Мѣ́сѧца тогѡ́же въ ѳ҃-й де́нь. Зача́тїе ст҃ы́ѧ а҆́нны, є҆гда̀ зача́тъ прест҃ꙋ́ю бцⷣꙋ.
И҆ пра́зднованїе пресвѧтѣ́й бцⷣѣ, въ че́сть і҆кѡ́ны є҆ѧ̀ нарица́емыѧ неча́ѧннаѧ ра́дость.
Слꙋ́жба є҆ѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры на ѕ҃, гла́съ д҃. Поⷣ: Зва́нный свы́ше:
Плодородѧ́щи непло́ды па́че наде́жды ꙳ дв҃ꙋ, хотѧ́щꙋю роди́ти бг҃а пло́тїю, ꙳ ра́достїю свѣ́титсѧ, ꙳ и҆ ликꙋ́етъ ра́дꙋющисѧ, ꙳ велегла́снѡ взыва́ющи: ꙳ колѣ̑на всѧ̑ сра́дꙋйтесѧ мнѣ̀ і҆и҃лєва. ꙳ сѐ во чре́вѣ ношꙋ̀, ꙳ и҆ поноше́нїе безча́дства ѿлага́ю, ꙳ ꙗ҆́коже благоизво́ли содѣ́тель, ꙳ ᲂу҆слы́шавъ моли́твꙋ мою̀, ꙳ и҆ болѣ̑зни се́рдца и҆сцѣлѝ, ꙳ въ жела́емыхъ мѝ.
И҆́же ѿ немо́кренна ка́мене, ꙳ и҆сточи́вый во́дꙋ, ꙳ пло́дъ чре́вꙋ твоемꙋ̀, а҆́нно, ꙳ да́рꙋетъ, приснодв҃ꙋ влⷣчцꙋ: ꙳ и҆зъ неѧ́же вода̀ спасе́нїѧ хо́щетъ произы́ти. ꙳ нектомꙋ̀ ꙗ҆́кѡ непло́днаѧ землѧ̀ ꙳ пребꙋ́деши на землѝ, ꙳ поноше́нїе ѿчꙋжди́ла є҆сѝ: ꙳ зе́млю бо возрасти́вши плодоносѧ́щꙋ жи́зни кла́съ поношє́нїѧ ѿе́млющїй всѣ̑мъ человѣ́кѡмъ, ꙳ ꙗ҆́коже благоизво́ли, ꙳ за милосе́рдїе ми́лости воѡбрази́тисѧ въ чꙋжде́е.
Прⷪ҇ро́чєскаѧ речє́нїѧ ꙳ ны́нѣ и҆сполнѧ́ютсѧ: ꙳ гора́ бо ст҃а́ѧ ꙳ въ ложесна́хъ водрꙋжа́етсѧ: ꙳ лѣ́ствица бжⷭ҇твеннаѧ насажда́етсѧ: прⷭ҇то́лъ вели́кїй цр҃е́въ проꙋготовлѧ́етсѧ: ꙳ мѣ́сто ᲂу҆краша́етсѧ бг҃овходи́мое: ꙳ кꙋпина̀ неѡпали́маѧ ꙳ начина́етъ прозѧба́ти: ꙳ мѷрополо́жница ст҃ы́ни ᲂу҆жѐ и҆стека́етъ, ꙳ непло́дствїѧ рѣ́ки простира́ющи бг҃омꙋ́дренныѧ а҆́нны, ꙳ ю҆́же вѣ́рою ᲂу҆блажа́емъ.
Сла́ва, и҆ ны́нѣ, гла́съ в҃: Ге́рманово:
Недовѣ́домое а҆́гг҃лѡмъ и҆ человѣ́кѡмъ вели́кое, є҆́же ѿ вѣ́ка сокрове́нное та́инство пресла́вное, дне́сь въ ложесна́хъ цѣломꙋ́дренныѧ а҆́нны младоно́ситсѧ марі́а бг҃оѻтрокови́ца, ᲂу҆готовлѧ́ема во вселе́нїе всѣ́хъ цр҃ѧ̀ вѣкѡ́въ, и҆ во ѡ҆бновле́нїе ро́да на́шегѡ. ю҆́же чи́стою со́вѣстїю ᲂу҆мо́лимъ, вопїю́ще къ не́й: молѝ сн҃а твоего̀ и҆ бг҃а, ꙗ҆́кѡ предста́тельница сꙋ́щи на́съ хрⷭ҇тїа́нъ, спастѝ дꙋ́шы на́шѧ.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
А҆́нна, бжⷭ҇твеннаѧ бл҃года́ть, и҆ногда̀ молѧ́щисѧ ѡ҆ ча́дѣ, возопѝ всѣ́хъ бг҃ꙋ и҆ зижди́телю: а҆дѡнаі̀ саваѡ́ѳъ, безча́дїѧ вѣ́си поноше́нїе, са́мъ болѣ́знь се́рдца моегѡ̀ разрѣшѝ, и҆ хлѧ́би ᲂу҆трѡ́бныѧ разве́рзи, и҆ непло́днꙋю плодоно́снꙋ покажѝ: ꙗ҆́кѡ да ражда́емое да́ръ тѝ принесе́мъ, благословѧ́ще, пою́ще и҆ є҆диномꙋ́дреннѡ сла́вѧще твоѐ благоꙋтро́бїе, и҆́мже мі́рꙋ дае́тсѧ ве́лїѧ ми́лость.
Сті́хъ: Клѧ́тсѧ гдⷭ҇ь дв҃дꙋ и҆́стиною и҆ не ѿве́ржетсѧ є҆ѧ̀.
Дре́вле молѧ́щисѧ вѣ́рнѡ а҆́нна цѣломꙋ́дреннаѧ и҆ бг҃а ᲂу҆молѧ́ющи, а҆́гг҃льскїй гла́съ ᲂу҆слы́ша, и҆звѣствꙋ́ющїй є҆́й про́симыхъ бжⷭ҇твенное сбытїѐ. къ не́йже безтѣле́сный ꙗ҆́вственнѡ бесѣ́доваше: моле́нїе твое́ бо гдⷭ҇ꙋ прибли́жисѧ, не сѣ́тꙋй и҆ ѿ сле́зъ ѿстꙋпѝ, благопло́дна бо бꙋ́деши ма́слина, прозѧба́ющи вѣ́твь кра́снꙋю дв҃ꙋ, ꙗ҆́же цвѣ́тъ процвѣте́тъ хрⷭ҇та̀ пло́тїю, подаю́щаго мі́рꙋ ве́лїю ми́лость.
Сті́хъ: Ѿ плода̀ чре́ва твоегѡ̀ посаждꙋ̀ на престо́лѣ твое́мъ.
Сꙋпрꙋ́гъ плодороди́тъ че́стенъ бжⷭ҇твеннꙋю ю҆́ницꙋ, и҆зъ неѧ́же про́йдетъ теле́цъ, неизрече́ннымъ сло́вомъ ᲂу҆пита́нный вои́стиннꙋ, за ве́сь мі́ръ закала́емый. тѣ́мъ, ра́дꙋющесѧ, и҆сповѣ́данїе непреста́нное во ᲂу҆миле́нїи гдⷭ҇еви прино́сѧтъ, и҆ всѧ́чєскаѧ по́льзꙋющꙋю и҆мѣ́ти бꙋ́дꙋтъ. сїѧ̑ ᲂу҆̀бо да ᲂу҆блажи́мъ, и҆ вѣ́рою ликовствꙋ́имъ въ зача́тїи бжⷭ҇твеннѣ, ꙗ҆́же ѿ ни́хъ бг҃а на́шегѡ мт҃ре ражда́емыѧ, є҆́юже дае́тсѧ бога́тнѡ ве́лїѧ ми́лость.
Сла́ва, и҆ ны́нѣ, гла́съ в҃:
Дне́сь и҆зъ ко́рене дв҃дова ца́рскаѧ порфѵ́ра прозѧ́бши, ѿ і҆ессе́а и҆зрасти́ти начина́етъ цвѣ́тъ та́инственный, въ не́йже хрⷭ҇то́съ бг҃ъ на́шъ процвѣтѐ, спаса́ѧй дꙋ́шы на́шѧ.
Тропа́рь, гла́съ д҃:
Дне́сь безча́дїѧ ᲂу҆́зы разрѣша́ютсѧ, і҆ѡакі́ма бо и҆ а҆́ннꙋ ᲂу҆слы́шавъ бг҃ъ, па́че наде́жды роди́ти тѣ̑мъ ꙗ҆́вѣ ѡ҆бѣщава́етъ бг҃оѻтрокови́цꙋ, и҆зъ неѧ́же са́мъ роди́сѧ неѡпи́санный, человѣ́къ бы́въ, а҆́гг҃лѡмъ повелѣ́въ вопи́ти є҆́й: ра́дꙋйсѧ, бл҃года́тнаѧ, гдⷭ҇ь съ тобо́ю.
Се́й тропа́рь глаго́летсѧ безъ бг҃оро́дична.
На ᲂу҆́трени, на Бг҃ъ гдⷭ҇ь, тропа́рь три́жды.
По а҃-й каѳі́смѣ, сѣда́ленъ, гла́съ а҃. Поⷣ: Ли́къ а҆́гг҃льскїй:
Но́вое не́бо во чре́вѣ а҆́нны зи́ждетсѧ бг҃а вседѣ́телѧ повелѣ́нїемъ, и҆зъ негѡ́же возсїѧ́етъ невече́рнее сл҃нце, мі́ръ ве́сь просвѣща́ющее лꙋча́ми бжⷭ҇тва̀, премно́жествомъ бл҃гоꙋтро́бїѧ, є҆ди́нъ чл҃вѣколю́бецъ.
Сла́ва, и҆ ны́нѣ, то́йже.
По в҃-й каѳі́смѣ, сѣда́ленъ, гла́съ и҆ поⷣ: то́йже:
Ли́къ прⷪ҇ро́ческїй проповѣ́да дре́вле непоро́чнꙋю чⷭ҇тꙋю и҆ бг҃оѻтрокови́цꙋ дв҃ꙋ, ю҆́же а҆́нна зача́тъ, непло́ды сꙋ́щи и҆ безча́дна: сїю̀ дне́сь весе́лїемъ се́рдца ᲂу҆блажи́мъ, спа́сшесѧ є҆ѧ̀ ра́ди, ꙗ҆́кѡ є҆ди́нꙋ непоро́чнꙋю.
Сла́ва, и҆ ны́нѣ, то́йже.
Канѡ́на два̀ ст҃ы́ѧ а҆́нны: а҃-й со і҆рмосо́мъ на и҃: вторы́й на ѕ҃.
Творе́нїе а҆ндре́ево.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Зача́тїе дне́сь, бг҃омꙋ́драѧ а҆́нно, твоѐ пра́зднꙋемъ, ꙗ҆́кѡ вмѣсти́вшꙋю нигдѣ́же вмѣсти́маго зачала̀ є҆сѝ, непло́дныхъ ѿрѣ́шшисѧ ᲂу҆́зъ.
Пра́ведныхъ ᲂу҆слы́шалъ є҆сѝ моли́твꙋ, ст҃ы́хъ и҆спо́лнилъ є҆сѝ ѡ҆бѣща́нїе, гдⷭ҇и, пра́ѻтєцъ твои́хъ, и҆ си̑мъ да́лъ є҆сѝ пло́дъ тебѐ ро́ждшꙋю, чⷭ҇тꙋю. (с. 155)
А҆́нна сла́внаѧ ны́нѣ зачина́етъ чⷭ҇тꙋю, безпло́тнаго заче́ншꙋю гдⷭ҇а пребл҃га́го: и҆ роди́ти и҆́мать пло́тїю и҆мꙋ́щꙋю роди́ти хрⷭ҇та̀.
Ѿ тлѣ́нныхъ возсїѧ́ла є҆сѝ, дв҃о, ложе́снъ: въ нетлѣ́ннѣ во чре́вѣ сла́вы сл҃нце носи́ла є҆сѝ, бы́вша ꙗ҆́коже є҆смы̀, кромѣ̀ враще́нїѧ и҆ смѣше́нїѧ.
Дрꙋгі́й канѡ́нъ, є҆гѡ́же краегране́сїе по а҆лфави́тꙋ.
Гла́съ то́йже. Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.
Чи́стꙋю дв҃ꙋ бг҃оѻтрокови́цꙋ, мт҃рь бы́ти хотѧ́щꙋю созда́телѧ, во чре́вѣ прїе́мши а҆́нна, ра́достнѡ вопїѧ́ше: кѡлѣ́на всѧ̑ і҆и҃лєва сра́дꙋйтесѧ мнѣ̀, се́ бо и҆ а҆́зъ зача́хъ.
Кни́гꙋ, ю҆́же проречѐ прⷪ҇ро́къ, запеча́танꙋ дх҃омъ бж҃е́ственнымъ, въ ложесна́хъ свои́хъ содержа́щи, а҆́нна всѣ̑мъ вопїѧ́ше: ю҆́же всѧ̑ списа̑нїѧ проѧвлѧ́ютъ, возвелича́юсѧ а҆́зъ, прозѧба́ющи дне́сь.
Во чре́вѣ вмѣща́етсѧ и҆ созида́етсѧ хра́мъ бжⷭ҇твенный и҆ спаси́тельный въ ложесна́хъ мт҃рнихъ: насажда́етсѧ лѣ́ствица, ꙗ҆́же къ вы̑шнимъ всѧ̑ человѣ́ки возводѧ́щаѧ. є҆ѧ́же зача́тїе вѣ́рнѡ да торжествꙋ́емъ.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Пло́дъ чре́ва а҆́ще пода́си мнѣ̀, вопїѧ́ше а҆́нна ко гдⷭ҇ꙋ, возвели́чꙋсѧ, и҆ тебѣ̀ принесꙋ̀ се́й. сегѡ̀ ра́ди зачина́етъ чⷭ҇тꙋю бг҃ома́терь.
Ꙗ҆́же по зако́нꙋ сконча́вши, и҆ бг҃ꙋ непоро́чнѡ (с. 156) рабо́тавши, чревоно́сиши вои́стиннꙋ законода́вца ро́ждшꙋю, а҆́нно всечестна́ѧ: тѣ́мже тѧ̀ вѣ́рнїи ᲂу҆блажа́емъ.
Въ садꙋ̀ молѧ́щейсѧ тебѣ̀, гла́съ ᲂу҆слы́ша высоча́йшїй, а҆́нно бг҃омꙋ́драѧ, и҆ пло́дъ чре́вꙋ твоемꙋ̀ дае́тъ, раѧ̀ ѿве́рзшꙋю две́рь благода́тїю.
Бг҃оро́диченъ:
Непло́дствꙋющїѧ мы́сли моеѧ̀ непло́дїе всѧ́кое ѿженѝ, и҆ плодоно́снꙋ добродѣ́тельми дꙋ́шꙋ мою̀ покажѝ, всест҃а́ѧ бцⷣе, вѣ́рныхъ по́моще.
И҆́нъ. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.
Прїе́млетъ съ высоты̀ молѧ́йсѧ гдⷭ҇ꙋ і҆ѡакі́мъ вожделѣ́нное вѣща́нїе, предста́вшꙋ а҆́гг҃лꙋ є҆мꙋ̀ и҆ глаго́лющꙋ: ѿидѝ, твоѧ̑ прошє́нїѧ, пра́ведне, всѣ́хъ бг҃ъ и҆спо́лни.
Призыва́ющи всѣ́хъ бг҃а, а҆́нна и҆ногда̀ въ садꙋ̀ стоѧ́щи, предста́вша зрѧ́ше себѣ̀ а҆́гг҃ла и҆ глаго́люща: да не скорби́ши, мт҃ри бо бж҃їей ма́ти и҆́маши бы́ти.
Ревнꙋ́ющи а҆́ннѣ, сꙋ́щей пре́жде тебє̀, молє́нїѧ къ бг҃ꙋ принесла̀ є҆сѝ, и҆ безсѣ́меннѡ прїе́мшꙋю сло́во невмѣсти́мое, чи́стꙋю во ᲂу҆тро́бѣ зачала̀ є҆сѝ, благоча́дїемъ твои́мъ всѧ̑ ны̀ а҆́нна ѡ҆благода́тивши.
Сѣда́ленъ, гла́съ д҃. Подо́бенъ: Вознесы́йсѧ:
І҆ѡакі́мъ свѧще́нный и҆ а҆́нна да́ръ принесо́ша дрє́внимъ свѧще́нникѡмъ, и҆ не прїѧ́ти бы́ша, непло́ды сꙋ́ще, мольбꙋ̀ принесо́ша да́телю всѧ́ческихъ, и҆ моли́твꙋ и҆́хъ ᲂу҆слы́шавъ, да́рꙋетъ и҆̀мъ сꙋ́щѡ две́рь жи́зни, є҆ѧ́же ст҃о́е почти́мъ зача́тїе.
Сла́ва, и҆ ны́нѣ: Подо́бенъ: Оу҆диви́сѧ і҆ѡ́сифъ:
Нескве́рнаѧ а҆́гница и҆ пречⷭ҇тый черто́гъ, ѿ првⷣникѡвъ произы́ти ны́нѣ начина́етъ, вѣ́рнїи, бг҃оꙋкраше́ннаѧ марі́а пресла́внѡ. весели́тесѧ про́чее, не́бо и҆ землѧ̀, и҆ всѝ земноро́днїи, совзыгра́йте: ꙗ҆́кѡ сотворѝ дне́сь пресла̑внаѧ бг҃ъ, во чре́вѣ непло́дствꙋющїѧ пло́дъ, є҆ди́нꙋ показа́въ дв҃ꙋ, ю҆́же вѣ́рнѡ воспое́мъ.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Ѽ бжⷭ҇твеннагѡ вѣща́нїѧ! ѽ стра́ннагѡ глаго́ланїѧ! а҆́ще и҆ а҆́зъ зачнꙋ̀; а҆́гг҃лꙋ къ не́й посла́вшꙋсѧ, а҆́нна, ᲂу҆дивлѧ́ющисѧ, велегла́снѡ вопїѧ́ше: бг҃ꙋ моемꙋ̀ сла́ва, творѧ́щемꙋ пресла̑внаѧ.
Сра́дꙋйтесѧ мнѣ̀ всѧ̑ племена̀ і҆и҃лєва: во ᲂу҆тро́бѣ зача́хъ но́вое не́бо, и҆зъ негѡ́же ѕвѣзда̀ возсїѧ́етъ пома́лѣ спасе́нїѧ, і҆и҃съ свѣтода́вецъ, а҆́нна, ра́дꙋющисѧ, взыва́ше.
Оу҆слы́ша а҆́ннино бг҃ъ стена́нїе, и҆ внѧ́тъ гдⷭ҇ь моли́твѣ є҆ѧ̀, и҆ безча́дїѧ ѻ҆́блакъ разори́въ, свѣ́томъ ѡ҆зарѧ́етъ благоча́дїѧ пресла́внѡ. тѣ́мже зачина́етъ є҆ди́нꙋ чⷭ҇тꙋю.
Бг҃оро́диченъ:
Дв҃о бцⷣе, нескве́рнаѧ ски́нїе, ѡ҆скверне́ннаго прегрѣше́ньми ѡ҆чи́сти мѧ̀ ны́нѣ щедро́тъ твои́хъ чистѣ́йшими кропле́ньми, и҆ да́ждь мѝ рꙋ́кꙋ по́мощи, да зовꙋ̀: сла́ва тебѣ̀, чⷭ҇таѧ бг҃опросла́вленнаѧ.
И҆́нъ. І҆рмо́съ:
Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Ѿве́рзесѧ ᲂу҆тро́ба твоѧ̀, ꙗ҆́же пре́жде неражда́ющаѧ, и҆ прїе́млеши, а҆́нно, ѻ҆́блакъ нбⷭ҇ный, и҆зъ негѡ́же на́мъ свѣ́тлое возсїѧ́въ сл҃нце, всѧ̑ свѣ́томъ и҆́стины ѡ҆зарѝ, и҆ глꙋбо́кꙋю тмꙋ̀ безбо́жїѧ ѿгна̀.
Престо́лъ ѻ҆гнеѻбра́зный бж҃їй въ ложесна́хъ твои́хъ водрꙋзи́сѧ: на не́мже сѣ́дъ воспочѝ, и҆ всѣ́хъ благочести́выхъ трꙋ́дъ ѿѧ́тъ, и҆ чи́стое бг҃озна́нїе водрꙋзѝ на землѝ, а҆́нно блаже́ннаѧ, бг҃опрїѧ́тнаѧ.
Сѐ, є҆го́же проречѐ соломѡ́нъ, во ᲂу҆тро́бѣ ѻ҆́дръ прїѧ́ла є҆сѝ, сохранѧ́емь и҆́стиннѣйше, и҆́стинномꙋ цр҃ю̀, къ бжⷭ҇твенномꙋ воззва́нїю, ро́да человѣ́ча ѡ҆браще́нїю: тѣ́мже тѧ̀ ра́достнѡ, а҆́нно, вѣ́рнїи ᲂу҆блажа́емъ.
Пѣ́снь є҃. І҆рмо́съ:
Тво́й ми́ръ да́ждь на́мъ, сн҃е бж҃їй: и҆но́гѡ бо, ра́звѣ тебє̀, бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
И҆зъ ко́рене прозѧ́бшаѧ дв҃дова и҆ і҆ессе́ева, а҆́нна ны́нѣ расти́ти начина́етъ бжⷭ҇твенный же́злъ, прозѧ́бшїй та́инственный цвѣ́тъ хрⷭ҇та̀, всѣ́хъ зижди́телѧ.
Ма́терь бы́вшꙋю мѧ̀, а҆́нна вопїѧ́ше, ᲂу҆́зрѧтъ лю́дїе и҆ ᲂу҆чꙋдѧ́тсѧ: се́ бо рождꙋ̀, ꙗ҆́кѡ благоволѝ соꙋ́зы разрѣши́вый непло́дствїѧ моегѡ̀.
Ѻ҆трокови́цꙋ, ю҆́же зача́хъ а҆́зъ, проро́честїи гла́си и҆здале́ча провозвѣсти́ша, го́рꙋ и҆ две́рь непрохо́днꙋю, прера́достнѡ а҆́нна вопїѧ́ше приходѧ́щымъ.
Бг҃оро́диченъ:
Ѻ҆́блакъ, и҆ ра́й, и҆ две́рь тѧ̀ свѣ́та, трапе́зꙋ, и҆ рꙋно̀ вѣ́мы, и҆ ста́мнꙋ, внꙋ́трь ма́ннꙋ носѧ́щꙋю, сла́дость мі́ра, чⷭ҇таѧ дв҃о мт҃и.
И҆́нъ. І҆рмо́съ:
Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ, бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Сни́де съ горы̀ і҆ѡакі́мъ, не скрижа́ли зако́на прїе́мый, но ю҆́же зако́нъ преднаписа̀, и҆ всѧ̑ прⷪ҇ро́чєскаѧ ѿкры́ша речє́нїѧ, бж҃їю мт҃рь чⷭ҇тꙋю, и҆ и҆гра́ѧ вопїѧ́ше: возвели́чисѧ се́рдце моѐ.
Въ ложесна́хъ ꙗ҆́кѡ ѡ҆щꙋтѝ а҆́нна и҆ногда̀ насажде́ннꙋю благопло́днꙋю ло́зꙋ, и҆зъ неѧ́же гро́здъ процвѣтѐ зрѣ́лый, на́мъ вїно̀ безсме́ртїѧ ѻ҆би́льнѡ и҆ска́пающїй, что́ ти возда́мъ, бл҃гоꙋтро́бне гдⷭ҇и, вѣща́ше;
Не терпѧ̀ і҆ѡакі́мъ тва́рь зрѣ́ти благоче́стїемъ не пло́дствꙋющꙋ, непло́дствꙋ а҆́ннинꙋ преитѝ молѧ́шесѧ, и҆ сїю̀ воз̾имѣ́ти ѻ҆трокови́цꙋ, и҆зъ неѧ́же сн҃ъ даде́сѧ, всѧ̑ сыноположи́вый своемꙋ̀ ѻ҆ц҃ꙋ̀, высоча́йшїй.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Ка́кѡ вмѣща́етсѧ во чре́вѣ вмѣсти́вшаѧ бг҃а; ка́кѡ ражда́етсѧ хрⷭ҇та̀ роди́вшаѧ пло́тїю; ка́кѡ же сосца́ми пита́етсѧ, ꙗ҆́же зижди́телѧ млеко́мъ напои́вшаѧ;
Мольбꙋ̀ ва́шꙋ ᲂу҆слы́шавъ бг҃ъ, плодови́тъ пло́дъ ны́нѣ да́рꙋетъ ва́мъ, всехва́льнїи і҆ѡакі́ме и҆ а҆́нно, дне́сь.
Чи́стꙋю голꙋби́цꙋ заче́нши во чре́вѣ, ра́дости дꙋхо́вныѧ и҆спо́лнисѧ и҆́стиннѡ, приносѧ́щи пѣ̑сни благода̑рныѧ а҆́нна бг҃ꙋ.
Бг҃оро́диченъ:
Треволнє́нїѧ помыслѡ́въ, и҆ страсте́й наведє́нїѧ, и҆ глꙋбина̀ грѣхѡ́въ ѻ҆каѧ́ннꙋю дꙋ́шꙋ мою̀ ѡ҆бꙋрева́ютъ: помози́ ми, ст҃а́ѧ влⷣчце.
И҆́нъ. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Зако́на сѣ̑ни ꙗ҆́вѣ прехо́дѧтъ: се́ бо зарѧ̀ бжⷭ҇твенныѧ бл҃года́ти показꙋ́етсѧ, дв҃а ѻ҆́блакъ, и҆зъ негѡ́же свѣ́тлое бжⷭ҇тва̀ возсїѧ́етъ вои́стиннꙋ сл҃нце, а҆́нна ра́дꙋющисѧ взыва́ше, бг҃а і҆и҃лева велича́ющи.
Стра́нное, а҆́ще и҆ а҆́зъ зачнꙋ̀, зрѣ́нїе, ꙗ҆́же пре́жде непло́дна и҆ неражда́ющаѧ, а҆́нна глаго́лаше, вѣща́ющаго а҆́гг҃ла ꙗ҆́кѡ ᲂу҆слы́ша, ꙗ҆́кѡ ѻ҆троча̀ роди́тсѧ, и҆ взыва́ше: до́брѣ блага́гѡ слы́шанїѧ, а҆́ще слове́съ сбытїѐ бꙋ́детъ.
Го́ры и҆ хо́лми, полѧ̀ и҆ мо́ре, а҆́гг҃льское мно́жество, и҆ всѐ є҆стество̀ человѣ́ческое да веселѧ́тсѧ: влⷣки бо бжⷭ҇твенный хра́мъ, нача́токъ примире́нїѧ прїѧ́тъ а҆́нна, є҆гда̀ ѡ҆щꙋтѝ себѐ самꙋ́ю заче́ншꙋю, вѣща́ше.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Пра́зднꙋетъ дне́сь вселе́ннаѧ а҆́ннино зача́тїе, бы́вшее ѿ бг҃а: и҆́бо та̀ породѝ па́че сло́ва сло́во ро́ждшꙋю.
І҆́косъ:
І҆ѡакі́мъ чꙋ́дный и҆ а҆́нна бг҃омꙋ́драѧ, ѻ҆́ба живꙋ́ще во всѧ́комъ благоче́стїи, по зако́нꙋ мѡѷсе́евꙋ, непло́дни бѧ́хꙋ, и҆ молѧ́хꙋсѧ бг҃ꙋ все́ю дꙋше́ю, глаго́люще: гдⷭ҇и саваѡ́ѳъ пребл҃гі́й, всѧ́ческихъ наде́жда, безча́дствїѧ болѣ́знь и҆ ᲂу҆кори́знꙋ вѣ́си и҆ печа́ль, пода́ждь ᲂу҆̀бо на́мъ пло́дъ и҆зъ чре́ва, и҆ принесе́мъ того̀ въ хра́мъ тво́й да́ръ свѧще́нъ, и҆ приноше́нїе и҆спо́лнено, па́че сло́ва сло́во ро́ждшꙋю.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ.
Безча́дства ᲂу҆кори́зны ᲂу҆бѣжа́ти молѧ́ше а҆́нна всѣ́хъ влⷣкꙋ, и҆ сеѧ̀ ми́лостивый гла́съ ᲂу҆слы́шавъ, того̀ ро́ждшꙋю пло́дъ подадѐ то́й, ꙗ҆́коже благоволѝ.
Ца́рскаѧ порфѵ́ра въ твое́мъ чре́вѣ и҆стка́тисѧ, а҆́нно, начина́етсѧ, ю҆́же бг҃ъ и҆ цр҃ь всѣ́хъ поне́съ, человѣ́кѡмъ ꙗ҆ви́тсѧ, и҆ смири́тъ врагѝ, борю́щыѧ ны̀.
Мѵ́ро благово́нное во ᲂу҆тро́бѣ зачала̀ є҆сѝ а҆́нно, мѵ́ро жи́зни преесте́ственнѡ воспрїе́мшꙋю влⷣкꙋ, дыха́ньми благода́ти помышлє́нїѧ на̑ша ѡ҆благоꙋха́вшаго.
Бг҃оро́диченъ:
Ꙗ҆́кѡ ѿ трⷪ҇цы є҆ди́наго тѧ̀, хрⷭ҇тѐ, сла́вимъ, ꙗ҆́кѡ и҆зъ дв҃ы вопло́щсѧ, кромѣ̀ враще́нїѧ человѣ́ческа, всѧ̑ поне́слъ є҆сѝ, не ѿстꙋпи́въ є҆стества̀ ѻ҆ч҃ескагѡ, і҆и҃се, а҆́ще и҆ соедини́лсѧ є҆сѝ на́мъ.
И҆́нъ. І҆рмо́съ:
Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене, стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Ѻ҆гнено́снꙋю дре́вле кꙋпинꙋ̀, мѡѷсе́й на сїна́и ю҆́же ви́дѣ, а҆́нна зача́тъ во чре́вѣ безча́дствїѧ, ѻ҆́гнь погаша́ющꙋю, ꙗ҆́кѡ нѣ́кое ѕлоче́стїе, пою́щымъ: ѻ҆тцє́въ бж҃е, бл҃гослове́нъ є҆сѝ.
Ка́плѧ твое́й ᲂу҆тро́бѣ пресла́внѡ ны́нѣ, а҆́нно, и҆сточи́сѧ, ꙗ҆́же во́дꙋ жи́зни всю̀ внꙋ́трь воспрїѧ́ше, ѡ҆роша́ющꙋю вѣ́рнѡ томꙋ̀ зовꙋ́щыѧ: ѻ҆тцє́въ бж҃е, бл҃гослове́нъ є҆сѝ.
Пте́нчее ꙗ҆́кѡ ᲂу҆зрѣ̀ гнѣздо̀, впери́ласѧ є҆сѝ дꙋ́хомъ и҆ моли́твою: голꙋби́цꙋ прїѧ́ла є҆сѝ нескве́рнꙋ, сꙋче́цъ носѧ́щꙋю хрⷭ҇та̀ ма́слинный, а҆́нно, мы́сленнагѡ пото́па на́съ свобожда́ющїй.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите, ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.
Дв҃дъ ꙗ҆́же проречѐ цр҃и́цꙋ, сѐ, во чре́вѣ прїе́млю, а҆́нна вопїѧ́ше: и҆ рождꙋ̀ всѣ́хъ предста́тельницꙋ вѣ́рныхъ, цр҃ѧ̀ хрⷭ҇та̀ и҆мꙋ́щꙋю роди́ти.
Землѧ̀, въ ню́же всели́сѧ землѝ содѣ́тель, ски́птръ ст҃ы́й, но́вый кївѡ́тъ, ста́мна ма́нны въ ложесна́хъ ма́тере, сего̀ ро́ждшꙋю начина́етъ прозѧба́ти.
Кꙋпина̀ неѡпа́льнаѧ, свѣ́щникъ златы́й, ѡ҆дꙋшевле́нный черто́гъ гдⷭ҇а бг҃а, честны́й же́злъ, во чре́вѣ ма́тере, сего̀ ро́ждшꙋю начина́етъ прозѧба́ти.
Бг҃оро́диченъ:
Возста́ви лежа́щаго мѧ̀ во глꙋбинѣ̀ ѕѡ́лъ, ны́нѣ борю́щыѧ мѧ̀ побѣдѝ врагѝ. ᲂу҆ѧ́звена безмѣ́стными сластьмѝ бл҃га́ѧ чⷭ҇таѧ, не пре́зри, но ᲂу҆ще́дри и҆ спасѝ.
И҆́нъ. І҆рмо́съ:
Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Что́ ми ᲂу҆тро́бꙋ содѣ́лалъ є҆сѝ безча́дствꙋющꙋ, и҆ сосцы̀ сꙋхі̑ѧ; ꙗ҆́коже проре́клъ є҆сѝ во прⷪ҇ро́цѣхъ, влⷣко, вопїѧ́ше а҆́нна и҆ногда̀: безча́дїѧ моегѡ̀ ᲂу҆кори́знꙋ разрѣшѝ, и҆ да́ждь мѝ пло́дъ, съ ни́мже вопїю̀: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Вни́де въ твою̀, а҆́нно, ᲂу҆тро́бꙋ свѣ́щникъ, и҆́же свѣщꙋ̀ бжⷭ҇твеннꙋю та́йнѡ вмѣстѝ, просвѣща́ющꙋю всѧ́ко дыха́нїе сїѧ̑нїи та́йными бжⷭ҇твеннагѡ зна́нїѧ. тѣ́мже ра́дꙋющисѧ взыва́ла є҆сѝ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Но́сѧтъ, ꙗ҆́коже краснѣ́йшїй ны́нѣ сопрꙋ́гъ, бжⷭ҇твеннꙋю ю҆́ницꙋ, и҆зъ неѧ́же теле́цъ кра́сный возсїѧ̀, за всѣ́хъ закла́выйсѧ, сла́вный і҆ѡакі́мъ и҆ а҆́нна, пою́ще: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Пѣ́снь ѳ҃. І҆рмо́съ:
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ.
Живопрїе́мный и҆сто́чникъ зачина́ющи, а҆́нно бг҃омꙋ́драѧ, ра́дость ны́нѣ прїимѝ, хра́мъ ст҃ы́й внꙋ́трь во чре́вѣ твое́мъ прїе́млющи, свѣ́томъ пра́вды ѡ҆блиста́емꙋ созда́телѧ велича́ющи.
Сопрꙋ́гъ честны́й и҆ пресла́вный, превѣ́чнагѡ сн҃а пра́ѻтцы, зако́на храни́телїе и҆звѣ́стнїи бы́вше, нача́токъ ра́дости ро́ждшїи, і҆ѡакі́мъ же и҆ а҆́нна почте́ни да бꙋ́дꙋтъ.
Ю҆́же данїи́лъ го́рꙋ вели́кꙋю ви́дѣ, и҆ і҆ѡ́иль зе́млю ст҃ꙋ́ю ᲂу҆зрѣ̀, две́рь непрохо́днꙋ, и҆́нъ же проречѐ запеча́танный и҆сто́чникъ, и҆ бжⷭ҇твенное рꙋно̀ бцⷣꙋ дв҃ꙋ воспои́мъ.
Бг҃оро́диченъ:
Порфѵ́ра, ꙗ҆́же рꙋно̀ ѡ҆багри́вшаѧ, неизрече́ннагѡ сло́ва воплоще́нїѧ, кади́льница злата́ѧ, трапе́за, на не́йже хлѣ́бъ хрⷭ҇то́съ возложи́сѧ, бцⷣа дв҃а сла́витсѧ.
И҆́нъ. І҆рмо́съ:
Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.
Ликовствꙋ́йте всѧ̑ дꙋ́шы, и҆ взыгра́йте: ны́нѣ землѧ̀ созда́сѧ, ꙗ҆́же плодороди́тъ неѡра́ннѣ кла́съ жизноно́сный, ѿ негѡ́же ꙗ҆́дше, не вза́лчꙋтъ когда̀, благосты́ню тогѡ̀ велича́ющїи.
Ѱалти́рь съ гꙋ́слїю воспрїимѝ, дв҃де, и҆ пѣсновоспо́й: сѐ, кївѡ́тъ ꙗ҆ви́сѧ бж҃їй, є҆го́же предре́клъ є҆сѝ ꙗ҆́вѣ бꙋ́дꙋщїй въ назда́нїе, и҆́мже воста́хомъ мы̀ ѿ грѣхопаде́нїѧ.
Ꙗ҆́кѡ велича́йшыѧ двѣ̀ ѕвѣзды̀, и҆знесо́сте всесвѣ́тлꙋю зарю̀, ꙗ҆́же возсїѧ́етъ вели́кое сл҃нце мі́рꙋ. тѣ́мже бл҃гохва́лимъ и҆ сла́вимъ ва́съ, і҆ѡакі́ме и҆ а҆́нно, ꙗ҆́кѡ бг҃омꙋ̑дрыѧ.
Свѣти́ленъ. Подо́бенъ: Свѣ́те неизмѣ́нный:
Свѣ́тъ ро́ждшаѧ, всю̀ ѡ҆зарѧ́ющїй, тва́рь, дне́сь начина́етъ прозѧба́ти а҆́нна непло́дными ложєсны̀. тѣ́мже стеце́мсѧ всѝ, и҆́бо прїи́де и҆збавле́нїе ѡ҆сꙋжде́нїѧ є҆́ѵина.
Сла́ва, и҆ ны́нѣ, то́йже.
На хвали́техъ стїхи̑ры на д҃, гла́съ а҃. Поⷣ: Нбⷭ҇ныхъ чинѡ́въ:
Ꙗ҆́же пре́жде человѣ́кѡвъ є҆стество̀ непло́дствꙋющее, ꙳ ꙗ҆́же къ бг҃ꙋ наде́жди, ꙳ нача́токъ благоче́стїѧ, прозѧба́етъ дв҃ꙋ, ꙳ є҆́юже до́брыхъ благопло́дїе проповѣ́дꙋетсѧ, ꙳ въ зача́тїи сеѧ̀ на землѝ, ꙳ припода́ти прише́ствїю хрⷭ҇то́вꙋ.
Два́жды.
Непроходи́маѧ две́рь цр҃ѧ̀ хрⷭ҇та̀, ꙳ ꙗ҆́же бж҃їимъ совѣ́томъ, ꙳ въ непло́дныхъ ложесна́хъ зача́тїе прїе́млетъ. ꙳ є҆́йже на землѝ предлага́емѣй, ꙳ во́змꙋтсѧ нбⷭ҇наѧ врата̀, и҆ земны̑мъ попꙋ́стѧтъ вхо́дъ.
И҆́же пре́жде вѣ̑къ неизрече́ннѡ ꙳ ѿ бг҃а земны̑мъ проповѣ́данныхъ бжⷭ҇твенныхъ ꙳ и҆ стра́шныхъ та́инствъ, ꙳ нача́токъ вѣ́ры ꙗ҆ви́сѧ, ꙳ чⷭ҇тыѧ и҆ бг҃оѻтрокови́цы зача́тїе. ꙳ є҆́юже дѣлѡ́мъ тмы̀ и҆ страстє́мъ преста́ти предвозвѣща́етъ.
Сла́ва, и҆ ны́нѣ, гла́съ и҃: Мала́ѯа:
Прїиди́те, ра́достнѡ дне́сь, всѧ́къ чи́нъ и҆ во́зрастъ человѣ́ческїй, со а҆́гг҃льскими ли̑ки, пресла́вное зача́тїе бцⷣы свѣ́тлѡ пра́зднꙋемъ: патрїа́рси, всѣ́хъ цр҃ѧ̀ мт҃рь: прⷪ҇ро́цы, ю҆́же ва́ми проповѣ́даннꙋю: пра́ѻтцы, ю҆́же ѿ ва́съ бг҃ома́терь: ста́рцы, бг҃оѻтцє́въ: бг҃оѻтцы̀, бг҃оѻтрокови́цꙋ: дѣ̑вы, приснодв҃ꙋ: вѣ́рнїи, ко́рень вѣ́ры: свѧще́нницы, всесвѧще́нный хра́мъ бж҃їй: ст҃ы́хъ всѣ́хъ ли́цы, винꙋ̀ собра́нїѧ ва́шегѡ: а҆́гг҃льскаѧ же вѡ́инства, ро́ждшꙋю влⷣкꙋ всеѧ̀ тва́ри и҆ сп҃са дꙋ́шъ на́шихъ.
Славосло́вїе вели́кое. По трист҃о́мъ тропа́рь є҆ди́ножды: и҆ ѿпꙋ́стъ.
На лїтꙋргі́и: Бл҃жє́нна ѿ канѡ́на пѣ́снь г҃-ѧ, и҆ втора́гѡ пѣ́снь ѕ҃-ѧ. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а: А҆пⷭ҇лъ къ гала́тѡмъ, зача́ло с҃і, ѿ полꙋ̀. А҆ллилꙋ́їа, гла́съ а҃: Спасе́нїе првⷣныхъ ѿ гдⷭ҇а: Є҆ѵⷢ҇лїе лꙋкѝ, зача́ло л҃ѕ. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ: