Мѣ́сѧца тогѡ́же въ к҃а-й де́нь. Ст҃а́гѡ сла́внагѡ прⷪ҇ро́ка и҆лїѝ.
Вѣ́стно бꙋ́ди, ꙗ҆́кѡ въ гре́ческихъ мине́ахъ печа́тныхъ, и҆ ᲂу҆ста́вахъ рꙋкопи́сныхъ, та́кожде и҆ въ слове́нскихъ рꙋкопи́сныхъ, и҆ въ печа́тныхъ ᲂу҆ста́вахъ, положена̀ слꙋ́жба и҆лїѝ прⷪ҇ро́ка шестери́чнаѧ со ѻ҆ктѡ́ихомъ.
Ве́черъ, ѻ҆бы́чнаѧ каѳі́сма. На Гдⷭ҇и, воззва́хъ, стїхи̑ры на ѕ҃: гла́съ а҃. Подо́бенъ: Нбⷭ҇ныхъ чинѡ́въ. И҆ самогла́сны, гла́съ в҃: Сла́ва, гла́съ ѕ҃: Прїиди́те правосла́вныхъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: На стїхо́внѣ ѻ҆ктѡ́иха. Сла́ва, гла́съ ѕ҃: Прⷪ҇ро́че, проповѣ́дниче хрⷭ҇то́въ: И҆ ны́нѣ, бг҃оро́диченъ: Тропа́рь, гла́съ д҃: Во пло́ти а҆́гг҃лъ: Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: На ᲂу҆́трени, на Бг҃ъ гдⷭ҇ь, тропа́рь прⷪ҇ро́ка, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: ѻ҆бы́чныѧ каѳі̑смы, и҆ сѣда́льны ѻ҆ктѡ́иха. Ѻ҆́ба канѡ́на ѻ҆ктѡ́иха: и҆ ст҃а́гѡ на ѕ҃. По г҃ пѣ́сни сѣда́ленъ. По ѕ҃-й пѣ́сни конда́къ, и҆ і҆́косъ, и҆ про́логъ. По ѳ҃-й пѣ́сни свѣти́ленъ прⷪ҇ро́ка. На хвали́техъ стїхи̑ры, на ѕ҃. Сла́ва, гла́съ и҃: Прⷪ҇ро́кѡвъ верхо́вники: И҆ ны́нѣ, бг҃оро́диченъ. На стїхо́внѣ ѻ҆ктѡ́иха. Сла́ва, гла́съ д҃: На ѻ҆́гненнѣй колесни́цѣ: На лїтꙋргі́и, бл҃жє́нна прⷪ҇ро́ка ѿ канѡ́на пѣ́снь г҃-ѧ и҆ ѕ҃-ѧ. Прокі́менъ, гла́съ д҃: Ты̀ і҆ере́й во вѣ́къ по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀. А҆пⷭ҇лъ собо́рнагѡ посла́нїѧ і҆а́кѡвлѧ, зача́ло н҃з. А҆ллилꙋ́їа, гла́съ є҃: Мѡѷсе́й и҆ а҆арѡ́нъ во і҆ере́ехъ є҆гѡ̀: Є҆ѵⷢ҇лїе лꙋкѝ, зача́ло д҃ї. Прича́стенъ: Въ па́мѧть вѣ́чнꙋю:
Въ нѣ́кїихъ же ᲂу҆ста́вѣхъ ѡ҆брѣта́ютсѧ и҆ чтє́нїѧ г҃ на вече́рни, и҆ славосло́вїе на ᲂу҆́трени.
А҆́ще же хра́мъ прⷪ҇ро́ка и҆лїѝ, и҆лѝ и҆зво́литъ настоѧ́тель, твори́мъ бдѣ́нїе.
На ма́лѣй вече́рни, на Гдⷭ҇и, воззва́хъ, стїхи̑ры на д҃. Гла́съ а҃.
Подо́бенъ: Нбⷭ҇ныхъ чинѡ́въ:
Трисо́лнечнымъ свѣ́томъ бжⷭ҇твеннагѡ сїѧ́нїѧ, ꙳ ᲂу҆ма̀ чистото́ю нечести́ваго царѧ̀, ꙗ҆́кѡ законопрестꙋ́пника ꙳, пра́веднымъ сꙋдо́мъ ѡ҆бличи́лъ є҆сѝ, ꙳ и҆ нб҃са̀ заключи́лъ є҆сѝ, ꙳ и҆ вдови́цꙋ съ сы́номъ препита́лъ є҆сѝ. ꙳ молѝ, прⷪ҇ро́че, спасти́сѧ дꙋша́мъ на́шымъ.
Два́жды.
Бжⷭ҇твеннымъ бг҃овидѣ́нїемъ досто́йнѡ прⷪ҇ро́ческимъ са́номъ, ꙳ и҆ ра́зꙋмомъ почте́нъ бы́въ, бжⷭ҇твенный прⷪ҇ро́че, ꙳ прорица́еши да̑льнаѧ ꙗ҆́кѡ бли́зъ сꙋ̑щаѧ: ꙳ царѧ̀ ꙗ҆́кѡ непра́ведна ѡ҆бличи́лъ є҆сѝ, ꙳ и҆ стꙋ́дныѧ свѧще́нники ноже́мъ закла́лъ є҆сѝ. молѝ хрⷭ҇та̀ бг҃а, спасти́сѧ дꙋша́мъ на́шымъ.
Нечести́вый ца́рь не терпѧ̀ твоегѡ̀ ѡ҆бличе́нїѧ, ꙳ тебѣ̀, бжⷭ҇твенный прⷪ҇ро́че, глаго́летъ: ꙳ ты́ ли є҆сѝ томѧ̀ и҆ развраща́ѧ і҆и҃лѧ; ты́ же ре́клъ є҆сѝ: не а҆́зъ, ѽ царю̀, но ты̀ и҆ до́мъ ѻ҆тца̀ твоегѡ̀: ꙳ поне́же бг҃а твоего̀, сотво́ршаго тѧ̀, ѡ҆ста́вилъ є҆сѝ, и҆ чꙋжды̑ѧ вве́лъ є҆сѝ. ꙳ но моли́твами, хрⷭ҇тѐ, твоегѡ̀ прⷪ҇ро́ка ѿ таковы́ѧ пре́лести и҆зба́ви на́съ и҆ спасѝ дꙋ́шы на́шѧ.
Сла́ва, гла́съ ѕ҃:
Бжⷭ҇твенный прⷪ҇ро́че и҆лїѐ, ты̀ непра́вдовавша царѧ̀ ѡ҆ навꙋѳе́евѣ ᲂу҆бі́йствѣ, и҆ ѡ҆ восхище́нїи вїногра́да ѡ҆бличи́въ, дерзнове́ннѡ ре́клъ є҆сѝ: поне́же безъ пра́вды ᲂу҆би́лъ є҆сѝ мꙋ́жа і҆и҃льтѧнина: си́це и҆ са́мъ ᲂу҆бїе́нъ бꙋ́деши, и҆ псѝ кро́вь твою̀ поли́жꙋтъ, и҆ блꙋдни̑цы въ кро́ви твое́й и҆змы́ютсѧ. но моли́твами, хрⷭ҇тѐ, твоегѡ̀ прⷪ҇ро́ка кꙋ́пнѡ и҆ ᲂу҆го́дника, такова́гѡ преще́нїѧ и҆зба́ви на́съ, и҆ дꙋ́шы на́шѧ спасѝ, ꙗ҆́кѡ чл҃вѣколю́бецъ.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Бжⷭ҇твенный прⷪ҇ро́че, ꙳ ты̀ ревнꙋ́ѧ по гдⷭ҇ѣ вседержи́тели, ꙳ моли́твою нб҃са̀ заключи́лъ є҆сѝ, ꙳ ре́къ: до́ждь и҆ роса̀ да не сни́детъ на зе́млю, ꙳ то́кмѡ глаго́ломъ ᲂу҆́стъ мои́хъ.
Сті́хъ: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀.
Бжⷭ҇твенный прⷪ҇ро́че, ꙳ ты̀ моли́твою и҆ ми́лованїемъ ꙳ па́ки небеса̀ ѿверза́еши, ꙳ и҆ до́ждь жа́ждꙋщымъ лю́демъ ꙳ бога́тнѡ да́рꙋеши.
Сті́хъ: Ты̀ і҆ере́й во вѣ́ки по чи́нꙋ мелхїседе́ковꙋ.
Бжⷭ҇твенный прⷪ҇ро́че, ꙳ ты̀ вдови́цꙋ съ сы́номъ препита́лъ є҆сѝ, ꙳ и҆ моли́твою го́рсть мꙋкѝ и҆ чва́нецъ ма́сла ᲂу҆мно́живъ, ꙳ по гл҃го́лꙋ госпо́дню, го́рсть мꙋкѝ ꙳ и҆ чва́нецъ ма́сла не ᲂу҆ма́лисѧ.
Сла́ва, гла́съ и҆ подо́бенъ то́йже:
Бжⷭ҇твенный прⷪ҇ро́че, ꙳ ты̀ моли́твою твое́ю ѻ҆́гнь съ небесѐ све́лъ є҆сѝ, ꙳ и҆ царѧ̀ ᲂу҆вѣ́рилъ є҆сѝ глаго́лати: ꙳ вои́стиннꙋ є҆ди́нъ бг҃ъ, ꙳ и҆́же и҆лїе́ю проповѣ́даемый.
И҆ ны́нѣ, бг҃оро́диченъ:
Влⷣчце бл҃га́ѧ, ꙳ ст҃і́и твоѝ рꙋ́цѣ ꙳ къ сн҃ꙋ твоемꙋ̀ воздѣжѝ, ꙳ дꙋшелюби́вомꙋ содѣ́телю, ꙳ ᲂу҆ще́дрити рабы̑ твоѧ̑.
На вели́цѣй вече́рни, на Гдⷭ҇и, воззва́хъ, стїхи̑ры на и҃. Гла́съ а҃.
Подо́бенъ: Нбⷭ҇ныхъ чинѡ́въ:
И҆́же ѳесві́тѧнина и҆лїю̀ ꙳ колесни́цею ѻ҆́гненною ꙳ ѿ землѝ ще́дре преложи́вый сло́ве: ꙳ сегѡ̀ моли́твами спасѝ на́съ вѣ́рнѡ тѧ̀ сла́вѧщихъ, ꙳ и҆ тогѡ̀ творѧ́щихъ ра́достнѡ ꙳ бжⷭ҇твеннꙋю па́мѧть и҆ спасе́нꙋю.
Въ трꙋ́сѣ и҆ ви́хрѣ то́нцѣ ꙳ ви́дѣлъ є҆сѝ бж҃їе прише́ствїе, и҆лїѐ бг҃облаже́нне, ꙳ просвѣща́ющее тѧ̀ дре́вле: ꙳ на колесни́цѣ же сѣдѧ̀ четвероко́ннѣй, ꙳ нб҃о преѣжда́лъ є҆сѝ страннолѣ́пнѡ, ꙳ ᲂу҆дивлѧ́емь, бг҃одꙋхнове́нне.
І҆ере́и стꙋ̑дныѧ ноже́мъ закла́лъ є҆сѝ: ꙳ не́бо ѧ҆зы́комъ на зе́млю не дожди́ти ᲂу҆держа́лъ є҆сѝ, ре́вностїю бжⷭ҇твенною разже́гсѧ: ꙳ є҆лїссе́а же и҆спо́лнилъ є҆сѝ ꙳ ми́лѡти пода́нїемъ сꙋгꙋ́бымъ, мꙋ́дре и҆лїѐ, ꙳ бжⷭ҇твенныѧ благода́ти.
И҆́ны стїхи̑ры, гла́съ в҃. Самогла́сны. І҆ѡа́нна а҆рхїепі́скопа:
Свѣти́льники возсїѧ́ша вселе́ннѣй два̀, всесвѣ́тлый и҆лїа̀ и҆ є҆лїссе́й: ѻ҆́въ ᲂу҆́бѡ бжⷭ҇твеннымъ сло́вомъ нбⷭ҇ныѧ ка̑пли затворѝ, и҆ царѧ̀ ѡ҆бличѝ, на колесни́цѣ же ѻ҆́гненнѣй на нб҃са̀ вознесе́сѧ: ѻ҆́въ же безча̑дныѧ во́ды и҆сцѣлѝ, и҆ сꙋгꙋ́бꙋ благода́ть прїѧ́тъ, і҆ѻрда̑нскїѧ стрꙋи̑ раздѣлѝ. и҆ ны́нѣ со а҆́гг҃лы ликꙋ́юще, ѡ҆ на́съ мо́лѧтъ, спасти́сѧ дꙋша́мъ на́шымъ.
Ꙗ҆́же на воздꙋ́сѣ колесни́ца тѧ̀ под̾е́мши ѻ҆гнено́сна, ꙗ҆́кѡ въ трꙋ́сѣ на небеса̀, ѻ҆гнедохнове́ннꙋю благода́ть тебѣ̀ чꙋде́съ подадѐ, и҆лїѐ ѳесві́тѧнине, нетлѣ́нна тѧ̀ сотво́рши, є҆́же не ви́дѣти сме́рти, до́ндеже ᲂу҆́бѡ проповѣ́си всѧ́чєскимъ кончи́нꙋ. тѣ́мже прїидѝ, подаѧ̀ на́мъ твои́хъ и҆справле́нїй наказа́нїе.
Свѣти́льниче невече́рнїй цр҃квей, бжⷭ҇твенною ре́вностїю разжига́емь, и҆лїѐ прⷪ҇ро́че, нбⷭ҇ныѧ ка̑пли затвори́лъ є҆сѝ: и҆ вра́номъ пита́нъ бы́въ, царѧ̀ ѡ҆бличи́лъ є҆сѝ, и҆ свѧще́нники ᲂу҆мори́лъ є҆сѝ: ѻ҆́гнь съ нб҃сѐ све́лъ є҆сѝ, и҆ пѧтьдесѧ́тника два̀ ᲂу҆мори́въ, напита́лъ є҆сѝ вдови́цꙋ є҆ле́емъ, и҆ мꙋкѝ ма́лою го́рстїю, и҆ сы́на є҆ѧ̀ моли́твою воскреси́лъ є҆сѝ: ѻ҆́гнь разже́глъ є҆сѝ въ водѣ̀: і҆ѻрда̑нскїѧ стрꙋи̑ пѣ́шъ преше́лъ є҆сѝ: колесни́цею же ѻ҆́гненною на нб҃са̀ возне́слсѧ є҆сѝ, є҆лїссе́ю благода́ть сꙋгꙋ́бꙋю по́далъ є҆сѝ. моли́сѧ непреста́ннѡ бг҃ꙋ, спасти́сѧ дꙋша́мъ на́шымъ.
Сла́ва, гла́съ ѕ҃. Вѷзанті́ево:
Прїиди́те, правосла́вныхъ совокꙋпле́нїе, соше́дшесѧ дне́сь въ пречестнѣ́мъ хра́мѣ бг҃оглаго́ливыхъ прⷪ҇рѡ́къ, ѱало́мски воспое́мъ сли́чнꙋю пѣ́снь, си́хъ просла́вльшемꙋ хрⷭ҇тꙋ̀ бг҃ꙋ на́шемꙋ, и҆ весе́лїемъ и҆ ра́достїю возопїе́мъ: ра́дꙋйсѧ, земны́й а҆́гг҃ле и҆ нбⷭ҇ный человѣ́че, и҆лїѐ великоимени́те: ра́дꙋйсѧ, и҆́же сꙋгꙋ́бꙋю благода́ть ѿ бг҃а прїе́мый, є҆лїссе́е всече́стне. ра́дꙋйтесѧ, застꙋ́пницы те́плїи, и҆ предста́тели и҆ вра́чеве дꙋ́шъ и҆ тѣле́съ хрⷭ҇толюби́выхъ люде́й: ѿ всѧ́кагѡ прило́га сопроти́вна и҆ ѡ҆бстоѧ́нїѧ, и҆ всѧ́кихъ бѣ́дъ, и҆зба́вите вѣ́рнѡ соверша́ющыѧ всепра́зднственнꙋю па́мѧть ва́шꙋ.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Ца́рствъ тре́тїихъ чте́нїе:
[Глава̀ з҃ї] Бы́сть сло́во гдⷭ҇не ко и҆лїѝ прⷪ҇ро́кꙋ, и҆ речѐ ко а҆ха́вꙋ: жи́въ гдⷭ҇ь бг҃ъ си́лъ, бг҃ъ і҆и҃левъ, є҆мꙋ́же предстою̀ дне́сь предъ ни́мъ, а҆́ще бꙋ́детъ въ лѣ̑та сїѧ̑ роса̀, и҆лѝ до́ждь, а҆́ще не словесы̀ ᲂу҆́стъ мои́хъ. И҆ бы́сть гл҃го́лъ гдⷭ҇ень ко и҆лїѝ, гл҃го́лѧ: и҆дѝ ѿсю́дꙋ на восто́къ, и҆ скры́йсѧ въ пото́цѣ хора́ѳовѣ, при рѣцѣ̀ і҆ѻрда́новѣ, и҆ бꙋ́детъ вода̀ ѿ пото́ка, и҆ пїе́ши ю҆̀, и҆ вра́нѡмъ повелю̀ пита́ти тѧ̀ та́мѡ. И҆ и҆́де и҆лїа̀, и҆ сотворѝ по гл҃го́лꙋ гдⷭ҇ню, и҆ сѣ́де при пото́цѣ хора́ѳовѣ, предъ лице́мъ і҆ѻрда́новымъ, и҆ вра́новє приноша́хꙋ є҆мꙋ̀ хлѣ́бы заꙋ́тра, и҆ мѧса̀ къ ве́черꙋ, и҆ ѿ пото́ка пїѧ́ше во́дꙋ. И҆ бы́сть по дне́хъ и҆́зсше пото́къ, ꙗ҆́кѡ не бѣ̀ дождѧ̀ на зе́млю. И҆ бы́сть гл҃го́лъ гдⷭ҇ень ко и҆лїѝ, гл҃го́лѧ: Воста́ни, и҆ и҆дѝ въ саре́фѳꙋ сїдѡ́нскꙋю, и҆ пребꙋ́ди та́мѡ: се́ бо заповѣ́дахъ женѣ̀ вдови́цѣ препита́ти тѧ̀. И҆ воста́въ и҆́де въ саре́фѳꙋ сїдѡ́нскꙋю, и҆ прїи́де во врата̀ гра́да, и҆ сѐ та́мѡ жена̀ вдова̀ собира́ше дрова̀, и҆ возопѝ и҆лїа̀ во слѣ́дъ є҆ѧ̀, и҆ речѐ є҆́й: принеси́ ми ᲂу҆́бѡ ма́лѡ воды̀ въ сосꙋ́дѣ, да пїю̀. И҆ и҆́де взѧ́ти воды̀. И҆ возопѝ и҆лїа̀ въ слѣ́дъ є҆ѧ̀, и҆ речѐ є҆́й: прїимѝ ᲂу҆́бѡ мнѣ̀ и҆ ᲂу҆крꙋ́хъ хлѣ́ба въ рꙋцѣ̀ твое́й, и҆ да ꙗ҆́мъ. И҆ речѐ жена̀: жи́въ гдⷭ҇ь бг҃ъ мо́й, а҆́ще є҆́сть ᲂу҆ менє̀ ѻ҆прѣсно́къ, но ра́звѣ є҆ли́кѡ го́рсть мꙋкѝ въ водоно́сѣ, и҆ ма́лѡ є҆ле́а во чва́нцѣ. И҆ сѐ а҆́зъ собира́ю два̀ полѣ́нца, и҆ вни́дꙋ и҆ сотворю̀ себѣ̀ и҆ ча́дѡмъ мои̑мъ, и҆ снѣ́мы, и҆ ᲂу҆́мремъ. И҆ речѐ къ не́й и҆лїа̀: дерза́й и҆ вни́ди, и҆ не сотворѝ по глаго́лꙋ твоемꙋ̀, но сотворѝ мнѣ̀ ѿтꙋ́дꙋ ѻ҆прѣсно́къ ма́лъ пре́жде, и҆ и҆знесе́ши мѝ: себѣ́ же и҆ ча́дѡмъ твои̑мъ сотвори́ши послѣдѝ. Ꙗ҆́кѡ та́кѡ гл҃го́летъ гдⷭ҇ь бг҃ъ і҆и҃левъ: водоно́съ мꙋкѝ не ѡ҆скꙋдѣ́етъ, и҆ чва́нецъ є҆ле́а не ᲂу҆ма́литсѧ до днѐ, до́ндеже да́стъ гдⷭ҇ь до́ждь на зе́млю. И҆ и҆́де жена̀, и҆ сотворѝ по глаго́лꙋ и҆лїинꙋ̀: и҆ дадѐ є҆мꙋ̀, и҆ ꙗ҆дѧ́ше то́й, и҆ та̀, и҆ ча̑да є҆ѧ̀. И҆ ѿ тогѡ̀ днѐ водоно́съ мꙋкѝ не ѡ҆скꙋдѣ̀, и҆ чва́нецъ є҆ле́а не ᲂу҆ма́лисѧ, по гл҃го́лꙋ гдⷭ҇ню, и҆́же гл҃го́ла рꙋко́ю и҆лїино́ю. И҆ бы́сть по глаго́лѣхъ си́хъ, и҆ разболѣ́сѧ сы́нъ жены̀, госпожѝ до́мꙋ, и҆ бѣ̀ болѣ́знь є҆гѡ̀ крѣпка̀ ѕѣлѡ̀, до́ндеже не ѡ҆ста̀ въ не́мъ дꙋ́хъ. И҆ речѐ жена̀ ко и҆лїѝ: что̀ мнѣ̀ и҆ тебѣ̀, человѣ́че бж҃їй, вше́лъ є҆сѝ ко мнѣ̀ воспомѧнꙋ́ти грѣхѝ моѧ̑, и҆ ᲂу҆мори́ти сы́на моего̀; И҆ речѐ и҆лїа̀ къ женѣ̀: да́ждь мѝ сы́на твоего̀. И҆ взѧ́тъ є҆го̀ ѿ ло́на є҆ѧ̀, и҆ вознесѐ є҆го̀ въ го́рницꙋ, въ не́йже са́мъ почива́ше, и҆ положѝ є҆го̀ на ѻ҆дрѣ̀ свое́мъ. И҆ возопѝ и҆лїа̀ ко гдⷭ҇ꙋ, и҆ речѐ: ᲂу҆вы̀ мнѣ̀, гдⷭ҇и, свидѣ́телю вдовы̀, ᲂу҆ неѧ́же а҆́зъ пребыва́ю, ты̀ ѡ҆ѕло́билъ є҆сѝ є҆́же ᲂу҆мори́ти сы́на є҆ѧ̀. И҆ дꙋ́нꙋ на ѻ҆́трочища трикра́ты, и҆ призва̀ гдⷭ҇а, и҆ речѐ: Гдⷭ҇и бж҃е мо́й, да возврати́тсѧ ᲂу҆́бѡ дꙋша̀ ѻ҆́трочища сегѡ̀ въ ѻ҆́нь, и҆ бы́сть та́кѡ. И҆ возопѝ и҆лїа̀, и҆ ᲂу҆слы́ша гдⷭ҇ь гла́съ и҆лїи́нъ, и҆ возврати́сѧ дꙋша̀ ѻ҆́трочища, и҆ ѡ҆живѐ. И҆ поѧ́тъ и҆лїа̀ ѻ҆́трочища, и҆ сведѐ и҆ ѿ го́рницы въ до́мъ, и҆ дадѐ и҆ ма́тери є҆гѡ̀. И҆ речѐ и҆лїа̀ къ не́й: ви́ждь, ꙗ҆́кѡ жи́въ є҆́сть сы́нъ тво́й. И҆ речѐ жена̀ ко и҆лїѝ: сѐ разꙋмѣ́хъ, ꙗ҆́кѡ чл҃вѣ́къ бж҃їй є҆сѝ ты̀, и҆ гл҃го́лъ гдⷭ҇ень во ᲂу҆стѣ́хъ твои́хъ и҆́стиненъ.
Ца́рствъ тре́тїихъ чте́нїе:
[Глава̀ и҃ї] Бы́сть гл҃го́лъ бж҃їй ко и҆лїѝ ѳесві́тѧнинꙋ, въ тре́тїе лѣ́то ца́рства а҆ха́влѧ, гл҃го́лѧ: и҆дѝ и҆ ꙗ҆ви́сѧ а҆ха́вꙋ, да́мъ бо до́ждь на лицѐ землѝ. И҆ бы́сть ꙗ҆́кѡ ви́дѣ а҆ха́въ и҆лїю̀, и҆ речѐ къ немꙋ̀: а҆́ще ты̀ є҆сѝ развраща́ѧй і҆и҃лѧ; И҆ речѐ и҆лїа̀: не развраща́ю а҆́зъ і҆и҃лѧ, но ты̀, и҆ до́мъ ѻ҆тца̀ твоегѡ̀, внегда̀ ѡ҆ста́висте вы̀ гдⷭ҇а бг҃а своего̀, и҆ и҆до́сте въ слѣ́дъ ваа́ла. И҆ ны́нѣ послѝ, и҆ соберѝ ко мнѣ̀ ве́сь і҆и҃ль, на го́рꙋ карми́льскꙋю, и҆ проро́ки стꙋ̑дныѧ ваа́лѡвы, и҆́хже три́ста и҆ пѧтьдесѧ́тъ: и҆ прорѡ́къ ме́рзскихъ четы́реста, ꙗ҆дꙋ́щихъ трапе́зꙋ і҆езаве́линꙋ. И҆ по глаго́лꙋ и҆лїинꙋ̀ посла̀ а҆ха́въ во ве́сь і҆и҃ль, и҆ собра̀ всѧ̑ проро́ки на го́рꙋ карми́льскꙋю, и҆ приведѐ ко всѣ̑мъ и҆̀мъ и҆лїю̀. И҆ речѐ и҆̀мъ и҆лїа̀: доко́лѣ вы̀ хра́млете на ѻ҆́ба кѡлѣ́на ва̑ша; а҆́ще є҆́сть гдⷭ҇ь бг҃ъ, и҆ди́те въ слѣ́дъ є҆гѡ̀: а҆́ще ли ваа́лъ є҆́сть, то̀ и҆ди́те за ни́мъ. И҆ не ѿвѣща́ша є҆мꙋ̀ лю́дїе словесѐ. И҆ речѐ и҆лїа̀ къ лю́демъ, а҆́зъ є҆́смь ѡ҆ста́хъ прⷪ҇ро́къ гдⷭ҇ень є҆ди́нъ: и҆ проро́цы ваа́лѡвы, и҆́хже три́ста и҆ пѧтьдесѧ́тъ мꙋже́й, и҆ проро́кѡвъ ме́рзскихъ четы́реста. И҆ речѐ и҆лїа̀: дади́те мѝ два̀ ю҆нца̀, да и҆зберетѐ себѣ̀ є҆ди́наго, и҆ растеши́те и҆ на ᲂу҆́ды, и҆ возложи́те и҆ на дрова̀, да не приложитѐ ѻ҆гнѧ̀. И҆ а҆́зъ растешꙋ̀ ю҆нца̀ дрꙋга́го, и҆ возложꙋ̀ на дрова̀, и҆ ѻ҆гнѧ̀ не возгнѣщꙋ̀. И҆ да призоветѐ и҆мена̀ богѡ́въ ва́шихъ, и҆ а҆́зъ призовꙋ̀ и҆́мѧ гдⷭ҇а бг҃а моегѡ̀: и҆ бꙋ́детъ бг҃ъ, и҆́же а҆́ще послꙋ́шаетъ ѻ҆гне́мъ, то́й є҆́сть бг҃ъ. И҆ ѿвѣща́ша всѝ лю́дїе, и҆ рѣ́ша: до́бръ глаго́лъ и҆лїи́нъ, и҆́же глаго́ла, да бꙋ́детъ та́кѡ. И҆ речѐ и҆лїа̀ проро́кѡмъ стꙋ̑днымъ: и҆збери́те себѣ̀ ю҆нца̀ є҆ди́наго, и҆ сотвори́те вы̀ пре́жде, ꙗ҆́кѡ ва́съ є҆́сть мно́жество, и҆ призови́те и҆мена̀ богѡ́въ ва́шихъ, и҆ ѻ҆гнѧ̀ не пригнѣща́йте. И҆ поѧ́ша ю҆нца̀, и҆ сотвори́ша та́кѡ. И҆ призыва́хꙋ и҆́мѧ ваа́лово ѿ ᲂу҆́тра и҆ до полꙋ́дне, и҆ рѣ́ша: послꙋ́шай на́съ, ваа́ле, послꙋ́шай на́съ. И҆ не бѣ̀ гла́са, ни послꙋша́нїѧ: и҆ рыска́хꙋ ѻ҆́коло же́ртвенника, и҆́же сотвори́ша сі́и. И҆ бы́сть полꙋ́дне, и҆ порꙋга́сѧ и҆̀мъ и҆лїа̀ ѳесві́тѧнинъ, и҆ речѐ: зови́те гла́сомъ вели́кимъ, ꙗ҆́кѡ бо́гꙋ ва́шемꙋ непра́зднство є҆́сть: да є҆да̀ что̀ и҆́ное стро́итъ, и҆лѝ ᲂу҆снꙋ́лъ є҆́сть, да ᲂу҆бꙋдитѐ є҆го̀; И҆ зовѧ́хꙋ гла́сомъ вели́кимъ, и҆ кроѧ́хꙋсѧ по ѻ҆бы́чаю своемꙋ̀ нѡжѝ, и҆ мно́зи би́ша себѐ бичьмѝ до проли́тїѧ кро́ве своеѧ̀. И҆ прорица́хꙋ, и҆ бы́сть до ве́чера, ꙗ҆́кѡ бы́ти вре́мѧ взы́ти же́ртвѣ, и҆ не бѣ̀ гла́са. И҆ глаго́ла и҆лїа̀ къ проро́кѡмъ стꙋ̑днымъ, глаго́лѧ: ѿстꙋпи́те ны́нѣ, да и҆ а҆́зъ сотворю̀ же́ртвꙋ мою̀, и҆ ѿстꙋпи́ша ті́и и҆ ᲂу҆мо́лкнꙋша. И҆ речѐ и҆лїа̀ къ лю́демъ: пристꙋпи́те ко мнѣ̀, и҆ пристꙋпи́ша къ немꙋ̀ всѝ лю́дїе. И҆ прїѧ́тъ и҆лїа̀ двана́десѧть ка́менїй, по числꙋ̀ колѣ́нъ сынѡ́въ і҆и҃левыхъ, ꙗ҆́коже гл҃го́ла є҆мꙋ̀ гдⷭ҇ь: і҆и҃ль бꙋ́детъ и҆́мѧ твоѐ. И҆ созда̀ ка́менїе во и҆́мѧ гдⷭ҇не, и҆ и҆сцѣлѝ ѻ҆лта́рь раско́панный: и҆ сотворѝ мо́ре вмѣща́ющее двѣ̀ мѣ́рѣ сѣ́мене ѻ҆́крестъ ѻ҆лтарѧ̀. И҆ воскладѐ пѡлѣ́на на ѻ҆лта́рь, и҆́же сотворѝ, и҆ растеса̀ на ᲂу҆́ды всесожега́емое, и҆ возложѝ на пѡлѣ́на, и҆ ѡ҆бы́де ѻ҆лта́рь. И҆ речѐ и҆лїа̀: принеси́те мѝ четы́ре водонѡ́сы воды̀, и҆ возлива́йте на всесожжє́нїѧ и҆ на пѡлѣ́на, и҆ сотвори́ша та́кѡ. И҆ речѐ: ᲂу҆дво́йте, и҆ ᲂу҆дво́иша. И҆ речѐ: ᲂу҆тро́йте, и҆ ᲂу҆тро́иша. И҆ прохожда́ше вода̀ ѻ҆́крестъ ѻ҆лтарѧ̀, и҆ мо́ре и҆спо́лнисѧ воды̀. И҆ возопѝ и҆лїа̀ на нб҃о, и҆ речѐ: Гдⷭ҇и бж҃е а҆враа́мовъ и҆ і҆саа́ковъ и҆ і҆а́кѡвль, послꙋ́шай менє̀, гдⷭ҇и, послꙋ́шай менє̀ дне́сь ѻ҆гне́мъ: да разꙋмѣ́ютъ всѝ лю́дїе сі́и, ꙗ҆́кѡ ты̀ є҆сѝ є҆ди́нъ гдⷭ҇ь бг҃ъ і҆и҃левъ, и҆ а҆́зъ ра́бъ тво́й, и҆ тебє̀ ра́ди сотвори́хъ дѣла̀ сїѧ̑ всѧ̑: и҆ ты̀ ѡ҆братѝ сердца̀ люде́й си́хъ въ слѣ́дъ тебє̀. И҆ падѐ ѻ҆́гнь ѿ гдⷭ҇а съ нб҃сѐ, и҆ поѧдѐ всесожжє́нїѧ и҆ пѡлѣ́на и҆ ка́менїе и҆ пе́рсть, и҆ во́дꙋ, ꙗ҆́же бѣ̀ въ мо́ри, всѧ̑ полиза̀ ѻ҆́гнь. И҆ падо́ша всѝ лю́дїе на лицы̀ свое́мъ, и҆ рѣ́ша: вои́стиннꙋ гдⷭ҇ь бг҃ъ, то́й є҆́сть бг҃ъ. И҆ речѐ и҆лїа̀ къ лю́демъ: поима́йте проро́ки ваа́лѡвы, да ни є҆ди́нъ скры́етсѧ ѿ ни́хъ, и҆ ꙗ҆́ша и҆̀хъ, и҆ ведѐ ѧ҆̀ и҆лїа̀ на пото́къ кі́ссовъ, и҆ тꙋ̀ и҆̀хъ закла̀. И҆ речѐ и҆лїа̀ посе́мъ а҆ха́вови: сѐ гла́съ хожде́нїѧ дожде́внагѡ, впрѧзѝ колесни́цꙋ твою̀, и҆ сни́ди, да не пости́гнетъ тебє̀ до́ждь. И҆ взы́де и҆лїа̀ на карми́льскꙋю го́рꙋ, и҆ прекло́нсѧ на зе́млю, и҆ положѝ лицѐ своѐ междꙋ̀ колѣ́нома свои́ма, и҆ помоли́сѧ ко гдⷭ҇ꙋ. И҆ не́бо помрачи́сѧ ѻ҆́блаки и҆ дꙋ́хомъ, и҆ бы́сть до́ждь ве́лїй: и҆ пла́часѧ а҆ха́въ, и҆́де до і҆езрае́лѧ. И҆ рꙋка̀ гдⷭ҇нѧ бы́сть на и҆лїѝ: и҆ стѧгнꙋ́въ чре́сла своѧ̑, и҆ течѐ предъ а҆ха́вомъ до і҆и҃лѧ. И҆ возвѣстѝ а҆ха́въ женѣ̀ свое́й і҆езаве́ли, всѧ̑ є҆ли̑ка сотворѝ и҆лїа̀: и҆ ꙗ҆́кѡ закла̀ проро́ки ноже́мъ. И҆ посла̀ і҆езаве́ль ко и҆лїѝ, глаго́лѧ: ᲂу҆́трѡ въ се́й же ча́съ положꙋ̀ дꙋ́шꙋ твою̀, ꙗ҆́коже дꙋ́шꙋ є҆ди́нагѡ ѿ си́хъ. И҆ слы́ша и҆ ᲂу҆боѧ́сѧ и҆лїа̀, воста́въ и҆́де дꙋшѝ ра́ди своеѧ̀, и҆ прїи́де въ вирсаві́ю, зе́млю і҆ꙋ́довꙋ. И҆ ѡ҆ста́ви ѻ҆́трочища своего̀ та́мѡ, и҆ и҆́де въ пꙋсты́ню днѐ пꙋ́ть. И҆ прише́дъ сѣ́де подъ сме́рчїемъ, и҆ просѝ дꙋшѝ свое́й сме́рти, и҆ речѐ: довлѣ́етъ мѝ, гдⷭ҇и, прїимѝ ᲂу҆́бѡ дꙋ́шꙋ мою̀ ѿ менє̀, ꙗ҆́кѡ нѣ́смь а҆́зъ па́че ѻ҆тє́цъ. И҆ лѧ́же и҆ ᲂу҆́спе подъ са́домъ. И҆ сѐ а҆́гг҃лъ гдⷭ҇ень коснꙋ́сѧ є҆мꙋ̀, и҆ речѐ є҆мꙋ̀: воста́ни, ꙗ҆́ждь и҆ пі́й. И҆ воззрѣ́въ и҆лїа̀, и҆ сѐ при возгла́вїи є҆гѡ̀ ѻ҆прѣсно́къ ꙗ҆чме́нный, и҆ корча́гъ воды̀: И҆ воста̀, и҆ ꙗ҆дѐ, и҆ пи́тъ, и҆ ѡ҆бра́щсѧ ᲂу҆́спе. И҆ ѡ҆бра́щсѧ а҆́гг҃лъ гдⷭ҇ень втори́цею, и҆ коснꙋ́сѧ є҆мꙋ̀, и҆ речѐ є҆мꙋ̀: воста́ни, ꙗ҆́ждь и҆ пі́й, ꙗ҆́кѡ мно́гъ ѿ тебє̀ пꙋ́ть. И҆ воста̀, и҆ ꙗ҆дѐ и҆ пи́тъ: и҆ и҆́де въ крѣ́пости ꙗ҆́ди тоѧ̀ четы́редесѧть дне́й, и҆ четы́редесѧть ноще́й до горы̀ хори́вскїѧ. И҆ вни́де та́мѡ въ пеще́рꙋ, и҆ всели́сѧ въ не́й, и҆ сѐ гл҃го́лъ гдⷭ҇ень къ немꙋ̀, и҆ речѐ є҆мꙋ̀ гдⷭ҇ь: что́ ты здѣ̀, и҆лїѐ; И҆ речѐ и҆лїа̀: ревнꙋ́ѧ поревнова́хъ по гдⷭ҇ѣ бз҃ѣ вседержи́тели, ꙗ҆́кѡ ѡ҆ста́виша тѧ̀ сы́нове і҆и҃левы и҆ ѻ҆лтарѝ твоѧ̑ раскопа́ша, и҆ прⷪ҇ро́ки твоѧ̀ ѻ҆рꙋ́жїемъ и҆зби́ша, и҆ ѡ҆ста́хъ а҆́зъ є҆ди́нъ, и҆ и҆́щꙋтъ дꙋшѝ моеѧ̀ и҆з̾ѧ́ти ю҆̀. И҆ речѐ а҆́гг҃лъ: и҆зы́ди ᲂу҆́трѡ, и҆ ста́ни въ горѣ̀ предъ гдⷭ҇емъ, и҆ сѐ мимои́детъ гдⷭ҇ь, и҆ дꙋ́хъ ве́лїй и҆ крѣ́покъ, разорѧ́ѧ го́ры, и҆ сокрꙋша́ѧ ка́менїе предъ гдⷭ҇емъ: не въ дꙋ́сѣ гдⷭ҇ь, и҆ по дꙋ́сѣ ви́хръ, и҆ не въ ви́хрѣ гдⷭ҇ь. И҆ по ви́хрѣ ѻ҆́гнь, и҆ не во ѻ҆гнѝ гдⷭ҇ь: и҆ по ѻ҆гнѝ гла́съ хла́да то́нка, и҆ та́мѡ гдⷭ҇ь. И҆ бы́сть ꙗ҆́кѡ ᲂу҆слы́ша и҆лїа̀, покры̀ лицѐ своѐ ми́лѡтїю свое́ю, и҆ и҆зы́де, и҆ ста̀ при пеще́рѣ. И҆ сѐ къ немꙋ̀ бы́сть гла́съ, и҆ речѐ: что̀ здѣ̀ ты̀, и҆лїѐ; И҆ речѐ и҆лїа̀: ревнꙋ́ѧ поревнова́хъ по гдⷭ҇ѣ бз҃ѣ вседержи́тели, ꙗ҆́кѡ ѡ҆ста́виша завѣ́тъ тво́й сы́нове і҆и҃левы, и҆ ѻ҆лтарѝ твоѧ̑ раскопа́ша, и҆ прⷪ҇ро́ки твоѧ̑ и҆зби́ша ѻ҆рꙋ́жїемъ, и҆ ѡ҆ста́хъ а҆́зъ є҆ди́нъ, и҆ и҆́щꙋтъ дꙋшѝ моеѧ̀ и҆з̾ѧ́ти ю҆̀. И҆ речѐ гдⷭ҇ь къ немꙋ̀: и҆дѝ, возврати́сѧ пꙋте́мъ твои́мъ, и҆ по́йдеши въ пꙋ́ть пꙋсты́ни дама́сковы, и҆ пома́жеши а҆заи́ла на ца́рство во а҆ссѷрі́и: И҆ і҆иꙋ́а сы́на на мессі́ина пома́жеши въ царѧ̀ і҆и҃лю, и҆ є҆лїссе́а сы́на сафа́това пома́жеши вмѣ́стѡ себє̀ прⷪ҇ро́ка.
Ца́рствъ четве́ртыхъ чте́нїе:
Бы́сть во днѝ ѻ҆́ны, ѡ҆брѣ́те и҆лїа̀ є҆лїссе́а сы́на сафа́това, и҆ то́й ѡ҆ра́ше вола́ми. И҆ и҆́де и҆лїа̀ къ немꙋ̀, и҆ пове́рже и҆лїа̀ ми́лѡть свою̀ на не́мъ: и҆ ѡ҆ста́ви є҆лїссе́й волы̀, и҆ течѐ созадѝ и҆лїѝ, и҆ слꙋжа́ше є҆мꙋ̀. И҆ бы́сть є҆гда̀ взѧ́тꙋ бы́ти и҆лїѝ гдⷭ҇емъ въ ви́хрѣ ꙗ҆́кѡ на нб҃о. И҆ и҆до́ста и҆лїа̀ и҆ є҆лїссе́й въ галга́лы. Речѐ и҆лїа̀ къ є҆лїссе́ю: сѣдѝ ᲂу҆́бѡ здѣ̀, ꙗ҆́кѡ гдⷭ҇ь посла̀ мѧ̀ до і҆ѻрда́на. И҆ речѐ є҆лїссе́й: жи́въ гдⷭ҇ь, и҆ жива̀ дꙋша̀ твоѧ̀, а҆́ще ѡ҆ста́влю тебѐ. И҆ поидо́ста ѻ҆́ба, и҆ пѧтьдесѧ́тъ мꙋже́й ѿ сынѡ́въ прⷪ҇ро́ческихъ прїидо́ша и҆ ста́ша прѧ́мѡ и҆здале́ча, ѻ҆́ба же ста́ста при і҆ѻрда́нѣ. И҆ прїѧ́тъ и҆лїа̀ ми́лѡть свою̀, и҆ сви́тъ ю҆̀, и҆ поразѝ є҆́ю во́ды, и҆ раздѣли́сѧ вода̀ сю́дꙋ и҆ сю́дꙋ, и҆ преидо́ста ѻ҆́ба по сꙋ́хꙋ: И҆ бы́сть ꙗ҆́кѡ преидо́ста, и҆ речѐ и҆лїа̀ є҆лїссе́ю: просѝ что̀ сотворю̀ тебѣ̀, пре́жде да́же не взѧ́тъ бꙋ́дꙋ ѿ тебє̀. И҆ речѐ є҆лїссе́й: да бꙋ́детъ ᲂу҆́бѡ дꙋ́хъ, и҆́же въ тебѣ̀, сꙋгꙋ́бъ во мнѣ̀. И҆ речѐ и҆лїа̀: ѡ҆жесточи́лъ є҆сѝ проси́ти: ѻ҆ба́че а҆́ще ᲂу҆ви́диши мѧ̀ взе́млема ѿ тебє̀, бꙋ́детъ тѝ та́кѡ, а҆́ще ли же не ᲂу҆ви́диши, не бꙋ́детъ. И҆ бы́сть и҆дꙋ́щымъ и҆̀мъ, и҆ глаго́лющымъ, и҆ сѐ колесни́ца ѻ҆́гненна, и҆ ко́ни ѻ҆́гненни, и҆ раздѣлѝ междꙋ̀ ѻ҆бѣ́ма, и҆ взѧ́тсѧ и҆лїа̀ трꙋ́сомъ, ꙗ҆́кѡ на не́бо. И҆ є҆лїссе́й зрѧ́ше, и҆ то́й вопїѧ́ше: ѻ҆́ч҃е, ѻ҆́ч҃е, колесни́ца і҆и҃лева, и҆ ко́ни є҆гѡ̀, и҆ не ви́дѣ є҆гѡ̀ ктомꙋ̀. И҆ ꙗ҆́тсѧ є҆лїссе́й за ри̑зы своѧ̑, и҆ раздра̀ ѧ҆̀ на дво́е, и҆ взѧ́тъ ми́лѡть и҆лїинꙋ̀ є҆лїссе́й, па́дшꙋю верхꙋ̀ є҆гѡ̀. И҆ ѡ҆брати́тсѧ є҆лїссе́й, и҆ ста̀ на бре́зѣ і҆ѻрда́на. И҆ прїѧ́тъ є҆лїссе́й ми́лѡть и҆лїинꙋ̀, па́дшꙋю верхꙋ̀ є҆гѡ̀, и҆ ᲂу҆да́ри во́ды, и҆ не раздѣли́шасѧ. И҆ речѐ є҆лїссе́й: гдѣ̀ ᲂу҆́бѡ є҆́сть бг҃ъ и҆лїи́нъ а҆пѳѡ̀; и҆ ᲂу҆да́ри є҆лїссе́й во́ды второ́е, и҆ раздѣли́шасѧ во́ды, и҆ пре́йде по сꙋ́хꙋ. (с. 365)
На лїті́и стїхи́ра хра́ма, и҆ ст҃а́гѡ самогла́сны, гла́съ д҃:
Нетлѣ́ннагѡ соедине́нїѧ прича́стникъ, блаже́нне прⷪ҇ро́че, бы́лъ є҆сѝ ѡ҆ бз҃ѣ сп҃сѣ мое́мъ, моли́твою і҆ѻрда́нъ раздѣли́въ, по сꙋ́хꙋ преше́лъ є҆сѝ, и҆ на ѻ҆́гненнѣй колесни́цѣ ꙗ҆́кѡ на нб҃са̀ восхище́нъ бы́лъ є҆сѝ, сꙋгꙋ́бꙋю бл҃года́ть є҆лїссе́ю ѡ҆ста́вль. тѣ́мже мо́лимъ тѧ̀, а҆́ще и҆ тѣ́ломъ восхище́нъ бы́лъ є҆сѝ, но дх҃омъ ѿ на́съ не разлꙋча́йсѧ, и҆ всегда̀ хрⷭ҇тꙋ̀ моли́сѧ, спасти́сѧ дꙋша́мъ на́шымъ.
Свѣтоза́ренъ ѻ҆́блакъ, бжⷭ҇твенный прⷪ҇ро́че, ꙗ҆ви́лсѧ є҆сѝ, и҆ска́паѧ тꙋ́чꙋ бг҃оразꙋ́мїѧ всѣ̑мъ вѣ̑рнымъ, напаѧ́ѧ бога́тнѡ вїно́мъ весе́лїѧ всѣ́хъ, вѣ́рою прити́чꙋщихъ къ бжⷭ҇твеннѣйшемꙋ хра́мꙋ твоемꙋ̀. тѣ́мже мо́лимъ тѧ̀, бжⷭ҇твенный прⷪ҇ро́че и҆ бг҃ови́дче и҆лїѐ, побѣ̑ды на врагѝ во́инствꙋ на́шемꙋ да́рꙋй, и҆ дꙋша́мъ на́шымъ ве́лїю ми́лость.
Самоде́ржцꙋ ᲂу҆мꙋ̀ пло́ть покори́лъ є҆сѝ, бжⷭ҇твенный и҆лїѐ прⷪ҇ро́че, ᲂу҆се́рднѡ восхождє́нїѧ ꙗ҆́кѡ по степе́немъ въ се́рдцы твое́мъ полага́ѧ. тѣ́мже и҆ непра́вдовавша цр҃ѧ̀ ѡ҆бличи́въ, гнѣ́ва бж҃їѧ запреще́нїе и҆зре́къ, и҆ стꙋ̑дныѧ свѧще́нники ꙗ҆́кѡ непра́ведны ноже́мъ погꙋби́лъ є҆сѝ, и҆ всѣ́хъ наꙋчи́лъ є҆сѝ ꙗ҆́снѡ вопи́ти: вои́стиннꙋ є҆ди́нъ є҆́сть бг҃ъ, є҆го́же и҆лїа̀ проповѣ́да.
Сла́ва, гла́съ ѕ҃:
Ѽ нечести́ва царѧ̀ повелѣ́нїѧ! ѽ поста̀ и҆спо́лнена кро́ве и҆ беззако́нїѧ! заповѣ́да по́стъ, да ᲂу҆бі́йство сотвори́тъ, и҆ а҆́бїе ᲂу҆бїе́нъ бы́сть навꙋѳе́й і҆и҃льтѧнинъ. что́ же, прⷪ҇ро́че, къ си́мъ ре́клъ є҆сѝ; ꙗ҆́кѡ та́кѡ глаго́летъ гдⷭ҇ь: поне́же безъ пра́вды мꙋ́жа і҆и҃льтѧнина ᲂу҆би́лъ є҆сѝ, та́кожде и҆ твоѧ̀ кро́вь пролїе́на бꙋ́детъ, и҆ блꙋдни̑цы къ кро́ви твое́й и҆змы́ютсѧ. но моли́твами, хрⷭ҇тѐ, твоегѡ̀ прⷪ҇ро́ка и҆ проповѣ́дника, такова́гѡ безчеловѣ́чества и҆зба́ви дꙋ́шы на́шѧ, ꙗ҆́кѡ человѣколю́бецъ.
И҆ ны́нѣ: Бцⷣе, ты̀ є҆сѝ лоза̀:
На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
И҆лїа̀ прⷪ҇ро́къ преди́вный, ꙳ заре́ю ᲂу҆́мъ просвѣти́въ, ꙳ ве́сь бы́сть бжⷭ҇твенъ ꙳, и҆ царѧ̀ нечести́ва сꙋ́дъ непра́ведный зрѧ̀ негодꙋ́етъ: ꙳ тѣ́мже и҆ сꙋдо́мъ бж҃їимъ ѿрече́нїе посыла́етъ на него̀, ꙳ та́кожде и҆ цари́цꙋ, ꙗ҆́кѡ неми́лостивꙋ и҆ златолюби́вꙋ, ꙳ сꙋдꙋ̀ бж҃їю предадѐ. ꙳ но моли́твами, хрⷭ҇тѐ, твоегѡ̀ прⷪ҇ро́ка и҆лїѝ ꙳, спасѝ всѣ́хъ на́съ, ꙗ҆́кѡ милосе́рдъ.
Сті́хъ: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀.
Доко́лѣ, гдⷭ҇и, ꙳ пꙋ́ть нечести́выхъ спѣ́етсѧ, ꙳ прⷪ҇ро́че, ре́клъ є҆сѝ; ꙳ ты̀ насади́лъ є҆сѝ, и҆ вкорени́шасѧ, ꙳ и҆ сотвори́ша пло́дъ беззако́нїѧ: ꙳ вои́стиннꙋ и҆ са́ми ѕлѣ̀ погибо́ша нече́стїемъ свои́мъ. ꙳ возопїю́тъ къ тебѣ̀, и҆ не ᲂу҆слы́шиши. ꙳ вскꙋ́ю мѝ показа́лъ є҆сѝ нече́стїе ꙳ сꙋде́й законопрестꙋ́пныхъ;
Сті́хъ: Ты̀ є҆сѝ і҆ере́й во вѣ́ки, по чи́нꙋ мелхїседе́ковꙋ:
И҆̀же честно́е твоѐ восхожде́нїе, ꙳ честны́й во прⷪ҇ро́цѣхъ, ꙳ вели́кїй и҆лїѐ, ꙳ пра́зднꙋющихъ твои́ми моли́твами ꙳ ѿ бѣ́дъ и҆збавлѧ́й и҆ скорбе́й, ꙳ и҆ лю́тыхъ нахожде́нїй: ꙳ да всегда̀ тебѣ̀, пресла́вный прⷪ҇ро́че, ꙳ хрⷭ҇тоимени́тїи лю́дїе, ꙳ почита́емъ и҆ ᲂу҆блажа́емъ.
Сла́ва, гла́съ ѕ҃:
Прⷪ҇ро́че, проповѣ́дниче хрⷭ҇то́въ, прⷭ҇то́ла вели́чествїѧ никогда́же ѿстꙋпа́еши, и҆ коемꙋ́ждо болѧ́щꙋ при́снѡ предстои́ши. Въ вы́шнихъ слꙋжѧ̀, вселе́ннꙋю бл҃гословлѧ́еши, всю́дꙋ прославлѧ́емь: просѝ ѡ҆чище́нїе дꙋша́мъ на́шымъ.
И҆ ны́нѣ, бг҃оро́диченъ: Творе́цъ, и҆ и҆зба́витель:
Тропа́рь, гла́съ д҃:
Во пло́ти а҆́гг҃лъ, прⷪ҇ро́кѡвъ ѡ҆снова́нїе, вторы́й прⷣте́ча прише́ствїѧ хрⷭ҇то́ва, и҆лїа̀ сла́вный, свы́ше посла́вый є҆лїссе́еви бл҃года́ть, недꙋ́ги ѿгонѧ́ти, и҆ прокажє́нныѧ ѡ҆чища́ти: тѣ́мже и҆ почита́ющымъ є҆го̀ то́читъ и҆сцѣлє́нїѧ.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На ᲂу҆́трени, на Бг҃ъ гдⷭ҇ь, тропа́рь два́жды. Сла́ва, и҆ ны́нѣ, бг҃оро́диченъ:
По а҃-й стїхоло́гїи сѣда́ленъ, гла́съ а҃:
На ѻ҆́гненнꙋю колесни́цꙋ, ꙗ҆́кѡ на крилꙋ̀ вѣ́трєнню возше́дъ, бжⷭ҇твенный прⷪ҇ро́че, къ небесє́мъ пресла́внѡ ше́ствїемъ дне́сь твори́ши, свы́ше сꙋгꙋ́бꙋю бл҃года́ть и҆ ми́лѡть є҆лїссе́еви ѡ҆ста́вль.
Два́жды.
Сла́ва, и҆ ны́нѣ, бг҃оро́диченъ:
Мт҃рь тѧ̀ бж҃їю мо́лимъ всѝ, дв҃ꙋ вои́стиннꙋ и҆ по ржⷭ҇твѣ̀ ꙗ҆́вльшꙋюсѧ, любо́вїю прибѣга́ющїи къ твое́й бл҃гости: тебе́ бо и҆́мамы грѣ́шнїи предста́тельницꙋ, тебѐ стѧжа́хомъ въ напа́стехъ спасе́нїе, є҆ди́нꙋ всенепоро́чнꙋю.
По в҃-й стїхоло́гїи сѣда́ленъ, гла́съ г҃.
Хра́мъ тво́й бжⷭ҇твенный всѣ̑мъ и҆сцѣлє́нїѧ незави́стнѡ и҆сточа́етъ, проро́че пречꙋ́дне, съ є҆лїссе́емъ преди́внымъ, хрⷭ҇тꙋ̀ вкꙋ́пѣ молѧ́щесѧ, низпосла́ти ми́ръ мі́рови, и҆ лю́демъ чтꙋ́щымъ ва́съ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ.
Кі́йждо и҆дѣ́же спаса́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀, бцⷣе, покрыва́ющее дꙋ́шы на́шѧ.
По полѷеле́и сѣда́ленъ, гла́съ и҃.
Премꙋ́дрости ꙗ҆́кѡ рачи́тель бы́въ, прⷪ҇ро́че всече́стне, непра́ведна царѧ̀ непра́вдꙋюща ꙗ҆́вѣ ѡ҆бличи́въ, и҆ ᲂу҆вѣ́рилъ є҆сѝ вопи́ти: вои́стиннꙋ бг҃ъ є҆ди́нъ є҆́сть, и҆́же и҆лїе́ю проповѣ́дꙋемый. ѿсю́дꙋ же і҆езаве́ль, ѡ҆ восхище́нїи и҆ ѡ҆ златолю́бїи ѡ҆бличи́лъ є҆сѝ. прⷪ҇ро́че и҆ предте́че прише́ствїѧ (с. 368) хрⷭ҇то́ва, и҆лїѐ великоимени́те, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти восхожде́нїе твоѐ вѣ́рнѡ сла́вѧщымъ.
Сла́ва, и҆ ны́нѣ, бг҃оро́диченъ:
Ꙗ҆́кѡ дѣ́вꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Та́же, степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃:Ты̀ є҆сѝ і҆ере́й во вѣ́ки, по чи́нꙋ мелхїседе́ковꙋ: Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе нѡ́гъ твои́хъ. Всѧ́кое дыха́нїе: Є҆ѵⷢ҇лїе ѿ лꙋкѝ, зача́ло д҃ї. По н҃ ѱалмѣ̀ стїхи́ра: гла́съ д҃.
На ѻ҆́гненнѣй колесни́цѣ, на ѻ҆́блакъ взѧ́лсѧ є҆сѝ, и҆ во странꙋ̀ свѣтови́днꙋю преложи́лсѧ є҆сѝ, ѽ ѳесві́тѧнине и҆лїѐ! стꙋ́дныѧ проро́ки посрами́въ. и҆́же не́бо сло́вомъ свѧза́вый, та́кѡ разрѣшѝ и҆ на́шѧ согрѣшє́нїѧ ко гдⷭ҇ꙋ моли́твами твои́ми, и҆ спасѝ дꙋ́шы на́шѧ.
Канѡ́нъ бцⷣы со і҆рмосо́мъ на ѕ҃, гла́съ и҃: Во́дꙋ проше́дъ:
И҆ прⷪ҇ро́ка, два̀ канѡ́на на и҃. Пе́рвый канѡ́нъ.
Гла́съ в҃. Пѣ́снь а҃. І҆рмо́съ:
Пои́мъ гдⷭ҇еви, въ мо́ри дре́вле лю́ди наста́вльшемꙋ, и҆ въ не́мъ фараѡ́на со всево́инствомъ погрꙋзи́вшемꙋ, пѣ́снь побѣ́днꙋю, ꙗ҆́кѡ просла́висѧ.
Ви́дѣти жела́ющїи и҆лїѝ чꙋде́съ ѻ҆гнедохнове́ннꙋю си́лꙋ, ѻ҆гнезра́чнагѡ и҆ честна́гѡ ѧ҆зы́ка, дꙋ́ха крѣ́пость, по достоѧ́нїю собра́хомсѧ.
Оу҆стнѣ̀, бг҃оно́се, и҆ недоꙋмѣ́ннагѡ ѧ҆зы́ка тѣснотꙋ́ же и҆ хꙋдогла́сїе, дѣ́йствомъ є҆́же въ тебѣ̀ дх҃а ѿве́рзи, и҆ ᲂу҆ѧснѝ въ пѣ́нїю чꙋде́съ твои́хъ.
Дае́ши па́че є҆стества̀ повинꙋ́вшымсѧ, сло́ве, честны̑мъ твои̑мъ повелѣ́нїємъ, и҆ покорѧ́еши дождю̀ двє́ри дꙋ́хомъ, ᲂу҆твержда́емо сло́во содѣва́ѧ.
Бг҃оро́диченъ:
Пое́мъ гдⷭ҇еви ѿ дв҃ы рожде́нномꙋ, и҆ мі́ръ ѡ҆бно́вльшемꙋ, и҆ тоѧ̀ ра́ди на́мъ жи́знь бжⷭ҇твеннꙋю дарова́вшемꙋ, пѣ́снь побѣ́днꙋю, ꙗ҆́кѡ просла́висѧ.
Дрꙋгі́й канѡ́нъ, творе́нїе і҆еромона́ха пахѡ́мїа, є҆гѡ́же краегране́сїе:
Пою̀ хвалꙋ̀ вели́комꙋ и҆лїѝ.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ѻ҆рга́нъ ꙗ҆ви́лсѧ є҆сѝ ᲂу҆дарѧ́емь бжⷭ҇твеннымъ брѧца́ломъ, прⷪ҇ро́че пречꙋ́дный, всевѣ́дца бг҃а воспѣва́ѧ, ѿмще́нїе пра́веднѡ всѣ̑мъ даю́ща по дѣлѡ́мъ и҆́хъ.
И҆́же не терпѧ̀ пре́лести, проро́че чꙋ́дный, царѧ̀ ѡ҆бличи́лъ є҆сѝ непра́вдꙋюща ѡ҆ беззако́нїи. тѣ́мже сꙋ́дъ бж҃їй по́лнъ гнѣ́ва томꙋ̀ нане́слъ є҆сѝ ѡ҆сꙋжде́нїѧ.
Прⷪ҇ро́че и҆ предте́че благода́ти, бжⷭ҇твенный и҆лїѐ, а҆ха́ва нечести́ваго царѧ̀ ты̀, ꙗ҆́кѡ законопристꙋ́пника, ѡ҆бличи́въ, стꙋ̑дныѧ свѧще́нники ꙗ҆́кѡ непреподо́бны погꙋби́лъ є҆сѝ.
Бг҃оро́диченъ:
Хрⷭ҇то́вꙋ мт҃рь въ пѣ́снехъ воспѣ́ти досто́йнѡ вѣ́рнїи потщи́мсѧ, ꙗ҆́кѡ сп҃са всѣ́хъ ро́ждшꙋю, живо́томъ и҆ сме́ртїю влады́чествꙋющаго.
Катава́сїа: Ѿве́рзꙋ ᲂу҆ста̀ моѧ̑.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и. (с. 370)
Ꙗ҆́кѡ и҆зрѧ́денъ, прⷪ҇ро́че, ᲂу҆чреди́тель, и҆́же вра́номъ творѧ̀ тебѣ̀ гоще́нїе, є҆ди́ный насыща́ѧй всѧ́ко живо́тно благоволе́нїѧ. є҆мꙋ́же всѝ зове́мъ: ты̀ є҆сѝ бг҃ъ на́шъ, и҆ нѣ́сть свѧ́та па́че тебє̀, гдⷭ҇и.
Благода́ть благодѣ́телю и҆ строи́телю, вдови́цꙋ и҆ прⷪ҇ро́ка напити́вшемꙋ, неизрече́ннымъ промышле́нїемъ. є҆мꙋ́же всѝ зове́мъ: ты̀ є҆сѝ бг҃ъ на́шъ, и҆ нѣ́сть свѧ́та па́че тебє̀, гдⷭ҇и.
Затвори́вый тꙋченѡ́сныѧ ѻ҆́блаки ѡ҆дожди́ти, пи́щи лиша́емѣ саре́фѳѣ, ѡ҆ста́нокъ бра́шна, непреста́ннѡ роси́ти сотворѝ. ты́ же взыва́лъ є҆сѝ: нѣ́сть свѧ́та па́че тебє̀, гдⷭ҇и.
Бг҃оро́диченъ:
Ты̀ є҆ди́на па́че всѣ́хъ ѿ вѣ́ка вели̑кимъ сподо́биласѧ є҆сѝ и҆ па́че є҆стества̀: бг҃а бо невмѣсти́маго все́ю тва́рїю во чре́вѣ прїѧ́ла є҆сѝ, и҆ воплоти́ла є҆сѝ. тѣ́мже бцⷣꙋ тѧ̀ всѝ почита́емъ.
И҆́нъ. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе є҆ди́не чл҃вѣколю́бче.
Всѣ́хъ ми́лостивнѡ, прⷪ҇ро́че, наказꙋ́еши, и҆ всѣ́хъ ми́лꙋеши, къ тебѣ̀ вѣ́рою притека́ющихъ во хра́мъ тво́й: и҆ по́мощи ѿ тебє̀ просѧ́щїи, ника́коже погрѣши́ша.
А҆ха́ва нечести́ваго царѧ̀ ты̀, бжⷭ҇твенный прⷪ҇ро́че, ѡ҆бличи́лъ є҆сѝ: и҆ ꙗ҆́кѡ престꙋ́пника зако́на, сꙋдо́мъ бж҃їимъ ѡ҆сꙋди́лъ є҆сѝ.
Безстꙋ́днаѧ цари́ца і҆езаве́ль тебѐ, бжⷭ҇твеннѣйшїй проро́че, и҆ска́ше ᲂу҆би́ти: ꙗ҆́кѡ на тоѧ̀ несвѧщє́нныѧ свѧще́нники, по достоѧ́нїю сꙋ́дъ сме́ртный наве́лъ є҆сѝ.
Бг҃оро́диченъ:
Мѣ́сто свѧще́нїѧ сла́вы, и҆ мы́сленнꙋю, чⷭ҇таѧ, трапе́зꙋ, хлѣ́бъ хрⷭ҇та̀ жи́знь всѣ́хъ прїе́мшꙋю, пое́мъ тѧ̀, влⷣчце.
Сѣда́ленъ, гла́съ и҃. Подо́бенъ: Премꙋ́дрости:
И҆сто́чника чꙋде́съ, прⷪ҇ро́кѡвъ ᲂу҆добре́нїе, всѝ пѣ́сненнѡ вѣ́рнїи восхва́лимъ ѳесві́тѧнина и҆лїю̀: съ пло́тїю бо є҆щѐ сы́й безсме́ртенъ, ꙗ҆́кѡ ме́ртвъ ᲂу҆вѣрѧ́етъ ме́ртвыхъ воста́нїе. тѣ́мже дерзнове́нїе къ бг҃ꙋ и҆мѣ́ѧ, подава́етъ и҆сцѣлє́нїѧ вѣ́рою просѧ́щымъ, и҆ мо́литсѧ хрⷭ҇тꙋ̀ прилѣ́жнѡ, согрѣше́нїй ѡ҆ставле́нїе пода́ти, пра́зднꙋющымъ любо́вїю свѧтꙋ́ю па́мѧть є҆гѡ̀.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
Кореносѣка́тель ᲂу҆́бѡ ꙗ҆ви́лсѧ є҆сѝ ѕло́бы, мꙋ́дре прⷪ҇ро́че, добродѣ́тели же насади́тель, тѣ́мже тѧ̀ ᲂу҆блажа́емъ.
Оу҆корѧ́ше тѧ̀ словесы̀ вдови́ца, пи́щею сме́рти, прⷪ҇ро́че, ѻ҆́трока воста́нїе ᲂу҆вѣрѧ́ющи.
Назна́менова сла́вꙋ трⷪ҇ческꙋю ꙗ҆́вѣ дꙋнове́нїемъ тричи́сленнымъ, ма́тери дѣ́тища жи́ва дарова̀.
Ко́ль разже́глсѧ є҆сѝ, палѧ̀ бжⷭ҇твеннымъ ѻ҆гне́мъ, и҆ ре́вностїю, ѽ прⷪ҇ро́че, царѧ̀ ѡ҆блича́ѧ, творѧ́ща беззакѡ́нїѧ.
Бг҃оро́диченъ:
Мо́лимъ тѧ̀, чⷭ҇таѧ, бг҃а безъ сѣ́мене заче́ншꙋю, при́снѡ моли́тисѧ за рабы̑ твоѧ̑.
И҆́нъ. І҆рмо́съ:
Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопїю́ще: сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й.
Вѣнча́ тѧ гдⷭ҇ь прⷪ҇ро́ка, премꙋ́дре, и҆ благода́ть тебѣ̀ да́рꙋѧ прорица́ти бꙋ̑дꙋщаѧ, ꙗ҆́кѡ настоѧ̑щаѧ. тѣ́мже ны́нѣ словесє́мъ сбытїѐ зрѧ́ще, хвала́ми при́снѡ тѧ̀, ꙗ҆́кѡ и҆́стиннаго прⷪ҇ро́ка, ᲂу҆блажа́емъ.
Є҆ли́кѡ попремно́гꙋ смиренномꙋ́дрїемъ ᲂу҆кра́шена, проро́ка твоегѡ̀ дꙋша̀, хрⷭ҇тѐ бж҃е, толи́кѡ па́че ѻ҆гнѧ̀ ре́вностїю распала́ема, стꙋ̑дныѧ свѧще́нники погꙋбѝ.
Лице́мъ, ꙗ҆́кѡ зерца́ломъ разрѣ́шшымсѧ, лицꙋ̀ хрⷭ҇то́вꙋ предстои́ши, пречꙋ́дне прⷪ҇ро́че: ѿѻнꙋ́дꙋже на́съ ми́лостивнѡ посѣща́й, да вси́ тѧ хвала́ми ꙗ҆́кѡ прⷪ҇ро́ка ᲂу҆блажа́емъ.
Бг҃оро́диченъ:
Наде́ждꙋ и҆ ᲂу҆твержде́нїе, и҆ спасе́нїѧ стѣ́нꙋ нерꙋши́мꙋ, тѧ̀ стѧжа́вше, всепѣ́таѧ, ѕло́бы всѧ́кїѧ и҆збавлѧ́емсѧ.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Зако́нъ ѻ҆те́ческїй тѧ̀, ꙗ҆́кѡ моли́твенника всеи́стинна показа̀, чꙋдодѣ́йственника, ѡ҆браща́юща є҆стества̀ стїхі́й, и҆лїѐ, и҆ прпⷣбнꙋ же́ртвꙋ попалѧ́юща вода́ми.
Посрами́лъ є҆сѝ и҆зрѧ́днѡ, ꙗ҆́кѡ и҆́стины слꙋжи́телю, прпⷣбне, скве́рнагѡ стꙋда̀ прⷪ҇ро́ки, всеблаже́нне и҆лїѐ, ꙗ҆́вѣ начерта́въ трⷪ҇ческꙋю си́лꙋ.
Сло́вомъ благода́ти свѧще́нствꙋѧ, и҆лїѐ, закла́лъ є҆сѝ свѧще́нники стꙋ̑дныѧ неви́нными твои́ми рꙋка́ми, ꙗ҆́коже ѻ҆гне́мъ, ре́вностїю ѡ҆палѧ́емь.
Бг҃оро́диченъ:
Тебѣ̀ ро́ждшей хрⷭ҇та̀, всемꙋ̀ содѣ́телѧ, взыва́емъ: ра́дꙋйсѧ, чⷭ҇таѧ, ра́дꙋйсѧ, свѣ́тъ возсїѧ́вшаѧ на́мъ: ра́дꙋйсѧ, вмѣсти́вшаѧ бг҃а невмѣсти́маго.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
И҆́же бжⷭ҇твенныѧ благода́ти ꙗ҆вле́на незаходи́маѧ зарѧ̀, и҆ ᲂу҆́мъ бжⷭ҇твеннѣйшїй, прⷪ҇ро́че и҆лїѐ, и҆́скреннѡ стѧжа́въ, благочести́выхъ къ пѣ́нїю возставлѧ́еши.
Кто̀ не ᲂу҆диви́тсѧ бжⷭ҇твеннѣй ре́вности твое́й, прⷪ҇ро́че всече́стне; кто́ ли не воспое́тъ хрⷭ҇та̀, толи́кꙋ крѣ́пость тебѣ̀ дарова́вшаго;
Ѿ бг҃а, прⷪ҇ро́че, ᲂу҆краси́лсѧ є҆сѝ прⷪ҇ро́чествомъ, и҆лїѐ пречꙋ́дне, ѿню́дъ бг҃ꙋ ве́сь соедини́всѧ, пре́лесть ѡ҆блича́ѧ, і҆и҃льтѧны къ бж҃їю позна́нїю приве́лъ є҆сѝ.
Бг҃оро́диченъ:
Со́лнце ро́ждши, бцⷣе, незаходи́мое, всего́ мѧ просвѣтѝ ѡ҆мраче́ннаго страстьмѝ, и҆ и҆спо́лни мѧ̀ бжⷭ҇твеннагѡ свѣ́та.
Пѣ́снь ѕ҃. І҆рмо́съ:
Бе́здна согрѣше́нїй ѡ҆бы́де мѧ̀ послѣ́днѧѧ, но ꙗ҆́кѡ прⷪ҇ро́ка і҆ѡ́нꙋ, гдⷭ҇и, гдⷭ҇и, возведѝ и҆зъ и҆стлѣ́нїѧ живо́тъ мо́й.
Сто́лпъ благоче́стїѧ и҆ житїѧ̀ чи́стагѡ, сади́тель чистоты̀ бы́лъ є҆сѝ, а҆́гг҃лѡмъ же подо́бникъ, чꙋ́дный и҆лїѐ бг҃оно́се.
Гнѣ́въ тѧ̀ пророкоꙋбі́йцы жены̀ ᲂу҆страши́въ, вѧза́ти и҆ рѣши́ти прїи́мша дождє́въ тече́нїе, чꙋ́дный и҆лїѐ, бѣ́гати твори́тъ.
Возвы́силъ є҆сѝ, колѣ̑на преклони́въ, ᲂу҆ма̀ превознесе́нное ѻ҆́ко, мольбо́ю и҆зрѧ́дною рѣше́нїе творѧ̀, и҆ бразды̑ земны̑ѧ ᲂу҆пои́лъ є҆сѝ тꙋ́чами.
Бг҃оро́диченъ:
Кꙋпина́ тѧ въ сїна́и, неѡпа́льнѡ прибли́жившисѧ ѻ҆гню̀, преднаписꙋ́етъ мт҃рь приснодв҃ꙋ, всепѣ́таѧ бцⷣе мр҃і́е.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Моле́бное пѣ́нїе приносѝ къ бг҃ꙋ, прⷪ҇ро́че всечестны́й, ѡ҆ всѣ́хъ въ бжⷭ҇твенный хра́мъ тво́й притека́ющихъ, да тѧ̀ всегда̀ ꙗ҆́кѡ вели́ка застꙋ́пника почита́емъ.
Оу҆́мъ человѣ́чь не дости́гнетъ житїѐ твоѐ, прⷪ҇ро́че, по досто́инствꙋ похвали́ти: па́че ᲂу҆́бѡ ᲂу҆́мныхъ чинѡ́въ возвели́чилсѧ є҆сѝ, зрѧ̀ хрⷭ҇то́во преѡбраже́нїе.
И҆́же всѧ́ческихъ гдⷭ҇ь и҆ творе́цъ на́мъ ꙗ҆ви́сѧ, по твоемꙋ̀ проро́чествꙋ, блаже́нне и҆лїѐ, всѧ̑ человѣ́ки призыва́ѧ къ позна́нїю своемꙋ̀, ꙗ҆́кѡ чл҃вѣколю́бецъ.
Бг҃оро́диченъ:
Марі́е, чⷭ҇тый дѣ́вства сосꙋ́де, ѡ҆чи́сти мо́й ᲂу҆́мъ ѿ страстна́гѡ ѡ҆мраче́нїѧ, и҆ и҆спо́лни благода́ти и҆ пра́вды се́рдце моѐ, всенепоро́чнаѧ.
Конда́къ, гла́съ в҃:
Прⷪ҇ро́че и҆ прови́дче вели́кихъ дѣ́лъ бг҃а на́шегѡ, и҆лїѐ великоимени́те, вѣща́нїемъ твои́мъ ᲂу҆ста́вивый водотѡ́чныѧ ѻ҆́блаки, молѝ ѡ҆ на́съ є҆ди́наго чл҃вѣколю́бца.
І҆́косъ:
Мно́гое человѣ́кѡвъ беззако́нїе, бж҃їе же мно́гое человѣколю́бїе зрѧ̀, прⷪ҇ро́къ смꙋща́шесѧ, и҆лїа̀ ꙗ҆рѧ́сѧ, и҆ словеса̀ неми́лостивна къ ми́лостивномꙋ подви́же, прогнѣ́вайсѧ, возопи́въ, на ѿме́щꙋщыѧсѧ тебє̀, сꙋдїѐ пра́ведный. но ᲂу҆тро́бꙋ бл҃га́гѡ ника́коже подви́же, є҆́же мꙋ́чити тогѡ̀ ѿмета́ющыѧсѧ: при́снѡ бо покаѧ́нїѧ всѣ́хъ жде́тъ є҆ди́ный чл҃вѣколю́бецъ.
Пѣ́снь з҃. І҆рмо́съ:
Кꙋпи́на въ горѣ̀ ѻ҆гнеѡпа́льнаѧ, и҆ росоно́снаѧ пе́щь халде́йскаѧ ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ ѻ҆́гнь неѡпа́льнѡ прїѧ́ла є҆сѝ. тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.
Пресла́внѡ бжⷭ҇твенною ты̀ воѡбраже́нною си́лою ѡ҆бле́ксѧ, пи́щею четыредесѧтодне́вною, и҆лїѐ чꙋ́дный, до́лгїй ше́ствовалъ є҆сѝ пꙋ́ть. тѣ́мже въ хѡри́вѣ глаго́лалъ є҆сѝ: бл҃гослове́нъ бг҃ъ ѻ҆тє́цъ на́шихъ.
Хла́дъ кро́токъ показа̀ и҆ то́нокъ гдⷭ҇а тебѣ̀, и҆лїѐ, по бз҃ѣ ревнꙋ́ющꙋ вседержи́тели, не дꙋ́хъ бꙋ́ренъ, ни трꙋ́съ, ни ѻ҆́гнь страша́ѧй. тѣ́мже і҆и҃сꙋ кро́ткомꙋ пѣ́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оѧвле́нїѧ сподо́билсѧ є҆сѝ и҆ прⷪ҇ро́чества, ꙗ҆́коже вели́кїй мѡѷсе́й, прⷪ҇ро́ки помазꙋ́ѧ дꙋ́хомъ, и҆ царѝ, и҆лїѐ чꙋ́дный. и҆ сла́вы на ѳавѡ́рѣ хрⷭ҇то́вы зри́тель бы́въ, пѣ́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Ражда́еши безъ сѣ́мене безнача́льнаго и҆ превѣ́чнаго гдⷭ҇а, ѻ҆́ч҃а сн҃а, мꙋ́дрость же и҆ си́лꙋ, напослѣ́докъ пречⷭ҇таѧ, па́че є҆стества̀ пло́тїю, на ѡ҆бновле́нїе земны́хъ. тѣ́мже и҆зъ тебє̀ ро́ждшемꙋсѧ зове́мъ: благослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Лю́ди і҆и҃левы, съ пѧтидесѧтонача́льникомъ къ тебѣ̀, бжⷭ҇твенный и҆лїѐ, прише́дшыѧ, ѻ҆гне́мъ съ небесѐ ꙗ҆́кѡ недостѡ́йныѧ попали́лъ є҆сѝ.
И҆́же бг҃овидѣ́нїемъ ѡ҆сїѧ́емь, досто́йнѡ бжⷭ҇твеннѣйшїй прⷪ҇ро́къ бы́лъ є҆сѝ, и҆лїѐ всечестны́й, и҆ ваа́лѡвы жє́ртвы ѿню́дъ ᲂу҆праздни́лъ є҆сѝ.
Є҆ли́кѡ дх҃ъ прест҃ы́й подадѐ прорица́ти, всечестны́й прⷪ҇ро́че и҆лїѐ, проре́клъ є҆сѝ ѡ҆ прише́ствїи сн҃а бж҃їѧ, и҆ не погрѣши́лъ, всеблаже́нне. є҆мꙋ́же пое́мъ: бл҃гослове́нъ бг҃ъ ѻ҆тє́цъ на́шихъ.
Стꙋ̑днымъ свѧще́нникѡмъ, трапе́зꙋ і҆езаве́линꙋ непра́веднѡ ꙗ҆дꙋ́щымъ, вои́стиннꙋ сꙋдо́мъ бж҃їимъ, и҆ прⷪ҇ро́ка рꙋко́ю, ꙗ҆́дъ сме́рти по достоѧ́нїю ѿры́гнꙋсѧ.
Бг҃оро́диченъ:
Спаси́ мѧ, мт҃и бж҃їѧ, содержи́ма глꙋбино́ю согрѣше́нїй, и҆ всѧ́кїѧ врагѡ́въ и҆схитѝ ѕло́бы, да твоѐ спаса́емь велича́ю застꙋпле́нїе.
Пѣ́снь и҃. І҆рмо́съ:
Оу҆страши́сѧ ѻ҆трокѡ́въ благочести́выхъ, соѻбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, не ᲂу҆трꙋжде́нъ ѻ҆́гнь, присноживꙋ́щꙋ же, и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
И҆зрѧ́днѡ ѡ҆брѣ́те а҆ха́въ ро́да ѿраже́нїе всегꙋби́тельное, прⷪ҇ро́ка ѡ҆бличе́нїемъ, скве́рнагѡ ᲂу҆бі́йства ме́рзское мꙋче́нїе: ѳесві́тѧнинъ же ѿ ѻ҆гнедохнове́нна ᲂу҆ма̀ жизнода́телю пѣ́снь воспѣва́ше: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
Дожди́тъ тебѣ̀ ѻ҆́гнь съ небесѐ попалѧ́ѧ, и҆лїѐ, ѡ҆держи́мыхъ пѧтьдесѧ́тъ сꙋгꙋ́бѡ, ꙗ҆́кѡ бж҃їю и҆зрѧ́днꙋ слꙋжи́телю: держа́щемꙋ бо присноживо́тнꙋю жи́знь бг҃олѣ́пнѡ пѣ́снь взыва́лъ є҆сѝ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
Таи́нника тѧ̀ показа̀ хрⷭ҇то́съ, ꙗ҆́кѡ чистоты̀ сади́телѧ, и҆ дѣ́вства пребжⷭ҇твенное прозѧбе́нїе, на ѳавѡ́рѣ бжⷭ҇твеннагѡ воплоще́нїѧ, бжⷭ҇тва̀ непостижи́мый свѣ́тъ во свое́й пло́ти показа́въ тебѣ̀, зовꙋ́щꙋ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
Бг҃оро́диченъ:
Всебога́тна бы́сть ᲂу҆тро́ба бж҃їѧ мт҃ре, ꙗ҆́кѡ прїи́мши сло́во дебельство́мъ пло́ти, ѿ неѧ̀ смѣ́шена земна́гѡ зра́ка по ѵ҆поста́си, ꙗ҆ви́сѧ гра́дъ бж҃їй, въ не́мже вы́шнїй жи́ти благоволѝ. є҆мꙋ́же пое́мъ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
И҆́нъ. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
И҆́же всѧ̑ вѣ́дый, ꙗ҆́кѡ бг҃ъ, бꙋ́дꙋщихъ и҆ бы́ти хотѧ́щихъ ра́зꙋмъ тебѣ̀, и҆лїѐ, ꙗ҆́кѡ вѣ́рнꙋ сꙋ́щꙋ, ввѣрѧ́етъ, и҆ дале́че сꙋ̑щаѧ ꙗ҆́кѡ бли́зъ показꙋ́етъ.
Благочести́вымъ дерзнове́нїемъ вжили́въ ᲂу҆́мъ тво́й, бл҃же́нне прⷪ҇ро́че, прорица́еши разстоѧ̑щаѧсѧ ꙗ҆́кѡ бли́зъ сꙋ̑щаѧ, всечестны́й прⷪ҇ро́че.
Ѡ҆чи́стивъ ѿ всѧ́кїѧ скве́рны, бжⷭ҇твенный прⷪ҇ро́че, тво́й ᲂу҆́мъ: тѣ́мъ и҆ ве́сь свѧ́тъ бы́лъ є҆сѝ, къ бжⷭ҇твенномꙋ свѣ́тꙋ всѣ́хъ наставлѧ́ѧ.
Бг҃оро́диченъ:
Є҆го́же родила̀ є҆сѝ сло́во па́че сло́ва, бг҃ороди́тельнице чⷭ҇таѧ, ѡ҆ на́съ молѝ вѣ́рнѡ чтꙋ́щихъ тѧ̀.
Пѣ́снь ѳ҃. І҆рмо́съ:
Ꙗ҆́же пре́жде со́лнца, свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀, бцⷣе, велича́емъ.
Нетре́нное человѣ́ки ше́ствїе на землѝ пожи́въ, ми́лѡтїю стрꙋю̀ і҆ѻрда́нскꙋю ѳесві́тѧнинъ преше́дъ, ѻ҆рꙋ́жникъ воздꙋ́шный неботе́чное совершѝ стра́нное ше́ствїе дх҃омъ.
Благоче́стїѧ ре́вностїю ѳесві́тѧнинъ ѡ҆палѧ́емь, на ѻ҆гнезра́чнѣй колесни́цѣ взима́етсѧ, ми́лѡть же све́рже: є҆́юже ᲂу҆таи́тисѧ не возмо́же, є҆лїссе́й ѡ҆дѣ́ѧвсѧ, прїе́млетъ бж҃е́ственнꙋю бл҃года́ть.
Ѿкрове́ннѣ бг҃ови́децъ ѳесві́тѧнинъ съ мѡѷсе́емъ зри́тъ, ꙗ҆̀же ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ̑къ земноро́дныхъ не взы́де, воплоще́на гдⷭ҇а, на ѳавѡ́рѣ вседержи́телѧ.
Бг҃оро́диченъ:
Напра́снагѡ дре́внѧгѡ ѿѧ́тельницꙋ ѡ҆сꙋжде́нїѧ, и҆ прама́тере и҆справле́нїѧ, ю҆́же ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀, бцⷣе, велича́емъ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Заре́ю невеще́ственною живонача́льныѧ трⷪ҇цы, прⷪ҇ро́че и҆лїѐ, ѡ҆божа́емь: тѣ́мъ тебѐ всѝ къ бг҃ꙋ ѡ҆ мі́рѣ моли́твенника приво́димъ, блаже́нне.
На земли́ тѧ а҆́гг҃ла позна́хомъ, бжⷭ҇твенный прⷪ҇ро́че, и҆ на нб҃сѝ ѿню́дъ человѣ́ка бж҃їѧ, ꙗ҆́коже и҆ са́мъ гдⷭ҇ь речѐ: поне́же и҆лїа̀ человѣ́къ же́стокъ є҆сѝ, согрѣша́ющꙋ і҆и҃лю терпѣ́ти не мо́жеши, взы́ди ты̀ ко мнѣ̀, да а҆́зъ до́лѣ сни́дꙋ.
На землѝ, бжⷭ҇твенный прⷪ҇ро́че, ꙗ҆́кѡ безпло́тенъ пожи́лъ є҆сѝ, и҆ ны́нѣ на нб҃са̀ возноси́мь, со а҆́гг҃льскими ли̑ки ликовствꙋ́еши: на́съ свы́ше назира́й пою́щихъ тѧ̀, бл҃же́нне.
Бг҃оро́диченъ:
Но́сиши на ѡ҆б̾ѧ́тїѧхъ бг҃а, носѧ́щаго всѧ́чєскаѧ, и҆ пита́еши пита́телѧ, чⷭ҇таѧ, на́мъ ᲂу҆подо́бльшасѧ: є҆го́же молѝ, лю́демъ твои̑мъ дарова́ти всѣ́хъ лю́тыхъ и҆збавле́нїе.
Свѣти́ленъ. Подо́бенъ: Свѣ́те неизмѣ́нный:
Свѣ́тъ на ѻ҆́гненнѣй четвероко́нной колесни́цѣ, небоше́ственна тѧ̀ показа́вый ѻ҆рꙋ́жника, и҆лїѐ, не пожрѐ въ коне́цъ: ѻ҆́гнь бо ѧ҆зы́комъ ѻ҆́гненнымъ привле́клъ є҆сѝ ни́зꙋ, и҆ и҆зсꙋши́лъ є҆сѝ тꙋ́чы.
Сла́ва:
На нбⷭ҇ныѧ крꙋ́ги ѻ҆́гненною колесни́цею возне́слсѧ є҆сѝ, ны́нѣ твою̀ соверша́ющыѧ па́мѧть вѣ́рнѡ, назира́ѧ ꙗ҆́кѡ свѣ́та бли́зъ сы́й, свѣ́тъ мы́сленный на́мъ дава́й.
И҆ ны́нѣ, бг҃оро́диченъ:
И҆́же ѿ бг҃а мі́рови пода̑ннымъ благи̑мъ, ты̀ вина̀ была̀ є҆сѝ, бцⷣе: но и҆ ны́нѣ молѝ ѡ҆ ѻ҆́бщемъ спасе́нїи бл҃гопремѣ́ннаго бг҃а.
На хвали́техъ стїхи̑ры на ѕ҃, гла́съ и҃. Поⷣ: Что̀ ва́съ нарече́мъ:
Є҆гда̀ ты̀, прⷪ҇ро́че чꙋ́дный, ꙳ бг҃ꙋ добродѣ́телей и҆ житїе́мъ чи́стымъ, ꙳ сраствори́всѧ съ ни́мъ, ꙳ ѻ҆́бласть прїе́мъ, ꙳ тва́рь по ра́зꙋмꙋ и҆змѣ́рилъ є҆сѝ, ꙳ и҆ двє́ри дождє́вныѧ во́лею затвори́лъ є҆сѝ, ꙳ и҆ свы́ше ѻ҆́гнь низве́лъ є҆сѝ, ꙳ и҆ врагѝ погꙋби́лъ є҆сѝ. ꙳ молѝ спасти́сѧ дꙋша́мъ на́шымъ.
Ре́вностїю гдⷭ҇нею распала́емь, ꙳ беззакѡ́нныѧ царѝ ты̀ и҆з̾ѡбличи́лъ є҆сѝ ꙗ҆́вѣ, ꙳ стꙋ̑дныѧ свѧще́нники ꙳ ты̀ ᲂу҆мори́лъ є҆сѝ те́плѣ, ꙳ вже́гъ ѻ҆́гнь въ водѣ̀, блаже́нне: ꙳ пи́щꙋ же недѣ́ланнꙋю и҆сточи́лъ є҆сѝ, ꙳ и҆ во́ды і҆ѻрда̑нскїѧ ꙳ ми́лѡтїю твое́ю пресѣ́клъ є҆сѝ. ꙳ молѝ спасти́сѧ дꙋша́мъ на́шымъ.
Є҆гда̀ ты̀, прⷪ҇ро́че, ꙳ показа́лъ є҆сѝ, на землѝ ꙳ ꙗ҆́кѡ вои́стиннꙋ ю҆́же на нб҃сѝ жи́знь, ꙳ жи́знїю сꙋ́щею въ тебѣ̀ соста́вною ѡ҆богатѣ́ѧсѧ, ꙳ ѻ҆́трока ме́ртва твои́мъ вдохнове́нїемъ воскреси́лъ є҆сѝ, ꙳ сме́рти кромѣ̀ на лѣ̑та лꙋ̑чша пребыва́еши, ꙳ на колесни́цꙋ ѻ҆́гненнꙋ всѣ́лъ є҆сѝ, ꙳ на высотꙋ̀ возвыша́емь. ꙳ молѝ спасти́сѧ дꙋша́мъ на́шымъ.
И҆́ны стїхи̑ры, гла́съ а҃, самогла́сны. Ге́рмана:
И҆лїа̀ ревни́вый, и҆ страсте́й самоде́ржецъ, на воздꙋ́сѣ носи́мь бѧ́ше дне́сь, всемі́рнагѡ таи́нникъ спасе́нїѧ начина́тель. ѽ сла́вы честны́ѧ, є҆́йже сподо́бисѧ небопа́рный прⷪ҇ро́къ, и҆ прⷪ҇ро́кѡвъ и҆зрѧ́дное ᲂу҆добре́нїе: се́й бо во пло́ти а҆́гг҃лъ, и҆ безпло́тенъ человѣ́къ показа́сѧ и҆справле́нми. є҆го́же хва́лѧще рце́мъ: застꙋпѝ на́съ, мꙋ́дре, въ де́нь сꙋ́дный.
Дꙋхо́вными пѣ́сньми прⷪ҇ро́ки хрⷭ҇то́вы всѝ восхва́лимъ: и҆лїа́ бо ѳесві́тѧнинъ, небоше́ственникъ бы́сть, и҆ ми́лѡтїю є҆лїссе́й бл҃года́ть прїѧ́тъ сꙋгꙋ́бꙋ ѿ бг҃а, и҆ свѣти́льницы свѣ́тлїи вселе́ннѣй ꙗ҆ви́шасѧ, молѧ́ще непреста́ннѡ ѡ҆ дꙋша́хъ на́шихъ.
Дв҃дски дне́сь вѣ́рнїи, прⷪ҇ро́ка гдⷭ҇нѧ пѣ́сньми почти́мъ, и҆лїю̀ ѳесві́тѧнина, и҆ ревни́телѧ пресвѣ́тла. се́й бо ѧ҆зы́комъ нб҃о ꙗ҆́кѡ ко́жꙋ затворѝ, и҆ зе́млю плодови́тꙋю непло́днꙋ сотворѝ. ѽ пресла́внагѡ чꙋдесѐ! зе́мленъ человѣ́къ, небесє́мъ ѡ҆дожди́ти дождѧ̀ не дадѐ. ѽ чꙋдесѐ! тлѣ́ненъ человѣ́къ въ нетлѣ́нїе ѡ҆дѣ́ѧсѧ, и҆ на нб҃са̀ востечѐ ѻ҆́гненною колесни́цею: ми́лѡтїю же є҆лїссе́ю сꙋгꙋ́бꙋ благода́ть дарова́въ, царѧ̀ ѡ҆блича́ѧ, и҆ лю́ди непокори́выѧ гла́домъ растлѣва́етъ, і҆ере́и стꙋ̑дныѧ всѧ̑ посрамѝ, и҆ вдови́ча сы́на сло́вомъ воскресѝ. тогѡ̀ мольба́ми, хрⷭ҇тѐ бж҃е на́шъ, въ ми́рѣ сохранѝ ѻ҆те́чество на́ше, и҆ побѣ́ды ѡ҆долѣ̑нїѧ на врагѝ да́рꙋй.
Сла́ва, гла́съ и҃:
Прⷪ҇ро́кѡвъ верхо́вники, и҆ всесвѣ́тлыѧ свѣти́льники вселе́нныѧ въ пѣ́снехъ почти́мъ вѣ́рнїи, и҆лїю̀ и҆ є҆лїссе́а, и҆ хрⷭ҇тꙋ̀ возопїе́мъ ра́достнѡ: бл҃гоꙋтро́бне гдⷭ҇и! пода́ждь лю́демъ твои̑мъ, мольба́ми прⷪ҇рѡ́къ твои́хъ, ѡ҆ставле́нїе грѣхѡ́въ и҆ ве́лїю ми́лость.
И҆ ны́нѣ, бг҃оро́диченъ: Влⷣчце, прїимѝ моли́твꙋ ра̑бъ твои́хъ.
Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна, пе́рвагѡ канѡ́на, пѣ́снь г҃, и҆ втора́гѡ ѕ҃. Прокі́менъ, гла́съ д҃: Ты̀ є҆сѝ і҆ере́й во вѣ́ки, по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе нѡ́гъ твои́хъ. А҆пⷭ҇лъ і҆а́кѡвлѧ посла́нїѧ, зача́ло н҃з. А҆ллилꙋ́їа, гла́съ д҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀. Є҆ѵⷢ҇лїе лꙋкѝ, зача́ло д҃ї. Прича́стенъ: Въ па́мѧть вѣ́чнꙋю бꙋ́детъ пра́ведникъ: