Мѣ́сѧца тогѡ́же въ д҃-й де́нь. Ст҃ы́ѧ великомꙋ́ченицы варва́ры:
И҆ прпⷣбнагѡ ѻ҆ц҃а̀ на́шегѡ і҆ѡа́нна дамаски́на.
На Гдⷭ҇и, воззва́хъ, стїхи̑ры ст҃ы́ѧ, гла́съ в҃. Поⷣ: Є҆гда̀ ѿ дре́ва:
Є҆гда̀ на сꙋди́щи стра́шнѣмъ і҆ꙋлїані́а зрѧ́щи всеблаже́ннаѧ мꙋ́ченицꙋ сла́внꙋю варва́рꙋ, ра́нами стра́ждꙋщꙋ, мꙋ́ками же разли́чными тѣ́ло всѐ ссѣца́емо, те́плыми слеза́ми вопїѧ́ше: сло́ве бж҃їй, сеѧ̀ ѻ҆́бщницꙋ мѧ̀ бы́ти ны́нѣ сподо́би, чл҃вѣколю́бче.
Є҆ди́нъ, варва́ра и҆́стиннѡ и҆ і҆ꙋлїані́а нра́въ къ благоче́стїю и҆мꙋ́ще ст҃ы̑ѧ, подвиза́шасѧ на врага̀, и҆ побѣди́вше того̀ крѣ́пкѡ, сла́вы сподо́бишасѧ ѿ хрⷭ҇та̀ бг҃а. тѣ́мже гꙋби́тельныхъ страсте́й вре́дъ потреби́вше, всѣ̑мъ вѣ̑рнымъ подаю́тъ врачева̑нїѧ.
Є҆гда̀ и҆зрече́сѧ на тѧ̀, мꙋ́ченице, честнѣ́йшаѧ варва́ро, сла́дкаѧ сме́рть, ра́дꙋющисѧ и҆ спѣша́щи тече́нїе соверши́ла є҆сѝ: нечести́вагѡ же роди́телѧ рꙋка́ми пребеззако́нными поже́рласѧ, и҆ пло́дъ бг҃ꙋ принесла́сѧ є҆сѝ. тѣ́мже съ мꙋ́дрыми дѣ́вами и҆́стиннѡ ликꙋ́ющи, зри́ши хрⷭ҇та̀, жениха̀ твоегѡ̀, ѡ҆сїѧ́нїе.
И҆́ны стїхи̑ры прпⷣбнагѡ, гла́съ и҃. Поⷣ: Ѽ пресла́внагѡ чꙋдесѐ!
Ѻ҆́ч҃е і҆ѡа́нне всемꙋ́дре, ꙳ цр҃ковь хрⷭ҇то́вꙋ ᲂу҆ѧсни́лъ є҆сѝ пѣ́сньми, ꙳ бжⷭ҇твєннѣйшаѧ сладкопоѧ̀, всесла́вне, ꙳ дѣ́йствомъ, ѻ҆́ч҃е, дх҃а, ꙳ твою̀ цѣвни́цꙋ ᲂу҆дарѧ́ѧ, ꙳ всесли́чнѣй дв҃довѣ подо́бѧсѧ. ꙳ є҆́юже возглаша́ѧ, бжⷭ҇твенными пѣ́сньми всѧ̑ привле́клъ є҆сѝ.
Ѻ҆́ч҃е і҆ѡа́нне сла́вне, ꙳ мїрскі́ѧ ѿстꙋ́пль мѧте́жныѧ молвы̀, ꙳ ко хрⷭ҇то́вѣ прите́клъ є҆сѝ тишинѣ̀, прпⷣбне, ꙳ и҆ видѣ̑нїи бжⷭ҇твенными и҆ дѣѧ̑нїи, ꙳ всебога́тыми ꙗ҆́вѣ свѣтлостьмѝ ꙳ и҆́стиннѡ ѡ҆богати́лсѧ є҆сѝ, ꙳ и҆ вѣ̑рнымъ препода́лъ є҆сѝ, ꙳ бг҃олѣ́пнымъ сїѧ́ѧ житїе́мъ, блаже́ннѣйше.
Прїиди́те, земноро́днїи, пѣ́сньми свѧще́нное и҆ честно́е ꙳ прпⷣбнагѡ торжество̀ і҆ѡа́нна ꙳ дне́сь благоче́стнѡ воспои́мъ: ꙳ се́й бо и҆́стиннѡ бжⷭ҇твеннагѡ ѡ҆сїѧ́нїѧ ꙳ сподо́бисѧ свѣ́тъ прїѧ́ти. ꙳ ѽ неизрече́ннагѡ твоегѡ̀ бл҃гоꙋтро́бїѧ, гдⷭ҇и, ꙳ и҆́мже мы̀ позна́хомъ ꙳ сла́вити тѧ̀ пребл҃га́го.
Сла́ва, гла́съ ѕ҃:
Ѻ҆те́чество, ро́дъ, и҆мѣ́нїе ѡ҆ста́вивши, варва́ро, и҆ нечести́ваго ѻ҆тца̀ возненави́дѣвши, бг҃а возлюби́ла є҆сѝ, є҆мꙋ́же ᲂу҆невѣ́стиласѧ є҆сѝ, и҆ была̀ є҆сѝ великокꙋ́пница наречена̀: того̀ молѝ спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Тридне́венъ:
Лю́ди беззако́ннѣйшыѧ безъ пра́вды пригвожда́ющыѧ тѧ̀ на дре́вѣ дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ.
На стїхо́внѣ ѻ҆ктѡ́иха. Сла́ва, ст҃а́гѡ, гла́съ ѕ҃.
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
Тропа́рь ст҃ы́ѧ, гла́съ и҃:
Варва́рꙋ свѧтꙋ́ю почти́мъ: вра̑жїѧ бо сѣ̑ти сокрꙋшѝ, и҆ ꙗ҆́кѡ пти́ца и҆зба́висѧ ѿ ни́хъ по́мощїю и҆ ѻ҆рꙋ́жїемъ креста̀, всечестна́ѧ.
Сла́ва, тропа́рь прпⷣбнагѡ, гла́съ и҃:
Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, вселе́нныѧ свѣти́льниче, мона́шествꙋющихъ бг҃одохнове́нное ᲂу҆добре́нїе, і҆ѡа́нне премꙋ́дре, ᲂу҆че́ньми твои́ми всѧ̑ просвѣти́лъ є҆сѝ, цѣвни́це дх҃о́внаѧ, молѝ хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени, на Бг҃ъ гдⷭ҇ь, тропа́рь ст҃ы́ѧ два́жды: Сла́ва, ст҃а́гѡ: и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Канѡ́нъ ѻ҆ктѡ́иха є҆ди́нъ, на ѕ҃: и҆ ст҃ы́хъ два̀ канѡ́на на и҃.
Канѡ́нъ ст҃ы́ѧ на д҃.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Ѽ трⷪ҇це пребжⷭ҇твеннаѧ чⷭ҇тна́ѧ! ꙗ҆́же па́че ᲂу҆ма̀ дарова́нїе твои̑мъ рабѡ́мъ, подаю́щи, свѣтоно́снꙋю вдохнѝ мра́чномꙋ моемꙋ̀ ᲂу҆мꙋ̀ лꙋчꙋ̀, твою̀ похвали́ти мꙋ́ченицꙋ варва́рꙋ приснопа́мѧтнꙋю.
Два́жды.
Похвале́нїй всѧ́къ предѣ́лъ вои́стиннꙋ превзы́де, твои́хъ мꙋ́чєникъ сла́ва, чл҃вѣколю́бче: но, є҆́же ѿ вѣ́ры по си́лѣ прїе́мъ хвале́нїе, возниспослѝ, влⷣко, бога́тнѡ воздаѧ́нїе.
Ѿ терно́внагѡ ко́рене и҆зрастѐ ши́покъ краснѣ́йшїй, цр҃ковь хрⷭ҇то́вꙋ ѡ҆благово́нстви: и҆ червле́нїемъ страда́нїѧ ѡ҆багри́вшисѧ кро́вїю сла́внаѧ варва́ра, ю҆́же досто́йнѡ воспое́мъ.
И҆́нъ канѡ́нъ прпⷣбнагѡ на д҃:
Гла́съ и҆ і҆рмо́съ то́йже.
Твоѧ̑ похвалы̑ нача́ти хотѧ́щꙋ мѝ, пода́ждь тво́й ны́нѣ гла́съ медото́чный, прпⷣбне, и҆́мже правосла́внꙋю ᲂу҆ѧсни́лъ є҆сѝ цр҃ковь пѣ́сньми, ѻ҆́ч҃е і҆ѡа́нне, ꙗ҆́же твою̀ почита́етъ па́мѧть.
Два́жды.
Ꙗ҆́кѡ мꙋ́дръ и҆ ѻ҆строꙋ́менъ сꙋдїѧ̀, и҆зрѧ́днѣйше сꙋ́щихъ є҆стество̀ смотрѧ́ѧ, нестоѧ́щихъ предразсꙋди́лъ є҆сѝ вѣ̑чнꙋющаѧ: привре́менными бо и҆змѣни́лъ є҆сѝ пребыва̑ющаѧ, ѻ҆́ч҃е і҆ѡа́нне, и҆дѣ́же тѧ̀ и҆ ны́нѣ хрⷭ҇то́съ просла́ви.
Бг҃оро́диченъ:
Превы́шши ꙗ҆ви́ласѧ є҆сѝ, чⷭ҇таѧ, всѧ́кїѧ тва́ри, ви́димыѧ же и҆ неви́димыѧ, приснодв҃о: зижди́телѧ бо родила̀ є҆сѝ, ꙗ҆́коже благоволѝ воплоти́тисѧ во ᲂу҆тро́бѣ твое́й: є҆го́же со дерзнове́нїемъ молѝ спастѝ пою́щыѧ тѧ̀.
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Оу҆ѧзвлѧ́ема любо́вїю твое́ю, ꙗ҆́кѡ женихо́вою, влⷣко, неѡде́ржнымъ стремле́нїемъ страстоте́рпица варва́ра всѐ ѻ҆те́ческое безбо́жїе возненави́дѣ.
Ни сла́дости красота̀, ни цвѣ́тъ добро́ты, ни бога́тство же, ни сла́дѡсти ю҆́нѡстныѧ ᲂу҆слади́ша тѧ̀, варва́ро сла́внаѧ, хрⷭ҇тꙋ̀ ᲂу҆невѣ́стившꙋюсѧ, до́браѧ дѣ́во.
Къ совершє́ннымъ подвигѡ́мъ ничто́же ꙗ҆ви́сѧ (с. 38) возбране́нїе не́мощи же́нстѣй, ни ю҆́ность во́зраста, хрⷭ҇тѐ: неви́димою бо твое́ю си́лою ᲂу҆крѣплѧ́ема.
Преподо́бнагѡ:
Расточи́лъ є҆сѝ бога́тство, бг҃ꙋ взаи́мъ даѧ̀: тѣ́мже тебѣ̀ на нб҃сѣ́хъ ᲂу҆гото́васѧ црⷭ҇тво: но и҆ ны́нѣ воздаѧ́нїе, і҆ѡа́нне, прїѧ́лъ є҆сѝ многокра́тное.
Премꙋ́дрости тала́нтъ прїе́мъ, дѣѧ́ньми ᲂу҆краша́ѧ, ᲂу҆ѧсни́лъ є҆сѝ, і҆ѡа́нне, цр҃ковь хрⷭ҇то́вꙋ: є҆го́же многоꙋсꙋгꙋблѧ́еши, и҆ житїѐ ѡ҆ста́вивъ.
Бг҃оро́диченъ:
Чи́ни ᲂу҆диви́шасѧ а҆́гг҃льстїи, пречⷭ҇таѧ, и҆ человѣ́чєскаѧ ᲂу҆страши́шасѧ сердца̀ ѡ҆ ржⷭ҇твѣ̀ твое́мъ. тѣ́мже тѧ̀ бцⷣꙋ вѣ́рою чти́мъ.
Конда́къ прпⷣбнагѡ, гла́съ д҃. Поⷣ: Вознесы́йсѧ на крⷭ҇тъ:
Пѣснопи́сца и҆ честна́го бг҃оглаго́льника, цр҃кве наказа́телѧ и҆ ᲂу҆чи́телѧ, и҆ врагѡ́въ сопротивоборца̀ і҆ѡа́нна воспои́мъ: ѻ҆рꙋ́жїе бо взе́мъ крⷭ҇тъ гдⷭ҇ень, всю̀ ѿразѝ є҆ресе́й пре́лесть, и҆ ꙗ҆́кѡ те́плый предста́тель къ бг҃ꙋ, всѣ̑мъ подае́тъ прегрѣше́нїй проще́нїе.
І҆́косъ:
Цр҃ко́вномꙋ наста́вникꙋ и҆ ᲂу҆чи́телю и҆ жерцꙋ̀, ꙗ҆́кѡ таи́нникꙋ неизглаго́ланныхъ возопїе́мъ согла́снѡ: и҆́же къ бг҃ꙋ твои́ми моли́твами ѿве́рзи ᲂу҆ста̀ на̑ша, и҆ сподо́би глаго́лати словеса̀ ᲂу҆че́нїй твои́хъ: ты́ бо трⷪ҇цѣ ꙗ҆ви́лсѧ є҆сѝ соприча́стникъ, ꙗ҆́кѡ дрꙋго́е со́лнце ѡ҆блиста́ѧ въ мі́рѣ, чꙋдесы̀ и҆ ᲂу҆чє́нїи просїѧ́въ, ꙗ҆́кѡ мѡѷсе́й, въ зако́нѣ гдⷭ҇ни поꙋча́ѧсѧ всегда̀, сло́вомъ и҆ дѣ́ломъ бы́лъ є҆сѝ свѣти́льникъ, и҆ молѧ̀ непреста́ннѡ всѣ̑мъ пода́ти прегрѣше́нїй проще́нїе.
Сѣда́ленъ, гла́съ г҃. Подо́бенъ: Красотѣ̀ дѣ́вства:
Въ страда́нїи твое́мъ всѧ̑ ᲂу҆диви́ла є҆сѝ, ꙗ҆́кѡ претерпѣ́вши мꙋчи́телей ра̑ны, вѧза̑нїѧ, мꙋ̑ки и҆ темни̑цы, варва́ро прехва́льнаѧ. тѣ́мже и҆ вѣне́цъ съ нб҃сѐ тебѣ̀ дадѐ хрⷭ҇то́съ, къ немꙋ́же, возжелѣ́вши ᲂу҆се́рднѡ, притекла̀ є҆сѝ: то́й бл҃года́ть подадѐ тебѣ̀, мꙋ́ченице, врачева̑нїѧ и҆сточа́ти человѣ́кѡмъ.
Сла́ва, прпⷣбнагѡ, гла́съ то́йже:
Трꙋба̀ благогла́сна ѡ҆свѧще́на, свѧще́ннѣйше, на́мъ ꙗ҆ви́лсѧ є҆сѝ, пѣснопою́щи ѻ҆бра́знѡ ᲂу҆чє́нїѧ гдⷭ҇а и҆ сп҃са концє́мъ, и҆ твои́ми словесы̀ мі́ръ просвѣти́лъ є҆сѝ, і҆ѡа́нне прпⷣбне, хрⷭ҇та̀ бг҃а молѝ дарова́ти на́мъ ве́лїю ми́лость.
И҆ ны́нѣ, бг҃оро́диченъ.
Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ: па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
И҆зъ дв҃ы ро́ждсѧ, дарова́лъ є҆сѝ ѻ҆трокови́цамъ дѣ́вамъ киче́нїе низложи́ти льсти́вагѡ: тѣ́мже добропобѣ́днаѧ варва́ра сегѡ̀ горды́ни порꙋга́сѧ.
Прама́ти хитростьмѝ льсти́вагѡ прельсти́вшисѧ пе́рвѣе, пи́щи и҆згна́на бы́сть ра́йскїѧ: варва́ра же семꙋ̀ порꙋга́вшисѧ, въ нбⷭ҇нѣмъ черто́зѣ ны́нѣ водворѧ́етсѧ.
Крⷭ҇то́мъ твои́мъ сме́рти си́лꙋ разори́лъ є҆сѝ: тѣ́мже, тѣлесѐ ѻ҆трокови́ца, хрⷭ҇тѐ, не пощадѣ́вши, терпи́тъ до́блественнѣйше ра̑ны, варва́ра, тве́рдымъ ᲂу҆мо́мъ.
Преподо́бнагѡ:
Повелѣ́нїю хрⷭ҇то́вꙋ повинꙋ́всѧ, ѡ҆ста́вилъ є҆сѝ мїрскꙋ́ю красотꙋ̀, бога́тство, сла́дость, свѣ́тлость: є҆гѡ́же ра́ди взе́мъ тво́й кре́стъ, послѣ́довалъ є҆сѝ, і҆ѡа́нне мꙋ́дре.
Соѡбнища́въ ѡ҆бнища́вшемꙋ хрⷭ҇тꙋ̀, чл҃вѣ́ческагѡ ра́ди спасе́нїѧ, спросла́вилсѧ є҆сѝ, ꙗ҆́коже то́й ѡ҆бѣща́сѧ, и҆ сцрⷭ҇твꙋеши же присноца́рствꙋющемꙋ, і҆ѡа́нне.
Бг҃оро́диченъ:
Тѧ̀ приста́нище спасе́нїѧ, и҆ стѣ́нꙋ неѡбори́мꙋ, бцⷣе влⷣчце, всѝ вѣ́рнїи вѣ́мы: ты́ бо моли́твами твои́ми ѿ бѣ́дъ и҆збавлѧ́еши дꙋ́шы на́шѧ.
Пѣ́снь є҃. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Ѻ҆кѡ́нцы тремѝ ба́ни просвѣща́тисѧ повелѣ́вши, та́инственнѡ написа́ла є҆сѝ креще́нїе, варва́ро, трⷪ҇чнымъ свѣ́томъ дꙋшѝ свѣтоно́сное сꙋ́щее ѡ҆чище́нїе.
Сꙋ́щагѡ бг҃а разже́гшисѧ ре́вностїю, лжеиме́нныхъ богѡ́въ скверна̑ваѧ ѡ҆плева̀ ли́ца варва́ра всехва́льнаѧ, рꙋга́ющисѧ ѻ҆трокови́ца внѣ́шнемꙋ мїроде́ржцꙋ.
Неи́стовства лю́тагѡ ѻ҆́тча ᲂу҆кло́ншꙋюсѧ варва́рꙋ, разстꙋ́пльшисѧ, а҆́бїе гора̀ прїѧ́тъ, ꙗ҆́коже дре́вле приснопа́мѧтнꙋю первомч҃ницꙋ ѳе́клꙋ, хрⷭ҇тꙋ̀ чꙋдодѣ́йствовавшꙋ.
Преподо́бнагѡ:
Стра́хомъ хрⷭ҇то́вымъ, ѻ҆́ч҃е, ᲂу҆твержда́емь къ бжⷭ҇твеннѣй жи́зни, плотско́е мꙋдрова́нїе всѐ покори́лъ є҆сѝ дꙋ́хꙋ, твоѧ̑, і҆ѡа́нне, чꙋ̑вства ѡ҆чища́ѧ.
Ѡ҆чи́стивъ всѧ́кїѧ скве́рны тѣ́ло и҆ ᲂу҆́мъ, и҆ дꙋ́шꙋ тщали́вѡ, бг҃омꙋ́дре, зарю̀ прїѧ́лъ є҆сѝ трисо́лнечнꙋю і҆ѡа́нне, свѣ́тлыми тѧ̀ богатѧ́щꙋю дарова̑нїи.
Бг҃оро́диченъ:
Молѝ твоего̀ сн҃а и҆ гдⷭ҇а, дв҃о чⷭ҇таѧ, плѣнє́ннымъ и҆збавле́нїе ѿ проти́внагѡ ѡ҆бстоѧ́нїѧ, на тѧ̀ надѣ́ющымсѧ ми́рное дарова́ти.
Пѣ́снь ѕ҃. І҆рмо́съ:
Во глꙋбинѣ̀ грѣхо́внѣй содержи́мъ є҆́смь, сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ спаси́ мѧ.
Ꙗ҆́коже ѡ҆бѣща́лсѧ є҆сѝ мꙋ́дрость дарова́ти, сп҃се, бг҃онаꙋче́нꙋ, тебє̀ ра́ди стоѧ́щымъ предъ сꙋди́щемъ мꙋчи́телей, є҆ѧ́же мꙋ́ченица варва́ра и҆спо́лнисѧ.
Безбо́жныхъ ле́сть и҆з̾ѡбличи́ла є҆сѝ сло́вомъ бг҃омꙋ́дрымъ, варва́ро сла́внаѧ: терпѣ́нїемъ же дѣ́лъ мꙋчи́телей мꙋдрова̑нїѧ ᲂу҆диви́ла є҆сѝ.
Ра́намъ неща́днѡ строга́тисѧ, рꙋ̑бы же власѧны́ми тве́рдѡ востира́тисѧ, хрⷭ҇та̀ ра́ди, непоро́чнаѧ страстоте́рпица тѣ́ло предадѐ.
Прпⷣбнагѡ:
Просвѣти́всѧ дх҃а бл҃года́тїю, бжⷭ҇твенныхъ и҆ человѣ́ческихъ зна́нїемъ веще́й ꙗ҆́снѡ ѡ҆богати́всѧ, тре́бꙋющымъ, і҆ѡа́нне, незави́стнѡ препо́далъ є҆сѝ.
Подо́бнѣ ликѡ́мъ нбⷭ҇нымъ, мꙋ́дре, цр҃ковь правосла́внѡ ᲂу҆краси́лъ є҆сѝ, ликостоѧ̑нныѧ пѣ̑сни приглаша́ѧ трⷪ҇цѣ бг҃овѣща̑нныѧ.
Бг҃оро́диченъ:
Неискꙋсомꙋ́жнѡ, дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бж҃ества̀ сн҃а и҆ бг҃а твоегѡ̀ ѻ҆́бразы.
Конда́къ, гла́съ д҃. Подо́бенъ: Вознесы́йсѧ на крⷭ҇тъ:
Въ трⷪ҇цѣ благоче́стнѡ пѣва́емомꙋ, послѣ́довавши бг҃ꙋ, страстоте́рпице, і҆́дѡльскаѧ притꙋпи́ла є҆сѝ чти̑лища: посредѣ́ же по́двига страда́льчествꙋющи, варва́ро, мꙋчи́телей преще́нїѧ не ᲂу҆страши́ласѧ є҆сѝ, мꙋжемꙋ́дреннаѧ, велегла́снѡ пою́щи при́снѡ: трⷪ҇цꙋ чтꙋ̀, є҆ди́но бжⷭ҇тво̀.
І҆́косъ:
Оу҆невѣ́стившꙋюсѧ хрⷭ҇тꙋ̀ мꙋче́нїемъ варва́рꙋ, соше́дшесѧ, почти́мъ досто́йнѡ: ꙗ҆́кѡ да, тоѧ̀ моли́твами па́гꙋбы дꙋшетлѣ́нныѧ и҆зба́вльшесѧ, и҆ гꙋби́тельства, трꙋ́са и҆ паде́жа, житїѐ въ ми́рѣ препрово́димъ, сподо́бившесѧ со всѣ́ми ст҃ы́ми, ѿ вѣ́ка бг҃ꙋ бл҃гоꙋгоди́вшими, ходи́ти во свѣ́тѣ, и҆ пѣ́ти съ ни́ми, ᲂу҆диви́лъ є҆сѝ, сп҃се, твоѧ̑ ми́лѡсти, всѣ̑мъ человѣ́кѡмъ, вѣ́рою и҆сповѣ́дающымъ: трⷪ҇цꙋ чти́мъ є҆ди́но бж҃ество̀.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть. хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
И҆́же зе́млю погꙋби́ти, и҆ потреби́ти мо́ре мꙋчи́тель сꙋ́етнѡ свирѣ́пствꙋѧ, ꙗ҆́кѡ и҆гра́лище лежи́тъ варва́ры ѻ҆трокови́цы подъ нога́ми: сего́ бо попра́въ хрⷭ҇то́съ ꙗ҆́коже пти́цꙋ хꙋ́дꙋ свѧза̀.
Ра́нами нестерпи́мыми твоемꙋ̀ стрꙋ́жемꙋ тѣ́лꙋ всемꙋ̀, ѡ҆багре́нꙋ же крове́й ка́плѧми, свѣща́ми претерпѣ́ла є҆сѝ пали́ма по ре́брѡмъ, мꙋ́ченице всехва́льнаѧ, хрⷭ҇та̀ благодарѧ́щи, варва́ро сла́внаѧ.
Ѽ безчеловѣ́чнагѡ и҆ немилосе́рдагѡ мꙋчи́телей сꙋровства̀ и҆ мно́жайшагѡ безбо́жества! сосцы́ бо мч҃ницы ꙗ҆́коже въ мѧсосѣ́чницѣ, лю́тѣ мечи̑ ѿсѣца́хꙋ, ᲂу҆́мъ ᲂу҆твержда́ющїѧ подвигополо́жникꙋ хрⷭ҇тꙋ̀.
Преподо́бнагѡ:
Ре́вностїю разжига́емь, бг҃обо́рныхъ є҆ресе́й всѧ́кое ѕлоꙋ́мїе возрази́лъ є҆сѝ свѣ́тлыми писа̑нїи, ᲂу҆бѣли́въ всѣ̑мъ ꙗ҆́снѡ дре́вле сѣ̑ѧннаѧ, мꙋ́дрыми, ѽ і҆ѡа́нне, напи̑санныѧ то́нкѡ.
Те́плѣ ѡ҆бличи́лъ є҆сѝ ѕлоиме́нныхъ ᲂу҆ченикѡ́въ ма́нента хꙋ́льное нече́стїе, разврати́ти покꙋси́вшеесѧ це́рковь хрⷭ҇то́вꙋ, словесы̀ и҆ догма̑ты твои́ми, ѽ і҆ѡа́нне, ꙗ҆̀же счини́лъ є҆сѝ.
Бг҃оро́диченъ:
Ст҃ы́хъ ст҃ѣ́йшꙋю поразꙋмѣва́емъ тѧ̀, ꙗ҆́кѡ є҆ди́нꙋ ро́ждшꙋю бг҃а непремѣ́ннаго, дв҃о нескве́рнаѧ, мт҃и безневѣ́стнаѧ: всѣ̑мъ бо и҆сточи́ла є҆сѝ вѣ̑рнымъ нетлѣ́нїе, бжⷭ҇твеннымъ ржⷭ҇тво́мъ твои́мъ.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆ви́сѧ тебѣ̀ хрⷭ҇то́съ во свѣ́тѣ непристꙋ́пнѣмъ заключе́ннѣй, ѽ варва́ро, въ темни́цѣ, дерза́ти повелѣва́ѧ и҆ ра̑ны врачꙋ́ѧ, и҆ ра́дость да́рꙋѧ: тѣ́мже впери́ласѧ є҆сѝ твоегѡ̀ жениха̀ раче́нїемъ.
Ꙗ҆ви́сѧ, хрⷭ҇тѐ, ꙗ҆вле́ннѡ прорече́нїе твоѐ и҆спо́лнено: ѻ҆те́цъ бо ча́до на сме́рть предае́тъ, самодѣ́латель же закла́нїѧ бы́въ ѻ҆каѧ́нный роди́тель твоеѧ̀ мꙋ́ченицы. тѣ́мже съ небесѐ ѻ҆гне́мъ и҆стреби́сѧ.
А҆́гг҃лъ свѣ́телъ ѻ҆де́ждею свѣтови́дною тѧ̀, хрⷭ҇та̀ ра́ди ѡ҆бнаже́ннꙋю, честна́ѧ варва́ро, ѡ҆дѣ́ѧше, ꙗ҆́коже невѣ́стꙋ, ѡ҆бходѧ́щꙋ стра̑сти: ѻ҆де́жди бо, мꙋ́ченице, совлекла́сѧ є҆сѝ, бжⷭ҇твенное прїе́мши и҆змѣне́нїе.
Преподо́бнагѡ:
Ѡ҆бличи́лъ є҆сѝ ꙗ҆́вѣ, треблаже́нне і҆ѡа́нне, несто́рїево раздѣле́нїе, севи́рово слїѧ́нїе, є҆диново́льное пребезꙋ́мїе: вѣ́рꙋ же є҆динодѣ́йственнꙋ, сїѧ́нїе правосла́вїѧ всѣ̑мъ ѡ҆блиста́въ концє́мъ.
Всѣ́ѧ вра́гъ пле́велы ѻ҆бы́чнѡ є҆реті́чєскїѧ въ цр҃кви хрⷭ҇то́вѣ, сегѡ̀ поклоне́нїѧ ѿмета́тисѧ во і҆кѡ́нахъ честны́хъ, но ѡ҆брѣ́те не дре́млюща тѧ̀, всеблаже́нне і҆ѡа́нне, всѧ́кое сѣ́мѧ ѕло́е и҆скоренѧ́юща.
Бг҃оро́диченъ:
Ты̀ ѿ ѻ҆ц҃а̀ неразлꙋ́чнаго, во чре́вѣ бг҃омꙋ́жнѡ пожи́вшаго, безсѣ́меннѡ зачала̀ є҆сѝ, и҆ несказа́ннѡ родила̀ є҆сѝ, бг҃ороди́тельнице пречи́стаѧ: тѣ́мже тѧ̀ спасе́нїе всѣ́хъ на́съ и҆сповѣ́даемъ.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Сла́внꙋю и҆мꙋ́щи прїѧ́ти кончи́нꙋ мече́мъ, варва́ро, мꙋче́нїѧ твоегѡ̀, со і҆ꙋлїані́ею вѣнцє́въ мꙋ́ченическихъ сподо́бльшисѧ, гла́съ бжⷭ҇твенный ᲂу҆слы́шала є҆сѝ, и҆сполнѧ́ющїй молє́нїѧ твоѧ̑.
Твоемꙋ̀ сочета́вшисѧ ны́нѣ всецр҃ю̀ женихꙋ̀ хрⷭ҇тꙋ̀, ѡ҆блиста́ющисѧ сла́вою, варва́ро, бжⷭ҇твеннагѡ свѣ́та, въ нбⷭ҇ныхъ черто́зѣхъ, пѣвцы̀ твоѧ̑ назира́й, страсте́й и҆змѣнѧ́ющи, и҆ приводѧ́щи живꙋ́щемꙋ бг҃ꙋ.
И҆сполнѧ́ѧ твоѐ проше́нїе, варва́ро страстоте́рпице, хрⷭ҇то́съ врачева̑нїѧ подае́тъ соверша́ющымъ твою̀ вѣ́рою лѣ́тнюю па́мѧть. ꙗ҆́кѡ и҆́стиннѡ морскі́й песо́къ твоѧ̑ превзыдо́ша благосла̑внаѧ чꙋдодѣ̑йства.
Преподо́бнагѡ:
Наꙋчи́лъ є҆сѝ всѧ̑ цр҃кѡ́вныѧ пѣ́ти сы́ны правосла́внѡ, є҆ди́ницꙋ въ трⷪ҇цѣ честнꙋ́ю: воплоще́нїе же сло́ва бжⷭ҇твенное бг҃осло́вити ꙗ҆́вѣ, і҆ѡа́нне, ᲂу҆ѧснѧ́ѧ неꙋдобопости̑жнаѧ мнѡ́гимъ во свѧще́нныхъ писа́нїихъ.
Ст҃ы́хъ чи́ны пѣсносло́вивъ, прпⷣбне, чⷭ҇тꙋю бцⷣꙋ, хрⷭ҇то́ва прⷣте́чꙋ, та́же а҆пⷭ҇лы, прⷪ҇ро́ки съ пѡ́стники и҆ мꙋ̑дрыѧ ᲂу҆чи́тели, пра́ведники и҆ мꙋ́ченики, въ тѣ́хъ ны́нѣ водворѧ́ешисѧ ски́нїихъ.
Бг҃оро́диченъ:
Черто́гъ была̀ є҆сѝ, и҆́же па́че ᲂу҆ма̀ воплоще́нїѧ сло́ва, дв҃о бг҃ороди́тельнице, ѡ҆дѣ́ѧна сла́вою добродѣ́телей и҆ и҆спещре́на. тѣ́мъ тѧ̀, всенепоро́чнаѧ, бцⷣꙋ возвѣща́емъ.
Свѣти́ленъ ѻ҆ктѡ́иха, и҆ ст҃ы́ѧ. Подо́бенъ: Жєны̀ ᲂу҆слы́шите:
Ꙗ҆́кѡ ши́покъ краснѣ́йшїй и҆зъ терно́внагѡ и҆зрасла̀ є҆сѝ ко́рене, дѣ́во варва́ро, же́ртвою, мч҃нице, свѧще́ннагѡ страда́нїѧ ѡ҆багри́вшисѧ кро́вїю. и҆ ны́нѣ бжⷭ҇твеннꙋю твою̀ па́мѧть соверша́ющыѧ любо́вїю спаса́й ѿ бѣ́дъ.
Сла́ва, прпⷣбнагѡ:
Ꙗ҆́кѡ бжⷭ҇твенъ свѣ́тъ, ѻ҆́ч҃е на́шъ, цр҃кви возсїѧ́лъ є҆сѝ, пѣ́нїй твои́хъ сїю̀ свѣ́тлостїю ѡ҆блиста́въ, и҆ свѣ́томъ нра́ва твоего̀, и҆́мже хрⷭ҇тѡ́вы догма́ты ꙗ҆влѧ́еши ᲂу҆кра́шены, къ немꙋ́же не преста́й ѡ҆ на́съ молѧ́сѧ, і҆ѡа́нне.
И҆ ны́нѣ, бг҃оро́диченъ:
Вои́стиннꙋ тѧ̀ бцⷣꙋ и҆сповѣ́дꙋемъ, влⷣчце, тобо́ю спаса́емїи: и҆́бо бг҃а неизрече́ннѡ родила̀ є҆сѝ разори́вшаго кресто́мъ сме́рть, и҆ къ себѣ̀ привле́кшаго прпⷣбныхъ собо́ры, съ ни́миже восхвалѧ́емъ тѧ̀, дв҃о.
На хвали́техъ стїхи̑ры ст҃ы́ѧ, на д҃, гла́съ а҃. Самогла́сенъ:
А҆нато́лїево:
Земны́ѧ пи́щи наслажде́нїе презрѣ́вши, и҆ ѻ҆́ч҃ее бога́тство, кꙋ́пнѡ же и҆ сла́вꙋ возненави́дѣвши, нбⷭ҇наго жениха̀ возлюби́ла є҆сѝ, варва́ро всесла́внаѧ: мече́мъ бо во главꙋ̀ ѿсѣ́кшисѧ, съ мꙋ́дрыми вошла̀ є҆сѝ дѣ́вами къ женихꙋ̀ хрⷭ҇тꙋ̀. тѣ́мже и҆ гꙋби́тельный недꙋ́гъ ѿгонѧ́ющи, вѣ̑рныѧ врачꙋ́еши дѣ́йствомъ ст҃а́гѡ дх҃а, и҆ мо́лишисѧ непреста́ннѡ ѡ҆ дꙋша́хъ на́шихъ.
Гла́съ в҃. Вѷзанті́ево:
Посрами́сѧ лꙋка́вый вра́гъ, ѿ жены̀ побѣжде́нъ, ꙗ҆́кѡ прама́терь и҆мѧ́ше дѣ́йство ко грѣхꙋ̀: ѿ дв҃ы бо вопло́щшеесѧ сло́во ѻ҆́ч҃ее непрело́жнѡ и҆ несмѣ́снѡ, ꙗ҆́кѡ вѣ́сть є҆ди́нъ са́мъ, клѧ́твꙋ разрꙋшѝ є҆́ѵинꙋ и҆ а҆да́мовꙋ, хрⷭ҇то́съ вѣнча́вый досто́йнѡ варва́рꙋ мꙋ́ченицꙋ, и҆ тоѧ̀ ра́ди да́рꙋѧ мі́рꙋ ѡ҆чище́нїе и҆ ве́лїю ми́лость.
Бг҃озва́ннаѧ мꙋ́ченица варва́ра, на сꙋди́щи стра́ждꙋщи, глаго́лаше: лю́ты ᲂу҆́бѡ ны́нѣшнїѧ мꙋ̑ки, ѽ мꙋчи́телїе, но ра́достно вѣ́чныѧ жи́зни воспрїѧ́тїе: не предпочтꙋ́ же ѿню́дъ земны́хъ па́че нбⷭ҇ныхъ. сегѡ̀ ра́ди сѣцы́те, стрꙋжи́те плѡ́ти, и҆ ѻ҆гню̀ преда́йте мѧ̀, ра́дꙋющисѧ ѿидꙋ̀ къ женихꙋ̀ моемꙋ̀ хрⷭ҇тꙋ̀: є҆ѧ́же моли́твами, хрⷭ҇тѐ бж҃е, ми́лѡсти твоѧ̑ низпослѝ, и҆ спаси́ ны, тоѧ̀ страда̑нїѧ соверша́ющыѧ вѣ́рнѡ.
Торжество̀ дне́сь страстоте́рпицы варва́ры, прїиди́те лю́дїе, воспои́мъ: тоѧ́ бо нижѐ ме́чь, нижѐ ѻ҆́гнь, ни́же и҆на́ѧ мꙋ́ка, нижѐ многоплетє́ннаѧ велїа́ра ловлє́нїѧ побѣди́ша. и҆ къ не́й вѣ́рою возопїе́мъ: хрⷭ҇та̀ молѝ, добромꙋ́ченице всесла́внаѧ, дарова́ти на́мъ ве́лїю ми́лость.
Сла́ва, гла́съ ѕ҃: І҆ѡа́нна мона́ха:
Страда́льческимъ ше́ствовавши пꙋте́мъ, прароди́тельнагѡ и҆збѣжа́ла є҆сѝ совѣ́та, варва́ро всечестна́ѧ: и҆ ꙗ҆́кѡ ᲂу҆́бѡ дѣ́ва мꙋдра̀ свѣщꙋ̀ носѧ́щи, вошла̀ є҆сѝ во дворы̀ гдⷭ҇а твоегѡ̀, и҆ ꙗ҆́кѡ мч҃ница мꙋ́жественна, бл҃года́ть прїѧ́ла є҆сѝ цѣли́ти плотскі̑ѧ стра̑сти. но и҆ на́съ, воспѣва́ющихъ тѧ̀, дꙋше́вныхъ болѣ́зней и҆зба́ви, къ бг҃ꙋ моли́твами твои́ми.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Всечⷭ҇таѧ ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи, вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стра́сть поно́снꙋю;
На стїхо́внѣ ѻ҆ктѡ́иха. Сла́ва, прпⷣбнагѡ, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ і҆ѡа́нне: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Не терплю̀, ча́до, ви́дѧщи тѧ̀ на дре́вѣ ᲂу҆снꙋ́вша, ꙳ бо́дрость всѣ̑мъ подаю́щаго: ꙳ ꙗ҆́кѡ да и҆̀же дре́вле престꙋпле́нїѧ плодо́мъ, ꙳ сно́мъ поги́бельнымъ ᲂу҆снꙋ́вшымъ, ꙳ бжⷭ҇твеннꙋю и҆ спаси́тельнꙋю ꙳ бо́дрость пода́си, ꙳ дв҃а глаго́лаше пла́чꙋщи, ю҆́же велича́емъ.
На лїтꙋргі́и, Бл҃жє́нна ѿ канѡ́на мꙋ́ченицы, пѣ́снь г҃: и҆ преподо́бнагѡ пѣ́снь ѕ҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ бг҃ъ і҆и҃левъ. Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ гала́тѡмъ, зача́ло с҃и: А҆ллилꙋ́їа, гла́съ а҃: Терпѧ̀, потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе ма́рка, зача́ло к҃а. Прича́стенъ: Ра́дꙋйтесѧ пра́веднїи: