Библиотеке требуются волонтёры

Мѣ́сѧца тогѡ́же въ к҃ѳ-й де́нь. Ст҃ы́хъ девѧтѝ мч҃никѡвъ, и҆̀же въ кѵ́зїцѣ:

И҆ прпⷣбнагѡ ме́мнона чꙋдотво́рца.

На Гдⷭ҇и, воззва́хъ, стїхи̑ры, мч҃никѡвъ, гла́съ и҃.

Подо́бенъ: Ѽ пресла́внагѡ чꙋдесѐ!

Мч҃ницы хрⷭ҇тѡ́вы прехва́льнїи, ꙳ ѡ҆держа́щꙋ и҆ногда̀ ꙳ є҆́ллинскомꙋ безꙋ́мїю, ꙳ и҆ влекꙋ́щꙋ всѣ́хъ ꙳ въ беззакѡ́нныѧ ꙗ҆́мы, ꙳ пꙋтѝ пра́вагѡ не ѡ҆ста́висте, ꙳ и҆ безбо́жїю не приложи́стесѧ: ꙳ но пострада́сте нра́ва до́блестїю, ꙳ и҆ жи́знь мече́мъ ᲂу҆мерщвле́ни наслѣ́довасте.

Ѳео́гнїа и҆ рꙋ́ѳа, а҆нтїпа́тра, ꙳ ѳеості́ха и҆ а҆рте́мꙋ, ꙳ ма́гна и҆ ѳеодо́та, ꙳ сла́внаго ѳаѵма́сїа и҆ бжⷭ҇твеннаго фїлимо́на, ꙳ страда́нїй свѣ́тлѡ ѡ҆блиста́вшыѧ, ꙳ и҆ сꙋ́щыѧ во тмѣ̀ просвѣти́вшыѧ, ꙳ вѣ́рою почти́мъ, ꙳ и҆ пѣ́сньми ᲂу҆блажи́мъ, ꙳ свѧще́ннꙋю си́хъ пра́зднꙋюще па́мѧть веселѧ́щесѧ.

Цвѣ́ти мч҃никѡвъ кра́снїи, ꙳ по́лкъ свѧще́нный, ꙳ бг҃особра́нное совокꙋпле́нїе, ꙳ цр҃ковь и҆зрѧ́днаѧ, ꙳ со́нмъ бг҃оизбра́ненъ, ꙳ ли́къ ст҃ы́й, собо́ръ блаже́нный, ꙳ за трⷪ҇цꙋ подви́гшесѧ, ꙳ се́й моли́тесѧ, ꙳ сїю̀ ᲂу҆моли́те ѡ҆ на́съ, ꙳ ꙗ҆́кѡ да прїи́мемъ грѣхѡ́въ ѡ҆ставле́нїе.

И҆́ны стїхи̑ры прпⷣбнагѡ, гла́съ и҆ подо́бенъ то́йже:

Прпⷣбне ме́мноне бл҃же́нне, ꙳ пред̾ѡчи́стивъ дꙋ́шꙋ ꙳ воздержа́нїемъ, ꙳ бы́лъ є҆сѝ чи́сто дх҃а и҆ красно̀ ѻ҆би́телище: ꙳ тѣ́мже лꙋка́вствїѧ дꙋ́хи ѿгонѧ́еши, ꙳ и҆ недꙋ́ги притека́ющымъ къ тебѣ̀ ꙳ и҆сцѣлѧ́еши всегда̀: ꙳ ѡ҆ на́съ восхвалѧ́ющихъ тѧ̀ ꙳ хрⷭ҇тꙋ̀ моли́сѧ.

Прпⷣбне ме́мноне сла́вне, ꙳ ѡ҆блада́въ страстьмѝ дꙋше́вными, ꙳ нача́льникъ бы́лъ є҆сѝ мона́хѡвъ, ꙳ къ трꙋдѡ́мъ помазꙋ́ѧ воздержа́нїѧ ᲂу҆се́рднѡ си́хъ, ꙳ и҆̀хже и҆ предста́вилъ є҆сѝ ꙳ всеви́дцꙋ сло́вꙋ: ꙳ пожи́въ же житїѐ блаже́нно, ꙳ и҆ скве́рны непримѣ́сно, ꙳ съ ни́ми на́съ всегда̀ помина́й восхвалѧ́ющихъ тѧ̀.

Прпⷣбне ме́мноне, пребога́те, ꙳ воды̀ дре́вле и҆сто́чникъ ꙳ и҆стещѝ сотвори́лъ є҆сѝ, ꙳ въ гдⷭ҇ню хвалꙋ̀ и҆ дꙋша́мъ въ снабдѣ́нїе. ꙳ ѿ глꙋбины̀ мо́рѧ кораблѝ спа́слъ є҆сѝ, ꙳ прꙋ́жїѧ вре́да моли́твами сохрани́лъ є҆сѝ, ꙳ чꙋдеса̀ безмѣ̑рнаѧ соверша́еши всегда̀: ꙳ ѡ҆ на́съ восхвалѧ́ющихъ тѧ̀ ꙳ хрⷭ҇тꙋ̀ моли́сѧ.

Сла́ва, и҆ ны́нѣ, пра́здника, и҆лѝ бг҃оро́диченъ:

Пло́ть ѿ крове́й твои́хъ ꙳ прїе́мь первовѣ́чный бг҃ъ, ꙳ тѧ̀ предста́тельницꙋ показа̀ ꙳ человѣ́кѡмъ, чⷭ҇таѧ. ꙳ тѣ́мже и҆зба́ви рабы̑ твоѧ̑ ꙳ ѿ всѧ́кїѧ бѣды̀ и҆ ѡ҆бстоѧ́нїѧ, ꙳ и҆ сѣ́тей лꙋка́вагѡ врага̀, ꙳ и҆ сїѧ́нїѧ причасти́тисѧ сподо́би и҆збра́нныхъ ꙳ всѧ̑ сла́вѧщыѧ и҆ покланѧ́ющыѧсѧ тебѣ̀.

Крⷭ҇тобг҃оро́диченъ:

Тѧ̀ ви́дѧщи пригвожда́ема ꙳ на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ча́до сла́дкое: ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый ꙳ милосе́рдїемъ твои́мъ;

Канѡ́нъ мч҃никѡвъ.

Гла́съ д҃. Пѣ́снь а҃. І҆рмо́съ:

Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ тричастно́е потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Бжⷭ҇твенными добро́тами наслажда́ющесѧ вкꙋ́пѣ, и҆ пото́ка пи́щнагѡ напита́ющесѧ бога́тнѡ, и҆ прича́стїемъ (с. 282) ѡ҆божа́еми, мч҃ницы вѣнцено́сцы, ва́съ блажа́щыѧ ѿ лю́тыхъ бѣ́дъ и҆зба́вите.

Ꙗ҆́коже со́лнєчныѧ лꙋчы̀ возсїѧ́вше, зарѧ́ми тве́рдыхъ пѡ́двигъ, страда́льцы, и҆ чꙋде́съ сїѧ̑нїи всѧ̑ просвѣща́ете, страсте́й но́щь рѣшитѐ, и҆ де́мѡнѡвъ мра́къ разорѧ́ете.

Оу҆мерщвле́ни на землѝ ꙗ҆́звами болѣ́зней, къ неболѣ́зненнѣй жи́зни преидо́сте вкꙋ́пѣ, ю҆́нїи многострада́льнїи. тѣ́мже то́чите и҆сцѣлє́нїѧ, всѧ́кꙋ болѣ́знь ѡ҆блегча́юще, бг҃опрїѧ́тными моли́твами, пребога́тїи.

Бг҃оро́диченъ:

Родила̀ є҆сѝ бг҃а и҆зъ чⷭ҇тыхъ твои́хъ крове́й, вопло́щшасѧ па́че ᲂу҆ма̀, зра́комъ и҆́же по на́съ, мт҃и пренепоро́чнаѧ. тѣ́мже вси́ тѧ ро́дове родѡ́въ ᲂу҆блажа́ютъ, свѧты́хъ мꙋ́чєникъ ᲂу҆твержде́нїе.

И҆́нъ канѡ́нъ прпⷣбнагѡ.

Гла́съ то́йже. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Бжⷭ҇твенною прест҃а́гѡ дх҃а блиста́ѧсѧ бл҃года́тїю, свѣтоно́сне ме́мноне, и҆ честно́е творѧ́щыѧ твоѐ ᲂу҆спе́нїе, свѣ́тлою моли́твою твое́ю страсте́й мглꙋ̀ ѡ҆чи́сти.

Прпⷣбне, тво́й кре́стъ взе́мъ, послѣ́довалъ є҆сѝ распе́ншемꙋсѧ сло́вꙋ на́съ ра́ди, и҆ плотска̑ѧ движє́нїѧ воздержа́нїемъ, прпⷣбне, и҆ ни́зꙋ лега́нїемъ ᲂу҆мертви́лъ є҆сѝ.

Поще́нїемъ и҆ моли́твами, и҆ слеза́ми, бг҃ꙋ соединѧ́ѧсѧ, прїѧ́лъ є҆сѝ бл҃года́ть ѿ негѡ̀ цѣли́ти недꙋ́ги, и҆ ѿгони́ти дꙋ́хи, ме́мноне бг҃омꙋ́дре, пребл҃же́нне.

Бг҃оро́диченъ:

Ѡ҆бле́ксѧ и҆зъ тебє̀ бг҃ъ въ чл҃вѣ́ка за бл҃гость, сꙋгꙋ́бъ про́йде, прест҃а́ѧ чⷭ҇таѧ, дѣ́йствы и҆ є҆стествы̀. є҆го́же молѝ всегда̀, просвѣти́ти пою́щыѧ тѧ̀.

Пѣ́снь г҃. І҆рмо́съ:

Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ. нѣ́сть бо свѧ́тъ, па́че тебє̀, чл҃вѣколю́бче.

Мє́ртвымъ и҆стꙋка̑ннымъ пожре́ти ника́коже восхотѣ́вше, поже́ршемꙋсѧ на́съ ра́ди же́ртва жива̀ принесо́стесѧ, ѻ҆́троцы прекра́снїи, свѧті́и мч҃ницы.

Закѡ́ны бжⷭ҇твенными, ᲂу҆крѣплѧ́еми си́лою дх҃а, беззако́ннꙋющихъ совѣ́ты и҆ ловлє́нїѧ низложи́сте, зако́ннѣ пострада́вше, сла́вꙋ ᲂу҆лꙋчи́сте.

Да восхва́литсѧ а҆рте́ма и҆ фїлимо́нъ, ѳеості́хъ и҆ ма́гнъ, рꙋ́фъ сла́вный, и҆ а҆нтїпа́тръ, и҆ ѳаѵма́сїй, ѳео́гнїй и҆ ѳеодо́тъ, великоимени́тїи.

Бг҃оро́диченъ:

Ѻ҆рꙋ̑жїѧ всѧ̑ вра̑жїѧ ны́нѣ до конца̀ ѡ҆скꙋдѣ́ша, тебѐ ро́ждши хрⷭ҇та̀, ᲂу҆ѧ́звлена копїе́мъ, всенепоро́чнаѧ, ѡ҆ не́мже мꙋ́чєницы ᲂу҆ѧзви́вшесѧ пострада́ша.

И҆́нъ. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Ꙗ҆́коже со́лнце на землѝ, добродѣ́телей просвѣще́нїемъ просїѧ́лъ є҆сѝ, всѣ́хъ дꙋ́шы, прпⷣбне, благода́тїю просвѣща́ѧ дꙋхо́вною.

Желѣ́зомъ твоѧ̑ чре́сла препоѧ̑сана и҆мѣ́лъ є҆сѝ страсте́й на ᲂу҆мерщвле́нїе ꙗ҆́вѣ, прпⷣбне ме́мноне, ѡ҆дѣ́ѧвсѧ безстра́стїемъ.

Человѣколюби́въ бы́въ немощны̑мъ, ѿ бг҃а прїѧ́лъ є҆сѝ бл҃года́ть мно́гꙋ, прпⷣбне, стра̑сти цѣли́ти неисцѣ̑льныѧ.

Бг҃оро́диченъ:

Сло́во бж҃їе въ твоѐ нескве́рное чре́во всели́сѧ, и҆ земны̑мъ, пречⷭ҇таѧ, всѧ́къ грѣ́хъ ѿѧ́ло є҆́сть.

Сѣда́ленъ, гла́съ а҃. Подо́бенъ: Гро́бъ тво́й:

Ли́къ свѣтови́дѣнъ свѧще́нныхъ страда́лєцъ, (с. 284) совокꙋпле́нїе красно̀, бг҃особра́ненъ собо́ръ, девѧточи́сленный соста́въ, пострада́вше крѣ́пкѡ, попра́вше вра́жїе мꙋчи́тельство, и҆ причто́стесѧ а҆́гг҃льскимъ ликѡ́мъ, гдⷭ҇еви предстоитѐ.

Сла́ва, прпⷣбнагѡ, гла́съ и҃. Подо́бенъ: Премꙋ́дрости:

Ꙗ҆́кѡ ѕвѣздꙋ́ тѧ всѝ свѣтови́днꙋ, добродѣ́тельми и҆ чꙋде́съ зарѧ́ми мі́ръ просвѣща́юща, восхвалѧ́емъ, бл҃же́нне: прича́стникъ бо бжⷭ҇твенныѧ свѣ́тлости бы́лъ є҆сѝ, и҆ къ сїѧ́нїю, ме́мноне, преше́лъ є҆сѝ незаходи́момꙋ. тѣ́мже свѣтоно́снꙋю и҆ свѧтꙋ́ю па́мѧть твою̀ почита́емъ всегда̀, сп҃са сла́вѧще, и҆ вѣ́рнѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀.

И҆ ны́нѣ, пра́здника, и҆лѝ бг҃оро́диченъ:

Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Крⷭ҇тобг҃оро́диченъ:

А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Сѣдѧ́й въ сла́вѣ на престо́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Сожжє́нїѧ, страда́льцы, и҆ бг҃ожрє́ннаѧ заколє́нїѧ, приноше́нїе соверше́нно, жє́ртвы прїѧ̑тны приведо́стесѧ во́лею поже́ршемꙋсѧ, и҆ сме́рть ᲂу҆мертви́вшемꙋ. тѣ́мже ва́съ ᲂу҆блажа́емъ.

Чꙋ́до вели́кое показꙋ́юще, слѧчє́нныѧ и҆спра́висте, страда́льцы, рꙋ́ки, и҆ во́днагѡ трꙋда̀ и҆зба́висте прибѣ́гшаго съ любо́вїю къ ра́цѣ ва́шей, наро́чита мꙋ́жа и҆ногда̀, досточꙋ́днїи.

Да ᲂу҆блажа́тсѧ досто́йнѡ, а҆рте́ма и҆ а҆нтїпа́тръ, ѳеості́хъ и҆ рꙋ́фъ, ма́гнъ и҆ фїлимо́нъ, и҆ ѳео́нъ, и҆ ѳео́гнъ съ сла́внымъ ѳеодо́томъ, пострада́вшїи зовꙋ́тъ: сла́ва, хрⷭ҇тѐ, си́лѣ твое́й.

Бг҃оро́диченъ:

И҆́же въ нѣ́дрѣхъ ѻ҆́ч҃їихъ неизрече́ннѡ сѣдѧ́й, на твои́хъ ѡ҆б̾ѧ́тїихъ сѣди́тъ, дв҃о, ꙗ҆́кѡ млⷣнецъ, є҆гѡ́же бл҃же́ннꙋю стрⷭ҇ть воѡбража́юще, добропобѣ́днїи ѻ҆́троцы и҆зво́лиша ᲂу҆мре́ти.

И҆́нъ. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Стрꙋѧ́ми, преподо́бне, сле́зными твоѐ се́рдце ѡ҆чи́стивъ, во́ды на безво́днѣмъ мѣ́стѣ и҆стека́ти ᲂу҆стро́илъ є҆сѝ, бг҃ꙋ тѧ̀ просла́вльшемꙋ, ме́мноне, ꙗ҆́кѡ своего̀ ᲂу҆го́дника.

Пресла́внымъ житїе́мъ ꙗ҆́кѡ ѕвѣзда̀ сїѧ́ѧ, свѧще́нными чꙋдесы̀ твои́ми, дрꙋго́е ты̀ не́бо показа́лсѧ є҆сѝ, бл҃же́нне, вѣ́рою зовꙋ́щымъ: сла́ва си́лѣ твое́й, гдⷭ҇и.

Зако́нѡмъ, преподо́бне, повинꙋ́ѧсѧ влⷣчнимъ, ꙗ҆̀же подъ тобо́ю сꙋ́щыѧ наста́вилъ є҆сѝ, ᲂу҆па́съ, прпⷣбне, многоꙋсꙋгꙋ́бивъ же ꙗ҆́кѡ ра́бъ послꙋшли́въ, дарова́вшемꙋ тебѣ̀ тала́нтъ.

Бг҃оро́диченъ:

Привлече́нный ᲂу҆́мъ мо́й, бг҃ороди́тельнице, къ сла́достемъ тѣлє́снымъ, твои́мъ хода́тайствомъ, молю́сѧ, ᲂу҆твердѝ, ꙗ҆́же є҆ди́на ро́ждшаѧ бл҃года́вца бг҃а.

Пѣ́снь є҃. І҆рмо́съ:

Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ: но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.

Ꙗ҆́коже мы́сленное ᲂу҆́глїе вже́гше ᲂу҆́мъ, попали́сте вои́стиннꙋ хвра́стнꙋю всѧ́кꙋ пре́лесть, бл҃же́ннїи, и҆ запале́нїе ᲂу҆гаси́сте і҆́дѡльское росо́ю вѣ́ры.

Раздѣле́нїѧ въ тѣлесѣ́хъ не и҆мѣ́сте мно́зѣхъ, за нераздѣ́льнꙋю пострада́ти, страда́льцы, трⷪ҇цꙋ и҆дꙋ́ще. тѣ́мже разрꙋши́сте дїа́вола ѡ҆полче́нїе всѧ́ко.

Воспѣва́етъ чꙋдеса̀ ва̑ша, ѿ лꙋка́вагѡ легеѡ́на разрѣши́выйсѧ де́мѡнска, мч҃ницы бг҃ови́днїи, къ честны̑мъ ковче́гѡмъ ва́шымъ прише́дый со ᲂу҆се́рдїемъ.

Бг҃оро́диченъ:

И҆збавлѧ́ющи ꙗ҆ви́сѧ на́мъ ѿ бѣ́дъ и҆ прегрѣше́нїй тлетво́рныхъ, страсте́й и҆ скорбе́й, и҆ ѡ҆бстоѧ́нїй, вѣ́рою пою́щыѧ тѧ̀, бцⷣе приснодв҃о.

И҆́нъ. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Оу҆́мъ тво́й чи́стыми воззрѣ̑нїи къ бг҃ꙋ ве́сь бы́въ, бг҃облаже́нне, плотски́хъ сласте́й ꙗ҆ви́сѧ вы́шши.

Сы́й вра́чь тѣле́съ, пребога́те, ѿженѝ скѡ́тскїѧ дꙋ́шъ болѣ̑зни бл҃года́тїю дх҃а.

Бл҃же́нъ є҆сѝ ты̀, и҆ добро̀ тебѣ̀ є҆́сть, побѣ́ждшꙋ ѕло́бꙋ вра́жїю, и҆ стра̑сти, пребл҃же́нне, ᲂу҆мертви́вшꙋ.

Бг҃оро́диченъ:

Родила̀ є҆сѝ бг҃а, и҆ дв҃а пребыла̀ є҆сѝ, бг҃оневѣ́сто: сегѡ̀ ра́ди ᲂу҆блажа́етъ тѧ̀ ве́сь человѣ́ческїй ꙗ҆зы́къ ра́дꙋѧсѧ.

Пѣ́снь ѕ҃. І҆рмо́съ:

Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆зъ глꙋбины̀ возведѝ живо́тъ мо́й, многоми́лостиве.

Честна̀ сме́рть ꙗ҆ви́сѧ бжⷭ҇твенныхъ страда́льцєвъ предъ тобо́ю, бж҃е всѧ́ческихъ, и҆̀хже ны́нѣ почита́ѧ, врачевство̀ безме́здное болѧ́щымъ ꙗ҆ви́лъ є҆сѝ.

Возвы́сивше рꙋ́цѣ и҆ сердца̀ высо́кимъ нра́вомъ къ вы́шнемꙋ мꙋжеꙋ́мнѡ, лꙋка́вагѡ возношє́нїѧ, мч҃ницы бг҃оно́сцы, низложи́сте.

Бг҃оро́диченъ:

Ꙗ҆́коже сто́гъ чре́во твоѐ, чⷭ҇таѧ, ꙗ҆ви́сѧ, пшени́цꙋ носѧ́щїй безсме́ртїѧ, всѣ́хъ вѣ́рныхъ дꙋ́шы пита́ющꙋю, и҆ мꙋ́ченики просвѣща́ющꙋю.

И҆́нъ. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Є҆ди́нѣмъ то́чїю зва́нїемъ прꙋ́зи ѿгонѧ́ютсѧ, и҆ всѧ́къ вре́дъ де́мѡнскїй: бг҃а бо, ме́мноне, ве́лїй ᲂу҆го́дникъ позна́лсѧ є҆сѝ, вельмѝ тѧ̀, ѻ҆́ч҃е, просла́вльшагѡ.

Побѣди́въ плотска́гѡ навѣ́та мꙋдрова́нїе, дх҃а бл҃года́ть прїѧ́лъ є҆сѝ ѿгонѧ́ти недꙋ́ги, и҆ болѧ́щыѧ грѣха́ми цѣли́ти дꙋ́шы, досточꙋ́дне.

Ѽ чꙋ́до! ка́кѡ ѿ є҆ди́нагѡ то́кмѡ призыва́нїѧ спаса́ютсѧ твоегѡ̀, пресла́вне ме́мноне, вѣ́рнїи пла́вающїи, тебѐ ви́дѧще приспѣва́юща, и҆ во́лнъ молвꙋ̀ кротѧ́ща;

Бг҃оро́диченъ:

Оу҆мертвѝ пло́ти моеѧ̀, дв҃о, мꙋдрова́нїе, ᲂу҆мертви́телѧ сме́рти и҆ жизнода́вца ꙗ҆́кѡ заче́нши, и҆ ро́ждши па́че сло́ва и҆ смы́сла, пречⷭ҇таѧ.

Конда́къ, гла́съ в҃. Подо́бенъ: Вы́шнихъ и҆щѧ̀:

Тве́рдый и҆ всесвѣ́тлый ли́къ мч҃никъ девѧтѝ, (с. 288) трисо́лнечнагѡ бжⷭ҇тва̀ и҆сповѣ̑дницы, на сꙋди́щи томꙋ̀ нача́льнѡ взыва́хꙋ: кро́вь и҆ дꙋ́шы на́шѧ съ тѣлесы̀, ꙗ҆́кѡ непоро́чнꙋю же́ртвꙋ прино́симъ тебѣ̀, влⷣко, въ ли́цѣхъ нбⷭ҇ныхъ твои́хъ сопричтѝ, ꙗ҆́кѡ бг҃ъ ми́лостивый.

Пѣ́снь з҃. І҆рмо́съ:

Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

И҆ска́паютъ ва́ши трꙋ́дове, мч҃ницы, бжⷭ҇твєнныѧ стрꙋи̑ и҆сцѣле́нїй всегда̀, болѣ́зней рѣ́ки и҆зсꙋша́юще, и҆ скве́рнꙋ всѧ́кꙋ ѿмыва́юще страсте́й, досточꙋ́днїи.

Ра́довахꙋсѧ страстоте́рпцы, внегда̀ скорбѣ́ти и҆̀мъ, ра́достїю неизглаго́ланною, поѧ́хꙋ ᲂу҆сѣка́еми мече́мъ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Тѧготꙋ̀ недꙋ́гѡвъ, стра̑сти сердє́чныѧ, и҆ болѣ̑зни тѣлє́сныѧ, всѧ́кꙋ же находѧ́щꙋю ско́рбь на́мъ ѡ҆блегчи́те, сла́внїи страда́льцы.

Бг҃оро́диченъ:

Ꙗ҆ви́вшисѧ всѣ̑мъ мч҃никѡмъ, чⷭ҇таѧ мт҃и бж҃їѧ, держа́ва ве́лїѧ, ꙗ҆ви́ласѧ є҆сѝ человѣ́кѡмъ застꙋпле́нїе, тѧ̀ пою́щымъ всегда̀ свѧще́нными пѣ́сньми.

И҆́нъ. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Сле́зными тꙋ́чами страсте́й погаси́лъ є҆сѝ пе́щь: ны́нѣ же ѻ҆гне́мъ, блаже́нне, вои́стиннꙋ попалѧ́еши чꙋде́съ твои́хъ ве́щный всегда̀ недꙋ́гѡвъ бре́дъ бл҃года́тїю.

Всеꙋсе́рднѡ творца̀ твоего̀, бл҃же́нне, возлюби́лъ є҆сѝ. тѣ́мже пло́ти и҆ мі́ра, ме́мноне мꙋ́дре, взыва́ѧ, внѣ̀ бы́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ꙗ҆́коже дре́во при и҆схо́дищихъ воздержа́нїѧ, ѻ҆́ч҃е, насажде́нъ бы́въ, возда́лъ є҆сѝ плоды̀ чꙋде́съ дѣ́йство, ме́мноне пребога́те, во бла́го вре́мѧ и҆з̾ѡби́лꙋѧ.

Ѿ прꙋгѡ́въ вре́дъ прибы́вшїй ᲂу҆ста́вилъ є҆сѝ, повелѣ̑нїи бжⷭ҇твенными, ме́мноне мꙋ́дре, рѣ́чными ᲂу҆дави́въ вода́ми, бл҃гослове́нъ є҆сѝ, бж҃е мо́й, зовы́й, возопи́лъ є҆сѝ.

Бг҃оро́диченъ:

Бꙋ́ри безмѣ́рныхъ согрѣше́нїй, ѻ҆трокови́це, и҆зба́ви мѧ̀, є҆ди́на смире́нныхъ по́мощь крѣ́пкаѧ, и҆ прегрѣше́нїй ѡ҆чище́нїе: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃. І҆рмо́съ:

И҆зба́вителю всѣ́хъ, всеси́льне, посредѣ̀ пла́мене благоче́ствовавшыѧ снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.

Ра́достнꙋю хвалꙋ̀ принесе́мъ, вели́кїѧ на́мъ застꙋ́пники, страстоте́рпцы мꙋ́ченики, пода́вшемꙋ вопїю́щымъ: всѧ̑ дѣла̀, бл҃гослови́те, гдⷭ҇нѧ, гдⷭ҇а.

Оу҆корени́вшесѧ на ка́мени вѣ́ры благоро́днѣ, ꙗ҆́коже вѣ̑тви, мч҃ницы, плоды̀ на́мъ страда́нїѧ принесо́ша, вѣ́рою пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Вра́чеве страсте́й великоимени́тїи, дꙋшѝ моеѧ̀ стра̑сти и҆сцѣли́те, и҆ гее́нны и҆зба́вите, и҆ тмы̀ ѻ҆́ныѧ кромѣ́шнїѧ, молѧ́ще хрⷭ҇та̀ бг҃а на́шего.

Бг҃оро́диченъ:

Законода́вца хрⷭ҇та̀ родила̀ є҆сѝ, зако́ннѡ страда́вшыѧ вѣнча́вшаго страстоте́рпцы мч҃ники. є҆го́же молѝ, зако́номъ грѣха̀ побѣжде́нна мѧ̀, ѻ҆трокови́це, и҆сцѣли́ти.

И҆́нъ. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́кѡ ᲂу҆́тро просїѧ́лъ є҆сѝ, ꙗ҆́кѡ ѕвѣзда̀, ꙗ҆́кѡ вели́кое со́лнце, ме́мноне бг҃одꙋхнове́нне, дꙋ́шы просвѣти́лъ є҆сѝ бл҃года́тїю, наста́вника тѧ̀ поста́вльшымъ и҆зрѧ́дна, и҆ ᲂу҆чи́телѧ свѧще́нна, и҆ наказа́телѧ чꙋ́дна вопїю́ща: всѧ̑ дѣла̀, благослови́те, гдⷭ҇нѧ, гдⷭ҇а.

Глꙋбокꙋ̀ ꙗ҆́звꙋ врагꙋ̀, ражда́ющꙋ сме́рть, пребл҃же́нне, да́лъ є҆сѝ, є҆гда̀ бл҃года́тїю дх҃а смире́нꙋ стѧжа́лъ є҆сѝ мꙋ́дрость, высокомꙋ́дрый тогѡ̀ нра́въ въ зе́млю смирѧ́ѧ, и҆ сѣ̑ти дꙋшетлѣ̑нныѧ є҆гѡ̀ попира́ѧ.

Ви́дѣти сподо́билсѧ є҆сѝ та́мѡ бл҃же́нство, и҆ наслажде́нїе вѣ́чнꙋющее, свѧ́те, и҆ ст҃ы́хъ свѣ́тлѡсти, пожи́въ житїѐ до́брѣ, и҆ ны́нѣ вопїе́ши ра́достнѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Мѣ́сто безво́дное пре́жде, ны́нѣ же во́дно, проповѣ́дꙋетъ, прпⷣбне, ко гдⷭ҇ꙋ вѣ́рꙋ твою̀, и҆ благода́ть чꙋде́съ твои́хъ, ꙗ҆̀же соверши́лъ є҆сѝ, вопїѧ̀ пода́телю до́брыхъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Недꙋ́говавшꙋю тѧгото́ю лю́тыхъ, и҆ пото́пльшꙋюсѧ смире́ннꙋю дꙋ́шꙋ мою̀, бг҃облагода́тнаѧ влⷣчце, посѣще́нїѧ сподо́би, и҆ здра́вꙋ до конца̀ покажѝ, зовꙋ́щꙋю: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.

Сѐ ѿверзо́шасѧ ва́мъ нбⷭ҇наѧ врата̀ пострада́вшымъ, речѐ хрⷭ҇то́съ страстоте́рпцємъ: вни́дите и҆ прїими́те ра́дꙋющесѧ, воздаѧ̑нїѧ болѣ́зней достѡ́йнаѧ, ѿ вѣ́ка хра́брствовавшымъ.

Кра́сни въ ра́нахъ тѣле́сныхъ бы́сте, и҆ а҆́гг҃лѡмъ ᲂу҆подо́бистесѧ: ны́нѣ же предстоитѐ всѣ́хъ красотѣ̀, ра́дꙋющесѧ при́снѡ, прича́стїемъ ꙗ҆́вѣ ᲂу҆добрѧ́еми кра́сныхъ, всечестні́и.

Ста́немъ въ домꙋ̀ бж҃їи, восхвалѧ́юще а҆нтїпа́тра, ѳеості́ха же, рꙋ́фа и҆ фїлимо́на страда̑нїѧ, бжⷭ҇твеннагѡ ѳаѵма́сїа чꙋдеса̀, ма́гна и҆ а҆рте́ма, ѳео́гнїа и҆ ѳеодо́та непобѣ́дное.

Де́нь спасе́нїѧ на́мъ возсїѧ̀ ст҃ы́хъ торжество̀, є҆́же соверша́юще моле́бнѡ, вопїе́мъ и҆̀мъ съ вѣ́рою: мч҃никѡвъ свѣтоза́рный ве́рше, всѣ́хъ сердца̀ ѡ҆зари́те.

Бг҃оро́диченъ:

Ѡ҆бле́ксѧ и҆зъ тебє̀ цр҃ь въ тѣле́снꙋю багрѧни́цꙋ, про́йде ве́сь красе́нъ и҆зъ ᲂу҆тро́бы твоеѧ̀, и҆ всѧ̑ врагѝ побѣдѝ, и҆ побѣ́дꙋ страда́льцємъ подадѐ, чⷭ҇таѧ є҆ди́на приснодв҃о.

И҆́нъ. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Возмо́глъ є҆сѝ ᲂу҆крѣплѧ́емь, держа́вою бг҃онача́льною, ме́мноне бг҃омꙋ́дре, всю̀ вра́жїю си́лꙋ пребори́ти: тѣ́мже вѣне́цъ ꙗ҆́кѡ побѣдоно́сецъ прїе́мь, ѡ҆ на́съ хрⷭ҇тꙋ̀ моли́сѧ.

Ꙗ҆́коже ѿ и҆сто́чника твоеѧ̀ ра́ки, стрꙋи̑ и҆сцѣле́нїй и҆стека́ютъ, бѡлѣ́зни и҆ сквє́рны, си́лою бжⷭ҇твеннагѡ дх҃а ѡ҆чища́ютъ, и҆ напоѧ́ютъ, прпⷣбне, помышлє́нїѧ чтꙋ́щихъ тѧ̀.

Дне́сь па́мѧть твоѧ̀, ѻ҆́ч҃е, ꙗ҆́коже со́лнце просвѣща́етъ всѧ́къ во́зрастъ и҆ ра́зꙋмъ: свѣ́та бо дѣла̀, ме́мноне, соверши́лъ є҆сѝ, и҆ къ свѣ́тꙋ незаходи́момꙋ ны́нѣ ѿше́дъ всели́лсѧ є҆сѝ.

Взѧ́лсѧ є҆сѝ ко ѻ҆би́телемъ вѣ̑чнымъ, бг҃а ꙗ҆́кѡ досто́йнѡ зрѧ̀, и҆ къ стадѡ́мъ преподо́бныхъ приче́лсѧ є҆сѝ, ме́мноне блаже́нне: съ ни́миже на́съ помина́й, на землѝ помина́ющихъ тѧ̀.

Бг҃оро́диченъ:

Гла́съ тѝ вопїе́мъ, дв҃о, ра́достнѡ а҆рха́гг҃ловъ: ра́дꙋйсѧ, клѧ́твы разрꙋше́нїе, прпⷣбныхъ сла́во, мч҃никѡвъ похвало̀, прⷪ҇ро́кѡвъ про́повѣдь и҆ человѣ́кѡвъ спасе́нїе.

Комментарии для сайта Cackle