Мѣ́сѧца тогѡ́же въ ѳ҃-й де́нь. Ст҃а́гѡ свѧщенномꙋ́ченика пагкра́тїа, є҆пі́скопа таѵромені́йскагѡ.
Стїхи̑ры, гла́съ в҃. Подо́бенъ: Є҆гда̀ ѿ дре́ва:
Є҆гда̀ верхо́вный ᲂу҆ч҃никѡ́въ ѡ҆бходѧ̀ мі́ръ ве́сь ᲂу҆твердѝ, тогда̀ ѡ҆брѣ́те тѧ̀ ꙗ҆́кѡ ка́мень честны́й, цр҃кве ѡ҆снова́нїе положѝ, бл҃же́нне, столпы̀ разорѧ́юща і҆́дѡльскїѧ и҆ хра́мы бжⷭ҇твенною си́лою сло́ва, пло́тїю примѣси́тисѧ, ѻ҆́ч҃е, человѣ́кѡмъ благоволи́вшагѡ.
Сло́вомъ ѿгонѧ̀ лꙋка̑выѧ дꙋ́хи ѕло́бы, соверши́лъ є҆сѝ дꙋхѡ́вны лю́ди, дх҃а благода́тїю, мꙋ́чениче пагкра́тїе, воздѣ́лаѧ ни́вꙋ си́хъ серде́чнꙋю, и҆ влага́ѧ сѣ́мѧ бжⷭ҇твенное, є҆́же дѣ́лателю приноша́лъ є҆сѝ нбⷭ҇номꙋ, молѧ̀ ѡ҆ восхвалѧ́ющихъ тѧ̀ вѣ́рнѡ.
За́падъ сїѧ̑нїи мы́сленными ты̀ восто́къ содѣ́лъ є҆сѝ, сл҃нца носѧ́щъ бж҃їѧ позна́нїѧ, ѿ дв҃ы на́мъ па́че ᲂу҆ма̀ возсїѧ́вшагѡ. и҆ заше́дъ страда́нїемъ, ѻ҆́ч҃е, возсїѧ́лъ є҆сѝ къ свѣ́тꙋ невече́рнемꙋ, и҆дѣ́же зерца́лѡмъ разрѣ́шшымсѧ, зри́ши жела́емꙋю добро́тꙋ подвигополо́жника твоегѡ̀, пагкра́тїе.
Сла́ва, и҆ ны́нѣ, бг҃оро́диченъ:
Є҆ди́на невмѣсти́маго бг҃а нетѣсномѣ́стнѡ во чре́вѣ носи́ла є҆сѝ, чл҃вѣ́ка бы́вша за бла́гость, прест҃а́ѧ бг҃оневѣ́сто. тѣ́мже молю́ тѧ: ᲂу҆тѣснѧ́ющихъ мѧ̀ страсте́й и҆змѣнѝ, ꙗ҆́кѡ да тѣ́снꙋю и҆ пра́вꙋю стезю̀ ше́ствовавъ, дости́гнꙋ ꙗ҆́же къ животꙋ̀, дв҃о, водѧ́щꙋю.
Крⷭ҇тобг҃оро́диченъ:
Дре́вꙋ крⷭ҇тномꙋ тѧ̀, і҆и҃се, пригвожде́на, зрѧ́щи неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ; свѣ́те непристꙋ́пный пребезнача́льнагѡ ѻ҆ц҃а̀, потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бж҃е́ственнꙋю, бж҃е́ственныѧ стрⷭ҇ти твоѧ̑ сла́вѧщїи.
Тропа́рь, гла́съ д҃:
И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, свѧщенномꙋ́чениче пагкра́тїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
Канѡ́нъ.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Пречестны́й ка́мень тѧ̀ цр҃ковь познава́етъ, пагкра́тїе, водрꙋже́нїемъ слове́съ твои́хъ ᲂу҆твержда́ема при́снѡ: и҆ сегѡ̀ ра́ди твою̀ почита́емъ па́мѧть дне́сь.
Ѡ҆бнови́лъ є҆сѝ ра́ломъ твои́хъ бжⷭ҇твенныхъ слове́съ сердца̀, пагкра́тїе, ѡ҆лѧденѣ̑вшаѧ пе́рвѣе ѕловѣ́рїѧ мгло́ю, плодонѡ́снаѧ показа́лъ є҆сѝ ꙗ҆́вѣ вѣ́ры ра́ди.
Є҆ди́ницꙋ тричи́сленнꙋю, соединѧ́емꙋ въ то́жде є҆стество̀ возвѣща́ѧ, погаси́лъ є҆сѝ безбо́жїѧ мглꙋ̀, и҆ свѣтолꙋ́чными ᲂу҆чє́нїи лю́ди просвѣти́лъ є҆сѝ.
Бг҃оро́диченъ:
И҆зъ тебє̀ возсїѧ̀ свѣтода́вецъ, просвѣща́ѧ концы̀ і҆и҃съ гдⷭ҇ь, чⷭ҇таѧ влⷣчце: и҆́мже и҆̀же во тмѣ̀ и҆ сѣ́ни свѣ́тъ ви́дѣша.
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ, въ во́ли твое́й, хрⷭ҇тѐ бж҃е, и҆́же надъ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Дх҃омъ ᲂу҆твержда́емь, лꙋка̑выѧ ѿгна́лъ є҆сѝ дꙋ́хи: и҆ трꙋдо́мъ моли́твъ хра́мы разори́лъ є҆сѝ і҆́дѡльскїѧ, цє́ркви возставлѧ́ѧ, досточꙋ́дне.
Сѣчи́тельнымъ сло́вомъ твои́мъ посѣ́клъ є҆сѝ ѕлоче́стїѧ, прпⷣбне, те́рнїе, и҆ насади́лъ є҆сѝ дꙋша́мъ спаси́тєльнаѧ ᲂу҆чє́нїѧ добродѣ́телей, ѻ҆би̑лꙋюща плодѡ́въ, свѧще́нне.
Сосꙋ́дъ ѡ҆брѣ́тъ тѧ̀ бжⷭ҇твеннагѡ дх҃а, чи̑стыѧ зари̑ прїе́млюща, верхо́вный ᲂу҆ч҃ни́къ, къ за́падꙋ посла̀ безбо́жїѧ и҆згна́ти мглꙋ̀, всече́стне.
Бг҃оро́диченъ:
Тѧ̀ ѻ҆́блакъ всесвѣ́телъ, ковче́гъ и҆ ста́мнꙋ всезла́тꙋ, простра́ннѣйшꙋ нб҃съ, и҆ превознесе́ннꙋю лѣ́ствицꙋ, неискꙋсобра́чнаѧ дв҃о, вѣ́рнїи ᲂу҆блажа́емъ.
Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Благоче́стїѧ побо́рникъ, побѣдоно́сецъ, свѧще́нне пагкра́тїе показа́всѧ, на нб҃сѣ́хъ со безпло́тными ны́нѣ предстои́ши гдⷭ҇еви: молѝ спасти́сѧ на́мъ.
Сла́ва, и҆ ны́нѣ, бг҃оро́диченъ:
Те́плое застꙋпле́нїе сꙋ́щымъ въ бѣда́хъ, и҆ помо́щницꙋ на́шꙋ, и҆ къ бг҃ꙋ премѣне́нїе, є҆́юже тлѝ и҆зба́вихомсѧ, бцⷣꙋ вѣ́рнїи ᲂу҆блажа́емъ.
Крⷭ҇тобг҃оро́диченъ:
На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею растерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ свѣ́те мо́й безлѣ́тный;
Пѣ́снь д҃. І҆рмо́съ:
Дх҃омъ прови́дѧ, проро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Ѻ҆гне́мъ ᲂу҆тѣ́шителѧ, ѻ҆гнедохнове́ненъ ꙗ҆́вльсѧ, ле́сть попали́лъ є҆сѝ, пагкра́тїе мꙋ́дре, и҆ возсїѧ́въ ꙗ҆́кѡ свѣ́щникъ въ мо́ри потоплѧ́ємымъ невѣ́дѣнїѧ, ко приста́нищємъ бжⷭ҇твенныѧ вво́диши во́ли.
Ѿ ка́мене некраесѣко́ма пе́тръ напои́всѧ и҆ насы́щсѧ, ꙗ҆́кѡ и҆́нꙋ тѧ̀ посыла́етъ рѣкꙋ̀, ѡ҆лѧденѣ́вшыѧ напои́ти дꙋ́шы, бг҃омꙋ́дре, и҆ нече́стїѧ рѣ́ки и҆зсꙋши́ти тече́нїемъ бжⷭ҇твеннагѡ проповѣ́данїѧ.
Глагѡ́лъ твои́хъ вѣща́нїе и҆злїѧ́сѧ, мꙋ́дре, сїѧ́нїемъ просвѣща́емь ра́зꙋма хрⷭ҇то́ва. тѣ́мже и҆ є҆́ллинскаѧ мꙋ́дрость ѡ҆бꙋи́сѧ, и҆ ѕло́бы мꙋдре́цъ сожже́сѧ, мꙋ́чениче свѧти́телю пагкра́тїе.
Житїѐ твоѐ бжⷭ҇твенными блиста́ѧсѧ добро́тами всѧ̑ ѡ҆мрачѝ де́мѡнскаѧ стремлє́нїѧ, и҆ разори́въ тмꙋ̀ безбо́жїѧ, сы́ны днѐ показа̀, любо́вїю твои̑мъ ᲂу҆че́нїємъ покори́вшыѧсѧ.
Бг҃оро́диченъ:
Воплоща́ема сло́ва во двою̀ сꙋщєствꙋ̀, ѻ҆трокови́це, и҆ хотѣ́нїи, родила̀ є҆сѝ, чⷭ҇таѧ, восхо́ды сказа́вшаго пресла́внѡ спасе́нїѧ ле́стїю порабощє́нымъ, чⷭ҇таѧ дв҃о всепѣ́таѧ.
Пѣ́снь є҃. І҆рмо́съ:
Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебє̀ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Чꙋде́съ показа̑нїи ᲂу҆лови́лъ є҆сѝ лю́ди, сло́вомъ же трє́бища разори́лъ є҆сѝ, и҆ созда́лъ є҆сѝ, свѧще́нне, цр҃кве́й добрѡ́ты, во ѡ҆бновле́нїе человѣ́кѡмъ.
Кровьмѝ ѡ҆багри́лъ є҆сѝ ѻ҆де́ждꙋ свѧще́ннꙋю, кро́вь же де́мѡнскꙋю и҆зсꙋши́лъ є҆сѝ: и҆ побѣдоно́сецъ возше́лъ є҆сѝ къ небесѝ, побѣ́ды прїи́мъ вѣне́цъ.
Разсѣ́десѧ предъ лице́мъ твои́мъ хра́мъ і҆́дѡльскїй, две́рь же ѿве́рзесѧ ꙗ҆зы́кѡмъ, и҆ даде́сѧ благода́ть бжⷭ҇твеннаѧ вѣ́рныхъ въ сердца̀, свѧщеннотаи́нниче ѻ҆́ч҃е.
Бг҃оро́диченъ:
Ꙗ҆́кѡ до́ждь во ᲂу҆тро́бꙋ твою̀ сни́де хрⷭ҇то́съ, чⷭ҇таѧ, и҆ тꙋ́чы и҆зсꙋшѝ многобо́жїѧ, и҆ и҆зведѐ бг҃оразꙋ́мїѧ во́дꙋ, сꙋ́щымъ въ пла́мени ле́стнѣмъ.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Ѡ҆благодати́въ тво́й ᲂу҆́мъ, и҆ просвѣти́въ бога́тнѡ і҆и҃съ просвѣще́нїе всѣ́хъ и҆ бг҃ъ: сло́вомъ твои́мъ безслове́сїѧ лю́ди и҆зба́ви.
Свѧщеннодѣ́йствовавъ въ бж҃їе є҆ѵⷢ҇лїе, мꙋ́дре, бжⷭ҇твеннаѧ ᲂу҆чє́нїѧ запеча́тствовавъ свѣ́тлѡ кро́вїю, свѧщеннотаи́нниче мꙋ́чениче пагкра́тїе.
Кропле́нїй і҆́дѡльскихъ, и҆ крове́й скве́рныхъ и҆зба́вилъ є҆сѝ лю́ди, и҆ поже́рлсѧ є҆сѝ ꙗ҆́коже а҆́гнецъ, пагкра́тїе, же́ртва жива̀ бг҃ꙋ прине́слсѧ є҆сѝ.
Бг҃оро́диченъ:
Соꙋда́влена прилѡ́ги непло́дныхъ помышле́нїй, возведѝ къ свѣ́тꙋ спасе́нїѧ и҆ жи́зни, всенепоро́чнаѧ, ꙗ҆́же сп҃са хрⷭ҇та̀ ро́ждшаѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Свѣ́тлаѧ таѵромені́ѡмъ, пагкра́тїе, ѕвѣзда̀ показа́лсѧ є҆сѝ, и҆ свѧщеннострада́лецъ ꙗ҆ви́лсѧ є҆сѝ за хрⷭ҇та̀: є҆мꙋ́же ны́нѣ предстоѧ̀, молѝ за чтꙋ́щыѧ тѧ̀, бл҃же́нне.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̑, поѧ́хꙋ и҆ благословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Кро́вїю крести́лсѧ є҆сѝ твое́ю, пагкра́тїе, пе́рвѣе въ водѣ̀ крести́въ лю́ди, и҆ ко хрⷭ҇тꙋ̀ преше́лъ є҆сѝ ра́дꙋѧсѧ: съ ни́миже водворѧ́ѧсѧ, прича́стїемъ ѡ҆божа́ешисѧ свѣ́тлѡ при́снѡ преблаже́нне.
Сла́ностїю погрꙋжє́нныѧ лю́тыхъ, ᲂу҆́дицею твои́хъ слове́съ возве́лъ є҆сѝ, свѧще́нне, и҆ моли́твъ чи́стымъ ѡ҆дожде́нїемъ мꙋ́тнꙋю и҆зсꙋши́лъ є҆сѝ ѕловѣ́рїѧ глꙋбинꙋ̀, свѧщеннотаи́нниче хрⷭ҇то́въ.
Ка́мень тѧ̀ вои́стиннꙋ неразсѣ́дный, ѡ҆снова́нїе положѝ, и҆ степе́нь недви́жимь, свѧще́нныѧ свѧщенноѧви́тель цр҃кве: въ не́йже сокрꙋша́етсѧ всѧ́ка ѕло́ба, мꙋ́дре, младе́нствꙋющагѡ врага̀.
Бг҃оро́диченъ:
Чистѣ́йшꙋ є҆ди́нꙋ тѧ̀ ѡ҆брѣ́тъ, всенепоро́чнаѧ, сло́во, пречⷭ҇таѧ, бж҃їе, и҆зъ твоегѡ̀ чре́ва поро́ждсѧ, вѣ̑рныѧ ѡ҆чища́етъ скве́рны, бг҃оневѣ́сто, прибы́вшїѧ на́мъ ѿ невоздержа́нїѧ ѕѡ́лъ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а по́йте, сщ҃е́нницы, просла́вите, ѻ҆́троцы, благослови́те, лю́дїе и҆ превозноси́те во всѧ̑ вѣ́ки.
Ѻ҆гне́мъ и҆знꙋрѧ́емь разли́чныхъ и҆скꙋше́нїй, невреди́мь пребы́лъ є҆сѝ, и҆з̾ѡстри́въ ᲂу҆́мъ свѣ́тлыми видѣ̑нїи, и҆ ꙗ҆ви́лсѧ є҆сѝ, мꙋ́дре, ме́чь, посѣка́ѧ ве́щь многобо́жїѧ.
Лю́ди приводѧ̀ въ ра́зꙋмъ хрⷭ҇то́въ, зна́мєнїѧ и҆ чꙋдеса̀ твори́лъ є҆сѝ ꙗ҆́вѣ, предглаго́лѧ хотѧ̑щаѧ бы́ти, ꙗ҆́кѡ прⷪ҇ро́къ бж҃їй, ᲂу҆тѣ́шителѧ, бг҃омꙋ́дре, дохнове́ньми.
Ѻ҆́бразъ зижди́телѧ показꙋ́ѧ лю́демъ, во́лею и҆́же поносѝ соединѧ́ѧсѧ на́мъ, зна́мєнїѧ и҆ си̑лы тѣ́мъ сотворѧ́еши многобо́жїѧ де́рзость ѿгонѧ̀.
Бг҃оро́диченъ:
Ꙗ҆́кѡ до́ждь во ᲂу҆тро́бꙋ твою̀ сни́де хрⷭ҇то́съ, и҆ всю̀ напоѝ тва́рь вои́стиннꙋ, и҆зсꙋши́въ, дв҃о, мꙋ̑тныѧ рѣ́ки і҆дѡлонеи́стовства, є҆ди́ный благодѣ́тель.
Пѣ́снь ѳ҃. І҆рмо́съ:
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ.
Свѣтолꙋ́чными петра̀ сїѧ̑нїи просвѣ́щсѧ дꙋше́ю и҆ мы́слїю, ꙗ҆́кѡ ѕвѣзда̀ многосвѣ́тлаѧ, къ за́падꙋ дости́глъ є҆сѝ просвѣща́ѧ ᲂу҆чє́нїи заше́дшыѧ въ невѣ́дѣнїѧ, пагкра́тїе, глꙋбинꙋ̀.
І҆кѡ́ннꙋю че́сть преходѧ́щꙋ въ первоѻбра́знꙋю ты̀ вѣ́дый, всю́дꙋ честнꙋ́ю поставлѧ́лъ є҆сѝ, сла́вне, і҆и҃са и҆ бг҃а на́шегѡ і҆кѡ́нꙋ, ка́пищємъ де́мѡнскимъ на потребле́нїе.
Свѣтоно́сное твоѐ сїѐ торжество̀, гра́дъ и҆ собо́ръ сотворѧ́етъ ра́дꙋѧсѧ, чꙋ́дный пагкра́тїе, тѧ̀ вѣ́рнѡ почита́юще. и҆̀хже благослови́ти ꙗ҆́кѡ па́стырь не преста́й, ѡ҆ всѣ́хъ моли́твꙋ творѧ̀.
Бг҃оро́диченъ:
Пощадѝ на́съ пою́щыѧ тѧ̀, гдⷭ҇и, ѿ дв҃ы несказа́ннѡ рожде́йсѧ, напа́стей и҆збавлѧ́ѧ, и҆ страсте́й и҆ скорбе́й, моли́твами є҆ѧ̀ твоѧ̑ рабы̑, ꙗ҆́кѡ бл҃годѣ́тель и҆ є҆ди́нъ чл҃вѣколю́бецъ.