Библиотеке требуются волонтёры

Мѣ́сѧца тогѡ́же въ к҃а-й де́нь. Прпⷣбнагѡ ѻ҆ц҃а̀ на́шегѡ тїмоѳе́а, и҆́же въ сѷмво́лѣхъ:

И҆ и҆́же во ст҃ы́хъ ѻ҆ц҃а̀ на́шегѡ є҆ѵста́ѳїа, а҆рхїепⷭ҇копа а҆нтїохі́йскагѡ.

На Гдⷭ҇и, воззва́хъ, стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!

Ѻ҆́ч҃е бг҃омꙋ́дре тїмоѳе́е, ꙳ воздержа́нїемъ мно́гимъ, ꙳ и҆ ча́стыми моли́твами, ꙳ страсте́й взыгра̑нїѧ ꙳ до конца̀ потреби́лъ є҆сѝ, ꙳ и҆ безстра́стїѧ бл҃года́ть прїе́мъ, ꙳ прїѧ́телище ꙗ҆ви́лсѧ є҆сѝ бжⷭ҇твеннагѡ дх҃а. ꙳ тѣ́мже дꙋ́хи ѿгонѧ́еши всегда̀ лꙋка̑выѧ, ꙳ живы́й и҆ по сме́рти, бг҃облаже́нне.

Ѻ҆́ч҃е бг҃омꙋ́дре тїмоѳе́е, ꙳ а҆враа́мꙋ подо́бникъ нело́женъ бы́лъ є҆сѝ, ꙳ и҆сцѣлѧ́ѧ всю́дꙋ ꙳ къ тебѣ̀ прибѣга́ющыѧ. ꙳ і҆́ѡвлевꙋ стѧжа́лъ є҆сѝ въ болѣ́знехъ крѣ́пость, ꙳ дв҃довꙋ кро́тость и҆мѣ́ѧ, ꙳ житїѐ равноа́гг҃льно на землѝ пожи́лъ є҆сѝ, ꙳ жела́нїе полꙋчи́лъ є҆сѝ коне́чное, ꙳ ѡ҆ на́съ молѧ́сѧ.

Ѻ҆́ч҃е бг҃омꙋ́дре тїмоѳе́е, ꙳ цѣломꙋ́дрїѧ ѻ҆́бразъ, ꙳ воздержа́нїѧ подписа́тель, ꙳ благоче́стїѧ зра́къ, ꙳ и҆ и҆сто́чникъ ᲂу҆миле́нїѧ, ꙳ правосла́вїѧ ᲂу҆твержде́нїе непоколеби́мо, ꙳ и҆сцѣле́нїй стрꙋѧ̀ присноте́чна, ꙳ со́лнце незаходи́мо, ꙳ ча́до бжⷭ҇твенныѧ бл҃года́ти, ꙳ и҆ мона́шествꙋющихъ ꙗ҆ви́лсѧ є҆сѝ ᲂу҆добре́нїе, прече́стне.

И҆́ны стїхи̑ры ст҃и́телю, гла́съ то́йже. Подо́бенъ: Что̀ вы̀ нарече́мъ:

И҆мѣ́ѧ житїѐ нбⷭ҇но, ꙳ ѿ бг҃а свѧще́нствовати положе́нъ бы́лъ є҆сѝ вои́стиннꙋ: ꙳ и҆ приноси́лъ є҆сѝ є҆мꙋ̀ слꙋ̑жбы ᲂу҆мо́мъ чи́стымъ. ꙳ Бѣды̑ претерпѣ́лъ є҆сѝ, бл҃же́нне, и҆ (с. 335) болѣ̑зни, ꙳ проповѣ́данїѧ ра́ди бжⷭ҇твеннагѡ, ꙳ и҆ тве́рдыѧ и҆́стины, ꙳ ю҆́же твои́ми словесы̀ ᲂу҆тверди́лъ є҆сѝ, ꙳ безꙋ̑мныѧ ѡ҆блича́ѧ ꙗ҆́вственнѡ.

Сло́вомъ свѧще́нныхъ твои́хъ тече́нїй ꙳ запали́лъ є҆сѝ ꙗ҆́вѣ хвра́стїе ꙳ а҆́рїа ѕлочести́вагѡ хꙋлє́нїѧ, ꙳ ѻ҆ц҃ꙋ̀ невмѣща́юща сн҃ꙋ ꙳ є҆стество́мъ и҆менова́тисѧ равноче́стнꙋ, ꙳ всесвѧще́нне є҆ѵста́ѳїе. ꙳ и҆ сердца̀ просвѣти́лъ є҆сѝ, ꙳ и҆ и҆́стиною ᲂу҆держа́лъ є҆сѝ, ꙳ вѣ́рою творѧ́щихъ па́мѧть твою̀.

Помава́ѧ жезло́мъ слове́съ твои́хъ, ꙳ всесвѧще́нный па́стырю, ꙳ ста́до бж҃їе слове́сное соблю́лъ є҆сѝ тѣ́мъ, ꙳ ѿ вѡ́лкъ всѧ́кихъ невреди́мо. ꙳ тѣ́мже тѧ̀ до́брый па́стырь ꙳ введѐ во ѡ҆гра́дꙋ нбⷭ҇нꙋю, ꙳ и҆дѣ́же ѻ҆те́честїи и҆збра́ннїи пра́ведныхъ дꙋ́си, ꙳ є҆ѵста́ѳїе бг҃оно́се преблаже́нне.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Комꙋ̀ ᲂу҆подо́биласѧ є҆сѝ, ѻ҆каѧ́ннаѧ дꙋшѐ, ꙳ къ покаѧ́нїю ника́коже возни́чꙋщи, ꙳ и҆ ѻ҆гнѧ̀ не ᲂу҆жаса́ющисѧ ꙳ ѕлы́хъ ѡ҆жида́ющагѡ; ꙳ воста́ни, и҆ є҆ди́нꙋ къ застꙋпле́нїю ско́рꙋю призовѝ, и҆ возопі́й: ꙳ дв҃о мт҃и, молѝ твоего̀ сн҃а и҆ бг҃а на́шего, ꙳ и҆зба́вити мѧ̀ ѿ сѣ́ти льсти́вагѡ.

Крⷭ҇тобогоро́диченъ. Подо́бенъ то́йже:

А҆́гница, а҆́гнца ꙗ҆́кѡ ви́дѣ ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ и҆ болѣ́знꙋющи съ пла́чемъ: ꙳ сн҃е мо́й, что̀ стра́нное сїѐ видѣ́нїе; ꙳ всѣ̑мъ живо́тъ даѧ́й ꙗ҆́кѡ гдⷭ҇ь, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ земны̑мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.

Тропа́рь, гла́съ д҃:

Бж҃е ѻ҆ц҃ъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ. (с. 336)

Канѡ́нъ прпⷣбнагѡ.

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.

Тѧ̀ мы́сленнꙋю ѕвѣздꙋ̀, на высотѣ̀, ѻ҆́ч҃е, воздержа́нїѧ просїѧ́вшꙋю свѣ́тлѡ, и҆ вѣ́рныхъ сердца̀ ѡ҆зарѧ́ющꙋ, бл҃же́нне тїмоѳе́е, восхвалѧ́емъ при́снѡ.

И҆мѣ́ѧ къ бг҃ꙋ протѧже́нно ᲂу҆ма̀ твоегѡ̀ ѻ҆́ко, ᲂу҆ны́нїѧ со́нъ ѿ дꙋшѝ ѿтрѧ́слъ є҆сѝ, ѻ҆́ч҃е, и҆ хра́мъ бы́лъ є҆сѝ бжⷭ҇твеннагѡ дх҃а, и҆ мѣ́сто свѧще́нїѧ, тїмоѳе́е.

Лꙋка́вагѡ кѡ́зни, смире́нїемъ ѡ҆гражде́нъ, ѻ҆́ч҃е, преше́лъ є҆сѝ невре́днѡ, и҆ къ бг҃ꙋ возвы́силсѧ є҆сѝ: и҆ тогѡ̀ сла́вы вы́нꙋ наслажда́ешисѧ, блаже́нне тїмоѳе́е.

Бг҃оро́диченъ:

Несказа́ннѡ бг҃а творца̀ всѧ́ческихъ, во чре́вѣ заче́ншꙋю безсѣ́меннѡ, и҆ пло́тїю ꙗ҆́кѡ и҆́стиннѡ ро́ждшꙋю бцⷣꙋ, ѻ҆трокови́цꙋ, и҆ дѣ́вствꙋющꙋю, пѣ́сньми почита́емъ.

И҆́нъ канѡ́нъ ст҃и́телѧ.

Гла́съ з҃. Пѣ́снь а҃. І҆рмо́съ:

Поспѣ́шествовавшемꙋ бг҃ꙋ во є҆гѵ́птѣ мѡѷсе́ови, и҆звестѝ і҆и҃лѧ, томꙋ̀ є҆ди́номꙋ пои́мъ, ꙗ҆́кѡ просла́висѧ.

И҆́же ѻ҆тцє́въ ве́рхъ, ꙗ҆́кѡ сло́ва благода́тїю ѡ҆дѣ́ѧнна, вели́каго є҆ѵста́ѳїа пѣ́сньми восхвалѧ́емъ.

Побо́рникъ вѣ́ры ꙗ҆́вльсѧ, хрⷭ҇то́вꙋ цр҃ковь неплѣне́нꙋ боре́нїемъ є҆́реси сохрани́лъ є҆сѝ, преподо́бне.

Оу҆ста̀ словесѐ бы́въ, ѿры́гнꙋлъ є҆сѝ ᲂу҆че́нїѧ пꙋчи́нꙋ, преподо́бне, въ не́йже потопи́лъ є҆сѝ а҆́рїево ѕлоче́стїе.

Бг҃оро́диченъ:

И҆́же сло́вомъ пло́тїю, па́че сло́ва ро́ждши нача́льника жи́зни, непреста́ннѡ молѝ спасти́сѧ дꙋша́мъ на́шымъ. (с. 337)

Пѣ́снь г҃. І҆рмо́съ:

Оу҆тверже́нїе моѐ, сп҃се, є҆сѝ, прибѣ́жище моѐ и҆ си́ла, поколеба́вшеесѧ се́рдце моѐ ᲂу҆твердѝ въ стра́сѣ твое́мъ, ꙗ҆́кѡ нѣ́сть свѧ́тъ, ꙗ҆́коже ты̀ бг҃ъ на́шъ.

Оу҆щедрѧ́ѧ всѣ́хъ ми́лованїемъ, и҆́ный а҆враа́мъ бы́лъ є҆сѝ, прїе́млѧ ѿвсю́дꙋ приходѧ́щыѧ, ѽ тїмоѳе́е, и҆ тѣ́ми ᲂу҆гожда́ѧ всѣ́хъ бг҃ꙋ.

Оу҆мертви́лъ є҆сѝ, ѻ҆́ч҃е, ꙗ҆̀же на землѝ твоѧ̑ ᲂу҆́ды, ꙗ҆́кѡ глаго́летъ а҆пⷭ҇лъ: жи́зни нбⷭ҇нѣй прича́стникъ показа́лсѧ є҆сѝ, въ не́йже чтꙋ́щыѧ тѧ̀ при́снѡ помина́й.

Восто́ка твои́хъ дѣ́лъ, ѻ҆́ч҃е, со́лнце бы́лъ є҆сѝ незаходи́мо, лꙋча́ми пѡ́двигъ концы̀ ѡ҆зарѧ́ѧ при́снѡ, и҆ де́мѡнѡвъ разорѧ́ѧ ѡ҆мраче́нїе.

Бг҃оро́диченъ:

Ст҃а́ѧ дв҃о, цр҃ѧ̀ ца́рствꙋющихъ роди́тельнице, плени̑цы прегрѣше́нїй мои́хъ расто́ргни, и҆ наста́ви къ покаѧ́нїѧ стезѧ́мъ моли́твами твои́ми.

И҆́нъ. І҆рмо́съ:

Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Ты̀ ѻ҆рꙋ́жїе и҆звле́къ и҆́стинное, ꙗ҆ви́лсѧ є҆сѝ благоче́стїѧ первонача́льникъ, сопроти̑вныѧ вѣ́рѣ пробо́дъ, є҆ѵста́ѳїе.

Ты̀ любоболѣ́зненнѡ воздѣ́лавъ цр҃ковь серпо́мъ ᲂу҆че́нїй твои́хъ, бл҃же́нне, и҆зъ ко́рене всѧ̑ посѣ́клъ є҆сѝ тѣ́мъ пле́велы.

Старѣ́йшинствꙋѧ со сла́вою и҆́стинномꙋ, сꙋ́щаго вои́стиннꙋ нача́льника лжѝ а҆́рїа, бг҃облаже́нне, порази́лъ є҆сѝ ка́менїемъ слове́съ твои́хъ.

Бг҃оро́диченъ:

Роди́лсѧ є҆сѝ несказа́ннѡ, ꙗ҆ви́лсѧ є҆сѝ ꙗ҆́коже благоволи́лъ є҆сѝ, сп҃се на́шъ: и҆ мі́ръ ѡ҆бнови́лъ є҆сѝ, гдⷭ҇и.

Сѣда́ленъ, гла́съ и҃. Подо́бенъ: Премꙋ́дрости:

Наꙋчи́всѧ сло́вꙋ, на́съ ра́ди ѿ дв҃ы ро́ждшемꙋсѧ безъ (с. 338) и҆стлѣ́нїѧ, сегѡ̀ бж҃ество̀ безбѡ́жнымъ проповѣ́далъ є҆сѝ: и҆ мнѡ́ги приве́лъ є҆сѝ бг҃ови вѣ́рою, свѧще́нныхъ чꙋде́съ мно́гими ꙗ҆вле́ньми. тѣ́мже, бг҃оно́се, ст҃ꙋ́ю твою̀ па́мѧть творѧ́ще, бл҃года́тїю твое́ю дꙋ́шы просвѣща́емъ, и҆ согла́снѡ вопїе́мъ тѝ: бг҃оно́се тїмоѳе́е, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀.

Сла́ва, сѣда́ленъ, гла́съ г҃. Подо́бенъ: Красотѣ̀ дѣ́вства:

Є҆диносꙋ́щнаго ѻ҆ц҃ꙋ̀ и҆ дх҃ꙋ сло́ва проповѣ́далъ є҆сѝ, ѻ҆́ч҃е є҆ѵста́ѳїе, и҆ безꙋ́мнаго тве́рдѡ жи́лами ᲂу҆че́нїй твои́хъ а҆́рїа ᲂу҆дави́лъ є҆сѝ, хꙋ́лѧщаго на пра́вое ᲂу҆че́нїе. тѣ́мже спричте́сѧ ликѡ́мъ ра́дꙋѧсѧ, бжⷭ҇твенныхъ проповѣ̑дникъ ѻ҆тє́цъ, съ ни́миже на́съ помина́й.

И҆ ны́нѣ, бг҃оро́диченъ:

Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, бл҃года́тнаѧ.

Крⷭ҇тобг҃оро́диченъ:

Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи гл҃го́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.

Пѣ́снь д҃. І҆рмо́съ:

И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Ты̀ моли́твами ᲂу҆твержда́ѧсѧ при́снѡ, мы́сленныхъ врагѡ́въ лꙋ́ки и҆ стрѣ́лы, ꙗ҆́коже младе́нєцъ стрѣлѧ́нїѧ вмѣни́лъ є҆сѝ, ѻ҆́ч҃е пресла́вне тїмоѳе́е.

Є҆́же къ на́мъ хрⷭ҇то́ва смотре́нїѧ, любо́вїю покланѧ́ѧсѧ, (с. 339) бг҃омꙋ́дре, ѻ҆́бразꙋ, и҆скꙋше́нїе мꙋ́къ претерпѣ́лъ є҆сѝ, ѿ сегѡ̀ ѿмета́ющихсѧ, ѽ тїмоѳе́е!

Ꙗ҆́коже нѣ́кїй сто́лпъ непоколеби́мь бы́лъ є҆сѝ при́снѡ къ бг҃ꙋ въ славосло́вїи, ника́коже почива́ѧ въ си́хъ пребы́лъ є҆сѝ красота́хъ прича́стникъ, ѽ тїмоѳе́е!

Бг҃оро́диченъ:

Но́во на землѝ родила̀ є҆сѝ ѻ҆троча̀, є҆́же ѿ ѻ҆ц҃а̀ пре́жде всѣ́хъ вѣ̑къ рожде́ннаго, нетлѣ́ннѡ мт҃и чⷭ҇таѧ, хрⷭ҇тїа́нъ и҆справле́нїе.

И҆́нъ. І҆рмо́съ:

Нб҃са̀ покры́ла є҆́сть добродѣ́тель твоѧ̀, гдⷭ҇и, и҆ твоегѡ̀ хвале́нїѧ всѧ̑ и҆спо́лнилъ є҆сѝ: сла́ва си́лѣ твое́й, чл҃вѣколю́бче.

Вѣ́ры собира́ѧ побѣди́тєльнаѧ, стрѣла́ми слове́сными нечести́ваго бг҃омꙋ́дреннѡ низложи́лъ є҆сѝ, ѻ҆́ч҃е, а҆́рїа.

Слове́съ твои́хъ свѣ́тлость ꙗ҆́коже мо́лнїѧ и҆зше́дши, а҆́рїево ѕлосла́вїе попалѧ́етъ, є҆ѵста́ѳїе премꙋ́дре.

Ѡ҆гражде́нїе положи́въ словесы̀ твои́ми, ꙗ҆́коже вїногра́дꙋ гдⷭ҇ню, цр҃кви, прпⷣбне.

Бг҃оро́диченъ:

Родила̀ є҆сѝ пло́тїю, дв҃о чⷭ҇таѧ, и҆́же пре́жде тебє̀ безнача́льнаго сло́ва, и҆ по тебѣ̀ па́че сло́ва, и҆зъ тебє̀ вочл҃вѣ́чшасѧ.

Пѣ́снь є҃. І҆рмо́съ:

Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.

Оу҆мо́мъ ѡ҆чище́ннымъ предстоѧ̀ трⷪ҇цѣ, бл҃же́нне, и҆ ѿѻнꙋ́дными зарѧ́ми ѡ҆сїѧ́емь, ѻ҆́ч҃е, сꙋ́щыѧ ны̀ во тмѣ̀ бѣ́дствꙋющыѧ дꙋше́вными страстьмѝ просвѣща́еши всегда̀.

Пло́ть воздержа́нїемъ, дꙋ́шꙋ безстра́стїемъ ᲂу҆краси́въ, мꙋ́дре, цр҃ѧ̀ всѧ́ческихъ ᲂу҆го́дникъ ꙗ҆ви́лсѧ є҆сѝ, и҆ ѿ негѡ̀ ꙗ҆́вѣ чꙋде́съ да́ры прїѧ́лъ є҆сѝ, тїмоѳе́е.

Не ᲂу҆мо́мъ льсти́внымъ, но просты́мъ се́рдцемъ проси́вши пристꙋпи́вшаѧ непло́ды, вѣ́рною моли́твою благоча́дна ꙗ҆влѧ́етсѧ ѿ непло́дства, пою́щи хрⷭ҇та̀ бг҃а на́шего. (с. 340)

Бг҃оро́диченъ:

Всели́всѧ во чре́во твоѐ живы́й въ вы́шнихъ, тѧ̀ содѣ́ла нб҃съ ши́ршꙋю, марі́е бцⷣе: є҆го́же ѡ҆ всѣ́хъ на́съ, ꙗ҆́кѡ бл҃га́ѧ, не преста́й молѧ́щи, бг҃оневѣ́сто.

И҆́нъ. І҆рмо́съ:

Оу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ, чл҃вѣколю́бче.

Мра́къ разори́лъ є҆сѝ є҆ресе́й, и҆ возсїѧ́лъ є҆сѝ концє́мъ всѣ̑мъ зари̑ ᲂу҆че́нїй твои́хъ, є҆ѵста́ѳїе блаже́нне.

Два́жды.

Ѡ҆рꙋ̑жїи ѡ҆гражда́еми, є҆ѵста́ѳїе, ᲂу҆че́нїй твои́хъ, настоѧ́щыѧ бжⷭ҇твеннѣй вѣ́рѣ є҆́рєси побѣжда́емъ.

Бг҃оро́диченъ:

Дв҃о, не преста́й молѧ́щи бг҃а, и҆зъ тебє̀ ро́ждшагосѧ пло́тїю, и҆зба́витисѧ рабѡ́мъ твои̑мъ ѿ всѧ́кагѡ ѡ҆бстоѧ́нїѧ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

До́брѣ твоѐ соблюда́ѧ дѣ́вства досто́инство во все́й твое́й жи́зни, женѣ̀ никогда́же въ лицѐ зрѣ́лъ є҆сѝ, є҆́же ѿ сегѡ̀ вре́дъ до конца̀ ѿрази́въ.

Въ приста́нище мы́сленное ᲂу҆стреми́лсѧ є҆сѝ, волна́ми сласте́й не ѡ҆мочи́всѧ, всебл҃же́нне тїмоѳе́е: но дх҃а живоно́сными вѣ́тры до́брѣ преплы́лъ є҆сѝ, всесла́вне.

Оу҆дали́лсѧ є҆сѝ ѱало́мски, въ гора́хъ живы́й, въ пꙋсты́нѧхъ при́снѡ, мꙋ́дре, водворѧ́ѧсѧ, до́ндеже вше́лъ є҆сѝ въ бж҃їй гра́дъ нбⷭ҇ный, тїмоѳе́е блаже́нне.

Бг҃оро́диченъ:

На плещꙋ̑ херꙋві̑мскꙋ неѡпи́саннѡ сѣдѧ́й, ѡ҆пи́саннѡ въ твоѐ чре́во всели́сѧ пло́тїю, а҆ не бж҃ество́мъ, и҆ и҆зъ тебє̀ про́йде, спаса́ѧ мѧ̀, всенепоро́чнаѧ. (с. 341)

И҆́нъ. І҆рмо́съ:

І҆ѡ́на и҆зъ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.

Слове́съ твои́хъ бг҃одохнове́нныхъ вѣ́тромъ ᲂу҆тиши́лъ є҆сѝ бꙋ́рю є҆реті́чествꙋющихъ, въ приста́нище благоче́стїѧ цр҃ковь направлѧ́ѧ, пребл҃же́нне.

Два́жды.

Въ добродѣ́тели непоро́ченъ сы́й, преподо́бне, сла́венъ ꙗ҆ви́лсѧ є҆сѝ сло́вомъ и҆ житїе́мъ, цр҃кве хрⷭ҇то́вы ᲂу҆добре́нїе.

Бг҃оро́диченъ:

Є҆го́же родила̀ є҆сѝ, бцⷣе, несказа́ннѡ бг҃а на́шего, молѧ́щи не преста́й, и҆зба́витисѧ ѿ бѣ́дъ, пою́щымъ тѧ̀, чⷭ҇таѧ приснодв҃о.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆́кѡ ѕвѣзда̀ многосвѣ́тлаѧ ѿ восто́ка возсїѧ́въ, ѡ҆зари́лъ є҆сѝ въ сердца́хъ вѣ́рныхъ добродѣ́тєли чꙋде́съ твои́хъ, чꙋдоно́сче всебл҃же́нне тїмоѳе́е.

Пѣ́снь з҃. І҆рмо́съ:

А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложи́вый на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ.

Оу҆гаси́въ страсте́й пла́мень сле́зъ росо́ю, бл҃года́ть чꙋде́съ и҆сточи́лъ є҆сѝ: и҆́миже ѡ҆чища́еши сквє́рны страсте́й, тїмоѳе́е.

Блаже́нство бжⷭ҇твенное нело́жно полꙋчи́лъ є҆сѝ, кро́ткихъ, преподо́бне, наслѣ́довалъ є҆сѝ зе́млю, и҆ ра́дости и҆збра́нныхъ насыща́ѧсѧ.

Разрѣше́нїе грѣхѡ́въ творѧ́щымъ любо́вїю свѧще́ннꙋю па́мѧть твоегѡ̀ преставле́нїѧ, ꙗ҆́кѡ дерзнове́нїе ѡ҆брѣ́тъ, блаже́нне, и҆спросѝ.

Бг҃оро́диченъ:

И҆зба́вленнїи всѝ ѿ пе́рвыѧ клѧ́твы, прест҃ы́мъ рождество́мъ твои́мъ, бл҃гослове́ннаѧ є҆ди́на, тѧ̀ благослови́мъ, бцⷣе нескве́рнаѧ. (с. 342)

И҆́нъ. І҆рмо́съ:

Въ пещѝ сꙋ́ще халде́йстѣй, а҆враа́мстїи ѻ҆́троцы ликова́хꙋ со а҆́гг҃ломъ, глаго́люще: ѻ҆тє́цъ на́шихъ бж҃е, бл҃гослове́нъ є҆сѝ.

Є҆реті́чествꙋющихъ бра́нь ѻ҆рꙋ́жїемъ дх҃а, мꙋ́дре, побѣди́въ, по́чєсти нетлѣ̑нныѧ прїѧ́лъ є҆сѝ ѿ хрⷭ҇та̀ вѣнча́емь.

Ме́чь ѻ҆боюдꙋѻ́стръ ᲂу҆ста̀ твоѧ̑, на нечести́выхъ, ѻ҆́ч҃е, показа́шасѧ, подъ рꙋко́ю сло́ва покрыва́ема, ꙗ҆́кѡ си́хъ бра́нь посѣ́къ.

Оу҆че́нїѧ лопа́тою развѣ́ѧлъ є҆сѝ а҆́рїевꙋ ле́сть ꙗ҆́кѡ пле́вы, во ѡ҆дꙋшевле́ннꙋю, ѻ҆́ч҃е, жи́тницꙋ собира́ѧ пшени́цꙋ вѣ́ры.

Бг҃оро́диченъ:

Бцⷣꙋ всѝ почти́мъ, ꙗ҆́кѡ сп҃са родила̀ є҆́сть, вѣ́рою взыва́юще: ра́дꙋйсѧ, рабо̀ и҆ мт҃и хрⷭ҇та̀ бг҃а на́шегѡ.

Пѣ́снь и҃. І҆рмо́съ:

Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Страстоꙋбі́йца бы́лъ є҆сѝ воздержа́нїемъ мно́гимъ и҆ ѕѣ́льными болѣ́зньми бдѣ́нїѧ, восхожде́ньми при́снѡ добродѣ́телей, преподо́бне, поꙋча́ѧсѧ въ се́рдцы, и҆ ѿ сла́вы преходѧ̀ въ сла́вꙋ неконча́емыѧ жи́зни и҆ нетлѣ́нїѧ.

Ꙗ҆́кѡ же́ртвꙋ, прпⷣбне, моли̑твы твоѧ̑ бг҃ꙋ пречⷭ҇томꙋ ты̀ прине́слъ є҆сѝ чи̑сты ѿ дꙋшѝ: бжⷭ҇твенно дѣ́йство ѿ негѡ̀ прїѧ́лъ є҆сѝ чꙋде́съ, де́мѡны ѿгонѧ́ти, и҆ человѣ́чєскїѧ цѣли́ти не́мѡщи.

Ненавистоѕло́бенъ и҆ неѕло́бивъ, ми́лостивъ и҆ кро́токъ и҆ пра́вдою ᲂу҆кра́шенъ, ѻ҆́ч҃е, бы́лъ є҆сѝ, прпⷣбенъ, непоро́ченъ, ѡ҆ша́ѧсѧ всѧ́кїѧ непра́вды, сто́лпъ мона́шествꙋющихъ: тѣ́мже тѧ̀ почита́емъ вѣ́рнїи во вѣ́ки.

Бг҃оро́диченъ:

Є҆ди́нꙋ тѧ̀ и҆збра̀ добро́тꙋ і҆а́кѡвлю ѻ҆́ч҃ее сло́во, и҆ во (с. 343) ᲂу҆тро́бѣ твое́й всели́сѧ, ꙗ҆́коже благоволѝ, па́че всѣ́хъ краснѣ́йшїй человѣ̑къ, всечⷭ҇таѧ, про́йде, ѡ҆мраче́нное на́ше ѡ҆чища́ѧ є҆стество̀.

И҆́нъ. І҆рмо́съ:

Є҆ди́наго безнача́льнаго цр҃ѧ̀ сла́вы, є҆го́же славосло́вѧтъ нбⷭ҇ныѧ си̑лы, и҆ трепе́щꙋтъ чи́ны а҆́гг҃льстїи, по́йте, свѧще́нницы, лю́дїе, превозноси́те є҆го̀ во вѣ́ки.

Жезло́мъ премꙋ́дрости твоеѧ̀ писа́нїй раздѣли́въ бж҃е́ственнꙋю пꙋчи́нꙋ, хрⷭ҇то́въ ст҃и́телю, и҆ преложи́лъ є҆сѝ къ землѝ правосла́вїѧ но́ваго і҆и҃лѧ: а҆рїани́ты же ꙗ҆́кѡ є҆гѵ́птѧны ᲂу҆дави́лъ є҆сѝ.

Нбⷭ҇нагѡ ты̀ сше́дъ видѣ́нїѧ, на сто́лпъ хала́нскїй, а҆́рїевъ, размѣси́лъ є҆сѝ ѧ҆зы́ки є҆реті́чествꙋющихъ, є҆ѵста́ѳїе мꙋ́дре, є҆диногла́снꙋю вѣ́рꙋ проповѣ́дꙋѧ во вѣ́ки.

И҆сповѣ́даньми твои́ми, и҆̀же по и҆́стинѣ, на за́падѣ жи́знь сконча́лъ є҆сѝ: возсїѧ́лъ є҆сѝ па́ки на восто́цѣ ста́дꙋ твоемꙋ̀, мꙋ́дре, зарю̀ бл҃гоче́стїѧ и҆спꙋща́ѧ во вѣ́ки.

Бг҃оро́диченъ:

Созда́вшаго а҆да́ма по ѻ҆́бразꙋ, и҆ ѿ смѣше́нїѧ є҆гѡ̀ проше́дша, и҆ спа́сша человѣ́ческїй ро́дъ, по́йте, свѧще́ннїи, лю́дїе, превозноси́те є҆го̀ во вѣ́ки.

Пѣ́снь ѳ҃. І҆рмо́съ:

Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Свѧще́нїѧ хра́мъ, ᲂу҆миле́нїѧ и҆сто́чникъ, сострада́нїѧ стрꙋѧ̀ ꙗ҆ви́лсѧ є҆сѝ, мꙋ́дре, любве́ же безмѣ́рнаѧ пꙋчи́на, гдⷭ҇ень ᲂу҆го́дникъ нело́женъ, и҆ нбⷭ҇ный граждани́нъ, и҆ а҆́гг҃лѡвъ є҆динокро́вникъ, и҆ чꙋде́съ точе́нїе.

Хвали́тисѧ ми́лости, ѻ҆́ч҃е, сꙋда̀ свѣ́дый, не презрѣ́лъ є҆сѝ стра́нна: но всѣ̑мъ бла́гъ, милосе́рдїѧ ѿве́рзлъ є҆сѝ, (с. 344) преподо́бне, ѻ҆те́цъ бы́въ си́рыхъ, и҆ вдови́цъ застꙋ́пникъ, и҆ наги́хъ ѡ҆дѣѧ́нїе, и҆ пи́ща а҆́лчꙋщихъ.

Ѿ землѝ ѿлꙋчи́лсѧ є҆сѝ къ нб҃сѝ, и҆дѣ́же и҆мѣ́лъ є҆сѝ є҆щѐ ходѧ̀ во пло́ти, до́брѣ житїѐ, преподо́бне, на́мъ ѡ҆чище́нїе согрѣше́нїй молѧ̀ дарова́ти, вѣ́рнѡ чтꙋ́щымъ твою̀ свѧтꙋ́ю па́мѧть.

Стрꙋю̀ на́мъ всегда̀ честна́ѧ твоѧ̀ ра́ка и҆сцѣле́нїѧ и҆сточа́етъ, ѻ҆́ч҃е, страсте́й и҆злїѧ̑нїѧ всѧ́ческихъ и҆зсꙋша́ющи, и҆ всѧ́кꙋ напоѧ́ющи дꙋ́шꙋ, къ благопло́дїю бжⷭ҇твенномꙋ, свѧще́нне тїмоѳе́е, хрⷭ҇то́въ ᲂу҆го́дниче.

Бг҃оро́диченъ:

Глаго́лѡмъ твои̑мъ послѣ́дꙋюще, ро́ди родѡ́въ, блаже́ннаѧ, тѧ̀ бл҃жи́мъ при́снѡ, бг҃а бо и҆́стиннѡ бл҃же́ннаго родила̀ є҆сѝ, прест҃а́ѧ чⷭ҇таѧ, всѧ̑ блажє́нны томꙋ̀ рабо́тающыѧ нело́жнѡ творѧ́ща.

И҆́нъ. І҆рмо́съ:

Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми, вѣ́рнїи, бцⷣꙋ велича́емъ.

И҆́же въ писа́нїихъ гро́здъ ᲂу҆чи́тельнѡ и҆згне́тъ, напои́лъ є҆сѝ вѣ́рныхъ вїна̀, ѻ҆́ч҃е, и҆́стины хрⷭ҇то́вы, сердца̀ веселѧ́ща.

Ѻ҆рꙋ́жїе ѻ҆боюдꙋѻстро̀ носѧ̀ бг҃осло́вный тво́й ѧ҆зы́къ, посѣ́клъ є҆сѝ лꙋка́вый а҆́рїа гнѣ́въ, непови́ннꙋю и҆ дꙋше́внꙋю кро́вь, бл҃же́нне, и҆злива́ющъ.

Наро́читый свѧты́й де́нь всесвѧты́ѧ твоеѧ̀ па́мѧти творѧ́ще дꙋхо́внѡ, тѧ̀ мо́лимъ: молѝ прилѣ́жнѡ, ст҃и́телю спасти́сѧ на́мъ.

Бг҃оро́диченъ:

Ю҆́же во чре́вѣ заче́ншꙋю неѡпи́санное сло́во, и҆ две́рь бжⷭ҇твенныѧ жи́зни на́мъ ꙗ҆́вльшꙋю, пречⷭ҇тꙋю вои́стиннꙋ бцⷣꙋ велича́емъ.

Комментарии для сайта Cackle