Мѣ́сѧца тогѡ́же въ і҃-й де́нь. И҆́же во ст҃ы́хъ ѻ҆ц҃а̀ на́шегѡ григо́рїа, є҆пі́скопа нѷссі́йскагѡ:

И҆ прпⷣбнагѡ дометїа́на, є҆пі́скопа мелїті́нскагѡ:

И҆ прпⷣбнагѡ ѻ҆ц҃а̀ на́шегѡ маркїа́на пресвѵ́тера, и҆ і҆коно́ма вели́кїѧ це́ркве:

Въ то́йже де́нь прпⷣбнагѡ па́ѵла коме́льскагѡ, и҆́же на ѻ҆бно́рѣ рѣцѣ̀.

Слꙋ́жба є҆гѡ̀ пи́сана по се́й слꙋ́жбѣ.

И҆ и҆́же во ст҃ы́хъ ѻ҆ц҃а̀ на́шегѡ ѳеофа́на затво́рника вы́шенскагѡ.

Слꙋ́жба є҆гѡ̀ пи́сана въ приложе́нїи.

На Гдⷭ҇и, воззва́хъ, стїхи̑ры ст҃а́гѡ григо́рїа, гла́съ є҃.

Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е свѧще́ннѣйше григо́рїе, тро́сть и҆спо́лнена ᲂу҆тѣ́шителѧ дыха́нїѧ, и҆ ѧ҆зы́че ꙗ҆снѣ́йшїй благоче́стїѧ, свѣти́льниче многосвѣ́тлый бжⷭ҇твенныѧ зарѝ, проповѣ́дниче и҆́стины, ѡ҆снова́нїе бг҃осло́вїѧ, и҆сто́чниче догма́тѡвъ высо́кихъ, наказа́нїй пото́че медото́чныхъ, цѣвни́це бг҃овѣща́ннаѧ, пѣ́сньми бг҃опи́санными наслажда́ющаѧ вѣ́рныхъ мы̑сли. хрⷭ҇та̀ молѝ, хрⷭ҇тꙋ̀ помоли́сѧ, всемꙋ́дре, въ стрꙋѧ́хъ і҆ѻрда́нскихъ ѡ҆бно́вльшемꙋ мі́ръ, спастѝ ро́дъ на́шъ. (с. 269)

Прпⷣбне ѻ҆́ч҃е всече́стне григо́рїе, сѣки́ра, сѣкꙋ́щаѧ є҆ретїкѡ́въ стремлє́нїѧ, ѻ҆боюдꙋѻ́стрый мечꙋ̀ ᲂу҆тѣ́шителѧ: ѻ҆рꙋ́жїе, посѣка́ющее прелюбодѣ̑йнаѧ сѣ́мена: ѻ҆́гнь, хвра̑стныѧ є҆́рєси попалѧ́ющїй: и҆ лопа́та, вои́стиннꙋ земледѣ́лательнаѧ, є҆́юже тѧ́жкое и҆ ле́гкое ᲂу҆че́нїй благоразсꙋжда́етсѧ: и҆ мѣ́рило, и҆звѣ̑ства всѧ̑ пра́вѧщее ко стезѝ спасе́нїѧ, хрⷭ҇та̀ молѝ, хрⷭ҇тꙋ̀ моли́сѧ всегда̀, во стрꙋѧ́хъ і҆ѻрда́нскихъ назда́вшемꙋ мі́ръ, спастѝ ро́дъ на́шъ.

Прпⷣбне ѻ҆́ч҃е всебл҃же́нне григо́рїе, ᲂу҆ста̀, и҆сточа̑ющаѧ бл҃жє́нныѧ гла́сы, ѿ неѡскꙋ́дныхъ спасе́нїѧ чє́рплющаѧ и҆ бж҃е́ственныхъ и҆сто́чникѡвъ, словеса́ же моли́твы всѣ̑мъ сказꙋ́ѧ, пра́вило, пра́вѧщее къ добродѣ́тели: и҆́же видѣ́ньми бж҃е́ственными просвѣще́нъ, заре́ю ѡ҆сїѧ́емь трⷪ҇цы несозда́нныѧ, є҆ѧ́же и҆ побо́рникъ непобѣди́мь бы́лъ є҆сѝ. хрⷭ҇тꙋ̀ моли́сѧ, хрⷭ҇та̀ молѝ, всемꙋ́дре, въ стрꙋѧ́хъ і҆ѻрда́нскихъ назда́вшаго мі́ръ, спастѝ ро́дъ на́шъ.

И҆́ны стїхи̑ры дометїа́на, гла́съ а҃. Подо́бенъ: Всехва́льнїи мч҃ницы:

И҆́же зе́млю и҆стреби́ти ꙳ пе́рвѣе запрети́въ всю̀, ꙳ и҆ и҆зсꙋши́ти мо́ре хвалѧ́йсѧ, ꙳ нарꙋга́емь вѣ́рными показа́сѧ, ꙳ ꙗ҆́кѡ пти́ца дне́сь, ꙳ и҆ посмѣѧ́тельнѣйшъ кома́ръ: ꙳ є҆мꙋ́же сꙋди́сѧ ви́дъ, ꙳ ꙗ҆́коже нѣ́кое страши́лище, ꙳ и҆ попра́всѧ хрⷭ҇то́вымъ ᲂу҆го́дникомъ.

Дометїа́нъ на́съ, вѣ́рнїи, ꙳ созыва́етъ дне́сь ꙳ къ трапе́зѣ бг҃оꙋго́днѣй, ꙳ къ семꙋ̀ сни́демсѧ ꙳ благодꙋ́шїѧ нра́вомъ, ꙳ и҆ спра́зднꙋимъ є҆мꙋ̀, ꙳ тогѡ̀ и҆справлє́нїѧ, ꙳ молѧ́ще сп҃са дꙋ́шъ на́шихъ, ꙳ ми́ръ мі́рови дарова́ти.

Возрасти́лъ є҆сѝ тала́нтъ хрⷭ҇то́въ, ꙳ да́нный тебѣ̀, всече́стне, ꙳ сꙋгꙋ́бою благода́тїю, ꙳ ꙗ҆́кѡ ра́бъ и҆́скреннїй. ꙳ Тѣ́мже слы́шиши: ꙳ благі́й ра́бе, бꙋ́ди тебѣ̀, ꙳ ꙗ҆́кѡ и҆́стиннꙋ бл҃го́мꙋ ᲂу҆го́дникꙋ, ꙳ и҆ ны́нѣ вни́ди въ ра́дость гдⷭ҇а твоегѡ̀, ꙳ трꙋдѡ́въ прїе́мъ возда̑нїѧ.

Сла́ва, гла́съ д҃:

Премꙋ́дрости сло́во твоѐ ᲂу҆краси́въ добродѣ́телїю непоро́чною, преꙋдо́бренъ во ѻ҆бои́хъ бы́лъ є҆сѝ, нѷссі́йскїй григо́рїе, бг҃овѣща́ннымъ твои́мъ гла́сомъ ᲂу҆краша́ѧ и҆ веселѧ̀ лю́ди, разꙋ́мнѡ трⷪ҇цы є҆динобо́жное, премꙋ́дре, и҆злага́ѧ. Тѣ́мже и҆ правосла́вными и҆ноплемє́нныѧ є҆́рєси побѣди́въ, держа́вꙋ вѣ́ры въ концѣ́хъ воздви́глъ є҆сѝ, хрⷭ҇тꙋ̀ предстоѧ̀ съ невеще́ственными слꙋжи́тели, и҆ дꙋша́мъ на́шымъ и҆спросѝ ми́ръ и҆ ве́лїю ми́лость.

И҆ ны́нѣ, гла́съ то́йже:

Трепета́ше рꙋка̀ крⷭ҇ти́телева, є҆гда̀ пречи́стомꙋ твоемꙋ̀ верхꙋ̀ коснꙋ́сѧ: возврати́сѧ і҆ѻрда́нъ рѣка̀ вспѧ́ть, не дерза́ющи слꙋжи́ти тебѣ̀: ꙗ҆́же бо ᲂу҆стыдѣ́сѧ і҆исꙋ́са наѵи́на, ка́кѡ творца̀ своегѡ̀ ᲂу҆страши́тисѧ не и҆мѧ́ше; Но всѐ и҆спо́лнилъ є҆сѝ смотре́нїе, сп҃се на́шъ, да спасе́ши мі́ръ ꙗ҆вле́нїемъ твои́мъ, є҆ди́не чл҃вѣколю́бче.

На стїхо́внѣ, стїхи̑ры, гла́съ в҃. Подо́бенъ: До́ме є҆ѵфра́ѳовъ:

Пѣ́нїе новолѣ́пное ꙳ да пое́тъ всѧ̀ тва́рь ꙳ ѿ дв҃ы ро́ждшемꙋсѧ хрⷭ҇тꙋ̀, ꙳ и҆ кре́щшемꙋсѧ во і҆ѻрда́нѣ дне́сь.

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Трꙋба̀ прⷪ҇ро́ческаѧ, ꙳ прⷣте́ча да вопїе́тъ: ꙳ сотвори́те гдⷭ҇ꙋ, ꙳ кре́щшемꙋсѧ въ стрꙋѧ́хъ, ꙳ плоды̀ и҆зрѧ́днѣйшихъ дѣѧ́нїй.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

Возсїѧ̀ сро́дный съ высоты̀ ꙳ бжⷭ҇твенный дх҃ъ, ꙳ въ ви́дѣ голꙋби́нѣ, ꙳ зри́мь несказа́ннѡ, ꙳ ны́нѣ хрⷭ҇тꙋ̀ притечѐ.

Сла́ва, гла́съ д҃:

Житїѐ бжⷭ҇твенно и҆спра́вивъ, видѣ́нїемъ дѣѧ́нїе ᲂу҆ѧсни́лъ є҆сѝ, бг҃оѧвле́нне григо́рїе, мꙋ́дрость бо возлюби́въ жела́нїемъ бжⷭ҇твеннымъ, и҆з̾ ᲂу҆́стъ дх҃а благода́тїю ѡ҆богати́лсѧ є҆сѝ: и҆ ꙗ҆́кѡ со́тъ ме́да сла́дость твои́хъ слове́съ и҆ска́паѧ, при́снѡ весели́ши ра́зꙋмы бжⷭ҇твенными цр҃ковь бж҃їю. Тѣ́мже на нб҃сѣ́хъ свѧти́тельски водворѧ́ѧсѧ, ѡ҆ на́съ непреста́ннѡ моли́сѧ, соверша́ющихъ па́мѧть твою̀.

И҆ ны́нѣ, гла́съ то́йже:

Тебѐ въ дс҃ѣ и҆ ѻ҆гнѝ ѡ҆чища́юща грѣ́хъ мі́ра, зрѧ̀ крⷭ҇ти́тель грѧдꙋ́ща къ себѣ̀, ᲂу҆жаса́ѧсѧ и҆ трепе́ща вопїѧ́ше, глаго́лѧ: не смѣ́ю держа́ти ве́рхъ тво́й пречи́стый, ты́ мѧ ѡ҆свѧтѝ, влⷣко, бжⷭ҇твеннымъ ꙗ҆вле́нїемъ твои́мъ, є҆ди́не чл҃вѣколю́бче.

Тропа́рь, гла́съ д҃:

Бж҃е ѻ҆ц҃ъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: по моли́твами и҆́хъ въ ми́рѣ ᲂу҆пра́ви живо́тъ на́шъ.

Сла́ва, и҆ ны́нѣ, пра́здника, гла́съ а҃:

Во і҆ѻрда́нѣ креща́ющꙋсѧ тебѣ̀, гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ, и҆ дх҃ъ въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. Ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.

Возслѣ́дованїе прпⷣбнагѡ маркїа́на пое́тсѧ на повече́рїи.

Канѡ́нъ.

Гла́съ а҃. Пѣ́снь а҃. І҆рмо́съ:

Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Стрꙋѧ́ми погре́бшемꙋ грѣ́хъ, хрⷭ҇тꙋ̀ прилѣплѧ́ѧсѧ, неѡсла́бными мановє́нїи, и҆зсꙋши́лъ є҆сѝ пото́ки страсте́й, бг҃омꙋ́дре маркїа́не.

Хрⷭ҇то́съ креща́ѧсѧ, ѡ҆чища́етъ и҆стлѣ́вшее страстьмѝ на́ше неможе́нїе: є҆мꙋ́же ᲂу҆годи́лъ є҆сѝ, маркїа́не, прилѣ́жнымъ, ѻ҆́ч҃е, воздержа́нїемъ.

Бг҃оро́диченъ:

Дв҃а пребыла̀ є҆сѝ по ржⷭ҇твѣ̀, бг҃а бо родила̀ є҆сѝ, є҆го́же вели́кїй прⷣте́ча во і҆ѻрда́нскихъ стрꙋѧ́хъ крестѝ съ тре́петомъ мно́гимъ, пречⷭ҇таѧ влⷣчце.

Пѣ́снь г҃. І҆рмо́съ:

Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же над̾ вода́ми не́бо ᲂу҆тверже́й второ́е, и҆ ѡ҆снова́вый на вода́хъ зе́млю, всеси́льне.

І҆ѻрда́нскїѧ стрꙋи̑, гдⷭ҇и, низше́дъ ѡ҆свѧти́лъ є҆сѝ дне́сь: и҆ ꙗ҆́коже да́ръ и҆ честно́е и҆ кра́сное приноше́нїе прїѧ́лъ є҆сѝ сла́внаго маркїа́на, сла́вити тѧ̀.

Ѡ҆блага́ѧй не́бо ѻ҆́блаки гдⷭ҇ь, ѻ҆де́ждою ѡ҆блече́ тѧ сщ҃е́нною свѧщеннодѣ́йствꙋюща, и҆ а҆́гг҃лѡмъ говѣ́йною, ꙗ҆́кѡ а҆́гг҃ла на землѝ съ пло́тїю пожи́вшаго.

А҆настасі́и бг҃омꙋ́дрыѧ свѧще́ненъ хра́мъ созда́лъ є҆сѝ, ᲂу҆краси́въ свѧще́нными и҆ честны́ми возложе́ньми: сегѡ̀ ра́ди съ не́ю, маркїа́не, всели́лсѧ є҆сѝ.

Бг҃оро́диченъ:

Грѣ́хъ пра́ѻц҃а, и҆́же и҆зъ тебє̀ рожде́йсѧ, прⷭ҇нодв҃о, во і҆ѻрда́нстѣй рѣцѣ̀ потоплѧ́етъ, ꙗ҆́кѡ благоꙋтро́бенъ. Є҆го́же прⷣте́ча крести́ти повелѣ́нъ бы́въ, спрѧ́ташесѧ.

Пѣ́снь д҃. І҆рмо́съ:

Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и.

И҆гра́йте, го́ры, ликꙋ́йте, хо́лми, і҆и҃съ креща́етсѧ є҆ди́нъ чи́стый, преподо́бнагѡ па́мѧть ᲂу҆ѧсни́вый: и҆́мже де́мѡнѡвъ всѧ̀ ле́сть ѡ҆мрачи́сѧ, и҆ вселе́ннаѧ просвѣти́сѧ.

Оу҆мертви́въ воздержа́нїемъ плотскі̑ѧ сла̑сти, бж҃е́ственнымъ твои́мъ проглаго́ланїемъ ѡ҆живи́лъ є҆сѝ мертвецы̀, въ погребе́нїе ѡ҆блобыза́ѧ, ѻ҆́ч҃е, и҆ а҆́бїе ᲂу҆мре́ти повелѣва́ѧ, до́ндеже прїи́детъ всѣ́хъ ѻ҆́бщее воскрⷭ҇нїе.

Житїѐ твоѐ добро́тою бж҃е́ственныхъ добродѣ́телей ᲂу҆кра́шено, ᲂу҆ѧснѧ́етъ вѣ̑рныѧ: моще́й же твои́хъ ра́ка ѡ҆блиста́етъ лꙋчѝ чꙋде́съ, вѣ́рою пристꙋпа́ющымъ, ѻ҆́ч҃е, и҆ вѣ́рою восхвалѧ́ющымъ тѧ̀.

Бг҃оро́диченъ:

И҆сто́чникъ ты̀ спасе́нїѧ родила̀ є҆сѝ хрⷭ҇та̀, ѡ҆свѧща́ющаго и҆сто́чники креще́нїемъ, є҆го́же і҆ѻрда́нъ ви́дѣвъ возврати́сѧ стра́хомъ, і҆ѡа́ннъ креща́ѧй ᲂу҆жасе́сѧ, чⷭ҇таѧ дв҃о всепѣ́таѧ.

Пѣ́снь є҃. І҆рмо́съ:

Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебє̀ бо́га не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Ѕмїє́въ ты̀ сокрꙋши́лъ є҆сѝ главы̑ кр҃ще́нїемъ, гдⷭ҇и бж҃е всеси́льне, вла́сть да́вый и҆ си́лꙋ маркїа́нꙋ бж҃е́ственномꙋ на де́мѡнскїѧ лє́сти.

Расточи́лъ є҆сѝ, разда́въ ни́щымъ, твоѐ и҆мѣ́нїе, бг҃омꙋ́дре всебл҃же́нне: тѣ́мже твоѧ̀ пребыва́етъ па́мѧть во вѣ́ки и҆ пра́вда.

Оу҆мири́лъ є҆сѝ смꙋще́нїѧ страсте́й по́мыслъ, прпⷣбне: хра́мъ же созда́лъ є҆сѝ бж҃е́ственнагѡ ми́ра и҆менꙋ́емый, въ хвалꙋ̀ гдⷭ҇ню, и҆́же всѣ́хъ ми́ра.

Бг҃оро́диченъ:

Дв҃а по ржⷭ҇твѣ̀ ꙗ҆ви́ласѧ є҆сѝ вои́стиннꙋ, чⷭ҇таѧ, бг҃а бо родила̀ є҆сѝ, є҆го́же і҆ѡа́ннъ въ вода́хъ і҆ѻрда́нскихъ ѡ҆мыва́етъ, на ѡ҆бновле́нїе мі́ра.

Пѣ́снь ѕ҃. І҆рмо́съ:

Проро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.

Пото́къ сла́дости подаѧ̀ на́мъ, і҆ѻрда́нскими стрꙋѧ́ми крⷭ҇ти́сѧ хрⷭ҇то́съ, и҆́же дне́сь прпⷣбнагѡ просвѣтѝ ᲂу҆спе́нїе.

Мѷрополо́жница мы́сленнаѧ моще́й ра́ка ꙗ҆ви́сѧ (с. 274) твои́хъ, сщ҃е́нне маркїа́не, и҆сточа́ющи чꙋде́съ мѵ́ро къ тебѣ̀ притека́ющымъ.

Мѷродохнове́нными мл҃твами ѿгна́лъ є҆сѝ ѻ҆гнѧ̀ клоко́чꙋщагѡ стремле́нїе, спа́слъ є҆сѝ хра́мъ невреди́мь, є҆го́же созда́лъ є҆сѝ, бг҃облаже́нне.

Бг҃оро́диченъ:

Дв҃а дои́ши пита́телѧ всѣ́хъ, є҆го́же прⷣте́ча ви́дѣвъ, взыгра́сѧ вопїѧ̀: и҆збавле́нїе и҆ спасе́нїе всѣ́хъ ꙗ҆ви́сѧ.

Сѣда́ленъ, гла́съ и҃. Подо́бенъ: Премꙋ́дрости:

Писа̑нїѧ ѿ младе́нства свѧщє́ннаѧ и҆спытꙋ́ѧ, бг҃оно́се маркїа́не, бж҃е́ственнѣ просїѧ́лъ є҆сѝ бл҃гоче́стїѧ: сн҃а бо и҆ сло́ва ѻ҆ц҃ꙋ̀ є҆диносꙋ́щна, и҆ бж҃е́ственномꙋ дх҃ꙋ проповѣ́далъ є҆сѝ сопресто́льна. Тѣ́мже а҆́рїево и҆ македо́нїево нече́стїе ѡ҆бличи́лъ є҆сѝ, и҆ вѣ́рꙋ ᲂу҆ѧсни́лъ є҆сѝ, правосла́внѡ сла́витисѧ. Молѝ хрⷭ҇та̀ бг҃а грѣхѡ́въ ѡ҆ставле́нїе пода́ти чтꙋ́щымъ съ любо́вїю па́мѧть твою̀.

Пѣ́снь з҃. І҆рмо́съ:

Сꙋ́щымъ въ пещѝ ѻ҆трокѡ́мъ твои́мъ, сп҃се, не прикоснꙋ́сѧ нижѐ стꙋжѝ ѻ҆́гнь. Тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ.

Жи́зни наста̀ и҆сто́чникъ, вода́ми ѡ҆мыва́ющїй прегрѣшє́нїѧ на̑ша, бж҃їе є҆диноро́дное безнача́льное сло́во: є҆мꙋ́же бл҃гоꙋгодѝ маркїа́нъ сла́вный, прело́жсѧ къ немꙋ̀.

Бл҃гомо́щными бдѣ̑нїи вои́стиннꙋ ᲂу҆спи́лъ є҆сѝ стра̑сти неꙋдободє́ржныѧ дꙋшѝ, и҆ ᲂу҆снꙋ́въ во глꙋбоча́йшей ста́рости, бл҃же́нне, къ свѣ́тꙋ ѿше́лъ є҆сѝ, ꙗ҆́кѡ днѐ сы́нъ и҆ хрⷭ҇то́въ слꙋжи́тель.

Ѻ҆рꙋ́жїе, є҆́же дре́во жи́зни хранѧ́щее, плєщѝ тебѣ̀ да́рꙋетъ, мꙋ́дре. Тѣ́мже ра́дости ра́йскїѧ наслажда́ешисѧ, воспѣва́ѧ вино́внаго спасе́нїѧ на́шегѡ, маркїа́не свѧще́нне.

Бг҃оро́диченъ:

Не ѡ҆пали́въ твои́хъ ложе́снъ, хрⷭ҇то́съ ражда́етсѧ, чⷭ҇таѧ, и҆зъ тебє̀ бг҃олѣ́пнѡ, є҆го́же ви́дѣвъ і҆ѡа́ннъ вопїѧ́ше: і҆и҃съ креща́етсѧ, спасе́нїе вѣ́рныхъ и҆ и҆збавле́нїе.

Пѣ́снь и҃. І҆рмо́съ:

Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте, свѧще́нницы, просла́вите, ѻ҆́троцы, бл҃гослови́те, лю́дїе, и҆ превозноси́те во всѧ̑ вѣ́ки.

Человѣ́ки породи́лъ є҆сѝ креще́нїемъ твои́мъ, бж҃е многоми́лостиве, дне́сь ѿ землѝ къ неизрече́ннѣй сла́вѣ прїе́мый ᲂу҆го́дника твоего̀ маркїа́на бжⷭ҇твеннаго.

Црⷭ҇кою ви́дѧще тѧ̀ лю́дїе свѧще́ннїи ѻ҆де́ждею ѡ҆блече́на, внегда̀ свѧщеннодѣ́йствовати, ᲂу҆диви́шасѧ, ѻ҆́тче, и҆ согла́снѡ хрⷭ҇та̀ всѣ́хъ цр҃ѧ̀ воспѣ́ша, всебл҃же́нне.

Воздержа́нїе стѧжа́лъ є҆сѝ, и҆ непреста́ннꙋю моли́твꙋ, возносѧ́щее смире́нїе, и҆ любо́вь и҆́стиннꙋю и҆ безстра́стїе, ѻ҆́тче. сегѡ̀ ра́ди хрⷭ҇то́съ благода́ть тебѣ̀ подадѐ чꙋде́съ во вѣ́ки.

Бг҃оро́диченъ:

Вмѣща́еши невмѣсти́маго, дв҃о, па́че ᲂу҆ма̀, є҆го́же и҆мѣ́ѧ прⷣте́ча крⷭ҇ти́ти, ᲂу҆жаса́ѧсѧ и҆ трепе́ща вопїѧ́ше: ѻ҆́гнь сы́й, хрⷭ҇тѐ, не ѡ҆палѝ менє̀, любо́вїю пою́ща тѧ̀.

Пѣ́снь ѳ҃. І҆рмо́съ:

Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ благода́ти, хра́мъ ѡ҆дꙋшевле́нный, сѣ́нь пречи́стꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи, велича́емъ.

Торжествꙋ́йте дне́сь, человѣ́цы, рѣ́ки и҆ го́ры, и҆гра́йте: і҆и҃съ креща́етсѧ, сп҃съ ꙗ҆ви́сѧ, и҆ спрославлѧ́етъ свои́мъ ꙗ҆вле́нїемъ маркїа́на ст҃о́е преставле́нїе.

Жела́нїй кра́йнѣйшее дости́глъ є҆сѝ, ѿрѣши́всѧ ᲂу҆́зъ тѣле́сныхъ, бг҃оно́сне прпⷣбне, зрѧ̀ свѣ́тлѡсти ст҃и́телей, прⷪ҇ро́кѡвъ, и҆ а҆пⷭ҇лѡвъ: съ ни́миже на́съ чтꙋ́щихъ тѧ̀ помина́й.

Бг҃оро́диченъ:

Но́сиши бг҃а на рꙋкꙋ̀, пита́ющаго бг҃одѣ́льною си́лою всѧ́чєскаѧ, є҆го́же ви́дѣвъ прⷣте́ча креще́нїѧ просѧ́ща, недоꙋмѣва́етъ ᲂу҆́жасомъ, бг҃ороди́тельнице, и҆ и҆сполнѧ́етъ со стра́хомъ повелѣ́нное.

Стїхи̑ры, гла́съ а҃. Подо́бенъ: Всехва́льнїи:

Ѻ҆́тче свѧще́ннѣйше, твоегѡ̀ житїѧ̀ свѣтлостьмѝ вселе́ннаѧ просвѣти́сѧ, и҆ ѡ҆мрачи́сѧ де́мѡнскаѧ ле́сть, недꙋ́зи ѿгонѧ́ютсѧ то́чїю прикоснове́нїемъ ра́ки твоеѧ̀: бжⷭ҇твеннаѧ бо благода́ть твоѧ̑ мо́щи ѡ҆сїѧ́вши, страсте́й рѣши́тъ ѡ҆мраче́нїе.

Ѻ҆́тче досточꙋ́дне, хра́мъ себѐ сотвори́лъ є҆сѝ присносꙋ́щнагѡ бжⷭ҇тва̀: хра́мы же воздви́глъ є҆сѝ свѧщє́нныѧ бжⷭ҇твеннѣй трⷪ҇цѣ на похвале́нїе: мє́ртвыѧ же возста́вилъ є҆сѝ глаго́ломъ, и҆ ми́лостивенъ стѧжа́лъ є҆сѝ нра́въ, разда́лъ є҆сѝ бога́тство просѧ́щымъ со ᲂу҆се́рдїемъ.

Наготꙋ̀ проси́вшагѡ ꙗ҆́вѣ, ѻ҆́тче, покры́лъ є҆сѝ, на́гъ са́мъ входѧ̀ во хра́мъ ст҃ы́й, бжⷭ҇твенною же ѻ҆де́ждою тѧ̀ хрⷭ҇то́съ ѡ҆блечѐ, бжⷭ҇твєннаѧ соверша́юща та̑инства: є҆ѧ́же ᲂу҆диви́шасѧ добро́тѣ ви́дѣвшїи, и҆ бж҃їѧ тѧ̀ позна́вше ᲂу҆го́дника.

Сла́ва, и҆ ны́нѣ, гла́съ то́йже:

Бою́сѧ твоегѡ̀ прише́ствїѧ, хрⷭ҇тѐ, ѻ҆ба́че повелѣ́нїю твоемꙋ̀ не проти́влюсѧ ра́бъ тво́й, сѐ рꙋ́кꙋ мою̀ простира́ю со стра́хомъ: ви́ждꙋ бо ст҃а́го съ высоты̀ сходѧ́ща дх҃а, влⷣко, твоего̀ є҆диноче́стнаго, и҆ ѻ҆ц҃ꙋ̀ безнача́льномꙋ сопресто́льна, свидѣ́тельствꙋюща тѧ̀ пло́тїю кр҃ща́ема.

На ᲂу҆́трени, на Бг҃ъ гдⷭ҇ь: Тропа́рь пра́здника два́жды: Сла́ва: ст҃ы́хъ, И҆ ны́нѣ: пра́здника.

По а҃-й стїхоло́гїи сѣда́ленъ, гла́съ г҃. Подо́бенъ: Дв҃а дне́сь:

Влⷣка дне́сь на і҆ѻрда́нъ прїи́де, крести́всѧ въ вода́хъ ѿ бжⷭ҇твеннагѡ прⷣте́чи: свы́ше же ѻ҆ц҃ъ (с. 277) свидѣ́тельствоваше: се́й є҆́сть сн҃ъ мо́й, въ не́мже благоизво́лихъ: и҆ дх҃ъ ꙗ҆ви́сѧ стра́ннымъ ви́домъ голꙋби́нымъ надъ ни́мъ.

Сла́ва, и҆ ны́нѣ, то́йже.

По в҃-й стїхоло́гїи сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

Бг҃оѧвле́нїѧ вре́мѧ, хрⷭ҇то́съ ꙗ҆ви́сѧ на́мъ во і҆ѻрда́нѣ рѣцѣ̀, прїиди́те, почерпе́мъ, вѣ́рнїи, во́дꙋ ѡ҆ставле́нїѧ грѣхѡ́въ на́шихъ: хрⷭ҇то́съ бо пло́тїю прїи́де, ѻ҆вча́те и҆щѧ̀ ѕвѣрьмѝ похище́ннагѡ, и҆ ѡ҆брѣ́тъ, введѐ ꙗ҆́кѡ благоꙋтро́бенъ въ ра́й па́ки. Хрⷭ҇то́съ ꙗ҆ви́сѧ на і҆ѻрда́нѣ, и҆ мі́ръ просвѣтѝ.

Сла́ва, и҆ ны́нѣ, то́йже.

Канѡ́нъ пра́здника на ѕ҃, и҆ ст҃ы́хъ два̀. Канѡ́нъ пра́здника.

Гла́съ в҃. Пѣ́снь а҃. І҆рмо́съ:

Глꙋбины̀ ѿкры́лъ є҆́сть дно̀, и҆ сꙋ́шею своѧ̑ влече́тъ, въ не́й покры́въ проти̑вныѧ, крѣ́пкїй во бранѣ́хъ гдⷭ҇ь, ꙗ҆́кѡ просла́висѧ.

А҆да́ма и҆стлѣ́вшаго ѡ҆бновлѧ́етъ стрꙋѧ́ми і҆ѻрда́нскими, и҆ ѕмїє́въ главы̑ гнѣздѧ́щихсѧ сокрꙋша́етъ цр҃ь вѣкѡ́въ гдⷭ҇ь, ꙗ҆́кѡ просла́висѧ.

Ѻ҆гне́мъ бж҃ества̀ невеще́ственнымъ, въ пло́ть веще́ственнꙋ ѡ҆дѣ́ѧвсѧ, і҆ѻрда́нскою ѡ҆блага́етсѧ водо́ю, воплоще́йсѧ ѿ дв҃ы гдⷭ҇ь, ꙗ҆́кѡ просла́висѧ.

Скве́рнꙋ ѡ҆мыва́ѧй человѣ́кѡвъ, си́мъ ѡ҆чи́щсѧ во і҆ѻрда́нѣ, и҆̀мже восхотѣ́въ ᲂу҆подо́бисѧ, є҆́же бѣ̀ пребы́въ, сꙋ́щыѧ во тмѣ̀ просвѣща́ѧй гдⷭ҇ь, ꙗ҆́кѡ просла́висѧ.

И҆́нъ канѡ́нъ ст҃а́гѡ григо́рїа.

Гла́съ в҃. Пѣ́снь а҃. І҆рмо́съ:

Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Бе́здна сы́й премꙋ́дрости, и҆ ра́зꙋма сокро́вище, и҆ самобла́гости и҆сто́чникъ сы́й дае́ши мѝ, хрⷭ҇тѐ, сла́вныѧ твоеѧ̀ цр҃кве пѣ́сньми свѣти́льника пѣ́ти григо́рїа.

Прїимѝ, ᲂу҆чи́телей, григо́рїе, свѣ́тлое ᲂу҆добре́нїе, ѻ҆́тче, ᲂу҆бо́гое пѣ́нїе твое́й приноси́мое ѿ любвѐ па́мѧти, въ не́йже хрⷭ҇та̀ на́мъ ᲂу҆ми́лостиви.

Ѡ҆брѣ́те ѡ҆чище́нꙋ свѧще́ннꙋю твою̀ дꙋ́шꙋ ѿ страсте́й тимѣ́нїѧ, сїѧ́нїе непристꙋ́пное. Тѣ́мже ꙗ҆́кѡ всели́всѧ въ тѧ̀, ѻ҆́тче, свѣ́тъ тѧ̀ показа̀, наꙋча́юща земны̑ѧ концы̀.

Сло́вомъ, сщ҃еннотаи́нниче, бога́тымъ же и҆ мꙋ́дрымъ, чⷭ҇тнꙋ́ю цр҃ковь бг҃осло́вити наꙋчи́лъ є҆сѝ є҆ди́ницꙋ тричи́сленнꙋю, и҆ трⷪ҇цꙋ сопресто́льнꙋ и҆ є҆диноче́стнꙋ, ѽ григо́рїе.

Бг҃оро́диченъ:

Вѣ́ра да вмѣнѧ́етсѧ є҆ди́на, а҆ не показа́нїе сꙋ́щихъ па́че ᲂу҆ма̀ чꙋде́съ, бг҃ороди́тельнице дв҃о, твои́хъ: и҆́бо непостижи́маго бг҃а сло́ва родила̀ є҆сѝ, ѡ҆бле́кшасѧ въ человѣ́чество.

И҆́нъ канѡ́нъ дометїа́на.

Гла́съ а҃. Пѣ́снь а҃. І҆рмо́съ:

Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Воста̑нїѧ пло́ти, и҆ страсте́й нашє́ствїѧ, бг҃опрїѧ́тне, и҆ востаю́щꙋю въ дꙋшѝ мое́й ᲂу҆кротѝ бра́нь, въ ми́рнѣ, ѻ҆́тче, ᲂу҆строе́нїи соблюдѝ.

Жела́нїемъ и҆ любо́вїю неꙋкло́нною, вы́шнѣй премꙋ́дрости прикоснꙋ́всѧ, пло́ть покори́лъ є҆сѝ, и҆ сꙋ̑щаѧ земна̑ѧ ѿтрѧ́слъ є҆сѝ, прпⷣбне, и҆ бг҃ъ и҆́стиннѡ въ прича́стїи бы́лъ є҆сѝ.

Дометїа́нъ чꙋ́дный пома́лꙋ ѿ землѝ возвыша́емь, прїи́де ѿ си́лы хꙋды́ѧ къ соверше́ннѣй си́лѣ, и҆ восхождє́нїѧ въ се́рдцы положѝ.

Бг҃оро́диченъ:

Вода́ми ѡ҆мочи́въ пло́ти, є҆́же прїѧ́тъ гдⷭ҇ь смѣше́нїе, ѿ твои́хъ содѣ́ла дѣ́вственныхъ крове́й человѣ́чество, ко ѡ҆полче́нїємъ проти́вныхъ непобо́рно.

Пѣ́снь г҃. І҆рмо́съ:

Крѣ́пость даѧ́й лю́дємъ на́шымъ гдⷭ҇ь, и҆ ро́гъ пома́занныхъ свои́хъ возносѧ́й, ѿ дв҃ы ражда́етсѧ, грѧде́тъ же ко креще́нїю. томꙋ̀, вѣ́рнїи, возопїи́мъ: нѣ́сть ст҃ъ, ꙗ҆́кѡ бг҃ъ на́шъ.

Непло́днаѧ дре́вле и҆ безча́днаѧ лю́тѣ дне́сь весели́сѧ, хрⷭ҇то́ва цр҃ковь: водо́ю бо и҆ дх҃омъ сы́нове тебѣ̀ роди́шасѧ, вѣ́рою взыва́юще: нѣ́сть ст҃ъ, ꙗ҆́коже бг҃ъ на́шъ.

Ве́лїимъ гла́сомъ въ пꙋсты́ни вопїе́тъ прⷣте́ча: хрⷭ҇тѡ́вы ᲂу҆гото́вайте пꙋти̑, и҆ стези̑ бг҃ꙋ на́шемꙋ пра̑вы содѣ́лайте, вѣ́рою взыва́юще: нѣ́сть ст҃ъ, ꙗ҆́коже бг҃ъ на́шъ.

И҆́нъ. І҆рмо́съ:

Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.

Пло́ти ᲂу҆́бѡ влⷣцѣ ᲂу҆мꙋ̀ взыгра̑нїѧ, всецр҃ю́ же ᲂу҆́мъ покори́лъ є҆сѝ. Тѣ́мже, непреткнове́ннѡ пꙋ́ть за́повѣдей проше́дъ, ты̀ трⷪ҇цы ѡ҆би́телище бы́лъ є҆сѝ лѣ́потно, григо́рїе.

Подо́бнѡ ꙗ҆́ростное ᲂу҆́бѡ на ѕмі́ѧ дꙋшѝ воѡрꙋжи́лъ є҆сѝ, всебл҃же́нне, жела́нїе же бг҃ꙋ всѐ кꙋ́пнѡ просте́ръ, къ недомы́сленнѣй и҆ неизмѣ́ннѣй добро́тѣ впери́лъ є҆сѝ, прпⷣбне.

Дѣѧ́нїю видѣ́нїе, ѻ҆́тче, приложи́лъ є҆сѝ, тѣ́мже ѻ҆́бласть це́ркве тебѣ̀ приносѧ̀ врꙋча́етъ хрⷭ҇то́съ, ю҆́же ᲂу҆́бѡ непоро́чнѡ ꙗ҆́кѡ неботаи́нникъ ᲂу҆пра́вилъ є҆сѝ и҆зрѧ́днѣйшїй, всеблаже́нне григо́рїе.

Проходѧ̀ добродѣ́телей предѣ́лъ, григо́рїе, и҆ восхождє́нїѧ въ се́рдцы твое́мъ ты̀ полага́ѧ, ѿ землѝ взѧ́лсѧ є҆сѝ, непреста́ннымъ тече́нїемъ къ нбⷭ҇номꙋ жи́тельствꙋ, пре́жде ѿ пло́ти и҆зше́ствїѧ твоегѡ̀.

Бг҃оро́диченъ:

Ты̀, мт҃и бж҃їѧ, несочта́ннѡ родила̀ є҆сѝ и҆зъ нетлѣ́ннагѡ ѻ҆ц҃а̀ возсїѧ́вшаго, безъ болѣ́зней ма́тернихъ. Тѣ́мже тѧ̀ бцⷣꙋ, воплоще́ннаго ро́ждшꙋю сло́ва, правосла́внѡ проповѣ́дꙋемъ.

И҆́нъ. І҆рмо́съ:

Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.

Въ крѣ́пости свое́й вра́гъ преве́тхїй, твоеѧ̀ дꙋшѝ не могі́й крѣ́пости поколеба́ти, ᲂу҆хищрѧ́етъ во вре́мѧ твоегѡ̀ разрѣше́нїѧ, та́йнами пти́цъ хꙋды́хъ низложи́ти.

Велехвале́нїемъ свои́мъ, пра́веднѡ и҆зничто́жествꙋетсѧ приꙋѧзвле́нїемъ ѕмі́й ѻ҆каѧ́нный, и҆ въ ви́дъ пе́сїихъ мꙋ́хъ преврати́сѧ, не́мощїю множа́йшею, и҆ подъ нога́ми лежи́тъ првⷣныхъ кра́сными попира́емь.

Бг҃оро́диченъ:

И҆зъ тебє̀ рожде́йсѧ безъ сѣ́мене сн҃ъ превѣ́чный, дв҃о мт҃и, мі́ръ ѡ҆бновѝ, сокрове́ннаго ѕмі́ѧ вода́ми въ креще́нїи свое́мъ ᲂу҆мертви́въ гдⷭ҇ь, и҆ тлѣ́нїѧ человѣ́ки и҆зба́вивъ.

Конда́къ пра́здника, гла́съ д҃:

Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й, гдⷭ҇и, зна́менасѧ на на́съ, въ ра́зꙋмѣ пою́щихъ тѧ̀: прише́лъ є҆сѝ, и҆ ꙗ҆ви́лсѧ є҆сѝ, свѣ́тъ непристꙋ́пный.

І҆́косъ:

Галїле́и ꙗ҆зы́честѣй, завꙋлѡ́нстѣй странѣ̀ и҆ нефѳали́мстѣй землѝ, ꙗ҆́коже речѐ прⷪ҇ро́къ, свѣ́тъ вели́къ возсїѧ̀ хрⷭ҇то́съ: ѡ҆мрачє́ннымъ свѣтла̀ ꙗ҆ви́сѧ зарѧ̀, и҆зъ виѳлее́ма ѡ҆блиста́ющаѧ, па́че же и҆зъ мр҃і́и гдⷭ҇ь, все́й вселе́ннѣй возсїѧва́етъ лꙋчы̀ сл҃нце пра́вды. Тѣ́мже, и҆̀же ѿ а҆да́ма, назі́и, прїиди́те, всѝ, ѡ҆блече́мсѧ въ него̀, да согрѣ́емсѧ, покрыва́етъ бо нагі̑ѧ, и҆ просвѣща́етъ тє́мныѧ: прише́лъ є҆сѝ, и҆ ꙗ҆ви́лсѧ є҆сѝ, свѣ́тъ непристꙋ́пный.

Конда́къ григо́рїа, гла́съ в҃. Подо́бенъ: Въ моли́твахъ.

Цр҃кве бж҃е́ственный і҆ера́рхъ, и҆ премꙋ́дрости честны́й тайноглаго́льникъ, нѷссі́йскїй бо́дрый ᲂу҆́мъ григо́рїй, со а҆́гг҃лы ликовствꙋ́ѧ, и҆ наслажда́ѧсѧ бж҃е́ственнымъ свѣ́томъ, молѧ́сѧ непреста́ннѡ ѡ҆ всѣ́хъ на́съ.

И҆ сѣда́ленъ, гла́съ г҃. Подо́бенъ: Бж҃е́ственныѧ вѣ́ры:

Бжⷭ҇твенное ѡ҆сїѧ́нїе наслѣ́довалъ є҆сѝ, житїѐ невеще́ственно пожи́въ, тезоимени́тнымъ свѧще́нствомъ просїѧ́лъ є҆сѝ: преесте́ственнѡ бо ᲂу҆ѧсни́въ ᲂу҆че́ньми, правосла́вїемъ мі́ръ ᲂу҆тверди́лъ є҆сѝ, ѻ҆́тче прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость.

Сла́ва, и҆́нъ сѣда́ленъ дометїа́на, гла́съ а҃. Поⷣ: Ка́мени запеча́танꙋ:

Свѧще́нства ᲂу҆краша́емь, ѻ҆́тче, пома́занїемъ бг҃ода́ннымъ, ᲂу҆ѧсни́лъ є҆сѝ сїѐ бж҃е́ственными добро́тами добродѣ́телей, и҆ бж҃е́ственнымъ ко хрⷭ҇тꙋ̀ повинове́нїемъ, и҆ сконча́въ твоѐ тече́нїе, на нб҃сѣ́хъ вопїе́ши со а҆́гг҃лы: сла́ва благоꙋтро́бїю твоемꙋ̀, сп҃се, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.

И҆ ны́нѣ, пра́здника, гла́съ и҆ подо́бенъ то́йже:

І҆и҃сꙋ ро́ждшꙋсѧ ѿ дв҃ы мр҃і́и, и҆ во і҆ѻрда́нѣ кре́щшꙋсѧ ѿ і҆ѡа́нна, дх҃ъ сни́де на него̀ зри́мый въ ви́дѣ голꙋби́нѣ. Сегѡ̀ ра́ди прⷪ҇ро́къ со а҆́гг҃лы глаго́лаше, зовы́й: сла́ва прише́ствїю твоемꙋ̀, хрⷭ҇тѐ, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.

Пѣ́снь д҃. І҆рмо́съ:

Оу҆слы́шахъ, гдⷭ҇и, гла́съ тво́й, є҆го́же ре́клъ є҆сѝ, гла́съ вопїю́щагѡ въ пꙋсты́ни, ꙗ҆́кѡ возгремѣ́лъ є҆сѝ надъ вода́ми мно́гими, твоемꙋ̀ свидѣ́тельствꙋѧй сн҃ꙋ, ве́сь бы́въ соше́дшагѡ дх҃а, возопѝ: ты̀ є҆сѝ хрⷭ҇то́съ, бж҃їѧ мꙋ́дрость и҆ си́ла.

Ѡ҆чища́емо со́лнце кто̀ ви́дѣ, проповѣ́дникъ вопїе́тъ, пресвѣ́тлое є҆стество́мъ; да тебѐ вода́ми, сїѧ́нїе сла́вы, ѻ҆ц҃а̀ ѻ҆́бразъ присносꙋ́щнагѡ, ѡ҆мы́ю, и҆ сѣ́но сы́й ѻ҆гню̀ прикоснꙋ́сѧ твоегѡ̀ бж҃ества̀: ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла.

Ꙗ҆ви́въ бжⷭ҇твенное, є҆́же и҆мѣ̀, бл҃гоговѣ́нїе мѡѷсе́й прилꙋчи́всѧ тебѣ̀: ꙗ҆́кѡ бо и҆з̾ кꙋпины́ тѧ возгласи́вша разꙋмѣ̀, а҆́бїе ѿвратѝ лицѐ. А҆́зъ же ка́кѡ тѧ̀ ᲂу҆ви́жꙋ ꙗ҆́снѡ; и҆лѝ ка́кѡ рꙋ́кꙋ положꙋ̀ на тѧ̀; ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла.

Дꙋше́вное соверша́ѧ мꙋ́дрѣ, и҆ сло́вомъ почте́ный, бездꙋ́шныхъ стыждꙋ́сѧ. А҆́ще бо крещꙋ́ тѧ, клеве́тна мѝ є҆́сть ѻ҆гне́мъ дымѧ́щаѧсѧ гора̀, побѣ́гшее же мо́ре на дво́е, и҆ і҆ѻрда́нъ се́й возврати́выйсѧ: ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла.

И҆́нъ. І҆рмо́съ:

Бжⷭ҇твенное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.

Ꙗ҆́кѡ сто́лпъ ви́дѣнъ бы́лъ є҆сѝ всесвѣ́телъ, житїе́мъ же и҆ сло́вомъ, те́плою правосла́вїѧ, григо́рїе, разжже́нъ ре́вностїю, но́ваго і҆и҃лѧ предводѧ̀.

Бл҃года́ть прїи́мъ дх҃о́внꙋю, ве́тхагѡ зако́на раздра́лъ є҆сѝ ѻ҆де́ждꙋ писа́нїѧ, и҆ сокрове́ннꙋю добро́тꙋ на́мъ ра́зꙋма ѿкры́лъ є҆сѝ.

Всѣ́хъ добродѣ́телей ви́ды хрⷭ҇то́съ показꙋ́ѧ блаже́нствы, григо́рїе, тебѣ̀ ввѣ́ри, ꙗ҆́кѡ слꙋжи́телю сло́ва, простра́ннѡ сказа́ти концє́мъ.

Бг҃оро́диченъ:

Безъ смѣше́нїѧ ᲂу҆́бѡ зачала̀ є҆сѝ нерастлѣ́ннѡ во ᲂу҆тро́бѣ и҆ пре́жде болѣ́зни родила̀ є҆сѝ, и҆ по ржⷭ҇твѣ̀ дв҃а, бг҃а пло́тїю ро́ждши, сохрани́ласѧ є҆сѝ.

И҆́нъ. І҆рмо́съ:

Го́рꙋ тѧ̀, благода́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.

Зако́нъ благода́ти показа́лъ є҆сѝ бы́ти сѣ́нь, сꙋ́щымъ въ зако́нѣ бж҃їи є҆вре́ємъ чтꙋ́щымъ, мꙋ́дре, и҆ є҆ѵⷢ҇лїе и҆́стиннагѡ бг҃оѧвле́нїѧ та́инство, хрⷭ҇тꙋ̀ взыва́ѧ: сла́ва си́лѣ твое́й, гдⷭ҇и.

Ѡ҆блиста́въ ꙗ҆́кѡ ѕвѣзда̀ ѿ восто́ка многосвѣ́тлаѧ, цр҃ковь просвѣща́еши, проповѣ́даѧ хрⷭ҇та̀, мꙋ́дрыми показа́ньми всеблагоче́стнѡ пра́вды сл҃нца, томꙋ̀ взыва́ѧ: сла́ва си́лѣ твое́й, гдⷭ҇и.

Ѕло́бы всѧ́кїѧ ѿто́ргнꙋвсѧ, и҆ любвѐ вре́менныѧ, ѻ҆́тче, со тща́нїемъ, и҆ просвѣти́лъ є҆сѝ свѣ́томъ ѻ҆те́чества твоегѡ̀ концы̀, мꙋ́дре, и҆ си̑мъ бога́тство ѡ҆дожди́лъ є҆сѝ, ѻ҆би́льнѣйшимъ бога́тства коли́чествомъ.

Бг҃оро́диченъ:

Сло́во, ꙗ҆́кѡ бг҃ъ сы́й неви́димый, прїи́мъ ѿ жены̀ человѣ́чо є҆стество̀ ви́димо, соверша́етъ и҆ ѡ҆чища́етъ въ рѣцѣ̀, и҆́же грѣха̀ чꙋ́ждїй, па́дшагѡ ѡ҆чища́ѧ прегрѣшє́нїѧ.

Пѣ́снь є҃. І҆рмо́съ:

І҆и҃съ, живота̀ нача́льникъ, разрѣши́ти ѡ҆сꙋжде́нїе грѧде́тъ а҆да́ма первозда́ннагѡ. Ѡ҆чище́нїй же, ꙗ҆́кѡ бг҃ъ, не тре́бꙋѧ, па́дшаго ѡ҆чища́етъ во і҆ѻрда́нѣ: въ не́мже враждꙋ̀ ᲂу҆би́въ, преимꙋ́щь всѧ́къ ᲂу҆́мъ ми́ръ да́рꙋетъ.

Сше́дшымсѧ без̾ числа̀ лю́демъ ѿ і҆ѡа́нна крести́тисѧ, са́мъ посредѣ̀ и҆́хъ ста̀, провозгласи́ же предстоѧ́щымъ: кто̀ показа̀, непокори́вїи, гнѣ́ва ва́мъ ᲂу҆клони́тисѧ хотѧ́щагѡ бы́ти; плоды̀ достѡ́йны хрⷭ҇тꙋ̀ сотвори́те: предстоѧ́й бо ны́нѣ ми́ръ да́рꙋетъ.

Дѣ́латель и҆ зижди́тель посредѣ̀ стоѧ́й, ꙗ҆́кѡ є҆ди́нъ всѣ́хъ сердца̀ и҆спытꙋ́етъ: чисти́тельнꙋю же лопа́тꙋ рꙋко́ю прїе́мъ, всемі́рное гꙋмно̀ всемꙋ́дрѣ разлꙋча́етъ, непло́дїе палѧ̀, бл҃гоплѡ́днымъ вѣ́чный живо́тъ да́рꙋетъ.

И҆́нъ. І҆рмо́съ:

Ѡ҆дѣѧ́йсѧ свѣ́томъ, ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ. (с. 284)

Ты̀, ꙗ҆́кѡ ѻ҆́гнь, попали́лъ є҆сѝ є҆ресе́й тернонѡ́снаѧ плетє́нїѧ слове́съ, вѣ́рныхъ же ᲂу҆мы̀ просвѣти́лъ є҆сѝ, блаже́нне тайново́дче григо́рїе.

Є҆ѵно́мїево ты̀ и҆з̾ѡбличи́лъ є҆сѝ беззако́нїе, и҆ сегѡ̀ словеса̀ неꙋдобоизбѣ̑жнаѧ: сѣте́й же прꙋ̑гла ѕѣ̑льнаѧ, ꙗ҆́кѡ паꙋчи̑ннаѧ тка̑нїѧ, разори́лъ є҆сѝ.

Ѡ҆бличи́лъ є҆сѝ, всеизрѧ́днѣйше, безбо́жнѣйшаго македо́нїа, бжⷭ҇твенный дх҃ъ безстꙋ́днѡ ᲂу҆кори́вшаго, ꙗ҆́кѡ неприча́стна семꙋ̀ сꙋ́ща, григо́рїе.

Бг҃оро́диченъ:

Ты̀ пра́вдꙋ же и҆ и҆збавле́нїе на́мъ ро́ждши хрⷭ҇та̀ безсѣ́меннѡ, свобо́дно содѣ́ѧла є҆сѝ ѿ клѧ́твы, бцⷣе, є҆стество̀ пра́ѻтца.

И҆́нъ. І҆рмо́съ:

Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.

Призрѣ̀ на зе́млю влⷣка тва́ри, и҆ сеѧ̀ поколеба́шасѧ, бг҃омꙋ́дре, ѡ҆снова̑нїѧ, и҆ лю́тѣ сотрѧсо́шасѧ: тебѣ́ же дꙋше́внагѡ мꙋ́жества, ѻ҆́тче, ѿ моли́твы не ᲂу҆клонѝ.

Не терпѣ́лъ є҆сѝ хꙋ́лѧщихъ слы́шати, сла́вне, на высотꙋ̀, и҆ глаго́лати непра́вдꙋ безꙋ̑мныѧ, но тѣ́хъ ѡ҆брати́лъ є҆сѝ па́стырскимъ твои́мъ жезло́мъ, и҆ недꙋ́жное и҆сцѣли́лъ є҆сѝ.

Є҆ди́но є҆стество̀ во хрⷭ҇тѣ̀, и҆мꙋ́щымъ проповѣ́дати, бг҃оглаго́ливе, ника́коже попꙋсти́лъ є҆сѝ сло́жное: по тѣ́хъ ᲂу҆лови́лъ є҆сѝ ᲂу҆че́нїй твои́хъ мре́жею, и҆ къ свѣ́тꙋ возве́лъ є҆сѝ.

Бг҃оро́диченъ:

Оу҆сладѝ во́дъ го́ресть со́лїю є҆лїссе́й: тво́й же, бг҃ома́ти, сн҃ъ и҆ бг҃ъ кре́щсѧ въ водѣ̀, грѣха̀ го́ресть и҆ болѣ́знь ѿѧ́тъ.

Пѣ́снь ѕ҃. І҆рмо́съ:

Гла́съ словесѐ, свѣти́льникъ свѣ́та, денни́ца сл҃нца, прⷣте́ча въ пꙋсты́ни, пока́йтесѧ, всѣ̑мъ вопїе́тъ лю́демъ, и҆ пред̾ѡчи́ститесѧ: се́ бо предстои́тъ хрⷭ҇то́съ, ѿ тлѝ мі́ръ и҆збавлѧ́ѧй.

Ро́ждсѧ нетлѣ́ннѡ ѿ бг҃а и҆ ѻ҆ц҃а̀, ѿ дв҃ы кромѣ̀ скве́рны воплоща́етсѧ хрⷭ҇то́съ: є҆мꙋ́же реме́нь, ꙗ҆́же ѿ на́съ сло́ва сочта́нїѧ, разрѣши́ти неꙋдо́бь ᲂу҆чи́тъ прⷣте́ча, земнорѡ́дныѧ ѿ ле́сти и҆збавлѧ́ѧ.

Ѻ҆гне́мъ крⷭ҇ти́тъ коне́чнымъ хрⷭ҇то́съ проти̑вныѧ, а҆ не бг҃а мꙋ́дрствꙋющихъ є҆го̀, дх҃омъ же ѡ҆бновлѧ́етъ водо́ю бл҃года́ти разꙋмли̑выѧ бжⷭ҇тва̀ є҆гѡ̀, ѿ прегрѣше́нїй и҆збавлѧ́ѧ.

И҆́нъ. І҆рмо́съ:

Неистовствꙋ́ющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.

Смире́нное мꙋдрова́нїе стѧжа́въ, всѣ̑мъ же кро́токъ боре́цъ показа́лсѧ є҆сѝ, григо́рїе, проти́вꙋ тща́щымсѧ ᲂу҆ма́лити сла́вꙋ хрⷭ҇то́вꙋ.

А҆́рїево ѿчꙋжде́нїе трⷪ҇цы, сло́вомъ бога́тнымъ де́рзостное раздѣле́нїе, григо́рїе, и҆ всеконе́чнѡ низложи́лъ є҆сѝ мꙋдрова̑нїѧ.

Неꙋче́ннѡ соедине́нїе трⷪ҇ческое, смѣше́нїе мꙋ́дрствꙋѧ, тобо́ю саве́ллїй ѡ҆бличи́сѧ бг҃обо́рецъ, григо́рїе всебл҃же́нне.

Бг҃оро́диченъ:

Дв҃а родѝ, и҆ ро́ждши пребы́сть чиста̀, на рꙋка́хъ носѧ́щаго всѧ́чєскаѧ, ꙗ҆́кѡ вои́стиннꙋ, дв҃о мт҃и, носи́вши.

И҆́нъ. І҆рмо́съ:

Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

И҆зба́вишасѧ ꙗ҆́кѡ ѿ сѣ́ти, прпⷣбне, сме́ртныѧ бѣ́дствꙋющїи лю́дїе, и҆ страсте́й мно́жество дале́че моли́твами твои́ми ѿгна́сѧ: и҆́бо са́ми пе́рвїи тѧ̀ и҆мѣ́ша застꙋ́пника.

Потреби́лъ є҆сѝ моли́твою, всемꙋ́дре, стремле́нїе недꙋ́га, къ дв҃ѣ и҆ мт҃ри и҆зба́вителѧ ско́рѡ прите́къ: не бо̀ стерпѣ́лъ є҆сѝ ꙗ҆́кѡ па́стырь сы́й, бѣ́дствꙋющей па́ствѣ пренебрега́тисѧ.

Бг҃оро́диченъ:

Оу҆жасо́шасѧ а҆́гг҃льстїи чи́ни, зрѧ́ще неви́димаго и҆зъ дв҃ы ро́ждшасѧ пло́тїю, и҆ невеще́ственнѡ сла́вимаго въ рѣцѣ̀ крести́тисѧ приходѧ́ща.

Конда́къ, гла́съ а҃. Подо́бенъ: Ли́къ а҆́гг҃льскїй:

Ѻ҆́комъ дꙋше́внымъ бо́дрствꙋѧ, ст҃и́телю, бо́дръ па́стырь ꙗ҆ви́лсѧ є҆сѝ мі́рꙋ: и҆ жезло́мъ мꙋ́дрости твоеѧ̀, и҆ те́плымъ предста́тельствомъ твои́мъ, всѧ̑ ѿгна́лъ є҆сѝ ѕлосла̑вныѧ ꙗ҆́кѡ во́лки, невре́дно соблю́дъ ста́до, григо́рїе всемꙋ́дре.

І҆́косъ:

Лѣ́ностїю ѻ҆каѧ́нный ѿпадо́хъ, и҆ къ сме́рти ᲂу҆снꙋ́хъ: но ꙗ҆́кѡ па́стырь бо́дрѣйшїй воздви́гни мѧ̀, ѻ҆́тче, и҆ стра̑сти моѧ̑ ᲂу҆спѝ, ѕлѣ̀ мꙋ́чащыѧ мѧ̀: ꙗ҆́кѡ да воста́въ, чи́стѣ воспою̀ твоѐ свѣтоно́сное преставле́нїе, є҆́же влⷣка вселе́нныѧ просла́ви досто́йнѡ: ꙗ҆́кѡ раба̀ вѣ́рнѣйшаго, ꙗ҆́кѡ ᲂу҆чи́телѧ всемꙋ́драго, ꙗ҆́кѡ дрꙋ́га и҆ таи́нника, и҆ ꙗ҆́кѡ строи́телѧ свои́хъ преда́нїй, и҆́хже до́брѣ сохрани́лъ є҆сѝ пома́занїе нескве́рнѡ, григо́рїе всемꙋ́дре.

Пѣ́снь з҃. І҆рмо́съ:

Ю҆́ношы бл҃гочести̑выѧ, пе́щи ѻ҆́гненнѣй приѡбщи́вшыѧсѧ, шꙋмѧ́щъ дꙋ́хъ ро́сный невреди̑мы сохранѝ, и҆ бж҃їѧ а҆́гг҃ла снисхожде́нїе. Тѣ́мже, въ пла́мени ѡ҆роша́еми, бл҃года́рственнѡ воспѣва́хꙋ: препѣ́тый ѻ҆тцє́въ гдⷭ҇и и҆ бж҃е, бл҃гослове́нъ є҆сѝ.

Ꙗ҆́коже на нб҃сѝ съ тре́петомъ и҆ чꙋ́домъ предстоѧ́хꙋ, во і҆ѻрда́нѣ си̑лы а҆́гг҃льскїѧ, смотрѧ́юще толи̑ка бж҃їѧ схождє́нїѧ: ꙗ҆́кѡ держа́й превы́шнихъ во́дъ соста́въ, въ вода́хъ плотоно́сецъ стоѧ́ше, бг҃ъ ѻ҆тцє́въ на́шихъ.

Ѻ҆́блакъ дре́вле и҆ мо́ре бж҃е́ственнагѡ проѡбража́хꙋ кр҃ще́нїѧ чꙋ́до, въ ни́хже дре́внїи крести́шасѧ, и҆сходѧ́ще зако́ннїи лю́дїе: мо́ре же бѣ̀ ѻ҆́бразъ воды̀, и҆ ѻ҆́блакъ дх҃а, и҆́миже соверша́еми, бл҃гослове́нъ є҆сѝ, зове́мъ, гдⷭ҇и бж҃е, во вѣ́ки.

Всѝ вѣ́рнїи, въ не́мже соверше́нїе прїѧ́хомъ, бг҃осло́вѧще немо́лчнѡ со а҆́гг҃лы, просла́вимъ ѻ҆ц҃а̀, и҆ сн҃а, и҆ дх҃а ст҃а́го, се́ бо трⷪ҇ца ѵ҆поста́сьми є҆диносꙋ́щнаѧ, є҆ди́нъ же бг҃ъ. є҆мꙋ́же и҆ пое́мъ: бл҃гослове́нъ є҆сѝ, гдⷭ҇и бж҃е, во вѣ́ки.

И҆́нъ. І҆рмо́съ:

Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Жела́нїемъ соедини́всѧ трисо́лнечнагѡ бжⷭ҇тва̀ сїѧ́нїю, григо́рїе, всѣ̑мъ ꙗ҆́кѡ зерца́ло сїѧ́ѧ, блиста́еши свѣ́та зари̑.

Сокро́вище словеса̀ твоѧ̑, ѻ҆ч҃ески ѡ҆ста́вилъ є҆сѝ, ѻ҆бы́чай дꙋшѝ ѡ҆чище́нїе, и҆ ра́зꙋма и҆сполне́нїе, вѣ́рою пѣснопою́щымъ: бж҃е, благослове́нъ є҆сѝ.

Пе́рваго ᲂу҆ма̀, и҆ вино́вна, ѻ҆ц҃а̀ возвѣсти́лъ є҆сѝ, сло́ва ᲂу҆́бѡ роди́телѧ, кꙋ́пнѡ же производи́телѧ дх҃а, трⷪ҇цꙋ пѣснопоѧ̀: бж҃е, благослове́нъ є҆сѝ.

Бг҃оро́диченъ:

Є҆ди́нꙋ ᲂу҆́бѡ ѵ҆поста́сь во двою̀ є҆стєствꙋ̀, всенепоро́чнаѧ, родила̀ є҆сѝ воплоще́нна бг҃а, є҆мꙋ́же всѝ пѣснопое́мъ: бж҃е, бл҃гослове́нъ є҆сѝ.

И҆́нъ. І҆рмо́съ:

Тебѐ ᲂу҆́мнꙋю, бцⷣе, пе́щь разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.

Нело́жное вѣ̑рнымъ соверши́сѧ ѡ҆бѣтова́нїе проѧвле́ннѡ: бжⷭ҇твенный бо дометїа́нъ, благода́ти сподо́бисѧ рѣши́ти недꙋ́ги, и҆ ѿгонѧ́ти де́мѡны, хва́льнаго провозвѣща́ѧ бг҃а препросла́вленнаго.

На землѝ съ на́ми бы́въ, и҆ пло́тски пожи́въ, подадѐ послѣ́довавшымъ є҆мꙋ̀, и҆ возлю́бльшымъ є҆го̀, чꙋдодѣ̑йствїѧ бл҃года́ти, хва́льный ѻ҆тцє́въ бг҃ъ и҆ препросла́вленный.

Ѕлочести̑выѧ низложѝ є҆́рєси бжⷭ҇твенный дометїа́нъ, севи́рова ᲂу҆че́нїѧ: и҆ непрело́жнꙋю вѣ́рꙋ и҆ правосла́внꙋю бг҃олѣ́пнѡ назна́мена, хва́льнаго возвѣща́ѧ бг҃а и҆ препросла́вленнаго.

Бг҃оро́диченъ:

Ѻ҆ч҃ескагѡ не ѿстꙋпѝ є҆стества̀, бж҃е́ственное сло́во вопло́щсѧ и҆зъ дв҃ы: тꙋ́ю бо и҆звѣ́стнѡ соблюдѐ, пребы́вшꙋ нескве́рнꙋ въ рождествѣ̀: и҆ прїе́млетъ є҆́же ѿ ѻ҆ц҃а̀ свидѣ́тельство хрⷭ҇то́съ, препросла́вленный во вѣ́ки.

Пѣ́снь и҃. І҆рмо́съ:

Та́йнꙋ пресла́внꙋю вавѷлѡ́нскаѧ показа̀ пе́щь, и҆сточи́вшаѧ ро́сꙋ, ꙗ҆́кѡ стрꙋѧ́ми и҆мѧ́ше невеще́ственный ѻ҆́гнь воспрїѧ́ти і҆ѻрда́нъ, и҆ ѡ҆б̾ѧ́ти пло́тїю креща́ема зижди́телѧ, є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.

Ѿложѝ стра́хъ ве́сь, и҆зба́витель прⷣте́чи речѐ: мнѣ́ же повини́сѧ, ꙗ҆́кѡ бл҃го́мꙋ, мнѣ̀ пристꙋпѝ, сїе́ бо є҆стество́мъ бы́хъ. мои̑мъ повелѣ́нїємъ покори́сѧ, и҆ крⷭ҇ти́ мѧ сше́дшаго: є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.

Глаго́лы ꙗ҆́коже ᲂу҆слы́ша крⷭ҇ти́тель влⷣчни, съ тре́петомъ дла́нь простира́етъ: ѻ҆ба́че же рꙋко́ю коснꙋ́всѧ верхꙋ̀ зижди́телѧ своегѡ̀, кре́щшемꙋсѧ вопїѧ́ше: ѡ҆свѧти́ мѧ, ты́ бо є҆сѝ бг҃ъ мо́й: є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.

Трⷪ҇цы ꙗ҆вле́нїе во і҆ѻрда́нѣ бы́сть, са́мое бо пребж҃е́ственное є҆стество̀, ѻ҆ц҃ъ возгласѝ: се́й креща́емый, сн҃ъ возлю́бленный мо́й. дх҃ъ же прїи́де къ подо́бномꙋ: є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.

И҆́нъ. І҆рмо́съ:

Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.

Всю̀ зарю̀ ᲂу҆тѣ́шителевꙋ, блаже́нне, прїѧ́лъ є҆сѝ наше́дшꙋю, зовѧ̀, преподо́бне: всѧ̑ дѣла̀, гдⷭ҇а по́йте, и҆ превозноси́те во всѧ̑ вѣ́ки.

И҆стека́ютъ на́мъ, по бжⷭ҇твенномꙋ сло́вꙋ хрⷭ҇то́вꙋ, и҆зъ чре́ва твоегѡ̀ рѣ́ки ра́зꙋма: вои́стиннꙋ бо и҆сто́чника непреста́нна благода́ть показа̀ мі́рꙋ тѧ̀, ѻ҆́тче, во вѣ́ки.

Ѽ чꙋ̑дныѧ бра̑тскїѧ дво́ицы, пло́тїю же срѡ́дныѧ, и҆ бжⷭ҇твєнныѧ мꙋдрова́нїемъ! сїю̀ чтꙋ́ще, васі́лїа досто́йнѡ вкꙋ́пѣ съ григо́рїемъ почти́мъ во вѣ́ки.

Свѣ́тъ мы́сленный въ тѧ̀ всели́всѧ, ѻ҆́тче, свѣщꙋ́ тѧ негаси́мꙋ мі́рови поста́вилъ є҆́сть, є҆ди́наго свѣ́та пою́ща трисо́лнечна и҆ бжⷭ҇твенна, є҆го́же превозно́симъ во всѧ̑ вѣ́ки.

Бг҃оро́диченъ:

Тебѐ па́че ᲂу҆ма̀ бг҃омꙋ́жнымъ сло́вомъ ро́ждшꙋю гдⷭ҇а и҆ двⷭ҇твꙋющꙋю, всѧ̑ дѣла̀ досто́йнѡ благослови́мъ, и҆ превозно́симъ во всѧ̑ вѣ́ки.

И҆́нъ. І҆рмо́съ:

Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою благоче́стїѧ чистѣ́е зла́та блеща́хꙋсѧ, глаго́люще: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Превше́лъ є҆сѝ ве́сь зако́нъ є҆стества̀ человѣ́ча, бг҃ꙋ же прилѣпи́лсѧ є҆сѝ, бг҃оглаго́ливе, жела́нїй кра́йнѣйшемꙋ, поѧ̀ є҆мꙋ̀: бл҃гослови́те, всѧ̑ дѣла̀, гдⷭ҇а, и҆ превозноси́те во всѧ̑ вѣ́ки.

Оу҆слы́шавъ бж҃е́ствєнныѧ за́пѡвѣди, расточи́лъ є҆сѝ ѻ҆би́льнѡ бога́тство тре́бꙋющымъ, благопокоре́нїѧ по́мысломъ, вопїѧ̀, досточꙋ́дне: благослови́те, всѧ̑ дѣла̀, гдⷭ҇а, и҆ превозноси́те во всѧ̑ вѣ́ки.

И҆сцѣле́нїй, дометїа́не, неѡскꙋ́денъ бы́лъ є҆сѝ, и҆сточа́ѧ пи́во, и҆сто́чникъ, и҆ пото́къ сла́дости, и҆ рѣка̀ ми́ра вопїю́щымъ: всѧ̑ дѣла̀, гдⷭ҇а по́йте, и҆ превозноси́те во всѧ̑ вѣ́ки.

Бг҃оро́диченъ:

Въ пещи́ тѧ ѻ҆бра́знѡ прописа́ша ѻ҆́троцы, дв҃о, и҆ въ кꙋпинѣ̀ проѡбразѝ мѡѷсе́й, и҆ дв҃дъ зрѧ́ тѧ ро́ждшꙋю младе́нца безмꙋ́жнѡ, гдⷭ҇а сла́вы: є҆го́же превозно́симъ во всѧ̑ вѣ́ки.

Пѣ́снь ѳ҃. І҆рмо́съ:

Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе. ѻ҆ба́че, бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

Дв҃де, прїидѝ дх҃омъ къ просвѣщє́ннымъ, ны́нѣ пристꙋпи́те, по́й, къ бг҃ꙋ вѣ́рою, глаго́лѧ: просвѣти́тесѧ, се́й ни́щїй воззва̀ а҆да́мъ въ паде́нїи. И҆́бо того̀ ᲂу҆слы́ша гдⷭ҇ь, прише́дъ стрꙋѧ́ми і҆ѻрда́нскими, тлѣ́ннаго же ѡ҆бновѝ.

И҆са́їа, и҆змы́йтесѧ, ѡ҆чи́ститесѧ, глаго́летъ, лꙋка̑вствїѧ предъ гдⷭ҇емъ ѡ҆ста́вите, жа́ждꙋщїи, на во́дꙋ жи́вꙋ и҆ди́те: кропи́тъ бо водо́ю, ѡ҆бновлѧ́ѧ хрⷭ҇то́съ пристꙋпа́ющыѧ къ немꙋ̀ вѣ́рою, и҆ къ животꙋ̀ нестарѣ́емомꙋ креща́етъ дх҃омъ.

Соблюда́емсѧ благода́тїю, вѣ́рнїи, и҆ печа́тїю: ꙗ҆́кѡ бо гꙋби́телѧ, бѣжа́ша пра́га є҆врє́и дре́вле ѡ҆крова́влена, та́кѡ и҆ на́мъ и҆схо́дное бжⷭ҇твенное сїѐ, пакибытїѧ̀ ба́нѧ бꙋ́детъ: ѿсю́дꙋ и҆ трⷪ҇цы ᲂу҆́зримъ свѣ́тъ незаходи́мый.

И҆́нъ. І҆рмо́съ:

И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

И҆справле́нїй же и҆ слове́съ твои́хъ блиста̑нїѧ, григо́рїе, восхвали́ти ᲂу҆́мъ не могі́й ꙗ҆́вѣ на́шъ, и҆сповѣ́дꙋетъ побѣжде́нїе благопохва́льно, твое́ же возвѣща́етъ па́че си́лы похвале́нїе.

Таи́нниче нбⷭ҇ныхъ и҆зрѧ́днѣйше, трⷪ҇цѣ ны́нѣ предстоѧ̀ со а҆́гг҃льскимъ ли́комъ, и҆ прⷪ҇ро́ческимъ, мч҃никѡвъ же и҆ пра́ведныхъ, и҆ патрїа́рхѡвъ, помѧнѝ на́съ, воспѣва́ющихъ твою̀ па́мѧть, григо́рїе.

Назира́еши свы́ше защища́ѧ ны́нѣ, свѧти́телю, цр҃кви хрⷭ҇тѡ́вы, побѣ̑ды да́рꙋѧ вѣ̑рнымъ лю́демъ и҆ рабо́тное сокрꙋшѝ и҆́го, твоѧ̑ спаса́ѧ пѣвцы̀ мл҃твами твои́ми, григо́рїе.

Бг҃оро́диченъ:

Ꙗ҆́кѡ ро́ждши, всечи́стаѧ, тва́ри содѣ́телѧ, по всемꙋ̀ рожде́ннаго но́сиши нача́ло, несосꙋ́дное и҆мꙋ́щи вели́чїе и҆ преесте́ственное. Тѣ́мже ржⷭ҇твꙋ̀ твоемꙋ̀ покланѧ́ющесѧ, тѧ̀ сла́вимъ.

И҆́нъ. І҆рмо́съ:

Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Оу҆ста́вилъ є҆сѝ, ѻ҆́тче, жела̑нїѧ любле́нїй, ᲂу҆держа́въ соверше́ннѣйшее: и҆ прїѧ́ша тѧ̀ патрїа́рхѡвъ селє́нїѧ, и҆ првⷣныхъ и҆ прпⷣбныхъ чи́ни, съ ни́миже мо́лиши ѡ҆ на́съ вседержи́телѧ.

И҆мѧ́ше ꙗ҆́коже и҆мѣ́нїе че́стно твоѐ ѻ҆те́чество, тѣ́ло твоѐ многострада́льное, скры́вшее свои́ми нѣ́драми, сла́вне, ма́терскими ᲂу҆стреми́вшеесѧ движе́ньми: тобо́ю бо наслажда́тисѧ чꙋжди̑мъ не терпѧ́ше.

Грѧдѝ по́мощь бы́ти мнѣ̀ въ напа́стехъ житїѧ̀ и҆ ѡ҆бстоѧ́нїихъ, и҆ ᲂу҆тишѝ воздвиза́ющꙋюсѧ бꙋ́рю на мѧ̀ страсте́й, и҆ въ ти́хо приведѝ приста́нище, вѣ́тромъ, ѻ҆́тче, моли́твы твоеѧ̀.

Бг҃оро́диченъ:

Стоѧ́ше да́же до тебє̀ сме́рть, є҆́же по на́мъ бы́ти, за є҆́же спасти́ ны, пресꙋ́щне сн҃е бж҃їй, бл҃говоли́вшагѡ и҆зъ безмꙋ́жныѧ мт҃ре, и҆ вода́ми ны̀ ѡ҆чи́стити, и҆ ѻ҆гне́мъ бжⷭ҇твеннымъ кр҃ще́нїѧ.

Свѣти́ленъ. Подо́бенъ: Посѣти́лъ ны̀:

Па́стырѧ до́браго григо́рїа всемꙋ́драго, нѷссе́євъ предсѣда́телѧ, васі́лїа премꙋ́драго є҆динонра́внаго бра́та по пло́ти, пра́зднственными пѣ́сньми просла́вимъ, всѝ.

Сла́ва, и҆ ны́нѣ, пра́здника:

Ꙗ҆ви́сѧ сп҃съ, бл҃года́ть и҆ и҆́стина во стрꙋѧ́хъ і҆ѻрда́нскихъ, и҆ сꙋ́щыѧ во тмѣ̀ и҆ сѣ́ни спѧ́щыѧ просвѣти́лъ є҆́сть: и҆́бо прїи́де и҆ ꙗ҆ви́сѧ свѣ́тъ непристꙋ́пный.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Ны́нѣ стра́нно сп҃съ ꙳ человѣ́кѡмъ да́рꙋетъ ѡ҆чище́нїе, ꙳ кромѣ̀ и҆зварѧ́ѧ ѻ҆гнѧ̀, ꙳ и҆ назида́ѧ дꙋ́шы, ꙳ без̾ сокрꙋше́нїѧ.

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Во́дꙋ бжⷭ҇твенныѧ жи́зни, ѿ и҆сто́чникѡвъ спаси́тельныхъ, ꙳ лю́дїе, съ весе́лїемъ ꙳ почерпи́те ᲂу҆се́рднѡ, ꙳ дꙋ́шъ на и҆збавле́нїе.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

Прїи́де просвѣще́нїе, ꙳ благода́ть ꙗ҆ви́сѧ, ꙳ и҆збавле́нїе наста̀, ꙳ мі́ръ просвѣти́сѧ, ꙳ лю́дїе, ра́дости и҆спо́лнитесѧ.

Сла́ва, гла́съ а҃:

Пра́выѧ вѣ́ры до́блїй подви́жниче, спострада́вый ꙗ҆́кѡ до́бръ во́инъ хрⷭ҇та̀ бг҃а, и҆ воево́дѣ ᲂу҆годи́вый: подвиза́йсѧ и҆ ны́нѣ по цр҃кви до́брымъ по́двигомъ, соблюда́ѧ ю҆̀ твои́ми догма́тами на недви́жимѣмъ ѡ҆снова́нїи, григо́рїе.

И҆ ны́нѣ, гла́съ и҃. І҆ѡа́нна мона́ха:

Гдⷭ҇и, и҆спо́лнити хотѧ̀, ꙗ҆̀же ᲂу҆ста́вилъ є҆сѝ ѿ вѣ́ка, ѿ всеѧ̀ тва́ри слꙋжи́тели та́йны твоеѧ̀ прїѧ́лъ є҆сѝ: ѿ а҆́гг҃лъ гаврїи́ла, ѿ человѣ̑къ дв҃ꙋ, ѿ нб҃съ ѕвѣздꙋ̀, и҆ ѿ во́дъ і҆ѻрда́нъ, въ не́мже беззако́нїе мїрско́е потреби́лъ є҆сѝ, сп҃се на́шъ, сла́ва тебѣ̀.

На лїтꙋргі́и, бл҃жє́нна, ѿ канѡ́на пра́здника пѣ́снь є҃-ѧ, со і҆рмосо́мъ на д҃, и҆ ст҃а́гѡ, пѣ́снь ѕ҃- ѧ, на д҃: Прокі́менъ: Честна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ корі́нѳѧнѡмъ, зача́ло рн҃а. А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ: Є҆ѵⷢ҇лїе ѿ матѳе́а, зача́ло л҃д, ѿ полꙋ̀. Прича́стенъ: Въ па́мѧть вѣ́чнꙋю бꙋ́детъ пра́ведникъ:

Слꙋ́жба преподо́бнагѡ ѻ҆ц҃а̀ на́шегѡ па́ѵла ѻ҆бно́рскагѡ, во́логодскагѡ чꙋдотво́рца.

Ве́черъ пое́мъ, Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ, стїхи̑ры, гла́съ д҃. Подо́бенъ: Зва́нный свы́ше:

Ве́сь возложи́лсѧ є҆сѝ вседержи́телю, ꙳ ѻ҆́тче прпⷣбне, ꙳ є҆гда̀ тѧ̀ бж҃е́ственное жела́нїе распалѝ, ꙳ и҆ дꙋ́шꙋ вперѝ, ꙳ тогда̀ мі́ръ ѡ҆ста́вилъ є҆сѝ ꙳ и҆ ꙗ҆̀же въ мі́рѣ, ꙳ и҆ взе́мъ крⷭ҇тъ, послѣ́довалъ є҆сѝ хрⷭ҇тꙋ̀ ꙳ невозвра́тнымъ по́мысломъ, ꙳ ничто́же предпоче́тъ па́че любвѐ є҆гѡ̀: ꙳ тогѡ̀ ра́ди бг҃ꙋ благоꙋгоди́лъ є҆сѝ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.

Ѿ ю҆́ности, прпⷣбне, ꙳ бг҃а возлюби́въ, ꙳ томꙋ̀ вседꙋ́шнѡ послѣ́довалъ є҆сѝ, ꙳ на ничто́же ѡ҆браща́ѧсѧ ꙳ сꙋ́щихъ въ мі́рѣ, ꙳ по всѧ̑ ᲂу҆ме́ты вмѣни́въ, ꙳ потща́лсѧ є҆сѝ бл҃гоꙋгоди́ти бг҃ꙋ, ꙳ за́повѣдьми є҆гѡ̀ ᲂу҆твержда́ѧсѧ. ꙳ тѣ́мже и҆ жела́нїе коне́чное дости́глъ є҆сѝ ꙳ хрⷭ҇то́ва ᲂу҆гожде́нїѧ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.

Ѡ҆снова́нїе крѣ́пко къ добродѣ́телемъ ꙳ положи́лъ є҆сѝ въ дꙋшѝ твое́й стра́хъ бж҃їй: ꙳ се́й бо є҆́сть нача́ло мꙋ́дрости, ꙳ и҆ ѡ҆кормле́нїе во все́мъ житїѝ, ꙳ хотѧ́щымъ ᲂу҆годи́ти бг҃ꙋ: ꙳ и҆ на се́мъ ѡ҆снова́нїи назда́лъ є҆сѝ ꙳ кра̑сныѧ добродѣ́тєли, ꙳ сохране́нїемъ животво́рныхъ бж҃їихъ за́повѣдей. є҆го́же молѝ, ꙳ спастѝ и҆ просвѣти́ти дꙋ́шы на́шѧ.

Сла́ва, гла́съ ѕ҃:

Ѡ҆ста́вивъ мі́ръ и҆ ꙗ҆̀же въ мі́рѣ, прпⷣбне, послѣ́довалъ є҆сѝ хрⷭ҇тꙋ̀, безмо́лвнымъ житїе́мъ тща́лсѧ є҆сѝ бл҃гоꙋгоди́ти є҆мꙋ̀: тѣ́мже ᲂу҆дали́лсѧ є҆сѝ бѣ́гаѧ, и҆ водвори́лсѧ є҆сѝ въ пꙋсты́ни: тогѡ̀ ра́ди мно́гихъ дꙋша́мъ бы́лъ є҆сѝ во́ждь ко спасе́нїю, твои́мъ ᲂу҆че́нїемъ ты́ѧ ᲂу҆твержда́ѧ, и҆ ѻ҆́бразъ бла́гъ во все́мъ себѐ предлага́ѧ. тѣ́мже во ѻ҆би́тели твое́й творѧ́щїи па́мѧть твою̀ свѣтоно́снꙋю ᲂу҆блажа́ютъ тѧ̀ ча̑да твоѧ̑, и҆ мо́лѧтъ тѧ̀, моли́тисѧ ко гдⷭ҇ꙋ, спасти́сѧ дꙋша́мъ на́шымъ.

И҆ ны́нѣ пра́здника, гла́съ д҃:

Трепета́ше рꙋка̀ крⷭ҇ти́телева, є҆гда̀ пречи́стомꙋ твоемꙋ̀ верхꙋ̀ коснꙋ́сѧ: возврати́сѧ і҆ѻрда́нъ рѣка̀ вспѧ́ть, не дерза́ющи слꙋжи́ти тебѣ̀: ꙗ҆́же бо ᲂу҆стыдѣ́сѧ і҆исꙋ́са наѵи́на, ка́кѡ творца̀ своегѡ̀ ᲂу҆страши́тисѧ не и҆мѧ́ше; Но всѐ и҆спо́лнилъ є҆сѝ смотре́нїе, сп҃се на́шъ, да спасе́ши мі́ръ ꙗ҆вле́нїемъ твои́мъ, є҆ди́не чл҃вѣколю́бче.

Вхо́дъ. Прокі́менъ днѐ. Чтє́нїѧ трѝ, пи́саны сегѡ̀ мцⷭ҇а въ а҃і де́нь.

На стїхо́внѣ стїхи̑ры пра́здника, гла́съ в҃.

Подо́бенъ: До́ме є҆ѵфра́ѳовъ:

Пѣ́нїе новолѣ́пное ꙳ да пое́тъ всѧ̀ тва́рь ꙳ ѿ дв҃ы ро́ждшемꙋсѧ хрⷭ҇тꙋ̀, ꙳ и҆ кре́щшемꙋсѧ во і҆ѻрда́нѣ дне́сь.

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Трꙋба̀ прⷪ҇ро́ческаѧ, ꙳ прⷣте́ча да вопїе́тъ: ꙳ сотвори́те гдⷭ҇ꙋ, ꙳ кре́щшемꙋсѧ въ стрꙋѧ́хъ, ꙳ плоды̀ и҆зрѧ́днѣйшихъ дѣѧ́нїй.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

Возсїѧ̀ сро́дный съ высоты̀ ꙳ бж҃е́ственный дх҃ъ, ꙳ въ ви́дѣ голꙋби́нѣ, ꙳ зри́мь несказа́ннѡ, ꙳ ны́нѣ хрⷭ҇тꙋ̀ притечѐ.

Сла́ва, гла́съ и҃:

Мона́хѡвъ мно́жества наста́вника тѧ̀ почита́емъ, ѻ҆́тче на́шъ па́ѵле, твое́ю бо стезе́ю вои́стиннꙋ пра́вѡ ходи́ти позна́хомъ: блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ првⷣныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, пра́здника, гла́съ д҃:

Тебѐ въ дс҃ѣ и҆ ѻ҆гнѝ ѡ҆чища́юща грѣ́хъ мі́ра, зрѧ̀ крⷭ҇ти́тель грѧдꙋ́ща къ себѣ̀, ᲂу҆жаса́ѧсѧ и҆ трепе́щѧ, вопїѧ́ше глаго́лѧ: не смѣ́ю держа́ти ве́рхъ тво́й пречи́стый, ты́ мѧ ѡ҆свѧтѝ, влⷣко, бж҃е́ственнымъ ꙗ҆вле́нїемъ твои́мъ, є҆ди́не чл҃вѣколю́бче.

Тропа́рь, гла́съ а҃:

Бжⷭ҇твенною любо́вїю ѿ ю҆́ности распала́емь, па́ѵле прпⷣбне, всѧ̑, ꙗ҆̀же въ мі́рѣ, кра̑снаѧ возненави́дѣвъ, хрⷭ҇та̀ є҆ди́наго возлюби́лъ є҆сѝ: и҆ сегѡ̀ ра́ди во внꙋ́треннюю пꙋсты́ню всели́лсѧ є҆сѝ, со ѕвѣрьмѝ жи́ти ве́сь хрⷭ҇тꙋ̀: ѿѻнꙋ́дꙋже и҆ всеви́дѧщее ѻ҆́ко твоѧ̑ трꙋды̀ ви́дѣвъ, да́ромъ чꙋде́съ и҆ по преставле́нїи ѡ҆богати́ тѧ. тѣ́мже вопїе́мъ тѝ: молѝ непреста́ннѡ ѡ҆ всѣ́хъ на́съ, честнꙋ́ю па́мѧть твою̀ при́снѡ въ пѣ́снехъ почита́ющихъ.

Сла́ва, и҆ ны́нѣ, пра́здника.

Во і҆ѻрда́нѣ креща́ющꙋсѧ тебѣ̀, гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ: и҆ дх҃ъ, въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды: Сла́ва, ст҃а́гѡ: И҆ ны́нѣ, пра́здника. По стїхоло́гїахъ сѣда́льны пра́здника.

По полѷеле́и сѣда́ленъ ст҃а́гѡ, гла́съ д҃. Поⷣ: Оу҆диви́сѧ і҆ѡ́сифъ:

Оу҆диви́сѧ тво́й дх҃о́вный настоѧ́тель вели́кїй се́ргїй, въ тебѣ̀ вели́ко воздержа́нїе зрѧ̀, и҆ внима́ше мы́слїю хотѧ̑щаѧ ѿ тебє̀ напослѣ́докъ бы́ти, па́ѵле: ви́дѣвъ бо твоѐ, є҆́же по бг҃ꙋ житїѐ, вра́жїими прилѡ́ги ника́коже поколеби́мо, свидѣ́тельствꙋетъ ꙗ҆́кѡ ѻ҆те́цъ и҆ храни́тель твоегѡ̀ житїѧ̀, и҆ бра́тїємъ вели́кїѧ ла́ѵры своеѧ̀ вопїѧ́ше: се́й, и҆́же посредѝ на́съ ме́ньшїй ви́дитсѧ, но послѣдѝ въ пꙋсты́ни вели́къ свѣти́льникъ бꙋ́детъ.

Два́жды.

Сла́ва, и҆ ны́нѣ пра́здника.

Степє́нна, прокі́менъ, и҆ є҆ѵⷢ҇лїе матѳе́а, зача́ло м҃г, прпⷣбномꙋ.

По н҃-мъ ѱалмѣ̀ стїхи́ра, гла́съ ѕ҃: Ѡ҆ста́вивъ мі́ръ и҆ ꙗ҆̀же въ мі́рѣ: пи́сана на Гдⷭ҇и, воззва́хъ: Сла́ва:

Канѡ́нъ пра́здника со і҆рмосо́мъ на ѕ҃: и҆ прпⷣбнагѡ канѡ́нъ на и҃.

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Возлюби́въ бг҃а, прпⷣбне, ѿ всеѧ̀ дꙋшѝ твоеѧ̀, томꙋ̀ ѿ ю҆́ности послꙋжи́лъ є҆сѝ въ простотѣ̀ се́рдца твоегѡ̀. тѣ́мже и҆ просла́ви тѧ̀: вѣ́сть бо гдⷭ҇ь сла́вѧщыѧ є҆го̀ прославлѧ́ти.

Ѿ ю҆́ности, прпⷣбне, бг҃ꙋ прилѣпи́лсѧ є҆сѝ, и҆ невозвра́тнѡ послѣ́довалъ є҆сѝ живонѡ́снымъ є҆гѡ̀ стопа́мъ: ᲂу҆дали́всѧ бо мі́ра, водвори́лсѧ є҆сѝ въ пꙋсты́ню. тѣ́мже почита́емъ па́мѧть твою̀.

Ны́нѣ, прпⷣбне ѻ҆́тче па́ѵле, съ ли́ки прⷪ҇рѡ́къ и҆ а҆пⷭ҇лъ, мч҃никъ же и҆ прпⷣбныхъ, во свѣ́тѣ ст҃ы́ѧ трⷪ҇цы соводворѧ́ѧсѧ, помина́й ча̑да твоѧ̑, вѣ́рою творѧ́щыѧ па́мѧть твою̀ свѣтоно́снꙋю.

Бг҃оро́диченъ:

Без̾ сѣ́мене ѻ҆́ч҃ею во́лею ѿ бжⷭ҇твеннагѡ дх҃а бж҃їѧ зачала̀ є҆сѝ сн҃а, и҆ пло́тїю родила̀ є҆сѝ, сꙋ́щаго и҆з̾ ѻ҆ц҃а̀ без̾ мт҃ре, на́съ же ра́ди и҆з̾ тебє̀ без̾ ѻ҆ц҃а̀.

Катава́сїа пра́здника.

Пѣ́снь г҃. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.

Ѿ мла́да во́зраста, прпⷣбне, возлюби́лъ є҆сѝ пребыва́ти въ домꙋ̀ гдⷭ҇ни, и҆ зрѣ́ти красоты̑ є҆гѡ̀. Тѣ́мже и҆збра́ тѧ гдⷭ҇ь ѿ мі́ра, во є҆́же слꙋжи́ти тебѣ̀ пред̾ лице́мъ є҆гѡ̀ въ прпⷣбїи и҆ пра́вдѣ.

Оу҆дали́всѧ мі́ра, трꙋ́дное житїѐ возлюби́лъ є҆сѝ, прпⷣбне, є҆́же ко всѣ̑мъ послꙋшли́вꙋ бы́ти, и҆ слꙋжи́ти всѣ̑мъ ѿ кра́йнѧгѡ смире́нїѧ, и҆ себѐ послѣ́днѣйша вмѣнѧ́ти ѿ всѣ́хъ. тѣ́мже и҆ гдⷭ҇ь просла́ви тѧ̀.

Въ безмо́лвїи возлюби́лъ є҆сѝ жи́ти, ѻ҆́тче прпⷣбне: тѣ́мже ᲂу҆дали́всѧ ѿ человѣ̑къ водвори́лсѧ є҆сѝ въ пꙋсты́ни, со ѕвѣрьмѝ живы́й. тогѡ̀ ра́ди ны́нѣ во свѣ́тѣ ст҃ы́хъ пребыва́ѧ, помина́й творѧ́щыѧ па́мѧть твою̀.

Бг҃оро́диченъ:

Неѡра́ннаѧ ни́ва ꙗ҆ви́ласѧ є҆сѝ, кла́съ жи́зненный ро́ждши, всѣ̑мъ причаща́ющымсѧ безсме́ртїѧ хода́таѧ, во ст҃ы́хъ ст҃а́гѡ свѧ́тѡ почива́ющаго.

Конда́къ и҆ і҆́косъ пра́здника.

Та́же сѣда́ленъ ст҃а́гѡ, гла́съ и҃. Подо́бенъ: Премꙋ́дрости:

Пожи́въ, прпⷣбне, во а҆́лчбѣ и҆ жа́жди, и҆ въ про́чїихъ ѕлострада́нїихъ, не даѧ̀ поко́ѧ тѣ́лꙋ твоемꙋ̀, за є҆́же полꙋчи́ти бꙋ́дꙋщїй поко́й, ѿѻнꙋ́дꙋже и҆ жела́нїѧ не погрѣши́лъ є҆сѝ, но полꙋчи́лъ є҆сѝ ѻ҆́ноѧ ра́дости, щади́мыѧ лю́бѧщымъ бг҃а. тѣ́мже помина́й ча̑да твоѧ̑ и҆ не забꙋ́ди, ꙗ҆́коже ѡ҆бѣща́лсѧ є҆сѝ, да всѝ вопїю́тъ тѝ: ѻ҆́тче на́шъ па́ѵле прпⷣбне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, пра́здника.

Пѣ́снь д҃. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Стра́хомъ бж҃їимъ ѡ҆гра́ждсѧ ѿ ю҆́ности, прпⷣбне, и҆ безмо́лвнѡ бг҃ꙋ послꙋжи́лъ є҆сѝ во ᲂу҆едине́нїи пребыва́ѧ, посто́мъ и҆ жа́ждею смирѧ́ѧ тѣ́ло, моли́твою же чи́стою дꙋ́шꙋ просвѣща́ѧ.

Хꙋ́дость ри́знꙋю па́че всѣ́хъ и҆мѣ́лъ є҆сѝ, прпⷣбне, не возлюби́въ мѧ́гкихъ и҆ сла́бѧщихъ тѣ́ло: вѣ́сть бо ѿ сегѡ̀ и҆ дꙋша̀ смирѧ́тисѧ, и҆ соѡбразова́тисѧ внꙋ́трєннѧѧ внѣ́шнемꙋ ᲂу҆строе́нїю.

Безмо́лвїе лобыза́въ ѿ ю҆́ности, и҆ мнѡ́га лѣ̑та въ то́мъ потрꙋди́всѧ, всѧ́кимъ ѕлострада́нїемъ дрꙋча̀ тѣ́ло твоѐ, и҆ не даѧ̀ себѣ̀ почива́ти тѣле́снѣ, да полꙋчи́ши бꙋ́дꙋщїй поко́й.

Бг҃оро́диченъ:

Неискꙋсобра́чнѡ родила̀ є҆сѝ, дв҃о, и҆ по ржⷭ҇твѣ̀ ꙗ҆ви́ласѧ є҆сѝ двⷭ҇твꙋющи па́ки. тѣ́мже немо́лчными гла̑сы, є҆́же ра́дꙋйсѧ, тебѣ̀, влⷣчце, вѣ́рою несомнѣ́нною взыва́емъ.

Пѣ́снь є҃. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.

Ты̀ процвѣ́лъ є҆сѝ, прпⷣбне, въ пꙋсты́ни, дв҃дски ꙗ҆́коже фі́нїѯъ, сїѧ́ѧ добродѣ́тельми: ѿѻнꙋ́дꙋже и҆ позна́нъ бы́лъ є҆сѝ, ꙗ҆́кѡ мнѡ́гимъ приходѧ́щымъ ревнова́ти твоемꙋ̀, є҆́же по бг҃ꙋ, житїю̀.

Ты̀, прпⷣбне, ꙗ҆вле́нъ бы́лъ є҆сѝ ѿ добродѣ́тельнагѡ жи́тельства, ѿ негѡ́же всѣ̑мъ ви́дѧщымъ созидова́тисѧ дꙋша́ми, и҆ къ ре́вности воздвиза́тисѧ, є҆́же ѿрещи́сѧ мі́ра, и҆ твоемꙋ̀ житїю̀ подо́битисѧ.

Ты̀, прпⷣбне, смири́всѧ па́че всѣ́хъ, и҆ ѿ сегѡ̀ приѡбрѣ́тъ ᲂу҆миле́нїе дꙋшѝ и҆ сле́зъ и҆сто́чникъ непрестаю́щь, и҆ сїѧ̑ вмѣни́въ хлѣ́бъ де́нь и҆ но́щь, по прⷪ҇ро́ческомꙋ рече́нїю.

Бг҃оро́диченъ:

Тѧ̀ ѻ҆рꙋ́жїе непобѣди́мое на врагѝ предлага́емъ: тѧ̀ ᲂу҆твержде́нїе и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Позна́въ бг҃а, прпⷣбне, по вмѣ́стномꙋ человѣ́кѡмъ, тѣ́мже и҆ позна́нъ бы́лъ є҆сѝ ѿ бг҃а по и҆́мени про́чихъ ѻ҆тє́цъ: и҆ дꙋ́шъ па́стырь ᲂу҆стро́енъ бы́лъ є҆сѝ, сїѧ̑ наставлѧ́ѧ къ добродѣ́телємъ, и҆ приводѧ̀ бг҃ꙋ спаса́емы.

Возлюби́въ, бл҃же́нне, всено́щное бдѣ́нїе, си́мъ ѡ҆чища́ѧ ᲂу҆́мъ тво́й, дꙋ́шꙋ же просвѣща́ѧ, и҆ тѣ́ло твоѐ смирѧ́ѧ, и҆ ко дневны̑мъ трꙋдѡ́мъ благопоко́рно ᲂу҆строѧ́ѧ.

Любо́вь къ бг҃ꙋ и҆ къ бли́жнемꙋ стѧжа́въ, зако́на и҆ прⷪ҇рѡ́къ и҆сполнѧ́ѧ глави́знꙋ: и҆́бо не любѧ́й бли́жнѧгѡ, нижѐ бг҃а возлюби́ти мо́жетъ, ты́ же, прпⷣбне ѻ҆́тче на́шъ па́ѵле, ѻ҆боѧ̑ и҆спо́лнилъ є҆сѝ.

Бг҃оро́диченъ:

Ѽ чꙋ́до, всѣ́хъ чꙋде́съ новѣ́йшее! ꙗ҆́кѡ дв҃а во ᲂу҆тро́бѣ всѧ́чєскаѧ содержа́щаго, неискꙋсомꙋ́жнѡ заче́нши, не тѣсновмѣстѝ.

Конда́къ, гла́съ и҃. Подо́бенъ: Взбра́нной воево́дѣ:

Всѐ твоѐ ᲂу҆́мное жела́нїе къ бг҃ꙋ впери́въ, и҆ томꙋ̀ невозвра́тнѡ ѿ дꙋшѝ послѣ́довалъ є҆сѝ, въ пꙋсты́ню всели́всѧ, и҆ та́мѡ а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко спасе́нїю: сегѡ̀ ра́ди и҆ хрⷭ҇то́съ тѧ̀ просла́ви, и҆ да́ромъ чꙋде́съ ѡ҆богатѝ. тѣ́мже всѝ вопїе́мъ тѝ: ра́дꙋйсѧ, па́ѵле прпⷣбне, пꙋсты́нный жи́телю.

І҆́косъ:

Оу҆дали́всѧ, прпⷣбне, ѿ человѣ́кѡвъ, и҆ безмо́лвїю житїѐ возлюби́въ, и҆ пꙋсты́ню дости́гъ споспѣ́шнꙋ къ семꙋ̀ лю́бѧщымъ бг҃а, и҆ въ то́й мнѡ́га лѣ̑та пожи́лъ є҆сѝ, ѡ҆скорблѧ́емь ѿ де́мѡнѡвъ, и҆ ѿ ненака́занныхъ человѣ̑къ, и҆ всѧ̑ сїѧ̑ претерпѣ́лъ є҆сѝ, бг҃ꙋ тѧ̀ ᲂу҆крѣплѧ́ющꙋ, и҆ ѻ҆́ныхъ не́мощь ѡ҆бличи́лъ є҆сѝ терпѣ́пїемъ твои́мъ: и҆ ѿсю́дꙋ ᲂу҆стро́енъ бы́лъ є҆сѝ па́стырь дꙋ́шъ, си́хъ ᲂу҆́бѡ словесы̀ ᲂу҆чѧ̀, дѣ́лы же показꙋ́ѧ и҆звѣ́стнѣ и҆ разꙋ́мнѣ. тѣ́мже и҆ ча̑да твоѧ̑ пра́зднꙋюще па́мѧть твою̀, вопїю́тъ тѝ: ра́дꙋйсѧ, па́ѵле прпⷣбне, пꙋсты́нный жи́телю.

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Поще́нїемъ ѡ҆гради́всѧ ѿ ю҆́ности, си́мъ тѣ́ло твоѐ смирѧ́ѧ, и҆ благопоко́рно дꙋшѝ сотворѧ́ѧ: къ семꙋ́ же и҆ стра̑сти ᲂу҆спива́ѧ, безъ стꙋже́нїѧ ѿ си́хъ пребы́лъ є҆сѝ, поѧ̀ хрⷭ҇тꙋ̀: бл҃гослове́нъ бг҃ъ ѻ҆тє́цъ на́шихъ.

Ѧ҆зы́ка воздержа́нїе и҆спра́вилъ є҆сѝ, ѻ҆́тче прпⷣбне, ѿ многоглаго́ланїѧ семꙋ̀ возбранѧ́ѧ, на моли́твꙋ же сего̀ простира́ѧ, и҆ є҆́же то́чїю нꙋ̑жднаѧ глаго́лати къ по́льзѣ слы́шащихъ и҆ пѣ́ти хрⷭ҇тꙋ̀: бл҃гослове́нъ бг҃ъ ѻ҆тє́цъ на́шихъ.

Нищетꙋ̀ самово́льнꙋю хрⷭ҇та̀ ра́ди стѧжа́въ, и҆ ѿ всѣ́хъ жите́йскихъ без̾имѣ́ненъ пребы́лъ є҆сѝ, добродѣ́тельми же ѡ҆богати́лсѧ є҆сѝ, и҆ мно́гихъ къ ре́вности воздви́глъ є҆сѝ, наꙋча́ѧ пѣ́ти хрⷭ҇тꙋ̀: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Вы́шнѧгѡ ѡ҆свѧще́нное бж҃е́ственное селе́нїе, ра́дꙋйсѧ. тобо́ю бо даде́сѧ ра́дость, бцⷣе, зовꙋ́щымъ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Цѣломꙋ́дрїе стѧжа́въ попремно́гꙋ, и҆ чистотꙋ̀ тѣле́снꙋю, ꙗ҆́коже подоба́етъ ст҃ы̑мъ, и҆́стинное же смире́нїе и҆ сокрꙋше́нїе срⷣца вельмѝ ᲂу҆держа́лъ є҆сѝ, и҆ ско́рбныхъ нанесе́нїе ра́дꙋѧсѧ прїима́лъ є҆сѝ, поѧ̀ бг҃ꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Стра́хъ бж҃їй стѧжа́въ въ себѣ̀, и҆ си́мъ наказа́въ чꙋ̑вства твоѧ̑, є҆́же не преходи́ти свои́хъ предѣ́лѡвъ, ни поврежда́тисѧ ѿ си́хъ ᲂу҆мꙋ̀. и҆ ѿсю́дꙋ бг҃ꙋ ᲂу҆годи́лъ є҆сѝ, во смире́нїи поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Ѕвѣ́рїе ди́вїи, прпⷣбне, кровоѧ́дцы сꙋ́ще, приходѧ́ще къ тебѣ̀ кро́тцы быва́хꙋ, ѿ бл҃года́ти бж҃їѧ, живꙋ́щїѧ въ тебѣ̀, ничто́же тѝ ско́рбнѡ показꙋ́юще, но и҆ повелѣ́нїю твоемꙋ̀ повинова́хꙋсѧ, пою́щаго: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Ты̀ є҆ди́на во всѣ́хъ ро́дѣхъ, дв҃о пречⷭ҇таѧ, мт҃и ꙗ҆ви́ласѧ є҆сѝ бж҃їѧ: ты̀ бжⷭ҇тва̀ была̀ є҆сѝ жили́ще, всенепоро́чнаѧ, не ѡ҆пали́вшисѧ ѻ҆гне́мъ непристꙋ́пнагѡ свѣ́та. тѣ́мже тѧ̀ всѝ бл҃гослови́мъ, мр҃і́е бг҃оневѣ́сто.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Пребы́вшꙋ тѝ, ѻ҆́тче, мнѡ́га лѣ̑та въ пꙋсты́ни, въ безмо́лвїи и҆ поще́нїи, и҆ всѣ́хъ ско́рбныхъ въ терпѣ́нїи, и҆ попремно́гꙋ бг҃ꙋ ᲂу҆годи́вшꙋ, ѿѻнꙋ́дꙋже и҆ ѻ҆́нъ тѧ̀ прославлѧ́етъ, ꙗ҆́кѡ своего̀ ᲂу҆го́дника.

Поще́нїемъ насажде́нъ бы́въ, ꙗ҆́кѡ дре́во при вода́хъ, бл҃же́нне, воздержа́нїѧ, процвѣ́лъ є҆сѝ добродѣ́тельми, и҆ въ мѣ́рꙋ дости́гъ во́зраста и҆сполне́нїѧ хрⷭ҇то́ва, и҆ дх҃о́внагѡ соверше́нїѧ полꙋчи́лъ є҆сѝ, ꙗ҆́коже мо́щно человѣ́кꙋ.

Ты̀ ᲂу҆́бѡ, прпⷣбне, хотѣ́лъ є҆сѝ ᲂу҆таи́тисѧ ѿ человѣ̑къ, и҆ є҆ди́нъ безмо́лвствовати: но бг҃ъ не ѡ҆ста́ви тебє̀ невѣ́дома бы́ти, но всѣ̑мъ показа̀ житїѐ твоѐ добродѣ́тельное, на по́льзꙋ хотѧ́щымъ стопа́мъ твои̑мъ послѣ́довати.

Бг҃оро́диченъ:

Ꙗ҆́же всѣ́ми влады́чествꙋющи тварьмѝ лю́демъ твои̑мъ да́рꙋй побѣ́дное ѡ҆долѣ́нїе, врага̀ полага́ющи примири́тельна цр҃кви, да тѧ̀ ꙗ҆́кѡ бцⷣꙋ велича́емъ.

Свѣти́ленъ:

Поревнова́въ, блаже́нне, прпⷣбномꙋ се́ргїю, ѿ негѡ́же и҆ наста́вленъ бы́въ на дх҃ѡ́вныѧ по́двиги, многолѣ́тнѣ потрꙋди́лсѧ є҆сѝ въ безмо́лвїи и҆ постѣ̀ и҆ про́чїихъ страда́нїихъ: и҆ ны́нѣ во свѣ́тѣ ст҃ы́ѧ трⷪ҇цы соводворѧ́ѧсѧ, на́съ помина́й.

Два́жды.

Сла́ва, и҆ ны́нѣ, пра́здника.

На хвали́техъ стїхи̑ры, на д҃, гла́съ и҃. Поⷣ: Ѽ пресла́внагѡ чꙋдесѐ!

Ѻ҆́ч҃е прпⷣбне, ꙳ ты̀ бг҃а возлю́бивъ ѿ ю҆́ности, ꙳ къ немꙋ̀ прилѣпи́лсѧ є҆сѝ, ꙳ ѡ҆ста́вивъ мі́ръ съ попече́ньми є҆гѡ̀: ꙳ и҆ ѿ всѣ́хъ ѡ҆бнажи́всѧ жите́йскихъ, ꙳ безмо́лвно житїѐ по́жилъ є҆сѝ, ꙳ несмꙋ́тнымъ ᲂу҆мо́мъ вы́нꙋ слꙋжѧ̀ бг҃ꙋ, ꙳ и҆ во смире́нїи мно́зѣ и҆ ᲂу҆миле́нїи дꙋшѝ: ꙳ тогѡ̀ ра́ди просла́ви тѧ̀ вели́кїй дарода́тель.

Два́жды.

Прпⷣбне ѻ҆́ч҃е па́ѵле, ꙳ ты̀ бг҃ꙋ послѣ́дꙋѧ, ꙳ всѣ́хъ возлюби́лъ є҆сѝ, ꙳ и҆ ѿ всѣ́хъ люби́мь бы́лъ є҆сѝ, ꙳ бл҃га́гѡ ра́ди жи́тельства ꙳ и҆ нра́ва благопристꙋ́пнагѡ, ꙳ ꙗ҆́коже ктомꙋ̀ не ꙗ҆́кѡ человѣ́ка и҆мѣ́ти, но ꙗ҆́кѡ а҆́гг҃ла: ꙳ ѿѻнꙋ́дꙋже и҆ дꙋ́шъ попече́нїе воспрїѧ́лъ є҆сѝ, ꙳ наставлѧ́ѧ сїѧ̑ твои́ми ᲂу҆че́ньми ꙳ къ нбⷭ҇номꙋ наслѣ́дїю.

Прпⷣбне, ѻ҆́ч҃е па́ѵле, ꙳ ты̀ на бг҃а ѡ҆ все́мъ ᲂу҆пова́нїе возложи́въ, ꙳ хра́мъ прече́стенъ живонача́льныѧ трⷪ҇цы воздви́глъ є҆сѝ, ꙳ бг҃ꙋ тѝ помога́ющꙋ, ꙳ и҆ ѻ҆би́тель созда́лъ є҆сѝ въ пребыва́нїе хотѧ́щымъ спасти́сѧ: ꙳ и҆ ѡ҆ си́хъ всѣ́хъ промышлѧ́ѧ ꙗ҆́кѡ при́сный ѻ҆ц҃ъ, ꙳ всѣ́хъ наставлѧ́ѧ и҆ наꙋча́ѧ, ꙳ и҆ собо́ю и҆справлѧ́ѧ, ꙳ да полꙋча́тъ бꙋ́дꙋщее блаже́нство.

Сла́ва, гла́съ г҃:

Пребл҃же́нне ѻ҆́ч҃е на́шъ па́ѵле, всѧ̑ сꙋ́щыѧ съ тобо́ю ᲂу҆чи́лъ є҆сѝ, глаго́лѧ: ча̑да, є҆ли́ка си́ла є҆́сть, подвиза́йтесѧ ѡ҆ свое́мъ спасе́нїи, и҆ терпи́те скѡ́рби лю̑ты, да полꙋ́чите бꙋ́дꙋщее бл҃же́нство. Никто́же, въ лѣ́ности пребыва́ѧ, полꙋчи́тъ бꙋ́дꙋщихъ бла̑гъ: но зако́ннѡ здѣ̀ стра́ждꙋщїи, та́мѡ зако́ннѡ вѣнчава́ютсѧ пра́ведными вѣнцы̑.

И҆ ны́нѣ: пра́здника.

Славосло́вїе вели́кое: и҆ ѿпꙋ́стъ. Ча́съ пе́рвый: и҆ коне́чный ѿпꙋ́стъ.

На лїтꙋргі́и слꙋ́жба преподо́бническаѧ.


Комментарии для сайта Cackle