Мѣ́сѧца тогѡ́же въ к҃-й де́нь. Прпⷣбныѧ ма́тере на́шеѧ макрі́ны, сестры̀ вели́кагѡ васі́лїа:

И҆ прпⷣбнагѡ ѻ҆тца̀ на́шегѡ ді́а.

Стїхи̑ры ст҃ы́ѧ, гла́съ д҃. Подо́бенъ: Да́лъ є҆сѝ зна́менїе:

Нетлѣ́нно соблюла̀ є҆сѝ дѣ́вство и҆ нескве́рно, ꙳ чи́стѡ пожи́вши: ꙳ и҆ бога́тство раздала̀ є҆сѝ, ꙳ хрⷭ҇то́во и҆спо́лнивши законоположе́нїе, ꙳ є҆мꙋ́же послѣ́довала є҆сѝ, ꙳ зе́млю ѡ҆ста́вльши и҆ ꙗ҆̀же на землѝ. ꙳ тѣ́мже тебѣ̀ нбⷭ҇наѧ и҆ не́бо дарова̀ ꙳ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ.

Любомꙋ́дренно дꙋше́вное ꙳ самодви́жимо и҆ безсме́ртно показа́ла є҆сѝ. ꙳ тѣ́мже и҆ потща́ласѧ є҆сѝ ꙳ не примѣси́тисѧ скве́рнѣ грѣхо́внѣй, ꙳ и҆ чиста̀ ѿ всѧ́кагѡ ка́ла, ꙳ премѣни́тисѧ соꙋ̑зъ тѣле́сныхъ, ꙳ ни є҆ди́ны скве́рны и҆мꙋ́щи, ни вра́ски, бг҃опрїѧ́тнаѧ, ꙳ но чиста̀ и҆ всенепоро́чна ꙳ женихꙋ̀ твоемꙋ̀ предста́ти.

Заре́ю просвѣти́сѧ ꙳ свѣтови́дное твоѐ лицѐ, ꙳ и҆ ᲂу҆ме́рши, прехва́льнаѧ, ꙳ хрⷭ҇тꙋ́ тѧ просла́вльшꙋ, ꙳ ꙗ҆́кѡ свою̀ дѣ́вꙋ бг҃ови́днꙋ, ꙳ ꙗ҆́кѡ ми́лостивꙋ и҆ ꙗ҆́снꙋ, ꙳ ꙗ҆́кѡ страда́тельнꙋ же и҆ бг҃оглаго́ливꙋ: ꙳ жи́знь бо равноа́гг҃льнꙋ на землѝ пожи́вши, ꙳ бг҃ꙋ ᲂу҆годи́ла є҆сѝ житїѧ̀ свѣ́тлостїю.

И҆́ны стїхи̑ры прпⷣбнагѡ, гла́съ то́йже. Подо́бенъ: Ꙗ҆́кѡ до́блѧ:

Ꙗ҆́кѡ ѕвѣздꙋ̀ всемі́рнꙋ, ꙳ мы́сленнѡ возсїѧ́вши ꙳ на церко́внѣй тве́рди, ꙳ восхвалѧ́емъ тѧ̀, бл҃же́нне, ꙳ бжⷭ҇твенными твои́ми сїѧ́нїи просвѣща́еми при́снѡ, ꙳ и҆ дꙋше́ю и҆ ᲂу҆мо́мъ, ꙳ чтꙋ́щїи тво́й свѣтоно́сный де́нь моле́бнѡ, свѧще́нне чꙋдоно́сне, ꙳ мона́шествꙋющихъ ᲂу҆добре́нїе.

Ꙗ҆́коже вторы́й а҆арѡ́нъ ꙳ жезла̀ прозѧбе́нїемъ ꙳ бжⷭ҇твенно ѡ҆свѧще́нїе, ѻ҆́ч҃е, бы́лъ є҆сѝ, ꙗ҆́коже мѡѷсе́й во́дꙋ, прпⷣбне, ꙳ и҆зъ ка́мене и҆зве́лъ є҆сѝ, ꙳ ꙗ҆́коже и҆лїа̀ мертвеца̀ моли́твою твое́ю воздви́глъ є҆сѝ, ꙳ ᲂу҆дивлѧ́емь вели́кими чꙋдесы̀, ꙳ и҆ бжⷭ҇твенными просвѣща́емь благозва́нїи, ꙳ ді́е бг҃омꙋ́дре пребога́те.

Дꙋхо́вное сїѧ́нїе, ꙳ проѧвле́нно прїе́мъ, ꙳ лꙋка́вствїѧ дꙋ́хи ѿгна́лъ є҆сѝ, ꙳ и҆ свѧще́нно попече́нїе дꙋша́мъ ᲂу҆стро́илъ є҆сѝ: ꙳ въ не́мже спаса́ютсѧ мно́жєства всегда̀, ꙳ чтꙋ́щыѧ твою̀ па́мѧть, ꙳ мꙋ́жескїѧ по́двиги, ꙳ и҆ чꙋде́съ пресла̑внаѧ вѣ́рою, ꙳ ді́е, ѻ҆тцє́въ похвало̀.

Сла́ва, и҆ ны́нѣ, бг҃оро́диченъ. Гла́съ и҆ подо́бенъ то́йже:

Ꙗ҆́же бг҃а невмѣсти́маго ꙳ во чре́вѣ твое́мъ вмѣсти́вшаѧ, ꙳ чл҃вѣколю́бнѡ чл҃вѣ́ка бы́вша, и҆ на́ше смѣше́нїе и҆зъ тебє̀ прїи́мша, ꙳ и҆ ѡ҆божи́вша ꙗ҆́вѣ, ꙳ не пре́зри менѐ, всечⷭ҇таѧ, ны́нѣ скорбѧ́ща: ꙳ но ᲂу҆ще́дри ско́рѡ, ꙳ и҆ разли́чныѧ вражды́ же ꙳ и҆ вреда̀ лꙋка́вагѡ свободѝ.

Крⷭ҇тобг҃оро́диченъ, подо́бенъ то́йже:

А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;

Тропа́рь ст҃ы́ѧ, гла́съ и҃:

Въ тебѣ̀, ма́ти, и҆звѣ́стнѡ спасе́сѧ є҆́же по ѻ҆́бразꙋ: прїи́мши бо кре́стъ послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ, презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ макрі́но, дꙋ́хъ тво́й.

Тропа́рь прпⷣбнагѡ, гла́съ д҃.

Пꙋсты́нный жи́тель, и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ, бг҃оно́се ѻ҆́ч҃е на́шъ ді́е: посто́мъ, бдѣ́нїемъ, моли́твою, нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ тѝ, сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Канѡ́нъ прпⷣбныѧ, є҆гѡ́же краегране́сїе:

Невѣ́стꙋ чи́стꙋ тѧ̀ хрⷭ҇тꙋ̀, макрі́но, вѣнча́ю.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Жениха̀ пречи́стаго, дꙋ́шъ красотꙋ̀, макрі́но всесла́внаѧ, є҆гѡ́же возжела́вши возлюби́ла є҆сѝ ѿ всегѡ̀ се́рдца твоегѡ̀, просвѣти́ти молѝ пою́щыѧ тѧ̀.

Сы́й бе́здна па́че ᲂу҆ма̀ бл҃гости, хрⷭ҇тѐ, твою̀ нескве́рнꙋю невѣ́стꙋ просла́вилъ є҆сѝ, жела́нїемъ твои́мъ пригвожде́ннꙋю, макрі́нꙋ непоро́чнꙋю и҆ пресла́внꙋю.

Макрі́но бг҃омꙋ́драѧ, дѣ́вства похвало̀, те́плѣ соблюла̀ є҆сѝ невре́дно, воздержа́нїемъ твоѐ житїѐ, пло́ть дꙋ́хꙋ покори́вши.

Бг҃оро́диченъ:

Свѣтоно́снѡ возсїѧ̀ въ сердца́хъ, пренепоро́чнаѧ, вѣ́рою чтꙋ́щихъ тѧ̀ бж҃їю мт҃рь, и҆ ѡ҆зарѝ де́нь свѣтоно́сный хрⷭ҇то́съ, и҆зъ ᲂу҆тро́бы твоеѧ̀ возсїѧ́вый, бг҃оневѣ́сто.

И҆́нъ канѡ́нъ прпⷣбнагѡ, творе́нїе і҆ѡ́сифово:

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Вы́нꙋ къ бг҃ꙋ манове́нми ᲂу҆добрѧ́емь, тво́й крⷭ҇тъ воспрїѧ́лъ є҆сѝ, и҆ хрⷭ҇тꙋ̀ послѣ́довалъ є҆сѝ, пло́ти твоеѧ̀ мꙋдрова́нїе, ді́е, ᲂу҆мертви́въ воздержа́нїемъ.

Оу҆́треневалъ є҆сѝ къ сла́вѣ незаходи́магѡ сл҃нца, преподо́бне, всесвѣ́тла бы́лъ є҆сѝ ѕвѣзда̀, и҆ вѣ̑рныѧ просвѣти́лъ є҆сѝ добродѣ́телей, бл҃же́нне, и҆ чꙋде́съ твои́хъ свѣ́тлостїю.

Оу҆страни́лъ є҆сѝ по́мыслъ тво́й, премꙋ́дре, сꙋ́щихъ въ мі́рѣ кра́сныхъ, премі́рныѧ сла́вы рачи́тель и҆́стиненъ бы́лъ є҆сѝ, съ пло́тїю безпло́тнаго побѣди́въ бжⷭ҇твенною благода́тїю.

Бг҃оро́диченъ:

Сл҃нца мы́сленнагѡ, всенепоро́чнаѧ, селе́нїе была̀ є҆сѝ, бжⷭ҇твенными свѣтлостьмѝ на́съ благоче́стнѡ ѡ҆зари́вшагѡ, и҆ мглꙋ̀ ѿгна́вша неразꙋ́мїѧ, приснодв҃о.

Пѣ́снь г҃. І҆рмо́съ:

Не мꙋ́дростїю, и҆ си́лою, и҆ бога́тствомъ хва́лимсѧ: но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀ чл҃вѣколю́бче.

Оу҆кра́шена добро́тою бг҃ода́нною, и҆ бл҃года́тїю, и҆ мꙋ́чєникъ благосла́вїе, и҆зводи́ма ро́да че́стна, нра́вꙋ поревнова́ла є҆сѝ си́хъ бжⷭ҇твенномꙋ.

Зако́нꙋ бжⷭ҇твенномꙋ повинꙋ́ющисѧ, дв҃о, ѡ҆ста́вила є҆сѝ житїѧ̀ мѧте́жъ, и҆ молвы̀ ᲂу҆бѣжа́ла є҆сѝ, поще́нїемъ и҆ моли́твами, жела́нїемъ ᲂу҆пражнѧ́ющисѧ.

Свѧще́нїе ѿ мѧ́гкихъ ногте́й возлюби́ла є҆сѝ, ѻ҆чи́ма же ма́тернима блюдо́ма, пребыла̀ є҆сѝ, макрі́но, нетлѣ́нна и҆ непоро́чна.

Бг҃оро́диченъ:

Зе́млю тѧ̀, дв҃о, всенепоро́чнаѧ ѻ҆трокови́це, вѣ́мы, ꙗ҆́кѡ кла́съ жи́зни на́мъ безсѣ́меннѡ прозѧ́бшꙋю, и҆́мже ᲂу҆твержда́еми, тѧ̀ ᲂу҆блажа́емъ.

И҆́нъ. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.

Бжⷭ҇твенными блиста́ѧсѧ сїѧ́нїи, свѣти́льникъ бы́лъ є҆сѝ, наставлѧ́ѧ вѣ́рою къ тебѣ̀ приходѧ́щыѧ, бл҃же́нне.

Наста́вилъ є҆сѝ къ жи́зни послѣ́дꙋющыѧ до́брѣ, преподо́бне: плотскі́ѧ бо стра̑сти бжⷭ҇твенною си́лою ᲂу҆мертви́лъ є҆сѝ.

Совокꙋпи́лсѧ є҆сѝ бг҃олѣ́пнѡ съ нбⷭ҇ными, на земли́ бо житїѐ а҆́гг҃льское пожи́лъ є҆сѝ, ді́е бг҃оно́се ѻ҆́ч҃е на́шъ.

Бг҃оро́диченъ:

Всели́сѧ въ тѧ̀ живы́й на нб҃сѣ́хъ, чⷭ҇таѧ: є҆го́же прилѣ́жнѡ молѝ, спастѝ дꙋ́шы пою́щихъ тѧ̀.

Конда́къ прпⷣбнагѡ, гла́съ в҃. Подо́бенъ: Твє́рдыѧ:

Чистото́ю дꙋшѝ бжⷭ҇твеннѣ воѡрꙋжи́всѧ, непреста́ннꙋю моли́твꙋ ꙗ҆́кѡ копїѐ прїи́мъ держа́внѡ, разсѣ́клъ є҆сѝ де́мѡнѡвъ полкѝ. чꙋдотво́рче ѻ҆́ч҃е на́шъ ді́е, молѝ непреста́ннѡ ѡ҆ всѣ́хъ на́съ.

Сѣда́ленъ ст҃ы́ѧ, гла́съ д҃. Подо́бенъ: Ско́рѡ предварѝ:

Бжⷭ҇твеннаѧ па́мѧть твоѧ̀, макрі́но, дне́сь возсїѧ́вши ꙗ҆ви́сѧ мі́рови ꙗ҆́кѡ со́лнце, сказꙋ́ющи житїѐ твоѐ: ты́ бо воздержа́нїемъ плотска̑ѧ движє́нїѧ разо́рши, ᲂу҆невѣ́стиласѧ є҆сѝ хрⷭ҇тꙋ̀. ѿ младе́нства. тѣ́мже хва́лѧщыѧ тѧ̀ и҆зба́ви ѿ всѧ́кихъ ѕѡ́лъ.

Сла́ва, прпⷣбнагѡ, гла́съ и҃. Подо́бенъ: Премꙋ́дрости:

Бг҃ꙋ ѿ младе́нства возложе́нъ бы́въ, и҆ томꙋ̀ да́же до конца̀ благоꙋгожда́ѧ, ѻ҆́ч҃е на́шъ прпⷣбне, дарова̑нїѧ ᲂу҆лꙋчи́лъ є҆сѝ, и҆ де́мѡнѡвъ мно́жество ѿгна́лъ є҆сѝ благода́тїю, въ гдⷭ҇ню похвалꙋ̀ ѻ҆би́тель созда́лъ є҆сѝ. тѣ́мже пресла́внѡ и҆ мє́ртвыѧ сподо́билсѧ є҆сѝ воздви́гнꙋти, прехва́льне, несꙋмнѣ́нною моли́твою твое́ю. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

И҆ ны́нѣ, бг҃оро́диченъ:

Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Крⷭ҇тобг҃оро́диченъ:

А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Оу҆мертви́вшисѧ мі́рꙋ и҆ мїрски̑мъ ве́щемъ, бг҃ꙋ жи́ти є҆ди́номꙋ, жела́нїемъ бжⷭ҇твеннымъ и҆спра́вила є҆сѝ, твоегѡ̀ жениха̀ жела́ющи добро́ты, спаса́ющагѡ нетлѣ́ннꙋ и҆ чи́стꙋ, всечестна́ѧ.

Поревнова́вши ѳе́клѣ честнѣ́й первомꙋ́ченицѣ, и҆ бжⷭ҇твенномꙋ тоѧ̀ житїю̀ вои́стиннꙋ подо́бѧщисѧ, ѿ вдохнове́нїѧ бжⷭ҇твеннагѡ свы́ше и҆ и҆́мѧ ѻ҆бра́знѡ прїѧ́тъ.

Невѣстоводѧ́щи дѣ̑вы, ты̀, макрі́но, привела̀ є҆сѝ дѣ́вственномꙋ сло́вꙋ, ѿ дв҃ы возсїѧ́вшемꙋ: безстра́стнымъ ᲂу҆́бѡ присвое́нїемъ и҆ подо́бїемъ, безстра́стїе ꙗ҆́вѣ пока́зовала є҆сѝ.

Бг҃оро́диченъ:

Дарова́нїй бжⷭ҇твєнныѧ стрꙋи̑, и҆ и҆сто́чницы и҆сцѣле́нїй, бжⷭ҇твеннагѡ бога́тства раздаѧ̑нїѧ даю́тсѧ живонача́льною дла́нїю, бг҃оневѣ́стнаѧ, ро́ждшагѡсѧ ѿ твоеѧ̀ ᲂу҆тро́бы, вседержи́телѧ.

И҆́нъ. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Дх҃а невеще́ственною свѣще́ю ᲂу҆́мъ тво́й просвѣща́ѧ, плотскꙋ́ю пре́лесть со́нъ вмѣни́лъ є҆сѝ, вы́шнѧгѡ тѧ̀ ча́юща гра́да, бг҃оно́се, смотрѧ́ѧ.

Ꙗ҆́кѡ ѻ҆́блакъ до́ждь носѧ́щїй, ца́рскомꙋ гра́дꙋ ꙗ҆́вльсѧ, напои́лъ є҆сѝ сего̀ напое́нїи ст҃а́гѡ дх҃а, дꙋша́мъ попече́нїе воздви́глъ є҆сѝ прекра́сно.

Оу҆мертви́всѧ грѣхꙋ̀ воздержа́нїемъ, мє́ртвымъ живо́тъ дарова́лъ є҆сѝ бжⷭ҇твеннымъ посо́бїемъ, во́дꙋ же и҆сточи́лъ є҆сѝ на́мъ ᲂу҆миле́нїѧ, прпⷣбне, творѧ́щымъ па́мѧть твою̀.

Бг҃оро́диченъ:

Свѣтоно́сенъ тѧ̀ свѣ́щникъ, бжⷭ҇твенное сїѧ́нїе во ᲂу҆тро́бѣ носи́вшꙋю, позна́хомъ, дв҃о. тѣ́мже мо́лимсѧ тебѣ̀: свѣ́томъ твои́мъ ѡ҆зарѝ всѣ́хъ дꙋ́шы пою́щихъ тѧ̀.

Пѣ́снь є҃. І҆рмо́съ:

Нечести́вїи не ᲂу҆́зрѧтъ сла́вы, твоеѧ̀, хрⷭ҇тѐ, но мы́ тѧ, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.

Ѡ҆скверни́тисѧ страстьмѝ, добро́тѣ кра́снѣй дꙋше́внѣй и҆ бг҃ови́днѣй, не стерпѣ́ла є҆сѝ, всемꙋ́драѧ, добро́тꙋ несказа́ннꙋю честна́гѡ жениха̀ твоегѡ̀ поразꙋмѣ́вши, до́браѧ дѣ́во.

Крѣ́пкимъ ᲂу҆тѣше́нїемъ ѡ҆богати́вшисѧ хрⷭ҇та̀, тве́рдѡ же и҆ незы́блемѡ страсте́й ᲂу҆мертви́ла є҆сѝ мно́гїй мѧте́жъ, ѿ но́щи ᲂу҆́треневавши, и҆ сла́вѧщи гдⷭ҇а.

Тве́рдъ соблюла̀ є҆сѝ ра́зꙋмъ хрⷭ҇тꙋ̀, томꙋ́ бо ѿ ᲂу҆тро́бы приве́ргласѧ є҆сѝ, непоро́чнаѧ, є҆мꙋ́же и҆ возложи́ла є҆сѝ дꙋ́шꙋ и҆ тѣ́ло твоѐ, ѿ ю҆́ности пости́вшисѧ.

Бг҃оро́диченъ:

Хрⷭ҇та̀ родила̀ є҆сѝ и҆зба́вителѧ всѧ́ческихъ, на́съ къ тлѣ́нїю во́лею па́дшихсѧ воѡбрази́вша, и҆ къ сла́вѣ несказа́ннѣй, бг҃ома́ти, возне́сша.

И҆́нъ. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

На горѣ̀ свѧще́ннѣй житїѧ̀ стоѧ̀, восхожде́нїемъ се́рдца разори́лъ є҆сѝ стра̑сти, и҆ бг҃ꙋ прибли́жилсѧ є҆сѝ.

Же́злъ ꙗ҆́коже а҆арѡ́новъ, страннолѣ́пнымъ прозѧбе́нїемъ бы́лъ є҆сѝ, бг҃оно́се, чи́сто влⷣцѣ и҆ бжⷭ҇твенно свѧще́нїе.

Ѽ бжⷭ҇твенныхъ дарѡ́въ, ѿ бг҃а дарова́нныхъ тебѣ̀! моты́кою бо моли́твъ твои́хъ, во́дꙋ жи́вꙋ ѿ бокѡ́въ землены́хъ, ѻ҆́ч҃е, и҆зве́лъ є҆сѝ.

Бг҃оро́диченъ:

Ни а҆́гг҃льскїй ᲂу҆́мъ, ни человѣ́ческїй мо́жетъ, всенепоро́чнаѧ, сказа́ти стра́шнагѡ ржⷭ҇тва̀ глꙋбинꙋ̀ недовѣ́домꙋю.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Жела́нїе хрⷭ҇то́во возраста́ѧ ꙗ҆вле́ннѣе, ᲂу҆́мъ тво́й ве́сь добродѣ́тель сво́йственнꙋ носѧ́ще, насадѝ и҆ благочє́стна бжⷭ҇твєннаѧ ᲂу҆чє́нїѧ.

Пою́щи хрⷭ҇та̀ непреста́нными моли́твами, тве́рдꙋю и҆звлекла̀ є҆сѝ ѿ негѡ̀, дѣ́во, по́мощь, и҆ бжⷭ҇твеннꙋю дѣ́вства благода́ть соблюла̀ є҆сѝ.

Вѣнце́мъ дарова́нїй хрⷭ҇то́съ вѣнча́ тѧ, ꙗ҆́кѡ чи́стꙋю дѣ́вꙋ, и҆ ли́кꙋ дѣ́вственномꙋ наста́вницꙋ: и҆ въ черто́зѣхъ нбⷭ҇ныхъ, бг҃омꙋ́драѧ, всели́ тѧ.

Бг҃оро́диченъ:

Є҆дине́нїемъ, ꙗ҆̀же пе́рвѣе разстоѧ̑щаѧсѧ, совокꙋпѝ, два́ бо є҆стества̀ совокꙋпле́на, родила̀ є҆сѝ неизрече́ннѡ бг҃а сло́ва, вои́стиннꙋ воплоще́нна, всенепоро́чнаѧ.

И҆́нъ. І҆рмо́съ то́йже:

Возвы́силъ є҆сѝ къ бг҃ꙋ серде́чное жела́нїе, и҆ смири́лъ є҆сѝ стра̑сти, и҆ свирѣ́пство де́мѡнѡвъ низложи́лъ є҆сѝ, бг҃оно́се, мона́шествꙋющихъ недви́жимое ¹⁰ ѡ҆снова́нїе.

Оу҆ра́нилъ є҆сѝ воздержа́нїемъ ра́нами, ѻ҆́ч҃е, є҆гѵ́петъ, страстны́ѧ свободи́лъ є҆сѝ є҆гѡ̀ рабо́ты, мно́жество неспрѧже́нныхъ и҆ сꙋпрꙋ́жныхъ благоче́стнѡ послѣ́дꙋющихъ тѝ, прпⷣбне.

Бога́тъ добродѣ́тельми, и҆ чꙋде́съ свѣ́тлостїю бы́въ и҆спо́лненъ, преста́вилсѧ є҆сѝ къ вы́шнемꙋ гра́дꙋ, ді́е бг҃омꙋ́дре, и҆ мо́лишисѧ и҆зба́витисѧ ѿ бѣ́дъ ста́дꙋ твоемꙋ̀.

Бг҃оро́диченъ:

Оу҆мертвѝ дꙋшѝ моеѧ̀ стра̑сти, всенепоро́чнаѧ, жи́знь всѣ́хъ неизрече́ннымъ сло́вомъ ро́ждши, и҆ ᲂу҆́мъ мо́й смꙋща́емый, ѻ҆трокови́це, ᲂу҆мирѝ.

Конда́къ ст҃ы́ѧ, гла́съ д҃. Подо́бенъ: Ꙗ҆ви́лсѧ є҆сѝ:

Бг҃а блага́го всѣ́мъ се́рдцемъ возлюби́ла є҆сѝ, макрі́но преподо́бнаѧ, и҆ сегѡ̀ крⷭ҇тъ честны́й на ра́мо прїе́мши, ᲂу҆се́рднѡ послѣ́довала є҆сѝ є҆мꙋ̀: ѿѻнꙋ́дꙋже согрѣше́нїй ѡ҆брѣла̀ є҆сѝ проще́нїе.

Пѣ́снь з҃. І҆рмо́съ:

Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Є҆ди́наго жела́ющи хрⷭ҇та̀, и҆ соверше́нною любо́вїю ꙗ҆́кѡ ᲂу҆ѧ́звена ꙗ҆́вѣ, вопїѧ́ше: текꙋ̀ въ слѣ́дъ тебє̀, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

Ѿри́нꙋвши стра̑сти, и҆ многомѧтє́жнаѧ движє́нїѧ, въ безстра́стїѧ свѣ́тлꙋю ѡ҆блече́сѧ ри́зꙋ, зовꙋ́щи: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

Низложи́вши шата́нїе ѕвѣрови́дное, вознесе́нное ѕлонача́льнагѡ врага̀, и҆ по́честь побѣ́ды прїѧ́ла є҆сѝ, достохва́льнаѧ, пою́щи: гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

Бг҃оро́диченъ:

Расто́ргни согрѣше́нїй плени̑цы твои́мъ мт҃рнимъ дерзнове́нїемъ, благоче́стнѡ и҆ вѣ́рнѡ пою́щихъ, дв҃о, ржⷭ҇тво̀ твоѐ.

И҆́нъ. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ѻ҆би́тель трⷪ҇цѣ твоѐ се́рдце сотвори́лъ є҆сѝ. тѣ́мже мона́шествꙋющымъ воздви́глъ є҆сѝ благопотре́бно, бг҃оно́се, попече́нїе, бл҃гослове́нъ є҆сѝ, зовы́й, въ хра́мѣ сла́вы твоеѧ̀, гдⷭ҇и.

Ѡ҆быстри́въ тво́й и҆сто́чникъ чꙋде́сный, ѻ҆́ч҃е бг҃омꙋ́дре, во́дꙋ спасе́нїѧ и҆сточи́лъ є҆сѝ вѣ́рнѡ творѧ́щымъ твоѐ ᲂу҆спе́нїе, ді́е чꙋ́дне, мона́шествꙋющихъ свѣти́ло пресвѣ́тлое.

Оу҆краси́въ добродѣ́тельми твоѐ житїѐ, бы́лъ є҆сѝ ве́сь свѣтоза́ренъ, и҆ сто́лпъ свѣтови́денъ, пою́щымъ наста́вникъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Бг҃оро́диченъ:

Ст҃ѣ́йшꙋ тѧ̀ херꙋві̑мъ содѣ́ла, ѻ҆трокови́це, бг҃ъ ст҃ы́й ꙗ҆́вѣ, ѡ҆свѧща́ѧ пою́щыѧ: бл҃гослове́нна ты̀ въ жена́хъ, пренепоро́чнаѧ влⷣчце.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.

Свѧщеннолѣ́пнѡ ты̀ житїѐ и҆ жи́знь чи́стꙋ препроводи́ла є҆сѝ: некра́домо возложе́нїе, добро́та же сокрове́на, бг҃ови́дно ᲂу҆краше́нїе, ꙗ҆ви́ласѧ є҆сѝ, бг҃одохнове́ннаѧ, зовꙋ́щи: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Оу҆мерщвле́нїемъ стра́сти ѡ҆дѣ́ѧнна, къ бжⷭ҇твенномꙋ безсме́ртїю преминꙋ́ла є҆сѝ, и҆зрѧ̑днаѧ наꙋчи́вши и҆ любомꙋ́дрєнаѧ, дꙋшѝ безсме́ртнѣй и҆ самодви́жнѣй, гдⷭ҇а по́йте, вопїю́щи, и҆ превозноси́те є҆го̀ во всѧ̑ вѣ́ки.

Заре́ю трисїѧ́ннагѡ свѣтоли́тїѧ ᲂу҆́мъ просвѣ́щши и҆ лицѐ, ᲂу҆снꙋ́ла є҆сѝ, пребога́таѧ, ᲂу҆спе́нїемъ блаже́ннымъ, съ весе́лїемъ ви́дѧщи тебѣ̀ жела́емаго, гдⷭ҇а по́йте, вопїю́щи, и҆ превозноси́те є҆го̀ во всѧ̑ вѣ́ки.

Бг҃оро́диченъ:

Тѧ̀ ковче́гъ прест҃ы́й, ѡ҆сѣнѧ́емый бжⷭ҇твеннымъ дх҃омъ, превѣ́чное сло́во и҆ присносꙋ́щное, за милосе́рдїе неизрече́нное вочл҃вѣ́чшеесѧ, ро́ждшꙋю бг҃ома́терь пое́мъ, и҆ превозно́симъ во всѧ̑ вѣ́ки.

И҆́нъ. І҆рмо́съ:

Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Жезла̀ твоегѡ̀ прозѧбе́нїемъ бг҃ъ твою̀ плодоно́снꙋ дꙋ́шꙋ ꙗ҆влѧ́ше, премꙋ́дре, наслажда́ющꙋю плодови́ты и҆ слове́сны са́ды, бжⷭ҇твеннымъ манове́нїемъ, въ раѝ пи́щи мона́хѡвъ мно́жество, вопїю́щихъ: всѧ̑ дѣла̀ благослови́те гдⷭ҇нѧ, гдⷭ҇а.

Оу҆́мъ тво́й бжⷭ҇твенными добро́тами ѡ҆блиста́емь, красе́нъ пребы́сть. и҆ ны́нѣ послѣ́днее дости́глъ є҆сѝ до́брыхъ, ꙗ҆́кѡ чи́стъ прича́стїемъ ѡ҆божа́емь при́снѡ, и҆ поѧ̀, благослови́те, всѧ̑ дѣла̀ гдⷭ҇нѧ, гдⷭ҇а.

Да тѧ̀ гла́сы ра́достными, торжествꙋ́юще, ді́е, почита́емъ, спаса́й ста́до твоѐ всегда̀, твою̀ па́мѧть пра́зднꙋющее, и҆ наста́ви къ жи́знєннымъ вхо́дѡмъ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Ꙗ҆ви́ласѧ є҆сѝ ши́рши нб҃съ, бг҃а вмѣ́щши, марі́е пречⷭ҇таѧ, є҆го́же молѝ спасти́ мѧ ѿ страсте́й содержа́щихъ, и҆ бꙋ́дꙋщагѡ стра́шнагѡ ѡ҆сꙋжде́нїѧ и҆зба́вити мѧ̀, вопїю́щаго: благослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Ми́лости вои́стиннꙋ бж҃їей бога́тѣй подо́бѧщисѧ, сконча́ла є҆сѝ пита́ющи всѧ̑ нището́ю снѣда́ємыѧ, прехва́льнаѧ: ѿсю́дꙋ ми́лостивый просла́ви тѧ̀, ꙗ҆́вльшꙋюсѧ ми́лостивꙋ.

Предъ лице́мъ ста́ла є҆сѝ бж҃їимъ, всехва́льнаѧ, свѣтоно́сна бо была̀ є҆сѝ, житїе́мъ и҆ сло́вомъ ᲂу҆кра́шена, и҆ всѧ́ческими хвала́ми, и҆ ро́да благосла́вїемъ сїѧ́ющи, превысо́кими восхожде́нїи.

Въ пресвѣ́телъ всели́ласѧ є҆сѝ черто́гъ, и҆ во хра́мъ, ѽ макрі́но, небе́сный, и҆дѣ́же, дѣ́во, пребыва́еши, со свѧти́тєли срѡ́дники твои́ми. молѝ со дерзнове́нїемъ гдⷭ҇а, всѧ̑ спастѝ пою́щыѧ тѧ̀.

Бг҃оро́диченъ:

Красе́нъ добро́тою пло́дъ, и҆ свѣ́телъ па́че всѣ́хъ чре́ва твоегѡ̀: ты́ бо, дв҃о бцⷣе, бг҃а воплоще́нна родила̀ є҆сѝ, ꙗ҆́вльшасѧ за є҆́же спастѝ человѣ́ка. тѣ́мже тѧ̀ всѝ велича́емъ.

И҆́нъ. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Тѧ̀ добродѣ́телей благозра́чїемъ, ѻ҆́ч҃е, ꙗ҆́кѡ а҆́гг҃ла ꙗ҆́вльшасѧ, и҆ къ нб҃сє́мъ возлетѣ́вша, позлащє́ннѣ и҆мꙋ́ща крилѣ̀, ра́достнѡ почита́емъ, и҆ благоче́стнѡ похвалѧ́емъ.

Ꙗ҆́коже со́лнце многосвѣ́тло ѿ восто́ка возсїѧ́въ, ді́е, всю́дꙋ зарю̀ добродѣ́телей и҆ чꙋде́съ твои́хъ бога́тнѡ просте́рлъ є҆сѝ, просвѣща́ѧ мі́ра концы̀.

Къ свѣ́тꙋ незаходи́момꙋ, ѻ҆́ч҃е, свѣтови́дѣнъ бы́въ добродѣ́телей свѣтозаре́нїемъ, преше́лъ є҆сѝ ра́дꙋѧсѧ, и҆ всели́лсѧ є҆сѝ, и҆дѣ́же преподо́бныхъ дꙋ́си: ѡ҆ ста́дѣ твое́мъ моли́сѧ.

Бг҃оро́диченъ:

Пощади́ мѧ, хрⷭ҇тѐ, є҆гда̀ прїи́деши сꙋди́ти мі́рꙋ со сла́вою, и҆мѣ́ѧ молѧ́щꙋю тѧ̀, сло́ве, бцⷣꙋ приснодв҃ꙋ, и҆ а҆́гг҃льскїѧ чи́ны, и҆ прпⷣбныхъ совокꙋплє́нїѧ.