Мѣ́сѧца тогѡ́же въ л҃-й де́нь. Слꙋ́жба ст҃и́телю мака́рїю, митрополі́тꙋ моско́вскомꙋ и҆ всеѧ̀ рꙋсѝ чꙋдотво́рцꙋ.

На вели́цѣй вече́рни.

На Гдⷭ҇и воззва́хъ, стїхи̑ры пра́здника, и҆ ст҃а́гѡ, гла́съ а҃.

Подо́бенъ: Нбⷭ҇ныхъ чинѡ́въ:

Бл҃же́нства вои́стиннꙋ ст҃ы́хъ, и҆́хже просла́вилъ є҆сѝ, ѻ҆́тче ст҃и́телю мака́рїе, дости́глъ є҆сѝ во црⷭ҇твїи нбⷭ҇нѣмъ, и҆дѣ́же ны́нѣ ра́дꙋѧсѧ, моли́сѧ ѡ҆ сп҃се́нїи дꙋ́шъ на́шихъ.

Бл҃же́нства и҆ ча́сти пра́ведныхъ, съ ни́миже сочета́лсѧ є҆сѝ, ѻ҆́тче ст҃и́телю мака́рїе, вкꙋси́лъ є҆сѝ во црⷭ҇твїи нбⷭ҇нѣмъ, и҆дѣ́же ны́нѣ насыща́ѧсѧ, моли́сѧ ѡ҆ сп҃се́нїи дꙋ́шъ на́шихъ.

Бл҃жє́нства є҆ѵⷢ҇льскаѧ, и҆́хже на землѝ проповѣ́далъ є҆сѝ, ѻ҆́тче ст҃и́телю мака́рїе, ѡ҆брѣ́лъ є҆сѝ вои́стиннꙋ на нб҃сѝ, и҆дѣ́же ны́нѣ мздо́ю веселѧ́сѧ, моли́сѧ ѡ҆ сп҃се́нїи дꙋ́шъ на́шихъ.

Бл҃же́нство тезоимени́тое, є҆го́же въ житїѝ возжелѣ́лъ є҆сѝ, ѻ҆́тче ст҃и́телю мака́рїе, стѧжа́лъ є҆сѝ въ жи́зни вѣ́чнѣй, и҆дѣ́же ны́нѣ поко́ѧсѧ, моли́сѧ ѡ҆ сп҃се́нїи дꙋ́шъ на́шихъ.

Сла́ва, гла́съ и҃:

Бл҃же́нный миротво́рецъ въ странѣ̀ рѡссі́йстѣй бы́лъ є҆сѝ, ѻ҆́тче ст҃и́телю мака́рїе, сегѡ̀ ра́ди сн҃ъ бж҃їй досто́инъ є҆сѝ нарещи́сѧ на нб҃сѝ, и҆дѣ́же ны́нѣ во сла́вѣ пребыва́еши, моли́сѧ при́снѡ ѡ҆ сп҃се́нїи дꙋ́шъ на́шихъ.

И҆ ны́нѣ, пра́здника.

Вхо́дъ. Прокі́менъ днѐ. Чтє́нїѧ трѝ ст҃и́тєльскаѧ, пи̑сана на ѡ҆боро́тѣ листа̀ л҃є.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

До́ме дх҃а ст҃а́гѡ и҆ црⷭ҇твїѧ наслѣ́дниче, бл҃же́нства дости́глъ є҆сѝ, ст҃е мака́рїе, моли́сѧ ѡ҆ при́снѡ сла́вѧщихъ тѧ̀.

Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Бл҃же́нне и҆ чꙋ́дне, мꙋ́жꙋ жела́нїй гдⷭ҇нихъ и҆ за́повѣдей є҆гѡ̀ ревни́телю, ст҃е мака́рїе, моли́сѧ ѡ҆ при́снѡ воспѣва́ющихъ тѧ̀.

Сті́хъ: Препоѧсꙋ́ѧсѧ ѻ҆рꙋ́жїемъ твои́мъ, и҆ налѧцы̀, и҆ ᲂу҆спѣва́й, и҆ црⷭ҇твꙋй и҆́стины ра́ди, кро́тости и҆ пра́вды.

Же́зле милосе́рдїѧ, па́лице бл҃года́ти, ᲂу҆го́дниче хрⷭ҇то́въ, па́стырю и҆́стиненъ. моли́сѧ ѡ҆ при́снѡ блажа́щихъ тѧ̀.

Сла́ва, гла́съ и҆ подо́бенъ то́йже:

Собо́ръ ст҃ы́хъ рꙋ́сскихъ, и҆́же тща́нїемъ твои́мъ, ст҃и́телю, ди́внѡ просла́вленъ бы́сть, съ весе́лїемъ вопїе́тъ тѝ: ра́дꙋйсѧ, мака́рїе, бл҃же́нствꙋ тезоимени́тый.

И҆ ны́нѣ, пра́здника.

Тропа́рь, гла́съ д҃:

Ꙗ҆́кѡ вели̑кимъ па́стырємъ є҆динонра́вна и҆ ᲂу҆чи́телємъ вселе́нныѧ є҆диномы́сленна, бж҃їѧ премꙋ́дрости слꙋжи́телѧ и҆зрѧ́дна, и҆́же бл҃же́нствꙋ тезоимени́тꙋ, дне́сь вѣ́рнїи всѝ воспои́мъ: хрⷭ҇та̀ бг҃а молѝ, ст҃и́телю мака́рїе. ᲂу҆мири́ти мі́ръ и҆ сп҃стѝ дꙋ́шы на́шѧ.

На ᲂу҆́трени.

На Бг҃ъ гдⷭ҇ь, тропа́рь пра́здника, два́жды, сла́ва, ст҃а́гѡ, и҆ ны́нѣ, пра́здника.

По а҃-мъ стїхосло́вїи сѣда́ленъ, гла́съ д҃. Подо́бенъ: Вознесы́йсѧ:

Дне́сь ст҃и́телѧ хрⷭ҇то́ва мака́рїа пречестна́ѧ па́мѧть свѣ́тлѡ возсїѧ̀ на́мъ. сїѧ́нїемъ кни́жныхъ списа́нїй просвѣти́лъ є҆́сть вѣ́рныхъ собо́ры и҆ ны́нѣ мо́литъ хрⷭ҇та̀ бг҃а дарова́ти на́мъ и҆́стинное вѣ́дѣнїе є҆гѡ̀ бжⷭ҇твенныхъ за́повѣдей.

Сла́ва, и҆ ны́нѣ, пра́здника.

По полѷеле́и сѣда́ленъ, гла́съ и҃.

Подо́бенъ: Повелѣ́нное та́йнѡ:

Ꙗ҆́кѡ со́лнце пресвѣ́тлое, возсїѧ́лъ є҆сѝ рꙋ́сстѣй землѝ добродѣ́тельми твои́ми и҆ непоро́чнымъ житїе́мъ, ѿгонѧ́ѧ страсте́й ѡ҆мрачє́нїѧ, ѻ҆́тче ст҃и́телю хрⷭ҇то́въ. сегѡ̀ ра́ди вопїе́мъ тѝ: ра́дꙋйсѧ, бл҃же́нне мака́рїе, похвало̀ цр҃кве хрⷭ҇то́вы и҆ вели́кїй чꙋдотво́рче.

Сла́ва, и҆ ны́нѣ, бг҃оро́диченъ:

Ты̀ є҆сѝ бж҃е́ственнаѧ сѣ́нь сло́ва, є҆ди́на пречⷭ҇таѧ бг҃ома́ти, чⷭ҇тото́ю а҆́гг҃лы превозше́дшаѧ, ѡ҆чи́сти на́съ ѿ грѣхѡ́въ и҆ всѧ́кїѧ скве́рны, бг҃оневѣ́стнаѧ.

Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе ѿ і҆ѡа́нна, зача́ло л҃ѕ.

По н҃-мъ ѱалмѣ̀ стїхи́ра, гла́съ ѕ҃:

Є҆гда̀ въ нощѝ молѧ́шесѧ пречꙋ́дный мака́рїй, тогда̀ со тре́пѣтомъ зрѧ́ше видѣ́нїе стра́шное, и҆ ᲂу҆́жасомъ ѡ҆держи́мь, сле́зы и҆сточа́ѧ, вопїѧ́ше: ѽ гдⷭ҇и, ка́кѡ мнѣ̀ ви́дѣти сїѐ: грѧде́тъ нече́стїе, кро́ве проли́тїе и҆ раздѣле́нїе землѝ рꙋ́сскїѧ, но, ѽ і҆и҃се, молю́сѧ прилѣ́жнѡ, пощадѝ, и҆ а҆́ще не поми́лꙋеши, не да́ждь мнѣ̀ ви́дѣти сїѐ.

Канѡ́нъ ст҃и́телѧ, гла́съ д҃.

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Вели́кїй цр҃ю̀, содѣ́телю всѣ́хъ, ѡ҆чи́сти бл҃гоꙋтро́бїемъ дꙋ́шꙋ мою̀ и҆ ѿженѝ страсте́й ѡ҆мрачє́нїѧ, да возвели́чꙋ, сп҃се, ᲂу҆го́дника твоего̀, ст҃и́телѧ мака́рїа.

Пра́вды бж҃їѧ взыскꙋ́ѧ, и҆змла́да хрⷭ҇тꙋ̀ послѣ́дꙋѧ, ѻ҆би́тели прпⷣбнагѡ пафнꙋ́тїа дости́глъ є҆сѝ, ст҃е мака́рїе, и҆дѣ́же мнѡ́гаѧ лѣ̑та во ᲂу҆ста́вѣ пребы́въ, житїѐ жесто́кое и҆ благо́е вкꙋси́лъ є҆сѝ.

Лѣ́ствицею добродѣ́телей на нб҃са̀ возше́лъ є҆сѝ, тѣ́мъ и҆ хрⷭ҇то́съ тѧ̀, ст҃и́телю, є҆щѐ на землѝ сꙋ́ща, въ мѣ́рꙋ во́зраста приведѐ и҆ ѻ҆би́тели можа́йскїѧ наста́вника поста́ви.

Бг҃оро́диченъ:

Ни́во дꙋхо́внаѧ, ꙗ҆́коже и҆з̾ бразды̀ кла́съ, и҆знесла̀ є҆сѝ всю̀ тва́рь пита́ющаго всѧ́чески, приснодв҃о.

Катава́сїа: Хрⷭ҇то́съ ражда́етсѧ:

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Є҆ди́нымъ по́мысломъ къ бг҃ꙋ ᲂу҆стреми́всѧ, во ѻ҆би́телехъ прпⷣбныхъ пафнꙋ́тїа и҆ ѳерапо́нта пребы́лъ є҆сѝ во всѧ́цѣмъ воздержа́нїи, ѿѻнꙋ́дꙋже ко ст҃и́тельствꙋ бг҃омъ призва́нъ бы́въ, мака́рїе досточꙋ́дне.

Ст҃ы́ѧ цр҃кве нова́града па́стырь и҆ ᲂу҆чи́тель бы́лъ є҆сѝ, хра́мы ᲂу҆краша́ѧ и҆ дꙋхо́вною добро́тою лю́ди и҆сполнѧ́ѧ, предѣ́лы нова́града свѣ́томъ хрⷭ҇то́вы вѣ́ры просвѣща́ѧ, бл҃же́нне ѻ҆́тче мака́рїе.

Писа̑нїѧ ѻ҆тє́ческаѧ возлюби́лъ є҆сѝ. бл҃же́нне ст҃и́телю, и҆ цр҃ковь премꙋ́дрости бж҃їѧ сщ҃е́нными лѣ́потами преꙋкраси́лъ є҆сѝ, возвели́чивъ ю҆̀ ᲂу҆че́нїемъ бг҃огла́снымъ.

Бг҃оро́диченъ:

Ме́ртвости и҆ тлѝ и҆зба́висѧ ро́дъ человѣ́чь, є҆стество́мъ бо жизнода́вца безсѣ́меннѡ родила̀ є҆сѝ, дв҃о всенепоро́чнаѧ, во сп҃се́нїе восхвалѧ́ющихъ тѧ̀ вѣ́рнѡ.

Катава́сїа: Пре́жде вѣ̑къ:

Сѣда́ленъ, гла́съ а҃:

Наста́вника и҆́ночествꙋющихъ, пафнꙋ́тїа прпⷣбнаго, блажи́тъ гра́дъ бо́ровскъ, сла́витъ можа́йскъ ѳерапо́нта бл҃же́ннаго, но́вградъ восхвалѧ́етъ а҆леѯа́ндра сви́рскаго со і҆ѡ́ною ст҃и́телемъ, славосло́витъ сла́внѣйшїй гра́дъ москва̀ первопресто́льника і҆ѡ́нꙋ со и҆ны́ми чꙋдотво́рцы, ты́ же ѿ всѣ́хъ си́хъ вкꙋ́пѣ славосло́вїе прїе́млеши, мака́рїе чꙋ́дне.

Сла́ва, и҆ ны́нѣ:

Патрїа́рхъ і҆а́кѡвъ, ꙗ҆́снѡ прови́дѣвъ, сп҃се, вєли́чїѧ строе́нїѧ твоегѡ̀, вопїѧ́ше дꙋ́хомъ ко і҆ꙋ́дѣ, глаго́лѧ та́йнѡ: ѿ лѣ́торасли возше́лъ є҆сѝ, сн҃е мо́й, возвѣща́ѧ тѧ̀ ѿ дв҃ы бг҃а.

Пѣ́снь д҃.

І҆рмо́съ: Любвѐ ра́ди, ще́дре, твоегѡ̀ ѻ҆́браза на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Трⷪ҇цꙋ, ѻ҆ц҃а̀, сн҃а и҆ ст҃а́го дх҃а, а҆пⷭ҇тольски проповѣ́дати повелѣ́лъ є҆сѝ, непросвѣще́ннꙋю ло́пь и҆ и҆ны̑ѧ сѣ́вєрныѧ ꙗ҆зы́ки ко хрⷭ҇тꙋ̀ приве́лъ є҆сѝ, низверга́ѧ бѣсѡ́вскаѧ трє́бища, и҆ на́съ просвѣтѝ, ст҃и́телю, свѣ́томъ и҆́стиннагѡ позна́нїѧ.

И҆́мѧ твоѐ, вели́кїѧ добродѣ́тели ра́ди, всю́дꙋ проповѣ́дано бы́сть, ꙗ҆́кѡ и҆з̾ са́мыѧ ст҃ы́ѧ землѝ, и҆дѣ́же гдⷭ҇ь на́шъ пло́тїю ра́спѧтъ бы́сть, сщ҃є́нныѧ да́ры прїѧ́ти сподо́билсѧ є҆сѝ, на́мъ же молѝ, ѻ҆́тче мака́рїе, нбⷭ҇нагѡ і҆ерⷭ҇ли́ма дости́гнꙋти.

А҆рхїпа́стырски трꙋди́всѧ, бж҃їимъ про́мысломъ прее́мникъ и҆ наслѣ́дникъ моско́вскихъ ст҃и́телей бы́ти сподо́билсѧ є҆сѝ, и҆дѣ́же чꙋ́дными добродѣ́тельми ᲂу҆краси́лсѧ є҆сѝ.

Бг҃оро́диченъ:

А҆да́мъ свободи́сѧ, и҆ є҆́ѵа ликꙋ́етъ, и҆ вопїю́тъ дꙋ́хомъ къ тебѣ̀, бг҃оро́дице: тобо́ю и҆зба́вихомсѧ перворо́дныѧ клѧ́твы, ꙗ҆́вльшꙋсѧ хрⷭ҇тꙋ̀.

Катава́сїа: Же́злъ и҆з̾ ко́рене і҆ессе́ова:

Пѣ́снь є҃.

І҆рмо́съ: Ты̀, гдⷭ҇и, мо́й свѣ́тъ, въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.

Моско́вскагѡ престо́ла ᲂу҆краше́нїе ди́вное бы́лъ є҆сѝ, ст҃и́телю, тѣ́мже и҆ лю́дїе всѝ чꙋ́дна нареко́ша тѧ̀, съ ни́миже и҆ мы̀ ны́нѣ пра́зднꙋюще па́мѧть твою̀, согла́снѡ тѧ̀ велича́емъ.

И҆́же добро́тѣ цр҃ко́внѣй поревнова́въ, вєли́кїѧ и҆ ди̑вныѧ собо́ры созва́лъ є҆сѝ, и҆́миже нѡ́вымъ чꙋдотво́рцємъ землѝ рѡссі́йскїѧ пра́зднованїе ᲂу҆тверди́сѧ, и҆ та́кѡ цр҃ковь рꙋ́сскаѧ просїѧ̀ пѡ́двиги ча̑дъ свои́хъ, ꙗ҆́коже пе́рлы драгоцѣ́нными.

Всеѧ̀ землѝ рꙋ́сскїѧ благоче́стїе пости́глъ є҆сѝ, ѻ҆́тче мака́рїе, мꙋчениколю́бче преизрѧ́дне, ꙗ҆́кѡ пчела̀, ѿовсю́дꙋ дꙋхо́вное сокро́вище собра́въ, и҆ ꙗ҆́кѡ же́ртвꙋ благопрїѧ́тнꙋю на свѣ́щницѣ цр҃ко́внѣй возже́глъ є҆сѝ.

Бг҃оро́диченъ:

Рꙋно̀ ѡ҆роше́нное, дв҃о, пла́мень грѣхѡ́въ мои́хъ ᲂу҆гасѝ, кꙋпино̀ неѡпали́маѧ, страсте́й мои́хъ те́рнїе (с. 668) попалѝ, подаю́щи мѝ на водѣ̀ ᲂу҆покое́нїѧ жи́ти, и҆ гее́нскагѡ мѧ̀ ѻ҆гнѧ̀ свободѝ.

Катава́сїа: Бг҃ъ сы́й ми́ра:

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ ра́ди млⷭ҇ти ѿ ре́бръ твои́хъ и҆сте́кшею кро́вїю.

Си́мъ же ѻ҆́бразомъ, ꙗ҆́кѡ ст҃і́и ди́внѡ просла́влени бы́ша, си́це ре́вностнѡ потща́лсѧ є҆сѝ. ст҃и́телю, собесѣ́дникъ благочести́выхъ мꙋже́й бы́ти, ѻ҆́выхъ ᲂу҆́бѡ ѻ҆би́тєли стро́ити благослови́вый, ѡ҆́вымъ потрє́бнаѧ подава́ѧ, и҆ны́хъ же хрⷭ҇та̀ проповѣ́дати посыла́ѧ, бл҃же́ннаго же васі́лїа моско́вскаго свои́ма рꙋка́ма погребстѝ сподо́бивыйсѧ, съ ни́миже молѝ сп҃сти́сѧ дꙋша́мъ на́шымъ.

Всѣ̑мъ ѻ҆́бразъ вѣ́ры и҆ воздержа́нїѧ ꙗ҆ви́лсѧ є҆сѝ, ѡ҆ ста́дѣ хрⷭ҇то́вѣ попече́нїе нелѣ́ностное и҆мѣ́ѧ, моско́вскагѡ первопресто́льнагѡ гра́да и҆ всеѧ̀ рѡссі́йскїѧ землѝ ᲂу҆твержде́нїе, мака́рїе бг҃олюби́ве, молѝ сп҃сти́сѧ дꙋша́мъ на́шымъ.

Трⷪ҇цкїѧ ѻ҆би́тели настоѧ́телѧ высо́кимъ са́номъ почти́лъ є҆сѝ, поста́вивъ ю҆̀ превы́шѣ всѣ́хъ, тѣ́мже любо́вь къ се́ргїю прпⷣбномꙋ показꙋ́ѧ и҆ грѧдꙋ̑щаѧ ст҃ы́ѧ ѻ҆би́тели предначертава́ѧ. мы́ же, ст҃и́телю, дивѧ́щесѧ твое́й премꙋ́дрости, взыва́емъ: молѝ сп҃сти́сѧ дꙋша́мъ на́шымъ.

Бг҃оро́диченъ:

Лѣ́ствице нбⷭ҇наѧ и҆ голꙋби́це неземна́ѧ, всѝ ро́ди вѣ́рныхъ согла́снѡ тѧ̀ ᲂу҆блажа́ютъ, ꙗ҆́кѡ бг҃оневѣ́стнꙋю мт҃рь хрⷭ҇та̀ бг҃а на́шегѡ.

Катава́сїа: И҆з̾ ᲂу҆тро́бы і҆ѡ́нꙋ:

Конда́къ, гла́съ г҃:

Бг҃омꙋ́дрымъ ᲂу҆че́нїемъ и҆ кни́жнымъ списа́нїемъ потща́лсѧ є҆сѝ. ст҃и́телю мака́рїе, лю́ди рѡссі̑йскїѧ просвѣти́ти и҆ ст҃ы́хъ землѝ на́шеѧ просла́вити. сегѡ̀ ра́ди чꙋ́денъ пронарече́сѧ, прее́мниче первопресто́льникѡвъ рѡссі́йскихъ, молѝ сохрани́тисѧ на́мъ въ вѣ́рѣ и҆ благоче́стїи невреди́мѡ.

І҆́косъ:

Па́ѵловꙋ словесѝ поревнова́въ, ст҃и́телю мака́рїе, пѣ́сньми почти́лъ є҆сѝ рѡссі́йскихъ па́стырей, ᲂу҆чи́телей и҆ наста́вникѡвъ, приснобдѧ́щихъ пред̾ прⷭ҇то́ломъ нбⷭ҇нагѡ цр҃ѧ̀ ѡ҆ на́шемъ ѻ҆те́чествѣ, съ ни́миже ра́дꙋѧсѧ ны́нѣ, молѝ хрⷭ҇та̀ бг҃а сохрани́тисѧ на́мъ въ вѣ́рѣ и҆ благоче́стїи невреди́мѡ.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ, ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Врє́днаѧ и҆ па̑гꙋбнаѧ є҆реті́ческихъ шата́нїй собо́рнѣ ѡ҆сꙋди́лъ є҆сѝ, ст҃и́телю хрⷭ҇то́въ, всѣ́хъ же правосла́вныхъ въ вѣ́рѣ въ трⷪ҇цꙋ є҆диносꙋ́щнꙋю ᲂу҆крѣпи́лъ є҆сѝ, пред̾ ст҃ы́ми і҆кѡ́нами воспѣва́ющихъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

И҆знесе́ тѧ, ст҃и́телю, землѧ̀ рꙋ́сскаѧ побо́рника вѣ́ры и҆ благоче́стїѧ, ревни́телѧ ѻ҆те́ческихъ преда́нїй и҆ ᲂу҆твержде́нїй, да наꙋчи́ши на́съ взыва́ти: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Смире́нъ, кро́токъ и҆ ми́лостивъ бы́лъ є҆сѝ, ст҃и́телю, ѻ҆троча̀ нра́вомъ ѡ҆брѣта́ѧсѧ и҆ соверше́нъ бы́въ ра́зꙋмомъ. мы́ же, дивѧ́щесѧ твои̑мъ добродѣ́телємъ и҆ по́двигѡмъ, взыва́емъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Бг҃оро́диченъ:

Ꙗ҆́кѡ є҆ди́нꙋ преесте́ственнѡ па́че человѣ́ка бл҃года́ть во твою̀ ᲂу҆тро́бꙋ прїе́мшꙋю, без̾ и҆стлѣ́нїѧ нетлѣ́ннѡ ро́ждшꙋю хрⷭ҇та̀ бг҃а на́шего, при́снѡ тѧ̀ сла́вимъ.

Катава́сїа: Ѻ҆́троцы, бл҃гоче́стїю совоспита́ни:

Пѣ́снь и҃.

І҆рмо́съ: Рꙋ́цѣ распросте́ръ данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли, ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́нїе сїѐ на́ше скꙋ́дное и҆ похвале́нїе недосто́йное прїимѝ, чꙋ́дне мака́рїе, да не вотщѐ взыва́емъ къ прⷭ҇то́лꙋ всевы́шнѧгѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Вєли́каѧ дѣѧ̑нїѧ твоѧ̑ ѡ҆ прославле́нїи ст҃ы́хъ и҆ просвѣще́нїи наро́да рꙋ́сскагѡ подвиза́ютъ, досточꙋ́дне мака́рїе, на́съ немо́лчнѡ пѣ́ти бг҃ꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Похвалꙋ̀ вели́кꙋю бг҃ꙋ возда́лъ є҆сѝ, всебл҃же́нне, ѡ҆ просвѣще́нїи невѣ́рнагѡ гра́да каза́ни, є҆мꙋ́же ст҃и́телѧ гꙋ́рїа поста́вилъ є҆сѝ, тѣ́мже рꙋ́сстїи лю́дїе ѡ҆ таковѣ́й бж҃їей ми́лости ра́достїю возопи́ша: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Чꙋ́дномꙋ бл҃говѣ́щенїю ᲂу҆диви́сѧ пречⷭ҇таѧ дв҃а, неискꙋсомꙋ́жномꙋ ржⷭ҇твꙋ̀ є҆ѧ̀ возра́довахꙋсѧ па́стырїе, собо́ри вѣ́рныхъ дивѧ́тсѧ ᲂу҆спе́нїю є҆ѧ̀ сла́вномꙋ, вопїю́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Катава́сїа: Чꙋ́да преесте́ственнагѡ:

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стества̀. тѣ́мъ, веселѧ́щесѧ, тѧ̀, бг҃оро́дице, велича́емъ.

Мака́рїа вели́кагѡ и҆́мѧ носи́лъ є҆сѝ, є҆гѡ̀ житїю̀ послѣ́дꙋѧ въ постѣ̀ и҆ по́двизѣхъ, воздержа́нїи и҆ кро́тости, тѣ́мъ тѧ̀, ст҃и́телю, велича́емъ.

Два́жды.

Ри́зами погреба́льными ѡ҆дѣ́ѧнꙋ и҆ на сме́ртнѣмъ ѻ҆дрѣ́ ти лежа́щꙋ, собо́ръ наро́да мнѡ́жества, ви́дѣвше тѧ̀ не ꙗ҆́кѡ ме́ртва, но спѧ́ща, ли́къ же тво́й, ꙗ҆́кѡ свѣ́томъ, сїѧ́ющь, ᲂу҆диви́шасѧ и҆ сла́вꙋ возда́ша всеси́льномꙋ бг҃ꙋ, прославлѧ́ющемꙋ ᲂу҆гѡ́дники своѧ̑.

Бг҃оро́диченъ:

Ю҆́же и҆ногда̀ і҆а́кѡвъ ви́дѣ, чꙋ́днꙋю лѣ́ствицꙋ, ѿ землѝ просте́ртꙋ къ нбⷭ҇нѣй высотѣ̀, и҆сповѣ́даемъ тѧ̀, пречⷭ҇таѧ бг҃оро́дице: тобо́ю бо зємна́ѧ и҆ нбⷭ҇наѧ ѡ҆́бщницы ꙗ҆ви́шасѧ.

Катава́сїа: Та́инство стра́нное:

Свѣти́ленъ:

Свѣ́томъ бл҃года́ти просвѣще́нъ бы́лъ є҆сѝ, ст҃и́телю мака́рїе, рѡссі́йскихъ ᲂу҆го́дникѡвъ и҆ моли́твенникѡвъ на́шихъ пѣ́сньми свѣ́тлѡ просла́вилъ є҆сѝ, съ ни́миже во свѣ́тлостехъ ст҃ы́хъ веселѧ́сѧ ны́нѣ, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Сла́ва, и҆ ны́нѣ, пра́здника.

На хвали́техъ стїхи̑ры, гла́съ ѕ҃. Подо́бенъ: Тридне́венъ:

Бл҃же́нъ и҆ ми́лостивъ а҆рхїере́й ꙗ҆ви́лсѧ є҆сѝ, ѻ҆́тче ст҃и́телю мака́рїе, предста́лъ є҆сѝ поми́лованъ прⷭ҇то́лꙋ бж҃їю, и҆дѣ́же со всѣ́ми ст҃ы́ми бг҃а въ трⷪ҇цѣ восхвалѧ́еши.

Бл҃же́нъ и҆ кро́токъ па́стырь ѻ҆ве́цъ дꙋхо́вныхъ бы́лъ є҆сѝ, ѻ҆́тче ст҃и́телю мака́рїе, наслѣ́довалъ є҆сѝ па̑жити вѣ̑чныѧ, и҆дѣ́же со ст҃ы́ми землѝ на́шеѧ гдⷭ҇а си́лъ прославлѧ́еши.

Бл҃же́нъ и҆ чи́стъ се́рдцемъ, и҆́мже бг҃а ᲂу҆зрѣ́лъ є҆сѝ, ѻ҆́тче ст҃и́телю мака́рїе, сподо́билсѧ є҆сѝ красоты̀ ра́йскїѧ, и҆дѣ́же съ ли́ки а҆́гг҃льскими ѻ҆ц҃а̀ свѣ́тѡвъ сла́виши.

Бл҃же́нства зрѣ́лый кла́съ, є҆го́же нището́ю дꙋ́ха возрасти́лъ є҆сѝ, ѻ҆́тче ст҃и́телю мака́рїе, пожа́лъ є҆сѝ во црⷭ҇твїи нбⷭ҇нѣмъ, къ семꙋ́ же бога́тствꙋ нетлѣ́нномꙋ и҆ на́съ, земноро́дныхъ, призыва́еши.

Сла́ва, гла́съ в҃:

Па́стырю до́брый, ст҃и́телю хрⷭ҇то́въ мака́рїе чꙋ́дный, бл҃гоче́стїѧ сто́лпъ бы́лъ є҆сѝ, мно́гими добродѣ́тельми ᲂу҆краси́всѧ: собесѣ́дниче ст҃ы́хъ мꙋже́й, кни́жниче премꙋ́дрый, і҆кѡнопи́сче нарочи́тый, просвѣти́телю и҆зрѧ́дный, є҆ресе́й и҆скорени́телю, моли́твенниче нелѣ́ностный, молѝ сп҃сти́сѧ дꙋша́мъ на́шымъ.

И҆ ны́нѣ, пра́здника.

Славосло́вїе вели́кое и҆ ѿпꙋ́стъ.

На лїтꙋргі́и слꙋ́жба пра́здника и҆ ст҃и́телѧ.

Комментарии для сайта Cackle