Библиотеке требуются волонтёры

Мѣ́сѧца тогѡ́же въ к҃и-й де́нь. Прпⷣбнагѡ ѻ҆ц҃а̀ на́шегѡ мѡѷсе́а мꙋ́рїна.

И҆ собо́ръ преподо́бныхъ ѻ҆тє́цъ на́шихъ пече́рскихъ, въ да́льнихъ пеще́рахъ, преподо́бнагѡ ѳеодо́сїа, почива́ющихъ.

Слꙋ́жба сїѧ̀ пи́сана въ приложе́нїи.

На Гдⷭ҇и, воззва́хъ, стїхи̑ры, гла́съ и҃. Подо́бенъ: Мч҃ницы твоѝ:

Мѡѷсе́й многонаро́читый мїрско́е ᲂу҆краше́нїе ѡ҆ста́вль мꙋ́дрѣ, болѣ́зньми воздержа́нїѧ крѣ́пкими стра̑сти покорѝ плотскі̑ѧ, и҆ низложи́въ многоко́зненнаго, побѣ́ды вѣне́цъ прїѧ́тъ. тогѡ̀ моли́твами, гдⷭ҇и, всѣ̑мъ пода́ждь ве́лїю ми́лость.

Воздержа́нїе и҆зрѧ́дное, стоѧ́нїе всено́щное, бдѣ́нное ѻ҆́ко, ᲂу҆́мъ смотрѧ́ющь бжⷭ҇твєнныѧ добрѡ́ты и҆мѣ́лъ є҆сѝ, блаже́нне мѡѷсе́е: тѣ́мже и҆сцѣле́нїй бл҃года́ть прїѧ́лъ є҆сѝ, стра̑сти цѣли́ти лю̑тыѧ. сегѡ̀ ра́ди тѧ̀ мо́лимъ, и҆спросѝ, ѻ҆́ч҃е, всѣ̑мъ ве́лїю ми́лость.

Дє́мѡнскїѧ кѡ́зни и҆ стрѣлѧ́нїѧ и҆ ловлє́нїѧ, бжⷭ҇твенною покрыва́емь, мѡѷсе́е, дла́нїю ѻ҆́ч҃е, проше́лъ є҆сѝ невре́днѡ, и҆ безстра́стїемъ ᲂу҆краша́емь, всѣ̑мъ прпⷣбнымъ приче́лсѧ є҆сѝ. молѝ дарова́ти вѣ́рою чтꙋ́щымъ тѧ̀ ве́лїю ми́лость.

Сла́ва, и҆ ны́нѣ, бг҃оро́диченъ:

Помышлє́нїѧ нечи̑ста и҆ ᲂу҆стны̀ льсти́вы, дѣла́ же моѧ̑ всѧ̑ ѡ҆сквернє́на, и҆ что̀ сотворю̀; ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ бл҃гоꙋтро́бенъ.

Крⷭ҇тобг҃оро́диченъ:

Не терплю̀, ча́до, ви́дѧщи тѧ̀ на дре́вѣ ᲂу҆снꙋ́вша, бо́дрость всѣ̑мъ подаю́щаго, ꙗ҆́кѡ да и҆̀же дре́вле престꙋпле́нїѧ плодо́мъ, сно́мъ поги́бельнымъ ᲂу҆снꙋ́вшымъ, бж҃е́ственнꙋю и҆ спаси́тельнꙋю бо́дрость пода́си, дв҃а глаго́лаше пла́чꙋщисѧ, ю҆́же велича́емъ.

На стїхо́внѣ ѻ҆ктѡ́иха. Сла́ва, и҆ ны́нѣ, бг҃оро́диченъ:

Тропа́рь, гла́съ а҃:

Пꙋсты́нный жи́тель, и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ, бг҃оно́се ѻ҆́ч҃е на́шъ мѡѷсе́е: посто́мъ, бдѣ́нїемъ, моли́твою, нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ тѝ, сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃.

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Грызе́нїемъ грѣхо́внымъ помраче́нное се́рдце моѐ ᲂу҆бѣ́ли, ѻ҆́ч҃е, покаѧ́нїѧ тꙋ́чами, моли́твами твои́ми.

Стра́хꙋ влⷣчню пло́ть пригвозди́въ, всѧ́ко помышле́нїе стра́стное ѿ се́рдца, бг҃оно́се пребл҃же́нне, и҆зсꙋши́лъ є҆сѝ.

Въ бразда́хъ мы́сленныхъ скры́въ сло́ва, ѻ҆́ч҃е, сѣ́мена, воздѣ́лалъ є҆сѝ пшени́цꙋ, въ сокро́вищахъ неистоща́емыхъ соблюда́емꙋ.

Бг҃оро́диченъ:

Всего́ мѧ спаса́етъ сло́во пребжⷭ҇твенное бла́гостїю, восхотѣ́въ и҆зъ чре́ва твоегѡ̀ воплоти́тисѧ, чⷭ҇таѧ мт҃и дв҃о.

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Дх҃омъ дви́жимь, дꙋхо́вными, мꙋ́дре, дѣѧ̑нїи терпѧ̀, лꙋка́вствїѧ покори́лъ є҆сѝ дꙋ́хи.

Си́лою ᲂу҆крѣплѧ́емь бг҃онача́льною, мѡѷсе́е прпⷣбне, крѣ́пкаго ꙗ҆́кѡ безпло́тенъ смири́лъ є҆сѝ ѕмі́ѧ.

Тꙋ́чами сле́зъ твои́хъ ѻ҆́гненное ѡ҆пале́нїе страсте́й ᲂу҆гаси́лъ є҆сѝ, и҆ рѣка̀ ꙗ҆ви́лсѧ є҆сѝ дарова́нїй, наполнѧ́ема дх҃омъ.

Бг҃оро́диченъ:

И҆мѣ́ѧ тѧ̀ по́мощь, врагѡ́въ стремле́нїѧ, чⷭ҇таѧ, не ᲂу҆бою́сѧ: и҆мѣ́ѧ тѧ̀ предста́тельницꙋ, тѣ́хъ побѣжда́ю полкѝ.

Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Бжⷭ҇твенными сїѧ̑нїи разбогатѣ́въ, и҆ тмꙋ̀ разрꙋши́лъ є҆сѝ страсте́й, всеблаже́нне, и҆ бо́дрыми моли́твами твои́ми ᲂу҆вѧди́лъ є҆сѝ пло́ти возвыша́ємаѧ мꙋдрова̑нїѧ, и҆ къ го́рнемꙋ преше́лъ є҆сѝ кра́йнемꙋ гра́дꙋ, ѻ҆́ч҃е прпⷣбне, хрⷭ҇та̀ бг҃а молѝ дарова́ти, на́мъ ве́лїю ми́лость.

Сла́ва, и҆ ны́нѣ, бг҃оро́диченъ:

Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ, но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇и: того̀ прилѣ́жнѡ молѝ, дарова́ти на́мъ ве́лїю ми́лость.

Крⷭ҇тобг҃оро́диченъ:

Нескве́рнаѧ а҆́гница сло́ва, нетлѣ́ннаѧ дв҃о мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Любопло́тнаго де́мѡна, непреста́нными, ѻ҆́ч҃е, мольба́ми и҆ болѣ́зней придаѧ́ньми, ѿ дꙋшѝ преблаже́нне, ѿгна́лъ є҆сѝ.

Преложи́въ помышле́нїе къ сꙋ́щымъ па́че ᲂу҆ма́ же и҆ сло́ва, прпⷣбне, воздержа́нїѧ зно́й, ꙗ҆́коже бжⷭ҇твеннꙋю ро́сꙋ терпѣ́лъ є҆сѝ.

Вѣ́триломъ воскрили́всѧ нестѧжа́нїѧ, легкѡ̀ преплы́лъ є҆сѝ жите́йское, ѻ҆́ч҃е, мо́ре, ко приста́нищꙋ ти́хомꙋ направлѧ́емь.

Бг҃оро́диченъ:

Дѣ́вства сосꙋ́де, и҆ невмѣсти́магѡ є҆стества̀ селе́нїе, дꙋ́шꙋ мою̀ просвѣтѝ ѡ҆мраче́ннꙋю, бг҃оневѣ́сто.

Пѣ́снь є҃. І҆рмо́съ:

Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ: ра́звѣ тебє̀ и҆но́гѡ не вѣ́мы.

Оу҆́глемъ разжига́емь, блаже́нне, безстра́стїѧ, ве́щь ᲂу҆добопа́льнꙋю страсте́й попали́лъ є҆сѝ.

Ѕвѣзда̀ воздержа́нїѧ, высота́ми сїѧ́ѧ, ꙗ҆ви́лсѧ є҆сѝ, дꙋ́шы на́шѧ просвѣща́ѧ, пресла́вне.

На высотꙋ̀ добродѣ́телей возше́лъ, є҆сѝ, и҆ во ѻ҆́стровъ дости́глъ є҆сѝ нбⷭ҇ный, ѻ҆́ч҃е мѡѷсе́е досточꙋ́дне.

Бг҃оро́диченъ:

Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а сло́ва пло́тїю мі́рꙋ родила̀ є҆сѝ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Но́щїю мѧ̀ грѣхо́вною, и҆ сласте́й ѡ҆мраче́нїемъ ѡ҆крꙋже́на, и҆̀же въ тебѣ̀, дꙋхо́вными сїѧ̑нїи всего̀ просвѣтѝ, всего̀ ко приста́нищꙋ спасе́нїѧ, ѻ҆́ч҃е, напра́ви.

Ꙗ҆́коже пчела̀ трꙋдолюби́ваѧ, со́томъ ᲂу҆ма̀ твоегѡ̀ цвѣ́ты добродѣ́телей собра́въ, и҆сточи́лъ є҆сѝ сла́дость безсме́ртнꙋю, го́ресть, ѻ҆́ч҃е, де́мѡнскꙋю ѿгонѧ́ющꙋю.

Въ пꙋсты́нѧхъ претерпѣва́ѧ, вы́шнїй гра́дъ наслѣ́довалъ є҆сѝ, пло́ть порабоща́ѧ поще́ньми, чꙋ́дне, къ пи́щи неѡскꙋдѣва́емѣй, и҆ къ ра̑йскимъ селе́нїємъ ѿше́лъ є҆сѝ.

Бг҃оро́диченъ:

Свѧще́нїе ᲂу҆́мное и҆ неприкоснове́нное ѡ҆чисти́лище, свѣти́льникъ златови́дѣнъ, и҆ трапе́зꙋ, ѡ҆дꙋшевле́ннꙋ, хлѣ́бъ носи́вшꙋю жи́зни, дв҃о, вѣ́рнїи тѧ̀ и҆менꙋ́емъ.

Конда́къ, гла́съ д҃:

Мꙋ́рїны заꙋши́въ, и҆ ли́ца де́мѡнѡвъ поплева́въ, мы́сленнѡ просїѧ́лъ є҆сѝ, ꙗ҆́коже со́лнце свѣ́тло, свѣ́томъ житїѧ̀ твоегѡ̀, и҆ ᲂу҆че́нїемъ наставлѧ́ѧ дꙋ́шы на́шѧ.

Пѣ́снь з҃. І҆рмо́съ:

Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Ка́ла страсте́й ѡ҆чище́нъ, дꙋхо́вными блиста́ѧсѧ сїѧ́ньми, къ свѣ́тꙋ вои́стиннꙋ невеще́ственномꙋ преста́вилсѧ є҆сѝ, и҆дѣ́же ли́цы, блаже́нне, по́стникѡвъ во вѣ́ки.

Всѧ́кїѧ и҆збѣ́глъ є҆сѝ ѕло́бы, присво́ивсѧ же до́брымъ преложе́нїемъ, и҆ до́брымъ жела́нїемъ, невеще́ственнѡ примѣси́лсѧ є҆сѝ, вопїѧ̀, бл҃же́нне: бж҃е, бл҃гослове́нъ є҆сѝ.

Болѣ́зньми воздержа́нїѧ безмѣ́рными, болѣ́зненный и҆зсꙋши́лъ є҆сѝ грѣ́хъ, бг҃оно́се. тѣ́мже безболѣ́зненное ѡ҆брѣ́лъ є҆сѝ благи́хъ наслажде́нїе, благословѧ̀ твоего̀ влⷣкꙋ.

Бг҃оро́диченъ:

Сѐ, ю҆́же речѐ дв҃ꙋ дх҃омъ вели́кїй и҆са́їа, во ᲂу҆тро́бѣ бг҃а зача́тъ и҆ ражда́етъ. є҆мꙋ́же пое́мъ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Моли́твами вжилѧ́емь, смире́нїемъ возвыша́емь, пра́вдою дꙋ́шꙋ ѡ҆блиста́ѧ, любо́вїю ᲂу҆краша́емь, къ добродѣ́телей соверше́нїю, къ ꙗ҆вле́ннѣй, ѻ҆́ч҃е, восте́клъ є҆сѝ высотѣ̀, зовы́й влⷣчцѣ: свѧще́нницы, благослови́те, лю́дїе, превозноси́те во всѧ̑ вѣ́ки.

Че́рный тѣ́ломъ, дꙋ́шꙋ же свѣтлѣ́йшꙋ со́лнечныхъ сїѧ́нїй стѧжа́въ, де́мѡнѡвъ ѡ҆чернѝ ѡ҆мрачє́ннаѧ ли́ца, вѣ́рныхъ же просвѣща́етъ сердца̀ свои́мъ подо́бїемъ, те́плѣ пою́щихъ: лю́дїе, превозноси́те хрⷭ҇та̀ во вѣ́ки.

Смире́нїемъ всю́дꙋ ѡ҆гражде́нъ, ᲂу҆бѣжа́лъ є҆сѝ, ѻ҆́ч҃е, є҆ѳїо́пѡвъ мы́сленныхъ стрѣлѧ́нїѧ, ѻ҆́бразъ же бы́лъ є҆сѝ мона́хѡмъ къ боре́нїю врагѡ́въ, дѣ́лы же и҆ словесы̀, съ ни́ми взыва́ѧ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ:

Па́че є҆стества̀ зачала̀ є҆сѝ, па́че сло́ва родила̀ є҆сѝ содѣ́телѧ человѣ́ческагѡ є҆стества̀, бы́вша чл҃вѣ́ка, ѻ҆ц҃ꙋ̀ неразлꙋ́чна, влⷣчце чⷭ҇таѧ. є҆мꙋ́же пое́тъ всѧ̀ тва́рь: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Въ дѣ́лѣхъ вои́стиннꙋ благи́хъ жи́знь сконча́въ, пости́глъ є҆сѝ благи́хъ и҆сто́чникъ, и҆ твоегѡ̀ жела́нїѧ коне́цъ прїѧ́лъ є҆сѝ, пра́зднꙋющихъ же и҆дѣ́же гла́съ съ хвале́нїемъ, ра́дꙋѧсѧ всели́лсѧ є҆сѝ, досточꙋ́дне мѡѷсе́е, ѻ҆́ч҃е прпⷣбне.

И҆ска́паютъ, ѻ҆́ч҃е, сла́дость по́льзы болѣ́зней по́тове твоѝ, и҆ го́ресть на́шꙋ стра́стнꙋю ѿго́нѧтъ: и҆сточа́ютъ на́мъ и҆сцѣлє́нїѧ мо́щи, и҆ гноє́нїѧ ѕѡ́лъ и҆ дꙋ́шъ скве́рнꙋ ѡ҆чища́ютъ.

Вѣнцы̑ вѣнча̀ хрⷭ҇то́съ неꙋвѧда́ющими твою̀, главꙋ̀, чꙋ́дне, побѣди́вша тве́рдѡ полкѝ мїроде́ржца, и҆ прпⷣбныхъ ликѡ́мъ прпⷣбнѡ приче́лсѧ є҆сѝ. съ ни́миже моли́сѧ, и҆зба́витисѧ напа́стей чтꙋ́щымъ тѧ̀.

Бг҃оро́диченъ:

Оу҆ста́вила є҆сѝ є҆ди́на въ жена́хъ клѧ́твꙋ первозда́нныхъ, бг҃оневѣ́сто, неѡпи́саннаго пло́тїю ро́ждши ѡ҆писꙋ́ема. ѡ҆бнови́ла є҆сѝ зако́ны є҆стества̀, нескве́рнаѧ, разстоѧ̑щаѧ пе́рвѣе, пресла́внымъ хода́тайствомъ твои́мъ соедини́ла є҆сѝ.

Комментарии для сайта Cackle