Мѣ́сѧца тогѡ́же въ и҃і-й де́нь. И҆̀же во ст҃ы́хъ, ѻ҆тє́цъ на́шихъ и҆ а҆рхїепⷭ҇копѡвъ а҆леѯандрі́йскихъ, а҆ѳана́сїа и҆ кѷрі́лла.

На Гдⷭ҇и, воззва́хъ, стїхи̑ры на ѕ҃, гла́съ д҃. Подо́бенъ: Ꙗ҆́кѡ до́блѧ:

Гонє́нїѧ претерпѣ́лъ є҆сѝ, ꙳ и҆ бѣды̑ под̾ѧ́лъ є҆сѝ, ꙳ бг҃оглаго́ливе преподо́бне а҆ѳана́сїе, ꙳ до́ндеже ле́сть прогна́лъ є҆сѝ ꙳ а҆́рїевꙋ безбо́жнꙋю, ꙳ и҆ ста́до твоѐ ѿ нече́стїѧ спа́слъ є҆сѝ, ꙳ є҆диносꙋ́щнаго ѻ҆ц҃ꙋ̀ догма́тствꙋѧ, ꙳ сн҃а же и҆ дх҃а правосла́внѡ, ꙳ сщ҃еннодѣ́йственне, всебл҃же́нне.

Блиста́ньми проповѣ́данїѧ ꙳ сꙋ́щыѧ во тмѣ̀ просвѣти́лъ є҆сѝ, ꙳ и҆ ле́сть всю̀ ѿгна́лъ є҆сѝ, ꙳ предбѣ́дствꙋѧ ѡ҆ вѣ́рѣ тве́рдѡ, а҆ѳана́сїе, ꙳ ꙗ҆́кѡ па́стырь и҆́стиненъ, ꙳ ꙗ҆́кѡ водрꙋже́нїе непоколеби́мо, ꙳ пресла́вне, хрⷭ҇то́вы цр҃кве: ꙳ сегѡ̀ ра́ди соше́дшесѧ, тѧ̀ почита́емъ, ꙳ пѣ́сненнѡ ра́дꙋющесѧ.

Добродѣ́тели всѧ́цѣй ѡ҆бꙋчи́лсѧ є҆сѝ ꙳ терпѣли́внѡ, бг҃одꙋхнове́нне, ꙳ и҆ пома́завсѧ дх҃а пома́занїемъ ст҃ы́мъ, ꙳ свѧщеннодѣ́тель свѧще́ннѣйшїй ꙗ҆́вѣ бы́лъ є҆сѝ, ꙳ и҆ па́стырь и҆́стиненъ, ꙳ и҆ вѣ́ры побо́рникъ: ꙳ тѣ́мже всѧ̀ цр҃ковь ꙳ сла́витъ твою̀ па́мѧть, свѧще́ннѡ соверша́ющи ꙳ и҆ сп҃са прославлѧ́ющи.

И҆́ны стїхи̑ры ст҃а́гѡ кѷрі́лла, гла́съ и҆ подо́бенъ то́йже:

Ѿ хрⷭ҇то́вы цр҃кве ꙳ мы́слєнныѧ во́лки, кѷрі́лле, ѿгна́лъ є҆сѝ ꙳ жезло́мъ ᲂу҆че́нїй твои́хъ, ꙳ и҆ сїю̀ ѻ҆́крестъ ѡ҆гради́лъ є҆сѝ ꙳ слове́съ ᲂу҆тверждє́нїи, ꙳ и҆ предста́вилъ є҆сѝ хрⷭ҇тꙋ̀ недви́жимꙋ и҆ непоколеби́мꙋ. ꙳ є҆го́же молѝ, ѿ тлѝ и҆ бѣ́дъ и҆зба́вити ꙳ вѣ́рою соверша́ющыѧ ꙳ всечестнꙋ́ю па́мѧть твою̀.

Сїѧ̑нїи дх҃а ꙳ просвѣти́въ тво́й ᲂу҆́мъ, ꙳ свѣтолꙋ́чное со́лнце бы́лъ є҆сѝ: ꙳ ꙗ҆́коже лꙋчы̀ повелѣ̑нїѧ ꙳ во всѧ̑ концы̀ простира́ѧ, ꙳ и҆ вѣ́рныхъ ѡ҆зарѧ́ѧ ꙳ и҆сполне́нїе всебл҃же́нне: ꙳ и҆ ѿгонѧ̀ тмꙋ̀, бг҃оно́се, є҆ресе́й ꙳ си́лою ѿ дв҃ы возсїѧ́вшагѡ.

Благосказа́нїемъ слове́съ твои́хъ, сщ҃е́ннѣйше кѷрі́лле, ꙳ цр҃ковь всѧ̀ ᲂу҆краша́етсѧ, ꙳ и҆ благоче́стнѡ ᲂу҆добрѧ́етсѧ ꙳ кра́сными добро́тами: ꙳ и҆ почита́етъ сщ҃е́ннѡ ꙳ твою̀ ст҃ꙋ́ю и҆ бл҃гознамени́тꙋю па́мѧть, сла́вне, ꙳ правосла́вныхъ похвало̀, ꙳ ѻ҆ц҃є́въ верхо́вне, и҆̀же на собо́рѣ ꙳ всест҃ы́ѧ побо́рниче.

Сла́ва, гла́съ ѕ҃. Ге́рманово:

Хрⷭ҇то́ва і҆ера́рха воспои́мъ всѝ а҆ѳана́сїа, ꙗ҆́кѡ а҆́рїева мнѣ̑нїѧ всѧ̑ ᲂу҆празднѝ, и҆ ст҃ы́ѧ трⷪ҇цы держа́вꙋ во все́мъ мі́рѣ ꙗ҆́снѡ возвѣща́етъ, є҆ди́наго бг҃а въ тре́хъ ли́цѣхъ нераздѣ́льна: є҆го́же и҆ мо́литъ ѡ҆ на́съ, вѣ́рою соверша́ющихъ па́мѧть є҆гѡ̀.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:

На дре́вѣ живо́тъ на́шъ, зрѧ́щи всенепоро́чнаѧ бцⷣа ви́сѧщъ, мт҃рски рыда́ющи вопїѧ́ше: сн҃е мо́й и҆ бж҃е мо́й, спасѝ любо́вїю пою́щыѧ тѧ̀.

На стїхо́внѣ ѻ҆ктѡ́иха. Сла́ва, гла́съ г҃. Ге́рманово:

Па́ки на́мъ златоте́чный ні́лъ, и҆ безсме́ртїѧ тезоимени́тъ, лѣ́тною па́мѧтїю прише́дъ, до́брыми восхожде́ньми наводнѧ́етъ златострꙋ̑йнаѧ безсме́ртїѧ лїѧ̑нїѧ, и҆ пи́щꙋ сла́дкꙋю плододаѧ̀ высо́кимъ бг҃овѣща́нїемъ, трⷪ҇цы нераздѣ́льнѣй держа́вѣ ᲂу҆чи́тъ покланѧ́тисѧ, и҆ и҆сточа́етъ бжⷭ҇твєннаѧ ᲂу҆чє́нїѧ, вѣ́рныхъ напаѧ́етъ помышлє́нїѧ, и҆ мо́литсѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:

Ѻ҆рꙋ́жїе се́рдце твоѐ про́йде, пречⷭ҇таѧ, є҆гда̀ сн҃а твоего̀ на крⷭ҇тѣ̀ ви́дѣла є҆сѝ, и҆ вопїѧ́ла є҆сѝ: не безча́днꙋ мѧ̀ покажѝ, сн҃е мо́й и҆ бж҃е мо́й, соблюды́й мѧ̀ по ржⷭ҇твѣ̀ дв҃ꙋ.

Тропа́рь, гла́съ д҃:

Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ: но мл҃твами и҆́хъ въ ми́рѣ ᲂу҆пра́ви живо́тъ на́шъ.

И҆лѝ се́й тропа́рь, гла́съ г҃:

Дѣ́лы возсїѧ́вше правосла́вїѧ, всѐ погаси́вше ѕлосла́вїе, побѣди́телїе побѣдоно́сцы бы́сте, бл҃гоче́стїемъ всѧ̑ ѡ҆богати́вше, цр҃ковь вельмѝ ᲂу҆краси́вше, досто́йнѡ ѡ҆брѣто́сте хрⷭ҇та̀ бг҃а, да́рꙋющаго на́мъ ве́лїю ми́лость.

И҆ ны́нѣ, бг҃оро́диченъ.

На ᲂу҆́трени є҆ди́нъ канѡ́нъ ѻ҆ктѡ́иха: И҆ ст҃ы́хъ два̀.

Канѡ́нъ ст҃а́гѡ а҆ѳана́сїа, є҆гѡ́же краегране́сїе:

А҆ѳана́сїй хвала̀ правосла́вїѧ бы́сть. Творе́нїе ѳеофа́ново.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

А҆ѳана́сїю приносѧ̀ похвалꙋ̀, ꙗ҆́кѡ добродѣ́тель бл҃гохвалѧ̀ къ бг҃ꙋ приношꙋ̀ па́че похвале́нїе, ѿ негѡ́же человѣ́кѡмъ даде́сѧ достохва́льно дарова́нїе добродѣ́тели, є҆ѧ́же бы́сть ѡ҆дꙋшевле́нъ ѻ҆́бразъ и҆ печа́ть.

Бг҃омꙋ́дрїѧ бы́лъ є҆сѝ и҆спо́лненъ, и҆ па́че со́лнца а҆́гг҃льскимъ, блаже́нне, житїе́мъ ѡ҆блиста́въ ны́нѣ, преподо́бне, превозше́лъ є҆сѝ похва́лъ зако́ны, ꙗ҆̀же ѿ на́съ: но прїимѝ, ѻ҆́ч҃е, а҆́ще и҆ не по досто́инствꙋ похвалѧ́емый.

Достодо́лжнѡ ᲂу҆́бѡ пѣ́снь плете́мъ, въ сла́внѣй твое́й па́мѧти, но лиша́ющесѧ велича́йшихъ, а҆ѳана́сїе, по досто́инствꙋ пѣ́сней твои́хъ, про́симъ проще́нїе на́мъ да́ти и҆ ѻ҆би́льнꙋю благода́ть тобо́ю дх҃а.

Ю҆́ношски плотски́хъ страсте́й и҆гра́нїе ᲂу҆мертви́лъ є҆сѝ, въ ю҆́ности твое́й стѧжа́въ мꙋ́дрость ста́рческꙋю и҆ и҆ бл҃гостоѧ́ннꙋю, а҆ѳана́сїе блаже́нне: премꙋ́дрости бо жела́нїемъ всѧ̑ чꙋ̑вства ᲂу҆пра́вилъ є҆сѝ.

Бг҃оро́диченъ:

Пресла̑внаѧ возглаго́лашасѧ ѡ҆ тебѣ̀ въ ро́дѣхъ родѡ́въ, бг҃а сло́ва во чре́вѣ вмѣсти́вшаѧ, чиста́ же пребы́вши, бцⷣе мр҃і́е. тѣ́мже тѧ̀ всѝ почита́емъ по бз҃ѣ предста́тельство на́ше.

И҆́нъ канѡ́нъ ст҃а́гѡ кѷрі́лла, є҆гѡ́же краегране́сїе:

Зрѣ́нїй кѷрі́ллъ бжⷭ҇твенныхъ цѣвни́ца. І҆ѡа́нново.

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Ѿ бг҃а свѣтода́тельнꙋю благода́ть, кѷрі́лле, прїе́мъ, и҆ свѣ́телъ свѣти́льникъ ꙗ҆ви́всѧ, словє́сныѧ ѡ҆блиста́лъ є҆сѝ на́мъ лꙋчы̀ па́мѧтїю твое́ю: ꙗ҆́кѡ да досто́йнѡ тѧ̀ воспои́мъ.

И҆спо́лнилсѧ є҆сѝ свѣтоѧвле́нїѧ, кѷрі́лле мꙋ́дре, дх҃а, ꙗ҆́кѡ за́повѣдей хрⷭ҇то́выхъ храни́тель, страсте́й ѡ҆чище́нъ, пребжⷭ҇твенныѧ бы́лъ є҆сѝ вои́стиннꙋ трⷪ҇цы жили́ще.

Ꙗ҆́кѡ ре́вности и҆ дерзнове́нїѧ и҆спо́лненъ, кѷрі́лле сла́вне, бг҃обо́рцы всѧ̑ нелжи́вѡ, ѧ҆зыкобѡ́лїѧ ѡ҆бличи́лъ є҆сѝ ѕлочести́выхъ є҆ресе́й, правосла́вїе защища́ѧ.

Бг҃оро́диченъ:

Трⷪ҇цы пребжⷭ҇твенныѧ, всечⷭ҇таѧ, є҆ди́наго родила̀ є҆сѝ, и҆з̾ тебє̀ пло́тїю ꙗ҆́вльшасѧ по на́мъ, благоволе́нїемъ роди́телѧ и҆ содѣ́йствїемъ дх҃а всест҃а́гѡ, бг҃оневѣ́сто.

Пѣ́снь г҃. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не человѣколю́бче.

Ѡ҆чи́стивъ ѿ всѧ́кїѧ скве́рны дꙋ́шꙋ же и҆ тѣ́ло, а҆ѳана́сїе, хра́мъ показа́лсѧ є҆сѝ досто́йнѡ бжⷭ҇твенъ. тѣ́мже трⷪ҇цы и҆сполне́нїе почѝ въ тебѣ̀, свѧщеннотаи́нниче всебл҃же́нне.

Твою̀ дꙋ́шꙋ, ꙗ҆́коже жела́ше, ᲂу҆тѣ́шителева бл҃года́ть, ѿ страсте́й ѡ҆чище́нꙋ ѡ҆брѣ́тши, ꙗ҆́вѣ въ не́й дѣ̑йствїѧ показꙋ́етъ, и҆ пресвѣ́тло свѣти́ло, ѻ҆́ч҃е, мі́рꙋ тѧ̀ полага́етъ.

Свѧти́тельства ᲂу҆́бѡ пра́вило свѧти́телємъ показа́лсѧ є҆сѝ, дѣ́тельнагѡ же подписа́нїе житїѧ̀, сло́во же твоѐ ꙗ҆́снѡ, видѣ́нїѧ ѻ҆́бразъ, премꙋ́дре, бг҃осло́вїѧ же твоегѡ̀ предѣ́лъ ᲂу҆че́нїѧ ꙗ҆ви́сѧ.

Бг҃оро́диченъ:

Херꙋві́мѡвъ и҆ серафі́мѡвъ превы́шши показа́ласѧ є҆сѝ, бцⷣе: ты́ бо є҆ди́на прїѧ́ла є҆сѝ невмѣсти́маго бг҃а во твое́мъ чре́вѣ, нескве́рнаѧ. тѣ́мже вѣ́рнїи тѧ̀ всѝ пѣ́сньми, чⷭ҇таѧ, ᲂу҆блажа́емъ.

И҆́нъ. І҆рмо́съ:

Весели́тсѧ ѡ҆ тебѣ̀ цр҃ковь твоѧ̑, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Оу҆крѣплѧ́емь ѡ҆ хрⷭ҇тѣ̀, кѡ́зни лꙋка́вагѡ ѕмі́ѧ, тве́рдымъ ᲂу҆мо́мъ, кѷрі́лле, ꙗ҆́кѡ тка́нїе паꙋчи́нное, расто́ргнꙋлъ є҆сѝ.

Ти́нꙋ страсте́й ѿ дꙋшѝ ѿтрѧ́слъ є҆сѝ, кѷрі́лле, низложи́въ всѧ́кое помыслѡ́въ возноше́нїе, на хрⷭ҇та̀ превозносѧ́щеесѧ.

Ꙗ҆́кѡ благополꙋ́ченъ страда́лецъ, ѻ҆́ч҃е, ᲂу҆клони́лсѧ є҆сѝ тве́рдѡ всѧ́кагѡ плотска́гѡ сладостра́стїѧ, ꙗ҆́кѡ тще́тнагѡ и҆ навѣ́тнагѡ.

Бг҃оро́диченъ:

Сло́во ѻ҆́ч҃ее, пред̾ѡчи́стившисѧ, ѽ чⷭ҇таѧ! дх҃омъ, слове́снагѡ є҆стества̀ на бл҃годѣѧ̑нїѧ родила̀ є҆сѝ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Свѧщеннонача̑льницы велича́йшїи благоче́стїѧ, и҆ до́блїи побѡ́рницы цр҃кве хрⷭ҇то́вы, всѧ̑ соблюди́те пою́щыѧ: спасѝ, ще́дре, вѣ́рою чтꙋ́щыѧ тѧ̀.

Сѣда́ленъ, а҆ѳана́сїа, гла́съ г҃. Подо́бенъ: Красотѣ̀ дѣ́вства:

Ꙗ҆́коже пред̾ѡпредѣлѝ предвоззва́вый тѧ̀, безсме́ртїѧ ты̀ пред̾ѡбраже́нїе бы́лъ є҆сѝ, ꙗ҆́кѡ ᲂу҆мертви́въ благоче́стнѡ а҆́рїєва мꙋдрова̑нїѧ: невреди́мь бо бы́лъ є҆сѝ и҆́стины побо́рникъ, ѻ҆́ч҃е а҆ѳана́сїе, правосла́вныхъ похвало̀. тѣ́мже тѧ̀ по до́лгꙋ пою́ще, соверша́емъ бжⷭ҇твеннꙋю па́мѧть твою̀.

Сла́ва, кѷрі́лла. Подо́бенъ: то́йже:

Є҆ресе́й ле́сть ѡ҆бличи́лъ є҆сѝ, и҆ правосла́внꙋю вѣ́рꙋ ᲂу҆ѧсни́лъ є҆сѝ, ꙗ҆́кѡ бг҃оглаго́ливъ и҆ благочести́въ, проповѣ́далъ є҆сѝ въ мі́рѣ є҆ди́но бжⷭ҇тво̀ въ трⷪ҇цѣ сла́вити, є҆стество́мъ є҆диносꙋ́щное, и҆ ли́цы неслїѧ́нное: тѣ́мже и҆ соше́дшесѧ, всесла́вне кѷрі́лле, почита́емъ па́мѧть твою̀.

И҆ ны́нѣ, бг҃оро́диченъ:

Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство, и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ.

Крⷭ҇тобг҃оро́диченъ:

Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи глаго́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, человѣколю́бче.

Всѐ тебѣ̀ вдохнꙋ̀ живоно́сное дыха́нїе съ высоты̀, пе́рвѣе прише́дшее бг҃олѣ́пнѡ дх҃а хрⷭ҇то́ва въ го́рницѣ, и҆ ᲂу҆ченикѝ насы́щшее, а҆пⷭ҇ла тѧ̀ показа̀ тринадесѧ́таго, ѻ҆́ч҃е, правосла́внꙋю вѣ́рꙋ проповѣ́дающаго.

Ты̀ бжⷭ҇твенною ре́вностїю ѕѣлѡ̀ распалѧ́емь, въ собо́рѣ спосо́бствꙋѧ, и҆ пре́жде є҆́же соверши́тисѧ тебѣ̀ предсѣда́телю, въ нїке́и проповѣ́дꙋеши є҆диносꙋ́щное: тѣ́мже цр҃кве хрⷭ҇то́съ пастыренача́льника и҆ ᲂу҆чи́телѧ тѧ̀ поставлѧ́етъ.

Врꙋче́на и҆мѣ́ѧ цр҃кѡ́внаѧ корми̑ла ѿ промышле́нїѧ бж҃е́ственнагѡ, а҆ѳана́сїе, є҆ретїкѡ́въ дꙋшеврє́днаѧ всѧ̑ ѧ҆зыкобѡ́лїѧ, ꙗ҆́коже нѣ́каѧ сѣки́ра посѣ́клъ є҆сѝ, и҆скоренѧ́ѧ ꙗ҆́коже те́рнїе, и҆ сѣ́мѧ сло́ва напаѧ́ѧ, мꙋ́дрѣ воздѣ́лалъ є҆сѝ.

Ѿ твоегѡ̀ ѧ҆зы́ка ѻ҆́гненнагѡ сожже́сѧ а҆́рїево сро́дное раздѣле́нїе и҆ слїѧ́нїе саве́ллїево, ꙗ҆̀же ѿ безмѣ́рїѧ ѕла̀, и҆ къ нече́стїю є҆диноче́стна, и҆ всѧ́кое съ ни́ми хꙋле́нїе є҆реті́ческое, ѽ а҆ѳана́сїе!

Бг҃оро́диченъ:

Ты̀ вѣ́рныхъ похвала̀ є҆сѝ, безневѣ́стнаѧ, ты̀ предста́тельница, ты̀ и҆ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши, всенепоро́чнаѧ, и҆ спаса́еши ѿ бѣ́дъ, вѣ́рою и҆ любо́вїю бцⷣꙋ чⷭ҇тꙋю тѧ̀ зна́ющыѧ.

И҆́нъ. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Побѣди́вша стра̑сти дꙋшетлѣ̑нныѧ, и҆ по́мысломъ ᲂу҆держа́вша плѡ́ти, бг҃оно́се кѷрі́лле, ви́дѣвъ хрⷭ҇то́съ, бжⷭ҇твенныѧ тѧ̀ цр҃кве предсѣда́телѧ, ѻ҆́ч҃е, поста́вилъ є҆́сть.

Наслѣ́довавъ, ꙗ҆́кѡ сн҃ъ возлю́бленъ, ѻ҆те́ческꙋю ма́рковꙋ добродѣ́тель, и҆ престо́ла бы́лъ є҆сѝ прее́мникъ, бж҃е́ственнагѡ стопа́мъ є҆ѵⷢ҇лі́ста послѣ́дꙋѧ.

Ѿ хрⷭ҇та̀ ᲂу҆́бѡ, ꙗ҆́кѡ ѻ҆вча̀, ᲂу҆па́слсѧ є҆сѝ, ꙗ҆́коже па́стырь, ᲂу҆па́слъ є҆сѝ ста́до, ѻ҆́ч҃е, словесы̀ дꙋшепита́тельными твои́ми, ꙗ҆́кѡ трава́ми и҆ цвѣты̀, ѻ҆би́льнѡ напитава́ѧ благода́ти.

Бг҃оро́диченъ:

И҆зъ не сꙋ́щихъ всѧ̑ бжⷭ҇твенною си́лою содѣ́лавый ражда́етсѧ и҆зъ тебє̀, бг҃ома́ти, мі́ръ ѡ҆зарѧ́ѧ свѣ́тлыми зарѧ́ми бжⷭ҇тва̀, и҆ бг҃озна́нїѧ свѣ́тлостїю.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Хрⷭ҇та̀ и҆мѣ́ѧ глаго́люща, ѻ҆́ч҃е, во ѻ҆рга́нѣ доброгла́снѣмъ ѧ҆зы́ка твоегѡ̀, посрами́лъ є҆сѝ ᲂу҆́бѡ і҆́дѡлѡвъ напи́саннѡ є҆́ресь, заблꙋждє́нныѧ наставлѧ́ѧ, и҆ ѡ҆браща́ѧ ко и҆́стинномꙋ бг҃ꙋ, а҆ѳана́сїе.

Гꙋби́тєльныѧ є҆́рєси всѧ̑, ѻ҆́ч҃е, и҆з̾ѡбличи́лъ є҆сѝ словесы̀ и҆ писа́ньми, разли́чнꙋю ле́сть и҆згонѧ́ѧ мꙋ́дрыми показа́ньми и҆зъ вселе́нныѧ, ᲂу҆ѧснѧ́ѧ невоспротивосло́внѣ правосла́внꙋю вѣ́рꙋ, блаже́нне.

Тѧ̀ ᲂу҆чи́телѧ вои́стиннꙋ вели́ка ᲂу҆чи́телей мꙋ́дрыхъ, а҆ѳана́сїе, неле́стнѡ сказꙋ́етъ, и҆ со а҆пⷭ҇лы причтѐ цр҃ковь хрⷭ҇то́ва, ѻ҆́ч҃е, и҆з̾ѧвлѧ́юща непоро́чное сло́во вѣ́ры.

Бг҃оро́диченъ:

Мт҃рнее дерзнове́нїе къ сн҃ꙋ твоемꙋ̀ стѧжа́вши, всечⷭ҇таѧ, сро́днагѡ промышле́нїѧ на́шегѡ не пре́зри, мо́лимсѧ: ꙗ҆́кѡ тѧ̀ и҆ є҆ди́но хрⷭ҇тїа́не ко влⷣцѣ ѡ҆чище́нїе ми́лостивно предлага́емъ.

И҆́нъ. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Ны́нѣ лицѐ хрⷭ҇то́во созерца́ѧй, ты̀ лице́мъ къ лицꙋ̀, ѽ кѷрі́лле! зерца́лѡмъ вои́стиннꙋ разрѣ́шшымсѧ, соедини́лсѧ є҆сѝ твои́мъ жела́нїемъ.

Тече́нїю вои́стиннꙋ ѕѣ́льномꙋ наводнѧ́ющемꙋ рѣ́ки, твоѐ, ѽ кѷрі́лле! ᲂу҆подо́бисѧ сло́во, ѕлосла́вныхъ ѿвраща́ѧ ᲂу҆хищрє́нїѧ.

Ра́внѣ ме́рзское а҆́рїево раздѣле́нїе, ѽ кѷрі́лле! скве́рное же саве́ллїево слїѧ́нїе и҆зъ глꙋбины̀ и҆зве́рглъ є҆сѝ.

Словеса̀ богатотвѡ́рнаѧ, ꙗ҆́кѡ зла́то ѡ҆ста́вилъ є҆сѝ, ѽ кѷрі́лле! сокрѡ́вища же, ꙗ҆́коже ка́мєнїѧ честна̑ѧ твоѧ̑, цр҃кви хрⷭ҇то́вѣ.

Бг҃оро́диченъ:

Тѧ̀ ѻ҆рꙋ́жїе непобѣди́мое на врагѝ предлага́емъ: тѧ̀ ᲂу҆твержде́нїе и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Чꙋжда́гѡ сѣ́мене сѣ́ѧтель ꙗ҆ви́всѧ а҆поллїна́рїй, зе́мнагѡ словесѐ и҆ ᲂу҆ма̀, хрⷭ҇то́во вочеловѣ́ченїе крѣ́пкѡ и҆з̾ѡбличи́сѧ ѿ тебє̀, всебл҃же́нне, ꙗ҆́коже несмы́сленъ и҆ ᲂу҆мовре́денъ.

Тече́нїй слове́сныхъ, и҆злїѧ́нныхъ и҆зъ ᲂу҆сте́нъ твои́хъ, ꙗ҆́кѡ и҆зъ и҆сто́чника приснотекꙋ́щагѡ благода́ти, прпⷣбне, сладча́йшыѧ ме́да, ꙗ҆́кѡ ѿ ѻ҆крі́на во́ды вѣ́рнїи почерпа́емъ.

Диви́тсѧ всѧ́къ твои́мъ, ѻ҆́ч҃е, влѣ́потꙋ списа́нїємъ мꙋ̑дрымъ, любезновмѣща́ѧ, хотѧ́щыѧ прозѧба́ти є҆́рєси прови́дѧ, ѿвраща́ємыѧ ѿ тебє̀ прⷪ҇ро́чески.

Бг҃оро́диченъ:

Да и҆зба́вимсѧ ѿ лю́тыхъ прегрѣше́нїй мольба́ми твои́ми, бг҃ороди́тельнице чⷭ҇таѧ: и҆ да полꙋчи́мъ, всечⷭ҇таѧ, бж҃е́ственнагѡ ѡ҆сїѧ́нїѧ и҆зъ тебє̀ неизрече́ннѡ воплоще́ннагѡ сн҃а бж҃їѧ.

И҆́нъ. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Клеща́ми серафі́мъ прⷪ҇ро́кꙋ ᲂу҆́гль, цр҃кви же хрⷭ҇то́вѣ твои́ми рꙋка́ми подае́ши, свѧщеннотаи́нниче, є҆́же ѿ бжⷭ҇твеннагѡ ѻ҆гнѧ̀ ᲂу҆́глїе ѡ҆чище́нїѧ.

Є҆динопредѣ̑льныѧ ꙗ҆́кѡ самѱѡ́нъ и҆ноплеме́нники не потреби́лъ є҆сѝ, и҆норѡ́дныѧ же всѧ̑ и҆носла́вныхъ ᲂу҆чє́нїѧ низложи́лъ є҆сѝ, и҆ держа́вꙋ правосла̑внымъ да́лъ є҆сѝ, кѷрі́лле.

Собо́рꙋ бг҃оизбра́нномꙋ ꙗ҆́вѣ предводи́тельствовавъ, ѕлоче́стїе нестѡ́рїево, хрⷭ҇тобо́рнꙋю де́рзость, ѻ҆́ч҃е, низложи́лъ є҆сѝ, ре́вностїю дыха́ѧ по и҆́стиннѣй бг҃ома́тери.

Бг҃оро́диченъ:

Ѽ чꙋ́до, всѣ́хъ чꙋде́съ новѣ́йшее! ꙗ҆́кѡ дв҃а во ᲂу҆тро́бѣ, всѧ́чєскаѧ содержа́щаго неискꙋсомꙋ́жнѡ заче́нши, не тѣсновмѣстѝ.

Конда́къ, гла́съ в҃. Подо́бенъ: Крове́й твои́хъ:

Правосла́вїѧ насади́въ ᲂу҆чє́нїѧ, ѕлосла́вїѧ те́рнїе и҆зсѣ́клъ є҆сѝ, ᲂу҆мно́живъ сѣ́мѧ вѣ́ры ѡ҆дожде́нїемъ дх҃а, преподо́бне: тѣ́мже тѧ̀ пое́мъ, а҆ѳана́сїе.

І҆́косъ:

А҆ѳана́сїа же и҆ кѷрі́лла всепра́зднственнꙋю па́мѧть пѣ́сньми, вѣ́рнїи, восхва́лимъ, дне́сь: сі́и бо а҆́рїа льсти́ваго и҆ є҆ѵно́мїа, вкꙋ́пѣ съ саве́ллїемъ, во глꙋбинꙋ̀ тѣ́хъ поги́бели вложи́ша, ѻ҆гню̀ вѣ́чномꙋ преда́вше ты́ѧ сгорѣ́ти, ꙗ҆́кѡ похꙋ́лившыѧ непра́веднѡ на сп҃сово воплоще́нїе: тѣ́мже тѧ̀ пое́мъ, а҆ѳана́сїе.

Пѣ́снь з҃. І҆рмо́съ:

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Є҆диноче́стное сопресто́льное ѻ҆ц҃ꙋ̀ сло́во, є҆диноро́дна же сн҃а правосла́внѡ проповѣ́давъ, безсме́ртїѧ, ѻ҆́ч҃е, тезоимени́те, а҆́бїе наꙋча́еши дх҃ꙋ сопресто́льна и҆ є҆диносꙋ́щна и҆ соприсносꙋ́щна.

Оу҆чи́телѧ тѧ̀ проповѣ́дника сщ҃енноѧвле́нна (с. 463) трисо́лнечнагѡ свѣ́та, возвѣща́юща вѣ́рꙋ правосла́вїѧ да́же до конє́цъ землѝ, нече́стїѧ зрѧ̀ роди́тель, и҆згна̑нїѧ на тѧ̀ воздвиза́етъ.

Бѣды̑ безмѣ̑рныѧ, ꙗ҆̀же под̾ѧ́лъ є҆сѝ, блаже́нне, подвиза́ѧсѧ по благоче́стїи, вѣнцы́ же та́коже свѣ́тлїи: и҆́бо а҆дама́нтъ бы́лъ є҆сѝ бїю́щымъ: къ себѣ́ же ꙗ҆́кѡ магни́тъ привлача́лъ є҆сѝ всѧ̑.

Стра̑нныѧ догма́ты, чꙋ́ждїѧ же цр҃кве хрⷭ҇то́вы и҆згна́лъ є҆сѝ, трⷪ҇цꙋ бг҃осло́вивъ ѵ҆поста́сьми, бжⷭ҇тво́мъ же є҆ди́ницꙋ, ю҆́же пѣ́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Ны́нѣ всѧ̑ и҆спо́лнишасѧ свѣ́та бжⷭ҇твеннагѡ тобо́ю, пречⷭ҇таѧ: ты́ бо две́рь ꙗ҆ви́ласѧ є҆сѝ, є҆́юже мі́рꙋ бг҃ъ бесѣ́дова, просвѣща́ѧ вѣ́рою зовꙋ́щыѧ: бл҃гослове́нъ бг҃ъ ѻ҆тє́цъ на́шихъ.

И҆́нъ. І҆рмо́съ:

Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Въ сїна́йстѣй горѣ̀ во мра́къ дре́вле вше́дъ, зако́нъ прїѧ́тъ, бл҃же́нне кѷрі́лле, мѡѷсе́й, ᲂу҆бива́ющїй пи́сменемъ: ты́ же разгнꙋ́лъ є҆сѝ сокрове́ннꙋю добро́тꙋ дх҃а.

Законоположе́нїѧ гада́ньми, ꙗ҆́коже младе́нцємъ пе́рвѣе, ѻ҆́ч҃е, да́ннагѡ покрыва́лꙋ покрове́нїѧ, ꙗ҆́коже ши́пки разꙋмѣ́нїѧ ты̀ ѿкры́лъ є҆сѝ, сказа́въ ѻ҆́бразы ꙗ҆́вственнѣйше.

Бг҃опроповѣ́дникѡвъ и҆ бг҃опрїѧ́тныхъ неꙋдобопости̑жныѧ кни̑ги, прⷪ҇ро́кѡвъ благода́тїю вдохнове́нъ, ѻ҆́ныѧ насы́щшаго дх҃а, кѷрі́лле, чи́стѣ на́мъ и҆з̾ѧви́лъ є҆сѝ.

Въ несли́тномъ соедине́нїи бжⷭ҇твенномъ, и҆ несѣко́момъ ꙗ҆́вѣ, ѻ҆́ч҃е, раздѣле́нїи, трѝ ᲂу҆́бѡ бг҃осло́вствꙋѧй ѵ҆поста̑си, ре́клъ є҆сѝ, кѷрі́лле, непремѣ̑нныѧ же въ сꙋществѣ̀ є҆ди́номъ и҆ бж҃ествѣ̀. (с. 464)

Бг҃оро́диченъ:

Вы́шнѧгѡ ѡ҆сщ҃е́нное бжⷭ҇твенное селе́нїе, ра́дꙋйсѧ, тобо́ю бо даде́сѧ ра́дость, бцⷣе, зовꙋ́щымъ: благослове́на ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Свѧти́телей ᲂу҆краше́нїе благосла́вное, а҆ѳана́сїе, сто́лпе свѣ́та и҆ цр҃кве ᲂу҆твержде́нїе: трⷪ҇цы побо́рниче, бг҃осло́вїѧ трꙋбо̀ злата́ѧ: житїѧ́ же мона́шескагѡ и҆звѣ́стный законописа́телю, съ на́ми пра́зднꙋеши, і҆ерє́и соверша́ѧ, лю́ди вѣ̑рныѧ приводѧ̀ хрⷭ҇тꙋ̀ во вѣ́ки.

Безсме́ртїѧ бы́лъ є҆сѝ вои́стиннꙋ тезоимени́тъ, дѣ́ѧтєльныѧ бо сло́вомъ превозше́лъ є҆сѝ, и҆скꙋ̑сныѧ же въ сло́вѣ и҆звѣ́стїемъ житїѧ̀ побѣжда́ѧ, во ѻ҆бои́хъ преше́лъ є҆сѝ краѝ. тѣ́мже преизѧ́щною добродѣ́телїю просїѧ́въ, безсме́ртнꙋю стѧжа́лъ є҆сѝ па́мѧть во вѣ́ки.

Ты̀ свѣтлѣ́йшее показа́лъ є҆сѝ, тайнонебе́сниче бг҃опрїѧ́тне, свѧти́тельство, до́блими страда́ньми твои́ми, пре́лесть и҆згна́лъ є҆сѝ твои́ми и҆згна̑нїи ча́стыми за трⷪ҇цꙋ, ю҆́же проповѣ́дꙋѧ вопїѧ́лъ є҆сѝ: ѻ҆ц҃ꙋ̀ поклони́тесѧ, сн҃а бг҃осло́вите, дх҃а воспо́йте, во всѧ̑ вѣ́ки.

Бг҃оро́диченъ:

Пло́тїю ро́ждшꙋю є҆ди́наго ѿ трⷪ҇цы бг҃а, и҆ по ржⷭ҇твѣ̀ па́ки цѣ́лꙋ пребы́вшꙋю непреста́ннѡ воспои́мъ, ꙗ҆́кѡ превы́шшꙋю херꙋві́мѡвъ, и҆ серафі́мѡвъ чⷭ҇тнѣ́йшꙋю, вопїю́ще: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

И҆́нъ. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́кѡ волна̀ морска́ѧ вои́стиннꙋ, въ тебѣ̀ и҆стечѐ премꙋ́дрости и҆сто́чникъ: и҆́бо приснотекꙋ́щыѧ потеко́ша рѣ́ки и҆з̾ чре́ва твоегѡ̀, ѻ҆́ч҃е, ᲂу҆че́нїй благочести́выхъ, ꙗ҆́коже проречѐ хрⷭ҇то́съ: прехо́дѧтъ бо песка̀ твоѧ̑ словеса̀ бг҃оглагѡ́ливаѧ.

Па́стырь и҆ ᲂу҆чи́тель мꙋ́дръ цр҃кви показа́всѧ, два̀, кѷрі́лле, ꙗ҆́вѣ и҆столкова́лъ є҆сѝ, преподо́бне, завѣ́ты: ꙗ҆́кѡ бо а҆гкѵ́рꙋ и҆ ѻ҆ч҃еское наслѣ́дїе твоѧ̑ и҆мꙋ́щи словеса̀, вопїе́тъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Сло́ва вопло́щшагѡсѧ на́съ ра́ди, всехитреца̀, ты̀ неизрече́нномꙋ наꙋча́еши соедине́нїю, кѷрі́лле, нераздѣ́льномꙋ, неслїѧ́нномꙋ, по коемꙋ́ждо манове́нїю ра́внѣ ᲂу҆клони́лъ є҆сѝ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Безъ мт҃ре сло́во и҆зъ ѻ҆ц҃а̀ сы́й пе́рвѣе, безъ ѻ҆ц҃а̀ бы́сть и҆зъ тебє̀ второ́е, всечⷭ҇таѧ, вопло́щсѧ пре́жде безпло́тный за бл҃гоꙋтро́бїе, восхотѣ́въ спастѝ пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Просїѧ̀ житїѐ, ꙗ҆́кѡ мо́лнїѧ, и҆злїѧ́сѧ же, ѻ҆́ч҃е, всѣ̑мъ вѣща́нїе твоѐ, ꙗ҆́коже гро́мъ, ꙗ҆̀же со́лнце назира́етъ: съ нб҃се́ бо и҆мѣ́лъ є҆сѝ свы́ше вдохнове́нїе и҆́стиннѡ. тѣ́мже не ᲂу҆гасѝ твоеѧ̀ па́мѧти хода́тай забве́нїѧ гро́бъ, а҆ѳана́сїе.

Свѣ́томъ трисо́лнечнымъ и҆ трисїѧ́ннымъ ꙗ҆снѣ́йше ны́нѣ ѡ҆сїѧ́емь, пѣвцє́мъ твои̑мъ ѡ҆сїѧ́нїе зареви́дное ꙗ҆влѧ́еши, ꙗ҆́кѡ зерца́ломъ свы́ше и҆спꙋща́ѧ со́лнечнѣ, и҆ тебѣ̀ ѡ҆ставле́нїѧ, блаже́нне, а҆́ще вели́ко и҆ превосхо́дно па́че досто́инства проси́мое.

Пою́ще мо́лимъ тѧ̀ прилѣ́жнѡ, ѡ҆ цр҃кви моли́сѧ, кресто́мъ побѣ̑ды дарова́ти во́инствꙋ, правосла́внѣй же вѣ́рѣ крѣ́пость на є҆́рєси врагѡ́въ, на́мъ же спасе́нїе, ми́ръ же мі́рꙋ, въ твое́й па́мѧти, а҆ѳана́сїе.

Бг҃оро́диченъ:

Зачала̀ є҆сѝ, дв҃о, безъ сѣ́мене всѧ́чєскаѧ созда́вшаго, сло́во бж҃їе, кромѣ̀ хотѣ́нїй пло́ти, кромѣ̀ тлѣ́нїѧ же родила̀ є҆сѝ, и҆ безъ болѣ́зней ма́терскихъ. тѣ́мъ тѧ̀, бцⷣꙋ и҆ ѧ҆зы́комъ и҆ се́рдцемъ и҆сповѣ́дающе, велича́емъ.

И҆́нъ. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.

Возноше́нїе на хрⷭ҇то́въ взе́млющеесѧ ра́зꙋмъ: и҆ сегѡ̀ бг҃ома́терь, кѷрі́лле, всѧ́кое крѣ́пцѣ низложи́лъ є҆сѝ нестѡ́рїа безбо́жное, сынѡ́въ дво́ицꙋ, та́кожде и҆ слїѧ́нїе безгла́вныхъ є҆сте́ствъ.

Си́лою ра́зꙋма и҆ просвѣще́нїемъ благода́ти, трⷪ҇цꙋ є҆диносꙋ́щнꙋю, сн҃а же воплоще́ннаго бг҃а, бг҃осло́вилъ є҆сѝ, блаже́нне: ꙗ҆ви́всѧ же бцⷣы побо́рникъ, въ вы́шнихъ ны́нѣ прославлѧ́ешисѧ.

Свы́ше на́съ пѣвцы̀, приснопа́мѧтне, назира́еши, ѻ҆́ч҃е, ми́лостивнѡ, побѣ̑ды крⷭ҇тонѡ́снымъ лю́демъ подаѧ̀, и҆ возвыша́ѧ моли́твами твои́ми ро́гъ правосла́вныхъ, ᲂу҆ѧснѧ́ѧ же твою̀ па́мѧть велича́ющыѧ.

Бг҃оро́диченъ:

Непло́дствꙋющее бжⷭ҇твенныхъ добродѣ́телей, всечⷭ҇таѧ бцⷣе, се́рдце моѐ покажѝ, дв҃о, плодоно́сно, и҆зъ непло́дове ро́ждшаѧсѧ, во́лею всѧ̑ претворѧ́ющагѡ ма́нїемъ, да пою́ тѧ всепѣ́тꙋю.

Свѣти́ленъ ѻ҆ктѡ́иха. Сла́ва, ст҃ы́хъ:

Пребж҃е́ственныѧ трⷪ҇цы ꙗ҆ви́стесѧ всемꙋ́дрїи таи̑нницы и҆ побѡ́рницы, а҆ѳана́сїе блаже́нне и҆ кѷрі́лле бг҃оѧвле́нне, а҆́рїа низложи́вше, и҆ съ ни́мъ саве́ллїа и҆ нестѡ́рїа а҆́бїе ѕлочести́ваго, и҆ съ ни́ми всѧ́кꙋю и҆нꙋ́ю пре́лесть ѕлочести́выхъ є҆ресе́й, ст҃и́телїе гдⷭ҇ни.

И҆ ны́нѣ, бг҃оро́диченъ:

Со дерзнове́нїемъ глаго́лати бцⷣꙋ, и҆ покланѧ́тисѧ се́й вои́стиннꙋ ѿ вѣ́рныхъ, ты̀ наꙋча́еши, кѷрі́лле всебл҃же́нне, безбо́жнꙋю нестѡ́рїа потреблѧ́ѧ пре́лесть.

На стїхо́внѣ ѻ҆ктѡ́иха. Та́же припѣ́въ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ.

Стїхи́ра, гла́съ г҃:

Ве́лїю похвалꙋ̀ сщ҃е́нныхъ а҆ѳана́сїа и҆ кѷрі́лла, непобѣди̑мыѧ предста́тели, сщ҃еннолѣ́пнѡ да восхва́лимъ: сі́и бо є҆ресе́й пѡ́лчища разсѣ́кше си́лою прест҃а́гѡ дх҃а, правосла́вїю ѡ҆долѣ̑нїѧ возста́виша во все́й вселе́ннѣй, чи́слѧще бл҃гоче́стнѡ трⷪ҇ческꙋю та́йнꙋ, сво́йствомъ ли́цъ, и҆ па́ки совокꙋплѧ́юще во є҆ди́но неслїѧ́ннѣ, сꙋщества̀ то́ждествомъ, и҆ херꙋві́мски бг҃осло́вѧще, мо́лѧтсѧ при́снѡ ѡ҆ дꙋша́хъ на́шихъ.

Сла́ва, гла́съ то́йже. Ге́рманово:

Вели́ка и҆́стины трꙋба̀, многострада́льный а҆ѳана́сїй, на трапе́зꙋ дне́сь созыва́етъ цр҃ковь, свѣ́тлѡ, вѣ́рнїи всѝ, къ торжествꙋ̀ ᲂу҆срѧ́щемъ до́браго па́стырѧ, пѣ́сньми почита́юще свѧщє́нныѧ є҆гѡ̀ трꙋды̀: ꙗ҆́кѡ да моли́твами є҆гѡ̀ прїи́мемъ ѿ хрⷭ҇та̀ бг҃а ве́лїю ми́лость.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Ве́лїѧ:

Зрѧ́щи и҆зъ тебє̀ рожде́ннаго, всенепоро́чнаѧ, ви́сѧща на дре́вѣ, восклица́ла є҆сѝ, вопїю́щи: вожделѣ́ннѣйшее моѐ ча́до, гдѣ̀ твоѧ̀ за́йде добро́та свѣтоно́снаѧ, ᲂу҆добри́вшагѡ ро́дъ человѣ́ческїй;

На лїтꙋргі́и: бл҃жє́нна, ѿ канѡ́на а҆ѳана́сїа пѣ́снь г҃, и҆ кѷрі́лла пѣ́снь ѕ҃-ѧ. Прокі́менъ, гла́съ и҃: Восхва́лѧтсѧ преподо́бнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ цр҃кви прпⷣбныхъ. А҆пⷭ҇лъ къ є҆вре́ємъ, зача́ло тл҃д. А҆ллилꙋ́їа, гла́съ в҃. Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Є҆ѵⷢ҇лїе матѳе́а, зача́ло а҃і. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:


Комментарии для сайта Cackle