Въ а҃-й де́нь: ст҃а́гѡ прⷪ҇ро́ка наꙋ́ма.
А҆ллилꙋ́їа, и҆лѝ тропа́рь. Стїхи̑ры, гла́съ г҃. Поⷣ: Ве́лїѧ крⷭ҇та̀ твоегѡ̀:
Бл҃года́ть ст҃а́гѡ дх҃а всели́сѧ въ тѧ̀, бж҃їй прⷪ҇ро́че, и҆ свое́ю лꙋче́ю содѣ́ла свѣщꙋ̀ пресвѣ́тлꙋ, и҆ тобо́ю проповѣ́даетъ бꙋ̑дꙋщаѧ нїнеѵі́и вели́комꙋ.
Ѻ҆́блакъ свѣтоза́ренъ ꙗ҆ви́лсѧ є҆сѝ, и҆ска́паѧ, наꙋ́ме, бж҃їй прⷪ҇ро́че, бг҃озна́нїѧ тꙋ́чꙋ: и҆ напои́лъ є҆сѝ пи́вомъ бж҃їѧ сꙋда̀ нїнеѵі́ю гра́дъ, нече́стїемъ болѣ́вшїй а҆́бїе.
Благосла́вїѧ нетлѣ́ннагѡ прича́стникъ бы́въ, наꙋ́ме, бж҃їй прⷪ҇ро́че, и҆ неизрече́нныѧ сла́вы, и҆ ра́дости несказа́нныѧ, и҆ сла́дости бжⷭ҇твенныѧ, ѡ҆ на́съ молѝ, бг҃одохнове́нне, всѣ́хъ влⷣкꙋ.
И҆́ны стїхи̑ры бцⷣы, гла́съ и҆ подо́бенъ то́йже.
(А҆́ще же а҆ллилꙋ́їа, пою́тсѧ стїхи̑ры пре́жде бцⷣы, пото́мъ ст҃а́гѡ.)
Ѻ҆рꙋ́жїемъ ᲂу҆ѧ́звлена мѧ̀ сꙋ́ща ѕмїи́нымъ, є҆́ле жи́ва, ѻ҆трокови́це, на ѻ҆дрѣ̀ лежа́ща ѿча́ѧнїѧ, и҆сцѣлѝ вско́рѣ лѣчбо́ю твоеѧ̀ моли́твы, и҆ раба̀ сотворѝ сн҃а и҆ бг҃а твоегѡ̀.
Вѣ́дꙋщи не́мощь мою̀ тѣле́снꙋю, и҆ дꙋше́внꙋю болѣ́знь, се́рдца же ѡ҆ѕлобле́нїе, посѣще́нїѧ сподо́би мѧ̀ бжⷭ҇твеннагѡ, всенепоро́чнаѧ дв҃о, и҆ спасѝ, молю́сѧ, те́плою твое́ю моли́твою.
Всѣ́хъ превзыдо́хъ, влⷣчце, согрѣше́ньми, но мно́жество, дв҃о, си́хъ ѡ҆чи́стивши, ми́лости твоеѧ̀ ра́ди ᲂу҆лꙋчи́ти мнѣ̀ проще́нїе въ бꙋ́дꙋщемъ сꙋдѣ̀, чⷭ҇таѧ, сподо́би, сн҃а и҆ бг҃а твоего̀ молѧ́щи.
Сла́ва, и҆ ны́нѣ, бг҃оро́диченъ:
Дв҃о, и҆зъ тебє̀ ро́ждшагосѧ молѝ, ста́до твоѐ сохрани́ти невре́дно ѿ всѧ́кагѡ и҆скꙋше́нїѧ проти́вника дїа́вола, и҆ и҆спо́лнити всю̀ во́лю сн҃а твоегѡ̀ ᲂу҆крѣпѝ, ѻ҆трокови́це.
Крⷭ҇тобг҃оро́диченъ:
Ѻ҆рꙋ́жїе се́рдце твоѐ про́йде, пречⷭ҇таѧ, є҆гда̀ сн҃а твоего̀ на крⷭ҇тѣ̀ ви́дѣла є҆сѝ и҆ вопїѧ́ла є҆сѝ: не безча́днꙋ мѧ̀ покажѝ, сн҃е мо́й и҆ бж҃е мо́й, соблюды́й мѧ̀ по ржⷭ҇твѣ̀ дв҃ꙋ.
На стїхо́внѣ ѻ҆ктѡ́иха. Тропа́рь, гла́съ в҃:
Прⷪ҇ро́ка твоегѡ̀ наꙋ́ма па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ, спасѝ дꙋ́шы на́шѧ.
На ᲂу҆́трени канѡ́нъ. Творе́нїе ѳеофа́ново.
Гла́съ є҃. Пѣ́снь а҃. І҆рмо́съ:
Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.
Наꙋ́ме, бж҃їимъ пома́завсѧ, бг҃опрїѧ́тне, дх҃омъ, и҆ сегѡ̀ бл҃года́тїю просвѣ́щсѧ: тѣ́мъ бжⷭ҇твенное прозрѣ́нїе ᲂу҆ма̀ твоегѡ̀ чтꙋ́ще, ᲂу҆блажа́емъ тѧ̀, всеизрѧ́дне.
Свы́ше ѡ҆гласи́вши, прⷪ҇ро́че, твою̀ дꙋ́шꙋ, дх҃а бл҃года́ть прⷪ҇ро́ческое дѣ́йство досто́йнѡ вдохнѐ, и҆ бг҃одохнове́ненъ ѧ҆зы́къ тво́й ᲂу҆стро́и, досточꙋ́дне.
Ѻ҆рга́нъ ꙗ҆ви́лсѧ є҆сѝ, ᲂу҆дарѧ́емь дх҃а брѧца́ломъ, ревни́телѧ бг҃а воспѣва́ѧ, и҆ всѣ̑мъ вѣща́ѧ бжⷭ҇твеннагѡ сꙋда̀ нелицемѣ́рїе, достосла́вне.
Бг҃оро́диченъ:
Пребл҃гослове́ннаѧ дв҃о всечⷭ҇таѧ, вѣ́рою тѧ̀ и҆ любо́вїю, ꙗ҆́кѡ бж҃їю мт҃рь чⷭ҇тнꙋ́ю, пою́щыѧ спаса́й ѿ бѣ́дъ, рѣша́щи неꙋкроти́мое свирѣ́пство.
Пѣ́снь г҃. І҆рмо́съ:
Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.
Прича́стїемъ животворѧ́щагѡ и҆ бжⷭ҇твеннагѡ дх҃а, дꙋше́ю бы́лъ є҆сѝ бг҃ови́днѣйшїй: тѣ́мже и҆ да̑льнаѧ ꙗ҆́вѣ всѣ̑мъ предвозвѣща́ти бжⷭ҇твеннымъ манове́нїемъ ты̀ пред̾ѡчи́стилсѧ є҆сѝ, бг҃одохнове́нне.
Сꙋ́дъ на врагѝ ѿмще́нїѧ предзрѣ́лъ є҆сѝ, бл҃же́нне бг҃ови́днѣйше, преѡби́дѧщихъ нечести́выхъ бж҃їе долготерпѣ́нїе, и҆ ми́лость, и҆ благосты́ню, ѿ неисцѣ́льныѧ ѕло́бы.
Бг҃оро́диченъ:
И҆́же дре́вле ѿ небытїѧ̀ сотвори́вый всѧ́чєскаѧ, и҆зъ твоеѧ̀ ст҃ы́ѧ ᲂу҆тро́бы прихо́дитъ, чл҃вѣ́къ бы́въ, чⷭ҇таѧ, за чл҃вѣколю́бїе превели́кое, чл҃вѣколю́бецъ, да человѣ́ки и҆зба́витъ.
Сѣда́ленъ, гла́съ є҃. Подо́бенъ: Собезнача́льное сло́во:
Несмѣ́сенъ начерта́нїемъ до́льнымъ, сла́вне, ты̀ ᲂу҆́мъ стѧжа́въ, бжⷭ҇твеннагѡ дх҃а чистѣ́йшее, наꙋ́ме, прїѧ́телище бы́лъ є҆сѝ, ѡ҆сїѧ́нїе є҆гѡ̀ прїе́млѧ свѣ́тлѡ, и҆ всѣ̑мъ ѡ҆блиста́ѧ: тѣ́мъ тѧ̀ мо́лимъ, ѡ҆ ми́рѣ мі́ра моли́сѧ.
Сла́ва, и҆ ны́нѣ, бг҃оро́диченъ:
И҆зъ тебє̀ вопло́щшагосѧ бг҃а и҆ гдⷭ҇а на́съ ра́ди, и҆стлѣ́вшихъ прегрѣше́ньми, молѝ прилѣ́жнѡ ᲂу҆ще́дрити ны̀, и҆ ѿврати́ти ꙗ҆́рость и҆ гнѣ́въ сво́й, чⷭ҇таѧ, ѡ҆ и҆̀же вѣ́рою чтꙋ́щихъ и҆ хва́лѧщихъ непреста́ннѡ си́лꙋ и҆ держа́вꙋ є҆гѡ̀.
Крⷭ҇тобг҃оро́диченъ:
На крⷭ҇тѣ̀ зрѧ́щи тѧ̀, хрⷭ҇тѐ, мт҃и твоѧ̀, во́лею посредѣ̀ разбо́йникѡвъ ви́сѧща, растерза́ющисѧ ᲂу҆тро́бою, мт҃рски глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀, ꙗ҆́коже ѕлодѣ́й пригвожде́нъ є҆сѝ, человѣ́ческїй ро́дъ хотѧ̀ ѡ҆живи́ти, ꙗ҆́кѡ бл҃гоꙋтро́бенъ;
Пѣ́снь д҃. І҆рмо́съ:
Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ помаза̑нныѧ твоѧ̑ прише́лъ є҆сѝ.
Сїѧ́ѧ заре́ю дх҃а, нїнеѵі́тѧнѡмъ преще́нїе запꙋстѣ́нїѧ предвозвѣсти́лъ є҆сѝ, бж҃їѧ си́лы проѧвлѧ́ѧ, бг҃оѧвле́нне, неизбѣ́жное.
Сꙋ́дъ пра́ведный зижди́телѧ повѣ́даеши, лю́тое всегꙋби́тельство лю́демъ враждє́бнымъ, ꙗ҆́кѡ прⷪ҇ро́чествꙋѧ провѣща́лъ є҆сѝ, наꙋ́ме, бж҃їй прⷪ҇ро́че всебл҃же́нне.
Смиреномꙋ́дрїемъ ᲂу҆краша́ема прⷪ҇ро́ка твоегѡ̀ дꙋша̀, къ бг҃овидѣ́нїю твоемꙋ̀, бл҃же, преесте́ственнѡ взѧ́сѧ, и҆ бжⷭ҇твеннагѡ видѣ́нїѧ свѣ́тлости.
Бг҃оро́диченъ:
Марі́е, гпⷭ҇жѐ тва́ри, цр҃ѧ̀ всѣ́хъ ро́ждши, є҆ди́на всепѣ́таѧ, страсте́й мꙋчи́тельства свобо́дна мѧ̀ покажѝ, моли́твами твои́ми.
Пѣ́снь є҃. І҆рмо́съ:
Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.
Непоро́чно и҆ чи́сто житїѐ стѧжа́ти, дѣ́йствомъ и҆ просвѣще́нїемъ ст҃а́гѡ дх҃а, наꙋ́ме, сподо́билсѧ є҆сѝ, проро́че чꙋ́дный.
Пло́ть покори́лъ є҆сѝ самоде́ржцꙋ ᲂу҆мꙋ̀, ᲂу҆се́рднѡ восхождє́нїѧ въ се́рдцѣ положи́въ: тѣ́мже ꙗ҆вле́нїѧ бг҃олѣ́пнагѡ полꙋчи́лъ є҆сѝ.
Па́че ви́димыхъ по́честей сꙋ́ть, и҆̀же прⷪ҇ро́чествомъ почествова́нныхъ: тѣ́ми бо вѣща́етъ ст҃ы́й дх҃ъ, пребл҃гі́й гдⷭ҇ь.
Бг҃оро́диченъ:
Нижѐ ᲂу҆́мъ нбⷭ҇ный и҆́стиннѡ возмо́жетъ тѧ̀, бг҃ома́ти, пѣ́ти досто́йнѡ: зижди́телѧ бо родила̀ є҆сѝ, нбⷭ҇ными пѣва́емаго си́лами.
Пѣ́снь ѕ҃. І҆рмо́съ:
Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Бжⷭ҇твенныѧ бл҃года́ти ꙗ҆́вльшасѧ хра́мъ, вѣ́рнїи, и҆ прїѧ́телище пречи́стое бы́вша, па́че ᲂу҆ма̀, бг҃оѧвле́нїѧ воспои́мъ.
Бжⷭ҇твеннагѡ дх҃а прїе́мъ незаходи́мꙋю зарю̀, и҆ ᲂу҆́мъ бжⷭ҇твенъ стѧжа́въ, благочести̑выѧ къ пѣснопѣ́нїю наказꙋ́етъ.
Бг҃оро́диченъ:
Мы́слєнныѧ си̑лы тѧ̀ и҆ человѣ́честїи всѝ ро́ди, ꙗ҆́кѡ бг҃а ро́ждшꙋю, сла́вѧтъ всегда̀, бл҃гослове́ннаѧ всенепоро́чнаѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Просвѣти́вшеесѧ дх҃омъ чи́стое твоѐ се́рдце, прⷪ҇ро́чества бы́сть свѣтлѣ́йшагѡ прїѧ́телище: зри́ши бо ꙗ҆́кѡ настоѧ̑щаѧ дале́че сꙋ̑щаѧ. сегѡ̀ ра́ди тѧ̀ почита́емъ, прⷪ҇ро́че бл҃же́нне наꙋ́ме сла́вне.
Пѣ́снь з҃. І҆рмо́съ:
Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Ꙗ҆́кѡ бг҃ови́днѣйша прⷪ҇ро́ка и҆мꙋ́ще ликѡ́въ нача́льника, че́стнѡ пра́зднꙋемъ бжⷭ҇твеннѣ, пѣснопою́ще: бж҃е, бл҃гослове́нъ є҆сѝ.
Тѧ̀ дх҃одви́жимаго позна́вше ѻ҆рга́на, и҆ цѣвни́цꙋ бг҃одохнове́ннꙋ, призыва́емъ застꙋ́пника, пѣ́сньми пою́ще: бж҃е, бл҃гослове́нъ є҆сѝ.
Вѣнча́ тѧ гдⷭ҇ь прⷪ҇ро́ка, чꙋ́дне, и҆ бл҃года́ть тебѣ̀ дадѐ предглаго́лати бꙋ̑дꙋщаѧ, є҆мꙋ́же всѝ пѣснопое́мъ: бж҃е, бл҃гослове́нъ є҆сѝ.
Бг҃оро́диченъ:
Две́рь непроходи́мꙋю прⷪ҇ро́къ ви́дѣ тѧ̀, дв҃о пречⷭ҇таѧ, ю҆́же є҆ди́нъ про́йде. є҆мꙋ́же всѝ пѣснопое́мъ: бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Тебѣ̀ вседѣ́телю въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте и҆ превозноси́те во всѧ̑ вѣ́ки.
Невеще́ственною заре́ю нача́льныѧ трⷪ҇цы, прⷪ҇ро́че, ѡ҆божа́емь, пое́ши, ра́дꙋѧсѧ: всѧ̑ дѣла̀ гдⷭ҇а по́йте, и҆ превозноси́те во всѧ̑ вѣ́ки.
Свѧщеннолѣ́пнѡ свѧще́ннꙋю твою̀ па́мѧть, прⷪ҇ро́че чꙋ́дный, чтꙋ́ще пое́мъ: всѧ̑ дѣла̀ гдⷭ҇а по́йте и҆ превозноси́те во всѧ̑ вѣ́ки.
Бг҃оро́диченъ:
Оу҆крѣпѝ, чⷭ҇таѧ, дꙋ́шꙋ мою̀, разсла́бленнꙋю прегрѣше́ньми и҆ страстьмѝ, ꙗ҆́кѡ да воспою̀, дв҃о, твоѐ ржⷭ҇тво̀, препросла́вленное во всѧ̑ вѣ́ки.
Пѣ́снь ѳ҃. І҆рмо́съ:
И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.
На землѝ равноа́гг҃льное житїѐ и҆мѣ́лъ є҆сѝ вои́стиннꙋ: и҆ ны́нѣ на нб҃сѣ́хъ со а҆́гг҃льскими ли́ки всели́лсѧ є҆сѝ бли́зъ свѣ́та трисїѧ́ннагѡ, є҆гѡ́же насыща́ѧсѧ, назира́й пою́щыѧ тѧ̀.
Тѧ̀ бг҃ꙋ приво́димъ ѡ҆ мі́рѣ, бл҃же́нне, моли́твенника, молѝ прилѣ́жнѡ, прⷪ҇ро́че, ꙗ҆́кѡ дерзнове́нїе и҆мѣ́ѧ, да́ти вѣ̑рнымъ благолѣ́пнѡ пребыва́ющее вѣ́чное и҆збавле́нїе.
Бг҃оро́диченъ:
Ꙗ҆́кѡ бг҃а ро́ждшꙋю, сꙋгꙋ́ба же и҆ соесте́ственна, и҆менꙋ́емъ тѧ̀ вѣ́рнїи бг҃оглаго́ливѡ бцⷣꙋ пречⷭ҇тꙋю всеи́стиннымъ зва́нїемъ, честно́е ржⷭ҇тво̀ проповѣ́дающе, всест҃а́ѧ бг҃оневѣ́сто.
Свѣти́ленъ днѐ. На стїхо́внѣ ѻ҆ктѡ́иха.