Мѣ́сѧца тогѡ́же въ в҃і-й де́нь. Прпⷣбнагѡ ѻ҆тца̀ на́шегѡ спѷрїдѡ́на чꙋдотво́рца, є҆пі́скопа трїмѷфі́йскагѡ.

На Гдⷭ҇и, воззва́хъ, стїхи̑ры на ѕ҃, гла́съ є҃. Подо́бенъ: Ра́дꙋйсѧ:

Ра́дꙋйсѧ, а҆рхїере́євъ пра́вило, цр҃кве непоколеби́мое ᲂу҆твержде́нїе, сла́во правосла́вныхъ, чꙋде́съ и҆сто́чниче, любвѐ стрꙋѧ̀ неистощи́маѧ, свѣти́льниче многосвѣ́тлый, дх҃а ѻ҆рга́не, ᲂу҆́ме бжⷭ҇твенный, кро́ткїй и҆ неѕло́бивый, и҆́же простото́ю и҆́стинною ᲂу҆краша́емь, человѣ́че нбⷭ҇ный, земны́й а҆́гг҃ле, вїногра́да дѣ́лателю, хрⷭ҇то́въ дрꙋ́же и҆́скреннїй, того̀ молѝ, пода́ти тебѐ чтꙋ́щымъ ве́лїю ми́лость.

Кро́токъ и҆ наслѣ́дникъ землѝ ты̀ кро́ткихъ, вои́стиннꙋ показа́лсѧ є҆сѝ, спѷрїдѡ́не ѻ҆тцє́въ сла́во: и҆́же жи́лами мꙋ́дрыхъ и҆ просты́хъ твои́хъ слове́съ бжⷭ҇твенною бл҃года́тїю, врага̀ вселꙋка́ваго и҆ пребезꙋ́мнаго а҆́рїа ᲂу҆дави́лъ є҆сѝ: и҆ велѣ́нїе бжⷭ҇твенное всѣ̑мъ ᲂу҆ѧсни́въ, вѣ̑рнымъ показа́лъ є҆сѝ, и҆ сп҃си́тельное возвы́сивъ дх҃омъ, всѧ̑ же правосла̑вныѧ просвѣти́въ ꙗ҆снѣ́йше, є҆ди́но сла́вити сло́во, ꙗ҆́кѡ вои́стиннꙋ є҆диносꙋ́щное ѻ҆ц҃ꙋ̀ пребезнача́льномꙋ, подаю́щее мі́рꙋ ве́лїю ми́лость.

Стра̑сти ᲂу҆мертви́въ плотскі̑ѧ, мє́ртвыѧ благода́тїю бж҃їею возста́вилъ є҆сѝ, и҆ ѕмїю̀ въ зла́то претвори́лъ є҆сѝ, и҆ рѣкѝ стремле́нїе моли́твою твое́ю, ѻ҆́ч҃е, ѡ҆бꙋзда́лъ є҆сѝ: но́щїю же царю̀ ꙗ҆́вльсѧ бѣ́дствꙋющемꙋ, сего̀ и҆сцѣли́лъ є҆сѝ къ се́рдцꙋ приближе́нїемъ, гдⷭ҇ꙋ тѧ̀ пресла́внѡ прославлѧ́ющꙋ. тѣ́мже велегла́снѡ твою̀ па́мѧть почита́емъ, и҆ моще́й бжⷭ҇твеннꙋю и҆ свѧще́ннꙋю ра́кꙋ чти́мъ, и҆зъ неѧ́же и҆стека́етъ врачева́нїй бжⷭ҇твеннаѧ стрꙋѧ̀, и҆ ве́лїѧ ми́лость.

Сла́ва, гла́съ а҃:

Прпⷣбне ѻ҆́ч҃е, бл҃же́нне спѷрїдѡ́не мꙋ́дре, ме́ртвꙋю ꙗ҆́коже жи́вꙋ вопроси́лъ є҆сѝ любвѐ ра́ди бж҃їѧ: ѕмїю́ же преложи́лъ є҆сѝ въ зла́то, нището́ю ѡ҆бдержи́момꙋ. тече́нїе же ᲂу҆держа́лъ є҆сѝ рѣкѝ, сострада́тельствовавъ лю́демъ: царю́ же предста́лъ є҆сѝ вра́чь промышле́нїемъ бж҃їимъ: мє́ртвыѧ же па́ки возста́вилъ є҆сѝ, ꙗ҆́кѡ тогѡ̀ ᲂу҆чени́къ, и҆ вѣ́рꙋ ᲂу҆ѧсни́лъ є҆сѝ посредѣ̀ ѻ҆тцє́въ мно́гихъ. всѧ̑ ᲂу҆́бѡ могі́й во ᲂу҆крѣплѧ́ющемъ тѧ̀ хрⷭ҇тѣ̀: того̀ и҆ ны́нѣ молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Всехва́льнїи мꙋ́чєницы:

Заколе́нїе твоѐ непра́ведное, хрⷭ҇тѐ, ꙳ дв҃а зрѧ́щи, ꙳ пла́чꙋщи вопїѧ́ше тѝ: ча́до сладча́йшее, ꙳ ка́кѡ безъ пра́вды ᲂу҆мира́еши; ꙳ ка́кѡ на дре́вѣ ви́сиши, ꙳ и҆́же всю̀ зе́млю повѣ́шей на вода́хъ; ꙳ не ѡ҆ста́ви менє̀ є҆ди́нꙋ, бл҃года́телю многоми́лостиве, ꙳ мт҃рь и҆ рабꙋ̀ твою̀, молю́сѧ.

На стїхо́внѣ ѻ҆ктѡ́иха. Сла́ва, ст҃а́гѡ, гла́съ в҃:

Ст҃и́телей бжⷭ҇твенный сосꙋ́дъ, ѻ҆́ч҃е прпⷣбне спѷрїдѡ́не мꙋ́дре, ты̀ добродѣ́тельми показа́лсѧ є҆сѝ: сегѡ̀ ра́ди цр҃кве предста́тель бы́въ, є҆ресенача́льники и҆згна́лъ є҆сѝ, и҆ а҆́рїево хꙋле́нїе собо́рнѣ на зе́млю низложи́лъ. тѣ́мже чꙋдодѣ́йствꙋѧ дѣ́ломъ и҆ сло́вомъ, сп҃са молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:

Дре́вꙋ крⷭ҇тномꙋ тѧ̀, і҆и҃се, пригвожде́на зрѧ́щи неискꙋсобра́чнаѧ, пла́чꙋщи глаго́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀, є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стрⷭ҇ти твоѧ̑ сла́вѧщїи.

Тропа́рь, гла́съ д҃:

Пра́вило вѣ́ры, и҆ ѻ҆́бразъ кро́тости, воздержа́нїѧ ᲂу҆чи́телѧ, ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е спѷрїдѡ́не, молѝ хрⷭ҇та̀ бг҃а, спасти́сѧ дꙋша́мъ на́шымъ.

И҆лѝ се́й, гла́съ а҃:

Собо́ра пе́рвагѡ показа́лсѧ є҆сѝ побо́рникъ и҆ чꙋдотво́рецъ, бг҃оно́се спѷрїдѡ́не, ѻ҆́ч҃е на́шъ. тѣ́мже ме́ртвꙋ ты̀ во гро́бѣ возгласи́въ, и҆ ѕмїю̀ въ зла́то претвори́лъ є҆сѝ: и҆ внегда̀ пѣ́ти тебѣ̀ ст҃ы̑ѧ моли̑твы, а҆́гг҃лы сослꙋжа́щыѧ тебѣ̀ и҆мѣ́лъ є҆сѝ, свѧще́ннѣйшїй. сла́ва да́вшемꙋ тебѣ̀ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Сла́ва, и҆ ны́нѣ, бг҃оро́диченъ:

На ᲂу҆́трени ѻ҆́ба канѡ́на ѻ҆ктѡ́иха, безъ мч҃ничнѡвъ: И҆ ст҃а́гѡ канѡ́нъ на ѕ҃. Творе́нїе ѳеофа́ново.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Кро́ткихъ зе́млю дости́гъ, ѻ҆́ч҃е, ꙗ҆́кѡ кро́токъ и҆ ми́лостивъ и҆ чи́стъ бы́въ, настоѧ́щꙋю се́рдца моегѡ̀ ᲂу҆кротѝ бꙋ́рю, ꙗ҆́кѡ, да, въ тишинѣ̀ бжⷭ҇твеннѣй бы́въ, пѣсносло́влю тѧ̀.

Дѣ̑ланїи бжⷭ҇твенными дꙋ́шꙋ, ѻ҆́ч҃е, ѡ҆чи́стивъ, бг҃ови́дѣнъ, спѷрїдѡ́не, бы́лъ є҆сѝ, и҆ бжⷭ҇твеннагѡ дх҃а пресвѣ́тлымъ ѡ҆богати́лсѧ є҆сѝ ѡ҆сїѧ́нїемъ: тѣ́мъ ѡ҆зарѧ́еши чи́стѡ бл҃жа́щыѧ тѧ̀.

Ѿ па́ствы, ꙗ҆́коже дв҃дъ, тѧ̀ воспрїе́мъ содѣ́тель, слове́сныѧ тѧ̀ поста́ви па́ствы па́стырѧ всеизѧ́щнѣйша, простото́ю и҆ кро́тостїю сїѧ́юща, и҆ безѕло́бїемъ, преподо́бне па́стырю, ᲂу҆краша́ема.

Бг҃оро́диченъ:

Прест҃а́ѧ дв҃о чⷭ҇таѧ, просвѣтѝ и҆ ѡ҆свѧтѝ помышлє́нїѧ и҆ дꙋ́шꙋ мою̀, молю́сѧ, ѻ҆́блаки разорѧ́ющи невѣ́жества моегѡ̀, и҆ тмꙋ̀ ѿе́млющи грѣхо́внꙋю, ꙗ҆́кѡ да по до́лгꙋ ᲂу҆блажа́ю тѧ̀.

Пѣ́снь г҃. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Оу҆́мъ тво́й безстра́стїемъ просвѣти́въ, и҆ бжⷭ҇твеннымъ смире́нїемъ ᲂу҆краси́всѧ, дарова̑нїѧ дх҃а прїѧ́лъ є҆сѝ ѿгони́ти дꙋ́хи, и҆ рѣши́ти недꙋ́ги вѣ́рнѡ чтꙋ́щихъ тѧ̀ свѧще́ннѣйше.

Ѕмі́ѧ началоѕло́бнаго ᲂу҆би́въ, нра́въ сребролю́бный попра́въ, ми́лꙋѧ тре́бꙋющаго, ст҃и́телю, ѕмі́ѧ преложи́лъ є҆сѝ въ златꙋ́ю ᲂу҆́тварь свѧще́нными твои́ми моли́твами, ѻ҆́ч҃е преподо́бне.

Возше́лъ є҆сѝ на го́рꙋ безстра́стїѧ, вше́лъ є҆сѝ во хра́мъ бг҃овидѣ́нїѧ, въ скрижа́ли же се́рдца твоегѡ̀ прїѧ́лъ є҆сѝ зако́нъ спаси́тельный, ꙗ҆́кѡ свѧще́ннѣйшїи и҆ ᲂу҆го́дникъ при́сный влⷣки твоегѡ̀.

Бг҃оро́диченъ:

Оу҆врачѝ стрꙋ́пы дꙋшѝ моеѧ̀, ᲂу҆́мъ мо́й ѡ҆мраче́нный нерадѣ́нїемъ, бг҃оневѣ́сто, ѡ҆зарѝ, да пою̀: нѣ́сть непоро́чны па́че тебє̀, непоро́чнаѧ, и҆ нѣ́сть чи́сты па́че тебє̀, влⷣчце.

Сѣда́ленъ, гла́съ и҃. Подо́бенъ: Премꙋ́дрости:

Ѿ па́ствы ѻ҆ве́цъ предста́тельствовати хрⷭ҇то́вѣ цр҃кви врꙋчи́всѧ, па́стырь бг҃опроизведе́нъ ты̀, спѷрїдѡ́не, возсїѧ́лъ є҆сѝ: ѕлосла́вїѧ во́лки ѿгна́лъ є҆сѝ словєсы̀ твои́ми, на благоче́стїѧ па́жити сїю̀ воспита́въ. тѣ́мже посредѣ̀ бг҃оно́сныхъ ѻ҆ц҃є́въ вѣ́рꙋ ᲂу҆тверди́лъ є҆сѝ мꙋ́дростїю дх҃а, і҆ера́рше бл҃же́нне, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ. Подо́бенъ:

Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителѧ: прїѧ́телище ꙗ҆́кѡ сꙋ́щи ᲂу҆тѣ́шителѧ, всепѣ́таѧ, беззако́нїѧ мѧ̀ сꙋ́ща скве́рное ѻ҆би́телище, и҆ де́мѡнѡвъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.

Крⷭ҇тобг҃оро́диченъ:

А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃. І҆рмо́съ:

Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Оу҆́гльми честна́гѡ разже́гсѧ дх҃а, страсте́й ᲂу҆добопопалѧ́емꙋю ве́щь, всебл҃же́нне, поже́глъ є҆сѝ: мі́ръ же ѻ҆гнесїѧ́ньми добродѣ́телей твои́хъ, спѷрїдѡ́не, просвѣти́лъ є҆сѝ.

Оу҆мертви́въ твоѧ̑ плотска̑ѧ движє́нїѧ, бг҃одохнове́нне, мє́ртвыѧ возста́вилъ є҆сѝ животво́рнымъ твои́мъ приглаго́ланїемъ. тѣ́мже молю̀ тѧ̀: ᲂу҆мерщвле́ннꙋю дꙋ́шꙋ мою̀, ѻ҆́ч҃е, ѡ҆живѝ.

Повинꙋ́ющисѧ ме́ртваѧ тебѣ̀ гла́съ, ѻ҆́ч҃е, дадѐ, и҆ рѣ̑чнаѧ стремлє́нїѧ твои́ми ᲂу҆держа́шасѧ повелѣ̑нїи: ꙗ҆ви́лсѧ є҆си́ бо, бл҃же́нне, чꙋдодѣ́латель, бжⷭ҇твеннꙋю бл҃года́ть прїе́мь.

Бг҃оро́диченъ:

Прⷪ҇ро́цы твоегѡ̀ та́инства глꙋбинꙋ̀ провозвѣсти́ша недомы́сленнꙋю: є҆ди́на бо родила̀ є҆сѝ, чⷭ҇таѧ, недоразꙋмѣва́емаго, воплоще́нна за милосе́рдїе неисповѣди́мое.

Пѣ́снь є҃. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Рѣка̀ сꙋ́щихъ въ тебѣ̀ дарова́нїй всѧ́кое напоѧ́етъ, прпⷣбне, се́рдце, всѣ̑мъ да́рꙋетъ бога́тнѡ здра́вїе: всѧ̑ бг҃а къ сла́вѣ возставлѧ́етъ тебѐ просла́вльшаго, и҆ чꙋдодѣ́йствы всѧ́кими почествова́вшаго.

Тѧ̀ ца́рь земны́й, бл҃же́нне, цр҃ѧ̀ нбⷭ҇нагѡ ꙗ҆́вѣ позна̀ и҆́скреннѧго раба̀, и҆ дарова́нїй бжⷭ҇твенныхъ и҆спо́лненнаго, внегда̀ прїитѝ тебѣ̀ къ немꙋ̀, вели́каго врача̀ къ бг҃ꙋ возвѣща́ѧ.

А҆враа́мовꙋ страннолю́бномꙋ нра́вꙋ ты̀ ᲂу҆подо́бивсѧ, всѣ̑мъ до́ма твоегѡ̀ вхо́ды ѿве́рзлъ є҆сѝ, и҆ всѣ̑мъ всѧ́къ бы́лъ є҆сѝ, и҆ промышлѧ́ѧ сꙋ́щими во ѡ҆бстоѧ́нїи, спѷрїдѡ́не блаже́нне.

Бг҃оро́диченъ:

Но́ва на́мъ породила̀ є҆сѝ млⷣнца, пре́жде вѣкѡ́въ, ѻ҆трокови́це, рожде́нна ѿ ѻ҆ц҃а̀ безнача́льна. є҆го́же ᲂу҆молѝ ꙗ҆́кѡ сн҃а и҆ бг҃а твоего̀, ᲂу҆ще́дрити бцⷣꙋ тѧ̀, пречⷭ҇таѧ, дꙋше́ю чи́стою возвѣща́ющыѧ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Зла́то ꙗ҆́кѡ ка́лъ тебѣ̀ вмѣни́сѧ, па́че зла́та безстра́стїемъ сїѧ́ющꙋ, и҆ ѡ҆богати́вшꙋсѧ, прпⷣбне, дарова̑нїи всезлаты́ми дх҃а.

Чи́стѡ слꙋжѧ̀ влⷣцѣ твоемꙋ̀, мно́жество и҆мѣ́лъ є҆сѝ, прпⷣбне, послꙋ́шающее тебѐ а҆́гг҃льскихъ си́лъ, неви́димыми гла́сы, свѧще́ннѣйше.

Пресла́вное, всемꙋ́дре, житїѐ твоѐ мі́рꙋ тѧ̀ пресла́вна, ѻ҆́ч҃е, содѣ́ла. тѣ́мже бжⷭ҇твеннꙋю па́мѧть твою̀, ра́дꙋющесѧ соверша́емъ пою́щїи тѧ̀.

Бг҃оро́диченъ:

Нб҃съ ши́рши чре́во твоѐ бы́сть неискꙋсомꙋ́жнаѧ, бг҃а вмѣсти́вшее, нигдѣ́же вмѣсти́маго, всест҃а́ѧ дв҃о бг҃оневѣ́сто.

Конда́къ, гла́съ в҃. Подо́бенъ: Вы́шнихъ и҆щѧ̀:

Любо́вїю хрⷭ҇то́вою ᲂу҆ѧзви́всѧ свѧще́ннѣйшїй, ᲂу҆́мъ впери́въ заре́ю дх҃а, дѣ́тельными видѣ́нїемъ твои́мъ дѣѧ́нїе ѡ҆брѣ́лъ є҆сѝ, бг҃опрїѧ́тне, же́ртвенникъ бжⷭ҇твенный бы́въ, просѧ̀ всѣ̑мъ бжⷭ҇твеннагѡ сїѧ́нїѧ.

І҆́косъ:

И҆зъ чре́ва ѡ҆свѧще́ннаго і҆ера́рха гдⷭ҇нѧ восхва́лимъ ны́нѣ спѷрїдѡ́на, бл҃года́ти скрижа̑ли прїе́мшаго бжⷭ҇твенныѧ сла́вы, и҆ въ чꙋдесѣ́хъ пресла́внаго все́й тва́ри, и҆ ꙗ҆́кѡ те́пла и҆ самови́дца бжⷭ҇твеннагѡ ѡ҆сїѧ́нїѧ, ꙗ҆́кѡ ни́щихъ предста́телѧ, и҆ согрѣша́ющихъ дꙋшево́дца: то́й бо бж҃е́ственна прⷭ҇то́лꙋ хрⷭ҇то́вꙋ же́ртва бы́сть, просѧ̀ всѣ̑мъ бж҃е́ственнагѡ сїѧ́нїѧ.

Пѣ́снь з҃. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Мѡѷсе́ево неѕло́бїе, дв҃довꙋ кро́тость, і҆́ѡва а҆ѵсі́тїдскагѡ непоро́чное стѧжа́въ, дх҃а бы́лъ є҆сѝ жили́ще, поѧ̀ свѧще́ннѣйше: сы́й бл҃гослове́нъ и҆ препросла́вленъ.

Прошє́нїѧ на главꙋ̀ твою̀ во вре́мѧ жа́твы нб҃са̀ и҆ска́паша, бꙋ́дꙋщее прозна́меноваша: бг҃ъ бо, ꙗ҆́коже речѐ, бжⷭ҇твеннꙋю па́мѧть твою̀, прпⷣбне, просла́ви, вѣ̑рныѧ ѡ҆свѧща́ѧ хода́тайствомъ твои́мъ.

Въ собо́рѣ ѻ҆тцє́въ тѧ̀ бг҃ъ прославлѧ́етъ, на сꙋдѣ̀ словеса̀ твоѧ̑ сохра́нша, бл҃же́нне: ꙗ҆̀же вѣ́рою прине́слъ є҆сѝ, безслове́снѣйшаго а҆́рїа ѡ҆бꙋѧ̑ющаѧ ꙗ҆́вѣ, и҆ ᲂу҆празднѧ́ющаѧ сегѡ̀ противле́нїе.

Бг҃оро́диченъ:

Гро́здъ возрасти́ла є҆сѝ неизрече́ннымъ сло́вомъ, ꙗ҆́кѡ лоза̀, дв҃о, є҆ди́наго невоздѣ́ланнаго, вїно̀ и҆сточа́юща, всѧ̑ веселѧ́щее, всѧ̑ ѡ҆свѧща́юща земны̑ѧ, и҆ всѧ́ко пїѧ́нство лю́тыхъ ѿе́млюща.

Пѣ́снь и҃. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Пе́щь страсте́й бжⷭ҇твенными ѡ҆дожде́ньми бжⷭ҇твеннагѡ дх҃а погаси́лъ є҆сѝ, и҆ ро́сꙋ и҆сточи́лъ є҆сѝ недꙋ́гѡвъ, ѻ҆́ч҃е, зно́й ѿе́млющꙋю, вѣ́рнѡ къ тебѣ̀ приходѧ́щихъ всегда̀, бл҃же́нне спѷрїдѡ́не пребога́те.

Безѕло́бивъ, пра́въ, кро́токъ же и҆ ми́лостивъ, и҆ неѕлопа́мѧтливъ бы́лъ є҆сѝ, любо́венъ, страннолю́бецъ, і҆ера́рхъ свѧще́ннѣйшїй, мꙋ́дростїю ᲂу҆кра́шенъ, прпⷣбне, правосла́вїѧ. тѣ́мже тѧ̀ вѣ́рою почита́емъ.

Дре́вле тебѣ̀ гла́съ, ꙗ҆́кѡ жива̀, ᲂу҆ме́ршаѧ, вопро́шшꙋ тѝ, ѻ҆́ч҃е, дадѐ. ѽ чꙋдесѐ и҆зрѧ́дна! ѽ пресла́внагѡ та́инства! ѽ бл҃года́ти, ю҆́же полꙋчи́лъ є҆сѝ, житїе́мъ ᲂу҆краша́емь а҆́гг҃льскимъ, досточꙋ́дне!

Бг҃оро́диченъ:

Стра̑сти моегѡ̀ се́рдца и҆сцѣлѝ ми́лостїю твое́ю, всепѣ́таѧ, ᲂу҆́мъ моѝ ᲂу҆мирѝ, и҆ дꙋ́шꙋ мою̀ просвѣтѝ: и҆ ходи́ти мѧ̀ возблагопꙋ́тстви на стєзѝ спаси́тєльныѧ, ꙗ҆́кѡ да при́снѡ пою́ тѧ, всепѣ́таѧ.

Пѣ́снь ѳ҃. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Безнача́льна роди́телѧ сн҃а ꙗ҆́снѡ проповѣ́далъ є҆сѝ, є҆диносꙋ́щна ѻ҆ц҃ꙋ̀ и҆ соприсносꙋ́щна, посредѣ̀ бг҃оно́сныхъ ѻ҆ц҃є́въ возвели́чивсѧ, и҆ беззако́ннꙋющихъ загради́лъ є҆сѝ ᲂу҆ста̀, ст҃и́телю всебл҃же́нне.

Многосвѣ́тлое со́лнце, ѻ҆тцє́въ ᲂу҆краше́нїе, і҆ере́євъ сла́ва, а҆́гг҃лѡвъ совсе́льниче, твою̀ свѣтоно́снꙋю па́мѧть ра́достнѡ ны́нѣ соверша́ющыѧ, свѣ́та сподо́би невече́рнѧгѡ моли́твами твои́ми.

Бжⷭ҇твєннаѧ селє́нїѧ, гра́дъ нбⷭ҇ный, пра́зднꙋющихъ кра́сный ли́къ, ѡ҆свѧще́ннꙋю дꙋ́шꙋ твою̀, и҆ добродѣ́тельми ᲂу҆кра́шеннꙋю, всеблаже́нне, прїѧ́тъ во гла́сѣ ра́дованїѧ.

Бг҃оро́диченъ:

Ве́лїе та́инство па́че ᲂу҆ма̀ ржⷭ҇тва̀ твоегѡ̀, ᲂу҆дивлѧ́етъ а҆́гг҃лы, бг҃ора́дованнаѧ, наслажда́етъ прпⷣбныхъ собо́ръ, свѧщє́нныѧ же весели́тъ ѻ҆тцы̀, бжⷭ҇твеннѡ пою́щыѧ тѧ̀, наде́ждꙋ дꙋ́шъ на́шихъ.

Свѣти́ленъ ѻ҆ктѡ́иха. Сла́ва, ст҃а́гѡ. Подо́бенъ: Не́бо ѕвѣзда́ми:

Тѧ̀ ѿ безслове́сныѧ па́ствы преведѐ въ слове́снꙋю дх҃ъ, бг҃оно́се, ꙗ҆́коже мѡѷсе́а и҆ дв҃да, и҆́хже ᲂу҆подо́билсѧ є҆сѝ нра́вꙋ, спѷрїдѡ́не, свѣ́те вселе́нныѧ.

Бг҃оро́диченъ:

Сꙋ́щихъ ѿ бг҃а мі́рꙋ пода́нныхъ благи́хъ ты̀ вина̀ была̀ є҆сѝ, бцⷣе: но и҆ ны́нѣ ᲂу҆ми́лостиви ѡ҆ ѻ҆́бщемъ спасе́нїи благопремѣ́ннаго бг҃а.

На стїхо́внѣ ѻ҆ктѡ́иха. Сла́ва, ст҃а́гѡ, гла́съ д҃:

Прпⷣбне ѻ҆́ч҃е, ст҃и́телю прехва́льне, а҆пⷭ҇льскагѡ ᲂу҆че́нїѧ бы́въ и҆спо́лненъ, и҆ бжⷭ҇твеннагѡ дх҃а жили́ще добродѣ́тельнагѡ ра́ди жи́тельства показа́всѧ, цр҃кѡ́вныѧ во́лки ᲂу҆че́ньми ѿгна́лъ є҆сѝ, и҆ правосла́вныхъ вѣ́рꙋ ᲂу҆ѧсни́лъ є҆сѝ, сто́лпъ ꙗ҆ви́лсѧ є҆сѝ благоче́стїѧ и҆ побо́рникъ. тѣ́мже и҆ чꙋдодѣ́йствꙋѧ въ концѣ́хъ, ѕмїю̀ въ зла́то преложи́лъ є҆сѝ, и҆ ме́ртвꙋю къ вопроше́нїю воздви́глъ є҆сѝ, но, ѽ ѻ҆тцє́въ досточꙋ́дне, и҆ ᲂу҆чи́телей собесѣ́дниче! сп҃сꙋ моли́сѧ спастѝ дꙋ́шы на́шѧ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:

Оу҆мерщвлѧ́ема ви́дѧщи хрⷭ҇та̀, ꙳ пречⷭ҇таѧ влⷣчца ꙳, ᲂу҆мерщвлѧ́юща льсти́ваго ꙳, восклица́ше го́рцѣ взыва́ющи, ꙳ и҆́же и҆зъ ᲂу҆тро́бы тоѧ̀ произше́дшꙋ, ꙳ и҆ долготерпѣ́нїю є҆гѡ̀ чꙋдѧ́щисѧ, взыва́ше ꙳: ча́до моѐ любе́знѣйшее ꙳, не забꙋ́ди рабы̀ твоеѧ̀ ꙳, не закоснѝ, чл҃вѣколю́бче, моѐ ᲂу҆тѣше́нїе.

На лїтꙋргі́и, Бл҃жє́нна, ѻ҆ктѡ́иха, и҆ ст҃а́гѡ пѣ́снь г҃. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы: А҆пⷭ҇лъ ко є҆вре́ємъ, зача́ло тл҃є. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости: Сті́хъ: Зако́нъ бг҃а є҆гѡ̀: Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю: