ма́лое мое́ стена́ние и рука́ма воздея́ние, я́коже благово́нну же́ртву, и Твой сподо́би зрак чи́стою со́вестию узре́ти.

Глаго́л мои́х, Влады́чице Блага́я, не пре́зри моле́ние, Роди́тельнице Ми́лостиваго Бо́га, от Твоея́ утро́бы возсия́вшаго: но даждь ми пре́жде конца́ Боже́ственное оставле́ние.

Слава: Преклони́хся страстьми́ блу́дно, преокая́нный, и удали́хся от Бо́га: Его́же моли́ спасти́ мя, Блага́я, к Тебе́ бо прибего́х, и оде́ждами мя пре́дними украси́.

И ныне: Не опали́ ложе́сн Твои́х Огнь сый Иису́с, из Тебе́ пло́тию прихо́дит: Сего́, Чи́стая, моли́ огня́ и вся́кия му́ки изба́вите ве́рою воспева́ющих Тя.

 

Таже: Го́споди поми́луй, трижды. Слава, и ныне

Седален, глас 6:

Чи́стая Де́во и Сла́вная, а́нгелов сла́во, егда́ предста́ла еси́ Кресту́ Сы́на и Бо́га Твоего́, не терпя́щи озлобле́ния враг, взыва́ла еси́, рыда́ющи стена́ньми, Едина Благослове́нная: ка́ко терпи́т Человеколю́бец сих всех наноси́мая?

Песнь 7

Ирмос: Отроцы в Вавило́не пе́щнаго пла́мене не убоя́шася: но посреде́ пла́мене вве́ржени, ороша́еми поя́ху: благослове́н еси́, Го́споди Бо́же оте́ц на́ших.

Возни́кни, о душе́ моя́, от злых, я́же соде́яла еси́, что спи́ши про́чее, что сном уны́ния низлежи́ши? Богоро́дице возопи́й: Пресвята́я, помози́ ми.

Образ ви́да Твоего́ чту и не сме́ю воззре́ти к Тебе́, Пресвята́я: молю́ прия́ти долго́в проще́ние и чи́сто ви́дети Твою́ пречи́стую ико́ну.

Слава: В Твое́ прибега́ю, Богороди́тельнице, заступле́ние, и припа́даю прия́ти проще́ние: не пре́зри мене́, Влады́чице, но уще́дривши спаси́ мя.

И ныне: Многообра́зными зло́бами душетле́ннаго оскверни́х ду́шу и ум, молю́ Тя, Пречи́стая, не пре́зри, и того́ искуше́ний исхити́ раба́ Твоего́.

Песнь 8

Ирмос: За зако́ны оте́ческия блаже́ннии в Вавило́не ю́ноши предбе́дствующе, царю́ющаго оплева́ша повеле́ние безу́мное, и совоку́плени, и́мже не свари́шася огне́м, Держа́вствуюшему досто́йную воспева́ху песнь: Го́спода по́йте дела́ и превозноси́те во вся ве́ки.

Безме́рно согреши́в и оскверни́в мое́ во гресе́х те́ло, неразу́мный, помышля́ю необыме́ннаго Суда́ День, и недоуме́вся, убоя́хся, и ужаса́юся и трепе́щу, ко Благоутро́бию Твоему́, Влады́чице, припа́даю: не отри́ни мене́, но виждь мою́ скорбь и изба́ви вся́каго осужде́ния мук многообра́зных.

Зако́н Боже́ственный презре́в, в ле́ности весь слежу́58 окая́нный: призре́вши, Пречи́стая, возста́ви вско́ре, и спасе́нных сотвори́ мя ча́сти получи́ти, да ра́дуяся зову́ Ти: ра́дуйся, Ра́досте ми́ру, Еди́на Предста́тельнице ве́рою призыва́ющим Твой тве́рдый покро́в.

Слава: Увы́ мне, душе́ моя́! Ка́ко предста́нем тогда́ во стра́се и тре́пете суди́щу стра́шному, егда́ а́нгели предста́нут во стра́се и тре́пете? Богоро́дицу иму́щи Бла́гу засту́пницу, преклони́ коле́но и воздежи́ ру́це к высоте́, вопию́щи: при́зри и пощади́ Твои́м ми́лостивным тогда́ взо́ром, Де́во.

И ныне: Покажи́ кре́пость Твою́ непосты́дну заступле́ние ны́не: я́ко должни́к бо, Ма́терними мольба́ми преклони́тся Твой Сын, Де́во. Предвари́ у́бо ны́не в ну́жный час, да не оты́ду негото́в, но поживу́ и еще́, Препе́тая Богоро́дице Чи́стая.

Песнь 9

Ирмос: Не рыда́й мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со славою, непреста́нно, я́ко Бог, ве́рою и любо́вию Тя велича́ющия.

Да вы́шния сла́вы получу́, Де́во, молю́ся Тебе́: осла́би ми и изба́ви долго́в тьмы, вся презре́вши, Пречи́стая, я́же в неве́дении, и ра́зуме, вку́пе дневна́я и нощна́я, я́ко да благода́рственную песнь ра́дуяся принесу́ Ти.

От вся́ких мя скорбе́й исхити́, Отрокови́це, и на ка́мени поста́ви но́зе мои́ Боже́ственнаго спасе́ния: Тя бо предста́тельницу необори́му ны́не стяжа́в, упова́ю прейти́ стену́ и прегра́ду, ю́же преслуша́нием дре́ва созда́х.

Слава: Тя молю́, ро́ждшую милосе́рдаго Судию́ и Влады́ку: приими́ де́рзость скве́рных усте́н и убо́гое пе́ние мое́, и не омерзи́ мене́, па́че всех челове́к грешне́йшаго: Тя бо по Бо́зе засту́пницу име́ю раб Твой.

И ныне: Яко вы́шши су́щи созда́ний вся́ческих, во утро́бе Твое́й име́ла еси́, Богоро́дице, Бо́га воплоще́нна: Сего́ приле́жно моли́, Чи́стая, разреши́ти вся́каго настоя́ния раба́ Твоего́, да свобо́дным гла́сом Тя славосло́влю и аз.

В ПЯТОК

Канон молебный Пресвятей Богородице

Песнь 1

Ирмос: Помо́щник и покро́витель бысть мне во спасе́ние, Сей мой Бог, и просла́влю Его, Бог отца́ моего́, и вознесу́ Его́, сла́вно бо просла́вися.

Припев: Пресвята́я Богоро́дице, спаси́ нас.

Не отри́ни, Блага́я, не омерзи́ мене́, не пре́зри мене́ под Твое́ милосе́рдие, Чи́стая, те́пле прите́кшаго: но даждь ми е́же в Тебе́ напита́тися благода́тию.

Богоро́дице Блага́я, скорбя́щих засту́пнице, приими́ мое́ от души́ стена́ние: и изба́ви мя от всех безме́рных зол, я́же лю́те соде́ях.

Слава: Тебе́ припа́даю, Блага́я, ско́рбных Предста́тельнице: изба́ви мя огня́ ве́чнующаго, и тьмы и про́пасти, во вся́ком житии́ зле пожи́вшаго.

И ныне: Увы́ мне! Ка́ко Тя, Изба́вителю, умолю́, Иису́се мой, безме́рно к Тебе́ согреши́в? Про́чее хода́таицу Ти приноша́ю ро́ждшую Тя Чи́стую, поми́луй и спаси́ мя.

Песнь 3

Ирмос: Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свят еси́ и Госпо́дь.

Припа́даю Ти, Ма́ти Сло́ва, приими́ мя щедро́тами Твои́ми: прося́щему же прегреше́ний проще́ние пода́ждь, те́плыми моли́твами Твои́ми.

Поми́луй мя, Влады́чице, поми́луй, и изба́ви от вся́каго лука́вствия, и озлобле́ния бесо́в, и ве́чнаго муче́ния.

Слава: Укроти́, Влады́чице, сласте́й мои́х го́рькое пия́нство, трезве́ние Боже́ственное ми подаю́щи покая́ния, и обраще́ние спаси́тельное.

И ныне: Вся́ческих Го́спода и Содержи́теля, Богороди́тельнице, неизглаго́ланно ро́ждши, умоли́ Сего́, е́же спасти́ ста́до Твое́.

Песнь 4

Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и Челове́ком яви́тися, и глаго́лаше: услы́шах слух Твой и убоя́хся: сла́ва си́ле Твое́й, Го́споди.

Язвы души́ моея́, не престая́, чешу́ любосла́стьми, и приложи́шася мне стру́пов боле́зни, и пребыва́ю нечу́вствен и неисцели́мь: поми́луй, Богороди́тельнице, и исцели́, и спаси́ мя моли́твами Твои́ми.

Тьма грехо́вная покры́ ду́шу мою́, Богороди́тельнице, я́ко в нощи́ си́це хожду́ во све́те, не ве́дый Христо́вы за́поведи. Свет ро́ждшая Боже́ственный, поми́луй мя и просвети́, молю́ся.

Слава: Сло́во Бо́га Жива́го сни́де во утро́бу Твою́, Ма́ти Де́во, и прие́м от Твои́х крове́й пречи́стых все мое́ смеше́ние, прихо́дит сугу́б во еди́ной ипоста́си, Его́же моли́ спасти́ ду́ши на́ша.

И ныне: Теле́сная хоте́ния приле́жно преидо́х и сла́сти вся, и растле́н бых весь, и скве́рнен и ме́рзок: Пречи́стая Богороди́тельнице, поми́луй и спаси́ мя милосе́рдием Твои́м.

Песнь 5

Ирмос: От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́ и научи́ мя, Спа́се, твори́ти во́лю Твою́.

Огнь гее́нский себе́ разжего́х, де́я неподо́бная, и гнев Бо́жий лю́те привлеко́х: помози́ ми, Чи́стая, и не оста́ви мене́.

Прегреше́ний оставле́ния прося́ при́сно, де́яти не престаю́ пребеззако́ния и Тебе́, Пречи́стая, огорчева́ю: очище́ние ве́рных, уще́дри мя.

Слава: Его́же от Твои́х крове́й родила́ еси́, Чи́стая, соверше́нна Челове́ка и Бо́га и́стинна Иису́са, умоли́ Того́ изба́витися нам огня́ ве́чнаго.

И ныне: Две́ре непроходи́мая, молю́ся, отве́рзи ми две́ри покая́ния и́стиннаго, и покажи́ стези́ покая́ния, Чи́стая, Яже всех наста́вница.

Песнь 6

Ирмос: Возопи́х всем се́рдцем мои́м к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.

Во́лны неподо́бных помышле́ний погружа́ют мя ны́не: но Ты, Влады́чице, к ти́хому приста́нищу наста́ви покая́ния и́стиннаго Твои́м милосе́рдием.

Наде́жду и сте́ну необори́мую, и предста́тельницу тве́рду стяжа́вше Тя, Отрокови́це, избавля́емся прегреше́ний и страсте́й лю́тых, и вся́каго вре́да.

Слава: Припа́даю Ти, Чи́стая Де́во, и вопию́ с пла́чем, Богоро́дице: изба́ви ду́шу мою́ окая́нную бу́дущаго суда́, и огня́ ве́чнаго.

И ныне: Кре́пость Ты еси́, Пречи́стая, немощны́х душе́ю, Твои́ми мольба́ми: те́мже мя, я́ко боля́ща душе́ю не пре́зри, но исцели́.

 

Таже: Го́споди поми́луй, трижды. Слава, и ныне

Седален, глас 6:

За милосе́рдие щедро́т, Христе́, соше́л еси́ на зе́млю, и от Де́вы вопло́щься, вся освяти́л еси́, я́же от земли́ и к Небеси́ всех призва́л еси́. Те́мже упова́юще на Тя, никогда́же погреши́м, но избавля́емся Тобо́ю настоя́ний: Ты бо еси́ Спас наш, Созда́телю Бо́же наш.

Песнь 7

Ирмос: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ нам: но не преда́ждь нас до конца́, отце́в Бо́же.

Егда́ душа́ окая́нная моя́ от телесе́ стерпе́ти хо́щет разлуче́ние, и не бу́дет избавля́яй ю, или утеша́яй ю́: тогда́, Влады́чице, предста́ни, и изба́ви мя бесо́в озлобле́ния.

Припа́даю Ти и приношу́ слез те́плыя ка́пли: вем Твое́ челове́колюбие, вем долготерпе́ние и незло́бие. Ты мя ны́не поми́луй, Чи́стая, прости́ и спаси́ мя.

Слава: Поми́луй, Де́во, стра́стную и окая́нную мою́ ду́шу, виждь страсте́й смуще́ние, виждь и разгоре́ние пло́ти непостоя́нное: и по́мощь даждь ми спаси́тельную, и избавле́ние.

И ныне: Отцу́ Единосу́щный, собезнача́льный Сын и Сло́во, плоть от Тебе́ прия́т ра́вну, у́мну и одушевле́нну непрело́жно, я́ко весть Сам: и естество́ на́ше обнови́ в ней лу́чше Де́во Чи́стая.

Песнь 8

Ирмос: Его́же Во́инства Небе́сная сла́вят и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозноси́те во вся ве́ки.

Недоуме́ю, помышля́я дея́ния моя́, и трепе́щу Судии́ Стра́шнаго Суди́ща: кий отве́т, окая́нный, принесу́ тогда́? Влады́чице ми́ра, бу́ди ми засту́пница.

Не отве́ржи у́бо мене́ Сама́, Влады́чице, от лица́ Твоего́, егда́ к Твоему́ воззрю́ о́бразу: но ми́лостива бу́ди ми и настоя́щего премени́ мя осужде́ния.

Слава: Неве́сто Бо́жия, Мари́е безневе́стная, от вся́каго лука́ваго вре́да изба́ви мя, вопию́ Ти, Твоего́ раба́: и в буду́щей при предста́ни ми, Еди́на христиа́н Предста́тельнице.

И ныне: Да челове́ки Сын Твой, Влады́чице, обожи́т, яви́ся из Тебе́ соверше́н Челове́к: Сего́ у́бо моли́ соверше́нно очи́щшася показа́ти прича́стника мя Боже́ственному Его Ца́рствию.

Песнь 9

Ирмос: Еже, ра́дуйся, от а́нгела прии́мшая и ро́ждшая Созда́теля Своего́, Де́во, спаси́ Тя велича́ющия.

Ты Еди́на Предста́тельнице челове́ков еси́, Пречи́стая, Ты еси́ стена́ христиа́н, Чи́стая, Тя ны́не предлага́ю ко Христу́ хода́таицу о мне смире́нном, да Твои́ми моли́твами поми́лует мя окая́ннаго.

Но́щи дела́ соде́лах, и нощь муче́ния хо́щет мя ны́не покры́ти пра́ведно су́етнаго, и вся́ко томле́ние прия́ти а́дово: но ро́ждшая Судию́ и Бо́га, Чи́стая Де́во, изба́ви мя вся́каго муче́ния.

Слава: Вре́мя живота́ моего́ во злых изжи́х, и к две́рем а́да прибли́жихся, и весь не гото́в, иду́ та́мо: помози́ ми, Блага́я Богоро́дице, на Тя бо наде́жду возложи́х.

И ныне: Благолюби́вая Влады́чице, а́нгелов украше́ние, муче́ников сла́во, с си́ми помоли́ся обрести́ нам ми́лость и разреше́ние долго́в, и возмощи́ всем до́бре жи́зни на́шея тече́ние сконча́ти, Боже́ственная де́ющим.

ГЛАС СЕДЬМОЙ

В СУББОТУ59

Канон Пресвятей Богородице

Песнь 1

Ирмос: Сокруши́вшему бра́ни мы́шцею Свое́ю и вса́дники триста́ты погрузи́вшему, пои́м Ему́, я́ко Изба́вителю на́шему Бо́гу: я́ко просла́вися.

Припев: Пресвята́я Богоро́дице, спаси́ нас.

Яко украше́ние пе́нием, и песнь Богоподо́бну благодаре́ния Ти да́ры прино́сим: е́же ра́дуйся ны́не, Чи́стая, я́ко от печа́ли ра́дость нам подала́ еси́.

Ми́лости Твоея́ благода́ть и покро́ва кре́пость не премолчи́м, Де́во Пречи́стая: я́ко от бед лю́тых нас спасла́ еси́.

Слава: От разли́чных изба́вльшеся искуше́ний и скорбе́й Ма́терними Твои́ми моли́твами, Пречи́стая, согла́сно и те́пле благодаре́ния Тебе́ вси гла́сы пои́м.

И ныне: Ря́снами испещре́на я́ко златы́ми, доброде́тельми и Ду́ха благода́тьми, Пречи́стая, я́ко Неве́ста Отча украси́вшися, вои́стинну яви́лася еси́ Ма́ти Бо́гу.

Песнь 3

Ирмос: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их, на недви́жимем мя ка́мени испове́дания Твоего́ утверди́.

Ра́дости Боже́ственныя вели́чие, я́ко от нача́ла нам весе́лию, благодаре́ния гла́сы прино́сим приле́жно, почита́юще Ю я́ко предста́тельницу на́шу.

Иже Тобо́ю изба́вльшеся от бед и Тебе́ ра́ди ра́дость получи́вше, Ма́ти безневе́стная, я́ко пода́тельницу благу́ю, и засту́пницу благохва́льну вси прославля́ем.

Слава: Измене́ние прегреше́ний и напа́стей Боже́ственною Твое́ю моли́твою прие́млюще, Ма́ти Христа́ Бо́га, я́ко вину́ благи́х воспева́ем Тя ве́рно благода́рными гла́сы.

И ныне: Яже ра́дости исто́чник безсме́ртныя, то́чит струи́ при́сно, и спаса́ет всех Сама́: я́ко присножи́зненное нам благодая́ние, Ма́ти Христа́ Бо́га.

Песнь 4

Ирмос: Покры́ла есть небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Досто́йну Ти песнь ра́дования, Чи́стая Де́во, веселя́щеся, прино́сим, изба́вльшеся от бед Твои́ми моли́твами.

Благода́рственно Тебе́, Де́во Чи́стая, душе́вныма рука́ма вно́сим пе́ние, Боже́ственными пе́сньми игра́юще, от печа́ли изба́вльшеся мно́гия.

Слава: Воздвиго́ша на ны бе́ды мно́ги страстни́и греси́: но Боже́ственным Твои́м покро́вом, Чи́стая, нас изба́ви.

И ныне: Блаже́ни вои́стину чту́щии Тя, Богоро́дице Пречи́стая, я́ко Тобо́ю греха́ и печа́ли изба́вихомся.

Песнь 5

Ирмос: Нощь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю и воспева́ю Твое́ Божество́.

Греха́ потреби́теля Христа́, Де́во, родила́ еси́, Имже от напа́стей и боле́зней спасе́ся мир: те́мже ра́дуйся, и мы вопие́м Ти, изба́вльшиися печа́лей.

Объе́мшеся разли́чными напа́стьми, Чи́стая Влады́чице, и печа́лию и ско́рбию, и лю́тым обстоя́нием, отча́явшеся мы весе́лия, наде́жду Тя обрето́хом.

Слава: Яко спасе́ния храни́лище нам рабо́м Твои́м, Чи́стая, отгоня́еши напа́сти и соблюда́еши невреди́мы. Те́мже, прича́стницы мно́гих Твои́х благ, благодари́м Тя пе́сньми.

И ныне: Благодари́м Тя, изба́вльшеся Тобо́ю грехо́в мно́гих, и не́мощей и боле́зней, и неду́г лю́тых, Пречи́стая Влады́чице: наде́жда бо еси́ тве́рда Твои́м ве́рным рабо́м.

Песнь 6

Ирмос: Во глубину́ грехо́вную впа́дая, Бла́же, я́ко Ио́на от ки́та вопию́ Ти: возведи́ от тли живо́т мой и спаси́ мя Человеколю́бче.

Ангельстии язы́цы досто́йно Твоя́ хвалы́ воспе́ти не мо́гут Чи́стая: мы же ны́не ра́бски взе́мшеся, ра́дование Гаврии́лово прино́сим Ти.

Во глубину́ печа́ли и обстоя́ния грехи́ на́шими впа́дше, изба́вихомся Тобо́ю от ну́жды и напа́стей, Де́во Богоро́дице Чи́стая.

Слава: Под до́лгом соде́лася весь мир, Чи́стая, благодари́ти, и хвали́ти, и сла́вити благода́ть Твою благоче́стно: Тобо́ю бо бед и печа́лей изба́влени бы́хом.

И ныне: В но́щи и во дни, я́ве и втай, под Твой прибега́ем покро́в, Пречи́стая Де́во, и́же Тя ве́рно славосло́вящия.

 

Таже: Го́споди поми́луй, трижды. Слава, и ныне

Седален, глас 7:

Го́споди, мы есмы́ лю́дие Твои́ и о́вцы па́жити Твоея́, заблу́ждших я́ко па́стырь обрати́ нас, тле́ю расточе́нных собери́ нас: поми́луй ста́до Твое́, умилосе́рдися на лю́ди Твоя́, моли́твами Богоро́дицы, Еди́не безгре́шный.

Песнь 7

Ирмос: В пещь о́гненную вве́ржени преподо́бнии о́троцы, огнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.

Ра́дование благода́рственное Тебе́ прино́сим, Ма́ти Бо́жия: я́ко вои́стину Тобо́ю изба́влени вся́каго зла́го начина́ния, и согла́сно Тебе́ пое́м: благослове́нна еси́.

Водвори́хомся в ве́чер в пла́чи печа́лей и ча́янии злых: но Твои́м Боголе́пным Кро́вом, Де́во, обоже́ни бы́вше, обрето́хом ра́дость зау́тра: Ты бо спасла́ еси́ нас.

Слава: Яко Боже́ственное прибе́жище, мы покро́в Твой вси стяжа́вше к Бо́гу, в напа́стех и гоне́ниих и гресе́х, к Тебе́ прибега́ем, и Тобо́ю измене́ние прие́млем, Пречи́стая.

И ныне: Благода́ть моли́твы Твоея́, Чи́стая, пропове́дуем усты́ и ду́хом, Сла́вная: я́ко Тебе́ ра́ди, напа́сти и бу́ри, и тя́жких печа́лей, и греха́ страсте́й вси избавля́емся.

Песнь 8

Ирмос: Стра́шнаго херуви́мом, и чу́днаго серафи́мом, и ми́ру Творца́, свяще́нницы и раби́, и ду́си пра́ведных, по́йте, благослови́те и превозноси́те Его во ве́ки.

Яко изба́вльшеся бу́ри грехо́вныя и страсте́й, и напа́стей Твои́ми моли́твами, Богоро́дице Блага́я, благода́рственным гла́сом, ра́дуйся, вопие́м Ти: я́ко Тобо́ю от печа́ли в ра́дость преше́дше.

В боле́знех и напа́стех одержи́мыя не пре́зри, Блага́я, но мольбу́ худу́ю услы́шавши, свободи́ нас от скорбе́й вели́ких: да ве́рно Твою́ моли́тву, Чи́стая, воспева́ем.

Слава: Прегреше́ний разруше́нию вина́, ны́не возста́ви нас от печа́лей, напа́стей и страсте́й челове́к, и искуше́ния неподо́бна: Твои́ми же, Богоро́дице, Боже́ственными мольба́ми, изба́ви нас от них пресла́вно.

И ныне: Щедро́ты Твоя́ на всех всегда́ низпосыла́ются, Христе́, благода́тию вои́стинну и мольба́ми ро́ждшия Тя: от Тебе́ бо прие́млем христиа́не ми́лость Твою́, Спа́се ми́лостиве.

Песнь 9

Ирмос: Па́че естества́ Ма́терь и по естеству́ Де́ву, Еди́ну в жена́х благослове́нную, пе́сньми ве́рнии Богоро́дицу велича́ем.

Ра́дование по достоя́нию со гла́сом восклица́ния Тебе́, Де́во, ны́не прино́сим со а́нгелом Гаврии́лом, изба́вльшеся от разли́чных искуше́ний, Богоро́дице, моли́твами Твои́ми.

Ра́дость и весе́лие, и ра́дование Боже́ственное, Де́во неискусому́жная, нам умно́жися Бо́жие: се бо пла́чущиися лю́те, ра́дуемся моли́твами Твои́ми.

Слава: Же́ртву хвале́ния пожру́, и язы́ком и гла́сом, песнь благода́рственную воздаю́ Ти приле́жно, Де́во: я́ко да Тебе́ моля́ся, в день печа́ли Тобо́ю изба́влюся.

И ныне: Сра́дуемся, Пречи́стая, Боже́ственному Твоему́ Рождеству́ благоче́стно: ра́дость бо нам источи́ла еси́ от напа́стей и печа́лей. Те́мже Ти благода́рно и мы песнь соверша́ем, ве́рно воспева́юще Тя.

В НЕДЕЛЮ

Канон молебный Пресвятей Богородице

Песнь 1

Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди: те́мже немо́кренно пешеше́ствовав, Изра́иль пое́т Тебе́ песнь побе́дну.

Припев: Пресвята́я Богоро́дице, спаси́ нас.

Чи́нове а́нгел я́ко вои́стинну и вресноту́ Ма́терь Тя Бо́га всех чтут, Пречи́стая: но и ныне от бре́нных усте́н мои́х приими́ песнь моле́бную.

Умертви́ пло́ти моея́ и еще́ живу́щую зло́бу, Жизнь и́стинную ро́ждшая, Пречи́стая: и страсте́й и прегреше́ний пода́ждь, Чи́стая, Твоему́ рабу́ избавле́ние.

Слава: Со́лнце от Со́лнца, безле́тное Сло́во непости́жно возсия́вшее, во вре́мя возсия́. Его́же заря́ми просвети́, Де́во, ду́ши на́ша и вразуми́.

И ныне: Подоба́ет Тебе́, Богоро́дице, хвале́ния Сло́во всегда́ де́йствуемо: но мы мо́лим Тя, Чи́стая, спаси́ от вся́кия жите́йския печа́ли к Тебе́ прибега́ющих.

Песнь 3

Ирмос: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их: на недви́жимем мя ка́мени испове́дания Твоего́ утверди́.

Отда́в до́лги раболе́пно благоразу́мие, Твои́х благода́тей, Влады́чице, те́пле воспева́ю Тя, Пречи́стая, Ма́ти Сло́ва и всех Изба́вителя: но и ны́не изми́ мя от жите́йских настоя́ний.

Умерщвле́на Ада́ма от преступле́ния дре́вле, лу́чшия, Пречи́стая, жи́зни сподо́била еси́ я́ве, Живонача́льное, Влады́чице, ро́ждшая Сло́во: но ны́не мя сме́ртнаго греха́ свободи́.

Слава: Ожесте́в пло́ти стра́стный зако́н, и ны́не оскорбля́ет, духо́вный, и к люте́йшим похоте́м совокупля́ет ум мой, Пречи́стая: но безстра́стия мир пода́ждь ми вско́ре Твои́ми моли́твами.

И ныне: Неска́занно во утро́бе, Пречи́стая, заче́нши Христа́ Содержи́теля всех, земноро́дных существо́ разреши́ла еси́ от а́довых вере́й: но и ны́не многоплете́нныя плени́цы, тле́ющия мя, расто́ргни.

Песнь 4

Ирмос: Отча не́дра не оста́вль и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя, Еди́не Человеколю́бче.

Но́щию борю́ся со тьмо́ю лю́тых, омрачи́в по́мысл: Две́ри Све́та, Твои́ми луча́ми одари́ мя и го́рести изми́ вско́ре и печа́ли.

Грехо́в мно́жеством стя́гнут и плени́цами напа́стей вельми́ свя́зан, Твою́, Влады́чице, ны́не по́мощь призыва́ю, да изба́влюся вся́кия му́ки.

Слава: Собо́рища злых и лю́тых и зави́стных и лука́вых челове́к сове́ты разори́, Всепе́тая, и вся́кия мя изба́ви печа́ли жития́ и ско́рби.

И ныне: Возвраще́ния слове́с лжи́вых и действ, я́же на мя, мече́м Твои́х моли́тв ссецы́, Влады́чице, и вско́ре разруши́, и вся́кия мя изба́ви печа́ли.

Песнь 5

Ирмос: Нощь не светла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю и воспева́ю Твое́ Божество́.

Непобеди́мая стена́ су́щи ве́рным, и покро́в бу́ди рабу́ Твоему́, Де́во, и от вся́кия ну́ждныя изба́ви печа́ли и озлобле́ния.

Неду́гую зело́, лю́те озло́бленный от обою́ страну́, Пречи́стая, душе́вную си́лу и теле́сную, ю́же подъя́х, Твои́ми моли́твами исцели́.

Слава: В пучи́ну, Де́во, щедро́т Твои́х ны́не прибега́ю, раб Твой, от одержа́щаго мя сове́та непра́веднаго да изба́влюся и озлобле́ния.

И ныне: Превозноси́ма есть сла́ва Твои́х моли́тв всю́ду, Де́во Ма́ти Пречи́стая: и́миже ны́не мя вся́каго изба́ви жите́йскаго настоя́ния.

Песнь 6

Ирмос: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Рече́ния и словеса́ всех ве́рно восхваля́ют Тя, Чи́стая, я́ко всех челове́к долг Рождество́м Твои́м я́ве разруши́ся: но и ны́не певе́ц Твои́х мольбу́ приими́, и изба́ви искуше́ний и печа́лей.

Боля́ща мя и стра́стным грехо́вным те́рнием бодо́ма, и́щуща ю́же от Тебе́ цельбу́, Пречи́стая, от вся́кия боле́зни же и ско́рби изми́ и изба́ви от напа́стей и печа́лей.

Слава: Земноро́дных естество́, на Не́бо Богоро́дице проявле́нно возвела́ еси́, бы́вши Пала́та Царя́ Сла́вы: те́мже мя от бе́здны мно́гих прегреше́ний и напа́стей, и страсте́й возведи́.

И ныне: Вопло́щшееся Сло́во па́че ума́ и сло́ва, Де́во Чи́стая, родила́ еси́, безслове́сия нас изба́вльшаго: те́мже Тя словесы́ Боже́ственными непреста́нно воспева́ем и ве́рно сла́вим.

 

Таже: Го́споди поми́луй, трижды. Слава, и ныне

Седален, глас 7

Влады́чице, прогне́вася Сын Твой на гре́шныя рабы́ Твоя́: Ще́драго бо на гнев обрати́хом мы, но на ми́лость претвори́ Его, Чи́стая. Умилосе́рдися, Ма́ти Бо́жия, умоли́ Благоутро́бнаго мольба́ми самодви́жными, плене́нныя изба́ви.

Песнь 7

Ирмос: В пещь о́гненную вве́ржени преподо́бнии о́троцы, огнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.

Укра́шена ря́снами чистоты́, Пречи́стая Отрокови́це: ду́шу мою́ ны́не претвори́ от зло́бы скве́рныя к Боже́ственней добро́те, Благослове́нная Влады́чице, Предста́тельнице ро́да на́шего.

Свире́пеют ны́не зло́бы бесо́вския зело́, и огнь страсте́й мне возжига́ют, но па́че Твои́ми заря́ми сих до конца́ попали́ щедро́тами Твои́ми, Предста́тельнице ро́да на́шего.

Слава: О нас Твоего́ Сы́на моля́щи, Пречи́стая Ма́ти Бо́жия, не преста́й отню́д моли́твами Твои́ми, челове́ческих печа́лей и бед изыма́ющи рабы́ Твоя́.

И ныне: Пресу́щный Сын от Тебе́, Де́во плоть прия́т непрело́жно, и Челове́к бысть, да спасе́т пою́щия: благослове́н, Пречи́стая, Плод Твоего́ чре́ва.

Песнь 8

Ирмос: Отроцы зовя́ху в пещи́ ороше́ни: тварь да благослови́т вся́ческая сло́вом Созда́вшаго и превозно́сит Его́ во ве́ки.

Па́жити стра́стныя и многообра́зныя беды́ окружа́ют вои́стинну, Влады́чице, Твоего́ раба́: но изба́ви мя тех вся́каго искуше́ния.

Да прии́дет ны́не на ны держа́вная Твоя́ длань, Влады́чице, и ча́емыя челове́ческия ско́рби да изба́вит нас.

Слава: Се́ти лука́вых и злосове́тных челове́к сокруши́, Чи́стая Богороди́тельнице: и Твоего́ раба изба́ви от вся́кия ну́жди.

И ныне: Еди́но су́щее ве́рных приста́нище Боже́ственно, Де́во Чи́стая, молю́ Тя изба́вити мя су́щия в мо́ри жития́ бу́ри го́рькия.

Песнь 9

Ирмос: Ра́дуйся, Неве́сто Све́тлая, Ма́ти Светода́вца: ра́дуйся, вмести́вшая Невмести́маго во утро́бе Твое́й: ра́дуйся саме́х херуви́мов честне́йшая, ро́ждшая Спа́са душ на́ших.

Отыгра́ся, я́ко жребе́ц, от за́поведей Влады́ки, брозда́ми Твои́х моли́тв да востя́гнуся, Пречи́стая, к пути́ ско́раго устрое́ния.

Низвлеко́мь есмь зело́ поползнове́нием неразу́мным к дея́нию лука́ваго греха́ моего́: изба́ви мя, Богоро́дице, преложе́ния го́ршаго.

Слава: Исцеле́ние пе́рвое я́вльшися челове́ческаго существа́, исцели́ла сокруше́ние Ада́ма и Евы: исцели́ мене́, Богоро́дице, Твои́ми мольба́ми.

И ныне: Целому́дрен ум пода́ждь ми, и чи́сто се́рдце, и ра́зум смотрели́в: да сохраню́, Влады́чице, Пречи́стая за́поведи Бо́га моего́.

В ПОНЕДЕЛЬНИК

Канон молебный Пресвятей Богородице

Песнь 1

Ирмос: Сокруши́вшему бра́ни мы́шцею Свое́ю и вса́дники триста́ты погрузи́вшему, пои́м Ему, я́ко Изба́вителю на́шему Бо́гу: я́ко просла́вися.

Припев: Пресвята́я Богоро́дице, спаси́ нас.

Тя вино́вну на́шего спасе́ния и Боже́ственнаго избавле́ния, мо́лим, Пречи́стая: моли́ся е́же спасти́ся нам.

Весь есмь в лю́тых напа́стех, в беда́х и прегреше́ниих, вопию́ Ти, Пречи́стая: спаси́ мя раба́ Твоего́.

Слава: Тя Де́ву Чи́стую мо́лим и Ма́терь Зижди́теля: от вся́каго озлобле́ния бесо́в изба́ви нас.

И ныне: Яже Сло́во пло́тию ро́ждши па́че сло́ва, Нача́льника жи́зни Христа́ Бо́га на́шего, моли́ спасти́ся нам.

Песнь 3

Ирмос: Утверди́ся ве́рою Христо́ва Це́рковь, и́бо непреста́нно пе́сньми вопие́т, пою́щи: свят еси́, Го́споди, и Тя пое́т дух мой.

Всепа́губныя зло́бы ше́ствовав стезю́, не обрето́х пути́ спасе́ния моего́: к нему́же мя Ты наста́ви, Пренепоро́чная Влады́чице.

Кре́пость и утвержде́ние, и по́мощь, и наде́жду Тя Еди́ну напису́ю, Всенепоро́чная: Ты ми бу́ди засту́пница в день исхо́да.

Слава: Всегда́ Тя Пренепоро́чная, молю́: в час сме́рти моея́ предста́ни и му́ки изба́ви раба́ Твоего́.

И ныне: Роди́лся еси́ от Де́вы несказа́нно, яви́лся еси́, я́коже изво́лил еси́, Спа́се наш, и мир обнови́л еси́, Го́споди.

Песнь 4

Ирмос: Услы́шах слух Твой и убоя́хся, разуме́х дела́ Твоя́ и ужасо́хся, Го́споди.

Повеле́ния моего́ Влады́ки престу́пль, враго́м яви́хся удо́бь одержи́мь: Ты мя изба́ви, Влады́чице.

В час сме́рти изба́ви, Пречи́стая, и спаси́ ду́шу мою́ стра́стную от бесо́в.

Слава: Разреши́, Пречи́стая Влады́чице, соу́зы прегреше́ний мои́х и к Животу́ ве́чному бу́ди ми хода́таица моли́твами Твои́ми.

И ныне: Воспева́ем Тя, по Рождестве́ па́ки Де́ву, и прославля́ем Тя, Пречи́стая, я́ко Ма́терь Бо́га на́шего.

Песнь 5

Ирмос: Утренююще Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же дал еси́ нам ору́жие в по́мощь.

Приста́нище в бу́ри лю́те смуща́емым, спасе́ния две́ри ве́рою спаса́емым, Де́во Блага́я, спаси́ мя раба Твоего́.

Мно́гия щедро́ты Твоя́, Де́во Богоро́дице, на мне рабе́ Твое́м яви́ бога́тно, избавля́ющи мя стра́шнаго и бу́дущаго суда́.

Слава: Нощь страсте́й непостоя́нна содержи́т ду́шу мою́ и к па́губней про́пасти отсыла́ет: све́том моли́твы Твоея́, Богоро́дице, спаси́ мя раба́ Твоего́.

И ныне: Пресвята́я Де́во Обра́дованная, ро́ждшая Сло́во в ле́то па́че сло́ва, моли́ Его спасти́ ду́ши на́ша.

Песнь 6

Ирмос: Ио́на из чре́ва а́дова вопия́ше: возведи́ от тли живо́т мой: мы же Тебе́ вопие́м: всеси́льне Спа́се, поми́луй нас.

В напа́стех засту́пницу Тя и́мамы тве́рду, в ско́рбех кре́пкое спасе́ние, поко́й в печа́лех, в беда́х по́мощь, Присноде́во.

Ты ми храни́тельница жи́зни всей яви́ся, Пречи́стая: Ты мя изба́ви от бесо́в в час сме́рти, Ты и по сме́рти упоко́й.

Слава: Добро́та честны́х святы́х а́нгел, ра́дование челове́ков всех Ты еси́, Богоро́дице Де́во: Ты мя к животу́ наста́ви.

И ныне: Исцели́, Пренепоро́чная, окая́нную ду́шу мою́, неисце́льно боля́щую жите́йскими пре́лестьми и мно́гих двере́й затворе́ньми.

 

Таже: Го́споди поми́луй, трижды. Слава, и ныне

Седален, глас 7:

За милосе́рдие ми́лости Твоея́, Христе́ Бо́же, от Де́вы Святы́я воплоти́тися изво́лил еси́: Ея́же ра́ди соблюди́ жизнь на́шу, я́ко Человеколю́бец.

Песнь 7

Ирмос: Пещь горя́щую ороси́л еси́, Спа́се, о́троки спасл еси́, пою́щия и глаго́лющия: благослове́н еси́ во ве́ки, Го́споди Бо́же оте́ц на́ших.

Мно́жество прегреше́ний мои́х прие́мля во ум, во отча́янии быва́ю, Де́во Пренепоро́чная. Те́мже Ти зову́: помози́ ми, да не до конца́ поги́бну.

Жи́зни су́щую Ма́терь Тя, Чи́стая, ве́дый, зову́ Ти: сме́рти душе́вныя изба́ви мя и ве́чныя жи́зни сподо́би.

Слава: Изба́ви, Пренепоро́чная, от бед, и страсте́й, и боле́зней, и озлобле́ния, и жития́ согреше́ний, и от ве́чнаго огня́ негаси́маго ве́рно чту́щия Тя пе́сньми.

И ныне: Всяк язы́к сла́вит Тя, Чи́стая, сла́ву су́щую и похвалу́ ро́да на́шего, и наста́вницу заблу́ждших, Богоро́дице Препе́тая.

Песнь 8

Ирмос: Стра́шнаго херуви́мом и Чу́днаго серафи́мом, и ми́ру Творца́, свяще́нницы и раби́, и ду́си пра́ведных, по́йте, благослови́те и превозноси́те Его во ве́ки.

Все́ житие́ мое́ ижди́х в ле́ности аз преокая́нный, и ны́не недоуме́юся, и к концу́ прибли́жихся, помози́ ми, Влады́чице.

Гре́шников прибе́жище, низве́рженных исправле́ние Ты еси́, Влады́чице: сего́ ра́ди притека́ю к покро́ву Твоему́, спаси́ мя.

Слава: Неусы́пну моли́тву я́ко иму́щи, Всенепоро́чная Влады́чице ми́ра, суда́ изба́ви бу́дущаго ве́рою чту́щия о́браз Твой.

И ныне: Пое́т Тя всяк язы́к сла́вяй, Бо́га бо Препе́таго родила́ еси́, Де́во Богоневе́сто: Его́же моли́ непреста́нно спасти́ души́ пою́щих Тя.

Песнь 9

Ирмос: Па́че естества́ Ма́терь и по естеству́ Де́ву, Еди́ну в жена́х благослове́нную, пе́сньми ве́рнии Богоро́дицу велича́ем.

Под Твое́ милосе́рдие прибега́ющии ве́рою избавля́ются ско́рбных бед жития́. Те́мже и аз к Твоему́ покро́ву прибего́х, Богоро́дице.

Кре́пкая засту́пнице, непобеди́мая стено́ печа́льных, Чи́стая, спаси́ мя от страсте́й грехо́в и огня́ ве́чнующаго.

Слава: Све́тлыми сия́ньми возсия́вшаго Сло́ва от Тебе́, Де́во Чи́стая, озари́ мя и спаси́, я́ко Блага́я, и от мук исхити́.

И ныне: Но́сиши Нося́щаго вся́ческая святы́ми рука́ми Твои́ми: Его́же моли́, Чи́стая, чужда́го злоде́йства неодержи́мых нас спасти́.

ВО ВТОРНИК

Канон Пресвятей Богородице

Песнь 1

Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ песнь побе́дную.

Припев: Пресвята́я Богоро́дице, спаси́ нас.

Уста́ви бу́рю сласте́й и страсте́й мои́х тишино́ю Боже́ственныя Твоея́ мольбы́, Пренепоро́чная: я́ко да ти́хим се́рдцем Твое́ славосло́влю неизглаго́ланное Рождество́.

Все жела́ние и сла́дость спасе́ния Рождество́м Твои́м бысть, Богоро́дице Влады́чице: вся́ку го́ресть отгоня́й, е́же от страсте́й прегреше́ний, рабо́м Твои́м.

Слава: Изба́ви мя, Пречи́стая, бесо́вския пре́лести, озлобле́ния же и вре́да, и искуше́ния: да ве́рою Тя сла́влю, су́щую по Бо́зе засту́пницу и покро́в мой.

И ныне: Яви́лся еси́ при купине́ Моисе́ю, Бо́жий Сло́ве, я́ко огнь попаля́я и не опаля́я же отню́д, е́же от Де́вы Рождество́ Твое́ вообража́я: Ея́же ра́ди челове́ка вообрази́л еси́.

Песнь 3

Ирмос: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их: на недви́жимем мя ка́мени испове́дания Твоего́ утверди́.

Возне́сшагося на Крест, и низло́жшаго а́да, Богоро́дице, Сего́ приле́жно моли́ о ве́рно пою́щих Тя всегда́ гла́сы и пе́сньми свяще́нными, наде́жде ми́ра и ве́рных заступле́ние.

Вы́шшая небе́с и сла́внейшая херуви́м заче́нши, родила́ еси́ Бо́га: те́мже моли́ Его́ прегреше́ний изба́вите мя, и осужде́ния стра́шнаго, Твое́ю милосе́рдою мольбо́ю и па́че сло́ва си́лою Твое́ю.

Слава: Измени́вшая челове́ки от тли сме́рти Рождество́м Твои́м, Влады́чице, тле́ния мя страсте́й и неду́г изба́ви, и прегреше́ний лю́тых: и живо́т нестаре́ющийся да́руй ми, Боже́ственным хода́тайством Твои́м.

И ныне: Неизме́нно челове́ком уподо́блься по всему́, Бо́жий Сло́ве, от Де́вы Чи́стыя проше́л еси́ я́ве и всем яви́л еси́ Богонача́лие Трисве́тлое, в неразли́чне Существе́, неизме́нных Ипоста́сех.

Песнь 4

Ирмос: Отча не́дра не оста́вль и соше́д на зе́млю, Христе́ Бо́же: та́йну услы́шах смотре́ния Твоего́ и просла́вих Тя, Еди́не Человеколю́бче.

Ми́лость Твою́ и милосе́рдие на рабы́ Твоя́, Чи́стая, простри́, при́сно моля́щия Тя, стра́шныя му́ки избавля́ющи моли́твами Твои́ми.

Чи́стою моли́твою, и те́плою ве́рою, к Тебе́ прибега́ю, Пренепоро́чная: Ты бу́ди очисти́лище мно́гих прегреше́ний мои́х, избавля́ющи и спаса́ющи мя.

Слава: Ра́дости на́шея Хода́таица Пречи́стая Твои́м Рождество́м яви́ся, Влады́чице: Сего́ моли́, Пренепоро́чная, напа́стей изба́вити и ве́чныя жи́зни сподо́бити мя.

И ныне: Отческих недр не отлу́чься и от Де́вы вопло́щся, Христе́ Бо́же, сохрани́ ста́до Твое́, смотре́ния Твоего́ покланя́ющееся Боже́ственным о́бразом.

Песнь 5

Ирмос: Нощь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю и воспева́ю Твое́ Божество́.

Тя молю́, Де́во Чи́стая, от мра́чнаго греха́ ду́шу мою́ изба́вити и озари́ти Боже́ственною заре́ю покая́ния ми́лости Твоея́.

Су́щия в пучи́не лю́тых напа́стей и ну́жных страсте́й, Пресвята́я Чи́стая, Твои́ми моли́твами и мольба́ми изба́ви и спаси́ хва́лящих Тя.

Слава: Яже Бо́га заче́нши во утро́бе деви́честей и ро́ждши, Богоро́дице Пресвята́я, Тя пою́щия от вся́каго изба́ви ве́чнаго осужде́ния.

И ныне: Ве́дуще Бо́жию Тя Ма́терь, Чи́стая, и засту́пницу на́шу, Тя хода́таицу предлага́ем спасе́ния на́шего ко Ще́дрому Го́споду.

Песнь 6

Ирмос: Возопи́х, Го́споди, внегда́ скорбе́ти ми, к Тебе́, и возве́л еси́ живо́т мой, Многоми́лостиве.

Твоего́ Сы́на, Влады́чице, вознесе́ннаго на Крест и изба́вльшаго челове́ки от тли, умоли́ спасти́ся нам.

Пречи́стая Влады́чице, не оста́ви мене́, на Тя упова́ющаго: но Твою́ ускори́ по́мощь.

Слава: От печа́ли изба́ви призыва́ющих Твое́ Боже́ственное и́мя и стра́шныя свободи́ му́ки.

И ныне: Пречи́стая Влады́чице, наде́ждо тве́рдая, любо́вию пою́щия Тя, я́ко и́стинную Богоро́дицу, сохрани́.

Таже: Го́споди поми́луй, трижды. Слава, и ныне

Седален, глас 7:

Распе́ншагося нас ра́ди Христа́ Бо́га и низло́жшаго сме́рти держа́ву, непреста́нно моли́, Богоро́дице Де́во, да спасе́т ду́ши на́ша.

Песнь 7

Ирмос: Пещь о́троцы огнепа́льну дре́вле росоточа́шу показа́ша, Еди́наго Бо́га воспева́юще и глаго́люще: превозноси́мый отце́в Бог и препросла́влен.

В недове́дении и печа́ли сый и в беда́х, Пречи́стая, Тя призыва́ю те́пле от се́рдца моего́: предвари́ и изба́ви мя, и пода́ждь, Чи́стая, утеше́ние мне.

Прегреше́ний мно́гих и страсте́й треволне́ния обурева́ют мя и ко глубине́ поги́бели низво́дят: даждь мне ру́ку, Богоро́дице, и спаси́, и поми́луй мя си́лою Твое́ю.

Слава: Твою́ Ма́терь привожду́ Ти в моли́тву, Спа́се Человеколю́бче: ю́же прие́м, изба́ви мя прегреше́ний и бу́дущаго суда́, и ве́чнующаго изми́ муче́ния.

И ныне: Умерщвле́нну ду́шу стяжа́в лю́тыми преступле́ньми, Тя молю́, Влады́чице, умори́вшую ад Рождество́м Твои́м, покая́ния о́бразы оживи́ мя.

Песнь 8

Ирмос: Вои́стину Су́щаго Бо́га, и всех существа́ вино́внаго, Христа́ превозно́сим и славосло́вим во вся ве́ки.

Спаси́ мя, Пречи́стая, от бед и тли, и страсте́й: к Тебе́ бо прибега́ю, мое́й наде́жде, и Боже́ственному спасе́нию.

В час коне́чный от клеветни́к лю́тых изъе́мши, Влады́чице Де́во, к Боже́ственному жили́щу Сама́ наста́ви мя.

Слава: Возни́кни, о душе́! Богоро́дице припа́дающи, возопи́й: Наде́жде и Спасе́ние всех, огня́ ве́чнаго изба́ви мя.

И ныне: Еди́ну в жена́х Благослове́нную Де́ву воспои́м, Христа́ превозноша́юще и славосло́вяще во вся ве́ки.

Песнь 9

Ирмос: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: тем я́ко Еди́ну, Бо́жиих чуде́с сподо́бльшуюся, Тя при́сно велича́ем.

Богоро́дица прино́сит Ти мольбу́ о мне, Влады́ко Христе́, ю́же прии́м, изба́ви мя от вся́кия му́ки.

Всегда́ молю́ Тя, Влады́чице: смире́нную изба́ви ду́шу мою́ бу́дущаго суда́ и му́ки.

Слава: Творца́ моего́ и Зижди́теля моли́, Де́во, стра́шнаго изба́вити мя суда́ и жизнь дарова́ти ми.

И ныне: Всенепоро́чная Ма́ти Де́во Чи́стая, душе́вных скверн изба́ви Твое́ ста́до, Тебе́ велича́ющее.

В СРЕДУ

Канон Пресвятей Богородице

Песнь 1

Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ песнь побе́дну.

Припев: Пресвята́я Богоро́дице, спаси́ нас.

Вода́ми живото́чными, Де́во, напо́й иста́явшую ду́шу мою́ зно́ем грехо́вным, я́ко да клас плодоно́сен возращу́, Чи́стая, Боже́ственного умиле́ния.

Одожди́ ми, Чи́стая, ка́пли умиле́ния щедро́тными ка́плями, и́миже отмы́ю, Отрокови́це, всю душе́вную скве́рну, от невня́тия ей прибы́вшую.

Слава: Ты, Соде́теля Твоего́ во утро́бе прие́мши, без тли родила́ еси́, Младе́нца Бо́га су́ща бы́вшаго, стра́нно чу́до, Раба́ и Ма́ти еси́, Влады́чице безневе́стная.

И ныне: Изба́вителя челове́ческому ро́ду и Свободи́теля и Спа́са, Христа́ нам родила́ еси́, Де́во Ма́ти Пречи́стая: те́мже я́ве Тя зна́юще, Хода́таицу жи́зни ве́чныя сла́вим.

Песнь 3

Ирмос: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их: на недви́жимем мя ка́мени испове́дания Твоего́ утверди́.

Теле́сную багряни́цу от Твои́х Пречи́стых крове́й обагри́в Царь всех и сию́ носи́в кроме́ тле́ния естество́м, Бог же и Челове́к, от Тебе́ про́йде, Де́во, име́я Ца́рство неизме́нно.

Яко сокро́вище благи́х и неизрече́нных, Де́во, да́нное всем от Бо́га, подае́ши нам незави́стное благода́ти, чуде́сныя да́ры, в напа́стех и беда́х и в не́мощех, моля́щимся Ти.

Слава: Тя Дании́л чу́дный прови́дя го́ру, Чи́стая, от нея́же ка́мень отсече́ся Христо́с, сокруши́ бесо́вския истука́ны. Те́мже я́ко всех до́брых песносло́вим вину́, изба́влени Рождество́м Твои́м.

И ныне: Богогла́сный Тя не́когда прови́де сви́ток, в не́мже Сло́во написа́ся, Чи́стая, пе́рстом Отчим. Те́мже моли́ся в кни́зе написа́ти мя жи́зни, лука́вое писа́ние грехо́в мои́х растерза́вши.

Песнь 4

Ирмос: Отча не́дра не оста́вль и соше́д на зе́млю, Христе́ Бо́же: та́йну услы́шах смотре́ния Твоего́ и просла́вих Тя, Еди́не Человеколю́бче.

Моли́тву к Ро́ждшемуся из Тебе́, Богоро́дице, сотвори́, я́ко да обря́щем по́мощь во вре́мя обстоя́ния, иже стра́сти Того сла́вящии.

Ми́ро из Тебе́, Пресвята́я Чи́стая, излия́вшееся, Соде́тель естества́, благово́ния испо́лни вся́ческая Боже́ственными разуме́ньми и смра́дную лесть прогна́.

Слава: Яко мы́сленную ле́ствицу, Чи́стая, поставле́й Тя су́щим на земли́ Христо́с Бог, Тобо́ю к Небе́сным Боже́ственным дея́нием ве́рныя возво́дит, я́ко Милосе́рд.

И ныне: Отягче́н бре́менем мно́гим грехо́вным, Блага́я, зову́ Ти: очище́ние ми яви́ся, Бо́га ро́ждшая, ми́ра Взе́млющаго прегреше́ния.

Песнь 5

Ирмос: Го́споди, Бо́же мой, от но́щи у́треневав, Тебе́ молю́ся: пода́ждь ми оставле́ние прегреше́ний мои́х и к све́ту Твои́х повеле́ний пути́ моя́ напра́ви, молю́ся.

Ма́ти Человеколю́бца и Бо́га, Препе́тая Богоро́дице, ве́рою Тя и любо́вию пе́сньми восхваля́ющему при́сно, очище́ние Твои́ми мольба́ми прегреше́ний мои́х низпосли́ мне.

Пречи́стая Богоро́дице, прия́телище су́щи неизме́ннаго Све́та и храм Боже́ственный Зари́, мою́ ду́шу омраче́нную све́том Твои́м просвети́, молю́ся.

Слава: Го́споди Бо́же мой, Иже бы́ти Челове́к изво́ливый, молю́ся Ти: благоволи́ спасти́ мя блу́днаго, ра́ди чи́сто ро́ждшия Тя Де́вы и Чи́стыя Отрокови́цы.

И ныне: Влады́чице Богома́ти, мои́х прегреше́ний пода́ждь проще́ние, Яже Жизнь ипоста́сную ми́рови ро́ждшая, Пренепоро́чная.

Песнь 6

Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

От тли сме́рти и е́же от Ада́ма греха́, Твои́м изба́вихомся, Богоро́дице, безсе́менным Рождество́м: Бог бо вку́пе и челове́к Еди́ный, То́йже и Сын Сый, избавле́ние согреше́ний ве́рным да́руя.

Мои́х прегреше́ний, Влады́чице, раздери́ рукописа́ние, в кни́зе мя спасе́нных написа́вши, Боже́ственными моли́твами Твои́ми: я́ко да во хвале́нии Тя пою́, святе́йшую херуви́м су́щую.

Слава: Отринове́нныя дре́вле пра́ведным Твои́м судо́м, Христе́, от Твоего́ лица́, призва́л еси́ плотски́м прише́ствием, я́ко Милосе́рд. И ны́не, Бла́же, согре́шшия ны приими́ и от зол премени́.

И ныне: Очище́ние ро́ждшую и гре́шников Благода́теля, Де́во Пречи́стая, молю́ Тя: вины́ безме́рных прегреше́ний мои́х разреши́ Ма́тернею Твое́ю моли́твою: и́маши бо, я́ко Ма́ти к Сы́ну, е́же мощи́.

 

Таже: Го́споди поми́луй, трижды. Слава, и ныне

Седален, глас 8

Под кров Твой вси земноро́днии прибега́ем, изба́ви ве́чнующаго огня́ ду́ши на́ша, Блага́я.

Песнь 7

Ирмос: Пещь о́троцы огнепа́льну дре́вле росоточа́щу показа́ша, Еди́наго Бо́га воспева́юще и глаго́люще: превозноси́мый отце́в Бо́же и препросла́влен.

Отягче́нный ум мой сном, Всенепоро́чная, ко благи́м де́ланием воздви́гни: я́ко да ублажа́ю Тя, Честне́йшую вся́кия тва́ри.

Юнии трие́ о́троцы посреде́ пе́щи Твое́ прообража́ху Рождество́: не опали́ся у́бо, огнь ро́ждши, Чи́стая. Те́мже ве́щныя ми стра́сти се́рдца попали́.

Слава: В жена́х Тя кра́сну и добру́ Прекра́сный Госпо́дь уразуме́в, из Тебе́ воплоти́ся. Того у́бо моли́, Пресвята́я Отрокови́це, спасти́ мя.

И ныне: Боже́ственная Роса́ из Тебе́ проше́дши, иста́явшия зно́ем грехо́вным ороша́ет, Пренепоро́чная. Те́мже Тя молю́, иста́явшую ду́шу мою́ ороси́.

Песнь 8

Ирмос: Неопа́льная огню́ в Сина́и прича́щшаяся купина́ Бо́га яви́ медленоязы́чному и гугни́вому Моисе́ови, и о́троки ре́вность Бо́жия три непребори́мыя во огни́ певцы́ показа́: вся дела́ Госпо́дня, Го́спода по́йте и превозноси́те во вся ве́ки.

Неопа́льна огне́м в Сина́и бесе́довавши купина́, Твое́ показу́я стра́нно Рождество́ Богови́дцу Моисе́ю. Те́мже уди́влься стра́нному Рождеству́ Твоему́, Чи́стая, ра́дуяся вопия́ше: вся дела́ Госпо́дня, Го́спода по́йте и превозноси́те Его́ во ве́ки.

Умерщвле́нный мой ум грехо́м, Яже живо́т ро́ждшая, Чи́стая Де́во, оживотвори́ и спаси́ к Бо́гу премене́нии Твои́ми Ма́терними, при́сно мя пою́ща: вся дела́ Госпо́дня, Го́спода по́йте и превозноси́те Его́ во ве́ки.

Слава: Име́ю Тя, Чи́стая, в но́щи и во дни храни́тельницу неотсту́пну, от мы́сленных и ви́димых враг, ника́коже наве́та зла и лука́ва ужаса́юся, поя́ Христу́: вся дела́ Госпо́дня, Го́спода по́йте и превозноси́те Его́ во вся ве́ки.

И ныне: От Своего́ Человеколю́бия Сын Твой, Богоро́дице, я́ко Благ преклоня́емь, Тя подаде́ по́мощь на враги́ и цельбу́ страсте́й ве́рою зову́щим: вся дела́ Госпо́дня, Го́спода по́йте и превозноси́те Его во вся ве́ки.

Песнь 9

Ирмос: Нетле́ния искуше́нием ро́ждшая и Всехитрецу́ Сло́ву плоть взаимода́вшая, Ма́ти неискусому́жная Де́во Богоро́дице: прия́телище Нестерпи́маго, село́ Невмести́маго Зижди́теля Твоего́, Тя велича́ем.

Неокра́домое бога́тство де́вства Твоего́, Ма́ти пло́тию яви́лася еси́ Вседержи́теля, Неве́сто Неискусому́жная, Де́во Богоро́дице, воспита́вши, я́ко Младе́нца, Пита́ющаго я́ко Зижди́тель весь мир и Освяща́юща.

Человеколю́бнейшее Сло́во ро́ждши, Де́во, грехи́ ми́ра взе́млющее, Сего́ моли́ нам низпосла́ти грехо́в разреше́ние, ве́рою несумне́нною по до́лгу Тя блажа́щим.

Слава: Грехолюби́в сый, трепе́щу и бою́ся, да не внеза́пу коне́ц жития́ дости́гнет мя, Чи́стая Влады́чице, всех оби́димых предста́тельнице, и о́бразы мя покая́ния укрепи́ти ныне умоле́на бу́ди.

И ныне: Да не во огнь по́слеши мя, угото́ванный мне, мо́лит Тя Де́ва, ро́ждшая Тя, и Боже́ственный безпло́тный лик, апо́столи, проро́цы, му́ченицы и священнонача́льницы, и ду́си пра́ведных, Всеще́дрый и Многоми́лостиве.

В ЧЕТВЕРТОК

Канон Пресвятей Богородице

Песнь 1

Ирмос: Истря́сшему Бо́гу фарао́на в мо́ри Чермне́м, песнь побе́дну пои́м, я́ко просла́вися.

Припев: Пресвята́я Богоро́дице, спаси́ нас.

Живота́ моего́ прозря́ наста́вший коне́ц, Влады́чице, вопию́: Ты ми даждь очище́ние согреше́ний, Богоневе́сто.

К пучи́не благосты́ни Твоея́ прите́к, вопию́: Влады́чице Блага́я, изба́ви мя вся́каго муче́ния.

Слава: Влады́чице, приими́ нас, ве́рою прибега́ющих к Тебе́, и пода́ждь напа́стей и скорбе́й избавле́ние.

И ныне: Ты па́дшую Ада́мову ски́нию проро́чески возста́вила еси́, Спа́са и Бо́га, Пречи́стая, во чре́ве носи́вши.

Песнь 3

Ирмос: Утверди́ся ве́рою Христо́ва Це́рковь, Не́бо непреста́нно пе́сньми вопие́т, пою́щи: свят еси́, Го́споди, и Тя пое́т дух мой.

Яже Бо́га и Влады́ку неизрече́нно заче́ншая, обдержи́ма мя бу́рею греха́, Ты от сих изба́ви и спаси́ мя, Пречи́стая.

Согреше́ний неподо́бных но́щию мя одержи́ма, покая́ния луча́ми озари́, Отрокови́це, де́лати ми пода́вши све́та дела́ всегда́.

Слава: Яже Небе́сный Хлеб ро́ждши, Богоро́дице, пита́ющи всех ве́рных сердца́, насы́ти а́лчущую ду́шу мою́ стра́стную.

И ныне: Утверди́хся, Боже́ственное Твое́ Рождество́ разуме́в, и заступле́нием, Де́во, обогаща́юся, зовы́й: свят еси́, Го́споди, спаса́я ду́ши на́ша.

Песнь 4

Ирмос: Услы́шах слух Твой и убоя́хся, разуме́х дела́ Твоя́ и ужасо́хся, Го́споди.

Стеню́ща пред Тобо́ю, Влады́чице, и вопию́ща приле́жно от ума́ моего́, да не пре́зриши мене́, ниже́ посрами́ши.

Попали́ у́нзший терн окая́нныя моея́ души́, сласте́й плотски́х, Яже Огнь Боже́ственный, Влады́чице, ро́ждшая.

Слава: Пода́ждь ми согреше́ний оставле́ние, всеблагослове́нная Чи́стая, и изба́ви ве́чнаго и ужа́снаго муче́ния.

И ныне: Сло́во в Тя все́льшееся, Пречи́стая, существо́ мое́ возобрази́, па́дшее преступле́ньми.

Песнь 5

Ирмос: Утренюет дух мой к Тебе́, Бо́же, зане́ Свет еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Уподо́бихся безслове́сным ското́м преокая́нный, страстьми́ безслове́сными окая́нней мое́й пло́ти рабо́тая: Ты, Богоро́дице, пода́ждь ми воспрянове́ние.

Поми́луй мя, па́че всех челове́к согреши́вшаго и к Твоему́ покро́ву прибега́юща те́плому, Богоро́дице Де́во, и муче́ний исхити́.

Cлава: Иже Богоро́дицу испове́дающии Тя, Ма́ти Де́во, непреиду́щаго Ца́рствия и пи́щи Тобо́ю, Богома́ти, улучи́ти да сподо́бятся.

И ныне: Благослове́нная и Препросла́вленная Ма́ти неискусому́жная, умерщвле́ную греха́ми ду́шу мою́, и страстьми́ погорбле́ную неодержа́нными, оживотвори́.

Песнь 6

Ирмос: Ио́на из чре́ва а́дова вопия́ше: возведи́ от тли живо́т мой: мы же Тебе́ вопие́м: всеси́льне Спа́се, поми́луй нас.

Содержи́т мя бу́ря грехо́вная, Де́во, и ко тли отча́яния веде́т: но простри́ ми ру́ку по́мощи тве́рдую и всемо́щную.

Елей, е́же в Тебе́, те́плаго милосе́рдия, возле́й на мя Влады́чице, и изба́ви согреше́ний, исхити́ огня́ ве́чнующаго.

Слава: Иже разреши́вшая от боле́зни, Де́во, Еву, Рождество́м Твои́м Пречи́стым, разреши́ ми, Отрокови́це, боле́зни стра́стныя моея́ души́ и телесе́.

И ныне: Песносло́виши из Тебе́ воплоще́ннаго Бо́га и рыда́еши, на Кресте́ вознесе́на Того́ смотря́ющи, Ма́ти Де́во Чи́стая и Пренепоро́чная.

Таже: Го́споди поми́луй, трижды. Слава, и ныне

Седален, глас7:

Плод чре́ва Твоего́, Чи́стая, Крест водрузи́ в концы́, и тли мир изба́ви: те́мже Тя я́ко Пресла́вную велича́ем.

Песнь 7

Ирмос: В пещь о́гненную вве́ржени преподо́бнии отроцы, огнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.

Прегреше́ний мои́х умно́жися преще́ние, суда́ досто́йно, Чи́стая, припа́даю и зову́ Ти: пре́жде конца́ пода́ждь ми очище́ние и умиле́ния сле́зы, и нра́вом исправле́ние.

Неду́говавша мя лю́те скве́рными прегреше́нии, Чи́стая, и ко отча́яния иду́ща гро́бу, я́ко ро́ждши Жизнь вся́ческих, Пречи́стая, Боже́ственными дея́нии оживи́.

Слава: Богороди́тельнице Блага́я, ве́рою призыва́ющих Твою́ благода́ть присноживу́щую, мы́сленныя сме́рти избавля́ющи, Ца́рствия сподо́би Пречи́стыми Твои́ми моли́твами.

И ныне: Непости́жное Рождество́ Де́вы славосло́вим, и́мже сме́рти изба́вихомся: Его́же ра́ди ро́ждшеся в нетле́ние, благослове́н еси́, зове́м, Го́споди Бо́же оте́ц на́ших.

Песнь 8

Ирмос: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте свяще́нницы, лю́дие, превозноси́те Его́ во ве́ки.

Страсте́й мя пещь попаля́ет, Де́во, и огне́м сласте́й пояда́ет: предвари́вши, ми́лостивною Твое́ю росо́ю угаси́ ю́, даю́щи души́ мое́й устуже́ние кре́пко.

Ду́шу оскверни́х и растли́х плоть сластьми́, валя́яся в сих, и бых поруга́ние челове́ком и смех враго́м: Влады́чице Богоро́дице, помо́щница мне бу́ди.

Слава: Бо́га, Его́же родила́ еси́, Де́во, умоли́ низпосла́ти спасе́ние ве́рно чту́щим Тя, и бед разруше́ние, и неду́гов лю́тых премене́ние ско́рое, и благода́ть ве́чную.

И ныне: Созда́вшаго Ада́ма по о́бразу, и от смеше́ния его́ проше́дша, и разре́шша пе́рвую кля́тву, по́йте, свяще́нницы, Го́спода и превозноси́те Его́ во ве́ки.

Песнь 9

Ирмос: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: тем Тя вси велича́ем.

Всесве́тлая Де́во Ма́ти Богоро́дице, окая́нную ду́шу мою́, лю́те омраче́нную страстьми́ плотски́ми, све́том моли́тв Твои́х в страх Бо́жий све́тло наста́ви.

Отча́явся от мно́жества согреше́ний моего́ спасе́ния и недоуме́нен яви́хся, Влады́чице Всесвята́я: Твое́ благодея́ние и ми́лость Твою́ низпосли́ мне.

Слава: Рождество́ Твое́, Богоро́дице, е́же па́че естества́, удивля́ет а́нгелы, ужаса́ет же челове́ки: всем бо несказа́нно есть и непостижи́мо. Сие́ же пою́ще, благоче́стно Тя сла́вим.

И ныне: Умерщвле́ния и тле́ния ри́зы совлецы́ ми, Де́во, Яже спасе́ния Ризу, воплоще́ннаго Сло́ва, ро́ждши челове́ком: те́мже вси Тя при́сно велича́ем.

В ПЯТОК

Канон Пресвятей Богородице

Песнь 1

Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ песнь побе́дну.

Припев: Пресвята́я Богоро́дице, спаси́ нас.

Влады́чице Богоро́дице, и́же на Тя упова́ние и́мущия и к Тебе́ притека́ющия, бед же и скорбе́й изба́ви, и паде́ния, и ве́чнаго пла́мене, и му́ки.

Росо́ю милосе́рдия Твоего́, Де́во Чи́стая, пла́мень погаси́ мои́х паде́ний, я́ко да не ко искуше́нию прииду́ вся́каго осужде́ния и огня́ бу́дущаго.

Слава: Одожди́ ми, Де́во, ка́пли Твоего́ милосе́рдия, сласте́й зно́ем всегда́ изсуша́ему, я́ко да непреста́нно сла́влю от Тебе́ ро́ждшагося Бо́га и Спа́са на́шего.

И ныне: Водо́ю напо́й Твоея́ моли́твы, Де́во, ду́шу мою́, разгоре́вшуюся печа́льным зно́ем, я́ко да Боже́ственнаго весе́лия от Тебе́ Ро́ждшемуся плоды́ принесу́.

Песнь 3

Ирмос: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их: на недви́жимем мя ка́мени испове́дания Твоего́ утверди́.

Тя молю́, Де́во, спасе́ние души́ мое́й и очище́ние пода́ждь, и благода́ть незави́стну, я́ко сильна́ и бла́га, и я́ко человеколюби́ва Отрокови́ца, и жи́зни нетле́нныя сподо́би.

Нело́жное спасе́ние и Предста́тельнице мира, ро́ждшая Зижди́теля, Чи́стая Де́во, от бед изба́ви воспева́ющих Тя ве́рно, и напа́стей жития́, и ве́чнаго осужде́ния.

Слава: Мо́лимся приле́жно щедро́там Твои́м, Отрокови́це, не пре́зри рабы́ смире́нныя: но я́ко Блага́я, ми́лостивным Твои́м о́ком при́зри, и томи́тельства нереши́маго диа́воля нас изба́ви.

И ныне: Ны́не зе́льством печа́ли объя́т есмь, Де́во, кре́пость мою́ всю разсла́бив, и весь на земли́ ниц лежу́. Но вопию́ Ти от души́: Ты воздви́гни мя па́ки и утеше́нием Твои́м укрепи́.

Песнь 4

Ирмос: Отча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя, Еди́не Человеколю́бче.

Ма́ти Бо́жия, изба́ви мя от тли и льсти́ваго томи́теля зми́я, при́сно мя обходя́щаго и запина́ющаго по Бо́зе стопы́ моя́.

Мы́сленныя Две́ри жизни́, покая́ния ми две́ри отве́рзи: я́ко ны́не ко отча́янным две́рем прибли́жихся, окая́нный, от мно́гих согреше́ний.

Слава: Кал страсте́й и сласте́й оттря́сши до́бре милосе́рдием Твои́м, Пресвята́я, чи́ста покажи́, и оде́ждею облецы́ мя светови́дною благода́тию.

И ныне: Скве́рну души́ и нечистоту́ телесе́ моего́ очи́стивши, Чи́стая, благоприя́тными мольба́ми Твои́ми, чи́ста предста́ви воспева́ти при́сно Тебе́ и сла́вити.

Песнь 5

Ирмос: Нощь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю и воспева́ю Твое́ Божество́.

Преблага́го Сло́ва, Де́во Всенепоро́чная, моли́ спасти́ся нам: и́бо засту́пницу Тя стяжа́хом и в ну́ждах по́мощь кре́пку.

Не преда́ждь враго́м мя, Чи́стая, мою́ па́губу зело́ и́щущим грехо́в мои́х ра́ди: но милосе́рдием Твои́м от сих вре́да исхити́.

Слава: Ве́дуще Тя Бо́га всех, Христе́, и всех Творца́, на Тя Еди́наго возложи́хом спасе́ния упова́ние, нас ра́ди вочелове́чшагося.

И ныне: Ра́дуйся, о́блаче Чи́стая, во́ду живо́тну источа́ющий, ра́дуйся, Де́во, му́чеников утвержде́ние и апо́столов, ра́дуйся, честно́е славосло́вие, Пренепоро́чная.

Песнь 6

Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Благоле́пия и красоты́ добро́ту, ю́же име́х Креще́нием, погуби́х, Влады́чице, де́я неподо́бная: Ты же те́плым Твои́м предста́тельством сию́ пода́ждь ве́рно чту́щим Тя.

Страда́ния и одержа́ния ну́жднаго и печа́ли изба́ви мя, Богоро́дице, утеше́ние ми Твое́ подаю́щи: ины́я бо не и́мам засту́пницы, ра́зве Тебе́, Всенепоро́чная, аз раб Твой.

Слава: Изба́вителя ро́ждшая, Благода́теля и Спа́са, кре́пость и́маши и мо́жеши ели́ко хо́щеши твори́ти, Пренепоро́чная. Те́мже Тя мо́лим, твои́ раби́: изба́ви нас страстны́я молвы́.

И ныне: Тя о́блак ле́гок дре́вле зрит, просвеща́емь Ду́хом, проро́к Иса́иа, на не́мже се́де сла́вы Госпо́дь, прии́де и низложи́ еги́петския вся истука́нныя, Де́во Ма́ти Пречи́стая.

Таже, Го́споди поми́луй, трижды. Слава, и ныне

Седален, глас 7:

Изба́ви огня́ ве́чнующаго покланя́ющихся Рождеству́ Твоему́: Тя бо Христо́с показа́ засту́пницу нам, пою́щим Тя.

Песнь 7

Ирмос: Пещь о́троцы огнепа́льну дре́вле росоточа́щу показа́ша, Еди́наго Бо́га воспева́юще и глаго́люще: превозноси́мый отце́в Бог и препросла́влен.

Грехо́в одержи́т мя мно́жество и ко тле́нию низво́дит мя па́губы и отчая́ния: Богоро́дице, предвари́ и пода́ждь ми по́мощь спаси́тельную.

Изба́ви мя вся́каго вра́жия злоде́йства, и искуше́ний и ско́рби, и в тишине́ и ми́ре сохрани́ ду́шу мою́, Пречи́стая: я́ко да ра́дуяся, пою́ си́лу Твою́.

Слава: Осужде́ние прови́дя дело́м мои́м лука́вым, окая́нный, взыва́ю Ти из глубины́ се́рдца моего́, Пречи́стая: Ты ми бу́ди, Влады́чице, заступле́ние и спаси́ мя.

И ныне: С му́ченики, со а́нгелы и со апо́столы, Всенепоро́чная, Твоего́ Сы́на и Го́спода моли́ спасти́ рабы́ Твоя́ от напа́стей и бед и печа́лей.

Песнь 8

Ирмос: В пещи́ о́троки подража́юще, духо́вную ро́су прие́мшии, ве́рою зове́м: благослови́те, дела́ Госпо́дня, Го́спода.

Бу́ди ми по́мощь, Де́во Пресвята́я, к Тебе́ прибега́ющему и вопию́щему с ве́рою: поми́луй, Чи́стая, и пре́жде конца́ очище́ние согреше́ний даждь ми: и в час кончи́ны пода́ждь спасе́ние, и по кончи́не поко́й да́руй.

Ужас одержи́т мя лют, егда́ помышля́ю стра́шное испыта́ние и Судию́ Неумоли́маго соде́явшим лука́вая, якова́ же вои́стинну ю́же аз окая́нный соде́ях, и му́ки о́ныя конца́ не иму́щия: Влады́чице ми́ра, бу́ди ми спасе́ние.

Слава: Иже земноро́дных вино́вна спасе́нию, о ве́рных побо́рнице, гре́шников очище́ние! О исто́чниче всего́ добра́ и пода́телю благи́х, Богороди́тельнице Чи́стая! Ты ми душе́вная боле́зни исцели́ и источи́ благода́ть ве́чную, и сла́ву и весе́лие.

И ныне: Дар от нас Яже дана́ еси́, Влады́чице, я́ко от нача́ла естества́, мольбы́ на́ша, Пречи́стая, приими́ да́ры красны́, воздаю́щи нам Твою́ по́мощь: я́ко да непреста́нно из Тебе́ Ро́ждшагося пое́м и превозно́сим во ве́ки.

Песнь 9

Ирмос: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: тем я́ко Еди́ну, Бо́жиих чуде́с сподо́бльшуюся, Тя при́сно велича́ем.

Под Твой кров, Де́во, ны́не прибего́х, от мно́жества прегреше́ний обурева́емаго и погиба́ющаго спаси́ мя, Яже Спа́са и Зижди́теля ро́ждши, и ве́чнаго изба́ви осужде́ния.

Творца́ и Бо́га и Го́спода, от Твои́х вопло́щшагося пречи́стых крове́й, о нас, Чи́стая, моли́, уще́дрити милосе́рдием Твои́м лю́ди отча́янныя.

Слава: Огня́ негаси́маго изба́ви мя и тьмы вне́шния, и пла́ча ве́чнаго, осужде́нию су́ща досто́йна, о Пресвята́я, Чи́стая Богоро́дице, хода́тайством Твои́м те́плым к Бо́гу.

И ныне: Под Твое́ю, Богоро́дице, благода́тию сохраня́емь, не снеде́н пребыва́ю прило́ги сопроти́вных враг: те́мже я́ко утвержде́ние Боже́ственно и степе́нь, воспева́ю и покланя́юся, и велича́ю Тя.

ГЛАС ВОСЬМЫЙ

В СУББОТУ60

Канон Пресвятей Богородице

Песнь 1

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Пресвята́я Богоро́дице, спаси́ нас.

Прииди́те та́йно, бра́тие, я́ко от нача́ла Святе́й Богоро́дице внесе́м, ве́рнии, песнь но́ву, днесь похваля́юще вели́чия Ея́.

Дре́вле Боговиде́нием Моисе́й озари́вся умо́м, Твоему́ я́сно науча́шеся, Чи́стая, Боголе́пному зача́тию, па́че естества́, Де́во, я́вльшуся ему́ в купине́ саду́.

Слава: Тебе́ предлага́ю серде́чная дея́ния и прия́тно подаю́ писа́ние, близ су́щий Боже́ственный заступле́ния кров, ко Влады́це Христу́ Тебе́ предложи́в.

И ныне: Приклони́ ми у́хо Твое́, Чи́стая, правосла́вною ве́рою, в се́ни лица́ Твоего́, че́стно любо́вию Ти притека́ющему и стра́хом покланя́ющуся, моле́бный мой глас услы́ши.

Песнь 3

Ирмос: Ты еси́ утвержде́ние притека́ющих к Тебе́, Го́споди, Ты еси́ свет омраче́нных, и пое́т Тя дух мой.

Ле́ствица дре́вле патриа́рхова Тя прообража́ше, Пренепоро́чная: а́нгельско бо явля́ше сни́тие Бо́жие к нам, Боже́ственное соше́ствие во утро́бе Твое́й.

Иу́дово коле́но всели́ся, е́же Иа́ков прорече́, от коле́на Его́ прорасти́ти избавле́ние, Иису́са Христа́: Его́же Ты ро́ждши, Пречи́стая, просла́вилася еси́.

Слава: Грехми́ отча́ян, обрето́х Тя приста́нище спасе́ния, Пречи́стая Богоро́дице, упова́ние на́ше и по́моще: те́мже мя к покая́нию наста́ви.

И ныне: Близ Тя су́щу Влады́ки и́мам, Пресла́вная Влады́чице, дея́ний мои́х кни́гу возложи́х на Тя ве́рою: не премолчи́ уще́дрити мя.

Песнь 4

Ирмос: Из горы́ приосене́нныя, Сло́ве, проро́к, Еди́ныя Богоро́дицы, хотя́ща воплоти́тися, богови́дно усмотри́ и со стра́хом славосло́вяше си́лу Твою́.

Ты я́ко мони́сты златы́ми оде́яна Неве́ста Отча, благода́ть прие́мши, укра́шшися добро́тою де́вства, Ма́ти яви́лася еси́ Сы́на Бо́жия.

Тя, и́стинный Сио́н, Христо́с Сло́во изво́ли Себе́ в Боже́ственное селе́ние, я́ко избра́нну избра́в, Богоро́дице, на обновле́ние всего́ ми́ра.

Слава: Ра́дуйся, кра́сная пала́то Сло́ва, де́вственный черто́же Царя́: ра́дуйся, похвало́ всех безпло́тных: ра́дуйся, челове́ков по́моще.

И ныне: Удаля́ются от Бо́га, те́мже и погиба́ют, отмета́ющии о́бразы Сы́на Твоего́, Ма́ти Бо́жия Де́во Богоро́дице: и́миже спаса́ются чту́щии Тя.

Песнь 5

Ирмос: Мрак души́ моея́ разжени́, Светода́вче Христе́ Бо́же, началоро́дную тьму изгна́в бе́здны: и да́руй ми свет повеле́ний Твои́х, Сло́ве, да у́тренюя сла́влю Тя.

С Боже́ственным соше́дшеся Гаврии́лом, возопии́м Богоро́дице ве́рно: ра́дуйся, Де́во Свята́я, Благода́тная, Госпо́дь с Тобо́ю, Иже Тебе́ ра́ди, потреби́в печа́ль, подаде́ ра́дование.

Пречи́стое Твое́ чре́во Гедео́н ви́де, Де́во Чи́стая, в не́же, я́ко дождь, Сло́во соше́д, воплоти́ся Боже́ственным Ду́хом, Отча неразлу́чен сый Божества́.

Cлава: Помо́щница ми́ра и засту́пница еси́ челове́ков гре́шных, Богороди́тельнице Де́во: и ве́рою и любо́вию прибега́ющим к Тебе́ премене́ние спаси́тельное и реши́ло прегреше́ний мно́гих.

И ныне: Прорасти́ла еси́ без се́мене, Иже пре́жде вся́кия тва́ри, прозябе́ние Сы́на Отча, безле́тно же и безнача́льно, Ду́хом Боже́ственным, Богороди́тельнице Чи́стая: Его́же подо́бие ви́да вси почита́ем.

Песнь 6

Ирмос: Содержи́ма мя прии́ми, Человеколю́бче, грехи́ мно́гими и припа́дающа щедро́там Твои́м, я́ко проро́ка, Го́споди, и спаси́ мя.

Де́вства Тя зерца́ло су́що, и прия́телище чи́сто Божества́ восхваля́ем, Де́во неискусобра́чная, пе́сньми.

Бог во утро́бе Твое́й воплоти́ся, безстра́стно и ужа́сно, Богоневе́сто, я́коже в сви́тце но́ве пи́сан пе́рстом Отчим.

Слава: Очище́ние и́мамы покро́в Твой, и изве́стную наде́жду и заступле́ние, Де́во Чи́стая: не посрами́, Влады́чице, рабы́ Твоя́.

И ныне: Страсте́й неуста́вное беше́ние, предста́нием Твои́м, Богоневе́сто, уста́ви в тишину́: и ко приста́нищу наста́ви нас тишины́.

 

Таже: Го́споди поми́луй, трижды. Слава, и ныне

Седален, глас 8:

Избра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице: но я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.

Песнь 7

Ирмос: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Ра́дости на́шея хода́таица яви́лася еси́, Де́во, и благода́ти: принося́ще вене́ц любо́вию, ра́дуйся, вопие́м Ти, благослове́нная Чи́стая, похваля́юще.

Гора́ Свята́я еси́ Бо́жия приосене́нная, гора́ ту́чна, Пренепоро́чная: гора́ усыре́нна Боже́ственными сия́нии: гора́, в не́йже Бог благоволи́ жи́ти.

Слава: Побежда́яй благода́ть Твою́ несть грех, Ма́терне бо дерзнове́ние и во́лю и́маши, и реши́ши прегреше́ния моли́твами Твои́ми, и прево́диши вся стремле́ния.

И ныне: От Тро́ицы родила́ еси́ Еди́наго, Богоро́дице, бы́вша непрело́жна плотски́м соедине́нием, сугу́ба су́ща Естество́м: Его́же ви́да о́браз почита́ем.

Песнь 8

Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся ве́ки.

Кади́льница яви́лася еси́ проро́ку, Боже́ственнаго Угля су́щи, грехи́ отъе́млющаго, Богоро́дице Де́во Ма́ти Бо́га на́шего.

Дании́л прови́де Тя гору ве́лию, Богоро́дице Де́во: из нея́же честны́й ка́мень Христо́с пло́тию облече́ся и ле́сти низложи́ и́дольския хра́мы.

Слава: Вели́кий кит и́щет пожре́ти мя, лю́таго греха́ и страсте́й мои́х отча́яния: но предвари́ и спаси́ ра́ба Твоего́, Влады́чице.

И ныне: Иже Тобо́ю бесе́довавый к челове́ком, Бог сый вся́ческих, зрак челове́ка восприя́т: Его́же взор почита́ем, Де́во, в писа́ниих.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

Вертогра́д затворе́н Тя, Де́во Богоро́дице, и запеча́тан исто́чник Ду́хом Боже́ственным прему́дрый в пе́снех пое́т: темже, я́ко Сад жи́зни, воплоща́ется Христо́с.

Твоего́ несказа́ннаго Рождества́ пропису́я проро́к, кни́гу запеча́тану прови́де, ея́же никто́же та́инство разуме́, вочелове́чения Рождества́ Твоего́.

Слава: Тебе́ во умиле́нии души́ мо́лимся вси: не пре́зри, Влады́чице, на́ша мольбы́, но бу́ди благоуве́тлив нам покро́в, и моли́тву на́шу услы́ши.

И ныне: Твоему́ и Сы́на Твоего́ припа́даю образо́м: и сомня́щихся почита́ти, я́ко ма́нентовы лжы61, отмета́ю, Богоро́дице Де́во: те́мже правосла́вно песнь скончава́ю.

В НЕДЕЛЮ

Канон Пресвятей Богородице62

Песнь 1

Ирмос: Колесницегони́теля фарао́ня погрузи́, чудотворя́й иногда́ моисе́йский жезл, крестообра́зно порази́в и раздели́в море: Изра́иля же беглеца́, пешехо́дца спасе́, песнь Бо́гови воспева́юща.

Припев: Пресвята́я Богоро́дице, спаси́ нас.

Пресла́вная о Тебе́ возглаго́лашася, Пречи́стая, ве́рных Сла́ва Еди́на бы́вша. Те́мже бу́дущия сла́вы прича́стника мя покажи́ Твои́ми моли́твами, сла́вящаго Тя, Пресвята́я Де́во Всепе́тая.

Благослове́н Плод, Пречи́стая, чре́ва Твоего́, Имже земни́и вси кля́твы изба́вихомся, Благослове́нная Всечи́стая. О, несказа́ннаго чудесе́, недоуме́ннаго слы́шания, всех же ве́рных спасе́ния!

Слава: Ангел мо́лит Тя, Го́споди, мно́жество всегда́, учени́к собо́р, и проро́к, сосло́вия му́ченик, и преподо́бных Твои́х: Богоро́дицы ра́ди грехо́в проще́ние да́руй нам, я́ко Человеколю́бец.

И ныне: Тебе́, Пречи́стую, в ложесна́х прие́мшую Огнь нестерпи́мый, молю́ ве́рою: гее́нны огня́ изба́вите мя и исхити́ти, и ве́чнующаго муче́ния свободи́ти Твои́ми благоприя́тными моли́твами.

Песнь 3

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты мене́ утверди́ в лю́бви Твое́й, жела́ний кра́ю, ве́рных утвержде́ние, Еди́не Человеколю́бче.

Чи́стаго жития́ отпа́д, Пречи́стая, приложи́хся ското́м и осужде́н весь бых: Яже Судию́ ро́ждшая, вся́каго осужде́ния изба́ви и спаси́ мя.

Стена́ния, Чи́стая, и душе́вную сле́зу, и при́сное ми умиле́ние пода́ждь, Отрокови́це: я́ко да пла́чу одержа́щия мя стра́сти от невня́тия, Богоблагода́тная.

Слава: Небе́снии чи́нове, служе́бнии ду́си, собо́р проро́к и апо́стол и му́ченик Твои́х мо́лят Тя непреста́нно, Ще́дре: лю́дем Твои́м да́руй прегреше́ний оставле́ние.

И ныне: Милосе́рдия мя Боже́ственнаго, я́ко ми́лостива, Пречи́стая, ны́не сподо́бити умоли́ Милосе́рдаго: нра́вы бо неми́лостивы немилосе́рдно стяжа́в, ве́чному огню́ досто́ин бых.

Песнь 4

Ирмос: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра Отча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.

Лука́вое грехо́в мои́х рукописа́ние раздери́, Пречи́стая, Боже́ственным копие́м, пробо́дшим Боже́ственная ре́бра вочелове́читися из Тебе́ Восхоте́вшаго: и моли́ сего́ в кни́зе мя спасе́нных написа́ти, безу́мно от Него́ удали́вшагося.

Да гла́сы благода́рственными сла́влю Тя, да любо́вию Боже́ственною велича́ю Тя, Пренепоро́чная: е́же вели́ким Твои́м Рождество́м вся удали́вшияся возвели́чивши, вельми́ удали́вшагося и лю́те па́дшаго мя проще́ния Боже́ственнаго сподо́би.

Слава: Зако́ны в Тебе́ испраздни́шася естества́, па́че бо естества́ Бо́га Сло́ва родила́ еси́. Те́мже Тя ве́рою молю́, Пренепоро́чная: па́че естества́ челове́ческаго мно́го согре́шша и Бо́га уда́льшася, обра́щшагося спаси́ моли́твами Твои́ми.

И ныне: Враг у́бо грехо́вными стрела́ми ду́шу мою́ всю уязви́ и оскверни́ сластьми́ мое́ се́рдце, и от пути́ отведе́ пра́ваго. Сего́ ра́ди, Де́во, вопию́ Ти: обрати́вши исцели́ и спаси́ мя.

Песнь 5

Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чу́ждая тьма, окая́ннаго? Но обрати́ мя и к све́ту за́поведей Твои́х пути́ моя́ напра́ви, молю́ся.

Ро́дове родо́в Тя, Де́во, присноблаже́нную ны́не блажа́т: Небе́сныя Си́лы, я́ко до́льняя с вы́шними совоку́пльшую, восхваля́ют Еди́ну в жена́х Благослове́нную, па́дшаго Ада́ма исправле́ние.

Пребы́ти ми це́лу и непрело́жна стоя́ния улу́чшу, но благоше́ствующу же и Бо́гу уго́дная де́лающу, Блага́я, моли́, Блага́го ро́ждши Сло́ва, нас безслове́сия изба́вльшаго.

Слава: Иже Кровь Свою́, Сло́ве, на Кресте́ пролия́вый, за премно́гую ми́лости бе́здну, страсте́й мои́х бе́здну изсуши́: и во умиле́нии Тебе́ Бо́гу угоди́ти Богоро́дицы ра́ди сподо́би.

И ныне: Ма́ти Де́во Отрокови́це, Яже Необыме́ннаго пло́тию ро́ждшая, а́нгелов сла́ву и бесо́в я́зву, Богоневе́сто, мое́ се́рдце уязви́вшееся грехо́м, цельбы́ Боже́ственныя сподо́би.

Песнь 6

Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Поми́ловася Тобо́ю естество́ челове́ческое, ми́лостивая Влады́чице: Ми́лостиваго бо родила́ еси́, Пречи́стая. Те́мже молю́ Тя, мою́ ду́шу поми́луй.

Безпло́тных чи́нове мо́лят Тя, Христе́, му́ченик, проро́к и апо́стол Твои́х: ро́ждшия Тя ра́ди, лю́ди Твоя́ спаси́ от вся́каго обстоя́ния.

Слава: Яже неде́ланная Земля́, Де́лателя ро́ждши и всех Зижди́теля, олядене́вшую ду́шу мою страстьми́, плодоно́сну покажи́ Боже́ственным разуме́нием.

И ныне: Преступи́х за́поведи, я́же к Бо́гу веду́щия мя, и не хотя́ порабо́тихся лука́вым страсте́м: те́мже молю́ Тя, Присноде́во, исхити́ мя от тех влады́чествия.

 

Таже: Го́споди поми́луй, трижды. Слава, и ныне

Седален, глас 8:

Небе́сное благоче́стие си́лам, и похва́льную высо́ту душа́м на́шим, Матереде́ву-Отрокови́цу восхва́лим, ве́рнии: ра́дуйся, Яже а́нгелом Творца́ во утро́бе заче́нши, ра́дуйся, па́дающих очище́ние, Бо́га Сло́ва вопло́щши. Ра́дуйся, Неве́сто неневе́стная.

Песнь 7

Ирмос: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко ко цве́тнице лику́юще, поя́ху: благослове́н еси́, Бо́же оте́ц на́ших.

Неизрече́нным Рождество́м Твои́м стра́шных и неизглаго́ланных веще́й нас сподо́била еси́, Богоро́дице: те́мже мя стра́шныя му́ки изба́ви и неизрече́нныя мя ра́дости испо́лни, Да пою́ Тя при́сно, Многопе́тую.

В ле́ности житие́ мое́ ижди́в, бых безпло́ден, и ужаса́юся пре́ния, и гее́нны огня́ негаси́маго: Яже Огнь ро́ждшая, Богоро́дице, нестерпи́мый, приложи́ изба́вити мя моли́твами Твои́ми.

Слава: Чуде́с превы́ше вели́кое чу́до Твоего́ Рождества́, Чи́стая Де́во, сего́ ра́ди вопию́ Ти, Богороди́тельнице: Твоя́ ми́лости на мне удиви́ и бу́дущаго гне́ва изба́ви, и спаси́ мя.

И ныне: Мене́ жи́вшаго в ле́ности, и презре́вшаго святы́я зако́ны Твоя́, и честна́я Твоя́, Христе́, повеле́ния, уще́дри, Спа́се, ро́ждшия Тя ра́ди, я́ко Благода́тель Бог, и Многоми́лостив.

Песнь 8

Ирмос: Седмери́цею пещь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Умерщвле́нную оживи́, па́дшую возста́ви, уя́звенную ду́шу мою́ исцели́, ум мой умири́, искуше́ний во́лны укроти́, Де́во, и вопию́ща мя спаси́: о́троцы, благослови́те, свяще́нницы воспо́йте, лю́дие, превозноси́те Его́ во ве́ки.

Яко разбо́йник, взыва́ю Ти, помяни́ мя, Человеколю́бче: пла́чу, я́ко блудни́ца, и вопию́: согреши́х, я́коже дре́вле блу́дный, ка́ющася приими́ мя отча́яннаго, Богоро́дицы ра́ди, да усе́рдно вопию́ Ти: свяще́нницы, воспо́йте, лю́дие превозноси́те Его́ во ве́ки.

Слава: Раболе́пно вопие́м Ти Богоро́дице Всепе́тая: со безчи́сленными у́мными си́лами, проро́ки и преподо́бными, и апо́столы же и му́ченики, сотвори́ мольбу́ за вся челове́ки, Боже́ственне пою́щия: свяще́нницы воспо́йте, лю́дие превозноси́те Его́ во ве́ки.

И ныне: Честне́йши еси́, Богоро́дице Всенепоро́чная, преми́рных а́нгельских чино́в: сих бо родила́ еси́ Созда́теля и Го́спода, от деви́ческия неискусобра́чныя утро́бы, во двух Существа́х, несме́сно и непрело́жно, Еди́ну Ипоста́сь, Богоро́дице, воплоща́ему.

Песнь 9

Ирмос: Устраши́ся всяк слух неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва быв Челове́к: те́мже Тя, Пречи́стую Богоро́дицу, ве́рнии, велича́ем.

О Боже́ственный о́дре Соломо́нов, его́же окружа́ют ны́не си́льнии шестьдеся́т63, [по] глаго́лу Боже́ственнаго Писа́ния, на не́мже Бог почи́, тьма́ми мя при́сно де́моны окруже́на, невре́дна сохрани́ си́лою Твое́ю, Чи́стая Присноде́во.

Иска́пающая Боже́ственную сла́дость, всех Сла́дость ро́ждшая, ду́шу мою́ услади́, я́дом змии́ным огорче́нную, отчужда́ющи мя го́рькаго вре́да всегда́ хода́тайством Твои́м, Предста́тельнице ве́рных Непосты́дная.

Слава: Со́лнце сла́вы, Иису́се, окая́нную мою́ ду́шу просвети́, мольба́ми Тебе́ ро́ждшия Чи́стыя Богоотрокови́цы: и безпло́тных слуг, честны́х апо́стол Твои́х, и святи́телей, и проро́к, и му́ченик избра́нных, и преподо́бных Твои́х.

И ныне: Страшу́ся, Еди́не Царю́, Твоего́ Втора́го и стра́шнаго прише́ствия, весь осужде́н и недоуме́нен сый, Го́споди. Те́мже пре́жде конца́ вопию́ Ти: ро́ждшия Тя ра́ди пощади́ мя и спаси́, Ми́лостиве, Благи́й Человеколю́бче.

В ПОНЕДЕЛЬНИК

Канон молебный Пресвятей Богородице

Песнь 1

Ирмос: Во́ду проше́д Человеколю́бче я́ко су́шу, и еги́петскаго зла избежа́в, Изра́ильтянин вопия́ше: Изба́вителю и Бо́гу на́шему пои́м.

Припев: Пресвята́я Богоро́дице, спаси́ нас.

Вод исто́чник моли́твенный Тя, Богороди́тельницу, ве́дуще вси, источа́ющ ве́рным струи́ душа́м и те́лом: те́мже Тя непреста́нно сла́вим.

Па́че естества́ Богонача́льное Сло́во родила́ еси́, Де́во, и естество́ от тли изба́вила еси́: те́мже безслове́сных мя и чрезъесте́ственных страсте́й свободи́.

Слава: Па́жити страсте́й плотски́х ны́не окружа́ют мя и оскорбля́ют лю́те: посети́ ско́ро раба́ Твоего́, Де́во, и от озлобля́ющих мя спаси́.

И ныне: Иже всю тварь содержа́й и нося́й и спаса́яй, на ру́ку Твое́й, Чи́стая, опи́сан яви́ся и челове́ческий род обнови́.

Песнь 3

Ирмос: Ты еси́ утвержде́ние притека́ющих к Тебе́, Го́споди: Ты еси́ свет омраче́нных, и пое́т Тя дух мой.

Успи́ смуще́ние лю́таго неду́га, обдержа́щаго мя ны́не, Пречи́стая Влады́чице, и прегреше́ний и страсте́й свободи́.

Неизрече́нна пучи́на щедро́т Твои́х, Пречи́стая, и́миже и мене́ изба́ви прегреше́ний и неду́гов.

Слава: Ускори́ и посети́, Пречи́стая, неду́гующаго мя, и тя́жкия боле́зни изба́ви, и вся́кия ско́рби.

И ныне: Возвели́чи ми́лость и заступле́ние, Пречи́стая, Твои́х моли́тв на мне: и изба́ви мя от напа́стей и скорбе́й.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Очисти́лище всегда́ моему́ се́рдцу покажи́, Пречи́стая, святы́х воспомина́ние, и прегреше́ний очище́ние.

Спасе́ние пода́ждь ми душе́вное и теле́сное, Пренепоро́чная, и боля́щему даждь цельбу́ и лю́тых избавле́ние.

Слава: Кова́рствия упраздни́ лука́вых бесо́в, Пречи́стая, и страсте́й воста́ния, и немощны́м нам си́лу пода́ждь.

И ныне: От ложе́сн Твои́х, Пречи́стая, пра́вды Со́лнце возсия́ и мир просвети́: Его́же Боже́ственными заря́ми и мене́ просвети́.

Песнь 5

Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чу́ждая тьма, окая́ннаго? Но обрати́ мя и к све́ту за́поведей Твои́х пути́ моя́ напра́ви, молю́ся.

Разреши́шася Твои́м Рождество́м у́зы сме́ртныя, и связа́ся тли держа́ва, Пресвята́я Де́во Всепе́тая. Те́мже разреши́ вско́ре и мои́х прегреше́ний плени́цы и тя́жкия печа́ли.

Лука́вствия бесо́в и зло́бы челове́ческия изба́ви, Влады́чице: и душе́вный неду́г и теле́сный ско́ро уврачу́й, ро́ждшая Еди́на вся́кия пло́ти и духо́в Врача́, Спа́са и Го́спода.

Слава: Яко клеща́ Боже́ственнаго Угля, Пречи́стая, молю́ Тя, попали́ вся́кую стра́стную по́хоть раба́ Твоего́ и неможе́ния лю́тая, неудо́бь стерпи́мая, и изсуши́ пото́ки печа́лей.

И ныне: Спасе́ние Тя всем по́дал есть Сын Твой, Всечи́стая Влады́чице, ве́ровавшим в Него́ и Бо́га пропове́дающим воплоще́нна от Тебе́ я́ве: те́мже мя спаси́ от разли́чных бед и скорбе́й.

Песнь 6

Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

При́зри на мя ми́лостивным Твои́м о́ком, Влады́чице, и от неду́гов лю́тых изба́ви вско́ре, и вся́каго озлобле́ния ча́емаго ны́не, и се́тей, и паде́ния.

Безу́мнаго нра́ва стра́стнаго, и за́висти неподо́бных, и вся́кия зло́бы, и озлобле́ния жите́йскаго изба́ви мя, Пречи́стая Влады́чице, Твои́ми мольба́ми.

Слава: Созда́вый нас в Тебе́, Де́во, созда́ся, естество́ челове́ческое от тли избавля́я: и мене́ у́бо изба́ви, Чи́стая, от одержа́щих мя искуше́ний Твои́ми моли́твами.

И ныне: Храм показа́лася еси́ Бо́га невмести́маго пречи́ст, Ты, Пречи́стая Влады́чице: храм и мене́ покажи́ Того благода́ти, Твои́ми моли́твами, и соблюди́ невреди́ма.

 

Таже: Го́споди поми́луй, трижды. Слава, и ныне

Седален, глас 8:

Яко Де́ву и Еди́ну в жена́х Тя, без се́мене ро́ждшую Бо́га пло́тию, вси блажи́м ро́ди челове́честии: Огнь бо всели́ся в Тя Божества́, и я́ко Младе́нца дои́ши Зижди́теля и Го́спода. Те́мже, а́нгельский и челове́ческий род, досто́йно сла́вим Пресвято́е Рождество́ Твое́ и согла́сно вопие́м Ти: моли́ Христа́ Бо́га согреше́ний оставле́ние дарова́ти воспева́ющим досто́йно сла́ву Твою́.

Песнь 7

Ирмос: От Иуде́и доше́дше о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Тя́жкия боле́зни воздая́ния обрето́х, и мно́гим неду́гом одержи́мь болю́: но молю́ Тя, Богоро́дице: помози́ ми и пода́ждь здра́вие вско́ре Твои́ми моли́твами.

Блаже́нная Де́во, прибе́жище скорбя́щих всех ве́рных, от вся́каго искуше́ния и печа́ли и зло́бы зави́дящих мне изми́, и от грех и разли́чных неду́г изба́ви.

Слава: Златокова́нная Ста́мно, из Нея́же истече́ Ми́ро животво́рное ве́рным, отыми́ души́ моея́ и те́ла неду́г, и прегреше́ний скве́рну, заступле́ньми Твои́ми, Чи́стая Богороди́тельнице.

И ныне: Рожде́ннаго неизрече́нно из Тебе́, Богома́ти, собезнача́льнаго Сло́ва Отцу́ и Ду́ху сла́вяще непреста́нно, во хвале́нии пое́м: оте́ц на́ших Бо́же, благослове́н еси́.

Песнь 8

Ирмос: Седмери́цею пещь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Вели́чествия разли́чных чуде́с Твои́х, Влады́чице, вси пропове́дуем, ве́рно притека́ющии к Твоему́ заступле́нию: но ны́не мя от неду́га лю́та и боле́зней душе́вных же и теле́сных премени́, и покажи́ здра́ва обою́ду, сла́вити Сы́на Твоего́ Христа́ во ве́ки.

Напра́сно возве́яша зави́дящих ве́три, и; злолю́тых ре́ки припро́шася зело́ храми́не мое́й у́мней, Де́во Чи́стая: но я́коже безу́мно волну́ющагося мо́ря, разори́ стремле́ние печа́льных всех: даждь и мне Твои́ми моли́твами тишину́ во вся ве́ки.

Слава: Созда́вый бре́нное те́ло челове́ка, Та́же ду́шу ему́ вложи́вый безсме́ртну, в Тебе́ зи́ждется, Де́во, Сый, и обновля́ет па́ки того́: Его́же мне благоуве́тлива и благопреме́нна покажи́ Твои́ми моли́твами, и си́лу пода́ждь всем скорбя́щим, и избавле́ние вско́ре.

И ныне: Све́том озаря́еши всегда́, Пречи́стая, сла́вящих Тя: из Твоея́ бо утро́бы возсия́ Свет Невече́рний: и от стра́ха нощна́го и те́мнаго и бесо́вскаго ла́яния избавля́еши Твоя́ рабы́: от ни́хже изми́ и мене́, и спаси́ от одержа́щих зол Твои́ми моли́твами.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

Вознеси́ рог Це́ркве, Пречи́стая, ве́рным на пога́ныя пода́ждь кре́пость и ца́рствия ски́птры утверди́.

Низложи́ вознесе́нныя и победи́ полки́ иноплеме́нных, хотя́щия бра́ней, Де́во Чи́стая, и Твоя́ рабы́ невре́дны от сих свободи́, Отрокови́це.

Слава: Еди́на побо́рнице христиа́ном правосла́вным, Тебе́ сла́вящим, моли́твами Твои́ми ага́ряны оружено́сныя вско́ре посрами́.

И ныне: Вразуми́, Де́во, ве́рных ли́ки, на враги́ неви́димыя и ви́димыя укре́пльши, и спаси́ от вся́кия ско́рби.

ВО ВТОРНИК

Канон молебный Пресвятей Богородице

Песнь 1

Ирмос: Во́ду проше́д, я́ко су́шу, и еги́петскаго зла избежа́в, Изра́ильтянин вопия́ше: Изба́вителю и Бо́гу на́шему пои́м.

Припев: Пресвята́я Богоро́дице, спаси́ нас.

Мно́гими содержи́мь напа́стьми, к Тебе́ прибега́ю, спасе́ния иски́й, о Ма́ти Сло́ва и Де́во! От тя́жких и лю́тых мя спаси́.

Страсте́й мя смуща́ют прило́зи, мно́гаго уны́ния испо́лните мою́ ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Слава: Спа́са ро́ждшую Тя и Бо́га, молю́, Де́во, изба́вити ми ся лю́тых: к Тебе́ бо ны́не прибега́я, простира́ю и ду́шу и помышле́ние.

И ныне: Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, Еди́на Богома́ти, я́ко Блага́я, Блага́го же Роди́тельнице.

Песнь 3

Ирмос: Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в лю́бви Твое́й, жела́ний кра́ю, ве́рных утвержде́ние, Еди́не Челове́колюбче.

Предста́тельство и покро́в жи́зни моея́ полага́ю Тя, Богороди́тельнице Де́во, Ты мя окорми́ ко приста́нищу Твоему́, благи́х вино́вна, ве́рных утвержде́ние, Еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти: Ты бо, Богоневе́стная, Нача́льника тишины́ Христа́ родила́ еси́, Еди́на Пречи́стая.

Слава: Благоде́теля ро́ждши, до́брых вино́внаго, благодея́ния бога́тство всем источи́: вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

И ныне: Лю́тыми неду́ги и боле́зненными страстьми́ истяза́ему, Де́во, Ты ми помози́, исцеле́ний бо неоску́дное Тя зна́ю сокро́вище, Пренепоро́чная, неиждива́емое.

Песнь 4

Ирмос: Услы́шах, Го́споди, смотре́ния Твоего́ та́инство: разуме́х дела́ Твоя́ и просла́вих Твое́ Божество́.

Страсте́й мои́х смуще́ние, ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми, Яже Благосе́рдаго ро́ждшая и Спа́са всех пою́щих Тя.

Слава: Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя Богома́терь.

И ныне: На одре́ боле́зни моея́ и не́мощи низлежа́щу ми, я́ко благолюби́ва помози́, Богоро́дице, Еди́на Присноде́во.

Песнь 5

Ирмос: Просвети́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколю́бче.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Изба́ви нас от бед, Богоро́дице Чи́стая, ве́чное ро́ждши Избавле́ние и Мир, всяк ум преиму́щий.

Слава: Разреши́ мглу прегреше́ний мои́х, Богоневе́сто, просвеще́нием Твоея́ све́тлости, Свет ро́ждшая Боже́ственный и преве́чный.

И ныне: Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми.

Песнь 6

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зол душа́ моя́ испо́лнися, и живо́т мой а́ду прибли́жися, и молю́ся я́ко Ио́на: от тли, Бо́же, возведи́ мя.

Сме́рти и тли я́ко спасл есть, Сам Ся изда́в сме́рти, тле́нием и сме́ртию мое́ естество́ я́то бы́вшее: Де́во, моли́ Го́спода и Сы́на Твоего́ враго́в злоде́йствия мя изба́вити.

Предста́тельницу Тя Живота́ вем и храни́тельницу тве́рду, Де́во, и напа́стей реша́щу молвы́ и нало́ги бесо́в отгоня́ющу: и молю́ся всегда́ от тли страсте́й мои́х изба́вити мя.

Слава: Яко сте́ну прибе́жища стяжа́хом, и душ всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся. О, Влады́чице, и ны́не нас от страсте́й и бед спаси́.

И ныне: На одре́ ны́не немощству́яй лежу́, и несть исцеле́ния пло́ти мое́й: но Бо́га и Спа́са ми́ру, и Изба́вителя неду́гов ро́ждшая, Тебе́ молю́ся, Благо́й: от тли неду́г возста́ви мя.

Тоже: Го́споди поми́луй, трижды. Слава, и ныне

Седален, глас 8:

Агнца и Па́стыря, и Спа́са ми́ра на Кресте́ зря́щи, Ро́ждшая Тя глаго́лаше слезя́щи: мир у́бо ра́дуется, прие́мля избавле́ние: утро́ба же Моя́ гори́т, зря́щи Твое́ распя́тие, е́же за всех терпи́ши, Сы́не и Бо́же Мой.

Песнь 7

Ирмос: От Иуде́и доше́дше о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Юже ми́ру Предста́тельницу показа́л еси́: оте́ц на́ших Бо́же, благослове́н еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися от прегреше́ний и душе́вных скверн ве́рою зову́щим: оте́ц на́ших Бо́же, благослове́н еси́.

Слава: Сокро́вище спасе́ния и исто́чник нетле́ния, Тя ро́ждшую, и столп утвержде́ния, и дверь покая́ния зову́щим показа́л еси́: оте́ц на́ших Бо́же, благослове́н еси́.

И ныне: Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ нам ро́ждшая.

Песнь 8

Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя во ве́ки.

Неможе́ние души́ моея́ исцеля́еши и теле́сныя боле́зни, Де́во, да Тя просла́влю, Чи́стая, во ве́ки.

Слава: Исцеле́ний бога́тство излива́еши ве́рно пою́щим Тя, Де́во, и превознося́щим неизрече́нное Твое́ Рождество́.

И ныне: Напа́стей Ты прило́ги отгоня́еши и страсте́й нахо́ды, Де́во: те́мже Тя пое́м во вся ве́ки.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

То́ка слез мои́х не отврати́ся, Яже от вся́каго лица́ вся́ку сле́зу отъе́мшаго, Де́во, Христа́ ро́ждшая.

Ра́дости мое́ се́рдце испо́лни, Де́во: Яже ра́дости прие́мшая исполне́ние, грехо́вную печа́ль потребля́ющи.

Слава: Све́та Твоего́ заря́ми просвети́ Де́во, мрак неве́дения отгоня́ющи, благове́рно Богоро́дицу Тя испове́дающих.

И ныне: На ме́сте озлобле́ния не́мощи смири́вшегося, Де́во, исцели́, из нездра́вия во здра́вие претворя́ющи.

В СРЕДУ

Канон молебный Пресвятей Богородице

Песнь 1

Ирмос: Колесницегони́теля фарао́ня погрузи́, чудотворя́й иногда́ моисе́йский жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.

Припев: Пресвята́я Богоро́дице, спаси́ нас.

Сло́во Бо́жие родила́ еси́ воплоще́нно, Еже пре́жде безпло́тное, па́че естества́, Всенепоро́чная Богоро́дице Де́во, Богому́жно в ми́ре пожи́вшее: те́мже Тя вси сла́вим, су́щее по Бо́зе заступле́ние на́ше.

Испещре́на разли́чием ша́ра64 Богоблагода́тная, Отчее Сло́во, плоть бы́вшее за милосе́рдие неизрече́нное, па́че ума́ и Сло́ва, Благослове́нная, родила́ еси́, пребы́вши Дева нескве́рная.

Слава: От ко́рене, Чи́стая, ца́рска прозя́бла еси́, Царя́ Христа́, Бо́жие Сло́во, па́че ума́ и смы́сла, воплоще́нна родила́ еси́ от чи́стых крове́й Твои́х, сугу́ба Естество́м показу́ема и Еди́нственна во Ипоста́си.

И ныне: Иже Богоро́дицу Тя пропове́дует, Пречи́стая, на вся́кия е́реси побежде́ние но́сит: плоть у́бо Бы́вшаго неизме́нно породила́ еси́, Богороди́тельнице, вы́шша вся́кия тва́ри, Сло́во Бо́жие Присносу́щное.

Песнь 3

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твои́х утверди́, я́ко несть Свят, па́че Тебе́, Еди́не Человеколю́бче.

Во Твою́ Святу́ю утро́бу Бог всели́ся, и воплоти́ся я́коже весть, Богома́ти, и спасе́ нас живоно́сными страстьми́: тем Тя спасе́ния дверь сла́вим.

На земли́ вопло́щься и поживе́ с челове́ки, Иже ду́шу всем челове́ком вдохну́вый, от утро́бы Твоея́ проше́д без се́мене, Пребоже́ственный: те́мже Тя ве́рнии вси пе́сньми, Чи́стая, ублажа́ем.

Слава: От Отца́ пре́жде век рожде́нна во утро́бе Твое́й заче́нши, Де́во неискусобра́чно, и родила́ еси́ нам вку́пе Бо́га и Челове́ка, во обою́ Естеству́ соверше́нна и неразде́льна.

И ныне: Жезл прозя́бший цвет нетле́ния Христа́, и злату́ю кади́льницу вси Тя зна́ем, Чи́стая, Боже́ственное существо́ нося́щую на руку́ угль, Де́во Богоблаже́нная.

Песнь 4

Ирмос: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра Отча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.

Киво́т издале́ча прообрази́ прие́мший зако́н Богопи́санный, во утро́бе Живонача́льное Сло́во зача́тое несказа́нно, Пренепоро́чная, пита́ющее бога́тно ду́ши пою́щих: си́ле Твое́й сла́ва, Человеколю́бче.

Ты и́стинная спасе́ния вина́, Богома́ти, Еди́на была́ еси́, Творцу́ и Зижди́телю, от Твои́х Пречи́стых крове́й плоть взаи́м да́вши: Еюже сме́ртныя сокруши́шася две́ри, и жизнь челове́ком дарова́ся.

Слава: Да о́браз погребе́нный страстьми́ взы́щеши бога́тством бла́гости, в Де́выя всели́лся еси́ утро́бу, из нея́же Ты, Прему́дрость Бо́жия, Храм созда́л еси́: и́мже пожи́в с челове́ки, Ще́дре, и спасл еси́ ми́ра концы́.

И ныне: По Бо́зе Тя Предста́тельницу стяжа́хом, Пренепоро́чная: Ты бо Бо́жия Ма́ти была́ еси́ Творца́ и Зижди́теля, и наш зрак прие́мшаго, и сий спа́сша от тли и бед и сла́вою Боже́ственною просла́вльша.

Песнь 5

Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чу́ждая тьма, окая́ннаго? Но обрати́ мя и к све́ту за́поведей Твои́х пути́ моя́ напра́ви, молю́ся.

Яко Бо́га заче́ншую, Пречи́стая, Зижди́теля, Соде́теля же и Го́спода, ро́дове Тя всех челове́к блажа́т и безпло́тных у́мнии чинонача́льницы я́ко Ма́терь Тя Бо́га сла́вят.

Во́инства Вы́шних Сил, Пречи́стая, блажа́т Тя: Тобо́ю бо то́кмо, и́же на земли́ с Небе́сными совоку́пльшеся, пое́м Рождество́ Твое́.

Слава: Несказа́нным, Де́во, о́бразом, Сло́во всели́ся в Тя и челове́к бысть, Иже пре́жде век от Отца́ возсия́вый, и челове́ки от тли избавля́я, к жи́зни нетле́нней возводя́ Един Благосе́рдый.

И ныне: Украси́лася еси́, Пречи́стая Де́во, де́вства добро́тами, и пе́рвыя Евы отпусти́ла еси́ злообра́зное, Христа́ ро́ждши, оде́жду безсме́ртия да́рующаго Тебе́ пою́щим.

Песнь 6

Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Иже вседержа́вною си́лою нося́й вся́ческая, в неможе́ние плотско́е от Тебе́ облече́ся, Де́во Всенепоро́чная, во благодея́ние челове́ков, я́ко Человеколю́бец.

На́йде на Тя вседе́тельный Дух, Всенепоро́чная, и Сло́во Бо́жие в Тя всели́ся, и плоть бысть несказа́нно, пребы́в неизме́нен.

Слава: Просвети́ ду́ши правосла́вно пою́щих Тя: рече́ния проро́к Твое́ провозвести́ша Пречи́стое зача́тие и па́че сло́ва, Богоневе́стная, Рождество́.

И ныне: Селе́ние Бо́жие, Боже́ственное вои́стинну и Прече́стное, пое́м благоче́стно Мари́ю Пречи́стую: Бо́га бо вмести́, восприе́мши Невмести́маго и Непостижи́маго.

 

Таже: Го́споди поми́луй, трижды. Слава, и ныне

Седален, глас 8:

Яко Всенепоро́чная Неве́сто Творцу́, я́ко неискусому́жная Ма́ти Изба́вителя, я́ко прия́телище су́щи Уте́шителя, Всепе́тая: беззако́нию мя су́ща скве́рно жили́ще, и бесо́м игра́лище в ра́зуме бы́вша, потщи́ся и сих злоде́йствия мя изба́вити, све́тло жили́ще доброде́тельми соде́лавши, светода́тельная и нетле́нная: разжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

Песнь 7

Ирмос: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Пречи́стая Влады́чице, заче́ншая Изба́вителя всех, несказа́ннаго и Боже́ственнаго сподо́би мя избавле́ния, велегла́сно вопию́щаго и пою́ща: благослове́н Бог оте́ц на́ших.

Ны́не вся испо́лнишася Све́та Боже́ственнаго Тобо́ю, Пречи́стая: Ты бо дверь яви́лася еси́, е́юже ми́рови Бог бесе́дова, просвеща́я ве́рою зову́щия: благослове́н Бог оте́ц на́ших.

Слава: Се ны́не испо́лнися Дави́да боже́ственнаго Боже́ственное прорече́ние: мо́лятся вои́стинну Твоему́ лицу́, Богороди́тельнице Чи́стая, стяжа́вшии бога́тство благода́ти, ны́не благословя́ще Бо́га оте́ц на́ших.

И ныне: Зачала́ еси́ Пречи́стая, над все́ми Бо́га и Го́спода, благоволи́вшаго спасти́ челове́ческий род от сме́рти и тли, Его́же досто́йно пою́ще, зове́м: благослове́н Бог оте́ц на́ших.

Песнь 8

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся дела́ Госпо́дня, Го́спода.

Благослове́нная Пречи́стая, души́ моея́ язвы и грехо́вныя стру́пы очи́сти, Бо́га ро́ждшая Иже над все́ми, Отрокови́це Чи́стая, от деви́ческия неискусобра́чныя утро́бы: Его́же, де́ти, благослови́те, и превозноси́те во ве́ки.

Све́та Незаходи́маго была́ еси́ прия́телище, Всечи́стая, де́вства добро́тами сия́ющи: и всех озари́ла еси́, Богоро́дицу Тя и́стинную испове́дающих от души́ и вопию́щих: де́ти, благослови́те, свяще́нницы, воспо́йте и превозноси́те Его во ве́ки.

Слава: Освя́щшися Ду́хом Святы́м, Богоро́дице Всенепоро́чная, вои́стинну прия́ла еси́ во утро́бе Безнача́льна Сы́на и Соприсносу́щна Отцу́, в Тебе́, Чи́стая, воплоща́ема, во благодея́ние ве́рою вопию́щим: де́ти, благослови́те, свяще́нницы, по́йте, и превозноси́те Его во ве́ки.

И ныне: Яко Бо́га ро́ждши па́че сло́ва и смы́сла, Сего́ умоли́, Пречи́стая Богома́ти, бы́ти благоуве́тливу недосто́йным нам всем, во стра́шное Его́ и ужа́сное прише́ствие, егда́ хо́щет суди́ти челове́ческому естеству́, наги́м стоя́щим всем, и со стра́хом суди́мым.

Песнь 9

Ирмос: Ужасе́ся о сем Не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Отве́рженных ве́чнаго пребыва́ния и па́дших окая́нно в смерть, па́ки нас призвала́ еси́, Пречи́стая, Ма́ти бы́вши Изба́вителя, и к пре́жнему тещи́ сподо́била еси́ Оте́честву: тем Тя, Богома́ти, непреста́нно велича́ем.

Удо́бь, Богоро́дице, пода́ждь ми преити́ жития́ волну́ напа́стей, и настоя́ния страсте́й, я́ко Блага́, укротя́щи и наставля́ющи к доброде́тели Небе́снаго ше́ствия: да я́ко благоде́тельницу непреста́нно вели́чаю Тя.

Слава: Чи́стая Пресла́вная Ма́ти Бо́жия, пою́щия Тя любо́вию спаси́ от напа́стей, молву́ реша́ющи ми́лостивно, я́ко Бо́га у́бо ро́ждши: вся, ели́ко хо́щеши твори́ти, твори́ши невозбра́нно и мо́жеши, Де́во. Те́мже Тя вси велича́ем.

И ныне: Побежда́ющую е́реси ю́ношския честну́ю Це́рковь покажи́, ю́же Христо́с Сын Твой, Обра́дованная, Кро́вию честно́ю Свое́ю я́ко Благ стяжа́ и спасе́ от бед и от наси́лия одержа́щаго нас, Влады́чице.

В ЧЕТВЕРТОК

Канон Пресвятей Богородице

Песнь 1

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Пресвята́я Богоро́дице, спаси́ нас.

Ми́лостива мне Христа́ соде́лай, Де́во Пренепоро́чная, в День при65 стра́шнаго осужде́ния изыма́ющи.

Одожди́ ми, Влады́чице, молю́ся, ка́пли умиле́ния, су́щую ми скве́рну отмыва́ющи, я́ко да сла́влю Тя.

Слава: Просвети́ мя Де́во, Яже Свет незаходи́мый ро́ждшая, моея́ ле́ности глубо́кую тьму отгоня́ющи.

И ныне: Спаси́ мя, Богоро́дице, во мно́гих гресе́х поги́бшаго, и му́ки вся́кия, и лю́таго осужде́ния изба́ви.

Песнь 3

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты мене́ утверди́ в лю́бви Твое́й, жела́ний кра́ю, ве́рных утвержде́ние, Еди́не Челове́колюбче.

Свяще́ннаго жития́ отпа́д, Пречи́стая, приложи́хся ското́м и осужде́н весь бых: но Ты, Яже Судию́ ро́ждшая, от вся́каго осужде́ния изба́ви мя и спаси́.

К Тебе́ прибега́ю, Влады́чице, всегда́ мно́жеством напа́стей обстои́ма уще́дривши спаси́ мя, Яже Спа́са ро́ждшая вся́ческих и Го́спода, Еди́на Препе́тая.

Cлава: Непроходи́мая Две́ре, Яже к Бо́гу приводя́щи, Отрокови́це, две́ри покая́ния ми отве́рзи, молю́ся, очи́стивши грехо́в мои́х скве́рну, ту́чами ми́лости Твоея́, Богоблагода́тная.

И ныне: Изба́ви мя страсте́й наведе́ния, Влады́чице, и борю́щияся враги́ моя́ ны́не победи́: утверди́ мя на ка́мени Бо́жиих хоте́ний и ду́шу мою́ просвети́, Две́ре Боже́ственнаго Све́та.

Песнь 4

Ирмос: Услы́шах, Го́споди, смотре́ния Твоего́ та́инство: разуме́х дела́ Твоя́ и просла́вих Твое́ Божество́.

Души́ моея́ я́звы исцели́, Богоблагода́тная Де́во: ум мой просвети́, Чи́стая, омраче́нный стра́стными нахо́ды.

Уны́нием спя́щаго и грехо́м покрове́ннаго, к покая́нию мя, Пречи́стая, призови́, я́ко Ма́ти Сло́ва.

Слава: Неискусобра́чная Влады́чице, Яже воплоще́нное Сло́во ро́ждшая, ду́шу мою́ просвети́ и от гее́нны изба́ви и муче́ния.

И ныне: На Тя наде́жду мою́ возложи́х всю, Ма́ти Де́во: ду́шу мою́ соблюди́, Яже Бо́га ро́ждши Спа́са моего́.

Песнь 5

Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чу́ждая тьма окая́ннаго? Но обрати́ мя и к све́ту за́поведей Твои́х пути́ моя́ напра́ви, молю́ся.

Души́ моея́ стра́сти всенеисце́льныя, Отрокови́це, исцели́, и уга́сший ле́ностию свети́льник мой возжзи́, и к покая́ния путе́м наста́ви, Де́во, да ве́рою и любо́вию Тя сла́влю.

Себе́ осужда́ю пре́жде испыта́ния, Богора́дованная, сту́дная дела́ ношу́ еди́н осужде́нный: но предста́ни ми, я́ко предста́тельница су́щи всем, и лю́таго осужде́ния изба́ви мя.

Слава: Избавля́ющи мя от плене́ния, и одержа́щия душетле́нныя молвы́, и страсте́й лю́тых, умерщвля́ющих мя, не преста́й, Пресвята́я Отрокови́це, гре́шником засту́пнице, челове́ком гото́вая Помо́щнице.

И ныне: Умерщвле́на мя всего́ жа́лом сме́ртным от преступле́ния, оживи́, Пречи́стая, Яже Жизнь заче́ншая ми́рови Изба́вителя и Царя́, и к све́ту наста́ви мя.

Песнь 6

Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Умерщвле́на мя мно́гими преступле́ньми, Пречи́стая Де́во, оживи́, Яже Жизнь челове́ком неизрече́нно ро́ждшая, Богоро́дице, и твори́ти ми во́лю Госпо́дню наста́ви.

Тя предста́тельницу и сте́ну ве́рнии вси стяжа́хом, и́же во глубине́ зол, и молв, и печа́лей потопля́емии при́сно, Богоро́дице, Еди́на ве́рным прибе́жище.

Слава: Увяди́вшая сады́ безбо́жия, Пренепоро́чная, Твои́м Святы́м прозябе́нием, расту́щую во мне при́сно вра́жию зло́бу потреби́, Пречи́стая.

И ныне: Освяти́ мой ум и просвети́ се́рдце мое́, Свята́я Ма́ти Бо́жия, и одержа́щих мя зол измени́: да Тя сла́влю тве́рдую засту́пницу мою.

 

Таже: Го́споди поми́луй, трижды. Слава, и ныне

Седален, глас 8:

О чудесе́ но́ваго! О стра́шнаго та́инства! Взыва́ше Агница, Сы́на зря́щи на Дре́ве кре́стнем просте́рта: что Се Сло́ве Бо́жий безсме́ртный? Ка́ко мертв зри́шися и зе́млю коле́блеши, я́ко Всеси́лен? Но воспева́ю Твое́ стра́шное и Боже́ственное схожде́ние.

Песнь 7

Ирмос: Отроцы евре́йстии в пещи́ попра́ша пла́мень дерзнове́нно и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.

Ми́лостива бу́ди ми, Де́во, и ура́нена м ору́жием греха́, пла́стырем исцели́ Твоея́ моли́твы: и огня́ негаси́маго исхити́ мя во ве́ки.

Изба́ви мя, Ма́ти Спа́сова, одержа́щаго лю́таго плене́ния, помышле́ний лука́вых и одержа́ний прегреше́ния, я́ко да при́сно спаса́емь, по до́лгу Тя сла́влю.

Слава: И ны́не к Тебе́ прибега́ю, Богома́ти, прегреше́ний плени́цами стя́гнут: за милосе́рдие ми́лости разреши́ мя, Де́во, и от бесо́в изба́ви муче́ния и зло́бы.

И ныне: Уще́дри и спаси́ мя, Де́во, Яже Ще́драго ро́ждши Бо́жия Сло́ва: и све́том, и́же в Тебе́, озари́ ду́шу мою́, и от бесо́в изба́ви мя лю́таго кова́рства.

Песнь 8

Ирмос: Седмери́цею пещь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Иже по всему́ соверше́н и естество́м непристу́пен, яви́ся прикоснове́н мне, пло́тию обложе́н из Тебе́, Неискусобра́чная: Его́же приле́жно моли́ беззако́ний мои́х бре́мя облегчи́те и суда́ бу́дущаго изба́вити мя.

Яже Судию́ и Го́спода ро́ждши па́че сло́ва, Сего я́ко Сы́на Твоего́, Пресвята́я, умоли́: в Час Суда́ осужде́ния, и огня́, и тьмы несвети́мыя, и скре́жета зубна́го изба́вити мя, ве́рою благоче́стно пою́щаго Тя всегда́.

Слава: Богороди́тельнице Пречи́стая, души́ моея́ я́звы и грехо́вный собла́зны очи́сти, исто́чником отмыва́ющи, и́же из ребр Рождества́ Твоего́, и и́же от них поте́кшими струя́ми: к Тебе́ бо взыва́ю, и к Тебе́ прибега́ю, и Тебе́ молю́ Богоблагода́тную.

И ныне: Умерщвле́нную ду́шу мою́ угрызе́нием змиины́м, Еди́на я́ве Живо́т ро́ждшая, Пренепоро́чная, оживи́: и нас ра́ди, Де́во, Рожде́ннаго, де́йствовати поспеши́ хоте́ния, вопию́щу: о́троцы, благослови́те, свяще́нницы, воспо́йте, лю́дие, превозноси́те Его во ве́ки.

Песнь 9

Ирмос: Ужасе́ся о сем Не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Просвети́, Две́ре Све́та, ослепле́нную ду́шу мою́ страстьми́, и лука́выми по́мыслы очерне́вшую, и бе́дствующую: и изба́ви мя напа́стей, и от бесо́в озлобле́ния и истяза́ния лю́таго, и бу́дущаго пла́мене и му́ки.

Пощади́ мя, Спа́се, рожде́йся от Де́вы и сохрани́вый Ро́ждшую Тя нетле́нну и по Рождестве́: егда́ ся́деши суди́ти дело́м мои́м, беззако́ния и грехи́ моя́ пре́зри, я́ко безгре́шен, и я́ко Бог ми́лостив и Человеколю́бец.

Слава: Нося́щи Небе́сный Огнь рука́ма, я́ко клеща́ми, Богоблагода́тная, души́ моея́ стра́сти попали́, Чи́стая, и стра́шнаго осужде́ния и огня́ и томле́ния лю́таго бесо́вскаго свободи́ мя.

И ныне: Осия́нием Твои́м мы́сленным просвети́ на́ша помышле́ния, и сердца́ и ра́зумы, Отрокови́це Богоблагода́тная, я́ко да стезя́ми живо́тными пра́ве ходя́ще, ми́лость полу́чим, возвеща́юще при́сно хвалы́ Твоя́.

В ПЯТОК

Канон Пресвятей Богородице

Песнь 1

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Пресвята́я Богоро́дице, спаси́ нас.

Умертви́ пло́ти моея́ мудрова́ние, Пречи́стая Де́во, Яже жизнь ро́ждшая, и му́ки вся́кия изба́ви мя.

Заре́ю пресве́тлою от Тебе́, Де́во, возсия́вшаго, души́ моея́ зе́ницы просвети́: я́ко да сла́влю Тя.

Слава: Моли́ся Влады́чице, Еди́на Свята́я Богоро́дице, я́ко да улучу́ в день суда́ спасе́ние и Боже́ственную све́тлость.

И ныне: Пречи́стая Богоро́дице, утиши́ боле́зни се́рдца моего́, Яже Христа́ неболе́зненно па́че ума́ и Сло́ва ро́ждшая.

Песнь 3

Ирмос: Ты еси́ утвержде́ние притека́ющих к Тебе́, Го́споди: Ты еси́ свет омраче́нных, и пое́т Тя дух мой.

Изба́ви мя моли́твами Твои́ми, Пречи́стая, вра́жиих стрел: и от помышле́ний находя́щих пощади́ се́рдце мое́.

Исцели́ Пренепоро́чная, души́ моея́ ра́ны, Ма́ти Бо́жия, утиши́ Твои́ми моли́твами серде́чное смуще́ние.

Слава: Укроти́ неуста́вное помышле́ний мои́х, Чи́стая Влады́чице, и отыми́ от души́ вся́ку печа́ль, Яже Ра́дость ро́ждшая.

И ныне: Ра́дуйся, спасе́ние притека́ющих к Тебе́, Де́во Ма́ти Христо́ва: ра́дуйся, апо́столов и му́чеников Похвало́.

Песнь 4

Ирмос: Услы́шах, Го́споди, смотре́ния Твоего́ та́инство: разуме́х дела́ Твоя и просла́вих Твое́ Божество́.

Души́ моея́ я́звы, Сло́ве Бо́жий, исцели́, уязви́выйся мене́ ра́ди, я́ко Человеколю́бец, и ума́ моего́ тьму просвети́.

Дрема́нием ле́ности моея́ сон грехо́вный пости́же, Де́во: бо́дренною Твое́ю моли́твою воздви́гни мя к покая́нию.

Слава: Яже от исто́чник источи́вшая во́ду оставле́ния, Пренепоро́чная, се́рдце мое́ напо́й, изсо́хшее вся́кими преступле́ньми.

И ныне: Пресвята́я Богоневе́сто, Влады́чице ми́ра, Ты мя спаси́, бед пременя́ющи и страсте́й молву отгоня́ющи.

Песнь 5

Ирмос: Утренююще вопие́м Ти, Го́споди, спаси́ ны: Ты бо еси́ Бог наш, ра́зве бо Тебе́ ино́го не ве́мы.

При́зри, Пречи́стая, и услы́ши глас мой, и вся очи́сти беззако́ния моя́, Влады́чице.

Со́лнце незаходи́мое ро́ждшая, Богоро́дице, всего́ мя просвети́, омраче́ннаго страстьми́: да сла́влю Тя и хвалю́, Пренепоро́чная.

Cлава: Уще́дри, Пресвята́я Отрокови́це, ду́шу мою́ и изба́ви суда́, и ве́чнующаго муче́ния.

И ныне: Неду́говавшую ду́шу мою́ исцели́, ро́ждшая всех Взе́млющаго неду́ги, Пресвята́я Влады́чице.

Песнь 6

Ирмос: Бе́здна грехо́в и прегреше́ний бу́ря мя смуща́ет, и во глубину́ ну́жднаго ре́ет мя отча́яния: но Твою́ кре́пкую ру́ку мне простри́, я́ко Петро́ви, о Упра́вителю, и спаси́.

Умертви́, Богоро́дице, пло́ти моея́ безчи́нная двиза́ния, Яже умерщвле́нныя зло́бою оживи́вшая, Твои́м живы́м Рождество́м: я́ко да сла́влю Тя, я́ко вину́ челове́ческаго обновле́ния.

Бе́здну щедро́т ро́ждши, Богоро́дице Де́во, ско́рбных жития́ ду́шу мою́ спаси́, и ра́дости духо́вныя две́ри отве́рзи ми: на Тя бо Еди́ну наде́жду возложи́х.

Слава: Да Твоя́ ра́достно воспою́ вели́чия, Де́во Пречи́стая, и вели́кую благода́ть чуде́с, безме́стная помышле́ния, томя́щая мя всегда́, моли́твами Твои́ми премени́.

И ныне: Родила́ еси́ па́че естества́ недр Оте́ческих неразлу́чнаго и Тобо́ю, Де́во, к челове́ком бесе́довавша: но я́ко похвала́ нас всех и утвержде́ние еси́, Богоро́дице, к Тебе́ прибега́ющия уще́дри.

 

Таже: Го́споди поми́луй, трижды. Слава, и ныне

Седален, глас 8:

Сло́во Отчее на зе́млю сни́де, и а́нгел све́тел Богоро́дице глаго́лаше: ра́дуйся, Благослове́нная, Яже черто́г Еди́на сохра́ньшая, зача́тие прие́мши Преве́чнаго Бо́га и Го́спода, да от пре́лести я́ко Бог спасе́т род челове́ческий.

Песнь 7

Ирмос: Отроцы евре́йстии в пещи́ попра́ша пла́мень дерзнове́нно и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.

Увы́ мне, ка́ко избе́гну мук, жду́щих мя, зле пожи́в зде́? Ка́ко Судии́ Стра́шному явлю́ся окая́нный? Богороди́тельнице Влады́чице, помо́щница тогда́ бу́ди ми.

Угаси́ пла́мень страсте́й мои́х и утиши́ бу́рю се́рдца моего́, Богома́ти Чи́стая: и изба́ви мя, Пречи́стая, бесо́в томле́ния и огня́ ве́чнаго.

Слава: Виждь скорбь мою́, Де́во, ю́же наведе́ мно́жество зол мои́х: и пре́жде отше́ствия поко́й ми пода́ждь, Ма́терними Твои́ми моли́твами умоля́ющи Сы́на Твоего́.

И ныне: Пла́мень страсте́й се́рдца моего́ погаси́ росо́ю Твое́ю Де́во, и огня́ стра́шнаго исхити́, Отрокови́це, и ве́чнаго суда́ и бесо́вскаго томле́ния.

Песнь 8

Ирмос: Благослови́те, о́троцы, Тро́ицы равночи́сленнии, Соде́теля Отца́ Бо́га, по́йте снизше́дшее Сло́во, и огнь в ро́су претво́ршее, и превозноси́те всем жизнь подава́ющаго, Ду́ха Всесвята́го во ве́ки.

Умертви́, Де́во, вся теле́сная на́ша двиза́ния, Яже ме́ртва зми́я живоно́сным Рождество́м Твои́м соде́лавши: и жизнь нестаре́ющую улучи́ти нам помоли́ся, я́ко да Тя пое́м во ве́ки.

Тя Богороди́тельнице, на по́мощь всегда́ призыва́ю, не посрами́ мене́ стяжа́вшаго студу́ дела́: но уще́дри мя, Пречи́стая, и пла́мене исхити́, и ве́чных изба́ви муче́ний.

Слава: Обра́дованная помо́щница ми яви́ся во обстоя́нии зол, избавля́ющи от находя́щих ми бесо́вских наве́т, я́ко да ублажа́ю Тя всегда́, Богоро́дице, Предста́тельнице всех.

И ныне: Пресвята́я Отрокови́це, апо́столов похвало́, му́чеников сла́во, сла́вы ве́чныя прича́стника мя сотвори́, взыва́юща: благослови́те Ду́ха Пресвята́го во ве́ки вся.

Песнь 9

Ирмос: Уста́вы прешла́ еси́ естества́, Соде́теля заче́нши и Го́спода, и дверь спасе́ния ми́рови была́ еси́: тем Тя, Богоро́дице, непреста́нно велича́ем.

Све́том Твои́м невече́рним, Две́ре Све́та, души́ моея́ тьму отжени́ лю́тую, и покая́ния ми пути́ светоза́рныя покажи́: я́ко да ше́ствуя в них, мра́ка отбе́гну грехо́внаго и непреста́нно велича́ю Тя.

Очи́сти рабы́ Твоя́, Бла́же, и прегреше́ний проще́ние да́руй: и ве́чнующаго пла́мене изба́ви нас, и прича́стники соде́лай Твоего́ Ца́рствия, Сло́ве Бо́жий: и́бо за е́же хотя́ спасти́ род челове́ч, Крест претерпе́л еси́.

Слава: Удо́бь, Богоро́дице, прейти́ ми жития́ пода́ждь прехожде́ние, и напа́стей воста́ния и страсте́й, я́ко Блага́, укротя́щи, и наставля́ющи к доброде́тели Небе́снаго Ца́рствия и поко́я Боже́ственна: я́ко да спаса́емь прославля́ю Тя.

И ныне: Неду́говавшую ду́шу мою́ стра́стию лю́тою, Яже ро́ждши Бо́га Преблага́го, я́ко ми́лостива исцели́, и изба́ви при́сно оскорбля́ющих мя, Пречи́стая, и прибыва́ющих злолю́тых: я́ко да спаса́емь, Тя усе́рдно велича́ю, возвели́чившую род наш.

БОГОРОДИЧНИК.

Каноны Божией Матери на каждый день.

* * *

27

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

28

Сплетней.

29

Т. е. Синай

30

Осуждения.

31

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

32

Творение Митрофана, митрополита Смирнскаго. Краегранесие канона: Митрофан, пою Тя, Владычице Богородице. – Краегранесие (акростих) – фраза, составляемая из начальных букв каждого тропаря греческого оригинала канона. В настоящем каноне порядок тропарей славянского Октоиха изменен для соответствия оригиналу.

33

Творение монахини Феклы.

34

Нападения бесовского.

35

Трудных, печальных (обстоятельств).

36

Т. е. сочетав снова чистому житию.

37

Препятствовать на пути.

38

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

39

Пронзил, остановил.

40

Соломон. Ср.: Песнь песней 3: 9–10.

41

Юница – телица. Это имя в богослужебных текстах усваивается Богородице, ибо и Христос, как Жертва за наши грехи, иногда называется юнцом, т.е. тельцом.

42

Реснотивно – истинно: пророк Даниил, который видел Седящего на престоле, поистине видел и истинное Рождество Богородицы.

43

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

44

Тихое, небурное.

45

Не могу уразуметь.

46

Истинно.

47

Сосуд.

48

Сладкое вино.

49

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

50

Ср.: Песнь песней 4:7.

51

Морщины; шире – всякий недостаток или порок.

52

Прощение.

53

Ткацкий стан.

54

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

55

Имеется в виду, что Богородица вместила в Себя Невместимого Бога.

56

Творение Иоанна иеромонаха. Краегранесие канона: Пресвятая, приими Иоанна рыдание.

57

Краегранесие канона: Даждь ми, Дево, слезы покаяния.

58

Слежу – лежу в праздности, валяюсь.

59

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

60

Т. е. канон следует читать в субботу вечером, под воскресенье. Все каноны читаются вечером указанного дня. Слово «молебный» в названии канона означает, что Устав предполагает его исполнение на молебне.

61

Ересь манихейства, с которой здесь сравнивается ересь иконоборчества.

62

Творение Иосифа, краегранесие: Моление есть восьмое Деве. Иосиф.

63

Ср.: Песнь песней 3: 7.

64

Украшенная различной красотой.

65

В День Суда.



Источник: Православный Свято-Тихоновский гуманитарный университет Москва, 2006.

Комментарии для сайта Cackle

Ищем ведущего программиста. Требуется отличное знание php, mysql, фреймворка Symfony, Git и сопутствующих технологий. Работа удаленная. Адрес для резюме: admin@azbyka.ru

Открыта запись на православный интернет-курс