Мѣ́сѧца тогѡ́же въ ѳ҃і-й де́нь. Прпⷣбнагѡ ѻ҆ц҃а̀ на́шегѡ і҆ѡа́нна ветхопеще́рника.

На Гдⷭ҇и, воззва́хъ, стїхи̑ры, гла́съ є҃. Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е і҆ѡа́нне досточꙋ́дне, ᲂу҆ѧзви́всѧ бжⷭ҇твеннымъ жела́нїемъ, тебє̀ ра́ди на землѝ во́лею стра́нствовавшагѡ, и҆ ѿ дв҃ы въ пло́ть ѡ҆бле́кшасѧ хрⷭ҇та̀ бг҃а, въ чꙋ́ждꙋ странꙋ̀, ѻ҆́ч҃е, дости́глъ є҆сѝ, всѣ́хъ сла́дкихъ мі́ра, мꙋ́дре, ѿчꙋжди́лъ є҆сѝ до конца̀ себѐ, пребл҃же́нне, стра́ненъ пожи́лъ є҆сѝ, добродѣ́тєли стѧжа́въ: стоѧ́нїе всено́щное, поꙋче́нїе сме́ртное, и҆ ѡ҆бꙋзда́лъ є҆сѝ стра̑сти воздержа́нїемъ твои́мъ, ревни́тель ꙗ҆́вльсѧ пре́жде тебє̀ пости́вшымсѧ, съ ни́миже и҆ просла́вилсѧ є҆сѝ.

Прпⷣбне ѻ҆́ч҃е і҆ѡа́нне пресла́вне, ᲂу҆чи́всѧ въ ста́дѣ бж҃е́ственнагѡ харїтѡ́на, поче́рплъ є҆сѝ ꙗ҆́кѡ гꙋ́ба и҆ налїѧ̀, сегѡ̀ бжⷭ҇твенномꙋ поревнова́въ пꙋтѝ, и҆ въ безмо́лвїи житїѐ и҆зжи́въ, сподо́билсѧ є҆сѝ честна́гѡ свѧщеннодѣ́йства, бы́въ досто́инъ жре́цъ, закала́ѧ ꙗ҆́кѡ непоро́ченъ а҆́гнецъ всегда̀, и҆ ѡ҆чища́емь бжⷭ҇твенными зарѧ́ми, и҆ просвѣща́ѧсѧ ᲂу҆мо́мъ, и҆ мы́слїю возне́слсѧ є҆сѝ въ видѣ̑нїѧ та̑йнаѧ, ко и҆зрѧ́дномꙋ бл҃же́нствꙋ.

Прпⷣбне ѻ҆́ч҃е і҆ѡа́нне пребл҃же́нне, си́лою трⷪ҇ческою ᲂу҆крѣплѧ́емь, є҆реті́ческагѡ вре́да ѿбѣ́глъ є҆сѝ всегѡ̀, прилѣпи́лсѧ є҆сѝ сꙋ́щемꙋ, мꙋ́дре, видѣ́нїемъ и҆ дѣѧ́нїемъ бж҃е́ственнымъ, и҆ дости́глъ є҆сѝ всѣ́хъ жела́емыхъ къ кра́йнѣй, бл҃же́нне, бжⷭ҇твеннѣй сла́вѣ, вои́стиннꙋ полꙋчи́лъ є҆сѝ досто́йнѡ по кончи́нѣ, и҆ ра́дꙋешисѧ со а҆́гг҃льскими ли́ки, соѡблиста́ѧсѧ и҆ бг҃ꙋ предстоѧ̀. тѣ́мже помѧнѝ творѧ́щихъ твою̀ па́мѧть досто́йнѡ, досточꙋ́дне.

Сла́ва, и҆ ны́нѣ, бг҃оро́диченъ:

Комꙋ̀ ᲂу҆подо́биласѧ є҆сѝ, дꙋшѐ, ᲂу҆спѣва́ющи въ го́ршихъ всегда̀, и҆ прилага́ющи безꙋ́мнѡ твои̑мъ ꙗ҆́звамъ стрꙋ́пы мно́жайшыѧ, ꙗ҆́кѡ всетѣле́снѣй бы́ти ꙗ҆́звѣ, не помышлѧ́ющи, ꙗ҆́кѡ сꙋдїѧ̀ приближа́етсѧ, є҆мꙋ́же предста́неши воспрїѧ́ти по дѣѧ́нїємъ вины̑ и҆ томлє́нїѧ; но ѡ҆бра́щшисѧ, припадѝ къ дв҃ѣ, зовꙋ́щи: влⷣчце, влⷣчце, не пре́зри мѧ̀, прогнѣ́вавшаго бг҃а бл҃гоми́лостиваго, и҆зъ тебє̀ на спасе́нїе человѣ́кѡмъ ро́ждшагосѧ и҆ распе́ншагосѧ пло́тїю.

Крⷭ҇тобг҃оро́диченъ:

Є҆гда̀ гро́здъ ненасажде́нъ сꙋ́щъ, ꙗ҆́кѡ лоза̀ ѿрасти́ла є҆сѝ, ᲂу҆зрѣ́вши на дре́вѣ повѣ́шена, прободе́на же копїе́мъ въ бжⷭ҇твєннаѧ ре́бра, что̀ сїѐ, гл҃го́лаше, сн҃е и҆ бж҃е мо́й; ка́кѡ, и҆́же недꙋ́ги всѧ̑ и҆ стра̑сти и҆сцѣлѧ́ѧй, стрⷭ҇ти терпи́ши, безстра́стенъ сы́й по є҆стествꙋ̀ бжⷭ҇твенномꙋ; что̀ тѝ безблагода́тнїи лю́дїе, бл҃годѣ́телю, сїѧ̑ возда́ша вмѣ́стѡ благодѣѧ́нїй; вопїѧ́ше пречⷭ҇таѧ. но тогѡ̀ стрⷭ҇тьмѝ страсте́й мѧ̀ свободи́ти молѝ непреста́ннѡ, ꙗ҆́кѡ да сла́влю тѧ̀.

Канѡ́нъ.

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Наде́ждею, ꙗ҆́же къ бг҃ꙋ, ᲂу҆крѣплѧ́емь ѿ ю҆́ности, благо́мꙋ прите́клъ є҆сѝ бг҃ꙋ, і҆ѡа́нне блаже́нне, мона́шескими пощє́нїи лꙋ́чшими составлѧ́ѧсѧ.

Бога́тыѧ и҆ свѣтоно́сныѧ бл҃года́ти и҆спо́лненъ, и҆ въ честны́хъ мѣ́стѣхъ живы́й, че́стнѡ положи́лъ є҆сѝ, къ добродѣ́телемъ веды́й восхождє́нїѧ, пребл҃же́нне.

Крѣ́постїю наста́вленъ бы́въ дх҃а, въ харїтѡ́новꙋ бг҃оно́снагѡ ѡ҆гра́дꙋ прите́къ, въ то́й пре́былъ є҆сѝ, свѧщеннодѣ́йственникъ бы́въ, просвѣще́нъ чисти́телю.

Ѡ҆чꙋжди́въ ѿ земны́хъ, преподо́бне, твою̀ мы́сль, нбⷭ҇нымъ сїю̀ благи̑мъ, і҆ѡа́нне, пригвозди́лъ є҆сѝ, и҆ є҆́же ѿтꙋ́дꙋ ᲂу҆лꙋчи́лъ є҆сѝ свѣтлѣ́йшее сїѧ́нїе.

Бг҃оро́диченъ:

И҆зъ тебє̀, ѡ҆бра́дованнаѧ, всечⷭ҇таѧ, на́мъ ꙗ҆ви́сѧ пра́вды сл҃нце хрⷭ҇то́съ, и҆ свѣ́томъ просвѣтѝ сѣдѧ́щыѧ пе́рвѣе въ те́мныхъ тве́рдехъ.

Пѣ́снь г҃. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Оу҆мертви́въ плотско́е воздержа́нїемъ и҆звѣ́стнымъ мꙋдрова́нїе, животворѧ́щемꙋ дх҃ꙋ, ѻ҆́ч҃е і҆ѡа́нне, прибли́жилсѧ є҆сѝ.

Два́жды.

Бжⷭ҇твенное и҆ свѣтоза́рное въ се́рдцѣ твое́мъ ꙗ҆́вѣ сїѧ́нїе свѣ́тлѡ всели́сѧ, ѻ҆́ч҃е і҆ѡа́нне бл҃же́нне.

Бг҃оро́диченъ:

Ты̀ є҆ди́на сꙋ́щымъ на землѝ па́че є҆стества̀ благи̑мъ хода́таица, мт҃и бж҃їѧ была̀ є҆сѝ: тѣ́мже тебѣ̀, ра́дꙋйсѧ, зове́мъ.

Сѣда́ленъ, гла́съ и҃. Подо́бенъ: Премꙋ́дрости:

Бжⷭ҇твеннымъ жела́нїемъ, блаже́нне, дꙋ́шꙋ ᲂу҆ѧзви́въ, ᲂу҆страни́лсѧ є҆сѝ, бога́тство ѡ҆ста́вль, пи́щꙋ и҆ свѣ́тлость, и҆ житїѧ̀ нестоѧ́тельное, и҆ во страна́хъ чꙋжди́хъ всече́стнѡ пожи́лъ є҆сѝ, воздержа́нїѧ болѣ́зньми ᲂу҆вѧди́лъ є҆сѝ тѣ́ло твоѐ, и҆ безмо́лвїемъ пожи́въ мꙋ́жески, дости́глъ є҆сѝ, прпⷣбне, добродѣ́телей соверше́нїе. тѣ́мже вѣ́рою вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Крⷭ҇тобг҃оро́диченъ:

А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Въ бг҃оза́рныхъ страна́хъ воспита́нъ, и҆ свѣтоза́рнымъ проли́тїемъ, ѻ҆́ч҃е, просвѣща́емь, добродѣ́тельми и҆ воздержа́ньми, бг҃омꙋ́дре, пожи́лъ є҆сѝ.

Ѿчꙋжди́всѧ ѻ҆те́чества и҆ твои́хъ, ко хрⷭ҇тꙋ̀ пристꙋпи́лъ є҆сѝ во́льнымъ хотѣ́нїемъ, крⷭ҇тъ взе́мъ, бг҃омꙋ́дре бл҃же́нне.

Ме́ртвъ всѣ́мъ ви́димымъ жи́зненною вино́ю, (с. 167) воздержа́нїемъ пожи́лъ є҆сѝ, і҆ѡа́нне премꙋ́дре, къ немꙋ́же и҆ ѿше́лъ є҆сѝ.

Бг҃оро́диченъ:

И҆́же во твою̀ ᲂу҆тро́бꙋ, дв҃о, бг҃опрїѧ́тнꙋю, па́че є҆стества̀ всели́сѧ, се́й и҆ по ржⷭ҇твѣ̀ бжⷭ҇твенною си́лою тѧ̀ дв҃ꙋ соблюдѐ.

Пѣ́снь є҃. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Оу҆́мъ, ѻ҆́ч҃е, чи́стъ безмо́лвїемъ стѧжа́въ, дх҃а ст҃а́гѡ си́лою вра́жїихъ сѣ́тей ѿбѣ́глъ є҆сѝ.

Два́жды.

Бл҃года́тїю бж҃їею и҆ премꙋ́дростїю, и҆ ᲂу҆чє́нїи пожи́лъ є҆сѝ, бг҃оѧвле́нне, свѧще́нникъ бы́въ, пребл҃же́нне ст҃и́телю.

Бг҃оро́диченъ:

Всѝ ро́ди благоче́стнѡ блажа́тъ тѧ̀, пречⷭ҇таѧ, ро́ждшꙋю, па́че є҆стества̀ и҆ сло́ва, вои́стиннꙋ бл҃же́ннаго.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Премꙋ́дрости рачи́тель бы́въ бжⷭ҇твенныѧ, бг҃одꙋхнове́нне, благода́тей вѣнце́мъ ѿ неѧ̀ вѣнча́лсѧ є҆сѝ, всѣ́ми ѻ҆́бразы свѣтоно́сномꙋ ᲂу҆чени́къ бы́въ харїтѡ́нꙋ.

Два́жды.

Поста́вилъ є҆сѝ на хрⷭ҇то́вѣ ка́мени но́зѣ твоѝ, дѣ́тельми восходѧ̀ добродѣ́телей, бг҃омꙋ́дре, бг҃оразꙋ́мнѡ восхождє́нїѧ въ се́рдцы твое́мъ, ѻ҆́ч҃е, полага́ѧ.

Бг҃оро́диченъ:

Клѧ́твы пе́рвыѧ ма́тере є҆́ѵы рождество́мъ твои́мъ свободи́хомсѧ: ты́ бо хрⷭ҇та̀ ро́ждши, дв҃о мт҃и, вмѣ́стѡ сеѧ̀ благослове́нїе всѣ̑мъ и҆сточи́ла є҆сѝ.

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Си́лою бжⷭ҇твенною, ꙗ҆́кѡ ѻ҆де́ждею ѡ҆бложе́нъ, всѧ́кїѧ напа́сти є҆реті́ческїѧ ѿбѣ́гнꙋти возмо́глъ є҆сѝ, пребл҃же́нне, бл҃гослове́нъ є҆сѝ, вопїѧ̀, въ хра́мѣ сла́вы твоеѧ̀, гдⷭ҇и.

Два́жды.

Стра́нствовавый на́съ ра́ди на землѝ гдⷭ҇ь, се́й во стра́нничествѣ, блаже́нне, тѧ̀ ꙗ҆́вѣ сохранѝ зовꙋ́ща: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Бг҃оро́диченъ:

Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ: тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Красе́нъ тѣ́ломъ и҆ дꙋше́ю, и҆ благоче́стїемъ твои́мъ, прпⷣбне, и҆ бжⷭ҇твеннагѡ ра́зꙋма ѻ҆рга́нъ, и҆ за́повѣдемъ бли́жнѣйшїй, и҆ пѣ́нїѧ чи́стагѡ цѣвни́ца бы́лъ є҆сѝ, воспѣва́ѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Два́жды.

Къ безсме́ртнѣй ᲂу҆́бѡ жи́зни и҆ неконча́емомꙋ бл҃же́нствꙋ преше́лъ є҆сѝ, прпⷣбне, и҆ нетлѣ́нное сподо́билсѧ є҆сѝ ра́дованїе ᲂу҆лꙋчи́ти, поѧ̀, бл҃же́нне: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Ѿтрѧса́емъ пра́хъ ме́ртвенный, нетлѣ́нни бы́вше, бж҃е́ственнымъ ржⷭ҇тво́мъ твои́мъ, пречⷭ҇таѧ: є҆сте́ственнꙋю бо и҆́стиннꙋю жи́знь и҆ присносꙋ́щнꙋю, чⷭ҇таѧ влⷣчце, родила̀ є҆сѝ. тѣ́мже вси́ тѧ бл҃гослови́мъ, марі́е бг҃оневѣ́стнаѧ.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Кончи́нꙋ всебл҃же́ннꙋю ѡ҆брѣ́лъ є҆сѝ воздержа́нїѧ по́двигомъ, ѻ҆́ч҃е і҆ѡа́нне, ко хрⷭ҇тꙋ̀ ѿше́дъ, и҆ по сме́рти къ безстра́стнѣй и҆ неболѣ́зненнѣй жи́зни всели́лсѧ є҆сѝ, свѧще́нне.

Два́жды.

Въ землѝ, ѻ҆́ч҃е, кро́ткихъ всели́тисѧ сподо́билсѧ є҆сѝ, ꙗ҆́коже подо́бникъ бы́въ молча̑льнымъ и҆ бг҃онѡ́снымъ мꙋжє́мъ: съ ни́миже ꙗ҆́вѣ воспрїѧ́лъ є҆сѝ, преподо́бне бл҃же́нне, наслажде́нїе.

Бг҃оро́диченъ:

И҆сто́чникъ безсме́ртїѧ на́мъ и҆сточи́ла є҆сѝ, дв҃о, и҆ ѡ҆ставле́нїѧ во́дꙋ, хрⷭ҇та̀ ро́ждши: и҆́мже ѡ҆чища́емсѧ ѿ всѧ́кїѧ скве́рны грѣхо́вныѧ, бг҃оневѣ́сто.