Въ а҃-й де́нь: ст҃ы́хъ и҆ чꙋдотво́рцєвъ безсре́бреникѡвъ космы̀ и҆ дамїа́на, въ ри́мѣ мꙋ́чившихсѧ.
Стїхи̑ры на ѕ҃, гла́съ а҃. Подо́бенъ: Нбⷭ҇ныхъ чинѡ́въ:
Чꙋде́сными зарѧ́ми ꙳ болѣ́зней на́шихъ ѿжени́те всѧ́къ недꙋ́гъ, ꙳ безсре́бреннѡ бл҃года́ть простира́юще, ꙳ дарова́ньми ᲂу҆ч҃телѧ ѡ҆бога́щшесѧ, ꙳ на землѝ болѣ̑зни земноро́дныхъ взе́мшагѡ ꙳ на ра́мѣхъ свои́хъ.
Враче́бнѣ ᲂу҆́бѡ пе́рвѣе наказа́вшесѧ до́брѣ, ꙳ болѣ̑зни всѣ̑мъ ѡ҆чища́ете вѣ́рою: ꙳ второ́е же па́ки ꙳ дꙋхо́внѡ себѐ воѡрꙋжи́вше, ꙳ ѿгонѧ́ете бжⷭ҇твеннѣ ꙳ и҆ дꙋше́вныхъ недꙋ̑гъ вреждє́нїѧ.
Ꙗ҆́кѡ безсре́бреннѡ бл҃года́ть ѿ хрⷭ҇та̀ бг҃а прїе́мше, ꙳ всѣ̑мъ безсре́бреннѡ и҆сцѣлѧ́ете, ꙳ безсре́брєницы, недꙋ́ги, ꙳ не то́кмѡ на́шѧ болѣ̑зни ѡ҆чища́ете, ꙳ но и҆ скотѡ́мъ даю́ще слове́снѡ и҆справле́нїе, ꙳ ꙗ҆́кѡ ми́лостиви.
И҆́ны стїхи̑ры, гла́съ д҃. Подо́бенъ: Да́лъ є҆сѝ зна́менїе:
Вода́ми дꙋхо́вными, ꙳ ꙗ҆́кѡ рѣ́ки наводнѧ́ємы ꙳ и҆ ꙗ҆́вѣ напо́лншесѧ, тва́рь напоѧ́ете ꙳ бг҃озна́меньми, и҆ пресла́вными и҆сцѣле́нїй дарова̑нїи, ꙳ и҆ дꙋшетлѣ̑нныѧ стра̑сти и҆зсꙋша́ете, ꙳ и҆ недꙋ́ги и҆сцѣлѧ́ете, ꙳ и҆ ѿгонѧ́ете дꙋ́хи, ꙳ бг҃оно́снїи безсре́брєницы, ꙳ моли́твєнницы ѡ҆ дꙋша́хъ на́шихъ.
Стра̑сти безсловє́сныѧ ꙳ поко́рше, ст҃і́и, ꙳ дꙋше́вными си́лами, ꙳ человѣ́кѡмъ и҆ скотѡ́мъ ꙳ благодѣѧ́нїе подава́ете, ꙳ ѿ хрⷭ҇та̀ дарова́нїемъ и҆сцѣле́нїй ѡ҆бога́щшесѧ. ꙳ тѣ́мже свѧще́нное ва́ше ꙳ и҆ свѣтоно́сное торжество̀ соверша́юще, ꙳ про́симъ ѡ҆чище́нїѧ дꙋша́мъ на́шымъ.
Бжⷭ҇твенный хра́мъ ва́шъ, ꙳ ꙗ҆́кѡ нб҃о показа́сѧ свѣтоза́рно и҆ спасе́нно, ꙳ ꙗ҆́кѡ ѕвѣ́зды чꙋдеса̀ спаси́тєльна, ꙳ ны́нѣ притѧжа́въ, ꙳ и҆ ꙗ҆́коже со́лнце свѣ́тло, ꙳ и҆сцѣле́нїй бжⷭ҇твенное дѣ́йство, ꙳ космо̀ пребл҃же́нне, дамїа́не пресла́вне, ꙳ гдⷭ҇ни слꙋжи́тели, ꙳ моли́твєнницы ѡ҆ дꙋша́хъ на́шихъ.
Сла́ва, гла́съ ѕ҃:
Безконе́чна є҆́сть ст҃ы́хъ бл҃года́ть, ю҆́же ѿ хрⷭ҇та̀ прїѧ́ша: тѣ́мже и҆ мѡ́щи и҆́хъ ѿ бжⷭ҇твенныѧ си́лы непреста́ннѡ дѣ́йствꙋютъ чꙋдеса̀, и҆́хже и҆ и҆мена̀, вѣ́рою призыва́єма, неисцѣ̑льныѧ болѣ̑зни и҆сцѣлѧ́ютъ, и҆́миже, гдⷭ҇и, и҆ на́съ дꙋше́вныхъ и҆ тѣле́сныхъ страсте́й свободѝ, ꙗ҆́кѡ чл҃вѣколю́бецъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Всѐ ѿло́жше:
А҆́гнца своего̀ ꙳ а҆́гница нескве́рнаѧ дре́вле ꙳ и҆ непоро́чнаѧ влⷣчца ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безбл҃года́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, ꙳ сло́ве, снизхожде́нїе.
На стїхо́внѣ стїхи̑ры ѻ҆ктѡ́иха. Сла́ва, гла́съ ѕ҃:
Всегда̀ и҆мꙋ́ще хрⷭ҇та̀ дѣ́йствꙋюща въ ва́съ, ст҃і́и безсре́бреницы, чꙋдодѣ́йствꙋете въ мі́рѣ, болѧ́щыѧ и҆сцѣлѧ́ете. И҆́бо врачевство̀ ва́ше и҆сто́чникъ є҆́сть неисчерпа́емый: че́рплемый же, па́че и҆з̾ѻби́льнѡ и҆стека́етъ, и҆ и҆злива́емь, и҆з̾ѡби́лꙋетъ, на кі́йждо де́нь и҆стощава́емь, и҆ ᲂу҆множа́емь, всѣ̑мъ подаѧ̀, и҆ неѡскꙋдѣва́емь пребыва́ѧ: и҆ че́рплющїи насыща́ютсѧ и҆сцѣле́нїѧ, то́й же пребыва́етъ неиждивꙋ́щь. что̀ ᲂу҆̀бо ва́съ нарече́мъ; цѣли́тельныхъ ли врачє́въ дꙋ́шъ же и҆ тѣле́съ; цѣли́телей страсте́й неисцѣ́льныхъ, тꙋ́не и҆сцѣлѧ́ющихъ всѣ́хъ, прїе́мшихъ дарова́нїе ѿ сп҃са хрⷭ҇та̀, подаю́щагѡ на́мъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: ꙳ что̀ стра́нное, ꙳ є҆́же ви́жꙋ, та́инство, сн҃е мо́й; ꙳ ка́кѡ на дре́вѣ ᲂу҆мира́еши пло́тїю повѣ́шенъ, ꙳ жи́зни пода́телю;
Тропа́рь, гла́съ и҃:
Ст҃і́и безсре́бреницы и҆ чꙋдотво́рцы космо̀ и҆ дамїа́не, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.
На ᲂу҆́трени, на Бг҃ъ гдⷭ҇ь, тропа́рь два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Канѡ́ны ѻ҆́ба ѻ҆ктѡ́иха, и҆ ст҃ы́хъ на ѕ҃.
Гла́съ д҃. Пѣ́снь а҃. І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Дво́ице свѣтови́днаѧ мꙋ́дрыхъ безсре́брєникъ, трⷪ҇цѣ честнѣ́й со всѣ́ми и҆збра́нными предстоѧ́щи, моли́сѧ, па́мѧть твою̀ свѣтоно́снꙋю творѧ́щымъ просвѣти́тисѧ дх҃а бжⷭ҇твенными свѣтлостьмѝ.
Превысо́цы ᲂу҆мо́мъ сꙋ́щихъ въ ве́щехъ ꙗ҆́вльшесѧ, невеще́ствєнна блиста̑нїѧ дх҃а мꙋ́дрїи прїѧ́сте, ст҃і́и. тѣ́мже тмꙋ̀ недꙋ́гѡвъ разрѣша́ете всегда̀ посѣщє́нїи бжⷭ҇твенными, безсре́брєницы.
Недрема́нно дꙋше́вное стѧжа́вше ѻ҆́ко, ко и҆сполне́нїю бж҃їю, бжⷭ҇твенныхъ за́повѣдей, спѧ́щыѧ въ недꙋ́зѣхъ, сла́внїи, къ до́бромꙋ здра́вїю возбꙋжда́ете бл҃года́тїю, ми́лостивїи бг҃оно́снїи безсре́брєницы.
Бг҃оро́диченъ:
Сп҃са и҆ бг҃а, ѿ чⷭ҇тыхъ твои́хъ крове́й, воплоти́ла є҆сѝ, чⷭ҇таѧ, показа́вшаго на́мъ врачѝ дꙋша́мъ на́шымъ, пречⷭ҇таѧ, сп҃си́тельны и҆ теплы̀ застꙋ́пники, чєстны́ѧ безсре́бреники, дꙋ́хомъ.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ, нѣ́сть бо свѧ́тъ, па́че тебє̀, чл҃вѣколю́бче.
Мѵ́ро благово́нно и҆сцѣле́нїй, бжⷭ҇твенный хра́мъ ва́шъ и҆сточа́етъ свѧще́ннѡ тꙋ́чи дꙋхѡ́вныѧ, стра̑сти ѕлосмра̑дныѧ ѿмыва́ѧ всегда̀.
Въ нбⷭ҇ныхъ се́лѣхъ водворѧ́ющесѧ всегда̀, сѣ́нь ва́шꙋ при́снѡ и҆сто́чникъ и҆сцѣле́нїй, премꙋ́дрїи, показꙋ́ете бл҃года́тїю вседержи́телѧ.
Плѡтскі́ѧ стра̑сти воздержа́нїѧ броздо́ю ѡ҆бꙋзда́вше, дꙋхѡ́вныѧ зари̑ пребога́тнѡ прїѧ́сте: тѣ́мже и҆сцѣле́ньми мі́ръ ѡ҆богаща́ете.
Бг҃оро́диченъ:
Краснѣ́йшꙋ въ жена́хъ тѧ̀ бг҃ъ и҆збра̀, и҆ и҆зъ тебє̀ пло́тски, чⷭ҇таѧ, роди́тисѧ благоизво́ли почива́ѧй во ст҃ы́хъ свои́хъ.
Сѣда́ленъ, гла́съ и҃. Подо́бенъ: Премꙋ́дрости:
И҆сцѣле́нїй да́тели и҆ чꙋдотво́рцы, и҆ чꙋде́съ свѣти́льники свѣтопрїе́мнїи всѣ̑мъ ꙗ҆ви́стесѧ, дꙋхо́вною благода́тїю, страстны́й бо пла́мень вѣ́рою прохлажда́ете, и҆ вѣ̑рнымъ въ не́й смы́слъ согрѣва́ете. тѣ́мъ врачевство̀ дꙋше́вное стѧжа́вше, бжⷭ҇твеннꙋю цр҃ковь ва́шꙋ, къ не́йже прибѣга́юще вопїе́мъ: бг҃оно́сцы безсре́брєницы, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть ва́шꙋ.
Сла́ва, гла́съ и҆ подо́бенъ то́йже:
И҆сцѣле́нїй зари̑ сꙋ́щымъ на землѝ возсїѧ́юще, бжⷭ҇твеннїи чꙋдотво́рцы, ꙗ҆́вѣ ѿгонѧ́ете человѣ́кѡвъ недꙋ́ги, вои́стиннꙋ незаходи́маго сл҃нца въ себѣ̀ стѧжа́вше, хрⷭ҇та̀ бг҃а на́шего. тѣ́мже досто́йнѡ соше́дшесѧ, почита́емъ сла́внꙋю, ст҃і́и, и҆ честнꙋ́ю ва́шꙋ па́мѧть, бг҃оно́снїи безсре́брєницы. моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть ва́шꙋ.
И҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Живоно́сными дѣ́йствы, всѧ́ческими дѣѧ̑нїи, (с. 10) смертонѡ́сныѧ стра̑сти человѣ́кѡвъ и҆сцѣлѧ́ете, свѣтови́днїи столпѝ, забра̑ла недви̑жима, вїногра́да и҆́стиннагѡ бжⷭ҇твєнныѧ ло́зы.
Сосцы̀ цр҃ко́внїи, и҆̀же млеко̀ пролива́юще и҆сцѣле́нїй, просвѣще́нїй, безсре́брєницы, пита́юще всѣ́хъ бж҃е́ственными бра́шны, да восхва́лѧтсѧ ра́достными пѣ́сньми.
Врачевство̀ показа́сѧ хра́мъ ва́шъ, ст҃і́и, ѡ҆бꙋрева́ємымъ небꙋ́рно приста́нище и҆ спаси́тельно, въ ѻ҆́ньже притека́юще всѝ прїе́млемъ тишинꙋ̀, и҆ лю́тыхъ и҆збавле́нїе.
Бг҃оро́диченъ:
Ми́лости мѧ̀, дв҃о, ꙗ҆́же въ тебѣ̀, сподо́би, ро́ждшаѧ сло́во, є҆ди́на вои́стиннꙋ ми́лостивное, є҆ди́но ми́лостивны ст҃ы̑ѧ показа́вшее, цѣли́тели и҆ чꙋдотво́рцы въ концѣ́хъ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Бжⷭ҇твенными свѣтлостьмѝ ꙗ҆́вѣ ѡ҆блиста́еми, ве́сь ѡ҆бхо́дите мі́ръ: всѧ̑ человѣ́ки просвѣща́ете, тмꙋ̀ ѿе́млюще страсте́й, де́мѡны прогонѧ́юще, бг҃оно́снїи безсре́брєницы.
Ꙗ҆́кѡ два̀ просвѣща́ете свѣти́льники поднебе́снꙋю, дꙋходви́жнѡ, бг҃оно́сцы, всю̀ тва́рь ѡ҆бходѧ́ще, и҆ и҆̀же на ѻ҆дрѣ̀ болѣ́зней посѣща́юще, и҆ ѿ бѣ́дъ и҆зима́юще.
Недꙋ́гꙋющымъ и҆сцѣле́нїе, страсте́й и҆збавле́нїе подаю́ще безсре́бреннѡ, всѣ̑мъ предста́тели вели́цы ꙗ҆ви́стесѧ, всѣ̑мъ помѡ́щницы съ бг҃омъ, всѣ̑мъ застꙋ́пницы, бг҃оно́снїи безсре́брєницы.
Бг҃оро́диченъ:
Мꙋ́дрость породила̀ є҆сѝ бж҃їю ѵ҆поста́снꙋю, пречⷭ҇таѧ дв҃о бцⷣе, ст҃ы̑ѧ премꙋ́дры показа́вшꙋю: и҆́миже ѕломꙋдреца̀ паде́сѧ шата́нїе, и҆ лю̑таѧ ᲂу҆хищрє́нїѧ. (с. 11)
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю.
Не хи́тростїю человѣ́ческою, но бжⷭ҇твенною бл҃года́тїю, ѡ҆чища́ете недꙋ́ги человѣ́кѡвъ, сла́внїи: сегѡ̀ ра́ди соше́дшесѧ, по до́лгꙋ ва́съ ᲂу҆блажа́емъ.
Любо́вїю ко хрⷭ҇тꙋ̀, бг҃оно́снїи, свѧза́еми, всю̀ ѕло́бꙋ де́мѡнѡвъ разрꙋша́ете бжⷭ҇твенною благода́тїю: сегѡ̀ ра́ди ва́ше соверша́емъ торжество̀.
Ꙗ҆́кѡ сꙋ́ще вїногра́да бжⷭ҇твеннагѡ прозѧбє́нїѧ, вїно̀ на́мъ и҆сцѣле́нїй сꙋ́щымъ въ сѣ́тованїи недꙋ́гѡвъ точа́ще, весе́лїѧ и҆сполнѧ́ете безсре́брєницы.
Бг҃оро́диченъ:
Хра́мъ тѧ̀ чи́стъ содѣ́ла, влⷣчце, пречи́стое сло́во є҆́же бжⷭ҇твенный хра́мъ безсре́брєникъ, велича́ѧ въ чꙋдесѣ́хъ и҆ зна́менїихъ всегда̀.
Конда́къ, гла́съ в҃:
Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.
І҆́косъ:
Всѧ́кагѡ ра́зꙋма и҆ мꙋ́дрости прехо́дитъ сло́во мꙋ́дрыхъ врачє́въ, и҆ всѣ̑мъ ра́зꙋмъ подаю́тъ: вы́шнѧгѡ бо благода́ть прїе́мше, неви́димѡ здра́вїе да́рꙋютъ всѣ̑мъ. ѿѻнꙋ́дꙋже и҆ мнѣ̀ по́вѣсти бл҃года́ть дарова́сѧ пѣ́ти, ꙗ҆́кѡ бг҃онѡ́сныѧ ᲂу҆го́дники хрⷭ҇тѡ́вы и҆ слꙋжи́тели, и҆сцѣле́нїй мно́жество подаю́щыѧ: болѣ́зни бо всѣ́хъ и҆збавлѧ́ютъ, мі́ръ и҆сцѣлѧ́юще чꙋдесы̀.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ѿверза́юще и҆сто́чникъ бг҃ода́нный ст҃і́и, всѣ̑мъ рѣ́ки и҆сточа́ете чи́стыхъ и҆сцѣле́нїй, ѿмыва́юще страсте́й сквернє́нїѧ, и҆ де́мѡнѡвъ ѕло́бꙋ всегꙋби́тельнꙋю.
Оу҆крѣплѧ́еми вседержи́телѧ дх҃а благода́тїю, здра́вїе болѧ́щымъ всегда̀ подае́тъ, дво́ица безсре́брєникъ твои́хъ досточꙋ́днаѧ, сло́ве бж҃їй, мꙋ́дросте и҆ си́ло.
Свѧ́тъ є҆ди́нъ є҆сѝ, прославлѧ́ѧ ст҃ы̑ѧ твоѧ̑: мі́ръ бо тѣ́хъ ра́ди и҆збавлѧ́еши ѿ бѣ́дъ, и҆ просвѣща́еши зовꙋ́щыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Же́злъ и҆зъ ко́рене і҆ессе́ева ты̀ прозѧбла̀ є҆сѝ, цвѣ́та хрⷭ҇та̀ и҆зрасти́вши, марі́е: ꙗ҆́кѡ цвѣтцы̀ чꙋдесы̀ ᲂу҆краси́вшаго своѧ̑ безсре́бреники ᲂу҆гѡ́дныѧ.
Пѣ́снь и҃. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
На́зи всѧ́кїѧ ꙗ҆ви́стесѧ вра́жїѧ ѕло́бы, ст҃і́и, бжⷭ҇твеннымъ дх҃омъ, на́мъ бы́вше ѻ҆де́жда спасе́нїѧ, и҆ ѡ҆ставле́нїѧ вина̀, и҆ лю́тыхъ премѣне́нїе, вопїю́щымъ: всѧ̑ дѣла̀ благослови́те гдⷭ҇нѧ гдⷭ҇а.
Сы́нове по прича́стїю бж҃їю, дамїа́не и҆ космо̀, бы́вше, вѣ́рою ѻ҆те́ческїй жре́бїй ны́нѣ ѡ҆брѣто́сте, нбⷭ҇ное наслажде́нїе, и҆ чꙋде́съ свѣ́тлое вои́стиннꙋ дѣ́йство, и҆ вопїе́те: всѧ̑ дѣла̀ благослови́те гдⷭ҇нѧ гдⷭ҇а.
Кропле́ньми ва́шими бг҃олѣ́пными скве́рнꙋ ѡ҆мы́йте дꙋше́внꙋю на́шꙋ, и҆ болѣ́знєнныѧ, ст҃і́и, прожени́те стра̑сти, и҆ де́мѡнскаѧ стремлє́нїѧ ѿими́те, ꙗ҆́кѡ предста́телїе, и҆ ꙗ҆́кѡ цѣли́телїе на́ши ми́лостивїи. (с. 13)
Ꙗ҆́кѡ крі́нъ, ꙗ҆́кѡ цвѣ́тъ мы́сленный, ꙗ҆́кѡ шипцы̀ дх҃омъ ᲂу҆кра́шени, на́мъ ꙗ҆ви́стесѧ, ст҃і́и, благово́нїе воспꙋща́юще, и҆ ѕлосмра́дїе страсте́й ѿгонѧ́юще, вопїю́щымъ: всѧ̑ дѣла̀ благослови́те гдⷭ҇нѧ гдⷭ҇а.
Бг҃оро́диченъ:
Оу҆мерщвлѧ́етсѧ сме́рть тобо́ю, жи́знь бо родила̀ є҆сѝ ѵ҆поста́снꙋю, хрⷭ҇та̀ бг҃а, пречⷭ҇таѧ, и҆ предста́тели жи́зни на́шеѧ показа́вшаго, безсре́бреники врачѝ, вопїю́щымъ: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Сѐ ны́нѣ что̀ добро̀, и҆лѝ что̀ красно̀, ꙗ҆́коже пи́шетъ, но то́кмѡ є҆́же жи́ти ны́нѣ бра́тїи въ є҆диномышле́нїи, въ мѣ́стѣ свѣтоза́рнѣ, въ се́лѣхъ нбⷭ҇ныхъ, въ сла́вѣ неꙋвѧда́ющей, ꙗ҆̀же по достоѧ́нїю ᲂу҆блажа́емъ;
Ꙗ҆́кѡ вели́къ сі́й хра́мъ, чꙋдесы̀ всегда̀ ᲂу҆краша́емь, въ ѻ҆́ньже при́снѡ приходѧ́ще, космо̀ и҆ дамїа́не досточꙋ́днїи, здра́вїе тре́бꙋющымъ подава́ете: тѣ́мже досто́йнѡ блажи́ми є҆стѐ.
Дне́сь сра́дꙋютсѧ на́мъ, бл҃же́ннїи, въ па́мѧти ва́шей, а҆́гг҃ли, и҆ бжⷭ҇твеннїи а҆пⷭ҇ли, прⷪ҇ро́цы и҆ прпⷣбнїи, и҆ всѝ пра́вєдницы, съ ни́миже ра́достнѡ водворѧ́ющесѧ, за ве́сь мі́ръ моли́тесѧ.
Бжⷭ҇твеннаѧ дво́ице и҆ свѣтоза́рнаѧ, безсре́бреннїи и҆ бг҃оно́снїи и҆ всечестні́и, ѡ҆ставле́нїе согрѣше́нїй, и҆ и҆справле́нїе житїѧ̀ и҆спроси́те, и҆ всѣ́хъ лю́тыхъ и҆збавле́нїе, восхвалѧ́ющымъ ва́съ всегда̀.
Бг҃оро́диченъ:
Свѣ́та жили́ще, чⷭ҇таѧ, была̀ є҆сѝ всѧ̑ ѡ҆зари́вшагѡ, и҆ свѣтоно́сны, и҆ ст҃ы показа́вшагѡ, ны́нѣ тмꙋ̀ ѿе́млюща страсте́й дꙋшетлѣ́нныхъ дх҃омъ, пречⷭ҇таѧ є҆ди́на приснодв҃о.
Свѣти́ленъ. Подо́бенъ: Нб҃о ѕвѣзда́ми:
Ко́е дово́льно бꙋ́детъ сло́во, безсре́брєникъ и҆зрещѝ бл҃года́ть и҆сцѣле́нїй; и҆́бо сꙋ́ть по бз҃ѣ, все́й вселе́ннѣй вра́чеве и҆ спаси́телїе.
Бг҃оро́диченъ:
Держа́внымъ твои́мъ кро́вомъ, ѿ вра̑гъ навѣ́та на́съ, чⷭ҇таѧ, твоѧ̑ рабы̑ сохранѝ всѧ̑ неврє́дны: тѧ́ бо стѧжа́хомъ є҆ди́нꙋ прибѣ́жище въ ско́рбехъ.
На хвали́техъ стїхи̑ры, на ѕ҃. Гла́съ а҃. Самогла̑сны:
Благода́ть и҆сцѣле́нїй ѿ бг҃а, прїе́мше, безсре́бреннѡ стра̑сти дꙋ́шъ и҆ тѣле́съ на́шихъ те́плѣ и҆сцѣлѧ́ете, всекра́снїи безсре́брєницы: тѣ́мже ва́ми хрⷭ҇то́съ вѣ̑рнымъ да́нное здра́вїе да́рꙋѧ, свѣти̑ла нелє́стнаѧ ва́съ показꙋ́етъ вселе́ннѣй. того̀ ᲂу҆моли́те, спасти́сѧ дꙋша́мъ на́шымъ.
Ѿ вы́шнѧгѡ про́мысла бе́зднꙋ и҆сцѣле́нїй поче́рпше, всѣ̑мъ и҆сточа́ете вѣ̑рнымъ и҆сцѣлє́нїѧ безсре́бреницы: преесте́ственнѣ бо недꙋ́гꙋющихъ стра̑сти, рꙋкодѣ́йствїи та́инственными, ѿ сокро́вищъ дх҃а лѣчбы̑ предлага́юще спаси́тєльныѧ, стра́ждꙋщихъ и҆сцѣлѧ́ете. тѣ́мже хра́мъ че́стенъ бы́вше живонача́льныѧ трⷪ҇цы, въ ва́съ бо ꙗ҆́вѣ ѻ҆би́тель сотворѝ: є҆́йже моли́тесѧ, спасти́сѧ дꙋша́мъ на́шымъ.
Гла́съ в҃. Ѳеофа́ново:
Любо́вїю бжⷭ҇твенною, и҆ жела́нїемъ бꙋ́дꙋщихъ, дѣ́тельнѣ пожи́вше, спаси́тєльныѧ пꙋти̑ и҆спра́висте. тѣ́мже чистотꙋ̀ дꙋше́внꙋю нескве́рнѡ соблю́дше, вє́щнымъ до конца̀ проти́вꙋ ста́сте: дх҃омъ же бжⷭ҇твеннымъ позла́щшесѧ, беззла́тнѡ и҆сцѣле́нїе недꙋ́гꙋющымъ подае́те, дво́ице свѧще́ннаѧ, свѣтоза́рное собра́нїе, просвѣще́нный бжⷭ҇твенный сопрꙋ́же безсре́брєницы, въ ско́рбехъ и҆ болѣ́знехъ посѣща́юще на́съ, и҆ дꙋ́шъ на́шихъ недꙋ́ги безме́зднѡ и҆сцѣлѧ́юще.
Ге́рманово:
Вели̑кимъ сподо́бльшесѧ дарѡ́мъ, прехва́льнїи, въ смире́нномъ житїѝ на землѝ пожи́сте: и҆ проходѧ́ще всю́дꙋ, тꙋ́не болѧ́щихъ стра̑сти и҆сцѣлѧ́юще, ꙗ҆ви́стесѧ а҆́гг҃лѡмъ собесѣ̑дницы, космо̀ съ дамїа́номъ мꙋ́дрымъ, бра́тїѧ прекра́снїи, и҆ на́шѧ стра̑сти, моли́твами ва́шими, и҆сцѣли́те.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.
И҆сто́чникъ и҆сцѣле́нїй є҆ди́наго то́кмѡ въ лѣ́тѣ и҆сцѣлева́ше, хра́мъ же безсре́бреникѡвъ всѐ мно́жество и҆сцѣлѧ́етъ недꙋ́гꙋющихъ: неѡскꙋ́дно бо є҆́сть и҆ неиждива́емое бога́тство ст҃ы́хъ. тѣ́хъ моли́твами, хрⷭ҇тѐ, поми́лꙋй на́съ.
Сті́хъ: Сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ:
Ге́рманово:
Ра́дꙋетсѧ ли́къ ст҃ы́хъ во вѣ́ки, црⷭ҇тво бо нбⷭ҇ное наслѣ́доваша: землѧ̀ мѡ́щи и҆́хъ прїе́мши, благово́нїе распꙋстѝ, рабѝ хрⷭ҇тѡ́вы бы́ша, все́льшесѧ въ жи́знь вѣ́чнꙋю.
Сла́ва, гла́съ д҃: Ѳеофа́ново:
И҆сто́чникъ и҆сцѣле́нїй, и҆мꙋ́ще ст҃і́и безсре́брєницы, и҆сцѣле́нїе подае́те всѣ̑мъ тре́бꙋющымъ, ꙗ҆́кѡ вели̑кимъ дарѡ́мъ сподо́бльшесѧ, ѿ приснотекꙋ́щагѡ и҆сто́чника сп҃са хрⷭ҇та̀. рече́ бо къ ва́мъ гдⷭ҇ь, ꙗ҆́кѡ є҆диноревни́телємъ а҆пⷭ҇толѡвъ: сѐ да́хъ ва́мъ вла́сть надъ дꙋ́хи нечи́стыми, ꙗ҆́коже тѣ́хъ и҆згони́ти, и҆ и҆сцѣли́ти всѧ́къ недꙋ́гъ, и҆ всѧ́кꙋю ꙗ҆́зю. тѣ́мже въ повелѣ́нїихъ є҆гѡ̀ до́брѣ пожи́вше, тꙋ́не прїѧ́сте, тꙋ́не подае́те, и҆сцѣлѧ́юще стра̑сти дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ.
А҆́ще ли слꙋчи́тсѧ среда̀, и҆лѝ пѧто́къ, глаго́ли крестобг҃оро́диченъ:
Гла́съ д҃. Подо́бенъ: Ꙗ҆́кѡ до́блѧ:
Распина́ема хрⷭ҇та̀ чл҃вѣколю́бца ви́дѧщи, пречⷭ҇таѧ, ꙳ и҆ ре́бра и҆скопова́ема копїе́мъ, ꙳ пла́чꙋщи вопїѧ́ше: ꙳ что̀ сїѐ, сн҃е мо́й! ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ; и҆ тщи́шисѧ безча́дствовати мѧ̀, вселюбе́знѣйшїй: ꙳ ᲂу҆дивлѧ́юсѧ, бл҃гоꙋтро́бне, ꙳ твоемꙋ̀ во́льномꙋ распѧ́тїю.
На стїхо́внѣ ѻ҆ктѡ́иха. Сла́ва, гла́съ и҃:
Кто̀ не ᲂу҆диви́тсѧ, кто̀ не просла́витъ, кто̀ не воспое́тъ вѣ́рнѡ, мꙋ́дрыхъ и҆ пресла́вныхъ безсре́брєникъ чꙋдеса̀; ꙗ҆́кѡ да и҆ по ст҃о́мъ и҆́хъ преставле́нїи, всѣ̑мъ подаю́тъ притека́ющымъ вѣ́рою бога́тнѡ и҆сцѣлє́нїѧ, и҆ чєстны́ѧ и҆ свѧты̑ѧ мо́щи тѣ́хъ и҆сточа́ютъ благода́ть и҆сцѣле́нїй. ѽ дво́ице ст҃а́ѧ! ѽ честны̑ѧ главы̑! ѽ премꙋ́дросте и҆ сла́во, ꙗ҆́же ѿ бг҃а да́нныѧ ва́мъ благода́ти! тѣ́мже пѣ́сньми зове́мъ бл҃годѣ́телю бг҃ꙋ, показа́вшемꙋ тѣ́хъ на врачева́нїе дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше: ꙳ люби́мѣйшее ча́до: ꙳ что́ ти со́нмъ воздадѐ безбл҃года́тный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне;
На лїтꙋргі́и, бл҃жє́нна ѻ҆ктѡ́иха, на д҃: и҆ ѿ канѡ́на ст҃ы́хъ, пѣ́снь г҃, на д҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ. А҆пⷭ҇лъ къ корі́нѳѧнѡмъ, зача́ло рн҃г. А҆ллилꙋ́їа, гла́съ д҃: Сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ: Є҆ѵⷢ҇лїе матѳе́а, зача́ло л҃д ѿ полꙋ̀. Прича́стенъ: Ра́дꙋйтесѧ, пра́веднїи ѡ҆ гдⷭ҇ѣ: