Мѣ́сѧца тогѡ́же въ г҃-й де́нь. Ст҃а́гѡ прⷪ҇ро́ка софо́нїи.
И҆ прпⷣбнагѡ ѻ҆тца̀ на́шегѡ са́ввы стороже́вскагѡ.
Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры прⷪ҇ро́ка г҃, гла́съ д҃. Поⷣ: Зва́нный свы́ше:
И҆́же зарю̀ бг҃онача́льнѣйшагѡ сїѧ́нїѧ прїи́мъ ꙳ ᲂу҆ма̀ чистото́ю, ꙳ и҆ бжⷭ҇твенныхъ слове́съ ꙳ провозвѣ́стникъ и҆ прозна́менатель, ꙳ и҆ прⷪ҇ро́къ бжⷭ҇твенный бы́въ, ꙳ ᲂу҆ста̀ бг҃одви̑жимаѧ ꙗ҆ви́лсѧ є҆сѝ дх҃а: ꙳ ꙗ҆̀же ѿ негѡ̀ тебѣ̀ показꙋ́ємаѧ проповѣ́дꙋѧ ꙳ и҆ сказꙋ́ѧ всѣ̑мъ ꙗ҆зы́кѡмъ ꙳ дае́мое спасе́нїе, ꙳ и҆ црⷭ҇твїе хрⷭ҇то́во, всече́стне. ꙳ є҆го́же молѝ ꙳ спастѝ и҆ просвѣти́ти дꙋ́шы на́шѧ.
И҆́же бг҃овидѣ́нїемъ сїѧ́ѧ досто́йнѡ, ꙳ и҆ прⷪ҇ро́ческимъ предсѣда́тельствомъ, ꙳ и҆ благода́тїю почествова́нъ, бг҃одохнове́нне, ꙳ и҆ бжⷭ҇твеннагѡ сподо́бленъ блаже́нства, ꙳ къ преблаго́мꙋ ны́нѣ дерзнове́нїемъ твои́мъ ꙳ и҆ ми́лованїемъ ѡ҆держи́мь, ꙳ молѧ́сѧ не преста́й ꙳ ѡ҆ и҆̀же вѣ́рою тѧ̀ восхвалѧ́ющихъ, ꙳ и҆ чтꙋ́щихъ, ꙗ҆́кѡ бг҃оглаго́лива, ꙳ и҆ че́стна и҆ бг҃опрїѧ́тна, ꙳ ѿ бѣ́дъ и҆зба́вити, и҆ спастѝ дꙋ́шы на́шѧ.
Твоего̀ прⷪ҇ро́ка, ꙳ ꙗ҆́кѡ ѡ҆дꙋшевле́нна ѻ҆́блака, показа́лъ є҆сѝ, безсме́ртне, ꙳ во́дꙋ точа́ща въ жи́знь во и҆́стиннꙋ вѣ́чнꙋю, ꙳ посла́въ сего̀ бога́тнѡ, ꙳ и҆ дарова́въ дх҃а всест҃а́го, ꙳ є҆диносꙋ́щнаго тебѣ̀ ѻ҆ц҃ꙋ̀ вседержи́телю, ꙳ и҆ сн҃ꙋ твоемꙋ̀, ꙳ и҆зъ твоегѡ̀ сꙋщества̀ возсїѧ́вшемꙋ, ꙳ и҆́мже проречѐ сп҃си́тельное прише́ствїе ꙳ хрⷭ҇та̀ бг҃а на́шегѡ, ꙳ и҆ ꙗ҆зы́кѡмъ всѣ̑мъ спасе́нїе провозвѣстѝ.
И҆́ны стїхи̑ры бцⷣы, гла́съ и҆ подо́бенъ то́йже:
(А҆́ще а҆ллилꙋ́їа, пою́тсѧ сі́и стїхи̑ры пре́жде, пото́мъ ст҃а́гѡ).
И҆́же благоче́стнѡ покланѧ́ющыѧсѧ ꙳ твоемꙋ̀ ржⷭ҇твꙋ̀, ꙳ ѿ всѧ́кагѡ спаса́й навѣ́та вра́жїѧ, ꙳ бг҃ороди́тельнице всенепоро́чнаѧ, ꙳ ꙗ҆́кѡ предста́тельница всегѡ̀ ро́да на́шегѡ сꙋ́щи: ꙳ тѧ́ бо ны́нѣ по́мощь всѝ стѧжа́хомъ, ꙳ прибѣ́жище же и҆ ᲂу҆твержде́нїе, ꙳ и҆ хода́таицꙋ ко влⷣцѣ хрⷭ҇тꙋ̀ и҆ гдⷭ҇ꙋ. ꙳ є҆го́же молѝ, дарова́ти ми́ръ мі́рꙋ, мо́лимсѧ, ꙳ и҆ грѣхѡ́въ разрѣше́нїе ꙳ притека́ющымъ въ кро́въ тво́й.
Сѐ гноє́нїѧ ѡ҆бнажа́ю тебѣ̀ ꙳ дꙋшѝ моеѧ̀, ꙳ и҆ показꙋ́ю лю̑тыѧ ꙗ҆́звы, ꙳ ꙗ҆̀же разбѡ́йницы наложи́ша мнѣ̀, ꙳ лꙋка́вствїѧ по́мыслы, ꙳ де́мѡнскими смꙋщє́нїи: ꙳ влⷣчце всенепоро́чнаѧ, ꙳ цѣли́телѧ дꙋ́шъ и҆ тѣле́съ ро́ждшаѧ, ꙳ и҆сцѣле́нїе ты́ ми пода́ждь си̑мъ, ꙳ и҆злива́ющи є҆ле́й милосе́рдїѧ твоегѡ̀ и҆ бла́гости, ꙳ къ благорастворе́нїю спасе́нїѧ и҆ здра́вїѧ.
Не скры́ю ѻ҆каѧ́нный лю́тыхъ мои́хъ, ꙳ ꙗ҆́кѡ всѧ̑ стѧжа́хъ, ꙗ҆́же ненави́дитъ бг҃ъ: ꙳ пло́ть ѡ҆скверни́хъ и҆ дꙋ́хъ мо́й, ꙳ и҆ ᲂу҆́мъ помышлє́нїи нечи́стыми, ꙳ и҆ дѣ́лы и҆ словесы̀ скве́рными: ꙳ ѧ҆зы́комъ ѡ҆сꙋжда́ю согрѣша́ющихъ, ꙳ са́мъ гѡ́ршаѧ содѣва́ю, бг҃ороди́тельнице: ꙳ всѣ́хъ мнѣ̀ си́хъ да́ждь и҆справле́нїе, ꙳ да, восклони́всѧ ѕла́гѡ моегѡ̀ ѻ҆бы́чаѧ, ꙳ припа́даю и҆ пла́чꙋсѧ, ꙳ ѡ҆ ни́хже ѕлѣ̀ содѣ́лахъ ꙳ въ жи́зни мое́й хожде́нїемъ.
Сла́ва, и҆ ны́нѣ, Подо́бенъ: то́йже.
Ꙗ҆́кѡ во глꙋбинꙋ̀ мно́гихъ согрѣше́нїй впадо́хъ ꙳ ѿ лѣ́ности моеѧ̀ ꙳ и҆ ᲂу҆ны́нїѧ ѻ҆каѧ́нный и҆ невѣ́дѣнїѧ, ꙳ и҆ ѿча́ѧнїемъ ны́нѣ ѡ҆держи́мь є҆́смь: ꙳ бꙋ́ди мѝ по́мощь и҆ ѡ҆чище́нїе, ꙳ и҆ спасе́нїе, пречⷭ҇таѧ, ꙳ и҆ ᲂу҆тѣше́нїе благопремѣ́ннѡ подаю́щи мѝ. ꙳ тѧ̀ молю̀, ꙳ и҆ тебѣ̀ ми́лсѧ дѣ́ю и҆ припа́даю, ꙳ и҆ вѣ́рою зовꙋ́ ти, ꙳ да не ꙗ҆влю́сѧ до конца̀ льсти́вомꙋ ѡ҆бра́дованїе.
Крⷭ҇тобг҃оро́диченъ, подо́бенъ то́йже:
Не рыда́й менѐ, мт҃и, ꙳ зрѧ́щи на дре́вѣ повѣ́шена твоегѡ̀ сн҃а и҆ бг҃а, ꙳ на вода́хъ повѣ́сившаго зе́млю неѡдержи́мѡ, ꙳ и҆ всю̀ тва́рь созда́вшаго: ꙳ и҆́бо воста́нꙋ и҆ просла́влюсѧ, ꙳ и҆ а҆́дѡва ца̑рствїѧ сокрꙋшꙋ̀ крѣ́постїю, ꙳ и҆ погꙋблю̀ тогѡ̀ си́лꙋ, ꙳ и҆ свѧ̑занныѧ и҆зба́влю ꙳ ѿ ѕлодѣ́йства є҆гѡ̀, ꙳ ꙗ҆́кѡ бл҃гоꙋтро́бенъ, ꙳ и҆ ѻ҆ц҃ꙋ̀ моемꙋ̀ приведꙋ̀, ꙳ ꙗ҆́кѡ чл҃вѣколю́бецъ.
На стїхо́внѣ ѻ҆ктѡ́иха. Тропа́рь, гла́съ в҃:
Прⷪ҇ро́ка твоегѡ̀ софо́нїи па́мѧть, гдⷭ҇и, пра́зднꙋюще: тѣ́мъ тѧ̀ мо́лимъ, спасѝ дꙋ́шы на́шѧ.
На ᲂу҆́трени канѡ́нъ, є҆гѡ́же краегране́сїе:
Софо́нїева мѧ̀ сла́ва да ᲂу҆ѧсни́тъ. Ѳеофа́ново:
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Тѧ̀ мо́лимъ, прⷪ҇ро́че, бж҃їю прⷭ҇то́лꙋ предстоѧ́ща моли́ти прилѣ́жнѡ, просвѣще́нїе дарова́ти на́мъ, вѣ́рою честнꙋ́ю пою́щымъ па́мѧть твою̀.
Ѻ҆рга́нъ бжⷭ҇твенный ꙗ҆ви́лсѧ є҆сѝ, вмѣща́ющь бжⷭ҇твеннагѡ дх҃а просвѣще́нїй и҆ дарѡ́въ, софо́нїе всемꙋ́дре: тѣ́мъ, ра́дꙋющесѧ, вѣ́рнїи тѧ̀ ᲂу҆блажа́емъ.
Бг҃оро́диченъ:
Свѣтлѣ́йшими зарѧ́ми всю̀ зе́млю возсїѧ́вшее сл҃нце и҆зъ ст҃а́гѡ чре́ва твоегѡ̀ ѡ҆зарѧ́етъ, влⷣчце: и҆́миже просвѣ́щшесѧ, тѧ̀ бж҃їю мт҃рь почита́емъ.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Всѧ̑ ви́дѧй, ꙗ҆́кѡ бг҃ъ, бꙋ́дꙋщихъ зна́нїе, и҆ хотѧ́щихъ бы́ти вѣ́дѣнїе тебѣ̀ ꙗ҆вле́ннѡ проѧвлѧ́етъ бг҃олѣ́пнѡ и҆ показꙋ́етъ, бл҃же́нне досточꙋ́дне.
Вжили́въ, бл҃же́нне, тво́й ᲂу҆́мъ благоче́стнымъ дерзнове́нїемъ, дх҃ꙋ бжⷭ҇твенномꙋ подклони́лъ є҆сѝ тебѐ, и҆ бы́лъ є҆сѝ прїѧ́тенъ та́мѡ сꙋ́щихъ бжⷭ҇твенныхъ вдохнове́нїй.
Бг҃оро́диченъ:
Сѐ, тебѐ всѝ ро́ди блажа́тъ вѣ́рою, безлѣ́тное сло́во пло́тїю въ лѣ́то ро́ждшꙋю преесте́ственнѡ и҆ дв҃ꙋ па́ки пребы́вшꙋю.
Сѣда́ленъ, гла́съ ѕ҃. Подо́бенъ: Милосе́рдїѧ двє́ри:
Ѡ҆чи́стивъ ѿ скве́рнъ ᲂу҆́мъ, всемꙋ́дре, зерца́ло бжⷭ҇твенное содѣ́лалъ є҆сѝ, лꙋ́чъ прїѧ́тно бжⷭ҇твеннагѡ дх҃а. и҆ ны́нѣ ко и҆сто́чникꙋ ра́дꙋѧсѧ ѿше́лъ є҆сѝ сїѧ́нїй, прⷪ҇ро́че софо́нїе.
Сла́ва, и҆ ны́нѣ, бг҃оро́диченъ:
Ѿ се́рдца стена́нїе и҆ ѿ ᲂу҆тро́бы приноша́ю тѝ, пренепоро́чнаѧ, твоѐ просѧ̀ благопребы́тное застꙋпле́нїе: поми́лꙋй всестра́стнꙋю мою̀ дꙋ́шꙋ. ᲂу҆ми́лостиви многоми́лостиваго бг҃а, и҆зба́вити мѧ̀ сꙋда̀ и҆ є҆́зера ѻ҆́гненнагѡ, є҆ди́на бл҃гослове́ннаѧ.
Крⷭ҇тобг҃оро́диченъ.
Тѧ̀ ро́ждшаѧ, хрⷭ҇тѐ, приснодв҃а ѻ҆трокови́ца, на крⷭ҇тѣ̀ зрѧ́щи, на́съ ра́ди вознесе́на, ᲂу҆ѧзвлѧ́ше своѐ печа́ли ѻ҆рꙋ́жїемъ се́рдце и҆ дꙋ́шꙋ, и҆ пла́каше, рыда́ющи мт҃рски: тоѧ̀ моли́твами поми́лꙋй ны̀, гдⷭ҇и ми́лостиве. (с. 21)
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Всѣ́хъ гдⷭ҇ь на́мъ ꙗ҆ви́сѧ по прⷪ҇ро́чествꙋ, бл҃же́нне, твоемꙋ̀, всѧ̑ призыва́ѧ къ позна́нїю своемꙋ̀, и҆ рабо́ты свободѝ.
Бл҃года́тїю ѡ҆зарѧ́емь, провозгласи́лъ є҆сѝ глаго́лѧ, подъ и҆́го є҆ди́но подкланѧ́ющымсѧ рабо́тати, послѣ́дꙋющымъ вѣ́рѣ и҆ гдⷭ҇ꙋ слꙋжа́щымъ.
Бг҃оро́диченъ:
Марі́е всечⷭ҇таѧ, страсте́й смꙋще́нїе моегѡ̀ по́мысла и҆ напа́стей бꙋ́рю разорѝ, безстра́стїѧ и҆сто́чникъ ро́ждши, мт҃и дв҃о.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Ѿ непра́вды къ добродѣ́тели, и҆ ѿ страсте́й плѣне́нїѧ мѧ̀, бл҃же́нне, ѡ҆братѝ твои́ми мольба́ми, прⷪ҇ро́че сла́вне, и҆ къ свѣ́тꙋ благоче́стїѧ дѣ́лъ ᲂу҆пра́ви.
Просвѣти́въ твою̀ дꙋ́шꙋ добродѣ́телей благоѻбра́зїѧми, ᲂу҆го́днꙋ показа́лъ є҆сѝ къ сїѧ́нїємъ бжⷭ҇твеннагѡ дх҃а, ѿ негѡ́же и҆ проро́чества бл҃года́тїю ѡ҆богати́лсѧ є҆сѝ.
Бг҃оро́диченъ:
Возглаша́ютъ проро́чєскаѧ речє́нїѧ, пречⷭ҇таѧ, мно́гими ѻ҆́бразы ржⷭ҇тво̀ твоѐ, и҆́хже мы̀ ны́нѣ сбытїѐ зрѧ́ще, и҆́стиннѡ бцⷣꙋ тѧ̀ возвѣща́емъ.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Прїе́мъ, сла́вне, дх҃а зари̑ ꙗ҆вле́нїемъ, ꙗ҆́кѡ зерца́ло проро́чєствїѧ бжⷭ҇твеннагѡ сїѧ́нїѧ, ѡ҆блиста́лъ є҆сѝ, ꙗ҆́кѡ сꙋ̑щаѧ, проро́чествꙋѧ бꙋ̑дꙋщаѧ.
Тво́й прїи́де цр҃ь, ра́дꙋйсѧ, сїѡ́не, и҆ красꙋ́йсѧ, ви́дѧ, (с.22) и҆ мі́ръ просвѣтѝ блиста́ньми своегѡ̀ бжⷭ҇тва̀, и҆ де́мѡнскꙋю ле́сть посрамѝ.
Бг҃оро́диченъ:
Пло́ти бре́ннѣй соедини́сѧ, и҆́же и҆зъ ѻ҆ц҃а̀ є҆диноро́дный въ ложесна́хъ твои́хъ, є҆ди́нъ и҆зъ двꙋ́хъ про́йде безъ тлѣ́нїѧ, соблю́дъ неврежде́нно чⷭ҇тое дѣ́вство твоѐ, всепѣ́таѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́лсѧ є҆сѝ свѣтоза́ренъ бжⷭ҇твеннымъ дх҃омъ, прⷪ҇ро́че софо́нїе, бж҃їе ꙗ҆вле́нїе возгласи́въ: ра́дꙋйсѧ ѕѣлѡ̀, дщѝ сїѡ́нѧ і҆ерꙋсали́мова, проповѣ́ждь: сѐ цр҃ь тво́й грѧде́тъ, спаса́ѧй.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Возсїѧ̀ па́мѧть твоѧ̀, прⷪ҇ро́че, мі́рꙋ, ꙗ҆́коже со́лнце, ѡ҆зарѧ́ющи проро́чества бл҃года́тїю твое́ю согла́снѡ пою́щыѧ вѣ́рнѡ: бл҃гослове́нъ є҆сѝ, бж҃е ѻ҆тє́цъ на́шихъ.
Тꙋ́чнѣйшїй ѻ҆́блакъ ты̀ ꙗ҆ви́всѧ, тꙋ́чꙋ бг҃оразꙋ́мїѧ на́мъ возсїѧ́лъ є҆сѝ ѿ спаси́тельныхъ, бл҃же́нне, и҆сто́чникѡвъ, и҆́миже просвѣща́емсѧ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Сло́во, дре́вле є҆́же бы́ти подаю́щее всѣ̑мъ бжⷭ҇твеннымъ хотѣ́нїемъ, воззва́ти восхотѣ́въ человѣ́ка, чⷭ҇таѧ, въ твою̀ всели́сѧ ᲂу҆тро́бꙋ, бл҃гослове́ннаѧ, ꙗ҆́же бг҃а пло́тїю ро́ждши.
Пѣ́снь и҃. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Возложе́нъ ве́сь вседержи́телю, промышле́нїѧ ѻ҆бразѡ́мъ тайнонаꙋчи́лсѧ є҆сѝ, строи́тельнѡ ꙗ҆зы́ки наказꙋ́ѧ. тѣ́мъ тѧ̀ пое́мъ прⷪ҇ро́че, бг҃оглаго́ливе.
Моле́бное пѣ́нїе бг҃ꙋ принесѝ ѡ҆ пою́щихъ тѧ̀, (с. 23) бг҃облаже́нне, и҆ напа́стей разорѝ смꙋще́нїе да тѧ̀ пое́мъ, прⷪ҇ро́че бг҃оглаго́ливе.
Бг҃оро́диченъ:
Жизнода́вца ро́ждши бг҃а и҆ гдⷭ҇и, сме́ртное гꙋби́тельство неꙋде́ржное ᲂу҆ста́вила є҆сѝ, пречⷭ҇таѧ, сїѐ ᲂу҆мертви́вши. тѣ́мъ тѧ̀ пое́мъ во всѧ̑ вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
На землѝ кро́ткихъ ты̀ всели́лсѧ є҆сѝ, и҆дѣ́же по кончи́нѣ а҆́гг҃льскїѧ зри́ши свѣ́тлѡсти, софо́нїе всемꙋ́дре, прⷪ҇ро́че бж҃їй, кро́токъ бы́въ, сїѧ́ѧ бл҃года́тїю. тѣ́мже ра́дꙋющесѧ вѣ́рнїи тѧ̀ ᲂу҆блажа́емъ.
Твои́хъ прорече́нїй, пресла́вне, свѣ́тлѡ ви́дѧще бы́вшее сбытїѐ, да́ннѣй тебѣ̀ бл҃года́ти чꙋди́мсѧ, и҆ ᲂу҆ма̀ твоегѡ̀ чистотѣ̀, и҆ дꙋшѝ бг҃ови́дномꙋ ᲂу҆дивлѧ́емсѧ.
Бг҃оро́диченъ:
Ꙗ҆́кѡ ты̀, никогда́же и҆́на дарова́сѧ ѿ родѡ́въ дре́внихъ, бг҃ома́ти всенепоро́чнаѧ: ты́ бо є҆ди́на всѣ́хъ несравне́ннꙋю и҆мѣ́ла є҆сѝ ст҃ы́ню и҆ чⷭ҇тотꙋ̀. тѣ́мже прїѧ́ла є҆сѝ бг҃а, въ тебѣ̀ воплоща́ема.
Свѣти́ленъ днѐ.
Слꙋ́жба прпⷣбнагѡ и҆гꙋ́мена са́ввы стороже́вскагѡ.
Ве́черъ, Блаже́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на ѕ҃, гла́съ ѕ҃. Поⷣ: Всѐ ѿло́жше:
Мі́ръ возненави́дѣвъ, ꙳ хрⷭ҇та̀ возлюби́лъ є҆сѝ. ꙳ сїѡ́на мы́сленнагѡ ꙳ жи́тель показа́лсѧ є҆сѝ. ꙳ наставле́нїемъ ᲂу҆ч҃телѧ твоегѡ̀, ꙳ соверше́ннагѡ послꙋша́нїѧ дости́глъ є҆сѝ, ꙳ и҆ мнѡ́гаѧ и҆скꙋшє́нїѧ претерпѣ́лъ є҆сѝ. ꙳ бжⷭ҇твеннымъ дх҃омъ себѐ воѡрꙋжи́въ, ꙳ къ боре́нїю льсти́вагѡ ꙳ ра́дꙋѧсѧ и҆зше́лъ є҆сѝ, ꙳ и҆ сего̀ побѣди́лъ є҆сѝ ꙳ си́лою и҆зъ дв҃ы возсїѧ́вшагѡ.
Ѿ ю҆́ности, прпⷣбне, ꙳ плотска̑ѧ мꙋдрова̑нїѧ ꙳ покори́лъ є҆сѝ дꙋ́хꙋ, ꙳ и҆ въ живоно́снꙋю ме́ртвость ѡ҆дѣ́ѧвсѧ, ꙳ свѣти́льникъ, блаже́нне, ꙳ ꙗ҆ви́лсѧ є҆сѝ пресвѣ́тлый. ꙳ бл҃года́тїю бжⷭ҇твеннагѡ дх҃а ꙳ и҆́стиненъ па́стырь показа́всѧ, ꙳ слове́сною, са́вво, цѣвни́цею, ꙳ собра́нное ста́до ѡ҆ хрⷭ҇тѣ̀ ꙳ до́брѣ ᲂу҆па́слъ є҆сѝ, ꙳ и҆ на па́жить дꙋхо́внꙋю возве́лъ є҆сѝ.
Зрѣ́ти жела́ѧ ꙳ мы́сленнꙋю свѣ́тлость, ꙳ бжⷭ҇твеннагѡ ѡ҆боже́нїѧ, ꙳ житїѐ возжелѣ́въ невеще́ственное, ꙳ мі́ръ ѡ҆ста́вилъ є҆сѝ: ꙳ пꙋсты́ню дости́глъ є҆сѝ, ꙳ и҆ слеза́ми сїю̀ напои́лъ є҆сѝ, ꙳ жела́нїе ᲂу҆лꙋчи́въ, ꙳ є҆́же ко влⷣцѣ твоемꙋ̀ предстоѧ́нїе. ꙳ и҆ ны́нѣ сщ҃еннолѣ́пнѡ предстои́ши, ꙳ со а҆́гг҃лы ликовствꙋ́ѧ.
Сла́ва, гла́съ то́йже. Самогла́сенъ:
Є҆́же по ѻ҆́бразꙋ соблю́дъ невреди́мо, ᲂу҆́мъ влады́кꙋ на стра̑сти па̑гꙋбныѧ по́стнически поста́вивъ, во є҆́же по подо́бїю ꙗ҆́кѡ мо́щно возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее: и҆ ны́нѣ на нб҃сѣ́хъ, зерца́лѡмъ разрѣ́шшымсѧ, ѻ҆́ч҃е на́шъ са́вво, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ, и҆ чтє́нїѧ г҃, пи̑саны сегѡ̀ мцⷭ҇а въ є҃ де́нь.
На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:
Бж҃їею си́лою ᲂу҆крѣплѧ́емь, ꙳ мы́сль свою̀ горѣ̀ возвыша́ѧ, ꙳ нбⷭ҇ное наслѣ́дїе, ѻ҆́ч҃е, прїѧ́лъ є҆сѝ, ꙳ и҆ на землѝ благоче́стнѡ сѡбра́ннаѧ твоеѧ̀ па́ствы ча̑да ᲂу҆па́слъ є҆сѝ, ꙳ до́блимъ твои́мъ нра́вомъ, ꙳ и҆ равноа́гг҃льнымъ житїе́мъ, ꙳ дх҃а свѣтлостьмѝ ст҃ы́ми ѡ҆сїѧ́емь, ꙳ ѡ҆ всѣ́хъ при́снѡ моли́сѧ, ꙳ творѧ́щихъ свѧще́ннꙋю па́мѧть твою̀.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Жела́ѧ ᲂу҆лꙋчи́ти нбⷭ҇нꙋю добро́тꙋ, ꙳ на землѝ, ꙗ҆́кѡ безпло́тенъ, ѻ҆́ч҃е, подвиза́лсѧ є҆сѝ: ꙳ и҆мѣ́ѧ посо́бїе непобѣди́мо, ꙳ си́лꙋ влⷣки твоегѡ̀, ꙳ надъ страстьмѝ воцр҃и́лсѧ є҆сѝ, ꙳ и҆ ны́нѣ вѣ́чномꙋ цр҃ю̀ предстои́ши. ꙳ є҆го́же молѝ, са́вво прпⷣбне, ꙳ спасти́сѧ дꙋша́мъ на́шымъ.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Житїѐ твоѐ благоче́стнѡ ꙳ добродѣ́тельми ᲂу҆кра́шено, ꙳ пра́вдою ꙗ҆́кѡ бжⷭ҇твеннымъ вѣнце́мъ вѣнча́всѧ, ꙳ влⷣчню прⷭ҇то́лꙋ предстои́ши, ꙳ со а҆́гг҃льскими ликꙋ́ѧ вѡ́инствы. ꙳ сегѡ̀ ра́ди тѧ̀ въ пѣ́снехъ почита́емъ, ꙳ са́вво прпⷣбне, ѻ҆́ч҃е на́шъ, ꙳ молѝ спасти́сѧ ста́дꙋ твоемꙋ̀ ꙳ ѿ всѣ́хъ и҆скꙋше́нїй.
Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ са́вво: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ, хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
Тропа́рь, гла́съ и҃:
Пꙋсты́ни ꙗ҆ви́лсѧ є҆сѝ до́брое прозѧбе́нїе, прпⷣбне: ѿ ю҆́ности бо и҆зво́лилъ є҆сѝ чи́стое житїѐ, дꙋхо́вномꙋ твоемꙋ̀ ᲂу҆чи́телю послѣ́дꙋѧ, и҆ тогѡ̀ ᲂу҆че́нїемъ ᲂу҆́мъ къ нбⷭ҇нымъ впери́въ, и҆ ста́дꙋ твоемꙋ̀ премꙋ́дръ наста́вникъ показа́лсѧ є҆сѝ. тѣ́мъ и҆ хрⷭ҇то́съ ꙗ҆́кѡ пресвѣ́тла тѧ̀ свѣти́льника чꙋдесы̀ ѡ҆богатѝ: са́вво, ѻ҆́ч҃е на́шъ, молѝ спасти́сѧ дꙋша́мъ на́шымъ.
На ᲂу҆́трени, по а҃-й стїхоло́гїи сѣда́ленъ, гла́съ д҃:
Зако́ннѡ ᲂу҆стро́ивъ твою̀ жи́знь, стра̑стнаѧ взыгра̑нїѧ до конца̀ ᲂу҆вѧди́лъ є҆сѝ, побѣ́ды вѣне́цъ ѿ бг҃а прїѧ́лъ є҆сѝ, са́вво, ѻ҆́ч҃е на́шъ, молѝ спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ.
Въ кро́въ тво́й, пречⷭ҇таѧ дв҃о, прибѣга́ющихъ, моли́твꙋ прїе́мши ѿ на́съ, не преста́й молѧ́щи чл҃вѣколю́бца, спасти́сѧ рабѡ́мъ твои̑мъ.
По в҃-й стїхосло́вїи сѣда́ленъ, гла́съ а҃:
Соверше́ннꙋю къ бг҃ꙋ любо́вь стѧжа́лъ є҆сѝ, ѻ҆́ч҃е, земна̑ѧ преѡби́дѣвъ, къ нбⷭ҇нымъ возше́лъ є҆сѝ, ра́дꙋѧсѧ: вѣнцено́сче преблаже́нне, молѝ хрⷭ҇та̀ бг҃а, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Оу҆пова́нїе хрⷭ҇тїа́нѡмъ, прест҃а́ѧ дв҃о, є҆го́же родила̀ є҆сѝ бг҃а па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀ вѣ́рою и҆ любо́вїю при́снѡ сла́вѧщымъ тѧ̀.
По полѷеле́и сѣда́ленъ, гла́съ и҃:
Влⷣцѣ хрⷭ҇тꙋ̀ во все́мъ, ѻ҆́ч҃е са́вво, ᲂу҆годи́лъ є҆сѝ, и҆́же своегѡ̀ црⷭ҇тва снаслѣ́дника тѧ̀ сотворѝ: и҆ по ст҃о́мъ преставле́нїи честны̑ѧ твоѧ̑ мо́щи и҆сточа́ютъ разли̑чнаѧ и҆сцѣлє́нїѧ. тѣ́мже вопїе́мъ тѝ: молѝ спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Ѿ всѧ́кагѡ преще́нїѧ и҆ ѡ҆ѕлобле́нїѧ человѣ̑къ спаси́ ны, прест҃а́ѧ дв҃о: тѧ́ бо и҆́мамы покро́въ и҆ застꙋпле́нїе прибѣга́ющїи къ тебѣ̀, бг҃ома́ти, и҆ рожде́ннаго и҆зъ тебє̀ бг҃а на́шего. є҆го́же молѝ и҆зба́витисѧ ѿ бѣ́дъ рабѡ́мъ твои̑мъ.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ в҃:
Прпⷣбне ѻ҆́ч҃е, и҆змла́да въ добродѣ́тели прилѣ́жнѡ ѡ҆бꙋчи́всѧ, ѻ҆рга́нъ бы́лъ є҆сѝ ст҃а́гѡ дх҃а, и҆ ѿ негѡ̀ прїе́мъ чꙋде́съ дѣ́йство, наꙋчи́лъ є҆сѝ человѣ́ки преѡби́дѣти сла̑дкаѧ. ны́нѣ же бжⷭ҇твеннымъ свѣ́томъ чистѣ́йше ѡ҆сїѧва́емь, просвѣтѝ и҆ на́шѧ мы̑сли, са́вво, ѻ҆́ч҃е на́шъ.
Канѡ́нѣ бцⷣѣ со і҆рмосо́мъ на ѕ҃. И҆ ст҃а́гѡ на и҃.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Наста́ви мѧ̀, гдⷭ҇и бж҃е мо́й, да возмогꙋ̀ благоче́стнѡ, ᲂу҆го́дника твоегѡ̀ прпⷣбнагѡ са́ввы сла́вное и҆ честно́е восхвали́ти торжество̀.
Мꙋ́жески подвиза́лсѧ є҆сѝ, и҆ зарю̀ дꙋхо́внꙋю воспрїе́мъ, взѧ́лсѧ є҆сѝ къ высотѣ̀ нбⷭ҇нѣй, и҆ ны́нѣ со а҆́гг҃лы прославлѧ́ешисѧ.
Ѻ҆рꙋ́жїемъ крⷭ҇та̀ ѡ҆гражда́ѧсѧ, прпⷣбне, всю̀ си́лꙋ проти́внагѡ побѣди́лъ є҆сѝ, и҆ до конца̀ сего̀ безъ вѣ́сти сотвори́лъ є҆сѝ.
Бг҃оро́диченъ:
Пресꙋ́щное сло́во, сꙋщество̀ на́ше прїе́мъ ѿ чи́стыхъ крове́й твои́хъ, бг҃осодѣ́ла на́съ, тлѣ́нїѧ и҆зба́вивъ, чⷭ҇таѧ: сегѡ̀ ра́ди тѧ̀ при́снѡ сла́вимъ.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Молча́нїемъ ѧ҆зы́къ ѡ҆бꙋзда́лъ є҆сѝ, и҆ немѧте́жнымъ житїе́мъ, во пло́ти а҆́гг҃льски, ѻ҆́ч҃е, пожи́лъ є҆сѝ.
Вои́стиннꙋ бл҃гі́ѧ жи́зни сподо́билсѧ є҆сѝ, прпⷣбне, чистото́ю и҆ поще́нїемъ сїю̀ ѡ҆брѣ́тъ. и҆ ны́нѣ со безпло́тными вопїе́ши: нѣ́сть ст҃ъ па́че тебє̀, гдⷭ҇и.
Трисїѧ́ннымъ свѣ́томъ ѡ҆заре́нъ, и҆ бл҃года́ть дх҃а ст҃а́гѡ всели́сѧ въ тѧ̀, прпⷣбне, возлю́бльши чи́стꙋю твою̀ дꙋ́шꙋ, и҆ непреста́ннѡ вопїе́ши: нѣ́сть ст҃ъ па́че тебє̀, гдⷭ҇и.
Бг҃оро́диченъ:
Разꙋмѣ́ти ржⷭ҇тва̀ твоегѡ̀, чⷭ҇таѧ, неизглаго́ланнꙋю глꙋбинꙋ̀, недоꙋмѣ́етъ ᲂу҆́мъ человѣ́чь: бг҃ъ бо, и҆стощи́въ себѐ за милосе́рдїе во ᲂу҆тро́бѣ твое́й, всего́ мѧ ѡ҆бновѝ.
Сѣда́ленъ, гла́съ д҃.
Мра́зъ нощны́й претерпѣ́лъ є҆сѝ, и҆ тѧготꙋ̀ ва́ра дневна́гѡ поне́слъ є҆сѝ, и҆ си́хъ ра́ди вѣ́чное наслажде́нїе и҆ пи́щꙋ присноживꙋ́щꙋю воспрїѧ́лъ є҆сѝ, хрⷭ҇то́въ ᲂу҆го́дниче бл҃же́нне са́вво: молѝ спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Чтⷭ҇аѧ, всенепоро́чнаѧ и҆ неискꙋсомꙋ́жнаѧ, ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то ро́ждши, сего̀ со ст҃ы́ми и҆ честны́ми патрїа̑рхи, мч҃ники, прⷪ҇рѡ́ки и҆ прпⷣбными молѝ, дарова́ти на́мъ ѡ҆чище́нїе и҆ ве́лїю ми́лость.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Безмѣ́рное смире́нїе возлюби́въ, своеѧ̀ мы́сли (с. 29) зри́тельное ѡ҆чи́стилъ є҆сѝ, и҆ ны́нѣ, въ ра́йскихъ селе́нїихъ водворѧ́ѧсѧ, вопїе́ши: сла́ва си́лѣ твое́й, гдⷭ҇и.
Сле́зными потѡ́ки, прпⷣбне, зе́млю се́рдца твоегѡ̀ напои́лъ є҆сѝ, предстоѧ̀ въ моли́твѣ неколе́бленъ, творцꙋ̀ всѣ́хъ взыва́лъ є҆сѝ: сла́ва си́лѣ твое́й, гдⷭ҇и.
Не забꙋ́ди ста́да твоегѡ̀, прпⷣбне, є҆́же мꙋ́дрѣ собра́лъ є҆сѝ и҆ въ жи́зни се́й ᲂу҆па́слъ є҆сѝ благоче́стнѡ: потщи́сѧ, ѻ҆́ч҃е на́шъ са́вво, ввестѝ во ѡ҆гра́дꙋ небе́снꙋю.
Бг҃оро́диченъ:
Чистоты̀ жили́ще, селе́нїе влⷣки всѣ́хъ, и҆ прⷪ҇ро́кѡвъ всѣ́хъ сбытїѐ, бг҃ора́дованнаѧ чⷭ҇таѧ, пою́щыѧ тѧ̀ ᲂу҆ще́дри.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Бо́дренными бдѣ̑нїи, бл҃же́нне, и҆ ча́стыми воздыха̑нїи, бл҃года́ть дх҃а возрастѐ въ тебѣ̀, ѻ҆́ч҃е, и҆ сла́вна тѧ̀, са́вво, показа̀.
Влⷣчне смире́нїе воспрїи́мъ, во́дꙋ почерпа́ѧ на ра́мѣхъ свои́хъ носи́ти и҆зво́лилъ є҆сѝ: нача́льника трꙋдополо́жна во все́мъ себѐ показа́лъ є҆сѝ.
Пребл҃же́нне, бг҃опрїѧ́тне ѻ҆́ч҃е на́шъ са́вво, непреста́ннѡ ста́до твоѐ вопїе́тъ тѝ: моли́твами твои́ми ко гдⷭ҇ꙋ спаси́ ны, мо́лимсѧ.
Бг҃оро́диченъ:
По рожде́нїи стра́шнѣмъ пребыла̀ є҆сѝ дв҃а, ꙗ҆́коже пре́жде. бг҃ъ бѣ̀ рожде́йсѧ, ᲂу҆строѧ́ѧй всѧ̑ во́лею, безневѣ́стнаѧ мр҃і́е бг҃облагода́тнаѧ.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Страда̑нїи пѡ́двигъ твои́хъ, пребл҃же́нне, кла́съ бжⷭ҇твенный возрасти́лъ є҆сѝ: и҆ пита́еши благоче́стнѡ восхвалѧ́ющыѧ тѧ̀, са́вво прпⷣбне, ѻ҆́ч҃е на́шъ.
Кнѧ́зѧ проше́нїе, ѻ҆́ч҃е, со тща́нїемъ и҆сполнѧ́ѧ, хра́мъ бг҃омт҃ре воздви́глъ є҆сѝ, въ не́мже пра́здничною ра́достїю мона́хѡвъ мно́жєства веселѧ́тсѧ, па́мѧть твою̀ прославлѧ́юще.
Ка́плѧми по́тѡвъ твои́хъ, прпⷣбне, врагѡ́въ ѡ҆полчє́нїѧ попра́лъ є҆сѝ, и҆ дости́глъ є҆сѝ а҆́гг҃льскїѧ невеще́ствєнныѧ ли́ки.
Бг҃оро́диченъ:
Всеблага́ѧ влⷣчце, ꙗ҆́же пребл҃га́го бг҃а пло́тїю ро́ждши, ѡ҆ѕло́бленное страстьмѝ моѐ се́рдце ѡ҆чи́сти, да вѣ́рою и҆ любо́вїю велича́ю тѧ̀.
Конда́къ, гла́съ в҃. Подо́бенъ: Вы́шнихъ и҆щѧ̀:
Гдⷭ҇нимъ жела́нїемъ распали́всѧ, стра̑сти плѡтскі́ѧ воздержа́нїемъ ѿтрѧ́съ, бжⷭ҇твеннагѡ свѣ́та незаходи́мое свѣти́ло ꙗ҆ви́лсѧ є҆сѝ, чꙋде́съ лꙋча́ми всѣ́хъ просвѣща́еши притека́ющихъ къ ра́цѣ моще́й твои́хъ, са́вво прпⷣбне, ѻ҆́ч҃е на́шъ.
І҆́косъ:
Всеси́льное дх҃а ст҃а́гѡ дѣ́йство бг҃ови́днѡ въ тѧ̀ всели́сѧ, и҆ бг҃олѣ́пными мановє́нїи благоте́чнѣ и҆ды́й къ горѣ̀, и҆дѣ́же хотѣ́лъ є҆сѝ ѻ҆би́тель воздви́гнꙋти, и҆ ꙗ҆́коже нбⷭ҇ный ра́й бл҃гово́нными насажде́нъ цвѣты̑, сїю̀ ѡ҆брѣ́тъ, всели́лсѧ є҆сѝ, и҆ хра́мъ бг҃ома́тере чꙋ́денъ воздви́глъ є҆сѝ, мона́хѡвъ мно́жество собра́лъ є҆сѝ, и҆ сїѧ̑ добродѣ́тельными дѣѧ̑нїи свѣ́тлѡ блиста́ющыѧ, воздержа̑нїи мꙋ́дрѡстнаѧ воѡбра́жь. и҆ ны́нѣ, въ па́мѧть твою̀ соше́дшесѧ, вопїе́мъ тѝ: молѝ ѡ҆ на́съ, са́вво прпⷣбне, ѻ҆́ч҃е на́шъ.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Пꙋчи́ною сле́зъ твои́хъ, пребога́те, ѕлонача́льнаго ѕмі́ѧ потопи́лъ є҆сѝ, ꙗ҆́кѡ побѣдоно́сецъ и҆зрѧ́денъ къ нбⷭ҇нымъ возлетѣ́лъ є҆сѝ, непреста́ннѡ вопїе́ши: бл҃гослове́нъ бг҃ъ ѻ҆тє́цъ на́шихъ.
Житїѐ неѕло́биво и҆мѣ́лъ є҆сѝ, и҆ непоро́чно, и҆ ᲂу҆кра́шено пѡ́ты страда́нїѧ, прехва́льне, бжⷭ҇твеннагѡ свѣтоли́тїѧ и҆спо́лнивсѧ, взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Хва́литсѧ, прпⷣбне, гра́дъ тво́й, ꙗ҆́кѡ вѣнце́мъ ца́рскимъ ѡ҆бложи́сѧ, и҆мѣ́ѧ мо́щи твоѧ̑ въ себѣ̀, ꙗ҆́кѡ добра̀ граждани́на ѿ бг҃а прїѧ́лъ є҆́сть.
Бг҃оро́диченъ:
Препѣ́таѧ дв҃о, препѣ́таго бг҃а ро́ждшаѧ, пою́щыѧ тѧ̀ прича́стники покажѝ свѣ́та, и҆ и҆зба́ви гее́нны ѻ҆гнѧ̀, и҆ всѧ́кагѡ вре́да вра́жїѧ моли́твами твои́ми.
Пѣ́снь и҃. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Мꙋдрова́нїе плотско́е ᲂу҆мертви́лъ є҆сѝ, че́сти и҆ и҆мѣ́нїѧ совле́клсѧ є҆сѝ, ѿ землѝ къ нбⷭ҇нымъ взы́ти тща́сѧ, и҆ всѧ̑ пѣ́ти наꙋча́ѧ: гдⷭ҇а по́йте, и҆ превозноси́те є҆го̀ во вѣ́ки.
Се́рдца твоегѡ̀ бразды̑, ѻ҆́ч҃е са́вво, мꙋ́дрѣ воздѣ́лалъ є҆сѝ, сле́зными тꙋ́чами сїѧ̑ напои́лъ є҆сѝ, и҆ благоꙋха́нно мѵ́ро прине́слсѧ є҆сѝ хрⷭ҇тꙋ̀, є҆мꙋ́же вопїе́ши: гдⷭ҇а по́йте, и҆ превозноси́те є҆го̀ во вѣ́ки.
Хрⷭ҇тꙋ̀ приносѧ̀, бл҃же́нне, пощє́нїѧ и҆ сле́зы, и҆ непоро́чнꙋю моли́твꙋ, ри́знꙋю лѣ́потꙋ, и҆ мѧ̑гкїѧ ѻ҆дє́жды власѧны́ми рꙋ̑бы премѣни́лъ є҆сѝ, си́мъ показꙋ́ѧ глꙋбоча́йшее смире́нїе.
Бг҃оро́диченъ:
И҆зба́вльшесѧ пе́рвыѧ клѧ́твы ржⷭ҇тво́мъ твои́мъ, всебл҃гослове́ннаѧ ѻ҆трокови́це бг҃ора́дованнаѧ, гаврїи́ловъ тебѣ̀ гла́съ возсыла́емъ: ра́дꙋйсѧ, вино́внаѧ всѣ́хъ спасе́нїѧ.
Пѣ́снь ѳ҃. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Ви́дѣти сла́вꙋ вседержи́телѧ жела́ѧ, ѡ҆бнови́лъ є҆сѝ дꙋшѝ крѣ́пость, и҆ сла́вою ѡ҆богати́лсѧ є҆сѝ нбⷭ҇ною.
Честно́е ᲂу҆краше́нїе бл҃года́ти, ѻ҆́ч҃е прпⷣбне са́вво, и҆спросѝ на́мъ во бранѣ́хъ крѣ́пость, и҆ здра́вїе тѣлесѐ: ꙗ҆́кѡ да непреста́ннѡ тѧ̀ велича́емъ.
Чи́ни а҆́гг҃льстїи тебѐ, ѻ҆́ч҃е, срѣто́ша, и҆ пра́ведныхъ собо́ри возвесели́шасѧ, и҆ ѿ вседержи́тельныѧ десни́цы влⷣчни вѣнча́лсѧ є҆сѝ. тѣ́мже тѧ̀ досто́йнѡ велича́емъ.
Бг҃оро́диченъ:
Свѣ́томъ твои́мъ мѧ̀, бг҃ора́дованнаѧ въ жена́хъ дв҃о, просвѣтѝ, молю́сѧ, и҆ ѻ҆гнѧ̀ вѣ́чнагѡ и҆зба́ви мѧ̀: ꙗ҆́кѡ да велича́ю тѧ̀, и҆ по до́лгꙋ да воспою̀ вели̑чїѧ твоѧ̑.
Свѣти́ленъ:
По́мысломъ лꙋ́чшимъ стра̑сти ᲂу҆держа́въ, и҆ де́мѡнѡвъ свирѣ̑пства низложи́лъ є҆сѝ. и҆ ны́нѣ со дерзнове́нїемъ предстоѧ̀ хрⷭ҇тꙋ̀, моли́сѧ ѡ҆ ста́дѣ твое́мъ, ѻ҆́ч҃е на́шъ.
Бг҃оро́диченъ:
По бз҃ѣ на тѧ̀ ᲂу҆пова́емъ, пречⷭ҇таѧ, и҆зъ тебє̀ проше́дшемꙋ сраспина́еми хрⷭ҇тꙋ̀, твои́ми, къ немꙋ̀ мольба́ми неврежде́нны до конца̀ ны̀ сохранѝ.
На хвали́техъ стїхи̑ры на д҃, гла́съ и҃. Самогла́сны:
Бжⷭ҇твенною си́лою ѡ҆дѣ́ѧвсѧ, ᲂу҆мертви́лъ є҆сѝ себѐ мі́рови: житїѐ непоро́чно пожи́въ, пресла́вне, є҆диножи́тель се́ргїа бжⷭ҇твеннагѡ бы́лъ є҆сѝ.
Чистоты̀ сосꙋ́дъ показа́всѧ, и҆сцѣле́нїй зари̑ ѡ҆блиста́лъ є҆сѝ, по́стникѡвъ ᲂу҆добре́нїе, мона́шествꙋющихъ похвала̀, са́вво прпⷣбне, ѻ҆́ч҃е на́шъ.
Оу҆мертви́въ себѐ мі́рꙋ, жи́знь равноа́гг҃льнꙋ на землѝ пожи́лъ є҆сѝ, и҆ ꙗ҆́кѡ да́ръ ѡ҆свѧще́нъ влⷣцѣ, прпⷣбне, твою̀ дꙋ́шꙋ са́вво, прине́слъ є҆сѝ, и҆сцѣле́нїй зари̑ ѡ҆блиста́лъ є҆сѝ, и҆ бжⷭ҇твеннагѡ црⷭ҇твїѧ досто́йнѡ полꙋчи́лъ є҆сѝ. молѝ спасти́сѧ дꙋша́мъ на́шымъ.
Свѣ́тлое и҆ бг҃оꙋго́дное житїѐ твоѐ, ꙗ҆́кѡ свѣ́тъ вои́стиннꙋ на землѝ показа́сѧ, бжⷭ҇твеннꙋю ви́дѣти свѣ́тлость, са́вво, сподо́билсѧ є҆сѝ. тѣ́мже и҆ ви̑димаѧ всѧ̑ ѡ҆ста́вилъ є҆сѝ, и҆ непостижи́маго зрѣ́ти сподо́билсѧ є҆сѝ, є҆го́же молѝ, прпⷣбне, спасти́сѧ дꙋша́мъ на́шымъ.
Сла́ва, гла́съ ѕ҃:
Прпⷣбне ѻ҆́ч҃е са́вво, во всю̀ зе́млю и҆зы́де вѣща́нїе и҆справле́нїй твои́хъ: тѣ́мже на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ разори́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. дерзнове́нїе и҆мѣ́ѧ ко гдⷭ҇ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое, и҆ ѿпꙋ́стъ. На лїтꙋргі́и: Бл҃жє́нна, пѣ́снь г҃ и҆ ѕ҃-ѧ. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. А҆пⷭ҇лъ къ гала́тѡмъ, зача́ло сг҃і. Є҆ѵⷢ҇лїе матѳе́а зача́ло і҃. Прича́стенъ: Въ па́мѧть вѣ́чнꙋю.