Мѣ́сѧца тогѡ́же въ к҃є-й де́нь. Є҆́же по пло́ти, ржⷭ҇тво̀ гдⷭ҇а бг҃а и҆ сп҃са на́шегѡ і҆и҃са хрⷭ҇та̀.

И҆ воспомина́нїе и҆збавле́нїѧ цр҃кве и҆ держа́вы рѡссі́йскїѧ ѿ наше́ствїѧ га́ллѡвъ, и҆ съ ни́ми два́десѧти ꙗ҆зы̑къ.

При часѣ̀ з҃-мъ днѐ, ᲂу҆дарѧ́етъ въ вели́кїй кампа́нъ, и҆ во всѧ̑ тѧ̑жкаѧ: и҆ собра́вшесѧ во хра́мъ, начина́емъ вече́рню по ѻ҆бы́чаю. Дїа́конъ глаго́летъ: Благословѝ, влады́ко. І҆ере́й: Бл҃гослове́нно црⷭ҇тво: и҆ по А҆ми́нѣ, предстоѧ́тель: Цр҃ю̀ нбⷭ҇ный: Трист҃о́е, и҆ по Ѻ҆́ч҃е на́шъ. Гдⷭ҇и, поми́лꙋй, в҃і, Сла́ва, и҆ ны́нѣ, Прїиди́те, поклони́мсѧ: три́жды. и҆ ѱало́мъ: Благословѝ, дꙋшѐ моѧ̀, гдⷭ҇а: Посе́мъ дїа́конъ глаго́летъ є҆ктенїю̀ вели́кꙋю. И҆ а҆́ще ᲂу҆́бѡ въ сꙋббѡ́тꙋ ве́чера, пое́мъ Блаже́нъ мꙋ́жъ, каѳі́смꙋ всю̀: а҆́ще же въ недѣ́лю ве́чера, пое́мъ то́чїю а҃-й а҆нтїфѡ́нъ. А҆́ще ли и҆́нъ де́нь, стїхоло́гїа не быва́етъ, но по є҆ктенїѝ а҆́бїе пое́мъ: Гдⷭ҇и, воззва́хъ, къ тебѣ̀: на гла́съ в҃. І҆ере́й же твори́тъ проскомі́дїю. Та́же дїа́конъ кади́тъ хра́мъ по ѻ҆бы́чаю, ли́кове же пою́тъ стїхи̑ры пра́здника, на и҃. Гла́съ в҃, самогла́сны.

Ге́рманово:

Прїиди́те, возра́дꙋемсѧ гдⷭ҇еви, настоѧ́щꙋю та́йнꙋ сказꙋ́юще: средостѣ́нїе граде́жа разрꙋши́сѧ, пла́менное (с. 493) ѻ҆рꙋ́жїе плещы̀ дае́тъ, и҆ херꙋві́мъ ѿстꙋпа́етъ ѿ дре́ва жи́зни, и҆ а҆́зъ ра́йскїѧ пи́щи причаща́юсѧ, ѿ негѡ́же произгна́нъ бы́хъ преслꙋша́нїѧ ра́ди: неизмѣ́нный бо ѻ҆́бразъ ѻ҆ч҃ь, ѻ҆́бразъ присносꙋ́щїѧ є҆гѡ̀, зра́къ раба̀ прїе́млетъ, ѿ неискꙋсобра́чныѧ мт҃ре проше́дъ, не преложе́нїе претерпѣ́въ: є҆́же бо бѣ̀ пребы́сть, бг҃ъ сы́й и҆́стиненъ: и҆ є҆́же не бѣ̀ прїѧ́тъ, чл҃вѣ́къ бы́въ чл҃вѣколю́бїѧ ра́ди. томꙋ̀ возопїи́мъ: рожде́йсѧ ѿ дв҃ы бж҃е, поми́лꙋй на́съ.

Два́жды.

А҆нато́лїево:

Гдⷭ҇ꙋ і҆и҃сꙋ ро́ждшꙋсѧ ѿ ст҃ы́ѧ, дв҃ы, присвѣти́шасѧ всѧ́чєскаѧ: па́стырємъ бо свирѧ́ющымъ, и҆ волхвѡ́мъ покланѧ́ющымсѧ, а҆́гг҃лѡмъ воспѣва́ющымъ, и҆́рѡдъ мѧтѧ́шесѧ, ꙗ҆́кѡ бг҃ъ во пло́ти ꙗ҆ви́сѧ, сп҃съ дꙋ́шъ на́шихъ.

Два́жды.

Црⷭ҇тво твоѐ, хрⷭ҇тѐ, бж҃е, црⷭ҇тво всѣ́хъ вѣкѡ́въ, и҆ влⷣчество твоѐ во всѧ́комъ ро́дѣ и҆ ро́дѣ, воплоти́выйсѧ ѿ дх҃а ст҃а́гѡ, и҆ ѿ приснодв҃ы марі́и вочл҃вѣ́чивыйсѧ, свѣ́тъ на́мъ возсїѧ̀, хрⷭ҇тѐ бж҃е, твоѐ прише́ствїе: свѣ́тъ ѿ свѣ́та, ѻ҆́ч҃ее сїѧ́нїе, всю̀ тва́рь просвѣти́лъ є҆сѝ, всѧ́кое дыха́нїе хва́литъ тѧ̀. ѻ҆́бразъ сла́вы ѻ҆́ч҃їѧ, сы́й, и҆ пре́жде сы́й, и҆ возсїѧ́вый ѿ дв҃ы бж҃е, поми́лꙋй на́съ.

Два́жды.

Что̀ тебѣ̀ принесе́мъ, хрⷭ҇тѐ, ꙗ҆́кѡ ꙗ҆ви́лсѧ є҆сѝ на землѝ, ꙗ҆́кѡ чл҃вѣ́къ на́съ ра́ди; ка́ѧждо бо ѿ тебє̀ бы́вшихъ тва́рей благодаре́нїе тебѣ̀ прино́ситъ: а҆́гг҃ли, пѣ́нїе: нб҃са̀, ѕвѣздꙋ̀: волсвѝ, да́ры: па́стырїе, чꙋ́до: землѧ̀, верте́пъ: пꙋсты́нѧ, ꙗ҆́сли: мы́ же, мт҃рь дв҃ꙋ. и҆́же пре́жде вѣ̑къ бж҃е, поми́лꙋй на́съ.

Два́жды.

Сла́ва, и҆ ны́нѣ: гла́съ то́йже. Кассі́ино:

А҆́ѵгꙋстꙋ є҆динонача́льствꙋющꙋ на землѝ, многонача́лїе человѣ́кѡвъ преста̀: и҆ тебѣ̀ вочл҃вѣ́чшꙋсѧ ѿ чⷭ҇тыѧ, многобо́жїѧ і҆́дѡлѡвъ ᲂу҆праздни́сѧ, подъ є҆ди́нѣмъ ца́рствомъ мїрски́мъ гра́ди бы́ша, и҆ во є҆ди́но влⷣчество бж҃ества̀ ꙗ҆зы́цы вѣ́роваша. написа́шасѧ лю́дїе повелѣ́нїемъ ке́саревымъ, написа́хомсѧ вѣ́рнїи и҆́менемъ бжⷭ҇тва̀, тебє̀ вочл҃вѣ́чшагѡсѧ бг҃а на́шегѡ. ве́лїѧ твоѧ̀ ми́лость, гдⷭ҇и, сла́ва тебѣ̀.

Вхо́дъ со є҆ѵⷢ҇лїемъ. Свѣ́те ти́хїй: Прокі́менъ днѐ. И҆ чтє́нїѧ по чи́нꙋ и҆́хъ, съ тропари̑, и҆ со стїхи̑ и҆́хъ.

[Зрѝ] А҆́ще прилꙋчи́тсѧ на́вечерїе ржⷭ҇тва̀ хрⷭ҇то́ва въ пѧто́къ, прокі́менъ пое́тсѧ: Кто̀ бо́гъ ве́лїй, ꙗ҆́кѡ бг҃ъ на́шъ.

Со стїхи̑ свои́ми. Дневны́й же ѡ҆ставлѧ́етсѧ.

Бытїѧ̀ чте́нїе.

[Глава̀ а҃] Въ нача́лѣ сотворѝ бг҃ъ не́бо и҆ зе́млю. Землѧ́ же бѣ̀ неви́дима и҆ неꙋстро́ена, и҆ тма̀ верхꙋ̀ бе́здны: и҆ дх҃ъ бж҃їй ноша́шесѧ верхꙋ̀ воды̀. И҆ речѐ бг҃ъ: да бꙋ́детъ свѣ́тъ: и҆ бы́сть свѣ́тъ. И҆ ви́дѣ бг҃ъ свѣ́тъ, ꙗ҆́кѡ добро̀: и҆ разлꙋчѝ бг҃ъ междꙋ̀ свѣ́томъ, и҆ междꙋ̀ тмо́ю. И҆ наречѐ бг҃ъ свѣ́тъ, де́нь: и҆ тмꙋ̀ наречѐ, но́щь. и҆ бы́сть ве́черъ, и҆ бы́сть ᲂу҆́тро, де́нь є҆ди́нъ. И҆ речѐ бг҃ъ: да бꙋ́детъ тве́рдь посредѣ̀ воды̀, и҆ да бꙋ́детъ разлꙋча́ющи посредѣ̀ воды̀, и҆ воды̀: и҆ бы́сть та́кѡ. И҆ сотворѝ бг҃ъ тве́рдь: и҆ разлꙋчѝ бг҃ъ междꙋ̀ водо́ю, ꙗ҆́же бѣ̀ подъ тве́рдїю, и҆ междꙋ̀ водо́ю, ꙗ҆́же бѣ̀ надъ тве́рдїю. И҆ наречѐ бг҃ъ тве́рдь не́бо: и҆ ви́дѣ бг҃ъ, ꙗ҆́кѡ добро̀. и҆ бы́сть ве́черъ, и҆ бы́сть ᲂу҆́тро, де́нь вторы́й. И҆ речѐ бг҃ъ: да собере́тсѧ вода̀, ꙗ҆́же подъ небесе́мъ въ собра́нїе є҆ди́но, и҆ да ꙗ҆ви́тсѧ сꙋ́ша: и҆ бы́сть та́кѡ, и҆ собра́сѧ вода̀, ꙗ҆́же подъ небесе́мъ въ собра̑нїѧ своѧ̑, и҆ ꙗ҆ви́сѧ сꙋ́ша. И҆ наречѐ бг҃ъ сꙋ́шꙋ, зе́млю: и҆ собра̑нїѧ во́дъ, наречѐ морѧ̀. и҆ ви́дѣ бг҃ъ, ꙗ҆́кѡ добро̀. И҆ речѐ бг҃ъ: да прорасти́тъ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое, творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ: и҆ бы́сть та́кѡ. И҆ и҆знесѐ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое, творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ по ро́дꙋ на землѝ: и҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь тре́тїй.

Чи́слъ чте́нїе.

[Глава̀ к҃д] Бы́сть дх҃ъ бж҃їй на валаа́мѣ, и҆ воспрїе́мъ при̑тчи своѧ̑, речѐ: ко́ль добрѝ до́ми твоѝ, і҆а́кѡве, и҆ ски̑нїѧ твоѧ̑, і҆и҃лю; ꙗ҆́кѡ страны̑ ѡ҆сѣнѧ́ющыѧ, ꙗ҆́кѡ са́дїе при рѣка́хъ, и҆ ꙗ҆́кѡ ски̑нїѧ, ꙗ҆̀же водрꙋзѝ гдⷭ҇и, и҆ ꙗ҆́кѡ ке́дри при вода́хъ. И҆зы́детъ человѣ́къ ѿ сѣ́мене є҆гѡ̀, и҆ ѡ҆блада́етъ ꙗ҆зы̑ки мно́гими, и҆ возвы́ситсѧ црⷭ҇тво є҆гѡ̀, и҆ возрасте́тъ. Бг҃ъ наста́витъ є҆го̀ и҆зъ є҆гѵ́пта, ꙗ҆́кѡ сла́вꙋ є҆диноро́га є҆гѡ̀. Поѧ́стъ ꙗ҆зы́ки вра̑гъ свои́хъ, и҆ то́лщꙋ и҆́хъ и҆зможди́тъ: и҆ стрѣла́ми свои́ми ᲂу҆стрѣли́тъ врага̀. Возле́гъ почѝ, ꙗ҆́кѡ ле́въ, и҆ ꙗ҆́кѡ скѵ́менъ, кто̀ возста́витъ є҆го̀; Благословѧ́щїи тѧ̀ благослове́ни, и҆ проклина́ющїи тѧ̀, про́клѧти. Возсїѧ́етъ ѕвѣзда̀ ѿ і҆а́кѡва, и҆ воста́нетъ человѣ́къ ѿ і҆и҃лѧ, и҆ ссѣче́тъ кнѧ́зи мѡави̑тскїѧ: и҆ плѣни́тъ всѧ̑ сы́ны си́ѳовы, и҆ бꙋ́детъ є҆дѡ́мъ достоѧ́нїе, и҆ бꙋ́детъ наслѣ́дїе и҆са́ѵъ вра́гъ є҆гѡ̀, и҆ і҆и҃ль сотворѝ крѣ́пость.

Прⷪ҇ро́чества мїхе́ина чте́нїе.

[Глава̀ д҃] Во дне́хъ ѻ҆́нѣхъ, гл҃го́летъ гдⷭ҇ь: соберꙋ̀ сокрꙋше́ннꙋю, и҆ ѿринове́ннꙋю прїимꙋ̀, ꙗ҆̀же ѿри́нꙋхъ: И҆ положꙋ̀ сотре́ннꙋю во ѡ҆ста́нокъ, и҆ ѿринове́ннꙋю въ ꙗ҆зы́къ крѣ́покъ, и҆ воцари́сѧ гдⷭ҇ь надъ ни́ми въ горѣ̀ сїѡ́нстѣй ѿ ны́нѣ и҆ во вѣ́ки. [Глава̀ є҃] И҆ ты̀, виѳлее́ме, до́ме є҆ѵфра́ѳовъ, є҆да̀ ма́лъ є҆сѝ, є҆́же бы́ти въ ты́сѧщахъ і҆ꙋ́довыхъ; И҆зъ тебє́ бо мнѣ̀ и҆зы́детъ старѣ́йшина, є҆́же бы́ти въ кнѧ́зѧ во і҆и҃ли: и҆ и҆схо́ди є҆гѡ̀ и҆зъ нача́ла, ѿ дне́й вѣ́ка. Сегѡ̀ ра́ди да́стъ ѧ҆̀, до вре́мене разжда́ющїѧ породи́тъ, и҆ про́чїи ѿ бра́тїй є҆гѡ̀ ѡ҆братѧ́тсѧ къ сынѡ́мъ і҆и҃лєвымъ. И҆ ста́нетъ, и҆ ᲂу҆́зритъ, и҆ ᲂу҆пасе́тъ па́ствꙋ свою̀ крѣ́постїю гдⷭ҇ь. И҆ въ сла́вѣ и҆́мене гдⷭ҇а бг҃а своегѡ̀ пребꙋ́дꙋтъ, занѐ ны́нѣ возвели́читсѧ да́же до конє́цъ землѝ.

Та́же возгласи́тъ чте́цъ, гла́съ ѕ҃: и҆ на́мъ воста́вшымъ, глаго́летъ тропа́рь се́й:

Та́йнѡ роди́лсѧ є҆сѝ въ верте́пѣ, но нб҃о тѧ̀ всѣ̑мъ проповѣ́да, ꙗ҆́коже ᲂу҆ста̀, ѕвѣздꙋ̀ предлага́ѧ, сп҃се, и҆ волхвы̀ тѝ приведѐ, вѣ́рою покланѧ́ющыѧсѧ тебѣ̀: съ ни́миже поми́лꙋй на́съ.

Сті́хъ а҃: Ѡ҆снова̑нїѧ є҆гѡ̀ на гора́хъ ст҃ы́хъ, лю́битъ гдⷭ҇ь врата̀ сїѡ́нѧ па́че всѣ́хъ селе́нїй і҆а́кѡвлихъ, пресла̑внаѧ глаго́лашасѧ ѡ҆ тебѣ̀, гра́де бж҃їй. помѧнꙋ̀ раа́въ и҆ вавѷлѡ́на, вѣ́дꙋщымъ мѧ̀.

И҆ пое́мъ коне́цъ:

И҆ волхвы̀ тѝ приведѐ, вѣ́рою покланѧ́ющыѧсѧ тебѣ̀: съ ни́миже поми́лꙋй на́съ.

Сті́хъ в҃: И҆ сѐ и҆ноплемє́нницы, и҆ тѵ́ръ, и҆ лю́дїе є҆ѳїо́пстїи, сі́и бы́ша та́мѡ. мт҃и сїѡ́нъ, рече́тъ человѣ́къ, и҆ человѣ́къ роди́сѧ въ не́мъ, и҆ то́й ѡ҆снова̀ и҆̀ вы́шнїй.

И҆ па́ки:

И҆ волхвы̀ тѝ приведѐ, вѣ́рою покланѧ́ющыѧсѧ тебѣ̀: съ ни́миже поми́лꙋй на́съ.

Сті́хъ г҃: Гдⷭ҇ь повѣ́сть въ писа́нїи люде́й, и҆ кнѧзе́й си́хъ бы́вшихъ въ не́мъ: ꙗ҆́кѡ веселѧ́щихсѧ всѣ́хъ жили́ще въ тебѣ̀.

И҆ волхвы̀ тѝ приведѐ, вѣ́рою покланѧ́ющыѧсѧ тебѣ̀: съ ни́миже поми́лꙋй на́съ.

Та́же, Сла́ва: пое́тъ ли́къ пра́вый, коне́цъ тропарѧ̀. И҆ ны́нѣ: лѣ́вый пое́тъ та́кожде коне́цъ. Посе́мъ глаго́летъ чте́цъ ве́сь тропа́рь.

И҆ пое́тъ са́мъ коне́цъ є҆гѡ̀.

Та́йнѡ роди́лсѧ є҆сѝ въ верте́пѣ, но нб҃о тѧ̀ всѣ̑мъ проповѣ́да, ꙗ҆́коже ᲂу҆ста̀, ѕвѣздꙋ̀ предлага́ѧ, сп҃се, и҆ волхвы̀ тѝ приведѐ вѣ́рою покланѧ́ющыѧсѧ тебѣ̀: съ ни́миже поми́лꙋй на́съ.

И҆ чтꙋ́тсѧ па́ки по ѻ҆бы́чаю чтє́нїѧ сїѧ̑.

Прⷪ҇ро́чества и҆са́їина чте́нїе.

[Глава̀ а҃і] Та́кѡ гл҃го́летъ гдⷭ҇ь: и҆зы́детъ же́злъ ѿ ко́рене і҆ссе́ова и҆ цвѣ́тъ ѿ ко́рене є҆гѡ̀ взы́детъ: и҆ почі́етъ на не́мъ дх҃ъ бж҃їй, дх҃ъ мꙋ́дрости и҆ ра́зꙋма, дх҃ъ совѣ́та и҆ крѣ́пости, дх҃ъ вѣ́дѣнїѧ и҆ благоче́стїѧ: дх҃ъ стра́ха бж҃їѧ и҆спо́лнитъ є҆го̀. Не по сла́вѣ сꙋ́дитъ, нижѐ по глаго́ланїю ѡ҆бличи́тъ: но сꙋ́дитъ пра́вдою смире́нныхъ сꙋ́дъ, и҆ ѡ҆бличи́тъ пра́востїю сла̑вныѧ землѝ: и҆ порази́тъ зе́млю сло́вомъ ᲂу҆́стъ свои́хъ, и҆ дх҃омъ ᲂу҆сте́нъ ᲂу҆бїе́тъ нечести́ваго. И҆ бꙋ́детъ пра́вдою препоѧ́санъ по чре́слѣхъ свои́хъ, и҆ и҆́стиною ѡ҆бви́тъ по ре́брѡмъ свои̑мъ. Тогда̀ пожирꙋ́етъ во́лкъ со а҆́гнцемъ, и҆ ры́сь почі́етъ съ ко́злищемъ, и҆ теле́цъ и҆ ле́въ и҆ ю҆не́цъ вкꙋ́пѣ пожирꙋ́ютъ, и҆ ѻ҆троча̀ ма́ло поведе́тъ и҆̀хъ. Теле́цъ и҆ ле́въ вкꙋ́пѣ пасꙋ́тсѧ, и҆ вкꙋ́пѣ ча̑да и҆́хъ бꙋ́дꙋтъ: и҆ ле́въ ꙗ҆́кѡ во́лъ снѣ́сть плє́вы. И҆ ѻ҆троча̀ мла́до на пеще́рꙋ а҆́спїдскꙋ, и҆ на ло́же пле́мене а҆́спїдска рꙋ́кꙋ возложи́тъ. И҆ не сотворѧ́тъ ѕла̀, нижѐ и҆́мꙋтъ погꙋби́ти ни є҆ди́нагѡ же на горѣ̀ ст҃ѣ́й мое́й: зане́же напо́лнисѧ всѧ̀ землѧ̀ позна́ти гдⷭ҇а, ꙗ҆́кѡ водѣ̀ мно́зѣ покры́ти морѧ̀. И҆ бꙋ́детъ въ де́нь ѻ҆́нъ ко́рень і҆ессе́овъ, и҆ возстаѧ́й владѣ́ти ꙗ҆зы́ки: на него̀ ꙗ҆зы́цы ᲂу҆пова́ютъ, и҆ бꙋ́детъ поко́й є҆гѡ̀, че́сть.

Прⷪ҇ро́чества варꙋ́хова чте́нїе.

[Варꙋⷯ глава̀ г҃] Се́й бг҃ъ на́шъ, и҆ не приложи́тсѧ и҆́нъ къ немꙋ̀. И҆з̾ѡбрѣ́те всѧ́къ пꙋ́ть хꙋдо́жества, и҆ дадѐ и҆ і҆а́кѡвꙋ ѻ҆́трокꙋ своемꙋ̀, и҆ і҆и҃лю возлю́бленномꙋ ѿ негѡ̀. Посе́мъ же на землѝ ꙗ҆ви́сѧ, и҆ съ человѣ̑ки поживѐ. Сїѧ̀ кни́га повелѣ́нїй бж҃їихъ, и҆ зако́нъ сы́й во вѣ́ки: всѝ держа́щїисѧ є҆ѧ̀ въ живо́тъ вни́дꙋтъ, ѡ҆ста́вившїи же ю҆̀ ᲂу҆́мрꙋтъ. [Варꙋⷯ д҃] Ѡ҆брати́сѧ, і҆а́кѡве, и҆ и҆ми́сѧ є҆ѧ̀. Поидѝ къ сїѧ́нїю прѧ́мѡ свѣ́та є҆ѧ̀. Не да́ждь и҆но́мꙋ сла́вы твоеѧ̀: и҆ поле́зныхъ тебѣ̀ ꙗ҆зы́кꙋ чꙋжде́мꙋ. Бл҃же́ни є҆смы̀, і҆и҃лю, ꙗ҆́кѡ ᲂу҆гѡ́днаѧ бг҃ꙋ на́мъ разꙋ̑мна сꙋ́ть.

Прⷪ҇ро́чества данїи́лова чте́нїе.

[Глава̀ к҃] Речѐ данїи́лъ навꙋходоно́сорꙋ: ты̀ царю̀, ви́дѣлъ є҆сѝ, и҆ сѐ ѻ҆́бразъ є҆ди́нъ, ѻ҆́бразъ ѻ҆́ный вели́къ, и҆ ѻ҆бли́чїе є҆гѡ̀ ѻ҆крꙋ́гло, стоѧ́ше предъ лице́мъ твои́мъ, и҆ видѣ́нїе є҆гѡ̀ стра́шно. Ѻ҆́бразъ, є҆гѡ́же глава̀ ѿ зла́та чи́ста: рꙋ́цѣ и҆ пе́рси и҆ мы̑шцы є҆гѡ̀ сре́брѧны: чре́во и҆ сте́гны мѣ̑дѧны: го́лєни желѣ̑зны: но́зѣ ча́сть ᲂу҆́бѡ желѣ́зна, и҆ ча́сть нѣ́каѧ скꙋде́льна. Ви́дѣлъ є҆сѝ, до́ндеже ѿто́ржесѧ ка́мень ѿ горы̀ безъ рꙋ́къ, и҆ поразѝ ѻ҆́бразъ, на но́ги жєлѣ́зныѧ и҆ скꙋдє́льныѧ, и҆ и҆стнѝ ѧ҆̀ до конца̀. Тогда̀ и҆стни́шасѧ во є҆ди́но, скꙋде́ль, желѣ́зо, мѣ́дь, сребро̀, зла́то, и҆ бы́ша ꙗ҆́кѡ пра́хъ ѿ гꙋмна̀ жа́твеннагѡ, и҆ взѧ́тъ ѧ҆̀ мно́жество дꙋхнове́нїѧ, и҆ мѣ́сто не ѡ҆брѣ́тесѧ и҆̀мъ: ка́мень же, порази́вый ѻ҆́бразъ, бы́сть въ го́рꙋ ве́лїю, и҆ и҆спо́лни всю̀ зе́млю. Сїѐ є҆́сть со́нїе, и҆ сказа́нїе є҆гѡ̀ рече́мъ предъ царе́мъ: Возста́витъ бг҃ъ нбⷭ҇ный црⷭ҇тво, є҆́же во вѣ́ки не и҆стлѣ́етъ, и҆ црⷭ҇тво є҆гѡ̀ лю́демъ и҆ны̑мъ не ѡ҆ста́витсѧ. И҆ и҆стни́тъ и҆ и҆зможди́тъ всѧ̑ ца̑рствїѧ, и҆ то̀ воста́нетъ во вѣ́ки. И҆́мже ѻ҆́бразомъ ви́дѣлъ є҆сѝ, ꙗ҆́кѡ ѿ горы̀ ѿсѣче́сѧ ка́мень безъ рꙋ́къ, и҆ сотры̀ скꙋде́ль, желѣ́зо, мѣ́дь, сребро̀, зла́то. Бг҃ъ вели́кїй сказа̀ царю̀, и҆̀мже подоба́етъ бы́ти по си́хъ, и҆ и҆́стинно со́нїе, и҆ вѣ́рно сказа́нїе є҆гѡ̀.

Посе́мъ чте́цъ глаго́летъ тропа́рь се́й, гла́съ ѕ҃:

Возсїѧ́лъ є҆сѝ, хрⷭ҇тѐ, ѿ дв҃ы, разꙋ́мное сл҃нце пра́вды, и҆ ѕвѣзда́ тѧ показа̀ въ верте́пѣ вмѣща́ющасѧ невмѣсти́маго. волхвы̀ наста́вилъ є҆сѝ на поклоне́нїе твоѐ, съ ни́миже тѧ̀ велича́емъ: жизнода́вче, сла́ва тебѣ̀.

Сті́хъ а҃, ѱало́мъ ч҃в: Гдⷭ҇ь воцр҃и́сѧ, въ лѣ́потꙋ ѡ҆блече́сѧ, ѡ҆блече́сѧ гдⷭ҇ь съ си́лꙋ, и҆ препоѧ́сасѧ: и҆́бо ᲂу҆твердѝ вселе́ннꙋю, ꙗ҆́же не подви́житсѧ. Гото́въ престо́лъ тво́й ѿто́лѣ, ѿ вѣ́ка ты̀ є҆сѝ.

Та́же па́ки:

Волхвы̀ наста́вилъ є҆сѝ на поклоне́нїе твоѐ, съ ни́миже тѧ̀ велича́емъ: жизнода́вче, сла́ва тебѣ̀.

Сті́хъ в҃: Воздвиго́ша рѣ́ки, гдⷭ҇и, воздвиго́ша рѣ́ки гла́сы своѧ̑. Во́змꙋтъ рѣ́ки сотрє́нїѧ своѧ̑, ѿ гла́сѡвъ во́дъ мно́гихъ.

Та́же па́ки:

Волхвы̀ наста́вилъ є҆сѝ на поклоне́нїе твоѐ, съ ни́миже тѧ̀ велича́емъ: жизнода́вче, сла́ва тебѣ̀.

Сті́хъ г҃: Ди̑вны высѡты̀ морскі̑ѧ, ди́венъ въ высо́кихъ гдⷭ҇ь. Свидѣ̑нїѧ твоѧ̑ ᲂу҆вѣ́ришасѧ ѕѣлѡ̀: до́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дні́й.

Сла́ва, коне́цъ тропарѧ̀: И҆ ны́нѣ, па́ки коне́цъ. Та́же тропа́рь ве́сь:

Возсїѧ́лъ є҆сѝ, хрⷭ҇тѐ, ѿ дв҃ы разꙋ́мное сл҃нце пра́вды, и҆ ѕвѣзда́ тѧ показа̀ въ верте́пѣ вмѣща́ющасѧ невмѣсти́маго. волхвы̀ наста́вилъ є҆сѝ на поклоне́нїе твоѐ, съ ни́миже тѧ̀ велича́емъ: жизнода́вче, сла́ва тебѣ̀.

Коне́цъ же тропарѧ̀ пое́тъ чте́цъ са́мъ, и҆ посе́мъ чте́тъ:

Прⷪ҇ро́чества и҆са́їина чте́нїе.

[Глава̀ ѳ҃] Ѻ҆троча̀ роди́сѧ на́мъ, сн҃ъ, и҆ даде́сѧ на́мъ, є҆гѡ́же нача́льство бы́сть на ра́мѣ є҆гѡ̀: и҆ нарица́етсѧ и҆́мѧ є҆гѡ̀: вели́кагѡ совѣ́та а҆́гг҃лъ, чꙋ́денъ, совѣ́тникъ, бг҃ъ крѣ́покъ, власти́тель, нача́льникъ ми́ра, ѻ҆ц҃ъ бꙋ́дꙋщагѡ вѣ́ка: приведе́тъ бо ми́ръ на нача́льники, и҆ здра́вїе є҆гѡ̀. И҆ ве́лїе нача́льство є҆гѡ̀, и҆ ми́ра є҆гѡ̀ нѣ́сть предѣ́ла. На прⷭ҇то́лъ дв҃довъ, и҆ на ца́рство є҆гѡ̀, и҆спра́вити є҆̀, и҆ застꙋпи́ти є҆̀ сꙋдьбо́ю и҆ пра́вдою, ѿ ны́нѣ и҆ до вѣ́ка. Ре́вность гдⷭ҇а саваѡ́ѳа сотвори́тъ сїѧ̑.

Прⷪ҇ро́чества и҆са́їина чте́нїе.

[Глава̀ з҃] Приложѝ гдⷭ҇ь гл҃го́лати ко а҆ха́зꙋ, гл҃го́лѧ: просѝ себѣ̀ зна́менїѧ ᲂу҆ гдⷭ҇а бг҃а твоегѡ̀, во глꙋбинꙋ̀, и҆лѝ въ высотꙋ̀. И҆ речѐ а҆ха́зъ: не и҆́мамъ проси́ти, нижѐ и҆скꙋси́ти гдⷭ҇а. И҆ речѐ и҆са́їа: ᲂу҆слы́шите ᲂу҆̀бо, до́ме дв҃довъ: є҆да̀ ма́лъ ва́мъ трꙋ́дъ даѧ́ти человѣ́кѡмъ, и҆ ка́кѡ гдⷭ҇ꙋ трꙋ́дъ даетѐ; Сегѡ̀ ра́ди да́стъ гдⷭ҇ь са́мъ ва́мъ зна́менїе: сѐ дв҃а во чре́вѣ прїи́метъ, и҆ роди́тъ сн҃а, и҆ нарекꙋ́тъ и҆́мѧ є҆гѡ̀ є҆мманꙋ́илъ: ма́сло и҆ ме́дъ и҆́мать снѣ́сти, пре́жде не́же ᲂу҆вѣ́дѣти є҆мꙋ̀, и҆лѝ и҆зво́лити лꙋка́вое, и҆збере́тъ благо́е: Занѐ пре́жде не́же разꙋмѣ́ти ѻ҆троча́ти благо́е и҆лѝ ѕло́е, ѿри́нетъ лꙋка̑ваѧ, и҆збере́тъ благо́е. [Глава̀ и҃] И҆ речѐ гдⷭ҇ь ко мнѣ̀: прїимѝ себѣ̀ сви́токъ но́въ, вели́къ, и҆ напишѝ въ не́мъ писа́ломъ человѣ́ческимъ, є҆́же ско́рѡ плѣне́нїе сотвори́ти коры́стей, настоѧ́тъ бо. И҆ свидѣ́тели мнѣ̀ сотворѝ вѣ́рны человѣ́ки, ᲂу҆рі́ю і҆ере́а, и҆ заха́рїю сы́на варахі́ина. И҆ пристꙋпи́хъ ко прⷪ҇ро́чицѣ, и҆ во чре́вѣ прїѧ́тъ, и҆ родѝ сы́на. И҆ речѐ мнѣ̀ гдⷭ҇ь: нарцы̀ и҆́мѧ є҆мꙋ̀, ско́рѡ плѣнѝ, и҆ напра́снѡ и҆спрове́рзи. Занѐ пре́жде не́же разꙋмѣ́ти ѻ҆троча́ти назва́ти ѻ҆тца̀ и҆лѝ ма́терь, прїи́метъ си́лꙋ дама́сковꙋ, и҆ коры̑сти самарі̑йскїѧ, прѧ́мѡ царю̀ а҆сѷрі́йскомꙋ. Съ на́ми бг҃ъ, разꙋмѣ́йте ꙗ҆зы́цы, и҆ покарѧ́йтесѧ. Оу҆слы́шите да́же до послѣ́днихъ землѝ, могꙋ́щїи покарѧ́йтесѧ: а҆́ще бо па́ки возмо́жете, и҆ па́ки побѣжде́ни бꙋ́дете. И҆ и҆́же а҆́ще совѣ́тъ совѣщава́ете, разори́тъ гдⷭ҇ь: и҆ сло́во, є҆́же а҆́ще возглаго́лете, не пребꙋ́детъ въ ва́съ, ꙗ҆́кѡ съ на́ми бг҃ъ.

Посе́мъ є҆ктенїа̀ ма́лаѧ, и҆ по возгла́сѣ трист҃о́е. И҆ прокі́менъ, гла́съ а҃: Гдⷭ҇ь речѐ ко мнѣ̀: Сн҃ъ мо́й є҆сѝ ты̀, а҆́зъ дне́сь роди́хъ тѧ̀. Сті́хъ: Просѝ ѿ менє̀, и҆ да́мъ тѝ ꙗ҆зы́ки, достоѧ́нїе твоѐ, и҆ ѡ҆держа́нїе твоѐ концы̀ землѝ. А҆пⷭ҇лъ къ є҆вре́ємъ, зача́ло т҃г. Многоча́стнѣ и҆ многоѻбра́знѣ: Коне́цъ: И҆ лѣ̑та твоѧ̑ не ѡ҆скꙋдѣ́ютъ. А҆ллилꙋ́їа, гла́съ є҃: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе но́гъ твои́хъ. Сті́хъ: Же́злъ си́лы по́слетъ тѝ гдⷭ҇ь ѿ сїѡ́на. Сті́хъ: И҆зъ чре́ва пре́жде денни́цы роди́хъ тѧ̀. Є҆ѵⷢ҇лїе лꙋкѝ, зача́ло є҃: Во дне́хъ ѻ҆́нѣхъ и҆зы́де повелѣ́нїе ѿ ке́сарѧ а҆́ѵгꙋста: Коне́цъ: Ꙗ҆́коже глаго́лано бы́сть къ ни̑мъ. ( Дне́ же рѧ́дъ. Прокі́менъ, а҆пⷭ҇лъ, и҆ є҆ѵⷢ҇лїе въ на́вечерїи ржⷭ҇тва̀ хрⷭ҇то́ва, и҆ бг҃оѧвле́нїѧ, не чте́тсѧ.) И҆ порѧ́дꙋ бжⷭ҇твеннаѧ лїтꙋргі́а вели́кагѡ васі́лїа. Вмѣ́стѡ Досто́йно: пое́мъ Ѡ҆ тебѣ̀ ра́дꙋетсѧ: Прича́стенъ є҆ди́нъ: Хвали́те гдⷭ҇а съ нб҃съ: А҆ллилꙋ́їа, три́жды.

И҆ по ѿпꙋ́стѣ лїтꙋргі́и вжига́етъ параекклисїа́рхъ свѣ́щникъ и҆ поставлѧ́етъ средѝ це́ркве. Кли́рїцы же ста́вше ѻ҆́ба ли̑ка вкꙋ́пѣ, пою́тъ возгла́снѡ тропа́рь пра́здника, гла́съ д҃: Ржⷭ҇тво̀ твоѐ, хрⷭ҇тѐ бж҃е на́шъ: Сла́ва, и҆ ны́нѣ, конда́къ, гла́съ г҃: Дв҃а дне́сь пресꙋ́щественнаго ражда́етъ: По сконча́нїи же кондака̀, многолѣ́тїе.

И҆ вхо́димъ въ трапе́зꙋ, и҆ ꙗ҆ди́мъ варе́нїе съ є҆ле́емъ, ры́бы же не ꙗ҆ди́мъ, вїно́ же пїе́мъ, благодарѧ́ще бг҃а.

[Зрѝ] Вѣ́стно бꙋ́ди:

А҆́ще слꙋчи́тсѧ на́вечерїе хрⷭ҇то́ва ржⷭ҇тва̀ въ сꙋббѡ́тꙋ, и҆лѝ недѣ́лю: по́стъ не быва́етъ, и҆ тропарѝ ца́рскихъ часѡ́въ со чте́нїѧми въ сꙋббѡ́тꙋ и҆ недѣ́лю не пою́тсѧ: но пое́мъ часы̀ ца̑рскїѧ пре́жде въ пѧто́къ, по ѻ҆бы́чаю, ꙗ҆́коже ᲂу҆каза́сѧ на рѧдꙋ̀, глаго́лемъ же: Вѣ́рꙋю во є҆ди́наго бг҃а: и҆ ѱало́мъ л҃г: Благословлю̀ гдⷭ҇а: и҆ ѿпꙋ́стъ. Лїтꙋргі́а же въ то́й де́нь не быва́етъ: но пое́мъ вече́рню во своѐ вре́мѧ: Въ сꙋббѡ́тꙋ же и҆ недѣ́лю лїтꙋргі́а быва́етъ во своѐ вре́мѧ златоꙋ́стагѡ. По ѿпꙋще́нїи же снѣда́емъ по ᲂу҆ло́мкꙋ хлѣ́ба, и҆ ѿ вїна̀ вкꙋша́емъ ма́лѡ: и҆ ѿхо́димъ въ кє́ллїи своѧ̑.

При часѣ́ же з҃-мъ днѐ, начина́емъ вече́рню. А҆́ще ли въ сꙋббѡ́тꙋ ве́чера, пое́мъ: Блаже́нъ мꙋ́жъ: каѳі́смꙋ всю̀. а҆́ще ли въ недѣ́лю ве́чера, а҃ а҆нтїфѡ́нъ. Пое́мъ на Гдⷭ҇и, воззва́хъ: пое́мъ стїхи̑ры на и҃, гла́съ в҃, самогла́сны: Прїиди́те, возра́дꙋемсѧ: и҆ прѡ́чаѧ. Сла́ва, и҆ ны́нѣ, гла́съ то́йже: А҆́ѵгꙋстꙋ є҆динонача́льствꙋющꙋ на землѝ: Вхо́дъ со є҆ѵⷢ҇лїемъ. Свѣ́те ти́хїй: Прокі́менъ днѐ. А҆́ще въ сꙋббѡ́тꙋ ве́чера, пое́мъ прокі́менъ: Гдⷭ҇ь воцр҃и́сѧ: и҆ чтє́нїѧ по чи́нꙋ и҆́хъ. По сконча́нїи же чте́нїй, Трист҃о́е не пое́мъ, но быва́етъ по паремїа́хъ є҆ктенїа̀ ма́лаѧ, и҆ по возгла́сѣ прокі́менъ, гла́съ а҃: Гдⷭ҇ь речѐ ко мнѣ̀: сн҃ъ мо́й є҆сѝ ты̀: Сті́хъ: Просѝ ѿ менє̀: А҆пⷭ҇лъ къ гала́тѡмъ, зача́ло с҃з. По человѣ́кꙋ глаго́лю: А҆ллилꙋ́їа, гла́съ є҃: Речѐ гдⷭ҇ь гдⷭ҇еви моемꙋ̀: Сті́хъ: Же́злъ си́лы по́слетъ тѝ гдⷭ҇ь: Сті́хъ: И҆зъ чре́ва пре́жде денни́цы роди́хъ тѧ̀: Є҆ѵⷢ҇лїе матѳе́а, зача́ло н҃г: Подо́бно є҆́сть црⷭ҇твїе нбⷭ҇ное зернꙋ̀ горꙋ́шичнꙋ. Посе́мъ є҆ктенїа̀, Рце́мъ всѝ: Та́же, Сподо́би, гдⷭ҇и: и҆ И҆спо́лнимъ вече́рнюю моли́твꙋ: и҆ возгла́съ. И҆ посе́мъ дїа́конъ глаго́летъ: Премꙋ́дрость. Ли́къ, Благословѝ. И҆ про́чее по ѻ҆бы́чаю. И҆ ѿпꙋ́стъ. По ѿпꙋ́стѣ же вжига́емъ свѣ́щникъ средѝ це́ркве, и҆ ста́вше ѻ҆́ба ли̑ка вкꙋ́пѣ, пою́тъ тропа́рь пра́здника, Сла́ва, и҆ ны́нѣ, конда́къ. И҆ вхо́димъ въ трапе́зꙋ, и҆ ꙗ҆ди́мъ соверше́ннѡ: ры́бы же не ꙗ҆ди́мъ, но со древѧнома́слїемъ, и҆ со́чиво ѡ҆бварено̀, и҆лѝ кꙋтїю̀ съ ме́домъ: и҆спива́емъ же и҆ вїна̀ въ сла́вꙋ бж҃їю: въ неимꙋ́щихъ же страна́хъ пїе́мъ пи́во. предлага́етсѧ же и҆ чте́нїе, поꙋче́нїе кѷрі́лла а҆рхїепі́скопа і҆ерꙋсали́мскагѡ, є҆мꙋ́же нача́ло: Ꙗ҆́коже ᲂу҆́бѡ во і҆и҃са хрⷭ҇та̀ надѣ́емсѧ.

[Зрѝ] Вѣ́дати подоба́етъ, ꙗ҆́кѡ пра́здникъ ржⷭ҇тва̀ хрⷭ҇то́ва въ кі́й де́нь ни слꙋчи́тсѧ, пое́тсѧ повече́рїе вели́кое си́це:

Ѡ҆ часѣ̀ десѧ́томъ но́щи быва́етъ бла́говѣстъ, и҆ пото́мъ трезво́нъ во всѧ̑ кампа́ны: і҆ере́й же со дїа́кономъ ѡ҆бо́лкшесѧ, творѧ́тъ нача́ло, ꙗ҆́коже во всѧ̑ пра́здники влⷣчни. Дїа́конъ глаго́летъ: Благословѝ, влады́ко. І҆ере́й: Бл҃гослове́нъ бг҃ъ на́шъ: И҆ кадѧ́щꙋ і҆ере́ю, глаго́лемъ повече́рїе вели́кое ѿ нача́ла: Сла́ва тебѣ̀, бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е, и҆ про́чее. Съ на́ми бг҃ъ: пое́мъ съ пѣ́нїемъ. и҆ вмѣ́стѡ тропаре́й ѻ҆бы́чныхъ, Просвѣтѝ ѻ҆́чи моѝ: глаго́лемъ тропа́рь пра́здника: и҆ вмѣ́стѡ, Поми́лꙋй на́съ, гдⷭ҇и, поми́лꙋй на́съ: глаго́лемъ конда́къ пра́здника. По Сла́ва въ вы́шнихъ: и҆схо́димъ въ притво́ръ, пою́ще.

На лїті́и стїхи̑ры самогла́сны, гла́съ а҃. і҆ѡа́нна мона́ха:

Нб҃о и҆ землѧ̀ дне́сь прⷪ҇ро́чески да возвеселѧ́тсѧ, а҆́гг҃ли и҆ человѣ́цы дꙋхо́внѡ да торжествꙋ́ютъ, ꙗ҆́кѡ бг҃ъ во пло́ти ꙗ҆ви́сѧ, сꙋ́щымъ во тмѣ̀ и҆ сѣ́ни сѣдѧ́щымъ, рожде́йсѧ ѿ дв҃ы: верте́пъ и҆ ꙗ҆́сли прїѧ́ша того̀: па́стырїе чꙋ́до проповѣ́дꙋютъ: волсвѝ ѿ востѡ́къ въ виѳлее́мъ да́ры прино́сѧтъ. мы́ же хвалꙋ̀ недосто́йными ᲂу҆стна́ми, а҆́гг҃льски томꙋ̀ принесе́мъ: сла́ва въ вы́шнихъ бг҃ꙋ, и҆ на землѝ ми́ръ: прїи́де бо ча́ѧнїе ꙗ҆зы́кѡвъ, прише́дъ спасѐ на́съ ѿ рабо́ты вра́жїѧ.

Нб҃о и҆ землѧ̀ дне́сь совокꙋпи́шасѧ, ро́ждшꙋсѧ хрⷭ҇тꙋ̀. дне́сь бг҃ъ на зе́млю прїи́де, и҆ человѣ́къ на нб҃са̀ взы́де. дне́сь ви́димь є҆́сть пло́тїю, є҆стество́мъ неви́димый, человѣ́ка ра́ди. сегѡ̀ ра́ди и҆ мы̀ славосло́вѧще возопїи́мъ є҆мꙋ̀: сла́ва въ вы́шнихъ бг҃ꙋ, и҆ на землѝ ми́ръ, дарова́ бо прише́ствїе твоѐ, сп҃се на́шъ, сла́ва тебѣ̀.

Сла́ва въ вы́шнихъ бг҃ꙋ, въ виѳлее́мѣ слы́шꙋ ѿ безпло́тныхъ дне́сь, на землѝ ми́ръ благоволи́вшемꙋ бы́ти. ны́нѣ дв҃а нб҃съ ши́рши: возсїѧ́ бо свѣ́тъ ѡ҆мрачє́ннымъ, и҆ смирє́нныѧ возвы́си, а҆́гг҃льски пою́щыѧ: сла́ва въ вы́шнихъ бг҃ꙋ.

По ѻ҆́бразꙋ и҆ по подо́бїю, и҆стлѣ́вша престꙋпле́нїемъ, ви́дѣвъ і҆и҃съ, приклони́въ нб҃са̀ сни́де, и҆ всели́сѧ во ᲂу҆тро́бꙋ дѣ́вственнꙋю неизмѣ́ннѡ, да въ не́й и҆стлѣ́вшаго а҆да́ма ѡ҆бнови́тъ, зовꙋ́ща: сла́ва ꙗ҆вле́нїю твоемꙋ̀, и҆зба́вителю мо́й и҆ бж҃е.

Сла́ва, гла́съ є҃. І҆ѡа́нна мона́ха:

Волсвѝ, персі́дстїи ца́рїе, позна́вше ꙗ҆́вѣ на землѝ ро́ждшагосѧ цр҃ѧ̀ нбⷭ҇наго, ѿ свѣ́тлыѧ ѕвѣзды̀ води́ми, достиго́ша въ виѳлее́мъ, да́ры носѧ́ще и҆збра̑нныѧ, зла́то, и҆ лїва́нъ, и҆ смѵ́рнꙋ: и҆ па́дше поклони́шасѧ: ви́дѣша бо въ верте́пѣ младе́нца лежа́ща безлѣ́тнаго.

И҆ ны́нѣ, гла́съ ѕ҃. Ге́рманово:

Ликꙋ́ютъ а҆́гг҃ли всѝ на нб҃сѝ, и҆ ра́дꙋютсѧ человѣ́цы дне́сь, и҆гра́етъ же всѧ̀ тва́рь ро́ждшагосѧ ра́ди въ виѳлее́мѣ сп҃са гдⷭ҇а: ꙗ҆́кѡ всѧ́каѧ ле́сть і҆́дѡльскаѧ преста̀, и҆ ца́рствꙋетъ хрⷭ҇то́съ во вѣ́ки.

На стїхо́внѣ стїхи̑ры самогла́сны, гла́съ в҃. Ге́рманово:

Ве́лїе и҆ пресла́вное чꙋ́до соверши́сѧ дне́сь: дв҃а ражда́етъ, и҆ ᲂу҆тро́ба не и҆стлѣва́етъ: сло́во воплоща́етсѧ, и҆ ѻ҆ц҃а̀, не ѿлꙋча́етсѧ: а҆́гг҃ли съ па́стырьми сла́вѧтъ, и҆ мы̀ съ ни́ми вопїе́мъ: сла́ва въ вы́шнихъ бг҃ꙋ, и҆ на землѝ ми́ръ.

Гла́съ г҃:

Сті́хъ: И҆зъ чре́ва пре́жде денни́цы роди́хъ тѧ̀: клѧ́тсѧ гдⷭ҇ь и҆ не раска́етсѧ.

Дне́сь ражда́етъ дв҃а творца̀ всѣ́хъ, є҆де́мъ прино́ситъ верте́пъ, и҆ ѕвѣзда̀ показꙋ́етъ хрⷭ҇та̀ со́лнца сꙋ́щымъ во тмѣ̀: съ да́ры волсвѝ поклони́шасѧ, вѣ́рою просвѣща́еми. и҆ па́стырїе ви́дѣша чꙋ́до, а҆́гг҃лѡмъ воспѣва́ющымъ и҆ глаго́лющымъ: сла́ва въ вы́шнихъ бг҃ꙋ. (с. 505)

Гла́съ то́йже. Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀:

А҆нато́лїево:

Гдⷭ҇ꙋ і҆и҃сꙋ ро́ждшꙋсѧ въ виѳлее́мѣ і҆ꙋде́йстѣмъ, ѿ востѡ́къ прише́дше волсвѝ, поклони́шасѧ бг҃ꙋ вочл҃овѣ́чшꙋсѧ. и҆ сокрѡ́вища своѧ̑ ᲂу҆се́рднѡ ѿве́рзше да́ры честны̑ѧ приноша́хꙋ: и҆скꙋше́но зла́то, ꙗ҆́кѡ цр҃ю̀ вѣкѡ́въ: и҆ лїва́нъ, ꙗ҆́кѡ бг҃ꙋ всѣ́хъ: ꙗ҆́кѡ тридне́вномꙋ же мертвецꙋ̀, смѵ́рнꙋ безсме́ртномꙋ. всѝ ꙗ҆зы́цы прїиди́те, поклони́мсѧ ро́ждшемꙋсѧ, спастѝ дꙋ́шы на́шѧ.

Сла́ва, гла́съ д҃. І҆ѡа́нна мона́ха:

Весели́сѧ, і҆ерꙋсали́ме, торжествꙋ́йте всѝ лю́бѧщїи сїѡ́на. дне́сь вре́менный разрѣши́сѧ соꙋ́зъ ѡ҆сꙋжде́нїѧ а҆да́мова. ра́й на́мъ ѿве́рзесѧ. ѕмі́й ᲂу҆праздни́сѧ: ꙗ҆́же бо прельстѝ пе́рвѣе, ны́нѣ ᲂу҆зрѣ̀ содѣ́телевꙋ бы́вшꙋ мт҃рь. ѽ глꙋбина̀ бога́тства, и҆ премꙋ́дрости и҆ ра́зꙋма бж҃їѧ! ꙗ҆́же и҆схода́таивши сме́рть все́й пло́ти, грѣхо́вный сосꙋ́дъ, спасе́нїѧ нача́ло бы́сть мі́рꙋ всемꙋ̀, бцⷣы ра́ди. млⷣнцъ бо ражда́етсѧ и҆зъ неѧ̀, всесоверше́нный бг҃ъ: и҆ ржⷭ҇тво́мъ дѣ́вство печа́тствꙋетъ: плєни́цы грѣхѡ́вныѧ разрѣша́ѧй пелена́ми: и҆ младе́нства ра́ди є҆́ѵины врачꙋ́етъ, ꙗ҆̀же въ печа́лехъ болѣ̑зни: да ликовствꙋ́етъ ᲂу҆́бѡ всѧ̀ тва́рь, и҆ да и҆гра́етъ ѡ҆бнови́ти бо ю҆̀ прїи́де хрⷭ҇то́съ, и҆ спастѝ дꙋ́шы на́шѧ.

И҆ ны́нѣ, гла́съ то́йже:

Въ верте́пъ всели́лсѧ є҆сѝ, хрⷭ҇тѐ бж҃е, ꙗ҆́сли тѧ̀ воспрїѧ́ша, па́стырїе же и҆ волсвѝ поклони́шасѧ. тогда̀ ᲂу҆́бѡ проро́ческаѧ и҆спо́лнисѧ про́повѣдь, и҆ а҆́гг҃льскїѧ си̑лы дивлѧ́хꙋсѧ, вопїю́ще и҆ глаго́люще: сла́ва схожде́нїю твоемꙋ̀, є҆ди́не чл҃вѣколю́бче.

Та́же: Ны́нѣ ѿпꙋща́еши: Трист҃о́е. По Ѻ҆́ч҃е на́шъ:

Тропа́рь, гла́съ д҃:

Ржⷭ҇тво̀ твоѐ, хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѐ вѣ́дѣти съ высоты̀ восто́ка: гдⷭ҇и, сла́ва тебѣ̀.

Три́жды.

Та́же: Бꙋ́ди и҆́мѧ гдⷭ҇не: пѣ́нїемъ три́жды. ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: Коне́цъ: Не лиша́тсѧ всѧ́кагѡ бла́га: Та́же чте́нїе пра́здника въ толкова́нїи є҆́же ѿ матѳе́а, сло́во д҃. Посе́мъ, Сла́ва въ вы́шнихъ бг҃ꙋ: и҆ є҆ѯа̀ ѱалмы̀, по ѻ҆бы́чаю.

На ᲂу҆́трени на Бг҃ъ гдⷭ҇ь: тропа́рь пра́здника три́жды.

По а҃-й стїхоло́гїи, сѣда́ленъ, гла́съ а҃. Поⷣ: Гро́бъ тво́й, сп҃се.

Во ꙗ҆́слехъ на́съ ра́ди безслове́сныхъ положи́лсѧ є҆сѝ, долготерпѣли́ве сп҃се, младе́нствовавъ во́лею: па́стырїе же тѧ̀ воспѣ́ша со а҆́гг҃лы, зовꙋ́ще. сла́ва и҆ хвала̀ на землѝ рожде́нномꙋ, и҆ ѡ҆божи́вшемꙋ земноро́дныхъ сꙋщество̀, хрⷭ҇тꙋ̀ бг҃ꙋ на́шемꙋ.

Сла́ва, и҆ ны́нѣ, то́йже: и҆ чте́нїе.

По в҃-й стїхоло́гїи сѣда́ленъ, гла́съ г҃. Поⷣ: Красотѣ̀ дѣ́вства:

Превѣ́чнаго и҆ непостижи́маго, соприсносꙋ́щнаго неви́димомꙋ ѻ҆ц҃ꙋ̀, во ᲂу҆тро́бѣ пло́тски носи́ла є҆сѝ, бцⷣе, є҆ди́но и҆ неслїѧ́нное трⷪ҇цы бжⷭ҇тво̀. просїѧ̀ бл҃года́ть твоѧ̀ въ мі́рѣ, всепѣ́таѧ. тѣ́мже непреста́ннѡ вопїе́мъ: ра́дꙋйсѧ, чⷭ҇таѧ дв҃о мт҃и.

Сла́ва, и҆ ны́нѣ, то́йже: и҆ чте́нїе.

По полѷеле́и сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ.

Прїиди́те, ви́димъ вѣ́рнїи, гдѣ̀ роди́сѧ хрⷭ҇то́съ, послѣ́дꙋемъ про́чее, а҆́може и҆́детъ ѕвѣзда̀ съ волхвы̑, восто́чными цари̑: є҆го́же а҆́гг҃ли пою́тъ непреста́ннѡ та́мѡ, па́стырїе свирѧ́ютъ пѣ́снь досто́йнꙋю, сла́ва въ вы́шнихъ, глаго́люще, дне́сь въ верте́пѣ ро́ждшемꙋсѧ ѿ дв҃ы и҆ бцⷣы, въ виѳлее́мѣ і҆ꙋде́йстѣмъ.

Сла́ва, и҆ ны́нѣ, то́йже:

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: И҆зъ чре́ва пре́жде денни́цы роди́хъ тѧ̀, клѧ́тсѧ гдⷭ҇ь и҆ не раска́етсѧ. Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе но́гъ твои́хъ. Всѧ́кое дыха́нїе да хва́литъ гдⷭ҇а. Хвали́те бг҃а во ст҃ы́хъ є҆гѡ̀. Є҆ѵⷢ҇лїе ѿ матѳе́а, зача́ло в҃: І҆и҃съ хрⷭ҇то́во ржⷭ҇тво̀ си́це бѣ̀: По н҃-мъ ѱалмѣ̀, вмѣ́стѡ, Моли́твами: пое́мъ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.

Всѧ́чєскаѧ дне́сь ра́дости и҆сполнѧ́ютсѧ, хрⷭ҇то́съ роди́сѧ ѿ дв҃ы.

И҆ ны́нѣ:

Всѧ́чєскаѧ дне́сь ра́дости и҆сполнѧ́ютсѧ, хрⷭ҇то́съ роди́сѧ въ виѳлее́мѣ.

Та́же: Поми́лꙋй мѧ̀, бж҃е: и҆ стїхи́ра, гла́съ ѕ҃:

Сла́ва въ вы́шнихъ бг҃ꙋ, и҆ на землѝ ми́ръ, дне́сь воспрїе́млетъ виѳлее́мъ сѣдѧ́щаго при́снѡ со ѻ҆ц҃е́мъ, дне́сь а҆́гг҃ли млⷣнца рожде́ннаго бг҃олѣ́пнѡ славосло́вѧтъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ благоволе́нїе.

Канѡ́на два̀. І҆рмосы̀ ѻ҆бою̀ канѡ́нѡвъ по два́жды: Тропари́ же на в҃і.

Канѡ́нъ пе́рвый, творе́нїе кѵ́ръ космы̀, є҆гѡ́же краегране́сїе:

Хрⷭ҇то́съ вочл҃вѣ́чивсѧ, є҆́же бѣ̀, бг҃ъ пребыва́етъ.

Гла́съ а҃. Пѣ́снь а҃. І҆рмо́съ:

Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.

И҆стлѣ́вша престꙋпле́нїемъ, по бж҃їю ѻ҆́бразꙋ бы́вшаго, всегѡ̀ тлѣ́нїѧ сꙋ́ща, лꙋ́чшїѧ ѿпа́дша бжⷭ҇твенныѧ жи́зни, па́ки ѡ҆бновлѧ́етъ мꙋ́дрый содѣ́тель, ꙗ҆́кѡ просла́висѧ.

Ви́дѣвъ зижди́тель ги́блема человѣ́ка, рꙋка́ми є҆го́же созда̀, приклони́въ нб҃са̀ схо́дитъ: сего́ же ѿ дв҃ы бжⷭ҇твенныѧ чⷭ҇тыѧ, всего̀ ѡ҆сꙋществꙋ́етъ, вои́стиннꙋ вопло́щсѧ, ꙗ҆́кѡ просла́висѧ.

Мꙋ́дрость, сло́во, и҆ си́ла, сн҃ъ сы́й ѻ҆́ч҃їй и҆ сїѧ́нїе, хрⷭ҇то́съ бг҃ъ, си́лъ ᲂу҆таи́всѧ, є҆ли́кѡ премі́рныхъ, и҆ є҆ли́кѡ на землѝ, и҆ вочл҃вѣ́чсѧ ѡ҆бнови́лъ є҆́сть на́съ, ꙗ҆́кѡ просла́висѧ.

Дрꙋгі́й канѡ́нъ. Творе́нїе кѵ́ръ і҆ѡа́нна.

Гла́съ то́йже. І҆рмо́съ:

Спасѐ лю́ди чꙋдодѣ́йствꙋѧй влⷣка, мо́крꙋю мо́рѧ волнꙋ̀ ѡ҆землени́въ дре́вле, во́лею же ро́ждсѧ ѿ дв҃ы, стезю̀ прохо́днꙋ небесѐ полага́етъ на́мъ: є҆го́же по сꙋществꙋ̀ ра́вна же ѻ҆ц҃ꙋ̀ и҆ человѣ́кѡмъ сла́вимъ.

И҆знесѐ чре́во свѧще́нное сло́во ꙗ҆́вѣ неѡпа́льнѡ живопи́санное кꙋпино́ю, смѣше́на зра́комъ человѣ́чимъ бг҃а, є҆́ѵы ѻ҆каѧ́ннꙋю ᲂу҆тро́бꙋ клѧ́твы дре́внїѧ разрѣша́ющее го́рькїѧ: є҆го́же земні́и сла́вимъ.

Показа̀ ѕвѣзда̀ пре́жде со́лнца, сло́во, прише́дшее ᲂу҆ста́вити грѣхѝ, волхвѡ́мъ, ꙗ҆́вѣ во ᲂу҆бо́зѣмъ верте́пѣ, ми́лостиваго тебѐ, пелена́ми пови́та: є҆го́же ра́дꙋющесѧ ви́дѧхꙋ самого̀ и҆ чл҃вѣ́ка и҆ гдⷭ҇а.

Катава́сїа пе́рвагѡ канѡ́на, і҆рмо́съ, а҃-й ли́къ: и҆ втора́го, вторы́й ли́къ.

Пѣ́снь г҃. І҆рмо́съ:

Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.

И҆́же дꙋхнове́нїѧ прича́щсѧ лꙋ́чшагѡ а҆да́мъ пе́рстный, и҆ къ тлѣ́нїю попо́лзсѧ же́нскою ле́стїю, хрⷭ҇та̀ ѿ жены̀ ви́дѧ, вопїе́тъ: и҆́же менє̀ ра́ди по мнѣ̀ бы́въ, свѧ́тъ є҆сѝ, гдⷭ҇и.

Соѻбра́зенъ бре́нномꙋ ᲂу҆мале́нїю растворе́нїемъ, хрⷭ҇тѐ, бы́въ, и҆ прича́стїемъ пло́ти го́ршїѧ, пода́въ бжⷭ҇твеннагѡ є҆стества̀, зе́мленъ бы́въ, и҆ пребы́въ бг҃ъ, и҆ возвы́сивый ро́гъ на́шъ, свѧ́тъ є҆сѝ, гдⷭ҇и.

Виѳлее́ме, весели́сѧ, кнѧзе́й і҆ꙋ́довыхъ сы́й цр҃ь: і҆и҃лѧ бо пасы́й, на ра́мѣхъ херꙋві́мскихъ, и҆зъ тебє̀ про́йде хрⷭ҇то́съ ꙗ҆́вѣ: и҆ вознесы́й ро́гъ на́шъ надъ всѣ́ми воцр҃и́сѧ.

И҆́нъ. І҆рмо́съ:

При́зри на пѣ̑нїѧ рабѡ́въ, бл҃годѣ́телю, врага̀ смирѧ́ѧ вознесе́ннꙋю горды́ню: носѧ́й же, всеви́дче, грѣха̀ превы́шше, непоколе́блемѡ ᲂу҆тверждє́нныѧ, бл҃же, пѣвцы̀, ѡ҆снова́нїемъ вѣ́ры.

Невѣ́сты пречⷭ҇тыѧ пребога́тое ржⷭ҇тво̀, ви́дѣти па́че ᲂу҆ма̀ сподо́бивсѧ, ли́къ свирѧ́ющихъ преклонѧ́шесѧ стра́ннымъ ѻ҆́бразомъ: чи́нъ же пою́щихъ безпло́тныхъ, цр҃ѧ̀ хрⷭ҇та̀ безсѣ́меннѡ вопло́щшагосѧ.

Высото́ю црⷭ҇твꙋѧй нб҃съ, милосе́рдїемъ соверша́етъ ѡ҆ на́съ, и҆зъ безневѣ́стныѧ ѻ҆трокови́цы: невеще́ственъ сы́й пре́жде, но по́слѣжде сло́во ѡ҆дебелѣ́вшо пло́тїю, да па́дшаго къ себѣ̀ привлече́тъ первозда́ннаго.

Ѵ҆пакоѝ, гла́съ и҃:

Нача́токъ ꙗ҆зы́кѡвъ, нб҃о тебѣ̀ принесѐ, лежа́щемꙋ младе́нцꙋ во ꙗ҆́слехъ, ѕвѣздо́ю волхвы̀ призва́вый, ꙗ҆̀же и҆ ᲂу҆жаса́ше, не ски́птры и҆ престо́ли, но послѣ́днѧѧ нищета̀: что́ бо хꙋ́ждше верте́па; что́ же смире́ншее пеле́нъ; въ ни́хже просїѧ̀ бжⷭ҇тва̀ твоегѡ̀ бога́тство: гдⷭ҇и, сла́ва тебѣ̀.

Пѣ́снь д҃. І҆рмо́съ:

Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.

Є҆го́же дре́вле проречѐ і҆а́кѡвъ, ꙗ҆зы́кѡвъ ѡ҆жида́нїе, хрⷭ҇тѐ, ѿ колѣ́на і҆ꙋ́дова возсїѧ́лъ є҆сѝ, и҆ си́лꙋ дама́сковꙋ, самарі́йскꙋю же коры́сть прише́лъ є҆сѝ и҆спроврещѝ, ле́сть премѣнѧ́ѧ въ мѣ́рꙋ бг҃олѣ́пнꙋ: сла́ва си́лѣ твое́й, гдⷭ҇и.

Волхва̀ дре́вле валаа́ма слове́съ ᲂу҆ченикѝ, мꙋ́дрыѧ ѕвѣздоблюсти́тели, ра́дости и҆спо́лнилъ є҆сѝ: ѕвѣзда̀ ѿ і҆а́кѡва возсїѧ́въ, влⷣко: ꙗ҆зы́кѡвъ нача́токъ вводи́мый, прїѧ́лъ же є҆сѝ ꙗ҆́вѣ: сла́ва си́лѣ твое́й, гдⷭ҇и.

Ꙗ҆́кѡ на рꙋно̀, во чре́во дв҃ы сше́лъ є҆сѝ до́ждь, хрⷭ҇тѐ, и҆ ꙗ҆́кѡ ка̑пли на зе́млю ка́плющыѧ. є҆ѳїо́пїа и҆ ѳарсі́съ, и҆ а҆раві́тстїи ѻ҆́строви же, сава̀ ми́дѡвъ всю̀ зе́млю держа́щїи, припадо́ша тебѣ̀, сп҃се: сла́ва си́лѣ твое́й, гдⷭ҇и.

И҆́нъ. І҆рмо́съ:

Ро́да человѣ́ча ѡ҆бновле́нїе дре́вле поѧ̀ прⷪ҇ро́къ а҆ввакꙋ́мъ предвозвѣща́етъ, ви́дѣти неизрече́ннѡ сподо́бивсѧ ѻ҆́бразъ: млады́й млⷣнецъ бо и҆зъ горы̀ дв҃ы и҆зы́де, люде́й во ѡ҆бновле́нїе, сло́во.

Ра́бенъ произы́де человѣ́кѡмъ вы́шнїй, во́лею пло́ть прїи́мъ ѿ дв҃ы, ꙗ҆́дъ ѡ҆чи́стити ѕмі́евы главы̀, приводѧ̀ всѧ̑ къ свѣ́тꙋ живоно́сномꙋ, бг҃ъ сы́й, ѿ вра́тъ безсо́лнечныхъ.

Ꙗ҆зы́цы, и҆̀же дре́вле тле́ю погрꙋже́ни, па́гꙋбы ѕѣлѡ̀ вра́жїѧ ᲂу҆бѣжа́вше, возно́сѧтъ рꙋ́ки съ похва́льными пѣ́сньми, є҆ди́наго чтꙋ́ще хрⷭ҇та̀, ꙗ҆́кѡ бл҃годѣ́телѧ, къ на́мъ ми́лостивнѡ прише́дшаго.

И҆зъ ко́рене и҆зра́стши і҆ессе́ева, дв҃о, ᲂу҆ста́вы прешла̀ є҆сѝ человѣ́ческагѡ сꙋщества̀, ѻ҆́ч҃ее ро́ждши превѣ́чное сло́во, ꙗ҆́кѡ благоволѝ са́мъ запеча́таннꙋю ᲂу҆тро́бꙋ проитѝ, и҆стоща́нїемъ стра́ннымъ.

Пѣ́снь є҃. І҆рмо́съ:

Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Въ рабѣ́хъ ке́саревымъ повелѣ́нїемъ написа́тисѧ поко́рьсѧ: и҆ на́съ рабы̑ сꙋ́щыѧ, врага̀ и҆ грѣха̀ свободи́лъ є҆сѝ, хрⷭ҇тѐ. ве́сь же по на́мъ ѡ҆бнища́въ, и҆ пе́рстнагѡ ѿ самагѡ̀ є҆дине́нїѧ и҆ ѡ҆бще́нїѧ бг҃осодѣ́лалъ є҆сѝ.

Сѐ дв҃а, ꙗ҆́коже дре́вле речѐ, во чре́вѣ прїе́мши родила̀ є҆́сть бг҃а вочеловѣ́чшасѧ, и҆ пребыва́етъ дв҃а. є҆ѧ́же ра́ди примири́вшесѧ бг҃ꙋ грѣ́шнїи, бцⷣꙋ сꙋ́щꙋю вои́стиннꙋ вѣ́рнїи воспои́мъ.

И҆́нъ. І҆рмо́съ:

И҆зъ но́щи дѣ́лъ ѡ҆мраче́нныѧ пре́лести ѡ҆чище́нїе на́мъ, хрⷭ҇тѐ, бо́дреннѡ ны́нѣ соверша́ющымъ пѣ́снь, ꙗ҆́кѡ бл҃годѣ́телю, прїидѝ, подава́ѧй ᲂу҆до́бнꙋ стезю̀, по не́йже востека́юще ѡ҆брѧ́щемъ сла́вꙋ.

Лю́тꙋю враждꙋ̀, ю҆́же къ на́мъ влⷣка ѿсѣка́ѧ па́ки, плотски́мъ прише́ствїемъ, да держа́щаго разрꙋши́тъ дꙋшетлѣ́ющаго, мі́ръ сочета́ѧ съ невеще́ственными сꙋществы̀, положи́въ пристꙋ́пна, ро́ждшаго, тва́ри.

Лю́дїе ви́дѣша дре́вле ѡ҆мраче́ннїи по дне́хъ свѣ́тъ вы́шнїѧ свѣ́тлости: ꙗ҆зы́ки же бг҃ꙋ наслѣ́дїе сн҃ъ прино́ситъ, подаѧ̀ та́мѡ неизрече́ннꙋю бл҃года́ть, и҆дѣ́же мно́жайшїй процвѣтѐ грѣ́хъ.

Пѣ́снь ѕ҃. І҆рмо́съ:

И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Прїи́де вопло́щсѧ хрⷭ҇то́съ бг҃ъ на́шъ и҆зъ чре́ва, є҆го́же ѻ҆ц҃ъ пре́жде денни́цы ражда́етъ: правлє́нїѧ же держа̀ пречи́стыхъ си́лъ, въ ꙗ҆́слехъ ско́тїихъ возлежи́тъ, и҆ пелена́ми повива́етсѧ: разрѣша́етъ же многоплетє́нныѧ плєни́цы прегрѣше́нїй.

Ю҆́но и҆зъ а҆да́ма ѻ҆троча̀ смѣше́нїѧ, роди́сѧ сн҃ъ, и҆ вѣ̑рнымъ даде́сѧ, бꙋ́дꙋщагѡ вѣ́ка се́й є҆́сть ѻ҆ц҃ъ и҆ нача́льникъ: и҆ нарица́етсѧ вели́кагѡ совѣ́та а҆́гг҃лъ. се́й крѣ́покъ бг҃ъ є҆́сть, и҆ держа́й ѻ҆́бластїю всю̀ тва́рь.

И҆́нъ. І҆рмо́съ:

Ѡ҆бита́ѧ і҆ѡ́на въ преиспо́днихъ морски́хъ, прїитѝ молѧ́шесѧ, и҆ бꙋ́рю ᲂу҆толи́ти: ᲂу҆нзе́нъ же а҆́зъ мꙋ́чащагѡ стрѣло́ю, хрⷭ҇тꙋ̀ воспѣва́ю: ѕѡ́лъ гꙋби́телю, ско́рѡ прїитѝ тебѣ̀ къ мое́й лѣ́ности.

И҆́же бѣ̀ и҆спе́рва къ бг҃ꙋ, бг҃ъ сло́во, ны́нѣ ᲂу҆твержда́етъ немощно́е дре́вле: ви́дѣвъ сохрани́ти, є҆́же по на́мъ сꙋщество̀, и҆́мже себѐ вторы́мъ ѻ҆бще́нїемъ а҆́бїе проѧвлѧ́ѧ страсте́й свобо́дное.

Грѧде́тъ на́съ ра́ди, и҆зъ а҆враа́млихъ чре́слъ, темнопа́дшыѧ во мра́цѣ прегрѣше́нїй, сы́ны воздви́гнꙋти до́лꙋ пони́кшихъ: и҆́же во свѣ́тѣ ѡ҆бита́ѧй и҆ ꙗ҆́слехъ, чрезъ достоѧ́нїе, ны́нѣ благоволи́въ въ человѣ́ческое спасе́нїе.

Конда́къ, гла́съ г҃. Подо́бенъ:

Дв҃а дне́сь пресꙋ́щественнаго ражда́етъ, и҆ землѧ̀ верте́пъ непристꙋ́пномꙋ прино́ситъ. а҆́гг҃ли съ па́стырьми славосло́вѧтъ, волсви́ же со ѕвѣздо́ю пꙋтеше́ствꙋютъ: на́съ бо ра́ди роди́сѧ ѻ҆троча̀ мла́до превѣ́чный бг҃ъ.

І҆́косъ:

Є҆де́мъ виѳлее́мъ ѿве́рзе, прїиди́те ви́димъ, пи́щꙋ въ та́йнѣ ѡ҆брѣто́хомъ: прїиди́те, прїи́мемъ сꙋ̑щаѧ ра̑йскаѧ внꙋ́трь верте́па: та́мѡ ꙗ҆ви́сѧ ко́рень ненапое́нъ, прозѧба́ѧ ѿпꙋще́нїе: та́мѡ ѡ҆брѣ́тесѧ кла́дѧзь неиско́панъ, и҆зъ негѡ́же дв҃дъ пи́ти дре́вле возжада́сѧ. та́мѡ дв҃а ро́ждши младе́нца, жа́ждꙋ ᲂу҆ста́ви а҆́бїе а҆да́мовꙋ и҆ дв҃довꙋ. сегѡ̀ ра́ди къ немꙋ̀ и҆́демъ, гдѣ̀ роди́сѧ ѻ҆троча̀ мла́до превѣ́чный бг҃ъ.

Пѣ́снь з҃. І҆рмо́съ:

Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Па́стырїе свирѧ́юще, ᲂу҆жа́сно свѣтоѧвле́нїе полꙋчи́ша: сла́ва бо гдⷭ҇нѧ ѡ҆блиста̀ и҆̀хъ, и҆ а҆́гг҃лъ, воспо́йте, вопїѧ̀: ꙗ҆́кѡ роди́сѧ хрⷭ҇то́съ, ѻ҆тцє́въ бг҃ъ бл҃гослове́нный.

Внеза́пꙋ съ сло́вомъ а҆́гг҃ловымъ нбⷭ҇наѧ вѡ́инства, сла́ва, вопїѧ́хꙋ, бг҃ꙋ въ вы́шнихъ, на землѝ ми́ръ, въ человѣ́цѣхъ благоволе́нїе: хрⷭ҇то́съ возсїѧ̀, ѻ҆тцє́въ бг҃ъ бл҃гослове́нный.

Глаго́лъ что̀ се́й, реко́ша па́стырїе; преше́дше ᲂу҆ви́димъ бы́вшее, бжⷭ҇твеннагѡ хрⷭ҇та̀. виѳлее́ма же доше́дше, съ ро́ждшею покланѧ́хꙋсѧ, воспѣва́юще: ѻ҆тцє́въ бж҃е, бл҃гослове́нъ є҆сѝ.

И҆́нъ. І҆рмо́съ:

Всецр҃ѧ̀ любо́вїю ᲂу҆ловле́ннїи ѻ҆́троцы, ᲂу҆кори́ша безчи́сленнѡ ꙗ҆рѧ́щасѧ мꙋчи́телѧ ѕлобо́жное ꙗ҆зыковре́дїе ¹⁰, и҆̀мже повинꙋ́сѧ ѻ҆́гнь мно́гїй, влⷣцѣ глаго́лющымъ: во вѣ́ки бл҃гослове́нъ є҆сѝ.

Слꙋги̑ ᲂу҆́бѡ неи́стовнѡ попалѧ́етъ, спаса́етъ же всепалѧ́щаѧ со стра́хомъ ю҆́ныѧ, седмочи́сленнымъ разжже́нїемъ возвы́шена: и҆̀хже вѣнча̀ пла́мень, незави́стнѡ гдⷭ҇ꙋ подаю́щꙋ благоче́стїѧ ра́ди ро́сꙋ.

Помо́щниче хрⷭ҇тѐ человѣ́кѡмъ, проти́вное гада́нїе, воплоще́нїе неизглаго́ланное и҆мѣ́ѧй, посрами́лъ є҆сѝ: бога́тство ѡ҆боже́нїѧ носѧ́й, воѡбра́жсѧ ны́нѣ, є҆гѡ́же ра́ди ᲂу҆пова́нїемъ, свы́ше въ преиспо́днїй прїидо́хомъ мра́къ.

Ѕлѣ̀ неꙋдержа́ннѡ возвыша́емый, нече́стнѡ бѣсѧ́щїйсѧ ѿ развраще́нїѧ мі́ра, низложи́лъ є҆сѝ всемо́щнѣ грѣ́хъ, ꙗ҆̀же привлечѐ пре́жде, дне́сь же ѿ сѣ́тей спаса́еши, вопло́щсѧ во́лею бл҃годѣ́телю.

Пѣ́снь и҃. І҆рмо́съ:

Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ. не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Влече́тъ вавѷлѡ́нѧ дщѝ ѻ҆́троки плѣнє́нныѧ дв҃довы ѿ сїѡ́на къ себѣ̀: дароно́сцы же сле́тъ волхвы̀ дѣ́ти, дв҃довѣ бг҃опрїѧ́тнѣй дще́ри молѧ́щыѧсѧ. тѣ́мъ воспѣва́юще воспое́мъ: да благослови́тъ тва́рь всѧ̑ гдⷭ҇а, и҆ превозно́ситъ во всѧ̑ вѣ́ки.

Ѻ҆рга́ны ᲂу҆клони́ша плачє́вныѧ пѣ̑сни, не поѧ́хꙋ бо въ землѝ чꙋжде́й ѻ҆́троцы сїѡ́новы: вавѷлѡ́нскꙋю же разрѣша́етъ ле́сть всю̀, и҆ мꙋсїкі̑йскїѧ соста́вы, въ виѳлее́мѣ возсїѧ́въ хрⷭ҇то́съ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Коры̑сти вавѷлѡ́нъ црⷭ҇тва сїѡ́нѧ, и҆ плѣне́нное бога́тство прїѧ́тъ: сокрѡ́вища же хрⷭ҇то́съ въ сїѡ́нъ сегѡ̀, и҆ царѝ ѕвѣздо́ю наставлѧ́ѧ ѕвѣздоблюсти́тели влече́тъ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

И҆́нъ. І҆рмо́съ:

Оу҆тро́бꙋ неѡпа́льнꙋ ѡ҆бразꙋ́ютъ ѻ҆трокови̑цы, и҆̀же въ ве́тсѣмъ ѡ҆палѧ́емїи ю҆́ношы, преесте́ственнѡ ражда́ющꙋю запечатлѣ́ннꙋ. ѻ҆боѧ́ же содѣва́ющи чꙋдодѣ́йство є҆ди́но, лю́ди къ пѣ́нїю возставлѧ́етъ бл҃года́ть.

Па́гꙋбы ᲂу҆бѣжа́вши, є҆́же ѡ҆божи́тисѧ пре́лестїю непреста́ннѡ пое́тъ и҆злїѧ́вшагосѧ сло́ва, ю҆́ношески всѧ̀ съ тре́петомъ тва́рь, несла́внꙋ хвалꙋ̀ боѧ́щисѧ прино́ситъ, тлѣ́нна сꙋ́щи, а҆́ще и҆ мꙋ́дрѣ терпѧ́ше.

Грѧде́ши, заблꙋ́ждше на па́жить ѡ҆браща́ѧ цвѣтотво́рнꙋю, и҆зъ пꙋсты́нныхъ холмѡ́въ, ꙗ҆зы́кѡвъ возста́нїе, человѣ́ческое є҆стество̀, си́лꙋ нꙋ́жнꙋю человѣкоꙋбі́йцы ᲂу҆гаси́ти: мꙋ́жъ же ꙗ҆ви́всѧ и҆ бг҃ъ промышле́нїемъ.

На ѳ҃-й пѣ́сни вжига́ютъ свѣщы̀ бра́тїѧ. Честнѣ́йшꙋю не пое́мъ: но пое́мъ припѣ́вы пра́здника.

Велича́й, дꙋшѐ моѧ̀, честнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.

Пѣ́снь ѳ҃. І҆рмо́съ:

Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.

Та́же вторы́й ли́къ пое́тъ то́йже припѣ́въ, и҆ і҆рмо́съ. И҆ про́чихъ ше́сть припѣ́вѡвъ припѣва́емъ на кі́йждо тропа́рь по є҆ди́ножды.

Велича́й, дꙋшѐ моѧ̀, ѿ дв҃ы бг҃а пло́тїю ро́ждшагосѧ.

Велича́й, дꙋшѐ моѧ̀, въ верте́пѣ ро́ждшагосѧ цр҃ѧ̀.

И҆зрѧ́дное тече́нїе зрѧ́ще волсвѝ неѻбы́чныѧ но́выѧ ѕвѣзды̀ новосїѧ́ющїѧ, нб҃са̀ просвѣща́ющїѧ, хрⷭ҇та̀ цр҃ѧ̀ зна́менꙋющїѧ на землѝ, ро́ждшагосѧ въ виѳлее́мѣ, на спасе́нїе на́ше.

Велича́й, дꙋшѐ моѧ̀, ѿ волхвѡ́въ бг҃а покланѧ́емаго.

Велича́й, дꙋшѐ моѧ̀, ѿ ѕвѣзды̀ волхвѡ́мъ возвѣще́ннаго.

Новорожде́нное, волхвѡ́мъ глаго́лющымъ, ѻ҆троча̀ цр҃ь, є҆го́же ѕвѣзда̀ ꙗ҆вѝ, гдѣ́ є҆сть, томꙋ́ бо поклони́тисѧ прїидо́хомъ: ꙗ҆рѧ́сѧ и҆́рѡдъ смꙋща́шесѧ, хрⷭ҇та̀ ᲂу҆би́ти бг҃обо́рецъ шата́ѧсѧ.

Велича́й, дꙋшѐ моѧ̀, чⷭ҇тꙋю дв҃ꙋ и҆ є҆ди́нꙋ бцⷣꙋ, ро́ждшꙋю хрⷭ҇та̀ цр҃ѧ̀.

Волсвѝ и҆ па́стырїе прїидо́ша поклони́тисѧ хрⷭ҇тꙋ̀, ро́ждшемꙋсѧ во виѳлее́мѣ гра́дѣ.

И҆спыта̀ и҆́рѡдъ вре́мѧ ѕвѣзды̀, є҆ѧ́же вожде́нїемъ волсвѝ въ виѳлее́мѣ покланѧ́хꙋсѧ хрⷭ҇тꙋ̀ съ да́ры: є҆́юже ко ѻ҆те́чествꙋ наставлѧ́еми, лю́таго дѣтоꙋбі́йцꙋ ѡ҆ста́виша порꙋ́гана.

Та́же пе́рвый ли́къ пое́тъ втора́гѡ канѡ́на припѣ́въ:

Дне́сь дв҃а ражда́етъ влⷣкꙋ внꙋ́трь верте́па.

И҆ і҆рмо́съ:

Люби́ти ᲂу҆́бѡ на́мъ, ꙗ҆́кѡ безбѣ́дное стра́хомъ ᲂу҆до́бѣе молча́нїе, любо́вїю же, дв҃о, пѣ̑сни тка́ти спротѧже́ннѡ сложє́нныѧ, неꙋдо́бно є҆́сть: но и҆ мт҃и, си́лꙋ, є҆ли́ко є҆́сть произволе́нїе, да́ждь.

Вторы́й же ли́къ пое́тъ припѣ́въ:

Дне́сь влⷣка ражда́етсѧ ꙗ҆́кѡ млⷣнецъ ѿ мт҃ре дв҃ы.

И҆ і҆рмо́съ то́йже: Люби́ти ᲂу҆́бѡ на́мъ:

Про́чїи же припѣва́емъ къ тропарє́мъ:

Дне́сь па́стырїе ви́дѧтъ сп҃са, пелена́ми ѡ҆бви́та, и҆ лежа́ща во ꙗ҆́слехъ.

Дне́сь влⷣка рꙋ́бищемъ пелена́етсѧ, неѡсѧ́занный, ꙗ҆́кѡ млⷣнецъ.

Дне́сь всѧ́ка тва́рь весели́тсѧ и҆ ра́дꙋетсѧ, ꙗ҆́кѡ хрⷭ҇то́съ роди́сѧ ѿ дв҃ы ѻ҆трокови́цы.

Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чⷭ҇таѧ, ви́дѣвше сло́ва, но́ва ꙗ҆́вльшагѡсѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.

Нбⷭ҇ныѧ си̑лы ро́ждшагосѧ сп҃са гдⷭ҇а и҆ влⷣкꙋ возвѣща́ютъ мі́рꙋ.

Вмѣ́стѡ, Сла́вы:

Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бжⷭ҇тва̀ держа́вꙋ.

Вмѣ́стѡ же, И҆ ны́нѣ:

Велича́й, дꙋшѐ моѧ̀, и҆зба́вльшꙋю на́съ ѿ клѧ́твы.

Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ: ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.

Та́же ѻ҆́ба ли̑ка, соше́дшесѧ вкꙋ́пѣ, пою́тъ пе́рвый припѣ́въ пра́здника, и҆ і҆рмо́съ: Та́инство стра́нное ви́жꙋ:

Посе́мъ втора́гѡ канѡ́на припѣ́въ, и҆ і҆рмо́съ: Люби́ти ᲂу҆́бѡ на́мъ.

И҆ покло́нъ:

Свѣти́ленъ.

Посѣти́лъ ны̀ є҆́сть свы́ше сп҃съ на́шъ, восто́къ восто́кѡвъ, и҆ сꙋ́щїи во тмѣ̀ и҆ сѣ́ни ѡ҆брѣто́хомъ и҆́стинꙋ: и҆́бо ѿ дв҃ы роди́сѧ гдⷭ҇ь.

Три́жды.

На хвали́техъ пое́мъ стїхи̑ры самогла́сны, д҃:

А҆ндре́а і҆ерꙋсали́мскагѡ. Гла́съ д҃:

Весели́тесѧ првⷣнїи, нб҃са̀ ра́дꙋйтесѧ, взыгра́йте го́ры, хрⷭ҇тꙋ̀ ро́ждшꙋсѧ: дв҃а сѣди́тъ херꙋві́мѡмъ подо́бѧщисѧ, носѧ́щи въ нѣ́дрѣхъ бг҃а сло́ва воплоще́нна: па́стырїе рожде́нномꙋ дивѧ́тсѧ: волсвѝ влⷣцѣ да́ры прино́сѧтъ, а҆́гг҃ли воспѣва́юще глаго́лютъ: непостижи́ме гдⷭ҇и, сла́ва тебѣ̀.

Бцⷣе дв҃о, ро́ждшаѧ сп҃са, ᲂу҆праздни́ла є҆сѝ пе́рвꙋю клѧ́твꙋ є҆́ѵинꙋ: ꙗ҆́кѡ мт҃и была̀ є҆сѝ благоволе́нїѧ ѻ҆́ч҃а, носѧ́щи въ нѣ́дрѣхъ бж҃їе сло́во воплоще́нное. не терпи́тъ та́йна и҆спыта́нїѧ. вѣ́рою є҆ди́ною сїю̀ всѝ сла́вимъ, зовꙋ́ще съ тобо́ю и҆ глаго́люще: неизрече́нне гдⷭ҇и, сла́ва тебѣ̀.

Прїиди́те, воспои́мъ мт҃рь сп҃совꙋ, по ржⷭ҇твѣ̀ па́ки ꙗ҆́вльшꙋюсѧ дв҃ꙋ: ра́дꙋйсѧ, гра́де ѡ҆дꙋшевле́нный цр҃ѧ̀ и҆ бг҃а, въ не́мже хрⷭ҇то́съ пожи́въ, спасе́нїе содѣ́ла. съ гаврїи́ломъ воспое́мъ, съ па́стырьми просла́вимъ, зовꙋ́ще: бцⷣе, молѝ и҆зъ тебє̀ воплоще́ннаго спасти́сѧ на́мъ.

Ѻ҆ц҃ъ благоизво́ли, сло́во пло́ть бы́сть, и҆ дв҃а родѝ бг҃а вочл҃вѣ́чшасѧ: ѕвѣзда̀ возвѣща́етъ, волсвѝ покланѧ́ютсѧ, па́стырїе чꙋдѧ́тсѧ и҆ тва́рь ра́дꙋетсѧ.

Сла́ва, гла́съ ѕ҃. Ге́рманово:

Є҆гда̀ вре́мѧ є҆́же на зе́млю прише́ствїѧ твоегѡ̀, пе́рвое написа́нїе вселе́ннѣй бы́сть, тогда̀ восхотѣ́лъ є҆сѝ человѣ́кѡвъ написа́ти и҆мена̀, вѣ́рꙋющихъ ржⷭ҇твꙋ̀ твоемꙋ̀. сегѡ̀ ра́ди таково́е повелѣ́нїе ѿ ке́сарѧ возгласи́сѧ: вѣ́чнагѡ бо твоегѡ̀ црⷭ҇твїѧ безнача́льное, ржⷭ҇тво́мъ твои́мъ ѡ҆бнови́сѧ. тѣ́мъ тебѣ̀ прино́симъ и҆ мы̀ па́че и҆мѣ́ннагѡ данносло́вїѧ, правосла́внагѡ бога́тства бг҃осло́вїе, ꙗ҆́кѡ бг҃ꙋ и҆ сп҃сꙋ дꙋ́шъ на́шихъ.

И҆ ны́нѣ, гла́съ в҃: І҆ѡа́нна мона́ха:

Дне́сь хрⷭ҇то́съ въ виѳлее́мѣ ражда́етсѧ ѿ дв҃ы: дне́сь безнача́льный начина́етсѧ, и҆ сло́во воплоща́етсѧ: си̑лы нбⷭ҇ныѧ ра́дꙋютсѧ, и҆ землѧ̀ съ человѣ́ки весели́тсѧ: волсвѝ влⷣцѣ да́ры прино́сѧтъ, па́стырїе рожде́нномꙋ дивѧ́тсѧ. мы́ же непреста́ннѡ вопїе́мъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ благоволе́нїе.

Славосло́вїе вели́кое. По трист҃о́мъ тропа́рь пра́здника. Є҆ктєнїѝ, и҆ ѿпꙋ́стъ. И҆ зна́менꙋетъ и҆гꙋ́менъ ст҃ы́мъ є҆ле́емъ бра́тїю ѿ ст҃а́гѡ канди́ла, є҆́же предъ пра́здничною і҆кѡ́ною, пою́щымъ на́мъ стїхи́рꙋ самогла́снꙋ пра́здника: и҆ ча́съ а҃. На а҃-мъ часѣ̀ тропа́рь пра́здника. По трист҃о́мъ конда́къ пра́здника. И҆ прѡ́чаѧ: и҆ соверше́нный ѿпꙋ́стъ.

[зрѝ] Вѣ́домо же бꙋ́ди и҆ сїѐ: Ꙗ҆́кѡ а҆́ще на́вечерїе ржⷭ҇тва̀ хрⷭ҇то́ва бꙋ́детъ въ сꙋббѡ́тꙋ, и҆ недѣ́лю, не быва́етъ поста̀: Лїтꙋргі́а же златоꙋ́стагѡ во своѐ вре́мѧ: а҆ на са́мый пра́здникъ лїтꙋргі́а пое́тсѧ васі́лїева непремѣ́ннѡ. Та́кожде быва́етъ и҆ въ пра́здникъ просвѣще́нїѧ. Вмѣ́стѡ же, Ѡ҆ тебѣ̀ ра́дꙋетсѧ: пое́мъ і҆рмо́съ ѳ҃ пѣ́сни. Въ се́й де́нь быва́етъ лїтꙋргі́а по ра́нꙋ, трꙋда̀ ра́ди бдѣ́ннагѡ.

На лїтꙋргі́и: а҆нтїфѡ́нъ а҃, ѱало́мъ р҃і, гла́съ в҃:

И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.

Припѣ́въ: Моли́твами бцⷣы, сп҃се, спасѝ на́съ.

Сті́хъ в҃: Въ совѣ́тѣ пра́выхъ и҆ со́нмѣ, вє́лїѧ дѣла̀ гдⷭ҇нѧ.

Моли́твами бцⷣы, сп҃се, спасѝ на́съ.

Сті́хъ г҃: И҆зы̑скана во всѣ́хъ во́лѧхъ є҆гѡ̀.

Моли́твами бцⷣы, сп҃се, спасѝ на́съ.

Сті́хъ д҃: И҆сповѣ́данїе и҆ великолѣ́пїе дѣ́ло є҆гѡ̀ и҆ пра́вда є҆гѡ̀ пребыва́етъ въ вѣ́къ вѣ́ка.

Моли́твами бцⷣы, сп҃се, спасѝ на́съ.

Та́же ѻ҆́ба ли̑ка: Сла́ва, и҆ ны́нѣ: Моли́твами бцⷣы:

А҆нтїфѡ́нъ в҃, ѱало́мъ ра҃і, гла́съ в҃.

Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Припѣ́въ: Спаси́ ны сн҃е бж҃їй, рожде́йсѧ ѿ дв҃ы, пою́щыѧ тѝ: А҆ллилꙋ́їа.

Сті́хъ в҃: Си́льно на землѝ бꙋ́детъ сѣ́мѧ є҆гѡ̀, ро́дъ пра́выхъ благослови́тсѧ.

Спаси́ ны, сн҃е бж҃їй.

Сті́хъ г҃: Сла́ва и҆ бога́тство въ домꙋ̀ є҆гѡ̀, и҆ пра́вда є҆гѡ̀ пребыва́етъ въ вѣ́къ вѣ́ка.

Спаси́ ны, сн҃е бж҃їй.

Сті́хъ д҃: Возсїѧ̀ во тмѣ̀ свѣ́тъ пра̑вымъ, ми́лостивъ и҆ ще́дръ и҆ пра́веденъ.

Спаси́ ны, сн҃е бж҃їй.

Та́же ѻ҆́ба ли̑ка вкꙋ́пѣ: Сла́ва, и҆ ны́нѣ.

Є҆диноро́дный сн҃е и҆ сло́ве бж҃їй:

А҆нтїфѡ́нъ г҃, ѱало́мъ р҃ѳ, гла́съ д҃.

Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀.

Тропа́рь:

Ржⷭ҇тво̀ твоѐ, хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѣ̀ вѣ́дѣти съ высоты̀ восто́ка: гдⷭ҇и, сла́ва тебѣ̀.

Сті́хъ в҃: До́ндеже положꙋ̀ врагѝ твоѧ̑, подно́жїе но́гъ твои́хъ.

Тропа́рь: Ржⷭ҇тво̀ твоѐ, хрⷭ҇тѐ бж҃е на́шъ:

Сті́хъ г҃: Же́злъ си́лы по́слетъ тѝ гдⷭ҇ь ѿ сїѡ́на, и҆ гдⷭ҇ьствꙋй посредѣ̀ врагѡ́въ твои́хъ.

Ржⷭ҇тво̀ твоѐ, хрⷭ҇тѐ бж҃е на́шъ:

Сті́хъ д҃: Съ тобо́ю нача́ло въ де́нь си́лы твоеѧ̀, во свѣ́тлостехъ ст҃ы́хъ твои́хъ.

Ржⷭ҇тво̀ твоѐ, хрⷭ҇тѐ бж҃е на́шъ.

Вхо́дное:

И҆зъ чре́ва пре́жде денни́цы роди́хъ тѧ̀, клѧ́тсѧ гдⷭ҇ь и҆ не раска́етсѧ: ты̀ і҆ере́й во вѣ́къ по чи́нꙋ мелхїседе́ковꙋ.

Тропа́рь высоча́йшимъ гла́сомъ. Ржⷭ҇тво̀ твоѐ, хрⷭ҇тѐ бж҃е на́шъ:

Сла́ва, и҆ ны́нѣ, конда́къ: Дв҃а дне́сь:

Вмѣ́стѡ трист҃а́гѡ, Є҆ли́цы во хрⷭ҇та̀ крести́стесѧ:

Прокі́менъ, гла́съ и҃: Всѧ̀ землѧ̀ да покло́нитсѧ тебѣ̀, и҆ пое́тъ тебѣ̀: Сті́хъ: Воскли́кните гдⷭ҇еви всѧ̀ землѧ̀: А҆пⷭ҇лъ къ гала́тѡмъ, зача́ло с҃ѳ: Є҆гда̀ прїи́де кончи́на лѣ́та. А҆ллилꙋ́їа, гла́съ а҃. Небеса̀ повѣ́даютъ сла́вꙋ бж҃їю. Сті́хъ: Де́нь днѝ ѿрыга́етъ глаго́лъ: Є҆ѵⷢ҇лїе матѳе́а, зача́ло г҃: І҆и҃сꙋ ро́ждшꙋсѧ. Прича́стенъ: И҆збавле́нїе посла̀ гдⷭ҇ь лю́демъ свои̑мъ. А҆ллилꙋ́їа, три́жды.

На трапе́зѣ быва́етъ ᲂу҆тѣше́нїе бра́тїи вели́кое: и҆ чте́мъ сло́во златоꙋ́стагѡ, є҆мꙋ́же нача́ло: Дре́вле ᲂу҆́бѡ патрїа́рхъ:

[Зрѝ] А҆́ще пра́здникъ ржⷭ҇тва̀ хрⷭ҇то́ва слꙋчи́тсѧ бы́ти въ сре́дꙋ, и҆ пѧто́къ, разрѣша́емъ ᲂу҆́бѡ мїрѧ́не на мѧ́со, мона́си же на сы́ръ и҆ ꙗ҆́ица: и҆ ꙗ҆ди́мъ ᲂу҆́бѡ ѿ ржⷭ҇тва̀ хрⷭ҇то́ва, по всѧ̑ дни̑, до на́вечерїѧ ст҃а́гѡ бг҃оѧвле́нїѧ, мїрсті́и ᲂу҆́бѡ мѧ́со, мона́си же сы́ръ и҆ ꙗ҆́ица.