Мѣ́сѧца тогѡ́же въ ѕ҃-й де́нь. Преподо́бнагѡ ѻ҆ц҃а̀ на́шегѡ виссарїѡ́на чꙋдотво́рца:
И҆ преподо́бнагѡ і҆ларїѡ́на но́вагѡ, ѻ҆би́тели далма́тскїѧ.
На Гдⷭ҇и, воззва́хъ, стїхи̑ры, гла́съ и҃. Поⷣ: Ѽ пресла́внагѡ чꙋдесѐ!
Свѣ́тъ мона́шествꙋющихъ, виссарїѡ́не мꙋ́дре, ꙳ ты̀ добродѣ́тельными зарѧ́ми, ꙳ и҆ сїѧ́нїемъ бл҃года́ти, ꙳ пꙋсты́ни бы́лъ є҆сѝ ꙗ҆́кѡ свѣти́ло пресвѣ́тло. ꙳ Страсте́й мглы̀ и҆ тмы̀ ѕлолю́тыхъ, ꙳ тѧ̀ чтꙋ́щыѧ те́плѣ и҆збавлѧ́й, ꙳ и҆ всѧ́кїѧ ско́рби и҆ напа́сти, ꙳ вѣ́рнѡ пою́щыѧ ꙳ твоѐ бж҃е́ственное ᲂу҆спе́нїе.
Неизрече́нныхъ пѡ́двигъ твои́хъ, ꙳ ты̀ бж҃е́ственною любо́вїю, ꙳ терпѧ̀ стоѧ́нїе посредѣ̀ те́рнїѧ, ꙳ показа́лъ є҆сѝ страда́льцємъ ра́вно сопротивле́нїе. ꙳ Го́рькагѡ мо́рѧ ᲂу҆слажда́еши во́ды, ꙳ и҆ дꙋ́шы напоѧ́еши въ жа́жди, премꙋ́дре. ꙳ Прехо́диши вы́ше ні́ловыхъ быстри́нъ, ꙳ творѧ̀ немо́кренно, прехва́льне, ꙳ на вода́хъ ше́ствїе.
Тѧ̀ подо́бника и҆лїѝ мꙋ́дромꙋ, ꙳ всѝ вѣ́дꙋще ꙗ҆́вѣ, виссарїѡ́не, восхвалѧ́емъ, ꙳ ми́лостїю бж҃е́ственною тебѣ̀ ꙳ съ нб҃сѐ ѡ҆дожди́лъ є҆сѝ водны̑ѧ стрꙋи̑, ꙳ и҆ дождє́вныѧ и҆сто́чники, и҆ ро́сꙋ бжⷭ҇твеннꙋю, ꙳ твои́ми чⷭ҇тны́ми моли́твами, подае́ши ᲂу҆жѐ свы́ше, ꙳ ѻ҆́ч҃е пребл҃же́нне, всѣ̑мъ вѣ̑рнымъ ꙳ бл҃года́ть же и҆ си́лꙋ, ꙳ и҆ покро́въ неѡбори́мъ.
И҆́ны стїхи̑ры прпⷣбнагѡ і҆ларїѡ́на, гла́съ д҃. Поⷣ: Да́лъ є҆сѝ зна́менїе:
Житїѐ нескве́рно, ꙳ терпѣ́нїе и҆ кро́тость, и҆ любо́вь нелицемѣ́рнꙋ, ꙳ воздержа́нїе безмѣ́рно, ꙳ всено́щное стоѧ́нїе, ꙳ ᲂу҆миле́нїе бж҃е́ственное, ꙳ вѣ́рꙋ и҆ наде́ждꙋ и҆́стиннꙋ, съ ми́лованїемъ, ѻ҆́ч҃е, стѧжа́въ, ꙳ ꙗ҆́кѡ а҆́гг҃лъ пожи́лъ є҆сѝ на землѝ съ тѣ́ломъ, ꙳ і҆ларїѡ́не бл҃же́нне, ꙳ моли́твенниче ѡ҆ дꙋша́хъ на́шихъ.
Земны́й а҆́гг҃лъ, ꙳ и҆ нбⷭ҇ный человѣ́къ бы́лъ є҆сѝ, прпⷣбне, ꙳ и҆сто́чникъ ᲂу҆миле́нїѧ, ми́лованїѧ стрꙋѧ̀, ꙳ пꙋчи́на чꙋде́съ, ꙳ грѣ́шникѡвъ и҆спорꙋ́чникъ, ꙳ ма́слина вои́стиннꙋ бж҃їѧ плодови́та, ꙳ є҆ле́емъ трꙋдѡ́въ твои́хъ ꙳ ᲂу҆маща́ѧ ли́ца, і҆ларїѡ́не чꙋ́дне, ꙳ вѣ́рнѡ восхвалѧ́ющихъ тѧ̀.
Оу҆́мъ тво́й сїѧ́ѧ ꙳ бжⷭ҇твенными разꙋмѣ̑нїи, ꙳ тѣле́сныхъ превы́ше страсте́й бы́лъ є҆сѝ, ꙳ несмѣ́шенъ до́льними, ꙳ носѧ̀ начерта́нїе, ꙳ и҆ и҆з̾ѡбража́ѧ въ себѣ̀ бж҃е́ственнꙋю добро́тꙋ, ꙳ и҆ познава́емь ве́сь свѣтови́дѣнъ, ꙳ дѣ́йствомъ дх҃а, і҆ларїѡ́не ѻ҆́ч҃е на́шъ, ꙳ мона́шествꙋющихъ ᲂу҆краше́нїе.
Сла́ва, и҆ ны́нѣ, пра́здника, и҆лѝ бг҃оро́диченъ:
Ра́дꙋйсѧ, сл҃нцезра́чнаѧ лꙋчѐ, ꙳ сл҃нца незаходи́магѡ прⷭ҇то́ле, ꙳ ꙗ҆́же сл҃нце возсїѧ́вши недоꙋмѣ́нное: ꙳ ра́дꙋйсѧ, ᲂу҆́ме, ѡ҆блиста́ѧй бж҃е́ственными сїѧ́ньми, ꙳ зарѐ мо́лнїйнаѧ, ѡ҆свѣти́вшаѧ землѝ концы̀, ꙳ и҆́стинное зла́та блиста́нїе, ꙳ вседо́браѧ и҆ пренепоро́чнаѧ, ꙳ свѣ́тъ невече́рнїй ꙳ вѣ̑рнымъ ѡ҆блиста́вши.
Крⷭ҇тобг҃оро́диченъ:
Распина́ема хрⷭ҇та̀ чл҃вѣколю́бца ꙳ ви́дѧщи пречⷭ҇таѧ, ꙳ и҆ ре́бра и҆скопава́єма копїе́мъ ꙳ пла́чꙋщи вопїѧ́ше: ꙳ что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀, вселюбе́знѣйшїй: ꙳ ᲂу҆дивлѧ́юсѧ, бл҃гоꙋтро́бне, твоемꙋ̀ во́льномꙋ распѧ́тїю.
Тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: по моли́твами и҆́хъ въ ми́рѣ ᲂу҆пра́ви живо́тъ на́шъ.
Канѡ́нъ ст҃а́гѡ виссарїѡ́на. Творе́нїе і҆ѡ́сифово.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Пое́тъ бг҃ꙋ це́рковь ликꙋ́ющи въ па́мѧти твое́й дне́сь, бг҃одохнове́нне виссарїѡ́не, и҆ вѣ́рою сла́витъ вели̑кїѧ, ѻ҆́ч҃е, по́двиги твоѧ̑.
Ра́бъ бг҃ꙋ ꙗ҆́вльсѧ, порабо́тилъ є҆сѝ дꙋше́вными си́лами стра̑сти тѣлє́сныѧ, и҆ свобо́дь всѧ́кїѧ ѕло́бы ꙗ҆ви́лсѧ є҆сѝ, ѻ҆́ч҃е всечꙋ́дне.
Оу҆краси́всѧ добро́тами пѡ́двигъ твои́хъ, сосꙋ́дъ ꙗ҆ви́лсѧ є҆сѝ благопотре́бенъ бж҃е́ственнагѡ дх҃а, тогѡ̀ дѣ̑йствїѧ вмѣща́ющь, виссарїѡ́не бл҃же́нне.
Бг҃оро́диченъ:
Дꙋ́шъ льсте́цъ мѧ̀ привлечѐ въ поги́бельный ро́въ: но мнѣ̀ прострѝ держа́внꙋю твою̀ рꙋ́кꙋ, и҆ ско́рѡ, бцⷣе, къ свѣ́тꙋ возведѝ.
И҆́нъ канѡ́нъ преподо́бнагѡ і҆ларїѡ́на.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Въ свѣ́тъ невеще́ственный и҆ разꙋ́мный ѿ тмы̀ сꙋ́щихъ веще́й востекі́й, і҆ларїѡ́не преподо́бне, моли́твами твои́ми къ бг҃ꙋ мѧ̀ просвѣтѝ.
Ѿ младе́нства сса́въ добродѣ́тель, воздержа́нїѧ болѣ́зньми и҆ пѡ́ты по́стными въ мꙋ́жа дости́глъ є҆сѝ, и҆ въ мѣ́рꙋ дꙋхо́внꙋю во́зраста хрⷭ҇то́ва.
Страсте́й пꙋчи́нꙋ преше́дъ, и҆ треволне́нїѧ де́мѡнѡвъ и҆збѣ́гъ, во приста́нище ᲂу҆стреми́лсѧ є҆сѝ немо́кренно безстра́стїѧ, ѻ҆́ч҃е преподо́бне.
Бг҃оро́диченъ:
Сло́во безъ ма́тере и҆зъ ѻ҆ц҃а̀, безъ ѻ҆тца̀ сего̀ напослѣ́докъ бг҃омꙋ́жнѡ родила̀ є҆сѝ, є҆ди́на бг҃ома́ти, ꙗ҆́кѡ превы́шши всеѧ̀ тва́ри.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ моѝ, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Возше́лъ є҆сѝ на высотꙋ̀ безстра́стїѧ, вше́лъ є҆сѝ во мра́къ бг҃овидѣ́нїѧ, прїѧ́лъ є҆сѝ въ се́рдцы твое́мъ бж҃е́ственный зако́нъ: и҆́мже ᲂу҆крѣ́пльсѧ, свѣти́льникъ пресвѣ́телъ мона́шествꙋющихъ, преподо́бне, бы́лъ є҆сѝ.
Плодови́таѧ ма́слина въ домꙋ̀ бж҃е́ственнѣмъ ꙗ҆́вѣ насажде́нъ ꙗ҆ви́лсѧ є҆сѝ, ѻ҆́ч҃е, є҆ле́емъ по́двигѡвъ твои́хъ ᲂу҆мастѝ на̑ша ли́ца, восхвалѧ́ющихъ твоѧ̑, виссарїѡ́не преподо́бне, чꙋдеса̀.
Нестѧжа́тельно пожи́въ, блаже́нне, житїѐ, пти́цамъ подо́бно, ѻ҆́ч҃е, кри́лы же ѡ҆блегча́емь безстра́стїѧ, вы́шнїѧ дости́глъ є҆сѝ ѻ҆би́тели ра́дꙋѧсѧ: сегѡ̀ ра́ди вѣ́рою тѧ̀ ᲂу҆блажа́емъ.
Бг҃оро́диченъ:
Лѣ́ностнѡ живо́тъ мо́й и҆зжи́въ, и҆ страстьмѝ се́рдце ѡ҆скверни́въ, пристꙋпа́ю къ тебѣ̀, влⷣчце, ᲂу҆миле́нїемъ дꙋшѝ, и҆ молю́сѧ ᲂу҆ще́дрити и҆ спасти́ мѧ, покаѧ́нїѧ ѻ҆́бразы мѧ̀ ᲂу҆тве́рждши.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Попали́лъ є҆сѝ ᲂу҆́глемъ воздержа́нїѧ, преподо́бне, страсте́й те́рнїе, и҆ прохлажда́еши вѣ́рныхъ мꙋдрова̑нїѧ.
Стрѣ́лы и҆з̾ѡщрє́ны добродѣ́тели стѧжа́въ дꙋ́хомъ, ꙗ҆́кѡ си́ленъ, ᲂу҆ѧзви́лъ є҆сѝ се́рдце лю́тагѡ ратобо́рца.
Ѻ҆рꙋ́жїемъ воздержа́нїѧ и҆ моли́твою, ꙗ҆́кѡ бронѧ́ми, преподо́бне, воѡрꙋжи́всѧ, врагѡ́въ неви́димыхъ побѣди́лъ є҆сѝ полкѝ.
Бг҃оро́диченъ:
Ми́лостивꙋ бы́ти мѝ, тѧ̀ молю̀, твои́ми, влⷣчце, дерзнове́ньми, и҆зъ тебє̀ ро́ждшемꙋсѧ, въ де́нь сꙋ́дный.
Конда́къ, і҆ларїѡ́на, гла́съ в҃. Подо́бенъ: Твє́рдыѧ.
Ѻ҆гра́ды живоно́сныѧ твоеѧ̀ па́жити па́стырски невреди́мо ста́до соблю́лъ є҆сѝ, и҆ ꙗ҆ви́лсѧ є҆сѝ высото́ю дѣ́лъ вели́къ, но́вый і҆ларїѡ́не, по благоче́стїи мнѡ́ги мꙋ̑ки и҆ скѡ́рби прїе́мъ: тѣ́мъ во всера́достный живо́тъ всели́лсѧ є҆сѝ го́рнѧгѡ сїѡ́на, молѝ за ны̀, преподо́бне.
Сѣда́ленъ, виссарїѡ́на, гла́съ а҃. Подо́бенъ: Гро́бъ тво́й:
Воздержа́нїѧ ѻ҆гне́мъ попали́въ стра̑сти, свѣща̀ свѣтла̀ безстра́стїѧ ꙗ҆ви́лсѧ є҆сѝ, тмꙋ̀ дꙋ́шъ на́шихъ ѿгонѧ́щи благода́тїю. тѣ́мже дне́сь свѣтоно́снꙋю твою̀ па́мѧть пра́зднꙋемъ весе́лїемъ се́рдца, виссарїѡ́не ѻ҆́ч҃е на́шъ.
Сла́ва, і҆ларїѡ́на, гла́съ д҃. Подо́бенъ: Ско́рѡ предварѝ:
Бг҃ꙋ ѡ҆свѧти́лъ є҆сѝ твою̀ жи́знь, всебл҃же́нне, бы́въ и҆зрѧ́денъ сщ҃еннодѣ́йственникъ вои́стиннꙋ хрⷭ҇то́въ, сщ҃е́нниче. тѣ́мже по мно́гихъ по́тѣхъ и҆ болѣ́знехъ, ра́дꙋѧсѧ въ невеще́ствєннаѧ преста́вилсѧ є҆сѝ селє́нїѧ: и҆ ны́нѣ и҆сточа́еши на́мъ стрꙋи̑ и҆сцѣле́нїй.
И҆ ны́нѣ, пра́здника, и҆лѝ бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
Крⷭ҇тобг҃оро́диченъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же благослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго: тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Ка̑пли и҆сцѣле́нїй прїѧ́лъ є҆сѝ ѿ пꙋчи́ны бл҃года́тей, ѿсю́дꙋ преложи́лъ є҆сѝ во́дꙋ морскꙋ́ю, моли́твою твое́ю, мꙋ́дре, на сла́дость, и҆сцѣлѧ́ѧ ᲂу҆ченикꙋ̀ твоемꙋ̀ жа́ждꙋ, досточꙋ́дне.
Ника́коже да́же до ста́рости ѡ҆скꙋдѣ́лъ є҆сѝ въ житїѝ, бг҃омꙋ́дре ѻ҆́ч҃е, въ пꙋсты́нѧхъ и҆ гора́хъ заблꙋжда́ѧ хотѣ́нїемъ, и҆ща́й бг҃а, свѣтлостьмѝ па́че ᲂу҆́мныхъ чꙋде́съ, тѧ̀ просвѣ́щша.
Бы́лъ є҆сѝ смире́нъ и҆ ѡ҆хꙋжде́нъ, возноси́мь безстра́стїемъ. тѣ́мже разрази́лъ є҆сѝ возношє́нїѧ де́мѡнѡвъ, свѣти́льникъ мона́шествꙋющихъ, ѻ҆́ч҃е, бы́въ, благоче́стнѡ вѣ́рою восхвалѧ́ющихъ тѧ̀.
Бг҃оро́диченъ:
Стра̑сти дꙋшѝ моеѧ̀ и҆сцѣлѝ, возраста́ющыѧ мѝ преѻкаѧ́ннѡ: по́мыслъ просвѣтѝ, дале́че ѿгонѧ́щи тмꙋ̀, чⷭ҇таѧ, де́мѡнѡвъ ѡ҆скорблѧ́ющихъ мѧ̀, и҆ всегда̀ сѣ̑ти дѣ́лающихъ мѝ.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Насажде́нъ бы́въ при вода́хъ воздержа́нїѧ, ѻ҆́ч҃е бл҃же́нне, лоза̀ ꙗ҆ви́лсѧ є҆сѝ благора́слена, благоче́стїѧ гро́здїе предлага́ющаѧ.
Ве́сь бжⷭ҇твенъ бы́въ и҆ дх҃оно́сенъ, ве́сь и҆зше́лъ є҆сѝ къ бг҃ꙋ, і҆ларїѡ́не всебл҃же́нне: тѣ́мже со а҆́гг҃лы ликꙋ́еши при́снѡ.
На ка́мени вѣ́ры поста́вилъ є҆сѝ стѡпы̀ се́рдца твоегѡ̀, и҆ непоколеби́мь пре́былъ є҆сѝ, прилѡ́гъ де́мѡнскихъ не ᲂу҆жаса́ѧсѧ.
Бг҃оро́диченъ:
Херꙋві̑мъ превы́шшꙋю тѧ̀ и҆ серафі̑мъ пое́мъ, пречⷭ҇таѧ: є҆гѡ́же бо трепе́щꙋтъ, носи́ла є҆сѝ пло́тїю бг҃а на́шего на рꙋкꙋ̀ твоє́ю.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ, сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.
Просвѣще́нїе все́льшеесѧ, пребл҃же́нне, ᲂу҆тѣ́шителѧ внꙋ́трь дꙋшѝ твоеѧ̀, ведꙋ́щꙋю къ ца́рствꙋ показа̀ стезю̀, въ не́йже ше́ствꙋѧ, де́мѡнѡвъ ловле́нїѧ и҆ помраче́нїѧ дꙋше́внагѡ ᲂу҆клони́лсѧ є҆сѝ.
Но́въ ꙗ҆́вльсѧ і҆исꙋ́съ, бг҃оно́се, со́лнца тече́нїе ᲂу҆ста́вилъ є҆сѝ мольбо́ю свѣтосїѧ́нною, бжⷭ҇твенными словесы̀ ᲂу҆краша́емь, блаже́нне, и҆ чꙋде́съ заре́ю просвѣща́емь, и҆ бж҃їими чꙋдесы̀ мно́гими ᲂу҆добрѧ́емь.
Въ кни́зѣ живо́тнѣй написа́лсѧ є҆сѝ досто́йнѡ, напи̑саннаѧ всѧ̑ сконча́въ въ бжⷭ҇твенныхъ кни́гахъ. тѣ́мже вопїю́ ти: рꙋкописа́нїе, ѻ҆́ч҃е, ѕѡ́лъ мои́хъ твои́ми расто́ргни ко всеви́дцꙋ бг҃ꙋ мольба́ми.
Бг҃оро́диченъ:
Стопа́мъ послѣ́дꙋѧ, собо́ръ преподо́бныхъ, и҆зъ чре́ва твоегѡ̀ возсїѧ́вшемꙋ неизрече́ннымъ ржⷭ҇тво́мъ, дв҃о мт҃и съ нбⷭ҇ными ли̑ки сочта́сѧ: съ ни́миже моли́сѧ, и҆ и҆спросѝ на́мъ ѡ҆чище́нїе, чтꙋ́щымъ тѧ̀.
И҆́нъ. І҆рмо́съ:
Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Ѻ҆́ко серде́чное неꙋсы́пно въ бжⷭ҇твенныхъ за́повѣдехъ соблю́лъ є҆сѝ незазо́рнѡ, сла́вне.
На го́рꙋ добродѣ́телей воздержа́нїемъ, бг҃оно́се, дѣ́тельнѡ восте́клъ є҆сѝ къ боговидѣ́нїю восхожде́нїѧ.
Є҆ле́й расточи́въ ни́щымъ, ѿ се́рдца, і҆ларїѡ́не преподо́бне, бога́тство небе́сное поче́рплъ є҆сѝ.
Бг҃оро́диченъ:
Сло́ва ковче́гъ тѧ̀ показа̀, бцⷣе, зако́на гдⷭ҇и, въ ѻ҆́ньже несказа́ннѡ всели́сѧ.
Пѣ́снь ѕ҃. І҆рмо́съ:
Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.
Не ѡ҆скꙋдѣ́лъ є҆сѝ мнѡ́гимъ приближа́ѧсѧ подвигѡ́мъ: ноще́й бо, преподо́бне, и҆ дне́й четы́редесѧть пребы́лъ є҆сѝ стоѧ̀, непрекло́ненъ нꙋ́ждными нꙋ́ждами є҆стества̀.
Оу҆мертви́въ твоѧ̑ ᲂу҆́ды, ꙗ҆̀же на землѝ, чꙋ́дне, живы́мъ дѣ́йствомъ и҆сцѣле́нїѧ ѡ҆богати́лсѧ є҆сѝ, и҆ живе́ши на небесѣ́хъ, ᲂу҆мерщвлѧ́ющихъ всегда̀ дꙋ́шъ на́шихъ стра̑сти и҆сцѣлѧ́ѧ.
Житїѐ твоѐ рыда́ѧ при́снѡ сконча́лъ є҆сѝ: жела́нїе бо бжⷭ҇твенное тѧ̀, ѻ҆́ч҃е, внꙋ́трь распалѝ. и҆ ны́нѣ на небесѣ́хъ ѡ҆брѣ́лъ є҆сѝ ᲂу҆тѣше́нїе, съ преподо́бными ли̑ки совокꙋплѧ́ѧсѧ.
Бг҃оро́диченъ:
Гдⷭ҇ь и҆зъ тебє̀ пло́тїю ражда́етсѧ, всѣ́хъ гпⷭ҇жꙋ̀ тѧ̀ тва́рей содѣ́лавъ: є҆го́же молѝ, чⷭ҇таѧ, ѡ҆блада́ющагѡ и҆зба́вити врага̀ дꙋ́шы на́шѧ.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Мы́сленнаго голїа́ѳа, ѕло́бою возносѧ́щагосѧ без̾ѻрꙋ́жнымъ твои́мъ сплете́нїемъ, вѣ́рнѡ пра́щею ᲂу҆би́лъ є҆сѝ, и҆ сегѡ̀ и҆сто́ргъ побѣди́тєльнаѧ ѻ҆рꙋ̑жїѧ, ꙗ҆́кѡ вельмѝ хва́лѧщасѧ посѣ́клъ є҆сѝ.
Вели́комꙋ въ добродѣ́телехъ поревнова́лъ є҆сѝ і҆ларїѡ́нꙋ, и҆ сегѡ̀ дꙋхо́внѡ стопа́мъ возслѣ́дꙋѧ, воздержа́нїемъ, преподо́бне, верхо́венъ ꙗ҆ви́лсѧ є҆сѝ, и҆ ста́дꙋ воѻбраже́нїе.
Пѡ́ты воздержа́тельными ᲂу҆́глїе стрѣ́лъ врага̀ погаси́лъ є҆сѝ до конца̀, и҆ ѻ҆́гнь вѣ́ры вже́гъ, попали́лъ є҆сѝ невѣ́рїѧ є҆реті́чєскаѧ шата̑нїѧ.
Бг҃оро́диченъ:
Зачала̀ є҆сѝ вои́стиннꙋ бж҃їѧ сло́ва во ᲂу҆тро́бѣ твое́й, и҆ сего̀ па́че є҆стества̀, всенепоро́чнаѧ, родила̀ є҆сѝ. є҆го́же моли́твами ᲂу҆молѝ, ѡ҆ и҆̀же вои́стиннꙋ бцⷣꙋ воспѣва́ющихъ тѧ̀.
Конда́къ виссарїѡ́на, гла́съ в҃. Подо́бенъ: Тве́рдыѧ:
Вы́шнихъ си́лъ подража́въ, преподо́бне, ѻ҆́бразомъ пти́цъ житїѐ пожи́лъ є҆сѝ, вре́мєннаѧ въ забы́тїи положи́въ, непреста́ннымъ жела́нїемъ влеко́мъ къ небє́снымъ добро́тамъ хрⷭ҇та̀ цр҃ѧ̀, до́ндеже того̀ дости́глъ є҆сѝ, виссарїѡ́не, молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ моли́тва.
Ѡ҆бнови́въ дꙋ́шꙋ воздержа́нїѧ благочести́вымъ, ѻ҆́ч҃е, ра́ломъ, кла́съ многопло́денъ воздѣ́лалъ є҆сѝ, въ жи́тницахъ соблюда́емь небе́сныхъ, и҆ пита́еши вѣ́рнѡ воспѣва́ющыѧ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Свѣ́тꙋ сраствори́всѧ невеще́ственномꙋ, чи́стъ свѣ́тъ бы́лъ є҆сѝ, и҆ быстринꙋ̀ рѣчнꙋ́ю преше́лъ є҆сѝ, ѡ҆мочи́въ ника́коже стопы̑ твоѧ̑: по стезѧ́мъ же пра̑вымъ, бг҃омꙋ́дре виссарїѡ́не, ходи́лъ є҆сѝ, грѣха̀ мꙋ̑тныѧ и҆зсꙋши́въ во́ды.
Ѽ чꙋ́до стра́шно! ка́кѡ непива́ємыѧ и҆ногда̀ во́ды, пїє́мы сотвори́лъ є҆сѝ бжⷭ҇твеннымъ назнамена́нїемъ, и҆ рѣчнꙋ́ю быстринꙋ̀ преше́лъ є҆сѝ, тече́нїе же ᲂу҆держа́лъ є҆сѝ со́лнечное, висарїѡ́не бг҃омꙋ́дре, бг҃озна̑менїи свѧще́нными велича́емь.
Бг҃оро́диченъ:
Мꙋ́дрость бж҃їѧ ѵ҆поста́снаѧ и҆зъ тебє̀, чⷭ҇таѧ, роди́сѧ, и҆ ѕловѣ̑рныѧ мꙋдрецы̀ потребѝ, и҆ ᲂу҆мꙋдрѝ мно́жество мона́шествꙋющихъ и҆ преподо́бныхъ, воспѣва́ти благода́тїю, благослове́ннаѧ, ꙗ҆́же бг҃а пло́тїю ро́ждшаѧ.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Въ ѕла́цѣ вы́шнѧгѡ црⷭ҇тва ста́до, ѻ҆́ч҃е, воспита́лъ є҆сѝ, и҆ жезло́мъ ᲂу҆че́нїй ѕвѣ́ри ѿгна́въ є҆реті́чєскїѧ, пѣ́лъ є҆сѝ: ѻ҆тє́цъ на́шихъ бж҃е, благослове́нъ є҆сѝ.
Чꙋде́съ зарю̀ просте́ръ, разорѧ́еши недꙋ́гꙋющихъ мглꙋ̀, и҆ здра́вїѧ лꙋчѝ подае́ши дне́сь, и҆ цѣльбы̑ зовꙋ́щымъ: ѻ҆тє́цъ на́шихъ бж҃е, благослове́нъ є҆сѝ.
Въ вы́шнюю вше́лъ є҆сѝ бра́чнꙋю трапе́зꙋ цр҃ѧ̀ хрⷭ҇та̀, во ѻ҆де́ждꙋ ѡ҆дѣ́ѧнъ, досто́йнѡ зовꙋ́щемꙋ. тѣ́мъ и҆ возле́глъ є҆сѝ вопїѧ̀: ѻ҆тє́цъ на́шихъ бж҃е, благослове́нъ є҆сѝ.
Бг҃оро́диченъ:
Па́че є҆стества̀ и҆ сло́ва, влⷣкꙋ всѣ́хъ родила̀ є҆сѝ, и҆ пита́еши ѿ сосцꙋ̑ твоє́ю, всѣ̑мъ во бла́го вре́мѧ гото́вѧщаго трапе́зꙋ: є҆го́же прилѣ́жнѡ, пречⷭ҇таѧ, ѡ҆ на́съ молѝ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Свѣ́тъ тебѣ̀ возсїѧ̀ ꙗ҆́вѣ, ꙗ҆́коже пра́ведникꙋ, и҆ ра́дость, и҆ весе́лїе, ꙗ҆́кѡ пла́кавшꙋ, ѻ҆́ч҃е, на землѝ прилѣ́жнѡ, и҆ стра́ннꙋ сеѧ̀ бы́вшꙋ нестѧжа́нїемъ, и҆ всѧ́цѣмъ ѕлострада́нїемъ.
Ве́сь ѿню́дъ сраствори́всѧ коне́чными жела̑нїи, преподо́бне ѻ҆́ч҃е: гра́ды же и҆ пꙋсты̑ни во ᲂу҆миле́нїи мно́зѣ прохожда́лъ є҆сѝ, до́ндеже митропо́лїю дости́глъ є҆сѝ вы́шнюю, свѣ́тлѡ ᲂу҆краша́емь.
Оу҆́тро возсїѧ́лъ є҆сѝ на́мъ, свѣ́тлыми добродѣ́тели просвѣщє́нїи, на́шѧ мы̑сли просвѣща́ѧ при́снѡ. тѣ́мже твою̀ свѣтоно́снꙋю дне́сь, ѻ҆́ч҃е виссарїѡ́не, соверша́емъ па́мѧть.
Бг҃оро́диченъ:
Но́ва родила̀ є҆сѝ сн҃а, собезнача́льна, чⷭ҇таѧ, ѻ҆ц҃ꙋ̀ безнача́льномꙋ, и҆ ѡ҆бнови́ла є҆сѝ є҆ди́на ѡ҆бветша́вшее на́ше є҆стество̀ лю́тыми престꙋплє́нїи: тѣ́мже тѧ̀ согла́снѡ пое́мъ, бцⷣе.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Сле́зными стрꙋѧ́ми страсте́й взыгра̑нїѧ, и҆ неꙋста̑вныѧ по́мыслы потопи́лъ є҆сѝ, и҆ пꙋчи́на бы́лъ є҆сѝ долготерпѣ́нїѧ, преподо́бне, къ тишинѣ̀ веды́й ти́хостнѣй вопїю́щыѧ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ꙗ҆́коже терпѣли́ва а҆дама́нта, воздержа́нїю и҆мꙋ́ще твоѧ̑ наказа̑нїѧ, і҆ларїѡ́не преподо́бне, сердца̀ ᲂу҆твержда́емъ, и҆ страсте́й полкѝ побѣжда́емъ, ѧ҆зы́комъ вѣ́рнѡ вопїю́ще: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Воздержа́нїемъ, преподо́бне, пло́ти благостра́стїе ᲂу҆держа́нїемъ и҆знꙋри́въ, премꙋ́дре, и҆спо́лнилъ є҆сѝ дх҃а дꙋше́вное дѣ́йство, и҆ къ безстра́стїѧ стезѧ́мъ дости́глъ є҆сѝ, зовы́й: ѻ҆́троцы, благослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Подъ кро́въ, влⷣчце, ст҃ы́хъ кри́лъ твои́хъ ѡ҆ѕло́бленнїи всѝ прибѣга́емъ, лю́тыми согрѣшє́нїи, и҆ напа́стьми и҆ скорбьмѝ. тѧ́ бо предста́тельницꙋ и҆мꙋ́ще вопїе́мъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшагѡ ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Крѣ́пѡсти низложи́лъ є҆сѝ льсти́вагѡ, крѣ́постїю препоѧ́санъ дꙋхо́вною, и҆ ꙗ҆ви́лсѧ є҆сѝ си́ленъ на стра̑сти, преблаже́нне: сегѡ̀ ра́ди чꙋде́съ благода́ти прїе́мъ ѿ бг҃а, вѣ̑рнымъ и҆сцѣлѣва́еши неисцѣ̑льныѧ недꙋ́ги.
Ꙗ҆ви́сѧ твоѧ̀ ве́лїѧ сла́ва ꙗ҆́же по бз҃ѣ все́й тва́ри, просвѣща́ѧ вѣ̑рныѧ свѧще́нными ᲂу҆подоблє́нїи непоро́чнагѡ твоегѡ̀ житїѧ̀, бг҃омꙋ́дре виссарїѡ́не, вои́стиннꙋ мона́хѡвъ ᲂу҆краше́нїе, и҆ ѻ҆тцє́въ верхо́вниче.
Стенѧ̀, пла́чѧ и҆ сѣ́тꙋѧ, ᲂу҆миле́нїемъ сле́знымъ кропѧ̀ зе́млю при́снѡ, ѻ҆́ч҃е бг҃омꙋ́дре, соверша́лъ є҆сѝ, до́ндеже ѡ҆брѣ́лъ є҆сѝ бжⷭ҇твенное ᲂу҆тѣше́нїе, во гра́дѣ бж҃їи со всѣ́ми ст҃ы́ми, преподо́бне, всели́всѧ.
Процвѣ́лъ є҆сѝ, ѻ҆́ч҃е, ꙗ҆́кѡ крі́нъ добродѣ́тельными благовѡ́нїи, на́шѧ ѡ҆благово́нствꙋй дꙋ́шы. тѣ́мже сотворѧ́емъ па́мѧть твою̀, ѕлосмра́дїѧ согрѣше́нїй про́симъ и҆зба́витисѧ, тебє̀ ра́ди, виссарїѡ́не, и҆ всѧ́кагѡ де́мѡнскагѡ ѡ҆ѕлобле́нїѧ.
Бг҃оро́диченъ:
Оу҆мовре́днѡ согрѣша́ѧ, неиспра́вленъ пребыва́ю, мно́гимъ нечꙋ́вствомъ ѡ҆б̾юродѣ́въ. тѣ́мже зовꙋ́ ти, влⷣчце: въ таковѣ́й нꙋ́жди сꙋ́ща посѣти́ мѧ ны́нѣ, и҆ ᲂу҆врачꙋ́й стра̑сти смире́ннагѡ се́рдца моегѡ̀.
И҆́нъ. І҆рмо́съ:
Оу҆жасе́сѧ ѡ҆ се́мъ не́бо и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
И҆сто́чника тѧ̀ чꙋде́съ, ꙗ҆́кѡ вои́стиннꙋ хрⷭ҇то́съ показа̀, блаже́нне, болѣ́знєнныѧ сквє́рны ѡ҆чища́юща страсте́й, и҆ недꙋ́гѡвъ болѣ̑зни потоплѧ́юща ᲂу҆до́бь. тѣ́мже и҆ рѣкꙋ́ тѧ дꙋше́вныхъ ѡ҆чище́нїй нарица́емъ всѝ, преблаже́нне.
Процвѣ́тъ, ꙗ҆́кѡ фі́нїѯъ дꙋхо́внѡ, въ домꙋ̀ бж҃їи, пресла́вне, пло́дъ прине́слъ є҆сѝ воздержа́нїѧ ꙗ҆́коже сла́дость, и҆́мже сердца̀, премꙋ́дре, наслади́лъ є҆сѝ ста́да твоегѡ̀ слове́снагѡ. тѣ́мже и҆ вѣнцы̀ нбⷭ҇ныѧ сла́вы, ѻ҆́ч҃е воспрїѧ́лъ є҆сѝ, приснопа́мѧтне.
Воздержа́нїѧ показа́лсѧ є҆сѝ, ѻ҆́ч҃е, пра́вило, и҆ кро́тости ꙗ҆ви́лсѧ є҆сѝ ѻ҆́бразъ, и҆ ти́хъ всѣ̑мъ, і҆ларїѡ́не, наста́вникъ: и҆ мою̀ мольба́ми ко гдⷭ҇ꙋ ᲂу҆кротѝ бꙋ́рю страсте́й, и҆ пода́ждь просѧ́щемꙋ глꙋбо́кїй ми́ръ, ꙗ҆́кѡ да досто́йнѡ ᲂу҆блажа́ю тѧ̀.
Бг҃оро́диченъ:
Тѧ̀ ѻ҆рꙋ́жїе въ бѣда́хъ и҆ напа́стехъ, приста́нище и҆ стѣ́нꙋ въ ско́рбехъ, и҆ щи́тъ во бранѣ́хъ и҆́мамы разꙋ́мный, и҆ вели́ко ѡ҆чисти́лище въ лю́тыхъ согрѣше́нїихъ и҆ нахожде́нїихъ. тѣ́мъ тѧ̀ бцⷣꙋ по до́лгꙋ чти́мъ, и҆ велича́емъ ржⷭ҇тво̀ твоѐ.