Библиотеке требуются волонтёры

Мѣ́сѧца тогѡ́же въ к҃в-й де́нь. Прпⷣбнагѡ ѻ҆ц҃а̀ на́шегѡ ѳео́дѡра сѷкеѡ́та:

И҆ пренесе́нїе моще́й ст҃а́гѡ бл҃говѣ́рнагѡ вели́кагѡ кн҃зѧ все́волода, нарече́ннагѡ во ст҃о́мъ креще́нїи гаврїи́ла.

На Гдⷭ҇и, воззва́хъ, стїхи̑ры, гла́съ є҃. Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е, свѧще́нный ѳео́дѡре, и҆зъ ложе́снъ ѡ҆свѧти́лсѧ є҆сѝ, и҆ позна́нъ бы́лъ є҆сѝ бг҃ови, ꙗ҆́коже дре́вле і҆еремі́а: твоѐ провозвѣстѝ рождество̀ ѕвѣзда̀, твоегѡ̀ сїѧ́нїемъ житїѧ̀ просвѣти́сѧ вселе́ннаѧ, ꙗ҆́кѡ вои́стиннꙋ, и҆ де́мѡнскаѧ тма̀ и҆счезѐ: ꙗ҆́зи ѿгна́шасѧ ѿ всѧ́кагѡ во́зраста, бл҃года́ть и҆стечѐ всѧ́кихъ и҆сцѣле́нїй. тѣ́мже вопїе́мъ тѝ: хрⷭ҇та̀ молѝ всегда̀, дарова́ти мі́рови ми́ръ и҆ ве́лїю ми́лость.

Прпⷣбне ѻ҆́ч҃е, досточꙋ́дне ѳео́дѡре, крѣ́пкимъ воздержа́нїемъ и҆ моли́твы ѻ҆гне́мъ ве́щь попали́въ грѣхо́внꙋю всю̀, воспрїѧ́тъ бжⷭ҇твеннꙋю зарю̀: въ тѧ̀ трⷪ҇ческꙋю бл҃года́ть всели́лъ є҆сѝ, и҆ ве́сь ꙗ҆ви́лсѧ є҆сѝ свѣтови́денъ, лꙋчы̀ и҆сцѣле́нїй ѡ҆блиста́ѧ, ви́дѧ прє́днѧѧ, ꙗ҆́коже дре́вле є҆лїссе́й, рѣшѧ̀ непло́дствїѧ ᲂу҆́зы, и҆ прогонѧ̀ дє́мѡнскїѧ полкѝ си́лою бжⷭ҇твеннагѡ дх҃а, и҆ молѧ́сѧ вселе́ннѣй дарова́ти ми́ръ и҆ ве́лїю ми́лость.

Прпⷣбне ѻ҆́ч҃е, всечестны́й ѳео́дѡре, со́лнце всю̀ ᲂу҆ѧсни́вый зе́млю въ дѣ́лѣхъ и҆ зна́менїихъ неисче́тныхъ, да́ръ че́стенъ хрⷭ҇тꙋ̀ бг҃ꙋ, свѧще́нства и҆звѣ́стный степе́нь, мона́шествꙋющихъ ѻ҆́бразъ, ᲂу҆твержде́нїе вѣ́рою къ тебѣ̀ притека́ющихъ, ка́мень честны́й, и҆ до́мъ трⷪ҇цы ѻ҆крі́нъ, и҆сточа́ющїй и҆сцѣле́нїй пꙋчи́нꙋ. хрⷭ҇тꙋ̀ моли́сѧ всегда̀, дарова́ти вселе́ннѣй ми́ръ и҆ ве́лїю ми́лость.

Сла́ва, и҆ ны́нѣ, бг҃оро́диченъ:

Комꙋ̀ ᲂу҆подо́биласѧ є҆сѝ, дꙋшѐ, ᲂу҆спѣва́ющи въ го́ршихъ всегда̀, и҆ прилага́ющи безꙋ́мнѡ твои̑мъ ꙗ҆́звамъ стрꙋ́пы мно́жайшыѧ, ꙗ҆́кѡ всетѣле́снѣй бы́ти ꙗ҆́звѣ, не помышлѧ́ющи, ꙗ҆́кѡ сꙋдїѧ̀ приближа́етсѧ, є҆мꙋ́же предста́неши воспрїѧ́ти по дѣѧ́нїємъ вины̑ и҆ томлє́нїѧ; но ѡ҆бра́щшисѧ, припадѝ къ дв҃ѣ, зовꙋ́щи: влⷣчце, влⷣчце, не пре́зри мѧ̀, прогнѣ́вавшагѡ бг҃а бл҃гоми́лостиваго, и҆зъ тебє̀ на спасе́нїе человѣ́кѡмъ ро́ждшагосѧ, и҆ распе́ншагосѧ пло́тїю.

Крⷭ҇тобг҃оро́диченъ:

Є҆гда̀ гро́здъ ненасажде́нъ сꙋ́щь, ꙗ҆́кѡ лоза̀ ѿрасти́ла є҆сѝ, ᲂу҆зрѣ́вши на дре́вѣ повѣ́шена, прободе́на же копїе́мъ въ бжⷭ҇твєннаѧ ре́бра: что̀ сїѐ, гл҃го́лаше, сн҃е и҆ бж҃е мо́й; ка́кѡ и҆́же недꙋ́ги всѧ̑ и҆ стра̑сти и҆сцѣлѧ́ѧй, стрⷭ҇ти терпи́ши, безстра́стенъ сы́й по є҆стествꙋ̀ бжⷭ҇твенномꙋ; что̀ тѝ безблагода́тнїи лю́дїе, бл҃года́телю, сїѧ̑ возда́ша, вмѣ́стѡ благодѣѧ́нїй, вопїѧ́ше пречⷭ҇таѧ; но тогѡ̀ стрⷭ҇тьмѝ, страсте́й мѧ̀ свободи́ти, молѝ непреста́ннѡ, ꙗ҆́кѡ да сла́влю тѧ̀.

Тропа́рь, гла́съ в҃:

Позна́нъ бы́въ ѿ пеле́нъ ѡ҆свѧще́нъ, и҆ ꙗ҆́вльсѧ бл҃года́тей и҆спо́лненъ, чꙋдесы̀ мі́ръ ѡ҆зари́лъ є҆сѝ, и҆ де́мѡнѡвъ мно́жество ѿгна́лъ є҆сѝ, свѧщеннодѣ́телю ѳео́дѡре: тѣ́мже ѡ҆ на́съ моли́сѧ гдⷭ҇еви.

Канѡ́нъ. Творе́нїе і҆ѡ́сифово.

Гла́съ д҃. Пѣ́снь а҃. І҆рмо́съ:

Наста́вльшемꙋ дре́вле і҆и҃лѧ бѣжа́щаго ѿ рабо́ты фараѡ́новы, и҆ въ пꙋсты́ни пита́вшемꙋ, пои́мъ и҆зба́вителю бг҃ꙋ на́шемꙋ, ꙗ҆́кѡ просла́висѧ.

Бг҃осїѧ́ннꙋю тѧ̀ ѕвѣздꙋ̀, мы́сленное со́лнце, тве́рди, премꙋ́дре, цр҃ко́внѣй показа̀, лꙋчы̀ чꙋде́съ и҆спꙋща́юща всегда̀, и҆ страсте́й мглꙋ̀ потреблѧ́юща.

Ѡ҆ ма́тернихъ тѧ̀ ложе́снъ творе́цъ, преподо́бне, ꙗ҆́коже і҆еремі́ю пе́рвѣе ѡ҆свѧ́щъ, содѣ́ла сосꙋ́дъ дх҃а бл҃гопотре́бенъ, дꙋ́хи ѿгонѧ́ща лꙋка̑выѧ, ѻ҆́ч҃е ѳео́дѡре.

По́томъ воздержа́нїѧ пла́мень страсте́й погаси́лъ є҆сѝ, и҆ ѡ҆дожде́нїемъ моли́твъ стрꙋи̑ чꙋде́съ и҆сточи́лъ є҆сѝ, болѣ́зней разжже́нїе, прпⷣбне, погаша́ющѧ ꙗ҆́вѣ, ѳео́дѡре.

Бг҃оро́диченъ:

Невоздѣ́ланный гро́здъ ѿ твоеѧ̀ ᲂу҆тро́бы процвѣтѐ, дв҃о мт҃и, сла́дость и҆сточа́ѧ ѡ҆ставле́нїѧ, и҆ весе́лїе безсме́ртно, чⷭ҇таѧ, ѿ пїѧ́нства лю́тыхъ ѡ҆б̾юродѣ́вшымъ.

Пѣ́снь г҃. І҆рмо́съ:

Оу҆твержда́ѧй гро́мъ, и҆ созида́ѧй дꙋ́хъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.

Ꙗ҆́кѡ чꙋ́дно житїѐ твоѐ, бг҃омꙋ́дре, ꙗ҆́кѡ стра̑шна чꙋдеса̀, ꙗ҆́кѡ высо́ко твоѐ є҆́же къ бг҃ꙋ и҆ присвое́нїе, и҆ манове́нїе, и҆ неꙋкло́нно восхожде́нїе, всесла́вне ѳео́дѡре.

Стремле́нїе страсте́й возрази́лъ є҆сѝ, пребл҃же́нне, болѣ́зненными ѿда̑нїи, и҆ де́мѡнѡвъ лꙋка̑ваѧ потреби́лъ є҆сѝ ловлє́нїѧ, прест҃а́гѡ дх҃а крѣ́постїю, ѳео́дѡре.

И҆́же къ честнѣ́й притека́юще ра́цѣ твое́й, ѿ сеѧ̀ почерпа́емъ и҆сцѣле́нїй сокрѡ́вища, и҆ чꙋде́съ пꙋчи̑ны, и҆ да́ръ незави́стный, пою́ще тѧ̀, ѳео́дѡре.

Бг҃оро́диченъ:

Зако́ни є҆стества̀ въ тебѣ̀, дв҃о, ѡ҆бновлѧ́ютсѧ: ражда́еши бо па́че є҆стества̀ содѣ́телѧ, па́че сло́ва влⷣкꙋ. є҆го́же прилѣ́жнѡ молѝ, спастѝ дꙋ́шы на́шѧ.

Сѣда́ленъ, гла́съ и҃. Подо́бенъ: Премꙋ́дрости:

Ѿ бг҃а тезоимени́тъ да́ръ да́нъ бы́въ человѣ́кѡмъ, на и҆збавле́нїе болѣ́зней мно́гихъ, вели̑ка и҆ ᲂу҆жа̑сна сотвори́лъ є҆сѝ чꙋдеса̀, ꙗ҆́зю всѧ́кꙋ и҆ недꙋ́гъ и҆сцѣлѧ́ѧ, и҆ де́мѡнѡвъ полкѝ ѿгонѧ́ѧ сло́вомъ. тѣ́мже и҆ досто́йнѡ хрⷭ҇то́вꙋ цр҃ковь ᲂу҆па́съ, є҆диножи́тель а҆пⷭ҇лѡвъ бы́лъ є҆сѝ, ст҃и́телю ѳео́дѡре. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безъ сѣ́мене, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Крⷭ҇тобг҃оро́диченъ:

А҆́гнца и҆ па́стырѧ, и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Оу҆слы́шахъ бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и, ꙗ҆́кѡ твоегѡ̀ хвале́нїѧ и҆спо́лнь землѧ̀.

Пото́къ сы́й ꙗ҆́вѣ, и҆спо́лненъ во́дъ бжⷭ҇твенныхъ, дарова́нїй дх҃а напоѧ́еши всю̀ цр҃ковь, ѻ҆́ч҃е ѳео́дѡре.

Оу҆дави́лъ є҆сѝ врага̀ жи́лами болѣ́зней твои́хъ, пребл҃же́нне, и҆ тогѡ̀ потреби́лъ є҆сѝ лꙋка̑ваѧ вѡ́инства моли́твъ твои́хъ мече́мъ, ѳео́дѡре.

Поꙋча́ѧсѧ въ зако́нѣ бж҃їи, при и҆схо́дищихъ (с. 192) воздержа́нїѧ бжⷭ҇твенное дре́во возрасти́лъ є҆сѝ, благопло́дїе дѣѧ́нїй добродѣ́тельныхъ приносѧ̀, ѳео́дѡре.

Бг҃оро́диченъ:

Бл҃же́нна ѿ родѡ́въ всѣ́хъ показа́ласѧ є҆сѝ хрⷭ҇та̀ ро́ждши, блажє́нны содѣва́ющаго томꙋ̀ рабо́тающыѧ, дв҃о мт҃и чⷭ҇таѧ влⷣчце.

Пѣ́снь є҃. І҆рмо́съ:

Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.

Неꙋсыпа́ющꙋю свѣщꙋ̀ тѧ̀, и҆ свѣ́щникъ неꙋгаса́ющь, свѣ́тъ безлѣ́тный показа̀, мра́комъ держи̑мымъ страсте́й, ѳео́дѡре, ѡ҆черне́нїемъ мно́гихъ грѣхѡ́въ.

До́брѣ на стезю́ тѧ наставлѧ́юща мч҃ника геѡ́ргїа ѿ млады́хъ ногте́й и҆мѣ́лъ є҆сѝ: и҆ семꙋ̀ ᲂу҆подо́билсѧ є҆сѝ, всѧ́кимъ ᲂу҆се́рдїемъ, и҆ ко гдⷭ҇ꙋ, ѻ҆́ч҃е преподо́бне, любо́вїю.

Непоро́чно воздержа́нїе, терпѣ́нїе несосꙋ́дно, вѣ́рꙋ и҆ наде́ждꙋ и҆ смире́нїе, любо́вь же и҆ стоѧ́нїе и҆мѣ́лъ є҆сѝ па́че человѣ́ка. тѣ́мже премно́гꙋю благода́ть ѡ҆брѣ́лъ є҆сѝ ѿ бг҃а.

Бг҃оро́диченъ:

Кропле́нїемъ ми́лости твоеѧ̀ напо́й, пречⷭ҇таѧ, и҆ста́ѧвшꙋю мою̀ мы́сль пла́менемъ грѣха̀, и҆ ᲂу҆га́сшїй се́рдца моегѡ̀ возжзѝ свѣти́льникъ, две́ре свѣ́та.

Пѣ́снь ѕ҃. І҆рмо́съ:

Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ: но ты̀, ᲂу҆пра́вителю бл҃гі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.

Печа́ль земны́хъ ѿтрѧ́слъ є҆сѝ, и҆ всѐ и҆сточи́лъ є҆сѝ жела́нїе ко влⷣцѣ, наслажда́ѧсѧ сегѡ̀ добро́тами, и҆ и҆стека́ющими ѿтꙋ́дꙋ, ѻ҆́ч҃е, свѣтлостьмѝ.

Растопи́лъ є҆сѝ мра́зъ грѣхо́вный, стꙋ́денїю напоѧ́емь, стоѧ̀ посредѣ̀ вѣ́тренника ꙗ҆́кѡ безпло́тенъ, ѻ҆́ч҃е, прило́ги претерпѣ́лъ є҆сѝ воздꙋ̑шныѧ, бж҃е́ственною согрѣва́емь бл҃года́тїю.

Ра́цѣ твое́й свѧще́ннѣй пристꙋпа́юще, бл҃гово́нїѧ бж҃е́ственнагѡ ра́зꙋма и҆сполнѧ́емсѧ, ст҃и́телю, смра́да и҆збавлѧ́ющесѧ страсте́й, любо́вїю тѧ̀ чтꙋ́щїи, чꙋдотво́рче ѻ҆́ч҃е прпⷣбне.

Бг҃оро́диченъ:

Страсте́й мѧ̀ треволне́нїе смꙋща́етъ, глꙋбина̀ ѿча́ѧнїѧ ѡ҆бꙋрева́етъ моѐ се́рдце: ко́рмчїю ро́ждши хрⷭ҇та̀, дв҃о, и҆ сп҃са, и҆зба́ви мѧ̀ и҆ спасѝ моли́твами твои́ми.

Конда́къ, гла́съ г҃. Подо́бенъ: Дв҃а дне́сь:

Ꙗ҆́кѡ на ѻ҆́гненнꙋю колесни́цꙋ, добродѣ́тельми, бг҃оно́се, возше́дъ, восте́клъ є҆сѝ на нбⷭ҇наѧ жили̑ща: ꙗ҆́кѡ а҆́гг҃лъ съ человѣ́ки пожи́лъ є҆сѝ, и҆ ꙗ҆́кѡ человѣ́къ со а҆́гг҃лы ѻ҆́крестъ ликовствꙋ́еши. сегѡ̀ ра́ди показа́лсѧ є҆сѝ чꙋде́съ бжⷭ҇твенное прїѧ́телище, ѳео́дѡре прпⷣбне.

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ꙗ҆́кѡ нело́женъ ст҃и́тель, же́ртвꙋ безкро́внꙋю прине́слъ є҆сѝ дꙋ́хомъ, и҆ страсте́й ᲂу҆мерщвле́нїемъ, же́ртвꙋ бл҃гово́ннꙋ, пребл҃же́нне, тебѐ влⷣцѣ прине́слъ є҆сѝ вѣ́рою.

Ѻ҆́гнь сласте́й воздержа́нїѧ пото́мъ погаси́лъ є҆сѝ, и҆ бездо́ждїемъ землѝ ᲂу҆ста́вилъ є҆сѝ тꙋ́чы, моли́твами, чꙋдотво́рче, ꙗ҆́коже и҆лїа̀, нб҃са̀ затворє́на моли́твами твои́ми ѿверза́ѧ.

Ѡ҆свѧ́щсѧ ѿ младе́нства, моли́твенною до́блестїю неплѡ́дныѧ сотвори́лъ є҆сѝ ᲂу҆трѡ́бы многоча̑дны, слѣпы̑мъ по́далъ є҆сѝ прозрѣ́нїе, и҆ хромы̑мъ бл҃готече́нїе, ѳео́дѡре требл҃же́нне.

Бг҃оро́диченъ:

Добро́тꙋ і҆а́кѡвлю тѧ̀ бг҃ъ и҆збра̀, и҆ въ тѧ̀ всели́сѧ, и҆ тѧ̀ соблюдѐ по ржⷭ҇твѣ̀ дв҃ꙋ, ꙗ҆́коже бѣ̀ пре́жде ржⷭ҇тва̀, дв҃о бг҃ороди́тельнице.

Пѣ́снь и҃. І҆рмо́съ:

Землѧ̀ и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ: свѣ́тъ и҆ тма̀, мра́зъ и҆ зно́й, сы́нове человѣ́честїи: свѧще́нницы, бл҃гослови́те гдⷭ҇а, и҆ превозноси́те є҆го̀ во вѣ́ки.

На ка́мени терпѣ́нїѧ ᲂу҆тверди́въ твоѧ̑ восхождє́нїѧ дꙋшє́внаѧ, не побѣди́лсѧ є҆сѝ прило́ги сопроти́вными, не поколеба́лсѧ є҆сѝ навѣ́ты вра́жїими: но къ высотѣ̀ бжⷭ҇твеннѣй восте́клъ є҆сѝ, ѡ҆ є҆́же въ вѣ́рѣ чтꙋ́щихъ тѧ̀ молѧ̀.

Стрꙋѧ̀ происхо́дитъ ѿ ра́ки твоеѧ̀ и҆сцѣле́нїй всѧ́кихъ, и҆ ѿмыва́етъ сквє́рны страсте́й, и҆ гное́нїе лю́тыхъ ѡ҆чища́етъ, и҆ вѣ́рныхъ напаѧ́етъ, ѳео́дѡре, всѣ́хъ сердца̀, любо́вїю чтꙋ́щихъ тѧ̀.

Дарѡ́въ бжⷭ҇твенныхъ тезоимени́тъ, и҆ таи́нникъ хрⷭ҇то́въ, по́стникѡвъ добро́та, свѧще́нникѡвъ красота̀, чꙋде́съ и҆сто́чникъ, честна́ѧ мѷрополо́жница дх҃а, ны́нѣ да восхва́литсѧ ѳео́дѡръ вели́кїй.

Бг҃оро́диченъ:

Свѧще́ннїи тѧ̀ прⷪ҇ро́кѡвъ проповѣ́дꙋютъ гла́си ѻ҆бра́знѡ, две́рь, и҆ го́рꙋ, и҆ сѣ́нь, зе́млю свѧтꙋ́ю, свѣ́та ѻ҆́блакъ, и҆зъ негѡ́же сꙋ́щымъ во тмѣ̀ и҆ сѣ́ни сѣдѧ́щымъ возсїѧ̀ сл҃нце, дв҃о, хрⷭ҇то́съ свѣтода́вецъ.

Пѣ́снь ѳ҃. І҆рмо́съ:

Ꙗ҆́кѡ сотворѝ мнѣ̀ вели́чїе си́льный, и҆ свѧ́то и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

Ꙗ҆́кѡ ᲂу҆́тро, ꙗ҆́кѡ де́нь свѣ́телъ, тво́й пра́здникъ ꙗ҆ви́сѧ, просвѣща́ющъ на̑ша сердца̀, вѣ́рнѡ восхвалѧ́ющихъ честны̑ѧ бѡлѣ́зни твоѧ̑, ѻ҆́ч҃е ѳео́дѡре.

Собесѣ́дникъ а҆́гг҃лѡвъ, а҆пⷭ҇лѡвъ, страда́льцєвъ, прпⷣбныхъ и҆ пра́ведникѡвъ бы́въ, ѻ҆́ч҃е, ст҃и́телей, на нб҃сѣ́хъ ѡ҆ на́съ хрⷭ҇та̀ мо́лиши при́снѡ.

Де́нь спасе́нїѧ, пра́здникъ весе́лїѧ ꙗ҆ви́сѧ, стеце́мсѧ, вѣ́рнїи, ѡ҆чи́стивше дꙋ́шы, ст҃и́тель созыва́етъ на́съ ѳео́дѡръ.

Бг҃оро́диченъ:

Стра́шно твоѐ ржⷭ҇тво̀, бцⷣе, мт҃и хрⷭ҇то́ва: тѣ́мже тѧ̀ ᲂу҆блажа́емъ, чⷭ҇таѧ, и҆ прославлѧ́емъ че́стнѡ, ро́дове родѡ́въ во вѣ́ки, а҆ми́нь.

Комментарии для сайта Cackle