Мѣ́сѧца тогѡ́же въ к҃а-й де́нь. Предпра́зднство ржⷭ҇тва̀ хрⷭ҇то́ва:
И҆ ст҃ы́ѧ мч҃ницы і҆ꙋлїані́и, ꙗ҆́же въ нїкомиді́и:
И҆ преставле́нїе и҆́же во ст҃ы́хъ ѻ҆тца̀ на́шегѡ петра̀ митрополі́та всеѧ̀ рѡссі́и.
Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры предпра́зднства, гла́съ д҃.
Подо́бенъ: Да́лъ є҆сѝ зна́менїе:
Се́й бг҃ъ на́шъ, ꙳ не вмѣни́тсѧ и҆́нъ къ немꙋ̀, ꙳ восклица́ше прⷪ҇ро́къ дх҃омъ, ꙳ и҆ пꙋ́ть и҆з̾ѡбрѣ́те всѧ́кагѡ хꙋдо́жества. ꙳ по си́хъ же человѣ́кѡмъ ᲂу҆подо́битсѧ, въ пло́ть ѡ҆бле́ксѧ: ꙳ ѿ дв҃ы бо бг҃оѻтрокови́цы роди́тисѧ грѧде́тъ, ꙳ пристꙋ́пенъ мнѣ̀ бы́въ, ꙳ и҆́же є҆стество́мъ непристꙋ́пный.
Сто́гъ гꙋме́нный ꙳ твоѐ чре́во, всенепоро́чнаѧ бцⷣе, показꙋ́етсѧ, ꙳ кла́съ невоздѣ́ланный, ꙳ па́че ᲂу҆ма̀ и҆ сло́ва носѧ́що неизрече́ннѡ. ꙳ є҆го́же въ верте́пѣ виѳлее́мстѣмъ роди́ши, ꙳ тва́рь всю̀ бжⷭ҇твенными ра́зꙋмы ꙳ хотѧ́щагѡ пита́ти бл҃года́тїю, ꙳ и҆ ѿ гла́да человѣ́чество ꙳ дꙋшетлѣ́ннагѡ и҆зба́вити.
Ю҆́ница непоро́чнаѧ, ꙳ ᲂу҆пита́ннаго ю҆нца̀ носѧ́щи во чре́вѣ, ꙳ грѧде́тъ во ст҃ы́й верте́пъ ꙳ пресла́внымъ сло́вомъ сего̀ породи́ти, ꙳ и҆ пелена́ми пови́ти, ꙗ҆́кѡ человѣ́ка, ꙳ и҆ положи́ти въ ꙗ҆́слехъ, ꙗ҆́кѡ млⷣнца. ꙳ тва́рь предпра́зднствꙋй, ꙳ ра́достнѡ велича́ющи, ꙳ такѡва́ѧ пресла̑внаѧ на землѝ содѣ́лавшаго.
И҆ ст҃ы́ѧ, гла́съ то́йже. Подо́бенъ: Ꙗ҆́кѡ до́блѧ:
Багрє́нїи кро́вными ꙳ спасе́нїѧ ѻ҆де́ждꙋ себѣ̀, ꙳ всехва́льнаѧ, ѡ҆багри́вши, ꙳ и҆ просвѣти́вшисѧ дх҃омъ, ꙳ гдⷭ҇ꙋ ѡ҆брꙋчи́ласѧ є҆сѝ безсме́ртномꙋ цр҃ю̀, ꙳ соблюда́ющемꙋ тѧ̀ непоро́чнꙋ, ꙳ нерастлѣ́ннꙋ во вѣ́къ вѣ́ка ꙳ въ черто́зѣхъ нбⷭ҇ныхъ ꙗ҆́кѡ дв҃ꙋ преꙋдо́бреннꙋ и҆ нетлѣ́ннꙋ.
Ра́намъ приѡбщи́вшисѧ, ꙳ и҆ со ѻ҆гне́мъ бра́вшисѧ, ꙳ и҆ пло́ти терза̑нїѧ претерпѣ́вши, ꙳ и҆ конѡ́бнаѧ врѣ̑нїѧ до́блественнѣ поне́сши, ꙳ не побѣди́ласѧ є҆сѝ по́мысломъ, ꙳ и҆стꙋка̑ннымъ не поже́рла є҆сѝ: ꙳ но прекло́нши бг҃ꙋ вы́ю, ꙳ ме́чнымъ мꙋче́нїемъ вѣнцено́сица, ꙳ на нб҃са̀ возшла̀ є҆сѝ.
Ка́плѧми кро́ве ᲂу҆ѧсни́вшисѧ, ꙳ возсїѧ́ла є҆сѝ проѧвле́ннѡ, ꙗ҆́кѡ со́лнце, ꙳ и҆ ѿгна́ла є҆сѝ, всехва́льнаѧ, безбо́жїѧ тмꙋ̀ бл҃года́тїю, ꙳ мч҃нице і҆ꙋлїані́е, и҆ вѣ̑рныѧ просвѣти́ла є҆сѝ, ꙳ чтꙋ́щыѧ твоѧ̑ до́блествєнныѧ по́двиги, ꙳ и҆ па́мѧть свѣ́тлꙋю и҆ свѣтоно́снꙋю, ꙳ и҆ по всемꙋ̀ спаси́тельнꙋю.
Сла́ва, и҆ ны́нѣ: предпра́зднства, гла́съ ѕ҃.
Сїѡ́не, торжествꙋ́й, і҆ерꙋсали́ме, весели́сѧ: гра́де хрⷭ҇та̀ бг҃а, под̾имѝ зижди́телѧ въ верте́пѣ и҆ ꙗ҆́слехъ вмѣща́емаго. ѿве́рзите мѝ врата̀, и҆ вше́дъ въ нѧ̀ ᲂу҆зрю̀, ꙗ҆́кѡ млⷣнца пелена́ми повива́емаго, дла́нїю же содержа́щаго тва́рь, є҆го́же пою́тъ а҆́гг҃ли непреста́ннымъ гла́сомъ, жизнода́вца, гдⷭ҇а спаса́ющаго ро́дъ на́шъ.
На стїхо́внѣ стїхи̑ры предпра́зднства, гла́съ в҃. Подо́бенъ: До́ме є҆ѵфра́ѳовъ:
Всѣ́хъ прⷪ҇ро́кѡвъ ꙳ проречє́нїѧ и҆сполнѧ́ютсѧ: хрⷭ҇то́съ бо ражда́етсѧ ꙳ въ виѳлее́мѣ гра́дѣ, и҆зъ чⷭ҇тыѧ бг҃оѻтрокови́цы.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Сла́ва земноро́дныхъ, ꙳ и҆ ра́дованїе и҆ хвала̀, ꙳ виѳлее́ме честны́й, ꙳. митропо́лїѧ бжⷭ҇твеннаѧ, ꙳ под̾имѝ зижди́телѧ твоего̀.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Сло́во ѻ҆́ч҃ее, ꙳ и҆́мже всѧ̑ бы́ша, ꙳ безстра́стнѡ и҆ нете́чнѡ, ꙳ ѵ҆поста́сь зри́тсѧ є҆ди́на ꙳ во двою̀ є҆стєствꙋ̀.
Сла́ва, и҆ ны́нѣ, гла́съ ѕ҃. Вѷзанті́ево:
Безневѣ́стнаѧ дв҃о, ѿкꙋ́дꙋ пришла̀ є҆сѝ; кто̀ роди́вый тѧ̀; кто̀ и҆ ма́ти твоѧ̀; ка́кѡ зижди́телѧ но́сиши на рꙋкꙋ̀; ка́кѡ не растли́ласѧ є҆сѝ ᲂу҆тро́бою; ѽ вели́кихъ пресла́вныхъ на тебѣ̀ стра́шныхъ та́инствъ, на землѝ соверша́емыхъ, зри́мъ, всест҃а́ѧ! и҆ пред̾ꙋготовлѧ́емъ досто́йный тебѣ̀ до́лгъ, на землѝ верте́пъ: и҆ ѿ нб҃съ про́симъ пода́ти ѕвѣздꙋ̀. и҆ волсви́ же прихо́дѧтъ ѿ восто́кѡвъ землѝ къ за́падѡмъ, ви́дѣти человѣ́ческое спасе́нїе, въ ꙗ҆́слехъ пелена́ми повива́емое.
Тропа́рь ст҃ы́ѧ, гла́съ д҃:
А҆́гница твоѧ̀, і҆и҃се, і҆ꙋлїані́а, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но, ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
Сла́ва, и҆ ны́нѣ, гла́съ то́йже:
Гото́висѧ виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бжⷭ҇твенный са́дъ, ѿ негѡ́же ꙗ҆́дше, жи́ви бꙋ́демъ, не ꙗ҆́коже а҆да́мъ ᲂу҆́мремъ. хрⷭ҇то́съ ражда́етсѧ, пре́жде па́дшїй возста́вити ѻ҆́бразъ.
Вѣ́домо бꙋ́ди, и҆дѣ́же пра́зднꙋетсѧ ст҃а́гѡ петра̀ митрополі́та пра́здникъ, пое́мъ канѡ́нъ ст҃ы́ѧ і҆ꙋлїані́и на повече́рїи, вкꙋ́пѣ съ трипѣ́снцемъ, и҆ послѣдѝ стїхи̑ры є҆ѧ̀.
На повече́рїи трипѣ́снецъ, і҆рмо́съ по два́жды, тропарѝ на ѕ҃: и҆ па́ки послѣдѝ і҆рмо́съ ѻ҆́ба ли̑ка вкꙋ́пѣ, є҆гѡ́же краегране́сїе:
Четве́ртомꙋ пою̀.
Гла́съ в҃. Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Вотщѐ со́нмище и҆́рѡдово, и҆ во́лею собира́етсѧ, скверноꙋбі́йственное, ражда́ющагосѧ гдⷭ҇а ᲂу҆би́ти хрⷭ҇та̀. є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀ гдⷭ҇и.
Лю́тый совѣ́тъ и҆́рѡдовъ покрыва́етсѧ, бг҃обо́рныѧ дꙋшѝ сы́й, со младє́нцы влⷣкꙋ ᲂу҆би́ти хрⷭ҇та̀, є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.
Пѣ́снь и҃. І҆рмо́съ:
Глаго́лъ мꙋчи́телевъ поне́же превозмо́же, седмери́цею пе́щь разжже́на бы́сть и҆ногда̀: въ не́йже ѻ҆́троцы не ѡ҆пали́шасѧ, царе́во попра́вше велѣ́нїе, но вопїѧ́хꙋ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
И҆злива́юще ꙗ҆́кѡ мѵ̑ра сле́зы на́съ ра́ди хрⷭ҇тꙋ̀ ражда́ющемꙋсѧ пло́тїю, и҆́миже сквє́рны ѡ҆чи́стимъ, пречⷭ҇томꙋ чи́стѣ приходѧ́ще, и҆ вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Слеза́ми ᲂу҆миле́нїѧ сле́зъ да ᲂу҆бѣжи́мъ, грѣ́шнїи, мꙋ́ки бꙋ́дꙋщїѧ стра́шныѧ, хрⷭ҇тѡ́вы стѡпы̀ прїе́мше, полага́емꙋ въ пелена́хъ, ꙗ҆́кѡ млⷣнцꙋ, вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Свѧщеннодѣ́йствоватисѧ и҆збавле́нїю вѣ́дѧще, ѿ свои́хъ ᲂу҆тро́бъ же и҆ сле́зъ и҆сто́чника, хрⷭ҇тꙋ̀ и҆сповѣ́данїемъ пред̾измы́вшесѧ, вѣ́рнїи, да пристꙋ́пимъ пло́тїю къ ро́ждшемꙋсѧ въ верте́пѣ, вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Дꙋша́ми чи́стыми и҆ нескве́рными ᲂу҆стна́ми, прїиди́те, возвели́чимъ нескве́рнꙋю и҆ пречⷭ҇тꙋю мт҃рь є҆мманꙋ́илевꙋ: є҆́юже, и҆зъ неѧ̀ къ рожде́нномꙋ приносѧ́ще моли́твꙋ, пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ.
Неразꙋ́менъ никто́же, ни лꙋка́въ завистноѻбра́зникъ да бꙋ́детъ, ѿ приносѧ́щихъ ны́нѣ да́ры бг҃ꙋ прїѧ́тны, вмѣ́стѡ смѵ́рны, и҆ зла́та, и҆ лїва́на, добродѣ́телей мѷроꙋха́нїе, пою́щихъ хрⷭ҇тꙋ̀ ражда́ющемꙋсѧ: пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ.
Глаго́лаше ко прише́дшымъ и҆́рѡдъ волхвѡ́мъ мꙋ̑дрымъ: ше́дше поищи́те ро́ждшагосѧ ны́нѣ цр҃ѧ̀, и҆ ѡ҆брѣ́тше возвѣсти́те мнѣ̀, поꙋчи́всѧ лю́тый ѡ҆ ᲂу҆бі́йствѣ скверноꙋбі́йственнымъ се́рдцемъ. пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ.
Ѽ слѣпо́тнагѡ скверноꙋбі́йства, вседе́рзостне! и҆́мже забве́нїе полꙋчи́лъ є҆сѝ, ꙗ҆́кѡ бг҃а никто́же є҆́мь рꙋка́ми ᲂу҆бїе́тъ: преразже́гсѧ же ꙗ҆́ростїю, свирѣ́пѡ младе́нцы закала́еши, и҆́рѡде, пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ.
На ᲂу҆́трени по а҃-й каѳі́смѣ сѣда́ленъ предпра́зднства.
Гла́съ в҃. Подо́бенъ: Благоѻбра́зный:
Непристꙋ́пный бг҃ъ, за бл҃гоꙋтро́бїе пристꙋ́пенъ мнѣ̀ бы́въ во́лею, прихо́дитъ пло́тїю роди́тисѧ, ꙗ҆́кѡ человѣ́къ, во гра́дѣ виѳлее́мѣ и҆зъ дв҃ы ѻ҆трокови́цы. є҆го́же прїѧ́ти ᲂу҆се́рднѡ потщи́мсѧ, вопїю́ще со стра́хомъ: гдⷭ҇и, сла́ва тебѣ̀.
Сла́ва, и҆ ны́нѣ, гла́съ а҃. Подо́бенъ: Гро́бъ тво́й:
Приклони́вый нб҃са̀, и҆ въ дв҃ꙋ всели́выйсѧ, предгрѧде́тъ пло́тїю въ виѳлее́мстѣмъ верте́пѣ роди́тисѧ, ꙗ҆́коже пи́шетсѧ, ꙗ҆ви́тисѧ же млⷣнцъ, младе́нцы ѡ҆живлѧ́ѧй во ᲂу҆тро́бѣ: сего̀ ра́дꙋющесѧ ны́нѣ срѧ́щимъ всѝ се́рдца пра́востїю.
По в҃-й каѳі́смѣ сѣда́ленъ, гла́съ є҃. Подо́бенъ: Собезнача́льное:
Виѳлее́ме, гото́висѧ на срѣ́тенїе дв҃ы марі́и и҆ бг҃ома́тере: се́ бо грѧде́тъ къ тебѣ̀ млⷣнца носѧ́щи хрⷭ҇та̀, собезнача́льнаго ѻ҆ц҃ꙋ̀ и҆ дх҃ꙋ при́снѡ: є҆го́же въ верте́пѣ роди́тъ, и҆ по ржⷭ҇твѣ̀ дв҃а па́ки ꙗ҆ви́тсѧ.
Сла́ва, и҆ ны́нѣ, гла́съ г҃. Подо́бенъ: Красотѣ̀:
Чꙋ́до пресла́вно зри́тсѧ дне́сь: сп҃си́тель бо на́шъ въ верте́пѣ пло́тїю ѿ дв҃ы на́съ ра́ди роди́тисѧ ны́нѣ тщи́тсѧ. волсви́ же съ да̑ры ꙗ҆́кѡ цр҃ю̀ покло́нѧтсѧ, и҆ па́стырїе со а҆́гг҃лы славосло́вѧтъ є҆го̀: съ ни́миже и҆ мы̀ вопїе́мъ: сла́ва на́съ ра́ди вочл҃вѣ́чшемꙋсѧ.
Канѡ́нъ предпра́зднства, со і҆рмосо́мъ на и҃: и҆ ст҃ы́ѧ на д҃.
Канѡ́нъ предпра́зднства, є҆гѡ́же краегране́сїе, по а҆лфави́тꙋ. І҆ѡ́сифъ.
Гла́съ д҃. Пѣ́снь а҃. І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ, побѣ́дное воспою̀ пѣ́нїе.
Ра́дꙋйсѧ, нб҃о, и҆ землѐ, весели́сѧ: бг҃ъ бо на́шъ бы́въ пло́тїю ѿ дв҃ы ѻ҆трокови́цы ражда́етсѧ, и҆ пелена́ми повива́етсѧ: плени̑цы же разрѣша́етъ мои́хъ прегрѣше́нїй, ꙗ҆́кѡ бл҃гоꙋтро́бенъ.
Цр҃и́ца чⷭ҇таѧ цр҃ѧ̀ всѣ́хъ ражда́етъ па́че ᲂу҆ма̀, вы́шнее вѣ̑рнымъ црⷭ҇тво ѿверза́ющаго, и҆ и҆́же въ на́съ ѻ҆каѧ́ннѡ ца́рствꙋющїй всегда̀ грѣ́хъ, коне́чнѡ ѿе́млющаго.
Писа̑нїѧ прⷪ҇ро́чєскаѧ коне́цъ прїе́млютъ: се́ бо, є҆го́же провозвѣсти́ша хрⷭ҇та̀, во гра́дѣ виѳлее́мѣ ꙗ҆влѧ́етсѧ воплоща́емь: сегѡ̀ ны́нѣ предпра́здновати ржⷭ҇тво̀ потщи́мсѧ пра́востїю мы́сли дне́сь.
И҆́нъ канѡ́нъ ст҃ы́ѧ, є҆гѡ́же краегране́сїе:
Пѣ́ти тѧ̀, мч҃нице, да приложи́тъ бг҃ъ бл҃года́ть.
І҆ѡ́сифъ.
Гла́съ то́йже. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Мч҃ническою ꙗ҆́вѣ свѣ́тлостїю ѡ҆блиста́ющи ѡ҆ бз҃ѣ ликꙋ́еши, свѧще́ннѡ ѡ҆божа́ема, всехва́льнаѧ, и҆ просвѣще́нїе моли́твами твои́ми подава́еши пою́щымъ тѧ̀.
Оу҆ѧзви́ласѧ є҆сѝ сладча́йшимъ раче́нїемъ хрⷭ҇то́вымъ, всехва́льнаѧ, и҆ плѡтскі́ѧ ѡ҆ста́вльши сла̑сти, и҆ ѡ҆брꙋ́чника тлѣ́ннаго, ѡ҆брꙋчи́ласѧ є҆сѝ, непоро́чнаѧ чи́стаѧ дѣ́во, сотво́ршемꙋ.
Ѡ҆сїѧ́въ свѣтлоѧвле́нными добро́тами твою̀ мы́сль созда́тель всѣ́хъ и҆ бг҃ъ, нбⷭ҇ныхъ тѧ̀ черто́гѡвъ дѣ́вственнѡ ликꙋ́ющꙋю, мꙋ́ченице бг҃омꙋ́драѧ, ᲂу҆досто́и.
Бг҃оро́диченъ:
Дв҃а созда́телѧ є҆стества̀ роди́ти и҆́детъ въ верте́пѣ, пло́ть и҆зъ неѧ̀ по ѵ҆поста́си несказа́ннѡ преесте́ственнѣ поне́сшаго, ꙗ҆́кѡ да ѡ҆божи́тъ человѣ́чество.
Пѣ́снь г҃. І҆рмо́съ:
Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.
Данїи́лъ тѧ̀ ѿ горы̀ дѣ́вственныѧ ка́мень, сло́ве, ѿсѣ́ченъ зри́тъ, и҆ и҆стнѣва́ющь хра́мы і҆́дѡльскїѧ держа́вою твое́ю: сегѡ̀ ра́ди тѧ̀ стра́хомъ сла́вимъ.
Ѿ восто́ка волсвѝ тебѣ̀, цр҃ю̀ всѣ́хъ, наста́влени бы́вше ѕвѣздо́ю, да́ры прино́сѧтъ, хрⷭ҇тѐ, смѵ́рнꙋ, зла́то и҆ лїва́нъ, ᲂу҆ди́вльшесѧ твоемꙋ̀ снисхожде́нїю.
Живоно́сный кла́съ ни́ва неѡра́ннаѧ но́ситъ, роди́ти во гра́дѣ виѳлее́мѣ марїа́мъ, всѣ́хъ дꙋ́шы пита́ющаго, зовꙋ́щихъ: ст҃ъ є҆сѝ, гдⷭ҇и.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Соверши́ла є҆сѝ дꙋ́шꙋ, хра́мъ бж҃їй пресвѧ́тъ, сла́внаѧ, бжⷭ҇твєннымъ храмѡ́мъ вы́нꙋ пѣ́сньми и҆ моли́твами присѣдѧ́щи.
Велича́йшихъ ᲂу҆лꙋчи́ти жела́ющи дарова́нїй, всечестна́ѧ, болѣ̑зни плотскі̑ѧ терпѣ́ла є҆сѝ ꙗ҆́кѡ въ чꙋжде́мъ тѣлесѝ.
Крове́й твои́хъ ка́плѧми, безбо́жїѧ ѻ҆́гнь погаси́ла є҆сѝ, и҆ вѣ́рныхъ напои́ла є҆сѝ, і҆ꙋлїані́е, ра́зꙋмы.
Бг҃оро́диченъ:
И҆збавлѧ́ѧй человѣ́ки и҆зба́витель, ѿ чⷭ҇тыѧ ражда́етсѧ въ виѳлее́мѣ, пелєны̀ ꙗ҆́коже млⷣнцъ прїе́мъ.
Конда́къ ст҃ы́ѧ, гла́съ г҃. Подо́бенъ: Дв҃а дне́сь:
Дѣ́вства добро́тами преѡчище́на, дѣви́це, и҆ мꙋче́нїѧ вѣнцы̑, і҆ꙋлїані́е, ны́нѣ вѣнча́вшисѧ, дае́ши сꙋ́щымъ въ нꙋ́ждахъ и҆ недꙋ́зѣхъ и҆сцѣле́нїе и҆ спасе́нїе, пристꙋпа́ющымъ къ ра́цѣ твое́й: бжⷭ҇твеннꙋю бо благода́ть хрⷭ҇то́съ и҆сточа́етъ и҆ жи́знь вѣ́чнꙋю.
Сѣда́ленъ, гла́съ д҃. Подо́бенъ: Ско́рѡ предварѝ:
Жениха̀ возлюби́вши творца̀ и҆ бг҃а, жениха̀ тлѣ́ннаго ѡ҆ста́вила є҆сѝ, мꙋ́ченице честна́ѧ, и҆ ра́дꙋющисѧ претерпѣ́ла є҆сѝ мꙋ̑ки и҆ терза̑нїѧ, и҆ ѻ҆́гненное томле́нїе. тѣ́мже вѣнцено́сица къ бжⷭ҇твенномꙋ черто́гꙋ возшла̀ є҆сѝ, и҆спроша́ющи всѣ̑мъ прегрѣше́нїй проще́нїе.
Сла́ва, и҆ ны́нѣ, предпра́зднства, гла́съ г҃. Поⷣ: Красотѣ̀ дѣ́вства:
Ра́дости и҆спо́лнитесѧ всѧ̑ концы̀: бцⷣа бо роди́ти приближа́етсѧ цр҃ѧ̀ всѧ́ческихъ. ѽ чꙋдесѐ неизрече́ннагѡ! безнача́льный начина́етсѧ, и҆ безпло́тный воплоща́етсѧ: верте́пъ прїе́млетъ содержа́щаго всѧ́чєскаѧ. виѳлее́ме, ра́дꙋйсѧ, и҆ ликꙋ́й тва́рь де́нь предпра́зднственный.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Ст҃а́ѧ мѷрополо́жница честна́гѡ свѧще́нїѧ, въ виѳлее́мѣ гра́дѣ сїѐ и҆злїѧ́ти прихо́дитъ, свѧще́нїе на́мъ всѣ̑мъ подаю́щаго, вопїю́щымъ: сла́ва, хрⷭ҇тѐ, си́лѣ твое́й.
Бг҃оглаго́ливе и҆са́їе, честна̑ѧ твоѧ̑ проповѣ̑данїѧ бы̑вшаѧ ви́дѧ вещмѝ, ра́дꙋйсѧ и҆ ликꙋ́й: дв҃а бо безсѣ́меннѡ родѝ въ верте́пѣ пло́тїю виѳлее́мстѣмъ невмѣсти́маго.
І҆и҃съ пло́тїю ражда́етсѧ, и҆ въ лѣ́тѣ безлѣ́тный ви́димь є҆́сть млⷣнецъ, разрѣша́ѧ моѧ̑ лѣ̑тнаѧ прегрѣшє́нїѧ, и҆ неизрече́нною нището́ю ны́нѣ ѡ҆богаща́етъ мѧ̀, ѡ҆бнища́вшаго тлетво́рными престꙋпле́нїѧми.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Просте́ртꙋ мы́сль стѧжа́вши ко всѣ́хъ гдⷭ҇ꙋ, пло́тїю просте́рта, и҆ ᲂу҆ранѧ́ема лю́тѡ, ника́коже брегла̀ є҆сѝ, і҆ꙋлїані́е до́браѧ дв҃о.
Превозмого́ша рачє́нїѧ влⷣчнѧѧ пло́ти, всехва́льнаѧ мч҃нице, ѡ҆мрачи́ти: тѣ́мже пренебрегла̀ є҆сѝ и҆ бога́тство, и҆ ѡ҆брꙋ́чника, и҆ многоѻбра̑зныѧ мꙋ̑ки.
Тѧ̀ нескве́рнꙋю а҆́гницꙋ, ꙗ҆́коже во́лцы, мꙋчи́телїе терза́юще, мч҃нице, ра́нами, непоро́чное цѣ́лое бж҃їе соверши́ша бжⷭ҇твенное ѻ҆вча̀ и҆ заколе́нїе.
Бг҃оро́диченъ:
Дѣ́вство по ржⷭ҇твѣ̀ запеча́тано, бцⷣе, ви́дѧщи, ᲂу҆́жасомъ ѡ҆держи́ма бы́вши. ча́до, взыва́ше: ка́кѡ ны́нѣ повїю́ тѧ, песко́мъ повива́ющаго мо́ре;
Пѣ́снь є҃. І҆рмо́съ:
Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ: но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Ѿ дв҃ы ражда́етсѧ бг҃ъ є҆мманꙋ́илъ, и҆ въ ꙗ҆́слехъ возле́гъ, на́ше воззва́нїе во́лею содѣ́ловаетъ: сегѡ̀ ржⷭ҇тво̀ благоче́стнѡ предпра́зднꙋимъ.
Сло́во сы́й пребезнача́льное ѻ҆́ч҃ее и҆ соесте́ственное, въ ꙗ҆́слехъ возле́гъ безслове́сныхъ, разрѣши́лъ є҆сѝ безслове́сїѧ ны̀, предпра́зднствꙋющыѧ благоче́стнѡ твоѐ ржⷭ҇тво̀.
Бл҃же́нъ бы́сть ко́рень і҆ессе́евъ, прозѧбы́й чⷭ҇тꙋю, цвѣ́тъ бжⷭ҇твенный носѧ́щꙋю хрⷭ҇та̀ гдⷭ҇а. є҆го́же предпра́зднꙋимъ ржⷭ҇тво̀ ра́дꙋющесѧ.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Стрꙋю̀, мꙋ́ченице, ѕлочести́вагѡ безбо́жїѧ и҆зсꙋши́ла є҆сѝ тече́ньми крове́й, непра́веднѡ пролива́емыми, и҆ ѻ҆́гнь пре́лести погаси́ла є҆сѝ.
Всецѣ́лꙋ тебѐ самꙋ́ю бг҃ꙋ принесла̀ є҆сѝ, че́рвлень дѣ́вства багрє́нїи крове́й твои́хъ, свѣтлѣ́йшꙋ соверши́вши.
Твое́ю добро́тою дꙋ́шꙋ ᲂу҆ѧзви́вши, претечѐ, ѽ влⷣко, дв҃а ви̑димыѧ добрѡ́ты, страда́нїемъ сїѧ́ющи.
Бг҃оро́диченъ:
Чꙋ́до новолѣ́пно, дв҃а и҆́детъ пречⷭ҇таѧ въ верте́пъ виѳлее́мскїй роди́ти бг҃а вочеловѣ́чшасѧ.
Пѣ́снь ѕ҃. І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Но́въ на землѝ на́мъ ѻ҆́трочищъ ро́ждсѧ, и҆́же пре́жде вѣкѡ́въ ѿ ѻ҆ц҃а̀ неизрече́ннѡ возсїѧ́въ, дре́внѧгѡ всѧ̑ свободѝ престꙋпле́нїѧ, ꙗ҆́кѡ бл҃гоꙋтро́бенъ.
Стра̑нна и҆ пресла́вна слы̑шана бы́ша въ виѳлее́мѣ гра́дѣ, роди́вшꙋсѧ тебѣ̀, безнача́льне сло́ве: па́стырїе бо со а҆́гг҃лы пѣ́снь тебѣ̀ ꙗ҆́кѡ влⷣцѣ приноша́хꙋ.
Ѕвѣзда̀ пра́вды возвѣща́етъ волхвѡ́мъ неизрече́ннѡ сл҃нца ро́ждшасѧ: є҆гѡ́же честно́е ны́нѣ предпра́зднꙋимъ ра́дꙋющесѧ ржⷭ҇тво̀.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Жела́нїемъ ᲂу҆ѧ́звлена бы́вши бжⷭ҇твеннымъ, взыва́ла є҆сѝ: хрⷭ҇та̀ и҆дꙋ̀ дости́гнꙋти кра́снаго добро́тою: тѣ́мже мꙋ̑ки терплю̀, неꙋкло́ннымъ ра́дꙋющисѧ ра́зꙋмомъ.
Протѧза́ти неми́лостивнѡ, и҆ же́злїемъ сокрꙋша́ти гдⷭ҇ню а҆́гницꙋ лꙋка́вый гони́тель повелѣва́ше, просте́ртꙋ ко хрⷭ҇тꙋ̀ мы́сль и҆мꙋ́щꙋю.
Оу҆́треневала є҆сѝ ко хрⷭ҇тꙋ̀, невече́рнемꙋ сл҃нцꙋ, и҆ тогѡ̀ свѣтлостьмѝ дꙋ́шꙋ, бг҃омꙋ́драѧ, и҆ се́рдце ѡ҆зари́ла є҆сѝ, и҆ къ свѣ́тꙋ преложи́ласѧ є҆сѝ присносꙋ́щномꙋ.
Бг҃оро́диченъ:
Мо́ре пови́вый мгло́ю, во́лею ражда́етсѧ зижди́тель и҆зъ дв҃ы ѻ҆трокови́цы, и҆ пелєны̀, ꙗ҆́кѡ млⷣнцъ, прїе́млетъ, мі́ръ и҆збавлѧ́ѧй.
Конда́къ, гла́съ в҃. Подо́бенъ: Вы́шнихъ и҆щѧ̀:
Въ виѳлее́мѣ зрѧ́ще пелена́ми повива́емаго, всю̀ зе́млю держа́ща рꙋко́ю свое́ю, предпра́зднствєнныѧ пѣ̑сни ро́ждшей сего̀ прино́симъ: мт҃рски бо весели́тсѧ, держа́щи въ нѣ́дрѣхъ сн҃а бж҃їѧ.
І҆́косъ:
Сн҃а бж҃їѧ дв҃а держа́щи во ѡ҆б̾ѧ́тїихъ, мт҃рскими ѡ҆блобыза́ньми цѣлꙋ́ющи, вѣща́ше: сѣ́мене не позна́хъ въ зача́тїи, и҆ тлѣ́нїѧ не под̾ѧ́хъ въ рожде́нїи: ны́нѣ же чиста̀ є҆́смь, ꙗ҆́коже пре́жде, кꙋ́пнѡ и҆ по ржⷭ҇твѣ̀. тѣ́мъ твоѐ проповѣ́дꙋю, ча́до, мно́гое благоꙋтро́бїе, и҆ непостижи́мое вели́чество, є҆́же показа́лъ є҆сѝ на мнѣ̀: ѿѻнꙋ́дꙋже и҆ ра́дꙋюсѧ, держа́щи въ нѣ́дрѣхъ сн҃а бж҃їѧ.
Пѣ́снь з҃. І҆рмо́съ:
Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жши, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ. (с. 366)
Ка́кѡ тѧ̀ верте́пъ вмѣсти́тъ, грѧдꙋ́ща на́съ ра́ди роди́тисѧ, невмѣсти́маго; ка́кѡ тѧ̀ воздои́тъ дв҃а, пита́телѧ всѣ́хъ, бл҃гоꙋтро́бне і҆и҃се, сꙋ́ща.
Глаго́лѡмъ послѣ́дꙋюще волхва̀ валаа́ма, волсвѝ тща́тсѧ хрⷭ҇тꙋ̀ поклони́тисѧ съ да̑ры, разꙋмѣ́юще сего̀ всѧ́кимъ дыха́нїемъ ца́рствꙋюща.
Непло́дствꙋющее человѣ́ческое є҆стество̀ всѧ́кїѧ добродѣ́тели ра́дꙋйсѧ и҆ ликꙋ́й: грѧде́тъ бо хрⷭ҇то́съ ѿ дв҃ы пло́тїю роди́тисѧ, ꙗ҆́кѡ да пока́жетъ тѧ̀ дѡ́брымъ благоча́дно.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Безꙋ́мїемъ въ ражже́нный коно́бъ, мꙋ́ченице, сꙋдїѧ́ тѧ вмета́етъ неми́лостивнѡ: а҆́гг҃ломъ же тѧ̀ гдⷭ҇ь невре́днꙋ спасѐ, сего̀ почита́ющꙋ.
Не ᲂу҆жаса́ющисѧ мꙋжемꙋ́дреннѡ, па́че же, всечестна́ѧ мꙋ́ченице, ко ѻ҆гню̀ грѧде́ши, восхлажде́нїе чꙋ́вствꙋющи, и҆ вопїю́щи: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ты̀ женихꙋ̀, ꙗ҆́коже вѣ́но, принесла̀ є҆сѝ, наро́дъ и҆ лю́ди вѣ́ровавшїи въ того̀, и҆ ле́сти ѡ҆мраче́нїе свѣтоно́сными твои́ми чꙋдотворе́ньми ѿрази́ла є҆сѝ.
Бг҃оро́диченъ:
Ра́дꙋйсѧ, село̀ невмѣсти́магѡ, мт҃и дв҃о: сего́ бо плотоно́сца хотѧ́щи на́съ ра́ди въ верте́пѣ роди́ти, пречⷭ҇таѧ, и҆справлѧ́юща свои́хъ рꙋ́къ созда́нїе.
Пѣ́снь и҃. І҆рмо́съ:
И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.
Мно́гими мѧ̀, хрⷭ҇тѐ, престꙋпле́ньми разбо́йникѡвъ бы́вшаго верте́пъ, за благоꙋтро́бїе неизрече́нное спаса́ѧ, роди́тисѧ въ верте́пѣ ѿ дв҃ы чⷭ҇тыѧ и҆зво́лилъ є҆сѝ.
Подписꙋ́ѧ соверше́нное мнѣ̀ ѡ҆ставле́нїе, написа́лсѧ є҆сѝ ке́саревымъ повелѣ́нїемъ творе́цъ тва́ри съ рабы̑: пою̀ твоегѡ̀ бл҃гоꙋтро́бїѧ безмѣ́рнꙋю, влⷣко, пꙋчи́нꙋ.
Свѣ́тлаѧ влⷣчнѧ пала́то, ка́кѡ возшла̀ є҆сѝ въ малѣ́йшїй верте́пъ, цр҃ѧ̀ гдⷭ҇а на́съ ра́ди вопло́щшасѧ роди́ти, всест҃а́ѧ дв҃о бг҃оневѣ́сто.
И҆́нъ. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Горѣ̀ твоѐ ѻ҆́ко и҆ ᲂу҆́мъ къ могꙋ́щемꙋ спастѝ и҆мꙋ́щи бг҃ꙋ, конѡ́бнаѧ врѣ̑нїѧ благода́тїю бжⷭ҇твеннагѡ дх҃а ᲂу҆гаси́ла є҆сѝ, воспѣва́ющи пѣ́снь ѻ҆́троческꙋю, мꙋ́ченице, вѣ́рою: благослови́те, всѧ̑ дѣла̀ гдⷭ҇нѧ, гдⷭ҇а.
Глаго́лꙋ мꙋчи́телѧ ѕлочести́вагѡ слꙋжа́ше, ѻ҆гнѧ̀ досто́йнїи сꙋемꙋ́дреннїи, жи́вꙋ тѧ̀, мꙋ́ченице, во ѻ҆́гнь вложи́ша: но неѡпале́на была̀ є҆сѝ ѻ҆гне́мъ, женихо́вою любо́вїю, бг҃оно́снаѧ, ѡ҆роша́ема, сего̀ почита́ющи.
Стоѧ́ла є҆сѝ предъ сꙋди́щемъ, хрⷭ҇та̀ проповѣ́дающи бг҃а безсме́ртнаго, претерпѣ́вшаго распѧ́тїе, и҆ пре́лесть ᲂу҆мертви́вшаго, и҆ безсме́ртнꙋю жи́знь вѣ̑рнымъ подаю́щаго вопїю́щымъ: всѧ̑ дѣла̀, по́йте гдⷭ҇а.
Бг҃оро́диченъ:
Ѻ҆́блаки восхожде́нїе своѐ полага́ѧ гдⷭ҇ь, ѻ҆́блакомъ на́мъ дв҃ою роди́тисѧ грѧде́тъ, ꙗ҆́кѡ да разори́тъ дꙋ́шъ на́шихъ грѣха̀ мра́чный ѻ҆́блакъ, вопїю́щихъ є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Ликꙋ́имъ всѝ вѣ́рнїи, взыгра́имъ и҆ согла́снѡ воскли́кнемъ: грѧде́тъ всѣ́хъ спасе́нїе, приближа́етсѧ роди́тисѧ гдⷭ҇и, спастѝ є҆гѡ̀ рождество̀ бг҃омꙋ́дреннѡ пра́зднꙋющыѧ.
Ѱалти́рь, ст҃ы́й дв҃де, воспрїимѝ и҆ гꙋ́сли, и҆ пѣсновоспо́й: до́ме є҆ѵфра́ѳовъ, весели́сѧ: ѻ҆ц҃ъ бо и҆зъ чре́ва є҆го́же родѝ, въ тебѣ̀ пресвѣ́тло ражда́етсѧ, ѿ дв҃ы воплоща́ѧсѧ.
Ꙗ҆́кѡ тꙋ́ча, ꙗ҆́кѡ вели́кїй до́ждь, во ᲂу҆тро́бꙋ твою̀ влⷣка сни́де, и҆ мра̑чнаѧ безбѡ́жїѧ, землѝ ѡ҆лѧденѣ́вшаѧ напоѝ, и҆ пре́лести морѧ̀ и҆зсꙋшѝ, бг҃ороди́тельнице мт҃и дв҃о.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
І҆ꙋлїані́и бг҃оно́сныѧ сꙋ́щымъ ѡ҆ вѣ́рѣ подвигѡ́мъ а҆́гг҃ли ᲂу҆диви́шасѧ: ка́кѡ же́нскимъ є҆стество́мъ посрамѝ тоѧ̀ прама́терь въ раѝ ᲂу҆мори́вшаго.
Ꙗ҆́кѡ преꙋдобре́ннаѧ страстоно́сица, и҆ преизрѧ́днаѧ дѣ́ва, вѣне́цъ воспрїѧ́ла є҆сѝ зако́ннѡ пра́вды, попра́вши съ пло́тїю безпло́тнаго, и҆ побѣдоно́сица бы́вши.
Тѧ̀ разꙋ́мнꙋю ла́стовицꙋ, и҆ нерастлѣ́ннꙋю го́рлицꙋ и҆ голꙋби́цꙋ, свидѣ́тельствомъ позлаще́нна и҆мꙋ́щꙋ кри́ла, и҆ къ бг҃ꙋ полетѣ́вшꙋю и҆ почи́вшꙋю, почита́емъ.
Процвѣла̀ є҆сѝ во ᲂу҆до́лѣхъ мч҃ническихъ, ꙗ҆́кѡ крі́нъ, страстоно́сице і҆ꙋлїані́е, и҆ ꙗ҆́кѡ ши́покъ благово́ненъ дѣ́вствомъ была̀ є҆сѝ, и҆ кра́сномꙋ женихꙋ̀ твоемꙋ̀ бжⷭ҇твенное ѡ҆бонѧ́нїе бы́вши.
Бг҃оро́диченъ:
Носѧ́щи носѧ́щаго всѧ̑, къ виѳлее́мꙋ грѧде́тъ дв҃а, того̀ и҆ роди́ти, и҆ во ꙗ҆́слехъ восклони́ти, ꙗ҆́кѡ млⷣнца, человѣ́кѡвъ воззва́нїе и҆зрѧ́днѡ содѣ́ловающаго.
Свѣти́ленъ предпра́зднства. Подо́бенъ: Посѣти́лъ ны̀ є҆́сть:
Предпра́зднствєнныѧ, вѣ́рнїи, ржⷭ҇тва̀ пѣ̑сни прїиди́те принесе́мъ всѝ: грѧде́тъ ᲂу҆жѐ хрⷭ҇то́съ въ виѳлее́мъ роди́тисѧ, спастѝ вселе́ннꙋю, ꙗ҆́кѡ є҆ди́нъ чл҃вѣколю́бецъ.
Сла́ва, и҆ ны́нѣ:
Виѳлее́ме, землѐ і҆ꙋ́дова, ᲂу҆красѝ вхо́ды: въ тебѣ́ бо дв҃а и҆ бцⷣа ᲂу҆жѐ прихо́дитъ роди́ти, въ верте́пѣ и҆ ꙗ҆́слехъ, бг҃а моего̀ и҆ гдⷭ҇а.
На хвали́техъ стїхи̑ры на д҃, гла́съ ѕ҃. Поⷣ: А҆́гг҃льскїѧ пред̾иди́те:
Содѣ́тельнаѧ ны́нѣ предгрѧде́тъ премꙋ́дрость: ꙳ прⷪ҇ро́честїи ѿверза́ютсѧ ѻ҆́блацы, ꙳ бл҃года́ть процвѣта́етъ, ꙳ и҆́стина возсїѧ̀: ꙳ престаю́тъ гада̑нїѧ сѣнѡ́внаѧ: ꙳ є҆де́ма ѿве́рзесѧ две́рь: ꙳ а҆да́ме, ликꙋ́й, ꙳ созда́тель бг҃ъ на́шъ ꙳ во́льнѡ созда́сѧ.
Речє́нїѧ и҆сполнѧ́ѧ прⷪ҇ро́чєскаѧ и҆ видѣ̑нїѧ, ꙳ ражда́етсѧ пло́тїю, ꙳ и҆ ѡ҆дебелѣва́етъ сло́во, ꙳ и҆ въ ꙗ҆́слехъ безслове́сныхъ роди́всѧ возлега́етъ. ꙳ сїѐ кра́йнее снизхожде́нїе, ꙳ сїѐ стра́шное смотре́нїе, ꙳ є҆гѡ́же ра́ди пое́мъ: ꙳ цр҃ь і҆и҃левъ ꙳ хрⷭ҇то́съ прихо́дитъ.
Сѐ чⷭ҇таѧ па́че ᲂу҆ма̀ и҆ сло́ва ꙳ ражда́етъ сн҃а бж҃їѧ, ꙳ є҆го́же прⷪ҇ро́цы проповѣ́даша дре́вле, ꙳ прови́дѧще дх҃омъ ст҃ы́мъ, ꙳ нескве́рнꙋ тѧ̀ сохранѧ́юща, ꙳ и҆ разрѣша́ющаго а҆да́ма ѿ грѣха̀ ꙳ лю́дїе, рце́мъ: цр҃ь на́шъ хрⷭ҇то́съ ꙳ пло́тїю прихо́дитъ.
Нѣ́дръ ѻ҆ч҃ескихъ не ѿстꙋ́пль, ꙳ человѣ́къ ꙗ҆ви́лсѧ є҆сѝ, ꙳ и҆ дѣ́вственными держи́мь рꙋка́ми, ꙳ волхвы̀ ѿ персі́ды ѕвѣздо́ю призва́лъ є҆сѝ, ꙳ цр҃ю̀ тебѣ̀ и҆ бг҃ꙋ покланѧ́ющыѧсѧ. ꙳ дх҃омъ ᲂу҆сте́нъ нече́ствꙋющыѧ кнѧ́зи ꙗ҆зы́чєскїѧ погꙋби́ши, ꙳ и҆ ᲂу҆пасе́ши ꙳ лю́ди ѡ҆сꙋществє́нныѧ.
Сла́ва, гла́съ и҆ подо́бенъ то́йже:
Сло́во и҆́же ѻ҆ц҃ꙋ̀ є҆диносꙋ́щенъ сы́й, ꙳ ѿ двⷭ҇твенныхъ растворе́нїе прїе́мъ чⷭ҇тыхъ крове́й, ꙳ и҆ зи́ждетсѧ, ꙳ и҆ расте́тъ вре́меннымъ разстоѧ́нїемъ, ꙳ па́ки и҆ ражда́етсѧ въ верте́пѣ: ꙳ ᲂу҆́жасъ ве́лїй! ꙳ а҆́гг҃ли воспѣва́ютъ, ꙳ человѣ́цы же рꙋка́ми пле́щꙋтъ: ꙳ цр҃ь і҆и҃левъ хрⷭ҇то́съ прихо́дитъ.
И҆ ны́нѣ, гла́съ и҆ подо́бенъ то́йже:
Волхва̀ валаа́ма проречє́нїѧ ꙳ и҆сполне́нїе прїе́млютъ: ꙳ персі́дскими бо чꙋдесы̀ ѡ҆блїѧ́ни бы́вше, ꙳ ѕвѣзды̀ неѻбы́чныѧ ѡ҆сїѧ́нїемъ, ꙳ незаходи́магѡ сл҃нца хрⷭ҇та̀ ѡ҆сїѧ́ни бы́вше, ꙳ въ виѳлее́мѣ воплоще́ннаго ꙳ бг҃а цр҃ѧ̀, ꙳ и҆ во́льнаго мертвеца̀ дармѝ назна́менаютъ.
На стїхо́внѣ стїхи́ры, гла́съ в҃. Подо́бенъ: До́ме є҆ѵфра́ѳовъ:
Просїѧва́етъ ѕвѣзда̀, ꙳ ᲂу҆жѐ ражда́емаго ꙳ въ верте́пѣ прозна́менꙋѧ: ꙳ па́стырїе со а҆́гг҃лы, волсвѝ съ да̑ры; ꙳ предвари́ти потщи́тесѧ.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Да прⷪ҇ро́чєскаѧ и҆спо́лнитъ проречє́нїѧ, ꙳ въ виѳлее́мѣ ражда́етсѧ, ꙳ и҆ є҆де́мъ ѿверза́етъ ꙳ сꙋ́щымъ и҆зъ а҆да́ма гдⷭ҇ь.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Пома́жи мѵ́ромъ, виѳлее́ме, ꙳ ꙗ҆́сли ст҃і́и: ꙳ въ тебѣ́ бо влⷣка ꙳ простре́ти и҆́мать ꙳ лꙋчѝ своегѡ̀ бжⷭ҇тва̀.
Сла́ва, и҆ ны́нѣ: Подо́бенъ то́йже:
Прїиди́те, земноро́днїи, ꙳ согла́снѡ дв҃ꙋ ꙳ бцⷣꙋ марі́ю ꙳ да воспое́мъ непреста́ннѡ, ꙳ и҆зъ неѧ́же хрⷭ҇то́съ ражда́етсѧ.
Въ то́йже де́нь, и҆́же во ст҃ы́хъ, ѻ҆тца̀ на́шегѡ петра̀ митрополі́та кі́евскагѡ и҆ всеѧ̀ рѡссі́и.
А҆́ще хра́мъ, и҆лѝ настоѧ́тель и҆зво́литъ, твори́мъ бдѣ́нїе.
На ма́лѣй вече́рни стїхи̑ры ст҃а́гѡ, гла́съ а҃. Поⷣ: Нбⷭ҇ныхъ чинѡ́въ:
Нбⷭ҇нымъ чинѡ́мъ поревнова́лъ є҆сѝ, ꙳ ст҃и́телю хрⷭ҇то́въ пе́тре, ꙳ и҆ на землѝ, бг҃оно́се, ѡ҆свѧще́нъ сосꙋ́дъ ꙗ҆ви́лсѧ є҆сѝ ꙳ и҆ жили́ще ст҃а́гѡ дх҃а. ꙳ тѣ́мже тѧ̀ ᲂу҆блажа́емъ, ꙳ и҆ ст҃о́е твоѐ дне́сь че́стнѡ ра́дꙋющесѧ пра́зднꙋемъ ᲂу҆спе́нїе.
Нбⷭ҇ныхъ чинѡ́въ ра́дованїе, ꙳ и҆ на землѝ а҆рхїере́євъ похвала̀, ꙳ свѧще́нникѡвъ сла́ва, пе́тре мꙋ́дре, ꙳ мона́шествꙋющихъ пра́вило, и҆ цр҃кве ᲂу҆твержде́нїе. ꙳ тѣ́мже тѧ̀ мо́лимъ: ꙳ не ѡ҆скꙋдѣ́й помоществꙋ́ѧ на́мъ, ꙳ притека́ющымъ къ тебѣ̀ рабѡ́мъ твои̑мъ.
На нб҃сѣ́хъ водворѧ́ѧсѧ, ꙳ прїимѝ ны́нѣ хвалꙋ̀ ча̑дъ твои́хъ, ѻ҆́тче, ꙳ пра́зднꙋющихъ че́стнѡ па́мѧть ᲂу҆спе́нїѧ твоегѡ̀, ꙳ и҆ пода́ждь сердє́чнаѧ прошє́нїѧ, ꙳ ᲂу҆го́дниче хрⷭ҇то́въ пе́тре, ꙳ и҆ пречⷭ҇тѣй ма́тери прилѣ́жнѡ моли́сѧ, ꙳ спастѝ ѿ бѣ́дъ дꙋ́шы на́шѧ.
Сла́ва, гла́съ ѕ҃. Самогла́сенъ:
Бжⷭ҇твеннаѧ бл҃года́ть, въ па́мѧти ᲂу҆спе́нїѧ твоегѡ̀, ѡ҆сѣнѧ́ющи притека́ющыѧ къ ра́цѣ моще́й твои́хъ, недꙋ́гѡвъ и҆сцѣле́нїе подава́етъ: ст҃и́телю ѻ҆́тче пе́тре, моли́сѧ ѡ҆ дꙋша́хъ на́шихъ.
И҆ ны́нѣ, предпра́зднства, гла́съ то́йже:
По́йте гдⷭ҇ꙋ ро́ждшемꙋсѧ ѿ дв҃ы: воспо́йте пѣ́снь вѡ́инства нбⷭ҇наѧ, земні́и, восплещи́те рꙋка́ми: бг҃ъ бо въ человѣ́цѣхъ, чл҃вѣ́къ бг҃ъ воздаѧ́нїемъ. сѐ та́инство соверша́етсѧ на́мъ дне́сь, цр҃ь і҆и҃левъ хрⷭ҇то́съ прихо́дитъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
До́мъ дꙋхо́вный, ꙳ пе́тръ ꙗ҆ви́сѧ ꙳ поспѣше́нїемъ бл҃года́ти ст҃а́гѡ дх҃а: ꙳ и҆́мже ны́нѣ соше́дшесѧ, ꙳ того̀ воспое́мъ.
Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Ра́дꙋйсѧ, ст҃и́телей ꙳ пе́тре похвало̀, ꙳ свѧще́нникѡвъ сла́во, ꙳ пра́вило мона́хѡвъ, ꙳ цр҃кве ᲂу҆твержде́нїе.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
Прїимѝ ны́нѣ пѣ́нїе ꙳ ча̑дъ твои́хъ, ѻ҆́ч҃е, ꙳ и҆ лю́бѧщымъ тѧ̀ ꙳ подава́й ѻ҆бы̑чнаѧ прошє́нїѧ.
Сла́ва, и҆ ны́нѣ, гла́съ то́йже:
До́ме є҆ѵфра́ѳовъ, ꙳ гра́де ст҃ы́й, ꙳ прⷪ҇ро́кѡвъ сла́во, ꙳ ᲂу҆красѝ до́мъ, ꙳ въ не́мже бжⷭ҇твенный ражда́етсѧ.
Тропа́рь, гла́съ д҃:
Ꙗ҆́же пре́жде безпло́днаѧ землѐ, ны́нѣ весели́сѧ: се́ бо хрⷭ҇то́съ свѣти́льника въ тебѣ̀ показа̀ ꙗ҆́вѣ сїѧ́юща въ мі́рѣ, и҆ и҆сцѣлѣва́юща недꙋ́ги и҆ бѡлѣ́зни на́шѧ. сегѡ̀ ра́ди ликꙋ́й и҆ весели́сѧ со дерзнове́нїемъ: ст҃и́тель бо є҆́сть вы́шнѧгѡ сїѧ̑ содѣ́ловаѧй.
И҆́нъ тропа́рь, гла́съ и҃:
Ликꙋ́й свѣ́тлѡ, благосла́внѣйшїй гра́де москва̀, и҆мѣ́ѧй въ себѣ̀ а҆рхїере́а петра̀, ꙗ҆́кѡ зарю̀ сл҃нца, всю̀ рѡссі́ю чꙋдодѣѧ̑нїи ѡ҆зарѧ́юща: то́й бо не́мѡщи врачꙋ́етъ, и҆ недꙋ́ги, ꙗ҆́кѡ тмꙋ̀, прого́нитъ ѿ вопїю́щихъ є҆мꙋ̀: ра́дꙋйсѧ, і҆ера́рше бг҃а вы́шнѧгѡ, тобо́ю сїѧ̑ па́ствѣ твое́й содѣ́ловающагѡ.
Сла́ва, и҆ ны́нѣ, предпра́зднства, гла́съ д҃:
Гото́висѧ, виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во мы́сленный, въ не́мже бжⷭ҇твенный са́дъ, ѿ негѡ́же ꙗ҆́дше, жи́ви бꙋ́демъ, не ꙗ҆́коже а҆да́мъ ᲂу҆́мремъ. хрⷭ҇то́съ ражда́етсѧ, пре́жде па́дшїй возста́вити ѻ҆́бразъ.
И҆ ѿпꙋ́стъ.
На вели́цѣй вече́рни пое́мъ: Блаже́нъ мꙋ́жъ: На Гдⷭ҇и, воззва́хъ, стїхи̑ры, на и҃. Предпра́зднства г҃: и҆ ст҃а́гѡ є҃.
Предпра́зднства стїхи̑ры, гла́съ д҃. Подо́бенъ: Ꙗ҆́кѡ до́блѧ:
Предпра́зднствєнныѧ пѣ̑сни, ꙳ мы́сли пра́востїю, ꙳ хрⷭ҇то́ва ржⷭ҇тва̀ предвозгласи́мъ: ꙳ ѻ҆ц҃ꙋ́ бо и҆ дх҃ꙋ, ꙳ сы́й равноче́стенъ, ꙳ за милосе́рдїе въ на́ше ѡ҆бо́лксѧ смѣше́нїе, ꙳ хо́щетъ роди́тисѧ въ виѳлее́мѣ: ꙳ є҆го́же ржⷭ҇тво̀ несказа́нное ꙳ па́стырїе со а҆́гг҃лы воспѣ́ша.
Въ кѷмва́лѣхъ возгласи́мъ, ꙳ въ пѣ́снехъ воскли́кнемъ: хрⷭ҇то́во ꙗ҆вле́нїе показа́сѧ, ꙳ прⷪ҇ро́чєскаѧ проповѣ̑данїѧ коне́цъ прїѧ́ша. ꙳ є҆го́же бо прореко́ша, ꙳ пло́тїю человѣ́кѡмъ ꙗ҆ви́тисѧ, ꙳ ражда́етсѧ во ст҃ѣ́мъ верте́пѣ, ꙳ и҆ въ ꙗ҆́слехъ возлега́етъ ꙗ҆́кѡ ѻ҆троча̀, ꙳ и҆ пелена́ми повива́етсѧ ꙗ҆́кѡ младе́нецъ.
Виѳлее́ме, ᲂу҆гото́висѧ, ꙳ є҆де́ме, ны́нѣ ѿве́рзисѧ: ꙳ роди́ти всест҃а́ѧ и҆́детъ. ꙳ нб҃са̀ да веселѧ́тсѧ, ꙳ да и҆гра́ютъ человѣ́цы, ꙳ въ ꙗ҆́слехъ жи́знь, въ верте́пѣ бога́тый, ꙳ прихо́дитъ мно́жества ра́ди ми́лости, ꙳ нищетꙋ̀ а҆да́мовꙋ воспрїи́мъ, ꙳ кромѣ̀ преложе́нїѧ и҆ смѣше́нїѧ.
Стїхи̑ры чꙋдотво́рца петра̀, гла́съ в҃. Поⷣ: Кі́ими похва́льными:
Кі́ими похва́льными вѣнцы̑ ᲂу҆вѧзе́мъ ст҃и́телѧ: свѧще́нства вѣне́цъ, благоче́стїѧ ᲂу҆правле́нїе, свѣ́тлое цр҃кве ᲂу҆краше́нїе, и҆сто́чникъ бжⷭ҇твенныхъ и҆сцѣле́нїй неисчерпа́емый: проли́тїе дарова́нїй дх҃о́вныхъ, рѣкꙋ̀ мно́гихъ чꙋде́съ, зе́млю рѡссі́йскꙋю веселѧ́ща тече́ньми, петра̀, те́плаго предста́телѧ на́шего и҆ храни́телѧ;
Два́жды.
Кі́ими смире́нными ᲂу҆стна́ми воспои́мъ ст҃и́телѧ: ди́внаго въ чꙋдесѣ́хъ и҆ безпло́тныхъ сожи́телѧ, ѡ҆свѧще́ннаго ѿ пеле́нъ, столпа̀ цр҃кве неподви́жима, весе́лїе землѝ на́шеѧ, пра́вды пра́вило, сирота́мъ пита́телѧ, ѡ҆би́димыхъ застꙋ́пника и҆ больны́хъ врача̀ безме́здна;
Два́жды.
Прїиди́те вѣ́рныхъ собо́ри, ѱало́мски воспле́щимъ рꙋка́ми: печа́льныхъ ᲂу҆тѣше́нїе и҆ ѿча́ѧнныхъ застꙋ́пника, бжⷭ҇твеннаго петра̀ воспѣва́юще, похвалꙋ̀ землѝ рѡссі́йскїѧ и҆ всегѡ̀ свѧще́нства ᲂу҆краше́нїе, рѣкꙋ̀ ми́лости, вои́стиннꙋ бжⷭ҇твеннагѡ хрⷭ҇то́ва смире́нїѧ ревни́телѧ, подаю́щаго мі́рови ве́лїю ми́лость.
Є҆ди́ножды.
Сла́ва, гла́съ а҃. Самогла́сенъ:
Бжⷭ҇твеннагѡ свы́ше ꙗ҆вле́нїѧ свѣ́тлостїю просвѣти́всѧ, пе́тре, тве́рдый ᲂу҆мо́мъ, зако́нѡвъ и҆збѣ́глъ є҆сѝ є҆сте́ственныхъ, ꙗ҆́коже сѣ́ни, бл҃года́тїю и҆́стинною, всемꙋ́дре ѡ҆кропле́нъ: ѿѻнꙋ́дꙋже прїѧ́телище прест҃а́гѡ дх҃а бы́въ, чꙋде́съ да́ръ воспрїѧ́лъ є҆сѝ, и҆ ѡ҆богаща́еши си́ми ча̑да твоѧ̑. и҆ ны́нѣ съ первост҃и́тєли предстоѧ̀ хрⷭ҇тꙋ̀, моли́сѧ ѡ҆ дꙋша́хъ на́шихъ.
И҆ ны́нѣ, предпра́зднства, гла́съ то́йже. Поⷣ: Прїимѝ, сѷмеѡ́не:
Прїими́те, ꙗ҆́сли, є҆го́же въ кꙋпинѣ̀ мѡѷсе́й законополо́жникъ прови́дѣ въ хори́вѣ, ны́нѣ ражда́ема ѿ дв҃ы дх҃омъ бжⷭ҇твеннымъ. та̀ є҆́сть, ꙗ҆́же въ зако́нѣ рече́ннаѧ: та̀ є҆́сть прⷪ҇ро́ческаѧ печа́ть, ꙗ҆́же бг҃а пло́тїю тлѣ̑ннымъ ꙗ҆влѧ́ющи, є҆мꙋ́же поклони́мсѧ.
Вхо́дъ. Прокі́менъ днѐ. Чтє́нїѧ г҃.
При́тчей чте́нїе.
[Глава̀ і҃] Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. [г҃] Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менє̀, ѽ ча̑да! честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ѡ҆сꙋ́дитъ же првⷣникъ ᲂу҆мира́ѧй живꙋ́щыѧ нечести̑выѧ. Оу҆́зрѧтъ бо кончи́нꙋ пра́веднагѡ, и҆ не разꙋмѣ́ютъ, что̀ совѣща́ша ѡ҆ не́мъ: ꙗ҆́кѡ пове́ржетъ гдⷭ҇ь нечести̑выѧ безгла́сны ни́цъ, и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆̀хъ сопроти́въ беззако́нїѧ и҆́хъ. [є҃] Тогда̀ ста́нетъ въ дерзнове́нїи мно́зѣ првⷣникъ предъ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀, смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ спасе́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ и҆ въ при́тчꙋ поноше́нїѧ безꙋ́мнїи. Житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сынѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ стє́зь, и҆ поги́бели, и҆ ходи́хомъ стєзѝ непрохо́дны, пꙋти́ же гдⷭ҇нѧ не разꙋмѣ́хомъ.
Премꙋ́дрости соломѡ́ни чте́нїе:
[Глава̀ і҃] Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ пра́вєднымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. Ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь прпⷣбныѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́мнагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. [ѕ҃] Оу҆́треневавый къ не́й, не ᲂу҆трꙋди́тсѧ. и҆ бдѧ́й є҆ѧ̀ ра́ди, вско́рѣ безъ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи, и҆ во стезѧ́хъ є҆ѧ̀ ꙗ҆влѧ́етсѧ и҆̀мъ благопрїе́мнѣ. Мꙋ́дрости никогда́же ѡ҆долѣ́етъ ѕло́ба. [и҃] Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: и҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀: таи́нница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бла́гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. [д҃] Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: бж҃е ѻ҆тцє́въ и҆ гдⷭ҇и ми́лости, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебє̀ тварьмѝ, и҆ да ᲂу҆правлѧ́етъ мі́ръ въ прпⷣбїи и҆ пра́вдѣ, да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ, ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ престо́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть предъ тобо́ю: и҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.
На лїті́и стїхи́ра хра́ма: и҆ ст҃а́гѡ, гла́съ д҃.
Свѣ́тлѡ дне́сь цр҃ковь ᲂу҆краша́етсѧ, и҆ ра́дꙋетсѧ зовꙋ́щи, ᲂу҆ѧсни́сѧ моѧ̀ добро́та па́че всѣ́хъ: ст҃и́телємъ бо красота̀ сла́вный пе́тръ, взы́де на нб҃са̀ къ цр҃ю̀ всѣ́хъ ца́рствꙋющемꙋ. прїиди́те же, празднолю́бцы, правосла́вныхъ собо́ри, пѣ̑нїѧ и҆ похвалы̑ томꙋ̀ принесе́мъ, зовꙋ́ще: ѽ ст҃и́телей добро́то! моли́сѧ хрⷭ҇тꙋ̀ бг҃ꙋ, и҆зба́вити хрⷭ҇тоимени̑тыѧ лю́ди ѿ всѧ́кїѧ ско́рби, и҆ спастѝ дꙋ́шы на́шѧ.
Гла́съ ѕ҃:
Дх҃а бжⷭ҇твеннаѧ бл҃года́ть ст҃и́телѧ тѧ̀ показа̀, и҆ ᲂу҆чи́телѧ и҆зрѧ́дна ꙗ҆вѝ: тѣ́мъ мра́къ нече́стїѧ ѡ҆бличи́въ, лю́ди бг҃оразꙋ́мїѧ ᲂу҆че́ньми просвѣти́лъ є҆сѝ, ст҃лю бг҃омꙋ́дре пе́тре, а҆рхїере́євъ сла́ва є҆сѝ и҆ красота̀, и҆ всѣ̑мъ бы́лъ є҆сѝ и҆звѣ́стенъ ѻ҆́бразъ ᲂу҆че́нїй. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, того̀ при́снѡ молѝ спасти́сѧ дꙋша́мъ на́шымъ.
До́блестей твои́хъ, свѧще́нне ѻ҆́ч҃е, пло́дъ ᲂу҆ѧснѝ вѣ́рныхъ сердца̀, кто́ бо слы́ша безмѣ́рное твоѐ смире́нїе, и҆ терпѣ́нїю не ᲂу҆диви́тсѧ; и҆ є҆́же къ ни́щымъ ти́хость, и҆ къ скорбѧ́щымъ ми́лованїе. всѧ̑ бг҃олѣ́пнѡ наꙋчи́лъ є҆сѝ, ст҃и́телю пе́тре: и҆ ны́нѣ на нб҃сѣ́хъ неꙋвѧда́емымъ вѣнча́всѧ вѣнце́мъ, молѝ ѡ҆ дꙋша́хъ на́шихъ.
Сла́ва, гла́съ ѕ҃. Самогла́сенъ:
Прпⷣбне требл҃же́нне свѧще́нный ѻ҆́ч҃е, па́стырю до́брый, ꙗ҆́кѡ пастыренача́льника хрⷭ҇та̀ ᲂу҆ченичѐ, положи́вый дꙋ́шꙋ твою̀ за ѻ҆́вцы: са́мъ и҆ ны́нѣ, прехва́льне ст҃и́телю пе́тре, и҆спросѝ моли́твами твои́ми, дарова́ти на́мъ ве́лїю ми́лость.
И҆ ны́нѣ, предпра́зднства, гла́съ то́йже:
Сїѡ́не, торжествꙋ́й, і҆ерꙋсали́ме, весели́сѧ, гра́де хрⷭ҇та̀ бг҃а, под̾имѝ зижди́телѧ въ верте́пѣ и҆ ꙗ҆́слѣхъ вмѣща́емаго. ѿве́рзите мѝ врата̀, и҆ вше́дъ въ нѧ̀, ᲂу҆зрю̀ ꙗ҆́кѡ млⷣнца пелена́ми повива́емаго, дла́нїю же содержа́щаго тва́рь: є҆го́же пою́тъ а҆́гг҃ли непреста́ннымъ гла́сомъ, жизнода́вца гдⷭ҇а, спаса́ющаго ро́дъ на́шъ.
На стїхо́внѣ стїхи̑ры предпра́зднства, гла́съ а҃. Подо́бенъ: Всехва́льнїи мꙋ́чєницы:
Ви́дѧщи держи́ма ꙳ рꙋка́ми свои́ми всечⷭ҇таѧ творца̀, ꙳ вѣща́ше: ча́до сла́дкое, ꙳ ка́кѡ тѧ̀ млⷣнца зрю̀, ꙳ и҆ разꙋмѣ́ти не могꙋ̀ непостижи́магѡ ꙳ твоегѡ̀ ны́нѣ снизхожде́нїѧ; ꙳ пою̀ держа́вꙋ твою̀, ꙳ покланѧ́юсѧ милосе́рдїю твоемꙋ̀, ꙳ є҆гѡ́же ра́ди спастѝ мі́ръ прише́лъ є҆сѝ.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Ꙗ҆ви́сѧ воплоща́емь ꙳ и҆зъ тебє̀, мт҃и неискꙋсобра́чнаѧ, ꙳ и҆ въ верте́пѣ ражда́емь, ꙳ и҆ ви́димь бжⷭ҇твенными ꙳ го́рними чи́нми неви́димый: ꙳ человѣ́ка бо прїи́де и҆зба́вити ꙳ ѿ ле́сти ѕмі́иныѧ. ꙳ не ᲂу҆дивлѧ́йсѧ, всенепоро́чнаѧ, ѡ҆ ржⷭ҇твѣ̀, ꙳ є҆стество̀ превосходѧ́щемъ.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Тѧ̀ млⷣнца пресоверше́нна зрю̀, ꙳ въ ꙗ҆́слехъ возлежа́ща: ꙳ не вѣ́мъ же та́йны ꙳ глꙋбинꙋ̀ несказа́ннꙋ: ꙳ ка́кѡ и҆ по ржⷭ҇твѣ̀ ꙳ нетлѣ́нна пребы́хъ, ꙳ зако́ны преше́дши є҆стества̀; ꙳ кꙋ́ю ᲂу҆́бѡ хвалꙋ̀ тебѣ̀ принесꙋ̀; ꙳ ка́кѡ просла́влю тѧ̀; ꙳ дв҃а ѻ҆трокови́ца вѣща́ше.
Сла́ва, гла́съ и҃:
Прїиди́те всѝ вѣ́рнїи, согла́снѡ воспои́мъ петра̀ всеблаже́ннаго, благоче́стїѧ свѣти́ло, воздержа́нїѧ пра́вило, терпѣ́нїѧ сто́лпъ, простоты̀ сокро́вище, смире́нїѧ рѣкꙋ̀ ѻ҆би́льнꙋю, ни́щихъ ᲂу҆тѣше́нїе, стра́нныхъ страннопрїе́мника, и҆ и҆́стинныѧ любвѐ хрⷭ҇то́вы дѣ́лателѧ вои́стиннꙋ блаже́ннаго. се́й ᲂу҆́бѡ жи́въ и҆ прише́дъ, человѣ́кѡмъ застꙋ́пникъ, и҆ спаси́тель показа́сѧ, болѣ́зней и҆ страсте́й неисцѣ́льныхъ вра́чь, и҆ ѿ всѧ́ческихъ напа́стей свободи́тель, и҆ хрⷭ҇та̀ мо́литъ спасти́сѧ дꙋша́мъ на́шымъ.
И҆ ны́нѣ, гла́съ то́йже:
Воспрїимѝ, виѳлее́ме, бж҃їю митропо́лїю: свѣ́тъ бо незаходи́мый въ тебѣ̀ роди́тисѧ прихо́дитъ. а҆́гг҃ли, ᲂу҆диви́тесѧ на нб҃сѝ, человѣ́цы, просла́вите на землѝ, волсвѝ, ѿ персі́ды пресла́вный да́ръ принеси́те, па́стырїе, свирѧ́юще, трⷭ҇то́е пѣ́нїе сла́дцѣ воспо́йте: всѧ́кое дыха́нїе да хва́литъ вседѣ́телѧ.
Тропа́рь ст҃а́гѡ, гла́съ д҃: Ꙗ҆́же пре́жде безпло́днаѧ: пи́санъ на ма́лѣй вече́рни. Сла́ва, и҆ ны́нѣ, предпра́зднства: Гото́висѧ, виѳлее́ме:
На ᲂу҆́трени, на Бг҃ъ гдⷭ҇ь, тропа́рь предпра́зднства: Гото́висѧ, виѳлее́ме: Два́жды. Сла́ва, ст҃а́гѡ: И҆ ны́нѣ, предпра́зднства.
По а҃-й стїхоло́гїи сѣда́ленъ, гла́съ а҃. Подо́бенъ: Гро́бъ тво́й:
Вели́кїй хрⷭ҇то́въ ст҃и́тель да воспое́тсѧ, сто́лпъ свѣ́тлый, просвѣща́ющїй ны̀ чꙋде́съ свѣтлостьмѝ, ѻ҆́блакъ ро́сный пла́мень страсте́й погаша́ющїй, и҆ ѡ҆роша́ющїй вѣ́рныхъ мы̑сли, бжⷭ҇твенный пе́тръ.
Два́жды.
Сла́ва, и҆ ны́нѣ, предпра́зднства, гла́съ то́йже:
Преклони́вый нб҃са̀, и҆ въ дв҃ꙋ всели́выйсѧ, происхо́дитъ пло́тїю въ виѳлее́мстѣмъ верте́пѣ роди́тисѧ, ꙗ҆́коже пи́шетсѧ, ꙗ҆ви́тисѧ же млⷣнецъ, младе́нцы ѡ҆живлѧ́ѧй во ᲂу҆тро́бѣ. сего̀ ра́дꙋющесѧ ны́нѣ срѧ́щемъ всѝ се́рдца пра́востїю.
По в҃-й стїхоло́гїи сѣда́ленъ, гла́съ г҃. Поⷣ: Красотѣ̀ дѣ́вства:
Ми́лостивомꙋ хрⷭ҇то́вꙋ ᲂу҆го́дникꙋ, неѕло́бивомꙋ и҆ кро́ткомꙋ, всѝ тебѣ̀ любо́вїю зове́мъ, прилѣ́жнѡ молѧ́щесѧ: разрѣшѝ междоꙋсо́бнꙋю страсте́й на́шихъ бра́нь, разрꙋшѝ ѕлочести̑ваѧ а҆га́рѧнъ кова̑рствїѧ, и҆ покорѝ ты́ѧ правовѣ̑рнымъ, присноблаже́нне, и҆ всѧ́ческихъ и҆зба́ви и҆скꙋше́нїй, любо́вїю воспѣва́ющихъ тѧ̀.
Два́жды.
Сла́ва, и҆ ны́нѣ, предпра́зднства, гла́съ а҃:
Весели́сѧ, виѳлее́ме, є҆ѵфра́ѳо, гото́висѧ: се́ бо а҆́гница, па́стырѧ вели́каго въ ложесна́хъ носѧ́щи, роди́ти грѧде́тъ: и҆ предви́дѧще бжⷭ҇твеннꙋю ѕвѣздꙋ̀, волсвѝ ра́дꙋютсѧ, съ па̑стыри пою́ще, пра́востїю серде́чною. (с. 381)
По полѷеле́и сѣда́ленъ, гла́съ є҃. Подо́бенъ: Собезнача́льное сло́во:
Правосла́вными сїѧ̑нїи, ꙗ҆́кѡ во тмѣ̀ лежа́щыѧ ны̀, ѡ҆тѧгчє́нныѧ во грѣсѣ́хъ просвѣти́лъ є҆сѝ, и҆ всѧ̑ кова̑рства лꙋка́выхъ дꙋхѡ́въ ѿгна́лъ є҆сѝ: чꙋде́съ самодѣ́теленъ ꙗ҆ви́всѧ, ѻ҆́ч҃е, сла́вимь про́мысломъ вы́шнѧгѡ бы́лъ є҆сѝ. тѣ́мъ тѧ̀ вѣ́рою почита́емъ, ст҃и́телю пе́тре, а҆пⷭ҇толѡвъ и҆ патрїа́рхѡвъ є҆динокро́вниче.
Два́жды.
Сла́ва, и҆ ны́нѣ, предпра́зднства, гла́съ и҆ подо́бенъ то́йже:
Виѳлее́ме, гото́висѧ на срѣ́тенїе дв҃ы марі́и и҆ бг҃ома́тере: се́ бо грѧде́тъ къ тебѣ̀ млⷣнца носѧ́щи хрⷭ҇та̀, собезнача́льнаго ѻ҆ц҃ꙋ̀ и҆ дх҃ꙋ при́снѡ. є҆го́же въ верте́пѣ роди́тъ, и҆ по ржⷭ҇твѣ̀ дв҃а па́ки ꙗ҆ви́тсѧ.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃. Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло л҃є ѿ полꙋ̀.
По н҃-мъ ѱалмѣ̀ стїхи́ра, гла́съ ѕ҃:
Є҆гда̀ преставле́нїе честна́гѡ твоегѡ̀ тѣ́ла, ѻ҆́ч҃е, приспѣ̀, тогда̀ мно́жество вѣ́рныхъ ѡ҆бстꙋпи́вше ѻ҆́дръ, ᲂу҆ми́льнѡ провожда́хꙋ тѧ̀. и҆ ѻ҆́въ бо зрѧ́ тѧ благословлѧ́юща лю́ди, ᲂу҆дивлѧ́шесѧ, кнѧ́зь же і҆ѡа́ннъ со слеза́ми вопїѧ́ше: ѽ влⷣко, что́ ти возда́мъ проти́вꙋ твоегѡ̀ бл҃годѣѧ́нїѧ, є҆́же на́мъ дарова́лъ є҆сѝ, прїе́мъ ѿ бг҃а благода́ть; тѣ́мже, ст҃и́телю пе́тре, моли́сѧ прилѣ́жнѡ хрⷭ҇тꙋ̀ бг҃ꙋ на́шемꙋ, спасти́сѧ невоева́нꙋ гра́дꙋ твоемꙋ̀.
Канѡ́нъ предпра́зднства со і҆рмосо́мъ на ѕ҃, и҆ ст҃а́гѡ два̀ на и҃.
Канѡ́нъ предпра́зднства, пи́санъ вы́ше сегѡ́же числа̀.
Канѡ́нъ ст҃а́гѡ петра̀.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ѻ҆́ч҃е бг҃омꙋ́дре свѧти́телю пе́тре, ѿве́рзи моѧ̑ недостѡ́йнаѧ ᲂу҆стна̀ воспѣ́ти тѧ̀, и҆ прїимѝ ꙗ҆́кѡ благово́нное кади́ло ѿ ᲂу҆бо́жества моегѡ̀, є҆́же тебѣ̀ принесо́хъ недосто́йный.
Воспои́мъ всѝ вели́каго ст҃и́телѧ петра̀, почти́мъ застꙋ́пника и҆ ᲂу҆твержде́нїе землѝ рѡссі́йскїѧ, є҆го́же дарова̀ гдⷭ҇ь гра́дꙋ москвѣ̀ храни́телѧ бо́дра.
Спаси́тєльнымъ хрⷭ҇тѡ́вымъ за́повѣдемъ послѣ́довалъ є҆сѝ, премꙋ́дре ст҃и́телю пе́тре, вдѡ́въ и҆ сирѡ́тъ бы́лъ є҆сѝ предста́тель, и҆ землѝ рѡссі́йскїѧ вели́кое защище́нїе.
Бг҃оро́диченъ:
Пречⷭ҇таѧ бцⷣе, содѣ́телѧ и҆ сп҃са ро́ждшаѧ всѣ́хъ пою́щихъ тѧ̀, спасѝ ѿ бѣ́дъ гра́дъ тво́й, непреста́ннѡ молѧ́щи сн҃а твоего̀ и҆ бг҃а на́шего за ны̀.
Дрꙋгі́й канѡ́нъ чꙋдотво́рца петра̀.
Гла́съ а҃. Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.
Бл҃года́ть дх҃а прїе́мъ, ѻ҆́ч҃е, во твоѐ се́рдце, хрⷭ҇то́въ свѧти́телю, ᲂу҆ѧснѝ ѧ҆зы́къ, и҆ се́рдце просвѣтѝ твои́хъ пѣвє́цъ, є҆́же твою̀ па́мѧть воспѣ́ти свѣ́тлѡ, пе́тре прпⷣбне.
Вели́кїй ны́нѣ пе́тръ па́стырь цр҃кве держа́вный, па́стырѧ вкꙋ́пѣ и҆ пасѡ́мыѧ, и҆ всю̀ цр҃ковь въ па́мѧть свою̀ призыва́етъ: тѣ́мже собра́вшисѧ ꙗ҆́кѡ ѻ҆́бщемꙋ ѻ҆ц҃ꙋ̀ свѣ́тлѡ торжествꙋ́емъ.
А҆́ще и҆ побѣжда́ютъ твоѧ̑ и҆справлє́нїѧ словеса̀ на̑ша и҆ помышлє́нїѧ, ѻ҆́ч҃е пе́тре, ѻ҆ба́че дꙋше́вное на́ше предложе́нїе, по си́лѣ приноси́мое тебѣ̀, прїимѝ съ любо́вїю, досточꙋ́дне: є҆́же бо по досто́инствꙋ пѣ̑сни тебѣ̀ соплестѝ, не возмо́жно є҆́сть и҆ всѣ̑мъ на́мъ. (с. 383)
Бг҃оро́диченъ:
Свѣ́тлое прихо́дитъ сл҃нце, ѿ вра́тъ заключе́нныхъ ꙗ҆влѧ́ющеесѧ: но́щь бо ꙗ҆вле́ннѣ ᲂу҆праздни́сѧ, де́нь же прибли́жисѧ. тѣ́мже є҆стество̀ на́ше тлѣ́нное прїе́мли влⷣкꙋ ѿ дв҃ы, тебє̀ ра́ди тлѣ́нна быва́ема.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Сокрꙋшѝ а҆га́рѧны, и҆ всѧ̑ сопоста́ты безбѡ́жныѧ, преподо́бне пе́тре, моле́нїемъ твои́мъ къ творцꙋ̀ и҆ бг҃ꙋ на́шемꙋ, и҆ си́лꙋ и҆́хъ борю́щꙋю ны̀ не́мощнꙋ покажѝ, и҆ свирѣ̑пства ѕлолю̑таѧ покорѝ.
Ты̀ проѧви́лъ є҆сѝ, влⷣко, въ послѣ́днемъ ро́дѣ на́шемъ чꙋдотво́рца ст҃и́телѧ петра̀, землѝ рѡссі́йскїѧ ᲂу҆твержде́нїе, цр҃кве твоеѧ̀ пра́вое пра́вило, и҆ і҆ере́йскагѡ чи́на чинонача́льника.
Тебѣ̀ прикоснꙋ́выйсѧ, ст҃е, сꙋ́щемꙋ въ честно́мъ гро́бѣ твое́мъ, и҆сцѣле́нїе полꙋчи́ти сподо́бисѧ: рꙋка́мъ бо тогѡ̀ къ пе́рсемъ прико́рчившымсѧ, бж҃їею бл҃года́тїю дае́ши простира́тисѧ.
Бг҃оро́диченъ:
Бꙋ́ди мѝ, дв҃о, прибѣ́жище и҆ приста́нище, стѣна̀ неѡбори́маѧ и҆ застꙋ́пница, бг҃а пло́тїю ро́ждшаѧ пречⷭ҇таѧ, и҆зба́вителѧ всеще́драго и҆ сп҃са пою́щихъ тѧ̀, бг҃оневѣ́стнаѧ.
И҆́нъ. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
Позна́ тѧ, бг҃оно́се, всевѣ́децъ бг҃ъ, пре́жде є҆́же зача́тисѧ тебѣ̀ во ᲂу҆тро́бѣ, и҆ роди́вшасѧ ѡ҆свѧща́етъ тѧ̀, и҆ па́стырѧ ѻ҆ве́цъ свои́хъ вели́ка ᲂу҆строѧ́етъ: ꙗ҆́кѡ бо а҆пⷭ҇лꙋ петрꙋ̀ ввѣрѧ́етъ тебѣ̀ своѧ̑ а҆́гнцы.
Жезло́мъ воздержа́нїѧ страсте́й мо́ре раздѣли́въ, бл҃же́нне, ꙗ҆́кѡ мѡѷсе́й, на безстра́стїѧ го́рꙋ возше́лъ є҆сѝ, и҆ прїе́мъ мы́слєнныѧ скрижа̑ли, па́ствꙋ твою̀ наꙋчи́лъ є҆сѝ хрⷭ҇то́вꙋ зако́нꙋ.
Смире́нъ ꙗ҆ви́лсѧ є҆сѝ, кро́токъ же и҆ ти́хъ, пе́тре, ѿѻнꙋ́дꙋже дх҃а бл҃года́ть ѻ҆би́льнѣ и҆злїѧ́вшесѧ на тѧ̀, вели́ка показа́ тѧ, чꙋде́съ лꙋча́ми зе́млю на́шꙋ ѡ҆сїѧва́юща.
Бг҃оро́диченъ:
Крѣ́пкїй держа́вный воплоти́выйсѧ ны́нѣ бг҃ъ ꙗ҆ви́сѧ сꙋ́щымъ во тмѣ̀ сѣ́ни сме́ртныѧ. свѣ́тъ ᲂу҆ви́дите, вѣ́рнїи, вели́къ, хрⷭ҇та̀ въ пеще́рѣ, и҆мꙋ́ща ѿ дв҃ы роди́тисѧ стра́шнѡ, ю҆́же вѣ́рнѡ воспои́мъ.
Катава́сїа: Пре́жде вѣ̑къ:
Конда́къ предпра́зднства, гла́съ г҃. Подо́бенъ: Дв҃а дне́сь:
Дв҃а дне́сь превѣ́чное сло́во въ верте́пѣ грѧде́тъ роди́ти неизрече́ннѡ: ликꙋ́й вселе́ннаѧ, ᲂу҆слы́шавши, просла́ви со а҆́гг҃лы и҆ па́стырьми хотѧ́щаго ꙗ҆ви́тисѧ ѻ҆троча̀ мла́до, превѣ́чнаго бг҃а.
І҆́косъ:
Ѽ ᲂу҆жа́снагѡ вои́стиннꙋ и҆ па́че сло́ва чꙋдесѐ! є҆́же бы́ти даѧ́й всѣ̑мъ, ра́ди бл҃гости, во чре́во ст҃ы́ѧ дв҃ы вни́де, и҆ въ верте́пѣ роди́тисѧ грѧде́тъ, и҆ въ ꙗ҆́слехъ положи́тисѧ. ѕвѣзда́ же сего̀ проповѣ́дꙋетъ свы́ше волхвѡ́мъ, и҆дꙋ́щымъ на поклоне́нїе є҆гѡ̀ съ да̑ры, и҆здале́ча привлача́щи со тща́нїемъ послѣ́дꙋющыѧ валаа́ма прорече́нїю, ре́кшагѡ: ѕвѣзда̀ хо́щетъ провозвѣсти́ти ѻ҆троча̀ мла́до, превѣ́чнаго бг҃а.
Сѣда́ленъ, гла́съ д҃. Подо́бенъ: Ско́рѡ предварѝ:
Свѣти́льникъ свѣтосїѧ́ненъ ꙗ҆ви́лсѧ є҆сѝ мі́рꙋ, просвѣща́ѧй блиста́ньми бжⷭ҇твенныхъ твои́хъ слове́съ вѣ́рныхъ помышлє́нїѧ, ст҃и́телю ѻ҆́ч҃е пе́тре. тѣ́мже всѝ свѧще́ннꙋю твою̀ и҆ бжⷭ҇твеннꙋю па́мѧть дне́сь ра́достнѡ соверша́емъ.
Два́жды.
Сла́ва, и҆ ны́нѣ, предпра́зднства. Подо́бенъ: то́йже:
Дв҃ы, предначни́те дѣви́ческꙋю ра́дость, ма́тєри, восхвали́те провожде́нїе мт҃ре хрⷭ҇та̀ бг҃а на́шегѡ: волсвѝ со а҆́гг҃лы, съ на́ми па́стырїе: грѧде́тъ бо дв҃а, во гра́дѣ виѳлее́мѣ роди́ти, сн҃а превѣ́чнаго бг҃а, спаса́ющаго мі́ръ ѿ тлѣ́нїѧ.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инства, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Бл҃года́тїю дх҃а пома́залсѧ є҆сѝ, а҆рхїере́й всеизрѧ́дне пе́тре: во хрⷭ҇та́ бо ѡ҆дѣ́ѧвсѧ, житїѧ̀ ра́ди чи́стагѡ. тѣ́мъ наꙋчи́лъ є҆сѝ сла́вити въ трⷪ҇цѣ є҆ди́наго бг҃а.
И҆зба́ви твоѐ ста́до ѿ бꙋ́ри грѣха̀, прпⷣбне ст҃и́телю пе́тре, бѣ́дъ же и҆ скорбе́й, приводѧ́ ны въ приста̑нища ти̑хаѧ бжⷭ҇твенныѧ во́ли хрⷭ҇то́вы.
Хрⷭ҇то́въ ꙗ҆ви́лсѧ є҆сѝ ᲂу҆го́дникъ, ѻ҆́ч҃е пресвѧще́нне пе́тре: тѣ́мъ молѧ́сѧ не преста́й ко гдⷭ҇ꙋ, ѿ напа́стей и҆ бѣ́дъ и҆ скорбе́й и҆зба́вити ста́до твоѐ, и҆ ѿ нꙋ́ждныхъ и҆скꙋше́нїй.
Бг҃оро́диченъ:
Свѧще́ннѡ тѧ̀ сла́вѧтъ ст҃и́тельстїи собо́ри и҆ всѝ преподо́бныхъ ли́цы: зижди́телѧ бо всѣ́хъ, сн҃а сло́во бж҃їе, ꙗ҆́кѡ млⷣнца на рꙋкꙋ̀ твоє́ю понесла̀ є҆сѝ.
И҆́нъ. І҆рмо́съ:
Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Зако́нѡмъ ѿ сосє́цъ ма́тернихъ подклони́всѧ дх҃ѡ́внымъ, зако́ны плотскі̑ѧ превше́лъ є҆сѝ, преподо́бне, ꙗ҆̀же въ жи́зни твое́й ᲂу҆мертви́лъ є҆сѝ воздержа́нїемъ крѣ́пкимъ. є҆гѡ́же ра́ди да́нъ є҆сѝ вѣ̑рнымъ чꙋдотво́рецъ вели́къ, пе́тре блаже́нне.
Сна̀ ѻ҆чесє́мъ твои̑мъ, и҆ дрема́нїѧ вѣ́ждѡмъ не да́лъ є҆сѝ, до́ндеже ѡ҆брѣ́те мѣ́сто поко́йно всѣ́хъ содѣ́тель, ѻ҆́ч҃е, срⷣце твоѐ: є҆́же ѡ҆чи́стившеесѧ досто́йнѣ показа̀ своѐ жили́ще сла́вы цр҃ь и҆ бг҃ъ вѣ́чный.
Оу҆мертвѝ мꙋдрова́нїе, премꙋ́дре, пло́ти моеѧ̀ неисцѣ́льное, и҆ къ бж҃е́ствєннымъ стезѧ́мъ наста́ви мѧ̀, ꙗ҆́кѡ крѣ́покъ и҆ си́ленъ, и҆ зако́нѡмъ благи̑мъ мѧ̀ повинѝ, блаже́нне, и҆ раба̀ покажи́ мѧ хрⷭ҇то́ва, порабоще́ннаго страстьмѝ лю́тыми.
Бг҃оро́диченъ:
И҆збавле́нїе посла̀ гдⷭ҇ь, ꙗ҆́коже пи́сано є҆́сть, лю́демъ и҆ племенє́мъ и҆ ꙗ҆зы́кѡмъ ны́нѣ. лю́ди бо себѣ̀ всѧ̑ содѣва́етъ є҆ди́номꙋ, вѣ́рою покланѧ́ющыѧсѧ, воплоще́нїю сыно́вню, и҆ тебѐ бцⷣꙋ и҆сповѣ́дающыѧ.
Катава́сїа: Же́злъ и҆зъ ко́рене:
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ѻ҆кре́стъ стоѧ́ще ра́ки твоеѧ̀, ст҃и́телю прпⷣбне пе́тре, и҆мѣ́емъ тѧ̀ хода́таѧ къ бг҃ꙋ, и҆ застꙋпле́нїе землѝ рѡссі́йскїѧ, и҆ ᲂу҆твержде́нїе незы́бленное.
Ми́лостивъ бы́въ ᲂу҆бѡ́гимъ, млⷭ҇ть дꙋше́внꙋю и҆спросѝ, прехва́льне: ми́лостыню бо стѧжа́въ, ѻ҆́ч҃е ст҃ы́й пе́тре, свѣщꙋ̀ свѣ́тлꙋ ᲂу҆стро́илъ є҆сѝ.
Жили́ще бы́лъ є҆сѝ ст҃а́гѡ дх҃а, вои́стиннꙋ, блаже́нне пе́тре, и҆ тогѡ̀ ꙗ҆вле́нными бжⷭ҇твенными да̑ры до́брѣ разбогати́лсѧ є҆сѝ.
Бг҃оро́диченъ:
Мѵ́ро тѧ̀ и҆менꙋ́емъ, пречⷭ҇таѧ, ꙗ҆́кѡ ро́ждшꙋю бг҃а пло́тїю, и҆стоще́нное благода́тное мѵ́ро всѣ̑мъ притека́ющымъ подъ кро́въ тво́й.
И҆́нъ. І҆рмо́съ:
Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Ꙗ҆́кѡ вели́кое бога́тство твои́хъ щедро́тъ, ꙗ҆ви́сѧ въ землѝ на́шей, безчи́сленное проли́тїе ми́лости твоеѧ̀, слꙋго̀ хрⷭ҇то́въ: ты́ бо просѧ́щымъ сꙋ́щаѧ подае́ши, и҆ ты̑ѧ насы́тити тщи́шисѧ твои́мъ предложе́нїемъ, блаже́нне.
Кро́токъ ꙗ҆ви́лсѧ є҆сѝ кꙋ́пнѡ и҆ смире́нъ, дѣ́ломъ и҆ сло́вомъ: и҆ си́мъ всѧ̑ къ себѣ̀ привле́клъ є҆сѝ. любо́вїю и҆ до́брыми дѣ́лы всѧ̑ ᲂу҆кроти́лъ є҆сѝ, и҆ сердца̀ возвесели́лъ є҆сѝ ᲂу҆крѣплѧ́емыхъ твои́ми чꙋдесы̀.
Вели́кїй па́стырь всѣ́хъ хрⷭ҇то́съ, ѻ҆ве́цъ тѧ̀, блаже́нне, показа̀ свои́хъ па́стырѧ и҆ ᲂу҆чи́телѧ слове́сныхъ. тѣ́мже заблꙋжда́ющаго мѧ̀ на гора́хъ поги́бели, ꙗ҆́кѡ па́стырь сострада́теленъ, твоѐ ны́нѣ ѻ҆вча̀ взыщѝ.
Бг҃оро́диченъ:
Вели́кїй человѣ́кѡвъ па́стырь и҆ ст҃и́тель, ѿ дв҃ы ꙗ҆́кѡ человѣ́къ прихо́дитъ, пꙋчи́ною неизрече́нныхъ щедро́тъ: виѳлее́ме, ᲂу҆гото́висѧ, па́стырїе, воспѣва́йте, ѻ҆́бщее возведе́нїе возвѣща́юще концє́мъ.
Катава́сїа: Бг҃ъ сы́й ми́ра:
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Житїѐ твоѐ цѣломꙋ́дреннѡ, свѧщенноѧвле́нне, соверши́лъ є҆сѝ, пра́вдою ᲂу҆краси́всѧ, и҆ мꙋ́жествомъ смы́сла добродѣ́тели сочета́въ себѣ̀, преблаже́нне ст҃и́телю пе́тре.
Хранѝ гра́дъ тво́й, ст҃и́телю пе́тре преблаже́нне, ѿ безбо́жныхъ и҆ чꙋжевѣ́рныхъ нахожде́нїй, и҆ ѿ междоꙋсо́бныѧ ра́ти, молѧ́сѧ непреста́ннѡ влⷣцѣ хрⷭ҇тꙋ̀, є҆́же ми́ръ па́ствѣ твое́й дарова́ти.
Ты̀ ᲂу҆́бѡ и҆ по сме́рти сла́вимь ꙗ҆́кѡ жи́въ, чꙋдодѣ́йствꙋеши немѡщны́мъ, и҆ слѧ́чєннымъ дае́ши и҆сцѣле́нїе бжⷭ҇твенною благода́тїю, гл҃го́летъ бо гдⷭ҇ь: прославлѧ́ющаго мѧ̀ просла́влю.
Бг҃оро́диченъ:
Превы́шши была̀ є҆сѝ нбⷭ҇ныхъ си́лъ, заче́нши сло́во бж҃їе неизрече́нное, и҆́же всѧ́чєскаѧ сло́вомъ соверши́въ, и҆ ѿ ѻ҆ц҃а̀ пре́жде вѣ̑къ роди́сѧ: того̀, чⷭ҇таѧ, молѧ́щи не преста́й.
И҆́нъ. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Ты̀ сирѡ́тъ вои́стиннꙋ бы́лъ є҆сѝ ѻ҆ц҃ъ, и҆ вдѡ́въ застꙋ́пникъ, сла́вне: печа́льныхъ же и҆ сꙋ́щихъ въ ско́рбехъ сла́дкое ᲂу҆тѣше́нїе, вра́чь дꙋше́вныхъ страсте́й кꙋ́пнѡ и҆ тѣле́сныхъ. тѣ́мже всѝ призыва́емъ тѧ̀, є҆́же бы́ти тебѣ̀ на́мъ предста́телю во ѡ҆бстоѧ́нїихъ на́шихъ.
Мꙋ́жїе свѧще́ннїи ра́достнѡ съ наро́домъ дне́сь, твою̀, ѻ҆́ч҃е, па́мѧть пра́зднꙋюще, торжествꙋ́ютъ, и҆̀мже согла́снѡ, и҆́стиннїи безмо́лвницы, и҆ прості́и всѝ ѻ҆́бще тѧ̀ воспѣва́ютъ, предста́телѧ же вкꙋ́пѣ и҆ ᲂу҆чи́телѧ.
Ча́до поро́чное а҆́зъ є҆ди́нъ бы́хъ, ѻ҆́ч҃е, страстьмѝ скве́рными, и҆ тогѡ̀ ра́ди недосто́инъ до́брагѡ твоегѡ̀, сла́вне, и҆ кра́снагѡ пра́зднованїѧ: но ты̀ ѡ҆чи́стивъ мою̀ скве́рнꙋ, преподо́бне, дꙋше́внꙋю и҆ тѣле́снꙋю, покажи́ мѧ торжества̀ твоегѡ̀ бы́ти досто́йна.
Бг҃оро́диченъ:
Чꙋ́до настоѧ́щее, чꙋ́до превосходѧ́щее, и҆ сло́ва и҆ ᲂу҆ма̀ всегѡ̀ вы́шше: и҆́бо дв҃а та́ѧжде и҆ мт҃и познава́етсѧ, и҆ ро́ждшеесѧ кꙋ́пнѡ бг҃ъ и҆ чл҃вѣ́къ. сегѡ̀ свѣ́тлое рожде́нїе предпра́зднꙋюще, воспѣва́емъ ра́дѡстнаѧ.
Катава́сїа: И҆зъ ᲂу҆тро́бы і҆ѡ́нꙋ:
Конда́къ, гла́съ в҃. Подо́бенъ: Взбра́нной:
Взбра́нномꙋ и҆ ди́вномꙋ на́шеѧ землѝ чꙋдотво́рцꙋ, дне́сь любо́вїю тебѣ̀ притека́емъ, пѣ́снь, бг҃оно́се, плетꙋ́ще, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, многоѻбра́зныхъ и҆зба́ви на́съ ѡ҆бстоѧ́нїй, да зове́мъ тѝ: ра́дꙋйсѧ, ᲂу҆твержде́нїе гра́дꙋ на́шемꙋ.
І҆́косъ:
Но́вый чꙋдотво́рецъ ꙗ҆ви́лсѧ є҆сѝ, и҆сцѣлє́нїѧ подава́ѧ всѣ̑мъ, ᲂу҆се́рднѡ ѿ дꙋшѝ приходѧ́щымъ: и҆ хрⷭ҇тѡ́вы лю́ди, бг҃оно́се, неви́димѡ посѣща́ѧ, зе́млю на́шꙋ просвѣща́еши, ꙗ҆́кѡ да согла́снѡ зове́мъ тѝ си́це: ра́дꙋйсѧ, свѣ́та безстра́стнагѡ до́ме: ра́дꙋйсѧ, страсте́й те́мныхъ прогони́телю: ра́дꙋйсѧ, де́мѡнскїѧ разрꙋши́вый кѡ́зни: ра́дꙋйсѧ, а҆́гг҃льскїѧ возвесели́вый чи́ны: ра́дꙋйсѧ, высото̀ бг҃овидѣ́нїѧ чи́стагѡ: ра́дꙋйсѧ, глꙋбино̀ смире́нїѧ, болѣ̑зни ѡ҆мыва́ющаѧ: ра́дꙋйсѧ, ꙗ҆́кѡ бы́лъ є҆сѝ зри́тель неви́димыхъ: ра́дꙋйсѧ, ꙗ҆́кѡ соѡбщи́лсѧ є҆сѝ ликѡ́мъ ст҃и́телей: ра́дꙋйсѧ, землѝ рѡссі́йскїѧ па́стырю и҆ ᲂу҆чи́телю: ра́дꙋйсѧ, ст҃и́телємъ и҆зрѧ́днаѧ похвало̀: ра́дꙋйсѧ, є҆гѡ́же ра́ди показа̀ бг҃ъ чꙋдодѣ̑йствїѧ вє́лїѧ: ра́дꙋйсѧ, є҆гѡ́же ра́ди бг҃ъ сла́витсѧ: ра́дꙋйсѧ, ᲂу҆твержде́нїе гра́дꙋ на́шемꙋ.
Пѣ́снь з҃. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Ѿве́рзи мѝ двє́ри покаѧ́нїѧ, преблаже́нне, а҆рхїере́ю пе́тре, да ѡ҆мы́ю скве́рнꙋ ѻ҆каѧ́нныѧ моеѧ̀ дꙋшѝ и҆ тѣ́ла, всѧ̑ чꙋ̑вствїѧ и҆ со́вѣсть направлѧ́ѧ бг҃ꙋ пѣ́ти: ѻ҆тцє́въ на́шихъ бж҃е, бл҃гослове́нъ є҆сѝ.
И҆́мамы тѧ̀ застꙋ́пника те́пла твоѝ рабѝ, и҆ стѣ́нꙋ неѡбори́мꙋ гра́да твоегѡ̀ москвы̀, и҆ ᲂу҆твержде́нїе, и҆ не ᲂу҆бои́мсѧ сопоста́тныхъ врагѡ́въ, но побѣжда́емъ ты̑ѧ си́лою хрⷭ҇то́вою, пою́ще: ѻ҆тє́цъ на́шихъ бж҃е, бл҃гослове́нъ є҆сѝ.
Оу҆ста́вы ѻ҆ч҃єскїѧ ᲂу҆тверди́лъ є҆сѝ, мꙋ́дре, и҆ цр҃ковь прест҃ы́ѧ бж҃їѧ мт҃ре свѧще́нства лѣ́потою прекра́снꙋ ᲂу҆стро́илъ є҆сѝ, и҆ ᲂу҆чє́нїи твои́ми лю́ди наказа́лъ є҆сѝ пѣ́ти: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Спаси́тельное приста́нище, бцⷣе дв҃о, тѧ̀ и҆мꙋ́ще ны́нѣ, жите́йскихъ бѣ́дъ и҆ бꙋ́ри и҆збѣга́емъ, къ приста́нищꙋ тишины̀ твоеѧ̀ прибѣга́юще, сн҃ꙋ твоемꙋ̀ зове́мъ: ѻ҆тє́цъ на́шихъ бж҃е, бл҃гослове́нъ є҆сѝ.
И҆́нъ. І҆рмо́съ:
Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Землѧ̀ на́ша и҆ страны̀ согла́снѡ, ѻ҆́ч҃е, чꙋдеса̀ твоѧ̑ возвѣща́ютъ, ꙗ҆̀же повсю́дꙋ ᲂу҆ча́ще пѣ́ти хрⷭ҇тꙋ̀ прера́достнѡ: ѻ҆ц҃є́въ на́шихъ бж҃е, бл҃гослове́нъ є҆сѝ.
Жени́хъ кра́сный добро́тою па́че всѣ́хъ сынѡ́въ человѣ́ческихъ, ꙗ҆́коже пи́сано є҆́сть, невѣ́стѣ, блаже́нне, свое́й, цр҃кви, краснѣ́йша тѧ̀ показа̀ жениха̀, тогѡ̀ носѧ́ща ѻ҆́бразы подо́бїѧ.
Оу҆краси́въ твоѐ житїѐ ми́лостынею и҆ кро́тостїю и҆ любо́вїю и҆́стинною, подража́тель показа́лсѧ є҆сѝ и҆зрѧ́дный па́стырѧ до́брагѡ, и҆збра́въ тогѡ̀ добродѣ́тєли до́брѣ.
Бг҃оро́диченъ:
Прихо́дитъ влⷣка въ верте́пъ роди́тисѧ ꙗ҆́кѡ человѣ́къ, пред̾ꙋсрѧ́щимъ, вѣ́рнїи, дв҃ꙋ чⷭ҇тꙋю, воспѣва́юще є҆́й ра́достнѡ: ра́дꙋйсѧ, мі́ра ра́досте, ра́дꙋйсѧ, дв҃о мт҃и хрⷭ҇то́ва.
Пѣ́снь и҃. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Побѣжде́нъ бы́въ ѿ врага̀, прегрѣшє́нїи мно́гими мо́лвъ жите́йскихъ, вѣ́рою прихождꙋ̀, и҆ ꙗ҆́кѡ манассі́а въ покаѧ́нїи вопїю́ ти, хрⷭ҇тѐ: гдⷭ҇а по́йте дѣла̀ и҆ превозноси́те є҆го̀ во вѣ́ки.
Моли̑твы, преблаже́нне, и҆ молє́нїѧ творѝ прилѣ́жнѡ къ бг҃ꙋ, при́снѡ за рабы̑ твоѧ̑, въ печа́лехъ застꙋ́пника и҆ побо́рника тѧ̀ и҆мꙋ́щыѧ, ѿ бѣ́дъ спаса́емсѧ, гдⷭ҇а пою́ще и҆ превозносѧ́ще є҆го̀ во вѣ́ки.
Воѡрꙋжа́ютсѧ на лю́ди твоѧ̑ смирє́нныѧ, ст҃и́телю пречестны́й ѻ҆́ч҃е пе́тре, сы́нове а҆га́рини: сокрꙋшѝ ты̑ѧ неви́димою си́лою моли́твъ твои́хъ, ко влⷣцѣ за ны̀, при̑сныѧ рабы̑ твоѧ̑, гдⷭ҇а пою́щыѧ и҆ превозносѧ́щыѧ є҆го̀ во вѣ́ки.
Бг҃оро́диченъ:
Влⷣчце дв҃о пречⷭ҇таѧ и҆ пресла́внаѧ, со ст҃и́телемъ петро́мъ твоемꙋ̀ сн҃ꙋ и҆ цр҃ю̀ моли́сѧ прилѣ́жнѡ, ѿ всѧ́кїѧ нꙋ́жды и҆ бѣ́дъ и҆зба́вити гра́дъ тво́й и҆́скреннїй москвꙋ̀, тебѐ вѣ́рою блажа́щїй, гпⷭ҇жѐ, и҆ пою́щїй и҆ превозносѧ́щїй во всѧ̑ вѣ́ки.
И҆́нъ. І҆рмо́съ:
Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Ѡ҆кормѝ моли́твою твое́ю па́ствꙋ сїю̀ многочеловѣ́чнꙋю твою̀, и҆ бꙋ́ри вѣ̑тръ проти́вныхъ, чꙋ́вственныхъ и҆ мы́сленныхъ ᲂу҆ста́ви твои́ми моли́твами: и҆ и҆зба́ви всѧ́кихъ и҆скꙋше́нїй и҆ смꙋще́нїй, и҆ да́же до конца̀ неврежде́нꙋ соблюда́й.
Падо́ша востаю́щїи на ны̀, ѻ҆́ч҃е, твои́ми моли́твами побѣжда́еми а҆га́рини внꙋ́цы, хотѧ́щїи наслѣ́дїе твоѐ ѡ҆ѕло́бити, и҆ смѣ́хъ бы́ша и҆ порꙋга́нїе, паде́нїѧ своегѡ̀ пла́чꙋще: мы́ же воспѣва́емъ ра́достнѡ твою̀ свѧще́ннꙋю па́мѧть.
Неизрече́нно твоѐ чадолю́бїе, ѻ҆́ч҃е, превосходѧ́ще ѻ҆те́ческꙋю любо́вь: всегда̀ ᲂу҆́бѡ неви́димѡ на́съ посѣща́еши непреста́нными твои́ми моли́твами, спасе́нїе на́мъ и҆спроша́ѧ, и҆ подава́ѧ на́мъ съ ти́хостїю, пе́тре, ра́дѡстнаѧ.
Бг҃оро́диченъ:
Всего́ мѧ па́дша, бцⷣе дв҃о, и҆ погꙋби́вша є҆́же по ѻ҆́бразꙋ, чⷭ҇таѧ, бг҃ъ своегѡ̀ созда́нїѧ не презрѣ́въ, тобо́ю всего́ мѧ ѡ҆бновѝ. є҆гѡ́же ра́ди, тебѐ, винꙋ̀ спасе́нїѧ на́шегѡ всѧ̀ тва́рь воспѣва́етъ, зовꙋ́щи: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.
Катава́сїа: Чꙋ́да преесте́ственнагѡ:
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Ꙗ҆́кѡ блꙋдни́ца и҆ разбо́йникъ и҆ мыта́рь вопїю́ ти ѿ се́рдца, хрⷭ҇тѐ: согрѣши́хъ, простѝ мнѣ̀, влⷣко, мнѡ́гаѧ моѧ̑ согрѣшє́нїѧ, и҆ и҆зба́ви мѧ̀ ѿ всѧ́кагѡ гнѣ́ва, твоегѡ̀ ст҃и́телѧ петра̀ моле́нїемъ, ꙗ҆́кѡ да непреста́ннѡ тѧ̀ велича́ю.
Прїиди́те собери́тесѧ всѝ моско́встїи наро́ди къ блаже́ннагѡ ст҃и́телѧ петра̀ гро́бꙋ, и҆ со слеза́ми возопі́йте къ бг҃ꙋ: и҆зба́ви, гдⷭ҇и, ѿ бѣ́дъ лю́ди твоѧ̑, глаго́люще, да тѧ̀ велича́емъ во вѣ́ки.
Вельмѝ ра́дꙋетсѧ ѡ҆ тебѣ̀, пречестны́й ѻ҆́ч҃е ст҃и́телю пе́тре, со́бственный гра́дъ тво́й москва̀, помо́щника, и҆ застꙋ́пника и҆мѣ́ѧ тѧ̀: и҆ ны́нѣ, влⷣко, не ѿходѝ дх҃омъ ѿ на́съ, моли́твꙋ творѧ̀ за ны̀ къ бг҃ꙋ, ꙗ҆́кѡ да и҆зба́витъ ны̀ ѿ наси́лїѧ безбо́жныхъ а҆га́рѧнъ, врагѡ́въ на́шихъ, да тѧ̀ всегда̀ велича́емъ.
Бг҃оро́диченъ:
Мр҃і́е, пречⷭ҇таѧ влⷣчце, ѡ҆скверне́нное се́рдце моѐ и҆ дꙋ́шꙋ мольба́ми твои́ми ѡ҆чи́сти, и҆ жи́зни вѣ́чныѧ наслѣ́дника мѧ̀, гпⷭ҇жѐ, сотворѝ, не помина́ющи мои́хъ безчи́сленныхъ ѕѡ́лъ, сн҃а твоего̀ и҆ бг҃а ᲂу҆молѝ за мѧ̀ ѻ҆каѧ́ннаго: и҆ пѣвцы̀ твоѧ̑ сохранѝ, всест҃а́ѧ.
И҆́нъ. І҆рмо́съ:
Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.
Сла́вꙋ твою̀ воспѣ́ти по досто́инствꙋ невозмо́жно, чꙋдеса́ бо премнѡ́га и҆ и҆сцѣлє́нїѧ безчи́слєннаѧ ѻ҆би́льнѡ подае́ши съ те́плою вѣ́рою приходѧ́щымъ къ тебѣ̀, пе́тре ст҃и́телю, похвало̀ землѝ на́шеѧ.
Положѝ тебѐ цр҃кве своеѧ̀ ѡ҆снова́нїе хрⷭ҇то́съ, и҆ столпа̀ крѣ́пка, и҆ непозы́бленна во вѣ́къ, соблюда́юща и҆ подтвержда́юща гра́дъ тво́й пребы́ти непоколеби́мъ до конца̀, и҆ ѿ врагѡ́въ ненавѣ́тꙋемь.
Ст҃и́телїе ᲂу҆́бѡ сщ҃е́нницы и҆ мона́си, и҆ всѝ лю́дїе, мꙋ́жїе, и҆ жєны̀, ста́рцы со младє́нцы, и҆ всѧ́къ во́зрастъ, и҆ всѧ́кое досто́инство, ст҃и́телѧ на́шегѡ свѣ́тлѡ па́мѧть да пра́зднꙋемъ.
Бг҃оро́диченъ:
Притеце́мъ чꙋ́до превели́кое ви́дѣти, дв҃а бо грѧде́тъ, млⷣнца носѧ́щи во ᲂу҆тро́бѣ, младе́нцы ѡ҆живлѧ́ющаго: па́стырїе со а҆́гг҃лы ѻ҆́бщꙋю пѣ́снь воспѣва́ютъ, въ пеще́рѣ спасе́нїе возвѣща́юще.
Катава́сїа: Та́инство стра́нное:
Свѣти́ленъ предпра́зднства. Подо́бенъ: Посѣти́лъ ны̀ є҆́сть:
Предпра́зднствєнныѧ, вѣ́рнїи, ржⷭ҇тва̀ пѣ̑сни прїиди́те принесе́мъ всѝ: грѧде́тъ ᲂу҆жѐ хрⷭ҇то́съ въ виѳлее́мъ роди́тисѧ, спастѝ вселе́ннꙋю, ꙗ҆́кѡ є҆ди́нъ чл҃вѣколю́бецъ.
Сла́ва, ст҃а́гѡ. Подо́бенъ: Жєны̀ ᲂу҆слы́шите:
Дх҃ъ ст҃ы́й ст҃и́телѧ тѧ̀ пома́за, пе́тре пребл҃же́нне, хрⷭ҇то́вꙋ па́ствꙋ па́ствити на па́житехъ спаси́тельныхъ. тѣ́мъ и҆ потща́лсѧ є҆сѝ наставлѧ́ти лю́ди пра́выми стезѧ́ми: тогѡ̀ ра́ди ны́нѣ сꙋгꙋ̑быѧ вѣнцы̀ ѿ вѣнцеда́вца прїѧ́лъ є҆сѝ.
И҆ ны́нѣ:
Гото́висѧ, виѳлее́ме, ᲂу҆красѝ до́мы твоѧ̑: къ тебѣ́ бо грѧде́тъ дв҃а, млⷣнца носѧ́щи хрⷭ҇та̀, ѻ҆ц҃ꙋ̀ собезнача́льнаго: прїи́де бо да спасе́тъ ро́дъ человѣ́ческїй.
На хвали́техъ стїхи̑ры, на и҃. Предпра́зднства д҃. гла́съ ѕ҃:
Подо́бенъ: А҆́гг҃льскїѧ:
Содѣ́тельнаѧ ны́нѣ предгрѧде́тъ премꙋ́дрость, ꙳ прⷪ҇ро́честїи ѿверза́ютсѧ ѻ҆́блацы, ꙳ благода́ть процвѣта́етъ, ꙳ и҆́стина возсїѧ̀: ꙳ престаю́тъ гада̑нїѧ сѣнѡ́внаѧ, ꙳ є҆де́мова ѿве́рзесѧ две́рь: ꙳ а҆да́ме ликꙋ́й, ꙳ созда́тель бг҃ъ на́шъ ꙳ во́лею созда́сѧ.
Речє́нїѧ и҆сполнѧ́ѧ прⷪ҇ро́чєскаѧ и҆ видѣ̑нїѧ, ꙳ ражда́етсѧ пло́тїю ꙳ и҆ ѡ҆дебелѣва́етъ сло́во, ꙳ и҆ въ ꙗ҆́слехъ безслове́сныхъ ро́ждсѧ возлега́етъ. ꙳ сїѐ кра́йнее схожде́нїе, ꙳ сїѐ стра́шное смотре́нїе, ꙳ є҆гѡ́же ра́ди пое́мъ: цр҃ь і҆и҃левъ ꙳ хрⷭ҇то́съ прихо́дитъ.
Сѐ чⷭ҇таѧ па́че ᲂу҆ма̀ и҆ сло́ва ꙳ ражда́етъ сн҃а бж҃їѧ, ꙳ є҆го́же прⷪ҇ро́цы проповѣ́даша дре́вле, ꙳ прови́дѧще дх҃омъ ст҃ы́мъ, ꙳ нескве́рнꙋ тѧ̀ сохранѧ́юща ꙳ и҆ разрѣша́ющаго а҆да́ма ѿ грѣха̀. ꙳ лю́дїе рце́мъ: ꙳ цр҃ь на́шъ хрⷭ҇то́съ ꙳ пло́тїю прихо́дитъ.
Нѣ́дръ ѻ҆ч҃ескихъ не ѿстꙋ́пль, ꙳ человѣ́къ ꙗ҆ви́лсѧ є҆сѝ: ꙳ и҆ дв҃и́ческими держи́мь рꙋка́ми, ꙳ волхвы̀ ѿ персі́ды ѕвѣздо́ю призва́лъ є҆сѝ, ꙳ цр҃ю̀ тебѣ̀ и҆ бг҃ꙋ покланѧ́ющыѧсѧ. ꙳ дꙋ́хомъ ᲂу҆сте́нъ ꙳ нече́ствꙋющыѧ кнѧ́зи ꙗ҆зы́чєскїѧ погꙋби́ши, ꙳ и҆ ᲂу҆пасе́ши лю́ди ꙳ ѡ҆сꙋществє́нныѧ.
И҆́ны стїхи̑ры ст҃а́гѡ петра̀, гла́съ и҃.
Подо́бенъ: Ѽ пресла́внагѡ чꙋдесѐ!
Прпⷣбне ѻ҆́ч҃е пе́тре, ꙳ ты̀ є҆щѐ во ᲂу҆тро́бѣ мт҃рни ꙳ ст҃льства прозва́нїе прїѧ́лъ є҆сѝ, ꙳ нарече́нное ѿ бг҃а. ꙳ ты̀ и҆змла́да хрⷭ҇та̀ возлюби́лъ є҆сѝ, ꙳ прїе́мъ ѿ негѡ̀ па́ствꙋ слове́сныхъ ѻ҆ве́цъ, ꙳ до́брѣ па́слъ є҆сѝ цр҃ковь бж҃їю. ꙳ тѣ́мъ твоѐ пра́зднꙋемъ ᲂу҆спе́нїе, ꙳ ра́дꙋющесѧ хрⷭ҇та̀ велича́емъ.
Два́жды.
Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.
Прпⷣбне ст҃лю пе́тре, ꙳ и҆спросѝ къ бг҃ꙋ моли́твами твои́ми цр҃кви ᲂу҆твержде́нїе, а҆рхїере́ю па́ствы попече́нїе и҆ ᲂу҆правле́нїе, ꙳ странѣ̀ побѣ́дꙋ на а҆га́рѧны, ꙳ и҆ на всѧ̑ врагѝ ѡ҆долѣ́нїе, ꙳ неподви́жимо и҆ не побори́мо пребыва́нїе гра́да твоегѡ̀, ꙳ и҆ вѣ̑рнымъ лю́демъ грѣхѡ́въ ѡ҆ставле́нїе, ꙳ всѣ̑мъ притека́ющымъ къ ра́цѣ моще́й твои́хъ, ꙳ за ны̀, ст҃и́телю, молѧ́сѧ.
Сті́хъ: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.
Прпⷣбне ѻ҆́ч҃е бг҃омꙋ́дре, ꙳ ты̀ и҆́стиннѡ ꙗ҆ви́лсѧ є҆сѝ ꙳ прельщє́ннаѧ сердца̀ наставлѧ́ѧ ꙳ на пꙋ́ть и҆́стинный. ꙳ ты̀ бы́лъ є҆сѝ ᲂу҆бо́гихъ и҆ вдѡ́въ защи́тникъ, ꙳ вельмѡ́жъ тве́рдое наказа́нїе: ꙳ и҆ всѣ̑мъ вѣ̑рнымъ, ꙳ притека́ющымъ ко пречⷭ҇тѣй бж҃їи мт҃ри, и҆спросѝ, ст҃е, грѣхѡ́въ ѡ҆ставле́нїе.
Сла́ва, гла́съ ѕ҃:
Всѧ́къ гра́дъ и҆ страна̀, сла́вномꙋ гра́дꙋ на́шемꙋ москвѣ̀ ра́дꙋйтесѧ, спра́зднꙋюще дне́сь: ди́вный бо вра́чь и҆ спаси́тель на́шъ вели́кїй пе́тръ, нбⷭ҇нагѡ врачевства̀ лѣчбы̑ предлага́етъ на́мъ, къ безмє́зднымъ лѣчба́мъ свои̑мъ всѧ̑ любе́знѡ созва̀, не хитростьмѝ человѣ́ческими, ни ѡ҆бвѧза́ньми, но дѣ́йствомъ ст҃а́гѡ дх҃а дꙋше́вное и҆ тѣле́сное и҆сцѣле́нїе преесте́ственное подава́ѧ. є҆́же прїе́млюще ѻ҆би́льнѣ, ро́дъ всѧ́къ и҆ во́зрастъ сла́вимъ хрⷭ҇та̀ бг҃а, подаю́щаго, ра́ди ᲂу҆го́дника своегѡ̀, того̀ воспѣва́ющымъ ве́лїю ми́лость.
И҆ ны́нѣ, гла́съ то́йже:
Волхва̀ валаа́ма проречє́нїѧ и҆сполне́нїе прїе́млютъ: пе́рсскими бо зна́мєнїи ѡ҆блїѧ́ни бы́вше, ѕвѣзды̀ неѻбы́чныѧ сїѧ́нїемъ, незаходи́магѡ сл҃нца хрⷭ҇та̀, ѡ҆сїѧ́ни бы́вше, въ виѳлее́мѣ воплоще́ннаго бг҃а цр҃ѧ̀, и҆ во́льнаго мертвеца̀ дармѝ назна́менꙋютъ.
Славосло́вїе вели́кое. По трист҃о́мъ тропа́рь ст҃а́гѡ. Сла́ва, и҆ ны́нѣ, предпра́зднства. Є҆ктєнїѝ, и҆ ѿпꙋ́стъ, и҆ ча́съ а҃. На часѣ́хъ тропа́рь предпра́зднства, и҆ ст҃а́гѡ. По трист҃о́мъ конда́къ предпра́зднства, и҆ ст҃а́гѡ, глаго́лемъ премѣнѧ́юще.
На лїтꙋргі́и бл҃жє́нна, ѿ канѡ́на предпра́зднства, пѣ́снь г҃: и҆ ст҃а́гѡ пѣ́снь ѕ҃. По вхо́дѣ тропа́рь предпра́зднства, и҆ ст҃а́гѡ: Сла́ва, конда́къ ст҃а́гѡ: И҆ ны́нѣ, предпра́зднства. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы: А҆пⷭ҇лъ ко є҆вре́ємъ, зача́ло ти҃і. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ. Сті́хъ: Зако́нъ бг҃а є҆гѡ̀: Є҆ѵⷢ҇лїе ѿ лꙋкѝ, зача́ло к҃д. Прича́стенъ: Въ па́мѧть вѣ́чнꙋю:
[Зрѝ] Подоба́етъ вѣ́дати: а҆́ще слꙋчи́тсѧ петра̀ митрополі́та въ недѣ́лю предъ ржⷭ҇тво́мъ хрⷭ҇то́вымъ ст҃ы́хъ ѻ҆ц҃ъ:
На ма́лѣй вече́рни на Гдⷭ҇и, воззва́хъ: стїхи̑ры воскрⷭ҇ны на д҃. Сла́ва, петрꙋ̀, гла́съ ѕ҃, самогла́сенъ: Бжⷭ҇твеннаѧ бл҃года́ть: И҆ ны́нѣ, предпра́зднства, гла́съ то́йже: По́йте гдⷭ҇еви: На стїхо́внѣ стїхи́ра воскрⷭ҇на є҆ди́на: и҆ ст҃а́гѡ стїхо́вна вели́кїѧ вече́рни, со стїхи̑ є҆ѧ̀. Сла́ва, ст҃а́гѡ, гла́съ и҃: Прїиди́те всѝ вѣ́рнїи: пи́санъ на вели́цѣй вече́рни, на стїхо́внѣ. И҆ ны́нѣ, предпра́зднства, гла́съ то́йже: Воспрїимѝ, виѳлее́ме, бж҃їю митропо́лїю: По трист҃о́мъ тропа́рь воскрⷭ҇нъ, и҆ ѻ҆ц҃є́въ. Сла́ва, ст҃а́гѡ: И҆ ны́нѣ, предпра́зднства. Та́же є҆ктенїа̀ ма́лаѧ, и҆ ѿпꙋ́стъ.
На вели́цѣй вече́рни на Гдⷭ҇и, воззва́хъ: стїхи̑ры воскрⷭ҇ны г҃, и҆ ѻ҆ц҃є́въ г҃. Подо́бенъ: Всѐ ѿло́жше: Сті́хъ а҃: Ꙗ҆ви́сѧ мі́ра концє́мъ: Сті́хъ в҃: Сла́вою ᲂу҆краша́ютсѧ: Сті́хъ г҃: Ѡ҆блиста̀ ве́селѡ. И҆ петрꙋ̀ со Сла́внымъ д҃, гла́съ в҃, подо́бенъ: Кі́ими похва́льными: Сла́ва, ѻ҆ц҃є́въ, гла́съ ѕ҃: Данїи́лъ, мꙋ́жъ жела́нїй: И҆ ны́нѣ, предпра́зднства, гла́съ то́йже: Верте́пе, благоꙋкраси́сѧ: Та́же вхо́дъ. Прокі́менъ днѐ. И҆ чтє́нїѧ ѻ҆ц҃є́въ г҃: ст҃а́гѡ г҃. На лїті́и стїхи̑ры предпра́зднства, ѻ҆те́ческїѧ недѣ́ли рѧдовы̑ѧ, гла́съ ѕ҃, подо́бенъ: Всѐ ѿло́жше: Сті́хъ а҃: Незаходи́мое со́лнце И҆ ст҃а́гѡ самогла́сны: И҆ ѻ҆ц҃є́въ гла́съ а҃: Лꙋча́ми ѡ҆блиста́вшесѧ. Сла́ва, ѻ҆ц҃є́въ, гла́съ г҃: Пра̑ѻц҃ъ собо́ръ: И҆ ны́нѣ, предпра́зднства, гла́съ то́йже: Благоꙋкраси́сѧ, виѳлее́ме: На стїхо́внѣ стїхи̑ры воскрⷭ҇ны: Сла́ва, ѻ҆ц҃є́въ, гла́съ в҃. Ра́дꙋйтесѧ прⷪ҇ро́цы: И҆ ны́нѣ, предпра́зднства, гла́съ то́йже: Сѐ вре́мѧ прибли́жисѧ: На благослове́нїи хлѣ́бѡвъ тропа́рь, Бцⷣе дв҃о: є҆ди́ножды: и҆ ѻ҆ц҃є́въ тропа́рь є҆ди́ножды, и҆ ст҃а́гѡ тропа́рь є҆ди́ножды. И҆ чте́нїе.
На ᲂу҆́трени, на Бг҃ъ гдⷭ҇ь: тропа́рь воскре́сенъ є҆ди́ножды, и҆ ѻ҆ц҃є́въ, є҆ди́ножды, Сла́ва, ст҃а́гѡ: И҆ ны́нѣ, предпра́зднства. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ. И҆ чте́нїе во є҆ѵⷢ҇лїи толково́мъ: Кни́га родства̀ і҆и҃са хрⷭ҇та̀: Полѷеле́й, и҆ тропарѝ, А҆́гг҃льскїй собо́ръ: и҆ сѣда́льны ст҃а́гѡ всѝ по є҆ди́нощи, Сла́ва, и҆ ны́нѣ, предпра́зднства, и҆ чте́нїе. Степє́нна гла́са. Прокі́менъ, и҆ Всѧ́кое дыха́нїе: Є҆ѵⷢ҇лїе воскре́сно. И҆ Воскрⷭ҇нїе хрⷭ҇то́во: По н҃-мъ ѱалмѣ̀ стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ петрꙋ̀ на д҃: и҆ ѻ҆ц҃є́въ на ѕ҃. Катава́сїа: Хрⷭ҇то́съ ражда́етсѧ: По г҃-й пѣ́сни конда́къ ст҃о́мꙋ и҆ і҆́косъ: ѵ҆пакоѝ ѻ҆ц҃є́въ, и҆ сѣда́ленъ ст҃а́гѡ два́жды: Сла́ва, и҆ ны́нѣ, предпра́зднства. По ѕ҃-й пѣ́сни конда́къ ѻ҆ц҃є́въ, и҆ і҆́косъ: и҆ чте́нїе. На ѳ҃-й пѣ́сни пое́мъ Честнѣ́йшꙋю: Свѣти́ленъ воскрⷭ҇нъ, и҆ ѻ҆ц҃є́въ: Сла́ва, ст҃а́гѡ, И҆ ны́нѣ, предпра́зднства. На хвали́техъ стїхи̑ры воскрⷭ҇ны г҃, и҆ ѻ҆ц҃є́въ в҃, и҆ ст҃а́гѡ со Сла́внымъ г҃, со стїхи̑ є҆гѡ̀: И҆лѝ ѡ҆ставлѧ́ютсѧ стїхи̑ры воскрⷭ҇ны, и҆ пое́мъ ѻ҆ц҃є́въ на д҃, и҆ ст҃а́гѡ на д҃, Сла́ва, ѻ҆ц҃є́въ, И҆ ны́нѣ, бг҃оро́диченъ: Пребл҃гослове́нна є҆сѝ, бцⷣе: Славосло́вїе вели́кое. Тропа́рь воскрⷭ҇нъ то́чїю, и҆ є҆ктєнїѝ, и҆ ѿпꙋ́стъ. Посе́мъ, Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃, и҆ коне́чный ѿпꙋ́стъ. На а҃-мъ часѣ̀ тропа́рь воскрⷭ҇нъ, Сла́ва, ѻ҆ц҃є́въ, И҆ ны́нѣ, бг҃оро́диченъ часѡ́въ. По трист҃о́мъ, конда́къ ѻ҆ц҃є́въ. На г҃-мъ часѣ̀ тропа́рь воскрⷭ҇нъ, Сла́ва, ст҃а́гѡ, И҆ ны́нѣ, бг҃оро́диченъ часѡ́въ. По трист҃о́мъ, конда́къ ст҃а́гѡ. На про́чихъ же часѣ́хъ тропарѝ и҆ кондакѝ ѻ҆ц҃є́въ, и҆ ст҃а́гѡ премѣнѧ́юще глаго́лемъ: воскрⷭ҇нъ же тропа́рь на всѣ́хъ часѣ́хъ глаго́лемъ въ нача́лѣ непремѣ́ннѡ.
На лїтꙋргі́и: бл҃жє́нна гла́са на д҃, и҆ ѻ҆ц҃є́въ, пѣ́снь г҃-ѧ на д҃, и҆ ст҃а́гѡ пѣ́снь ѕ҃-ѧ на д҃. По вхо́дѣ тропа́рь воскрⷭ҇нъ, и҆ ѻ҆ц҃є́въ, и҆ предпра́зднства, и҆ ст҃а́гѡ. Та́же конда́къ ѻ҆ц҃є́въ, Сла́ва, ст҃а́гѡ: И҆ ны́нѣ, предпра́зднства. Прокі́менъ, А҆пⷭ҇лъ, А҆ллилꙋ́їа и҆ Є҆ѵⷢ҇лїе ѻ҆ц҃є́въ, и҆ ст҃а́гѡ. Прича́стенъ: Хвали́те: Дрꙋгі́й: Ра́дꙋйтесѧ, пра́веднїи: