Минея. Июнь (церковнославянским шрифтом)

 День 13День 14День 15 

Мѣ́сѧца тогѡ́же въ д҃і-й де́нь. Ст҃а́гѡ прⷪ҇ро́ка є҆лїссе́а:

И҆ и҆́же во ст҃ы́хъ ѻ҆ц҃а̀ на́шегѡ меѳо́дїа, патрїа́рха кѡнстанті́нѧ гра́да.

На Гдⷭ҇и, воззва́хъ, стїхи̑ры прⷪ҇ро́ка, гла́съ и҃.

Подо́бенъ: Ѽ пресла́внагѡ чꙋдесѐ!

Ра́дꙋйсѧ, є҆лїссе́е премꙋ́дре, ꙳ ты́ бо ѡ҆чи́стивъ ᲂу҆́мъ ꙳ ѿ сласте́й тѣле́сныхъ, ꙳ прїѧ́лъ є҆сѝ, сла́вне, зари̑ дꙋхѡ́вныѧ: ꙳ про́чымъ же всѣ̑мъ пре́далъ є҆сѝ, ꙳ и҆ ве́сь ꙗ҆ви́лсѧ є҆сѝ свѣтови́денъ. ꙳ тѣ́мже всели́лсѧ є҆сѝ къ свѣ́тꙋ незаходи́момꙋ, ꙳ ѡ҆ на́съ всегда̀ моли́сѧ ꙳ восхвалѧ́ющихъ тѧ̀.

Тѧ̀, є҆лїссе́е блаже́нне, ꙳ ревни́тель и҆лїа̀, ꙳ въ сꙋгꙋ́бѣй благода́ти ꙳ просвѣще́на ѡ҆ста́вль, ꙳ воздꙋ́шный ѻ҆рꙋ́жникъ вои́стиннꙋ ꙗ҆́вльшисѧ. ꙳ є҆го́же подо́бїемъ, ꙳ быстрины̑ рѣчны̑ѧ ᲂу҆ста́вилъ є҆сѝ благода́тїю, ꙳ и҆ преше́лъ є҆сѝ, сла́вне, ра́достнѡ ᲂу҆краша́ѧсѧ, ꙳ и҆ велича́ѧ хрⷭ҇та̀.

Дре́вле вѣ́ры сѡмані́тїды, ꙳ ѻ҆троча̀ да́рꙋетъ моли́тва, ꙳ є҆го́же ᲂу҆ме́рша воздви́глъ є҆сѝ, ꙗ҆́кѡ прⷪ҇ро́къ бжⷭ҇твенный свѧще́ннѡ ᲂу҆дивлѧ́емь: ꙳ со́лїю же па́ки во́ды безча̑дныѧ, ꙳ ꙗ҆́вѣ претвори́лъ є҆сѝ въ чадоро́дїе, ꙳ чꙋдеса̀ безмѣ̑рнаѧ соверша́еши, ꙳ благода́тїю вседѣ́телѧ дх҃а, блаже́нне: ꙳ тѣ́мже пое́мъ тѧ̀.

И҆́ны стїхи̑ры ст҃а́гѡ меѳо́дїа, гла́съ и҆ подо́бенъ то́йже:

Ѻ҆́ч҃е бг҃омꙋ́дре меѳо́дїе, ꙳ ꙗ҆́коже ле́въ рыка́нїемъ ꙳ премꙋ́дрыхъ ᲂу҆че́нїй твои́хъ, ꙳ і҆анні́на ᲂу҆жаси́лъ є҆сѝ льсти́ваго ли́са, ꙳ и҆ ᲂу҆́бѡ не терпѣ̀ твоегѡ̀ ѡ҆бличе́нїѧ, ꙳ ꙗ҆́звою меча̀ ссѣка́етсѧ ѕлочести́вый. ꙳ тѣ́мже не ѡ҆ста́вилъ є҆сѝ ста́да ги́блемагѡ хрⷭ҇то́ва, ꙳ побо́рникъ бы́въ, ꙳ правосла̑внымъ лю́демъ.

Правосла́вїѧ ᲂу҆твержде́нїе, ꙳ це́ркве па́стырь, ꙳ мона́хѡвъ ᲂу҆добре́нїе, ꙳ рѣка̀ наводнѧ́ема вода́ми дх҃а, ꙳ ча́ша пролива́ющаѧ питїѐ пресла́дко, ꙳ свѣти́ло, просвѣща́ющее мі́ра концы̀: ꙳ ме́чь ѻ҆бою́дꙋ наѡщре́нъ благода́тїю, ꙳ и҆ ѕлочести́выхъ полкѝ ссѣка́ющь, ꙳ ты̀ є҆сѝ меѳо́дїе.

И҆сповѣ́данїѧ ѻ҆́бразъ, ꙳ свѧти́телей ѡ҆снова́нїе, ꙳ и҆ бг҃одохнове́ненъ ѻ҆рга́нъ, ꙳ воспѣ́вый ᲂу҆чє́нїѧ, благоче́стїѧ и҆спо́лненъ, ꙳ премꙋ́дрости до́мъ, любвѐ пꙋчи́на, ꙳ ми́лованїѧ стрꙋѧ̀ приснотекꙋ́щаѧ, ꙳ ѻ҆крі́нъ и҆злива́ющь пи́во ᲂу҆миле́нїѧ, и҆ благоцвѣтꙋ́щь, сла́вне, ра́й, ꙳ ты̀ є҆сѝ, меѳо́дїе.

Сла́ва, гла́съ в҃.

Прⷪ҇рѡ́къ бжⷭ҇твенное прише́ствїе возсїѧ̀ дне́сь, созыва́юще та́йнѡ празднѡлю́бныѧ дꙋ́шы. и҆́же на колесни́цѣ неботе́чнѣ всѣ́дъ, восто́ка невече́рнѧгѡ ѕвѣзда̀, съ є҆лїссе́емъ чꙋ́днымъ мꙋ́жемъ, разширѧ́етъ стрꙋи̑ но́вагѡ і҆ѻрда́на, проповѣ́данїе ᲂу҆ѧснѧ́ѧ благоче́стїѧ, сꙋгꙋ́бымъ ѻ҆́бразомъ воѡбража́юще ꙗ҆́снѡ, ве́тхїѧ и҆ но́выѧ є҆диногла́сныѧ сла́вы согꙋ́бо благослове́нїе, во и҆̀же вѣ́рнѡ соверша́ющихъ всепра́зднственнꙋю па́мѧть и҆́хъ.

И҆ ны́нѣ, пра́здника, и҆лѝ бг҃оро́диченъ:

Крⷭ҇тобг҃оро́диченъ. Подо́бенъ: Є҆гда̀ ѿ дре́ва:

Дре́вꙋ крⷭ҇тномꙋ тѧ̀, і҆и҃се пригвожде́на, зрѧ́щи неискꙋсобра́чнаѧ пла́чꙋщи глаго́лаше: ча́до сла́дкое почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ; свѣ́те непристꙋ́пный пребезнача́льнагѡ ѻ҆ц҃а̀, потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщїи.

На стїхо́внѣ пра́здника, и҆лѝ ѻ҆ктѡ́иха. Пото́мъ глаго́лемъ припѣ́въ:

Свѧще́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ.

И҆ пое́мъ стїхи́рꙋ, гла́съ д҃:

Ве́селѡ дне́сь цр҃ковь бж҃їѧ ѡ҆дѣва́етсѧ, и҆ ра́дꙋетсѧ зовꙋ́щи: ᲂу҆ѧсни́сѧ моѧ̀ добро́та па́че всѧ́кагѡ гра́да: се́ бо свѧти́телей вели́кое сокро́вище, сла́вный меѳо́дїй, ше́ствїе къ небесє́мъ сотворѝ. прїиди́те ᲂу҆̀бо, празднолю́бцы, правосла́вныхъ собо́ръ ли́къ соста́вльше кꙋ́пнѡ ѻ҆́крестъ бж҃е́ственныѧ ра́ки, и҆сцѣле́нїй то́ки прїе́мше ѿ неѧ̀, моли́тесѧ хрⷭ҇тꙋ̀ бг҃ꙋ, и҆зба́вити вселе́ннꙋю ѿ всѧ́кїѧ є҆́реси.

Сла́ва, гла́съ ѕ҃:

Прⷪ҇ро́че, проповѣ́дателю хрⷭ҇то́въ, престо́ла вели́чества никогда́же ѿлꙋча́ешисѧ, и҆ коемꙋ́ждо болѧ́щꙋ при́снѡ предстои́ши, въ вы́шнихъ слꙋжѧ̀, вселе́ннꙋю благословлѧ́еши, всю́дꙋ прославлѧ́емь, просѝ ѡ҆чище́нїѧ дꙋша́мъ на́шымъ.

И҆ ны́нѣ, пра́здника, и҆лѝ бг҃оро́диченъ.

Крⷭ҇тобг҃оро́диченъ. Подо́бенъ: Тридне́венъ:

На дре́вѣ живо́тъ на́шъ зрѧ́ще всенепоро́чнаѧ бцⷣа ви́сѧщь, мт҃рски рыда́юще вопїѧ́ше: сн҃е мо́й, и҆ бж҃е мо́й, спасѝ любо́вїю пою́щыѧ тѧ̀.

Тропа́рь прⷪ҇ро́ка, гла́съ д҃:

Во пло́ти а҆́гг҃лъ, прⷪ҇ро́кѡвъ ѡ҆снова́нїе, вторы́й предте́ча прише́ствїѧ хрⷭ҇то́ва, и҆лїа̀ сла́вный, свы́ше посла́вый є҆лїссе́еви благода́ть, недꙋ́ги ѿгонѧ́ти, и҆ прокажє́нныѧ ѡ҆чища́ти: тѣ́мже и҆ почита́ющымъ є҆го̀ то́читъ и҆сцѣлє́нїѧ.

Сла́ва, меѳо́дїа, гла́съ то́йже:

Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ст҃и́телю меѳо́дїе, молѝ хрⷭ҇та̀ бг҃а, спасти́сѧ дꙋша́мъ на́шымъ.

И҆ ны́нѣ: бг҃оро́диченъ.

На ᲂу҆́трени канѡ́нъ ѻ҆ктѡ́иха є҆ди́нъ: и҆ ст҃ы́хъ два̀, на и҃.

Канѡ́нъ прⷪ҇ро́ка, є҆гѡ́же краегране́сїе:

Пою̀ ве́селѡ є҆лїссе́евꙋ благода́ть.

Гла́съ є҃. Пѣ́снь а҃. І҆рмо́съ:

Спаси́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.

И҆знача́ла ѡ҆ бз҃ѣ поє́мыѧ пѣ̑сни, и҆́миже пое́тсѧ пое́мый, прⷪ҇ро́ческими ѡ҆блиста́ѧ хвала́ми, пою̀ просла́вльшаго, ꙗ҆́кѡ просла́висѧ.

Взе́мъ ко́жꙋ и҆зъ рꙋкѝ прⷪ҇ро́чи, совоспрїѧ́тъ са́нъ, ѿ ра́ла прⷪ҇ро́къ претворѧ́емь, заре́ю дꙋхо́вною, ꙗ҆́кѡ просла́висѧ.

Ꙗ҆́кѡ предразꙋмѣ̀, хрⷭ҇тѐ, є҆́же къ лꙋ́чшемꙋ зва́нїю, є҆лїссе́ево предложе́нїе, прⷪ҇ро́чества благода́тїю просвѣти́лъ є҆сѝ, сп҃се всеси́льне, ꙗ҆́кѡ просла́висѧ.

Бг҃оро́диченъ:

Пречⷭ҇таѧ мт҃и бж҃їѧ, воплоще́ннаго и҆зъ тебє̀, и҆ ѿ нѣ́дръ роди́телѧ не ѿлꙋ́чшасѧ бг҃а, непреста́ннѡ молѝ, ѿ всѧ́кїѧ бѣды̀ спастѝ, ꙗ҆̀же созда̀.

И҆́нъ канѡ́нъ ст҃а́гѡ меѳо́дїа.

Гла́съ д҃. Пѣ́снь а҃. І҆рмо́съ:

Порази́вый є҆гѵ́пта, и҆ фараѡ́на мꙋчи́телѧ погрꙋзи́вый въ мо́ри, лю́ди спа́слъ є҆сѝ и҆з̾ рабо́ты, мѡѷсе́йски пою́щыѧ пѣ́снь побѣ́днꙋю: ꙗ҆́кѡ просла́висѧ.

Въ постѣ́хъ, преподо́бне, порабоща́ѧ тѣ́ло твоѐ, ᲂу҆ма́стилъ є҆сѝ дꙋ́шꙋ твою̀ восхождє́нїи бжⷭ҇твенными, и҆ пи́щꙋ прїѧ́лъ є҆сѝ вы́шнѧгѡ црⷭ҇тва неиждива́емꙋю.

Слове́снымъ мече́мъ воѡрꙋжи́всѧ дх҃а, ꙗ҆́коже во бронѧ̀ вѣ́рою ѡ҆дѣ́ѧвсѧ, и҆ мꙋ́жески є҆ретїкѡ́въ полкѝ пресѣ́клъ є҆сѝ, всеблаже́нне меѳо́дїе ѻ҆́ч҃е.

Рѣка̀ приснотекꙋ́щаѧ це́ркви бы́ша ᲂу҆ста̀ твоѧ̑ бж҃е́ствєннаѧ, є҆реті́чєскаѧ морѧ̀, ꙗ҆́кѡ вои́стиннꙋ, преподо́бне меѳо́дїе, и҆зсꙋша́ѧ и҆ напоѧ́ѧ вѣ̑рныѧ.

Бг҃оро́диченъ:

Сѣ́нь ѡ҆дꙋшевле́ннꙋ, и҆ ковче́гъ, и҆ трапе́зꙋ, го́рꙋ, ѿ неѧ́же ᲂу҆сѣче́сѧ безъ рꙋкꙋ̑ человѣ̑чꙋ ка́мень, и҆́же всѣ́хъ гдⷭ҇ь, мр҃і́ю пречⷭ҇тꙋю пѣ́сньми почти́мъ.

Пѣ́снь г҃. І҆рмо́съ:

Си́лою крⷭ҇та̀ твоегѡ̀, хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити спаси́тельное твоѐ вознесе́нїе.

Земна́гѡ пристра́стїѧ ѿстꙋ́пль ѻ҆гнедохнове́нномꙋ послꙋжи́лъ є҆сѝ, слꙋжи́телемъ ᲂу҆гожде́нїѧ влⷣки бесѣ́дꙋѧ.

Въ дꙋ́сѣ прїѧ́лъ є҆сѝ сꙋгꙋ́ба ᲂу҆чи́телѧ дарова̑нїѧ, не погрѣши́въ лѣ́ностїю ѻ҆́наго восхожде́нїѧ.

Съ рыда́нїемъ и҆лїѝ предста́въ, и҆ растерза́въ ри́зꙋ, ми́лѡтїю раздѣлѧ́еши стрꙋи̑ і҆ѻрда̑нскїѧ.

Бг҃оро́диченъ:

Молѝ непреста́ннѡ, чⷭ҇таѧ, проше́дшаго и҆зъ чре́слъ твои́хъ, и҆зба́вити ѿ ле́сти дїа́воли пою́щыѧ тѧ̀, бг҃оневѣ́сто.

И҆́нъ. І҆рмо́съ:

Оу҆твержда́ѧй гро́мъ, и҆ созида́ѧй дх҃ъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.

Тꙋчено́сный бы́сть ѻ҆́блакъ, ѧ҆зы́къ тво́й, меѳо́дїе: сердца́ бо благочести́выхъ напаѧ́ющь сло́вомъ нечести́выхъ же всегда̀ подавлѧ́ющь пле́велы.

И҆справлѧ́ѧ вѣ́ры сло́во, ра́нъ и҆скꙋ́съ прїѧ́лъ є҆сѝ, и҆ въ мра́чнѣй, ѻ҆́ч҃е, темни́цѣ сѣдѣ́ти ѡ҆сꙋжде́нъ бы́лъ є҆сѝ. тѣ́мже къ свѣ́тꙋ невече́рнемꙋ преста́вилсѧ є҆сѝ веселѧ́сѧ.

Мꙋ́ченикѡвъ страда̑нїѧ воспѣ́лъ є҆сѝ, си́хъ причасти́лсѧ є҆сѝ неѿе́млемыѧ, ѻ҆́ч҃е, ра́дости, ꙗ҆́кѡ сꙋгꙋ́бѡ пострада́въ, непреста́нными скорбьмѝ и҆ ра́нами, меѳо́дїе.

Бг҃оро́диченъ:

Гаврїи́лъ, ра́дꙋйсѧ, дв҃ѣ повѣ́дꙋѧ, вѣща́ще: дх҃ъ ст҃ы́й на тѧ̀ на́йдетъ, дв҃о, и҆ сп҃са гдⷭ҇а зачне́ши во чре́вѣ твое́мъ.

Конда́къ меѳо́дїа, гла́съ в҃. Подо́бенъ: Твє́рдыѧ:

На землѝ подвиза́лсѧ є҆сѝ ꙗ҆́кѡ безпло́тный, и҆ небеса̀ наслѣ́довалъ є҆сѝ, меѳо́дїе, ꙗ҆́кѡ и҆з̾ѧсни́вый въ концѣ́хъ і҆кѡ́нъ поклоне́нїе: въ трꙋдѣ́хъ бо и҆ болѣ́знехъ вѧ́щше пребы́въ, не преста́лъ є҆сѝ дерзнове́нїемъ ѡ҆блича́ѧ ѿмета́ющыѧсѧ і҆кѡ́ны хрⷭ҇тѡ́вы.

І҆́косъ:

Грѣхѡ́въ мѝ разрѣше́нїе пода́ждь, є҆́же пѣ́ти по достоѧ́нїю по́двиги твоѧ̑, меѳо́дїе пресла́вне: въ ро́въ бо глꙋбо́къ вве́рженъ бы́лъ є҆сѝ, да ꙗ҆̀же пре́жде дꙋ́шы во глꙋбинѣ̀ погребє́нныѧ невѣ́дѣнїѧ, разрѣши́ши къ сїѧ́нїю бжⷭ҇твеннагѡ свѣтоли́тїѧ, наꙋчи́въ ꙗ҆́вѣ подсо́лнечнꙋю, бж҃е́ственномꙋ вои́стиннꙋ неизрече́нномꙋ хрⷭ҇то́вꙋ покланѧ́тисѧ воѡбраже́нїю, ѡ҆блича́ѧ ѿмета́ющыѧсѧ і҆кѡ́ны хрⷭ҇тѡ́вы.

Сѣда́ленъ прⷪ҇ро́ка, гла́съ а҃. Подо́бенъ: Гро́бъ тво́й:

Прозрѣ́нїемъ бжⷭ҇твеннымъ и҆лїа́ тѧ вели́кїй, мꙋ́дре є҆лїссе́е, ᲂу҆ченика̀ взима́етъ, прⷪ҇ро́ка предпоказꙋ́етъ, сїѧ́юща дх҃омъ. тѣ́мже дне́сь всест҃ꙋ́ю твою̀ па́мѧть пра́зднꙋюще благочестномꙋ́дреннѡ, почита́емъ тѧ̀ съ ни́мъ, сла́вне.

Сла́ва, прпⷣбнагѡ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆́кѡ свѣ́тлое со́лнце возсїѧ́въ, ѻ҆́ч҃е, ᲂу҆че́ньми твои́ми всю̀ вселе́ннꙋю, свѧще́нне, просвѣща́еши, меѳо́дїе, и҆ ѿгонѧ́еши мглꙋ̀ є҆реті́ческꙋю.

И҆ ны́нѣ, пра́здника, и҆лѝ бг҃оро́диченъ:

Пречи́стѣи рꙋ́цѣ твоѝ, дв҃о мт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь, хрⷭ҇тѐ, ми́лѡсти твоѧ̑.

Крⷭ҇тобг҃оро́диченъ:

На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃ернею растерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;

Пѣ́снь д҃. І҆рмо́съ:

Оу҆слы́шахъ, гдⷭ҇и, и҆зъ гро́ба твоѐ воста́нїе, и҆ просла́вихъ твою̀ непобѣди́мꙋю си́лꙋ.

Ꙗ҆́коже дре́вле во́ды, и҆ ны́нѣ непло́дный ᲂу҆́мъ мо́й и҆сцѣлѧ́еши благода́тїю, є҆лїссе́евыми моли́твами.

Бжⷭ҇твеннѣ ѡ҆богати́лсѧ є҆сѝ вы́шнихъ сказа́нїемъ, и҆ ѕвѣ́ремъ дѣте́й ѿе́млеши ѕлоѻбра́зїе.

Ви́дѣнъ бы́лъ є҆сѝ, сла́вне, дѣ́вствомъ ᲂу҆кра́шенъ, сꙋ́щымъ во тмѣ̀ пре́лести, ꙗ҆́кѡ свѣти́льникъ и҆здале́че сїѧ́ѧ.

Молча́ти не мо́жетъ дх҃омъ дви́жимь ѧ҆зы́къ, твоѧ̑ ди̑внаѧ въ житїѝ, є҆лїссе́е, и҆справлє́нїѧ.

Бг҃оро́диченъ:

Вои́стиннꙋ сла́вимъ тѧ̀, бцⷣе безневѣ́стнаѧ, и҆ въ твоѐ приста́нище вѣ́рнїи прибѣга́емъ.

И҆́нъ. І҆рмо́съ:

Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.

Мꙋ́дрости разꙋ́мною ча́шею ѡ҆мочи́въ ᲂу҆стнѣ̀, ѻ҆́ч҃е, рѣ́ки на́мъ и҆сточи́лъ є҆сѝ ᲂу҆че́нїй, преподо́бне, бл҃гоче́стнѡ творѧ́щымъ па́мѧть твою̀.

Ты̀ проповѣ́датель возжелѣ́ненъ, сла́докъ сло́вомъ, про́стъ пра̑вы, дꙋхо́вными дарова̑нїи, свѧти́телю преподо́бне, пребога́тъ ꙗ҆ви́лсѧ є҆сѝ, меѳо́дїе.

Копїе́мъ мы́сленнымъ бж҃е́ственнагѡ сло́ва, є҆́же въ ме́рзости є҆реті́честѣй, сꙋ́щꙋю пострѣка́въ, ᲂу҆ста́вилъ є҆сѝ нече́стїѧ на́глость, меѳо́дїе.

Бг҃оро́диченъ:

Ра́дꙋйсѧ, две́ре мы́сленнаѧ, и҆зъ неѧ́же про́йде неизрече́ннымъ сло́вомъ цр҃ь нбⷭ҇ный, и҆ соблю́дъ непоро́чнꙋ, запеча́танꙋ па́ки ѡ҆ста́ви.

Пѣ́снь є҃. І҆рмо́съ:

Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебє̀ и҆но́гѡ не зна́емъ. (с. 181)

Молчали́вое и҆ кро́ткое, бг҃одохнове́нне, дꙋшѝ твоеѧ̀, прⷪ҇ро́ка тѧ̀ показа̀, є҆лїссе́е, вѣ́ры ра́ди.

Бж҃е́ственное твои́хъ слове́съ дѣ́йство просвѣща́етъ мѧ̀ глагѡ́лы дꙋхо́вными, є҆лїссе́е всеблаже́нне.

Ме́ртвъ грѣ́хъ, ꙗ҆́кѡ жи́вꙋ предстоѧ́щꙋ гдⷭ҇еви, проро́че, тебѣ̀, є҆лїссе́е, вмѣнѧ́шесѧ.

Бг҃оро́диченъ:

Не преста́й молѧ́щи, є҆го́же родила̀ є҆сѝ, бцⷣе, спастѝ дꙋ́шы на́шѧ, воспѣва́ющихъ тѧ̀, пречⷭ҇таѧ.

И҆́нъ. І҆рмо́съ:

Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.

Свѣ́томъ просвѣща́емь трисо́лнечнымъ, сла́вне, мра́чнꙋю и҆ те́мнꙋю є҆́реси мглꙋ̀ благоче́стнѡ ѿгна́лъ є҆сѝ, и҆ ѕвѣзда̀ бы́лъ є҆сѝ, вѣ́рными блиста́ѧ сїѧ̑нїи.

И҆з̾ѡщре́на тро́сть дх҃а, ѧ҆зы́къ тво́й ꙗ҆́кѡ скоропи́сца кни́жника, меѳо́дїе, показа́сѧ, на скрижа́ли начерта́ѧ серде́цъ благода́ти бжⷭ҇твенный зако́нъ нело́жнѡ.

Слє́зныѧ то́ки всено́щными стоѧ̑нїи, ꙗ҆́кѡ би́серїе носѧ̀, преподо́бне, си́ми грѣхѡ́вныѧ пото́ки и҆зсꙋши́лъ є҆сѝ: и҆ бжⷭ҇твеннагѡ дх҃а прїѧ́телище ꙗ҆ви́лсѧ є҆сѝ чи́сто.

Бг҃оро́диченъ:

И҆збавлѧ́еши моли́твами твои́ми ѿ всѧ́кагѡ ѡ҆бстоѧ́нїѧ прибѣга́ющыѧ въ покро́въ тво́й, мр҃і́е бцⷣе, ты́ бо чтꙋ́щихъ тѧ̀ предста́тельница є҆сѝ и҆ ᲂу҆пова́нїе съ бг҃омъ.

Пѣ́снь ѕ҃. І҆рмо́съ:

Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ человѣколю́бцꙋ, и҆ спасе́ мѧ десни́ца твоѧ̀, гдⷭ҇и.

Напо́лни пото́ки и҆ногда̀, ни до́ждь, ни дꙋ́хъ воздꙋ́шный, воздꙋ́хъ же благода́ти, прⷪ҇ро́че, и҆ сло́во твоѐ дѣ́йствомъ дх҃а напо́лни.

Ѿ ма́ла сосꙋ́да и҆ногда̀, прⷪ҇ро́че, ꙗ҆́коже напо́лнилъ є҆сѝ незави́стнѡ є҆ле́й женѣ̀, и҆ мнѣ̀ бжⷭ҇твеннꙋю ми́лость и҆сточи́ти, є҆лїссе́е, помоли́сѧ.

Честна́ѧ жена̀, прⷪ҇ро́че, вѣ́рою вжилѧ́ема, въ ста́рости непло́дствїѧ разрѣше́нїе прїе́млетъ моли́твою, бл҃гоча́дїе плодѧ́щи.

Бг҃оро́диченъ:

Кꙋпинꙋ́ тѧ неѡпали́мꙋ, и҆ го́рꙋ, и҆ лѣ́ствицꙋ ѡ҆дꙋшевле́ннꙋ, и҆ две́рь нбⷭ҇нꙋю досто́йнѡ сла́вимъ, мр҃і́е сла́внаѧ, правовѣ́рныхъ похвало̀.

И҆́нъ. І҆рмо́съ:

Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ: но ты̀, ᲂу҆пра́вителю благі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.

Пчелѣ̀ трꙋдолю́бнѣй поревнова́въ, пи́смєнныѧ собра́лъ є҆сѝ цвѣ́ты, ꙗ҆́коже въ со́тѣ, се́рдцемъ твои́мъ сїѐ состроѧ́ѧ, и҆ всѣ̑мъ и҆сточа́ѧ рѣкꙋ̀ ᲂу҆че́нїй твои́хъ.

Слове́съ дх҃о́вныхъ напо́лнивсѧ ѧ҆зы́къ тво́й, премꙋ́дре, ѧ҆зыкобѡ́лїѧ низложѝ хꙋ́льникѡвъ, проповѣ́дающь хрⷭ҇то́во воплоще́нїе почита́ти, и҆ плотско́е подо́бїе.

Пе́рвѣе ᲂу҆́бѡ на сѣда́лищи ста́рєцъ похвали́въ гдⷭ҇а, на ст҃и́тельстѣ престо́лѣ, напослѣ́докъ же возне́слсѧ є҆сѝ са́мъ, ᲂу҆па́съ бг҃оꙋго́днѡ и҆збра̑нныѧ, ѻ҆́ч҃е, сїѧ̑ лю́ди.

Бг҃оро́диченъ:

Є҆ди́нꙋ тѧ̀ бг҃а на́шегѡ мт҃рь, бцⷣе влⷣчце, тва́рь всѧ̀ познава́етъ, ꙗ҆́кѡ є҆ди́на вмѣсти́ла є҆сѝ бг҃а несказа́ннѡ во ᲂу҆тро́бѣ твое́й, бжⷭ҇твеннымъ не ѡ҆пали́вшисѧ ѻ҆гне́мъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Прⷪ҇ро́къ бж҃їй ꙗ҆ви́лсѧ є҆сѝ, сꙋгꙋ́бꙋю благода́ть прїе́мь, вои́стиннꙋ досто́йнꙋю тебѐ, є҆лїссе́е блаже́нне: и҆лїи́ бо бы́лъ є҆сѝ совсе́льникъ, съ ни́мъ хрⷭ҇тꙋ̀ бг҃ꙋ молѧ́сѧ непреста́ннѡ ѡ҆ всѣ́хъ на́съ.

І҆́косъ:

Въ зако́нѣ гдⷭ҇ни возсїѧ́вшаго, всѝ є҆лїссе́а мꙋ́драго пѣ̑нїи пѣ́сненными воспое́мъ: ве́сь бо и҆спо́лненъ є҆́сть чꙋде́съ сꙋгꙋ́быми ѻ҆́бразы, на́мъ и҆сточа́ѧ и҆сцѣле́нїй стрꙋи̑: кропи́тъ бо дꙋ́шы вѣ́рныхъ, и҆ спаса́етъ ѿ бѣ́дъ, ꙗ҆́коже дре́вле лю́ди безча́дствꙋющыѧ, ᲂу҆слажда́етъ со́лїю во́ды, креще́нїѧ благода́ть возвѣща́ѧ ꙗ҆́вѣ, молѧ̀ непреста́ннѡ ѡ҆ всѣ́хъ на́съ.

Пѣ́снь з҃. І҆рмо́съ:

Въ пе́щи ѻ҆́гненнѣй пѣсносло́вцы спасы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.

Премꙋ́дрости лꙋ́чшїѧ ты̀, є҆лїссе́е, и҆спо́лнивсѧ, вопїѧ́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Ты̀ ꙗ҆́кѡ жи́зни слꙋжи́тель, ма́тери а҆́бїе жи́ва, ме́ртва сы́на, прⷪ҇ро́че, показа́лъ є҆сѝ.

Ненача́ємыѧ и҆ногда̀ прⷪ҇ро́чєскаѧ пита́ѧ дѣ́ти, всегꙋби́тєльныѧ снѣ̑ди творѧ̀ невреждє́нны.

Бг҃оро́диченъ:

И҆́же ѿ дв҃ы рожде́йсѧ, ю҆́же бцⷣꙋ содѣ́ла, бл҃гослове́нъ бг҃ъ ѻ҆тє́цъ на́шихъ.

И҆́нъ. І҆рмо́съ:

Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Росо́ю бжⷭ҇твенныѧ любвѐ погаси́лъ є҆сѝ стрⷭ҇те́й, пресла́вне, разжже́ннꙋю пе́щь, и҆скꙋ́шсѧ же ꙗ҆́кѡ зла́то напа́стьми горни́ломъ, ꙗ҆́кѡ со́лнце блиста́еши.

А҆дама́нтское се́рдце въ ско́рбехъ и҆мѣ́лъ є҆сѝ и҆ въ гоне́нїихъ, меѳо́дїе, и҆ ны́нѣ блиста́еши лꙋча́ми нбⷭ҇ными, и҆ ѻ҆гнедохвове́нными ᲂу҆сты̀: тѣ́мже тѧ̀ восхвалѧ́емъ.

Ꙗ҆́коже неѡбори́мь сто́лпъ, неподви́жимь пребы́лъ є҆сѝ напа́стными прилѡ́ги, пре́лести ᲂу҆твержде́нїе низлага́ѧ, свѧти́телю, си́лою твои́хъ слове́съ, меѳо́дїе преблаже́нне.

Бг҃оро́диченъ:

Пречꙋ́дный ты̀ черто́гъ, соеди́ншагѡ себѐ человѣ́чествꙋ, бг҃а є҆ди́на породила̀ є҆сѝ, и҆ дв҃ою пребыла̀ є҆сѝ, бг҃оневѣ́стнаѧ мт҃и мр҃і́е дв҃о.

Пѣ́снь и҃. І҆рмо́съ:

Ѡ҆роси́вшаго пе́щь, и҆ ѻ҆́троки сохра́ншаго, посредѣ̀ горѧ́щагѡ пла́мене, ѻ҆́троцы, славосло́вите, свѧще́нницы, благослови́те, лю́дїе, превозноси́те во всѧ̑ вѣ́ки.

Сотво́ршаго ѡ҆чище́нїе, прⷪ҇ро́ка повелѣ́нїемъ, ѻ҆́троцы воспѣва́ютъ, ст҃и́тели бл҃госло́вѧтъ, лю́дїе превозно́сѧтъ є҆гѡ̀ во вѣ́ки.

Ѿ ве́щи ѡ҆чи́щь ᲂу҆́мъ невеще́ственнѡ, невеще́ственнагѡ жела́нїемъ ѡ҆держи́мь, ви́дѣлъ є҆сѝ. тѣ́мже и҆гра́ѧ вопїѧ́лъ є҆сѝ: хрⷭ҇та̀ превозноси́те во всѧ̑ вѣ́ки.

Благода́тїю прови́дѣ бꙋ̑дꙋщаѧ, на дре́вѣ пречи́стый крⷭ҇тъ зри́ши воѡбраже́нъ. тѣ́мже вопїѧ́лъ є҆сѝ ра́дꙋѧсѧ, бг҃онаꙋче́нный прⷪ҇ро́че: хрⷭ҇та̀ превозноси́те во всѧ̑ вѣ́ки.

Колесни́цъ мно́жество ѡ҆крꙋ́жшихъ тѧ̀, низложѝ, чꙋ́дне, мра́комъ незави́стнѡ ᲂу҆ста́вилъ є҆сѝ, безꙋ́мїе ѡ҆блича́ѧ, всеблаже́нне, вопїѧ̀: хрⷭ҇та̀ превозноси́те во всѧ̑ вѣ́ки.

Бг҃оро́диченъ:

А҆́гг҃ли сла́вѧтъ ржⷭ҇тво̀ твоѐ, чⷭ҇таѧ, бг҃оневѣ́сто, съ ни́миже всѝ пое́мъ: ѻ҆́троцы, благослови́те, свѧще́нницы, пѣсносло́вите, лю́дїе, превозноси́те во всѧ̑ вѣ́ки.

И҆́нъ. І҆рмо́съ:

Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ, свѣ́тъ и҆ тма̀, мра́зъ и҆ зно́й, сы́нове человѣ́честїи, свѧще́нницы, благослови́те гдⷭ҇а и҆ превозноси́те є҆го̀ во вѣ́ки.

Ты̀ низложи́лъ є҆сѝ є҆реті́чєскаѧ шата̑нїѧ, є҆́же пои́стиннѣ ѕлочести̑ваѧ, и҆ совозне́слъ є҆сѝ вѣ́рныхъ цр҃кве, ѻ҆́ч҃е, ро́гъ, хрⷭ҇то́вꙋ наказꙋ́ѧ і҆кѡ́нꙋ честѝ, меѳо́дїе. тѣ́мже тѧ̀ пое́мъ, и҆ любо́вїю почита́емъ.

Тѧ̀ ѕвѣздꙋ̀ всесвѣ́тлꙋю сл҃нце показа̀ хрⷭ҇то́съ, на тве́рди, премꙋ́дре, цр҃ко́внѣй, и҆ твои́ми сїѧ̑нїи чⷭ҇тны́хъ ᲂу҆че́нїй, концы̀, ѻ҆́ч҃е, ѡ҆зари́лъ є҆сѝ во всѧ̑ вѣ́ки.

Твоѐ сло́во ꙗ҆́коже гро́мъ, меѳо́дїе, возшꙋмѣ̀ на землѝ, мамѡ́ны содѣ́йственника, и҆ роди́телѧ пре́лести, ꙗ҆́коже ѕмі́ѧ свѧза́въ, ѿсла́лъ є҆сѝ тмѣ̀ вѣ́чнѣй, ꙗ҆́кѡ сꙋ́ща наслѣ́дника.

Бг҃оро́диченъ:

Є҆ди́нъ є҆сѝ є҆диноро́денъ горѣ̀, є҆ди́нъ и҆ до́лѣ то́йже, безъ ма́тере горѣ̀ ѿ ѻ҆ц҃а̀, и҆ безъ ѻ҆тца̀ и҆зъ мт҃ре до́лꙋ: въ не́йже воѡбра́жсѧ, въ чꙋжде́е, сло́ве, ѡ҆бнища́въ, въ моѐ смири́вшеесѧ є҆стество̀ ѿ грѣха̀.

Пѣ́снь ѳ҃. І҆рмо́съ:

Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи, є҆диномꙋ́дреннѡ велича́емъ.

Жезло́мъ сѣчи́тельнымъ возвлачѧ̀ желѣ́зо прⷪ҇ро́къ, ве́щное человѣ̑къ сꙋщество̀ крⷭ҇то́мъ вознесе́но наꙋча́ше.

Да тѣле́съ пока́жетъ воста́нїе живонача́льникъ, возставлѧ́етъ мертвеца̀, ѿню́дъ не и҆мꙋ́ща дыха́нїѧ пло́тїю, прⷪ҇ро́ка показꙋ́ѧ пречестно́е.

Ны́нѣ въ бж҃е́ственнѣмъ поко́и бг҃а мо́лиши, чꙋ́дне, блаже́нство ᲂу҆лꙋчи́ти при́снѡ тѧ̀ блажа́щымъ.

Бг҃оро́диченъ:

Ра́дꙋйсѧ, бцⷣе, мт҃и хрⷭ҇та̀ бг҃а, є҆го́же родила̀ є҆сѝ, молѝ, согрѣше́нїй ѡ҆ставле́нїе дарова́ти вѣ́рою воспѣва́ющымъ тѧ̀.

И҆́нъ. І҆рмо́съ:

Ꙗ҆́кѡ сотворѝ мнѣ̀ вели̑чїѧ си́льный, и҆ ст҃о и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

Ст҃и́телей красота̀, мона́хѡвъ ᲂу҆добре́нїе, всѣ́хъ вѣ́рныхъ ѻ҆́бразъ, це́ркве па́стырь, и҆ правосла́вныхъ степе́нь, ты̀ є҆сѝ, меѳо́дїе.

И҆лїинꙋ̀ ре́вность стѧжа́въ, и҆спо́лнилъ є҆сѝ стꙋда̀ беззакѡ́нныѧ і҆ерє́и, воплоще́нїѧ гдⷭ҇нѧ непокланѧ́ющихсѧ ѻ҆́бразꙋ, мꙋ́дре меѳо́дїе.

Ликꙋ́ѧ со а҆́гг҃лы предъ лице́мъ и҆зба́вителѧ, и҆ сла́вы є҆гѡ̀ наслажда́ѧсѧ, моли́твами твои́ми на́съ ѿ всѧ́кихъ и҆скꙋше́нїй и҆зба́ви, меѳо́дїе.

Бг҃оро́диченъ:

Пое́мъ твоѐ ржⷭ҇тво̀, и҆ сла́вимъ и҆зъ тебѐ рожде́ннаго, ꙗ҆́кѡ бг҃а же и҆ чл҃вѣ́ка, мт҃и дв҃о чⷭ҇таѧ. є҆го́же молѝ прилѣ́жнѡ, поми́ловати на́съ.

Свѣти́ленъ. Подо́бенъ: Нб҃о ѕвѣзда́ми:

И҆лїинꙋ̀ благода́ть сꙋгꙋ́бꙋ прїѧ́лъ є҆сѝ ѿ бг҃а, є҆лїссе́е бг҃облаже́нне: и҆ просѧ́щымъ ᲂу҆ тебє̀ вѣ́рнѡ, сꙋгꙋ́бѡ и҆сцѣлє́нїѧ дае́ши, дꙋша́мъ же и҆ тѣ́лѡмъ.

Сла́ва, ст҃и́телѧ. Подо́бенъ: Оу҆ч҃никѡ́мъ зрѧ́щымъ:

Прїиди́те, вѣ́рнїи, пое́мъ бжⷭ҇твеннꙋю па́мѧть ст҃и́телѧ дне́сь меѳо́дїа, въ ро́вѣ преиспо́днемъ вве́ржена: да дꙋ́шы и҆зба́витъ погребє́нныѧ во тмѣ̀ ѿ лꙋка́вагѡ нече́стїѧ.

И҆ ны́нѣ, пра́здника, и҆лѝ бг҃оро́диченъ:

Препѣ́таѧ, дв҃о и҆ бцⷣе, бг҃а неизрече́ннѡ ро́ждшаѧ, прилѣ́жнѡ молѝ сн҃а твоего̀ ѡ҆ на́съ рабѣ́хъ твои́хъ, ᲂу҆ще́дрити и҆ спастѝ, любо́вїю хва́лѧщыѧ тѧ̀.

На стїхо́внѣ ѻ҆ктѡ́иха. Сла́ва, гла́съ ѕ҃:

Ѕвѣзда̀ возсїѧ̀ бл҃гоче́стїѧ ѿ за́пада со́лнца ви́димагѡ, вели́кїй во ст҃и́телехъ меѳо́дїй, и҆ мглꙋ̀ пресѣ́къ ѕлосла́вныхъ, почѝ на и҆́стиннѣмъ восто́цѣ, пра́веднагѡ сл҃нца хрⷭ҇та̀ бг҃а на́шегѡ, и҆ та́мѡ со безпло́тными водворѧ́ѧсѧ ли̑ки, и҆ престо́лꙋ предстоѧ̀ трⷪ҇ческомꙋ, ꙗ҆́кѡ преподо́бенъ, ꙗ҆́кѡ мꙋ́ченикъ, ꙗ҆́кѡ ст҃и́тель, ꙗ҆́кѡ патрїа́рхъ дѣѧ́нїемъ и҆ видѣ́нїемъ, на́мъ про́ситъ, вѣ́рою творѧ́щымъ свѧще́ннꙋю є҆гѡ̀ па́мѧть, ве́лїѧ ми́лости.

И҆ ны́нѣ, пра́здника, и҆лѝ бг҃оро́диченъ:

Крⷭ҇тобг҃оро́диченъ. Подо́бенъ: Тридне́венъ:

Зача́тїе твоѐ безсѣ́менное, и҆ ржⷭ҇тво̀ несказа́нное помышлѧ́ющи, дивлю́сѧ ѕѣлѡ̀, ка́кѡ си́це, ꙗ҆́коже ѕлодѣ́й, бл҃говоли́лъ є҆сѝ ᲂу҆мре́ти, сн҃е; пречⷭ҇таѧ взыва́ше.

На лїтꙋргі́и прокі́менъ, гла́съ д҃: Ты̀ і҆ере́й во вѣ́къ по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇ви моемꙋ̀: А҆пⷭ҇лъ собо́рнагѡ посла́нїѧ і҆а́кѡвлѧ, зача́ло н҃з. А҆ллилꙋ́їа, гла́съ д҃: Мѡѷсе́й и҆ а҆арѡ́нъ: Є҆ѵⷢ҇лїе лꙋкѝ, зача́ло д҃і. Прича́стенъ: Въ па́мѧть вѣ́чнꙋю бꙋ́детъ пра́ведникъ:


 День 13День 14День 15