Мѣ́сѧца тогѡ́же въ ѕ҃і-й де́нь. Ст҃ы́хъ мч҃ницъ, а҆га́пїи, і҆ри́ны и҆ хїоні́и.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:
Дѣ́вство нетлѣ́нно, ꙳ мꙋче́нїе всечꙋ́дно, ꙳ хрⷭ҇тꙋ̀ принесо́сте честны̑ѧ дѣ̑вы, ꙳ низложи́вше шата́нїе пре́лести безбо́жное ꙳ си́лою крⷭ҇тною, ꙳ мꙋ́жественнымъ ра́зꙋмомъ. ꙳ тѣ́мже всѧ̀ хрⷭ҇то́ва цр҃ковь пра́зднꙋетъ ꙳ свѧтꙋ́ю ва́шꙋ па́мѧть ꙳ свѣтоно́снꙋю и҆ наро́читꙋю.
Хїоні́и страда́нїю, ꙳ и҆ а҆га́пїи сопротивле́нїю, ꙳ і҆ри́ны мч҃ницы неѡдолѣ́нїю, ꙳ ли́цы а҆́гг҃льстїи бл҃же́ннїи ꙳ ꙗ҆́вѣ ᲂу҆диви́шасѧ: ꙳ ка́кѡ мꙋ́жественными сплетє́нїи ꙳ врага̀ неви́димаго разрази́вше, ꙳ побѣ́ды вѣне́цъ ѿ рꙋкѝ живоно́сца ꙳ бога́тнѡ прїѧ́ша.
Ѻ҆гне́мъ скончава́еми, ꙳ разжже́ннымъ смы́сломъ ꙳ пла́мень погаси́сте сꙋ́етства, ꙳ и҆ свѣщꙋ̀ неꙋга́сшꙋ дꙋше́внꙋю соблю́дше, ꙳ внидо́сте со хрⷭ҇то́мъ въ черто́гъ нбⷭ҇ный: ꙳ чꙋде́сными же и҆́скрами ꙳ стра̑сти пожго́сте, стрⷭ҇тонѡ́сицы, ꙳ де́мѡнѡвъ же полкѝ ꙳ страда́льчески побѣди́сте.
Сла́ва, и҆ ны́нѣ, бг҃оро́диченъ:
Тꙋ́чами дх҃а прест҃а́гѡ, пречⷭ҇таѧ, ꙳ мою̀ мы́сль ѡ҆росѝ, ꙳ ꙗ҆́же ка́плю ро́ждшаѧ хрⷭ҇та̀, ꙳ неизче́тнѡ безмѣ̑рнаѧ беззакѡ́нїѧ человѣ́кѡвъ ꙳ щедро́тами и҆змы́вшꙋю: ꙳ и҆зсꙋшѝ и҆сто́чникъ страсте́й мои́хъ, ꙳ и҆ пото́ка мѧ̀ сподо́би ꙳ пи́щи живы́ѧ при́снѡ, ꙳ моли́твами твои́ми.
Крⷭ҇тобг҃оро́диченъ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
Канѡ́нъ, творе́нїе і҆ѡ́сифово.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Бл҃года́ть мнѣ̀ съ нб҃сѐ, мч҃ницы гдⷭ҇ни, и҆схода́таите, ва́ше восхвалѧ́ющемꙋ на землѝ свѣтоно́сное торжество̀.
Расто́ргше пристра́стїе плотски́хъ соꙋ̑зъ бжⷭ҇твеннымъ дх҃омъ, хрⷭ҇тꙋ̀ дѣ̑вы свѧза́шасѧ любо́вїю бг҃оразꙋ́мною.
Напра́вилъ є҆сѝ ко приста́нищємъ, сп҃се, нбⷭ҇нымъ дѣ̑вы твоѧ̑, проше́дшыѧ немо́креннѡ мꙋ́къ непостоѧ́ннꙋю пꙋчи́нꙋ.
Дѣлесы̀ чи́стыми, ѿ дв҃ы ѻ҆трокови́цы возсїѧ́вшемꙋ сло́вꙋ ᲂу҆годи́вше дѣ̑вы, си́мъ веселѧ́тсѧ.
Бг҃оро́диченъ:
Ражда́еши несказа́ннѡ, є҆го́же ѻ҆ц҃ъ неизрече́ннѡ родѝ, и҆ сѡсцы̀ пита́еши, всѧ́чєскаѧ пита́ющаго, влⷣчце.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Тꙋ́чами бжⷭ҇твеннагѡ дх҃а напаѧ́еми, кла́сы мч҃ничєскїѧ, бжⷭ҇твеннымъ дѣ́ланїемъ дѣ̑вы процвѣто́ша.
Па́че ви́димыхъ неви́димаѧ возлю́бльше, ви̑димыѧ и҆ неви̑димыѧ врагѝ побори́сте.
Ѻ҆гнѧ̀ не ᲂу҆жасо́стесѧ, разгара́еми дх҃а бжⷭ҇твеннымъ ѻ҆гне́мъ: тѣ́мже и҆сцѣле́нїй бжⷭ҇твеннꙋю ро́сꙋ и҆сточа́ете.
Бг҃оро́диченъ:
Расто́ргни прегрѣше́нїй мои́хъ лю́тое рꙋкописа́нїе, влⷣчце, ꙗ҆́же ᲂу҆́зы разрѣ́шшаѧ а҆́дѡвы безсѣ́меннымъ ржⷭ҇тво́мъ твои́мъ.
Сѣда́ленъ, гла́съ и҃. Подо́бенъ: Премꙋ́дрости:
Оу҆невѣ́стившесѧ гдⷭ҇еви бг҃олѣ́пнѡ, ꙗ҆́коже да́ръ кро́вь и҆ заколе́нїе томꙋ̀ принесо́сте, стрⷭ҇тонѡ́сицы ѻ҆трокови̑цы, и҆ черто́гъ бжⷭ҇твенный досто́йнѡ ᲂу҆лꙋчи́сте, просвѣще́нїѧ неизрече́ннагѡ непреста́ннѡ и҆сполнѧ́ємы. тѣ́мже свѧтꙋ́ю и҆ честнꙋ́ю ва́шꙋ па́мѧть творѧ́ще дꙋхо́внѡ, сп҃са прославлѧ́емъ и҆ вѣ́рнѡ взыва́емъ: моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Премꙋ́дрость и҆ сло́во въ твое́мъ чре́вѣ заче́нши, неѡпа́льнѡ, мт҃и бж҃їѧ, мі́рови родила̀ є҆сѝ мі́ръ содержа́щаго, и҆ во ѡ҆б̾ѧ́тїихъ понесла̀ є҆сѝ всѧ̑ носѧ́щаго, пита́телѧ всѣ́хъ и҆ творца̀ тва́ри. тѣ́мже молю́ тѧ, всест҃а́ѧ дв҃и́це, и҆ вѣ́рнѡ сла́влю тѧ̀, и҆зба́витисѧ мѝ ѿ прегрѣше́нїй, и҆ въ де́нь сꙋда̀, є҆гда̀ предста́ти и҆́мамъ предъ лице́мъ созда́телѧ моегѡ̀, влⷣчце дв҃о чⷭ҇таѧ, твою̀ по́мощь тогда̀ пода́ждь мѝ: всѧ̑ бо мо́жеши, є҆ли̑ка хо́щеши, всепѣ́таѧ.
Крⷭ҇тобг҃оро́диченъ:
А҆́гнца и҆ па́стырѧ, и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Тѣле́сныхъ жела́нїй жела́нїемъ бжⷭ҇твеннымъ ѿлꙋчи́вшесѧ, ѻ҆би́тєлища дх҃а хрⷭ҇тѡ́вы дѣ̑вы содѣ́лашасѧ.
Согла́сїемъ бг҃омꙋ́дрымъ на проти́внаго ѡ҆полчи́вшесѧ, побѣ́дꙋ бжⷭ҇твеннꙋю прїѧ́сте, и҆ вѣнцє́въ бжⷭ҇твенныхъ сподо́бистесѧ.
Свѧще́ннѡ ꙗ҆́коже неѕло́биви води́стесѧ а҆́гницы пожре́тисѧ, всечєстны́ѧ, не вопїю́ще, ни зовꙋ́ще, но произволе́нїемъ ᲂу҆мерщвлѧ́еми.
Бг҃оро́диченъ:
Воплоща́ема гдⷭ҇а родила̀ є҆сѝ, гпⷭ҇жѐ, всеѧ̀ тва́ри, є҆го́же молѝ и҆зба́вити мѧ̀, всест҃а́ѧ, ѿ ѻ҆́бласти вра́жїѧ кова́рства.
Пѣ́снь є҃. І҆рмо́съ:
Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.
Оу҆́треневаша вкꙋ́пѣ ко хрⷭ҇тꙋ̀, свѣ́тꙋ незаходи́момꙋ, дѣ̑вы бг҃омꙋ̑дрыѧ, и҆ па́че сїѧ́нїѧ со́лнечнагѡ ѡ҆зари́шасѧ.
Оу҆́ды мꙋ́жески ѿда́сте къ мꙋ́камъ, мꙋ́чивше томи́телѧ терпѣ́нїемъ, страстотє́рпицы досточꙋ̑дныѧ.
Цвѣ́тъ свѧще́ненъ мч҃никѡмъ показа́стесѧ, бл҃гово́нїе бжⷭ҇твеннагѡ ра́зꙋма це́ркви подаю́ще, всехва́льнїи.
Глаго́лы ва́шими велехва́льный ѡ҆нѣмѣ̀, терпѣ́нїемъ же побѣди́сѧ, и҆ потребле́нїю ѿпꙋще́нъ бы́сть, прехва́льнїи.
Бг҃оро́диченъ:
Коне́цъ мѝ бла́гъ прибы́ти, ѻ҆трокови́це, молѝ, ꙗ҆́кѡ да и҆збѣ́гнꙋ ждꙋ́щихъ мѧ̀ безконе́чныхъ мꙋ́къ и҆ спасꙋ́сѧ.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Претерпѣ́вше плотскі̑ѧ болѣ̑зни и҆ ѻ҆́гненное томле́нїе мꙋ́жески, хрⷭ҇тѡ́вы стрⷭ҇тотє́рпицы и҆ невѣ̑сты, а҆га́пїа и҆ хїоні́а, и҆ і҆ри́на, прїѧ́ша вѣне́цъ благолѣ́пенъ и҆ неиждива́емꙋю сла́вꙋ съ мꙋ́ченики.
Влачи́ми по землѝ, ꙗ҆́коже ка́менїе, и҆спроверго́сте, дѣ̑вы, пре́лести зда́нїе всѐ си́лою сло́ва, къ це́ркви возведо́стесѧ ст҃ѣ́й, предстоѧ́ти ра́достнѡ владꙋ́щемꙋ все́ю тва́рїю.
И҆сцѣлє́нїѧ ра́ка хїоні́и и҆ і҆ри́ны, и҆ а҆га́пїи то́читъ, ѿ и҆сто́чника напаѧ́ема бога́тнѡ ᲂу҆тѣ́шителѧ, и҆ ᲂу҆ставлѧ́етъ болѣ̑зни, напаѧ́етъ же бл҃гоче́стнѡ пристꙋпа́ющихъ сердца̀ бл҃года́тїю.
Бг҃оро́диченъ:
Ме́ртвость ко́жныхъ ри́зъ а҆да́мъ ѿло́жь воплоще́нїемъ твоегѡ̀ сн҃а, бцⷣе дв҃о, во ѻ҆де́ждꙋ бжⷭ҇твенныѧ сла́вы ѡ҆блече́сѧ, сла́вѧ тѧ̀ ра́достнѡ, ꙗ҆́кѡ мт҃рь бж҃їю всенепоро́чнꙋю.
Конда́къ, гла́съ д҃:
Крѣ́пкѡ дꙋ́шꙋ, і҆ри́но, ѡ҆полчи́ла є҆сѝ вѣ́рою, ꙗ҆́вѣ лꙋка́ваго посрами́вши, и҆ ко хрⷭ҇тꙋ̀ привела̀ є҆сѝ тмы̀ люде́й мно́жєства, бл҃же́ннаѧ: и҆ порфѵ́рꙋ ѿ крове́й носѧ́щи, со а҆́гг҃лы ны́нѣ весели́шисѧ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Ни ѕвѣре́й ди́вїихъ наи́тїѧ, ни клоко́чꙋщагѡ стремле́нїѧ ѻ҆гнѧ̀ непостоѧ́ннагѡ, ни ᲂу҆дѡ́въ ѿсѣче́нїѧ, ни болѣ́зней многоѻбра́зныхъ, хрⷭ҇тѡ́вы ѻ҆трокови̑цы ᲂу҆страши́шасѧ, доблемꙋ̑дрыѧ.
И҆мꙋ́ще ѻ҆́ко серде́чное ко спаса́ющемꙋ бг҃ꙋ и҆ цр҃ю̀ а҆́гницы хрⷭ҇тѡ́вы, ѿлꙋчи́шасѧ ко всемꙋ̀ вра́жїю ѡ҆полче́нїю, и҆ побѣди́ша мꙋ́жески.
Ми́лостивъ бꙋ́ди твои̑мъ рабѡ́мъ, пребл҃гі́й, мольба́ми хїоні́и и҆ і҆ри́ны чи́стыѧ, и҆ честны́ѧ а҆га́пїи, грѣхѡ́въ проще́нїе и҆́хъ ра́ди на́мъ подава́ѧ.
Всѐ жела́нїе дѣ̑вы стѧжа́вше ко є҆ди́номꙋ влⷣцѣ, жите́йскꙋю красотꙋ̀ вмѣни́сте ꙗ҆́кѡ со́нъ, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Оу҆мертвѝ, чⷭ҇таѧ, живꙋ́щїй, молю́ тѧ, во мнѣ̀ грѣ́хъ и҆ жи́знь мѧ̀ ᲂу҆лꙋчи́ти сподо́би нестарѣ́емꙋю, ꙗ҆́же живо́тъ ро́ждшаѧ, и҆ ᲂу҆мори́вшаго ѕмі́ѧ.
Пѣ́снь и҃. І҆рмо́съ:
Бг҃оглаго́ливїи ѻ҆́троцы, въ пещѝ со ѻ҆гне́мъ пла́мень попира́юще, поѧ́хꙋ: благослови́те, дѣла̀ гдⷭ҇нѧ, гдⷭ҇а.
Наꙋ́чшесѧ бжⷭ҇твєннымъ пресла́внѡ, во вре́мѧ (с. 124) подвигѡ́въ нра́въ мꙋ́жески воспрїѧ́ша хрⷭ҇тѡ́вы а҆́гницы, тве́рдѡ пострада́вше.
Помраче́нъ пїѧ́нствомъ гони́тель мра́чнагѡ грѣха̀, смѣ́хꙋ до́лженъ ꙗ҆влѧ́шесѧ: хрⷭ҇тѡ́вы же дѣ̑вы, ꙗ҆́кѡ свѣ́тъ показа́шасѧ.
Цѣвни́ца гласѧ́щи ꙗ҆́вѣ бж҃їю пѣ́снь и҆сповѣ́данїѧ бжⷭ҇твеннагѡ, и҆ свѣ́дѣнїѧ и҆ вѣ́ры показа́стесѧ вои́стиннꙋ дѣ̑вы ѻ҆трокови̑цы.
Оу҆тве́рждшесѧ любо́вїю влⷣки, ᲂу҆тверждє́нїѧ всѧ̑ дїа́волѧ низложи́сте, стрⷭ҇тонѡ́сицы хрⷭ҇тѡ́вы, и҆ ны́нѣ ᲂу҆блажа́етесѧ.
Бг҃оро́диченъ:
Ѻ҆́бразы носѧ́щи дре́вле твоегѡ̀ ржⷭ҇тва̀, ю҆́ношы не ѡ҆палѧ́етъ, дв҃о мт҃и, пе́щь, ꙗ҆́коже ни ᲂу҆тро́бꙋ твою̀ ѻ҆́гнь бжⷭ҇твенный.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
Напра́вистесѧ, дѣ̑вы, къ бжⷭ҇твєннымъ приста́нищємъ ѡ҆кормле́нїемъ хрⷭ҇та̀ бг҃а на́шегѡ, напа̑сти преше́дше свирѣ́пыхъ во́лнъ.
Ꙗ҆́кѡ ѕвѣ́зды, ꙗ҆́кѡ свѣщы̀ сїѧ́юще, і҆ри́на и҆ а҆га́пїа, и҆ хїоні́а, просвѣща́ютъ вселе́нныѧ бога́тнѡ всѧ̑ концы̀.
Совокꙋпи́стесѧ съ ли́ки безпло́тныхъ, безплѡ́тныѧ врагѝ съ пло́тїю до́блественнѣ, стрⷭ҇тонѡ́сицы, побѣди́вше.
Па́мѧть ва́ша бжⷭ҇твенными просвѣще́на свѣтови́дными, страстонѡ́сицы, дарова̑нїи, мы̑сли просвѣща́етъ восхвалѧ́ющихъ ва́съ.
Бг҃оро́диченъ:
Бл҃голюби́ваѧ дв҃о, ѡ҆ѕло́бленнꙋю грѣхо́мъ дꙋ́шꙋ мою̀ ᲂу҆врачꙋ́й, ꙗ҆́же пребл҃га́го сло́ва поро́ждшаѧ.