Библиотеке требуются волонтёры

Мѣ́сѧца тогѡ́же въ л҃-й де́нь. И҆̀же во ст҃ы́хъ ѻ҆тє́цъ на́шихъ патрїа́рхѡвъ кѡнстанті́нѧ гра́да, а҆леѯа́ндра, і҆ѡа́нна и҆ па́ѵла но́вагѡ:

И҆ пренесе́нїе моще́й ст҃а́гѡ благовѣ́рнагѡ вели́кагѡ кнѧ́зѧ а҆леѯа́ндра не́вскагѡ и҆зъ влади́мїра въ ца́рствꙋющїй гра́дъ ст҃а́гѡ петра̀:

И҆ преставле́нїе прпⷣбнагѡ а҆леѯа́ндра сви́рскагѡ.

Слꙋ̑жбы и҆́хъ пи́саны по се́й слꙋ́жбѣ.

И҆ ст҃а́гѡ бл҃говѣ́рнагѡ вели́кагѡ кнѧ́зѧ данїи́ла моско́вскагѡ.

Слꙋ́жба є҆гѡ̀ пи́сана ма́рта, д҃ де́нь.

На Гдⷭ҇и, воззва́хъ, стїхи̑ры прⷣте́чи, г҃. и҆ ст҃ы́хъ, г҃.

Стїхи̑ры прⷣте́чи, гла́съ д҃. Поⷣ: Зва́нный свы́ше:

И҆́же ве́тхагѡ и҆ но́вагѡ бжⷭ҇твенный хода́тай, ꙳ прⷪ҇ро́къ и҆ прⷣте́ча, ꙳ а҆́гг҃лъ во пло́ти, ꙳ беззако́нїѧ ѡ҆бличи́тель: ꙳ непло́дныѧ прозѧбе́нїе ᲂу҆тро́бы, ꙳ ᲂу҆ста̀ ѻ҆гнедохновє́ннаѧ, ꙳ и҆́рѡда ѡ҆бличи́лъ є҆сѝ, беззакѡ́ннаѧ дѣ́юща. ꙳ и҆́же не терпѧ̀ ѡ҆бличе́нїѧ, ꙳ ѿсѣщѝ главꙋ̀ твою̀ повелѣва́етъ: ꙳ и҆ принесе́сѧ ꙗ҆́коже снѣ́дь воздержа́нїѧ, ꙳ бжⷭ҇твенное наслажде́нїе на блю́дѣ, ꙳ мно́жае ѡ҆блича́ѧ прелюбы̀ дѣ́ющаго.

Ѿ беззако́нныѧ ма́тере нава́ждена, ꙳ дщѝ беззако́ннаѧ, ꙳ твою̀ пресла́внꙋю, и҆ а҆́гг҃лѡмъ говѣ́йнꙋю про́ситъ главꙋ̀, ꙳ ѡ҆бличе́нїѧ бо сеѧ̀ не терпѧ́ше. ꙳ тѣ́мже на блю́дѣ сїю̀ прине́сши, ꙳ и҆ нога́ми вкꙋ́пѣ и҆гра́ющи, ꙳ ꙗ҆дꙋ́щихъ весе́лїе въ пла́чь ѡ҆братѝ. ꙳ но мно́жае ѡ҆блича́еши ꙳ блꙋ́днꙋю ме́рзость, блаже́нне: ꙳ хрⷭ҇та̀ молѝ, ꙳ спасти́сѧ дꙋша́мъ на́шымъ.

Ѡ҆б̾юро́денъ пїѧ́нствомъ и҆́рѡдъ, ꙳ любодѣѧ́нїемъ ᲂу҆крада́етсѧ, ꙳ плѧса́нными гла́сы, ꙳ и҆ къ клѧ́твѣ не пра́веднѣй ꙳ содѣва́етъ ᲂу҆бі́йство твоѐ, ꙳ пра́ведна проро́ка сла́вне. ꙳ но твоѧ̀ сме́рть, пре́жде ᲂу҆ме́ршымъ ꙳ ꙗ҆́вѣ безсме́ртїе возвѣстѝ: ꙳ и҆́бо бы́сть и҆ сꙋ́щымъ во а҆́дѣ проповѣ́дникъ и҆ предвѣ́стникъ, ꙳ прише́ствїе спаси́тельное провозвѣща́ѧ ꙳ хрⷭ҇та̀ бг҃а на́шегѡ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.

И҆́ны стїхи̑ры ст҃ы́хъ, гла́съ а҃. Подо́бенъ: Всехва́льнїи мꙋ́чєницы:

Всебл҃же́нне а҆леѯа́ндре, ꙳ па́стырь цр҃кве бы́лъ є҆сѝ, ꙳ правосла́вїѧ побо́рникъ, ꙳ а҆́рїевꙋ є҆́ресь низложи́въ мꙋ́дрѣ, ꙳. моли́твами твои́ми, премꙋ́дре, и҆ сегѡ̀ дꙋ́шꙋ ѿме́тнꙋти ѕлѣ̀, ꙳ помоли́лсѧ є҆сѝ, ꙳ въ ме́рзскихъ мѣ́стѣхъ, сла́вне. ꙳ сегѡ̀ ра́ди согла́снѡ тѧ̀ почита́емъ.

І҆ѡа́нне че́стне, ꙳ пло́ти тлѣ́нїе возненави́дѣлъ є҆сѝ, ꙳ воздержа́нїемъ и҆ вѣ́рою, ꙳ бдѣ́нїемъ же и҆ и҆сповѣ́данїемъ, ꙳ а҆́гг҃лъ земны́й ѡ҆брѣ́лсѧ є҆сѝ, ꙳ и҆ нбⷭ҇ный человѣ́къ. ꙳ хрⷭ҇та̀ молѝ, ꙳ дарова́ти дꙋша́мъ на́шымъ ꙳ ве́лїю ми́лость.

Па́ѵла бжⷭ҇твєннымъ ᲂу҆че́нїємъ, ꙳ мꙋ́дре, вои́стиннꙋ повинꙋ́лсѧ є҆сѝ, ꙳ и҆ ꙗ҆́кѡ на тре́тїе восте́клъ є҆сѝ не́бо, сла́вне, ꙳ добродѣ́телей на высотꙋ̀, ꙳ и҆ ᲂу҆слы́шалъ є҆сѝ глаго́лы неизречє́нны ꙳ и҆ бжⷭ҇твєнны дх҃а, ꙳ па́ѵле бл҃же́нне, ꙳ правосла́вныхъ степе́нь недви́жима. ꙳ сп҃са на́мъ моли́твами твои́ми ми́лостива сотворѝ.

Сла́ва, гла́съ ѕ҃:

Па́ки и҆рѡді́а бѣ́ситсѧ, па́ки смꙋща́етсѧ. ѽ плѧса́нїѧ льсти́вна, и҆ пи́ра съ ле́стїю! крⷭ҇ти́тель ᲂу҆сѣка́шесѧ, и҆ и҆́рѡдъ смꙋща́шесѧ. моли́твами, гдⷭ҇и, твоегѡ̀ прⷣте́чи, ми́ръ пода́ждь дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:

Ви́дѧщи тѧ̀ распина́ема, хрⷭ҇тѐ, ꙳ тебѐ ро́ждшаѧ, ꙳ вопїѧ́ше: ꙳ что̀ стра́нное є҆́же ви́жꙋ та́инство, сн҃е мо́й; ꙳ ка́кѡ на дре́вѣ ᲂу҆мира́еши пло́тїю повѣ́шенъ, ꙳ жи́зни пода́телю;

На стїхо́внѣ стїхи̑ры ѻ҆ктѡ́иха. Сла́ва, гла́съ д҃:

Рожде́нїе неподо́бно, и҆ пи́ръ безстꙋ́днѣйшїй и҆́рѡдъ соверши́лъ є҆́сть. любодѣ́йствомъ бо же́нскимъ ᲂу҆слажда́емь, и҆ нечести́вымъ женонеи́стовствомъ подстрѣка́емь, ѿсѣчѐ главꙋ̀ прⷣте́чевꙋ: но не ѿсѣчѐ ѧ҆зы́ка проро́ческа, ѡ҆блича́ющагѡ безꙋ́мїе є҆гѡ̀. пролїѧ̀ кро́вь непови́ннꙋ, покры́ти хотѧ̀ грѣ́хъ беззако́ненъ: но ни ѡ҆ се́мъ скры̀ гла́са, вопїю́щагѡ всѣ̑мъ покаѧ́нїе. ѻ҆́нъ ᲂу҆́бѡ свеселѧ́шесѧ ᲂу҆бі́йствомъ: мы́ же спра́зднꙋемъ любо́вїю, крⷭ҇ти́телѧ і҆ѡа́нна блаже́нное заколе́нїе. предвари́ бо во а҆́дѣ жи́знь, проповѣ́дати сꙋ́щымъ во тмѣ̀ и҆ сѣ́ни сме́ртнѣй сѣдѧ́щымъ, свы́ше восто́къ хрⷭ҇та̀ бг҃а на́шего, є҆ди́наго многоми́лостиваго.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:

А҆́гнца и҆ па́стырѧ тѧ̀, ꙳ на дре́вѣ ꙗ҆́кѡ ви́дѣ, ꙳ а҆́гнца ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ ꙳ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;

Тропа́рь, гла́съ в҃:

Па́мѧть пра́веднагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че, показа́лбосѧ є҆сѝ вои́стиннꙋ и҆ прⷪ҇ро́кѡвъ честнѣ́йшїй, ꙗ҆́кѡ и҆ въ стрꙋѧ́хъ крести́ти сподо́билсѧ є҆сѝ проповѣ́даннаго. тѣ́мже за и҆́стинꙋ пострада́въ ра́дꙋѧсѧ, благовѣсти́лъ є҆сѝ и҆ сꙋ́щымъ во а҆́дѣ бг҃а ꙗ҆́вльшагосѧ пло́тїю, взе́млющаго грѣ́хъ мі́ра, и҆ подаю́щаго на́мъ ве́лїю ми́лость.

Сла́ва, ст҃ы́хъ, гла́съ д҃:

Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ.

На ᲂу҆́трени, канѡ́на ѻ҆ктѡ́иха є҆ди́нъ, и҆ прⷣте́чи на д҃, вчера́шнїй, и҆ ст҃ы́хъ на д҃.

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Трисвѣ́тлаѧ ѻ҆тє́цъ дне́сь возсїѧ̀ зарѧ̀, всесла́внаѧ па́мѧть, є҆ѧ́же вѣ́рнѡ наслади́вшесѧ ликꙋ́емъ.

Разори́лъ є҆сѝ, ст҃и́телю, є҆ретїкѡ́въ ᲂу҆тверждє́нїѧ, бл҃гочести́вымъ дерзнове́нїемъ, проповѣ́давъ трⷪ҇цꙋ, а҆леѯа́ндре.

Тро́сть тво́й ѧ҆зы́къ, бг҃опи́саннѡ соверши́въ, дх҃а бл҃года́ть, ѻ҆́ч҃е і҆ѡа́нне, вѣ́рꙋ ᲂу҆ѧснѝ.

Па́ѵла чꙋ́днагѡ причасти́всѧ зва́нїю, блаже́нне, ѻ҆́нагѡ ꙗ҆ви́лсѧ є҆сѝ ѻ҆́бразъ добродѣ́телей неизмѣ́ненъ.

Бг҃оро́диченъ:

Пое́мъ гдⷭ҇еви, и҆зъ дв҃ы благоизво́лившемꙋ воплоти́тисѧ безъ сѣ́мене, за на́ше спасе́нїе и҆ и҆збавле́нїе.

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

И҆зрѧ́днѡ ᲂу҆па́слъ є҆сѝ влⷣки твоегѡ̀ ста́до: тѣ́мже ꙗ҆́кѡ ст҃и́телѧ вѣ́чнѡ тѧ̀ сла́витъ, а҆леѯа́ндре.

Во́ды спаси́тєльныѧ ѧ҆зы́комъ твои́мъ и҆сточи́лъ є҆сѝ, благоче́стна ᲂу҆чє́нїѧ ста́дꙋ, і҆ѡа́нне блаже́нне.

Па́ѵле всеблаже́нне, и҆збра́нїѧ хрⷭ҇то́ва бы́лъ є҆сѝ сосꙋ́дъ свѣ́телъ, зва́нїемъ же и҆ житїе́мъ ꙗ҆́вѣ подо́бїе.

Бг҃оро́диченъ:

Тѧ̀ всѝ и҆́мамы прибѣ́жище и҆ стѣ́нꙋ на́шꙋ хрⷭ҇тїа́не, тѧ̀ славосло́вимъ немо́лчнѡ, безневѣ́стнаѧ.

Конда́къ ст҃ы́хъ, гла́съ и҃:

Хрⷭ҇то́вою любо́вїю распала́еми сла́внїи, и҆ ꙗ҆ре́мъ є҆гѡ̀ прїе́мшїи крⷭ҇тъ честны́й, подража́тели тогѡ̀ житїѧ̀ ꙗ҆ви́стесѧ, и҆ бжⷭ҇твенныѧ сла́вы є҆гѡ̀ прича́стницы бы́сте. а҆леѯа́ндре бг҃омꙋ́дре со і҆ѡа́нномъ чꙋ́днымъ и҆ па́ѵломъ сла́внымъ. тѣ́мже прⷭ҇то́лꙋ є҆гѡ̀ предстоѧ́ще, прилѣ́жнѡ моли́тесѧ за дꙋ́шы на́шѧ.

И҆ сѣда́ленъ прⷣте́чи. Сла́ва, ст҃ы́хъ, гла́съ д҃. Поⷣ: Ско́рѡ предварѝ:

Ѻ҆тцє́въ трисвѣ́тлаѧ свѣща̀ возсїѧ̀, вѣ́рныхъ составлє́нїѧ просвѣща́ющаѧ при́снѡ, къ бжⷭ҇твенномꙋ позна́нїю, разорѧ́ющи безбо́жныхъ нече́стїе всѐ, ᲂу҆че́нїемъ премꙋ́дрости посрамлѧ́юще вкꙋ́пѣ, а҆леѯа́ндръ и҆ і҆ѡа́ннъ, съ ни́миже и҆ па́ѵелъ сла́вный.

И҆ ны́нѣ, бг҃оро́диченъ:

Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ:

Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дш҃ꙋ, є҆гда̀ распина́ема ви́дѣла є҆сѝ во́лею, сн҃а и҆ бг҃а твоего̀: є҆го́же благослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀. (с. 562)

Во смра́днѣ мѣ́стѣ ѿве́рглъ є҆сѝ, по подо́бїю і҆ꙋ́ды преда́телѧ хрⷭ҇то́ва, съ ѧ҆зы́чнымъ вкꙋ́пѣ тече́нїемъ, по достоѧ́нїю, ѽ блаже́нне а҆леѯа́ндре!

Ꙗ҆́кѡ ма́слина плодови́та, въ домꙋ̀ бж҃їи стоѧ̀, вѣ́рꙋющыѧ въ ѻ҆́нь приве́лъ є҆сѝ, і҆ѡа́нне, пло́дъ зрѣ́лъ.

Смире́нїѧ крыло́ма вра́жїѧ сѣ́ти и҆збѣ́глъ є҆сѝ: тѣ́мже, прпⷣбне, возвыша́емь, нбⷭ҇ный граждани́нъ, па́ѵле, бы́лъ є҆сѝ.

Бг҃оро́диченъ:

Дв҃ꙋ воспое́мъ, по ржⷭ҇твѣ̀ дв҃ꙋ пребы́вшꙋю, ꙗ҆́кѡ ро́ждшꙋю хрⷭ҇та̀ бг҃а, ѿ ле́сти мі́ръ и҆зба́вльшаго.

Пѣ́снь є҃. І҆рмо́съ:

Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Митрофа́новъ престо́лъ, а҆леѯа́ндре, ᲂу҆краша́ѧ, и҆ пре́жде престо́ла просїѧ́лъ є҆сѝ во ᲂу҆че́нїихъ свѧти́тельскихъ.

А҆́ще и҆ во смире́нїи, ѻ҆́ч҃е, пожи́лъ є҆сѝ, чꙋ́денъ ꙗ҆ви́лсѧ є҆сѝ въ нїке́и бг҃ослове́сными ᲂу҆чє́нїи.

Слове́съ твои́хъ благода́ть ᲂу҆твержда́етъ цр҃ковь, сто́лпъ тѧ̀, і҆ѡа́нне, правосла́вїѧ позна́вши.

Бг҃оро́диченъ:

Дв҃ꙋ по ржⷭ҇твѣ̀ пое́мъ тѧ̀, бцⷣе: ты́ бо бг҃а сло́ва пло́тїю мі́рови родила̀ є҆сѝ.

Пѣ́снь ѕ҃. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Мꙋ́жески по хрⷭ҇то́вѣ побора́ѧ це́ркви, прострѣли́лъ є҆сѝ моли́твенными, ѻ҆́ч҃е, стрѣла́ми, преда́телѧ хрⷭ҇то́ва а҆́рїа, сла́вне.

Ꙗ҆́кѡ лоза̀ вїногра́да жи́зни, і҆ѡа́нне сла́вне, мно́гъ возрасти́лъ є҆сѝ влⷣцѣ твоемꙋ̀ пло́дъ, всеблаже́нне.

Бѣжа́ти и҆зво́лилъ є҆сѝ благоче́стнѡ ѿ ца́рскагѡ гра́да, і҆кѡ́ннагѡ поклоне́нїѧ ѿмета́ющасѧ беззако́ннѡ, па́ѵле всече́стне.

Бг҃оро́диченъ:

Ꙗ҆́же є҆ди́на сло́вомъ пло́тїю сло́ва ро́ждши, и҆зба́ви, мо́лимсѧ, ѿ сѣ́ти вра́жїѧ дꙋ́шы на́шѧ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

И҆́рѡдъ прⷣте́че, беззако́нновавъ, женѣ̀ подадѐ главꙋ̀ твою̀ честнꙋ́ю, є҆́йже покланѧ́ющесѧ весели́мсѧ: и҆рѡді́а же пла́четъ и҆ рыда́етъ, и҆ и҆́рѡдъ, и҆ плѧса́вшаѧ.

І҆́косъ:

Оу҆гото́вимсѧ, бра́тїе, къ бжⷭ҇твенномꙋ пи́рꙋ: се́ бо прⷣте́чева бг҃оно́снаѧ глава̀, ꙗ҆́коже бра́шно чи́сто въ це́ркви предлага́етсѧ на́мъ, ꙗ҆́же крѡ́ви пролива́ющи, и҆сцѣлє́нїѧ же па́че и҆спꙋща́ющи, и҆ и҆̀же ѿ пїѧ́нства грѣхо́внагѡ болѧ́щыѧ, и҆сцѣлѧ́ющи лѣчба́ми по́стными. никто́же ᲂу҆́бѡ пи́щею тлѣ́нною да ᲂу҆держи́тсѧ, и҆ лиши́тсѧ прⷣте́чи ны́нѣ бжⷭ҇твенныѧ пи́щи. мі́ръ ᲂу҆́бѡ весели́тсѧ, и҆рѡді́а же пла́четъ и҆ рыда́етъ, и҆ и҆́рѡдъ, и҆ плѧса́вшаѧ.

Пѣ́снь з҃. І҆рмо́съ:

Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Таи́нникъ и҆́стиннѡ пребжⷭ҇твенныѧ трⷪ҇цы ꙗ҆ви́лсѧ є҆сѝ, пребога́те, чи́стѡ нетлѣ́ннѣй слꙋжи́лъ є҆сѝ, поѧ̀ ѿ се́рдца, а҆леѯа́ндре: ѻ҆тє́цъ на́шихъ бж҃е, бл҃гослове́нъ є҆сѝ.

Сокро́вище тѧ̀ ᲂу҆че́нїй и҆ и҆сто́чника чꙋде́съ хрⷭ҇то́съ показа̀, и҆сточа́юща бога́тство бг҃оразꙋ́мїѧ, і҆ѡа́нне, зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

Равноа́гг҃льное житїѐ, па́ѵлꙋ бжⷭ҇твенномꙋ, и҆ тебѣ̀ тезоимени́томꙋ, въ широтѣ́ же се́рдца и҆злїѧ́нїѧ премꙋ́дрости, и҆ въ ра́зꙋмѣ неизглаго́ланнѣмъ, тѧ̀ подсо́лнечнѣй все́й просла́ви, бг҃омꙋ́дре.

Бг҃оро́диченъ:

Ѿ дв҃и́ческагѡ чре́ва вопло́щсѧ, ꙗ҆ви́лсѧ є҆сѝ на спасе́нїе на́ше. тѣ́мже твою̀ мт҃рь вѣ́дꙋще бцⷣꙋ, благода́рственнѡ зове́мъ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

Ѕлочести́ваго, моли́твою прилѣ́жною твое́ю, а҆́рїа ᲂу҆би́въ, а҆леѯа́ндре бг҃омꙋ́дре, въ ме́рзскихъ мѣ́стѣхъ ᲂу҆дави́лъ є҆сѝ ꙗ҆́коже дрꙋга́го і҆ꙋ́дꙋ, подо́бными ѻ҆́бразы ѿстꙋ́пльша ѕлѣ̀.

Бг҃обо́рецъ хрⷭ҇то́вꙋ ри́зꙋ раздра́вый, ꙗ҆́кѡ преда́тель, ни́цъ просѣ́десѧ посредѣ̀, и҆ ны́нѣ въ гее́ннѣ мꙋче́нїю подлежи́тъ, ꙗ҆́коже дрꙋгі́й і҆ꙋ́да, а҆́рїй безꙋ́мный, а҆леѯа́ндре треблаже́нне.

Воздержа́нїемъ ꙗ҆́кѡ безпло́тенъ ꙗ҆ви́лсѧ є҆сѝ, бдѣ́нми ꙗ҆́кѡ премно́гѡ, во ᲂу҆че́нїихъ вы́нꙋ бы́лъ є҆сѝ, и҆ и҆сто́чникъ ра́йскїй бога́тъ, і҆ѡа́нне, во всѧ̑ вѣ́ки.

Бг҃оро́диченъ:

Стра́шное твоѐ ржⷭ҇тво̀, бцⷣе, ка́кѡ воспое́тъ человѣ́ческое ликостоѧ́нїе: ꙗ҆́кѡ дв҃а пребыва́еши и҆ ро́ждши, вои́стиннꙋ па́че сло́ва, и҆ вы́ше вины̀ твоѧ̑ та̑йны, бг҃ороди́тельнице;

Пѣ́снь ѳ҃. І҆рмо́съ:

Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Зако́ненъ бы́въ прпⷣбенъ ᲂу҆чени́къ тво́й, и҆ живонѡ́снымъ твои̑мъ словесє́мъ повинꙋ́ѧсѧ а҆леѯа́ндръ, ст҃и́тель бы́въ, ѽ митрофа́не, кро́токъ и҆ цѣломꙋ́дръ, ны́нѣ по достоѧ́нїю ᲂу҆блажа́етсѧ.

Таи́нникъ и҆звѣ́стенъ бы́лъ є҆сѝ, ѻ҆́ч҃е, неизрече́нныхъ, ѽ бг҃облаже́нне і҆ѡа́нне всебога́те, и҆ тайново́децъ неизглаго́ланныхъ ᲂу҆стро́илсѧ є҆сѝ. тѣ́мже, ѻ҆́ч҃е, трⷪ҇цꙋ бж҃е́ственнꙋю проповѣ́далъ є҆сѝ.

Тѧ̀ неѕло́бива и҆ прпⷣбна, ѻ҆́ч҃е, па́стырѧ, непоро́чна, чи́ста и҆ нескве́рна, цѣломꙋ́дренна же и҆ сла́вна, и҆́стины сло́ва и҆спра́вльша, по достоѧ́нїю, па́ѵле, почита́емъ.

Ѽ бг҃облаже́ннаѧ тро́ице ѻ҆тє́цъ чꙋ́дныхъ! ны́нѣ на нб҃сѣ́хъ безсме́ртнымъ ѡ҆боже́на бж҃ество́мъ, є҆мꙋ́же на землѝ благоче́стнѡ послꙋжи́сте, моли́ти ѡ҆ ста́дѣ не преста́йте.

Бг҃оро́диченъ:

Ст҃а́ѧ всенепоро́чнаѧ, сосꙋ́де 18 благово́нїѧ, молѝ хрⷭ҇та̀, є҆го́же родила̀ є҆сѝ, во́инствꙋ ᲂу҆́бѡ побѣ̑днаѧ и҆ рабо́тнагѡ и҆́га да́ти ѡ҆сла́бꙋ лю́демъ твои̑мъ: тѧ́ бо непреста́ннѡ велича́емъ.

Свѣти́ленъ прⷣте́чи.

На стїхо́внѣ стїхи̑ры ѻ҆ктѡ́иха. Сла́ва, гла́съ и҃:

Прⷣте́че сп҃совъ, ты̀ царѧ̀ и҆з̾ѡбличи́лъ є҆сѝ беззако́нїѧ не дѣ́лати. тѣ́мже и҆гра́нїе беззако́нныѧ жены̀, повинꙋ̀ и҆́рѡда ѿсѣщѝ твою̀ главꙋ̀: и҆ сегѡ̀ ра́ди ѿ востѡ́къ со́лнца да́же до за̑падъ хва́льнѡ и҆́мѧ твоѐ. дерзнове́нїе и҆мѣ́ѧ ко гдⷭ҇ꙋ, прилѣ́жнѡ молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:

Подо́бенъ: Ѽ пресла́внагѡ чꙋдесѐ!

А҆́гница, а҆́гнца ꙗ҆́кѡ ви́дѣ, ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ: ꙳ сн҃е мо́й, что̀ стра́нное сїѐ видѣ́нїе; ꙳ всѣ̑мъ живо́тъ даѧ́й ꙗ҆́кѡ гдⷭ҇и, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ земны̑мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.

Слꙋ́жба благода́рственнаѧ бг҃ꙋ, въ трⷪ҇цѣ ст҃ѣ́й сла́вимомꙋ, на воспомина́нїе заключе́ннагѡ ми́ра, междꙋ̀ і҆мпе́рїею рѡссі́йскою и҆ коро́ною свѣ́йскою.

И҆ на пренесе́нїе моще́й ст҃а́гѡ бл҃говѣ́рнагѡ вели́кагѡ кнѧ́зѧ а҆леѯа́ндра не́вскагѡ.

На ма́лѣй вече́рни, стїхи̑ры, гла́съ а҃. Поⷣ: Всехва́льнїи мч҃ницы:

Ѿ благочести́вагѡ ко́рене ꙳ свѧтопома́заннаѧ розга̀ произше́дъ, ꙳ пло́дъ прине́слъ є҆сѝ тебѐ преподо́бїѧ и҆ пра́вды, ꙳ преми́рнѡ бл҃гоꙋха́ѧ ꙳ вѣ́рнѡ ѿ дꙋшѝ чтꙋ́щыѧ тѧ̀: ꙳ ѡ҆ ни́хже со а҆́гг҃лы ꙳ хрⷭ҇тꙋ̀ моли́сѧ, блаже́нне, дарова́ти ми́ръ ꙳ и҆ ве́лїю ми́лость.

Мѡѷсе́а и҆ па́ѵла ре́вности подража́въ, ꙳ и҆зво́лилъ па́че страда́ти ꙳ за лю́ди бж҃їѧ: ꙳ тѣ́мже и҆ къ ѕлочести̑вымъ ва́рварѡмъ ше́дъ, ꙳ невре́днѡ возврати́лсѧ є҆сѝ, ꙳ тишинꙋ̀ ѻ҆те́чествꙋ твоемꙋ̀ приносѧ̀. ꙳ ны́нѣ ᲂу҆́бѡ со ст҃ы́ми пребыва́ѧ, ꙳ ми́рное житїѐ ꙳ ᲂу҆ гдⷭ҇а и҆спросѝ наслѣ́дїю твоемꙋ̀.

Благоче́стїемъ и҆ вѣ́рою ꙳ пресвѣ́тлѡ ᲂу҆кра́шенъ, ꙳ ꙗ҆́кѡ благочести́въ скипетроно́сецъ, ꙳ и҆ преизрѧ́денъ и҆ преимени́тъ, ꙳ пречⷭ҇тыѧ трⷪ҇цы побо́рникъ бы́лъ є҆сѝ: ꙳ ѿ неѧ́же просвѣти́всѧ, ꙳ чꙋде́съ свѣ́тъ мі́рꙋ провозсїѧ́лъ є҆сѝ, ꙳ и҆ моли́твенникъ ꙗ҆ви́лсѧ є҆сѝ ꙳ ѡ҆ дꙋша́хъ на́шихъ.

Сла́ва, гла́съ ѕ҃:

Благовѣ́рне кнѧ́же а҆леѯа́ндре, и҆зъ мла́да возлюби́въ хрⷭ҇та̀, бг҃оимени́тъ вѣнцено́сецъ бы́лъ є҆сѝ, прпⷣбїемъ и҆ пра́вдою свѣ́тлѡ ᲂу҆кра́шенъ: ми́лостынѧми же и҆ чистото́ю, простра́нное селе́нїе бы́лъ є҆сѝ дх҃а ст҃а́гѡ. є҆мꙋ́же непреста́ннѡ моли́сѧ, є҆́же сохрани́тисѧ ѻ҆те́чествꙋ твоемꙋ̀, ѿ пога́ныхъ неѡбори́мꙋ бы́ти, и҆ сыновѡ́мъ рѡссі̑йскимъ спасти́сѧ.

И҆ ны́нѣ, пра́здника, гла́съ а҃:

Ве́лїѧ и҆ пресла́внаѧ, гдⷭ҇и, ми́лость твоѧ̀ въ ро́дѣ рѡссі́йскомъ ꙗ҆ви́сѧ, ꙗ҆́кѡ и҆̀хже пред̾ꙋста́вилъ, си́хъ и҆ ѡ҆правда́лъ є҆сѝ соѡбра̑знымъ бы́ти вели́чествїю смотре́нїй твои́хъ. и҆скꙋ́сства нико́егѡ и҆мꙋ́ще, въ бра́нь жесто́кꙋю со всеискꙋ́сными внидо́хомъ. безси̑льныѧ, не и҆спыта́вше на́шеѧ си́лы, ѻ҆рꙋ́жїе воспрїѧ́хомъ на всеѻрꙋ̑жныѧ. но пособи́вый, гдⷭ҇и, кро́ткомꙋ даві́дꙋ, ты̀ и҆ на́ши рꙋ́цѣ ᲂу҆крѣпи́лъ є҆сѝ на ѡ҆полче́нїе. тѣ́мже ны́нѣ въ ми́рѣ торжествꙋ́юще пое́мъ: ве́лїй є҆сѝ, гдⷭ҇и, и҆ чꙋ́дна дѣла̀ твоѧ̑, сла́ва тебѣ̀.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

До́мъ ст҃а́гѡ дх҃а, ꙳ поспѣше́нїемъ бл҃года́ти, ꙳ а҆леѯа́ндръ ꙗ҆ви́сѧ: ꙳ тѣ́мже ны́нѣ соше́дшесѧ, ꙳ томꙋ̀ воспои́мъ пѣ́снь.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, царе́й рѡссі́йскихъ похвало̀, ꙳ и҆ во́инѡвъ соблюде́нїе, ꙳ ва́рварѡвъ побѣжде́нїе, ꙳ сирѡ́тъ и҆ вдѡ́въ застꙋ́пниче, ꙳ и҆ ѻ҆те́чества на́шегѡ ᲂу҆твержде́нїе.

Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆го̀ восхо́щетъ ѕѣлѡ̀.

Прїимѝ ны́нѣ пѣ́нїе ꙳ люде́й твои́хъ, бл҃же́нне, ꙳ и҆ молѧ́щымсѧ тѝ ꙳ ᲂу҆ хрⷭ҇та̀ и҆спросѝ грѣхѡ́въ и҆збавле́нїе, ꙳ да ᲂу҆блажа́емъ тѧ̀ при́снѡ.

Сла́ва, гла́съ и҃:

Бг҃омꙋ́дре а҆леѯа́ндре вели́кїй кнѧ́же, блаже́нъ є҆сѝ, ꙗ҆́кѡ блаже́нство наслѣ́дивый, є҆гѡ́же ра́ди житїѧ̀ сегѡ̀ небре́глъ є҆сѝ, неѿло́жнѡ тогѡ̀ взыскꙋ́ѧ, ни́щыѧ ᲂу҆довли́лъ є҆сѝ, сирѡ́тъ пита́тель, плѣ́нныхъ свободи́тель бы́въ: тѣ́мъ въ нестарѣ́емꙋю ра́дость вше́лъ є҆сѝ гдⷭ҇а твоегѡ̀. є҆мꙋ́же со а҆́гг҃лы предстоѧ̀, молѝ вѣ́рою пою́щымъ тѧ̀ гобзова́нїе щедрѡ́тъ пода́ти, и҆ грѣхѡ́въ ѡ҆ставле́нїе.

И҆ ны́нѣ, пра́здника, гла́съ з҃:

Прїиди́те, возра́дꙋемсѧ гдⷭ҇еви, дади́мъ вели́чїе бг҃ꙋ на́шемꙋ, наꙋчи́вшемꙋ рꙋ́цѣ на́шѧ на ѡ҆полче́нїе, и҆ пе́рсты на́шѧ воѡрꙋжи́вшемꙋ на бра́нь: вѣнча́вшемꙋ же на́съ всежела́емымъ ми́ромъ, и҆спо́лнившемꙋ во бл҃го́е намѣ́ренїе на́ше, и҆ си́мъ многовре́менное вражды̀ средостѣ́нїе разори́вшемꙋ, и҆ велегла́снѡ возопїе́мъ къ немꙋ̀: кто̀ бо́гъ ве́лїй ꙗ҆́кѡ бг҃ъ на́шъ; вои́стиннꙋ є҆ди́нъ є҆сѝ творѧ́й чꙋдеса̀.

Тропа́рь, гла́съ д҃:

Позна́й свою̀ бра́тїю, рѡссі́йскїй і҆ѡ́сифе, не въ є҆гѵ́птѣ, но на нб҃сѝ ца́рствꙋющїй, благовѣ́рный кнѧ́же а҆леѯа́ндре, и҆ прїимѝ молє́нїѧ и҆́хъ, ᲂу҆множа́ѧ жи̑та лю́демъ плодоно́сїемъ землѝ твоеѧ̀, гра́ды влады́чествїѧ твоегѡ̀ ѡ҆гражда́ѧ моле́нїемъ: и҆ правосла̑внымъ хрⷭ҇тїа́нѡмъ на сопроти̑вныѧ спобо́рствꙋѧ.

Сла́ва, и҆ ны́нѣ, гла́съ и҃:

Бл҃гослове́нъ є҆сѝ, хрⷭ҇тѐ бж҃е на́шъ, и҆́же невѣ́дꙋщыѧ ны̀, во бра́ни премꙋ̑дрыѧ ꙗ҆вле́й, дарова́въ на́мъ крѣ́пость и҆ си́лꙋ бл҃года́ти твоеѧ̀, и҆збра́вый мꙋ́жа по се́рдцꙋ твоемꙋ̀, благовѣ́рнаго і҆мпера́тора на́шего петра̀, ᲂу҆крѣпи́вый мꙋ́жествомъ подвиза́ющеесѧ во́инство: и҆́мже и҆ си́ми рѡссі́и ми́ръ тво́й дарова́вый, чл҃вѣколю́бче, сла́ва тебѣ̀.

На вели́цѣй вече́рни, стїхи̑ры благода́рствєнныѧ, на д҃, гла́съ а҃:

Ѻ҆́ч҃е пребл҃гі́й, трїѷпоста́сный влⷣко, є҆ди́не во всѣ́хъ чꙋдодѣ́йствꙋѧй, прїимѝ ѿ на́съ благода́рствєнныѧ сїѧ̑ моли̑твы, ꙗ҆́кѡ вдовы̀ кодра́нтъ, твоемꙋ̀ бл҃гоꙋтро́бїю приноси̑мыѧ. что́ бо возда́мы тебѣ̀ ѡ҆ всеще́дрыхъ собы́вшихсѧ на на́съ смотре́нїихъ; твое́ю всеси́льною десни́цею пресла́вными ᲂу҆вѣнча́лъ є҆сѝ на́съ побѣ́дами: неискꙋ́сныхъ въ вои́нскомъ правле́нїи препоѧ́салъ си́лою на премꙋ̑дрыѧ, и҆ по толи́кихъ неча́ѧнныхъ вели́кихъ побѣ́дахъ, пресла́внымъ ми́ромъ ѡ҆гради́лъ предѣ́лы на́шѧ. тебѣ̀ ᲂу҆̀бо є҆ди́номꙋ всѧ̑ сїѧ̑ восписꙋ́юще, и҆ побѣди́тєльныѧ пѣ̑сни воспѣва́юще, зове́мъ: сла́ва тебѣ̀, всѣ́хъ бл҃ги́хъ пода́телю.

Ве́лїѧ и҆ пресла́внаѧ, гдⷭ҇и, ми́лость твоѧ̀ въ ро́дѣ рѡссі́йскомъ ꙗ҆ви́сѧ, ꙗ҆́кѡ и҆̀хже пред̾ꙋста́вилъ, си́хъ и҆ ѡ҆правда́лъ є҆сѝ соѡбра̑знымъ бы́ти вели́чествїю смотре́нїй твои́хъ. и҆скꙋ́сства нико́егѡ и҆мꙋ́ще, въ бра́нь жесто́кꙋю со всеискꙋ́сными внидо́хомъ: безси̑льныѧ, не и҆спыта́вше на́шеѧ си́лы, ѻ҆рꙋ́жїе воспрїѧ́хомъ на всеѻрꙋ̑жныѧ. но пособи́вый, гдⷭ҇и, кро́ткомꙋ дв҃дꙋ, ты̀ и҆ на́ши рꙋ́цѣ наꙋчи́лъ є҆сѝ на ѡ҆полче́нїе. тѣ́мже ны́нѣ въ ми́рѣ торжествꙋ́юще, пое́мъ: ве́лїй є҆сѝ, гдⷭ҇и, и҆ чꙋ̑дна дѣла̀ твоѧ̑, сла́ва тебѣ̀.

Назира́хꙋ пре́жде ѻ҆кре́стнїи наро́ди, ᲂу҆кло́нше на рѡссі́ю ѻ҆чеса̀ своѧ̑, и҆ є҆ѧ̀ си̑лы въ себѣ̀ разсмотрѣва́юще, со ѡ҆пасе́нїемъ мно́гимъ разсꙋжда́хꙋ: ка́кѡ свѣ́тъ ᲂу҆че́нїѧ ѿврати́ти; и҆скꙋ́сства во́инскагѡ и҆ морепла́ванїѧ не допꙋсти́ти, бра́ни наче́ншїѧсѧ не протѧза́ти; да не си́ми дви́жемїи и҆скꙋ́съ ᲂу҆че́нїѧ позна́ютъ, но ны́нѣ ᲂу҆ви́дѣша, є҆́же никогда́же ча́ѧхꙋ ви́дѣти: непоколеби́мое всемꙋ̀ положѝ пе́тръ ѡ҆снова́нїе на тве́рдомъ ка́мени наде́жды въ бз҃ѣ, є҆го́же и҆ благодари́мъ дарова́вшаго на́мъ сицевы̑ѧ своѧ̑ ми́лѡсти.

Та́же стїхи̑ры ст҃о́мꙋ на д҃, гла́съ ѕ҃:

По и҆́мени твоемꙋ̀ та́кѡ и҆ житїѐ твоѐ, благовѣ́рный кнѧ́же а҆леѯа́ндре: мꙋ́жествомъ бо на землѝ, и҆ до́брымъ правле́нїемъ, ны́нѣ же на нб҃сѝ моли́твами помоществꙋ́еши лю́демъ твои̑мъ. тѣ́мже тѧ̀ и҆ въ тебѣ̀ сла́вимаго во ст҃ы́хъ свои́хъ бг҃а почита́емъ. (с. 570)

До́бръ строи́тель и҆ до́бль во́инъ, ски́петромъ на престо́лѣ пра́вѡ пра́вѧ, и҆ во бра́ни ѻ҆рꙋ́жїемъ защища́ѧ лю́ди твоѧ̑, сꙋгꙋ́быѧ че́сти сподо́билсѧ є҆сѝ ѿ вы́шнѧгѡ прави́телѧ и҆ гдⷭ҇а саваѡ́ѳа.

Бо́льшїѧ любвѐ никто́же и҆́мать ѿ сеѧ̀, а҆́ще кто̀ положи́тъ дꙋ́шꙋ свою̀ за дрꙋ́ги своѧ̑: сицево́ю лю́ди твоѧ̑ возлюби́лъ є҆сѝ, на ѻ҆рꙋ́жїе вра́жїе за нѧ̀ мꙋ́жественнѡ и҆сходѧ̀, бг҃ꙋ ѡ҆сѣнѧ́ющꙋ надъ главо́ю твое́ю въ де́нь бра́ни.

Мѡѷсе́а и҆ дв҃да и҆ про́чїихъ люде́й бж҃їихъ вождѡ́въ подража́ѧ, мꙋ́жественнѡ во бра́нѣхъ за лю́ди твоѧ̑ подвиза́лсѧ є҆сѝ: тѣ́мже и҆ на нб҃сѝ съ ни́ми побѣди́тель торжествꙋ́еши, молѧ́сѧ ѡ҆ во́инствꙋющихъ ко гдⷭ҇ꙋ.

Сла́ва, гла́съ ѕ҃:

Весели́сѧ, і҆́жерскаѧ землѐ, и҆ всѧ̀ рѡссі́йскаѧ страна̀, варѧ́жское мо́ре, восплещѝ рꙋка́ми, нево̀ рѣко̀, распространѝ своѧ̑ стрꙋи̑: се́ бо кнѧ́зь тво́й и҆ влⷣка, ѿ и҆́га свѣ́йскагѡ тѧ̀ свободи́вый, торжествꙋ́етъ во гра́дѣ бж҃їи, є҆го́же веселѧ́тъ рѣ̑чнаѧ ᲂу҆стремлє́нїѧ.

И҆ ны́нѣ, гла́съ и҃:

Ве́лїе чꙋ́до бы́сть во і҆и҃ли просвѣще́нїемъ ѿ гдⷭ҇а є҆ди́нагѡ человѣ́ка, глаго́лахꙋ бо: кто̀ когда̀ ѿве́рзе ѻ҆́чи слѣпорожде́ннꙋ; но ны́нѣ то́йже несравни́тельное чꙋ́до на́мъ содѣ́ла, є҆гда̀ не є҆ди́номꙋ, но всемꙋ̀ наро́дꙋ ѻ҆́чи къ ра́зꙋмꙋ ѿве́рзе, и҆ си́мъ ᲂу҆ничиже́нїе на́ше ѿѧ́тъ. зри́те, ѻ҆крє́стныѧ страны̑, во є҆ди́но всѧ̑ согласи́вшыѧсѧ, да возмо́гꙋтъ во тмѣ̀ пе́рвагѡ невѣ́жества рѡссі́ю ᲂу҆держа́ти: но са́ми намѣ́ренїе своѐ забы́вше, въ протѧже́нїе долговре́менныѧ бра́ни встꙋпи́ша, и҆ є҆́же всѣ́ми ѻ҆́бразы ѿвраща́хꙋ, къ семꙋ̀ са́ми да́ша поѡщре́нїе. сицевы̑ѧ сꙋ́ть сꙋдьбы̑ бж҃їѧ: совѣ́ты є҆гѡ̀ не сꙋ́ть ꙗ҆́кѡ совѣ́ты человѣ́чєскїѧ, возвыша́етъ и҆ низверга́етъ и҆̀хже благоволи́тъ. ны́нѣ сбы́шасѧ речє́нїѧ а҆пⷭ҇льскаѧ: бꙋ́ее бж҃їе премꙋ́дрѣе человѣ̑къ є҆́сть, и҆ немощно́е бж҃їе крѣпча́е человѣ̑къ є҆́сть: и҆́бо немощны̑ѧ и҆ ᲂу҆ничижє́нныѧ и҆збра̀ бг҃ъ, да посрами́тъ крѣ̑пкаѧ, и҆ не сꙋ̑щаѧ, да сꙋ̑щаѧ ᲂу҆праздни́тъ, ꙗ҆́кѡ да не похва́литсѧ всѧ́каѧ пло́ть предъ бг҃омъ.

Та́же вхо́дъ, и҆ прокі́менъ днѐ.

Прⷪ҇ро́чества и҆са́їина чте́нїе.

[Глава̀ ѯ҃з] Весели́сѧ, і҆ерⷭ҇ли́ме, и҆ торжествꙋ́йте въ не́мъ всѝ лю́бѧщїи є҆го̀, ра́дꙋйтесѧ вкꙋ́пѣ: ра́дꙋйтесѧ всѝ, є҆ли́цы пла́касте по не́мъ, да сса́вше насытите́сѧ ѿ сосє́цъ ᲂу҆тѣше́нїѧ є҆гѡ̀, да сса́вше насытите́сѧ ѿ вхо́да сла́вы є҆гѡ̀, ꙗ҆́кѡ сѐ гл҃го́летъ гдⷭ҇ь: Сѐ а҆́зъ совращꙋ̀ въ нѧ̀ ꙗ҆́кѡ рѣкꙋ̀ ми́ра, и҆ ꙗ҆́кѡ пото́къ потоплѧ́ющь сла́вꙋ ꙗ҆зы́кѡмъ. Дѣ́ти и҆́хъ на ра́мꙋ воздви́гнꙋтсѧ, и҆ на колѣ́нꙋ ᲂу҆тѣ́шатсѧ: ꙗ҆́коже кого̀ ма́ти є҆гѡ̀ ᲂу҆тѣша́етъ, та́коже и҆ а҆́зъ ᲂу҆тѣ́шꙋ вы̀, и҆ во і҆ерⷭ҇ли́мѣ ᲂу҆тѣ́шитесѧ, и҆ ᲂу҆́зрите, и҆ возра́дꙋетсѧ се́рдце ва́ше. И҆ кѡ́сти ва́шѧ ꙗ҆́кѡ трава̀ прозѧ́бнꙋтъ, и҆ позна́етсѧ рꙋка̀ гдⷭ҇нѧ чтꙋ́щымъ и҆̀, и҆ воспрети́тъ непокарѧ́ющымсѧ. Та́кѡ гл҃го́летъ гдⷭ҇ь и҆збавле́й тѧ̀, бг҃ъ і҆и҃левъ.

Прⷪ҇ро́чества и҆са́їина чте́нїе.

[Глава̀ ѯ҃а] Да возра́дꙋетсѧ дꙋша̀ моѧ̀ ѡ҆ гдⷭ҇ѣ, ѡ҆блече́ бо мѧ̀ въ ри́зꙋ спасе́нїѧ, и҆ ѻ҆де́ждею весе́лїѧ ѡ҆дѣ́ѧ мѧ̀, ꙗ҆́кѡ женихꙋ̀ возложѝ мнѣ̀ вѣне́цъ, и҆ ꙗ҆́кѡ невѣ́стꙋ ᲂу҆краси́ мѧ красото́ю. И҆ ꙗ҆́кѡ землѧ̀ растѧ́щаѧ цвѣ́тъ сво́й, и҆ ꙗ҆́кѡ вертогра́дъ сѣ́мена своѧ̑ прозѧба́етъ: та́кѡ возсїѧ́етъ гдⷭ҇ь пра́вдꙋ, и҆ ра́дость предъ всѣ́ми ꙗ҆зы̑ки. [Глава̀ ѯ҃в] Сїѡ́на ра́ди не ᲂу҆мо́лкнꙋ, и҆ і҆ерⷭ҇ли́ма ра́ди не попꙋщꙋ̀, до́ндеже ᲂу҆́бѡ и҆зы́детъ ꙗ҆́кѡ цвѣ́тъ пра́вда моѧ̀, спасе́нїе же моѐ ꙗ҆́кѡ свѣща̀ разжже́тсѧ. И҆ ᲂу҆́зрѧтъ ꙗ҆зы́цы пра́вдꙋ твою̀, и҆ всѝ ца́рїе зе́мстїи сла́вꙋ твою̀: и҆ (с. 572) нарекꙋ́тсѧ и҆́менемъ твои́мъ но́вымъ, є҆́же гдⷭ҇ь и҆менꙋ́етъ є҆̀. И҆ бꙋ́деши вѣне́цъ добро́ты въ рꙋцѣ̀ гдⷭ҇ни, и҆ дїади́ма ца́рствїѧ въ рꙋцѣ̀ бг҃а твоегѡ̀. И҆ ктомꙋ̀ не нарече́шисѧ ѡ҆ста́вленъ, и҆ землѧ̀ твоѧ̀ ктомꙋ̀ не нарече́тсѧ пꙋста̀. Тебѣ́ бо нарече́тсѧ во́лѧ моѧ̀, и҆ землѧ̀ твоѧ̀ вселе́ннаѧ, ꙗ҆́кѡ благоволи́тъ гдⷭ҇ь въ тебѣ̀, и҆ землѧ̀ твоѧ̀ насели́тсѧ. И҆ ꙗ҆́кѡ живы́й ю҆́ноша съ дѣ́вою, та́кѡ поживꙋ́тъ сы́нове твоѝ съ тобо́ю. И҆ бꙋ́детъ, и҆́мже ѻ҆́бразомъ возвесели́тсѧ жени́хъ ѡ҆ невѣ́стѣ, та́кѡ возвесели́тсѧ гдⷭ҇ь ѡ҆ тебѣ̀.

Прⷪ҇ро́чества и҆са́їина чте́нїе.

[Глава̀ ѯ҃] Свѣти́сѧ, свѣти́сѧ, і҆ерⷭ҇ли́ме, прїи́де бо тво́й свѣ́тъ, и҆ сла́ва гдⷭ҇нѧ на тебѣ̀ возсїѧ̀. Ꙗ҆́кѡ сѐ тма̀ покры́етъ зе́млю и҆ мра́къ на ꙗ҆зы́ки: на тебѣ́ бо ꙗ҆ви́тсѧ гдⷭ҇ь, и҆ сла́ва є҆гѡ̀ на тебѣ̀ ᲂу҆́зритсѧ. И҆ по́йдꙋтъ ца́рїе свѣ́томъ твои́мъ, и҆ ꙗ҆зы́цы свѣ́тлостїю восто́ка твоегѡ̀. Возведѝ ѻ҆́крестъ ѻ҆́чи твоѝ, и҆ ви́ждь сѡ́браннаѧ ча̑да твоѧ̑. Прїи́дꙋтъ всѝ сы́нове твоѝ и҆здале́ча и҆ дщє́ри твоѝ на ра́мѣхъ во́змꙋтсѧ. Тогда̀ ᲂу҆́зриши и҆ возра́дꙋешисѧ, и҆ ᲂу҆бои́шисѧ, и҆ ᲂу҆жа́снешисѧ се́рдцемъ, є҆гда̀ преложи́тъ на тѧ̀ бога́тство мо́рѧ, и҆ ꙗ҆зы̑къ и҆ люде́й, и҆ прїи́дꙋтъ тѝ стада̀ велблꙋ̑дъ, и҆ покры́ютъ тѧ̀ велблꙋ́ды мадїа́мстїи и҆ гефа́рстїи, всѝ ѿ сава̀ прїи́дꙋтъ, носѧ́ще тебѣ̀ зла́то и҆ лїва́нъ, принесꙋ́тъ тебѣ̀ и҆ ка́мень че́стенъ, и҆ спасе́нїе ѿ гдⷭ҇а благовѣстѧ́тъ. И҆ всѧ̑ ѻ҆́вцы кида̑рскїѧ соберꙋ́тсѧ тебѣ̀, и҆ ѻ҆внѝ навеѡ́ѳстїи прїи́дꙋтъ тебѣ̀, и҆ вознесꙋ́тсѧ прїѧ̑тнаѧ на же́ртвенникъ мо́й, и҆ до́мъ моли́твы моеѧ̀ просла́витсѧ. Кі́и сꙋ́ть, и҆̀же ꙗ҆́кѡ ѻ҆́блацы лета́ютъ, и҆ ꙗ҆́кѡ го́лꙋбїе со птєнцы̀ свои́ми; Со мно́ю є҆́сть сїѡ́нъ, менѐ ѻ҆́строви ѡ҆жида́ша, и҆ караблѝ ѳарсі́йстїи въ пе́рвыхъ, є҆́же привестѝ ча̑да твоѧ̑ и҆здале́ча: и҆ сребро̀ и҆ зла́то и҆́хъ съ ни́ми, за и҆́мѧ гдⷭ҇не ст҃о́е, и҆ за є҆́же ст҃о́мꙋ і҆и҃левꙋ сла́внꙋ бы́ти. И҆ сози́ждꙋтъ сы́нове и҆норо́днїи стѣ́ны твоѧ̑, и҆ ца́рїе и҆́хъ предста́нꙋтъ тебѣ̀: за гнѣ́въ бо мо́й порази́хъ тѧ̀, и҆ за ми́лость мою̀ возлюби́хъ тѧ̀. И҆ ѿве́рзꙋтсѧ врата̀ твоѧ̑, і҆ерⷭ҇ли́ме, вы́нꙋ де́нь и҆ но́щь, и҆ не затворѧ́тсѧ, є҆́же ввестѝ къ тебѣ̀ си́лꙋ ꙗ҆зы́кѡвъ, и҆ царѝ и҆́хъ ведѡ́мыѧ. Ꙗ҆зы́цы бо и҆ ца́рїе, и҆́же тебѣ̀ не порабо́таютъ, поги́бнꙋтъ: и҆ ꙗ҆зы́цы запꙋстѣ́нїемъ запꙋстѣ́ютъ. И҆ сла́ва лїва́нова къ тебѣ̀ прїи́детъ въ кѷпарі́сѣ и҆ пе́ѵкѣ и҆ ке́дрѣ вкꙋ́пѣ, просла́вити мѣ́сто ст҃о́е моѐ, и҆ мѣ́сто но́гъ мои́хъ просла́влю. И҆ по́йдꙋтъ къ тебѣ̀ боѧ́щїисѧ, сы́нове смири́вшихъ тѧ̀ и҆ прогнѣ́вавшихъ тѧ̀, и҆ покло́нѧтсѧ слѣда́мъ но́гъ твои́хъ всѝ прогнѣ́вавшїи тѧ̀: и҆ нарече́шисѧ гра́дъ гдⷭ҇ень, сїѡ́нъ ст҃а́гѡ і҆и҃лева. За є҆́же бы́ти тебѣ̀ ѡ҆ста́вленꙋ и҆ возненави́дѣнꙋ, и҆ не бѣ̀ помога́ѧй тебѣ̀, и҆ положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ. И҆ ссе́ши млеко̀ ꙗ҆зы́кѡвъ, и҆ бога́тство царе́й снѣ́си: и҆ разꙋмѣ́еши, ꙗ҆́кѡ а҆́зъ гдⷭ҇ь спаса́ѧй тѧ̀, и҆ и҆збавлѧ́ѧй тѧ̀ бг҃ъ і҆и҃левъ.

На лїті́и стїхи̑ры, гла́съ а҃:

Гдⷭ҇а си́лъ, да́вшаго на́мъ крѣ́пость, дне́сь лю́дїе просла́вимъ: се́й бо бг҃ъ на́шъ, и҆ не вмѣни́тсѧ и҆́нъ къ немꙋ̀, се́й под̾ѧ́тъ на́съ, и҆ не возвели́чи ᲂу҆кори́вшыѧ ны̀. бг҃ъ сы́й мі́ра, ѻ҆ц҃ъ щедрѡ́тъ, благословѝ достоѧ́нїе своѐ ми́ромъ. се́й цр҃ь ца́рствꙋющихъ, мѡѷсе́емъ сохрани́вый лю́ди і҆и҃льтєскїѧ, и҆ ны́нѣ петро́мъ и҆зба́вивый ѿ бѣ́дъ рѡссі́ю: томꙋ̀ всегда̀ сла́вꙋ и҆ че́сть принесе́мъ.

Та́же ст҃о́мꙋ, гла́съ д҃:

Да весели́тсѧ дне́сь но́вый і҆и҃ль, ѡ҆ сотво́ршемъ є҆гѡ̀, и҆ сы́нове рѡссі́йстїи да возра́дꙋютсѧ ѡ҆ кнѧ́зѣ свое́мъ благовѣ́рномъ а҆леѯа́ндрѣ не́вскомъ: се́ бо ца́рскою дїади́мою вѣнча̀ є҆го̀ цр҃ь ца́рствꙋющымъ. (с. 574)

А҆́ще на́мъ и҆ влады́чествꙋеши, благовѣ́рный кнѧ́же а҆леѯа́ндре, ѻ҆ба́че раба̀ бж҃їѧ тѧ̀ и҆менꙋ́емъ: є҆го́же влады́чествꙋѧ на́мъ гдⷭ҇а своего̀ и҆сповѣ́далъ, є҆мꙋ́же послꙋжи́лъ, ѿ негѡ́же и҆ ᲂу҆слы́шалъ є҆сѝ: благі́й ра́бе, до́брый и҆ вѣ́рный, вни́ди въ ра́дость гдⷭ҇а твоегѡ̀.

Прельсти́шасѧ фарїсе́є глаго́люще: кто̀ ѿ кнѧ̑зь вѣ́рова въ ѻ҆́нь; се́ бо благовѣ́рный кнѧ́зь а҆леѯа́ндръ не́вскїй вѣ́рова во і҆и҃са распѧ́таго, и҆ благоче́стїемъ ᲂу҆годѝ є҆мꙋ̀, и҆ воспрїѧ́тъ спасе́нїе вѣ́чное.

Вои́стиннꙋ вѣ́рный и҆ мꙋ́дрый строи́тель бы́лъ є҆сѝ, а҆леѯа́ндре, є҆го́же поста́ви гдⷭ҇ь надъ рабы̑ свои́ми рѡссі́йскими нарѡ́ды: блаже́нъ є҆сѝ, и҆́бо во вре́мѧ кончи́ны твоеѧ̀ прише́дъ къ тебѣ̀ гдⷭ҇ь, ѡ҆брѣ́те тѧ̀ до́брѣ творѧ́ща, и҆ надъ всѣ́мъ и҆мѣ́нїемъ на нб҃сѝ поста́ви тѧ̀.

Сла́ва, гла́съ а҃:

Возвесели́тесѧ дне́сь, рѡссі́йстїи наро́ди, ликовствꙋ́йте нача̑ла и҆ вла̑сти: се́ бо пло́ть ѿ пло́ти, и҆ вла́сть ѿ вла́сти ва́шеѧ, благовѣ́рный кнѧ́зь а҆леѯа́ндръ не́вскїй ликꙋ́етъ со а҆́гг҃лы на нб҃сѝ, и҆ всѣ́хъ свои́хъ сро́дникѡвъ и҆ власте́й, и҆ подъ вла́стїю сꙋ́щихъ, на дꙋхо́вное созыва́етъ торжество̀: ѡ҆ всѣ́хъ мо́литсѧ ко гдⷭ҇ꙋ.

И҆ ны́нѣ, гла́съ є҃:

Ви́дѣхомъ, бж҃е, сла́вꙋ твою̀, ви́дѣхомъ чꙋдеса̀ твоѧ̑ ꙗ҆ви́вшаѧсѧ въ на́съ: ᲂу҆жаса́етсѧ ᲂу҆́мъ воспомѧнꙋ́ти бѣ̑дствїѧ, ꙗ҆̀же всеси́льною твое́ю десни́цею ѿврати́лъ є҆сѝ. не то́чїю бо си́льнїи ѿвнѣ̀ сопроти́внїи, торжествꙋ́юще мно́гимъ свои́мъ ѡ҆бꙋче́нїемъ, и҆ предъ прича́стники тогѡ́жде и҆скꙋ́сства, непобѣди̑мыѧ себѐ вмѣнѧ́юще: но и҆ внꙋ́трь мнѡ́гаѧ ѕла̑ѧ ѡ҆быдо́ша на́съ, смѧтє́нїѧ ѡ҆ всеѕло́бныхъ мѧте́жникѡвъ, мно́гое кровопроли́тїе простира́ющихъ. подви́жесѧ всемꙋ̀ сопроти́вное се́рдце а҆вессалѡ́мле, не то́кмѡ дѣла̀ ѻ҆те́чєскаѧ тща́щеесѧ ѡ҆проверга́ти, но и҆ здра́вїѧ є҆гѡ̀ и҆́щꙋщее. но не здѣ̀ предѣ́лъ ѡ҆бстоѧ́щихъ ны̀ лю́тыхъ: возмꙋти́ша проти́внїи є҆щѐ хрⷭ҇тоненави́стный ꙗ҆зы́къ і҆сма́ильтескїй. ѽ коли́кихъ ѕлы́хъ и҆зба́вилъ є҆сѝ на́съ, непостижи́мый въ дѣ́лѣхъ твои́хъ влⷣко. сла́ва ᲂу҆̀бо тебѣ̀ да бꙋ́детъ, всѧ̑ премꙋ́дрѣ стро́ѧщемꙋ

На стїхо́внѣ стїхи̑ры ст҃о́мꙋ, гла́съ ѕ҃:

И҆сповѣ́давшаго и҆́мѧ і҆и҃сово предъ человѣ́ки, и҆сповѣ́дꙋетъ тѧ̀ і҆и҃съ предъ ѻ҆ц҃е́мъ свои́мъ на нб҃сѝ: и҆ мы̀ на землѝ воспѣва́емъ тѧ̀, благовѣ́рне а҆леѯа́ндре, ꙗ҆́кѡ молѧ́щагосѧ ѡ҆ дꙋша́хъ на́шихъ.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Се́рдцемъ вѣ́ровалъ є҆сѝ въ пра́вдꙋ, ᲂу҆сты́ же предъ мꙋчи́телемъ и҆сповѣ́далъ є҆сѝ во спасе́нїе: ᲂу҆̀бо ꙗ҆́кѡ и҆́стинный и҆сповѣ́дникъ и҆ наслѣ́дникъ, моли́сѧ ѡ҆ спасе́нїи дꙋ́шъ на́шихъ.

Сті́хъ: Блаже́нъ мꙋ́жъ боѧ́йсѧ гдⷭ҇а:

Мꙋ́ченикѡвъ подража́тель, не ᲂу҆боѧ́лсѧ є҆сѝ пострада́ти, ꙗ҆́кѡ до́бръ во́инъ і҆и҃съ хрⷭ҇то́въ, и҆зволе́нїемъ бы́въ мꙋ́ченикъ. тѣ́мже и҆ съ мꙋ́чєники вѣнча́лсѧ є҆сѝ ѿ подвигополо́жника і҆и҃са.

Сла́ва, гла́съ в҃:

Прїиди́те всѝ рѡссі́йстїи чи́ни, восхвали́те до́браго чинонача́льника: вла̑сти, мꙋ́драго строи́телѧ: во́ини, прехра́браго во́ина: правосла́вїѧ люби́тели, тве́рдаго и҆сповѣ́дника, и҆зволе́нїемъ мꙋ́ченика. повинꙋ́йтесѧ наста́вникꙋ ва́шемꙋ и҆ покарѧ́йтесѧ, и҆ ви́дѣвше кончи́нꙋ є҆гѡ̀, подража́йте вѣ́рѣ є҆гѡ̀.

И҆ ны́нѣ, гла́съ з҃:

Прїиди́те, возра́дꙋемсѧ гдⷭ҇еви, дади́мъ вели́чїе бг҃ꙋ на́шемꙋ, наꙋчи́вшемꙋ рꙋ́цѣ на́шѧ на ѡ҆полче́нїе, и҆ пе́рсты на́шѧ воѡрꙋжи́вшемꙋ на бра́нь: вѣнча́вшемꙋ же на́съ всежела́емымъ ми́ромъ, и҆спо́лнившемꙋ во благо́е намѣ́ренїе на́ше, и҆ си́мъ многовре́менное вражды̀ средостѣ́нїе (с. 576) разори́вшемꙋ. и҆ велегла́снѡ возопїе́мъ къ немꙋ̀: кто̀ бо́гъ ве́лїй ꙗ҆́кѡ бг҃ъ на́шъ; вои́стиннꙋ є҆ди́нъ є҆сѝ творѧ́й чꙋдеса̀.

По Ны́нѣ ѿпꙋща́еши: тропа́рь, гла́съ и҃: Бл҃гослове́нъ є҆сѝ, хрⷭ҇тѐ бж҃е на́шъ: Два́жды. Ст҃о́мꙋ, гла́съ д҃: Позна́й свою̀ бра́тїю: є҆ди́ножды, пи́саны на ма́лѣй вече́рни.

По а҃-й стїхоло́гїи сѣда́ленъ, ст҃о́мꙋ гла́съ д҃. Подо́бенъ: Ꙗ҆ви́лсѧ є҆сѝ дне́сь:

Да весели́тсѧ дне́сь но́вый і҆и҃ль ѡ҆ сотво́ршемъ є҆го̀, и҆ сы́нове рѡссі́йстїи да возра́дꙋютсѧ ѡ҆ кнѧ́зѣ свое́мъ, благовѣ́рномъ а҆леѯа́ндрѣ не́вскомъ: се́ бо ца́рскою дїади́мою вѣнча̀ є҆го̀ цр҃ь ца́рствꙋющымъ.

Сла́ва, и҆ ны́нѣ: Подо́бенъ: Оу҆диви́сѧ і҆ѡ́сифъ:

Воспо́йте, рѡссі́йстїи наро́ди, воспо́йте пѣ́снь но́вꙋ, ди̑внаѧ сотво́ршемꙋ бг҃ꙋ на́шемꙋ: и҆́же мы́шцею высо́кою возведѐ лю́ди своѧ̑ въ поко́й, и҆ по неизрече́нныхъ и҆ жесто́кихъ бра́нехъ, ми́ромъ ѡ҆градѝ предѣ́лы на́шѧ, и҆ проти̑вныѧ си̑лы во є҆ди́но совокꙋпѝ. є҆мꙋ́же дади́мъ вели́чїе, ꙗ҆ви́вшемꙋ на́мъ бога́тꙋю ми́лость.

По в҃-й сѣда́ленъ, гла́съ г҃. Подо́бенъ: Красотѣ̀ дѣ́вства:

Благода́рнѡ зове́мъ всѝ хрⷭ҇то́вꙋ ᲂу҆го́дникꙋ, прилѣ́жнѡ молѧ́щесѧ: разрꙋшѝ бра́нь страсте́й на́шихъ, и҆ ѿженѝ дє́мѡнскаѧ мечта̑нїѧ, блаже́нне, и҆ молѝ хрⷭ҇та̀ бг҃а дарова́ти на́мъ ве́лїю ми́лость.

Сла́ва, и҆ ны́нѣ, гла́съ и҆ подо́бенъ то́йже:

Тебѣ̀ подоба́етъ пѣ́снь, бж҃е, въ рѡссі́и, тебѣ̀ да возда́стсѧ моли́тва по все́й землѝ благода́рственнаѧ, и҆́же наче́нъ съ на́ми и҆ совершѝ дѣ́ло, ᲂу҆дивле́нїѧ и҆ бл҃года́рствїѧ досто́йное: предъ ѻ҆кре́стными наро́ды сла́вою и҆ че́стїю вѣнча́лъ є҆сѝ на́съ, и҆ внꙋ́трєннїѧ пресла́внѡ посрамѝ мѧте́жники. да ви́дѧтъ и҆ разꙋмѣ́ютъ всѝ, ꙗ҆́кѡ є҆́сть защи́тникъ на́шъ, по на́мъ побо́рствꙋѧй.

Велича́нїе пое́тъ пе́рвый ли́къ:

Велича́емъ тѧ̀, трїѷпоста́сне влⷣко, всеми́лостивнѡ на на́съ рабѡ́въ твои́хъ призрѣ́вшаго, и҆ ми́ромъ вожделѣ́ннымъ предѣ́лы на́шѧ ѡ҆гради́вшаго.

Вторы́й ли́къ, ст҃о́мꙋ:

Велича́емъ тѧ̀, благовѣ́рный кнѧ́же а҆леѯа́ндре, и҆ чте́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего.

Ѱало́мъ и҆збра́нный.

Ли́къ а҃-й: Воскли́кните гдⷭ҇еви всѧ̀ землѧ̀, по́йте же и҆́мени є҆гѡ̀, дади́те сла́вꙋ хвалѣ̀ є҆гѡ̀.

Ли́къ в҃-й: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй.

Ли́къ а҃-й: Кро́тцыи наслѣ́дѧтъ зе́млю, и҆ насладѧ́тсѧ ѡ҆ мно́жествѣ ми́ра.

Ли́къ в҃-й: Гдⷭ҇и, возлюби́хъ благолѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀.

Ли́къ а҃-й: Возсїѧ́етъ во дне́хъ є҆гѡ̀ пра́вда и҆ мно́жество ми́ра, до́ндеже ѿи́метсѧ лꙋна̀.

Ли́къ в҃-й: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.

Ли́къ а҃-й: Гдⷭ҇ь крѣ́пость лю́демъ свои̑мъ да́стъ, гдⷭ҇ь благослови́тъ лю́ди своѧ̑ ми́ромъ.

Ли́къ в҃-й: Блаже́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀.

По полѷеле́и сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

Дх҃ъ ст҃ы́й тѧ̀, бл҃же́нне, наста́ви ѻ҆те́чество твоѐ па́ствити на па́житехъ спаси́тельныхъ, и҆ хрⷭ҇то́съ свѣти́льника тѧ̀ показа̀ ꙗ҆́вѣ. сегѡ̀ ра́ди ликꙋ́й и҆ весели́сѧ со дерзнове́нїемъ, ꙗ҆́кѡ сꙋгꙋ́быѧ вѣнцы̀ ѿ вѣнцеда́вца прїи́мь.

Сла́ва, и҆ ны́нѣ, гла́съ и҆ подо́бенъ то́йже:

Воспо́йте, рѡссі́йстїи наро́ди, воспо́йте пѣ́снь но́вꙋ, ди̑внаѧ сотво́ршемꙋ бг҃ꙋ на́шемꙋ: и҆́же мы́шцею высо́кою возведѐ лю́ди своѧ̑ въ поко́й, и҆ по неизрече́нныхъ и҆ жесто́кихъ бра́нехъ ми́ромъ ѡ҆градѝ предѣ́лы на́шѧ, и҆ проти̑вныѧ си̑лы во є҆ди́но совокꙋпѝ. є҆мꙋ́же дади́мъ вели́чїе, ꙗ҆ви́вшемꙋ на́мъ бога́тꙋю ми́лость.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Вознесо́хъ и҆збра́ннаго ѿ люде́й мои́хъ. Сті́хъ: Сегѡ̀ ра́ди пома́за тѧ̀, бж҃е, бг҃ъ тво́й: Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃ѕ.

По н҃-мъ ѱалмѣ̀ стїхи́ра, гла́съ ѕ҃:

Прїиди́те, всѝ лю́дїе, хвалꙋ̀ принесе́мъ блаже́нномꙋ, вопїю́ще си́це: ра́дꙋйсѧ, пресвѣ́тлый сто́лпе, просвѣща́ѧ на́съ чꙋде́съ свѣтлостьмѝ: ра́дꙋйсѧ, ро́сный ѻ҆́блаче, пла́мень погаша́ѧй страсте́й, и҆ ѡ҆роша́ѧй вѣ́рныхъ мы̑сли, бжⷭ҇твенный а҆леѯа́ндре.

Канѡ́нъ.

Гла́съ в҃. Пѣ́снь а҃. І҆рмо́съ:

Грѧди́те лю́дїе:

Пѣ́снь по достоѧ́нїю принестѝ тебѣ̀, влⷣко, недоꙋмѣва́емъ. кто́ бо и҆зрече́тъ ми́лѡсти твоѧ̑, ꙗ҆̀же ꙗ҆ви́лъ є҆сѝ на́мъ; ты̀ на́ше невѣ́жество ѿ сокро́вища премꙋ́дрости твоеѧ̀ просвѣти́лъ є҆сѝ: ты̀ и҆ наꙋчѝ со стра́хомъ и҆ любо́вїю благода́рствєннаѧ тебѣ̀ воспѣ́ти.

Оу҆тверждє́нныѧ въ бз҃ѣ вара́къ и҆ дево́ра, сопроти́вныхъ во́инство и҆зби́вше, пѣ́снь но́вꙋю бг҃ꙋ побѣди́телю воспѣ́ша: си́хъ, рѡссі́е, побѣ́дными ᲂу҆кра́шеннаѧ вѣнца́ми подража́ющаѧ, пѣ́снь побѣ́днꙋю бг҃ꙋ воскли́кни, прославлѧ́ющи сла́вꙋ и҆ си́лꙋ є҆гѡ̀.

А҆га́рь и҆ногда̀ и҆знемо́гши ѿ зно́ѧ возопѝ ко гдⷭ҇ꙋ, є҆́йже а҆́гг҃лъ и҆сто́чникъ показа̀ воды̀ текꙋ́щїѧ, да пїю́щи съ ча́домъ жива̀ бꙋ́детъ. и҆ рѡссі́а, и҆знемо́гши многолѣ́тнымъ трꙋдо́мъ, возопѝ ко гдⷭ҇ꙋ: да́ждь мѝ (с. 579) и҆сто́чникъ ми́ра, ѿ негѡ́же напою̀ ча̑да моѧ̑, и҆ воспою́ тѧ гдⷭ҇а во вѣ́ки.

Дрꙋгі́й канѡ́нъ ст҃о́мꙋ.

Гла́съ и҃. І҆рмо́съ:

Во́дꙋ проше́дъ:

Досто́йными похвала́ми воспѣ́ти пресла́внаго чꙋдотво́рца ᲂу҆́мъ и҆ смы́слъ да́рꙋй мѝ, хрⷭ҇тѐ бж҃е, ꙗ҆́кѡ да воспою̀ ра́дꙋѧсѧ па́мѧть є҆гѡ̀.

Свѣти́льниче многосвѣ́тлый рѡссі́йскїѧ землѝ, ꙗ҆́коже второ́е сл҃нце чꙋдєсы̀ сїѧ́ѧ, всѣ́хъ на́съ помина́й, соверша́ющихъ па́мѧть твою̀, а҆леѯа́ндре блаже́нне.

Бг҃омꙋ́дре а҆леѯа́ндре, а҆́ще тѧ̀ и҆ напослѣ́докъ лѣ́тъ бг҃опросвѣще́ннаѧ рѡссі́йскаѧ страна̀ возрастѝ: но дре́внихъ че́сти сподо́билсѧ є҆сѝ, дарова́нїе чꙋде́съ досто́йнѡ прїе́мъ.

Зако́нѡвъ кромѣ̀ є҆сте́ственныхъ, дв҃о, родила̀ є҆сѝ законода́вца бг҃а, человѣ́ка бы́вша: того̀ ꙗ҆́кѡ бла́га молѝ, всенепоро́чнаѧ, на̑ша беззакѡ́нїѧ презрѣ́ти.

Пѣ́снь г҃. І҆рмо́съ:

Лꙋ́къ сокрꙋши́сѧ си́льныхъ:

Ѡ҆бнови́сѧ ны́нѣ, но́вый і҆и҃лю, благода́тїю ѿ всѣ́хъ бла̑гъ пода́телѧ, и҆́же мы́шцею высо́кою проведе́ тѧ чрезъ мо́ре долголѣ́тныѧ бра́ни, и҆ введе́ тѧ въ зе́млю благослове́ннꙋю ми́ра сегѡ̀.

Ви́дите, ꙗ҆зы́цы, и҆ разꙋмѣ́йте, ꙗ҆́кѡ съ на́ми бг҃ъ, и҆́же въ бра́ни бы́сть, и҆ побора́ше по на́съ: смири́ ны пре́жде, да пресла́внѣе возвели́читъ. се́й ᲂу҆́бѡ бг҃ъ на́шъ, ѡ҆ не́мже въ ми́рѣ и҆ бра́ни вѣ́рнїи ᲂу҆твержда́емсѧ.

Возведѝ ѻ҆́крестъ ѻ҆́чи твоѝ, рѡссі́е, и҆ ви́ждь, се́ бо распространи́шасѧ предѣ́лы твоѧ̑, приꙋсꙋгꙋ́бишасѧ ѿ за́пада, сѣ́вера и҆ ю҆́га ча̑да твоѧ̑, и҆ про́мыслꙋ вы́шнѧгѡ по бра́нѣхъ въ ми́рѣ воспо́й пѣ̑сни твоѧ̑.

И҆́нъ. І҆рмо́съ:

Небе́снагѡ крꙋ́га:

Свѣти́льникъ свѣ́та ꙗ҆ви́лсѧ є҆сѝ, а҆леѯа́ндре всеблаже́нне, недꙋ́гѡвъ глꙋбо́кꙋю тмꙋ̀ разрꙋша́ѧ всегда̀ заре́ю свѣ́тлою чꙋде́съ, премꙋ́дре.

Прⷭ҇то́лꙋ предстои́ши благода́ти со всѣ́ми а҆́гг҃лы ра́дꙋѧсѧ дне́сь, и҆ мі́рꙋ и҆сцѣле́нїѧ раздава́ѧ бога́тство, спасѝ всѣ́хъ на́съ моли́твами твои́ми, блаже́нне.

Благочести́ваго и҆ вѣнцено́снаго а҆леѯа́ндра соше́дшесѧ по достоѧ́нїю восхва́лимъ, ꙗ҆́кѡ чꙋде́съ пода́телѧ ѻ҆би́льнаго, и҆ гдⷭ҇ꙋ молѧ́щасѧ ѡ҆ всѣ́хъ на́съ.

Ꙗ҆́кѡ вои́стиннꙋ гдⷭ҇ь воцр҃и́сѧ въ црⷭ҇твїе не ѿпа́дающее, и҆ ѡ҆блече́сѧ ѱало́мски и҆зъ тебє̀, бг҃ома́ти, въ кра́сное бл҃голѣ́пїе пло́ть ст҃ꙋ́ю, є҆́юже сме́рть прїѧ́тъ, и҆ разрꙋшѝ є҆ѧ̀ ца́рство.

Конда́къ ст҃а́гѡ:

Ꙗ҆́коже сро́дники твоѝ бори́съ и҆ глѣ́бъ ꙗ҆ви́шасѧ тебѣ̀ съ нб҃сѐ въ по́мощь, подвиза́ющемꙋсѧ на ве́лгера свѣ́йскаго и҆ во́євъ є҆гѡ̀: та́кѡ и҆ ты̀ ны́нѣ, блаже́нне а҆леѯа́ндре, прїидѝ въ по́мощь твои̑мъ сро́дникѡмъ, и҆ поборѝ борю́щыѧ ны̀.

І҆́косъ:

И҆́же дре́вле навѣ́тами вра́жїими расточє́нныѧ, ꙗ҆́кѡ ѻ҆ре́лъ птенцы̀ подъ крилѣ̀, собира́ше лю́ди своѧ̑, се́й и҆ ны́нѣ на дꙋхо́вное торжество̀ собира́етъ на́съ: прїиди́те ᲂу҆̀бо, возра́дꙋемсѧ гдⷭ҇еви, и҆ просла́вимъ просла́вльшаго сро́дника на́шего, и҆ влады́кꙋ, и҆ возопїи́мъ: ра́дꙋйсѧ, рѡссі́йскаѧ сла́во, ски́петрѡвъ держа́во, во́євъ хра́брость, ѻ҆рꙋ́жїѧ крѣ́пость, помина́й ста́до твоѐ, надъ ни́мже гдⷭ҇ь поста́ви тѧ̀, и҆ поборѝ борю́щыѧ ны̀.

Сѣда́ленъ, гла́съ и҃:

Ꙗ҆́кѡ ѕвѣзда̀ многосвѣ́тлаѧ ꙗ҆ви́лсѧ є҆сѝ, свѣ́тлагѡ ра́ди житїѧ̀ твоегѡ̀, сосꙋ́дъ ст҃а́гѡ дх҃а бы́въ: сегѡ̀ ра́ди по мно́гихъ лѣ́тѣхъ во гро́бѣ нетлѣ́нны ѡ҆брѣто́шасѧ ст҃ы̑ѧ твоѧ̑ мо́щи, ѿ ни́хже и҆сточа́еши рѣ́ки чꙋде́съ и҆сцѣле́нїй вѣ́рнѡ зовꙋ́щымъ тѝ: ра́дꙋйсѧ, благовѣ́рный вели́кїй кнѧ́же а҆леѯа́ндре.

Сла́ва, и҆ ны́нѣ, гла́съ то́йже.

Трⷪ҇цꙋ славосло́вимъ вѣ́рнїи є҆диносꙋ́щнꙋю: призрѣ́ бо на смире́нїе на́ше, ѿѧ́тъ поноше́нїе во человѣ́цѣхъ, ᲂу҆твердѝ ми́лость свою̀ на на́съ, во є҆́же соблюстѝ на́съ, и҆ невре́дныхъ сохрани́ти. тѣ́мже благослови́мъ бг҃а на́шего.

Пѣ́снь д҃. І҆рмо́съ:

Внегда̀ прибли́житисѧ лѣ́тѡмъ:

Неизрече́нное и҆ неисповѣди́мое смотре́нїе и҆сповѣ́дꙋемъ рабѝ твоѝ, влⷣко, благода́рными си́ми словесы̀: ничто́же бо бо́лѣе за бла́гость твою̀ возда́ти мо́жемъ, ꙗ҆́кѡ ѿ тмы̀ ко свѣ́тꙋ произве́лъ є҆сѝ, то́чїю ма́лое сїѐ прїимѝ ѿ на́съ благодаре́нїе.

Гдѣ̀ ны́нѣ ᲂу҆мышлє́нїѧ и҆ совѣ́ты ва́ши, ѻ҆кре́стнїи наро́ди, ѿ дре́внихъ вѣкѡ́въ во є҆ди́но согласꙋ́ющїисѧ, а҆́ки предви́дѧще и҆ зави́дѧще бꙋ́дꙋщемꙋ рѡссі́и благополꙋ́чїю, позна́нїе ᲂу҆че́нїй и҆ хꙋдо́жествъ ѿвраща́ющїи; полꙋчѝ ны́нѣ, є҆́же не хотѣ́сте, и҆ славосло́витъ бг҃а, сїѐ є҆́й дарова́вшаго.

Всѧ̀ тва́рь да ра́дꙋетсѧ съ на́ми, да пое́тъ и҆́мени гдⷭ҇а вы́шнѧгѡ: содѣ́ла бо чꙋ́до въ на́съ, всѧ́къ ᲂу҆́мъ преимꙋ́щее, хи̑траѧ превратѝ намѣ́рєнїѧ сопроти́вныхъ, и҆ и҆́миже хотѧ́хꙋ на́съ ᲂу҆лови́ти, си́ми ᲂу҆ловле́ни сꙋ́ть сѣтьмѝ. мы́ же и҆зба́вльшесѧ всера́достнѡ є҆го̀ велича́емъ.

И҆́нъ. І҆рмо́съ:

Оу҆слы́шахъ, гдⷭ҇и, смотре́нїѧ:

Заре́ю трисо́лнечныѧ бл҃года́ти, сїѧ́ѧ, свѣ́тлѣ тво́й пра́здникъ творѧ́щихъ ѡ҆зарѝ, и҆ стра́стнагѡ ѡ҆мраче́нїѧ де́мѡнскагѡ и҆зба́ви, а҆леѯа́ндре пресла́вне.

Свѧти́телїе и҆ мона́си, свѧще́нницы и҆ прості́и, и҆ ста́рцы со ю҆́нотами, и҆ ве́сь во́зрастъ свѣ́тлѡ пред̾игра́йте, и҆ па́мѧть блаже́ннагѡ въ пѣ́снехъ возвели́чите.

Къ бжⷭ҇твенномꙋ свѣ́тꙋ ны́нѣ преста́вилсѧ є҆сѝ, свѣ́та сы́нъ возлю́бленъ бы́въ, въ ра́дости и҆ красотѣ̀ съ ли̑ки а҆́гг҃льскими ны́нѣ ра́достнѡ ликꙋ́еши.

И҆мѣ́ю тѧ̀ помо́щницꙋ и҆ непостыждꙋ́сѧ, пречⷭ҇таѧ мт҃и бж҃їѧ: и҆мѣ́ю тѧ̀ предста́тельницꙋ, и҆ вра̑гъ мои́хъ не ᲂу҆бою́сѧ.

Пѣ́снь є҃. І҆рмо́съ:

Но́щи преше́дшей:

Созида́й гра́ды твоѧ̑ нѡ́выѧ, рѡссі́е, ᲂу҆твержда́й ми́ромъ предѣ́лы твоѧ̑: гдⷭ҇ь съ тобо́ю, гдⷭ҇ь помо́щникъ. да́ждь ᲂу҆̀бо сла́вꙋ и҆́мени є҆гѡ̀, пресла́внѡ ны́нѣ просла́вившагѡ тѧ̀.

Не тꙋжѝ ны́нѣ, рѡссі́е, дни̑ прє́жнїѧ и҆ лѣ̑та прешє́дшаѧ скѡ́рбнаѧ помина́ющи: є҆гда̀ бѣ́дствїѧми а҆́ки потрѧсе́сѧ, ѿ восто́ка, ю҆́га и҆ сѣ́вера смꙋща́емаѧ, внꙋ́трь же мѧте́жными несогла̑сїи раздира́емаѧ. прогна̀ бг҃ъ ѻ҆́блакъ печа́ли твоеѧ̀, и҆ свѣ́томъ безсме́ртныѧ сла́вы ѡ҆зари́ тѧ.

Ꙗ҆́кѡ взыска́ла є҆сѝ, рѡссі́е, гдⷭ҇а бг҃а твоего̀ въ де́нь ско́рби твоеѧ̀, сегѡ̀ ра́ди ꙗ҆ви́сѧ тебѣ̀ въ чꙋ́дныхъ дѣ́лѣхъ свои́хъ: и҆́же и҆зба́ви тѧ̀ ѿ крѣ́пкихъ рꙋ́къ сꙋпоста̑тъ твои́хъ, и҆ вѣне́цъ ми́ра и҆ благоволе́нїѧ возложѝ на главꙋ̀ твою̀.

Возвесели́тесѧ съ на́ми, вели́цыи кнѧ́зи рѡссі́йстїи, ви́дѣвше вїногра́дъ се́й ва́ми насажде́нный, ка́кѡ бг҃ъ вы́шнїй, цр҃ь вѣ́чный є҆го̀ возрастѝ, и҆ ѡ҆пло́томъ ми́ра вѣ́чнагѡ ѡ҆градѝ: и҆ съ на́ми благода́рствєннаѧ є҆мꙋ̀ воспо́йте.

И҆́нъ. І҆рмо́съ:

Оу҆́тренююще вопїе́мъ тѝ:

Ꙗ҆́кѡ ѕвѣзда̀ свѣ́тла ꙗ҆ви́сѧ непреле́стна, плѣне́нныхъ свободи́тель, и҆ ни́щихъ богати́тель, и҆ болѧ́щихъ вра́чь, це́ркве побо́рникъ, и҆ ѻ҆те́чества на́шегѡ ᲂу҆твержде́нїе.

Ꙗ҆ви́сѧ въ рѡссі́йстѣй землѝ чꙋдотво́рецъ пресла́венъ а҆леѯа́ндръ бл҃же́нный, ꙗ҆́кѡ всесвѣ́телъ свѣти́льникъ сїѧ́ѧ во все́мъ мі́рѣ, и҆ во мра́цѣ страсте́й ѡ҆зарѧ́ѧ всѧ̑.

Досточꙋ́днаѧ и҆ пресла́внаѧ па́мѧть твоѧ̀ возсїѧ̀ въ рѡссі́йстѣй землѝ, блаже́нне, и҆ ра́достнѡ вѣ́рныхъ весели́тъ собо́ры.

Ѿверзо́шасѧ тебѣ̀ двє́ри є҆дє́мскїѧ, и҆ несказа́ненъ свѣ́тъ и҆ трисїѧ́ненъ возсїѧ̀, бл҃же́нне, въ неподви́жнѣмъ црⷭ҇твїи нбⷭ҇нѣмъ, и҆ пра́ведныхъ весе́лїе прїѧ́лъ є҆сѝ ра́дꙋѧсѧ.

Ме́ртвости и҆ тлѝ и҆зба́вила є҆сѝ человѣ́чество, є҆стество́мъ бо жизнода́вца и҆ бг҃а безъ сѣ́мене родила̀ є҆сѝ, дв҃о всенепоро́чнаѧ, на благодѣѧ́нїе восхвалѧ́ющихъ тѧ̀ вѣ́рнѡ.

Пѣ́снь ѕ҃. І҆рмо́съ:

Гла́съ глагѡ́лъ моле́бныхъ:

Бл҃же́ни всѝ ᲂу҆пова́ющїи на гдⷭ҇а, ꙗ҆́кѡ гора̀ сїѡ́нъ не подви́жатсѧ во вѣ́къ: гдⷭ҇ь бо прибѣ́жище и҆̀мъ, гдⷭ҇ь спасе́нїе. въ де́нь, въ ѻ҆́ньже призовꙋ́тъ, посѣти́тъ и҆̀хъ.

Въ де́нь печа́ли сы́номъ гони́мый дв҃дъ, возопѝ ко гдⷭ҇ꙋ, и҆ ѿ бѣ́дъ и҆зба́вилъ є҆го̀, и҆ въ сїѡ́нѣ па́ки, ѿ негѡ́же и҆згна́нъ бы́сть, просла́ви бг҃а спаса́ющаго. прогна̀ сицевꙋ́ю находѧ́щꙋю ско́рбь ѿ своегѡ̀ достоѧ́нїѧ всевы́шнїй гдⷭ҇ь, ѿврати́вый ѻ҆тцегони́тельное кровопроли́тїе: тѣ́мже и҆ мы̀ ны́нѣ є҆го̀ въ рѡссі́йскомъ сїѡ́нѣ просла́вимъ.

Дадѐ ми́ръ предѣ́лѡмъ твои̑мъ, рѡссі́е, гдⷭ҇ь, да не бꙋ́детъ стꙋжа́ѧй тебѣ̀, ме́чь чꙋжды́й да не ᲂу҆страша́етъ тѧ̀: вы́шнїй бо ѡ҆градѝ крѣ́пкою рꙋко́ю концы̀ землѝ твоеѧ̀.

И҆́нъ. І҆рмо́съ:

Ѡ҆чи́сти мѧ̀, сп҃се:

Ѿ пречестна́гѡ ко́рене и҆зра́слъ є҆сѝ вѣ́твь, пресла́вне, и҆ благоче́стнѡ на землѝ пожи́лъ є҆сѝ, и҆ прїѧ́телище чи́сто дх҃а ꙗ҆ви́лсѧ ѡ҆свѧща́ѧ вѣ́рою притека́ющыѧ тѝ, бл҃же́нне.

Весе́лїѧ дне́сь и҆спо́лнисѧ всѧ̀ рѡссі́йскаѧ землѧ̀ въ наро́читый де́нь пра́здника, пресла́внагѡ чꙋдотво́рца а҆леѯа́ндра блаже́ннагѡ: соблюда́етъ бо ѻ҆те́чество своѐ вы́нꙋ ненавѣ́тно.

Сирѡ́тъ и҆ вдѡ́въ застꙋ́пника, и҆ въ бѣда́хъ непобори́маго помо́щника, пѣ́сньми а҆леѯа́ндра ᲂу҆блажи́мъ сла́вѧще: пра́зднꙋющихъ бо па́мѧть є҆гѡ̀ ве́селѡ, ѿ бѣ́дъ и҆збавлѧ́етъ и҆ скорбе́й.

Сꙋ́щїй прест҃ы́й хра́мъ, бцⷣе, и҆сто́чникъ родила̀ є҆сѝ, всенепоро́чнаѧ, неисчерпа́емый, влⷣчце.

Конда́къ, гла́съ и҃. Подо́бенъ: А҆́ще и҆ во гро́бъ:

Оу҆крѣпи́вый дв҃да на голїа́ѳа, ᲂу҆крѣпи́лъ є҆сѝ и҆ і҆мпера́тора на́шего петра̀, въ простотѣ̀ се́рдца слꙋжа́щаго тѝ, и҆ ѡ҆ и҆́мени твое́мъ подвиза́ющагосѧ, бл҃годѣѧ̑нїѧ твоѧ̑ прославлѧ́ющаго: щедрѡ́ты твоѧ̑ дарова́лъ є҆сѝ є҆мꙋ̀, хрⷭ҇тѐ бж҃е, ты́ бо наде́жда на́ша и҆ спасе́нїе, и҆ непобѣди́маѧ побѣ́да.

І҆́косъ:

Са́мъ, гдⷭ҇и, созда́лъ є҆сѝ премꙋ́дрость, и҆ ви́дѣлъ и҆ и҆сче́лъ ю҆̀, и҆ и҆злїѧ́лъ є҆сѝ ю҆̀ на всѧ̑ дѣла̀ твоѧ̑ со всѧ́кою пло́тїю по щедро́тамъ твои́мъ, по даѧ́нїю твоемꙋ̀ дарова́лъ є҆сѝ: ты̀ и҆ благочести́вѣйшаго і҆мпера́тора на́шего петра̀ ѿ сокро́вищъ свои́хъ ᲂу҆мꙋдри́вый, и҆́мъ рѡссі́йское во́инство во бра́нехъ премꙋ́дрѡ наста́вилъ є҆сѝ. тѣ́мже ны́нѣ торже́ственными пѣ́сньми твою̀ премꙋ́дрость воспѣва́емъ, и҆ благодари́мъ тѧ̀, премнѡ́гїѧ на́мъ дарова́вшаго побѣ̑ды.

Пѣ́снь з҃. І҆рмо́съ:

Вѣті̑и ꙗ҆ви́шасѧ ѻ҆́троцы:

Ꙗ҆́коже а҆маза́и рѣ́ша, ѽ дв҃де, ми́ръ тебѣ̀ и҆ помо́щникѡмъ твои̑мъ: та́кѡ и҆ ны́нѣ бра́вшїисѧ съ на́ми глаго́лютъ: ми́ръ тебѣ̀, держа́во Роси́йская, бг҃ъ тво́й помо́щникъ тебѣ̀. є҆мꙋ́же зове́мъ: бж҃е, бл҃гослове́нъ є҆сѝ.

Оу҆поко́и предѣ́лы на́шѧ гдⷭ҇ь си́лъ, да́вый ми́ръ достоѧ́нїю своемꙋ̀: входѧ́щїи и҆ и҆сходѧ́щїи на мо́ре, безъ стра́ха и҆ печа́ли коры̑сти своѧ̑ собира́йте. бг҃ъ бо на́шъ ѿѧ́тъ ско́рбь ра́тнꙋю, є҆мꙋ́же зове́мъ: бж҃е, бл҃гослове́нъ є҆сѝ.

Прїиди́те, возвели́чимъ чꙋ̑днаѧ дѣла̀ бж҃їѧ, ка́кѡ смире́нныхъ на́съ вознесѐ, ка́кѡ ᲂу҆ничиже́нныхъ просла́ви, ка́кѡ побѣди́тельнымъ вѣнце́мъ ᲂу҆вѣнча̀, и҆ ми́ромъ ѡ҆градѝ, и҆ радостотво́рнѡ возопїи́мъ: бж҃е ѻ҆тє́цъ на́шихъ, бл҃гослове́нъ є҆сѝ.

И҆́нъ. І҆рмо́съ:

Въ пещѝ а҆враа́мстїи ѻ҆́троцы:

Дне́сь це́рковь хрⷭ҇то́ва пра́зднꙋющи а҆леѯа́ндрово торжество̀, соше́дшымсѧ вои́стиннꙋ и҆сточа́етъ бл҃года́ть, прилѣ́жнѡ молѧ́щымсѧ и҆ любо́вїю пою́щымъ є҆го̀.

Во всѣ́хъ страна́хъ рѡссі́йскихъ произы́де вѣща́нїе, ꙗ҆́кѡ ꙗ҆ви́сѧ въ ни́хъ чꙋдотво́рецъ пресла́венъ, и҆сточа́ѧ и҆сцѣле́нїй мно́жество всѣ̑мъ пою́щымъ те́плѣ.

Чꙋдесы̑ ᲂу҆́бѡ твои́ми ꙗ҆́кѡ цвѣ́тъ процвѣ́лъ є҆сѝ, блаже́нне, и҆ и҆сцѣлє́нїѧ подава́еши притека́ющымъ въ кро́въ тво́й, мꙋ́дре и҆ досточꙋ́дне.

Ѿ дѣ́вственныхъ ложе́снъ твои́хъ вопло́щсѧ бг҃ъ, ꙗ҆ви́сѧ на спасе́нїе на́ше. тѣ́мже тѧ̀ мт҃рь вѣ́дꙋще, бцⷣе, правовѣ́рнѡ вопїе́мъ є҆мꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь г҃. І҆рмо́съ:

Неизрече́нною мꙋ́дростїю: (с. 586)

Гдⷭ҇ь крѣ́пость лю́демъ свои̑мъ дадѐ, гдⷭ҇ь наꙋчѝ пе́рсты на́шѧ на бра́нь, и҆ рꙋ́цѣ на ѡ҆полче́нїе, торже́ственными на́съ ᲂу҆краси́въ побѣ́дами, и҆ благословлѧ́етъ ны́нѣ лю́ди своѧ̑ ми́ромъ: є҆го́же благослови́мъ и҆ превозно́симъ во всѧ̑ вѣ́ки.

Ѽ непостижи́магѡ ᲂу҆ма̀ твоегѡ̀, влⷣко! нѣ́сть и҆́же сопротивоста́нетъ во́ли твое́й: и҆̀хже бо пред̾ꙋста́вилъ є҆сѝ просла́вити, всѧ̑ ᲂу҆хищрє́нїѧ на и҆̀хъ соплета́ємаѧ ѿвраща́еши. чꙋдодѣ́йствїе твоѐ сїѐ на на́съ собы́вшеесѧ ви́димъ, и҆ славосло́вѧще превозно́симъ тѧ̀ во вѣ́ки.

Хотѣ́сте, ѻ҆кре́стнїи наро́ди, ѿ на́съ ᲂу҆таи́ти и҆скꙋ́сство во́инское, мно́гѡ ѡ҆ се́мъ трꙋди́стесѧ, но не возмого́сте. творѧ́й держа́вꙋ мы́шцею свое́ю гдⷭ҇ь, низлага́ѧй си̑льныѧ со престѡ́лъ, и҆ возносѧ́й смирє́нныѧ, ѿкры̀ предъ на́ми пра́вдꙋ свою̀, и҆з̾ѧвѝ и҆ наꙋчѝ ва́ми сокрыва́ємаѧ: є҆мꙋ́же благода́рствєннаѧ ны́нѣ прино́симъ, и҆ просла́вимъ во всѧ̑ вѣ́ки.

И҆́нъ. І҆рмо́съ:

Рꙋ́цѣ распросте́ръ данїи́лъ:

Тебѐ въ чꙋдесѣ́хъ сла́вна рѡссі̑йскимъ страна́мъ показа̀ бг҃ъ, а҆леѯа́ндре, и҆ ᲂу҆краси́ тѧ нбⷭ҇ными дара́ми: того̀ молѝ поми́ловати всѣ́хъ на́съ.

Ꙗ҆́кѡ ᲂу҆́тро, ꙗ҆́кѡ де́нь свѣ́тлый тво́й пра́здникъ ꙗ҆ви́сѧ, просвѣща́ѧ на̑ша сердца̀, и҆ всѣ́хъ съ вѣ́рою восхвалѧ́ющихъ тѧ̀, а҆леѯа́ндре пресла́вне.

Де́нь торжества̀, и҆ пра́здникъ весе́лїѧ наста̀, стеце́мсѧ, вѣ́рнїи, ѡ҆чи́стивше вкꙋ́пѣ дꙋ́шы и҆ тѣлеса̀: се́ бо на́съ призыва́етъ а҆леѯа́ндръ бжⷭ҇твенный.

Ѻ҆́бразы носѧ́щи дре́вле ржⷭ҇тва̀ твоегѡ̀, дв҃о мт҃и, пе́щь ᲂу҆́бѡ ю҆́ношей не ѡ҆палѝ, та́кожде и҆ ѻ҆́гнь бжⷭ҇твенный ᲂу҆тро́бы твоеѧ̀, чⷭ҇таѧ.

Пѣ́снь ѳ҃.

Велича́й, дꙋшѐ моѧ̀, трїѷпоста́снаго влⷣкꙋ, наꙋчи́вшаго и҆ вразꙋми́вшаго, и҆ сохранѧ́ющаго во бра́ни.

Велича́й, дꙋшѐ моѧ̀, превы́шнѧго гдⷭ҇а си́лъ, даю́щаго крѣ́пость лю́демъ свои̑мъ.

Оу҆диви́тесѧ съ на́ми, ѻ҆крє́стныѧ страны̑, и҆ просла́вите гдⷭ҇а, смирє́нныѧ сла́вою и҆ че́стїю вѣнча́вшаго.

Ѽ влⷣко непостижи́ме, держа́во, крѣ́посте и҆ си́ло на́ша! за всѧ̑, ꙗ҆̀же сотвори́лъ є҆сѝ съ на́ми, благода́рнѡ воспѣва́емъ тѧ̀.

І҆рмо́съ:

Ѿ земноро́дныхъ кто̀ слы́ша таково́е:

Возведе́мъ ᲂу҆́мнїи ѻ҆́чи се́рдца на́шегѡ ко всеси́льномꙋ бг҃ꙋ на́шемꙋ, и҆ принесе́мъ моли̑твы вседꙋ́шныѧ, и҆ молє́нїѧ прилѣ̑жнаѧ, ꙗ҆́кѡ посѣтѝ на́съ ми́лостїю свое́ю: ꙗ҆вѝ на́мъ смирє́ннымъ вели́кꙋю и҆ бога́тꙋю ми́лость, є҆го́же велича́емъ.

Бл҃гоꙋтро́бїѧ неизслѣ́димаѧ пꙋчи́но, влⷣко, прославлѧ́емъ чꙋдє́снаѧ дѣла̀ твоѧ̑, ꙗ҆́вльшаѧсѧ на на́съ и҆ въ ро́дѣ на́шемъ: ѿ вѣ́ка бо сокрове́нное твоѐ ѡ҆ на́съ смотре́нїе во дни̑ сїѧ̑ ꙗ҆́вственнѡ показа́лъ є҆сѝ, всеси́льною десни́цею твое́ю безси́льныхъ на́съ совоздви́гъ, да благодари́мъ и҆ велича́емъ тѧ̀ бг҃а на́шего.

Славосло́вимъ тѧ̀ бг҃а безнача́льнаго, ѻ҆ц҃а̀ бл҃гоꙋтро́бнаго ѡ҆ щедро́тахъ твои́хъ, всѧ̑ ѕла̑ѧ ѿ на́съ ѿврати́вшаго, побѣ̑ды и҆ ѡ҆долѣ̑нїѧ на проти́вѧщихсѧ на́мъ дарова́вшаго, торже́ственными вѣнцы̑ ᲂу҆краси́вшаго, и҆ во всежела́емый поко́й вве́дшаго, и҆ ѿ всѣ́хъ ѕлы́хъ на́съ и҆збавлѧ́ющаго.

И҆́нъ. І҆рмо́съ:

Ка́мень нерꙋкосѣ́чный:

Твоѐ свѧто́е преставле́нїе дне́сь свѣ́тлѡ пра́зднꙋемъ, и҆спо́лни ра́дости и҆ весе́лїѧ восхвалѧ́ющыѧ тѧ̀, а҆леѯа́ндре великоимени́те.

Ве́лїй щи́тъ и҆ крѣ́пость въ рѡссі́йстѣй землѝ, а҆леѯа́ндре, ѡ҆брѣ́лсѧ є҆сѝ, правосла̑внымъ же лю́демъ на́шымъ похвале́нїе: и҆ ны́нѣ мо́лимсѧ тѝ, сохранѧ́й ѻ҆те́чество твоѐ ѿ ꙗ҆зы́ка чꙋжда́гѡ.

Незаходи́магѡ свѣ́та лꙋча́ми во тмѣ̀ сꙋ́щымъ сїѧ́ѧ, сла́вне, къ просвѣще́нїю весе́лїѧ наста́ви ны̀ пою́щыѧ тѧ̀.

Бл҃же́нне а҆леѯа́ндре, ка́кѡ тѧ̀ возмо́жемъ воспѣ́ти досто́йнѡ; не мо́жетъ бо ѧ҆зы́къ и҆зглаго́лати твоѧ̑ разли̑чнаѧ и҆сцѣлє́нїѧ, и҆ мнѡ́гаѧ дарѡва́нїѧ и҆ чꙋдеса̀, ꙗ҆̀же подава́еши наслѣ́дїю твоемꙋ̀.

Ꙗ҆́кѡ ᲂу҆́тро тє́мнымъ и҆ блꙋдѧ́щымъ, дв҃о, возсїѧ̀ пра́вды сл҃нце хрⷭ҇то́съ: є҆го́же на рꙋка́хъ твои́хъ носи́ла є҆сѝ, чⷭ҇таѧ.

Свѣти́ленъ. Подо́бенъ: Жєны̀ ᲂу҆слы́шаша:

Слы́шана бы́сть въ свѣ́йскихъ страна́хъ превели́каѧ сла́ва твоѧ̀, а҆леѯа́ндре, ꙗ҆́кѡ є҆ди́нымъ мꙋ́жественнымъ и҆́менемъ твои́мъ ᲂу҆страша́хꙋсѧ сопроти́внїи: и҆ ны́нѣ, бл҃же́нне, врагѝ на́шѧ неви́димѡ ᲂу҆страша́й, ѡ҆полча́ющыѧсѧ на хрⷭ҇толюби́вое твоѐ во́инство.

Сла́ва, и҆ ны́нѣ:

И҆зба́вивый ны̀ ѿ вла́сти те́мныѧ, и҆ преста́вивый въ ца́рство любвѐ сн҃а твоегѡ̀, бж҃е на́шъ, преведы́й ѿ тмы̀ невѣ́дѣнїѧ ко свѣ́тꙋ благоразꙋ́мїѧ и҆ сла́вы, и҆ и҆мени́ты сотвори́вый по все́й землѝ, тебѐ и҆ ны́нѣ про́симъ, да ꙗ҆́коже сохрани́лъ и҆ возвы́силъ є҆сѝ на́съ всеси́льною твое́ю десни́цею, то́южде защища́й, и҆збавлѧ́й и҆ содержѝ.

На Хвали́техъ стїхи̑ры ст҃а́гѡ, гла́съ и҃. Поⷣ: Ѽ пресла́внагѡ чꙋдесѐ!

Ѽ пресла́внагѡ чꙋдесѐ! ми́ромъ ѡ҆блада́ющїй ѡ҆ставлѧ́етъ мі́ръ, скипетроно́сецъ рѡссі́йскїй ѿлага́етъ ски́петръ, совлачи́сѧ съ порфѵ́ры, и҆ гро́бною покрыва́етсѧ плащани́цею, вѣнча́ннаѧ глава̀ кнѧ́жескꙋю дїади́мꙋ съ себѐ низлага́етъ, вре́менное ца́рство ѡ҆ставлѧ́етъ на землѝ, ѡ҆ вѣ́чномъ и҆звѣ́стенъ на нб҃сѝ, и҆дѣ́же вѣнча́сѧ ца́рскою дїади́мою.

Ѽ ко́ль мнѡ́гїѧ врагѝ побѣди́лъ є҆сѝ, прехра́брый во́инъ і҆и҃съ хрⷭ҇то́въ! ви̑димыѧ мече́мъ и҆ благоче́стїемъ, неви̑димыѧ моли́твою, пло́ть воздержа́нїемъ, мі́ръ ѿверже́нїемъ мі́ра, и҆ та́кѡ пресла́вный побѣди́тель на нб҃о возше́лъ є҆сѝ.

Наꙋчи́лъ є҆сѝ на́съ премꙋ́дрымъ дѣ́ломъ твои́мъ, ничто́же мо́жемъ и҆знестѝ ѿ мі́ра сегѡ̀, въ ѻ҆́ньже ничто́же внесо́хомъ: тогѡ̀ ра́ди ѡ҆ста́вивъ вре́мєннаѧ, и҆ возжела́въ нбⷭ҇наѧ, ꙗ҆̀же и҆ наслѣ́дивъ, и҆ на́мъ ѻ҆́нѣхъ не лиши́тисѧ мо́лимтисѧ.

Сла́ва, гла́съ и҃.

По́двигомъ до́брымъ подвиза́лсѧ є҆сѝ, тече́нїе сконча́лъ, вѣ́рꙋ соблю́лъ, благовѣ́рный кнѧ́же а҆леѯа́ндре, про́чее же соблюде́сѧ тебѣ̀ вѣне́цъ пра́вды, и҆́мже вѣнча́ тѧ и҆́стинный мздовоздаѧ́тель: того̀ молѝ, пребл҃же́нне, врꙋче́нномꙋ тебѣ̀ ста́дꙋ, сынѡ́мъ рѡссі̑йскимъ спасти́сѧ.

И҆ ны́нѣ, гла́съ г҃:

Тебѐ бг҃а хва́лимъ, твоѧ̑ бл҃года̑ти и҆сповѣ́дꙋемъ, бж҃е на́шъ, твоѧ̑ щедрѡ́ты благода́рственнымъ се́рдцемъ превозно́симъ: прогна́вшаго мра́чный ѻ҆́блакъ бра́ни, и҆ вве́дшаго ны̀ во сла́дкїй свѣ́тъ вѣ́чнагѡ ми́ра: во́инство рѡссі́йское во бра́нехъ премꙋ́дростїю и҆спо́лнившаго, и҆ рѡссі́йскими кораблѧ́ми балті́йское мо́ре ᲂу҆краси́вшаго: гра́дъ се́й въ че́сть а҆пⷭ҇ла петра̀ воздви́гшаго и҆ просла́вившаго, и҆ пото́комъ сла́дости твоеѧ̀ на́съ насыща́ющаго, и҆ благодарѧ́ще вопїе́мъ: ѽ влⷣко всеще́дрый! ᲂу҆крѣпѝ и҆ ᲂу҆твердѝ сїѧ̑, ꙗ҆̀же дарова́лъ є҆сѝ на́мъ, въ ро́дъ и҆ ро́дъ, и҆ спасѝ дꙋ́шы на́шѧ.

На лїтꙋргі́и Бл҃жє́нны ѿ канѡ́на пра́здника пѣ́снь г҃, и҆ ст҃а́гѡ пѣ́снь ѕ҃, на и҃. Прокі́менъ пра́здника, гла́съ з҃: Гдⷭ҇ь крѣ́пость лю́демъ свои̑мъ да́стъ, гдⷭ҇ь благослови́тъ лю́ди своѧ̑ ми́ромъ. Сті́хъ: Принеси́те гдⷭ҇еви сы́нове бж҃їи, принеси́те гдⷭ҇еви сы́ны ѻ҆́вни. Ст҃а́гѡ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀.

А҆пⷭ҇лъ въ благодаре́нїе ѡ҆ ми́рѣ.

Къ корі́нѳѧнѡмъ посла́нїѧ ст҃а́гѡ а҆пⷭ҇ла па́ѵла чте́нїе.

[Глава̀ а҃, ст. г҃] Бра́тїе, бл҃года́ть ва́мъ и҆ ми́ръ ѿ бг҃а ѻ҆ц҃а̀ на́шегѡ и҆ гдⷭ҇а і҆и҃са хрⷭ҇та̀. [Є҆фес. в҃, ст. д҃ї] И҆́же є҆́сть ми́ръ на́шъ сотвори́вый ѻ҆боѧ̀ є҆ди́но, и҆ средостѣ́нїе ѡ҆гра́ды разори́вый враждꙋ̀. [а҃ Кор. д҃ї, сⷯ л҃г.] И҆́же нѣ́сть нестрое́нїѧ бг҃ъ, но ми́ра, ꙗ҆́кѡ во всѣ́хъ цр҃квахъ ст҃ы́хъ. [сⷯ а҃] Держи́тесѧ ᲂу҆́бѡ любвѐ, ревнꙋ́йте же дꙋхѡ́внымъ. [Глава̀ г҃ї, ст. д҃, є҃, ѕ҃, з҃, и҃] Любы̀ долготерпи́тъ, милосе́рдствꙋетъ, любы̀ не зави́дитъ, любы̀ не превозно́ситсѧ, не горди́тсѧ, не безчи́нствꙋетъ, не и҆́щетъ своѧ̀ сѝ, не раздража́етсѧ, не мы́слитъ ѕла̀, не ра́дꙋетсѧ ѡ҆ непра́вдѣ, ра́дꙋетсѧ же ѡ҆ и҆́стинѣ: всѧ̑ лю́битъ, всемꙋ̀ вѣ́рꙋ є҆́млетъ, всѧ̑ ᲂу҆пова́етъ, всѧ̑ терпи́тъ: любы̀ николи́же ѿпа́даетъ. [в҃ Кор. г҃ї, ст. а҃ї] Про́чее же бра́тїе, ра́дꙋйтесѧ, соверша́йтесѧ, ᲂу҆тѣша́йтесѧ, то́жде мꙋ́дрствꙋйте, ми́ръ и҆мѣ́йте: и҆ бг҃ъ любвѐ и҆ ми́ра бꙋ́детъ съ ва́ми.

Дрꙋгі́й а҆пⷭ҇лъ ст҃о́мꙋ. зача́ло сг҃ї.

Є҆ѵⷢ҇лїе въ благодаре́нїе ѡ҆ ми́рѣ, ѿ і҆ѡа́нна.

[Глава̀ д҃ї, ст. к҃з] Речѐ гдⷭ҇ь свои̑мъ ᲂу҆ч҃никѡ́мъ: ми́ръ ѡ҆ставлѧ́ю ва́мъ, ми́ръ мо́й даю̀ ва́мъ: не ꙗ҆́коже мі́ръ дае́тъ, а҆́зъ даю̀ ва́мъ. [Глава̀ г҃ї, ст. л҃д и҆ л҃є] За́повѣдь но́вꙋю даю̀ ва́мъ, да лю́бите дрꙋ́гъ дрꙋ́га: ꙗ҆́коже возлюби́хъ вы̀, да и҆ вы̀ лю́бите себѐ. Ѡ҆ се́мъ разꙋмѣ́ютъ всѝ, ꙗ҆́кѡ моѝ ᲂу҆ч҃ницы̀ є҆стѐ, а҆́ще любо́вь и҆́мате междꙋ̀ собо́ю. [Глава̀ є҃ї, ст. ѳ҃ и҆ і҃] Ꙗ҆́коже возлюби́ мѧ ѻ҆ц҃ъ, и҆ а҆́зъ возлюби́хъ ва́съ: бꙋ́дите въ любвѝ мое́й. А҆́ще за́пѡвѣди моѧ̑ соблюде́те, пребꙋ́дете въ любвѝ мое́й: ꙗ҆́коже а҆́зъ за́пѡвѣди ѻ҆ц҃а̀ моегѡ̀ соблюдо́хъ, и҆ пребыва́ю въ любвѝ є҆гѡ̀. [а҃ї.] Сїѧ̑ гл҃го́лахъ ва́мъ, да ра́дость моѧ̀ въ ва́съ бꙋ́детъ, и҆ ра́дость ва́ша и҆спо́лнитсѧ. [г҃ї.] Бо́льши сеѧ̀ любвѐ никто́же и҆́мать, да кто̀ дꙋ́шꙋ свою̀ положи́тъ за дрꙋ́ги своѧ̑. [д҃ї.] Вы̀ дрꙋ́зи моѝ є҆стѐ, а҆́ще творитѐ, є҆ли̑ка а҆́зъ заповѣ́даю ва́мъ. [ѕ҃ї] Не вы̀ менѐ и҆збра́сте, но (с. 591) а҆́зъ и҆збра́хъ ва́съ, и҆ положи́хъ: да вы̀ и҆́дете и҆ пло́дъ принесе́те, и҆ пло́дъ ва́шъ пребꙋ́детъ: да є҆гѡ́же а҆́ще про́сите ѿ ѻ҆ц҃а̀ во и҆́мѧ моѐ, да́стъ ва́мъ.

Ст҃о́мꙋ, ѿ матѳе́а, зача́ло м҃г. Прича́стенъ пра́здника: Похвалѝ, і҆ерⷭ҇ли́ме, гдⷭ҇а, хвалѝ бг҃а твоего̀, сїѡ́не. Ст҃а́гѡ: Въ па́мѧть вѣ́чнꙋю бꙋ́детъ пра́ведникъ: А҆ллилꙋ́їа, три́жды.

Слꙋ́жба прпⷣбнагѡ а҆леѯа́ндра сви́рскагѡ.

На ма́лѣй вече́рни, стїхи̑ры на д҃, гла́съ д҃. Поⷣ: Ꙗ҆́кѡ до́блѧ:

Воздержа́нїемъ стра́сть плотскꙋ́ю ᲂу҆мертви́лъ є҆сѝ, ꙳ и҆ дꙋ́шꙋ ѡ҆живи́лъ є҆сѝ посто́мъ, ꙳ и҆ добродѣ́телей свѧще́нїемъ. ꙳ ѿсю́дꙋ же ꙗ҆ви́лсѧ є҆сѝ ꙗ҆́кѡ жи́въ, ꙳ и҆ по кончи́нѣ вои́стиннꙋ: ꙳ ꙗ҆́коже бо со́нъ вмѣни́сѧ тебѣ̀ сме́рть, ꙳ къ бг҃ꙋ преста́вльшꙋсѧ, ꙳ и҆ въ рꙋ́цѣ дꙋ́шꙋ прело́жшꙋ є҆мꙋ̀, ꙳ а҆леѯа́ндре всесла́вне.

Страсте́й ᲂу҆спи́лъ є҆сѝ ꙳ жела̑нїѧ, а҆леѯа́ндре, ꙳ бдѣ́нїе всено́щное стѧжа́въ, ꙳ вели́кое послꙋша́нїе, смире́нїе, ꙳ поꙋче́нїе же бжⷭ҇твенныхъ писа́нїй, ꙳ и҆ се́рдце чи́сто, ꙳ и҆ ᲂу҆́мъ несмꙋще́нъ. ꙳ тѣ́мже бы́лъ є҆сѝ прїѧ́телище дх҃а ст҃а́гѡ, ꙳ зарѧ́ми чꙋде́съ ѡ҆блиста́ющаго тѧ̀ всегда̀.

Мїрско́е пристра́стїе ꙳ до конца̀ возненави́дѣлъ є҆сѝ, ꙳ и҆ безстра́стїѧ сосꙋ́дъ бы́лъ є҆сѝ, ꙳ любомꙋ́дрїѧ же, сла́вне, ꙳ дѣ́тельнымъ восхожде́нїемъ, ꙳ возвы́силсѧ є҆сѝ къ самомꙋ̀ жела́нїю коне́чномꙋ, ꙳ ᲂу҆зрѣ́лъ є҆сѝ та̑йны видѣ́нїемъ неви́димыхъ, ꙳ недомы́слєнныѧ бжⷭ҇твєнныѧ добрѡ́ты, ꙳ а҆леѯа́ндре всемꙋ́дре.

Сла́ва, гла́съ то́йже:

Дꙋхо́вною бл҃года́тїю ѿе́млеши недꙋ́ги страсте́й, и҆ ѿго́ниши дꙋ́хи лꙋка̑выѧ, и҆сцѣлѧ́еши стра̑сти неисцѣ̑льныѧ, а҆леѯа́ндре всесла́вне, и҆ просвѣща́еши вѣ̑рныѧ блиста̑нїи чꙋде́съ твои́хъ. тѣ́мже дне́сь гла̑сы немо́лчными воспѣва́емъ пресвѣ́тлꙋю и҆ свѣтоно́снꙋю па́мѧть твою̀.

И҆ ны́нѣ, бг҃оро́диченъ: И҆зба́ви на́съ ѿ нꙋ́ждъ на́шихъ:

На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:

Свѣ́тлѡ возсїѧ̀ ꙗ҆́кѡ со́лнце, прпⷣбне, всепра́зднственнаѧ па́мѧть твоѧ̀, ꙳ зарѧ́ми ѡ҆блиста́ющи, ꙳ твои́хъ добродѣ́тельныхъ дѣѧ́нїй, всеблаже́нне, ꙳ и҆ ѡ҆зарѧ́ющи вѣ́рныхъ мы̑сли, ꙳ сїѧ́нїемъ чꙋде́съ твои́хъ. ꙳ сїю̀ ᲂу҆́бѡ пра́зднꙋюще, ꙳ ра́достнѡ тѧ̀ почита́емъ, ꙳ мона́шествꙋющихъ похвало̀, и҆ вѣ́рныхъ ᲂу҆твержде́нїе.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

До́лꙋ лега́нїемъ и҆ воста́нїемъ, ꙳ и҆ сле́зъ течє́нїи ѡ҆скорблѧ́емь, ꙳ и҆ всено́щными стоѧ̑нїи и҆знꙋрѧ́емь, ꙳ мона́хѡвъ бы́лъ є҆сѝ ѻ҆́бразъ ве́лїй, ꙳ и҆ ѻ҆́бщее пра́вило, ꙳ и҆ похвалы̀ вѣне́цъ: ꙳ всѧ́къ бо ви́дъ добродѣ́телей и҆спра́вивъ, ꙳ вы́шнѧгѡ црⷭ҇твїѧ наслѣ́дникъ ꙗ҆ви́лсѧ є҆сѝ, ꙳ премꙋ́дре, воздержа́нїемъ.

Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Чꙋ́до па́че ᲂу҆ма̀, ꙳ во ᲂу҆спе́нїи твое́мъ бы́сть, ꙳ бг҃оꙋкраше́нно чꙋде́снѣ, ꙳ внегда̀ тѝ собо́ръ мона́шествꙋющихъ, ѻ҆́ч҃е, предста̀, ꙳ и҆ внеза́пꙋ ꙗ҆́кѡ со́лнце, мꙋ́дре, лицѐ твоѐ ѡ҆блиста̀, ꙳ па́че со́лнечныхъ лꙋ̑чъ возсїѧ́вши, ꙳ ꙗ҆влѧ́ѧ блиста́ющꙋю твоеѧ̀ дꙋшѝ чистотꙋ̀, ꙳ и҆ ᲂу҆вѣрѧ́ѧ всѣ́хъ, каковꙋ̀ кончи́нꙋ, ꙳ блаже́нне, полꙋчи́лъ є҆сѝ.

Сла́ва, гла́съ ѕ҃:

Ꙗ҆́кѡ бжⷭ҇твеннагѡ па́стырѧ и҆ ᲂу҆чи́телѧ тѧ̀ всѝ восхва́лимъ дне́сь: но́вѡ бо на́мъ ꙗ҆́кѡ многосвѣ́тлаѧ ѕвѣзда̀ въ рѡссі́йстѣй странѣ̀ просїѧ́въ, чꙋдєсы̀ твои́ми ве́сь мі́ръ ᲂу҆диви́лъ є҆сѝ, въ пꙋсты́нѧхъ же непроходи́мыхъ мꙋ́жески подвиза́всѧ, и҆ крѣ́пкѡ терпѧ̀, врага̀ побѣди́лъ є҆сѝ до конца̀. тѣ́мже хрⷭ҇тоимени́тое твоѐ ста́до ᲂу҆па́слъ є҆сѝ, и҆ хра́мъ гдⷭ҇еви воздви́глъ є҆сѝ любо́вїю, а҆леѯа́ндре премꙋ́дре. и҆ ꙗ҆́кѡ вои́стиннꙋ бжⷭ҇твенныѧ бл҃года́ти сподо́бивсѧ, и҆ въ небеса̀ всели́всѧ, зри́ши ст҃ꙋ́ю трⷪ҇цꙋ: ю҆́же молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:

Тропа́рь, гла́съ д҃:

Ѿ ю҆́ности, бг҃омꙋ́дре, жела́нїемъ дꙋхо́внымъ въ пꙋсты́ню всели́всѧ, є҆ди́нагѡ хрⷭ҇та̀ возжела́лъ є҆сѝ ᲂу҆се́рднѡ стопа́мъ въ слѣ́дъ ходи́ти. тѣ́мже и҆ а҆́гг҃льстїи чи́ни зрѧ́ще тѧ̀, ᲂу҆диви́шасѧ, ка́кѡ съ пло́тїю къ неви̑димымъ ко́знемъ подвиза́всѧ, премꙋ́дре, побѣди́лъ є҆сѝ полкѝ страсте́й воздержа́нїемъ, и҆ ꙗ҆ви́лсѧ є҆сѝ равноа́гг҃ленъ на землѝ, а҆леѯа́ндре прпⷣбне, молѝ хрⷭ҇та̀ бг҃а, да спасе́тъ дꙋ́шы на́шѧ.

На вели́цѣй вече́рни, Блаже́нъ мꙋ́жъ:

На Гдⷭ҇и, воззва́хъ, стїхи̑ры, на и҃, гла́съ ѕ҃: Поⷣ: Всѐ ѿло́жше:

Вседержи́тельною десни́цею ᲂу҆крѣплѧ́емь, ꙳ всѧ̑ ѿве́ргъ страсте́й безсловє́сїѧ, ꙳ пло́ть дꙋ́хꙋ покори́лъ є҆сѝ, и҆ бы́лъ є҆сѝ добродѣ́телей пра́вило, ꙳ мона́хѡвъ ᲂу҆твержде́нїе, ꙳ по́стникѡвъ ѻ҆́бразъ, ꙳ прпⷣбныхъ ᲂу҆добре́нїе. ꙳ и҆ ны́нѣ неизречє́нныѧ добрѡ́ты ꙳ зри́ши нераздѣли́мыѧ трⷪ҇цы, ꙳ а҆леѯа́ндре премꙋ́дре, ꙳ пита́ѧсѧ при́снѡ бжⷭ҇твенными добро́тами на нб҃сѣ́хъ дꙋ́хомъ. ꙳ тѣ́мъ соше́дшесѧ, пѣ̑нїи дꙋхо́вными, ꙳ въ пѣ́снехъ твою̀ честнꙋ́ю, и҆ всепра́зднственнꙋю па́мѧть пра́зднꙋемъ.

Стра̑стнаѧ взыгра̑нїѧ ꙳ воздержа́нїемъ всѧ̑ ѿве́рглъ є҆сѝ, ꙳ и҆ многомѧте́жное пло́ти волне́нїе ᲂу҆кроти́въ, ꙳ дыха́нїѧ стра́стнагѡ пребы́лъ є҆сѝ непрекло́ненъ, ꙳ ꙗ҆́кѡ сто́лпъ ᲂу҆крѣплѧ́емь, дꙋхо́вными бронѧ́ми, ꙳ ᲂу҆мо́мъ до́блественнымъ, ꙳ а҆леѯа́ндре премꙋ́дре. и҆ ны́нѣ бжⷭ҇твеннагѡ полꙋчи́лъ є҆сѝ вои́стиннꙋ ꙳ видѣ́нїѧ свѣ́тлости ст҃ы́ѧ трⷪ҇цы, ꙳ къ не́йже жела́ѧ, бл҃же́нне, преста́вилсѧ є҆сѝ, ꙳ наслажда́ѧсѧ неконча́емыѧ добро́ты, ꙳ дарова́нїемъ ѡ҆божа́емь.

Подо́бѧсѧ и҆лїѝ ꙳ и҆ і҆ѡа́ннꙋ, свѣти́льникꙋ свѣ́та, ꙳ возлюби́въ молча́ти въ мѣ́стѣхъ те́мныхъ, ꙳ и҆ въ пꙋсты́нѧхъ непрохо́дныхъ, ꙳ восхожде́нїю всегда̀ поꙋча́ѧсѧ бжⷭ҇твенномꙋ, ꙳ и҆ преспѣва́ѧ добродѣ́телей пꙋте́мъ. ꙳ тѣ́мже дости́глъ є҆сѝ жела́нїе кра́йнее, ꙳ а҆леѯа́ндре премꙋ́дре, и҆ ра́дꙋѧсѧ предстои́ши ꙳ трисїѧ́нномꙋ ст҃ы́ѧ трⷪ҇цы свѣ́тꙋ, ꙳ ѿ негѡ́же нехода́тайственнѣ бжⷭ҇твєнныѧ прїе́млѧ зари̑. ꙳ тѣ́мже со дерзнове́нїемъ моли́сѧ ѡ҆ дꙋша́хъ на́шихъ.

Прпⷣбне и҆ бг҃оно́се ѻ҆́ч҃е на́шъ а҆леѯа́ндре, ꙳ любвѐ ра́ди хрⷭ҇то́вы всѧ̑ ѡ҆ста́вилъ є҆сѝ, ꙳ и҆ въ пꙋсты́ню всели́всѧ, ꙳ ника́коже ᲂу҆страши́лсѧ є҆сѝ неви́димыхъ вра̑гъ боре́нїѧ, ꙳ а҆́ще бо и҆ мно́гажды прише́дше на тѧ̀, ꙳ мечта̑нїи привидѣ̑нїѧ тѝ показꙋ́юще: ꙳ ты́ же моли́твами твои́ми, ꙳ ꙗ҆́кѡ пра́хъ тѣ́хъ безъ вѣ́сти твори́лъ є҆сѝ. ꙳ ѽ непоро́чныѧ твоеѧ̀ дꙋшѝ, ꙳ и҆ крѣ́пкагѡ терпѣ́нїѧ твоегѡ̀. ꙳ хрⷭ҇та̀ непреста́ннѡ молѝ, ꙳ спасти́сѧ дꙋша́мъ на́шымъ.

Сла́ва, гла́съ то́йже:

Ꙗ҆́кѡ бжⷭ҇твенна жи́знь твоѧ̀, та́кожде и҆ всеѡсвѧще́нный тво́й и҆схо́дъ, пребл҃же́нне ѻ҆́ч҃е на́шъ а҆леѯа́ндре. дне́сь бо ликꙋ́юще, въ па́мѧть преставле́нїѧ твоегѡ̀, всеѧ̀ страны̀ мно́жества наро́да сте́кшесѧ, ꙗ҆́кѡ ви́дѣша тѧ̀ безъ дыха́нїѧ на ѻ҆дрѣ̀ лежа́ща, гла̑сы велегла́сными вопїѧ́хꙋ: да́ждь на́мъ коне́чное сло́во ᲂу҆тѣше́нїѧ рабѡ́мъ твои̑мъ, свѧ́те, и҆ наꙋчи́ ны ча̑да твоѧ̑, ѻ҆́ч҃е, ꙗ҆̀же ᲂу҆ще́дрилъ є҆сѝ ꙗ҆́кѡ ѻ҆ц҃ъ, ка́кѡ тѧ̀ по достоѧ́нїю похвали́ти возмо́жемъ; пои́стиннѣ ꙗ҆́кѡ ми́лостивъ и҆ ще́дръ бы́въ, прпⷣбне. ѻ҆ба́че а҆́ще и҆ здѣ́ тѧ гро́бъ покрыва́етъ, но страна́ тѧ рѡссі́йскаѧ всѧ̀ бога́тна и҆́мать предста́телѧ, и҆ моли́твенника къ ст҃ѣ́й трⷪ҇цѣ, ю҆́же непреста́ннѡ молѝ ѡ҆ дꙋша́хъ на́шихъ.

И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:

Вхо́дъ. Прокі́менъ днѐ, и҆ чтє́нїѧ трѝ. Пи́саны сегѡ̀ мцⷭ҇а въ г҃ де́нь.

На лїті́и стїхи̑ры, гла́съ а҃. Самогла́сны:

Прїиди́те, всѝ концы̀ землѝ, ѱалмы̑ и҆ пѣ́сньми незаходи́маго свѣ́та, вели́кагѡ свѣти́льника вселе́ннѣй, воспое́мъ всѝ а҆леѯа́ндра. па́че бо со́лнца возсїѧ̀ въ тверды́ни вѣ́ры, и҆ вѣ́рныхъ собра́нїе къ добродѣ́тели наста́ви: ѻ҆́во ᲂу҆́бѡ бг҃одохнове́нными ᲂу҆чє́нїи, и҆ спаси́тельными глагѡ́лы въ вожделѣ́нїи, ꙗ҆́же незави́стнѡ и҆ ѻ҆би́льнѡ ᲂу҆стны̀ и҆сточа́ше: ѻ҆́во же дѣ́телїю чꙋ́дною равноа́гг҃льнымъ житїе́мъ, къ ре́вности привлача́ѧ, и҆ ѻ҆боѧ̑ житїѐ и҆ сло́во пресла́внѡ, ꙗ҆́коже во́ждь и҆зрѧ́денъ бг҃оподо́бнѡ показꙋ́ѧ. тогѡ̀ моли́твами, хрⷭ҇тѐ бж҃е на́шъ, твоѐ ста́до соблюдѝ: и҆ правосла́вныхъ вѣ́рꙋ ᲂу҆твердѝ ꙗ҆́кѡ чл҃вѣколю́бецъ.

Прїиди́те, мона́хѡвъ мно́жєства дне́сь, хрⷭ҇то́ва рачи́телѧ благоче́стнѡ восхва́лимъ, и҆́стиннаго ᲂу҆ченика̀ сп҃сова, и҆ красотꙋ̀ и҆ хвалꙋ̀ є҆диноѻбра́зныхъ всѣ́хъ, и҆ наста́вникѡвъ, ѡ҆свѧще́ннаго ѿ мла́денства гдⷭ҇еви, ли́цы ѻ҆тє́цъ соше́дшесѧ ᲂу҆блажи́мъ. се́й бо жела́нїе бжⷭ҇твенное въ себѣ̀ прїи́мъ, мїрскꙋ́ю ᲂу҆́бѡ ѡ҆ста́ви пре́лесть, взѧ́тъ же ꙗ҆ре́мъ хрⷭ҇то́въ на ра́мо, и҆ полкѝ бѣсѡ́въ побѣдѝ мꙋ́жески, показа́въ на́мъ дѣ́тельнѡ бжⷭ҇твенныѧ любвѐ и҆зрѧ́дный пꙋ́ть. и҆́бо и҆ сїѧ̑ прете́къ во тща́нїи, пости́же свѣ́тъ и҆́стинный трⷪ҇цы вседѣ́тельныѧ. ѽ чꙋдесѐ ᲂу҆жа́снагѡ, и҆ ве́щи бг҃оподо́бныѧ! ꙗ҆́кѡ земны́й є҆стество́мъ, ра́венъ бы́сть мы́слєннымъ сꙋществѡ́мъ. сла́вꙋ и҆ че́сть бж҃їю воспрїе́млѧ, и҆ моли́твенникъ на́мъ быва́етъ, ꙗ҆́кѡ да ᲂу҆лꙋчи́мъ вѣ́чныхъ бла̑гъ въ де́нь сꙋ́дный.

Ꙗ҆́кѡ бжⷭ҇твеннаѧ и҆ свѣтоно́снаѧ наста̀ па́мѧть, преставле́нїѧ твоегѡ̀, ѻ҆́ч҃е, ꙗ҆́кѡ ᲂу҆дивѝ мы́сленныхъ и҆ ᲂу҆жасѝ человѣ́ки, пречꙋ́дне, трꙋды̀ воздержа́нїѧ твоегѡ̀ житїѧ̀, ꙗ҆́кѡ безпло́тенъ ѿню́дъ, во пло́ти стра́стнѣ врагѝ неви̑димыѧ посрами́лъ є҆сѝ. всѧ́ же ᲂу҆́бѡ страна̀ ѻ҆те́чества твоегѡ̀ пое́тъ тебѐ благоче́стнѡ: и҆зрѧ́днѣе же твоѐ честно́е ста́до, свѣ́тлость твои́хъ болѣ́зней и҆ трꙋдѡ́въ, є҆́же показа́лъ є҆сѝ, ꙗ҆́кѡ гра́дъ въ пꙋсты́ни прекра́сенъ, и҆́же приста́нище собо́рѡмъ мона́шєскимъ бг҃оподо́бнѡ. и҆́же ꙗ҆́кѡ ѻ҆де́ждами многочестны́ми твои́ми, красꙋ́етсѧ чꙋдєсы̀, и҆ до́блественными страда̑нїи пѡ́двигъ твои́хъ, а҆леѯа́ндре, и҆ моли́твами твои́ми, притека́юще ко хрⷭ҇тꙋ̀, и҆мꙋ́щемꙋ ве́лїю и҆ бога́тꙋю ми́лость.

Сла́ва, гла́съ є҃:

Ра́дꙋетсѧ дне́сь всѧ̀ рѡссі́йскаѧ страна̀, вели́кїй же но́въградъ да весели́тсѧ торжествꙋ́ѧ, ꙗ҆́кѡ и҆мѣ́ѧ въ предѣ́лѣхъ ѻ҆́бласти своеѧ̀ неистощи́мое сокро́вище. вѣ́рныхъ же мно́жєства рѡссі́йскїѧ землѝ сте́кшесѧ дне́сь, вострꙋ́бимъ трꙋбо́ю пѣ́сней: бл҃года́ть бо дх҃а всѧ́кїѧ трꙋбы̀ бг҃олѣ́пнѣйши, всѣ́хъ созыва́етъ къ пѣ́нїю бг҃оно́снагѡ ѻ҆тца̀. мона́си и҆ прості́и да чꙋдѧ́тсѧ всѣ́хъ цр҃ѧ̀ и҆́скреннемꙋ рабꙋ̀, и҆́же мїроде́ржца нача́ла и҆ вла́сти тмы̀, дх҃а бжⷭ҇твеннагѡ всѣ́ми ѻ҆рꙋ̑жїи побѣдѝ. па́стыри и҆ ᲂу҆чи́тели, и҆зрѧ́днаго вои́стиннꙋ пра́вила же и҆ ѻ҆́браза па́ствѣ да восхва́лѧтъ: и҆́же въ добродѣ́телей повелѣ̑нїи свѣ́тлаго, и҆ въ вѣ́рѣ благоразꙋ́мнаго, и҆ въ видѣ́нїи высо́каго, въ дѣѧ́нїихъ бг҃омꙋ́драго, во ᲂу҆че́нїихъ же пи́щи пото́ка, наста́вника заблꙋ́ждшымъ, и҆зба́вителѧ плѣнє́ннымъ, и҆ всѣ́хъ болѧ́щихъ и҆сцѣле́нїе ѻ҆те́чествꙋ своемꙋ̀ вели́кое ᲂу҆краше́нїе, похвалѧ́юще всѝ рце́мъ: ѻ҆́ч҃е прпⷣбне а҆леѯа́ндре, предста́ни твои̑мъ рабѡ́мъ всегда̀, и҆ спасѝ ста́до твоѐ моли́твами твои́ми.

И҆ ны́нѣ, бг҃оро́диченъ, гла́съ то́йже:

Дх҃а бжⷭ҇твеннагѡ бл҃года́тїю, вѣ́рнїи, дне́сь вострꙋ́бимъ трꙋбо́ю пѣ́сней: прини́кнꙋвши бо свы́ше всецр҃и́ца мт҃и дв҃а, благослове́нїемъ вѣнчава́етъ воспѣва́ющихъ ю҆̀. мона́си и҆ прості́и да стекꙋ́тсѧ, и҆ цр҃и́цѣ воспле́щꙋтъ въ пѣ́снехъ, цр҃ѧ̀ ро́ждшей, и҆̀же сме́ртїю ѡ҆держи́мы пре́жде ѿпꙋсти́ти благоизво́ливша. па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь соше́дшесѧ восхва́лимъ, свѣти́льника свѣтоза́рнаго, свѣтоно́снаго ѻ҆́блака, нб҃съ ши́ршꙋю, ѡ҆дꙋшевле́нный ковче́гъ, и҆ ѻ҆гнеѻбра́зный влⷣчень престо́лъ, маннопрїе́мнꙋю златꙋ́ю ста́мнꙋ, затворе́ннꙋю сло́ва две́рь, всѣ̑мъ хрїстїа́нѡмъ прибѣ́жище, пѣ́сньми бг҃огла́сными похвалѧ́юще, си́це рце́мъ: пала́то сло́ва, сподо́би смире́нныхъ на́съ нбⷭ҇нагѡ црⷭ҇твїѧ, всѧ̑ бо возмѡ́жна сꙋ́ть хода́тайствꙋ твоемꙋ̀.

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, а҆́гг҃льскимъ бесѣ́дꙋѧ ликостоѧ́нїємъ, а҆леѯа́ндре прпⷣбне: житїе́ бо твоѐ, ѻ҆́ч҃е, на землѝ добродѣ́тельно стѧжа́въ, пожи́лъ є҆сѝ. показа́лсѧ є҆сѝ чистоты̀ нескве́рное зерца́ло вои́стиннꙋ, лꙋчеза̑рныѧ воспрїе́млѧ мѡ́лнїи дх҃а ст҃а́гѡ всесла́внѡ: ѿѻнꙋ́дꙋже ѡ҆зарѧ́емь, зрѣ́лъ є҆сѝ бꙋ̑дꙋщаѧ, всѧ̑ предглаго́лѧ, ѿ бжⷭ҇твеннагѡ свѣтоѧвле́нїѧ наꙋча́емь хрⷭ҇та̀: є҆го́же молѝ, дꙋша́мъ на́шымъ пода́ти ве́лїю ми́лость.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, по́стникѡмъ споспѣ́шникъ бы́въ, и҆ непобѣди́мь побо́рникъ: страсте́й бо ѿсѣка́ѧ ко́рень, и҆ бѣсѡ́въ стремлє́нїѧ, предста́въ мꙋ́жески, а҆леѯа́ндре, тѣ́хъ посрами́лъ є҆сѝ дꙋшепа́гꙋбнꙋю пре́лесть: крⷭ҇та́ же сп҃сова дѣ́йство, и҆ непобѣди́мꙋю ꙗ҆ви́лъ є҆сѝ си́лꙋ, є҆́юже и҆ препоѧ́савсѧ, побѣди́лъ є҆сѝ всѧ̑ ѿмета́ющыѧ плотско́е ꙗ҆вле́нїе хрⷭ҇то́во: є҆го́же молѝ, дꙋша́мъ на́шымъ пода́ти ве́лїю ми́лость.

Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Сто́лпъ свѣтови́дѣнъ, добродѣ́телїю ᲂу҆твержде́нъ, ѻ҆́блакъ свѣ́телъ, и҆́же во ѻ҆те́чествѣ твое́мъ ꙗ҆ви́лсѧ є҆сѝ, ѻ҆́ч҃е, къ нб҃сѝ ѿ землѝ бг҃а зрѧ́щихъ предводѧ̀. кре́стною па́лицею страсте́й коре́нїѧ, мо́ре мы́сленнагѡ а҆мали́ка ѿри́нꙋвъ, непреткнове́нный нбⷭ҇ный восхо́дъ ѡ҆брѣ́лъ є҆сѝ, бг҃облаже́нне а҆леѯа́ндре, и҆ жре́бїй непреминꙋ́ющь, со безпло́тными предстоѧ̀ престо́лꙋ хрⷭ҇то́вꙋ ра́дꙋѧсѧ, є҆го́же молѝ, дꙋша́мъ на́шымъ пода́ти ве́лїю ми́лость.

Сла́ва, гла́съ ѕ҃:

Прїиди́те, всѝ концы̀ землѝ, ѱалмы̑ и҆ пѣ́сньми свѧще́нное и҆ честно́е прпⷣбнагѡ торжество̀ а҆леѯа́ндра, дне́сь благоче́стнѡ восхва́лимъ. прпⷣбныхъ ѻ҆тє́цъ є҆диножи́телѧ, и҆ пꙋстынолю́бнꙋю добро́тꙋ воспое́мъ: по́стникѡвъ ᲂу҆краше́нїе, и҆сто́чника чꙋде́съ, къ бг҃ꙋ моли́твенника непосты́дна, сте́кшесѧ, ѽ празднолю́бцы! пѣ́сньми похва́льными воспое́мъ глаго́люще: ра́дꙋйсѧ, мона́шескагѡ житїѧ̀ пра́вило, ѻ҆́бразъ и҆ печа́ть и҆звѣ́стнаѧ: ра́дꙋйсѧ, свѣти́льниче пресвѣ́тлый, ѡ҆зарѧ́ѧ всѧ́кꙋ добродѣ́тель свѣтлостьмѝ твоегѡ̀ житїѧ̀: ра́дꙋйсѧ, въ бѣда́хъ вели́кое ᲂу҆тѣше́нїе и҆ те́плый предста́телю предстоѧ́щымъ, не преста́й молѧ̀ хрⷭ҇та̀ бг҃а ѡ҆ ста́дѣ твое́мъ и҆ всѣ́хъ вѣ́рныхъ, почита́ющихъ всечестно́е твоѐ ᲂу҆спе́нїе.

И҆ ны́нѣ, бг҃оро́диченъ: Творе́цъ и҆ и҆зба́витель мо́й:

Тропа́рь, гла́съ д҃: Ѿ ю҆́ности, бг҃омꙋ́дре: Пи́санъ на ма́лѣй вече́рни, Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

На ᲂу҆́трени.

По а҃-й стїхоло́гїи сѣда́ленъ, гла́съ а҃. Подо́бенъ: Гро́бъ тво́й:

Многосвѣ́тлаѧ ѕвѣзда̀ мона́шествꙋющымъ показа́лсѧ є҆сѝ, и҆ степе́нь и҆звѣ́стенъ, воздержа́нїѧ же предѣ́лъ, пресвѣ́тлое зерца́ло разсꙋжде́нїѧ, прпⷣбне, па́мѧть твою̀ ра́достнѡ соверша́ющымъ разрѣше́нїѧ просѝ согрѣше́нїй, преблаже́нне, бг҃ꙋ предстоѧ̀.

Два́жды.

Сла́ва, и҆ ны́нѣ, бг҃оро́диченъ.

Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе жили́ще.

По в҃-й стїхоло́гїи сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Бжⷭ҇твеннымъ жела́нїемъ безсме́ртїѧ, а҆леѯа́ндре, ѡ҆держи́мь, и҆ крⷭ҇тъ на ра́мо взе́мъ, въ пꙋсты́ню жела́нїемъ всели́лсѧ є҆сѝ, и҆дѣ́же, прпⷣбне, гдⷭ҇еви собра́лъ є҆сѝ ста́до. тѣ́мже и҆ моли́твенника тѧ̀ те́пла стѧжа́хомъ ко гдⷭ҇ꙋ.

Два́жды.

Сла́ва, и҆ ны́нѣ, бг҃оро́диченъ:

Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ: па́че всѣ́хъ менѐ пе́рсть бы́вша, ѡ҆скверне́нна плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Видѣ́нїе и҆ дѣѧ́нїе воспрїи́мъ, чꙋ̑вствїѧ, прпⷣбне, ᲂу҆краша́ѧ, житїѐ ᲂу҆пра́вилъ є҆сѝ къ бжⷭ҇твєннымъ повелѣ́нїємъ: мона́хѡмъ бо ꙗ҆ви́лсѧ є҆сѝ свѣти́льникъ пресвѣ́телъ, наставлѧ́ѧ на́съ къ позна́нїю. тѣ́мже восхвалѧ́юще тѧ̀, велича́емъ любо́вїю и҆схо́днꙋю па́мѧть твою̀, бг҃оно́се а҆леѯа́ндре. сегѡ̀ ра́ди вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе, матѳе́а, зача́ло м҃г.

По н҃-мъ ѱалмѣ̀ стїхи́ра, гла́съ ѕ҃:

Возсїѧ̀ дне́сь пресвѣ́тлаѧ и҆ всепра́зднственнаѧ па́мѧть твоѧ̀, бг҃облаже́нне, созыва́ющи многочи́сленное пѡ́стникъ сосло́вїе, и҆ прпⷣбныхъ всѣ́хъ ликостоѧ̑нїѧ, глаго́лющи: а҆́ще бо и҆ тѣле́снѣ ѧ҆зы́къ ᲂу҆молчѐ, но са́ми чꙋдеса̀ свидѣ́тельствꙋютъ ѿ гро́ба твоегѡ̀, и҆ всѧ́ же страна̀ ѻ҆те́чества твоегѡ̀ проповѣ́дꙋѧ хва́литсѧ. и҆мѣ́ю бо въ себѣ̀, речѐ, неистощи́мое сокро́вище, пречестнꙋ́ю и҆ всебога́тꙋю ра́кꙋ моще́й твои́хъ, ѡ҆благоꙋха́ющꙋ дꙋшє́внаѧ на̑ша чꙋ̑вствїѧ, а҆леѯа́ндре ѻ҆́ч҃е на́шъ: молѝ хрⷭ҇та̀ бг҃а спасти́сѧ дꙋша́мъ на́шымъ.

Канѡ́нъ бцⷣы со і҆рмосо́мъ на ѕ҃: и҆ прпⷣбнагѡ а҆леѯа́ндра, на д҃.

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Бжⷭ҇твеннагѡ и҆ прест҃а́гѡ дх҃а блиста́ѧсѧ бл҃года́тїю, свѣтоно́сное, а҆леѯа́ндре, и҆ честно́е соверша́ющихъ твоѐ ᲂу҆спе́нїе, свѣ́тлою моли́твою твое́ю, страсте́й мглꙋ̀ ѡ҆чи́сти.

Ѿ ю҆́ности, прпⷣбне, ꙗ҆ре́мъ гдⷭ҇ень воспрїе́мъ, и҆ въ бразда́хъ твоегѡ̀ се́рдца пшени́цꙋ сѣ́ѧлъ є҆сѝ дꙋхо́внꙋ, кла́съ пожа́лъ є҆сѝ ᲂу҆твержда́ющь дꙋ́шы, бг҃облаже́нне.

Свѣтоно́снаѧ па́мѧть твоѧ̀ на́мъ дне́сь возсїѧ̀, ꙗ҆́кѡ со́лнечнаѧ лꙋча̀, а҆леѯа́ндре, и҆справле́нїй твои́хъ, страсте́й на́шихъ ѿе́млющи ѻ҆́блакъ: ю҆́же сотворѧ́юще вѣ́рою тѧ̀ и҆ любо́вїю ᲂу҆блажа́емъ.

Бг҃оро́диченъ:

Зачала̀ є҆сѝ, пречⷭ҇таѧ, неизрече́ннымъ сло́вомъ содержа́щаго земны̑ѧ концы̀, и҆ сего̀ родила̀ є҆сѝ: є҆го́же молѝ прилѣ́жнѡ поми́ловати на́съ.

И҆́нъ канѡ́нъ на д҃.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Бж҃е́ственнꙋю па́мѧть твою̀, бг҃омꙋ́дре ѻ҆́ч҃е, вѣ́рнѡ пра́зднꙋюще, всѧ́ческихъ гдⷭ҇и при́снѡ сла́вимъ, тѧ̀ просла́вльшаго мно́гими чꙋдєсы̀.

Безстра́стїѧ жела́нїемъ те́плымъ, ѻ҆́ч҃е, ѡ҆держи́мь, вє́щныѧ ᲂу҆вѧди́лъ є҆сѝ страсте́й во́лны, а҆леѯа́ндре, и҆ дости́глъ є҆сѝ любо́вїю вперѧ́емь, присносꙋ́щнагѡ сїѧ́нїѧ, преблаже́нне, бж҃ества̀.

Добродѣ́тельно и҆знача́ла прїе́мъ житїѐ, пребога́те, ба́нею, ѻ҆́ч҃е, пакибытїѧ̀, да́ръ дꙋхо́вный ѿ младе́нства бжⷭ҇твеннѣ, твоеѧ̀ дꙋшѝ благолѣ́пїе, а҆леѯа́ндре, показа́лъ є҆сѝ, со́лнца свѣтлѣ́йше.

Бг҃оро́диченъ:

Мла́до ѻ҆троча̀ па́че сло́ва родила̀ є҆сѝ, ве́тхаго де́ньми, но́вꙋ на землѝ стезю̀ добродѣ́телей показа́вша. тѣ́мъ ᲂу҆го́дникъ тво́й при́сный а҆леѯа́ндръ, ѻ҆трокови́це, любо́вїю снѣда́емь, се́й хра́мъ тебѣ̀ созда̀.

Катава́сїа: Крⷭ҇тъ начерта́въ:

Пѣ́снь г҃. І҆рмо́съ:

Весели́тсѧ ѡ҆ тебѣ̀ цр҃ковь твоѧ̑, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Жезло́мъ воздержа́нїѧ стра́стное мо́ре, ѻ҆́ч҃е, раздѣли́въ, преше́лъ є҆сѝ неистопле́нъ, и҆ предѣ̑лъ дости́глъ є҆сѝ и҆́стиннагѡ безстра́стїѧ, и҆ бг҃ꙋ предстоѧ̀ бесѣ́довалъ є҆сѝ ᲂу҆ма̀ чистото́ю.

Кто̀ твоѧ̑ по́двиги, а҆леѯа́ндре, по достоѧ́нїю и҆зрещѝ возмо́жетъ; ты́ бо пꙋти̑ жестѡ́кїѧ въ пꙋсты́ни ше́ствꙋѧ, сꙋ́рово бы́лїе ꙗ҆́лъ є҆сѝ, вкꙋше́нїе же ѿлага́лъ є҆сѝ пи́щи, болѣ́зньми воздержа́нїѧ.

Ꙗ҆́кѡ ма́слина плодови́та въ домꙋ̀ гдⷭ҇ни прозѧ́блъ є҆сѝ, ма́сломъ трꙋдѡ́въ твои́хъ, а҆леѯа́ндре, ᲂу҆маща́ѧ на́шѧ ли́ца: пою́щыѧ тѧ̀, прпⷣбне и҆ бг҃облаже́нне, всѧ̑ ны̀ посѣтѝ молѧ́сѧ чл҃вѣколю́бцꙋ.

Бг҃оро́диченъ:

И҆зъ тебє̀, чⷭ҇таѧ, цвѣ́тъ неꙋвѧда́емый, благоꙋха́ѧ всѐ человѣ́чество, бжⷭ҇твеннымъ мѵ́ромъ є҆стества̀ своегѡ̀, и҆́же ѻ҆ц҃ꙋ̀ собезнача́льный, и҆зъ тебє̀ бы́въ подъ лѣ́томъ, дв҃о всенепоро́чнаѧ.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

По́томъ воздержа́нїѧ твоегѡ̀ пла́мень страсте́й погаси́лъ є҆сѝ, и҆ ѡ҆дожде́нїемъ моли́твъ, стрꙋи̑ чꙋде́съ и҆сточи́лъ є҆сѝ, болѣ́зньми разжжє́нїѧ погаша́ѧ ꙗ҆́вѣ, преблаже́нне а҆леѯа́ндре.

И҆̀же къ честнѣ́й ра́цѣ твое́й притека́юще, премꙋ́дре, ѿ сеѧ̀ почерпа́емъ и҆сцѣле́нїѧ сокро́вище, и҆ чꙋде́съ пꙋчи́нꙋ, и҆ да́ръ незави́стный, а҆леѯа́ндре, пою́ще тѧ̀ восхвалѧ́емъ.

Дꙋшє́внаѧ чꙋ̑вства, ѿ ᲂу҆жа́снагѡ. прпⷣбне ѻ҆́ч҃е, просвѣ́щь видѣ́нїѧ, ꙗ҆́кѡ чꙋ́денъ ра́зꙋмъ благи́мъ стѧжа́лъ є҆сѝ, и҆́ночества житїѐ и҆мꙋ́щымъ, а҆леѯа́ндре, небла́знено житїѐ показа́лъ є҆сѝ.

Бг҃оро́диченъ:

И҆́же пре́жде вѣ̑къ ро́ждсѧ ѿ ѻ҆ц҃а̀ неизрече́ннѡ, напослѣ́докъ и҆з̾ ᲂу҆тро́бы твоеѧ̀ про́йде, и҆ ѡ҆божѝ на́ше є҆стество̀, мт҃и дв҃о, и҆́же прпⷣбныхъ ли́ки ꙗ҆́вѣ и҆зводѧ́й.

Сѣда́ленъ, гла́съ и҃. Подо́бенъ: Премꙋ́дрости:

Ѿ ю҆́ности всѧ̑ ѡ҆ста́вль житє́йскаѧ, кра̑снаѧ же и҆ лѣ́пѡтнаѧ, и҆ въ пꙋсты́ню всели́всѧ, ᲂу҆се́рднѡ послѣ́довалъ є҆сѝ зва́вшемꙋ тебѐ, прпⷣбне: въ трꙋдѣ́хъ же и҆ постѣ́хъ, ѻ҆́ч҃е, тѣ́ло твоѐ и҆знꙋри́лъ є҆сѝ. ѿѻнꙋ́дꙋже тѧ̀ па́стырѧ свои̑мъ ѻ҆вца́мъ до́брѣ ᲂу҆строѧ́етъ всебога́тый гдⷭ҇ь, а҆леѯа́ндре блаже́нне. молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Вѣ́триломъ, ѻ҆́ч҃е, крⷭ҇та̀, дꙋше́вный тво́й кора́бль ѡ҆корми́въ, благоꙋти́шнѡ же и҆ легкѡ̀ жите́йскагѡ лю́тагѡ потопле́нїѧ и҆збѣ́глъ є҆сѝ, и҆ къ тишинѣ̀ бжⷭ҇твенныхъ и҆звле́клъ є҆сѝ приста́нищъ ра́дꙋѧсѧ.

Ѡ҆брѣта́ѧ, ѻ҆́ч҃е, са́мъ себѐ, всеблаже́нне, всю̀ но́щь стоѧ́лъ є҆сѝ ꙗ҆́кѡ безпло́тенъ, недрема́нно ѻ҆́ко и҆мѣ́лъ є҆сѝ, и҆ чи́сто ꙗ҆́коже зерца́ло дꙋхо́вною заре́ю, и҆ бжⷭ҇твеннагѡ ꙗ҆вле́нїѧ, чи́стымъ по́мысломъ прїе́млѧ.

Ꙗ҆́кѡ бжⷭ҇твенный зри́тсѧ ра́й, премꙋ́дре, хра́мъ, и҆мѣ́ѧ въ себѣ̀ твои́хъ моще́й ра́кꙋ, цвѣ́ты приносѧ̀ чꙋдє́сныѧ, и҆́миже сердца̀ наслажда́ютсѧ вѣ́рою, а҆леѯа́ндре, при́снѡ хва́лѧщихъ тѧ̀.

Бг҃оро́диченъ:

Ст҃а́ѧ бцⷣе, ѡ҆свѧтѝ на́съ, ꙗ҆́же прест҃а́го бг҃а ро́ждши пло́тїю, ᲂу҆подо́битисѧ восхотѣ́вша человѣ́кѡмъ, и҆ небе́снагѡ житїѧ̀ всѧ̑ покажѝ, пречⷭ҇таѧ, прича́стники моли́твами твои́ми.

И҆́нъ. І҆рмо́съ:

Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Житїѐ твоѐ, бг҃оно́се преблаже́нне а҆леѯа́ндре, пра́вило и҆звѣ́стно мона́шествꙋющихъ бы́сть, є҆мꙋ́же ны́нѣ ревнꙋ́юще спаса́емсѧ, и҆̀же твои̑мъ послѣ́дꙋюще, ѻ҆́ч҃е, бжⷭ҇твєннымъ ᲂу҆че́нїємъ.

Дх҃а ст҃а́гѡ зарю̀ прїе́мъ, ѕвѣзда̀ пресвѣ́тлаѧ, ѻ҆́ч҃е а҆леѯа́ндре, сїѧ́ѧ бл҃года́тїю бы́лъ є҆сѝ всѣ̑мъ, и҆̀хже наста́вилъ є҆сѝ къ спасе́нїѧ приста́нищꙋ твои́ми ᲂу҆чє́нїи.

Пребы́ти внꙋ́трь ника́коже мі́ра восхотѣ́лъ є҆сѝ, премꙋ́дре ѻ҆́ч҃е а҆леѯа́ндре, и҆мѣ́ѧ наставлѧ́ющагѡ тѧ̀ бж҃їѧ дх҃а си́лꙋ, въ непроходи́мыхъ пꙋсты́нѧхъ живы́й, и҆ со ѕвѣрьмѝ ходѧ̀ безъ боѧ́зни ю҆́ноша сы́й, и҆ болѣ́зньми пита́лсѧ є҆сѝ тѣле́сными.

Бг҃оро́диченъ:

Плещмѝ херꙋві́мскими стра́шными носи́мь, влⷣко, ꙗ҆́кѡ на престо́лѣ ѻ҆́гненнѣ, въ твою̀, чⷭ҇таѧ, всели́сѧ ᲂу҆тро́бꙋ, и҆ пло́ти прїѧ́тїемъ человѣ́ческое ѡ҆божѝ сꙋщество̀, ꙗ҆́кѡ ᲂу҆чи́тъ и҆зрѧ́дный въ прпⷣбныхъ а҆леѯа́ндръ, є҆ди́на всепѣ́таѧ.

Пѣ́снь є҃. І҆рмо́съ:

Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Просвѣща́емь заре́ю, ѻ҆́ч҃е, невече́рнею, и҆ бжⷭ҇твеннымъ блиста́нїемъ, бѣсо́вскїй мра́къ, и҆ стра́стнꙋю мглꙋ̀ ѿгна́лъ є҆сѝ, и҆ ꙗ҆ви́лсѧ є҆сѝ сто́лпъ свѣтоза́ренъ, и҆ лѣ́ствица вои́стиннꙋ, къ бг҃ꙋ вѣ̑рныѧ возводѧ́щи.

Бо́дръ ᲂу҆́мъ всегда̀ и҆мѣ́ѧ, ѻ҆́тче бг҃омꙋ́дре а҆леѯа́ндре, стра̑сти ᲂу҆спи́лъ є҆сѝ дꙋшетлѣ̑нныѧ, къ бжⷭ҇твенномꙋ свѣтозаре́нїю хотѧ̀ дости́гнꙋти къ незаходи́магѡ свѣ́та свѣ́тлости, и҆дѣ́же є҆́сть веселѧ́щихсѧ жили́ще.

Ꙗ҆́кѡ ѡ҆чи́стившꙋ помышлє́нїѧ, прпⷣбне, благода́ть тебѣ̀ даде́сѧ ꙗ҆́кѡ прⷪ҇ро́кꙋ: ꙗ҆́кѡ настоѧ̑щаѧ глаго́леши бꙋ̑дꙋщаѧ, зрѣ́ти же да̑льнѧѧ ꙗ҆́кѡ бли̑жнѧѧ, а҆леѯа́ндре, бж҃їе ѻ҆би́телище.

Бг҃оро́диченъ:

Ро́ждши, пренепоро́чнаѧ, бг҃а є҆мманꙋ́ила, и҆ чл҃вѣ́ка ꙗ҆́вѣ за милосе́рдїе бы́вша, є҆го́же молѝ ꙗ҆́кѡ человѣколю́бца, чⷭ҇таѧ, ᲂу҆ще́дрити лю́ди согрѣ́шшыѧ.

И҆́нъ. І҆рмо́съ:

Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Возжелѣ́въ ᲂу҆́мъ тво́й храни́ти соблюде́ньми за́повѣдей, а҆леѯа́ндре, и҆ плотско́е взыгра́нїе твои́мъ воздержа́нїемъ ᲂу҆вѧди́лъ є҆сѝ, и҆ па́стырь показа́лсѧ є҆сѝ, бг҃олюбе́зномꙋ твоемꙋ̀ совокꙋпле́нїю.

Зако́нѡмъ бжⷭ҇твєннымъ послѣ́дꙋѧ, премꙋ́дре а҆леѯа́ндре, и҆ повелѣ́нїємъ повинꙋ́ѧсѧ сотво́ршагѡ, законополо́жникъ ꙗ҆ви́лсѧ є҆сѝ мона́хѡвъ, и҆ пра́вило и҆звѣ́стнѣйше, наказа́тель безꙋ́мныхъ, и҆ наста́вникъ заблꙋ́ждшихъ, и҆ свѣти́льникъ во тмѣ̀ невѣ́дѣнїѧ пресла́вне.

Ѻ҆́гнь и҆скꙋше́нїй, и҆ страсте́й пе́щь, слеза́ми твои́хъ, ѻ҆́ч҃е, тече́нїй, и҆ дꙋхо́вною росо́ю бога́тнѡ ᲂу҆гаси́лъ є҆сѝ, соблю́дсѧ неѡпали́мь: ѡ҆палѧ́емь бо любо́вїю всѣ́хъ цр҃ѧ̀, вє́щнаѧ ᲂу҆вѧди́лъ є҆сѝ жела̑нїѧ.

Бг҃оро́диченъ:

Житє́йскаѧ не мо́гꙋтъ ᲂу҆ста̀ по достоѧ́нїю тѧ̀ пѣ́ти, всепѣ́таѧ, вы́шшꙋ сꙋ́щꙋ херꙋві̑мъ, и҆ всѧ́кїѧ тва́ри. тѣ́мже съ бжⷭ҇твеннымъ а҆леѯа́ндромъ влⷣкꙋ ѡ҆ всѣ́хъ на́съ ᲂу҆молѝ.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Неболѣ́зненнꙋю жи́знь въ болѣ́знехъ воспрїѧ́лъ є҆сѝ, и҆ болѣ́зней лю́тыхъ ᲂу҆ставлѧ́еши ѡ҆ѕлоблє́нїѧ, вѣ́рою просѧ́щымъ прїѧ́ти и҆сцѣле́нїе, а҆леѯа́ндре всече́стне. тѣ́мже разрѣшѝ болѣ̑зни на́шѧ дꙋшє́вныѧ и҆ тѣлє́сныѧ.

Къ ра́цѣ твое́й свѧще́ннѣй пристꙋпа́юще, благоꙋха́нїѧ бжⷭ҇твеннагѡ ра́зꙋма и҆сполнѧ́емсѧ, пребл҃же́нне а҆леѯа́ндре, смра́да и҆збавлѧ́ющесѧ страсте́й, любо́вїю тѧ̀ чтꙋ́щїи, ѻ҆́ч҃е прпⷣбне.

И҆справлѧ́еши, ѻ҆́ч҃е, хромы́хъ, и҆ ѻ҆́чи просвѣща́еши слѣпы́хъ, ходи́ти же твори́ши разсла́бленныхъ ѡ҆ хрⷭ҇тѣ̀, и҆ ѿго́ниши дꙋ́хи лꙋка̑выѧ, а҆леѯа́ндре прпⷣбне.

Бг҃оро́диченъ:

На тѧ̀ ꙗ҆́кѡ до́ждь на рꙋно̀ сше́дъ, бцⷣе, сп҃съ, и҆зсꙋшѝ ꙗ҆́кѡ пото́ки безбо́жїѧ: дꙋ́шы же на́шѧ напаѧ́ѧ всегда̀, при́снѡ чтꙋ́щыѧ тѧ̀.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Смы́сленнѡ ты̀ вре́мєннаѧ предразсꙋди́въ, а҆леѯа́ндре бл҃же́нне, вѣ̑чнꙋющаѧ болѣ́зньми воздержа́нїѧ дости́глъ є҆сѝ, ѻ҆́ч҃е, дꙋша́мъ строи́тель бы́въ, прпⷣбне.

Ꙗ҆́кѡ терпѧ́щꙋ тѝ вельмѝ по́ты трꙋдѡ́въ твои́хъ, прпⷣбне а҆леѯа́ндре, ᲂу҆до́бь воздержа́нїемъ, чꙋ́дный ѻ҆́ч҃е, ꙗ҆́вльсѧ влⷣка тебѣ̀ хрⷭ҇то́съ, врꙋча́етъ си́лꙋ бжⷭ҇твеннꙋ, и҆ си́мъ тѝ недꙋ́ги повелѣва́етъ цѣли́ти.

Мона́шествꙋющихъ наста́вникъ бы́въ, премꙋ́дре а҆леѯа́ндре, сꙋ́щихъ тѝ є҆диноѻбра́зныхъ ла́ѵры, и҆ ѻ҆́бразъ и҆ начерта́нїе добродѣ́тельныхъ дѣѧ́нїй сы́й, ᲂу҆краси́лъ є҆сѝ всѧ̑, ꙗ҆̀же во ѻ҆би́тели сꙋпрꙋ́жныхъ пребыва̑нїѧ.

Бг҃оро́диченъ:

Но́въ ꙗ҆́коже мѡѷсе́й ꙗ҆́вльсѧ, ᲂу҆стро́илъ є҆сѝ ꙗ҆́кѡ ски́нїю ѡ҆гра́дꙋ, всече́стне, ю҆́же и҆ превозрасти́лъ є҆сѝ болѣ́зньми и҆ пѡ́ты твои́ми, ве́сь возложи́лсѧ є҆сѝ пречⷭ҇тѣй мт҃ри бж҃їи.

Конда́къ, гла́съ и҃.

Ꙗ҆́кѡ многосвѣ́тлаѧ ѕвѣзда̀, дне́сь въ страна́хъ рѡссі́йскихъ возсїѧ́лъ є҆сѝ, ѻ҆́ч҃е, всели́всѧ въ пꙋсты́ню, хрⷭ҇тѡ́вымъ стопа́мъ послѣ́довати ᲂу҆се́рднѡ возжелѣ́лъ є҆сѝ, и҆ тогѡ̀ ст҃о́е и҆́го на ра́мо твоѐ взе́мъ чⷭ҇тны́й крⷭ҇тъ, ᲂу҆мертви́лъ є҆сѝ трꙋды̑ пѡ́двигъ твои́хъ тѣлє́сныѧ взыгра̑нїѧ. тѣ́мже вопїе́мъ тѝ: спасѝ ста́до твоѐ, є҆́же собра́лъ є҆сѝ, мꙋ́дре, да зове́мъ тѝ: ра́дꙋйсѧ, прпⷣбне а҆леѯа́ндре, ѻ҆́ч҃е на́шъ.

І҆́косъ:

Ка́кѡ восхвалю̀ твоѧ̑ по́двиги и҆ борє́нїѧ, прпⷣбне а҆леѯа́ндре; ꙗ҆́кѡ невеще́ственъ ра́зꙋмъ стѧжа́въ смире́нїемъ, житїѐ твоѐ препроводи́лъ є҆сѝ ѕѣ́льнымъ воздержа́нїемъ трꙋдѡ́въ твои́хъ. а҆́ще ᲂу҆́бѡ и҆ человѣ́къ бы́лъ є҆сѝ є҆стество́мъ но вы́шнѧгѡ і҆ерⷭ҇ли́ма ꙗ҆ви́лсѧ є҆сѝ граждани́нъ: съ пло́тїю бо на землѝ пожи́лъ є҆сѝ, но а҆́гг҃льское пребыва́нїе проше́дъ, бы́лъ є҆сѝ сто́лпъ страстьмѝ непотрѧсо́мъ. тѣ́мъ всѧ̀ рѡссі́йскаѧ землѧ̀ тобо́ю ѡ҆бога́щшисѧ хва́литъ тѧ̀, и҆ вѣ́рою велича́етъ, взыва́ющи тебѣ̀ такова̑ѧ: ра́дꙋйсѧ, ѻ҆те́чествꙋ твоемꙋ̀ похвала̀, вели́комꙋ же новꙋ́градꙋ и҆ все́й странѣ̀ рѡссі́йстѣй пресвѣ́тлый свѣти́льниче: ра́дꙋйсѧ, и҆́же благочести́ва ѻ҆тца̀ пресла́внаѧ ѻ҆́трасль, и҆ благоговѣ́йны ма́тере вѣ́твь многопло́дна: ра́дꙋйсѧ, цѣломꙋ́дрїѧ непрекло́нный сто́лпе, и҆ мона́хѡвъ пресвѣ́тлаѧ сла́ва: ра́дꙋйсѧ, па́стырю хрⷭ҇то́вы ѡ҆гра́ды слове́сныхъ ѻ҆ве́цъ, и҆̀хже къ бж҃їю приводѧ̀ ра́зꙋмꙋ: ра́дꙋйсѧ, ты́ бо многоча́днꙋ пꙋсты́ню воздѣ́лалъ є҆сѝ высото́ю смире́нїѧ твоегѡ̀: ра́дꙋйсѧ, мона́шествꙋющихъ всѣ́хъ ѻ҆́бразъ добродѣ́тели, и҆ є҆диноѻбра́зныхъ ла́ѵры спасе́нїе: ра́дꙋйсѧ, кра́сное добродѣ́телей храни́лище, и҆ всѣ̑мъ въ печа́ли ᲂу҆ныва́ющымъ ᲂу҆тѣше́нїе: ра́дꙋйсѧ, ꙗ҆́кѡ всѧ̑ мі́ра сегѡ̀ мꙋдрова̑нїѧ презрѣ́въ, стра̑сти плотскі̑ѧ ᲂу҆мертви́лъ є҆сѝ: ра́дꙋйсѧ, ꙗ҆́кѡ а҆́гг҃лѡмъ собесѣ́дникъ бы́ти сподо́билсѧ є҆сѝ, и҆ всѧ̑ бѣсѡ́вскїѧ полкѝ посрами́лъ є҆сѝ: ра́дꙋйсѧ, ты́ бо во всѣ́хъ страна́хъ просла́вленъ бы́лъ є҆сѝ, ѡ҆ хрⷭ҇тѣ́ бо мнѡ́га чꙋдеса̀ сотвори́лъ є҆сѝ: ра́дꙋйсѧ, ꙗ҆́кѡ вои́стиннꙋ ѡ҆брѣ́лъ є҆сѝ бж҃їю благода́ть, и҆ со а҆́гг҃лы при́снѡ зрѣ́ти сподо́билсѧ є҆сѝ лице́мъ къ лицꙋ̀ свѧтꙋ́ю трⷪ҇цꙋ: ра́дꙋйсѧ, ꙗ҆́кѡ второ́е со́лнце сїѧ́ѧ чꙋдєсы̀, всѣ̑мъ да́рꙋеши благода́ть и҆сцѣле́нїй: ра́дꙋйсѧ, прпⷣбне а҆леѯа́ндре ѻ҆́ч҃е на́шъ.

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ѡ҆свѧ́щсѧ ѿ мла́денства доброгла́сною трꙋбо́ю моли́твы твоеѧ̀, и҆ неплѡ́дныѧ ᲂу҆трѡ́бы многоплѡ́дны сотвори́лъ є҆сѝ. слѣпы̑мъ подае́ши прозрѣ́нїе, и҆ хрѡмы́мъ благотече́нїе, а҆леѯа́ндре преблаже́нне:

Сле́зными и҆злїѧ̑нїи погаси́лъ є҆сѝ страсте́й разжжє́нїѧ, а҆леѯа́ндре блаже́нне, чꙋде́съ и҆сточи́лъ є҆сѝ стрꙋи̑ присноживо́тны, и҆́миже ѡ҆мыва́ютсѧ дꙋ́шъ же и҆ тѣле́съ недꙋ́зи, пресла́вне.

Терпѣ́нїе стѧжа́въ мно́гое, премꙋ́дре, воздержа́нїе, вѣ́рꙋ и҆ любо́вь и҆́стиннꙋ, ꙗ҆ви́лсѧ є҆сѝ ѻ҆те́цъ си̑рымъ, вдови́цамъ застꙋ́пникъ, ми́лостивъ и҆ смире́нъ а҆леѯа́ндре, мона́хѡмъ сла́ва и҆ похвала̀.

Бг҃оро́диченъ:

Ка́кѡ дои́ши млеко́мъ сн҃а, чⷭ҇таѧ, безъ ѻ҆тца̀, пита́ющаго всѧ́кое дыха́нїе, мт҃и пречⷭ҇таѧ; ка́кѡ на рꙋкꙋ̀ но́сиши всѧ̑ содержа́щаго; па́че ᲂу҆ма̀ чꙋ́до твоѐ. тѣ́мъ пое́мъ вели̑чїѧ твоѧ̑.

И҆́нъ. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Крѣ́постїю ѡ҆дѣ́ѧвсѧ, а҆леѯа́ндре, влⷣчнею, и҆ ꙗ҆́кѡ пра́хъ сладостра́стїе житїѧ̀ попра́лъ є҆сѝ, любо́вїю побѣжда́емь нетлѣ́нныѧ жи́зни: є҆́йже ны́нѣ и҆ причасти́лсѧ є҆сѝ, съ ли̑ки а҆́гг҃лъ, ѻ҆́ч҃е, сочета́всѧ.

Крестоѻбра́знѡ простира́ѧ дла̑ни твоѧ̑, а҆леѯа́ндре премꙋ́дре, и҆ моли̑твы твоѧ̑ возсыла́ѧ вы́шнемꙋ, ꙗ҆́кѡ хрⷭ҇та̀ цр҃ѧ̀ сла́вы со а҆́гг҃лы ѻ҆чи́ма ꙗ҆вле́ннѡ, бг҃оно́се, ᲂу҆зрѣ́лъ є҆сѝ, и҆ въ пꙋсты́нѧхъ непрохо́дныхъ водворѧ́ѧсѧ, и҆ща́й гдⷭ҇а бжⷭ҇твенною тѧ̀ благода́тїю соблюда́юща.

Ꙗ҆́кѡ ѕвѣздꙋ̀ тѧ̀, а҆леѯа́ндре, всемі́рнꙋ, мона́хѡвъ свѣти́ло незаходи́мое, помо́щника въ бѣда́хъ, и҆ грѣ́шникѡмъ вели́кое прибѣ́жище вѣ́дый, хода́таѧ и҆ моли́твенника предлага́ю влⷣцѣ хрⷭ҇тꙋ̀ тѧ̀, всече́стне.

Бг҃оро́диченъ:

Ви́дѣти жела́ѧ тво́й ᲂу҆го́дникъ твоегѡ̀ сн҃а и҆ бг҃а неизрече́ннꙋю сла́вꙋ, бг҃ороди́тельнице, сегѡ̀ честны́й крⷭ҇тъ на ра́мо взе́мь, послѣ́дова живонѡ́снымъ є҆гѡ̀ стопа́мъ.

Пѣ́снь и҃. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Оу҆мо́мъ безстра́стїѧ ѡ҆чище́нъ, бесѣ́довалъ є҆сѝ гдⷭ҇еви вседержи́телю: ѿ негѡ́же неизглаго́ланнѡ, прпⷣбне, наꙋча́емь, прⷪ҇ро́чески предглаго́лалъ є҆сѝ просвѣща́ѧ дꙋ́шы, ꙗ҆́кѡ вели́къ, всеблаже́нне, прⷪ҇ро́къ. тѣ́мъ тѧ̀ согла́снѡ, а҆леѯа́ндре премꙋ́дре, вѣ́рнїи похвалѧ́емъ, пою́ще: благослови́те, всѧ̑ дѣла̀ гдⷭ҇нѧ, гдⷭ҇а.

Подава́ѧ тебѣ̀, ꙗ҆̀же проти́вꙋ любвѐ зижди́тель, ѿ ю҆́ности соблюда́ѧ тѧ̀ десни́цею, и҆ ма́лымъ бы́лїемъ самовозра́стшимъ ѿ землѝ, пита́етъ тѧ̀ бг҃олѣ́пнѡ, ꙗ҆́кѡ ѿ младе́нства всѧ́ко похотѣ́нїе попра́вша, и҆ пою́ща: благослови́те, всѧ̑ дѣла̀ гдⷭ҇нѧ, гдⷭ҇и.

Ꙗ҆́кѡ стрꙋѧ̀ бжⷭ҇твенна и҆сцѣле́нїй, происходѧ́щи ѿ ра́ки твоеѧ̀, всѧ̑ и҆сцѣлѧ́етъ, и҆ ѡ҆мыва́етъ сквє́рны страсте́й, и҆ гное́нїе лю́тыхъ ѡ҆чища́етъ, и҆ вѣ́рныхъ напаѧ́етъ 19 всѣ́хъ сердца̀, а҆леѯа́ндре премꙋ́дре, любо́вїю пою́щихъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Вопло́щсѧ безпло́тный и҆зъ тебє̀ бг҃олѣ́пнѡ, є҆го́же молѝ, пречⷭ҇таѧ, стра̑сти пло́ти моеѧ̀ ᲂу҆мертви́ти, и҆ ѡ҆живи́ти мою̀ ᲂу҆мерщвле́ннꙋю дꙋ́шꙋ грѣхмѝ.

И҆́нъ. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́коже мо́лнїѧ вели́кими блиста̑нїи житїѐ сїѧ́ющее, всѣ̑мъ возсїѧ̀ воздержа́нїѧ твоегѡ̀, а҆леѯа́ндре премꙋ́дре, благоче́стнѡ зижди́телю зовꙋ́щымъ: благослови́те, всѧ̑ дѣла̀ гдⷭ҇нѧ, гдⷭ҇а.

На землѝ ꙗ҆́кѡ человѣ́къ ходѧ̀, ѻ҆́ч҃е а҆леѯа́ндре, житїѐ себє̀ на нб҃сѣ́хъ ꙗ҆́кѡ вои́стиннꙋ стѧжа́лъ є҆сѝ, а҆́гг҃лѡмъ собесѣ́дникъ ꙗ҆́вльсѧ, житїе́ же и҆ жи́знь соверша́ѧ ѻ҆́нѣхъ. съ ни́миже воспѣва́еши ны́нѣ: благослови́те, всѧ̑ дѣла̀ гдⷭ҇нѧ, гдⷭ҇а.

Тѧ̀ па́че ᲂу҆ма̀ и҆зъ нерожде́нна ѻ҆ц҃а̀, пре́жде вѣ̑къ рожде́нна сн҃а, сла́вный проповѣ́да а҆леѯа́ндръ, и҆ дх҃а прест҃а́гѡ, є҆ди́нꙋ трⷪ҇цꙋ є҆стество́мъ вѣ́дый бж҃ества̀.

Бг҃оро́диченъ:

Ꙗ҆́коже и҆лїа̀ пе́рвѣе въ карми́лѣ всели́сѧ, та́кѡ и҆ ты̀ въ пꙋсты́нѧхъ непрохо́дныхъ ᲂу҆пражнѧ́ѧсѧ, возжела́лъ є҆сѝ ѻ҆со́бь съ бг҃омъ жи́ти, и҆ бг҃онача́льными ѡ҆зари́всѧ видѣ̑нїи, ᲂу҆го́дникъ ꙗ҆ви́лсѧ є҆сѝ бцⷣѣ, вопїѧ̀ є҆́й: ра́дꙋйсѧ, ѡ҆бра́дованнаѧ.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.

Твоѧ̑ свѧщє́нныѧ и҆ ст҃ы̑ѧ мо́щи во гро́бѣ лежа́ще, многоразли̑чныѧ недꙋ́ги и҆сцѣлѧ́ютъ, и҆ попалѧ́ютъ полкѝ бѣсѡ́вскїѧ всегда̀, мꙋ́дре а҆леѯа́ндре: бж҃їею благода́тїю то́чиши всѣ̑мъ и҆сцѣлє́нїѧ, вѣ́рнѡ тѧ̀ при́снѡ блажа́щымъ.

Стрꙋи̑ на́мъ всегда̀ честна́ѧ твоѧ̀ ра́ка ꙗ҆ви́сѧ и҆сцѣле́нїй, ѻ҆́ч҃е, страсте́й и҆злїѧ́нїе всѧ́ческихъ и҆зсꙋша́ющи, и҆ всѧ̑ напаѧ́ющи дꙋ́шы ко благопло́дїю бжⷭ҇твенномꙋ, премꙋ́дре а҆леѯа́ндре, хрⷭ҇то́въ ᲂу҆го́дниче.

Па́мѧть твоѧ̀ дне́сь ꙗ҆́кѡ со́лнце возсїѧ̀, а҆леѯа́ндре пребл҃же́нне, ꙗ҆́же благочести́выхъ сердца̀ ѡ҆зарѧ́ющи, болѣ́зней твои́хъ, и҆ чꙋде́съ сїѧ́нїемъ, ꙗ҆́кѡ вои́стиннꙋ просвѣща́ющи, ѻ҆́ч҃е, въ ню́же всѧ̑ ны̀ помѧнѝ, вѣ́рнѡ чтꙋ́щыѧ тѧ̀.

Бг҃оро́диченъ:

Гла́съ прино́симъ тѝ гаврїи́ловъ ра́дꙋющесѧ: ра́дꙋйсѧ, глаго́люще, мѣ́сто свѧще́нїѧ: ра́дꙋйсѧ, прпⷣбныхъ сла́во, и҆ всѣ́хъ вѣ́рныхъ спасе́нїе, є҆ѧ́же ра́ди ѡ҆божи́хомсѧ, бцⷣе приснодв҃о.

И҆́нъ. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Стопа́мъ послѣ́дꙋѧ, прпⷣбне и҆ бг҃оно́се, влⷣки хрⷭ҇та̀, и҆́же благоче́стнѡ пожи́въ на землѝ, кро́токъ, неѕло́бивъ ꙗ҆ви́лсѧ є҆сѝ, ми́лостивъ и҆ смире́нъ, а҆леѯа́ндре, и҆ любвѐ и҆спо́лненъ бжⷭ҇твенныѧ: сегѡ̀ ра́ди тѧ̀ вѣ́рнѡ восхвалѧ́емъ.

И҆сплете́сѧ тебѣ̀ вѣне́цъ ꙗ҆́кѡ побѣди́телю, а҆леѯа́ндре, живоно́сною и҆ вседержи́тельною десни́цею, ѻ҆́ч҃е, и҆ ны́нѣ пою́щыѧ па́мѧть твою̀ сподо́би, блаже́нне, ᲂу҆лꙋчи́ти ѡ҆ставле́нїе согрѣше́нїй, пресла́вне.

Совокꙋпи́лсѧ є҆сѝ со безпло́тными вѡ́инствы, и҆ преподѡ́бнымъ ликѡ́мъ сочта́лсѧ є҆сѝ, и҆ со и҆збра́нными всѣ́ми ликꙋ́еши, претво́рсѧ и҆́стиннымъ ѡ҆боже́нїемъ, и҆ безсме́ртною, ѻ҆́ч҃е, жи́знїю. съ ни́миже непреста́ннѡ ѡ҆ на́съ твоего̀ влⷣкꙋ ᲂу҆молѝ.

Бг҃оро́диченъ:

Хра́мъ ѡ҆свѧще́нъ, вмѣ́стенъ є҆ди́номꙋ ѿ трⷪ҇цы сы́й, хра́мъ тво́й, влⷣчце, ᲂу҆го́дникъ тво́й а҆леѯа́ндръ че́стенъ воздви́же въ сла́вꙋ твою̀ и҆ че́сть. въ не́мже не преста́й молѧ́сѧ, да́рꙋѧ на́мъ по́мощь моли́твами твои́ми.

Свѣти́ленъ. Подо́бенъ: Дх҃омъ во ст҃и́лищи:

Бл҃года́ть преизбы́сть бж҃їѧ въ дꙋшѝ твое́й, премꙋ́дре а҆леѯа́ндре, и҆ ꙗ҆́кѡ безпло́тенъ на землѝ пожи́лъ є҆сѝ. тѣ́мъ почита́ющихъ тѧ̀ страсте́й и҆зба́ви те́мныхъ ѻ҆́блакъ, и҆ къ ти́хомꙋ приста́нищꙋ приводѧ̀, и҆ ѿгонѧ́ѧ ѡ҆полчє́нїѧ бѣсѡ́вскаѧ бжⷭ҇твенною си́лою.

Два́жды.

Сла́ва, и҆ ны́нѣ, бг҃оро́диченъ:

Сотво́рь вои́стиннꙋ съ тобо́ю вели̑чїѧ сн҃ъ превѣ́чный ѻ҆́ч҃имъ совѣ́томъ: жи́знь бо нетлѣ́ннꙋю безъ стра́сти родила̀ є҆сѝ, и҆ пребыла̀ є҆сѝ ꙗ҆́коже пре́жде ржⷭ҇тва̀ дв҃а, мт҃рскихъ и҆збѣ́гши болѣ́зней, и҆ по ржⷭ҇твѣ̀ дв҃ою пребы́вши.

На хвали́техъ стїхи̑ры, на д҃, гла́съ д҃.

Поⷣ: Да́лъ є҆сѝ зна́менїе:

Прпⷣбне и҆ бг҃оно́сне, ꙳ житїѐ твоѐ проше́дъ нескве́рнѡ, ꙳ терпѣ́нїе же и҆ кро́тость и҆ любо́вь нелицемѣ́рнꙋ, ꙳ воздержа́нїе безмѣ́рно, ꙳ всено́щное стоѧ́нїе, ꙳ ᲂу҆миле́нїе бж҃е́ственно, ꙳ вѣ́рꙋ и҆ наде́ждꙋ и҆́стиннꙋ, ꙳ съ ми́лованїемъ ѻ҆́ч҃е стѧжа́въ, ꙳ ꙗ҆́кѡ а҆́гг҃лъ пожи́лъ є҆сѝ на землѝ съ тѣ́ломъ, ꙳ а҆леѯа́ндре блаже́нне, ꙳ моли́твенниче ѡ҆ дꙋша́хъ на́шихъ.

Ꙗ҆́кѡ земны́й а҆́гг҃лъ, ꙳ и҆ нбⷭ҇ный человѣ́къ бы́лъ є҆сѝ, премꙋ́дре, ꙳ и҆сто́чникъ ᲂу҆миле́нїѧ ꙳ и҆ щедро́тъ стрꙋѧ̀ незави́стна ꙗ҆ви́лсѧ є҆сѝ, ꙳ пꙋчи́на чꙋде́съ, ꙳ грѣ́шникѡмъ и҆спорꙋ́чникъ, ꙳ ма́слина вои́стиннꙋ бж҃їѧ плодови́та, ꙳ ма́сломъ трꙋдѡ́въ твои́хъ, ꙳ а҆леѯа́ндре чꙋ́дне, ᲂу҆маща́ѧ сердца̀ ꙳ вѣ́рнѡ восхвалѧ́ющихъ тѧ̀.

Прпⷣбне и҆ бг҃облаже́нне, ꙳ ᲂу҆мертви́лъ є҆сѝ пло́ти мꙋдрова́нїе бжⷭ҇твенными разꙋмѣ̑нїи, тѣле́сныхъ превы́ше страсте́й бы́лъ є҆сѝ, ꙳ и҆ смѣше́нъ до́льними носѧ̀ начерта́нїе, ꙳ и҆з̾ѡбража́ѧ въ себѣ̀ бжⷭ҇твеннꙋю добро́тꙋ: ꙳ и҆ показа́лсѧ є҆сѝ ве́сь свѣтови́дѣнъ ꙳ дѣ́йствомъ ст҃а́гѡ дх҃а, ꙳ а҆леѯа́ндре ѻ҆́ч҃е на́шъ, ꙳ и҆́нокꙋющымъ ᲂу҆краше́нїе.

И҆сто́чникъ чꙋде́съ показа̀, ꙳ и҆ рѣкꙋ̀ дарова́нїй ра́кꙋ моще́й твои́хъ, ꙳ человѣ́кѡмъ гдⷭ҇и, ꙳ а҆леѯа́ндре премꙋ́дре, ꙳ слѣпы̑мъ є҆́же ви́дѣти сїѧ̑ дарова́сѧ, ꙳ прокажє́ннымъ ѡ҆чище́нїе. ꙳ ѡ҆держи̑мыѧ нечи́стыми дꙋ́хи, ꙳ ѿ тѣ́хъ вла́сти и҆збавлѧ́еши, ꙳ и҆ цѣломꙋ́дрїе тѣ̑мъ твори́ши, ꙳ и҆сцѣле́нїемъ неѡскꙋ́дно.

Сла́ва, гла́съ ѕ҃:

Ра́дꙋйсѧ, по́стникѡмъ свѣти́ло многосвѣ́тлое, и҆́нокѡмъ ѕвѣзда̀ незаходи́маѧ, па́стырємъ похвала̀, ѻ҆́ч҃е а҆леѯа́ндре, прпⷣбнымъ совсе́льниче: ра́дꙋйсѧ, трⷪ҇цы пресвѣ́тлое жили́ще: ра́дꙋйсѧ, любвѐ и҆ ми́лованїѧ и҆сто́чниче: ра́дꙋйсѧ, пресвѣ́тлый свѣти́льниче разсꙋжде́нїѧ: ра́дꙋйсѧ, пра́вило добродѣ́телей и҆́стинное: ра́дꙋйсѧ, сто́лпе ѡ҆дꙋшевле́нный: ра́дꙋйсѧ, вели́комꙋ новꙋ́градꙋ похвала̀ и҆ ᲂу҆твержде́нїе.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:

Славосло́вїе вели́кое. И҆ ѿпꙋ́стъ.

На лїтꙋргі́и, бл҃жє́нна, ѿ канѡ́на пѣ́снь г҃ и҆ ѕ҃. Прокі́менъ: Честна̀ предъ гдⷭ҇емъ: Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃ї. А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю:

* * *

18

Исправлена опечатка оригинала: сꙋсꙋ́де. Прим. orthlib

19

Исправлена опечатка оригинала: напалѧ́етъ. В Минее СПб, 1895 (репринт 1995) напаѧ́етъ. Прим. orthlib

Комментарии для сайта Cackle