Мѣ́сѧца тогѡ́же въ з҃-й де́нь. Собо́ръ ст҃а́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна.

Ве́черъ стїхоло́гїа не быва́етъ, бдѣ́нїѧ ра́ди бы́вшагѡ, кромѣ̀ сꙋббѡ́ты.

На Гдⷭ҇и, воззва́хъ, стїхи̑ры пра́здника г҃ гла́съ в҃:

Просвѣти́телѧ на́шего, просвѣща́ющаго всѧ́каго человѣ́ка, ви́дѣвъ прⷣте́ча крⷭ҇ти́тисѧ прише́дша, ра́дꙋетсѧ дꙋше́ю, и҆ трепе́щетъ, рꙋко́ю показꙋ́етъ є҆го̀, и҆ глаго́летъ лю́демъ: се́й и҆збавлѧ́ѧй і҆и҃лѧ, свобожда́ѧй на́съ ѿ и҆стлѣ́нїѧ. Ѽ безгрѣ́шный хрⷭ҇тѐ, бж҃е на́шъ, сла́ва тебѣ̀!

И҆зба́вителю на́шемꙋ, ѿ раба̀ креща́емꙋ, и҆ дх҃а прише́ствїемъ свидѣ́тельствꙋемꙋ, ᲂу҆жасо́шасѧ зрѧ́ще (с. 192) а҆́гг҃льскаѧ вѡ́инства. Гла́съ же съ нб҃сѐ принесе́сѧ ѿ ѻ҆ц҃а̀: се́й, є҆го́же прⷣте́ча рꙋко́ю креща́етъ, сн҃ъ мо́й є҆́сть возлю́бленный, ѡ҆ не́мже бл҃говоли́хъ. Хрⷭ҇тѐ бж҃е на́шъ, сла́ва тебѣ̀!

І҆ѻрда̑нскїѧ стрꙋи̑ тебѐ и҆сто́чника прїѧ́ша, и҆ ᲂу҆тѣ́шитель въ ви́дѣ голꙋби́нѣ схожда́ше. Приклонѧ́етъ ве́рхъ приклони́вый нб҃са̀. Зове́тъ и҆ вопїе́тъ бре́нїе зижди́телю: что́ ми повелѣва́еши, ꙗ҆́же вы́ше менє̀; а҆́зъ тре́бꙋю твоегѡ̀ кр҃ще́нїѧ. Ѽ безгрѣ́шный хрⷭ҇тѐ, бж҃е на́шъ, сла́ва тебѣ̀!

И҆ предте́чи г҃. Гла́съ а҃. Подо́бенъ: Всехва́льнїи мч҃ницы:

Ви́дѣвъ тѧ̀ грѧдꙋ́ща, хрⷭ҇тѐ, къ себѣ̀ предте́ча, ꙳ и҆ креще́нїѧ просѧ́ща, ꙳ съ тре́петомъ возопѝ: ꙳ что́ ми повелѣва́еши, ꙳ ꙗ҆̀же па́че си́лы соверши́ти; ꙳ ѽ всеси́льне гдⷭ҇и, ꙳ ка́кѡ рꙋко́ю коснꙋ́сѧ тебє̀, ꙳ рꙋко́ю всѧ̑ содержа́щагѡ; ꙳ ты́ мѧ па́че крестѝ раба̀ твоего̀.

Ꙗ҆ви́хсѧ ве́сь человѣ́къ ны́нѣ, ꙳ пристꙋ́пенъ тебѣ̀ бы́хъ, ꙳ є҆стество́мъ непристꙋ́пный: ꙳ во́лею ѡ҆бнища́хъ бога́тъ сы́й, ꙳ ꙗ҆́кѡ да ѡ҆бнища́вшее ѡ҆богащꙋ̀ ꙳ нетлѣ́нїемъ и҆ и҆збавле́нїемъ. ꙳ Пристꙋпѝ, крестѝ ꙳ тлѣ́нїю неподлежа́щаго, ꙳ и҆ мі́ръ ѿ тлѝ и҆з̾има́ющаго.

Содержи́мь є҆́смь ѿвсю́дꙋ, ꙳ и҆ ка́мѡ бѣжа́ти недоꙋмѣ́юсѧ, ꙳ речѐ зижди́телю прⷣте́ча: пото́къ сы́й пи́щный, ще́дре, ꙳ ка́кѡ ᲂу҆́бѡ тѧ̀ ꙳ рѣ̑чныѧ вше́дшаго прїи́мꙋтъ стрꙋи̑, ꙳ и҆злива́юща спасе́нїе, ꙳ почита́ющымъ твоѐ ꙳ ст҃о́е, сло́ве, ꙗ҆вле́нїе;

Сла́ва, гла́съ ѕ҃:

Во пло́ти свѣти́льниче, прⷣте́че сп҃совъ, прозѧбе́нїе непло́дныѧ, дрꙋ́же сꙋ́щагѡ ѿ дв҃ы, є҆мꙋ́же взыгра́ньми во ᲂу҆тро́бѣ поклони́лсѧ є҆сѝ, и҆ крести́лъ є҆сѝ въ вода́хъ і҆ѻрда́нскихъ: сего̀ молѝ, мо́лимсѧ, прⷪ҇ро́че, бꙋ́дꙋщихъ и҆збѣжа́ти треволне́нїй.

И҆ ны́нѣ, пра́здника, гла́съ то́йже.

Бг҃ъ сло́во ꙗ҆ви́сѧ пло́тїю ро́дꙋ человѣ́ческомꙋ, стоѧ́ше крести́тисѧ во і҆ѻрда́нѣ. И҆ глаго́лаше къ немꙋ̀ прⷣте́ча: ка́кѡ прострꙋ̀ рꙋ́кꙋ, и҆ прикоснꙋ́сѧ верхꙋ̀ держа́щагѡ всѧ́чєскаѧ; а҆́ще и҆ ѿ мр҃і́и є҆сѝ млⷣнецъ, но вѣ́мъ тѧ̀ бг҃а превѣ́чнаго, по землѝ хо́диши пѣва́емый ѿ серафі̑мъ, и҆ ра́бъ влⷣкꙋ креща́ти не наꙋчи́хсѧ. Непостижи́ме гдⷭ҇и, сла́ва тебѣ̀.

Вхо́дъ. Прокі́менъ, гла́съ з҃:

Бг҃ъ на́шъ на нб҃сѝ и҆ на землѝ, всѧ̑, є҆ли̑ка восхотѣ̀, сотворѝ.

Сті́хъ: Во и҆схо́дѣ і҆и҃левѣ ѿ є҆гѵ́пта, до́мꙋ і҆а́кѡвлѧ и҆зъ люде́й ва̑рваръ, бы́сть і҆ꙋде́а ст҃ы́нѧ є҆гѡ̀, і҆и҃ль ѻ҆́бласть є҆гѡ̀.

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

И҆ па́ки: Бг҃ъ на́шъ на нб҃сѝ и҆ на землѝ:

Та́же, є҆ктенїа̀.

На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:

Ꙗ҆́кѡ ви́дѣ тѧ̀, влⷣко, і҆ѡа́ннъ предте́ча, ꙳ къ немꙋ̀ и҆дꙋ́ща, ꙳ ᲂу҆жа́сенъ бы́въ, ꙳ ꙗ҆́кѡ благонра́венъ ра́бъ со стра́хомъ вопїѧ́ше: ꙳ ко́е смире́нїе, сп҃се; ꙳ ка́ѧ нищета̀, въ ню́же ѡ҆дѣ́ѧлсѧ є҆сѝ, ꙳ бога́тствомъ бла́гости смири́вшагосѧ человѣ́ка возне́съ, ꙳ ꙗ҆́кѡ благоꙋтро́бенъ, ꙳ ꙗ҆́кѡ въ него̀ ѡ҆дѣ́ѧвыйсѧ;

Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть.

Грѧдѝ ко мнѣ̀, ꙳ та́инство соверша́ющемꙋ спаси́тельное, ꙳ предте́чи противовѣща́лъ є҆сѝ, ꙳ со стра́хомъ послꙋжѝ, ꙳ сп҃се всѧ́ческихъ, и҆ не ᲂу҆жаса́йсѧ. ꙳ Сокрꙋше́ннаго бо а҆да́ма грѣхо́мъ ѡ҆бновлѧ́ѧ, ꙳ креща́юсѧ, ꙗ҆́кѡ человѣ́къ: ꙳ є҆стество́мъ нескве́рный, ꙳ і҆ѻрда́нскими вода́ми, въ ни́хже ви́диши прише́дша мѧ̀.

Сті́хъ: Что́ ти є҆́сть, мо́ре, ꙗ҆́кѡ побѣ́гло є҆сѝ; и҆ тебѣ̀, і҆ѻрда́не, ꙗ҆́кѡ возврати́лсѧ є҆сѝ вспѧ́ть;

Со́лнце ѡ҆чища́емо ꙳ кто̀ ѿ земноро́дныхъ ви́дѣ, ꙳ і҆ѡа́ннъ проти́вѡ речѐ, ꙳ и҆ ѡ҆дѣва́ющаго нб҃о ѻ҆́блаки ѡ҆бнажа́ема всего̀, ꙳ и҆ и҆сто́чники и҆ рѣ́ки содѣва́ющаго въ во́ды входѧ́ща; ꙳ дивлю́сѧ несказа́нномꙋ смотре́нїю твоемꙋ̀, влⷣко: ꙳ не ѡ҆тѧгчѝ раба̀ твоего̀ ꙳ стра́шными повелѣ̑нїи.

Сла́ва, гла́съ д҃. Вѷзанті́ево:

Ꙗ҆́кѡ дх҃а рачи́тель, и҆ бл҃года́ти бг҃овѣща́ннаѧ ла́стовица, ꙗ҆́снѡ смотре́нїе цр҃е́во, человѣ́ческомꙋ ро́дꙋ и҆зъ чи́стыѧ свѣ́тлѡ возсїѧ́вшаго, человѣ́кѡвъ на ѡ҆бновле́нїе, просвѣти́лъ є҆сѝ, предте́че, сѣ́тꙋющихъ ѻ҆бы́чай ѿе́млѧ въ коне́цъ, и҆ жи́зни присносꙋ́щныѧ прїѧ́ти направлѧ́ѧ сердца̀, въ покаѧ́нїи креща́емыхъ, бл҃же́нне бг҃опрїѧ́тне.

И҆ ны́нѣ, гла́съ то́йже:

Прїиди́те, подража́имъ мꙋ̑дрыѧ дѣ̑вы, прїиди́те, срѧ́щимъ ꙗ҆́вльшагосѧ влⷣкꙋ: ꙗ҆́кѡ прїи́де, ꙗ҆́кѡ жени́хъ ко і҆ѡа́ннꙋ. і҆ѻрда́нъ ви́дѣвъ тѧ̀ ᲂу҆боѧ́сѧ и҆ пожда̀. І҆ѡа́ннъ вопїѧ́ше: не смѣ́ю держа́ти верха̀ безсме́ртнагѡ. Дх҃ъ схожда́ше въ ви́дѣ голꙋби́нѣ ѡ҆свѧти́ти во́ды. И҆ гла́съ съ нб҃сѐ: се́й є҆́сть сн҃ъ мо́й, прише́дый въ мі́ръ спастѝ ро́дъ человѣ́ческїй, гдⷭ҇и, сла́ва тебѣ̀.

Тропа́рь, гла́съ в҃:

Па́мѧть пра́веднагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че, показа́лбосѧ є҆сѝ вои́стиннꙋ и҆ прⷪ҇ро́кѡвъ честнѣ́йшїй, ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. Тѣ́мже за и҆́стинꙋ пострада́въ ра́дꙋѧсѧ, бл҃говѣсти́лъ є҆сѝ и҆ сꙋ́щымъ во а҆́дѣ бг҃а ꙗ҆́вльшагосѧ пло́тїю, взе́млющаго грѣ́хъ мі́ра и҆ подаю́щаго на́мъ ве́лїю млⷭ҇ть.

Сла́ва, и҆ ны́нѣ, пра́здника:

Во і҆ѻрда́нѣ креща́ющꙋсѧ тебѣ̀, гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ: и҆ дх҃ъ въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. Ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.

На повече́рїи, по трист҃о́мъ, конда́къ предте́чи: Плотска́гѡ твоегѡ̀ прише́ствїѧ: Ли́стъ р҃, на ѡ҆боро́тѣ.

На полꙋ́нощницѣ глаго́лемъ каѳі́смꙋ ѻ҆бы́чнꙋю. По а҃-мъ Трист҃о́мъ, вмѣ́стѡ, Сѐ жени́хъ: глаго́лемъ тропа́рь пра́здника. По в҃-мъ Трист҃о́мъ, конда́къ предте́чи: Плотска́гѡ твоегѡ̀ прише́ствїѧ:

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, Предте́чи: И҆ ны́нѣ, пра́здника.

По а҃-й стїхоло́гїи сѣда́ленъ, гла́съ а҃. Подо́бенъ: Ка́мени запеча́танꙋ:

І҆и҃сꙋ ро́ждшꙋсѧ ѿ дв҃ы мр҃і́и, и҆ во і҆ѻрда́нѣ кре́щшꙋсѧ ѿ і҆ѡа́нна, дх҃ъ сни́де на него̀ зри́мый въ ви́дѣ голꙋби́нѣ. Сегѡ̀ ра́ди прⷪ҇ро́къ со а҆́гг҃лы глаго́лаше зовы́й: сла́ва прише́ствїю твоемꙋ̀, хрⷭ҇тѐ, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не человѣколю́бче.

Сла́ва, и҆ ны́нѣ, то́йже.

По в҃-й стїхоло́гїи сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Во стрꙋѧ́хъ ви́дѣвъ тѧ̀ і҆ѻрда́нскихъ крести́тисѧ хотѧ́ща, вели́кїй предте́ча, хрⷭ҇тѐ, съ весе́лїемъ взыва́ше: прише́лъ є҆сѝ, и҆ ꙗ҆ви́лсѧ є҆сѝ свѣ́тъ непристꙋ́пный.

Сла́ва, и҆ ны́нѣ, то́йже.

Канѡ́нъ пра́здника пе́рвый со і҆рмосо́мъ на ѕ҃, тропарѝ на д҃: и҆ дрꙋгі́й со і҆рмосо́мъ на д҃. І҆рмосы̀ ѻ҆бою̀ канѡ́нѡвъ пра́здника по два́жды: и҆ предте́чи на д҃, гла́съ то́йже. Канѡ́нъ пра́здника.

Гла́съ в҃. Пѣ́снь а҃. І҆рмо́съ:

Глꙋбины̀ ѿкры́лъ є҆́сть дно̀, и҆ сꙋ́шею своѧ̑ влече́тъ, въ не́й покры́въ проти̑вныѧ, крѣ́пкїй во бранѣ́хъ гдⷭ҇ь, ꙗ҆́кѡ просла́висѧ.

А҆да́ма и҆стлѣ́вшаго ѡ҆бновлѧ́етъ стрꙋѧ́ми і҆ѻрда́нскими, и҆ ѕмїє́въ главы̑ гнѣздѧ́щихсѧ сокрꙋша́етъ цр҃ь вѣкѡ́въ гдⷭ҇ь, ꙗ҆́кѡ просла́висѧ.

Ѻ҆гне́мъ бж҃ества̀ невеще́ственнымъ, въ пло́ть веще́ственнꙋ ѡ҆дѣ́ѧвсѧ, і҆ѻрда́нскою ѡ҆блага́етсѧ водо́ю, воплоще́йсѧ ѿ дв҃ы гдⷭ҇ь, ꙗ҆́кѡ просла́висѧ.

Скве́рнꙋ ѡ҆мыва́ѧй человѣ́кѡвъ, си́мъ ѡ҆чи́щсѧ во і҆ѻрда́нѣ: и҆̀мже восхотѣ́въ ᲂу҆подо́бисѧ, є҆́же бѣ̀ пребы́въ, сꙋ́щыѧ во тмѣ̀ просвѣща́ѧй гдⷭ҇ь, ꙗ҆́кѡ просла́висѧ.

И҆́нъ канѡ́нъ пра́здника. Гла́съ то́йже.

Пѣ́снь а҃. І҆рмо́съ:

Ше́ствꙋетъ морскꙋ́ю волнѧ́щꙋюсѧ бꙋ́рю, сꙋ́шꙋ а҆́бїе і҆и҃ль ꙗ҆́вльшꙋюсѧ: че́рмный же по́нтъ трїста́ты є҆гѵ́пєтскїѧ покры̀ кꙋ́пнѡ, водостла́ненъ гро́бъ, си́лою крѣ́пкою десни́цы влⷣчни.

Оу҆́трꙋ ꙗ҆́вльшꙋсѧ человѣ́кѡмъ свѣтоно́снꙋ, ны́нѣ ѿ пꙋсты́ни къ вода́мъ і҆ѻрда̑нскимъ, цр҃ю̀, преклони́лъ є҆сѝ со́лнца твою̀ вы́ю, ли́ка мра́чна родонача́льника и҆схи́тити, скве́рны же всѧ́кїѧ ѡ҆чи́стити тва́рь.

Безнача́льне, стрꙋѧ́мъ спогре́бшасѧ тебѣ̀, сло́ве, но́ваго прево́диши, и҆стлѣ́вшаго ле́стїю сего̀, несказа́ннѡ ѿ ѻ҆ц҃а̀ прїе́мъ гла́съ держа́венъ: се́й возлю́бленный, ра́венъ же мнѣ̀ є҆́сть ѻ҆́трокъ є҆стество́мъ.

Канѡ́нъ предте́чи. Творе́нїе ѳеофа́ново, є҆гѡ́же краегране́сїе:

Крести́телю хрⷭ҇то́въ, хвалє́нїѧ моѧ̑ прїимѝ.

Гла́съ в҃. Пѣ́снь а҃. І҆рмо́съ:

Непроходи́мое волнѧ́щеесѧ мо́ре, бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇еви пои́мъ: сла́внѡ бо просла́висѧ.

Погрꙋжа́ема мѧ̀ страсте́й бꙋ́рею, предте́че, мл҃твами твои́ми предвари́въ спасѝ: безстра́стїѧ бо са́мъ бы́лъ є҆сѝ прїѧ́телище чⷭ҇тно́е и҆ чистѣ́йшее, гдⷭ҇ꙋ свы́ше ѿ младе́нства возложе́нъ.

Ра́дꙋѧсѧ бг҃ꙋ предстоѧ́й а҆́гг҃лъ, равноа́гг҃льнаго бл҃говѣстѝ заха́рїи честно́мꙋ, твоемꙋ̀ свѧще́нствꙋющꙋ ѻ҆тцꙋ̀, тѧ̀, всебл҃же́нне, гдⷭ҇нѧ предте́чꙋ, и҆ дрꙋ́га бы́вша.

И҆спо́лненъ бы́лъ є҆сѝ всест҃а́гѡ дх҃а, є҆щѐ во чре́вѣ твоеѧ̀ ма́тере внꙋ́трь носи́мь, и҆ взыгра́нїемъ кра́снымъ дѣ́вственный пло́дъ ра́дꙋѧсѧ возвѣсти́лъ є҆сѝ, и҆ поклони́лсѧ є҆сѝ, прⷪ҇ро́че всече́стне.

Непрохо́дный всѣ̑мъ человѣ́кѡмъ пе́рвѣе, стра́нный пꙋ́ть житїѧ̀ просѣ́кшаго, и҆ крести́вшаго хрⷭ҇та̀ во і҆ѻрда́нскихъ стрꙋѧ́хъ, восхва́лимъ гдⷭ҇нѧ прⷣте́чꙋ, бж҃е́ственнаго и҆ бг҃омꙋ́драго.

Бг҃оро́диченъ:

Всеѡсщ҃е́нный двⷭ҇тва хра́мъ, во чре́вѣ бг҃а сло́ва чревоноси́вшаѧ, притека́ющыѧ къ тебѣ̀ и҆ призыва́ющыѧ, чⷭ҇таѧ, спасѝ моли́твами твои́ми, бѣ́дъ разрꙋша́ющи нахожде́нїе, всенепоро́чнаѧ.

Катава́сїа: Глꙋбины̀ ѿкры́лъ є҆́сть дно̀:

Дрꙋгі́й: Ше́ствꙋетъ морскꙋ́ю: По кли́росѡмъ.

Пѣ́снь г҃. І҆рмо́съ:

Крѣ́пость даѧ́й царє́мъ на́шымъ гдⷭ҇ь и҆ ро́гъ пома́занныхъ свои́хъ возносѧ́й ѿ дв҃ы ражда́етсѧ, грѧде́тъ же ко креще́нїю. томꙋ̀, вѣ́рнїи, возопїе́мъ: нѣ́сть ст҃ъ, ꙗ҆́кѡ бг҃ъ на́шъ.

Непло́днаѧ дре́вле и҆ безча́днаѧ лю́тѣ, дне́сь весели́сѧ хрⷭ҇то́ва це́рковь: водо́ю бо и҆ дх҃омъ сы́нове тебѣ̀ роди́шасѧ, вѣ́рою взыва́юще: нѣ́сть ст҃ъ, ꙗ҆́коже бг҃ъ на́шъ.

Ве́лїимъ гла́сомъ въ пꙋсты́ни вопїе́тъ прⷣте́ча: хрⷭ҇тꙋ̀ ᲂу҆гото́вайте пꙋти̑, и҆ стези̑ бг҃ꙋ на́шемꙋ пра̑вы содѣ́лайте, вѣ́рою взыва́юще: нѣ́сть ст҃ъ, ꙗ҆́коже бг҃ъ на́шъ.

И҆́нъ. І҆рмо́съ:

Є҆ли́цы дре́внихъ и҆зрѣши́хомсѧ сѣ́тей, бра́шенъ львѡ́въ сотре́нныхъ члено́вными, ра́дꙋимсѧ и҆ разшири́мъ ᲂу҆ста̀, сло́во плетꙋ́ще слове́съ сладкопѣ́нїѧ, и҆́мже къ на́мъ наслажда́етсѧ дарова́нїй.

Оу҆мерщвле́нїе пе́рвѣе насади́вый тва́ри, ѕвѣ́рѧ ѕлодѣ́йственнагѡ воѡбра́жсѧ въ є҆стество̀, ѡ҆мрача́етсѧ плотски́мъ прише́ствїемъ, ᲂу҆́трꙋ ꙗ҆́вльшꙋсѧ, прирази́всѧ влⷣцѣ, сокрꙋши́ти свою̀ вражде́бнꙋю главꙋ̀.

Влече́тъ къ себѣ̀ бг҃озда́нное є҆стество̀ ᲂу҆тро́бы мꙋчи́телѧ, погребе́нное предѣ́лы: ражда́етсѧ па́ки земноро́дныхъ ѡ҆бновле́нїе, дѣ́ло держа́вно соверша́ѧ влⷣка: прїи́де бо то́е ѡ҆чи́стити хотѧ̀.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. Возвесели́босѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Непло́дствїѧ поноше́нїе разрѣши́лъ є҆сѝ, позна́въ дв҃ы бжⷭ҇твенное ржⷭ҇тво̀, взыгра́лъ є҆сѝ ра́дꙋѧсѧ во чре́вѣ ма́терни, всехва́льне, а҆́гг҃лѡвъ сожи́телю, гдⷭ҇ень предте́че блаже́ннѣйшїй.

Стези̑ пред̾ꙋгото́вивъ гдⷭ҇ни, ше́ствовалъ є҆сѝ предъ лице́мъ є҆гѡ̀, прⷪ҇ро́че: ꙗ҆́кѡ свѣти́льникъ бо всѣ̑мъ ꙗ҆влѧ́ѧй сла́вы ѻ҆́ч҃ее сїѧ́нїе, ꙗ҆́вльшеесѧ пло́тїю на́съ ра́ди, показа́лсѧ є҆сѝ всѣ́хъ и҆зѧ́щнѣйшїй.

Возсїѧ́лъ є҆сѝ, ꙗ҆́кѡ ᲂу҆́тро, пра́вды сл҃нце возвѣща́ѧ сꙋ́щымъ во тмѣ̀: всѣ́хъ бо спасе́нїѧ ты̀ бы́лъ є҆сѝ проповѣ́дникъ и҆ предте́ча, и҆ всѣ̑мъ глаго́лалъ є҆сѝ: ко хрⷭ҇тꙋ̀ пристꙋпи́те вѣ́рою, и҆ спасе́тесѧ.

Бг҃оро́диченъ:

Ра́дость неизглаго́ланнꙋю прїе́мши, зачала̀ є҆сѝ безсѣ́меннѡ твоего̀ влⷣкꙋ, всю̀, бг҃ома́ти, вселе́ннꙋю призва́вшаго. Є҆мꙋ́же и҆ взыва́емъ: ꙗ҆́кѡ нѣ́сть ст҃ъ па́че тебє̀, гдⷭ҇и.

Катава́сїа: Крѣ́пость даѧ́й: Дрꙋгі́й: Є҆ли́цы дре́внихъ:

Конда́къ, гла́съ д҃:

Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й, гдⷭ҇и, зна́менасѧ на на́съ, въ ра́зꙋмѣ пою́щихъ тѧ̀: прише́лъ є҆сѝ, и҆ ꙗ҆ви́лсѧ є҆сѝ свѣ́тъ непристꙋ́пный.

І҆́косъ:

Галїле́и ꙗ҆зы́честѣй, завꙋлѡ́нстѣй странѣ̀, и҆ нефѳали́мстѣй землѝ, ꙗ҆́коже речѐ прⷪ҇ро́къ, свѣ́тъ вели́къ возсїѧ̀ хрⷭ҇то́съ, ѡ҆мрачє́ннымъ свѣтла̀ ꙗ҆ви́сѧ зарѧ̀ и҆зъ виѳлее́ма ѡ҆блиста́ющаѧ, па́че же и҆зъ мр҃і́и гдⷭ҇ь, все́й вселе́ннѣй возсїѧва́етъ лꙋчы̀ сл҃нце пра́вды. Тѣ́мже и҆̀же ѿ а҆да́ма назі́и, прїиди́те всѝ ѡ҆блече́мсѧ въ него̀, да согрѣ́емсѧ: покрыва́етъ бо нагі̑ѧ, и҆ просвѣща́етъ тє́мныѧ. Прише́лъ є҆сѝ, и҆ ꙗ҆ви́лсѧ є҆сѝ свѣ́тъ непристꙋ́пный.

Та́же сѣда́ленъ, гла́съ и҃. Подо́бенъ: Премꙋ́дрости:

І҆ѻрда́нъ стрꙋѧ́ми слꙋ́житъ, и҆ і҆ѡа́ннъ простира́етъ рꙋ́кꙋ тлѣ́ннꙋю, ꙗ҆́вльшꙋсѧ тебѣ̀, неви́диме, пло́тїю ко креще́нїю: но ѻ҆́въ ᲂу҆́бѡ возвраща́шесѧ вспѧ́ть со стра́хомъ, ѻ҆́въ же а҆́бїе держа́ше съ тре́петомъ тѧ̀ нетлѣ́ннаго. Вои́стиннꙋ а҆́гнецъ бж҃їй и҆сто́чникъ присноживо́тный, и҆сто́чники же и҆ морѧ̀, и҆ человѣ́ки ѡ҆свѧти́въ: трⷪ҇ца бо просїѧ̀ свы́ше, сн҃а тѧ̀ и҆менꙋ́етъ роди́тель, и҆ ст҃ы́й дх҃ъ схо́дитъ.

Сла́ва, и҆ ны́нѣ, то́йже.

Пѣ́снь д҃. І҆рмо́съ:

Оу҆слы́шахъ, гдⷭ҇и, гла́съ тво́й, є҆го́же ре́клъ є҆сѝ, гла́съ вопїю́щагѡ въ пꙋсты́ни, ꙗ҆́кѡ возгремѣ́лъ є҆сѝ надъ вода́ми мно́гими, твоемꙋ̀ свидѣ́тельствꙋѧй сн҃ꙋ, ве́сь бы́въ соше́дшагѡ дх҃а, возопѝ: ты̀ є҆сѝ хрⷭ҇то́съ, бж҃їѧ мꙋ́дрость и҆ си́ла.

Ѡ҆чища́емо со́лнце кто̀ ви́дѣ, проповѣ́дникъ вопїе́тъ, пресвѣ́тлое є҆стество́мъ; да тебѐ вода́ми сїѧ́нїе сла́вы, ѻ҆ц҃а̀ ѻ҆́бразъ присносꙋ́щнагѡ ѡ҆мы́ю, и҆ сѣ́но сы́й ѻ҆гню̀ прикоснꙋ́сѧ твоегѡ̀ бж҃ества̀: ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла.

Ꙗ҆вѝ бжⷭ҇твенное, є҆́же и҆мѣ̀ бл҃гоговѣ́нїе мѡѷсе́й прилꙋчи́всѧ тебѣ̀: ꙗ҆́кѡ бо и҆з̾ кꙋпины̀ тѧ̀ возгласи́вша разꙋмѣ̀, а҆́бїе ѿвратѝ лицѐ, а҆́зъ же ка́кѡ тѧ̀ ᲂу҆ви́жꙋ ꙗ҆́снѡ; и҆лѝ ка́кѡ рꙋ́кꙋ положꙋ̀ на тѧ̀; ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла. (с. 200)

Дꙋше́вное соверша́ѧ, мꙋ́дре, и҆ сло́вомъ почте́ный, бездꙋ́шныхъ стыждꙋ́сѧ. А҆́ще бо крещꙋ́ тѧ, клеве́тна мѝ є҆́сть ѻ҆гне́мъ дымѧ́щаѧсѧ гора̀, побѣ́гшее же мо́ре на дво́е, и҆ і҆ѻрда́нъ се́й возврати́выйсѧ: ты́ бо є҆сѝ хрⷭ҇то́съ, бж҃їѧ мꙋ́дрость и҆ си́ла.

И҆́нъ. І҆рмо́съ:

Ѻ҆гне́мъ ѡ҆чи́щсѧ та́йнагѡ зрѣ́нїѧ, поѧ̀ прⷪ҇ро́къ человѣ́кѡвъ новодѣ́йство, возглаша́етъ гла́съ, дх҃омъ пле́щꙋщъ, воплоще́нїе ꙗ҆влѧ́ющь неизрече́нна сло́ва, и҆́мже си́льныхъ держа̑вы сотро́шасѧ.

По́сланъ ѿ ѻ҆ц҃а̀, всесвѣ́тлое сло́во, но́щи ѿгна́ти ѕломра́чное стремле́нїе, и҆ и҆скорени́ти грѧде́ши человѣ́кѡвъ грѣхѝ, сы́ны же привлещѝ твои́мъ креще́нїемъ, бл҃же, свѣ̑тлы ѿ стрꙋ́й і҆ѻрда́нскихъ.

Са́мое прови́дѣвъ нарече́нное сло́во, ꙗ҆́снѡ проповѣ́дникъ вопїе́тъ тва́ри: се́й пре́жде менє̀, вторы́й пло́тїю, соѻбра́зенъ просїѧ̀ бжⷭ҇твенною си́лою, вражде́бный на́шъ ѿѧ́ти грѣ́хъ.

Па́жить ᲂу҆ себє̀ животво́рнꙋ носѧ̀, ᲂу҆ловлѧ́етъ ѕмїє́въ гнѣ́здамъ натека́ѧ мно́гими сѣтьмѝ, низлага́ѧ бг҃ъ сло́во: запина́етъ же ᲂу҆ѧзви́вшаго всемі́рный ро́дъ, сего̀ потре́бль и҆збавлѧ́етъ тва́рь.

И҆́нъ. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Ѡ҆сквернє́нныѧ ѡ҆мы́ти водо́ю посла́лсѧ є҆сѝ, ѿ влⷣки ᲂу҆готовлѧ́ѧ прїѧ́ти, взе́млющагѡ грѣ́хъ хрⷭ҇та̀, и҆ ле́сть ѿгонѧ́ща бг҃оразꙋ́мїѧ заре́ю, всече́стне.

Ꙗ҆́да мѧ̀ ѕмїи́на ᲂу҆грызе́нїѧ и҆сцѣли́ти, бл҃же́нне, молѝ, и҆́же хрⷭ҇та̀ вода́ми крести́въ і҆ѻрда́нскими, въ ни́хже ѕмїє́въ возгнѣзди́вшꙋюсѧ ѕло́бꙋ сп҃съ сокрꙋшѝ.

Мꙋ́дростїю бж҃їею ᲂу҆кра́шенъ, прише́лъ є҆сѝ (с. 201) хрⷭ҇топроповѣ́дникъ: вопїю́щагѡ бо бы́лъ є҆сѝ зовꙋ́щїй, пока́йтесѧ, гла́съ, ꙗ҆́кѡ прⷪ҇ро́къ провозгласѝ, сꙋ́щаго па́че всѣ́хъ человѣ̑къ тѧ̀ показꙋ́ѧ на́мъ.

Стра́нное и҆ человѣ́ки нетре́нное живы́й житїѐ, предста́лъ є҆сѝ вода́мъ, всеизрѧ́днѣйше, і҆ѻрда̑нскимъ, гла́съ ѻ҆́ч҃їй слы́шавъ, и҆ прише́ствїе дх҃а ᲂу҆зрѣ́въ.

Бг҃оро́диченъ:

И҆́же всѧ̑ созда́вый гдⷭ҇ь, по на́мъ са́мъ зи́ждетсѧ, всели́всѧ, всечⷭ҇таѧ, во ᲂу҆тро́бꙋ твою̀ всест҃ꙋ́ю, во ѻ҆́бразъ человѣ́чь ѡ҆дѣ́ѧсѧ, и҆ сво́й ѻ҆́бразъ спасѐ.

Катава́сїа: Оу҆слы́шахъ, гдⷭ҇и, гла́съ тво́й: Дрꙋгі́й: Ѻ҆гне́мъ ѡ҆чи́щсѧ:

Пѣ́снь є҃. І҆рмо́съ:

І҆и҃съ, живота̀ нача́льникъ, разрѣши́ти ѡ҆сꙋжде́нїе грѧде́тъ а҆да́ма первозда́ннагѡ, ѡ҆чище́нїй же ꙗ҆́кѡ бг҃ъ не тре́бꙋѧ, па́дшаго ѡ҆чища́етъ во і҆ѻрда́нѣ: въ не́мже враждꙋ̀ ᲂу҆би́въ, преимꙋ́щь всѧ́къ ᲂу҆́мъ ми́ръ да́рꙋетъ.

Сше́дшымсѧ без̾ числа̀ лю́демъ ѿ і҆ѡа́нна крести́тисѧ, са́мъ посредѣ̀ и҆́хъ ста̀. Провозгла́си же предстоѧ́щымъ: кто̀ показа̀, непокори́вїи, гнѣ́ва ва́мъ ᲂу҆клони́тисѧ хотѧ́щагѡ бы́ти; плоды̀ достѡ́йны хрⷭ҇тꙋ̀ сотвори́те: предстоѧ́й бо ны́нѣ ми́ръ да́рꙋетъ.

Дѣ́латель и҆ зижди́тель посредѣ̀ стоѧ́й, ꙗ҆́кѡ є҆ди́нъ всѣ́хъ сердца̀ и҆спытꙋ́етъ, чисти́тельнꙋю же лопа́тꙋ рꙋко́ю прїе́мъ, всемі́рное гꙋмно̀ всемꙋ́дрѣ разлꙋча́етъ, непло́дїе палѧ̀, бл҃гоплѡ́днымъ вѣ́чный живо́тъ да́рꙋетъ.

И҆́нъ. І҆рмо́съ:

Врага̀ те́мнагѡ и҆ ѡ҆скверне́ннагѡ ꙗ҆́да ѡ҆чище́нїемъ дх҃а и҆змове́ни, къ но́вой приста́хомъ небла́зненной стезѝ, водѧ́щей въ непристꙋ́пнꙋю ра́дость, є҆ди́нѣмъ пристꙋ́пнꙋ, и҆̀мже бг҃ъ примири́сѧ.

Ви́дѣвъ зижди́тель, во мра́цѣ прегрѣше́нїй плени́цами неизбѣ́жными, є҆го́же воѡбразѝ пє́рсты, поставлѧ́етъ на ѻ҆бою̀ ра̑мꙋ воздви́гъ горѣ̀, ны́нѣ во многотекꙋ́щихъ вода́хъ ѡ҆мыва́ѧ стꙋда̀ дре́внѧгѡ а҆да́мова ѕла́гѡ нра́ва.

Со бл҃гоче́стїемъ притеце́мъ прилѣ́жнѡ, ко и҆сто́чникѡмъ пречи̑стымъ тече́нїѧ спаси́тельнагѡ, сло́во ᲂу҆смотрѧ́юще ѿ нетлѣ́нныѧ, почерпа̑ла приносѧ́ще жа́жди бжⷭ҇твенныѧ, мі́ра сла́достнѣ и҆сцѣлѧ́ѧ недꙋ́гъ.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Преесте́ственныѧ добродѣ́тели свѣтлостьмѝ ѡ҆заре́нъ, ꙗ҆́кѡ ѿ нбⷭ҇нагѡ тайновожде́нїе вода́мъ предста́лъ є҆сѝ і҆ѻрда̑нскимъ, креща́ѧ и҆ ѡ҆чища́ѧ водо́ю, предте́че, вѣ́рою дꙋше́вною пристꙋпа́ющыѧ тебѣ̀.

Чи́стый и҆ нетлѣ́нный свѣ́тъ хотѧ̀ крести́ти, сосꙋ́дъ чистѣ́йшїй показа́лсѧ є҆сѝ, і҆ѡа́нне: бо́лїй бо всѣ́хъ ѿ негѡ̀ пред̾избра́лсѧ є҆сѝ, прⷪ҇ро́кѡвъ же честнѣ́йшїй, прⷪ҇ро́чествованнаго бо сподо́билсѧ є҆сѝ ви́дѣти.

По́сланъ бы́въ пред̾ лице́мъ гдⷭ҇нимъ, всегѡ̀ всѣ̑мъ стєзѝ человѣ́кѡмъ показꙋ́ѧ, прикаса́етсѧ трепе́щѧ верхꙋ̀ влⷣчню, и҆ кр҃ща́етъ глаго́лѧ предте́ча: и҆но́гѡ ра́звѣ тебє̀ бо́га не вѣ́мъ.

Кто̀ ви́дѣ, и҆лѝ кто̀ слы́ша когда̀ безскве́рнаго созда́нїю ве́рхъ преклонѧ́юща, рꙋко́ю всѧ̑ содержа́щаго, тѣ́мъ тре́петнѡ крести́тель вопїѧ́ше: и҆но́гѡ па́че тебє̀ бо́га не вѣ́мъ.

Бг҃оро́диченъ:

Сн҃ъ бж҃їй, сн҃ъ тво́й, дв҃о, ꙗ҆́вѣ показа́сѧ, дѣла̀ ꙗ҆́кѡ бг҃ъ соверша́ѧ во́лею є҆ди́ною. Тѣ́мже тѧ̀ всѝ и҆́стиннѡ бцⷣꙋ и҆ гдⷭ҇ственнѡ и҆менꙋ́емъ: и҆ны́ѧ бо мт҃ре бж҃їѧ не вѣ́мы.

Катава́сїа: І҆и҃съ, живота̀ нача́льникъ: Дрꙋгі́й: Врага̀ те́мнагѡ:

Пѣ́снь ѕ҃. І҆рмо́съ:

Гла́съ словесѐ, свѣти́льникъ свѣ́та, денни́ца сл҃нца, прⷣте́ча, въ пꙋсты́ни, пока́йтесѧ, всѣ̑мъ вопїе́тъ лю́демъ, и҆ пред̾ѡчи́ститесѧ: се́ бо предстои́тъ хрⷭ҇то́съ, ѿ тлѝ мі́ръ и҆збавлѧ́ѧй.

Ро́ждсѧ нетлѣ́ннѡ ѿ бг҃а и҆ ѻ҆ц҃а̀, ѿ дв҃ы кромѣ̀ скве́рны воплоща́етсѧ хрⷭ҇то́съ: є҆мꙋ́же реме́нь, ꙗ҆̀же ѿ на́съ сло́ва сочта́нїѧ, разрѣши́ти неꙋдо́бь ᲂу҆чи́тъ предте́ча, земнорѡ́дныѧ ѿ ле́сти и҆збавлѧ́ѧ.

Ѻ҆гне́мъ крⷭ҇ти́тъ коне́чнымъ хрⷭ҇то́съ проти̑вныѧ, а҆ не бг҃а мꙋ́дрствꙋющихъ є҆го̀: дх҃омъ же ѡ҆бновлѧ́етъ водо́ю бл҃года́ти разꙋмли̑выѧ бжⷭ҇тва̀ є҆гѡ̀, ѿ прегрѣше́нїй и҆збавлѧ́ѧ.

И҆́нъ. І҆рмо́съ:

Вожделѣ́ннаго ꙗ҆́вствова со всебл҃же́ннымъ гла́сомъ ѻ҆ц҃ъ, є҆го́же и҆з̾ чре́ва ѿры́гнꙋ: є҆́й, глаго́летъ, се́й соесте́ственъ сн҃ъ сы́й свѣтоза́ренъ, произни́че и҆з̾ человѣ́ча ро́да: сло́во же моѐ жи́во, и҆ чл҃вѣ́къ промышле́нїемъ.

Ѿ глꙋби́ннагѡ льва̀, тревече́рнїй стра́ннѣ прⷪ҇ро́къ во внꙋ́треннихъ валѧ́ѧсѧ, а҆́бїе произы́де, пакибытїѧ̀ спасе́нїе, ѿ ѕмі́ѧ человѣкоꙋбі́йцы, всѣ̑мъ пред̾ѧвлѧ́ѧ въ послѣ̑днѧѧ лѣ̑та.

Ѿве́рстꙋ не́бꙋ всесвѣ́тлыхъ писа́нїй, ᲂу҆чени́къ зри́тъ ѿ ѻ҆ц҃а̀ посыла́емь: пребыва́ющь же дх҃ъ на пречи́стѣмъ сло́вѣ, наше́дъ ꙗ҆́кѡ го́лꙋбь неизрече́ннымъ ѻ҆́бразомъ, лю́демъ же ꙗ҆влѧ́етсѧ, прише́дшымъ ко влⷣцѣ.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Ты̀ сло́ва гла́съ предше́ствовалъ є҆сѝ, и҆ ꙗ҆́кѡ свѣтоно́снаѧ ѕвѣзда̀ возсїѧ́лъ є҆сѝ, провозвѣща́ѧ, предте́че, ты̀ пра́вды сл҃нца.

Земны́хъ попече́нїй не ᲂу҆вѣ́дѣлъ є҆сѝ, и҆ нбⷭ҇ными наде́ждами ѡ҆богати́лсѧ є҆сѝ: на землѝ ꙗ҆́кѡ а҆́гг҃лъ жи́знь соверши́лъ є҆сѝ, всебл҃же́нне.

Прⷪ҇ро́кѡвъ тѧ̀ печа́ть зна́емъ, ꙗ҆́кѡ ве́тхаго и҆ но́ваго хода́таѧ, и҆ крести́телѧ и҆ прⷣте́чꙋ, сп҃са хрⷭ҇та̀ предвозвѣща́емъ.

Бг҃оро́диченъ:

Несказа́нно вои́стиннꙋ зача́тїе, неизрече́нно ржⷭ҇тво̀ твоѐ и҆ непостижи́мо всѣ̑мъ вѣ̑рнымъ познава́етсѧ и҆ вѣ́рꙋетсѧ, є҆ди́на бг҃оневѣ́сто.

Катава́сїа: Гла́съ словесѐ: Дрꙋгі́й: Вожделѣ́ннаго ꙗ҆́вствова:

Конда́къ, гла́съ ѕ҃:

Плотска́гѡ твоегѡ̀ прише́ствїѧ ᲂу҆боѧ́всѧ і҆ѻрда́нъ, стра́хомъ возвраща́шесѧ: прⷪ҇ро́ческое же слꙋже́нїе и҆сполнѧ́ѧ і҆ѡа́ннъ, тре́петомъ спрѧ́ташесѧ: а҆́гг҃льскїѧ чи́ни ᲂу҆жаса́хꙋсѧ, зрѧ́ше тѧ̀ во стрꙋѧ́хъ пло́тїю креща́ема: и҆ всѝ сꙋ́щїи во тмѣ̀ ѡ҆зарѧ́хꙋсѧ, воспѣва́юще тѧ̀ ꙗ҆́вльшагосѧ, и҆ просвѣти́вшаго всѧ̑.

І҆́косъ:

Ѡ҆слѣ́пшꙋ а҆да́мꙋ во є҆де́мѣ, ꙗ҆ви́сѧ сл҃нце и҆з̾ виѳлее́ма, и҆ ѿве́рзе є҆мꙋ̀ зѣ̑ницы, ѡ҆мы́въ сїѧ̑ і҆ѻрда́нскими вода́ми: ѡ҆чернѣ́вшемꙋ и҆ ѡ҆мраче́нномꙋ свѣ́тъ возсїѧ̀ неꙋгаси́мый. Оу҆жѐ є҆мꙋ̀ нѣ́сть но́щь, по всегда̀ де́нь. Є҆́же ко ᲂу҆́трꙋ ᲂу҆́тро, є҆гѡ̀ ра́ди роди́сѧ: къ ве́черꙋ бо сокры́сѧ, ꙗ҆́коже пи́шетъ, ѡ҆брѣ́те зарю̀ возставлѧ́ющꙋю того̀. И҆́же къ ве́черꙋ пады́й, и҆змѣни́сѧ мра́ка, и҆ дости́же ко ᲂу҆́трꙋ ꙗ҆́вльшагѡсѧ, и҆ просвѣти́вшагѡ всѧ̑.

Пѣ́снь з҃. І҆рмо́съ:

Ю҆́ноши бл҃гочести̑выѧ, пе́щи ѻ҆́гненнѣй приѡбщи́вшыѧсѧ, шꙋмѧ́щъ дх҃ъ ро́сный невреди̑мы сохранѝ, и҆ бж҃їѧ а҆́гг҃ла снизхожде́нїе. Тѣ́мже, въ пла́мени ѡ҆роша́еми, благода́рственнѡ воспѣва́хꙋ: препѣ́тый ѻ҆ц҃ъ гдⷭ҇и и҆ бж҃е, бл҃гослове́нъ є҆сѝ.

Ꙗ҆́коже на нб҃сѝ съ тре́петомъ и҆ чꙋ́домъ предстоѧ́хꙋ, во і҆ѻрда́нѣ си̑лы а҆́гг҃льскїѧ, смотрѧ́юще толи̑ка бж҃їѧ схождє́нїѧ: ꙗ҆́кѡ держа́й превы́шнихъ во́дъ соста́въ, въ вода́хъ плотоно́сецъ стоѧ́ше, бг҃ъ ѻ҆ц҃ъ на́шихъ.

Ѻ҆́блакъ дре́вле и҆ мо́ре бжⷭ҇твеннагѡ проѡбража́хꙋ креще́нїѧ чꙋ́до: въ ни́хже дре́внїи крести́шасѧ, и҆сходѧ́ще зако́ннїи лю́дїе. Мо́ре же бѣ̀ ѻ҆́бразъ воды̀, и҆ ѻ҆́блакъ дх҃а: и҆́миже соверша́еми, бл҃гослове́нъ є҆сѝ, зове́мъ, гдⷭ҇и бж҃е, во вѣ́ки.

Всѝ вѣ́рнїи, въ не́мже соверше́нїе прїѧ́хомъ, бг҃осло́вѧще немо́лчнѡ со а҆́гг҃лы, просла́вимъ ѻ҆ц҃а̀, и҆ сн҃а, и҆ дх҃а ст҃а́го: се́ бо трⷪ҇ца ѵ҆поста́сьми є҆диносꙋ́щнаѧ, є҆ди́нъ же бг҃ъ, є҆мꙋ́же пое́мъ: бл҃гослове́нъ є҆сѝ, гдⷭ҇и бж҃е, во вѣ́ки.

И҆́нъ. І҆рмо́съ:

Ѡ҆палѝ стрꙋе́ю ѕмі́євы главы̑ пе́щный высо́кїй пла́мень, ю҆́ношы носѧ́щъ бл҃гочести̑выѧ, ᲂу҆ти́шивый неꙋдободержи́мꙋю мглꙋ̀ и҆з̾ грѣха̀, всю́ же ѡ҆мыва́етъ росо́ю дх҃а.

Тебѐ живописꙋ́ющїй а҆ссѷрі́йскїй пла́мень ᲂу҆жа́сенъ поставлѧ́еши, въ ро́сꙋ преведе́нъ. Тѣ́мже вода̀ ны́нѣ, ꙗ҆́коже пла́мень ѡ҆дѣва́ѧй вре́днꙋю ѕло́бꙋ, хрⷭ҇тѐ, прикрове́ннꙋю ѡ҆палѧ́етъ, ѿ поползнове́нныѧ стезѝ призыва́ющи.

Раздѣ́льшꙋсѧ і҆ѻрда́нꙋ дре́вле, по сꙋ́хꙋ прехо́дѧтъ лю́дїе і҆и҃льстїи, тебѐ держа́внѣйшаго, содержа́ща тва́рь некосни́тельнѣ, ны́нѣ въ вода́хъ написꙋ́ющїи, къ нетлѣ́ннѣй и҆ поле́знѣй стезѝ.

Вѣ́мы пе́рвѣе всепа́гꙋбный пото́пъ, ми́лостивнѡ тѧ̀ всѣ́хъ во тлю̀ привестѝ. ѽ тревели̑каѧ сотворѧ́ѧ, и҆ стра̑ннаѧ! ны́нѣ же пото́пльша, хрⷭ҇тѐ, грѣ́хъ за благосе́рдїе и҆ человѣ́ческое спасе́нїе.

И҆́нъ. І҆рмо́съ:

Кꙋпина̀ въ горѣ̀ ѻ҆гнеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ ѻ҆́гнь неѡпа́льнѡ прїѧ́ла є҆сѝ. Тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆ц҃ъ на́шихъ.

Сщ҃еннодѣ́йствовавъ креще́нїе, и҆ соверши́въ, прⷣте́че, ꙗ҆̀же ѿ бг҃а ꙗ҆́вѣ да̑нныѧ тебѣ̀ та̑йны, ꙗ҆́кѡ а҆́гнецъ неѕло́бивъ, сщ҃еннодѣ́йствꙋемый прине́слсѧ є҆сѝ же́ртва. Тѣ́мже съ тобо́ю согла́снѡ пое́мъ: бл҃гослове́нъ бг҃ъ ѻ҆ц҃ъ на́шихъ.

Но́вый и҆лїа̀ ты̀ бы́лъ є҆сѝ, со дерзнове́нїемъ, прⷣте́че, и҆ царѧ̀ ѡ҆блича́ѧ беззако́нновавша, и҆ житїѐ невеще́ственно показꙋ́ѧ на́мъ, ꙗ҆́коже ѻ҆́нъ, требл҃же́нне. Тѣ́мже съ тобо́ю, прⷪ҇ро́че, пое́мъ: бл҃гослове́нъ бг҃ъ ѻ҆ц҃ъ на́шихъ.

И҆́же прⷪ҇ро́кѡвъ бо́льшїй, и҆ а҆пⷭ҇лѡвъ, прⷣте́че, хрⷭ҇то́выхъ бжⷭ҇твеннꙋю че́сть наслѣ́довавъ, ты̀ зако́на и҆сполне́нїе, и҆ нача́ло ꙗ҆́вѣ но́выѧ бл҃года́ти ꙗ҆ви́лсѧ є҆сѝ. Тѣ́мже съ тобо́ю, требл҃же́нне, пое́мъ: бл҃гослове́нъ бг҃ъ ѻ҆ц҃ъ на́шихъ.

Бг҃оро́диченъ:

Пѣснослове́ньми всечⷭ҇тꙋю и҆ бг҃опрїѧ́тнꙋю влⷣчцꙋ, бл҃гочести́вїи досто́йнѡ всѝ воспои́мъ, ꙗ҆́кѡ бг҃а ро́ждшꙋю є҆диноро́днаго на́мъ человѣ́кѡмъ ꙗ҆́вльшасѧ. Къ немꙋ́же, вѣ́рнїи, согла́снѡ пое́мъ, бл҃гослове́нъ бг҃ъ ѻ҆ц҃ъ на́шихъ.

Катава́сїа: Ю҆́ноши бл҃гочести̑выѧ: Дрꙋгі́й: Ѡ҆палѝ стрꙋе́ю ѕмі́євы главы̑:

Пѣ́снь и҃. І҆рмо́съ:

Та́йнꙋ пресла́внꙋю вавѷлѡ́нскаѧ показа̀ пе́щь, и҆сточи́вшаѧ ро́сꙋ, ꙗ҆́кѡ стрꙋѧ́ми и҆мѧ́ше невеще́ственный ѻ҆́гнь воспрїѧ́ти і҆ѻрда́нъ, и҆ ѡ҆б̾ѧ́ти пло́тїю креща́ема зижди́телѧ, є҆го́же благословѧ́тъ лю́дїе, и҆ превозно́сѧтъ во всѧ̑ вѣ́ки.

Ѿложѝ стра́хъ ве́сь, и҆зба́витель предте́чи речѐ: мнѣ́ же повини́сѧ, ꙗ҆́кѡ бл҃го́мꙋ, мнѣ̀ пристꙋпѝ, сїе́ бо є҆стество́мъ бы́хъ, мои̑мъ повелѣ́нїємъ покори́сѧ, и҆ крести́ мѧ соше́дшаго: є҆го́же благословѧ́тъ лю́дїе, и҆ превозно́сѧтъ во всѧ̑ вѣ́ки.

Глаго́лы ꙗ҆́коже ᲂу҆слы́ша крⷭ҇ти́тель влⷣчни, съ тре́петомъ дла́нь простира́етъ: ѻ҆ба́че же рꙋко́ю коснꙋ́всѧ верхꙋ̀ зижди́телѧ своегѡ̀, кре́щшемꙋсѧ вопїѧ́ше: ѡ҆свѧти́ мѧ, ты́ бо є҆сѝ бг҃ъ мо́й, є҆го́же благословѧ́тъ лю́дїе, и҆ превозно́сѧтъ во всѧ̑ вѣ́ки.

Трⷪ҇цы ꙗ҆вле́нїе во і҆ѻрда́нѣ бы́сть, са́мое бо пребж҃е́ственное є҆стество̀, ѻ҆ц҃ъ возгласѝ: се́й креща́емый, сн҃ъ возлю́бленный мо́й. Дх҃ъ же прїи́де къ подо́бномꙋ, є҆го́же благословѧ́тъ лю́дїе, и҆ превозно́сѧтъ во всѧ̑ вѣ́ки.

И҆́нъ. І҆рмо́съ:

Свобо́дна ᲂу҆́бѡ тва́рь познава́етсѧ, и҆ сы́нове свѣ́та пре́жде ѡ҆мраче́ннїи: є҆ди́нъ сте́нетъ тмы̀ предста́тель. Ны́нѣ да бл҃гослови́тъ ᲂу҆се́рднѡ вино́внаго, пре́жде ѻ҆каѧ́нное ꙗ҆зы́кѡвъ всенаслѣ́дїе.

Трїѐ бг҃ови́днїи во ѻ҆гнѝ ѡ҆роша́еми, ѡ҆зарѧ́ющесѧ тремѝ всесвѣ́тлѣ ст҃ы́нѧми, ꙗ҆́вѣ пока́зовахꙋ превы́шнее є҆стество̀ смѣше́нїемъ человѣ́ческимъ, ѻ҆гнепалѧ́щее росо́ю ми́лостивнѡ всѧ́кꙋ па́гꙋбнꙋю ле́сть.

Да ᲂу҆бѣли́тсѧ всѧ́кое земно́е є҆стество̀, ѿ паде́нїѧ ны́нѣ на не́бо возводи́мо: и҆́мже бо всѧ̑ соблюда́ютсѧ сло́вомъ, текꙋ́щими стрꙋѧ́ми ѡ҆мы́вшесѧ, прегрѣше́нїй пре́жнихъ ᲂу҆бѣжѐ, пресвѣ́тлѡ и҆змове́но.

И҆́нъ. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Тѧ̀ и҆́же на землѝ равноа́гг҃льна ꙗ҆́вльшасѧ премѣне́ннымъ житїе́мъ, и҆ всѣ́хъ вы́шша, і҆ѡа́нне всебл҃же́нне, ра́достнѡ почита́емъ, зовꙋ́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Є҆ди́но въ тре́хъ бжⷭ҇тва̀ сꙋщество̀, є҆диносꙋ́щными ѵ҆поста́сьми, прⷪ҇ро́че, наꙋчи́лъ є҆сѝ: гла́сомъ бо роди́телѧ, и҆ прише́ствїемъ дх҃а позна́лъ є҆сѝ креща́емаго, сло́ва бж҃їѧ присносꙋ́щнаго.

Оу҆́тро мы́сленное, сл҃нце возвѣща́ѧ, є҆́же и҆з̾ дв҃ы возсїѧ́вшее, и҆з̾ непло́дныѧ предте́клъ є҆сѝ, і҆ѡа́нне всече́стне, и҆ а҆́гнца проповѣ́далъ є҆сѝ, мі́ра грѣ́хъ человѣколю́бїемъ взе́млющаго.

Свы́ше на́съ ны́нѣ назира́ѧ, бл҃же́нне, твои́ми моли́твами сохранѝ, бжⷭ҇твенномꙋ проповѣ́данїю послѣ́дꙋющыѧ твоемꙋ̀, всебл҃же́нне, и҆ во ᲂу҆че́нїихъ пребыва́юще, предте́че, бжⷭ҇твенныхъ и҆ спаси́тельныхъ твои́хъ догма́тѡвъ.

Бг҃оро́диченъ:

Сла́вы ѻ҆́ч҃їѧ зачала̀ є҆сѝ несказа́ннѡ превѣ́чное ѡ҆сїѧ́нїе, и҆ сло́во безнача́льное, въ нача́лѣ сꙋ́щее разꙋмѣва́емое: и҆ ны́нѣ и҆з̾ тебє̀ перворожде́нна, всечⷭ҇таѧ, бы́вша неизмѣ́ннѡ тва́ри.

Катава́сїа: Та́йнꙋ пресла́внꙋю вавѷлѡ́нскаѧ: Дрꙋгі́й: Свобо́дна ᲂу҆́бѡ тва́рь познава́етсѧ:

На ѳ҃-й пѣ́сни, Честнѣ́йшꙋю не пое́мъ, но пое́мъ припѣ́вы пра́здника, и҆ предте́чи, и҆ і҆рмосы̀.

Припѣ́въ:

Велича́й, дꙋшѐ моѧ̀, честнѣ́йшꙋю го́рнихъ во́инствъ, дв҃ꙋ пречи́стꙋю бцⷣꙋ.

Пѣ́снь ѳ҃. І҆рмо́съ:

Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе. Ѻ҆ба́че, бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

Та́же вторы́й ли́къ пое́тъ то́йже припѣ́въ и҆ і҆рмо́съ:

Велича́й, дꙋшѐ моѧ̀, ѿ прⷣте́чи креще́нїѧ просѧ́ща.

Велича́й, дꙋшѐ моѧ̀, во і҆ѻрда́нѣ прише́дшаго крести́тисѧ.

Дв҃де, прїидѝ дх҃омъ къ просвѣщє́ннымъ, ны́нѣ пристꙋпи́те, по́й, къ бг҃ꙋ вѣ́рою, глаго́лѧ: просвѣти́тесѧ, се́й ни́щїй воззва̀ а҆да́мъ въ паде́нїи: и҆́бо того̀ ᲂу҆слы́ша гдⷭ҇ь, прише́дъ стрꙋѧ́ми і҆ѻрда́нскими, тлѣ́ннаго же ѡ҆бновѝ.

Два́жды.

Велича́й, дꙋшѐ моѧ̀, ѿ ѻ҆ч҃ескагѡ гла́са свидѣ́тельствованна.

И҆са́їа, и҆змы́йтесѧ, ѡ҆чи́ститесѧ, глаго́летъ, лꙋка̑вствїѧ предъ гдⷭ҇емъ ѡ҆ста́вите, жа́ждꙋщїи, на во́дꙋ жи́вꙋ и҆ди́те: кропи́тъ бо водо́ю, ѡ҆бновлѧ́ѧ хрⷭ҇то́съ пристꙋпа́ющыѧ къ немꙋ̀ вѣ́рою, и҆ къ животꙋ̀ нестарѣ́емомꙋ креща́етъ дх҃омъ.

Велича́й, дꙋшѐ моѧ̀, є҆ди́наго ѿ трⷪ҇цы, прекло́ншаго вы́ю, и҆ креще́нїе прїе́мша.

Соблюда́емсѧ благода́тїю, вѣ́рнїи, и҆ печа́тїю: ꙗ҆́кѡ бо гꙋби́телѧ бѣжа́ша пра́га є҆вре́и дре́вле ѡ҆крова́влена: та́кѡ и҆ на́мъ и҆схо́дное бжⷭ҇твенное сїѐ, пакибытїѧ̀ ба́нѧ бꙋ́детъ. ѿсю́дꙋ и҆ трⷪ҇цы ᲂу҆́зримъ свѣ́тъ незаходи́мый.

Та́же пе́рвый ли́къ пое́тъ втора́гѡ канѡ́на припѣ́въ:

Дне́сь влⷣка преклонѧ́етъ вы́ю под̾ рꙋ́кꙋ предте́чевꙋ. И҆ і҆рмо́съ:

Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ, невѣ́сто всечⷭ҇таѧ, мт҃и бл҃гослове́ннаѧ! є҆́юже полꙋчи́вше всесоверше́нное спасе́нїе, досто́йнѡ хва́лимъ ꙗ҆́кѡ благодѣ́телѧ, да́ръ носѧ́ще пѣ́снь благодаре́нїѧ.

Та́же вторы́й ли́къ пое́тъ то́йже припѣ́въ, и҆ і҆рмо́съ.

Дне́сь і҆ѡа́ннъ креща́етъ влⷣкꙋ во стрꙋѧ́хъ і҆ѻрда́нскихъ.

Оу҆вѣ́дѣхомъ мѡѷсе́ю кꙋпино́ю ꙗ҆влє́ннаѧ, грѧдѝ стра́нными ᲂу҆ста́вы содѣ́ланнаѧ: ꙗ҆́кѡ бо спасе́сѧ ѻ҆́гнь носѧ́щи дв҃а, свѣтоно́сна ро́ждши бл҃годѣ́телѧ, во і҆ѻрда́нскихъ же стрꙋѧ́хъ ꙗ҆вле́нна.

Дне́сь влⷣка вода́ми погреба́етъ человѣ́ческїй грѣ́хъ.

Помазꙋ́еши, соверша́ѧ человѣ́ческое сꙋщество̀, цр҃ю̀ безнача́льне, дх҃а ѻ҆бще́нїемъ, стрꙋѧ́ми чи́стыми ѿмы́въ: и҆ тмы̀ крѣ́пость же посра́мль возвы́шеннꙋю, ны́нѣ въ безпреста́ннѣмъ возда́ти житїѝ.

И҆́нъ. І҆рмо́съ:

Ꙗ҆̀же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆з̾ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀, бцⷣе, велича́емъ.

Припѣ́въ къ тропарє́мъ прⷣте́чєвымъ:

Велича́й, дꙋшѐ моѧ̀, (и҆́же) во прⷪ҇ро́цѣхъ вели́каго предте́чꙋ.

И҆зъ пꙋсты́ни прⷣте́ча гла́съ, сло́во показꙋ́етъ пло́тски къ на́мъ прише́дшее: и҆ присꙋ́щее прера́достнѡ крести́ти гото́витсѧ, дꙋ́шы ѡ҆чища́ющее ѿ грѣха̀, вѣ́ры ра́ди.

Благода́ть же и҆ зако́нъ хода́таѧ тѧ̀ че́стна ꙗ҆́вѣ предлага́ютъ, ѻ҆́въ ᲂу҆́бѡ запеча́тствꙋющаго, ѻ҆́ваѧ же начина́ющаго, всѣ́хъ прⷪ҇ро́кѡвъ сло́вомъ предпочте́ннаго, па́че ви́димыхъ пожи́вша, всече́стне.

Безтѣлє́снымъ подо́бное житїѐ показа́въ, со а҆́гг҃льскими ли́ки весели́тсѧ, и҆ прⷭ҇то́лꙋ предстоѧ̀ влⷣчню ра́дꙋетсѧ, восхвалѧ́ющымъ ѡ҆ставле́нїе и҆ спасе́нїе и҆спроша́ѧ.

Бг҃оро́диченъ:

Припѣ́въ пе́рвый:

За бл҃гоꙋтро́бїе всѣ́хъ и҆зба́витель человѣ́къ быва́етъ, и҆ плотско́е рожде́нїе прїе́млетъ, человѣколю́бнѡ па́че человѣ́кѡвъ сы́й чл҃вѣколю́бецъ, и҆з̾ двⷭ҇твеннагѡ ложесна̀ твоегѡ̀, бг҃ороди́тельнице всеблаже́ннаѧ.

И҆ посе́мъ на схо́дѣ пое́мъ ѻ҆́ба ли̑ка вкꙋ́пѣ припѣ́въ пра́здника.

Та́же катава́сїа: Недоꙋмѣ́етъ всѧ́къ ѧ҆зы́къ:

Та́же припѣ́въ бцⷣѣ, и҆ і҆рмо́съ: Ѽ па́че ᲂу҆ма̀:

И҆ покло́нъ.

Свѣти́ленъ прⷣте́чи. Подо́бенъ: Дх҃омъ въ ст҃и́лищи:

Стези̑ пред̾ꙋгото́валъ є҆сѝ чꙋ́днѡ гдⷭ҇еви: гла́съ бо бы́лъ є҆сѝ тогѡ̀ прише́ствїѧ, и҆ проповѣ́дникъ и҆́стиннѣйшїй, прⷪ҇ро́кѡвъ превы́шнїй, бл҃же́нне і҆ѡа́нне: ты̀ свѣ́тъ ви́дѣлъ є҆сѝ, ꙗ҆́кѡ неизглаго́ланное є҆гѡ̀ сконча́въ смотре́нїе.

Сла́ва, и҆ ны́нѣ, пра́здника:

Ꙗ҆ви́сѧ сп҃съ, благода́ть и҆ и҆́стина во стрꙋѧ́хъ і҆ѻрда́нскихъ, и҆ сꙋ́щыѧ во тмѣ̀ и҆ сѣ́ни спѧ́щыѧ просвѣти́лъ є҆́сть: и҆́бо прїи́де и҆ ꙗ҆ви́сѧ свѣ́тъ непристꙋ́пный.

На хвали́техъ стїхи̑ры, гла́съ а҃, на д҃. Самогла́сны:

Свѣ́тъ ѿ свѣ́та возсїѧ̀ мі́рꙋ хрⷭ҇то́съ сп҃съ на́шъ, ꙗ҆вле́йсѧ бг҃ъ: семꙋ̀, лю́дїе, поклони́мсѧ.

Ка́кѡ тѧ̀, хрⷭ҇тѐ, рабѝ влⷣкꙋ досто́йнѡ почти́мъ; ꙗ҆́кѡ въ вода́хъ всѣ́хъ на́съ ѡ҆бнови́лъ є҆сѝ.

Ты̀ во і҆ѻрда́нѣ кре́щсѧ, сп҃се на́шъ, во́ды ѡ҆свѧти́лъ є҆сѝ, дла́нїю раба̀ рꙋкополага́емый, и҆ стра̑сти мі́ра врачꙋ́ѧй. Ве́лїе та́инство ꙗ҆вле́нїѧ твоегѡ̀, чл҃вѣколю́бче гдⷭ҇и, сла́ва тебѣ̀.

И҆́стинный свѣ́тъ ꙗ҆ви́сѧ, и҆ всѣ̑мъ просвѣще́нїе да́рꙋетъ. креща́етсѧ хрⷭ҇то́съ съ на́ми, и҆́же всѧ́кїѧ вы́шше чистоты̀: влага́етъ свѧще́нїе водѣ̀, и҆ дꙋша́мъ сїѐ ѡ҆чище́нїе быва́етъ, земно́е ꙗ҆влѧ́емое, и҆ вы́шше нб҃съ разꙋмѣва́емое. Ба́нею спасе́нїе, водо́ю же дх҃ъ: погрꙋже́нїѧ ра́ди, и҆́же къ бг҃ꙋ, на́шъ восхо́дъ быва́етъ. Чꙋдє́сна дѣла̀ твоѧ̑, гдⷭ҇и, сла́ва тебѣ̀.

Сла́ва, гла́съ ѕ҃. Самогла́сенъ:

А҆́гг҃лъ и҆зъ непло́дныхъ ложе́снъ произше́лъ є҆сѝ, крести́телю, ѿ са́мыхъ пеле́нъ въ пꙋсты́ню всели́лсѧ є҆сѝ, печа́ть же всѣ́хъ прⷪ҇ро́кѡвъ показа́лсѧ є҆сѝ: є҆го́же бо ѻ҆нѝ многоѻбра́знѡ ви́дѣша, и҆ гада́тельнѡ проповѣ́даша, сего̀ крⷭ҇ти́ти во і҆ѻрда́нѣ сподо́билсѧ є҆сѝ. Гла́съ же ᲂу҆слы́шалъ є҆сѝ ѻ҆ч҃ескїй съ нб҃сѐ, свидѣ́тельствꙋющь є҆гѡ̀ сн҃овство̀: и҆ дх҃а ви́дѣлъ є҆сѝ голꙋби́нымъ ви́домъ, гла́съ влекꙋ́щаго на креща́емаго. Но, ѽ всѣ́хъ прⷪ҇ро́кѡвъ превы́шшїй! не преста́й моли́тисѧ ѡ҆ на́съ, вѣ́рнѡ творѧ́щихъ твою̀ па́мѧть.

И҆ ны́нѣ, гла́съ в҃. А҆нато́лїа:

Дне́сь хрⷭ҇то́съ на і҆ѻрда́нъ прїи́де крести́тисѧ, дне́сь і҆ѡа́ннъ каса́етсѧ верхꙋ̀ влⷣчню. Си̑лы нбⷭ҇ныѧ ᲂу҆жасо́шасѧ, пресла́вное ви́дѧще та́инство, мо́ре ви́дѣ и҆ побѣжѐ, і҆ѻрда́нъ ви́дѣвъ, возврати́сѧ. Мы́ же просвѣ́щшесѧ вопїе́мъ: сла́ва ꙗ҆ви́вшемꙋсѧ бг҃ꙋ, и҆ на землѝ ви́дѣнномꙋ, и҆ просвѣти́вшемꙋ мі́ръ.

Славосло́вїе вели́кое. По трист҃о́мъ тропа́рь прⷣте́чи: Сла́ва, и҆ ны́нѣ, пра́здника: є҆ктєнїѝ и҆ ѿпꙋ́стъ, и҆ ча́съ пе́рвый. На а҃-мъ часѣ̀ тропа́рь пра́здника: Сла́ва, прⷣте́чи: И҆ ны́нѣ, бг҃оро́диченъ часѡ́въ. По трист҃о́мъ конда́къ пра́здника, и҆ про́чее. И҆ соверше́нный ѿпꙋ́стъ.

На лїтꙋргі́и: Бл҃жє́нна пра́здника, пѣ́снь г҃-ѧ, на д҃: и҆ ст҃а́гѡ пѣ́снь ѕ҃-ѧ, на д҃. По вхо́дѣ тропа́рь пра́здника, и҆ прⷣте́чи. Сла́ва, конда́къ прⷣте́чи: И҆ ны́нѣ, пра́здника. Вхо́дное: Спаси́ ны, сн҃е бж҃їй, во і҆ѻрда́нѣ крⷭ҇ти́выйсѧ, пою́щыѧ тѝ: А҆ллилꙋ́їа. Си́це пое́мъ и҆ до ѿда́нїѧ. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й: А҆пⷭ҇лъ въ дѣѧ́нїихъ, зача́ло м҃в. А҆ллилꙋ́їа, гла́съ є҃: Свѣ́тъ возсїѧ̀ пра́ведникꙋ, и҆ пра̑вымъ се́рдцемъ весе́лїе. Сті́хъ: Весели́тесѧ, пра́веднїи ѡ҆ гдⷭ҇ѣ: Є҆ѵⷢ҇лїе і҆ѡа́нна, зача́ло г҃. Прича́стенъ: Ꙗ҆ви́сѧ благода́ть бж҃їѧ: Дрꙋгі́й: Въ па́мѧть вѣ́чнꙋю бꙋ́детъ пра́ведникъ:

🕅 А҆́ще прилꙋчи́тсѧ собо́ръ і҆ѡа́нна прⷣте́чи въ недѣ́лю, пое́мъ си́це:

Въ сꙋббѡ́тꙋ ве́чера на ма́лѣй вече́рни стїхи̑ры воскрⷭ҇ны и҆ бцⷣы, по ѻ҆бы́чаю.

На вели́цѣй вече́рни по каѳі́смѣ, на Гдⷭ҇и, воззва́хъ, стїхи̑ры воскрє́сны гла́са, г҃: и҆ пра́здника, д҃, гла́съ в҃: Просвѣти́телѧ на́шего: и҆ прⷣте́чи г҃, гла́съ а҃, подо́бенъ: Всехва́льнїи мꙋ́чєницы: Сла́ва, прⷣте́чи: И҆ ны́нѣ, бг҃оро́диченъ пе́рвый, гла́са. Вхо́дъ. Прокі́менъ днѐ. На лїті́и стїхи̑ры пра́здника, поє́мыѧ на са́мый пра́здникъ. Сла́ва, пра́здника, гла́съ и҃: Гдⷭ҇и, и҆спо́лнити хотѧ̀. И҆ ны́нѣ, гла́съ то́йже: Дне́сь тва́рь просвѣща́етсѧ: На стїхо́внѣ стїхи̑ры воскрє́сны, ѿ а҆лфави́та. Сла́ва, прⷣте́чи, гла́съ д҃: И҆ ны́нѣ, пра́здника. На бл҃гослове́нїи хлѣ́бѡвъ тропа́рь, Бцⷣе дв҃о: є҆ди́ножды, и҆ пра́здника є҆ди́ножды, и҆ прⷣте́чи, є҆ди́ножды. и҆ чте́мъ въ посла́нїихъ а҆пⷭ҇тольскихъ.

[Зрѝ] А҆ и҆дѣ́же нѣ́сть всено́щнагѡ, на повече́рїи по Досто́йнѣ и҆ по Трист҃о́мъ глаго́лемъ конда́къ прⷣте́чи: Сла́ва, и҆ ны́нѣ, пра́здника.

На ᲂу҆́трени: На Бг҃ъ гдⷭ҇ь, тропа́рь воскре́сенъ два́жды: Сла́ва, прⷣте́чи: И҆ ны́нѣ, пра́здника. По ѻ҆бы́чныхъ стїхоло́гїахъ сѣда́льны воскрє́сны съ бг҃орѡ́дичны и҆́хъ: и҆ чте́нїе въ толкова́нїи є҆ѵⷢ҇лїа, є҆́же ѿ матѳе́а, недѣ́лѧ по креще́нїи. По непоро́чнахъ тропарѝ и҆́хъ, и҆ ѵ҆пакоѝ гла́са: и҆ чте́мъ въ толкова́нїи є҆ѵⷢ҇лїа, недѣ́лѧ рѧ́дъ. А҆́ще ли же недѣ́лѧ рѧ́дъ бꙋ́детъ во ѿстꙋ́пкѣ, тогда̀ є҆ѵⷢ҇лїе недѣ́ли рѧ́дъ не чте́мъ. Степє́нна гла́са, и҆ прокі́менъ: Всѧ́кое дыха́нїе: Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: и҆ про́чее воскрⷭ҇но. Канѡ́нъ воскрⷭ҇нъ со і҆рмосо́мъ на д҃, и҆ пра́здника, ѻ҆́ба канѡ́на на ѕ҃, и҆ прⷣте́чи на д҃. Катава́сїа пра́здника, ѻ҆́ба ли̑ка вкꙋ́пѣ. По г҃-й пѣ́сни конда́къ и҆ і҆́косъ пра́здника, и҆ сѣда́ленъ прⷣте́чи два́жды: Сла́ва, и҆ ны́нѣ, пра́здника. И҆ чте́нїе ѡ҆ принесе́нїи рꙋкѝ прⷣте́чевы. По ѕ҃-й пѣ́сни конда́къ и҆ і҆́косъ прⷣте́чи. На ѳ҃-й пѣ́сни пое́мъ Честнѣ́йшꙋю: Свѣти́ленъ воскре́сенъ: Сла́ва, прⷣте́чи: И҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника д҃, со стїхѝ пра́здничными, и҆̀же пи̑саны ве́чера на стїхо́внѣ. Та́же глаго́лемъ сті́хъ на гла́съ ѕ҃-й: Возвесели́тсѧ пра́ведникъ: и҆ пое́мъ самогла́снꙋ стїхи́рꙋ прⷣте́чи, ꙗ҆́же пи́сана на сла́вꙋ, на хвали́техъ: А҆́гг҃лъ и҆з̾ непло́дныхъ ложе́снъ: Сла́ва, стїхи́ра є҆ѵⷢ҇льскаѧ: И҆ ны́нѣ: Пребл҃гослове́нна є҆сѝ, бцⷣе дв҃о: Славосло́вїе вели́кое: и҆ тропа́рь воскре́сенъ то́чїю: и҆ є҆ктєнїѝ, и҆ ѿпꙋ́стъ.

На а҃-мъ часѣ̀ тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. По Трист҃о́мъ конда́къ пра́здника.

На г҃-мъ часѣ̀ тропа́рь воскре́сенъ. Сла́ва, прⷣте́чи: И҆ ны́нѣ, бг҃оро́диченъ часѡ́въ. По Трист҃о́мъ конда́къ прⷣте́чи. Та́кожде глаго́лемъ и҆ на про́чихъ часѣ́хъ, тропа́рь и҆ конда́къ пра́здника, и҆ прⷣте́чи, премѣнѧ́юще.

На лїтꙋргі́и: Бл҃жє́нна ѻ҆ктѡ́иха на д҃: и҆ пра́здника пѣ́снь г҃-ѧ на д҃. ѻ҆бои́хъ канѡ́нѡвъ: и҆ прⷣте́чи пѣ́снь ѕ҃-ѧ, на д҃. По вхо́дѣ тропа́рь воскрⷭ҇нъ, и҆ пра́здника, и҆ прⷣте́чи. Та́же Сла́ва, конда́къ прⷣте́чи. И҆ ны́нѣ, пра́здника. Прокі́менъ, а҆пⷭ҇толъ, а҆ллилꙋ́їа, и҆ є҆ѵⷢ҇лїе недѣ́ли по бг҃оѧвле́нїи, и҆ прⷣте́чи. Прича́стенъ пра́здника, и҆ прⷣте́чи. Въ па́мѧть вѣ́чнꙋю:

А҆́ще не бꙋ́детъ ѿстꙋ́пки, то̀ недѣ́ли рѧ́дъ чте́мъ а҆пⷭ҇лъ, и҆ є҆ѵⷢ҇лїе, под̾ зача́ло.

А҆́ще ли же ѿстꙋ́пка бꙋ́детъ, а҆пⷭ҇ла и҆ є҆ѵⷢ҇лїа недѣ́ли рѧ́дꙋ не чте́мъ, и҆ прокі́менъ гла́са ѡ҆ставлѧ́етсѧ.

🕅 Подоба́етъ вѣ́дати:

А҆́ще прилꙋчи́тсѧ попра́зднство креще́нїѧ хрⷭ҇то́ва въ недѣ́лю, а҆ ст҃ы́й пое́тсѧ на д҃, и҆лѝ на ѕ҃. Въ сꙋббѡ́тꙋ ве́чера на ма́лѣй вече́рни стїхи̑ры воскрє́сны и҆ бцⷣѣ, по ѻ҆бы́чаю. Тропа́рь воскре́сенъ: Сла́ва, и҆ ны́нѣ, бг҃оро́диченъ є҆гѡ̀. На вели́цѣй вече́рни, по стїхоло́гїи, на Гдⷭ҇и, воззва́хъ, стїхи̑ры воскрє́сны д҃: и҆ пра́здника г҃, тогѡ̀ днѐ, и҆ ст҃а́гѡ г҃. [Зрѝ] А҆́ще ли пое́тсѧ ст҃ы́й на ѕ҃, и҆лѝ є҆мꙋ́же и҆ полѷеле́й, и҆ пое́мъ стїхи̑ры воскрє́сны г҃, и҆ пра́здника г҃, и҆ ст҃а́гѡ д҃. Сла́ва, ст҃а́гѡ. А҆́ще же нѝ, Сла́ва, пра́здника: И҆ ны́нѣ, бг҃оро́диченъ пе́рвый гла́са. На лїті́и стїхи̑ры пра́здника, тогѡ̀ днѐ рѧдовы̑ѧ стїхѡ́вныѧ. Сла́ва, и҆ ны́нѣ, пра́здника. А҆́ще ли и҆́мать ст҃ы́й Сла́вꙋ, Сла́ва, ст҃а́гѡ: И҆ ны́нѣ, пра́здника. На стїхо́внѣ стїхи̑ры воскрє́сны. Сла́ва, ст҃а́гѡ, а҆́ще є҆́сть: И҆ ны́нѣ, пра́здника. А҆́ще ли нѝ, Сла́ва, и҆ ны́нѣ, пра́здника. На бл҃гослове́нїи хлѣ́бѡвъ тропа́рь, Бцⷣе дв҃о: два́жды, и҆ пра́здника є҆ди́ножды: и҆ Бꙋ́ди и҆́мѧ гдⷭ҇не: и҆ про́чее, и҆ чте́нїе въ посла́нїихъ а҆пⷭ҇льскихъ.

На ᲂу҆́трени, на Бг҃ъ гдⷭ҇ь, тропа́рь воскре́сенъ, два́жды. Сла́ва, ст҃а́гѡ, а҆́ще є҆́сть: а҆́ще ли нѝ, Сла́ва, и҆ ны́нѣ, пра́здника. По каѳі́смахъ сѣда́льны воскрє́сны, и҆ бг҃орѡ́дичны и҆́хъ. и҆ чте́нїе во є҆ѵⷢ҇лїи толково́мъ, недѣ́лѧ по просвѣще́нїи, и҆ непорѡ́чны, и҆ тропа́рь: А҆́гг҃льскїй собо́ръ: ѵ҆пакоѝ гла́са. И҆ чте́нїе во є҆ѵⷢ҇лїи толково́мъ, недѣ́лѧ рѧ́дъ. [Зрѝ] ( А҆́ще ли и҆́мать ст҃ы́й полѷеле́й. И҆ по полѷеле́и, тропарѝ: А҆́гг҃льскїй собо́ръ: И҆ по є҆ктенїѝ сѣда́льны ст҃а́гѡ всѝ, и҆ чте́нїе.) Степє́нна, и҆ прокі́менъ гла́са: и҆ Всѧ́кое дыха́нїе: Є҆ѵⷢ҇лїе воскре́сно: стїхи́ра воскре́сна, и҆ про́чее воскре́сно. Канѡ́нъ воскре́сенъ со і҆рмосо́мъ на д҃: и҆ бцⷣѣ на два̀: и҆ пра́здника на д҃: и҆ ст҃а́гѡ на д҃. Катава́сїа пра́здника. А҆́ще полѷеле́й, и҆лѝ славосло́вїе, и҆ пое́мъ канѡ́нъ воскре́сенъ со і҆рмосо́мъ на д҃, и҆ пра́здника на д҃, и҆ ст҃а́гѡ на ѕ҃. По г҃-й пѣ́сни конда́къ и҆ і҆́косъ пра́здника, и҆ ст҃а́гѡ, а҆́ще и҆́мать, и҆ сѣда́ленъ ст҃а́гѡ. Сла́ва, и҆ ны́нѣ, пра́здника, и҆ чте́нїе. По ѕ҃-й пѣ́сни конда́къ воскрⷭ҇нъ и҆ і҆́косъ, и҆ про́логъ. На ѳ҃-й пѣ́сни пое́мъ Честнѣ́йшꙋю. Свѣти́ленъ воскре́сенъ: Сла́ва, ст҃а́гѡ, а҆́ще и҆́мать: А҆́ще ли нѝ, Сла́ва, и҆ ны́нѣ, пра́здника. На хвали́техъ стїхи̑ры воскрє́сны д҃: и҆ ст҃а́гѡ, а҆́ще и҆́мать, подѡ́бны г҃, и҆ самогла́сенъ, и҆́же на Сла́вꙋ, пое́мъ съ припѣ́вы є҆гѡ̀. [Зрѝ] А҆́ще ли не и҆́мать ст҃ы́й хвали́тныхъ, и҆ пое́мъ стїхи̑ры воскрє́сны д҃: и҆ пра́здника д҃, тогѡ̀ днѐ стїхѡ́вны ᲂу҆́трєннїѧ съ припѣ́вы пра́здничными. Сла́ва, стїхи́ра є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскре́сенъ то́чїю. Є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ ѻ҆бы́чное и҆схожде́нїе въ притво́ръ, и҆ ча́съ а҃-й.

На а҃-мъ часѣ̀ тропа́рь воскре́сенъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника. Та́кожде и҆ въ про́чыѧ часы̀ глаго́лемъ конда́къ пра́здника и҆ воскре́сенъ премѣнѧ́юще: а҆́ще полѷеле́й, и҆ ст҃а́гѡ.

На лїтꙋргі́и: Бл҃жє́нна гла́са на ѕ҃, и҆ пра́здника пѣ́снь рѧдова́ѧ на д҃. А҆́ще ли и҆́мать ст҃ы́й пѣ́снь: и҆ бл҃жє́нна воскрє́сна на д҃: и҆ пра́здника пѣ́снь рѧдова́ѧ на д҃: и҆ ст҃а́гѡ пѣ́снь ѕ҃-ѧ, на д҃. По вхо́дѣ тропа́рь воскре́сенъ, и҆ пра́здника: Та́же хра́ма, и҆ ст҃а́гѡ, а҆́ще и҆́мать. Сла́ва, конда́къ ст҃а́гѡ: И҆ ны́нѣ, пра́здника. [Зрѝ] А҆́ще ли не и҆́мать ст҃ы́й тропарѧ̀ и҆ кондака̀: Сла́ва, воскре́сенъ: И҆ ны́нѣ, пра́здника. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе недѣ́ли по просвѣще́нїи. Та́же ст҃а́гѡ, а҆́ще и҆́мать: а҆́ще ли нѝ, рѧ́дъ. А҆ прокі́менъ гла́са ѡ҆ставлѧ́етсѧ. Прича́стенъ: Хвали́те гдⷭ҇а съ нб҃съ: Дрꙋгі́й ст҃а́гѡ, а҆́ще и҆́мать: А҆́ще ли нѝ, пра́здника.

[Зрѝ] Сꙋббѡ́та по просвѣще́нїи.

Прокі́менъ, а҆ллилꙋ́їа, и҆ прича́стенъ пра́здника. А҆пⷭ҇толъ къ є҆фесе́ємъ, зача́ло сл҃г. Є҆ѵⷢ҇лїе матѳе́а, зача́ло з҃.

Недѣ́лѧ по просвѣще́нїи.

Прокі́менъ, гла́съ а҃: Бꙋ́ди, гдⷭ҇и, ми́лость твоѧ̑ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ, првⷣнїи, ѡ҆ гдⷭ҇ѣ, пра̑вымъ подоба́етъ похвала̀. А҆пⷭ҇лъ къ є҆фесе́ємъ, зача́ло ск҃д ѿ полꙋ̀. А҆ллилꙋ́їа, гла́съ є҃: Млⷭ҇ти твоѧ̑, гдⷭ҇и, во вѣ́къ воспою̀, въ ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̀ мои́ми. Сті́хъ: Занѐ ре́клъ є҆сѝ, въ вѣ́къ ми́лость сози́ждетсѧ, на небесѣ́хъ ᲂу҆гото́витсѧ и҆́стина твоѧ̀. Є҆ѵⷢ҇лїе матѳе́а, зача́ло и҃. Прича́стенъ пра́здника: Ꙗ҆ви́сѧ бл҃года́ть бж҃їѧ, спаси́тельнаѧ всѣ̑мъ человѣ́кѡмъ. Дрꙋгі́й: Хвали́те гдⷭ҇а съ нб҃съ, хвали́те є҆го̀ въ вы́шнихъ.


Комментарии для сайта Cackle