Мѣ́сѧца тогѡ́же въ д҃і-й де́нь. Прпⷣбныхъ ѻ҆тє́цъ на́шихъ, въ сїна́и и҆ раі́ѳѣ и҆збїе́нныхъ.
И҆ свѧты́ѧ равноапⷭ҇льныѧ ні́ны просвѣти́тельницы грꙋ́зїи.
Слꙋ́жба є҆ѧ̀ пи́сана въ приложе́нїи.
Пое́мъ всю̀ слꙋ́жбꙋ преподо́бныхъ въ г҃і де́нь. Поне́же въ сі́й де́нь ѿдае́тсѧ пра́здникъ просвѣще́нїѧ, и҆ пое́тсѧ слꙋ́жба пра́здника.
Ве́черъ ѻ҆бы́чнаѧ каѳі́сма, на Гдⷭ҇и, воззва́хъ, стїхи̑ры на ѕ҃: поє́мыѧ на са́мый пра́здникъ. Сла́ва, и҆ ны́нѣ: Приклони́лъ є҆сѝ главꙋ̀ прⷣте́чи: Прокі́менъ днѐ. Вхо́да нѣ́сть, паремі́й не чте́мъ. Та́же, Сподо́би, гдⷭ҇и: и҆ є҆ктенїа̀, И҆спо́лнимъ вече́рнюю моли́твꙋ: На стїхо́внѣ стїхи̑ры пра́здника, со стїхѝ и҆́хъ. Сла́ва, и҆ ны́нѣ, пра́здника. По Ны́нѣ ѿпꙋща́еши, и҆ по трист҃о́мъ тропа́рь пра́здника. Та́же є҆ктенїа̀, Поми́лꙋй на́съ, бж҃е: и҆ ѿпꙋ́стъ. Ст҃а́го же, и҆́же на рѧдꙋ̀, помина́емъ на ѿпꙋ́стѣ. Воꙋ́трїе полꙋ́нощницꙋ пое́мъ по ѻ҆бы́чаю съ каѳі́смою, и҆ тропарѝ глаго́лемъ рѧдовы̑ѧ. и҆ моли́твꙋ глаго́лемъ: Помѧнѝ, гдⷭ҇и, въ наде́жди воскресе́нїѧ: И҆ ѿпꙋ́стъ.
На ᲂу҆́трени на Бг҃ъ гдⷭ҇ь, тропа́рь пра́здника три́жды. По каѳі́смахъ сѣда́льны пра́здника. И҆ чте́нїе пра́здника. Канѡ́нъ пе́рвый со і҆рмосо́мъ на и҃: дрꙋгі́й канѡ́нъ со і҆рмосо́мъ на ѕ҃. І҆рмосы̀ пое́мъ ѻ҆бою̀ канѡ́нѡвъ по два́жды. Катава́сїа, і҆рмо́съ пое́мъ пе́рвагѡ канѡ́на, на схо́дѣ. По г҃-й пѣ́сни ѵ҆пакоѝ, гла́съ є҃: Є҆гда̀ ꙗ҆вле́нїемъ твои́мъ: По ѕ҃-й пѣ́сни конда́къ пра́здника, и҆ і҆́косъ. На ѳ҃-й пѣ́сни Честнѣ́йшꙋю не пое́мъ, но пое́мъ припѣ́вы пра́здника, ꙗ҆́коже и҆ на са́мый пра́здникъ. Свѣти́ленъ пра́здника є҆ди́ножды. Сла́ва, и҆ ны́нѣ, то́йже. На хвали́техъ стїхи̑ры пра́здника, на д҃. Сла́ва, гла́съ ѕ҃: Вода́ми і҆ѻрда́нскими: И҆ ны́нѣ, гла́съ в҃: Дне́сь хрⷭ҇то́съ на і҆ѻрда́нъ: И҆ славосло́вїе вели́кое. По трист҃о́мъ тропа́рь пра́здника. Є҆ктєнїѝ, и҆ ѿпꙋ́стъ. и҆ ѻ҆бы́чное и҆схожде́нїе въ притво́ръ. и҆ ча́съ а҃-й тропа́рь и҆ конда́къ пра́здника.
На лїтꙋргі́и бл҃жє́нна, ѻ҆бои́хъ канѡ́нѡвъ пѣ́снь ѳ҃, на и҃. А҆нтїфѡ́нѡвъ же пра́здника не глаго́лемъ. По вхо́дѣ тропа́рь пра́здника. Сла́ва, и҆ ны́нѣ, конда́къ пра́здника. Та́же трист҃о́е. Прокі́менъ, а҆ллилꙋ́їа и҆ прича́стенъ пра́здника. А҆пⷭ҇лъ и҆ є҆ѵⷢ҇лїе днѐ.
🕅 Подоба́етъ вѣ́дати, а҆́ще слꙋчи́тсѧ ѿда́нїе бг҃оѧвле́нїѧ въ недѣ́лю пре́жде мытарѧ̀ и҆ фарїсе́а.
Въ сꙋббѡ́тꙋ на ма́лѣй вече́рни, на Гдⷭ҇и, воззва́хъ, стїхи̑ры воскрє́сны: Сла́ва, и҆ ны́нѣ, пра́здника. На стїхо́внѣ стїхи́ра воскре́сна є҆ди́на, и҆ пра́здника, стїхо́вна со стїхѝ свои́ми, вели́кїѧ вече́рни. Сла́ва, и҆ ны́нѣ, пра́здника: Дне́сь хрⷭ҇то́съ: пи́санъ на хвали́техъ.
На вели́цѣй вече́рни по ѻ҆бы́чной стїхоло́гїи. На Гдⷭ҇и, воззва́хъ, стїхи̑ры воскрє́сны г҃, и҆ ꙾восто́ченъ꙾ 2 є҆ди́нъ: и҆ пра́здника ѕ҃, поє́мыѧ на са́мый пра́здникъ. Сла́ва, пра́здника: И҆ ны́нѣ, бг҃оро́диченъ а҃-й гла́са. На лїті́и стїхи̑ры, и҆ Сла́ва, и҆ ны́нѣ, пра́здника. На стїхо́внѣ стїхи̑ры воскрє́сны. Сла́ва, и҆ ны́нѣ, пра́здника. На бл҃гослове́нїи хлѣ́бѡвъ тропа́рь: Бцⷣе дв҃о, два́жды: и҆ пра́здника є҆ди́ножды. и҆ чте́нїе въ посла́нїихъ а҆пⷭ҇тольскихъ. А҆́ще же нѣ́сть бдѣ́нїѧ. По Ны́нѣ ѿпꙋща́еши, тропа́рь воскре́сенъ. Сла́ва, и҆ ны́нѣ, пра́здника. На повече́рїи по Досто́йнѣ, по Ѻ҆́ч҃е на́шъ, конда́къ пра́здника.
На ᲂу҆́трени на Бг҃ъ гдⷭ҇ь, тропа́рь воскре́сенъ два́жды. Сла́ва, и҆ ны́нѣ, пра́здника. По каѳі́смахъ сѣда́льны воскрє́сны, съ бг҃орѡ́дичны и҆́хъ. И҆ чте́нїе. Та́же непорѡ́чны, съ тропарѝ: А҆́гг҃льскїй собо́ръ. ѵ҆пакоѝ гла́са. Степє́нна. Прокі́менъ, Всѧ́кое дыха́нїе: Є҆ѵⷢ҇лїе воскре́сно, и҆ про́чее воскре́сно и҆ до канѡ́на. Канѡ́нъ воскре́сенъ со і҆рмосо́мъ на д҃, и҆ бцⷣѣ на два̀: и҆ пра́здника ѻ҆́ба канѡ́на на и҃. Катава́сїа пра́здника. По г҃-й пѣ́сни конда́къ пра́здника, и҆ і҆́косъ, и҆ ѵ҆пакоѝ пра́здника, и҆ чте́нїе пра́здника. По ѕ҃-й пѣ́сни конда́къ воскрⷭ҇нъ и҆ і҆́косъ, и҆ чте́мъ про́логъ. На ѳ҃-й пѣ́сни пое́мъ Честнѣ́йшꙋю: Свѣти́ленъ воскре́сенъ. Сла́ва, и҆ ны́нѣ, пра́здника. На хвали́техъ стїхи̑ры воскрє́сны д҃: и҆ пра́здника д҃, со Сла́внымъ, съ припѣ́вы и҆́хъ. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ, бцⷣе дв҃о: Славосло́вїе вели́кое. По трист҃о́мъ, тропа́рь воскре́сенъ то́чїю, є҆ктєнїѝ, и҆ ѿпꙋ́стъ: и҆ ѡ҆глаше́нїе, и҆ и҆схожде́нїе ѻ҆бы́чное въ притво́ръ. и҆ ча́съ а҃-й, и҆ коне́чный ѿпꙋ́стъ. На часѣ́хъ тропа́рь воскре́сенъ, Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника и҆ воскре́сенъ, глаго́лемъ премѣнѧ́юще.
На лїтꙋргі́и бл҃жє́нна гла́са на ѕ҃: и҆ пра́здника пѣ́снь ѳ҃-ѧ ѻ҆бои́хъ канѡ́нѡвъ на д҃. По вхо́дѣ тропа́рь воскре́сенъ, и҆ пра́здника. Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, А҆пⷭ҇лъ и҆ є҆ѵⷢ҇лїе, недѣ́ли рѧ́дъ. А҆ллилꙋ́їа и҆ прича́стенъ пра́здника, и҆ днѐ.
🕅 Зри́мъ же и҆ сегѡ̀ ᲂу҆каза́нїѧ.
А҆́ще приспѣ́етъ въ д҃і і҆аннꙋа́рїа недѣ́лѧ ѡ҆ мытарѝ и҆ фарїсе́и, на ѿда́нїе бг҃оѧвле́нїѧ, пое́мъ воскре́сно, и҆ трїѡ́ди, и҆ пра́здника.
Въ сꙋббѡ́тꙋ ве́чера, на ма́лѣй вече́рни стїхи̑ры воскрє́сны, на д҃. Сла́ва, и҆ ны́нѣ, бг҃оро́диченъ а҃-й гла́са, ма́лыѧ вече́рни. На стїхо́внѣ стїхи́ра воскрⷭ҇на є҆ди́на: и҆ пра́здника стїхо́вна вели́кїѧ вече́рни со стїхѝ є҆ѧ̀. Сла́ва, и҆ ны́нѣ, пра́здника: Дне́сь хрⷭ҇то́съ: пи́санъ на хвали́техъ. По трист҃о́мъ тропа́рь воскрⷭ҇нъ: Сла́ва, и҆ ны́нѣ, пра́здника. є҆ктенїа̀ ма́лаѧ, и҆ ѿпꙋ́стъ.
На вели́цѣй вече́рни, Бл҃же́нъ мꙋ́жъ, каѳі́смꙋ всю̀: на Гдⷭ҇и, воззва́хъ, стїхи̑ры воскрє́сны, гла́са г҃, и҆ трїѡ́ди г҃, со Сла́внымъ, и҆ пра́здника д҃, поє́мыѧ на са́мый пра́здникъ, Сла́ва, пра́здника. И҆ ны́нѣ, бг҃оро́диченъ а҃-й гла́са. Вхо́дъ, прокі́менъ днѐ. На лїті́и стїхи̑ры пра́здника, и҆ трїѡ́ди самогла̑сны: Фарїсе́а велехва́льный гла́съ: Сла́ва, мытарѧ̀ и҆ фарїсе́а: И҆ ны́нѣ, пра́здника. На стїхо́внѣ стїхи̑ры воскрє́сны: Сла́ва, трїѡ́ди: И҆ ны́нѣ, пра́здника. На бл҃гослове́нїи хлѣ́бѡвъ, тропа́рь, Бцⷣе дв҃о: два́жды, и҆ пра́здника, є҆ди́ножды, и҆ чте́нїе. А҆́ще же нѣ́сть бдѣ́нїѧ, по Ны́нѣ ѿпꙋща́еши, тропа́рь воскре́сенъ: Сла́ва, и҆ ны́нѣ, пра́здника. На повече́рїи по Досто́йнѣ: по Ѻ҆́ч҃е на́шъ, конда́къ пра́здника: Сла́ва, и҆ ны́нѣ, трїѡ́ди.
На ᲂу҆́трени на Бг҃ъ гдⷭ҇ь, тропа́рь воскре́сенъ два́жды. Сла́ва, и҆ ны́нѣ, пра́здника. По каѳі́смахъ сѣда́льны воскрє́сны, съ бг҃орѡ́дичны и҆́хъ. И҆ чте́нїе во є҆ѵⷢ҇лїи толково́мъ. И҆ непорѡ́чны: ѵ҆пакоѝ гла́са, и҆ чте́нїе. Степє́нна, и҆ прокі́менъ гла́са, и҆ є҆ѵⷢ҇лїе воскре́сно. Воскресе́нїе хрⷭ҇то́во: Ѱало́мъ н҃. Сла́ва, Покаѧ́нїѧ: И҆ ны́нѣ, На спасе́нїѧ стези̑: та́же, Поми́лꙋй мѧ̀, бж҃е: и҆, Мно́жєства содѣ́ѧнныхъ мно́ю лю́тыхъ: Канѡ́нъ воскре́сенъ: со і҆рмосо́мъ на д҃, и҆ трїѡ́ди на д҃: и҆ пра́здника ѻ҆́ба канѡ́на на ѕ҃. Катава́сїа пра́здника. По г҃-й пѣ́сни конда́къ и҆ і҆́косъ, и҆ сѣда́ленъ трїѡ́ди. Сла́ва, и҆ ны́нѣ, пра́здника. По ѕ҃-й пѣ́сни конда́къ и҆ і҆́косъ пра́здника: На ѳ҃-й пѣ́сни пое́мъ Честнѣ́йшꙋю: Свѣти́ленъ воскре́сенъ: Сла́ва, трїѡ́ди: И҆ ны́нѣ, пра́здника. На хвали́техъ стїхи̑ры воскрє́сны д҃: и҆ пра́здника со Сла́внымъ д҃, съ припѣ́вы и҆́хъ. Сла́ва, самогла́сенъ трїѡ́ди: И҆ ны́нѣ, Преблагослове́нна є҆сѝ, бцⷣе дв҃о: Славосло́вїе вели́кое. По трист҃о́мъ тропа́рь воскре́сенъ то́чїю, є҆ктенїи̑, и҆ ѿпꙋ́стъ, и҆ и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ. и҆ ча́съ а҃-й. и҆ соверше́нный ѿпꙋ́стъ. На а҃-мъ часѣ̀ тропа́рь воскре́сенъ, Сла́ва, пра́здника: И҆ ны́нѣ, бг҃оро́диченъ часѡ́въ. По трист҃о́мъ конда́къ трїѡ́ди. Та́кожде и҆ на г҃-мъ, и҆ на ѕ҃-мъ, и҆ на ѳ҃-мъ часѣ́хъ глаго́лемъ тропарѝ: кондаки́ же пра́здника и҆ трїѡ́ди, премѣнѧ́юще глаго́лемъ.
На лїтꙋргі́и бл҃жє́нна гла́са на д҃: и҆ трїѡ́ди пѣ́снь г҃, на д҃: и҆ пра́здника пѣ́снь ѳ҃, на д҃. По вхо́дѣ тропа́рь воскре́сенъ, и҆ пра́здника. Сла́ва, конда́къ трїѡ́ди: И҆ ны́нѣ, пра́здника. Прокі́менъ гла́са, и҆ пра́здника. А҆пⷭ҇лъ и҆ є҆ѵⷢ҇лїе днѐ. Прича́стенъ: Хвали́те гдⷭ҇а съ нб҃съ: Дрꙋгі́й, пра́здника.
* * *
꙾А҆нато́лїевъ꙾