Мѣ́сѧца тогѡ́же въ к҃ѳ-й де́нь. Ст҃а́гѡ великомч҃ника и҆ цѣли́телѧ пантелеи́мона.

Стїхи̑ры на ѕ҃, гла́съ д҃. Подо́бенъ: Зва́нный свы́ше:

И҆́же по достоѧ́нїю ꙳ зва́нъ бы́въ пантелеи́монъ, ꙳ є҆гда̀ чл҃вѣколю́бное ꙳ всѣ̑мъ просте́рлъ є҆сѝ дꙋ́шъ попече́нїе, ꙳ и҆ тѣле́съ и҆сцѣле́нїе показꙋ́ѧ. ꙳ тогда̀ тезоиме́ннымъ ꙳ зва́нїемъ ѡ҆богати́лсѧ є҆сѝ, ꙳ добродѣ́тели воздаѧ́нїе, ꙳ и҆ благоче́стїѧ возме́здїе, мч҃ниче, ѡ҆брѣ́тъ, ꙳ вѣнцено́сецъ и҆ непобѣди́мь во́инъ ꙗ҆́вльсѧ ꙳ хрⷭ҇та̀ бг҃а на́шегѡ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.

И҆́же ѿ невеще́ственныхъ и҆стѡ́чникъ сп҃си́телѧ, ꙳ бжⷭ҇твенныхъ и҆сцѣле́нїй ꙳ при́снѡ бл҃года́ть почерпа́ѧ, и҆ бога́тнѡ и҆злива́ѧ, ꙳ и҆ подава́ѧ пристꙋпа́ющымъ къ тебѣ̀, всеблаже́нне, ꙳ всѣ́хъ сла́вное твоѐ и҆ всесвѧще́нное ꙳ и҆ свѣтоно́сное торжество̀ ꙳ вѣ́рнѡ соверша́ющихъ, ꙳ бл҃года́тїю бжⷭ҇твенною си́хъ ѡ҆зарѝ, ꙳ бг҃оподо́бнымъ пома́занъ и҆менова́нїемъ, ꙳ ꙗ҆́вѣ и҆ бла́гостїю: ꙳ є҆́йже молѝ, ꙳ всѣ̑мъ дарова́тисѧ пою́щымъ тѧ̀.

Мꙋ́ками мно́гими и҆скꙋси́сѧ, ꙳ твоѧ̀ ны́нѣ ѻ҆гнепа́льнаѧ любо́вь, ꙳ ко є҆́же сꙋ́щемꙋ жела́нїю, ꙳ мо́ремъ и҆ ѻ҆гне́мъ ꙳ зави́стнѡ бори́мь. ꙳ тѣ́мже ѕлонача́льнаго и҆спрове́ргъ, ꙳ живоно́сное дѣ́йство ᲂу҆тѣ́шителѧ ꙳ ꙗ҆́вѣ прїѧ́тъ богатода́тельное. ꙳ є҆́юже и҆ жи́ва пресла́внѡ ᲂу҆ме́ршаго, ꙳ бг҃омꙋ́дре, показа́лъ є҆сѝ, ꙳ и҆ разли̑чнаѧ и҆сцѣлє́нїѧ ꙳ содѣ́лалъ є҆сѝ, пребл҃же́нне.

И҆́ны стїхи̑ры, гла́съ в҃. Самогла́сны. А҆нато́лїево:

Безме́зднѡ бл҃года́ть дае́ши человѣ́кѡмъ, пантелеи́моне мч҃ниче сла́вне, и҆ дꙋ́хи ѿго́ниши призыва́нїемъ хрⷭ҇то́вымъ, и҆ слѣпы̑мъ ви́дѣти да́рꙋеши, ꙗ҆́кѡ тогѡ̀ ᲂу҆го́дникъ и҆́скреннїй. но молѝ врачꙋ̀, всебл҃же́нне, дарова́ти мі́рꙋ ми́ръ тве́рдъ, и҆ тѧ̀ лю́бѧщымъ ве́лїю ми́лость.

Ма́тере благочести́выѧ возжела́лъ є҆сѝ вѣ́рꙋ, ѻ҆́ч҃ее и҆спра́вилъ є҆сѝ нече́стїе: є҆рмола́а бо ᲂу҆тве́рждсѧ ᲂу҆че́нїи, си́мъ и҆ креще́нїе соверши́лъ є҆сѝ, пантелеи́моне мꙋ́чениче сла́вне, ми́лостивагѡ бг҃а, недꙋ́гꙋющихъ врачꙋ̀, и҆ страсте́й ѿгони́телю, молѝ и҆зба́витисѧ ѿ напа́стей вѣ́рою творѧ́щымъ пречестнꙋ́ю па́мѧть твою̀.

Ѿри́нꙋлъ є҆сѝ пре́лесть ѻ҆тца̀, всесла́вне, и҆ словеса̀ ма́тернѧ смы́сленнѡ прїе́мь, па́че зла́та пло́дъ прине́слъ є҆сѝ, по гдⷭ҇ню гла́сꙋ: и҆ вра́чь и҆зрѧ́денъ ꙗ҆ви́лсѧ є҆сѝ, пантелеи́моне мꙋ́чениче сла́вне. ше́ствꙋѧ же бл҃года́ти пꙋте́мъ, ѡ҆брѣ́лъ є҆сѝ лежа́ща ни́зꙋ младе́нца, є҆хі́дною ᲂу҆грызе́на: и҆ къ бг҃ꙋ моли́твꙋ сотвори́въ и҆ прилѣ́жнѡ помоли́всѧ, а҆́бїе ѻ҆́трока воскреси́лъ є҆сѝ, и҆ ѕвѣ́рѧ растерза́лъ є҆сѝ. тѣ́мже помина́й на́съ, вѣ́рою творѧ́щихъ твою̀ па́мѧть, ꙗ҆́кѡ да ѡ҆брѧ́щемъ ми́лость въ де́нь сꙋ́дный.

Сла́ва, гла́съ ѕ҃: Вѷзанті́ево:

Возсїѧ̀ дне́сь честна́ѧ па́мѧть безсре́бреника, вѣ̑рныѧ созыва́ющи на трапе́зꙋ та́йнꙋю, и҆ къ торжествꙋ̀ пра́зднественномꙋ водѧ́щи празднолю́бныхъ составлє́нїѧ: наста́ бо ны́нѣ на́мъ чꙋдодѣ́йственный вра́чь, недꙋ́ги всѣ̑мъ и҆сцѣлѧ́ѧй, пантелеи́монъ тве́рдый страда́лецъ, и҆ мо́литсѧ прилѣ́жнѡ гдⷭ҇еви, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Всѐ ѿло́жше:

Ѻ҆рꙋ́жїе, ꙗ҆́коже речѐ сѷмеѡ́нъ, ꙳ се́рдце твоѐ про́йде, ꙳ пречⷭ҇таѧ влⷣчце, ꙳ є҆гда̀ ᲂу҆зрѣ́ла є҆сѝ и҆зъ тебє̀ возсїѧ́вшаго неизрече́ннымъ сло́вомъ, ꙳ ѿ беззако́нныхъ ꙗ҆́кѡ ѡ҆сꙋжде́нна ꙳ возноси́ма на крⷭ҇тъ, ꙳ ѻ҆́цтомъ и҆ же́лчїю напаѧ́емаго, ꙳ ре́бра же пробода́ема, и҆ рꙋ́цѣ и҆ но́зѣ пригвожда́емы, ꙳ и҆ рыда́ющи восклица́ше, ꙳ мт҃рски вопїю́щи: что̀ сїѐ, ча́до сладча́йшее, ꙳ но́вое та́инство;

На стїхо́внѣ ѻ҆ктѡ́иха. Сла́ва, гла́съ и҃. Вѷзанті́ево:

Ма́тернее возлюби́въ благоче́стїе, ѻ҆́тчимъ же безбо́жїемъ возгнꙋша́всѧ, врачꙋ̀ дꙋ́шъ во́инъ бы́въ, враче́бнѣ себѐ наказа́лъ є҆сѝ: и҆ бжⷭ҇твенною бл҃года́тїю во ѻ҆бои́хъ благоискꙋ́сенъ, страсте́й всегꙋби́тель, и҆ дꙋ́шъ вра́чь показа́лсѧ є҆сѝ: но ꙗ҆́коже во страда́нїихъ тве́рдое, и҆ въ моли́твахъ приснопребыва́тельное стѧжа́въ, пантелеи́моне мꙋ́чениче хрⷭ҇то́въ, прилѣ́жнѡ молѝ, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Ѽ пресла́внагѡ чꙋдесѐ!

Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, ꙳ люби́мѣйшее ча́до: ꙳ что́ ти со́нмъ воздадѐ безблагода́рный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне;

Тропа́рь, гла́съ г҃:

Страстоте́рпче ст҃ы́й и҆ цѣле́бниче пантелеи́моне, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

На ᲂу҆́трени ѻ҆́ба канѡ́на ѻ҆ктѡ́иха безъ мꙋ́ченичнѡвъ: и҆ ст҃а́гѡ на ѕ҃. Творе́нїе Ѳеофа́ново, є҆гѡ́же краегране́сїе:

Пантелеи́мона всеизрѧ́днаго мꙋ́ченика пою̀.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Пристꙋ́пль ᲂу҆се́рднѡ ко хрⷭ҇тꙋ̀, пре́жде сконча́нїѧ є҆́же ѡ҆ хрⷭ҇тѣ̀, мертвеца̀ пе́рвѣе воздви́глъ є҆сѝ, ны́нѣ же мѧ̀, пребога́те, ᲂу҆мерщвле́на грѣхо́внымъ ᲂу҆грызе́нїемъ, твои́ми моли́твами, ѽ пантелеи́моне, ѡ҆животворѝ.

Возсїѧ̀ ꙗ҆́коже ѕвѣзда̀, носѧ̀ во ю҆́ности ста́ростный и҆ бг҃омꙋ́дрый ра́зꙋмъ: добро́тою же тѣ́ла благолѣ́пїе дꙋшѝ стѧжа́въ, препросла́вленномꙋ сло́вꙋ ꙗ҆ви́лсѧ є҆сѝ прекра́сенъ.

Оу҆мертви́всѧ мі́рꙋ, и҆ во хрⷭ҇та̀, блаже́нне, ѡ҆дѣ́ѧвсѧ ба́нею креще́нїѧ, бы́лъ є҆сѝ бг҃оно́сенъ ѻ҆рга́нъ, и҆ прїѧ́телище дѣ́йства дх҃ꙋ, всѣ̑мъ ᲂу҆гожда́ѧ, всѣ́хъ ᲂу҆врачꙋ́ѧ недꙋ́ги.

Премꙋ́дрость сестрꙋ̀ себѣ̀ притвори́въ, и҆ прича́стникъ жи́зни ведо́мь, ѿ неѧ̀ почти́лсѧ є҆сѝ, и҆ вѣнце́мъ дарова́нїй ᲂу҆краси́лсѧ є҆сѝ, бжⷭ҇твенныѧ зарѝ, блаже́нне, ѡ҆блиста́ѧ свѣ́тлостїю.

Бг҃оро́диченъ:

Благослове́нми, прест҃а́ѧ чⷭ҇таѧ, є҆стество̀ ᲂу҆да́лено преслꙋша́нїемъ бы́вшее ѿ зижди́телѧ, хрⷭ҇та̀ ро́ждши вѣнча́ла є҆сѝ, и҆ тлѣ́нїѧ свободи́ла є҆сѝ. тѣ́мже ра́дꙋющисѧ, всѝ вѣ́рнїи тѧ̀ ᲂу҆блажа́емъ.

Пѣ́снь г҃. І҆рмо́съ:

Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Словеса̀ дх҃а ᲂу҆слы́шавъ, бы́лъ є҆сѝ ꙗ҆́кѡ землѧ̀ до́браѧ и҆ благопло́днаѧ, прїе́мый сѣ́мѧ многоцѣ́нно, и҆ роди́вый, треблаже́нне, спасе́нїе дꙋша́мъ.

Оу҆мертви́лъ є҆сѝ мꙋдрова́нїе ѕмїи́на ᲂу҆грызе́нїѧ, и҆ дꙋ́шꙋ ѡ҆живи́лъ є҆сѝ, бг҃одохнове́ннѡ возроди́всѧ, и҆ цр҃ю̀ всѣ́хъ предстоѧ̀.

Посрами́лъ є҆сѝ безбо́жное мꙋчи́телей повелѣ́нїе, и҆ ко хрⷭ҇тꙋ̀ прите́клъ є҆сѝ: вмѣ́стѡ всѣ́хъ сего̀ стѧжа́въ, и҆ бы́лъ є҆сѝ, бг҃омꙋ́дре, вели́кїй кꙋпе́цъ.

Ма́тере твоеѧ̀ благоче́стїе возлю́бль, сла́вне, ѻ҆́ч҃ее же возненави́дѣлъ є҆сѝ безбо́жїе многомѧте́жное, ꙗ҆́кѡ и҆мѣ́ѧ ра́зꙋмъ, лꙋ́чшее и҆збра́лъ є҆сѝ.

Бг҃оро́диченъ:

Носѧ́й бжⷭ҇твеннымъ манове́нїемъ всю̀ тва́рь гдⷭ҇ь, на рꙋкꙋ̀ но́ситсѧ твоє́ю, дв҃о. є҆го́же ны́нѣ молѝ, и҆зба́вити ѿ бѣ́дъ пою́щыѧ тѧ̀.

Сѣда́ленъ, гла́съ д҃: Подо́бенъ: Оу҆диви́сѧ і҆ѡ́сифъ:

До́блѧго страда́льца благоче́стїѧ хрⷭ҇то́ва восхва́лимъ свѣ́тлѡ, пантелеи́мона вѣ́рнїи, ѱалмы̑ и҆ пѣ́ньми и҆ пѣ́сньми дꙋхо́вными, и҆́мже мꙋчи́тельство неви́димагѡ врага̀ си́лою бжⷭ҇твенною попра́сѧ, и҆ недꙋ́гѡвъ и҆сцѣле́нїе бога́тнѡ ѿ гдⷭ҇а дарова́сѧ творѧ́щымъ вѣ́рнѡ бжⷭ҇твенный и҆ честны́й пра́здникъ є҆гѡ̀.

Сла́ва, дрꙋгі́й, гла́съ и҆ подо́бенъ то́йже:

Є҆рмола́а мꙋ́драгѡ, мꙋ́чениче, слове́съ послꙋ́шалъ є҆сѝ, и҆ ѡ҆ста́вилъ є҆сѝ а҆́бїе хꙋдо́жество земно́е, ꙗ҆́кѡ ме́рзско, ꙗ҆́кѡ некрѣ́пко, ꙗ҆́кѡ гꙋби́тельно, и҆мѣ́ѧ хрⷭ҇то́вы стра̑сти, ᲂу҆чє́нїѧ жи́зни въ се́рдцы твое́мъ, неисцѣ́льнѡ стра́ждꙋщымъ здра́вїе, пантелеи́моне, да́рꙋѧ. тѣ́мже моли́сѧ ѡ҆ творѧ́щихъ любо́вїю па́мѧть твою̀.

И҆ ны́нѣ, бг҃оро́диченъ:

Треволне́нїи страстны́ми, безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менѐ ѻ҆каѧ́ннаго поги́бнꙋти, бе́зднꙋ милосе́рдїѧ ро́ждши: ра́звѣ бо тебє̀ наде́жды не и҆́мамъ. да не врагѡ́мъ ᲂу҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ, и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а.

Крⷭ҇тобг҃оро́диченъ:

Дв҃а и҆ а҆́гница ви́дѣвши на крⷭ҇тѣ̀ безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго воздвиза́ѧ пра́ѻтца.

Пѣ́снь д҃. І҆рмо́съ:

Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Послѣ́дꙋѧ влⷣцѣ любо́вїю, расточи́лъ є҆сѝ бога́тство ни́щымъ, себѐ ѡ҆бнажа́ѧ къ страда́нїю, є҆́же и҆ проше́лъ є҆сѝ, вѣ̑чныѧ надє́жды прови́дѣвъ.

Хвале́нїѧ бг҃ꙋ же́ртвꙋ прине́слъ є҆сѝ, ꙗ҆́вѣ возгнꙋша́всѧ і҆́дѡльскихъ тре́бъ: все́ же шата́нїе нечести́выхъ, страстоте́рпче, попра́лъ є҆сѝ.

Снѣда́ємымъ за́вистїю, и҆ гнѣ́вомъ бори̑мымъ, непобори́мꙋю си́лꙋ си̑мъ предста́вилъ є҆сѝ, мꙋ́чениче, и҆ побѣди́лъ є҆сѝ ѕлочести́вое томле́нїе воѡрꙋжи́всѧ.

И҆́же ста́рца сѷмеѡ́на рꙋка́ми держи́мый, ста́рца тѧ̀ глагѡ́лы, пантелеи́моне, ᲂу҆ловѝ къ бжⷭ҇твенномꙋ разꙋмѣ́нїю, и҆ ко мно́гихъ спасе́нїю, и҆ и҆збавле́нїю.

Бг҃оро́диченъ:

Ю҆́ныѧ и҆ дѣ̑вы во слѣ́дъ тебє̀ потеко́ша, дв҃ꙋ и҆ ѻ҆трокови́цꙋ тѧ̀ и҆ мт҃рь зрѧ́ще: є҆ди́на бо ѻ҆боѧ̑ во є҆ди́но собрала̀ є҆сѝ неска́заннѡ, бг҃оневѣ́сто.

Пѣ́снь є҃. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю.

Ра́достнѡ по́двиги под̾ѧ́лъ є҆сѝ мꙋче́нїѧ, ѡ҆гражде́нъ си́лою бжⷭ҇твенною, и҆ терпѣ́нїемъ тве́рдѡ мꙋчє́нїѧ под̾е́млѧ, ра́дꙋѧсѧ вопїѧ́лъ є҆сѝ: и҆но́гѡ бо ра́звѣ тебє̀ бг҃а не зна́емъ.

Ю҆́ношеско ты̀ противле́нїе и҆мѣ́ѧ, и҆ тве́рдостїю дꙋшѝ возставле́нїе стѧжа́въ, всѧ́кꙋ ꙗ҆́звꙋ до́блественнѣ претерпѣ́лъ є҆сѝ, и҆ мꙋ́жескимъ, блаже́нне, ᲂу҆мо́мъ, благода́тїю бжⷭ҇твеннагѡ креста̀ ᲂу҆крѣплѧ́емь.

Несогла́сное ѿри́нꙋ вѣща́нїе заблꙋ́ждшихъ, небе́снымъ ᲂу҆че́нїемъ страда́лецъ, и҆ мнѡ́гимъ спасе́нїю пресла́внꙋ бы́сть вино́вникъ, твои́мъ дѣ́йствомъ, хрⷭ҇тѐ, ᲂу҆крѣплѧ́емь.

Бг҃оро́диченъ:

Речє́нїѧ премꙋ́дрыхъ, и҆ гада̑нїѧ всѧ̑ препросла́влєнаѧ, и҆ прⷪ҇ро́кѡвъ проречє́нїѧ, тѧ̀ проѡбража́хꙋ проѧвле́ннѡ напослѣ́докъ бы́ти бж҃їю роди́тельницꙋ: и҆ны́ѧ бо ра́звѣ тебє̀ чⷭ҇тыѧ не зна́емъ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

І҆́дѡлы лє́стныѧ ѡ҆плева́лъ є҆сѝ, и҆ возноси́мꙋю пре́лесть ᲂу҆праздни́лъ є҆сѝ, чꙋдодѣ́йствꙋѧ ди̑внаѧ, и҆ творѧ̀ и҆сцѣлє́нїѧ, бг҃омꙋ́дре.

Вѣне́чникъ показа́лсѧ є҆сѝ, всеизрѧ́дне, сквозѣ́ бо ѻ҆́гнь ты̀ проше́лъ є҆сѝ и҆ во́дꙋ: и҆ на колесѝ протѧза́емь, пресла́внѡ погꙋби́лъ є҆сѝ безꙋ̑мныѧ.

Мꙋчи́телей сꙋровство̀ низложи́въ, неꙋдо́бь носи̑маѧ бїє́нїѧ тѣлє́снаѧ дꙋше́вною крѣ́постїю пострада́лъ є҆сѝ, бг҃омꙋ́дре, благода́тїю.

Бг҃оро́диченъ:

Содержа́й концы̀ землѝ ꙗ҆́кѡ бг҃ъ, твои́ми рꙋка́ми, чⷭ҇таѧ, держи́тсѧ, ѡ҆писа́нїемъ тѣ́ла, и҆́же бжⷭ҇твеннымъ зра́комъ неѡпи́санный.

Конда́къ, гла́съ є҃:

Подража́тель сы́й ми́лостивагѡ, и҆ и҆сцѣле́нїй благода́ть ѿ негѡ̀ прїе́мъ, страстоте́рпче и҆ мч҃ниче хрⷭ҇та̀ бг҃а, моли́твами твои́ми дꙋшє́вныѧ на́шѧ недꙋ́ги и҆сцѣлѝ, ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: спаси́ ны, гдⷭ҇и.

І҆́косъ:

Безсре́бреника па́мѧть, до́блѧгѡ страда́льца, вѣ́рнагѡ цѣле́бника, благоче́стнѡ воспое́мъ хрⷭ҇толю́бцы, да прїи́мемъ ми́лость, па́че же ѡ҆скве́рнши, ꙗ҆́коже и҆ а҆́зъ своѧ̑ хра́мы: дꙋша́мъ бо и҆ тѣ́лѡмъ возлю́бленнїи и҆сцѣлє́нїѧ подава́етъ. потщи́мсѧ ᲂу҆̀бо, вѣ̑рнаѧ бра́тїѧ, въ сердца́хъ на́шихъ и҆мѣ́ти є҆гѡ̀ крѣ́пость, и҆збавлѧ́юща ѿ ле́сти вопїю́щыѧ: спаси́ ны, гдⷭ҇и.

Пѣ́снь з҃. І҆рмо́съ:

Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆́же ᲂу҆́стъ ва́шихъ моли́тва.

Зако́ннѡ стражда̀, и҆ побѣди́въ врага̀, приста́нище благоꙋти́шно сꙋ́щымъ въ мо́ри, сла́вне, ѡ҆бꙋрева́ємымъ бы́лъ є҆сѝ, свѣ́тъ же сꙋ́щымъ во тмѣ̀ житїѧ̀, и҆ пѣ́ти наꙋчи́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Блаже́нъ є҆сѝ и҆ добро̀ тебѣ̀ є҆́сть ны́нѣ, преблаже́нне, воспрїи́мшемꙋ пребога́тнꙋю и҆ бл҃же́ннꙋю наде́ждꙋ твою̀, ᲂу҆гото́ваннꙋю вѣ́рою гдⷭ҇еви зовꙋ́щымъ: бл҃гослове́нъ бг҃ъ ѻ҆тє́цъ на́шихъ.

Ст҃ы́хъ дꙋ́шы, и҆ пра́ведныхъ ли́цы, и҆ безпло́тныхъ чи́ни а҆́гг҃льстїи прїѧ́ша, слико́вника тѧ̀, бл҃же́нне. мече́мъ бо ᲂу҆сѣ́ченъ бы́въ во главꙋ̀, пое́ши ра́дꙋѧсѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Ѻ҆рꙋ́жїе є҆́же пре́жде дре́ва живо́тнагѡ на́съ ѿлꙋчи́вшее, ны́нѣ ѡ҆браща́емо прїе́млетъ, зна́менавшыѧсѧ кро́вїю, и҆зъ ре́бръ сн҃а твоегѡ̀ и҆зше́дшею, пренепоро́чнаѧ: бл҃гослове́на є҆сѝ бг҃а пло́тїю ро́ждшаѧ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Благопрїѧ́тное твоеѧ̀ хи́трости, дꙋше́вное ѡ҆слѣпле́нїе ѻ҆́тчее и҆сцѣлѧ́етъ, подаю́щее свѣ́тъ вѣ́рою, преблаже́нне, притека́ющымъ, и҆ ко сп҃сꙋ хрⷭ҇тꙋ̀ наставлѧ́ющи.

За хрⷭ҇та̀ закла́нъ бы́въ, къ вѣ́чнѣй жи́зни преминꙋ́лъ є҆сѝ, и҆ бг҃озва́ненъ ꙗ҆ви́лсѧ є҆сѝ и҆менова́нїемъ бж҃їимъ, бг҃омꙋ́дре. тѣ́мъ почита́емъ тѧ̀, и҆ превозно́симъ хрⷭ҇та̀ во вѣ́ки.

Виті́йское ѿложи́въ лю́тое мꙋ́дрыхъ глꙋмле́нїе, хрⷭ҇то́вымъ призыва́нїемъ, болѣ́зненныхъ страсте́й корє́нїѧ посѣка́еши, и҆сцѣлѧ́ѧ превозносѧ́щыѧ хрⷭ҇та̀ во вѣ́ки.

Бг҃оро́диченъ:

Безсме́ртїѧ зарю̀ вѣ́мы и҆сто́чника тѧ̀, бцⷣе, ꙗ҆́кѡ ро́ждшꙋю сло́ва безсме́ртнагѡ ѻ҆ц҃а̀, всѣ́хъ сме́рти и҆збавлѧ́ющаго, превозносѧ́щихъ є҆го̀ во вѣ́ки.

Пѣ́снь ѳ҃. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Преста́вилсѧ є҆сѝ ра́дꙋѧсѧ къ жела́нїю коне́чномꙋ, и҆дѣ́же все́льсѧ, преблаже́нне, блаже́нный коне́цъ прїѧ́ти вои́стиннꙋ сподо́билсѧ є҆сѝ, сы́й со влⷣкою твои́мъ во вѣ́ки безконє́чныѧ.

Жела́нїе полꙋчи́лъ є҆сѝ, и҆ любвѐ твоеѧ̀ и҆сполне́нїе, ка́плющей є҆щѐ те́плѣй кро́ви, за хрⷭ҇та̀ и҆злїѧ́вшейсѧ: ѿ негѡ́же ра́дꙋѧсѧ прїѧ́лъ є҆сѝ вѣнцы̀ по́двигѡвъ твои́хъ.

Львѡ́въ ᲂу҆ста̀, и҆ ѕвѣре́й зїѧ̑нїѧ, ꙗ҆́коже данїи́лъ дре́вле ты̀ ѡ҆бꙋзда́лъ є҆сѝ: вѣ́сть бо стыдѣ́тисѧ, мꙋ́чениче, добродѣ́тели и҆ безслове́сное є҆стество̀. тѣ́мже тѧ̀, пресла́вне, соше́дшесѧ ᲂу҆блажа́емъ.

Бога́тнꙋю бла́гость тебѣ̀ хрⷭ҇то́съ да́рꙋетъ, сокро́вище и҆сцѣле́нїй на́мъ да́рꙋѧ, и҆ всеми́лостива и҆зволе́нїемъ, тѧ̀ пода́въ всѧ́комꙋ скорбѧ́щемꙋ и҆ приста́нище ти́хое, и҆ предста́телѧ и҆ защи́тителѧ.

Бг҃оро́диченъ:

Ꙗ҆́кѡ рꙋно̀, всенепоро́чнаѧ, до́ждь нбⷭ҇ный во ᲂу҆тро́бѣ заче́нши на́мъ родила̀ є҆сѝ, тишинꙋ̀ даю́щаго, ꙗ҆́кѡ бг҃а того̀ пою́щымъ, и҆ тѧ̀ всепѣ́тꙋю бцⷣꙋ проповѣ́дающымъ.

Свѣти́ленъ. Подо́бенъ: Оу҆ченикѡ́мъ:

Ми́лостивнꙋю твою̀ дꙋ́шꙋ прови́дѣ бг҃ъ, пантелеи́мона тѧ̀ проповѣ́да: безсре́бреннѡ бо тре́бꙋющымъ и҆сцѣле́нїе и҆сточа́еши, свѧ́те, мꙋчи́телей свирѣ́пство терпѣ́пїемъ твои́мъ побѣди́вый.

Бг҃оро́диченъ:

Бцⷣꙋ пѣ́сньми немо́лчными благоче́стнѡ пое́мъ, вопїю́ще: ра́дꙋйсѧ, горо̀ ст҃а́ѧ: ра́дꙋйсѧ, престо́ле ѻ҆гнено́сный всѣ́хъ цр҃ѧ̀: ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во.

На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!

Дѣ́ло промышле́нїѧ вы́шнѧгѡ, є҆́же на тебѣ̀ бы́вшее, ꙳ свѣ́тлѡ показа́сѧ: ꙳ тѣлє́сныѧ бо стра̑сти цѣли́ти ꙗ҆́вственнѡ, пантелеи́моне, наꙋча́емь, ꙳ дꙋ́шъ ѡ҆брѣ́лсѧ є҆сѝ вра́чь и҆зрѧ́денъ, ꙳ сло́вомъ благода́ти ᲂу҆врачꙋ́ѧ всѧ̑, ꙳ и҆ мра́чныѧ ле́сти и҆збавлѧ́ѧ, ꙳ къ тебѣ̀ притека́ющыѧ.

Ми́лости бж҃їи подо́бѧсѧ, ꙳ пантелеи́монъ ꙗ҆́вѣ и҆менова́сѧ, ꙳ сꙋгꙋ́бо прїе́мъ и҆́мѧ, и҆ подо́бное ве́щи. ꙳ ꙗ҆́кѡ сострада́теленъ бо ми́лꙋеши всѣ́хъ, ꙳ сꙋгꙋ́бо подаѧ̀ си̑мъ и҆сцѣле́нїе, ꙳ пита́ѧ и҆ цѣлѧ̀ ꙳ и҆ къ ра́зꙋмꙋ, сла́вне, наставлѧ́ѧ бжⷭ҇твенномꙋ, ꙳ и҆ пресвѣ́тломꙋ хрⷭ҇то́вꙋ, пребога́те.

Добро́тою, бг҃омꙋ́дре, тѣле́сною ꙳ дꙋше́внꙋю добро́тꙋ благодꙋ́шнѡ премѣни́лъ є҆сѝ, ꙳ и҆ ᲂу҆́мное благолѣ́пїе ꙳ плотско́ю красото́ю, ꙳ и҆ зрѧ́щыѧ, мч҃ниче, ᲂу҆диви́лъ є҆сѝ, ꙳ зна́меньми сїѧ́ѧ и҆ чꙋдесы̀, ꙳ цвѣ́томъ ю҆́ности ꙳ состарѣ́вшихсѧ ра́зꙋмъ прїе́мъ, ꙳ вѣ́рою же и҆ благода́тїю просвѣща́емь.

Гла́съ є҃. Самогла́сенъ. Ге́рманово:

Всесвѣ́тлаѧ мч҃ника па́мѧть сїѧ́етъ ꙗ҆́кѡ со́лнце концє́мъ, и҆ непреста́ннѡ подава́етъ вѣ̑рнымъ и҆сцѣлє́нїѧ, недꙋ́ги ѿгонѧ́ющи, и҆ стра̑сти и҆сцѣлѧ́ющи: мо́литсѧ бо при́снѡ пантелеи́монъ хрⷭ҇тꙋ̀, дарова́ти дꙋша́мъ на́шымъ ве́лїю ми́лость.

Сла́ва, гла́съ д҃. Вѷзанті́ево:

Дне́сь просїѧ̀ страстоно́сца па́мѧть, прїиди́те вѣ́рнїи, дꙋхо́внѡ возвесели́мсѧ, и҆ пѣ́сньми сего̀ вѣнча́емъ: и҆́бо неви́димаго врага̀ си́лою крⷭ҇тною мꙋ́жески побѣди́лъ є҆́сть, и҆ мꙋчи́телей безмѣ́рныхъ мꙋ́къ не ᲂу҆боѧ́всѧ, зако́ннѡ по́честь прїѧ́тъ вы́шнѧгѡ зва́нїѧ: и҆ ны́нѣ со а҆́гг҃лы вѣ́чнѡ почива́етъ. но, ѽ мꙋ́чениче хрⷭ҇то́въ пантелеи́моне, врачꙋ̀ недꙋ́гꙋющихъ и҆ приста́нище ѡ҆бꙋрева́емыхъ, не преста́й молѧ́сѧ ми́лостивомꙋ бг҃ꙋ, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Ꙗ҆́кѡ до́блѧ:

Распина́ема хрⷭ҇та̀ чл҃вѣколю́бца ви́дѧщи пречⷭ҇таѧ, и҆ ре́бра и҆скопова́ема копїе́мъ, ꙳ пла́чꙋщи вопїѧ́ше: что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀, вселюбе́знѣйшїй; ꙳ ᲂу҆дивлѧ́юсѧ бл҃гоꙋтро́бне, ꙳ твоемꙋ̀ во́льномꙋ распѧ́тїю.

На стїхо́внѣ ѻ҆ктѡ́иха, и҆ стїхи́ра ст҃а́гѡ, гла́съ а҃.

Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Вѷзанті́ево:

По́двигомъ до́брымъ подвиза́лсѧ є҆сѝ, и҆ тече́нїе сконча́лъ є҆сѝ мꙋче́нїѧ твоегѡ̀, мꙋ́чениче пантелеи́моне: тѣ́мже въ вы́шнихъ со а҆́гг҃лы ликꙋ́еши, досто́йнѡ болѣ́зней твои́хъ прїе́мъ вы́шнее црⷭ҇тво. но молѝ, врачꙋ̀ всеблаже́нне, дарова́ти на́мъ ве́лїю ми́лость.

Сла́ва, гла́съ є҃. Вѷзанті́ево:

Прїиди́те мꙋчениколю́бцы, є҆диномꙋ́дреннѡ всѝ восхва́лимъ страстоте́рпца хрⷭ҇то́ва, по благоче́стїи до́брѣ подви́гшасѧ, и҆ по́честїю побѣ́дною ѡ҆дѣ́ѧвшасѧ, свѣти́льника вселе́нныѧ, и҆ присносїѧ́ющꙋю ѕвѣздꙋ̀ цр҃кве. тѣ́мже и҆ къ немꙋ̀ вопїю́ще рце́мъ: пантелеи́моне, мꙋ́чениче сла́вне, бꙋ́ди на́мъ дꙋша́мъ же и҆ тѣ́лѡмъ спасе́нїе, и҆ покро́въ недви́жимь, молѧ́сѧ ко гдⷭ҇ꙋ ѡ҆ на́съ непреста́ннѡ, во є҆́же спастѝ на́съ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Ра́дꙋйсѧ:

А҆́гнца своего̀ а҆́гница и҆ногда̀ зрѧ́щи, къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее, хрⷭ҇тѐ; чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многоми́лостиве гдⷭ҇и, да́ждь мѝ сло́во рабѣ̀ твое́й: сн҃е мо́й вселюбе́знѣйшїй, не пре́зри, ще́дре, молча̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рови ве́лїю ми́лость.

На лїтꙋргі́и, бл҃жє́нна ѻ҆ктѡ́иха на д҃: И҆ ст҃а́гѡ пѣ́снь г҃: на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а: А҆пⷭ҇лъ къ тїмоѳе́ю, зача́ло сч҃в. А҆ллилꙋ́їа, гла́съ в҃: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Є҆ѵⷢ҇лїе і҆ѡа́нна, зача́ло н҃в: Прича́стенъ: Въ па́мѧть вѣ́чнꙋю: