Мцⷭ҇а тогѡ́же въ а҃і-й де́нь. Прпⷣбнагѡ ѻ҆ц҃а̀ на́шегѡ ѳеодо́сїа, ѻ҆́бщихъ жи́тїй нача́льника:

И҆ прпⷣбнагѡ ѻ҆ц҃а̀ на́шегѡ мїхаи́ла кло́пскагѡ, новгоро́дскагѡ чꙋдотво́рца.

Слꙋ́жба є҆гѡ̀ пи́сана по се́й слꙋ́жбѣ.

Ве́черъ, Бл҃же́нъ мꙋ́жъ, пе́рвый а҆нтїфѡ́нъ.

На Гдⷭ҇и, воззва́хъ, пое́мъ стїхи̑ры на ѕ҃, гла́съ є҃.

Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е бг҃оно́се ѳеодо́сїе, вельмѝ подвиза́лсѧ є҆сѝ въ привре́меннѣй жи́зни, въ пѣ́нїихъ и҆ поще́нїихъ и҆ бдѣ́нїихъ, ѻ҆́бразъ бы́въ твои̑мъ ᲂу҆ченикѡ́мъ: ны́нѣ же ликꙋ́еши со безтѣле́сными, хрⷭ҇та̀ непреста́ннѡ славосло́вѧ, ѿ бг҃а бг҃а сло́ва и҆ и҆зба́вителѧ, подкло́ншагѡ главꙋ̀ прⷣте́чи, и҆ ѡ҆свѧти́вшагѡ є҆стество̀ водно́е: того̀ молѝ, томꙋ̀ помоли́сѧ, прпⷣбне, дарова́ти цр҃кви є҆диномы́слїе, ми́ръ и҆ ве́лїю ми́лость.

Прпⷣбне ѻ҆́ч҃е бг҃оно́се ѳеодо́сїе, ѡ҆брѣ́тши, ꙗ҆́коже жела́ше, чи́стꙋю твою̀ дꙋ́шꙋ, дх҃а благода́ть всест҃а́гѡ въ тѧ̀ всели́сѧ, ꙗ҆́кѡ пречⷭ҇тый свѣ́тъ, є҆гѡ́же дѣ́йствомъ свѣ́тлѡ ᲂу҆кра́шенъ, хрⷭ҇та̀ непреста́ннѡ славосло́виши, во двою̀ сꙋщєствꙋ̀ є҆ди́наго сн҃а, креща́емаго рꙋко́ю прⷣте́чевою, и҆ свидѣ́тельствована гла́сомъ ѻ҆́ч҃имъ. того̀ молѝ, томꙋ̀ помоли́сѧ, прпⷣбне, дарова́ти вселе́ннѣй є҆диномы́слїе, ми́ръ и҆ ве́лїю ми́лость.

Прпⷣбне ѻ҆́ч҃е бг҃оно́се ѳеодо́сїе, лѣ́потнѡ сподо́билсѧ є҆сѝ бл҃же́нныѧ жи́зни, чистото́ю и҆ посто́мъ сїю̀ ѡ҆брѣ́тъ: жи́въ бо преста́вилсѧ є҆сѝ къ го́рнѣй жи́зни, всѣ̑мъ ра́доватисѧ ре́къ, и҆ со безпло́тными хрⷭ҇та̀ непреста́ннѡ славосло́вѧ, ѿ дв҃ы несказа́ннѡ пло́ть прїе́мшаго, и҆ пото́пльша на́шѧ грѣхѝ креще́нїемъ въ стрꙋѧ́хъ і҆ѻрда́нскихъ. того̀ молѝ, томꙋ̀ помоли́сѧ, ст҃е, дарова́ти вселе́ннѣй є҆диномы́слїе, ми́ръ и҆ ве́лїю ми́лость.

Сла́ва, гла́съ в҃:

Прпⷣбне ѻ҆́ч҃е, ꙗ҆́кѡ гра́дъ жива́гѡ бг҃а, возвесели́ша свѧще́ннꙋю твою̀ дꙋ́шꙋ рѣ̑чнаѧ стремлє́нїѧ, воды̀ ѡ҆ставлє́нїѧ, проше́дшагѡ і҆ѻрда́нъ, и҆ всѣ̑мъ концє́мъ бл҃гоче́стїѧ сло́во и҆сточи́вшагѡ хрⷭ҇та̀ бг҃а на́шегѡ. є҆го́же молѝ, всебл҃же́нне ѳеодо́сїе, спасти́сѧ дꙋша́мъ на́шымъ.

И҆ ны́нѣ, гла́съ то́йже:

Приклони́лъ є҆сѝ главꙋ̀ прⷣте́чи, сокрꙋши́лъ є҆сѝ главы̑ ѕмїє́въ: прише́дъ въ стрꙋи̑ просвѣти́лъ є҆сѝ всѧ́чєскаѧ, є҆́же сла́вити тѧ̀, сп҃се, просвѣти́телѧ дꙋ́шъ на́шихъ.

Прокі́менъ днѐ, и҆ чтє́нїѧ.

Премꙋ́дрости соломѡ́новы чте́нїе.

[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. сегѡ̀ ра́ди прїи́мꙋтъ црⷭ҇твїе бл҃голѣ́пїѧ и҆ вѣне́цъ добро́ты ѿ рꙋкѝ гдⷭ҇ни, занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ брѡнѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе. Поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды. вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дх҃ъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе: и҆ ѕлодѣ́йство преврати́тъ престо́лы си́льныхъ. [ѕ҃] Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑, концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе.

[Глава̀ г҃] Пра́ведныхъ дꙋ́ши въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе.

[Глаⷡ҇ д҃] Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀, сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:

Творе́нїе і҆ѡ́сифово:

Ви́дѣлъ є҆сѝ, ка́кѡ ѡ҆бложи́хсѧ твои́мъ ѻ҆́бразомъ, ꙳ є҆го́же созда́хъ, ꙳ па́че ᲂу҆ма̀ смири́всѧ, гдⷭ҇ь речѐ: ꙳ что̀ ᲂу҆́бѡ стра́нно, дрꙋ́же, ꙳ а҆́ще и҆ подклонѧ́юсѧ десни́цѣ твое́й, ꙳ ꙗ҆́коже є҆ди́нъ ѿ твои́хъ клеврє́тъ, ꙳ и҆ ѡ҆дѣва́юсѧ ѡ҆бнаже́нъ вода́ми; ꙳ ѡ҆бнажє́нныѧ бо хощꙋ̀ ѡ҆дѣ́ѧти, ꙗ҆́кѡ благоꙋтро́бенъ, ꙳ въ нетлѣ́нїе вѣ́чное.

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Ꙗ҆ви́сѧ воплоща́емь, но ᲂу҆тро́ба тѧ̀ прїѧ́тъ неѡпа́льна пребы́вши: ꙳ пе́щь бо и҆здале́ча сїю̀ ѡ҆бразꙋ́етъ ꙳ не ѡ҆пали́вша ѻ҆трокѡ́въ. ꙳ а҆́зъ же сѣ́но сы́й, на ѻ҆́гнь ка́кѡ положꙋ̀ дла́нь, влⷣко, ꙳ є҆гѡ́же трепе́щꙋтъ нбⷭ҇наѧ и҆ земна̑ѧ всѧ̑, ꙳ і҆и҃се всеси́льне, сп҃се дꙋ́шъ на́шихъ.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

Ты́ мѧ въ вода́хъ і҆ѻрда́нскихъ ѡ҆мы́й, скве́рны ѿню́дъ не и҆мꙋ́ща, гдⷭ҇ь речѐ: и҆ ѡ҆скве́рншеесѧ є҆стество̀ человѣ́ческое ꙳ престꙋпле́нїемъ а҆да́ма, ѡ҆мы́вшеесѧ но́во бꙋ́детъ. ꙳ мнѣ́ бо креща́емꙋ, ꙳ ѡ҆бновле́нїе всѣ̑мъ человѣ́кѡмъ ꙳ водо́ю и҆ дх҃омъ быва́етъ.

Сла́ва, гла́съ и҃. Стꙋді́тово:

Мона́хѡвъ мно́жества, наста́вника тѧ̀ почита́емъ, ѻ҆́ч҃е на́шъ ѳеодо́сїе: твое́ю бо стезе́ю вои́стиннꙋ пра́вѡ ходи́ти позна́хомъ. Бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ првⷣныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, гла́съ то́йже:

А҆́гг҃льскаѧ вѡ́инства ᲂу҆жасо́шасѧ ѡ҆ ви́димѣмъ, дне́сь во і҆ѻрда́нѣ на́гꙋ стоѧ́щꙋ тѝ, сп҃се, въ вода́хъ, и҆ пречи́стый ве́рхъ тво́й прекло́ншꙋ крести́тисѧ ѿ і҆ѡа́нна. тебѣ́ бо ѡ҆бнища́вшꙋ во́лею, мі́ръ ѡ҆богати́сѧ: гдⷭ҇и, сла́ва тебѣ̀.

Тропа́рь, гла́съ и҃:

Сле́зъ твои́хъ тече́ньми, пꙋсты́ни безпло́дное воздѣ́лалъ є҆сѝ, и҆ и҆̀же и҆з̾ глꙋбины̀ воздыха́ньми во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀: ѳеодо́сїе ѻ҆́ч҃е на́шъ, молѝ хрⷭ҇та̀ бг҃а, спасти́сѧ дꙋша́мъ на́шымъ.

Сла́ва, и҆ ны́нѣ, пра́здника, гла́съ а҃:

Во і҆ѻрда́нѣ креща́ющꙋсѧ тебѣ̀, гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ, и҆ дх҃ъ, въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника. И҆ ѻ҆бы̑чныѧ каѳі̑смы.

По а҃-й стїхоло́гїи сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

І҆исꙋ́съ наѵи́нъ во і҆ѻрда́нѣ рѣцѣ̀ преводѧ̀ лю́ди, и҆ бж҃їй кївѡ́тъ, сѣннопи́шетъ бꙋ́дꙋщее бл҃годѣ́тельство: ѻ҆́бразъ бо на́мъ воз̾ѻбраже́нїѧ, и҆ начерта́нїе нело́жно порожде́нїѧ, та́инственное прехожде́нїе ѻ҆бои́ми сѣннопи́шетъ дх҃омъ. хрⷭ҇то́съ ꙗ҆ви́сѧ на і҆ѻрда́нѣ ѡ҆ст҃и́ти во́ды.

Сла́ва, и҆ ны́нѣ, то́йже.

По в҃-й стїхоло́гїи сѣда́ленъ, гла́съ є҃. Подо́бенъ: Собезнача́льное сло́во:

Є҆диноче́стное сло́во ѻ҆ц҃ꙋ̀ и҆ дх҃ꙋ, воплоще́нно за милосе́рдїе, и҆ креща́емо, а҆́гг҃льстїи ли́цы ви́дѣвше трепета́хꙋ: и҆ і҆ѻрда́нъ рѣка̀ ᲂу҆стыдѣ́вшисѧ и҆ ᲂу҆боѧ́вшисѧ возврати́сѧ вспѧ́ть, на́съ возводѧ̀ къ высотѣ̀ спасе́нїѧ, страстьмѝ и҆стлѣ́вшыѧ.

Сла́ва, и҆ ны́нѣ, то́йже.

По полѷеле́и сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Къ бжⷭ҇твеннѣй высотѣ̀ твоѧ̑ воздѣ́въ рꙋ́ки, сто́лпъ, прпⷣбне, свѣтоно́сенъ ꙗ҆ви́лсѧ є҆сѝ, моли́твенными зарѧ́ми сїѧ́ѧ: къ нб҃си́ бо впери́въ мы́сль, и҆ неизглаго́ланныхъ бы́въ прича́стникъ, ве́сь ѡ҆блиста́лъ є҆сѝ, хрⷭ҇та̀ бг҃а молѧ̀, дарова́ти на́мъ ве́лїю ми́лость.

Два́жды.

Сла́ва, и҆ ны́нѣ, пра́здника. Подо́бенъ: Дв҃а дне́сь:

Влⷣка дне́сь на і҆ѻрда́нъ прїи́де, кре́щсѧ въ вода́хъ ѿ бжⷭ҇твеннагѡ прⷣте́чи. свы́ше же ѻ҆ц҃ъ свидѣ́тельствоваше: се́й є҆́сть сн҃ъ мо́й, ѡ҆ не́мже благоволи́хъ. и҆ дх҃ъ ꙗ҆ви́сѧ стра́ннымъ ви́домъ голꙋби́нымъ надъ ни́мъ.

Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе лꙋкѝ, зача́ло к҃д.

По н҃-мъ ѱалмѣ̀ стїхи́ра, гла́съ ѕ҃:

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безпоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

Канѡ́нъ пра́здника со і҆рмосо́мъ на и҃.

Гла́съ в҃. Пѣ́снь а҃. І҆рмо́съ:

Ше́ствꙋетъ морскꙋ́ю волнѧ́щꙋюсѧ бꙋ́рю, сꙋ́шꙋ а҆́бїе і҆и҃ль ꙗ҆́вльшꙋюсѧ: че́рмный же по́нтъ трїста́ты є҆гѵ́пєтскїѧ покры̀ кꙋ́пнѡ, водостла́ненъ гро́бъ, си́лою крѣ́пкою десни́цы влⷣчни.

Оу҆́трꙋ ꙗ҆́вльшꙋсѧ человѣ́кѡмъ свѣтоно́снꙋ, ны́нѣ ѿ пꙋсты́ни къ вода́мъ і҆ѻрда̑нскимъ, цр҃ю̀, преклони́лъ є҆сѝ сл҃нца твою̀ вы́ю, ли́ка мра́чна родонача́льника и҆схи́тити, скве́рны же всѧ́кїѧ ѡ҆чи́стити тва́рь.

Безнача́льне, стрꙋѧ́мъ спогре́бшасѧ тебѣ̀, сло́ве, но́ваго прево́диши и҆стлѣ́вшаго ле́стїю: сегѡ̀ несказа́ннѡ ѿ ѻ҆ц҃а̀ прїе́мъ гла́съ держа́венъ: се́й возлю́бленный, ра́венъ же мѝ є҆́сть ѻ҆́трокъ є҆стество́мъ.

Канѡ́нъ ст҃а́гѡ на ѕ҃. Ѳеофа́ново.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Ꙗ҆́кѡ мꙋ́дръ чинонача́льникъ на́шъ, ѻ҆́ч҃е ѳеодо́сїе, бг҃олѣ́пнѡ пѣ́снь предначнѝ, прише́дшемꙋ во всемі́рное спасе́нїе, хрⷭ҇тꙋ̀ бг҃ꙋ, и҆ всест҃ꙋ́ю па́мѧть твою̀ съ собо́ю просла́вльшемꙋ.

И҆зъ пꙋсты́ни прⷣте́ча хрⷭ҇то́въ, ѿ а҆арѡ́новы є҆лїсаве́ти прозѧбы́й прїи́де: въ кꙋпѣ́ли же ѳеодо́сїй роди́всѧ дх҃омъ, пꙋстыннограждани́нъ бы́сть, і҆и҃сꙋ послѣ́дствꙋѧ.

Кре́щшꙋсѧ въ стрꙋѧ́хъ хрⷭ҇тꙋ̀, і҆и҃льтескагѡ собо́рища потреби́сѧ шата́нїе, въ цр҃кви же равноа́гг҃льно жи́тельство насади́сѧ, є҆́же неꙋкло́ннѡ соверши́лъ є҆сѝ, всеблаже́нне ѳеодо́сїе.

Ѻ҆́бщникъ стра́сти бы́въ, ѻ҆́ч҃е, поще́нїемъ, на́съ ра́ди на крⷭ҇тѣ̀ пригвожде́нномꙋ, досто́йнѡ соѻбра́зенъ бы́лъ є҆сѝ тогѡ̀ воскрⷭ҇нїѧ, и҆ снаслѣ́дникъ бы́лъ є҆сѝ сла́вы, ѳеодо́сїе.

Бг҃оро́диченъ:

Ѻ҆трокови́цъ бжⷭ҇твенный ли́къ, бжⷭ҇твеннѣйше въ жена́хъ тѧ̀ до́брꙋю и҆менꙋ́ютъ, бцⷣе влⷣчце, добро́тами ᲂу҆кра́шеннꙋю бжⷭ҇тва̀: добротвори́тельное бо сло́во па́че сло́ва родила̀ є҆сѝ.

Катава́сїа: Глꙋбины̀ ѿкры́лъ є҆́сть дно̀:

Пѣ́снь г҃. І҆рмо́съ:

Є҆ли́цы дре́внихъ и҆зрѣши́хомсѧ сѣ́тей, бра́шенъ львѡ́въ сотре́нныхъ члено́вными, ра́дꙋимсѧ и҆ разшири́мъ ᲂу҆ста̀, сло́во плетꙋ́ще ѿ слове́съ сладкопѣ́нїѧ, и҆́мже къ на́мъ наслажда́етсѧ дарова́нїй.

Оу҆мерщвле́нїе пе́рвѣе насади́вый тва́ри, ѕвѣ́рѧ ѕлодѣ́йственнагѡ воѡбра́жсѧ въ є҆стество̀, ѡ҆мрача́етсѧ плотски́мъ прише́ствїемъ, ᲂу҆́трꙋ ꙗ҆́вльшꙋсѧ, прирази́всѧ влⷣцѣ, сокрꙋши́ти свою̀ вражде́бнꙋю главꙋ̀.

Влече́тъ къ себѣ̀ бг҃озда́нное є҆стество̀, ᲂу҆тро́бы мꙋчи́телѧ, погребе́нное предѣ́лы: ражда́етсѧ па́ки земноро́дныхъ ѡ҆бновле́нїе, дѣ́ло держа́вно соверша́ѧ влⷣка, прїи́де бо то́е ѡ҆чи́стити хотѧ̀.

И҆́нъ. І҆рмо́съ:

Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь прише́ствїемъ твои́мъ, въ не́йже ᲂу҆тверди́сѧ моѐ се́рдце.

Вода́ми покрыва́ѧ превы́спрєннѧѧ гдⷭ҇ь, тѣле́снѡ ѡ҆дѣ́ѧшесѧ въ стрꙋи̑ і҆ѻрда̑нскїѧ: въ не́мже ᲂу҆тверди́сѧ се́рдце моѐ.

Свѣ́тъ во і҆ѻрда́нѣ бжⷭ҇твенный возсїѧ́вый, прозѧбе́нїе сꙋ́щымъ на землѝ бг҃ода́нное, бл҃гослове́нїѧ и҆ произволе́нїѧ блага́гѡ проѧвлѧ́етъ тѧ̀, ѳеодо́сїе.

Ѡ҆ста́вилъ є҆сѝ мі́ръ и҆ ꙗ҆̀же въ мі́рѣ, прпⷣбне, бы́вшемꙋ ѡ҆бнаже́нїю влⷣчню подо́бѧсѧ на і҆ѻрда́нѣ, ѳеодо́сїе.

Крⷭ҇тъ сп҃совъ на ра́мена взе́мъ, поте́клъ є҆сѝ на гро́бъ є҆гѡ̀, ꙗ҆́коже є҆ле́нь на и҆сто́чники водны̑ѧ спаси́тєльныѧ, всебл҃же́нне ѳеодо́сїе.

Бг҃оро́диченъ:

Чи́ни ᲂу҆жасо́шасѧ а҆́гг҃льстїи, всечи́стаѧ, и҆ человѣ́чєскаѧ ᲂу҆страши́шасѧ сердца̀ ѡ҆ ржⷭ҇твѣ̀ твое́мъ: тѣ́мъ тѧ̀, бцⷣе, вѣ́рою почита́емъ.

Катава́сїа: Крѣ́пость даѧ́й царє́мъ на́шымъ гдⷭ҇ь:

Конда́къ пра́здника, гла́съ д҃:

Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й, гдⷭ҇и, зна́менасѧ на на́съ въ ра́зꙋмѣ пою́щихъ тѧ̀: прише́лъ є҆сѝ и҆ ꙗ҆ви́лсѧ є҆сѝ свѣ́тъ непристꙋ́пный.

І҆́косъ:

Галїле́и ꙗ҆зы́честѣй, завꙋлѡ́нстѣй странѣ̀, и҆ нефѳали́мстѣй землѝ, ꙗ҆́коже речѐ прⷪ҇ро́къ, свѣ́тъ вели́къ возсїѧ̀ хрⷭ҇то́съ. Ѡ҆мрачє́ннымъ свѣтла̀ ꙗ҆ви́сѧ зарѧ̀, и҆з̾ виѳлее́ма ѡ҆блиста́ющаѧ, па́че же и҆зъ мр҃і́и гдⷭ҇ь, все́й вселе́ннѣй возсїѧва́етъ лꙋчы̀ сл҃нце пра́вды. тѣ́мже, и҆̀же ѿ а҆да́ма, назі́и, прїиди́те, всѝ, ѡ҆блече́мсѧ въ него̀, да согрѣ́емсѧ: покрыва́етъ бо нагі̑ѧ, и҆ просвѣща́етъ тє́мныѧ. Прише́лъ є҆сѝ и҆ ꙗ҆ви́лсѧ є҆сѝ свѣ́тъ непристꙋ́пный.

Сѣда́ленъ ст҃а́гѡ, гла́съ и҃. Подо́бенъ: Премꙋ́дрости:

Воздержа́нїемъ и҆ болѣ́зньми, и҆ моли́твами дꙋ́шꙋ твою̀ ᲂу҆краси́въ бг҃олѣ́пнѡ, бы́лъ є҆сѝ соприча́стникъ мꙋ́ченикѡмъ, бл҃же́нне, и҆ чꙋде́съ вои́стиннꙋ да́ры прїѧ́лъ є҆сѝ, є҆́же и҆сцѣлѧ́ти недꙋ́ги вѣ́рою чтꙋ́щихъ тѧ̀. тѣ́мже и҆ де́мѡнѡвъ ѿгонѧ́ѧ мно́жєства, подае́ши и҆сцѣлє́нїѧ человѣ́кѡмъ бл҃года́тїю: бг҃оно́се ѳеодо́сїе, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти пра́зднꙋющымъ вѣ́рою па́мѧть твою̀.

Два́жды.

Сла́ва, и҆ ны́нѣ, пра́здника, гла́съ то́йже:

І҆ѻрда́нъ стрꙋѧ́ми слꙋ́житъ, и҆ і҆ѡа́ннъ простира́етъ рꙋ́кꙋ тлѣ́ннꙋю, ꙗ҆́вльшꙋсѧ тебѣ̀, неви́диме, пло́тїю ко креще́нїю: но ѻ҆́въ ᲂу҆́бѡ возвраща́шесѧ вспѧ́ть стра́хомъ, ѻ҆́въ же а҆́бїе держа́ше съ тре́петомъ тѧ̀ нетлѣ́ннаго. Вои́стиннꙋ а҆́гнецъ бж҃їй, и҆сто́чникъ присноживо́тный, и҆сто́чники же и҆ морѧ̀ и҆ человѣ́ки ѡ҆свѧти́въ: трⷪ҇ца бо просїѧ̀, свы́ше сн҃а тѧ̀ и҆менꙋ́етъ роди́тель, и҆ ст҃ы́й дх҃ъ снизхо́дитъ.

Пѣ́снь д҃. І҆рмо́съ:

Ѻ҆гне́мъ ѡ҆чи́щсѧ та́йнагѡ зрѣ́нїѧ, поѧ̀ прⷪ҇ро́къ человѣ́кѡвъ новодѣ́йство, возглаша́етъ гла́съ, дх҃омъ пле́щꙋщъ, воплоще́нїе ꙗ҆влѧ́ющь неизрече́нна сло́ва, и҆́мже си́льныхъ держа̑вы сотро́шасѧ.

По́сланъ ѿ ѻ҆ц҃а̀, пресвѣ́тлое сло́во, но́щи ѿгна́ти ѕломра́чное стремле́нїе, и҆ и҆скорени́ти грѧде́ши человѣ́кѡвъ грѣхѝ, сы́ны же привлещѝ твои́мъ креще́нїемъ, бл҃же, свѣ̑тлы, ѿ стрꙋ́й і҆ѻрда́нскихъ.

Са́мое прови́дѣвъ нарече́нное сло́во, ꙗ҆́снѡ проповѣ́дникъ вопїе́тъ тва́ри: се́й пре́жде менє̀, вторы́й пло́тїю, соѻбра́зенъ просїѧ̀ бжⷭ҇твенною си́лою, вражде́бный на́шъ ѿѧ́ти грѣ́хъ.

Па́жить ᲂу҆ себє̀ животво́рнꙋ носѧ̀, ᲂу҆ловлѧ́етъ ѕмїє́въ гнѣ́здамъ натека́ѧ мно́гими сѣтьмѝ, низлага́ѧ бг҃ъ сло́во: запина́етъ же ᲂу҆ѧзви́вшаго всемі́рный ро́дъ, сего̀ потре́бль и҆збавлѧ́етъ тва́рь.

И҆́нъ. І҆рмо́съ:

Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Въ вода́хъ главы̑ ѕмїє́въ сокрꙋши́лъ є҆сѝ, и҆ дх҃омъ, сло́ве бж҃їй, ѡ҆бнови́лъ є҆сѝ всего́ мѧ человѣ́ка. тѣ́мъ вопїю́ ти: сла́ва си́лѣ твое́й, гдⷭ҇и.

Прекло́ншемꙋ главꙋ̀ прⷣте́чи, ᲂу҆подо́бивсѧ хрⷭ҇тꙋ̀ покоре́нїемъ, и҆ и҆зрѧ́днымъ смире́нїемъ, ѻ҆́ч҃е ѳеодо́сїе, на добродѣ́тели возше́лъ є҆сѝ сто́лпъ непоколеби́мый.

Дв҃ѣ и҆ мт҃ри послꙋжи́въ хрⷭ҇та̀ бг҃а, непобори́мꙋ бл҃года́ть прїѧ́лъ є҆сѝ дх҃а, ѻ҆́ч҃е ѳеодо́сїе, и҆ врагѝ неви̑димыѧ низложи́лъ є҆сѝ.

Волхвѡ́въ тѧ̀ сла́вный верте́пъ прїе́мый, дароно́сца показа̀ на́съ ра́ди кре́щшемꙋсѧ хрⷭ҇тꙋ̀, вѣ́рꙋ, ѳеодо́сїе, и҆ съ наде́ждею любо́вь приносѧ́ща.

Стрⷭ҇тьмѝ влⷣки хрⷭ҇та̀ ᲂу҆крѣплѧ́емь, со́вѣстїю любе́зною претерпѣ́лъ є҆сѝ мꙋче́нїе, ѻ҆́ч҃е ѳеодо́сїе, съ те́мнымъ борѧ́сѧ мїроде́ржцемъ.

Бг҃оро́диченъ:

Зачала̀ є҆сѝ во ᲂу҆тро́бѣ твое́й безсѣ́меннѡ гдⷭ҇а, и҆ сего̀ родила̀ є҆сѝ воплоще́нна, спаса́ющаго мі́ръ мл҃твами твои́ми. тѣ́мже тѝ зове́мъ: ра́дꙋйсѧ, приснодв҃о влⷣчце.

Катава́сїа: Оу҆слы́шахъ, гдⷭ҇и, гла́съ тво́й:

Пѣ́снь є҃. І҆рмо́съ:

Врага̀ те́мнагѡ и҆ ѡ҆скверне́ннагѡ ꙗ҆́да ѡ҆чище́нїемъ дх҃а и҆змове́ни, къ но́вой приста́хомъ небла́зненной стезѝ, водѧ́щей въ непристꙋ́пнꙋю ра́дость, є҆ди́нѣмъ пристꙋ́пнꙋ, и҆̀мже бг҃ъ примири́сѧ.

Ви́дѣвъ зижди́тель, во мра́цѣ прегрѣше́нїй плени́цами неизбѣ́жными, є҆го́же воѡбразѝ пє́рсты, поставлѧ́етъ на ѻ҆бою̀ ра̑мꙋ воздви́гъ горѣ̀, ны́нѣ во многотекꙋ́щихъ вода́хъ ѡ҆мыва́ѧ стꙋда̀ дре́внѧгѡ, а҆да́мова ѕла́гѡ пра́ва.

Со бл҃гоче́стїемъ притеце́мъ прилѣ́жнѡ ко и҆сто́чникѡмъ пречи̑стымъ тече́нїѧ спаси́тельнагѡ. Сло́во ᲂу҆смотрѧ́юще ѡ҆ нетлѣ́нныѧ, почерпа̑ла приносѧ́ще жа́жди бжⷭ҇твенныѧ, мі́ра сла́достнѣ и҆сцѣлѧ́ѧ недꙋ́гъ.

И҆́нъ. І҆рмо́съ:

Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы. (с. 314)

Возже́гъ ᲂу҆́мъ, и҆́же на́съ въ вода́хъ ѡ҆бнови́вшагѡ мꙋ́дрѣ ᲂу҆тверди́лъ є҆сѝ низве́рженный поще́нїемъ, повѣ́шеньми тѣ́ло, всебл҃же́нне ѳеодо́сїе.

Житїѐ при́снѡ сме́рти положи́въ поꙋче́нїе, ѿити́ же тща́всѧ къ ꙗ҆́вльшемꙋсѧ на́съ ра́ди пло́тїю, себѣ̀ сотвори́лъ є҆сѝ гро́бъ, ѳеодо́сїе.

Сме́рть хрⷭ҇то́вꙋ во́льнꙋю тво́й ᲂу҆чени́къ сла́вный васі́лїй, ѻ҆́ч҃е ѳеодо́сїе, подража́ѧ, но́вый ѡ҆бновлѧ́етъ гро́бъ ра́дꙋѧсѧ.

Бг҃оро́диченъ:

Сѐ во ᲂу҆тро́бѣ, бцⷣе всечⷭ҇таѧ, хрⷭ҇та̀ бг҃а, па́че сло́ва, и҆мѣ́ла є҆сѝ, ꙗ҆́коже и҆са́їа проречѐ, па́че є҆стества́ же сего̀, бг҃ороди́тельнице, родила̀ є҆сѝ.

Катава́сїа: І҆и҃съ, живота̀ нача́льникъ:

Пѣ́снь ѕ҃. І҆рмо́съ:

Вожделѣ́ннагѡ ꙗ҆́вствова со всебл҃же́ннымъ гла́сомъ ѻ҆ц҃ъ, є҆го́же и҆з̾ чре́ва ѿры́гнꙋ: є҆́й, глаго́летъ, се́й соесте́ственъ сн҃ъ сы́й свѣтоза́ренъ, произни́че и҆з̾ человѣ́ча ро́да: сло́во же моѐ жи́во, и҆ чл҃вѣ́къ промышле́нїемъ.

Ѿ глꙋби́ннагѡ льва̀, тревече́рнїй стра́ннѣ прⷪ҇ро́къ во внꙋ́треннихъ валѧ́ѧсѧ, а҆́бїе произы́де, пакибытїѧ̀ спасе́нїе, ѿ ѕмі́ѧ человѣкоꙋбі́йцы, всѣ̑мъ пред̾ѧвлѧ́ѧ въ послѣ̑днѧѧ лѣ̑та.

Ѿве́рстꙋ нб҃ꙋ всесвѣ́тлыхъ писа́нїй, ᲂу҆чени́къ зри́тъ ѿ ѻ҆ц҃а̀ посыла́емь: пребыва́ющъ же дх҃ъ на пречи́стѣмъ сло́вѣ наше́дъ, ꙗ҆́кѡ го́лꙋбь, неизрече́ннымъ ѻ҆́бразомъ, лю́демъ же ꙗ҆влѧ́етсѧ, прише́дшымъ ко влⷣцѣ.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Нетлѣ́нїе на́мъ дарова́лъ є҆сѝ, хрⷭ҇тѐ, въ воскрⷭ҇нїи твое́мъ, тѣ́мже васі́лїй, сла́вный ᲂу҆го́дникъ тво́й, и҆ ᲂу҆́меръ, ꙗ҆́коже жи́въ ꙗ҆влѧ́етсѧ.

Ѡ҆чища́ѧй мі́ръ креща́етсѧ, менє̀ ра́ди бг҃ъ чл҃вѣ́къ по мнѣ̀ бы́въ: є҆го́же во двꙋ́хъ є҆стества́хъ, ѳеодо́сїе бл҃же́нне, проповѣ́далъ є҆сѝ.

Сла́дость весе́лїѧ хрⷭ҇тꙋ̀ бг҃ꙋ, мѷроно́сицъ сле́зы ѡ҆бра́щшемꙋ въ ра́дость, ѳеодо́сїе, то́ки сле́зъ твои́хъ и҆ска́паша.

Бг҃оро́диченъ:

Милосе́рдїѧ твоегѡ̀ сподо́би мѧ̀, ꙗ҆́же ми́лостивѣйшаго сло́ва ро́ждшаѧ, свое́ю кро́вїю ѿ тлѝ человѣ́ки и҆зба́вльшаго.

Катава́сїа: Гла́съ словесѐ:

Конда́къ, гла́съ и҃. Подо́бенъ: Взбра́нной:

Насажде́нъ во дво́рѣхъ гдⷭ҇а твоегѡ̀, прпⷣбными твои́ми добродѣ́тельми краснѡ̀ процвѣ́лъ є҆сѝ, и҆ ᲂу҆мно́жилъ є҆сѝ ча̑да твоѧ̑ въ пꙋсты́ни, сле́зъ твои́хъ тꙋ́чами напаѧ́ємаѧ, стадонача́льниче бж҃їи бжⷭ҇твенныхъ дворѡ́въ. тѣ́мже зове́мъ: ра́дꙋйсѧ, ѻ҆́ч҃е ѳеодо́сїе.

І҆́косъ:

Человѣ́къ ᲂу҆́бѡ є҆стество́мъ бы́лъ є҆сѝ, ѻ҆́ч҃е, но ꙗ҆ви́лсѧ є҆сѝ сограждани́нъ а҆́гг҃лѡвъ: ꙗ҆́кѡ бо безпло́тенъ на землѝ пожи́въ, мꙋ́дре, плотско́е всѐ промышле́нїе ѿве́рглъ є҆сѝ. тѣ́мже и҆ ѿ на́съ слы́шиши: ра́дꙋйсѧ, ѻ҆тца̀ благочести́вагѡ ѻ҆́трасле: ра́дꙋйсѧ, ма́тере благоговѣ́йныѧ вѣ́твь: ра́дꙋйсѧ, пꙋсты́нный граждани́не всекра́сный: ра́дꙋйсѧ, вселе́нныѧ свѣти́льниче многосвѣ́тлый: ра́дꙋйсѧ, ꙗ҆́кѡ ѿ ю҆́ности послѣ́довалъ є҆сѝ хрⷭ҇тꙋ̀: ра́дꙋйсѧ, ꙗ҆́кѡ ᲂу҆вѧди́лъ є҆сѝ плотскі̑ѧ сла̑сти: ра́дꙋйсѧ, мона́шествꙋющихъ хода́тай спасе́нїѧ: ра́дꙋйсѧ, ᲂу҆ныва́ющихъ ѻ҆́бразъ ᲂу҆тѣше́нїѧ: ра́дꙋйсѧ, мнѡ́гїѧ ѿ ле́сти и҆зба́вивый: ра́дꙋйсѧ, то́ки чꙋде́съ да́рꙋѧ: ра́дꙋйсѧ, ѡ҆ ни́щихъ попече́нїе сотвори́вый: ра́дꙋйсѧ, на́шъ предста́телю и҆ и҆зба́вителю: ра́дꙋйсѧ, ѻ҆́ч҃е ѳеодо́сїе.

Пѣ́снь з҃. І҆рмо́съ:

Ѡ҆палѝ стрꙋе́ю ѕмі́євы главы̑ пе́щный высо́кїй пла́мень, ю҆́ношы носѧ́щъ благочести̑выѧ, ᲂу҆ти́шивый неꙋдободержи́мꙋю мглꙋ̀ и҆зъ грѣха̀, всю́ же ѡ҆мыва́етъ росо́ю дх҃а.

Тебѐ живописꙋ́ющїй а҆ссѷрі́йскїй пла́мень ᲂу҆жа́сенъ поставлѧ́еши, въ ро́сꙋ преведе́нъ. тѣ́мже вода̀ ны́нѣ ꙗ҆́коже пла́мень, ѡ҆дѣва́ѧй вре́днꙋю ѕло́бꙋ, хрⷭ҇тѐ, прикрове́ннꙋю ѡ҆палѧ́етъ, ѿ поползнове́нныѧ стезѝ призыва́ющи.

Раздѣ́льшꙋсѧ і҆ѻрда́нꙋ дре́вле, по сꙋ́хꙋ прехо́дѧтъ лю́дїе і҆и҃льстїи, тебѐ держа́внѣйшаго, содержа́ща тва́рь некосни́тельнѣ, ны́нѣ въ вода́хъ написꙋ́ющїи, къ нетлѣ́ннѣй и҆ поле́знѣй стезѝ.

Вѣ́мы пе́рвѣе всепа́гꙋбный пото́пъ, ми́лостивнѡ тѧ̀ всѣ́хъ во тлю̀ привестѝ. ѽ тревели̑каѧ сотворѧ́ѧ, и҆ стра̑ннаѧ! ны́нѣ же пото́пльша, хрⷭ҇тѐ, грѣ́хъ за бл҃госе́рдїе и҆ человѣ́ческое спасе́нїе.

И҆́нъ. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Стрꙋю̀ попалѧ́ющꙋю грѣ́хъ, и҆ пла́мень ѡ҆роша́ющь человѣ́ческїй ро́дъ, гдⷭ҇и, во твое́мъ креще́нїи совокꙋпи́въ, сло́ве бж҃їй, превозноси́мый бж҃е, бл҃гослове́нъ є҆сѝ и҆ препросла́вленъ.

Пе́щь сотво́ршемꙋ і҆ѻрда́нъ, тебѐ сама́го ꙗ҆́кѡ кади́ло всесоже́глъ є҆сѝ, прпⷣбне, и҆ пла́мень небе́сный, нело́женъ ѻ҆́бразъ бжⷭ҇твеннагѡ манове́нїѧ прїе́мъ, хра́мъ водрꙋзи́лъ є҆сѝ дꙋ́шъ спаси́тельный.

Твои́ми воево́дствы мѡѷсе́єва повинꙋ́ютсѧ, бл҃года́ти ꙗ҆́вльшейсѧ, прпⷣбне: враги́ бо неви̑димыѧ низложи́въ, гра́дъ нбⷭ҇ный наслѣ́дꙋютъ твоѝ лю́дїе, всехва́льне.

Стрꙋѧ́ми погре́бшемꙋ грѣ́хъ, тебѐ сама́го ѡ҆бита́лище сотвори́лъ є҆сѝ, ѳеодо́сїе, бг҃оꙋго́дное, хра́мъ созда́въ приноси́ти непреста́ннꙋю пѣ́снь, законоположи́лъ є҆сѝ многоѧзы́чными гла́сы.

Ѻ҆трокѡ́въ подража́ѧ дерзнове́нїе, мꙋчи́телѧ ѻ҆гнедохнове́нное преще́нїе ᲂу҆кори́лъ є҆сѝ, мꙋ́дрѣ предста́тельствꙋѧ по цр҃кви хрⷭ҇то́вѣ, ѻ҆́ч҃е ѳеодо́сїе, є҆ѧ́же ра́ди во́льнѡ ꙗ҆ви́сѧ пло́тїю распина́емый.

Бг҃оро́диченъ:

Всечи́стое зача́тїе, нетлѣ́нное ржⷭ҇тво̀, ты̀ є҆ди́на показа́ла є҆сѝ, дв҃а пребы́вши: бг҃а бо зачала̀ є҆сѝ надъ всѣ́ми сꙋ́щаго, чⷭ҇таѧ, чл҃вѣ́ка бы́вша, вѣ́рныхъ на спасе́нїе и҆ и҆збавле́нїе.

Катава́сїа: Ю҆́ношы бл҃гочести̑выѧ:

Пѣ́снь и҃. І҆рмо́съ:

Свобо́дна ᲂу҆́бѡ тва́рь познава́етсѧ, и҆ сы́нове свѣ́та пре́жде ѡ҆мраче́ннїи: є҆ди́нъ сте́нетъ тмы̀ предста́тель. Ны́нѣ да бл҃гослови́тъ ᲂу҆се́рднѡ вино́внаго, пре́жде ѻ҆каѧ́нное ꙗ҆зы́кѡвъ всенаслѣ́дїе.

Трїѐ бг҃ови́днїи, во ѻ҆гнѝ ѡ҆роша́еми, ѡ҆зарѧ́ющесѧ тремѝ всесвѣ́тлѣ ст҃ы́нѧми, ꙗ҆́вѣ пока́зовахꙋ превы́шнее є҆стество̀ смѣше́нїемъ человѣ́ческимъ, ѻ҆гнепалѧ́щее росо́ю ми́лостивнѡ всѧ́кꙋ па́гꙋбнꙋю ле́сть.

Да ᲂу҆бѣли́тсѧ всѧ́кое земно́е є҆стество̀, ѿ паде́нїѧ ны́нѣ на нб҃о возводи́мо: и҆́мже бо всѧ̑ соблюда́ютсѧ сло́вомъ, текꙋ́щими стрꙋѧ́ми ѡ҆мы́вшесѧ, согрѣше́нїй пре́жнихъ ᲂу҆бѣжѐ, пресвѣ́тлѡ и҆змове́но.

И҆́нъ. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пе́щь и҆ногда̀ въ вавѷлѡ́нѣ стрꙋи̑ і҆ѻрда̑нскїѧ и҆з̾ѡбразѝ, бжⷭ҇твеннымъ кр҃ще́нїемъ, проти̑вныѧ ѡ҆палѧ́ющи, вѣ̑рныѧ же ѡ҆роша́ющи, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Тѣле́сныхъ страсте́й пред̾изше́дъ пре́жде ѿше́ствїѧ, ѳеодо́сїе, ѿ нѣ́дръ земны́хъ во́дъ и҆з̾има́ѧ, ю҆́ноши ꙗ҆влѧ́ешисѧ, зовꙋ́щꙋ: благослови́те, всѧ̑ дѣла̀ гдⷭ҇нѧ, гдⷭ҇а.

Бы́сть твои́хъ рꙋ́къ бл҃гослове́нїе, во стрꙋѧ́хъ креща́ющагѡсѧ хрⷭ҇та̀ бжⷭ҇твеннѣйшее повелѣ́нїе, невла́жнѣй землѝ ро́днѣйшаѧ вода̀, и҆ грѣ́ющее со́лнце: зерно́ бо во многопло́денъ кла́съ пшени́цы, безсѣ́меннѡ пита́шесѧ.

Во мра́къ мы́сленный свѣ́та бжⷭ҇твеннѣйшагѡ ты̀ вше́дъ, ѳеодо́сїе, и҆ скрижа̑ли пе́рстомъ бж҃їимъ написа́въ се́рдцꙋ твоемꙋ̀, бл҃гоче́стїѧ ᲂу҆чє́нїѧ прине́слъ є҆сѝ ᲂу҆ченикѡ́мъ твои̑мъ, кни́гꙋ жи́зни, всебл҃же́нне.

Вѣ́рꙋ тве́рдꙋ кровоточи́выѧ, ѻ҆́ч҃е, подража́вши жена̀, рꙋ́бищꙋ коснꙋ́вшисѧ, ꙗ҆́коже тма̀ сꙋ́щымъ въ тебѣ̀ просвѣще́нїемъ недꙋ́гъ ѿгна́сѧ: бы́лъ бо є҆сѝ и҆збра́нїѧ сосꙋ́дъ ꙗ҆́вльшемꙋсѧ хрⷭ҇тꙋ̀.

Трⷪ҇ченъ:

Тѧ̀ и҆з̾ бг҃а бг҃а ви́дѣвше, тѣле́снѣ ꙗ҆́вльшагосѧ хрⷭ҇та̀ неизглаго́ланнѡ, позна́хомъ ᲂу҆́бѡ неви́димаго ѻ҆ц҃а̀ твоего̀, и҆ дх҃а твоего̀ ст҃а́го, зовꙋ́ще: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Ты̀ ѻ҆ц҃ꙋ̀ неразлꙋ́чнаго, во ᲂу҆тро́бѣ бг҃омꙋ́жнѡ жи́тельствовавшаго, безсѣ́меннѡ зачала̀, и҆ несказа́ннѡ родила̀ є҆сѝ. тѣ́мъ тѧ̀ спасе́нїе всѣ́хъ на́съ вѣ́мы.

Катава́сїа: Та́йнꙋ пресла́внꙋю:

Пѣ́снь ѳ҃. І҆рмо́съ:

Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ, невѣ́сто всечⷭ҇таѧ, мт҃и бл҃гослове́ннаѧ! є҆́юже полꙋчи́вше всесоверше́нное спасе́нїе, досто́йнѡ хва́лимъ, ꙗ҆́кѡ бл҃годѣ́телѧ, да́ръ носѧ́ще пѣ́снь благодаре́нїѧ.

Оу҆вѣ́дѣхомъ мѡѷсе́ю кꙋпино́ю ꙗ҆влє́ннаѧ, грѧдѝ стра́нными ᲂу҆ста̑вы содѣ́ланнаѧ: ꙗ҆́кѡ бо спасе́сѧ ѻ҆́гнь носѧ́щи дв҃а, свѣтоно́сна ро́ждши бл҃годѣ́телѧ, во і҆ѻрда́нскихъ же стрꙋѧ́хъ ꙗ҆вле́нна.

Помазꙋ́еши соверша́ѧ человѣ́ческое сꙋщество̀, цр҃ю̀ безнача́льне, дх҃а ѻ҆бще́нїемъ, стрꙋѧ́ми чⷭ҇тыми ѿмы́въ и҆ тмы̀: крѣ́пость же посра́мль возвы́шеннꙋю, ны́нѣ въ безпреста́ннѣмъ возда́ти житїѝ.

И҆́нъ. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Собо́ры проповѣ́далъ є҆сѝ, бг҃омꙋ́дре ѳеодо́сїе, чⷭ҇тны́хъ равночи́слєны є҆ѵⷢ҇лїи хрⷭ҇то́выхъ, произволе́нїемъ кро́вь мꙋ́ченическꙋ прїе́мъ ре́вностїю, и҆ мꙋ́ченикъ безъ кро́ве благоче́стїѧ ꙗ҆ви́лсѧ є҆сѝ.

Сꙋ́дъ непра́веднагѡ пра́веднѡ ѡ҆сꙋдѝ, за твоѐ и҆згна́нїе прогна́вшъ, и҆ хꙋ́льными ᲂу҆стна́ми нечести́вꙋю дꙋ́шꙋ и҆з̾е́мшъ, жи́зни же лиши́вшъ жи́зни врага̀, преподо́бне.

Твоѧ̀ помина́юще ᲂу҆чє́нїѧ, ѳеодо́сїе, во двою̀ сꙋществꙋ̑ хрⷭ҇та̀ проповѣ́даемъ, двѣ̀ вѡ́ли вѣ́дꙋще, є҆сте́ствєнны и҆ дѣ̑йственны и҆ самовла̑стны, въ бз҃ѣ кре́щшемсѧ пло́тїю.

Тезоиме́нно даѧ́нїе бл҃го ѿ ѻ҆ц҃а̀ свѣ́тѡвъ, дꙋ́шъ и҆ тѣле́съ вра́чь бы́лъ є҆сѝ, снѣ́дь ѻ҆би́льна и҆ питїѐ, и҆̀же во гла́дѣ та́ющихъ и҆ жа́жди, и҆ наги́хъ ѡ҆дѣѧ́нїе, и҆ па́дающихъ и҆справле́нїе.

Не преста́й ста́до твоѐ назира́ѧ, ѻ҆́ч҃е прпⷣбне, и҆ твоѐ помина́ѧ ѡ҆бѣща́нїе, є҆́же ꙗ҆́кѡ наде́жди ко́твы непрело́мны привѧза́хомъ ка́меню, ко хрⷭ҇тꙋ̀ хода́таѧ тѧ̀ и҆мꙋ́ще, ѳеодо́сїе.

Є҆ди́ницꙋ тричи́сленнꙋю, трⷪ҇цꙋ є҆диносꙋ́щнꙋю правосла́внѡ пою́ще, вѣ́рнїи, просла́вимъ, несѣко́мо пребж҃е́ственное є҆стество̀ трисїѧ́нное, невече́рнюю зарю̀ є҆ди́нꙋ нетлѣ́ннꙋю, свѣ́тъ на́мъ возсїѧ́вшꙋю.

Бг҃оро́диченъ:

Ꙗ҆́кѡ ᲂу҆́тро ѡ҆брѣла́сѧ є҆сѝ ра́ннее въ жите́йстѣй но́щи, двⷭ҇тва зарѧ́ми ѡ҆блиста́ющи, восто́къ сл҃нца мы́сленнагѡ пра́вды на́мъ ꙗ҆́вльшаѧ, бг҃ома́ти всечи́стаѧ.

Катава́сїа: Недоꙋмѣ́етъ всѧ́къ ѧ҆зы́къ:

Свѣти́ленъ. Подо́бенъ: Посѣти́лъ ны̀:

Ѡ҆чи́стихомсѧ свѣ́тлѡ, хрⷭ҇тѐ мо́й, ѡ҆чище́нїемъ твои́мъ, и҆ ны́нѣ пра́здничною ра́достїю, ѳеодо́сїа честна́гѡ па́мѧтїю ѡ҆богати́хомсѧ: тѣ́мже мона́шествꙋющихъ веселѧ́тсѧ чи́ни.

Два́жды.

Сла́ва, и҆ ны́нѣ, пра́здника:

Ꙗ҆ви́сѧ сп҃съ бл҃года́ть и҆ и҆́стина во стрꙋѧ́хъ і҆ѻрда́нскихъ, и҆ сꙋ́щыѧ во тмѣ̀ и҆ сѣ́ни спѧ́щыѧ просвѣти́лъ є҆́сть: и҆́бо прїи́де и҆ ꙗ҆ви́сѧ свѣ́тъ непристꙋ́пный.

На хвали́техъ стїхи̑ры на д҃, гла́съ є҃. Подо́бенъ: Ра́дꙋйсѧ:

До́мъ высо́кихъ добродѣ́телей, пред̾ꙋстро́ивъ тебѐ сама́го, ѳеодо́сїе, въ бж҃е́ственнѣмъ бцⷣы сподо́билсѧ є҆сѝ хра́мѣ ѡ҆бита́ти, и҆ се́й посѣща́ти: бж҃їю бо свѣ́тлость зрѣ́ти возлюби́лъ є҆сѝ, и҆́стинныѧ же ны́нѣ сѣ́ни благолѣ́пїе, и҆ неизрече́ннꙋю зри́ши красотꙋ̀, ю҆́же ᲂу҆́бѡ ѡ҆снова̀ вы́шнїй, прпⷣбне, и҆ вселѧ́етъ преꙋсе́рднѡ къ немꙋ̀ взира́ющыѧ: того̀ молѝ низпосла́ти дꙋша́мъ на́шымъ ве́лїю млⷭ҇ть.

Болѣ́зньми по́стническими тебѐ сама́го ѡ҆чи́стивъ, подража́тель бы́лъ є҆сѝ, всебл҃же́нне, твоегѡ̀ влⷣки: и҆́бо кра́ѧ ри́зы твоеѧ̀ прикоснꙋ́вшейсѧ, недꙋ́гъ и҆сцѣли́лъ є҆сѝ: гла́домъ та́ющыѧ въ пꙋсты́ни напита́лъ є҆сѝ, ѿ неистощи́магѡ подаѧ̀ сокро́вища, ꙗ҆́кѡ тезоимени́тъ бж҃їѧ даѧ́нїѧ бы́въ: вѣ́рꙋ же правосла́внꙋю проповѣ́далъ є҆сѝ, прпⷣбне, мꙋчи́телѧ неи́стовство въ ничто́же вмѣни́въ, хрⷭ҇та̀ молѧ̀, подаю́щаго мі́рꙋ ве́лїю ми́лость.

Пла́мень къ бг҃ꙋ неꙋкло́нныѧ и҆ разжже́нныѧ и҆ те́плыѧ любвѐ вже́гъ, съ нб҃сѐ воспрїѧ́лъ є҆сѝ сїѧ́нїе, благоволе́нїе бжⷭ҇твенное тебѣ̀ возвѣща́ющее, хра́мъ ст҃ѣ́йшїй добродѣ́тели наказа́нїе созда́ти, и҆ дꙋ́шъ попече́нїе: є҆го́же наче́нъ бл҃гоче́стнѡ соверши́лъ є҆сѝ, и҆дѣ́же и҆ многострада́льное лежи́тъ тѣ́ло твоѐ, положе́ньми чи́стыми, всебл҃же́нне, преизѧ́щнѡ почита́емо. хрⷭ҇та̀ молѝ, низпосла́ти дꙋша́мъ на́шымъ ве́лїю млⷭ҇ть.

Вои́стиннꙋ да́же до ски́нїи чꙋ́дныѧ, да́же до до́мꙋ бж҃їѧ, ѳеодо́сїе, проше́лъ є҆сѝ ра́дованїемъ, и҆ весе́лїемъ дꙋшѝ: и҆дѣ́же гла́съ, ѻ҆́ч҃е, пра́зднꙋющихъ, кра́снагѡ слы́шати хотѧ́й и҆ сла́дкагѡ пѣ́нїѧ, и҆ неизрече́нныѧ дꙋшесла́дости и҆ ᲂу҆тѣше́нїѧ бы́въ въ прича́стїи, бл҃же́нне, є҆ѧ́же са́мыѧ жела́ѧ пло́ть ᲂу҆мертви́лъ є҆сѝ, ю҆́же и҆ полꙋчи́лъ є҆сѝ, бж҃е́ственною пра́вдою ᲂу҆краша́емь, хрⷭ҇та̀ молѧ̀, дꙋша́мъ на́шымъ да́ти ве́лїю млⷭ҇ть.

Сла́ва, гла́съ в҃:

Добродѣ́телей лѣ́ствица, ѻ҆́бразъ показа́сѧ на землѝ та́йнѡ, сего̀ восхва́лимъ ꙗ҆́кѡ по́стникѡвъ ᲂу҆добре́нїе, пости́всѧ бо и҆́стиннѡ ꙗ҆́коже вели́кїй а҆нтѡ́нїй, безмѣ́рное смире́нїе показа́въ: и҆ ᲂу҆па́съ лю́ди своѧ̑ благоче́стнѡ, во ѡ҆гра́дꙋ ст҃ꙋ́ю вселѝ, и҆дѣ́же ли́къ а҆́гг҃льскїй пребыва́етъ, прилѣ́жнѡ вопїе́мъ тѝ: не забꙋ́ди и҆ ны́нѣ ста́да твоегѡ̀, всебл҃же́нне ѳеодо́сїе, но моли́твами твои́ми ко гдⷭ҇ꙋ, спасѝ на́съ, мо́лимсѧ.

И҆ ны́нѣ, гла́съ то́йже:

Дне́сь хрⷭ҇то́съ на і҆ѻрда́нъ прїи́де крести́тисѧ, дне́сь і҆ѡа́ннъ каса́етсѧ верхꙋ̀ влⷣчню, си̑лы нбⷭ҇ныѧ ᲂу҆жасо́шасѧ, пресла́вное ви́дѧще та́инство, мо́ре ви́дѣ и҆ побѣжѐ, і҆ѻрда́нъ ви́дѣвъ возврати́сѧ. мы́ же просвѣ́щшесѧ вопїе́мъ: сла́ва ꙗ҆ви́вшемꙋсѧ бг҃ꙋ, и҆ на землѝ ви́дѣнномꙋ, и҆ просвѣти́вшемꙋ мі́ръ.

Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ.

На лїтꙋргі́и: Бл҃жє́нна ѿ канѡ́на пра́здника, пѣ́снь ѕ҃-ѧ на д҃: и҆ ст҃а́гѡ пѣ́снь ѕ҃-ѧ же на д҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ корі́нѳѧнѡмъ, зача́ло рѻ҃ѕ. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю бꙋ́детъ првⷣникъ:

🕅 Подоба́етъ вѣ́дати ѡ҆ се́мъ, ка́кѡ восхо́дитъ недѣ́лѧ ѡ҆ мытарѝ и҆ фарїсе́и.

Начина́етсѧ ᲂу҆́бѡ недѣ́лѧ мытарѧ̀ и҆ фарїсе́а і҆аннꙋа́рїа въ а҃і число̀ въ попра́зднство бг҃оѧвле́нїѧ, на па́мѧть прпⷣбнагѡ ѻ҆ц҃а̀ на́шегѡ ѳеодо́сїа: низхо́дитъ же феѵрꙋа́рїа по є҃і.

[Зрѝ] Вѣ́домо же бꙋ́ди: Ꙗ҆́кѡ а҆́ще прилꙋчи́тсѧ недѣ́лѧ ꙗ҆́же мытарѝ и҆ фарїсе́и, і҆аннꙋа́рїа въ а҃і: и҆ прпⷣбнагѡ ѳеодо́сїа, пое́тсѧ слꙋ́жба, є҆гда̀ є҆кклисїа́рхъ разсꙋ́дитъ, во и҆ны́й де́нь.

Въ сꙋббѡ́тꙋ ве́чера: На ма́лѣй вече́рни стїхи̑ры воскрє́сны и҆ бцⷣы, по ѻ҆бы́чаю.

На вели́цѣй вече́рни пое́мъ: Бл҃же́нъ мꙋ́жъ, каѳі́смꙋ всю̀. На Гдⷭ҇и, воззва́хъ, стїхи̑ры воскрє́сны г҃, и҆ ꙾восто́ченъ꙾ 1 а҃, и҆ пра́здника г҃, тогѡ̀ днѐ: и҆ трїѡ́ди самогла́сны в҃: повторѧ́юще а҃-ю. Сла́ва, трїѡ́ди: И҆ ны́нѣ, бг҃оро́диченъ ли гла́са: Вхо́дъ. Прокі́менъ днѐ. На лїті́и: Стїхи̑ры пра́здника, тогѡ̀ днѐ стїхѡ́вныѧ вечє́рнїѧ и҆ ᲂу҆́трєннїѧ. Сла́ва, и҆ ны́нѣ, трїѡ́ди, гла́съ г҃. На стїхо́внѣ: стїхи̑ры воскрє́сны, по а҆лфави́тꙋ. Сла́ва, пра́здника: И҆ ны́нѣ, трїѡ́ди. На бл҃гослове́нїи хлѣ́бѡвъ тропа́рь, Бцⷣе дв҃о: два́жды: и҆ пра́здника, є҆ди́ножды, и҆ чте́нїе. А҆́ще же нѣ́сть бдѣ́нїѧ, по Ны́нѣ ѿпꙋща́еши: тропа́рь воскре́сенъ: Сла́ва, и҆ ны́нѣ, пра́здника. На повече́рїи: по Досто́йнѣ, по Ѻ҆́ч҃е на́шъ, конда́къ пра́здника: Сла́ва, и҆ ны́нѣ, трїѡ́ди.

На ᲂу҆́трени: На Бг҃ъ гдⷭ҇ь, тропа́рь воскре́сенъ два́жды: Сла́ва, и҆ ны́нѣ, пра́здника. По каѳі́смахъ сѣда́льны воскрє́сны, съ бг҃орѡ́дичны и҆́хъ: и҆ чте́нїе во є҆ѵⷢ҇лїи толково́мъ, недѣ́лѧ по креще́нїи. По непоро́чнахъ тропарѝ: А҆́гг҃льскїй собо́ръ: и҆ ѵ҆пакоѝ гла́са. И҆ чте́нїе, недѣ́лѧ ѡ҆ мытарѝ и҆ фарїсе́и. Степє́нна, и҆ прокі́менъ гла́са. Є҆ѵⷢ҇лїе воскре́сное. Воскресе́нїе хрⷭ҇то́во: Ѱало́мъ н҃. Сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ, бг҃оро́диченъ: На спасе́нїѧ стези̑: Та́же, Поми́лꙋй мѧ̀, бж҃е: и҆ Мно́жєства содѣ́ѧнныхъ мно́ю лю́тыхъ: и҆ моли́тва ѻ҆бы́чнаѧ: Спасѝ, бж҃е, лю́ди твоѧ̑: Канѡ́нъ воскре́сенъ со і҆рмосо́мъ на д҃: и҆ пра́здника на д҃: и҆ трїѡ́ди на ѕ҃. Катава́сїа пра́здника. По г҃-й пѣ́сни конда́къ пра́здника и҆ і҆́косъ, и҆ сѣда́ленъ: Сла́ва, и҆ ны́нѣ, трїѡ́ди. По ѕ҃-й пѣ́сни конда́къ трїѡ́ди и҆ і҆́косъ. На ѳ҃-й пѣ́сни пое́мъ, Честнѣ́йшꙋю: Свѣти́ленъ воскре́сенъ: Сла́ва, пра́здника: И҆ ны́нѣ, трїѡ́ди. На хвали́техъ стїхи̑ры воскрє́сны г҃, и҆ пра́здника г҃, и҆ трїѡ́ди гла́са тре́тїѧгѡ съ припѣ́вы: Воскреснѝ, гдⷭ҇и бж҃е мо́й: Мытарѧ̀ и҆ фарїсе́а: в҃, И҆сповѣ́мсѧ тебѣ̀, гдⷭ҇и: Фарїсе́а велехва́льный гла́съ: Сла́ва: Ѿ дѣ́лъ похвале́ньми: И҆ ны́нѣ: Преблагослове́нна є҆сѝ: и҆ славосло́вїе вели́кое. По трисвѧто́мъ тропа́рь воскре́сенъ то́чїю: є҆ктєнїѝ, и҆ ѿпꙋ́стъ. И҆ ѻ҆бы́чнаѧ лїті́а въ притво́рѣ: въ не́йже пое́мъ, Сла́ва, и҆ ны́нѣ, стїхи́рꙋ є҆ѵⷢ҇льскꙋю, и҆ ча́съ а҃-й. На а҃ часѣ̀ тропа́рь воскре́сенъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника: и҆ соверше́нный ѿпꙋ́стъ. Та́кожде и҆ на про́чихъ часѣ́хъ глаго́лемъ тропа́рь воскре́сенъ, и҆ пра́здника: Кондаки́ же премѣнѧ́емъ.

На лїтꙋргі́и: Бл҃жє́нна гла́са на д҃: и҆ пра́здника пѣ́снь рѧдова́ѧ, на д҃: и҆ трїѡ́ди пѣ́снь ѕ҃, на д҃. По вхо́дѣ тропа́рь воскре́сенъ, и҆ пра́здника. Сла́ва, конда́къ пра́здника: И҆ ны́нѣ, трїѡ́ди. Прокі́менъ ндⷧ҇и по просвѣще́нїи. Та́же пра́здника. А҆пⷭ҇лъ, и҆ є҆ѵⷢ҇лїе и҆лѝ по просвѣще́нїи. Та́же ѡ҆ мытарѝ и҆ фарїсе́и. Прича́стный: Хвали́те гдⷭ҇а съ нб҃съ: Дрꙋгі́й: пра́здника.

Въ то́йже де́нь прпⷣбнагѡ и҆ бг҃оно́снагѡ ѻ҆ц҃а̀ на́шегѡ мїхаи́ла кло́пскагѡ, и҆́же въ вели́комъ новѣ́градѣ.

Ве́черъ: Бл҃же́нъ мꙋ́жъ, а҃-й а҆нтїфѡ́нъ: На Гдⷭ҇и, воззва́хъ, пое́мъ стїхи̑ры на ѕ҃, гла́съ в҃. Подо́бенъ: Кі́ими похва́льными вѣнцы̀:

Кі́ими похва́льными вѣнцы̑ ᲂу҆вѧзе́мъ прпⷣбнагѡ главꙋ̀, сосꙋ́да и҆збра́ннаго, цѣломꙋ́дрїѧ столпа̀, въ не́мже ст҃а́ѧ трⷪ҇ца жили́ще себѣ̀ сотворѝ, црⷭ҇твїѧ нбⷭ҇нагѡ наслѣ́дника, и҆сто́чника бжⷭ҇твенныхъ и҆сцѣле́нїй неисчерпа́емаго, проли́тїе дарова́нїй дх҃о́вныхъ, рѣкꙋ̀ мно́гихъ чꙋде́съ, ѻ҆́трасли рѡссі́йскїѧ землѝ веселѧ́щꙋ тече́ньми, бг҃оно́снаго мїхаи́ла, застꙋ́пника на́шего и҆ храни́телѧ;

Кі́ими смире́нными ᲂу҆стна́ми воспое́мъ преподо́бнаго, ревни́телѧ прⷪ҇ро́кѡмъ, а҆пⷭ҇лѡмъ и҆ мч҃никѡмъ, а҆́гг҃лѡмъ сожи́телѧ, чистотꙋ̀ дꙋше́внꙋю и҆ серде́чнꙋю соблю́дшаго ѿ пеле́нъ, безъ неѧ́же никто́же ᲂу҆́зритъ бг҃а, весе́лїе землѝ рѡссі́йскїѧ, ѡ҆ на́съ ко хрⷭ҇тꙋ̀ моле́бника, преди́внаго въ чꙋдесѣ́хъ, и҆ хрⷭ҇та̀ ра́ди всю̀ жи́знь свою̀ мꙋ́ченически сконча́вшаго;

Прїиди́те, рѡссі́йстїи собо́ри, ѱало́мски воспле́щемъ рꙋка́ми, печа́льныхъ ᲂу҆тѣ́хꙋ, и҆ ѿча́ѧнныхъ застꙋ́пника, бг҃оно́снаго ѻ҆ц҃а̀ мїхаи́ла воспои́мъ, бжⷭ҇твеннагѡ хрⷭ҇то́ва смире́нїѧ ревни́телѧ, похвалꙋ̀ вели́кагѡ нова́града, и҆ всеѧ̀ рѡссі́йскїѧ землѝ ᲂу҆добре́нїе, и҆ хрⷭ҇тїа́нѡмъ всѣ̑мъ вездѣ̀ промы́сленника, и҆ моли́твами свои́ми подаю́щаго мі́рꙋ ве́лїю ми́лость.

И҆́ны стїхи̑ры, гла́съ д҃. Подо́бенъ: Да́лъ є҆сѝ зна́менїе:

Да́лъ є҆сѝ зна́менїе ꙳ боѧ́щымсѧ тебє̀, гдⷭ҇и, ꙳ благоче́стїѧ наказа́телѧ, ꙳ возстꙋ́пльшаго на разꙋ́мный сто́лпъ, прпⷣбнаго мїхаи́ла, ꙳ пра́вдою и҆ мꙋ́жествомъ ᲂу҆кра́шена, ꙳ цѣломꙋ́дренна вои́стиннꙋ, ꙳ и҆ добродѣ́тельми превосходѧ́ща. ꙳ тѣ́мъ мы̀ тебѣ̀, хрⷭ҇тѐ, воспѣва́юще глаго́лемъ: ꙳ моли́твами преподо́бнагѡ мїхаи́ла спасѝ дꙋ́шы на́шѧ.

Да́лъ є҆сѝ зна́менїе ꙳ боѧ́щымсѧ тебє̀, гдⷭ҇и, ꙳ со́лнца свѣтлѣ́йша просвѣще́нна дꙋше́ю, ꙳ и҆ бжⷭ҇твенными блиста̑нїи рѡссі́йскꙋю зе́млю просвѣща́юща, мїхаи́ла вседо́блѧго и҆ прпⷣбнаго, ꙳ тмꙋ̀ нече́стїѧ ѿгонѧ́ща, ꙳ вѣ̑рнымъ застꙋ́пника, и҆ помо́щника въ бѣда́хъ и҆ печа́лѣхъ, ꙳ и҆ ꙗ҆́кѡ ѻ҆ч҃естволю́бца, и҆ предста́телѧ, ꙳ и҆ моли́твенника ѡ҆ дꙋша́хъ на́шихъ.

Благоꙋха́етъ ра́ка ꙳ честны́хъ твои́хъ моще́й, ꙳ бг҃оно́сне мїхаи́ле: ст҃ы́ѧ бо трⷪ҇цы селе́нїе и҆ благоꙋха́нїе бы́лъ є҆сѝ, ꙳ и҆ словесы̀ твои́ми бг҃одохнове́нными лю́ди ᲂу҆диви́лъ є҆сѝ, ꙳ и҆ рѡссі́йскꙋю зе́млю ѡ҆благоꙋха́лъ є҆сѝ. ꙳ И҆ ны́нѣ мо́лимъ тѧ̀: ꙳ помѧнѝ всѧ̑ ны̀, вѣ́рою па́мѧть твою̀ почита́ющыѧ, ꙳ ко гдⷭ҇ꙋ дерзнове́нїе ꙗ҆́кѡ стѧжа́въ, бг҃оно́се.

Сла́ва, гла́съ д҃:

Подоба́етъ вели́кагѡ нова́града наро́дѡмъ бг҃оно́снаго мїхаи́ла вездѣ̀ и҆мѣ́ти, ꙗ҆́кѡ нѣ́кꙋю ᲂу҆́тварь ца́рскꙋю и҆ сокро́вище некра́домо, всѣ̑мъ подаю́ща здра́вїѧ ѻ҆би́льнѡ бога́тство, всю̀ рѡссі́йскꙋю зе́млю во є҆ди́нство совокꙋ́пльша. Къ немꙋ́же возопїе́мъ: прпⷣбне ѻ҆́ч҃е, ѡ҆ ми́рѣ и҆ ᲂу҆строе́нїи всегѡ̀ мі́ра моли́сѧ, и҆ ѡ҆ спасе́нїи дꙋ́шъ на́шихъ.

И҆ ны́нѣ, пра́здника.

А҆́ще ли внѣ̀ попра́зднства: пое́мъ бг҃орѡ́дичны во все́й слꙋ́жбѣ ст҃а́гѡ.

Вхо́дъ. Прокі́менъ днѐ. Чтє́нїѧ трѝ. Ли́стъ рн҃а.

На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:

Є҆гда̀ бжⷭ҇твенное свы́ше зва́нїе прїи́де на тѧ̀, бг҃оно́сне мїхаи́ле, тогда̀ си́лою бж҃їею ѡ҆брѣ́лсѧ во ѻ҆би́тели ст҃ы́ѧ трⷪ҇цы, всѣ̑мъ вѣ̑рнымъ на по́льзꙋ бы́лъ є҆сѝ. Бжⷭ҇твенное хрⷭ҇то́во смире́нїе возлюби́въ, дх҃а ст҃а́го и҆мѣ́ѧ въ се́рдцы твое́мъ, и҆ любо́вїю серде́чною подвиза́всѧ, и҆ тѣ́ло твоѐ ᲂу҆дрꙋчи́въ посто́мъ и҆ бдѣ́нїемъ, ра́дꙋѧсѧ, прпⷣбне, вопїѧ́лъ є҆сѝ: сла́ва, чл҃вѣколю́бче, твоемꙋ̀ смотре́нїю.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Є҆гда̀ ѻ҆те́чества, прпⷣбне, ᲂу҆дали́лсѧ є҆сѝ, тогда̀ ꙗ҆ре́мъ гдⷭ҇ень на сѧ̀ возложи́лъ є҆сѝ, и҆ кре́стъ тво́й взе́мъ послѣ́довалъ є҆сѝ хрⷭ҇тꙋ̀. и҆ во ю҆ро́дство во́лею преложи́лсѧ є҆сѝ хрⷭ҇та̀ ра́ди, и҆ жесто́кое житїѐ на землѝ показа́лъ є҆сѝ, и҆ мнѡ́ги си́мъ ᲂу҆диви́лъ є҆сѝ. ѿѻнꙋ́дꙋже дарова̑нїѧ чꙋде́съ ѿ хрⷭ҇та̀ прїи́мъ, ра́дꙋѧсѧ вопїѧ́лъ є҆сѝ: сла́ва, чл҃вѣколю́бче, твоемꙋ̀ смотре́нїю.

Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Є҆гда̀ ᲂу҆мо́мъ возлетѣ́лъ є҆сѝ ѿ земны́хъ на нбⷭ҇наѧ, тогда̀ невозвра́тнымъ пꙋте́мъ ᲂу҆пра́вилсѧ є҆сѝ въ црⷭ҇тво нбⷭ҇ное, є҆́же и҆ полꙋчи́лъ є҆сѝ. и҆ та́мѡ со а҆́гг҃лы водворѧ́ѧсѧ, предстои́ши ст҃ѣ́й трⷪ҇цѣ, во мно́зѣ дерзнове́нїи, и҆ ра́дꙋѧсѧ вопїе́ши: сла́ва, чл҃вѣколю́бче, твоемꙋ̀ смотре́нїю.

Сла́ва, гла́съ ѕ҃. Самогла́сенъ:

Прпⷣбне ѻ҆́ч҃е бг҃оно́сне мїхаи́ле, во всю̀ зе́млю и҆зыдо́ша вѣща̑нїѧ твоѧ̑, и҆ въ концы̀ вселе́нныѧ житїѧ̀ твоегѡ̀ и҆справлє́нїѧ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ полкѝ разрꙋши́въ, а҆́гг҃льскимъ чинѡ́мъ присовокꙋпи́лсѧ є҆сѝ, и҆́хже житїю̀ ꙗ҆́вѣ поревнова́лъ є҆сѝ. Дерзнове́нїе и҆мѣ́ѧ ко гдⷭ҇ꙋ, ми́ръ и҆спросѝ дꙋша́мъ на́шымъ.

И҆ ны́нѣ, пра́здника. Тропа́рь прпⷣбнагѡ, гла́съ и҃:

И҆́же на землѝ хрⷭ҇та̀ ра́ди во́лею въ бꙋ́йство преложи́всѧ, мі́ра сегѡ̀ красѡты̀ ѿню́дъ возненави́дѣлъ є҆сѝ, и҆ плотска̑ѧ и҆гра̑нїѧ ᲂу҆вѧди́въ посто́мъ и҆ жа́ждею, и҆ на землѝ лега́нїемъ, ѿ зно́ѧ же и҆ стꙋ́дени, ѿ дождѧ̀ и҆ снѣ́га, и҆ ѿ про́чїѧ воздꙋ́шныѧ тѧ́гости никогда́же ᲂу҆клони́лсѧ є҆сѝ: дꙋ́шꙋ же ѡ҆чи́стилъ є҆сѝ добродѣ́тельми, ꙗ҆́кѡ зла́то въ горни́лѣ, ѻ҆́ч҃е прпⷣбне бг҃оно́сне мїхаи́ле, и҆ ны́нѣ на нб҃сѣ́хъ предстои́ши прⷭ҇то́лꙋ прест҃ы́ѧ трⷪ҇цы. Но ꙗ҆́кѡ и҆мѣ́ѧ дерзнове́нїе мно́гое, молѝ хрⷭ҇та̀ бг҃а, спасти́сѧ дꙋша́мъ на́шымъ.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника два́жды. Сла́ва, ст҃а́гѡ: И҆ ны́нѣ, пра́здника.

По а҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:

Посто́мъ и҆ воздержа́нїемъ и҆ на землѝ лега́нїемъ ᲂу҆вѧди́лъ є҆сѝ плотскі̑ѧ стра̑сти, дꙋ́шꙋ же просвѣти́лъ є҆сѝ, и҆ на нб҃сѣ́хъ ѿ хрⷭ҇та̀ вели́ко воздаѧ́нїе воспрїѧ́лъ є҆сѝ. Тѣ́мже благоꙋгоди́въ бг҃ꙋ, досто́инъ сосꙋ́дъ чꙋде́съ и҆ по кончи́нѣ ꙗ҆ви́лсѧ є҆сѝ, всѣ̑мъ и҆сцѣле́нїе подаѧ̀ вѣ́рою притека́ющымъ къ ра́цѣ моще́й твои́хъ, мїхаи́ле прпⷣбне: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее въ страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

По в҃-й стїхоло́гїи сѣда́ленъ, гла́съ є҃. Подо́бенъ: Собезнача́льное сло́во:

Тве́рдаго а҆дама́нта, столпа̀ непоколеби́ма вра́жїими прилѡ́ги, бг҃оно́снаго мїхаи́ла пѣ́сньми почти́мъ: терпѣ́нїемъ бо вои́стиннꙋ посрами́вша проти́внаго врага̀, и҆ без̾ вѣ́сти сотво́рша, и҆ ны́нѣ молѧ́щасѧ ѡ҆ спасе́нїи дꙋ́шъ на́шихъ.

Два́жды.

Сла́ва, и҆ ны́нѣ, бг҃оро́диченъ:

Оу҆жа́сно чꙋ́до зача́тїѧ, и҆ несказа́ненъ ѻ҆́бразъ ржⷭ҇тва̀ въ тебѣ̀ позна́сѧ, приснодв҃о чⷭ҇таѧ, ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ помышле́нїе. сла́ва твоѧ̀, бцⷣе, во всѣ́хъ простре́сѧ, ко спасе́нїю дꙋ́шъ на́шихъ.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Гдⷭ҇ень ꙗ҆ре́мъ на сѧ̀ взе́мъ, мона́шествꙋющихъ ꙗ҆ви́лсѧ є҆сѝ сто́лпъ и҆ ᲂу҆твержде́нїе, и҆ ко ст҃ѣ́й трⷪ҇цѣ ве́лїй моле́бникъ: хрⷭ҇тѡ́вы бо возжелѣ́въ бжⷭ҇твєнныѧ за́пѡвѣди, и҆ дѣ́ломъ соверши́лъ є҆сѝ, прпⷣбне. тѣ́мже къ ре́вности а҆́гг҃льскагѡ житїѧ̀ воздви́глъ є҆сѝ всѧ̑, є҆́же є҆диномꙋ́дреннѡ сла́вити хрⷭ҇та̀ бг҃а, бг҃оно́сне мїхаи́ле. є҆го́же молѝ, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Пречⷭ҇таѧ дв҃о мт҃и хрⷭ҇та̀ бг҃а, дꙋшѝ моеѧ̀ стра̑сти лю̑тыѧ и҆сцѣлѝ, молю́сѧ, и҆ проще́нїе да́рꙋй мои́хъ прегрѣше́нїй, ꙗ҆̀же безꙋ́мнѣ содѣ́ѧвъ, дꙋ́шꙋ мою̀ ѡ҆скверни́хъ, и҆ тѣ́ло ѡ҆калѧ́хъ ѻ҆каѧ́нный. Оу҆вы̀ мнѣ̀, что̀ сотворю̀ въ ча́съ ѻ҆́ный, внегда̀ а҆́гг҃ли дꙋ́шꙋ мою̀ разлꙋча́тъ ѿ ᲂу҆бо́гагѡ моегѡ̀ тѣлесѐ; тогда̀ помо́щница мѝ бꙋ́ди, и҆ предста́тельница: тебе́ бо и҆́мамъ наде́ждꙋ ра́бъ тво́й.

Степє́нна, а҃-й а҆нтїфѡ́нъ д҃-гѡ гла́са. Прокі́менъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ: Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе ѿ лꙋкѝ, зача́ло к҃д.

По н҃-мъ ѱалмѣ̀ стїхи́ра самогла́сна, гла́съ ѕ҃: Преподо́бне ѻ҆́ч҃е бг҃оно́сне мїхаи́ле: Пи́сана на вече́рни, на стїхо́внѣ сла́вникъ.

Канѡ́нъ прпⷣбномꙋ мїхаи́лꙋ.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Ѿ ю҆́ности, прпⷣбне, сосꙋ́дъ и҆збра́нный бы́лъ є҆сѝ прест҃ы́ѧ трⷪ҇цы, чистоты̀ ра́ди житїѧ̀ твоегѡ̀, бл҃горо́дїе ѡ҆ста́вивъ, мона́шескїй чи́нъ воспрїѧ́лъ є҆сѝ: и҆ крⷭ҇тъ тво́й взе́мъ, хрⷭ҇тꙋ̀ послѣ́довалъ є҆сѝ. и҆ тогѡ̀ ра́ди во ю҆ро́дство преложи́лсѧ є҆сѝ, и҆ вѣнце́мъ ѿ негѡ̀ вѣнча́лсѧ є҆сѝ, бг҃оно́се ѻ҆́ч҃е.

Всѧ̑ ᲂу҆мꙋдрѧ́ющемꙋ бг҃ꙋ моли́сѧ, прпⷣбне, ѡ҆ рабѣ̀ твое́мъ, да ѿве́рзетъ моѧ̑ ᲂу҆ста̀ недостѡ́йнаѧ, и҆ да подви́гнетъ мо́й ѧ҆зы́къ ко́сный: тѣснотꙋ́ же и҆ хꙋдогла́сїе, ѻ҆́ч҃е, да разве́рзетъ дѣ́йствомъ ст҃а́гѡ дх҃а къ пѣ́нїю чꙋде́съ твои́хъ.

Бг҃оглагѡ́ливымъ прⷪ҇ро́кѡмъ то́ченъ, и҆ бг҃ови́дцємъ а҆пⷭ҇лѡмъ нра́вомъ ᲂу҆подо́бивсѧ, и҆́же до тре́тїѧгѡ нб҃сѐ возше́дшаго ᲂу҆слы́шавъ глаго́люща: мы̀ ю҆ро́ди хрⷭ҇та̀ ра́ди, и҆ ты̀, прпⷣбне, сїѧ̑ ᲂу҆слы́шавъ, ю҆ро́дъ на землѝ бы́лъ є҆сѝ хрⷭ҇та̀ ра́ди, безче́стїе и҆ ᲂу҆кори̑зны претерпѣ́въ, че́сти въ црⷭ҇твїи нбⷭ҇нѣмъ сподо́билсѧ є҆сѝ.

Бг҃оро́диченъ:

Мои́хъ прегрѣше́нїй, влⷣчце, плени́цꙋ расто́ргни, твоего̀ сп҃а и҆ бг҃а молѧ́щи, и҆ томѧ́щїй мѧ̀ грѣ́хъ, приснодв҃о, низложѝ, ꙗ҆́кѡ да воспѣва́ю тѧ̀ всегда̀, всенепоро́чнаѧ, тобо́ю спаса́емь.

Канѡ́нъ дрꙋгі́й прпⷣбнагѡ мїхаи́ла, є҆гѡ́же краегране́сїе ᲂу҆ червле́ныхъ слове́съ.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Въ црⷭ҇тво нбⷭ҇ное ᲂу҆́зкимъ и҆ приско́рбнымъ пꙋте́мъ, по за́повѣди влⷣки своегѡ̀ хрⷭ҇та̀, прпⷣбне ѻ҆́ч҃е мїхаи́ле, ше́дъ, широ́кїй и҆ простра́нный пꙋ́ть возненави́дѣлъ є҆сѝ. Распросте́ршїйсѧ мра́къ ᲂу҆ма̀ моегѡ̀ ѿженѝ: да возмогꙋ̀ ма́лое сїѐ моле́нїе принестѝ въ пресвѣ́тлꙋю па́мѧть твою̀.

Благочести́вагѡ ко́рене пресвѣ́тлаѧ ѻ҆́трасль, всю̀ мы́сль твою̀ бг҃ꙋ возложи́лъ є҆сѝ ѿ младе́нства: и҆ крⷭ҇тъ тво́й взе́мъ, невозвра́тнымъ пꙋте́мъ томꙋ̀ послѣ́довалъ є҆сѝ, и҆ по а҆пⷭ҇толꙋ дх҃о́внꙋю мꙋ́дрость стѧжа́въ, є҆́же є҆́сть бꙋ́йство хрⷭ҇та̀ ра́ди, всѧ́чески ѿрѣва́ѧ ѿ себє̀ тщесла́вїе.

Хрⷭ҇толюби́вагѡ царѧ̀ въ жи́зни се́й бг҃омо́лецъ бы́лъ є҆сѝ, ны́нѣ предстоѧ̀ ст҃ѣ́й трⷪ҇цѣ во мно́зѣ дерзнове́нїи, моли́сѧ, прпⷣбне ѻ҆́ч҃е, ѡ҆ держа́вѣ є҆гѡ̀, и҆зба́витисѧ ѿ нахожде́нїѧ и҆ноплеме́нныхъ вели́кїѧ рѡссі́и хрⷭ҇толюби̑вымъ лю́демъ, пѣ́снь бг҃ꙋ возсыла́ющымъ.

І҆ѡа́нна списа́вшагѡ лѣ́ствицꙋ нра́вѡмъ ᲂу҆подо́билсѧ є҆сѝ, мона́шескїй чи́нъ возлюби́въ, на безстра́стїѧ го́рꙋ возше́дъ, и҆ сегѡ̀ ра́ди невозбра́ненъ восхо́дъ къ нб҃сѝ ѡ҆брѣ́лъ, є҆сѝ, и҆ въ нбⷭ҇наѧ врата̀ дости́гъ, въ го́рнемъ і҆ерⷭ҇ли́мѣ всели́лсѧ є҆сѝ, и҆дѣ́же веселѧ́щихсѧ всѣ́хъ жили́ще, пѣ́снь бг҃ꙋ возсыла́ющихъ.

Трⷪ҇ченъ:

Речє́нїѧ бж҃е́ствєннаѧ и҆ прⷪ҇ро́чєствїѧ, ꙗ҆̀же и҆здре́вле по́мнѧще ꙗ҆́вѣ, бг҃онача́льное є҆стество̀ є҆ди́нственное сла́вимъ, присносꙋ́щное, собезнача́льное, въ тре́хъ ли́цѣхъ, ѻ҆ц҃ѣ̀, и҆ сн҃ѣ, и҆ дс҃ѣ, содѣ́тельное, всеси́льное.

Бг҃оро́диченъ:

Неискꙋсобра́чнѡ хрⷭ҇та̀ родила̀ є҆сѝ, є҆́же по на́мъ, на́съ ра́ди воспрїе́мша є҆стество̀, пречⷭ҇таѧ, и҆ непрело́жна во ѻ҆бою̀ пребы́вша: є҆го́же молѝ непреста́ннѡ, грѣхѡ́въ мои́хъ дарова́ти и҆ и҆скꙋше́нїй и҆збавле́нїе.

Пѣ́снь г҃. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Ка́меню вѣ́ры петрꙋ̀ а҆пⷭ҇лꙋ ᲂу҆подо́бивсѧ, распѧ́лсѧ є҆сѝ мі́рови во все́й жи́зни твое́й, прпⷣбне мїхаи́ле, и҆ но́ги твоѧ̑ невозвра́тнѡ къ нбⷭ҇номꙋ ше́ствїю ᲂу҆пра́вивъ, го́рнѧгѡ і҆ерⷭ҇ли́ма дости́глъ є҆сѝ: со ст҃ы́ми предстоѧ̀ ст҃ѣ́й трⷪ҇цѣ, молѝ ѡ҆ на́съ є҆ди́наго чл҃вѣколю́бца.

И҆лїинꙋ̀ ре́вность воспрїе́мъ, прпⷣбне: не возмого́ша бо ни прещє́нїѧ, ни молє́нїѧ согрѣша́ющихъ тебѐ ᲂу҆вѣща́ти, є҆́же тѣ́хъ непреподо́бнѣ содѣ́ѧнныхъ не ѡ҆блича́ти: не преста́лъ є҆сѝ ᲂу҆́бѡ сїѐ творѧ̀, до́ндеже коне́чнѣ ѻ҆́ныѧ и҆спра́вилъ є҆сѝ.

Храни́тель бꙋ́ди вели́кїѧ рѡссі́и хрⷭ҇толюби́выхъ люде́й, бг҃оно́сне ѻ҆́ч҃е мїхаи́ле, и҆збавлѧ́ѧ врагѡ́въ наше́ствїѧ, гла́да же и҆ па́гꙋбы: да твои́ми мл҃твами ко хрⷭ҇тꙋ̀ бг҃ꙋ, и҆зба́вльшесѧ, тебѐ всѝ ꙗ҆́кѡ застꙋ́пника почита́емъ.

Бг҃оро́диченъ:

Во и҆ны́хъ жена́хъ мт҃и, до́ндеже дв҃а, не позна́сѧ, ни мт҃и по ржⷭ҇твѣ̀ дѣ́вствовати сподо́бисѧ: на тебѣ́ же, дв҃о, ѻ҆боѧ̑ ᲂу҆стро́ишасѧ. тѣ́мъ весе́лїемъ дꙋ́ха воспѣва́ю: нѣ́сть непоро́чны па́че тебє̀, влⷣчце.

И҆́нъ. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ па́че тебє̀, є҆ди́не чл҃вѣколю́бче.

Всеѧ̀ рѡссі́и ве́лїй чꙋдотво́рецъ, прпⷣбне, бы́лъ є҆сѝ, и҆ прⷪ҇ро́ческагѡ вели́кагѡ да́ра сподо́билсѧ є҆сѝ, сказа́въ безвѣ̑стнаѧ и҆ та̑йнаѧ: и҆зба́ви ны̀ ѿ та́йныхъ прегрѣше́нїй и҆ помышле́нїй лꙋка́выхъ, да чи́стымъ се́рдцемъ хрⷭ҇тꙋ̀ возопїе́мъ: ꙗ҆́кѡ нѣ́сть ст҃ъ па́че тебє̀, чл҃вѣколю́бче.

Самоде́ржца, ре́клъ є҆сѝ, благочести́вагѡ вели́кагѡ кнѧ́зѧ во́ли покори́тисѧ, прⷪ҇ро́чески вѣща́въ, блаже́нне, ѽ мꙋ́жїе вели́кагѡ нова́града! та́кѡ бо подоба́етъ, и҆ та́кѡ ᲂу҆годи́сѧ сꙋдьба́мъ бж҃їимъ бы́ти: а҆́ще же не послꙋ́шаете, ѕлѣ̀ поги́бнете, є҆́же и҆ бы́сть, ѿ бг҃а на́мъ въ наказа́нїе.

Повелѣ́нїємъ влⷣки хрⷭ҇та̀, ѻ҆́ч҃е, послѣ́дствꙋѧ, кро́токъ и҆ смире́нъ, и҆ всѣ̑мъ всѧ́къ бы́лъ є҆сѝ подо́бникъ, вселе́нныѧ ᲂу҆чи́телю: и҆ пред̾ кнѧ́зи не стыдѧ́сѧ є҆́же ѡ҆ благоче́стїи, и҆ є҆́же сꙋдьба́мъ бж҃їимъ го́дѣ, предвари́въ бꙋ́дꙋщее ꙗ҆́снѡ сказа́лъ є҆сѝ.

Благослове́нїемъ твои́мъ то́щыѧ жи̑тницы и҆спо́лнилъ є҆сѝ жи́та, и҆ ктомꙋ̀ про́чее не и҆стощи́шасѧ: и҆ ѡ҆лѧденѣ́вшыѧ и҆ногда̀ люде́й ни̑вы дꙋшє́вныѧ ѡ҆чи́стилъ є҆сѝ, и҆ плодонѡ́сны сотвори́лъ є҆сѝ: и҆ непло́дный ᲂу҆́мъ мо́й плодоно́сенъ сотворѝ.

Трⷪ҇ченъ:

Ѿ є҆ди́нагѡ ѻ҆ц҃а̀, ꙗ҆́кѡ ѿ ᲂу҆ма̀ рожде́ннаго сло́ва, и҆ дх҃а происходѧ́ща неизглаго́ланнѡ, по коемꙋ́ждо помышле́нїи и҆ пи́сменными ᲂу҆чє́нїи пости́гше, є҆ди́наго бг҃а трисо́лнечнаго почита́емъ.

Бг҃оро́диченъ:

Хра́мъ ꙗ҆ви́ласѧ є҆сѝ чи́стъ, дв҃о мт҃и мр҃і́е, всѧ̑ всеси́льнѡ и҆ мꙋдрососта́вльшагѡ хрⷭ҇та̀, и҆ въ чинꙋ̀ поло́жшагѡ и҆ носѧ́щагѡ: є҆го́же ми́лостива мнѣ̀ сотворѝ, ма́терними твои́ми моли́твами.

Сѣда́ленъ, гла́съ и҃. Подо́бенъ: Премꙋ́дрости:

Ѿ земны́хъ на нбⷭ҇наѧ помы́сливъ, и҆ дѣ́ломъ соверши́въ ко хрⷭ҇тꙋ̀ любо́вь, и҆ подо́бнѡ мо́лнїи, ѿ восто́ка до за́пада восходѧ́щей ско́ростїю, ꙗ҆́кѡ и҆́ный а҆ввакꙋ́мъ, ѻ҆́ч҃е, несе́нный а҆́гг҃ломъ съ пи́щею въ вавѷлѡ́нъ, прекорми́ти данїи́ла прⷪ҇ро́ка, въ ро́вѣ затворе́на, дости́глъ є҆сѝ, прпⷣбне, ѻ҆би́тели ст҃ы́ѧ трⷪ҇цы, и҆ промышлѧ́лъ є҆сѝ въ жи́зни се́й ѡ҆ поле́зныхъ мно́жественныхъ, и҆ а҆́лчꙋщыѧ дꙋ́шы накорми́въ мона́хѡвъ пи́щею неги́блющею, въ црⷭ҇твїе нбⷭ҇ное рꙋково́дствовалъ є҆сѝ, и҆дѣ́же пра́веднѡ пресвѣ́тлымъ вѣнце́мъ вѣнча́лсѧ є҆сѝ, бл҃же́нне. и҆ ны́нѣ, ѻ҆́ч҃е мїхаи́ле, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, пра́здника.

Пѣ́снь д҃. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Пѣ́снь воспѣ́лъ є҆сѝ бг҃ꙋ безпреста́ни, и҆ слꙋ́хъ тво́й къ немꙋ̀ приклони́лъ є҆сѝ. Ꙗ҆́кѡ и҆мѣ́ѧ дерзнове́нїе мно́го, и҆ моли́твами твои́ми, ѻ҆́ч҃е, совѣ́тꙋющихъ на правосла́вїе мы̑сли и҆ совѣ́ты разорѝ, и҆ во́инство на́ше воѡрꙋжѝ на ва́рвары побѣ́дою, и҆ междоꙋсѡ́бныѧ бра̑ни ᲂу҆мирѝ.

Ꙗ҆́кѡ со́лнце ѿ восто́ка возсїѧ́въ во ѻ҆би́тели ст҃ы́ѧ трⷪ҇цы, средѝ мно́жества мона́хѡвъ, просвѣти́лъ є҆сѝ сꙋ́щыѧ во тмѣ̀ невѣ́дѣнїѧ: и҆ ю҆ро́дъ бы́лъ є҆сѝ хрⷭ҇та̀ ра́ди, хотѧ̀ ᲂу҆таи́тисѧ. не бо̀ ᲂу҆кры́етсѧ, речѐ, гра́дъ верхꙋ̀ горы̀ стоѧ̀, ни вжига́ютъ свѣти́льника, и҆ под̾ спꙋ́домъ полага́ютъ.

Ꙗ҆́кѡ пресвѣ́тлое свѣти́ло возсїѧ́лъ є҆сѝ, и҆ ꙗ҆́кѡ фі́нїѯъ въ домꙋ̀ ст҃ы́ѧ трⷪ҇цы прⷪ҇ро́чески процвѣ́лъ є҆сѝ, бг҃оно́сне мїхаи́ле, ꙗ҆́кѡ денни́ца пред̾ сл҃нцемъ пра́вды хрⷭ҇то́мъ просїѧ́лъ є҆сѝ, и҆ жи́вꙋ же́ртвꙋ са́мъ себѐ влⷣцѣ прине́слъ є҆сѝ, ѻ҆́ч҃е преблаже́нне.

Бг҃оро́диченъ:

До́брыхъ всѣ́хъ ѡ҆бнажи́хсѧ, и҆ лежꙋ̀ въ ѕло́бѣ: но ро́ждшаѧ ѡ҆бле́кшаго въ нетлѣ́нїе всѧ̑ дре́вле во тлю̀ па́дшыѧ, и҆ менѐ ны́нѣ пре́жними ᲂу҆красѝ, и҆ вторы́хъ и҆зба́ви, бг҃оневѣ́сто.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Мака́рїа вели́кагѡ, па́че є҆стества̀ а҆́гг҃льское житїѐ на землѝ пожи́вшагѡ, сегѡ̀ постꙋ̀ и҆ бдѣ́нїю, и҆ на землѝ лега́нїю, и҆ прѡ́чимъ добродѣ́телемъ, ѻ҆́ч҃е мїхаи́ле, поревнова́лъ є҆сѝ, и҆ ꙗ҆́кѡ со́лнце въ рѡссі́йстѣй землѝ возсїѧ́лъ є҆сѝ: молѝ ѡ҆ на́съ є҆ди́наго чл҃вѣколю́бца.

Свѧтѣ́йшагѡ а҆рхїепⷭ҇кпа є҆ѵѳѵ́мїа поꙋче́нїємъ и҆ дх҃ѡ́внымъ наказа́нїємъ вельмѝ внима́ѧ, но скрыва́ѧсѧ ю҆ро́дствомъ хрⷭ҇та̀ ра́ди въ жи́зни се́й, бл҃же́нне, ра́зꙋма дх҃о́внагѡ и҆спо́лненный хрⷭ҇тꙋ̀ взыва́лъ є҆сѝ: си́лѣ твое́й сла́ва, чл҃вѣколю́бче.

Бг҃оспаса́емыхъ хрⷭ҇толюби́выхъ люде́й, и҆ мона́хѡвъ мно́жєства ра́дости и҆спо́лнилъ є҆сѝ, и҆ дх҃о́внагѡ весе́лїѧ, твои́мъ ди́внымъ и҆ чрез̾есте́ственнымъ, ꙗ҆́кѡ во є҆ди́номъ часѣ̀ прихожде́нїемъ во ѻ҆би́тель ст҃ы́ѧ трⷪ҇цы, бг҃оно́сный мїхаи́ле, хрⷭ҇тꙋ̀ взыва́ѧ: си́лѣ твое́й сла́ва, чл҃вѣколю́бче.

Градѡ́въ высоча́йшагѡ вели́кагѡ нова́града наро́ди, моли́твенника тѧ̀ те́пла и҆мꙋ́ще, и҆ ско́раго помо́щника, и҆ ꙗ҆́кѡ стѣ́нꙋ тве́рдꙋ, и҆ забра́ло неѡбори́мо, и҆ воево́дꙋ крѣ́пка и҆ непобѣди́ма мо́лѧтъ: не забꙋ́ди моли́твєнникъ твои́хъ, и҆збавлѧ́ѧ ны̀ ѿ всѧ́кїѧ нꙋ́жды и҆ печа́ли.

Трⷪ҇ченъ:

Содержи́тельнаѧ всѣ́хъ сꙋ́щихъ, неви́димаѧ, всеще́драѧ, благоꙋтро́бнаѧ, человѣколюби́ваѧ, трⷪ҇це честна́ѧ и҆ бг҃онача́льнаѧ, не забꙋ́ди менє̀ твоегѡ̀ раба̀, бж҃е, вконе́цъ, нижѐ разорѝ и҆́же завѣща́лъ є҆сѝ твои̑мъ рабѡ́мъ завѣ́тъ, за неизрече́ннꙋю ми́лость.

Бг҃оро́диченъ:

Кра́снꙋю тѧ̀, всечи́стаѧ, є҆ди́нꙋ ѡ҆брѣ́тъ ѿ вѣ́ка добро́тꙋ і҆а́кѡвлю, пребезнача́льное сло́во, и҆ всели́всѧ въ тѧ̀ бл҃гоꙋтро́бїѧ ра́ди, ѡ҆бновѝ человѣ́ческое є҆стество̀: є҆го́же молѝ непреста́ннѡ, ѿ всѧ́кїѧ мнѣ̀ и҆зба́витисѧ ско́рби.

Пѣ́снь є҃. І҆рмо́съ:

Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы.

Хода́тай непреста́ненъ, ѻ҆́ч҃е, бꙋ́ди ѡ҆ на́съ ко прест҃ѣ́й трⷪ҇цѣ, съ ли́ки ст҃ы́хъ, и҆́хже ты̀ жи́тельствꙋ поревнова́лъ є҆сѝ: моли́сѧ, мо́лимъ тѧ̀, ѡ҆ ми́рѣ и҆ ѡ҆ ᲂу҆строе́нїи всегѡ̀ мі́ра, да ти́хо и҆ безмо́лвно житїѐ поживе́мъ въ вѣ́цѣ се́мъ, и҆ въ бꙋ́дꙋщемъ жи́знь вѣ́чнꙋю полꙋчи́мъ.

Прпⷣбне ѻ҆́ч҃е мїхаи́ле, въ по́стницѣхъ вели́къ бы́въ во ѻ҆би́тели, и҆дѣ́же мона́шеское житїѐ проходи́лъ є҆сѝ, є҆ди́нощи въ седми́цѣ вкꙋша́ѧ хлѣ́ба и҆ воды̀ съ воздержа́нїемъ, и҆ всю̀ жи́знь твою̀ та́кѡ сконча́лъ є҆сѝ.

Во́лею, прпⷣбне, преложи́лсѧ во ю҆ро́дство хрⷭ҇та̀ ра́ди, скѡ́рби и҆ бѣды̑ претерпѣ́лъ є҆сѝ, порꙋга̑нїѧ и҆ ᲂу҆кори̑зны и҆ доса̑ды, мꙋ́чєницы бо въ ма́лѣ вре́мени хрⷭ҇та̀ ра́ди пострада́ша: ты́ же, ѻ҆́ч҃е, всю̀ жи́знь твою̀ мꙋ́ченически сконча́въ, и҆ тогѡ̀ ра́ди сꙋгꙋ́бꙋ мздꙋ̀ на небесѣ́хъ воспрїѧ́лъ є҆сѝ.

Бг҃оро́диченъ:

Оу҆пра́ви ᲂу҆́мъ мо́й, влⷣчце, трꙋжда́ющїйсѧ въ пꙋчи́нѣ скорбе́й, и҆ потоплѧ́емый наше́ствїемъ тлетво́рныхъ страсте́й. Спасѝ, бцⷣе, къ тебѣ̀ прибѣга́ющаго: и҆ны́ѧ бо по́мощи, чⷭ҇таѧ, ра́звѣ тебє̀, не зна́емъ.

И҆́нъ. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Вели́кагѡ нова́града наро́ди, въ пречестнꙋ́ю па́мѧть бг҃оно́снагѡ ѻ҆ц҃а̀ мїхаи́ла, моли̑твы со слеза́ми пролива́юще глаго́лютъ: ѽ пречестны́й ѻ҆́ч҃е, ꙗ҆́коже не да́лъ є҆сѝ въ расхище́нїе ѻ҆би́тели, та́кѡ и҆ ѡ҆клевета́ющыѧ на́съ смирѝ, и҆ пꙋти̑ на́шѧ напра́ви, мо́лимсѧ.

І҆ѡа́нна крести́телѧ ᲂу҆́зкимъ и҆ приско́рбнымъ пꙋте́мъ ходи́ти произво́лилъ є҆сѝ, жесто́кое на землѝ житїѐ пожи́въ, ꙗ҆́кѡ безпло́тенъ: во ю҆ро́дство преложи́лсѧ є҆сѝ хрⷭ҇та̀ ра́ди, є҆го́же молѝ, прпⷣбне, во тмѣ̀ грѣха̀ низлежа́щаго мѧ̀ воздви́гнꙋти.

Преподо́бно и҆ свѧ́то на землѝ житїѐ пожи́въ, посто́мъ и҆ бдѣ́нїемъ, и҆ на землѝ лега́нїемъ, и҆ про́чими добродѣ́тельми мона́шеское житїѐ проше́дъ, ѻ҆́бразъ бы́лъ є҆сѝ ꙗ҆ре́мъ гдⷭ҇ень на сѧ̀ взе́мшымъ, и҆ хрⷭ҇тꙋ̀ послѣ́довавшымъ: пꙋ́ть мо́й напра́ви, молю́сѧ.

Ско́ростїю, бг҃оно́сный ѻ҆́ч҃е, ꙗ҆влѧ́ѧсѧ, ѿ бѣ́дъ и҆збавлѧ́ѧ, подо́бѧсѧ свѣтоза́рномꙋ со́лнцꙋ, на безмѣ́рной высотѣ̀ сїѧ́ющꙋ, и҆ ѡ҆бходѧ́щꙋ всю̀ вселе́ннꙋю во є҆ди́номъ днѝ. ты̀, прпⷣбне, па́че человѣ́ка въ жи́зни се́й, бг҃ꙋ сꙋ́щемꙋ въ вы́шнихъ, тва́рь всю̀ созда́вшемꙋ послꙋжи́лъ є҆сѝ.

Трⷪ҇ченъ:

Дрема́нїемъ ѡ҆тѧгче́на мѧ̀ грѣхо́внымъ и҆ порѣва́ема въ со́нъ сме́ртный, ꙗ҆́кѡ человѣколюби́ваѧ, и҆ всебл҃га́ѧ, и҆ всеми́лостиваѧ, бг҃онача́льнаѧ трⷪ҇це ст҃а́ѧ, ᲂу҆ще́дри и҆ возста́ви мѧ̀.

Бг҃оро́диченъ:

Мт҃и дв҃о ѻ҆трокови́це, пречⷭ҇таѧ всенепоро́чнаѧ бг҃облагода́тнаѧ, твои́ми моли́твами сн҃а и҆ бг҃а твоего̀ и҆ гдⷭ҇а ми́лостива сотворѝ мнѣ̀: и҆ страсте́й и҆ прегрѣше́нїй твоего̀ раба̀ и҆зба́ви вско́рѣ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Ны́нѣ честны̑ѧ мо́щи твоѧ̑, лежа́ще во ѻ҆би́тели ст҃ы́ѧ трⷪ҇цы, въ не́йже є҆щѐ въ жи́зни се́й мно́гѡ потрꙋди́лсѧ є҆сѝ, врачева̑нїѧ мнѡ́гаѧ и҆сточа́ютъ съ вѣ́рою приходѧ́щымъ. тѣ́мже мо́лимъ тѧ̀, ѻ҆́ч҃е: и҆ дꙋшє́вныѧ стра̑сти и҆ недꙋ́ги и҆сцѣлѝ тебѐ сла́вѧщихъ.

Бе́здны грѣхѡ́въ и҆спо́лненъ а҆́зъ, и҆ твоѧ̀ моли́тва ꙗ҆́кѡ кади́ло благово́нно и҆спра́висѧ предъ бг҃омъ. ны́нѣ молю́ тѧ, прпⷣбне ѻ҆́ч҃е: бе́зднꙋ грѣхѡ́въ мои́хъ и҆стребѝ, и҆ бꙋѧ́ющее мо́ре ѕла́гѡ пїѧ́нства и҆зсꙋшѝ, и҆ напое́нїе гнѣ́вное ѿженѝ, цѣломꙋ́дренный ᲂу҆́мъ бг҃оно́сный мїхаи́ле.

Да́ждь мѝ, хрⷭ҇тѐ, ра́зꙋмъ терпѣ́нїѧ, є҆́же не ѡ҆сꙋжда́ти согрѣша́ющихъ киче́нїемъ фарїсе́йскимъ: но ꙗ҆́кѡ мытаре́во моѐ покаѧ́нїе прїимѝ, и҆ ꙗ҆́кѡ блꙋ́днаго сы́на, бж҃е, ве́чери твоеѧ̀ досто́йна мѧ̀ ꙗ҆вѝ моли́твами прпⷣбнагѡ мїхаи́ла.

Бг҃оро́диченъ:

Ѡ҆бветша́вшыѧ ны̀ го́рькимъ дре́ва пре́жде вкꙋше́нїемъ, и҆ па́дшыѧ поползе́нїемъ, пречⷭ҇таѧ, ѡ҆бнови́ла є҆сѝ, зижди́телѧ ро́ждши сло́во ѵ҆поста́сное, дв҃о мт҃и влⷣчце.

И҆́нъ. І҆рмо́съ:

Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю! и҆ спасѝ.

Васі́лїа вели́кагѡ поꙋче́нїе въ се́рдцы твое́мъ воспрїѧ́лъ є҆сѝ, бꙋ́рею грѣха̀ не погрꙋзи́всѧ, и҆ въ ти́хое приста́нище дости́гъ црⷭ҇твїѧ нбⷭ҇нагѡ, кора́бль дꙋше́вный съ некра́домымъ бога́тствомъ соблю́лъ є҆сѝ, ѻ҆́ч҃е, и҆ на́съ ѿ сме́ртныѧ глꙋбины̀ возведѝ.

Благода́рное сїѐ пѣ́нїе, приноси́мое тебѣ̀ не пре́зри, ѻ҆́ч҃е, но па́че прїимѝ, и҆ ра́дости дх҃о́вныѧ и҆спо́лни на́съ: да безъ закоснѣ́нїѧ поклони́мсѧ ра́цѣ, и҆дѣ́же лежа́тъ честны̑ѧ мо́щи твоѧ̑, и҆сцѣле́нїе всѣ̑мъ да́рꙋюще.

Принесе́сѧ моли́тва твоѧ̀ и҆ сле́зы къ бг҃ꙋ, ꙗ҆́кѡ бл҃гоꙋха́нный ѳѷмїа́мъ, и҆ же́ртва непоро́чна и҆ благопрїѧ́тна, и҆ менє̀ не забꙋ́ди хода́тайствомъ твои́мъ ко прест҃ѣ́й трⷪ҇цѣ, и҆ да́ждь ми́лость ненави́дѧщымъ мѧ̀, и҆ враждꙋ́ющымъ мѝ, и҆ ѿ сме́ртныѧ глꙋбины̀ и҆зба́ви ны̀.

Всепрпⷣбномꙋ житїю̀ поревнова́въ бг҃оно́сныхъ ѻ҆ц҃є́въ, ѿ вѣ́ка бг҃оꙋго́днѡ пожи́вшихъ, ѻ҆́ч҃е мїхаи́ле, и҆ во ю҆ро́дствѣ хрⷭ҇та̀ ра́ди всю̀ жи́знь твою̀ мꙋ́ченически сконча́вый, бꙋ́йство нелѣ́пое ѿ менє̀ ѿженѝ.

Трⷪ҇ченъ:

Вседержи́телю бж҃е, и҆ є҆ди́не неѡпредѣле́нный, всели́сѧ въ мѧ̀ за неизрече́ннꙋю ми́лость, трисо́лнечный влⷣко: и҆ ѡ҆зари́ мѧ, и҆ вразꙋмѝ, ꙗ҆́кѡ бл҃гоꙋтро́бенъ.

Бг҃оро́диченъ:

Хра́мъ ꙗ҆ви́ласѧ є҆сѝ бг҃а невмѣсти́магѡ, пречи́стаѧ, хра́мъ и҆ менѐ тогѡ̀ покажѝ бжⷭ҇твенныѧ благода́ти, прест҃а́ѧ влⷣчце, твои́ми мольба́ми, и҆ соблюдѝ невреди́ма.

Конда́къ, гла́съ и҃. Подо́бенъ: Взбра́нной:

Дх҃а ст҃а́гѡ си́лою ᲂу҆подо́билсѧ є҆сѝ бг҃оглагѡ́ливымъ дрє́внимъ прⷪ҇ро́кѡмъ, сказа́въ безвѣ̑стнаѧ и҆ та̑йнаѧ, и҆ є҆́же го́дѣ сꙋдьба́мъ бж҃їимъ въ сбытїѐ: и҆ и҆́на мнѡ́га чꙋдеса̀ ѡ҆ хрⷭ҇тѣ̀ сотвори́въ, и҆ лю́ди ᲂу҆диви́въ, торжествова́ти ᲂу҆стро́илъ є҆сѝ вопїю́щыѧ: сла́ва бг҃ꙋ прославлѧ́ющемꙋ ст҃ы̑ѧ своѧ̑.

І҆́косъ:

Оу҆подо́билсѧ є҆сѝ прⷪ҇ро́кꙋ а҆ввакꙋ́мꙋ, ѻ҆́ч҃е, восхище́нъ си́лою бж҃їею ꙗ҆́кѡ на ѻ҆́блацѣ ѿ дале́че страны̀, и҆ ѡ҆брѣ́лсѧ є҆сѝ во ѻ҆би́тели ст҃ы́ѧ трⷪ҇цы. Ѻ҆́нъ бо ѿ і҆ерⷭ҇ли́ма а҆́гг҃ломъ несе́нъ бы́сть съ пи́щею въ вавѷлѡ́нъ, и҆ та́мѡ прекормѝ данїи́ла прⷪ҇ро́ка, и҆ вселе́ннꙋю ᲂу҆дивѝ: ты́ же лю́ди твоѧ̑ возвесели́лъ є҆сѝ, чꙋде́съ дѣ́йствомъ, и҆ мно́жество мона́хѡвъ твоемꙋ̀ житїю̀ ᲂу҆диви́шасѧ, и҆ послѣ́дствꙋющихъ тебѣ̀ прекорми́лъ є҆сѝ ꙗ҆́дїю неги́блющею, но пребыва́ющею въ жи́зни вѣ́чнѣй вопїю́щыѧ бг҃ꙋ: сла́ва прославлѧ́ющемꙋ ст҃ы̑ѧ своѧ̑.

Пѣ́снь з҃. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть, хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Бг҃опроти́внїи лю́дїе, є҆реті́чєскаѧ мꙋ́дрствꙋющїи, ѕло́бою содержи́мїи распыха́хꙋсѧ сердцы̀ свои́ми, ви́дѧще на́съ почита́ющихъ честны̑ѧ мо́щи твоѧ̑, и҆ благода́рственнѡ хрⷭ҇тꙋ̀ взыва́ющихъ: сы́й бл҃гослове́нъ и҆ препросла́вленъ.

Свѣ́тъ трисїѧ́ненъ пребж҃е́ственныѧ трⷪ҇цы въ се́рдцы твое́мъ жили́ще себѣ̀ содѣ́ла. Ѿтꙋ́дꙋ напо́лнивсѧ дх҃а ст҃а́гѡ, бг҃оно́сне ѻ҆́ч҃е, є҆реті́ческое ѡ҆полче́нїе ѡ҆мрачи́лъ є҆сѝ, просвѣти́лъ же є҆сѝ собо́ръ правосла́вныхъ, вѣ́рою хрⷭ҇тꙋ̀ бг҃ꙋ пою́щихъ: сы́й бл҃гослове́нъ и҆ препросла́вленъ.

Сокрꙋшѝ, прпⷣбне мїхаи́ле, мы̑шцы врагѡ́въ мы́сленныхъ востаю́щихъ на мѧ̀, и҆ лꙋ́ки и҆́хъ сломѝ, и҆ стрѣ́лы притꙋпѝ моли́твами твои́ми, ꙗ҆́кѡ дерзнове́нїе ве́лїе и҆мѣ́ѧ къ бг҃ꙋ, да возмогꙋ̀ пѣ́ти: сы́й благослове́нъ и҆ препросла́вленъ.

Бг҃оро́диченъ:

Пе́щь проѡбразова́ше твоѐ ржⷭ҇тво̀, всенепоро́чнаѧ, ѻ҆трокѡ́въ бо не ѡ҆палѝ: ꙗ҆́коже бо ни ложе́снъ твои́хъ ѻ҆́гнь бжⷭ҇твенный. Тѣ́мже мо́лимъ тѧ̀: ѻ҆гнѧ̀ вѣ́чнагѡ и҆зба́ви на́съ, дв҃о мт҃и влⷣчце.

И҆́нъ. І҆рмо́съ:

На по́ли деи́рѣ и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ, въ не́йже трѝ ѻ҆́троки пѣсносло́вѧхꙋ є҆ди́наго бг҃а, трⷪ҇чнѡ воспѣва́хꙋ глаго́люще: ѻ҆тє́цъ бж҃е, бл҃гослове́нъ є҆сѝ.

Мїхаи́ла, вели́кагѡ а҆рхїстрати́га, первостоѧ́телѧ престо́лꙋ прест҃ы́ѧ трⷪ҇цы, тезоиме́нство стѧжа́въ, всѣ̑мъ нбⷭ҇нымъ невеще́ствєннымъ си́ламъ соѡбща́ешисѧ, прпⷣбне ѻ҆́ч҃е, съ ни́ми хрⷭ҇тꙋ̀ взыва́ѧ: ѻ҆ц҃є́въ бж҃е, благослове́нъ є҆сѝ.

Кло́потъ де́мѡнскїй крⷭ҇та̀ зна́менїемъ неѧ́вственъ сотвори́лъ є҆сѝ, и҆ клоко́щꙋщеесѧ мо́ре жите́йское волна́ми сꙋе́тъ скорѣ́е є҆ле́нскїѧ бо́рзости прескочи́лъ є҆сѝ, и҆ въ прꙋ́дныхъ мѣ́стѣхъ грѣха̀ не потопи́лсѧ є҆сѝ, бг҃оно́сный ѻ҆́ч҃е, поѧ̀ хрⷭ҇тꙋ̀: ѻ҆ц҃є́въ бж҃е, благослове́нъ є҆сѝ.

Хрⷭ҇толюби́вомꙋ кнѧ́зю, прише́дшꙋ во ѻ҆би́тель ст҃ы́ѧ трⷪ҇цы, и҆ мы́сль свою̀ и҆сповѣ́давшꙋ тѝ, є҆́же воздви́гнꙋти хра́мъ ст҃ы́ѧ трⷪ҇цы во ѻ҆би́тели твое́й, є҆мꙋ́же, ѻ҆́ч҃е, ꙗ҆́снѡ сказа́лъ є҆сѝ: а҆́ще сотвори́ши сїѐ, всѧ́кое жела́нїе благо́е полꙋчи́ши, є҆́же и҆ бы́сть. Тѣ́мже хрⷭ҇тꙋ̀ взыва́лъ є҆сѝ: ѻ҆ц҃є́въ бж҃е, благослове́нъ є҆сѝ.

Ско́ръ помо́щникъ бы́лъ є҆сѝ, прпⷣбне, є҆щѐ въ жи́зни се́й бо ѻ҆би́тели ст҃ы́ѧ трⷪ҇цы: дале́че бо въ мо́ри кꙋпцꙋ̀ съ корабле́мъ потоплѧ́емꙋ, и҆ тебѐ призва́вшꙋ на по́мощь, и҆ ꙗ҆́кѡ мо́лнїѧ ско́ростїю по вода́мъ ходѧ̀, сего̀ и҆зба́вилъ є҆сѝ ѿ потопле́нїѧ.

Трⷪ҇ченъ:

Оу҆́мъ нерожде́нный ѻ҆ц҃ъ, и҆ ѿ негѡ̀ сло́во ро́ждшеесѧ, и҆ дх҃ъ бжⷭ҇твенный непости́жнѣ и҆схо́денъ сы́й, бж҃е є҆динонача́льне трисо́лнечне, пою̀ тебѣ̀: благослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Оу҆мерщвле́нъ бы́хъ, пречⷭ҇таѧ, грѣхо́внымъ ꙗ҆́домъ напое́нъ, и҆ притека́ю къ тебѣ̀ вѣ́рою, ро́ждшей нача́льника живота̀. Твои́ми моли́твами раба̀ твоего̀ ѡ҆живѝ, и҆ и҆скꙋше́нїй и҆ страсте́й и҆зба́ви, є҆ди́на чⷭ҇таѧ.

Пѣ́снь и҃. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Приноси́магѡ тебѣ̀ моле́нїѧ, прпⷣбне ѻ҆́ч҃е мїхаи́ле, ѿ мно́жества твоемꙋ̀ житїю̀ послѣ́дствꙋющихъ не пре́зри, но со ᲂу҆се́рдїемъ прїи́мъ всѧ̑ ны̀ спасѝ, хрⷭ҇тꙋ̀ вопїю́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

И҆мѣ́ѧ дх҃а ст҃а́го въ се́рдцы твое́мъ, ꙗ҆́кѡ є҆ди́нъ бг҃оглаго́ливыхъ дре́внихъ прⷪ҇рѡ́къ, бꙋ̑дꙋщаѧ ꙗ҆вле́ннѡ человѣ́кѡмъ сказа́лъ є҆сѝ, и҆ въ настоѧ́щее сїѐ вре́мѧ да́рꙋй во́инствꙋ на́шемꙋ на ва́рвары побѣ́дꙋ, бг҃оно́се ѻ҆́ч҃е.

Ѿ земны́хъ къ нбⷭ҇нымъ ѻ҆би́телемъ пресла́внѡ возше́лъ є҆сѝ, бг҃оно́се ѻ҆́ч҃е мїхаи́ле, и҆ та́мѡ, прпⷣбныхъ че́сти сподо́бивсѧ, предстои́ши ст҃ѣ́й трⷪ҇цѣ, и҆ зри́ши неизречє́ннаѧ, и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взы́де, ꙗ҆̀же ᲂу҆гото́ва бг҃ъ лю́бѧщымъ є҆го̀.

Бг҃оро́диченъ:

Вели́комꙋ та́инствꙋ ржⷭ҇тва̀ твоегѡ̀ кто̀ не ᲂу҆диви́тсѧ, бцⷣе, и҆лѝ кі́й ѧ҆зы́къ земны́хъ, и҆лѝ ᲂу҆́мъ безпло́тныхъ и҆зрещѝ возмо́жетъ; па́че бо є҆стества̀ и҆ смы́сла, бцⷣе, зижди́телѧ всѣ́хъ родила̀ є҆сѝ.

И҆́нъ. І҆рмо́съ:

Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ, во вѣ́ки.

Волнꙋ́ющїйсѧ мо́й ᲂу҆́мъ нелѣ́пыми страстьмѝ и҆ помышлє́нїи и҆сцѣлѝ, прпⷣбне, и҆ коле́блющеесѧ се́рдце моѐ ᲂу҆твердѝ, и҆ смꙋща́ющыѧ вѣ́тры дꙋ́шꙋ мою̀ ᲂу҆ти́ши, да сла́влю хрⷭ҇та̀, содѣ́телѧ всѣ́хъ, во вѣ́ки.

Рꙋко́ю содержа́щагѡ всю̀ тва́рь бг҃а, и҆ человѣ́ка созда́вшагѡ честнѣ́йша всеѧ̀ тва́ри за́пѡвѣди, преподо́бне, соверши́лъ є҆сѝ, бг҃оꙋго́днѡ на землѝ жи́знь твою̀ живѧ̀, и҆ во ю҆ро́дство хрⷭ҇та̀ ра́ди во́лею преложи́всѧ, го́рдость и҆ тщесла́вїе ѿ себє̀ ѿри́нꙋлъ є҆сѝ, пѣ́снь воспѣва́ѧ содѣ́телю всѣ́хъ во вѣ́ки.

Пресвѵ́тера ди́внаго ѻ҆́наго во ᲂу҆́жасъ приве́лъ є҆сѝ, твои́мъ ди́внымъ и҆ чрез̾есте́ственнымъ прехожде́нїемъ, во ѻ҆би́тель ст҃ы́ѧ трⷪ҇цы. ѽ чꙋ́до! ка́кѡ ѡ҆брѣ́лсѧ є҆сѝ внꙋ́трь хра́ма со всѧ́кимъ ᲂу҆твержде́нїемъ заключе́на, дх҃ꙋ ст҃о́мꙋ сїѧ̑ дѣ́йствꙋющꙋ;

И҆лїѝ ѻ҆гнено́сномꙋ, и҆зрѧ́дномꙋ прⷪ҇ро́кꙋ, ѻ҆гнедохнове́нномꙋ ᲂу҆мꙋ̀, начерта́вшемꙋ трⷪ҇ческꙋю си́лꙋ, ᲂу҆подо́билсѧ є҆сѝ, прпⷣбне ѻ҆́ч҃е мїхаи́ле, бл҃гоче́стїѧ ре́вностїю всѧ́чески, и҆ па́ки во ю҆ро́дство хрⷭ҇та̀ ра́ди преложи́сѧ: но добродѣ́тель ᲂу҆таи́тисѧ не возмо́же.

Трⷪ҇ченъ:

Гдⷭ҇онача́лїе безнача́льное, всеси́льнꙋ и҆ пребл҃гꙋ, совершеннонача́льнꙋ, бл҃годѣ́йственнꙋ, неѡпредѣ́льнꙋ, винꙋ̀ невино́внꙋ, твори́тельнꙋ, присносꙋ́щнꙋ, промысли́тельнꙋ и҆ спаси́тельнꙋю всѣ́хъ, є҆ди́ницꙋ по сꙋществꙋ̀, и҆ трⷪ҇цꙋ ли́цы сла́влю тѧ̀, бж҃е мо́й, вѣ́рнѡ во вѣ́ки.

Бг҃оро́диченъ:

На землѝ возсїѧ̀ невече́рнее сл҃нце, ржⷭ҇тво́мъ є҆́же и҆з̾ тебє̀ дѣ́вственнымъ, пречⷭ҇таѧ влⷣчце, и҆ человѣ́ки и҆зба́ви ѿ і҆́дѡльскагѡ помраче́ннагѡ мра́ка. Тѣ́мже и҆ ны́нѣ мѧ̀ па́че тогѡ̀ бг҃онача́лїѧ ѡ҆зарѝ лꙋча́ми, и҆ соблюдѝ твоего̀ раба̀.

Пѣ́снь ѳ҃. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.

Пахѡ́мїа вели́кагѡ чи́нꙋ а҆́гг҃льскомꙋ и҆ житїю̀ подража́въ, равноа́гг҃льнѡ во ѻ҆би́тели ст҃ы́ѧ трⷪ҇цы пожи́лъ є҆сѝ: тѣ́мже и҆ равноа́гг҃льнꙋ по́честь ѿ бг҃а сподо́билсѧ є҆сѝ прїѧ́ти. Мы́ же всѝ благоче́стнѡ тѧ̀ ᲂу҆блажа́емъ, бг҃оно́сне ѻ҆́ч҃е мїхаи́ле.

Пꙋте́мъ ходѧ̀ ведꙋ́щимъ въ црⷭ҇тво нбⷭ҇ное, преподо́бно на землѝ житїѐ пожи́лъ є҆сѝ: и҆ въ бꙋ́йство хрⷭ҇та̀ ра́ди во́лею преложи́всѧ, мра́зомъ и҆ зно́емъ, и҆ на землѝ лега́нїемъ, а҆лка́нїемъ и҆ жа́ждею тѣ́ло твоѐ ᲂу҆дрꙋчи́лъ є҆сѝ, дꙋ́хъ же возвесели́лъ є҆сѝ. Тѣ́мже тѧ̀ всѝ благоче́стнѡ ᲂу҆блажа́емъ.

Моле́нїй и҆ пѣ́нїй гла́сы ᲂу҆слы́ши, бг҃оно́сне ѻ҆́ч҃е мїхаи́ле, къ вѣ́рѣ же и҆ любвѝ вонмѝ хрⷭ҇толюби́выхъ люде́й, и҆, ꙗ҆́кѡ ѻ҆течестволю́бецъ, поборѝ врагѝ, ѻ҆́тче, вою́ющыѧ на ны̀, свы́ше бл҃года́тїю покрыва́ѧ хва́лѧщыѧ тѧ̀.

Бг҃оро́диченъ:

И҆сцѣли́ла є҆сѝ сокрꙋше́нїе, всенепоро́чнаѧ, и҆ дрє́внїѧ стра̑сти земны́хъ, бг҃а поро́ждши цр҃ѧ̀ хрⷭ҇та̀, поне́сшаго пло́тїю недꙋ́ги на́шѧ: тѣ́мже тѧ̀ всѝ ро́ди, дв҃о влⷣчце, ᲂу҆блажа́юще, бг҃оневѣ́сто, велича́емъ.

И҆́нъ. І҆рмо́съ:

Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Мы́сленное мо́ре страсте́й ᲂу҆спи́въ поще́нїемъ, и҆ чꙋ́вственныѧ воды̀ разлива̑нїѧ мнѡ́га, є҆́зера и҆льме́нѧ свирѣ́пѡ волнꙋ́ємы во́лны, и҆ жестокодыха́ющыѧ вѣ́тры сло́вомъ ᲂу҆кроти́лъ є҆сѝ, и҆ на пꙋ́ть ми́ра напра́ви ны̀.

Жи́лами слове́съ твои́хъ ᲂу҆дави́лъ є҆сѝ ѕмі́ѧ, хва́лѧщагосѧ ве́сь мі́ръ поглоти́ти, и҆ те́плыми слеза́ми твои́ми къ бг҃ꙋ ѻ҆́гненное є҆гѡ̀ дыха́нїе погаси́лъ є҆сѝ, и҆ безъ вѣ́сти сотвори́лъ є҆сѝ: тогѡ̀ зїѧ́нїѧ, преподо́бне, и҆зба́ви, и҆ на пꙋ́ть ми́ра напра́ви ны̀.

Ꙗ҆́кѡ мѡѷсе́й бг҃ови́децъ чꙋдодѣ́йствꙋѧ, преподо́бне, мл҃твою во́дꙋ и҆з̾ землѝ и҆зве́лъ є҆сѝ, ꙗ҆́же ꙗ҆́коже рѣка̀ ѻ҆би́льнѡ всю̀ ѻ҆би́тель напаѧ́ше, и҆ съ плі́нѳами и҆ ка́менїемъ ладїи̑ пловꙋ́щыѧ на созда́нїе це́ркве ст҃ы́ѧ трⷪ҇цы, въ ти́хое приста́нище приве́лъ є҆сѝ, и҆ на пꙋ́ть ми́ра напра́ви ны̀.

Прпⷣбне бг҃оно́сне ѻ҆́ч҃е мїхаи́ле, ꙗ҆́коже не да́лъ є҆сѝ мꙋжє́мъ кро́ве и҆ льстѝ въ расхище́нїе ѻ҆би́тели, въ не́йже мона́шеское житїѐ проходи́лъ є҆сѝ: та́кѡ ѡ҆клевета́ющыѧ на́съ смирѝ, и҆ грѣхо́внꙋю печа́ль ѿженѝ, и҆ сердца̀ на̑ша ра́дости и҆спо́лни, и҆ на пꙋ́ть ми́ра напра́ви ны̀.

Трⷪ҇ченъ:

Є҆ди́но гдⷭ҇ство и҆ трисїѧ́нное, є҆ди́нственное бг҃онача́лїе трисо́лнечное, пѣвцы̀ прїимѝ твоѧ̑ бг҃олѣ́пнѡ, и҆ прегрѣше́нїй и҆зба́ви, и҆ и҆скꙋше́нїй лю́тыхъ, и҆ вско́рѣ ми́ръ пода́ждь человѣколю́бнѡ, и҆ цр҃кве́й соедине́нїе, и҆ на пꙋ́ть ми́ра напра́ви ны̀.

Бг҃оро́диченъ:

Во ᲂу҆тро́бꙋ, хрⷭ҇тѐ сп҃се мо́й, двⷭ҇твеннꙋю всели́всѧ, ꙗ҆ви́лсѧ є҆сѝ мі́рꙋ всемꙋ̀ бг҃омꙋ́жнѡ, неизмѣ́ненъ, неслїѧ́ненъ вои́стиннꙋ: и҆ ѡ҆бѣща́лъ є҆сѝ всегда̀ съ твои́ми рабы̑ бы́ти ꙗ҆́вѣ. Тѣ́мже тебѐ ро́ждшїѧ моли́твами, ми́ръ мі́рꙋ твоемꙋ̀ ᲂу҆стро́й, и҆ на пꙋ́ть ми́ра напра́ви ны̀.

Свѣти́ленъ. Подо́бенъ: Прⷪ҇ро́цы:

Пресвѣ́тлый свѣти́льникъ неꙋгаси́мый, ѿ восто́ка мы́сленнагѡ сл҃нца хрⷭ҇та̀, ꙗ҆́кѡ свѣтоза́рнаѧ лꙋча̀ возсїѧ́въ, мра́чнꙋю странꙋ̀ на за́падѣ и҆ сѣ́верѣ просвѣти́лъ є҆сѝ свѣ́тлостїю слове́съ и҆ добродѣ́тели дѣѧ́нїемъ: є҆мꙋ́же не преста́й молѧ́сѧ, є҆́же въ ми́рѣ сохрани́ти, мїхаи́ле прпⷣбне, па́мѧть твою̀ почита́ющыѧ.

Два́жды.

Сла́ва, и҆ ны́нѣ, пра́здника, и҆лѝ бг҃оро́диченъ:

Премꙋ́дрость ѵ҆поста́снꙋю и҆ пресꙋ́щное сло́во, и҆ врача̀ всѣ́хъ ро́ждшаѧ, всечⷭ҇таѧ бцⷣе, гноє́нїѧ и҆ ꙗ҆́звы и҆сцѣлѝ дꙋ́шъ на́шихъ, и҆ сохранѧ́й неврє́дны всѧ́кагѡ врагѡ́въ нахо́да, всегда́ тѧ молѧ́щыѧ, застꙋ́пнице мі́ра бл҃га́ѧ.

На хвали́техъ стїхи̑ры, на д҃, гла́съ и҃. Подо́бенъ: Ѽ пресла́внагѡ чꙋдесѐ!

Ѽ пресла́внагѡ чꙋдесѐ, ꙳ въ не́мощнѣмъ тѣлесѝ ꙗ҆́кѡ безпло́тенъ, ꙳ ᲂу҆се́рднѡ тебѐ сама́го бг҃ꙋ возложи́въ, прпⷣбне мїхаи́ле, ꙳ всю̀ жи́знь твою̀ мꙋ́ченически хрⷭ҇то́вы ра́ди любвѐ сконча́лъ є҆сѝ, ꙳ плотскі̑ѧ стра̑сти препобѣди́лъ є҆сѝ, ꙳ и҆ ве́лїй чꙋдотво́рецъ бы́лъ є҆сѝ. ꙳ Тогѡ̀ ра́ди зове́мъ хрⷭ҇тꙋ̀: ꙳ спасѝ, бж҃е, дꙋ́шы на́шѧ, ꙗ҆́кѡ благоꙋтро́бенъ.

Ѽ пресла́внагѡ чꙋдесѐ, ꙳ и҆спо́лнено стра́ха и҆ ра́дости дꙋхо́вныѧ, ꙳ мона́хѡвъ мно́жество, ꙳ въ прехожде́нїе бг҃оно́снагѡ ѻ҆ц҃а̀ мїхаи́ла: ꙳ ꙗ҆́кѡ бо мо́лнїѧ восходѧ́щи ѿ восто́ка до за́пада, ꙳ ѡ҆брѣ́тесѧ во ѻ҆би́тели прест҃ы́ѧ трⷪ҇цы, ꙳ во хра́мѣ со всѧ́кимъ ᲂу҆твержде́нїемъ заключе́ннѣмъ и҆ неразрꙋши́мѣмъ. ꙳ Семꙋ̀ дивѧ́щесѧ зовѧ́хꙋ хрⷭ҇тꙋ̀: ꙳ спасѝ, бж҃е, дꙋ́шы на́шѧ, ꙗ҆́кѡ благоꙋтро́бенъ.

Ѽ пресла́внагѡ чꙋдесѐ, ꙳ во́льнымъ ю҆ро́дствомъ твои́мъ хрⷭ҇та̀ ра́ди, ꙳ соверши́сѧ дꙋхо́внаѧ мꙋ́дрость въ тебѣ̀, ѻ҆́ч҃е мїхаи́ле. ꙳ Нищетꙋ̀ хрⷭ҇то́вꙋ возлюби́въ, ꙳ ꙗ҆ре́мъ гдⷭ҇ень на сѧ̀ взѧ́лъ є҆сѝ, посто́мъ и҆ бдѣ́нїемъ тѣ́ло твоѐ ᲂу҆дрꙋчи́лъ є҆сѝ, ꙳ и҆ на высотꙋ̀ добродѣ́телей возше́лъ є҆сѝ, ꙳ высотꙋ̀ хрⷭ҇то́вы та́йныѧ добро́ты зри́ши. ꙳ Тогѡ̀ ра́ди зове́мъ хрⷭ҇тꙋ̀: ꙳ спасѝ, бж҃е, дꙋ́шы на́шѧ, ꙗ҆́кѡ благоꙋтро́бенъ.

Ѽ пресла́внагѡ чꙋдесѐ, ꙳ ꙗ҆́кѡ дѣ́йствомъ ст҃а́гѡ дх҃а, ꙳ высѡ́каѧ и҆ ди̑внаѧ прⷪ҇ро́чєскаѧ вѣща̑нїѧ, ꙳ преподо́бномꙋ и҆ бг҃оно́сномꙋ ѻ҆ц҃ꙋ̀ мїхаи́лꙋ, ꙳ безвѣ̑стнаѧ и҆ та̑йнаѧ ѿкры́шасѧ, ꙳ и҆ є҆́же го́дѣ сꙋдьба́мъ бж҃їимъ, ꙳ и҆ мнѡ́гимъ бы́сть во спасе́нїе. ѽ каково̀ дарова́нїе на́мъ дарова́сѧ, ꙳ є҆гѡ́же ра́ди, хрⷭ҇тѐ, спасѝ, бж҃е, дꙋ́шы на́шѧ, ꙳ ꙗ҆́кѡ благоꙋтро́бенъ.

Сла́ва, гла́съ є҃. Самогла́сенъ:

Бжⷭ҇твеннымъ ѻ҆гне́мъ разжиза́емь, и҆ свѣ́томъ просвѣща́емь прест҃ы́ѧ трⷪ҇цы, мꙋ́дре, пред̾ѡчи́стилъ є҆сѝ себѐ, бг҃оно́се мїхаи́ле, воздержа́нїемъ и҆ чистото́ю, и҆ вра̑жїѧ побѣди́лъ є҆сѝ совѣ́ты и҆ кова̑рства, и҆ на ре́вность бж҃е́ственнꙋю подви́гнꙋвъ съ собо́ю мона́хѡвъ мно́жєства, преѡби́дѣти привре́мєннаѧ ᲂу҆вѣща́лъ є҆сѝ. Тѣ́мже въ славослове́нїи тебѐ ᲂу҆блажа́емъ: моли́сѧ, прпⷣбне, є҆ди́номꙋ сердцевѣ́дцꙋ хрⷭ҇тꙋ̀ бг҃ꙋ, да пощади́тъ дꙋ́шы на́шѧ.

И҆ ны́нѣ, бг҃оро́диченъ, гла́съ то́йже:

Стра́шно и҆ пресла́вно, и҆ ве́лїе та́инство, невмѣсти́мый во чре́во вмѣща́етсѧ, и҆ мт҃и по ржⷭ҇твѣ̀ дв҃а па́ки пребы́сть: бг҃а бо родѝ и҆з̾ неѧ̀ воплоще́нна. Томꙋ̀ возопїе́мъ, томꙋ̀ пѣ́снь рце́мъ, со а҆́гг҃лы воспѣва́юще: ст҃ъ є҆сѝ, безнача́льный бж҃е, и҆́же на́съ ра́ди вочеловѣ́чивыйсѧ, сла́ва тебѣ̀.

Славосло́вїе вели́кое, и҆ ѿпꙋ́стъ. На лїтꙋргі́и: Бл҃жє́нна пра́здника, и҆ ст҃а́гѡ пѣ́снь ѕ҃. Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀. А҆пⷭ҇лъ къ корі́нѳѧнѡмъ, зача́ло рл҃а. А҆ллилꙋ́їа: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Є҆ѵⷢ҇лїе ѿ лꙋкѝ, зача́ло к҃д. Прича́стный: Въ па́мѧть вѣ́чнꙋю бꙋ́детъ пра́ведникъ:

* * *

1

꙾А҆нато́лїевъ꙾


Комментарии для сайта Cackle