Мѣ́сѧца тогѡ́же въ г҃ї-й де́нь. Прпⷣбнагѡ ѻ҆ц҃а̀ на́шегѡ маѯі́ма и҆сповѣ́дника.

Слꙋ́жба є҆гѡ̀ пое́тсѧ въ в҃ї де́нь съ мч҃ники, ꙗ҆́коже предписа́сѧ.

И҆ свѧти́телѧ тѵ́хѡна, є҆пі́скопа воро́нежскагѡ, задо́нскагѡ чꙋдотво́рца.

Слꙋ́жба є҆гѡ̀ пи́сана въ приложе́нїи.

Въ сі́й же де́нь ѿдае́тсѧ пра́здникъ гдⷭ҇нѧ преѡбраже́нїѧ: и҆ пое́тсѧ слꙋ́жба всѧ̀ пра́здника.

Ве́черъ, ѻ҆бы́чнаѧ каѳі́сма. На Гдⷭ҇и, воззва́хъ, стїхи̑ры пра́здника на ѕ҃, поє́мыѧ на са́мый пра́здникъ: Сла́ва, и҆ ны́нѣ, пра́здника.

А҆́ще сꙋббѡ́та, Сла́ва, пра́здника: И҆ ны́нѣ, догма́тїкъ настоѧ́щагѡ гла́са. На стїхо́внѣ стїхи̑ры пра́здника. Сла́ва, и҆ ны́нѣ, пра́здника. Тропа́рь пра́здника, є҆ктенїа̀, и҆ ѿпꙋ́стъ. На повече́рїи по трист҃о́мъ конда́къ пра́здника. Полꙋ́нощницꙋ же пое́мъ по ѻ҆бы́чаю, съ трѡпарѝ дневны́ми. На ᲂу҆́трени, на Бг҃ъ гдⷭ҇ь, тропа́рь пра́здника, три́жды. По каѳі́смахъ сѣда́льны пра́здника. Канѡ́нъ пра́здника, со і҆рмосо́мъ на и҃: дрꙋгі́й безъ і҆рмосѡ́въ, на ѕ҃. Катава́сїа, Крⷭ҇тъ начерта́въ: Ѻ҆́ба ли́ка вкꙋ́пѣ. По г҃-й пѣ́сни сѣда́ленъ два́жды. По ѕ҃-й пѣ́сни конда́къ и҆ і҆́косъ пра́здника. На ѳ҃-й пѣ́сни Честнѣ́йшꙋю не пое́мъ: но пое́мъ припѣ́въ пра́здника. Свѣти́ленъ пра́здника, два́жды. На хвали́техъ стїхи̑ры пра́здника, на д҃. Сла́ва, и҆ ны́нѣ, пра́здника. Славосло́вїе вели́кое. По трист҃о́мъ, тропа́рь пра́здника, є҆ктєнїѝ, ѡ҆глаше́нїе, и҆ ѿпꙋ́стъ, и҆ ѻ҆бы́чное и҆схожде́нїе, и҆ ча́съ пе́рвый, въ притво́рѣ.

На лїтꙋргі́и, бл҃жє́нна ѻ҆бои́хъ канѡ́нѡвъ, пѣ́снь ѳ҃-ѧ, со і҆рмосо́мъ на и҃. Тропа́рь пра́здника. Сла́ва, и҆ ны́нѣ, конда́къ пра́здника. Прокі́менъ, а҆ллилꙋ́їа и҆ прича́стенъ пра́здника. А҆пⷭ҇лъ, и҆ є҆ѵⷢ҇лїе днѐ то́чїю.

🕅 А҆́ще ли слꙋчи́тсѧ ѿда́нїе пра́здника преѡбраже́нїе хрⷭ҇то́ва въ недѣ́лю:

На ма́лѣй вече́рни, стїхи̑ры воскрⷭ҇ны. На стїхо́внѣ стїхи́ра воскрⷭ҇на, и҆ пра́здника стїхо́вна: съ припѣ́вы свои́ми вели́кїѧ вече́рни: Сла́ва, и҆ ны́нѣ, пра́здника. Тропа́рь воскрⷭ҇нъ: Сла́ва, и҆ ны́нѣ, пра́здника. На вели́цѣй вече́рни, на Гдⷭ҇и, воззва́хъ, стїхи̑ры воскрⷭ҇ны г҃. и҆ ꙾восто́ченъ꙾ ⁹ є҆ди́нъ: и҆ пра́здника ѕ҃, поє́мыѧ на са́мый пра́здникъ. Сла́ва, пра́здника: И҆ ны́нѣ, бг҃оро́диченъ а҃-й гла́са. На лїті́и стїхи̑ры, и҆ Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва, и҆ ны́нѣ, пра́здника. По трист҃о́мъ, тропа́рь, Бцⷣе дв҃о: два́жды, и҆ пра́здника, є҆ди́ножды, и҆ благослове́нїе хлѣ́бѡвъ, и҆ чте́нїе.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, и҆ ны́нѣ, пра́здника. По каѳі́смахъ, сѣда́льны воскрⷭ҇ны съ бг҃орѡ́дичны и҆́хъ, и҆ чте́нїе во є҆ѵⷢ҇лїи. Недѣ́лѧ рѧ́дъ, и҆ прѡ́чаѧ по ѻ҆бы́чаю. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на два̀: и҆ пра́здника ѻ҆́ба канѡ́на, на и҃. Катава́сїа: Крⷭ҇тъ начерта́въ: ѻ҆́ба ли́ка вкꙋ́пѣ. По г҃-й пѣ́сни конда́къ пра́здника, и҆ і҆́косъ: и҆ сѣда́ленъ пра́здника, два́жды. По ѕ҃-й пѣ́сни конда́къ и҆ і҆́косъ воскрⷭ҇нъ. На ѳ҃-й пѣ́сни пое́мъ Честнѣ́йшꙋю: Свѣти́ленъ воскрⷭ҇нъ: Сла́ва, и҆ ны́нѣ, пра́здника. На хвали́техъ стїхи̑ры, воскрⷭ҇ны д҃, и҆ пра́здника д҃, со Сла́внымъ, съ припѣ́вы пра́здничными. Сла́ва, стїхи́ра є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое. По трист҃о́мъ, тропа́рь воскрⷭ҇нъ то́чїю, є҆ктєнїѝ, ѡ҆глаше́нїе, и҆ ѿпꙋ́стъ, и҆ ча́съ а҃, въ притво́рѣ. На часѣ́хъ тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. Конда́къ пра́здника. Та́кожде и҆ на про́чихъ часѣ́хъ, конда́къ воскре́сенъ, и҆ пра́здника, глаго́лемъ премѣнѧ́юще.

На лїтꙋргі́и бл҃жє́нна гла́са, на ѕ҃: и҆ пра́здника, д҃-гѡ гла́са, пѣ́снь ѳ҃-ѧ, на д҃. Тропа́рь воскрⷭ҇нъ и҆ пра́здника. Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, а҆ллилꙋ́їа, и҆ прича́стенъ днѐ, и҆ пра́здника, а҆пⷭ҇лъ, и҆ є҆ѵⷢ҇лїе днѐ.