Мѣ́сѧца тогѡ́же въ к҃г-й де́нь. Предпра́зднство ржⷭ҇тва̀ хрⷭ҇то́ва:
И҆ ст҃ы́хъ десѧтѝ мꙋ́чєникъ, и҆̀же въ кри́тѣ.
Ве́черъ, на Гдⷭ҇и, воззва́хъ, стїхи̑ры предпра́зднства г҃, и҆ ст҃ы́хъ г҃.
Предпра́зднства стїхи̑ры, гла́съ д҃. Подо́бенъ: Ꙗ҆́кѡ до́блѧ:
Предпра́зднствєнныѧ пѣ̑сни, ꙳ мы́сли пра́востїю, ꙳ хрⷭ҇то́ва ржⷭ҇тва̀ предвозгласи́мъ: ꙳ ѻ҆ц҃ꙋ́ бо и҆ дх҃ꙋ сы́й равноче́стенъ, ꙳ за милосе́рдїе въ на́ше ѡ҆дѣ́ѧвсѧ смѣше́нїе, ꙳ и҆́мать роди́тисѧ, ꙳ въ виѳлее́мѣ гра́дѣ: ꙳ є҆гѡ́же ржⷭ҇тво̀ несказа́нное ꙳ па́стырїе со а҆́гг҃лы воспѣ́ша.
Въ кѷмва́лѣхъ возгласи́мъ, ꙳ въ пѣ́снехъ воскли́кнемъ: ꙳ хрⷭ҇то́во ꙗ҆вле́нїе показа́сѧ: ꙳ проро́чєскаѧ проповѣ̑данїѧ коне́цъ прїѧ́ша: ꙳ є҆гѡ́же бо прореко́ша, ꙳ пло́тїю человѣ́кѡмъ ꙗ҆ви́тисѧ, ꙳ ражда́етсѧ во ст҃ѣ́мъ верте́пѣ, ꙳ и҆ въ ꙗ҆́слехъ возлега́етъ, ꙗ҆́кѡ ѻ҆троча̀, ꙳ и҆ пелена́ми повива́етсѧ, ꙗ҆́кѡ млⷣнецъ.
Виѳлее́ме, ᲂу҆гото́висѧ, ꙳ є҆де́ме, ны́нѣ ѿве́рзисѧ: ꙳ роди́ти всест҃а́ѧ и҆́детъ, ꙳ нб҃са̀ да веселѧ́тсѧ, ꙳ да и҆гра́ютъ человѣ́цы: ꙳ въ ꙗ҆́слехъ жи́знь, въ верте́пѣ бога́тый, ꙳ прихо́дитъ мно́жества ра́ди ми́лости, ꙳ нищетꙋ̀ а҆да́мовꙋ воспрїи́мъ, ꙳ кромѣ̀ преложе́нїѧ и҆ смѣше́нїѧ.
И҆́ны стїхи̑ры ст҃ы́хъ мꙋ́ченикѡвъ, гла́съ и҆ подо́бенъ то́йже:
Десѧти́це бг҃озва́ннаѧ, ꙳ и҆ свѣща̀ десѧтосвѣ́тлаѧ, ꙳ бжⷭ҇твенными сїѧ̑нїи ѡ҆зарѧ́ющи цр҃ко́вное и҆сполне́нїе, ꙳ столпѝ непоколе́бленнїи, ꙳ ѕвѣ́зды свѣ̑тлыѧ, ꙳ и҆̀же зе́млю ѡ҆небеси́вше ꙳ свѣтлостьмѝ велича́йшихъ подвигѡ́въ, ꙳ похвала́ми свѧще́нными ꙳ велегла́снѡ да восхва́лѧтсѧ дне́сь.
Да похва́литсѧ ѳеодꙋ́лъ, ꙳ зо́тїкъ же и҆ помпі́й. ꙳ васїлі́дъ, є҆ѵпо́ръ, а҆гаѳо́пꙋсъ же и҆ саторні́нъ, ꙳ гела́сїй же, и҆ бжⷭ҇твенный є҆ѵа́рестъ, ꙳ съ ни́миже и҆ є҆ѵнїкїа́нъ ꙳ ны́нѣ да почти́тсѧ пѣ́сньми, ꙳ всеблаготи̑шнаѧ сꙋ́щымъ въ бꙋ́ри приста̑нища, ꙳ и҆̀же пре́лесть ѡ҆бличи́вше ꙳ и҆ вѣне́цъ побѣди́тельный прїе́мше.
Кри̑тскаѧ прозѧбє́нїѧ, ꙳ цр҃кѡ́внаѧ ᲂу҆тверждє́нїѧ, ꙳ и҆ вѣ́рныхъ неꙋвѧда́ємаѧ ᲂу҆крашє́нїѧ, ꙳ ра́йстїи сладкодохнове́ннїи цвѣ́ти честні́и, благопрїѧ̑тнаѧ хрⷭ҇тѡ́ва ꙳ и҆ кра̑снаѧ заколє́нїѧ, ꙳ и҆ возложє́нїѧ небе́снагѡ хра́ма, ꙳ десѧти́цꙋ трⷪ҇цы свѧтꙋ́ю, ꙳ страстоте́рпцєвъ почти́мъ.
Сла́ва, гла́съ г҃:
Предпра́зднственный дне́сь мч҃никѡвъ наста̀ пра́здникъ: ржⷭ҇твенный на́мъ предподписꙋ́ющь де́нь, ѿ сл҃нца сл҃нце, ѿ дв҃ы бг҃а ꙗ҆́вльшасѧ пло́тїю проповѣ́дающъ, десѧти́ца мꙋ́ченикѡвъ въ кри́тѣ крѣ́пкѡ пострада́вшаѧ, вѣнцы̀ побѣ́ды ѿ нб҃сѐ прїѧ́ша. къ ни́мже возопїи́мъ: ли́че свѧтоизбра́нный, моли́те хрⷭ҇та̀, ст҃і́и мч҃ницы, ѡ҆ вѣ́рою соверша́ющихъ всечестнꙋ́ю па́мѧть ва́шꙋ.
И҆ ны́нѣ, гла́съ то́йже:
Благоꙋкраси́сѧ, виѳлее́ме, ѿве́рзесѧ бо є҆де́мъ: гото́висѧ, є҆ѵфра́ѳо, ѡ҆бновлѧ́етсѧ бо а҆да́мъ и҆ є҆́ѵа съ ни́мъ: клѧ́тва бо разори́сѧ, спасе́нїе мі́рꙋ процвѣтѐ, и҆ дꙋ́шы пра́ведныхъ ᲂу҆краша́ютсѧ: ꙗ҆́кѡ да́ръ дароно́сїѧ, вмѣ́стѡ мѵ́ра пѣ́нїе приносѧ́ще, спасе́нїе дꙋше́вное, и҆ нетлѣ́нїе прїе́млюще. се́ бо, въ ꙗ҆́слехъ возлежа́й, предповелѣва́етъ пѣснопѣ́нїе дх҃о́вное соверша́ти вопїю́щымъ непреста́ннѡ: гдⷭ҇и, сла́ва тебѣ̀.
На стїхо́внѣ стїхи̑ры, гла́съ ѕ҃. Подо́бенъ: Тридне́венъ:
Безмѣ́рнаѧ мꙋ́дрость бж҃їѧ, до́мъ себѣ̀ па́че ᲂу҆ма̀ ѿ дв҃ы созда̀ хрⷭ҇то́съ, и҆ хо́щетъ въ верте́пѣ и҆ ꙗ҆́слехъ безслове́сныхъ пло́тїю роди́тисѧ па́че смы́сла.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Ꙗ҆ви́лсѧ є҆сѝ прⷪ҇ро́кѡмъ, хрⷭ҇тѐ, ꙗ҆́кѡ мо́щно бѣ̀ ви́дѣти тѧ̀ зижди́телѧ: въ послѣ́днихъ же времена́хъ всѣ̑мъ показа́лсѧ є҆сѝ человѣ́кѡмъ, во гра́дѣ виѳлее́мѣ, чл҃вѣ́къ бы́въ.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Ѡ҆бтечѐ возвѣща́ющи ѕвѣзда̀ сл҃нце пра́вды хрⷭ҇та̀ ѕвѣздосло́вцємъ, во гра́дѣ виѳлее́мѣ, и҆ а҆́гг҃ли па́стырємъ ны́нѣ благовѣствꙋ́ютъ, съ ни́миже потеце́мъ, бг҃омꙋ́дрїи.
Сла́ва, гла́съ в҃:
Кри́тъ предпра́зднствꙋетъ дне́сь ржⷭ҇тво̀ хрⷭ҇то́во, въ па́мѧти страстоте́рпцєвъ. тѣ́мже моли́твами и҆́хъ, гдⷭ҇и, спасѝ дꙋ́шы на́шѧ.
И҆ ны́нѣ, гла́съ то́йже:
Сѐ вре́мѧ прибли́жисѧ спасе́нїѧ на́шегѡ, гото́висѧ, верте́пе, дв҃а приближа́етсѧ роди́ти: виѳлее́ме, землѐ і҆ꙋ́дова, красꙋ́йсѧ и҆ весели́сѧ, ꙗ҆́кѡ и҆зъ тебє̀ возсїѧ̀ гдⷭ҇ь на́шъ. ᲂу҆слы́шите го́ры и҆ хо́лми, и҆ ѻ҆крє́стныѧ страны̑ і҆ꙋдє́йскїѧ, ꙗ҆́кѡ грѧде́тъ хрⷭ҇то́съ: да спасе́тъ, є҆го́же созда̀, человѣ́ка, ꙗ҆́кѡ чл҃вѣколю́бецъ.
Тропа́рь мꙋ́ченикѡвъ, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀, бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Сла́ва, и҆ ны́нѣ, предпра́зднства:
Гото́висѧ, виѳлее́ме, ѿве́рзисѧ всѣ́мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бжⷭ҇твенный са́дъ: ѿ негѡ́же ꙗ҆́дше, жи́ви бꙋ́демъ, не ꙗ҆́коже а҆да́мъ ᲂу҆́мремъ. хрⷭ҇то́съ ражда́етсѧ, пре́жде па́дшїй возста́вити ѻ҆́бразъ.
На повече́рїи трипѣ́снецъ, є҆гѡ́же краегране́сїе: Предсꙋббѡ́тїе же.
І҆рмо́съ по два́жды, тропарѝ на ѕ҃: послѣди́ же і҆рмо́съ ѻ҆́ба ли̑ка вкꙋ́пѣ.
Гла́съ ѕ҃. Пѣ́снь а҃. І҆рмо́съ:
Къ тебѣ̀ ᲂу҆́тренюю, бл҃гоꙋтро́бїѧ ра́ди, себѐ и҆стощи́вшемꙋ непрело́жнѡ, и҆ зра́къ раба̀ ѿ дв҃ы носи́вшемꙋ, сло́ве бж҃їй: ми́ръ пода́ждь мѝ па́дшемꙋ, чл҃вѣколю́бче.
Ѡ҆мы́вше смы́слы, и҆ пред̾ѡчи́стившесѧ та́йны причаще́нїемъ стра́шнагѡ смотре́нїѧ: тѣ́ломъ и҆ дꙋше́ю къ виѳлее́мꙋ гра́дꙋ взы́демъ, влⷣкꙋ ви́дѣти ражда́ющасѧ.
Зри́те, дрꙋ́зи, и҆ не бо́йтесѧ, безꙋ́мный бо и҆́рѡдъ всꙋ́е шата́етсѧ, зижди́телѧ ᲂу҆би́ти ро́ждшагосѧ: но то́й, ꙗ҆́кѡ жи́знь и҆ сме́рть содержа́й, живе́тъ и҆ спаса́етъ мі́ръ, ꙗ҆́кѡ чл҃вѣколю́бецъ.
Пѣ́снь и҃. І҆рмо́съ:
Сто́лпъ ѕло́бы противобо́жныѧ ѻ҆́троцы бжⷭ҇твеннїи ѡ҆бличи́ша: на хрⷭ҇та́ же шата́ѧсѧ и҆́рѡдъ свирѣ́пѣетъ, совѣ́тꙋетъ тщє́тнаѧ, ᲂу҆би́ти поꙋчава́етсѧ живота̀ держа́щаго дла́нїю: є҆го́же всѧ̀ тва́рь благослови́тъ, сла́вѧщи во вѣ́ки.
Ѿ вѣ́ждей лѣ́ности со́нъ всѝ вѣ́рнїи ѿтрѧсе́мъ, въ моли́твѣ же побди́мъ, и҆скꙋшє́нїѧ ѿража́юще, ꙗ҆̀же ѿ лꙋка́вагѡ, и҆ съ па́стырьми зри́телїе сла́вы ꙗ҆ви́мсѧ хрⷭ҇та̀ ро́ждшагѡсѧ: є҆го́же всѧ̀ тва́рь благослови́тъ, сла́вѧщи во вѣ́ки.
Глꙋбинꙋ̀ премꙋ́дрости и҆ ра́зꙋма зижди́телева кто̀ и҆спыта́етъ человѣ́кѡвъ; бж҃їихъ сꙋдє́бъ бе́зднꙋ кто̀ (с. 423) премꙋ́дръ пости́гнетъ; и҆́хже ра́ди нб҃са̀ преклони́въ, съ человѣ̑ки плотоно́сецъ поживѐ: є҆го́же всѧ̀ тва́рь благослови́тъ, сла́вѧще во вѣ́ки.
Скве́рнꙋ сло́вꙋ ѿ ᲂу҆сте́нъ и҆зы́ти вѣ́рнїи возбрани́мъ: поꙋчи́вшесѧ же, словеса̀ бжⷭ҇твєннаѧ хрⷭ҇тꙋ̀ ны́нѣ принесе́мъ, разрѣ́шшемꙋ ны̀ безслове́сїѧ, въ безслове́сныхъ лежа́щемꙋ ꙗ҆́слехъ: є҆го́же всѧ̀ тва́рь благослови́тъ, сла́вѧще во вѣ́ки.
Ѿрица́тисѧ плотски́хъ страсте́й и҆ мі́ра кра́сныхъ потщи́мсѧ, дꙋхо́вныхъ же держи́мсѧ попече́нїй, бг҃омꙋ́дрїи, досто́йны себѐ самы́ѧ ражда́ющемꙋсѧ представлѧ́юще ѿ дѣ́лъ влⷣцѣ: є҆го́же всѧ̀ тва́рь благослови́тъ, сла́вѧще во вѣ́ки.
Пѣ́снь ѳ҃. І҆рмо́съ:
Честнѣ́йшꙋю херꙋві̑мъ, и҆ сла́внѣйшꙋю безъ сравне́нїѧ серафі̑мъ, безъ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Па́гꙋбное велѣ́нїе вражде́бнагѡ, смꙋща́ющагѡ ржⷭ҇тво̀ і҆и҃сово, младе́нцєвъ неѕло́бивыхъ содѣ́ла ᲂу҆бі́йство: мы́ же ро́ждшагосѧ вѣ́рою почти́мъ.
Зако́ны є҆сте́ствєнныѧ преѡби́дѧ, и҆ завѣ́ты бжⷭ҇твєнныѧ ѿме́ща и҆́рѡдъ лю́тый, ма́тєри беззако́ннѡ ѡ҆безча́дстви, и҆ младе́нцы ᲂу҆бѝ неви́ннѡ за всѣ́хъ жи́знь.
Ꙗ҆зы́кѡмъ ѿве́рзесѧ є҆де́мскаѧ две́рь, ражда́ющꙋсѧ въ верте́пѣ и҆зба́вителю: и҆сто́чникъ же безсме́ртїѧ жа́ждꙋщымъ и҆сточа́етъ гдⷭ҇ь сла́вы, є҆го́же велича́емъ.
Ѡ҆крꙋжа́хꙋ ꙗ҆́кѡ прⷭ҇то́лъ херꙋві́мскїй, а҆́гг҃ли ꙗ҆́сли, верте́пъ бо нб҃о зрѧ́хꙋ, лежа́щꙋ въ не́мъ влⷣцѣ, и҆ сла́ва въ вы́шнихъ бг҃ꙋ, вопїѧ́хꙋ.
Та́же і҆рмо́съ. И҆ покло́нъ.
На ᲂу҆́трени, на Бг҃ъ гдⷭ҇ь: тропа́рь предпра́зднства два́жды. Сла́ва мꙋ́ченикѡвъ: И҆ ны́нѣ, предпра́зднства.
По а҃-й стїхоло́гїи сѣда́ленъ, гла́съ г҃. Поⷣ: Бжⷭ҇твенныѧ вѣ́ры.
Ра́дꙋетсѧ дне́сь цр҃ковь, пое́тъ, краси́тсѧ, (с. 424) предпра́зднствꙋетъ сп҃сово вои́стиннꙋ ржⷭ҇тво̀: всест҃о́е бо соверша́етсѧ торжество̀, и҆ въ гдⷭ҇ню сла́вꙋ ѡ҆блачи́тсѧ. всѝ воззове́мъ хрⷭ҇тꙋ̀ бг҃ꙋ: чл҃вѣколю́бче, поми́лꙋй ны̀, пою́щыѧ тѧ̀.
Сла́ва, и҆ ны́нѣ, то́йже:
По в҃-й стїхоло́гїи сѣда́ленъ, гла́съ и҃. Подо́бенъ: Премꙋ́дрости:
И҆зъ нѣ́дръ ѻ҆ч҃ескихъ соше́лъ є҆сѝ, и҆ несказа́ннымъ и҆стоща́нїемъ, ю҆́же по на́мъ нищетꙋ̀ воспрїѧ́лъ є҆сѝ, па́че є҆стества̀, чл҃вѣколю́бче, въ верте́пъ всели́тисѧ бл҃говоли́лъ є҆сѝ, гдⷭ҇и, и҆ ꙗ҆́кѡ млⷣнецъ сѡсцы̀ пита́ешисѧ зижди́тель и҆ гдⷭ҇и. тѣ́мже ѕвѣздо́ю наставлѧ́еми волсвѝ, да́ры тебѣ̀ прино́сѧтъ, ꙗ҆́кѡ влⷣцѣ тва́ри: па́стырїе и҆ а҆́гг҃ли дивлѧ́хꙋсѧ зовꙋ́ще: сла́ва въ вы́шнихъ бг҃ꙋ, на зе́млю грѧдꙋ́щемꙋ роди́тисѧ, ꙗ҆́кѡ чл҃вѣ́кꙋ.
Сла́ва, и҆ ны́нѣ, то́йже.
Канѡ́нъ предпра́зднства со і҆рмосо́мъ на и҃: и҆ ст҃ы́хъ на ѕ҃.
Канѡ́нъ предпра́зднства, є҆гѡ́же краегране́сїе по а҆лфави́тꙋ. І҆ѡ́сифъ.
Гла́съ ѕ҃. Пѣ́снь а҃. І҆рмо́съ:
Волно́ю морско́ю скры́вшаго дре́вле, гони́телѧ, мꙋчи́телѧ, въ ꙗ҆́слехъ сокрыва́емаго ᲂу҆би́ти и҆́щетъ и҆́рѡдъ: но мы̀ съ волхвы̑ пои́мъ: гдⷭ҇еви воспои́мъ, сла́внѡ бо просла́висѧ.
Кнѧ́зь и҆зъ і҆ꙋ́ды ѡ҆скꙋдѣ̀ ᲂу҆жѐ: є҆мꙋ́же бо завѣща́сѧ, ꙗ҆́коже предписа́сѧ, ꙗ҆зы́кѡвъ ча́ѧнїе і҆и҃съ хрⷭ҇то́съ прїи́де, и҆ въ верте́пѣ ражда́етсѧ кра́йнїи ра́ди бл҃гости.
Виѳлее́ме, весели́сѧ ра́достїю: въ тебѣ́ бо ражда́етсѧ хрⷭ҇то́съ гдⷭ҇ь. вселе́ннаѧ да и҆гра́етъ, прїе́млющи и҆збавле́нїе: да ликꙋ́етъ всѧ̀ тва́рь пра́зднꙋющи.
Ро́дъ человѣ́ческїй хотѧ̀ спастѝ, пребл҃гі́й, во ᲂу҆тро́бꙋ всели́сѧ неискꙋсобра́чныѧ дв҃ы: и҆ сѐ роди́тисѧ грѧде́тъ. томꙋ̀ поклони́мсѧ: сла́внѡ бо просла́висѧ.
И҆́нъ канѡ́нъ ст҃ы́хъ, є҆гѡ́же краегране́сїе въ бг҃оро́дичнахъ. Геѡ́ргїа.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Пресвѣ̑тлыѧ дне́сь лꙋчи̑ возсїѧ́ша, ᲂу҆́мнаго возвѣща́ющыѧ сл҃нца всѣ̑мъ тогѡ̀ въ мі́рѣ во пло́ти ѡ҆сїѧ́нїе и҆ ꙗ҆вле́нїе.
Дꙋхо́внꙋю дне́сь предпра́зднственнꙋю страстоно́сцы трапе́зꙋ всѣ̑мъ предложи́ша, та́инственнѡ пита́ющꙋю ны̀ блиста́ньми ражда́ющагѡсѧ хрⷭ҇та̀.
Ꙗ҆́кѡ свѣ̑тлыѧ возсїѧ́вше ѕвѣ́зды ст҃і́и, ᲂу҆́мномꙋ послѣ́довасте сла́вы сл҃нцꙋ, во вре́мѧ подвигѡ́въ: и҆ сегѡ̀ ны́нѣ полꙋчи́вше, просвѣти́стесѧ.
Ѡ҆полчє́нїѧ вра̑жїѧ разори́ша є҆динодꙋ́шствовавше мꙋ́чєницы, и҆ побѣди́тєльнаѧ ѿ ро́ждшагѡсѧ въ верте́пѣ хрⷭ҇та̀ неизглаго́ланнѡ воспрїѧ́ша.
Бг҃оро́диченъ:
Ро́дъ человѣ́ческїй хвалꙋ̀ тебѣ̀ предпра́зднственнꙋю прино́ситъ, бг҃оневѣ́стнаѧ: ꙗ҆́кѡ ѻ҆́бщїѧ ра́дости хода́таѧ и҆ вино́вника сла́вѧтъ ро́ждшагосѧ и҆зъ тебє̀ чл҃вѣколю́бца.
Пѣ́снь г҃. І҆рмо́съ:
Тебѐ на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши въ верте́пѣ ражда́ющасѧ, ᲂу҆́жасомъ содрога́шесѧ, нѣ́сть свѧ́тъ, па́че тебє̀, гдⷭ҇и, зовꙋ́щи.
Въ ра́бїй ѡ҆блещи́сѧ ѻ҆́бразъ восхотѣ́лъ є҆сѝ, ꙗ҆́кѡ да рабо́ты мѧ̀ лꙋка́ваго и҆зба́виши, пѣсносло́влю твоѐ бл҃гоꙋтро́бїе, сло́ве, ѻ҆ц҃ꙋ̀ собезнача́льне и҆ соприсносꙋ́щне: сла́ва смотре́нїю твоемꙋ̀.
Грѧде́тъ дв҃а гдⷭ҇а роди́ти въ верте́пѣ, предвари́те, волсвѝ: па́стырїе ны́нѣ прїиди́те, пѣ́снь съ высоты̀ а҆́гг҃ли возопі́йте, ꙗ҆ви́сѧ человѣ́кѡмъ и҆збавле́нїе.
И҆ща́й мѧ̀ заблꙋ́ждшаго, чл҃вѣколю́бче, и҆ верте́пъ ꙗ҆́вльшасѧ разбо́йническїй дѣ́лы непло́дными, въ верте́пъ ны́нѣ прише́лъ є҆сѝ ѿ дв҃ы дне́сь роди́тисѧ, влⷣко: сла́ва, сло́ве, прише́ствїю твоемꙋ̀.
И҆́нъ. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ, пою́щихъ тѧ̀.
Пелена́ми пови́всѧ, пло́тїю ро́ждшеесѧ сло́во раздра̀ ри̑зы дре́внѧгѡ ѡ҆сꙋжде́нїѧ, и҆ на́съ въ нетлѣ́нїе ѡ҆блечѐ.
Со́нмъ, премꙋ́дрїи, безбо́жїѧ разори́сте, си́лою во пло́ти ꙗ҆́вльшагосѧ хрⷭ҇та̀ бг҃а, и҆ сегѡ̀ любвѝ свѧза́стесѧ.
Бг҃оро́диченъ:
Разрѣши́хомсѧ ᲂу҆́зъ ѡ҆сꙋжде́нїѧ, зижди́телю пелена́ми пови́вшꙋсѧ: и҆ ѻ҆де́ждею ѡ҆блеко́хомсѧ, бцⷣе, пе́рвыѧ красоты̀.
Конда́къ предпра́зднства, гла́съ г҃. Подо́бенъ: Дв҃а дне́сь.
Дв҃а дне́сь превѣ́чное сло́во въ верте́пѣ грѧде́тъ роди́ти неизрече́ннѡ: ликꙋ́й, вселе́ннаѧ, ᲂу҆слы́шавши, просла́ви со а҆́гг҃лы и҆ па́стырьми хотѧ́щаго ꙗ҆ви́тисѧ ѻ҆троча̀ мла́до, превѣ́чнаго бг҃а.
І҆́косъ:
Ѽ ᲂу҆жа́снагѡ вои́стиннꙋ и҆ па́че сло́ва чꙋдесѐ! є҆́же бы́ти даѧ́й всѣ̑мъ, ра́ди бл҃гости, во чре́во ст҃ы́ѧ дв҃ы вни́де, и҆ въ верте́пѣ роди́тисѧ грѧде́тъ, и҆ въ ꙗ҆́слехъ положи́тисѧ. ѕвѣзда́ же сего̀ проповѣ́дꙋетъ свы́ше волхвѡ́мъ, и҆дꙋ́щымъ на поклоне́нїе є҆гѡ̀ съ да̑ры, и҆здале́ча привлача́щи со тща́нїемъ послѣ́дꙋющыѧ валаа́ма прорече́нїю, ре́кшагѡ: ѕвѣзда̀ хо́щетъ провозвѣсти́ти ѻ҆троча̀ мла́до, превѣ́чнаго бг҃а.
Сѣда́ленъ ст҃ы́хъ, гла́съ а҃. Подо́бенъ: Гро́бъ тво́й, сп҃се:
Кри́тстїи свѣ́тлїи и҆ честні́и градоде́ржцы, страда́вше крѣ́пкѡ, побѣди́ша вѣ́рою ѕмі́ѧ ѕлонача́льнаго, и҆ зако́ннѣ вѣнча́ни бы́ша. си́хъ дне́сь достохва́льнꙋю па́мѧть пра́зднꙋемъ, велегла́снѡ всѣ́хъ сла́вѧще гдⷭ҇а.
Два́жды.
Сла́ва, и҆ ны́нѣ, предпра́зднства, гла́съ и҆ подо́бенъ то́йже:
Ра́дꙋйсѧ, сїѡ́не, виѳлее́ме, ᲂу҆краси́сѧ, всѣ́хъ содержи́тель ѕвѣздꙋ̀ предпосла́въ, возвѣстѝ своѐ безмѣ́рное схожде́нїе: є҆го́же бо трепе́щꙋтъ небє́сныѧ си̑лы, се́й ражда́етсѧ ѿ дв҃ы непревра́щнѡ, є҆ди́ный бг҃ъ на́шъ.
Пѣ́снь д҃. І҆рмо́съ:
Ѿ дв҃ы прише́ствїе твоѐ прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ ѿ ю҆́га, воплоща́ѧсѧ, прише́лъ є҆сѝ, и҆зба́вителю, а҆да́ма ѿринове́ннаго воззва́ти.
Свѣтоза́рный ѻ҆́блакъ грѧде́тъ, возсїѧ́ти хрⷭ҇та̀ и҆зъ мт҃рнихъ ложе́снъ, пра́вды сл҃нце, всю̀ зе́млю лꙋча́ми бжⷭ҇твенными просвѣща́ющаго.
Бг҃ъ человѣ́кѡмъ ꙗ҆ви́сѧ подо́бенъ, и҆ ѡ҆бнищава́етъ пло́тїю, да на́съ ѡ҆богати́тъ, и҆ въ верте́пѣ ражда́етсѧ: сего̀ вѣ́рнїи чи́стымъ се́рдцемъ под̾и́мемъ.
Сѐ хрⷭ҇то́съ во гра́дѣ ражда́етсѧ виѳлее́мѣ, ꙗ҆́кѡ да є҆де́мъ на́мъ ѿве́рзетъ, преслꙋша́нїемъ пе́рвѣе ѕмі́ѧ ѡ҆краде́нїѧ заключе́нный, бжⷭ҇твеннѡ торжествꙋ́имъ.
И҆́нъ. І҆рмо́съ:
Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ диви́хсѧ, и҆ возопи́хъ: сла́ва си́лѣ твое́й, гдⷭ҇и.
Нб҃са̀ да ра́дꙋютсѧ, землѧ̀ та́инственнагѡ да и҆спо́лнитсѧ весе́лїѧ: хрⷭ҇то́съ бо прїи́де ѡ҆бнови́ти всѧ́чєскаѧ.
Десѧти́ца провозвѣща́ющи страда́льцєвъ рожде́нїе зижди́телево, съ на́ми ликꙋ́етъ и҆ сра́дꙋетсѧ.
Хрⷭ҇то́во соше́ствїе къ нб҃сѝ возвы́си бжⷭ҇твеннѡ до́блествєнныѧ мꙋ́ченики страда́нїемъ.
Бг҃оро́диченъ:
Ꙗ҆́кѡ ѻ҆́бщꙋю ра́дость, ѽ бцⷣе! всѧ̀ тва́рь пѣ́сньми тѧ̀ почита́етъ, предпра́зднствꙋющи.
Пѣ́снь є҃. І҆рмо́съ:
Къ тебѣ̀ ᲂу҆́тренюю, бл҃гоꙋтро́бїѧ ра́ди, себѐ и҆стощи́вшемꙋ непрело́жнѡ, и҆ зра́къ раба̀ ѿ дв҃ы носи́вшемꙋ, сло́ве бж҃їй. ми́ръ пода́ждь мѝ па́дшемꙋ, чл҃вѣколю́бче.
Се́рдце всѧ́кое земноро́дныхъ да и҆гра́етъ, да весели́тсѧ тва́рь: гдⷭ҇ь ражда́етсѧ и҆зъ ѻ҆трокови́цы чⷭ҇тыѧ въ верте́пѣ виѳлее́мстѣмъ, и҆ волсвѝ томꙋ̀ прино́сѧтъ да́ры достѡ́йныѧ.
Лю́дїе дре́вле въ сѣ́ни сме́ртнѣй сѣдѧ́щїи, ᲂу҆́зрите свѣ́тъ ва́мъ возсїѧ́вшїй ѿ дв҃ы, и҆ мно́гагѡ дꙋшесла́достїѧ и҆спо́лнитесѧ, ѡ҆бнища́вшаго сло́ва велича́юще при́снѡ.
Въ ма́лѣмъ верте́пѣ грѧде́ши вмѣсти́тисѧ, невмѣ́стный є҆стество́мъ: ꙗ҆́кѡ да мѧ̀ ᲂу҆ма́лившагосѧ престꙋпле́нїемъ, возвели́чиши за ми́лость безмѣ́рнꙋю. покланѧ́юсѧ твоемꙋ̀ бл҃гоꙋтро́бїю, долготерпѣли́ве.
И҆́нъ. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Вѣ́рꙋ хрⷭ҇тꙋ̀, ꙗ҆́кѡ зла́то, и҆ пѣснопѣ́нїе, ꙗ҆́кѡ лїва́нъ прїѧ́тенъ, и҆ чи́стꙋю любо́вь, ꙗ҆́кѡ смѵ́рнꙋ принесе́мъ вѣ́рнїи, на́съ ра́ди роди́тисѧ пло́тїю благоволи́вшемꙋ.
Защище́нїе страда́льцєвъ, въ согла́сїе собра́вшесѧ дне́сь є҆ди́но хрⷭ҇то́во, врагѡ́въ многоѻбра̑зныѧ низложѝ кѡ́зни, и҆ побѣ́ды по́чєсти досто́йнѣ прїѧ́ша.
Во пло́ти хрⷭ҇то́во прише́ствїе, премꙋ́дрїи мꙋ́чєницы ᲂу҆вѣ́дѣвше ꙗ҆́вственнѡ, плотскꙋ́ю любо́вь ѿри́нꙋша. тѣ́мже за любо́вь є҆гѡ̀ и҆ пострада́ша.
Бг҃оро́диченъ:
И҆зба́вльшесѧ пре́лести, чⷭ҇таѧ, і҆́дѡльскїѧ, тебє̀ ра́ди позна́хомъ творца̀ и҆ є҆ди́наго сп҃са. тѣ́мъ въ тогѡ̀ рождествѣ̀, тѧ̀ любо́вїю почита́емъ, пречⷭ҇таѧ.
Пѣ́снь ѕ҃. І҆рмо́съ:
Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тли́ мѧ возведѝ.
Зако́нѡвъ тѧ̀ дв҃а плотски́хъ кромѣ̀, гдⷭ҇и, прихо́дитъ роди́ти въ верте́пѣ, и҆ во ꙗ҆́слехъ пло́тїю восклони́ти, ꙗ҆́кѡ млⷣнца.
Стра́нна мѧ̀ бы́вша ѿ бг҃а престꙋпле́ньми, пребжⷭ҇твенный, рожде́йсѧ ѿ ѻ҆трокови́цы неискꙋсобра́чныѧ, ми́лости ра́ди, граждани́на нбⷭ҇наго ꙗ҆влѧ́етъ.
Го́ры же и҆ хо́лмы и҆ ᲂу҆дѡ́лїѧ возвесели́тесѧ: гдⷭ҇ь бо пло́тїю ражда́етсѧ, ѡ҆бновлѧ́ѧй тва́рь, и҆стлѣ́вшꙋю лꙋка́выми престꙋпле́ньми.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Съ высоты̀ на́мъ возсїѧ́вшаѧ за неизрече́ннꙋю ми́лость восто́чнаѧ ѕвѣзда̀, возвѣща́ющаѧ привѣща́ше сꙋ́щымъ въ мі́рѣ ѡ҆заре́нїе.
Въ нощѝ житїѧ̀ свѣтѧ́ще въ пꙋчи́нѣ пре́лести ходѧ́щымъ, свѣ́томъ хрⷭ҇то́вымъ ᲂу҆пра́висте къ немꙋ̀ человѣ́ки, всесла́внїи.
И҆зъ глꙋбины̀ безбо́жїѧ возвлечѐ къ бг҃овѣ́дѣнїѧ высотѣ̀ мꙋ́ченики, за неизрече́ннꙋю ми́лость въ верте́пѣ рожде́йсѧ, ꙗ҆́кѡ чл҃вѣколю́бецъ.
Ро́ждшагосѧ и҆зъ тебє̀, бг҃оневѣ́сто, во пло́ти хрⷭ҇та̀ бг҃а, па́че смы́сла, бжⷭ҇твеннагѡ возрожде́нїѧ земноро́днїи, и҆ че́сти сподо́бихомсѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Денни́ца возсїѧ̀ мꙋ́ченикѡвъ честно́е страда́льчество пред̾ѡзарѧ́ющее на́мъ, въ верте́пѣ ражда́емаго: є҆го́же дв҃а безсѣ́меннѡ родѝ.
І҆́косъ:
Ѿ дв҃ы на́съ ра́ди рожде́ннаго въ верте́пѣ хрⷭ҇та̀ жизнода́вца, лю́бѧще ѻ҆рꙋ́жницы, по́лкъ воздвиго́ша свѣ́телъ на велїа́ра: и҆ побѣди́вше ꙗ҆́вственнѡ на зе́млю того̀ низверго́ша, безмѣ́рнѡ сего̀ дре́вле хва́лѧщасѧ. тѣ́мже свѣ́тѧтъ сꙋ́щымъ во тмѣ̀, ꙗ҆́кѡ свѣти̑ла сꙋ́ще мы́сленнагѡ сл҃нца: ѕвѣзда́ бо ᲂу҆́бѡ пре́жде волхвѡ́мъ предста̀, пꙋтеводѧ́щи въ виѳлее́мъ, гра́дъ і҆ꙋ́довъ, сі́и же на́мъ проповѣ́даютъ чрезъ мꙋ̑ки, є҆го́же дв҃а безсѣ́меннѡ родѝ.
Пѣ́снь з҃. І҆рмо́съ:
Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Ка́кѡ тѧ̀ малѣ́йшїй, сло́ве под̾и́метъ верте́пъ; нището́ю мно́гою нищетꙋ̀ а҆да́мовꙋ ѿе́мшаго, и҆ бога́тствомъ бжⷭ҇твенныѧ бл҃года́ти человѣ́ки ѡ҆богати́вшаго;
Глаго́лы стра̑нныѧ па́стырїе слы́шавше, потща́шасѧ виѳлее́мъ ви́дѣти, и҆ въ ꙗ҆́слехъ безслове́сныхъ, разрѣша́ющаго безслове́сїѧ всѧ̑ человѣ́ки, возлежа́щаго.
Оу҆сты́ же и҆ се́рдцемъ, пло́тїю приходѧ́щаго роди́тисѧ хрⷭ҇та̀, въ верте́пѣ ѿ дв҃ы ѻ҆трокови́цы, пѣсносло́вити потщи́мсѧ, и҆ вѣ́рнѡ поклони́мсѧ.
И҆́нъ. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Бога́тство своегѡ̀ неизрече́ннагѡ хрⷭ҇то́съ чл҃вѣколю́бїѧ, пло́тїю ѡ҆бнища́въ, показа̀: вочл҃вѣ́чивсѧ бо ѿве́рзе благи́хъ ѻ҆би́льство, немо́лчнѡ зовꙋ́щымъ: бл҃гослове́нъ є҆сѝ, бж҃е ѻ҆тє́цъ на́шихъ.
Бжⷭ҇твеннымъ хрⷭ҇то́вымъ благово́нїемъ мы́сленнѣ ᲂу҆слади́вшесѧ страстоно́сцы, возгнꙋша́шасѧ сла́дкихъ всѣ́хъ красо́тъ, и҆ страда́нїемъ семꙋ̀ послѣ́доваша, зовꙋ́ще: бл҃гослове́нъ є҆сѝ, бж҃е ѻ҆тє́цъ на́шихъ.
Же́ртва хрⷭ҇тꙋ̀ предпра́зднственнаѧ, мꙋ́дрїи, показа́вшесѧ, благоꙋха́нїе страда́нїѧ, ꙗ҆́кѡ мѵ́ро семꙋ̀ принесо́сте. тѣ́мже мѷроꙋха́нїемъ чꙋде́съ вы̀ просла́ви, вопїю́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Ви́дѣти чи́стыми мы́сли ѻ҆чесы̀ разꙋмѣва́емꙋю, въ верте́пѣ и҆зъ тебє̀, всечⷭ҇таѧ, пло́тїю ро́ждшагѡсѧ бг҃а на́шегѡ, сла́вꙋ и҆ свѣ́тлость бжⷭ҇твеннꙋю, твое́ю сподо́би ны̀ моли́твою, вѣ́рнѡ пѣсносло́вѧщыѧ тѧ̀.
Пѣ́снь и҃. І҆рмо́съ:
За зако́ны ѻ҆ч҃єскїѧ блаже́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Па́че сло́ва є҆ди́наго гдⷭ҇а воплоще́ннаго, ѻ҆трокови́це, и҆ ѡ҆бложе́ннаго человѣ́ческимъ подо́бїемъ, держа́щи рꙋка́ми, и҆ покланѧ́ющисѧ, и҆ лобыза́ющи мт҃рски, ча́до, глаго́лала є҆сѝ, сладча́йшее, ка́кѡ тѧ̀ си́це держꙋ̀, держа́щаго рꙋко́ю всю̀ тва́рь, и҆ ѿ рꙋкѝ рабо́ты сїю̀ свобожда́ющаго;
Пѣсносло́вити, бжⷭ҇твеннїи а҆́гг҃ли, на землѝ ро́ждшагосѧ ᲂу҆гото́витесѧ: волсвѝ да́ры, пꙋтеводи́ми ѕвѣздо́ю, принеси́те: па́стырїе, сего̀ потщи́тесѧ ви́дѣти, на мт҃рнихъ, ꙗ҆́коже млⷣнца, сѣдѧ́ща ѡ҆б̾ѧ́тїихъ, вопїю́ще: гдⷭ҇а по́йте дѣла̀, и҆ превозноси́те во всѧ̑ вѣ́ки.
Свѣ́та ѻ҆́блаче, неискꙋсобра́чнаѧ, ка́кѡ пелена́ми повива́еши, ѻ҆́блаки ѡ҆дѣва́ющаго нб҃са̀ неизглаго́ланнымъ ма́нїемъ; ка́кѡ въ безслове́сныхъ ꙗ҆́слехъ воскланѧ́еши, безслове́сїѧ человѣ́ки за безмѣ́рнꙋю ми́лость и҆збавлѧ́ющаго влⷣкꙋ; є҆мꙋ́же всѧ̀ покланѧ́етсѧ стра́хомъ тва́рь, пѣсносло́вѧщи во всѧ̑ вѣ́ки.
И҆́нъ. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Всѧ̀ тва́рь нача́тки гото́витъ тебѣ̀, хрⷭ҇тѐ, въ верте́пѣ ѿ чⷭ҇тыѧ дв҃ы и҆мꙋ́щꙋ роди́тисѧ: и҆ пое́тъ хвалꙋ̀ предпра́зднственнꙋю, тѧ̀ славосло́вѧщи є҆ди́наго бл҃годѣ́телѧ.
Рожде́нномꙋ на землѝ послѣ́дꙋюще хрⷭ҇тꙋ̀, страстоно́сцы, вѣ́рꙋ предводи́телѧ, ꙗ҆́коже ѕвѣздꙋ̀ свѣ́тлꙋю, и҆мꙋ́ще, ви́дѣша: и҆ принесо́ша да́ры семꙋ̀ бжⷭ҇твєнныѧ, мꙋче́нїемъ.
Си́лою хрⷭ҇то́вою ᲂу҆крѣплѧ́еми премꙋ́дрїи, наси́лованїе вра́жїе, страстоте́рпцы, побори́сте, и҆ сего̀ не́мощна показа́сте, пѣсносло́вѧще хрⷭ҇та̀ во вѣ́ки всѧ̑.
Бг҃оро́диченъ:
И҆́же въ нѣ́дрѣхъ ѻ҆́ч҃ихъ, на дла́нѣхъ мт҃рнихъ твои́хъ, бцⷣе, рожде́йсѧ въ верте́пѣ, почѝ: и҆ всѣ̑мъ вѣ́рнѡ пою́щымъ тѧ̀, на нб҃сѣ́хъ ѿверза́етъ црⷭ҇тво.
Пѣ́снь ѳ҃. І҆рмо́съ:
Не диви́сѧ ны́нѣ, ѽ мт҃и, ви́дѧщи ꙗ҆́кѡ млⷣнца, є҆го́же и҆зъ чре́ва пре́жде денни́цы родѝ ѻ҆ц҃ъ: возста́вити бо и҆ сопросла́вити человѣ́ческое па́дшее є҆стество̀ прїидо́хъ ꙗ҆́вственнѡ, вѣ́рою и҆ любо́вїю тѧ̀ велича́ющее.
Ра́дꙋйсѧ, прїѧ́телище, пречⷭ҇таѧ, ра́дости неизглаго́ланныѧ: се́ бо грѧде́ши роди́ти въ верте́пѣ неизрече́ннѡ влⷣкꙋ, хотѧ́щаго тва́рь всю̀, и҆стлѣ́вшꙋю престꙋпле́нїемъ пе́рвѣе, ѡ҆бнови́ти вои́стиннꙋ: сего̀ пѣсносло́вѧще вѣ́рою, тѧ̀ велича́емъ.
Дꙋ́шы пра́ведныхъ всѝ, и҆ подземна̑ѧ кꙋ́пнѡ ра́дꙋйтесѧ: се́ бо и҆збавле́нїе всѣ́хъ ꙗ҆ви́сѧ, во гра́дѣ виѳлее́мѣ ражда́ющеесѧ: ѕвѣзда́ же сего̀ возвѣща́етъ волхвѡ́мъ, и҆́щꙋщымъ благоче́стнѡ: є҆го́же и҆ ви́дѣвше въ верте́пѣ, ᲂу҆́жаса и҆спо́лнишасѧ.
Ꙗ҆́кѡ не́бо тѧ̀ и҆но́е воспѣва́емъ, дв҃о, пра́вды сл҃нце на́мъ и҆зъ ложе́снъ пречⷭ҇тыхъ хотѧ́щꙋю возсїѧ́ти ᲂу҆́треннее, просвѣща́ющее во тмѣ̀ сꙋ́щыѧ сме́рти и҆ тлѝ. тѣ́мже до́лжнѡ хвала́ми тѧ̀ велича́емъ.
И҆́нъ. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Цр҃ѧ̀ всѧ́ческихъ прише́ствїе бжⷭ҇твенное, во́инство страда́льцєвъ предте́кшее, все́й тва́ри весе́лїѧ трапе́зꙋ возвѣща́етъ, и҆ всѧ̑ прїе́млетъ вѣ̑рныѧ, своѧ̑ до́блєсти предложи́въ, ꙗ҆́коже снѣ̑ди.
Ꙗ҆́коже ѕвѣздꙋ̀ вѣ́рꙋ страстоте́рпцы гдⷭ҇ни зрѧ́ще, и҆ держа́ще тве́рдѡ, къ невече́рнемꙋ сл҃нцꙋ, тоѧ̀ ра́ди непреткнове́ннѡ ко хрⷭ҇тꙋ̀ наста́вистесѧ мꙋ́дрїи: и҆ крѡ́ви семꙋ̀ ꙗ҆́кѡ да́ры принесо́сте.
Ѿ нетлѣ́нныхъ ѕлачникѡ́въ, страстоно́сцы, цвѣ́ты поже́нше ра́зꙋма хрⷭ҇то́ва, благово́нїѧ є҆гѡ̀ напо́лнистесѧ, пострада́вше: и҆ мѵ̑ра благовѡ́ннѣйшаѧ томꙋ̀ мꙋче́нїемъ са́ми себѐ принесо́сте.
Бг҃оро́диченъ:
И҆злїѧ́сѧ бл҃года́ть, бцⷣе дв҃о, во всѣ́хъ родѣ́хъ земноро́дныхъ, и҆ чꙋде́съ твои́хъ бога́тство и҆стека́етъ ѻ҆би́льнѡ во свѣ́тлѣй ржⷭ҇тва̀ твоегѡ̀ ра́дости, и҆ богати́тъ вѣ́рою и҆ любо́вїю тѧ̀ сла́вѧщыѧ.
Свѣти́ленъ. Подо́бенъ: Со ᲂу҆ченики̑:
Съ ѳеодꙋ́ломъ вѣнча́емъ зѡ́тїка, а҆гаѳопо́да и҆ саторні́на, помпі́а, вкꙋ́пѣ є҆ѵнїкїа́на, сла́внаго васїлі́да, є҆ѵпо́ра же бжⷭ҇твеннаго, и҆ сла́внаго гела́сїа и҆ є҆ѵа́реста пѣ́сньми ра́достнѡ, ꙗ҆́кѡ да моли́твами тѣ́хъ и҆зба́вимсѧ прегрѣше́нїй, и҆ вѣнцы̀ прїи́мемъ ѿ хрⷭ҇та̀ сп҃си́телѧ.
Сла́ва, и҆ ны́нѣ, предпра́зднства. Подо́бенъ: Жєны̀ ᲂу҆слы́шите:
Та́инство сокрове́нное, а҆́гг҃лѡмъ несказа́нное, ѻ҆ц҃а̀ бл҃говоле́нїемъ, и҆ дх҃а содѣ́йствомъ, хо́щетъ соверши́тисѧ, потщи́мсѧ: сло́во бо безнача́льное нача́ло прїе́мь, ꙗ҆́кѡ чл҃вѣ́къ, ѿ дв҃ы ражда́етсѧ на спасе́нїе мі́ра.
На хвали́техъ стїхи̑ры, на д҃, гла́съ ѕ҃. Поⷣ: А҆́гг҃льскїѧ пред̾иди́те:
Пред̾ѡпредѣле́нное ѻ҆ц҃е́мъ пре́жде вѣ̑къ, ꙳ и҆ предпроповѣ́данное прⷪ҇рѡ́ки въ послѣ̑днѧѧ, ꙳ та́инство ꙗ҆ви́сѧ, ꙳ и҆ бг҃ъ вочеловѣ́чисѧ, ꙳ пло́ть прїе́мъ ѿ дв҃ы, ꙳ зи́ждетсѧ несозда́нный во́лею, сы́й быва́етъ, ꙳ цр҃ь і҆и҃левъ ꙳ хрⷭ҇то́съ прихо́дитъ.
Пою́ тѧ, цр҃ю̀, пелена́ми пови́таго, ꙳ рѣши́ши бо плени̑цы мои́хъ грѣхопаде́нїй, ꙳ и҆ сла́вою безсме́ртною ꙳ и҆ нетлѣ́нною почти́въ мѧ̀, ꙳ всего̀ ѻ҆ц҃ꙋ̀ присво́илъ є҆сѝ, ꙳ содѣ́тельствꙋѧ и҆ воззида́ѧ. ꙳ тѣ́мъ вопїю́ ти: ꙳ цр҃ь і҆и҃левъ ꙳ хрⷭ҇то́съ прихо́дитъ.
Свѣ́тъ ѿ свѣ́та произше́дшїй, ꙳ и҆ ѿ дв҃ы возсїѧ́вшїй ꙳ сꙋ́щымъ на землѝ, ѕвѣздо́ю ви́дѣвше ѕвѣздосло́вцы волсвѝ, ꙳ персі́дскꙋю ѿлага́хꙋ тмꙋ̀, ꙳ и҆ ѕвѣ́зднꙋю всю̀ пре́лесть, ꙳ и҆ въ ра́дости ро́ждшемꙋсѧ бг҃ꙋ поѧ́хꙋ: ꙳ бл҃гослове́нъ прише́дый бг҃ъ на́шъ, ꙳ сла́ва тебѣ̀.
Ѕла́къ младе́нческїй неи́стовнѣ пожина́етъ, ꙳ ѿ мꙋ́дрыхъ нарꙋга́нъ бы́въ и҆́рѡдъ волхвѡ́въ, ꙳ и҆ рꙋкꙋ̀ скверноꙋбі́йственнꙋ ꙳ на тѧ̀ воздвиза́ти мнѧ́ше, ꙳ но прише́лъ є҆сѝ, є҆гѵ́птѧнѡмъ ꙳ тмꙋ̀ глꙋбоча́йшꙋю ѿгонѧ̀, ꙳ съ ни́миже пое́мъ: ꙳ бл҃гослове́нъ прише́дый бг҃ъ на́шъ, ꙳ сла́ва тебѣ̀.
Сла́ва, гла́съ и҆ подо́бенъ то́йже:
По́й, но́вый і҆и҃лю, пѣ́снь но́вꙋ: ꙳ воспо́й пѣ́нїе нбⷭ҇ное ѻ҆́но: ꙳ весели́сѧ и҆ красꙋ́йсѧ ра́достїю, ꙳ и҆ ликꙋ́й, принесѝ ꙳ свѣ́тлѡ пра́зднствєннаѧ: ꙳ бг҃ъ ѿ ю҆́га пло́тїю ꙗ҆ви́сѧ. ꙳ то́йже хо́щетъ ꙳ во і҆ѻрда́нскихъ стрꙋѧ́хъ ѡ҆мы́тисѧ, ꙳ ꙗ҆́кѡ чл҃вѣ́къ.
И҆ ны́нѣ, подо́бенъ то́йже:
Ꙗ҆ви́лсѧ є҆сѝ на землѝ, ꙳ и҆ съ человѣ̑ки пожи́лъ є҆сѝ, ꙳ ке́сарѧ повелѣ́ньми съ рабы̑ написа́лсѧ є҆сѝ: ꙳ созда́лсѧ є҆сѝ не преложи́всѧ, ꙳ неизмѣ́ненъ пре́былъ є҆сѝ, ꙳ ве́сь сы́й бг҃ъ, а҆́ще и҆ воплоти́лсѧ є҆сѝ. ꙳ сла́ва твоемꙋ̀ смотре́нїю, че́сть, хвала̀, великолѣ́пїе, ꙳ и҆ ны́нѣ, и҆ во вѣ́ки, а҆ми́нь.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Благоꙋха́й, сїѡ́не, ꙳ ꙗ҆́сли ст҃ы̑ѧ: ꙳ въ тебѣ́ бо влⷣка ꙳ простре́ти и҆́мать ꙳ лꙋчѝ своегѡ̀ бжⷭ҇тва̀.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Вѣ́рꙋ вмѣ́стѡ зла́та, любо́вь же ꙗ҆́кѡ смѵ́рнꙋ, ꙗ҆́кѡ лїва́нъ дѣѧ̑нїѧ ꙳ принесе́мъ зижди́телю, грѧдꙋ́щемꙋ во своѧ̑.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
Приближа́етсѧ хрⷭ҇то́съ, ѕвѣзда̀ пред̾ѡзарѧ́етъ, нбⷭ҇ное мно́жество ꙳ во́инства приница́етъ, ꙳ ᲂу҆́мныхъ си́лъ.
Сла́ва, гла́съ г҃. Стꙋді́тово:
До́блїи мч҃ницы и҆́стины, ва́съ ни нꙋ́жда мꙋчи́тельскаѧ, ни ласка́нїе преле́стное, ни ᲂу҆де́съ ѿсѣчє́нїѧ, нижѐ смє́ртнаѧ прещє́нїѧ ѿ бжⷭ҇твенныѧ любвѐ разлꙋчи́ти возмого́ша. тѣ́мъ дерзнове́нїе и҆мꙋ́ще ко хрⷭ҇тꙋ̀, и҆́же надъ всѣ́ми бг҃ꙋ, сїѐ воздаѧ́нїе болѣ́зненныхъ страда́нїй, проси́те ѿ хрⷭ҇та̀, прїѧ́ти моли́твами ва́шими, и҆ ве́лїю ми́лость.
И҆ ны́нѣ, предпра́зднства, гла́съ и҃: А҆нато́лїево:
Въ виѳлее́мѣ ражда́етсѧ всѣ́хъ творе́цъ, и҆ є҆де́мъ ѿверза́етъ превѣ́чный цр҃ь: пла́менное ѻ҆рꙋ́жїе плещы̀ дае́тъ: средостѣ́нїе граде́жа разори́сѧ: нбⷭ҇ныѧ си̑лы съ земны́ми совокꙋплѧ́ютсѧ, а҆́гг҃лы съ человѣ̑ки держа́вное торжество̀ составлѧ́ютъ: чи́стїи чⷭ҇томꙋ пѣ́нїе приноша́ютъ. ви́димъ дв҃ꙋ, ꙗ҆́кѡ прⷭ҇то́лъ сла́вы херꙋві́мскїй, вмѣсти́вшꙋю ника́коже вмѣсти́маго бг҃а, и҆ носѧ́щꙋю, є҆го́же серафі́ми со стра́хомъ прославлѧ́ютъ, ꙗ҆́кѡ да пода́стъ мі́рꙋ ве́лїю ми́лость.
На лїтꙋргі́и бл҃жє́нна предпра́зднства, пѣ́снь г҃-ѧ: и҆ мꙋ́ченикѡвъ, пѣ́снь ѕ҃-ѧ. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ. А҆пⷭ҇лъ къ є҆фесе́ємъ, зача́ло сл҃г. А҆ллилꙋ́їа: Воззва́ша пра́веднїи: Є҆ѵⷢ҇лїе лꙋкѝ, зача́ло ѕ҃. Прича́стенъ: Ра́дꙋйтесѧ пра́веднїи ѡ҆ гдⷭ҇ѣ: