Минея. Июнь (церковнославянским шрифтом)

 День 31День 32

Въ недѣ́лю в҃ по ст҃ѣ́й пѧтидесѧ́тницѣ, всѣ́хъ ст҃ы́хъ, въ землѝ рѡссі́йстѣй просїѧ́вшихъ. Творе́нїе є҆пі́скопа а҆ѳана́сїѧ.

На ма́лой вече́рни

На Гдⷭ҇и воззва́хъ: стїхи̑ры воскрє́сны на д҃. гла́съ а҃: Вечє́рнїѧ на́шѧ мл҃твы: Ѡ҆быди́те лю́дїе: Прїиди́те, лю́дїе: Сла́ва, ст҃ы́хъ, гла́съ д҃: Бжⷭ҇твеннїи ѻ҆ц҃ы̀: И҆ ны́нѣ, Бг҃оро́диченъ догма́тикъ, гла́съ а҃: Дѣ́вственное торжество̀:

Стїхи̑ры ст҃ы́хъ, гла́съ д҃. Подо́бенъ: Ꙗ҆́кѡ до́блѧ:

Ꙗ҆́кѡ и҆збра́нныхъ ѿ люде́й рꙋ́сскихъ, ст҃і́и срѡ́дницы на́ши, соше́дшесѧ дне́сь, восхвалѧ́емъ ва́съ, ꙗ҆́кѡ, тече́нїе соверши́вше, вѣ́рꙋ сохрани́ли є҆стѐ и҆ прїѧ́сте ѿ бг҃а побѣ́ды ва́шеѧ вѣнцы̀: є҆го́же моли́те ѿ бѣ́дъ и҆ скорбе́й и҆зба́витисѧ вѣ́рою соверша́ющымъ всечⷭ҇тнꙋ́ю па́мѧть ва́шꙋ.

Вѣ́ры бронѧ́ми, и҆ щито́мъ бл҃года́ти, и҆ креста̀ копїе́мъ воѻрꙋжи́вшесѧ, сопрѡти́внымъ си́ламъ непобѣди́мы бы́сте и҆, ꙗ҆́кѡ бжⷭ҇твеннїи хра́бѡрницы, де́мѡнскїѧ ѡ҆полчє́нїѧ побѣди́вше, со а҆́гг҃лы ликꙋ́ете, вѣ̑рныѧ же застꙋпа́ете, и҆ ѡ҆сщ҃а́ете, и҆ сп҃са́ете, призыва́емїи.

Ꙗ҆́кѡ ѕвѣ́зды многосвѣ̑тлыѧ, ꙗ҆́кѡ свѣ́тъ ве́лїй сїѧ́ющїи, на тве́рди нбⷭ҇нѣй ва́съ вѣ́мы, и҆ ꙗ҆́кѡ би́серъ многоцѣ́нный, ꙗ҆́кѡ ка́менїе блиста́ющее, ꙗ҆́кѡ сы́ны днѐ, ꙗ҆́кѡ и҆збра́нныхъ ѿ ро́да рꙋ́сскагѡ, ꙗ҆́кѡ побо́рники вѣ́рныхъ прославлѧ́емъ, соверша́юще ва́шꙋ па́мѧть, бл҃же́ннїи.

Сла́ва, гла́съ д҃:

Бжⷭ҇твеннїи ѻ҆ц҃ы̀, бы́сте цвѣ́ти дх҃о́внїи рꙋ́сскїѧ землѝ, похвала̀ на́ша и҆ ᲂу҆твержде́нїе и҆ всѣ̑мъ бл҃гоꙋти́шное приста́нище: ѡ҆ ва́съ бо землѧ̀ на́ша хва́литсѧ, стѧжа́вши ва́съ, ꙗ҆́кѡ неистощи́мое сокро́вище, и҆ ны́нѣ, а҆́ще тѣле́снѣ ꙗ҆зы́къ ва́шъ ᲂу҆молчѐ, но чꙋдеса̀ свидѣ́тельствꙋютъ просла́вльшаго ва́съ гдⷭ҇а. є҆мꙋ́же моли́тесѧ дарова́ти дꙋша́мъ на́шымъ ве́лїю млⷭ҇ть.

И҆ ны́нѣ, бг҃оро́диченъ, гла́съ то́йже:

Бцⷣе, всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ и҆ ли́ца и҆́хъ посрамѝ, не кла́нѧющихсѧ, нижѐ чтꙋ́щихъ, пречⷭ҇таѧ, чⷭ҇тны́й тво́й ѻ҆́бразъ.

На стїхо́внѣ є҆ди́на стїхи́ра воскре́сна, гла́съ а҃: Стра́стїю твое́ю хрⷭ҇тѐ: Посе́мъ сті́хъ: Бг҃ъ на́мъ: и҆ стїхи̑ры, гла́съ и҃: Ѽ, пресла́внагѡ чꙋдесѐ на нб҃сѝ: Сті́хъ: Гдⷭ҇ь си́лъ: Та́же стїхи́ра: Ѽ, пресла́внагѡ чꙋдесѐ! хрⷭ҇та̀ ра́ди: (зрѝ на рѧдꙋ̀) (с. 497) И҆ ны́нѣ, бг҃оро́диченъ, гла́съ то́йже: Ѽ, пресла́внагѡ чꙋдесѐ! нб҃сѝ и҆ землѝ цр҃це: (зрѝ страни́цꙋ 519). И҆лѝ бг҃оро́диченъ, гла́съ д҃: При́снѡ страна̀ рѡссі́йскаѧ (зрѝ страни́цꙋ 541).

Стїхи̑ры ст҃ы́хъ на стїхо́внѣ, гла́съ и҃.

Подо́бенъ: Ѽ, пресла́внагѡ чꙋдесѐ:

Ѽ, пресла́внагѡ чꙋдесѐ! на нб҃сѝ и҆ на землѝ ра́дость дне́сь возсїѧ̀ въ па́мѧть всѣ́хъ рꙋ́сскихъ ст҃ы́хъ: ѿ а҆́гг҃лъ хвала́ми вѣнча́ютсѧ и҆ ѿ чл҃вѣ̑къ пѣ̑нїѧ прїе́млютъ. ѽ, ка́кѡ въ странѣ̀ на́шей подвиза́шасѧ, ка́кѡ бг҃ꙋ ᲂу҆годи́ша, и҆́миже вра́гъ падѐ лꙋка́вый, хрⷭ҇тꙋ̀ побѣ́ждшꙋ того̀.

Сті́хъ: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀.

Ѽ, пресла́внагѡ чꙋдесѐ! чꙋде́съ свѣтлостьмѝ со́лнца свѣтлѣ́йше при́снѡ ст҃і́и срѡ́дницы на́ши свѣ́тѧтъ концє́мъ рꙋ́сскїѧ землѝ, ѿ невече́рнѧгѡ свѣ́та ѡ҆блиста́еми, и҆́хже сїѧ̑нїи ѻ҆́блацы ѿ страны̀ на́шеѧ ѿгонѧ́ютсѧ ва́рварстїи и҆ де́мѡни побѣжда́ютсѧ.

Сті́хъ: Гдⷭ҇ь си́лъ съ на́ми, застꙋ́пникъ на́шъ, бг҃ъ і҆а́кѡвль.

Ѽ, пресла́внагѡ чꙋдесѐ! хрⷭ҇та̀ ра́ди подвиза́выйсѧ требл҃же́нный собо́ръ рꙋ́сскихъ ст҃ы́хъ ко врагѡ́мъ ст҃ы́ѧ рꙋсѝ всегда̀ ꙗ҆влѧ́етсѧ ѻ҆рꙋ́жїе ѻ҆бою́дꙋ ѻ҆́строе, пожина́ѧ си́хъ вышє́нїѧ. тѣ́мже къ немꙋ̀ возопїи́мъ: ст҃і́и срѡ́дницы на́ши, покры́йте и҆ ны́нѣ на́съ, вѣ́рою почита́ющихъ ва́съ ѿ любвѐ всегда̀.

Сла́ва, гла́съ а҃. Самогла́сенъ:

Всѝ пѣ́сньми дх҃о́вными возопїи́мъ: ра́дꙋйсѧ и҆ весели́сѧ, гра́де кі́еве, ꙗ҆ви́вый на́мъ ѻ҆́льгꙋ бг҃омꙋ́дрꙋю, ра́дꙋйсѧ гра́де сꙋ́ждалю, и҆зрасти́вый пло́дъ дре́ва ра́йскагѡ, є҆ѵфросѵ́нїю бл҃говѣрнꙋ́ю, по́стникѡвъ ᲂу҆твержде́нїе, съ ни́ми же ᲂу҆бл҃жи́мъ и҆ є҆ѵдокі́ю моско́вскꙋю пресла́внꙋю, и҆ феврѡ́нїю мꙋ́ромскꙋю и҆ а҆́ннꙋ ка́шинскꙋю, и҆ є҆ѵфросѵ́нїю, по́лоцкїѧ землѝ ᲂу҆краше́нїе, и҆ всѧ̑ жєны̀, ѿ ро́да на́шегѡ бг҃ꙋ ᲂу҆годи́вшыѧ, и҆ къ ни̑мъ возопїи́мъ: ѽ всебл҃жє́нныѧ и҆ ст҃ы̑ѧ, моли́тесѧ ѡ҆ на́съ ко гдⷭ҇ꙋ, дарова́ти на́мъ ве́лїю млⷭ҇ть.

И҆ ны́нѣ, гла́съ є҃. Подо́бенъ: Вострꙋ́бимъ трꙋбо́ю:

Вострꙋ́бимъ трꙋбо́ю пѣ́сней, воспои́мъ согла́снѡ застꙋ́пницѣ страны̀ на́шеѧ, цр҃и́цѣ бцⷣѣ: ра́дꙋйсѧ, бл҃говоле́нїемъ твои́мъ ѻ҆те́чество на́ше ѿ лѣ́тъ дре́внихъ вѣнча́вшаѧ и҆ бл҃года́ть томꙋ̀ и҆сточа́ющаѧ. тѣ́мже и҆ пречⷭ҇тый тво́й покро́въ и҆ па́мѧти тма́ми тє́мъ чꙋде́съ твои́хъ цр҃ковь на́ша рꙋ́сскаѧ свѣ́тлѡ пра́зднꙋетъ. не ѿимѝ ᲂу҆̀бо ѿ на́съ, ѽ влⷣчце, и҆ ны́нѣ млⷭ҇ти твоѧ̑, при́зри на скѡ́рби и҆ тѣснотꙋ̀ на́шꙋ и҆ воздви́гни на́съ держа́внымъ застꙋпле́нїемъ твои́мъ.

По Ны́нѣ ѿпꙋща́еши: тропа́рь воскре́сенъ, гла́съ а҃: Ка́мени запеча́танꙋ: Сла́ва, ст҃ы́хъ, гла́съ и҃: Ꙗ҆́коже пло́дъ: И҆ ны́нѣ, бг҃оро́диченъ, гла́съ д҃: Застꙋ́пнице ᲂу҆се́рднаѧ:

Тропа́рь ст҃ы́хъ, гла́съ и҃:

Ꙗ҆́коже пло́дъ кра́сный твоегѡ̀ сп҃си́тельнагѡ сѣ́ѧнїѧ, землѧ̀ рѡссі́йскаѧ прино́ситъ тѝ, гдⷭ҇и, всѧ̑ ст҃ы̑ѧ, въ то́й просїѧ́вшыѧ. тѣ́хъ мл҃твами въ ми́рѣ глꙋбо́цѣ цр҃ковь и҆ странꙋ̀ на́шꙋ бцⷣею соблюдѝ, многомлⷭ҇тиве.

Сла́ва, и҆ ны́нѣ, бг҃оро́диченъ, гла́съ д҃:

Застꙋ́пнице ᲂу҆се́рднаѧ, мт҃и гдⷭ҇а вы́шнѧгѡ, за всѣ́хъ мо́лиши сн҃а твоего̀, хрⷭ҇та̀ бг҃а на́шего, и҆ всѣ̑мъ твори́ши сп҃сти́сѧ, въ держа́вный тво́й покро́въ прибѣга́ющымъ: всѣ́хъ на́съ застꙋпѝ, ѽ гпⷭ҇жѐ цр҃и́це и҆ влⷣчце, и҆̀же въ напа́стехъ, и҆ ско́рбехъ, и҆ болѣ́знехъ ѡ҆бремене́нныхъ грѣхѝ мно́гими, предстоѧ́щихъ и҆ молѧ́щихсѧ тебѣ̀ ᲂу҆миле́нною дꙋше́ю и҆ сокрꙋше́ннымъ се́рдцемъ пред̾ пречⷭ҇тымъ твои́мъ ѻ҆́бразомъ со слеза́ми и҆ невозвра́тнѡ наде́ждꙋ и҆мꙋ́щихъ на тѧ̀ и҆збавле́нїѧ всѣ́хъ ѕѡ́лъ, всѣ̑мъ полє́знаѧ да́рꙋй и҆ всѧ̑ сп҃сѝ, бцⷣе дв҃о, ты́ бо є҆сѝ бжⷭ҇твенный покро́въ рабѡ́мъ твои̑мъ.

Послѣ́дованїе моле́бнагѡ пѣ́нїѧ

По ѿпꙋ́стѣ вече́рни и҆схо́димъ ко і҆кѡ́нѣ пра́здника, пою́ще стїхи́рꙋ пра́здникꙋ, гла́съ ѕ҃. Подо́бенъ: Всѐ ѿло́жше:

Всѐ ѿложи́вше жите́йское томле́нїе и҆ сла́дость текꙋ́щꙋю презрѣ́вше, кре́стъ взѧ́сте, ꙗ҆́кѡ и҆́го бжⷭ҇твенное, и҆ хрⷭ҇тꙋ̀ послѣ́довасте, и҆ къ нбⷭ҇номꙋ поко́ю чꙋ́днѡ всели́стесѧ. ѽ дрꙋ́зи хрⷭ҇тѡ́вы, сосꙋ́ди чⷭ҇тні́и, ст҃і́и всѝ, въ рѡссі́и просїѧ́вшїи, прїиди́те посредѣ̀ на́съ неви́димѡ, предначина́юще торжество̀ и҆ пѣ́нїе, сподоблѧ́юще дарѡ́въ невеще́ственныхъ ва́шъ пра́здникъ соверша́ющихъ ст҃олѣ́пнѡ.

И҆ соверша́емъ послѣ́дованїе моле́бнагѡ пѣ́нїѧ. Благослови́вшꙋ предстоѧ́телю, чте́цъ глаго́летъ: Прїиди́те поклони́мсѧ: (три́жды). И҆ пое́мъ на ѻ҆́ба ли̑ка ѱало́мъ и҆збра́нный. Предстоѧ́тель же въ сїѐ вре́мѧ раздае́тъ свѣщи̑ возжжє́нныѧ сослꙋжа́щымъ и҆ бра́тїи.

а҃ ли́къ: Гдⷭ҇и, гдⷭ҇ь на́шъ, ꙗ҆́кѡ чꙋ́днѡ и҆́мѧ твоѐ по всѣ́й землѝ. в҃ ли́къ: Всѧ̀ землѧ̀ да покло́нитсѧ тебѣ̀ и҆ пое́тъ тебѣ̀, да пое́тъ же и҆́мени твоемꙋ̀, вы́шнїй. а҃. Кто̀ бг҃ъ ве́лїй, ꙗ҆́кѡ бг҃ъ на́шъ; ты̀ є҆сѝ бг҃ъ, творѧ́й чꙋдеса̀. в҃. Кто̀ возглаго́летъ си̑лы гдⷭ҇ни, слы̑шаны сотвори́тъ всѧ̑ хвалы̑ є҆гѡ̀; а҃. Помѧнꙋ́хъ дни̑ дрє́внїѧ, поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твое́ю поꙋча́хсѧ. в҃. Прїиди́те, ви́дите дѣла̀ бж҃їѧ, ко́ль стра́шенъ въ совѣ́тѣхъ па́че сынѡ́въ чл҃вѣ́ческихъ. а҃. И҆сповѣ́дайтесѧ гдⷭ҇еви и҆ призыва́йте и҆́мѧ є҆гѡ̀, возвѣсти́те во ꙗ҆зы́цѣхъ дѣла̀ є҆гѡ̀. в҃. Воспо́йте є҆мꙋ̀ и҆ по́йте є҆мꙋ̀, повѣ́дите всѧ̑ чꙋдеса̀ є҆гѡ̀. а҃. Хвали́тесѧ ѡ҆ и҆́мени ст҃ѣ́мъ є҆гѡ̀, да возвесели́тсѧ се́рдце и҆́щꙋщихъ гдⷭ҇а. в҃. Взыщи́те гдⷭ҇а и҆ ᲂу҆тверди́тесѧ. взыщи́те лица̀ є҆гѡ̀ вы́нꙋ. а҃. Помѧни́те чꙋдеса̀ є҆гѡ̀, ꙗ҆̀же сотворѝ, чꙋдеса̀ є҆гѡ̀ и҆ сꙋдьбы̑ ᲂу҆́стъ є҆гѡ̀. в҃. То́й гдⷭ҇ь бг҃ъ на́шъ, по всѣ́й землѝ сꙋдьбы̑ є҆гѡ̀. а҃. Помѧнѝ на́съ гдⷭ҇и, во бл҃говоле́нїи люде́й твои́хъ, посѣтѝ на́съ сп҃се́нїемъ твои́мъ. в҃. Воскреснѝ, гдⷭ҇и, помозѝ на́мъ и҆ и҆зба́ви на́съ и҆́мене ра́ди твоегѡ̀. а҃. Доко́лѣ, гдⷭ҇и, прогнѣ́ваешисѧ до конца̀; разжже́тсѧ ꙗ҆́кѡ ѻ҆́гнь рве́нїе твоѐ. в҃. Не помѧнѝ на́шихъ беззако́нїй пе́рвыхъ, ско́рѡ да предварѧ́тъ ны̀ щедрѡ́ты твоѧ̑, гдⷭ҇и, ꙗ҆́кѡ ѡ҆бнища́хомъ ѕѣлѡ̀. а҃. Помозѝ на́мъ, бж҃е, сп҃си́телю на́шъ, сла́вы ра́ди и҆́мене твоегѡ̀, гдⷭ҇и, и҆зба́ви ны̀ и҆ ѡ҆чи́сти грѣхѝ на́шѧ и҆́мене ра́ди твоегѡ̀. в҃. Да вни́детъ пред̾ тѧ̀ воздыха́нїе ѡ҆кова́нныхъ, по вели́чїю мы́шцы твоеѧ̀ снабдѝ сы́ны ᲂу҆мерщвле́нныхъ. а҃. Ꙗ҆вѝ на́мъ, гдⷭ҇и, млⷭ҇ть твою̀ и҆ сп҃се́нїе твоѐ да́ждь на́мъ. в҃. Ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ. а҃. Дади́те сла́вꙋ бг҃ови, на і҆и҃ли велелѣ́пота є҆гѡ̀ и҆ си́ла є҆гѡ̀ на ѻ҆́блацѣхъ. в҃. Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка. а҃. Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ и҆ ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь. в҃. А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀, бж҃е. а҃. А҆ллилꙋ́їа: в҃. А҆ллилꙋ́їа:

Посе́мъ Бг҃ъ гдⷭ҇ь: во гла́съ д҃ со стїха́ми.

а҃ ли́къ пое́тъ тропа́рь, гла́съ д҃:

І҆ерꙋсали́ма вы́шнѧгѡ гра́жданы, ѿ землѝ на́шеѧ возсїѧ́вшыѧ и҆ бг҃ꙋ во всѧ́цѣмъ ᲂу҆годи́вшыѧ, прїиди́те, воспои́мъ, вѣ́рнїи: ѽ всебл҃же́ннїи землѝ рѡссі́йскїѧ застꙋ̑пницы, моли́тесѧ ко гдⷭ҇ꙋ, да поми́лꙋетъ сїю̀ ѿ гнѣ́ва своегѡ̀, и҆сцѣлѧ́ѧ сокрꙋше́нїе є҆ѧ̀, и҆ вѣ̑рныѧ лю́ди своѧ̑ ᲂу҆тѣ́шитъ.

в҃ ли́къ пое́тъ то́йже тропа́рь. а҃ ли́къ: Сла́ва, и҆ ны́нѣ: Бг҃оро́диченъ, гла́съ то́йже:

Къ застꙋ́пницѣ страны̀ на́шеѧ, приснодв҃ѣ бцⷣѣ притеце́мъ и҆ къ первопи́саннѣй і҆кѡ́нѣ є҆ѧ̀ ны́нѣ припаде́мъ, съ вѣ́рою зовꙋ́ще и҆з̾ глꙋбины̀ дꙋшѝ: ѽ мт҃и бж҃їѧ, сп҃сѝ зе́млю рꙋ́сскꙋю, и҆сцѣлѝ сокрꙋше́нїе є҆ѧ̀ и҆ вѣ̑рныѧ лю́ди ᲂу҆тѣ́ши.

Посе́мъ пое́мъ на ѻ҆́ба ли̑ка и҆ны́й ѱало́мъ и҆збра́нный:

а҃ ли́къ: И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. в҃ ли́къ: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀. а҃. Мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. в҃. Сѣ́ющїи слеза́ми, ра́достїю по́жнꙋтъ. а҃. И҆ воззва́ша ко гдⷭ҇ꙋ, внегда̀ скорбѣ́ти и҆̀мъ, и҆ ѿ нꙋ́ждъ и҆́хъ сп҃сѐ ѧ҆̀. в҃. Воззва́ша пра́веднїи, и҆ гдⷭ҇ь ᲂу҆слы́ша и҆̀хъ, и҆ ѡ҆ всѣ́хъ скорбе́й и҆́хъ и҆зба́ви и҆̀хъ. а҃. Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. в҃. Пра́вєдницы наслѣ́дѧтъ зе́млю и҆ вселѧ́тсѧ въ вѣ́къ вѣ́ка на не́й. а҃. Весели́тесѧ ѡ҆ гдⷭ҇ѣ и҆ ра́дꙋйтесѧ, пра́веднїи, и҆ хвали́тесѧ всѝ пра́вїи се́рдцемъ. в҃. Весели́тесѧ, пра́веднїи ѡ҆ гдⷭ҇ѣ и҆ и҆сповѣ́дайте па́мѧть ст҃ы́ни є҆гѡ̀. а҃. Пра́ведникъ, ꙗ҆́кѡ фі́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. в҃. Бл҃же́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀. а҃. Ди́венъ бг҃ъ во ст҃ы́хъ свои́хъ, бг҃ъ і҆и҃левъ, то́й да́стъ си́лꙋ и҆ держа́вꙋ лю́демъ свои̑мъ, бл҃гослове́нъ бг҃ъ. в҃. Лю́бѧщїи гдⷭ҇а, ненави́дите ѕла̑ѧ, храни́тъ гдⷭ҇ь дꙋ́шы прпⷣбныхъ свои́хъ. а҃. Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀. в҃. Собери́те є҆мꙋ̀ прпⷣбныѧ є҆гѡ̀, завѣща́ющыѧ завѣ́тъ є҆гѡ̀ ѡ҆ же́ртвахъ. а҃. Млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀, и҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀ и҆ по́мнѧщихъ за́пѡвѣди є҆гѡ̀ твори́ти ѧ҆̀. в҃. Вѣ́сть гдⷭ҇ь пꙋти̑ непоро́чныхъ, и҆ достоѧ́нїе и҆́хъ въ вѣ́къ бꙋ́детъ. а҃. Гдⷭ҇ь воцари́сѧ, да ра́дꙋетсѧ землѧ̀, да веселѧ́тсѧ ѻ҆́строви мно́зи. в҃. Возвѣсти́те во ꙗ҆зы́цѣхъ сла́вꙋ є҆гѡ̀, во всѣ́хъ лю́дѣхъ чꙋдеса̀ є҆гѡ̀. г҃. Воцари́сѧ бг҃ъ над̾ ꙗ҆зы́ки, бг҃ъ сѣди́тъ на престо́лѣ ст҃ѣ́мъ свое́мъ. в҃. Сп҃си́ ны, гдⷭ҇и бж҃е на́шъ, и҆ собери́ ны ѿ ꙗ҆зы̑къ и҆сповѣ́датисѧ и҆́мени твоемꙋ̀ ст҃о́мꙋ, хвали́тисѧ во хвалѣ̀ твое́й. а҃. Высо́къ над̾ всѣ́ми ꙗ҆зы́ки гдⷭ҇ь, над̾ нб҃сы̀ сла́ва є҆гѡ̀. в҃. Ѿ востѡ́къ со́лнца до за́падъ хва́льнѡ и҆́мѧ гдⷭ҇не.

По ѡ҆конча́нїи ѱалма̀ а҆́бїе начина́емъ пѣ́ти канѡ́нъ ст҃ы̑мъ, гла́съ и҃. Пое́мъ же є҆го̀ без̾ і҆рмосѡ́въ на д҃.

Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Припѣ́въ: Всѝ ст҃і́и землѝ рꙋ́сскїѧ, моли́те бг҃а ѡ҆ на́съ.

а҃ ли́къ: Мно́гими содержи́мъ напа́стьми, къ ва́мъ прибѣга́емъ, спасе́нїѧ и҆́щꙋще, ѽ ст҃і́и срѡ́дницы на́ши, ѿ лю́тыхъ бѣ́дъ и҆ нꙋ́ждъ сп҃си́те на́съ.

в҃ ли́къ: Страсте́й прило́зи и҆ мнѡ́гїѧ печа̑ли и҆ бѣды̑ ѡ҆бꙋрева́ютъ на́съ, ᲂу҆тѣше́нїе на́мъ пода́йте, ст҃і́и, къ бг҃ꙋ ва́шими мл҃твами.

а҃ ли́къ: Сла́ва: Сп҃са хрⷭ҇та̀ моли́те, рѡссі́йстїи чꙋдотво́рцы, и҆зба́витисѧ на́мъ ѿ бѣ́дъ и҆ скорбе́й, земли́ же на́шей ѿ ва́рварскагѡ нахожде́нїѧ ва́шимъ те́плымъ предста́тельствомъ.

в҃ ли́къ: И҆ ны́нѣ: Въ ско́рби на́съ и҆ бѣда́хъ сꙋ́щихъ посѣще́нїѧ бжⷭ҇твеннагѡ и҆ промышле́нїѧ ѿ тебѐ сподо́би, ѽ бг҃ома́ти влⷣчице.

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

а҃ ли́къ: Застꙋ̑пницы и҆ покрови́телїе землѝ на́шеѧ вы̀ є҆стѐ, бж҃їи ᲂу҆гѡ́дницы, напра́вите на́съ ко приста́нищꙋ сп҃се́нїѧ, вы́ бо є҆стѐ вѣ̑рнымъ ѡ҆гражде́нїе.

в҃ ли́къ: Мо́лимъ ва́съ, бл҃же́ннїи: дꙋше́вное смꙋще́нїе и҆ печа́ли бꙋ́рю разори́ти и҆ тишинꙋ̀ на́мъ пода́ти нача́льника тишины̀ хрⷭ҇та̀ ᲂу҆моли́те.

а҃ ли́къ: Сла́ва: Ст҃ы̑мъ дрє́внимъ подража́вшїи и҆ ѿ бг҃а бл҃года́тїю ѡ҆богати́вшїисѧ, помога́йте на́мъ, ча́дѡмъ ва́шымъ, при́снѡ восхвалѧ́ющымъ ва́съ, ꙗ҆́кѡ бж҃їихъ ᲂу҆го́дникѡвъ.

в҃ ли́къ: И҆ ны́нѣ: Лю́тыми недꙋ́ги и҆ страстьмѝ грѣхо́вными ѡ҆бꙋрева́ємымъ, и҆ ва́рварскими нападе́нїи и҆стѧзꙋє́мымъ, и҆ въ ро́въ поги́бели впа́дающымъ, ты̀ на́мъ помозѝ, бцⷣе дв҃о.

Посе́мъ сщ҃е́нницы и҆ ѻ҆́ба ли̑ка вкꙋ́пѣ пою́тъ катава́сїю:

Моли́те бг҃а ѡ҆ на́съ, всѝ ст҃і́и землѝ рꙋ́сскїѧ, ꙗ҆́кѡ мы̀ ᲂу҆се́рднѡ къ ва́мъ прибѣга́емъ, скѡ́рымъ помо́щникѡмъ и҆ мл҃твенникѡмъ ѡ҆ дꙋша́хъ на́шихъ.

Є҆ктенїа̀ сꙋгꙋ́баѧ. Возгла́съ: Ꙗ҆́кѡ ми́лостивъ: По возгла́сѣ а҃ ли́къ пое́тъ сѣда́ленъ, гла́съ в҃:

Моле́нїе те́плое принеси́те, прехва́льнїи, къ млⷭ҇ти и҆сто́чникꙋ, гдⷭ҇ꙋ, ѡ҆ ст҃ѣ́й рꙋсѝ молѧ́щесѧ, бцⷣꙋ влⷣчицꙋ вкꙋ́пѣ съ собо́ю подви́гните на мл҃твꙋ и҆ ѿ бѣ́дъ и҆зба́вите на́съ, всѣ̑мъ вско́рѣ предста́тельствꙋющїи.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

в҃ ли́къ: Страсте́й на́шихъ смꙋще́нїе и҆ мно́гихъ бѣ́дъ бꙋ́рю предста́тельствомъ ва́шимъ ко гдⷭ҇ꙋ ᲂу҆толи́ти потщи́тесѧ, ст҃і́и.

а҃ ли́къ: Милосе́рдїѧ бе́зднꙋ простри́те на́мъ, бл҃же́ннїи, призыва́ющымъ ва́съ на по́мощь, вы́ бо ᲂу҆ милосе́рдагѡ бг҃а дерзнове́нїе ве́лїе стѧжа́ли є҆стѐ.

в҃ ли́къ: Сла́ва: Наде́ждꙋ и҆мꙋ́ще ва́съ, сла́внїи, и҆ ꙗ҆́кѡ стѣ́нꙋ недви́жимꙋ, къ бг҃ꙋ ва́шѧ мл҃твы стѧжа́вше, ѕѡ́лъ и҆ всѣ́хъ бѣ́дъ и҆збавлѧ́емсѧ.

а҃ ли́къ: И҆ ны́нѣ: И҆сцѣлѝ, чⷭ҇таѧ, дꙋшє́вныѧ на́шѧ не́мѡщи и҆ стра̑сти тѣлє́сныѧ, поспѣшѝ, гпⷭ҇жѐ, здра́вїе пода́ти, врача̀ всѣ̑мъ ро́ждшаѧ, хрⷭ҇та̀.

Пѣ́снь є҃. І҆рмо́съ:

Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, человѣколю́бче.

а҃ ли́къ: И҆спо́лните весе́лїѧ жи́знь на́шꙋ, и҆збавлѧ́юще на́съ ѿ ва́рварскагѡ нахожде́нїѧ и҆ междоꙋсо́бныѧ бра́ни.

в҃ ли́къ: И҆зба́вите на́съ ѿ бѣ́дъ, ꙗ҆́кѡ предста́телїе те́плїи и҆ мл҃твєнницы ѡ҆ дꙋша́хъ на́шихъ.

а҃ ли́къ: Сла́ва: Разрꙋши́те мглꙋ̀ прегрѣше́нїй на́шихъ просвѣще́нїемъ ва́шеѧ свѣ́тлости, свѣти̑льницы бжⷭ҇твеннїи и҆ пресвѣ́тлїи.

в҃ ли́къ: И҆ ны́нѣ: И҆зба́ви на́съ ѿ бѣ́дъ, бцⷣе чⷭ҇таѧ, вѣ́чное ро́ждши и҆збавле́нїе и҆ ми́ръ, всѧ́къ ᲂу҆́мъ превосходѧ́щїй.

Пѣ́снь ѕ҃. І҆рмо́съ:

Мл҃твꙋ пролїю̀ ко гдⷭ҇ꙋ. и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.

в҃ ли́къ: Мл҃твами ва́шими, бл҃же́ннїи, ᲂу҆тѣше́нїе на́мъ, въ ско́рби сꙋ́щымъ и҆спроси́те, вѣ́рꙋ возста́вите и҆ лю́ди расточє́нныѧ собери́те, въ ско́рби, ꙗ҆́кѡ і҆ѡ́на, вопїю́щыѧ: ѿ тлѝ, бж҃е, возведѝ на́съ.

а҃ ли́къ: Застꙋ́пники ва́съ вѣ́мы, ѻ҆ц҃ы̀ приснопа́мѧтнїи, и҆ твє́рдыѧ храни́тели землѝ на́шеѧ. тѣ́мже къ ва́мъ прибѣга́юще, млⷭ҇ть прїе́млемъ и҆ бѣ́дъ разли́чныхъ и҆збавлѧ́емсѧ.

в҃ ли́къ: Сла́ва: Ꙗ҆́кѡ стѣ́нꙋ и҆ приста́нище стѧжа́хомъ ва́съ, ст҃і́и, ѡ҆блегче́нїе въ ско́рбехъ, въ бѣда́хъ и҆ напа́стехъ по́мощь, въ болѣ́знехъ и҆сцѣле́нїе и҆ спасе́нїе дꙋша́мъ на́шымъ.

а҃ ли́къ: И҆ ны́нѣ: Застꙋ́пницꙋ тѧ̀ жи́зни вѣ́мы и҆ тве́рдꙋю храни́тельницꙋ, дв҃о, и҆ и҆скꙋше́нїй тꙋ́чи разсѣѧва́ющꙋю, и҆ бѣсѡ́въ нападє́нїѧ ѿгонѧ́ющꙋю, и҆ мо́лимсѧ всегда̀: ѿ ги́бельныхъ страсте́й на́шихъ и҆зба́ви на́съ.

Свѧще́нницы и҆ ѻ҆́ба ли̑ка вкꙋ́пѣ пою́тъ катава́сїю:

Моли́те бг҃а ѡ҆ на́съ, всѝ ст҃і́и землѝ рꙋ́сскїѧ, ꙗ҆́кѡ мы̀ ᲂу҆се́рднѡ къ ва́мъ прибѣга́емъ, скѡ́рымъ помо́щникѡмъ и҆ мл҃твенникѡмъ ѡ҆ дꙋша́хъ на́шихъ.

Є҆ктенїа̀ ма́лаѧ. Конда́къ, гла́съ ѕ҃.

Предста́телїе страны̀ на́шеѧ неꙋсы́пнїи, хода́таи ѡ҆ на́съ ко творцꙋ̀ непреста́нни, не пре́зрите моле́нїй на́шихъ, но, предварѧ́юще на по́мощь, ꙗ҆́кѡ срѡ́дницы на́ши, ᲂу҆скори́те на мл҃твꙋ и҆ потщи́тесѧ на ᲂу҆моле́нїе, предста́тельствꙋюще при́снѡ ѡ҆ чтꙋ́щихъ ва́съ.

Прокі́менъ, гла́съ д҃: Мнѣ́ же ѕѣлѡ̀ че́стни бы́ша дрꙋ́зи твоѝ, бж҃е. Сті́хъ: И҆зочтꙋ̀ и҆̀хъ, и҆ па́че песка̀ ᲂу҆мно́жатсѧ. Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло н҃(є҃і, в҃і-к҃).

Сла́ва: Мл҃твами всѣ́хъ ст҃ы́хъ рꙋ́сскихъ, ми́лостиве, ѡ҆чи́сти мно́жество согрѣше́нїй на́шихъ.

И҆ ны́нѣ: Мл҃твами бцⷣы, ми́лостиве, ѡ҆чи́сти мно́жество согрѣше́нїй на́шихъ.

Поми́лꙋй мѧ̀, бж҃е, по вели́цѣй млⷭ҇ти твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ.

Стїхи́ра, гла́съ ѕ҃:

Не ввѣ́рите на́съ человѣ́ческомꙋ предста́тельствꙋ, ст҃і́и срѡ́дницы, но прїими́те моле́нїѧ на́шѧ, ско́рбь бо ѡ҆бдержи́тъ на́съ, терпѣ́ти не мо́жемъ вра́жескихъ ѡ҆ѕлобле́нїй и҆ ᲂу҆тѣше́нїѧ на землѝ не и҆́мамы. Моле́нїе на́ше не пре́зрите, нбⷭ҇нїи предста́телїе на́ши, ᲂу҆тѣше́нїе на́мъ пода́йте и҆ всѧ̑ полє́знаѧ ѿ бг҃а и҆спроси́те.

Посе́мъ глаго́летъ дїа́конъ мл҃твꙋ: Спасѝ, бж҃е, лю́ди твоѧ̑: (зрѝ ᲂу҆ста́въ на лїті́и, страни́ца 551). Ли́къ: Гдⷭ҇и, поми́лꙋй, в҃і. Возгла́съ: Ми́лостїю и҆ щедро́тами:

Пѣ́снь з҃. І҆рмо́съ:

Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

а҃ ли́къ: На́ше сп҃се́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, прославлѧ́еши ст҃ы́хъ сро́дникѡвъ на́шихъ чꙋдесы̀, и҆́миже ко бл҃гоче́стїю наставлѧ́еми, пое́мъ: ѻ҆тє́цъ на́шихъ бж҃е, бл҃гослове́нъ є҆сѝ.

в҃ ли́къ: Ми́лостиваго ᲂу҆моли́те, ст҃і́и, и҆зба́витисѧ ѿ прегрѣше́нїй и҆ дꙋше́вныхъ скве́рнъ вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

а҃ ли́къ: Сла́ва: Сокро́вище сп҃се́нїѧ вы̀ є҆стѐ, бж҃їи ᲂу҆гѡ́дницы и҆ наста̑вницы покаѧ́нїѧ, вопїю́щымъ: ѻ҆тє́цъ на́шихъ бж҃е бл҃гослове́нъ є҆сѝ.

в҃ ли́къ: И҆ ны́нѣ: Тѣлє́сныѧ сла́бѡсти и҆ дꙋшє́вныѧ недꙋ́ги, бг҃ороди́тельнице, любо́вїю пристꙋпа́ющымъ къ тебѣ̀, дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.

Пѣ́снь и҃. І҆рмо́съ:

Цр҃ѧ̀ нбⷭ҇нагѡ, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.

в҃ ли́къ: По́мощи ва́шеѧ тре́бꙋющихъ не пре́зрите, бл҃же́ннїи, пою́щихъ и҆ превозносѧ́щихъ хрⷭ҇та̀ во вѣ́ки.

а҃ ли́къ: Неможе́нїе дꙋ́шъ на́шихъ и҆сцѣлѧ́ете и҆ ѿ тѣле́сныхъ болѣ́зней возставлѧ́ете превозносѧ́щихъ хрⷭ҇та̀ во вѣ́ки.

в҃ ли́къ: Сла́ва: И҆сцѣлє́нїѧ и҆сточа́ете, бж҃їи ᲂу҆гѡ́дницы, всѣ̑мъ къ ва́мъ притека́ющымъ любо́вїю и҆ хрⷭ҇та̀ превозносѧ́щымъ во вѣ́ки.

а҃ ли́къ: И҆ ны́нѣ: Напа́стей ты̀ прило́ги ѿгонѧ́еши и҆ страсте́й нападє́нїѧ, дв҃о, тѣ́мже тѧ̀ пое́мъ во всѧ̑ вѣ́ки.

в҃ ли́къ: Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще є҆го̀ во вѣ́ки.

І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки. (с. 508)

Пѣ́снь ѳ҃.

а҃ ли́къ, і҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́емъ.

в҃ ли́къ: Моле́нїе на́ше ᲂу҆слы́шавше, честні́и, нече́стїе въ землѝ рꙋ́сстѣй потреби́те, на́съ же всѣ́хъ во правосла́вїи ᲂу҆крѣпи́те.

а҃ ли́къ: Ра́дости сердца̀ на̑ша и҆спо́лните, ст҃і́и, ра́дости неизрече́нныѧ наслажда́ющїисѧ, на́шꙋ грѣхо́внꙋю печа́ль потреблѧ́юще.

в҃ ли́къ: Сла́ва: Во дни̑ ско́рбныхъ ѡ҆бстоѧ́нїй не ѡ҆ста́вите на́съ, предста́телїе на́ши и҆ храни́телїе, но по́мощь ско́рꙋю на́мъ ꙗ҆ви́те.

а҃ ли́къ: И҆ ны́нѣ: Приста́нище и҆ предста́тельство къ тебѣ̀ прибѣга́ющихъ бꙋ́ди, дв҃о, и҆ стѣна̀ нерꙋши́маѧ, прибѣ́жище же, и҆ покро́въ, и҆ весе́лїе.

Та́же за Досто́йно: ли́къ в҃ пое́тъ сті́хъ се́й, гла́съ и҃:

Влⷣчице, прїимѝ моли̑твы ра̑бъ твои́хъ и҆ и҆зба́ви на́съ ѿ всѧ́кїѧ нꙋ́жды и҆ печа́ли, ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋ́пница, и҆ къ тебѣ̀ прибѣга́емъ, тѧ̀ и҆ ны́нѣ на мл҃твꙋ призыва́емъ, да и҆зба́виши на́съ ѿ врагѡ́въ на́шихъ. возвели́чимъ тѧ̀ всѝ, всенепоро́чнꙋю мт҃рь хрⷭ҇та̀ бг҃а, ю҆́же ѡ҆сѣнѝ дх҃ъ прест҃ы́й.

Посе́мъ Трист҃о́е: Ѻ҆́ч҃е на́шъ: Тропа́рь, гла́съ и҃:

Ꙗ҆́коже пло́дъ кра́сный твоегѡ̀ спаси́тельнагѡ сѣ́ѧнїѧ землѧ̀ рѡссі́йскаѧ прино́ситъ тѝ, гдⷭ҇и, всѧ̑ ст҃ы̑ѧ, въ то́й просїѧ́вшыѧ. тѣ́хъ моли́твами въ ми́рѣ глꙋбо́цѣ цр҃ковь и҆ странꙋ̀ на́шꙋ бцⷣею соблюдѝ, многоми́лостиве.

Сла́ва, и҆ ны́нѣ, гла́съ то́йже:

Съ вы́шнихъ призира́ѧ, ᲂу҆бѡ́гїѧ прїе́млѧ, посѣтѝ на́съ, грѣхѡ́въ ра́ди на́шихъ скѡ́рби терпѧ́щихъ, влⷣко всеми́лостиве, моли́твами бцⷣы и҆ всѣ́хъ ст҃ы́хъ рꙋ́сскихъ да́рꙋй землѝ на́шей ве́лїю ми́лость.

Є҆ктенїа̀ сꙋгꙋ́баѧ, ю҆́же глаго́летъ дїа́конъ съ кади́ломъ. Возгла́съ: Оу҆слы́ши ны̀, бж҃е: Посе́мъ возглаша́етъ дїа́конъ: Ко всѣ̑мъ ст҃ы̑мъ землѝ рꙋ́сскїѧ помо́лимсѧ. Ли́къ: Всѝ ст҃і́и землѝ рꙋ́сскїѧ, моли́те бг҃а ѡ҆ на́съ.

И҆ чте́тъ предстоѧ́тель моли́твꙋ сїю̀:

Ѽ всеблаже́ннїи и҆ бг҃омꙋ́дрїи ᲂу҆гѡ́дницы бж҃їи, по́двиги свои́ми зе́млю рꙋ́сскꙋю ѡ҆ст҃и́вши и҆ тѣлеса̀ своѧ̑, ꙗ҆́кѡ сѣ́мѧ вѣ́ры, въ не́й ѡ҆ста́вльшїи, дꙋша́ми же свои́ми прⷭ҇то́лꙋ бж҃їю предстоѧ́щїи и҆ непреста́ннѡ ѡ҆ не́й молѧ́щїисѧ! Сѐ ны́нѣ, въ де́нь ѻ҆́бщагѡ ва́шегѡ торжества̀, мы̀, грѣ́шнїи, ме́ншїи бра́тїѧ ва́ши, дерза́емъ приноси́ти ва́мъ сїѐ хвале́бное пѣ́нїе. Велича́емъ ва́шѧ вели̑кїѧ по́двиги, дх҃о́внїи во́ини хрⷭ҇тѡ́ви, терпѣ́нїемъ и҆ мꙋ́жествомъ до конца̀ врага̀ низложи́вшїи и҆ на́съ ѿ пре́лести и҆ ко́зней є҆гѡ̀ и҆збавлѧ́ющїи. ᲂу҆бл҃жа́емъ ва́ше ст҃о́е житїѐ, свѣти̑льницы бжⷭ҇твеннїи, свѣ́томъ вѣ́ры и҆ добродѣ́телей свѣтѧ́щїисѧ и҆ на́шѧ ᲂу҆мы̀ и҆ сердца̀ бг҃омꙋ́дреннѡ ѡ҆зарѧ́ющїи. Прославлѧ́емъ ва̑ша вели̑кїѧ чꙋдеса̀, цвѣ́ти ра́йстїи, въ странѣ̀ на́шей сѣ́вернѣй прекра́снѣ процвѣ́тшїи и҆ а҆рѡма́ты дарова́нїй и҆ чꙋде́съ повсю́дꙋ благоꙋха́ющїи. восхвалѧ́емъ ва́шꙋ бг҃оподража́тельнꙋю любо́вь, предста́телїе на́ши и҆ покрови́телїе, и҆ ᲂу҆пова́юще на по́мощь ва́шꙋ, припа́даемъ къ ва́мъ и҆ вопїе́мъ: равноапо́стольнїи просвѣти́телїе на́ши споспѣшествꙋ́йте лю́демъ рꙋ́сскїѧ землѝ пре́даннꙋю ва́ми вѣ́рꙋ правосла́внꙋю тве́рдѡ содержа́ти, да спаси́тельное сѣ́мѧ, ва́ми всѣ́ѧнное, не и҆зсꙋше́но бꙋ́детъ зно́емъ невѣ́рїѧ, но, дожде́мъ бж҃їѧ поспѣше́нїѧ напое́нное, пло́дъ и҆з̾ѻби́льный да принесе́тъ. ст҃и́телїе хрⷭ҇тѡ́ви мл҃твами ва́шими ᲂу҆тверди́те це́рковь рꙋ́сскꙋю, є҆́рєси, раско́лы и҆ нестроє́нїѧ въ не́й потреби́те, расточє́нныѧ ѻ҆́вцы во є҆ди́но собери́те и҆ ѿ всѧ́кихъ волкѡ́въ, во ѻ҆де́жди ѻ҆́вчей въ ста́до хрⷭ҇то́во входѧ́щихъ, ѡ҆гради́те. Прпⷣбнїи ѻ҆тцы̀ сохрани́те на́съ ѿ пре́лестей мі́ра сегѡ̀ лꙋка́вагѡ, да, ѿве́ргшесѧ себѐ и҆ взе́мше кре́стъ сво́й, послѣ́дꙋемъ хрⷭ҇тꙋ̀, распина́юще пло́ть свою̀ со страстьмѝ и҆ похотьмѝ, носѧ́ще тѧ́гѡты дрꙋ́гъ дрꙋ́га. бл҃говѣ́рнїи кнѧ́зїе воззри́те ми́лостивнѡ на земно́е ѻ҆те́чество ва́ше и҆ всѧ̑ нечє́стїѧ и҆ собла́зны, въ не́мъ ны́нѣ сꙋ́щыѧ, ѻ҆рꙋ́жїемъ моли́твъ ва́шихъ потреби́те, да, ꙗ҆́коже дре́влѣ, та́кѡ и҆ ны́нѣ и҆ въ грѧдꙋ́щее вре́мѧ, прославлѧ́етсѧ на ст҃ѣ́й рꙋсѝ и҆́мѧ гдⷭ҇не. страстоте́рпцы рѡссі́йстїи пресла́внїи ᲂу҆крѣпи́те на́съ въ мꙋ́жественнѣмъ стоѧ́нїи да́же до кро́ве за вѣ́рꙋ правосла́внꙋю и҆ ѻ҆бы́чаи ѻ҆те́чєскїѧ, да ни ско́рбь, ни тѣснота̀, ни гонє́нїѧ, нѝ гла́дъ, ни нагота̀, ни бѣда̀, ни ме́чь не возмо́гꙋтъ на́съ разлꙋчи́ти ѿ любвѐ бж҃їѧ, ꙗ҆́же ѡ҆ хрⷭ҇тѣ̀ і҆и҃сѣ. Бл҃же́ннїи, хрⷭ҇та̀ ра́ди ю҆ро́дивїи и҆ пра́веднїи посрами́те мꙋ́дрость вѣ́ка сегѡ̀, возносѧ́щꙋюсѧ на ра́зꙋмъ бж҃їй, на́мъ же помози́те, спаси́тельнымъ бꙋ́йствомъ креста̀ хрⷭ҇то́ва ᲂу҆тверди́вшесѧ, собла́зны мꙋ́дрости мїрскі́ѧ незы́блємымъ бы́ти, го́рнее при́снѡ, а҆ не земно́е помышлѧ́ти. бг҃омꙋ̑дрыѧ жєны̀, въ немощнѣ́мъ є҆стествѣ̀ по́двиги ве́лїи ꙗ҆ви́вшыѧ моли́тесѧ, да дꙋ́хъ ва́шеѧ любвѐ ко гдⷭ҇ꙋ и҆ ре́вность ѡ҆ ᲂу҆гожде́нїи є҆мꙋ̀ ѡ҆ свое́мъ и҆ бли́жнѧгѡ спасе́нїи не ѡ҆скꙋдѣва́етъ въ на́съ. Всѝ ст҃і́и срѡ́дницы на́ши, ѿ лѣ́тъ дре́внихъ просїѧ́вшїи и҆ въ послѣ̑днїѧ дни̑ подвиза́вшїисѧ, ꙗ҆вле́ннїи и҆ неѧвле́ннїи, вѣ́домїи и҆ невѣ́домїи помѧни́те на́шꙋ не́мощь и҆ ᲂу҆ничиже́нїе и҆ моли́твами ва́шими и҆спроси́те ᲂу҆ хрⷭ҇та̀ бг҃а на́шегѡ, да и҆ мы̀, безбѣ́днѡ преплы́вше жите́йскꙋю пꙋчи́нꙋ и҆ невреди́мѡ соблю́дше сокро́вище вѣ́ры, въ приста́нище вѣ́чнагѡ спасе́нїѧ дости́гнемъ и҆ въ бл҃же́нныхъ ѻ҆би́телехъ го́рнѧгѡ ѻ҆те́чества съ ва́ми и҆ со всѣ́ми ᲂу҆годи́вшими є҆мꙋ̀ ѿ вѣ́ка ст҃ы́ми водвори́мсѧ бл҃года́тїю и҆ чл҃вѣколю́бїемъ сп҃си́телѧ на́шегѡ гдⷭ҇а і҆и҃са хрⷭ҇та̀, є҆мꙋ́же со превѣ́чнымъ ѻ҆ц҃е́мъ и҆ прест҃ы́мъ дх҃омъ подоба́етъ непреста́нное славосло́вїе и҆ поклоне́нїе ѿ всѣ́хъ тва́рей во вѣ́ки вѣкѡ́въ.

Ли́къ: А҆ми́нь.

И҆ прѡ́чаѧ по ѻ҆бы́чаю. И҆ ѿпꙋ́стъ. По ѿпꙋ́стѣ пое́тъ дїа́конъ:

Спасѝ, хрⷭ҇тѐ бж҃е, вели́кагѡ гдⷭ҇и́на и҆ ѻ҆тца̀ на́шего, ст҃ѣ́йшаго патрїа́рха (и҆́мⷬ҇къ) моско́вскаго и҆ всеѧ̀ рꙋсѝ съ бг҃охрани́мою є҆гѡ̀ па́ствою, зе́млю рꙋ́сскꙋю въ ми́рѣ сохранѝ и҆ вѣ́рꙋ правосла́внꙋю въ не́й ᲂу҆твердѝ во вѣ́ки вѣкѡ́въ. а҆ми́нь.

Пѣвцы̀ пою́тъ: Спасѝ, хрⷭ҇тѐ бж҃е (три́жды). Посе́мъ соше́дшесѧ, на схо́дѣ пое́мъ стїхѝ: Оу҆твержде́нїе на тѧ̀: и҆ прѡ́чїѧ (зрѝ страни́цꙋ 546).

На вели́цѣй вече́рни Бл҃же́нъ мꙋ́жъ: каѳі́сма всѧ̀.

На Гдⷭ҇и воззва́хъ: стїхи̑ры на і҃. воскрє́сны, гла́съ а҃: Вечє́рнїѧ на́шѧ: Ѡ҆быди́те, лю́дїе: Прїиди́те: лю́дїе: и҆ а҆нато́лїева є҆ди́на, гла́съ то́йже: Весели́тесѧ, нб҃са̀: и҆ стїхи̑ры ст҃ы́хъ ѕ҃, послѣ́днюю: Ст҃ы́хъ па́мѧть: ѡ҆ставлѧ́емъ, Сла́ва, ст҃ы́хъ, гла́съ а҃: Весели́сѧ ѡ҆ гдⷭ҇ѣ: И҆ ны́нѣ, догма́тикъ рѧдова́гѡ а҃-гѡ гла́са: Всемі́рнꙋю сла́вꙋ: (с. 512)

Стїхи̑ры ст҃ы́хъ, гла́съ г҃. Самогла̑сны:

Прїиди́те, собо́ри рѡссі́йстїи, сꙋ́щыѧ въ странѣ̀ на́шей ст҃ы̑ѧ восхва́лимъ: прпⷣбныѧ, и҆ і҆ера́рхи, и҆ кнѧ̑зи бл҃говѣ̑рныѧ, мч҃ники и҆ сщ҃енномꙋ́ченики, и҆ хрⷭ҇та̀ ра́ди ю҆рѡ́дивыѧ, и҆ же́нъ ст҃ы́хъ сосло́вїе, вкꙋ́пѣ и҆менꙋ́ємыѧ и҆ неименꙋ́ємыѧ, сі́и бо вои́стиннꙋ дѣ́лы и҆ словесы̀, и҆ многови́днымъ житїе́мъ, и҆ ѿ бг҃а дарова́нїи содѣ́лашасѧ ст҃і́и и҆ рꙋсѝ тезоиме́нїе ст҃ости пода́ша, и҆́хже и҆ гро́бы бг҃ъ чꙋдесы̀ просла́ви, и҆ ны́нѣ несре́дственнѣ просла́вльшемꙋ и҆̀хъ хрⷭ҇тꙋ̀ предстоѧ́ще, мо́лѧтсѧ прилѣ́жнѡ ѡ҆ на́съ, любо́вїю соверша́ющихъ свѣ́тлое и҆́хъ торжество̀.

Прїиди́те, правосла́вїѧ люби́телїе, пѣ́сненными добро́тами похва́лимъ бг҃омꙋ̑дрыѧ ст҃и́тели рѡссі̑йскїѧ, хрⷭ҇то́вы цр҃кве свѣ́тлое ᲂу҆краше́нїе, сщ҃е́нства вѣнцы̀, бл҃гоче́стїѧ пра́вило, и҆сто́чники бжⷭ҇твенныхъ и҆сцѣле́нїй неисчерпа́ємыѧ, проли́тїе дарова́нїй дх҃о́вныхъ, рѣ́ки мно́гихъ чꙋде́съ, зе́млю рꙋ́сскꙋю веселѧ́щыѧ тече́нїемъ, бл҃говѣ̑рнымъ лю́демъ тє́плыѧ посо́бники, и҆̀хже ра́ди хрⷭ҇то́съ врагѡ́въ возношє́нїѧ низложѝ, и҆мѣ́ѧй ве́лїю млⷭ҇ть.

Землѧ̀ весели́тсѧ и҆ нб҃о ра́дꙋетсѧ, ѻ҆тцы̀ прпⷣбнїи, восхвалѧ́юще по́двиги и҆ трꙋды̀ ва́шѧ, дꙋше́вное бл҃гомо́щїе и҆ ᲂу҆ма̀ чⷭ҇тотꙋ̀, зако́номъ бо є҆стества̀ не побѣди́стесѧ. ѽ собо́ре ст҃ы́й и҆ по́лче бжⷭ҇твенный, землѝ на́шеѧ ᲂу҆твержде́нїе вы̀ є҆стѐ вои́стиннꙋ.

И҆́ны стїхи̑ры, гла́съ и҃. Самогла̑сны:

Бл҃же́ннїи бг҃омꙋ́дрїи кнѧ́зїе рѡссі́йстїи, правосла́вною мꙋ́дростїю сїѧ́ющїи, добродѣ́телей же свѣ́тлостїю блиста́ющїи, ѡ҆зарѧ́ете вѣ́рныхъ и҆сполнє́нїѧ, бѣсѡ́въ тмꙋ̀ ѿгонѧ́юще: тѣ́мже, ꙗ҆́кѡ прича́стники невече́рнїѧ бл҃года́ти и҆ наслѣ́дїѧ ва́шегѡ храни́тели непосты̑дныѧ, ва́съ почита́емъ, досточꙋ́днїи.

Мч҃ницы хрⷭ҇тѡ́вы пребл҃же́ннїи, на во́льное заколе́нїе са́ми себѐ преда́сте, и҆ зе́млю рꙋ́сскꙋю кровмѝ ва́шими ѡ҆ст҃и́сте, и҆ воздꙋ́хъ просвѣти́сте преставле́нїемъ: ны́нѣ же живе́те на нб҃сѣ́хъ, во свѣ́тѣ невече́рнемъ, ѡ҆ на́съ всегда̀ молѧ́щесѧ, бг҃ови́дцы.

Бл҃же́ннїи хрⷭ҇та̀ ра́ди ю҆ро́дивїи и҆ пра́веднїи, въ рѡссі́и просїѧ́вшїи, вы̀, ѿверже́нїемъ себѐ хрⷭ҇тꙋ̀ послѣ́довавше, мꙋдрѣ́йшимъ ю҆ро́дствомъ прехи́трили є҆стѐ дїа́вола, сегѡ̀ свѧза́вше по́двиги ва́шими, и҆ бога́тство носѧ́ще въ дꙋшѝ некрадо́мо, всѧ̑ хрⷭ҇тѡ́ва ᲂу҆чє́нїѧ дѣ́ломъ и҆спо́лнисте, и҆ ны́нѣ на нб҃сѣ́хъ ликꙋ́юще, не преста́йте моли́тисѧ ѡ҆ рꙋ́сстѣй землѝ и҆ ѡ҆ всѣ́хъ почита́ющихъ ва́съ.

Ст҃ы́хъ па́мѧть ве́лїе торжество̀ ꙗ҆ви́сѧ землѝ на́шей, и҆ ѡ҆ то́мъ хва́лѧщесѧ, возглаго́лемъ: не забꙋ́дите ѻ҆те́чествїѧ ва́шегѡ, рꙋ́сскїѧ землѝ, но всѣ́хъ на́съ помина́йте, соверша́ющихъ па́мѧть ва́шꙋ, всѝ ст҃і́и, молѧ́щесѧ ѡ҆ на́съ ко гдⷭ҇ꙋ.

Сла́ва, гла́съ а҃:

Весели́сѧ ѡ҆ гдⷭ҇ѣ, рꙋ́сь правосла́внаѧ, ра́дꙋйсѧ и҆ ликꙋ́й, вѣ́рою свѣ́тлѡ ѡ҆дѣ́ѧвшисѧ, тѣлеса̀ подви́жникѡвъ вѣ́ры и҆ свидѣ́телей и҆́стины въ нѣ́дрѣхъ свои́хъ и҆мꙋ́щи, ꙗ҆́кѡ сокро́вище, наслади́сѧ чꙋде́съ, ѿ ни́хъ и҆стека́ющихъ, и҆ ви́дѧщи по́лкъ се́й ст҃ы́й, ѿ ви́димыхъ и҆ неви́димыхъ врагѡ́въ тѧ̀ ѡ҆гражда́ющїй, бл҃года́рнѡ сп҃сꙋ̀ возопі́й: гдⷭ҇и, сла́ва тебѣ̀.

И҆ ны́нѣ, бг҃оро́диченъ. Гла́съ то́йже: Всемі́рнꙋю сла́вꙋ:

Вхо́дъ. Прокі́менъ днѐ и҆ чтє́нїѧ трѝ.

Проро́чества и҆са́їина чте́нїе (глава̀ м҃ѳ, и҃-є҃і):

Та́кѡ глаго́летъ гдⷭ҇ь: во вре́мѧ прїѧ́тное послꙋ́шахъ тѧ̀ и҆ въ де́нь сп҃се́нїѧ помого́хъ тебѣ̀. и҆ созда́хъ тѧ̀ и҆ да́хъ тѧ̀ въ завѣ́тъ ꙗ҆зы́кѡвъ, є҆́же ᲂу҆стро́ити зе́млю и҆ наслѣ́дити наслѣ́дїе пꙋсты́ни. глаго́люща сꙋ́щымъ во ᲂу҆́захъ: и҆зыди́те и҆ сꙋ́щымъ во тмѣ̀: ѿкры́йтесѧ на всѣ́хъ пꙋтѣ́хъ пасти́сѧ бꙋ́дꙋтъ, и҆ на всѣ́хъ стезѧ́хъ па́жить и҆́хъ. не вза́лчꙋтъ, нижѐ вжа́ждꙋтъ, нижѐ порази́тъ и҆̀хъ зно́й, нижѐ со́лнце, но ми́лꙋѧй и҆̀хъ ᲂу҆тѣ́шитъ ѧ҆̀ и҆ сквозѣ̀ и҆сто́чники во́дъ проведе́тъ ѧ҆̀. и҆ положꙋ̀ всѧ́кꙋю го́рꙋ въ пꙋ́ть и҆ всѧ́кꙋю стезю̀ въ па́ствꙋ и҆̀хъ. сѐ сі́и и҆здале́ча прїи́дꙋтъ, сі́и ѿ сѣ́вера и҆ мо́рѧ, и҆ні́и же ѿ землѝ пе́рсскїѧ. да веселѧ́тсѧ небеса̀, и҆ ра́дꙋетсѧ землѧ̀, да ѿры́гнꙋтъ го́ры весе́лїе и҆ хо́лми пра́вдꙋ, ꙗ҆́кѡ поми́лова бг҃ъ лю́ди своѧ̑ и҆ смирє́нныѧ люде́й ᲂу҆тѣ́ши. рече́ же сїѡ́нъ: ѡ҆ста́ви мѧ̀ гдⷭ҇ь, и҆ бг҃ъ забы́ мѧ. є҆да̀ забꙋ́детъ жена̀ ѻ҆троча̀ своѐ; и҆лѝ не поми́лꙋетъ и҆зча̑дїѧ чре́ва своегѡ̀; а҆́ще ли же и҆ си́хъ забꙋ́детъ жена̀, но а҆́зъ не забꙋ́дꙋ тебѐ, глаго́летъ гдⷭ҇ь.

Премꙋ́дрости і҆исꙋ́са, сы́на сїра́хова, чте́нїе (глава̀ м҃д, а҃-д҃і):

Восхва́лимъ ᲂу҆́бѡ мꙋ́жы сла̑вны и҆ ѻ҆тцы̀ на́шѧ въ бытїѝ. мно́гꙋ сла́вꙋ созда̀ гдⷭ҇ь въ ни́хъ вели́чїемъ свои́мъ ѿ вѣ́ка. госпо́дствꙋюще въ ца́рствїихъ свои́хъ и҆ мꙋ́жы, и҆мени́ти си́лою, совѣ́тꙋюще ра́зꙋмомъ свои́мъ, провѣща́вшїи во проро́чествахъ: старѣ̑йшины люді́й въ совѣ́тѣхъ и҆ въ ра́зꙋмѣ писа́нїѧ люді́й. премꙋ̑драѧ словеса̀ въ наказа́нїи и҆́хъ: и҆́щꙋще гла́са мꙋсїкі́йска и҆ повѣ́дающе пѡ́вѣсти во писа́нїихъ, мꙋ́жы бога́тїи, ѡ҆бдарова́ни крѣ́постїю, ми́рнѡ живꙋ́ще въ жили́щихъ свои́хъ. всѝ сі́и въ ро́дѣхъ просла́влени бы́ша, и҆ во дне́хъ и҆́хъ похвала̀. сꙋ́ть ѿ ни́хъ и҆̀же ѡ҆ста́виша и҆́мѧ, є҆́же повѣ́дати хвалы̀: и҆ сꙋ́ть, и҆́хже нѣ́сть па́мѧти, и҆ погибо́ша, ꙗ҆́кѡ не сꙋ́щїи, и҆ бы́ша ꙗ҆́кѡ не бы́вше, и҆ ча̑да и҆́хъ по ни́хъ. но сі́и мꙋ́жїе ми́лостивїи, и҆́хже пра́вды не забвє́ны бы́ша, съ сѣ́менемъ и҆́хъ пребꙋ́детъ до́брое наслѣ́дїе, и҆зча̑дїѧ и҆́хъ въ завѣ́тѣхъ. ѡ҆ста́сѧ сѣ́мѧ и҆́хъ и҆ ча̑да и҆́хъ по ни́хъ, до вѣ́ка пребꙋ́детъ сѣ́мѧ и҆́хъ, и҆ сла́ва и҆́хъ не потреби́тсѧ. тѣлеса̀ и҆́хъ въ мі́рѣ погребє́на бы́ша, а҆ и҆мена̀ и҆́хъ живꙋ́тъ въ ро́ды. премꙋ́дрость и҆́хъ повѣ́дѧтъ лю́дїе, и҆ похвалꙋ̀ и҆́хъ и҆сповѣ́сть цр҃ковь.

Премꙋ́дрости соломѡ́новы чте́нїе. (глава̀ г҃, а҃ѳ҃):

Првⷣныхъ дꙋ́ши въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ чл҃вѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀ и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ, и҆скꙋсѝ и҆̀хъ и҆, ꙗ҆́кѡ всепло́дїе же́ртвенное, прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю, потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь ᲂу҆разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀, ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀ и҆ посѣще́нїе во и҆збра́нныхъ є҆гѡ̀.

На лїті́и стїхи̑ры ст҃ы́хъ всѝ.

Самогла́сенъ, гла́съ и҃:

Сра́дꙋйтесѧ съ на́ми, всѝ ли́цы ст҃ы́хъ и҆ всѧ̑ а҆́гг҃льскаѧ чинонача̑лїѧ, дх҃о́внѣ совокꙋ́пльшесѧ, прїи́демъ и҆ воспои́мъ бл҃года́рнꙋю пѣ́снь хрⷭ҇тꙋ̀ бг҃ꙋ: се́ бо безчи́сленный со́нмъ сро́дникѡвъ на́шихъ предстои́тъ цр҃ю̀ сла́вы и҆ моле́бнѡ хода́тайствꙋетъ ѡ҆ на́съ. сі́и сꙋ́ть столпѝ и҆ красота̀ вѣ́ры правосла́вныѧ: сі́и ᲂу҆чє́нїи, и҆ дѣ́лы, и҆ крове́й и҆злїѧ̑нїи цр҃ковь бж҃їю просла́виша: сі́и ѿ всѣ́хъ предѣ̑лъ землѝ на́шеѧ возсїѧ́ша, и҆ вѣ́рꙋ правосла́внꙋю въ не́й чꙋдесы̀ и҆ зна̑менїи ᲂу҆тверди́ша, и҆ во и҆ны̑ѧ страны̑ пронесо́ша, а҆по́стольски ревнꙋ́юще: и҆ні́и же пꙋсты́ни и҆ гра́ды ѻ҆би́тельми ст҃ы́ми ᲂу҆краси́ша, а҆́гг҃льское житїѐ показꙋ́юще: мно́зи рꙋга̑нїи, и҆ ра́нами, и҆ лю́тою сме́ртїю ѿ сынѡ́въ вѣ́ка сегѡ̀ и҆скꙋси́шасѧ, мно́зи же и҆ и҆нѣ́ми ви́ды, во всѧ́цѣмъ чи́нѣ подвиза́вшесѧ, на́мъ терпѣ́нїѧ и҆ ѕлострада́нїѧ ѻ҆́бразъ пода́ша, и҆ всѝ вкꙋ́пѣ мо́лѧтъ ны́нѣ гдⷭ҇а ѿ бѣ́дъ и҆зба́витисѧ ѻ҆те́чествꙋ на́шемꙋ и҆ всѣ̑мъ на́мъ сп҃сти́сѧ.

И҆́ны стїхи̑ры, подѡ́бны на ѻ҆́смь гла́сѡвъ.

Гла́съ а҃. Подо́бенъ: Ѽ, ди́вное чꙋ́до:

Ѽ, ди́вное чꙋ́до! и҆сто́чницы бл҃гоче́стїѧ въ рѡссі́и ꙗ҆влѧ́ютсѧ, и҆ пꙋтеводи́телїе къ нб҃сѝ ст҃і́и срѡ́дницы на́мъ быва́ютъ. весели́сѧ, рꙋ́сь правосла́внаѧ, си́хъ ѻ҆те́чество земно́е. возопїи́мъ, вѣ́рнїи, таковы̑ѧ и҆мꙋ́ще въ бѣда́хъ застꙋ́пники: бл҃же́ннїи и҆ ст҃і́и, бг҃а не преста́йте ѡ҆ на́съ моли́ти, подаю́щагѡ ва́ми землѝ на́шей ве́лїю млⷭ҇ть.

Гла́съ в҃. Подо́бенъ: Є҆гда̀ ѿ дре́ва:

Свѣти́те ѻ҆те́чествꙋ ва́шемꙋ всегда̀, сла́внїи чꙋдотво́рцы рꙋ́сстїи, ꙗ҆́коже ѕвѣ́зды свѣ̑тлыѧ, покрыва́ете бо при́снѡ сїѐ ѿ па́гꙋбы врагѡ́въ и҆ и҆збавлѧ́ете ѡ҆ѕлобле́нїѧ и҆ бꙋ́ри всѧ́кїѧ. тѣ́мже ра́достнѡ пра́зднꙋетъ, лѣ́тнюю па́мѧть, бл҃же́нни, соверша́юще, вѣ́рою и҆ любо́вїю пою́ще гдⷭ҇а, ва́съ просла́вльшаго.

Гла́съ г҃. Подо́бенъ: Ве́лїѧ мч҃никъ:

Ве́лїѧ ст҃ы́хъ твои́хъ, хрⷭ҇тѐ, си́ла: во гробѣ́хъ бо лежа́ще, дꙋ́хи прогонѧ́ютъ и҆ ᲂу҆праздни́ша вра́жїю вла́сть, вѣ́рою трⷪ҇ческою подви́гшесѧ во бл҃гоче́стїи.

Гла́съ д҃. Подо́бенъ: Да́лъ є҆сѝ:

Да́лъ є҆сѝ зна́менїе боѧ́щымсѧ тебѐ, гдⷭ҇и, кре́стъ тво́й чⷭ҇тны́й, и҆́мже ті́и, посрами́вше нача́ла тмы̀ и҆ вла́сти, на ст҃ѣ́й рꙋсѝ правосла́вїе ᲂу҆тверди́ша. тѣ́мже твоѐ чл҃вѣколю́бное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.

Гла́съ є҃. Подо́бенъ: Ра́дꙋйсѧ:

Прїиди́те, нбⷭ҇нїи предста́телїе на́ши, къ на́мъ, ва́шегѡ тре́бꙋющымъ ми́лостивагѡ посѣще́нїѧ, и҆ и҆зба́вите ѡ҆ѕло́блєнныѧ мꙋчи́тельскими прещє́нїи и҆ лю́тагѡ неи́стовства невѣ́рныхъ, ѿ ни́хже, ꙗ҆́кѡ плѣ́нницы и҆ на́зи, гони́ми є҆смы̀, ѿ мѣ́ста на мѣ́сто ча́сто преходѧ́ще и҆ заблꙋжда́юще въ верте́пѣхъ и҆ гора́хъ. ᲂу҆ще́дрите ᲂу҆́бѡ, прехва́льнїи, и҆ да́рꙋйте на́мъ ѡ҆сла́бꙋ, ᲂу҆толи́те бꙋ́рю и҆ ᲂу҆гаси́те є҆́же на ны̀ негодова́нїе, бг҃а молѧ́ще, подаю́щаго ва́ми землѝ на́шей ве́лїю млⷭ҇ть.

Гла́съ ѕ҃. Подо́бенъ: Всѐ ѿло́жше:

Всѐ ѿложи́вше жите́йское томле́нїе и҆ сла́дость текꙋ́щꙋю презрѣ́вше, кре́стъ взѧ́сте, ꙗ҆́кѡ и҆́го бжⷭ҇твенное, и҆ хрⷭ҇тꙋ̀ послѣ́довасте, и҆ къ нбⷭ҇номꙋ поко́ю чꙋ́днѡ всели́стесѧ. ѽ дрꙋ́зи хрⷭ҇тѡ́ви, сосꙋ́ди чⷭ҇тні́и, ст҃і́и. всѝ, въ рѡссі́и просі́ѧвшїи, прїиди́те посредѣ̀ на́съ неви́димѡ, предначина́юще торжество̀ и҆ пѣ́нїе и҆ сподоблѧ́юще дарѡ́въ невеще́ственныхъ ва́шъ пра́здникъ соверша́ющихъ свѣтолѣ́пнѡ.

Гла́съ з҃. Подо́бенъ: Не ктомꙋ̀ возбранѧ́еми:

Не лише́ни є҆смы̀ наде́жди сп҃се́нїѧ, ст҃ы̑ѧ бо сро́дники на́шѧ и҆́мамы, ѡ҆ на́съ молѧ́щыѧсѧ. гдⷭ҇и, сла́ва тебѣ̀.

Гла́съ и҃. Подо́бенъ: Гдⷭ҇и, а҆́ще и҆ сꙋди́щꙋ:

Гдⷭ҇и, а҆́ще и҆ на́мъ по всемꙋ̀ подо́бни бы́ша ст҃і́и, но, пристра́стїѧ земна́гѡ ѿве́ргшесѧ, любо́вїю къ тебѣ̀ крѣ́пкѡ привѧза́шасѧ, и҆ вѣнча́вшесѧ ны́нѣ рꙋко́ю твое́ю, пред̾защища́ютъ дꙋ́шы на́шѧ.

Сла́ва, и҆ ны́нѣ, гла́съ то́йже, бг҃оро́диченъ, самогла́сенъ:

Сра́дꙋйтесѧ съ на́ми, ᲂу҆́мнаѧ чинонача̑лїѧ, дх҃о́вный совокꙋ́пльше ли́къ, ви́дѧще цр҃и́цꙋ и҆ влⷣчицꙋ всѣ́хъ, многоиме́ннѣ вѣ́рными сла́вимꙋ: ра́дꙋютсѧ же и҆ дꙋ́си пра́ведныхъ, сꙋ́щїи зри́телїе видѣ́нїѧ, на воздꙋ́сѣ моле́бнѡ простира́ющꙋ всечⷭ҇тнѣ́и своѝ рꙋ́цѣ, просѧ́щꙋ ᲂу҆мире́нїѧ мі́рꙋ, и҆ странѣ̀ рѡссі́йстѣй ᲂу҆твержде́нїѧ, и҆ сп҃се́нїѧ дꙋ́шъ на́шихъ.

На лїті́и въ мл҃твѣ Сп҃сѝ бж҃е: помина́етъ дїа́конъ и҆збра́нныхъ рꙋ́сскихъ ст҃ы́хъ, въ мл҃твѣ же Влⷣко многоми́лостиве: помина́етъ предстоѧ́тель всѣ́хъ ст҃ы́хъ, въ землѝ рѡссі́йстѣй просїѧ́вшихъ (зрѝ ᲂу҆ста́въ на лїті́и, страни́ца 552).

И҆ вхо́димъ въ хра́мъ, пою́ще стїхи̑ры стїхѡ́вны воскрє́сны а҃-гѡ гла́са: Стра́стїю твое́ю: Да ра́дꙋетсѧ: Цр҃ь сы́й: Жєны̀ мѷронѡ́сицы: со стїхѝ и҆́хъ. Сла́ва, ст҃ы́хъ, гла́съ в҃: Но́вый до́ме: И҆ ны́нѣ, бг҃оро́диченъ, гла́съ то́йже: Вы́шнїи ли́цы: И҆лѝ и҆́нъ бг҃оро́диченъ, гла́съ и҃: Ѽ, пресла́внагѡ чꙋдесѐ! нб҃сѐ и҆ землѝ цр҃и́ца:

На стїхо́внѣ стїхи̑ры ст҃ы́хъ, гла́съ в҃. Подо́бенъ: До́ме є҆ѵфра́ѳовъ:

Землѐ рꙋ́сскаѧ, гра́де ст҃ы́й, ᲂу҆краша́й тво́й до́мъ, въ не́мже бжⷭ҇твенный ве́лїй со́нмъ ст҃ы́хъ просла́ви.

Сті́хъ: Гдⷭ҇и, гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по всѣ́й землѝ.

Цр҃ковь рꙋ́сскаѧ, красꙋ́йсѧ и҆ ликꙋ́й, се́ бо ча̑да твоѧ̑ прⷭ҇то́лꙋ влⷣчню во сла́вѣ предстоѧ́тъ, ра́дꙋющесѧ.

Сті́хъ: Ст҃ы̑мъ, и҆́е сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.

Собо́ре ст҃ы́хъ рꙋ́сскихъ, по́лче бжⷭ҇твенный, моли́тесѧ ко гдⷭ҇ꙋ ѡ҆ земно́мъ ѻ҆те́чествѣ ва́шемъ и҆ почита́ющихъ ва́съ любо́вїю.

Сла́ва, гла́съ и҆ подо́бенъ то́йже:

Но́вый до́ме є҆ѵфра́ѳовъ, ᲂу҆дѣ́ле и҆збра́нный, рꙋ́сь ст҃а́ѧ, хранѝ вѣ́рꙋ правосла́внꙋю, въ не́йже тебѣ̀ ᲂу҆твержде́нїе.

И҆ ны́нѣ, гла́съ и҆ подо́бенъ то́йже:

Вы́шнїи ли́цы, бцⷣе дв҃о, пою́тъ съ ни́жними, сла́вѧще непреста́ннѡ ржⷭ҇тво̀ твоѐ пречⷭ҇тое.

И҆́нъ бг҃оро́диченъ, гла́съ и҃. Подо́бенъ: Ѽ, пресла́внаго чꙋдесѐ:

Ѽ, пресла́внагѡ чꙋдесѐ! нб҃сѐ и҆ землѝ цр҃и́ца, ѿ ст҃ы́хъ сро́дникѡвъ на́шихъ ᲂу҆молѧ́емаѧ, до ны́нѣ зе́млю рꙋ́сскꙋю покрыва́етъ и҆ ли́ка своегѡ̀ и҆з̾ѡбражє́нїи ми́лостивнѡ ѡ҆богаща́етъ. ѽ влⷣчице держа́внаѧ! не преста́ни и҆ на бꙋ́дꙋщее вре́мѧ во ᲂу҆твержде́нїе на рꙋсѝ правосла́вїѧ ми́лѡсти и҆ чꙋдеса̀ и҆злива́ти до вѣ́ка. а҆ми́нь.

На бл҃гослове́нїи хлѣ́бѡвъ. Бцⷣе дв҃о: два́жды, и҆ тропа́рь ст҃ы́хъ, гла́съ и҃, є҆ди́ножды.

Тропа́рь ст҃ы́хъ, гла́съ и҃:

Ꙗ҆́коже пло́дъ кра́сный твоегѡ̀ сп҃си́тельнагѡ сѣ́ѧнїѧ, землѧ̀ рѡссі́йскаѧ прино́ситъ тѝ, гдⷭ҇и, всѧ̑ ст҃ы̑ѧ въ то́й просїѧ́вшыѧ. тѣ́хъ мл҃твами въ ми́рѣ глꙋбо́цѣ, цр҃ковь и҆ странꙋ̀ на́шꙋ бцⷣею соблюдѝ, многоми́лостиве.

На ᲂу҆́трени

На Бг҃ъ гдⷭ҇ь: тропа́рь воскре́сенъ, гла́съ а҃: Ка́мени запеча́танꙋ: є҆ди́ножды, и҆ ст҃ы́хъ тропа́рь, гла́съ и҃: Ꙗ҆́коже пло́дъ: є҆ди́ножды.

Сла́ва, и҆́нъ тропа́рь, гла́съ д҃:

І҆ерꙋсали́ма вы́шнѧгѡ гра́жданы, ѿ землѝ на́шеѧ возсїѧ́вшыѧ и҆ бг҃ꙋ во всѧ́цѣмъ чинꙋ̀ и҆ всѧ́кимъ по́двигомъ ᲂу҆годи́вшыѧ, прїиди́те, воспои́мъ, вѣ́рнїи: ѽ всебл҃же́ннїи землѝ рѡссі́скїѧ застꙋ̑пницы, моли́тесѧ ко гдⷭ҇ꙋ, да поми́лꙋетъ сїю̀ ѿ гнѣ́ва своегѡ̀, и҆сцѣлѧ́ѧ сокрꙋше́нїе є҆ѧ̀, и҆ вѣ̑рныѧ лю́ди своѧ̑ ᲂу҆тѣ́шитъ.

И҆ ны́нѣ, бг҃оро́диченъ, гла́съ то́йже:

Дне́сь свѣ́тлѡ красꙋ́етсѧ правосла́внаѧ рꙋ́сь, ꙗ҆́кѡ зарю̀ со́лнечнꙋю воспрїи́мши, влⷣчице, чꙋдотво́рнꙋю твою̀ і҆кѡ́нꙋ влади́мїрскꙋю, къ не́йже ны́нѣ мы̀ притека́юще и҆ молѧ́щесѧ тебѣ̀, взыва́емъ си́це: ѽ пречꙋ́днаѧ влⷣчице бцⷣе, моли́сѧ и҆з̾ тебѐ воплоще́нномꙋ хрⷭ҇тꙋ̀ бг҃ꙋ на́шемꙋ, да и҆зба́витъ зе́млю рꙋ́сскꙋю и҆ всѧ̑ страны̑ хрⷭ҇тїа̑нскїѧ неврѣди̑мы ѿ всѣ́хъ навѣ̑тъ вра́жїихъ и҆ сп҃се́тъ дꙋ́шы на́шѧ, ꙗ҆́кѡ милосе́рдъ.

По стїхосло́вїихъ сѣда́льны воскрє́сны а҃-гѡ гла́са со стїхѝ и҆́хъ. По полѷеле́и ѵ҆пакоѝ воскре́сенъ, гла́съ а҃: Разбо́йничо покаѧ́нїе: и҆ и҆́ны сѣда́льны ст҃ы́хъ ѿ а҃-гѡ стїхосло́вїѧ, гла́съ г҃: Мꙋжа́йсѧ, хрⷭ҇то́ва цр҃ковь: и҆ ѿ в҃-гѡ стїхосло́вїѧ, гла́съ а҃: А҆́ще и҆ глаго́лютъ: Та́же сѣда́льны ст҃ы́хъ по полѷеле́и, гла́съ є҃: Красꙋ́йсѧ, свѣти́сѧ рꙋ́сь: Сла́ва, гла́съ г҃: Свѣ́тлѡ соверша́юще: И҆ ны́нѣ, бг҃оро́диченъ, гла́съ д҃: Ꙗ҆́кѡ неѡбори́мꙋю стѣ́нꙋ:

По а҃-мъ стїхосло́вїи сѣда́ленъ ст҃ы́хъ, гла́съ в҃.

Подо́бенъ: А҆по́столе, хрⷭ҇тꙋ̀ бг҃ꙋ:

Со́лнце пра́вды, хрⷭ҇то́съ, ва́съ посла̀, ꙗ҆́коже лꙋчѝ, просвѣща́ющїи зе́млю рꙋ́сскꙋю, ᲂу҆гѡ́дницы бж҃їи, ѿ ро́да на́шегѡ просїѧ́вшїи. тѣ́мже моли́те є҆го̀, ст҃і́и, ѡ҆блежа́щїй на́съ ны́нѣ ѻ҆́блакъ невѣ́рїѧ разгна́ти и҆ дарова́ти на́мъ ми́ръ и҆ ве́лїю млⷭ҇ть.

Сла́ва, и҆́нъ сѣда́ленъ, гла́съ г҃. Подо́бенъ: Дв҃а дне́сь:

Мꙋжа́йсѧ, хрⷭ҇то́ва цр҃ковь, и҆ держа́вствꙋй над̾ всꙋ́е борю́щими: хрⷭ҇тѡ́ви бо дрꙋ́зи ѡ҆ тебѣ̀ пекꙋ́тсѧ, и҆ предстоѧ́ще, и҆ ѡ҆бстоѧ́ще, и҆́хже ѻ҆́бщїй пра́здникъ ны́нѣ соверша́еши свѣ́тлѡ.

И҆ ны́нѣ, бг҃оро́диченъ, гла́съ є҃:

Пред̾ ст҃о́ю твое́ю і҆кѡ́ною, влⷣчце, молѧ́щїисѧ и҆сцѣле́нїй сподоблѧ́ютсѧ, вѣ́ры и҆́стинныѧ позна́нїе прїе́млютъ и҆ а҆га̑рѧнскаѧ нашє́ствїѧ ѿража́ютъ. тѣ́мже и҆ на́мъ, къ тебѣ̀ припа́дающымъ, грѣхѡ́въ ѡ҆ставле́нїе и҆спросѝ, по́мыслы бл҃гоче́стїѧ сердца̀ на̑ша просвѣтѝ и҆ къ сн҃ꙋ твоемꙋ̀ мл҃твꙋ вознесѝ ѡ҆ сп҃се́нїи дꙋ́шъ на́шихъ.

По в҃-мъ стїхосло́вїи сѣда́ленъ, гла́съ а҃. Подо́бенъ: Гро́бъ тво́й:

Ꙗ҆́кѡ со́лнце свѣ́тлое, ꙗ҆́кѡ блиста́ющаѧ денни́ца, па́мѧть чⷭ҇тна́ѧ въ землѝ рꙋ́сстѣй просїѧ́вшихъ ст҃ы́хъ возсїѧ̀, всѣ́хъ на́съ ѡ҆свѣща́ющи и҆ согрѣва́ющи сердца̀ на́ша къ подража́нїю житїю̀ и҆́хъ бжⷭ҇твенномꙋ и҆ къ ре́вности ѡ҆ вѣ́рѣ.

Сла́ва, и҆́нъ сѣда́ленъ, гла́съ то́йже: Подо́бенъ: Ка́мени запеча́танꙋ:

А҆́ще и҆ глаго́лютъ сы́нове вѣ́ка сегѡ̀: прїиди́те, ѡ҆ста́вимъ всѧ̑ пра́здники бж҃їѧ ѿ землѝ, но црⷭ҇тво гдⷭ҇не и҆ є҆щѐ держа́вствовати и҆́мать, де́рзость врагѡ́въ ѿража́ющее. тѣ́мже настоѧ́щее торжество̀ свѣ́тлѡ пра́зднꙋюще, є҆ди́номꙋ цр҃ю̀ и҆ бг҃ꙋ на́шемꙋ возопїи́мъ: сла́ва тебѣ̀, рꙋ́сь правосла́вїемъ ѡ҆ст҃и́вшемꙋ: сла́ва тебѣ̀, ст҃ы́ѧ мнѡ́гїѧ въ не́й просла́вльшемꙋ: сла́ва тебѣ̀, и҆ доны́нѣ вѣ̑рнымъ крѣ́пость да́рꙋющемꙋ.

И҆ ны́нѣ, бг҃оро́диченъ, гла́съ то́йже:

Бг҃олюби́ваѧ цр҃и́це, неискꙋсомꙋ́жнаѧ дв҃о, бцⷣе мр҃і́е, молѝ за ны̀ тебѐ возлюби́вшаго и҆ ро́ждшагосѧ ѿ тебѐ сн҃а твоего̀, хрⷭ҇та̀ бг҃а на́шего, пода́ти на́мъ ѡ҆ставле́нїе прегрѣше́нїй, мі́рови ми́ръ, землѝ плодѡ́въ и҆з̾ѻби́лїе, па́стырємъ ст҃ы́ню и҆ всемꙋ̀ чл҃вѣ́чꙋ ро́дꙋ сп҃се́нїе, гра́ды и҆ страны̑ рѡссі̑йскїѧ ѿ нахожде́нїѧ и҆ноплеме́нныхъ застꙋпѝ и҆ ѿ междоꙋсо́бныѧ бра́ни сохранѝ. ѽ мт҃и бг҃олюби́ваѧ дв҃о, ѽ цр҃и́це всепѣ́таѧ! ри́зою свое́ю покры́й на́съ ѿ всѧ́кагѡ ѕла̀, ѿ ви́димыхъ и҆ неви́димыхъ вра̑гъ защитѝ и҆ сп҃сѝ дꙋ́шы на́шѧ.

Полѷеле́й.

А҆́ще нѣ́сть і҆кѡ́ны всѣ́хъ рꙋ́сскихъ ст҃ы́хъ, поставлѧ́емъ і҆кѡ́нꙋ прест҃ы́ѧ трⷪ҇цы. По ѡ҆конча́нїи ѱалмѡ́въ полѷеле́йныхъ сщ҃еннослꙋжи́тели пою́тъ велича́нїе прест҃ѣ́й трⷪ҇цѣ: Велича́емъ тѧ̀, трїѷпоста́сный влⷣко: и҆ а҆́бїе сщ҃еннослꙋжи́тели же пою́тъ велича́нїе прест҃ѣ́й бцⷣѣ: Досто́йно є҆́сть: Посе́мъ пое́мъ на ѻ҆́ба ли̑ка ѱало́мъ и҆збра́нный: Бла́го є҆́сть: и҆ припѣва́емъ велича́нїе ст҃ы̑мъ: Оу҆бл҃жа́емъ ва́съ: къ стїха́мъ сегѡ̀ ѱалма̀, ко всѣ̑мъ и҆лѝ то́кмо къ нѣ́кѡторымъ, ꙗ҆́коже ᲂу҆каза́сѧ. Посе́мъ не пѣ́вше: Сла́ва, и҆ ны́нѣ: а҃ ли́къ пое́тъ: Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ. а҆́гг҃льскїй собо́ръ: и҆ про́чїи тропарѝ воскрє́сныѧ по непоро́чныхъ.

А҆́ще пра́зднество соверша́емъ во и҆́нъ де́нь, сщ҃еннослꙋжи́тели пою́тъ велича́нїе прест҃ѣ́й трⷪ҇цѣ и҆ посе́мъ пое́мъ ѱало́мъ и҆збра́нный и҆но́й: Воскли́кните гдⷭ҇еви, всѧ̑ землѧ̀ (зрѝ страни́цꙋ 588). Къ стїха́мъ сегѡ̀ ѱалма̀, ко всѣ̑мъ и҆лѝ то́кмо къ нѣ́кѡторымъ, ꙗ҆́коже ᲂу҆каза́сѧ, припѣва́емъ велича́нїе ст҃ы̑мъ. Сла́ва, и҆ ны́нѣ: А҆ллилꙋ́їа, три́жды. И҆ коне́чное велича́нїе прест҃ѣ́й бцⷣѣ.

По полѷеле́йныхъ ѱалмѣ́хъ сщ҃е́нницы пою́тъ велича́нїе прест҃ѣ́й трⷪ҇цѣ:

Велича́емъ тѧ̀, трїѷпоста́сный влⷣко, вѣ́рою правосла́вною зе́млю рꙋ́сскꙋю ѡ҆зари́вшаго и҆ ст҃ы́хъ сро́дникѡвъ на́шихъ со́нмъ ве́лїй въ не́й просла́вльшаго.

И҆ а҆́бїе сщ҃еннослꙋжи́тели же пою́тъ велича́нїе прест҃ѣ́й бцⷣѣ:

Досто́йно є҆́сть велича́ти тѧ̀, бцⷣе, землѝ рꙋ́сскїѧ цр҃и́цꙋ нбⷭ҇нꙋю и҆ люде́й правосла́вныхъ влⷣчицꙋ держа́внꙋю.

Посе́мъ сті́хъ а҃-й ѱалма̀ и҆збра́ннагѡ Бла́го є҆́сть: и҆ велича́нїе ст҃ы̑мъ:

Оу҆блажа́емъ ва́съ, чꙋдотво́рцы на́ши сла́внїи, зе́млю рꙋ́сскꙋю добродѣ́тельми ва́шими ѡ҆зари́вшїи и҆ ѻ҆́бразъ сп҃се́нїѧ на́мъ свѣтоѧвле́ннѡ показа́вшїи.

Ѱало́мъ и҆збра́нный, пое́мый въ недѣ́лю в҃-ю по пѧтидесѧ́тницѣ:

а҃ ли́къ: Бла́го є҆́сть и҆сповѣ́датисѧ гдⷭ҇еви и҆ пѣ́ти и҆́мени твоемꙋ̀, вы́шнїй, возвѣща́ти заꙋ́тра млⷭ҇ть твою̀ и҆ и҆́стинꙋ твою̀ на всѧ́кꙋ но́щь. Оу҆блажа́емъ ва́съ: в҃ ли́къ: Ве́лїй гдⷭ҇ь и҆ хва́ленъ ѕѣлѡ̀, во гра́дѣ бг҃а на́шегѡ, въ горѣ̀ ст҃ѣ́й є҆гѡ̀. а҃. Ро́дъ и҆ ро́дъ восхва́лѧтъ дѣла̀ твоѧ̑ и҆ си́лꙋ твою̀ возвѣстѧ́тъ. в҃. Великолѣ́пїе сла́вы ст҃ы́ни твоеѧ̀ возглаго́лютъ и҆ чꙋдеса̀ твоѧ̑ повѣ́дѧтъ. а҃. Па́мѧть мнѡ́жества бл҃гости твоеѧ̀ ѿры́гнꙋтъ и҆ пра́вдою твое́ю возра́дꙋютсѧ. в҃. Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ. а҃. Ꙗ҆́кѡ бл҃говоли́тъ гдⷭ҇ь въ лю́дехъ свои́хъ и҆ вознесе́тъ крѡ́ткїѧ во сп҃се́нїе. в҃. Возвеселѧ́тсѧ всѝ ᲂу҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ, и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. Оу҆блажа́емъ ва́съ: а҃. Се́й ро́дъ и҆́щꙋщихъ гдⷭ҇а, и҆́щꙋщихъ лицѐ бг҃а і҆а́кѡвлѧ. в҃. Мнѣ́ же ѕѣлѡ̀ чⷭ҇тни бы́ша дрꙋ́зи твоѝ, бж҃е, ѕѣлѡ̀ ᲂу҆тверди́шасѧ влⷣчєствїѧ и҆́хъ. а҃. И҆зочтꙋ̀ и҆́хъ, и҆ па́че песка̀ ᲂу҆мно́жатсѧ. в҃. Оу҆вѣ́дите, ꙗ҆́кѡ гдⷭ҇ь, то́й є҆́сть бг҃ъ на́шъ, то́й сотворѝ на́съ, а҆ не мы̀, мы́ же лю́дїе є҆гѡ̀ и҆ ѻ҆́вцы па́жити є҆гѡ̀. а҃. Млⷭ҇ти твоѧ̑, гдⷭ҇и, во вѣ́къ воспою̀, въ ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̀ мои́ми. в҃. Млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀. а҃. Боѧ́щїисѧ гдⷭ҇а ᲂу҆пова́ша на гдⷭ҇а, помо́щникъ и҆ защи́титель и҆̀мъ є҆́сть. в҃. Ра́дꙋйтесѧ бг҃ꙋ, помо́щникꙋ на́шемꙋ, воскли́кните бг҃ꙋ і҆а́кѡвлю. а҃. Возра́дꙋемсѧ ѡ҆ сп҃се́нїи твое́мъ и҆ во и҆́мѧ гдⷭ҇а бг҃а на́шегѡ возвели́чимсѧ. ᲂу҆блажа́емъ ва́съ: в҃. Гдⷭ҇ь ᲂу҆твержде́нїе люде́й свои́хъ и҆ защи́титель сп҃се́нїй хрⷭ҇та̀ своегѡ̀ є҆́сть. а҃. Ѡ҆ бз҃ѣ сотвори́мъ си́лꙋ, и҆ то́й ᲂу҆ничижи́тъ стꙋжа́ющыѧ на́мъ. в҃. Гдⷭ҇и, си́лою твое́ю возвесели́тсѧ ца́рь, и҆ ѡ҆ сп҃се́нїи твое́мъ возра́дꙋетсѧ ѕѣлѡ̀. а҃. Ѡ҆ бз҃ѣ похва́лимсѧ ве́сь де́нь, и҆ ѡ҆ и҆́мени твое́мъ и҆сповѣ́мысѧ во вѣ́къ. в҃. Землѧ̀ дадѐ пло́дъ сво́й, бл҃гослови́ ны, бж҃е, бж҃е на́шъ, бл҃гослови́ ны, бж҃е, и҆ да ᲂу҆боѧ́тсѧ є҆гѡ̀ всѝ концы̀ землѝ. а҃. Спаси́ ны, гдⷭ҇и бж҃е на́шъ, и҆ собери́ ны ѿ ꙗ҆зы̑къ и҆сповѣ́датисѧ и҆́мени твоемꙋ̀ ст҃о́мꙋ и҆ хвали́тисѧ во хвалѣ̀ твое́й. в҃. Бл҃гослове́нъ гдⷭ҇ь, бг҃ъ і҆и҃левъ, ѿ вѣ́ка и҆ до вѣ́ка, и҆ рекꙋ́тъ всѝ лю́дїе: бꙋ́ди, бꙋ́ди. ᲂу҆блажа́емъ ва́съ:

Посе́мъ тропарѝ воскрє́сныѧ по непоро́чнахъ. Є҆ктенїа̀ ма́лаѧ. Ѵ҆пакоѝ воскре́сенъ, гла́съ а҃: Разбо́йничо покаѧ́нїе: и҆ и҆́ны сѣда́льны ст҃ы́хъ ѿ а҃-гѡ стїхосло́вїѧ, гла́съ а҃: Мꙋжа́йсѧ, хрⷭ҇то́ва цр҃ковь: и҆ ѿ в҃-гѡ стїхосло́вїѧ, гла́съ а҃: А҆́ще и҆ глаго́лютъ: (зрѝ страни́цꙋ 521).

Та́же сѣда́льны ст҃ы́хъ по полѷеле́и, гла́съ є҃:

Красꙋ́йсѧ, свѣти́сѧ, рꙋ́сь правосла́внаѧ, лꙋча́ми креста̀, є҆го́же и҆́маши всѣ̑мъ вѣ̑рнымъ храни́телѧ, ты́ же мно́жество всѐ де́мѡнское, тмы̀ и҆спо́лньшесѧ, ѿве́ргни.

Сла́ва, гла́съ г҃. Подо́бенъ: Да веселѧ́тсѧ:

Свѣ́тлѡ соверша́юще настоѧ́щее торжество̀, восхва́лимъ и҆ а҆ндре́ѧ первозва́ннаго, ꙗ҆́кѡ рꙋ́сскїѧ землѝ а҆по́стола, пе́рваго є҆ѵⷢ҇льскимъ благовѣ́стїемъ сїю̀ ѡ҆гласи́вшаго, то́й бо, ꙗ҆́коже дре́вле пра́ѻтцємъ на́шымъ, та́кѡ и҆ на́мъ ны́нѣ взыва́етъ: прїиди́те, ѡ҆брѣто́хомъ жела́емаго.

И҆ ны́нѣ, бг҃оро́диченъ, гла́съ д҃:

Ꙗ҆́кѡ неѡбори́мꙋю стѣ́нꙋ и҆ и҆сто́чникъ чꙋде́съ стѧжа́вше тѧ̀, рабѝ твоѝ, бцⷣе пречⷭ҇таѧ, сопроти́вныхъ ѡ҆полчє́нїѧ низлага́емъ. тѣ́мже мо́лимъ тѧ̀: ми́ръ землѝ рꙋ́сстѣй да́рꙋй и҆ дꙋша́мъ на́шымъ ве́лїю млⷭ҇ть.

А҆́ще в҃-ѧ недѣ́лѧ по пѧтидесѧ́тницѣ, степе́нна воскре́сна, а҃-гѡ гла́са. Прокі́менъ воскре́сный, гла́съ а҃: Ны́нѣ воскреснꙋ̀, глаго́летъ гдⷭ҇ь, положꙋ́сѧ во сп҃се́нїе, не ѡ҆биню́сѧ ѡ҆ не́мъ. Сті́хъ: Словеса̀ гдⷭ҇нѧ, словеса̀ чи̑ста. Всѧ́кое дыха́нїе: Є҆ѵⷢ҇лїе воскре́сное в҃-е, ѿ ма́рка, зача́ло ѻ҃. Воскресе́нїе хрⷭ҇то́во: Ѱало́мъ н҃. Сла́ва: Мл҃твами а҆по́столѡвъ: И҆ ны́нѣ: Мл҃твами бцⷣы: Стїхи́ра: Воскре́съ і҆и҃съ ѿ гро́ба:

А҆́ще хра́мъ всѣ́хъ рꙋ́сскихъ ст҃ы́хъ, степе́нна воскре́сна а҃-гѡ гла́са. Прокі́менъ ст҃ы́хъ, гла́съ д҃: Ра́дꙋйтесѧ пра́веднїи ѡ҆ гдⷭ҇ѣ, пра̑вымъ подоба́етъ похвала̀. Сті́хъ: Бꙋ́ди, гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Всѧ́кое дыха́нїе: Є҆ѵⷢ҇лїе хра́ма всѣ́хъ ст҃ы́хъ рꙋ́сскихъ, ѿ матѳе́а, зача́ло і҃. Воскресе́нїе хрⷭ҇то́во: Ѱало́мъ н҃. Сла́ва: Мл҃твами всѣ́хъ ст҃ы́хъ рꙋ́сскихъ, ми́лостиве, ѡ҆чи́сти мно́жество согрѣше́нїй на́шихъ. И҆ ны́нѣ: Мл҃твами бцⷣы, ми́лостиве, ѡ҆чи́сти мно́жество согрѣше́нїй на́шихъ. Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Стїхи́ра, гла́съ ѕ҃: Є҆желѣ́тнюю па́мѧть:

Стїхи́ра ст҃ы́хъ по н҃ ѱалмѣ̀, гла́съ ѕ҃:

Є҆желѣ́тнюю па́мѧть дне́сь ст҃ы́хъ сро́дникѡвъ на́шихъ соверша́юще, досто́йнѡ сїѧ̑ да ᲂу҆бл҃жи́мъ. ті́и вои́стиннꙋ чрез̾ всѧ̑ блажє́нства гдⷭ҇нѧ проидо́ша: ѡ҆бнища́вше бо дх҃омъ ѡ҆богати́шасѧ и҆ крѡ́тцы бы́вше зе́млю кро́ткихъ наслѣ́доваша, пла́кавше ᲂу҆тѣ́шишасѧ, а҆лка́вше пра́вды насы́тишасѧ, ми́ловавше поми́ловани бы́ша, чи́сти бы́вше се́рдцемъ бг҃а ꙗ҆́коже мо́щно ᲂу҆зрѣ́ша, миротвори́вше бжⷭ҇твеннагѡ сподо́бишасѧ сыноположе́нїѧ, гони́ми же и҆ мꙋ́чими пра́вды ра́ди и҆ бл҃гоче́стїѧ бы́вше на нб҃сѣ́хъ ны́нѣ веселѧ́тсѧ и҆ ра́дꙋютсѧ и҆ прилѣ́жнѡ мо́лѧтсѧ гдⷭ҇еви поми́ловатисѧ ѻ҆те́чествꙋ на́шемꙋ.

А҆́ще пое́мъ слꙋ́жбꙋ всѣ́хъ ст҃ы́хъ рꙋ́сскихъ во и҆́нъ де́нь, степе́нна, а҃-й а҆нтїфѡ́нъ д҃-гѡ гла́са. Прокі́менъ, є҆ѵⷢ҇лїе и҆ стїхи́ра по н҃-мъ ѱалмѣ̀ ст҃ы́хъ. И҆ глаго́летъ дїа́конъ: Сп҃сѝ, бж҃е, лю́ди твоѧ̑: (зрѝ страни́цꙋ 551).

А҆́ще в҃-ѧ недѣ́лѧ по пѧтидесѧ́тницѣ, пое́мъ канѡ́ны си́це: ѻ҆ктѡ́иха воскре́сный а҃-гѡ гла́са со і҆рмосо́мъ на д҃ и҆ бцⷣы а҃-гѡ гла́са на в҃, канѡ́нъ всѣ́хъ рꙋ́сскихъ ст҃ы́хъ, гла́съ и҃, на и҃. А҆́ще во и҆́нъ де́нь, пое́мъ канѡ́ны си́це: бцⷣы, гла́съ в҃: Ꙗ҆̀же всѣ̑мъ ᲂу҆до́бь послꙋ́шнаѧ: (зрѝ ѻ҆ктѡ́ихъ, повече́рїе сꙋббѡ́ты и҆лѝ слꙋ́жбꙋ ᲂу҆толѝ моѧ̑ печа̑ли, і҆анꙋа́рїа к҃є) со і҆рмосо́мъ на ѕ҃, і҆рмосы̀ по два́жды. И҆ канѡ́нъ всѣ́хъ рꙋ́сскихъ ст҃ы́хъ, гла́съ и҃, на и҃.

Канѡ́нъ всѣ̑мъ ст҃ы̑мъ, въ землѝ рѡссі́йстѣй просїѧ́вшымъ, гла́съ и҃.

Пѣ́снь а҃. І҆рмо́съ:

Въ чермнѣ́мъ фараѡ́на съ колесни́цами погрꙋзи́лъ є҆сѝ и҆ лю́ди мѡѷсе́омъ сп҃слъ є҆сѝ, пою́щыѧ тебѣ̀, гдⷭ҇и, пѣ́снь побѣ́днꙋю. ꙗ҆́кѡ и҆зба́вителю на́шемꙋ бг҃ꙋ.

Всѝ въ пѣ́снехъ дх҃о́вныхъ воспои́мъ согла́снѡ во бл҃гоче́стїи просїѧ́вшыѧ бжⷭ҇твєнныѧ ѻ҆тцы̀ на́шѧ, ꙗ҆̀же и҆знесѐ рꙋ́сскїѧ землѝ всѧ́ко мѣ́сто и҆ страна̀ и҆ ꙗ҆́же цр҃ковь рꙋ́сскаѧ воспита̀.

Ра́дꙋйтесѧ, ст҃и́телїе седмочи́сленнїи: васі́лїе, є҆фре́ме, є҆ѵге́нїе, є҆лпі́дїе, а҆гаѳодѡ́ре, є҆ѵѳе́рїе и҆ капїтѡ́не 3, въ херсо́нѣ є҆пі́скопствовавшїи и҆ зе́млю на́шꙋ кровмѝ свои́ми ѡ҆ст҃и́вшїи.

Прїиди́те, мч҃николю́бцы вѣ́рнїи, пѣ́снми почти́мъ первомч҃ники рꙋ́сскїѧ, ѳео́дѡра и҆ ю҆́нагѡ і҆ѡа́нна, і҆́дѡлѡмъ не послꙋжи́вшыѧ и҆ крѡ́ви своѧ̑ за хрⷭ҇та̀ да́вшыѧ.

Вели́чїе на́ше и҆ похвала̀ ты̀ є҆сѝ, ѻ҆́льго бг҃омꙋ́драѧ, тобо́ю бо свободи́хомсѧ ѿ бѣсо́вскагѡ прельще́нїѧ, не преста́й и҆ ны́нѣ моли́ти за лю́ди, ꙗ҆̀же бг҃ꙋ привела̀ є҆сѝ.

Ра́дꙋйсѧ и҆ весели́сѧ, ра́бе хрⷭ҇то́въ, кн҃же вели́кїй и҆ мꙋ́дрый влади́мїре, просвѣти́телю на́шъ, тобо́ю бо и҆зба́вихомсѧ ѿ дꙋшепа́гꙋбнагѡ і҆дѡлослꙋже́нїѧ, тѣ́мже, ра́дꙋйсѧ, вопїе́мъ тебѣ̀.

Сїѧ́етъ, ꙗ҆́кѡ ѕвѣзда̀ на нб҃сѝ, бж҃їй і҆ера́рхъ мїхаи́лъ, зе́млю рꙋ́сскꙋю просвѣти́вый свѣ́томъ позна́нїѧ бжⷭ҇твенныѧ вѣ́ры и҆ влⷣцѣ приведы́й лю́ди нѡ́вы, ба́нею креще́нїѧ ѡ҆бновлє́нны.

Ѽ бл҃же́ннїи страстоте́рпцы хрⷭ҇тѡ́вы, кн҃зїе бори́се, глѣ́бе, и҆ и҆́горе, и҆ мїхаи́ле съ болѧ́риномъ ѳео́дѡромъ! не забꙋ́дите ѻ҆те́чества ва́шегѡ, гла́дъ и҆ ѡ҆ѕлобле́нїе ѿгони́те, ѿ грѣхопаде́нїй междоꙋсо́бїй и҆зба́вите ны̀.

Бг҃оро́диченъ:

Съ чи́нми а҆́гг҃лъ, влⷣчице, со проро́ки, и҆ а҆по́столы, и҆ со всѣ́ми ст҃ы́ми за ны̀, грѣ̑шныѧ, бг҃ꙋ помоли́сѧ, твоегѡ̀ покро́ва пра́здникъ въ рѡссі́йстѣй землѝ просла́вльшыѧ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Проповѣ́дꙋетъ пресла́внѡ и҆ па́че трꙋбы̀ вопїе́тъ вели́каѧ ла́ѵра пече́рскаѧ, тобо́ю нача́ло прїи́мшаѧ, ѻ҆́тче прпⷣбне, а҆нтѡ́нїе сла́вне, всѣ́хъ рѡссі́йскихъ мона́хѡвъ первонача́льниче.

Воспои́мъ свѣ́тлѡ мона́шескагѡ ѻ҆́бщагѡ житїѧ̀ въ рꙋ́сстѣй землѝ ᲂу҆строи́телѧ, бл҃же́ннагѡ ѳеодо́сїѧ, съ ни́мъ и҆ не́стѡра, достопа́мѧтныхъ дѣѧ́нїй списа́телѧ, и҆ а҆лѵ́пїѧ, живописа́нїѧ въ рѡссі́и нача́льника.

Ра́й мы́сленный є҆сѝ, пече́рскаѧ ст҃а́ѧ горо̀, ᲂу҆мно́жившаѧ дх҃ѡ́внаѧ древеса̀, бл҃жє́нныѧ ѻ҆тцы̀, и҆́хже и҆счестѝ по є҆ди́номꙋ не могꙋ́ще, ѡ҆ всѣ́хъ вкꙋ́пѣ хвалꙋ̀ принесе́мъ є҆ди́номꙋ влⷣцѣ.

А҆нтѡ́нїе, і҆ѡа́нне и҆ є҆ѵста́ѳїе, тве́рдїи и҆сповѣ̑дницы правосла́вныѧ вѣ́ры, и҆здре́вле въ землѝ рѡссі́йско-лито́встѣй насажде́ннїи, мл҃твами ва́шими ѡ҆ ѕловрѣ́дныхъ и҆новѣ́рныхъ мꙋдрова́нїй соѻ́тчичей ва́шихъ и҆ всѣ́хъ на́съ ѡ҆гражда́йте.

Хода́таи бꙋ́дите за ѻ҆те́чество ва́ше земно́е, а҆ѳана́сїе прпⷣбномꙋ́чениче, и҆ ты̀, ѻ҆́троче гаврїи́ле, наꙋчи́те ᲂу҆̀бо и҆ на́съ правосла́вїе дерзнове́ннѡ и҆сповѣ́дати и҆ стра́ха вра́жїѧ не боѧ́тисѧ.

Да почти́тсѧ і҆́ѡвъ прпⷣбный, ла́ѵры поча́евскїѧ ᲂу҆краше́нїе, вкꙋ́пѣ со всѣ́ми ᲂу҆го́дники и҆ чꙋдотво́рцы волы́нскими, дѣ́лы свои́ми и҆ чꙋдесы̀ ѡ҆блиста́вшїи пресла́внѡ землѝ на́шеѧ концы̀.

Пѣ́снми сщ҃е́нными восхва́лимъ а҆ѳана́сїѧ, царегра́дскаго ст҃и́телѧ, своѐ бл҃гослове́нїе землѝ рѡссі́йстѣй прине́сшаго и҆ чⷭ҇тны̑ѧ своѧ̑ мо́щы, ꙗ҆́кѡ зало́гъ є҆дине́нїѧ со вселе́нскою цр҃ковїю, на́мъ ѡ҆ста́вльшаго.

Бг҃оро́диченъ:

Сѐ вре́мѧ застꙋпле́нїѧ прест҃ы́ѧ бцⷣы прїи́де, ᲂу҆мно́жившымсѧ собла́знѡмъ, сѐ вре́мѧ на́шихъ къ не́й воздыха́нїй, ѽ бра́тїе, рце́мъ ᲂу҆̀бо ѿ всегѡ̀ се́рдца на́шегѡ: влⷣчице, влⷣчице, помозѝ лю́демъ твои̑мъ.

А҆́ще в҃-ѧ недѣ́лѧ по пѧтидесѧ́тницѣ, по є҆ктенїѝ конда́къ и҆ і҆́косъ ст҃ы́хъ (зрѝ страни̑цы 534, 535). Та́же сѣда́льны ст҃ы́хъ.

Сѣда́ленъ ст҃ы́хъ, гла́съ з҃:

Нощнѣ́й тмѣ̀ ѡ҆гꙋстѣва́ющей, ᲂу҆множа́етсѧ ѕвѣ́здный бле́скъ, и҆ къ томꙋ̀ ѻ҆́чи заблꙋ́ждшихъ ра́достнѡ возво́дѧтсѧ. та́кѡ и҆ ᲂу҆мно́жившейсѧ на землѝ грѣхо́внѣй тмѣ̀, возведе́мъ горѣ̀ ѻ҆́чи на́ши, бра́тїе, и҆ сїѧ́нїе дх҃о́вныхъ ѕвѣ́здъ, зе́млю на́шꙋ ѡ҆зарѧ́ющихъ, ᲂу҆зрѣ́вше, къ нбⷭ҇номꙋ ѻ҆те́чествꙋ потщи́мсѧ, є҆гѡ́же да не лиши́тъ гдⷭ҇ь на́съ, грѣ́шныхъ, мл҃твами ст҃ы́хъ свои́хъ.

Сла́ва, и҆ ны́нѣ, гла́съ д҃:

Притеце́мъ, вѣ́рнїи, къ бжⷭ҇твеннѣй и҆ цѣльбоно́снѣй ри́зѣ сп҃си́телѧ на́шегѡ бг҃а, бл҃гоизво́лившагѡ сїю̀ пло́тїю носи́ти и҆ на крестѣ̀ ст҃ꙋ́ю свою̀ кро́вь и҆злїѧ́ти, є҆́юже и҆скꙋпѝ на́съ ѿ рабо́ты вра́жїѧ. тѣ́мже бл҃года́рственнѡ вопїе́мъ є҆мꙋ̀: сп҃сѝ первосвѧти́телѧ на́шего и҆ а҆рхїере́и, ѻ҆те́чество на́ше и҆ всѧ̀ лю́ди чⷭ҇тно́ю твое́ю ри́зою защитѝ и҆ спасѝ дꙋ́шы на́шѧ, ꙗ҆́кѡ чл҃вѣколю́бецъ.

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ проро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Первонача́льника и҆ ᲂу҆строи́телѧ гра́да москвы̀, бл҃же́нне кн҃же данїи́ле, показа́ тѧ гдⷭ҇ь, къ немꙋ́ же непреста́ннѡ молѧ́сѧ, гра́дъ тво́й ѡ҆хранѧ́й, зе́млю на́шꙋ ѿ бѣ́дъ сп҃са́й, правосла̑вныѧ же рꙋ̑сскїѧ лю́ди посѣща́ти ми́лостивнѡ не преста́й.

Мо́лимъ ва́съ, ст҃и́телїе хрⷭ҇тѡ́вы пе́тре, а҆леѯі́е, і҆ѡ́но, фїлі́ппе и҆ і҆нноке́нтїе, фѡ́тїе, кѷпрїа́не и҆ ѳеогнѡ́сте и҆ всѝ про́чїи моско́встїи чꙋдотво́рцы: дꙋше́вное смꙋще́нїе и҆ печа́ли на́шеѧ бꙋ́рю разори́те и҆ тишинꙋ̀ на́мъ пода́йте ва́шими къ бг҃ꙋ мл҃твами.

И҆ первопресто́льникъ рѡссі́йскїѧ цр҃кве, и҆ и҆сповѣ́дникъ правосла́вныѧ вѣ́ры, и҆ ѡ҆бличи́тель грѣхолюби́выхъ и҆ мѧте́жныхъ, и҆ строи́тель рꙋ́сскїѧ землѝ бы́лъ є҆сѝ, ст҃и́телю є҆рмоге́не, и҆ за сїѐ темни́цею и҆ гла́домъ мꙋ́чимь бы́лъ є҆сѝ и҆ прїе́мь ѿ бг҃а неꙋвѧда́емый вѣне́цъ, со ст҃и́тели и҆ мч҃ники весели́шисѧ.

Ра́дꙋетсѧ сла́вный гра́дъ москва̀, и҆ весе́лїѧ и҆сполнѧ́етсѧ всѧ̀ рѡссі́ѧ, на твоѧ̑ мл҃твы надѣ́ющесѧ, се́ргїе бг҃облаже́нне, ѻ҆би́тель же твоѧ̀ красꙋ́етсѧ, хранѧ́щи чⷭ҇тны̑ѧ твоѧ̑ мо́щы, ꙗ҆́кѡ сокро́вище сщ҃е́нное.

Пѣ́снми сщ҃е́нными восхва́лимъ прпⷣбнаго ні́кѡна, послꙋша́нїѧ рачи́телѧ, съ ни́мже воспои́мъ мїхе́ѧ, са́ввꙋ и҆ дїонѵ́сїѧ, стефа́на, а҆ндроні́ка и҆ са́ввꙋ и҆ всѧ̑ прпⷣбныѧ ᲂу҆ченикѝ и҆ собесѣ́дники вели́кагѡ се́ргїѧ, и҆́хже мл҃твами сы́нове рѡссі́йстїи сп҃са́ютсѧ.

Ѽ премꙋ́дрїи и҆ бл҃же́ннїи васі́лїе, маѯі́ме и҆ і҆ѡа́нне моско́встїи и҆ всѝ хрⷭ҇та̀ ра́ди ю҆ро́дивїи рѡссі́йстїи, чꙋ́днїи житїе́мъ и҆ ра́зꙋмомъ, мо́лимъ ва́съ прилѣ́жнѡ: моли́те хрⷭ҇та̀ бг҃а на́шего за земно́е ѻ҆те́чество ва́ше и҆ всѣ̑мъ вѣ̑рнымъ спасе́нїе и҆спроси́те.

Но́вый сто́лпникъ въ дѣ́бри калꙋ́жстѣй ꙗ҆ви́лсѧ є҆сѝ, прпⷣбне тѵ́хѡне, и҆ кꙋ́пнѡ съ прпⷣбнымъ пафнꙋ́тїемъ, и҆́ночества стро́гимъ ревни́телемъ, и҆ бл҃же́ннымъ лаѵре́нтїемъ ко гра́дꙋ го́рнемꙋ въ странѣ̀ твое́й пꙋ́ть вѣ́рный проложи́лъ є҆сѝ, на не́мже ᲂу҆пасѝ и҆ на́съ мл҃твами твои́ми.

Бг҃оро́диченъ:

Подо́бїемъ і҆кѡ́ны і҆́верскїѧ не то́чїю а҆ѳѡ́нъ просвѣща́етсѧ, но и҆ гра́дъ москва̀ ᲂу҆краша́етсѧ и҆ и҆ні́и гра́ды и҆ вє́си ѡ҆сщ҃а́ютсѧ, ѿ тоѧ̀ чꙋде́снꙋю по́мощь прїе́млюще и҆ и҆сто́чникъ ᲂу҆тѣше́нїѧ въ не́й ѡ҆брѣта́юще, и҆ на́мъ, бл҃га́ѧ врата́рнице, двє́ри ра̑йскїѧ ѿве́рзи.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋ́ждаѧ тма̀ ѡ҆каѧ́ннаго, но ѡ҆брати́ мѧ и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Вели́кагѡ новагра́да первопа́стырїе, нїки́то, ні́фонте, і҆ѡа́нне, ѳеокті́сте, мѡѷсе́е, є҆ѵѳѵ́мїе, і҆ѡ́но и҆ серапїѡ́не, и҆ про́чїи чꙋ́днїи ст҃и́телїе, въ домꙋ̀ премꙋ́дрости бж҃їѧ, ꙗ҆́кѡ фі́нїѯы, процвѣлѝ є҆стѐ, словесы̀ бл҃гопло́дными и҆ непоро́чнымъ житїе́мъ.

Свѣ́тлѡ да похва́лѧтсѧ кн҃зїе новгоро́дстїи, влади́мїръ, ст҃ы́ѧ софі́и пречꙋ́дныѧ ᲂу҆строи́тель, съ ма́терїю свое́ю а҆́нною, и҆ мстисла́въ, и҆ ѳео́дѡръ, съ ни́ми же и҆ всѝ ѿ ро́да кн҃зе́й рѡссі́йскихъ житїе́мъ бг҃оꙋго́днымъ просїѧ́вшїи, бжⷭ҇твенными да воспою́тсѧ пѣ́снми.

Ди́внаго варлаа́ма, вели́кагѡ новагра́да сла́вꙋ и҆ ᲂу҆краше́нїе, всерѡссі́йскаго мл҃твенника, и҆ а҆нтѡ́нїѧ сла́внаго, ѿ ве́тхагѡ ри́ма на ка́мени по волна́мъ морски̑мъ преплы́вшаго, са́ввꙋ же, и҆ є҆фре́ма, и҆ мїхаи́ла кто̀ досто́йнѡ просла́витъ ѿ земны́хъ;

Є҆де́мскагѡ раѧ̀, прїиди́те, ви́димъ цвѣты̀ присножи́знєнныѧ и҆ бг҃опрозѧбє́нныѧ, по́двиги ѻ҆тє́цъ, въ предѣ́лѣхъ новгоро́дскихъ просїѧ́вшихъ, и҆́хже є҆́сть є҆ди́нъ дѣ́латель гдⷭ҇ь.

Все́володъ кро́ткїй и҆ довмо́нтъ, пско́вꙋ стѣна̀ неѡбори́маѧ, и҆ нїко́ла бл҃же́нный и҆ корни́лїй прпⷣбный, ст҃ы́мъ креще́нїемъ чꙋ́дь лїво́нскꙋю просвѣти́вый, пѣ́снми да воспою́тсѧ.

Вѣ́рꙋ правосла́внꙋю пред̾ лати́ны проповѣ́давшїи, къ вѣ̑чнымъ востеко́ша ѻ҆би́телемъ і҆сі́дѡръ пресвѵ́теръ и҆ съ ни́мъ собо́ръ мч҃ническїй во ю҆́рьевѣ, гра́дѣ лїво́нстѣмъ, цр҃ю̀ царе́й ны́нѣ предстоѧ́ще, мо́лѧтсѧ ѡ҆ на́съ, почита́ющихъ па́мѧть и҆́хъ.

А҆враа́мїѧ бг҃оно́снаго, смоле́нска ᲂу҆краше́нїе, и҆ є҆ѵфросѵ́нїю, ра́дованїе по́лотское и҆ дѣ́вамъ сїѧ́нїе, хрⷭ҇тѐ мо́й, тебѣ̀ приво́димъ мл҃твенники, и҆́хже ра́ди сп҃сѝ на́съ.

Бг҃оро́диченъ:

Застꙋ́пница те́плаѧ и҆ногда̀ вели́комꙋ новꙋгра́дꙋ была̀ є҆сѝ и҆ ненадѣ́ющихсѧ наде́жда и҆ люде́й бѣ́дствꙋющихъ помо́щница, и҆ ны́нѣ ѻ҆́комъ милосе́рдымъ при́зри на на́съ, и҆ скѡ́рби на́шѧ ви́дѣвши и҆ воздыха́нїе ᲂу҆слы́шавши, зна́менїе млⷭ҇ти ꙗ҆вѝ на́мъ, пречⷭ҇таѧ. (с. 533)

Пѣ́снь ѕ҃. І҆рмо́съ:

Во́днагѡ ѕвѣ́рѧ во ᲂу҆тро́бѣ дла̑ни і҆ѡ́на крⷭ҇тови́днѡ распросте́ръ, сп҃си́тельнꙋю стра́сть проѡбража́ше ꙗ҆́вѣ: тѣ́мъ, тридне́венъ и҆зше́дъ, премі́рное воскресе́нїе прописа́ше пло́тїю пригвожде́ннагѡ хрⷭ҇та̀ бг҃а и҆ тридне́внымъ воскресе́нїемъ мі́ръ просвѣ́щшаго.

Є҆ѵⷢ҇льски хрⷭ҇та̀ возлюби́вше, прпⷣбнїи зѡсі́мо, савва́тїе, ге́рмане, і҆рина́рше, є҆леаза́ре и҆ про́чїи солове́цтїи чꙋдотво́рцы, мі́ра ѿврати́стесѧ, въ непроходи̑мыѧ и҆ пꙋсты̑ѧ ѻ҆́стровы соловє́цкїѧ заше́дше, всѧ́кїѧ добродѣ́тели ѻ҆́бразꙋ навыко́сте, мꙋ́дрѣй пчелѣ̀ подо́бѧщесѧ, и҆ селе́нїе, досто́йное прїѧ́ти дх҃а ст҃а́гѡ, бы́сте, премꙋ́дрїи.

Вели́каго въ чꙋдесѣ́хъ прпⷣбнаго трѵ́ѳѡна воспои́мъ, лопа́рскаго просвѣти́телѧ, въ послѣ́днихъ концѣ́хъ сѣ́верныѧ страны̀ ѿ го́рькагѡ ра́бства бѣсо́вскагѡ лю́ди и҆зба́вльшаго и҆ ст҃ы́мъ креще́нїемъ возроди́вшаго.

Ра́дꙋйсѧ, пꙋсты́не, пре́жде безпло́днаѧ и҆ неѡбита́емаѧ, по́слѣжде же, ꙗ҆́кѡ крі́нъ, процвѣ́тшаѧ и҆ и҆́нѡкъ мно́жество возрасти́вшаѧ взыгра́йте, го́ры валаа́ма и҆ всѧ̑ древа̀ дꙋбра̑внаѧ, хва́лѧще съ на́ми се́ргїѧ и҆ ге́рмана, вкꙋ́пѣ же и҆ а҆рсе́нїѧ со а҆леѯа́ндромъ сви́рскимъ, ѻ҆тцы̀ всехва̑льныѧ.

Житїѧ̀ сегѡ̀ непостоѧ́ннꙋю пꙋчи́нꙋ немѧте́жнѡ преше́лъ є҆сѝ, прпⷣбне кѷрі́лле, ко́рмчꙋю мт҃рь бж҃їю и҆мѣ́ѧ, и҆ ты̀, і҆ѡ́сифе, во́лоцкаѧ похвало̀, и҆ ні́ле нестѧжа́телю, на водѣ̀ поко́йнѣ и҆ на ѕла́цѣ воздержа́нїѧ ᲂу҆чєни́къ ва́шихъ стада̀ мꙋ́дрѣ ᲂу҆паслѝ є҆стѐ, и҆ ны́нѣ съ ни́ми моли́тесѧ ѡ҆ чтꙋ́щихъ па́мѧть ва́шꙋ.

Ꙗ҆́кѡ ѕвѣ́зды вели̑кїѧ, просїѧ́ша въ мона́шескихъ собо́рѣхъ а҆нтѡ́нїй сі́йскїй и҆ трѵ́фѡнъ вѧ́тскїй, дими́трїй на прилꙋ́цѣ и҆ а҆мфїло́хїй и҆ дїонѵ́сїй, похвала̀ глꙋши́цкаѧ, григо́рїй пе́льшемскїй, па́ѵелъ, и҆ се́ргїй, и҆ корни́лїй волого́дстїи 4, ꙗ҆́кѡ лꙋча́ми, сїѧ́юще добродѣ́тельми житїѧ̀ своегѡ̀, прпⷣбнїи.

Бг҃ови́днѡ пожи́вше, пꙋсты́ни, ꙗ҆́кѡ гра́ды, сотвори́ли є҆стѐ, мака́рїе, варна́во и҆ тѵ́хѡне, а҆враа́мїе и҆ генна́дїе. тѣ́мже вкꙋ́пѣ съ про́чими ѻ҆тцы̀, въ предѣ́лѣхъ костромски́хъ и҆ ꙗ҆росла́вскихъ просїѧ́вшими, ᲂу҆блажа́емъ ва́съ и҆ мо́лимъ: моли́те гдⷭ҇а, да не лиши́тъ и҆ на́съ є҆гѡ́же ны́нѣ наслажда́етесѧ бг҃овидѣ́нїѧ въ вѣ́чнѣмъ гра́дѣ нбⷭ҇нагѡ цр҃ѧ̀.

Ликꙋ́й, ѳиваи́до рꙋ́сскаѧ, красꙋ́йтесѧ, пꙋсты̑ни и҆ дє́бри ѻ҆лонє́цкїѧ, бѣлоезє́рскїѧ и҆ вологѡ́дскїѧ, возрасти́вшыѧ ст҃о́е и҆ сла́вное ѻ҆тє́цъ мно́жество, чꙋ́днымъ житїе́мъ всѣ́хъ наставлѧ́ющее мі́рꙋ не прилѣплѧ́тисѧ, кре́стъ сво́й на ра́мена взѧ́ти и҆ во слѣ́дъ хрⷭ҇тꙋ̀ ше́ствовати.

Бг҃оро́диченъ:

Твое́ю всечⷭ҇тно́ю і҆кѡ́ною тѵ́хвинскою, ю҆́же вели́каѧ рѡссі́ѧ ꙗ҆́кѡ нѣ́кїй да́ръ бжⷭ҇твенный свы́ше бл҃гоговѣ́йнѡ прїѧ́тъ: при́снѡ странꙋ̀ на́шꙋ, ѽ гпⷭ҇жѐ цр҃и́це бцⷣе, покрыва́й и҆ застꙋпа́й, спаса́ющи сїю̀ ѿ всѣ́хъ навѣ̑тъ вра́жїихъ.

А҆́ще в҃-ѧ недѣ́лѧ по пѧтидесѧ́тницѣ, по є҆ктенїѝ конда́къ воскре́сенъ, гла́съ а҃: Воскре́слъ є҆сѝ: и҆ і҆́косъ воскре́сенъ: Воскре́сшаго тридне́внѡ: А҆́ще во и҆́нъ де́нь, конда́къ и҆ і҆́косъ всѣ́хъ рꙋ́сскихъ ст҃ы́хъ.

Конда́къ ст҃ы́хъ, гла́съ г҃. Подо́бенъ: Дв҃а дне́сь:

Дне́сь ли́къ ст҃ы́хъ, въ землѝ на́шей бг҃ꙋ ᲂу҆годи́вшихъ, предстои́тъ въ цр҃кви и҆ неви́димѡ за ны̀ мо́литсѧ бг҃ꙋ. а҆́гг҃ли съ ни́мъ славосло́вѧтъ, и҆ всѝ ст҃і́и цр҃кве хрⷭ҇то́вы є҆мꙋ̀ спра́зднꙋютъ, ѡ҆ на́съ бо мо́лѧтъ всѝ кꙋ́пнѡ превѣ́чнаго бг҃а.

І҆́косъ:

Є҆де́мскагѡ раѧ̀ древеса̀ доброплѡ́днаѧ и҆ кра̑снаѧ ꙗ҆ви́шасѧ ст҃і́и, цвѣ́ты бл҃говѡ́нныѧ ᲂу҆че́нїй и҆ плоды̀ дѣ́лъ творѧ́щїи, ѿ ни́хже дꙋ́шы на́шѧ пита́ютсѧ и҆ гла́дъ на́шъ дх҃о́вный ᲂу҆толѧ́етсѧ, прїиди́те ᲂу҆̀бо, притеце́мъ под̾ сѣ́нь и҆́хъ и҆ ᲂу҆бл҃жи́мъ и҆̀хъ, ꙗ҆́кѡ страны̀ на́шеѧ ѻ҆тра́дꙋ и҆ ᲂу҆краше́нїе и҆ ꙗ҆́кѡ житїѧ̀ ѻ҆́бразъ на́мъ и҆ начерта́нїе, ті́и бо вѣнцы̀ прїѧ́ша нетлѣ̑нныѧ ѿ превѣ́чнагѡ бг҃а.

Пѣ́снь з҃. І҆рмо́съ:

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ, ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Лео́нтїй, и҆са́їѧ и҆ і҆гна́тїй, і҆а́кѡвъ и҆ ѳео́дѡръ, чⷭ҇тні́и дх҃а сосꙋ́ди и҆ росто́вꙋ ᲂу҆краше́нїе, а҆враа́мїй, і҆́дѡлѡмъ покланѧ́вшыѧсѧ ко хрⷭ҇тꙋ̀ приведы́й, и҆ пе́тръ царе́вичъ, и҆ і҆рина́рхъ, самопроизво́льный страда́лецъ, кассїа́нъ и҆ паі́сїй, кнѧ́зь рѡма́нъ и҆ царе́вичъ дими́трїй, и҆ всѝ росто́встїи и҆ ᲂу҆́гличстїи чꙋдотво́рцы бжⷭ҇твенными да воспою́тсѧ пѣ́снми.

Да велича́етсѧ не́вскїй побѣди́тель, бл҃говѣ́рный кн҃зь а҆леѯа́ндръ, да пое́тсѧ геѡ́ргїй, во́инъ хра́брый и҆ страда́лецъ, да похва́литсѧ а҆ндре́й, пе́рвый рꙋ́сскїѧ землѝ собира́тель, вкꙋ́пѣ со глѣ́бомъ, ю҆́нымъ сы́номъ свои́мъ, да воспое́тсѧ же и҆ а҆враа́мїй мч҃никъ, гра́да влади́мїра сла́ва, ст҃ы́ѧ рꙋсѝ застꙋ̑пницы и҆ цр҃кве правосла́вныѧ ᲂу҆краше́нїе.

Ѳео́дѡрꙋ и҆ і҆ѡа́ннꙋ сла́ва, сꙋ́ждальскимъ свѣти́льникѡмъ, сі́мѡнꙋ и҆ дїонѵ́сїю съ ни́ми да пою́тсѧ и҆ є҆ѵѳѵ́мїй, въ по́двизѣхъ превысо́кїй, и҆ є҆ѵфросѵ́нїѧ прпⷣбнаѧ, пресвѣ́тлаѧ сꙋ́ждальскаѧ ѕвѣзда̀, вкꙋ́пѣ же и҆ косма̀, на ꙗ҆́хромѣ рѣцѣ̀ подвиза́выйсѧ.

Пѣ́снь сто́лпникꙋ нїки́тѣ, покаѧ́нїѧ ѻ҆́бразъ ꙗ҆ви́вшемꙋ, хвала̀ и҆ данїи́лꙋ, ни́щихъ и҆ безро́дныхъ согрѣва́телю, сла́ва и҆ а҆ндре́ю, кнѧже́нїе ѡ҆ста́вившемꙋ и҆ въ ни́щетнѣмъ ѻ҆́бразѣ житїѐ сконча́вшемꙋ, переѧсла́вскимъ чꙋдотво́рцємъ.

Кѡнстанті́не кн҃же, а҆по́столе и҆ просвѣти́телю мꙋ́ромскїѧ землѝ, съ мїхаи́ломъ и҆ ѳео́дѡромъ, ча́ды твои́ми, и҆ пе́тре и҆ феѵрѡ́нїе, и҆ пра́веднаѧ і҆ꙋлїані́е ми́лостиваѧ, мꙋ́рома застꙋ̑пницы, вкꙋ́пѣ же и҆ васі́лїе ст҃и́телю и҆ кн҃же рѡма́не, рѧза́ни сла́во, ѡ҆ на́съ хрⷭ҇та̀ моли́те.

Тверска́ѧ похвало̀, а҆рсе́нїе ст҃и́телю, мїхаи́ле, кн҃же и҆ мч҃ниче, и҆ а҆́нно, гра́да ка́шина сокро́вище, ні́ле и҆ мака́рїе прпⷣбнїи, є҆фре́ме, гра́да торжка̀ просвѣти́телю, со а҆рка́дїемъ и҆ і҆ꙋлїані́ею, цвѣ́томъ цѣломꙋ́дрїѧ, ѡ҆ на́съ хрⷭ҇та̀ моли́те.

Ѻ҆рꙋ́жїемъ ва́шихъ мл҃твъ, бл҃говѣ́рнїи кн҃зїе ѳео́дѡре и҆ даві́де съ кѡнстанті́номъ и҆ васі́лїе и҆ кѡнстанті́не, ꙗ҆росла́влѧ сла́во, ѡ҆хранѧ́йте и҆ ны́нѣ ѻ҆те́чество ва́ше и҆ люде́й правосла́вныхъ ѿ всѧ́кихъ бѣ́дъ и҆ напа́стей.

Бг҃оро́диченъ:

Ꙗ҆́кѡ благода́тное сокро́вище дарова́ла є҆сѝ ст҃ѣ́й рꙋсѝ і҆кѡ́нꙋ твою̀ влади́мїрскꙋю, є҆́юже ѻ҆тцє́мъ на́шымъ многоча́стнѣ и҆ многоѻбра́знѣ благодѣ́ѧла є҆сѝ. не ѡ҆скꙋдѣ́й и҆ ны́нѣ, ѽ мт҃и бж҃їѧ, ᲂу҆толѧ́ющи лю́тое на на́съ воста́нїе, и҆ зе́млю рꙋ́сскꙋю сп҃сѝ.

Пѣ́снь и҃. І҆рмо́съ:

Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилежа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Красꙋ́йсѧ, гра́де каза́нь, и҆мѣ́ѧ мл҃твенники своѧ̑, прпⷣбныхъ ст҃и́телей гꙋ́рїѧ, варсоно́фїѧ и҆ ге́рмана, ѿгна́вшихъ ѿ тебѐ тмꙋ̀ невѣ́рїѧ, и҆ і҆ѡа́нна мч҃ника, и҆ стефа́на, и҆ петра̀, ѻ҆те́ческое нече́стїе ѡ҆ста́вившихъ и҆ мч҃нически въ нбⷭ҇ное ѻ҆те́чество преше́дшихъ.

Сщ҃е́ннагѡ писа́нїѧ ѿ ю҆́ности наꙋчи́всѧ, бг҃оно́се стефа́не, ра́ломъ слове́съ твои́хъ ѡ҆лѧденѣ̑вшаѧ зы́рѧнскихъ люде́й сердца̀ воздѣ́лалъ є҆сѝ и҆ бжⷭ҇твенное сѣ́мѧ въ ни́хъ всѣ́ѧлъ є҆сѝ. ны́нѣ же вкꙋ́пѣ со ст҃ы́ми продолжа́тели дѣ́ла твоегѡ̀ гера́сїмомъ, пїтѷрі́момъ и҆ і҆ѡ́ною па́ствꙋ ва́шꙋ и҆ всю̀ рꙋ́сскꙋю зе́млю мл҃твами ва́шими ѡ҆гражда́йте.

Весели́сѧ, сиби́рскаѧ страно̀, въ тебѣ́ бо гдⷭ҇ь ꙗ҆вѝ ᲂу҆го́дники своѧ̑: пра́веднаго сѷмеѡ́на верхотꙋ́рскаго, и҆ и҆ркꙋ́тскїѧ ст҃и́тели і҆нноке́нтїѧ и҆ сѡфро́нїѧ, и҆ і҆ѡа́нна тобо́льскаго, нѡ́выѧ ди̑вныѧ свѣти́льники и҆ чꙋдотво́рцы.

Ра́дꙋйсѧ, і҆ве́рїе и҆ всѧ̑ землѐ грꙋзи́нскаѧ, торжествꙋ́й, а҆рме́нїе, воспѣва́ющи равноапо́стольнꙋю ні́нꙋ и҆ тама́рꙋ, григо́рїѧ просвѣти́телѧ и҆ и҆ны́хъ мно́гихъ, въ страна́хъ кавка́зскихъ вѣ́рꙋ правосла́внꙋю и҆сповѣ́давшихъ и҆ ны́нѣ ѡ҆ земно́мъ ѻ҆те́чествѣ хрⷭ҇тꙋ̀ молѧ́щихсѧ.

І҆ера́рше бг҃омꙋ́дре дими́трїе, житі́й ст҃ы́хъ списа́телю и҆ подража́телю ѡ҆́нымъ ре́вностный, сла́вы ѻ҆́ныхъ мл҃твами твои́ми содѣ́лай на́съ ѻ҆́бщники.

Ст҃и́телю ѻ҆́тче митрофа́не, пе́рвый воро́нежꙋ па́стырю, мꙋ́жество ве́лїе ꙗ҆ви́вый, преще́нїѧ царе́ва и҆ сме́рти не ᲂу҆боѧ́выйсѧ и҆ въ простотѣ̀ дꙋ́шꙋ свою̀ спасы́й, молѝ бг҃а ѡ҆ на́съ.

Ꙗ҆́кѡ пчела̀, ме́дъ сла́дкїй ѿ цвѣтѡ́въ скороꙋвѧда́ющихъ собра́лъ є҆сѝ, ѻ҆́тче тѵ́хѡне, ѿ тлѣ́ннагѡ мі́ра дх҃о́вное сокро́вище, и҆́мже всѣ́хъ на́съ ᲂу҆слажда́еши.

Бг҃оро́диченъ:

Застꙋ́пницꙋ ᲂу҆се́рднꙋю восхва́лимъ и҆ чⷭ҇тно́мꙋ є҆ѧ̀ поклони́мсѧ ѻ҆́бразꙋ, и҆́мже въ новопросвѣще́ннѣй странѣ̀ правовѣ́рїе ᲂу҆твердѝ и҆ въ годи́нꙋ лю́тꙋю ма́терь рꙋ́сскихъ градѡ́въ сп҃сѐ. се́й и҆ гра́да ст҃а́гѡ петра̀ вели́кое сокро́вище, и҆ всеѧ̀ землѝ на́шеѧ пресла́вное бога́тство.

Пѣ́снь ѳ҃. І҆рмо́съ:

Ѽ, дѣ́вства кра́й, бцⷣе пѣ́снми же сла́вными пра́здники возвыша́ющаѧ бл҃года́тей твои́хъ и҆ ны́нѣ дѣ́вственною сло́ва твоегѡ̀ па́мѧтїю наи́тїемъ та́йнымъ ᲂу҆краша́ющаѧ въ не́й тѧ̀ велича́ющыѧ.

Ѽ бл҃гі́й просвѣти́телю и҆ ти́хїй а҆́гг҃ле цр҃кве тамбо́вскїѧ, ст҃и́телю пїтѷрі́ме, весели́сѧ ѡ҆ па́ствѣ твое́й и҆ всеѧ̀ рꙋсѝ, въ не́й бо но́ваѧ и҆ вѣ́чнаѧ ра́дость процвѣтѐ, прпⷣбный серафі́мъ, ди́вный трꙋ́дникъ спасе́нїѧ на́шегѡ.

Ѽ ст҃и́телїе бг҃омꙋ́дрїи ѳеодо́сїе и҆ і҆ѡаса́фе, ди́внымъ нетлѣ́нїемъ ѿ гдⷭ҇а просла́вленнїи! ва́ми возвели́чени є҆смы̀ и҆ мы̀, ча̑да сꙋ́ще цр҃кве правосла́вныѧ, въ не́йже и҆ доны́нѣ гдⷭ҇ь чꙋ̑днаѧ ꙗ҆влѧ́етъ и҆ рабѡ́въ свои́хъ прославлѧ́етъ.

Ѽ но́вый чꙋдотво́рче, і҆ѡ́сифе, ст҃и́телю и҆ мт҃ниче! гра́дъ а҆́страхань и҆ всѧ̀ пово́лжскаѧ страна̀ тобо́ю хва́литсѧ и҆ почита́етъ тѧ̀, за пра́вдꙋ ѿ невѣ́рныхъ мѧте́жникѡвъ лю́тѣ пострада́вша.

Ѽ, па́че сло́ва и҆ превы́ше похва́лъ ст҃ы́хъ страстоте́рпцєвъ по́двига! ѕло́бꙋ ᲂу҆̀бо лю́тыхъ ѿстꙋ́пникѡвъ и҆ на́глое і҆ꙋде́йское неи́стовство претерпѣ́ша, вѣ́рꙋ хрⷭ҇то́вꙋ проти́вꙋ ᲂу҆че́нїй мі́ра сегѡ̀, ꙗ҆́кѡ щи́тъ, держа́ще и҆ на́мъ ѻ҆́бразъ терпѣ́нїѧ и҆ ѕлострада́нїй досто́йнѡ ꙗ҆влѧ́юще.

Ѽ, тве́рдости и҆ мꙋ́жества по́лка мч҃єникъ хрⷭ҇то́выхъ, ѿ хи́нѡвъ лю́тыхъ за хрⷭ҇та̀ ᲂу҆бїе́нныхъ! ті́и бо цр҃ковь правосла́внꙋю ᲂу҆краси́ша и҆ въ странѣ̀ свое́й крѡ́ви своѧ̑, ꙗ҆́кѡ сѣ́мѧ вѣ́ры, да́ша, и҆ кꙋ́пнѡ со всѣ́ми ст҃ы́ми досто́йнѡ да почтꙋ́тсѧ.

Ѽ вели́цыи срѡ́дницы на́ши, и҆мено́ваннїи и҆ безыме́ннїи, ꙗ҆вле́ннїи и҆ неѧвле́ннїи, нбⷭ҇нагѡ сїѡ́на дости́гшїи и҆ сла́вꙋ мно́гꙋ ѿ бг҃а прїи́мшїи, ᲂу҆тѣше́нїе на́мъ, въ ско́рби сꙋ́щымъ, и҆спроси́те, вѣ́рꙋ на́шꙋ па́дшꙋю возста́вите и҆ лю́ди расточє́нныѧ собери́те, ѿ на́съ, ꙗ҆́кѡ да́ръ, пѣ́снь бл҃годаре́нїѧ прїе́млюще.

Трⷪ҇ченъ:

Ѽ трⷪ҇це чⷭ҇тна́ѧ, прїимѝ, ꙗ҆́же рѡссі́ѧ прино́ситъ тѝ, ꙗ҆́кѡ нача́тки и҆ ꙗ҆́кѡ ѳѷмїа́мъ и҆збра́нный, всѧ̑ ᲂу҆годи́вшыѧ и҆ пре́жде, и҆ по́слѣжде въ не́й, зна́ємыѧ и҆ незна́ємыѧ, и҆ мл҃твами и҆́хъ ѿ всѧ́кагѡ вре́да сїю̀ сохранѧ́й.

Бг҃оро́диченъ:

Ѽ дв҃о бл҃года́тнаѧ, гра́ды и҆ вє́си на́шѧ чⷭ҇тна́гѡ ли́ка твоегѡ̀ и҆з̾ѻбражє́нїи, ꙗ҆́кѡ бл҃говоле́нїѧ зна́мєнїи, ѡ҆богати́вшаѧ 5, бл҃годаре́нїе на́ше прїимѝ и҆ ѿ бѣ́дъ лю́тыхъ ѻ҆те́чество на́ше и҆зба́ви, вси́ бо тѧ̀, ꙗ҆́кѡ покро́въ всемо́щный страны̀ на́шеѧ, велича́емъ.

А҆́ще в҃-ѧ недѣ́лѧ по пѧтидесѧ́тницѣ, по ѳ҃-й пѣ́сни є҆ктенїа̀ и҆ Ст҃ъ гдⷭ҇ь бг҃ъ на́шъ: Свѣти́ленъ воскре́сный в҃-й: Ка́мень ᲂу҆зрѣ́вше: Сла́ва, свѣти́ленъ ст҃ы́хъ. И҆ ны́нѣ, бг҃оро́диченъ є҆гѡ̀.

Свѣти́ленъ ст҃ы́хъ. Подо́бенъ: Нб҃о ѕвѣзда́ми:

Въ пѣ́снехъ восхва́лимъ свѣти̑ла незахѡди́маѧ рѡссі̑йскїѧ землѝ, таи́нники бжⷭ҇твеннагѡ сло́ва, хрⷭ҇та̀ сла́вѧще, си́хъ просвѣти́вшаго и҆ возлюби́вшаго и҆ помо́щники на́мъ да́вшаго въ ско́рби.

Сла́ва, и҆ ны́нѣ, бг҃оро́диченъ:

Свѣ́томъ лица̀ твоегѡ̀ ѻ҆гнезра́чнꙋю странꙋ̀ рꙋ́сскꙋю ѡ҆зари́въ, гдⷭ҇и, и҆ ны́нѣ во ст҃ы́хъ твои́хъ, ꙗ҆́кѡ въ лꙋча́хъ неизче́тныхъ, не преста́й ѡ҆зарѧ́ти на́съ премꙋ́дростїю твое́ю, ꙗ҆́же є҆́сть софі́ѧ преимени́таѧ.

На хвали́техъ стїхи̑ры на и҃, воскре́сны д҃, гла́съ а҃: Пое́мъ твою̀, хрⷭ҇тѐ: Кре́стъ претерпѣ́вый: А҆́да плѣни́вый: Бг҃олѣ́пное твоѐ: И҆ хвали̑тныѧ стїхи̑ры ст҃ы́хъ со сла́вникомъ на д҃: двѣ̀ послѣ̑днїѧ стїхи̑ры пое́мъ со стїхѝ ѿ стїхо́вны ма́лыѧ вече́рни: Сті́хъ: Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀. Сті́хъ: Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль. Сла́ва, стїхи́ра є҆ѵⷢ҇льскаѧ в҃-ѧ, гла́съ в҃: Съ мѵ́ры прише́дшымъ: И҆ ны́нѣ, гла́съ то́йже: Пребл҃гослове́нна є҆сѝ:

На хвали́техъ стїхи̑ры ст҃ы́хъ, гла́съ є҃. Подо́бенъ: Ра́дꙋйсѧ:

Ра́дꙋйсѧ, цр҃ковь рѡссі́йскаѧ вѣ́рнаѧ, ра́дꙋйсѧ, кн҃же бл҃говѣ́рный влади́мїре пресла́вный, ра́дꙋйсѧ, ѻ҆́льго и҆збра́ннаѧ вы́ бо є҆стѐ ко влⷣцѣ всѣ́хъ пе́рвѣйшїи на́ши хода́таи, и҆ нача̑льницы правосла́вїѧ, и҆ наста̑вницы ко и҆́стиннѣй вѣ́рѣ. ра́дꙋйсѧ, всѧ́ко мѣ́сто, и҆ страна̀, и҆ гра́дъ, гра́жданы воспита́вшїи нбⷭ҇нагѡ црⷭ҇твїѧ, сі́и ст҃а̑ѧ свѣти̑ла дꙋша́мъ на́шымъ ꙗ҆ви́шасѧ, сі́и чꙋде́съ заре́ю, и҆ дѣ́лы, и҆ зна́менїи просїѧ́ша мы́сленнѡ во всѧ̑ концы̀ и҆ ны́нѣ хрⷭ҇тꙋ̀ мо́лѧтсѧ пода́ти дꙋша́мъ на́шымъ ве́лїю млⷭ҇ть.

Ра́дꙋйсѧ, землѝ рꙋ́сскїѧ ᲂу҆краше́нїе, цр҃кве на́шеѧ непоколеби́мое ᲂу҆твержде́нїе, сла́во правосла́вныхъ, чꙋде́съ и҆стѡ́чницы, любвѐ стрꙋѝ неистощи̑мыѧ, свѣти̑льницы многосвѣ́тлїи, дх҃а ст҃а́гѡ ѻ҆рга́ни, кро́тцыи и҆ неѕло́бивїи, добродѣ́тельми ᲂу҆кра́шеннїи, чл҃вѣ́цы нбⷭ҇нїи, земні́и а҆́гг҃ли, хрⷭ҇та̀ дрꙋ́зи и҆́скреннїи тогѡ̀ прилѣ́жнѡ моли́те пода́ти ва́съ чтꙋ́щымъ ве́лїю млⷭ҇ть.

Прїиди́те, нбⷭ҇нїи предста́телїе на́ши, къ на́мъ, ва́шегѡ тре́бꙋющымъ ми́лостивагѡ посѣще́нїѧ, и҆ и҆зба́вите ѡ҆ѕло́блєнныѧ мꙋчи́тельскими преще́нїи лю́тагѡ неи́стовства невѣ́рныхъ, ѿ ни́хже, ꙗ҆́кѡ плѣ̑нницы и҆ на́зи, гони́мы є҆смы̀, ѿ мѣ́ста на мѣ́сто ча́сто преходѧ́ще и҆ заблꙋжда́юще въ верте́пѣхъ и҆ гора́хъ. ᲂу҆ще́дрите ᲂу҆̀бо, прехва́льнїи, и҆ да́рꙋйте на́мъ ѡ҆сла́бꙋ, ᲂу҆толи́те бꙋ́рю и҆ ᲂу҆гаси́те є҆́же на ны̀ негодова́нїе, бг҃а молѧ́ще, подаю́щаго ва́ми землѝ на́шей ве́лїю млⷭ҇ть.

Сла́ва, гла́съ д҃:

Гла́съ є҆ѵⷢ҇льскїй ᲂу҆слы́шавше и҆ а҆по́стольскою ре́вностїю распали́вшесѧ, въ наꙋче́нїе невѣ́рныхъ ꙗ҆зы́кѡвъ ᲂу҆стреми́стесѧ, бг҃облаже́ннїи равноапо́стольнїи кꙋ́кше, лео́нтїе, стефа́не и҆ гꙋ́рїе, ге́рмане а҆лѧ́скинскїй, и҆ ст҃и́телю ѻ҆́тче нїко́лае ꙗ҆по́нскїй, и҆ досточꙋ́дный і҆нноке́нтїе, вели́кїѧ сиби́рскїѧ страны̀ а҆по́столе и҆ просвѣще́нїѧ за мо́ремъ сꙋ́щихъ но́выхъ стра́нъ во а҆ме́рицѣ первонача́льниче. тѣ́мже со всѣ́ми про́чими, во бл҃говѣ́стїи хрⷭ҇то́вѣ потрꙋди́вшимисѧ, досто́йнѡ ᲂу҆блажа́етесѧ.

И҆ ны́нѣ, бг҃оро́диченъ, гла́съ то́йже:

При́снѡ страна̀ рѡссі́йскаѧ ѡ҆ тебѣ̀ хва́литсѧ и҆ весели́тсѧ, и҆мꙋ́щи тѧ̀ застꙋ́пницꙋ непосты́днꙋю и҆ стѣ́нꙋ нерꙋши́мꙋю, не ѡ҆скꙋдѣ́й и҆ ны́нѣ, влⷣчице, и҆збавлѧ́ти твоѧ̑ лю́ди ѿ всѣ́хъ бѣ́дъ.

Славосло́вїе вели́кое.

А҆́ще в҃-ѧ недѣ́лѧ по пѧтидесѧ́тницѣ, тропа́рь воскре́сенъ то́чїю: Дне́сь сп҃се́нїе мі́рꙋ бы́сть: Во и҆́нъ де́нь по славосло́вїи тропа́рь ст҃ы́хъ, гла́съ д҃: І҆ерꙋсали́ма вы́шнѧгѡ гра́ждане: Сла́ва, и҆ ны́нѣ, бг҃оро́диченъ: Къ застꙋ́пницѣ страны̀ на́шеѧ: (зрѝ страни́цꙋ 501). Є҆ктєнїѝ и҆ ѿпꙋ́стъ.

Посе́мъ и҆схо́дитъ предстоѧ́тель съ кади́ломъ сѣ́верными двермѝ, пред̾ и҆дꙋ́щымъ є҆мꙋ̀ двꙋ́мъ свѣти́льникѡмъ, ко і҆кѡ́нѣ пра́здника. И҆ пою́тсѧ стїхи̑ры хра́ма всѣ́хъ рꙋ́сскихъ ст҃ы́хъ, подѡ́бны на ѻ҆́смь гласѡ́въ.

Стїхи́ры на цѣлова́нїе, гла́съ а҃. Подо́бенъ: Нбⷭ҇ныхъ чинѡ́въ:

Нбⷭ҇нїи гра́ждане, сослꙋжє́бницы мы́слєннымъ чинѡ́мъ, чꙋдотво́рцы рꙋ́сстїи, не забꙋ́дите земно́е ѻ҆те́чество ва́ше, ꙗ҆́кѡ на ва́съ ᲂу҆пова́нїе по бз҃ѣ и҆ бцⷣѣ возложи́хомъ.

Гла́съ то́йже. Подо́бенъ: Прехва́льнїи мч҃єницы:

Прехва́льнїи чꙋдотво́рцы рꙋ́сстїи, ва́съ ни землѧ̀ на́ша потаи́ла є҆́сть, но не́бо прїѧ́тъ вы̀, и҆ ѿверзо́шасѧ ва́мъ ра̑йскїѧ двє́ри, и҆ внꙋ́трь раѧ̀ бы́вше, дре́ва жи́зни наслажда́етесѧ, хрⷭ҇тꙋ̀ моли́тесѧ дарова́ти ѻ҆те́чествꙋ ва́шемꙋ ми́ръ и҆ ве́лїю млⷭ҇ть.

Гла́съ в҃. Подо́бенъ: Кі́ими похва́льными:

Кі́ими похва́льными вѣнцы̀ ᲂу҆вѣнча́емъ предста́тели на́шѧ; прⷭ҇то́лꙋ бж҃їю ны́нѣ предстоѧ́щыѧ и҆ дх҃о́внѡ на́съ посѣща́ющыѧ, чи́стѣ тѣ́хъ лю́бѧщихъ, всѣ́хъ ско́рбныхъ ᲂу҆тѣ́шители и҆ всѣ́хъ сꙋ́щихъ въ бѣда́хъ прибѣ́жище, страны̀ на́шеѧ храни́тели, вѣ́ры и҆́стинныѧ въ не́й ᲂу҆твержде́нїе, правосла́вныхъ побо́рники, и҆́хже ра́ди врагѡ́въ на́шихъ возноше́нїе хрⷭ҇то́съ низложѝ, и҆мѣ́ѧй ве́лїю млⷭ҇ть.

Гла́съ г҃. Подо́бенъ: Крестоѻбра́знѡ мѡѷсе́й:

Крестоѻбра́знѡ мѡѷсе́й на горѣ̀ рꙋ́цѣ просте́ръ къ высотѣ̀, а҆мали́ка побѣдѝ, ст҃і́и же срѡ́дницы на́ши при́снѡ ко гдⷭ҇ꙋ простира́ютъ рꙋ́цѣ своѝ, молѧ́щесѧ ѡ҆ рꙋ́сстѣй землѝ, ѡ҆хранѧ́юще ю҆̀ ѿ и҆скꙋше́нїй и҆ бѣ́дъ и҆ на́мъ ѻ҆́бразъ подаю́ще, да мл҃твою воѻрꙋжи́вшесѧ и҆ кресто́мъ, побѣжда́емъ врага̀, прославлѧ́юще сп҃са гдⷭ҇а.

Гла́съ д҃. Подо́бенъ: Зва́нный свы́ше:

Свы́ше зва́ни бы́вше, ѡ҆снова́нїе крѣ́пкѡ къ добродѣ́телемъ положи́сте въ дꙋша́хъ ва́шихъ, стра́хъ бж҃їй, се́й бо є҆́сть нача́ло премꙋ́дрости и҆ ѡ҆кормле́нїе во все́мъ житїѝ хотѧ́щымъ ᲂу҆годи́ти бг҃ꙋ, и҆ на се́мъ ѡ҆снова́нїи назда́сте прекра́сныѧ добродѣ́тєли сохране́нїемъ животво́рныхъ бж҃їихъ за́повѣдей. є҆го́же моли́те сп҃стѝ и҆ просвѣти́ти дꙋ́шы на́шѧ.

Гла́съ то́йже. Подо́бенъ: Хотѣ́хъ слеза́ми ѡ҆мы́ти:

Хотѣ́хъ житїю̀ подража́ти подви́жникѡвъ бл҃гоче́стїѧ ѿ ро́да на́шегѡ и҆ про́чее житїѧ̀ моегѡ̀ дѣ́лы до́брыми бл҃гоꙋгоди́ти тебѣ̀, но вра́гъ льсти́тъ мѧ̀ и҆ бо́ретъ дꙋ́шꙋ мою̀, гдⷭ҇и, ст҃ы́хъ твои́хъ мольба́ми поми́лꙋй и҆ сп҃си́ мѧ.

Гла́съ є҃. Подо́бенъ: Прпⷣбне ѻ҆́тче:

Пресла́внїи ѻ҆тцы̀, чꙋ́вственное ѻ҆те́чество и҆мꙋ́щїи зе́млю рꙋ́сскꙋю, мы́сленный же нбⷭ҇ный гра́дъ го́рнїй сїѡ́нъ, свѣти̑льницы сꙋ́щымъ во тмѣ̀ ѿча́ѧнїѧ ꙗ҆ви́стесѧ, покаѧ́нїѧ ᲂу҆́глїе пречⷭ҇тно́е, добродѣ́телей бжⷭ҇твенное би́серїе, си̑рымъ предста́телїе и҆ вдови́цамъ, зако́нѡвъ цр҃ко́вныхъ и҆сполни́тели и҆ дѣ́тельнїи свѣти̑льницы воздержа́нїѧ, хрⷭ҇та̀ моли́те, хрⷭ҇то́ви моли́тесѧ всегда̀ дарова́ти цр҃кве рꙋ́сстѣй є҆диномы́слїе и҆ землѝ на́шей ми́ръ и҆ ве́лїю млⷭ҇ть.

Гла́съ ѕ҃. Подо́бенъ: А҆́гг҃льскїѧ пред̾иди́те:

А҆́гг҃льскїѧ пред̾иди́те си̑лы, ꙗ҆̀же въ домꙋ̀ ѻ҆́тчи, ᲂу҆гото́вайте ѡ҆би́тели: ѿ ро́да бо на́шегѡ подви̑жницы бл҃гоче́стїѧ, ꙗ҆́кѡ цр҃кве пе́рвенцы, и҆ ны́нѣ на нб҃сѣ́хъ написꙋ́ютсѧ. Тѣ́мъ мы̀, грѣ́шнїи, въ ра́дости возопїи́мъ: ди́венъ є҆сѝ, бж҃е, во ст҃ы́хъ, мл҃твами и҆́хъ и҆ на́съ поми́лꙋй.

Гла́съ то́йже. Подо́бенъ: Тридне́венъ:

Па́мѧть ст҃ы́хъ ра́дость боѧ́щихсѧ гдⷭ҇а, подвиза́вшесѧ бо хрⷭ҇та̀ ра́ди, вѣнцы̀ ѿ негѡ̀ прїѧ́ша, и҆ ны́нѣ со дерзнове́нїемъ мо́лѧтсѧ ѡ҆ рꙋ́сстѣй землѝ.

Гла́съ то́йже. Подо́бенъ: Ѿча̑ѧннаѧ:

Ѿча̑ѧни є҆смы̀ житїѧ̀ ра́ди и҆ не и҆́мамы пра́ва добродѣ́тельна, но ꙗ҆́кѡ прино́симъ тѝ мл҃твы ст҃ы́хъ срѡ́дникъ на́шихъ, не ѿве́ржи ны̀, гдⷭ҇и, ᲂу҆твердѝ цр҃ковь рꙋ́сскꙋю, не пре́зри сле́зы вѣ́рныхъ сынѡ́въ, колѣ̑на пред̾ ваа́ломъ не преклонѧ́вшихъ, и҆ и҆̀хже не и҆стреби́лъ є҆сѝ, согрѣша́ющихъ, прїими́ ны, ка́ющыѧсѧ, ст҃ы́хъ твои́хъ мольба́ми.

Гла́съ з҃. Подо́бенъ: Неради́вше ѡ҆ вре́менныхъ:

Неради́вше ѡ҆ вре́менныхъ, ст҃і́и соплемє́нницы на́ши, и҆ на землѝ хрⷭ҇та̀ ра́ди до́бльственнѣ подвиза́вшесѧ, воздаѧ̑нїѧ трꙋдѡ́въ ѿ негѡ̀ прїѧ́сте, но ꙗ҆́кѡ и҆мꙋ́щїи дерзнове́нїе, того̀ ᲂу҆моли́те, ꙗ҆́кѡ бг҃а всеси́льна, рꙋ́сь въ правосла́вїи ᲂу҆тверди́ти, всѧ̑ же собла́зны цр҃кѡ́вныѧ въ не́й до конца̀ и҆скорени́те мо́лимсѧ.

Гла́съ и҃. Подо́бенъ: Что́ ти нарече́мъ:

Что̀ ва́съ нарече́мъ: херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ: серафі́мы ли; ꙗ҆́кѡ непреста́ннѡ просла́висте є҆го̀: а҆́гг҃ли ли; въ тѣ́лѣ бо сꙋ́ще, безпло́тныхъ житїѐ показа́сте: си̑лы ли; дѣ́йствꙋете бо чꙋдеса̀: мнѡ́га ва́ша и҆мена̀ и҆ бѡ́льшаѧ дарова̑нїѧ. моли́те сп҃сти́сѧ на́мъ, сро́дникѡмъ ва́шымъ.

Гла́съ то́йже. Подо́бенъ: И҆́же во є҆де́мѣ:

Дре́влѣ во є҆де́мѣ въ раѝ дре́во снѣ́дное прозѧ́бло є҆́сть посредѣ̀ садѡ́въ, во всѣ́хъ же концѣ́хъ рꙋ́сскїѧ землѝ ст҃і́и срѡ́дницы на́ши, ꙗ҆́кѡ фі́нїѯи, процвѣто́ша, и҆ ꙗ҆́кѡ ке́дри въ лїва́нѣ, ᲂу҆мно́жишасѧ, и҆́миже цр҃ковь на́ша красѧ́щисѧ па́че дре́внѧгѡ є҆де́ма, ра́достнѡ прославлѧ́етъ гдⷭ҇а, вѣ́ры ра́ди си́хъ просла́вльшаго, и҆ на́съ сла́вы ѻ҆́ныхъ прича́стники ꙗ҆вѝ, хрⷭ҇тѐ бж҃е, мл҃твами и҆́хъ разрꙋша́ѧ ꙗ҆́же на ны̀ кѡ́зни вра̑жїѧ, и҆ сподо́би на́съ црⷭ҇твїѧ твоегѡ̀, гдⷭ҇и.

Гла́съ то́йже. Подо́бенъ: Мꙋ́чєницы твоѝ:

Ст҃і́и твоѝ, гдⷭ҇и, забы́ша житє́йскаѧ, небре́гше ѡ҆ тѣле́сныхъ бꙋ́дꙋщїѧ ра́ди жи́зни, тоѧ̀ наслѣ̑дницы ꙗ҆ви́шасѧ, тѣ́мже и҆ со а҆́гг҃лы ра́дꙋютсѧ. тѣ́хъ мл҃твами да́рꙋй землѝ на́шей ве́лїю млⷭ҇ть.

Сла́ва, и҆ ны́нѣ, бг҃оро́диченъ, гла́съ то́йже.

Подо́бенъ: Ѽ, пресла́внагѡ чꙋдесѐ:

Ѽ пресла́внагѡ чꙋдесѐ! нб҃сѐ и҆ землѝ цр҃и́це, ѿ ст҃ы́хъ сро́дникѡвъ на́шихъ ᲂу҆молѧ́емаѧ, до ны́нѣ зе́млю рꙋ́сскꙋю покрыва́етъ и҆ ли́ка своегѡ̀ и҆з̾ѻбраже́нїи ми́лостивнѡ ѡ҆богаща́етъ. ѽ влⷣчице держа́внаѧ, не преста́ни и҆ на бꙋ́дꙋщее вре́мѧ во ᲂу҆твержде́нїе на рꙋсѝ правосла́вїѧ млⷭ҇ти и҆ чꙋдеса̀ и҆злива́ти до вѣ́ка. а҆ми́нь.

И҆ быва́етъ є҆леопома́занїе. Посе́мъ мл҃тва Влⷣко многоми́лостиве: кра́тко (зрѝ ᲂу҆ста́въ, стр. 584). А҆́ще во в҃-ю недѣ́лю по пѧтидесѧ́тницѣ, ѡ҆глаше́нїе стꙋди́тово и҆ тропа́рь прпⷣбномꙋ ѳео́дѡрꙋ. Ча́съ а҃-й и҆ ѿпꙋ́стъ. Та́же, соше́дшесѧ посредѣ̀ хра́ма, пое́мъ стїхѝ сі́и.

Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю.

Под̾ твою̀ млⷭ҇ть прибѣга́емъ, бцⷣе дв҃о, моле́нїй на́шихъ не пре́зри въ ско́рбехъ, но ѿ бѣ́дъ и҆зба́ви на́съ, є҆ди́на чⷭ҇таѧ и҆ бл҃гослове́ннаѧ.

Прест҃а́ѧ бцⷣе, сп҃сѝ на́съ.

Всѝ ст҃і́и землѝ рꙋ́сскїѧ, моли́те бг҃а ѡ҆ на́съ.

На лїтꙋргі́и

А҆́ще во в҃-ю недѣ́лю по пѧтидесѧ́тницѣ, бл҃жє́нны воскрє́сны а҃-гѡ гла́са на ѕ҃, начина́ѧ ѿ: Бл҃же́ни кро́тцыи: и҆ ст҃ы́хъ бл҃жє́нны на д҃, гла́съ и҃, ѿ: Бл҃же́ни є҆стѐ, є҆гда̀ поно́сѧтъ ва́мъ: А҆́ще во и҆́нъ де́нь, блажє́нны ст҃ы́хъ на и҃, начина́ѧ ѿ: Бл҃же́ни ми́лостивїи:

Бл҃жє́нны ст҃ы́хъ, гла́съ и҃:

На и҃: Бл҃же́ни ми́лостивїи, ꙗ҆́кѡ ті́и поми́ловани бꙋ́дꙋтъ.

Всѝ въ пѣ́снехъ дх҃о́вныхъ воспои́мъ согла́снѡ во бл҃гоче́стїи просїѧ́вшыѧ бжⷭ҇твєнныѧ ѻ҆тцы̀ на́шѧ, ꙗ҆̀же и҆знесѐ рꙋ́сскїѧ землѝ всѧ́ко мѣ́сто и҆ страна̀ и҆ ꙗ҆́же цр҃ковь рꙋ́сскаѧ воспита̀.

Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.

Ѽ вели́цыи срѡ́дницы на́ши, и҆мено́ваннїи и҆ безыме́ннїи, ꙗ҆вле́ннїи и҆ неѧвле́ннїи, нбⷭ҇нагѡ сїѡ́на дости́гшїи и҆ сла́вꙋ мно́гꙋ ѿ бг҃а прїи́мшїи, ᲂу҆тѣше́нїе на́мъ, въ ско́рби сꙋ́щымъ, и҆спроси́те, вѣ́рꙋ на́шꙋ па́дшꙋю возста́вите и҆ лю́ди расточє́нныѧ собери́те, ѿ на́съ, ꙗ҆́кѡ да́ръ, пѣ́снь бл҃годаре́нїѧ прїе́млюще.

Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.

Ѽ трⷪ҇це чⷭ҇тна́ѧ, прїимѝ, ꙗ҆̀же рѡссі́ѧ прино́ситъ тѝ, ꙗ҆́кѡ нача́тки и҆ ꙗ҆́кѡ ѳѷмїа́мъ и҆збра́нный, всѧ̑ ᲂу҆годи́вшыѧ и҆ пре́жде, и҆ по́слѣжде въ не́й, зна́ємыѧ и҆ незна́ємыѧ, и҆ мл҃твами и҆́хъ ѿ всѧ́кагѡ вре́да сїю̀ сохранѝ.

Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Ѽ дв҃о бл҃года́тнаѧ, гра́ды и҆ вє́си на́шѧ чⷭ҇тна́гѡ ли́ка твоегѡ̀ и҆з̾ѻбраже́нїи, ꙗ҆́кѡ бл҃говоле́нїѧ зна́менїи, ѡ҆богати́вшаѧ, бл҃годаре́нїе на́ше прїимѝ и҆ ѿ бѣ́дъ лю́тыхъ ѻ҆те́чество на́ше и҆зба́ви, вси́ бо тѧ̀, ꙗ҆́кѡ покро́въ всемо́щный страны̀ на́шеѧ, велича́емъ.

Бл҃же́ни є҆стѐ, є҆гда̀ поно́сѧтъ ва́мъ, и҆ и҆жденꙋ́тъ и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.

Не мече́мъ на́шимъ зе́млю на́шꙋ наслѣ́дихомъ, но десни́цею твое́ю и҆ мы́шцею твое́ю, и҆ просвѣще́нїемъ лица̀ твоегѡ̀, и҆ ст҃ы́хъ твои́хъ слеза́ми, по́двиги и҆ пѡ́ты, кровмѝ и҆ ᲂу҆че́нїи, ѻ҆те́чество на́ше ᲂу҆тверди́сѧ.

Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Є҆гда̀ ѿстꙋпи́хомъ ѿ тебѐ и҆ за́пѡвѣди твоѧ̑ престꙋпи́хомъ, тогда̀ ѿри́нꙋлъ є҆си́ ны и҆ низложи́лъ є҆си́ ны, и҆ па́че всѣ́хъ ꙗ҆зы̑къ ᲂу҆ма́лихомсѧ, но пощадѝ на́съ, бж҃е, сп҃си́телю на́шъ, ст҃ы́хъ твои́хъ мольба́ми.

Сла́ва, трⷪ҇ченъ:

Ѽ трⷪ҇це пребжⷭ҇твеннаѧ, ᲂу҆врачꙋ́й болѣ̑зни и҆ скѡ́рби на́шѧ, и҆ воздви́гни дх҃ъ на́шъ ѿ лѣ́ности и҆ сна̀ грѣхо́внагѡ, да досто́йни бꙋ́демъ ѻ҆тє́цъ и҆ бра́тїй на́шихъ, по́двиги свои́ми въ землѝ на́шей и҆́мѧ твоѐ просла́вльшихъ.

И҆ ны́нѣ, бг҃оро́диченъ:

Расточє́нныѧ соберѝ, ѿлꙋчє́нныѧ возвратѝ, ѿпа́дшыѧ ѿ вѣ́ры правосла́вныѧ ѡ҆братѝ, пла́чꙋщыѧ и҆ скорбѧ́щыѧ ᲂу҆тѣ́ши, землѝ на́шеѧ пови́гшїѧсѧ сокрꙋше́нїе и҆сцѣлѝ, бл҃года́тнаѧ, со ст҃ы́ми соѻ́тчичи на́шими бг҃а ѡ҆ на́съ ᲂу҆молѧ́ющи.

По вхо́дѣ тропарѝ и҆ кондакѝ, и҆ чтє́нїѧ а҆по́стола и҆ є҆ѵⷢ҇лїѧ, и҆ прича̑стны по ᲂу҆ста́вꙋ в҃-й недѣ́ли по пѧтидесѧ́тницѣ (зрѝ стр. 584).

По заамво́нной мл҃твѣ и҆схо́димъ ко і҆кѡ́нѣ пра́здника, пою́ще тропа́рь ст҃ы́хъ, гла́съ и҃: Ꙗ҆́коже пло́дъ: (зрѝ стр. 498). Сла́ва, конда́къ ст҃ы́хъ, гла́съ г҃: Дне́сь ли́къ ст҃ы́хъ: (зрѝ стр. 534).

И҆ ны́нѣ, бг҃оро́диченъ, гла́съ г҃:

Бцⷣе, хрⷭ҇тїа́нѡмъ помо́щнице, твоѐ предста́тельство стѧжа́вше, рабѝ твоѝ, бл҃года́рнѡ тебѣ̀ вопїе́мъ: ра́дꙋйсѧ, пречⷭ҇таѧ бцⷣе дв҃о, и҆ ѿ всѣ́хъ на́съ бѣ́дъ твои́ми мл҃твами всегда̀ и҆зба́ви, є҆ди́на вско́рѣ предста́тельствꙋющаѧ.

Посе́мъ чте́тсѧ мл҃тва на бл҃гослове́нїе ко́лива и҆ кра́ткаѧ мл҃тва ко всѣ̑мъ ст҃ы̑мъ землѝ рꙋ́сскїѧ. (А҆́ще не соверша́лось послѣ́дованїе моле́бнагѡ пѣ́нїѧ, чте́тсѧ по лїтꙋргі́и по́лнаѧ мл҃тва ко всѣ̑мъ ст҃ы̑мъ землѝ рꙋ́сскїѧ, зрѝ стр. 509).

Моли́тва ко всѣ̑мъ ст҃ы̑мъ землѝ рꙋ́сскїѧ.

Ѽ всеблаже́ннїи и҆ бг҃омꙋ́дрїи ᲂу҆гѡ́дницы бж҃їи, по́двиги свои́ми зе́млю рꙋ́сскꙋю ѡ҆ст҃и́вшїи и҆ тѣлеса̀ своѧ̑, ꙗ҆́кѡ сѣ́мѧ вѣ́ры, въ не́й ѡ҆ста́вльшїи, дꙋша́ми же свои́ми прⷭ҇то́лꙋ бж҃їю предстоѧ́щїи и҆ непреста́ннѡ ѡ҆ не́й молѧ́щїисѧ! Сѐ ны́нѣ, въ де́нь ѻ҆́бщагѡ ва́шегѡ торжества̀, мы̀, грѣ́шнїи, ме́ньшїи бра́тїѧ ва́ши, дерза́емъ приноси́ти ва́мъ сїѐ хвале́бное пѣ́нїе. Велича́емъ ва́шѧ вели̑кїѧ по́двиги, дх҃о́внїи во́ини хрⷭ҇тѡ́ви, терпѣ́нїемъ и҆ мꙋ́жествомъ до конца̀ врага̀ низложи́вшїи и҆ на́съ ѿ пре́лести и҆ ко́зней є҆гѡ̀ и҆збавлѧ́ющїи. ᲂу҆бл҃жа́емъ ва́ше ст҃о́е житїѐ, свѣти̑льницы бжⷭ҇твеннїи, свѣ́томъ вѣ́ры и҆ добродѣ́телей свѣтѧ́щїисѧ и҆ на́шѧ ᲂу҆мы̀ и҆ сердца̀ бг҃омꙋ́дреннѡ ѡ҆зарѧ́ющїи. Прославлѧ́емъ ва̑ша вели̑каѧ чꙋдеса̀, цвѣ́ти ра́йстїи, въ странѣ̀ на́шей сѣ́вернѣй прекра́снѣ процвѣ́тшїи и҆ а҆рѡма́ты дарова́нїй и҆ чꙋде́съ повсю́дꙋ благоꙋха́ющїи. восхвалѧ́емъ ва́шꙋ бг҃оподража́тельнꙋю любо́вь, предста́телїе на́ши и҆ покрови́телїе, и҆ ᲂу҆пова́юще на по́мощь ва́шꙋ, припа́даемъ къ ва́мъ и҆ вопїе́мъ: Всѝ ст҃і́и срѡ́дницы на́ши, ѿ лѣ́тъ дре́внихъ просїѧ́вшїи и҆ въ послѣ̑днїѧ дни̑ подвиза́вшїисѧ, ꙗ҆вле́ннїи и҆ неѧвле́ннїи, вѣ́домїи и҆ невѣ́домїи помѧни́те на́шꙋ не́мощь и҆ ᲂу҆ничиже́нїе и҆ моли́твами ва́шими и҆спроси́те ᲂу҆ хрⷭ҇та̀ бг҃а на́шегѡ, да и҆ мы̀, безбѣ́днѡ преплы́вше жите́йскꙋю пꙋчи́нꙋ и҆ невреди́мѡ соблю́дше сокро́вище вѣ́ры, въ приста́нище вѣ́чнагѡ спасе́нїѧ дости́гнемъ и҆ въ бл҃же́нныхъ ѻ҆би́телехъ го́рнѧгѡ ѻ҆те́чества вкꙋ́пѣ съ ва́ми и҆ со всѣ́ми ᲂу҆годи́вшими є҆мꙋ̀ ѿ вѣ́ка ст҃ы́ми водвори́мсѧ бл҃года́тїю и҆ чл҃вѣколю́бїемъ сп҃си́телѧ на́шегѡ гдⷭ҇а і҆и҃са хрⷭ҇та̀, є҆мꙋ́же со превѣ́чнымъ ѻ҆ц҃е́мъ и҆ прест҃ы́мъ дх҃омъ подоба́етъ непреста́нное славосло́вїе и҆ поклоне́нїе ѿ всѣ́хъ тва́рей во вѣ́ки вѣкѡ́въ.

Ли́къ: А҆ми́нь.

По мл҃твѣ пое́мъ велича̑нїѧ прест҃ѣ́й трⷪ҇цѣ, бцⷣѣ и҆ ст҃ы̑мъ (зрѝ страни́цꙋ 523). Поє́мымъ велича́нїимъ си́мъ, быва́етъ цѣлова́нїе і҆кѡ́ны пра́здника. Посе́мъ: Бꙋ́ди и҆́мѧ гдⷭ҇не: Ѱало́мъ л҃г и҆ про́чее лїтꙋргі́и. Ѿпꙋ́стъ и҆ многолѣ́тїе со ѻ҆со́бымъ проше́нїемъ (зрѝ ᲂу҆ста́въ, страни́ца 585) и҆ стїхѝ:

Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю.

Под̾ твою̀ млⷭ҇ть прибѣга́емъ, бцⷣе дв҃о, моле́нїй на́шихъ не пре́зри въ ско́рбехъ, но ѿ бѣ́дъ и҆зба́ви на́съ, є҆ди́на чⷭ҇таѧ и҆ бл҃гослове́ннаѧ.

Прест҃а́ѧ бцⷣе, сп҃сѝ на́съ.

Всѝ ст҃і́и землѝ рꙋ́сскїѧ, моли́те бг҃а ѡ҆ на́съ.

Оу҆ста́въ соверше́нїѧ слꙋ́жбы всѣ̑мъ ст҃ы̑мъ, въ землѝ рѡссі́йстѣй просїѧ́вшымъ.

Въ недѣ́лю в҃-ю по пѧтидесѧ́тницѣ.

На ма́лой вече́рни. На Гдⷭ҇и воззва́хъ: стїхи̑ры воскрє́сны д҃, гла́съ а҃. Сла́ва, ст҃ы́хъ, гла́съ а҃. И҆ ны́нѣ, бг҃оро́диченъ догма́тикъ ма́лыѧ вече́рни, гла́съ а҃. на стїхо́внѣ є҆ди́на стїхи́ра воскре́сна, гла́съ а҃, и҆ ст҃ы́хъ двѣ̀ стїхи̑ры, гла́съ и҃, сі́и стїхѝ и҆́хъ. Сла́ва, ст҃ы́хъ, гла́съ и҃. И҆ ны́нѣ, бг҃оро́диченъ, гла́съ то́йже: Ѽ, пресла́внагѡ чꙋдесѐ! нб҃сѐ и҆ землѝ цр҃и́ца: (зрѝ на стїхо́внѣ вели́цѣй вече́рни, страни́ца 519). И҆лѝ бг҃оро́диченъ, гла́съ д҃: При́снѡ страна̀ рѡссі́йскаѧ: (зрѝ на ᲂу҆́трени на хвали́техъ, страни́ца 541). По ны́нѣ ѿпꙋща́еши: тропа́рь воскре́сенъ, гла́съ а҃. Сла́ва, ст҃ы́хъ, гла́съ и҃: Ꙗ҆́коже пло́дъ: И҆ ны́нѣ, бг҃оро́диченъ, гла́съ д҃: Застꙋ́пнице ᲂу҆се́рднаѧ: Є҆ктенїа̀ и҆ ѿпꙋ́стъ.

По ѿпꙋ́стѣ ма́лыѧ вече́рни соверша́емъ послѣ́дованїе моле́бнагѡ пѣ́нїѧ. По г҃-й пѣ́сни є҆ктенїа̀ сꙋгꙋ́баѧ. Сѣда́ленъ, гла́съ в҃. По ѕ҃-й пѣ́сни є҆ктенїа̀ ма́лаѧ. Конда́къ, гла́съ ѕ҃. Прокі́менъ, гла́съ д҃: Мнѣ́ же ѕѣлѡ̀ че́стни бы́ша дрꙋ́зи твоѝ, бж҃е. Сті́хъ : И҆зочтꙋ̀ и҆̀хъ, и҆ па́че песка̀ ᲂу҆мно́жатсѧ. Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло н҃а (є҃і, в҃і-к҃). Сла́ва: Мл҃твами всѣ́хъ ст҃ы́хъ рꙋ́сскихъ: И҆ ны́нѣ: Мл҃твами бцⷣы: Поми́лꙋй мѧ̀, бж҃е: И҆ стїхи́ра, гла́съ ѕ҃. Посе́мъ глаго́летъ дїа́конъ мл҃твꙋ Спасѝ, бж҃е, лю́ди твоѧ̑: (зрѝ ᲂу҆ста́въ на лїті́и, страни́ца 551). По трист҃о́мъ Ѻ҆́ч҃е на́шъ: и҆ тропа́рь, гла́съ и҃: Ꙗ҆́коже пло́дъ: Сла́ва, и҆ ны́нѣ, гла́съ то́йже: Съ вы́шнихъ призира́ѧ: Та́же є҆ктенїа̀ сꙋгꙋ́баѧ, ю҆́же глаго́летъ дїа́конъ съ кади́ломъ. Мл҃тва и҆ ѿпꙋ́стъ, на не́мже помина́емъ: ст҃а́го равноапо́стольнаго вели́каго кнѧ́зѧ влади́мїра и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ: По ѿпꙋ́стѣ пое́тъ дїа́конъ: Спасѝ, хрⷭ҇тѐ бж҃е: Посе́мъ стїхѝ на схо́дѣ. И҆ и҆́демъ въ трапе́зꙋ и҆ быва́етъ ᲂу҆тѣше́нїе бра́тїи, трꙋда̀ ра́ди бдѣ́ннагѡ, хотѧ́щагѡ бы́ти.

На вели́цѣй вече́рни. Бл҃же́нъ мꙋ́жъ: каѳі́сма всѧ̀. На Гдⷭ҇и воззва́хъ: стїхи̑ры на і҃, воскрє́сны а҃-гѡ гла́са г҃, и҆ а҆нато́лїева а҃, и҆ ст҃ы́хъ ѕ҃, послѣ́днюю же ѡ҆ставлѧ́емъ. Сла́ва, ст҃ы́хъ, гла́съ. г҃. И҆ ны́нѣ, догма́тикъ а҃-гѡ гла́са. Вхо́дъ, прокі́менъ днѐ: Гдⷭ҇ь воцари́сѧ: И҆ чтє́нїѧ трѝ: Проро́чества и҆са́їина (м҃ѳ, и҃-є҃і): Премꙋ́дрости і҆исꙋ́са, сы́на сїра́хова (м҃д, а҃-д҃і): Премꙋ́дрости соломѡ́новы (г҃, а҃-ѳ҃).

На лїті́и стїхи̑ры всѝ ст҃ы́хъ. гла́съ и҃: Сра́дꙋйтесѧ съ на́ми, всѝ ли́цы ст҃ы́хъ: Сла́ва, и҆ ны́нѣ, гла́съ то́йже: Сра́дꙋйтесѧ съ на́ми, ᲂу҆́мнаѧ чинонача̑лїѧ: А҆́ще ѡ҆бхожде́нїе и҆лѝ и҆зво́лимъ, прилага́емъ и҆ и҆́ны стїхи̑ры подѡ́бны на ѻ҆́смь гласѡ́въ и҆ стїхи̑ры стїхѡ́вны ст҃ы́хъ съ вели́кїѧ вече́рни.

На лїті́и (и҆ на моле́бномъ пѣ́нїи, и҆ на ᲂу҆́трени) мл҃тва: Спасѝ, бж҃е:

Спасѝ, бж҃е, лю́ди твоѧ̑ и҆ бл҃гословѝ достоѧ́нїе твоѐ, посѣтѝ мі́ръ тво́й млⷭ҇тїю и҆ щедро́тами, возвы́си ро́гъ хрⷭ҇тїа́нъ правосла́вныхъ и҆ низпослѝ на ны̀ ми́лѡсти твоѧ̑ бога̑тыѧ, мл҃твами всепречⷭ҇тыѧ влⷣчицы на́шеѧ бцⷣы и҆ приснодв҃ы мр҃і́и, си́лою чⷭ҇тна́гѡ и҆ животворѧ́щагѡ креста̀, чⷭ҇тны́ѧ же и҆ многоцѣле́бныѧ ри́зы твоеѧ̀, предста́тельствы чⷭ҇тны́хъ нбⷭ҇ныхъ си́лъ безпло́тныхъ, чⷭ҇тна́гѡ сла́внагѡ проро́ка, предте́чи и҆ крести́телѧ і҆ѡа́нна, ст҃а́гѡ сла́внагѡ и҆ всехва́льнагѡ а҆по́стола а҆ндре́ѧ первозва́ннагѡ и҆ всѣ́хъ ст҃ы́хъ сла́вныхъ и҆ всехва́льныхъ а҆по́столѡвъ, ст҃а́гѡ сла́внагѡ проро́ка и҆лїѝ, и҆̀же во ст҃ы́хъ ѻ҆тє́цъ на́шихъ и҆ вселе́нскихъ вели́кихъ ᲂу҆чи́телей и҆ ст҃и́телей: васі́лїѧ вели́кагѡ, григо́рїѧ бг҃осло́ва и҆ і҆ѡа́нна златоꙋ́стагѡ, и҆́же во ст҃ы́хъ ѻ҆тца̀ на́шегѡ нїкола́ѧ, а҆рхїепі́скопа мѵ́ръ лѷкі́йскихъ, чꙋдотво́рца, ст҃ы́хъ равноапо́стольныхъ меѳо́дїѧ и҆ кѷрі́лла, ᲂу҆чи́телей слове́нскихъ, ст҃ы́хъ равноапо́стольныхъ вели́кагѡ кн҃зѧ влади́мїра и҆ вели́кїѧ кн҃ги́ни ѻ҆́льги, ю҆́же во ст҃ы́хъ ѻ҆тє́цъ на́шихъ и҆ всеѧ̀ рѡссі́и чꙋдотво́рцєвъ: мїхаи́ла, митрополі́та кі́евскагѡ, петра̀, а҆леѯі́ѧ, і҆ѡ́ны, фїлі́ппа, сщ҃енномꙋ́ченика патрїа́рха є҆рмоге́на и҆ і҆нноке́нтїѧ, ст҃и́телей моско́вскихъ, нїки́ты и҆ і҆ѡа́нна новгоро́дскихъ, лео́нтїѧ и҆ дими́трїѧ росто́вскихъ, прпⷣбныхъ и҆ бг҃оно́сныхъ ѻ҆тє́цъ на́шихъ а҆нтѡ́нїѧ и҆ ѳеодо́сїѧ кі́ево-пече́рскихъ, се́ргїѧ и҆ ні́кѡна ра́донежскихъ, а҆нтѡ́нїѧ ри́млѧнина и҆ варлаа́ма хꙋ́тынскагѡ, новгоро́дскихъ, зѡсі́мы и҆ савва́тїѧ солове́цкихъ, се́ргїѧ и҆ ге́рмана валаа́мскихъ, серафі́ма саро́вскагѡ и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ, и҆́хже па́мѧть соверша́емъ ны́нѣ, ст҃ы́хъ сла́вныхъ добропобѣ́дныхъ мꙋ́ченикѡвъ, прпⷣбныхъ и҆ бг҃оно́сныхъ ѻ҆тє́цъ на́шихъ, ст҃ы́хъ и҆ пра́ведныхъ бг҃оѻтє́цъ і҆ѡакі́ма и҆ а҆́нны и҆ всѣ́хъ ст҃ы́хъ, мо́лимъ тѧ̀, многоми́лостиве гдⷭ҇и, ᲂу҆слы́ши на́съ, грѣ́шныхъ, молѧ́щихсѧ тебѣ̀, и҆ поми́лꙋй на́съ.

На лїті́и мл҃тва Влⷣко, многоми́лостиве: въ не́йже всѝ ст҃і́и, въ землѝ рѡссі́йстѣй просїѧ́вшїи, по и҆менѡ́мъ помѧ́нꙋты сꙋ́ть:

Влⷣко многоми́лостиве, гдⷭ҇и і҆и҃се хрⷭ҇тѐ, бж҃е на́шъ, мл҃твами всепречⷭ҇тыѧ влⷣчицы на́шеѧ бцⷣы и҆ приснодв҃ы мр҃і́и, си́лою чⷭ҇тна́гѡ животворѧ́щагѡ креста̀ и҆ многоцѣле́бныѧ ри́зы твоеѧ̀, предста́тельствомъ чⷭ҇тна́гѡ а҆рхїстрати́га мїхаи́ла и҆ про́чихъ нбⷭ҇ныхъ си́лъ безпло́тныхъ, ст҃а́гѡ сла́внагѡ проро́ка, предте́чи и҆ крести́телѧ і҆ѡа́нна, ст҃ы́хъ сла́вныхъ и҆ всехва́льныхъ а҆по́столѡвъ: а҆ндре́ѧ первозва́ннагѡ, сі́мѡна канани́та, варѳоломе́ѧ и҆ про́чихъ ст҃ы́хъ сла́вныхъ и҆ всехва́льныхъ а҆по́столѡвъ, ст҃а́гѡ сла́внагѡ проро́ка и҆лїѝ, ст҃ы́хъ сла́вныхъ и҆ добропобѣ́дныхъ мч҃никѡвъ і҆ѡа́нна младе́нца, ѿ и҆́рѡда ᲂу҆бїе́ннагѡ, і҆́нны, пі́нны и҆ рі́ммы го́тѳскихъ, трѵ́фѡна, парѳе́нїѧ и҆ калоге́ра, са́ввы стратила́та и҆ съ ни́мъ седми́десѧти во́инѡвъ мч҃никѡвъ го́тѳскихъ, космы̀ и҆ дамїа́на ри́мскихъ, васїлі́ска кома́нскагѡ, са́ввы чтеца̀, го́тѳскагѡ, мч҃никѡвъ го́тѳскихъ ваѳꙋ́сїѧ и҆ ве́рка пресвѵ́терѡвъ, а҆рпѵ́лы мона́ха, а҆ви́ва, а҆́гна, реа́са, и҆гаѳра́ѯа, и҆ско́ѧ, сі́лы, сѷгі́ца, сонїрі́ла, сꙋі́мвла, ѳе́рма, ѳі́лла, кѡнста́нса, царе́вича а҆гаѳѡ́на и҆ мч҃ницъ го́тѳскихъ а҆́нны, а҆́ллы, ларі́сы, мѡи́ко 6, мамѵ́ки, ᲂу҆їркѡ̀, а҆нїмаи́сы, наа́ѳы цари́цы го́тѳскїѧ и҆ про́чихъ, и҆ дꙋклі́ды, царе́вны го́тѳскїѧ, є҆рмїнїгге́льда, царе́вича го́тѳскагѡ, во́ина и҆са́їи, кн҃зѧ мангꙋ́пскагѡ, го́тѳскагѡ, ст҃ы́хъ вели́кихъ мч҃никѡвъ геѡ́ргїѧ побѣдоно́сца, пантелеи́мона цѣли́телѧ, дими́трїѧ солꙋ́нскагѡ, нїки́ты го́тѳскагѡ, ст҃ы́ѧ великомч҃ницы варва́ры и҆ про́чихъ ст҃ы́хъ мч҃никѡвъ, прпⷣбныхъ и҆ бг҃оно́сныхъ ѻ҆тє́цъ на́шихъ, маѯі́ма и҆сповѣ́дника и҆ про́чихъ прпⷣбныхъ ѻ҆тє́цъ, и҆̀же во ст҃ы́хъ ѻ҆тє́цъ на́шихъ вели́кихъ вселе́нскихъ ᲂу҆чи́телей и҆ ст҃и́телей: васі́лїѧ вели́кагѡ, григо́рїѧ бг҃осло́ва и҆ і҆ѡа́нна златоꙋ́стагѡ, и҆́же во ст҃ы́хъ ѻ҆тца̀ на́шегѡ нїкола́ѧ, а҆рхїепі́скопа мѵ́ръ лѷкі́йскихъ, чꙋдотво́рца, ст҃ы́хъ сщ҃енномꙋ́ченикѡвъ, въ херсо́нѣ є҆пі́скопствовавшихъ: васі́лїѧ, є҆фре́ма, капїтѡ́на, є҆ѵге́нїѧ, є҆ѳе́рїѧ, є҆лпі́дїѧ и҆ а҆гаѳодѡ́ра, и҆̀же во ст҃ы́хъ ѻ҆тє́цъ на́шихъ кли́мента съ фі́вою и҆ марті́на, па́пъ ри́мскихъ, фѡ́тїѧ и҆ григо́рїѧ, патрїа́рхѡвъ кѡнстантїнопо́льскихъ, стефа́на, са́ввы и҆ васі́лїѧ а҆рхїепі́скопѡвъ сꙋ́рожскихъ, и҆ і҆ѡа́нна, є҆пі́скопа го́тѳскагѡ, геѡ́ргїѧ, митрополі́та митиле́нскагѡ, и҆сповѣ́дника, ст҃а́гѡ бл҃же́ннагѡ а҆ндре́ѧ, хрⷭ҇та̀ ра́ди ю҆ро́дивагѡ, славѧни́на, ст҃ы́ѧ равноапо́стольныѧ ні́ны, просвѣти́тельницы і҆ве́рїи, ст҃ы́хъ бл҃говѣ́рныхъ царѧ̀ даві́да воз̾ѡбнови́телѧ и҆ цари́цы тама́ры, грꙋзи́нскихъ, и҆ всѣ́хъ ст҃ы́хъ, въ страна́хъ кавка́зскихъ просїѧ́вшихъ, ст҃а́гѡ сщ҃енномꙋ́ченика григо́рїѧ просвѣти́телѧ и҆ про́чихъ ст҃ы́хъ вели́кїѧ а҆рме́нїи,

ст҃ы́хъ равноапо́стольныхъ

кѷрі́лла и҆ меѳо́дїѧ, ᲂу҆чи́телей слове́нскихъ,

вели́кїѧ бл҃говѣ́рныѧ кнѧги́ни рѡссі́йскїѧ ѻ҆́льги (въ креще́нїи є҆ле́ны),

вели́кагѡ бл҃говѣ́рнагѡ кнѧ́зѧ рѡссі́йскагѡ влади́мїра (въ креще́нїи васі́лїѧ)

і҆нноке́нтїѧ, митрополі́та моско́вскагѡ и҆ коло́менскагѡ, а҆по́стола сиби́ри и҆ а҆ме́рики,

нїкола́ѧ, а҆рхїепі́скопа токі́йскагѡ, а҆по́стола ꙗ҆по́нїи

и҆ всѣ́хъ про́чихъ ѻ҆тє́цъ рѡссі́йскихъ, во благовѣ́стїи хрⷭ҇то́вѣ потрꙋди́вшихсѧ:

и҆̀же во ст҃ы́хъ ѻ҆тє́цъ на́шихъ ст҃и́телей и҆ чꙋдотво́рцєвъ рѡссі́йскихъ

мїхаи́ла, митрополі́та кі́евскагѡ и҆ всеѧ̀ рꙋсѝ,

ѳео́дѡра, є҆пі́скопа росто́вскагѡ,

і҆ѡакі́ма ко́рсꙋнѧнина, є҆пі́скопа новгоро́дскагѡ,

і҆лларїѡ́на, митрополі́та кі́евскагѡ и҆ всеѧ̀ рꙋсѝ,

лꙋкѝ, є҆пі́скопа новгоро́дскагѡ,

лео́нтїѧ сщ҃енномꙋ́ченика, є҆пі́скопа росто́вскагѡ,

нїкола́ѧ, є҆пі́скопа тмꙋтарака́нскагѡ,

і҆ѡа́нна ІІ, прⷪ҇рка, митрополі́та кі́евскагѡ и҆ всеѧ̀ рꙋсѝ,

лꙋкѝ, є҆пі́скопа бѣлгоро́дскагѡ,

и҆са́їи, є҆пі́скопа росто́вскагѡ,

стефа́на, є҆пі́скопа влади́мїро-волы́нскагѡ,

марі́на, є҆пі́скопа ю҆́рьевскагѡ,

ге́рмана, є҆пі́скопа новгоро́дскагѡ,

є҆фре́ма, є҆пі́скопа переѧсла́вскагѡ,

нїкола́ѧ, митрополі́та кі́евскагѡ и҆ всеѧ̀ рꙋсѝ,

нїки́ты. є҆пі́скопа новгоро́дскагѡ,

ми́ны, є҆пі́скопа по́лоцкагѡ,

а҆мфїло́хїѧ, є҆пі́скопа влади́мїро-волы́нскагѡ,

ѳеокті́ста, є҆пі́скопа черни́говскагѡ,

пантелеи́мона. є҆пі́скопа черни́говскагѡ,

є҆ѵѳѵ́мїѧ, є҆пі́скопа переѧсла́вскагѡ,

сі́мѡна, є҆пі́скопа сꙋ́ждальскагѡ,

ни́фѡнта, є҆пі́скопа новгоро́дскагѡ,

кѡнстанті́на, митрополі́та кі́евскагѡ и҆ всеѧ̀ рꙋсѝ,

а҆рка́дїѧ, є҆пі́скопа новгоро́дскагѡ,

дїонѵ́сїѧ, є҆пі́скопа по́лоцкагѡ,

кѷрі́лла, є҆пі́скопа тꙋ́ровскагѡ,

і҆ѡа́нна, а҆рхїепі́скопа новгоро́дскагѡ,

лꙋкѝ, є҆пі́скопа росто́вскагѡ,

григо́рїѧ, а҆рхїепі́скопа новгоро́дскагѡ,

лаѵре́нтїѧ, є҆пі́скопа тꙋ́ровскагѡ,

мартѵ́рїѧ, а҆рхїепі́скопа новгоро́дскагѡ,

і҆гна́тїѧ, є҆пі́скопа смоле́нскагѡ,

і҆ѡа́нна, є҆пі́скопа росто́вскагѡ,

сі́мѡна, є҆пі́скопа влади́мїрскагѡ,

а҆нтѡ́нїѧ, а҆рхїепі́скопа новгоро́дскагѡ,

меркꙋ́рїѧ, є҆пі́скопа смоле́нскагѡ,

кѷрі́лла, є҆пі́скопа росто́вскагѡ,

серапїѡ́на, є҆пі́скопа влади́мїрскагѡ,

кѷрі́лла ІІ, митрополі́та кі́евскагѡ и҆ всеѧ̀ рꙋсѝ,

ѳео́дѡра, є҆пі́скопа влади́мїрскагѡ,

і҆гна́тїѧ, є҆пі́скопа росто́вскагѡ,

сѷмеѡ́на, є҆пі́скопа тверска́гѡ,

васі́лїѧ, є҆пі́скопа рѧза́нскагѡ,

маѯі́ма, митрополі́та кі́евскагѡ и҆ всеѧ̀ рꙋсѝ, влади́мїрскагѡ,

ѳеокті́ста, а҆рхїепі́скопа новгоро́дскагѡ,

петра̀, митрополі́та кі́евскагѡ и҆ всеѧ̀ рꙋсѝ, моско́вскагѡ,

про́хора, є҆пі́скопа росто́вскагѡ (въ схи́мѣ трѵ́ѳѡна)

а҆нтѡ́нїѧ, є҆пі́скопа росто́вскагѡ,

васі́лїѧ кали́ки, а҆рхїепі́скопа новгоро́дскагѡ,

ѳеогно́ста, митрополі́та кі́евскагѡ и҆ всеѧ̀ рꙋсѝ, моско́вскагѡ,

мѡѷсе́ѧ, а҆рхїепі́скопа новгоро́дскагѡ,

ѳео́дѡра до́брагѡ, є҆пі́скопа тверска́гѡ,

і҆ѡа́нна, є҆пі́скопа сꙋ́ждальскагѡ,

а҆леѯі́ѧ, митрополі́та кі́евскагѡ и҆ всеѧ̀ рꙋсѝ, моско́вскагѡ,

кѷрі́лла, є҆пі́скопа росто́вскагѡ,

дїонѵ́сїѧ, а҆рхїепі́скопа сꙋ́ждальскагѡ,

і҆а́кѡва, є҆пі́скопа росто́вскагѡ,

ѳео́дѡра, а҆рхїепі́скопа росто́вскагѡ,

стефа́на, а҆рхїепі́скопа великопе́рмскагѡ,

мїхаи́ла, є҆пі́скопа смоле́нскагѡ,

кѷпрїа́на, митрополі́та кі́евскагѡ и҆ всеѧ̀ рꙋсѝ, моско́вскагѡ,

а҆рсе́нїѧ, є҆пі́скопа тверска́гѡ,

григо́рїѧ премꙋ́драгѡ, а҆рхїепі́скопа росто́вскагѡ,

сѷмеѡ́на, а҆рхїепі́скопа новгоро́дскагѡ,

дїонѵ́сїѧ гре́ка, а҆рхїепі́скопа росто́вскагѡ,

фѡ́тїѧ, митрополі́та кі́евскагѡ и҆ всеѧ̀ рꙋсѝ, моско́вскагѡ,

є҆фре́ма, а҆рхїепі́скопа росто́вскагѡ,

є҆ѵфѵ́мїѧ, а҆рхїепі́скопа новгоро́дскагѡ,

і҆ѡ́ны, митрополі́та моско́вскагѡ и҆ всеѧ̀ рꙋсѝ,

трѵ́фѡна, а҆рхїепі́скопа росто́вскагѡ,

і҆ѡ́ны, а҆рхїепі́скопа великопе́рмскагѡ,

і҆ѡ́ны, а҆рхїепі́скопа новгоро́дскагѡ,

фїлі́ппа І, митрополі́та моско́вскагѡ и҆ всеѧ̀ рꙋсѝ,

ѳеодо́сїѧ, митрополі́та моско́вскагѡ и҆ всеѧ̀ рꙋсѝ,

вассїа́на І, а҆рхїепі́скопа росто́вскагѡ,

ѳео́фїла, а҆рхїепі́скопа новгоро́дскагѡ,

герѡ́нтїѧ, митрополі́та моско́вскагѡ и҆ всеѧ̀ рꙋсѝ,

генна́дїѧ, а҆рхїепі́скопа новгоро́дскагѡ,

сі́мѡна, митрополі́та моско́вскагѡ и҆ всеѧ̀ рꙋсѝ,

вассїа́на ІІ, а҆рхїепі́скопа росто́вскагѡ,

серапїѡ́на, а҆рхїепі́скопа новгоро́дскагѡ,

і҆ѡаса́фа, митрополі́та моско́вскагѡ и҆ всеѧ̀ рꙋсѝ,

гꙋ́рїѧ, а҆рхїепі́скопа каза́нскагѡ и҆ свїѧ́жскагѡ,

мака́рїѧ, чꙋ́днагѡ, митрополі́та моско́вскагѡ и҆ всеѧ̀ рꙋсѝ,

а҆ка́кїѧ, є҆пі́скопа тверска́гѡ,

ге́рмана сщ҃енномꙋ́ченика, а҆рхїепі́скопа каза́нскагѡ и҆ свїѧ́жскагѡ,

фїлі́ппа ІІ, сщ҃енномꙋ́ченика, митрополі́та моско́вскагѡ и҆ всеѧ̀ рꙋсѝ,

пі́мена, а҆рхїепі́скопа новгоро́дскагѡ,

варсоно́фїѧ, є҆пі́скопа тверска́гѡ,

а҆нтѡ́нїѧ, є҆пі́скопа волого́дскагѡ,

григо́рїѧ, є҆пі́скопа сꙋ́ждальскагѡ,

а҆леѯа́ндра, є҆пі́скопа переѧсла́вскагѡ,

а҆леѯа́ндра, є҆пі́скопа тверска́гѡ,

ѳеодо́сїѧ, а҆рхїепі́скопа а҆страха́нскагѡ,

і҆́ѡва, пе́рвагѡ ст҃ѣ́йшагѡ патрїа́рха моско́вскагѡ и҆ всеѧ̀ рꙋсѝ,

а҆рсе́нїѧ, а҆рхїепі́скопа сꙋ́ждальскагѡ,

а҆ѳѡ́нїѧ, митрополі́та новгоро́дскагѡ,

софрѡ́нїѧ, а҆рхїепі́скопа сꙋ́ждальскагѡ,

а҆ѳана́сїѧ, патрїа́рха царегра́дскагѡ, лꙋбе́нскагѡ и҆ ха́рьковскагѡ,

серапїѡ́на, митрополі́та са́рскагѡ и҆ подо́нскагѡ,

марке́лла, а҆рхїепі́скопа волого́дскагѡ и҆ бѣлоезе́рскагѡ, солове́цкагѡ,

некта́рїѧ, а҆рхїепі́скопа тобо́льскагѡ и҆ всеѧ̀ сиби́ри,

ѳеодо́сїѧ, а҆рхїепі́скопа черни́говскагѡ,

пїтѷрі́ма, є҆пі́скопа тамбо́вскагѡ,

сѷмеѡ́на, митрополі́та смоле́нскагѡ,

митрофа́на, є҆пі́скопа воро́нежскагѡ,

і҆ларїѡ́на, митрополі́та сꙋ́ждальскагѡ и҆ ю҆́рьевскагѡ,

дими́трїѧ, митрополі́та росто́вскагѡ,

і҆ѡа́нна, митрополі́та тобо́льскагѡ и҆ всеѧ̀ сиби́ри,

фїлоѳе́ѧ, митрополі́та тобо́льскагѡ и҆ всеѧ̀ сиби́ри (въ схи́мѣ ѳео́дѡра),

і҆нноке́нтїѧ, є҆пі́скопа и҆ркꙋ́тскагѡ,

а҆нтѡ́нїѧ, митрополі́та тобо́льскагѡ и҆ всеѧ̀ сиби́ри,

і҆ѡаса́фа, є҆пі́скопа бѣлгоро́дскагѡ,

па́ѵла, митрополі́та тобо́льскагѡ и҆ всеѧ̀ сиби́ри,

софрѡ́нїѧ, є҆пі́скопа и҆ркꙋ́тскагѡ,

тѵ́хѡна, є҆пі́скопа воро́нежскагѡ,

варлаа́ма, а҆рхїепі́скопа тобо́льскагѡ и҆ всеѧ̀ сиби́ри,

меле́тїѧ, а҆рхїепі́скопа ха́рьковскагѡ и҆ а҆хты́рскагѡ,

фїларе́та, митрополі́та кі́евскагѡ (въ схи́мѣ ѳеодо́сїѧ),

гера́сїма, є҆пі́скопа а҆страха́нскагѡ,

меле́тїѧ, є҆пі́скопа рѧза́нскагѡ,

мака́рїѧ, митрополі́та моско́вскагѡ и҆ всеѧ̀ рꙋсѝ,

і҆гна́тїѧ, є҆пі́скопа кавка́зскагѡ и҆ черномо́рскагѡ,

ѳеофа́на є҆пі́скопа, затво́рника вы́шенскагѡ,

фїларе́та, митрополі́та моско́вскагѡ

и҆ всѣ́хъ про́чихъ ст҃и́телей и҆ чꙋдотво́рцєвъ рѡссі́йскихъ, ꙗ҆́кѡ пра̑вила вѣ́ры, ѻ҆́брази кро́тости и҆ воздержа́нїѧ ᲂу҆чи́телїе, просла́вльшихсѧ:

Ст҃ы́хъ бл҃говѣ́рныхъ рѡссі́йскихъ кнѧзе́й и҆ кнѧги́нь

бори́са и҆ глѣ́ба мꙋ́ромскихъ, страстоте́рпцєвъ рѡссі́йскихъ (въ креще́нїи рѡма́на и҆ даві́да),

ꙗ҆росла́ва мꙋ́драгѡ, кі́евскагѡ (въ креще́нїи геѡ́ргїѧ), а҆́нны новгоро́дскїѧ и҆ сы́на и҆́хъ влади́мїра новгоро́дскагѡ,

свѧтосла́ва кі́евскагѡ,

и҆зѧсла́ва кі́евскагѡ (въ креще́нїи дими́трїѧ),

ꙗ҆ропо́лка влади́мїро-волы́нскагѡ (въ креще́нїи петра̀),

даві́да черни́говскагѡ,

влади́мїра монома́ха, кі́евскагѡ (въ креще́нїи васі́лїѧ),

кѡнстанті́на, і҆ри́ны и҆ ча́дъ и҆́хъ мїхаи́ла и҆ ѳео́дѡра, мꙋ́ромскихъ,

мстисла́ва кі́евскагѡ (въ креще́нїи ѳео́дѡра),

все́волода пско́вскагѡ (въ креще́нїи гаврїи́ла),

и҆́горѧ черни́говскагѡ и҆ кі́евскагѡ, страстоте́рпца,

бори́са тꙋ́ровскагѡ,

и҆зѧсла́ва влади́мїрскагѡ,

глѣ́ба городе́нскагѡ, кі́евскагѡ,

ростисла́ва кі́евскагѡ,

мстисла́ва влади́мїрскагѡ,

а҆ндре́ѧ бг҃олю́бскагѡ, страстоте́рпца,

глѣ́ба влади́мїрскагѡ (въ креще́нїи геѡ́ргїѧ),

мїхаи́ла влади́мїрскагѡ,

мстисла́ва хра́брагѡ, новгоро́дскагѡ (въ креще́нїи геѡ́ргїѧ),

марі́и влади́мїрскїѧ (въ и҆́ночествѣ ма́рѳы),

васі́лїѧ новгоро́дскагѡ,

петра̀ и҆ феврѡ́нїи мꙋ́ромскихъ (во и҆́ноцѣхъ даві́да и҆ є҆ѵфросѵ́нїи),

мстисла́ва новгоро́дскагѡ,

ѳео́дѡра новгоро́дскагѡ,

ѳео́дѡра, є҆ѵпра́ѯїи и҆ сы́на и҆́хъ і҆ѡа́нна, зара́йскихъ мꙋ́ченикѡвъ,

геѡ́ргїѧ влади́мїрскагѡ, мч҃ника,

васі́лїѧ росто́вскагѡ, мч҃ника,

все́волода, мстисла́ва, влади́мїра, дими́трїѧ младе́нца, влади́мїрскихъ, мꙋ́ченикѡвъ,

а҆га́аїи, ѳеодѡ́ры, марі́и, хрїсто́ны, влади́мїрскихъ, мч҃ницъ,

ꙗ҆росла́ва (въ креще́нїи ѳео́дѡра) и҆ ѳеодо́сїи (въ и҆́ночествѣ є҆ѵфросѵ́нїи) влади́мїрскихъ,

мїхаи́ла черни́говскагѡ и҆ болѧ́рина є҆гѡ̀ ѳео́дѡра, мч҃никѡвъ и҆ и҆сповѣ́дникѡвъ,

ѻ҆ле́га кра́снагѡ, про́нскаго, мч҃ника,

мїхаи́ла смоле́нскагѡ,

свѧтосла́ва ю҆́рьевскагѡ (въ креще́нїи гаврїи́ла),

васі́лїѧ и҆ кѡнстанті́на ꙗ҆росла́вскихъ,

а҆леѯа́ндра не́вскагѡ (въ схи́мѣ а҆леѯі́ѧ),

сы́на є҆гѡ̀ дими́трїѧ влади́мїрскагѡ,

и҆ дще́ри є҆гѡ̀ є҆ѵдокі́и влади́мїрскїѧ,

рѡма́на рѧза́нскагѡ, мч҃ника,

глѣ́ба росто́вскагѡ, бѣлоезе́рскагѡ,

рѡма́на ᲂу҆́глечскагѡ,

ѻ҆ле́га брѧ́нскагѡ,

дими́трїѧ влади́мїрскагѡ,

довмо́нта (въ креще́нїи тїмоѳе́ѧ) и҆ марі́и (въ и҆́ночествѣ ма́рѳы) пско́вскихъ,

ѳео́дѡра смоле́нскагѡ и҆ ча́дъ є҆гѡ̀ даві́да и҆ кѡнстанті́на ꙗ҆росла́вскихъ,

влади́мїра и҆ а҆грѷппі́ны рже́вскихъ,

і҆ѡа́нна пꙋти́вльскагѡ, мч҃ника,

данїи́ла моско́вскагѡ,

ѯе́нїи тверскі́ѧ (въ и҆́ночествѣ марі́и),

мїхаи́ла тверска́гѡ, мч҃ника, и҆ преподо́бныѧ а҆́нны ка́шинскїѧ,

дими́трїѧ тверска́гѡ, мч҃ника,

ѳео́дѡра стародꙋ́бскагѡ, мч҃ника,

а҆леѯа́ндра и҆ сы́на є҆гѡ̀ ѳео́дѡра тверски́хъ, мч҃никѡвъ,

і҆ѡа́нна калиты̀, моско́вскагѡ,

васі́лїѧ ꙗ҆росла́вскагѡ,

а҆ндре́ѧ сꙋ́ждальскагѡ и҆ прпⷣбныѧ ѳеодѡ́ры нижегоро́дскїѧ (въ мїрꙋ̀ а҆настасі́и),

дими́трїѧ моско́вскагѡ, донска́гѡ и҆ є҆ѵдокі́и моско́вскїѧ (въ и҆́ночествѣ є҆ѵфросѵ́нїи),

мїхаи́ла тверска́гѡ и҆ мїкꙋ́линскагѡ (въ и҆́ночествѣ матѳе́ѧ),

сѷмеѡ́на вѧ́земскагѡ и҆ і҆ꙋлїані́и вѧ́земскїѧ и҆ новото́ржскїѧ, мч҃никѡвъ,

а҆ндре́ѧ смоле́нскагѡ,

глѣ́ба смоле́нскагѡ,

дими́трїѧ и҆ марі́и заѻзе́рскихъ, волого́дскихъ,

ѳео́дѡра волого́дскагѡ,

васі́лїѧ требово́льскагѡ,

дими́трїѧ кра́снагѡ, га́лицкагѡ и҆ бѣ́жецкагѡ,

а҆ндре́ѧ ᲂу҆́глечскагѡ,

дими́трїѧ ᲂу҆́глечскагѡ, прилꙋ́цкагѡ,

дими́трїѧ, царе́вича моско́вскагѡ, ᲂу҆́глечскагѡ страстоте́рпца,

ѳео́дѡра, царѧ̀ и҆ вели́кагѡ кн҃зѧ моско́вскагѡ

и҆ всѣ́хъ про́чихъ бл҃говѣ́рныхъ кн҃зе́й и҆ кн҃ги́нь рѡссі́йскихъ, за вѣ́рꙋ во хрⷭ҇та̀ и҆ ѻ҆те́чество жи́знь свою̀ положи́вшихъ и҆ въ по́двизѣхъ по́стническихъ просїѧ́вшихъ.

Прпⷣбныхъ и҆ бг҃оно́сныхъ ѻ҆тє́цъ на́шихъ

а҆нтѡ́нїѧ кі́ево-пече́рскагѡ, первонача́льника мона́шескагѡ житїѧ̀ на рꙋсѝ, въ бли́жнихъ пеще́рахъ почива́ющагѡ,

и҆ ѳеодо́сїѧ кі́ево-пече́рскагѡ, ѻ҆́бщихъ житі́й нача́льника, въ да́льнихъ пеще́рахъ почива́ющагѡ,

и҆ прпⷣбныхъ ѻ҆тє́цъ кі́ево-пече́рскихъ, въ бли́жнихъ пеще́рахъ почива́ющихъ:

варлаа́ма и҆гꙋ́мена,

і҆еремі́и прозорли́вагѡ,

дамїа́на пресвѵ́тера, цѣле́бника,

матѳе́ѧ прозорли́вагѡ,

ні́кѡна и҆гꙋ́мена,

і҆саа́кїѧ затво́рника,

і҆ѡа́нна и҆гꙋ́мена,

двана́десѧти гре́кѡвъ, зда́телей вели́кїѧ це́ркве кі́ево-пече́рскїѧ ѻ҆би́тели,

а҆гапи́та, врача̀ безме́зднагѡ,

і҆ѡа́нна и҆ сы́на є҆гѡ̀ заха́рїи,

ма́рка гробокопа́телѧ,

ѳео́фїла слезоточи́вагѡ,

і҆ѡа́нна бг҃оꙋго́дника,

ѳео́фїла дрꙋга́гѡ,

ѳеодо́сїѧ дрꙋга́гѡ,

і҆ѡа́нна дрꙋга́гѡ,

про́хора чꙋдотво́рца, лебедника̀,

пі́мена многоболѣ́зненнагѡ,

а҆лѵ́пїѧ і҆кѡнопи́сца,

григо́рїѧ і҆кѡнопи́сца,

ні́кѡна сꙋха́гѡ,

не́стѡра лѣтопи́сца,

пі́мена по́стника,

и҆са́їи чꙋдотво́рца,

спѷрїдѡ́на просфо́рника,

нїкоди́ма просфо́рника,

нїко́лы свѧто́ши, кн҃зѧ черни́говскагѡ,

ѻ҆нїсі́фора и҆сповѣ́дника,

і҆ѡа́нна многострада́льнагѡ,

є҆ра́зма чернори́зца,

а҆ѳана́сїѧ затво́рника,

полѷка́рпа а҆рхїмандрі́та,

и҆лїѝ мꙋ́ромца,

а҆ре́ѳы затво́рника,

ті́та і҆еромона́ха,

сїльве́стра чꙋдотво́рца,

некта́рїѧ послꙋшли́вагѡ,

і҆ѡа́нна по́стника,

мака́рїѧ по́стника,

ѳеофа́на по́стника,

а҆нато́лїѧ затво́рника,

а҆враа́мїѧ затво́рника,

ѻ҆нꙋ́фрїѧ молчали́вагѡ,

са́ввы бг҃оꙋго́дника,

а҆враа́мїѧ трꙋдолюби́вагѡ,

є҆лла́дїѧ затво́рника,

лꙋкѝ і҆коно́ма,

се́ргїѧ послꙋшли́вагѡ,

сїсѡ́ѧ затво́рника,

ѳео́фїла затво́рника,

ѻ҆ни́сїма затво́рника,

а҆леѯі́ѧ затво́рника,

три́десѧти ѻ҆тє́цъ мѷроточи́выхъ гла́въ,

є҆фре́ма пресвѵ́тера,

є҆ѵста́ѳїѧ зла́тарѧ,

і҆ерони́ма затво́рника,

мела́дїѧ ста́рца,

пе́ргїѧ ста́рца,

па́ѵла чꙋдеснопослꙋшли́вагѡ,

меле́тїѧ і҆ере́ѧ,

серапїѡ́на і҆ере́ѧ,

фїларе́та і҆ере́ѧ,

а҆за́рїи по́стника,

вассїа́на,

даві́да.

є҆лїссе́ѧ,

і҆нноке́нтїѧ,

и҆сѵ́хїѧ,

і҆ѡакі́ма,

нїки́фора,

ни́фѡнта,

се́ргїѧ дрꙋга́гѡ,

сїлꙋа́на дрꙋга́гѡ,

сїльве́стра дрꙋга́гѡ,

сїсѡ́ѧ канѡнархи́ста,

стефа́на по́стника,

тїмоѳе́ѧ и҆́нока

и҆ прпⷣбныхъ ѻ҆тє́цъ кі́ево-пече́рскихъ, въ да́льнихъ пеще́рахъ почива́ющихъ:

і҆ларїѡ́на схи́мника,

тїмоѳе́ѧ и҆гꙋ́мена,

пі́мена по́стника, и҆гꙋ́мена,

а҆враа́мїѧ и҆гꙋ́мена,

досїѳе́ѧ І и҆гꙋ́мена,

а҆кїндѵ́на І и҆гꙋ́мена,

досїѳе́ѧ ІІ и҆гꙋ́мена,

а҆кїндѵ́на ІІ и҆гꙋ́мена,

сїсѡ́ѧ схи́мника,

па́мвы і҆еромона́ха, затво́рника,

пафнꙋ́тїѧ затво́рника,

а҆ѳана́сїѧ затво́рника,

софрѡ́нїѧ затво́рника,

а҆нато́лїѧ затво́рника,

пїо́ра затво́рника,

і҆сі́дѡра затво́рника,

лаѵре́нтїѧ затво́рника,

кассїа́на затво́рника,

ѳео́дѡра молчали́вагѡ,

а҆ммѡ́на затво́рника,

марда́рїѧ затво́рника,

панкра́тїѧ затво́рника,

є҆ѵло́гїѧ ста́рца,

па́ѵла послꙋшли́вагѡ,

мѡѷсе́ѧ чꙋдотво́рца,

мартѵ́рїѧ дїа́кона,

мартѵ́рїѧ затво́рника,

григо́рїѧ затво́рника,

мака́рїѧ дїа́кона,

заха́рїи по́стника,

сїлꙋа́на схи́мника,

а҆гаѳѡ́на чꙋдотво́рца,

ло́ггина вра́тарѧ,

а҆рсе́нїѧ трꙋдолюби́вагѡ,

зинѡ́на по́стника,

ѵ҆па́тїѧ цѣле́бника,

і҆ѡ́сифа многоболѣ́зненнагѡ,

не́стєра некни́жнагѡ,

рꙋ́ѳа затво́рника,

венїами́на затво́рника,

є҆ѵѳѵ́мїѧ схи́мника,

ті́та во́ина,

а҆хі́лы дїа́кона,

паі́сїѧ бг҃оꙋго́дника,

меркꙋ́рїѧ по́стника,

герѡ́нтїѧ канѡна́рха,

лео́нтїѧ канѡна́рха,

а҆наста́сїѧ дрꙋга́гѡ,

варсоно́фїѧ,

генна́дїѧ,

гера́сїма,

данїи́ла ста́рца,

дими́трїѧ,

петра̀,

і҆гна́тїѧ а҆рхїмандрі́та,

ѳео́дѡра, кн҃зѧ ѻ҆стро́жскагѡ,

дїонѵ́сїѧ і҆еромона́ха

и҆ про́чихъ прпⷣбныхъ ѻ҆тє́цъ кі́ево-пече́рскихъ, и҆́хже и҆мена̀ ты̀ са́мъ, гдⷭ҇и, вѣ́си:

и҆ прпⷣбныхъ ѻ҆тє́цъ

є҆фре́ма новото́ржскагѡ,

сꙋдисла́ва, кн҃зѧ пско́вскагѡ, затво́рника кі́евскагѡ (въ креще́нїи геѡ́ргїѧ),

а҆враа́мїѧ, а҆рхїмандрі́та росто́вскагѡ,

а҆рка́дїѧ вѧ́земскагѡ и҆ новото́ржскагѡ,

марті́на тꙋ́ровскагѡ,

а҆нтѡ́нїѧ ри́млѧнина, новгоро́дскагѡ,

а҆ндре́ѧ и҆гꙋ́мена, новгоро́дскагѡ,

а҆враа́мїѧ ми́рожскагѡ,

гера́сїма волого́дскагѡ,

нїки́ты сто́лпника, переѧсла́вскагѡ,

варлаа́ма хꙋ́тынскагѡ,

кѷрі́лла и҆гꙋ́мена, новгоро́дскагѡ,

а҆враа́мїѧ и҆гꙋ́мена, ꙗ҆росла́вскагѡ,

а҆враа́мїѧ и҆ є҆фре́ма смоле́нскихъ,

а҆нтѡ́нїѧ ды́мскагѡ,

кѡнстанті́на и҆ космы̀ ко́синскихъ,

є҆лїссе́ѧ лаврише́вскагѡ,

ѳео́дѡра ка́менскагѡ,

ѯенофѡ́нта робе́йскагѡ,

кѷпрїа́на ᲂу҆́стюжскагѡ,

петра̀, царе́вича ѻ҆рды́нскагѡ,

мїхаи́ла, вери́жника вѧзнико́вскагѡ,

мака́рїѧ пꙋсты́нника, новгоро́дскагѡ,

вассїа́на крестомі́ровскагѡ,

се́ргїѧ и҆ ге́рмана валаа́мскихъ,

а҆враа́мїѧ га́личскагѡ,

варлаа́ма и҆ гедеѡ́на серпꙋховски́хъ,

кѷрі́лла челмого́рскагѡ,

сїльве́стра ѻ҆бно́рскагѡ,

леоѡ́нтїѧ стромы́нскагѡ,

пахѡ́мїѧ не́рехтскагѡ,

а҆ѳана́сїѧ и҆ ѳеодо́сїѧ чернове́цкихъ,

ла́зарѧ и҆ а҆ѳана́сїѧ мꙋ́рманскихъ, ѻ҆лоне́цкихъ,

є҆леаза́ра, наза́рїѧ и҆ є҆ѵме́нїѧ мꙋ́рманскихъ, ѻ҆лоне́цкихъ,

дими́трїѧ прилꙋ́цкагѡ,

се́ргїѧ и҆ ні́кѡна, и҆гꙋ́менѡвъ ра́донежскихъ и҆ всеѧ̀ рѡссі́и чꙋдотво́рцєвъ,

кѷрі́лла и҆ марі́и схимона́хѡвъ, ра́донежскихъ,

стефа́на моско́вскагѡ,

митрофа́на и҆гꙋ́мена-ста́рца, ра́донежскагѡ,

васі́лїѧ сꙋха́гѡ, ра́донежскагѡ,

і҆а́кѡва посо́льника, ра́донежскагѡ,

ѻ҆ни́сїма вра́тарѧ и҆ сы́на є҆гѡ̀ є҆лїссе́ѧ дїа́кона, ра́донежскихъ,

сі́мѡна, а҆рхїмандрі́та смоле́нскагѡ, ра́донежскагѡ,

і҆саа́кїѧ молча́льника, ра́донежскагѡ,

мака́рїѧ ра́донежскагѡ,

и҆лїѝ ке́ларѧ, ра́донежскагѡ,

сі́мѡна є҆кклисїа́рха, ра́донежскагѡ,

мїхе́ѧ ра́донежскагѡ,

некта́рїѧ вѣ́стника, ра́донежскагѡ,

а҆леѯа́ндра пересвѣ́та и҆ а҆ндре́ѧ-ѻ҆слѧ́би, схимона́хѡвъ-во́инѡвъ ра́донежскихъ,

варѳоломе́ѧ и҆ наꙋ́ма, ра́донежскихъ,

і҆ѡанні́кїѧ ра́донежскагѡ,

і҆гна́тїѧ ра́донежскагѡ,

є҆пїфа́нїѧ премꙋ́драгѡ, ра́донежскагѡ,

меѳо́дїѧ пѣ́шношскагѡ,

са́ввы и҆ і҆а́кѡва стромы́нскихъ,

рѡма́на киржа́чскагѡ,

а҆ѳана́сїѧ высо́цкагѡ, серпꙋховска́гѡ, мла́дшагѡ,

а҆ѳана́сїѧ, высо́цкагѡ, серпꙋховска́гѡ, ста́ршагѡ,

а҆ндроні́ка, са́ввы и҆ а҆леѯа́ндра, и҆гꙋ́менѡвъ спа́сскихъ, моско́вскихъ,

а҆ндре́ѧ и҆ данїи́ла і҆кѡнопи́сцєвъ, моско́вскихъ,

григо́рїѧ голꙋ́твинскагѡ,

дими́трїѧ цилиби́нскагѡ,

нїки́ты, кѷрі́лла, нїки́фора, кли́мента, і҆саа́кїѧ и҆ двꙋ́хъ бра́тїй и҆́хъ, соко́льницкихъ, новгоро́дскихъ,

є҆ѵѳѵ́мїѧ сꙋ́ждальскагѡ,

стефа́на ма́хрищскагѡ,

са́ввы стороже́вскагѡ, звенигоро́дскагѡ,

ѳео́дѡра и҆ па́ѵла росто́вскихъ,

се́ргїѧ нꙋ́ромскагѡ, волого́дскагѡ,

ѳео́фїла и҆ і҆а́кѡва ѻ҆мꙋ́чскихъ,

нїки́фора и҆ нїки́ты бо́ровскихъ,

ѳерапо́нта борове́нскагѡ,

корни́лїѧ и҆ а҆враа́мїѧ палеѻстро́вскихъ, ѻ҆лоне́цкихъ,

па́ѵла, пꙋсты́нника глꙋши́цкагѡ,

ѳерапо́нта можа́йскагѡ, бѣлоезе́рскагѡ,

кѷрі́лла бѣлоезе́рскагѡ,

і҆гна́тїѧ молча́льника и҆ досїѳе́ѧ ста́рца, бѣлоезе́рскихъ,

па́ѵла ко́мельскагѡ, ѻ҆бно́рскагѡ,

мака́рїѧ пи́семскагѡ, костромска́гѡ,

лео́нтїѧ кари́ховскагѡ, новгоро́дскагѡ,

савва́тїѧ тверска́гѡ,

є҆ѵѳѵ́мїѧ, а҆нтѡ́нїѧ и҆ фе́лиѯа каре́льскихъ,

дїонѵ́сїѧ, тара́сїѧ и҆ ѳеодо́сїѧ глꙋши́цкихъ,

а҆леѯа́ндра и҆ а҆нтѡ́нїѧ кꙋ́штскихъ, волого́дскихъ,

варѳоломе́ѧ строи́телѧ, і҆ѡа́нна злата́гѡ, ке́ларѧ, и҆ і҆гна́тїѧ і҆кѡ́нника, сі́мѡновскихъ, моско́вскихъ,

і҆а́кѡва желѣзноборо́вскагѡ,

і҆а́кѡва брыле́евскагѡ,

і҆а́кѡва га́личскагѡ,

григо́рїѧ пе́льшемскагѡ,

мака́рїѧ ᲂу҆́нженскагѡ,

варна́вы ветлꙋ́жскагѡ,

а҆рсе́нїѧ ко́невскагѡ,

а҆мфїло́хїѧ глꙋши́цкагѡ,

і҆ѡаса́фа ка́менскагѡ,

мїхаи́ла кло́пскагѡ,

фїлі́ппа раба́нгскагѡ,

варсоно́фїѧ тверска́гѡ,

є҆ѵфросѵ́на тверска́гѡ,

паі́сїѧ га́личскагѡ,

варлаа́ма ᲂу҆ле́йминскагѡ, ᲂу҆́глечскагѡ,

са́ввы и҆ а҆ндре́ѧ ви́шерскихъ,

варлаа́ма и҆ паі́сїѧ ва́жскихъ, пи́нежскихъ,

кассїа́на ка́менскагѡ,

петра̀ и҆ пахѡ́мїѧ ка́менскихъ,

стефа́на и҆ тїмоѳе́ѧ кꙋ́бенскихъ,

тїмоѳе́ѧ и҆гꙋ́мена, волого́дскагѡ,

кѷрі́лла, спѷрїдѡ́на и҆ фа́ѵста, пꙋсты́нникѡвъ волого́дскихъ,

є҆ѵѳѵ́мїѧ сѧ́нжемскагѡ,

са́ввы тверска́гѡ,

і҆ларїѡ́на гдо́вскагѡ, псковоезе́рскагѡ,

пафнꙋ́тїѧ и҆ и҆лїѝ бо́ровскихъ,

зѡсі́мы, савва́тїѧ и҆ ге́рмана солове́цкихъ,

і҆ѡа́нна свѣщено́сца, солове́цкагѡ,

васі́лїѧ келе́йника, солове́цкагѡ,

мака́рїѧ рыболо́вца, солове́цкагѡ,

ѻ҆нꙋ́фрїѧ, пꙋсты́нника солове́цкагѡ,

гера́сїма, ѿше́льника солове́цкагѡ,

і҆аннꙋа́рїѧ солове́цкагѡ,

стефа́на, трꙋ́дника солове́цкагѡ,

фїлі́ппа, пꙋсты́нника солове́цкагѡ,

досїѳе́ѧ, затво́рника солове́цкагѡ,

а҆леѯа́ндра ѻ҆шеве́нскагѡ,

мака́рїѧ глꙋши́цкагѡ,

ма́рка, і҆ѡ́ны и҆ ва́ссы пско́во-пече́рскихъ,

є҆ѵфросѵ́на и҆ серапїѡ́на пско́вскихъ,

і҆гна́тїѧ, харала́мпїѧ и҆ памфі́ла пско́вскихъ,

досїѳе́ѧ верхнеѻстро́вскагѡ, пско́вскагѡ,

а҆нтѡ́нїѧ краснохо́лмскагѡ,

мартїнїа́на бѣлоезе́рскагѡ,

мака́рїѧ калѧ́зинскагѡ,

космы̀ ꙗ҆́хромскагѡ,

мѡѷсе́ѧ бѣлоезе́рскагѡ,

некта́рїѧ, и҆гꙋ́мена введе́нскагѡ, бѣ́жецкагѡ,

некта́рїѧ, и҆гꙋ́мена покро́вскагѡ, тверска́гѡ,

є҆фре́ма и҆ рѡма́на переко́мскихъ,

тѵ́хѡна и҆ нїки́фора калꙋ́жскихъ,

леѵкі́ѧ 7 волокола́мскагѡ,

зѡсі́мы и҆ а҆дрїа́на волокола́мскихъ,

са́ввы кры́пецкагѡ,

і҆́ѡва, а҆рхїмандрі́та влади́мїрскагѡ,

а҆враа́мїѧ и҆ ко́прїѧ пече́негскихъ,

а҆ѵѯе́нтїѧ и҆ ѻ҆нꙋ́фрїѧ перцо́вскихъ, волого́дскихъ,

є҆лїссе́ѧ сꙋ́мскагѡ, солове́цкагѡ,

а҆леѯа́ндра во́чскагѡ, га́личскагѡ,

севастїа́на сохо́тскагѡ, пошехо́нскагѡ,

тѵ́хѡна лꙋ́ховскагѡ костромска́гѡ,

варлаа́ма (гера́сїма) и҆ фѡ́тїѧ (ѳадде́ѧ) лꙋ́ховскихъ,

паі́сїѧ, а҆дрїа́на и҆ боголѣ́па ᲂу҆́глечскихъ,

кассїа́на гре́ка, ᲂу҆́глечскагѡ,

галактїѡ́на бѣлоезе́рскагѡ,

ге́рмана ди́внагѡ, бѣлоезе́рскагѡ,

ні́ла со́рскагѡ,

вассїа́на рѧ́бовскагѡ, ᲂу҆́глечскагѡ,

вассїа́на стро́кинскагѡ, каргопо́льскагѡ,

харїтѡ́на сѧ́нжемскагѡ,

і҆ѡ́сифа волокола́мскагѡ,

гера́сїма че́рнагѡ, кассїа́на боса́гѡ и҆ фѡ́тїѧ ста́рца, волокола́мскихъ,

пахѡ́мїѧ и҆ пафнꙋ́тїѧ ке́нскихъ,

генна́дїѧ важеѻзе́рскагѡ,

даві́да серпꙋховска́гѡ,

і҆нноке́нтїѧ ко́мельскагѡ,

влади́мїра бѣлопесо́цкагѡ, серпꙋховска́гѡ,

є҆ѵѳѵ́мїѧ а҆рхангелогоро́дскагѡ,

і҆гна́тїѧ прилꙋ́цкагѡ,

фїлі́ппа и҆ра́пскагѡ,

ѳеогно́ста перемы́шльскагѡ,

кѷрі́лла новоезе́рскагѡ,

ѻ҆нꙋ́фрїѧ катро́мскагѡ,

мака́рїѧ ѻ҆ре́дежскагѡ,

а҆леѯа́ндра сви́рскагѡ,

і҆гна́тїѧ, леѡні́да, дїонѵ́сїѧ, ѳео́дѡра, ѳерапо́нта, корни́лїѧ и҆ а҆ѳана́сїѧ ѻ҆стро́вскихъ,

і҆ѡ́ны климене́цкагѡ,

корни́лїѧ, кассїа́на и҆ лаѵре́нтїѧ ко́мельскихъ,

ло́ггина корѧ́жемскагѡ,

данїи́ла переѧсла́вскагѡ,

и҆родїѡ́на и҆лоєзе́рскагѡ,

стефа́на ѻ҆зе́рскагѡ, ко́мельскагѡ,

і҆ѡа́нна и҆ ло́нгина ꙗ҆ре́нгскихъ,

леѡні́да пошехо́нскагѡ,

кѷпрїа́на тро́пскаго, ꙗ҆росла́вскагѡ,

зѡсі́мы ворбозо́мскагѡ,

а҆рсе́нїѧ ко́мельскагѡ,

і҆ѡакі́ма ѻ҆по́чскагѡ,

ні́фѡнта телѣ́говскагѡ, ᲂу҆́стюжскагѡ,

гера́сїма бо́лдинскагѡ,

а҆рка́дїѧ дорогобꙋ́жскагѡ,

ні́ла столобе́нскагѡ,

маѯі́ма гре́ка,

а҆нтѡ́нїѧ сі́йскагѡ,

а҆леѯа́ндра, і҆ѡакі́ма и҆ и҆лїѝ сі́йскихъ,

нїки́фора важеѻзе́рскагѡ,

вассїа́на и҆ і҆ѡ́ны пертоми́нскихъ,

сі́мѡна сойги́нскагѡ.

і҆ѡ́ны и҆ некта́рїѧ каза́нскихъ,

генна́дїѧ костромска́гѡ и҆ любимогра́дскагѡ,

ни́фѡнта кожеезе́рскагѡ.

і҆ѡаса́фа, затво́рника нижегоро́дскагѡ,

дими́трїѧ и҆́нока, нижегоро́дскагѡ,

ѳеодо́сїѧ то́темскагѡ,

зино́вїѧ ѻ҆́тенскагѡ,

а҆рсе́нїѧ новгоро́дскагѡ,

ѳеодѡрі́та, просвѣти́телѧ ко́льскагѡ,

хрїстофо́ра сольвычего́дскагѡ,

кѷрі́лла а҆страха́нскагѡ,

а҆ѳана́сїѧ сѧ́нжемскагѡ,

а҆на́нїи і҆кѡнопи́сца, новгоро́дскагѡ,

ні́кѡна и҆ дїонѵ́сїѧ новгоро́дскихъ,

нїка́ндра пско́вскагѡ,

трѵ́фѡна пече́негскагѡ, просвѣти́телѧ ко́льскагѡ,

варлаа́ма, и҆гꙋ́мена ма́хрищскагѡ, є҆пⷭ҇кпа сꙋ́ждальскагѡ,

се́ргїѧ малопи́нежскагѡ,

і҆ѡ́ны ꙗ҆шезе́рскагѡ,

і҆гна́тїѧ и҆ і҆саа́кїѧ ло́мскихъ, ꙗ҆росла́вскихъ, (с. 573)

ѻ҆нꙋ́фрїѧ ма́льскагѡ, пско́вскагѡ,

серапїѡ́на и҆збо́рскагѡ, пско́вскагѡ,

про́хора и҆ вассїа́на ꙗ҆́стребскихъ, влади́мїрскихъ,

стефа́на гꙋси́нскагѡ,

ѳерапо́нта мо́нзенскагѡ,

кѷпрїа́на стороже́нскагѡ,

а҆нтѡ́нїѧ черноезе́рскагѡ,

кѷрі́лла сы́рьинскагѡ,

ні́кѡна, васі́лїѧ и҆ тѵ́хѡна соколо́вскихъ, и҆́стринскихъ,

тѵ́хѡна караче́вскагѡ,

данїи́ла шꙋ́жгорскагѡ,

харїтѡ́на кꙋ́динскагѡ,

варлаа́ма ке́ретскагѡ,

а҆ѳана́сїѧ на́волоцкагѡ,

мака́рїѧ ри́млѧнина, новгоро́дскагѡ,

ѯенофѡ́нта тꙋта́нскагѡ, тверска́гѡ,

вїке́нтїѧ волого́дскагѡ,

петра̀, і҆ере́ѧ черевко́вскагѡ, сольвычего́дскагѡ,

нїка́ндра городноезе́рскагѡ,

пафнꙋ́тїѧ балахни́нскагѡ,

мартѵ́рїѧ зелене́цкагѡ,

гꙋ́рїѧ ша́лацкагѡ.

се́ргїѧ шꙋ́хтомскагѡ,

а҆дрїа́на мо́нзенскагѡ,

ѳеодо́сїѧ трꙋ́дника, мо́нзенскагѡ,

стефа́на костромска́гѡ,

серапїѡ́на кожеезе́рскагѡ,

корни́лїѧ, ло́ггина, ге́рмана и҆ боголѣ́па кожеезе́рскихъ,

а҆нтѡ́нїѧ леохно́вскагѡ.

і҆ѡ́сифа, а҆нтѡ́нїѧ и҆ і҆ѡанні́кїѧ заѻники́евскихъ,

а҆враа́мїѧ, и҆гꙋ́мена спа́сскагѡ, корѧ́жемскагѡ, (с. 574)

трѵ́фѡна вѧ́тскагѡ,

а҆нтѡ́нїѧ солове́цкагѡ,

і҆а́кѡва солове́цкагѡ, костромска́гѡ,

ге́рмана столобе́нскагѡ,

і҆рина́рха, затво́рника росто́вскагѡ,

і҆ѡа́нна, затво́рника пско́вскагѡ,

полѷка́рпа брѧ́нскагѡ,

і҆рина́рха пономарѧ̀, ра́донежскагѡ,

дѡроѳе́ѧ книгохрани́телѧ, ра́донежскагѡ,

дѡроѳе́ѧ и҆ і҆ларїѡ́на ю҆́гскихъ,

і҆ѡа́нна, трꙋ́дника каргопо́льскагѡ, власа́тагѡ (въ и҆́ночествѣ і҆ѡ́ны),

мака́рїѧ жа́бынскаго, бѣ́левскагѡ,

вассїа́на ти́ксненскагѡ,

і҆рина́рха солове́цкагѡ,

ма́рка бѣла́винскагѡ,

дїонѵ́сїѧ ра́донежскагѡ,

дїодѡ́ра и҆ про́хора (порфѵ́рїѧ) ю҆рьего́рскихъ,

а҆ндре́ѧ, пꙋсты́нника солове́цкагѡ,

нїки́фора новгоро́дца, пꙋсты́нника солове́цкагѡ,

мїсаи́ла і҆еромона́ха, пꙋсты́нника солове́цкагѡ,

а҆дрїа́на, пꙋсты́нника солове́цкагѡ,

не́стѡра, пꙋсты́нника солове́цкагѡ,

тїмоѳе́ѧ а҆ле́ѯинца (въ схи́мѣ ѳео́дѡра), пꙋсты́нника солове́цкагѡ.

са́ввы, пꙋсты́нника солове́цкагѡ,

є҆фре́ма че́рнагѡ, пꙋсты́нника солове́цкагѡ,

а҆леѯі́ѧ калꙋжа́нина, пꙋсты́нника солове́цкагѡ,

і҆ѡ́сифа І, пꙋсты́нника солове́цкагѡ,

тѵ́хѡна москвитѧ́нина, пꙋсты́нника солове́цкагѡ,

ѳеодꙋ́ла рѧза́нца, пꙋсты́нника солове́цкагѡ,

трѵ́фѡна, пꙋсты́нника солове́цкагѡ,

і҆ѡ́сифа ІІ млада́гѡ, пꙋсты́нника солове́цкагѡ,

севастїа́на, пꙋсты́нника солове́цкагѡ,

гꙋ́рїѧ, и҆́нока чꙋ́днагѡ, солове́цкагѡ,

кѵ́рїка (кѷрїа́ка), больни́чнагѡ ста́рца, пꙋсты́нника солове́цкагѡ,

кассїа́на мꙋезе́рскагѡ, солове́цкагѡ,

а҆ѵѯе́нтїѧ, а҆́ѯїѧ и҆ тара́сїѧ, и҆́нокѡвъ солове́цкихъ, кашка́ренскихъ,

а҆нтѡ́нїѧ ке́нскагѡ, кожее́рскагѡ (въ схи́мѣ а҆враа́мїѧ),

нїкоди́ма кожеезе́рскагѡ,

мака́рїѧ холмого́рскагѡ, краснопо́льскагѡ,

є҆ѵфросѵ́на кꙋ́ржескагѡ, каргопо́льскагѡ,

а҆нтѡ́нїѧ краснохо́лмскагѡ,

дїонѵ́сїѧ переѧсла́вскагѡ,

і҆ѡакі́ма ша́ртомскагѡ,

далма́та пе́рмскагѡ,

генна́дїѧ і҆кѡнопи́сца, черни́говскагѡ,

і҆́ѡва поча́евскагѡ,

леѡні́да ᲂу҆стьнедꙋ́мскагѡ,

лꙋкїа́на а҆леѯа́ндровскагѡ,

є҆леаза́ра а҆́нзерскагѡ,

фїлі́ппа сꙋхо́нскагѡ,

тѵ́хѡна крестого́рскагѡ, во́хмовскагѡ,

корни́лїѧ а҆леѯа́ндровскагѡ,

мака́рїѧ высокоезе́рскагѡ,

мака́рїѧ меню́жскагѡ,

ѳеодо́сїѧ сі́йскагѡ,

и҆са́їи и҆ нїкано́ра сі́йскихъ, рꙋчье́вскихъ,

а҆враа́мїѧ и҆гꙋ́мена богоро́дицкагѡ, пи́нежскагѡ,

корни́лїѧ переѧсла́вскагѡ,

кѷрі́лла, схимона́ха борисоглѣ́бскагѡ,

пі́мена, затво́рника и҆ вери́жника росто́вскагѡ,

ка́рпа моско́вскагѡ,

ті́та, пꙋсты́нника ю҆́рьевскагѡ, пово́лжскагѡ,

зѡсі́мы а҆леѯа́ндровскагѡ,

і҆́ѡва а҆нзе́рскагѡ (въ схи́мѣ і҆исꙋ́са),

сине́сїѧ схїархїмандрі́та, сиби́рскагѡ,

мїсаи́ла, і҆еромона́ха а҆бала́цкагѡ,

а҆ндре́ѧ и҆гꙋ́мена рафаи́ловскагѡ, тобо́льскагѡ,

серафі́ма саро́вскагѡ,

ге́рмана а҆лѧ́скинскагѡ,

данїи́ла а҆́чинскагѡ, сиби́рскагѡ,

варлаа́ма, пꙋсты́нника чико́йскагѡ, сиби́рскагѡ,

мака́рїѧ миссїоне́ра а҆лта́йскагѡ,

а҆ре́ѳы верхотꙋ́рскагѡ, сиби́рскагѡ,

паі́сїѧ нѧ́мецкагѡ,

а҆мвро́сїѧ ѻ҆́птинскагѡ,

сїлꙋа́на а҆ѳѡ́нскагѡ,

прпⷣбныхъ же́нъ и҆ матере́й

а҆́нны, кнѧжны̀ кі́евскїѧ,

є҆ѵфросѵ́нїи и҆гꙋ́менїи, по́лоцкїѧ,

є҆ѵпра́ѯїи, кнѧги́ни пско́вскїѧ,

є҆ѵфросѵ́нїи, кнѧжны̀ сꙋ́ждальскїѧ,

харїті́ны, кнѧжны̀ лито́вскїѧ,

параске́ѵы, и҆гꙋ́менїи рже́вскїѧ,

софі́и, вели́кїѧ кнѧги́ни моско́вскїѧ, сꙋ́ждальскїѧ,

є҆ле́ны и҆гꙋ́менїи, моско́вскїѧ,

і҆ꙋлїані́и дѣ́вы, ѻ҆льша́нскїѧ,

софі́и кнѧжны̀, слꙋ́цкїѧ

и҆ всѣ́хъ про́чихъ прпⷣбныхъ ѻ҆тє́цъ и҆ ма́терей, въ по́двизѣхъ по́стническихъ просїѧ́вшихъ,

ст҃ы́хъ и҆ добропобѣ́дныхъ мч҃никѡвъ рѡссі́йскихъ

ѳео́дѡра варѧ́га и҆ сы́на є҆гѡ̀ і҆ѡа́нна, кі́евскихъ,

геѡ́ргїѧ ѻ҆́трока,

а҆враа́мїѧ болга́рскагѡ, влади́мїрскагѡ,

меркꙋ́рїѧ смоле́нскагѡ,

ѳео́дѡра фїло́софа, ка́мскагѡ,

а҆нтѡ́нїѧ, і҆ѡа́нна и҆ є҆ѵста́фїѧ лито́вскихъ,

і҆ѡа́нна каза́нскагѡ,

стефа́на и҆ петра̀ каза́нскихъ,

бори́са, і҆а́кѡва, ѳео́дѡра, сїльва́на, ѳео́дѡра, васі́лїѧ, ѳео́дѡра, дими́трїѧ, мїхаи́ла, і҆ѡа́нна и҆ васі́лїѧ каза́нскихъ,

сѷмеѡ́на, кѷпрїа́на, і҆ѡ́сифа, васі́лїѧ и҆ и҆̀же съ ни́ми, и҆рге́нскихъ, сиби́рскихъ,

па́ѵла рꙋ́сскагѡ,

гаврїи́ла младе́нца, бѣлосто́кскагѡ,

па́ѵла ви́ленскагѡ,

є҆ѵста́ѳїѧ ѻ҆́трока, кры́мскагѡ,

пахѡ́мїѧ рꙋ́сскагѡ, а҆ѳѡ́нскагѡ,

и҆ всѣ́хъ про́чихъ рѡссі́йскихъ мч҃никѡвъ и҆ мч҃ницъ, за вѣ́рꙋ во хрⷭ҇та̀ и҆ бл҃гоче́стїе страда̑нїѧ претерпѣ́вшихъ:

ст҃ы́хъ сщ҃енномꙋ́ченикѡвъ рѡссі́йскихъ

кꙋ́кши, просвѣти́телѧ вѧ́тичей, кі́ево-пече́рскагѡ,

митрофа́на а҆рхїепі́скопа, пахѡ́мїѧ а҆рхїмандрі́та, данїи́ла и҆гꙋ́мена и҆ ѳеодо́сїѧ и҆гꙋ́мена, влади́мїрскихъ,

сѷмеѡ́на, є҆пі́скопа переѧсла́вскагѡ,

лꙋкїа́на кі́ево-пече́рскагѡ,

а҆нѳі́ма, є҆пі́скопа са́рскагѡ,

патрі́кїѧ і҆ере́ѧ, влади́мїрскагѡ,

гера́сїма, є҆пі́скопа великопе́рмскагѡ,

пїтѷрі́ма, є҆пі́скопа великопе́рмскагѡ,

і҆сі́дѡра пресвѵ́тера и҆ и҆̀же съ ни́мъ седми́десѧти двꙋ́хъ ст҃ы́хъ мч҃никѡвъ, ю҆́рьевскихъ,

мака́рїѧ, митрополі́та кі́евскагѡ и҆ всеѧ̀ рꙋсѝ и҆ и҆̀же съ ни́мъ,

ѳеокті́ста, а҆рхїепі́скопа тверска́гѡ,

є҆рмоге́на, ст҃ѣ́йшагѡ патрїа́рха моско́вскагѡ и҆ всеѧ̀ рꙋсѝ,

мїсаи́ла, а҆рхїепі́скопа рѧза́нскагѡ,

і҆ѡ́сифа, митрополі́та а҆страха́нскагѡ,

нїки́фора і҆еромона́ха, кры́мскагѡ,

кѡнста́нцїѧ рꙋ́сскагѡ,

нїки́ты славѧни́на, і҆еромона́ха пантелеи́монова монастырѧ̀, а҆ѳѡ́нскагѡ

и҆ всѣ́хъ про́чихъ ст҃ы́хъ сщ҃енномꙋ́ченикѡвъ рѡссі́йскихъ, за вѣ́рꙋ во хрⷭ҇та̀ и҆ цр҃ковь хрⷭ҇то́вꙋ страда̑нїѧ претерпѣ́вшихъ:

ст҃ы́хъ прпⷣбномꙋ́ченикѡвъ рѡссі́йскихъ

мѡѷсе́ѧ ᲂу҆́грина, кі́ево-пече́рскагѡ,

григо́рїѧ чꙋдотво́рца, кі́ево-пече́рскагѡ, є҆ѵстра́тїѧ кі́ево-пече́рскагѡ,

кли́мента, и҆гꙋ́мена кі́ево-ѕвѣри́нецкагѡ, и҆ и҆̀же съ ни́мъ,

ѳео́дѡра и҆ васі́лїѧ дїа́кона, кі́ево-пече́рскихъ,

а҆наста́сїѧ дїа́кона, кі́ево-пече́рскагѡ,

і҆ѡаса́фа снетого́рскаго и҆ васі́лїѧ мїро́жскагѡ и҆ съ ни́ми і҆ѡ́сифа и҆ кѡнстанті́на пресвѵ́терѡвъ, пско́вскихъ,

григо́рїѧ и҆ кассїа́на а҆вне́жскихъ, а҆нтѡ́нїѧ, и҆́нока чꙋ́довскагѡ, моско́вскагѡ,

са́ввы и҆ венїами́на, и҆гꙋ́менѡвъ желѣзнобо́ровскихъ,

є҆фре́ма, дїоні́сїѧ, і҆ерѡнѵ́ма и҆ і҆саа́кїѧ ѻ҆бно́рскихъ,

а҆дрїа́на ѻ҆ндрꙋ́совскагѡ,

а҆дрїа́на пошехо́нскагѡ,

корни́лїѧ и҆ ᲂу҆ченика̀ є҆гѡ̀ вассїа́на пско́во- пече́рскихъ,

гела́сїѧ и҆гꙋ́мена, новгоро́дскагѡ,

а҆гапи́та маркꙋше́вскагѡ,

і҆ѡ́ны, гꙋ́рїѧ и҆ ге́рмана пече́негскихъ, ко́льскихъ,

григо́рїѧ сщ҃еннои́нока,

данїи́ла, и҆гꙋ́мена грѣхозарꙋ́цкагѡ, и҆ съ ни́мъ три́десѧти преподобномꙋ́ченикѡвъ и҆ двꙋхсо́тъ мч҃никѡвъ мїрѧ́нъ, ᲂу҆́глечскихъ,

кѡнстанті́на, и҆гꙋ́мена новото́ржскагѡ съ бра́тїею,

а҆настасі́и и҆гꙋ́менїи, и҆ съ не́ю три́десѧти пѧтѝ сесте́ръ мона́хинь, ᲂу҆́глечскихъ,

а҆нтѡ́нїѧ и҆гꙋ́мена покро́вскагѡ, гера́сїма а҆рхїмандрі́та, є҆ѵѳѵ́мїѧ и҆ варсоно́фїѧ сщ҃еннои́нокѡвъ и҆ бра́тїй и҆́нокѡвъ мака́рїѧ, матѳі́ѧ, вассїа́на, гꙋ́рїѧ, і҆́ѡва, і҆ларїѡ́на, і҆́ѡва, а҆ка́кїѧ, ѻ҆нꙋ́фрїѧ, і҆ѡ́сифа, герѡ́нтїѧ, лео́нтїѧ, тѵ́хѡна, фїларе́та, гела́сїѧ, і҆ѡ́сифа, вассїа́на, хрїстофо́ра, серапїѡ́на, ге́рмана, марке́лла, нїки́ты, а҆рсе́нїѧ, ѳеодо́сїѧ, і҆ѡ́ны, і҆ꙋ́ды, сѷмеѡ́на, мїхаи́ла, і҆ѡа́нна, мака́рїѧ, ма́манта, григо́рїѧ, нїки́фора, і҆ларїѡ́на, а҆ѳана́сїѧ, полѷе́ѵкта, космы̀ и҆ съ ни́ми ты́сѧчи мч҃никѡвъ мїрѧ́нъ, ᲂу҆́глечскихъ,

і҆ѡаса́фа бо́ровскагѡ, а҆рхїмандрі́та трⷪ҇цкагѡ, съ бра́тїею,

є҆ѵфросѵ́на синоезе́рскагѡ,

галактїѡ́на волого́дскагѡ,

і҆́ѡва ᲂу҆ще́льскагѡ,

сі́мѡна во́ломскагѡ,

а҆ѳана́сїѧ бре́стскагѡ,

мака́рїѧ ка́невскагѡ, а҆рхїмандрі́та ѻ҆брꙋ́чскагѡ

и҆ всѣ́хъ про́чихъ ст҃ы́хъ прпⷣбномꙋ́ченикѡвъ и҆ рѡссі́йскихъ, за вѣ́рꙋ во хрⷭ҇та̀, ѻ҆те́чество и҆ бл҃гоче́стїе страда̑нїѧ претерпѣ́вшихъ:

ст҃ы́хъ новомꙋ́ченикѡвъ рѡссі́йскихъ

тѵ́хѡна, ст҃ѣ́йшагѡ патрїа́рха моско́вскагѡ и҆ всеѧ̀ рꙋсѝ,

влади́мїра, митрополі́та кі́евскагѡ и҆ га́лицкагѡ,

венїамі́на, митрополі́та петрогра́дскагѡ и҆ гдо́вскагѡ,

се́ргїѧ а҆рхїмандрі́та,

ю҆́рїѧ и҆ і҆ѡа́нна,

і҆ѡа́нна и҆ а҆леѯа́ндра і҆ере́євъ,

є҆лїсаве́ты, вели́кїѧ кнѧги́ни и҆ варва́ры и҆́нокини

и҆ всѣ́хъ про́чихъ ст҃ы́хъ новомꙋ́ченикѡвъ рѡссі́йскихъ, за вѣ́рꙋ во хрⷭ҇та̀, ѻ҆те́чество и҆ бл҃гоче́стїе страда̑нїѧ претерпѣ́вшихъ:

ст҃ы́хъ бл҃же́нныхъ, хрⷭ҇та̀ ра́ди ю҆ро́дивыхъ и҆ чꙋдотво́рцєвъ рѡссі́йскихъ

проко́пїѧ ᲂу҆́стюжскагѡ,

заха́рїи і҆ере́ѧ,

ѳео́дѡра новгоро́дскагѡ,

нїкола́ѧ коча́нова, новгоро́дскагѡ,

геѡ́ргїѧ новгоро́дскагѡ,

маѯі́ма моско́вскагѡ,

геѡ́ргїѧ шенкꙋ́рскагѡ,

і҆сі́дѡра твердисло́ва, росто́вскагѡ,

леѡ́нтїѧ ᲂу҆́стюжскагѡ,

і҆ѡа́нна ᲂу҆́стюжскагѡ,

кѷрі́лла ве́льскагѡ,

васі́лїѧ ка́менскагѡ,

трофі́ма сꙋ́ждальскагѡ,

лаѵре́нтїѧ калꙋ́жскагѡ,

се́ргїѧ схимона́ха, переѧсла́вскагѡ,

васі́лїѧ моско́вскагѡ,

тїмофе́ѧ ѻ҆по́чскагѡ, пско́вскагѡ,

нїкола́ѧ са́лоса пско́вскагѡ,

і҆ѡа́нна ми́лостивагѡ, власа́тагѡ, росто́вскагѡ,

парѳе́нїѧ сꙋ́ждальскагѡ,

сі́мѡна ю҆́рьевецкагѡ,

і҆ѡа́нна, большо́й колпа́къ, моско́вскагѡ,

стефа́на росто́вскагѡ,

кѡнстанті́на новото́ржскагѡ,

і҆ѡа́нна можа́йскагѡ,

і҆а́кѡва трꙋ́дника, моско́вскагѡ,

ѳео́дѡра,

кѷпрїа́на сꙋ́ждальскагѡ,

проко́пїѧ вѧ́тскагѡ,

ма́рѳы моско́вскїѧ,

и҆лїѝ дани́ловскагѡ, ꙗ҆росла́вскагѡ,

і҆ѡа́нна І и҆ і҆ѡа́нна ІІ, солове́цкихъ,

маѯі́ма і҆ере́ѧ пра́веднагѡ, то́темскагѡ,

ѳѡмы̀, и҆родїѡ́на, мїхаи́ла, і҆ѡа́нна и҆ васі́лїѧ сольвычего́дскихъ,

а҆ндре́ѧ тоте́мскагѡ,

а҆ѳана́сїѧ росто́вскагѡ,

ѻ҆нꙋ́фрїѧ рѡма́новскагѡ, ꙗ҆росла́вскагѡ,

кѷпрїа́на кара́чевскагѡ,

і҆ѡа́нна верхотꙋ́рскагѡ, сиби́рскагѡ,

космы̀ верхотꙋ́рскагѡ, сиби́рскагѡ,

є҆ѵдокі́и сꙋ́ждальскїѧ,

до́мны ста́рицы, то́мскїѧ, сиби́рскїѧ,

ѯе́нїи петербꙋ́ргскїѧ

и҆ всѣ́хъ про́чихъ ст҃ы́хъ бл҃же́нныхъ ѻ҆тє́цъ и҆ ма́терей рѡссі́йскихъ, хрⷭ҇та̀ ра́ди въ по́двизѣхъ ю҆ро́дства просїѧ́вшихъ:

ст҃ы́хъ пра́ведныхъ ѻ҆тє́цъ и҆ ма́терей рѡссі́йскихъ

і҆ѡа́нна и҆ марі́и ᲂу҆стю́жскихъ,

і҆ꙋлїані́и новгоро́дскїѧ,

васі́лїѧ и҆ і҆ри́ны ка́шинскихъ,

се́ргїѧ и҆ варва́ры сви́рскихъ,

ѳе́клы переѧсла́вскїѧ,

глѷке́рїи дѣ́вы, новгоро́дскїѧ,

і҆а́кѡва борови́чскагѡ,

а҆рте́мїѧ, ѻ҆́трока верко́льскагѡ, и҆ сестры̀ є҆гѡ̀ параске́ѵы пирими́нскїѧ,

варсоно́фїи моско́вскїѧ,

пелагі́и рже́вскїѧ,

і҆а́кѡва и҆ і҆ѡа́нна, ѻ҆́трокѡвъ меню́жскихъ,

са́ввы і҆ере́ѧ, мошо́кскагѡ, влади́мїрскагѡ,

гаврїи́ла и҆ а҆настасі́и, васі́левскихъ, влади́мїрскихъ,

васі́лїѧ мч҃ника, мангазе́йскагѡ, сиби́рскагѡ,

і҆ꙋлїані́и ми́лостивыѧ, геѡ́ргїѧ и҆ и҆́нокини ѳеодо́сїи ла́заревскихъ, мꙋ́ромскихъ,

сѷмеѡ́на верхотꙋ́рскагѡ, сиби́рскагѡ,

і҆ѡа́нна младе́нца мч҃ника, ᲂу҆́глечскагѡ,

боголѣ́па ѻ҆́трока-схимона́ха, черноѧ́рскагѡ,

ка́рпа медꙋше́вскагѡ ковро́вскагѡ,

проко́пїѧ ᲂу҆стьѧ́нскагѡ,

григо́рїѧ і҆ере́ѧ, дими́трїѧ, а҆рте́мїѧ и҆ є҆ѵфросѵ́нїи, шꙋ́йскихъ, влади́мїрскихъ,

і҆ꙋлїані́и сольвычего́дскїѧ,

параске́ѵы кевро́льскїѧ, а҆рха́нгельскїѧ,

і҆ѡа́нна и҆сповѣ́дника, рꙋ́сскагѡ,

петра̀ ѻ҆́трока, то́мскагѡ, сиби́рскагѡ.

ѳео́дѡра то́мскагѡ, сиби́рскагѡ,

стефа́на ѻ҆́мскагѡ, сиби́рскагѡ

і҆ѡа́нна, прѡтоїере́ѧ кроншта́дтскагѡ, чꙋдотво́рца

и҆ всѣ́хъ про́чихъ ѻ҆тє́цъ, бра́тїй, же́нъ, ма́терей и҆ сесте́ръ рѡссі́йскихъ, хрⷭ҇та̀ ра́ди во бл҃гоче́стїи и҆ пра́ведности подвиза́вшихсѧ, и҆ всѣ́хъ про́чихъ ст҃ы́хъ, въ землѝ рѡссі́йстѣй просїѧ́вшихъ, и҆́хже и҆мена̀ ты̀ са́мъ, гдⷭ҇и, вѣ́си, ст҃ы́хъ пра́ведныхъ бг҃оѻтє́цъ і҆ѡакі́ма и҆ а҆́нны и҆ всѣ́хъ ст҃ы́хъ твои́хъ, бл҃гопрїѧ́тнꙋ сотворѝ мл҃твꙋ на́шꙋ, да́рꙋй на́мъ ѡ҆ставле́нїе прегрѣше́нїй на́шихъ, покры́й на́съ кро́вомъ крилꙋ̀ твое́ю, ѿженѝ ѿ на́съ всѧ́каго врага̀ и҆ сꙋпоста́та, ᲂу҆мирѝ на́шꙋ жи́знь, гдⷭ҇и, поми́лꙋй на́съ и҆ мі́ръ тво́й и҆ сп҃сѝ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ.

И҆ вхо́димъ въ хра́мъ, пою́ще стїхи̑ры стїхѡ́вны воскрє́сны, а҃-гѡ гла́са: Сла́ва, ст҃ы́хъ в҃, гла́съ в҃: Но́вый до́ме: И҆ ны́нѣ, бг҃оро́диченъ, гла́съ то́йже: Вы́шнїи ли́цы: И҆лѝ и҆́нъ бг҃оро́диченъ, гла́съ и҃: Ѽ, пресла́внагѡ чꙋдесѐ! нб҃сѐ и҆ землѝ цр҃и́ца:

На бл҃гослове́нїи хлѣ́бѡвъ Бцⷣе дв҃о: два́жды и҆ тропа́рь ст҃ы́хъ, гла́съ и҃: Ꙗ҆́коже пло́дъ: є҆ди́ножды.

На ᲂу҆́трени. На Бг҃ъ гдⷭ҇ь: тропа́рь воскре́сенъ є҆ди́ножды и҆ ст҃ы́хъ тропа́рь, гла́съ и҃: Ꙗ҆́коже пло́дъ: є҆ди́ножды: сла́ва, и҆́нъ тропа́рь ст҃ы́хъ, гла́съ д҃: І҆ерꙋсали́ма вы́шнѧгѡ: И҆ ны́нѣ, бг҃оро́диченъ, гла́съ то́йже: Дне́сь свѣ́тлѡ красꙋ́етсѧ:

По а҃-мъ и҆ в҃-мъ стїхосло́вїи сѣда́льны воскрє́сны а҃-гѡ гла́са со стїхѝ и҆́хъ. По полѷеле́и велича̑нїѧ прест҃ѣ́й трⷪ҇цѣ и҆ бцⷣѣ, ѱало́мъ и҆збра́нный Бл҃го є҆́сть: и҆ припѣва́емъ ко стїхѡ́мъ є҆гѡ̀ велича́нїе ст҃ы̑мъ. Посе́мъ, не пѣ́вше Сла́ва, и҆ ны́нѣ: тропарѝ воскрє́сныѧ по непоро́чныхъ: А҆́гг҃льскїй собо́ръ: Ѵ҆пакоѝ воскре́сенъ а҃-гѡ гла́са и҆ и҆́ны сѣда́льны ст҃ы́хъ а҃-гѡ и҆ в҃-гѡ стїхосло́вїи без̾ бг҃оро́дичнѡвъ, пе́рвый сѣда́ленъ ст҃ы́хъ по полѷеле́и. Сла́ва, и҆́нъ сѣда́ленъ ст҃ы́хъ по полѷеле́и. И҆ ны́нѣ, бг҃оро́диченъ є҆гѡ̀.

Степе́нна воскре́сна а҃-гѡ гла́са. Прокі́менъ воскре́сный, гла́съ а҃: Ны́нѣ воскреснꙋ̀: Є҆ѵⷢ҇лїе воскре́сное в҃-е, ѿ ма́рка, зача́ло ѻ҃. Воскресе́нїе хрⷭ҇то́во: По н҃-ъ ѱалмѣ̀ стїхи́ра, гла́съ ѕ҃: Воскре́съ і҆и҃съ.

А҆́ще же хра́мъ всѣ́хъ рꙋ́сскихъ ст҃ы́хъ. Степе́нна воскре́сна а҃-гѡ гла́са. Прокі́менъ ст҃ы́хъ, гла́съ д҃: Ра́дꙋйтесѧ, пра́веднїи, ѡ҆ гдⷭ҇ѣ, пра̑вымъ подоба́етъ похвала̀. Сті́хъ: Бꙋ́ди, гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Всѧ́кое дыха́нїе: Є҆ѵⷢ҇лїе хра́ма всѣ́хъ рꙋ́сскихъ ст҃ы́хъ, ѿ матѳе́а, зача́ло і҃. Воскресе́нїе хрⷭ҇то́во: Ѱало́мъ н҃. Сла́ва: Мл҃твами всѣ́хъ ст҃ы́хъ рꙋ́сскихъ: И҆ ны́нѣ: Мл҃твами бцⷣы: По н҃-мъ ѱалмѣ̀ стїхи́ра ст҃ы́хъ, гла́съ ѕ҃: Є҆желѣ́тнюю па́мѧть: Посе́мъ глаго́летъ дїа́конъ мл҃твꙋ Спасѝ, бж҃е, лю́ди твоѧ̑: (зрѝ ᲂу҆ста́въ на лїті́и, страни́ца 551).

Канѡ́нъ воскре́сенъ ѻ҆ктѡ́иха а҃-гѡ гла́са со і҆рмосо́мъ на д҃, канѡ́нъ бцⷣѣ воскре́сный а҃-гѡ гла́са на в҃, и҆ канѡ́нъ всѣ́хъ рꙋ́сскихъ ст҃ы́хъ, гла́съ и҃, на и҃. Катава́сїѧ: Ѿве́рзꙋ ᲂу҆ста̀ моѧ̑: По г҃-й пѣ́сни конда́къ, і҆́косъ и҆ сѣда́ленъ съ бг҃оро́дичномъ є҆гѡ̀ ст҃ы́хъ. По ѕ҃-й пѣ́снь конда́къ и҆ і҆́косъ воскре́сенъ. По ѳ҃-й пѣ́сни Ст҃ъ гдⷭ҇ь: Свѣти́ленъ воскре́сенъ. Сла́ва, ст҃ы́хъ. И҆ ны́нѣ, бг҃оро́диченъ є҆гѡ̀.

На хвали́техъ стїхи̑ры на и҃, воскрє́сны д҃, гла́съ а҃ и҆ ст҃ы́хъ д҃ со сла́вникомъ, со стїхѝ ѿ стїхо́вны ма́лыѧ вече́рни. Сла́ва, стїхи́ра є҆ѵⷢ҇льскаѧ, втора́ѧ. И҆ ны́нѣ, гла́съ в҃: Пребл҃гослове́нна є҆сѝ, бцⷣе дв҃о: По вели́комъ славосло́вїи тропа́рь воскре́сенъ то́чїю: Дне́сь сп҃се́нїе мі́рꙋ бы́сть: Є҆ктенїа̀ и҆ ѿпꙋ́стъ, на не́мже помина́емъ: ст҃а́го равноапо́стольнаго вели́каго кнѧ́зѧ влади́мїра и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ: И҆ пое́мъ многолѣ́тны.

Посе́мъ ѻ҆бы́чное и҆схожде́нїе. Поє́мымъ же стїхи́рамъ хра́ма всѣ́хъ рꙋ́сскихъ ст҃ы́хъ на ѻ҆́смь гласѡ́въ, кади́тъ предстоѧ́тель і҆кѡ́нꙋ пра́здника (с. 584) и҆ быва́етъ пома́занїе ѿ лампа́ды ст҃ы́мъ є҆ле́емъ. По пома́занїи же ст҃ы́мъ є҆ле́емъ глаго́летъ предстоѧ́тель: Ми́ръ всѣ̑мъ. Ли́къ: И҆ дх҃ови твоемꙋ̀. Дїа́конъ: Главы̑ на́шѧ гдⷭ҇еви прикло́нимъ. Ли́къ: Тебѣ̀ гдⷭ҇и. И҆ чте́тъ предстоѧ́тель мл҃твꙋ: Влⷣко многоми́лостиве: кра́ткѡ, присовокꙋплѧ́ѧ то́кмѡ: ст҃а́го равноапо́стольнаго вели́кагѡ кнѧ́зѧ влади́мїра и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ, и҆́хже па́мѧть соверша́емъ ны́нѣ: Ѡ҆глаше́нїе стꙋди́тово: тропа́рь прпⷣбномꙋ ѳео́дѡрꙋ и҆ ча́съ а҃.

На часѣ́хъ тропа́рь воскре́сенъ. Сла́ва, ст҃ы́хъ тропарѝ и҃-гѡ и҆ д҃-гѡ гла́сѡвъ, премѣнѧ́юще глаго́лемъ. Конда́къ на а҃-мъ и҆ ѕ҃-мъ часѣ́хъ воскре́сенъ, на г҃-мъ и҆ ѳ҃-мъ часѣ́хъ конда́къ ст҃ы́хъ.

На лїтꙋргі́и. Бл҃жє́нны воскрє́сны а҃-гѡ гла́са на ѕ҃, начина́ѧ ѿ: Бл҃же́ни кро́тцыи: и҆ ст҃ы́хъ бл҃жє́нны на д҃, гла́съ и҃, ѿ: Бл҃же́ни є҆стѐ, є҆гда̀ поно́сѧтъ ва́мъ:

По вхо́дѣ. Тропа́рь воскре́сенъ, гла́съ а҃, и҆ ст҃ы́хъ ѻ҆́ба тропарѧ̀ и҃-гѡ и҆ д҃-гѡ гла́сѡвъ. Конда́къ воскре́сенъ, гла́съ а҃. Сла́ва, конда́къ ст҃ы́хъ, гла́съ г҃. И҆ ны́нѣ, конда́къ ᲂу҆спе́нїѧ бцⷣы, гла́съ в҃: Въ мл҃твахъ: Прокі́менъ воскре́сенъ, гла́съ а҃: Бꙋ́ди, гдⷭ҇и, ми́лость твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ, пра́веднїи ѡ҆ гдⷭ҇ѣ, пра̑вымъ подоба́етъ похвала̀. Прокі́менъ ст҃ы́хъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀ ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Сохрани́ мѧ, гдⷭ҇и, ꙗ҆́кѡ на тѧ̀ ᲂу҆пова́хъ. А҆по́столъ воскре́сенъ къ ри́млѧнѡмъ, зача́ло п҃а ѿ полꙋ̀ и҆ ст҃ы́хъ а҆по́стѡлъ къ колоса́ємъ: зача́ло сн҃ѕ ѿ полꙋ̀. А҆лиллꙋ́їѧ, гла́съ а҃. Сті́хъ: Бг҃ъ даѧ́й ѿмще́нїе мнѣ̀, и҆ покори́вый лю́ди под̾ мѧ̀. Сті́хъ в҃: Велича́ѧй сп҃се́нїѧ царе́ва, и҆ творѧ́й млⷭ҇ть хрїстꙋ̀ своемꙋ̀ даві́дꙋ, и҆ сѣ́мени є҆гѡ̀ до вѣ́ка. И҆ ст҃ы́хъ, гла́съ сті́хъ: Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ. Сті́хъ в҃: Спа́слъ є҆сѝ на́съ ѿ стꙋжа́ющихъ на́мъ и҆ ненави́дѧщихъ на́съ посрами́лъ є҆сѝ. Є҆ѵⷢ҇лїе воскре́сное ѿ матѳе́а, зача́ло ѳ҃ и҆ ст҃ы́хъ є҆ѵⷢ҇лїе ѿ лꙋкѝ, зача́ло ѯ҃з. Прича́стенъ воскре́сенъ: Хвали́те гдⷭ҇а съ нб҃съ, хвали́те є҆го̀ въ вы́шнихъ. И҆ ст҃ы́хъ: Бл҃говоли́тъ гдⷭ҇ь въ лю́дехъ свои́хъ и҆ вознесе́тъ крѡ́ткїѧ во сп҃се́нїе.

По заамво́нной мл҃твѣ и҆схо́димъ ко і҆кѡ́нѣ пра́здника, пою́ще тропа́рь ст҃ы́хъ, гла́съ и҃. Сла́ва, конда́къ ст҃ы́хъ, гла́съ г҃. И҆ ны́нѣ, бг҃оро́диченъ, гла́съ г҃. Посе́мъ чте́тсѧ мл҃тва на бл҃гослове́нїе ко́лива, въ че́сть и҆ па́мѧть всѣ́хъ ст҃ы́хъ, въ землѝ рѡссі́йстѣй просїѧ́вшихъ. И҆ мл҃тва ко всѣ̑мъ ст҃ы̑мъ землѝ рꙋ́сскїѧ. По мл҃твѣ пое́мъ велича̑нїѧ прест҃ѣ́й трⷪ҇цѣ, бцⷣѣ и҆ ст҃ы̑мъ. Бꙋ́ди и҆́мѧ гдⷭ҇не: ѱало́мъ л҃г и҆ про́чее лїтꙋргі́и. Ѿпꙋ́стъ, на не́мже помина́емъ: ст҃а́го равноапо́стольнаго вели́каго кнѧ́зѧ влади́мїра и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ.

По ѿпꙋ́стѣ лїтꙋргі́и быва́етъ многолѣ́тїе и҆ присоединѧ́емъ проше́нїе сїѐ:

Хрⷭ҇тїа́нскагѡ бл҃гоче́стїѧ ревни́телємъ и҆ защи́тникѡмъ хрⷭ҇то́вы цр҃кве и҆ всѣ̑мъ правосла̑внымъ хрⷭ҇тїа́нѡмъ пода́ждь, гдⷭ҇и, тишинꙋ̀ и҆ бл҃годе́нствїе, и҆ и҆з̾ѻби́лїе плодѡ́въ земны́хъ, и҆ мнѡ́гаѧ лѣ̑та.

И҆ по многолѣ́тїи пое́мъ стїхѝ.

Ѡ҆б̾ ѿда́нїи пра́здника хра́ма всѣ́хъ ст҃ы́хъ, въ землѝ рѡссі́йстѣй просїѧ́вшихъ.

Въ ве́черъ же днѐ тогѡ̀ быва́етъ ѿда́нїе пра́здника сегѡ̀ по чинꙋ̀ ѿда́нїѧ пра́здника ст҃ы́хъ ѻ҆тцє́въ пе́рвагѡ вселе́нскагѡ собо́ра въ недѣ́лю з҃-ю по па́сцѣ. Къ вече́рни трезво́нъ без̾ больша́гѡ. На вече́рни каѳі̑смы не стїхосло́вимъ. На Гдⷭ҇и, воззва́хъ: стїхи̑ры ст҃ы́хъ г҃ ѿ ма́лыѧ вече́рни, гла́съ д҃: Ꙗ҆́кѡ и҆збра́нныхъ ѿ люде́й рꙋ́сскихъ: Вѣ́ры бронѧ́ми: Ꙗ҆́кѡ ѕвѣ́зды многосвѣ̑тлыѧ: (зрѝ страни̑цы 495, 496). И҆ ст҃а́гѡ мине́и стїхи̑ры г҃. Сла́ва, ст҃ы́хъ гла́съ а҃: Весели́сѧ ѡ҆ гдⷭ҇ѣ. рꙋ́сь правосла́внаѧ: (зрѝ страни́цꙋ 513). И҆ ны́нѣ, бг҃оро́диченъ догма́тикъ, гла́съ то́йже: Всемі́рнꙋю сла́вꙋ: Вхо́да нѣ́сть. Прокі́менъ днѐ. Сподо́би, гдⷭ҇и: є҆ктенїа̀ проси́тельнаѧ. И҆ стїхи́ры ст҃ы́хъ на стїхо́внѣ ѿ ма́лыѧ вече́рни, гла́съ и҃: Ѽ, пресла́внагѡ чꙋдесѐ! на нб҃сѝ: Ѽ, пресла́внагѡ чꙋдесѐ! чꙋде́съ: Ѽ, пресла́внагѡ чꙋдесѐ! хрⷭ҇та̀ ра́ди: (зрѝ страни́цꙋ 497). Сла́ва, гла́съ ѕ҃: Є҆желѣ́тнюю па́мѧть дне́сь (зрѝ страни́цꙋ 526). И҆ ны́нѣ, бг҃оро́диченъ, гла́съ є҃: Вострꙋ́бимъ трꙋбо́ю: (зрѝ страни́цꙋ 498). По трист҃о́мъ тропа́рь ст҃ы́хъ, гла́съ и҃: Ꙗ҆́коже пло́дъ: (зрѝ страни́цꙋ 498). Сла́ва, тропа́рь ст҃а́гѡ и҆з̾ мине́и. И҆ ны́нѣ, бг҃оро́диченъ, гла́съ д҃: Дне́сь свѣ́тлѡ красꙋ́етсѧ: (зрѝ страни́цꙋ 520). Є҆ктенїа̀ сꙋгꙋ́баѧ и҆ ѿпꙋ́стъ, на не́мже помина́емъ ст҃а́го равноапо́стольнаго вели́кагѡ кнѧ́зѧ влади́мїра и҆ ст҃а́го, (и҆́мⷬ҇къ, а҆́ще бꙋ́детъ наꙋ́трїе па́мѧть рꙋ́сскагѡ ст҃а́гѡ) и҆ всѣ́хъ про́чихъ чꙋдотво́рцєвъ, въ землѝ рѡссі́йстѣй просїѧ́вшихъ, ст҃а́го (и҆́мⷬ҇къ вселе́нскагѡ ст҃а́гѡ, є҆го́же па́мѧть бꙋ́детъ наꙋ́трїе).

А҆́ще наꙋ́трїе пра́здникъ въ понедѣ́льникъ бꙋ́детъ два̀ ст҃ы́хъ, на вече́рни пое́мъ стїхи̑ры є҆ди́нагѡ ст҃а́гѡ, дрꙋга́гѡ же ст҃а́гѡ пое́мъ стїхи̑ры на ᲂу҆́трени на хвали́техъ. А҆́ще же бꙋ́детъ ст҃ы́й, и҆мѣ́ѧй славосло́вїе и҆лѝ полѷеле́й, и҆ тогда̀ слꙋ́жбꙋ си́хъ ст҃ы́хъ пое́мъ во и҆́нъ де́нь, и҆ли́ же, а҆́ще неꙋдо́бь перенестѝ сїѐ пра́зднованїе на и҆́нъ де́нь, ѿда́нїѧ хра́ма не быва́етъ.

Въ хра́мѣ всѣ́хъ рꙋ́сскихъ ст҃ы́хъ, и҆дѣ́же по ᲂу҆ста́вꙋ пое́тсѧ канѡ́нъ хра́ма, ꙗ҆́коже въ сꙋббѡ́тꙋ на ᲂу҆́трени, є҆гда̀ нѣ́сть пра́зднꙋемагѡ ст҃а́гѡ, пое́мъ канѡ́нъ ст҃ы́хъ, и҆́же на моле́бномъ пѣ́нїи положе́нъ (зрѝ страни́цꙋ 502).

Оу҆ста́въ соверше́нїѧ слꙋ́жбы всѣ̑мъ ст҃ы̑мъ, (с. 587) въ землѝ рѡссі́йстѣй просїѧ́вшымъ, во и҆́нъ де́нь.

На ма́лой вече́рни. На Гдⷭ҇и, воззва́хъ: стїхи̑ры ст҃ы́хъ на д҃, гла́съ и҃, повторѧ́юще пе́рвꙋю стїхи́рꙋ два́жды. Сла́ва, ст҃ы́хъ, гла́съ д҃. И҆ ны́нѣ, бг҃оро́диченъ, гла́съ то́йже: Бцⷣѣ, всѣ́хъ цр҃и́це: На стїхо́внѣ стїхи̑ры ст҃ы́хъ, гла́съ и҃. Сла́ва, гла́съ а҃. И҆ ны́нѣ, гла́съ є҃: Вострꙋ́бимъ трꙋбо́ю: И҆лѝ бг҃оро́диченъ, гла́съ и҃: Ѽ, пресла́внагѡ чꙋдесѐ! нб҃сѐ и҆ землѝ цр҃и́ца: (зрѝ на стїхо́внѣ вели́цѣй вече́рни, страни́ца 519). По Ны́нѣ ѿпꙋща́еши: тропа́рь ст҃ы́хъ, гла́съ и҃: Ꙗ҆́коже пло́дъ: Сла́ва, и҆ ны́нѣ, бг҃оро́диченъ, гла́съ д҃: Застꙋ́пнице ᲂу҆се́рднаѧ: є҆ктенїа̀ и҆ ѿпꙋ́стъ.

По ѿпꙋ́стѣ ма́лыѧ вече́рни соверша́емъ послѣ́дованїе моле́бнагѡ пѣ́нїѧ (зрѝ порѧ́докъ соверше́нїѧ є҆гѡ̀ во ᲂу҆ста́вѣ недѣ́ли в҃-й по пѧтидесѧ́тницѣ, страни́ца 550).

На вели́цѣй вече́рни, Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ: стїхи̑ры ст҃ы́хъ на и҃, повторѧ́юще пе́рвꙋю два́жды. Сла́ва, гла́съ а҃: Весели́сѧ ѡ҆ гдⷭ҇ѣ: И҆ ны́нѣ: Всемі́рнꙋю сла́вꙋ: Вхо́дъ, прокі́менъ днѐ. И҆ чтє́нїѧ трѝ. На лїті́и стїхи̑ры всѝ ст҃ы́хъ. Мл҃твы Сп҃сѝ, бж҃е: и҆ Влⷣко многоми́лостиве: (зрѝ во ᲂу҆ста́вѣ недѣ́ли в҃-й по пѧтидесѧ́тницѣ, страни̑цы 551, 552). На стїхо́внѣ стїхи̑ры ст҃ы́хъ, гла́съ в҃. Сла́ва, ст҃ы́хъ, гла́съ в҃. И҆ ны́нѣ, бг҃оро́диченъ, гла́съ то́йже. И҆лѝ и҆́нъ бг҃оро́диченъ, гла́съ и҃: Ѽ, пресла́внагѡ чꙋдесѐ! нб҃сѐ и҆ землѝ цр҃и́ца: На благослове́нїи хлѣ́бѡвъ тропа́рь ст҃ы́хъ, гла́съ и҃: Ꙗ҆́коже пло́дъ: два́жды. И҆ Бцⷣе дв҃о: є҆ди́ножды.

На ᲂу҆́трени. На Бг҃ъ гдⷭ҇ь: тропа́рь ст҃ы́хъ, гла́съ и҃: Ꙗ҆́коже пло́дъ: два́жды. Сла́ва, и҆́нъ тропа́рь ст҃ы́хъ, гла́съ д҃: І҆ерꙋсали́ма вы́шнѧгѡ: И҆ ны́нѣ, бг҃оро́диченъ: Дне́сь свѣ́тлѡ красꙋ́етсѧ:

По а҃-мъ и҆ в҃-мъ стїхосло́вїихъ сѣда́льны ст҃ы́хъ съ бг҃орѡ́дичны и҆́хъ. По полѷеле́и велича́нїе прест҃ѣ́й трⷪ҇цѣ:

Велича́емъ тѧ̀, трїѷпоста́сный влⷣко, вѣ́рою правосла́вною зе́млю рꙋ́сскꙋю ѡ҆зари́вшаго и҆ ст҃ы́хъ сро́дникѡвъ на́шихъ со́нмъ ве́лїй въ не́й просла́вльшаго.

Посе́мъ пое́мъ на ѻ҆́ба ли̑ка ѱало́мъ и҆збра́нный: Воскли́кните гдⷭ҇еви: и҆ припѣва́емъ къ стїха́мъ сегѡ̀ ѱалма̀, ко всѣ̑мъ и҆лѝ то́кмѡ къ нѣ́которымъ, ꙗ҆́коже ᲂу҆каза́сѧ, велича́нїе ст҃ы̑мъ.

Оу҆блажа́емъ ва́съ, чꙋдотво́рцы на́ши сла́внїи, зе́млю рꙋ́сскꙋю добродѣ́тельми ва́шими ѡ҆зари́вшїи и҆ ѻ҆́бразъ спасе́нїѧ на́мъ свѣтоѧвле́ннѡ показа́вшїи.

Ѱало́мъ и҆збра́нный, пое́мый во и҆́нъ де́нь:

а҃ ли́къ: Воскли́кните гдⷭ҇еви всѧ̀ землѧ̀, по́йте же и҆́мени є҆гѡ̀, дади́те сла́вꙋ хвалѣ̀ є҆гѡ̀. Оу҆блажа́емъ ва́съ: в҃ ли́къ: Ꙗ҆́кѡ бг҃ъ ве́лїй гдⷭ҇ь и҆ цр҃ь ве́лїй по всѣ́й землѝ, ꙗ҆́кѡ въ рꙋ́цѣ є҆гѡ̀ всѝ концы̀ землѝ и҆ высѡты̀ го́ръ тогѡ̀ сꙋ́ть. а҃. Прїиди́те, поклони́мсѧ и҆ припаде́мъ є҆мꙋ̀ и҆ воспла́чемсѧ пред̾ гдⷭ҇емъ, сотво́ршимъ на́съ. в҃. Бж҃е, ᲂу҆ши́ма на́шима ᲂу҆слы́шахомъ и҆ ѻ҆тцы̀ на́ши возвѣсти́ша на́мъ дѣ́ло, є҆́же содѣ́лалъ є҆сѝ во дне́хъ и҆́хъ, во дне́хъ дре́внихъ. а҃. Ѿве́рзꙋ въ при́тчахъ ᲂу҆ста̀ моѧ̑, провѣща́ю гана̑нїѧ и҆спе́рва. в҃ Є҆ли̑ка слы́шахомъ и҆ позна́хомъ ѧ҆̀ и҆ ѻ҆тцы̀ на́шѧ повѣ́даша на́мъ. а҃. Не ᲂу҆таи́шасѧ ѿ ча́дъ и҆́хъ въ ро́дъ и҆́нъ, возвѣща́юще хвалы̑ гдⷭ҇ни и҆ си̑лы є҆гѡ̀, и҆ чꙋдеса̀ є҆гѡ̀, ꙗ҆̀же сотворѝ. в҃. Гдⷭ҇и бж҃е на́шъ, ты̀ послꙋ́шалъ є҆сѝ и҆̀хъ, бж҃е, ты̀ млⷭ҇тивъ быва́лъ є҆сѝ и҆̀мъ и҆ мща́ѧ на всѧ̑ начина̑нїѧ и҆́хъ. а҃. На тѧ̀ ᲂу҆пова́ша ѻ҆тцы̀ на́ши, ᲂу҆пова́ша и҆ и҆зба́вилъ є҆сѝ ѧ҆̀. в҃. Къ тебѣ̀ воззва́ша и҆ спасо́шасѧ, на тѧ̀ ᲂу҆пова́ша и҆ не постыде́шасѧ. Оу҆блажа́емъ ва́съ: а҃. И҆ да ᲂу҆пова́ютъ на тѧ̀ зна́ющїи и҆́мѧ твоѐ, ꙗ҆́кѡ не ѡ҆ста́вилъ є҆сѝ взыска́ющихъ тѧ̀, гдⷭ҇и. в҃. Не бо мече́мъ свои́мъ наслѣ́диша зе́млю и҆ мы́шца и҆́хъ не спасѐ и҆̀хъ. а҃. Но десни́ца твоѧ̑ и҆ мы́шца твоѧ̑ и҆ просвѣще́нїе лица̀ твоегѡ̀, ꙗ҆́кѡ бл҃говоли́лъ є҆сѝ въ ни́хъ. в҃. Бг҃ъ на́мъ прибѣ́жище и҆ си́ла, помо́щникъ въ ско́рбехъ, ѡ҆брѣ́тшихъ ны̀ ѕѣлѡ̀. а҃. Бж҃е, ѿри́нꙋлъ ны̀ є҆сѝ и҆ низложи́лъ є҆сѝ на́съ, разгнѣ́валсѧ є҆сѝ и҆ ᲂу҆ще́дрилъ є҆сѝ на́съ. в҃. Ꙗ҆́кѡ а҆́ще не гдⷭ҇ь бы бы́лъ въ на́съ, внегда̀ воста́ти человѣ́кѡмъ на ны̀, ᲂу҆̀бо живы́хъ поже́рли бы́ша на́съ. а҃. Бл҃гослове́нъ гдⷭ҇ь, и҆́же не дадѐ на́съ въ лови́твꙋ зꙋбѡ́мъ и҆́хъ. в҃. Ꙗ҆́кѡ не ѿри́нетъ гдⷭ҇ь люде́й свои́хъ и҆ достоѧ́нїѧ своегѡ̀ не ѡ҆ста́витъ. а҃. Спа́слъ бо є҆сѝ на́съ ѿ стꙋжа́ющихъ на́мъ и҆ ненави́дѧщихъ на́съ посрами́лъ є҆сѝ. Оу҆блажа́емъ ва́съ: в҃. По́мощь на́ша во и҆́мѧ гдⷭ҇а, сотво́ршагѡ нб҃о и҆ зе́млю. а҃. Не на́мъ, гдⷭ҇и, не на́мъ, но и҆́мени твоемꙋ̀ да́ждь сла́вꙋ ѡ҆ млⷭ҇ти твое́й и҆ и҆́стинѣ твое́й. в҃. Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль. а҃. По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте, ꙗ҆́кѡ цр҃ь всеѧ̀ землѝ бг҃ъ, по́йте разꙋ́мнѡ. в҃. Гдⷭ҇ь цр҃ь во вѣ́къ и҆ въ вѣ́къ вѣ́ка, поги́бнете, ꙗ҆зы́цы, ѿ землѝ є҆гѡ̀. а҃. Мы́ же лю́дїе твоѝ и҆ ѻ҆́вцы па́жити твоеѧ̀, и҆сповѣ́мысѧ тебѣ̀, бж҃е, во вѣ́къ, въ ро́дъ и҆ ро́дъ возвѣсти́мъ хвалꙋ̀ твою̀. в҃. Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ, и҆ бл҃гослове́но и҆́мѧ сла́вы є҆гѡ̀ во вѣ́къ и҆ въ вѣ́къ вѣ́ка, и҆ и҆спо́лнитсѧ сла́вы є҆гѡ̀ всѧ̀ землѧ̀, бꙋ́ди, бꙋ́ди. Оу҆блажа́емъ ва́съ: а҃. Сла́ва: Оу҆блажа́емъ ва́съ: в҃. И҆ ны́нѣ: Оу҆блажа́емъ ва́съ: а҃. А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀, бж҃е. в҃. А҆ллилꙋ́їа.

Сщ҃еннослꙋжи́тели: А҆ллилꙋ́їа: И҆ коне́чное велича́нїе бцⷣѣ:

Досто́йнѡ є҆́сть велича́ти тѧ̀, бцⷣе, землѝ рꙋ́сскїѧ цр҃и́цꙋ нбⷭ҇нꙋю и҆ люде́й правосла́вныхъ влⷣчицꙋ держа́внꙋю.

По полѷеле́и сѣда́льны ст҃ы́хъ. И҆ ны́нѣ, бг҃оро́диченъ. Степе́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Ра́дꙋйтесѧ, пра́веднїи, ѡ҆ гдⷭ҇ѣ, пра̑вымъ подоба́етъ похвала̀. Сті́хъ: Бꙋ́ди, гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Всѧ́кое дыха́нїе: Є҆ѵⷢ҇лїе ѿ матѳе́а, зача́ло і҃. Ѱало́мъ н҃. Сла́ва: Мл҃твами всѣ́хъ ст҃ы́хъ рꙋ́сскихъ: И҆ ны́нѣ: Мл҃твами бцⷣы: По н҃-мъ ѱалмѣ̀ стїхи́ра, гла́съ ѕ҃: Є҆желѣ́тнюю па́мѧть: Посе́мъ глаго́летъ дїа́конъ мл҃твꙋ Сп҃сѝ, бж҃е, лю́ди твоѧ̑: (зрѝ во ᲂу҆ста́вѣ на лїті́и въ недѣ́лю в҃-ю по пѧтидесѧ́тницѣ, страни́ца 551).

Канѡ́нъ бцⷣы, гла́съ в҃: Ꙗ҆́же всѣ̑мъ ᲂу҆до́бь послꙋ́шнаѧ: (зрѝ ѻ҆ктѡ́ихъ, повече́рїе сꙋббѡ́ты, и҆лѝ слꙋ́жбꙋ Оу҆толѝ моѧ̑ печа̑ли, і҆аннꙋа́рїѧ к҃є) со і҆рмосо́мъ на ѕ҃, і҆рмосы̀ по два́жды. И҆ канѡ́нъ всѣ́хъ рꙋ́сскихъ ст҃ы́хъ, гла́съ и҃, на и҃. По г҃-й пѣ́сни сѣда́ленъ ст҃ы́хъ съ бг҃оро́дичнымъ є҆гѡ̀. По ѕ҃-й пѣ́сни конда́къ и҆ і҆́косъ ст҃ы́хъ. По ѳ҃-й пѣ́сни свѣти́ленъ ст҃ы́хъ съ бг҃оро́дичномъ є҆гѡ̀.

На хвали́техъ стїхи̑ры ст҃ы́хъ на д҃, гла́съ є҃, повторѧ́юще пе́рвꙋю два́жды. Сла́ва, гла́съ д҃. И҆ ны́нѣ, гла́съ то́йже: При́снѡ страна̀ рѡссі́йскаѧ: По вели́комъ славосло́вїи тропа́рь ст҃ы́хъ, гла́съ д҃: І҆ерꙋсали́ма вы́шнѧгѡ: Сла́ва, и҆ ны́нѣ, бг҃оро́диченъ, гла́съ то́йже: Въ застꙋ́пницѣ страны̀ на́шеѧ: (зрѝ въ послѣ́дованїи моле́бнагѡ пѣ́нїѧ, страни́ца 519). Є҆ктенїа̀ и҆ ѿпꙋ́стъ, на не́мже помина́емъ: ст҃а́го равноапо́стольнаго вели́кагѡ кн҃зѧ влади́мїра и҆ всѣ́хъ про́чїихъ чꙋдотво́рцєвъ, въ землѝ рѡссі́йстѣй просїѧ́вшихъ: И҆ пое́мъ многолѣ́тны.

Посе́мъ и҆схожде́нїе и҆ пою́тсѧ стїхи̑ры хра́ма всѣ́хъ рꙋ́сскихъ ст҃ы́хъ на ѻ҆́смь гласѡ́въ. И҆ быва́етъ пома́занїе. Ѡ҆ се́мъ зрѝ во ᲂу҆ста́вѣ в҃-й недѣ́ли по пѧтидесѧ́тницѣ (страни́цы 499), то́кмѡ ѡ҆глаше́нїе стꙋди́тово и҆ тропа́рь прпⷣбномꙋ ѳео́дѡрꙋ не глаго́лемъ. И҆ ча́съ а҃-й. На часѣ́хъ ѻ҆́ба тропарѧ̀ ст҃ы́хъ, и҃-гѡ и҆ д҃-гѡ гласѡ́въ, глаго́лемъ и҆ конда́къ ст҃ы́хъ.

На лїтꙋргі́и. Бл҃жє́нны ст҃ы́хъ на и҃, начина́ѧ ѿ: Бл҃же́ни ми́лостиви: По вхо́дѣ ѻ҆́ба тропарѧ̀ ст҃ы́хъ и҃-гѡ и҆ д҃-гѡ гласѡ́въ. Сла́ва, конда́къ ст҃ы́хъ, гла́съ г҃. И҆ ны́нѣ, конда́къ ᲂу҆спе́нїѧ бцⷣы, гла́съ г҃: Въ мл҃твахъ: Прокі́менъ ст҃ы́хъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Сохрани́ мѧ, гдⷭ҇и, ꙗ҆́кѡ на тѧ̀ ᲂу҆пова́хъ. А҆по́столъ ст҃ы́хъ, ко є҆вре́ємъ, зача́ло т҃л. А҆ллилꙋ́їа, гла́съ д҃: Бж҃е, ᲂу҆ши́ма на́шима ᲂу҆слы́шахомъ, и҆ ѻ҆тцы̀ на́ши возвѣсти́ша на́мъ. Сті́хъ: Спа́слъ бо є҆сѝ на́съ ѿ стꙋжа́ющихъ на́мъ и҆ ненави́дѧщихъ на́съ посрами́лъ є҆сѝ. Є҆ѵⷢ҇лїе ст҃ы́хъ, ѿ матѳе́а, зача́ло а҃і. Прича́стенъ ст҃ы́хъ: Бл҃говоли́тъ гдⷭ҇ь въ лю́дехъ свои́хъ и҆ вознесе́тъ крѡ́ткїѧ во сп҃се́нїе.

И҆ про́чее послѣ́дованїе, ꙗ҆́коже во в҃-ю недѣ́лю по пѧтидесѧ́тницѣ ᲂу҆каза́сѧ. Ѡ҆б̾ ѿда́нїи пра́здника зрѝ вы́ше (страни́цꙋ 585).

* * *

3

Требник, Общая Минея и Типикон дают в этом имени ударение другое: капі́тѡн-. Прим. orthlib

4

Для этого географического прилагательного в этой службе систематично употребляется осовремененное написание волого́д- , тогда как другие оцифрованные богослужебные тексты однозначно употребляют ударение на первом слоге: во́логод-. Прим. orthlib

5

В оригинале было ѡ҆бѡгати́вшаѧ, что показалось неверным по смыслу. Прим. orthlib

6

Требник дает другое написание сего имени: мѡїкѡ̀. Прим. orthlib

7

Перенесено ударение в соответствии со статистикой по другим изданиям. В оригинале ле́ѵкїѧ. Прим. orthlib


 День 31День 32