Библиотеке требуются волонтёры

Мѣ́сѧца тогѡ́же въ к҃з-й де́нь. Прпⷣбнагѡ ѻ҆ц҃а̀ на́шегѡ и҆ и҆сповѣ́дника проко́пїа декаполі́та.

На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:

По ѻ҆́бразꙋ бы́въ бж҃їю, ꙳ и҆ по подо́бїю, ꙳ ѿ нача́ла созда́нїѧ, всебл҃же́нне, ꙳ ѻ҆́браза достоѧ́нїе соблюстѝ потща́лсѧ є҆сѝ, ꙳ по́мысломъ всебл҃гочести́вымъ, ꙳ и҆ ᲂу҆ма̀ чистото́ю и҆ свѧ́тости, ꙳ и҆ страсте́й воздержа́нїемъ, ꙳ и҆ соблюде́нїемъ хрⷭ҇то́выхъ велѣ́нїй ꙳ и҆ бл҃гоче́стїѧ, пребога́те.

Поще́нїемъ пе́рвѣе прїе́мъ, ꙳ и҆ страда́нїемъ бг҃омꙋ́дреннѡ послѣдѝ, ꙳ бл҃гоꙋгоди́лъ є҆сѝ ѻ҆бои́ми созда́вшемꙋ, ꙳ є҆ди́номꙋ ѡ҆чище́нїе ꙳ и҆стѧзꙋ́ющемꙋ ѿ на́съ, ꙳ и҆ дꙋше́вное благоро́дїе. ꙳ є҆гѡ́же плотско́е прише́ствїе сла́вѧ, ꙳ покланѧ́лсѧ є҆сѝ ѻ҆́бразꙋ ст҃о́мꙋ, ꙳ и҆́же по тогѡ̀ вочл҃вѣ́ченїю.

И҆́же сло́ва воплоще́нїе ꙳ ѕлочести́вѣ ѿве́ргшыѧ, ꙳ ѡ҆блича́ѧ, прпⷣбне, ꙳ соверши́лъ є҆сѝ ꙗ҆́звенными и҆стѧза̑нїи, ꙳ и҆ всѧ́цѣми ѡ҆ѕлобле́ньми и҆ ᲂу҆́зами, и҆ темни́цею, ꙳ ᲂу҆твержда́ѧ и҆́стинꙋ: ꙳ тѣ́мже бы́лъ є҆сѝ хрⷭ҇то́ва црⷭ҇твїѧ наслѣ́дникъ, ꙳ и҆ ра́дости неизрече́нныѧ, ꙳ и҆ присносꙋ́щнагѡ сїѧ́нїѧ.

Сла́ва, и҆ ны́нѣ, бг҃оро́диченъ: гла́съ и҆ подо́бенъ то́йже:

Ꙗ҆́кѡ моли́твꙋ неꙋсыпа́ющꙋю, ꙳ и҆ мольбꙋ̀ пребыва́ющꙋю: ꙳ и҆мꙋ́щи, пречⷭ҇таѧ, къ бг҃ꙋ, ꙳ напа̑сти ᲂу҆спѝ, ꙳ во́лны ᲂу҆кротѝ ѻ҆каѧ́нныѧ моеѧ̀ дꙋшѝ, ꙳ и҆ въ ско́рби сꙋ́щее се́рдце моѐ ᲂу҆тѣ́ши, ꙳ ѻ҆трокови́це, молю́ тѧ, ꙳ и҆ ѡ҆бл҃годатѝ ᲂу҆́мъ мо́й, ꙳ ꙗ҆́кѡ да досто́йнѡ сла́влю тѧ̀. (с. 402)

Крⷭ҇тобогоро́диченъ, подо́бенъ то́йже:

А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ще: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;

Тропа́рь, гла́съ и҃:

Сле́зъ твои́хъ тече́ньми, пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, проко́пїе ѻ҆́ч҃е на́шъ, молѝ хрⷭ҇та̀ бг҃а, спасти́сѧ дꙋша́мъ на́шымъ.

Канѡ́нъ, є҆гѡ́же краегране́сїе:

Твоѧ̑ по́двиги бг҃олѣ́пнѣ пою̀, бл҃же́нне.

Творе́нїе ѳеофа́ново.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ, пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Бл҃гоче́стїѧ любо́вїю ѡ҆б̾ѧ́тъ бы́въ, и҆ бжⷭ҇твеннымъ раче́нїемъ треволнє́нїѧ мїрска̑ѧ ѿтрѧ́слъ є҆сѝ, преподо́бне, бг҃ꙋ побѣ́днꙋю пѣ́снь взыва́ѧ: ꙗ҆́кѡ просла́висѧ.

Свѣтоно́сное твоѐ житїѐ, и҆ свѣ́тлое дꙋшѝ, и҆ спротѧже́нное, бл҃гоче́стїю срастворе́нно добродѣ́тели воѡбраже́нїе, въ тебѣ̀, преподо́бне, ꙗ҆́вѣ содѣ́лаша.

Преесте́ственнымъ ᲂу҆че́нїемъ, и҆ свѣтоза́рнымъ хрⷭ҇то́вымъ ѡ҆свѣща́емь, страстны̑ѧ прило́ги воздержа́нїемъ ᲂу҆вѧди́лъ є҆сѝ, вопїѧ̀ побѣ́днꙋю пѣ́снь вседержи́телю.

Бг҃оро́диченъ:

Воплоще́нное сло́во бг҃олѣ́пнѡ заче́нши, пречⷭ҇таѧ, є҆́же (с. 403) пре́жде безпло́тное, на́мъ па́че є҆стества̀ родила̀ є҆сѝ, чⷭ҇таѧ, по ржⷭ҇твѣ̀ дв҃а пребы́вши.

Пѣ́снь г҃. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Твоѧ̀ бг҃опрїѧ́тнаѧ дꙋша̀, вѣ́ры ра́ди ре́вностїю распалѧ́ема, блаже́нне, беззако́нныхъ го́рькое неи́стовство и҆ ꙗ҆́рость, бг҃оно́се, держа́внѡ разори́ла є҆́сть.

Твои́ми кровьмѝ ѡ҆багри́всѧ, мч҃ничєскимъ страда́нїємъ ᲂу҆подо́билсѧ є҆сѝ, треблаже́нне, ра̑ны нечести́выхъ мꙋ́жественною дꙋше́ю претерпѣ́лъ є҆сѝ терпѣли́внѡ, проко́пїе.

Под̾ѧ́лъ є҆сѝ, преподо́бне, сꙋгꙋ̑бы по́двиги мꙋ́дрѣ є҆́рєси ѡ҆блича́ѧ, и҆ львѡ́въ стремлє́нїѧ мꙋ́жески претерпѣ́въ бг҃омꙋ́дреннѡ, премꙋ́дре проко́пїе.

Бг҃оро́диченъ:

Мꙋ́дрость и҆ сло́во ѻ҆́ч҃ее, є҆́же пре́жде всѣ́хъ вѣ́къ напослѣ́докъ време́нъ неизрече́ннѡ вопло́щсѧ ѿ неискꙋсомꙋ́жныѧ мт҃ре, бцⷣꙋ сїю̀ содѣ́ла.

Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ:

Воздержа́нїѧ добро́тами ᲂу҆кра́шенъ, мꙋче́нїѧ кровьмѝ ᲂу҆ѧсни́лъ є҆сѝ дꙋ́шꙋ, и҆ па́че со́лнца просїѧ́лъ є҆сѝ, чꙋдоно́сне проко́пїе преподо́бне.

Сла́ва, и҆ ны́нѣ, бг҃оро́диченъ:

Те́плое застꙋпле́нїе сꙋ́щымъ въ бѣда́хъ, и҆ помо́щницꙋ на́шꙋ, и҆ къ бг҃ꙋ премѣне́нїе, є҆́юже тлѝ и҆зба́вихомсѧ, бцⷣꙋ, вѣ́рнїи, ᲂу҆блажа́емъ.

Крⷭ҇тобг҃оро́диченъ:

На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею растерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;

Пѣ́снь д҃. І҆рмо́съ:

Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи. (с. 404)

Напаѧ́ѧ, преподо́бне, сле́зными тече́ньми се́рдце твоѐ, бл҃же́нне, добродѣ́телей сѣ́мѧ воздѣ́лалъ є҆сѝ по́мысломъ чи́стымъ, преподо́бне проко́пїе.

Земно́е мꙋдрова́нїе бжⷭ҇твенномꙋ дх҃ꙋ повинꙋ́лъ є҆сѝ, ѻ҆́ч҃е, по́стническое житїѐ прїе́мъ, и҆ сочета́емь ликѡ́мъ мꙋ́ченичєскимъ, всебл҃же́нне.

Ꙗ҆́кѡ мч҃никъ бжⷭ҇твенъ и҆ и҆́стиннѣйшъ по благоче́стїи, є҆реті́ческое ѡ҆бличи́лъ є҆сѝ безꙋ́мїе: неи́стовство бо мꙋ́жески безбо́жныхъ пренебре́глъ є҆сѝ.

Бг҃оро́диченъ:

Зако́нныхъ кромѣ̀ ᲂу҆ста́вѡвъ, всенепоро́чнаѧ, заче́нши зижди́телѧ, и҆ безъ тлѝ сего̀ породила̀ є҆сѝ, и҆ бцⷣа и҆́стиннаѧ и҆ гдⷭ҇ьственнѡ была̀ є҆сѝ.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Ѡ҆свѧще́нна по́стнически, и҆ сконча́вшасѧ кро́вїю, ѻ҆́ч҃е досто́йнѡ почита́емъ: па́мѧть бо пра́ведныхъ съ похвала́ми при́снѡ, вѣ́рнѡ соверша́етсѧ и҆ помина́етсѧ.

Мꙋ́дрѣ всѐ претворѧ́ѧ и҆ ᲂу҆строѧ́ѧ къ лꙋ́чшемꙋ, ꙗ҆́коже хо́щетъ гдⷭ҇ь: ѕлочествꙋ́ющихъ скверноꙋбі́йство твои́мъ воздержа́нїемъ, и҆ мꙋче́нїѧ сла́вою преложѝ.

На ра́мо взе́мъ крⷭ҇тное всеѻрꙋ́жїе, ѻ҆́ч҃е, хрⷭ҇тꙋ̀ послѣ́довалъ є҆сѝ, всѧ̑ за̑днѧѧ забве́нїю творѧ̀, къ прє́днимъ тече́нїємъ простира́ѧсѧ.

Бг҃оро́диченъ:

Пое́мъ, пречⷭ҇таѧ, и҆зъ тебє̀ въ пло́ть стра́стнꙋ же и҆ ме́ртвеннꙋ ѡ҆дѣ́ѧвшагосѧ гдⷭ҇а, и҆ ѡ҆боже́нꙋ содѣ́лавшаго, соедине́нїемъ неслїѧ́ннымъ по ѵ҆поста́си.

Пѣ́снь ѕ҃. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, въ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве. (с. 405)

Преходѧ̀, приснопа́мѧтне, ѿ сла́вы вои́стиннꙋ по́стническїѧ, восте́клъ є҆сѝ къ мч҃никѡвъ сла́вѣ и҆ че́сти, твое́ю кро́вїю въ багрѧни́цꙋ ѡ҆червле́нꙋ ѡ҆дѣ́ѧнъ.

Текꙋ́щихъ непостоѧ́нное преѡби́дѣвъ, дꙋше́ю и҆ по́мысломъ бг҃омꙋ́дреннымъ, приснопребыва́ющимъ, благи́мъ и҆ конца̀ не и҆мꙋ́щимъ, благоче́стнѡ впери́лсѧ є҆сѝ, всебл҃же́нне.

Воздержа́нїемъ благомо́щнымъ и҆ кро́тостїю хрⷭ҇то́съ зрѧ̀ тѧ̀ ѡ҆богати́вшасѧ, человѣколю́бнѣ призрѣ̀ на тѧ̀, и҆ сла́вы показа̀ прича́стника, страстоте́рпче пресла́вне.

Бг҃оро́диченъ:

Всенепоро́чнаѧ влⷣчце, дꙋшѝ моеѧ̀ тѧ̑жкаѧ и҆ лю̑таѧ сокрꙋшє́нїѧ рꙋкодѣѧ́ньми и҆сцѣлѝ та́йными, дѣйстви́тєльныѧ лѣчбы̑ сн҃а твоегѡ̀ полага́ющи стрⷭ҇ти.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Денни́цꙋ дне́сь цр҃ковь и҆мꙋ́щи, всѧ́кꙋю ѕлосла́вїѧ мглꙋ̀ разгонѧ́етъ, почита́ющи тѧ̀, нбⷭ҇нотаи́нниче проко́пїе пресла́вне.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ пресвѣ́тло житїѐ твоѐ, бг҃омꙋ́дре, бы́сть по́стничествомъ, та́кѡ ꙗ҆ви́сѧ твоѐ ꙗ҆́вѣ страда́нїе тве́рдо: хрⷭ҇та́ бо просла́вилъ є҆сѝ, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Цѣломꙋ́дрїѧ чистото́ю, чꙋ́дный ѻ҆́ч҃е, препоѧ́савсѧ, мꙋ́жествомъ же мꙋче́нїѧ вѣне́цъ свѣ́телъ прїѧ́лъ є҆сѝ бл҃года́тїю, зовы́й: бл҃гослове́нъ є҆сѝ, бж҃е ѻ҆тє́цъ на́шихъ.

Не покланѧ́ющїисѧ ѻ҆́бразꙋ твоемꙋ̀ пречⷭ҇томꙋ, сп҃се, нечести́вїи раба̀ твоего̀ ꙗ҆́звѧтъ стрꙋ́жꙋще лю́тѣ пою́ща (с. 406) и҆ глаго́люща къ тебѣ̀: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Веселѧ́щесѧ ржⷭ҇тво́мъ твои́мъ, всенепоро́чнаѧ, вси́ тѧ ᲂу҆блажа́емъ: тогѡ́ бо ра́ди ны́нѣ плотска́гѡ мы̀ и҆зба́вльшесѧ тлѣ́нїѧ, вопїе́мъ є҆мꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃. І҆рмо́съ:

И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Разрѣше́нъ ѿ тлѝ, и҆ пре́жде сме́рти ꙗ҆́вльсѧ, преста́вилсѧ є҆сѝ ѿсю́дꙋ къ нетлѣ́ннѣй, прпⷣбне, жи́зни, сме́рть прїе́мъ лѣ́ствицею свѣ́тлѡ, проко́пїе бг҃омꙋ́дре.

И҆спо́лненъ ꙗ҆ви́лсѧ є҆сѝ зарѝ бл҃года́тныѧ, и҆ къ незаходи́момꙋ свѣ́тꙋ, ѻ҆́ч҃е, ѿше́лъ є҆сѝ, всѧ́ко ве́щное ѿложи́въ жела́нїе. тѣ́мже тѧ̀ почита́емъ, проко́пїе бг҃омꙋ́дре.

Воѡрꙋже́нъ си́лою бжⷭ҇твеннагѡ дх҃а, лꙋка́вствїѧ дꙋхѡ́въ побѣди́лъ є҆сѝ полкѝ. тѣ́мже нбⷭ҇ныѧ двє́ри тебѣ̀ ѿверзо́шасѧ, бл҃же́нне, воспѣва́ющꙋ хрⷭ҇та̀ во вѣ́ки всѧ̑.

Бг҃оро́диченъ:

Блажа́тъ всѝ ро́ди, влⷣчце, ꙗ҆́коже прорекла̀ є҆сѝ, є҆ди́на бг҃обл҃же́ннаѧ, тѧ̀ и҆́стиннꙋю бцⷣꙋ пречⷭ҇тꙋю: ю҆́же превозно́симъ во всѧ̑ вѣ́ки.

Пѣ́снь ѳ҃. І҆рмо́съ:

Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Пострада́ти зако́ннѡ, мч҃ниче, и҆зво́ливъ, страсте́й стремлє́нїѧ воздержа́нїемъ ᲂу҆мертви́лъ є҆сѝ, и҆ плотска̑ѧ взыгра̑нїѧ, ᲂу҆го́дниче хрⷭ҇то́въ: тѣ́мже безстра́стїѧ ны́нѣ, (с. 407) безсме́ртное съ безпло́тными во́инствы, ѡ҆брѣ́лъ є҆сѝ наслажде́нїе.

Сꙋдїѝ пра́ведномꙋ свѣ́тлѡ предстои́ши, ꙗ҆́кѡ побѣди́тель вѣнцы̀ неꙋвѧда́ємыѧ прїе́мъ, прилѣ́жнѡ, проко́пїе, молѧ́сѧ ѡ҆ соверша́ющихъ твою̀ свѧще́ннꙋю па́мѧть, и҆ бжⷭ҇твенный пра́здникъ преставле́нїѧ твоегѡ̀.

Зарѧ́ми тре́ми ны́нѣ ѡ҆зарѧ́емь, ѿ є҆ди́нагѡ несказа́ннѡ происходѧ́щими бжⷭ҇тва̀, пребога́тнагѡ наслѣ́дїѧ сподо́билсѧ є҆сѝ, и҆ кра́снагѡ весе́лїѧ, ра́дꙋѧсѧ съ премі́рными во́инствы, ѻ҆́ч҃е проко́пїе.

Бг҃оро́диченъ:

Тлѣ́ненъ, сло́во бж҃їе нетлѣ́нное, зра́къ прїе́мъ, человѣ́ки въ нетлѣ́нїе ѡ҆блечѐ, бл҃говоле́нїемъ ѻ҆́ч҃имъ всели́всѧ въ тѧ̀ ѡ҆бра́дованнꙋю: тѣ́мже, пречⷭ҇таѧ, съ нбⷭ҇ными во́инствы тѧ̀ велича́емъ.

Комментарии для сайта Cackle